Taitọs

¹ Emi Pọọlu ogwu usun̄ Awaji, mè ogwu otuchieen̄ kè Jisọs Karais nge ikpa etip keyi ijet owu. Awaji ìgobo emi, inyi ǹnenrak ichechieek ebi ọmọ ogobobe inyi lek kan̄ m̀bene, mè ǹjeen̄ ema atikọ kan̄, eyi òkijeen̄ ene ubọk ebesa iluk ugwem òkinyi Awaji umin. ² Sa me lek atikọ yi ke ebi ene ekikpọ chieen̄ ikakaan̄ ugwem ikakaan̄ge itata eyi Awaji ogwu kpokọtbe ikan̄ ataak ochieekbe use inyinyi ebi kan̄ karake sabum înirom linyọn̄. ³ Me mgbọ mgbọ kan̄ osobe, inenichili ikọ ya ijeen̄ ebilene sa me ilolook ata etip eyi îkanabe itap emi me ubọk. Ikwaan̄ ilolook ata etip yi ìnin̄ emi ubọk inan̄a me ida eyi Awaji ogwu Unyan̄a onyibe. ⁴ Ǹkige ikpa yi inyi owu Taitọs, ata gwun̄ n̄a enerieen̄ me emen ichechieek eyi òkup inyi otutuuk kiji. Atata nnwọn mè esuuk eyi Awaji Ute, mè eyi Jisọs Karais ogwu Unyan̄a kiji ikup inyi owu! ⁵ Ǹtele owu me achọ Keret, inyi owu òneen̄ inu geelek eji erọbe isik òsun̄ me irek. Gobo ebi ugane ntitiin̄ me ama geelek ere ntitiin̄ Awaji okupbe me achọ ya, kubọk ntumube inyi owu. ⁶ Ogwu ugane ntitiin̄ geelek môre ogwu ikakaan̄ge nrọ-nlọ geege me emen, mè ire si ogwu òkaan̄ nwa ge gaalek. Ebi bọn mêre ebi ìchechieek me lek kè Jisọs Karais, kpebere nsabọn unye ibot, ebi ìkirọ inu afa afa. ⁷ Ofifi si, ogwu òkpọ chieen̄ me ntitiin̄ Awaji, môre ogwu ikakaan̄ge nrọ-nlọ geege me emen, mije, ọmọ ìre ogwu Awaji okanabe uwu kan̄ itap me ubọk. Ìkpore ogwu òkigumu lek, ìkpore si ogwu òkigwat lek inaan̄ ejit. Ìkpore ogwu òkinwọ miin̄ isa, ìkpore ogwu òkirọ inu afa afa. Ìkpore si ogwu ejit ile. ⁸ Kpan̄asi ikeya, ọmọ môre ogwu òkima ibọbọkọ ene itap, mè ire si ogwu òkima nnwọn. Ọmọ môre ogwu òkikọt itet lek kan̄ ikaan̄, mè ikiluk ugwem òtatat mè ikup me mbuban me isi Awaji, mè ikikọt itọ ikọ inyi lek kan̄. ⁹ Ọmọ môre si ogwu òtetet ikọ Awaji yi ògbegbe utoon̄-ejit inye, kubọk ejeen̄be ọmọ. Sa me ikeyi, ọmọ môkọt ikisa ata ijejeen̄ yi itap ebi ene efuuk me owot, mè ikikọt si ikeke ifaan̄ ikọ geelek ebi ìkije ikeme ijejeen̄ yi ekitumu ikeme ijejeen̄ yi. ¹⁰ Mije, me etete ebi ìchechieek ìkup me Keret, owuwa ebi unye-ibot òwa, ògak ge ebi ìnan̄a me ubọk iriaak Awaji ebi Ju inichieek me lek kè Jisọs Karais, mè ikigbini ibe mè ebi geelek ìchechieek me lek kè Jisọs Karais ekalọlọ ifefieek afi. Ife chi ekije ikana ikitumu ataak ataak ikọ ikike ikisa ifiaan̄ ene ifiin̄. ¹¹ Îgbe ibe erọ mè otu ife chi ichit, mije, ema mêkisa nlilọ ijejeen̄ ikagbege ibe ejeen̄ iwuwọlọ ichechieek owuwa ototun̄ ukan̄ isan̄a kpai. Eyi òfefieek ichit, inu chi ema ekijeen̄, ekijeen̄ isa ikiweek oruru. Îkaan̄ esip enenen! ¹² Ògak ge, ene ge me etete ebi nriran ebi Keret îsa otu kan̄ itumu ibe ke ebi Keret ìre ife ìkikan̄ ataak mgbọ geelek; ke ema ìre ijo anam afa, mè ire si ebi ugbek, mè ebi ebek ile ìkigbaan̄ ubọk iba itap me otu. ¹³ Ikọ ene ya otumube ìre atikọ. Eya orọ, sa ida ònyenye gana nyi ebi ntitiin̄ Awaji me Keret, inyi ema ekeke enye me emen ichechieek, ¹⁴ mè ekayaka ìgban̄ owuwa urọk ikakaan̄ge ibot, echi ebi Ju ekikpa. Gana si nyi ema ibe ekayaka ìgban̄ ikan echi ebi ìjijit atikọ eyi Awaji ekinyi. ¹⁵ Me lek ebi geelek ìkiluk ugwem òtatana, inu geelek ìtatana ikup. Ire, me lek ebi geelek ebi kpekiluk ugwem òtatana, melek ebi ekachieekge, kpunu inu geege òtatana, mije, ibot kiban̄ mè ejit kiban̄ îfiat isan̄a kpai. ¹⁶ Ema ekitumu ibe ke ema mîriọọn̄ Awaji, ire, irọrọ kiban̄ ìkijeen̄ ibe ke ema mîjit Awaji. Îgbe ibe esan̄a lek me lek ife chi, mije, ema kpekigban̄ utọn̄ inyi Awaji. Ema kpebekọkọt si irọ inu geege òrere ata inu.

¹ Ire, owu me lek kwun̄, mgbọ geelek obojeen̄ inu, kijeen̄ inu òjeje itat me lek ata ijejeen̄ eyi Awaji. ² Jeen̄ ebi ugane ebirieen̄ ibe ere ebi chieen̄ okire ijọn̄ mgbọ geelek, mè ekekaan̄ igwuun̄-lek, mè ere ebi ifuk-ibot kiban̄ okiso ifuk mgbọ geelek, mè ebi ìkikọt itet lek kiban̄ ikaan̄, mè ebi ìkekeke inye me emen ichechieek mè imumechieen̄ mè ukarajit. ³ Ikeya si, jeen̄ ebi ugane ebibaan̄ ibe ekesiki lek, mè ekeluk ugwem eyi òkinyi Awaji umin mgbọ geelek, mè ekare ebi ìkitumu ene ifiat, ekare si ebi ìkinwọ miin̄ isa. Kpan̄asi ikeya, ema ekejeen̄ inu ònwọnwọn. ⁴ Mgbọ ya ke ema mêkọt ikijeen̄ ebibaan̄ ebi ekanin̄ge ugane ibe ekema ebi olom mè ebi bọn, ⁵ mè eketet lek kiban̄ ekaan̄, mè ekakibubat chieen̄, ire, ekeriọọn̄ ubọk ekpọ uwu, mè ekekaan̄ ata ejit, mè ekesiki ibot enyi ebi olom, inyi ene geege ikakọt ìtumu ijo ikọ ìkeme ikọ Awaji. ⁶ Ikeya si, jeen̄ ebi nsabọn irieen̄ ibe eketet lek kiban̄ ekaan̄. ⁷ Owu Taitọs, me oniin̄ geelek, luk ugwem eyi ebi ene mêkikpọ, mè ikikween̄ inu òfolek irọrọ ata inu. Me emen inu geelek okijeen̄, re ogwu atikọ, mè kirọ inyi eriọọn̄ ibe ke inu owu okijeen̄ îkup me uyọt. ⁸ Mgbọ geelek okijeen̄ inu, kitumu ikọ òtetet mun̄, eyi ebi ene kpebekọt imun̄ nrọ-nlọ geege me emen, inyi esip itet ebi ìkije ikeme owu, mè ema ekamun̄ ijo inu geege ebesa itumu ikeme eji. ⁹ Jeen̄ ebi ìrere usun̄ ibe ekesiki ibot enyi ebi nte uwu kiban̄ mgbọ geelek, mè ekerọ inu òbokibele ebi nte uwu kiban̄ ejit. Jeen̄ ema ibe ekakifọọk ebi nte uwu kiban̄ otu mgbọ ebi nte uwu kiban̄ ekitumu ikọ inyi ema, ¹⁰ mè ekakichiin̄ inu nte uwu kiban̄. Kpan̄asi ikeya, ema ekejeen̄ ibe ke ema mîgbe utoon̄-ejit me oniin̄ geelek. Sa me ikeyi, ugwem kiban̄ môkisa itọn̄ ijet ijejeen̄ eyi eji ekijeen̄ òfolek Awaji Ogwu Unyan̄a kiji, me emen inu geelek ema ekirọ. ¹¹ Mije, Awaji îra isan̄a atata nnwọn kan̄ isibi, Awaji ìbosa me lek atata nnwọn yi inyan̄a otutuuk ebilene isibi. ¹² Atata nnwọn yi si okijeen̄ eji ibe ejit ugwem ekariọọn̄ge Awaji, mè ejit si ijo ulọk eyi utop linyọn̄, mè eketet lek kiji ekaan̄, mè ekeluk ugwem òtatat mè ikinyi Awaji umin me linyọn̄ keyi. ¹³ Sa me ikeyi ke atata nnwọn yi okijeen̄ eji ibe ekeluk ugwem òtatat me mgbọ keyi eji ekupbe me ubelejit ikikpọ chieen̄ inunu eyi umin mè uja eyi ikpele Awaji kiji mè ogwu Unyan̄a kiji Jisọs Karais. ¹⁴ Ogwu Unyan̄a kiji Jisọs Karais ore ogwu òsasa ugwem kan̄ inyi mije kiji otutuuk, isasa ifaka eji isibi me emen otutuuk ijo irọrọ. Sa me ikeyi ke ọmọ ogwọk ogbogbo ene itana isun̄ inyi lek kan̄, inyi enere ebi kan̄ ebi ìkakaan̄ ikpele ulọk irọrọ ata inu mgbọ geelek. ¹⁵ Kijeen̄ ema otutuuk inu chi, mè kisa unye kwun̄ kubọk ogwu mkpulu tap ebi okijeen̄ inu efuuk me emen, mè kikan̄ inu nyi ema si mgbọ geelek ema ejebe ilọ. Kachieek ibe ene geege ikpọ owu chieen̄ isiki.

¹ Keek otutuuk ebi ntitiin̄ Awaji ibe ekesiki ibot enyi ebi ibot geelek ema ekupbe me irak, mè ekesiki ibot si enyi ebi ibot mkpulu eyi ido kiban̄. Tumu nyi ema ibe ekegban̄ utọn̄ enyi ebi ibot chi, mè ekekup me mbem-lek irọrọ inu geelek ònwọnwọn. ² Teme ema ibe ekatumu ene geege ìfiat, eluk me esuuk melek ene geelek. Keek ema si ibe ekekaan̄ ukarajit me emen inu geelek, mè ekesiki lek me atikọ me isi otutuuk ene. ³ Me mgbọ òraraka, eji me lek kiji si mîbubut, mè ikinye ibot. Ebi ene ekekifiaan̄ eji ifiin̄, eji ekekinin̄ usun̄ inyi utop linyọn̄ keyi mè ijo ulọk geelek òkup esese esese. Me etete mgbọ ya si, usen geelek, eji ekirọrọ ene nnaan̄, mè ikikeek ene ijo me ekarọge eji inu geege ìlọ. Mgbọ ya si, eji ekekikaan̄ njijọ ejit me lek ebi ene, mè ikicha ene. Ebi ene ekekicha eji si. ⁴ Ire, mgbọ mgbọ okembe, Awaji Ogwu Unyan̄a kiji onenisan̄a ata ejit kan̄ mè imumechieen̄ kan̄ isibi inyi eji, ⁵ mè inyan̄a eji. Unyan̄a yi înyan̄abe eji, ìkare mije owuwa ata inu eji erọbe. Îre sa me ejit nsan kan̄. Awaji ìnyan̄a eji inan̄a me lek igwọgwọk eyi Ekwukwu Mbuban ogwọkbe eji, mè isa me ikeya ikpọk eji iman ayaya, mè inyi eji ayaya ugwem. ⁶ Inan̄a me lek kè Jisọs Karais Ogwu Unyan̄a kiji, Awaji îchili ubọk inyi eji Ekwukwu Mbuban kan̄ ojot ojot. ⁷ Mije keyi, mgbọ Awaji owuwuuk lek isa me lek atata nnwọn kan̄ ifeme itip-oyerebet isan̄a eji me ibot, eji mîkaan̄ ikpọchieen̄ ibe ke eji mêkaan̄ ugwem ikakaan̄ge itata me irot. ⁸ Ikọ chi ntumube inyi owu ìre atalek atikọ. Eya orọ, tet otu nye jeen̄ inu chi, inyi ebi ìchechieek me lek Awaji ekesa me otutuuk ejit kiban̄ ekerọ ata inu mgbọ geelek. Inu chi înwọn enenen, mè inin̄ oruru inyi ene geelek. ⁹ Ire, san̄a lek kwun̄ me lek owuwa burubut ifan̄a, mè ibaak, mè ujọn̄ọ mfufuk owot iman ebi nte nte. Kakigọọk ìwut ifan̄a òfolek Ikan kè Mosis, mije, òjelek ifan̄a chi geelek ìre inu ikike ikasibige oruru geege. ¹⁰ Ire ikaan̄ ogwu òkitap icheche lek me emen ntitiin̄, taba ene ya ubọk me utọn̄ mgbọ ge, mè taba si òso mgbọ iba. Ire ene ya ìkagwu ikom, tele ọmọ, mè ikayaka ìgọọk enyi ìgbaan̄ ìrọ inu geege. ¹¹ Me atikọ, òjelek ene òkup ikeya îfiat isan̄a, mije, îriọọn̄ ibe ọmọ gwa òkirọ ijo inu, mè ikpọkpọ ikirọ si ifo isi. Sa me ikeyi, ọmọ gaalek îsa ubọk kan̄ itip lek kan̄ oyerebet. ¹² Mgbọ geelek nriabe Atemas mè ìre Taikikọs inu me lek kwun̄, gwat lek na namun̄ emi me Nikopolis, mije, ǹkiben me ejit ibe ke mâkup me ama ya me mgbọ utọọk. ¹³ Jenas ogwu usọ ikan, mè Apọlọs isibene ije kiban̄, mun̄ ibe ke otap ubọk inyi ema, inyi ema ekaan̄ inu geelek ema mêweekbe me oniin̄ ije kiban̄. ¹⁴ Jeen̄ ebi kiji geelek ibe ekesi ata ikwaan̄, mè ekesa me ikeya ekekaan̄ inorie mè inu geelek òkup ema me uyọt me usen me usen, mè ekaluk ugwem una ubọk ikwaan̄. ¹⁵ Otutuuk ebi melek n̄a ekupbe mîtọp owu amọn. Tọp otutuuk ebi unene kiji me emen ichechieek amọn nyi emi. Atata nnwọn eyi Awaji ikup inyi enyi otutuuk ene!