Ebi Rom

Ebi Rom

¹ Emi Pọọlu ogwu usun̄ kè Karais Jisọs, ogwu Jisọs ogwenbe ibe inire ogwu otuchieen̄ kan̄, mè isan̄a isun̄ esese ibe ikilook ata etip eyi Awaji, îre emi nge ikpa etip yi ijet enyi. ² Ata etip yi ke Awaji ochieek me use me otu ebi nriran kan̄ karake ukot ikaan̄, kubọk egebe me emen Ikpa Mbuban. ³ Ata etip yi ìre etip òfo me lek Gwun̄ kan̄, òrere Okaan̄ kiji Jisọs Karais. Me akpalek ebilene, ọmọ ìre gwun̄ owot iman kè Debit. ⁴ Awaji îjeen̄ ibe ke ọmọ ore Gwun̄ Awaji, sa me unye eyi Ekwukwu Mbuban, mè ijojomo me mkpa eyi ọmọ ojomobe. ⁵ Sa me lek kan̄ ke Awaji onyi eji atata nnwọn, mè igwen eji ibe eji enere ebi otuchieen̄, mè esa ata etip esi elook ebi ekarege ebi Ju, mije erieen̄ kan̄, inyi ema enechieek me lek kan̄, mè esiki ibot enyi ọmọ. ⁶ Enyi ebi Rom si me otu ifuk ebi Awaji ogwenbe ibe enekana ebi eyi Jisọs Karais. ⁷ Emi ǹkige ikpa etip yi ijet enyi otutuuk ebi ìkup me Rom, enyi ebi Awaji omabe, mè igwen ibe enere ebi kan̄. Atata nnwọn mè esuuk eyi ònan̄a me ubọk Awaji ogwu òrere Nte kiji, mè eyi ònan̄a me ubọk Okaan̄-ene Jisọs Karais ikup inyi enyi. ⁸ Me adasi irek, ntọn̄ Awaji n̄a me ibot kinyi, sa me erieen̄ kè Jisọs Karais, mije, ukpatu òfolek ichechieek kinyi òkitaan̄ ikana ere me linyọn̄. ⁹ Awaji ogwu nkisa otutuuk ejit n̄a isi ikwaan̄ inyi, ikwaan̄ eyi ilolook ata etip eyi ogwu Gwun̄, Awaji ya ore ogwu ata-ikọ inyi emi. ¹⁰ Awaji îriọọn̄ ibe ke nkikeek enyi me uriaak n̄a mgbọ geelek. Ǹkiriaak si uriaak mgbọ keyi ibe, ire ineme Awaji, mè isan̄a irek isibi inyi emi, mè ǹnu ǹnemkpọ enyi. ¹¹ Ǹkiweek inunu inimun̄ enyi, inyi eji egbaan̄ ekaan̄ usini uche eyi Ekwukwu Mbuban, mè enyi esa me ikeya ekeke enye. ¹² Eyi ìsibi ibe, ire nnu, ke ichechieek kinyi môtap emi efuuk me emen, eyi n̄a si oyayaka itap enyi efuuk me emen. ¹³ Bọn Nte n̄a, ǹkiweek ibe enyi eriọọn̄ ibe ke nkitọt owuwa mgbọ inunu inikpọ enyi, inyi ǹkọt ǹrọ mè owuwa ene me etete kinyi egwu ekom echieek me lek kè Jisọs Karais, kubọk nrọbe me esese ofifi ido ebi kpere ebi Ju. Ire, mege inire mgbọ keyi, ìkire nsitọt, inu ge îra ikput emi, mè irọ inyi nkanu. ¹⁴ Emi nkaan̄ otutuuk ene urieek itutumu ikọ Awaji inyi ema, mè ìre ebi Giris, mè ìre ebi kpere ebi Giris, mè ìre ebi ìriọọn̄ inu, mè ìre ebi kperiọọn̄ inu. ¹⁵ Îre mije keyi ke îkup emi me uyọt enenen isasa ata etip ya inilook enyi ebi ìkup me Rom. ¹⁶ Esip geege ìkatet emi ilolook ata etip yi, mije ọmọ ore unye eyi Awaji okisa inyan̄a ebi geelek ìchechieek. Edasi ilook ebi Ju ata etip yi, sabum enilook si ebi ekarege ebi Ju. ¹⁷ Mije, ata etip yi okijeen̄ ubọk ene obosa ire ogwu ata irọrọ inan̄a me ubọk Awaji. Ata irọrọ keyi ìkinan̄a me lek ichechieek, bene me ibebene kan̄ re itata kan̄. Ikeya si ke ege me emen Ikpa Mbuban ibe, “Ogwu ata irọrọ ìboluk ugwem inan̄a me ichechieek kan̄.” ¹⁸ Awaji òkinaan̄ ejit me emen inyọn̄ ikeme ebilene mije ema ekirọ ijo inu, kpekimin Awaji, melek si mije ema ekisa ijo inu kiban̄ ikana ichit atikọ eyi Awaji. ¹⁹ Awaji ìkinaan̄ ejit inyi ema, mije, otutuuk inu ògbegbe ibe eriọọn̄ òfolek Awaji îsibi utoon̄ me isi kiban̄. Awaji me lek kan̄ osan̄a inu chi isibi ijeen̄ ema. ²⁰ Karake Awaji orombe linyọn̄, ebilene mîmun̄ inu Awaji okaan̄be me ugwem kan̄ echi chieen̄ ene ìkpokọt imun̄. Inu chi ìre unye Awaji eyi òkukup ire mgbọ ikakaan̄ge itata, mè òjelek ugwem Awaji okaan̄be. Ebilene esa me lek inu Awaji orombe igobo inu chi itet. Mije inu chi ema eriọọn̄be, ema kpekaan̄ inu geege ebetumu isa inyan̄a lek kiban̄. ²¹ Mije, ema mîriọọn̄ ogwu Awaji orebe isan̄a, mè ijit imimin ọmọ kubọk Awaji, mè ijit si ibebe ọmọ: “Owu onirọ.” Kpan̄asi ikeya, ifuk-ibot kiban̄ ìkpọkpọ iwuwọlọ isan̄a kpai, ejit burubut kiban̄ okpọkpọ idun. ²² Ema ekimọnọ lek kiban̄ kubọk ebi ìriọọn̄ inu, ire ema mîkana ndide. ²³ Kpan̄asi ema ebekitọbọ ebum inyi Awaji ogwu òkakaan̄ umin, ogwu ìkakikwu, ema eyaka ikisi itọbọ ebum inyi mkpọmfaka erombe me mbet ebilene òkikwukwu, mè echi òbet lek ofut, mè anam, mè inu òkinyinyọnọ me ijọn̄. ²⁴ Mije keyi, Awaji ojijit ema itele, inyi ema ekeluk ugwem egọọk ijo ulọk geelek òkup ema me ejit, mè ekenyam lek kiban̄ enyi ten̄ten̄ ugwem barabat me etete kiban̄, mè ekesa lek kiban̄ erọ inu ochak. ²⁵ Ema mîjit atikọ eyi Awaji, mè iyaka inikichieek ikọ ataak. Ema ekitọbọ ebum, mè ikisi ikwaan̄ inyi inu erorom, kpan̄asi ebekitọbọ ebum mè ikisi ikwaan̄ inyi ogwu òrorom inu chi geelek, ogwu itọn̄ okupbe inyi ire mgbọ ikakaan̄ge itata. Ikup ikeya! ²⁶ Mije keyi ke Awaji ojit ema itele me emen ijo ulọk kiban̄. Ulọk ilaak îtap ebibaan̄ kiban̄ iraak. Ema mîtele igọgọọk ebirieen̄ ilaak, ubọk Awaji esun̄be, mè iyaka ikisi igọọk ebibaan̄ ogbo kiban̄ ilaak. ²⁷ Ikeya si ke ebirieen̄ kiban̄ etele igọgọọk ebibaan̄ ilaak, ubọk Awaji osun̄be, mè iyaka ikibumu ejit inin̄ lek ebirieen̄ ogbo kiban̄ ikigọọk ilaak, mije ijo ulọk kiban̄. Inu esip! Mije ten̄ten̄ ugwem barabat chi ema ekiluk melek ebirieen̄ ogbo kiban̄, ema mîbọkọ si mkpukpe ògbegbe nlilọ ugwem kiban̄. ²⁸ Ofifi si, ubọk ebilene emọnọbe ibe ke irọriọọn̄ Awaji ìkakup me uyọt, Awaji îjit ema itele me emen njijọ wọlọwọlọ ekiket, inyi ema ekerọ inu ikagbege ibe erọ. ²⁹ Inu ikpak, mè ijo inu geelek, mè chieen̄ ile, mè wọlọwọlọ ugwem geelek, mè njijọ ejit, mè ikpakpan̄ ene, mè ibaak, mè ataak, mè ejit mba ìjojot emen kiban̄. Ema ìre ebi ìkikpa ene, ³⁰ mè ebi ìkifiat ene, mè ebi ìchacha Awaji, mè ebi unyechieen̄, mè ebi ugumulek, mè ebi otu ile. Ema ekisan̄a owuwa aya oniin̄ ekisa irọ ijo inu isibi, kpekilibi nte kiban̄ mè nga kiban̄. ³¹ Ema kpekaan̄ ifuk-ibot geege, kpekaan̄ ichechieek geege me lek kè Karais, kpekisun̄ ikọ otu kiban̄ geege, kpekito ene nsan kubọk ge. ³² Ubọk geelek ema eriọọn̄be unen ikan Awaji otapbe ibe ke ebi geelek ìkirọ inu chi ebekwukwu, ema ekpọkpọ ikirọ si inu chi ifo isi, mè ikirọ ebi geelek ìkirọ ijo inu chi inye.

¹ Eya orọ, owu ogwu òkifieek ofifi ene ikọ, kpunu inu geege obokọt itumu isa inyan̄a lek kwun̄. Mije, mgbọ geelek ofieekbe ene ikọ, mè ikirọ si inu ya osabe ifieek ene ikọ, owu òkitip lek kwun̄ oyerebet. ² Eji mîriọọn̄ ibe ke oyerebet Awaji ofieekbe inyi ebi ìkirọ òjelek ijo inu chi ìre unen oyerebet, mè ire si oyerebet atikọ. ³ Mgbọ owu ogwu ebilene ikike okifieek oyerebet inyi ebi ofifi ife, mè ikirọ si òjelek ijo inu ife cha ekirọ, ìre owu òkikeek ibe ke owu mônwọnọ oyerebet Awaji? ⁴ Sa ìre owu òkikpọ Awaji isiki chieen̄ mije îkaan̄be ikpele ata ejit, mè ujọn̄ọ ukarajit, mè ikime inu ebilene ekirọ? Ìre owu òkariọọn̄ ibe ke Awaji ìkikaan̄ ata ejit me lek kwun̄, inyi owu ògwu òkom òsibi me emen ijo kwun̄? ⁵ Ire, owu òkpọkpọ itet ejit inye, òkachieek inwenwene. Sa me ikeyi, owu gwa òkititiin̄ unaan̄-ejit Awaji ikeme me ibot kwun̄ iban mgbọ Awaji môjeen̄be ojot ojot unaan̄-ejit kan̄, me usen ìbosibi oyerebet me ibot ebilene. Oyerebet kan̄ ìre unen oyerebet. ⁶ Awaji ìbokpe ene geelek mkpukpe igọọk me lek ikwaan̄ ene ya osibe. ⁷ Ebi ìkpọkpọ itet lek inye ikirọ ata inu ikisa iweek itọn̄ mè umin ònan̄a me ubọk Awaji, mè ikiweek si inyi ema ekakwu, Awaji mônyi ema ugwem ikakaan̄ge itata. ⁸ Ire, ebi geelek ìkiweek inu inyi lek kiban̄ gaalek, mè ikijit atikọ eyi Awaji, mè ikirọ ijo inu geelek, Awaji mônaan̄ ejit enenen inyi ema, mè irọ ema inu me lek uyọt uyọt. ⁹ Ufialek mè ujat môkup inyi otutuuk ebi geelek ìkirọ ijo inu. Uyọrọlek yi môdasi ibene me lek ebi Ju, sabum ònore lek ebi kpere ebi Ju. ¹⁰ Ire, ebi geelek ìkirọ ata inu, Awaji mônyi ema umin, mè itọn̄, mè esuuk. Ìbodasi ibene me lek ebi Ju, sabum ònore lek ebi kpere ebi Ju. ¹¹ Mije, Awaji ìkakilibi ene chieen̄. ¹² Ebi geelek ekakaan̄ge Ikan kè Mosis, ire ema irọ ijo inu, ema mêkwaan̄ mije ijo kiban̄. Awaji ìkposa Ikan kè Mosis itip ema oyerebet. Ire, ebi geelek ìkakaan̄ Ikan kè Mosis, mè ikirọ ijo inu, Awaji ìbosa Ikan kè Mosis itip ema oyerebet. ¹³ Mije, ìkare ebi ìnọnọ Ikan ya gaalek ere ebi ata irọrọ me isi Awaji. Îre ebi ìnọnọ Ikan ya, mè ikirọ inu Ikan ya otumube ke Awaji omọnọ kubọk ebi ata irọrọ. ¹⁴ (Me atikọ, ebi kpere ebi Ju kpekaan̄ Ikan kè Mosis. Ire, mgbọ geelek ema esabe me ifuk-ibot kiban̄ ikirọ inu òlilibi itat me lek Ikan ya, ema ekijeen̄ ibe ke ema mîkaan̄ ikan me emen kiban̄, ubọk geelek ema kpekaan̄ Ikan kè Mosis. ¹⁵ Ugwem kiban̄ ìkijeen̄ ibe ke mîge inu geelek Ikan kè Mosis otumube me ejit kiban̄. Mije, ejit kiban̄ îkifieek ema ikọ mgbọ geelek ema ekirọ inu òlọlọ, mè ikirọ ema inye mgbọ geelek ema ekirọ inu òtatat.) ¹⁶ Eya orọ, me Usen Oyerebet ya, Awaji môsa me ubọk kè Jisọs Karais isibi oyerebet me ibot ebilene igọọk me lek nlelet inu geelek òkup ema me emen ejit. Ikeyi ke ata etip eyi nkilook okitumu. ¹⁷ Mgbọ keyi, owu òkigwen lek kwun̄ ogwu Ju, mè ikisa Ikan kè Mosis itoon̄ ejit, mè ikigugo lek ibe ke owu melek Awaji ìre òma; ¹⁸ owu oriọọn̄ inu geelek Awaji okiweek, mè isa me lek Ikan eyi ejeen̄be owu iriọọn̄ inu echi ònwọnwọn ichit, mè ikilibi igọọk echa; ¹⁹ owu oriọọn̄ ijaan̄ lek ibe ke ìre owu okijeen̄ ebi ǹnàan̄ oniin̄, mè ire utoon̄ inyi ebi ìkup me emen udun, ebi kperiọọn̄ Awaji, ²⁰ mè ire si ogwu nteme inyi ebi ekakaan̄ge iriọọn̄-inu, mè ire ogwu ijejeen̄ inyi asasa nsabọn. Me emen Ikan kè Mosis, enyi mîkaan̄ ojot ojot ifuk-ibot, mè ojot ojot atikọ. ²¹ Ire ikeya, me mgbọ keyi, owu ogwu òkijeen̄ ebi ofifi ife inu, ìre keke orọ owu òkakijeen̄ lek kwun̄ inu? Ǹdo owu nu! Owu ogwu òkitumu ikọ Awaji ibe mè ebi ene ekachiin̄ inọ, ìre owu òkakichiin̄ inọ? ²² Owu ogwu òkitumu ibe mè ekakirọ ugan-nwa, ìre owu òkakirọ ugan-nwa? Owu ogwu òchacha mkpọmfaka, ìre owu òkachiin̄ inu me isi mkpọmfaka? ²³ Owu ogwu òkisa Ikan kè Mosis igugo lek, ìre owu òkakirọn̄ Ikan ya, mè ìsa esip ìjet Awaji? ²⁴ Îre mije keyi ke ege me emen Ikpa Mbuban ibe, “Mije kinyi ebi Ju ke ebi ekarege ebi Ju ekitumu erieen̄ Awaji ifiat.” ²⁵ Ire owu okisun̄ Ikan kè Mosis, ifefieek afi eyi ofieekbe îkaan̄ oruru. Ire, ire owu òkakisun̄ Ikan ya, ifefieek afi eyi owu ofieekbe ìkakaan̄ oruru, owu òyaka inikup kubọk ogwu ikafieekge afi. ²⁶ Ire ebi ekafieekge afi irọ inu Ikan kè Mosis obe erọ, mêmọnọ ema kubọk ebi ìfefieek afi. ²⁷ Me atikọ, ebi ekafieekge afi ebi ìrọrọ inu Ikan kè Mosis obe erọ, mêkeke ata-ikọ ikeme enyi ebi ìfefieek afi, mè ikaan̄ si Ikan kè Mosis eyi egege isibi, mije enyi ekifiat Ikan cha. ²⁸ Ata ogwu Ju ìkare ogwu òrere ogwu Ju me akpalek gaalek. Ikeya si, ata ifefieek afi ìkare inu eyi akpalek, eyi ebilene ekimun̄ gaalek. ²⁹ Ire, ata ogwu Ju ìre ogwu òrere ogwu Ju ire emen ejit kan̄. Ikeya si, ata ifefieek afi ìre inu eyi Ekwukwu Mbuban okirọ me emen ejit ene. Ìkare Ikan egege isibi okifieek ene òjelek afi keya. Mije keyi, Awaji me lek kan̄ ore ogwu òbotọn̄ òjelek ogwu òkup ikeya, ìkare ebilene ebetọn̄.

¹ Ire ikeya, ìre keke ke irere ogwu Ju osa inwọn igak ekarege ogwu Ju? Sa ìre keke ke ifefieek afi osa inwọn igak ekafieekge afi? ² Me atikọ, irere ogwu Ju îkaan̄ owuwa oruru me agan̄ geelek. Me adasi irek, îre ebi Ju ke Awaji osa ikọ kan̄ itap me ubọk. ³ Ire usini kiban̄ kpekeke inye me emen inu ema echieekbe me lek, ìre eya môkọt irọ inyi Awaji ikakeke ìnye me emen use îchieekbe ema? ⁴ Iin̄-iin̄, eya ìkpokọt irọ! Awaji ìkpolọlọ irere ogwu atikọ, ìrere ibe ke otutuuk ebilene ìre ebi ataak, kubọk egebe me Ikpa Mbuban ibe, “Sa me ikeyi, ire otumu ikọ, ikọ kwun̄ ìbore atikọ. Ire osi oyerebet, oyerebet ìbonwọnwọn owu.” ⁵ Ire ijo inu kiji irọ inyi ata irọrọ eyi Awaji isibi utoon̄ ijaan̄, ìre keke ke eji ebetumu? Ìre eji mêtumu ibe ke unaan̄-ejit Awaji onaan̄be inyi eji ìkatat? Ifuk-ibot ebilene ke nkisa igbini ikọ yi. ⁶ Iin̄-iin̄, ìkare ikeya! Mije, ire Awaji ìkare ogwu ata irọrọ, ìre ìbojeje ikọt isibi oyerebet me ibot ebi linyọn̄? ⁷ Ofifi ene môkọt igbini si ibe, ire ugwem ataak kan̄ itap ubọk irọ inyi atikọ Awaji isibi utoon̄, mè irọ inyi Awaji isa me ikeya ibọkọ itọn̄, ìre Awaji ìjeje ikitip ọmọ oyerebet si ibe ke ọmọ ìre ogwu ijo? ⁸ Mebe ke ìre ikeya ke îkup, inu eji mekijeen̄ ìre, mè eji otutuuk ene ekpọkpọ ekerọ ijo inu, inyi ata inu ikinu. Ire, ìkare ikeya ke eji ekijeen̄. Me atikọ, usini ene mêkitumu eji ifiat, mè ikikpa inyi ebi ene ibe ke eyiyi ore inu eji ekijeen̄. Itip-oyerebet eyi Awaji obotip ema îgbe. ⁹ Mgbọ keyi, ìre keke ke eji ebeyaka itumu? Ìre eji ebi Ju mînwọn igak ebi ofifi ife? Eji kpenwọn igak ema kubọk ge! Eji mîwuuk lek ijeen̄ ibe ke otutuuk ene ìre ìkike, ebi Ju mè ebi kpere ebi Ju, ema otutuuk ìre ebi ijo. ¹⁰ Mîge si me Ikpa Mbuban ibe, “Kpunu ene geege òrere ogwu ata irọrọ, kpunu kubọk ge! ¹¹ Kpunu ene geege òkikọt igobo inu itet, kpunu si ene geege òkiweek Awaji. ¹² Otutuuk ene mîtele Awaji, mè ifiat isan̄a, kpeyaka ikup me lek inu geege. Kpunu ene geege òkirọ inu òtatat, kpunu kubọk ge! ¹³ Ikọ òkisibi ema me emen ebek ìkijọ kubọk udọn̄ ufuun̄ ekachitge otu. Ema ekisa alọm kiban̄ itumu ikọ ifiaan̄ ene ifiin̄. Ikọ òkinan̄a ema me otu isibi ìkifiat ene kubọk iwot òkup me otu ijo ulu. ¹⁴ Ijo ikọ, mè ogbo ojot ema otu. ¹⁵ Ema kpekifiat mgbọ isasan̄a ugwem ene. ¹⁶ Ere geelek ema erebe, ema ekifafiat inu igwook, mè ikitap ebi ene me ufieejit mè ichep. ¹⁷ Ema kperiọọn̄ inu esuuk orebe. ¹⁸ Ukpook Awaji geege kpunu me emen kiban̄.” ¹⁹ Mgbọ keyi, eji mîriọọn̄ ibe, inu geelek Ikan kè Mosis okitumu, ke ìkitumu inyi ebi ìkup me irak Ikan ya, inyi otu ebilene ichit, mè ekakaan̄ inu ebesa itumu inyan̄a lek kiban̄. Sa me ikeyi, ema mêriọọn̄ ibe ke otutuuk ebi linyọn̄ ekup me irak oyerebet Awaji. ²⁰ Kpunu ene geege òbokọt ikana ogwu ata irọrọ me isi Awaji inan̄a me isusun̄ Ikan kè Mosis. Kpan̄asi ikeya, inu Ikan kè Mosis okirọ ìre irọrọ inyi ene iriọọn̄ ibe ke ọmọ ìre ogwu ijo me atikọ. ²¹ Me mgbọ keyi, Awaji îjeen̄ eji oniin̄ eyi kan̄ eyi ene môsabe ikana ogwu ata irọrọ me isi Awaji. Oniin̄ ata irọrọ keyi ìkagbaan̄ me lek Ikan kè Mosis. Ikan kè Mosis mè inu ebi Nriran egebe îrọ oniin̄ ata irọrọ keyi inye. ²² Awaji ìkirọ mè ene ikana ogwu ata irọrọ me isi kan̄ inan̄a me lek ichechieek ene ya ochieekbe me lek kè Jisọs Karais. Awaji ìkirọ inu yi inyi otutuuk ebi geelek ìchechieek me lek kè Jisọs Karais, mè ìre ebi Ju, mè ìyaka ire ebi kpere ebi Ju. Kpunu esese geege òkukup. ²³ Mije, otutuuk ene mîrọ ijo inu, kpekọt ikaan̄ umin mè uja eyi ònan̄a me ubọk Awaji. ²⁴ Ire, bak me lek atata nnwọn eyi Awaji onyibe eji me ikike, Awaji ìkayaka ìtip eji oyerebet, mije, Karais Jisọs îfaka eji isibi me emen itip-oyerebet Awaji. ²⁵ Awaji ìsasa Karais inyi ibe inikwu mkpa me ibot ebilene kubọk ngwugwa esabe isuuk ọmọ ejit, inyi ọmọ itele ijo inyi ebi geelek ìchechieek me lek kè Karais. Awaji ìrọ inu yi isasa ijeen̄ ibe ke ọmọ ìre ogwu ata irọrọ. Mije, Awaji îsa me ujọn̄ọ ukarajit kan̄ ikpọ chieen̄ ilọ me lek ijo inu ebilene erọbe me mgbọ òraraka, ìkasulu ema osusut. ²⁶ Awaji ìrọ inu yi, inyi ọmọ isa ijeen̄, me mgbọ keyi, ibe ke ọmọ ìre ogwu ata irọrọ, mè ogwu òkirọ unen, mè ire si ogwu òkisan̄a itip-oyerebet isan̄a me ibot ebi geelek ìchechieek me lek kè Jisọs. ²⁷ Ire ikeya, inu eji ekisa ìgugo lek ya ìkup me owa? Ìkayaka ìkup! Ìre keke orọ mè ikayaka ìkup? Ìre mije eji esun̄be Ikan kè Mosis? Iin̄-iin̄ ìkare! Îre mije eji echieekbe me lek kè Jisọs Karais. ²⁸ Mije, eji ekitumu ibe ke Awaji ìkisan̄a ene itip-oyerebet me ibot sa me ichechieek, ìkare sa me isusun̄ Ikan kè Mosis. ²⁹ Ìre Awaji ìre Awaji ebi Ju gaalek? Ìre ìkare ọmọ yaage ore Awaji ebi kpere ebi Ju? Iin̄, me atikọ, ọmọ yaage ore si Awaji ebi kpere ebi Ju, ³⁰ mije, Awaji ge gaalek okup. Ọmọ si obosan̄a itip-oyerebet isan̄a me ibot ebi Ju, òrere ebi efieekbe afi, sa me lek ichechieek ema echieekbe me lek kè Jisọs Karais, mè isan̄a si itip-oyerebet isan̄a me ibot ebi kpere ebi Ju sa me lek ichechieek yaage si. ³¹ Ìre ìsibi ibe ke eji mîsa ichechieek yi inigwak Ikan kè Mosis isan̄a? Iin̄-iin̄, ìkare ikeya. Kpan̄asi ikeya, eji ekirọrọ inyi Ikan kè Mosis ikeke inye.

¹ Mgbọ keyi, ìre keke ke eji ebekọt itumu òfolek kè Ebereham nte nte kiji ukot ikaan̄? Ìre keke ke ọmọ me lek kan̄ oweek isibi? ² Mebe ke Ebereham ìkana ogwu ata irọrọ me isi Awaji sa me inu îkọtbe irọ, kè òkaan̄ inu mokọtbe isa ikigugo lek. Ire, gogolek keya kpomore me isi Awaji. ³ Ìre keke ke Ikpa Mbuban otumu òfolek kè Ebereham? Ikpa Mbuban ìbe, “Ebereham îchieek ikọ Awaji otumube, Awaji osasa mije keya ifuk ọmọ kubọk ogwu ata irọrọ.” ⁴ Ogwu òsi ikwaan̄ îkibọkọ mkpukpe ubọk ikwaan̄ kan̄. Kpekicheche mkpukpe ya inyi ọmọ kubọk uche. Ekikpekpe mkpukpe ya inyi ọmọ mije ikwaan̄ îsibe. ⁵ Ire, ìkakup ikeya me lek ogwu òchechieek me lek Awaji ogwu òkirọ inyi ebi ijo ekana ebi ata irọrọ. Ubọk geelek ene ya ikarọge ikwaan̄ geege, Awaji ìkisa me ichechieek ene ya ifuk ene ya kubọk ogwu ata irọrọ, ìkare me lek ikwaan̄ ene ya osibe. ⁶ Ikọ yaage si ke ogwu ubọọn̄ Debit otumu mgbọ îtumube ikọ òfolek ugbana òkukup inyi ene geelek Awaji ofukbe kubọk ogwu ata irọrọ me oniin̄ eyi ikagbaan̄ge me lek isisi ikwaan̄. ⁷ Debit ìtumu ibe, “Ugbana ikup inyi ebi Awaji otelebe nrọ-nlọ kiban̄ inyi, mè ichit ijo inu kiban̄! ⁸ Ugbana ikup inyi ene ya ogwu Okumugwem ìkpoyakabe ifuk nrọ-nlọ kan̄ itoon̄ me ibot.” ⁹ Ugbana eyi ogwu ubọọn̄ Debit otumube ikọ òfolek yi, ìre ìkup inyi ebi efieekbe afi gaalek? Sa ìre îre si lek ebi kpefieek afi? Eji mîwuuk lek ikitumu me ibe ke Awaji ìfuk Ebereham kubọk ogwu ata irọrọ mije ichechieek kan̄. ¹⁰ Ìre mgbọ owa ke Awaji ofuk Ebereham kubọk ogwu ata irọrọ? Ìre mgbọ îfieekbe afi isan̄a, sa ìre sabum înifieek afi? Ìkare mgbọ îfieekbe afi isan̄a. Inu yi îrọ sabum înifieek afi. ¹¹ Eya orọ, efieek Ebereham afi kubọk iman̄ oriọọn̄ isasa ijeen̄ ibe ke ọmọ îkana ogwu ata irọrọ. Ọmọ ìkana ogwu ata irọrọ ya mije ichechieek îchieekbe me mgbọ ikafieekge afi nu. Mije keyi, Ebereham ìre ute inyi otutuuk ebi ìchechieek me lek Awaji, mè isa me ikeya ikana ebi ata irọrọ, ubọk geelek kpefieek ema afi. ¹² Ebereham ìre si nte nte otutuuk ebi ìfefieek afi mè ikaan̄ si ichechieek igbaalek ifefieek afi. Ìkare ebi ìfefieek afi gaalek. Îre ebi ìfefieek afi mè ikaan̄ si ichechieek ya eyi Ebereham nte kiji okaan̄be sabum înifieek afi. ¹³ Ofifi si, mgbọ Awaji ochieekbe use ibe ke ọmọ môsa otutuuk linyọn̄ inyi Ebereham mè bọn owot iman kan̄ me irot, ìkare mije Ebereham osun̄be Ikan kè Mosis. Îre mije Ebereham ochieekbe me lek Awaji, mè isa me ikeya ikana ogwu ata irọrọ. ¹⁴ Mije, ire ke ìre ebi ìsusun̄ Ikan kè Mosis ebekaan̄ linyọn̄ me irot, ìsibi ibe ke ichechieek me lek Awaji ìre inu ikike ikakaan̄ge oruru, use eyi Awaji ochieekbe ya si ìkakup me lek inu geege. ¹⁵ Mije, bak me lek ebilene kpekikọt isun̄ otutuuk Ikan kè Mosis, Ikan cha ìkisa unaan̄-ejit Awaji inu. Ire, ere ikan ikakupge, kpekirọn̄ ikan. ¹⁶ Eya orọ, use Awaji ochieekbe ya ìkinu inan̄a me ichechieek, inyi ije me atata nnwọn Awaji gaalek. Use ya si ìkup inyi otutuuk bọn owot iman kè Ebereham. Ìkakup ìnyi ebi ìkisun̄ Ikan kè Mosis gaalek, ìkup si inyi ebi ìkakaan̄ òjelek ichechieek kè Ebereham. ¹⁷ Ikeyi ke ege me Ikpa Mbuban ibe, “Nrọ owu ute inyi owuwa ido.” Ebereham ìre nte kiji me isi Awaji ogwu ọmọ me lek kan̄ si ochieekbe me lek, Awaji ogwu òkitap ugwem me emen ebi ìkwukwu. Ọmọ si okisa ikọ otu irom inu isibi me ere inu kpunube. ¹⁸ Me ere kpunube ikpọchieen̄ geege, Ebereham osasa me ikpọchieen̄ ichieek ikọ Awaji otumube, mè inan̄a me ikeya ikana ute inyi owuwa ido. Ike egebe me Ikpa Mbuban, Awaji ìtumu inyi Ebereham ibe, “Ikeya ke bọn owot iman kwun̄ ebewa ikup.” ¹⁹ Mgbọ Ebereham okikup ikpọ use ya, îriọọn̄ ibe, mije ọmọ okanbe iso efit acha ge, ke akpalek kan̄ îwọ ikup kubọk eyi nkwukwu ene, mè iriọọn̄ si ibe, mije ukan, ke owot kè Sera nwa kan̄ si îwọ ikup kubọk eyi nkwukwu ene. Ire, ìkachieek ibe ichechieek kan̄ iwọ. ²⁰ Ìkakaan̄ si ejit iba me lek use Awaji ya, kubọk ogwu una ichechieek. Kpan̄asi ikeya, ìtetet lek inye me emen ichechieek kan̄, mè isa itọn̄ inyi Awaji, ²¹ mije, îriọọn̄ ijaan̄ lek ibe ke Awaji îkaan̄ unye isasa irọ use ya îchieekbe ọmọ iso. ²² Eyi ke Awaji osa ifuk Ebereham kubọk ogwu ata irọrọ. ²³ Usem ya egebe ibe, “Eyi ke Awaji osa ifuk ọmọ kubọk ogwu ata irọrọ,” kpege ibak Ebereham gaalek. ²⁴ Ire, usem ya ìkup inyi eji si ebi Awaji obofuk kubọk ebi ata irọrọ, eji ebi ìchechieek me lek kan̄, ọmọ ogwu òjojomo Okaan̄ kiji Jisọs Karais me mkpa. ²⁵ Mije, Awaji ìsa Jisọs inyi ibe inikwu mkpa mije ijo inu kiji, mè iyaka ijomo ọmọ me mkpa, inyi iniben itip-oyerebet isan̄a me ibot kiji.

¹ Eya orọ, mije Awaji ofukbe eji kubọk ebi ata irọrọ sa me ichechieek, eji mîkup me esuuk melek Awaji inan̄a me lek Okaan̄ kiji Jisọs Karais. ² Sa me lek kan̄, ogwu eji echieekbe me lek, ke eji ekaan̄ uche me lek atata nnwọn eyi eji ekupbe me emen mgbọ keyi. Eji mîbele ejit enenen, mije, eji mîkaan̄ ikpọchieen̄ ibe ke eji mêgọọk ikaan̄ uche me lek umin mè uja eyi Awaji. ³ Ìkare eya gaalek. Eji ekibele ejit si me emen ufialek eji ekibọkọ, mije, eji mîriọọn̄ ibe ke ufialek chi ìkijeen̄ eji ubọk ekikat ejit. ⁴ Ukarajit okekirọ inyi eji ekeluk ata ugwem eyi Awaji obọkọbe itap. Ata ugwem eyi Awaji obọkọbe itap okekinyi eji ikpọchieen̄. ⁵ Ikpọchieen̄ òkup ikeyi ìkakifiin̄ ene ìtele, mije Awaji înyi eji imumechieen̄ kan̄ imin enenen me emen ejit kiji. Imumechieen̄ yi ìje me ubọk Ekwukwu Mbuban ogwu Awaji ochebe inyi eji. ⁶ Mije, mgbọ mgbọ Awaji okembe, mgbọ eji ekakaan̄ge unye geege isasa inwọnọ unaan̄-ejit Awaji, Karais onunu inikwu mkpa mije kiji ebi ìkirọ ijo inu. ⁷ Ìkiyọyọt enenen sabum ene ònokwu mkpa me ibot ogwu ata irọrọ. Ire, usini mgbọ, ene ge môkọt ichieek ikwukwu mkpa me ibot ogwu ata ene. ⁸ Ire, Awaji îjeen̄ imumechieen̄ kan̄ me lek kiji me oniin̄ òsisibi esese. Mije, mgbọ eji ekupbe me emen ijo inu kiji ke Karais okwu mkpa me ibot kiji. ⁹ Me mgbọ keyi, mije mkpa kan̄, Awaji îben itip-oyerebet isan̄a eji me ibot. Eyi ògak eya ìre ke eji mênwọnọ unaan̄-ejit Awaji sa me lek kè Karais. ¹⁰ Mije, ire Awaji isa mkpa ogwu Gwun̄ itap esuuk me etete kan̄ melek kiji me mgbọ eji erebe ebi ochicha kan̄, me mgbọ keyi eji ekanabe ebi òma melek kan̄, ọmọ ìkpolọlọ inyanyan̄a eji isibi mije ugwem Gwun̄ kan̄ ojomobe me mkpa iniluk. ¹¹ Ire, ìkayaka me ikeya gaalek. Eji mîbele ejit mgbọ keyi eji melek Awaji ekigbaan̄ inu irọ inan̄a me lek Okaan̄ kiji Jisọs Karais, ogwu òrọrọ inyi eji enekana ebi òma melek Awaji. ¹² Ijo inu ìnan̄a me lek ene ge inin̄ linyọn̄. Mkpa onanan̄a me lek ijo inu ya înin̄ si linyọn̄. Ikeya ke mkpa osa inu inyi otutuuk ebilene, mije otutuuk ebilene mîrọ ijo inu. ¹³ Mije, sabum eninyinyi Ikan, ijo inu òwa me linyọn̄. Ire, ire kpunu ikan, kpekifuk ijo inu ene okirọ. ¹⁴ Ire, mkpa îkpan̄ ene me linyọn̄ keyi bene me ukot kè Adam na re ukot kè Mosis, mè ikpan̄ ire lek ebi ekarọge òjelek ijo inu Adam orọbe mgbọ îrọn̄be ikan Awaji. Adam ìkup kubọk ogwu esabe itọ me lek ene ya ogwu òbonunu, òrere Jisọs Karais. ¹⁵ Ire, Adam mè ogwu òbonunu ya kpere ìkike, mije, uche Awaji onyibe me ikike ìkakup kubọk nrọ-nlọ kè Adam. Iin̄, nrọ-nlọ eyi ene ge gaalek, òrere Adam, îsa mkpa ijet owuwa ene. Ire, atata nnwọn eyi Awaji melek uche Awaji eyi ònan̄a me lek atata nnwọn eyi ogwu ene ge ya, òrere Jisọs Karais, môso ire lek otutuuk ene igak ikeya. ¹⁶ Ofifi si, uche Awaji onyibe me ikike ìkakup kubọk mkpukpe ijo inu eyi ene ge, òrere Adam, orọbe. Oyerebet ìnu mije ijo inu ge gaalek, mè isa itip-oyerebet igbaalek inu. Ire, uche Awaji ìnu me mgbọ owuwa ebi ene erọbe ijo inu, mè iniben itip-oyerebet isan̄a ebilene me ibot. ¹⁷ Îre mije ijo inu eyi ene ge gaalek orọbe ke mkpa onan̄a me ibot ene ge ya inikikpan̄ owuwa ene. Ikeya si, inu ene ge gaalek si, òrere Jisọs Karais, orọbe îmin enenen igak unye mkpa. Ebi geelek ìbọbọkọ ogbogbo atata nnwọn eyi Awaji, mè ibọkọ si uche ata irọrọ eyi Awaji onyibe me ikike, ife cha mêre ebi ìbekitim ikpan̄ me ugwem keyi inan̄a me lek kè Jisọs Karais. ¹⁸ Mije keya, ike ikwaan̄ ijo irọrọ ge gaalek osabe itip-oyerebet ijet otutuuk ebilene, ikeya si ke ikwaan̄ ata irọrọ ge gaalek orọ inyi eben itip-oyerebet esan̄a otutuuk ebilene me ibot, mè isa si ugwem ijet otutuuk ebilene. ¹⁹ Ike owuwa ene ekanabe ebi ijo mije unye ibot ene ge, ikeya si, owuwa ene mêkana ebi ata irọrọ inan̄a me lek isisiki ibot eyi ene ge. ²⁰ Ikan kè Mosis ìnu inenirọ inyi nrọ-nlọ imumana. Ire, ere nrọ-nlọ okimumana, ere ya si ke atata nnwọn eyi Awaji okimumana ichit. ²¹ Ìkup ikeyi inyi: Ike ijo inu okitọ ikọ, mè ikisa mkpa ijet ebi ene, ikeya si, atata nnwọn eyi Awaji môkitọ ikọ si, mè ikirọ inyi ebi ene ekana ebi ata irọrọ, mè ekaan̄ ugwem ikakaan̄ge itata inan̄a me lek Okaan̄ kiji Jisọs Karais.

¹ Ubọk îkupbe ikeya, ìre keke ke eji ebeyaka itumu? Ìre eji mêkpọkpọ ikirọ ijo inu, inyi atata nnwọn eyi Awaji ikimumana? ² Iin̄-iin̄, ìkare ikeya! Eji mîwuuk lek ikwaan̄ isan̄a me ere ijo inu okupbe. Ìre eji ebejeje iyaka ikiluk me emen ijo inu ifo isi? ³ Me atikọ, enyi mîriọọn̄ ibe, me mgbọ egwookbe eji mun̄, inyi eji melek Jisọs Karais ere ge, ke egwook eji mun̄ ya inyi eji melek kan̄ ere ge me emen mkpa kan̄. ⁴ Mgbọ egwookbe eji mun̄, egbaan̄ eji melek kan̄ ifuun̄, inyi eji ekaan̄ uche me lek mkpa eyi ọmọ okwube. Sa me ikeya, ike Awaji osabe me unye kan̄ eyi òkakaan̄ umin mè uja ijomo Karais me mkpa, ikeya si, eji si mêluk ayaya ugwem. ⁵ Ire eji melek kan̄ ire ge mije eji melek kan̄ ekwube mkpa, eji melek kan̄ si mêre ge inan̄a me lek eji mêjomobe me mkpa kubọk ọmọ ojomobe. ⁶ Eji mîriọọn̄ ibe ke egbaan̄ oka akpalek kiji melek Karais igon ikpan̄ me inyọn̄ uti nkwurieen̄, inyi akpalek ijo inu ikayaka ìkaan̄ unye geege, mè eji ekayaka ìre usun̄ ìnyi ijo inu ofifi, ⁷ mije, ene geelek òkwukwu, înwọnọ irọrọ ijo inu. ⁸ Ire eji ikwu melek Karais, eji mîchieek ibe ke eji mêgọọk ọmọ si ikaan̄ aya ugwem. ⁹ Mije, eji mîriọọn̄ ijaan̄ lek ibe, eyi Karais ojomobe me mkpa, ke ìkpokọt iyaka ikwu ofifi, mije, mkpa ìkpoyaka ikaan̄ unye me lek kan̄. ¹⁰ Mkpa Karais okwube, ìkwu isasa iben mkpukpe ijo inu isan̄a mgbọ yaage gaalek. Ire, ugwem îkiluk mgbọ keyi, ìkiluk inyi Awaji. ¹¹ Ubọk yaage si, enyi ìfuk lek kinyi kubọk ebi ìkwukwu isibi itele ijo inu, mè ìkiluk ugwem ìnyi Awaji, mije, enyi mîkana ire ge melek Jisọs Karais. ¹² Eya orọ, ikachieek ibe ijo inu ikitọ ikọ me akpalek kinyi eyi òbokwukwu, inyi ikasa enyi ìrọ usun̄ ìnyi ijo ulọk kan̄. ¹³ Ikasa nriro lek kinyi geege ìnyi ijo inu isa irọ inu ikpak kan̄. Kpan̄asi ikeya, ìsa lek kinyi ìnyi Awaji, kubọk ebi esan̄abe me mkpa itap me ugwem, mè isa otutuuk nriro lek kinyi ìnyi ọmọ isa irọ inu ikwaan̄ eyi ata irọrọ. ¹⁴ Mije, ijo inu ìkpore nte uwu inyi enyi, bak me lek enyi kpekup me irak Ikan kè Mosis, enyi ekup me irak atata nnwọn eyi Awaji. ¹⁵ Keke si? Ìre eji mêkirọ ijo inu, mije eji ekupbe me irak atata nnwọn eyi Awaji, kpekup me irak Ikan kè Mosis? Iin̄-iin̄, ìkare ikeya! ¹⁶ Ìre enyi kperiọọn̄ ibe, ire enyi isa lek kinyi irọ usun̄ inyi ene, mè ikisiki ibot inyi ene ya kubọk usun̄, ke enyi mîkana usun̄ inyi ene ya me atikọ? Inu geelek ene ya otọbe inyi enyi, eya ke enyi eberọ, mè ìre ijo inu eyi môsabe mkpa ijet enyi, mè ìre isisiki ibot eyi môrọbe inyi enyi ekana ebi ata irọrọ. ¹⁷ Me mgbọ òraraka, enyi ìre usun̄ inyi ijo inu. Ire, itọn̄ ikup inyi Awaji, mije, enyi mîsa otutuuk ejit kinyi ibọkọ ata ijejeen̄ eyi ejeen̄be enyi itap. ¹⁸ Mgbọ keyi enyi mînwọnọ me ubọk ijo inu, mè ikana usun̄ inyi ata irọrọ. ¹⁹ Ǹkitumu usem ebilene mêkọtbe itet inyi enyi, mije, akpalek kinyi îwọ me mgbọ òraraka. Enyi mîsa nriro lek kinyi irọ usun̄ inyi inu ikatanage me isi Awaji, mè ikpọkpọ ikirọ inu ikpak mgbọ geelek. Me mgbọ keyi, ìyaka ìsa otutuuk nriro lek kinyi cha ìnin̄ usun̄ ìnyi ata irọrọ, mè ìkup me mbuban. ²⁰ Mgbọ enyi erebe usun̄ inyi ijo inu, ata irọrọ ìkakikọt ìtọ ikọ ìnyi enyi. ²¹ Ìre kpasi oruru ke enyi ekaan̄ me emen ijo inu cha echi òkitet enyi esip mgbọ keyi? Ijo ugwem òkup ikecha ìkisa mkpa ijet ene. ²² Ire, mgbọ keyi esan̄abe enyi isibi me irak ubọk ijo inu, enyi enenikana usun̄ inyi Awaji, oruru enyi ebekaan̄ ìre iluluk ugwem òkup mbuban, eyi òbonyi enyi ugwem ikakaan̄ge itata me mgburudun̄ mgbọ. ²³ Mije, mkpukpe ijo inu ìre mkpa. Ire, uche Awaji okiche inyi ene me ikike ìre ugwem ikakaan̄ge itata, inan̄a me lek Okaan̄ kiji Jisọs Karais.

¹ Bọn Nte n̄a, enyi ìre ebi ìrọriọọn̄ ikan ijaan̄. Ìre enyi kperiọọn̄ ibe ke ikan ìkikaan̄ unye me lek ene mgbọ ene okupbe me ugwem gaalek? ² Eji esa enenwaan̄ òbat olom ekween̄ inu. Ikan ìbọp ogwu enenwaan̄ òbat olom ikam me lek ogwu olom me mgbọ ogwu olom okupbe me ugwem gaalek. Ire, ire ogwu olom ikwu, ogwu enenwaan̄ ya ìkayaka ìkup me irak ikan olom mè nwa ya. ³ Ire ogwu enenwaan̄ òbat olom itele ogwu olom, mè isi ibat ofifi ene, me ere ogwu olom okupbe me ugwem, ogwu enenwaan̄ ya îrọn̄ ikan ugan-nwa. Ire, ire ogwu olom ikwu iraka sabum înisi ibat ofifi ene, ikan ugan-nwa ìkayaka ìbọp ọmọ. Mgbọ ya, ọmọ môkọt ibat ofifi ene, mije, ọmọ ìkup me lek kan̄. ⁴ Ìkup ikeya si me lek kinyi, bọn Nte n̄a, me inu òfolek Ikan kè Mosis. Mije enyi melek Karais erebe akpalek ge sa me mkpa kan̄, enyi mîkwaan̄ isibi itele Ikan kè Mosis. Me mgbọ keyi, enyi mîkana ebi eyi Karais ogwu òjojomo me mkpa, inyi eji eneluk ugwem òkaan̄ oruru enyi Awaji. ⁵ Mije, mgbọ eji ekupbe me irak ubọk akpalek ijo inu kiji, ijo ulọk eyi Ikan kè Mosis okisan̄a isibi ke eji ekigọọk, mè ikiluk ugwem eyi òkisa mkpa ijet eji. ⁶ Mgbọ keyi, mije eji ekwube isibi itele inu ya òbọbọp eji ikaan̄, eji mîsibi itele Ikan kè Mosis. Eya orọ, eji mêsi ikwaan̄ inyi Awaji me aya oniin̄ eyi Ekwukwu Mbuban, ìkayaka ìre me oka oniin̄ eyi Ikan kè Mosis egege isibi. ⁷ Ìre keke ke eji ebeyaka itumu? Ìre Ikan kè Mosis ìre ijo inu? Iin̄-iin̄, ìkpokọt ire ikeya! Ikwaan̄ Ikan okirọ ìre ikpọkpọk mbum ijo inu. Me atikọ, mebe kpunu Ikan, emi kpamariọọn̄ inu ijo inu orebe. Mije, mebe Ikan ìkatumu ibe, “Kakaan̄ chieen̄ ile me lek inu ofifi ene,” emi kpamariọọn̄ ibe ke îkaan̄ inu ekigwen chieen̄ ile. ⁸ Ire, mgbọ yaage Ikan osan̄abe irek isibi, ijo inu onwenween̄ lek iraka inin̄ emen ugwem n̄a, mè inisan̄a owuwa ijo ulọk eyi chieen̄ ile òkup esese esese isibi me emen n̄a. Mije, ere ikan ikakupge, ijo inu ìre inu òkwukwu. ⁹ Emi me lek n̄a, nluk ugwem mgbọ ge me kpunube ikan. Ire, mgbọ ikan onube, ijo inu obebene unye me emen n̄a, ¹⁰ mè irọ inyi emi ǹkwu. Ikan eyi morọ inyi ene iluk ugwem, irere lek n̄a, ìyaka inisa mkpa ijet emi. ¹¹ Mije, mgbọ yaage ikan osan̄abe irek isibi, ijo inu onenifiaan̄ emi, mè ije me irak ikan ya inikpan̄ emi ito. ¹² Eya orọ, Ikan kè Mosis me lek kan̄ îkup me mbuban, nteme geelek enyibe me Ikan kè Mosis ya si îkup me mbuban, mè itat, mè inwọn. ¹³ Ire ikeya, ìre Ikan ya òrere inu ònwọnwọn ìyaka inikana mkpa inyi emi? Iin̄-iin̄, ìkpokọt ire ikeya! Ire, ijo inu ìje me irak inu ònwọnwọn inisa mkpa ijet emi, inyi otutuuk ene esa eriọọn̄ ibe ke ijo inu ìre ijo inu me atikọ. Ikeya si, inan̄a me lek ikan, îsibi utoon̄ ibe ke ijo inu ìre inu òfefieek enenen isaba iraka iman̄. ¹⁴ Eji mîriọọn̄ ibe ke Ikan ìre inu eyi ekwukwu. Ire, emi ǹkiluk ugwem igọọk me ọrọmijọn̄ eyi akpalek. Ijo inu îlep emi isa irọ usun̄ inyi lek kan̄. ¹⁵ Ǹkakiriọọn̄ inu nkirọ. Mije, inu geelek mweekbe irọrọ, ǹkakirọ. Ire, inu nchabe, eya ke nkirọ. ¹⁶ Mije nriọọn̄be ibe ke inu nkirọ ìre inu nkaweekge irọrọ, nchieek ibe ke Ikan kè Mosis înwọn. ¹⁷ Eya ìkijeen̄ ibe ke ìkare emi me lek n̄a nkirọ inu ya; ke ìre ijo inu òkup emi me emen okirọ. ¹⁸ Nriọọn̄ ibe ke kpunu ata inu geege òkup me emen n̄a, òrere me emen akpalek ijo inu eyi nkaan̄be. Mije, îkilọk emi irọrọ inu òtatat, ire, ǹkakikọt ìrọ. ¹⁹ Mije, inu nkirọ ìkare ata inu eyi nkiweek irọrọ. Iin̄-iin̄, kpan̄asi ikeya, ijo inu eyi nkaweekge irọrọ, eya ore eyi mkpọkpọ ikirọ mgbọ geelek. ²⁰ Ire emi nkirọ inu nkaweekge irọrọ, ìsibi ibe ke ìkayaka ìre emi nkirọ inu ya; ke ìre ijo inu òkup emi me emen okirọ. ²¹ Inu nyakabe iniweek imun̄ me emen n̄a ìre ikeyi: Mgbọ geelek mweekbe irọrọ ata inu, ìkire ijo inu ijo inu gaalek ke nkirọ. ²² Me ijọn̄ ijọn̄ ejit n̄a, mma irọrọ ikan Awaji. ²³ Ire, îkaan̄ ofifi ikan òkisi ikwaan̄ me emen otutuuk nriro lek n̄a, mè ikitim akọn̄ melek ata ikan eyi òkup me emen ejit n̄a, mè irọ inyi emi ǹkana usun̄ ǹnyi ikan eyi ijo inu eyi òkitọ ikọ me emen n̄a. ²⁴ Jei, njijin lek n̄a îmin! Ìre ekene obotaba emi isibi me ubọk akpalek keyi òbosa emi ijet mkpa? ²⁵ Itọn̄ ikup inyi Awaji ibe ke mîtaba emi isibi sa me lek Okaan̄ kiji Jisọs Karais! Eya orọ, emi me lek n̄a, me ijọn̄ ijọn̄ ejit n̄a, emi ìre usun̄ inyi ikan Awaji. Ire, me emen akpalek ijo inu nkaan̄be, emi ìre usun̄ inyi ikan eyi ijo inu.

¹ Eya orọ, mgbọ keyi, itip-oyerebet geege ìkayaka ìkup ìnyi ebi geelek ìrere ge melek Jisọs Karais. ² Mije, inan̄a me lek kè Jisọs Karais, ikan Ekwukwu Mbuban eyi òkinyi ene ugwem, înyan̄a emi isibi me irak ubọk ikan ijo inu eyi òkisa mkpa ijet ene. ³ Inu Ikan kè Mosis ikakọtge ìrọ, mije akpalek ijo inu kiji orọbe inyi Ikan ya iwọ, Awaji îrọ inu ya sa me lek îriabe Gwun̄ kan̄ gaalek inu me mbet ebilene ebi ìkirọ ijo inu, inyi inisa lek kan̄ igwa ngwugwa iben ijo inu ebilene isan̄a. Sa me ikeyi, Awaji îfieek oyerebet itip ijo inu òkup me emen ebilene, ìrere ebi ijo, ⁴ mè irọ otutuuk otu Ikan kè Mosis ya iso me emen kiji, inyi eji enwọnọ itip-oyerebet, mije, eji ekiluk ugwem igọọk me nteme eyi Ekwukwu Mbuban, kpeyaka ikiluk igọọk me ijo ulọk eyi akpalek ijo inu kiji. ⁵ Ebi ìkiluk ugwem igọọk me akpalek ijo inu kiban̄ ekikeek ubọk ema mêsabe ikirọ inu akpalek ijo inu ya okitọ inyi ema mgbọ geelek. Ire, ebi ìkiluk ugwem igọọk me nteme eyi Ekwukwu Mbuban ekikeek ubọk ema mêsabe ikirọ inu Ekwukwu Mbuban okiteme ema mgbọ geelek. ⁶ Ekiket irọrọ inu akpalek ijo inu okiweek mgbọ geelek ìkisa mkpa ijet ene. Ire, ekiket irọrọ inu Ekwukwu Mbuban okiweek mgbọ geelek ìkisa esuuk mè ugwem ikakaan̄ge itata ijet ene. ⁷ Mije, ejit ene eyi ijo inu okikpulu ìkichacha Awaji, ìkakima irọrọ ikan Awaji, ìkpokọkọt si irọ. ⁸ Ebi akpalek ijo inu kiban̄ okikpulu kpekikọt irọ inu òkibele Awaji ejit. ⁹ Ire, eyi kinyi, ìkare akpalek ijo inu kinyi okitọ ikọ inyi enyi, îre Ekwukwu Mbuban okitọ, mè ire Ekwukwu Awaji ikup me emen kinyi me atikọ. Ene geelek ikakaan̄ge Ekwukwu kè Karais me emen kan̄, ene ya ìkare ogwu eyi Karais. ¹⁰ Ire Jisọs Karais ikup me emen kinyi, akpalek kinyi îkwu, ìkpoyaka isi ikwaan̄ inyi ijo inu. Ire, ekwukwu kinyi òwa me ugwem, mije, enyi mîkana ebi ata irọrọ me isi Awaji. ¹¹ Ire Ekwukwu Awaji ogwu òjojomo Jisọs Karais me mkpa ikiluk me emen kinyi, ọmọ ogwu òjojomo Jisọs Karais môtap ugwem me akpalek kinyi ya òbokwukwu sa me Ekwukwu kan̄ ogwu òkiluk me emen kinyi. ¹² Eya orọ, bọn Nte n̄a, eji mîkaan̄ urieek ikpekpe òfo me lek ubọk iluk ugwem. Urieek ya ìkare iluluk ugwem igọọk me lek akpalek eyi ijo inu kiji. ¹³ Mije, ire enyi ikiluk ugwem kubọk akpalek ijo inu ya okiweek, enyi mêkwaan̄. Ire, ire enyi isa me unye eyi Ekwukwu Mbuban ikpan̄ ijo inu cha enyi ekisa akpalek kinyi irọ, enyi mêluk ugwem ikakaan̄ge itata. ¹⁴ Ebi geelek Ekwukwu Mbuban okikpulu, ebiba ere bọn Awaji. ¹⁵ Mije, Ekwukwu Mbuban ogwu Awaji onyibe enyi ìkporọ inyi enyi eketet ukpook, mè ekpọk esi enin̄ usun̄. Kpan̄asi ikeya, Ekwukwu Mbuban ìborọ inyi enyi ekana bọn Awaji, mè ekegwen Awaji, “Papa! Nte n̄a!” ¹⁶ Ekwukwu Awaji me lek kan̄, melek ekwukwu òkup eji me emen ekigbaan̄ itumu otu ge, mè ikirọ inye ibe ke eji ìre bọn Awaji. ¹⁷ Mgbọ keyi eji erebe bọn Awaji, eji mêbọkọ irot eyi Awaji osun̄be inyi ebi kan̄, mè igọọk Jisọs Karais igbaan̄ ikaan̄ uche me irot ogwu Ute osun̄be iban ọmọ. Mije, ire eji igọọk Karais imun̄ ufialek îmun̄be me atikọ, eji mêgọọk ọmọ si igbaan̄ ikaan̄ umin mè uja kan̄. ¹⁸ Mfuk isan̄a, mè imun̄ ibe ke ufialek eji ekimun̄ mgbọ keyi ìkaso inu ebesa itọ me lek umin mè uja eyi Awaji obochili inyi eji. ¹⁹ Otutuuk inu geelek Awaji orombe ìkikup me mbem-lek ikikpọ mgbọ Awaji môsan̄abe ebi ìrere bọn kan̄ isibi ijeen̄ otutuuk ene. ²⁰ Awaji îrọ inyi otutuuk inu îrombe ikup me irek usun̄ ere ema kpebekọt irọ inu geege òsibi oruru. Ìkare inu chi me lek kiban̄ eweek ikukup ikeya, îre Awaji osa me nkeek kan̄ isun̄ ema ikeya. Ìsun̄ ema ikeya, ²¹ mè ikikpọ chieen̄ ibe ke ọmọ môsan̄a ema isibi me irek usun̄ ya ere ema ebekup ijọ, mè isa ema itap me utelelek òkakaan̄ umin mè uja, eyi esun̄be inyi bọn Awaji. ²² Eji mîriọọn̄ ibe, mege inire mgbọ keyi, ke otutuuk inu geelek Awaji orombe òkito mfi me irak uga ufialek kubọk nwa-owot uman okitet. ²³ Ire, ìkare ema gaalek, eji me lek kiji ebi Awaji onyibe Ekwukwu Mbuban kubọk adasi mfut me lek ugbana òkinu me isi, eji si mêkito mfi me emen kiji ike eji ekupbe me mbem-lek ikikpọ mgbọ Awaji môbọkọbe eji itap isa irọ bọn kan̄, mè inwene akpalek kiji. ²⁴ Îre ikpọchieen̄ keyi eji ekaan̄be ke esa inyan̄a eji. Kpunu ene geege òkikpọ chieen̄ ikakaan̄ inu îwuukbe lek ikaan̄ isan̄a. Eya orọ, ikakaan̄ ikpọchieen̄ me lek inu eyi esabe chieen̄ imun̄ ìkare ikpọchieen̄ kubọk ge. ²⁵ Ire, ire eji ikikpọ chieen̄ ikakaan̄ inu eji kpewuuk lek ikaan̄, eji ekikakat ejit ikikup ikpọ inu ya. ²⁶ Ikeya si, îre Ekwukwu Mbuban okitap ubọk inyi eji mgbọ lek kiji owọbe. Eji kpekiriọọn̄ ubọk ògbegbe ibe eji ekeriaak uriaak. Ire, Ekwukwu Mbuban me lek kan̄ okibọkọ uriaak kiji iriaak inyi eji, mè ikito mfi òdọdọk enenen me emen uriaak ya, eyi ikọ otu ìkpokọt ibum ibot. ²⁷ Awaji ogwu òkiriọọn̄ otutuuk inu òkup ene me ejit, îriọọn̄ inu òkup Ekwukwu Mbuban me ejit, mije, Ekwukwu Mbuban ìkibeek mbeek me ibot bọn Awaji igọọk me nkeek Awaji. ²⁸ Eji mîriọọn̄ ijaan̄ lek ibe ke Awaji ìkisa otutuuk inu igbaan̄ irọ ata ikwaan̄ inyi ebi ìmumun̄ ọmọ me chieen̄, òrere ebi ọmọ ogwenbe ibe enerọ inu ọmọ odọmọbe isun̄. ²⁹ Mije, ebi Awaji owuukbe lek iriọọn̄, ebiba ere ebi îwuukbe lek igobo isibi isun̄ esese, inyi enebet lek Gwun̄ kan̄, mè ekup kubọk Gwun̄ kan̄ okupbe, inyi Gwun̄ kan̄ ya inikup me etete kiban̄ kubọk adasi gwun̄ me etete owuwa ngwan̄. ³⁰ Ebi îgobobe isun̄ esese cha, ebiba si ke îgwen. Ebi îgwenbe cha, ebiba si ke îben itip-oyerebet isan̄a me ibot. Ebi îbenbe itip-oyerebet isan̄a me ibot, ebiba si ke înyi umin mè uja kan̄. ³¹ Eyi Awaji orọbe otutuuk inu chi inyi eji, ìre keke ke eji ebeyaka itumu? Ire Awaji ikeke inyi eji, ìre ekene obokọt irọ ikeme eji? ³² Ire Awaji iria ogwu Gwun̄ inu ibe inibọkọ ufialek me ibot kiji otutuuk ene, ìkatet ìkaan̄, ìre Awaji ya ìkpofat inyi eji otutuuk inu geelek me ikike igbaalek Gwun̄ kan̄ ya înyibe eji? ³³ Ìre ekene obokọt ifuk ikan ikeme ebi Awaji ogobobe inyi lek kan̄? Awaji me lek kan̄ okiben itip-oyerebet isan̄a ema me ibot. ³⁴ Ìre ekene obotip ema oyerebet? Jisọs Karais ogwu òkwukwu, mè ijomo si me mkpa, ọmọ òwa osikibe ikweek me agan̄ ubọk ulom Awaji ikitumu ikọ ibot kiji inyi Awaji. ³⁵ Ire ikeya, ìre ekene obokọt iche eji isan̄a me lek imumechieen̄ Karais okaan̄be me lek kiji? Ìre uyọrọlek môkọt, sa ìre uga ufialek, sa ìre saasaak, sa ìre una inorie, sa ìre ijeje njak, sa ìre unan, sa ìre mkpa? Kpunu inu geege òbokọt iche eji isan̄a me lek imumechieen̄ Karais okaan̄be me lek kiji! ³⁶ Kubọk egebe me Ikpa Mbuban ibe, “Mije kwun̄, eji ekikup me otu mkpa egwe geelek; emọnọ eji kubọk arọọn̄ ebesa isi ifieek ebek.” ³⁷ Iin̄-iin̄, kpan̄asi ikeya, me emen inu chi geelek, eji mîgak ebi ìkitim ikpan̄ me linyọn̄ keyi, sa me unye kè Jisọs Karais ogwu òmumun̄ eji me chieen̄! ³⁸ Mije, emi nriọọn̄ ijaan̄ lek ibe ke kpunu inu geege òbokọt iche eji isan̄a me lek imumechieen̄ Awaji, mè ìre mkpa mè ìyaka ire ugwem, mè ìre ebi osat Awaji, mè ìyaka ire ijo erumun̄, mè ìre inu òkukup me mgbọ keyi, mè ìyaka ire echi òkup me isi, mè ìre unye eyi mkpulu geelek, ³⁹ mè ìre ere òbebene ichit, mè ìre ere òdọdọk ichit, mè ìyaka irere ofifi inu geelek me etete otutuuk inu geelek Awaji orombe. Kpunu inu geege obokọt iche eji isan̄a me lek imumechieen̄ Awaji okaan̄be me lek kiji, eyi eji ekaan̄be sa me lek kè Jisọs Karais Okaan̄ kiji.

¹ Ǹkitumu atikọ kubọk ogwu òchieek me lek kè Jisọs Karais, ǹkakan̄ ataak, ejit n̄a eyi Ekwukwu Mbuban okikpulu îrọ si inye ibe ke ìkare ataak ke nkikan̄. ² Ejit îkifieek emi enenen, mè ikisisaak emi mgbọ geelek mije ebi kiji, ebi Ijeren. ³ Ubọk îkupbe emi me ejit, emi me lek n̄a mâkọt ichieek ibe Awaji ifieek otu inyi emi, mè ifieek emi isan̄a me lek kè Karais, mije una ichechieek ebi ngwan̄ n̄a, ebi melek n̄a erebe akpalek ge mè eje ge, ⁴ ìrere ebi Ijeren, ire eya môrọ mè ema ekaan̄ ichechieek. Awaji îrọ owuwa inu inyi ema, ire, ema kpegban̄ utọn̄ inyi Awaji. Îre ema ke Awaji ogobo isa irọ bọn inyi lek kan̄, ema si ke Awaji onyi umin kan̄ mè uja kan̄. Ema ke Awaji onyan̄a ibot inyi, mè inyi Ikan kan̄. Ema ke Awaji onyi unye ibe eketọbọ ebum me Uwu Mbuban enyi ọmọ, ema si ke Awaji ochieek use inyi. ⁵ Ebi nte nte ukot ikaan̄ cha eriọọn̄be erieen̄ me mfufuk ìre nte nte kiban̄. Me akpalek ebilene, Karais me lek kan̄ ìre si gwun̄ owot iman kiban̄. Itọn̄ ikup inyi Awaji ogwu òkup me ibot otutuuk inu geelek ire mgbọ ikakaan̄ge itata. Ikup ikeya! ⁶ Ikọ n̄a ìkasibi ibe ke use Awaji ìkakọt ìsi ikwaan̄ kan̄ ìso, mije, ìkare otutuuk ebi Ijeren ere ata ebi Ijeren. ⁷ Ìkayaka ìrere si otutuuk bọn owot iman kè Ebereham ere ata bọn kè Ebereham, mije, Awaji ìtumu inyi Ebereham ibe, “Îre bọn owot iman kè Ajiki ke ebefuk kubọk echi kwun̄.” ⁸ Eya ìsibi ibe ke ìkare bọn esabe me akpalek iman ere bọn Awaji. Îre bọn emanbe igọọk me lek use Awaji ke ekifuk kubọk bọn kè Ebereham. ⁹ Mije, mgbọ Awaji ochieekbe use ya, ìtumu ibe, “Mgbọ nsun̄be isikem, emi mâgwu ikom inu. Nsigwu ikom inu, Sera môman gwun̄ enerieen̄.” ¹⁰ Ìkare eya gaalek. Ute ge gaalek obon nsabọn ebirieen̄ iba Ribeka omanbe. Îre Ajiki, nte nte kiji ukot ikaan̄ obon ema. ¹¹ Ribeka ìgbagbaan̄ nsabọn iba chi iman mgbọ ge. Mgbọ Ribeka okupbe me owot kiban̄, Awaji otutumu inyi Ribeka ibe, “Îre ogwu ugane obokisi ikwaan̄ inyi ogwu ijija!” Inu yi ìrọrọ iraka sabum eniman ema, me mgbọ ema kperọriọọn̄-nu ata inu mè ijo inu. Awaji ìrọ ikeyi igọọk me nkeek kan̄ isasa ijeen̄ ibe ke ìre ọmọ me lek kan̄ ogobo gwun̄ ge me etete nsabọn iba cha, mè itele ogwulọ. Awaji ìrọ si ikeyi inyi ebi ene esa eriọọn̄ ibe ke ìkare ikwaan̄ gwun̄ ya orọbe ke esa igobo gwun̄ ya; ke ìre me nkeek Awaji ogwu ògwegwen ọmọ gaalek ke esa igobo ọmọ. ¹³ Ikeya si ke ege me Ikpa Mbuban ibe ke Awaji ìbe, “Jekọp ke mma, Isọ ke ncha!” ¹⁴ Ìre keke ke eji ebetumu? Ìre eji mêbe ke Awaji ìkakirọ inu òtatat? Iin̄-iin̄, eji kpebekọt itumu! ¹⁵ Mije, Awaji ìtumu inyi Mosis ibe, “Ogwu òneme emi ke mbato nsan; ogwu òneme emi si ke mbakaan̄ ejit njijin me lek.” ¹⁶ Eya orọ, inu chi geelek ìkakire mije nkeek ebilene mè kwulukwulu ebilene, ìkire mije ejit nsan Awaji. ¹⁷ Mije, Awaji ìtumu inyi ogwu Fero, ogwu ubọọn̄ ebi Ijipiti, ibe, “Îre mije keyi ke mkpukpo owu isibi, inyi ǹsa me lek kwun̄ ǹjeen̄ unye n̄a, mè ebi ene eketumu erieen̄ n̄a esibi me otutuuk linyọn̄.” ¹⁸ Eya orọ, ogwu Awaji oweekbe itoto nsan ke îkito nsan, ogwu îweekbe irọrọ mè inye ejit, ogwa ke îkirọ inyi ejit inye. ¹⁹ Ene ge me etete kinyi môkọt ido emi ibe, “Ire ikeya, ìre keke orọ mè Awaji ikpọkpọ ikifieek eji ikọ? Ìre ekene okikọt isisik ibot ibe mè ekiket Awaji ikarọ ìso?” ²⁰ Owu ogwu ebilene, ìre owu ìre ekene, eyi obokifọọk Awaji otu? Ìre inu ene orombe môkọt ikaan̄ otu ido ogwu òrorom ọmọ ibe, “Òjeje irom emi ikeyi?” Ìkpokọt ido! ²¹ Mije, me atikọ, ogwu òbot ugọn̄ îkaan̄ unye isasa owut arika ge gaalek îsan̄abe ibot owuwa esese ugọn̄. Môkọt isa ọkpọkọ ibot ugọn̄ echi mêkisa irọ inu òkakaan̄ umin, mè isa si ofifi ọkpọkọ ibot ugọn̄ echi mêkisa irọ ten̄eten̄e inu geelek. ²² Ikeya ke îkup si me lek inu Awaji okirọ. Awaji îweek irọrọ inyi unye kan̄ mè unaan̄-ejit kan̄ iriọọn̄ ubọk isibi utoon̄ enenen. Mije keya, mgbọ îkisun̄ ebi înaan̄be ejit inyi cha iban usen mkpa kiban̄, ikekikaan̄ ujọn̄ọ ukarajit me lek ife cha, mè ikime ijo inu geelek ema ekirọ. Ire Awaji ikirọ ikeya, ìre îlọ? ²³ Awaji îwuuk lek igobo usini ene isibi inyi enegọọk ọmọ ekaan̄ umin kan̄ mè uja kan̄, mè ikikaan̄ ejit nsan me lek ife chi. Ire Awaji ikikaan̄ ujọn̄ọ ukarajit me lek ebi ìkup me irak unaan̄-ejit kan̄ cha, inyi ebi ọmọ okaan̄be ejit nsan me lek esa me ikeya eriọọn̄ ubọk umin kan̄ mè uja kan̄ osabe imin iyaka, ìre îlọ? ²⁴ Eji ere ebi ife ba, ebi Awaji ogwenbe inyi lek kan̄. Eji kpere ebi Ju gaalek. Îgwen usini kiji inan̄a me etete ebi Ju, mè igwen usini kiji inan̄a me etete ebi ekarege ebi Ju. ²⁵ Ikeyi ke Awaji otumu me otu kè Hosia ogwu nriran ibe, “Ebi kpewuuk lek ire ebi n̄a, mâgwen ema ‘Ebi n̄a.’ Ido ebi kpewuuk lek ire ebi òma n̄a, mâgwen ema ‘Ebi òma n̄a.’ ²⁶ Me ere etumube inyi ema ibe, ‘Enyi kpere ebi n̄a,’ me ere yaage si ke mêgwen ema ‘Bọn Awaji òkup me ugwem.’ ” ²⁷ Asaya îtaan̄ ukpo itumu ikọ òfolek ebi Ijeren ibe, “Ubọk geelek ido ebi Ijeren ebi n̄a ewabe ikup kubọk okpoon̄ agba awaji, ene inen mè inen ebi ìsisik gaalek ke ebenyan̄a. ²⁸ Mije, Okaan̄-ene môrọ ikọ otu kan̄ iso me linyọn̄ keyi ugwat ugwat, mè irọ otutuuk isan̄a mgbọ ge kpai.” ²⁹ Awaji îtumu si sa me otu kè Asaya me adasi mgbọ ibe, “Mebe Okumugwem ogwu òkaan̄ otutuuk inyọn̄ mè ijọn̄ ìkasik sọntiik ibot bọn kiji inen mè inen, kè eji èkwaan̄ èsan̄a, mè ido kiji okana ǹrioon̄ kubọk ama Sọdọm mè ama Gọmọra.” ³⁰ Mgbọ keyi, ìre keke ke eji ebeyaka itumu? Ìre eji mêtumu ibe ke ebi kpere ebi Ju, ebi kpekisasa lek ikakana ebi ata irọrọ, mîkana ebi ata irọrọ inan̄a me lek ichechieek kiban̄, ³¹ me ere ebi Ju me lek kiban̄, ebi ìkiweweek ikan eyi òborọ inyi ema ekana ebi ata irọrọ, kpekọt ikana ebi ata irọrọ? ³² Ìre keke orọ mè ebi Ju ekakọt ìkana ebi ata irọrọ? Îre mije ema kpesa me ichechieek iweek ikakana ebi ata irọrọ. Kpan̄asi ikeya, ema ekirọ kubọk ke ekisa me ata ubọk ikwaan̄ ikana ebi ata irọrọ. Mije keyi, ema mîtọbọ ukot me lek “ewuuk òkitọbọ ene ukot.” ³³ Ikeyi ke Awaji otumu me Ikpa Mbuban ibe, “Ìkpọ, mben ewuuk ge iyik me Sayọn, eyi ebi ene ebetọbọ ukot me lek; ewuuk ya oborọ inyi ema enan̄a erọn̄. Ire, ene geelek òtotoon̄ ejit me lek ewuuk ya, kpunu inu geege òborọ inyi esip itet ene ya.”

¹ Bọn Nte n̄a, inu mbenbe me ejit, mè ikiriaak Awaji me lek me ibot ebi Ijeren ìre, mè Awaji inyan̄a ema. ² Mije, emi me lek n̄a mâkọt ikeke ata-ikọ inyi ema ibe, me atikọ, ke ema mîkaan̄ ulọk òmimin enenen me lek Awaji. Ire, ulọk kiban̄ ya ìkaje melek ata ifuk-ibot. ³ Ema mîtele oniin̄ ata irọrọ eyi ònan̄a me ubọk Awaji, mè ikiweek ikakana ebi ata irọrọ me oniin̄ eyi akpalek kiban̄ gaalek. Sa me ikeya, ema mîjit ikakana ebi ata irọrọ me oniin̄ eyi Awaji osan̄abe isibi. ⁴ Karais îra isa Ikan kè Mosis isi ire òta kan̄. Eya orọ, ikakana ebi ata irọrọ ìyaka inikup inyi ebi geelek ìchechieek me lek kè Karais. ⁵ Òfo me lek ikakana ebi ata irọrọ sa me isusun̄ Ikan kè Mosis, Mosis me lek kan̄ ìtumu ibe, “Ene geelek òkisun̄ Ikan ìboluk si inan̄a me lek Ikan.” ⁶ Ire, inu ekitumu òfo me lek ikakana ogwu ata irọrọ inan̄a me ichechieek ìre ikeyi, “Kakitumu me ejit kwun̄ ibe: Ìre ekene obonene ifo emen inyọn̄?” (Eya ìre isasa Karais isibi inu me ijọn̄.) ⁷ “Kakitumu si ibe: Ìre ekene obokwala isibi ifo ere òdọdọk ichit?” (Eya ìre ibebene Karais isibi me ama ekwukwu inu me linyọn̄.) ⁸ Ikọ ekitumu ìre ikeyi: “Ikọ Awaji ya îgbet owu lek enenen, ìkup me otu kwun̄, mè ikup si me ejit kwun̄.” Etip yi ore etip eyi ichechieek eyi eji ekilook ibe: ⁹ Ire owu osa otu kwun̄ itumu isibi ibe ke Jisọs Karais ore Okaan̄-ene, mè ichieek si me ejit kwun̄ ibe ke Awaji îjomo ọmọ me mkpa, mênyan̄a owu. ¹⁰ Mije, ejit kwun̄ ke obosa ichieek, mè inwọnọ itip-oyerebet Awaji. Otu kwun̄ ke obosa itumu ichechieek kwun̄ isibi, mè ikaan̄ unyan̄a. ¹¹ Ikeya ke ege me Ikpa Mbuban ibe, “Ogwu geelek òtotoon̄ ọmọ ejit me lek, kpunu inu geege òborọ inyi esip itet ene ya.” ¹² Kpunu esese geege òkukup me etete ebi Ju mè ebi kpere ebi Ju. Okaan̄-ene yaage ore Okaan̄ kiban̄ otutuuk, ọmọ yaage si okisa ikpele ugbana igbana otutuuk ebi geelek ìgwegwen erieen̄ kan̄. ¹³ Mije, Ikpa Mbuban îtumu ibe, “Ene geelek ògwegwen erieen̄ Okaan̄-ene, mênyan̄a ene ya.” ¹⁴ Ire ikeya, ìre ema ebejeje igwen erieen̄ ogwu ema kpechieek me lek? Ofifi si, ìre ema ebejeje ichieek me lek ogwu ema kpewuuk lek inọ etip òfolek? Sa ìre ema ebejeje inọ etip ya, ire ene geege ìkasi ìlook ema etip ya? ¹⁵ Ìre ife cha ebejeje ikọt isi ilook etip ya, ire ìkakaan̄ ogwu òraria ema isibi? Ikeya ke ege me Ikpa Mbuban ibe, “Inunu ebi ìkilook ata etip mikijaan̄ igak eke!” ¹⁶ Ire, ìkare otutuuk ebi Ijeren ebọkọ ata etip ya itap. Ikeya ke Asaya otumu si ibe, “Okumugwem, ìre ekene ochieek etip kiji?” ¹⁷ Eya orọ, îre inọnọ ata etip okisa ichechieek inu. Ata etip ya ìre ata etip kè Karais eyi eji ekilook. ¹⁸ Ire, mâdo enyi nu, ìre ema ebi Ju kpenọ ata etip ya? Ema otutuuk ene mînọ iso kpai, kubọk Ikpa Mbuban orọbe inye ibe, “Ida kiban̄ îtaan̄ ikana otutuuk linyọn̄; ikọ kiban̄ îso ikana ntutun̄ ere geelek me linyọn̄.” ¹⁹ M̀kpọk ǹdo si, ìre ebi Ijeren kperiọọn̄ ibot usem ya? Ema mîriọọn̄! Me adasi irek, Awaji ìtumu me otu kè Mosis ibe, “Mâsa ido ebi ekariọọn̄ge Awaji irọ inyi enyi emin ejit me lek n̄a. Mâsa ido ebi kpekikọt igobo inu geege itet irọ inyi ejit inaan̄ enyi.” ²⁰ Ikeya si, Asaya ìkatet ukpook itutumu ibe ke Awaji ìbe, “Ebi kpeweweek emi ere ebi ìmumun̄ emi, ebi kpedodo inu òfolek n̄a, ebiba ke nchili lek n̄a ijeen̄.” ²¹ Ire, òfolek ebi Ijeren ke Awaji otumu ibe, “M̀kpọkpọ inyana ubọk iba n̄a itele, ibene me ewelegwe ifit egwe, ikigwen, mè ikiriaak ebi unye ibot kechi, ebi ìkikpaka ibot ibe enu. Ema kpechieek inunu.”

¹ Mâdo-nu ikọ ge: Ìre Awaji îjit ebi kan̄? Iin̄-iin̄, eya ìkpokọt irọ! Emi me lek n̄a, emi ìre ogwu Ijeren, gwun̄ owot iman kè Ebereham, ogwu otoko kè Benjamin. ² Awaji ìkajit ebi kan̄, ebi îwuukbe lek iriọọn̄, mè igobo bene me ibebene. Ìre enyi kperiọọn̄ inu egebe me Ikpa Mbuban òfolek mgbọ Ilaija okitumu ikọ ikeme ebi Ijeren me isi Awaji? ³ Ilaija ìtumu ibe, “Okumugwem, ife chi mîkpan̄ ebi nriran kwun̄ isan̄a, mè igwak otutuuk ntook ngwugwa kwun̄ igwook me ijọn̄. Ìyaka inisik emi gaalek. Me mgbọ keyi, ema mêkiweek si ikpakpan̄ emi.” ⁴ Ìre keke ke Awaji ofọọk ọmọ? Awaji ìfọọk ọmọ ibe, “Nsun̄ obop ene jaaba me Ijeren inyi lek n̄a, ebi kpetọbọ akpatukot me ijọn̄ inyi yọk ekigwen Baali.” ⁵ Ikeya si, me mgbọ keyi, îkaan̄ ibot ene inen mè inen ìsisik, ebi Awaji ogobobe me etete ebi Ijeren isun̄ inyi lek kan̄ sa me atata nnwọn kan̄. ⁶ Awaji ìkigobo ene sa me atata nnwọn kan̄, ìkare sa me ikwaan̄ ene orọbe. Mije, ire Awaji ikisa me ikwaan̄ ene orọbe igobo ene, ìsibi ibe ke atata nnwọn ya ìkayaka ire atata nnwọn. ⁷ Ìre keke si oyaka irọ? Inu ya eyi ebi Ijeren ekwukwulube iweek igak, kpekọt ikaan̄, ebi Awaji ogobobe me etete kiban̄ inyi lek kan̄ mîkaan̄. Ebibilọ cha mîkana ìnan, kpechieek inọnọ igwen eyi Awaji okigwen ema. ⁸ Mîge si me Ikpa Mbuban ibe, “Awaji îrọ inyi ema ekana ebi ndide. Ema mîkaan̄ chieen̄, ire, kpekisa imọọn̄ inu, ema mîkaan̄ utọn̄, ire, kpekisa inọ ikọ. Ikeya ke îkup mege inire chereyi.” ⁹ Debit si îtumu ibe mè, “Inorie ijọk kiban̄ itet ema kubọk ufe, mè ikana si ewuuk òkitọbọ ene ukot inyi ema, mè ema erọn̄ enin̄ emen osusut. ¹⁰ Chieen̄ kiban̄ idun, inyi ema ekakọt ìmọọn̄ inu; udun̄ kiban̄ inwun ekpuk me irak ulobo ufialek ire mgbọ geelek.” ¹¹ Mâkpọk ido si: Ìre ebi Ijeren mînan̄a irọn̄ isan̄a ire lek eyi kpebeyaka ikọt ibene ema igwuun̄? Iin̄-iin̄, ìkare ikeya. Inu òkukup ìre ke, mije nrọ-nlọ kiban̄, unyan̄a înan̄a isi ire lek ebi kpere ebi Ju, inyi ebi Ju esa me ikeya ekaan̄ ejit mba. ¹² Nrọ-nlọ ebi Ju îrọ inyi Awaji isa inu ubọọn̄ kan̄ igbana otutuuk ebi linyọn̄. Ichep ema ekaan̄be mije nrọ-nlọ kiban̄ îtap ebi kpere ebi Ju ubọọn̄ me emen ugbana eyi Awaji. Ire nrọ-nlọ ebi Ju isa ata inu chi inu, ìsibi ibe ke ugbana mômin enenen mgbọ otutuuk ebi Ju mêkanabe igọọk Awaji. ¹³ Enyi ebi kpere ebi Ju ke nkitumu ikọ yi inyi. Eyi emi nrebe ogwu otuchieen̄ ogwu òkilook ebi kpere ebi Ju ata etip, nkisa ikwaan̄ yi igugo lek enenen. ¹⁴ Inan̄a me irọrọ ikeya, mâtitọ ebi Ju kiji ejit, inyi ema ebene ekaan̄ ejit mba me lek kinyi. Usini mgbọ, usini kiban̄ mêgwu ikom, mè isa me ikeya ikaan̄ unyan̄a inan̄a me ubọk ikwaan̄ n̄a. ¹⁵ Îre mije ejitbe ema ke Awaji obak me lek irọ esuuk melek ebilene me otutuuk linyọn̄. Ire ijijit ema eyi Awaji ojitbe irọ inyi ebilene me otutuuk linyọn̄ ekana ebi òma melek Awaji, mgbọ Awaji môbọkọbe ema itap, ìre keke ke eya obosa inu? Eya môrọ inyi ebi ìkwukwu ejomo me mkpa, mè eneluk ugwem. ¹⁶ Ire usini me lek akpa ekọkọk eyi esabe irọ fituru isa igwa ngwugwa adasi mfut inyi Awaji ikup me mbuban, ìsibi ibe ke otutuuk akpa ekọkọk ya îkup me mbuban. Ikeya si, ire ugwun̄-ijọn̄ uti ikup me mbuban, otutuuk otu agọọk uti ya si îkup me mbuban. ¹⁷ Awaji ogwu òwowop ata uti olifu, òrere ebi Ijeren, îfieek usini otu agọọk isan̄a, mè isi isa otu agọọk ijo olifu oron, òrere enyi, ininwaan̄ me ere ata otu agọọk cha onan̄abe, enyi enenikigọọk ata otu agọọk kechilọ ikinyinyan̄a ata inorie ònan̄a me lek ugwun̄-ijọn̄ ata uti olifu ya. ¹⁸ Eya orọ, ikagugo lek, mè ìkpọ otu agọọk echi efieekbe isan̄a cha chieen̄ ìsiki. Sabum enyi ebegugo lek, ìkeek ibe ke enyi ìre otu agọọk ikike. Ìkare enyi ekibeme ugwun̄-ijọn̄, îre ugwun̄-ijọn̄ okibeme enyi. ¹⁹ Usini mgbọ, enyi mêkitumu ibe, “Iin̄ ma, esọsọp otu agọọk kechilọ isan̄a inyi eji ekaan̄ irek.” ²⁰ Îre atikọ! Esọp ema isan̄a mije una ichechieek kiban̄, mè iyaka isa enyi ininwene, mije enyi ekaan̄be ichechieek. Eya orọ, ikagumu lek mije keya. Kpan̄asi ikeya, ìkifieek owot. ²¹ Mije, ire Awaji ìkatele ema ebi ìrere otu agọọk òtitibi isibi me lek uti ya me lek kan̄, ìkpotele enyi si ebi esabe ininwaan̄, mè ire enyi inan̄a irọn̄. ²² Ikawuuk ibe ke Awaji ìre ogwu ata ejit, mè ire si ogwu unye ejit. Awaji înye ejit me lek ebi Ijeren ebi ìnanan̄a irọn̄, mè ikaan̄ ata ejit me lek kinyi, ire enyi ikeke inye me ikekirọ inu òbokirọ mè ọmọ ikikaan̄ ata ejit me lek kinyi ifo isi. Ire enyi kpekeke inye, ìbosọsọp enyi si ifiin̄. ²³ Ema ebi Ju si, ire ema itele una ichechieek kiban̄, Awaji môkpọk iyaka ema inwaan̄, mije, Awaji môkọt ikpọk iyaka ema inwaan̄ me irek kiban̄. ²⁴ Eyi kinyi, enyi ìre ijo olifu oron. Awaji onenisan̄a enyi isa ininwaan̄ me lek ata uti olifu eyi ewowop, inu kpekirarak irọ! Ire Awaji ikat ejit irọ òjelek inu òkup ikeya, ìsibi ibe ke ìkpoyọt ọmọ me lek ikpọkpọk isa ebi Ijeren, ìrere otu agọọk uti ya me lek kan̄, ininwaan̄ me irek kiban̄, me ere ema enan̄abe me lek uti kiban̄. ²⁵ Bọn Nte n̄a, îkaan̄ udọk udọk atikọ ge nkiweek irọrọ mè enyi eriọọn̄, inyi enyi ekamọnọ lek kinyi kubọk enyi mîmalek iriọọn̄ inu, mije unyan̄a keyi enyi ekaan̄be. Unye-ibot ebi Ijeren ekinye mgbọ keyi ìkpokup ire mgbọ geelek. Ojot ojot otu ifuk ebi kpere ebi Ju isigwu ikom igọọk Awaji isan̄a, unye-ibot ebi Ijeren môta. ²⁶ Sa me ikeya, mênyan̄a otutuuk ebi Ijeren kubọk egebe me Ikpa Mbuban ibe, “Ogwu unyan̄a mônan̄a me Sayọn inu, mè inisan̄a una ukpook Awaji isan̄a me emen bọn owot iman kè Jekọp. ²⁷ Mârọ inyan̄a-ibot keyi melek kiban̄ mgbọ mâmọnọbe ijo inu kiban̄ isan̄a.” ²⁸ Ebi Ju mîjit ata etip, mè ikana ebi ochicha Awaji mije kinyi ebi kpere ebi Ju. Ire, sa me lek igogobo eyi Awaji ogobobe ema inyi lek kan̄, ema ìre ebi Awaji omabe, mije ebi nte nte kiban̄ ukot ikaan̄. ²⁹ Mije, Awaji isigobo ene, îgobo isan̄a. Isigbana ene, îgbana isan̄a. Ìkakinwene ejit. ³⁰ Enyi ebi ìkikpaka ibot inyi Awaji me adasi mgbọ mîkaan̄ ejit nsan Awaji mgbọ keyi mije unye-ibot ebi Ijeren. ³¹ Ikeya si, mije ejit nsan Awaji okaan̄be me lek kinyi, ema mîkana ebi ìkikpaka ibot inyi Awaji, inyi Awaji ikaan̄ si ejit nsan me lek kiban̄ mgbọ keyi. ³² Mije, Awaji îrọ inyi otutuuk ebilene ekana ebi ìkikpaka ibot, inyi ọmọ ikaan̄ ejit nsan me lek otutuuk kiban̄. ³³ Ìre ekene oriọọn̄ ubọk Awaji osabe ibọọn̄ ubọọn̄ iyaka? Sa ìre ekene oriọọn̄ ubọk iriọọn̄-inu kan̄ mè ifuk-ibot kan̄ osabe idọk iyaka? Ìre ekene obokọt igobo itet ubọk îkisa idọmọ inu me nkeek kan̄? Ubọk irọ-inu kan̄, kpunu ogwu òbokọt iriọọn̄. ³⁴ Kubọk Ikpa Mbuban otumube ibe, “Ìre ekene oriọọn̄ ejit Okumugwem? Sa ìre ekene obokọt iteme ọmọ nteme? ³⁵ Ìre ekene orak ìfọọk inu inyi Awaji, eyi mêbe Awaji iniyaka ikpe?” ³⁶ Mije, otutuuk inu geelek ìnan̄a me ubọk kan̄, otutuuk inu geelek ìkiluk ugwem inan̄a me ubọk kan̄, otutuuk inu geelek ìkup inyi ọmọ. Itọn̄ mè umin ikup inyi ọmọ mege ire mgbọ ikakaan̄ge itata! Ikup ikeya!

¹ Eya orọ, bọn Nte n̄a, mije Awaji okaan̄be ejit nsan me lek kinyi, soso, nriaak enyi, ìsa lek kinyi ìnyi Awaji kubọk ke esasa enyi me ògat ugwem igwa ngwugwa inyi Awaji, ngwugwa òkup me mbuban, mè ikibele Awaji ejit. Eyi ore isisi ikwaan̄ inyi Awaji kubọk ebi ìkaan̄ ifuk-ibot. ² Ikayaka ìluk ugwem ìgọọk me lek ọrọmijọn̄ linyọn̄ keyi ofifi. Kpan̄asi ikeya, ìtele mè Awaji inyi enyi ayaya ejit, mè isa me ikeya inwene enyi. Mgbọ keya ke enyi mêkọt iriọọn̄ nkeek Awaji. Nkeek Awaji înwọn, mè ikibele Awaji ejit, mè iso ifuk. ³ Sa me atata nnwọn eyi Awaji onyibe emi, ǹkitumu inyi enyi ibe, ene geege ikamọnọ lek kan̄ ubene ubene ìsaba ìraka ubọk îgbebe. Kpan̄asi ikeya, ìfiat mgbọ ìkeek lek kinyi, mè ìriọọn̄ ubọk enyi ekupbe me atikọ, mè ìtọ lek kinyi ìgọọk me okike ichechieek Awaji onyibe enyi. ⁴ Ene geelek ìkaan̄ akpalek ge, melek owuwa nriro me lek. Ire, otutuuk nriro cha kpekigbaan̄ irọ chieen̄ ikwaan̄ ge gaalek. ⁵ Ikeya si, me emen kè Karais, ubọk geelek eji erebe owuwa ene, eji otutuuk ene ìre akpalek ge gaalek. Ene geelek me etete kiji ìkup inyi otutuuk kiji, ìkakup ìnyi lek kan̄ gaalek. ⁶ Eji ekaan̄ si uche esese esese igọọk me lek atata nnwọn Awaji onyibe eji me ene me ene. Ire uche ene ge ire ibeben nriran, ene ya isa ibeben nriran ya isi ikwaan̄ igọọk me okike ichechieek ọmọ okaan̄be. ⁷ Ogwu eyi kan̄ orebe isisi ikwaan̄, ene ya ikisi ikwaan̄. Ogwu eyi kan̄ orebe ijejeen̄ inu, ene ya ikijeen̄ inu. ⁸ Ogwu uche kan̄ orebe itatap ebi ene efuuk me emen, ene ya ikitap ebi ene efuuk me emen. Ogwu eyi kan̄ orebe isasa inu îkaan̄be ikitap ubọk inyi ebi una, ene ya ikichili ubọk iche inu inyi ebi una. Ogwu eyi kan̄ orebe ikpukpulu, ene ya igbala chieen̄, mè ikikpulu ijaan̄. Ogwu eyi kan̄ orebe ikakaan̄ ejit nsan me lek ene, ene ya ikisa me ubelejit ito ene nsan. ⁹ Ikachieek ibe imumechieen̄ kinyi ire eyi ofiaan̄, ire, ire eyi atikọ. Ìcha ijo inu, me ìkitet ata inu ìnye. ¹⁰ Ìkikaan̄ ulọk me lek bọn Nte kinyi me ejit imumechieen̄ ngwan̄ mè ngwan̄. Ìkinyi ebi melek kinyi umin ìgak ubọk enyi ekinyi lek kinyi. ¹¹ Ìkikaan̄ ulọk me isisi ikwaan̄, ikawọ lek. Ìkisa otutuuk ejit kinyi ìsi ikwaan̄ ìnyi Okaan̄-ene. ¹² Ìkinwọọn̄ unwọọn̄ mije ikpọchieen̄ kinyi, ìkikat ejit me emen ufialek, mè ìkiriaak uriaak mgbọ geelek. ¹³ Ìkiche inu enyi ekaan̄be ìnyi ebi eyi Awaji ebi kpekaan̄ inu, mè ìkibọkọ ebi ichen ìtap. ¹⁴ Ìkiriaak Awaji ibe igbana ebi ìkisisaak enyi, ìkigbana ema, ikakifieek otu ìnyi ema. ¹⁵ Ìkibele ejit melek ebi ìkibele ejit, mè ìkifieek ejit melek ebi ìkifieek ejit. ¹⁶ Ìgọọk ebi melek kinyi ìluk me esuuk. Ikakibene lek. Ìkigọọk ebi irek kiban̄ osikibe igak eyi kinyi ìkigbaan̄ inu ìrọ. Ikakimọnọ lek kinyi kubọk enyi gaalek eriọọn̄ inu igak. ¹⁷ Ikakisa ijo inu ìyaka ìkpe ene me ijo inu eyi ene orọbe enyi. Ìmun̄ ibe ke enyi mîkirọ inu ònwọnwọn me chieen̄ otutuuk ene. ¹⁸ Ìkiluk me esuuk melek otutuuk ene, ire ifet, mè ikup enyi me ubọk ikọkọt irọ. ¹⁹ Bọn Nte n̄a, ikarọ ene useen̄ inu. Kpan̄asi ikeya, ìkinyi irek mè unaan̄-ejit Awaji isi ikwaan̄, mije, Okaan̄-ene ìtumu me Ikpa Mbuban ibe, “Îre emi mbasan̄a useen̄. Mâyaka ikpe.” ²⁰ Kubọk Ikpa Mbuban otumube, “Ire uraafiọọn̄ itaka ogwu ochicha kwun̄, nyi inorie. Ire ebek irak, nyi inu enwọnwọ mè inwọ. Mgbọ okirọ inu chi inyi ogwu ochicha kwun̄, òkititiin̄ mbubuuk ukan̄ igwook ọmọ me ibot.” ²¹ Ikakinyi irek ibe ijo inu ikitim ikpan̄ enyi. Kpan̄asi ikeya, ìkisa ata inu ìtim ìkpan̄ ijo inu.

¹ Ene geelek ikisiki lek kan̄ inyi mkpulu geelek òkikpulu ọmọ, mije, kpunu mkpulu geege eyi ikanan̄age me ubọk Awaji. Mkpulu geelek òkikpulu me mgbọ keyi, îre Awaji osun̄ ema otutuuk. ² Eya orọ, ene geelek ònyenye ibot inyi mkpulu ìnye ibot inyi inu eyi Awaji me lek kan̄ osan̄abe isibi. Ebi geelek ìkirọ òjelek inu òkup ikeya, ekisa oyerebet ijet lek kiban̄. ³ Mije, ebi ibot mkpulu kpere inu ukpook inyi ebi ìkirọ inu òtatat. Ema ìre inu ukpook inyi ebi ìkirọ inu ikatatge. Ire okiweek ibe ukpook ebi ibot mkpulu ikakitet owu, kirọ inu òtatat, inyi ema eketọn̄ owu. ⁴ Mije, ogwu ibot mkpulu ìre gwun̄ ikwaan̄ Awaji, ogwu Awaji osan̄abe isun̄ ibe ikirọ owu ata inu. Ire, ire orọ ilọ, fieek owot me lek kan̄, mije, oge akọn̄ òkup ọmọ me ubọk ya ìkare me ikike. Ọmọ ìre gwun̄ ikwaan̄ Awaji ogwu Awaji osan̄abe ibe inijeen̄ unaan̄-ejit Awaji me lek ebi ìkirọ inu ikatatge. ⁵ Eya orọ, îgbe ibe ene isiki ibot inyi mkpulu geelek. Ìkare mije ukpook osusut gaalek, ire, mije owu me lek kwun̄ oriọọn̄be ibe ke îtat irọrọ ikeya. ⁶ Mije keyi si orọ îgbebe ibe enyi eketip otitip ido, mije ebi ibot mkpulu ekisa otutuuk mgbọ kiban̄ isi ikwaan̄ inyi Awaji. ⁷ Ìkpe otutuuk ene urieek geelek enyi ekaan̄be ema. Ebi enyi ekaan̄be urieek otitip ido, ìkpe otitip ido ìnyi. Ebi enyi ekikpe mkpukpe inyi me ibot inu enyi ekaan̄be, ìkikpe mkpukpe cha ìnyi ema. Ebi ìgbegbe inyinyi ulibi, ìnyi ulibi. Ebi ìgbegbe inyinyi umin, ìnyi umin. ⁸ Ikakaan̄ ene geege urieek, îtata urieek eyi imumechieen̄ gaalek, mije, urieek imumechieen̄ ìkakita. Ene geelek òmumun̄ ogwu melek kan̄ me chieen̄ îrọ otutuuk Ikan kè Mosis iso. ⁹ Inu Ikan kè Mosis okitumu ibe, “Karọ ugan-nwa, kakpan̄ ene, kachiin̄ inọ, kakaan̄ chieen̄ ile me lek inu ofifi ene okaan̄be,” mè otutuuk ofifi inu geelek egebe me Ikan kè Mosis, otutuuk ikan chi ìre ikan ge gaalek, eyi òrere: “Mun̄ ogwu melek kwun̄ me chieen̄ kubọk omun̄be lek kwun̄ me chieen̄.” ¹⁰ Ogwu òmumun̄ ene me chieen̄ ìkpokọt irọ ene ya ijo inu geege. Eya orọ, imumechieen̄ ore irọrọ Ikan kè Mosis iso. ¹¹ Ìnye lek ìkirọ ikeya, mije, enyi mîriọọn̄ inu mgbọ keyi orebe. Îkem mgbọ enyi mênan̄abe ikeke me ilaak, mije, unyan̄a kiji îgbet enenen mgbọ keyi igak mgbọ eji ebenebe ikaan̄ ichechieek. ¹² Eririeen̄ môniraka. Ìsik sọntiik egwe môwelebe itoon̄ ene me lek! Eya orọ, eji ewọọk irọrọ echi emen udun esan̄a me lek kiji, mè etap nroon̄ akọn̄ eyi mêsabe itim akọn̄ me utoon̄ ikarek. ¹³ Eji eluk ugwem òtatana me isi Awaji ubọk îgbebe ibe ekeluk me chieen̄ ikarek. Eji etele ijo ifit miin̄ mè òje oyet, mè inwọnwọ miin̄ isa, mè ijeje oyet, mè ugwem barabat, mè gọlọgọlọ eyi etim, mè etele si chieen̄ ile. ¹⁴ Kpan̄asi ikeya, ìtap Jisọs Karais kubọk ọfọnti, mè ìjit irọrọ ijo ulọk cha echi akpalek ijo inu kinyi okitọ inyi enyi.

¹ Ìbọkọ gwun̄ Nte ogwu ichechieek kan̄ ikanyege ìtap kubọk ogwu melek kinyi, mè ikafieek ọmọ ikọ mije inu îchieekbe me ejit kan̄, eyi ikajege ìkike melek eyi kinyi. ² Ichechieek ene ge môkọt inyi irek ibe ene ya ikirie otutuuk inu geelek. Ire, ofifi ene ogwu ichechieek kan̄ ikanyege môkọt ikirie inu ònan̄a me lek uti gaalek. ³ Ogwu òkirie inu geelek ikakpọ ogwu ìkakirie inu geelek chieen̄ ìsiki. Ogwu ìkakirie inu geelek ikafieek oyerebet ìtip ogwu òkirie inu geelek îmun̄be, mije, Awaji îbọkọ ene ya itap. ⁴ Owu ogwu òkisibi oyerebet me ibot gwun̄ ikwaan̄ ofifi ene, ìre owu ìre ekene? Îre ogwu nte uwu kan̄ gaalek obokọt iriọọn̄ mè ìre òkirọ inwọn, mè ìre ìkarọ ìnwọn. Ọmọ môrọ inwọn, mije, Okaan̄-ene môrọ inyi ọmọ irọ ijaan̄. ⁵ Ene ge môkọt ikimọnọ ibe ke usen ge îkup me mbuban igak usen kechilọ, me ere ofifi ene okimọnọ ibe ke otutuuk usen ìre ìkike. Ene geelek imun̄ ibe ke inu ọmọ ochieekbe me lek ìre eyi ejit kan̄ ochieekbe inye. ⁶ Ogwu òkisun̄ usen ge me mbuban igak usen kechilọ, ìkirọ ikeya inyi Okaan̄-ene. Ogwu òkitaka anam, ìkitaka isa imin Okaan̄-ene, mije, ìkinyi Awaji itọn̄. Ogwu ìkakirie inu geelek, ìkirọ si ikeya inyi Okaan̄-ene, mè ikinyi Awaji itọn̄. ⁷ Mije, kpunu ene geege me etete kiji ogwu òkiluk ugwem inyi lek kan̄ gaalek. Kpunu si ogwu òkikwu mkpa inyi lek kan̄ gaalek. ⁸ Ire eji igat ugwem, eji egat inyi Okaan̄-ene. Ire eji ikwu, eji ekwu si inyi Okaan̄-ene. Eya orọ, mè ìre eji ekup me ògat ugwem, mè ìre eji ekwukwu, eji ìre eyi Okaan̄-ene. ⁹ Îre mije keyi ke Jisọs Karais okwu, mè iyaka ijomo me mkpa, inyi ọmọ inire Okaan̄-ene inyi ebi ìkwukwu, mè ebi ìkup me ugwem. ¹⁰ Ire ikeya, ìre owu òjeje ikifieek gwun̄ Nte kwun̄ ikọ? Sa ìre owu òjeje ikikpọ gwun̄ Nte kwun̄ chieen̄ isiki? Mije, eji otutuuk ene mêkeke me isi ogboon̄ oyerebet Awaji, mè Awaji isibi eji oyerebet me ibot. ¹¹ Okumugwem ìtumu me Ikpa Mbuban ibe, “Eyi nkupbe me ugwem, ene geelek môtọbọ ekpe me isi n̄a; otu geelek môtumu isibi ibe ke emi nre Awaji.” ¹² Eya orọ, ene geelek me etete kiji ìbofuk ifuk eyi ibot kan̄ inyi Awaji. ¹³ Eya orọ, eji ekayaka ìfieek bọn Nte kiji ikọ. Kpan̄asi ikeya, ìtumu ìfieek ibe ke enyi kpeberọ inu geege òbokana ukput inyi gwun̄ Nte kinyi, mè irọ inyi inan̄a irọn̄ inin̄ me emen ijo inu. ¹⁴ Emi kubọk ogwu ògọgọọk Jisọs igbaan̄ ire ge, nriọọn̄ ijaan̄ lek ibe ke kpunu inorie geege òkukup me lek kan̄, mè ire inorie ikatanage me isi Awaji. Ire, ire ikaan̄ ogwu ifuk inu ge kubọk inu ikatanage me isi Awaji, me lek ene ya, inu ya si ìkatana me isi Awaji. ¹⁵ Ire inu owu okirie ikisisaak gwun̄ Nte kwun̄, ìsibi ibe ke owu òkayaka ìrọ inu me imumechieen̄. Kasa me lek inorie okirie ìjijaka ugwem gwun̄ Nte kwun̄ ogwu Jisọs Karais okwube mkpa me ibot. ¹⁶ Kachieek ibe inu owu okimọnọ kubọk ata inu iyaka inikana inu ebi ene ekitumu ibe ke ìre ijo inu. ¹⁷ Mije, mkpulu eyi Awaji ìkagbaan̄ me lek inu irerie mè inwọnwọ, ire, ìkido ata irọrọ, mè esuuk, mè unwọọn̄ echi Ekwukwu Mbuban okinyi. ¹⁸ Mije, ene geelek òkisi ikwaan̄ inyi Karais me oniin̄ òkup ikeyi ìre ogwu Awaji okibele ejit me lek, mè ire si ogwu inu kan̄ okineme ebilene. ¹⁹ Eya orọ, ubọk geelek eji ekọtbe, eji ekerọ inu echi òbokitap esuuk, mè echi òbokinama eji mè ebi melek kiji inye. ²⁰ Kajijaka ikwaan̄ Awaji mije inorie. Otutuuk inorie geelek îtana me isi Awaji. Ire, ìkatat ibe ene irie inorie eyi òborọ inyi ofifi ene inan̄a irọn̄. ²¹ Înwọn enenen ire owu òkataka anam, òkanwọ miin̄, òkarọrọ si ofifi inu geege eyi môrọbe inyi gwun̄ Nte kwun̄ inan̄a irọn̄. ²² Eya orọ, ire ikaan̄ inu geelek owu ochieekbe me lek òfolek inu chi, sun̄ nyi lek kwun̄ melek Awaji. Ugbana môkup inyi ene geelek ikatipge lek kan̄ oyerebet sa me lek inu îbọkọbe itap inyi lek kan̄. ²³ Ire, ire ikaan̄ ogwu ikaan̄ ejit iba òfolek inu îkirie, Awaji îtip ene ya oyerebet, mije, ìkasa me ichechieek ìrie inu ya, bak me lek, irọrọ geelek eyi ikanan̄age me ichechieek ìre ijo inu.

¹ Îgbe ibe eji ebi ìkekeke inye me ichechieek ekeme nrọ-nlọ òkup me emen ebi kpekeke inye me ichechieek, me ekakeekge ubelejit eyi akpalek kiji. ² Ene geelek me etete kiji ikirọ inyi ejit ibele ogwu melek kan̄, mè ikirọ ene ya ata inu, mè inama ichechieek ene ya ibene. ³ Mije, Jisọs Karais me lek kan̄ ìkaweek ubelejit eyi lek kan̄ gaalek, kubọk egebe me Ikpa Mbuban ibe: “Otutuuk unyechieen̄ ebi ene ekinyi owu ìnikikeme emi.” ⁴ Mije, inu geelek egebe me Ikpa Mbuban me ukot ikaan̄, ege isasa ijeen̄ eji inu eyi òbokikat eji ejit, mè ikitap eji efuuk me emen, inyi eji esa me ikeya ekaan̄ ikpọchieen̄. ⁵ Awaji ogwu òkikat ene ejit, mè ikitap ene efuuk me emen, irọ inyi enyi otutuuk ene egbaan̄ eluk me ejit ge me mgbọ keyi enyi ekigọọk Jisọs Karais, ⁶ inyi enyi otutuuk ene egbaan̄ esa ejit ge, mè ida ge etọn̄ Awaji ogwu òrere Nte Okaan̄ kiji Jisọs Karais. ⁷ Me mgbọ yi, ìbọkọ ebi melek kinyi ìtap, kubọk Jisọs Karais obọkọbe enyi itap, inyi itọn̄ ikup inyi Awaji. ⁸ Mije, ǹkitumu atikọ inyi enyi ibe ke Karais îkana gwun̄ ikwaan̄ inyi ebi Ju, inenirọ use Awaji ochieekbe ebi nte nte kiban̄ ukot ikaan̄ inye, inyi ema esa eriọọn̄ ibe ke Awaji ìre ogwu atikọ. ⁹ Sa me ikeyi ebi kpere ebi Ju mêtọn̄ Awaji mije ejit nsan kan̄, kubọk Ikpa Mbuban otumube ibe, “Mije keyi, mâtọn̄ owu me etete ebi kpere ebi Ju; mâkọt okwa itọn̄ erieen̄ kwun̄.” ¹⁰ Ofifi si, Ikpa Mbuban îtumu ibe, “Enyi ebi kpere ebi Ju, ìgọọk ebi eyi Awaji ìnwọọn̄ unwọọn̄.” ¹¹ Ikpa Mbuban îtumu me ofifi ere si ibe, “Otutuuk kinyi ebi kpere ebi Ju, ìtọn̄ Okumugwem, mè ìkọt okwa ìtọn̄ ọmọ, enyi ebi otutuuk ido geelek.” ¹² Ofifi si, Awaji îtumu me otu kè Asaya ogwu nriran ibe, “Gwun̄ owot iman kè Jesi ge mônan̄a isibi; ọmọ ore ogwu òbonikpulu ebi ido geelek me linyọn̄. Ebi ido geelek me linyọn̄ ebekaan̄ ikpọchieen̄ me lek kan̄.” ¹³ Awaji ogwu òkinyi ene ikpọchieen̄, inyi enyi ojot ojot unwọọn̄ mè esuuk, mè irọ inyi ikpọchieen̄ enyi ekaan̄be me lek kan̄ ikpọkpọ ikimin, sa me unye eyi Ekwukwu Mbuban. ¹⁴ Bọn Nte n̄a, emi me lek n̄a nchieek ibe ke enyi me lek kinyi mîkaan̄ ata ejit, mè inwọn me ugwem, mè ikaan̄ ojot ojot ifuk-ibot. Nriọọn̄ si ibe ke enyi mîso ebi mêkọtbe ikijeen̄ lek kinyi inu. ¹⁵ Ire, ǹge ikpa keyi ijet enyi, inyi ǹsa irek keyi ǹkpọk ǹkeek enyi usini ikọ òkup me uyọt, eyi mwuukbe lek itumu inyi enyi. Ǹkatet ukpook, ǹnyenye otu ikitumu ikọ keyi, mije atata nnwọn eyi Awaji onyibe emi, ¹⁶ mè isa emi irọ ogwu ikwaan̄ kè Jisọs Karais me etete kinyi ebi kpere ebi Ju. Ǹkirọ ikwaan̄ ilolook ata etip me etete kinyi, kubọk ogwu ngwugwa eyi Awaji, inyi enyi ekana inu esabe igwa ngwugwa òkibele Awaji ejit, mije, Ekwukwu Mbuban îgwọk enyi itana, mè isun̄ enyi me mbuban. ¹⁷ Mije keyi, ǹkisa ikwaan̄ nkisi inyi Awaji ibaan̄ alọm mije kè Jisọs Karais. ¹⁸ Me atikọ, emi m̀kpatumu ofifi ikọ geege ilọ me lek ikọ òfolek ikwaan̄ Karais osabe emi irọ me etete ebi kpere ebi Ju, mè irọ inyi ema enesiki ibot enyi Awaji. Karais ìrọ inu yi sa me ikọ otu n̄a, mè irọrọ n̄a, ¹⁹ mè unye esese inu ukechieen̄, mè uyeke inu, mè sa me unye eyi Ekwukwu Mbuban. Ikeya ke mbene me Jeruselem ijijen̄e ikana otutuuk ere isi igwook me agan̄ ekigwen Ilirikọm, mè ilook ata etip kè Karais iso otutuuk ere cha. ²⁰ Ulọk òmimin emi me ejit ichit bene me ibebene ìre isasa ata etip kè Jisọs Karais isi ilook me ere ebi ene kpewuuk lek ilook, inyi nkatumu ikọ Awaji me ere ofifi ene owuukbe lek itọbọ ọdọ. ²¹ Ire, kubọk egebe me Ikpa Mbuban ibe, “Ebi kpekpa inu òfolek kan̄ inyi, mêmun̄, ebi kpewuuk lek inọ ikọ kan̄ mêgobo itet.” ²² Me atikọ, eyiyi ore inu òtetet emi ikaan̄ owuwa mgbọ, inyi nkakọt ìnu ìnimun̄ enyi. ²³ Ire, îwuuk lek ikilọlọk emi imumun̄ enyi karake owuwa acha òraraka. Eya orọ, mgbọ keyi nkayakage ìkaan̄ ikwaan̄ geege irọrọ me agba agan̄ kechi, ǹkiweek inunu inimun̄ enyi. ²⁴ Ǹkitọt igbagba ikpọ enyi mgbọ mbaraka isi Sipen. Me oniin̄ ije n̄a, mâgba Rom inigọọk enyi ikup sọnja mgbọ. Nsinwọọn̄ enyi isan̄a, mânenije ije n̄a isi Sipen. Ǹkikpọ chieen̄ ibe ke enyi mêtap ubọk inyi emi, inyi ije ya ifet. ²⁵ Ire, me mgbọ keyi, ǹkup me oniin̄ ije, m̀basa inu ijet bọn Awaji ìkup me Jeruselem. ²⁶ Mije, ebi ntitiin̄ Awaji ìkup me agan̄ Mesidonia mè agan̄ Akaya mîsa me ata ejit ititiin̄ inu iria ibe esa esi eche enyi ebi ìkup me una me etete ebi ntitiin̄ Awaji ìkup me Jeruselem. ²⁷ Ema gaalek etumu ifieek me ejit kiban̄, mè irọ. Me atikọ, îgbe ibe ema etap ubọk enyi ebi ugbọọn̄ ìkup me ntitiin̄ Awaji me Jeruselem. Mije, ire ebi Ju iche usini ugbana Awaji eyi ema ekaan̄be inyi ebi kpere ebi Ju, îgbe si ibe ebi kpere ebi Ju eche usini ugbana linyọn̄ keyi eyi ema ekaan̄be enyi ebi Ju. ²⁸ Nsirọ ikwaan̄ keyi isan̄a, mè imun̄ ibe ke nkana uche ikpoko yi itap ema me ubọk, mânibene ije isi Sipen, mè igba itọp enyi amọn. ²⁹ Nriọọn̄ ibe, mgbọ mânube, ke mâsa ojot ojot ugbana kè Jisọs Karais igbaalek inu. ³⁰ Bọn Nte n̄a, nsa me erieen̄ Okaan̄ kiji Jisọs Karais, mè imumechieen̄ eyi Ekwukwu Mbuban okinyi, iriaak enyi ibe, soso, ìgọọk emi ìriaak uriaak ìnye me ibot n̄a ìsa ìtap ubọk ìnyi emi me emen ufialek n̄a. ³¹ Ìriaak Awaji ibe inyan̄a emi isibi me ubọk ebi kpechieek me lek kè Jisọs Karais me Judia, mè Awaji irọ mè bọn Awaji ìkup me Jeruselem ebọkọ inu chi nkisa ijet ema me atata. ³² Ire ineme Awaji, nsikana uche chi inyi ema isan̄a, mgbọ ya ke mbanikọt ije me unwọọn̄ inu me lek kinyi, inyi enyi melek n̄a egbaan̄ ebele ejit, mè ekaan̄ aya efuuk. ³³ Awaji ogwu òkinyi ene esuuk ikup melek kinyi otutuuk ene. Ikup ikeya!

¹ Ǹkiweek ibe enyi eriọọn̄ gwun̄ Nte kiji enenwaan̄ ekigwen Fibi, òrere ogwu ntap-ubọk me ntitiin̄ Awaji òkup me ama Kenkiriye. ² Soso, ìbọkọ ọmọ ìtap me erieen̄ Okaan̄-ene ubọk ògbegbe ibe ebọkọ gwun̄ eyi Awaji etap, mè ìtap ubọk ìnyi ọmọ me inu geelek òkup ọmọ me uyọt. Mije, ọmọ îtap ubọk enenen inyi owuwa ene, mè itap si inyi emi. ³ Ìtọp Pirisila mè Akwila amọn ìnyi emi. Îre ema melek n̄a ekigbaan̄ isi ikwaan̄ inyi Jisọs Karais. ⁴ Ema mîsa ugwem kiban̄ isun̄ inu ikike, inyi ema ekọt etap ubọk enyi emi. Ejit îbele emi enenen mije kiban̄. Ìkare emi gaalek nkitọn̄ ema, otutuuk ebi ntitiin̄ Awaji ìkup me ido ebi kpere ebi Ju si mîbele ejit enenen me lek kiban̄. ⁵ Ìtọp si ebi ntitiin̄ Awaji eyi òkup me uwu kiban̄ amọn ìnyi emi. Ìtọp ata ogwu une n̄a, Epenitọs, amọn ìnyi emi. Ọmọ ore adasi ene òchechieek me lek kè Jisọs Karais me otutuuk agan̄ Esia. ⁶ Ìtọp Meri amọn ìnyi emi. Ọmọ îsa otutuuk unye kan̄ isi ikwaan̄ inyi enyi. ⁷ Ìtọp Andọrọnikọs mè Junias amọn ìnyi emi. Ema ìre ebi Ju ama n̄a, ebi melek n̄a ekupbe me uwu mkpọn. Ema ìre ebi eriọọn̄be erieen̄ me etete ebi otuchieen̄. Ema edasi n̄a ikana ebi eyi Karais. ⁸ Ìtọp Ampilietọs amọn ìnyi emi. Ọmọ ìre ogwu mmabe enenen me emen Okaan̄-ene. ⁹ Ìtọp Ọbanọs amọn ìnyi emi. Ọmọ melek kiji ekigbaan̄ isi ikwaan̄ inyi Karais. Ìtọp si ata une n̄a Sitakis amọn ìnyi emi. ¹⁰ Ìtọp Apelis amọn ìnyi emi. Ọmọ ìre ogwu etọbe ikpọ, mè imun̄ ibe ke îsiki ibot inyi Karais. Ìtọp ebi ototun̄ ukan̄ kè Arisitobulọs amọn ìnyi emi. ¹¹ Ìtọp Erọdiọn, ogwu ama n̄a, amọn ìnyi emi. Ìtọp ebi ototun̄ ukan̄ kè Nasisọs ebi ìkup me emen Okaan̄-ene amọn ìnyi emi. ¹² Ìtọp Tarafina melek Tarafosa amọn ìnyi emi. Ebibaan̄ chi mîkwukwulu enenen me irọrọ ikwaan̄ Okaan̄-ene. Ìtọp ata une n̄a Pesis amọn ìnyi emi. Ọmọ si ìre ofifi enenwaan̄ òtatap lek isi ikwaan̄ Okaan̄-ene enenen. ¹³ Ìtọp Rufọs amọn ìnyi emi. Ọmọ ìre ogwu ikwaan̄ ogwu Okaan̄-ene ogobobe inyi lek kan̄. Ìtọp si ogwu uga amọn ìnyi emi. Ọmọ îre si uga inyi emi. ¹⁴ Ìtọp Asinkiritọs, mè Felegọn, mè Hemes, mè Patorobas, mè Hemas, mè bọn Nte ebi melek kiban̄ amọn ìnyi emi. ¹⁵ Ìtọp Filologọs, mè Julia, mè Neriọs, mè ogwu ngwan̄ enenwaan̄, mè Olimpas, mè otutuuk bọn Awaji ìkup melek kiban̄ amọn ìnyi emi. ¹⁶ Ìkat lek kinyi, mè ìtọp lek kinyi amọn me oniin̄ òkup mbuban ìnyi emi. Otutuuk ntitiin̄ kè Karais mîtọp enyi amọn isan̄a. ¹⁷ Ǹkiriaak enyi, bọn Nte n̄a ibe, soso ìgbala chieen̄ me lek ebi ìkitap icheche lek, mè ikiwuwọlọ ichechieek ebi ene, mè ikije ikeme ijejeen̄ ya enyi ebọkọbe. Ìsan̄a lek kinyi me lek kiban̄. ¹⁸ Mije, ìkare Karais Okaan̄ kiji ke ema ekitọbọ ebum inyi. Îre ulọk kiban̄ ke ema ekitọbọ ebum inyi. Ema ekisa unin̄i otu, mè ikọ ofiaan̄ ikileke ekiket ebi kperiọọn̄ ofiaan̄ kiban̄. ¹⁹ Etip kinyi òkitaan̄ ikana ere geelek ibe ke enyi mîsiki ibot inyi ata etip enenen. Eya orọ, ejit îbele emi enenen mije kinyi. Ire, ìgbala chieen̄. Ǹkiweek ibe enyi ekerọ ata inu kubọk ebi ìriọọn̄ inu. Ǹkaweek ibe enyi eriọọn̄ inu geege òfolek ijo inu. ²⁰ Ìkpofiin̄ mgbọ Awaji ogwu òkinyi ene esuuk môkpukpukube Setan me irak ukot kinyi. Atata nnwọn Okaan̄ kiji Jisọs ikup melek kinyi! ²¹ Timọti, ogwu melek n̄a ekigbaan̄ isi ikwaan̄, îtọp enyi amọn. Lusiọs, mè Jesin, mè Sosipata, ebi ama n̄a, mîtọp enyi amọn si. ²² Emi Tetiọs ogwu ògege ikpa yi inyi Pọọlu, ntọp enyi amọn si. ²³ Gayọs, ogwu òsa me ata ejit inyi emi melek ebi ntitiin̄ Awaji irek me uwu kan̄, îtọp enyi amọn si. Erasitọs ogwu òkisun̄ ikpoko ikwaan̄ ama, mè Kwọtọs gwun̄ Nte kiji enerieen̄ mîtọp enyi amọn si. ²⁴ [Atata nnwọn Okaan̄ kiji Jisọs Karais ikup melek kinyi otutuuk ene. Ikup ikeya!] ²⁵ Mgbọ keyi, eji etọn̄ Awaji ogwu òbokọt irọ inyi enyi ekeke enye me ichechieek sa me ata etip kè Jisọs Karais eyi nkilook igọọk me lek nlelet inu echilibe ijeen̄ emi. Awaji ìlelet udọk udọk inu yi karake ukot ikaan̄, ²⁶ mè inichili ikpọk mbum mgbọ keyi sa me owuwa inu ebi nriran egebe, melek ida Awaji ogwu mgbọ ikakaan̄ge itata onyibe, inyi otutuuk ebi ido geelek me linyọn̄ esa me ikeya echieek, mè esiki ibot enyi ọmọ. ²⁷ Itọn̄, ikup inyi Awaji ogwu ọmọ gaalek oriọọn̄be inu ichit, sa me lek kè Jisọs Karais! Ikup ikeya!