Mak

Mak

¹ Eyi ìre ata etip òfolek kè Jisọs Karais, òrere Gwun̄ Awaji. ² Ata etip yi ìbene kubọk Asaya ogwu nriran ogebe ibe ke Awaji ìbe, “Emi mâria gwun̄ ikwaan̄ n̄a ibe idasi ije me isi kwun̄, mè isi inen̄e oniin̄ isun̄ iban owu.” ³ Gwun̄ ikwaan̄ yi ke ege inu òfolek ibe, “Ida ge òkitaan̄ ukpo me emen èwê ikilook ebi ene ibe, ‘Ìnen̄e oniin̄ ìsun̄ ìban Okaan̄-ene, mè ìrọ oniin̄ òtatat ìnyi ọmọ.’ ” ⁴ Ikeyi ke Jọn onikijijen̄e ikana me emen èwê, ikigwook ene mun̄, mè ikitumu inyi ebi ene ibe, “Ìgwu ìkom me ijo kinyi, inyi egwook enyi mun̄, mè Awaji itele ijo kinyi inyi enyi.” ⁵ Ogbogbo ebi ene enanan̄a me agan̄ Judia mè ama Jeruselem isibi isi igban̄ ikọ kè Jọn, mè ikitumu ijo kiban̄ isibi. Jọn okekigwook ema mun̄ me okwaan̄ Jọdan. ⁶ Jọn ìkitap ọfọnti esabe inwọọn̄ aligọ irom, mè ikitobo fanti ikpa anam me ebon. Inorie îkirie ìre akaka melek njijoon̄ aran̄ akwọọk. ⁷ Inenikitumu inyi ebi ene ibe, “Îkaan̄ ogwu mônube me udun̄ n̄a. Ene ya îmin igak emi enenen. Emi ǹkasoon̄ ogwu òbosiki isọọk itọn̄ọ olik ikpukot ene ya. ⁸ Emi ǹkisa mun̄ ikike igwook enyi mun̄, ire, ene ya ìbosa Ekwukwu Mbuban igwook enyi mun̄.” ⁹ Sọnja mgbọ iraraka, Jisọs onanan̄a me Najeret me agan̄ Galili inu. Jọn onenigwook ọmọ mun̄ me okwaan̄ Jọdan. ¹⁰ Mgbọ yaage Jisọs onan̄abe me emen mun̄ iwook inene ijọn̄, imumun̄ isinyọn̄ okigwuku ibook, mè imun̄ Ekwukwu Mbuban okinu kubọk ekerekwukwu, mè inisọọk ọmọ me lek. ¹¹ Ida ge onanan̄a me inyọn̄ ikitumu ibe, “Owu ore Gwun̄ n̄a ogwu mmabe. Ejit n̄a îbele me lek kwun̄ enenen.” ¹² Mgbọ yaage, Ekwukwu Mbuban osasa Jisọs ifo emen èwê, ¹³ ere îkupbe akọp usen ini, Yọk okekitọ ọmọ ikpọ. Anam oron si me ere ya okupbe. Ebi osat Awaji enunu inisi ikwaan̄ inyi ọmọ. ¹⁴ Mgbọ etetbe Jọn itap me mkpọn, Jisọs osisi Galili, mè ikilook ata etip eyi Awaji, ¹⁵ mè ikibe, “Mgbọ îso! Mkpulu eyi Awaji îkup mgbet! Ìgwu ìkom me ijo kinyi, mè ìchieek me lek ata etip yi.” ¹⁶ Usen ge, mgbọ Jisọs okije me agba okwaan̄ oyô Galili, inenimun̄ ebi mbọm irin̄, ene iba, Saimọn mè ogwu ngwan̄ Anduru, ekitọp njin, ¹⁷ mè igwen ema ibe, “Ìna, ìnigọọk emi, ke mârọ inyi enyi ekana ebi ìkibọm mbọm itet-ene.” ¹⁸ Mgbọ yaage, ema etetele njin kiban̄ mè igọọk ọmọ ije. ¹⁹ Mgbọ înan̄abe me ere ya ije ifo isi sọnja, ikpọkpọk imun̄ si ofifi ngwan̄ iba, Jemis melek Jọn, bọn kè Jebidi, melek nte kiban̄ ekupbe me emen uji ikinama njin kiban̄. ²⁰ Mgbọ yaage îmun̄be ema, igwegwen ema si. Ema etetele nte kiban̄ Jebidi melek ebi uji me emen uji, mè isibi igọọk Jisọs. ²¹ Ema enenije isi ire ama ekigwen Kapanọm. Mgbọ Usen Mbuban orebe, Jisọs ojeje isi uwu ntitiin̄, mè ibene ikijeen̄ ebi ene ikọ Awaji. ²² Inu îjeen̄be okeke ebi ene chieen̄ enenen, mije, ìkajeen̄ inu ya kubọk ebi ìjeen̄ Ikan ekijeen̄. Ire, ọmọ înye otu ikijeen̄ ikọ Awaji ya kubọk ogwukaan̄ ikọ ya me lek kan̄. ²³ Me mgbọ ya, ogwu enerieen̄ ge ijo erumun̄ okupbe me emen òwa me emen uwu ntitiin̄ ya. Ogwu enerieen̄ yi otataan̄ ukpo itumu inyi Jisọs ibe, ²⁴ “Ìre keke ke òkiweek eji me lek, owu Jisọs ogwu Najeret? Ìre ònu inenijijaka eji? Nriọọn̄ owu ijaan̄ lek. Owu ìre Ogwu Òkup Mbuban, ogwu Awaji oriabe inu.” ²⁵ Jisọs ogagana inyi ijo erumun̄ ya ibe, “Chit otu! Nan̄a sibi me emen gwun̄ enerieen̄ yi!” ²⁶ Ijo erumun̄ ya obeben gwun̄ enerieen̄ ya itọbọ me ijọn̄. Ogwu enerieen̄ ya okekijen. Itataan̄ ukpo, mè inan̄a me emen kan̄ isibi. ²⁷ Inu yi okwukwu ebi ene lek enenen. Ema ekekitumu ibe, “Îyak, ìre keke ire eyi? Aya ijejeen̄ keyi, mè unye keyi ye? Ene yi ìkitọ ikọ inyi ijo erumun̄, mè ijo erumun̄ ogban̄ mè osiki ibot onyi.” ²⁸ Ikeyi ke etip kè Jisọs otaan̄ ikana otutuuk ama òkup me Galili. ²⁹ Jisọs onenisa Jemis mè Jọn mè otutuuk ebi udun̄ kan̄ inan̄a me uwu ntitiin̄ ya isibi, mè iraka isi ge isi uwu ebi Saimọn melek Anduru. ³⁰ Mgbọ ema erebe uwu ya, nga nwa kè Saimọn ìlalaak me inyọn̄ mkpilaak, mije, lek kan̄ ìkanye, ukan̄ obak ọmọ me lek. Mgbọ yaage Jisọs onin̄be uwu ya, ebi ene etutumu inyi ibe ke lek ogwu enenwaan̄ ya ìkanye. ³¹ Jisọs ojeje inin̄, mè itet ọmọ ubọk, mè itap ubọk ibene ọmọ igwuun̄. Ukan̄ ya otetele ọmọ, lek kan̄ onyenye. Inenitem inorie inyi ema. ³² Me otu ikakwun̄, mgbọ ura onimbe, ebi ene esasa ebi orukan̄ mè ebi ijo erumun̄ okupbe me emen ijet Jisọs. ³³ Ogbogbo ebi ama Kapanọm ya esisibi inijot isi oyet uwu ya. ³⁴ Jisọs ogwagwa otutuuk esese chieen̄ orukan̄ kiban̄ isan̄a, mè irieen̄ owuwa ijo erumun̄ isibi me emen kiban̄. Ìkachieek ijo erumun̄ cha esan̄a amọn, mije, ema mîriọọn̄ ogwu ọmọ orebe. ³⁵ Me òfit-iwele kan̄, me agan̄ egwe, Jisọs onanan̄a ikeke me ilaak, mè ije isibi me emen ama Kapanọm ifo ere ònọnọọn̄, isi ikweek ikiriaak uriaak. ³⁶ Saimọn mè ebi melek kan̄ enanan̄a isibi isi ikiweek ọmọ. ³⁷ Mgbọ emun̄be ọmọ, enenitumu inyi ọmọ ibe, “Otutuuk ene mêkiweek owu.” ³⁸ Ire, Jisọs ofọfọọk ema ibe, “Eji eneje esi ofifi ama òkukup ikana ere yi, inyi ǹsi ǹtumu ikọ Awaji si me ama cha. Îre mije keyi ke nnu linyọn̄.” ³⁹ Sa me ikeyi ke îje ikana otutuuk ama me Galili ikitumu ikọ Awaji me emen uwu ntitiin̄ kiban̄, mè ikirieen̄ ijo erumun̄ isibi me emen ebi ene. ⁴⁰ Ene ge òkifiak orukan̄ inyakpa onunu, mè initọbọ ekpe me isi kè Jisọs, mè ibeek ọmọ ibe, “Ire ineme owu, owu môkọt igwa emi, inyi emi ǹtana.” ⁴¹ Njijin kan̄ otetet Jisọs, inyanyana ubọk itet ọmọ me lek, mè ibe, “Îneme emi. Lek kwun̄ inye!” ⁴² Mgbọ yaage orukan̄ kan̄ otata, lek kan̄ onyenye, ọmọ otatana. ⁴³ Jisọs oraria ọmọ ibe ifo, mè iriọọn̄ ubọk itaba ọmọ ubọk me utọn̄ ibe, ⁴⁴ “Kakpa inu yi geege ìnyi ene geege. Je si sa lek kwun̄ jeen̄ ogwu ngwugwa ikpọ, mè gwa ngwugwa eyi Mosis onyibe me Ikan ibe ene geelek egwabe inyakpa isan̄a me lek igwa, inyi ebi ene esa eriọọn̄ ibe ke mîgwa owu; ke owu otana.” ⁴⁵ Ire, ogwu enerieen̄ ya osasa ukpatu igwagwa kan̄ ya ikisi ikpa ikana otutuuk ere. Mije keyi, Jisọs ìkayaka ìkọt ìkije me isi ene ìnin̄ ama, ìyaka ikije ikana me ere ene ekalukge. Ebi ene mîra ikinan̄a me ere geelek ikisibi si igọọk ọmọ.

¹ Mgbọ usen inen mè inen orakabe, Jisọs ogwugwu ikom ifo Kapanọm. Etip onenitaan̄ ikana ibe ke ọmọ me uwu ge me ama ya. ² Ebi ene efafan̄a inu, mè inin̄ ijot emen uwu ya, mè igwook me oyet, isi oyet uwu ya si ìkata ene. Jisọs okekitumu ikọ Awaji inyi ema. ³ Mgbọ îkitumu ikọ ya, ebirieen̄ ini ebeben ogwu enerieen̄ ge òkifiak orukan̄ ngọm ibesa ijet ọmọ igwa. ⁴ Ire, ubọk ebi ene enin̄be inwaan̄ uwu ya, ema kpekọt isa ene ya ije ire lek kè Jisọs. Eya orọ, ema esisi inene inyọn̄ otoon̄-uwu, mè ichili nruruk me otoon̄-uwu ya itat me ere Jisọs okweekbe, mè iben ogwu ngọm ya me inyọn̄ ufo itap itibi me chieen̄ nruruk ya, mè isiki ọmọ iniyik me ijọn̄ me isi kè Jisọs. ⁵ Mgbọ Jisọs omun̄be ichechieek ife chi ekaan̄be, itutumu inyi ogwu ngọm ya ibe, “Gwun̄ enerieen̄, mîtele ijo kwun̄ inyi owu.” ⁶ Usini ebi ìjeen̄ Ikan ìkup me ere ya ekekinunuun̄ me emen ejit kiban̄ ibe, ⁷ “Ìre ene yi ìjeje ikitumu ikọ ikeyi? Ene yi ìkitumu mbuban ikọ ikeme Awaji. Ìre ekene obokọt itele ijo inyi ene, ilọ Awaji gaalek?” ⁸ Mgbọ yaage, Jisọs orọriọọn̄ me emen ekwukwu kan̄ ibe ke ema mêkikeek inu yi me emen ejit kiban̄, mè inido ema ibe, “Ìre keke orọ enyi ekikeek òjelek inu òkup ikeyi? ⁹ Ìre eyi owa ofet itutumu inyi ene yi òkifiak orukan̄ ngọm? Ìre ibebe: Mîtele ijo kwun̄ inyi owu? Sa ìre ibebe: Ben ufo kwun̄, mè je fo? ¹⁰ Ire, mâjeen̄ enyi ibe ke emi Gwun̄ Ebilene nkaan̄ unye me linyọn̄ keyi itetele ijo inyi ene.” Inenitumu inyi ogwu orukan̄ ngọm ya ibe, ¹¹ “M̀be owu, nan̄a keke, ben ufo kwun̄ je fo!” ¹² Me chieen̄ otutuuk kiban̄, ogwu orukan̄ ngọm ya onanan̄a ikeke, mè iben ufo kan̄ ije isibi ifo. Ukpook otetet ema otutuuk ene. Ema ebebene ikitọn̄ Awaji, mè ikibe ke ema kperarak imun̄ òjelek inu òkup ikeyi. ¹³ Jisọs oneninan̄a me Kapanọm isibi, mè ikpọk isi agba okwaan̄ oyô Galili. Ogbogbo ene esisibi igọọk ọmọ, ibebene ikijeen̄ ema inu. ¹⁴ Me mgbọ îkije ifo isi, inenimun̄ Libai gwun̄ kè Alifiọs ogwu òkitip otitip ido okupbe me uwu ikwaan̄ kan̄, mè igwen ọmọ ibe, “Na nagọọk emi!” Libai onanan̄a ikeke, mè igọọk Jisọs. ¹⁵ Sọnja mgbọ iraraka, Jisọs onenisi uwu kè Libai, mè ikirie ichen. Owuwa ebi ìkitip otitip ido, mè ebi kpekisun̄ Ikan kè Mosis mîgọọk Jisọs mè ebi udun̄ kan̄ inire uwu ya, mè igọọk isiki ikweek me lek ikasi ikirie inorie. Owuwa ene mîgọọk inire uwu ya. ¹⁶ Usini ebi Farisi ebi ìjeen̄ Ikan, enenimun̄ Jisọs melek ebi kpekisun̄ Ikan kè Mosis, mè ebi ìkibọkọ otitip ido egbaan̄be ikweek me ere ge ikirie inorie, mè ikido ebi udun̄ kan̄ ibe, “Ìre keke orọ mè ene yi ikigọọk ebi ìkitip otitip ido, mè ebi ijo ife chi ikirie inorie?” ¹⁷ Jisọs onọnọ ikọ ya ema ekido, mè ifọọk ema ibe, “Ebi lek onyebe kpekiweek ogwu ofia, îre ebi lek ikanyege ekiweek ogwu ofia. Emi ǹkanu me linyọn̄ inenigwen ebi ata irọrọ, îre ebi ijo irọrọ ke nnu inenigwen ibe egwu ekom.” ¹⁸ Me mgbọ ge ebi udun̄ kè Jọn mè ebi Farisi ekijin otu, îkaan̄ ebi ìnunu me lek kè Jisọs, mè inido ọmọ ibe, “Ìre keke orọ ebi udun̄ kè Jọn ògwook mun̄ mè ebi udun̄ ebi Farisi ekijin otu, ire, ebi udun̄ kwun̄ kpekijin otu?” ¹⁹ Jisọs ofọfọọk ema ibe, “Ìre ebi ìsi ijọk ido-nwa mêjin otu me mgbọ ogwu òdo nwa okupbe melek kiban̄? Eyi ogwu òdo nwa okupbe melek kiban̄, eya ìkpokọt irọ. ²⁰ Ire, usen òkinu, mgbọ mêsan̄abe ogwu òdo nwa isan̄a me etete kiban̄. Îre mgbọ keya ke ema ebejin otu. ²¹ Kpunu ogwu òkisa ọkpọkọ aya ekwut ichim ichit ere ògwagwak me lek oka ekwut, mije, ọkpọkọ aya ekwut ya môlibi iriaak mgbọ mêgwọkbe ekwut ya, mè itaba chieen̄ ere ya igwak ibook igak ubọk îkupbe me adasi mgbọ. ²² Ikeya si, kpekitap aya miin̄ me emen oka ogbokot ikpa anam, mije, unye aya miin̄ ya môrama ogbokot ya ibum. Inenire, miin̄ me ichep, ogbokot me ichep. Eya orọ, ekitap aya miin̄ me emen ayaya ogbokot ikpa anam.” ²³ Me Usen Mbuban ge, Jisọs mè ebi udun̄ kan̄ ekekije iraka me emen uko akpa. Mgbọ ema ekije, ebi udun̄ kan̄ ekekifan̄a akpa me uko ya itaka. ²⁴ Ebi Farisi ìkukup imun̄ ema ekifaan̄ akpa cha enenido Jisọs ibe, “Ìre keke orọ ebi udun̄ kwun̄ ekirọ inu ikatatge irọrọ me Usen Mbuban?” ²⁵ Jisọs ododo ema ibe, “Ìre enyi kpefuk inu Debit orọbe mgbọ uraafiọọn̄ otakabe ọmọ mè ebi melek kan̄? ²⁶ Debit ìjeje inin̄ emen Uwu Awaji, mè isi imọnọ fituru esabe igwa ngwugwa inyi Awaji itaka. Inu yi ìrọ me mgbọ Abiata orebe ogwu ibot ebi ibot ngwugwa. Me ubọk ikan kiban̄ okupbe, fituru ya ìkup inyi ebi ngwugwa gaalek. Ire, Debit îtaka, mè iche si inyi ebi melek kan̄ etaka.” ²⁷ Me ikakana ikọ kan̄ igwook, Jisọs otutumu inyi ema ibe, “Awaji ìbak me lek ebilene isan̄a Usen Mbuban isibi, ìkabak me lek Usen Mbuban ìrom ebilene. ²⁸ Eya orọ, emi Gwun̄ Ebilene ìre si Ogwukaan̄ Usen Mbuban.”

¹ Jisọs onenikpọk isi uwu ntitiin̄. Me emen uwu ya enerieen̄ ge òwa ogwu ubọk ge ogọmbe. ² Usini ene me emen uwu ya ekekikpọ mè ìre Jisọs môgwa ene ya me Usen Mbuban, inyi ema etet ọmọ me ikan. ³ Jisọs onenibe gwun̄ enerieen̄ ya, “Sibi na me isi.” ⁴ Mgbọ gwun̄ enerieen̄ ya osibibe inikeke, Jisọs onenido ebi ìkup me uwu ya ibe, “Ìre keke ke Ikan kè Mosis onyi irek ibe erọ me Usen Mbuban? Ìre ìbe erọ ata inu esa etap ubọk enyi ene, sa ìre ibe erọ ene nnaan̄? Ìre ibe enyan̄a ugwem ene, sa ìre ibe efiat ugwem ene?” Kpunu ene geege òbọbọkọ ọmọ otu. ⁵ Jisọs onanaan̄ ejit, mè ikpọ ema sìì. Njijin kiban̄ otetet ọmọ, mije unye-ibot mè nlilọ ifuk-ibot kiban̄. Inenikana isi ikpọ ene ya, mè itumu inyi ibe, “Nyana ubọk kwun̄!” Ogwu enerieen̄ ya onyanyana ubọk, orukan̄ ya otata, ubọk kan̄ okukup kubọk îkupbe me adasi mgbọ. ⁶ Mgbọ yaage ebi Farisi enanan̄a me uwu ntitiin̄ ya isibi, mè isi igọọk ebi ìkigọọk Erọdu ije inin̄ oru ubọk ema mêsabe ikpan̄ Jisọs. ⁷ Jisọs melek ebi udun̄ kan̄ eneninan̄a me ere ya ije ifo agba okwaan̄ oyô Galili. Ogbogbo ene egbọgbọọk igọọk ọmọ. Ife chi enan̄a me agan̄ Galili, mè agan̄ Judia, ⁸ mè ama Jeruselem, mè ido Idumia, mè ido òkup me usaba agan̄ okwaan̄ Jọdan, mè agan̄ ama Taya mè Saidọn. Otutuuk ife chi enu me lek kè Jisọs, mije, ema enọbe inu Jisọs okirọ. ⁹ Ebi ene mîkọt iwa enenen ire lek Jisọs otumube inyi ebi udun̄ kan̄ ibe etet uji ge etap me ijọn̄ enyi ọmọ inin̄ emen, inyi ebi ene ekanwan ọmọ. ¹⁰ Me lek Jisọs ogwabe owuwa ene, ebi orukan̄ geelek ìkup me ere ya ekekichichiki lek, mè ikibieen̄ ene, ikiweek oniin̄ ema mêsabe ikọt initet ubọk me lek kan̄. ¹¹ Ene geelek ijo erumun̄ okupbe me emen isimun̄ Jisọs, îra irọn̄ me ijọn̄ me isi kan̄, ijo erumun̄ òkup me emen kan̄ îra itaan̄ ukpo ibe Jisọs, “Owu ore Gwun̄ Awaji.” ¹² Ire, Jisọs îra igana inyi ijo erumun̄ cha ibe ekatumu ogwu ọmọ orebe. ¹³ Jisọs onenije inene inyọn̄ orioon̄ ge, mè igwen ebi ejit kan̄ onemebe me etete ogbogbo ene cha. Ema enenene igọọk ọmọ. ¹⁴ Inenigobo akọp mè ene iba ebi îweekbe me etete ebi îgwenbe cha, mè igwen ema ebi otuchieen̄ kan̄. Ìgobo ema ibe enegọọk ọmọ ekup mgbọ geelek, inyi ọmọ iria ema isibi, mè ekesi etumu ikọ Awaji ekana ere, ¹⁵ mè ekaan̄ unye isasa ikirieen̄ ijo erumun̄ isibi me emen ene. ¹⁶ Akọp me ene iba cha ebi îgobobe ìre: Saimọn ogwu înyibe erieen̄, Pita, ¹⁷ mè Jemis, mè ogwu ngwan̄ Jọn, bọn kè Jebidi (ngwan̄ iba chi ke Jisọs ogwen “Bọn nsook-isinyọn̄”), ¹⁸ mè Anduru, mè Filip, mè Batolomi, mè Matiyu, mè Tọmọs, mè Jemis gwun̄ kè Alifiọs, mè Tadiọs, mè Saimọn ogwu ulọk ama ominbe me ejit, ¹⁹ mè Judas Isikariọt ogwu ònenileke Jisọs inyi ekpan̄. ²⁰ Me mgbọ Jisọs oyakabe ika inu me uwu îkikup me Kapanọm, ebi ene egbugbuku inichit ere ya. Mije keyi, ọmọ mè ebi udun̄ kan̄ kpekọkọt ikaan̄ irek irie inorie. ²¹ Mgbọ ebi uwu kiban̄ enọbe inu òfolek kan̄, ema enanan̄a inu ibenisak ọmọ ifo, mije ebi ene ekitumu ibe ke ibot kan̄ îwuwọlọ. ²² Usini ebi ìjeen̄ Ikan ìnan̄a me Jeruselem inu ekekitumu ibe, “Îre Bejibun ogwu ibot ijo erumun̄ okup ene yi me ibot. Unye kè Bejibun ke îkisa irieen̄ ijo erumun̄ isibi me emen ene.” ²³ Jisọs inọnọ ikọ ya, igwegwen ife cha iriaak me lek kan̄, mè ikitumu ikọ inyi ema me urọk ibe, “Ìre Setan môjeje irieen̄ Setan isibi me emen ene? ²⁴ Ido geelek ebi ìkup me emen ekitim akọn̄ me lek kiban̄, ido ya ìbochechep. ²⁵ Uwu geelek ebi ìluk me emen ekikpan̄ lek kiban̄, uwu ya ìkabokeke. ²⁶ Ikeya si, ire ebi ìkigọọk Setan ikitim akọn̄ ikeme lek kiban̄, mkpulu kè Setan ìkpokeke, ìborọrọn̄ ichep. ²⁷ Me atikọ, kpunu ogwu òbokọt inin̄ uwu ogwu ònyenye lek isi ifum inu, îtata ìdadasi itet ogwu unye ya ibọp sabum ònokọt òfum inu me uwu kan̄. ²⁸ Mgbọ yi, ǹkitumu atikọ inyi enyi, mêkọt itele ijo inu geelek mè ijo otu usem geelek inyi ebilene. ²⁹ Ire, ene geelek òtutumu ijo usem ikeme Ekwukwu Mbuban, kpebetele inyi, mije, îrọ ijo inu eyi òbobia me ibot kan̄ ire mgbọ ikakaan̄ge itata.” ³⁰ Jisọs ìtumu ikọ yi, mije, ema cha ekitumu ibe ke ijo erumun̄ okup ọmọ me ibot. ³¹ Mgbọ ya, ebi ngwan̄ kè Jisọs melek ogwu uga enunu inire uwu ere Jisọs okupbe, mè ikeke me oyet iria ikwaan̄ ibe egwen Jisọs enyi ema. ³² Owuwa ene me emen uwu ya ekweekbe ikana Jisọs mgbọ etip ya onube inyi ọmọ. Ema elolook ọmọ ibe, “Kpọ, nga kwun̄ mè ebi ngwan̄ kwun̄ me oyet ekekebe ikiweek imumun̄ owu.” ³³ Jisọs ododo ema ibe, “Ìre ebi owa ere nga n̄a mè ebi ngwan̄ n̄a?” ³⁴ Idodo ikọ ya isan̄a, iraraan̄ chieen̄ ikana ikikpọ ebi ìkwekweek ikana ọmọ me ijọn̄, mè ibe, “Ìkpọ, ebibi ere nga n̄a mè ebi ngwan̄ n̄a. ³⁵ Ene geelek òkirọ inu eyi Awaji okiweek, ogwa ore nga n̄a mè ngwan̄ n̄a enerieen̄ mè ngwan̄ n̄a enenwaan̄.”

¹ Ofifi mgbọ Jisọs osibe agba okwaan̄ oyô Galili, mè ibene ikijeen̄ ikọ Awaji, ebi ene esisibi inu iwa enenen. Mije keya, Jisọs oninin̄ emen uji ikweek ikijeen̄ inu. Enenibieen̄ uji ya ito me lek mun̄, mè ida ibọkọ sọnja. Otutuuk ene cha ekekeke me otu inyọn̄ me ere ya. ² Jisọs onenikisa me urọk ikijeen̄ ema owuwa inu, mè inikpa ibe, ³ “Ene ge oninan̄a isi iwop mfut me uko. ⁴ Mgbọ îkigwọ mfut cha ifiaak ikana, usini orọrọn̄ me eden̄ oniin̄. Ebi kè ofut enunu, mè initọk imeen̄ isan̄a. ⁵ Usini orọrọn̄ me ijọn̄ ewuuk ere achiaan̄ ikadọkge. Sọnja mgbọ, ititibi isibi, mije, achiaan̄ òkup me ere ya ìkadọk. ⁶ Ire, mgbọ ura obumbe, unye ura ya onenitet ema ichiaak, ikwakwaan̄ isan̄a, mije ugwun̄-ijọn̄ kiban̄ ikatibige ìnin̄ ijọn̄ ìdọk. ⁷ Usini orọrọn̄ me etete ukpak. Ukpak cha otitibi ichit nsek uti cha, mè irọ inyi ikato mfut. ⁸ Ire, usini mfut orọrọn̄ me ata ijọn̄, mè itibi imiin̄, mè ito mfut. Usini oto mfut iwa akọp mgbọ ita, usini akọp mgbọ gweregwen, usini efit mgbọ, igak otu ifuk esabe iwop.” ⁹ Me ichichit ikọ kan̄, Jisọs onenibe ema, “Ogwu ikaan̄ utọn̄ ìbosa inọ ikọ, inọ!” ¹⁰ Mgbọ owuwa ene eyatbe isan̄a, ibot ene inen mè inen ìsisik, igbaalek akọp mè ene iba ebi udun̄ kan̄, enenikido ọmọ ibot urọk cha îtobe. ¹¹ Jisọs onenifọọk ema ibe, “Awaji îkpọk mbum nlelet inu òfolek mkpulu kan̄ inyi enyi. Ire, ebi ofifi ife ke ekijeen̄ inu geelek me urọk, inyi, ¹² ‘Ema mêmun̄, ire, kpebekọt imun̄ itet. Ema mênọ, ire, kpebekọt igobo itet. Mije, ire ema imun̄, mè inọ, ema mêgwu ikom igọọk Awaji, mè Awaji òtele ijo kiban̄ onyi ema.’ ” ¹³ Jisọs onenido ema ibe, “Ire enyi kpekọt igobo sọntiik urọk keyi itet, ìre môyaka ikaan̄ urọk eyi enyi mêkọtbe igobo itet? ¹⁴ Mfut eyi ogwu òwop mfut owopbe ìre ikọ Awaji. ¹⁵ Usini ene ekup kubọk mfut echi òrọrọn̄ me eden̄ oniin̄. Mgbọ yaage ema enọbe ikọ Awaji, Yọk îra inu inisan̄a ikọ ya ewopbe me ejit kiban̄ isan̄a. ¹⁶ Usini ene si ekup kubọk mfut echi òrọrọn̄ me ijọn̄ ewuuk. Mgbọ yaage ema enọbe ikọ Awaji, ema mîra ibọkọ itap me ubelejit. ¹⁷ Ire, ikọ ya ìkafuk, mije, ìkatibi ugwun̄-ijọn̄ me emen kiban̄. Eya orọ ufialek mè tukutuku isinu inyi ema mije ikọ ya, mgbọ yaage ema mîra inan̄a irọn̄. ¹⁸ Usini ene ekup kubọk mfut echi òrọrọn̄ me etete ukpak. Ebibi ere ebi ìnọnọ ikọ ya, ¹⁹ ire ekiket inu linyọn̄, mè ulọk inu ubọọn̄ linyọn̄, melek owuwa ulọk òkup esese esese îra inichit ikọ ya, mè orọ inyi ikọ ya ikato mfut. ²⁰ Ire, usini ene ekup kubọk mfut echi ewopbe me ata ijọn̄. Ebiba ere ebi ìnọnọ ikọ ya, mè ibọkọ itap. Ema ekup kubọk uti cha echi òtoto mfut iwa, echi usini otobe akọp mgbọ ita, usini akọp mgbọ gweregwen, usini efit mgbọ, igak otu ifuk esabe iwop.” ²¹ Jisọs onenitumu inyi ema ibe, “Ìre ene mômin mkpukan̄, mè isa okwa ikana ichit? Sa ìre môben itap me irak mkpilaak? Ìre ìkare inyọn̄ ngugọọn̄ ke ìboben itoon̄? ²² Inu geelek eletbe môkpọk mbum. Inu geelek echitbe si, mêsan̄a isibi me chieen̄ otutuuk ene. ²³ Ogwu ikaan̄ utọn̄ ìbosa inọ ikọ, inọ! ²⁴ “Ìtet ibot me lek inu eyi enyi ekinọ, mije, ubọk enyi etọbe inyi ene, ubọk keya si ke Awaji obotọ inyi enyi, mè itọ iraka. ²⁵ Ogwu òkakaan̄ inu ke mênyi inu isọkọ me lek eyi îkaan̄be. Ire, ogwu ikakaan̄ge, mêtet sọntiik eyi îkaan̄be ibọkọ isan̄a me ubọk.” ²⁶ Jisọs îtumu si ibe, “Mkpulu eyi Awaji ìkup kubọk ene owop mfut me uko, ²⁷ mè ikinin̄ uwu ilaak me eririeen̄. Isire ikarek, îra inan̄a isi uyọrọlek kan̄. Otutuuk mgbọ cha mfut cha okekitibi, mè ikimiin̄. Ire, ọmọ ìkariọọn̄ ubọk îrọbe. ²⁸ Ijọn̄ me lek kan̄ okirọ inyi mfut uti cha itibi, mè ito mfut. Inwan̄ okidasi itibi isibi, sabum ajakajak, sabum mfut onikitibi isibi me emen ajakajak cha. ²⁹ Mgbọ mfut cha isiniren̄e, ene ya îra isi igbeme, mije, mgbọ irọrọkọ inu me uko îra ikem.” ³⁰ Jisọs onenitumu ibe, “Ìre keke ke mêsa mkpulu eyi Awaji itọ me lek? Sa ìre kpasi urọk obotat me lek mọnọ? ³¹ Mkpulu eyi Awaji ìkup kubọk ukwuuk mfut uti ekigwen mọsitadi. Ukwuuk mfut uti yi osip ichit me lek otutuuk ukwuuk mfut uti ekiwop me ijọn̄. ³² Ire, isiwop, îra itibi isibi, mè okana uti òmimin igak otutuuk inu geelek ekiwop me uko, mè òkaan̄ owuwa ikpele agọọk echi unọn òwulu me inyọn̄ okiniluk me irak.” ³³ Ikeyi ke Jisọs osa owuwa asabọn urọk ijeen̄ ema ikọ Awaji, ikpọ me ubọk ema ekọtbe igobo itet. ³⁴ Ìkakaan̄ ikọ geege îtumube inyi ema eyi ikarege me urọk. Ire, mgbọ geelek ọmọ mè ebi udun̄ kan̄ gaalek isikup, îra ikibum ibot urọk cha inyi ema. ³⁵ Me ikakwun̄ usen yaage, Jisọs obebe ebi udun̄ kan̄, “Eji enesaba okwaan̄ oyô yi etoon̄ me usaba agan̄.” ³⁶ Ema enanan̄a itele urum ene cha, mè isi inin̄ uji ya eyi Jisọs okweekbe me emen, mè isa Jisọs igbaalek ikọp inan̄a. Owuwa uji me ere ya si mîgọọk ema inan̄a. ³⁷ Ema me okwaan̄, uga egwijo ojijibi isoon̄ ema, ekoon̄ obebene, mè ikitap mun̄ me uji. ³⁸ Ire, ike mgbọ ya, Jisọs îsa inu ibene ibot, mè ikilaak me agan̄ edim uji ya. Ebi udun̄ kan̄ esisi itimi ọmọ, mè ibe ọmọ, “Nte uwu, ìre môtop owu me lek ire eji ikwaan̄ ita?” ³⁹ Jisọs obobolo chieen̄, mè inan̄a ikeke, mè igana inyi efet ya ibe, “Ikup ikeya! Kayaka iwut!” Efet ya owọwọ, isi mun̄ olọlọkọ. ⁴⁰ Jisọs onenido ebi udun̄ kan̄ ibe, “Ìre keke orọ mè ukpook itet enyi? Ìre enyi kpekaan̄ si ichechieek me lek n̄a?” ⁴¹ Inu yi Jisọs orọbe ogwogwook ema mbiribọ me lek enenen. Ema ekekidido lek kiban̄ ibe, “Ìre kpasi ene ire eyi, ogwu efet mè ekoon̄ si okirọ ida kan̄?”

¹ Jisọs mè ebi udun̄ kan̄ enenisaba okwaan̄ oyô Galili ya itoon̄ me agba ijọn̄ ebi Gerasa. ² Mgbọ yaage Jisọs osibibe me uji ikeke me ijọn̄, enerieen̄ ge ogwu ijo erumun̄ okupbe me emen onanan̄a me oron-ekwukwu isibi inu inichichini ọmọ. ³ Ene yi ìkiluk me oron-ekwukwu. Kpunu ene geege òkọkọt ibọp ọmọ ikam. Ìrere mkpọn, kpekikọt isa ibọp ọmọ. ⁴ Owuwa mgbọ, mîkisa mkpọn ibọp ọmọ ubọk mè ukot, îra ikifaan̄ mkpọn echi òkup ọmọ me ubọk, mè osọp echi òkup ọmọ me ukot ofiin̄. Înye lek enenen. Kpunu ene geege òkikọt ikeme ọmọ isiki. ⁵ Eririeen̄ mè ikarek, ìkije ikana me oron-ekwukwu mè inyọn̄ ogoon̄, mè òkotaan̄ ukpo, mè òkosa ọkpọkọ ewuuk òkoseke lek kan̄ obak. ⁶ Ene yi îkup me ujọn̄ọ ere imun̄ Jisọs, mè ilibi isibi inu initọbọ ekpe me isi kè Jisọs, ⁷ mè itaan̄ nga ukpo ile ibe, “Owu Jisọs, Gwun̄ Awaji Òbebene Ichit, òkiweek emi keke me lek? Soso, nriaak owu, me erieen̄ Awaji, kasulu emi osusut.” ⁸ Ene yi ìtumu ikọ yi, mije, Jisọs îbene ikigana inyi ijo erumun̄ ya ibe isibi me emen ene ya. ⁹ Jisọs onenido ọmọ ibe, “Keke ire erieen̄ kwun̄?” Ifọfọọk ibe, “Erieen̄ n̄a ìre ‘Urum,’ mije, eji mîwa.” ¹⁰ Irariaak Jisọs owuwa mgbọ ibe ikalap ema ìsibi me inyọn̄ ijọn̄ agan̄ ya. ¹¹ Ike mgbọ ya, îkaan̄ owuwa okodi òkukup igbet me ere ya ikirie urie me inyọn̄ ogoon̄ ya. ¹² Ijo erumun̄ cha enenibeek Jisọs ibe, “Soso, ria eji tap me emen okodi chilọ.” ¹³ Jisọs ochechieek, ijo erumun̄ cha enanan̄a me emen ene ya isibi, mè isi inin̄ emen okodi cha. Otutuuk urum okodi cha, òsoso obop okodi iba, olilibi inan̄a me inyọn̄ ogoon̄ ya ikwala isibi igwook me okwaan̄, mè inwọ mun̄, mè ikwaan̄ isan̄a. ¹⁴ Ebi ìkikpọ chieen̄ me lek okodi cha elilibi ifon emen ama kiban̄ melek asabọn ama òkukup ikana me ere ya, mè isi ikikpa inu yi òrọrọ ikana ere. Ebi ene egbugbuku isibi inu ibenikpọ. ¹⁵ Mgbọ ema enire lek kè Jisọs, ema eyaka inimun̄ ene ya ogwu mgbọ òkakaan̄ owuwa ijo erumun̄ me emen okweekbe irek, mè ọfọnti me lek, mè iriọọn̄ lek kan̄. Ukpook otetet otutuuk ife cha. ¹⁶ Ebi ìkukup imun̄ mgbọ inu chi orọbe enenikikpa inyi ebi ife cha inu òrọrọ ene ya melek okodi cha. ¹⁷ Mgbọ ife chi egban̄be ubọk inu cha osabe irọ isan̄a, ema ebebene ikiriaak Jisọs ibe isibi me inyọn̄ ijọn̄ kiban̄. ¹⁸ Mgbọ Jisọs obosaba inin̄ uji, ogwu îsan̄abe ijo erumun̄ me emen ya okekiriaak Jisọs ibe itele mè ọmọ igọọk ogwugwu ije. ¹⁹ Ire Jisọs ojijit, mè itumu inyi ọmọ ibe, “Gwu kom fo gọọk ebi uwu kinyi, mè si kpa ikpele inu Okaan̄-ene orọbe inyi owu, mè ike îkaan̄be owu nsan me lek nyi ema.” ²⁰ Ogwu enerieen̄ yi ogwugwu ikom, mè ikisi ikpa inu Jisọs orọbe inyi ọmọ ikana otutuuk agan̄ ya eyi ekigwen “Akọp Ama.” Inu îkpabe otetet ebi ìnọnọ ukpook enenen. ²¹ Jisọs onenigwu ikom isaba okwaan̄ oyô ya itoon̄ me agan̄ mgbọ ema enan̄abe ya. Owuwa ebi ene enunu, mè igban ikana ọmọ me agba okwaan̄ ya. ²² Ene ge ekigwen Jairọs, ogwu ibot me uwu ntitiin̄ ebi Ju, onunu, mè inirọn̄ lek me ijọn̄ me ukot kè Jisọs, ²³ mè ikiriaak ibe, “Sọntiik gwun̄ n̄a enenwaan̄ mônikwu. Soso, na si toon̄ ubọk me lek, inyi lek kan̄ inye, mè igat ugwem.” ²⁴ Jisọs onenigọọk ọmọ ije. Owuwa ene egbugbuku igọọk ije, mè ifan̄a ichit Jisọs. ²⁵ Me etete owuwa ene cha, ogwu enenwaan̄ ge òwa ogwu eje okisibi me lek otutuuk akọp mè acha iba, ìkafieek. ²⁶ Ogwu enenwaan̄ yi îbọkọ uyọt me ubọk owuwa ebi ofia, ire, kpekọt igwa ọmọ itet. Îfiat otutuuk inu îkaan̄be isa igwa lek, kpan̄asi îbotata, ìyaka ikitatap inu me lek. ²⁷ Ogwu enenwaan̄ yi oneninọ ukpatu ònin̄ me lek kè Jisọs, mè ininan̄a me agan̄ udun̄ ikije me etete owuwa ene cha inu agan̄ isi, mè inire lek kè Jisọs, mè itet ubọk me lek ọfọnti kan̄. ²⁸ Sabum mgbọ ya, ogwu enenwaan̄ yi îtumu ifieek me ejit kan̄ ibe ìrere ọfọnti kè Jisọs ke ọmọ okọt ichak ubọk me lek, ke lek kan̄ mônye. ²⁹ Mgbọ îjebe iriaak, mè itet ubọk me lek ọfọnti kè Jisọs, eje ya ofefieek mgbọ yaage. Ọmọ orọriọọn̄ me emen kan̄ ibe ke lek kan̄ înye; ke orukan̄ kan̄ îta. ³⁰ Mgbọ yaage, Jisọs orọriọọn̄ ibe ke unye înan̄a ọmọ me emen isibi, mè ikana chieen̄ me udun̄, mè ikido ibe, “Ìre ekene ochak ubọk me lek ọfọnti n̄a?” ³¹ Ebi udun̄ kan̄ efọfọọk ọmọ ibe, “Ìre eyi ebi ene ekanabe ichit owu ikeyi ke owu oyaka ikido ogwu òchachak owu ubọk me lek?” ³² Ire, Jisọs okpọkpọ ikiriraan̄ chieen̄ si ikana ikiweek imumun̄ ogwu òrọrọ inu yi. ³³ Ogwu enenwaan̄ ya îriọọn̄ inu òrọrọ ọmọ. Ibebene ikifieek owot, mè ikiran, mè inisan̄a lek kan̄ isibi, mè itọbọ ekpe me ijọn̄ me ukot kè Jisọs, mè inikpa otutuuk ubọk inu ya osabe irọ inyi Jisọs. ³⁴ Jisọs onenibe ọmọ, “Gwun̄ n̄a enenwaan̄, ichechieek kwun̄ îrọ mè lek kwun̄ inye. Fo me esuuk. Orukan̄ kwun̄ ita.” ³⁵ Jisọs òkitumu ikọ yi me otu, bọn ikwaan̄ enanan̄a me uwu kè Jairọs ogwu ibot uwu ntitiin̄ ebi Ju ya inilook Jairọs ibe, “Gwun̄ kwun̄ enenwaan̄ ya îkwu. Kayaka ìmama lek ìsisaak ogwu ijejeen̄.” ³⁶ Jisọs ìkagban̄ utọn̄ me lek etip ema ekilook, ire, itutumu inyi Jairọs ibe, “Katet ukpook, gaalek kaan̄ ichechieek!” ³⁷ Inenisa Pita mè Jemis mè Jọn ngwan̄ kè Jemis igbaalek kan̄ isi uwu ya, ìkachieek ibe ofifi ene igọọk ema ije. ³⁸ Mgbọ ema erebe uwu ogwu ibot uwu ntitiin̄ ya, Jisọs omumun̄ ubọk ere okijijiin̄, mè imun̄ ebi ene ekito ito, mè ikikpukpọt ikana me ijọn̄. ³⁹ Ijeje inin̄ uwu ya, mè ikido ebi ife cha ibe, “Ìre keke orọ enyi ekifan̄a ere, mè ikito ito ikeyi? Gwun̄ enenwaan̄ yi ìkakwukwu, ìkilalaak.” ⁴⁰ Ife cha ebebene ikichak ọmọ. Mije keya, Jisọs orerieen̄ otutuuk kiban̄ isibi, mè isa nte gwun̄ ya mè nga gwun̄ ya melek ebi udun̄ kan̄ ene ita cha igbaalek inin̄ emen agwut ere emaan̄be gwun̄ ya. ⁴¹ Mgbọ ema enin̄be agwut ya, Jisọs otetet gwun̄ ya me ubọk, mè ibe ọmọ, “Talita, kum!”, eyi òsisibi, “Gwun̄ enenwaan̄, m̀be owu, nan̄a keke!”. ⁴² Mgbọ yaage, gwun̄ ya onanan̄a ikeke, mè ibene ikije ikana me emen agwut ya. (Ọmọ ìre gwun̄ akọp mè acha iba). Mgbọ ebi melek kè Jisọs emun̄be uyeke uyeke inu ya, mbiribọ ogwogwook ema me lek enenen. ⁴³ Jisọs orọriọọn̄ ubọk itaba ema ubọk me utọn̄ ibe ekakpa inu yi òrọrọ ìnyi ene geege, mè ibe eweek inorie enyi gwun̄ ya irie.

¹ Jisọs oneninan̄a me ere ya ika inu me ama ere ekpukpobe ọmọ isibi. Ebi udun̄ kan̄ egọgọọk ọmọ inu. ² Me Usen Mbuban, ọmọ onenisi uwu ntitiin̄ me ama ya, mè ibene ikijeen̄ ikọ Awaji. Ebi ene mîwa me uwu ntitiin̄ ya. Inu îjeen̄be oririki ebi ife cha lek. Ema ekekibe, “Îyak, ìre owa ke ene yi okween̄ inu kechi? Ìre iriọọn̄-inu kechi îkaan̄be ìjeje? Sa ikwaan̄ ukechieen̄ chi ikisi ye? ³ Ìre ìkare ogwu usọ ya, gwun̄ kè Meri ire eyi? Ìre ìkare ọmọ ore ngwan̄ kè Jemis mè Josefu mè Judas melek Saimọn? Ìre ìkare ama keyi ke ebi ngwan̄ kan̄ ebibaan̄ egọọk iluk?” Ema ebebene ikaan̄ njijọ ejit me lek kan̄. ⁴ Jisọs onenifọọk ema ibe, “Ogwu nriran îkikaan̄ umin me ere geelek, îtata me ama ere înan̄abe, mè otoko kan̄, mè uwu ere emanbe ọmọ gaalek ke kpekinyi ọmọ umin.” ⁵ Mije una ichechieek kiban̄, Jisọs ìkakọt irọ inu ukechieen̄ geege me ama ya, ita me lek ene inen mè inen îtoon̄be ubọk me ibot, mè irọ inyi lek inye. ⁶ Îke Jisọs chieen̄ enenen imumun̄ ibe ke ife cha kpetoon̄ ọmọ ejit me lek. Inenikijijen̄e ikana me asabọn ama òkukup igbet ama kiban̄ ikijeen̄ inu. ⁷ Jisọs onigwen akọp mè ebi udun̄ kan̄ iba ititiin̄, mè iniria ema isibi ene iba iba ibe esi etumu ikọ Awaji, mè inyi ema unye isasa irieen̄ ijo erumun̄ isibi me emen ene. ⁸ Sabum ema enije, inyinyi ema nteme ibe, “Ikasa inu geege ìkaan̄ me ubọk ìje ije ya, îtata mkpat. Ikakaan̄ inorie, ikaben akpa ubọk, ikatap ikpoko me akpa. ⁹ Ìtap ikpukot me ukot, ire, ikamọnọ ọfọnti ìso iba. ¹⁰ Ama geelek enyi enin̄be, ire ikaan̄ uwu ibọbọkọ enyi itap, ìkup me uwu ya ìre mgbọ enyi mênan̄abe me ama ya isibi. ¹¹ Ikaan̄ ama geelek enyi erebe, mè kpebọkọ enyi itap, kpeweek si inọnọ ikọ enyi ebetumu, ìnan̄a me ama ya ìsibi. Enyi isisibi, ìgen̄ achiaan̄ ukot kinyi ìgwook me ama ya, inyi ire inu ata-ikọ ikeme ebi ama ya.” ¹² Ema enanan̄a isibi, mè ikije ikana ikitumu inyi ebi ene ibe egwu kom, mè etele ijo kiban̄. ¹³ Ema mîrieen̄ si owuwa ijo erumun̄ isibi me emen ene, mè iken owuwa ebi orukan̄ aran̄, mè irọ inyi lek kiban̄ inye. ¹⁴ Erieen̄ kè Jisọs mè etip otutuuk inu îkirọ otataan̄ ikana ere geelek, mè inire utọn̄ kè Erọdu. Usini ene ekekitumu ibe ke Jisọs ìre Jọn ògwook mun̄ ogwu òkwukwu; ke îra ijomo me mkpa; ke ìre eya orọ îkaan̄be unye ikisa irọ uyeke uyeke inu chi geelek. ¹⁵ Usini ene ekibe ke ìre Ilaija. Usini ene si ebebe ke ìre ogwu nriran ge onu kubọk ebi nriran ekinu me ukot ikaan̄. ¹⁶ Mgbọ Erọdu onọbe ikọ chi, itutumu ibe, “Jọn ògwook mun̄ ogwu nnyibe ida ibe efieek ibot, îjomo me mkpa.” ¹⁷ Erọdu yi ore ogwu ònyinyi unye ibe etet Jọn ebọp, mè egon me uwu mkpọn, inyi ejit ibele Erọdias ogwu nwa. Erọdias ìre nwa Erọdu obọkọbe me ubọk kè Filip, ogwu ngwan̄ kan̄ gaalek. ¹⁸ Eya orọ, Jọn okekitumu inyi Erọdu ibe, “Owu orọn̄ ikan mije obọkọbe nwa ngwan̄ kwun̄.” ¹⁹ Mije ikọ yi, Erọdias obeben Jọn me ejit, mè ikiweek ikpakpan̄. Ire, irek ìkasibi ìnyi ọmọ, mije, Erọdu ìkachieek inyi ọmọ. ²⁰ Erọdu îkinyi Jọn ulibi, mije, îriọọn̄ ibe ke Jọn ìkirọ inu òtatat, mè ire si ene ogwu Awaji ogobobe isun̄ inyi lek kan̄. Mije keyi ke îkikpọ Jọn chieen̄ me lek, inyi unan geege ikasak me lek. Erọdu îkima ikekigban̄ ikọ Jọn okitumu, ubọk geelek owuwa ikọ cha okisisaak ọmọ enenen. ²¹ Usen ge, inu yi Erọdias okiweek onenire ubọk. Usen ya ìre usen Erọdu otobe ijọk isasa ikeek usen uman kan̄, mè item inorie, mè iria ikwaan̄ igwen ebi ibot mkpulu, mè ebi ibot akọn̄, mè ebi ilile me Galili. ²² Gwun̄ kè Erọdias enenwaan̄ osisibi inu inijop okwa me isi kè Erọdu melek ebi ichen cha. Okwa ya îjopbe onenibele otutuuk ebi ìkup me ere ya ejit enenen. Eya orọ, Erọdu ogwegwen gwun̄ enenwaan̄ ya, mè itumu inyi ibe, “Do emi inu geelek oweekbe, ke mânyi owu.” ²³ Înyan̄a ibot igbaalek inyi gwun̄ ya ibe, “Mânyi owu inu geelek odobe emi, ìrere icheche ama ubọọn̄ n̄a irek iba, mè isa agan̄ ge inyi owu.” ²⁴ Gwun̄ enenwaan̄ ya onanan̄a isibi, mè isi lek ogwu uga isi ikpa inyi, mè ido ibe, “Ìre keke ke mbado?” Ogwu uga obebe, “Si do ibe inyi owu ibot kè Jọn ògwook mun̄.” ²⁵ Gwun̄ yi ogwugwu ikom ugwat ugwat inu me isi ogwu ubọọn̄ Erọdu, mè initumu inyi ibe, “Ǹkiweek ibe owu ònyi emi ibot kè Jọn ògwook mun̄ me emen okwa mgbọ keyi.” ²⁶ Inu yi gwun̄ enenwaan̄ ya odobe onenifieek Erọdu me lek enenen. Ire, ìkakọt ìjit, mije ebi ichen kan̄ cha, mè ubọk îwuukbe lek inyan̄a ibot me isi ebi ife cha ibe ke ọmọ mônyi gwun̄ ya inu geelek îdobe ọmọ. ²⁷ Eya orọ, iraria ogwu akọn̄ ge ibe isi me uwu mkpọn isi ifieek ibot kè Jọn isa inu. Ogwu akọn̄ ya osisi ifieek Jọn ibot, ²⁸ mè iben itap me emen okwa isa ijet gwun̄ enenwaan̄ ya. Ibọbọkọ, mè isa ijet ogwu uga. ²⁹ Mgbọ ebi udun̄ kè Jọn enọbe ibe ke mîkpan̄ Jọn, ema esisi iben nkwukwu kan̄ isa ifo isi ifuun̄. ³⁰ Ebi otuchieen̄ kè Jisọs cha ìsisi itumu ikọ Awaji enenika, mè inikpa inu geelek ema erọbe, mè echi ema ejeen̄be ebi ene inyi Jisọs. ³¹ Ike mgbọ ya, owuwa ene ebi ìkinunu me lek kè Jisọs mêkinu, ebi ìyayaka ikifo mêkifo. Mije keyi, ebi otuchieen̄ kan̄ kpekọt ikaan̄ irek ìrie ukpọk ukpọk lek inorie. Eya orọ, Jisọs onenitumu inyi ebi udun̄ kan̄ ibe, “Ìna, inyi eji esi eweek ere ge ekup eji gaalek esiki efuuk sọnja.” ³² Jisọs mè ebi udun̄ kan̄ gaalek eneninin̄ uji, mè ikọp isi ere ema ebesi isiki efuuk. ³³ Owuwa ene emumun̄ ema ekikọp, mè iriọọn̄ ibe ke ìre ema, mè igbuku isibi inan̄a me ama geelek òkup me agan̄ ya, mè ilibi ikana inyọn̄ inyọn̄ idasi isi ire ere ya me isi kiban̄. ³⁴ Ema enenikọp itoon̄ me ijọn̄. Mgbọ Jisọs osibibe me uji, mè ibene chieen̄ imun̄ ogbogbo ebi ene cha, njijin kiban̄ otetet ọmọ enenen, mije, ema ekup kubọk arọọn̄ ikakaan̄ge ogwu òkekikpukpo. Ibebene ikijeen̄ ema owuwa inu me ere ya. ³⁵ Mgbọ egwe ojọkọbe inire otu ikakwun̄, ebi udun̄ kan̄ enenitumu inyi ọmọ ibe, “Egwe mônifit, ere yi si ìre emen èwê, kpunu ama. ³⁶ Tumu nyi ebi ife chi ibe eje esi emen ama òkukup igbet ere yi esi elep inu ema mêriebe.” ³⁷ Jisọs ofọfọọk ema ibe, “Enyi me lek kinyi ìweek inorie ìnyi ife chi erie ma.” Ebi udun̄ kan̄ ebebe ọmọ, “Îyak! Ìre owu òkariọọn̄ ibe ke inorie òboso ife chi môben iso efit dinari iba (òrere ikpoko ogwu ikwaan̄ ge oborie otutuuk onyan̄ jeeta)?” ³⁸ Jisọs oyayaka inido ema ibe, “Ìre owut fituru inen ke enyi ekaan̄? Ìsi ìkpọ-nu.” Mgbọ ema esibe isi iweek iriọọn̄, ema enunu initumu inyi ọmọ ibe ke ìre owut fituru go mè ufuk irin̄ iba gaalek ke ema ekaan̄. ³⁹ Jisọs obebe ema etumu enyi ebi ife cha ibe esiki ekweek me inyọn̄ mbubet me irek me irek. ⁴⁰ Ikeya ke ife cha enisiki ikweek me irek me irek, usini irek efit ene, usini akọp ene go. ⁴¹ Jisọs onenibọkọ owut fituru go mè ufuk irin̄ iba cha ikaan̄ me ubọk, mè ibene chieen̄ ikpọ inyọn̄, mè inyi Awaji itọn̄, mè inikpọkọ fituru cha, mè isa inyi ebi udun̄ kan̄ ibe esa esi eche enyi ebi ife cha. Ubọk yaage si ke îfan̄a ufuk irin̄ iba cha inyi ibe esa eche eso otutuuk ene. ⁴² Otutuuk kiban̄ ererie inorie ya, mè irie ijot owot. ⁴³ Mgbọ eriebe isan̄a, ebi udun̄ kè Jisọs eneniteen̄ ọkpọkọ fituru mè ọkpọkọ irin̄ echi etakabe isik, ijojot akọp mè okwun iba. ⁴⁴ Otu ifuk ebirieen̄ ebi ìrerie inorie ya ìre obop ebirieen̄ go. ⁴⁵ Mgbọ yaage eriebe inorie ya isan̄a, Jisọs obebe ebi udun̄ kan̄ enin̄ uji ekọp esaba okwaan̄ oyô ya esi Betisaida ke ọmọ gwa òkinu. Inenikup itap ebi ife cha me oniin̄, ema efofon isan̄a. ⁴⁶ Mgbọ Jisọs otapbe ema me oniin̄ isan̄a, inenene inyọn̄ ogoon̄ ge isi ikup ikiriaak uriaak. ⁴⁷ Ike mgbọ egwe ofitbe, ebi udun̄ kan̄ me emen uji me eden̄ okwaan̄, Jisọs gaalek osik me ijọn̄. ⁴⁸ Îkup me inyọn̄ ogoon̄ ya ibene chieen̄ imun̄ ema me eden̄ okwaan̄ ekibọkọ ufialek me lek uran̄, mije efet okiwut ikibieen̄ ema ikpebe ifo udun̄. Me eririeen̄, me òfo agan̄ egwe, Jisọs onanan̄a ikije ukot ukot me inyọn̄ isi mun̄ igọọk ema, mè ibonije iraka ema. ⁴⁹ Ema emumun̄ ọmọ okije me inyọn̄ isi mun̄, mè ikikeek ibe ke ìre ekwukwu, mè isan̄a ukpo ibọn̄. ⁵⁰ Otutuuk kiban̄ mîmun̄ ọmọ iso, ukpook otetet ema enenen. Mgbọ yaage, Jisọs otutumu inyi ema ibe, “Ìkat ejit, ikatet ukpook, ke emi ke ìre.” ⁵¹ Inenisaba inin̄ emen uji ya, mè igọọk ema ikweek. Efet ya owọwọ. Inu yi ebi udun̄ kan̄ emun̄be okeke ema chieen̄ enenen. ⁵² Mije, bak me lek ema kpekikọt igwat lek igobo inu itet, ema kpekọt isa inorie Jisọs onyibe obop ene go cha iriọọn̄ ogwu Jisọs orebe. ⁵³ Ema enenikọp isaba okwaan̄ ya itoon̄ me agan̄ ijọn̄ ekigwen Geneseret, mè igwuun̄ uji. ⁵⁴ Ema inanan̄a me uji isibi, ebi ene erọriọọn̄ Jisọs isi mgbọ yaage, ⁵⁵ mè ilibi ekot ekot ikana otutuuk agan̄ ya ikisi ibeen̄ ebi orukan̄ me inyọn̄ ufo isa ijet Jisọs. Ere geelek enọbe ibe ke ọmọ òwa, mîra isa ebi orukan̄ ijet ọmọ. ⁵⁶ Ere geelek Jisọs osibe, mè ìre ama ilile, mè ìre sọntiik ama, mè ìre ama ibot uwu ge ge, ebi ene ekikpukpulu ebi orukan̄ isa isibi inu me oyet ewe, mè inikibeek ọmọ ibe itele inyi ebi orukan̄ cha etet ubọk me utọn̄ ọfọnti inyọn̄ kan̄. Otutuuk ebi geelek ìtetet ubọk me lek ọfọnti kan̄, lek kiban̄ onyenye isan̄a kpai.

¹ Usen ge, usini ebi Farisi mè ebi ìjeen̄ Ikan ìnan̄a me Jeruselem enunu me lek kè Jisọs. ² Me ere ya, ema enenimun̄ ibe ke usini ebi udun̄ kè Jisọs kpegwọk lek sabum enirie inorie. Eyi ìsibi ibe ke ema kpegwọk ubọk igọọk me lek mfaka ebi Ju. ³ Otutuuk ebi Ju, ògak ge ebi Farisi, ekigọọk ọrọmijọn̄ ebi nte nte kiban̄, kpekirie inorie me ekagwọkge ubọk. ⁴ Ema isinan̄a me ewe ika, kpekirie inu geege îtata egwọgwọk lek. Îkaan̄ si owuwa ọrọmijọn̄ ema ekirọ, kubọk igwọgwọk otin̄, mè ugọn̄, mè ekpen̄, mè alala. ⁵ Eya orọ, ebi Farisi mè ebi ìjeen̄ Ikan enenido Jisọs ibe, “Ìre keke orọ ebi udun̄ kwun̄ ekijit irọrọ ọrọmijọn̄ ebi ugane? Kpekigwọk lek sabum ènerie inorie.” ⁶ Jisọs onenifọọk ema ibe, “Enyi ebi isi iba kechi! Ikọ Asaya otumube me ukot ikaan̄ ibak enyi ìkpọkpọ itat. Asaya ìtumu ibe ke Awaji ibe, ‘Ife chi ekimin emi me ukpọk-otu ikike, ire, ejit kiban̄ îjọn̄ọ ere me lek n̄a. ⁷ Ema ekitọbọ ebum inyi emi ikike, mè ikijeen̄ ikan ema gaalek etapbe kubọk ìre ikan Awaji.’ ⁸ Enyi mîjuuk Ikan Awaji itele, mè iyaka initet ọrọmijọn̄ ebilene inye.” ⁹ Îtumu si inyi ema ibe, “Enyi mîkaan̄ ujọn̄ọ ifuk-ibot enyi ekisa ijit isusun̄ Ikan Awaji, mè ikitet ijejeen̄ eyi kinyi inye. ¹⁰ Mosis ìnyi Ikan ibe mè ene geelek ikinyi ogwu ute mè ogwu uga ulibi; ikaan̄ ene geelek òtutumu ogwu ute mè ìre ogwu uga ilọ, ekpakpan̄. ¹¹ Ire, enyi ekijeen̄ ibe, ire ogwu ikaan̄ inu mosabe itap ubọk inyi ogwu ute mè ogwu uga, mè itumu inyi ogwu ute mè ìre ogwu uga ibe ke inu ya ìkup inyi Awaji, ¹² ke ìkayaka ìkup me uyọt ibe ene ya irọ inu ògbegbe ibe ọmọ irọ inyi ogwu ute mè ìre ogwu uga. ¹³ Mije enyi ekijeen̄ bọn kinyi ọrọmijọn̄ kinyi, enyi mîsa ikọ Awaji isun̄ inu ikike. Melek si, ìkare ọrọmijọn̄ keyi gaalek ke enyi ekirọ, enyi mîkirọ si owuwa ọrọmijọn̄ òkup esese.” ¹⁴ Jisọs onenigwen ogbogbo ene cha ititiin̄ me agba lek kan̄, mè ibe ema, “Enyi otutuuk ene, ìgban̄ utọn̄, mè ìtet ibot me lek inu mbatumu inyi enyi. ¹⁵ Ìkare inu geege ene oriebe itap me owot okirọ inyi ene ikatana me isi Awaji. Îre inu òkinan̄a me emen ejit ene isibi okirọ inyi ene ikatana me isi Awaji. [ ¹⁶ Ogwu ikaan̄ utọn̄ isasa inọ ikọ, inọ!”] ¹⁷ Mgbọ Jisọs onan̄abe itele urum ene cha, mè ifo uwu, ebi udun̄ kan̄ enunu inibeek ọmọ ibe ibak ibot urọk ya inyi ema. ¹⁸ Jisọs onenido ema ibe, “Ìre enyi kpekaan̄ nden̄? Ìre ìkabook enyi chieen̄ ibe ke kpunu inu geege eyi ene oriebe eyi òkirọ inyi ene ikatana me isi Awaji? ¹⁹ Inu ene oriebe ìkakifo emen ejit ene, ìkifo emen owot ene, mè ene ya òne ofiin̄.” (Ikọ keyi Jisọs otumube îjeen̄ ibe ke otutuuk inorie geelek îtana me isi Awaji.) ²⁰ Jisọs onenitumu si ibe, “Îre inu ònan̄a me ejit ene isibi okirọ inyi ene ikatana. ²¹ Mije, îre nan̄a me emen ejit ene ke ijo ekiket geelek okinan̄a isibi, mè ijeje oyet, mè ichichiin̄ inọ, mè ikpakpan̄ ene, ²² mè ugan-nwa, mè ikakaan̄ ejit ile, mè irọrọ nnaan̄, mè ikakan̄ ataak, mè barabat, mè ikakaan̄ chieen̄ ile, mè itutumu ene ifiat, mè igugumu lek, mè irọrọ inu kubọk ebi una ifuk-ibot. ²³ Otutuuk ijo inu chi ìkinan̄a me emen ejit ene isibi. Îre echichi okirọ inyi ene ikatana me isi Awaji.” ²⁴ Jisọs oneninan̄a me ere ya isi agan̄ ama Taya. Me agan̄ ya, îkaan̄ uwu ge îgbabe ikup. Ìkaweek ibe ebi ene eriọọn̄ ibe ke ọmọ òwa me uwu ya, ire, ìkakọt ìlet. ²⁵ Îkaan̄ enenwaan̄ ge, ogwu ijo erumun̄ okisisaak ogwu gwun̄ enenwaan̄. Mgbọ ogwu enenwaan̄ yi onọbe inu òfolek kè Jisọs, inunu me uwu ya, mè inirọn̄ me ijọn̄ me ukot kè Jisọs. ²⁶ Ogwu enenwaan̄ yi ìre ogwu ido Giris. Eman ọmọ me agan̄ Fonisia eyi òkup me ido Siria. Ọmọ okekibeek Jisọs ibe irieen̄ ijo erumun̄ ya isibi me emen gwun̄ kan̄ enenwaan̄. ²⁷ Jisọs onenifọọk ọmọ ibe, “Tele mè nsabọn edasi erie inorie ejot owot. Mije, ìkatat ibe eben inorie nsabọn etọp eto me ijọn̄ enyi ibo.” ²⁸ Ire, ogwu enenwaan̄ ya ofọfọọk ọmọ ibe, “Iin̄, Ogwu Nte, ikeya ke ìre ubọk owu otumube. Ire, ibo ìkekikup si me irak ikasi ikirie ngigen̄e inorie òkinan̄a me ubọk nsabọn igwook me ijọn̄.” ²⁹ Jisọs obebe ọmọ, “Owu ofọọk itop. Eya orọ gwu kom fo, ke ijo erumun̄ ya îra isibi itele gwun̄ kwun̄.” ³⁰ Ogwu enenwaan̄ ya ogwugwu ikom ifo isi ire uwu kan̄, mè imun̄ gwun̄ kan̄ ya olaakbe me inyọn̄ mkpilaak, mè imun̄ si ibe ke ijo erumun̄ ya îtele gwun̄ ya. ³¹ Jisọs oneninan̄a me Taya ije iraka Saidọn itibi agan̄ ekigwen Akọp Ama, mè isi ire okwaan̄ oyô Galili. ³² Me ere ya, enenisa ogwu ìnan ge ikakọtge ìtumu si ikọ ìjaan̄ ijet Jisọs, mè ibeek ibe itoon̄ ubọk me lek, mè igwa. ³³ Jisọs osasa ene ya ije inan̄a me etete ebi ene isi ere ònọnọọn̄, mè itap otubọk kan̄ me utọn̄ ene ya agan̄ iba, mè icho ataak, mè ichak ubọk me lek alọm ene ya, ³⁴ mè ibene chieen̄ ikpọ inyọn̄, mè inunuun̄ me emen kan̄, mè ibe, “Efata!”, eyi òsisibi, “Chili!” ³⁵ Mgbọ yaage, utọn̄ ene ya ochichili, ibebene ikinọ ikọ. Alọm kan̄ si otọtọn̄ọ, ibebene ikitumu ikọ ijaan̄. ³⁶ Jisọs otutumu ibe ekakpa inu ọmọ orọbe ya ìnyi ene geege. Ire, ike îkigban ema, ikeya ke ema eriọọn̄ ikikpa inu ya ikana ere. ³⁷ Inu yi Jisọs orọbe okeke otutuuk ebi ìnọnọ chieen̄ iraka onineen̄. Ema ekekitumu ibe, “Inu geelek îkirọ ìkpọkpọ ikijaan̄. Îrọ si inyi ogwu ìnan inọ ikọ, mè irọ inyi ogwu mbuuk itumu ikọ!”

¹ Sọnja mgbọ iraraka, owuwa ene enunu me lek kè Jisọs. Mije ema ekakaan̄ge inorie geege irerie, Jisọs onenigwen ebi udun̄ kan̄ ititiin̄, mè itumu inyi ibe, ² “Njijin ife chi îtet emi enenen. Egwe ita ire echa ife chi ekupbe melek n̄a. Mgbọ keyi, inorie kiban̄ îta, kpunu inu ema eberie. ³ Ire mbe ife chi eje ukpọk owot efon, mêgak iweek me oniin̄, mije, usini kiban̄ enan̄a me ujọn̄ọ ere inu.” ⁴ Ebi udun̄ kan̄ enenido ọmọ ibe, “Ìre owa me emen èwê keyi ke eji ebekọt ikaan̄ inorie òboso owuwa ene kechi?” ⁵ Jisọs onenido ema ibe, “Ìre owut fituru inen ke enyi ekaan̄?” Ema efọfọọk, ibe ke owut fituru jaaba ke ema ekaan̄. ⁶ Jisọs oneninyi ida ibe ife cha esiki ekweek me ijọn̄, mè inibọkọ owut fituru jaaba cha, mè inyi Awaji itọn̄, mè ikpọkọ, mè isa inyi ebi udun̄ kan̄ ibe esa eche enyi ebi ife cha. Ebi udun̄ kan̄ esasa fituru cha isi iche. ⁷ Ema mîkaan̄ si ufuk irin̄ inen mè inen. Jisọs onenibọkọ irin̄ cha si, mè inyi Awaji itọn̄ me lek, mè ibe ebi udun̄ kan̄ esa egbaalek eche enyi ife cha. ⁸ Ebi ife cha ererie inorie ya, mè irie ijot. Mgbọ eriebe isan̄a, ebi udun̄ kè Jisọs eteteen̄ ọkpọkọ echi òsisik ekakọtge ìtaka ìsan̄a, ijojot okwun jaaba. ⁹ Ebi ìrerie inorie ya mîso obop ebirieen̄ ini. Jisọs onenitap ema me oniin̄ ifofo kiban̄. ¹⁰ Mgbọ yaage ife cha efonbe isan̄a, ọmọ mè ebi udun̄ kan̄ enanan̄a inin̄ uji, mè ikọp isi agan̄ ama ekigwen Dalamanuta. ¹¹ Usini ebi Farisi enunu me lek kè Jisọs mè ikigọọk ọmọ iwut ifan̄a. Ema ekiweweek itọtọ ọmọ ikpọ. Eya orọ, ema enenitumu inyi Jisọs ibe, “Rọ-nu inu ukechieen̄ ge ònan̄a me emen inyọn̄.” ¹² Jisọs ofọfiọọk, mè ibe, “Ìre keke orọ ebi linyọn̄ mgbọ keyi ekiweek inu ijejeen̄? Me atikọ, ìkakaan̄ inu ijejeen̄ geege eberọ ijeen̄ ema.” ¹³ Itutumu ikeyi isan̄a, inanan̄a itele ema, mè inin̄ uji, ọmọ mè ebi udun̄ kan̄, mè ikọp isaba okwaan̄ ya ifo ofifi agan̄. ¹⁴ Ebi udun̄ kè Jisọs mîwuuk itatap fituru me uji, isan̄a me lek owut ge gaalek òsisik me ubọk kiban̄ me emen uji ya. ¹⁵ Jisọs okekitaba ema ubọk me utọn̄ ibe, “Ìgbala chieen̄ me lek olat ebi Farisi melek olat kè Erọdu.” ¹⁶ Ebi udun̄ kan̄ ekekitumu me lek kiban̄ ibe ke ìkalọlọ fituru ema ewuukbe ya orọ îkitumu ikọ ya. ¹⁷ Jisọs orọriọọn̄ inu ema ekitumu, mè inido ema ibe, “Ìre keke orọ enyi ekinina lek ibe ke enyi kpekaan̄ fituru? Ìre enyi kperiọọn̄ inu geege? Sa ìre enyi kpekikọt igobo inu geege itet? Sa ìre ejit kinyi ìkachichili si? ¹⁸ Ìre enyi ekaan̄ chieen̄ ikike, kpekisa imọọn̄ inu? Sa ìre enyi ekaan̄ utọn̄ ikike, kpekisa inọ ikọ? Ìre enyi kpekikeek inu? ¹⁹ Mgbọ nsabe owut fituru go inyi obop ebirieen̄ go, eyi ema eriebe ijot, ìre okwun inen ke enyi eteen̄ ọkpọkọ echi osisik ijot?” Ema efọfọọk ibe, ke ìre akọp mè okwun iba. ²⁰ Jisọs ododo ema si ibe, “Ìre mgbọ nkpọkọbe owut fituru jaaba isa inyi obop ebirieen̄ ini, ema eriebe ijot, ìre okwun inen ke enyi eteen̄ ọkpọkọ echi òsisik ijot?” Ema efọfọọk ibe, ke ìre okwun jaaba. ²¹ Ikeya ke Jisọs onibe ema, “Ìre enyi kpetet si ibot usem n̄a?” ²² Ema enenire ama ekigwen Betisaida. Ebi ene enenisa ogwu ǹnàan̄ ge ijet Jisọs ibe itoon̄ ubọk me lek, inyi imọọn̄ inu. ²³ Jisọs otetet ogwu ene ya me ubọk, mè isa ọmọ ije inan̄a me emen ama ya isibi, mè ikwut ataak igwook ọmọ me chieen̄, mè isa ubọk itoon̄ ọmọ me lek, mè ido ọmọ ibe, “Ìre omọọn̄ inu?” ²⁴ Ogwu ene ya obebene chieen̄ ikpọ ere, mè ifọọk ibe, “Mmun̄ ebilene ekije, ire, ebilene cha eyaka ibet lek uti.” ²⁵ Jisọs okpọkpọk itoon̄ ọmọ ubọk me chieen̄. Chieen̄ kan̄ obobolo, ibebene ikimọọn̄ inu ijaan̄. ²⁶ Jisọs onenitumu inyi ọmọ ibe, “Raka isi ge fo uwu kwun̄, kayaka ìgwu ìkom ìje ìnin̄ emen ama.” ²⁷ Jisọs mè ebi udun̄ kan̄ eneninan̄a ikije ikana asabọn ama òkukup ikana ama ekigwen Sisaria Filipai. Me oniin̄ ije kiban̄, Jisọs okekido ebi udun̄ kan̄ ibe, “Ìre ebi ene ekitumu ibe ke emi ìre ekene?” ²⁸ Ema efọfọọk ibe, “Usini ene ekibe ke owu ìre Jọn ògwook mun̄, usini ekibe ke owu ìre Ilaija ogwu nriran. Usini si ekibe ke owu ìre ene ge me lek ebi nriran.” ²⁹ Jisọs onenido ema ibe, “Enyi me lek kinyi, ìre enyi ebe ke emi ìre ekene?” Pita ofọfọọk ọmọ ibe, “Owu ore ogwu Awaji otoon̄be ubọk me ibot ya.” ³⁰ Jisọs obebe ema ekakpa inu òfolek kan̄ ìnyi ene geege. ³¹ Jisọs onenibene ikitumu inyi ebi udun̄ kan̄ ibe, “Emi Gwun̄ Ebilene mâbọkọ owuwa ufialek. Ebi ugane ama, mè ebi ibot ngwugwa, mè ebi ìjeen̄ Ikan mêjit emi, mè ikpan̄ emi. Ire, egwe ita isiraka, mâjomo me mkpa.” ³² Jisọs ìkalet otu, ìkpọkpọ itumu ikọ ya ikpọk mbum. Eya orọ Pita ogwegwen ọmọ ida ibọkọ, mè itumu inyi ọmọ ibe, “Ìre kpasi ikọ ke okitumu ikeya?” ³³ Jisọs okakana chieen̄ ikpọ ebi udun̄ kan̄, mè igana inyi Pita ibe, “Je nan̄a emi me isi, owu Yọk keyi! Ìkare Awaji ke ogọọk ikeke, îre ebilene ke ogọọk ikeke.” ³⁴ Jisọs onenigwen otutuuk ebi ìkup me ere ya igbaalek ebi udun̄ kan̄ ititiin̄, mè itumu inyi ema ibe, “Ire ikaan̄ ogwu iweek igọgọọk emi, ene ya ijit lek kan̄, mè iben uti nkwurieen̄ kan̄ isa igọọk emi. ³⁵ Mije, ogwu iweek ibọbọọk ugwem kan̄, ene ya môfiin̄ ugwem kan̄. Ire, ene geelek òfifiin̄ ugwem kan̄ mije n̄a, mè ìre mije ata etip yi nkilook, ene ya môkaan̄ ugwem ya. ³⁶ Ìre kpasi oruru ke ene obokaan̄, ire ene ya ikaan̄ otutuuk linyọn̄, mè ifiin̄ ugwem kan̄? ³⁷ Sa ìre keke ke ene obokọt isa inyi me useen̄ ibot ejit kan̄? ³⁸ Ire ikaan̄ ogwu itet esip mije n̄a, mè ìre mije ikọ n̄a me etete ebi mgbọ keyi ebi ìrere ebi ijo mè ebi ekariọọn̄ge Awaji, emi Gwun̄ Ebilene, mâtet esip mije ene ya mgbọ mânube melek ebi osat mbuban me umin mè uja eyi Nte n̄a.”

¹ Jisọs onenitumu si inyi ema ibe, “Me atikọ, usini ebi ìkekeke me ere yi mgbọ yi kpebekwu mege ire mgbọ ema mêsabe chieen̄ kiban̄ imun̄ mkpulu eyi Awaji onube melek ikpele unye.” ² Mgbọ egwe gweregwen orakabe, Jisọs onenisa Pita mè Jemis mè Jọn inene ifo inyọn̄ ubene ogoon̄ ge, ema gaalek. Me ere ya, me isi ebi udun̄ kan̄ cha, akpalek kè Jisọs onwenwene. ³ Ọfọnti îtapbe me lek okpọkpọ itoon̄, mè itana igak abalara geelek òkup me otutuuk linyọn̄. ⁴ Ebi udun̄ kan̄ ene ita cha enenimun̄ ebi nriran, Ilaija melek Mosis, ekanabe isibi, mè ikigọọk Jisọs ikpa ukpatu. ⁵ Pita onenitumu inyi Jisọs ibe, “Ogwu ijejeen̄, înwọn ubọk eji ekupbe me ere yi. Eji enenama atanga ita, ge eyi kwun̄, ge eyi kè Mosis, ge eyi kè Ilaija.” ⁶ Pita ìtumu ikọ yi, mije, ìkariọọn̄ inu ìbotumu, bak me lek inu ema emun̄be me ere ya îgwook ema mbiribọ me lek enenen. ⁷ Oduku inyọn̄ onenikana ichit ema. Ebi udun̄ kan̄ enọnọ ida ge okitumu ikọ me emen oduku inyọn̄ ya ibe, “Ogwu ìre gwun̄ n̄a ogwu mmabe. Ìgban̄ utọn̄ me lek ikọ kan̄!” ⁸ Mgbọ ebi udun̄ kan̄ eraan̄be chieen̄, kpeyaka imun̄ ene geege, îtata Jisọs gaalek. ⁹ Mgbọ ema ekinan̄a me inyọn̄ ogoon̄ ya isibi, Jisọs otutumu inyi ema ibe ekakpa inu ema emun̄be ìnyi ene geege mege ire mgbọ ọmọ, Gwun̄ Ebilene, môjomobe me mkpa. ¹⁰ Ema ebeben inu ya ichit me lek kiban̄, kpetumu inyi ene geege. Ire, ema ebebene ikidido lek kiban̄ inu ijojomo me mkpa ya osibibe. ¹¹ Ema enenido Jisọs ibe, “Ìre keke orọ ebi ìjeen̄ Ikan ekitumu ibe ke Ilaija obodasi inu sabum ogwu Awaji otoon̄be ubọk me ibot?” ¹² Jisọs ofọfọọk ema ibe, “Me atikọ, Ilaija obodasi inu inineen̄ inu geelek isun̄. Ire, ìre keke orọ egebe me Ikpa Mbuban ibe ke Gwun̄ Ebilene mômun̄ owuwa ufialek; ke mêcha ọmọ, mè ijit ọmọ? ¹³ Mgbọ yi, ǹkitumu inyi enyi ibe ke Ilaija ya îra inunu. Ire, ebi ene mîrọ ọmọ inu geelek ejit kiban̄ otọbe, kubọk egebe me Ikpa Mbuban ibak ọmọ.” ¹⁴ Mgbọ ema enube inichichini melek ebi udun̄ kè Jisọs ebi ekagọọkge ema ìnene inyọn̄ ogoon̄ ya, ema enenimun̄ ebi ene ejotbe ere ya, mè imun̄ si ebi ìjeen̄ Ikan ekigọọk ebi udun̄ kan̄ cha igbini ikọ. ¹⁵ Mgbọ otutuuk ebi ife cha emun̄be Jisọs okinu, ema eririki, mè igbọọk igọọk isi itọp ọmọ amọn. ¹⁶ Jisọs onenido ebi udun̄ kan̄ cha ibe, “Ìre keke ke enyi melek ife cha ekigbini?” ¹⁷ Ene ge me lek ebi ife cha otutumu inyi ọmọ ibe, “Ogwu Ijejeen̄, ǹsa gwun̄ n̄a enerieen̄ ogwu ijo erumun̄ okisisaak ijet owu ògwa. Ijo erumun̄ ya îtap gwun̄ ya mbuuk. ¹⁸ Ìkire, mgbọ geelek îbenebe, îra ida gwun̄ ya itọbọ me ijọn̄, awo îra ikisibi ibaan̄ me otu, îra ikitaka ejeek, mè ònye òkup tin̄n̄ kubọk ene òkwukwu. Mbeek ebi udun̄ kwun̄ ibe erieen̄ ijo erumun̄ ya esibi me emen gwun̄ ya, ire, mîsa igak, kpekọt.” ¹⁹ Jisọs onenitumu inyi ebi udun̄ kan̄ cha ibe, “Jei, ebi mgbọ keyi, enyi mînan ichechieek enenen! Ìre kpa mgbọ ke mbagọọk enyi ikup ire sabum enyi ènekaan̄ ichechieek? Ìre kpa mgbọ ke mbame una ichechieek kinyi isi ire? Ìsa gwun̄ ya ìjet emi!” ²⁰ Ema esasa gwun̄ ya inu. Mgbọ yaage ijo erumun̄ òkup me emen gwun̄ ya omun̄be Jisọs, ibebene gwun̄ ya me lek kubọk mkpikpi, mè ijibi ọmọ itọbọ me ijọn̄, ikekisa ikana me ijọn̄, mè ikigbuk awo me otu. ²¹ Jisọs onenido nte gwun̄ ya ibe, “Ìre kpa mgbọ ke inu yi obene ikirọ gwun̄ yi?” Nte gwun̄ ya ofọfọọk ibe, “Îre bene me karake ijija kan̄. ²² Ijo erumun̄ yi îkiben gwun̄ yi itọp itap me emen ukan̄ mè emen mun̄ owuwa mgbọ, ikiweek ikpakpan̄. Soso, ire owu môkọt igwa gwun̄ yi, nye lek rọ eji nsan, mè tap ubọk nyi eji.” ²³ Jisọs onenibe nte gwun̄ ya, “Ìkare mè ìre emi mâkọt irieen̄ ijo erumun̄ ya isibi, îre, mè ìre owu okaan̄ ichechieek. Mije, inu geelek îkup mfufet inyi ene geelek òchechieek.” ²⁴ Ìkatata Jisọs me otu, nte gwun̄ ya otataan̄ ukpo ibe, “Nchieek, soso tap ubọk nyi emi, inyi ǹsibi me emen una ichechieek.” ²⁵ Mgbọ Jisọs omun̄be owuwa ebi ene ekigbọọk ikilibi inu me ere ya, igagana inyi ijo erumun̄ ya ibe, “Owu ijo erumun̄ òtatap gwun̄ yi mbuuk mè ìnan, m̀be owu, nan̄a me emen gwun̄ yi sibi! Kayaka ìkpọk ìnin̄ emen kan̄ ofifi!” ²⁶ Ijo erumun̄ ya otataan̄ ukpo, mè ijibi gwun̄ enerieen̄ ya itọbọ me ijọn̄, mè isik ọmọ unye unye, mè inan̄a isibi me emen kan̄. Gwun̄ ya okpọkpọ iwọ ilaak me ijọn̄ kubọk nkwukwu ene, ebi ene ebebene ikitumu ibe ke îkwu. ²⁷ Ire, Jisọs otetet ọmọ ubọk, mè itap ubọk ibene ọmọ igwuun̄, ikekeke. ²⁸ Mgbọ Jisọs onin̄be emen uwu, ebi udun̄ kan̄ enwenween̄ lek ikido ọmọ ibe, “Ìre keke orọ eji kpekọt irieen̄ ijo erumun̄ ya isibi me emen gwun̄ ya?” ²⁹ Jisọs otutumu inyi ema ibe ke kpunu ofifi oniin̄ geege ebesa ikọt irieen̄ òjelek ijo erumun̄ keyi isibi me emen ene, îtata me uriaak gaalek. ³⁰ Jisọs mè ebi udun̄ kan̄ eneninan̄a me ere ya ije itibi agan̄ Galili ikifo isi. Ìkaweek ibe ene geege iriọọn̄ inu òfolek ije kiban̄, ³¹ mije, mgbọ ya ke îsa ikijeen̄ ebi udun̄ kan̄ inu. Inu îkijeen̄ ema ìre ke mêtet ọmọ, Gwun̄ Ebilene, ikana itap me ubọk ebilene; ke ife chi mêkpan̄ ọmọ. Ire, egwe ita isiraka, ke ọmọ môjomo me mkpa. ³² Ebi udun̄ kan̄ kpekọt igobo ikọ yi itet. Kpeyaka ikọkọt si ido ọmọ ibot ikọ ya, mije ukpook. ³³ Mgbọ ema enenire uwu me Kapanọm, Jisọs onenido ebi udun̄ kan̄ ibe, “Ìre keke ke enyi ekikpa mgbọ eji ekije me oniin̄ ya?” ³⁴ Kpunu ene geege me lek kiban̄ òsasan̄a amọn, mije, mgbọ ema ekije me oniin̄ ya, ema mînyinyan̄a irek ogwu òmimin ichit me etete kiban̄. ³⁵ Jisọs onenikweek irek, mè inigwen akọp mè ebi udun̄ kan̄ iba cha iriaak me lek kan̄, mè itumu inyi ema ibe, “Ire ikaan̄ ogwu iweek irere ogwu isi, ene ya môkana ogwu òje udun̄, mè ikana si ogwu òbokisi ikwaan̄ inyi otutuuk ene.” ³⁶ Inenisa sọntiik gwun̄ ge inu me etete kiban̄, mè iben gwun̄ ya ikaan̄ me ubọk kan̄, mè itumu inyi ebi udun̄ kan̄ ibe, ³⁷ “Ene geelek òbọbọkọ ene ge me lek nsabọn chi itap, ìbọkọ emi itap. Ene geelek òbọbọkọ emi itap, ìkabọkọ emi gaalek ìtap, ìbọkọ emi melek Awaji ogwu òraria emi inu itap.” ³⁸ Jọn onenikpa inyi Jisọs ibe, “Ogwu ijejeen̄, eji mîmun̄ ene ge ogwu ikarege ogwu kiji okisa erieen̄ kwun̄ irieen̄ ijo erumun̄ isibi me emen ene, mè igban ene ya ibe ikayaka ìrọ, mije, ọmọ ìkakigọọk eji ìje.” ³⁹ Jisọs onenibe ema, “Ikayaka ìgban ene ya, mije, ogwu òsasa erieen̄ n̄a irọ inu ukechieen̄ ìkpokọt igwu ikom mgbọ yaage initumu ijo ikọ ibak emi. ⁴⁰ Ene geelek ogwu ikarọge ìkeme eji, ìkeke melek kiji. ⁴¹ Me atikọ, ǹkitumu inyi enyi ibe, ene geelek òcheche ekpen̄ mudim ge inyi enyi mije enyi erebe ebi n̄a, ene ya ìkpolọlọ ibọbọkọ mkpukpe kan̄. ⁴² “Ire ikaan̄ ogwu irọ inyi ene ge me lek asa nsabọn chi ifiin̄ ichechieek îkaan̄be me lek n̄a, mônwọn ire itobo ikpele ewuuk ikọk-akpa me ebek ene ya, mè iben ọmọ itọp ito me ejit okwaan̄, inyi igen. ⁴³ Ikeya si, ire ubọk kwun̄ ikisa owu itap me ijo inu, fieek fiin̄, mije, mônwọn ibe owu òsa agan̄ ubọk ge ònin̄ me ugwem ikakaan̄ge itata, igak owu ikakaan̄ ubọk iba me lek, mè isi inin̄ emen ukan̄ ama yọk eyi òkilomo ire mgbọ ikakaan̄ge itata. ⁴⁵ Ire ukot kwun̄ ikisa owu itap me ijo inu, fieek fiin̄, mije, mônwọn owu isasa agan̄ ukot ge me lek inin̄ ugwem eyi ikakaan̄ge itata igak eyi mêbenbe owu, mè ukot iba me lek itọp itap me emen ukan̄ ama yọk. ⁴⁷ Ire chieen̄ kwun̄ ikirọ inyi owu ònin̄ me ijo inu, rọkọ san̄a, mije, mônwọn owu isasa agan̄ chieen̄ ge me lek inin̄ me mkpulu eyi Awaji igak owu ikakaan̄ chieen̄ iba me lek, mè etọp owu etap me emen ukan̄ ama yọk, ⁴⁸ ere ‘Mkput òkitaka ene ìkakikwu, ukan̄ òkitaka ene si ìkakiniin̄.’ ⁴⁹ Mije, mêsa ukan̄ ikala ene geelek inyi ikitoon̄, kubọk ekitap uchi me lek inu ngwugwa inyi ikitop. ⁵⁰ “Uchi ìre ata inu. Ire, ire uchi ifiin̄ utop kan̄, ìre eberọrọ inyi iyaka ikaan̄ utop kan̄? Eya orọ, enyi ikafiin̄ utop kinyi, ìluk me esuuk melek ebi melek kinyi.”

¹ Jisọs oneninan̄a me Kapanọm ije isi agan̄ Judia, mè isaba okwaan̄ Jọdan. Ogbogbo ebi ene enunu si inikana ichit ọmọ. Ikekijeen̄ ema inu kubọk îkirọ me ere geelek îkisi. ² Usini ebi Farisi enunu me lek kè Jisọs me ere ya inikiweek ileleke ọmọ ikọ me otu, mè inido ọmọ ibe, “Îre Ikan kè Mosis înyi irek ibe ene ijit ogwu nwa?” ³ Jisọs oneniyaka ido ema ibe, “Ìre kpasi Ikan ke Mosis onyi enyi?” ⁴ Ema efọfọọk ibe ke Mosis ìnyi Ikan ibe, “Ogwu ibojit ogwu nwa, ige ikpa iyaak-olom inyi, mè ilap isibi.” ⁵ Jisọs onenitumu inyi ema ibe, “Mosis ìnyi enyi Ikan ya, mije, ejit kinyi minye. ⁶ Ire, me ibebene, mgbọ Awaji orombe otutuuk inu, Awaji ìrom enerieen̄ mè enenwaan̄. ⁷ ‘Mije keyi, ogwu enerieen̄ môtele ogwu ute mè ogwu uga, mè isa lek kan̄ ichim iriaak me lek ogwu nwa, ⁸ ema ene iba mênenikana ire akpalek ge. Sa me ikeya, ema kpeyaka ire ene iba ofifi, ema eyaka inire ge kpọi.’ ⁹ Eya orọ, inu Awaji ogbaan̄be ibuk, ene geege ikayiyala.” ¹⁰ Mgbọ ema egwube ikom ifo uwu, ebi udun̄ kan̄ enenido ọmọ ikọ òfolek iyayaak olom mè nwa ya. ¹¹ Jisọs otutumu inyi ema ibe, “Ene geelek òjijit ogwu nwa, mè isi ido ofifi nwa, ene ya îrọn̄ ikan ugan-nwa ikeme ogwu nwa. ¹² Ikeya si, ogwu enenwaan̄ geelek òyayaak ogwu olom, mè isi ibat ofifi enerieen̄ îrọn̄ ikan ugan-nwa ikeme ogwu olom.” ¹³ Îkaan̄ ebi ene ìsasa nsabọn inu me lek kè Jisọs ibe itoon̄ ubọk me lek, mè igbana. Ire, ebi udun̄ kan̄ ekakan̄ inu inyi ebi ife cha. ¹⁴ Mgbọ Jisọs omun̄be inu ebi udun̄ kan̄ ekirọ, inanaan̄ ejit, mè itumu inyi ema ibe, “Ìtele mè nsabọn cha enu me lek n̄a, ikakput ema, mije, îre ebi ìkup kubọk nsabọn ke mkpulu eyi Awaji okup inyi. ¹⁵ Me atikọ, ǹkitumu inyi enyi ibe, ogwu geelek ikabọkọge mkpulu eyi Awaji ìtap kubọk nsabọn ekibọkọ inu itap, ene ya ìkponin̄ mkpulu ya kubọk ge.” ¹⁶ Jisọs onenikibeen̄ nsabọn cha ge ge ikaan̄, mè ikitoon̄ ema ubọk me lek, mè ikigbana ema. ¹⁷ Mgbọ Jisọs onan̄abe me ere ya isibi, mè ibene ikije ije kan̄ ifo isi, gwun̄ enerieen̄ ge olilibi inu, mè initọbọ ekpe me ijọn̄ me isi kan̄, mè ibe ọmọ, “Atata Ogwu Ijejeen̄, ìre keke ke mbarọ mè ikaan̄ ugwem ikakaan̄ge itata?” ¹⁸ Jisọs onenido ene ya ibe, “Ìre keke orọ mè owu ògwen emi ata ene? Kpunu ene geege òrere ata ene, ilọ me lek Awaji gaalek. ¹⁹ Owu oriọọn̄ ibe ke Ikan ìtumu ibe, ‘Kakpan̄ ene, kagan nwa ene, kachiin̄ inọ, kakeke ata-ikọ ataak, kafeen̄ ene, nyi nte kwun̄ mè nga kwun̄ ulibi.’ ” ²⁰ Ogwu enerieen̄ ya ofọfọọk ọmọ ibe, “Ogwu Ijejeen̄, ǹkisusun̄ otutuuk Ikan kecha bene me karake ijija n̄a.” ²¹ Jisọs okpọkpọ ọmọ sìì, mè ima ọmọ, mè inibe ọmọ, “Îkaan̄ inu ge òsisik owu irọrọ me ugwem kwun̄. Je fo, mè si nyam inu geelek okaan̄be, mè sa ikpoko ya nyi ebi ugbọọn̄, ke owu môkaan̄ inu ubọọn̄ me emen inyọn̄, mè gwu kom nagọọk emi.” ²² Mgbọ ene yi onọbe ikọ yi, isi kan̄ îgbugbolo, ifefieek ejit, mè ije ifo, mije, ọmọ ìre ogwu òbọbọọn̄ ubọọn̄ enenen. ²³ Jisọs oyayaka chieen̄ ikana ikpọ ebi udun̄ kan̄, mè itumu inyi ema ibe, “Môyọt enenen ebi ìbọbọọn̄ ubọọn̄ ininin̄ me mkpulu eyi Awaji.” ²⁴ Ikọ ya otetet ebi udun̄ kan̄ ukpook enenen. Ire, Jisọs okpọkpọk itumu inyi ema ibe, “Ebi n̄a, ininin̄ mkpulu eyi Awaji ìre inu òyọyọt. ²⁵ Aligọ ijeje itibi chieen̄ alaga îfet igak ogwu òbọbọọn̄ ubọọn̄ ininin̄ mkpulu eyi Awaji.” ²⁶ Ikọ yi otetet ebi udun̄ kan̄ ukpook iraka iman̄. Ema ebebene ikidido lek kiban̄ ibe, “Ire ikeya, ìre ekene ke mênyan̄a?” ²⁷ Jisọs okpọkpọ ema sìì, mè itumu inyi ema ibe, “Me lek ebilene, inu keyi ìkpokọt imọnọ irek. Ire, ìkare ikeya me lek Awaji, mije, inu geelek îkup mfufet me lek Awaji.” ²⁸ Pita onenibe Jisọs, “Kpọ, eji mîjuuk inu geelek eji ekaan̄be itele, mè igọọk owu.” ²⁹ Jisọs obebe ema, “Me atikọ, ene geelek òtetele uwu kan̄, mè ìre ebi ngwan̄ ebirieen̄, mè ìre ebi ngwan̄ ebibaan̄, mè ìre nga kan̄, mè ìre nte kan̄, mè ìre nsabọn kan̄, mè ìre ijọn̄ uko kan̄ îkaan̄be, mije n̄a, mè mije ata etip yi, ³⁰ ene ya môkaan̄ inu iwa enenen igak echi îtelebe. Ene ya ìbokaan̄ efit efit uwu, mè ngwan̄ ebirieen̄, mè ngwan̄ ebibaan̄, mè uga, mè nsabọn, mè ijọn̄ uko, mè ibọkọ si tukutuku, me linyọn̄ keyi, mè iyaka inikaan̄ ugwem ikakaan̄ge itata me ofifi inyọn̄. ³¹ Ire, owuwa ebi ìrere ebi isi me mgbọ keyi mêkana ebi òta, owuwa ebi ìrere ebi òta me mgbọ keyi mêkana ebi isi.” ³² Jisọs mè ebi udun̄ kan̄ enenikije me oniin̄ isi Jeruselem. Jisọs okije me isi, ebi udun̄ kan̄ ekekije igọọk ọmọ me udun̄. Ukot ije kan̄ îtet ebi udun̄ kan̄ ukpook. Ebi ene ebi ìkigọọk ema me udun̄ me oniin̄ ya si mîfieek owot. Jisọs okpọkpọk igwen ebi udun̄ kan̄ ida ibọkọ, mè itumu inu òborọ ọmọ inyi ema. ³³ Îtumu inyi ema ibe, “Ìgban̄ utọn̄, eji ebesi Jeruselem. Me ama ya, mêleke emi Gwun̄ Ebilene ikana itap me ubọk ebi ibot ngwugwa mè ebi ìjeen̄ Ikan. Ife chi mêtip emi oyerebet mkpa, mè iyaka emi itap me ubọk ebi ekarege ebi Ju, ³⁴ ebi mêsabe emi irọ inu ochak, mè icho ataak igwook emi me lek, mè isulu emi me njijan̄, mè ikpan̄ emi. Ire, egwe ita isiraka, mâjomo me mkpa.” ³⁵ Jemis melek Jọn bọn kè Jebidi eneninu me lek kè Jisọs, mè inibe ọmọ, “Ogwu Ijejeen̄, îkaan̄ inu ge eji ekiweek ibe owu òrọ ònyi eji.” ³⁶ Jisọs onenido ema ibe, “Keke ke ìre?” ³⁷ Ema enenifọọk ibe, “Eji ekiweek ibe, mgbọ owu osikweek me inyọn̄ udu ubọọn̄ me emen mkpulu kwun̄, mè owu òtele inyi eji ekweek irek me agba lek kwun̄, ene ge me agan̄ ulom, ene ge me agan̄ ujit.” ³⁸ Jisọs onenibe ema, “Enyi kperiọọn̄ inu ya enyi ekido. Ìre enyi mêkọt inwọ ujat inu ònan̄a me emen ekpen̄ ufieejit eyi mbanwọ? Sa ìre enyi mêkọt ibọkọ igwook-mun̄ eyi ikpele ufialek eyi mbabọkọ?” ³⁹ Ema efọfọọk ibe ke ema mêkọt. Jisọs onenitumu inyi ema ibe, “Enyi mêkọt inwọ ujat inu eyi mbanwọ, mè ibọkọ si igwook-mun̄ eyi mbabọkọ. ⁴⁰ Ire, emi ǹkakaan̄ unye igogobo ebi ìbekweek me agan̄ ulom n̄a mè agan̄ ujit n̄a. Irek kecha ìkup inyi ebi Awaji oneen̄be isun̄ iban.” ⁴¹ Mgbọ akọp ebi udun̄ kan̄ kechilọ enọbe ikọ ya, ema enanaan̄ ejit enenen inyi Jemis mè Jọn. ⁴² Eya orọ Jisọs ogwegwen otutuuk kiban̄ ititiin̄, mè itumu inyi ema ibe, “Enyi mîriọọn̄ ibe ke ebi ìkikpulu ido ebi ekarege ebi Ju ekisa me unye ubọk ikpulu ebi ìkup me irak kiban̄. Ikeya si, ebi ilile me ido chi ekitọ ikọ òneme ema inyi ebi ema ekikpulu. ⁴³ Ire, ìkabore ikeya me etete kinyi. Ogwu iweek irere ogwu ibot me etete kinyi, ene ya môdasi ire ogwu òkisi ikwaan̄ inyi otutuuk kinyi. ⁴⁴ Ogwu iweek irere ogwu isi, ene ya môkana ogwu usun̄ inyi otutuuk ene. ⁴⁵ Mije, Gwun̄ Ebilene me lek kan̄ ìkanu ibe ebilene enesi ikwaan̄ enyi ọmọ, ìnu inenisi ikwaan̄ inyi ebilene, mè inenisa ugwem kan̄ ikpe mkpukpe ijo inu me ibot owuwa ene.” ⁴⁶ Ema enenire Jeriko. Mgbọ Jisọs mè ebi udun̄ kan̄ mè ogbogbo ebi ene ekinan̄a me Jeriko ikije isibi, îkaan̄ enerieen̄ ge ogwu ǹnàan̄, ekigwen Batimiọs, gwun̄ kè Timiọs, òkup me agba oniin̄ ya ikibeek inu. ⁴⁷ Mgbọ înọbe ibe ke ìre Jisọs ogwu Najeret ire ogwa òkiraka me oniin̄ ya, ibebene ikitaan̄ ukpo ikibe, “Jisọs, Gwun̄ kè Debit, to emi nsan!” ⁴⁸ Ebi ene ekekikpin ọmọ ibe iriaan̄ ere. Ire, Batimiọs okpọkpọ ichieek mkpa ikitaan̄ ukpo ya inye ikibe, “Gwun̄ kè Debit, to emi nsan!” ⁴⁹ Jisọs oyayaka ikeke, mè ibe ebi udun̄ kan̄ egwen ene ya enyi ọmọ. Ema enenisi igwen ogwu ǹnàan̄ ya, mè itumu inyi ọmọ ibe, “Kayaka ìfieek owot, nan̄a keke na, ke ìbe owu ònu.” ⁵⁰ Batimiọs inọnọ ikeya, iwọwọọk ọfọnti kan̄ itọp ito, mè ito ubọk inan̄a ikeke, mè ije inu lek kè Jisọs. ⁵¹ Jisọs onenido ọmọ ibe, “Ìre keke ke oweek ibe emi ǹrọ ǹnyi owu?” Batimiọs ofọfọọk ibe, “Ogwukaan̄ n̄a, ǹkiweek imọmọọn̄ inu.” ⁵² Jisọs onenibe ọmọ, “Je fo, ke ichechieek kwun̄ îrọ inyi lek kwun̄ inye.” Mgbọ yaage Batimiọs obebene ikimọọn̄ inu, mè igọọk Jisọs ije.

¹ Mgbọ ema ekije igbet Jeruselem, ema enenire ama Betifegi melek ama Betani me inyọn̄ ogoon̄ Olifu. Jisọs oneniria ene iba me lek ebi udun̄ kan̄ ibe, ² “Ìje ìsi ama yilọ òkup me isi kinyi. Mgbọ yaage enyi enin̄be ama ya, enyi mêmun̄ gwun̄ inyinya akpan ge etobobe itele, eyi ene geege ikanenege inyọn̄. Ìtọn̄ọ ìsa ìjet emi. ³ Ire ikaan̄ ogwu ido ibe mè ìre enyi ejeje ikitọn̄ọ anam ya, ìtumu ìnyi ene ya ibe ke Okaan̄-ene okiweek, ke môyaka igwat lek iria isa inu.” ⁴ Ema enenije, mè isi imun̄ gwun̄ anam ya etobobe me agba isotu uwu ge òkup me agba oniin̄, mè itọn̄ọ. ⁵ Ebi ìkup me ere ya edodo ema ibe, “Keke orọ enyi ekitọn̄ọ anam ya?” ⁶ Ema efọfọọk ebi ife cha ike Jisọs obe ema efọọk. Ife cha etetele mè ema esa anam ya eje. ⁷ Ema enenisa inyinya akpan ya ijet Jisọs, mè iwele ekwut kiban̄ me inyọn̄, Jisọs onenene ikweek. ⁸ Owuwa ene ewewele ekwut kiban̄ me oniin̄, usini ene esọsọp otu uti mè inwan̄ me lek igwook si me oniin̄, inyi Jisọs ije me inyọn̄. ⁹ Owuwa ebi ìkije me isi kan̄ mè ebi ìkije me udun̄ kan̄ ebebene ikibọn̄ okooko, mè ikibe, “Osana! Awaji igbana ogwu ònunu me erieen̄ Okumugwem! ¹⁰ Awaji igbana mkpulu kè Debit nte kiji eyi òkinu me isi! Itọn̄ ikup inyi Awaji me emen inyọn̄ ere òbebene ichit!” ¹¹ Jisọs onenire Jeruselem, mè ije isi inin̄ Uwu Mbuban, mè ikiriraan̄ chieen̄ ikana ikikpọ inu geelek òkup me ere ya. Ire, mije egwe ojọkọbe, ọmọ mè akọp mè ene iba ebi udun̄ kan̄ egwugwu ikom isibi ifo Betani. ¹² Me òfit-iwele kan̄, mgbọ Jisọs mè ebi udun̄ kan̄ ekinan̄a me Betani inu Jeruselem, uraafiọọn̄ otataka Jisọs. ¹³ Inenikeke me ujọn̄ọ ere imun̄ uti figi ge, inwan̄ ojotbe lek, mè ije isi ikpọ mè ọmọ mômun̄ mfut me inyọn̄. Ire, mgbọ îrebe lek uti ya, ìkamun̄ mfut geege, ìyaka ire inwan̄ inwan̄ ojot lek, mije, mgbọ ya ìkare ibot-mgbọ figi okito. ¹⁴ Jisọs otutumu inyi uti figi ya ibe, “Ene geege ikayaka ìrie mfut ònan̄a me lek kwun̄ ofifi.” Ebi udun̄ kan̄ enọnọ ikọ ya îtumube. ¹⁵ Mgbọ ema erebe Jeruselem, Jisọs onenije isi inin̄ emen Uwu Mbuban, mè ibene ikilap ebi ìkinyam ewe, mè ebi ìkilep inu me emen uwu ya isibi, mè ida ikasi ebi ìkinwene ikpoko, mè ogboon̄ ebi ìkinyam elesia, ikana ichit. ¹⁶ Ìkachieek si ibe ebi ene eben inu ewe geege esa eje etibi uwu ya. ¹⁷ Ikekitumu inyi ebi ife cha ibe, “Ege me Ikpa Mbuban ibe, ‘Mêkigwen uwu n̄a uwu uriaak eyi ebi ido geelek.’ Ire, enyi eyaka ikisa uwu ya irọ ere ebi inọ ekinu inilet lek.” ¹⁸ Ebi ibot ngwugwa mè ebi ìjeen̄ Ikan enọnọ inu yi òrọrọ, mè ibene ikiweek oniin̄ ikpakpan̄ Jisọs. Ire, ema mîkaan̄ ufieek-owot me lek kè Jisọs, mije, ogbogbo ebi ene mîkaan̄ ulọk me lek kan̄, inan̄a me lek uyeke uyeke inu cha îkijeen̄. ¹⁹ Mgbọ îrebe ikakwun̄ me usen ya, Jisọs mè ebi udun̄ kan̄ enanan̄a me Jeruselem isibi. ²⁰ Me òfit-iwele kan̄, me otu ewelegwe, mgbọ ema ebenije iraka, ema emumun̄ uti figi ya ochiaakbe ire lek ugwun̄-ijọn̄. ²¹ Pita onenikeek inu òrọrọ me iyakwut òraraka, mè inigwen Jisọs ibe, “Ogwu Ijejeen̄, kpọ, uti figi ofieekbe otu inyi ya îkwu!” ²² Jisọs otutumu inyi ema ibe, “Ìkaan̄ ichechieek me lek Awaji. ²³ Me atikọ, ǹkitumu inyi enyi ibe, ire ene itumu inyi ogoon̄ yi ibe, ‘Jibi nan̄a me akpat, mè si rọn̄ me okwaan̄,’ mè ire ene ya ichieek ibe ke inu ọmọ otumube môrọ, mêrọ si ikeya inyi ene ya, mè ire ìkakaan̄ ejit iba. ²⁴ Eya orọ mgbọ geelek enyi ekibeek Awaji inu, ìchieek ibe ke enyi mîbọkọ inu ya, ke Awaji mônyi enyi si inu ya enyi ebeekbe. ²⁵ Mgbọ enyi isikiriaak uriaak, ìtele inu geelek ene orọbe enyi ilọ ìnyi ene ya, inyi Nte kinyi ogwu òkup me emen inyọn̄ itele si nrọ-nlọ kinyi inyi enyi. [ ²⁶ Ire owu òkatele nrọ-nlọ ene orọbe owu ìnyi ene ya, Nte kwun̄ ogwu òkup me emen inyọn̄ ìkpotele si nrọ-nlọ eyi owu orọbe inyi owu.]” ²⁷ Jisọs mè ebi udun̄ kan̄ enenigwu ikom inu Jeruselem. Mgbọ Jisọs okije me emen Uwu Mbuban, ebi ibot ngwugwa, mè ebi ìjeen̄ Ikan, mè ebi ugane ama, enunu me lek kan̄, ²⁸ mè inido ọmọ ibe, “Ìre kpasi unye ke osa ikirọ otutuuk inu chi? Ìre ekene onyi owu unye yi?” ²⁹ Jisọs onenitumu inyi ema ibe, “Emi mâdo enyi ikọ ge. Ire enyi ifọọk ikọ ya, mâtumu unye nsabe ikirọ inu chi inyi enyi. ³⁰ Ìre unye eyi Jọn okisa igwook ene mun̄ ìnan̄a me owa? Ìre ìnan̄a me ubọk Awaji, sa ìre ìnan̄a me ubọk ebilene? Ìtumu ìnyi emi nu.” ³¹ Ema eninin̄ oru me lek kiban̄, mè ibe, “Ire eji ifọọk ibe ke ìnan̄a me ubọk Awaji, môdo eji ibe mè ìre keke orọ eji kpechieek ikọ kè Jọn. ³² Sa ìre eji mêfọọk ibe ke ìnan̄a me ubọk ebilene mọnọ?” (Ema mîkaan̄ ufieek-owot me lek ebi ene, mije, otutuuk ene mîchieek ibe ke Jọn ìre ogwu nriran.) ³³ Eya orọ, ema efọfọọk Jisọs ibe ke ema kperiọọn̄. Jisọs obebe ema, “Emi si m̀kpatumu ere unye eyi nkisa irọ inu chi geelek onan̄abe inyi enyi.”

¹ Jisọs onenito urọk ge inyi ema ibe, “Îkaan̄ mgbọ ge ene ge owopbe uko gerep, mè inama ọgọ ikana, mè irọkọ udọn̄ ere ebekichimi mun̄ isibi me lek mfut gerep cha, mè inama uwu-oket ere ebekikup ibem uko ya, mè inisa uko ya inyi ebi ikwaan̄ uko ibe ekekpọ chieen̄ me lek, mè inan̄a isi ije me ofifi ido. ² Mgbọ gerep cha oren̄ebe, ogwukaan̄ uko ya oneniria ogwu usun̄ kan̄ ge ibe isi lek ebi ikwaan̄ uko cha isi ibọkọ uche mfut eyi òrere ọmọ lek isa ijet ọmọ. ³ Ebi ikwaan̄ uko cha etetet ogwu usun̄ ya isut, mè irieen̄ itap me oniin̄, ukpọk ubọk. ⁴ Ogwukaan̄ uko ya oyayaka iria ofifi ogwu usun̄. Ebi ikwaan̄ uko cha etetet isulu ibot ibum, mè irọ ọmọ inu esip. ⁵ Ogwukaan̄ uko ya oneniria si ofifi ogwu usun̄. Ebi ikwaan̄ uko cha etetet ogwugwa ikpan̄. Ikeyi ke ogwukaan̄ uko ya okpọkpọ ikiria ebi usun̄ kan̄. Ife cha esusut usini, mè ikpan̄ usini. ⁶ “Ene ge òsisik iraria ìre gwun̄ ogwukaan̄ uko ya okaan̄be. Gwun̄ ya ìre gwun̄ îmabe enenen. Ọmọ ore ogwu mgburudun̄ îriabe isi lek ebi ikwaan̄ uko cha. Ekiket kan̄ ìre ke ife cha mênyi gwun̄ kan̄ ulibi. ⁷ “Ire, mgbọ ebi ikwaan̄ uko cha emun̄be gwun̄ ya okinu, ema eninin̄ oru me lek kiban̄ ibe, ‘Kpọ gwun̄ ogwukaan̄ uko ya okinu yilọ! Isinu, eji etet ekpan̄, inyi irot ìbokaan̄ ikana ire eyi kiji.’ ⁸ Ikeyi ke ema etet gwun̄ ogwukaan̄ uko ya ikpan̄, mè itaba nkwukwu kan̄ isibi me uko ya.” ⁹ Jisọs onenido ebi ibot ebi Ju cha ibe, “Ìre enyi ekeek ibe ke ogwukaan̄ uko ya ìborọrọ? Ìbonunu inikpan̄ ebi ikwaan̄ uko cha isan̄a, mè isa uko gerep kan̄ ya inyi ofifi ebi ikwaan̄ uko. ¹⁰ Ìre enyi kpefuk me Ikpa Mbuban ibe, ‘Ewuuk ebi ìnama uwu ejitbe, ọmọ oyaka inikana ata ibot uwu. ¹¹ Eyi ìre inu Okumugwem orọbe, inu yi îjaan̄ enenen me chieen̄ kiji.’?” ¹² Ebi ibot ebi Ju cha erọriọọn̄ ibe ke ìre ema ke Jisọs okitumu ikọ chi ibak. Eya orọ ema ekekiweek oniin̄ ebesa itet ọmọ me ere ya. Ire, ukpook ebi ene ìkachieek. Ema ejujuuk ọmọ itele, mè isibi ifo. ¹³ Ebi ibot ebi Ju cha eneniria usini ebi Farisi mè usini ebi ìkigọọk Erọdu ibe esi eleke Jisọs ikọ me otu. ¹⁴ Ife chi enunu me lek kè Jisọs, mè inibe ọmọ, “Ogwu Ijejeen̄, eji mîriọọn̄ ibe ke owu ìre ogwu òkitumu atikọ, òkakilibi ene chieen̄, òkakikpọ ene geege chieen̄ me isi. Kpan̄asi ikeya, owu òkijeen̄ ebi ene oniin̄ Awaji me atikọ. Tumu nyi eji nu, ìre îgbe ibe eketip otitip ido enyi ogwu Sisa, sa ìre ìkagbe? ¹⁵ Ìre eji eketip, sa ìre eji ekakitip?” Jisọs orọriọọn̄ ejit uleke kiban̄, mè ido ema ibe, “Ìre keke orọ enyi ekitip ufe inyi emi? Ìsa dinari ge ìjet emi m̀kpọ-nu.” ¹⁶ Ema esasa inu. Jisọs onenido ema ibe, “Ìre ogugo kè ekene mè erieen̄ kè ekene ire echi me lek ikpoko yi?” Ema efọfọọk ọmọ ibe ke ìre eyi ogwu Sisa. ¹⁷ Jisọs obebe ema, “Ìsa inu ogwu Sisa ìnyi ogwu Sisa, mè ìsa eyi Awaji ìnyi Awaji.” Mije ufọọk-otu keyi, ukpook kè Jisọs otetet ema enenen. ¹⁸ Ebi ekigwen ebi Sadusi, ebi ìkibe ke ene kpekijomo me mkpa, eneninu me lek kè Jisọs, mè inibe ọmọ, ¹⁹ “Ogwu Ijejeen̄, Mosis ìnyi eji Ikan ibe, ire ene ikwu itele ogwu nwa, ìkabon gwun̄, mè ngwan̄ ene ya imọnọ nwakpa ngwan̄ kan̄ okwube itele ya me lek nwa, mè ibon bọn me owot inyi ngwan̄ kan̄ ogwu òkwukwu. ²⁰ Me ere ngwan̄ ebirieen̄ jaaba ekupbe, ogwu adasi me etete kiban̄ onenikaan̄ nwa, mè ikwu itele, ìkabon gwun̄. ²¹ Ogwu òso iba onenimọnọ nwakpa ya me lek nwa, mè ikwu si itele, ìkabon gwun̄. Ikeya ke ogwu òso ita orọ si. ²² Ikeya si ke otutuuk ebi ngwan̄ kechilọ cha erọ. Ema ene jaaba cha erere olom inyi ogwu enenwaan̄ ya iso, mè ikwaan̄ ita, kpebon gwun̄ me owot ogwu enenwaan̄ ya. Me mgburudun̄ kan̄, ogwu enenwaan̄ ya si okwukwu. ²³ Me mgbọ ebi ìkwukwu mêjomobe me mkpa, ìre ogwu enenwaan̄ yi ìbore nwa inyi ekene me etete ebi ngwan̄ jaaba cha, mije, otutuuk kiban̄ mîkaan̄ ọmọ me lek nwa iso?” ²⁴ Jisọs ofọfọọk ema ibe, “Berebet ke enyi kperiọọn̄ inu egebe me Ikpa Mbuban, enyi kperiọọn̄ si unye Awaji okaan̄be. Mkpọ si enyi ekije ilọ! ²⁵ Me mgbọ ijojomo me mkpa, ebilene ebeluk kubọk ebi osat Awaji ìkup me emen inyọn̄ ekiluk. Kpebekaan̄ olom, kpebekaan̄ si nwa. ²⁶ Ire me lek ikọ ebi ìkwukwu ijojomo me mkpa, ìre enyi kpefuk me ikpa Mosis ogebe, ere òtutumu ikọ òfolek ukan̄ òlolomo me lek uti, ike Awaji otumube inyi Mosis ibe, ‘Emi ìre Awaji kè Ebereham, mè Awaji kè Ajiki, mè Awaji kè Jekọp?’ ²⁷ Awaji ìre Awaji ebi ìkup me ugwem, ìkare Awaji ebi ìkwukwu. Enyi mîje ilọ enenen!” ²⁸ Ike mgbọ ya, ene ge me lek ebi ìjeen̄ Ikan înọ ema ekiwut ifan̄a ya, mè imun̄ ibe ke Jisọs îfọọk ebi Sadusi cha itat, mè inido Jisọs ibe, “Me etete otutuuk Ikan, ìre Ikan eyi owa okup me uyọt ichit?” ²⁹ Jisọs ofọfọọk ọmọ ibe, “Ikan eyi òkukup me uyọt igak otutuuk Ikan ìre eyi òbe, ‘Ebi Ijeren, ìgban̄! Okumugwem Awaji kiji, ìre Awaji ge gaalek. ³⁰ Ma Okumugwem Awaji kwun̄ me otutuuk ejit kwun̄, mè otutuuk ibot-ejit kwun̄, mè otutuuk ekiket kwun̄, mè otutuuk unye kwun̄.’ ³¹ Ikan eyi òkup me uyọt igọọk eya ìre eyi òbe, ‘Ma ebilene ogbo kwun̄ kubọk omabe akpalek kwun̄.’ Kpunu ofifi Ikan òmimin igak Ikan iba kechi.” ³² Ogwu òjeen̄ Ikan ya obebe Jisọs, “Ogwu Ijejeen̄, owu ofọọk itat. Owu otumu atikọ ibe ke Okumugwem gaalek ore Awaji; ke kpunu ofifi Awaji òkukup isan̄a me lek Okumugwem; ³³ ke ene môma Awaji me otutuuk ejit kan̄, mè otutuuk ekiket kan̄, mè otutuuk unye kan̄, mè ima si ogwu melek kan̄ kubọk îmabe lek kan̄; ke isusun̄ Ikan iba chi îkup me uyọt igak isasa anam mè ngwugwa òkup esese esese inigwa inyi Awaji.” ³⁴ Jisọs omumun̄ ibe ke ene ya îgobo ikọ ya itet, mè ifọọk inen, mè itutumu inyi ọmọ ibe, “Owu òkajọn̄ọ ere me ininin̄ mkpulu eyi Awaji.” Eya iraraka, kpunu ene geege òyayaka ikọt isan̄a mgbugba me lek ido Jisọs ikọ ofifi. ³⁵ Mgbọ Jisọs okijeen̄ inu me Uwu Mbuban ya, inenikido ibe, “Ìre ebi ìjeen̄ Ikan ejeje ikitumu ibe ke ogwu Mesaya (òrere ogwu Awaji otoon̄be ubọk me ibot) ìbonan̄a me owot iman kè Debit isibi? ³⁶ Debit me lek kan̄ îben nriran me unye Ekwukwu Mbuban, mè itumu ibe, ‘Okumugwem ìtumu inyi Okaan̄ n̄a ibe, “Kweek me agan̄ ubọk ulom n̄a, mege ire mgbọ mârọbe inyi ebi ochicha kwun̄ ekana inu ibene ukot enyi owu.” ’ ³⁷ Ìre ogwu Debit me lek kan̄ ogwenbe Okaan̄-ene ìbojeje iyaka inire gwun̄ ònan̄a me owot iman kè Debit isibi?” Ogbogbo ebi ene ìkukup me ere ya ekekigban̄ ikọ kè Jisọs, mè ikibele ejit me lek. ³⁸ Ike Jisọs okijeen̄ inu me ere ya, ikekitaba ebi ene ubọk me utọn̄ ibe, “Ìgbala chieen̄ me lek ebi ìjeen̄ Ikan, ebi ìkinwọọn̄ isasa ujọn̄ọ ọfọnti kiban̄ ije ikana ere, mè ikima ibe eketọp ema ata amọn eyi umin me ere ene ewabe. ³⁹ Ema ekima ikwekweek me inyọn̄ ikasi esun̄be inyi ebi ibot me uwu ntitiin̄, mè ikwekweek me irek umin me ere geelek ekirie ijọk, ⁴⁰ mè ikima si ifefeen̄ ebi nwakpa ibọkọ uwu kiban̄ isak, mè ikinwọọn̄ irariaak ujọn̄ọ uriaak isa ikifiaan̄ ebi ene ibe ke ema mîriọọn̄ Awaji igana. Osusut kiban̄ obomin igak.” ⁴¹ Jisọs onenisiki ikweek iriaak me ere ekitap ikpoko me emen Uwu Mbuban ya, mè ikikpọ ubọk ebi ene ekinu initap ikpoko. Owuwa ebi ìkakaan̄ ikpoko ekekinu initap owuwa ikpoko. ⁴² Nwakpa ge, ogwu ugbọọn̄, ojeje inu, mè initap asabọn ikpoko iba (echi otu ewe kiban̄ osipbe enenen igak ata ikpoko ge). ⁴³ Jisọs onenigwen ebi udun̄ kan̄ ititiin̄, mè itumu inyi ema ibe, “Me atikọ, ogwu ugbọọn̄ nwakpa yi otap ikpoko iwa igak otutuuk ene. ⁴⁴ Mije, ebibilọ etap inu òsisik me lek inu ubọọn̄ kiban̄. Ire, ogwu enenwaan̄ yi ìchachan otutuuk uwu kan̄ isa inu initap, igọọk me lek irek ugbọọri kan̄.”

¹ Mgbọ Jisọs okinan̄a me Uwu Mbuban isibi, ene ge me lek ebi udun̄ kan̄ onenibe ọmọ, “Ogwu Ijejeen̄, kpọ ubọk ewuuk òkup me lek uwu chi omiin̄be ikeke! Kpọ ubọk uwu chi osabe ijaan̄, mè ikeke ikeya me ijọn̄ jìk!” ² Jisọs onenitumu inyi ọmọ ibe, “Ikpele unye uwu chi enyi emun̄be, mêgbugbọ otutuuk igwook me ijọn̄, kpunu ewuuk geege òboyaka itoon̄ me inyọn̄ ge.” ³ Jisọs onenije inene inyọn̄ ogoon̄ Olifu, mè isiki ikweek me ere ya iyaka isi kan̄ ikikpọ Uwu Mbuban. Pita mè Jemis mè Jọn mè Anduru enwenween̄ lek ije inu lek kan̄, mè inido ọmọ ibe, ⁴ “Tumu nyi eji nu, ìre mgbọ owa ke inu chi oborọ? Ìre kpasi inu ijejeen̄ ke eji ebesa iriọọn̄ mgbọ inu chi oborọ iso?” ⁵ Jisọs ofọfọọk ema ibe, “Ìkup me mbem, ikachieek ibe ene geege ifiaan̄ enyi. ⁶ Owuwa ene mênu me erieen̄ n̄a, ogwu ikup môkitumu ibe ke ọmọ ore Karais ya. Sa me ikeyi, ife chi mêfiaan̄ owuwa ene ifiin̄. ⁷ Enyi isikinọ okput akọn̄ me agba lek kinyi, mè ikinọ si etip akọn̄ òkitim me ujọn̄ọ ere, ikatet ukpook, mije, òjelek inu òkup ikeya môrọ, ire, òta mgbọ ìkpore-nu. ⁸ Ido môtim akọn̄ melek ido, ama môtim akọn̄ melek ama. Sikisik ijọn̄ môkup me owuwa ere, owuwa akan̄ môkup si. Inu chi geelek ìbore gaalek ibebene ujaralek cha, ìbokup kubọk uman obene ikifiak nwa-owot. ⁹ “Ire, ìkup me mbem-lek, mije, mêtet enyi, mè isa enyi isi uwu oyerebet, mè isulu enyi me emen uwu ntitiin̄. Enyi mêkeke me isi ebi ubọọn̄ mè ebi ibot mkpulu mije n̄a, mè ikilook ema ata etip. ¹⁰ Ire, mêdasi ilook ata etip ikana otutuuk ido geelek. ¹¹ Mgbọ geelek mêtetbe enyi isa isi uwu oyerebet, ikasisaak lek kinyi me lek inu enyi ebetumu. Ire, mgbọ ya isire, ìkpọkpọ ìtumu inu geelek Awaji môtapbe enyi me otu ibe enyi etumu, mije, ikọ enyi mêtumube ìkabore ikọ otu kinyi, ìbore ikọ eyi Ekwukwu Mbuban obokitumu. ¹² “Ngwan̄ môsa ogwu ngwan̄ inyi ekpan̄. Ute môsa ogwu gwun̄ inyi ekpan̄. Nsabọn mênye ibot inyi ebi ute mè ebi uga, mè irọ inyi ekpan̄ ema. ¹³ Otutuuk ene mêcha enyi mije enyi echieekbe me lek n̄a. Ire, ogwu geelek òkekeke inye ire mgburudun̄, ogwa ke Awaji obonyan̄a. ¹⁴ “Enyi isimun̄ òchichaka inu eyi ichep okekebe me ere ikagbege ibe ikeke (ogwu òkifuk, itet inu îfukbe), mgbọ ya, ebi ìkup me Judia elibi efon inyọn̄ ogoon̄. ¹⁵ Ikaan̄ ogwu ikup me inyọn̄ otoon̄-uwu kan̄, ikasibi ijọn̄ ìnin̄ uwu ìsi ìmọnọ inu kan̄ geege. ¹⁶ Ikaan̄ ogwu ikup me uko, ikagwu ìkom ìnu uwu ìnimọn̄ọ ọfọnti kan̄. ¹⁷ Môfieek enenen me lek ebibaan̄ ebi ìkup me owot, mè ebi ìkaan̄ nsek nsabọn ìkinwọ ebe me ubọk mgbọ usen cha môrebe. ¹⁸ Ìriaak Awaji, inyi inu yi ikarọ me mgbọ utọọk, ¹⁹ mije, ujaralek òbokup me usen cha mômin enenen. Òjelek kan̄ ìkararak ìkup bene me karake Awaji orombe linyọn̄ na re mgbọ keyi. Òjelek kan̄ ìkpokukup si mege linyọn̄ òta. ²⁰ Ire, Awaji îsan̄a usini me lek usen cha igele, mije ebi îgobobe inyi lek kan̄. Ire ìkare ikeya, kpunu ene geege ogwu mokup me ugwem itibi ufialek cha. ²¹ Mgbọ ya, ire ikaan̄ ogwu itumu inyi enyi ibe, ‘Ìkpọ ke Karais ire ogwu,’ mè ìre ‘Ke Karais ire ogwulọ,’ ikachieek. ²² Mije, owuwa Karais ataak mè owuwa ebi nriran ataak mêkana isibi, mè inijeen̄ owuwa inu ijejeen̄, mè ikirọ owuwa inu ukechieen̄ isa ikifiaan̄ ebi ene. Ire ikup mfufet, ema mêfiaan̄ si ebi Awaji ogobobe inyi lek kan̄. ²³ Eya orọ, ìgbala chieen̄! Nra isa ata mgbọ itumu inu chi geelek inyi enyi. ²⁴ “Mgbọ usen ujaralek cha isiraka isan̄a, ‘Ura môdun, onyan̄ ìkpoyaka itoon̄, ²⁵ ebi kè ntoronyan̄ mênan̄a me isinyọn̄ irurọn̄ọ. Ikpele inu geelek òkinyi utoon̄ me isinyọn̄ môsisik, mè ijibi inan̄a me akpat.’ ²⁶ “Me mgbọ ya, ebilene mêmun̄ Gwun̄ Ebilene okinu me emen oduku inyọn̄, me ikpele unye mè umin mè uja. ²⁷ Me mgbọ ya, môria ebi osat kan̄ ibe ekana me agan̄ geelek me otutuuk linyọn̄, me agan̄ inyọn̄, mè agan̄ osiki, mè agan̄ mbum-ura, mè agan̄ ichep-ura, esi ekpulu ebi ọmọ ogobobe inyi lek kan̄ etitiin̄. ²⁸ “Ìsa uti figi ìkween̄ inu. Uti figi isigen̄ oka inwan̄ isan̄a, mè inibene igwook ayaya inwan̄ me lek, enyi mîra iriọọn̄ ibe ke mgbọ ura îgbet. ²⁹ Ikeya si, enyi isimun̄ otutuuk inu chi ntumube okirọ, ìriọọn̄ ibe ke inunu Gwun̄ Ebilene îgbet; ke îra irere me otu isotu kinyi. ³⁰ Me atikọ, ǹkitumu inyi enyi ibe ke ebi ukot keyi kpebekwaan̄ isan̄a otutuuk inu chi môrọbe iso. ³¹ Inyọn̄ mè ijọn̄ môraka, ire, ikọ n̄a ìkakaan̄ mgbọ iraraka kubọk ge. ³² “Ire, kpunu ene geege òrọriọọn̄ usen ya, mè mbubak mgbọ ya mgbọ Gwun̄ Ebilene môgwube ikom inu. Ebi osat Awaji ìkup me emen inyọn̄ me lek kiban̄ kperiọọn̄. Emi Gwun̄ Awaji ǹkariọọn̄, îtata Nte n̄a gaalek oriọọn̄. ³³ Eya orọ, ìgwọk chieen̄, mè ìkibem, mije, enyi kperiọọn̄ mgbọ mgbọ ya môrebe. ³⁴ Usen ya ìbokup kubọk ene obosi ije, mè ikana uwu kan̄ itap me ubọk ebi usun̄ kan̄, mè inyi ema ikwaan̄ ema eberọ me ene me ene, mè itumu inyi ogwu òkibem isotu ibe igbala chieen̄ ibem ere. ³⁵ “Eya orọ, ìkup me mbem, mije, enyi kperiọọn̄ mgbọ ogwukaan̄ uwu oboka, mè ìre ìboka me ikakwun̄, mè ìre ejit eririeen̄, mè ìre mgbọ unọn môkpọkbe, mè ìre me agan̄ egwe. ³⁶ Ire ogwukaan̄ uwu ikana isibi me uwuuk-lek, ikachieek ibe inimun̄ enyi me ilaak. ³⁷ Inu chi geelek nkitumu inyi enyi, ǹkitumu inyi otutuuk ene. Ìkup me mbem.”

¹ Egwe iba osik sabum ijọk Iraraka mè ijọk Fituru Ekatapge Olat me lek. Ebi ibot ngwugwa mè ebi ìjeen̄ Ikan enenikiweek ubọk ema mêlekebe Jisọs, mè itet ikpan̄. ² Ire, ema etutumu me lek kiban̄ ibe ke ìkagbe ibe ire me mgbọ ijọk ya, inyi ebi ene ekato etim. ³ Jisọs onenije isi Betani, mè ikup me uwu kè Saimọn, ogwu òfafiak orukan̄ inyakpa. Mgbọ îkirie inorie, ogwu enenwaan̄ ge osasa ojot ojot iko aran̄ unye otu ewe ekigwen nâdì, òkidun̄u utop olu ikaan̄ me ubọk inin̄ uwu ya, mè inifan̄a ebek iko ya, mè iben aran̄ ya ikana igwook Jisọs me ibot. ⁴ Usini ebi ene ìkup me ere ya enanaan̄ ejit, mè ikinunuun̄ me lek kiban̄ ibe, “Ìre keke orọ ogwu enenwaan̄ yi ijijit aran̄ yi ikeyi? ⁵ Mêkọt inyam aran̄ yi efit dinari ita (eyi òrere otu ifuk ikpoko mêkọtbe isa ikpe ogwu ikwaan̄ ge acha ge), mè esa ikpoko ya eche enyi ebi ugbọọn̄.” Ema ebebene ikikan̄ inu inyi ogwu enenwaan̄ ya ijo ijo. ⁶ Jisọs otutumu inyi ema ibe, “Ìtele ogwu enenwaan̄ yi, ikayaka ìsisaak, mije, îrọ inu òjajaan̄, mè igbe inyi emi. ⁷ Enyi mêkọt ikitap ubọk inyi ebi ugbọọn̄ mgbọ geelek, mije, ebi ugbọọn̄ melek kinyi ebekikup mgbọ geelek. Ire, emi ǹkabagọọk enyi ikup mgbọ geelek. ⁸ Ogwu enenwaan̄ yi îrọ inu îkọtbe, mije, ìgwook emi aran̄ ya me lek isasa ibala akpalek n̄a iban mgbọ mêfuun̄be emi. ⁹ Me atikọ, ǹkitumu inyi enyi ibe, ere geelek mêlookbe ata etip ikana ire me otutuuk linyọn̄, mêtumu inu ogwu enenwaan̄ yi orọbe igbaalek, inyi ekesa ekeek ogwu enenwaan̄ yi.” ¹⁰ Mgbọ ya, Judas Isikariọt, ene ge me lek ebi akọp mè ene iba ebi udun̄ kè Jisọs, onenisi lek ebi ibot ngwugwa isi igọọk inin̄ oru ubọk ọmọ obosa ileke Jisọs inyi ema. ¹¹ Inu îtumube ya obebele ife cha ejit. Ema echechieek use ibe ke ema mênyi ọmọ ikpoko. Eya orọ, Judas obebene ikiweek mgbọ irek môsibibe inyi ọmọ isa Jisọs initap ema me ubọk. ¹² Me adasi usen ijọk eyi Fituru Ekatapge Olat me lek, òrere usen ekikpan̄ arọọn̄ ekisa irie ijọk Iraraka, ebi udun̄ kè Jisọs enenido Jisọs ibe, “Ìre ere owa ke eji ebesi irọ inorie ijọk Iraraka inyi owu?” ¹³ Jisọs onenisan̄a ene iba me lek kiban̄ iria ibe, “Ìsi emen ama yi, ke enyi mêchichini enerieen̄ ge obenbe ugọn̄ mudim. ¹⁴ Ìgọọk ene ya ìsi ìre uwu, mè ìtumu ìnyi ogwukaan̄ uwu ya ibe ke Ogwu Ijejeen̄ ibe mè ìre omọmọ agwut ere ọmọ mè ebi udun̄ kan̄ ebekup irie inorie ijọk Iraraka? ¹⁵ Ene ya môjeen̄ enyi agwut ilile ge ebalabe, mè inen̄e isun̄ isan̄a me uwu inyọn̄. Ìrọ inorie ya ìsun̄ ìban emi me ere ya.” ¹⁶ Ebi udun̄ kan̄ ene iba cha ejeje inin̄ emen ama ya, mè imun̄ inu geelek ike Jisọs otumube, mè irọ inorie ijọk Iraraka ya isun̄ me inyọn̄ ikasi. ¹⁷ Me ikakwun̄ usen ya, Jisọs mè akọp mè ene iba ebi udun̄ kan̄ enenikweek irek me uwu ya. ¹⁸ Mgbọ ema ekweekbe me lek ikasi, mè ikirie inorie, Jisọs onenitumu inyi ebi udun̄ kan̄ ibe, “Me atikọ, ene ge me lek kinyi, ogwu òkigọọk emi igbaan̄ irie inorie mgbọ yi, môleke emi inyam.” ¹⁹ Ejit ofefieek ebi udun̄ kan̄ cha enenen, ogwu ikup odo òbe, “Ke ìkare emi wa?” ²⁰ Jisọs ofọfọọk ema ibe, “Îre ene ge me lek kinyi akọp mè ene iba, ogwu òkigọọk emi igbaan̄ ijiin̄ fituru me emen alala usun̄ ge me inyọn̄ ikasi mgbọ yi oboleke emi inyam. ²¹ Gwun̄ Ebilene môkwu mkpa kubọk egebe ibak ọmọ me Ikpa Mbuban. Ire, môfieek inyi ene ya ogwu môlekebe emi Gwun̄ Ebilene inyi mè ekpan̄. Kè ònwọn ire kpememaman ene ya.” ²² Mgbọ ema ekirie inorie ya, Jisọs omọmọnọ fituru, mè inyi Awaji itọn̄, mè ikpọkọ, mè isa inyi ebi udun̄ kan̄, mè itumu inyi ema ibe, “Ìbọkọ! Eyi ìre akpalek n̄a.” ²³ Ikeya si ke îben ekpen̄ mè miin̄ me emen, mè inyi Awaji itọn̄, mè iyaka itap me ubọk ebi udun̄ kan̄. Ema otutuuk ene egbagbaan̄ inwọ miin̄ me emen ekpen̄ ya. ²⁴ Jisọs onenitumu inyi ema ibe, “Eyi ìre eje n̄a eyi egwookbe mije ibot owuwa ene, eje n̄a eyi esabe irọ inyan̄a-ibot eyi Awaji onyan̄abe inyi ebilene, inye. ²⁵ Me atikọ, emi m̀kpayaka inwọ miin̄ keyi ofifi mege ire usen mâkpọkbe inwọ eyi ayaya me mkpulu eyi Awaji.” ²⁶ Mgbọ ema eriebe inorie ya isan̄a, ema enenikọt okwa itọn̄ Awaji, mè inan̄a isibi ije ifo inyọn̄ ogoon̄ Olifu. ²⁷ Jisọs onenitumu inyi ebi udun̄ kan̄ ibe, “Otutuuk kinyi mêyat itele emi, kubọk egebe me Ikpa Mbuban ibe ke Awaji ìbe, ‘Mâkpan̄ ogwu òkpukpo arọọn̄, urum arọọn̄ môyiyala.’ ²⁸ Ire, nsijomo me mkpa, mâsi ikup me Galili iban enyi.” ²⁹ Pita otutumu inyi Jisọs ibe, “Ìrere otutuuk ene eyayat itele owu, emi m̀kpatele owu.” ³⁰ Jisọs otutumu inyi Pita ibe, “Kpọ, me eririeen̄ cherekeyi, sabum unọn obosan̄a amọn iso mgbọ iba, owu me lek kwun̄ môjit emi mgbọ ita.” ³¹ Ire, Pita okekitumu inye ibe, “Emi m̀kpajit owu kubọk ge, ìrere ebegbagbaan̄ emi melek kwun̄ ikpan̄ mgbọ ge.” Ikeya si ke otutuuk ebi udun̄ kan̄ kechilọ etumu. ³² Jisọs mè ebi udun̄ kan̄ eneninan̄a ije isi ere ekigwen Gesemeni. Inenitumu inyi ema ibe, “Ìkup ìban emi, mè ǹsi ǹriaak uriaak,” ³³ mè isa Pita mè Jemis mè Jọn igbaalek ije inan̄a. Ufieejit mè ufieek-owot obebene ikikeme ọmọ. ³⁴ Itutumu inyi ema ene ita cha ibe, “Ufieejit òkup emi me ejit îmin enenen ire lek môkọtbe ikpan̄ emi. Ìkup me ere keyi, mè ìkup me mbem.” ³⁵ Inenije ifo isi sọnja, mè irọn̄ inyana me ijọn̄, mè iriaak uriaak ibe, ire ikup mfufet, mè Awaji iben ufialek eyi mgbọ ya iraka ọmọ me ibot, ³⁶ mè ikitumu ibe, “Jei, Nte n̄a! Kpunu inu geege òkigak owu irọrọ. Ben ekpen̄ ufialek yi san̄a emi me lek. Ire, ikare me nkeek eyi n̄a. Nkeek eyi kwun̄ irọ!” ³⁷ Irariaak uriaak yi isan̄a, inenigwu ikom ije inu, mè inimun̄ ebi udun̄ kan̄ ene ita cha ekilaak, mè itumu inyi Pita ibe, “Saimọn, ìre òkilalaak? Ìre owu òkpokọt itop chieen̄ ukpọk ukpọk lek mbubak mgbọ ge gaalek? ³⁸ Ìkup me mbem, mè ìkiriaak uriaak, inyi enyi ekarọn̄ ìnin̄ me ntọ-mkpọ. Mmun̄ ibe ke ekwukwu kinyi îbem lek me atikọ, ire, akpalek kinyi îwọ.” ³⁹ Inenitele ema, mè ije isi iriaak uriaak yaage îriaakbe me adasi mgbọ, ⁴⁰ mè iyaka inu òso mgbọ iba, mè inimun̄ si ema ekilaak, mije, ilaak îtet ema enenen. Ema si kperọriọọn̄ inu ebeyaka itumu inyi ọmọ. ⁴¹ Jisọs ojeje, mè ikpọk inu òso mgbọ ita, mè ibe ema, “Ìre enyi ekilalaak isiki efuuk si ire mgbọ keyi? Îkem! Ìbolo chieen̄ ke mgbọ ya îre! Ìkpọ, mêniyaka emi Gwun̄ Ebilene itap me ubọk ebi ijo. ⁴² Ìnan̄a ìkeke ìnije ke ogwu òboleke emi ire ogwulọ òkinu.” ⁴³ Jisọs òkitutumu ikọ ya me otu, Judas, ene ge me lek akọp mè ene iba ebi udun̄ kan̄, okakana isibi, ọmọ melek urum ebi ene ebi ebi ibot ngwugwa, mè ebi ìjeen̄ Ikan, mè ebi ugane ama eriabe ibe enetet Jisọs. Ife chi eje melek oge etim mè ibet me ubọk inu ere ya. ⁴⁴ Sabum ema enube, Judas îwuuk lek itumu inyi ebi melek kan̄ cha ibe ke ene geelek ọmọ môkanabe ikat ore ene ya, mè ebibi etet esa eje, mè egwuun̄ chieen̄ me lek. ⁴⁵ Mgbọ yaage Judas orebe ere ya, iraraka isi ge isi lek kè Jisọs, mè itọp ọmọ amọn ibe, “Ogwu ijejeen̄,” mè ikana ọmọ ikat. ⁴⁶ Ebi ife cha eninin̄ mgbọ yaage gìrìrìm, mè itet Jisọs. ⁴⁷ Ene ge me lek ebi udun̄ kè Jisọs ìkekeke me ere ya owọwọọk oge etim kan̄, mè ikep ogwu usun̄ ogwu ibot ebi ibot ngwugwa, utọn̄ ofefieek inan̄a. ⁴⁸ Jisọs okekido ebi ife cha ibe, “Ìre emi ìre ogwu òkichiin̄ inọ me afa, eyi enyi esabe oge etim, mè ibet isibi inu ibenitet emi? ⁴⁹ Ke ǹkigọgọọk enyi ikup me Uwu Mbuban usen geelek ikijeen̄ inu, enyi kpetet emi. Inu egebe me Ikpa Mbuban ìkaan̄ irọrọ iso ike egebe.” ⁵⁰ Otutuuk ebi udun̄ kan̄ eyayaak itele ọmọ, mè ilibi ichieen̄ ita kpai. ⁵¹ Gwun̄ enerieen̄ ge òwa me ere ya òsasa ekwut gaalek ikana ichit lek, mè ikije igọọk Jisọs me udun̄. Ebi ife cha egọgọọk gwun̄ enerieen̄ ya ibetet. ⁵² Ifafiala me ubọk kiban̄, mè ifiin̄ ekwut kan̄ itele, mè ilibi njak njak ifo. ⁵³ Ebi ife cha esasa Jisọs isi uwu ogwu ibot ebi ibot ngwugwa. Otutuuk ebi ibot ngwugwa mè ebi ugane ama mè ebi ìjeen̄ Ikan mîtitiin̄ me uwu ya. ⁵⁴ Pita okekije me ujọn̄ọ ere igọọk ema me udun̄, mè igọọk iraka inin̄ emen oyet egep ogwu ibot ebi ibot ngwugwa, mè isi igọọk ebi ìkibem ere ikup ikigwele ukan̄. ⁵⁵ Ebi ibot ngwugwa mè otutuuk ebi Oru ebi Ju ekekiweek inu ata-ikọ ebesa itoon̄ Jisọs uraamọn, inyi ekọt ekpan̄ ọmọ, ire, ema kpekọt ikaan̄. ⁵⁶ Owuwa ebi ata-ikọ mînu inikeke ataak ataak ata-ikọ ikeme Jisọs, ire, ikọ kiban̄ ìkaje ìkike. ⁵⁷ Usini ebi ìkup me ere ya enanan̄a ikeke, mè ikan̄ ataak ikeme Jisọs ibe, ⁵⁸ “Eji mînọ ene yi okitumu ibe ke ọmọ môgbugbọ Uwu Mbuban yi eyi ebilene enamabe, mè isa egwe ita inama ofifi eyi ikarege eyi ubọk ebilene onamabe.” ⁵⁹ Ikọ ebi ata-ikọ kechi si ìkaje lek ge. ⁶⁰ Ogwu ibot ebi ibot ngwugwa oneninan̄a ikeke me isi otutuuk ene, mè ido Jisọs ibe, “Ìre òkakaan̄ inu geege obofọọk? Ìre keke ke ife chi ekitumube ikeme owu ikeyi?” ⁶¹ Ire, Jisọs okpọkpọ iriaan̄ otu, ìkasan̄a amọn. Ogwu ibot ebi ibot ngwugwa okpọkpọk ido ọmọ ibe, “Ìre owu ore Karais ya, òrere Gwun̄ Awaji ogwu ògbe itọn̄?” ⁶² Jisọs onenifọọk ibe, “Emi nre ene ya! Enyi mêmun̄ Gwun̄ Ebilene okweekbe irek me agan̄ ubọk ulom Awaji Ogwu Òkaan̄ Unye Geelek, mè inan̄a ikinu me emen oduku inyọn̄.” ⁶³ Ogwu ibot ebi ibot ngwugwa osasa me unaan̄-ejit itaba ọfọnti îtapbe me lek igwak, mè itumu ibe, “Ìre kpasi ata-ikọ ke eji eyaka iweek? ⁶⁴ Enyi otutuuk ene mîsa utọn̄ kinyi inọ mbuban ikọ eyi ene yi otumube ikeme Awaji. Nkeek kinyi ye?” Otutuuk kiban̄ etitip Jisọs oyerebet, mè ichieek igwook ibe ke îgbe mkpa. ⁶⁵ Usini kiban̄ ebebene ikigọkọ ataak itọbọ ọmọ me lek, mè isa ekwut ibọp ọmọ chieen̄ ichit, mè ikigoon̄ ọmọ akpọ, mè ikibe ọmọ, “Bak-nu, ìre ekene osulu owu?” Ebi akọn̄ ìkibem ere enenitaba ọmọ ije, mè ikisut ọmọ. ⁶⁶ Mgbọ Pita okupbe me oyet egep ya, gwun̄ enenwaan̄ ge me lek ebi usun̄ ogwu ibot ebi ibot ngwugwa osisibi inu. ⁶⁷ Mgbọ îmun̄be Pita okigwele ukan̄, igwugwuun̄ chieen̄ ikpọ Pita, mè itumu inyi ibe, “Ke owu si me lek ebi ìkigọọk Jisọs ogwu Najeret ya ije.” ⁶⁸ Pita okakan̄, mè itumu inyi ogwu enenwaan̄ ya ibe, “Ǹkariọọn̄ inu okitumu,” mè inan̄a ije ifo otunchit isi igọọk ikeke. [Mgbọ yaage unọn osasan̄a amọn.] ⁶⁹ Mgbọ gwun̄ enenwaan̄ ya omun̄be Pita me ere ya, isasa ebi ìkekeke me ere ya ikijeen̄ ibe, “Ìkpọ, ene yi ìre ene ge me lek ebi ife cha.” ⁷⁰ Pita okpọkpọk ikan̄. Sọnja mgbọ iraraka, ebi ìkeke me ere ya etutumu inyi Pita ibe, “Owu òkpokọt ikan̄ ibe ke owu òkare ene ge me lek ife chi, mije, owu ìre ogwu Galili.” ⁷¹ Pita otatap awọ ikeme lek kan̄, mè ikinyan̄a ibot ibe, “Ǹkitumu atikọ. Ǹkariọọn̄ ene yi enyi ekitumu ikọ ibak.” ⁷² Mgbọ yaage, unọn osasan̄a amọn òso mgbọ iba. Pita onenisi ikeek ikọ ya Jisọs otumube inyi ọmọ ibe, “Sabum unọn obosan̄a amọn iso mgbọ iba, owu môjit emi mgbọ ita.” Mgbọ yaage Pita obebene ito ikito.

¹ Me ewelegwe ewelegwe, ebi ibot ngwugwa, mè ebi ugane ama, mè ebi ìjeen̄ Ikan melek otutuuk Oru ebi Ju etutumu ifieek inu ema eberọ, mè initap Jisọs mkpọn me ubọk, mè isa ọmọ isi ikana itap me ubọk kè Pailet (ogwu ibot mkpulu ebi Rom etobe me agan̄ Judia me mgbọ ya). ² Pailet onenido Jisọs ibe, “Ìre owu ore ogwu ubọọn̄ ebi Ju ya?” Jisọs ofọfọọk ọmọ ibe, “Owu otumu ma!” ³ Ebi ibot ngwugwa ekekitumu owuwa ikọ itoon̄ Jisọs. ⁴ Eya orọ Pailet okpọkpọk ido ọmọ ibe, “Ìre owu òkakaan̄ inu geege òbofọọk? Ìre òkanọ otutuuk inu chi ekitumu itoon̄ owu?” ⁵ Ire, Jisọs ìkasan̄a amọn geege. Inu ya okeke Pailet chieen̄. ⁶ Mgbọ geelek ijọk Iraraka okire, Pailet îkisan̄a ogwu mkpọn ge me uwu mkpọn isibi ibe ifo. Ene ya ìkire ogwu ebi Ju edobe. ⁷ Ike mgbọ ya, îkaan̄ ogwu mkpọn ge ekigwen Barabas. Barabas yi me lek ebi etapbe me mkpọn mije uyọrọlek ema etapbe, mè ikpan̄ ene. ⁸ Urum ebi ene ìtititiin̄ me ere uwu kè Pailet enenikibeek Pailet ibe irọ inu îkirọ acha geelek, me ibot mgbọ ya, inyi ema. ⁹ Pailet onenido ema ibe, “Ìre enyi mîweek ibe emi ǹsan̄a ogwu ubọọn̄ ebi Ju ǹsibi ǹnyi enyi?” ¹⁰ Pailet îriọọn̄ ibe ke ìre sa me ejit mba ke ebi ibot ngwugwa esa Jisọs ijet ọmọ. ¹¹ Ire, ebi ibot ngwugwa ekekitumu inyi ebi ene cha ibe ekachieek, kpan̄asi ebedo Jisọs, edo ibe isan̄a Barabas isibi inyi ema. ¹² Pailet okpọkpọk ido ema ibe, “Ìre keke ke enyi eweek ibe emi ǹrọ ogwu enyi ekigwen ogwu ubọọn̄ ebi Ju?” ¹³ Ema ekekitaan̄ ukpo ibe, “Gon ọmọ kpan̄ me uti nkwurieen̄!” ¹⁴ Pailet ododo ema ibe, “Mije keke? Ìre kpasi ijo inu ke îrọ?” Ire, ema erọriọọn̄ ikitaan̄ ukpo unye unye ikibe, “Gon ọmọ kpan̄ me uti nkwurieen̄!” ¹⁵ Mije Pailet okiweek irọrọ inyi ejit ibele ebi ife cha, inenisan̄a Barabas isibi me mkpọn inyi ema, mè isa Jisọs inyi ebi akọn̄ ibe esulu me njijan̄, mè esa esi egon ekpan̄ me inyọn̄ uti nkwurieen̄. ¹⁶ Ebi akọn̄ cha esasa Jisọs isibi isi emen oyet egep uwu ogwu ibot mkpulu, me igwen otutuuk ebi urum akọn̄ kiban̄ ititiin̄. ¹⁷ Ema enenitap Jisọs ikpele ọfọnti irio irio eyi ebi ubọọn̄ ekitap, mè isa ukpak ilọk okpibot ubọọn̄ ikwuun̄ ọmọ me ibot, ¹⁸ mè ikitumu inyi ọmọ ibe, “Ogwu Ubọọn̄ ebi Ju, eji mînyi owu amọn!” ¹⁹ Ema esasa uti ikisulu ọmọ me ibot, mè ikigọkọ ataak itọbọ ọmọ me lek, mè ikigwook ekpe me isi kan̄, mè ikitọbọ ibot inyi ọmọ. ²⁰ Mgbọ ema erọbe ọmọ inu ochak chi isan̄a, ema eneniwọọk ọmọ ọfọnti irio irio ya isan̄a me lek, mè ikpulu ọfọnti kan̄ cha itap ọmọ me lek, mè isa ọmọ isibi ibesa isi igon ikpan̄ me inyọn̄ uti nkwurieen̄. ²¹ Mgbọ ekisa Jisọs ije me oniin̄ ibesi igon ikpan̄, ema enenichichini melek ogwu enerieen̄ ge ekigwen Saimọn, nte kè Alikisenda melek Rufọs, ònan̄a me ama ekigwen Sairini okije inu. Ema etetet ogwu enerieen̄ yi me ubọk unye ibe iben uti nkwurieen̄ kè Jisọs. ²² Ema enenisa Jisọs isi ire ere ekigwen Gọligọta, (eyi òsisibi Ere Ngigọ Ibot Ene). ²³ Eneninyi Jisọs miin̄ etapbe ugwun̄ ònan̄a me lek uti mâa me emen. Ugwun̄ yi ìkirọ inyi ene ikanọ unan me lek. Ire, Jisọs ojijit inwọnwọ. ²⁴ Ema enenigon Jisọs me inyọn̄ uti nkwurieen̄, mè ikpulu ọfọnti kan̄. Sabum ema eniche ọfọnti cha, edadasi iroon̄ nriroon̄ isasa iriọọn̄ ubọk ema ebeche ọfọnti cha me lek kiban̄. ²⁵ Òfuk-mgbọ îsulu onaan̄ge eyi ewelegwe mgbọ ema egonbe Jisọs me inyọn̄ uti nkwurieen̄. ²⁶ Ulook egebe igon kubọk ikan esabe itip ọmọ oyerebet ìre: OGWU UBỌỌN̄ EBI JU. ²⁷ Mîgon si ebi inọ iba, ebi ìkichiin̄ inọ me afa, me uti nkwurieen̄ me agba lek kan̄ me ere ya, ene ge me agan̄ ulom kan̄, ene ge me agan̄ ujit kan̄. [ ²⁸ Sa me ikeyi ke inu egebe me Ikpa Mbuban ibak ọmọ orọ iso. Ege me Ikpa Mbuban ibe, “Mîfuk ọmọ itap me otu ifuk ebi ìkifiat ikan.”] ²⁹ Ebi ìkije iraka me ere ya ekekitọp ibot, mè ikichak ọmọ ibe. “Owu ogwu òbe ke ọmọ môgbugbọ Uwu Mbuban ito, mè isa egwe ita gaalek ikpọk inama isan̄a! ³⁰ Nyan̄a lek kwun̄ ma! Nan̄a me inyọn̄ uti nkwurieen̄ ya sibi ijọn̄ nu.” ³¹ Ikeya si, ebi ibot ngwugwa, mè ebi ìjeen̄ Ikan ekekitumu me lek kiban̄ ikisa ichak Jisọs ibe, “Înyan̄a ebi ofifi ife, ire, ìkakọt ìnyan̄a lek kan̄. ³² Ọmọ ogwu òrere Karais ya, ogwu ubọọn̄ ebi Ijeren, inan̄a me inyọn̄ uti nkwurieen̄ isibi ijọn̄ nu, inyi eji emun̄, mè echieek me lek kan̄.” Ubọk yaage ke ene iba cha egonbe igba ọmọ ekitumu si ijo otu ikọ isa ikinyi ọmọ unyechieen̄. ³³ Me mgbọ òfuk-mgbọ osulube akọp mè iba eyi ejit ikarek, ere ogwugwu ikom idun kubọk eririeen̄, mè ikup ikeya ire mgbọ òfuk-mgbọ osulube ita eyi ikarek. ³⁴ Mgbọ òfuk-mgbọ osulube ita ya, Jisọs otataan̄ ukpo ibe, “Elọi Elọi, lama sabatani?”, eyi osisibi, “Awaji n̄a, Awaji n̄a, ìre keke orọ ojitbe emi itele?” ³⁵ Mgbọ usini ebi ìkup me ere ya enọbe ikọ îtumube, ema ekekitumu ibe, “Ìgban̄, òkibọn̄ọ Ilaija.” ³⁶ Ene ge me lek kiban̄ olilibi isi imọnọ ise ijiin̄ me emen miin̄ òkitop njijin njijin, mè isa inwaan̄ me otu uti, mè ibene ifo otu kè Jisọs ibe inwọ, mè ikitumu ibe, “Ìjuuk ọmọ ìtele, mè ekpọ-nu mè ìre Ilaija mônu iniwaka ọmọ isan̄a me inyọn̄ uti nkwurieen̄ isibi ijọn̄.” ³⁷ Jisọs otataan̄ ukpo, mè ikwu. ³⁸ Ekwut esabe igbaka ikwek Ere Òkup Mbuban Ichit me Uwu Mbuban otọtọbọ ibum ọkpọkọ iba ibene me inyọn̄ ire ijọn̄. ³⁹ Ogwu ibot akọn̄ ge òkekeke me ere ya mè imun̄ ubọk Jisọs osabe ikwu, otutumu ibe, “Me atikọ, ene yi ìre Gwun̄ Awaji!” ⁴⁰ Îkaan̄ usini ebibaan̄ ìkukup me ujọn̄ọ ere ikikpọ inu ya òkirọ. Ebibaan̄ cha ìre Meri ogwu ama Magidala, mè Salomi, mè Meri nga kè Jemis ogwu ijija melek Josefu. ⁴¹ Mgbọ Jisọs okupbe me Galili, îre ebibaan̄ chi ekigọọk ọmọ me udun̄, mè ikikpọ ọmọ chieen̄ me lek. Owuwa ebibaan̄ ebi ìgọgọọk Jisọs me udun̄ inu Jeruselem me ere ya si ekupbe. ⁴² Usen ya ìre usen ebi Ju ekinen̄e lek kiban̄ isun̄ (mije òfit iwele kan̄ obore Usen Mbuban kiban̄). Eya orọ, me agan̄ ikakwun̄ usen ya, ⁴³ Josefu ogwu ama Arimatia, ene ge eriọọn̄be erieen̄ me emen Oru ebi Ju, ogwu òkikpọ chieen̄ me inunu mkpulu eyi Awaji, osasa me unye-ejit ije isi ido Pailet ibe inyi ọmọ unye, mè ọmọ isi iben nkwukwu kè Jisọs. ⁴⁴ Îke Pailet chieen̄ inọnọ ibe ke Jisọs îgwat lek ikwu ikeya. Ineniria etip igwen ogwu ibot akọn̄ ya ibe inu, mè ido ọmọ ibe mè ìre Jisọs îkwu ifiin̄ mgbọ ye? ⁴⁵ Mgbọ Pailet onọbe me otu ogwu ibot akọn̄ ya ibe ke Jisọs îkwu, ineninyi Josefu unye ibe isi iben nkwukwu kè Jisọs. ⁴⁶ Josefu onenisi ilep ekwut ekisa ikat nkwukwu ene isi ifuun̄, mè isi isan̄a nkwukwu kè Jisọs, mè isa ekwut ya ikat, mè iben isi itap me emen udọn̄ ufuun̄ erọkọbe me lek ewuuk, mè ikpukpọt ikpele ewuuk ge ichit otu udọn̄ ya. ⁴⁷ Meri ogwu ama Magidala, mè Meri nga kè Josefu mîgọọk si inu ere ya, mè imun̄ ere efuun̄be nkwukwu kè Jisọs.

¹ Mgbọ Usen Mbuban orakabe, Meri ogwu ama Magidala, mè Meri nga kè Jemis, mè Salomi, enenisi ilep aran̄ utop olu ema mêsabe isi iken nkwukwu kè Jisọs. ² Me otu ewelegwe, me usen Awaji, mgbọ ura obumbe, ebibaan̄ cha esisi udọn̄ ufuun̄ ya. ³ Mgbọ ema ekije me oniin̄, ema ekekinina lek ibe, “Ìre ekene obonikpukpọt ewuuk esabe ichit otu udọn̄ ya isan̄a inyi eji mọnọ?” ⁴ Ewuuk ya îmin enenen. Ire, mgbọ ema erebe ere ya, ema emumun̄ ibe ke mîkpukpọt ewuuk ya isan̄a me otu udọn̄ ya. ⁵ Ema eninin̄ emen udọn̄ ya, mè imun̄ gwun̄ enerieen̄ ge osikibe ikweek me agan̄ ubọk ulom, mè ọfọnti okuket me lek. Ema eririki. ⁶ Gwun̄ enerieen̄ ya obebe ema, “Ikariki! Nriọọn̄ ibe ke enyi ekiweek Jisọs ogwu Najeret, ogwu egonbe ikpan̄ me inyọn̄ uti nkwurieen̄. Îjomo me mkpa, ìkakup me ere keyi. Ìna ìnikpọ ere emaan̄be nkwukwu kan̄. ⁷ Ìfo, mè ìsi ìtumu ìnyi Pita, mè ebi udun̄ kan̄ kechilọ ibe ke Jisọs òkije isi Galili isisi ikup iban ebibi; ke ebibi mêchichini ọmọ me ere ya ike îtumube inyi ebibi.” ⁸ Mbiribọ ogwogwook ebibaan̄ cha me lek, ema esasa me uran-lek inan̄a me udọn̄ ya ilibi ekot ekot ifo. Kpesan̄a amọn inyi ene geege me oniin̄, mije ukpook. ⁹ Mgbọ Jisọs ojomobe me mkpa me ewelegwe usen Awaji, ìdasi isibi me isi kè Meri ogwu Magidala ogwu îrieen̄be ijo erumun̄ jaaba isibi me emen. ¹⁰ Meri ogwu Magidala yi osisi ikpa inyi ebi melek Jisọs ekije. Mgbọ ya ema ekup me ufieejit, mè ikito ito. ¹¹ Mgbọ ema enọbe ibe ke Jisọs me ugwem; ke Meri ogwu Magidala îmun̄ lek kan̄, ema kpechieek. ¹² Sọntiik mgbọ iraraka, Jisọs osisibi kubọk ofifi ene me isi ebi udun̄ kan̄ ene iba mgbọ ema ekije me oniin̄ ibesi gwun̄ ama ge. ¹³ Ema egwugwu ikom ika inu Jeruselem, mè inikpa inu ya inyi ebi udun̄ kan̄ kechilọ. Ire, ebi udun̄ kan̄ cha kpechieek si. ¹⁴ Me mgburudun̄, Jisọs onenisibi me isi akọp mè ebi udun̄ kan̄ ge cha mgbọ ema ekirie inorie, mè ikan̄ inu inyi ema, mije una ichechieek kiban̄ melek ike ema ekatbe ejit ijit ikọ ebi ìmumun̄ ọmọ mgbọ ọmọ ojomobe me mkpa iraka ekpabe inyi ema. ¹⁵ Inenibe ema, “Ìje ikana otutuuk linyọn̄, mè ìlook otutuuk ebilene ata etip eyi Awaji. ¹⁶ Ene geelek òchechieek mè igwook mun̄, mênyan̄a ene ya. Ire, ogwu geelek ikachieekge, mêtip ogwugwa oyerebet mkpa. ¹⁷ Ebi ìchechieek mêkaan̄ inu ijejeen̄ kechi: ema mêsa erieen̄ n̄a irieen̄ ijo erumun̄ isibi me emen ene, ema mêtumu nke nke usem. ¹⁸ Ire ema itet ubọk me lek ijijunu, mè ìyaka ire ibọk ke ema enwọ, unan geege ìkposak ema me lek. Ema mêtoon̄ ebi orukan̄ ubọk me ibot, mè lek ebi orukan̄ ònye.” ¹⁹ Mgbọ Okaan̄-ene Jisọs otumube ikọ isan̄a melek kiban̄, ebeben ọmọ ifo emen inyọn̄. Ọmọ okwekweek me agan̄ ubọk ulom Awaji. ²⁰ Ebi udun̄ kan̄ ekekijijen̄e ikana ikilook ata etip eyi Awaji me ere geelek, mè ikirọ uyeke inu. Okaan̄-ene okekigọọk ema igbaan̄ isi ikwaan̄, mè ikisa inu ukechieen̄ cha irọ ikọ kan̄ echi ema ekitumu inye.]