2 TESALONINKI

PƆLƱ KALATA’N

M’Ɔ TIAN YƖ NNYUAN

M’Ɔ HƐLƐLƖ NWANLƖN

TESALONINKI

ASƆNƖN MMA’N-MƆ’N

M’ɔ wɔ nun’n

Kalata ɛhɩ anun, ɔ nʋn nunhan kʋn’n mɔ Pɔlʋ hɛlɛlɩ nwanlɩn Tesaloninki asɔnɩn, mma’n-mɔ anun, ɔ lɛ da Nyanmɩan asɩ. Ɔ sanlɩn kɛ Tesaloninki asɔnɩn mma’n-mɔ lɛ bɔ mɔndɩnlɩn bɛ́ dedi nɩn anun bɛ kɔ bɛ́ nyunnun, ɛsɛ bɛ kulo bɛ́ nwʋn sunnzun mɔ bɛ lɛ kele bɛ́ ahʋlʋwa ɔ. Pɔlʋ a hɛlɛ kalata ɛhɩ ɔ’a wowula bɛ́ anwʋnsɛlɛ, ɛsɛ ɔ’a tɩnngɛ bɛ́ wɔ ɛjɔlɛ mɔ anɩn ɔ jɩjɩ bɛ́ asɔnɩn nɩn anwʋn.

Kalata nɩn ati 1, Pɔlʋ lɛ wowula bɛ́ anwʋnsɛlɛ wɔ yalɛ’n mɔ bɛ lɛ nwun yɩ́ nɩn anun. Ɔ lɛ kacɩ bɛ́ kɛ yɛ́ Mɩn Zozi fi nyanmɩansʋ, ɔ ’ba sa ba ɔ yɩ bɛ́ wɔ yalɛ’n mɔ bɛ lɛ nwun yɩ́ nɩn anun nán ɔ tua bɛ́ mɔ bɛ lɛ man bɛ nwun yalɛ’n kalɛ. Kalata nɩn ati 2.1-12, Pɔlʋ lɛ kan yɛ́ Mɩn ɛwalɛ nɩn ɛjɔlɛ biekun. Menian mmie-mɔ a sɛcɩ asɔnɩn mma’n-mɔ ati anun. Bɛ lɛ kele kɛ yɛ́ Mɩn a a dada angʋnmɩn. Pɔlʋ lɛ kele nun kɛ asannan nán Zozi a sa a a’n, bɛ ’ba nwun yɩ́ kɛ sʋanlan ati anun ɛtɛ kʋn ’ba fite. Ɔ le Abɔnsanmʋn tunmin’n, ɔ ’ba jasʋ Nyanmɩan akɔmɩn anun. Nan yɛ́ Mɩn Zozi ’ba man sʋanlan sɔ’n wu. Kalata nɩn ati 2.13-3.15, Pɔlʋ lɛ kan kele asɔnɩn mma’n-mɔ kɛ bɛ tíla bɛ́ dedi nɩn anun kpolo, ɛsɛ bɛ bɔ́ mɔndɩnlɩn wɔ mmʋtʋɛ ɛyɔlɛ nɩn anun. Mɔ ɔ ’kɔ kalata nɩn agualɩɛ’n, Pɔlʋ a kuku bɛ́ asɔnɩn nɩn anun ɛjɔlɛ kʋn asʋ. Ɛjɔlɛ sɔ’n y’ɔ le kɛ ɔ’a tɩ kɛ Tesaloninki ɛbɛlɛ asɔnɩn mma’n mmie-mɔ ngulo man kɛ bɛ di junman. Pɔlʋ nwan bɛ kánnzʋ bɛ́. Ɔ sanlɩn kɛ bɛ́ abalabɔ nʋn ngehele’n m’ɔ hehelelɩ bɛ́’n ngɔ man sʋ (3.6-15). Kalata nɩn agualɩɛ nun, Pɔlʋ lɛ yeyila bɛ́.

Ahɩn ebisa

¹Mɩ́n Pɔlʋ, mɩn nʋn Silivɩn nʋn Timote yɛ̂ yɛ lɛ kɛlɛ kalata ɛhɩ yɛ nwan ɛmɔ Tesaloninki asɔnɩn mma’n-mɔ ɔ. Ɛmɔ mɔ bɛ nʋn yɛ́ Sɩ Nyanmɩan nʋn yɛ́ Mɩn Zozi Kilisi a yɔ kʋn’n, yɛ ’bisa ɛmɔ ahɩn.

²Nyanmɩan m’ɔ tɩ yɛ́ Sɩ’n, ɔ nʋn yɛ́ Mɩn Zozi Kilisi, bɛ nwún ɛmɔ anwʋn anwunnvoe, ɛsɛ bɛ cɩ́cɩ ɛmɔ alʋa.

Asɩna

³Anianman-mɔ, ɔ fata kɛ tɛmʋn biala yɛ da Nyanmɩan asɩ wɔ ɛmɔ dunman nun. Ɔ di kɛ yɛ yɔ yɩ́ sɔ, afɩ dedi’n mɔ ɛmɔ le yɩ́’n, ɔ nʋn ehulo mɔ ɛmɔ anun kʋn biala fa kulo bɛ́ bʋ nga’n-mɔ’n, ɔ kɔ yɩ́ nyunnun alɩhɩan biala. ⁴Ɛhɩka ati, yɛ fa ɛmɔ yɛ tu yɛ́ nʋan nun wɔ Nyanmɩan asɔnɩn’n-mɔ anun. Afɩ sunnzun mɔ ɛmɔ lɛ nwun yalɛ ngacile kʋalaa, mɔ bɛ lɛ kele ɛmɔ ahʋlʋwa ɔ, ɛmɔ dedi’n jin yɩ́ ja nun. ⁵Yalɛ’n mɔ ɛmɔ lɛ nwun yɩ́’n kele kɛ ɛmɔ sɛ fata Nyanmɩan Belemgbin Mân’n mɔ yɩ́ ti yɛ̂ ɛmɔ lɛ nwun yalɛ sɔ’n. Ɔ man sɛ Nyanmɩan ’bua menian’n-mɔ ndɛɛ a, yɩ́ fɔ́ʋ́n sʋ ɔ. ⁶Afɩ, Nyanmɩan anyunnun, ɛ tɩ sɛsɛ kɛ ɔ héle bɛ́ mɔ bɛ lɛ kele ɛmɔ yalɛ’n kʋsʋ yalɛ ⁷yɛ̂ ɛmɔ mɔ bɛ lɛ kele ɛmɔ ahʋlʋwa’n, Nyanmɩan ’ba man ɛmɔ nʋn yɛ́, yɛ ’nyan alaje. Alaje sɔ’n, yɛ ’ba nyan yɩ́ wɔ mɛlɛ mɔ yɛ́ Mɩn Zozi fi nyanmɩansʋ ɔ ’ba yɩ yɩ́ nwʋn kele’n. Ɔ nʋn yɩ́ tunminfʋɛ mmɔfʋɛ’n-mɔ yɛ̂ ɔ ’ba a ɔ. ⁸Ɔ ’ba a sɩ̂n m’ɔ lɛ jue nɩn afian, ɔ ’tua bɛ́ mɔ bɛ nzɩ man Nyanmɩan ɔ nʋn bɛ́ mɔ b’a nne man yɛ́ Mɩn Zozi Ɛjɔlɛkpa’n b’a nni man’n kalɛ. ⁹Menian sɔ’n-mɔ, bɛ́ ahatua mɔ bɛ ’nyan yɩ́’n y’ɔ le munnzue m’ɔ le man ayuelɩɛ’n. Bɛ́ nyɩn ngɔ bɔ man yɛ́ Mɩn ɔ nʋn yɩ́ anunminnyanmʋn tunmin’n lé. ¹⁰Cɩan mɔ Zozi ’ba a’n, menian’n-mɔ mɔ b’a le yɩ́ b’a li mɔ bɛ tɩ yɩ́ dɩɛ’n ’ba wula yɩ́ anunminnyanmʋn, ɛsɛ bɛ ’fʋa yɩ́. Ɛmɔ ’ba tanlan menian sɔ’n-mɔ anun bie. Ɔ sanlɩn kɛ Nyanmɩan Ɛjɔlɛkpa nɩn anwʋn kpayɛ’n mɔ yɛ bɔlɩ’n, ɛmɔ a le a li.

¹¹Ɛhɩka ati, cɩan daa yɛ sɛlɛ Nyanmɩan yɛ man ɛmɔ. Yɛ sɛlɛ yɩ́ kɛ ɔ mán ɛmɔ sɛ́ fata ngʋan’n mɔ yɩ́ ti yɛ̂ ɔ’a fɛlɛ ɛmɔ yɩ́ nwʋn’n. Ɔ nanndɩ tunmin’n m’ɔ le yɩ́ nɩn asʋ, yɛ sɛlɛ yɩ́ kɛ, nyɔlɩɛ kpa mɔ yɩ́ nwʋn ajʋnlɩn wɔ ɛmɔ ati anun’n, ɔ mán ɛmɔ yɩ́ nwʋn anwʋnsɛlɛ maan ɛmɔ hʋ́ala yɩ́ yɔ́. Ɛsɛ nyɔlɩɛ kpa m’ɔ kɔ man ɛmɔ kɔ bɔ yɩ́ bʋ, m’ɔ kele kɛ ɛmɔ le dedi’n, ɔ mán ɛmɔ yɔ́ dede bɛ gúa yɩ́ bʋ. ¹²Ɛbɛlɛ nɩn anun, ɔ nanndɩ Nyanmɩan Kpili ɔ nʋn yɛ́ Mɩn Zozi Kilisi anwunnvoe nɩn asʋ, ɛmɔ ’ba wula yɛ́ Mɩn Zozi anunminnyanmʋn, yɩ́ kʋsʋ, ɔ ’ba wula ɛmɔ bie.

Ɛtɛfʋɛ Sʋanlan Kpili’n

¹Anianman-mɔ, m’ɔ tʋ de yɛ́ Mɩn Zozi Kilisi ɛwalɛ’n, ɔ nʋn yɛ́ nʋan ehuan mɔ yɛ ’kuan wɔ yɩ́ nwʋn ɛbɛlɛ’n, yɛ ’sɛlɛ ɛmɔ kɛ ²sɛ ɛmɔ a tɩ kɛ yɛ́ Mɩn cɩan sɔ nɩn a ju dada angʋnmɩn an, nán bɛ man bɛ́ ti anun sɛcɩ bɛ́ ndɛ-ndɛ sʋa, ɛsɛ nán bɛ man bɛ́ lʋa bɔ bɛ́ nwʋn. Ɛ ’su yɩ́ akpʋlʋwa a, sʋanlan bie a fa yɛ́ dunman a han kɛ Nyanmɩan a yɩ a hele yɛ́ maan y’a han ɛjɔlɛ sɔ’n, anaan y’a hɛlɛ yɩ́ nwʋn kalata kɛ yɛ́ Mɩn ɛwalɛ cɩan nɩn a ju dada angʋnmɩn. ³Nán bɛ man sʋanlan fɩ́ɩ́ sɩn atɩn ngacile biala asʋ ɔ laka bɛ́. Ɔ sanlɩn kɛ asannan nan yɛ́ Mɩn Zozi a a’n, menian’n-mɔ ’ba yaci Nyanmɩan bɛ tʋ, Ɛtɛfʋɛ Sʋanlan Kpili’n mɔ ɔ ’jasʋ Nyanmɩan akɔmɩn anun nán ɔ wu’n ’ba yɩ yɩ nwʋn kele. ⁴Ɛtɛfʋɛ Sʋanlan Kpili sɔ’n, like biala mɔ menian’n-mɔ fa sʋ Nyanmɩan’n, ɔ ngɔ bu man yɩ́ like fɩ́ɩ́. Nyanmɩan Kpili mɔ menian’n-mɔ sʋ yɩ́’n, ɔ ’ba jasʋ yɩ́ kɔmɩn anun. Ɛsɛ bɔbɔ, ɔ ’ba hɔ dede ɔ kɔ wʋlʋ Nyanmɩan Sua Nwannzan-nwannzan nɩn anun, ɔ ’tanlan asɩ ɔ bu yɩ́ nwʋn kɛ yɩ́ bɔbɔ muonun y’ɔ tɩ Nyanmɩan nɩn ɔ.

⁵Ɛmɔ ngacɩ man kɛ mɛlɛ mɔ anɩn n wɔ ɛmɔ anwʋn ɛlɔ’n, n ganlɩn ɛjɔlɛ sɔ’n n gelelɩ ɛmɔ ɔ? ⁶Nan kɩkaala, like kʋn jɩjɩ yɩ́, yɩ́ ti yɛ̂ ɔ man Ɛtɛfʋɛ Sʋanlan Kpili sɔ’n yɩlɩ man yɩ́ nwʋn dede ɔ ’ju tɛmʋn m’ɔ fata’n, ɛmɔ sɩ like sɔ’n. ⁷Nvɩalɩɛ nun, Ɛtɛfʋɛ Sʋanlan Kpili sɔ’n tunmin’n lɛ di junman dada angʋnmɩn. Tɛmʋn mɔ yɛ wɔ nun’n, ɔ di kɛ sʋanlan’n m’ɔ man Ɛtɛfʋɛ sɔ’n fitelɩ man’n jasʋ ɛbɛlɛ. ⁸Nan sɛ ɔ jasʋ ɛbɛlɛ yue a, bɛlɛ mɔ anɩn Ɛtɛfʋɛ Sʋanlan Kpili’n lɛ ba fite ɔ. Ɛtɛfʋɛ sɔ’n, tɛmʋn mɔ yɛ́ Mɩn Zozi ’ba a yɩ́ anunminnyanmʋn ɔ nʋn yɩ́ tunmin nɩn anun’n, ɔ ’ba bu yɩ́ fʋɔ maan bɛ kun yɩ́, ɛsɛ ɔ ’fa yɩ́ tunmin bɔ yɩ́ bʋsʋ bɔkɔɔ. ⁹Mɛlɛ mɔ Ɛtɛfʋɛ Sʋanlan Kpili’n ’ba yɩ yɩ́ nwʋn’n, *Satan ’ba fa yɩ́ tunmin’n wula yɩ́ nun. Sʋanlan sɔ’n ’ba fa tunmin kpili sɔ’n yɔ ato nzɔlɛ ɔ nʋn ato asinbɛnwʋn ninnge. ¹⁰Ɔ ’ba fa ɛtɛ ɛyɔlɛ tunmin’n m’ɔ le yɩ́’n yɔ ninnge ngacile kʋalaatin ɔ laka menian’n-mɔ ɔ man bɛ minlin. Menian sɔ’n-mɔ ’ba minlin, ɔ sanlɩn kɛ b’a nne man ananhɔlɛ ɛjɔlɛ’n b’a nni man, ɛsɛ b’a ngulo man ananhɔlɛ ɛjɔlɛ’n m’ɔ man bɛ nyan bɛ́ ti’n. ¹¹Ɛhɩka ati, Nyanmɩan Kpili a yɩ nnaka tunmin’n kɛ ɔ lí junman bɛ́ nun maan bɛ lé ato ɛjɔlɛ’n bɛ lí. ¹²Yɩ́ ti, bɛ́ kʋalaa mɔ b’a nne man ananhɔlɛ ɛjɔlɛ’n b’a nni man’n, nan ɛtɛ nɩn anwʋn palasili yɛ̂ bɛ lili’n, bɛ́ sɔ menian’n-mɔ, bɛ ’bu bɛ́ fʋɔ bɛ kun bɛ́.

Ɛmɔ nánndɩ ngehele kpa nɩn asʋ

¹³Anianman-mɔ, ɛmɔ mɔ yɛ́ Mɩn kulo bɛ́’n, ɔ di kɛ tɛmʋn biala yɛ da Nyanmɩan asɩ wɔ ɛmɔ dunman nun. Ɔ sanlɩn kɛ Nyanmɩan a fɛlɛ ɛmɔ abʋbɔ nɩn anun kɛ ɔ ’man ɛmɔ nyan bɛ́ ti, ɔ nanndɩ Wawɛ Nwannzan-nwannzan nɩn asʋ, ɛmɔ kaci yɩ́ menian bɛ de ananhɔlɛ’n bɛ di. ¹⁴Ɔ nanndɩ Ɛjɔlɛkpa’n mɔ yɛ bɔlɩ yɛ helelɩ ɛmɔ nɩn asʋ yɛ̂ ɔ’a fɛlɛ ɛmɔ maan ɛmɔ a nyan ngʋan ɔ. Ɔ’a fɛlɛ ɛmɔ yɩ́ nwʋn kɛ ɛmɔ bála a nyan yɛ́ Mɩn Zozi Kilisi anunminnyanmʋn’n bie. ¹⁵Ɛhɩka ati, anianman-mɔ, ngehele’n mɔ yɛ hanlɩn yɩ́ yɛ́ nʋan nun yɛ helelɩ ɛmɔ anaan yɛ hɛlɛlɩ yɩ́ kalata sʋ yɛ nwanlɩn ɛmɔ’n, ɛmɔ fá síe kpa bɛ nánndɩ sʋ.

¹⁶Yɛ́ Mɩn Zozi Kilisi muonun nʋn yɛ́ Sɩ Nyanmɩan Kpili mɔ b’a hulo yɛ́, b’a nwun yɛ́ nwʋn anwunnvoe b’a wowula yɛ́ anwʋnsɛlɛ m’ɔ le man ayuelɩɛ, ɛsɛ b’a man y’a nyan anyɩndasʋɛ kpa’n. ¹⁷Bɛ cɩ́cɩ ɛmɔ alʋa bɛ mán ɛmɔ anwʋnsɛlɛ maan ninnge kʋalaa mɔ ɛmɔ ’yɔ anaan ɛjɔlɛ kʋalaa mɔ ɛmɔ ’kan’n, ɔ yɔ́ faɩn.

Ɛmɔ sɛ́lɛ Nyanmɩan bɛ mán yɛ́

¹Yɩ́ bɛ-yue-asɩɛ, anianman-mɔ, ɛmɔ sɛ́lɛ Nyanmɩan bɛ mán yɛ́ maan yɛ́ Mɩn Anʋan Ɛjɔlɛ’n bɔ́ sánndɩ ndɛ-ndɛ, menian’n-mɔ lé lí, bɛ wúla yɩ́ anunminnyanmʋn kɛ bɛ wulalɩ yɩ́ wɔ ɛmɔ afian ɛlɔ’n. ²Ɛsɛ ɛmɔ sɛ́lɛ Nyanmɩan bɛ mán ɔ lé yɛ́ fi menian ɛtɛfʋɛ’n-mɔ nʋn ati anun ɛtɛ’n-mɔ asa nun. Ɔ sanlɩn kɛ nán menian’n-mɔ kʋalaa yɛ̂ bɛ de Ɛjɔlɛkpa’n bɛ di ɔ. ³Nan kʋsʋ yɛ́ Mɩn tɩ ananhɔlɛfʋɛ. Ɔ ’wowula ɛmɔ anwʋnsɛlɛ, ɛsɛ ɔ ’sisa ɛmɔ wɔ Abɔnsanmʋn anwʋn. ⁴Yɛ́ Mɩn dunman nun, yɛ de ɛmɔ yɛ di. Ɔ man yɛ nwun yɩ́ fɔ́ʋ́n kɛ ɛmɔ lɛ yɔ, ɛsɛ ɛmɔ ’ba yɔ ninnge’n-mɔ mɔ y’a hele ɛmɔ kɛ ɛmɔ yɔ́’n. ⁵Yɛ́ Mɩn bʋ́ka ɛmɔ maan Nyanmɩan ehulo’n tánlan ɛmɔ ahʋnlɩn’n-mɔ anun yɛ̂ yalɛ’n mɔ ɛmɔ lɛ nwun yɩ́’n, ɔ mán ɛmɔ sí abʋtalɛ kɛ Kilisi sili abʋtalɛ’n.

Junman elie’n yɔ ehian kpa

⁶Anianman-mɔ, yɛ lɛ kɛlɛ ɛmɔ wɔ yɛ́ Mɩn Zozi Kilisi dunman nun kɛ nán man ɛmɔ nʋn anianman’n-mɔ mɔ bɛ lɛ yɔ ɛfʋan’n, mɔ ɛsɛ bɛ nnanndɩ man ngehele’n mɔ yɛ falɩ yɛ manlɩn ɛmɔ nɩn asʋ’n bie fɩ́ɩ́ tu nun. ⁷Like mɔ ɛmɔ yɔ a, ɔ nʋn yɛ́ dɩɛ’n tɩ kʋn’n, ɛmɔ sɩ. Ɔ sanlɩn kɛ mɛlɛ mɔ anɩn yɛ wɔ ɛmɔ anwʋn ɛlɔ’n, y’a ngaci man ɛfʋanfʋɛ. ⁸Y’a mman man sʋanlan fɩ́ɩ́ a ngua man yɛ́ nʋan alɩɛ mgban. Nan ɛfɛ nʋn yalɛ nɩn anun, yɛ lili junman sɛlɛ kpa kɔngɔɛ nʋn eyua, ɔ man ɛmɔ anun bie fɩ́ɩ́ a mmɔ man yɛ́ nwʋn kalɛ. ⁹Yɛ yɔlɩ yɩ́ sɔ, nán kɛ bie a, yɛ le man atɩn kɛ yɛ sɔ ninnge’n mɔ ɛmɔ ’fa bɛ bʋka yɛ́ nɩn anun ɔ. Nan yɛ́ nwan yɛ ’yɔ yɩ́ sɔ maan ɛmɔ nɩan sʋ bɛ yɔ bie. ¹⁰Mɛlɛ mɔ anɩn yɛ wɔ ɛmɔ anwʋn ɛlɔ’n, yɛ hanlɩn yɛ helelɩ ɛmɔ kɛ: “Sʋanlan m’ɔ ngulo man kɛ ɔ di junman’n, ɔ le man atɩn kʋsʋ kɛ ɔ di like ɔ”.

¹¹Yɛ lɛ kan sɔ yɛ kele ɛmɔ, afɩ y’a tɩ kɛ ɛmɔ afian ɛlɔ, mmie-mɔ a kaci ɛfʋanfʋɛ, bɛ nni man junman fɩ́ɩ́, nan menian ɛjɔlɛ nun cenjin elie yɛ̂ ɔ cian bɛ́ ɔ. ¹²Bɛ́ sɔ menian’n-mɔ, yɛ́ Mɩn Zozi Kilisi dunman nun, yɛ ’bʋtʋ bɛ́ yɛ kan yɛ kele bɛ́ kɛ bɛ lí junman wɔ anzʋnunjɔ nun alɩhɩan biala bɛ nɩ́an bɛ́ nwʋn. ¹³M’ɔ tʋ de ɛmɔ’n, anianman-mɔ, nán man ɛmɔ anwʋn bubu bɛ́ wɔ ye ɛyɔlɛ nɩn anwʋn.

¹⁴Sʋanlan mɔ yɩ́ nyɩn a nzɔ man ngehele’n mɔ y’a hele wɔ kalata ɛhɩ anun’n, ɛmɔ hɛ́lɛ yɩ́ dunman bɛ síe, ɛsɛ nán man ɛmɔ nʋn yɩ́ tu nun, bɛ mán nyian hún yɩ́. ¹⁵Nan kʋsʋ, nán man ɛmɔ bu yɩ́ kɛ kpɔfʋɛ, nan ɛmɔ kánnzʋ yɩ́. Ɔ sanlɩn kɛ ɔ tɩ ɛmɔ anianman.

Nyila

¹⁶Yɛ́ Mɩn muonun m’ɔ man alʋacɩcɩɛ’n, ɔ sɩ́n atɩn biala asʋ ɔ mán ɛmɔ tánlan wɔ alʋacɩcɩɛ nun cɩan daa. Yɛ́ Mɩn nʋn ɛmɔ kʋalaa tánlan.

¹⁷Ahɩn’n mɔ mɩɩn bisa ɛmɔ’n, mɩ́n muonun, mɩ́n Pɔlʋ, n ne mɩ́n sa yɛ̂ m’an hɛlɛ ɔ. Kɛ mɩn sannyɩn mɩ́n kalata’n-mɔ kʋalaa nɩn anɩn, kɛ mɩn kpɩn mɩn kɛlɛ yɩ́ nɩn anɩn. ¹⁸Yɛ́ Mɩn Zozi Kilisi nwún ɛmɔ kʋalaa anwʋn anwunnvoe.