1 TIMOTE

PƆLƱ KALATA’N

M’Ɔ LILI MƱA

HƐLƐLƖ NWANLƖN

TIMOTE’N

M’ɔ wɔ nun’n

Timote fi Likawonin mân nun kulo’n mɔ bɛ fɛlɛ yɩ́ Lisitili nɩn asʋ (Junman 14.6). Ɛnɛ bɛ fɛlɛ mân sɔ’n Tuluki mân. Timote asɩ’n tɩ *Gɛlɛkɩ sʋanlan yɛ̂ yɩ́ nin’n tɩ Zufʋ balasua. Pɔlʋ junman’n m’ɔ lili ɔ bɔlɩ Zozi anwʋn Ɛjɔlɛkpa’n Lisitɩlɩ kulo nɩn asʋ’n, Timote nʋn yɩ́ nin Eninsi nʋn yɩ́ nin anin dɩɛ Loyisi kɔ fa bɛ́ nwʋn kɔ man Zozi. Mɔ Pɔlʋ salɩ hɔlɩ Lisitɩlɩ ɛlɔ’n, ɔ falɩ Timote bɔlɩ yɩ́ nwʋn maan ɔ bʋkalɩ yɩ́ bɛ lili yɛ́ Mɩn junman’n (Junman 16.1-3).

Kalata ɛhɩ anun, yɛ nwun yɩ́ kɛ Pɔlʋ fi Efɛzɩ kulo’n m’ɔ wɔ Azi mân nɩn asʋ, ɔ’a hɔ Masedʋanɩn mân nun. Mɔ ɔ ’kɔ’n, ɔ kɔ yaci Timote Efɛzɩ ɛbɛlɛ kɛ ɔ tótua ato ngehelefʋɛ’n-mɔ atɩn (yɩ́ ti 1.3). Pɔlʋ hɛlɛlɩ kalata sɔ’n, ɔ wowulalɩ Timote anwʋnsɛlɛ ɔ nʋn afʋtu kpa m’ɔ tʋ de yɩ́ junman’n m’ɔ di yɩ́ asɔnɩn nɩn anun’n.

Kalata nɩn ati 1, 4 nʋn 6 nɩn anun, Pɔlʋ lɛ kan bɛ́ mɔ bɛ kekele ato ninnge bɛ yaci ananhɔlɛ nɩn anwʋn ɛjɔlɛ. Ato ninnge sɔ’n-mɔ tʋ de Nyanmɩan mala’n ɔ nʋn Zozi anwʋn dedi’n. Kalata nɩn ati 2, Pɔlʋ lɛ kan kele asɔnɩn mma’n-mɔ kɛ bɛ yɔ́ mmʋtʋɛ, ɛsɛ ɔ lɛ kekele bɛ́ bɛ́ asɔnɩn ɛyɔlɛ nɩn anwʋn ninnge. Kalata nɩn ati 3, ɔ lɛ kan atɩn’n m’ɔ sɛ kɛ asɔnɩn mgbain’n-mɔ nanndɩ sʋ nɩn ɛjɔlɛ. Kalata nɩn ati 4.7-6.21, Pɔlʋ lɛ wowula Timote anwʋnsɛlɛ kɛ ɔ lí junman’n ɔ héhele Nyanmɩan Anʋan Ɛjɔlɛ’n. Ɔ lɛ tu yɩ́ fʋɔ kɛ ɔ si yɔ nán ɔ’a nɛnɩan menian fâ fâ’n-mɔ mɔ bɛ wɔ asɔnɩn nɩn anun nɩn asʋ kɛ Zozi Kilisi akʋa kpa’n yɔ yɩ́’n. Kalata nɩn agualɩɛ nun, Pɔlʋ lɛ wowula Timote anwʋnsɛlɛ kɛ ɔ hʋ́n dedi nɩn ati kʋan kpa’n.

¹Timote,

Mɩn Pɔlʋ mɔ n dɩ Kilisi Zozi bɔfʋɛ’n, ɔ fi Nyanmɩan m’ɔ tɩ yɛ́ Ngʋandefʋɛ’n, ɔ nʋn Zozi Kilisi m’ɔ tɩ yɛ́ susuguasʋ’n dunman nun, mɩ́n yɛ̂ mɩɩn kɛlɛ kalata ɛhɩ mɩn nwan wɔ́ ɔ. ²Wɔ́ dedi nɩn ati, mɩn bu wɔ́ kɛ mɩ́n kunnun baa kpa bɔkɔɔ. Mɩn ’bisa wɔ́ ahɩn mɩn yɔ wɔ́ ɛcɩan’n mo.

Nyanmɩan m’ɔ tɩ Sɩɛ’n, ɔ nʋn Zozi Kilisi m’ɔ tɩ yɛ́ Mɩn’n, bɛ nwún wɔ nwʋn anwunnvoe, bɛ yɔ́ wɔ́ ye, bɛ cɩ́cɩ wɔ́ lʋa.

Ato ngehelefʋɛ’n-mɔ

³Ɛjɔlɛ’n mɔ mɩn ’kɔ Masedʋanɩn mân nɩn anun mɔ n ganlɩn n gelelɩ wɔ́’n, mɩɩn kacɩ wɔ́ biekun. N zelɩ wɔ́ kɛ ɛ tánlan Efɛzɩ kulo nɩn asʋ nán ɛ tótua ato ninnge’n mɔ menian’n mmie-mɔ lɛ kekele wɔ asɔnɩn nɩn anun’n. ⁴Kan kele bɛ́ kɛ bɛ yáci ɛhʋa m’ɔ man sʋanlan minlin yɩ́ dedi m’ɔ le yɩ́ wɔ Kilisi nun’n, nʋn bɛ́ nannan-mɔ dunman nɩn anwʋn akpʋlʋwa ndɩnndɩɩn esue’n. Ɔ man ngondin ba, ɔ man sʋanlan nnyan man dedi’n mɔ Nyanmɩan nanndɩ sʋ ɔ de yɩ́’n. ⁵Mɩɩn tu wɔ́ fʋɔ sɔ’n, yɩ́ dɩɛ, anɩn asɔnɩn mma’n-mɔ nyan ehulo wɔ bɛ́ afian, ehulo m’ɔ fi ahʋnlɩn mɔ nun a tɩ, m’ɔ tɩ fufue, mɔ de Nyanmɩan di sakpa. ⁶Menian’n mmie-mɔ fi abalabɔ atɩn kpa nɩn asʋ b’a jasʋ b’a fa bɛ́ nwʋn b’a wula ɛjɔlɛ mgban-mgban’n-mɔ anun. ⁷Bɛ kulo kɛ bɛ yɔ Nyanmɩan *mala’n ngehelefʋɛ, nan kʋsʋ ɛjɔlɛ mɔ bɛ́ muonun bɛ lɛ kan’n, bɛ ndɩ man yɩ́ bʋ, ɛsɛ ninnge’n muonun mɔ bɛ jin sʋ cɩnnjɩn bɛ lɛ kele’n, bɛ ndɩ man yɩ́ bʋ.

⁸Yɛ sɩ kɛ Nyanmɩan mala’n tɩ kpa, sɛ sʋanlan di sʋ kpa a. ⁹Afɩ yɛ sɩ kɛ menian mɔ bɛ bɔ bala kpa’n, nán bɛ́ ti yɛ̂ Nyanmɩan Kpili kpɛlɩ mala’n tʋlɩ ɛbɛlɛ ɔ. Nan menian mɔ bɛ bɔ bala ɛtɛ’n, bɛ́ mɔ bɛ jasʋ Nyanmɩan akɔmɩn anun’n, bɛ́ mɔ bɛ́ ti akunnun tɩ ɛtɛ’n, ɔ nʋn ɛtɛfʋɛ’n-mɔ, bɛ́ mɔ bɛ́ nyɩn nzɔ Nyanmɩan mɔ bɛ́ nyɩn ci ninnge mɔ bɛ tɩ nwannzan-nwannzan’n, bɛ́ mɔ bɛ kun bɛ́ sɩ nʋn bɛ́ nin-mɔ, bɛ́ mɔ bɛ tɩ kodiawu bɛ di awue, ¹⁰bɛ́ mɔ bɛ yɔ satɩlɩfʋɛ ninnge’n, mmelenzua mɔ bɛ nʋn bɛ́ manngʋn mmelenzua da anaan mmalasua mɔ bɛ nʋn bɛ́ manngʋn mmalasua da’n, bɛ́ mɔ bɛ tɔnɩn menian maan bɛ kaci nganga’n, bɛ́ mɔ bɛ di ato, ɔ nʋn bɛ́ mɔ bɛ kan ato ndâ, ɔ nʋn bɛ́ mɔ bɛ yɔ ɛtɛ ngacile ngacile dɔʋn biekun m’ɔ nʋn ananhɔlɛ ngehele kpa’n tɩ man kʋn’n. Bɛ́ ti yɛ̂ Nyanmɩan kpɛlɩ mala’n tʋlɩ ɛbɛlɛ ɔ. ¹¹Ananhɔlɛ ngehele sɔ’n y’ɔ le m’ɔ wɔ Ɛjɔlɛkpa’n mɔ b’a fa b’a wula mɩ́n sa nun nɩn anun’n. Anunminnyanmʋn Ɛjɔlɛkpa sɔ’n fi Nyanmɩan m’ɔ tɩ nyila baka nɩn ɛlɔ.

Pɔlʋ ’ba la Zozi Kilisi asɩ

¹²Yɛ́ Mɩn Zozi Kilisi mɔ ɔ’a wula mɩ́n anwʋnsɛlɛ wɔ mɩ́n junman elie nɩn anun’n, mɩn ’da yɩ́ asɩ. Mɩn ’da yɩ́ asɩ kɛ ɔ’a bu mɩ́n sʋanlan ɔ’a fa yɩ́ junman’n ɔ’a wula mɩ́n sa nun. ¹³Mɩ́n mɔ daba mɩn kan ɛjɔlɛ ɛtɛ mɩn tia yɩ́, mɔ ɛsɛ mɩn kele yɩ́ menian’n-mɔ yalɛ kpa’n, Zozi a nwun mɩ́n nwʋn anwunnvoe. Ɔ sanlɩn kɛ daba, anɩn mɩn nne man yɩ́ mɩn nni man, ɛsɛ anɩn mɩn nzɩ man kɛ like ɛtɛ yɛ̂ anɩn mɩn yɔ ɔ. ¹⁴Yɛ́ Mɩn a nwun mɩ́n nwʋn anwunnvoe kpili sʋnman. Ɔ’a man mɩn nʋn Zozi Kilisi y’a yɔ kʋn, mɩn de yɩ́ mɩn di, ɛsɛ n ne yɩ́ nwʋn ehulo.

¹⁵Ɛjɔlɛ kʋn m’ɔ tɩ ananhɔlɛ ɛjɔlɛ m’ɔ sɛ kɛ yɛ de yɛ di’n y’ɔ le kɛ Zozi Kilisi a a mân nɩn anun kɛ ɔ ’ba le ɛtɛfʋɛ’n-mɔ ati ngʋan. Nan ɛtɛfʋɛ’n-mɔ anun kpain’n y’ɔ le mɩ́n Pɔlʋ. ¹⁶Nan Nyanmɩan a nwun mɩ́n nwʋn anwunnvoe. Afɩ mɩ́n mɔ n dɩ ɛtɛfʋɛ’n-mɔ kʋalaa anun kpain’n dunman nun, bɛ́ mɔ bɛ ’ba le Zozi Kilisi bɛ di bɛ nyan ngʋan m’ɔ le man ayuelɩɛ’n, bɛ ’ba nwun yɩ́ kɛ Zozi Kilisi si abʋtalɛ kpa. ¹⁷Belemgbin mɔ yɩ́ mɛlɛ’n le man ayuelɩɛ, m’ɔ tɩ asɩ cɩan daa m’ɔ tɩ Nyanmɩan baa kʋnmgba cein mɔ bɛ nnwun man yɩ́’n, asasʋɛ nʋn anunminnyanmʋn hán yɩ́ dahuu! Amɩn!

Like mɔ Pɔlʋ nwan Timote yɔ́’n

¹⁸Mɩ́n wa Timote, junman’n mɔ m’an hele wɔ́ kɛ ɛ lí’n y’ɔ le kɛ ɛ tótua ato ninnge’n mɔ menian’n mmie-mɔ lɛ kekele yɩ́ ɛlɔ asɔnɩn nɩn anun’n. Junman sɔ’n tʋ de wɔ́ nwʋn ɛjɔlɛ’n mɔ Nyanmɩan mgbɔmanfʋɛ’n-mɔ lili mʋa hanlɩn’n. Sɛ ɛ di ɛjɔlɛ sɔ nɩn asʋ a, ɛ ’ba hʋala kʋan kpa’n kʋn, ¹⁹ɛ tila dedi’n mɔ ɛ le yɩ́ nɩn anun, ɛ nyan ajʋnlɩn kpa mɔ ahunnun ndɩtɩɛ nnʋn man yɩ́ nwʋn’n. Nan menian’n mmie-mɔ a ndie man afʋtu sɔ’n, ɔ man b’a minlin bɛ́ dedi’n. ²⁰Menian sɔ’n mmie-mɔ y’ɔ le Imene nʋn Alɛgɩzanndɩlɩ. M’an yɩ bɛ́ m’an man Abɔnsanmʋn maan bɛ nwun yɩ́ kɛ Nyanmɩan anwʋn ɛjɔlɛ ɛtɛ ɛhan’n tɩ man like kpa.

Bɛ yɔ́ asɔnɩn bɛ mán menian’n-mɔ kʋalaa

¹Ɛhɩ, like mɔ mɩɩn sɛlɛ kɛ bɛ lí mʋa bɛ yɔ́’n y’ɔ le kɛ bɛ bʋ́tʋ bɛ́ nwʋn bɛ héle Nyanmɩan, bɛ yɔ́ asɔnɩn, bɛ sɛ́lɛ Nyanmɩan bɛ mán menian’n-mɔ kʋalaatin, ɛsɛ bɛ lá Nyanmɩan asɩ. ²Ɛmɔ sɛ́lɛ Nyanmɩan bɛ mán mmelemgbin’n-mɔ, ɔ nʋn bɛ́ kʋalaa mɔ bɛ le tunmin bɛ sie mân’n. Yɩ́ dɩɛ, anɩn yɛ tanlan wɔ anzʋnunjɔ nun, yɛ nyan yɛ́ nwʋn yɛ sʋ Nyanmɩan, yɛ bɔ bala m’ɔ sɔ yɩ́ nyɩn. ³Like m’ɔ tɩ kpa mɔ Nyanmɩan m’ɔ tɩ yɛ́ Ngʋandefʋɛ’n kulo nɩn anɩn. ⁴Afɩ ɔ kulo kɛ menian’n-mɔ kʋalaatin nwun ananhɔlɛ atɩn’n bɛ nyan bɛ́ ti. ⁵Ɔ sanlɩn kɛ Nyanmɩan tɩ baa kʋnmgba cein. Sʋanlan kʋsʋ m’ɔ di kulo menian’n-mɔ nʋn Nyanmɩan asafian’n tɩ baa kʋnmgba cein. Sʋanlan sɔ’n y’ɔ le Kilisi Zozi m’ɔ kacili yɩ́ nwʋn kulo sʋanlan’n. ⁶Yɩ́ muonun, ɔ’a fa yɩ́ nwʋn ɔ’a bɔ afɔlɩɛ ɔ’a yɩ tɛɛ ɔ’a tua kulo menian’n-mɔ kʋalaatin ɛtɛ nɩn ati kalɛ. Mɔ tɛmʋn’n juli’n, Kilisi yɔlɩ yɩ́ sɔ maan bɛ nwunlin yɩ́ kɛ Nyanmɩan kulo kɛ kulo menian’n-mɔ kʋalaatin nyan bɛ́ ti. ⁷Ɛhɩka ati, ɔ’a yɩ mɩ́n kɛ n gán yɩ́ Nʋan Ɛjɔlɛ’n, ɛsɛ n gáci yɩ́ bɔfʋɛ m mán bɛ́ mɔ bɛ tɩ man Zufʋ’n nyán dedi ɛsɛ bɛ nwún ananhɔlɛ nɩn anwʋn atɩn’n. Ananhɔlɛ yɛ̂ mɩɩn kan ɔ, mɩn nni man ato.

⁸Yɩ́ ti, mɩn kulo kɛ lɩka kʋalaatin, mmelenzua’n-mɔ sɛ́lɛ Nyanmɩan. Bɛ ’sɛlɛ a, bɛ kúku bɛ́ sa’n-mɔ asʋ anwunno wɔ anwʋntɩɛ nun, bɛ yɩ́ bɛ́ kunnun, nán bɛ man akpʋlʋwa esue ba bɛ́ afian.

⁹Ɛsɛ mɩn kulo kɛ mmalasua’n-mɔ kʋsʋ wowula bɛ́ nwʋn kɛ ɔ sɛ fata’n. Nán bɛ wowula bɛ́ nwʋn bɛ kele bɛ́ nwʋn, nan bɛ wówula bɛ́ nwʋn kɛ ɔ sɛ fata’n. Nán bɛ nwan bɛ́ ti’n-mɔ ngacile ngacile, nán bɛ sɩsa njʋaba’n-mɔ bɛ sesie bɛ́ nwʋn, nán bɛ kala ɛtanlan mɔ yɩ́ gua yɔ sɩ’n bɛ kele bɛ́ nwʋn. ¹⁰Nan bɛ bɔ́ bala kpa m’ɔ sɛ kɛ mmalasua mɔ bɛ lɛ sʋ Nyanmɩan’n bɔ’n.

¹¹Ɔ sɛ kɛ mmalasua’n-mɔ bɛ́bɛlɛ bɛ́ nwʋn asɩ, bɛ tánlan koun, bɛ tíe ninnge’n mɔ mmelenzua’n-mɔ lɛ kele’n. ¹²Mɩn ngulo man kɛ balasua kekele ninnge anaan ɔ fʋ belenzua sʋ. Nan mɩn kulo kɛ ɔ sie yɩ́ nwʋn’n koun. ¹³Ɔ sanlɩn kɛ Adamʋn yɛ̂ Nyanmɩan lili mʋa ɔ bɔlɩ yɩ́ asannan nán ɔ’a bɔ Ɛvʋ kʋsʋ ɔ. ¹⁴Nán Adamʋn yɛ̂ bɛ lakalɩ yɩ́ ɔ. Nan balasua’n yɛ̂ bɛ lakalɩ yɩ́ mɔ yɩ́ nyɩn a nzɔ man Nyanmɩan ɔ. ¹⁵Nan kʋsʋ, yɩ́ biala, kɛmɔ balasua’n tɩ ɛta’n, sɛ ɔ bɔ mɔndɩnlɩn ɔ tila yɩ́ dedi nɩn anun, ɔ kulo Nyanmɩan ɔ tanlan wɔ anwʋntɩɛ nun nán ɔ’a ngele man yɩ́ nwʋn an, ɔ ’nyan yɩ́ ti.

Asɔnɩn nɩn asʋ mgbain’n-mɔ

¹Ɛjɔlɛ ɛhɩ mɔ mɩɩn kan’n tɩ ananhɔlɛ: sɛ sʋanlan kʋn kulo kɛ ɔ di asɔnɩn nɩn asʋ kpain an, anɩn like kpa yɛ̂ ɔ’a kpʋnndɛ ɔ. ²Nan kʋsʋ sʋanlan mɔ ɔ ’di asɔnɩn nɩn ati’n, ɔ di kɛ ɔ yɔ́ sʋanlan mɔ bɛ nnyan man yɩ́ nwʋn ɛjɔlɛ ɛtɛ fɩ́ɩ́ bɛ ngan man. Ɔ ja balasua kʋnmgba cein. Ɔ sɩ yɩ́ nwʋn sisa. Ɔ ’yɔ like a, ɔ jʋnlɩn yɩ́ nwʋn kpa. Ɔ bɔ abalabɔ m’ɔ fata, ɔ man menian’n-mɔ anyɩn sɔ yɩ́. Sɛ sʋanlan ba tʋ yɩ́ a, ɔ sɔ yɩ́ nun kanlanman. Ɔ tɩ sʋanlan m’ɔ kʋala like kele. ³N’ɔ yɔ kɔnʋnmɩnnzan, ɛsɛ n’ɔ yɔ sʋanlan kpukpo-kpukpo. Ɔ tɩ sʋanlan mɔ yɩ́ ahʋnlɩn la asɩ m’ɔ mgbʋndɛ man butule. N’ɔ yɔ sʋanlan mɔ yɩ́ nyɩn bʋlʋ esika. ⁴Ɔ yɔ́ sʋanlan mɔ yɩ́ muonun ɔ kʋala yɩ́ awulo nɩn asʋ nɩan, mɔ yɩ́ mma’n-mɔ anyɩn sɔ yɩ́ kpa. ⁵Ɔ sanlɩn kɛ sʋanlan mɔ yɩ́ muonun ɔ ngʋala man yɩ́ awulo nɩn asʋ nɩan’n, ɔ ’yɔ sɛ nán ɔ’a hʋala ɔ’a nɩan Nyanmɩan Kpili asɔnɩn mma’n-mɔ asʋ? ⁶Nán man ɔ yɔ sʋanlan mɔ bɛlɛ mɔ ɔ’a fa yɩ́ nwʋn ɔ’a man Nyanmɩan. Afɩ ɔ kʋala kɛ ɔ tu yɩ́ nwʋn kɛ Abɔnsanmʋn yɔlɩ yɩ́ mɔ yɩ́ ti yɛ̂ Nyanmɩan ’ba bua yɩ́ ndɛɛ’n. ⁷Ɔ fata kɛ ɔ yɔ sʋanlan mɔ bɛ́ mɔ bɛ nzɩ Nyanmɩan’n de yɩ́ di, nán b’a ngʋlʋ man yɩ́ nwʋn, nán Abɔnsanmʋn kʋsʋ asa a ngan man yɩ́.

Asɔnɩn nɩn asʋ bʋkafʋɛ’n-mɔ

⁸Asɔnɩn nɩn asʋ bʋkafʋɛ’n-mɔ kʋsʋ, ɔ fata kɛ bɛ yɔ́ menian mɔ bɛ fɛlɩ bɛ́, mɔ bɛ di ananhɔlɛ. Nán bɛ yɔ kɔnʋnmɩnnzan, nán bɛ yɔ menian mɔ bɛ́ nyɩn bʋlʋ esika. ⁹Ɔ fata kɛ bɛ nyan ajʋnlɩn kpa nán b’a tila bɛ́ dedi’n m’ɔ tɩ nvɩalɩɛ nun like nɩn anun kpa. ¹⁰Menian sɔ’n-mɔ, bɛ sá bɛ́ nɩ́an kʋalaaka, nán sɛ ɛmɔ a ndɩ man bɛ́ nwʋn ɛjɔlɛ ɛtɛ fɩ́ɩ́ a, bɛlɛ mɔ anɩn bɛ lɛ ba li junman sɔ nɩn ɔ.

¹¹Ɔ sɛ kɛ bɛ́ yɩ-mɔ kʋsʋ yɔ́ mmalasua mɔ bɛ fɛlɩ bɛ́. Nán bɛ yɔ mmalasua mɔ bɛ kan menian anwʋn ɛjɔlɛ ɛtɛ bɛ sɛcɩ bɛ́ dunman. Bɛ lé bɛ́ nwʋn bɛ lí. Bɛ lí ananhɔlɛ wɔ ninnge kʋalaa anun.

¹²Ɔ sɛ kɛ asɔnɩn nɩn asʋ bʋkafʋɛ’n-mɔ já balasua kʋnmgba cein, ɛsɛ bɛ hʋ́ala bɛ nɩ́an bɛ́ mma’n-mɔ nʋn bɛ́ awulo nɩn asʋ kpa. ¹³Afɩ bɛ́ mɔ bɛ di bɛ́ junman’n kpa’n, menian’n-mɔ anyɩn sɔ bɛ́, ɛsɛ bɛ́ dedi’n mɔ bɛ le yɩ́ wɔ Zozi Kilisi anun’n, ɔ jinlan yɩ́ ja nun kpa.

Nyanmɩan nvɩalɩɛ nun like kpili kpa’n

¹⁴Timote, mɩɩn kɛlɛ wɔ́ kalata ɛhɩ, n ne anyɩndasʋɛ kɛ ɔ ngɔ hyɛ man fɩ́ɩ́ mɩn ’ba a wɔ́ nwʋn ɛlɔ. ¹⁵Nan kʋsʋ sɛ mɩn cɛ nán m malɩ man an, kalata ɛhɩ ’ba hele wɔ́ bala m’ɔ sɛ kɛ Nyanmɩan awulo amma’n-mɔ bɔ’n. Nyanmɩan awulo amma sɔ’n-mɔ y’ɔ le Tɩasɩfʋɛ Nyanmɩan asɔnɩn mma’n-mɔ. Asɔnɩn mma sɔ’n-mɔ tɩ kɛ sua mpila, bɛ suan ananhɔlɛ’n. ¹⁶Yɛ́ kʋalaa yɛ nwun yɩ́ yuein, Nyanmɩan a yɩ nvɩalɩɛ nun like kpili kpa ɔ’a hele yɛ́. Like sɔ’n y’ɔ le Zozi.

Ɔ’a kaci yɩ́ nwʋn kulo sʋanlan.

Nyanmɩan Wawɛ nɩn a hele kɛ

ɔ tɩ Nyanmɩan Awa sɛsɛfʋɛ.

Nyanmɩan mmɔfʋɛ’n-mɔ a nwun yɩ́.

Yɩ́ nwʋn ɛjɔlɛ’n, b’a bɔ

b’a hele mân nɩn anun menian’n-mɔ.

Mân nɩn anun menian’n-mɔ a le yɩ́ a li.

Ɔ’a fʋ ɔ’a hɔ nyanmɩansʋ

wɔ anunminnyanmʋn nun.

Ato ngehelefʋɛ’n-mɔ

¹Nyanmɩan Wawɛ’n kan yɩ́ yuein kɛ mɛlɛ kasian nɩn anun, menian mmie-mɔ mma nne man Kilisi bɛ nni man kʋ́n. Nan bɛ ’fa bɛ́ nwʋn bɛ bɔ ato ngehelefʋɛ’n-mɔ, ɛsɛ bɛ ’di wawɛ ɛtɛ’n-mɔ ngehele dɩɛ’n-mɔ asʋ. ²Bɛ ’man apoo mma atofʋɛ’n-mɔ kolo bɛ́ nʋan nun bɛ laka bɛ́. Atofʋɛ sɔ’n-mɔ, bɛ le man ajʋnlɩn kʋ́n. Bɛ́ ajʋnlɩn’n ngan man ɛjɔlɛ ngele man bɛ́ kʋ́n. ³Bɛ ’kekele kɛ ajaa’n tɩ man like kpa, ɛsɛ like mɔ bɛ di’n, bie tɩ man kpa mɔ bɛ di ɔ. Nan kʋsʋ Nyanmɩan bɔlɩ ninnge sɔ’n-mɔ kɛ menian mɔ bɛ de Kilisi bɛ di mɔ b’a nwun ananhɔlɛ’n, bɛ yɔ́ asɔnɩn, bɛ lá Nyanmɩan asɩ, nán bɛ lí ninnge sɔ’n-mɔ. ⁴Ninnge’n mɔ Nyanmɩan Kpili bɔlɩ’n, yɩ́ kʋalaa tɩ kpa, baa kʋn nnʋn man nun m’ɔ tɩ man kpa ɔ. Yɩ́ ti ɔ sɛ kɛ yɛ da Nyanmɩan asɩ nán yɛ sɔ yɩ́ kʋalaa anun. ⁵Ɔ sanlɩn kɛ Nyanmɩan Anʋan Ɛjɔlɛ’n nʋn asɔnɩn ɛyɔlɛ’n, ɔ man ninnge kʋalaa anwʋn tɩ wɔ Nyanmɩan anyunnun.

Zozi Kilisi akʋa kpa’n

⁶Sɛ ɛ kekele anianman’n-mɔ ninnge ɛhɩ-mɔ a, ɛ ’ba kaci Zozi Kilisi akʋa kpa. Dedi nɩn anwʋn ngehele kpa’n mɔ ɛ nanndɩ sʋ’n y’ɔ tɩ wɔ́ ɛkala nɩn alɩɛ ɔ. ⁷Ɛhʋa ɛjɔlɛ mgban-mgban’n m’ɔ nʋn dedi’n tɩ man kʋn’n, yaci gua. Nan bɔ mɔndɩnlɩn fa wɔ́ nwʋn bɔ Nyanmɩan kpa. ⁸Anwʋnnaan nɩn anun ekpunndian’n tɩ like kpa, nan kʋsʋ ɔ tɩ man cɩnnjɩn. Nan like mɔ bɛ yɔ a, Nyanmɩan kulo’n, ɔ tɩ kpa wɔ like biala anun. Ɔ sanlɩn kɛ sɛ yɛ bɔ bala sɔ nɩn an, anɩn yɛ sɩ kɛ yɛ le ngʋan m’ɔ le man ayuelɩɛ wɔ mɛlɛ ɛhɩ anun, ɔ nʋn mɛlɛ’n m’ɔ lɛ ba nɩn anun.

⁹Ɛjɔlɛ ɛhɩ tɩ ananhɔlɛ m’ɔ sɛ kɛ sʋanlan de di ɔ. ¹⁰Yɩ́ sɔ ati yɛ̂ yɛ lɛ di junman ɛsɛ yɛ lɛ kpɩlɩ ɔ. Ɔ sanlɩn kɛ y’a fa yɛ́ anyɩndasʋɛ’n kʋalaa y’a wula Tɩasɩfʋɛ Nyanmɩan’n m’ɔ tɩ menian’n-mɔ kʋalaa Ngʋandefʋɛ nɩn anun. Nan kʋsʋ, menian mɔ bɛ de yɩ́ bɛ di’n, bɛ́ ala yɛ̂ ɔ de bɛ́ ɔ.

¹¹Kekele ninnge sɔ’n-mɔ nán kan fua sʋ kpa maan bɛ yɔ́. ¹²Ɛ tɩ batʋnman, kʋsʋ n’ɛ man sʋanlan fɩ́ɩ́ tʋtʋ wɔ́ nyunnun ngɛsɛlɛ. Nan wɔ́ ɛjʋjɔlɛ nun o, wɔ́ abalabɔ nun o, wɔ́ ehulo mɔ ɛ fa kulo menian’n-mɔ o, wɔ́ dedi nun o, wɔ́ anwʋntɩɛ nun o, man menian mɔ bɛ le dedi’n, bɛ nɩ́an wɔ́ dɩɛ nɩn asʋ bɛ yɔ́ bie. ¹³Kɩnnga Ɛhɛlɛ Ɛjɔlɛ’n bagua nun, kan Nyanmɩan Anʋan Ɛjɔlɛ’n wowula asɔnɩn mma’n-mɔ anwʋnsɛlɛ, ɛsɛ kekele bɛ́ ninnge dede maan m mála. ¹⁴Mɛlɛ mɔ Nyanmɩan mgbɔmanfʋɛ’n-mɔ hanlɩn wɔ́ nwʋn ɛjɔlɛ, mɔ asɔnɩn mgbain’n-mɔ falɩ bɛ́ sa fualɩ wɔ́ nwʋn’n, wawɛ nun junman’n mɔ Nyanmɩan falɩ manlɩn wɔ́’n, n’ɛ bubu wɔ́ nyɩn gua sʋ. ¹⁵Tɩ wɔ́ nyɩn di junman sɔ’n maan bɛ́ kʋalaa bɛ nwún yɩ́ kɛ ɛ lɛ bɔ mɔndɩnlɩn. ¹⁶Sie wɔ́ muonun wɔ́ nwʋn ye, ɛsɛ nɩan wɔ́ ninnge’n mɔ ɛ kekele’n kʋsʋ asʋ, nán mian wɔ́ bʋ. Ɔ sanlɩn kɛ, sɛ ɛ yɔ yɩ́ sɔ a, wɔ́ muonun ɛ ’nyan wɔ́ ti, ɛsɛ bɛ́ mɔ bɛ tie wɔ́’n kʋsʋ ’nyan bɛ́ ti.

Pɔlʋ ’ba tu Timote fʋɔ

¹N’ɛ fa ahʋnlɩn kpili kan ɛjɔlɛ kele sʋanlan kpain. Nan sɛ ɛ ’kan ɛjɔlɛ ɛ kele yɩ́ ɛ tu yɩ́ fʋɔ a, bu yɩ́ kɛ yɩ́ y’ɔ wʋlɩ wɔ́ ɔ. Bu mgbafɛlɛ’n-mɔ kɛ wɔ́ nianman mmelenzua y’ɔ le bɛ́. ²Bu mmalasua mgbain’n-mɔ kɛ wɔ́ nin y’ɔ le bɛ́. Bu ndalua’n-mɔ kʋsʋ kɛ wɔ́ nianman mmalasua y’ɔ le bɛ́. Sɛ ɛ ’kan ɛjɔlɛ ɛ kele bɛ́ ɛ tu bɛ́ fʋɔ a, kan wɔ anwʋntɩɛ nun kpa bɔkɔɔ.

Kunlannvʋɛ’n-mɔ

³Kunlannvʋɛ mmalasua’n-mɔ mɔ bɛ le man sʋanlan fɩ́ɩ́ m’ɔ bʋka bɛ́’n, nɩan bɛ́ lɩka wɔ anyɩnnzɔ nun kpa. ⁴Nan sɛ kunlannvʋɛ balasua kʋn le yɩ́ mma-mɔ a, anaan yɩ́ nnʋnman-mɔ a, kekele bɛ́ kɛ bɛ́ Nyanmɩan junman’n m’ɔ fata kɛ bɛ di mʋa bɛ di’n y’ɔ le kɛ bɛ nɩ́an bɛ́ nwʋn amma’n-mɔ. Bɛ yɔ́ yɩ́ sɔ bɛ síe mɔ bɛ́ nwʋn amma’n-mɔ yɔlɩ manlɩn bɛ́ nɩn abʋsʋ. Yɩ́ sɔ yɛ̂ Nyanmɩan Kpili kulo ɔ. ⁵Balasua m’ɔ tɩ kunlannvʋɛ sakpa, m’ɔ le man sʋanlan fɩ́ɩ́ m’ɔ nɩan yɩ́’n, yɩ́ dɩɛ, ɔ fa yɩ́ lʋa’n kʋalaa ɔ wula Nyanmɩan Kpili asa nun. Ɔ bɔ mɔndɩnlɩn ɔ sɛlɛ yɩ́ kɔngɔɛ nʋn eyua kɛ ɔ nɩ́an yɩ́ sʋ. ⁶Nan kunlannvʋɛ m’ɔ lɛ di mân’n, sɛ yɩ́ nyɩn wɔ sʋ bɔbɔ a, anɩn ɔ tɩ kɛ ɔ’a wu. ⁷Kan ɛjɔlɛ sɔ’n kele bɛ́, nán sʋanlan fɩ́ɩ́ a nnyan man bɛ́ nwʋn ɛjɔlɛ ɛtɛ a ngan man. ⁸Afɩ sɛ sʋanlan kʋn nnɩan man yɩ́ nwʋn amma’n-mɔ, cilili yɩ́ ata dɩɛ nɩn anun menian’n-mɔ a, anɩn ɔ tɩ kɛ ɔ’a yaci yɩ́ dedi’n ɔ’a tʋ. Sʋanlan m’ɔ nzɩ man Nyanmɩan’n tɩ kpa tala yɩ́.

⁹Kunlannvʋɛ balasua mɔ ɛ ’ka yɩ́ wula kunlannvʋɛ’n-mɔ anun’n, man ɔ yɔ́ balasua mɔ ɔ’a li afʋɛ abulasian, m’ɔ jalɩ belenzua kʋnmgba cein. ¹⁰Ɛsɛ ɔ yɔ́ balasua mɔ menian’n-mɔ bɔ yɩ́ dunman kpa, mɔ ɔ’a ta yɩ́ mma’n-mɔ kpa, mɔ ɛyɛfʋɛ tʋ yɩ́ a, ɔ sike yɩ́ kanlanman, ɔ nwunnzin Nyanmɩan menian’n-mɔ aja nɩn anwʋn, ɔ bʋka alʋabɔfʋɛ’n-mɔ, mɔ ɛsɛ ɔ yɔ nyɔlɩɛ ngacile kpa’n kʋalaatin’n.

Kunlannvʋɛ ndalua’n-mɔ

¹¹Nan kunlannvʋɛ ndalua’n-mɔ, n’ɛ ka bɛ́ wula nun. Ɔ sanlɩn kɛ sɛ bian ajaa ɛjɔlɛ tɔ bɛ́ ti anun an, anɩn b’a kaci bɛ́ nzin b’a si Kilisi. ¹²B’a tʋn ndâ’n mɔ bɛ lili mʋa bɛ hanlɩn wɔ Kilisi anyunnun’n. ¹³Sɛ bɔbɔ ɛ kɛlɛ bɛ́ dunman an, bɛ nyɔ man like kpa fɩ́ɩ́, nan bɛ cinnin awulo’n-mɔ anun. M’ɔ tɩ yalɛ biekun’n y’ɔ le kɛ adawu mgbili ɛbɔ nʋn cenjin yɛ̂ bɛ di ɔ. Ɛjɔlɛ m’ɔ nvata man mɔ bɛ kan’n yɛ̂ bɛ kan ɔ. ¹⁴Ɛhɩka ati, mɩn kulo kɛ kunlannvʋɛ ndalua’n-mɔ já mmian, bɛ wʋ́ mma, bɛ nɩ́an bɛ́ awulo’n-mɔ asʋ, nán bɛ́ mɔ bɛ kpɔ yɛ́ nɩn a nnyan man yɛ́ nwʋn ɛjɔlɛ ɛtɛ a ngan man. ¹⁵Mɩɩn kan sɔ, ɔ sanlɩn kɛ bɛ́ mmie-mɔ fi ananhɔlɛ atɩn nɩn asʋ b’a jasʋ dada angʋnmɩn b’a fa Abɔnsanmʋn dɩɛ nɩn asʋ. ¹⁶Sɛ balasua kʋn le dedi nán kunlannvʋɛ mmalasua-mɔ gua yɩ́ sa sʋ a, ɔ nɩ́an bɛ́. N’ɔ yaci bɛ́ tʋ asɔnɩn nɩn asa sʋ, nán asɔnɩn nɩn a hʋala ɔ’a nɩan kʋnlannvʋɛ mmalasua’n-mɔ mɔ sakpa bɛ le man sʋanlan fɩ́ɩ́ m’ɔ nɩan bɛ́’n.

Asɔnɩn nɩn asʋ mgbain’n-mɔ

¹⁷Asɔnɩn nɩn asʋ mgbain’n-mɔ mɔ bɛ nɩan asɔnɩn nɩn asʋ kpa’n, ɔ fata kɛ bɛ man bɛ́ anyɩnnzɔ nʋn ahatua kpa, nán yɩ́ lɩlɩ bɛ́ mɔ bɛ kan Nyanmɩan Anʋan Ɛjɔlɛ’n, mɔ ɛsɛ bɛ kekele ninnge’n. ¹⁸M’ɔ man mɩɩn kan sɔ’n y’ɔ le kɛ, b’a hɛlɛ wɔ Ɛhɛlɛ Ɛjɔlɛ nɩn anun kɛ: Ɛnalɛ’n m’ɔ lɛ tetia *bele nɩn asʋ’n, n’ɛ cɩcɩ yɩ́ nʋan’n. Ɛsɛ b’a hɛlɛ yɩ́ biekun kɛ: Sʋanlan m’ɔ lɛ di junman’n, yɩ́ ahatua m’ɔ fata’n, bɛ fá bɛ mán yɩ́.¹⁹Asɔnɩn nɩn asʋ kpain kʋn mɔ bɛ kɔ tʋn yɩ́ ɛsʋan’n, sɛ menian nnyuan anaan nsan a nni man yɩ́ nwʋn adanzɩɛ a, n’ɛ de tʋ nun. ²⁰Bɛ́ mɔ bɛ kɔ yɔ like ɛtɛ’n, tu bɛ́ nyunnun bagua nun maan ɛhɩnlɩn-mɔ súlo nán bɛ́ kʋsʋ b’a nyɔ man ɛtɛ sɔ’n bie.

²¹Nyanmɩan Kpili anyunnun, Kilisi Zozi nʋn nyanmɩansʋ mmɔfʋɛ’n-mɔ kʋsʋ anyunnun, mɩn kan ndâ kɛ ɛ lí ngehele sɔ-mɔ asʋ. Yɩ́ ti, n’ɛ nɩan sʋanlan anyunnun wɔ like biala anun, n’ɛ kulo menian’n-mɔ bie ɛ yaci bie.

²²N’ɛ ku fa wɔ́ sa sie sʋanlan ati asʋ, ɛ fa asɔnɩn’n junman wula yɩ́ sa nun, ɔ sanlɩn kɛ sɛ ɔ’a yɔ ɛtɛ a, yɩ́ ɛtɛ sɔ’n ’kan wɔ́ bie. Wɔ́ muonun, nɩan wɔ́ nwʋn kpa, man wɔ́ nwʋn tɩ́. ²³Kɛmɔ wɔ́ kʋ’n jɩjɩ wɔ́ m’ɔ man ɛ njɛ man nán a fʋkɛ’n, n’ɛ nʋn nzue ngʋnmɩn ala, nan nʋn divɩn nganngan. ²⁴Menian’n mmie-mɔ ɛtɛ mɔ bɛ kɔ yɔ’n, bɛ di mʋa bɛ nwun yɩ́ yuein kʋalaaka nán b’a bua bɛ́ ndɛɛ’n. Nan mmie-mɔ kʋsʋ dɩɛ’n, bɛ di mʋa bɛ bua bɛ́ ndɛɛ kʋalaaka nán b’a nwun yɩ́ kɛ b’a yɔ ɛtɛ. ²⁵Yɩ́ sɔ kʋsʋ ala, nyɔlɩɛ kpa mɔ sʋanlan kɔ yɔ’n, bɛ nwun yɩ́ yuein, yɛ̂ nunhan kʋsʋ mɔ bɛ ngʋala bɛ nnwun man yɩ́ ɛbɛlɛ ala’n, ɔ nvɩa man lé.

Nganga’n-mɔ

¹Bɛ́ kʋalaa mɔ bɛ tɩ nganga’n, bɛ mán bɛ́ nyɩn sɔ́ bɛ́ mɩn-mɔ kpa, nán menian’n-mɔ a nzɛcɩ man Nyanmɩan dunman, ɛsɛ b’a ngan man yɛ́ ngehele nɩn nwʋn ɛjɔlɛ ɛtɛ. ²Nganga mɔ bɛ́ mɩn-mɔ de Kilisi di’n, nán bɛ tʋa kɛ bɛ́ nianman y’ɔ le bɛ́ nɩn ati, bɛ fa bɛ́ nyɩn bɛ wowula bɛ́ nyunnun. Nan ɔ sɛ kɛ bɛ sʋ bɛ́ kanlanman kpa. Ɔ sanlɩn kɛ bɛ di bɛ́ junman’n bɛ man bɛ́ mɔ b’a le yɛ́ Mɩn b’a li mɔ bɛ kulo bɛ́’n nyan sʋ nvasʋɛ. Kekele ninnge sɔ’n maan bɛ yɔ́.

Ato ngehele’n nʋn anyanbɛnwʋn kpa’n

³Sɛ sʋanlan bie kekele ninnge ngacile ngacile, nán ɔ nni man yɛ́ Mɩn Zozi Kilisi anwʋntɩɛ ɛjɔlɛ’n-mɔ asʋ ɔ nʋn ngehele’n m’ɔ man bɛ bɔ abalabɔ m’ɔ sɔ Nyanmɩan anyɩn nɩn an, ⁴anɩn sʋanlan sɔ’n tɩ atubɛnwʋn sʋanlan. Ɔ nzɩ man like fɩ́ɩ́. Yɩ́ like m’ɔ la yɩ́ nwʋn kɛ anwʋnnyalɛ’n y’ɔ le ninnge’n-mɔ anwʋn akpʋlʋwa esue nʋn ɛtɩan’n. Kɛ ɔ yɔ mɔ menian’n-mɔ fa bɛ́ nwʋn ɛkpɔ bɛ di butule, bɛ kpɛ nzʋba, bɛ kan bɛ́ nwʋn ɛjɔlɛ ɛtɛ, ⁵bɛ su akpʋlʋwa ndɩnndɩɩn bɛ́ afian nɩn anɩn. Afɩ bɛ́ ajʋnlɩn nɩn a yɔ mgban-mgban, bɛ nzɩ man ananhɔlɛ nɩn anwʋn ɛjɔlɛ fɩ́ɩ́ kʋ́n. Bɛ jʋnlɩn kɛ Nyanmɩan anwʋn dedi’n mɔ yɛ le yɩ́’n, ɔ tɩ like mɔ bɛ fa bɛ kpʋnndɛ anyanbɛnwʋn.

⁶Ɔ tɩ ananhɔlɛ, Nyanmɩan anwʋn dedi’n mɔ yɛ le yɩ́’n, ɔ tɩ anyanbɛnwʋn like kpili kpa man sʋanlan mɔ yɩ́ nyɩn sɔ yɩ́ dɩɛ kaan m’ɔ le yɩ́’n. ⁷Ɔ sanlɩn kɛ mɔ yɛ ’ba mân ɛhɩ anun’n, yɛ nʋn like fɩ́ɩ́ a mma man, yɛ̂ sɛ yɛ ’sa yɛ kɔ a, yɛ ngʋala man bie nʋn kɔ. ⁸Ɛhɩka ati, sɛ yɛ nyan alɩɛ yɛ di, yɛ nyan taladɩɛ yɛ wula a, ɛhɩ ala sa yɛ́. ⁹Nan menian mɔ bɛ kulo kɛ bɛ nyan bɛ́ nwʋn’n, menian sɔ’n-mɔ, bɛ tɔ sɔnɩan nɩn anun kɛ ngaa. Ninnge mgban-mgban m’ɔ man menian sɛcɩ bɔkɔ-bɔkɔ, ɛsɛ bɛ́ bʋsʋ bɔ’n yɛ̂ bɛ kulo ɔ. ¹⁰Afɩ ɛtɛ ngacile’n kʋalaa fi esika anyɩnbʋlʋ’n. Menian mmie-mɔ anyɩn a bʋlʋ esika’n dede b’a yaci bɛ́ dedi’n b’a tʋ mʋa, b’a fa bɛ́ nwʋn b’a wula emian ngacile dɔʋn anun.

Pɔlʋ ’ba tu Timote fʋɔ

¹¹Nan wɔ́ dɩɛ, ɛ tɩ Nyanmɩan sʋanlan, n’ɛ yɔ ninnge sɔ’n-mɔ bie. Yɔ nyɔlɩɛ kpa. Fa wɔ́ nwʋn bɔ Nyanmɩan sɛlɛ kpa, nyan dedi, nyan ehulo, si abʋtalɛ, yɔ bɛtɛɛ. ¹²Bɔ mɔndɩnlɩn kpa, man wɔ́ asɩtanlan’n nʋn wɔ́ dedi’n yɔ́ kʋn. Kpʋnndɛ ngʋan m’ɔ le man ayuelɩɛ’n mɔ Nyanmɩan a fɛlɛ wɔ́ kɛ ɛ nyán yɩ́’n. Ɔ sanlɩn kɛ yɩ́ ti yɛ̂ ɛ lili wɔ́ dedi nɩn anwʋn adanzɩɛ kanlanman wɔ menian dɔʋn anyunnun ɔ. ¹³Nyanmɩan Kpili m’ɔ man ninnge kʋalaa ngʋan nɩn anyunnun, ɔ nʋn Kilisi Zozi m’ɔ lili yɩ́ dedi nɩn anwʋn adanzɩɛ kanlanman wɔ Pʋnsʋ Pilatɩ anyunnun’n kʋsʋ anyunnun, mɩn kan ndâ kɛ ¹⁴ɛ lí ɛjɔlɛ’n mɔ m’an hele wɔ́ nɩn asʋ, ɛsɛ ɛ síe wɔ́ nwʋn kʋnlʋn-ngʋnlʋn nán b’a nnyan man wɔ́ nwʋn ɛjɔlɛ ɛtɛ b’a ngan man. Yɔ yɩ́ sɔ dede m’ɔ jú cɩan mɔ yɛ́ Mɩn Zozi Kilisi ’yɩ yɩ nwʋn kele’n. ¹⁵Cɩan’n mɔ yɛ́ Mɩn Zozi ’yɩ yɩ nwʋn kele’n, Nyanmɩan yɛ̂ ɔ ’kele ɔ. Nyanmɩan sɔ’n, yɩ́ ngʋnmɩn cein y’ɔ tɩ Belemgbin ɔ, ɔ tɩ salɩɛ baka, ɔ tɩ mmelemgbin’n-mɔ Belemgbin, ɔ tɩ mɩnlɩan’n-mɔ Amɩn. ¹⁶Yɩ́ kʋnmgba cein ala yɛ̂ yɩ́ dɩɛ ɔ nwu man lé ɔ. Jawe’n m’ɔ tɩ nun’n, sʋanlan fɩ́ɩ́ ngʋala man yɩ́ nwʋn kpunnge. Sʋanlan fɩ́ɩ́ nwunlin man yɩ́ lé, yɛ̂ sʋanlan fɩ́ɩ́ ngʋala man yɩ́ nwʋn kpunnge. Kulo sʋanlan fɩ́ɩ́ nwunlin man yɩ́ lé, yɛ̂ kulo sʋanlan fɩ́ɩ́ ngʋala man kɛ ɔ nwun yɩ́. Asasʋɛ nʋn tunmin yɔ́ yɩ́ dɩɛ cɩan daa! Amɩn!

¹⁷Bɛ́ mɔ b’a nyan mân ɛhɩ anun ninnge’n, tu bɛ́ fʋɔ kɛ nán bɛ fa bɛ tu bɛ́ nwʋn. Se bɛ́ kɛ nán bɛ fa bɛ́ anyɩndasʋɛ’n bɛ tʋ anwʋndɩɛ’n m’ɔ njɛ man nán ɔ’a sɛcɩ nɩn asʋ. Nan bɛ fá bɛ́ anyɩndasʋɛ’n bɛ tʋ́ Nyanmɩan Kpili asʋ. Yɩ́ mɔ sɛ ɔ ’fa like man yɛ́ a, ɔ man yɛ́ dɔʋn kpa maan yɛ di nun fɛ’n. ¹⁸Tu bɛ́ fʋɔ kɛ bɛ yɔ́ nyɔlɩɛ kpa, bɛ mán ye ɛyɔlɛ’n tɩ́ bɛ́ kpa, bɛ yɔ́ ahunnunye, ɛsɛ bɛ bʋ́ka ɛhɩnlɩn-mɔ. ¹⁹Sɛ bɛ yɔ yɩ́ sɔ a, ɔ tɩ kɛ anwʋnndɩɛ m’ɔ tɩ kpa, ɛsɛ ɔ nzɛcɩ man yɛ̂ bɛ lɛ kokuan bɛ sie bɛ man bɛ́ nwʋn wɔ mɛlɛ’n m’ɔ lɛ ba nɩn anun ɔ, nán b’a hʋala b’a nyan ananhɔlɛ ngʋan kpa’n bɛ́ asɩtanlan nɩn anun.

²⁰Timote, like’n mɔ Nyanmɩan a fa a wula wɔ́ sa nun’n, nɩan sʋ kpa. Ɛjɔlɛ mgban-mgban’n m’ɔ nʋn dedi’n tɩ man kʋn’n, n’ɛ tie bie, ɛsɛ bɛ́ ninnge’n mɔ bɛ́ nwan bɛ sɩ yɩ́ nan kʋsʋ ɔ tɩ ato mɔ bɛ lɛ kele’n, n’ɛ suan bie. ²¹Like ati m’ɔ man mɩɩn kan sɔ’n, y’ɔ le kɛ menian mmie-mɔ bu bɛ́ nwʋn kɛ bɛ sɩ ananhɔlɛ ngehele’n kpa, bɛ nne man ananhɔlɛ ngehele kpa’n mɔ yɛ kekele’n bɛ nni man. Ɔ man bɛ fi dedi atɩn nɩn asʋ b’a jasʋ.

Nyanmɩan nwún ɛmɔ anwʋn anwunnvoe.