1 PƖƐLƖ

PƖƐLƖ KALATA’N

M’Ɔ LILI MƱA HƐLƐLƖ’N

M’ɔ wɔ nun’n

Nwan sʋanlan dɩɛ y’ɔ le Pɩɛlɩ? Zozi mmɔfʋɛ bulu nʋn nnyuan nɩn anun, yɩ́ yɛ̂ anɩn ɔ tɩ bɛ́ kpain ɔ. Dunman Pɩɛlɩ’n tɩ *gɛlɛkɩ anɩɛ, yɩ́ bʋ y’ɔ le kɛ ɛbʋɛ. Zozi y’ɔ tʋnlɩn yɩ́ sɔ ɔ, nan yɩ́ dunman’n, *ebele anɩɛ nɩn anun, bɛ fɛlɛ yɩ́ Simʋn. Pɩɛlɩ fi Galile mân nɩn anun kulo’n mɔ bɛ fɛlɛ yɩ́ Bɛtɩsayida nɩn asʋ (Zʋan 1.43). Anɩn, Pɩɛlɩ nʋn yɩ́ nianman bian Andele, bɛ cɩ ejue Galile asue nɩn anun. Nan mɔ Zozi fɛlɛlɩ bɛ́ yɩ́ nwʋn’n, bɛ yacili ejue ɛhyɩɛ junman’n bɛ sili yɩ́ sʋ bɛ kacili yɩ́ menian. Mɔ Zozi fʋlɩ hɔlɩ nyanmɩansʋ’n, Pɩɛlɩ bɔlɩ Zozi anwʋn Ɛjɔlɛkpa’n Zoluzalɛmʋn kulo nɩn asʋ ɛbɛlɛ, ɔ nʋn Zude nʋn Samali mân nɩn anun. Kɛ bɛ lɛ kpɩn bɛ kele’n, ɔ hɔlɩ dede ɔ juli *Lɔmʋn kulo nɩn asʋ. Ɛbɛlɛ yɛ̂ bɛ bʋbɔlɩ yɩ́ kʋlʋwa sʋ bɛ hunlin yɩ́ ɔ.

Kalata ɛhɩ anun, Pɩɛlɩ lɛ kan kele yɛ́ kɛ Silivɩn mɔ bɛ fɛlɛ yɩ́ biekun Silasɩ’n yɛ̂ ɔ’a hɛlɛ kalata sɔ’n ɔ’a man yɩ́ ɔ (5.12). “Babilɔnʋn” ɛlɔ yɛ̂ ɔ’a hɛlɛ kalata ɛhɩ ɔ (5.13). Babilɔnʋn, yɩ́ bʋ y’ɔ le kɛ Lɔmʋn. Ɔ’a hɛlɛ ɔ’a nwan Kilisi menian’n-mɔ mɔ b’a tʋ b’a sanndɩ mân mân’n-mɔ mɔ ɛnɛ bɛ fɛlɛ yɩ́ Tuluki mân nɩn anun’n (1.1).

Tɛmʋn sɔ’n, anɩn bɛ lɛ kele Kilisi menian’n-mɔ ahʋlʋwa ɛlɔ. Ɛhɩka ati, Pɩɛlɩ a hɛlɛ kalata ɛhɩ ɔ’a nwan bɛ́ ɔ’a wowula bɛ́ anwʋnsɛlɛ wɔ bɛ́ yalɛ’n mɔ bɛ lɛ nwun yɩ́ nɩn anun. Kalata nɩn ati 1.2-12, Pɩɛlɩ lɛ kacɩ bɛ́ kɛ Nyanmɩan ’ba le bɛ́ ti, ɛsɛ ɔ’a sie bɛ́ ajâ kpili kpa wɔ nyanmɩansʋ. Ajâ sɔ’n, bɛ ’ba nyan yɩ́ mɛlɛ mɔ Zozi Kilisi ’ba yɩ yɩ́ nwʋn kele menian’n-mɔ mân nɩn ayuelɩɛ nun’n. Yɩ́ sɔ ati, bɛ tíla bɛ́ ahʋnlɩn bɛ nyán dedi wɔ yalɛ enwuan mɔ bɛ lɛ nwun yɩ́ nɩn anun. Kalata nɩn ati 1.13-2.10, ɔ lɛ kacɩ bɛ́ kɛ Nyanmɩan nwan bɛ nánndɩ anwʋntɩɛ nun. Kalata nɩn ati 2.11-5.19, ɔ lɛ bʋtʋ bɛ́ kɛ bɛ nánndɩ kanlanman wɔ bɛ́ mɔ bɛ nzɩ man Nyanmɩan nɩn afian, ɛsɛ bɛ́ muonun bɛ́ afian, bɛ nánndɩ kanlanman. Bɛ nɩ́an Kilisi m’ɔ nwunlin yalɛ, nan kʋsʋ, ɔ’a nyɔ man ɛtɛ fɩ́ɩ́ nɩn ɛnanndɩɛ dɩɛ nɩn asʋ. Kalata nɩn agualɩɛ nun (5.1-14), Pɩɛlɩ lɛ man asɔnɩn mma’n-mɔ nʋn bɛ́ mgbain’n-mɔ afʋtu.

Ahɩn ebisa

¹Mɩ́n Pɩɛlɩ, mɔ n dɩ Zozi Kilisi bɔfʋɛ’n, mɩ́n yɛ̂ mɩɩn kɛlɛ kalata ɛhɩ mɩn nwan ɛmɔ ɔ. Mɩɩn kɛlɛ ɛmɔ mɔ Nyanmɩan a yɩ bɛ́ a yɔ yɩ́ dɩɛ’n, mɔ b’a kaci nyɔfʋɛ b’a tʋ b’a sanndɩ Pʋn, nʋn Galasi, nʋn Kapadɔsʋ, nʋn Azi nʋn Bitinin mân nɩn anun’n. ²Nyanmɩan m’ɔ tɩ Sɩɛ nɩn a yɩ ɛmɔ ɔ’a wula yɩ́ nyɩhyɛ nɩn anun daba. Yɩ́ Wawɛ’n tunmin nun, ɔ’a man ɛmɔ a kaci yɩ́ anwʋntɩɛ menian. Yɩ́ Wawɛ nɩn a man ɛmɔ a fa bɛ́ nwʋn b’a man Zozi Kilisi. Ɔ’a man Zozi moja nɩn a tu ɛmɔ anwʋn efian’n.

Mɩn ’bisa ɛmɔ ahɩn. Nyanmɩan nwún ɛmɔ anwʋn anwunnvoe ɔ mán ɛmɔ alʋa cɩ́cɩ bɛ́ nwʋn kpa.

Ngʋan fʋfɔlɛ nɩn anwʋn anyɩndasʋɛ’n

³Yɛ ’da Nyanmɩan asɩ, yɩ́ m’ɔ tɩ yɛ́ Mɩn Zozi Kilisi Asɩ’n. Nyanmɩan ehulo kpili nɩn ati, ɔ’a man Zozi Kilisi fi ewue nun a tinnge ɔ’a man y’a nyan ngʋan fʋfɔlɛ. Ɛhɩ ati, yɛ le nyanmɩansʋ ngʋan nɩn anwʋn anyɩndasʋɛ kpa. ⁴Nyanmɩan a sie yɩ́ mma’n-mɔ ajâ. Nyila’n m’ɔ wɔ nun’n nzɛcɩ man lé, ɔ ngun man lé, ɔ mgba man lé. Ɔ’a fa ajâ sɔ’n ɔ’a sie ɛmɔ anwunno ɛlɔ. ⁵Nyanmɩan fa yɩ́ tunmin’n ɔ sisa ɛmɔ. Ɔ sanlɩn kɛ ɛmɔ de yɩ́ di. Ɔ ’sisa ɛmɔ dede maan ɛmɔ nyan bɛ́ ti kpa bɔkɔɔ mân nɩn ayuelɩɛ nun. ⁶Yɩ́ ti, sɛ bɔbɔ ɛmɔ lɛ nwun yalɛ ngacile biala mɛlɛ kaan ɛhɩ anun an, ɛmɔ lí fɛ. ⁷Yalɛ ngacile sɔ’n-mɔ anun yɛ̂ bɛ nwun yɩ́ kɛ ɛmɔ de Nyanmɩan di sakpa ɔ. Ɛmɔ nwún yɩ́ kɛ esika kɔkɔlɛ’n, bɛ kolo bɛ tu yɩ́ nwʋn efian’n. Esika kɔkɔlɛ sɔ’n muonun m’ɔ nʋn mân’n bɛ ’ba kpɛ nun’n, bɛ fa sɩ̂n bɛ sɔ yɩ́ bɛ nɩan. Yɩ́ sɔ kʋsʋ ala, ɛmɔ dedi’n mɔ yɩ́ kpa tala esika kɔkɔlɛ’n, bɛ ’sɔ yɩ́ bɛ nɩan sɛ ɔ tɩ kunngun an. Yɩ́ dɩɛ anɩn cɩan mɔ Zozi Kilisi ’ba yɩ yɩ́ nwʋn’n, bɛ ’yɩ ɛmɔ ayɛ, bɛ kuku ɛmɔ asa sʋ, bɛ wula ɛmɔ anunminnyanmʋn. ⁸Ɛmɔ kulo Zozi nan kʋsʋ ɛmɔ nwunlin man yɩ́ nyunnun lé. Ɛmɔ nwunlin man yɩ́ nyunnun lé, nan kʋsʋ ɛmɔ de yɩ́ di. Ɛmɔ di yɩ́ nwʋn fɛ kpili. Fɛ sɔ’n, bɛ ngʋala man yɩ́ kan, ɔ tɩ anunminnyanmʋn like. ⁹Ɔ sanlɩn kɛ ɛmɔ dedi nɩn abʋ’n y’ɔ le kɛ Nyanmɩan ’de ɛmɔ ati.

¹⁰M’ɔ tʋ de bɛ́ ti ele sɔ’n, Nyanmɩan mgbɔmanfʋɛ’n-mɔ hanlɩn anwunnvoe’n mɔ Nyanmɩan a nwun ɛmɔ nɩn anwʋn ɛjɔlɛ daba. Bɛ tɩlɩ bɛ́ nyɩn kpa ¹¹bɛ kpʋnndɛlɩ atɩn’n mɔ Nyanmɩan ’sɩn sʋ ɔ de menian’n-mɔ ati’n, ɛsɛ bɛ kpʋnndɛlɩ kɛ ahan bɛ nwun tɛmʋn mɔ ninnge sɔ’n-mɔ ’ju sʋ kɛ Kilisi Wawɛ’n helelɩ bɛ́’n. Afɩ Kilisi Wawɛ sɔ’n mɔ anɩn ɔ wɔ bɛ́ nun’n, ɔ lili mʋa ɔ hanlɩn amannɩnhunnun’n mɔ Kilisi ’ba nwun yɩ́’n, ɔ nʋn anunminnyanmʋn’n mɔ ɔ ’nyan yɩ́ nɩn anwʋn ɛjɔlɛ. ¹²Nyanmɩan yɩlɩ helelɩ mgbɔmanfʋɛ sɔ’n-mɔ kɛ ngalɩɛ’n m’ɔ falɩ manlɩn bɛ́’n tɩ man bɛ́ muonun bɛ́ ngalɩɛ, nan ɔ tɩ ɛmɔ dɩɛ. Ngalɩɛ sɔ’n yɛ̂ sian dɩɛ bɛ́ mɔ bɛ bɔ Ɛjɔlɛkpa nɩn a han a hele ɛmɔ nɩn ɔ. Wawɛ Nwannzan-nwannzan’n mɔ Nyanmɩan sʋanlɩn yɩ́’n, yɩ́ yɛ̂ ɔ falɩ ɛjɔlɛ sɔ’n wulalɩ bɛ́ nʋan ɔ. Nyanmɩansʋ mmɔfʋɛ’n-mɔ muonun kpʋnndɛ kɛ ahan bɛ nwun like sɔ’n.

Abalabɔ nwannzan-nwannzan’n mɔ Nyanmɩan kulo’n

¹³Ɛhɩka ati, ɛmɔ síe tile, bɛ fá bɛ́ ajʋnlɩn bɛ tʋ́ nyila’n mɔ Nyanmɩan ’yeyila ɛmɔ nɩn asʋ mɛlɛ mɔ Zozi Kilisi ’yɩ yɩ́ kele’n. Ɛmɔ nyán yɩ́ nwʋn anyɩndasʋɛ kpa bɔkɔɔ. ¹⁴Ɛmɔ mán bɛ́ nyɩn sɔ́ Nyanmɩan. Nán man ɛmɔ nyan ajʋnlɩn ɛtɛ ɛtɛ bɛ yɔ nyɔlɩɛ m’ɔ tɩ man kpa kɛ tɛmʋn mɔ anɩn ɛmɔ nzɩ man Nyanmɩan anwʋn ɛjɔlɛ’n fɩ́ɩ́’n. ¹⁵Kɛmɔ Nyanmɩan mɔ ɔ’a fɛlɛ ɛmɔ yɩ́ nwʋn’n tɩ nwannzan-nwannzan’n, ɛmɔ kʋsʋ abalabɔ kʋalaatin anun, ɛmɔ yɔ́ bɛ́ nwʋn nwannzan-nwannzan. ¹⁶Afɩ b’a hɛlɛ wɔ Ɛhɛlɛ Ɛjɔlɛ nɩn anun kɛ Nyanmɩan nwan: Ɛmɔ síe bɛ́ nwʋn nwannzan-nwannzan, ɔ sanlɩn kɛ n dɩ nwannzan-nwannzan.

¹⁷Nyanmɩan nnɩan man sʋanlan nyunnun ɔ mmua man yɩ́ ndɛɛ. Sʋanlan kʋn biala nyɔlɩɛ nɩn anwʋn yɛ̂ ɔ ’nɩan ɔ bua yɩ́ ndɛɛ ɔ. Ɛhɩka ati, ɛmɔ mmʋtʋɛ’n-mɔ anun, sɛ ɛmɔ fɛlɛ Nyanmɩan Sɩɛ a, anɩn mɛlɛ mɔ ɛmɔ tɛ nanndɩ asɩɛ nɩn asʋ ɛwa’n, ɛmɔ héle kɛ ɛmɔ man Nyanmɩan anyɩnnzɔ ɛmɔ nyɔlɩɛ’n-mɔ kʋalaa anun. ¹⁸Afɩ ɛmɔ sɩ kalɛ mɔ b’a tua maan ɛmɔ a nyan bɛ́ ti fi asɩtanlan basa-basa’n mɔ ɛmɔ anan-mɔ helelɩ ɛmɔ nɩn anun’n. Nán esika jɛtɛ fufue anaan esika kɔkɔlɛ m’ɔ sɛcɩ’n yɛ̂ b’a fa b’a tua ɛmɔ ati kalɛ ɔ. ¹⁹Nan bɛ le Kilisi moja’n m’ɔ sʋ ɛbʋɛ’n yɛ̂ b’a fa b’a yɩ ɛmɔ ati tɛɛ ɔ. Afɩ Kilisi tɩ kɛ *bʋa baa, yɩ́ lɩka fɩ́ɩ́ buli man ɛbʋɩn, yɩ́ nwʋn tɩta man nun. ²⁰Asannan nán Nyanmɩan a bɔ mân’n, ɔ lili mʋa yɩlɩ Kilisi kɛ ɔ’a a li sɔ junman’n. Nán ɛmɔ kpa ɛyɔlɛ ati, mɛlɛ kasian ɛhɩ-mɔ anun yɛ̂ ɔ’a yɩ yɩ́ nwʋn ɔ’a hele ɔ. ²¹Yɩ́ dunman nun ati yɛ̂ ɛmɔ de Nyanmɩan Kpili m’ɔ jasʋlɩ yɩ́ fi ewue nun, mɔ ɔ’a man ɔ’a nyan anunminnyanmʋn’n di ɔ. Ɔ man ɛmɔ fa bɛ́ dedi’n nʋn bɛ́ anyɩndasʋɛ’n bɛ wula Nyanmɩan anun. ²²Ananhɔlɛ ɛjɔlɛ’n mɔ ɛmɔ anyɩn sɔ yɩ́’n, ɔ’a man ɛmɔ anwʋn a tɩ ɛsɛ ɛmɔ kulo anianman’n-mɔ. Ehulo sɔ’n tɩ man bɛ́ je sʋ ehulo. Ɛhɩka ati, ɛmɔ fá bɛ́ ahʋnlɩn’n kʋalaa bɛ húlo bɛ́ nwʋn kpa. ²³Afɩ b’a wʋ ɛmɔ fʋfɔlɛ. Awɔlɛ sɔ’n fi man kulo sʋanlan, nan ɔ fi ɛmɔ Asɩ Nyanmɩan Kpili. Ɔ nanndɩ yɩ́ Nʋan Ɛjɔlɛ’n m’ɔ wɔ ɛbɛlɛ dahuu nɩn asʋ y’ɔ man ɛmɔ a nyan ngʋan fʋfɔlɛ ɔ. ²⁴Afɩ b’a hɛlɛ wɔ Ɛhɛlɛ Ɛjɔlɛ nɩn anun kɛ:

Kulo menian’n-mɔ kʋalaa tɩ kɛ ndile.

Bɛ́ anunminnyanmʋn’n mɔ bɛ le yɩ́’n kʋalaatin

tɩ kɛ ndile’n ndetele’n.

Ndile’n yʋɩ a, ndetele’n tɩtɩ gua asɩ.

²⁵Nan yɛ́ Mɩn Anʋan Ɛjɔlɛ’n dɩɛ,

Ɔ wɔ ɛbɛlɛ dahuu.

Ɛjɔlɛ sɔ’n, y’ɔ le Ɛjɔlɛkpa’n mɔ b’a bɔ b’a hele ɛmɔ’n.

Nyanmɩan menian’n-mɔ

¹Ɛhɩka ati, ɛmɔ yáci ati anun ɛtɛ ninnge’n-mɔ kʋalaa bɛ gúa. Ɛmɔ yáci ato elie’n. Ɛmɔ yáci bɛ́ nwʋn apoo ɛbɔ ɔ nʋn bɛ́ nwʋn ɛkpɔ ɛfa’n. Ɛmɔ yáci bɛ́ manngʋn’n-mɔ anzin ɛjɔlɛ ɛtɛ ɛhan’n. ²Nan ɛmɔ mán bɛ́ nyɩn bʋ́lʋ Nyanmɩan Anʋan Ɛjɔlɛ nɩn anun kpa kɛ adɔman’n-mɔ anyɩn bʋlʋ nyafʋsue’n nán ɔ’a man ɛmɔ a nyin b’a nyan bɛ́ ti. ³Kɛ Ɛhɛlɛ Ɛjɔlɛ’n kan yɩ́’n: Ɛmɔ a nwun kɛ yɛ̂ Mɩn tɩ kpa sʋnman.

⁴Ɛmɔ hyʋ́ɩn bɛ kpúnnge yɛ́ Mɩn Zozi Kilisi mɔ menian’n-mɔ a mmu man yɩ́ sʋanlan’n. Nan Nyanmɩan anyunnun an, Zozi anwʋn cian kpa. Kɛ sʋanlan m’ɔ lɛ si sua fa nyɔbʋɛ’n, Nyanmɩan kʋsʋ a fa Zozi Kilisi m’ɔ man ngʋan’n kɛ ɛbʋɛ, ɔ a bɔ yɩ́ sua nɩn abʋ. ⁵Nyanmɩan lɛ fa ɛmɔ kʋsʋ mɔ Zozi a man ɛmɔ ngʋan’n kɛ nyɔbʋɛ ɔ si yɩ́ sua. Sua sɔ’n, ɔ nanndɩ Zozi Kilisi asʋ, ɛmɔ ’kaci nun anwʋntɩɛ tɛɛyɩfʋɛ bɛ bɔ afɔlɩɛ’n m’ɔ sɔ Nyanmɩan anyɩn’n. ⁶Afɩ b’a hɛlɛ wɔ Ɛhɛlɛ Ɛjɔlɛ nɩn anun kɛ Nyanmɩan nwan:

Ɛmɔ nɩ́an, mɩɩn si mɩ́n sua’n Siʋn bʋka nɩn asʋ ɛbɛlɛ.

M’an yɩ sʋanlan kʋn mɔ yɩ́ nwʋn cian mɩ́n kpa

m’an sie ɛbɛlɛ kɛ ayialɩɛ nɩn asʋ ɛbʋɛ’n.

Sʋanlan biala m’ɔ de yɩ́ di’n,

anyunnunguasɩɛ ngan man yɩ́ lé.

⁷Ɛmɔ mɔ bɛ de yɩ́ bɛ di’n, ɔ tɩ like m’ɔ sʋ ɛbʋɛ man ɛmɔ. Nan bɛ́ mɔ bɛ nne man yɩ́ bɛ nni man’n, bɛ́ dɩɛ, b’a hɛlɛ wɔ Ɛhɛlɛ Ɛjɔlɛ nɩn anun kɛ:

Ɛbʋɛ’n mɔ bɛ́ mɔ bɛ lɛ si sua’n buli yɩ́ kɛ

ɔ tɩ man kpa mɔ bɛ juli bɛ tʋlɩ’n,

yɩ́ yɛ̂ ɔ’a kaci ɛbʋɛ kpa’n m’ɔ le sua nɩn anun ɔ.

⁸Ɛsɛ Ɛhɛlɛ Ɛjɔlɛ nɩn anun lɩka kʋn, Nyanmɩan nwan:

Ɛbʋɛ sɔ’n man sʋanlan aja kpula,

ɔ man sʋanlan fin asɩ.

Bɛ́ ja kpula yɩ́ bɛ fin asɩ, ɔ sanlɩn kɛ b’a nne man Nyanmɩan Anʋan Ɛjɔlɛ’n b’a nni man. Bɛ́ dɩɛ mɔ bɛ hyɩhyɛlɩ bɛ manlɩn bɛ́ nɩn anɩn.

⁹Nan ɛmɔ dɩɛ, ɛmɔ tɩ menian mɔ Nyanmɩan a yɩ ɛmɔ. Ɛmɔ tɩ Nyanmɩan m’ɔ tɩ belemgbin’n tɛɛyɩfʋɛ, ɛmɔ tɩ menian nwannzan-nwannzan, ɛmɔ tɩ yɩ́ menian kpa bɔkɔɔ. Nyanmɩan a fɛlɛ ɛmɔ fi awosin nɩn anun, ɔ’a man ɛmɔ a fite yɩ́ jawe kpili nɩn anun. Ɔ’a yɩ ɛmɔ kɛ ɛmɔ bɔ́ yɩ́ ɛnyɩnman nyɔlɩɛ mgbili mgbili’n-mɔ bɛ héle menian’n-mɔ. ¹⁰Daba anɩn ɛmɔ tɩ man Nyanmɩan menian. Nan sian dɩɛ, ɛmɔ a kaci yɩ́ menian. Daba anɩn Nyanmɩan nzɩ man ɛmɔ anwʋn anwunnvoe, nan sian dɩɛ, Nyanmɩan a nwun ɛmɔ anwʋn anwunnvoe.

Nyanmɩan menian’n-mɔ abalabɔ’n.

¹¹Anianman ehulo mma, ɛmɔ tɩ nyɔfʋɛ asɩɛ nɩn asʋ ɛwa. Ɛmɔ walɩ mgbannza. Yɩ́ ti, mɩn ’sɛlɛ ɛmɔ mɩn bʋtʋ bɛ́ kɛ ɛmɔ síe bɛ́ nwʋn ye wɔ ninnge ɛtɛ ɛtɛ’n-mɔ mɔ ɛtɛ anwʋnnaan nɩn anyɩn bʋlʋ yɩ́ nwʋn nɩn anwʋn. Ɔ sanlɩn kɛ ninnge sɔ’n-mɔ nʋn ɛmɔ ɛkala’n kʋn ɛlɔɛ. ¹²Ɛmɔ bɔ́ abalabɔ kpa wɔ bɛ́ mɔ bɛ nzɩ man Nyanmɩan nɩn afian. Sɛ bɔbɔ bɛ tʋn ɛmɔ ɛsʋan kɛ ɛmɔ yɔ nyɔlɩɛ ɛtɛ a, bɛ ’ba nwun ɛmɔ nyɔlɩɛ kpa’n, nán cɩan mɔ Nyanmɩan kɔ yɩ yɩ́ nwʋn kɔ hele bɛ́’n, anɩn bɛ yɩ yɩ́ ayɛ.

¹³Ɛhɩ, kɛmɔ ɛmɔ tɩ yɛ́ Mɩn menian’n, ɛmɔ bɛ́bɛlɛ bɛ́ nwʋn asɩ bɛ mán mgbain’n-mɔ kʋalaatin mɔ bɛ sie mân’n. Ɛmɔ bɛ́bɛlɛ bɛ́ nwʋn asɩ bɛ mán belemgbin kpain’n m’ɔ le tunmin wɔ menian’n-mɔ kʋalaa asʋ’n. ¹⁴Kʋnmanna’n-mɔ mɔ belemgbin a sesie bɛ́ kɛ bɛ túa nyɔlɩɛtɛfʋɛ’n-mɔ kalɛ nán bɛ fʋ́a bɛ́ mɔ bɛ bɔ bala kpa’n, ɛmɔ bɛ́bɛlɛ bɛ́ nwʋn asɩ bɛ mán bɛ́ kʋsʋ. ¹⁵Afɩ like mɔ Nyanmɩan kulo’n y’ɔ le kɛ ɛmɔ bɔ́ bala kpa. Yɩ́ dɩɛ, anɩn ngʋasɩafʋɛ’n-mɔ mɔ bɛ nzɩ man like fɩ́ɩ́’n, bɛ nnyan man ɛmɔ anwʋn ɛjɔlɛ ɛtɛ fɩ́ɩ́ bɛ ngan man. ¹⁶Ɛmɔ a nyan fanwʋndi, nan kʋsʋ nán bɛ man fanwʋndi sɔ’n kaci kɛ ɛtanlan bɛ fɩa yɩ́ bʋ bɛ yɔ nyɔlɩɛ ɛtɛ. Nan ɛmɔ bɔ́ bala kpa, ɔ sanlɩn kɛ ɛmɔ tɩ Nyanmɩan ngʋa. ¹⁷Ɛmɔ mán menian’n-mɔ kʋalaa anyɩnnzɔ. Ɛmɔ húlo anianman’n-mɔ mɔ b’a fa bɛ́ nwʋn b’a man Zozi’n. Ɛmɔ súlo Nyanmɩan, ɛmɔ mán belemgbin anyɩnnzɔ.

Ɛmɔ yɔ́ kɛ Zozi yɔlɩ yɩ́’n

¹⁸Ɛmɔ mɔ bɛ tɩ ngʋa’n, ɛmɔ bɛ́bɛlɛ bɛ́ nwʋn asɩ, bɛ mán bɛ́ mɩn-mɔ anyɩnnzɔ kpa. Nán kɛ bɛ́ mɔ bɛ tɩ kpa mɔ bɛ tɩ bɛtɛɛ nɩn ala y’ɔ di kɛ ɛmɔ bɛbɛlɛ bɛ́ nwʋn asɩ bɛ man bɛ́ anyɩnnzɔ ɔ. Nan ɔ di kɛ ɛmɔ yɔ yɩ́ sɔ bɛ man bɛ́ mɔ bɛ tɩ man kpa’n-mɔ kʋsʋ. ¹⁹Afɩ sɛ sʋanlan kʋn man Nyanmɩan anyɩnnzɔ nán ɔ lɛ nwun yalɛ m’ɔ nzɛ nvata man an, ɔ tɩ like kpa. ²⁰Nan sɛ ɛmɔ yɔ ɛtɛ nán bɛ lɛ kele ɛmɔ yalɛ, nán ɛmɔ tila bɛ́ ahʋnlɩn an, anɩn anunminnyanmʋn benin yɛ̂ ɛmɔ nyan yɩ́ nun ɔ? Nan sɛ ɛmɔ bɔ bala kpa, mɔ bɛ lɛ kele ɛmɔ yalɛ, nán sɛ ɛmɔ tila bɛ́ ahʋnlɩn bɛ nwun yalɛ sɔ nɩn an, ɔ tɩ like kpa wɔ Nyanmɩan anyunnun.

²¹Ɛfɛlɛ’n mɔ Nyanmɩan a fɛlɛ ɛmɔ yɩ́ nwʋn’n, yɩ́ bʋ nɩn anɩn. Ɔ sanlɩn kɛ Kilisi kʋsʋ nwunlin amannɩɛ wɔ ɛmɔ dunman nun maan ɛmɔ kʋsʋ nɩan yɩ́ dɩɛ nɩn asʋ bɛ yɔ bie. ²²Kilisi a nyɔ man ɛtɛ lé, ɔ’a nni man ato lé. ²³Bɛ kpɛlɩ yɩ́ nzʋba, ɔ’a mgbɛ man bɛ́ bie. Bɛ helelɩ yɩ́ yalɛ, ɔ’a nvʋa man bɛ́ ti. Ɔ falɩ yɩ́ kʋalaa wulalɩ Nyanmɩan m’ɔ tɩ ndɛɛbuafʋɛ kpa nɩn asa nun. ²⁴Kilisi muonun sʋalɩ yɛ́ ɛtɛ’n kʋalaa yɩ́ ti sʋ wɔ kʋlʋwa nɩn asʋ. Ɔ’a yɔ sɔ maan y’a wu yɛ fi ɛtɛ nɩn anun y’a jasʋ yɛ bɔ bala m’ɔ tɩ sɛsɛ. Ɔ sanlɩn kɛ, ɛbʋta’n mɔ bɛ bʋtalɩ yɩ́’n y’ɔ man ɛmɔ anwʋn a sa ɔ. ²⁵Afɩ daba anɩn ɛmɔ tɩ kɛ mmʋa mɔ b’a minlin ɔ. Nan sian dɩɛ, ɛmɔ a sa a a Kilisi m’ɔ tɩ bʋa ɛnɩanfʋɛ kpa’n m’ɔ sisa ɛmɔ ɛkala nɩn anwʋn.

Balasua nʋn yɩ́ hun bɛ́ asɩtanlan’n

¹Ɛhɩ, ɛmɔ mmalasua’n-mɔ, ɛmɔ bɛ́bɛlɛ bɛ́ nwʋn asɩ bɛ́ mán bɛ́ hun-mɔ. Sɛ ɛmɔ ahun mmie-mɔ nne man Nyanmɩan Anʋan Ɛjɔlɛ’n bɛ nni man nán bɛ nwun ɛmɔ asɩtanlan kpa nɩn an, sɛ bɔbɔ ɛmɔ a ngan man ɛjɔlɛ b’a ngele man bɛ́ a, bɛ ’fa bɛ́ nwʋn bɛ man Nyanmɩan. ²Afɩ bɛ ’ba nwun yɩ́ kɛ ɛmɔ asɩtanlan’n tɩ kpa, ɛsɛ ɛmɔ anyɩn sɔ bɛ́. ³Nán bɛ kpʋnndɛ bɛ́ nwʋn elie kɛ bɛ́ ti enyuan mɔ b’a sesie yɩ́ kanlanman, ɔ nʋn esika ninnge mɔ bɛ fa bɛ sesie bɛ́ nwʋn, ɔ nʋn ɛtanlan nganlanman ɛhala. ⁴Nan ɛmɔ mán ɛmɔ kanlanman’n fi ɛmɔ akunnun kʋsʋ ɔ fíte. Kanlanman’n mɔ bɛ lɛ kpʋnndɛ m’ɔ le man ɛsɛcɩɛ’n y’ɔ le ahʋnlɩn m’ɔ tɩ kpa, m’ɔ tɩ bɛtɛɛ. Kanlanman sɔ’n, ɔ tɩ like m’ɔ sʋ ɛbʋɛ kpa wɔ Nyanmɩan anyunnun. ⁵Daba mmalasua’n-mɔ mɔ anɩn bɛ le anyɩndasʋɛ wɔ Nyanmɩan ɛlɔ’n, kɛ bɛ yɔlɩ yɩ́ nɩn anɩn. Bɛ bɛbɛlɛlɩ bɛ́ nwʋn asɩ bɛ manlɩn bɛ́ hun-mɔ. ⁶Kɛ anɩn Sala tɩ yɩ́ nɩn anɩn. Ɔ bɛbɛlɛlɩ yɩ́ nwʋn asɩ dede ɔ fɛlɛlɩ Abalahamʋn “Yɛmɩnlɩn”. Sɛ ɛmɔ kʋsʋ bɔ bala kpa, nán sɛ ɛmɔ a nyaci man bɛ́ nwʋn maan like fɩ́ɩ́ a nnwonwunlan man ɛmɔ a, anɩn Sala amma mmalasua y’ɔ le ɛmɔ sakpa.

⁷Ɛmɔ mmelenzua’n-mɔ kʋsʋ, ɛmɔ nʋn bɛ́ yɩ-mɔ tánlan kanlanman. Ɛmɔ nwún yɩ́ kɛ bɛ́ anwʋnsɛlɛ’n nju man ɛmɔ dɩɛ’n. Ɛmɔ mán bɛ́ anyɩnnzɔ. Ɔ sanlɩn kɛ ngʋan’n mɔ Nyanmɩan ’fa man ɛmɔ’n, bɛ́ kʋsʋ bɛ wɔ nun bie. Ɛmɔ yɔ́ yɩ́ sɔ, nán Nyanmɩan Kpili a tie ɛmɔ asɔnɩn ɛyɔlɛ’n.

Nyanmɩan ’yeyila bɛ́ mɔ bɛ lɛ nwun yalɛ wɔ Zozi Kilisi dunman nun’n

⁸Mɩ́n ɛjɔlɛ nɩn ayuelɩɛ’n y’ɔ le kɛ ɛmɔ kʋalaa nyán ajʋnlɩn kʋn. Ɛmɔ nwún ɛmɔ anwʋn anwunnvoe. Ɛmɔ húlo bɛ́ nwʋn kɛ anianman-mɔ kulo bɛ́ nwʋn’n. Ɛmɔ yɔ́ bɛ́ nwʋn ye, bɛ bɛ́bɛlɛ bɛ́ nwʋn asɩ bɛ́ manngʋn’n-mɔ anyunnun. ⁹Nán bɛ fa ɛtɛ bɛ tua ɛtɛ’n kalɛ, anaan nzʋba bɛ tua nzʋba’n kalɛ. Nan ɛmɔ sɛ́lɛ Nyanmɩan maan ɔ yéyila bɛ́. Ɔ sanlɩn kɛ Nyanmɩan kulo kɛ ɔ yeyila ɛmɔ, yɩ́ ti y’ɔ man ɔ fɛlɛlɩ ɛmɔ ɔ. ¹⁰B’a hɛlɛ wɔ Ɛhɛlɛ Ɛjɔlɛ nɩn anun kɛ:

Sʋanlan m’ɔ kulo kɛ ɔ nyan ngʋan ɔ di fɛ’n,

anɩn ɔ yáci yɩ́ manngʋn’n-mɔ anwʋn ɛjɔlɛ ɛtɛ ɛhan

nʋn ato elie’n.

¹¹Ɔ yɩ́ yɩ́ sa nyɔlɩɛ ɛtɛ nɩn anun,

nán ɔ yɔ́ nyɔlɩɛ kpa.

Ɔ kpʋ́nndɛ anzʋnunjɔ atɩn’n, nán ɔ nánndɩ sʋ.

¹²Ɔ sanlɩn kɛ Nyanmɩan anyɩn kpala sɛsɛfʋɛ’n-mɔ,

ɔ tie bɛ́ asɔnɩn ɛyɔlɛ’n.

Nan bɛ́ mɔ bɛ yɔ ɛtɛ’n,

ɔ ngulo man kɛ yɩ́ nyɩn bɔ bɛ́.

¹³Sɛ ɛmɔ yɩ bɛ́ kunnun kpa bɔkɔɔ, mɔ ɛmɔ lɛ bɔ bala kpa’n, nwan y’ɔ kʋala ɔ yɔ ɛmɔ ɛtɛ ɔ? ¹⁴Sɛ ɛmɔ bɔ bala kpa nán ɛmɔ nwun amannɩɛ bɔbɔ a, Nyanmɩan ’yeyila ɛmɔ. Yɩ́ sɔ ati, nán bɛ sulo bɛ́ mɔ bɛ kele ɛmɔ yalɛ’n maan ɛmɔ ati anun sɛcɩ ɛmɔ. ¹⁵Nan ɛmɔ wúla Kilisi m’ɔ tɩ ɛmɔ Amɩn nɩn anunminnyanmʋn wɔ ɛmɔ ahʋnlɩn nɩn anun. Sɛ sʋanlan bie bisa ɛmɔ anyɩndasʋɛ’n mɔ ɛmɔ le yɩ́ wɔ Kilisi anun nɩn anwʋn ɛjɔlɛ a, ¹⁶ɛmɔ tʋ́ bɛ́ ahʋnlɩn asɩ bɛ fá anyɩnnzɔ bɛ búa yɩ́. Ɛmɔ mán ɛmɔ anʋan ɛjɔlɛ nʋn ɛmɔ abalabɔ’n yɔ́ kʋn, nán anyunnunguasɩɛ a han bɛ́ mɔ Zozi Kilisi dunman nun bɛ kan ɛmɔ anzin ɛjɔlɛ ɛtɛ’n. ¹⁷Afɩ ɔ tɩ kpa kɛ ɛmɔ yɔ́ nyɔlɩɛ kpa bɛ nwún amannɩɛ, ɔ sanlɩn kɛ Nyanmɩan kulo yɩ́ sɔ. Sɛ ɛmɔ yɔ nyɔlɩɛ kpa a, ɔ tɩ kpa tala kɛ ɛmɔ kɔ yɔ nyɔlɩɛ ɛtɛ nán ɛmɔ a nwun yalɛ’n.

¹⁸Kilisi muonun wuli kpɛ̂ kʋnmgba cein yɛ́ ɛtɛ’n dunman nun. Yɩ́ m’ɔ tɩ sɛsɛfʋɛ’n, ɔ wuli bɛ́ mɔ bɛ tɩ man sɛsɛfʋɛ’n-mɔ dunman nun maan y’a fa yɛ́ nwʋn y’a wula Nyanmɩan asa nun. Bɛ hunlin yɩ́ nwʋnnaan’n, nan Nyanmɩan Wawɛ’n manlɩn yɩ́ ngʋan. ¹⁹Wawɛ sɔ’n dunman nun, ɔ hɔlɩ hanlɩn Nyanmɩan Anʋan Ɛjɔlɛ’n ɔ helelɩ wawɛ’n-mɔ mɔ b’a gua bɛ́ fiadɩ’n. ²⁰Wawɛ sɔ’n-mɔ, mɛlɛ mɔ Nowe ’bʋbɔ meli’n, bɛ́ nyɩn a nzɔ man Nyanmɩan. Nyanmɩan Kpili sili abʋtalɛ ɔ nwʋnndɛlɩ bɛ́ dede, menian mɔ bɛ ’fʋ meli nɩn anun’n fʋlɩ. Bɛ́ mɔ bɛ fʋlɩ meli nɩn anun’n b’a nzʋn man fɩ́ɩ́. Bɛ tɩ menian mɔcʋɛ ala yɛ́ bɛ fʋlɩ nun bɛ nyanlɩn bɛ́ ti asue nɩn anyɩnsʋ ɔ. ²¹Nzue sɔ’n, anɩn ɔ tɩ kɛ ɛsɔnɩan’n m’ɔ man ɛmɔ nyan bɛ́ ti sian dɩɛ’n nzɔlɛ. Ɛsɔnɩan sɔ’n, nán y’ɔ le bɛ́ nwʋn efian nɩn enwunnzian’n. Nan yɩ́ y’ɔ le ɛsɛlɛ’n mɔ yɛ sɛlɛ Nyanmɩan kɛ ɔ mán yɛ́ ahʋnlɩn nɩn anun tɩ’n. Ɔ sanlɩn kɛ Zozi Kilisi fi ewue nun ɔ’a jasʋ. ²²Ɔ’a fʋ ɔ’a hɔ anwunno, ɔ tɩ Nyanmɩan Kpili fama sʋ. Nyanmɩansʋ mmɔfʋɛ’n-mɔ anun, bɛ́ mɔ bɛ di kpain’n ɔ nʋn bɛ́ mɔ bɛ le tunmin’n, yɩ́ y’ɔ sie bɛ́ ɔ.

Abalabɔ fʋfɔlɛ’n

¹Ɛhɩ, kɛmɔ Kilisi nwunlin anwʋnnaan nun amannɩnhunnun’n, ɛmɔ kʋsʋ nyán ajʋnlɩn kʋnmgba sɔ’n mɔ anɩn ɔ le yɩ́’n. Ɔ sanlɩn kɛ sʋanlan m’ɔ kɔ nwun anwʋnnaan nun amannɩnhunnun’n, ɔ nwula man yɩ́ sa ɛtɛ nɩn anun kʋ́n. ²Sian dɩɛ, ɔ di kɛ ɛmɔ bɔ bala mɔ Nyanmɩan kulo wɔ ɛmɔ asɩtanlan nɩn anun mɛlɛ mɔ ɛmɔ tɛ wɔ asɩɛ nɩn asʋ ɛwa’n. Nan ɔ nni man kɛ ɛmɔ bɔ bala ɛtɛ mɔ anwʋnnaan kulo’n kʋ́n. ³Afɩ, bɛ́ mɔ bɛ nzɩ man Nyanmɩan’n, bɛ́ nyɔlɩɛ mɔ bɛ yɔ’n, daba ɛmɔ falɩ tɛmʋn dɔʋn bɛ yɔlɩ bie. Anɩn ɛmɔ asɩtanlan’n tɩ basa-basa, ɛmɔ bɔ bala ɛtɛ mɔ anwʋnnaan kulo’n, ɛmɔ tɩ kɔnʋnmɩnnzan, ɛmɔ nʋn bɛ́ manngʋn-mɔ bɛ didi bɛ nʋn nzan dede ɔ fʋ bɛ bʋ́ɛ sʋ, ɛsɛ ɛmɔ sɔ amʋan m’ɔ tɩ busuɔfʋɛ like’n. ⁴Kɛmɔ sian dɩɛ, ɛmɔ nʋn bɛ́ mɔ bɛ nzɩ man Nyanmɩan’n nyɔ man mgban-mgban ninnge sɔ’n-mɔ kʋ́n’n, ɛhɩka ati yɛ̂ menian sɔ’n-mɔ bɔ ɛmɔ amgba ɔ. Ɔ sanlɩn kɛ ɛmɔ abalabɔ’n sin bɛ́ nwʋn. ⁵Bɛ ’ba bu bɛ́ nyɔlɩɛ’n-mɔ anwʋn mgbʋnndan bɛ kele Nyanmɩan mɔ ɔ’a sesie yɩ́ nwʋn ɔ ’ba bua anyɩnwɔsʋɛ mma’n-mɔ nʋn ewue mma’n-mɔ ndɛɛ’n. ⁶Afɩ bɛ hanlɩn Ɛjɔlɛkpa’n bɛ helelɩ yɛ́ nan-mɔ mɛlɛ mɔ anɩn bɛ́ nyɩn wɔ sʋ’n. Ɔ man sɛ b’a wu bɔbɔ a, Nyanmɩan tunmin nun, Wawɛ Nwannzan-nwannzan’n ’man bɛ nyan ngʋan.

⁷Like biala ayuelɩɛ a kpunnge. Ɛhɩka ati, ɛmɔ bú mgbʋnndan kpa. Ɛmɔ sésie bɛ́ nwʋn nán b’a hʋala b’a tanlan mmʋtʋɛ nɩn anun. ⁸M’ɔ cian tala like kʋalaa’n y’ɔ le kɛ ɛmɔ fá bɛ́ ahʋnlɩn’n kʋalaa bɛ húlo bɛ́ nwʋn. Ɔ sanlɩn kɛ ehulo’n kala ɛtɛ dɔʋn asʋ. ⁹Sʋanlan biala m’ɔ kɔ wʋlʋ ɛmɔ awulo’n, ɛmɔ sɔ́ yɩ́ nun kanlanman, nán bɛ munlan bɛ jʋjɔ bɛ́ konvin abʋ. ¹⁰Nyanmɩan Kpili a man ɛmɔ anun kʋn biala Wawɛ nun junman. Junman ngacile ngacile sɔ’n, sʋanlan kʋn lí yɩ́ dɩɛ’n kpa ɔ fá bʋ́ka yɩ́ manngʋn’n-mɔ kɛ ɔ sɛ fata’n. ¹¹Sʋanlan m’ɔ kan Nyanmɩan Anʋan Ɛjɔlɛ’n, ɔ hán ɛjɔlɛ mɔ Nyanmɩan kɔ man yɩ́ kɛ ɔ hán’n. Sʋanlan m’ɔ bʋka yɩ́ manngʋn’n-mɔ’n, ɔ fá anwʋnsɛlɛ’n kʋalaa mɔ Nyanmɩan Kpili a fa a man yɩ́’n ɔ bʋ́ka bɛ́. Like biala anun, yɛ yɔ́ yɩ́ sɔ maan anunminnyanmʋn hán Nyanmɩan wɔ Zozi Kilisi dunman nun. Ɔ sanlɩn kɛ anunminnyanmʋn’n nʋn tunmin’n tɩ yɩ́ dɩɛ cɩan daa. Amɩn!

Amannɩnhunnun nʋn nyila’n

¹²Anianman ehulo mma, ɛmɔ lɛ nwun amannɩnhunnun. Amannɩnhunnun sɔ’n tɩ kɛ sɩ̂n mɔ b’a kpʋnmgbɔ b’a gua ɛmɔ anwʋn ɔ. Nán bɛ man ɔ sin bɛ́ nwʋn kɛ ɛjɔlɛ ngacile bie yɛ̂ ɔ’a tʋ ɛmɔ ɔ. ¹³Nan ɛmɔ lí fɛ kɛ ɛmɔ lɛ nwun Kilisi amannɩnhunnun’n bie, nán cɩan mɔ ɔ ’yɩ yɩ́ anunminnyanmʋn’n kele’n, ɛmɔ a li fɛ dede ɔ’a bʋ sʋ. ¹⁴Sɛ Kilisi dunman nun menian’n-mɔ kpɛ ɛmɔ nzʋba a, nyila kan ɛmɔ. Ɔ sanlɩn kɛ anunminnyanmʋn Wawɛ’n m’ɔ tɩ Nyanmɩan Wawɛ’n wɔ ɛmɔ anun. ¹⁵Nán man ɛmɔ anun bie nwun amannɩɛ kɛ ɔ’a li awue, anaan ɔ’a wua, anaan ɔ’a yɔ ɛtɛ, anaan ɔ’a li abie ɛjɔlɛ dɩɛ anun cenjin. ¹⁶Nan sɛ ɛmɔ anun bie lɛ nwun amannɩɛ Kilisi dunman nun an, n’ɔ man yɩ́ nwʋn nyian kun yɩ́. Nan ɔ lá Nyanmɩan asɩ kɛ ɔ tɩ Kilisi sʋanlan.

¹⁷Afɩ mân’n ndɛɛ ebua nɩn a li mʋa a bɔ yɩ́ bʋ Nyanmɩan menian’n-mɔ ɛlɔ. Yɛ́ mɔ yɛ tɩ yɩ́ menian’n, sɛ ndɛɛ ebua’n bɔ yɩ́ bʋ yɛ́ ɛlɔ a, anɩn bɛ́ mɔ bɛ nne man Nyanmɩan Anʋan Ɛjɔlɛ’n bɛ nni man’n, bɛ́ ayuelɩɛ’n, ɔ ’yue bɛ́ sɛ? ¹⁸Afɩ Ɛhɛlɛ Ɛjɔlɛ’n nwan:

Bɛ́ mɔ bɛ tɩ fɔ́ʋ́n’n,

sɛ bɛ́ ti ele tɩ man nzɛmɩndɛ a,

anɩn bɛ́ mɔ bɛ nne man Nyanmɩan bɛ nni man

ɔ nʋn ati anun ɛtɛ mma’n-mɔ, bɛ ’yɔ bɛ́ nwʋn sɛ?

¹⁹Yɩ́ sɔ ati, bɛ́ mɔ bɛ lɛ nwun amannɩɛ, m’ɔ tɩ Nyanmɩan akunnun like’n, bɛ fá bɛ́ nwʋn bɛ wúla Nyanmɩan asa nun kpa bɔkɔɔ nán bɛ yɔ́ nyɔlɩɛ kpa. Afɩ yɩ́ m’ɔ bɔlɩ ɛmɔ’n, ɔ tɩ ananhɔlɛfʋɛ, yɩ́ anɔhʋba’n m’ɔ bɔlɩ ɛmɔ’n, ɔ ’di sʋ.

Asɔnɩn mgbain’n-mɔ

¹Kɩkaala dɩɛ, ɛ ’nwun ɛjɔlɛ kaan mɔ mɩɩn fa mɩn tʋ asɔnɩn mgbain’n-mɔ mɔ bɛ wɔ ɛmɔ afian ɛlɔ nɩn anyunnun’n. Mɩ́n muonun n dɩ asɔnɩn kpain’n bie kɛ bɛ́. Mɩn di Kilisi amannɩnhunnun’n mɔ ɔ’a nwun yɩ́ nɩn anwʋn adanzɩɛ, ɛsɛ mɛlɛ mɔ ɔ ’ba a’n, mɩn ’tanlan yɩ́ anunminnyanmʋn nɩn anun bie. Yɩ́ sɔ ati, mɩn ’sɛlɛ ɛmɔ mɩn bʋtʋ bɛ́ kɛ: ²Nyanmɩan menian’n-mɔ mɔ ɔ’a fa bɛ́ ɔ’a wula ɛmɔ asa nun’n, bɛ tɩ kɛ mmʋa kpule, ɛmɔ nɩ́an bɛ́ sʋ kpa. Nán bɛ nɩan bɛ́ sʋ kɛ junman mɔ bɛ lɛ fa bɛ tinndin ɛmɔ kɛ bɛ lí ɔ, nan ɛmɔ yɩ́ bɛ́ kunnun bɛ nɩ́an bɛ́ sʋ kpa bɔkɔɔ kɛ Nyanmɩan kulo’n. Nán bɛ yɔ yɩ́ kɛ bɛ lɛ nɩan bɛ́ sʋ bɛ kpʋnndɛ nun esika. Nan ɛmɔ sí bɛ́ hue bɛ nɩ́an bɛ́ sʋ. ³Menian mɔ Nyanmɩan a fa bɛ́ a wula ɛmɔ asa nun’n, nán bɛ sisi bɛ́, nan ɛmɔ mɔ bɛ tɩ mmʋa ɛnɩanfʋɛ’n, ɛmɔ bɔ́ bala kpa maan bɛ nɩ́an sʋ bɛ bɔ́ bie. ⁴Yɩ́ dɩɛ cɩan mɔ Kilisi m’ɔ tɩ Bʋa Ɛnɩanfʋɛ Kpain’n kɔ a’n, anɩn ɛmɔ nyan anunminnyanmʋn abotile’n m’ɔ nzɛcɩ man lé’n.

Asɔnɩn mma’n-mɔ

⁵Ɛmɔ mgbafɛlɛ’n-mɔ kʋsʋ, ɛmɔ bɛ́bɛlɛ bɛ́ nwʋn asɩ bɛ mán mgbain’n-mɔ. Afɩ mɩɩn kan mɩn kele ɛmɔ kʋalaa kɛ bɛ bɛ́bɛlɛ bɛ́ nwʋn asɩ bɛ mán bɛ́ nwʋn. Ɔ sanlɩn kɛ b’a hɛlɛ wɔ Ɛhɛlɛ Ɛjɔlɛ nɩn anun kɛ:

Atubɛnwʋn mma’n-mɔ,

Nyanmɩan Kpili nʋn bɛ́ le yɩ́.

Nan bɛ́ mɔ bɛ bɛbɛlɛ bɛ́ nwʋn asɩ’n,

Nyanmɩan nwun bɛ́ nwʋn anwunnvoe.

⁶Yɩ́ sɔ ati, mɩɩn kan mɩn kele ɛmɔ kɛ ɛmɔ bɛ́bɛlɛ bɛ́ nwʋn asɩ bɛ mán tunminfʋɛ Nyanmɩan Kpili, nán ɔ’a man ɛmɔ sʋ mɛlɛ kasian nɩn anun. ⁷Ɛmɔ fá bɛ́ nzusue’n kʋalaa bɛ wúla yɩ́ sa nun, ɔ sanlɩn kɛ ɔ nɩan ɛmɔ lɩka.

⁸Ɛmɔ sésie bɛ́ nwʋn, bɛ sísa bɛ́ nwʋn, ɔ sanlɩn kɛ ɛmɔ kpɔfʋɛ Abɔnsanmʋn lɛ bɔ ɛmɔ anwʋn mgbɔlɔka kɛ tɛtɩanfʋɛ mɔ yɩ́ nyɩn a bʋlʋ ɔ lɛ tɛtɩan ɔ kpʋnndɛ naan mɔ ɔ ’cɩ yɩ́ di ɔ. ⁹Ɛmɔ tíla bɛ́ dedi nɩn anun kpa bɛ jínlan bɛ́ ja nun kpunndiin wɔ yɩ́ nyunnun. Afɩ asɔnɩn mma’n-mɔ mɔ bɛ wɔ mân’n lɩka kʋalaatin’n, kɛ bɛ nwun yalɛ nɩn anɩn. ¹⁰Kɩkaala ɛmɔ lɛ nwun yalɛ kaan, yɩ́ nzin, Nyanmɩan Kpili m’ɔ sɩ anwunnvoe sʋnman’n, mɔ ɔ’a fɛlɛ ɛmɔ kɛ ɛmɔ nʋn Kilisi bɛ yɔ́ kʋn bɛ tánlan yɩ́ anunminnyanmʋn’n m’ɔ le man ayuelɩɛ nɩn anun’n, yɩ́ muonun, ɔ ’sesie ɛmɔ kpa. Ɔ ’man ɛmɔ tin. Ɔ ’man ɛmɔ anwʋnsɛlɛ. Ɔ ’man ɛmɔ jinlan bɛ́ ja nun kpunndiin. ¹¹Tunmin’n tɩ yɩ́ dɩɛ cɩan daa! Amɩn.

Ngalɩɛ nʋn ahɩn ebisa

¹²Anianman *Silivɩn yɛ̂ ɔ’a bʋka mɩ́n maan m’an hɛlɛ kalata sin kaan ɛhɩ m’an nwan ɛmɔ ɔ. Ɔ tɩ anianman m’ɔ nanndɩ ananhɔlɛ atɩn nɩn asʋ ɔ. Mɩɩn fa kalata sɔ’n mɩn wowula ɛmɔ anwʋnsɛlɛ ɛsɛ mɩn kele ɛmɔ kɛ Nyanmɩan a nwun yɛ́ nwʋn anwunnvoe sakpa. Yɩ́ ti, ɛmɔ jínlan bɛ́ ja nun kpunndiin.

¹³Asɔnɩn mma’n-mɔ mɔ bɛ wɔ *Babilɔnʋn mɔ Nyanmɩan a fɛlɛ bɛ́ yɩ́ nwʋn kɛ ɔ’a fɛlɛ ɛmɔ’n, bɛ́ nwan bɛ ’bisa ɛmɔ ahɩn. Maakɩ mɔ asɔnɩn nɩn anun ɔ tɩ mɩ́n wa’n, yɩ́ kʋsʋ yɩ́ nwan ɔ ’bisa ɛmɔ ahɩn.

¹⁴Ɛmɔ bísa bɛ́ nwʋn ahɩn bɛ tɔ́ bɛ́ nwʋn nun.

Bɛ́ kʋalaa mɔ b’a fa bɛ́ nwʋn b’a man Kilisi’n, Nyanmɩan cɩ́cɩ bɛ́ lʋa.