PIƐLƖ KALATA’N
M’Ɔ TƆ SƱ NNYUAN’N
M’ɔ wɔ nun’n
Pɩɛlɩ hɛlɛlɩ kalata ɛhɩ nwanlɩn bɛ́ kʋalaa mɔ b’a fa bɛ́ nwʋn b’a man Zozi Kilisi’n. Anɩn ɔ lɛ kan kele bɛ́ kɛ ɔ sɩ kɛ ɔ ngɔ hyɛ man, ɔ ’ba wu. Ɛhɩka ati, ɔ kulo kɛ ɔ kacɩ bɛ́ ninnge’n-mɔ m’ɔ hehelelɩ’n. Alimʋa kalata’n mɔ Pɩɛlɩ hɛlɛlɩ nɩn anun, ɔ lɛ kan kele asɔnɩn mma’n-mɔ kɛ sɛ mân’n lɛ kele bɛ́ ahʋlʋwa a, bɛ tíla bɛ́ dedi nɩn anun kpolo. Kalata’n m’ɔ tɔ sʋ nnyuan ɛhɩ anun, ɔ lɛ kan kele bɛ́ kɛ sɛ ato ngehelefʋɛ-mɔ fite asɔnɩn nɩn anun nán bɛ lɛ kekele ato ninnge bɛ sɛcɩ yɩ́ a, bɛ sɔ́ ananhɔlɛ ɛjɔlɛ’n mɔ bɛ tɩlɩ nɩn anun kpa.
Kalata nɩn ati 1.1-15, Pɩɛlɩ lɛ kan like ati m’ɔ man ɔ lɛ kɛlɛ yɩ́ kalata’n: ɔ ’kacɩ asɔnɩn mma’n-mɔ maan bɛ́ ti tanlan wawɛ nun ɛjɔlɛ’n mɔ bɛ hanlɩn helelɩ bɛ́ nɩn asʋ. Alimʋa ɛkacɩɛ dɩɛ’n (1.16-21) tʋ de Zozi Kilisi anwʋn Ɛjɔlɛkpa’n. Ɛjɔlɛkpa sɔ’n, yɩ́ Pɩɛlɩ muonun nʋn mmɔfʋɛ’n-mɔ di yɩ́ nwʋn adanzɩɛ kɛ ɔ tɩ ananhɔlɛ. Nyanmɩan mgbɔmanfʋɛ’n-mɔ mɔ Wawɛ Nwannzan-nwannzan’n hyʋɩnlɩn bɛ́ maan bɛ hɛlɛlɩ Ɛhɛlɛ Ɛjɔlɛ Nwannzan-nwannzan’n kʋsʋ di yɩ́ nwʋn adanzɩɛ. Kalata nɩn ati nnyuan nɩn anun, Pɩɛlɩ lɛ bɔ ato ngehelefʋɛ’n-mɔ nyɔlɩɛ’n-mɔ bɛ fa bɛ sɛcɩ asɔnɩn’n tɛtɛlɛ nun. Ɛkannzʋɛ mɔ Zudɩ kannzʋlɩ ato ngehelefʋɛ’n-mɔ yɩ́ kalata nɩn anun’n, yɩ́ kʋnmgba nɩn ala bɔbɔ yɛ̂ yɛ nwun yɩ́ Pɩɛlɩ kʋsʋ kalata nɩn anun ɔ. Kalata nɩn ati nsan nɩn anun, Pɩɛlɩ lɛ bua bɛ́ mɔ bɛ́ nwan yɛ́ Mɩn Zozi ngɔ sa ngɔ a man ɔ ngɔ bua man mân’n ndɛɛ’n. Ɔ lɛ kacɩ bɛ́ kɛ sɛ Kilisi a hyɛ nán ɔ walɩ man an, anɩn bɛ nwún yɩ́ kɛ Nyanmɩan a si abʋtalɛ. Ɔ sanlɩn kɛ Nyanmɩan ngulo man kɛ sʋanlan fɩ́ɩ́ minlin, nan ɔ kulo kɛ bɛ́ kʋalaa bɛ kaci bɛ́ asɩtanlan’n bɛ fi bɛ́ ɛtɛ nɩn anun bɛ jasʋ (3.9). Kalata nɩn agualɩɛ nun, Pɩɛlɩ kulo kɛ asɔnɩn mma’n-mɔ mɩan bɛ́ bʋ bɛ tanlan anwʋntɩɛ nun nán Nyanmɩan a nnyan man bɛ́ nwʋn ɛjɔlɛ ɛtɛ ɔ’a ngan man mɛlɛ mɔ Kilisi ’sa ba’n (3.11-18).
1Ahɩn ebisa
1Mɩ́n, Simʋn Pɩɛlɩ, mɔ n dɩ Zozi Kilisi akʋa ɛsɛ n dɩ yɩ́ bɔfʋɛ’n yɛ̂ mɩɩn kɛlɛ kalata ɛhɩ ɔ. Mɩɩn kɛlɛ mɩn nwan ɛmɔ kʋalaa mɔ ɛmɔ le dedi kʋnmgba’n mɔ yɛ le yɩ́ mɔ yɩ́ nwʋn cian’n. Zozi Kilisi m’ɔ tɩ yɛ́ Nyanmɩan m’ɔ tɩ yɛ́ Ngʋandefʋɛ nɩn adawʋlʋman, y’a nyan dedi sɔ’n ɔ sanlɩn kɛ ɔ tɩ sɛsɛ. 2Mɩn ’bisa ɛmɔ ahɩn. Nyanmɩan nʋn yɛ́ Mɩn Zozi, bɛ nwún ɛmɔ anwʋn anwunnvoe, ɛsɛ bɛ́ man ɛmɔ alʋa cɩ́cɩ bɛ́ nwʋn kpa. Bɛ mán ɛmɔ sɩ́ bɛ́ kpa.
3Zozi Kilisi mɔ Nyanmɩan tunmin’n wɔ yɩ́ nun’n, ɔ’a fa yɩ́ kʋalaa m’ɔ cian’n ɔ’a man yɛ́ maan yɛ bu amanmuo m’ɔ sɔ Nyanmɩan anyɩn. Ɔ’a man y’a sɩ Nyanmɩan m’ɔ fɛlɛlɩ yɛ́ kɛ yɛ yɔ́ kpa kɛ yɩ́ muonun ɛsɛ yɛ wʋ́lʋ yɩ́ anunminnyanmʋn nɩn anun’n. 4Yɩ́ ti, ninnge mgbakpa’n-mɔ m’ɔ falɩ bɔlɩ yɛ́ anɔhʋba’n, ɔ’a man yɛ́ sa a han bɛ́. Ninnge sɔ’n-mɔ dunman nun, ɛmɔ kʋala bɛ nwanndi mân ɛhɩ anun anyɩnbʋlʋ ninnge ɛtɛ’n m’ɔ man ewue’n nán ɛmɔ nʋn Nyanmɩan bɛ yɔ kʋn.
5Ɛhɩka ati, ɛmɔ bɔ́ mɔndɩnlɩn bɛ bɔ́ bala kpa bɛ tʋ́ bɛ́ dedi nɩn asʋ. Ɛmɔ nwún ngɛlɛ bɛ tʋ́ bɛ́ abalabɔ kpa nɩn asʋ. 6Ɛsɛ ɛmɔ bɔ́ mɔndɩnlɩn bɛ sɔ́ bɛ́ nwʋn bɛ tʋ́ ngɛlɛ nɩn asʋ. Ɛmɔ sí abʋtalɛ bɛ tʋ́ bɛ́ nwʋn ɛsɔ nɩn asʋ. Ɛmɔ fá bɛ́ nwʋn bɛ bɔ́ Nyanmɩan. 7Ɛmɔ anwʋn ɛbɔ mɔ b’a fa b’a bɔ Nyanmɩan’n, ɛmɔ húlo anianman’n-mɔ bɛ bʋ́ka sʋ. Ɛmɔ húlo menian’n-mɔ kʋalaatin bɛ tʋ́ anianman’n-mɔ ehulo nɩn asʋ. 8Ninnge m’ɔ di kɛ ɛmɔ nyan yɩ́ bɛ́ asɩtanlan nɩn anun nɩn anɩn. Sɛ ɛmɔ nyan yɩ́ dɔʋn an, ɔ ’man ɛmɔ di junman’n kanlanman kpa ɛsɛ bɛ ’sɩ yɛ́ Mɩn Zozi Kilisi bɛ kɔ bɛ́ nyunnun. 9Nan sʋanlan mɔ ninnge sɔ’n-mɔ nnʋn man yɩ́ nun’n, anɩn ɔ tɩ kɛ anyɩnsinlinwafʋɛ anaan ɔ tɩ kɛ sʋanlan m’ɔ nnwun man mʋa. Ɔ tɩ sʋanlan mɔ yɩ́ lʋa a fi kɛ yɩ́ ɛtɛ’n m’ɔ yɔlɩ yɩ́ daba’n, Nyanmɩan a fa a hye yɩ́. 10Yɩ́ sɔ ati, ɛfɛlɛ’n mɔ Nyanmɩan a fɛlɛ ɛmɔ ɛsɛ ɔ’a fa ɛmɔ’n, ɛmɔ bɔ́ mɔndɩnlɩn bɛ jínlan nun cɩnnjɩn kpa. Ɔ sanlɩn kɛ sɛ ɛmɔ yɔ yɩ́ sɔ a, ɛmɔ ngɔ tɔ man ɛtɛ nun lé. 11Ɛbɛlɛ nɩn anun yɛ̂ Nyanmɩan ’tike yɛ́ Mɩn Zozi Kilisi m’ɔ tɩ yɛ́ Ngʋandefʋɛ’n Belemgbin Mân’n m’ɔ mgbɛ man nun lé nɩn anʋan’n maan ɛmɔ wʋlʋ nun ɔ.
12Ɛhɩka ati, cɩan biala mɩn ’kacɩ ɛmɔ ninnge sɔ’n-mɔ kɛmɔ afɩ ɛmɔ sɩ bɛ́ daba’n maan ananhɔlɛ ɛjɔlɛ’n mɔ ɛmɔ tɩlɩ’n fɔtɔ ɛmɔ kpa. 13Kɛmɔ n dɛ tɩ asɩ’n, mɩn de mɩn di kɛ ɔ tɩ kpa kɛ n gácɩ ɛmɔ ninnge sɔ’n-mɔ nán ɛmɔ alʋa a nvi man bɛ́ nwʋn. 14Afɩ mɩn sɩ kɛ ɔ ngɔ hyɛ man, m ’ba wu kɛ yɛ́ Mɩn Zozi Kilisi hanlɩn helelɩ mɩ́n’n. 15Nan kɛmɔ n wuli man’n, mɩn ’bɔ mɔndɩnlɩn mɩn kɛlɛ kalata sɔ’n-mɔ mɩn sie ɛmɔ. Yɩ́ dɩɛ sɛ mɩn wu a, anɩn ɛmɔ alʋa nvi man ɛjɔlɛ sɔ’n-mɔ.
Zozi Kilisi anunminnyanmʋn’n
16Ɛhɩ, yɛ́ Mɩn Zozi Kilisi tunmin m’ɔ le yɩ́ ɔ nʋn yɩ́ ɛwalɛ nɩn anwʋn ɛjɔlɛ yɛ̂ yɛ hanlɩn yɛ helelɩ ɛmɔ ɔ. Nán ɛjɔlɛ mɔ menian’n-mɔ bɔ bɛ́ ti anun bɛ kan’n yɛ̂ yɛ hanlɩn ɔ. Nan yɛ nwunlin yɩ́ anunminnyanmʋn kpili’n yɛ́ nyɩnsʋ. 17Mɛlɛ mɔ Nyanmɩan m’ɔ tɩ Sɩɛ’n ’man yɩ́ asasʋɛ ɔ wula yɩ́ anunminnyanmʋn’n, anɩn yɛ wɔ ɛbɛlɛ. Yɩ́ anunminnyanmʋn kpili nɩn anun, Nyanmɩan kɔ man bɛ kɔ tɩ yɩ́ nɩn’n. Yɩ́ nwan: “Mɩ́n ehulo Baa y’ɔ le sʋanlan ɛhɩ. M’an fa mɩ́n lʋa’n kʋalaa m’an wula yɩ́ nun.” 18Mɛlɛ mɔ anɩn yɛ nʋn yɩ́ wɔ bʋka nwannzan-nwannzan nɩn asʋ ɛlɔ’n, yɛ́ bɔbɔ muonun yɛ tɩlɩ anɩɛ sɔ’n m’ɔ fi nyanmɩansʋ’n.
19Yɩ́ sɔ ati, yɛ de ɛjɔlɛ’n mɔ Nyanmɩan mgbɔmanfʋɛ’n-mɔ hanlɩn’n yɛ di kpa. Ɔ fata kɛ ɛmɔ yɔ anzʋɛ bɛ tie ɛjɔlɛ sɔ’n kpa. Ɔ sanlɩn kɛ ɛjɔlɛ sɔ’n-mɔ tɩ kɛ kanlannɩɛ m’ɔ lɛ ta awosin nun ɔ. Ɔ ’ta dede alɩbahɩan nzalama’n fite nán alɩ́ɛ nɩn a hɩn. Zozi Kilisi m’ɔ tɩ kɛ alɩbahɩan nzalama sɔ’n ’ta ɛmɔ ahʋnlɩn’n-mɔ anun. 20Yɩ́ bɛ-yue-asɩɛ, ɛmɔ nwún yɩ́ kɛ, ɛjɔlɛ’n mɔ Nyanmɩan mgbɔmanfʋɛ’n-mɔ hanlɩn, m’ɔ wɔ Ɛhɛlɛ Ɛjɔlɛ nɩn anun’n, nán bɛ́ ngʋnmɩn bɛ́ ti anun yɛ̂ bɛ bɔlɩ bɛ́ hanlɩn ɔ. 21Ɔ sanlɩn kɛ ɛjɔlɛ mɔ Nyanmɩan kɔ fɩtɩ nun ɔ kɔ hele’n, ɔ tɩ man like mɔ sʋanlan muonun kʋala kɛ ɔ bɔ yɩ́ ti anun ɔ kan ɔ. Nan Wawɛ Nwannzan-nwannzan’n m’ɔ wɔ mgbɔmanfʋɛ’n-mɔ anun’n y’ɔ man bɛ jʋjɔlɩ Nyanmɩan anʋan ɔ.
2Ato ngehelefʋɛ’n-mɔ
1Ɛhɩ, daba anɩn ato mgbɔmanfʋɛ-mɔ wɔ Nyanmɩan menian’n-mɔ anun. Ato ngehelefʋɛ-mɔ kʋsʋ ’ba fite fite ɛmɔ afian. Bɛ ’ba hehele ato ninnge nvɩalɩɛ nun bɛ sɛcɩ asɔnɩn’n. Menian sɔ’n-mɔ mɔ yɛ́ Mɩn a le bɛ́ ti fi bɛ́ ɛtɛ nɩn anun’n, b’a kaci bɛ́ nzin b’a si yɩ́. Bɛ́ nyɔlɩɛ sɔ’n ’ba man bɛ wu nvu nun. 2Menian dɔʋn ’ba fa bɛ́ atɩn ɛtɛ nɩn asʋ yɛ̂ bɛ́ nyɔlɩɛ ɛtɛ’n dunman nun, menian’n-mɔ ’ba han Nyanmɩan ananhɔlɛ atɩn nɩn anwʋn ɛjɔlɛ ɛtɛ. 3Esika anyɩnbʋlʋ’n dunman nun, ato ngehelefʋɛ sɔ’n-mɔ ’ba bɔ ɛmɔ apoo bɛ didi ɛmɔ anwʋn. Nan Nyanmɩan m’ɔ bua ndɛɛ nɩn a fa bɛ́ nwʋn ajʋnlɩn dada angʋnmɩn. Ɔ ngɔ hyɛ man fɩ́ɩ́ ɔ ’ba bɔ bɛ́ bʋsʋ.
4Afɩ nyanmɩansʋ mmɔfʋɛ’n-mɔ mɔ bɛ yɔlɩ ɛtɛ’n, Nyanmɩan Kpili a nva man bɛ́ nwʋn sa a nje man bɛ́. Nán ɔ’a hyɩ bɛ́ ɔ’a gua bɔnza kpili nɩn anun, lɩka m’ɔ tɩ awosin’n. Bɛ wɔ ɛbɛlɛ dede ɔ ’bua bɛ́ ndɛɛ. 5Nyanmɩan a nyaci man daba daba menian’n-mɔ anwʋn sa ɔ’a nje man bɛ́. Ɔ manlɩn esue kpili tɔlɩ dede ɔ nʋanlɩn menian ati anun ɛtɛ’n-mɔ mɔ anɩn bɛ wɔ mân sɔ nɩn anun’n. Bian’n mɔ bɛ fɛlɛ yɩ́ Nowe mɔ anɩn ɔ tu menian’n-mɔ fʋɔ kɛ bɛ bɔ́ bala kpa’n, ɔ nʋn menian nsʋ ala yɛ̂ Nyanmɩan Kpili lelɩ bɛ́ ngʋan ɔ. 6Nyanmɩan Kpili bɔlɩ Sodɔmʋn nʋn Gomɔɔ kulo’n-mɔ abʋsʋ. Ɔ tʋlɩ bɛ́ nun sɩ̂n dede bɛ tɔlɩ nzʋan. Ɔ’a yɔ bɛ́ sɔ maan bɛ nwun yɩ́ kɛ menian mɔ bɛ́ nyɩn nzɔ man yɩ́’n, kɛ bɛ́ ayuelɩɛ’n yue yɩ́ nɩn anɩn. 7Mɛlɛ sɔ’n, Lɔtʋ m’ɔ tɩ sʋanlan kpa, m’ɔ di menian’n-mɔ ɛtɛ’n mɔ bɛ yɔ nɩn anwʋn yalɛ’n, Nyanmɩan Kpili lelɩ yɩ́ ngʋan. 8Anɩn sɛsɛfʋɛ sɔ’n tɩ ɛtɛfʋɛ’n-mɔ afian. Ɛtɛfʋɛ sɔ’n-mɔ nyɔlɩɛ’n mɔ bɛ yɔ yɩ́ cɩan daa m’ɔ tɩ ɛtɛ ɔ nwun yɩ́’n, ɔ man ɔ di yalɛ. 9Ɛhɩka ati, yɛ́ Mɩn sɩ atɩn mɔ ɔ ’bu sʋ ɔ de bɛ́ mɔ b’a fa bɛ́ nwʋn b’a bɔ yɩ́’n fi emian nɩn anun. Nan ɛtɛfʋɛ’n-mɔ dɩɛ, mɔ Nyanmɩan a fa a sie bɛ́’n y’ɔ le ndɛɛ ebua’n mɔ ɔ ’bua bɛ́ ndɛɛ ebua cɩan nɩn anun’n. 10Menian mɔ bɛ mmu man Nyanmɩan Kpili tunmin’n like fɩ́ɩ́ mɔ ninnge ɛtɛ mɔ anwʋnnaan’n kulo’n yɛ̂ cɩan daa bɛ yɔ’n, bɛ́ yɛ̂ Nyanmɩan ’tua bɛ́ kalɛ nɩn ɔ.
Ato ngehelefʋɛ sɔ’n-mɔ mɔ n ganlɩn bɛ́ ɛjɔlɛ’n, bɛ nzulo man sʋanlan fɩ́ɩ́, ɛsɛ bɛ tu bɛ́ nwʋn. Bɛ́ nyɩn nzɔ man nyanmɩansʋ mmɔfʋɛ’n-mɔ mɔ bɛ le anunminnyanmʋn’n, nan bɛ kan bɛ́ nwʋn ɛjɔlɛ ɛtɛ. 11Kʋsʋ nyanmɩansʋ mmɔfʋɛ’n-mɔ muonun mɔ bɛ le anwʋnsɛlɛ kpa ɔ nʋn tunmin bɛ tala ato ngehelefʋɛ sɔ’n-mɔ’n, bɛ ngan man ɛjɔlɛ ɛtɛ bɛ ndia man bɛ́ wɔ Nyanmɩan anyunnun. 12Nan menian sɔ’n-mɔ nzɩ man ngɛlɛ fɩ́ɩ́. Bɛ yɔ bɛ́ ninnge’n-mɔ kɛ ebolo naan. Mɔ bɛ́ ti’n kɔ se bɛ́’n yɛ̂ bɛ yɔ ɔ. Bɛ́ ɛhyɩɛ nʋn bɛ́ ehuan ati yɛ̂ bɛ bɔlɩ bɛ́ ɔ. Menian sɔ’n-mɔ kan like mɔ bɛ nzɩ man yɩ́ nɩn anwʋn ɛjɔlɛ ɛtɛ. Bɛ ’wu sakpa kɛ ebolo naan’n-mɔ wu yɩ́’n. 13Yalɛ’n mɔ bɛ kele menian’n-mɔ’n, Nyanmɩan Kpili ’ba hele bɛ́ bie. Eyua sʋ kpa yɛ̂ bɛ yɔ bɛ́ ninnge ɛtɛ’n-mɔ ɔ. Sɛ ɛmɔ lɛ di ɛnyɩnmɩan nán bɛ ba ɛmɔ afian an, bɛ́ abalabɔ ɛtɛ’n gua ɛmɔ anyunnun asɩ. Ɛsɛ bɛ di apoo’n mɔ bɛ bɔ ɛmɔ nɩn anwʋn fɛ. 14Balasua ɛjɔlɛ yɛ̂ ɔ wɔ bɛ́ ajʋnlɩn nun ɔ. Cɩan daa bɛ yɔ ɛtɛ’n bɛ kɔ bɛ́ nyunnun. Bɛ laka menian’n-mɔ mɔ Nyanmɩan Anʋan Ɛjɔlɛ’n tɩlɩ man bɛ́’n maan bɛ gua kunman nun. Esika anyɩnbʋlʋ y’ɔ la bɛ́ nwʋn ɔ. Menian sɔ’n-mɔ a fa munnzue. 15Bɛ fi ananhɔlɛ atɩn nɩn asʋ b’a jasʋ. B’a minlin b’a fa Bozɔɔ awa Balamʋn m’ɔ kulo esika nɩn atɩn dɩɛ nɩn asʋ. Balamʋn sɔ’n, esika nɩn anyɩnbʋlʋ dunman nun, ɔ yɔlɩ nyɔlɩɛ ɛtɛ. 16Nan cɩan kʋn Nyanmɩan tuli yɩ́ nyunnun wɔ yɩ́ anzʋsɛlɛ nɩn anwʋn. Afɩ afunlunmun’n mɔ anɩn ɔ tɩ sʋ’n, ɔ tɩ naan m’ɔ njʋjɔ man. Afunlunmun’n kɔ jʋjɔ kɛ kulo sʋanlan jʋjɔ’n ɔ kɔ tua kpɔmanfʋɛ sɔ nɩn atɩn wɔ yɩ́ nyɔlɩɛ ɛtɛ nɩn anwʋn.
17Menian sɔ’n-mɔ tɩ kɛ asue mɔ ɔ’a sɩsan ɔ. Bɛ tɩ kɛ esue mɔ ɔ’a munlan mɔ anwʋnman’n nʋn yɩ́ a hɔ ɔ. Nyanmɩan Kpili a sesie bɛ́ lɩka awosin bibaa kpa nɩn anun. 18Bɛ kolo bɛ́ nʋan nun mgban. Bɛ sua bɛ́ mɔ kɩkaala bɛ fi ɛtɛfʋɛ’n-mɔ asa nun b’a foti’n ngaa bɛ man bɛ nɩan bɛ́ nyɔlɩɛ ɛtɛ’n-mɔ asʋ maan bɛ gua kunman nun biekun. 19Bɛ kan bɛ kele bɛ́ kɛ bɛ ’ba nyan fanwʋndi, nan kʋsʋ anɩn bɛ́ muonun bɛ tɩ ɛtɛ’n m’ɔ fa bɛ kɔ ewue nun’n nganga. Ɔ sanlɩn kɛ like m’ɔ sie sʋanlan’n man sʋanlan sɔ’n kaci yɩ́ kanga. 20Afɩ menian mɔ bɛ kɔ sɩ yɛ́ Mɩn yɛ́ Defʋɛ Zozi Kilisi, mɔ bɛ kɔ tɩ bɛ́ nwʋn fi mân nɩn anun ninnge nvuin nvuin’n-mɔ anwʋn’n, sɛ bɛ sa bɛ́ nzin ninnge sɔ’n-mɔ anwʋn biekun an, bɛ etolo mɔ bɛ kɔ tolo’n, anɩn daba dɩɛ’n tɩ kpa. 21Ɔ tɩ kpa man menian sɔ’n-mɔ kɛ ahan b’a nwun man Nyanmɩan atɩn’n, ɔ tala kɛ bɛ kɔ nwun yɩ́ nán b’a ju yɩ́ mala nwannzan-nwannzan’n m’ɔ kɔ hele bɛ́’n b’a tʋ’n. 22Mɔ ɔ’a tʋ bɛ́’n, ɔ kele kɛ anyɩnndala’n mɔ menian’n-mɔ bu’n tɩ ananhɔlɛ. Bɛ́ nwan: “Cʋa nɩn a sa yɩ́ nzin ɔ’a li like’n m’ɔ kpuli’n,” ɛsɛ “Kpolike’n mɔ b’a bia yɩ́’n, ɔ’a sa ɔ’a kunndo yɩ́ nwʋn asâ nɩn anun biekun.”
3Yɛ́ Mɩn ɛwalɛ’n
1Ehulo mma, ɛ ’nwun kalata’n m’ɔ tian yɩ́ nnyuan’n mɔ mɩɩn kɛlɛ mɩn bɛlɛ ɛmɔ’n. Kalata nnyuan sɔ’n kʋalaa anun, mɩn kacɩ ɛmɔ ninnge mɔ ɛmɔ sɩ yɩ́ daba’n mɩn man ɛmɔ ati tanlan sʋ kpa. 2Mɩn kulo kɛ ɛmɔ ati kacɩ ɛjɔlɛ’n mɔ Nyanmɩan mgbɔmanfʋɛ kʋnlʋn-ngʋnlʋn’n-mɔ hanlɩn yɩ́ daba’n. Ɛsɛ mɩn kulo kɛ ɛmɔ ati kacɩ yɛ́ Mɩn yɛ́ Defʋɛ’n mala’n mɔ ɛmɔ mmɔfʋɛ’n-mɔ sɩnlɩn ɛmɔ ɛlɔ bɛ hehelelɩ ɛmɔ’n.
3Mɩ́n ɛjɔlɛ’n m’ɔ li mʋa’n y’ɔ le kɛ, ɛmɔ nwún yɩ́ kɛ mɛlɛ kasian nɩn anun, menian mmie-mɔ ’ba fite fite. Menian sɔ’n-mɔ ’ba yɔ nyɔlɩɛ ɛtɛ’n mɔ bɛ́ muonun bɛ́ kunnun kulo’n. Bɛ ’ba gʋlʋ ɛmɔ anwʋn 4bɛ kan kɛ: “Asʋ Zozi a mmɔ man anɔhʋba kɛ ɔ ’ba ɔ? Nan ɔ wɔ nin? Ɔ sanlɩn kɛ, kɛ yɛ́ nan-mɔ wuli dada angʋnmɩn dede m’ɔ ju ɛnɛ’n, ninnge’n kʋalaa mɔ Nyanmɩan bɔlɩ’n, fɩ́ɩ́ kacili man!” 5Menian sɔ’n-mɔ, bɛ man bɛ́ lʋa fi bɛ́ nwʋn kɛ daba daba, Nyanmɩan Kpili le yɩ́ Nʋan Ɛjɔlɛ’n y’ɔ bɔlɩ anwunno nʋn asɩ ɔ. Ɔ man asɩɛ’n fi nzue nun fitelɩ, nan ɔ’a tɩ asɩɛ’n fi nzue nɩn anwʋn. 6Ɛsɛ Nyanmɩan kpili le nzue y’ɔ falɩ sɛcɩlɩ daba mân nɩn ɔ. Mân’n kʋalaa nʋanlɩn. 7Nan anwunno nʋn asɩɛ’n mɔ bɛ wɔ ɛwa ɛnɛ’n, Nyanmɩan Anʋan Ɛjɔlɛ kʋnmgba sɔ nɩn a fa bɛ́ a sie dede ɔ ’ju cɩan mɔ ɔ ’tʋ bɛ́ nun sɩ̂n. Ɔ’a fa bɛ́ ɔ’a sie dede ɔ ’ju cɩan mɔ ɔ ’bua mân’n ndɛɛ ɔ kun ɛtɛfʋɛ’n-mɔ.
8Ehulo mma, ɛjɔlɛ kʋn ɛhɩ, nán bɛ man bɛ́ lʋa fi. Ɛjɔlɛ sɔ’n y’ɔ le kɛ yɛ́ Mɩn anyunnun, cɩan kʋn tɩ kɛ afʋɛ akpɩɩ, yɛ̂ “afʋɛ akpɩɩ tɩ yɩ́ nyunnun cɩan kʋn.” 9Menian’n mmie-mɔ jʋnlɩn kɛ like’n mɔ yɛ́ Mɩn nwan ɔ ’yɔ’n, ɔ’a hyɛ yɩ́ nwʋn sʋnman. Nán yɩ́ sɔ ɔ, nán ɔ’a si abʋtalɛ ɛmɔ dunman nun. Ɔ sanlɩn kɛ ɔ ngulo man kɛ ɛmɔ nunhan bie fɩ́ɩ́ minlin, nan ɔ kulo kɛ bɛ́ kʋalaa bɛ fi bɛ́ ɛtɛ nɩn anun bɛ jasʋ. 10Nan kʋsʋ yɛ́ Mɩn ɛwalɛ cɩan’n, ɔ ’fu yɛ́ nun kɛ awofʋɛ. Cɩan sɔ’n, nyanmɩan’n ’ba han nun, ɔ ’man menian’n-mɔ anwʋn wʋsʋ bɛ́ nán yɩ́ bʋsʋ a nunnun. Sɩ̂n ’ba jue yala anwunno ɛlɔ ninnge’n-mɔ. Asɩɛ’n nʋn sʋ ninnge’n kʋalaa abʋsʋ ’ba bɔ.
11Sɛ ninnge’n-mɔ kʋalaa ayuelɩɛ’n tɩ sʋa a, anɩn ɛmɔ nɩ́an bɛ́ nwʋn kpa wɔ bɛ́ abalabɔ nɩn anun. Ɔ di kɛ ɛmɔ ɛnanndɩɛ’n yɔ nwannzan-nwannzan m’ɔ kele kɛ ɛmɔ a fa bɛ́ nwʋn b’a bɔ Nyanmɩan. 12Ɛmɔ tánlan bɛ nwʋ́nndɛ Nyanmɩan Kpili ɛwalɛ cɩan’n, nán ɛmɔ bɔ́ mɔndɩnlɩn bɛ yɔ́ like mɔ bɛ yɔ a, cɩan sɔ’n kɔ ju ndɛ’n. Cɩan sɔ’n, sɩ̂n’n ’yala anwunno ɛlɔ ninnge’n-mɔ ɔ bɔ bɛ́ bʋsʋ bɔkɔɔ! 13Nan yɛ́ dɩɛ, yɛ lɛ nwʋnndɛ anwunno fʋfɔlɛ’n, nʋn asɩɛ fʋfɔlɛ’n m’ɔ tɩ sɛsɛfʋɛ’n-mɔ lɩka mɔ Nyanmɩan Kpili a fa a bɔ yɛ́ anɔhʋba’n.
14Ɛhɩ ati, ehulo mma, kɛmɔ ɛmɔ lɛ nwʋnndɛ yɛ́ Mɩn ɛwalɛ’n, ɛmɔ bɔ́ mɔndɩnlɩn bɛ bɔ́ bala kpa. Yɩ́ dɩɛ, cɩan m’ɔ kɔ a’n, bɛ nnyan man ɛmɔ anwʋn ɛjɔlɛ ɛtɛ fɩ́ɩ́ bɛ ngan man wɔ yɩ́ nyunnun, nán ɛmɔ a tanlan wɔ alʋacɩcɩɛ nun. 15Ɛmɔ nwún yɩ́ kɛ abʋtalɛ’n mɔ yɛ́ Mɩn lɛ si’n, menian’n-mɔ ngʋan ele ti ɔ. Ɛjɔlɛ sɔ’n yɛ̂ Pɔlʋ m’ɔ tɩ yɛ́ nianman kpa’n le ngɛlɛ’n mɔ Nyanmɩan manlɩn yɩ́’n ɔ hɛlɛlɩ bɛlɛlɩ ɛmɔ nɩn ɔ. 16Yɩ́ kalata’n-mɔ kʋalaa m’ɔ kɔ hɛlɛ nɩn anun, ɔ kan ɛjɔlɛ sɔ’n. Yɩ́ kalata’n-mɔ anun, ɛjɔlɛ kpɔlɛ kpɔlɛ mmie-mɔ wɔ nun, bɛ́ bʋ ɛtɩɛ yɔ sɩ kpa. Menian mɔ bɛ nzɩ man like fɩ́ɩ́ mɔ bɛ́ dedi’n nza man bɛ́’n, bɛ kaci kaci ɛjɔlɛ sɔ’n-mɔ. Nyanmɩan Anʋan Ɛjɔlɛ bʋ nga’n, kɛ bɛ kaci kaci yɩ́ hɔ. Bɛ́ muonun bɛ lɛ yɔ bɛ́ nwʋn.
17Nan ɛmɔ dɩɛ, ehulo mma, b’a kacɩ ɛmɔ. Ɛmɔ nɩ́an bɛ́ nwʋn kpa, nán bɛ́ mɔ bɛ kpɔ Nyanmɩan nɩn a nnaka man ɛmɔ maan ɛmɔ a minlin man bɛ́ jinlanbɛlɛ kpa’n. 18Nan ɛmɔ bɔ́ mɔndɩnlɩn bɛ tánlan yɛ́ Mɩn Zozi m’ɔ tɩ yɛ́ Ngʋandefʋɛ nɩn anwunnvoe enwuan’n nʋn yɩ́ ɛsɩɛ nɩn anun bɛ hɔ́ bɛ́ nyunnun. Anunminnyanmʋn hán yɩ́ ɛnɛ, ɔ nʋn mɛlɛ daa! Amɩn.