1 TESALONINKI

PƆLƱ KALATA’N

M’Ɔ LILƖ MƱA HƐLƐLƖ

NWANLƖN TESALONINKI

ASƆNƖN MMA’N-MƆ’N

M’ɔ wɔ nun’n

Anɩn, Tesaloninki tɩ Masedʋanɩn mân nɩn anun ɛlɔ kulo kpili’n kʋn. Silivɩn mɔ bɛ fɛlɛ yɩ́ biekun Silasɩ’n, nʋn Timote yɛ̂ bɛ bʋkalɩ Pɔlʋ maan ɔ bɔlɩ ɛlɔ asɔnɩn nɩn ɔ. Nan kɛmɔ Zufʋ’n-mɔ totua yɩ́ atɩn’n, Pɔlʋ a njɛ man Tesaloninki ɛbɛlɛ (Junman 17). Ɔ kpatili ɔ fi Masedʋanɩn mân nɩn anun ɔ hɔlɩ Akayi mân nɩn anun. Nan m’ɔ fi Masedʋanɩn mân nɩn anun hɔlɩ’n, ɔ sʋanlɩn Timote Tesaloninki ɛlɔ kɛ ɔ hɔ́ nɩ́an asɔnɩn mma’n-mɔ abʋsʋ sɛ bɛ yacili man bɛ́ dedi’n bɛ tɩlɩ man wɔ ahʋlʋwa’n mɔ bɛ lɛ kele bɛ́ nɩn anwʋn an. Mɔ Timote hɔlɩ walɩ m’ɔ bɔlɩ amannɩɛ fɛ helelɩ Pɔlʋ’n, yɩ́ lʋa cɩcɩlɩ nán ɔ’a hɛlɛ kalata ɛhɩ ɔ’a nwan bɛ́. Kalata nɩn anun, ɔ’a nwun Nyanmɩan anwʋn ye, ɛsɛ ɔ’a wowula bɛ́ anwʋnsɛlɛ kɛ bɛ tíla bɛ́ dedi nɩn anun bɛ hɔ́ bɛ́ nyunnun.

Kalata nɩn ati 1-3, Pɔlʋ lɛ kacɩ kɛ ɔ kpɩnlɩn lili junman’n bɛ́ afian ɛlɔ’n. Yɛ̂ ɔ di fɛ kɛ sunnzun mɔ bɛ lɛ nwun yalɛ, bɛ le bɛ́ dedi nɩn anun kpolo. Ɔ kulo kɛ ɔ nwun bɛ́ nwʋn biekun. Kalata nɩn ati 4.1-12, Pɔlʋ lɛ kacɩ bɛ́ ngehele’n m’ɔ helelɩ bɛ́ wɔ ɛnanndɩɛ kpa nɩn anwʋn’n cɩnnjɩn, bɛ síe bɛ́ nwʋn ye wɔ ajʋamannɩn ngacile kʋalaa anwʋn. Kalata nɩn ati (4.13-5.11), Pɔlʋ lɛ kan yɛ́ Mɩn Zozi Kilisi ɛwalɛ’n mɔ ɔ ’sa ba nɩn ɛjɔlɛ. Kalata nɩn agualɩɛ nun, Pɔlʋ lɛ tu bɛ́ fʋɔ ɛsɛ ɔ lɛ yeyila bɛ́.

Ahɩn ebisa

¹Mɩ́n Pɔlʋ, mɩ́n nʋn Silivɩn nʋn Timote yɛ̂ yɛ lɛ kɛlɛ kalata ɛhɩ yɛ nwan ɛmɔ Tesaloninki asɔnɩn mma’n-mɔ ɔ. Ɛmɔ mɔ bɛ nʋn yɛ́ Sɩ Nyanmɩan nʋn yɛ́ Mɩn Zozi Kilisi a yɔ kʋn’n, yɛ ’bisa ɛmɔ ahɩn.

Nyanmɩan nwún ɛmɔ anwʋn anwunnvoe, ɛsɛ ɔ cɩ́cɩ ɛmɔ alʋa.

Asɩna

²Yɛ da Nyanmɩan asɩ cɩan daa wɔ ɛmɔ dunman nun, ɛsɛ yɛ sɛlɛ Nyanmɩan Kpili cɩan daa yɛ man ɛmɔ. ³Nyanmɩan m’ɔ tɩ yɛ́ Sɩ nɩn anyunnun, tɛmʋn biala yɛ́ ti kacɩ ɛmɔ nyɔlɩɛ’n m’ɔ kele kɛ ɛmɔ le dedi, ɛmɔ kulo bɛ́ nwʋn, ɛsɛ yɛ́ Mɩn Zozi Kilisi ɛwalɛ cɩan nɩn anwʋn anyɩndasʋɛ mɔ ɛmɔ le yɩ́’n, ɔ tɩ man nzɛmɩndɛ. ⁴Anianman-mɔ, yɛ sɩ kɛ Nyanmɩan a hulo ɛmɔ, ɔ’a nɩan menian’n-mɔ anun ɔ’a kpa ɛmɔ maan b’a yɔ yɩ́ dɩɛ. ⁵Ɔ sanlɩn kɛ nán yɛ́ nʋan mgban nɩn ala yɛ̂ yɛ falɩ yɛ bɔlɩ Ɛjɔlɛkpa’n yɛ helelɩ ɛmɔ ɔ. Nan Wawɛ Nwannzan-nwannzan’n jinlanlɩn yɛ́ nzin maan yɛ bɔlɩ yɩ́ tunmin sʋ kʋsʋ yɛ helelɩ ɛmɔ. Ɔ manlɩn ɛmɔ nwunlin yɩ́ fɔ́ʋ́n kʋsʋ kpa kɛ Ɛjɔlɛkpa sɔ’n tɩ ananhɔlɛ. Kɛ ɔ kɔ yɔ nán ɛmɔ a kpasi’n, ɛmɔ nwunlin kɛ yɛ kpɩnlɩn yɛ nʋn ɛmɔ tanlanlɩn’n. ⁶Ɛmɔ a nɩan yɛ́ nʋn yɛ́ Mɩn asɩtanlan sɔ nɩn asʋ. Ɛhɩka ati yɛ̂ bɛ helelɩ ɛmɔ ahʋlʋwa kpa tɛmʋn mɔ ɛmɔ lelɩ Nyanmɩan Anʋan Ɛjɔlɛ’n bɛ lili nɩn ɔ. Nan kʋsʋ Wawɛ Nwannzan-nwannzan nɩn a man ɛmɔ le fɛ elie. ⁷Ɔ man Masedʋanɩn nʋn Akayi mân nɩn anun, sɛ bɛ ’kan bɛ́ kʋalaa mɔ b’a le Zozi Kilisi b’a li nɩn ɛjɔlɛ a, bɛ bɔ ɛmɔ dunman. ⁸Ɔ sanlɩn kɛ Nyanmɩan Anʋan Ɛjɔlɛ’n tɛtɛlɩ ɛmɔ Masedʋanɩn mân nɩn anun ɔ nʋn Akayi mân nɩn anun. Ɔ’a nga man ɛbɛlɛ ala, nan mân’n lɩka kʋalaatin, bɛ bɔ dedi’n mɔ ɛmɔ le yɩ́ wɔ Nyanmɩan anun nɩn anwʋn ɛjɔlɛ. Yɩ́ ti, yɛ́ muonun yɛ ngan man ɛmɔ dedi nɩn anwʋn ɛjɔlɛ kʋ́n. ⁹Kɛ ɛmɔ kpɩnlɩn sɔlɩ yɛ́ nun mɛlɛ mɔ yɛ hɔlɩ ɛmɔ ɛlɔ, ɔ nʋn kɛ ɛmɔ kpɩnlɩn yɔlɩ bɛ yacili amʋan’n-mɔ bɛ gualɩ bɛ falɩ bɛ́ nwʋn bɛ manlɩn Tɩasɩfʋɛ Nyanmɩan’n m’ɔ tɩ ananhɔlɛ’n nán b’a sʋ yɩ́’n, menian’n-mɔ kʋalaa kan yɩ́ nwʋn ɛjɔlɛ. ¹⁰Ɛsɛ bɛ kan kɛ ɛmɔ lɛ nwʋnndɛ kɛ Nyanmɩan Awa Zozi m’ɔ man ɔ fi ewue nun ɔ’a tinnge’n, ɔ fi nyanmɩansʋ ɔ bála. Afɩ, yɩ́ dein yɛ̂ ɔ de yɛ́ ti nán Nyanmɩan sikpɛ’n m’ɔ lɛ ba nɩn a ngun man yɛ́ ɔ.

Pɔlʋ nʋn yɩ́ manngʋn’n-mɔ junman’n

¹Anianman-mɔ, ɛmɔ muonun sɩ kɛ, ɛmɔ anwʋn ɛlɔ ɛwalɛ mɔ yɛ walɩ’n, ɔ’a nyɔ man mgban. Afɩ, yɛ́ Mɩn junman’n mɔ yɛ walɩ lili yɩ́ ɛmɔ afian ɛlɔ nɩn a su mma kpa. ²Ɛmɔ sɩ kɛ bɛ helelɩ yɛ́ ahʋlʋwa Filipʋ kulo nɩn asʋ ɛlɔ kʋalaaka nán y’a ju Tesaloninki. Mɔ yɛ juli ɛmɔ anwʋn ɛlɔ’n, menian’n-mɔ jɩjɩlɩ yɛ́ sɛlɛ kpa, nan kʋsʋ Nyanmɩan Kpili manlɩn yɛ́ anwʋnsɛlɛ maan yɛ bɔlɩ Ɛjɔlɛkpa’n yɛ helelɩ ɛmɔ. ³Ɔ man Ɛjɔlɛkpa sɔ’n mɔ yɛ bɔ yɛ kele menian’n-mɔ’n, ɔ tɩ man ato ɛjɔlɛ, yɛ mmɔ yɛ mgbʋnndɛ man esika, ɛsɛ yɛ mmɔ yɛ nnaka sʋanlan fɩ́ɩ́. ⁴Nan yɛ kan ɛjɔlɛ’n kɛ Nyanmɩan Kpili muonun kulo kɛ yɛ kan yɩ́’n. Ɔ sanlɩn kɛ ɔ’a nwun yɛ́ ti anun, ɔ’a bu yɛ́ ɔ’a fa yɩ́ Ɛjɔlɛkpa’n ɔ’a wula yɛ́ sa nun. Yɩ́ sɔ ati, yɛ ngan man mɔ yɛ kan an, menian’n-mɔ akunnun jɔ yɩ́ nwʋn’n, nan mɔ Nyanmɩan Kpili akunnun jɔ yɩ́ nwʋn’n yɛ̂ yɛ kan ɔ. ⁵Ɛmɔ muonun sɩ kɛ yɛ lakalɩ man ɛmɔ lé, ɛsɛ yɛ́ nyɩn bʋlʋlɩ man ɛmɔ anwʋndɩɛ’n-mɔ lé. Nyanmɩan muonun di yɩ́ nwʋn adanzɩɛ. ⁶Cɩan bie lé, y’a mgbʋnndɛ man kɛ ɛmɔ anaan ɛhɩnlɩn-mɔ fʋa yɛ́. ⁷Kɛmɔ yɛ tɩ Kilisi mmɔfʋɛ’n, yɛ kʋala yɛ kele ɛmɔ yɛ́ tunmin’n mɔ yɛ le yɩ́’n, nan yɛ́ dɩɛ, y’a nyɔ man yɩ́ sɔ. Mɔ anɩn yɛ wɔ ɛmɔ anwʋn ɛlɔ’n, yɛ bɛbɛlɛlɩ yɛ́ nwʋn asɩ yɛ manlɩn ɛmɔ. Yɛ yɔlɩ kɛ ɛta m’ɔ lɛ nɩan yɩ́ mma ɔ. ⁸Ehulo kpili’n mɔ yɛ kulo ɛmɔ nɩn ati, nán Ɛjɔlɛkpa nɩn angʋnmɩn ala yɛ̂ ahan yɛ ’bɔ yɛ kele ɛmɔ ɔ, nan ɛsɛ ahan yɛ ’fa yɛ́ muonun yɛ́ ngʋan’n yɛ man ɛmɔ. Ɔ sanlɩn kɛ ɛmɔ anwʋn hianlɩn yɛ́ sʋnman. ⁹Anianman-mɔ, ɛmɔ sɩ yɩ́ fɔ́ʋ́n kɛ mɛlɛ mɔ anɩn yɛ lɛ bɔ Nyanmɩan Ɛjɔlɛkpa’n yɛ kele ɛmɔ’n, yɛ lili junman sɛlɛ kpa kɔngɔɛ nʋn eyua, yɛ nwunlin yalɛ nʋn ɛfɛ, yɛ nyanlɩn esika yɛ sielɩ yɛ́ nwʋn. Ɔ man ɛmɔ anun bie fɩ́ɩ́ a mmɔ man yɛ́ nwʋn kalɛ. ¹⁰Ɛmɔ nʋn Nyanmɩan di yɛ́ nwʋn adanzɩɛ kɛ yɛ bɔlɩ abalabɔ mɔ yɩ́ nwʋn tɩ, m’ɔ tɩ fɔ́ʋ́n, mɔ bɛ nnyan man yɩ́ nwʋn ɛjɔlɛ ɛtɛ fɩ́ɩ́ bɛ ngan man wɔ ɛmɔ mɔ bɛ de Zozi bɛ di nɩn afian. ¹¹Ɛmɔ sɩ kɛ yɛ nʋn ɛmɔ anun kʋn biala tanlanlɩn kɛ sɩɛ nʋn yɩ́ mma. ¹²Yɛ wowulalɩ ɛmɔ anwʋnsɛlɛ, yɛ cɩcɩlɩ ɛmɔ alʋa ɛsɛ yɛ tuli ɛmɔ fʋɔ kɛ ɛmɔ bɔ́ bala kpa m’ɔ sɔ Nyanmɩan Kpili anyɩn. Afɩ, yɩ́ muonun yɛ̂ ɔ’a fɛlɛ ɛmɔ kɛ ɛmɔ bála bɛ káci yɩ́ anunminnyanmʋn belemgbin mân nɩn anun menian ɔ.

¹³Ɛhɩka ati, yɛ da Nyanmɩan asɩ cɩan biala. Ɔ sanlɩn kɛ mɛlɛ mɔ yɛ hanlɩn Nyanmɩan Anʋan Ɛjɔlɛ’n yɛ helelɩ ɛmɔ’n, ɛmɔ a nne man ɛjɔlɛ sɔ’n b’a ndʋ man nun kɛ kulo sʋanlan ɛjɔlɛ, nan ɛmɔ sɔlɩ nun kɛ ɔ tɩ Nyanmɩan Anʋan Ɛjɔlɛ sakpa. Ɔ man ɛmɔ mɔ bɛ de bɛ di’n, Ɛjɔlɛkpa sɔ’n lɛ di junman sɛlɛ wɔ ɛmɔ asɩtanlan nɩn anun. ¹⁴Anianman-mɔ, Nyanmɩan menian’n-mɔ mɔ bɛ wɔ Zude mân nɩn anun ɛlɔ mɔ bɛ nʋn Zozi Kilisi a yɔ kʋn’n, ɛmɔ a kaci kɛ bɛ́ ala. Yalɛ mɔ Zufʋ’n-mɔ helelɩ bɛ́’n, yɩ́ kʋnmgba nɩn ala yɛ̂ menian mɔ bɛ nʋn ɛmɔ tɩ nɩn a hele ɛmɔ nɩn ɔ. ¹⁵Zufʋ sɔ’n-mɔ mɔ bɛ hunlin yɛ́ Mɩn Zozi nʋn Nyanmɩan mgbɔmanfʋɛ’n-mɔ’n, bɛ́ yɛ̂ bɛ helelɩ yɛ́ yalɛ nɩn ɔ. Bɛ nzɔ man Nyanmɩan anyɩn, ɛsɛ bɛ kpɔ menian’n-mɔ kʋalaatin! ¹⁶Bɛ kulo kɛ bɛ tan yɛ́ nyɩnsʋ, yɩ́ dɩɛ anɩn yɛ ngan man ɛjɔlɛ’n yɛ ngele man bɛ́ mɔ bɛ tɩ man Zufʋ’n nán b’a nyan bɛ́ ti. Bɛ́ nyɔlɩɛ sɔ’n, ɔ man bɛ́ ɛtɛ nɩn a sʋn. B’a yɔ dede b’a man Nyanmɩan sikpɛ nɩn a hyɩ bɛ́.

Pɔlʋ alʋa lɛ dɔ Tesaloninki asɔnɩn mma’n-mɔ

¹⁷Yɛ́ dɩɛ, anianman-mɔ, kɛ yɛ tɩtɩlɩ yɛ́ nwʋn nun kaan’n, yɛ nwunlin man ɛmɔ anwʋn, nan kʋsʋ yɛ́ ti wɔ ɛmɔ sʋ dahuu. Yɛ́ lʋa lɛ dɔ ɛmɔ kpa, yɛ kulo kɛ yɛ nwun ɛmɔ anwʋn. ¹⁸Ɛhɩka ati, yɛ́ nwan ahan yɛ ’ba ɛmɔ anwʋn ɛlɔ. Nan mɩ́n bɔbɔ mɩ́n Pɔlʋ, m mɔbʋalɩ mɩ́n nwʋn kʋn, yɩ́ nzin biekun, mɩ́n nwan mɩn ’ba, nan *Satan a man y’a nnyan man atɩn. ¹⁹Mɛlɛ mɔ yɛ́ Mɩn Zozi ’ba a, mɔ yɛ ’ba fite yɩ́ nyunnun’n, nzu like dɩɛ anwʋn yɛ̂ ɔ ’nɩan fʋa yɛ́ ɔ? Yɛ́ fɛ elie like’n y’ɔ le benin? Nzukɛ yɛ̂ ɔ kele kɛ yɛ lili kunnunmun mɔ yɛ kʋala kɛ yɛ fa yɛ tu yɛ́ nʋan nun ɔ? ²⁰Yɛ́ anunminnyanmʋn ɔ nʋn yɛ́ fɛ elie’n kʋalaa y’ɔ le ɛmɔ.

¹Ɛhɩka ati, kɛmɔ y’a tanlan dede yɛ ndɩ man ɛmɔ angan fɩ́ɩ́’n, sian y’a ngʋala man nwʋnndɛ kʋ́n. Ɔ man y’a fa ajʋnlɩn kɛ Timote hɔ́ nɩ́an ɛmɔ abʋsʋ, nán yɛ́ ngʋnmɩn yɛ ka Atɛnɩn ɛwa. ²Yɛ́ nianman Timote nʋn yɛ́ y’ɔ di Nyanmɩan junman nɩn ɔ. Yɛ́ nʋn yɩ́ y’ɔ bɔ Zozi anwʋn Ɛjɔlɛkpa’n yɛ kele menian’n-mɔ ɔ. Yɛ lɛ sʋan yɩ́ ɛmɔ anwʋn ɛlɔ kɛ ɔ wówula ɛmɔ anwʋnsɛlɛ, ɔ cɩ́cɩ ɛmɔ alʋa, ɛsɛ ɔ bʋ́ka ɛmɔ maan bɛ́ dedi’n jínlan yɩ́ ja nun kpa. ³Yɩ́ dɩɛ, anɩn ɛmɔ anun bie fɩ́ɩ́ anwʋn a mmubu man yɩ́ wɔ yalɛ’n mɔ yɛ lɛ nwun yɩ́ kɩkaala nɩn anun. Afɩ ɛmɔ muonun sɩ kɛ yalɛ sɔ’n mɔ yɛ lɛ nwun yɩ́’n wɔ ninnge’n-mɔ mɔ Nyanmɩan sesielɩ manlɩn yɛ́ nɩn anun bie. ⁴Afɩ mɛlɛ mɔ anɩn yɛ tɛ wɔ ɛmɔ anwʋn ɛlɔ’n, yɛ lili mʋa yɛ hanlɩn yɛ helelɩ ɛmɔ kɛ bɛ lɛ ba hele yɛ́ yalɛ. Mɛlɛ sɔ’n yɛ̂ ɔ’a ju nɩn ɔ, ɛmɔ muonun sɩ. ⁵Ɛhɩka ati, kɛmɔ m’an tanlan dede mɔ mɩn ndɩ man ɛmɔ angan fɩ́ɩ́’n, mɩn tanlan an, ɔ ndanlan man. Ɔ man m’an sʋan Timote ɛmɔ anwʋn ɛlɔ, kɛ ɔ hɔ́ nɩ́an sɛ ɛmɔ tɛ le dedi wɔ Zozi nun an. N nili yalɛ kɛ bɩcɩ Abɔnsanmʋn a a a sɔ ɛmɔ a nɩan, ɔ’a kaci ɛmɔ ajʋnlɩn, ɔ’a man yɛ́ junman nɩn a yɔ mgban.

Timote amannɩɛ’n

⁶Nan kɩkaala dɩɛ, Timote fi ɛmɔ anwʋn ɛlɔ ɔ’a a. Ɔ’a bɔ ɛmɔ anwʋn amannɩɛ fɛ ɔ’a hele yɛ́. Yɩ́ nwan ɛmɔ le dedi, ɛmɔ le ehulo, ɛsɛ yɩ́ nwan ɛmɔ ati wɔ yɛ́ sʋ dahuu, ɛmɔ alʋa lɛ dɔ yɛ́ sɛlɛ kpa, ɛmɔ kulo kɛ bɛ nwun yɛ́ nwʋn kɛ yɛ́ kʋsʋ yɛ kulo kɛ yɛ nwun ɛmɔ anwʋn’n. ⁷Ɛhɩka ati, anianman-mɔ, yalɛ nʋn ɛfɛ’n mɔ yɛ tɩ nun’n, ɛmɔ a man yɛ́ lʋa a cɩcɩ. Ɔ sanlɩn kɛ ɛmɔ dedi nɩn a wowula yɛ́ anwʋnsɛlɛ. ⁸Ɔ man kɩkaala dɩɛ, yɛ́ nwʋn a sanndɩ yɛ́, afɩ ɛmɔ jin bɛ́ ja nun bɛ nʋn yɛ́ Mɩn tɛ nanndɩ. ⁹Yɛ le ɛmɔ anwʋn fɛ elie kpili wɔ Nyanmɩan anyunnun, ɔ man yɛ nnwun man like fɩ́ɩ́ bɔbɔ mɔ yɛ ’fa yɛ ’da Nyanmɩan Kpili asɩ ɔ. ¹⁰Kɔngɔɛ nʋn eyua, yɛ sɛlɛ yɩ́ kpa kɛ ɔ mán yɛ nyán atɩn yɛ nwún ɛmɔ anwʋn biekun, nán yɛ héhele ɛmɔ ninnge mɔ ɔ’a ha wɔ ɛmɔ dedi nɩn anwʋn’n yɛ sɔ́ sʋ.

¹¹Yɛ́ Sɩ Nyanmɩan Kpili muonun, ɔ nʋn yɛ́ Mɩn Zozi Kilisi, bɛ sésie yɛ́ atɩn kanlanman maan yɛ bála nwun ɛmɔ anwʋn. ¹²Ehulo’n mɔ ɛmɔ kulo bɛ́ nwʋn, mɔ ɛmɔ fa kulo menian’n-mɔ kʋalaatin’n, yɛ́ Mɩn mán ɔ hɔ́ yɩ́ nyunnun kpa kɛ ehulo’n mɔ yɛ fa yɛ kulo ɛmɔ’n. ¹³Yɛ́ Mɩn wówula ɛmɔ anwʋnsɛlɛ ɔ mán ɛmɔ ahʋnlɩn’n-mɔ anun tɩ́, nán b’a nnyan ɛmɔ anwʋn ɛjɔlɛ ɛtɛ fɩ́ɩ́ b’a ngan man wɔ Nyanmɩan m’ɔ tɩ Sɩɛ nɩn anyunnun, mɛlɛ mɔ yɛ́ Mɩn Zozi nʋn yɩ́ anwʋntɩɛ mma’n-mɔ kʋalaa ’ba a’n.

Abalabɔ m’ɔ sɔ Nyanmɩan anyɩn’n

¹Ɛhɩ, anianman-mɔ, abalabɔ mɔ ɛmɔ bɔ a, ɔ sɔ Nyanmɩan anyɩn’n, yɛ helelɩ ɛmɔ. Yɛ de yɛ di kɛ ɛmɔ bɔ abalabɔ sɔ’n. Nan, sian dɩɛ, yɛ lɛ bʋtʋ yɛ sɛlɛ ɛmɔ kɛ yɛ́ Mɩn Zozi dunman nun, ɛmɔ bɔ́ bala sɔ’n kpa bɛ hɔ́ bɛ́ nyunnun bɛ mán ɔ tála daba’n. ²Afɩ ɛmɔ sɩ, amanmuo’n mɔ yɛ́ Mɩn Zozi helelɩ yɛ́ kɛ yɛ bú’n, y’a han yɩ́ nwʋn ɛjɔlɛ y’a hele ɛmɔ.

³Nyɔlɩɛ mɔ Nyanmɩan kulo’n y’ɔ le ɛhɩ: ɔ kulo kɛ ɛmɔ yɔ menian nwannzan-nwannzan, ɛsɛ ɛmɔ nɩan bɛ́ nwʋn ye kpa wɔ satɩlɩfʋɛ nyɔlɩɛ’n-mɔ anwʋn. ⁴Ɛmɔ anun kʋn biala nwún yɩ́ yɩ já, ɔ nʋn yɩ́ bɛ tánlan anwʋntɩɛ nun, ɔ nʋn anyɩnnzɔ nun, ⁵nán ɛmɔ a nnyan man ajʋnlɩn basa basa kɛ bɛ́ mɔ bɛ nzɩ man Nyanmɩan’n le yɩ́’n. ⁶Asɩtanlan sɔ nɩn anun, sʋanlan fɩ́ɩ́ n’ɔ bu yɩ́ manngʋn anyunnun ɔ sɛcɩ yɩ́ ajaa, anaan ɔ di yɩ́ dufule. Yɛ hanlɩn yɛ helelɩ ɛmɔ, ɛsɛ yɛ kannzʋlɩ ɛmɔ kpa kɛ menian mɔ bɛ yɔ ɛtɛ sɔ’n, Nyanmɩan Kpili ’ba tua bɛ́ yɩ́ nwʋn kalɛ. ⁷Afɩ, Nyanmɩan a nvɛlɛ man yɛ́ kɛ yɛ yɔ́ satɩlɩfʋɛ nyɔlɩɛ, nan ɔ’a fɛlɛ yɛ́ kɛ yɛ bɔ́ abalabɔ m’ɔ sɔ yɩ́ nyɩn yɛ mán yɛ́ nwʋn tɩ́. ⁸Ɛhɩka ati, sʋanlan mɔ ɔ’a nni man ngehele sɔ nɩn asʋ’n, nán kulo sʋanlan yɛ̂ ɔ’a mmu man yɩ́ like ɔ, nan Nyanmɩan Kpili’n mɔ ɔ’a fa yɩ́ Wawɛ Nwannzan-nwannzan’n ɔ’a man ɛmɔ’n yɛ̂ ɔ’a yɩ yɩ́ ɔ’a tʋ ɔ.

⁹M’ɔ tʋ de ehulo’n mɔ ɛmɔ kulo anianman’n-mɔ mɔ bɛ le dedi’n, ɔ njian man kɛ yɛ kɛlɛ ɛmɔ yɩ́ nwʋn kalata biekun ɔ. Ɔ sanlɩn kɛ Nyanmɩan muonun a hele ɛmɔ kɛ ɛmɔ kpɩ́n bɛ húlo bɛ́ nwʋn’n. ¹⁰Sakpa, ɛmɔ kulo anianman’n-mɔ kʋalaa mɔ bɛ wɔ Masedʋanɩn mân nɩn anun’n. Nan kʋsʋ, anianman-mɔ, yɛ ’sɛlɛ ɛmɔ kɛ ɛmɔ nyán ehulo kpili m’ɔ tala ɛhɩ asʋ. ¹¹Ɛmɔ mían bɛ́ bʋ kpa bɛ tánlan wɔ anzʋnunjɔ nun, ɛmɔ nɩ́an ɛmɔ muonun anwʋn ɛjɔlɛ bɛ lí, ɛsɛ ɛmɔ lí junman bɛ kpʋ́nndɛ mɔ ɛmɔ a mɩan yɩ́ nwʋn’n, kɛ yɛ selɩ ɛmɔ kɛ ɛmɔ yɔ́’n. ¹²Sɛ ɛmɔ yɔ yɩ́ sɔ a, menian’n-mɔ mɔ bɛ nzɩ man Nyanmɩan’n, bɛ́ nyɩn ’ba sɔ ɛmɔ, ɛsɛ ɛmɔ ngɔ mian man like fɩ́ɩ́ anwʋn.

Yɛ́ Mɩn yɩ́ ɛwalɛ’n

¹³Anianman-mɔ, yɛ kulo kɛ ɛmɔ nwun bɛ́ mɔ b’a wu nɩn anwʋn ɛjɔlɛ’n fɔ́ʋ́n, nán ɛmɔ anwʋn a mmubu man bɛ́ kɛ bɛ́ mɔ bɛ nzɩ man Nyanmɩan nɩn anwʋn bubu bɛ́’n, ɔ sanlɩn kɛ bɛ le man anyɩndasʋɛ kɛ yɛ́. ¹⁴Yɛ́ dɩɛ, yɛ de yɛ di kɛ Zozi a wu, ɛsɛ ɔ fi ewue nun ɔ’a tinnge. Yɩ́ ti, yɛ de yɛ di biekun kɛ Zozi dunman nun, Nyanmɩan Kpili ’ba man bɛ́ mɔ bɛ de yɩ́ bɛ di mɔ b’a wu’n ngʋan maan bɛ fi ewue nun bɛ tinnge. ¹⁵Ɛhɩ anwʋn, ɛmɔ tie yɛ́ Mɩn ngehele ɛjɔlɛ kʋn mɔ yɛ lɛ kan yɛ kele ɛmɔ’n. Ɛjɔlɛ sɔ’n y’ɔ le kɛ mɛlɛ mɔ yɛ́ Mɩn ’ba a’n, yɛ́ mɔ yɛ́ nyɩn tɛ wɔ sʋ’n, yɛ ngɔ li man mʋa bɛ́ mɔ b’a le Zozi b’a li mɔ b’a wu nɩn anyunnun. ¹⁶Ɔ sanlɩn kɛ bɛ ’ba man atɩn, nyanmɩansʋ mmɔfʋɛ mgbain’n-mɔ anun kʋn ’ba tɩan nun, bɛ ’ba hu Nyanmɩan kɔnɔtɩ’n, anɩn yɛ́ Mɩn muonun fi anwunno ɛlɔ ɔ lɛ ju ba. Bɛ́ mɔ b’a le Kilisi b’a li mɔ b’a wu’n, bɛ fi ewue nun bɛ ’di mʋa bɛ tinnge. ¹⁷Yɩ́ nzin, yɛ́ mɔ yɛ́ nyɩn tɛ wɔ sʋ tɛmʋn sɔ nɩn anun’n, yɛ́ nʋn bɛ́ mɔ bɛ fi ewue nun b’a tinnge’n, bɛ ’ba fʋla yɛ́ kʋalaa bɔlɛ́ nɩn anun anwunno ɛlɔ, yɛ ’kɔ a kpa yɛ́ Mɩn atɩn. Ɔ fi ɛbɛlɛ, yɛ́ nʋn yɛ́ Mɩn yɛ ’tanlan dahuu. ¹⁸Ɛhɩka ati, ɛmɔ fá ɛjɔlɛ sɔ’n-mɔ bɛ wówula bɛ́ nwʋn anwʋnsɛlɛ.

¹M’ɔ tʋ de cɩan anaan mɛlɛ mɔ ninnge sɔ’n-mɔ ’te’n, anianman-mɔ, ɔ njian man kɛ yɛ kɛlɛ ɛmɔ yɩ́ nwʋn kalata. ²Afɩ, ɛmɔ muonun sɩ yɩ́ fɔ́ʋ́n kɛ yɛ́ Mɩn yɩ́ ɛwalɛ cɩan’n ’ba li yɛ́ nvu nun kɛ awofʋɛ m’ɔ lɛ wua kɔngɔɛ ɔ. ³Mɛlɛ mɔ eyuadɩ nɩn anun menian’n-mɔ alʋa ’ba fi bɛ́ nwʋn, mɔ bɛ ’ba han kɛ: “Yɛ le anzʋnunjɔ, ɛsɛ yɛ nzusu man ɛjɔlɛ fɩ́ɩ́”, tɛmʋn sɔ’n yɛ̂ nvu nun mgban, munnzue’n ’ba tʋ bɛ́ kɛ nwʋnnzɛfʋɛ mɔ yɩ́ kʋ kɔ han yɩ́. Ɔ man bɛ́ nun bie fɩ́ɩ́ ngɔ nnyan man atɩn nán ɔ’a nwanndi. ⁴Nan ɛmɔ dɩɛ, anianman-mɔ, ɛmɔ tɩ man awosin nun, nán cɩan sɔ nɩn a li ɛmɔ nvu nun kɛ awofʋɛ m’ɔ lɛ wua ɔ. ⁵Afɩ, ɛmɔ kʋalaa tɩ kanlannɩɛ’n nʋn alɩhɩan nɩn anun menian. Nán alɩsan nʋn awosin nun menian y’ɔ le yɛ́. ⁶Ɛhɩka ati, nán bɛ man yɛ́ dafɩ kɛ menian ɛhɩnlɩn-mɔ, nan bɛ mán yɛ sísa, ɛsɛ yɛ yɔ́ yɛ́ ninnge’n-mɔ kʋalaa kpɛ kpɛ kpɛ. ⁷Afɩ kɔngɔɛ yɛ̂ bɛ da bɛ dafɩ ɔ, ɛsɛ kɔngɔɛ yɛ̂ menian’n-mɔ nʋn nzan dede bɛ bʋ ɔ. ⁸Nan yɛ́ dɩɛ, alɩhɩan nɩn anun menian y’ɔ le yɛ́. Ɛhɩka ati, bɛ mán yɛ yɔ́ yɛ́ ninnge’n-mɔ kʋalaa kpɛ kpɛ kpɛ. Kɛ sʋanlan m’ɔ lɛ kɔ ɛlɔɛ’n wula bulalɛ taladɩɛ’n ɔ sisa yɩ́ hue’n, yɛ́ kʋsʋ yɛ nyán dedi ɔ nʋn ehulo. Kɛ sʋanlan mɔ lɛ kɔ ɛlɔɛ’n sʋ bulalɛ kele’n ɔ sisa yɩ́ ti’n, yɛ́ kʋsʋ yɛ nyán anyɩndasʋɛ kɛ Zozi a le yɛ́ ti. ⁹Ɔ sanlɩn kɛ Nyanmɩan a nvɛlɛ man yɛ́ yɩ́ nwʋn kɛ yɛ wú sikpɛ ewue, nan ɔ nanndɩ yɛ́ Mɩn Zozi Kilisi asʋ, ɔ’a fɛlɛ yɛ́ yɩ́ nwʋn kɛ y’a a nyan ngʋan. ¹⁰Afɩ, yɛ́ ti yɛ̂ Zozi wuli ɔ. Ɔ man sɛ yɛ́ nyɩn wɔ sʋ, anaan sɛ yɛ wu a, yɛ ’nyan ngʋan yɛ nʋn yɩ́ tanlan dahuu mɛlɛ mɔ ɔ ’ba sa ba’n. ¹¹Ɛhɩka ati, ɛmɔ cɩ́cɩ bɛ́ nwʋn alʋa, ɛsɛ ɛmɔ wówula bɛ́ nwʋn anwʋnsɛlɛ kɛ ɛmɔ a bɔ yɩ́ bʋ bɛ lɛ yɔ’n.

Afʋtu

¹²Anianman-mɔ, yɛ lɛ sɛlɛ ɛmɔ kɛ ɛmɔ mán bɛ́ nyɩn sɔ́ menian mɔ bɛ di yɛ́ Mɩn junman wɔ ɛmɔ afian ɛlɔ, mɔ yɛ́ Mɩn dunman nun, bɛ li ɛmɔ ati, ɛsɛ bɛ kannzʋ ɛmɔ’n. ¹³Bɛ́ junman’n mɔ bɛ di nɩn ati, ɛmɔ fʋ́a bɛ́ kpa, ɛsɛ bɛ húlo bɛ́ kpa. Ɛmɔ afian ɛlɔ, ɛmɔ tánlan wɔ anzʋnunjɔ nun.

¹⁴Anianman-mɔ, yɛ ’sɛlɛ ɛmɔ kɛ, ɛmɔ kánnzʋ ɛfʋanfʋɛ’n-mɔ. Bɛ́ mɔ bɛ nwʋn a bubu bɛ́’n-mɔ, ɛmɔ wówula bɛ́ anwʋnsɛlɛ, ɛmɔ bʋ́ka bɛ́ mɔ bɛ le man anwʋnsɛlɛ’n, bɛ sí abʋtalɛ wɔ menian’n-mɔ kʋalaa anwʋn. ¹⁵Ɛmɔ nɩ́an bɛ́ nwʋn kpa, nán sʋanlan fɩ́ɩ́ a nva man ɛtɛ a ndua man ɛtɛ’n kalɛ. Mɛlɛ biala anun, ɛmɔ afian, ɔ nʋn menian nga’n-mɔ kʋalaa afian, ɛmɔ bɔ́ abalabɔ kpa.

¹⁶Ɛmɔ lí ndutue cɩan daa. ¹⁷Ɛmɔ yɔ́ asɔnɩn tɛmʋn biala. ¹⁸Ɛmɔ lá Nyanmɩan asɩ like biala anun. Ɛmɔ mɔ bɛ nʋn Kilisi Zozi a yɔ kʋn’n, like mɔ Nyanmɩan lɛ kpʋnndɛ yɩ́ ɛmɔ ɛlɔ nɩn anɩn. ¹⁹Ɛmɔ nán bɛ tan Wawɛ Nwannzan-nwannzan nɩn anyɩnsʋ, nán ɔ fi ɛmɔ anun ɔ’a ndu man. ²⁰Ɛjɔlɛ mɔ Nyanmɩan Wawɛ’n kɔ fa kɔ wula sʋanlan anʋan m’ɔ kɔ han’n, nán man ɛmɔ bu yɩ́ ɛjɔlɛ mgban-mgban. ²¹Nan kʋsʋ, ɛmɔ nɛ́nɩan yɩ́ kʋalaa anun, bɛ fá m’ɔ tɩ kpa’n bɛ síe. ²²Like biala m’ɔ man bɛ tɔ ɛtɛ nun’n, nán bɛ yɔ. ²³Nyanmɩan Kpili m’ɔ tɩ alʋacɩcɩɛ baka’n, ɔ fá ɛmɔ yɔ́ yɩ́ dɩɛ kpa bɔkɔɔ. Ɔ nɩ́an ɛmɔ sʋanlan baka nɩn asʋ, ɛmɔ ajʋnlɩn nɩn asʋ, ɔ nʋn ɛmɔ ɛkala nɩn asʋ. N’ɔ man efian fɩ́ɩ́ kan ɛmɔ dede ɔ jú yɛ́ Mɩn Zozi Kilisi ɛwalɛ cɩan. ²⁴Nyanmɩan Kpili mɔ ɔ’a fɛlɛ ɛmɔ yɩ́ nwʋn’n tɩ ananhɔlɛfʋɛ, ɔ ’yɔ yɩ́ sɔ man ɛmɔ.

²⁵Anianman-mɔ, ɛmɔ sɛ́lɛ Nyanmɩan bɛ mán yɛ́ kʋsʋ. ²⁶Yɛ ’yɔ anianman’n-mɔ mɔ bɛ wɔ ɛlɔ’n kʋalaa like, ɛmɔ tɔ́ bɛ́ nun bɛ́ man yɛ́. ²⁷Mɩn ’sɛlɛ ɛmɔ kpa wɔ yɛ́ Mɩn dunman nun kɛ ɛmɔ kɩ́nnga kalata ɛhɩ bɛ héle anianman’n-mɔ kʋalaatin.

²⁸Yɛ́ Mɩn Zozi Kilisi nwún ɛmɔ anwʋn anwunnvoe.