Ichichili

Ichichili

¹ Echi ìre inu echi Jisọs Karais ochilibe ijeen̄ ebi ikwaan̄ Awaji. Îre Awaji onyi Jisọs Karais inu chi ibe isa ijeen̄ ebi kan̄, inyi ema eriọọn̄ inu òborọrọ me sọntiik mgbọ òkup me isi. Jisọs Karais oraria ogwu osat kan̄ ibe inichili inu cha ijeen̄ Jọn ogwu ikwaan̄ kan̄. ² Jọn oneniben otutuuk inu cha îmun̄be itumu isibi, mè isa me ikeya ikirọ inye ibe ke ikọ Awaji eyi Jisọs Karais ochilibe ijeen̄ ọmọ ìre atikọ. ³ Ugbana môkup inyi ene geelek òfufuk ikọ nriran egebe me ikpa yi. Ugbana môkup si inyi ebi geelek ìnọnọ etip chi, mè ikirọ inu etumube, mije, mgbọ inu chi oborọ iso îgbet enenen. ⁴ Îre emi Jọn nkige ikpa yi ijet enyi ebi ntitiin̄ Awaji jaaba òkup me agan̄ Esia. Atata nnwọn mè esuuk ikup inyi enyi inan̄a me ubọk Awaji ogwu òkukup karake akat, mè ikup si me mgbọ keyi, ogwu òbokup ire mgbọ geelek. Atata nnwọn mè esuuk ikup si inyi enyi inan̄a me ubọk ekwukwu jaaba òkekeke me isi ogboon̄ ubọọn̄ Awaji, ⁵ mè ubọk kè Jisọs Karais, ogwu ikọ kan̄ ogbebe ibe etoon̄ ejit me lek, ogwu Awaji odasi ijomo me mkpa. Ọmọ si ore ogwu òkikpulu otutuuk ebi ubọọn̄ linyọn̄ keyi. Ọmọ îmun̄ eji me chieen̄. Sa me mkpa kan̄ ke înyan̄a eji isibi me emen ijo kiji. ⁶ Îkpulu eji isa irọ ebi Awaji okikpulu, mè isa eji irọ ebi ngwugwa, inyi eji ekesi ikwaan̄ enyi Awaji ogwu òrere Nte kan̄. Itọn̄ mè mkpulu ikup inyi Jisọs ire mgbọ ikakaan̄ge itata! Ikup ikeya! ⁷ Ìkpọ, òkinu! Ìboje melek oduku inyọn̄ inu. Chieen̄ geelek mômun̄ ọmọ, ìrere ebi ìsasa otunwa ichim ọmọ, ema si mêmun̄ ọmọ. Otutuuk ebi ido geelek òkup me linyọn̄ keyi mêto ito ufieejit mije kan̄. Iin̄, ikeya ke îbokup! Ikup ikeya! ⁸ Okumugwem Awaji Ogwu Òkaan̄ Unye Geelek, ogwu òkukup karake akat, mè ikup me mgbọ keyi, ogwu òbokup ire mgbọ geelek, ìtumu ibe, “Emi nre Ibebene mè Itata inu geelek.” ⁹ Emi Jọn nkige ikpa yi ijet enyi. Emi ìre gwun̄ Nte kinyi, ogwu melek kinyi ekigbaan̄ ibọkọ ufialek, mè igbaan̄ ikup me mkpulu kè Jisọs Karais, mè ikigbaan̄ ikat ejit ikime ufialek òkukup inyi eji mije kè Jisọs. Îre mije nkitumu ikọ Awaji, eyi Jisọs orọbe inye ibe ke ìre atikọ, eya orọ etetbe emi inito me inyọn̄ achọ ekigwen Patimọs. ¹⁰ Mgbọ nkupbe me inyọn̄ achọ ya, me Usen Awaji ge, Ekwukwu Awaji okakana ichit emi, nnọnọ ida ge okitaan̄ unye unye me udun̄ n̄a kubọk ida otita, ¹¹ mè ikitumu ibe, “Ge otutuuk inu omun̄be tap me ikpa, mè ria jet ntitiin̄ Awaji jaaba òkup me Efesọs, mè Simaina, mè Pegamọm, mè Tiyatira, mè Sadis, mè Filadefia, mè Lawodisia.” ¹² Nraraan̄ chieen̄ ikana iweek imumun̄ ogwu òkitumu ikọ ya inyi emi. Mgbọ ngwube isi ikana, ǹyaka inimun̄ ngugọọn̄ mkpukan̄ jaaba esabe alata araran̄ irom, ¹³ mè imun̄ ene ge “òbet lek gwun̄ ebilene” okekebe me etete ngugọọn̄ mkpukan̄ cha, mè itap ujọn̄ọ ọfọnti okuket igwook ire ijọn̄ ukot, mè isa fanti alata araran̄ ikana me otu ejit, mè ibọp ikaan̄. ¹⁴ Ibot kan̄ mè ijeek òkup ọmọ me ibot ìkitana jai kubọk eri akpọọn̄, mè ikitana si kubọk abalara, sa chieen̄ kan̄ okisak kubọk alọm ukan̄. ¹⁵ Ukot iba kan̄ ìkimumen kubọk ekwe òkikala me emen ukan̄, sa ida kan̄ okitaan̄ woii kubọk ida owuwa agbugbuk. ¹⁶ Ọmọ okakaan̄ ntoronyan̄ jaaba me ubọk kan̄ agan̄ ulom. Oge etim isi iba òrereke, owọwọọk isibi ikeke ikeya me otu kan̄. Isi kan̄ okekitoon̄ ikeya miai kubọk unye ura ejit ikarek. ¹⁷ Mgbọ mmun̄be ene ya, nrọrọn̄ inyana me ukot kan̄ kubọk ogwu òkwukwu. Ọmọ onyanyana ubọk agan̄ ulom kan̄ ichak emi me lek, mè itumu inyi emi ibe, “Kafieek owot! Emi ìre Adasi mè Òta! ¹⁸ Emi ìre Ogwu Òkup Me Ugwem. Nkwu me mgbọ òraraka. Ire, kpọ, me mgbọ keyi, emi òwa me ugwem mege ire mgbọ ikakaan̄ge itata! Mkpa mè ama ekwukwu ìkup emi me ubọk. Otutuuk atafi isotu kiban̄ ìkup emi me ubọk. ¹⁹ “Eya orọ, ge inu chi geelek omun̄be tap me ikpa. Ge echi òkukup me mgbọ keyi, mè ge si echi òborọ me mgbọ òkup me isi. ²⁰ Ke omun̄ ntoronyan̄ jaaba chi òkup me ubọk n̄a agan̄ ulom, melek ngugọọn̄ mkpukan̄ jaaba cha esabe alata araran̄ irom? Nlelet inu òkup me lek kiban̄ ìre ikeyi: Ntoronyan̄ jaaba chi ìkeke inyi ebi osat Awaji jaaba ìkikpulu ntitiin̄ Awaji jaaba cha. Sa ngugọọn̄ mkpukan̄ jaaba chi okeke inyi ntitiin̄ Awaji jaaba cha me lek kiban̄.”

¹ Ogwu mmun̄be ya onenitumu inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Efesọs ibe: Eyi ìre ikọ ònan̄a me otu ogwu òkaan̄ ntoronyan̄ jaaba me akajit ubọk kan̄ agan̄ ulom, mè ikije ikana me etete ngugọọn̄ mkpukan̄ jaaba cha esabe alata araran̄ irom. ² Nriọọn̄ otutuuk kwulukwulu kinyi, mè iriọọn̄ si ibe ke enyi mîkinye lek irọ ikwaan̄, mè ikikat si ejit mgbọ inu okiyọt. Nriọọn̄ si ibe ke enyi kpekichieek ibe ebi ìkirọ ijo inu ekup me etete kinyi. Îkaan̄ ebi ìkigwen lek kiban̄ ebi otuchieen̄, me ere ema kpere ebi otuchieen̄. Nriọọn̄ ibe ke enyi mîtọ ife chi ikpọ, mè imun̄ ibe ke ema ìre ebi ataak. ³ Enyi mîkikat ejit ibọkọ owuwa ufialek mije erieen̄ n̄a. Enyi kpechieek-nu ibe efuuk ita enyi me emen. ⁴ “Ire, ǹkabele ejit, mije ijo inu ge mmun̄be me ugwem kinyi. Enyi kpeyaka ima emi kubọk adasi mgbọ ya. ⁵ Mije adasi imumechieen̄ ya enyi etelebe, enyi mînan̄a irọn̄ ijọn̄ọ ere. Ìkeek ikpele irọn̄ yi, mè ìgwu ìkom, mè ìyaka ìkirọ inu cha echi enyi ekirọ me adasi mgbọ. Ire enyi kpegwu ikom me ijo kinyi, emi mânu inisan̄a ngugọọn̄ mkpukan̄ kinyi isan̄a me irek kan̄. ⁶ Ire, ǹkitọn̄ enyi mije ata ugwem ge enyi ekaan̄be. Enyi mîcha irọrọ ebi ìkigọọk Nikolas ekirọ, kubọk emi nchabe si. ⁷ “Ogwu ikaan̄ utọn̄, inọ inu Ekwukwu Awaji okitumu inyi ebi ntitiin̄ Awaji geelek! Ogwu itim ikpan̄, mânyi ene ya unye ibe irie mfut ònan̄a me lek uti eyi òkinyi ene ugwem, eyi òtibi me eden̄ Paradais eyi Awaji.” ⁸ Ogwu ene ya mmun̄be otutumu si inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Simaina ibe: Eyi ìre ikọ ònan̄a me otu ogwu òrere Adasi mè Òta, ogwu òkwukwu, mè ikpọk ijomo me mkpa iniluk ugwem. ⁹ Nriọọn̄ otutuuk ufialek enyi ekibọkọ, mè iriọọn̄ si ibe ke enyi mîgbọọn̄ enenen. Ire, me atikọ, enyi kpere ugbọọn̄, enyi mîbọọn̄ ubọọn̄. Nriọọn̄ ijo ikọ ebi ataak cha ekisa itumu enyi ifiat. Ife cha ekikan̄ ataak ibe ke ema ìre ebi Ju, ire, ema kpere ebi Ju kubọk ge. Ema ìre ebi ntitiin̄ eyi Setan. ¹⁰ Ikafieek owot mije owuwa uyọrọlek enyi mêjebe itibi. Me atikọ, Yọk môkpulu usini kinyi itap me mkpọn, mè isisaak enyi enenen otutuuk akọp usen, isasa itọ enyi ikpọ. Ire, ìrere ebekpakpan̄ enyi, ìkeke ìnye me lek n̄a, ke mânyi enyi okpibot ubọọn̄ eyi ugwem ikakaan̄ge itata. ¹¹ “Ogwu ikaan̄ utọn̄, inọ ikọ Ekwukwu Awaji okitumu inyi ebi ntitiin̄ Awaji geelek. Ogwu itim ikpan̄ ntọ-mkpọ chi geelek, ene ya ìkpoyaka ikwu mkpa eyi òso mgbọ iba kubọk ge.” ¹² Ene ya okpọkpọk itumu si inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Pegamọm ibe: Eyi ìre ikọ ònan̄a me otu ogwu òkaan̄ oge etim isi iba òrereke ya. ¹³ Nriọọn̄ ere enyi elukbe, mè iriọọn̄ ibe ke enyi eluk me ere Setan oyikbe ogboon̄ ubọọn̄ kan̄, mè ikikpulu. Ire, enyi mîkeke inye melek n̄a. Enyi kpenwunween̄ otu, mè ijit ichechieek me lek n̄a, ìrere mgbọ etetbe Antipas, ogwu òsasa otutuuk ejit kan̄ ichieek me lek n̄a, mè ikitumu emi isibi, ikpan̄ me ama kinyi ere Setan okiluk. ¹⁴ “Ire, ubọk geelek si, îkaan̄ usini inu enyi ekirọ, echi òkinaan̄ emi ejit me lek kinyi. Îkaan̄ ebi ene me etete kinyi ebi ìkitet ijo ijejeen̄ kè Belam inye. Îre Belam yi onyi Belak ifuk-ibot eyi îsabe ileke ebi Ijeren, inyi erie inorie esabe igwa ngwugwa inyi mkpọmfaka, mè erọn̄ enin̄ ugwem barabat, mè esa me ikeya erọ ijo inu. ¹⁵ Îkaan̄ si ebi ofifi ene me etete kinyi ìtetet si ijo ijejeen̄ ebi ìkigọọk Nikolas inye. ¹⁶ Eya orọ, ìgwu ìkom! Ire ìkare ikeya, mânu me ikafiatge mgbọ, mè inisa oge etim òkup emi me otu itim akọn̄ melek ife cha ebi ìkirọ ijo inu cha. ¹⁷ “Ogwu ikaan̄ utọn̄, inọ ikọ Ekwukwu Awaji okitumu inyi ebi ntitiin̄ Awaji geelek. Ogwu itim ikpan̄, mânyi ene ya inorie emen inyọn̄, eyi chieen̄ ene ikamun̄ge-nu, mè inyi ene ya si ewuuk okuket ge egebe aya erieen̄ ge me lek. Îtata ogwu òbọbọkọ ewuuk ya gaalek òboriọọn̄ erieen̄ òkup me lek.” ¹⁸ Ene ya otutumu si inyi emi ibe, “Ge ikpa jet ogwu osat Awaji òkikpulu ntitiin̄ Awaji òkup me Tiyatira ibe: Eyi ìre etip ònan̄a me otu Gwun̄ Awaji, ogwu chieen̄ iba kan̄ okisak kubọk alọm ukan̄, ogwu ukot iba kan̄ okimumọọn̄ kubọk ekwe ekakala. ¹⁹ Nriọọn̄ otutuuk ata inu enyi ekirọ, mè ubọk enyi ekimun̄ ebi ene me chieen̄, mè iriọọn̄ si ichechieek enyi ekaan̄be me lek n̄a, mè ikwaan̄ enyi ekisi mije ichechieek kinyi, mè ukarajit enyi ekaan̄be. Nriọọn̄ si ibe ke enyi ba mêkirọ eyi ògak ikeya me mgbọ keyi. ²⁰ “Ire, îkaan̄ inu ge mmun̄be me etete kinyi, eyi ikabelege emi ejit. Enyi ejeje itele ibe ogwu enenwaan̄ ya ekigwen Jeseben, ogwu òkimọnọ lek kan̄ kubọk ogwu nriran, ikup me etete kinyi? Ogwu enenwaan̄ yi ìkisa ijo ijejeen̄ kan̄ irọ inyi ebi ikwaan̄ n̄a erọn̄ enin̄ me ugwem barabat, mè ekerie inorie esabe igwa ngwugwa inyi mkpọmfaka. ²¹ Nnyi ogwu enenwaan̄ ya mgbọ ibe igwu ikom isibi itele ugwem barabat kan̄, ire, ìkaweek inwenwene. ²² Eya orọ, mârọ inyi ọmọ ifiak enenen, mè imun̄ ufialek me inyọn̄ mkpilaak orukan̄. Mârọ si inyi ebi ife cha ìkigọọk ọmọ ibubat ebọkọ ufialek enenen, îtata ema egwugwu ikom itele ijo ugwem ogwu enenwaan̄ ya okijeen̄ ema. ²³ Mâkpan̄ otutuuk ebi ìkigọọk ọmọ irọ ijo inu cha isan̄a kpai, inyi otutuuk ntitiin̄ Awaji geelek eriọọn̄ ibe ke emi ìre ogwu òkiriọọn̄ ekiket ene geelek, mè ejit ene geelek. Mâkpe si ene geelek me etete kinyi mkpukpe igọọk me ubọk ikwaan̄ kinyi. ²⁴ “Ire, enyi ebi ama Tiyatira, ebi geelek ekagọọkge ìrọ ijo ijejeen̄ echi Jeseben ya okijeen̄, enyi ebi ekagọọkge ìkween̄ inu cha ema ekitumu ibe ke ìre udọk udọk nlelet inu eyi Setan, emi m̀kpasa ofifi ikan geege inisisaak enyi. ²⁵ Ire, otutuuk inu mbatumu inyi enyi ìre ikeyi: Ìtet ichechieek ya enyi ewuukbe lek ikaan̄ ìnye mege ire mgbọ mâgwube ikom inu. ²⁶ “Ene geelek òtitim ikpan̄, mè ikeke inye ikirọ inu nkiweek mege ire òta, mânyi ene ya unye ibe ikikpulu owuwa ido, ²⁷ kubọk emi mbọkọbe unye me ubọk Nte n̄a, mè ikikpulu owuwa ido. Ene ya môkisa okuba ubọọn̄ esabe okwukwut irọ ikikpulu ebi ido cha, mè ikitun̄ ema ikpukpuku kubọk ugọn̄ ebobot. ²⁸ Mânyi si ene ya ntoronyan̄ otu ewelegwe. ²⁹ “Ogwu ikaan̄ utọn̄, inọ ikọ Ekwukwu Awaji okitumu inyi ntitiin̄ Awaji geelek.”

¹ Ogwu mmun̄be ya otutumu si inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Sadis ibe: Eyi ìre ikọ ònan̄a me otu ogwu òkakaan̄ ekwukwu jaaba eyi Awaji, mè ikaan̄ si ntoronyan̄ jaaba me ubọk. Nriọọn̄ ubọk ikwaan̄ kinyi. Ebi ene ekikeek ibe ke enyi me ugwem. Ire, kpunu ugwem geege me emen kinyi, enyi ekwukwu isan̄a. ² Ìnan̄a ìkeke me ilaak! Ìtap unye me emen sọntiik ugwem ichechieek òsisik enyi me emen, inyi ikakwu ìsan̄a isi ge. Mije, mmun̄ ibe ke ubọk ikwaan̄ kinyi ìkariọọn̄ ubọk ìjaan̄ ìsan̄a me isi Awaji n̄a. ³ Eya orọ, ìkeek ijejeen̄ ya enyi enọbe, mè ibọkọ itap. Ìrọ, otutuuk inu cha ejeen̄be enyi, mè ìgwu ìkom ìsibi ìtele ijo kinyi. Ire, ire enyi kpegwu ikom, mânu me lek kinyi kubọk ogwu inọ okinu uwu ene. Enyi kpeberiọọn̄ oke mgbọ mbanu. ⁴ “Ire, îkaan̄ ene inen mè inen ìkup me etete kinyi me Sadis ebi kpefiat-nu ọfọnti kiban̄. Ema mêtap ọfọnti okuket me lek isa ikigọọk emi ije ikana, mije, ema mîgbe. ⁵ Ene geelek òtitim ikpan̄ môtap si ọfọnti okuket, kubọk ife chi ebetap. M̀kpatutuku erieen̄ kiban̄ isan̄a me ikpa ugwem ya kubọk ge. Mâtumu isibi me isi Nte n̄a mè isi ebi osat kan̄ ibe ke ema ìre ebi n̄a. ⁶ “Ogwu ikaan̄ utọn̄, inọ inu Ekwukwu Awaji okitumu inyi ebi ntitiin̄ Awaji geelek.” ⁷ Ene ya otutumu si inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Filadefia ibe: Eyi ìre ikọ ònan̄a me otu ogwu òkup me mbuban, ogwu atikọ, ogwu òkaan̄ atafi kè Debit me ubọk. Inu geelek îchilibe, kpunu ogwu òkikọt ichit. Inu geelek îchitbe, kpunu ogwu òkikọt ichili. ⁸ Nriọọn̄ ata ubọk ikwaan̄ kinyi. Nriọọn̄ ibe ke enyi kpekaan̄ ikpele unye, ire, enyi mîkirọ ikọ n̄a. Enyi kpejit emi. Kpan̄asi ikeya, enyi ekekeke inye melek n̄a. Mije keya, nchili isotu ibook inyi enyi, eyi kpunu ene geege òbokọt ichit! ⁹ Ebi ntitiin̄ eyi Setan cha, ebi ataak cha ìkibe ke ema ìre ebi Ju, me ere ema kpere ebi Ju geege, mârọ inyi ema enetọbọ ekpe me ukot kinyi, mè eriọọn̄ ibe ke emi mmun̄ enyi me chieen̄. ¹⁰ Mije enyi egban̄be utọn̄ me lek ikọ ntumube ibe enyi ekaan̄ ukarajit, emi mâchit enyi itibi mgbọ ikpele ntọ-mkpọ eyi òbonu me otutuuk linyọn̄ initọ otutuuk ebilene ìluk me linyọn̄ keyi ikpọ, inyi inu geege ikare enyi lek. ¹¹ “Emi gwa ǹkinu ugwat ugwat. Ìtet ugwem ichechieek enyi ekaan̄be ìnye, inyi ene geege ikabọkọ okpibot ubọọn̄ kinyi ìsan̄a enyi me ubọk. ¹² Ene geelek òtitim ikpan̄, mâsa ene ya irọ ata me emen uwu mbuban eyi Awaji n̄a. Ene ya ìkpoyaka inan̄a me uwu mbuban ya isibi. Mâge erieen̄ Awaji n̄a me lek ene ya, mè ige si erieen̄ ama Awaji n̄a, òrere ayaya Jeruselem, eyi òbonan̄a me ubọk Awaji n̄a me emen inyọn̄ isibi inu. Mâge si ayaya erieen̄ n̄a me lek ene ya. ¹³ “Ogwu ikaan̄ utọn̄, inọ ikọ Ekwukwu Awaji okitumu inyi ebi ntitiin̄ Awaji geelek.” ¹⁴ Ene ya si onenitumu inyi emi ibe, “Ge ikpa jet ogwu osat Awaji ogwu òkikpulu ntitiin̄ Awaji òkup me Lawodisia ibe: Eyi ìre ikọ ònan̄a me otu ogwu erieen̄ kan̄ orebe ‘Ikup Ikeya,’ ogwu ata-ikọ ya ògbegbe ibe etoon̄ ejit me lek, ogwu òkitumu atikọ, ogwu otutuuk inu geelek Awaji orombe onan̄abe me ubọk kan̄. ¹⁵ Emi nriọọn̄ ubọk ikwaan̄ kinyi. Enyi ekup kubọk mun̄ òwọwọ otu. Yoyok, ìkayok. Tọtọọk, ìkatọọk. Mebe enyi eyoyok isi ge, mè ìyaka ire etọtọọk isi ge, kè obele emi ejit. ¹⁶ Eya orọ, mije enyi ewọbe ikeyi, kpeyok, kpetọọk, mâkwut enyi isibi me otu n̄a. ¹⁷ Enyi ekitumu ibe, ‘Emi mbọọn̄ ubọọn̄, kpunu inu geege ònanan emi. Eya orọ, ǹkayaka ìweek inu geege.’ Ire, enyi kperiọọn̄ ibe ke inu îyọt enyi me lek enenen; ke enyi mîkaan̄ njijin. Enyi kperiọọn̄ si ibe ke enyi ìre ebi ugbọọn̄, mè ebi ǹnàan̄; ke enyi ekije njak. ¹⁸ Ǹkiteme enyi nteme ibe, ìna me ubọk n̄a ìnilep alata araran̄ esabe ukan̄ ikala inyi ikitoon̄, inyi enyi ebọọn̄ ubọọn̄. Ìnilep ọfọnti okuket ìkitap, inyi enyi esa echit njak kinyi, ke mikaan̄ esip. Ìnilep ugwun̄ chieen̄ ìsa ìtap me chieen̄ kinyi, inyi enyi ekọt ekemọọn̄ inu. ¹⁹ “Ebi mmabe ke nkigana ikọ inyi, mè ikisulu me njijan̄. Eya orọ, ìgbala chieen̄, mè ìgwu ìkom ìtele ijo kinyi. ²⁰ Kpọ, emi ǹkeke me otu isotu, mè ikitọbọ ubọk. Ire ikaan̄ ogwu inọ ida n̄a, mè igwuku isotu inyi emi, mânin̄ emen uwu ene ya, mè igọọk ene ya igbaan̄ irie inorie, ọmọ si môgọọk emi igbaan̄ irie. ²¹ Ene geelek òtitim ikpan̄, mânyi ene ya unye ibe igọọk emi isiki ikweek me inyọn̄ ogboon̄ ubọọn̄ n̄a, kubọk emi ntimbe ikpan̄, mè igọọk Nte n̄a isiki ikweek me inyọn̄ ogboon̄ ubọọn̄ kan̄. ²² “Eya orọ, ogwu ikaan̄ utọn̄, inọ ikọ Ekwukwu Awaji okitumu inyi ebi ntitiin̄ Awaji geelek.”

¹ Mgbọ eya orakabe, nnenibene chieen̄ ikpọ, mè imun̄ isotu ge ogwukube ibook me emen inyọn̄. Ida ya òkitaan̄ kubọk otita, eyi òtutumu ikọ inyi emi me adasi mgbọ ya onenitumu inyi emi ibe, “Nene na me ere keyi, inyi ǹjeen̄ owu inu òborọ me mgbọ òkup me isi.” ² Mgbọ yaage, Ekwukwu Awaji okakana ichit emi, mmumun̄ ogboon̄ ubọọn̄ ge okupbe me emen inyọn̄, me imun̄ ene ge osikibe ikweek me inyọn̄ ogboon̄ ubọọn̄ ya. ³ Isi ogwu òkup me inyọn̄ ogboon̄ ubọọn̄ ya okekitana okuket mè araran̄ kubọk ewuuk unye otu ewe ekigwen jasipa, mè eyi ekigwen kanelian. Egop ubọọn̄ ge òninin̄ ikup njijoon̄ inwan̄ njijoon̄ inwan̄ kubọk ewuuk unye otu ewe ge ekigwen emeran, okakana ichit ogboon̄ ubọọn̄ ya. ⁴ Ofifi akọp ogboon̄ ubọọn̄ iba mè ini okukup ikana ogboon̄ ubọọn̄ ya. Akọp ebi ugane iba mè ini ìtatap ọfọnti okuket, mè ikwuun̄ okpibot ubọọn̄ alata araran̄ me ibot ekwekweek irek me inyọn̄ akọp ogboon̄ ubọọn̄ iba mè ini cha. ⁵ Utoon̄ okekikebe mèrèmèrèp ikana me lek ogboon̄ ubọọn̄ ya. Isinyọn̄ okekigbugbut, mè ikisook si me ere ogboon̄ ubọọn̄ ya okupbe. Mkpukan̄ jaaba okekeke me isi ogboon̄ ubọọn̄ ya, mè ikilomo. Mkpukan̄ jaaba chi ìre ekwukwu jaaba eyi Awaji. ⁶ Inu ge òbet lek okwaan̄ ge òwa me isi ogboon̄ ubọọn̄ ya. Mun̄ òkup me okwaan̄ ya ìkpọkpọ igen ikup kubọk umọọn̄ eyi mêkọtbe imọọn̄ inu itibi. Inu ini òkup me ugwem, mè ikaan̄ chieen̄ chieen̄ ijot lek me agan̄ isi, mè agan̄ udun̄ onenikeke ikana me agan̄ ini eyi ogboon̄ ubọọn̄ ya. ⁷ Me lek inu ini cha, eyi adasi ìbet lek egbe inwọọn̄, eyi òso iba obet lek orie erie mbuuk, eyi òso ita okaan̄ isi ebilene, sa eyi òso ini obet lek igo òkiwuwulu. ⁸ Me etete inu ini chi òkup me ugwem, geelek îkaan̄ uwop gweregwen, mè ikaan̄ chieen̄ chieen̄ iso otutuuk lek, mè ikaan̄ si ire irak uwop cha. Ikarek mè eririeen̄, ema kpekiriaan̄ otu, ekpọkpọ ikikọt okwa itọn̄ Awaji ibe, ⁹ Mgbọ geelek inu ini cha òkup me ugwem ekikọt okwa eyi umin mè uja mè itọn̄ isa ikitik ogwu òsisiki ikweek me inyọn̄ ogboon̄ ubọọn̄ ya, ogwu òkup me ugwem ire mgbọ geelek mgbọ geelek, ¹⁰ akọp ebi ugane iba mè ini cha mîra ikigwook ekpe me ijọn̄ me isi ogwu òkup me inyọn̄ ogboon̄ ubọọn̄ ya, ogwu òkup me ugwem ire mgbọ geelek mgbọ geelek, mè ikitọbọ ebum inyi ọmọ, mè ikichili okpibot ubọọn̄ kiban̄ ito me isi ogboon̄ ubọọn̄ ya, mè ikikọt okwa ibe, ¹¹ “Ogwukaan̄ kiji mè Awaji kiji, owu ogbe ibọbọkọ itọn̄, mè umin, mè unye, mije, owu orom otutuuk inu. Ìneneme owu ke owu orom ema, mè irọ inyi ema egat ugwem.”

¹ Nnenimun̄ ikpa ge ekakat me ubọk agan̄ ulom ogwu òsisiki ikweek me inyọn̄ ogboon̄ ubọọn̄ ya. Egege inu ichit lek ikpa ya, isi mè udun̄, mè itet ikpa ya ikat, mè inisa agba igọm otu ikpa ya ichit irek jaaba, inyi ene geege ikakọt ìchili. ² Nnenimun̄ ogwu osat Awaji ge òkakaan̄ ikpele unye okitaan̄ ukpo ikido ibe, “Ìre ekene ogbe ogwu òbokama agba cha, mè ichili ikpa ya?” ³ Ire, kpemun̄ ene geege me otutuuk emen inyọn̄, mè ìre linyọn̄ keyi, mè ìyaka ire irak linyọn̄, òrere ama ekwukwu, ogwu òbokọt ichili ikpa ya, mè ìre ogwu òbokọt itap chieen̄ ikpọ inu egebe me emen. ⁴ Mbebene ikito ito, mè ito ito enenen, mije, kpemun̄ ene geege ògbegbe, ogwu òbokọt ichili ikpa ya, mè ìre ogwu òbokọt itap chieen̄ ikpọ emen. ⁵ Ene ge me etete akọp ebi ugane iba mè ini cha onenitumu inyi emi ibe, “Kayaka ito ito! Kpọ, Egbe Inwọọn̄ otoko kè Juda, òrere Ugwun̄-ijọn̄ kè Debit îra itim ikpan̄. Îre ọmọ obokọt ikama irek agba jaaba cha, mè ichili ikpa ya.” ⁶ Nnenimun̄ Gwun̄ Arọọn̄ ge, òkukup kubọk ekpakpan̄, okekebe me eden̄ ere ogboon̄ ubọọn̄ ya okupbe. Akọp ebi ugane iba mè ini cha, mè inu ini cha òkup me ugwem enenikeke ikana ọmọ. Gwun̄ Arọọn̄ ya îtibi iko jaaba me ibot, mè ikaan̄ chieen̄ jaaba, eyi òrere ekwukwu jaaba eyi Awaji, ebi Awaji oriabe isibi itap me otutuuk linyọn̄. ⁷ Gwun̄ Arọọn̄ ya onenisi ibọkọ ikpa ya me ubọk agan̄ ulom ogwu òsisiki ikweek me inyọn̄ ogboon̄ ubọọn̄ ya. ⁸ Mgbọ îbọkọbe ikpa ya, inu ini òkup me ugwem cha, mè akọp ebi ugane iba mè ini cha otutuuk etọtọbọ ibot me ijọn̄ me isi Gwun̄ Arọọn̄ ya. Ema geelek mîkaan̄ uneen̄ me ubọk, mè ngigọ esabe alata araran̄ irom, mè nsensi me emen ojotbe. Nsensi ya ìre uriaak bọn Awaji eriaakbe. ⁹ Ema ekekikọt ayaya okwa ge ibe, “Owu ogbe ibọbọkọ ikpa ekakat ya, mè ikama agba kan̄ cha isan̄a, mije, mîkpan̄ owu, owu osasa eje kwun̄ ilep ebi ene inan̄a me egep geelek, mè otu usem geelek, mè ama geelek, mè ido geelek, isa ijet Awaji. ¹⁰ Owu osa ebi olepbe cha irọ ebi Awaji okikpulu, mè irọ inyi ema ekana ebi ngwugwa ìkisi ikwaan̄ inyi Awaji kiji, mè ema ekekpulu ebi ìluk me linyọn̄ keyi.” ¹¹ Nneniraan̄ chieen̄ ikpọ, mè inọ ida ogbogbo ebi osat me ego me ego, eyi ekariọọn̄ge otu ifuk, ekekebe ikana ogboon̄ ubọọn̄ ya, melek inu òkup me ugwem cha, melek akọp ebi ugane iba mè ini cha otutuuk, ¹² mè ikitaan̄ ukpo ikikọt okwa ibe, “Owu Gwun̄ Arọọn̄ ya ekpan̄be, îre owu ogbe ibọbọkọ unye eyi mkpulu, mè inu ubọọn̄, mè iriọọn̄-inu, mè unye geelek, mè umin, mè uja, mè itọn̄!” ¹³ Nneninọ otutuuk inu geelek Awaji orombe, òkup me emen inyọn̄, mè echi òkup me linyọn̄ keyi, mè echi òkup me irak linyọn̄ òrere ama ekwukwu, mè echi òkup me okwaan̄, mè otutuuk inu geelek òkup me emen kiban̄, ekikọt okwa ibe, “Itọn̄, mè umin, mè uja, mè unye eyi mkpulu geelek ikup inyi ogwu òkup me inyọn̄ ogboon̄ ubọọn̄ ya, mè Gwun̄ Arọọn̄ ya ire mgbọ geelek mgbọ geelek.” ¹⁴ Inu ini cha òkup me ugwem, mè akọp ebi ugane iba mè ini cha echechieek igwook ibe, “Ikup ikeya!” Ebi ugane cha egegele igwook me ijọn̄, mè itọbọ ebum.

¹ Nnenikikpọ, mè imun̄ mgbọ Gwun̄ Arọọn̄ ya okamabe irek ge me lek irek agba jaaba cha esabe igọm otu ikpa ya ichit. Mgbọ îkamabe agba ya, nnọnọ ubọk inu ge me lek inu ini cha òkup me ugwem osookbe ida kubọk isinyọn̄ itumu ibe, “Na!” ² Nraraan̄ chieen̄, mè imun̄ inyinya okuket ge okinu. Ogwu òkweek me inyọn̄ inyinya ya îkaan̄ ogban̄ me ubọk. Enenikwuun̄ ọmọ okpibot ubọọn̄. Ọmọ olilibi me inyọn̄ inyinya kan̄ inan̄a kubọk ogwu òtitim ikpan̄ me akọn̄, mè iben me ejit ikpọkpọ ikitim si ikpan̄ ifo isi. ³ Gwun̄ Arọọn̄ ya onenikama òso irek agba iba. Mgbọ îkamabe, nnọnọ inu òkup me ugwem eyi òso iba otumube ibe, “Na!” ⁴ Ofifi inyinya onanan̄a isibi inu, mè inin̄ ikeya ikup araran̄ kubọk alọm ukan̄. Eneninyi ogwu òkup me inyọn̄ kan̄ unye ibe isan̄a esuuk isan̄a me linyọn̄, inyi ebi ene ebene ekekpan̄ lek kiban̄. Mînyi si ogwu òkup me inyọn̄ inyinya araran̄ yi ikpele oge akọn̄ ge. ⁵ Gwun̄ Arọọn̄ ya onenikama òso irek agba ita. Mgbọ îkamabe, nnọnọ ida inu òkup me ugwem eyi òso ita otumube ibe, “Na!” Nraraan̄ chieen̄, mè imun̄ inyinya ofifit ge osibibe inu. Ogwu òkup me inyọn̄ kan̄ îkaan̄ inu ekisa itọ inu me ubọk. ⁶ Nneninọ inu ge òtaan̄ kubọk ida ene onan̄abe me etete inu ini cha òkup me ugwem ikitumu ibe, “Ebi ene mêsa dinari ge ilep ewop akpa ge gaalek, mè isa si dinari ge ilep ewop akpa balì ita gaalek. Ire, ikajijaka uko olifu mè uko gerep, inyi aran̄ mè miin̄ ikanan.” ⁷ Gwun̄ Arọọn̄ ya onenikama òso irek agba ini. Nnọnọ ida inu òkup me ugwem eyi òso ini okitumu ibe, “Na!” ⁸ Nraraan̄ chieen̄, mè imun̄ inyinya ge òkpọkpọ ikup joon̄ kubọk ene ogwu orukan̄ ofiakbe ifiin̄ enenen. Ogwu òkup me inyọn̄ inyinya ya, ekigwen Mkpa. Ama Ekwukwu okekigọọk ọmọ me udun̄. Eneninyi ema unye ibe esa akọn̄, mè akan̄, mè orukan̄, mè ijo anam oron ekpan̄ ebilene, irek ge me etete irek ini, me otutuuk linyọn̄. ⁹ Gwun̄ Arọọn̄ ya onenikama òso irek agba go. Mkpọkpọ me irak ntook òkup me ere ya, mè imun̄ ibot ejit otutuuk ebi ekpan̄be mije ema ekitumu ikọ Awaji, mè isa otutuuk ugwem kiban̄ ichieek inye, mè ikiluk ugwem igọọk me lek. ¹⁰ Ema ekekitaan̄ ukpo itumu ibe, “Okumugwem, owu ogwu atikọ, mè ogwu òkup me mbuban, ìre mgbọ owa ke obosibi oyerebet me ibot ebi linyọn̄ cha, mè isulu ema osusut me useen̄ ema ekpan̄be eji? Mije, òkikup ifiin̄.” ¹¹ Eneninyi ema ọfọnti okuket, me ene me ene, mè itumu inyi ema ibe enye lek ekup sọntiik mgbọ, mege ire mgbọ ebi linyọn̄ mêkpan̄be si bọn Nte kiban̄ mè ebi melek kiban̄ ekigbaan̄ isi ikwaan̄ inyi Awaji iso otu ifuk, kubọk ekpan̄be ema. ¹² Nnenikikpọ mgbọ Gwun̄ Arọọn̄ ya okamabe òso irek agba gweregwen. Mgbọ yaage, ijọn̄ osisisik atalek unye unye, ura ogwugwu ikom idun, mè ifit ikup kpurọk kubọk egwe-ufit esabe inwọọn̄ lek ebot irom. Onyan̄ ogwugwu ikom si, mè inin̄ ikup eje eje. ¹³ Ntoronyan̄ òkup me isinyọn̄ ogegen̄ igwook me ijọn̄ kubọk mfut figi òto me ulọ mgbọ okigen̄ igwook me ijọn̄ mgbọ unye efet okiwut ibieen̄. ¹⁴ Isinyọn̄ okakat igba kubọk ufo, mè ininiin̄ ichep. Ogoon̄ geelek, mè achọ geelek òkup me linyọn̄ yi, ojijibi inan̄a me akpat. ¹⁵ Mije ukpook, otutuuk ebi ubọọn̄ ìkup me linyọn̄, mè ebi ibot mkpulu geelek, mè ebi ibot akọn̄ geelek, mè ebi ìbọbọọn̄ ubọọn̄, mè ebi isi ile, mè otutuuk ebi usun̄, mè ebi kpere ebi usun̄, elilibi isi ilet me emen udọn̄ mè irak ewuuk òkup me inyọn̄ ogoon̄, ¹⁶ mè ikitaan̄ ukpo itumu inyi ogoon̄ cha mè ewuuk cha ibe, “Ìgbugbọ ìchit eji, mè ìlet eji me chieen̄ ogwu òkweek irek me inyọn̄ ogboon̄ ubọọn̄ ya, inyi unaan̄-ejit eyi Gwun̄ Arọọn̄ ya ikare eji lek! ¹⁷ Mije, uga usen unaan̄-ejit kiban̄ îra ire. Kpunu ene geege òbokọt ikeke ida!”

¹ Mgbọ eya orakabe, mmumun̄ ebi osat Awaji ini ekekebe me agan̄ ini eyi linyọn̄ keyi, mè ikikput efet òkinan̄a me agan̄ ini cha ikiwut igwook me linyọn̄, inyi efet geege ikayaka ìwut me inyọn̄ ijọn̄, mè okwaan̄, mè inyọn̄ ibot uti geege. ² Nnenimun̄ si ofifi ogwu osat ge okinan̄a me agan̄ mbum-ura inu, mè ikaan̄ inu ekisa itap iman̄ òriọọn̄ eyi Awaji òkup me ugwem, me ubọk. Ogwu osat yi onenitaan̄ ukpo ikitumu inyi ebi osat ini kechilọ, ebi Awaji onyibe unye ibe ejijaka ijọn̄ mè okwaan̄, ibe, ³ “Ikajijaka ijọn̄ mè okwaan̄ nu, mè uti geege, inyi eji edasi etap iman̄ oriọọn̄ me inyọn̄ okwut isi ebi ikwaan̄ Awaji kiji.” ⁴ Nneninọ ebakbe otu ifuk ebi etapbe iman̄ oriọọn̄ Awaji me inyọn̄ isi. Otu ifuk kiban̄ ìre, efit obop ene ge mè akọp obop ini mè obop ini. Ema enan̄a me otutuuk otoko geelek òkup me Ijeren, otoko ge, akọp mè obop ene iba: ⁵ Me otoko kè Juda, akọp mè obop ene iba ke etap iman̄ oriọọn̄ me inyọn̄ isi, me otoko kè Ruben, akọp mè obop ene iba, me otoko kè Gadi, akọp mè obop ene iba, ⁶ me otoko kè Ase, akọp mè obop ene iba, me otoko kè Nafitali, akọp mè obop ene iba, me otoko kè Manasi, akọp mè obop ene iba, ⁷ me otoko kè Simiọn, akọp mè obop ene iba, me otoko kè Libai, akọp mè obop ene iba, me otoko kè Isaka, akọp mè obop ene iba, ⁸ me otoko kè Jebulọn, akọp mè obop ene iba, me otoko kè Josefu, akọp mè obop ene iba, me otoko kè Benjamin, akọp mè obop ene iba. ⁹ Mgbọ eya orakabe, mkpọkpọ, mè imun̄ ogbogbo ene eyi kpekọtbe ifuk otu ifuk ekekebe me isi ogboon̄ ubọọn̄ ya, mè isi Gwun̄ Arọọn̄ ya. Ema enan̄a me otutuuk ido geelek, mè etete ebi ife geelek, mè otu usem geelek, mè ere geelek òkup me otutuuk linyọn̄ keyi. Ema otutuuk ene etap ujọn̄ọ ọfọnti okuket, mè ikaan̄ nlak me ubọk, ¹⁰ mè ikitaan̄ ukpo idimi okwa ibe, “Unyan̄a geelek ìkinan̄a me ubọk Awaji kiji ogwu òkweek me inyọn̄ ogboon̄ ubọọn̄ ya, mè inan̄a si me ubọk Gwun̄ Arọọn̄ ya!” ¹¹ Otutuuk ebi osat Awaji ekekeke ikat ikana ogboon̄ ubọọn̄ ya, mè ebi ugane cha, mè inu ini òkup me ugwem cha, mè igele igwook me ijọn̄ me isi ogboon̄ ubọọn̄ ya, mè ikana isi ikwuun̄, mè ikitọbọ ebum inyi Awaji, ¹² mè ikitumu ibe, “Ikup ikeya! Otutuuk itọn̄, mè umin, mè uja, mè iriọọn̄-inu, mè otutuuk itọtọn̄ geelek, mè ulibi, mè unye eyi mkpulu, mè unye-lek ikup inyi Awaji kiji ire mgbọ geelek mgbọ geelek. Ikup ikeya!” ¹³ Ene ge me lek ebi ugane cha onenido emi ibe, “Ìre ebi owa ere ife chi ebi ìtap ujọn̄ọ ọfọnti okuket chi? Ìre ere owa ke ema enan̄a inu?” ¹⁴ Nnenifọọk ọmọ ibe, “Ogwu nte, owu gaalek oriọọn̄.” Ogwu ugane ya onenitumu inyi emi ibe, “Ife chi ìre ebi ìjeje itibi ikpele ufialek ya, mè ikeke inye. Ema mîgwọk ọfọnti kiban̄ me emen eje Gwun̄ Arọọn̄ ya, inyi ikitana okuket. ¹⁵ Îre mije keyi ke ema ekup me isi ogboon̄ ubọọn̄ Awaji, mè ikisi ikwaan̄ inyi ọmọ me uwu kan̄ eririeen̄ mè ikarek. Ogwu òkweek irek me inyọn̄ ogboon̄ ubọọn̄ ya môkpulu ema itap me isi kan̄, mè ichit ema, inyi inu geege ikasisaak ema. ¹⁶ Uraafiọọn̄ geege ìkpoyaka itaka ema, ebek ìkpoyaka irak ema ofifi. Ura ìkpoyaka itaka ema, uyok ìkpoyaka iwọp ema. ¹⁷ Mije, Gwun̄ Arọọn̄ ya ogwu òkup me eden̄ ogboon̄ ubọọn̄ ya môkikpukpo ema kubọk ogwu òkpukpo arọọn̄ okikpukpo arọọn̄ kan̄. Môsa ema ije isi ere ogbuuruk eyi mun̄ ugwem okupbe. Awaji môtuku si otutuuk mun̄ ito geelek isan̄a ema me chieen̄.”

¹ Gwun̄ Arọọn̄ ya onenikama òso irek agba jaaba esabe igọm otu ikpa ekakat ya ichit. Mgbọ îkamabe, otutuuk emen inyọn̄ okpọkpọ ikup yìràk, kpunu amọn geege, mege iso inu òkup kubọk akọp nkikek mgbọ ita. ² Nnenimun̄ ebi osat jaaba cha ìkikeke me isi Awaji. Eneninyi ema otita jaaba. ³ Ofifi ogwu osat ge onunu inikeke me agba lek ntook, mè ikaan̄ ngigọ alata araran̄ ekisa iwọp nsensi me ubọk. Mînyi ọmọ owuwa nsensi ibe iwọp me inyọn̄ ntook alata araran̄ ya òkup me isi ogboon̄ ubọọn̄ ya, inyi utop olu nsensi cha ikigbaan̄ ifuku melek uriaak otutuuk bọn Awaji eriaakbe. ⁴ Oduku nsensi cha ekiwọp, melek uriaak bọn Awaji cha okekigbaan̄ inan̄a me ubọk ogwu osat ya ikibumu ifo inyọn̄ me isi Awaji. ⁵ Ogwu osat ya onenilọbọ ukan̄ me inyọn̄ ntook ya itap ijot ngigọ alata araran̄ ekisa iwọp nsensi ya, mè iben ngigọ ya, mè ukan̄ me emen itọp ito me linyọn̄. Mgbọ yaage, isinyọn̄ okekisook, mè ikigbugbut, mè ikikebe mèrèmèrèp. Ijọn̄ okekisisik. ⁶ Ebi osat jaaba cha ìkakaan̄ otita jaaba cha enenibem lek iwuwut otita kiban̄. ⁷ Adasi ogwu osat iwuwut otita kan̄, mgbọ yaage, mun̄ ònyenye kubọk ewuuk, mè ukan̄, mè eje ogbagbaan̄ ikirep kubọk ibot igwook me linyọn̄, mè itaka irek ge me etete irek ita me linyọn̄ isan̄a, mè itaka si irek ge me etete irek ita me lek otutuuk uti òkup me linyọn̄ isan̄a, mè itaka si otutuuk njijoon̄ mbubet isan̄a kpai me linyọn̄. ⁸ Òso ogwu osat iba oneniwut otita kan̄, ebeben inu ge òkup kubọk ikpele ogoon̄ ukan̄ okisak me lek itọp itap me emen awaji. Irek ge me etete irek ita me lek otutuuk emen awaji okakana eje. ⁹ Irek ge me etete irek ita me lek otutuuk inu geelek òkaan̄ ugwem me emen, mè iluk me emen awaji, okwakwaan̄ ita. Irek ge me etete irek ita me lek otutuuk uji ile geelek òkikọp me emen awaji ojijijaka ita si. ¹⁰ Òso ogwu osat ita oneniwut otita kan̄. Mgbọ îwutbe, ikpele ntoronyan̄ òkibeen̄ kubọk ibot ukan̄ owawaka inan̄a me isinyọn̄ irọn̄ inin̄ emen irek ge me etete irek ita me lek otutuuk asabọn okwaan̄ mè emen mudim geelek òkup me linyọn̄. ¹¹ Erieen̄ ntoronyan̄ ya ire Ujat. Irek ge me etete irek ita me lek otutuuk mun̄ òkup me linyọn̄ obebene ikijat. Owuwa ebi ene ekwakwaan̄ mije ema enwọbe mun̄ ya òjajat. ¹² Ogwu osat òso ini oneniwut otita kan̄. Mgbọ îwutbe, inenikup kubọk inu ge onan̄a itọbọ irek ge me etete irek ita me lek ura, mè irek ge me etete irek ita me lek onyan̄, mè irek ge me etete irek ita me lek ntoronyan̄. Mije keya, irek ge me etete irek ita me lek utoon̄ kiban̄ okakana udun. Sa me ikeya, irek ge me etete irek ita me lek ikarek okakana udun. Irek ge me etete irek ita me lek eririeen̄ si okakana udun. ¹³ Nnenibene chieen̄ ikpọ, mè inọ igo ge okiwulu me akpabin inyọn̄, mè ikitaan̄ ukpo itumu ibe, “Jei, môfieek! Môfieek! Môfieek enenen inyi ebi ìluk me linyọn̄, mije ida otita ita echi ebi osat ita kechilọ ebewut!”

¹ Òso ogwu osat go oneniwut otita kan̄. Iwuwut isan̄a, mmumun̄ ntoronyan̄ ge òwuwuuk lek inan̄a me isinyọn̄ irọn̄ me ijọn̄, enyinyi ntoronyan̄ ya atafi ekisa ichili isotu otu udọn̄ ya eyi ikakaan̄ge okputut. ² Mgbọ ntoronyan̄ ya ochilibe otu udọn̄ ya, oduku okekibumu isibi me emen kubọk oduku ukan̄ emen aka oron, mè ichit ura mè otutuuk isinyọn̄ bùk. ³ Ogbogbo akaka onanan̄a me emen oduku ya, mè inikana ichit otutuuk inyọn̄ ijọn̄, enyinyi ema unye òkup kubọk iwot otu eferen̄. ⁴ Mîtumu inyi ema ibe ekataka mbubet geege, mè uti geege, mè ekafiat inu geege òkaan̄ inwan̄ me lek me linyọn̄, ire, mè ema eloon̄ otutuuk ebilene ebi kpekaan̄ iman̄ òriọọn̄ eyi Awaji me inyọn̄ okwut isi kiban̄. ⁵ Kpenyi ema unye ibe ekpakpan̄ ene. Ire, enyi ema unye ibe erọ inyi ebi ife cha emun̄ ujaralek otutuuk onyan̄ go. Ujaralek ife cha emun̄be ìjat ikup kubọk mgbọ eferen̄ okisook ene. ⁶ Me otutuuk onyan̄ go cha, ebilene mêweek mkpa, ire, kpebemun̄. Mêweek ikwukwu, ire, mkpa môlibi itele ema. ⁷ Akaka cha ebet lek inyinya eneen̄be isun̄ ibesa isi akọn̄. Me ibot kiban̄, ema mîkwuun̄ inu ge òkup kubọk okpibot ubọọn̄ esabe alata araran̄ irom. Sa isi kiban̄ onibet lek isi ebilene. ⁸ Ijeek òkup ema me ibot ìbet lek ijeek ibot ebibaan̄. Sa ejeek òkup ema me otu onireke kubọk ejeek otu egbe inwọọn̄. ⁹ Ukwek-ejit ema esabe ikwek isi ejit kiban̄ ìkup kubọk echi esabe okwukwut irom. Ema isikiwulu, ida uwop kiban̄ ìkitaan̄ kubọk mgbọ ogbogbo inyinya okitaba owuwa uji akọn̄ ilibi isi isi akọn̄. ¹⁰ Edim kiban̄, mè inu ema ekisa isook ene ìkup kubọk echi eferen̄. Iwot òkup ema me edim ìkifiak ene otutuuk onyan̄ go. ¹¹ Ogwu ubọọn̄ òkikpulu ema ìre ogwu osat òkikpọ chieen̄ me lek udọn̄ ikakaan̄ge okputut ya. Erieen̄ kan̄ eyi usem ebi Iburu ìre Abadọn, sa eyi usem Giris ore Apoliọn. (Abadọn mè Apoliọn ìsibi “ogwu òfiat inu.”) ¹² Adasi uyọrọlek înu mè iraka! Ìyaka inisik uyọrọlek iba òbonu me isi. ¹³ Ogwu osat òso gweregwen oneniwut otita kan̄. Nnọnọ inu ini òsọsọọk isibi me lek ntook alata araran̄ ya òkup me isi Awaji, okisan̄a amọn, ¹⁴ mè ikitumu inyi ogwu osat òso gweregwen, ogwu otita ya okupbe me ubọk ibe, “Tọn̄ọ ebi osat ini cha tele, ebi ebọpbe isun̄ me agba lek ikpele okwaan̄ ekigwen Yuferetis.” ¹⁵ Etọtọn̄ọ ebi osat ini cha itele, ebi esun̄be me mbem-lek ikpọ mbubak mgbọ keyi, me usen chereyi, me onyan̄ keyi, me acha keyi kubọk Awaji osunbe, inyi ema enekpan̄ irek ge me etete irek ita me lek otutuuk ebilene me linyọn̄. ¹⁶ Ebi osat cha etọn̄ọbe itele, enenisa ogbogbo urum ebi akọn̄ ìkilibi me inyọn̄ inyinya inu. Otu ifuk ebi akọn̄ cha ebakbe inyi emi ǹnọ ìre efit efie iba. ¹⁷ Inyinya cha, mè ebi akọn̄ ìkilibi me inyọn̄ inyinya cha, kubọk mmun̄be me ilaak ọkpọchieen̄ n̄a ekup ikeyi: Ukwek-ejit kiban̄ ìkup araran̄ kubọk alọm ukan̄, mè ikup si oluku oluku kubọk ewuuk ekigwen safaya, mè ikup si unwan unwan kubọk biridọni. Ibot inyinya cha ìkup kubọk ibot egbe inwọọn̄. Ukan̄ mè oduku mè biridọni okekinan̄a me otu kiban̄ isibi. ¹⁸ Inu ufialek ita cha, òrere ukan̄ mè oduku mè biridọni òkinan̄a me otu inyinya cha isibi okpakpan̄ irek ge me etete irek ita me lek otutuuk ebilene ìkup me linyọn̄. ¹⁹ Unye inyinya cha ìkup me otu kiban̄ mè edim kiban̄. Edim kiban̄ ìkup kubọk ijijunu, mè ikaan̄ si ibot me lek. Ibot chi òkup me edim kiban̄ ke ema ekisa itọk ebilene itap unan me lek. ²⁰ Ire, ebilene ebi ìsisik me ugwem, ebi uyọrọlek chi ikakpan̄ge, kpechieek si igwugwu ikom, mè itele ọrọmijọn̄ kiban̄. Ema kpechieek itetele itọtọbọ ebum inyi ijo erumun̄, mè mkpọmfaka esabe alata araran̄ itọkọ, mè echi alata okuket, mè echi ekwe, mè echi ewuuk, mè echi esabe uti ikọ. Otutuuk mkpọmfaka chi kpekikọt imọọn̄ inu, kpekikọt inọ ikọ, kpekikọt ije ije si. ²¹ Ife cha si kpegwu ikom itele ikpakpan̄ ene, mè ugwem ibọk ibọk mè iwot, mè ugwem barabat, mè ichichiin̄ inọ kiban̄ cha.

¹ Mgbọ eya orakabe, nnenimun̄ ofifi ikpele ogwu osat ge okinan̄a me emen inyọn̄ isibi inu. Ọfọnti îtapbe me lek ìre oduku inyọn̄, egop ubọọn̄ ogbagbaka ikana me agan̄ ibot kan̄, isi kan̄ okekitoon̄ kubọk ura, sa ukot iba kan̄ onibet lek alọm ukan̄ òkilomo ujọn̄ọ ujọn̄ọ kubọk ata uwu. ² Ikpele ogwu osat ya îkaan̄ sọntiik ikpa ge echilibe itele me ubọk, mè ito ukot kan̄ agan̄ ulom me emen awaji, mè ito eyi agan̄ ujit me inyọn̄ ijọn̄. ³ Inenitaan̄ ukpo kubọk mgbọ egbe inwọọn̄ okigbin. Mgbọ yaage, isinyọn̄ obọbọkọ otu, mè isook mgbọ jaaba. ⁴ Mgbọ isinyọn̄ osookbe mgbọ jaaba isan̄a, nnenibage ikọ isinyọn̄ ya otumube itap me ikpa. Ire, ida ge onanan̄a me emen inyọn̄ ikitumu inyi emi ibe, “Chit inu isinyọn̄ òsosook mgbọ jaaba ya otumube. Kage ìtap me ikpa, inyi ikakpọk mbum.” ⁵ Ogwu osat ya mmun̄be òtoto ukot kan̄ ge me okwaan̄, mè ito ge me inyọn̄ ijọn̄ onenibene ubọk agan̄ ulom kan̄ ifo inyọn̄, ⁶ mè inyan̄a ibot me erieen̄ Awaji ogwu òkup me ugwem ire mgbọ ikakaan̄ge itata, ogwu òrorom isinyọn̄ mè otutuuk inu geelek òkup me emen kan̄, mè irom ijọn̄, mè otutuuk inu geelek òkup me emen kan̄, mè irom emen awaji, mè otutuuk inu geelek òkup me emen kan̄. Ìsa erieen̄ Awaji inyan̄a ibot ibe, “Kpebeyaka ifiat mgbọ ofifi. ⁷ Ogwu osat òso jaaba isiwut otita kan̄, mgbọ ya, Awaji môrọ otutuuk nlelet otitọt kan̄ iso, kubọk îlookbe ebi ikwaan̄ kan̄, ìrere ebi nriran ukot ikaan̄.” ⁸ Ida ge òkukup me emen inyọn̄ itumu ikọ inyi emi me adasi mgbọ ya, okpọkpọk initumu inyi emi ibe, “Je si bọkọ ikpa ya echilibe itele me ubọk ogwu osat ya òkeke me okwaan̄ mè inyọn̄ ijọn̄.” ⁹ Njeje isi lek ogwu osat ya, mè ibe inyi emi sọntiik ikpa ya. Ibebe emi, “Bọkọ, mè taka men. Môjat me emen owot kwun̄, ire, me otu kwun̄, ìboninin̄i kubọk aran̄ akwọọk.” ¹⁰ Mbọbọkọ sọntiik ikpa ya me ubọk ogwu osat ya, mè itaka imen, ininin̄i emi me otu kubọk aran̄ akwọọk. Ire, mgbọ mmenbe ire owot, igwugwu ikom, mè ijat emi me emen owot kubọk olulut. ¹¹ Enenitumu inyi emi ibe, “Owu môkpọk iben nriran òfolek owuwa ido, mè ebi ofifi ife ìkup esese esese, mè ebi otu usem òkup esese esese, mè owuwa ebi ubọọn̄.”

¹ Eya iraraka, eneninyi emi ujọn̄ọ uti ge òkup kubọk uti itọ-inu, mè itumu inyi emi ibe, “Nan̄a keke, mè je si tọ uwu mbuban Awaji, mè tọ ntook ngwugwa òkup me uwu mbuban ya, mè fuk otu ifuk ebi ìkitọbọ ebum me uwu mbuban ya. ² Ire, katọ oyet egep uwu mbuban Awaji. Tele ere keya, katọ, mije, mîra ikana ere ya itap me ubọk ebi ekarege ebi Ju. Ife cha mêjak ama mbuban yi me ukot otutuuk akọp onyan̄ ini mè iba. ³ Mâria ebi ata-ikọ n̄a iba isibi. Ema mêtap ọfọnti ufieejit, mè inilook etip eyi Awaji obop usen ge mè efit iba mè akọp gweregwen.” ⁴ Ebi ata-ikọ iba chi ere uti olifu iba cha, mè ngugọọn̄ mkpukan̄ iba cha òkeke me isi Okumugwem ogwu òkikpulu otutuuk linyọn̄. ⁵ Ire ene iweek itatap ema unan me lek, ukan̄ mônan̄a me otu kiban̄ isibi, mè itaka ebi ochicha kiban̄ ikpan̄. Ikeya ke ene geelek òweweek itatap ema unan me lek obokwu. ⁶ Ebi ata-ikọ iba chi mîkaan̄ unye ichichit isinyọn̄, inyi ibot ikarep otutuuk mgbọ ema ekilook etip eyi Awaji. Ema mîkaan̄ unye irọrọ mè mun̄ okwaan̄ geelek ikana eje, mè ikaan̄ si unye igwegwen esese chieen̄ orukan̄ geelek itap me linyọn̄ otu mbubak mgbọ geelek òneneme ema. ⁷ Mgbọ ema isitumu ikọ Awaji ema ekitumu isan̄a, anam ukpook ge ònan̄a me emen udọn̄ eyi kpunube okputut ya isibi mônitim etim melek kiban̄, mè itim igak ema, mè ikpan̄ ema. ⁸ Nkwukwu kiban̄ môlaak ibia me eden̄ oniin̄ me ama ile ya, eyi ekebe erieen̄ ikigwen Sọdọm mè Ijipiti, ere ema egonbe Okaan̄ kiban̄ ikpan̄ me inyọn̄ uti nkwurieen̄. ⁹ Ebi geelek ìnan̄a me ido geelek, mè otu usem geelek, mè etete ebi ife geelek, mè ere geelek mênu inikeke ikikpọ nkwukwu ife cha, mè itele mè elaak ikeya egwe ita mè ọkpọkọ. Kpebechieek ibe efuun̄ ema. ¹⁰ Ebi linyọn̄ mêbele ejit enenen mije mkpa ebi nriran iba chi. Ema mêto ijọk, mè ikichon inu ikana, ogwu ikup, oche inu onyi ebi melek kan̄. Ema mênwọọn̄ unwọọn̄ enenen, mije, etip eyi Awaji eyi ebi nriran iba cha elookbe îtap ikpele ufialek me lek ebilene me linyọn̄. ¹¹ Mgbọ egwe ita mè ọkpọkọ cha orakabe, Awaji onenifuuk efuuk ugwem itap me emen nkwukwu ebi nriran iba cha. Ema enanan̄a ikeke, mè ikeke me ukot kiban̄. Uga ukpook otetet otutuuk ebi ìmumun̄ ema. ¹² Ema eneninọ ida ge ònan̄a me emen inyọn̄ okitaan̄ ukpo igwen ema ibe, “Ìnene ìna me ere keyi.” Me chieen̄ otutuuk ebi ochicha kiban̄ ìkeke me ere ya ikikpọ ema, oduku inyọn̄ okakana ichit ema, mè iben ema ibene ifo emen inyọn̄. ¹³ Mgbọ yaage, ijọn̄ obebene isisik atalek unye unye. Irek ge me etete akọp irek me ama ile ya ogbugbugbọ igwook. Obop ene jaaba ekwakwaan̄ me emen sikisik ijọn̄ ya. Ukpook otetet ebi ìsisik me ugwem. Ema ebebene ikitọn̄ Awaji ogwu òkup me emen inyọn̄, mè ikinyi ọmọ umin. ¹⁴ Ikpele uyọrọlek eyi òso iba înu mè iraka. Eyi òso ita òkinu me ikafiatge mgbọ. ¹⁵ Mgbọ eya orakabe, ogwu osat òso jaaba oneniwut otita kan̄. Mgbọ yaage îwutbe, nnọnọ owuwa ida okitaan̄ ukpo me emen inyọn̄ itumu ibe, “Otutuuk mkpulu òkup me linyọn̄ îra ikana echi Okumugwem mè echi Karais kan̄. Ọmọ môkikpulu mege ire mgbọ ikakaan̄ge itata.” ¹⁶ Akọp ebi ugane iba mè ini cha, ebi ìkweek irek me inyọn̄ ogboon̄ ubọọn̄ kiban̄ me isi Awaji, egegele igwook me ijọn̄, mè itọbọ ebum inyi Awaji, ¹⁷ mè ikibe, “Eji mîtọn̄ owu Okumugwem Awaji Ogwu Òkaan̄ Unye Geelek, ogwu òkukup karake akat, mè ikup si mgbọ keyi, mije, owu omọnọ ikpele unye kwun̄ ikaan̄, mè ibene ikikpulu me atikọ. ¹⁸ Ido ebi kperiọọn̄ owu mînaan̄ ejit inyi owu, ire, mgbọ unaan̄-ejit kwun̄ îkem. Îkem si mgbọ owu obosibi oyerebet me ibot ebi ìkwakwaan̄, mè ikpe ebi ikwaan̄ kwun̄, ìrere ebi nriran ukot ikaan̄ mkpukpe, mè ikpe si otutuuk ebi bọn kwun̄, mè otutuuk ebi ìnyinyi erieen̄ kwun̄ umin, bene me ebi sọntiik re lek ebi ilile. Mgbọ owu obokpan̄ ebi ìkifiat linyọn̄ keyi îre.” ¹⁹ Enenichili isotu uwu mbuban Awaji eyi òkup me emen inyọn̄ ibook. Mmumun̄ okop inyan̄a-ibot Awaji me emen uwu mbuban ya. Mgbọ yaage, isinyọn̄ obebene ikikebe, mè ikigbugbut, mè ikisook. Ijọn̄ okekisisik, mun̄ ònyenye ikup kubọk ewuuk okekirep unye unye igwook me ijọn̄ kubọk unye otu ibot.

¹ Nnenimun̄ ikpele inu ijejeen̄ ge òkup uyeke uyeke osibibe ikeke me isinyọn̄. Mmun̄ ogwu enenwaan̄ ge otapbe ura kubọk ọfọnti, mè isa onyan̄ ibene ukot, mè ikwuun̄ okpibot ubọọn̄, eyi òrere akọp mè ntoronyan̄ iba, me ibot. ² Owot îmin me lek ogwu enenwaan̄ ya iso mgbọ ìboman gwun̄. Mgbọ uman okitet, ikekitaan̄ ukpo. ³ Ofifi inu òkup uyeke uyeke osisibi ikeke si me isinyọn̄. Eya ìre nga ijijunu ile ge òkaan̄ ukot mè ikaan̄ uwop, mè inin̄ ikup irio irio. Ijijunu ya ìkaan̄ ibot jaaba, mè akọp iko, melek okpibot ubọọn̄ jaaba me inyọn̄ ibot jaaba kan̄ cha. ⁴ Ijijunu yi osasa edim kan̄ igbaan̄ irek ge me etete irek ita me lek otutuuk ntoronyan̄ òkup me isinyọn̄ igwook me ijọn̄, mè inikeke me isi ogwu enenwaan̄ ya uman okitet, ikikpọ mgbọ ìboman gwun̄ ya ito, inyi ọmọ iben gwun̄ ya imen mgbọ yaage. ⁵ Ogwu enenwaan̄ ya oneniman gwun̄ enerieen̄, ogwu òbonikisa okuba okwukwut ikpulu otutuuk ido eyi linyọn̄ keyi me unye. Mgbọ yaage îmanbe gwun̄ ya ito, esisiik gwun̄ ya isan̄a me ere ya, mè isa isi lek Awaji, mè ogboon̄ ubọọn̄ kan̄. ⁶ Ogwu enenwaan̄ ya olilibi ifo emen èwê, ere Awaji onen̄ebe isun̄ iban ọmọ, inyi ekpọ ọmọ chieen̄ me lek me ere ya obop usen ge mè efit iba mè akọp gweregwen. ⁷ Akọn̄ obubumu me emen inyọn̄. Ogwu osat ge ekigwen Maiken mè owuwa ebi osat melek kan̄ etitim akọn̄ melek ijijunu ya. Ijijunu ya melek ebi osat kan̄ etitim si ubọk ema ekọtbe. ⁸ Ire, ema kpenye lek kubọk Maiken mè ebi melek kan̄. Eya orọ, akọn̄ ofefieek ema, ema efifiin̄ irek kiban̄ me emen inyọn̄. ⁹ Sa me ikeya ke elap ikpele ijijunu òkaan̄ ukot mè uwop ya, ọmọ melek ebi osat kan̄, isibi me emen inyọn̄ igwook me linyọn̄. Ikpele ijijunu ya ore ijijunu mgbọ ukot ikaan̄ ya eyi ekigwen Yọk, mè igwen si Setan, ogwu òfafiaan̄ otutuuk ebi linyọn̄ inyi eje elọ oniin̄. ¹⁰ Nneninọ ida ge okitaan̄ ukpo me emen inyọn̄ ikitumu ibe, “Me mgbọ keyi, unyan̄a eyi Awaji kiji înu! Awaji kiji îjeen̄ ikpele unye kan̄! Mkpulu kan̄ îsibi utoon̄! Unye eyi mkpulu kè Karais ogwu ọmọ oriabe inu, îsibi si utoon̄! Mije, mîben ogwu òkitumu ikeme bọn Nte kiji me isi Awaji eririeen̄ mè ikarek itọp isibi me emen inyọn̄. ¹¹ Bọn Nte kiji cha mîtim ikpan̄ ọmọ sa me lek eje Gwun̄ Arọọn̄ ya, melek ema ekekebe ata-ikọ ibe ke ikọ Awaji ìre atikọ, mè ichieek si ibe ekpan̄ ema, inyi ema ekwu mkpa mije ikọ Awaji. ¹² Eya orọ, ìnwọọn̄ unwọọn̄, enyi ebi ìkup me emen inyọn̄, mè unwọọn̄ ikup me emen inyọn̄! Ire, ikpele ujaralek îra inu inyi enyi, linyọn̄ mè okwaan̄, mije, Yọk îra isibi inu me lek kinyi! Unaan̄-ejit òjot me emen kan̄ ìkare sọntiik, mije, îriọọn̄ ibe ke mgbọ kan̄ ìsik sọntiik mgbidim gaalek.” ¹³ Mgbọ ijijunu ya omun̄be ibe ke mîlap ọmọ inito me linyọn̄, igọgọọk ogwu enenwaan̄ òman gwun̄ enerieen̄ ya. ¹⁴ Ire, Awaji onyinyi ogwu enenwaan̄ ya uwop iba kubọk echi ikpele igo, inyi isa iwulu ifo ere enen̄ebe isun̄ iban ọmọ me emen èwê, mè ekpọ ọmọ chieen̄ me lek acha ita mè ọkpọkọ, inyi ijijunu ya ikakọt ìsoon̄ ọmọ. ¹⁵ Ijijunu ya ogbọgbọ mun̄ isibi me otu kan̄ kubọk okwaan̄, inyi ukot mun̄ ya iben ogwu enenwaan̄ ya ite ichep. ¹⁶ Ire, ijọn̄ okaka otu, mè imeen̄ okwaan̄ ijijunu ya ogbọbe isibi me otu isan̄a kpai, mè isa me ikeya itap ubọk inyi ogwu enenwaan̄ ya. ¹⁷ Ijijunu ya onanaan̄ ejit enenen me lek ogwu enenwaan̄ ya, mè inan̄a isi isisi itim akọn̄ melek bọn kan̄ kechilọ, òrere ebi ìkisun̄ ikan Awaji, mè ikisa me ichechieek itet atikọ Jisọs ochilibe ijeen̄ ema inye. ¹⁸ Ijijunu ya onenisi ikeke me inyọn̄ okpoon̄ me agba awaji.

¹ Nnenimun̄ anam ukpook ge okinan̄a me emen mun̄ me emen awaji isibi. Anam ya ìkaan̄ ibot jaaba, mè akọp iko, mè ikwuun̄ akọp okpibot ubọọn̄ me inyọn̄ akọp iko kan̄ cha, mè ikaan̄ erieen̄ unyechieen̄ me lek ibot cha me ge me ge. ² Anam ukpook mmun̄be ya ìbet lek egbe. Ire, ukot kan̄ ìkup kubọk uga anam afa ge òbet lek ibo. Sa otu kan̄ onikup kubọk otu egbe inwọọn̄. Ijijunu ya onenikana unye kan̄, mè irek ubọọn̄ kan̄, melek ikpele unye eyi mkpulu kan̄ inyi anam ukpook ya. ³ Me etete ibot jaaba cha, ge ìkup kubọk unan osak me lek igbet mkpa, mè iyaka inita isan̄a. Anam ukpook ya îke otutuuk ebi linyọn̄ chieen̄ enenen. Otutuuk ene egbugbuku ikigọọk ọmọ. ⁴ Ebilene etọtọbọ ebum inyi ijijunu òkaan̄ ukot ya mije îkanabe unye eyi mkpulu kan̄ inyi anam ukpook ya, mè ikitọbọ ebum si inyi anam ukpook ya, mè ikitumu ibe, “Ìre ekene okaan̄ unye kubọk anam ukpook yi? Ìre ekene obokọt itim akọn̄ melek kan̄?” ⁵ Ijijunu ya onyinyi anam ukpook ya unye ibe ikitumu ikpele otu ikọ, mè ikinye chieen̄ inyi Awaji akọp onyan̄ ini mè iba. ⁶ Anam ukpook ya obebene ikinye chieen̄ inyi Awaji, mè ikitumu erieen̄ Awaji ifiat, mè ikitumu si emen inyọn̄ ere Awaji olukbe ifiat, mè ikinye chieen̄ inyi otutuuk ebi ìluk me emen inyọn̄. ⁷ Ijijunu ya înyi si anam ukpook ya unye ibe itim akọn̄ melek bọn Awaji, mè itim ikpan̄ ema. Înyi ọmọ unye si ibe ikikpulu ebi ido geelek, mè ebi ife geelek, mè ebi otu usem geelek, mè ebi ere geelek me linyọn̄. ⁸ Otutuuk ebi ìluk me linyọn̄ mêtọbọ ebum inyi anam ukpook ya. Ebi ìbetọbọ ebum inyi ọmọ ìre ebi ekagege erieen̄ kiban̄, karake sabum enirom linyọn̄, me emen ikpa ugwem eyi Gwun̄ Arọọn̄ ya ogwu ekpan̄be. ⁹ Ogwu ikaan̄ utọn̄, inọ! ¹⁰ Ene geelek esun̄be inyi ibe ke mêtet me akọn̄, mêtet si me akọn̄. Ene geelek esun̄be inyi ibe ke ìbokwu me otu oge akọn̄, môkwu si me otu oge akọn̄. Eya orọ îgbe ibe bọn Awaji geelek ekaan̄ ukarajit, mè ekeke enye me ichechieek kiban̄ mgbọ geelek. ¹¹ Mgbọ eya orakabe, nnenimun̄ ofifi anam ukpook okinan̄a me irak ijọn̄ itibi isibi, mè ikaan̄ iko iba me ibot kubọk gwun̄ arọọn̄. Ire, ìkitumu ikọ kubọk ijijunu òkaan̄ ukot ya. ¹² Ikekisa otutuuk ikpele unye eyi mkpulu eyi adasi anam ukpook ya okaan̄be ikirọ ikpele inu me isi adasi anam ukpook ya, mè irọ ibe otutuuk linyọn̄, mè otutuuk ebi ìluk me linyọn̄ etọbọ ebum enyi adasi anam ukpook ya, eyi unan osakbe me ibot igbet mkpa, mè iyaka ita. ¹³ Ikekirọ ikpele uyeke uyeke inu, mè igwen ukan̄ inan̄a me isinyọn̄ igwook me ijọn̄ me isi otutuuk ene. ¹⁴ Mije ikpele uyeke inu cha enyibe ọmọ unye ibe ikirọ me isi anam ukpook keyilọ ya, ifafiaan̄ otutuuk ebi ìluk me linyọn̄, mè inyi ema ida ibe ebot inu ge òbet lek adasi anam ukpook ya, eyi esabe oge akọn̄ ikep itap unan me lek igbet mkpa, itutuun̄ isi igat ugwem. ¹⁵ Mînyi ọmọ unye ibe itap efuuk me emen inu ya ebotbe inyi adasi anam ukpook ya, inyi ikifuuk efuuk, mè itumu ikọ. Mînyi ọmọ unye si ibe ikpan̄ otutuuk ebi geelek ìjijit itọtọbọ ebum inyi inu ebobot ya òbet lek adasi anam ukpook ya. ¹⁶ Anam ukpook òso iba ya onenitet otutuuk ene, ebi sọntiik mè ebi ilile, ebi ìbọbọọn̄ ubọọn̄ mè ebi ugbọọn̄, ebi usun̄ mè ebi ekarege usun̄, me unye ubọk, ibe etap iman̄ oriọọn̄ me inyọn̄ ubọk kiban̄ agan̄ ulom, mè ìre inyọn̄ okwut isi kiban̄. ¹⁷ Ene geelek ikakaan̄ge iman̄ oriọọn̄ ya ìkpokọt ilep inu geege, ìkpokọt si inyam inu geege. Iman̄ oriọọn̄ ya ìre erieen̄ anam ukpook ya, mè ìre otu ifuk òkekeke inyi erieen̄ kan̄. ¹⁸ Ikọ yi ìkido ibe ebi ene ekaan̄ iriọọn̄-inu sabum mênikọt igobo itet. Ogwu òkakaan̄ ifuk-ibot môkọt iriọọn̄ inu otu ifuk eyi anam ukpook ya osibibe, mije, otu ifuk ya ìkeke inyi erieen̄ ene. Otu ifuk ya ìre efit gweregwen, mè akọp gweregwen, mè gweregwen.

¹ Nnenikpọ, mè imun̄ Gwun̄ Arọọn̄ Awaji okekebe me inyọn̄ ogoon̄ Sayọn̄, ọmọ melek efit obop ene ge mè akọp obop ini mè obop ini, ebi egebe erieen̄ Gwun̄ Arọọn̄ ya mè erieen̄ Nte kan̄ me inyọn̄ okwut isi. ² Nneninọ ida ge okinan̄a me emen inyọn̄ ikitaan̄ woii kubọk ida owuwa agbugbuk, mè ikisook kubọk isinyọn̄, mè itop ene me utọn̄ kubọk ebi ìkikwak uneen̄ ekikwak uneen̄ kiban̄. ³ Efit obop ene ge mè akọp obop ini mè obop ini cha ekekeke me isi ogboon̄ ubọọn̄ ya, mè isi inu ini òkup me ugwem cha, mè isi akọp ebi ugane iba mè ini cha, mè ikikọt ayaya okwa eyi ene geege ikakọtge ìkween̄, ilọ me lek kiban̄ gaalek, ebi Gwun̄ Arọọn̄ ya ofakabe isibi me linyọn̄. ⁴ Ema ìre ebi ìtatana isan̄a, kpefiat lek kiban̄ melek ebibaan̄. Ema esa me ejit ge ikigọọk Gwun̄ Arọọn̄ ya isi ere geelek ìbosi. Gwun̄ Arọọn̄ ya ìfafaka ema isibi me etete ebilene, mè isan̄a ema isun̄ esese inyi Awaji melek kan̄, kubọk adasi mfut. ⁵ Ema kpekan̄ ataak kubọk mgbọ ge, kpunu nrọ-nlọ geege me ugwem kiban̄. ⁶ Nnenimun̄ ofifi ogwu osat ge okiwulu me lek efet ibosa ata etip eyi mgbọ ikakaan̄ge itata inilook ebi ido geelek, mè ebi ife geelek, mè ebi otu usem geelek, mè ebi ere geelek me otutuuk linyọn̄. ⁷ Ogwu osat ya okekitaan̄ ukpo itumu ibe, “Ìtet ukpook me lek Awaji, mè ìnyi ọmọ umin mè itọn̄, mije, îkem mgbọ ọmọ obosibi oyerebet me ibot otutuuk ebilene. Ìtọbọ ebum ìnyi Awaji ogwu òrom inyọn̄ mè ijọn̄, mè emen awaji, mè ogbuuruk geelek ere mun̄ okinan̄a isibi.” ⁸ Ogwu osat òso iba onunu eyi kan̄, mè initumu ibe, “Jei, ama ile ya înan̄a irọn̄! Babilọn ama ile ya înan̄a irọn̄! Ama ile ya òrọrọ inyi ebi ido geelek enwọ ijo unye miin̄ kan̄, mè egọọk ọmọ ekween̄ ijo ugwem barabat kan̄!” ⁹ Ogwu osat òso ita onunu si, mè initaan̄ ukpo itumu ibe, “Ogwu geelek òtọtọbọ ebum inyi anam ukpook ya, mè inu ebotbe òbet lek kan̄ ya, mè ichieek ibe ege iman̄ oriọọn̄ anam ukpook ya me inyọn̄ okwut isi kan̄, mè ìre inyọn̄ ubọk kan̄, ¹⁰ uyok uyok unaan̄-ejit Awaji môkeme ene ya, mè ikup ọmọ me lek kubọk ìnwọ unye miin̄ eyi egwookbe ikeya me emen ekpen̄, kpewọlọ, inyi isiki otu. Ene ya mômun̄ ujaralek me emen ukan̄ biridọni, me isi otutuuk ebi osat Awaji ìkup mbuban, mè isi Gwun̄ Arọọn̄ ya. ¹¹ Oduku ukan̄ ekisa isulu ema osusut ya môkibumu ifo inyọn̄ mege ire mgbọ ikakaan̄ge itata. Me eririeen̄ mè ikarek, kpunu isiki-efuuk inyi ebi geelek ìtọtọbọ ebum inyi anam ukpook ya, mè ìre inu ebotbe òbet lek kan̄, mè otutuuk ebi ìkakaan̄ iman̄ oriọọn̄ eyi erieen̄ anam ukpook ya.” ¹² Eya orọ, otutuuk bọn Awaji, ebi ìkisun̄ ikan Awaji, mè itet ichechieek ema echieekbe me lek kè Jisọs inye, îkup me uyọt ibe ema ekaan̄ ujọn̄ọ ukarajit. ¹³ Nneninọ ida ge ònan̄a me emen inyọn̄ okitumu ibe, “Ge ikọ keyi tap me ikpa: Ugbana môkup inyi otutuuk ebi ìkwakwaan̄ mije ema echieekbe me lek Okaan̄-ene bene me mgbọ keyi fo isi.” Ekwukwu Awaji ofọfọọk ibe, “Iin̄ îre atikọ! Ema mêsiki efuuk, kwulukwulu kiban̄ îta. Me mgbọ keyi, mkpukpe ata ubọk ikwaan̄ kiban̄ òkigọọk ema.” ¹⁴ Nnenibene chieen̄ ikpọ, mè imun̄ oduku inyọn̄ okuket ge, mè imun̄ ene ge “òbet lek gwun̄ ebilene” osikibe ikweek me inyọn̄ oduku inyọn̄ ya, mè ikwuun̄ okpibot ubọọn̄ esabe alata araran̄ irom, mè ikaan̄ oge isọp-akpa òrereke me ubọk. ¹⁵ Ofifi ogwu osat ge onanan̄a me uwu mbuban isibi inu, mè ikitaan̄ ukpo itumu inyi ogwu òsisiki ikweek me inyọn̄ oduku inyọn̄ ya ibe, “Mọnọ oge isọp-akpa kwun̄, mè sa rọkọ inu me uko. Mfut ewopbe me uko, òrere linyọn̄, îren̄e isan̄a kpai. Mgbọ irọrọkọ inu me uko îkem.” ¹⁶ Ogwu òsisiki ikweek me inyọn̄ oduku inyọn̄ ya onenimọnọ oge isọp-akpa kan̄ iwum ikana me linyọn̄, mè irọkọ otutuuk inu isan̄a me uko, eyi òrere linyọn̄. ¹⁷ Ofifi ogwu osat onanan̄a me uwu mbuban me emen inyọn̄ isibi inu, mè ikaan̄ oge isọp-akpa òrereke si me ubọk. ¹⁸ Ofifi ogwu osat si, ogwu òkikpọ chieen̄ me lek ukan̄, onanan̄a me agba lek ntook isibi inu, mè initaan̄ ukpo itumu inyi ogwu osat ogwu òkaan̄ oge isọp-akpa òrereke ya ibe, “Mọnọ oge isọp-akpa kwun̄ òrereke sa sọp mfut gerep òkup me lek olik gerep me linyọn̄, mije, gerep cha îren̄e isan̄a.” ¹⁹ Ogwu osat ya omọmọnọ oge isọp-akpa kan̄ iwum ikana me linyọn̄, mè isọp mfut gerep cha, mè ititiin̄, mè ikpulu itọọn̄ igwook me emen ikpele otik ekisa ichimi mun̄ isibi me lek gerep, inyi echimi mun̄ esibi me lek. Ikpele otik ya ìkeke inyi uga unaan̄-ejit eyi Awaji. ²⁰ Eneniben gerep cha me emen ikpele otik ya isibi isi iyik me udun̄ ama, mè ikitun̄, inyi mun̄ isibi me lek. Eje okekigbuk isibi me emen otik ya, mè igbọọk ijọn̄ọ ere iso efit ewuuk ije iba, mè inan̄a me ijọn̄ ibene iso ejit ge mè ọkpọkọ.

¹ Mgbọ eya orakabe, nnenimun̄ ofifi ikpele inu ge òkup uyeke uyeke me emen inyọn̄. Inu ya ìre ebi osat Awaji jaaba melek òta uyọrọlek jaaba. Uyọrọlek cha ìre echi òta, mije, ema isiraka isan̄a, unaan̄-ejit Awaji îta. ² Nnenimun̄ inu ge òkup kubọk okwaan̄. Inu òkup kubọk mun̄ me okwaan̄ ya ìkitoon̄ kubọk umọọn̄, mè ikup kubọk esa ukan̄ igwa. Ebi ìtitim ikpan̄ anam ukpook ya, mè inu ebotbe òbet lek kan̄, mè itim si ikpan̄ iman̄ òriọọn̄ eyi erieen̄ kan̄ ya, ekekeke me agba okwaan̄ ya, mè ikaan̄ uneen̄ Awaji onyibe ema me ubọk, ³ mè ikikọt òjelek okwa Mosis ogwu ikwaan̄ Awaji ojeen̄be me ukot ikaan̄, òrere si okwa ekisa itọn̄ Gwun̄ Arọọn̄ Awaji, ibe, “Okumugwem Awaji Ogwu Òkaan̄ Unye Geelek, ubọk ikwaan̄ kwun̄ îmin enenen, mè ikaan̄ ukpook. Oniin̄ kwun̄ ìre oniin̄ eyi unen mè atikọ. Owu ore Ogwu Ubọọn̄ me ukot geelek. ⁴ Okumugwem, ìre ekene ore ogwu kpotet ukpook me lek kwun̄? Ìre ekene ore ogwu kponyibe owu umin? Mije, owu gaalek okup me mbuban. Otutuuk ido geelek me linyọn̄ mênu initọbọ ebum me isi kwun̄, mije otutuuk ene mîmun̄ ubọk ikwaan̄ ata irọrọ kwun̄ geelek.” ⁵ Mgbọ eya orakabe, nnenikpọ, mè imun̄ echilibe Ere Òkup Mbuban Ichit ibook me emen uwu mbuban òkup me emen inyọn̄. ⁶ Ebi osat jaaba cha ìsasa uyọrọlek jaaba cha inu enanan̄a me emen uwu mbuban ya isibi. Ema otutuuk etap ọfọnti okuket òtatana jai, mè ikitoon̄, mè isa fanti alata araran̄ ibọp ikana me otu ejit. ⁷ Ge me lek inu ini òkup me ugwem cha oneninyi ebi osat jaaba cha okwa alata araran̄ jaaba echi unaan̄-ejit Awaji ogwu òkup me ugwem mgbọ geelek mgbọ geelek ojotbe me emen. ⁸ Oduku ònan̄a me umin mè uja mè unye eyi Awaji ojojot emen uwu mbuban ya. Kpunu ene geege òkọkọt inin̄ emen uwu mbuban ya mege ire mgbọ uyọrọlek jaaba cha echi ebi osat jaaba cha esabe inu orakabe.

¹ Mgbọ eya orakabe, nnọnọ ida ge ònan̄a me uwu mbuban ya okitaan̄ ukpo itumu inyi ebi osat jaaba cha ibe, “Ìben unaan̄-ejit Awaji òkup me emen okwa jaaba cha ìsi ìkana ìgwook me linyọn̄.” ² Adasi ogwu osat oneniben unaan̄-ejit òkup me emen okwa eyi kan̄ isi ikana igwook me inyọn̄ ijọn̄. Mgbọ yaage, inya akpọk isi ile òkiyok ene kubọk ada okpọkpọk ichit lek otutuuk ebi ìkakaan̄ iman̄ òriọọn̄ eyi anam ukpook ya, mè itọbọ ebum inyi inu ebotbe òbet lek kan̄ ya. ³ Ogwu osat òso iba onenikana unaan̄-ejit òkup me emen okwa eyi kan̄ igwook me emen awaji. Mun̄ òkup me emen awaji okakana eje, kubọk eje ònan̄a me lek nkwukwu ene. Inu geelek òkaan̄ ugwem me lek me emen awaji okwakwaan̄ isan̄a kpai. ⁴ Ogwu osat òso ita onenikana unaan̄-ejit òkup me emen okwa eyi kan̄ igwook me otutuuk okwaan̄, mè ibot odidim geelek. Mun̄ òkup me emen okwaan̄ mè odidim cha okakana eje. ⁵ Nnọnọ ogwu osat òkikpulu mun̄ geelek okitumu ibe, “Owu Awaji ogwu òkup me mbuban, ogwu òkukup karake akat, mè ikup si mgbọ keyi, otutuuk oyerebet chi ofieekbe ìre unen, ubọk owu ofieekbe si îtat. ⁶ Mije, ema mîfiat eje bọn kwun̄ mè ebi nriran kwun̄, owu oneninyi ema eje, inyi ema enwọ si. Ikeya ogbe ema.” ⁷ Nnọnọ ida ge ònan̄a me lek ntook ya okibọkọ otu ibe, “Iin̄, Okumugwem Awaji Ogwu Òkaan̄ Unye Geelek, oyerebet kwun̄ ìre atikọ, mè unen.” ⁸ Ogwu osat òso ini onenikana unaan̄-ejit òkup me emen okwa eyi kan̄ igwook me lek ura. Inyinyi ura unye inyi iyok kubọk ukan̄, mè ikiwọp ebi ene. ⁹ Uyok ura owọwọp ebi ene iyaan̄ akpa. Ire, ema ejijit inwenwene ejit, mè ijit si inyinyi Awaji umin, mè ikigbo erieen̄ Awaji, ogwu òkakaan̄ unye itọtọ ikọ inyi uyọrọlek chi geelek. ¹⁰ Ogwu osat òso go onenikana unaan̄-ejit òkup me emen okwa eyi kan̄ igwook me inyọn̄ ogboon̄ ubọọn̄ anam ukpook ya. Mgbọ yaage, uga udun okakana ichit otutuuk ama ubọọn̄ kan̄ bùk. Ebi ene ekekiloon̄ alọm kiban̄ mije ujaralek cha, ¹¹ mè ikitiik Awaji ogwu òkup me emen inyọn̄ mije ufiak melek inya kiban̄. Ire, kpechieek si igwugwu ikom itele ijo ugwem kiban̄ cha. ¹² Ogwu osat òso gweregwen onenikana unaan̄-ejit òkup me emen okwa eyi kan̄ igwook me ikpele okwaan̄ ekigwen Yuferetis. Mun̄ òkup me emen okwaan̄ ya ochachat isan̄a kpai, inyi ebi ubọọn̄ ìnan̄a me agan̄ mbum-ura emun̄ oniin̄ eje esaba. ¹³ Nnenimun̄ ijo erumun̄ ita ìkup kubọk akwọọk enan̄abe isibi me otu ijijunu òkaan̄ ukot ya, mè otu anam ukpook ya, mè otu ogwu nriran ataak ya. ¹⁴ Ema ìre ijo erumun̄ kè Setan ebi ìkirọ inu ukechieen̄ òkup esese esese. Ijo erumun̄ ita chi enenisi ichichini melek otutuuk ebi ubọọn̄ me otutuuk linyọn̄, mè igwen ema ibe enetitiin̄ me ere ge, mè ebem lek ititim akọn̄ me ikpele usen ya eyi Awaji Ogwu Òkaan̄ Unye Geelek ogobobe isun̄. ¹⁵ “Ìkpọ, m̀banu mgbọ enyi ekakpọge chieen̄, kubọk ogwu inọ! Ugbana môkup inyi ene geelek òkup me ọkpọchieen̄, mè ikigbala ubọk isun̄ ọfọnti kan̄, inyi ọmọ ikaje njak, mè ìrie esip.” ¹⁶ Ebi ijo erumun̄ cha enenititiin̄ otutuuk ebi ubọọn̄ cha me ere ge ekigwen Amagedọn me usem Iburu. ¹⁷ Òso ogwu osat jaaba onenikana unaan̄-ejit òkup me emen okwa eyi kan̄ igwook me emen efet. Mgbọ yaage, ida ge ònan̄a me inyọn̄ ogboon̄ ubọọn̄ òkup me uwu mbuban ya otataan̄ ukpo itumu ibe, “Mîrọ isan̄a! Îta!” ¹⁸ Isinyọn̄ okekikebe, mè ikigbugbut, mè ikisook. Ijọn̄ okekisisik enenen. Kperarak imun̄ òjelek sikisik ijọn̄ òkup ikeya me linyọn̄ karake Awaji orombe ebilene. ¹⁹ Nga ama ile ya otọtọbọ ibum ọkpọkọ ita. Ama ile òkup me ido geelek ogbugbugbọ igwook. Awaji okekeek uga ama ile ya ekigwen Babilọn, mè ichik ujat miin̄ eyi ikpele unaan̄-ejit kan̄ inyi ibe inwọ. ²⁰ Otutuuk achọ geelek òkup me linyọn̄ keyi olilibi ichieen̄. Otutuuk ikpele ogoon̄ geelek onininiin̄ ita isan̄a kpai, kpeyaka imun̄ geege. ²¹ Mun̄ òkup kubọk ewuuk okekinan̄a ọkpọkọ ọkpọkọ me isinyọn̄ ikirep igwook me lek ebilene kubọk ibot. Ọkpọkọ ewuuk cha ge îkilobo ikup kubọk akpa uchi ilile. Ebilene ebebene ikitiik Awaji, mije, uyọrọlek eyi ọkpọkọ ewuuk ya îtap ene ikpele ufialek me lek enenen.

¹ Ge me lek ebi osat jaaba, ebi ìkaan̄ okwa jaaba cha me ubọk onunu, mè initumu inyi emi ibe, “Na, mâjeen̄ owu osusut òkukup inyi ikpele ogwu òje oyet ya, òrere ama ile ya enamabe me agba owuwa okwaan̄. ² Otutuuk ebi ubọọn̄ linyọn̄ mîrọ ugan-nwa melek kan̄ iso. Otutuuk ebi ìluk me linyọn̄ mîgọọk ọmọ ije oyet, isasa ema kubọk miin̄.” ³ Ekwukwu Awaji okakana ichit emi. Ogwu osat ya obeben emi isi iyik me emen èwê. Mmumun̄ ogwu enenwaan̄ ge osikibe ikweek me inyọn̄ anam ukpook ge òkup araran̄. Anam ukpook ya ìkaan̄ ibot jaaba, mè itibi akọp iko me ibot. Egege erieen̄ unyechieen̄ geelek òkitumu Awaji ifiat ijot lek anam ukpook ya. ⁴ Ogwu enenwaan̄ ya ìtap ọfọnti araran̄, eyi alata araran̄ mè ewuuk unye otu ewe geelek, eyi ònan̄a me ijọn̄ mè eyi ònan̄a me okwaan̄, okimumen me lek, mè ikaan̄ ekpen̄ alata araran̄ me ubọk. Me emen ekpen̄ ya, inu mbuban geelek, mè bukubuku ugwem barabat geelek ìjojot. ⁵ Mîge uyeke uyeke erieen̄ nlelet ge me inyọn̄ okwut isi ogwu enenwaan̄ ya. Erieen̄ ya ìre, ⁶ Nnenimun̄ ibe ke eje ogbogbo bọn Awaji, ebi ìkekeke ata-ikọ inyi Jisọs, ebi ogwu enenwaan̄ ya okpan̄be, îsa ogwu enenwaan̄ ya kubọk miin̄. Mgbọ mmun̄be ogwu enenwaan̄ ya, îsisik emi ekwukwu enenen. ⁷ Ogwu osat ya onenido emi ibe, “Ìre keke orọ mè ogwu enenwaan̄ yi ike owu chieen̄? Mâkpa nlelet inu òfolek ogwu enenwaan̄ ya inyi owu, mè ikpa si inu òfolek anam ukpook ya eyi îsikibe ikweek me inyọn̄, eyi òkaan̄ ibot jaaba, mè itibi akọp iko me ibot, inyi owu. ⁸ Anam ukpook ya omun̄be îwuuk lek ikup me ugwem mgbọ òraraka, ire, mgbọ keyi ìkayaka ìkup me ugwem. Sọnja mgbọ, môkpọk inan̄a me udọn̄ ikakaan̄ge okputut ya isibi inu, mè inan̄a isi ere mêkpan̄be ọmọ. Ebi geelek ìluk me linyọn̄, ebi ekagege erieen̄ kiban̄ me emen ikpa eyi ugwem karake sabum enirom linyọn̄, mgbọ ema mêmun̄be anam ukpook ya, môke ema chieen̄ enenen. Mije, anam ukpook ya îwuuk lek ikup me ugwem mgbọ òraraka, ìkakup me ugwem mgbọ keyi, ire, môyaka inu iniluk ugwem mgbọ òkup me isi. ⁹ “Îgbe ibe ene ikaan̄ ifuk-ibot òfo me lek inu yi. Ibot jaaba cha ìkeke inyi orioon̄ jaaba echi ogwu enenwaan̄ ya osikibe ikweek me inyọn̄. Ema ekeke si inyi ubọọn̄ jaaba. ¹⁰ Me etete kiban̄, ubọọn̄ go mîwuuk lek ikpulu, mè ikwaan̄ iraka. Ge ọmọ òwa òkikpulu mgbọ keyi. Ge keyilọ ìkabene ìkpulu nu. Ire, isibene ikpulu, môkup sọnja mgbọ gaalek. ¹¹ Anam ukpook ya eyi òwuwuuk lek ikup me ugwem, ire, ìkayaka ìkup mgbọ keyi, anam keya ore òso ubọọn̄ jeeta. Ọmọ îwuuk lek ìre ubọọn̄ ge me etete adasi ebi ubọọn̄ jaaba cha. Ọmọ mônisi inyi ekpan̄ ọmọ. ¹² “Akọp iko cha omun̄be me ibot anam ukpook ya ìre akọp ebi ubọọn̄ ebi kpebene-nu ikpulu. Ire, mênyi ema unye ibe egọọk anam ukpook ya ekpulu, mbubak mgbọ ge gaalek. ¹³ Akọp ubọọn̄ chi ekaan̄ ulọk ge gaalek. Ema mêkana unye kiban̄, mè irek ubọọn̄ kiban̄ inyi anam ukpook ya. ¹⁴ Ema mêtim akọn̄ melek Gwun̄ Arọọn̄ Awaji. Ire, Gwun̄ Arọọn̄ ya môtim ikpan̄ ema, mije, ọmọ ìre Okaan̄ ebikaan̄-ene, mè Ubọọn̄ ebi ubọọn̄. Melek si, ebi kan̄ ebi ọmọ ogobobe inyi lek kan̄, mè igwen, òrere ebi ìkekeke inye melek kan̄, mè ikigọọk ọmọ me udun̄ mgbọ geelek, ife chi mêgọọk ọmọ itim ikpan̄ si.” ¹⁵ Ogwu osat ya onenitumu inyi emi ibe, “Owuwa okwaan̄ cha omun̄be me ere ogwu òje oyet ya osikibe ikweek ìkeke inyi urum ebi ene, mè ebi ido geelek, mè ebi ife geelek, mè ebi otu usem geelek òkup me linyọn̄. ¹⁶ Anam ukpook ya omun̄be, mè akọp iko cha mêcha ogwu òje oyet ya. Ema mêkpulu otutuuk inu îkaan̄be isan̄a, me itele ọmọ njak. Mêtaka ufuk kan̄, mè isa ukan̄ iwọp ọmọ itaka iriọk. ¹⁷ Awaji îtap me ejit akọp ebi ubọọn̄ cha ibe ere otu ge, mè enekana unye kiban̄ mè irek ubọọn̄ kiban̄ etap me ubọk anam ukpook ya, inyi ikikpulu mege ire mgbọ ikọ Awaji môrọbe iso. Sa me ikeyi ke Awaji orọ inyi akọp ebi ubọọn̄ chi erọ nkeek kan̄. ¹⁸ Ogwu enenwaan̄ ya omun̄be ore ama ile ya, eyi òkitọ ikọ inyi otutuuk ebi ubọọn̄ ebi linyọn̄.”

¹ Mgbọ eya orakabe, mmumun̄ ofifi ogwu osat Awaji ge onan̄abe me emen inyọn̄ inu. Ogwu osat ya îkaan̄ unye enenen, utoon̄ ònan̄a me lek kan̄ ototoon̄ ikana otutuuk linyọn̄. ² Ikekitaan̄ ukpo ikitumu ibe, “Îrọn̄! Îrọn̄! Babilọn ama ile ya îrọn̄! Ọmọ îkana ere ebi osat yọk, mè ijo erumun̄ geelek, mè ebi kè ofut geelek ikatanage me isi Awaji, mè ofut geelek òkichaka mbuban ekiluk. ³ Mije, otutuuk ebi linyọn̄ mîgọọk ọmọ irọ ugan-nwa mè òje oyet, isasa ema kubọk miin̄. Otutuuk ebi ubọọn̄ linyọn̄ mîrọ ugan-nwa melek kan̄ iso. Ebi ìkinyam ewe me linyọn̄ keyi mîbọọn̄ ubọọn̄ inan̄a me lek ubene ugwem ogwu enenwaan̄ ya okiluk.” ⁴ Nneninọ ofifi ida okitaan̄ inan̄a me emen inyọn̄ itumu ibe, “Ebi n̄a, ìnan̄a isibi me emen kan̄! Ikagọọk ọmọ ìtap ubọk me emen ijo inu kan̄, inyi enyi ekagọọk ọmọ ìbọkọ osusut kan̄ geege. ⁵ Mije ijo kan̄ îwa enenen, mè itoon̄ ibene mege isi ire emen inyọn̄. Awaji ìkawuuk inu ikpak kan̄! ⁶ Enyi ìrọ ọmọ me lek ubọk ọmọ orọbe enyi. Otutuuk ijo inu îrọbe enyi, ìkpe ọmọ useen̄ mgbọ iba. Ujat inu ya îtọkọbe ijot ekpen̄ inyi ene, ìtọkọ eyi òjajat igak ikeya mgbọ iba ìnyi ọmọ inwọ. ⁷ Ìnyi ọmọ ujaralek mè ufieejit ògbegbe ìgọọk me ìkeke umin mè ubene ugwem eyi ọmọ onyibe lek kan̄. Mije, ìkigugo lek me emen ejit kan̄ ibe, ‘Emi ǹkisiki ikweek irek kubọk ubọọn̄ enenwaan̄, ǹkare nwakpa, m̀kpakup me ufieejit kubọk ge.’ ⁸ Eya orọ, otutuuk uyọrọlek kan̄ ìborọn̄ ikeme ọmọ me egwe ge gaalek. Mkpa, mè ufieejit, mè uga akan̄, môkeme ọmọ. Ukan̄ môtaka ọmọ, mije, Okumugwem Awaji ogwu òkisibi ọmọ oyerebet me ibot ìre ogwu òmimin enenen. ⁹ “Ebi ubọọn̄ linyọn̄ ebi ìrọrọ ugan-nwa melek kan̄, mè irie utop otu melek kan̄, mêto ito, mè ifieek ejit inyi ọmọ mgbọ ema mêmun̄be oduku ònan̄a me lek ukan̄ òkitaka ọmọ okibumu ifo inyọn̄. ¹⁰ Ujaralek ọmọ obokibọkọ me emen ukan̄ ya môtet ema ukpook enenen. Mije keya, ema mêkeke me ujọn̄ọ ere, mè ikito ito ibe, ‘Jei, njijin! Owu okaan̄ njijin onọ! Jei, Babilọn, nga ama ile! Jei, Babilọn, ama unye! Mbubak mgbọ ge gaalek uyọrọlek onube ke owu ojijaka, mè ichep isan̄a kpai!’ ¹¹ “Ebi ìkinyam uga ewe me linyọn̄ mêto ito, mè ifieek ejit enenen inyi ọmọ, mije, kpunu ogwu òboyaka ikilep ogbogbo inu mbit kiban̄ ofifi. ¹² Kpunu ogwu òboyaka ikilep inu mbit echi alata araran̄, mè echi alata okuket, mè ewuuk unye otu ewe, echi ònan̄a me ijọn̄, mè echi ònan̄a me okwaan̄, mè ekwut irio irio, mè echi òrọrọt mè ikimumọọn̄, mè echi òkup eje eje, mè esese lek uti, mè owuwa inu esabe oduk eniin̄ irom, mè unye ewe uwot, mè ekwe, mè okwukwut, mè ewuuk urọt lek. ¹³ Kpunu ogwu òboyaka ikilep si inu mbit kiban̄, kubọk inu òkirọ inorie itop eyi ekigwen sinamọn, mè inu ekisa irọ aran̄ utop olu, mè nsensi, mè mâa, mè farankinsens, mè miin̄, mè aran̄ olifu, mè akpa ekọkọk, mè echi ibot ibot, mè erie mbuuk, mè arọọn̄, mè inyinya, mè uji ijọn̄ inyinya okitaba ije, mè akpalek ebilene, mè ibot ejit ebilene si. ¹⁴ “Ebi mbit cha mêkitumu ibe, ‘Jei, otutuuk ata inu cha òkilọk owu ikakaan̄ îlibi itele owu. Otutuuk inu ubọọn̄ kwun̄, mè umin kwun̄ îniniin̄ ichep, owu òkpoyaka ikọt ikaan̄ ema ofifi.’ ¹⁵ Ebi ewe ìnyanyam inu chi inyi ọmọ, mè ibọọn̄ ubọọn̄ inan̄a me lek kan̄ kpebekọt ije igbet ọmọ ere me lek. Ebekeke me ujọn̄ọ ere, mije, ujaralek kan̄ môtet ema ukpook. Ema mêkeke me ujọn̄ọ ere ikito ito, mè ikifieek ejit ibe, ¹⁶ ‘Jei, njijin! Owu okaan̄ njijin onọ! Jei Babilọn, nga ama ile! Owu ogwu òkitap ata ọfọnti okuket, mè ọfọnti irio irio, mè eyi eje eje, mè ikinwunwan̄ alata araran̄, mè ewuuk unye otu ewe eyi ijọn̄ mè eyi okwaan̄, echi òkekimumen, ichit lek. ¹⁷ Me mbubak mgbọ ge gaalek ke otutuuk ikpele inu ubọọn̄ kwun̄ ojijaka isan̄a kpai.’ “Ebi ìkikọp uji ile, mè ebi geelek ìkisi ikwaan̄ me emen, mè ebi ije ìkup me emen uji ile, ema otutuuk ene mêkeke me ujọn̄ọ ere. ¹⁸ Mgbọ ema mêmun̄be oduku ònan̄a me lek ukan̄ òkitaka ama ya okibumu, ema mêtaan̄ ukpo ibe, ‘Jei, ukpook! Ìre kpasi ofifi ama ile obet lek nga ama ile keyi?’ ¹⁹ Ema mêgwọ mfuun̄ igwook me ibot kiban̄ mije ufieejit, mè ikifieek ejit, mè ikito ito ibe, ‘Jei, njijin! Owu okaan̄ njijin! Jei, nga ama ile, ere otutuuk uji ile òkikọp me emen awaji okinu inibọọn̄ ubọọn̄ inan̄a me lek ubọọn̄ kwun̄. Me mbubak mgbọ ge gaalek, otutuuk inu ubọọn̄ kwun̄ cha îta isan̄a kpai! ²⁰ Enyi ebi ìkup me emen inyọn̄, ìbele ejit, mije, uga ama ya înan̄a irọn̄! Enyi bọn Awaji, mè ebi otuchieen̄, mè ebi nriran, ìbele ejit! Awaji îtip ọmọ oyerebet mije inu îrọbe enyi.’ ” ²¹ Eya iraraka, ikpele ogwu osat ge obeben mbubak ewuuk ge òmimin ikup kubọk ikpele ewuuk ikọk-akpa itọp ito me okwaan̄ ke gbìdìi, mè ibe, “Ikeyi ke mêsa me unye iben owu, Babilọn, nga ama ile ya, itọp itap me emen okwaan̄, kpebeyaka ikpọk imun̄ ọmọ ofifi. ²² Kpebeyaka ikinọ ida ebi ìkikọt okwa, mè ida uneen̄, mè odu, mè otita okitaan̄ me emen kwun̄ ofifi. Ebi usọ geege kpebeyaka ikup me emen kwun̄ ofifi. Ewuuk ikọk-akpa ìkpoyaka isan̄a amọn me emen kwun̄ ofifi. ²³ Utoon̄ mkpukan̄ ìkpoyaka itoon̄ me emen kwun̄ ofifi. Ijọk ido-nwa, mè ida ogwu òdo nwa, mè ida aya nwa òbat olom ìkpoyaka itaan̄ me emen kwun̄ ofifi. Me adasi mgbọ, ebi mbit ìluk me emen kwun̄ ere ebi ilile me linyọn̄. Ire, owu osa iwot kwun̄ ileke otutuuk ido geelek ifiin̄ isan̄a.” ²⁴ Babilọn îbọkọ osusut ògbegbe ọmọ, mije, îre me emen kan̄ ke emun̄ eje otutuuk ebi nriran, mè eje bọn Awaji, emen kan̄ si ke emun̄ eje otutuuk ebi ekpan̄be me linyọn̄ keyi.

¹ Mgbọ otutuuk inu cha orakabe, nnọnọ inu òkup kubọk ida ogbogbo ene ekidimi okwa me emen inyọn̄ ibe, “Ìtọn̄ Awaji! Mije unyan̄a, mè umin, mè unye ìre eyi Awaji kiji. ² Mije, otutuuk oyerebet kan̄ ìre unen mè atikọ. Ọmọ îtip ikpele ogwu enenwaan̄ òje oyet ya oyerebet, ogwu òsasa ijo ugwem barabat kan̄ ifiat linyọn̄ isan̄a. Awaji îkpe ọmọ useen̄ eje ebi ikwaan̄ kan̄ ebi ọmọ okpan̄be.” ³ Ife cha ekpọkpọk itaan̄ ukpo si ibe, “Ìtọn̄ Awaji! Oduku ukan̄ ònan̄a me lek kan̄ môkibumu ifo inyọn̄ ire mgbọ ikakaan̄ge itata!” ⁴ Akọp ebi ugane iba mè ini cha, mè inu ini cha òkup me ugwem erọrọn̄ me ijọn̄, mè itọbọ ebum inyi Awaji ogwu òsisiki ikweek me inyọn̄ ogboon̄ ubọọn̄ ya, mè ichieek igwook ibe, “Ikup ikeya! Ìtọn̄ Awaji!” ⁵ Ida ge onanan̄a me inyọn̄ ogboon̄ ubọọn̄ ya ikitumu ibe, “Ìtọn̄ Awaji kiji, enyi otutuuk ebi ikwaan̄ kan̄, ebi ìkinyi ọmọ umin, ebi ilile mè ebi asasa!” ⁶ Nnọnọ ida ge okitaan̄ kubọk ida ogbogbo ene, mè ikitaan̄ si woii kubọk ida owuwa agbugbuk, mè ikpele ida isinyọn̄ ikibe, “Ìtọn̄ Awaji! Mije îre Okumugwem Awaji kiji Ogwu Òkaan̄ Unye Geelek okikpulu. ⁷ Eya orọ, eji enwọọn̄ unwọọn̄, mè ebele ejit, mè enyi ọmọ umin! Mije, ijọk ido-nwa Gwun̄ Arọọn̄ îre! Ogwu ayaya nwa ìbodo îneen̄ lek kan̄ isun̄ isan̄a. ⁸ Mînyi ayaya nwa òbat olom ya ujuja ọfọnti okuket òtatana mè itoon̄, ibe isa ibala lek.” (Ọfọnti okuket ya ìkeke inyi ikwaan̄ ata irọrọ eyi bọn Awaji erọbe.) ⁹ Ogwu osat ya onenitumu inyi emi ibe, “Ge ikọ keyi tap me ikpa: ‘Ugbana môkup inyi ebi egwenbe ibe enu enegọọk erie inorie ijọk ido-nwa eyi Gwun̄ Arọọn̄ ya!’ ” Ogwu osat ya otutumu si ibe, “Ikọ chi ìre ikọ ònan̄a me otu Awaji me lek kan̄.” ¹⁰ Nrọrọn̄ me ijọn̄ me ukot ogwu osat ya, mè ibatọbọ ebum inyi. Ire, ibebe emi, “Iin̄-iin̄, karọ. Emi ìre ogwu ikwaan̄ Awaji kubọk owu melek bọn Nte kwun̄, ebi ìchechieek me lek atikọ eyi Jisọs ochilibe ibook, erebe. Tọbọ ebum nyi Awaji! Mije, atikọ eyi Jisọs ochilibe ore inu òkinyi ebi nriran unye ema ekisa iben nriran.” ¹¹ Nnenimun̄ emen inyọn̄ ochilibe ibook, mè imun̄ si inyinya okuket ge. Erieen̄ ogwu òkilibi me inyọn̄ inyinya ya ìre Ogwu Ògbe Utoon̄ Ejit, mè ire si Atikọ. Ọmọ ìkisa me ata irọrọ isibi oyerebet, mè ikitim akọn̄ me unen. ¹² Chieen̄ iba kan̄ ìkisak kubọk ukan̄, ọmọ îkwuun̄ owuwa okpibot ubọọn̄ me ibot. Îkaan̄ erieen̄ ge egebe me lek kan̄ eyi kpunube ene geege òrọriọọn̄ inu erieen̄ ya orebe, ilọ ọmọ gaalek. ¹³ Ọfọnti îtapbe me lek, ebeben ijiin̄ me emen eje. Erieen̄ kan̄ ìre Ikọ Awaji. ¹⁴ Otutuuk urum akọn̄ emen inyọn̄ egbugbuku ikigọọk ọmọ me udun̄. Ema otutuuk ekilibi me inyọn̄ inyinya okuket kiban̄, mè itap ọfọnti okuket òtatana, mè itoon̄ chieen̄. ¹⁵ Oge akọn̄ ge òrereke owọwọọk isibi me otu kan̄. Îre oge akọn̄ ya ke ìbosa itim akọn̄ ikpan̄ ido geelek, mè isa okuba okwukwut ikpulu ema. Îre ọmọ obochimi mun̄ isibi me lek mfut gerep me ere ekichimi mun̄ gerep, isasa ijeen̄ ikpele unaan̄-ejit Awaji Ogwu Òkaan̄ Unye Geelek. ¹⁶ Mîge erieen̄ me lek ọfọnti kan̄ melek owot ukot kan̄. Erieen̄ ya ìre, ¹⁷ Nnenimun̄ ogwu osat ge okekebe me inyọn̄ ura, mè ikitaan̄ ukpo itumu inyi otutuuk unọn òwulu me inyọn̄ ibe, “Ìna ìnititiin̄ me ere ge ìrie inorie ikpele ijọk eyi Awaji oboto! ¹⁸ Ìna ìnitaka ufuk akpalek ebi ubọọn̄, mè echi ebi ibot akọn̄, mè ebi akọn̄ kiban̄, mè anam inyinya, mè echi ebi ìkilibi me inyọn̄ kiban̄, mè ufuk akpalek otutuuk ebilene, ebi usun̄, mè ebi kpere usun̄, echi ebi ilile, mè echi ebi asasa!” ¹⁹ Nnenimun̄ anam ukpook ya, mè otutuuk ebi ubọọn̄ linyọn̄, melek urum ebi akọn̄ kiban̄ etitiin̄be me ere ge ibenitim akọn̄ melek ogwu òkup me inyọn̄ inyinya ya, mè ebi urum akọn̄ kan̄. ²⁰ Ire, etetet anam ukpook ya me agam, ọmọ melek ogwu nriran ataak ya òrọrọ esese inu òkup uyeke uyeke cha isa ikisi ikwaan̄ inyi ọmọ. Ogwu nriran ataak ya ìsa inu ukechieen̄ chi ifiaan̄ usini ene, inyi echieek ibe ege iman̄ òriọọn̄ eyi anam ukpook ya me lek kiban̄, mè echieek si itọtọbọ ebum inyi inu ebotbe inyi anam ukpook ya. Ebebeen̄ anam ukpook ya, mè ogwu nriran ataak ya, me ògat ugwem itọọn̄ itap me emen udọn̄ ukan̄ biridọni. ²¹ Esasa oge akọn̄ òwọwọọk isibi me otu ogwu òkup me inyọn̄ inyinya ya ikpan̄ otutuuk ebi akọn̄ melek kiban̄ cha isan̄a kpai. Otutuuk unọn òwulu me inyọn̄ otataka ufuk ijot owot.

¹ Nnenimun̄ ogwu osat ge okinan̄a me emen inyọn̄ inu, mè ikaan̄ atafi isotu udọn̄ ikakaan̄ge okputut ya mè nga mkpọn ile ge me ubọk. ² Itetet ijijunu òkaan̄ ukot ya, òrere ijijunu ukot ikaan̄ ya, òrere Yọk mè ìre si Setan, mè isa mkpọn ya ibọp ọmọ ikam, inyi ikup ikeya obop acha ge, ³ mè iben ọmọ itọp itap me emen udọn̄ ikakaan̄ge okputut ya, mè igon otu ichit ikwek ọmọ, mè itap iman̄ me lek ochichit otu udọn̄ ya, inyi ọmọ ikakọt ìnan̄a ìsibi ìnifiaan̄ ebi ido geelek me linyọn̄ ofifi mege obop acha ge ya môtabe. Obop acha ge ya isiraka, mêkpọk initọn̄ọ ọmọ itele sọnja mgbọ. ⁴ Nnenimun̄ owuwa ogboon̄ ubọọn̄, mè imun̄ ebi ene esikibe ikweek me inyọn̄. Ebi ìsisiki ikweek me inyọn̄ ogboon̄ ubọọn̄ cha ìre ebi enyibe unye ibe ekesibi oyerebet. Mmun̄ si ibot ejit ebi efieekbe ibot mije ichechieek ema echieekbe me lek kè Jisọs, melek ikọ Awaji eyi ema ekitumu. Ema kpetọbọ ebum inyi anam ukpook ya, mè ìre inu ebotbe òbet lek kan̄ ya, kpechieek si ibe etap ema iman̄ òriọọn̄ eyi anam ukpook ya me inyọn̄ okwut isi, mè ìre inyọn̄ ubọk kiban̄. Ife chi enenijomo me mkpa inin̄ me ugwem, mè inigọọk Karais ikikpulu otutuuk obop acha ge. ⁵ Eyi ore adasi ijojomo me mkpa. (Isan̄a me lek kè ebibi, otutuuk ebi ìkwukwu kpejomo me mkpa inin̄ me ugwem mege ire mgbọ obop acha ge ya otabe.) ⁶ Ugbana môkup inyi otutuuk ebi geelek ìjojomo me mkpa me adasi ijojomo me mkpa yi. Ema ìre ebi Awaji osan̄abe isun̄ esese inyi lek kan̄. Mkpa eyi òso mgbọ iba ìkakaan̄ unye me lek kiban̄. Ema mêre ebi ngwugwa inyi Awaji, mè ire si inyi Karais, mè igọọk ikup ikikpulu ebi ene obop acha ge. ⁷ Mgbọ obop acha ya isiraka, mêsan̄a Setan isibi me mkpọn. ⁸ Isisan̄a ọmọ isibi me mkpọn, môjijen̄e ikana isi ikifiaan̄ otutuuk ebi ido geelek òkup me otutuuk agan̄ ini eyi linyọn̄ keyi, echi òrere Gọọgu mè Magọọgu, mè ititiin̄ ema ibe enetim akọn̄ melek bọn Awaji. Ife cha mêwa me otu ifuk ikup kubọk nkwukwuuk okpoon̄ òkup me agba awaji. ⁹ Ema egbọgbọọk ikana iso otutuuk ubọk linyọn̄ yi owelebe iyaka, mè inigban ikana ere bọn Awaji elukbe, melek ama ile ya eyi Awaji omabe enenen. Ire, ukan̄ onanan̄a me emen inyọn̄ inu mgbọ yaage, mè itaka ema otutuuk ikpan̄ isan̄a kpai. ¹⁰ Etetet Yọk ya, ogwu òfafiaan̄ ema, itọp itap me emen udọn̄ ukan̄ biridọni ya, ere etọọn̄be anam ukpook ya melek ogwu nriran ataak ya igwook. Ere ya ke ema ebekup ikibọkọ ujaralek, eririeen̄ mè ikarek mege ire mgbọ ikakaan̄ge itata. ¹¹ Nnenimun̄ ikpele ogboon̄ ubọọn̄ okuket ge, mè imun̄ si ogwu òsisiki ikweek me inyọn̄. Ijọn̄ mè isinyọn̄ elilibi inan̄a me isi kan̄, mè ilibi ichep, kpeyaka imun̄ ema ofifi. ¹² Nnenimun̄ ebi ìkwukwu, ebi ilile, mè ebi asasa ekekebe me isi ogboon̄ ubọọn̄ ya. Enenichili owuwa ikpa, mè iyaka inichili si ofifi ikpa ge, eyi òrere ikpa eyi ugwem. Enenikisibi oyerebet me ibot otutuuk ebi ìkwukwu cha igọọk me lek inu ema erọbe kubọk egebe me emen ikpa cha. ¹³ Okwaan̄ osasan̄a otutuuk ebi ìkwakwaan̄ me emen kan̄ isibi. Mkpa mè ama ekwukwu osasan̄a otutuuk ebi ìkwakwaan̄ ebi ìkup me emen kiban̄ isibi. Enenisibi oyerebet me ibot ene geelek igọọk me lek inu îrọbe. ¹⁴ Enenitet mkpa mè ama ekwukwu itọp itap me emen udọn̄ ukan̄ ya. Udọn̄ ukan̄ ya ore mkpa eyi òso mgbọ iba ya. ¹⁵ Ene geelek ekamun̄ge erieen̄ kan̄ me emen ikpa eyi ugwem ya, mîra iben itọp itap me emen udọn̄ ukan̄ ya.

¹ Nnenimun̄ ayaya isinyọn̄ mè ayaya linyọn̄. Adasi isinyọn̄ mè adasi linyọn̄ îchep, okwaan̄ ìkayaka ìkup. ² Nnenimun̄ Ama Mbuban ya, eyi òrere ayaya Jeruselem ya okinan̄a me emen inyọn̄, ere Awaji okupbe, ikisibi inu. Ebabala ọmọ isan̄a kubọk ekibala ayaya nwa inyi ogwu enerieen̄ òbododo me usen ijọk ido-nwa. ³ Nnọnọ ida ge okitaan̄ ukpo me ere ogboon̄ ubọọn̄ ya okupbe ikitumu ibe, “Mgbọ keyi, ere iluluk eyi Awaji ìkup me etete ebilene. Awaji môluk melek kiban̄, ema mêre ebi kan̄. Awaji me lek kan̄ môkup melek kiban̄, mè ire Awaji kiban̄. ⁴ Ọmọ môtuku ema mun̄ ito geelek isan̄a me chieen̄. Mkpa ìkpoyaka ikup. Ufieejit, mè ito, mè unan geege ìkpoyaka ikup ofifi. Mije, ukot oka inu cha geelek îraka isan̄a kpai.” ⁵ Ogwu òsisiki ikweek me inyọn̄ ogboon̄ ubọọn̄ ya onenitumu inyi emi ibe, “Kpọ mânirọ inyi otutuuk inu ikana ayaya,” mè itumu si inyi emi ibe, “Ge ikọ chi tap me ikpa, mije, ikọ chi ìre ikọ ògbegbe ibe etoon̄ ejit me lek, mè ire si atikọ.” ⁶ Inenitumu inyi emi ibe, “Îta! Mîrọ isan̄a! Emi nre Alifa mè Omega ya, òrere Ibebene mè Itata. Ene geelek ebek orakbe, mânyi mun̄ eyi ònan̄a me ogbuuruk ere mun̄ òkinyi ene ugwem okigbuk inan̄a isibi. ⁷ Ene geelek òtitim ikpan̄ môbọkọ otutuuk inu chi. Emi mâre Awaji kan̄, ọmọ orere gwun̄ n̄a. ⁸ Ire, ebi ukpook owot, mè ebi kpechieek me lek Awaji, mè ebi ìchachaka mbuban, mè ebi ìkpan̄ ene, mè ebi barabat, mè ebi ìkaan̄ ugwem ibọk ibọk mè ebi iwot, mè ebi ìkitọbọ ebum inyi mkpọmfaka, mè otutuuk ebi geelek ìkikan̄ ataak, irek kiban̄ ìbore emen udọn̄ ukan̄ biridọni ya. Eyiyi ore mkpa eyi òso mgbọ iba ya.” ⁹ Ge me lek ebi osat jaaba cha, ebi ìkaan̄ okwa jaaba echi òta uyọrọlek cha okupbe me emen, onunu inibe emi, “Na, mâjeen̄ owu ayaya nwa òbat olom ya, òrere nwa Gwun̄ Arọọn̄ ya.” ¹⁰ Ekwukwu Awaji okakana ichit emi, ogwu osat ya obeben emi isa isi inyọn̄ ikpele ubene ogọọn̄ ge, mè ijeen̄ emi Ama Mbuban ya, òrere Jeruselem, mgbọ îkinan̄a me ubọk Awaji me emen inyọn̄ ikisibi inu. ¹¹ Ama ya okekitoon̄ mije umin mè uja eyi Awaji, mè ikimumen kubọk atalek unye otu ewe ewuuk ekigwen jasipa, mè igen kubọk umọọn̄ mêkọtbe imọọn̄ inu itibi. ¹² Mînama ikpele mgban òbebene ìkana ama ya. Mgban ya ìkaan̄ akọp mè otunchit iba me lek. Akọp mè ebi osat iba ekekeke ikibem otunchit cha. Mîge si erieen̄ akọp mè otoko iba ebi Ijeren me lek akọp mè otunchit iba cha. ¹³ Me lek mgban ama ya, otunchit ita okup me agan̄ mbum-ura, otunchit ita okup me agan̄ inyọn̄, otunchit ita okup me agan̄ òsiki, otunchit ita si okukup me agan̄ ichep-ura. ¹⁴ Enama ama ya itoon̄ me inyọn̄ akọp mè ewuuk irak ijọn̄ iba echi egebe erieen̄ akọp mè ebi otuchieen̄ iba eyi Gwun̄ Arọọn̄ ya okaan̄be, me lek. ¹⁵ Ogwu osat ya òtutumu ikọ melek n̄a onenikaan̄ uti itọ-inu esabe alata araran̄ irom me ubọk ibosa itọ ama ya, mè mgban ama ya, mè otunchit cha. ¹⁶ Ama ya ìkaan̄ isi ini, isi ini cha ìre ìkike, ge ìkajọn̄ọ ìgak ge. Ujọn̄ọ kan̄ ìre obop ewuuk ije iba mè efit ini. Ikeya si ke uwele kan̄ mè ubene kan̄ okeke, mije, ujọn̄ọ kan̄, mè uwele kan̄, mè ubene kan̄ ìre ikike. ¹⁷ Ogwu osat ya onenisa ubọk ebilene ekisa itọ inu itọ ulobo akpọk mgban ya, isisibi akọp ejit jaaba mè iba. ¹⁸ Esa ewuuk unye otu ewe ekigwen jasipa inama mgban ama ya, mè isa alata araran̄ inama otutuuk ama ya me lek kan̄. Alata araran̄ esabe inama ama ya, kpunu okpa geege me lek, ìkpọkpọ igen kubọk umọọn̄. ¹⁹ Esa owuwa esese ewuuk unye otu ewe ibala ewuuk irak ijọn̄ mgban ama ya. Adasi ewuuk irak ijọn̄ ya ìre ewuuk unye otu ewe òtatana mè igen eyi ekigwen jasipa. Eyi òso iba ore ewuuk òkup oluku oluku eyi ekigwen safaya. Eyi òso ita ore ewuuk okuket mè eje eje eyi ekigwen kalisidoni. Eyi òso ini ore ewuuk òkup njijoon̄ inwan̄ njijoon̄ inwan̄ eyi ekigwen emeran. ²⁰ Eyi òso go ore ewuuk òkup chieen̄ nwen̄enwen̄e eyi ekigwen sadonikis. Eyi òso gweregwen ore ewuuk araran̄ eyi ekigwen kanelian. Eyi òso jaaba ore ewuuk òkup unwan unwan eyi ekigwen karasolet. Eyi òso jeeta ore ewuuk òkup lek ge njijoon̄ inwan̄, lek ge oluku oluku eyi ekigwen berin. Eyi òso onaange ore ofifi ewuuk òkup si unwan unwan eyi ekigwen topaji. Eyi òso akọp ore ewuuk òkup chieen̄ oduku oduku eyi ekigwen karasoperes. Eyi òso akọp mè ge ore ewuuk òkup lek ge oluku oluku, lek ge njijoon̄ inwan̄ eyi ekigwen jasinti. Sa eyi òso akọp mè iba ore ewuuk òkup irio irio eyi ekigwen ametis. ²¹ Esa ewuuk unye otu ewe ònan̄a me okwaan̄ irọ otutuuk akọp mè otunchit iba cha. Otunchit ge ìre ototuuk ototuuk ewuuk ge, kpebum, kpegba isọk. Oniin̄ òkup me emen ama ya, esa alata araran̄ kpunube okpa geege me lek, eyi ògegen kubọk umọọn̄, irọ. ²² Ǹkamun̄ uwu mbuban geege me emen ama ya, mije, Okumugwem Awaji Ogwu Òkaan̄ Unye Geelek mè Gwun̄ Arọọn̄ ya ere uwu mbuban òkup me ama ya. ²³ Kpeweek utoon̄ eyi ura, mè eyi onyan̄ me ama ya, mije, uja mè umin eyi Awaji okinyi utoon̄ me emen ama ya, sa Gwun̄ Arọọn̄ ya ore mkpukan̄ òkitoon̄ me ama ya. ²⁴ Ebi ido geelek eyi linyọn̄ keyi mêkisa utọọn̄ kan̄ imoon̄ inu ikijijen̄e, ebi ubọọn̄ linyọn̄ mêsa si inu ubọọn̄ kiban̄ inu me emen ama ya. ²⁵ Kpebechit otunchit ama ya kubọk usen geege, ebegwugwuku otutuuk otunchit cha ibook mgbọ geelek, mije, eririeen̄ ìkpokup me ama ya. ²⁶ Mêsa otutuuk uja inu ubọọn̄ mè umin eyi linyọn̄ keyi inu me emen ama ya. ²⁷ Ire, inu geelek ikatanage ìkponin̄ emen ama ya. Ene geelek òkirọ inu òkisa esip inu, mè ìre ogwu ofiaan̄, ìkponin̄ emen ama ya. Îtata ebi geelek egebe erieen̄ kiban̄ me emen ikpa ugwem eyi Gwun̄ Arọọn̄ ya gaalek ebenin̄ emen ama ya.

¹ Ogwu osat ya onenijeen̄ emi okwaan̄ eyi mun̄ ugwem ya. Mun̄ ya ìkpọkpọ igen kubọk umọọn̄, mè ikigbuk inan̄a me ogboon̄ ubọọn̄ eyi Awaji, mè eyi Gwun̄ Arọọn̄ ya isibi, ² mè ikigbuk iniraka me eden̄ oniin̄ ama ya. Uti òkito mfut eyi òkinyi ene ugwem otitibi me agba lek okwaan̄ ya me agan̄ iba, mè ikito mfut kan̄ akọp mè mgbọ iba me acha, mgbọ ge me onyan̄ geelek. Inwan̄ uti ya ke ekisa igwa otutuuk ebi linyọn̄. ³ Inu geelek Awaji ofieekbe otu inyi ìkpokup me emen ama ya. Ogboon̄ ubọọn̄ eyi Awaji mè eyi Gwun̄ Arọọn̄ môkup me emen ama ya, ebi ikwaan̄ kan̄ ekekitọbọ ebum inyi ọmọ me ere ya. ⁴ Ema mêmun̄ Awaji isi mè isi. Mêge si erieen̄ Awaji me inyọn̄ okwut isi kiban̄. ⁵ Eririeen̄ ìkpoyaka ikup, ebi ene kpebeyaka iweek utoon̄ mkpukan̄, mè ìre utoon̄ ura, mije, Okumugwem Awaji me lek kan̄ môre utoon̄ inyi ema. Ema mêkikpulu mege ire mgbọ ikakaan̄ge itata. ⁶ Ogwu osat ya onenitumu inyi emi ibe, “Ikọ chi ìre atikọ, mè igbe ibe etoon̄ ejit me lek. Okumugwem Awaji kiji, ogwu òkinyi ebi nriran Ekwukwu kan̄, ọmọ oria ogwu osat kan̄ ibe inijeen̄ ebi ikwaan̄ kan̄ inu echi òbomọnọ irek me ikafiin̄ge mgbọ. ⁷ “Ìkpọ, emi gwa ǹkinu ugwat ugwat! Ugbana môkup inyi ebi ìkirọ otutuuk ikọ nriran egebe me ikpa yi.” ⁸ Emi Jọn me lek n̄a nsa utọn̄ n̄a inọ ikọ chi, mè isa chieen̄ n̄a imun̄ si inu chi. Mgbọ nnọbe ikọ chi, mè imun̄ inu chi, nrọrọn̄ me ukot ogwu osat Awaji ya ogwu òjejeen̄ emi inu chi, mè ibatọbọ ebum inyi ọmọ. ⁹ Ire, ọmọ otutumu inyi emi ibe, “Iin̄-iin̄, karọ! Emi ìre ogwu ikwaan̄ Awaji kubọk owu mè bọn Nte kwun̄, ìrere ebi nriran, mè otutuuk ebi geelek ìkirọ inu egebe me emen ikpa yi, erebe. Tọbọ ebum nyi Awaji!” ¹⁰ Ogwu osat ya onenitumu inyi emi ibe, “Kachit ikọ nriran egebe me emen ikpa yi, chili jeen̄ ebi ene, mije, ìkpofiin̄ mgbọ inu chi geelek môrọbe iso. ¹¹ Ogwu òkirọ ijo inu, ikpọkpọ ikirọ ijo inu kan̄ ifo isi. Ogwu òkirọ inu ikpak, ikpọkpọ ikirọ inu ikpak kan̄ ifo isi. Ikeya si, ogwu òkirọ ata inu, itet lek inye ikirọ ata inu kan̄ ifo isi. Ogwu òsusun̄ lek kan̄ me mbuban inyi Awaji, ikpọkpọ ikisun̄ lek kan̄ me mbuban inyi Awaji ifo isi.” ¹² “Ìkpọ, emi gwa ǹkinu ugwat ugwat! Mkpukpe n̄a mbasa ikpe ebi ene me ubọk ikwaan̄ kiban̄ ọmọ òwa me ubọk n̄a. M̀bakpe ene geelek mkpukpe igọọk me ubọk ikwaan̄ kan̄. ¹³ Emi ìre Alifa mè Omega, òrere Adasi mè Òta, Ibebene mè Itata otutuuk inu geelek. ¹⁴ Ugbana môkup inyi ebi ìgwọgwọk ọfọnti kiban̄ itana. Îre ema ke enyi unye ibe erie mfut ònan̄a me lek uti eyi òkinyi ene ugwem ya, mè eje etibi me otunchit cha enin̄ emen ama ya. ¹⁵ Ire, otutuuk ebi ìkifiat lek kiban̄ kubọk ibo, mè ebi ìkirọ ugwem ibọk ibọk mè iwot iwot, mè ebi barabat, mè ebi ìkikpan̄ ene me agam, mè ebi ìki riaak mkpọmfaka, mè ebi geelek ìkima ofiaan̄ mè ikikan̄ ataak, ebibi otutuuk ebekup me udun̄ ama ya, kpebenin̄ emen ama ya. ¹⁶ “Emi Jisọs nria ogwu osat n̄a inu me lek kinyi ibe inu inilook enyi otutuuk inu chi òkukup inyi ntitiin̄ Awaji geelek. Emi nre Ugwun̄-ijọn̄ ya, òrere Gwun̄ Owot Iman kè Debit ya, mè ire si Ntoronyan̄ Otu Ewelegwe ya eyi òkitoon̄ enenen.” ¹⁷ Ekwukwu Awaji, mè ayaya nwa Gwun̄ Arọọn̄ ya ekekibe, “Na!” Ene geelek ònọnọ ikọ chi itumu si ibe, “Na!” Ogwu geelek ebek mun̄ ugwem orakbe, ene ya inu inibọkọ mun̄ eyi ugwem ya inwọ me ikike. ¹⁸ Emi Jọn nkitaba otutuuk ebi geelek ìnọnọ ikọ nriran chi egebe me emen ikpa yi ubọk me utọn̄. Ene geelek òtatap ofifi inu isọkọ me lek inu egebe me emen ikpa yi, Awaji môsa otutuuk ufialek echi egebe inu òfolek me emen ikpa yi itap isọkọ me lek osusut ìbosulu ene ya. ¹⁹ Ene geelek òsasan̄a inu me lek ikọ nriran egebe me emen ikpa yi, Awaji môsan̄a ubọk ene ya isan̄a me lek uti òkinyi ene ugwem ya, inyi ikakaan̄ uche me lek mfut ònan̄a me lek uti ya. Mêsan̄a ọmọ isibi ito me oyet, inyi ikakaan̄ irek geege me emen Ama Mbuban ya eyi egebe inu òfolek me emen ikpa yi. ²⁰ Ogwu òkekeke ata-ikọ ibe ke ikọ chi ìre atikọ ìkitumu ibe, “Iin̄, emi gwa ǹkinu ugwat ugwat!” Ikup ikeya! Okaan̄-ene Jisọs, na! ²¹ Atata nnwọn eyi Okaan̄-ene Jisọs ikup melek otutuuk ebi eyi Awaji. Ikup ikeya!