EFƐZƖ

PƆLƱ KALATA’N

M’Ɔ HƐLƐLƖ NWANLƖN

EFƐZƖ ASƆNƖN MMA’N-MƆ’N

M’ɔ wɔ nun’n

Tɛmʋn mɔ Pɔlʋ ’kɛlɛ kalata sɔ’n, anɩn ɔ la fiadɩ. Anɩn Efɛzɩ y’ɔ tɩ Azi mân nɩn anun kulo kpili nɩn ɔ. Mân sɔ’n, ɛnɛ bɛ fɛlɛ yɩ́ Tuluki. Pɔlʋ yɛ̂ ɔ bɔlɩ ɛbɛlɛ asɔnɩn nɩn abʋ ɔ. Ɔ lili afʋɛ nsan ɛbɛlɛ ɔ sesielɩ asɔnɩn’n. Asɔnɩn’n kɔ tɛlɛ dede ɔ kɔ ju kulo bʋ nga’n mɔ bɛ wɔ ɛbɛlɛ etin nɩn asʋ’n kʋalaatin. Ɔ tɩ ananhɔlɛ kɛ Efɛzɩ dunman yɛ̂ ɔ fite ɔ. Kʋsʋ kalata nɩn ɛhɛlɛ mɔ Pɔlʋ a hɛlɛ’n, ɔ tɩ etin sɔ nɩn asʋ asɔnɩn’n-mɔ kʋalaatin bɛ́ kalata. Yɩ́ ti yɛ̂ Pɔlʋ mmʋbɔ man menian dɔʋn dunman yɩ́ kalata sɔ nɩn anun ɔ.

Kalata sɔ’n, yɛ kʋala kɛ yɛ ce nun mgbili nnyuan. Mɔ li mʋa’n (yɩ́ ti 1-3), Pɔlʋ lɛ yɩ Nyanmɩan ayɛ ɔ da yɩ́ asɩ wɔ yɩ́ nyila’n kʋalaa m’ɔ fa man yɛ́ wɔ Kilisi dunman nun’n. Afɩ, bɛ́ mɔ bɛ de Kilisi bɛ di’n, m’ɔ tɩ Zufʋ o, m’ɔ tɩ man Zufʋ o, Zozi a han bɛ́ a bɔ nun ɔ’a man b’a kaci Nyanmɩan anwʋntɩɛ mma. Anwʋntɩɛ mma sɔ’n-mɔ yɛ̂ bɛ fɛlɛ bɛ́ asɔnɩn nɩn ɔ. Pɔlʋ lɛ sɛlɛ Nyanmɩan kɛ ɔ mán bɛ nyán yɩ́ Wawɛ Nwannzan-nwannzan’n nán b’a tɩ Kilisi ehulo nɩn abʋ kpa. M’ɔ li sian’n (yɩ́ ti 4-6), Pɔlʋ lɛ bʋtʋ asɔnɩn mma’n-mɔ kɛ bɛ bɔ́ abalabɔ kpa m’ɔ sɔ Nyanmɩan anyɩn. Kalata nɩn agualɩɛ nun (6.10-18), ɔ lɛ kacɩ asɔnɩn mma’n-mɔ kɛ bɛ fá Nyanmɩan ɛlɔɛ ninnge’n-mɔ bɛ síe bɛ́ nwʋn nán b’a hʋala bɛ́ ja nun jinlan wɔ Abɔnsanmʋn naka junman’n m’ɔ di nɩn anyunnun.

Ahɩn ebisa

¹Mɩ́n Pɔlʋ, mɔ Nyanmɩan a hulo kɛ n gáci Kilisi Zozi bɔfʋɛ’n, mɩ́n yɛ̂ mɩɩn kɛlɛ kalata ɛhɩ mɩn nwan ɛmɔ mɔ bɛ tɩ Nyanmɩan anwʋntɩɛ mma [Efɛzɩ kulo nɩn asʋ ɛlɔ], mɔ bɛ de Kilisi Zozi bɛ di’n.

²Mɩn ’bisa ɛmɔ ahɩn. Yɛ́ Sɩ Nyanmɩan Kpili nʋn yɛ́ Mɩn Zozi Kilisi nwún ɛmɔ anwʋn anwunnvoe ɛsɛ bɛ cɩ́cɩ ɛmɔ alʋa.

Nyanmɩan nyila’n-mɔ

³Yɛ yɩ́ Nyanmɩan Kpili m’ɔ tɩ yɛ́ Mɩn Zozi Kilisi Asɩ nɩn ayɛ. Ɔ sanlɩn kɛ kɛmɔ yɛ nʋn Kilisi a yɔ sʋanlan munmuan kʋn’n, Nyanmɩan a fa yɩ́ nyila’n kʋalaa m’ɔ le yɩ́ anwunno ɛlɔ’n ɔ’a man yɛ́. ⁴Ɔ nanndɩ Kilisi sʋ, Nyanmɩan lili mʋa kpalɩ yɛ́ sielɩ kʋalaaka nán ɔ’a bɔ mân’n. Afɩ ɔ kulo kɛ yɛ́ ɛnanndɩɛ’n yɔ nwannzan-nwannzan wɔ yɩ́ nyunnun nán ɔ’a nyan man yɛ́ nwʋn ɛjɔlɛ ɛtɛ ɔ’a ngan man. Ehulo mɔ Nyanmɩan kulo yɛ́ nɩn ati, ⁵ɔ lili mʋa ɔ hyɩhyɛlɩ sielɩ kɛ ɔ ’fa yɛ́ kaci yɩ́ mma wɔ Zozi Kilisi dunman nun. Ɔ yɔlɩ yɩ́ sɔ, ɔ sanlɩn kɛ ɔ yɔ yɩ́ ɛnyɩnmɩn. ⁶Afɩ, ɔ kulo kɛ yɛ́ mɔ yɛ tɩ yɩ́ mma’n, yɛ yɩ yɩ́ ayɛ, yɛ wula yɩ́ anunminnyanmʋn ɔ fi yɩ́ ye kpili’n mɔ ɔ’a yɔ yɛ́ nɩn anwʋn wɔ yɩ́ ehulo Baa’n dunman nun. ⁷Kilisi ewue’n m’ɔ wuli gualɩ yɩ́ moja nɩn asɩ nɩn a tua yɛ́ ti kalɛ’n. Nyanmɩan ye kpili ɛhɩ mɔ ɔ’a man yɛ́’n, ɔ’a man y’a nyan ɛtɛ face. ⁸Ye sɔ’n mɔ ɔ’a yɔ yɛ’n tɩ kpili sʋnman. Ɔ man yɛ́ ngɛlɛ nʋn ajʋnlɩn. ⁹Ɔ nanndɩ Kilisi asʋ, nvɩalɩɛ nun ɛhyɩhyɛ’n m’ɔ tɩ yɩ́ kunnun sʋ like, m’ɔ sesielɩ yɩ́ daba’n, ɔ’a yɩ ɔ’a hele yɛ́. ¹⁰Ɛhyɩhyɛ sɔ’n mɔ Nyanmɩan ’ba gua yɩ́ bʋ mân nɩn ayuelɩɛ nun’n y’ɔ le kɛ ɔ ’ba han anwunno ɛlɔ nʋn asɩɛ nɩn asʋ ɛwa ninnge’n kʋalaatin bɔ nun ɔ fa bɛ́ wula Kilisi m’ɔ tɩ kpain nɩn asa nun.

¹¹Yɛ nʋn Kilisi y’a yɔ sʋanlan munmuan kʋn. Y’a kaci Nyanmɩan menian. Ɔ sanlɩn kɛ Nyanmɩan kpalɩ yɛ́ sielɩ daba daba ɔ fi yɩ́ ɛhyɩhyɛ nɩn anwʋn. Afɩ, ɔ’a hulo ɔ’a yɔ yɩ́ sɔ, ¹²nán yɛ́ mɔ y’a li mʋa y’a fa yɛ́ lʋa’n y’a wula Ngʋandefʋɛ nɩn anun’n, yɛ yɩ Nyanmɩan ayɛ, yɛ wula yɩ́ anunminnyanmʋn. ¹³Ɛmɔ kʋsʋ, mɛlɛ mɔ ɛmɔ tɩlɩ ananhɔlɛ ɛjɔlɛ’n, Ɛjɔlɛkpa’n m’ɔ man ɛmɔ ngʋan’n, ɛmɔ a le Kilisi a li. Ɛhɩka ati, Nyanmɩan a fa yɩ́ Wawɛ nwannzan-nwannzan’n m’ɔ falɩ bɔlɩ anɔhʋba’n ɔ’a wula ɛmɔ nun. Ɔ kele kɛ ɛmɔ tɩ yɩ́ dɩɛ. ¹⁴Wawɛ Nwannzan-nwannzan sɔ’n di ajinlanmun kɛ yɛ tɩ Nyanmɩan afilie nɩn anun menian. Yɛ lɛ nwʋnndɛ kɛ ɔ lé yɛ́ ti bɔkɔɔ maan yɛ yɔ́ yɩ́ dɩɛ dahuu nán y’a yɩ yɩ́ ayɛ y’a wula yɩ́ anunminnyanmʋn.

Pɔlʋ ɛbʋtʋɛ’n

¹⁵Ɛhɩka ati, sian mɔ mɩ́n kʋsʋ m’an tɩ kɛ ɛmɔ a fa bɛ́ dedi’n b’a wula yɛ́ Mɩn Zozi anun, ɛsɛ ɛmɔ kulo bɛ́ kʋalaa mɔ bɛ tɩ Nyanmɩan anwʋntɩɛ menian’n, ¹⁶mɩn da Nyanmɩan asɩ cɩan biala wɔ ɛmɔ dunman nun. Mɩ́n ti kacɩ ɛmɔ mɩ́n mmʋtʋɛ’n-mɔ anun ¹⁷mɩn sɛlɛ yɛ́ Mɩn Zozi Kilisi Nyanmɩan’n, m’ɔ tɩ Sɩɛ’n m’ɔ le anunminnyanmʋn’n kɛ ɔ mán ɛmɔ nwún ngɛlɛ kpa, ɔ yɩ́ yɩ́ nwʋn yuein ɔ héle ɛmɔ maan ɛmɔ sɩ́ yɩ́ kpa bɔkɔɔ. ¹⁸Ɔ mán yɩ́ kanlannɩɛ’n tá ɛmɔ ajʋnlɩn nɩn anun yuein nán ɛmɔ a tɩ anyɩndasʋɛ’n mɔ yɩ́ ti yɛ̂ ɔ fɛlɛlɩ ɛmɔ nɩn abʋ. Ɔ mán ɛmɔ tɩ yɩ́ bʋ kɛ ninnge mgbakpa’n mɔ ɔ’a fa ɔ’a sie yɩ́ anwʋntɩɛ menian’n-mɔ’n tɩ anunminnyanmʋn like m’ɔ tɩ man nzɛmɩndɛ. ¹⁹Ɔ mán ɛmɔ tɩ́ yɩ́ bʋ kɛ yɩ́ tunmin’n tɩ kpili sʋnman man yɛ́ mɔ yɛ de Kilisi yɛ di’n. Tunmin sɔ’n, yɩ́ yɛ̂ ɔ yɩlɩ helelɩ anwʋnsɛlɛ sʋ ²⁰ɔ manlɩn Ngʋandefʋɛ’n fi ewue nɩn anun tinngelɩ ɔ. Ɔ’a fa yɩ́ ɔ’a sie yɩ́ anunminnyanmʋn lɩka yɩ́ sa fama sʋ anwunno ɛlɔ mân dɩɛ nɩn anun. ²¹Ɛbɛlɛ, Kilisi y’ɔ sie nyanmɩansʋ mmɔfʋɛ mgbain nʋn nganngan’n-mɔ kʋalaatin ɔ. Bɛ́ mɔ bɛ di kpain o, tunminfʋɛ o, kʋalafʋɛ o, bɛ́ mɔ bɛ di belemgbin o, yɩ́ y’ɔ sie bɛ́ kʋalaa ɔ. Yɩ́ asasʋɛ’n tala asasʋɛ biala mɔ bɛ kʋala kɛ bɛ nyan yɩ́ mân ɛhɩ anun nʋn fʋfɔlɛ’n kʋsʋ mɔ Nyanmɩan ’ba bɔ nɩn anun dɩɛ’n. ²²Nyanmɩan Kpili a sie Kilisi kpain like biala asʋ. Ɔ’a fa yɩ́ a man Asɔnɩn’n. ²³Asɔnɩn’n tɩ kɛ yɩ́ nwʋnnaan yɛ̂ ɔ tɩ kɛ Asɔnɩn nɩn ati. Ɔ wɔ eyuadɩ’n lɩka kʋalaatin. Yɩ́ yɛ̂ ɔ yɩ Asɔnɩn’n kpa bɔkɔɔ ɔ.

Nyanmɩan anwunnvoe’n

¹Ɛhɩ, ɛmɔ ɛtɛ’n-mɔ ati, daba nɩn anun, Nyanmɩan nwun ɛmɔ kɛ menian mɔ b’a wu ɔ. Ɔ sanlɩn kɛ ɛmɔ fʋnndʋnlɩn yɩ́. ²Mɛlɛ sɔ nɩn anun, anɩn ɛmɔ ɛnanndɩɛ’n nʋn eyuadɩ dɩɛ’n tɩ kʋn kpɛ. Abɔnsanmʋn m’ɔ tɩ eyuadɩ nɩn asʋ kpain’n, yɩ́ yɛ̂ anɩn ɛmɔ sʋ yɩ́ ɔ. Kpain sɔ’n yɛ̂ ɔ lɛ di bɛ́ mɔ bɛ́ nyɩn ci Nyanmɩan nɩn anun junman tɛmʋn ɛhɩ mɔ yɛ wɔ nun nɩn ɔ. ³Daba nɩn anun, anɩn kɛ yɛ́ kʋalaa yɛ tɩ yɩ́ nɩn anɩn. Like mɔ ɛtɛ anwʋnnaan nɩn anyɩn bʋlʋ yɩ́ nwʋn’n yɛ̂ yɛ kpʋnndɛ ɔ. Like mɔ ɛtɛ anwʋnnaan’n nʋn yɛ́ ajʋnlɩn’n kulo kɛ yɛ yɔ́’n, like sɔ’n yɛ̂ yɛ yɔ ɔ. Ɛtɛ’n mɔ b’a wʋ yɛ́ nʋn nɩn ati, yɛ́ tɩ menian mɔ Nyanmɩan sikpɛ’n cɩ yɛ́ kɛ menian bʋ nga’n-mɔ. ⁴Nan Nyanmɩan Kpili a nwun yɛ́ nwʋn anwunnvoe. Ɔ sanlɩn kɛ ehulo’n m’ɔ kulo yɛ́’n tɩ kpili sʋnman. ⁵Yɛ́ mɔ yɛ́ ɛtɛ’n-mɔ man yɛ wuli’n, ɔ’a man yɛ́ nʋn Kilisi y’a nyan ngʋan. Sɛ ɛmɔ a nyan ngʋan an, ɔ kele kɛ Nyanmɩan a nwun ɛmɔ anwʋn anwunnvoe ɔ’a man ɛmɔ a nyan ngʋan. ⁶Kilisi Zozi dunman nun, Nyanmɩan a man yɛ́ nʋn Zozi fi ewue nun y’a tinnge, yɛ́ nʋn yɩ́ tɩ anwunno ɛlɔ mân nɩn anun. ⁷Nyanmɩan a yɔ yɩ́ sɔ, ɔ’a hele kɛ mɛlɛ’n m’ɔ lɛ ba nɩn anun, yɩ́ ye nɩn anwʋn ninnge mgbakpa’n mɔ ɔ’a fa ɔ’a sie yɛ́ mɔ y’a le Kilisi Zozi y’a li’n tɩ man nzɛmɩndɛ. ⁸Ɔ sanlɩn kɛ, sɛ ɛmɔ a nyan ngʋan an, ɔ kele kɛ Nyanmɩan a nwun ɛmɔ anwʋn anwunnvoe, ɔ fi ɛmɔ dedi nɩn anwʋn. Ngʋan sɔ’n mɔ ɛmɔ a nyan yɩ́’n, ɔ fi man ɛmɔ muonun. Nan ɔ tɩ Nyanmɩan acɛdɩɛ. ⁹Nán kɛ mɔndɩnlɩn mɔ ɛmɔ a bɔ nɩn anun like ɔ, nán sʋanlan a fa a tu yɩ́ nwʋn. ¹⁰Ɔ sanlɩn kɛ Nyanmɩan yɛ̂ ɔ’a sesie yɛ́ ɔ’a bɔ yɛ́ ɔ. Ɔ’a bɔ yɛ́ kɛ yɛ nʋn Ngʋandefʋɛ Zozi yɛ yɔ́ sʋanlan munmuan kʋn nán y’a hʋala y’a yɔ nyɔlɩɛ kpa. Nyɔlɩɛ sɔ’n-mɔ, Nyanmɩan Kpili lili mʋa sesielɩ manlɩn yɛ́ kɛ yɛ yɔ́.

Yɛ nʋn Kilisi a yɔ sʋanlan munmuan kʋn

¹¹Ɛhɩ, b’a nwʋ man ɛmɔ Zufʋ. Zufʋ’n-mɔ fɛlɛ ɛmɔ “bɛ́ mɔ bɛ kpɛlɩ man bɛ́ mmian nun”. Bɛ fɛlɛ bɛ́ nwʋn “bɛ́ mɔ b’a kpɛ bɛ́ mmian nun”, ɔ fi nzɔlɛ’n mɔ menian’n-mɔ a yɔ a sie yɩ́ bɛ́ nwʋnnaan nɩn asʋ’n. ¹²Ɛmɔ kácɩ kɛ mɛlɛ sɔ nɩn anun’n anɩn ɛmɔ nni man Kilisi afilie’n bie. Izalayɛ amma’n-mɔ anyunnun an, bɛ nga man ɛmɔ bie. Nyɩhyɛ’n mɔ Nyanmɩan nʋn Izalayɛ amma’n-mɔ hyɩhyɛlɩ’n, anɔhʋba’n m’ɔ bɔlɩ bɛ́’n, anɩn ɛmɔ nnʋn man nun bie. Ɛmɔ gua mân nɩn anun mgban, ɛmɔ le man anyɩndasʋɛ, ɛsɛ ɛmɔ nzɩ man Nyanmɩan. ¹³Nan sian dɩɛ, ɛmɔ nʋn Zozi Kilisi b’a yɔ sʋanlan munmuan kʋn. Ɛmɔ mɔ anɩn ɛmɔ nʋn Izalayɛ amma’n-mɔ afian tɩ’n, Ngʋandefʋɛ Zozi moja nɩn a hyʋɩn ɛmɔ ɔ’a mantan bɛ́. ¹⁴Ɔ sanlɩn kɛ Kilisi a man bɛ́ mɔ bɛ tɩ Zufʋ o, bɛ́ mɔ bɛ tɩ man Zufʋ o, yɛ́ kʋalaa y’a nyan anzʋnunjɔ, yɛ nʋn yɩ́ y’a yɔ sʋanlan munmuan kʋn. Anɩn Zufʋ’n-mɔ nʋn bɛ́ mɔ bɛ tɩ man Zufʋ’n bɛ kpɔ bɛ́ nwʋn. Ɛkpɔ sɔ’n tɩ kɛ talɛ m’ɔ ja menian afian. Kilisi a wu ɔ’a tu ɛkpɔ’n kɛ talɛ mɔ b’a bubu yɩ́ ɔ. Ɔ’a han Zufʋ’n-mɔ nʋn bɛ́ mɔ bɛ tɩ man Zufʋ’n ɔ’a bɔ nun, ɔ’a man b’a yɔ fatule kʋnmgba cein. ¹⁵Kilisi a wu ɔ’a kpɛ Zufʋ’n-mɔ mala’n nʋn sʋ ninnge’n-mɔ anun. Ɔ’a han Zufʋ’n-mɔ nʋn bɛ́ mɔ bɛ tɩ man Zufʋ’n ɔ’a bɔ nun. Ɔ’a man fatule nnyuan nɩn a yɔ fatule fʋfɔlɛ baa kʋnmgba cein. Fatule fʋfɔlɛ sɔ’n nʋn Kilisi a yɔ sʋanlan munmuan kʋn. Kɛ ɔ kpɩnlɩn yɔlɩ mɔ Kilisi a man y’a nyan anzʋnunjɔ nɩn anɩn. ¹⁶Ɛkpɔ’n m’ɔ la fatule nnyuan nɩn afian’n, Kilisi a wu kʋlʋwa nɩn asʋ ɔ’a nunnun yɩ́ bʋsʋ. Ewue’n m’ɔ wuli kʋlʋwa nɩn asʋ nɩn ati, ɔ’a han fatule nnyuan’n, ɔ’a bɔ nun, ɛsɛ ɔ’a sesie bɛ́ nʋn Nyanmɩan bɛ́ afian. ¹⁷Ɛhɩ, Kilisi a a, ɔ’a bɔ Ɛjɔlɛkpa’n m’ɔ man alʋacɩcɩɛ’n nɩn ɔ’a hele ɛmɔ mɔ bɛ tɩ man Zufʋ mɔ anɩn ɛmɔ nʋn Nyanmɩan bɛ́ afian tɩ’n. Ɛsɛ Zufʋ’n-mɔ mɔ bɛ mantan Nyanmɩan kʋkʋ’n, Kilisi a a, ɔ’a bɔ Ɛjɔlɛkpa’n m’ɔ man alʋacɩcɩɛ’n ɔ’a hele bɛ́ kʋsʋ. ¹⁸Sɛ Wawɛ Nwannzan-nwannzan’n man Zufʋ o, bɛ́ mɔ bɛ tɩ man Zufʋ o, yɛ́ kʋalaa yɛ kʋala kɛ yɛ fite Nyanmɩan anyunnun an, anɩn ɔ fi Kilisi.

¹⁹Ɛhɩka ati, ɛmɔ mɔ bɛ tɩ man Zufʋ’n, ɛmɔ tɩ man nyɔfʋɛ anaan menian mgban kʋ́n. Nan sian dɩɛ, ɛmɔ tɩ Nyanmɩan anwʋntɩɛ mma kpa bɔkɔɔ, ɛmɔ di yɩ́ afilie’n bie. ²⁰Ɛmɔ tɩ́ yɩ́ bʋ kpa. Asɔnɩn’n tɩ kɛ sua. Alimʋa nɩn anun, Nyanmɩan a sie Zozi Kilisi mmɔfʋɛ’n-mɔ nʋn yɩ́ mgbɔmanfʋɛ’n-mɔ kɛ sua nɩn awula bɛ́ bʋ. Ɛmɔ kʋsʋ wɔ yɩ́ sʋ ɛfʋla nɩn anun bie kɛ biliki. Alimʋa biliki’n mɔ bɛ́ mɔ bɛ lɛ si sua’n bɛ sie yɩ́ ayialɩɛ nɩn asʋ kʋalaaka nán b’a fʋla sua nɩn asʋ’n, biliki sɔ’n y’ɔ le Kilisi muonun. ²¹Yɩ́ y’ɔ man sua bɔndin’n yɔ kunngun ɔ. Ɛsɛ yɩ́ y’ɔ man sua’n kɔ anwunno ɔ kaci asɔnɩn sua nwannzan-nwannzan man yɛ́ Mɩn ɔ. ²²Ɛmɔ nʋn Kilisi, b’a yɔ sʋanlan munmuan kʋn. Ɛmɔ wɔ sua’n mɔ bɛ lɛ si nɩn anun bie kɛ biliki. Ɛmɔ nʋn bɛ́ bʋ nga’n-mɔ b’a kaci kɛ sua mɔ Nyanmɩan Wawɛ Nwannzan-nwannzan’n wɔ nun ɔ.

Pɔlʋ junman’n

¹Ɛhɩka ati, mɩn sɛlɛ Nyanmɩan mɩn man ɛmɔ. Ɛmɔ sɩ kɛ Zozi dunman nun, Ɛjɔlɛkpa’n mɔ m malɩ m mɔlɩ n gelelɩ ɛmɔ mɔ bɛ tɩ man Zufʋ nɩn ati, b’a hyɩ mɩ́n Pɔlʋ b’a tʋ mɩ́n fiadɩ. ²Junman’n mɔ Nyanmɩan Kpili ehulo nɩn anun ɔ’a fa ɔ’a wula mɩ́n sa nun kɛ n ní man ɛmɔ’n, mɩn de mɩn di kɛ ɛmɔ a tɩ junman sɔ nɩn angan. ³Junman sɔ’n, nvɩalɩɛ nun like yɛ̂ Nyanmɩan a yɩ ɔ’a hele mɩ́n ɔ. Mɩ́n sa ati kalata ɛhɩ anun, m’an li mʋa m’an han like sɔ nɩn anwʋn ɛjɔlɛ kaan m’an hele ɛmɔ dada angʋnmɩn. ⁴Sɛ ɛmɔ kɩnnga a, ɛmɔ ’ba nwun yɩ́ kɛ nvɩalɩɛ nun like sɔ’n tʋ de Kilisi. ⁵Nvɩalɩɛ nun like sɔ’n, daba Nyanmɩan a nyɩ man ɔ’a ngele man menian’n-mɔ. Nan sian dɩɛ, ɔ nanndɩ yɩ́ Wawɛ Nwannzan-nwannzan nɩn asʋ, ɔ’a yɩ ɔ’a hele yɩ́ mmɔfʋɛ nʋn yɩ́ mgbɔmanfʋɛ nwannzan-nwannzan’n-mɔ. ⁶Ɛ ’nwun nvɩalɩɛ nun like sɔ’n: bɛ́ mɔ bɛ tɩ man Zufʋ mɔ bɛ nʋn Kilisi a yɔ sʋanlan munmuan kʋn, ɔ fi Ɛjɔlɛkpa’n mɔ b’a le b’a li’n, bɛ di Nyanmɩan afilie’n bie kɛ Zufʋ’n-mɔ. Anɔhʋba’n mɔ Nyanmɩan bɔlɩ yɩ́ menian’n-mɔ nʋn sʋ nyila’n, ɛmɔ kʋsʋ wɔ nun bie.

⁷Ɛjɔlɛkpa sɔ’n, Nyanmɩan a nwun mɩ́n nwʋn anwunnvoe ɔ’a fa ɔ’a wula mɩ́n sa nun. Ɔ’a man m’an kaci sʋ akʋa kɛ m mɔ́ n géle menian’n-mɔ kʋalaatin wɔ yɩ́ tunmin nɩn anun. ⁸Nyanmɩan anwʋntɩɛ mma’n-mɔ anun, n dɩ man like fɩ́ɩ́. Nan kʋsʋ, ɔ’a man mɩ́n acɛdɩɛ kɛ m mɔ́ Ɛjɔlɛkpa’n n géle ɛmɔ mɔ bɛ tɩ man Zufʋ’n. Ɛjɔlɛkpa sɔ’n m’ɔ tʋ de Kilisi’n kele ninnge mgbakpa mɔ Kilisi le yɩ́ m’ɔ bʋ yɛ́ sʋ’n. ⁹Nyanmɩan Kpili mɔ ɔ’a bɔ like biala’n, ɔ’a man mɩ́n atɩn kɛ n yɩ́ yɩ́ nvɩalɩɛ nun ɛhyɩhyɛ’n m’ɔ fɩalɩ sʋ dede ɔ’a ju ɛnɛ’n n géle menian’n-mɔ kʋalaatin. ¹⁰Ɔ man sian dɩɛ, Asɔnɩn’n y’ɔ man nyanmɩansʋ mmɔfʋɛ’n-mɔ mɔ bɛ di kpain nʋn tunminfʋɛ’n nwun Nyanmɩan ngɛlɛ kpili’n m’ɔ sɩ nɩn ɔ. ¹¹Like’n m’ɔ jʋnlɩnlɩn yɩ́ nwʋn daba kɛ ɔ ’yɔ’n, ɔ nanndɩ yɛ́ Mɩn Zozi Kilisi sʋ, ɔ’a man ɔ’a kpɩn sʋ. ¹²Kɛmɔ yɛ de Kilisi yɛ di, ɛsɛ yɛ nʋn yɩ́ y’a yɔ sʋanlan munmuan kʋn’n, yɛ́ kunnun ndɩtɩ man yɛ́ kʋ́n. Yɛ le atɩn yɛ kʋala kɛ yɛ fite Nyanmɩan anyunnun ahʋnmɩnkan nun. ¹³Ɛjɔlɛkpa nɩn ati, sɛ mɩɩn nwun yalɛ ɛmɔ dunman nun an, nán bɛ man bɛ́ nwʋn bubu bɛ́. Nan ɔ tɩ ɛmɔ anunminnyanmʋn wɔ Nyanmɩan anyunnun.

Pɔlʋ ɛbʋtʋɛ’n

¹⁴Ɛhɩka ati, sɛ mɩn tʋ mɩ́n nyɩn mɩn nɩan junman kpili’n mɔ Nyanmɩan a li a man yɛ́ nɩn an, mɩn kʋtʋ mɩ́n ja ebue nɩn asʋ Sɩɛ nɩn anyunnun. ¹⁵Sɩɛ sɔ’n dunman’n la anwunno ɛlɔ nʋn asɩ ɛwa afilie kʋalaa asʋ. ¹⁶Mɩn sɛlɛ yɩ́ kɛ, ɔ nanndɩ yɩ́ anunminnyanmʋn kpili’n m’ɔ le yɩ́ nɩn asʋ, ɔ fá yɩ́ Wawɛ’n ɔ wúla ɛmɔ ɛkala nɩn anwʋnsɛlɛ kpa. ¹⁷Ɛsɛ, ɔ nanndɩ ɛmɔ dedi nɩn asʋ, ɔ mán Kilisi tánlan ɛmɔ ahʋnlɩn nɩn anun. Mɩn sɛlɛ yɩ́ kɛ ɔ mán ɛmɔ sɔ́ ndɩan bɛ tánlan Kilisi ehulo nɩn anun sɛlɛ kpa. ¹⁸Mɩn sɛlɛ Nyanmɩan kɛ ɔ mán ɛmɔ nʋn anwʋntɩɛ mma’n-mɔ kʋalaatin hʋ́ala bɛ tɩ́ yɩ́ bʋ kɛ ehulo’n mɔ Kilisi kulo yɛ́’n tɩ tɛtɛlɛ, ɔ tɩ tɩnndɩn, ɔ kɔ anwunno ɛsɛ ɔ tɩ kpʋnlʋn-mgbʋnlʋn kpa. Ɔ tɩ man like nzɛmɩndɛ. ¹⁹Nyanmɩan mán ɛmɔ nwún ehulo’n mɔ Kilisi kulo yɛ́’n. Ɔ tɩ ananhɔlɛ kɛ sʋanlan fɩ́ɩ́ ngʋala man kɛ ɔ nwun yɩ́ dede ɔ gua yɩ́ bʋ. Nan kʋsʋ, Nyanmɩan mán ɛmɔ nwún yɩ́ kpa bɔkɔɔ like biala anun, nán Nyanmɩan nyila’n kʋalaatin a han ɛmɔ. ²⁰Nyanmɩan Kpili m’ɔ le tunmin m’ɔ fa di junman wɔ yɛ́ nun’n, ɔ kʋala kɛ ɔ yɔ like biala m’ɔ tala mɔ yɛ kɔ sɛlɛ anaan mɔ yɛ kɔ jʋnlɩn nɩn asʋ. ²¹Yɩ́ m’ɔ kʋala like biala yɔ maan ɔ tala sʋ’n, anunminnyanmʋn hán yɩ́ wɔ Asɔnɩn nɩn anun wɔ Zozi Kilisi dunman nun cɩan daa! Amɩn.

Asɔnɩn junman’n

¹Ɛhɩ, mɩ́n mɔ yɛ́ Mɩn dunman nun b’a tʋ mɩ́n fiadɩ’n, mɩn ’sɛlɛ ɛmɔ mɩn bʋtʋ bɛ́: Kɛmɔ Nyanmɩan a fɛlɛ ɛmɔ yɩ́ nwʋn’n, ɛmɔ bɔ́ abalabɔ kpa m’ɔ sɔ yɩ́ nyɩn. ²Ɛmɔ bɛ́bɛlɛ bɛ́ nwʋn asɩ cɩan daa. Ɛmɔ nyán ahʋnlɩn bɛtɛɛ, ɛsɛ bɛ sí abʋtalɛ. Ɛmɔ fá ehulo bɛ sʋ́sɔ bɛ́ nwʋn nun. ³Kɛmɔ Wawɛ Nwannzan-nwannzan nɩn a hohuan ɛmɔ anʋan maan ɛmɔ a yɔ kʋn’n, ɛmɔ bɔ́ mɔndɩnlɩn bɛ tánlan anʋannzɛ sɔ nɩn anun wɔ anzʋnunjɔ nun. ⁴Asɔnɩn’n m’ɔ tɩ kɛ Kilisi anwʋnnaan’n tɩ baa kʋnmgba. Wawɛ Nwannzan-nwannzan’n kʋsʋ tɩ baa kʋnmgba. Anyɩndasʋɛ like’n kʋsʋ mɔ yɩ́ ti yɛ̂ Nyanmɩan a fɛlɛ ɛmɔ’n tɩ baa kʋnmgba. ⁵Yɛ́ Mɩn Zozi tɩ baa kʋnmgba. Dedi’n tɩ baa kʋnmgba. Ɛsɔnɩan’n tɩ baa kʋnmgba. ⁶Nyanmɩan m’ɔ tɩ yɛ́ kʋalaa yɛ́ Sɩ’n tɩ baa kʋnmgba. Ɔ sie yɛ́ kʋalaatin. Ɔ nanndɩ yɛ́ kʋalaa yɛ́ sʋ, ɔ di yɩ́ junman’n. Ɛsɛ ɔ wɔ yɛ́ kʋalaa yɛ́ nun. ⁷Nan kʋsʋ, Kilisi a nɩan yɩ́ acɛdɩɛ nɩn anwʋn ɔ’a hye ɔ’a man yɛ́ ngʋkʋn ngʋkʋn. Acɛdɩɛ sɔ’n tɩ tunmin mɔ bɛ fa bɛ di Asɔnɩn nɩn anun junman. ⁸Ɛhɩ ati, Ɛhɛlɛ Ɛjɔlɛ’n lɛ kan kɛ:

Ɔ’a li kunnunmun ɔ’a fʋ anwunno

ɔ nʋn nganga’n-mɔ a hɔ.

Ɛsɛ ɔ’a hye menian’n-mɔ acɛdɩɛ.

⁹Bɛ́ nwan: “Ɔ’a fʋ anwunno”. Yɩ́ bʋ y’ɔ le benin? Yɩ́ bʋ y’ɔ le kɛ ɔ lili mʋa ɔ juli asɩɛ nɩn asʋ ɛwa. ¹⁰Sʋanlan’n mɔ ɔ’a ju asɩɛ nɩn asʋ ɛwa’n, yɩ́ kʋnmgba’n yɛ̂ ɔ’a sa ɔ’a fʋ anwunno ɛlɔ nyanmɩansʋ nɩn ɔ. Ɔ wɔ like biala ati asʋ, ɛsɛ ɔ wɔ eyuadɩ’n lɩka kʋalaatin. ¹¹Yɩ́ yɛ̂ ɔ’a hye acɛdɩɛ nɩn ɔ. Ɔ’a sesie menian’n mmie-mɔ kɛ yɩ́ mmɔfʋɛ, mmie-mɔ kɛ yɩ́ mgbɔmanfʋɛ, mmie-mɔ kɛ Ɛjɔlɛkpabɔfʋɛ yɛ̂ mmie-mɔ kʋsʋ kɛ ɛsɔfʋ mɔ bɛ kele like. ¹²Ɔ’a sesie bɛ́ kʋalaa sɔ maan Nyanmɩan anwʋntɩɛ mma’n-mɔ kʋala bɛ di yɩ́ junman’n bɛ man Asɔnɩn’n m’ɔ tɩ Kilisi anwʋnnaan’n kɔ yɩ́ nyunnun. ¹³Yɩ́ dɩɛ, anɩn yɛ́ kʋalaa yɛ́ dedi’n yɔ kʋn yɛ sɩ Nyanmɩan Awa’n. Ɛbɛlɛ nɩn anun, anɩn yɛ́ ti a tin, y’a kaci kɛ Kilisi bɔbɔ muonun kpa bɔkɔɔ. ¹⁴Yɩ́ sɔ ɛhɩ anun, anɩn yɛ ngaci man kɛ mmatʋnman kʋ́n, nán atofʋɛ’n-mɔ a nnaka man yɛ́, b’a mmɔ man yɛ́ tanngo tanngo kɛ asutue mgbaha bɔ ɛlɛɛ tanngo tanngo’n. ¹⁵Nan sɛ yɛ le ehulo yɛ kan ananhɔlɛ, yɛ yɔ ananhɔlɛ like a, yɛ ’nyin yɛ tʋ Kilisi m’ɔ li yɛ́ ti’n wɔ like biala anun. ¹⁶Sɛ anwʋnnaan nɩn akpɔlɛ akpɔlɛ’n kʋalaa a hohuan bɛ́ nʋan b’a yɔ kunngun kpa a, ɔ fi Kilisi. Yɩ́ yɛ̂ ɔ man anwʋnnaan bɔndɩn nɩn akpɔlɛ akpɔlɛ’n kʋalaa sisa sʋ ɔ yɔ munmuan kʋn ɔ. Yɩ́ sɔ ati, sɛ akpɔlɛ’n kʋn biala yɔ like m’ɔ sɛ fata nɩn an, anwʋnnaan bɔndɩn’n nyin ɛsɛ ɔ kpasi ehulo nɩn anun.

Abalabɔ ɛtɛ’n nʋn abalabɔ kpa’n

¹⁷Ɛhɩ, yɛ́ Mɩn dunman nun, ɛ ’nwun ɛjɔlɛ mɔ mɩɩn kan mɩn fua sʋ mɩn kele ɛmɔ’n. Nán man ɛmɔ bu bɛ́ mân’n kɛ bɛ́ mɔ bɛ nzɩ man Kilisi’n. Ɔ sanlɩn kɛ ajʋnlɩn mgban-mgban y’ɔ wɔ bɛ́ ti anun ɔ. ¹⁸Bɛ nzɩ man ngɛlɛ fɩ́ɩ́. Ngʋan’n mɔ Nyanmɩan fa ce’n, bɛ nnyan man bie. Ɔ sanlɩn kɛ bɛ nzɩ man yɩ́ nwʋn ɛjɔlɛ fɩ́ɩ́ bɔbɔ. Ɛsɛ bɛ́ ahʋnlɩn nɩn a kete sʋnman. ¹⁹Bɛ nzɩ man nyian. B’a fa bɛ́ nwʋn b’a wula satɩlɩfʋɛ nyɔlɩɛ’n-mɔ anun yɛ̂ ɛtɛ ngacile ngacile’n kʋalaa gua bɛ́ nwʋn efian.

²⁰Nan ɛmɔ dɩɛ, nán ɛhɩ yɛ̂ ɛmɔ suanlɩn wɔ Kilisi anwʋn ɔ. ²¹Ɛmɔ a tɩ Zozi anwʋn ɛjɔlɛ’n kʋalaatin. Ananhɔlɛ’n m’ɔ tʋ de Zozi’n, ɛmɔ mɔ bɛ tɩ yɩ́ menian’n, b’a han b’a hele ɛmɔ. ²²Mɔ b’a hele ɛmɔ’n y’ɔ le kɛ ɛmɔ yáci bɛ́ asɩtanlan daba’n bɛ tʋ́. Asɩtanlan daba sɔ’n, anyɩnbʋlʋ ɛtɛ m’ɔ wɔ nun’n, ɔ man ewue. ²³Ɛmɔ mán Nyanmɩan Wawɛ’n káci ɛmɔ ahʋnlɩn’n nʋn bɛ́ ajʋnlɩn’n kpa bɔkɔɔ. ²⁴Ɛmɔ bɔ́ abalabɔ kpa m’ɔ kele kɛ ɛmɔ tɩ menian nvʋfɔlɛ mɔ Nyanmɩan muonun a bɔ ɔ. Abalabɔ kpa sɔ’n, ɔ di kɛ bɛ nwun yɩ́ asɩtanlan sɛsɛ nʋn anwʋntɩɛ nun, m’ɔ kele kɛ ɛmɔ tɩ ananhɔlɛ nɩn anun sakpa.

²⁵Ɛhɩ ati, ɛmɔ yáci ato elie’n. Sʋanlan kʋn biala hán ananhɔlɛ héle yɩ́ manngʋn. Ɔ sanlɩn kɛ yɛ tɩ anwʋnnaan baa kʋnmgba nɩn anun akpɔlɛ akpɔlɛ. ²⁶Sɛ ɛmɔ fɛ ɛya a, ɛmɔ nɩ́an bɛ́ nwʋn kpa nán ɛmɔ a ndɔ man ɛtɛ nɩn anun. Nán bɛ fɛ ɛya dede maan alɩ́ɛ san sʋ. ²⁷Nán bɛ man Abɔnsanmʋn nyan ɛmɔ anwʋn atɩn fɩ́ɩ́. ²⁸Sʋanlan m’ɔ wua’n, ɔ yáci yɩ́ awue’n. Ɔ bɔ́ mɔndɩnlɩn, ɔ lí junman. Ɔ nyán yɩ́ nʋan nun alɩɛ nán ɔ’a nyan bie ɔ’a bʋka sʋanlan m’ɔ wɔ emian nun’n. ²⁹Nán bɛ man ɛjɔlɛ ɛtɛ fɩ́ɩ́ fi bɛ́ nʋan fite. Nan bɛ mán ɛjɔlɛ m’ɔ tɩ kpa fi bɛ́ nʋan fíte. Ɛjɔlɛ m’ɔ man sʋanlan dedi’n kɔ yɩ́ nyunnun, ɔ bʋka bɛ́ mɔ bɛ lɛ tie’n yɛ̂ ɔ tɩ kpa ɔ. ³⁰Nán bɛ bɔ Wawɛ Nwannzan-nwannzan alʋa. Ɔ wɔ ɛmɔ anun maan ɛmɔ nwun yɩ́ kɛ ɛmɔ tɩ Nyanmɩan dɩɛ dede ɔ kɔ ju cɩan mɔ Nyanmɩan ’de ɛmɔ ati kpa bɔkɔɔ’n. ³¹Ɛmɔ yáci akunnun bile ɛyɔlɛ’n nʋn ɛya ɛfɛ’n, nʋn menian’n-mɔ ɛya ɛhan’n nʋn ɛtɛtɩan’n, ɔ nʋn nzʋba ɛkpɛ’n. Ɛmɔ yáci ati anun ɛtɛ ninnge’n kʋalaa bɛ gúa. ³²Nan ɛmɔ yɔ́ ati anun kpa menian, bɛ húlo bɛ́ nwʋn. Ɛmɔ fá bɛ́ nwʋn ɛtɛ’n-mɔ bɛ hyé bɛ́ nwʋn kɛ Nyanmɩan falɩ ɛmɔ dɩɛ’n hyelɩ ɛmɔ wɔ Kilisi dunman nun’n.

Yuein nɩn anun menian

¹Ɛhɩka ati, kɛmɔ ɛmɔ tɩ Nyanmɩan ehulo mma’n, ɛmɔ bɔ́ mɔndɩnlɩn bɛ yɔ́ bɛ́ ninnge’n-mɔ kɛ yɩ́. ²Ɛmɔ mán bɛ́ asɩtanlan’n héle kɛ ɛmɔ kulo Nyanmɩan nʋn bɛ́ manngʋn-mɔ kɛ Kilisi a hulo yɛ́ dede ɔ’a wu yɛ́ dunman nun’n. Ewue’n mɔ Kilisi a wu yɛ́ dunman nun’n tɩ kɛ afɔlɩɛ nʋn tɛɛ ɛyɩɛ like m’ɔ tu ɛtɛ’n. Like sɔ’n ban fanlan kɛ anatɩlɩ, ɔ sɔ Nyanmɩan anyɩn.

³Ɛmɔ tɩ Nyanmɩan anwʋntɩɛ mma, yɩ́ ti, nán man bɛ tɩ satɩlɩfʋɛ nyɔlɩɛ fɩ́ɩ́, anaan basa-basa ɛyɔlɛ ɔ nʋn anyɩnbʋlʋ bɔbɔ ɛmɔ afian ɛlɔ. ⁴Kʋasɩanzɛmʋn, agʋlʋbɛnwʋn, ɔ nʋn ɛjɔlɛ ɛtɛ, nán bɛ man bie fɩ́ɩ́ fi bɛ́ nʋan fite. Nan like m’ɔ di kɛ ɛmɔ yɔ’n, y’ɔ le Nyanmɩan asɩna. ⁵Afɩ, ɛmɔ nwún yɩ́ yuein kɛ sʋanlan biala m’ɔ yɔ satɩlɩfʋɛ nyɔlɩɛ, m’ɔ tɩ basa-basa, m’ɔ tɩ acɛbɛ (afɩ, acɛbɛ ɛyɔlɛ’n tɩ kɛ amʋan ɛsɔ), bɛ́ mɔ bɛ yɔ sɔ’n, bie fɩ́ɩ́ ngɔ man Kilisi nʋn Nyanmɩan Belemgbin Mân nɩn anun ɛlɔ lé. ⁶Nán bɛ man sʋanlan fɩ́ɩ́ kan mgban-mgban ɛjɔlɛ ɔ laka ɛmɔ. Mgban-mgban ɛjɔlɛ sɔ’n-mɔ ati yɛ̂ Nyanmɩan sikpɛ’n ’cɩ bɛ́ mɔ bɛ nyɩn nzɔ man yɩ́ nɩn ɔ. ⁷Menian sɔ’n-mɔ, nán bɛ nʋn bɛ́ tu nun fɩ́ɩ́.

⁸Daba anɩn ɛmɔ wɔ awosin nɩn anun. Nan sian dɩɛ mɔ ɛmɔ nʋn yɛ́ Mɩn a yɔ sʋanlan munmuan kʋn’n, ɛmɔ wɔ yuein nɩn anun. Ɛhɩka ati, ɛmɔ nánndɩ kɛ yuein nun menian. ⁹Ɔ sanlɩn kɛ sʋanlan m’ɔ nanndɩ yuein nɩn anun’n, ɔ bɔ bala kpa, ɔ tɩ sɛsɛ, ɛsɛ ɔ kan ananhɔlɛ. ¹⁰Ɛmɔ bɔ́ mɔndɩnlɩn bɛ nwún like m’ɔ sɔ Yɛ́ Mɩn anyɩn nɩn angʋnmɩn. ¹¹Mgban-mgban ninnge’n-mɔ mɔ menian’n-mɔ yɔ yɩ́ awosin nɩn anun’n, nán bɛ fa bɛ́ nwʋn bɛ bɔ bɛ́ bɛ yɔ bie. Nan sɛ ɛmɔ nwun yɩ́ a, ɛmɔ héle kɛ ɔ tɩ ɛtɛ. ¹²Menian sɔ’n-mɔ nyɔlɩɛ’n mɔ bɛ yɔ yɩ́ nvɩalɩɛ nun’n, sɛ bɛ kan an, ɔ tɩ nyian. ¹³Nan mɔ bɛ kɔ tu nyɔlɩɛ sɔ’n-mɔ kʋalaa bɛ kɔ gua yuein nɩn anun’n, kɛ bɛ kpɩn bɛ tɩ yɩ́’n, anɩn b’a nwun yɩ́ yuein. ¹⁴Afɩ like biala mɔ bɛ nwun yɩ́ yuein’n, anɩn ɔ wɔ yuein nun. Yɩ́ sɔ ati yɛ̂ b’a han kɛ:

Wɔ́ mɔ ɛ lɛ dafɩ’n, tinnge,

Nyanmɩan anyunnun an, ɔ tɩ kɛ a wu.

Yɩ́ ti, fi ewue nun jasʋ

nán Kilisi ’ba man ɛ fite yɩ́ yuein nɩn anun.

¹⁵Ɛhɩ ati, ɛmɔ nɩ́an bɛ́ ɛnanndɩɛ nɩn asʋ kpa. Nán bɛ nanndɩ kɛ menian mɔ bɛ nzɩ man ɛjɔlɛ fɩ́ɩ́ ɔ. Nan ɛmɔ nánndɩ kɛ mmɛngɛlɛfʋɛ. ¹⁶Kɛmɔ mɛlɛ’n mɔ yɛ wɔ nun’n yɔ sɩ’n, tɛmʋn kaan mɔ ɛmɔ kɔ nyan yɩ́’n, ɛmɔ fá lí Nyanmɩan junman’n kpa. ¹⁷Ɛhɩ ati, nán bɛ yɔ kɛ ngʋasɩafʋɛ’n-mɔ. Nan ɛmɔ bɔ́ mɔndɩnlɩn bɛ tɩ́ like mɔ Nyanmɩan kulo kɛ ɛmɔ yɔ nɩn abʋ kpa. ¹⁸Nán bɛ nʋn nzan bɛ bʋ. Ɔ man sʋanlan yɔ ninnge basa-basa. Nan ɛmɔ mán Nyanmɩan Wawɛ’n tánlan ɛmɔ nun kpa. ¹⁹Ɛmɔ tʋ́ Izalayɛ ayɛ ɛyɩɛ ejue ɔ nʋn asɔnɩn ejue bɛ wówula bɛ́ nwʋn anwʋnsɛlɛ. Ɛmɔ fá bɛ́ ahʋnlɩn’n kʋalaatin bɛ tʋ́ ejue bɛ yɩ́ Yɛ́ Mɩn ayɛ. ²⁰Yɛ́ Mɩn Zozi Kilisi dunman nun, ɛmɔ lá Sɩɛ nɩn asɩ dahuu wɔ like biala anun.

²¹Anyɩnnzɔ’n mɔ ɛmɔ man Kilisi nɩn ati, ɛmɔ bɛ́bɛlɛ bɛ́ nwʋn asɩ bɛ́ manngʋn’n-mɔ anyunnun.

Yɩɛ nʋn huan

²²Ɛhɩ, ɛmɔ mmalasua’n-mɔ, ɛmɔ bɛ́bɛlɛ bɛ́ nwʋn asɩ bɛ́ hun-mɔ anyunnun kɛ ɛmɔ bɛbɛlɛ bɛ́ nwʋn asɩ Yɛ́ Mɩn anyunnun’n. ²³Afɩ, belenzua sie yɩ́ yɩ kɛ Kilisi kʋsʋ sie Asɔnɩn’n. Asɔnɩn’n m’ɔ tɩ Kilisi anwʋnnaan’n, Kilisi y’ɔ tɩ yɩ́ Ngʋandefʋɛ nɩn ɔ. ²⁴Yɩ́ sɔ ati, ɛmɔ mmalasua’n-mɔ, ɛmɔ bɛ́bɛlɛ bɛ́ nwʋn asɩ like biala anun bɛ́ hun-mɔ anyunnun kɛ Asɔnɩn’n yɔ yɩ́ Kilisi anyunnun’n.

²⁵Ɛmɔ mmelenzua’n-mɔ kʋsʋ, ɛmɔ húlo bɛ́ yɩ-mɔ kɛ Kilisi hulolɩ Asɔnɩn’n dede ɔ wuli yɩ́ dunman nun’n. ²⁶Ɔ’a yɔ yɩ́ sɔ ɔ’a fa yɩ́ nʋan ɛjɔlɛ’n nʋn nzue ɔ’a bia Asɔnɩn’n, ɔ’a man yɩ́ nwʋn a tɩ ɔ’a fata Nyanmɩan. ²⁷Afɩ, Kilisi kulo kɛ Asɔnɩn’n fite yɩ́ muonun yɩ́ nyunnun anunminnyanmʋn nun, mɔ efian fɩ́ɩ́ nʋn like ɛtɛ fɩ́ɩ́ nnʋn man yɩ́ nwʋn. Yɩ́ nwʋn a tɩ, bɛ nnyan man yɩ́ nwʋn ɛjɔlɛ ɛtɛ fɩ́ɩ́ bɛ ngan man. ²⁸Kɛ Kilisi kpɩn kulo Asɔnɩn’n, mmelenzua’n-mɔ kʋsʋ húlo bɛ́ yɩ-mɔ kɛ bɛ́ muonun bɛ kulo bɛ́ nwʋn’n. Sʋanlan m’ɔ kulo yɩ́ yɩ’n kulo yɩ́ muonun yɩ́ nwʋn. ²⁹Afɩ, sʋanlan fɩ́ɩ́ kpɔlɩ man yɩ́ sʋanlan baka’n lé. Nan ɔ di alɩɛ ɛsɛ ɔ nɩan yɩ́ nwʋn kɛ Kilisi nɩan Asɔnɩn nɩn asʋ’n. ³⁰Asɔnɩn’n m’ɔ tɩ Kilisi anwʋnnaan’n, yɩ́ akpɔlɛ akpɔlɛ’n y’ɔ le yɛ́. ³¹Ɛhɛlɛ Ɛjɔlɛ’n nwan: Ɛhɩka ati, belenzua’n fi yɩ́ sɩ nʋn yɩ́ nin abʋ anwʋn ’ba jasʋ. Ɔ ’fa yɩ́ nwʋn bɔ yɩ́ yɩ nán bɛ́ munnyuan’n bɛ yɔ sʋanlan munmuan kʋn.³²Ajaa nɩn anwʋn ɛjɔlɛ sɔ’n, mɩn nɩan an, anɩn ɔ tʋ de Kilisi nʋn yɩ́ Asɔnɩn’n. Ɛjɔlɛ sɔ’n tɩ nvɩalɩɛ nun ɛjɔlɛ kpili kpa. ³³Ɛjɔlɛ’n kʋalaa kʋalaa’n y’ɔ le kɛ belenzua biala húlo yɩ́ yɩ kɛ yɩ́ muonun ɔ kulo yɩ́ nwʋn’n. Balasua biala kʋsʋ mán yɩ́ hun anyɩnnzɔ.

Mmatʋnman’n-mɔ nʋn bɛ́ sɩ nʋn bɛ́ nin

¹Ɛmɔ mmatʋnman’n-mɔ, kɛmɔ ɛmɔ nʋn yɛ́ Mɩn a yɔ sʋanlan munmuan kʋn’n, ɛmɔ mán bɛ́ nyɩn sɔ́ bɛ́ sɩ nʋn bɛ́ nin. Ɔ sanlɩn kɛ yɩ́ sɔ tɩ kpa. ²Nyanmɩan mala’n lɛ kele kɛ: “Man wɔ́ nyɩn sɔ́ wɔ́ sɩ nʋn wɔ́ nin.” Ɔ tɩ alimʋa mala mɔ b’a bɔ anɔhʋba b’a tʋ sʋ kɛ: ³“Nán wɔ́ asɩtanlan nɩn a yɔ kpa ɛsɛ a hyɛ asɩɛ nɩn asʋ.”

⁴Ɛmɔ mɔ ɛmɔ tɩ sɩɛ’n kʋsʋ, nán man ɛmɔ kan ɛmɔ mma’n-mɔ ɛya. Nan ɛmɔ tá bɛ́ bɛ héle bɛ́ ngɛlɛ, ɛsɛ ɛmɔ tɩ́nngɛ bɛ́ wɔ yɛ́ Mɩn atɩn dɩɛ nɩn asʋ.

Nganga’n-mɔ nʋn bɛ́ mɩn-mɔ

⁵Ɛmɔ mɔ ɛmɔ tɩ nganga’n, ɛmɔ mán bɛ́ nyɩn sɔ́ bɛ́ mɩn-mɔ mɔ bɛ wɔ asɩɛ nɩn asʋ ɛwa’n kpa. Ɛmɔ yɩ́ bɛ kunnun bɛ sʋ́ bɛ́ kɛ Kilisi yɛ̂ ɛmɔ lɛ sʋ yɩ́ ɔ. ⁶Ɛmɔ amɩn’n-mɔ anyunnun, nán man ɛmɔ yɔ kɛ menian mɔ bɛ lɛ di junman bɛ kpʋnndɛ ɛfʋa, kʋsʋ bɛ kaci bɛ́ nzin an, anɩn ɛmɔ a bubu bɛ́ sa nʋn bɛ́ ja b’a tanlan sʋ. Nan ɛmɔ yɩ́ bɛ́ kunnun bɛ yɔ́ like mɔ Nyanmɩan kulo kɛ Kilisi ngʋa’n-mɔ yɔ’n. ⁷Ɛmɔ fá ahʋnlɩn kpa bɛ lí kanga junman’n kanlanman. Ɔ tɩ kɛ yɛ́ Mɩn yɛ̂ ɛmɔ lɛ di man yɩ́, nan nán kulo menian’n-mɔ ala yɛ̂ ɛmɔ lɛ di man bɛ́ ɔ. ⁸Ɛmɔ kácɩ kɛ sʋanlan biala, sɛ ɔ tɩ kanga o, sɛ ɔ tɩ man kanga o, yɩ́ junman kpa m’ɔ kɔ li’n, ɔ ’nyan yɩ́ nwʋn ahatua m’ɔ fata’n yɛ́ Mɩn asa nun.

⁹Ɛmɔ mɩnlɩan’n-mɔ kʋsʋ mɔ bɛ le nganga’n, ɛmɔ yɔ́ bɛ́ kpa. Nán bɛ kele bɛ́ ahʋlʋwʋa. Ɛmɔ kácɩ kɛ ɛmɔ muonun kʋsʋ tɩ Kilisi ngʋa. Ɛmɔ nʋn bɛ́, ɛmɔ Amɩn’n tɩ kʋn. Ɔ tɩ anwunno. Yɩ́ dɩɛ, ɔ nnɩan man sʋanlan nyunnun ɔ mmu man yɩ́ bɩ.

Nyanmɩan ɛlɔɛ nɩn anwʋn ninnge’n-mɔ

¹⁰Mɩ́n kalata nɩn agualɩɛ nun, mɩɩn kan mɩn kele ɛmɔ kɛ ɛmɔ kpʋ́nndɛ anwʋnsɛlɛ’n sʋanlan munmuan kʋn’n mɔ ɛmɔ nʋn yɛ́ Mɩn b’a yɔ’n, ɔ nʋn yɩ́ tunmin kpili nɩn anun. ¹¹Ɛmɔ fá Nyanmɩan ɛlɔɛ ninnge’n-mɔ kʋalaa bɛ síe bɛ́ nwʋn. Ɛmɔ fá síe bɛ́ nwʋn nán ɛmɔ a hʋala bɛ́ ja nun jinlan wɔ Abɔnsanmʋn naka junman’n m’ɔ di nɩn anyunnun. ¹²Ɔ sanlɩn kɛ nán kulo menian’n-mɔ yɛ̂ yɛ nʋn bɛ́ le ɛlɔɛ ɔ. Nan anwunno ɛlɔ mmɔfʋɛ ati anun ɛtɛ’n-mɔ, bɛ́ mɔ bɛ di kpain, tunminfʋɛ nʋn bɛ́ mɔ bɛ sie awosin mân’n mɔ bɛ tɩ yɛ́ mgbɔfʋɛ’n yɛ̂ yɛ nʋn bɛ́ le ɛlɔɛ ɔ. ¹³Ɛhɩka ati, ɛmɔ fá Nyanmɩan ɛlɔɛ ninnge’n-mɔ kʋalaa bɛ síe bɛ́ nwʋn! Yɩ́ dɩɛ, cɩan mɔ kpɔfʋɛ’n kɔ han ɛmɔ’n, ɛmɔ ’kʋala yɩ́ nyunnun jinlan bɛ nʋn yɩ́ kʋn dede bɛ di yɩ́ sʋ kunnunmun, anɩn ɛmɔ tɛ jin bɛ́ ja nun kpunndiin. ¹⁴Yɩ́ ti, ɛmɔ bɔ́bʋa bɛ́ nwʋn kpa bɛ síe. Ɛmɔ mán ananhɔlɛ’n tánlan ɛmɔ anun. Ananhɔlɛ’n tɩ kɛ nzalafʋ’n bɛlɛtɩ’n m’ɔ hyɩ yɩ́ taladɩɛ nɩn asʋ’n. Sɛsɛ ɛyɔlɛ’n mɔ Kilisi a man ɛmɔ a yɔ wɔ Nyanmɩan anyunnun’n, ɔ káci kɛ ɛmɔ ɛlɔɛ taladɩɛ. Taladɩɛ sɔ’n tɩ bulalɛ. Bɛ wula bɛ sisa bɛ́ hue’n. ¹⁵Ɛmɔ mán bɛ́ nwʋn tɛ bɛ́ bɛ bɔ́ Ɛjɔlɛkpa’n m’ɔ man alʋacɩcɩɛ’n. Ɔ tɩ kɛ ɛlɔɛ mgbabʋa mɔ nzalafʋ’n wula ɔ. ¹⁶Ɛmɔ tíla dedi nɩn anun bɛ sísa bɛ́ nwʋn. Ɔ tɩ kɛ ɛlɔɛ nɩn anun ɛbʋɩn tɛtɛlɛ’n mɔ nzalafʋ’n tila ɔ sisa yɩ́ sʋanlan baka’n, nán taa nʋn acɔ nʋn dadɩɛ’n-mɔ a ngan man yɩ́. Sɛ ɛmɔ yɔ yɩ́ sɔ a, ɛmɔ ’ba hʋala Abɔnsanmʋn taa’n-mɔ kʋalaa mɔ b’a sɔ gʋgɔhɩn’n nonuan. ¹⁷Ngʋan’n mɔ Ngʋandefʋɛ Zozi a man ɛmɔ’n, ɔ tɩ kɛ nzalafʋ’n bulalɛ kele’n m’ɔ sʋ’n. Ɛmɔ fá Nyanmɩan Anʋan Ɛjɔlɛ’n mɔ Wawɛ Nwannzan-nwannzan’n fa man ɛmɔ’n bɛ lí junman kɛ nzalafʋ’n fa yɩ́ dadɩɛ’n di’n. ¹⁸Mɛlɛ biala anun, ɛmɔ tánlan Nyanmɩan Wawɛ nɩn anun bɛ sɛ́lɛ Nyanmɩan. Ɛmɔ mán bɛ́ nyɩn kpála bɛ tánlan mmʋtʋɛ nɩn anun cɩnnjɩn kpa. Ɛmɔ sɛ́lɛ Nyanmɩan bɛ mán yɩ́ anwʋntɩɛ mma’n-mɔ kʋalaatin.

¹⁹Ɛmɔ sɛ́lɛ Nyanmɩan bɛ mán mɩ́n kʋsʋ maan ɔ fá ɛjɔlɛ m’ɔ di mɔ mɩn kan nɩn ala ɔ wúla mɩ́n nʋan. Ɔ mán n nyán anwʋnsɛlɛ m mɔ́ nvɩalɩɛ Ɛjɔlɛkpa’n n géle menian’n-mɔ. ²⁰Ɛjɔlɛkpa sɔ’n mɔ n dɩ sʋ bɔfʋɛ, mɔ yɩ́ ti yɛ̂ b’a bɔ mɩ́n kpaun’n, ɛjɔlɛ mɔ Nyanmɩan kulo kɛ mɩn kan’n, ɔ mán n nyán anwʋnsɛlɛ n gán.

Ngalɩɛ nʋn nyila

²¹Tisiki m’ɔ tɩ yɛ́ ehulo anianman’n, ɔ sʋ Kilisi ananhɔlɛ nun ɔ bʋka mɩ́n yɛ di yɛ́ Mɩn junman’n. Ɔ ’ba bɔ kʋalaa kʋalaa’n ɔ kele ɛmɔ, nán ɛmɔ a nwun ɛjɔlɛ mɔ ɔ’a tʋ mɩ́n’n. ²²Ɛhɩka ati, mɩɩn sʋan anianman sɔ’n ɛmɔ anwʋn ɛlɔ maan ɔ kan kele ɛmɔ kɛ yɛ tɩ akpɔlɛ, nán ɛmɔ ahʋnlɩn a tɔ bɛ́ kunnun b’a nyan anwʋnsɛlɛ.

²³Sɩɛ Nyanmɩan Kpili nʋn yɛ́ Mɩn Zozi Kilisi cɩ́cɩ anianman’n-mɔ kʋalaa alʋa, bɛ mán bɛ nyán ehulo, ɔ nʋn dedi. ²⁴Bɛ́ kʋalaa mɔ bɛ le ehulo m’ɔ le man ayuelɩɛ bɛ kulo yɛ́ Mɩn Zozi Kilisi’n, Nyanmɩan nwún bɛ́ nwʋn anwunnvoe.