GALASI

PƆLƱ KALATA’N

M’Ɔ HƐLƐLƖ NWANLƖN

GALASI MAN NƖN ANUN

ASƆNƖN MMA’N-MƆ’N

M’ɔ wɔ nun’n

Pɔlʋ bɔlɩ asɔnɩn Galasi mân nɩn anun kulo mgbili’n mmie-mɔ asʋ. Galasi mân sɔ’n, ɛnɛ bɛ fɛlɛ yɩ́ Tuluki mân. Nan mɔ Pɔlʋ fi ɛbɛlɛ hɔlɩ’n, ɔ kɔ tɩ kɛ Zufʋ menian mmie-mɔ a hɔ ɛlɔ bɛ lɛ kekele ninnge ngacile. Bɛ́ nwan Pɔlʋ tɩ man Zozi bɔfʋɛ kpa, ɔ nni man Moyizɩ mala nɩn asʋ, ɛsɛ ɔ nni man Zufʋ’n-mɔ amanmuo nɩn asʋ. Bɛ́ ngehele nɩn anun, bɛ lɛ kele bɔbɔ kɛ ɔ tɩ cɩnnjɩn kɛ bɛ kpɛ́ mmelenzua’n-mɔ mmian nun nán b’a nyan bɛ́ ti. Pɔlʋ lɛ sa yɩ́ nɩn ɔ bua bɛ́ bie anwʋnsɛlɛ sʋ wɔ yɩ́ nwʋn ɛjɔlɛ ɛtɛ’n ɔ nʋn Zozi Kilisi Ɛjɔlɛkpa’n mɔ ɔ’a bɔ nɩn anwʋn ɛjɔlɛ ɛtɛ mɔ Zufʋ sɔ’n-mɔ a han’n.

Kalata nɩn ati 1-2, Pɔlʋ lɛ kan like m’ɔ sɩ ɔ nʋn mɔ ɔ’a nwun yɩ́ m’ɔ kele kɛ ɔ tɩ Zozi Kilisi bɔfʋɛ sakpa nɩn ɛjɔlɛ. Zozi Kilisi muonun y’ɔ fɛlɛlɩ yɩ́ ɔ. Kalata nɩn ati 3-4, Pɔlʋ lɛ kele kɛ nán Moyizɩ mala’n y’ɔ man sʋanlan nyan yɩ́ ti ɔ, nan dedi’n m’ɔ wɔ yɛ́ Mɩn Zozi anun’n y’ɔ man sʋanlan nyan yɩ́ ti ɔ. Kalata nɩn ati 5-6, Pɔlʋ lɛ kan kele yɩ́ nianman asɔnɩn mma’n-mɔ kɛ nán bɛ tie Zufʋ sɔ’n-mɔ ngehele’n. Nan bɛ tíla bɛ́ dedi’n m’ɔ wɔ Zozi Kilisi nun nɩn anun, bɛ mán Wawɛ Nwannzan-nwannzan’n tɩ́nngɛ bɛ́ atɩn bɛ bɔ́ bala m’ɔ tɩ kpa. Kalata nɩn agualɩɛ nun, Pɔlʋ lɛ kannzʋ bɛ́ mɔ bɛ kulo kɛ bɛ tinndin menian maan bɛ kpɛ bɛ́ mmian nun’n.

Ahɩn ebisa

¹Mɩ́n Pɔlʋ mɔ n dɩ Zozi bɔfʋɛ’n, mɩ́n yɛ̂ mɩɩn kɛlɛ kalata ɛhɩ mɩn nwan ɛmɔ ɔ. Nán menian’n-mɔ anaan sʋanlan yɛ̂ ɔ sielɩ mɩ́n bɔfʋɛ ɔ. Nan Zozi Kilisi nʋn Nyanmɩan m’ɔ tɩ yɛ́ Sɩ mɔ ɔ’a jasʋ Zozi fi ewue nun’n, bɛ́ yɛ̂ b’a sie mɩ́n bɔfʋɛ ɔ. ²Anianman’n-mɔ mɔ bɛ nʋn mɩ́n yɛ wɔ ɛwa’n, bɛ nʋn mɩ́n yɛ̂ yɛ lɛ kɛlɛ kalata ɛhɩ yɛ nwan ɛmɔ mɔ bɛ wɔ asɔnɩn nɩn anun Galasi mân nɩn anun ɛlɔ nɩn ɔ.

³Yɛ ’bisa ɛmɔ ahɩn. Nyanmɩan m’ɔ tɩ yɛ́ Sɩ’n, ɔ nʋn Zozi Kilisi m’ɔ tɩ yɛ́ Mɩn’n, bɛ nwún ɛmɔ anwʋn anwunnvoe bɛ mán ɛmɔ alʋa cɩ́cɩ bɛ́ nwʋn. ⁴Yɛ́ ɛtɛ’n dunman nun, Zozi Kilisi falɩ yɩ́ nwʋn yɩlɩ tɛɛ maan y’a nyan yɛ́ ti. Ɔ man mân ɛhɩ anun ninnge ɛtɛ’n-mɔ le man tunmin yɛ́ sʋ kʋ́n. Zozi Kilisi yɔlɩ Nyanmɩan m’ɔ tɩ Sɩɛ nɩn akunnun like. ⁵Anunminnyanmʋn hán Nyanmɩan cɩan daa! Amɩn!

Ɛjɔlɛkpa’n tɩ ba kʋnmgba cein

⁶Ɔ sin mɩ́n nwʋn kpa kɛ kɩkaala ɛhɩ, ɛmɔ a kaci bɛ́ nzin b’a si Nyanmɩan. Zozi Kilisi anwunnvoe’n mɔ ɔ’a nwun ɛmɔ’n dunman nun, Nyanmɩan a fɛlɛ ɛmɔ. Nan kʋsʋ afɩ ɛmɔ a kaci bɛ́ nzin b’a si yɩ́ bɛ lɛ tie ɛjɔlɛkpa fʋfɔlɛ. ⁷Nán kɛ ɛjɔlɛkpa fʋfɔlɛ biekun wɔ ɛbɛlɛ ɔ. Nan menian mmie-mɔ lɛ sɛcɩ ɛmɔ ati anun. Afɩ bɛ kulo kɛ bɛ kaci Kilisi Ɛjɔlɛkpa’n. ⁸Yɩ́ ti, sɛ yɛ́ nun sʋanlan kʋn bɔbɔ, anaan nyanmɩansʋ bɔfʋɛ’n bie ba bɔ ɛjɔlɛkpa kele ɛmɔ, sɛ ɛjɔlɛkpa sɔ’n nʋn mɔ yɛ bɔlɩ yɛ helelɩ ɛmɔ’n tɩ man kʋn an, munnzue hán sʋanlan sɔ’n! ⁹Y’a li mʋa y’a han y’a hele ɛmɔ, ɛsɛ mɩɩn kan mɩ́n funlan nun kɛ, sɛ sʋanlan bie ba bɔ ɛjɔlɛkpa kele ɛmɔ, sɛ ɛjɔlɛkpa sɔ’n nʋn mɔ b’a li mʋa ba bɔ ba hele ɛmɔ’n tɩ man kʋn an, munnzue hán sʋanlan sɔ’n.

¹⁰Asʋ mɩn kulo kɛ menian’n-mɔ yɩ mɩ́n ayɛ anaan Nyanmɩan yɩ́ mɩ́n ayɛ ati yɛ̂ mɩɩn kan sɔ ɔ? Asʋ mɩn kpʋnndɛ kɛ mɩn yɔ like mɔ menian’n-mɔ kulo ɔ? Cɛcɛ, ɔ sanlɩn kɛ sɛ mɩn kpʋnndɛ kɛ mɩn yɔ like mɔ menian’n-mɔ kulo a, anɩn n dɩ man Kilisi akʋa kʋ́n.

Kɛ ɔ kpɩnlɩn yɔlɩ mɔ Pɔlʋ kacili Zozi bɔfʋɛ’n

¹¹Anianman-mɔ, mɩɩn kan mɩn kele ɛmɔ kɛ Ɛjɔlɛkpa’n mɔ m mɔlɩ n gelelɩ ɛmɔ’n, ɔ tɩ man like mɔ kulo sʋanlan dasannin yɛ̂ ɔ’a hyɩhyɛ ɔ. ¹²Ɔ sanlɩn kɛ, nán sʋanlan yɛ̂ ɔ falɩ wulalɩ mɩ́n sa nun anaan ɔ hehelelɩ mɩ́n ɔ. Nan Zozi Kilisi muonun yɛ̂ ɔ yɩlɩ ɔ helelɩ mɩ́n ɔ. ¹³Daba mɔ anɩn mɩn nʋn Zufʋ’n-mɔ yɛ́ asɔnɩn’n tɩ kʋn’n, ɛmɔ tɩlɩ mɩ́n abalabɔ mɔ mɩn bɔ nɩn anwʋn ɛjɔlɛ. Ɛmɔ sɩ kɛ anɩn mɩn kele Nyanmɩan asɔnɩn mma’n-mɔ yalɛ kpili kpa. Ɛsɛ anɩn mɩn kulo kɛ mɩn bɔ yɩ́ bʋsʋ. ¹⁴Zufʋ’n-mɔ mɔ bɛ wɔ yɛ́ mân nɩn anun’n, bɛ́ mɔ mɩn nʋn bɛ́ yɛ tɩ tikpɛ yɛ́ Zufʋ asɔnɩn nɩn anun’n, anɩn mɩ́n nwʋn tɛ mɩ́n yɛ́ nan-mɔ amanmuo mɔ bɛ helelɩ yɛ́ nɩn anun ɔ tala bɛ́ kʋalaatin. ¹⁵Nan Nyanmɩan a nwun mɩ́n nwʋn anwunnvoe. Mɔ anɩn bɛ wʋlɩ man mɩ́n’n, Nyanmɩan yɩlɩ mɩ́n ɛsɛ ɔ fɛlɛlɩ mɩ́n kɛ n zʋ́ yɩ́. ¹⁶Mɛlɛ mɔ Nyanmɩan nwan ɔ ’yɩ yɩ́ Wa’n kele mɩ́n, maan mɩn kɔ bɔ Ɛjɔlɛkpa’n mɩn kele bɛ́ mɔ bɛ tɩ man Zufʋ’n, mɔ mɩn ’kɔ’n, m’an gɔ a mmisa man sʋanlan ɛjɔlɛ. ¹⁷Ɛsɛ bɔbɔ, bɛ́ mɔ bɛ lili mʋa mɩ́n nyunnun bɛ kacili mmɔfʋɛ mɔ bɛ wɔ Zoluzalɛmʋn ɛlɔ’n, m’an ngɔ a nnwun man bɛ́ nwʋn. Nan n vi ɛbɛlɛ ala, mɩ́n nʋan y’ɔ le Alabi mân nun. N vi ɛbɛlɛ yɛ̂ n zalɩ n gɔlɩ Damasɩ ɔ.

¹⁸Ɔ lili afʋɛ nsan kʋalaaka nán m’an sɩn m’an hɔ Zoluzalɛmʋn. Ɛbɛlɛ yɛ̂ n nwunlin Pɩɛlɩ (Sefasɩ) ɔ, nán m’an li mɔlɛ nnyuan yɩ́ nwʋn ɛbɛlɛ. ¹⁹M’an nnwun man mmɔfʋɛ’n-mɔ anun bie fɩ́ɩ́, cɛlɛ kɛ yɛ́ Mɩn anianman Zʋakɩ ala. ²⁰Ɛjɔlɛ’n mɔ mɩɩn kan yɩ́ kalata nɩn anun ɛwa’n tɩ ananhɔlɛ, Nyanmɩan anyunnun mɩ́n nni man ato. ²¹Ɛsɛ n vi ɛbɛlɛ, mɩ́n nʋan y’ɔ le Sili nʋn Silisi mân nun. ²²Tɛmʋn sɔ’n kʋalaatin, anɩn Zozi Kilisi asɔnɩn mma’n-mɔ mɔ bɛ wɔ Zude mân nɩn anun’n, bɛ nzɩ man mɩ́n sʋanlan baka’n. ²³Ɛjɔlɛ mɔ anɩn bɛ sɩ’n y’ɔ le mɔ menian’n-mɔ kan’n. Bɛ́ nwan: “Sʋanlan’n mɔ daba anɩn ɔ kele yɛ́ yalɛ, ɔ kpʋnndɛ kɛ ɔ bɔ yɛ́ bʋsʋ’n, sian dɩɛ, yɩ́ yɛ̂ ɔ lɛ bɔ Ɛjɔlɛkpa’n kpayɛ ɔ.” ²⁴Mɩ́n dunman nun ati, menian’n-mɔ yɩ Nyanmɩan ayɛ.

Pɔlʋ nʋn Zozi Kilisi mmɔfʋɛ nga’n-mɔ

¹Ɛhɩ, afʋɛ bulu nʋn nnan sɩnlɩn, yɩ́ nzin yɛ̂ n zalɩ n gɔlɩ Zoluzalɛmʋn ɔ. Mɔ mɩn ’kɔ Zoluzalɛmʋn’n, mɩn nʋn Baanabasɩ nʋn Titɩ yɛ̂ yɛ hɔlɩ ɔ. ²Nyanmɩan hanlɩn helelɩ mɩ́n kɛ n gɔ́. Yɩ́ ti y’ɔ man n gɔlɩ ɔ. Mɔ n juli ɛlɔ’n, cɩan kʋn mɩn nʋn Asɔnɩn nɩn asʋ mgbain’n-mɔ kɔ yia. Ɛjɔlɛkpa’n mɔ mɩn bɔ mɩn kele bɛ́ mɔ bɛ tɩ man Zufʋ’n, n gɔ hehele bɛ́ nun. Afɩ mɩn ngulo man kɛ junman’n mɔ m’an li, anaan mɔ mɩɩn di’n yɔ mgban. ³Sakpa, bɛ kɔ le mɩ́n junman’n bɛ kɔ tʋ nun. Ɔ sanlɩn kɛ Titɩ mɔ mɩn nʋn yɩ́ hɔlɩ’n, ɔ tɩ Gɛlɛkɩ. Nan kʋsʋ, b’a ndinndin man yɩ́ kɛ ɔ kpɛ́ yɩ́ mmian nun. ⁴Sɛ mmian nun ɛkpɛ ɛjɔlɛ walɩ nun an, anɩn ɔ fi ato anianman’n-mɔ mɔ bɛ falɩ bɛ́ nwʋn bɛ fʋlalɩ yɛ́ nun’n. Bɛ fɩalɩ bɛ fʋlalɩ yɛ́ nun, yɩ́ dɩɛ, anɩn bɛ nyan atɩn bɛ tɩtɛ yɛ́ bɛ nwun fanwʋndi’n mɔ Zozi Kilisi a man y’a nyan yɩ́’n. Afɩ, bɛ kulo kɛ yɛ kaci bɛ́ nganga. ⁵Y’a mman man ato anianman sɔ’n-mɔ atɩn sin kaan sʋa ala. Yɛ yɔlɩ sɔ maan Ɛjɔlɛkpa’n m’ɔ tɩ ananhɔlɛ nɩn a ndʋnndʋn man ɛmɔ afian.

⁶Nan bɛ́ mɔ bɛ bu bɛ́ menian mgbili mgbili’n, kɛ anɩn bɛ kpɩn bɛ tɩ yɩ́ daba’n, nán ɛhɩ y’ɔ cian mɩ́n ɔ. Ɔ sanlɩn kɛ, Nyanmɩan nnɩan man sʋanlan anyunnun ɔ mmua man yɩ́ ndɛɛ. Menian sɔ’n-mɔ muonun, b’a ndinndin man mɩ́n kɛ n yɔ́ like fʋfɔlɛ. ⁷Afɩ bɛ́ muonun bɛ nwunlɩn yɩ́ kɛ Nyanmɩan a fa Ɛjɔlɛkpa nɩn a wula mɩn sa nun kɛ m mɔ́ n géle bɛ́ mɔ bɛ tɩ man Zufʋ’n, kɛ ɔ falɩ wulalɩ Pɩɛlɩ asa nun kɛ ɔ bɔ́ héle Zufʋ’n-mɔ’n. ⁸Ɔ sanlɩn kɛ Nyanmɩan m’ɔ manlɩn Pɩɛlɩ tunmin ɔ sielɩ yɩ́ bɔfʋɛ manlɩn Zufʋ’n-mɔ’n, yɩ́ yɛ̂ ɔ’a man mɩ́n tunmin ɔ’a sie mɩ́n bɔfʋɛ ɔ’a man bɛ́ mɔ bɛ tɩ man Zufʋ nɩn ɔ. ⁹Ɔ man Zʋakɩ, Pɩɛlɩ (Sefasɩ) nʋn Zʋan mɔ anɩn bɛ tɩ kɛ asɔnɩn nɩn asʋ mgbain’n, bɛ nwunlɩn yɩ́ kɛ Nyanmɩan yɛ̂ ɔ falɩ junman sɔ’n wulalɩ mɩ́n sa nun ɔ. Bɛ kɔ soman mɩn nʋn Baanabasɩ yɛ́ sa nun. Ɔ fi ɛbɛlɛ, yɛ́ kʋalaa yɛ kɔ han, ɔ kɔ sɛ yɛ́ nʋan kɛ, bɛ́ mɔ bɛ tɩ man Zufʋ’n, bɛ́ afian ɛlɔ junman’n wɔ yɛ́ sa nun. Yɛ̂ bɛ mɔ bɛ tɩ Zufʋ’n, bɛ́ afian ɛlɔ junman’n wɔ bɛ́ kʋsʋ bɛ́ sa nun. ¹⁰Ɛjɔlɛ kʋnmgba ala yɛ̂ bɛ hanlɩn bɛ helelɩ yɛ́ ɔ. Bɛ́ nwan yɛ́ ti kácɩ Zoluzalɛmʋn Asɔnɩn nɩn anun ehianfʋɛ’n-mɔ. Ɛbɛlɛ ɛjɔlɛ sɔ’n dɩɛ, m mɔlɩ mɔndɩnlɩn kpa n nili.

Pɔlʋ ’ba tu Pɩɛlɩ anyunnun Antiɔsʋ

¹¹Ɛhɩ, mɔ Pɩɛlɩ (Sefasɩ) walɩ Antiɔsʋ’n, n duli yɩ́ nyunnun bagua nun. Ɔ sanlɩn kɛ yɩ́ nyɔlɩɛ m’ɔ yɔlɩ’n tɩ man kpa fɩ́ɩ́. ¹²Anɩn Pɩɛlɩ nʋn bɛ́ mɔ bɛ tɩ man Zufʋ’n yɛ̂ ɔ di like ɔ. Nan mɔ Zʋakɩ sʋanlɩn menian Antiɔsʋ ɛlɔ, mɔ Pɩɛlɩ nwunlin bɛ́’n, ɔ kɔ tɩ yɩ́ nwʋn, ɔ nʋn bɛ́ mɔ bɛ tɩ man Zufʋ’n ngɔ li man like kʋ́n. Ɔ sanlɩn kɛ anɩn Pɩɛlɩ sulo Zufʋ sɔ’n-mɔ mɔ bɛ lɛ kele kɛ, menian mɔ b’a mgbɛ man bɛ́ mmian nun’n, bɛ nnyan man ngʋan. ¹³Anianman Zufʋ ɛhɩnlɩn-mɔ kʋsʋ kɔ nɩan Pɩɛlɩ nyɔlɩɛ ɛtɛ sɔ nɩn asʋ. Baanabasɩ muonun kɔ fa yɩ́ nwʋn kɔ wula nyɔlɩɛ ɛtɛ sɔ nɩn anun bie.

¹⁴Nan mɔ n nwunlin kɛ bɛ́ ɛnanndɩɛ’n ngɔ man atɩn sʋ, mɔ ɛsɛ bɛ́ abalabɔ’n nʋn ananhɔlɛ Ɛjɔlɛkpa’n tɩ man kʋn’n, n gɔ bisa Pɩɛlɩ (Sefasɩ) bagua nɩn anyunnun ɛbɛlɛ kɛ: “Wɔ́ Pɩɛlɩ, ɛ tɩ Zufʋ, ɛ nʋn bɛ́ mɔ bɛ tɩ man Zufʋ’n yɛ̂ bɛ san ɔ. Nan afɩ ɔ yɔ sɛ mɔ ɛ kulo kɛ ɛ tinndin bɛ́ maan bɛ kaci Zufʋ ɔ?”

¹⁵Yɛ́ dɩɛ, bɛ ’wʋ yɛ́ a, anɩn yɛ tɩ Zufʋ. Yɛ tɩ man kɛ mân ɛhɩnlɩn-mɔ anun menian’n-mɔ mɔ yɛ́ Zufʋ’n-mɔ yɛ bu bɛ́ ɛtɛfʋɛ’n. ¹⁶Nan kʋsʋ yɛ sɩ kɛ nán like mɔ mala’n kele’n yɛ̂ sʋanlan yɔ a Nyanmɩan bu yɩ́ sɛsɛfʋɛ ɔ. Nan sʋanlan m’ɔ kɔ le Zozi Kilisi kɔ li nɩn ala yɛ̂ Nyanmɩan bu yɩ́ sɛsɛfʋɛ ɔ. Ɛhɩka ati, yɛ́ kʋsʋ y’a le Zozi Kilisi y’a li. Dedi sɔ’n mɔ yɛ le yɩ́ Kilisi anun’n yɛ̂ ɔ man yɛ kaci sɛsɛfʋɛ ɔ. Nan nán like mɔ Moyizɩ mala’n kɔ hele mɔ sʋanlan kɔ yɔ’n y’ɔ man ɔ kaci sɛsɛfʋɛ Nyanmɩan anyunnun ɔ. Ɔ sanlɩn kɛ Nyanmɩan anyunnun, bɛ́ mɔ bɛ di mala nɩn asʋ’n, bɛ́ nun bie fɩ́ɩ́ ngɔ ngaci man sɛsɛfʋɛ.

¹⁷Nan kɛmɔ Zozi Kilisi dunman nun yɛ kulo kɛ yɛ kaci sɛsɛfʋɛ’n, sɛ bɛ nwun yɩ́ kɛ yɛ yɔ ɛtɛ kɛ bɛ́ mɔ bɛ tɩ man Zufʋ’n yɔ yɩ́ nɩn an, asʋ ɔ kele kɛ Kilisi di bɛ́ mɔ bɛ yɔ ɛtɛ nɩn anzin ɔ? Cɛcɛ! ¹⁸Afɩ sɛ mɩn sa mɩn bɔ mɩn hyɩhyɛ mala’n mɔ m gbɛlɩ nun’n mɩn tʋ ɛbɛlɛ biekun an, anɩn ɔ kele kɛ n dɩ sʋanlan mɔ yɩ́ nyɩn nzɔ man mala nɩn ɔ. ¹⁹Afɩ mala sɔ nɩn a man m’an nyan ewue, ɔ man mala’n le man tunmin wɔ mɩ́n sʋ kʋ́n. Nan sɛ n ne ngʋan mɩn sʋ Nyanmɩan an, ɔ fi Zozi Kilisi mɔ mɩn de yɩ́ mɩn di’n. ²⁰Ɔ sanlɩn kɛ, mɩ́n nʋn Kilisi b’a bʋbɔ yɛ́ kʋlʋwa nɩn asʋ. Sɛ n ne ngʋan an, ɔ fi man mɩ́n. Ɔ fi Kilisi m’ɔ wɔ mɩ́n nun’n. Asɩɛ nɩn asʋ ɛwa mɔ n dɩ’n, sian dɩɛ mɩn tanlan wɔ dedi’n mɔ n ne yɩ́ wɔ Nyanmɩan Awa nɩn anun’n. Ɔ sanlɩn kɛ Nyanmɩan Awa nɩn a hulo mɩ́n dede ɔ’a wu ɔ’a man m’an nyan mɩ́n ti. ²¹Mɩ́n nwʋn anwunnvoe’n mɔ Nyanmɩan a nwun mɩ́n’n, mɩn mmu man yɩ́ junman nvule. Afɩ, sɛ bɛ di mala nɩn asʋ bɛ kaci sɛsɛfʋɛ wɔ Nyanmɩan anyunnun an, anɩn Kilisi ewue’n m’ɔ wuli nɩn a yɔ mgban.

Mala’n nʋn dedi’n tɩ man kʋn

¹O! Galasi amma ngʋasɩafʋɛ. Nwan yɛ̂ ɔ’a tʋ ɛmɔ ndɩnndan ɔ? Ɛmɔ sɩ yɩ́ yuein kɛ kʋlʋwa nɩn asʋ yɛ̂ bɛ bʋbɔlɩ Zozi Kilisi ɔ. ²Mɩn kulo kɛ mɩn bisa ɛmɔ kosuan baa kʋnmgba cein maan ɛmɔ bua mɩ́n bie. Nyanmɩan Wawɛ’n m’ɔ wɔ ɛmɔ anun’n, asʋ mala’n mɔ ɛmɔ a li sʋ’n yɛ̂ ɔ man ɛmɔ a nyan yɩ́ anaan Ɛjɔlɛkpa’n mɔ ɛmɔ a tɩ b’a le b’a li’n yɛ̂ ɔ man ɛmɔ a nyan yɩ́ ɔ? ³Ngɛlɛ yɛ̂ ɛmɔ nzɩ man anaan? Ɛmɔ le Nyanmɩan Wawɛ’n yɛ̂ ɛmɔ a bɔ yɩ́ bʋ. Sian dɩɛ, ɛmɔ kulo kɛ bɛ gua yɩ́ bʋ wɔ anwʋnnaan nun ɔ? ⁴Asʋ ɛmɔ a fɛ mgban ɔ? Atɩn nnʋn man ɛbɛlɛ kɛ ɔ yɔ́ sɔ. ⁵Nyanmɩan a fa yɩ́ Wawɛ’n ɔ’a man ɛmɔ. Ɔ yɔ asinbɛnwʋn ninnge ɛmɔ afian. Asʋ mala’n mɔ ɛmɔ di sʋ nɩn ati yɛ̂ ɔ yɔ sɔ anaan Ɛjɔlɛkpa’n mɔ ɛmɔ a tɩ b’a le b’a li nɩn ati ɔ?

⁶Ɛ ’nwun ɛjɔlɛ mɔ b’a hɛlɛ wɔ Abalahamʋn anwʋn’n: Abalahamʋn lelɩ Nyanmɩan lili. Nyanmɩan nɩanlɩn Abalahamʋn dedi nɩn anwʋn ɔ buli yɩ́ kɛ sɛsɛfʋɛ. ⁷Yɩ́ ti, ɛmɔ tɩ́ yɩ́ bʋ kɛ bɛ́ mɔ bɛ de Nyanmɩan bɛ di’n, bɛ́ yɛ̂ bɛ tɩ Abalahamʋn amma kpa nɩn ɔ. ⁸Afɩ Ɛhɛlɛ Ɛjɔlɛ’n lɛ kele kɛ, bɛ́ mɔ bɛ tɩ man Zufʋ’n, Nyanmɩan ’nɩan bɛ́ dedi nɩn anwʋn ɔ bu bɛ́ sɛsɛfʋɛ. Ɛhɩka ati yɛ̂ Nyanmɩan lili mʋa ɔ bɔlɩ Ɛjɔlɛkpa sɔ’n ɔ helelɩ Abalahamʋn kɛ: Mɩn ’sɩn wɔ́ sʋ mɩn yeyila asɩɛ nɩn asʋ menian’n-mɔ kʋalaatin.⁹Kɛmɔ Abalahamʋn lelɩ Nyanmɩan lili, mɔ Nyanmɩan ’yeyilalɩ yɩ́’n, ɔ man bɛ́ kʋalaa mɔ bɛ de Nyanmɩan bɛ di’n, Nyanmɩan yeyila bɛ́ kɛ ɔ yeyilalɩ Abalahamʋn’n.

¹⁰Nan bɛ́ mɔ bɛ susu bɛ́ ti bɛ gua mala nɩn asʋ’n, munnzue yɛ̂ b’a fa ɔ. Afɩ b’a hɛlɛ wɔ Ɛhɛlɛ Ɛjɔlɛ nɩn anun kɛ: Yɩ́ kʋalaa mɔ b’a hɛlɛ m’ɔ wɔ mala kalata nɩn anun’n, wɔ́ sʋanlan mɔ a nni man sʋ kpa bɔkɔɔ’n, munnzue hán wɔ́.¹¹Sɛ ɛmɔ fa bɛ́ nyɩn bɛ tʋ a, ɛmɔ nwun yɩ́ yuein kɛ, Nyanmɩan anyunnun, sʋanlan ngʋala man kɛ ɔ di mala nɩn asʋ ɔ kaci sɛsɛfʋɛ ɔ. Ɔ sanlɩn kɛ Ɛhɛlɛ Ɛjɔlɛ’n lɛ kele kɛ: Sʋanlan mɔ yɩ́ dedi nɩn ati Nyanmɩan bu yɩ́ sɛsɛfʋɛ’n, sʋanlan sɔ’n ’nyan ngʋan.¹²Mala’n nʋn dedi’n tɩ man kʋn. Nan Ɛhɛlɛ Ɛjɔlɛ’n lɛ kele kɛ: Sʋanlan m’ɔ kɔ li mala nɩn asʋ’n, mala’n maan ɔ ’nyan ngʋan.¹³Nan mala nɩn asʋ munnzue’n m’ɔ di kɛ ɔ kan yɛ́’n, Kilisi a fa munnzue sɔ’n ɔ’a le yɛ́ ti. Ɛhɛlɛ Ɛjɔlɛ lɛ kele kɛ: Munnzue hán sʋanlan biala mɔ bɛ kɔ hun yɩ́ bɛ kɔ mɩnnda yɩ́ baka sʋ’n.¹⁴Ɛjɔlɛ sɔ nɩn a kpɩn sʋ. Ɔ sanlɩn kɛ, Zozi Kilisi dunman nun, Nyanmɩan nyila nɩn a han bɛ́ mɔ bɛ tɩ man Zufʋ’n kɛ ɔ falɩ bɔlɩ Abalahamʋn anɔhʋba’n. Yɩ́ ti, dedi’n y’ɔ man yɛ nyan Wawɛ Nwannzan-nwannzan’n mɔ Nyanmɩan a fa a bɔ yɛ́ anɔhʋba nɩn ɔ.

¹⁵Anianman-mɔ, ɔ tɩ eyuadɩ nɩn anun ɛwa nvandʋhʋn. Nvandʋhʋn sɔ’n y’ɔ le kɛ, sɛ sʋanlan kʋn kɛlɛ ajâ kalata kɛ ɔ sɛ fata’n sie ɛbɛlɛ a, sʋanlan fɩ́ɩ́ le man atɩn ɔ mgbɔ man ɛjɔlɛ sɔ’n, ɛsɛ ɔ le man atɩn ɔ ndʋ man ɛjɔlɛ sɔ nɩn asʋ. ¹⁶Kɛ ɛjɔlɛ’n tɩ yɩ́ nɩn anɩn. Nyanmɩan bɔlɩ Abalahamʋn nʋn yɩ́ bʋsʋ sʋanlan nɩn anɔhʋba. Ɛhɛlɛ Ɛjɔlɛ’n ngan man kɛ: “Abalahamʋn nʋn yɩ́ bʋsʋ menian’n-mɔ” kɛ like mɔ bɛ sʋnlɩn ɔ. Nan yɩ́ nwan: “Ɛ nʋn wɔ́ bʋsʋ sʋanlan.” Ɛbɛlɛ nɩn anun, yɛ nwun yɩ́ kɛ, yɩ́ bʋsʋ sʋanlan sɔ’n y’ɔ le Kilisi. ¹⁷Mɔ mɩɩn kan’n y’ɔ le kɛ Nyanmɩan nʋn Abalahamʋn bɛ yɔlɩ nyɩhyɛ bɛ sielɩ. Ɔ sanlɩn kɛ ɔ bɔlɩ Abalahamʋn anɔhʋba yɩ́ nzin afʋɛ ɛya nnan abulasan kʋalaaka nán ɔ’a fa mala’n ɔ’a man Moyizɩ. Mala’n ngʋala man kɛ ɔ kpɔ ɛjɔlɛ sɔ’n ɔ man anɔhʋba’n mɔ Nyanmɩan bɔlɩ’n ka. ¹⁸Afɩ ajâ’n mɔ Nyanmɩan sie’n, sɛ mala’n y’ɔ man bɛ nyan yɩ́ a, anɩn anɔhʋba ɛjɔlɛ nnʋn man nun kʋ́n. Nan kʋsʋ, anɔhʋba’n mɔ Nyanmɩan bɔlɩ Abalahamʋn’n, yɩ́ ti y’ɔ man ɔ nwunlin yɩ́ nwʋn anwunnvoe ɔ.

¹⁹Sɛ ɛjɔlɛ’n tɩ sʋa a, anɩn nzukɛ ati yɛ̂ Nyanmɩan falɩ mala’n manlɩn bɛ́ ɔ? Nyanmɩan falɩ mala’n manlɩn bɛ́ maan bɛ nwun yɩ́ kɛ menian’n-mɔ nyɔlɩɛ’n nzɔ man yɩ́ nyɩn. Mala sɔ’n lalɩ ɛbɛlɛ dede ɔ juli Abalahamʋn abʋsʋ sʋanlan’n, mɔ yɩ́ ti yɛ̂ Nyanmɩan bɔlɩ yɩ́ anɔhʋba nɩn ɛwalɛ tɛmʋn. Nyanmɩan sʋanlɩn yɩ́ mmɔfʋɛ’n-mɔ maan bɛ nʋn mala’n walɩ, ɔ nanndɩ sʋanlan kʋn m’ɔ di asafian nɩn asʋ. ²⁰Sʋanlan’n m’ɔ di asafian’n, nán sʋanlan kʋnmgba ati ɛjɔlɛ y’ɔ di ɔ, nan anɔhʋba’n mɔ Nyanmɩan bɔlɩ’n, yɩ́ muonun y’ɔ lili nun ɛjɔlɛ nɩn ɔ.

²¹Asʋ, like mɔ Nyanmɩan kɔ bɔ anɔhʋba kɛ ɔ ’yɔ’n, mala’n kʋala kɛ ɔ totua yɩ́ atɩn ɔ? Cɛcɛ! Ɔ sanlɩn kɛ, sɛ mala kʋn wɔ ɛbɛlɛ m’ɔ man sʋanlan nyan ngʋan an, ahan mala’n kʋala kɛ ɔ man sʋanlan kaci sɛsɛfʋɛ wɔ Nyanmɩan anyunnun. ²²Nan Ɛhɛlɛ Ɛjɔlɛ’n lɛ kele kɛ ɛtɛ nɩn a fa yɩ́ sa a tʋ yɛ́ kʋalaa yɛ́ sʋ. Ɔ man bɛ́ mɔ bɛ le dedi’n, bɛ́ dedi’n mɔ bɛ le yɩ́ wɔ Zozi Kilisi anun’n dunman nun, bɛ nyan anɔhʋba’n mɔ Nyanmɩan bɔlɩ nɩn anun like.

²³Asannan nán dedi’n tɛmʋn a ju sʋ’n, anɩn yɛ wɔ mala nɩn asa abʋ. Anɩn yɛ lɛ nwʋnndɛ dedi’n m’ɔ di kɛ bɛ yɩ bɛ kele’n ²⁴Ɔ man mala’n tɩ kɛ sʋanlan m’ɔ lɛ di yɛ́ taataa fa yɛ́ wula Kilisi asa nun, nán dedi’n mɔ yɛ le yɩ́ nɩn a man y’a kaci sɛsɛfʋɛ wɔ Nyanmɩan anyunnun. ²⁵Ɛnɛ mɔ yɛ wɔ dedi mɛlɛ nɩn anun’n, yɛ nnʋn man mala nɩn asa abʋ kʋ́n. ²⁶Afɩ, ɛmɔ nʋn Zozi Kilisi b’a yɔ kʋn, ɛmɔ dedi nɩn ati, ɛmɔ a kaci Nyanmɩan amma. ²⁷Ɛmɔ kʋalaatin mɔ b’a sɔnɩn ɛmɔ, mɔ ɛmɔ nʋn Kilisi b’a yɔ kʋn’n, ɛmɔ asɩtanlan nɩn a yɔ kɛ Kilisi dɩɛ nɩn ala. ²⁸Yɩ́ ti, kɩkaala dɩɛ, Zufʋ o, m’ɔ tɩ man Zufʋ o, kanga o, m’ɔ tɩ man kanga o, belenzua o, balasua o, mgbacɩ mgbacɩɛ nnʋn man bɛ́ afian kʋ́n. Ɔ sanlɩn kɛ ɛmɔ nʋn Zozi Kilisi a yɔ kʋn. ²⁹Sɛ ɛmɔ tɩ Kilisi dɩɛ a, anɩn ɛmɔ tɩ Abalahamʋn amma. Like mɔ Nyanmɩan falɩ bɔlɩ Abalahamʋn anɔhʋba’n, ɔ tɩ ɛmɔ dɩɛ.

¹Ɛ ’nwun ɛjɔlɛ mɔ mɩn kulo kɛ mɩn kan mɩn kele ɛmɔ’n. Baa’n mɔ yɩ́ sɩ wu a, yɩ́ yɛ̂ ɔ di yɩ́ ajâ’n, kannzɛ ninnge’n-mɔ kʋalaa tɩ yɩ́ dɩɛ bɔbɔ, nan sɛ ɔ tɛ tɩ batʋnman an, anɩn ɔ tɩ kɛ kanga. ²Ɔ sanlɩn kɛ, mɛlɛ mɔ ɔ tɛ tɩ batʋnman’n, menian sie yɩ́, ɛsɛ bɛ nɩan yɩ́ ninnge’n-mɔ asʋ dede ɔ kɔ ju cɩan mɔ yɩ́ sɩ helelɩ’n. ³Yɛ́ kʋsʋ yɛ́, mɛlɛ mɔ anɩn yɛ tɛ tɩ kɛ mmatʋnman’n, anɩn yɛ tɩ eyuadɩ nɩn anun mala’n-mɔ nganga. ⁴Nan mɔ tɛmʋn’n juli’n, Nyanmɩan sʋanlɩn yɩ́ Wa’n. Baa sɔ’n, balasua kʋn y’ɔ wʋlʋ yɩ́ ɔ. Bɛ ’wʋ yɩ́ a, anɩn Zufʋ’n-mɔ mala’n wɔ ɛbɛlɛ. ⁵Nyanmɩan kɔ sʋan yɩ́ kɛ ɔ bála a le bɛ́ mɔ bɛ tɩ mala’n nganga’n maan yɛ káci Nyanmɩan amma. ⁶Like m’ɔ kele kɛ ɛmɔ tɩ Nyanmɩan amma’n y’ɔ le yɩ́ Wa’n Wawɛ’n mɔ ɔ’a fa ɔ’a wula yɛ́ nun’n. Wawɛ sɔ’n lɛ tɩan kan kɛ: “Aba!” Yɩ́ bʋ y’ɔ le kɛ Baba. ⁷Yɩ́ ti, anianman, ɛ tɩ man kanga kʋ́n. Nan ɛ tɩ Nyanmɩan awa. Kɛmɔ ɛ tɩ yɩ́ wa’n, like kʋalaa mɔ Nyanmɩan ’fa man yɩ́ mma’n-mɔ’n, ɛ ’nyan bie.

Pɔlʋ lɛ di Galasi asɔnɩn mma’n-mɔ anwʋn yalɛ

⁸Daba mɔ anɩn ɛmɔ nzɩ man Nyanmɩan’n, ɛmɔ tɩ mmʋsʋɩn’n-mɔ mɔ bɛ tɩ man Nyanmɩan’n nganga. ⁹Nan sian dɩɛ mɔ ɛmɔ sɩ Nyanmɩan, mɔ ɛsɛ bɔbɔ Nyanmɩan sɩ ɛmɔ’n, ɔ yɔ sɛ mɔ ɛmɔ lɛ kaci bɛ́ nyɩn ninnge mgban-mgban sɔ’n-mɔ anwʋn ɛlɔ biekun ɔ? Ɔ yɔ sɛ mɔ ɛmɔ kulo kɛ bɛ kaci bɛ́ nganga biekun ɔ? ¹⁰Ɛmɔ le bɛ anaân cɩan, sala’n m’ɔ bɔ yɩ́ bʋ fi’n ɔ nʋn afʋɛ anʋan fɛtɩ’n-mɔ elie’n tɩ ɛmɔ cɩnnjɩn kpa. ¹¹Mɩn di ɛmɔ anwʋn yalɛ, junman’n mɔ m’an li yɩ́ ɛmɔ afian ɛlɔ nɩn a yɔ mgban.

¹²Anianman-mɔ, mɩn ’sɛlɛ ɛmɔ kɛ bɛ káci kɛ mɩ́n. N dɩ man Zufʋ’n-mɔ mala’n kanga kʋ́n. Yɩ́ ti, ɛmɔ kʋsʋ, nán bɛ kaci Zufʋ’n-mɔ mala’n nganga. Afɩ mɛlɛ mɔ m malɩ ɛmɔ anwʋn ɛlɔ’n, n gacɩlɩ kɛ ɛmɔ mɔ bɛ tɩ man Zufʋ’n, ɛmɔ anun bie fɩ́ɩ́ yɔlɩ man mɩ́n ɛtɛ. ¹³Nan ɛmɔ ati kácɩ kɛ, mɛlɛ mɔ mɩn ’di mʋa mɩn bɔ Ɛjɔlɛkpa’n mɩn kele ɛmɔ’n, anɩn ewue lɛ kun mɩ́n. ¹⁴Ewue sɔ’n, anɩn ɛmɔ ngʋala man yɩ́ nɩan. Nan kʋsʋ, ɛmɔ a mmu man mɩ́n sʋanlan mgban, ɛsɛ ɛmɔ a ndʋtʋ man mɩ́n nyunnun ngɛsɛlɛ. Ɛmɔ a sɔ mɩ́n nun kɛ nyanmɩansʋ bɔfʋɛ yɛ̂ ɔ’a a tʋ ɛmɔ ɔ. Ɛmɔ a sɔ mɩn nun kɛ Zozi Kilisi muonun yɛ̂ ɔ’a a tʋ ɛmɔ ɔ. ¹⁵Tɛmʋn sɔ’n, ɛmɔ lili fɛ kpa. Afɩ mɩn di ɛmɔ anwʋn adanzɩɛ kɛ sɛ ɔ tɩ mɔ bɛ kʋala anyɩan fʋfɔlɛ fa sie ɛbɛlɛ a, ahan ɛmɔ falɩ bɛ́ nyɩn dɩɛ’n bɛ sielɩ mɩ́n dɩɛ nɩn abʋsʋ. Afɩ ɔ yɔ sɛ mɔ bɛ nnwun man ɛmɔ fɛ elie sɔ’n kʋ́n ɔ? ¹⁶Ananhɔlɛ ɛjɔlɛ’n mɔ mɩɩn kan mɩn kele ɛmɔ’n, asʋ yɩ́ ti y’ɔ man m’an kaci ɛmɔ kpɔfʋɛ ɔ?

¹⁷Ɛmɔ nwún yɩ́ kɛ menian sɔ’n-mɔ lɛ bɔ mɔndɩnlɩn kpa maan ɛmɔ kaci bɛ si bɛ́ sʋ, nan kʋsʋ ajʋnlɩn sɔ’n mɔ b’a fa’n tɩ man kpa. Mɔ bɛ lɛ kpʋnndɛ’n y’ɔ le kɛ, ɛmɔ káci bɛ́ nzin bɛ sí mɩ́n nán ɛmɔ fá bɛ́ nwʋn bɔ́ bɛ́ kpa. ¹⁸Ɔ tɩ kpa kɛ ɛmɔ fá bɛ́ nwʋn bɛ bɔ́ bɛ́ mɔ bɛ kele ɛmɔ atɩn kpa’n. Nan atɩn’n mɔ n gelelɩ ɛmɔ mɛlɛ mɔ m malɩ ɛmɔ ɛlɔ’n, sɛ bɔbɔ n nnʋn man ɛmɔ anwʋn ɛlɔ a, ɛmɔ nánndɩ atɩn sɔ nɩn asʋ bɛ hɔ́ bɛ́ nyunnun. ¹⁹Mɩ́n mma-mɔ, mɩn di ɛmɔ anwʋn yalɛ biekun. Ɛmɔ anwʋn yalɛ’n mɔ mɩɩn di’n, ɔ nʋn balasua mɔ yɩ́ kʋ a han yɩ́’n dɩɛ tɩ kʋn. Mɩn ’bɔ ɛmɔ anwʋn mɔndɩnlɩn dede ɛmɔ nanndɩ Kilisi atɩn dɩɛ nɩn asʋ. ²⁰Ɔ ’ka mɩ́n ngʋnmɩn an, ahan n wɔ ɛmɔ anwʋn ɛbɛlɛ nán m’an nwun kɛ mɩn ’kpɩn mɩn jʋjɔ bɛtɛɛ sʋ mɩn kele ɛmɔ’n. Ɔ sanlɩn kɛ mɩn di ɛmɔ anwʋn yalɛ kpa!

Agaa nʋn Sala

²¹Ɛmɔ mɔ bɛ kulo kɛ bɛ di mala nɩn asʋ’n, ɛjɔlɛ’n m’ɔ wɔ mala nɩn anun’n, asʋ ɛmɔ tɩlɩ man ɔ? ²²Mala’n lɛ kele kɛ *Abalahamʋn wʋlɩ mma mmelenzua nnyuan. Nunhan kʋn anin’n tɩ kanga, bɛ fɛlɛ yɩ́ Agaa yɛ̂ nunhan kʋn kʋsʋ anin dɩɛ’n tɩ man kanga, bɛ fɛlɛ yɩ́ Sala. ²³Kanga balasua nɩn awa dɩɛ’n, ɔ wʋlɩ yɩ́ kɛ mmalasua’n-mɔ kʋalaa wɔ bɛ́ mma’n-mɔ’n. Nan balasua’n m’ɔ tɩ man kanga nɩn awa dɩɛ’n, Nyanmɩan falɩ bɔlɩ Abalahamʋn anɔhʋba.

²⁴Ɛjɔlɛ sɔ’n, yɛ kʋala kɛ yɛ fa yɛ tʋ like kʋn anwʋn. Like sɔ’n y’ɔ le kɛ mmalasua nnyuan sɔ’n-mɔ tɩ kɛ nyɩhyɛ nnyuan’n mɔ Nyanmɩan nʋn menian’n-mɔ hyɩhyɛlɩ’n. Nyɩhyɛ’n mɔ Nyanmɩan nʋn menian’n-mɔ hyɩhyɛlɩ yɩ́ *Sinayi bʋka nɩn asʋ’n, kanga balasua’n mɔ bɛ fɛlɛ yɩ́ Agaa’n, yɩ́ anɩn. Yɩ́ mma dɩɛ m’ɔ wʋ bɛ́’n tɩ nganga mma. ²⁵Yɩ́ ti, Sinayi bʋka’n m’ɔ wɔ Alabi mân nɩn anun ɛlɔ’n, yɛ̂ ɔ tɩ kɛ Agaa nɩn ɔ. Agaa sɔ’n, ɛsɛ ɔ tɩ kɛ ɛnɛ Zoluzalɛmʋn kulo’n. Ɔ nʋn yɩ́ mma’n-mɔ bɛ tɩ nganga. ²⁶Nan nyanmɩansʋ Zoluzalɛmʋn kulo dɩɛ’n, ɔ tɩ man kanga. Yɛ́ nin dɩɛ nɩn anɩn. ²⁷Afɩ Ɛhɛlɛ Ɛjɔlɛ’n lɛ kele kɛ:

Wɔ́ mɔ ɛ tɩ mʋta mɔ ɛ nwʋ man baa’n,

di yɩ́ nwʋn fɛ!

Wɔ́ mɔ ɛ nwunlin man awɔlɛ yalɛ,

bɔ e se ye! Ɔ sanlɩn kɛ,

balasua’n mɔ yɩ́ hun a nian man yɩ́ bʋsʋ’n,

yɩ́ mma’n-mɔ b’a sʋn tala nunhan’n

m’ɔ tɩ ajaa nɩn abʋ dɩɛ’n-mɔ.

²⁸Nan anianman-mɔ, ɛmɔ dɩɛ, anɔhʋba’n mɔ Nyanmɩan bɔlɩ’n, nun mma y’ɔ le ɛmɔ kɛ Izakɩ. ²⁹Daba, baa’n mɔ bɛ wʋlɩ yɩ́ kɛ mmatʋnman nga’n-mɔ’n, ɔ helelɩ baa’n mɔ bɛ wʋlɩ yɩ́ Wawɛ Nwannzan-nwannzan tunmin nɩn anun ahʋlʋwa. Ɛnɛ anun kʋsʋ, kɛ ɛjɔlɛ’n tɩ yɩ́ nɩn anɩn. ³⁰Nan Ɛhɛlɛ Ɛjɔlɛ’n nwan nzɛ? Yɩ́ nwan: “Fʋan kanga balasua sɔ’n nʋn yɩ́ wa belenzua’n, ɔ sanlɩn kɛ kanga baa’n le man atɩn ɔ nni man yɩ́ sɩ ajâ. Nan nunhan’n mɔ yɩ́ nin tɩ man kanga’n y’ɔ di ajâ ɔ.” ³¹Yɩ́ ti, anianman-mɔ, yɛ tɩ man kanga balasua nɩn amma, nan nunhan’n m’ɔ tɩ man kanga’n, yɩ́ mma y’ɔ le yɛ́.

Fanwʋndi’n

¹Ɛhɩ, fanwʋndi’n dunman nun y’ɔ man Kilisi a a le yɛ́ ti ɔ. Yɩ́ ti, ɛmɔ jínlan bɛ́ ja nun kpunndiin kpa, nán bɛ man sʋanlan fɩ́ɩ́ fa ɛmɔ kaci yɩ́ nganga kʋ́n. ²Ɛmɔ tíe, mɩ́n Pɔlʋ, mɩɩn kan mɩn kele ɛmɔ kɛ, sɛ ɛmɔ man bɛ kpɛ ɛmɔ mmian nun an, anɩn Kilisi tɩ mgban man ɛmɔ. ³Ɛsɛ mɩɩn kan mɩn funlan nun kɛ, sʋanlan biala m’ɔ kulo kɛ ɔ kpɛ yɩ́ mmian nun’n, anɩn ɔ lí mala’n kʋalaatin asʋ. ⁴Ɛmɔ mɔ ɛmɔ kulo kɛ bɛ di mala nɩn asʋ maan Nyanmɩan bu ɛmɔ sɛsɛfʋɛ’n, ɛmɔ nʋn Kilisi afian a tɩ. Ɛmɔ a tʋ a fʋn Nyanmɩan anwunnvoe’n. ⁵Nan yɛ́ dɩɛ, dedi’n mɔ Nyanmɩan Wawɛ’n man’n, nun yɛ̂ yɛ lɛ kpʋnndɛ anyɩndasʋɛ’n nʋn sɛsɛ ɛyɔlɛ’n wɔ Nyanmɩan anyunnun ɔ. ⁶Afɩ sɛ sʋanlan fa yɩ́ nwʋn man Zozi Kilisi a, b’a kpɛ yɩ́ mmian nun o, bɛ kpɛlɩ man yɩ́ mmian nun o, like m’ɔ tɩ cɩnnjɩn’n y’ɔ le dedi’n m’ɔ man yɛ kulo yɛ́ nwʋn’n.

⁷Ngɛlɛmɔ nun, ɛmɔ bɔlɩ yɩ́ bʋ kanlanman. Nan nwan yɛ̂ ɔ’a totua ɛmɔ kɛ nán bɛ nanndɩ ananhɔlɛ atɩn nɩn asʋ kʋ́n ɔ? ⁸Atɩn’n mɔ atofʋɛ’n-mɔ a hele ɛmɔ kɛ bɛ sɩ́n sʋ’n, ɔ fi man Nyanmɩan m’ɔ ɔ’a fɛlɛ ɛmɔ yɩ́ nwʋn’n. ⁹Afɩ fali ayile kaan sʋa, ɔ man fali’n kʋalaa tu. ¹⁰Nan kʋsʋ, mɩn de mɩn di kɛ yɛ́ Mɩn dunman nun, ɛmɔ ngɔ nyan man ajʋnlɩn ngacile. Nan sʋanlan’n m’ɔ lɛ tan ɛmɔ anyɩnsʋ’n, kɛ ɔ kpɩn tɩ yɩ́’n biala, Nyanmɩan ’tua yɩ́ kalɛ.

¹¹Anianman-mɔ, m’ɔ tʋ de mɩ́n’n, sɛ ɔ tɩ ananhɔlɛ kɛ mmian nun ɛkpɛ ɛjɔlɛ yɛ̂ mɩn bɔ mɩn kele menian’n-mɔ a, anɩn ɔ yɔ sɛ mɔ afɩ menian’n-mɔ tɛ kele mɩ́n ahʋlʋwa ɔ? Sɛ mmian nun ɛkpɛ ɛjɔlɛ yɛ̂ mɩn bɔ mɩn kele menian’n-mɔ a, ahan Kilisi ewue’n m’ɔ wuli kʋlʋwa nɩn asʋ’n njɩjɩ man sʋanlan fɩ́ɩ́. ¹²Bɛ́ mɔ bɛ lɛ tan ɛmɔ anyɩnsʋ’n, mɔ mmian nun ɛkpɛ y’ɔ cian bɛ́’n, bɛ sá bɛ́ nwʋn e!

¹³Anianman-mɔ, fanwʋndi nɩn ati yɛ̂ Nyanmɩan a fɛlɛ ɛmɔ ɔ. Yɩ́ ti, nán bɛ fa fanwʋndi sɔ’n bɛ bu atɩn ngacile bie asʋ bɛ yɔ mɔ anwʋnnaan’n kulo ɔ. Nan ɛmɔ húlo bɛ́ nwʋn bɛ sʋ́sɔ bɛ́ nwʋn nun. ¹⁴Ɔ sanlɩn kɛ, mala’n kʋalaatin wɔ ɛjɔlɛ kpɔlɛ ɛhɩ anun: “Kulo wɔ́ manngʋn kɛ wɔ́ bɔbɔ muonun wɔ́ nwʋn.” ¹⁵Nan sɛ ɛmɔ yɔ kɛ ebolo naan bɛ kɩka kɩka bɛ́ nwʋn, ɛsɛ ɛmɔ cɩ bɛ́ nwʋn bɛ di a, anɩn ɛmɔ nɩ́an bɛ nwʋn kpa nán ɛmɔ a nyue man ɛmɔ abʋsʋ bɔ.

Wawɛ Nwannzan-nwannzan’n nʋn ɛtɛ anwʋnnaan’n

¹⁶Ɛ ’nwun ɛjɔlɛ mɔ mɩɩn kan mɩn kele ɛmɔ’n: Ɛmɔ yɔ́ like mɔ Wawɛ Nwannzan-nwannzan’n kulo’n nán bɛ yáci ɛtɛ anwʋnnaan’n dɩɛ’n. ¹⁷Ɔ sanlɩn kɛ, like mɔ ɛtɛ anwʋnnaan’n kulo’n, Wawɛ Nwannzan-nwannzan’n ngulo man. Like kʋsʋ mɔ Wawɛ Nwannzan-nwannzan’n kulo’n, ɛtɛ anwʋnnaan’n ngulo man. Bɛ́ munnyuan bɛ nzʋn man etin kʋn asʋ. Yɩ́ ti y’ɔ man ɛmɔ ngʋala man like mɔ ɛmɔ kulo’n yɔ ɔ. ¹⁸Afɩ sɛ ɛmɔ yɔ like mɔ Wawɛ Nwannzan-nwannzan’n kulo a, mala’n le man tunmin ɛmɔ sʋ.

¹⁹Ninnge’n mɔ ɛtɛ anwʋnnaan’n kulo’n, ɔ nvɩa man. Ninnge sɔ’n y’ɔ le basa basa ɛjɔlɛ, satɩlɩfʋɛ ɛyɔlɛ, mgban-mgban ɛyɔlɛ, ²⁰amʋan ɛsɔ, jiliwa ɛyɩɛ, anvɔlɛ etua, butule elie, bɛ́ nwʋn ɛkpɔ, ɛya ɛfɛ, ejujue, bɛ́ nwʋn nun ebubue, ato eku ɛhyɩɛ ²¹mân nɩn anun ninnge anyɩnbʋlʋ, kɔnʋnmɩnnzan, alɩɛ mɔ bɛ di dede ɔ fʋ bɛ́ ɛbʋɛ sʋ ɔ nʋn yɩ́ nzin ninnge ɛtɛ ɛtɛ mmiekun-mɔ kɛ ɛhɩka. Ɛjɔlɛ’n mɔ n nili mʋa n ganlɩn n gelelɩ ɛmɔ’n, mɩɩn kan mɩn funlan nun kɛ, bɛ́ mɔ bɛ bɔ abalabɔ sɔ’n-mɔ’n, bɛ nnyan man asɩtanlan Nyanmɩan Belemgbin Mân nɩn anun ɛlɔ.

²²Nan Wawɛ Nwannzan-nwannzan’n baa dɩɛ m’ɔ su’n y’ɔ le ehulo, fɛ elie, alʋacɩcɩɛ, abʋtalɛ esie, ahunnunye ɛyɔlɛ, kpa ɛyɔlɛ, ananhɔlɛ elie ²³bɛtɛɛ ɛyɔlɛ, bɛ́ nwʋn ye esie. Mala’n ngan man like mɔ Wawɛ Nwannzan-nwannzan’n kulo nɩn anwʋn ɛjɔlɛ ɛtɛ. ²⁴Ɔ sanlɩn kɛ bɛ́ mɔ bɛ tɩ Zozi Kilisi dɩɛ’n, ninnge mgban mgban’n-mɔ mɔ ɛtɛ anwʋnnaan’n kulo’n, b’a yaci yɩ́ kʋalaa b’a gua. Ɔ tɩ kɛ b’a bʋbɔ ninnge sɔ’n-mɔ kʋlʋwa’n mɔ Zozi Kilisi wuli sʋ nɩn asʋ. ²⁵Wawɛ Nwannzan-nwannzan’n y’ɔ man y’a nyan ngʋan ɔ. Yɩ́ ti, yɛ yáci yɩ́ maan ɔ tɩ́nngɛ yɛ́ atɩn. ²⁶Nán bɛ man yɛ tu yɛ́ nwʋn, nán man yɛ kan yɛ́ nwʋn ɛya, ɛsɛ nán man yɛ́ nyɩn bʋlʋ yɛ́ nwʋn.

Bɛ mán yɛ bʋ́ka bʋ́ka yɛ́ nwʋn

¹Ɛhɩ, anianman-mɔ, sɛ sʋanlan kʋn tɔ ɛtɛ nɩn anun nán ɛmɔ nwun yɩ́ a, ɛmɔ mɔ Wawɛ Nwannzan-nwannzan’n wɔ bɛ́ nun’n, ɛmɔ fá ahʋnlɩn bɛtɛɛ bɛ síe yɩ́ atɩn kpa nɩn asʋ. Wɔ́ mɔ ɛ lɛ bʋka yɩ́’n, síe wɔ́ nwʋn ye nán a ndɔ man ɛtɛ nɩn anun. ²Ɛmɔ bʋ́ka bʋ́ka bɛ́ nwʋn wɔ bɛ́ emian’n-mɔ anun. Sɛ ɛmɔ yɔ yɩ́ sɔ a, anɩn ɛmɔ lɛ di Kilisi mala nɩn asʋ. ³Sɛ sʋanlan kʋn bu yɩ́ nwʋn kpa tala yɩ́ manngʋn-mɔ, nan kʋsʋ ɔ tɩ man like fɩ́ɩ́ a, anɩn ɔ lɛ laka laka yɩ́ nwʋn. ⁴Sʋanlan kʋn biala sɔ́ yɩ́ muonun yɩ́ ɛnanndɩɛ’n ɔ nɩ́an. Sɛ ɔ tɩ m’ɔ di yɩ́ nwʋn fɛ a, anɩn yɩ́ ngʋnmɩn ɔ lí yɩ́ nwʋn fɛ, nán man ɔ fa tʋ yɩ́ manngʋn’n-mɔ dɩɛ nɩn anwʋn. ⁵Ɔ sanlɩn kɛ sʋanlan kʋn biala ’ba bu yɩ́ muonun yɩ́ ɛnanndɩɛ nɩn anwʋn akpʋnndan ɔ kele Nyanmɩan.

⁶Sʋanlan mɔ bɛ lɛ kele yɩ́ Ɛjɔlɛkpa’n, ɔ di kɛ ɔ fa yɩ́ ninnge’n m’ɔ le yɩ́’n bie man sʋanlan’n m’ɔ lɛ kele yɩ́’n. ⁷Nán bɛ laka laka bɛ́ nwʋn, bɛ ngʋlʋ man Nyanmɩan anwʋn. Like mɔ sʋanlan kɔ lua’n, like sɔ’n yɛ̂ ɔ ’tɩ ɔ. ⁸Sɛ ɔ dua like mɔ ɛtɛ anwʋnnaan’n kulo a, like m’ɔ kpɔlɔ’n yɛ̂ ɔ ’tɩ ɔ. Nan sɛ ɔ dua like mɔ Wawɛ Nwannzan-nwannzan’n kulo a, Wawɛ’n ’man ɔ nyan nyanmɩansʋ ngʋan m’ɔ le man ayuelɩɛ’n. ⁹Yɛ yɔ́ ye’n yɛ hɔ́ yɛ́ nyunnun, nán bɛ man yɛ́ nwʋn bubu yɛ́. Ɔ sanlɩn kɛ cɩan bie dede yɛ ’nyan nun like. ¹⁰Ɛhɩka ati, tɛmʋn biala mɔ atɩn wɔ nun’n, yɛ yɔ́ menian’n-mɔ kʋalaa ye. Nan menian m’ɔ di kɛ yɛ yɔ bɛ́ ye kpa’n y’ɔ le Zozi Kilisi menian’n-mɔ.

Afʋtu nʋn ngalɩɛ

¹¹Sian dɩɛ, mɩ́n muonun mɩ́n sa yɛ̂ mɩɩn fa mɩn kɛlɛ ɛmɔ ɔ. Ɛmɔ sɩ mɩ́n ɛhɛlɛ’n nzɔlɛ. Ɔ sanlɩn kɛ mɩn kɛlɛ mgbili mgbili kpa.

¹²Bɛ́ mɔ bɛ kulo kɛ mân’n nwun bɛ́’n, bɛ́ yɛ̂ bɛ lɛ tinndin ɛmɔ kɛ ɛmɔ kpɛ́ bɛ́ mmian nun nɩn ɔ. Bɛ lɛ yɔ sɔ, afɩ bɛ ngulo man kɛ bɛ kele bɛ́ ahʋlʋwa wɔ Kilisi kʋlʋwa’n dunman nun. ¹³Bɛ́ muonun mɔ b’a kpɛ bɛ́ mmian nun’n, bɛ nni man mala nɩn asʋ. Nan bɛ kulo kɛ ɛmɔ kpɛ bɛ́ mmian nun maan bɛ fa ɛmɔ bɛ tu bɛ́ nʋan nun. ¹⁴Nan mɩ́n dɩɛ, yɛ́ Mɩn Zozi Kilisi kʋlʋwa nɩn ala yɛ̂ mɩn fa mɩn tu mɩ́n nʋan nun. Ɔ sanlɩn kɛ Kilisi kʋlʋwa’n dunman nun, ɛtɛ mân’n nwun mɩ́n kɛ b’a bʋbɔ mɩ́n kʋlʋwa sʋ. Mɩ́n kʋsʋ mɩ́n, mɩn nwun ɛtɛ mân’n kɛ b’a bʋbɔ yɩ́ kʋlʋwa sʋ. Yɩ́ bʋ y’ɔ le kɛ mɩn nʋn ɛtɛ mân’n yɛ́ afian a tɩ. ¹⁵Sɛ b’a kpɛ sʋanlan kʋn mmian nun o, sɛ bɛ kpɛlɩ man yɩ́ mmian nun o, nán ɛhɩ yɛ̂ ɔ tɩ cɩnnjɩn ɔ. Nan m’ɔ cian’n y’ɔ le kɛ yɛ káci abɔdɩɛ fʋfɔlɛ. ¹⁶Nyanmɩan yíla bɛ́ mɔ bɛ ’nanndɩ atɩn sɔ’n mɔ m’an hele nɩn asʋ’n, bɛ nʋn Nyanmɩan Izalayɛ amma kpa’n-mɔ. Ɔ nwún bɛ́ nwʋn anwunnvoe ɔ mán bɛ́ tánlan alʋacɩcɩɛ nun.

¹⁷Ɔ fi ɛnɛ m’ɔ kɔ’n, sʋanlan fɩ́ɩ́ n’ɔ wula mɩ́n akpue. Ɔ sanlɩn kɛ mɩ́n nwʋn kafʋan’n-mɔ kele kɛ n dɩ Zozi akʋa.

¹⁸Anianman-mɔ, yɛ́ Mɩn Zozi Kilisi nwún ɛmɔ anwʋn anwunnvoe. Amɩn!