1 KOLƖNTƖ

PƆLƱ KALATA’N

M’Ɔ LILI MƱA

HƐLƐLƖ NWANLƖN

KOLƖNTƖ ASƆNƖN MMA’N-MƆ’N

M’ɔ wɔ nun’n

Anɩn Kolɩntɩ tɩ Akayi mân nɩn anun kulo kpili kpa. Ɛnɛ bɛ fɛlɛ mân sɔ’n Gɛlɛsɩ, ɔ wɔ Aboloci mân nɩn anun. Ɛbɛlɛ menian’n-mɔ sɔ amʋan dɔʋn, ɛsɛ ajʋamannɩn ɛbɔ’n y’ɔ tɩ bɛ́ junman ɔ. Pɔlʋ lili junman ɛbɛlɛ afʋɛ kʋn sala nsian ɔ bɔlɩ Asɔnɩn’n (Junman 18). Mɛlɛ mɔ Pɔlʋ ’kɛlɛ kalata ɛhɩ’n, anɩn ɔ wɔ Azi mân nɩn anun kulo’n mɔ bɛ fɛlɛ yɩ́ Efɛzɩ nɩn asʋ. Kolɩntɩ asɔnɩn mma’n mmie-mɔ nʋn bɛ́ asɔnɩn nɩn anun kalata walɩ tʋlɩ Pɔlʋ kɛ kosuan’n-mɔ mɔ b’a bisa’n, ɔ mán bɛ́ yɩ́ nwʋn asan.

Kɛ yɛ nwun yɩ́ Pɔlʋ kalata ɛhɩnlɩn-mɔ anun’n, ɔ man sʋanlan y’ɔ kɛlɛ man yɩ́ ɔ. Kalata ɛhɩ, anianman Sɔsʋtɛnɩn yɛ̂ Pɔlʋ manlɩn ɔ hɛlɛlɩ ɔ (yɩ́ ti 1.1). Anianman sɔ’n tɩ Kilisi sʋanlan, nan kʋsʋ yɛ nzɩ man yɩ́ nwʋn ɛjɔlɛ fɩ́ɩ́.

Pɔlʋ a hye kalata ɛhɩ nɩn anun nnyuan. Alimʋa lɩka dɩɛ’n (yɩ́ ti 1-6), yɛ nwun yɩ́ kɛ Pɔlʋ nʋn anianman’n-mɔ b’a li amannɩɛ a yue, nan kʋsʋ ɛjɔlɛ kpɔlɛ nsan wɔ nun m’ɔ jɩjɩ Pɔlʋ ɔ: (1) asɔnɩn mma’n-mɔ a bubu bɛ́ nwʋn nun (yɩ́ ti 1.10-4.21), (2) sʋanlan kʋn nʋn yɩ́ sɩ ayɩ nɩn a la (yɩ́ ti 5), (3) asɔnɩn mma’n mmie-mɔ sanman sanman bɛ́ nwʋn bɛ́ mɔ bɛ nzɩ man Nyanmɩan nɩn anyunnun (yɩ́ ti 6). Ɛhɩka ati, Pɔlʋ lɛ kan kele asɔnɩn mma’n-mɔ kɛ bɛ sésie anyunnunguasɩɛ ɛjɔlɛ sɔ’n-mɔ, nán bɛ tánlan wɔ anʋannzɛ nun.

Lɩka’n m’ɔ tɔ sʋ nnyuan’n (yɩ́ ti 7-16), Pɔlʋ lɛ man bɛ́ kosuan’n-mɔ anwʋn asan. Ɔ lɛ kan ajaa nɩn anwʋn ɛjɔlɛ (yɩ́ ti 7). Ɔ lɛ kannzʋ bɛ́ kɛ bɛ síe bɛ́ nwʋn ye wɔ amʋan’n-mɔ anwʋn (8.1-11.1). Ɔ lɛ kan yɛ́ Mɩn Alɩɛ nɩn anwʋn ɛjɔlɛ (11.2-34). Ɔ lɛ kan kele bɛ́ kɛ bɛ kpʋ́nndɛ Wawɛ Nwannzan-nwannzan nɩn acɛdɩɛ’n m’ɔ bʋka asɔnɩn’n, ɛsɛ bɔbɔ, bɛ nánndɩ wɔ ehulo nun (12-14). Ɔ lɛ kan ewuetinnge nɩn ɛjɔlɛ (yɩ́ ti 15). Kalata nɩn agualɩɛ nun (yɩ́ ti 16), Pɔlʋ lɛ kan kele bɛ́ kɛ ɔ ’ba sɩn bɛ́ nwʋn ɛlɔ, ɔ de Zoluzalɛmʋn ɛlɔ ehianfʋɛ’n-mɔ kɛtɩ’n mɔ bɛ lɛ tʋ’n ɔ fa kɔ. Ɛsɛ ɔ lɛ bisa bɛ́ ahɩn.

Ahɩn ebisa

¹Mɩ́n Pɔlʋ mɔ Nyanmɩan a hulo ɔ’a fɛlɛ mɩ́n maan m’an kaci Kilisi Zozi bɔfʋɛ’n, mɩn nʋn yɛ́ nianman Sɔsʋtɛnɩn, yɛ́ yɛ̂ yɛ lɛ kɛlɛ kalata ɛhɩ ɔ.

²Yɛ lɛ kɛlɛ kalata ɛhɩ yɛ nwan ɛmɔ Kolɩntɩ asɔnɩn mma’n-mɔ. Ɛmɔ asɔnɩn’n tɩ Nyanmɩan dɩɛ. Nyanmɩan a fa ɛmɔ ɛtɛ’n-mɔ ɔ’a hye ɛmɔ, ɔ’a man ɛmɔ a yɔ nwannzan-nwannzan, ɔ fi junman’n mɔ Kilisi Zozi a li’n dunman nun. Ɔ’a fɛlɛ ɛmɔ kɛ ɛmɔ nʋn Kilisi Zozi bɛ yɔ́ munmuan kʋn bɛ tánlan anwʋntɩɛ nun. Ɔ’a fɛlɛ ɛmɔ nʋn asɔnɩn mma’n-mɔ mɔ bɛ wɔ kulo kulo’n-mɔ kʋalaa asʋ’n. Bɛ de yɛ́ Mɩn Zozi Kilisi bɛ di kɛ yɛ́ kʋsʋ yɛ de yɩ́ yɛ di’n.

³Yɛ ’bisa ɛmɔ ahɩn. Yɛ́ Sɩ Nyanmɩan Kpili nʋn yɛ́ Mɩn Zozi Kilisi, bɛ yéyila ɛmɔ sʋ, bɛ nwún ɛmɔ anwʋn anwunnvoe, bɛ mán ɛmɔ alʋa cɩ́cɩ bɛ́ nwʋn.

Asɩna

⁴Nyanmɩan nanndɩ Zozi Kilisi sʋ ɔ’a nwun ɛmɔ anwʋn anwunnvoe. Anwunnvoe sɔ’n mɔ Nyanmɩan a nwun ɛmɔ nɩn ati, cɩan daa mɩn da yɩ́ asɩ. ⁵Ɔ sanlɩn kɛ, kɛmɔ ɛmɔ nʋn Zozi Kilisi a yɔ kʋn’n, Nyanmɩan a bʋka ɛmɔ man ɛmɔ dedi nɩn a hɔ yɩ́ nyunnun kpa. Ɔ a man ɛmɔ sɩ yɩ́ nwʋn ɛjɔlɛ’n kpa, ɛsɛ ɛmɔ sɩ yɩ́ nʋan ɛjɔlɛ’n kan kpa. ⁶Afɩ, Kilisi anwʋn ɛjɔlɛ’n mɔ ɛmɔ tɩlɩ nɩn a sɔ ndɩan kpa wɔ ɛmɔ afian. ⁷Ɔ man ɛmɔ mɔ bɛ lɛ nwʋnndɛ mɛlɛ mɔ yɛ́ Mɩn Zozi Kilisi ’ba yɩ yɩ́ nwʋn kele’n, ɛmɔ mmian man Nyanmɩan acɛdɩɛ fɩ́ɩ́ anwʋn. ⁸Nyanmɩan ’man ɛmɔ jinlan bɛ́ ja nun kpunndiin dede ɔ kɔ ju yɩ́ ayuelɩɛ. Yɩ́ dɩɛ anɩn cɩan mɔ Zozi Kilisi kɔ a’n, sʋanlan fɩ́ɩ́ nnyan man ɛmɔ anwʋn ɛjɔlɛ ɛtɛ ɔ ngan man. ⁹Nyanmɩan dɩɛ, ɔ nnaka man sʋanlan. Yɩ́ yɛ̂ ɔ’a fɛlɛ ɛmɔ kɛ ɛmɔ nʋn yɩ́ Wa Zozi Kilisi m’ɔ tɩ yɛ́ Mɩn’n yɔ́ kʋn ɔ.

Asɔnɩn nɩn anun mmubue’n

¹⁰Anianman-mɔ, mɩn ’sɛlɛ ɛmɔ mɩn bʋtʋ bɛ́ kɛ yɛ́ Mɩn Zozi Kilisi dunman nun, ɛmɔ mán bɛ́ afian sɛ́, nan nán bɛ bubu bɛ́ nwʋn nun. Ɛmɔ mán bɛ́ ajʋnlɩn yɔ́ kʋn. Ɛmɔ mán bɛ́ nʋan sɛ́ bɛ́ nwʋn kpa bɔkɔɔ. ¹¹Afɩ, anianman-mɔ, balasua’n mɔ bɛ fɛlɛ yɩ́ Kolowe nɩn anwʋn menian a a yɩ mɩ́n anzʋti kɛ akpʋlʋwa a tɔ ɛmɔ afian. ¹²Akpʋlʋwa sɔ’n y’ɔ le kɛ sʋanlan bie jasʋ a, yɩ́ nwan: “N wɔ Pɔlʋ afan”, bie kʋsʋ nwan: “N wɔ Apolɔsʋ afan”, bie kʋsʋ nwan: “N wɔ *Sefasɩ afan”, bie kʋsʋ nwan: “N wɔ Kilisi afan.” ¹³Hei! Yɩ́ ti, ɛmɔ jʋnlɩn kɛ kulo sʋanlan nʋn Kilisi sɛ ɔ? Asʋ mɩ́n, Pɔlʋ, mɩ́n yɛ̂ n wuli kʋlʋwa nɩn asʋ wɔ ɛmɔ dunman nun ɔ? Asʋ Pɔlʋ dunman nun yɛ̂ bɛ sɔnɩnlɩn ɛmɔ ɔ? Cɛcɛ! ¹⁴Nan mɩn ’da Nyanmɩan asɩ kɛ m’an nzɔnɩn man ɛmɔ anun bie fɩ́ɩ́ kɛ bian’n mɔ bɛ fɛlɛ yɩ́ Kilisipusi’n ɔ nʋn Gayiyusi ala. ¹⁵Ɔ man sʋanlan fɩ́ɩ́ ngʋala ɔ nze man kɛ bɛ sɔnɩnlɩn yɩ́ wɔ mɩ́n dunman nun. ¹⁶Ɛsɛ n zɔnɩnlɩn bian’n mɔ bɛ fɛlɛ yɩ́ Sɩtefanasɩ’n nʋn yɩ́ sasʋ’n-mɔ. Bɛ yɩ bɛ́ a, mɩn nne nni man kɛ n zɔnɩnlɩn sʋanlan ngacile biekun ɔ. ¹⁷Afɩ Kilisi a nzʋan man mɩ́n kɛ m mála n zɔ́nɩn sʋanlan. Nan ɔ sʋanlɩn mɩ́n kɛ m mála m mɔ́ yɩ́ Ɛjɔlɛkpa’n n géle menian’n-mɔ. Ɛjɔlɛkpa sɔ’n mɔ mɩn bɔ’n, nán kulo sʋanlan dasannin ngɛlɛ ɛjɔlɛ ɔ. Ɔ sanlɩn kɛ sɛ kulo sʋanlan dasannin ngɛlɛ ɛjɔlɛ yɛ̂ mɩn bɔ a, anɩn Kilisi ewue’n m’ɔ wuli kʋlʋwa nɩn asʋ’n tɩ mgban.

Kilisi kʋlʋwa nɩn anwʋn ɛjɔlɛ’n

¹⁸Ɛhɩ, Kilisi ewue’n m’ɔ wuli kʋlʋwa nɩn asʋ nɩn anwʋn ɛjɔlɛ’n, ɔ tɩ kʋasɩanzɛmʋn ɛjɔlɛ man menian mɔ bɛ lɛ minlin’n. Nan yɛ́ mɔ y’a nyan yɛ́ ti’n, ɛjɔlɛ sɔ’n tɩ Nyanmɩan tunmin. ¹⁹Afɩ b’a hɛlɛ wɔ Ɛhɛlɛ Ɛjɔlɛ nɩn anun kɛ Nyanmɩan nwan:

Mɩn ’ba man ngɛlɛfʋɛ’n-mɔ kaci sɛnvʋɛ.

Mɩn ’ba sɛcɩ bɛ́ mɔ bɛ le ajʋnlɩn nɩn ajʋnlɩn’n.

²⁰Nan ɔ tɩ sʋa a, anɩn bɛngɛlɛfʋɛ’n halɩ nin? Zufʋ’n-mɔ mɔ bɛ sɩ *mala’n anaan Gɛlɛkɩ’n-mɔ mɔ bɛ sɩ jʋjɔ’n, bɛ́ bɛngɛlɛfʋɛ’n halɩ nin? Nyanmɩan a hele kɛ eyuadɩ ɛhɩ anun ngɛlɛ’n tɩ kʋasɩanzɛmʋn! ²¹Eyuadɩ’n nʋn yɩ́ ngɛlɛ m’ɔ sɩ’n, ɔ’a nnwun man kɛ Nyanmɩan sɩ ngɛlɛ ɔ. Ɛhɩka ati, Kilisi ewue’n m’ɔ wuli kʋlʋwa nɩn asʋ anwʋn ɛjɔlɛ’n mɔ yɛ kan’n, eyuadɩ’n bu yɩ́ kʋasɩanzɛmʋn. Nan kʋsʋ Nyanmɩan nanndɩ ɛjɔlɛ sɔ nɩn asʋ, ɔ de bɛ́ mɔ bɛ de bɛ di’n ngʋan. ²²Zufʋ’n-mɔ kulo kɛ bɛ nwun asinbɛnwʋn ninnge bɛ́ nyɩnsʋ nán b’a le b’a li. Gɛlɛkɩ’n-mɔ kʋsʋ kulo kɛ bɛ fa bɛ́ muonun bɛ́ ti anun ngɛlɛ’n dede bɛ nwun Nyanmɩan. ²³Nan yɛ́ dɩɛ, Zozi Kilisi mɔ b’a bʋbɔ yɩ́ kʋlʋwa nɩn asʋ nɩn anwʋn ɛjɔlɛ yɛ̂ yɛ kan ɔ. Ɛjɔlɛ sɔ’n jɩjɩ Zufʋ’n-mɔ. Bɛ́ mɔ bɛ tɩ man Zufʋ nɩn anyunnun an, ɛjɔlɛ sɔ’n tɩ kʋasɩanzɛmʋn. ²⁴Nan bɛ́ mɔ Nyanmɩan a fɛlɛ bɛ́ yɩ́ nwʋn’n, Zufʋ o, m’ɔ tɩ man Zufʋ o, bɛ́ kʋalaa bɛ nwun yɩ́ kɛ Nyanmɩan tunmin’n wɔ Kilisi anun, ɛsɛ Nyanmɩan ngɛlɛ’n wɔ Kilisi anun. ²⁵Afɩ, menian’n-mɔ bu kɛ Nyanmɩan a sɛ. Nan kʋsʋ yɩ́ ɛsɛɛ mɔ ɔ’a sɛ’n, ɔ sɩ ngɛlɛ ɔ tala menian’n-mɔ ngɛlɛ mɔ bɛ́ nwan bɛ sɩ yɩ́ sʋnman’n. Menian’n-mɔ nwan Nyanmɩan tɩ ɛfʋan. Nan kʋsʋ, yɩ́ ɛfʋan m’ɔ tɩ’n, ɔ le anwʋnsɛlɛ ɔ tala menian’n-mɔ anwʋnsɛlɛ mɔ bɛ́ nwan bɛ le yɩ́ sʋnman’n.

²⁶Anianman-mɔ, ɛmɔ muonun tʋ́ bɛ́ nyɩn bɛ nɩ́an bɛ́ afian kɛ ɛmɔ mɔ Nyanmɩan a fɛlɛ bɛ yɩ́ nwʋn’n, ngɛlɛfʋɛ a nzʋn man nun, tunminfʋɛ a nzʋn man nun, dɩhyɩɛ kʋsʋ a nzʋn man nun. ²⁷Nan Nyanmɩan dɩɛ, like mɔ eyuadɩ’n bu yɩ́ kʋasɩanzɛmʋn’n y’ɔ fa ɔ gua ngɛlɛfʋɛ’n-mɔ anyunnun asɩ ɔ. Ɛsɛ like mɔ menian’n bu yɩ́ bɛtɛɛ’n y’ɔ fa gua m’ɔ yɔ sɩ nɩn anyunnun asɩ ɔ. ²⁸Ɛsɛ like mɔ menian’n-mɔ mmu man yɩ́ bie’n, m’ɔ tɩ mgban mgban bɛ́ nyunnun’n yɛ̂ Nyanmɩan fa ɔ sɛcɩ mɔ bɛ bu yɩ́ kɛ ɔ tɩ kpa sʋnman nɩn ɔ. ²⁹Nyanmɩan yɔ yɩ́ sɔ nán kulo sʋanlan fɩ́ɩ́ a ndu man yɩ́ nwʋn ɔ’a ngele man yɩ́. ³⁰Ɔ sanlɩn kɛ Nyanmɩan adawʋlʋman yɛ̂ ɛmɔ nʋn Zozi Kilisi a yɔ kʋn. Nyanmɩan adawʋlʋman, Zozi Kilisi a hele yɛ́ ngɛlɛ. Ɔ’a man y’a yɔ sɛsɛ, ɔ’a man yɛ́ nwʋn a tɩ ɛsɛ ɔ’a man y’a nyan yɛ́ ti. ³¹Ɔ’a man Ɛhɛlɛ Ɛjɔlɛ nɩn a kpɩn sʋ. Yɩ́ nwan:

Sʋanlan mɔ yɩ́ nwan ɔ lɛ tu yɩ́ nwʋn’n,

anɩn ɔ tú yɩ́ nwʋn wɔ like mɔ yɛ́ Mɩn a yɔ nɩn anwʋn.

Ɛjɔlɛkpa’n mɔ Pɔlʋ bɔ’n

¹Ɛhɩ, anianman-mɔ, mɛlɛ mɔ m malɩ ɛmɔ anwʋn ɛlɔ m mɔlɩ Nyanmɩan nvɩalɩɛ nun Ɛjɔlɛkpa’n n gelelɩ ɛmɔ’n, m’an ngolo man mɩ́n nʋan nun anaan m’an ngele ɛmɔ kɛ mɩn sɩ ngɛlɛ. ²Afɩ anɩn ɔ wɔ mɩ́n kunnun kɛ sɛ mɩn ba ɛmɔ anwʋn ɛlɔ a, Zozi Kilisi m’ɔ wuli kʋlʋwa nɩn asʋ nɩn angʋnmɩn ala anwʋn ɛjɔlɛ yɛ̂ mɩn ’kan ɔ. ³Ɛhɩka ati, mɛlɛ mɔ m malɩ ɛmɔ anwʋn ɛlɔ’n, n nolɩ mɩ́n nwʋn nun, ɛsɛ anɩn mɩn sulo, mɩ́n nwʋn wʋsʋ mɩ́n kpa. ⁴Ɛjɔlɛ mɔ n ganlɩn ɔ nʋn Nyanmɩan ninnge’n mɔ n gekelelɩ ɛmɔ’n, m’an ngolo man mɩ́n nʋan nun m’an gele man ɛmɔ kɛ mɩn sɩ ngɛlɛ. Nan tunmin sʋ, Nyanmɩan Wawɛ’n muonun a man ɛmɔ a nwun yɩ́ kɛ ɛjɔlɛ sɔ’n tɩ ananhɔlɛ. ⁵Ɔ man ɛmɔ dedi’n mɔ ɛmɔ le yɩ́’n, ɔ fi man kulo sʋanlan ngɛlɛ’n m’ɔ sɩ nɩn anwʋn. Nan ɛmɔ dedi’n mɔ ɛmɔ le yɩ́’n fi Nyanmɩan tunmin nɩn anwʋn.

Nyanmɩan ngɛlɛ’n

⁶Nan kʋsʋ ngɛlɛ ɛjɔlɛ kʋn yɛ̂ mɩn ’ba han mɩn kele menian mɔ bɛ́ dedi nɩn a tin wɔ Nyanmɩan ninnge’n-mɔ anun ɔ. Ngɛlɛ ɛjɔlɛ sɔ’n, ɔ fi man mân ɛhɩ anun, ɛsɛ ɔ fi man bɛ́ mɔ bɛ sie mân ɛhɩ mɔ bɛ́ tunmin’n ’ba yue nɩn ɛlɔ. ⁷Nan ngɛlɛ ɛjɔlɛ sɔ’n, ɔ tɩ Nyanmɩan nvɩalɩɛ nun ngɛlɛ ɛjɔlɛ. Ɔ’a fa ɔ’a fɩa menian’n-mɔ. Asannan nán Nyanmɩan a sesie mân’n, ɔ yɔlɩ ajʋnlɩn kɛ ɔ ’man yɛ tanlan yɩ́ anunminnyanmʋn nɩn anun bie. Ɛhɩka ati, ɔ’a yɩ nvɩlɩɛ nun ngɛlɛ ɛjɔlɛ sɔ’n ɔ’a hele yɛ́. ⁸Mân ɛhɩ anun menian mɔ bɛ le tunmin’n fɩ́ɩ́ a nnwun man ngɛlɛ sɔ’n. Sɛ ɔ tɩ kɛ bɛ nwunlin yɩ́ a, ahan b’a mmʋbɔ man yɛ́ Mɩn m’ɔ le anunminnyanmʋn’n kʋlʋwa nɩn asʋ. ⁹Ɛhɛlɛ Ɛjɔlɛ’n lɛ kele kɛ Nyanmɩan nwan:

Like mɔ sʋanlan fɩ́ɩ́ anyɩn bɔlɩ man yɩ́ lé,

mɔ sʋanlan fɩ́ɩ́ tɩlɩ man yɩ́ nwʋn ɛjɔlɛ lé,

mɔ ɛsɛ sʋanlan fɩ́ɩ́ jʋnlɩnlɩn man yɩ́ nwʋn lé’n,

like sɔ’n yɛ̂ Nyanmɩan fa man menian

mɔ bɛ kulo yɩ́ nɩn ɔ.

¹⁰Yɛ́ dɩɛ, Nyanmɩan nanndɩ Wawɛ Nwannzan-nwannzan nɩn asʋ ɔ’a yɩ nvɩalɩɛ nun like sɔ’n ɔ’a hele yɛ́. Ɔ sanlɩn kɛ, Wawɛ Nwannzan-nwannzan’n dɩɛ, ɔ kʋala ɔ nwun ninnge’n-mɔ kʋalaa yuein. Nyanmɩan muonun nyɩhyɛ ninnge’n-mɔ m’ɔ fɩa kpa’n, Wawɛ Nwannzan-nwannzan’n nwun yɩ́. ¹¹Kulo sʋanlan afan kʋsʋ, cɛlɛ kɛ sʋanlan sunsunmin’n m’ɔ wɔ yɩ́ nun’n yɛ̂ ɔ sɩ yɩ́ bʋ ɛjɔlɛ’n kʋalaa ɔ. Kɛ ɔ tɩ yɩ́ nɩn ala anɩn, Nyanmɩan Wawɛ’n kʋsʋ y’ɔ sɩ Nyanmɩan abʋ ɛjɔlɛ’n kʋalaa ɔ. ¹²Yɛ́ dɩɛ nán eyuadɩ ɛhɩ anun wawɛ’n yɛ̂ ɔ wɔ yɛ́ nun ɔ. Nan Nyanmɩan Wawɛ’n y’ɔ wɔ yɛ́ nun ɔ. Ɔ man yɛ kʋala kɛ yɛ nwun ninnge’n-mɔ kʋalaa mɔ Nyanmɩan a fa a man yɛ́’n. ¹³Ɛhɩka ati, sɛ yɛ lɛ kan ninnge sɔ’n-mɔ anwʋn ɛjɔlɛ yɛ kele menian’n-mɔ a, yɛ nva man kulo sʋanlan ngɛlɛ yɛ ngan man bɛ́ nwʋn ɛjɔlɛ. Nan Nyanmɩan Wawɛ’n ngɛlɛ dɩɛ’n yɛ̂ yɛ fa yɛ kan ninnge sɔ’n-mɔ anwʋn ɛjɔlɛ ɔ. Ɔ man sɛ yɛ lɛ kan ɛjɔlɛ yɛ kele bɛ́ mɔ bɛ le Wawɛ nɩn an, wawɛ nun ninnge’n-mɔ anwʋn ɛjɔlɛ yɛ̂ yɛ kan ɔ. ¹⁴Sʋanlan m’ɔ le man Nyanmɩan Wawɛ’n, ɔ ngʋala ɔ mmu man Nyanmɩan Wawɛ sɔ nɩn ɛjɔlɛ nɩn ananhɔlɛ. Yɩ́ nyunnun an, ɛjɔlɛ sɔ’n tɩ kʋasɩanzɛmʋn, ɔ ngʋala ɔ ndɩ man yɩ́ bʋ. Ɔ sanlɩn kɛ wawɛ nun yɛ̂ bɛ bua ndɛɛ ɔ. ¹⁵Sʋanlan mɔ Nyanmɩan Wawɛ’n wɔ yɩ́ nun’n, ɔ kʋala kɛ ɔ bua ninnge kʋalaa ndɛɛ. Nan kʋsʋ yɩ́ muonun dɩɛ, sʋanlan fɩ́ɩ́ ngʋala man yɩ́ ndɛɛ bua. ¹⁶Ɛhɛlɛ Ɛjɔlɛ’n lɛ kele kɛ Nyanmɩan nwan:

Nwan yɛ̂ ɔ sɩ yɛ́ Mɩn ati anun ajʋnlɩn ɔ?

Nwan yɛ̂ ɔ kʋala kɛ ɔ tu yɩ́ fʋ ɔ?

Nan yɛ́ dɩɛ, Kilisi ajʋnlɩn’n yɛ̂ yɛ le yɩ́ ɔ.

Nyanmɩan junman’n mɔ yɩ́ ngʋa’n-mɔ di’n

¹Ɔ man mɩ́n dɩɛ, anianman-mɔ, m’an ngʋala man ɛjɔlɛ kan kele ɛmɔ kɛ menian mɔ Nyanmɩan Wawɛ’n wɔ bɛ́ nun ɔ. N jʋjɔlɩ n gelelɩ ɛmɔ kɛ bɛ jʋjɔ bɛ kele mân ɛhɩ anun menian’n-mɔ’n kɛ bɛ jʋjɔ bɛ kele mmatʋnman mɔ b’a fa bɛ́ nwʋn b’a man Kilisi’n. ²Nán alɩɛ m’ɔ yɔ nʋnnɔɛ yɛ̂ n valɩ m manlɩn ɛmɔ ɔ. Nan nyafʋsue yɛ̂ n valɩ manlɩn ɛmɔ ɔ. Ɔ sanlɩn kɛ ɛmɔ ngʋala man alɩɛ di. Ɛnɛ nʋn ɛnɛ bɔbɔ muonun, ɛmɔ ngʋala man alɩɛ di. ³Ɔ sanlɩn kɛ ɛmɔ tɛ bɔ bɛ́ bala’n kɛ mân ɛhɩ anun menian’n-mɔ bɔ yɩ́’n. Sunmin cɩan’n mɔ ɛmɔ kulo bɛ́ kunnun, ɔ nʋn butule elie m’ɔ wɔ ɛmɔ afian’n, ɔ kele kɛ ɛmɔ kacili man. Ɛmɔ abalabɔ’n tɩ kɛ mân ɛhɩ anun menian nga’n-mɔ dɩɛ’n. ⁴Ɛmɔ anun kʋn bie jasʋ a, yɩ́ nwan: “Mɩ́n sʋanlan dɩɛ’n y’ɔ le Pɔlʋ.” Kʋn biekun nwan: “Mɩ́n sʋanlan dɩɛ’n y’ɔ le Apolɔsʋ.” Nán kulo sʋanlan nyɔlɩɛ y’ɔ le ɛhɩ ɔ?

⁵Nan Apolɔsʋ y’ɔ le nwan? Pɔlʋ y’ɔ le nwan? Nyanmɩan ngʋa ala yɛ̂ yɛ tɩ ɔ. Ɔ nanndɩ yɛ́ sʋ ɔ’a man ɛmɔ a nyan dedi. Yɛ́ nunhan kʋn biala a yɔ like’n mɔ yɛ́ Mɩn manlɩn yɩ́ kɛ ɔ yɔ́’n. ⁶M’an lua baka baa’n, Apolɔsʋ kʋsʋ a gugua sʋ nzue, nan Nyanmɩan y’ɔ man ɔ’a fifi ɔ. ⁷Ɔ man sʋanlan’n m’ɔ kɔ lua’n ɔ nʋn nunhan’n m’ɔ kɔ gugua sʋ nzue’n, bɛ́ bie tɩ man like fɩ́ɩ́, nan Nyanmɩan m’ɔ man ɔ fifi’n y’ɔ le dunman ɔ. ⁸Sʋanlan’n mɔ ɔ’a lua’n ɔ nʋn mɔ ɔ’a gugua sʋ nzue’n, bɛ́ munnyuan bɛ sɛ. Nyanmɩan ’ba nɩan sʋanlan kʋn junman dɩɛ’n m’ɔ kɔ li nɩn anwʋn ɔ ce yɩ́ like. ⁹Ɔ sanlɩn kɛ, yɛ́ menian nnyuan’n, yɛ tɩ amanngʋan wɔ Nyanmɩan junman nɩn anun. Nan ɛmɔ dɩɛ, Nyanmɩan ebo’n y’ɔ le ɛmɔ. Ɛsɛ ɛmɔ tɩ sua mɔ Nyanmɩan a si ɔ.

¹⁰Ɔ nanndɩ Wawɛ nun junman’n mɔ Nyanmɩan a fa a man mɩ́n kɛ n ní nɩn asʋ, m’an wula sua sɔ nɩn abʋ. M’an li junman sɔ’n ngɛlɛ sʋ kɛ bɛ́ mɔ bɛ lɛ si sua’n bɛ́ kpain’n yɔ yɩ́’n. Sian dɩɛ, sʋanlan fʋfɔlɛ lɛ fʋla sʋ. Nan nunhan kʋn biala m’ɔ lɛ fʋla sua nɩn asʋ’n, ɔ nɩ́an yɩ́ nyɩn. ¹¹Ɔ sanlɩn kɛ Zozi Kilisi yɛ̂ b’a fa b’a wula sua sɔ nɩn abʋ ɔ. Sʋanlan fɩ́ɩ́ kʋ́n ngʋala man kɛ ɔ fa like fʋfɔlɛ wula yɩ́ bʋ. ¹²Menian mmie-mɔ ’ba fa esika ɛmanlan, anaan jɛtɛ, anaan nyɔbʋɛ mɔ bɛ mian yɩ́ nwʋn kpa bɛ fa bɛ fʋla sua nɩn asʋ. Mmie-mɔ kʋsʋ ’ba fa mmaka anaan ndile, anaan nyâ bɛ fʋla sua nɩn asʋ. ¹³Cɩan mɔ Nyanmɩan ’bua menian’n-mɔ ndɛɛ’n, bɛ ’nwun sʋanlan kʋn biala junman dɩɛ m’ɔ lili’n. Ɔ sanlɩn kɛ, bɛ ’ba fa sɩ̂n bɛ sa sʋanlan kʋn biala junman’n m’ɔ lili’n bɛ nɩan. ¹⁴Sʋanlan mɔ sɩ̂n nɩn a nnyala man yɩ́ like dɩɛ m’ɔ kɔ fa kɔ fʋla sua nɩn asʋ’n, sʋanlan sɔ’n, ɔ ’nyan nun like kpa. ¹⁵Nan sʋanlan mɔ sɩ̂n’n kɔ yala yɩ́ like dɩɛ m’ɔ kɔ fa kɔ fʋla sua nɩn asʋ’n, sʋanlan sɔ’n, ɔ nnyan man nun like. Ɔ ’nyan yɩ́ ti lɩlɩ, nan kʋsʋ, ɔ tɩ kɛ sʋanlan mɔ ɔ’a tɔ sɩ̂n nun ɔ’a fite ɔ.

¹⁶Ɛmɔ muonun sɩ yɩ́ fɔ́ʋ́n kɛ Nyanmɩan asɔnɩn sua’n y’ɔ le ɛmɔ, Nyanmɩan Wawɛ’n wɔ ɛmɔ anun. ¹⁷Ɛhɩka ati, sɛ sʋanlan kʋn bubu Nyanmɩan asɔnɩn sua nɩn an, sʋanlan sɔ’n, Nyanmɩan kʋsʋ ’bubu yɩ́ nun bɔkɔɔ. Ɔ sanlɩn kɛ Nyanmɩan sua’n tɩ nwannzan-nwannzan. Sua sɔ’n kʋsʋ y’ɔ le ɛmɔ.

¹⁸Sʋanlan fɩ́ɩ́ n’ɔ laka laka yɩ́ nwʋn. Sɛ sʋanlan kʋn bu yɩ́ nwʋn kɛ ɔ sɩ mân ɛhɩ anun ngɛlɛ nɩn an, anɩn ɔ káci kʋasɩafʋɛ, nán ɔ’a nwun ngɛlɛ. ¹⁹Ɔ sanlɩn kɛ mân ɛhɩ anun ngɛlɛ’n tɩ kʋasɩanzɛmʋn wɔ Nyanmɩan anyunnun. Ɔ man Ɛhɛlɛ Ɛjɔlɛ’n lɛ kele kɛ Nyanmɩan nwan: Ngɛlɛfʋɛ’n-mɔ ngɛlɛ mɔ bɛ kɔ bɔ nɩn anun yɛ̂ Nyanmɩan fa cɩ bɛ́ ɔ.²⁰Ɛsɛ yɩ́ nwan: Yɛ́ Mɩn sɩ kɛ ngɛlɛfʋɛ’n-mɔ ajʋnlɩn’n tɩ nvuin.²¹Ɛhɩka ati, bie fɩ́ɩ́ n’ɔ fa sʋanlan ɔ tu yɩ́ nʋan nun. Ɔ sanlɩn kɛ ninnge kʋalaa tɩ ɛmɔ dɩɛ. ²²Pɔlʋ o, Apolɔsʋ o, *Sefasɩ o, mân nɩn o, ngʋan o, ewue o, mɛlɛ’n mɔ yɛ wɔ nun o, ɔ nʋn m’ɔ lɛ ba nɩn o, yɩ́ kʋalaa tɩ ɛmɔ dɩɛ. ²³Nan ɛmɔ dɩɛ, ɛmɔ tɩ Kilisi dɩɛ yɛ̂ Kilisi tɩ Nyanmɩan dɩɛ.

Kilisi mmɔfʋɛ’n-mɔ

¹Ɛhɩka ati, mɩn kulo kɛ ɛmɔ nwun yɛ́ kɛ yɛ tɩ Kilisi ngʋa, yɛ tɩ menian mɔ Nyanmɩan a fa yɩ́ nvɩalɩɛ nun ananhɔlɛ ɛjɔlɛ’n ɔ’a wula yɛ́ sa nun kɛ yɛ hán yɩ́ nwʋn ɛjɔlɛ yɛ héle ɛmɔ. ²Like kʋalaa m’ɔ cian man sʋanlan mɔ bɛ kɔ fa junman bɛ kɔ wula yɩ́ sa nun’n y’ɔ le kɛ ɔ mán bɛ nwún yɩ́ ti anun kɛ ɔ tɩ ananhɔlɛfʋɛ. ³Mɩ́n dɩɛ, sɛ ɛmɔ bua mɩ́n ndɛɛ o, anaan menian’n-mɔ bua mɩ́n ndɛɛ o, ɛhɩ fɩ́ɩ́ nvalɩ man mɩ́n nwʋn. Ɛsɛ bɔbɔ, mɩ́n muonun mɩn mmua man mɩ́n nwʋn ndɛɛ ⁴Ɔ tɩ ananhɔlɛ, mɩ́n ti’n nze man mɩ́n kɛ m’an yɔ ɛtɛ. Nan kʋsʋ nán ɛhɩ y’ɔ kele kɛ n dɩ sɛsɛfʋɛ ɔ. Ɔ sanlɩn kɛ yɛ́ Mɩn y’ɔ bua mɩ́n ndɛɛ ɔ. ⁵Ɛhɩka ati, sɛ cɩan’n m’ɔ ’fa bua ndɛɛ’n juli man angʋnmɩan an, nán bɛ bua sʋanlan fɩ́ɩ́ ndɛɛ. Ɛmɔ nwʋ́nndɛ maan yɛ́ Mɩn bála kʋalaaka. Ninnge m’ɔ fɛfɩa awosin nɩn anun’n, ɔ ’ba tu yɩ́ kʋalaa fite jawe nun. Menian’n-mɔ nvɩalɩɛ nun ɛjɔlɛ m’ɔ wɔ bɛ́ ahʋnlɩn nun’n, yɛ́ Mɩn ’ba man bɛ nwun yɩ́. Cɩan sɔ’n yɛ̂ Nyanmɩan ’ba yɩ sʋanlan kʋn biala ayɛ wɔ yɩ́ junman’n m’ɔ lili nɩn anwʋn ɔ.

⁶Anianman-mɔ, m’an fa ɛhɩ kʋalaa mɔ m’an han’n m’an tʋ Apolɔsʋ nʋn mɩ́n muonun yɛ́ nwʋn m’an hele ɛmɔ like. Anyɩnndala’n mɔ bɛ́ nwan: “N’ɛ kan tala mɔ b’a hɛlɛ nɩn asʋ’n”, mɩn kulo kɛ yɛ́ nwʋn nvandʋhʋn nɩn anun, ɛmɔ suan bɛ tɩ yɩ́ bʋ. Ɛmɔ anun bie le man atɩn ɔ njinlan man sʋanlan kʋn afan ɔ ndu man yɩ́ nwʋn ɔ ngele man kʋn. ⁷Ɔ sanlɩn kɛ wɔ́ mɔ ɛ bu wɔ́ nwʋn kɛ ɛ tɩ kpa tala wɔ́ manngʋn’n-mɔ’n, wɔ́ muonun ɛ tɩ wɔ́ dɩɛ sɛ? Nzu yɛ̂ ɛ le yɩ́ mɔ nán Nyanmɩan y’ɔ manlɩn wɔ́ ɔ? Nyanmɩan yɛ̂ ɔ’a fa ninnge kʋalaa ɔ’a man wɔ́ ɔ, nan nzukɛ ati yɛ̂ ɛ fa tu wɔ́ nwʋn kɛ nán Nyanmɩan yɛ̂ ɔ falɩ manlɩn wɔ́ ɔ?

⁸Kɩkaala dɩɛ, ɛmɔ asa a han ninnge’n kʋalaatin. Ɛmɔ a nyan bɛ́ nwʋn a yue. Ɛmɔ a kaci mmelemgbin b’a san yɛ́ nwʋn. Mɩn kulo kɛ ɛmɔ kaci mmelemgbin sakpa, nán yɛ́ kʋsʋ yɛ nʋn ɛmɔ a li belemgbin sɔ’n. ⁹Afɩ, mɩn nwun yɩ́ kɛ yɛ́ mɔ yɛ tɩ Zozi Kilisi mmɔfʋɛ’n, Nyanmɩan a fa yɛ́ a sie menian’n-mɔ kʋalaa anzin. Yɛ tɩ kɛ menian mɔ bagua nun yɛ̂ bɛ kun bɛ́ ɔ. Ɔ sanlɩn kɛ bɛ yɩ yɛ́ bɛ kele mân bɔndɩn’n, bɛ yɩ yɛ́ bɛ kele nyanmɩansʋ mmɔfʋɛ’n-mɔ ɔ nʋn menian’n-mɔ kʋsʋ. ¹⁰Kilisi dunman nun, menian’n-mɔ bu yɛ́ kɛ sɛnvʋɛ. Nan ɛmɔ dɩɛ, ɛmɔ nʋn Kilisi b’a yɔ kʋn ɛmɔ a nwun ngɛlɛ. Yɛ le man anwʋnsɛlɛ, nan ɛmɔ dɩɛ, ɛmɔ le anwʋnsɛlɛ. Menian’n-mɔ mmu man yɛ́ like fɩ́ɩ́, nan ɛmɔ dɩɛ, bɛ lile ɛmɔ anwunno. ¹¹Bɩcɩ ɛhɩ, ɛhɔɛ nʋn nzuhoe lɛ kun yɛ́, yɛ nnyan man taladɩɛ yɛ nwula man. Menian’n-mɔ lɛ bʋ yɛ́. Yɛ nnyan man lɩka yɛ ndanlan man, yɛ nanndɩ nun. ¹²Yɛ́ muonun yɛ fa yɛ́ nwʋn yɛ tɩ, nán y’a nyan yɛ́ nʋan nun alɩɛ y’a li. Bɛ ’kpɛ yɛ́ nzʋba a, anɩn yɛ lɛ yeyila bɛ́ sʋ. Bɛ ’kele yɛ́ ahʋlʋwa a, anɩn yɛ lɛ tila yɛ́ ahʋnlɩn. ¹³Menian’n-mɔ ’sɛcɩ yɛ́ dunman an, yɛ ndɛ man bɛ́ sʋ. Bɩcɩ nʋn bɩcɩ, menian’n-mɔ bu yɛ́ kɛ eyuadɩ nɩn anun ewula. Bɛ bu yɛ́ kɛ fʋfʋɛ sʋ ewula.

¹⁴Nán kɛ mɩɩn kɛlɛ ɛjɔlɛ sɔ’n-mɔ mɩn gua ɛmɔ anyunnun asɩ ɔ. Nan mɩn kulo kɛ mɩn tu ɛmɔ fʋɔ kɛ mɩ́n mma mɔ mɩn kulo bɛ́ kpa ɔ. ¹⁵Ɔ sanlɩn kɛ, sɛ bɔbɔ menian akpɩɩ bulu tɩnngɛ ɛmɔ wɔ Kilisi atɩn nɩn asʋ a, ɛmɔ asɩ’n y’ɔ le mɩ́n. Mɩ́n yɛ̂ m mɔlɩ Kilisi anwʋn Ɛjɔlɛkpa’n n gelelɩ ɛmɔ ɔ. ¹⁶Ɛhɩka ati, mɩɩn kan mɩn kele ɛmɔ kɛ ɛmɔ nɩ́an mɩ́n ɛnanndɩɛ dɩɛ nɩn asʋ, bɛ nánndɩ. ¹⁷Ɔ man m’an sʋan Timote ɛmɔ anwʋn ɛlɔ. Ɔ tɩ mɩ́n wa mɔ mɩn kulo yɩ́ kpa ɛsɛ ɔ nanndɩ yɛ́ Mɩn atɩn nɩn asʋ ananhɔlɛ nun. Ɔ ’ba hele ɛmɔ kɛ mɩn kpɩn mɩn nanndɩ Kilisi atɩn nɩn asʋ’n. Atɩn sɔ nɩn anwʋn ɛjɔlɛ yɛ̂ mɩn kele yɩ́ lɩka kʋalaatin Asɔnɩn’n-mɔ anun ɔ.

¹⁸Ɛmɔ mmie-mɔ lɛ tu bɛ́ nʋan nun, bɛ jʋnlɩn kɛ m mma man ɛmɔ anwʋn ɛlɔ. ¹⁹Nan sɛ yɛ́ Mɩn bʋa a, mɩn ’ba a ɛmɔ anwʋn ɛlɔ ɛlɛ nsan ɛhɩ anun. Sɛ mɩn ju ɛlɔ a, yɛ̂ mɩn ’ba nwun atubɛnwʋn mma sɔ’n-mɔ ɔ. Nán bɛ́ nʋan nun etue nɩn ala yɛ̂ mɩn ’fa mɩn nwun bɛ́ ɔ. Nan sɛ bɛ́ tunmin’n mɔ bɛ le yɩ́’n fi Nyanmɩan ɛlɔ a, mɩn ’ba nwun yɩ́. ²⁰Ɔ sanlɩn kɛ, Nyanmɩan Belemgbin Mân’n tɩ man bɛ́ nʋan nun etue ɛjɔlɛ, nan ɔ tɩ tunmin ɛjɔlɛ. ²¹Benin yɛ̂ ɛmɔ kulo ɔ? Asʋ ɛmɔ kulo kɛ n vá mgbele m mála n vín ɛmɔ, anaan m mála n jɩ́cɩ ɛmɔ alʋa ɔ?

Asɔnɩn nɩn anun abalabɔ ɛtɛ’n

¹Bɛ kannvʋ kɛ ɛmɔ mmalasua ɛjɔlɛ nʋn mmelenzua ɛjɔlɛ m’ɔ la ɛmɔ anwʋn’n, bɛ́ bɔbɔ muonun mɔ bɛ nzɩ man Nyanmɩan’n, bɛ ngɔ yɔ man yɩ́ sɔ. M’an tɩ kɛ ɛmɔ anun kʋn nʋn yɩ́ sɩ ayɩ’n da. ²Esuan kpa m’ɔ di kɛ ɛmɔ sun bɛ fʋan sʋanlan sʋa fi Asɔnɩn nɩn anun’n, kanngʋ ɛmɔ dɩɛ ɛmɔ anwʋn yɛ̂ bɛ tu ɔ. ³Mɩ́n dɩɛ, anwʋnnaan nun an, n nnʋn man ɛmɔ afian ɛlɔ, kʋsʋ wawɛ nun an, mɩn nʋn ɛmɔ yɛ̂ yɛ wɔ ɛlɔ. Yɛ́ Mɩn Zozi dunman nun, sʋanlan’n mɔ ɔ’a li ɛjɔlɛ ɛtɛ sɔ’n, m’an bua yɩ́ ndɛɛ dada angʋnmɩn kɛ n wɔ ɛmɔ afian. ⁴Sɛ ɛmɔ yia a, n wɔ ɛmɔ afian wawɛ nun. Yɛ́ Mɩn Zozi tunmin’n ’ba jinlan ɛmɔ anzin. ⁵Ɛmɔ wúla sʋanlan sɔ nɩn awʋba *Satan asa nun maan nyian hún yɩ́ nán cɩan mɔ yɛ́ Mɩn Zozi kɔ sa kɔ a’n, anɩn sʋanlan sɔ nɩn ɛkala’n nyan ngʋan.

⁶Ɛmɔ anʋan nun etue’n tɩ man kpa. Ɛmɔ nzɩ man kɛ fali ayile kaan sʋa mɔ bɛ kɔ fa bɛ kɔ wula fali’n maan ɔ tu ɔ? ⁷Ɛmɔ yɩ́ ɛtɛ sɔ’n fi ɛmɔ afian maan ɛmɔ anwʋn tɩ́ kpa bɔkɔɔ. Sɛ ɛmɔ yɔ yɩ́ sɔ a, ɛmɔ ’ba kaci fali fʋfɔlɛ mɔ ayile nnʋn man nun ɔ. Ɛmɔ a kaci kɛ fali fʋfɔlɛ dada angʋnmɩn bɔbɔ. Ɔ sanlɩn kɛ yɛ́ *Pakɩ fɛtɩ dɩɛ nɩn a bɔ yɩ́ bʋ. Afɩ Kilisi m’ɔ tɩ kɛ yɛ́ Pakɩ bʋa baa’n, b’a hun yɩ́ b’a yɩ yɛ́ ti tɛɛ. ⁸Ɛhɩka ati, sɛ yɛ ’di yɛ́ fɛtɩ nɩn an, nán bɛ man fali ayile daba tanlan yɛ́ kpaʋn nɩn anun. Nán man ati anun ɛtɛ nʋn basa basa fali ayile’n tanlan ɛmɔ asɩtanlan nɩn anun. Nan ɛmɔ kpʋ́nndɛ anwʋntɩɛ nʋn ananhɔlɛ kpaʋn dɩɛ’n mɔ fali ayile nnʋn man nun’n.

⁹Ɛhɩ, mɩ́n kalata’n mɔ n gɛlɛlɩ ɛmɔ nɩn anun, n ganlɩn kɛ menian mɔ bɛ tʋn ajaa’n, ɛmɔ nʋn bɛ́ nán bɛ san nun. ¹⁰M’an nze man ɛmɔ kɛ nán bɛ jʋjɔ bɛ́ mɔ bɛ nzɩ man Nyanmɩan mɔ bɛ gua mân nɩn anun bɛ tʋn ajaa, bɛ tɩ anyɩnbʋlʋ, bɛ wua anaan bɛ sɔ amʋan nɩn ɛlɔ. Sɛ yɩ́ sɔ a, anɩn ɛmɔ fi mân nɩn anun bɛ tú! ¹¹Nan mɩɩn kele kɛ nán man ɛmɔ nʋn sʋanlan mɔ yɩ́ nwan ɔ tɩ Kilisi dɩɛ, kʋsʋ ɔ tʋn ajaa, ɔ tɩ anyɩnbʋlʋ, ɔ sɔ amʋan, ɔ tɩ ngʋnndʋnmgbɔ, ɔ tɩ kɔnʋnmɩnnzan anaan awofʋɛ’n, sʋanlan sʋa, nán man ɛmɔ nʋn yɩ́ san nun. Nán man ɛmɔ nʋn yɩ́ bɛ wula bɛ́ sa talie kʋn anun bɔbɔ.

¹²Bɛ́ mɔ bɛ tɩ man Kilisi dɩɛ’n, sɛ bɛ ’bua bɛ́ ndɛɛ e, sɛ bɛ mmua man bɛ́ ndɛɛ e, nán mɩ́n ɛjɔlɛ ɔ. Nyanmɩan muonun yɛ̂ ɔ ’bua bɛ́ ndɛɛ ɔ. ¹³Nan menian mɔ ɛmɔ nʋn bɛ́ wɔ eku kʋn anun’n, asʋ yɛ ngʋala man kɛ yɛ bua bɛ́ ndɛɛ ɔ? B’a hɛlɛ wɔ Ɛhɛlɛ Ɛjɔlɛ nɩn anun kɛ Nyanmɩan nwan: Ɛmɔ fʋ́an abɔlɛfʋɛ’n fi ɛmɔ afian.

Bɛ́ nwʋn ɛsanman’n

¹Ɛhɩ, sɛ ɛmɔ anun kʋn nʋn yɩ́ nianman bie nyan ɛjɔlɛ a, ɔ yɔ sɛ m’ɔ yaci Nyanmɩan menian’n-mɔ ɛbɛlɛ ɔ fa ɛjɔlɛ’n kɔ ahɩnlɩnnvie maan bɛ di yɩ́ bɛ́ mɔ bɛ nzɩ man Nyanmɩan nɩn aja sʋ ɔ? ²Ɛmɔ nzɩ man kɛ cɩan bie dede Nyanmɩan menian’n-mɔ yɛ̂ bɛ ’bua mân nɩn anun menian’n-mɔ kʋalaa ndɛɛ ɔ? Nán sɛ cɩan bie dede Nyanmɩan menian’n-mɔ yɛ̂ bɛ ’bua mân nɩn anun menian’n-mɔ kʋalaa ndɛɛ a, anɩn ɛjɔlɛ nganngan sʋa yɛ̂ ɛmɔ ngʋala man yɩ́ di ɔ? ³Ɛmɔ nzɩ man kɛ cɩan bie dede, yɛ́ yɛ̂ yɛ ’bua nyanmɩansʋ mmɔfʋɛ’n-mɔ ndɛɛ ɔ? Nán sɛ yɛ́ yɛ̂ yɛ ’bua bɛ́ ndɛɛ a, anɩn mân ɛhɩ anun ɛjɔlɛ yɛ̂ ɛmɔ ngʋala man yɩ́ di ɔ? ⁴Nan ɛmɔ dɩɛ, sɛ ɛjɔlɛ tɔ ɛmɔ afian an, menian mɔ Asɔnɩn’n mmu man bɛ́ like nɩn aja sʋ yɛ̂ ɛmɔ sanman bɛ́ nwʋn ɔ. ⁵Mɩɩn kan maan nyian tɔ ɛmɔ anyɩnsʋ. Yɩ́ ti, ngɛlɛfʋɛ baa kʋnmgba nnʋn man Asɔnɩn nɩn anun mɔ sɛ ɛjɔlɛ tɔ a, ɔ kʋala kɛ ɔ sesie anianman’n-mɔ afian ɔ? ⁶Sɛ ɛjɔlɛ tɔ anianman nnyuan afian an, anɩn kanngʋ menian mɔ bɛ nzɩ man Nyanmɩan nɩn aja sʋ yɛ̂ bɛ fa ɛjɔlɛ’n bɛ kɔ ɔ?

⁷Ɛsanman’n mɔ ɛmɔ sanman bɛ́ nwʋn bɛ jinlan bagua nun bɛ yɩ ndɛɛ’n, dada angʋnmɩn, ɔ kele kɛ ɔ’a nyɔ man ye. Nzukɛ ati yɛ̂ ɛmɔ nyaci man menian’n-mɔ maan bɛ nzisi man ɛmɔ ɔ? Nzukɛ ati yɛ̂ ɛmɔ nyaci man menian’n-mɔ maan bɛ nni man ɛmɔ ndunlunmun ɔ? ⁸Kanngʋ ɛmɔ muonun yɛ̂ ɛmɔ sisi bɛ́ nianman’n-mɔ bɛ di bɛ́ ndunlunmun ɔ.

⁹Ɛmɔ muonun sɩ yɩ́ fɔ́ʋ́n kɛ menian mɔ bɛ yɔ ɛtɛ’n, bɛ nnyan man asɩtanlan wɔ Nyanmɩan Belemgbin Mân nɩn anun ɛlɔ bie. Nán bɛ laka laka bɛ́ nwʋn. Menian mɔ bɛ yɔ satɩlɩfʋɛ nyɔlɩɛ, bɛ́ mɔ bɛ sɔ amʋan, bɛ́ mɔ bɛ tʋn ajaa, bɛ́ mɔ bɛ kpʋnndɛ bɛ́ nwʋn, ¹⁰bɛ́ mɔ bɛ wua, bɛ́ mɔ bɛ tɩ anyɩnbʋlʋ, bɛ́ mɔ bɛ tɩ kɔnʋnmɩnnzan, bɛ́ mɔ bɛ tɩ ngʋnndʋnmgbɔ anaan bɛ ngan man ananhɔlɛ, menian sɔ’n-mɔ ngɔ nnyan man asɩtanlan wɔ Nyanmɩan Belemgbin Mân nɩn anun ɛlɔ bie. ¹¹Daba, kɛ anɩn ɛmɔ anun mmie-mɔ tɩ yɩ́ nɩn anɩn. Nan Nyanmɩan a tɩ ɛmɔ anwʋn fi ɛtɛ nɩn anun, ɔ’a fa ɛmɔ ɔ’a yɔ yɩ́ dɩɛ, ɔ’a man ɛmɔ a yɔ sɛsɛ wɔ yɩ́ nyunnun yɛ́ Mɩn Zozi Kilisi nʋn yɛ́ Nyanmɩan Wawɛ’n dunman nun.

Bɛ fá bɛ́ sʋanlan baka’n bɛ wúla yɛ́ Mɩn anunminnyanmʋn

¹²Ɛmɔ anun mmie-mɔ nwan: “Mɩn kʋala mɩn yɔ like biala mɔ mɩn kulo ɔ.” Ɔ tɩ ananhɔlɛ, nan kʋsʋ yɩ́ kʋalaa tɩ man kpa mman man ɛmɔ. Mɩn kʋala mɩn se kɛ: “Mɩn kʋala mɩn yɔ like biala mɔ mɩn kulo ɔ”, nan kʋsʋ mɩn ngʋala man kɛ mɩn yaci mɩ́n nwʋn maan like biala fa mɩ́n yɔ yɩ́ kanga. ¹³Ɛmɔ nwan: “Alɩɛ ati yɛ̂ bɛ bɔlɩ kʋɛ ɔ, yɛ̂ kʋɛ kʋsʋ ati yɛ̂ bɛ bɔlɩ alɩɛ ɔ.” Ɔ tɩ ananhɔlɛ, nan kʋsʋ Nyanmɩan ’ba sɛcɩ ninnge nnyuan sɔ’n-mɔ. Nan sʋanlan baka’n dɩɛ, nán satɩlɩfʋɛ ɛyɔlɛ ati yɛ̂ bɛ bɔlɩ ɔ. Ɔ tɩ yɛ́ Mɩn dɩɛ, yɛ̂ yɛ́ Mɩn kʋsʋ tɩ sʋanlan baka’n dɩɛ. ¹⁴Nyanmɩan m’ɔ man yɛ́ Mɩn fi ewue nun a tinnge’n, ɔ ’ba fa yɩ́ tunmin’n ɔ man yɛ́ kʋsʋ yɛ fi ewue nun yɛ tinnge. ¹⁵Ɛmɔ sɩ kɛ ɛmɔ anwʋnnaan’n tɩ Kilisi anwʋnnaan kpa bɔkɔɔ. Asʋ ɔ tɩ kpa kɛ n vá Kilisi anwʋnnaan’n sin mɩn nʋn balasua m’ɔ si tutu’n yɛ hán yɛ bɔ́ nun ɔ? Cɛcɛ! ¹⁶Anaan, asʋ ɛmɔ nzɩ man kɛ belenzua kʋn m’ɔ kɔ fa yɩ́ nwʋn kɔ bɔ balasua m’ɔ si tutu’n, anɩn ɔ nʋn yɩ́ b’a kaci anwʋnnaan kʋn ɔ? Ɔ sanlɩn kɛ, Ɛhɛlɛ Ɛjɔlɛ’n nwan: Bɛ́ menian nnyuan’n, bɛ ’ba kaci sʋanlan munmuan kʋn.¹⁷Nan sʋanlan m’ɔ kɔ fa yɩ́ nwʋn kɔ bɔ yɛ́ Mɩn’n, ɔ nʋn yɩ́ bɛ kaci sʋanlan munmuan kʋn wɔ wawɛ nun.

¹⁸Ɛhɩka ati, ɛmɔ nwánndi satɩlɩfʋɛ ɛyɔlɛ’n. Ɛtɛ biala mɔ sʋanlan kɔ yɔ’n, ɔ ngan man yɩ́ nwʋnnaan’n. Nan sʋanlan m’ɔ tɩ satɩlɩfʋɛ’n, ɔ yɔ ɛtɛ ɔ kan yɩ́ muonun yɩ́ nwʋnnaan’n. ¹⁹Asʋ ɛmɔ nzɩ man kɛ ɛmɔ sʋanlan baka’n tɩ Wawɛ Nwannzan-nwannzan’n mɔ Nyanmɩan a fa a man ɛmɔ’n sua ɔ? Wawɛ sɔ’n wɔ ɛmɔ anun. Ɛmɔ muonun nzie man bɛ́ nwʋn kʋ́n. ²⁰Nyanmɩan a tua ɛmɔ ati kalɛ ɔ’a to ɛmɔ. Ɛhɩka ati, ɛmɔ fá bɛ́ sʋanlan baka’n bɛ wúla Nyanmɩan anunminnyanmʋn.

Ajaa nɩn anwʋn ɛjɔlɛ’n

¹Afɩ sian dɩɛ, kosuan’n mɔ ɛmɔ hɛlɛlɩ mɩ́n kalata bɛ bisalɩ mɩ́n’n, ɛ ’nwun yɩ́ mmua’n. Ɔ tɩ kpa man belenzua kʋn kɛ n’ɔ ja bala. ²Nan kʋsʋ satɩlɩfʋɛ ɛyɔlɛ’n mɔ ɔ’a tolo’n dunman nun, ɔ tɩ kpa kɛ belenzua kʋn biala já yɩ́ yɩ yɛ̂ balasua kʋn biala kʋsʋ já yɩ́ hun. ³Ɔ di kɛ belenzua’n di yɩ́ yɩ anwʋn ɛjɔlɛ, balasua’n kʋsʋ di kɛ ɔ di yɩ́ hun anwʋn ɛjɔlɛ. ⁴Balasua’n le man tunmin yɩ́ muonun yɩ́ sʋanlan baka nɩn asʋ. Yɩ́ sʋanlan baka’n tɩ yɩ́ hun dɩɛ. Belenzua’n kʋsʋ le man tunmin yɩ́ muonun yɩ́ sʋanlan baka nɩn asʋ. Yɩ́ sʋanlan baka’n tɩ yɩ́ yɩ dɩɛ. ⁵Nán bɛ tua bɛ́ nwʋn nna. Ɛmɔ kʋala kɛ bɛ́ nʋan sɛ bɛ́ nwʋn bɛ fa tɛmʋn bɛ yɔ asɔnɩn. Sɛ tɛmʋn sɔ’n sɩn an, anɩn atɩn wɔ nun kɛ yɩ́ daba’n. Sɛ ɔ’a nyɔ man sɔ a, ɛmɔ ngɔ hʋala man nun sɔ kʋ́n. *Satan kʋala kɛ ɔ laka ɛmɔ maan ɛmɔ tɔ yɩ́ ngaa nɩn anun. ⁶Mɔ mɩɩn kan mɩn kele ɛmɔ’n, ɔ tɩ afʋtu nan nán mala ɔ. ⁷Mɩn kulo kɛ ahan menian’n-mɔ kʋalaa kaci kɛ mɩ́n. Nan kʋsʋ ɔ le sʋanlan kʋn acɛdɩɛ dɩɛ mɔ Nyanmɩan a fa a man yɩ́ ɔ, ɛhɩ dɩɛ le yɩ́ ngʋnmɩn, ɛhɩ dɩɛ le yɩ́ ngʋnmɩn.

⁸Ɛjɔlɛ mɔ mɩɩn kan mɩn kele mmiannzin, mmalasin nʋn kunlannvʋɛ’n-mɔ’n y’ɔ le kɛ ɔ tɩ kpa man ɛmɔ kɛ ɛmɔ tánlan kɛ n dɩ yɩ́’n. ⁹Nan sɛ ɛmɔ nɩan nán bɛ ngʋala man nun sɔ a, anɩn ɛmɔ já bala anaan bian. Ɔ sanlɩn kɛ sɛ ɛmɔ ja bala anaan bian an, ɔ tɩ kpa tala kɛ ɛmɔ kɔ li bɛ́ ɛbʋɛ’n.

¹⁰Afɩ bɛ́ mɔ bɛ tɩ abufʋɛ’n kʋsʋ, nán mɩ́n yɛ̂ mɩɩn kan ɔ, nan yɛ́ Mɩn muonun yɛ̂ ɔ lɛ kan ɔ. ¹¹Balasua m’ɔ ja bian’n, n’ɔ yila yɩ́ hun. Sɛ ɔ yila a, n’ɔ ja bian kʋ́n. Sɛ ɔ kulo a, ɔ nʋn yɩ́ hun bɛ sésie bɛ́ afian bɛ já. Belenzua’n kʋsʋ n’ɔ yila yɩ́ yɩ.

¹²Bɛ́ bʋ nga’n-mɔ (Mɩ́n muonun yɛ̂ mɩɩn kan ɔ, nán yɛ́ Mɩn yɛ̂ ɔ lɛ kan ɔ.) Sɛ Asɔnɩn nɩn anun belenzua kʋn ja yɩ́ yɩ mɔ yɩ́ yɩ’n ngɔ man asɔnɩn’n, sɛ yɩɛ sɔ’n kulo kɛ ɔ nʋn yɩ́ tanlan nun an, belenzua’n n’ɔ yila yɩ́. ¹³Yɩ́ sɔ kʋnmgba nɩn ala, sɛ Asɔnɩn nɩn anun balasua kʋn ja bian mɔ yɩ́ hun’n ngɔ man asɔnɩn’n, sɛ huan sɔ’n kulo kɛ ɔ nʋn yɩ́ yɩ bɛ tanlan nun an, ɔ tíe, n’ɔ yila yɩ́. ¹⁴Afɩ balasua’n m’ɔ kɔ asɔnɩn’n dunman nun, yɩ́ hun mantan Nyanmɩan kʋkʋ. Belenzua’n kʋsʋ m’ɔ kɔ asɔnɩn’n dunman nun, yɩ́ yɩ mantan Nyanmɩan kʋkʋ. Sɛ ɔ tɩ man sɔ a, ɛmɔ amma’n-mɔ tɩ kɛ menian mɔ bɛ nzɩ man Nyanmɩan kʋsʋ anɩn bɛ́ nwʋn a tɩ.

¹⁵Sɛ kʋsʋ nunhan’n m’ɔ ngɔ man asɔnɩn’n, sɛ belenzua nɩn o, sɛ balasua nɩn o, mɔ yɩ́ nwan ɔ ’yila’n, bɛ yáci yɩ́ maan ɔ yíla. Ɛbɛlɛ nɩn anun, anɩn belenzua’n anaan balasua’n m’ɔ kɔ asɔnɩn nɩn a nyan alaje. Ɔ sanlɩn kɛ Nyanmɩan a fɛlɛ yɛ́ kɛ yɛ tánlan anzʋnunjɔ nun. ¹⁶Wɔ́ balasua’n mɔ a fa wɔ́ nwʋn a man Kilisi’n, asʋ ɛ kʋala ɛ nwun yɩ́ fɔ́ʋ́n kɛ ɛ ’man wɔ́ hun fa yɩ́ nwʋn man Nyanmɩan? Anaan wɔ́ belenzua’n mɔ a fa wɔ́ nwʋn a man Kilisi’n, asʋ ɛ kʋala ɛ nwun yɩ́ fɔ́ʋ́n kɛ ɛ ’man wɔ́ yɩ fa yɩ́ nwʋn man Nyanmɩan?

¹⁷Ɛhɩ, sɛ yɛ yɩ ajaa nɩn anwʋn ɛjɔlɛ dɩɛ’n nun an, ɔ di kɛ sʋanlan kʋn biala nanndɩ atɩn’n mɔ Nyanmɩan a hele yɩ́ nɩn asʋ. Kɛ anɩn ɔ kpɩn tɩ yɩ́ mɔ Nyanmɩan a fɛlɛ yɩ́’n, ɔ fá yɩ́ sɔ. Anɩn ɛjɔlɛ mɔ mɩɩn kan mɩn kele ɛmɔ nɩn anɩn. Ɛjɔlɛ sɔ’n mɔ m’an han’n, ɔ tɩ mala man Asɔnɩn’n-mɔ kʋalaatin. ¹⁸Wɔ́ mɔ Nyanmɩan ’fɛlɛ wɔ́ a, anɩn b’a kpɛ wɔ́ mmian nun’n, man wɔ́ like tánlan ɛbɛlɛ. Wɔ́ kʋsʋ mɔ Nyanmɩan ’fɛlɛ wɔ́ a, anɩn bɛ kpɛlɩ man wɔ́ mmian nun’n, man wɔ́ like tánlan ɛbɛlɛ. ¹⁹Sɛ b’a kpɛ wɔ́ mmian nun o, sɛ bɛ kpɛlɩ man wɔ́ mmian nun o, nán ɛhɩ yɛ̂ ɔ cian ɔ. Like m’ɔ cian’n y’ɔ le Nyanmɩan mala nɩn asʋ elie’n. ²⁰Kɛ anɩn sʋanlan kʋn kpɩn tɩ yɩ́ mɔ Nyanmɩan a fɛlɛ yɩ́’n, ɔ fá yɩ́ sɔ. ²¹Ɛ tɩ kanga yɛ̂ Nyanmɩan a fɛlɛ wɔ́ ɔ? N’ɛ di yɩ́ nwʋn yalɛ. Sɛ ɛ kʋala kɛ ɛ sɩn ɛbɛlɛ ɛ nyan fanwʋndi a, anɩn sɩn ɛbɛlɛ. ²²Ɔ sanlɩn kɛ kanga mɔ yɛ́ Mɩn kɔ fɛlɛ yɩ́’n, anɩn yɛ́ Mɩn a man ɔ’a nyan fanwʋndi. Sʋanlan kʋsʋ m’ɔ di yɩ́ ti anwʋn mɔ yɛ́ Mɩn kɔ fɛlɛ yɩ́’n, anɩn ɔ’a kaci yɛ́ Mɩn kanga. ²³Nyanmɩan a tua ɛmɔ ati kalɛ ɔ’a to ɛmɔ. Ɛhɩka ati, nán bɛ kaci menian’n-mɔ nganga. ²⁴Anianman-mɔ, ɔ tɩ ananhɔlɛ, kɛ sʋanlan kʋn biala kpɩn tɩ yɩ́ mɔ Nyanmɩan a fɛlɛ yɩ́’n, ɔ fá yɩ́ sɔ ɔ nʋn Nyanmɩan bɛ tánlɩn.

Mmiannzin nʋn mmalasin nʋn kunlannvʋɛ’n-mɔ anwʋn ɛjɔlɛ dɩɛ’n

²⁵M’ɔ tʋ de mmiannzin nʋn mmalasin’n-mɔ anwʋn ɛjɔlɛ dɩɛ’n, yɛ́ Mɩn a ngan man nun ɛjɔlɛ ɔ’a ngele man mɩ́n. M’ɔ wɔ mɩ́n muonun mɩ́n ajʋnlɩn nun’n yɛ̂ mɩɩn kan nɩn ɔ. Ɔ sɛ kɛ ɛmɔ de ɛjɔlɛ sɔ’n bɛ di. Ɔ sanlɩn kɛ, yɛ́ Mɩn a nwun mɩ́n nwʋn anwunnvoe ɔ’a man m’an kaci ananhɔlɛfʋɛ. ²⁶Emian ngacile dɔʋn mɔ yɛ wɔ nun’n dunman nun, mɩn de mɩn di kɛ ɔ tɩ kpa kɛ sʋanlan kʋn biala há kɛ ɔ tɩ yɩ́’n. ²⁷M’ɔ ja bala’n, n’ɔ yila yɩ́. M’ɔ nja man bala’n, n’ɔ kpʋnndɛ bala. ²⁸Nan sɛ wɔ́ belenzua’n wɔ́ nwan ɛ ’ja bala a, anɩn a nyɔ man ɛtɛ. Sɛ talua’n kʋsʋ nwan ɔ ’ja bian an, anɩn ɔ’a nyɔ man ɛtɛ. Nan kʋsʋ bɛ́ mɔ bɛ lɛ ja bɛ́ nwʋn’n, bɛ ’ba nwun bɛ́ nyɩnsʋ cɩan daa. Mɩn ngulo man kɛ ɛmɔ nwun bɛ́ nyɩnsʋ.

²⁹Anianman-mɔ, ɛjɔlɛ’n mɔ mɩɩn kan mɩn kele ɛmɔ’n y’ɔ le kɛ mɛlɛ’n tɩ tika. Yɩ́ ti kɩkaala dɩɛ, bɛ́ mɔ bɛ ja bala’n, bɛ tánlan kɛ bɛ nja man bala. ³⁰Bɛ́ mɔ bɛ́ lʋa a bɔ’n, bɛ yɔ́ kɛ bɛ́ lʋa bɔlɩ man. Bɛ́ mɔ bɛ lɛ di fɛ’n, bɛ yɔ́ kɛ bɛ lɛ nni man fɛ. Bɛ́ mɔ bɛ to ninnge’n, bɛ yɔ́ kɛ bɛ le man like fɩ́ɩ́. ³¹Bɛ́ mɔ bɛ le mân ɛhɩ anun ninnge’n, bɛ yɔ́ kɛ bɛ le man like fɩ́ɩ́. Ɔ sanlɩn kɛ mân ɛhɩ mɔ yɛ wɔ nun’n, ɔ ’sɩn.

³²Mɩn ngulo man kɛ nzusue tɔ ɛmɔ anwʋn fɩ́ɩ́ sʋa. Sʋanlan m’ɔ nja man bala’n, yɛ́ Mɩn ninnge’n-mɔ anwʋn akpʋnndan ala yɛ̂ ɔ bu ɔ. Like m’ɔ yɔ a, ɔ kɔ sɔ yɛ́ Mɩn anyɩn’n, yɛ̂ ɔ yɔ ɔ. ³³Nan belenzua m’ɔ ja bala’n, mân nɩn anun ninnge’n-mɔ anwʋn yɛ̂ ɔ jʋnlɩn ɔ. Like m’ɔ yɔ a yɩ́ yɩ di fɛ’n yɛ̂ ɔ yɔ ɔ. ³⁴Ɛjɔlɛ’n yɔ sua a, anɩn belenzua nɩn anyɩn wɔ ninnge nnyuan anwʋn. Balasua anaan talua kʋsʋ m’ɔ nja man bian’n, yɛ́ Mɩn ninnge’n-mɔ anwʋn akpʋnndan ala yɛ̂ ɔ bu ɔ. Sɛ like yɛ̂ ɔ lɛ yɔ o, sɛ ɛjɔlɛ yɛ̂ ɔ lɛ susu o, ɔ fa yɩ́ sʋanlan baka’n kʋalaa wula yɛ́ Mɩn asa nun. Nan balasua m’ɔ ja bian’n, yɩ́ dɩɛ mân nɩn anun ninnge’n-mɔ anwʋn y’ɔ jʋnlɩn ɔ. Like m’ɔ yɔ a yɩ́ hun di fɛ’n yɛ̂ ɔ yɔ ɔ. ³⁵Ɛhɩ mɔ mɩɩn kan’n, mɩɩn kan mɩn man ɛmɔ. Nan nán kɛ mɩɩn kan sɔ mɩn tʋnndʋn ɛmɔ aja nun ɔ. Mɩn kulo kɛ ɛmɔ bu bɛ mân’n kɛ ɔ fata kɛ bɛ bu yɩ́’n, nán ɛmɔ a fa bɛ́ nwʋn b’a bɔ yɛ́ Mɩn kpa bɔkɔɔ b’a li yɩ́ junman’n.

³⁶Sɛ kʋsʋ sʋanlan kʋn nɩan nán ɔ tɩ anyunnunguasɩɛ man yɩ́ wa balasua’n kɛ ɔ lɛ bʋ aja sʋ, sɛ ɔ tɩ cɩnnjɩn kɛ ɔ já bian an, anɩn ɔ fá yɩ́ aja. Sɛ ɔ yɔ yɩ́ sɔ a, anɩn ɔ’a nyɔ man ɛtɛ. ³⁷Nan sɛ belenzua kʋsʋ kʋn si yɩ́ hue kɛ ɔ nja man bala, mɔ nán kɛ b’a mian yɩ́ kɛ ɔ já bala’n, sɛ ɔ nɩan yɩ́ kunnun nán ɔ’a nja man bala ɔ kɔ hʋala tanlan an, ɔ tɩ like kpa. ³⁸Ɔ man sɛ sʋanlan kʋn ja bala a, ɔ tɩ like kpa. Nan nunhan kʋsʋ mɔ ɔ’a nja man bala’n, ɔ tɩ like kpa.

³⁹Balasua m’ɔ kɔ ja bian’n, ɔ nʋn yɩ́ hun bɛ wɔ nun dede yɩ́ hun wu. Sɛ ɔ wu a, ɔ le atɩn ɔ kʋala kɛ ɔ ja belenzua m’ɔ kulo ɔ. Nan kʋsʋ, ɔ le man atɩn kɛ ɔ ja belenzua m’ɔ falɩ man yɩ́ nwʋn manlɩn man Kilisi ɔ. ⁴⁰Nan sɛ ɔ’a nja man bian kʋ́n an, ɔ ’di yɩ́ nwʋn fɛ tala kɛ ɔ kɔ ja bian’n. Ɛjɔlɛ’n mɔ m’an han’n, mɩn de mɩn di kɛ mɩ́n kʋsʋ n ne Nyanmɩan Wawɛ’n yɛ̂ m’an han ɔ.

Amʋan sʋ naan nɩn anwʋn ɛjɔlɛ’n

¹M’ɔ tɩ amʋan sʋ naan nɩn anwʋn ɛjɔlɛ dɩɛ’n, yɛ́ kʋalaa yɛ sɩ nun ɛjɔlɛ kɛ ɛmɔ lɛ kpɩn kele’n. Nan like ɛsɩɛ sɔ’n, ɔ man bɛ tu bɛ́ nwʋn. Like kʋsʋ m’ɔ man bɛ kpasi’n y’ɔ le ehulo’n. ²Sʋanlan m’ɔ bu yɩ́ nwʋn kɛ ɔ sɩ like’n, anɩn ɔ nzɩ ɔ ngua man yɩ́ bʋ kpa kɛ ɔ fata kɛ ɔ sɩ́ yɩ́’n. ³(M’ɔ cian’n y’ɔ le Nyanmɩan ehulo’n.) Sʋanlan m’ɔ kulo Nyanmɩan’n yɛ̂ Nyanmɩan kʋsʋ sɩ yɩ́ ɔ.

⁴M’ɔ tɩ amʋan sʋ naan elie nɩn anwʋn ɛjɔlɛ dɩɛ’n, yɛ sɩ kɛ amʋan’n tɩ man yɩ́ ti anwʋn like fɩ́ɩ́ mân nɩn anun. Mɔ yɛ sɩ’n y’ɔ le kɛ Nyanmɩan tɩ baa kʋnmgba cein. ⁵Sɛ bɔbɔ menian mmie-mɔ de di kɛ anwunno ɛlɔ nʋn asɩ ɛwa, ninnge dɔʋn wɔ ɛbɛlɛ mɔ bɛ sʋ bɛ́, ɛsɛ b’a fa bɛ́ b’a kaci bɛ́ mɩn an, ⁶yɛ́ dɩɛ mɔ yɛ sɩ’n y’ɔ le kɛ Nyanmɩan tɩ baa kʋnmgba cein. Ɔ tɩ Sɩɛ mɔ ɔ’a bɔ ninnge’n-mɔ kʋalaatin ɔ. Yɩ́ dunman nun yɛ̂ yɛ wɔ mân nɩn anun ɔ. Mɩnlɩan kʋsʋ baa kʋnmgba cein’n y’ɔ le Zozi Kilisi. Yɩ́ dunman nun yɛ̂ ninnge’n-mɔ kʋalaa wɔ mân nɩn anun ɔ, ɛsɛ yɩ́ dunman nun yɛ̂ yɛ le ngʋan ɔ.

⁷Nan kʋsʋ menian dɔʋn nzɩ man ananhɔlɛ sɔ’n. Amʋan ɛjɔlɛ nɩn a fɔtɔ mmie-mɔ dede sɛ kɩkaala bɛ di naan sɔ nɩn an, ɔ yɔ bɛ kɛ bɛ lɛ di amʋan sʋ naan. Kɛmɔ bɛ́ ti tinlin man’n, sɛ bɛ lɛ di alɩɛ sɔ nɩn an, anɩn ɔ yɔ bɛ kɛ b’a tɔ ɛtɛ nun. ⁸Nán alɩɛ y’ɔ man yɛ́ ɛnanndɩɛ’n sɔ Nyanmɩan anyɩn ɔ. Sɛ yɛ di o, sɛ y’a nni man o, yɛ nnyan man nun like fɩ́ɩ́.

⁹Nan kʋsʋ, ɛmɔ nɩ́an bɛ́ nwʋn kpa. Fanwʋndi’n mɔ Nyanmɩan a man ɛmɔ’n, bɛ nánndɩ yɩ́ nwʋn kpa nán bɛ́ mɔ bɛ dedi’n tinlin man nɩn a ndɔ man ɛtɛ nun. ¹⁰Afɩ, wɔ́ mɔ ɛ sɩ ɛjɔlɛ’n, sɛ sʋanlan mɔ yɩ́ dedi’n tinlin man’n nwun wɔ́ amʋan sua ɛlɔ kɛ ɛ lɛ didi a, yɩ́ kʋsʋ yɩ́ ajʋnlɩn’n ’man yɩ́ anwʋnsɛlɛ kɛ ɔ hɔ́ lí amʋan sʋ like. ¹¹Anɩn like’n mɔ wɔ́ nwan ɛ sɩ’n dunman nun, wɔ́ nianman’n mɔ yɩ́ ti yɛ̂ Kilisi a wu mɔ yɩ́ dedi’n tinlin man’n, ɛ lɛ man ɔ minlin. ¹²Sɛ ɛmɔ yɔ sɔ maan ɛmɔ anianman’n-mɔ tɔ ɛtɛ nɩn anun an, anɩn Kilisi muonun yɛ̂ ɛmɔ lɛ yɔ yɩ́ ɛtɛ ɔ. Ɔ sanlɩn kɛ, ɛmɔ man bɛ yɔ like mɔ bɛ́ ajʋnlɩn’n man bɛ́ kɛ ɔ tɩ man kpa. ¹³Ɛhɩka ati, alɩɛ mɔ mɩn di a mɩ́n nianman’n kɔ tɔ ɛtɛ nun’n, alɩɛ sɔ’n, mɩn ’tua, m mman man mɩ́n nianman’n ndɔ man ɛtɛ nun.

Ɔ fata kɛ Pɔlʋ nyan yɩ́ junman nɩn anun like

¹N ne fanwʋndi. N dɩ Zozi Kilisi bɔfʋɛ. M’an nwun yɛ́ Mɩn Zozi muonun mɩ́n nyɩnsʋ. Junman’n mɔ n nili manlɩn yɛ́ Mɩn’n, yɩ́ mma m’ɔ suli’n y’ɔ le ɛmɔ. ²Sɛ bɔbɔ mmie-mɔ mmu man mɩ́n kɛ n dɩ Kilisi bɔfʋɛ a, ɛmɔ dɩɛ, ɛmɔ bu mɩ́n kɛ n dɩ Kilisi bɔfʋɛ. Ɔ sanlɩn kɛ junman’n mɔ n nili m’ɔ man ɛmɔ nʋn yɛ́ Mɩn Zozi b’a yɔ kʋn’n, ɛmɔ tɩ nzɔlɛ m’ɔ kele kɛ n dɩ Kilisi bɔfʋɛ.

³Sɛ menian kan kɛ n dɩ man Kilisi bɔfʋɛ a, ɛjɔlɛ mɔ mɩn bua bɛ́’n y’ɔ le kɛ ⁴mɩ́n junman’n mɔ mɩn di’n, asʋ ɔ nvata man kɛ mɩn nyan nun alɩɛ mɩn di mɩn nʋn nzue ɔ? ⁵Asʋ n nne man atɩn kɛ mɩn ja asɔnɩn nɩn anun balasua kɛ mmɔfʋɛ’n-mɔ, kɛ *Sefasɩ nʋn yɛ́ Mɩn anianman’n-mɔ yɔ yɩ́ nɩn ɔ? ⁶Asʋ ɔ tɩ kpa kɛ mɩn nʋn Baanabasɩ yɛ́ munnyuan ala yɛ̂ yɛ lí junman yɛ gúa yɛ́ nʋan alɩɛ ɔ?

⁷Nzalafʋ benin yɛ̂ yɩ́ muonun ɔ gua yɩ́ nʋan alɩɛ ɔ? Nwan sʋanlan dɩɛ yɛ̂ ɔ yɔ ebo m’ɔ nni man yɩ́ ebo nɩn asʋ alɩɛ ɔ? Sʋanlan benin yɛ̂ ɔ sie ayɛmʋa m’ɔ le man atɩn ɔ nyuihyuin man bɛ́ nyafʋsue’n bie a nnʋn man ɔ? ⁸Nvandʋhʋn ɛhɩ-mɔ mɔ m’an fa m’an tʋ yɩ́ nwʋn’n, asʋ nán kɛ kulo menian’n-mɔ yɔ yɩ́ nɩn an? Nán ɛjɔlɛ kʋnmgba sɔ’n kʋsʋ yɛ̂ Moyizɩ mala’n kan ɔ? ⁹Afɩ b’a hɛlɛ wɔ *Moyizɩ mala nɩn anun kɛ: Sɛ ɛnalɛ’n lɛ tetia *bele nɩn asʋ ɔ kpʋnmgba a, n’ɛ cɩcɩ yɩ́ nʋan’n. Asʋ nnalɛ’n-mɔ anwʋn cian Nyanmɩan ɔ? ¹⁰Nán yɛ́ lɩlɩ yɛ́ dunman nun ati yɛ̂ ɔ man ɔ’a han sɔ ɔ? Yuo, yɛ́ dunman nun ati yɛ̂ ɔ man b’a hɛlɛ ɛjɔlɛ sɔ nɩn ɔ. Ɔ di kɛ sʋanlan’n m’ɔ lɛ futu asɩɛ’n maan bɛ dua’n, ɔ nʋn sʋanlan’n m’ɔ lɛ kpʋnmgbɔ bele’n, bɛ nyan anyɩndasʋɛ kɛ junman’n mɔ bɛ lɛ di’n, bɛ ’nyan nun like. ¹¹Sɛ y’a han Nyanmɩan Anʋan Ɛjɔlɛ’n nán ɔ su mma a, ɛmɔ jʋnlɩn kɛ mɔ yɛ lɛ kpʋnndɛ yɩ́ ɛmɔ ɛlɔ’n sʋnlɩn sʋnman ɔ? ¹²Sɛ mmie-mɔ le atɩn bɛ didi ɛmɔ anwʋn an, asʋ yɛ le man atɩn yɛ ndala man bɛ́ ɔ? Nan kʋsʋ y’a nnɩan man yɩ́ sɔ. Y’a mian yɛ́ nyɩn y’a yɔ maan like fɩ́ɩ́ a mma a ndʋnndʋn man Kilisi Ɛjɔlɛkpa nɩn aja nun.

¹³Ɛmɔ sɩ yɩ́ fɔ́ʋ́n kɛ bɛ́ mɔ bɛ di Nyanmɩan awulo nɩn anun junman’n, Nyanmɩan awulo nɩn anun ninnge’n yɛ̂ bɛ fa bɛ nɩan bɛ́ nwʋn ɔ. Bɛ́ mɔ yɛ̂ bɛ yɩ tɛɛ’n kʋsʋ, tɛɛ ɛyɩɛ mʋcɩa nɩn asʋ ninnge’n yɛ̂ bɛ fa bɛ nɩan bɛ́ nwʋn ɔ. ¹⁴Kɛ ɔ tɩ yɩ́ nɩn ala anɩn. Ɔ sanlɩn kɛ yɛ́ Mɩn a man atɩn kɛ menian mɔ bɛ bɔ Ɛjɔlɛkpa’n, Ɛjɔlɛkpa sɔ nɩn anwʋn yɛ̂ ɔ di kɛ bɛ didi ɔ.

¹⁵Nan mɩ́n dɩɛ, ninnge sɔ’n m’ɔ fata kɛ mɩn nyan yɩ́’n, m’an nne man bie fɩ́ɩ́. Nán kɛ mɩɩn kɛlɛ ɛmɔ kalata ɛhɩ mɩn bisa maan ɛmɔ yɩ man mɩ́n ɔ. Sɛ mɩn ’wu bɔbɔ a, ɔ tɩ kpa. Ɔ man sʋanlɩn fɩ́ɩ́ ngʋala ndu man mɩ́n ti kele sɔ’n. ¹⁶Ɛjɔlɛkpa’n mɔ mɩn bɔ’n, ɔ tɩ man like mɔ mɩn fa mɩn tu mɩ́n nʋan nun ɔ. Nan ɔ tɩ like mɔ b’a fa b’a tinndin mɩ́n ɔ. Sɛ m’an mmɔ Ɛjɔlɛkpa’n m’an ngele man menian’n-mɔ a, munnzue yɛ ɔ ’kan mɩ́n ɔ. ¹⁷Sɛ ɔ tɩ kɛ mɩ́n muonun mɩ́n ti anwʋn junman mɔ m’an hulo yɛ̂ mɩɩn di a, ahan mɩn man bɛ tua mɩ́n yɩ́ nwʋn kalɛ. Nan ɔ tɩ junman mɔ b’a fa b’a wula mɩ́n sa nun, sɛ mɩn ngulo man bɔbɔ a, ɔ sɛ kɛ n ní. ¹⁸Anɩn mɩ́n ahatua’n y’ɔ le benin? Mɩ́n ahatua’n dɩɛ’n y’ɔ le fɛ elie’n mɔ mɩn nyan yɩ́ mɛlɛ mɔ mɩɩn bɔ Ɛjɔlɛkpa’n mɩn kele menian’n-mɔ’n. Ɛjɔlɛkpa’n mɔ mɩn bɔ’n, mɩn mgbʋnndɛ man kɛ bɛ tua mɩ́n yɩ́ nwʋn kalɛ.

¹⁹N ne fanwʋndi, n ndɩ sʋanlan fɩ́ɩ́ kanga. Nan kʋsʋ kɛ ɔ kɔ yɔ nán m’an nyan menian dɔʋn m’an man yɛ́ Mɩn’n, ɔ man m’an kaci menian’n-mɔ kʋalaa kanga. ²⁰Mɩn nni man Moyizɩ mala nɩn asʋ, nan kʋsʋ kɛ ɔ kɔ yɔ nán mɩ́n sa a han Zufʋ’n-mɔ mɔ bɛ di mala sɔ nɩn asʋ m’an man yɛ́ Mɩn’n, ɔ man sɛ mɩn nʋn bɛ́ yɛ̂ tɩ a, mɩn yɔ mɩ́n nwʋn kɛ bɛ́. ²¹Bɛ́ mɔ bɛ́ kʋsʋ bɛ nni man Moyizɩ mala nɩn asʋ’n, sɛ n wɔ bɛ́ afian an, mɩn yɔ mɩ́n nwʋn kɛ bɛ́ nán mɩ́n sa a han bɛ́, m’an man yɛ́ Mɩn. Nán kɛ bie a mɩ́n nyɩn nzɔ man Nyanmɩan mala nɩn ɔ. Cɛcɛ, nan Kilisi mala nɩn asʋ yɛ́ mɩn di ɔ. ²²Bɛ́ mɔ bɛ́ dedi’n tinlin man’n, sɛ mɩn nʋn bɛ́ tɩ a, mɩn yɔ mɩ́n nwʋn kɛ mɩ́n kʋsʋ mɩ́n dedi’n tinlin man nán mɩ́n sa a han bɛ́, m’an man yɛ́ Mɩn. Mɩn fa mɩ́n nwʋn mɩn tɩ mɩn yɔ like biala nán mɩ́n sa a han mmie-mɔ m’an man yɛ́ Mɩn. ²³Ɛjɔlɛkpa nɩn ati yɛ̂ mɩn yɔ ɛhɩ-mɔ kʋalaa nán mɩ́n kʋsʋ m’an nyan nun nyila.

²⁴Ɛmɔ sɩ yɩ́ fɔ́ʋ́n kɛ bɛ́ mɔ bɛ su ɛnwanndie’n, bɛ́ kʋalaa bɛ nwanndi, nan kʋsʋ bɛ́ nunhan kʋn yɛ̂ ɔ nyan ɔ. Ɛhɩka ati, ɛmɔ nwánndi kpa, nán b’a nyan nun like. ²⁵Bɛ́ kʋalaa mɔ bɛ su ɛnwanndie’n, mɛlɛ mɔ bɛ ’kpunndin kpunndin bɛ́ akpɔlɛ’n-mɔ anun’n, bɛ totua bɛ́ nwʋn ninnge kpa. Bɛ yɔ yɩ́ sɔ nán b’a nyan ɛnwanndie nɩn anun kele’n. Kele sɔ’n, ɔ sɛcɩ. Nan yɛ́ dɩɛ mɔ yɛ lɛ yɔ’n, yɛ lɛ yɔ yɛ nyan kele m’ɔ le man ɛsɛcɩɛ’n. ²⁶Ɛhɩka ati, ɛnwanndie’n mɔ mɩɩn nwanndi’n, mɩ́n nyɩn wɔ lɩka kʋn. N dɩ kɛ sʋanlan m’ɔ lɛ kʋn ngondin ɔ. Mɩn ndʋ man mɩ́n kɔtɔlɛ dɩɛ nɩn anwʋnman nun. ²⁷Kɛ ɔ kɔ yɔ nán mɩ́n mɔ m’an bɔ Ɛjɔlɛkpa’n m’an hele menian’n-mɔ’n b’a nyɩ man mɩ́n b’a ndʋ man’n, mɩn bɩlɩ mɩ́n nwʋn kpa, ɛsɛ mɩn sie mɩ́n nwʋn ye.

Bɛ nɩ́an bɛ́ nwʋn kpa wɔ amʋan’n-mɔ anwʋn

¹Anianman-mɔ, ɛjɔlɛ m’ɔ tʋlɩ yɛ́ nan-mɔ mɛlɛ mɔ anɩn bɛ nʋn Moyizɩ nanndɩ ɛwâ nɩn anun ɛlɔ’n, mɩn kulo kɛ ɛmɔ ati kacɩ. Mɔ anɩn bɛ nanndɩ ɛwâ nɩn anun ɛlɔ’n, Nyanmɩan manlɩn like kʋn kɛ bɔlɛ́ walɩ helelɩ bɛ́ atɩn’n, ɛsɛ ɔ kpacɩlɩ jenvie nɩn anun maan bɛ nanndɩ bɛ́ ja nun bɛ kpɛlɩ yɩ́. ²Mɔ bɛ wɔ bɔlɛ́ nɩn anun ɔ nʋn mɔ bɛ ’kpɛ jenvie’n, bɛ sɔnɩnlɩn bɛ́ kʋalaatin ɔ man bɛ nʋn Moyizɩ yɔlɩ kʋn. ³Alɩɛ kʋnmgba’n m’ɔ fi Nyanmɩan asa nun’n yɛ̂ bɛ́ kʋalaa bɛ lili ɔ. ⁴Nzue kʋnmgba’n m’ɔ fi Nyanmɩan ɛlɔ’n yɛ̂ bɛ́ kʋalaa bɛ nʋnlɩn ɔ. Nzue sɔ’n fi Nyanmɩan ɛbʋta’n m’ɔ si bɛ́ sʋ nɩn anun. Ɛbʋta sɔ’n y’ɔ le Kilisi. ⁵Nan kʋsʋ Nyanmɩan akunnun a njɔ man bɛ́ kʋalaa bɛ́ nwʋn. Ɔ man bɛ wuli ɛwa nɩn anun. ⁶Ninnge sɔ’n-mɔ, ɔ tɩ kɛ nzɔlɛ yɛ̂ bɛ lɛ yɩ yɩ́ bɛ kele yɛ́, nán yɛ́ kʋsʋ y’a nnyan man ajʋnlɩn ɛtɛ kɛ bɛ́. ⁷Ɔ nvata man kɛ ɛmɔ sɔ amʋan kɛ bɛ́ nun mmie-mɔ sɔlɩ amʋan’n. B’a hɛlɛ wɔ Ɛhɛlɛ Ɛjɔlɛ nɩn anun kɛ: Menian’n-mɔ kɔ tanlan asɩ bɛ kɔ li like bɛ kɔ nʋn sʋ nzan. Ɛsɛ bɛ kɔ jasʋ bɛ kɔ si yɩ́ nwʋn abile.⁸Nán bɛ man yɛ yɔ satɩlɩfʋɛ kɛ bɛ́ nun mmie-mɔ yɔlɩ yɩ́ mɔ menian akpɩɩ abulaa nʋn nsan wuli cɩan kʋnmgba’n. ⁹Nán bɛ man yɛ sɔ yɛ́ Mɩn yɛ nɩan kɛ bɛ́ nun mmie-mɔ yɔlɩ yɩ́ mɔ owo-mɔ kɩkalɩ bɛ́ maan bɛ wuli’n. ¹⁰Nán bɛ jʋjɔ bɛ́ konvin abʋ, kɛ bɛ́ nun mmie-mɔ yɔlɩ yɩ́ mɔ nyanmɩansʋ bɔfʋɛ’n m’ɔ kun sʋanlan’n hunlin bɛ́’n.

¹¹Munnzue sɔ’n m’ɔ hanlɩn bɛ́’n, ɔ tɩ fʋɔ yɛ̂ bɛ lɛ fa bɛ tu ɛhɩnlɩn-mɔ ɔ. B’a hɛlɛ ninnge sɔ’n bɛ lɛ fa bɛ kannzʋ yɛ́, ɔ sanlɩn kɛ mɛlɛ’n mɔ yɛ wɔ nun ɛwa’n, mân nɩn ayuelɩɛ a ju. ¹²Ɛhɩka ati, sʋanlan m’ɔ de di kɛ ɔ jin yɩ́ ja nun’n, ɔ nɩ́an yɩ́ nwʋn kpa nán ɔ’a ndɔ man. ¹³Sɔnɩan fɩ́ɩ́ nnʋn man ɛbɛlɛ mman man ɛmɔ m’ɔ bʋ ɛmɔ sʋ ɔ. Ɔ sanlɩn kɛ Nyanmɩan tɩ ananhɔlɛfʋɛ. Ɔ ngʋala man kɛ ɔ yaci maan sɔnɩan’n bʋ ɛmɔ anwʋnsɛlɛ nɩn asʋ ɔ. Sɛ sɔnɩan’n tʋ ɛmɔ a, Nyanmɩan ’sesie maan ɛmɔ kʋala yɩ́ nyunnun jinlan bɛ di yɩ́ sʋ kunnunmun.

¹⁴Ɛhɩka ati, anianman ehulo mma, ɛmɔ nwánndi amʋan ɛsɔ’n. ¹⁵Ɛmɔ tɩ menian mɔ bɛ sɩ ngɛlɛ, ɛjɔlɛ ɛhɩ mɔ m’an han m’an hele ɛmɔ’n, ɛmɔ muonun tɩ́tɩ nɩ́an. ¹⁶Yɛ́ Mɩn nzan’n mɔ yɛ ’nʋn an yɛ da Nyanmɩan asɩ nán y’a nʋn’n, ɔ kele kɛ yɛ nʋn Kilisi yɛ́ moja nɩn a yɔ kʋn. Kpaʋn’n mɔ yɛ bubu nun yɛ di’n, ɔ kele kɛ yɛ nʋn Kilisi yɛ́ sʋanlan baka nɩn a yɔ kʋn. ¹⁷Kpaʋn’n tɩ baa kʋnmgba cein. Kannzɛ yɛ sʋnlɩn bɔbɔ a, yɛ́ kʋalaa yɛ tɩ anwʋnnaan kʋn. Ɔ sanlɩn kɛ kpaʋn kʋn sɔ’n tɩ yɛ́ kʋalaa yɛ́ dɩɛ.

¹⁸Ɛmɔ nɩ́an kɛ daba anɩn Izalayɛ amma’n-mɔ yɔ yɩ́’n. Bɛ́ mɔ bɛ kɔ li naan’n mɔ bɛ kɔ fa bɛ kɔ yɩ tɛɛ Nyanmɩan mʋcɩa nɩn asʋ bɛ kɔ man yɩ́’n, anɩn bɛ nʋn yɩ́ a yɔ kʋn. ¹⁹Sɛ mɩn kan sɔ a, asʋ mɩ́n nwan amʋan’n anaan amʋan sʋ naan’n tɩ like ɔ? ²⁰Cɛcɛ! Nan mɩ́n nwan bɛ́ mɔ bɛ nzɩ man Nyanmɩan’n, nán Nyanmɩan yɛ bɛ yɩ bɛ́ tɛɛ’n bɛ man yɩ́ ɔ, nan bɛ yɩ bɛ man wawɛ ɛtɛ’n-mɔ. Nan mɩ́n dɩɛ mɩn ngulo man kɛ ɛmɔ nʋn wawɛ ɛtɛ’n-mɔ yɔ kʋn. ²¹Ɛmɔ ngʋala man kɛ bɛ nʋn yɛ́ Mɩn kangɔ nɩn anun nán ɛsɛ ɛmɔ a nʋn wawɛ ɛtɛ’n-mɔ kʋsʋ kangɔ dɩɛ nɩn anun. Ɛmɔ ngʋala man kɛ bɛ tanlan yɛ́ Mɩn tɔbɩlɩ nɩn anwʋn bɛ didi nán ɛsɛ ɛmɔ a tanlan wawɛ ɛtɛ’n-mɔ kʋsʋ dɩɛ nɩn anwʋn b’a didi. ²²Anaan ɛmɔ kulo kɛ bɛ wula yɛ́ Mɩn akpue ɔ? Asʋ ɛmɔ jʋnlɩn kɛ yɛ le anwʋnsɛlɛ yɛ tala yɩ́ ɔ?

Bɛ kpʋ́nndɛ ɛhɩnlɩn-mɔ ati anwʋn nvasʋɛ

²³Ɛmɔ kan kɛ: “Yɛ kʋala yɛ yɔ like biala mɔ yɛ kulo ɔ.” Ɔ tɩ ananhɔlɛ, nan kʋsʋ yɩ́ kʋalaa tɩ man kpa mman man ɛmɔ. Ɔ tɩ ananhɔlɛ kɛ ɛmɔ kʋala kɛ bɛ yɔ like biala mɔ ɛmɔ kulo ɔ, nan kʋsʋ yɩ́ kʋalaa mmʋka man ɛmɔ maan ɛmɔ dedi’n ngɔ man yɩ́ nyunnun. ²⁴Sʋanlan fɩ́ɩ́ n’ɔ kpʋnndɛ yɩ́ ti anwʋn nvasʋɛ, nan ɔ kpʋ́nndɛ ɛhɩnlɩn-mɔ dɩɛ.

²⁵Like mɔ bɛ di, mɔ ɛmɔ kɔ to yɩ́ gua nun’n, nán bɛ sulo yɩ́ nzin bɛ bisa bisa yɩ́ nwʋn kosuan nán ɛmɔ lí. ²⁶Ɔ sanlɩn kɛ Ɛhɛlɛ Ɛjɔlɛ’n lɛ kan kɛ: Asɩɛ’n nʋn sʋ ninnge’n kʋalaatin tɩ yɛ́ Mɩn dɩɛ.

²⁷Sɛ sʋanlan m’ɔ nzɩ man Nyanmɩan’n fɛlɛ ɛmɔ alɩɛ nán ɛmɔ tie a, like biala mɔ bɛ kɔ fa bɛ kɔ man ɛmɔ’n, ɛmɔ lí, nán bɛ sulo yɩ́ nzin bɛ bisa bisa yɩ́ nwʋn kosuan. ²⁸Nan sɛ sʋanlan bie kan kele ɛmɔ kɛ: “Naan ɛhɩ tɩ amʋan sʋ naan,” yɩ́ dɩɛ anɩn nán bɛ di, ɔ fi ɛjɔlɛ’n mɔ sʋanlan sɔ nɩn a han a hele ɛmɔ’n. Ɔ sanlɩn kɛ ɔ’a kacɩ ɛmɔ. ²⁹Nán wɔ́ ajʋnlɩn dɩɛ nɩn anwʋn ɛjɔlɛ yɛ̂ mɩɩn kan yɩ́ ɛwa ɔ, nan ɛhɩnlɩn ajʋnlɩn dɩɛ nɩn anwʋn ɛjɔlɛ yɛ̂ mɩɩn kan ɔ. Nan afɩ ɔ yɔ sɛ mɔ like mɔ mɩn kʋala kɛ mɩn yɔ’n, sʋanlan mgban kʋala ɔ kan yɩ́ nwʋn ɛjɔlɛ ɔ? ³⁰Sɛ mɩn da Nyanmɩan asɩ nán m’an li like a, anɩn ɔ yɔ sɛ mɔ mɩn nyan yɩ́ nwʋn amannɩɛ ɔ?

³¹Ɛhɩka ati, sɛ ɛmɔ ’di alɩɛ o, sɛ ɛmɔ ’nʋn nzue o, yɩ́ kʋalaa mɔ ɛmɔ ’yɔ’n, ɛmɔ yɔ́ bɛ wúla Nyanmɩan anunminnyanmʋn. ³²Like mɔ ɛmɔ yɔ a, ɔ kʋala kɛ ɔ man Zufʋ o, m’ɔ tɩ man Zufʋ o, anaan Nyanmɩan asɔnɩn’n tɔ asɩ’n, like sɔ’n, nán bɛ yɔ. ³³Ɛmɔ yɔ́ kɛ mɩ́n. Like biala mɔ mɩn yɔ a bɛ́ kʋalaa bɛ di yɩ́ nwʋn fɛ’n yɛ̂ mɩn yɔ ɔ. Nán m’ɔ tɩ kpa man mɩ́n’n yɛ̂ mɩn yɔ ɔ, nan m’ɔ tɩ kpa man ɛhɩnlɩn-mɔ’n yɛ̂ mɩn yɔ nán b’a nyan ngʋan ɔ.

¹Ɛmɔ sósuan mɩ́n kɛ mɩn sosuan Kilisi’n.

²Mɩɩn yɩ ɛmɔ ayɛ. Ɔ sanlɩn kɛ like biala anun, ɛmɔ kacɩ mɩ́n cɩan daa, ɛsɛ ninnge kʋsʋ mɔ n gelelɩ ɛmɔ’n, ɛmɔ nánndɩ sʋ kpa.

Ɔ sɛ kɛ mmalasua’n-mɔ cɩcɩ bɛ́ ti sʋ

mɛlɛ mɔ bɛ ’yɔ asɔnɩn’n

³Nan kʋsʋ mɩn kulo kɛ ɛmɔ tɩ ɛjɔlɛ ɛhɩ abʋ kpa kɛ Kilisi y’ɔ sie belenzua biala ɔ. Belenzua’n kʋsʋ y’ɔ sie yɩ́ yɩ ɔ. Yɛ̂ Nyanmɩan y’ɔ sie Kilisi ɔ. ⁴Belenzua kʋn mɔ ɔ ’yɔ asɔnɩn, anaan Nyanmɩan kɔ fa ɛjɔlɛ kɔ wula yɩ́ nʋan kɛ ɔ hán héle menian m’ɔ kɔ cɩcɩ yɩ́ ti sʋ’n, anɩn belenzua sɔ nɩn anyɩn a nzɔ man Kilisi. ⁵Nan balasua kʋn kʋsʋ mɔ ɔ ’yɔ asɔnɩn, anaan Nyanmɩan kɔ fa ɛjɔlɛ kɔ wula yɩ́ nʋan kɛ ɔ hán héle menian mɔ ɔ’a njɩcɩ man yɩ́ ti nɩn asʋ’n, anɩn balasua sɔ nɩn anyɩn nzɔ man yɩ́ hun. Anɩn ɔ tɩ kɛ balasua mɔ b’a kpa yɩ́ ti ɔ. ⁶Balasua kʋsʋ m’ɔ ngulo man kɛ ɔ cɩcɩ yɩ́ ti sʋ’n, anɩn ɔ tɩ́tɩ. Nan kʋsʋ ɔ tɩ anyunnunguasɩɛ man balasua kʋn kɛ ɔ kpá anaan ɔ tɩ́tɩ yɩ́ ti’n. Yɩ́ sɔ ati, ɔ cɩ́cɩ sʋ. ⁷Ɔ nzɛ nvata man kɛ belenzua cɩcɩ yɩ́ ti sʋ ɔ. Ɔ sanlɩn kɛ Nyanmɩan nɩanlɩn yɩ́ nwʋn sʋ y’ɔ bɔlɩ yɩ́ ɔ, ɔ tɩ Nyanmɩan anunminnyanmʋn. Nan balasua’n dɩɛ, ɔ tɩ belenzua nɩn anunminnyanmʋn. ⁸Afɩ belenzua anvɩn bowe yɛ̂ Nyanmɩan falɩ bɔlɩ balasua ɔ, nan nán balasua’n dɩɛ’n yɛ̂ Nyanmɩan falɩ bɔlɩ belenzua ɔ. ⁹Nyanmɩan bɔlɩ balasua manlɩn belenzua nán ɔ’a mmɔ man belenzua ɔ’a mman man balasua. ¹⁰Ɛhɩka ati, nyanmɩansʋ mmɔfʋɛ’n-mɔ dunman nun, balasua’n cɩ́cɩ yɩ́ ti sʋ ɔ héle kɛ ɔ bɛbɛlɛ yɩ́ nwʋn asɩ man yɩ́ hun.

¹¹Nan kʋsʋ, yɛ́ mân’n mɔ yɛ nʋn yɛ́ Mɩn yɛ lɛ bu’n, belenzua’n nni man yɩ́ ti anwʋn yɛ̂ balasua’n kʋsʋ nni man yɩ́ ti anwʋn. ¹²Afɩ sɛ bɔbɔ belenzua nɩn anvɩn bowe yɛ̂ Nyanmɩan falɩ bɔlɩ balasua nɩn an, balasua’n kʋsʋ yɛ̂ ɔ wʋ belenzua nɩn ɔ. Ɛhɩ kʋalaa fi Nyanmɩan ɛlɔ. ¹³Ɛmɔ muonun bɛ nɩ́an balasua m’ɔ lɛ yɔ asɔnɩn mɔ ɔ’a njɩcɩ man yɩ́ ti sʋ’n, asʋ ɔ tɩ kpa? ¹⁴Mân’n muonun mɔ yɛ wɔ nun’n kele yɛ́ kɛ, ɔ tɩ anyunnunguasɩɛ man belenzua kʋn kɛ ɔ síe yɩ́ ti’n maan ɔ nyín ndɩnndɩɩn kɛ balasua. ¹⁵Nan sɛ balasua sie yɩ́ ti nɩn an, ɔ tɩ anunminnyanmʋn man yɩ́. Ɔ sanlɩn kɛ Nyanmɩan falɩ enyuan ndɩnndɩɩn sɔ’n manlɩn balasua kɛ ɔ fá hála yɩ́ ti. ¹⁶Ɛjɔlɛ’n mɔ m’an han’n, sʋanlan mɔ yɩ́ nwan ɔ ’su ɛjɔlɛ ɛhɩ anwʋn akpʋlʋwa’n, mɩɩn kan yɩ́ tika mɩn kele yɩ́ kɛ yɛ́ muonun o, Nyanmɩan asɔnɩn’n-mɔ anun o, kɛ yɛ yɔ yɩ́ nɩn anɩn.

Yɛ́ Mɩn alɩɛ nɩn anwʋn ɛjɔlɛ’n

¹⁷M’ɔ tɩ yɛ́ Mɩn alɩɛ nɩn elie nɩn anwʋn ɛjɔlɛ dɩɛ’n, mɩn nyɩ man ɛmɔ ayɛ. Ɔ sanlɩn kɛ mɛlɛ mɔ ɛmɔ kɔ yia’n, like mɔ ɛmɔ yɔ’n tɩ man kpa fɩ́ɩ́. ¹⁸M’an tɩ kɛ mɛlɛ mɔ ɛmɔ asɔnɩn mma’n-mɔ kɔ yia’n, ɛmɔ anʋan nzɛ man bɛ́ nwʋn, ɛmɔ bubu bɛ́ nwʋn nun. Mɩn nne man ɛjɔlɛ sɔ’n mɩn nni man kpa. ¹⁹Nan sɛ ɛmɔ bubu bɛ́ nwʋn nun an, anɩn bɛ nwun menian kʋsʋ mɔ bɛ sʋ Zozi Kilisi ananhɔlɛ nun sakpa’n. ²⁰Mɛlɛ mɔ ɛmɔ kɔ yia’n, nán yɛ́ Mɩn alɩɛ nɩn elie ati yɛ̂ ɛmɔ yia ɔ. ²¹Ɔ sanlɩn kɛ sɛ ɛmɔ yia tɔbɩlɩ nɩn anwʋn an, sʋanlan kʋn kpɩlɩ di yɩ́ muonun yɩ́ alɩɛ dɩɛ m’ɔ tʋnlɩn’n, nan bɛ nje man bɛ nni man. Ɔ man mmie-mɔ didi dede bɛ́ kʋ yi kpa. Mmie-mɔ nʋn nzan dede bɛ bʋ, kʋsʋ anɩn ɛhɔɛ lɛ kun mmie-mɔ. ²²Ɛmɔ le man awulo mɔ bɛ di like nun bɛ nʋn nzan ɔ? Anaan ɛmɔ mmu man Nyanmɩan Asɔnɩn’n like ɔ? Ɛmɔ kulo kɛ anyunnunguasɩɛ kan bɛ́ mɔ bɛ wɔ nun mɔ bɛ le man like fɩ́ɩ́ nɩn ɔ? Nzu ɛjɔlɛ dɩɛ yɛ̂ ɛmɔ kulo kɛ n gán n géle ɛmɔ ɔ? Asʋ ɔ fata kɛ mɩn yɩ ɛmɔ ayɛ ɔ? Cɛcɛ! Mɩn ngʋala man kɛ mɩn yɩ ɛmɔ ayɛ!

²³Ɛhɩ, like mɔ yɛ́ Mɩn helelɩ mɩ́n’n yɛ̂ mɩ́n kʋsʋ m’an hele ɛmɔ ɔ. Like sɔ’n y’ɔ le kɛ kɔngɔɛ’n, asannan nán b’a yɩ yɛ́ Mɩn Zozi b’a man’n, ɔ falɩ kpaʋn. ²⁴M’ɔ lalɩ Nyanmɩan asɩ yuelɩ’n, ɔ kɔ bubu nun. Yɩ́ nwan: “Ɛhɩ tɩ mɩ́n nwʋnnaan, mɩɩn fa mɩn man ɛmɔ. Ɛmɔ yɔ́ ɛhɩ bɛ fá bɛ kácɩ mɩ́n.” ²⁵Mɔ bɛ lili kpaʋn’n yuelɩ’n, ɔ kɔ fa nzan kangɔ’n. Yɩ́ nwan: “Nzan’n m’ɔ wɔ kangɔ ɛhɩ anun’n y’ɔ le nyɩhyɛ fʋfɔlɛ’n mɔ Nyanmɩan lɛ fa mɩ́n moja’n hyɩhyɛ’n. Mɛlɛ biala mɔ ɛmɔ ’nʋn nzan sɔ’n, ɛmɔ nʋ́n bɛ kácɩ mɩ́n.” ²⁶Afɩ mɛlɛ biala mɔ ɛmɔ lɛ di kpaʋn ɛhɩ, mɔ ɛmɔ lɛ nʋn nzan ɛhɩ’n, anɩn ɛmɔ lɛ bɔ yɛ́ Mɩn ewue’n m’ɔ wuli nɩn anwʋn kpayɛ dede ɔ kɔ ju mɛlɛ mɔ ɔ ’sa ba’n.

²⁷Ɛhɩka ati, sɛ sʋanlan kʋn sɩn atɩn m’ɔ nzɛ nvata man nɩn asʋ ɔ di yɛ́ Mɩn kpaʋn’n ɔ nʋn yɩ́ nzan nɩn an, anɩn sʋanlan sɔ nɩn a yɔ ɛtɛ ɔ’a tia yɛ́ Mɩn anwʋnnaan’n nʋn yɩ́ moja’n. ²⁸Ɔ man sʋanlan kʋn biala sɔ́ yɩ́ nwʋn nɩ́an kʋalaaka nán ɔ’a li kpaʋn sɔ’n ɔ’a nʋn nzan’n. ²⁹Ɔ sanlɩn kɛ sʋanlan m’ɔ lɛ di kpaʋn sɔ’n ɔ nʋn nzan’n mɔ ɔ’a mmu man kɛ yɛ́ Mɩn anwʋnnaan’n nʋn yɩ́ moja’n, anɩn sʋanlan sɔ’n lɛ bu yɩ́ muonun yɩ́ nwʋn fʋɔ. ³⁰Ɛhɩka ati yɛ̂ ɛmɔ anun mmie-mɔ dɔʋn a fʋkɛ fʋkɛ, mmie-mɔ a bubu, mmie-mɔ kʋsʋ dɔʋn a wu nɩn ɔ. ³¹Sɛ yɛ di mʋa yɛ sɔ yɛ́ nwʋn yɛ nɩan kʋalaaka nán y’a li yɛ́ Mɩn alɩɛ nɩn an, Nyanmɩan mmua man yɛ́ ndɛɛ. ³²Nan sɛ yɛ́ Mɩn bua yɛ́ ndɛɛ a, ɔ ’pinnin yɛ́ nán yɛ́ ti a nga man nun kɛ ɛyuadɩ’n dɩɛ’n.

³³Ɔ man anianman-mɔ, sɛ ɛmɔ yia mɔ ɛmɔ ’ba li yɛ́ Mɩn alɩɛ’n, ɛmɔ nwʋ́nndɛ bɛ́ nwʋn. ³⁴Kɛ ɔ kɔ yɔ nán Nyanmɩan a mbinnin man ɛmɔ mɛlɛ mɔ ɛmɔ kɔ yia’n, sʋanlan m’ɔ nɩan an, ɔ’a gɔlɔ’n, ɔ lí like yɩ́ awulo nán ɔ’a a. Yɩ́ bʋ nga’n, sɛ mɩn ba ɛmɔ anwʋn ɛlɔ a, n gɔ sesie.

Wawɛ Nwannzan-nwannzan nɩn acɛdɩɛ’n-mɔ

¹Ɛhɩ, anianman-mɔ, m’ɔ tʋ de Wawɛ Nwannzan-nwannzan nɩn acɛdɩɛ’n-mɔ anwʋn ɛjɔlɛ dɩɛ’n, mɩn kulo kɛ ɛmɔ tɩ yɩ́ bʋ kpa. ²Ɛmɔ sɩ kɛ daba mɔ anɩn ɛmɔ nzɩ man Nyanmɩan’n, amʋan’n-mɔ mɔ bɛ njʋjɔ man’n, bɛ́ yɛ̂ anɩn ɛmɔ nanndɩ nun bɛ sɔ ɔ. ³Ɛhɩka ati, mɩn kulo kɛ ɛmɔ tɩ yɩ́ bʋ kpa kɛ, sʋanlan mɔ Nyanmɩan Wawɛ’n wɔ yɩ́ nun’n ngʋala ngan man kɛ: “Zozi a fa munnzue!” Sɛ Wawɛ Nwannzan-nwannzan’n kʋsʋ nnʋn man nun an, sʋanlan kʋn ngʋala ngan man kɛ: “Zozi tɩ yɛ́ Mɩn!”

⁴Acɛdɩɛ’n-mɔ tɩ ngacile dɔʋn, nan kʋsʋ yɩ́ kʋalaa fi Wawɛ Nwannzan-nwannzan kʋnmgba’n. ⁵Junman’n tɩ ngacile dɔʋn nan kʋsʋ yɛ́ Mɩn kʋnmgba’n yɛ̂ bɛ lɛ sʋ yɩ́ ɔ. ⁶Junman elie’n tɩ ngacile dɔʋn nan kʋsʋ Nyanmɩan kʋnmgba’n sɩn yɩ́ kʋalaa asʋ ɔ di junman yɛ́ asɩtanlan nɩn anun.

⁷Wawɛ Nwannzan-nwannzan’n man sʋanlan kʋn biala acɛdɩɛ kʋn maan ɔ fa bʋka ɛhɩnlɩn-mɔ kʋalaatin. ⁸Wawɛ Nwannzan-nwannzan’n fa ngɛlɛ ɛjɔlɛ ɔ wula sʋanlan’n bie anʋan maan ɔ kan. Wawɛ kʋnmgba’n kele sʋanlan’n bie like maan ɔ nwun yɩ́ yuein ɔ bʋka ɛhɩnlɩn-mɔ. ⁹Wawɛ kʋnmgba sɔ’n man sʋanlan’n bie dedi. Ɔ man sʋanlan’n bie kʋsʋ tunmin maan nwuluwafʋɛ’n-mɔ anwʋn sa. ¹⁰Ɔ man sʋanlan’n bie tunmin maan ɔ yɔ asinbɛnwʋn ninnge. Ɔ man bie kʋsʋ kan ɛjɔlɛ mɔ Nyanmɩan kɔ fa kɔ wula yɩ́ nʋan kɛ ɔ hán’n. Ɔ man sʋanlan’n bie kʋsʋ nwun wawɛ ɛtɛ’n nʋn Nyanmɩan Wawɛ nɩn angʋnmɩn. Ɔ man sʋanlan’n bie kan anɩɛ ngacile ngacile. Ɔ man bie kʋsʋ tutu anɩɛ ngacile ngacile sɔ’n-mɔ abʋ. ¹¹Wawɛ kʋnmgba cein sɔ’n yɛ̂ ɔ yɔ ninnge sɔ’n-mɔ kʋalaa ɔ. Acɛdɩɛ m’ɔ kulo kɛ ɔ fa man sʋanlan kʋn biala’n y’ɔ fa man ɔ.

Zozi Kilisi menian’n-mɔ kʋalaa tɩ anwʋnnaan kʋn

¹²Ɛhɩ, ɛmɔ sɩ kulo sʋanlan kɛ ɔ kpɩn tɩ yɩ́’n. Yɩ́ akpɔlɛ akpɔlɛ’n-mɔ sʋnlɩn. Bɛ kan yɩ́ kʋalaa bɛ bɔ nun an, anɩn ɔ yɔ anwʋnnaan kʋn. Kilisi kʋsʋ, kɛ ɔ tɩ yɩ́ nɩn ala anɩn. ¹³Yɛ́ kʋalaatin, Zufʋ o, m’ɔ tɩ man Zufʋ o, kanga o, m’ɔ tɩ man kanga o, Wawɛ kʋnmgba sɔ nɩn a hohuan yɛ́ nʋan, y’a kaci anwʋnnaan kʋn, b’a sɔnɩn yɛ́, ɛsɛ Wawɛ Nwannzan-nwannzan’n wɔ yɛ́ kʋalaa yɛ́ nun.

¹⁴Nán akpɔlɛ baa kʋnmgba y’ɔ yɔ anwʋnnaan nɩn ɔ, nan akpɔlɛ dɔʋn y’ɔ yɔ anwʋnnaan nɩn ɔ. ¹⁵Sɛ ajalɛ’n nwan: “Mɩ́n dɩɛ, nán asaa y’ɔ le mɩ́n, yɩ́ ti, n nnʋn man anwʋnnaan nɩn anun bie.” Sɛ ɔ kan sɔ ti a, asʋ ɔ nnʋn man anwʋnnaan nɩn anun bie ɔ? ¹⁶Sɛ anzʋɛ’n kʋsʋ nwan: “Mɩ́n dɩɛ, nán anyɩan y’ɔ le mɩ́n, yɩ́ ti, n nnʋn man anwʋnnaan nɩn anun bie.” Sɛ ɔ kan sɔ ti a, asʋ ɔ nnʋn man anwʋnnaan nɩn anun bie ɔ? ¹⁷Sɛ ɔ tɩ kɛ anwʋnnaan’n kʋalaa y’ɔ le anyɩan an, ahan sʋanlan ’yɔ sɛ nán ɔ’a tɩ ɛjɔlɛ? Sɛ ɔ tɩ kɛ anwʋnnaan’n kʋalaa y’ɔ le anzʋɛ a, ahan sʋanlan ’yɔ sɛ nán ɔ’a tɩ nvan? ¹⁸Mʋafʋɛ, kɛ kulo sʋanlan akpɔlɛ akpɔlɛ’n lɩka mɔ Nyanmɩan kulo kɛ ɔ sie yɩ́’n, ɛbɛlɛ yɛ̂ ɔ’a sie yɩ́ ɔ. ¹⁹Afɩ sɛ ɔ tɩ kɛ yɩ́ kʋalaa tɩ tɔlɛ baa kʋnmgba a, ahan bɛ nvɛlɛ man yɩ́ sʋanlan. ²⁰Ɔ tɩ ananhɔlɛ kɛ kulo sʋanlan akpɔlɛ akpɔlɛ’n-mɔ sʋnlɩn, nan yɩ́ kʋalaa yɔ anwʋnnaan kʋn.

²¹Ɛhɩka ati, anyɩan ngʋala ngan ngele man asaa kɛ: “Wɔ́ asaa, m mianlɩn man wɔ́ nwʋn!” Bɛ́ ti kʋsʋ ngʋala ngan ngele man ajalɛ kɛ: “Wɔ́ ajalɛ, m mianlɩn man wɔ́ nwʋn!” ²²Bɛ ngʋala bɛ ngan man sɔ. Ɔ sanlɩn kɛ anwʋnnaan nɩn akpɔlɛ’n-mɔ mɔ bɛ mmu man bɛ́ like fɩ́ɩ́’n, bɛ́ yɛ̂ bɛ́ nwʋn cian ɔ. ²³Yɛ́ anwʋnnaan’n lɩka mɔ yɛ mmu man yɩ́ like fɩ́ɩ́’n, yɩ́ yɛ̂ yɛ sesie yɩ́ kpa ɔ. Lɩka mɔ sʋanlan nwun yɩ́ a, ɔ tɩ anyunnunguasɩɛ man yɛ́’n, yɛ kala sʋ. ²⁴Lɩka mɔ sʋanlan nwun yɩ́ a, ɔ tɩ kpa’n, yɛ yaci yɛ gua sʋ. Anwʋnnaan’n lɩka sɔ’n-mɔ yɛ nwun bɛ́ a, yɛ mmu man bɛ́ like fɩ́ɩ́’n, Nyanmɩan a sesie maan bɛ́ nwʋn cian yɛ́ kpa. ²⁵Ɔ yɔ yɩ́ sɔ nán mgbacɩ mgbacɩɛ a ndanlan man anwʋnnaan nɩn anun. Ɔ sanlɩn kɛ anwʋnnaan nɩn anun akpɔlɛ akpɔlɛ’n-mɔ kʋalaa sʋsɔ bɛ́ nwʋn nun. ²⁶Sɛ anwʋnnaan nɩn anun akpɔlɛ’n bie lɛ nwun yalɛ a, bɛ́ kʋalaa yɛ́ anɩn bɛ nʋn yɩ́ lɛ nwun yalɛ sɔ nɩn ɔ. Yɛ̂ sɛ bɛ́ nun kʋn bie kʋsʋ lɛ di fɛ a, bɛ́ kʋalaa yɛ̂ anɩn bɛ lɛ di fɛ sɔ nɩn ɔ.

²⁷Kilisi anwʋnnaan’n y’ɔ le ɛmɔ kʋalaa. Ɛmɔ anun kʋn biala tɩ anwʋnnaan sɔ nɩn anun akpɔlɛ kʋn. ²⁸Ɛhɩka ati y’ɔ man Nyanmɩan lili mʋa sielɩ mmɔfʋɛ’n-mɔ Asɔnɩn nɩn anun ɔ. M’ɔ tian yɩ́ nnyuan’n y’ɔ le mgbɔmanfʋɛ’n-mɔ. M’ɔ tian yɩ́ nsan’n y’ɔ le bɛ́ mɔ bɛ kekele menian’n-mɔ ninnge’n. M’ɔ tɔ sʋ’n y’ɔ le bɛ́ mɔ bɛ yɔ asinbɛnwʋn ninnge’n, bɛ́ mɔ bɛ le tunmin maan nwuluwafʋɛ’n-mɔ anwʋn sa’n, bɛ́ mɔ bɛ bʋka yalɛfʋɛ’n-mɔ’n, bɛ́ mɔ bɛ nɩan Asɔnɩn nɩn asʋ’n, ɔ nʋn bɛ́ mɔ bɛ kan anɩɛ ngacile’n-mɔ’n. ²⁹Asʋ bɛ́ kʋalaa bɛ tɩ mmɔfʋɛ ɔ? Cɛcɛ! Asʋ bɛ́ kʋalaa bɛ tɩ mgbɔmanfʋɛ ɔ? Cɛcɛ! Asʋ bɛ́ kʋalaa bɛ kekele menian’n-mɔ ninnge ɔ? Cɛcɛ! Asʋ bɛ́ kʋalaa bɛ yɔ asinbɛnwʋn ninnge ɔ? Cɛcɛ! ³⁰Asʋ bɛ́ kʋalaa bɛ man nwuluwafʋɛ’n-mɔ anwʋn sa ɔ? Cɛcɛ! Asʋ bɛ́ kʋalaa bɛ kan anɩɛ ngacile ngacile ɔ? Cɛcɛ! Asʋ bɛ́ kʋalaa bɛ tu anɩɛ sɔ’n-mɔ abʋ ɔ? Cɛcɛ! ³¹Ɛhɩka ati, ɛmɔ kpʋ́nndɛ acɛdɩɛ’n-mɔ mɔ bɛ́ nwʋn cian’n. Nan mɩn ’ba hele ɛmɔ atɩn kanlanman kanlanman kpa kʋn.

Ehulo’n

¹Ɛhɩ, sɛ bɔbɔ mɩn kʋala mân nɩn anun anɩɛ’n-mɔ kʋalaatin kan an, sɛ mɩn kʋala nyanmɩansʋ mmɔfʋɛ’n-mɔ dɩɛ’n kan an, sɛ mɩn ngulo man sʋanlan an, anɩn n dɩ kɛ kpakpan mɔ bɛ lɛ fa bɛ bɔ sʋ mgban. ²Man n ní Nyanmɩan kpɔman, man n zɩ́ ninnge’n kʋalaatin dede n zɩ́ Nyanmɩan nvɩalɩɛ nun ɛjɔlɛ’n kʋalaatin, man n nyán dedi dede n dútu mmʋka’n-mɔ abʋ bɔbɔ, sɛ mɩn nwun sʋanlan nán m’an ngulo man yɩ́ a, anɩn n dɩ man like fɩ́ɩ́. ³Man n vá mɩ́n nwʋn ninnge’n kʋalaa mɔ n ne yɩ́’n n jé, ɛsɛ bɔbɔ n dɔ́nɩn mɩ́n nwʋn nán m’an fa m’an tu mɩ́n nʋan nun, sɛ n nne man ehulo a, n nne man sʋ nvasʋɛ.

⁴M’ɔ kulo sʋanlan’n, ɔ si abʋtalɛ, ɔ yɔ ati anun kpa ninnge. M’ɔ kulo sʋanlan’n, yɩ́ nyɩn mmʋlʋ man sʋanlan like, ɛsɛ ɔ ndu man yɩ́ nʋan nun. M’ɔ kulo sʋanlan’n, ɔ ndu man yɩ́ nwʋn. ⁵M’ɔ kulo sʋanlan’n, ɔ nyɔ man anyunnunguasɩɛ like, ɔ tɩ man ahyʋan. Ɔ nvɛ man sʋanlan anwʋn ɛya. M’ɔ kulo sʋanlan’n, ɔ nva man sʋanlan anwʋn ɛjɔlɛ ɔ nzie man yɩ́ kunnun. ⁶M’ɔ kulo sʋanlan’n, ɔ nni man ɛtɛ nɩn anwʋn fɛ nan ananhɔlɛ nɩn anwʋn fɛ y’ɔ di ɔ. ⁷M’ɔ kulo sʋanlan’n, ɔ tila yɩ́ ahʋnlɩn kpa, ɔ le dedi, ɔ le anyɩndasʋɛ, ɔ si abʋtalɛ.

⁸Ehulo’n le man ayuelɩɛ. Kpɔman elie’n tɛmʋn ’ba sɩn, anɩɛ ngacile ngacile nɩn ɛhan’n tɛmʋn ’ba sɩn, ninnge’n-mɔ ɛsɩɛ’n tɛmʋn ’ba sɩn. ⁹Ɔ sanlɩn kɛ yɛ sɩ ninnge’n-mɔ ebue, ɛsɛ yɛ di kpɔman nɩn ebue. ¹⁰Nan mɛlɛ mɔ like’n m’ɔ tɩ kʋnlʋn-ngʋnlʋn kpa’n ’ba fite’n, m’ɔ tɩ ebue ebue’n ’ba minlin.

¹¹Mɔ n dɩ batʋnman’n, anɩn mɩn jʋjɔ kɛ batʋnman, mɩn jʋnlɩn kɛ batʋnman, mɩn yɔ mɩ́n ninnge’n-mɔ kɛ batʋnman. Nan mɔ n yɔlɩ kpain’n, n nyacili mmatʋnman ninnge’n. ¹²Mɔ yɛ nwun yɩ́ ɛnɛ’n, ɔ tɩ kɛ yɛ lɛ nɩan nɩannun nun. Ɔ tɩ mɩnnzanlɩn-mɩnnzanlɩn man yɛ́. Nan mɛlɛ’n ’ba ju, yɛ ’ba nwun yɩ́ tofee. Ɛnɛ, ninnge’n-mɔ ebue ebue yɛ̂ mɩn sɩ ɔ. Nan tɛmʋn’n ’ba ju, mɩn ’ba sɩ yɩ́ kpa bɔkɔɔ kɛ Nyanmɩan sɩ mɩ́n’n.

¹³Sian dɩɛ, ninnge nsan ɛhɩ-mɔ wɔ ɛbɛlɛ. Ninnge nsan sɔ’n-mɔ y’ɔ le dedi’n, anyɩndasʋɛ’n, ɔ nʋn ehulo’n. Nan bɛ́ nsan nɩn anun kpili kpa’n y’ɔ le ehulo’n.

Ɛmɔ kpʋ́nndɛ Nyanmɩan Wawɛ nɩn acɛdɩɛ mgbakpa’n-mɔ

¹Ɛhɩka ati, ɛmɔ mán sʋanlan ehulo’n hían ɛmɔ cɩnnjɩn kpa. Ɛsɛ ɛmɔ bɔ́ mɔndɩnlɩn kpa bɛ kpʋ́nndɛ acɛdɩɛ’n-mɔ mɔ Nyanmɩan Wawɛ’n man’n. Man Nyanmɩan kpɔman elie acɛdɩɛ dɩɛ’n hían ɛmɔ kpa. ²Sʋanlan m’ɔ lɛ kan anɩɛ ngacile ngacile’n, anɩn nán menian-mɔ y’ɔ lɛ kan kele bɛ́ ɔ, nan ɔ lɛ kan kele Nyanmɩan. Ɔ sanlɩn kɛ sʋanlan fɩ́ɩ́ ndɩ man anɩɛ’n m’ɔ lɛ kan’n. Nvɩalɩɛ nun ɛjɔlɛ yɛ̂ Wawɛ Nwannzan-nwannzan’n lɛ man ɔ kan ɔ. ³Nan sʋanlan m’ɔ lɛ di Nyanmɩan kpɔman’n, ɔ kan ɛjɔlɛ’n kele menian’n-mɔ ɔ man bɛ́ dedi’n kɔ yɩ́ nyunnun, ɔ wowula bɛ́ anwʋnsɛlɛ ɛsɛ ɔ cɩcɩ bɛ́ lʋa. ⁴Sʋanlan m’ɔ lɛ kan anɩɛ ngacile ngacile’n, anɩn ɔ lɛ kan maan yɩ́ ngʋnmɩn yɩ́ dedi’n kɔ yɩ́ nyunnun. Nan sʋanlan m’ɔ lɛ di Nyanmɩan kpɔman’n, ɔ kan ɛjɔlɛ’n ɔ man bɛ́ kʋalaa mɔ bɛ wɔ asɔnɩn nɩn anun’n dedi’n kɔ yɩ́ nyunnun. ⁵Mɩ́n dɩɛ, sɛ Wawɛ Nwannzan-nwannzan’n man ɛmɔ kʋalaa kan anɩɛ ngacile ngacile a, mɩn di yɩ́ nwʋn fɛ. Nan kʋsʋ mɔ mɩɩn kpʋnndɛ’n, y’ɔ le kɛ ɛmɔ kʋalaa bɛ lí Nyanmɩan kpɔman. Afɩ sʋanlan m’ɔ di Nyanmɩan kpɔman’n, yɩ́ junman dɩɛ’n tɩ kpa tala sʋanlan mɔ kan anɩɛ ngacile ngacile’n dɩɛ’n. Nan sɛ sʋanlan kʋn kʋala kɛ ɔ tutu anɩɛ ngacile ngacile sɔ’n-mɔ abʋ maan Asɔnɩn mma’n-mɔ kʋalaatin dedi’n kɔ yɩ́ nyunnun an, yɩ́ kʋsʋ ɔ tɩ kpa.

⁶Anianman-mɔ, sɛ mɩn ba ɛmɔ anwʋn ɛlɔ, nán sɛ mɩn kan anɩɛ ngacile ngacile mɩn kele ɛmɔ a, nzu nvasʋɛ dɩɛ yɛ̂ ɛmɔ ’nyan yɩ́ sʋ ɔ? Nvasʋɛ nnʋn man sʋ. Nan sɛ Nyanmɩan yɩ like kele nán mɩn kan yɩ́ nwʋn ɛjɔlɛ mɩn kele ɛmɔ a, anaan mɩn kekele ɛmɔ ɛjɔlɛ nun an, anaan mɩn di Nyanmɩan kpɔman an, anaan mɩn kan Nyanmɩan anwʋn ɛjɔlɛ mɩn kele ɛmɔ a, ɛmɔ ’nyan sʋ nvasʋɛ. ⁷Bɛ mán yɛ fá ɛjɔlɛ sɔ’n yɛ tʋ́ kɛ sʋanlan m’ɔ le ku fulutu anaan ɔ lɛ bɔ sanngo anwʋn. Sɛ ɔ’a mmɔ man yɩ́ kpa a, ɔ ’yɔ sɛ nán b’a nwun ejue’n m’ɔ lɛ tʋ’n? ⁸Sʋanlan m’ɔ lɛ ku kɔnɔtɩ’n, sɛ ɔ’a ngu man yɩ́ kpa a, nwan yɛ̂ ɔ ’sesie yɩ́ nwʋn ɔ kɔ ɛlɔɛ ɔ? ⁹Kɛ ɔ tɩ yɩ́ kʋsʋ man ɛmɔ nɩn ala anɩn. Anɩɛ mɔ ɛmɔ lɛ kan mɔ sʋanlan ndɩ man’n, anɩn ɛmɔ lɛ kan gua anwʋnman nun mgban. ¹⁰Anɩɛ sʋnlɩn mân nɩn anun kpa, nan kʋsʋ kʋn nnʋn man ɛbɛlɛ mɔ sʋanlan ndɩ man yɩ́ bʋ ɔ. ¹¹Anɩɛ mɔ mɩn ndɩ man’n, sɛ sʋanlan lɛ fa kan ɛjɔlɛ kele mɩ́n an, mɩn bu sʋanlan sɔ nɩn ɛyɛfʋɛ, yɩ́ kʋsʋ ɔ bu mɩ́n ɛyɛfʋɛ. ¹²Ɔ man, kɛmɔ ɛmɔ kpʋnndɛ kɛ bɛ nyan Wawɛ Nwannzan-nwannzan nɩn acɛdɩɛ’n-mɔ’n, anɩn ɛmɔ kpʋ́nndɛ nunhan mɔ ɛmɔ nyan yɩ́ dɔʋn kpa a, ɔ kʋala kɛ ɔ man Asɔnɩn mma’n-mɔ kʋalaatin dedi’n kɔ yɩ́ nyunnun’n.

¹³Ɛhɩka ati, sʋanlan m’ɔ kan anɩɛ ngacile ngacile’n, ɔ sɛ́lɛ Nyanmɩan maan ɔ hʋ́ala yɩ́ bʋ tú. ¹⁴Ɔ sanlɩn kɛ sɛ mɩɩn yɔ asɔnɩn anɩɛ ngacile ngacile nun an, anɩn mɩ́n wawɛ’n yɛ̂ ɔ lɛ yɔ asɔnɩn nɩn ɔ, mɩ́n ajʋnlɩn’n wɔ ɛbɛlɛ mgban. ¹⁵Sɛ ɔ tɩ sɔ a, anɩn mɩn ’yɔ yɩ́ sɛ? Mɩn ’fa mɩ́n wawɛ mɩn yɔ asɔnɩn, ɛsɛ mɩn ’fa mɩ́n ajʋnlɩn’n kʋsʋ mɩn yɔ asɔnɩn. Mɩn ’fa mɩ́n wawɛ’n mɩn tʋ ejue, ɛsɛ mɩn ’fa mɩ́n ajʋnlɩn’n kʋsʋ mɩn tʋ ejue. ¹⁶Afɩ sɛ ɛ lɛ da Nyanmɩan asɩ anɩɛ ngacile ngacile nun, mɔ sʋanlan bie wɔ ɛmɔ afian m’ɔ ndɩ man anɩɛ sɔ’n, sɛ ɛ da Nyanmɩan asɩ yue a, ɔ ngʋala ɔ ngan man “Amɩn”, ɔ sanlɩn kɛ ɔ’a ndɩ man ɛjɔlɛ’n mɔ a han’n. ¹⁷Sɛ bɔbɔ asɩna’n tɩ like kpa a, ɔ mman man sʋanlan sɔ’n dedi’n ngɔ man yɩ́ nyunnun. ¹⁸Mɩn ’da Nyanmɩan asɩ, ɔ sanlɩn kɛ mɩn kan anɩɛ ngacile ngacile dɔʋn mɩn tala ɛmɔ kʋalaatin. ¹⁹Nan kʋsʋ sɛ Asɔnɩn mma’n-mɔ yia nán mɩn kan ɛjɔlɛ mgbɔlɛ nnun mɔ bɛ tɩ yɩ́ bʋ, ɔ bʋka bɛ́’n, ɔ tɩ kpa tala kɛ n gɔ han ɛjɔlɛ mgbɔlɛ akpɩɩ bulu anɩɛ ngacile ngacile nun mɔ sʋanlan fɩ́ɩ́ ndɩ man ɔ.

²⁰Anianman-mɔ, nán man ɛmɔ ajʋnlɩn’n yɔ kɛ mmatʋnman ajʋnlɩn, nan ɛmɔ nyán mgbain ajʋnlɩn. Kʋsʋ ɛtɛ nɩn anyunnun an, ɛmɔ káci kɛ adɔman. ²¹B’a hɛlɛ wɔ Ɛhɛlɛ Ɛjɔlɛ nɩn anun kɛ yɛ́ Mɩn nwan:

Mɩn ’nanndɩ nyɔfʋɛ

mɔ ɛmɔ ndɩ man bɛ́ anɩɛ nɩn asʋ,

mɩn kan ɛjɔlɛ mɩn kele meninsʋnman’n.

Ɛhɩ bɔbɔ muonun, bɛ lɛ ngɔ tie man mɩ́n.

²²Ɛhɩka ati, anɩɛ ngacile ngacile’n mɔ bɛ kan’n, ɔ tɩ nzɔlɛ mɔ Nyanmɩan yɩ kele bɛ́ mɔ bɛ nzɩ man yɩ́’n, nan ɔ tɩ man nzɔlɛ mman man bɛ́ mɔ bɛ sɩ yɩ́’n, nan Nyanmɩan kpɔman nɩn elie dɩɛ’n, ɔ tɩ nzɔlɛ man sʋanlan’n m’ɔ sɩ Nyanmɩan’n, nan ɔ tɩ man nzɔlɛ mman man m’ɔ nzɩ man Nyanmɩan’n. ²³Yɛ fá yɩ́ kɛ asɔnɩn mma’n-mɔ kʋalaa a yia bɛ lɛ kan anɩɛ ngacile ngacile. Sɛ menian mɔ bɛ nzɩ man asɔnɩn nɩn anun ɛjɔlɛ, anaan bɛ́ mɔ bɛ nzɩ man Nyanmɩan’n wʋlʋ lɩka mɔ ɛmɔ a yia nɩn an, bɛ ngan man kɛ ɛmɔ lɛ sɛ ɔ? ²⁴Nan sɛ ɛmɔ kʋalaa lɛ di Nyanmɩan kpɔman nán sʋanlan m’ɔ nzɩ man asɔnɩn nɩn anun ɛjɔlɛ, anaan m’ɔ nzɩ man Nyanmɩan wʋlʋ lɩka mɔ ɛmɔ a yia nɩn an, ɛjɔlɛ’n mɔ ɛmɔ lɛ kan’n maan ɔ nwʋn yɩ́ kɛ ɔ tɩ ɛtɛfʋɛ. Ɔ nwun yɩ́ kɛ ɛjɔlɛ’n mɔ ɔ’a tɩ’n maan ɔ di fʋɔ. ²⁵Anɩn yɩ́ nwʋn ɛjɔlɛ kʋalaa a tulu. Ɔ ’kʋtʋ Nyanmɩan anyunnun ɔ sʋ yɩ́, ɔ se kɛ: “Nyanmɩan wɔ ɛmɔ afian ɛwa sakpa!”

Like m’ɔ sɛ kɛ bɛ yia a, bɛ yɔ́’n

²⁶Anianman-mɔ, afɩ nzu yɛ̂ ɔ sɛ kɛ ɛmɔ yia a, bɛ yɔ́ ɔ? Mɛlɛ mɔ ɛmɔ kʋalaa kɔ yia’n, sɛ sʋanlan kʋn le ejue ɔ tʋ, kʋn lɛ kekele yɩ́ manngʋn’n-mɔ Nyanmɩan Anʋan Ɛjɔlɛ, kʋn lɛ di kpɔman, kʋn lɛ kan anɩɛ ngacile ngacile, kʋn kʋsʋ lɛ tu anɩɛ ngacile sɔ nɩn abʋ a, yɩ́ kʋalaa mɔ ɛmɔ lɛ yɔ’n, bɛ yɔ́ bɛ bʋ́ka bɛ́ nwʋn bɛ mán bɛ́ dedi’n hɔ́ yɩ́ nyunnun. ²⁷Sɛ ɛmɔ lɛ kan anɩɛ ngacile a, man menian nnyuan anaan nsan hán. Nan kʋsʋ bɛ hán yɩ́ bɛ́ ti ngʋkʋn, yɛ̂ sʋanlan kʋn kʋsʋ tú mɔ bɛ lɛ kan nɩn abʋ. ²⁸Sɛ sʋanlan fɩ́ɩ́ nnʋn man ɛbɛlɛ m’ɔ tu mɔ bɛ lɛ kan nɩn abʋ a, anɩn sʋanlan’n m’ɔ lɛ kan anɩɛ ngacile sɔ’n múan yɩ́ nʋan Asɔnɩn sua nɩn anun. Ɔ hán yɩ́ kunnun, ɔ hán mán Nyanmɩan.

²⁹Bɛ́ mɔ bɛ di Nyanmɩan kpɔman’n kʋsʋ, nunhan nnyuan, anaan nsan lí kpɔman’n nán bɛ́ nga’n tɩ́tɩ bɛ́ ɛjɔlɛ’n bɛ nɩ́an. ³⁰Sɛ nunhan kʋn wɔ ɛmɔ afian mɔ Nyanmɩan a yɩ like a hele yɩ́ kɛ ɔ hán’n, sʋanlan’n mɔ yɩ́ nʋan wɔ ɛjɔlɛ sʋ’n, ɔ múan yɩ́ nʋan. ³¹Ɛmɔ kʋalaa, bɛ kʋala kɛ bɛ di kpɔman’n bɛ́ ti ngʋkʋn maan bɛ́ kʋalaa bɛ nwun like, ɛsɛ bɛ wowula bɛ́ nwʋn anwʋnsɛlɛ. ³²Bɛ́ mɔ bɛ di kpɔman’n, ɔ di kɛ bɛ lí kpɔman’n kɛ ɔ sɛ fata’n. ³³Ɔ sanlɩn kɛ Nyanmɩan ngulo man basa basa, nan ɔ kulo anzʋnunjɔ.

Kɛ ɔ tɩ yɩ́ wɔ anwʋntɩɛ mma’n-mɔ asɔnɩn’n-mɔ anun’n, ³⁴sɛ ɛmɔ yia nán bɛ́ ’yɔ asɔnɩn an, mmalasua’n-mɔ tánlan koun, bɛ le atɩn bɛ ngan ɛjɔlɛ. Ɔ sɛ kɛ mmalasua’n-mɔ bɛ́bɛlɛ bɛ́ nwʋn asɩ kɛ b’a hɛlɛ wɔ Nyanmɩan mala nɩn anun’n. ³⁵Sɛ Ɛjɔlɛ’n bie wɔ ɛbɛlɛ mɔ bɛ nnwun man yɩ́ kpa, nán bɛ kulo kɛ bɛ bisa a, bɛ bísa bɛ́ hun-mɔ bɛ́ awulo ɛlɔ. Afɩ ɔ tɩ man kpa man balasua kɛ ɔ hán ɛjɔlɛ mɛlɛ mɔ Asɔnɩn mma’n-mɔ kɔ yia’n.

³⁶Ɛmɔ jʋnlɩn kɛ ɛmɔ ɛlɔ yɛ̂ Nyanmɩan ɛjɔlɛ’n bɔlɩ yɩ́ bʋ ɔ? Anaan ɛmɔ jʋnlɩn kɛ ɛmɔ ngʋnmɩn ala yɛ̂ b’a tɩ Nyanmɩan ɛjɔlɛ nɩn ɔ? ³⁷Sʋanlan mɔ yɩ́ nwan ɔ di Nyanmɩan kpɔman, anaan Wawɛ Nwannzan-nwannzan kan ɛjɔlɛ kele yɩ́’n, ɔ nwún yɩ́ kɛ ɛjɔlɛ’n mɔ m’an hɛlɛ ɛmɔ’n tɩ yɛ́ Mɩn mala. ³⁸Sʋanlan m’ɔ mmu man ɛjɔlɛ sɔ nɩn ananhɔlɛ’n, nán bɛ tie yɩ́.

³⁹Ɛhɩka ati, anianman-mɔ, ɛmɔ kpʋ́nndɛ kpɔman elie acɛdɩɛ’n kpa. Nan kʋsʋ, nán bɛ totua anɩɛ ngacile ngacile nɩn ɛhan. ⁴⁰Ɛmɔ yɔ́ ninnge’n-mɔ kʋalaa kpɛ kpɛ, nán bɛ yɔ yɩ́ sɩsakaa.

¹Anianman-mɔ, mɩɩn kacɩ ɛmɔ Ɛjɔlɛkpa’n mɔ m mɔlɩ n gelelɩ ɛmɔ mɔ ɛmɔ lelɩ lili’n. Ɛjɔlɛkpa sɔ’n, ɛmɔ bɔlɩ nun mɔndɩnlɩn kpa. ²Sɛ ɛmɔ de Ɛjɔlɛkpa sɔ’n bɛ di kɛ m gbɩnlɩn m mɔlɩ n gelelɩ ɛmɔ nɩn an, Nyanmɩan ’de ɛmɔ ngʋan. Sɛ ɔ tɩ man sɔ a, anɩn ɛmɔ dedi nɩn a yɔ mgban.

³Ɛjɔlɛ m’ɔ sʋ ɛbʋɛ tala ɛjɔlɛ’n kʋalaa mɔ bɛ hanlɩn bɛ helelɩ mɩ́n mɔ mɩ́n kʋsʋ n ganlɩn n gelelɩ ɛmɔ’n y’ɔ le kɛ b’a hɛlɛ wɔ Ɛhɛlɛ Ɛjɔlɛ nɩn anun kɛ yɛ́ ɛtɛ’n-mɔ ati yɛ̂ Kilisi wuli ɔ. ⁴Ɛsɛ b’a hɛlɛ wɔ Ɛhɛlɛ Ɛjɔlɛ nɩn anun kɛ ɔ wuli bɛ sielɩ. Yɩ́ cɩan nsan nɩn asʋ, ɔ fi ewue nun tinngelɩ. ⁵M’ɔ fi ewue nun tinngelɩ’n, ɔ lili mʋa yɩlɩ yɩ́ nwʋn helelɩ *Sefasɩ nán ɔ’a yɩ yɩ́ nwʋn ɔ’a hele yɩ́ mmɔfʋɛ bulu nʋn nnyuan’n. ⁶Yɩ́ menian ɛya nnun nʋn yɩ́ nzin yialɩ ɛsɛ ɔ kɔ yɩ yɩ́ nwʋn ɔ kɔ hele bɛ́. Yɩ́ menian sɔ’n-mɔ mmie-mɔ dɔʋn tɛ tɩ asɩ, ngʋkʋn ala yɛ̂ b’a wu ɔ. ⁷Ɛhɩ anzin, ɔ kɔ yɩ yɩ́ nwʋn kɔ hele Zʋakɩ, ɛsɛ ɔ kɔ yɩ yɩ́ nwʋn ɔ kɔ kele mmɔfʋɛ’n-mɔ kʋalaatin. ⁸Mɔ afɩ ɔ yɩlɩ yɩ́ nwʋn helelɩ bɛ́ kʋalaa yuelɩ’n, ɔ kɔ yɩ yɩ́ nwʋn ɔ kɔ hele mɩ́n kʋsʋ mɩ́n. Nan mɩ́n yɛ̂ n dɩ bɛ́ kʋala bɛ́ kasian nɩn ɔ.

⁹N dɩ mmɔfʋɛ’n-mɔ kʋalaa anun kasian. Ɔ nvata man kɛ bɛ fɛlɛ mɩ́n bɔfʋɛ bɔbɔ. Ɔ sanlɩn kɛ n gelelɩ Nyanmɩan Asɔnɩn nɩn ahʋlʋwa. ¹⁰Nan Nyanmɩan adawʋlʋman, ɛnɛ ɔ’a man m’an kaci yɩ́ bɔfʋɛ. Yɩ́ anwunnvoe’n m’ɔ nwunlin mɩ́n’n kʋsʋ a nyɔ man mgban. Ɔ sanlɩn kɛ m’an li junman kpa m’an tala mmɔfʋɛ’n-mɔ kʋalaatin. Nán kɛ mɩ́n muonun mɩ́n tunmin yɛ̂ m’an fa m’an li junman sɔ nɩn ɔ, nan Nyanmɩan muonun nwunlin anwunnvoe ɔ jinlanlɩn mɩ́n nzin. ¹¹Ɔ man sɛ mɩ́n yɛ̂ m mɔlɩ Ɛjɔlɛkpa nɩn o, sɛ mmɔfʋɛ’n-mɔ yɛ̂ bɛ bɔlɩ o, Ɛjɔlɛkpa kʋnmgba sɔ’n mɔ yɛ bɔ’n yɛ̂ ɛmɔ lelɩ lili nɩn ɔ.

Yɛ́ ewuetinnge’n

¹²Sɛ yɛ kan yɛ kele menian’n-mɔ kɛ Kilisi fi ewue nun ɔ’a tinnge a, anɩn ɔ yɔ sɛ mɔ ɛmɔ anun mmie-mɔ kan kɛ ewue tinnge nnʋn man ɛbɛlɛ ɔ? ¹³Sɛ ewuetinnge nnʋn man ɛbɛlɛ a, anɩn Kilisi kʋsʋ wuli’n, ɔ’a ndinnge man. ¹⁴Sɛ Kilisi a nwu man ɔ’a ndinnge man an, anɩn yɩ́ Ɛjɔlɛkpa’n mɔ yɛ bɔ yɛ kele menian’n-mɔ tɩ ato ɛjɔlɛ, anɩn ɛsɛ ɛmɔ dedi’n kʋsʋ a yɔ mgban. ¹⁵Sɛ Kilisi fi ewue nun ɔ’a ndinnge man an, anɩn yɛ lɛ tʋn Nyanmɩan ɛsʋan. Afɩ anɩn yɛ lɛ kele kɛ ɔ’a tinnge Kilisi fi ewue nun, kʋsʋ anɩn ɛjɔlɛ’n tɩ man sɔ. ¹⁶Ɔ sanlɩn kɛ sɛ bɛ́ mɔ b’a wu’n fi ewue nun ndinnge man fɩ́ɩ́ a, anɩn Kilisi kʋsʋ fi ewue nun ɔ’a ndinnge man. ¹⁷Yɛ̂ sɛ Kilisi fi ewue nun ɔ’a ndinnge man an, anɩn ɛmɔ dedi nɩn a yɔ mgban, ɛsɛ anɩn ɛmɔ ɛtɛ’n-mɔ kʋalaa tɛ sʋ ɛmɔ. ¹⁸Ɛsɛ anɩn ɔ kele kɛ bɛ́ mɔ bɛ de Kilisi bɛ di mɔ b’a wu’n, b’a minlin. ¹⁹Nan sɛ mân ɛhɩ mɔ yɛ wɔ nun ɛwa nɩn ala yɛ̂ yɛ le anyɩndasʋɛ wɔ Kilisi anwʋn an, anɩn yɛ tɩ alʋabɔfʋɛ kpili kpa yɛ tala menian’n-mɔ kʋalaatin.

²⁰Nan ɔ tɩ ananhɔlɛ, Kilisi fi ewue nun ɔ’a tinnge. Yɩ́ ewuetinnge sɔ’n tɩ ajinlanmun, ɔ kele kɛ bɛ́ mɔ b’a wu’n kʋsʋ fi ewue nun bɛ ’ba tinnge. ²¹Sʋanlan kʋnmgba dunman nun yɛ̂ ewue walɩ mân nɩn anun ɔ. Ewuetinnge’n kʋsʋ fi sʋanlan kʋnmgba cein ɛlɔ. ²²Kɛmɔ menian’n-mɔ kʋalaa ’wu, ɔ sanlɩn kɛ bɛ tɩ Adamʋn abʋsʋ menian’n, yɩ́ kʋnmgba nɩn ala, bɛ́ mɔ bɛ nʋn Kilisi b’a yɔ kʋn’n kʋsʋ fi ewue nun ’tinnge. ²³Nan kʋsʋ ɔ le sʋanlan kʋn nʋn yɩ́ mɛlɛ. Kilisi yɛ̂ ɔ’a li mʋa ɔ’a tike atɩn nɩn ɔ. Cɩan mɔ ɔ ’ba sa ba’n, bɛ́ mɔ bɛ tɩ yɩ́ dɩɛ’n kʋsʋ fi ewue nun ’ba tinnge. ²⁴Ɛhɩ anzin, anɩn mân nɩn ayuelɩɛ a ju. Tɛmʋn sɔ’n, nyanmɩansʋ mmɔfʋɛ ɛtɛ’n-mɔ mɔ bɛ kpɔ Kilisi, mɔ bɛ le tunmin bɛ sie mân’n, Kilisi ’fin bɛ́ asɩ ɔ fa belemgbin mân’n ɔ wula Nyanmɩan m’ɔ tɩ Sɩɛ nɩn asa nun. ²⁵Afɩ, ɔ fata kɛ Kilisi sie mân’n dede ɔ ju mɛlɛ mɔ Nyanmɩan maan ɔ tia bɛ́ mɔ bɛ kpɔ yɩ́’n kʋalaatin ati sʋ. ²⁶Kpɔfʋɛ kasian’n mɔ bɛ ’fin yɩ́ asɩ’n y’ɔ le ewue. ²⁷Afɩ Ɛhɛlɛ Ɛjɔlɛ’n nwan: Nyanmɩan a fa ninnge kʋalaa a gua yɩ́ ja abʋ. Nan sɛ Ɛhɛlɛ Ɛjɔlɛ’n kan kɛ: “Nyanmɩan a fa ninnge kʋalaa a gua yɩ́ ja abʋ” a, ɔ tɩ yuein kɛ Nyanmɩan mɔ ɔ’a fa ninnge kʋalaa ɔ’a gua Kilisi aja abʋ’n nnʋn man ninnge sɔ’n-mɔ anun bie. ²⁸Mɛlɛ mɔ Kilisi ’ba li ninnge kʋalaa asʋ kunnunmun’n, yɩ́ Kilisi muonun ’ba bɛbɛlɛ yɩ́ nwʋn asɩ ɔ man Nyanmɩan. Ɔ ’bɛlɛlɛ yɩ́ nwʋn asɩ ɔ man Nyanmɩan mɔ ɔ ’man ɔ di ninnge kʋalaa asʋ kunnunmun’n, nán Nyanmɩan a li ninnge kʋalaa asʋ belemgbin.

²⁹Nan sɛ bɛ́ mɔ b’a wu’n fi ewue nun ndinnge man an, anɩn bɛ́ mɔ bɛ man bɛ́ sɔnɩn bɛ́’n, nzu like dɩɛ yɛ̂ bɛ lɛ kpʋnndɛ ɔ? Sɛ bɛ́ mɔ b’a wu’n fi ewue nun ndinnge man an, anɩn nzukɛ ati yɛ̂ yɛ man bɛ sɔnɩn yɛ́’n? ³⁰Yɛ́ muonun, ɔ yɔ sɛ mɔ tɛmʋn biala ewue fɔfʋan yɛ́ ɔ? ³¹Anianman-mɔ, mɩn di ɛmɔ anwʋn fɛ kɛ ɛmɔ nʋn mɩ́n y’a yɔ kʋn wɔ yɛ́ Mɩn Zozi Kilisi dunman nun. Ɛhɩka ati, cɩan biala ewue fɔfʋan mɩ́n. ³²Mɔ anɩn n wɔ Efɛzɩ kulo nɩn asʋ ɛlɔ’n, menian dɔʋn nʋn mɩn jinlanlɩn sʋ kpa kɛ ebolo naan mɔ bɛ́ nwʋn yɔ esulo. Sɛ bɛ́ mɔ b’a wu’n fi ewue nun ndinnge man, nan mɩ́n nwʋn ehele ati yɛ̂ mɩn nʋn naan sɔ’n-mɔ hʋnlɩn ɛlɔɛ nɩn an, anɩn nzu nvasʋɛ dɩɛ yɛ̂ mɩn nyan yɩ́ sʋ ɔ? Anɩn anyɩnndala’n mɔ bɛ buli nɩn a kpɩn sʋ. Bɛ́ nwan:

Yɛ dídi ɛsɛ yɛ nʋ́nnʋn,

ɔ sanlɩn kɛ ɛhɩnman nán yɛ wu a,

anɩn yɛ́ dɩɛ a yue.

³³Nán man ɛmɔ laka laka bɛ́ nwʋn. Sɛ ɛmɔ nʋn bɛ́ mɔ bɛ yɔ nyɔlɩɛ ɛtɛ’n tu nun an, bɛ ’yɔ dede bɛ man ɛmɔ kʋsʋ yɔ nyɔlɩɛ ɛtɛ’n bie. ³⁴Ɛmɔ nyán ajʋnlɩn nán bɛ yáci ɛtɛ ɛyɔlɛ’n. Mɩɩn kan maan nyian kun ɛmɔ, afɩ ɛmɔ anun mmie-mɔ nzɩ man Nyanmɩan.

Ewuetinnge mma’n-mɔ, bɛ́ nwʋnnaan’n tɩ sɛ?

³⁵Nan sʋanlan bie ’ba bisa kɛ: “Bɛ́ mɔ b’a wu’n, bɛ ’tinnge sɛ? Sɛ bɛ tinnge kʋsʋ a, bɛ́ nwʋnnaan’n tɩ sɛ?” ³⁶Sɛ ɛ bisa ɛjɔlɛ sʋa a, anɩn ɛ tɩ tomgban. Ɛ nzɩ man kɛ baka baa mɔ sʋanlan kɔ lua’n, ɔ kpɔlɔ kʋalaaka nán ɔ’a fifi ɔ? ³⁷Like mɔ ɛ kɔ lua’n, sɛ abolowe o, sɛ *bele o, yɩ́ wa’n yɛ̂ ɛ fun wula ɔ, nán yɩ́ baka’n yɛ̂ ɛ kpɛ dua ɔ. ³⁸Nyanmɩan man baka baa sɔ’n fifi ɔ kaci baka, Nyanmɩan man baka baa biala fifi kɛ yɩ́ nin’n tɩ yɩ́’n. ³⁹Mân nɩn anun ninnge’n kʋalaa mɔ bɛ de ɛnwʋnmɩan’n, bɛ́ nwʋnnaan’n tɩ ngacile ngacile. Ɔ le kulo menian’n-mɔ dɩɛ nɩn angʋnmɩn. Ɔ le naan’n-mɔ dɩɛ nɩn angʋnmɩn. Ɔ le nnʋnman’n-mɔ dɩɛ nɩn angʋnmɩn. Ɔ le ejue’n-mɔ kʋsʋ dɩɛ nɩn angʋnmɩn. ⁴⁰Anwunno ɛlɔ ninnge’n-mɔ ɔ le kɛ bɛ si tɩ yɩ́ ɔ. Asɩ ɛwa dɩɛ’n-mɔ kʋsʋ ɔ le kɛ bɛ si tɩ yɩ́ ɔ. Anwunno ɛlɔ dɩɛ’n-mɔ le bɛ́ nganlanman dɩɛ nɩn angʋnmɩn. Asɩ ɛwa dɩɛ’n-mɔ kʋsʋ le bɛ́ nganlanman dɩɛ nɩn angʋnmɩn. ⁴¹Sɛnzɛ’n tɩ yɩ́ ti anwʋn kanlanman dɩɛ, sala’n tɩ yɩ́ ti anwʋn kanlanman dɩɛ. Nzalama’n-mɔ kʋsʋ tɩ bɛ́ ti anwʋn nganlanman dɩɛ. Nzalama’n-mɔ muonun afian, ɔ le kʋn biala nʋn yɩ́ ti anwʋn kanlanman.

⁴²Kɛ ɛjɔlɛ’n tɩ yɩ́ nɩn ala anɩn man bɛ́ mɔ bɛ fi ewue nun bɛ ’ba tinnge’n. Sʋanlan m’ɔ kɔ wu mɔ bɛ kɔ sie yɩ́’n, sɛ ɔ fi ewue nun tinnge a, ɔ nwu man fɩ́ɩ́ kʋ́n. ⁴³Sʋanlan m’ɔ kɔ wu mɔ bɛ kɔ sie yɩ́’n, ɔ tɩ nvuin, ɛsɛ ɔ le man anwʋnsɛlɛ. Nan sɛ ɔ fi ewue nun tinnge a, anɩn ɔ’a yɔ kanlanman, ɛsɛ anɩn yɩ́ nwʋn a yɔ sɩ. ⁴⁴Sɛ sʋanlan wu bɛ sie yɩ́ a, anɩn ɔ tɛ tɩ yɩ́ kulo sʋanlan nɩn ala. Nan sɛ ɔ fi ewue nun tinnge a, anɩn ɔ’a kaci wawɛ nun sʋanlan. Sɛ ɔ le anwʋnnaan nun sʋanlan an, anɩn ɔ le wawɛ nun kʋsʋ sʋanlan. ⁴⁵B’a hɛlɛ wɔ Ɛhɛlɛ Ɛjɔlɛ nɩn anun kɛ: Adamʋn mɔ Nyanmɩan lili mʋa bɔlɩ yɩ́’n, ɔ bɔlɩ yɩ́ kɛ ɔ’a a nyan ngʋan. Nan Kilisi m’ɔ tɩ Adamʋn m’ɔ li sian’n, Nyanmɩan bɔlɩ yɩ́ kɛ ɔ’a a man menian’n-mɔ ngʋan. ⁴⁶Ɛmɔ nɩ́an, anwʋnnaan nun sʋanlan’n di mʋa kʋalaaka nán ɔ’a tʋ wawɛ nun sʋanlan dɩɛ’n. ⁴⁷Adamʋn mɔ Nyanmɩan lili mʋa bɔlɩ yɩ́’n, ɔ le asɩɛ nɩn anwʋn nvutule’n y’ɔ bɔlɩ yɩ́ ɔ. Nan Kilisi m’ɔ tɩ Adamʋn m’ɔ li sian’n, yɩ́ dɩɛ ɔ fi nyanmɩansʋ. ⁴⁸Bɛ́ mɔ bɛ tɩ asɩɛ nɩn asʋ menian’n, bɛ tɩ kɛ Adamʋn mɔ bɛ falɩ ngɛtɩɛ bɛ bɔlɩ yɩ́’n. Nan bɛ́ mɔ bɛ tɩ Nyanmɩan amma’n, bɛ tɩ kɛ sʋanlan’n m’ɔ fi nyanmɩansʋ’n. ⁴⁹Kɛmɔ afɩ kɩkaala dɩɛ yɛ tɩ kɛ sʋanlan’n mɔ bɛ falɩ ngɛtɩɛ bɛ bɔlɩ yɩ́’n, cɩan kʋn yɛ ’ba kaci kɛ sʋanlan’n m’ɔ fi nyanmɩansʋ’n.

⁵⁰Anianman-mɔ, ɛ ’nwun ɛjɔlɛ mɔ mɩɩn kan mɩn kele ɛmɔ’n. Ɛjɔlɛ sɔ’n y’ɔ le kɛ like m’ɔ le anwʋnnaan nʋn moja’n, ɔ ngʋala man Nyanmɩan Belemgbin Mân nɩn anun ɛlɔ kɔ. Like m’ɔ sɛcɩ’n, ɔ ngʋala ɔ nga man ɛbɛlɛ dahuu. ⁵¹Ɛmɔ tíe, mɩɩn ’ba han nvɩalɩɛ nun ɛjɔlɛ kʋn mɩn kele ɛmɔ. Ɛjɔlɛ sɔ’n y’ɔ le kɛ yɛ́ kʋalaa yɛ ngɔ yue man wu, nan yɛ́ kʋalaa yɛ ’ba kaci. ⁵²Ɔ ’yɔ nvu nun, bɛ ’muan bɛ́ nyɩn bɛ tɩ, mɛlɛ mɔ bɛ kɔ hu kɔnɔtɩ kasian nɩn anun’n. Bɛ ku nun an, bɛ́ mɔ b’a wu’n fi ewue nun ’ba tinnge. Sɛ bɛ tinnge a, bɛ nwun man kʋ́n ɛsɛ yɛ́ kʋalaa yɛ ’ba kaci. ⁵³Ɔ sanlɩn kɛ anwʋnnaan’n m’ɔ wu’n, ɔ ’kaci anwʋnnaan m’ɔ nwu man kʋ́n ɔ. ⁵⁴Mɛlɛ mɔ anwʋnnaan’n m’ɔ wu’n kɔ kaci anwʋnnaan m’ɔ nwu man kʋ́n’n, anɩn Ɛhɛlɛ Ɛjɔlɛ nɩn a kpɩn sʋ. Ɛhɛlɛ Ɛjɔlɛ’n nwan:

B’a fin ewue asɩ b’a li yɩ́ sʋ kunnunmun.

⁵⁵Ewue, wɔ́ tunmin’n wɔ nin?

Wɔ́ tunmin’n mɔ ɛ fa kun sʋanlan’n wɔ nin?

⁵⁶Ɛtɛ nɩn ati y’ɔ man ewue le tunmin ɔ kun sʋanlan ɔ. Ɛtɛ’n kʋsʋ tunmin’n fi *Moyizɩ mala’n. ⁵⁷Nan bɛ mán yɛ lá Nyanmɩan asɩ, ɔ sanlɩn kɛ yɛ́ Mɩn Zozi Kilisi dunman nun, ɔ’a man yɛ di ɛtɛ nɩn asʋ kunnunmun.

⁵⁸Ɛhɩka ati, anianman ehulo mma, ɛmɔ jínlan bɛ́ ja nun kpunndiin kpa, nán bɛ man like fɩ́ɩ́ kaci ɛmɔ ajʋnlɩn, nan bɛ lí yɛ́ Mɩn junman’n bɛ hɔ́ bɛ́ nyunnun. Ɛmɔ ati tánlan sʋ kɛ junman’n mɔ ɛmɔ lɛ di man yɛ́ Mɩn’n, ɔ tɩ man junman nvule.

Kɛtɩ’n mɔ bɛ ’tʋ bɛ kɔ man

Zoluzalɛmʋn asɔnɩn mma’n-mɔ’n

¹Ɛhɩ, m’ɔ tʋ de kɛtɩ’n mɔ bɛ ’tʋ bɛ kɔ man Nyanmɩan menian’n-mɔ mɔ bɛ wɔ Zoluzalɛmʋn’n, ɛmɔ yɔ́ yɩ́ kɛ n gelelɩ Galasi mân nɩn anun asɔnɩn mma’n-mɔ’n. ²Mɔlɛ daa, sʋanlan kʋn biala nɩ́an yɩ́ esika’n m’ɔ nyan yɩ́ nɩn anwʋn, ɔ fá kaan síe mɔ ɔ ’fa bʋka Nyanmɩan menian’n-mɔ ɔ. Nán bɛ man mɩn ju ɛlɔ kʋalaaka nán b’a tɩtɩ ndɩtɩ. ³Sɛ mɩn ju ɛmɔ anwʋn ɛlɔ a, menian mɔ ɛmɔ a yɩ bɛ́ kɛ bɛ fá ɛmɔ esika’n bɛ hɔ́ Zoluzalɛmʋn’n, mɩn ’kɛlɛ kalata mɩn tʋ sʋ mɩn man bɛ kɔ. ⁴Sɛ ɔ di mɔ mɩ́n muonun mɩn kɔ bie a, mɩn nʋn bɛ́ yɛ ’kɔ.

Lɩka mɔ Pɔlʋ kulo kɛ ɔ kɔ’n

⁵Sɛ mɩn kpɛ Masedʋanɩn mân’n yue a, mɩn ’ba a ɛmɔ anwʋn ɛlɔ. ⁶Sɛ mɩn ba a, mɩn ’di kɔ yɔ ɛlɛsan kʋn ɛmɔ afian. Sɛ Nyanmɩan bʋa a, mɩn kʋala kɛ mɩn tanlan ɛmɔ anwʋn ɛbɛlɛ dede fɔsɩɛ’n sɩn. Yɩ́ dɩɛ anɩn lɩka biala mɔ mɩn kulo kɛ mɩn kɔ’n, ɛmɔ kɔ soman mɩ́n. ⁷Mɩn ngulo man kɛ mɩn kpɛ nun, nan sɛ Nyanmɩan bʋa, mɩn kulo kɛ mɩn di kɔ yɔ ɛlɛsan kʋn ɛmɔ anwʋn ɛbɛlɛ. ⁸Nan kʋsʋ mɩn ’tanlan Efɛzɩ ɛwa dede *Pantekɔtʋ cɩan’n ju. ⁹Ɔ sanlɩn kɛ junman kpili kpa anwʋn atɩn a tike a man mɩ́n Efɛzɩ ɛwa. Nan kʋsʋ bɛ́ mɔ bɛ nʋn mɩ́n jin sʋ’n sʋnlɩn.

¹⁰Ɛhɩ, sɛ Timote ju ɛmɔ anwʋn ɛlɔ a, ɛmɔ sɔ́ yɩ́ nun kanlanman. Ɔ sanlɩn kɛ ɔ di yɛ́ Mɩn junman’n kɛ mɩn di yɩ́’n. ¹¹Yɩ́ ti, sʋanlan fɩ́ɩ́ n’ɔ fa yɩ́ nyɩn ci yɩ́. Nan ɛmɔ bʋ́ka yɩ́ wɔ yɩ́ atɩn etue nun maan ɔ hɔ́ anzʋnunjɔ nun dede ɔ sá bála tʋ́ mɩ́n. Afɩ mɩn lɛ nwʋnndɛ yɩ́ nʋn anianman’n-mɔ mɔ bɛ hɔlɩ somanlɩn yɩ́’n.

¹²Yɛ́ nianman Apolɔsʋ dɩɛ, m’an sɛlɛ yɩ́ dede kɛ ɔ nʋn anianman ɛhɩnlɩn-mɔ, bɛ hɔ́ nɩ́an ɛmɔ abʋsʋ. Kɩkaala dɩɛ, ɔ nyanlɩn man yɩ́ nwʋn alaje. Nan sɛ ɔ nyan alaje a, ɔ ’kɔ a nɩan ɛmɔ abʋsʋ.

Afʋtu nʋn ahɩn ebisa

¹³Anianman-mɔ, ɛmɔ síe bɛ́ nwʋn ye, bɛ tíla bɛ́ dedi nɩn anun sɛlɛ kpa. Ɛmɔ tíla bɛ́ ahʋnlɩn, nán bɛ man bɛ́ nwʋn bubu bɛ́. ¹⁴Like biala mɔ ɛmɔ ’yɔ’n, bɛ yɔ́ yɩ́ ehulo nun.

¹⁵Ɛmɔ sɩ Sɩtefanasɩ nʋn yɩ́ awulo nɩn anun menian’n-mɔ. Akayi mân nɩn anun, bɛ́ yɛ̂ bɛ lili mʋa bɛ lelɩ Ɛjɔlɛkpa’n bɛ lili ɔ. Bɛ di junman kpa bɛ man Nyanmɩan menian’n-mɔ. Anianman-mɔ, mɩɩn sɛlɛ ɛmɔ kpa kɛ ¹⁶ɛmɔ bɛ́bɛlɛ bɛ́ nwʋn asɩ bɛ mán bɛ́ kʋalaa mɔ bɛ di yɛ́ Mɩn junman’n kɛ yɩ́’n. ¹⁷Mɩn di Sɩtefanasɩ nʋn Fɔɔtunatusi nʋn Akayikusi bɛ́ ɛwalɛ nɩn anwʋn fɛ kpa. Ɔ sanlɩn kɛ b’a li ɛmɔ aja nun. ¹⁸Bɛ́ ɛwalɛ nɩn a man mɩ́n lʋa a cɩcɩ, ɔ’a man ɛmɔ kʋsʋ alʋa a cɩcɩ. Menian sʋa-mɔ, ɛmɔ nwun bɛ́ a, bɛ bú bɛ́ kpa.

¹⁹Asɔnɩn mma’n-mɔ kʋalaa mɔ bɛ wɔ Azi mân nɩn anun’n, bɛ́ nwan bɛ ’bisa ɛmɔ ahɩn. Akilasɩ nʋn Pilisi, bɛ́ kʋalaa mɔ bɛ yia bɛ́ awulo ɛbɛlɛ bɛ yɔ asɔnɩn’n, bɛ́ nwan bɛ ’bisa ɛmɔ ahɩn wɔ yɛ́ Mɩn dunman nun. ²⁰Anianman’n-mɔ kʋalaa mɔ bɛ wɔ ɛwa’n, bɛ́ nwan bɛ ’bisa ɛmɔ ahɩn. Ɛmɔ bísa bɛ́ nwʋn ahɩn bɛ tɔ́ bɛ́ nwʋn nun kɛ anianman-mɔ yɔ yɩ́’n bɛ mán mɩ́n.

²¹Mɩ́n muonun yɛ̂ mɩɩn kɛlɛ ɛjɔlɛ kpɔlɛ ɛhɩ mɩn bisa ɛmɔ ahɩn ɔ. ²²Sʋanlan m’ɔ ngulo man yɛ́ Mɩn’n, munnzue hán yɩ́! Malanata, yɛ́ Mɩn lɛ ba.

²³Yɛ́ Mɩn Zozi yéyila ɛmɔ, ɔ nwún ɛmɔ anwʋn anwunnvoe.

²⁴Mɩn kulo ɛmɔ kʋalaatin, ɔ sanlɩn kɛ yɛ́ kʋalaa yɛ nʋn yɛ́ Mɩn Zozi Kilisi y’a yɔ kʋn.