2 TIMOTE

PƆLƱ KALATA’N

M’Ɔ TIAN YƖ NNYUAN

M’Ɔ HƐLƐLƖ NWANLƖN

TIMOTE’N

M’ɔ wɔ nun’n

Mɔ anɩn Pɔlʋ la fiadɩ ɔ lɛ nwun yalɛ *Lɔmʋn ɛlɔ’n, y’ɔ hɛlɛlɩ kalata ɛhɩ ɔ (yɩ́ ti 1.8,16-17, 2.9). Ɔ hɛlɛlɩ nwanlɩn Timote. Mɛlɛ sɔ’n, anɩn Timote wɔ Efɛzɩ kulo nɩn asʋ ɛbɛlɛ. Pɔlʋ nwan Timote asa kan kalata nɩn an, n’ɔ de sie nan ɔ tʋ yɩ́ Lɔmʋn ɛlɔ (4.9). Afɩ, ɔ de di kɛ yɩ́ ewue cɩan nɩn a kpunnge (4.6). Pɔlʋ a li junman kpa ɔ’a man yɛ́ Mɩn Zozi Kilisi, yɩ́ ti, ɔ lɛ wowula Timote anwʋnsɛlɛ kɛ ɔ nɩ́an yɩ́ muonun yɩ́ Pɔlʋ dɩɛ nɩn asʋ nán ɔ lí bie.

Kalata nɩn ati 1.3-2.13, Pɔlʋ lɛ kan kele Timote kɛ ɔ tíla yɩ́ dedi nɩn anun kpa wɔ yalɛ’n mɔ bɛ́ mɔ bɛ bɔ Zozi Ɛjɔlɛkpa’n nwun yɩ́ nɩn anwʋn. Kalata nɩn ati 2.14-4.5, Pɔlʋ lɛ kan kele yɩ́ kɛ ɔ jínlan ngehele’n m’ɔ nʋn Ɛhɛlɛ Ɛjɔlɛ Nwannzan-nwannzan’n kɔ sʋ nɩn anun kpa. Kɛ Pɔlʋ yɔlɩ yɩ yɩ́ alimʋa kalata nɩn anun’n, ɔ lɛ kannzʋ Timote kɛ ɔ nɩ́an yɩ́ nwʋn wɔ ato ngehelefʋɛ’n-mɔ anwʋn. Kalata nɩn agualɩɛ nun, Pɔlʋ lɛ bɔ yɩ́ asɩtanlan nɩn anun amannɩɛ, ɔ lɛ man Timote ngalɩɛ.

Ahɩn ebisa

¹Timote,

Mɩ́n Pɔlʋ mɔ n dɩ Kilisi Zozi bɔfʋɛ’n kʋn, mɩ́n yɛ̂ mɩɩn kɛlɛ kalata ɛhɩ mɩn nwan wɔ́ ɔ. Nyanmɩan a hulo, ɔ’a yɩ mɩ́n kɛ m mɔ́ nyanmɩansʋ ngʋan m’ɔ le man ayuelɩɛ nɩn anwʋn kpayɛ. Ngʋan sɔ’n, Nyanmɩan falɩ bɔlɩ anɔhʋba daba. Sian dɩɛ, y’a nyan yɩ́ wɔ kʋn ɛyɔlɛ’n mɔ yɛ nʋn Zozi Kilisi y’a yɔ nɩn anun. ²Mɩ́n wa mɔ mɩn kulo wɔ́ kpa, mɩn ’bisa wɔ́ ahɩn mɩn yɔ wɔ́ ɛcɩan’n mo.

Mɔndɩnlɩn nɩn anwʋn afʋtu’n

³Nyanmɩan Kpili mɔ n ne ajʋnlɩn kpa mɩn sʋ yɩ́ kɛ yɛ nannan-mɔ sʋlɩ yɩ́’n, mɩn ’da yɩ́ asɩ. Mɩn ’da yɩ́ asɩ kɛ kɔngɔɛ nʋn eyua, sɛ mɩn ’yɔ asɔnɩn an, mɩ́n tɩ kacɩ wɔ́. ⁴Mɩn kacɩ wɔ́ nyɩn ɛmʋɩn nɩn an, anɩn mɩ́n lʋa lɛ dɔ wɔ́ sɛlɛ kpa mɩn kulo kɛ mɩn nwun wɔ́ nwʋn, nán mɩn nyan fɛ elie kpili kpa. ⁵Wɔ́ dedi’n m’ɔ tɩ ananhɔlɛ nɩn anwʋn ɛjɔlɛ tɛ wɔ mɩ́n ti anun. Dedi’n mɔ wɔ́ nan balasua Loyisi nʋn wɔ́ nin Eninsi, bɛ lili mʋa bɛ nyanlɩn yɩ́’n, mɩn de mɩn di kpa kɛ ɛ tɛ le dedi sɔ’n.

⁶Ɛhɩka ati, mɩɩn kacɩ wɔ́ kɛ, mɛlɛ mɔ n valɩ mɩ́n sa n vualɩ wɔ́ nwʋn’n, junman’n mɔ Nyanmɩan Kpili falɩ manlɩn wɔ́ kɛ ɛ lí’n, bɔ mɔndɩnlɩn di. ⁷Ɔ sanlɩn kɛ Wawɛ Nwannzan-nwannzan’n mɔ Nyanmɩan Kpili a fa a man yɛ́’n, ɔ man yɛ nyɔ man minndiin, nan ɔ wowula yɛ́ anwʋnsɛlɛ, ɔ man yɛ nyan ehulo, ɛsɛ ɔ man yɛ kʋala yɛ́ nwʋn bɩlɩ.

Nyian nɩn anwʋn afʋtu’n

⁸Yɩ́ ti n’ɛ man yɛ́ Mɩn adanzɩɛ elie nɩn anwʋn nyian kun wɔ́. Mɩ́n kʋsʋ mɔ yɛ́ Mɩn dunman nun ati yɛ̂ b’a tʋ mɩ́n fiadɩ’n, n’ɛ man mɩ́n nwʋn nyian kun wɔ́. Nan nanndɩ anwʋnsɛlɛ’n mɔ Nyanmɩan Kpili a fa a man wɔ́ nɩn asʋ, nwun Ɛjɔlɛkpa nɩn anwʋn amannɩɛ’n bie kɛ mɩ́n. ⁹Nyanmɩan yɛ̂ ɔ’a le yɛ́ ngʋan ɔ, ɛsɛ yɩ́ yɛ̂ ɔ’a fɛlɛ yɛ́ kɛ yɛ káci yɩ́ menian ɔ. Nán kɛ like kpa mɔ y’a yɔ ti ɔ, nan yɩ́ muonun ɔ’a hulo yɩ́ sɔ ɛsɛ ɔ’a nwun yɩ́ nwʋn anwunnvoe. Kilisi Zozi adawʋlʋman, Nyanmɩan a nwun yɛ́ nwʋn anwunnvoe sɔ’n, yɩ́ nzin nán ɔ’a bɔ mân’n. ¹⁰Nan sian dɩɛ, yɛ́ Ngʋandefʋɛ Kilisi Zozi mɔ ɔ’a yɩ yɩ́ nwʋn ɔ’a hele’n dunman nun, Nyanmɩan a hele yɛ́ kɛ ɔ’a nwun yɛ́ nwʋn anwunnvoe. Ɔ sanlɩn kɛ Kilisi Zozi yɛ̂ ɔ’a tʋa ewue ɔ’a le yɩ́ tunmin’n m’ɔ le yɩ́ nɩn ɔ, ɛsɛ ɔ nanndɩ Ɛjɔlɛkpa nɩn asʋ, ɔ’a yɩ ngʋan m’ɔ le man ayuelɩɛ’n ɔ’a hele. ¹¹Ɛjɔlɛkpa sɔ nɩn ati yɛ̂ Nyanmɩan a yɩ mɩ́n kɛ bɔfʋɛ ɔ nʋn ngehelefʋɛ ɔ. ¹²Ɛhɩka ati yɛ̂ mɩɩn nwun yalɛ ɛhɩ ɔ, nan kʋsʋ yɩ́ nwʋn nyian ngun man mɩ́n. Ɔ sanlɩn kɛ mɩn sɩ sʋanlan’n mɔ m’an fa mɩ́n lʋa’n kʋalaa m’an wula yɩ́ nun’n. Mɩn de mɩn di kɛ ɔ le tunmin ɔ nɩan like’n mɔ ɔ’a fa ɔ’a wula mɩ́n sa nun nɩn asʋ dede ɔ ’ju cɩan mɔ yɛ́ Mɩn ’bua menian’n-mɔ kʋalaa ndɛɛ’n.

¹³Nɩan ananhɔlɛ ɛjɔlɛ’n mɔ n gelelɩ wɔ́ nɩn asʋ nanndɩ, nán jinlan wɔ́ ja nun kpa wɔ dedi’n nʋn ehulo’n mɔ yɛ le yɩ́ wɔ kʋn ɛyɔlɛ’n mɔ yɛ́ nʋn Zozi Kilisi y’a yɔ nɩn anun. ¹⁴Ɔ nanndɩ Wawɛ Nwannzan-nwannzan’n m’ɔ wɔ yɛ́ nun nɩn asʋ, di ngehele kpa’n mɔ b’a fa b’a wula wɔ́ sa nun nɩn asʋ.

¹⁵Wɔ́ muonun ɛ sɩ kɛ anianman’n-mɔ kʋalaa mɔ bɛ fi Azi mân nɩn anun’n, b’a nwanndi mɩ́n. Menian sɔ’n bɛ́ mmie-mɔ y’ɔ le Fizɛ nʋn Ɛlɩmozɛnɩn.

¹⁶Nan Onezifɔɔ dɩɛ, Yɛ́ Mɩn yɔ́ yɩ́ nvilie’n-mɔ ye. Ɔ sanlɩn kɛ fiadɩ’n mɔ b’a tʋ mɩ́n’n, mɩ́n nwʋn nyian ngun man yɩ́, ɔ cɩcɩ mɩ́n lʋa. ¹⁷M’ɔ juli *Lɔmʋn ɛwa’n, ɔ bɔlɩ mɔndɩnlɩn ɔ kpʋnndɛlɩ mɩ́n dede ɔ nwunlin mɩ́n. ¹⁸Yɩ́ ti, cɩan mɔ yɛ́ Mɩn ’ba bua menian’n-mɔ ndɛɛ’n, ɔ nwún yɩ́ nwʋn anwunnvoe. Mɔ anɩn n wɔ Efɛzɩ ɛlɔ’n, mɩ́n nwʋn mɔndɩnlɩn m’ɔ bɔlɩ’n, wɔ́ muonun ɛ sɩ.

Nwun Kilisi anwʋn amannɩɛ’n bie kɛ mɩɩn nwun yɩ́’n

¹Nan wɔ́ dɩɛ, mɩ́n wa, Kilisi Zozi a nwun yɛ́ nwʋn anwunnvoe ɔ’a man yɛ nʋn yɩ́ y’a yɔ kʋn. Fa wɔ́ nyɩn tʋ nán wowula wɔ́ nwʋn anwʋnsɛlɛ. ²Ɛjɔlɛ’n mɔ ɛ tɩlɩ kɛ n ganlɩn yɩ́ menian dɔʋn anyunnun, menian mɔ ɛ de di kɛ sɛ ɛ kan ɛjɔlɛ sɔ’n kele bɛ́ a, bɛ́ kʋsʋ bɛ kɔ hʋala yɩ́ kan kele bɛ́ manngʋn’n-mɔ’n, kan ɛjɔlɛ sɔ’n kele bɛ́. ³Amannɩɛ’n m’ɔ mɩɩn nwun yɩ́ kɛ Kilisi Zozi nzalafʋ kpa’n, wɔ́ kʋsʋ nwun yɩ́ sɔ bie. ⁴Nzalafʋ mɔ yɩ́ nwan ɔ yɔ like m’ɔ sɔ yɩ́ sahɩnlan’n mɔ ɔ’a fa yɩ́ junman nun nɩn anyɩn’n, ɛjɔlɛ mɔ bɛ́ mɔ bɛ tɩ man nzalafʋ’n di’n, ɔ nva man yɩ́ nwʋn nwula man nun. ⁵Sʋanlan kʋsʋ m’ɔ lɛ su ɛnwanndie’n, sɛ ɔ nwanndi kɛ mala’n kele nɩn an, yɛ̂ bɛ fa kunnunmun elie nɩn anwʋn like bɛ man yɩ́ ɔ. ⁶Sʋanlan m’ɔ kɔ li junman sɛlɛ kɔ fɛ kɔ lua ebo’n, yɩ́ yɛ̂ ɔ di mʋa ɔ tɩ ebo nɩn asʋ baa ɔ. ⁷Ɛjɔlɛ ɛhɩ mɔ mɩɩn kan mɩn kele wɔ́’n, jʋnlɩn yɩ́ nwʋn kpa, nán yɛ́ Mɩn ’ba bʋka wɔ́ maan ɛ tɩ ninnge sɔ’n-mɔ kʋalaa abʋ.

⁸Man wɔ́ ti kácɩ Zozi Kilisi m’ɔ fi ewue nun ɔ’a tinnge’n. Ɔ tɩ belemgbin *Davidi abʋsʋ sʋanlan kɛ Ɛjɔlɛkpa’n mɔ mɩn bɔ’n kpɩn kele’n. ⁹Ɛjɔlɛkpa sɔ nɩn ati yɛ̂ mɩɩn nwun yalɛ m’ɔ ɛsɛ b’a gua mɩ́n sa ngɔnzɔngɔnzɔ kɛ kodiawu. Nan Nyanmɩan Anʋan Ɛjɔlɛ’n dɩɛ, bɛ bɔlɩ man yɩ́ kpaun. ¹⁰Ɛhɩka ati, bɛ́ mɔ Nyanmɩan Kpili a kpa bɛ́ a yɔ yɩ́ dɩɛ’n-mɔ dunman nun, mɩn tila mɩ́n ahʋnlɩn wɔ amannɩɛ enwuan’n kʋalaa anun. Yɩ́ dɩɛ anɩn bɛ́ kʋsʋ bɛ nʋn Zozi yɔ kʋn, nán b’a nyan ngʋan, bɛ nʋn yɩ́ a tanlan yɩ́ anunminnyanmʋn’n m’ɔ le man ayuelɩɛ nɩn anun.

¹¹Ɛjɔlɛ ɛhɩ-mɔ mɔ bɛ lɛ kan’n tɩ ananhɔlɛ:

Sɛ yɛ nʋn yɩ́, y’a wu a,

yɛ nʋn yɩ́ ’nyan ngʋan.

¹²Sɛ yɛ jinlan yɛ́ ja nun kpunndiin an,

yɛ nʋn yɩ́ ’di belemgbin.

Nan sɛ yɛ yɩ yɩ́ yɛ tʋ a,

yɩ́ kʋsʋ ɔ ’yɩ yɛ́ tʋ.

¹³Sɛ yɛ nnanndɩ man fɔ́ʋ́n an,

yɩ́ dɩɛ, ɔ nanndɩ fɔ́ʋ́n.

Ɔ sanlɩn kɛ ɔ ngaci man yɩ́ nʋan lé.

Sʋanlan m’ɔ di junman kpa’n, Nyanmɩan yɔ yɩ́ mo

¹⁴Kacɩ bɛ́ ɛjɔlɛ ɛhɩ nán tu bɛ́ fʋɔ kpa wɔ Nyanmɩan Kpili anyunnun, kɛ bɛ yáci ɛjɔlɛ’n-mɔ anwʋn butule elie’n. Ɔ sanlɩn kɛ nvasʋɛ fɩ́ɩ́ nnʋn man sʋ, ɔ man bɛ́ mɔ bɛ lɛ tie’n minlin. ¹⁵Bɔ mɔndɩnlɩn kɛ sʋanlan mɔ b’a sɔ yɩ́ b’a nɩan m’ɔ fi nun ɔ’a fite, n’ɛ sa wɔ́ junman nɩn anwʋn nyian, kan ananhɔlɛ ɛjɔlɛ’n fɔ́ʋ́n, nán ɛ fite Nyanmɩan anyunnun an, ɔ’a ndu man wɔ́ nyunnun ¹⁶Akpʋlʋwa esue kʋasɩa nun mgban m’ɔ nʋn dedi ɛjɔlɛ’n tɩ man kʋn’n, n’ɛ su bie. Ɔ sanlɩn kɛ bɛ́ mɔ bɛ kulo akpʋlʋwa esue sɔ’n, cɩan daa anɩn bɛ nʋn Nyanmɩan bɛ́ afian lɛ tɩ. ¹⁷Bɛ́ ninnge dɩɛ’n mɔ bɛ kekele’n, ɔ tɩ kɛ anwʋnnyalɛ m’ɔ le man ayile. Menian sɔ’n bɛ́ mmie-mɔ y’ɔ le Imene nʋn Filɛtɩ. ¹⁸Bɛ fi ananhɔlɛ atɩn nɩn asʋ b’a jasʋ, bɛ́ nwan ewuetinnge nɩn a sɩn dada angʋnmɩn. Ɛjɔlɛ mɔ bɛ kan bɛ kele menian’n-mɔ maan bɛ yaci bɛ́ dedi’n bɛ tʋ nɩn anɩn. ¹⁹Nan kʋsʋ Asɔnɩn’n m’ɔ tɩ kɛ sua mɔ Nyanmɩan a wula yɩ́ bʋ’n, ɔ jin yɩ́ ja nun kunngun kpa. B’a hɛlɛ sʋ kɛ: “Yɛ́ Mɩn sɩ bɛ́ mɔ bɛ tɩ yɩ́ dɩɛ’n.” Ɛsɛ “Sʋanlan biala m’ɔ kɔ se kɛ ɔ tɩ Nyanmɩan dɩɛ’n, ɔ káci yɩ́ nzin ɔ sí nyɔlɩɛ ɛtɛ’n.”

²⁰Awulo kpili kʋn biala anun, nán esika kɔkɔlɛ nʋn jɛtɛ ninnge mɔ bɛ didi nun anaan bɛ nʋn nun nɩn angʋnmɩn ala yɛ bɛ nwun yɩ́ nun ɔ. Nan bɛ nwun baka nʋn afa kʋsʋ ninnge mɔ bɛ didi nun anaan bɛ nʋn nun kʋsʋ ɛbɛlɛ. Cɩan mgbili’n-mɔ anun yɛ́ bɛ fa esika kɔkɔlɛ nʋn jɛtɛ ninnge’n-mɔ ɔ. Nan baka nʋn afa dɩɛ’n-mɔ, cɩan daa bɛ fa bɛ yɔ like. ²¹Yɩ́ sɔ kʋsʋ ala, sɛ sʋanlan kʋn sie yɩ́ nwʋn kʋnlʋn-ngʋnlʋn wɔ ɛtɛ’n-mɔ mɔ m’an bubu m’an hele wɔ́ nɩn anwʋn an, Nyanmɩan ’fa junman m’ɔ tɩ kpa’n ɔ man ɔ di. Ɔ sanlɩn kɛ ɔ tɩ yɩ́ Mɩn dɩɛ. Ɔ bɔbʋa yɩ́ nwʋn ɔ yɔ nyɔlɩɛ biala m’ɔ tɩ kpa’n.

²²Yɩ́ ti, nwanndi ninnge’n-mɔ mɔ mgbafɛlɛ’n-mɔ anyɩn bʋlʋ yɩ́ nwʋn’n. Kpʋnndɛ sɛsɛ ɛyɔlɛ wɔ́ asɩtanlan nɩn anun, nyan dedi nʋn ehulo kɔ wɔ́ nyunnun, ɛ nʋn bɛ́ mɔ bɛ sʋ Nyanmɩan ananhɔlɛ nun’n bɛ tánlan wɔ anzʋnunjɔ nun. ²³Akpʋlʋwa esue kʋasɩa nun mgban’n, n’ɛ su bie. Ɛ sɩ kɛ yɩ́ ayuelɩɛ’n, ɔ kaci butule. ²⁴Sʋanlan kʋsʋ m’ɔ di Nyanmɩan junman’n, ɔ nvata man kɛ ɔ di butule. Nan ɔ di kɛ ɔ kulo menian’n-mɔ kʋalaatin, ɔ yɔ sʋanlan m’ɔ kʋala like kele, ɛsɛ ɔ si abʋtalɛ. ²⁵Kpʋlʋfʋɛ’n-mɔ, ɔ di kɛ ɔ tʋ yɩ́ ahʋnlɩn asɩ ɔ kekele bɛ́ like. Ɛ ’su yɩ́ akpʋlʋwa a, Nyanmɩan kʋala kɛ ɔ man bɛ kaci bɛ́ abalabɔ’n bɛ nwun ananhɔlɛ atɩn’n. ²⁶Anɩn bɛ́ nyɩn a a kulo, bɛ yɩyɩ bɛ́ nwʋn fi Abɔnsanmʋn ngaa’n-mɔ mɔ bɛ tɔlɩ nun bɛ kacili nganga bɛ yɔlɩ m’ɔ kulo nɩn anun.

Ayuelɩɛ mɛlɛ nɩn anun asɩtanlan’n

¹Kacɩ kɛ mɛlɛ kasian nɩn anun, mân nɩn anun ’ba yɔ sɩ kpa. ²Afɩ menian’n-mɔ ’ba kaci ahyʋan, bɛ́ nyɩn ’ba bʋlʋ esika, bɛ ’tu bɛ́ nʋan nun, ɛsɛ bɛ ’tu bɛ́ nwʋn. Bɛ ’kɩkan ɛjɔlɛ ɛtɛ bɛ tia Nyanmɩan, bɛ́ nyɩn ngɔ sɔ man bɛ́ sɩ nʋn bɛ́ nin-mɔ kʋ́n, bɛ ngɔ sɩ man ye, bɛ́ nyɩn ngɔ sɔ man like m’ɔ tɩ nwannzan-nwannzan’n. ³Bɛ ngɔ hulo man sʋanlan, bɛ ngɔ nwun man koun, bɛ ’sɛcɩ menian dunman, bɛ ngɔ hʋala man bɛ́ nwʋn bɩlɩ fɩ́ɩ́, bɛ ’ba yɔ ati ɛtɛ, bɛ ngɔ hulo man kpa nɩn ɛyɔlɛ. ⁴Bɛ ’laka menian, bɛ ’yɔ mɔ bɛ kulo, bɛ ’kuku bɛ́ nwʋn sʋ. Bɛ ’kulo mân nɩn anun fɛ’n bɛ tala Nyanmɩan. ⁵Bɛ ’yɔ bɛ́ nwʋn kɛ menian mɔ bɛ de Nyanmɩan bɛ di kɛ yɛ́, nan kʋsʋ bɛ nne man yɩ́ tunmin’n bɛ nni man. Sɔ menian’n-mɔ, n’ɛ fa wɔ́ nwʋn bɔ bɛ́. ⁶Nunhan mmie-mɔ wʋwʋlʋ awulo’n-mɔ anun bɛ laka laka mmalasua mɔ bɛ́ ajʋnnɩn’n tɩ tɩka, ɛtɛ dɔʋn sʋ bɛ́ mɔ bɛ kulo mân nɩn anun ninnge ngacile kʋalaatin’n. ⁷Mmalasua sɔ’n-mɔ, cɩan daa bɛ kulo kɛ bɛ suan like, nan kʋsʋ bɛ nwunlin man ananhɔlɛ’n lé. ⁸Kɛ Zʋanɛsɩ nʋn Zʋanbɛlɛsɩ, bɛ nun *Moyizɩ, bɛ jinlanlɩn sʋ’n, yɩ́ sɔ kʋsʋ ala, menian sɔ’n-mɔ nʋn ananhɔlɛ’n jin sʋ. Menian sɔ’n-mɔ ajʋnlɩn tɩ man kpa, ɛsɛ bɛ́ dedi’n kʋsʋ tɩ mgban. ⁹Nan bɛ ngɔ hʋala man mʋa kɔ. Ɔ sanlɩn kɛ bɛ́ kʋasɩa mɔ bɛ tɩ’n, ɔ ’ba fite mân’n kʋalaa anyunnun kɛ Zʋanɛsɩ nʋn Zʋanbɛlɛsɩ dɩɛ’n.

Pɔlʋ amannɩɛ m’ɔ nwunlin yɩ́’n

¹⁰Nan wɔ́ dɩɛ, ɛ nwunlin mɩ́n ninnge mɔ n gekelelɩ’n, mɩ́n abalabɔ mɔ m mɔlɩ’n, ɔ nʋn mɔ m muli bɛ́ nwʋn akpʋnndan n yɔlɩ’n, ɛ nwunlin mɩ́n dedi’n, ɔ nʋn abʋtalɛ’n mɔ n zili’n, ɔ nʋn ehulo’n mɔ n ne yɩ́’n, ɔ nʋn mɔndɩnlɩn’n mɔ m mɔlɩ’n, ¹¹ɔ nʋn yalɛ’n mɔ n nwunlin yɩ́’n. N nwunlin yalɛ kpa Antiɔsʋ, Ikoninwɔmʋn, ɔ nʋn Lisitili ɛlɔ. Nzu ahʋlʋwa dɩɛ yɛ̂ b’a ngele man mɩ́n ɔ? Nan kʋsʋ yɛ́ Mɩn lelɩ mɩ́n fi yɩ́ kʋalaa anun. ¹²Ɛsɛ bɔbɔ, bɛ́ kʋalaa mɔ bɛ nʋn Kilisi Zozi b’a yɔ kʋn, mɔ bɛ kulo kɛ bɛ yɔ like mɔ Nyanmɩan kulo’n, bɛ ’kele bɛ́ ahʋlʋwa. ¹³Nan ati ɛtɛ mma’n-mɔ nʋn atofʋɛ’n-mɔ, bɛ́ ti ’min ɛtɛ nɩn anun bɛ laka laka menian dede bɛ laka bɛ́ muonun bɛ́ nwʋn.

¹⁴Nan wɔ́ dɩɛ, ninnge mɔ a suan, mɔ a nwun yɩ́ kɛ ɔ tɩ ananhɔlɛ’n, fa sie kpa. Wɔ́ muonun, ɛ sɩ sʋanlan’n m’ɔ hehelelɩ wɔ́ ninnge sɔ’n-mɔ’n. ¹⁵Anɩn ɛ tɩ batʋnman kaan sʋa yɛ̂ ɛ nwunlin Ɛhɛlɛ Ɛjɔlɛ Nwannzan-nwannzan nɩn ɔ. Ɔ kʋala ɔ man ɛ nwun ngɛlɛ ɛ de Kilisi Zozi di ɛ nyan ngʋan. ¹⁶Ɔ sanlɩn kɛ Ɛhɛlɛ Ɛjɔlɛ’n kʋalaa fi Nyanmɩan Kpili muonun ɛlɔ. Ɔ tɩ kpa mɔ bɛ fa bɛ kekele menian ninnge maan bɛ nwun ananhɔlɛ’n. Bɛ fa bɛ kpala ato’n, bɛ fa bɛ tɩnngɛ sʋanlan, bɛ fa bɛ bʋka sʋanlan maan ɔ bɔ bala m’ɔ sɔ Nyanmɩan anyɩn. ¹⁷Yɩ́ dɩɛ, anɩn Nyanmɩan sʋanlan’n yɔ faɩn, ɔ kʋala like biala m’ɔ tɩ kpa’n yɔ.

¹Nyanmɩan Kpili nʋn Kilisi Zozi mɔ ɔ ’ba bua anyɩnwɔsʋɛ mma ɔ nʋn ewue mma ndɛɛ nɩn anyunnun, mɩn kan ndâ kɛ Kilisi ɛwalɛ’n mɔ ɔ ’ba sa ba’n, ɔ nʋn yɩ́ belemgbin mɔ ɔ ’ba li’n dunman nun, ²kan Nyanmɩan Anʋan Ɛjɔlɛ fua sʋ, sɛ mɛlɛ’n tɩ kpa o, sɛ ɔ tɩ man kpa o, kan dede maan bɛ lé bɛ lí, tu bɛ́ nyunnun, wowula bɛ́ anwʋnsɛlɛ, si abʋtalɛ kpa bɔkɔɔ kekele bɛ́ ninnge. ³Ɔ sanlɩn kɛ, ɔ ’ba ju mɛlɛ’n bie’n, menian’n-mɔ ngɔ tie man ananhɔlɛ ngehele’n kʋ́n. Like mɔ bɛ́ ahʋnlɩn’n kulo’n yɛ̂ bɛ ’yɔ ɔ. Ɛhɩka ati, ɛjɔlɛ mɔ bɛ́ muonun bɛ kulo kɛ bɛ tie’n, bɛ ’ba yia yɩ́ nwʋn ngehelefʋɛ dɔʋn maan bɛ kan bɛ kele bɛ́. ⁴Bɛ ’ba totua bɛ́ nzʋ wɔ ananhɔlɛ ɛjɔlɛ nɩn anwʋn nán bɛ tie ɛhʋa. ⁵Nan wɔ́ dɩɛ, sie tile wɔ like biala anun, tila wɔ́ ahʋnlɩn wɔ yalɛ elie nɩn anun, man wɔ́ nwʋn tɛ wɔ́ bɔ Ɛjɔlɛkpa’n, di junman mɔ Nyanmɩan a fa a man wɔ́’n.

⁶Nan mɩ́n dɩɛ, n dɩ kɛ b’a hun mɩ́n, b’a butu mɩ́n moja nɩn asɩ dada angʋnmɩn. Afɩ mɩ́n ewue tɛmʋn a ju. ⁷M’an hʋn kʋan kpa’n. M’an sɔ mɩ́n dedi nɩn anun kpa, m’an nwanndi dede m’an gua yɩ́ bʋ. ⁸Kɩkaala dɩɛ, kunnunmun elie nɩn anwʋn ahatua lɛ nwʋnndɛ mɩ́n. Ahatua sɔ’n y’ɔ le ngʋan ele abotile’n. Mɩn ’nyan yɩ́ cɩan mɔ yɛ́ Mɩn m’ɔ bua ndɛɛ sɛsɛ’n, ɔ ’bua kulo menian’n-mɔ ndɛɛ’n. Ɛsɛ bɔbɔ, nan mɩ́n ngʋnmɩn ala yɛ̂ mɩn ’nyan yɩ́ ɔ, nan mɩn nʋn bɛ́ kʋalaa mɔ bɛ le ehulo bɛ lɛ nwʋnndɛ mɛlɛ’n mɔ yɛ́ Mɩn ’yɩ yɩ́ nwʋn kele’n.

Ngalɩɛ

⁹Bɔ mɔndɩnlɩn tʋ mɩ́n ɛwa ndɛ-ndɛ. ¹⁰Ɔ sanlɩn kɛ Demasɩ a hulo ɛnɛ mân’n dede ɔ’a nwanndi mɩ́n. Ɔ’a hɔ Tesaloninki. Kelesan a hɔ Galasi mân nun, Titɩ kʋsʋ a hɔ Dalɩmasi mân nun. ¹¹Luku angʋnmɩn yɛ̂ ɔ wɔ mɩ́n nwʋn ɛwa ɔ. Ɛ ’ba a, fa Maakɩ ɛ nʋn yɩ́ bɛ bála. Ɔ sanlɩn kɛ ɔ kʋala ɔ bʋka mɩ́n wɔ mɩ́n junman elie nɩn anun. ¹²M’an sʋan Tisiki Efɛzɩ ɛlɔ. ¹³N yacili mɩ́n taladɩɛ kpili’n mɔ mɩn wula taladɩɛ a, mɩn fa mɩn wula sʋ’n Tolowasɩ ɛlɔ, Kalɩpusɩ anwʋn ɛbɛlɛ. Sɛ ɛ ’ba a, fa bɛlɛ mɩ́n.

¹⁴Alɛgɩzanndɩlɩ m’ɔ bɔ mmulalɛ’n, ɔ’a bɔ mɔndɩnlɩn ɔ’a li mɩ́n nwʋn ɛjɔlɛ ɛtɛ kpa. Yɛ́ Mɩn ’ba tua yɩ́ nyɔlɩɛ sɔ nɩn anwʋn kalɛ. ¹⁵Wɔ́ kʋsʋ wɔ́, sie wɔ́ nwʋn ye wɔ yɩ́ nwʋn. Ɔ sanlɩn kɛ, ɔ tanlɩn yɛ́ nyɩnsʋ kpa wɔ yɛ́ ngehele nɩn anwʋn.

¹⁶Alimʋa tɛmʋn mɔ bɛ nʋn mɩ́n hɔlɩ bɛ́ mɔ bɔ di ɛjɔlɛ’n-mɔ aja sʋ, mɔ mɩn ’sa mɩ́n nɩn’n, sʋanlan fɩ́ɩ́ a njinlan man mɩ́n nzin. Bɛ́ kʋalaa bɛ nwanndili mɩ́n. ¹⁷Nan yɛ́ Mɩn jinlanlɩn mɩ́n nzin, ɔ wulalɩ mɩ́n anwʋnsɛlɛ, ɔ man m mɔlɩ Ɛjɔlɛkpa’n kpayɛ kpa bɔkɔɔ manlɩn bɛ́ kʋalaa mɔ bɛ tɩ man Zufʋ’n tɩlɩ. Yɛ́ Mɩn a le mɩ́n fi tɛtɩanfʋɛ nɩn asa nun. ¹⁸Ɛsɛ yɛ́ Mɩn de mɩ́n fi ɛtɛ ngacile’n kʋalaa anun ɔ di mɩ́n taataa maan mɩn wʋlʋ yɩ́ Belemgbin Mân nɩn anun. Anyunminnyanmʋn hán yɩ́ dahuu. Amɩn.

¹⁹Mɩn ’yɔ Pilisili nʋn Akilasɩ, Onezifɔɔ nʋn yɩ́ awulo amma’n-mɔ kʋalaa like. ²⁰Elasɩtɩ a ha Kolɩntɩ ɛlɔ yɛ̂ m’an yaci Tolofimʋn Minle ɛlɔ, ɔ sanlɩn kɛ anɩn ɔ ndɩ man akpɔlɛ. ²¹Bɔ mɔndɩnlɩn bala kʋalaaka nán afʋɛ nɩn anʋan a yia. Ebulusi, Pudansɩ, Linunsɩ, Kolodia, ɔ nʋn anianman’n-mɔ kʋalaa, bɛ́ nwan bɛ ’yɔ wɔ́ like.

²²Yɛ́ Mɩn nʋn wɔ́ tánlan. Nyanmɩan nwún ɛmɔ kʋalaa anwʋn anwunnvoe.