Ebi Filipai
11 Emi Pọọlu melek Timọti, eji ebi usun̄ kè Karais Jisọs ege ikpa etip yi ijet enyi, otutuuk bọn Awaji ìkup me Filipai, enyi ebi ìrere bọn eyi Awaji inan̄a me lek kè Karais Jisọs, mè otutuuk kinyi ebi ìkikpọ chieen̄ me ntitiin̄ Awaji, mè ebi ntap-ubọk me ntitiin̄ Awaji. 2 Atata nnwọn mè esuuk eyi ònan̄a me ubọk Awaji ogwu òrere Nte kiji, mè Okaan̄-ene Jisọs Karais ikup inyi enyi. 3 Nkitọn̄ Awaji n̄a enenen mije kinyi mgbọ geelek nkikeek enyi. 4 Mgbọ geelek nkiriaak uriaak me ibot kinyi otutuuk ene, ǹkiriaak melek ikpele unwọọn̄ me ejit n̄a, 5 mije enyi egọọkbe emi ikisi ikwaan̄ ata etip yi bene me ibebene mege na re mgbọ keyi. 6 Ofifi si, ejit n̄a înye ibe ke Awaji ogwu òbebene irọrọ ata ikwaan̄ kan̄ me emen ejit kinyi ìkpolọlọ isisi ikwaan̄ yi mege isi ire òta kan̄, me usen Jisọs Karais mônube. 7 Îgbe ibe emi ǹkaan̄ òjelek ulọk òkup ikeyi me lek kinyi otutuuk, mije, mben enyi me ejit enenen. Melek si, enyi otutuuk mîgọọk emi igbaan̄ ikaan̄ uche me lek atata nnwọn eyi Awaji onyibe emi me mgbọ keyi nkupbe me mkpọn, melek mgbọ nkije ikana ikitumu ikọ me ibot ata etip, mè ikirọ ata etip ya inye. 8 Ulọk nkaan̄be me lek kinyi îdọk enenen. Awaji me lek kan̄ môkọt ikeke ata-ikọ inyi emi. Ulọk yi ìnan̄a me ejit kè Jisọs Karais me lek kan̄. 9 Uriaak nkiriaak inyi enyi ìre, mè imumechieen̄ enyi ekaan̄be me lek ebi melek kinyi ikpọkpọ ikimin, mè enyi ekekaan̄ si atata ifuk-ibot, mè ekegobo inu etet ejaan̄ lek. 10 Sa me ikeyi ke enyi ebekọt ikiriọọn̄ inu ònwọnwọn ichit, inyi enyi etana esan̄a, mè ekakaan̄ nrọ-nlọ geege me emen mege ire usen Karais môkpọkbe inu. 11 Ofifi si, ikwaan̄ ata irọrọ eyi òkinan̄a me ubọk kè Jisọs Karais môjot me emen ugwem kinyi. Mije keyi, ebi ene mêkinyi Awaji umin mè itọn̄. 12 Mgbọ yi, bọn Nte n̄a, ǹkiweek irọrọ inyi enyi eriọọn̄ ibe kè otutuuk inu chi òrọrọ emi îrọ inyi ata etip yi itaan̄ ijọn̄ọ ere. 13 Mije ufialek n̄a chi, otutuuk ebi uwu ere ogwu Sisa okiluk, mè otutuuk ebi ofifi ife mîra iniriọọn̄ ijaan̄ lek ibe ke emi ǹkup me mkpọn mije kè Karais. 14 Ofifi si, mkpọn yi nkupbe me emen îtap owuwa bọn Nte efuuk me emen, inyi ema etumu ikọ Awaji, kpetet ukpook, kpelibi ene geege chieen̄. 15 Îre atikọ ibe ke usini ene ekilook ata etip kè Jisọs Karais me njijọ ejit, isasa itap ufialek. Ire, usini ene ekisa me ata ekiket ilook ebi ene ata etip ya, inyi ikọ Awaji ije inyi isi. 16 Ebi ìkisa me ata ekiket ilook ata etip ya ìre ebi ìmumun̄ emi me chieen̄, mije, ema mîriọọn̄ ibe ke Awaji ìsa emi initap me uwu mkpọn, inyi ǹsa me irek keyi ǹrọ mè ebi ene eriọọn̄ ibe ke ata etip yi ìre atikọ. 17 Ebibilọ cha kpesa me ata ejit ikilook ata etip ya. Ekisa me ejit mba, inyi ema etap ufialek ekeme emi me ibot me emen mkpọn yi nkupbe. 18 Ire, eya ìkakup me uyọt. Inu òkukup me uyọt ìre ke ema mêkilook ata etip kè Karais ya si me oniin̄ geelek, mè ìre me ijo ejit, mè ìyaka ire me ata ejit. Mije keyi, ejit îbele emi enenen. Me atikọ, mâkibele ejit si inyi isi, 19 mije nriọọn̄ ibe, sa me uriaak enyi ekiriaak me ibot n̄a, melek ntap-ubọk eyi Ekwukwu kè Jisọs Karais, ke inu yi môrọ inyi emi ǹsibi me mkpọn. 20 Inu nkiweek me otutuuk ejit n̄a, mè ikikpọ chieen̄ si, ìre, mè inu geege ikarọ inyi esip itet emi. Ire, kpan̄asi ikeya, ǹkiweek ibe ǹkat ejit enenen me mgbọ keyi kubọk nkikat otutuuk mgbọ, inyi Karais ikaan̄ umin me emen akpalek n̄a, mè ìre emi ǹkwukwu, mè ìyaka ire ǹkukup me ugwem. 21 Mije, me lek n̄a, ire emi nkup me ugwem, ǹkup inyi Karais. Ire nkwu mkpa, eya ìre oruru inyi emi. 22 Ire, ire nluk ugwem inyi isi me linyọn̄ keyi, mâkọt irọ owuwa inu eyi môtapbe ubọk inyi owuwa ene. Mije keya, ǹkayaka ìriọọn̄ agan̄ mbamọnọ. 23 Agan̄ iba cha ìkpọkpọ ikitaba emi. Îlọk emi ikwukwu itele linyọn̄ keyi, mè ifo isi igọọk Karais ikup, mije, eya onwọn enenen igak iluluk me linyọn̄ keyi. 24 Ire, mije kinyi, emi ikukup me ugwem me linyọn̄ keyi îkup me uyọt igak emi ikwukwu ifo igọọk Karais. 25 Eyi ìre atikọ. Eya orọ, nriọọn̄ ibe ke mâluk melek kinyi, mè ikitap ubọk inyi enyi, inyi enyi ekaan̄ unwọọn̄, mè ekeje enyi isi me emen ichechieek. 26 Eya orọ, ire nsibi me mkpọn, mè ikpọk inichichini melek kinyi, enyi mênwọọn̄ unwọọn̄ enenen mije n̄a, mè itọn̄ Jisọs Karais enenen mije inu îrọbe inyi emi. 27 Ire, enyi ìluk ugwem ògbegbe ebi ìbọbọkọ ata etip kè Karais itap. Eya ore inu òkukup me uyọt. Ire enyi ikiluk ikeya, mè ìre ǹnunu, mè ìre ǹkakọt ìnu, mâriọọn̄ ibe ke enyi mîkeke inye me ekiket ge, mè ikisa me ejit ge igbaan̄ itim akọn̄ me ibot ata etip eyi enyi echieekbe me lek. 28 Mânọ si ibe ke enyi kpechieek ibe ebi ìkirọ ikeme enyi etap enyi ukpook me emen. Eyi môjeen̄ ema ikpọk mbum ibe ke Awaji me lek kan̄ obotip ema oyerebet, mè inyan̄a enyi isibi. 29 Mije, Awaji ogwu ògwegwen enyi, inyi enyi enechieek me lek kè Karais, ìgwen enyi si ibe enyi enebọkọ ufialek mije kè Karais. 30 Me mgbọ keyi, îre enyi melek n̄a ekigbaan̄ itim akọn̄ ya enyi emun̄be emi nkitim me mgbọ òraraka, mè ikup me lek ititim si inire mgbọ keyi.
21 Karake enyi ekanabe ebi eyi Karais, igọgọọk Karais îtap enyi efuuk me emen. Imumechieen̄ kan̄ înyi enyi ukarajit. Enyi mîgbaan̄ inu irọ melek Ekwukwu Mbuban. Enyi mîkaan̄ si ata ejit mè ejit nsan me lek ebi melek kinyi. 2 Ire inu chi ire ikeya me atikọ, soso, ìgbaan̄ ìkaan̄ ejit ge, mè ìmun̄ lek kinyi me chieen̄, mè ìkaan̄ ekiket ge mè ulọk ge. Ìkiluk ikeyi ìfo isi, inyi unwọọn̄ n̄a ijot ichak. 3 Me emen inu geelek enyi ekirọ, ikakikeek lek kinyi gaalek. Ìsan̄a lek kinyi me lek ugumulek ikakaan̄ge ibot. Kpan̄asi ikeya, ìkisiki lek kinyi me ijọn̄, mè ìkimọnọ ebi ofifi ife kubọk ebi ìnwọnwọn igak enyi. 4 Ikakirọ inu òbokinin̄ enyi gaalek oruru. Ire, ìkiweek irọrọ inu echi òbokinin̄ oruru inyi ebi ofifi ife si igbaalek. 5 Ìtele inyi ekiket ejit kinyi ire ìkike melek ekiket ejit kè Karais Jisọs. 6 Me atikọ, bene me ibebene, Karais ìre ìkike melek Awaji. Ire, ìkasa me unye ìgọbọ irek irere ìkike melek Awaji ìkaan̄. 7 Kpan̄asi ikeya, ìtetele otutuuk irek ya, mè iyaka inimọnọ irek ogwu usun̄, emaman ọmọ me linyọn̄ keyi me mbet ebilene kubọk ekiman ebilene. 8 Mgbọ înube me linyọn̄ kubọk ebilene, ìsisiki lek kan̄ me ijọn̄, mè ichieek ikwukwu mkpa. Mkpa ya si ke îkwu me inyọn̄ uti nkwurieen̄. 9 Mije keya, Awaji obebene ọmọ ifo inyọn̄, mè isun̄ ọmọ me irek òbebene ichit, mè inyi ọmọ erieen̄ ilile eyi òmimin igak otutuuk erieen̄ geelek. 10 Eya orọ, isibak erieen̄ kè Jisọs, otutuuk inu geelek Awaji orombe, bene me lek ebi ìkup me emen inyọn̄ re lek ebi ìkup me linyọn̄ keyi, mè ebi ìkup me irak linyọn̄ keyi (eyi òrere ama ekwukwu), mêgwook akpatukot me ijọn̄, mè itọbọ ebum inyi Jisọs. 11 Otutuuk otu geelek môtumu isibi si ibe ke Jisọs Karais ore Okaan̄-ene, inyi itọn̄ mè umin geelek ikup inyi Awaji Ute. 12 Eya orọ, atata ebi une n̄a, enyi mîkigban̄ utọn̄ inyi emi mgbọ nkupbe melek kinyi. Ire, mgbọ keyi nkakupge melek kinyi, îkup me uyọt enenen ibe enyi egban̄ utọn̄ egak ikeya. Ìsiki lek ìsi ikwaan̄ ìnyi Awaji me uran-lek mè ukpook, inyi unyan̄a kinyi iso ifuk. 13 Mije, îre Awaji me lek kan̄ okisi ikwaan̄ me emen ejit kinyi, inyi enyi ekeweek irọrọ inu òkibele ọmọ ejit. Ọmọ si okitap ubọk inyi enyi, mè enyi ekekọt erọ si inu cha. 14 Ikakinunuun̄, ikakitap okput me inu geelek enyi eberọ. 15 Sa me ikeya, enyi mêre ebi kpunube inu geege ebesa itumu ikọ ikeme. Enyi mêre si bọn Awaji ebi ìtatana isan̄a, ebi ekakaan̄ge nrọ-nlọ geege me lek, me etete ijo ebi linyọn̄ keyi ebi ìwuwuwọlọ isan̄a. Îre enyi ekinyi utoon̄ me emen ijo linyọn̄ keyi, kubọk ebi kè ntoronyan̄ ekinyi utoon̄ me isinyọn̄. 16 Enyi ekinyi utoon̄ ya me linyọn̄ mije enyi ekilook ebi ene etip òkinyi ene ugwem. Ìnye lek ìkirọ ikeya ìnyi isi mege ire mgbọ Karais môkpọkbe inu, inyi ǹkaan̄ inu mâsabe igugo lek. Mije, mâriọọn̄ ibe ke ekot nlibibe mè kwulukwulu nkwukwulube ìkachep me ikike. 17 Ichechieek kinyi ìkup kubọk ngwugwa egwabe inyi Awaji. Usini mgbọ, ugwem n̄a obore kubọk miin̄ ebesa itọkọ igwook me lek ngwugwa ya. Ìrere ikeya ke ìbokup, emi mâbele ejit, mè igọọk otutuuk kinyi igbaan̄ inwọọn̄ unwọọn̄ si. 18 Ikeya si, îgbe ibe enyi ebele ejit, mè egọọk emi enwọọn̄ unwọọn̄. 19 Ire ineme Okaan̄-ene Jisọs, ǹkikpọ chieen̄ iraria Timọti inu me lek kinyi me mgbet mgbet mgbọ, inyi ǹnọ etip òfolek kinyi, mè ǹkaan̄ ubelejit. 20 Ǹkakaan̄ ofifi ene òkup kubọk Timọti, ogwu ata ekiket òfolek kinyi okiyok me ejit. 21 Mije, otutuuk kè ebilọ, ogwu ikup, ìkirọ inu òneme ọmọ, isasa itap ubọk inyi ugwem kan̄. Kpunu ogwu òyayaka ikikpọ chieen̄ me lek inu eyi Jisọs Karais. 22 Ire Timọti, otutuuk kinyi mîriọọn̄ ibe ke îkaan̄ ata ugwem. Mije, ọmọ îgọọk emi isi ikwaan̄ ilolook ata etip, kubọk gwun̄ okigọọk ogwu ute isi ikwaan̄. 23 Ǹkikpọ chieen̄ iraria ọmọ inu me lek kinyi mgbọ geelek mâriọọn̄be ubọk inu obokup melek n̄a me ere keyi. 24 Ntoon̄ ejit me lek Okaan̄-ene si ibe ke ìkpojọn̄ọ mgbọ emi me lek n̄a mânube inimun̄ enyi. 25 Epaforoditọs, atata gwun̄ Nte n̄a ogwu enyi eriabe ibe initap ubọk inyi emi, îgọọk emi isi ikwaan̄, mè itim akọn̄ ya ijaan̄. Me mgbọ keyi, mmun̄ ibe ke îkup me uyọt ibe emi ǹria ọmọ ǹka ǹjet enyi me ere keya. 26 Mije, otutuuk kinyi mêkilọk ọmọ. Ofifi si, îfieek ọmọ me lek ibe ke enyi mîra inọ ibe ke lek kan̄ ìkanye. 27 Me atikọ, Epaforoditọs îfiak enenen, mè ibonikwu. Ire, Awaji okakaan̄ ejit nsan me lek kan̄, mè ikaan̄ si me lek n̄a, mè inyan̄a ugwem kan̄, inyi nkarọn̄ ìnin̄ ofifi inu ufieejit eyi òmimin igak eyi nkupbe me emen mgbọ keyi. 28 Eya orọ îkupbe emi me uyọt igak otutuuk igwagwat lek iria ọmọ ijet enyi, inyi enyi emun̄ ọmọ, mè ebele ejit, mè ufieejit n̄a si iyaka igele. 29 Ọmọ isinu, ìsa unwọọn̄ ìbọkọ ọmọ ìtap kubọk ngwan̄ kinyi me emen Okaan̄-ene. Îgbe ibe enyi ekemin ebi ìkup kubọk Epaforoditọs. 30 Mije, ìsik sọntiik ọmọ mokwu mije ikwaan̄ kè Karais. Îsa ugwem kan̄ igwen inu ikike, inyi ọmọ ikọt inyi emi ntap-ubọk eyi ikafetge ibe enyi me lek kinyi ekọt etap enyi emi.
31 Me òta kan̄, bọn Nte n̄a, ìbele ejit mije enyi erebe ebi eyi Okaan̄-ene. Efuuk ìkata emi me emen ikpọkpọk ige si ikọ yaage mwuukbe lek ige ijet enyi, mije, ire ǹkakpọk ìge ikọ yi ìjet enyi, enyi mêkọt inin̄ emen ufialek. 2 Ìgbala chieen̄ kinyi me lek ebi ife cha ìkisi ijo ikwaan̄ kubọk ibo, mè ikitọ ibe efieek otutuuk ene afi eyi akpalek. 3 Eji ebi ìrere bọn Awaji inan̄a me ichechieek me lek kè Karais, eji ere ebi efieekbe afi ya me atikọ, ìkare ema cha. Eji ekitọbọ ebum inyi Awaji igọọk me nteme eyi Ekwukwu Awaji, mè ikimin Karais Jisọs mije inu îrọbe. Eji kpetoon̄ ejit me lek ọrọmijọn̄ eyi akpalek. 4 Mebe ke ọrọmijọn̄ eyi akpalek îkup me uyọt, emi me lek n̄a nso ogwu motoon̄ ejit me lek. Ire ikaan̄ ogwu òkigugo lek ibe ke ọmọ îso ogwu môkọtbe itoon̄ ejit me lek ọrọmijọn̄ eyi akpalek, emi me lek n̄a nso igak ene ya. 5 Mije, mgbọ emanbe emi isan̄a, efieek emi afi me òso egwe jeeta, igọọk me lek ọrọmijọn̄ ebi Ju. Ire me lek irere ogwu Ijeren, emi ìre gwun̄ owot ido Ijeren ònan̄a me otoko kè Benjamin, mè ire si atalek ogwu Iburu esabe eje ebi Iburu ibon. Ire me agan̄ isusun̄ Ikan ebi Ju, emi ìre ogwu Farisi. 6 Ire me agan̄ ulọk itetet ọrọmijọn̄ ebi Ju, emi me lek n̄a nsisaak ebi ntitiin̄ Awaji me otutuuk efuuk n̄a. Ire si me agan̄ irere ogwu ata irọrọ me emen Ikan ebi Ju, emi ǹkare fọkọfọkọ ene, kpunu nlilọ geege me emen n̄a, nrọ otutuuk Ikan iso. 7 Ire, otutuuk inu cha geelek echi mafukbe kubọk oruru inyi lek n̄a, mfuk ema otutuuk kubọk ichep mgbọ keyi mije kè Karais. 8 Ìkare inu kecha gaalek ke mfuk ichep! Me atikọ, mfuk otutuuk inu nkaan̄be kubọk ichep mije kè Karais, mije, irọriọọn̄ Karais Jisọs Okaan̄ n̄a, ọmọ onwọn ichit. Îre mije kè Jisọs Karais ke ntele otutuuk inu. M̀mọnọ otutuuk inu cha kubọk ifin ikike me lek n̄a, inyi ǹkọt ǹkaan̄ Karais me lek kan̄ me emen ugwem n̄a kubọk oruru, 9 mè ǹkana ogwu eyi Karais me atikọ. Sa me ikeyi, emi m̀kpare ogwu ata irọrọ inan̄a me isusun̄ Ikan. Ire, mâkana ogwu ata irọrọ mije nchieekbe me lek kè Karais. Òjelek irere ogwu ata irọrọ keyi ìkinan̄a me ubọk Awaji, mè ikup inyi ebi geelek ìchechieek me lek kè Karais. 10 Inu nkiweek ichit me ugwem n̄a ìre irọriọọn̄ Karais, mè irọriọọn̄ si unye ònan̄a me lek ijojomo me mkpa eyi ọmọ ojomobe. Ǹkiweek si imumun̄ ufialek ọmọ omun̄be, mè ikukup kubọk ọmọ okupbe me emen mkpa îkwube. 11 Sa me ikeya, usini mgbọ, emi mâgọọk ikup me otu ifuk ebi ìbejomo me mkpa. 12 Ǹkatumu ibe ke nra iwuuk lek ikaan̄ otutuuk inu cha nkiweek ikakaan̄. Ǹkatumu si ibe ke nra inwọn isan̄a. Ire, ǹtetet lek inye ikilibi ekọt yi, inyi ǹkọt ǹkaan̄ inu cha, mije, îre bak me lek inu cha ke Karais onyan̄a emi, mè itet emi ikaan̄. 13 Bọn Nte n̄a, emi ǹkamọnọ ibe ke nra ikaan̄ inu ya nkibak me lek ilibi ekot ya. Ire, inu ge gaalek ke nkirọ mgbọ geelek. Ǹkiwuwuuk otutuuk inu echi òrọrọ iraka, mè itet lek inye ikilibi ekot ya inyi isi, mè iben chieen̄ n̄a igwuun̄ me lek inu echi òkup me isi. 14 M̀kpọkpọ itet lek n̄a inye ikilibi ekot ya, inyi ǹlibi ǹre òta, mè m̀ben mkpukpe. Mkpukpe ya ìre igwen, eyi Awaji osabe me lek kè Jisọs Karais igwen emi itap me ugwem eyi emen inyọn̄. 15 Îgbe ibe otutuuk kiji ebi ìmimiin̄ ikem me emen inu eyi Awaji ekekaan̄ òjelek ekiket òkup ikeyi. Ire ikaan̄ ogwu ikaan̄ ofifi ekiket me lek inu geelek, Awaji môrọ inyi ene ya igobo itet. 16 Inu òkukup me uyọt ìre, mè eji ekeluk ugwem egọọk me lek atikọ ya eyi eji ewuukbe lek ikaan̄. 17 Bọn Nte n̄a, ìgọọk otutuuk ene ìkiluk ugwem kubọk nkiluk me agan̄ geelek. Eji mîra ijeen̄ enyi òjelek ugwem ògbegbe ibe enyi ekeluk. Eya orọ, enyi isimun̄ ebi geelek ìkiluk ugwem ikeya, ìgbala chieen̄ ìkween̄ ubọk ema ekirọ inu. 18 Mije, nra iwuuk lek itaba enyi ubọk me utọn̄ owuwa mgbọ ibe ke owuwa ene me etete kinyi ekiluk ugwem kubọk ebi ochicha uti nkwurieen̄ kè Karais. Mgbọ keyi, ǹkisa mun̄ ito me chieen̄ ikpọk itaba enyi ubọk me utọn̄ òfolek ikọ yaage si. 19 Òta kiban̄ ìbore mkpa me ama yọk. Owot kiban̄ ke ema ekisi ikwaan̄ inyi kubọk ìre Awaji. Inu echi mokitap ema esip me isi ke ema eyaka ikisa igugo lek. Inu linyọn̄ keyi gaalek ke ema ekisa itoon̄ ejit. 20 Eyi kiji, eji ìre bọn owot emen inyọn̄. Eji ekikpọ chieen̄ mgbọ Ogwu Unyan̄a, òrere Okaan̄-ene Jisọs Karais, mônan̄abe me emen inyọn̄ inu. 21 Ọmọ isinu, môninwene mwuwọ akpalek kiji yi òbokwukwu, inyi ikaan̄ umin mè uja kubọk akpalek kan̄. Unye ìbosa inwene akpalek kiji ìre ikpele unye kan̄ ya eyi îsabe ikpulu otutuuk inu geelek itap me irak ubọk mkpulu kan̄.
41 Atata bọn Nte n̄a ebi mmun̄be me chieen̄, îkilọk emi enenen imumun̄ enyi mgbọ geelek. Enyi ere unwọọn̄ n̄a, mè ire si okpibot ubọọn̄ eyi nkaan̄be kubọk mkpukpe ikwaan̄ n̄a. Atata ebi une n̄a, mije inu ya Karais oborọ inyi eji, îgbe ibe enyi ebi eyi Awaji ekeke enye. 2 Mgbọ keyi, ǹkiriaak ebi ngwan̄ kiji ebibaan̄ iba, Yuwodia mè Sintiki, ibe soso, mè ema erọ esuuk me etete kiban̄, mè egbaan̄ echieek, mije ema ìre ge me emen Karais. 3 Owu si, atata ogwu une n̄a, ogwu melek n̄a ekigbaan̄ isi ikwaan̄, soso, tap ubọk rọ inyi esuuk ikup me etete ebibaan̄ iba cha, mije, ema melek n̄a mîgbaan̄ imun̄ ufialek mgbọ ema egọọkbe emi ikisi ilook ebi ene ata etip. Kelementi mè ebi ofifi ife ìgọgọọk eji ijijen̄e mîmun̄ si ufialek. Awaji îge otutuuk erieen̄ kiban̄ me emen ikpa ugwem. 4 Enyi ebi ìrere ebi eyi Karais, ìkinwọọn̄ unwọọn̄ mgbọ geelek! Iin̄, m̀be enyi ìkinwọọn̄ unwọọn̄! 5 Ìkirọ inu esuuk esuuk melek otutuuk ene. Inunu Okaan̄-ene îkup mgbet. 6 Ikasisaak ejit kinyi òfolek inu geege. Kpan̄asi ikeya, ìkpa inu geelek òkup enyi me uyọt ìnyi Awaji me uriaak. Me emen uriaak kinyi, ìkibeek Awaji mbeek, mè ìkinyi si ọmọ itọn̄. 7 Ire enyi ikirọ ikeya, esuuk Awaji, eyi ebilene kpebekọt igobo itet, môbem ejit kinyi mè ekiket kinyi, inyi unan geege ikare enyi ebi eyi Karais Jisọs lek. 8 Bọn Nte n̄a, òta ikọ n̄a ìre ikeyi: Ìkikeek ekiket òfolek inu geelek òrere atikọ, mè inu geelek òtatat, mè inu geelek òtatana me isi Awaji, mè inu geelek òjajaan̄, mè inu geelek ebi ene ekima. Inu geelek ònwọnwọn ichit, mè echi ebi ene mêkọtbe itọn̄, echichi ore inu ògbegbe ibe enyi ekekeek ekiket òfolek. 9 Inu geelek enyi ekween̄be me ubọk n̄a, mè echi enyi ebọkọbe emi me ubọk, mè echi enyi enọbe emi me otu, mè echi enyi emun̄be me ugwem n̄a, ìkirọ otutuuk cha, ke Awaji ogwu ibot esuuk môkup melek kinyi. 10 Nnwọọn̄ unwọọn̄, mè itọn̄ Okaan̄-ene enenen ibe ke enyi mîyaka ikpọk ibene ikikpọ emi chieen̄ me lek. Îfiin̄ mgbọ, karake enyi kpeyaka ikirọ. Me atikọ, nriọọn̄ ibe ke enyi mîkikaan̄ ulọk irọrọ, ire, irek ìkasibi ìnyi enyi ekọt ejeen̄ ulọk kinyi. 11 Ìkare kubọk ke îkaan̄ inu ònanan emi orọ mè ǹtumu ikọ ya, mije, m̀bọbọọk ugwem n̄a, inyi irek geelek nkupbe iso emi. 12 Nriọọn̄ ubọk ekisa iluk ugwem me mgbọ una, mè iriọọn̄ si ubọk ekisa iluk ugwem me mgbọ owuwa. Nra ije itibi irek chi geelek, mè iriọọn̄ nlelet inu òkup me emen. Eya orọ, me mgbọ geelek, mè irek geelek, me uraafiọọn̄, mè mgbọ owot ojotbe emi, mè ìre m̀bọbọọn̄ ubọọn̄, mè ìre m̀gbọgbọọn̄ ugbọọn̄, nriọọn̄ ubọk mbasa ikup me ubelejit, mè itele inyi inu geelek nkaan̄be iso emi. 13 Mâkọt irọ inu chi geelek sa me unye kè Karais ogwu òkitap emi efuuk me emen. 14 Ubọk geelek si, enyi mîrọ ijaan̄ enenen me itatap ubọk inyi emi me emen otutuuk ufialek n̄a. 15 Ògak ge, enyi ebi Filipai mîriọọn̄ ijaan̄ lek ibe, me mgbọ ntelebe Mesidonia, mè inibene ilolook ata etip keyi me etete kinyi me adasi mgbọ, ke kpunu ofifi ntitiin̄ Awaji geege ògọgọọk emi igbaan̄ isi ikwaan̄ kubọk enyi erọbe. Ike enyi ekibọkọ ikwaan̄ n̄a itap, enyi mîra ikiche si uche inyi emi. Îre enyi gaalek ekirọ inu ya. 16 Mije, mgbọ nkupbe me Teselonaika, enyi mîria ntap-ubọk owuwa mgbọ ijet emi mgbọ inu okinan emi. 17 Ìkare inu cha enyi ekiria ijet emi okup emi me uyọt. Inu òkup emi me uyọt ìre oruru eyi Awaji obonyi enyi mije ntap-ubọk chi enyi ekitap inyi emi. 18 Inu enyi eriabe ijet emi inan̄a me ubọk kè Epaforoditọs îtap emi ubọọn̄. Kpunu inu geege òyayaka inan emi. Enyi mînyi emi otutuuk inu mweekbe, mè inyi iraka. Uche cha ìkup kubọk ngwugwa òkidun̄u utop olu, eyi egwabe inyi Awaji, Awaji obọbọkọ, mè ibele ejit me lek. 19 Eya orọ, Awaji n̄a ogwu òbọbọọn̄ ubọọn̄ ichit me umin kan̄ mè uja kan̄, môsa me lek kè Karais Jisọs inyi enyi otutuuk inu geelek òkup enyi me uyọt. 20 Itọn̄ ikup inyi Awaji kiji òrere Nte kiji, isi ire mgbọ geelek ikakaan̄ge itata. Ikup ikeya. 21 Ìtọp otutuuk ebi eyi Awaji ebi ìrere si ebi eyi Karais amọn ìnyi emi. Otutuuk bọn Nte ebi melek n̄a ekupbe me ere keyi mîtọp enyi amọn si. 22 Otutuuk ebi eyi Awaji ìkup me ere keyi, ògak ge ebi ìkup me uwu ogwu Sisa, mîtọp enyi amọn si. 23 Atata nnwọn eyi Okaan̄-ene Jisọs Karais ìkup me emen kinyi otutuuk ene.