1 ZƱAN

ZƱAN KALATA’N

M’Ɔ LI MƱA’N

M’ɔ wɔ nun’n

Kɛ menian’n-mɔ lɛ kpɩn kele’n, Zozi bɔfʋɛ Zʋan hɔlɩ tanlanlɩn kulo kpili’n mɔ bɛ fɛlɛ yɩ́ Efɛzɩ nɩn asʋ. Ɛbɛlɛ asɔnɩn’n-mɔ, Zozi bɔfʋɛ Pɔlʋ yɛ̂ ɔ bɔlɩ bɛ́ bʋ ɔ. Mɛlɛ mɔ Zʋan walɩ juli ɛbɛlɛ’n, ɔ kacili asɔnɩn sɔ’n-mɔ asʋ kpain. Ɛhɩka ati yɛ̂ ɔ fɛlɛ asɔnɩn’n-mɔ anun menian’n-mɔ yɩ́ mma nɩn ɔ.

Zʋan hɛlɛlɩ kalata nsan mɔ yɛ le yɩ́ yɛ́ sa nun ɛwa’n. Alimʋa kalata dɩɛ’n, ɔ’a ngɛlɛ ɔ ngɔ man asɔnɩn kʋn anaan sʋanlan kʋn. Nan kalata nɩn an, anɩn ɔ di kɛ asɔnɩn’n-mɔ kʋalaatin kɩnnga. Kalata nɩn anun, ɛjɔlɛ tile nnyuan wɔ nun. Ɛjɔlɛ tile kʋn lɛ sɛlɛ bɛ́ kɛ bɛ nánndɩ ananhɔlɛ atɩn nɩn asʋ. Ɛjɔlɛ sɔ’n, yɩ́ bʋ y’ɔ le kɛ bɛ lé yɛ́ Mɩn Zozi bɛ lí bɛ́ ahʋnlɩn nɩn anun kpa, ɛsɛ bɛ húlo bɛ́ nwʋn. Ɛjɔlɛ tile kʋn kʋsʋ lɛ kannzʋ bɛ́ kɛ bɛ nɩ́an bɛ́ nwʋn wɔ bɛ́ mɔ bɛ kekele ato ninnge’n-mɔ anwʋn (2.18-29, 4.1-6).

Sʋanlan’n mɔ yɩ́ nʋan ɛjɔlɛ’n man ngʋan’n

y’ɔ le Nyanmɩan Awa Zozi Kilisi

¹Anianman-mɔ, yɛ lɛ kɛlɛ ɛmɔ yɛ bɔ sʋanlan’n mɔ yɩ́ nʋan ɛjɔlɛ’n man ngʋan nɩn anwʋn ɛjɔlɛ yɛ kele ɛmɔ. Ninnge’n-mɔ kʋalaa abʋbɔ nɩn anun’n, anɩn sʋanlan sɔ’n wɔ ɛbɛlɛ. Yɛ́ dɩɛ, y’a tɩ yɩ́ nʋan anun ɛjɔlɛ, y’a nwun yɩ́ yɛ́ nyɩnsʋ, yɛ́ nyɩn a ha yɩ́ nwʋn y’a fa yɛ́ sa y’a han yɩ́. ²Mɛlɛ m’ɔ yɩlɩ yɩ́ nwʋn’n, yɛ nwunlin yɩ́. Ɛhɩka ati, yɛ di yɩ́ nwʋn adanzɩɛ yɛ lɛ kan yɩ́ nwʋn ɛjɔlɛ yɛ kele ɛmɔ. Yɩ́ yɛ̂ ɔ man yɛ́ ngʋan m’ɔ le man ayuelɩɛ nɩn ɔ. Anɩn ɔ wɔ yɛ́ Sɩ Nyanmɩan anwʋn ɛlɔ yɛ̂ ɔ’a a yɩ yɩ́ nwʋn ɔ’a hele yɛ́ ɔ. ³Anianman-mɔ, sʋanlan sɔ’n, ɔ tɩ Nyanmɩan Awa. Mɔ y’a nwun yɩ́ yɛ́ nyɩnsʋ nʋn ɛjɔlɛ mɔ y’a tɩ’n, yɛ lɛ bɔ nun amannɩɛ yɛ kele ɛmɔ kʋsʋ nán ɛmɔ nʋn yɛ́, yɛ kan yɛ bɔ nun yɛ yɔ kʋn. Afɩ yɛ́ dɩɛ, yɛ nʋn yɛ́ Sɩ Nyanmɩan nʋn yɩ́ Wa Zozi Kilisi y’a han y’a bɔ nun y’a yɔ kʋn. ⁴Ɛhɩka ati yɛ̂ yɛ lɛ kɛlɛ kalata ɛhɩ yɛ bɛlɛ ɛmɔ nán yɛ́ fɛ elie nɩn a la yɩ́ nyɩn kpa bɔkɔɔ.

Nyanmɩan tɩ kanlannɩɛ

⁵Anianman-mɔ, ɛ ’nwun ɛjɔlɛ’n mɔ Zozi Kilisi hanlɩn helelɩ yɛ́ mɔ yɛ lɛ bɔ nun amannɩɛ yɛ kele ɛmɔ’n. Ɛjɔlɛ sɔ’n, y’ɔ le kɛ Nyanmɩan tɩ kanlannɩɛ, awosin fɩ́ɩ́ nnʋn man yɩ́ nun. ⁶Yɩ́ ti, sɛ yɛ kan kɛ yɛ nʋn yɩ́ y’a han y’a bɔ nun y’a yɔ kʋn nán sɛ yɛ tɛ yɔ awosin nɩn anun nyɔlɩɛ’n-mɔ a, anɩn yɛ lɛ laka laka yɛ́ muonun yɛ́ nwʋn yɛ́ ɛjɔlɛ’n nʋn yɛ́ nyɔlɩɛ’n-mɔ anun. ⁷Nan sɛ yɛ tɩ kanlannɩɛ’n yuein nɩn anun kɛ Nyanmɩan muonun tɩ yɩ́ nɩn an, anɩn yɛ nʋn ɛmɔ, y’a han y’a bɔ nun. Anɩn yɩ́ Wa Zozi moja’n tɩ yɛ́ nwʋn wɔ ɛtɛ biala anun. ⁸Sɛ yɛ kan kɛ yɛ nyɔ man ɛtɛ a, anɩn yɛ lɛ laka laka yɛ́ muonun yɛ́ nwʋn, ananhɔlɛ fɩ́ɩ́ nnʋn man yɛ́ nun. ⁹Nan sɛ yɛ kan yɛ́ ɛtɛ’n-mɔ yɛ kele Nyanmɩan an, ɔ ’fa yɛ́ nwʋn sa ɔ ce yɛ́, ɛsɛ ɔ ’tɩ yɛ́ nwʋn wɔ ɛtɛ biala anun. Yɛ kʋala yɛ de yɩ́ yɛ tʋ nun. Ɔ sanlɩn kɛ Nyanmɩan tɩ sɛsɛfʋɛ. ¹⁰Sɛ yɛ kan kɛ yɛ yɔlɩ man ɛtɛ a, anɩn yɛ lɛ kele kɛ Nyanmɩan tɩ atofʋɛ. Anɩn y’a nva man yɩ́ Nʋan Ɛjɔlɛ’n y’a nzie man.

Zozi Kilisi di yɛ́ ti ɛjɔlɛ

¹Mɩ́n mma-mɔ, kɛ ɔ kɔ yɔ nán ɛmɔ a nyɔ man ɛtɛ’n, yɩ́ ti yɛ̂ mɩɩn kɛlɛ kalata ɛhɩ mɩn bɛlɛ ɛmɔ ɔ. Nan sɛ sʋanlan bie yɔ ɛtɛ bɔbɔ a, yɛ le dimanfʋɛ kʋn wɔ yɛ́ Sɩ Nyanmɩan anwʋn ɛbɛlɛ m’ɔ di yɛ́ ti ɛjɔlɛ ɔ. Dimanfʋɛ sɔ’n, y’ɔ le Zozi Kilisi m’ɔ tɩ sɛsɛfʋɛ’n. ²Ɔ sanlɩn kɛ Zozi Kilisi a fa yɩ́ nwʋn a yɩ yɛ́ ti tɛɛ maan Nyanmɩan a fa yɛ́ ɛtɛ’n kʋalaa a hye yɛ́. Nán yɛ́ ɛtɛ dɩɛ nɩn ala yɛ̂ ɔ ’fa ce yɛ́ ɔ, nan ɔ ’fa menian’n-mɔ kʋalaa ɛtɛ’n ɔ ce bɛ́. ³Sɛ yɛ́ nyɩn sɔ Nyanmɩan, yɛ yɔ like m’ɔ kɔ hele yɛ́ kɛ yɛ yɔ́ nɩn an, anɩn yɛ sɩ Nyanmɩan sakpa. ⁴Sʋanlan mɔ yɩ́ nwan: “Mɩ́n dɩɛ, mɩn sɩ Nyanmɩan,” nán yɩ́ nyɩn nzɔ man yɩ́ a, anɩn sʋanlan sɔ’n tɩ atofʋɛ, ɔ ngan man ananhɔlɛ fɩ́ɩ́. ⁵Nan sʋanlan kʋsʋ mɔ yɩ́ nyɩn sɔ Nyanmɩan Anʋan Ɛjɔlɛ’n, anɩn ɔ tɩ sʋanlan m’ɔ kulo Nyanmɩan sakpa. Ɛbɛlɛ yɛ̂ yɛ nwun yɩ́ kɛ y’a fa yɛ́ nwʋn y’a bɔ Nyanmɩan ɔ. ⁶Sʋanlan m’ɔ kɔ han kɛ ɔ nʋn Nyanmɩan b’a yɔ kʋn’n, ɔ di kɛ ɔ nanndɩ atɩn’n mɔ Zozi Kilisi nanndɩlɩ sʋ nɩn asʋ.

⁷Mɩ́n ehulo mma, nán mala fʋfɔlɛ yɛ̂ mɩɩn kɛlɛ mɩn bɛlɛ ɛmɔ ɔ. Nan mala daba’n mɔ bɛ hanlɩn bɛ helelɩ ɛmɔ mɛlɛ mɔ ɛmɔ falɩ bɛ́ nwʋn bɛ manlɩn Zozi’n. Mala daba sɔ nɩn anwʋn ɛjɔlɛ yɛ̂ mɩɩn kacɩ ɛmɔ ɔ. ⁸Nan kʋsʋ, ɔ tɩ kɛ mala fʋfɔlɛ yɛ̂ mɩɩn kɛlɛ mɩn bɛlɛ ɛmɔ ɔ. Bɛ nwun yɩ́ ananhɔlɛ wɔ Kilisi ɛnanndɩɛ nɩn anun, ɔ nʋn ɛmɔ kʋsʋ ɛnanndɩɛ nɩn anun. Yɛ nwun yɩ́ kɛ ɔ tɩ fʋfɔlɛ, ɔ sanlɩn kɛ awosin nɩn a hɔ a yue, jawe nɩn a fite dada angʋnmɩn. ⁹Sʋanlan m’ɔ kɔ han kɛ ɔ nanndɩ jawe nɩn anun nan ɔ kpɔ yɩ́ nianman an, anɩn sʋanlan sɔ’n tɛ nanndɩ awosin nɩn anun. ¹⁰Sʋanlan m’ɔ kulo yɩ́ nianman’n, anɩn sʋanlan sɔ’n nanndɩ jawe nun. Ɔ nyɔ man like fɩ́ɩ́ m’ɔ kʋala kɛ ɔ man sʋanlan tɔ ɛtɛ nɩn anun ɔ. ¹¹Nan sʋanlan m’ɔ kpɔ yɩ́ nianman’n, anɩn sʋanlan sɔ’n tɛ nanndɩ awosin nɩn anun. Ɔ nanndɩ awosin nun, ɔ nzɩ man lɩka m’ɔ lɛ kɔ’n. Afɩ awosin nɩn a lu yɩ́ nyɩn nɩn asʋ tuun.

Nán bɛ kulo eyuadɩ’n

¹²Mɩ́n mma-mɔ, mɩɩn kɛlɛ kalata ɛhɩ mɩn bɛlɛ ɛmɔ, ɔ sanlɩn kɛ Kilisi dunman nun ati, Nyanmɩan a fa ɛmɔ ɛtɛ nɩn a hye ɛmɔ. ¹³Mɩ́n sɩ-mɔ, mɩɩn kɛlɛ kalata ɛhɩ mɩn bɛlɛ ɛmɔ, ɔ sanlɩn kɛ ɛmɔ sɩ sʋanlan’n m’ɔ wɔ ɛbɛlɛ sunmin mân nɩn abʋbɔ nɩn anun’n. Mgbafɛlɛ-mɔ, mɩɩn kɛlɛ kalata ɛhɩ mɩn bɛlɛ ɛmɔ, ɔ sanlɩn kɛ ɛmɔ asa a hʋala Abɔnsanmʋn.

¹⁴Mɩ́n mma-mɔ, mɩɩn kɛlɛ ɛhɩ mɩn bɛlɛ ɛmɔ, ɔ sanlɩn kɛ ɛmɔ sɩ Sɩɛ’n. Mɩ́n sɩ-mɔ, mɩɩn kɛlɛ kalata ɛhɩ mɩn bɛlɛ ɛmɔ, ɔ sanlɩn kɛ ɛmɔ sɩ sʋanlan’n m’ɔ wɔ ɛbɛlɛ sunmin mân nɩn abʋbɔ nɩn anun’n. Ɛmɔ mgbafɛlɛ’n-mɔ, mɩɩn kɛlɛ kalata ɛhɩ mɩn bɛlɛ ɛmɔ, ɔ sanlɩn kɛ ɛmɔ anwʋn yɔ sɩ. Nyanmɩan Anʋan Ɛjɔlɛ’n wɔ ɛmɔ anun, ɛsɛ ɛmɔ asa a hʋala Abɔnsanmʋn. ¹⁵Nán bɛ kulo eyuadɩ’n, nán bɛ man bɛ́ nyɩn bʋlʋ nun ninnge’n-mɔ. Sʋanlan m’ɔ kɔ hulo eyuadɩ ɛhɩ anun ninnge’n-mɔ’n, sʋanlan sɔ’n, anɩn ɔ ngulo man Nyanmɩan. ¹⁶Afɩ ninnge’n kʋalaa m’ɔ wɔ nun’n, ajʋnlɩn basa-basa, ɔ nʋn ninnge’n kʋalaa mɔ sʋanlan anyɩn bʋlʋ yɩ́ nwʋn’n, ɔ nʋn asɩɛ nɩn asʋ ɛwa anwʋndɩɛ’n mɔ bɛ fa bɛ tu bɛ́ nwʋn’n, ɛhɩ kʋalaa fi man Sɩɛ nɩn ɛlɔ, nan ɔ tɩ eyuadɩ nɩn anun ninnge. ¹⁷Eyuadɩ’n nʋn nun anyɩnbʋlʋ’n ’kpɛ nun, nan sʋanlan m’ɔ yɔ like mɔ Nyanmɩan kulo’n, sʋanlan sɔ’n le nyanmɩansʋ ngʋan’n m’ɔ le man ayuelɩɛ’n.

Bɛ́ mɔ bɛ kpɔ Zozi Kilisi’n

¹⁸Mɩ́n mma-mɔ, mân nɩn ayuelɩɛ ka kaan ju. Ɛmɔ a tɩ kɛ bɛ́ nwan Kilisi kpɔfʋɛ’n di kɛ ɔ ba. Sian dɩɛ, Kilisi mgbɔfʋɛ’n-mɔ a sʋn. Ɛhɩ y’ɔ man yɛ nwun yɩ́ kɛ yɛ wɔ mɛlɛ kasian nɩn anun ɔ. ¹⁹Kilisi mgbɔfʋɛ sɔ’n-mɔ, daba anɩn bɛ wɔ yɛ́ eku nɩn anun bie, nan kʋsʋ bɛ nʋn yɛ́ tɩ man kʋn. Afɩ sɛ ɔ tɩ kɛ bɛ nʋn yɛ́ tɩ kʋn an, ahan b’a nyɩ man bɛ́ nwʋn. B’a yɩ bɛ́ nwʋn maan bɛ nwun yɩ́ ananhɔlɛ kɛ nán yɛ́ menian y’ɔ le bɛ́. ²⁰Nan ɛmɔ dɩɛ, Kilisi a fa Wawɛ Nwannzan-nwannzan’n ɔ’a man ɛmɔ, ɔ’a man ɛmɔ kʋalaa a nwun ananhɔlɛ ɛjɔlɛ’n. ²¹Sɛ mɩɩn kɛlɛ ɛmɔ a, nán kɛ ɛmɔ nzɩ man ananhɔlɛ ɛjɔlɛ nɩn ɔ, nan kɛmɔ ɛmɔ sɩ yɩ́ nɩn ati ɔ. Afɩ, ɛmɔ sɩ kɛ ananhɔlɛ’n nʋn ato’n bɛ nzan man.

²²Atofʋɛ’n y’ɔ le nwan? Atofʋɛ’n y’ɔ le sʋanlan’n m’ɔ kan kɛ Zozi tɩ man Kilisi’n. Sʋanlan sɔ’n kpɔ Kilisi. Ɔ nne man Sɩɛ’n nʋn Baa’n nni man. ²³Afɩ, sʋanlan m’ɔ nne Baa’n nni man’n, anɩn sʋanlan sɔ’n, ɔ nne man Sɩɛ’n kʋsʋ nni man. Nan sʋanlan m’ɔ de Baa’n di’n, anɩn ɔ de Sɩɛ’n kʋsʋ di.

²⁴Ɛhɩka ati, ɛjɔlɛ’n mɔ abʋbɔ nɩn anun bɛ hanlɩn bɛ helelɩ ɛmɔ’n, ɛmɔ mán ɔ tánlan ɛmɔ ati anun kpa. Sɛ ɛmɔ fa ɛjɔlɛ sɔ’n sie a, anɩn ɛmɔ kʋsʋ nʋn Baa’n nʋn Sɩɛ nɩn a han a bɔ nun b’a yɔ kʋn.

²⁵Ɛ ’nwun like mɔ Kilisi a fa a bɔ yɛ́ anɔhʋba kɛ ɔ ’fa man yɛ́’n: nyanmɩansʋ ngʋan’n m’ɔ le man ayuelɩɛ’n.

²⁶Bɛ́ mɔ bɛ kulo kɛ bɛ laka ɛmɔ’n, bɛ́ ti yɛ̂ mɩɩn kɛlɛ kalata ɛhɩ mɩn bɛlɛ ɛmɔ ɔ. ²⁷Nan ɛmɔ dɩɛ, Kilisi a fa yɩ́ Wawɛ nɩn a man ɛmɔ. Kɛmɔ yɩ́ Wawɛ’n wɔ ɛmɔ anun nɩn ati, ɔ njian man kɛ sʋanlan héhele ɛmɔ ninnge. Ɔ sanlɩn kɛ Wawɛ’n kekele ɛmɔ ngɛlɛ ninnge kʋalaa anun. Ninnge’n kʋalaa m’ɔ kele’n tɩ ananhɔlɛ, ato nnʋn man nun. Ɛmɔ mán bɛ́ nyɩn sɔ́ like mɔ Wawɛ’n kele ɛmɔ’n nán ɛmɔ nʋn Kilisi a yɔ kʋn.

²⁸Afɩ sian, mɩ́n mma-mɔ, ɛmɔ nʋn Zozi Kilisi bɛ yɔ́ kʋn nán cɩan m’ɔ kɔ a’n, yɛ́ ahʋnlɩn a tɔ yɛ́ kunnun, nán yɛ́ nyunnun a ngua man asɩ yɩ́ ɛwalɛ nɩn anun. ²⁹Ɛmɔ sɩ kɛ Kilisi tɩ sɛsɛfʋɛ, ɛhɩka ati, ɛmɔ nwún yɩ́ kɛ sʋanlan m’ɔ yɔ nyɔlɩɛ m’ɔ tɩ kpa’n, sʋanlan sɔ’n tɩ Nyanmɩan awa.

Yɛ tɩ Nyanmɩan amma sakpa

¹Anianman-mɔ, ɛmɔ nɩ́an ehulo kpili’n mɔ Nyanmɩan a hulo yɛ́’n! Ɔ’a hulo yɛ́ dede ɔ’a fɛlɛ yɛ́ yɩ́ mma. Sɛ ɔ fɛlɛ yɛ́ yɩ́ mma a, ɔ tɩ ananhɔlɛ, ɔ sanlɩn kɛ y’a kaci yɩ́ mma sakpa. Ɛmɔ nɩ́an, like m’ɔ man menian’n-mɔ nnwun man kɛ yɛ tɩ yɩ́ mma’n, y’ɔ le kɛ bɛ nzɩ man Nyanmɩan muonun.

²Ehulo mma, sian dɩɛ, yɛ tɩ Nyanmɩan amma. Nán kɛ cɩan bie yɛ ’ba kpɩn yɛ kaci yɩ́’n, ɔ fitelɩ man yuein. Kʋsʋ mɔ yɛ sɩ’n y’ɔ le kɛ cɩan mɔ Kilisi’n kɔ sa kɔ a’n, yɛ́ kʋalaa yɛ ’ba nwun yɩ́ yuein kɛ ɔ kpɩn tɩ yɩ́’n, nán yɛ kaci kɛ yɩ́. ³Sʋanlan biala m’ɔ le anyɩndasʋɛ kɛ ɔ tɩ Nyanmɩan awa’n, ɔ sie yɩ́ nwʋn nwannzan-nwannzan kɛ Kilisi tɩ nwannzan-nwannzan’n. ⁴Sʋanlan biala m’ɔ kɔ yɔ ɛtɛ’n, anɩn ɔ’a tʋn Nyanmɩan mala’n. Ɔ sanlɩn kɛ ɛtɛ ɛyɔlɛ’n yɛ̂ bɛ fɛlɛ yɩ́ mala ɛtʋan nɩn ɔ. ⁵Ɛmɔ sɩ kɛ yɛ́ ɛtɛ nɩn ati yɛ̂ Zozi Kilisi walɩ ɔ. Ɔ walɩ yɛ́ ɛtɛ nɩn ecicie. Yɩ́ muonun, ɛtɛ sin kaan sʋa, ɔ yɔlɩ man bie lé. ⁶Ɛhɩ ati, sʋanlan biala m’ɔ kɔ fa yɩ́ nwʋn ɔ kɔ bɔ Zozi Kilisi’n, ɔ yáci ɛtɛ nɩn ɛyɔlɛ. Nan sʋanlan m’ɔ tɛ yɔ ɛtɛ’n, anɩn ɔ nwunlin man Zozi Kilisi lé ɛsɛ ɔ nzɩ man yɩ́.

⁷Mɩ́n mma-mɔ, nán bɛ man sʋanlan fɩ́ɩ́ laka ɛmɔ. Sʋanlan m’ɔ yɔ nyɔlɩɛ m’ɔ tɩ sɛsɛ’n, anɩn sʋanlan sɔ’n muonun tɩ sɛsɛfʋɛ kɛ Kilisi tɩ yɩ́’n. ⁸Nan sʋanlan m’ɔ yɔ ɛtɛ’n, anɩn ɔ tɩ Abɔnsanmʋn sʋanlan. Ɔ sanlɩn kɛ mân’n bɔlɩ yɩ́ bʋ ala yɛ̂ Abɔnsanmʋn yɔlɩ ɛtɛ ɔ. Ɛhɩ ati, Nyanmɩan Awa’n walɩ kɛ ɔ ’ba bɔ Abɔnsanmʋn junman’n m’ɔ di nɩn abʋsʋ. ⁹Sʋanlan biala m’ɔ tɩ Nyanmɩan awa’n, ɔ yáci ɛtɛ nɩn ɛyɔlɛ. Ɔ sanlɩn kɛ Nyanmɩan tunmin’n m’ɔ man ngʋan’n wɔ yɩ́ nun. Ɔ le man atɩn kɛ ɔ yɔ ɛtɛ ɔ, ɔ sanlɩn kɛ Nyanmɩan tɩ yɩ́ Sɩ. ¹⁰Ɛ ’nwun like m’ɔ man bɛ nwun Nyanmɩan amma’n-mɔ nʋn Abɔnsanmʋn dɩɛ’n-mɔ angʋnmɩn’n: sʋanlan biala m’ɔ nyɔ man nyɔlɩɛ m’ɔ tɩ sɛsɛ anaan ɔ ngulo man yɩ́ nianman’n, anɩn sʋanlan sɔ’n tɩ man Nyanmɩan awa.

Ɛmɔ húlo bɛ́ nwʋn

¹¹Ɛhɩ, Ɛjɔlɛkpa nɩn abʋbɔ nɩn anun, ɛjɔlɛ mɔ ɛmɔ tɩlɩ’n y’ɔ le kɛ yɛ húlo yɛ́ nwʋn. ¹²Nán man yɛ yɔ kɛ Kayɩn m’ɔ tɩ Abɔnsanmʋn sʋanlan, m’ɔ hunlin yɩ́ nianman’n. Nzukɛ ati yɛ̂ Kayɩn hunlin yɩ́ nianman’n? Ɔ hunlin yɩ́, ɔ sanlɩn kɛ Kayɩn muonun, yɩ́ nyɔlɩɛ’n-mɔ tɩ man kpa. Yɩ́ nianman’n nyɔlɩɛ dɩɛ’n-mɔ tɩ kpa.

¹³Mɩ́n nianman-mɔ, sɛ mân nɩn anun menian’n-mɔ kpɔ ɛmɔ a, nán bɛ man ɔ sin bɛ́ nwʋn. ¹⁴Yɛ sɩ kɛ yɛ fi ewue nun y’a tinnge y’a wʋlʋ ngʋan nun. Yɛ nwun yɩ́ sɔ, ɔ sanlɩn kɛ yɛ kulo yɛ́ nianman’n-mɔ. Sʋanlan m’ɔ ngulo man sʋanlan’n, anɩn ɔ tɛ wɔ ewue nun. ¹⁵Sʋanlan biala m’ɔ ngulo man sʋanlan’n, anɩn ɔ kun sʋanlan. Ɛmɔ sɩ kɛ sʋanlan m’ɔ kun sʋanlan’n, ɔ nnyan man nyanmɩansʋ ngʋan’n m’ɔ le man ayuelɩɛ’n. ¹⁶M’ɔ man y’a nwun ehulo’n y’ɔ le kɛ Zozi Kilisi a hulo kulo menian’n-mɔ dede ɔ’a wu bɛ́ dunman nun. Ɔ sɛ kɛ yɛ́ kʋsʋ yɛ húlo yɛ́ nianman’n-mɔ dede yɛ wú bɛ́ dunman nun. ¹⁷Sɛ sʋanlan kʋn le eyuadɩ nɩn anun anwʋndɩɛ’n-mɔ, sɛ ɔ nwun yɩ́ kɛ yɩ́ nianman nɩn a mian nán sɛ ɔ’a nne man yɩ́ a, sʋanlan sʋa, ɔ yɔ sɛ m’ɔ kan kɛ Nyanmɩan ehulo’n wɔ yɩ́ nun ɔ?

¹⁸Mɩ́n mma-mɔ, nán bɛ man yɛ kulo yɛ́ nwʋn yɛ́ je sʋ nʋn yɛ́ nʋan nun mgban. Nan bɛ mán yɛ húlo yɛ́ nwʋn ananhɔlɛ nun, ɛsɛ bɛ mán yɛ yɔ́ like m’ɔ kele kɛ yɛ kulo yɛ́ nwʋn sakpa. ¹⁹Sɛ yɛ yɔ yɩ́ sɔ a, yɛ ’nwun yɩ́ kɛ ananhɔlɛ’n wɔ yɛ́ nun. Ɛhɩ yɛ̂ ɔ ’ba man yɛ́ ahʋnlɩn ’tɔ yɛ́ kunnun wɔ Nyanmɩan anyunnun ɔ. ²⁰Afɩ, sɛ yɛ́ ahʋnlɩn’n bu yɛ́ fʋɔ biala a, Nyanmɩan tɩ kpili tala yɛ́ ahʋnlɩn’n, ɛsɛ ɔ sɩ like biala.

²¹Yɩ́ ti, ehulo mma, sɛ yɛ́ ahʋnlɩn’n mmu man yɛ́ fʋɔ a, anɩn yɛ́ ahʋnlɩn tɔ yɛ́ kunnun wɔ Nyanmɩan anyunnun. ²²Like biala mɔ yɛ kɔ sɛlɛ yɩ́’n, ɔ ’fa man yɛ́. Ɔ sanlɩn kɛ yɛ di yɩ́ mala nɩn asʋ ɛsɛ yɛ yɔ yɩ́ kunnun like. ²³Ɛ ’nwun mala’n mɔ ɔ’a fa ɔ’a man yɛ́’n: Yɛ lé yɩ́ Wa Zozi Kilisi yɛ lí, nán yɛ húlo yɛ́ nwʋn kɛ Kilisi hanlɩn helelɩ yɛ́’n. ²⁴Sʋanlan m’ɔ di Nyanmɩan mala nɩn asʋ’n, anɩn ɔ wɔ Nyanmɩan anun, Nyanmɩan kʋsʋ wɔ yɩ́ nun. Like m’ɔ man yɛ nwun yɩ́ kɛ Nyanmɩan wɔ yɛ́ nun’n y’ɔ le yɩ́ Wawɛ Nwannzan-nwannzan’n mɔ ɔ’a fa ɔ’a man yɛ́’n.

Nyanmɩan Wawɛ’n yɛ̂ kpɔfʋɛ’n wawɛ’n

¹Ehulo mma, nán bɛ de bɛ́ kʋalaa mɔ bɛ́ nwan bɛ le Nyanmɩan Wawɛ’n bɛ di. Nan ɛmɔ sɔ́ bɛ́ bɛ nɩ́an sɛ wawɛ’n mɔ bɛ le yɩ́’n fi Nyanmɩan ɛlɔ sakpa a. Afɩ ato mgbɔmanfʋɛ dɔʋn a tʋ a sanndɩ mân nɩn anun. ²Ɛ ’nwun like m’ɔ man bɛ nwun yɩ́ kɛ sʋanlan ɛhɩ le Nyanmɩan Wawɛ’n: Sʋanlan biala m’ɔ kɔ han kɛ Zozi Kilisi a kaci yɩ́ nwʋn kulo sʋanlan sakpa’n, anɩn sʋanlan sɔ’n le Nyanmɩan Wawɛ’n. ³Nan sʋanlan m’ɔ nne Zozi anwʋn ɛjɔlɛ sɔ’n nni man’n, anɩn sʋanlan sɔ’n le man Nyanmɩan Wawɛ’n. Wawɛ’n m’ɔ wɔ sʋanlan sɔ nɩn anun’n tɩ Kilisi kpɔfʋɛ’n wawɛ. Ɛmɔ tɩlɩ kɛ wawɛ sɔ’n ’ba a mân nɩn anun. Kɩkaala dɩɛ, wawɛ sɔ nɩn a a mân nɩn anun dada angʋnmɩn. ⁴Mɩ́n mma-mɔ, ɛmɔ dɩɛ, ɛmɔ tɩ Nyanmɩan menian. Ɛmɔ asa a hʋala ato mgbɔmanfʋɛ’n-mɔ. Ɔ sanlɩn kɛ Wawɛ’n m’ɔ wɔ ɛmɔ anun’n, ɔ yɔ sɩ tala wawɛ’n m’ɔ wɔ mân ɛhɩ anun menian’n-mɔ anun’n. ⁵Kɛmɔ bɛ tɩ mân ɛhɩ anun menian’n, nunhan ɛjɔlɛ ala yɛ̂ bɛ kan ɔ. Mɔ bɛ kɔ han’n kʋsʋ yɛ̂ menian’n-mɔ tie ɔ. ⁶Nan yɛ́ dɩɛ, Nyanmɩan menian y’ɔ le yɛ́. Sʋanlan m’ɔ sɩ Nyanmɩan’n tie yɛ́. Nunhan m’ɔ nzɩ man Nyanmɩan’n ndie man yɛ́. Ɛbɛlɛ yɛ̂ yɛ fa yɛ nwun Nyanmɩan Wawɛ’n m’ɔ kan ananhɔlɛ’n nʋn atofʋɛ’n-mɔ wawɛ nɩn angʋnmɩn ɔ.

Nyanmɩan tɩ ehulo baka.

⁷Ehulo mma, bɛ mán yɛ húlo yɛ́ nwʋn. Ɔ sanlɩn kɛ ehulo’n fi Nyanmɩan ɛlɔ. Sʋanlan biala m’ɔ kulo sʋanlan’n, ɔ tɩ Nyanmɩan awa, ɛsɛ anɩn ɔ sɩ Nyanmɩan. ⁸Nan sʋanlan m’ɔ ngulo man sʋanlan’n, anɩn ɔ nzɩ man Nyanmɩan. Ɔ sanlɩn kɛ Nyanmɩan tɩ ehulo baka. ⁹Ɛ ’nwun kɛ Nyanmɩan kpɩnlɩn helelɩ yɛ́ kɛ ɔ kulo yɛ́’n: ɔ’a sʋan yɩ́ Bangɔlɔ’n mân nɩn anun maan yɩ́ dunman nun, yɛ nyan ngʋan. ¹⁰Nan ehulo’n mɔ Nyanmɩan kulo yɛ́’n, nán kɛ yɛ́ yɛ̂ y’a li mʋa y’a hulo Nyanmɩan ɔ. Nan yɩ́ lɩlɩ ɔ’a li mʋa ɔ’a hulo yɛ́ ɔ’a sʋan yɩ́ Wa’n kɛ yɛ́ ɛtɛ’n-mɔ dunman nun, ɔ yɩ́ yɛ́ ti tɛɛ maan yɛ nyán ɛtɛ facɛ.

¹¹Ehulo mma, sɛ Nyanmɩan a hulo yɛ́ sʋa a, yɛ́ kʋsʋ yɛ húlo yɛ́ nwʋn. ¹²Sʋanlan fɩ́ɩ́ nwunlin man Nyanmɩan lé. Nan sɛ yɛ kulo yɛ́ nwʋn an, Nyanmɩan ’tanlan yɛ́ nun bɛ nwun yɩ́ ehulo’n m’ɔ wɔ yɛ́ nun’n kpa bɔkɔɔ. ¹³Like m’ɔ man yɛ nwun kɛ Nyanmɩan wɔ yɛ́ nun, ɛsɛ yɛ́ kʋsʋ yɛ wɔ yɩ́ nun’n, y’ɔ le kɛ ɔ’a fa yɩ́ Wawɛ’n ɔ’a man yɛ́. ¹⁴Y’a nwun yɩ́ yɛ̂ yɛ lɛ bɔ kpayɛ kɛ Sɩɛ nɩn a sʋan Baa’n kɛ ɔ bála a le mân nɩn ati. ¹⁵Sɛ sʋanlan kʋn kan yɩ́ bagua nun kɛ Zozi tɩ Nyanmɩan Awa a, anɩn Nyanmɩan wɔ sʋanlan sɔ nɩn anun ɛsɛ yɩ́ kʋsʋ ɔ wɔ Nyanmɩan anun. ¹⁶Nan yɛ́ dɩɛ, yɛ sɩ kɛ Nyanmɩan kpɩn kulo yɛ́’n, ɔ man y’a le yɩ́ y’a li. Nyanmɩan tɩ ehulo baka. Sʋanlan m’ɔ le ehulo’n, anɩn ɔ tɩ Nyanmɩan dɩɛ, Nyanmɩan kʋsʋ tɩ yɩ́ dɩɛ. ¹⁷Sɛ yɛ le ehulo sakpa yɛ́ nun an, cɩan mɔ Nyanmɩan ’ba bua menian’n-mɔ ndɛɛ’n, yɛ́ kunnun ndɩtɩ man yɛ́. Ɔ sanlɩn kɛ asɩtanlan’n mɔ yɛ tɩ nun mân nɩn anun’n, ɔ nʋn Zozi dɩɛ’n tɩ kʋn. ¹⁸Esulo nnʋn man ehulo nɩn anzin. Sʋanlan m’ɔ kulo sʋanlan kpa’n, ɔ nzulo man yɩ́ nzin. Sʋanlan m’ɔ sulo yɩ́ nzin’n, anɩn ɔ le man ehulo kpa. Afɩ, esulo’n kele kɛ ɛtɛ’n wɔ ɛbɛlɛ nʋn yɩ́ nwʋn ahatua. ¹⁹Nan yɛ́ dɩɛ, yɛ kulo Nyanmɩan nʋn menian’n-mɔ, ɔ sanlɩn kɛ Nyanmɩan y’ɔ lili mʋa ɔ hulolɩ yɛ́ ɔ. ²⁰Sɛ sʋanlan kʋn kan kɛ: “Mɩn kulo Nyanmɩan” nán sɛ ɔ kpɔ yɩ́ nianman an, anɩn ɔ tɩ atofʋɛ. Afɩ, sɛ ɔ kpɔ yɩ́ nianman’n m’ɔ nwun yɩ́ nɩn an, nán Nyanmɩan m’ɔ nnwun man yɩ́’n yɛ̂ ɔ kʋala kɛ ɔ kulo yɩ́ ɔ. ²¹Ɛ ’nwun mala’n mɔ Kilisi a fa a man yɛ́’n. Sʋanlan m’ɔ kulo Nyanmɩan’n di kɛ ɔ kulo yɩ́ nianman’n kʋsʋ.

Yɛ di mân nɩn asʋ kunnunmun

¹Sʋanlan biala m’ɔ de di kɛ Zozi tɩ Kilisi’n, anɩn sʋanlan sɔ’n tɩ Nyanmɩan awa. Ɛhɩka ati, sʋanlan mɔ yɩ́ nwan ɔ kulo Sɩɛ’n, anɩn ɔ kulo yɩ́ mma’n-mɔ kʋsʋ. ²Like m’ɔ man yɛ nwun yɩ́ kɛ yɛ kulo Nyanmɩan amma’n-mɔ’n y’ɔ le mɛlɛ mɔ yɛ kulo Nyanmɩan yɛ di yɩ́ mala nɩn asʋ’n. ³Afɩ, sɛ yɛ́ nwan yɛ kulo Nyanmɩan an, ɔ di kɛ yɛ di yɩ́ mala nɩn asʋ. Yɩ́ mala sɔ’n nyɔ man sɩ mɔ yɛ ngʋala man sʋ di ɔ. ⁴Ɔ sanlɩn kɛ Nyanmɩan awa biala di mân nɩn asʋ kunnunmun. Like m’ɔ man yɛ di mân nɩn asʋ kunnunmun’n y’ɔ le yɛ́ dedi’n. ⁵Nwan yɛ̂ ɔ kʋala mân nɩn asʋ kunnunmun di ɔ? Sʋanlan m’ɔ de di kɛ Zozi tɩ Nyanmɩan Awa’n yɛ̂ ɔ kʋala mân nɩn asʋ kunnunmun di ɔ.

Like m’ɔ kele kɛ Zozi tɩ Nyanmɩan Awa’n

⁶Zozi Kilisi muonun walɩ asɩɛ nɩn asʋ ɛwa. Bɛ sɔnɩnlɩn yɩ́ asue nɩn anun, ɛsɛ mɛlɛ mɔ ɔ ’wu’n, ɔ gualɩ yɩ́ moja nɩn asɩ. Nán ɛsɔnɩan ala yɛ̂ bɛ sɔnɩnlɩn yɩ́ ɔ, nan ɛsɛ ɔ gualɩ yɩ́ moja nɩn asɩɛ nɩn asʋ. Nyanmɩan Wawɛ’n muonun di yɩ́ nwʋn adanzɩɛ. Ɔ sanlɩn kɛ yɩ́ dɩɛ, ɔ nni man ato. ⁷Ninnge nsan kele yɛ́ kɛ Zozi tɩ Nyanmɩan Awa sakpa. ⁸Ninnge nsan sɔ’n y’ɔ le Nyanmɩan Wawɛ’n, ɛsɔnɩan’n mɔ bɛ sɔnɩnlɩn yɩ́ asue nɩn anun’n, ɔ nʋn yɩ́ moja’n m’ɔ gualɩ asɩɛ nɩn asʋ’n. Ninnge nsan sɔ nɩn anʋan ɛjɔlɛ tɩ kʋn. ⁹Menian’n-mɔ ninnge’n-mɔ mɔ bɛ kɔ nwun yɩ́’n, sɛ bɛ kan yɩ́ nwʋn ɛjɔlɛ bɛ kele yɛ́ a, yɛ de yɛ di. Nyanmɩan dɩɛ’n m’ɔ kan’n tala bɛ́ dɩɛ’n. Afɩ, Nyanmɩan muonun di adanzɩɛ kɛ Zozi tɩ yɩ́ Wa. ¹⁰Sʋanlan m’ɔ de di kɛ Zozi Kilisi tɩ Nyanmɩan Awa’n, ɔ sɩ yɩ́ fɔ́ʋ́n kɛ ɛjɔlɛ sɔ’n tɩ ananhɔlɛ. Nan sʋanlan m’ɔ nne nni man’n, ɔ kele kɛ Nyanmɩan tɩ atofʋɛ. Ɔ sanlɩn kɛ adanzɩɛ’n mɔ Nyanmɩan di wɔ yɩ́ Wa nɩn anwʋn’n, sʋanlan sɔ’n dɩɛ, ɔ nne nni man. ¹¹Ɛ ’nwun adanzɩɛ sɔ’n: Nyanmɩan a man yɛ́ nyanmɩansʋ ngʋan’n m’ɔ le man ayuelɩɛ’n. Ngʋan sɔ’n, ɔ nanndɩ yɩ́ Wa nɩn asʋ yɛ̂ ɔ man yɛ nyan yɩ́ ɔ. ¹²Sʋanlan m’ɔ kɔ le Baa’n kɔ li’n, ɔ le nyanmɩansʋ ngʋan’n. Nan sʋanlan mɔ ɔ’a nne man Nyanmɩan Awa’n ɔ’a nni man’n, ɔ le man ngʋan sɔ’n bie.

Nyanmɩansʋ ngʋan’n m’ɔ le man ayuelɩɛ’n

¹³Ɛmɔ mɔ bɛ de Nyanmɩan Awa’n bɛ di’n, mɩɩn kɛlɛ kalata ɛhɩ mɩn bɛlɛ ɛmɔ, mɩn man ɛmɔ nwun yɩ́ kɛ ɛmɔ le nyanmɩansʋ ngʋan’n m’ɔ le man ayuelɩɛ’n. ¹⁴Ɛ ’nwun like ati m’ɔ man yɛ́ kunnun ndɩtɩ man yɛ́ wɔ Nyanmɩan anyunnun’n: afɩ sɛ yɛ bisa yɩ́ like m’ɔ kulo a, yɛ sɩ yɩ́ fɔ́ʋ́n kɛ ɔ ’fa man yɛ́. ¹⁵Kɛmɔ yɛ sɩ yɩ́ fɔ́ʋ́n kɛ sɛ yɛ bisa yɩ́ like a, ɔ yɔ anzʋɛ ɔ tie yɛ́’n, like biala mɔ yɛ kɔ bisa yɩ́ kɛ ɔ fá mán yɛ́’n, ɔ ’fa man yɛ́. ¹⁶Sɛ sʋanlan kʋn nwun yɩ́ kɛ yɩ́ nianman lɛ yɔ ɛtɛ m’ɔ ngun man sʋanlan an, ɔ sɛ́lɛ Nyanmɩan ɔ mán yɩ́, nán Nyanmɩan ’ba man ɔ nyan ngʋan. Mɩ́n nwan bɛ́ mɔ bɛ yɔ ɛtɛ m’ɔ ngun man sʋanlan nɩn ala. Ɛtɛ kʋn wɔ ɛbɛlɛ, sɛ bɛ yɔ a, ɔ kun sʋanlan. M’an ngan man kɛ ɛmɔ sɛ́lɛ Nyanmɩan bɛ mán menian mɔ bɛ yɔ ɛtɛ sɔ’n. ¹⁷Ɛtɛ kʋalaa tɩ ɛtɛ, nan kʋsʋ ɛtɛ’n mmie-mɔ wɔ ɛbɛlɛ, ɔ ngun man sʋanlan. ¹⁸Yɛ sɩ kɛ sʋanlan biala m’ɔ tɩ Nyanmɩan dɩɛ’n, ɔ nga man ɛtɛ ɛyɔlɛ nɩn anun. Ɔ sanlɩn kɛ Nyanmɩan Awa’n sisa yɩ́. Abɔnsanmʋn ngʋala man yɩ́ like fɩ́ɩ́ yɔ. ¹⁹Yɛ́ dɩɛ, yɛ sɩ kɛ yɛ tɩ Nyanmɩan amma, nan mân bɔndɩn’n, bɛ́ dɩɛ bɛ wɔ Abɔnsanmʋn asa nun. ²⁰Yɛ sɩ kɛ Nyanmɩan Awa nɩn a a hele yɛ́ ngɛlɛ maan y’a nwun ananhɔlɛ Nyanmɩan’n sakpa. Yɛ nʋn ananhɔlɛ Nyanmɩan’n muonun, y’a yɔ kʋn wɔ yɩ́ Wa Zozi Kilisi dunman nun. Yɩ́ y’ɔ tɩ ananhɔlɛ Nyanmɩan nɩn ɔ, ɛsɛ yɩ́ y’ɔ tɩ ngʋan’n m’ɔ le man ayuelɩɛ nɩn ɔ.

²¹Mɩ́n mma-mɔ, ɛmɔ nɩ́an bɛ́ nwʋn kpa wɔ amʋan’n-mɔ anwʋn.