Matiyu

Matiyu

¹ Mfufuk owot nte kè Jisọs Karais gwun̄ kè Debit ònan̄a me owot iman kè Ebereham ìje ikeyi: ² Ebereham obon Ajiki, Ajiki onenibon Jekọp, Jekọp onenibon Juda melek ebi ngwan̄ ebirieen̄. ³ Juda onenibon Pereji melek Jera me owot kè Tema. Pereji onenibon Hejirọn, Hejirọn onenibon Ram. ⁴ Ram onenibon Aminadap, Aminadap onenibon Nasiọn, Nasiọn onenibon Salimọn. ⁵ Salimọn onenibon Bowaji me owot kè Rehabu. Bowaji onenibon Obedi me owot kè Rufu. Obedi onenibon Jesi. ⁶ Jesi onenibon ogwu ubọọn̄ Debit. Debit onenibon Sọlọmọn me owot nwa kè Yuraya. ⁷ Sọlọmọn onenibon Rehobowam, Rehobowam onenibon Abija, Abija onenibon Asa. ⁸ Asa onenibon Jiosefat, Jiosefat onenibon Joram, Joram onenibon Ujaya. ⁹ Ujaya onenibon Jotam, Jotam onenibon Ehaji, Ehaji onenibon Ejikaya. ¹⁰ Ejikaya onenibon Manasi, Manasi onenibon Amọn, Amọn onenibon Josaya. ¹¹ Josaya onenibon Jekọnaya melek ebi ngwan̄ ebirieen̄ sabum enikpulu ebi Ijeren me akọn̄ isa ifo ido Babilọn. ¹² Mgbọ ema enan̄abe me ido Babilọn ika ke Jekọnaya obon Siatien. Siatien onenibon Jerubaben. ¹³ Jerubaben onenibon Abiudu, Abiudu onenibon Eliakim, Eliakim onenibon Ajọ. ¹⁴ Ajọ onenibon Jadọk, Jadọk onenibon Akim, Akim onenibon Eliudu. ¹⁵ Eliudu onenibon Elieja, Elieja onenibon Matan, Matan onenibon Jekọp. ¹⁶ Jekọp onenibon Josefu òrere nlom kè Meri ogwu òmaman Jisọs ogwu òrere Karais (eyi òsisibi ogwu Awaji otoon̄be ubọk me ibot). ¹⁷ Bene me ukot kè Ebereham na re ukot kè Debit ìsibi akọp mè owot iman ini. Bene me ukot kè Debit na re mgbọ ekpulube ebi Ijeren me akọn̄ isa ifo ido Babilọn ìre akọp mè owot iman ini. Bene me mgbọ ebi Ijeren enan̄abe me Babilọn ika na re mgbọ emanbe Karais ìre si akọp mè owot iman ini. ¹⁸ Imaman kè Jisọs Karais ìkup ikeyi: Josefu înu initet Meri ogwu ònenire nga kè Jisọs itele ibodo me lek nwa. Ire, sabum ema enikana olom mè nwa, enenimun̄ ibe ke Meri înin̄ owot inan̄a me unye Ekwukwu Mbuban. ¹⁹ Ire, mije Josefu ogwu olom orebe ogwu ata irọrọ, ìkaweek irọrọ Meri inu esip me isi ebi ene. Eya orọ, ibeben me ejit ibe ke ọmọ mônween̄ lek ijit Meri me nlelet, inyi utọn̄ ebi ene ikanọ. ²⁰ Ire, ike Josefu okikeek inu yi, ogwu osat Okumugwem osisibi ichichini ọmọ me emen ilaak, mè ibe ọmọ, “Josefu gwun̄ kè Debit, mọnọ Meri nwa kwun̄. Katet ukpook, mije, Meri ìnin̄ owot yi inan̄a me unye Ekwukwu Mbuban. ²¹ Meri nwa kwun̄ môman gwun̄ enerieen̄. Owu mônyi gwun̄ ya erieen̄, Jisọs (eyi òsisibi Ogwu Unyan̄a), mije, gwun̄ ya obonyan̄a ebi kiban̄ isibi me emen ijo kiban̄.” ²² Otutuuk inu òmọmọnọ irek îrọ inyi ikọ Okumugwem otumube inan̄a me otu ogwu nriran kan̄ irọ iso. ²³ Okumugwem ìbe ke obaak enenwaan̄ ge ikariọọn̄ge enerieen̄ mônin̄ owot, mè iman gwun̄ enerieen̄; ke mêgwen gwun̄ ya Imanuwen, eyi òsisibi “Awaji òwa melek kiji.” ²⁴ Mgbọ Josefu onan̄abe ikeke me ilaak, irọrọ si ike ogwu osat Okumugwem obe ọmọ irọ, mè imọnọ Meri ogwu nwa isa ifo uwu kan̄. ²⁵ Ire, ìkagọọk Meri ìlaak mege ire mgbọ Meri omanbe gwun̄ enerieen̄ ya. Josefu onyinyi gwun̄ ya erieen̄, Jisọs.

¹ Eman Jisọs me ama Betelehem eyi òkup me Judia, me mgbọ Erọdu orebe ubọọn̄ me agan̄ ya. Mgbọ emanbe ọmọ, ebi ìriọọn̄ inu ìnan̄a me agan̄ mbum-ura enunu Jeruselem, ² mè inikidido ibe, “Gwun̄ ya emanbe, òbonire ogwu ubọọn̄ ebi Ju ya ìkup me owa? Eji emun̄ ntoronyan̄ kan̄ osibibe me agan̄ mbum-ura, mè inu ibenitọbọ ebum inyi ọmọ.” ³ Mgbọ ogwu ubọọn̄ Erọdu onọbe ikọ yi, ejit kan̄ ìkabele. Ikeya si, otutuuk ebi ama Jeruselem kpebele ejit. ⁴ Eya orọ, ogwu ubọọn̄ Erọdu ogwegwen otutuuk ebi ibot ngwugwa, mè otutuuk ebi ìjeen̄ Ikan ititiin̄, mè ido ema ibe, “Ìre enyi efuk me Ikpa Mbuban ibe ìre ere owa ke ebeman ogwu Awaji otoon̄be ubọk me ibot ya?” ⁵ Ema efọfọọk ibe ke ìre me ama Betelehem eyi òkup me Judia, mije ke ogwu nriran îge inu òfolek ibe ke Awaji ìbe, ⁶ “Owu Betelehem, ubọk geelek orebe sọntiik ama me etete otutuuk ama ile òkup me ido Juda, ogwu ibot mkpulu ìbonan̄a me emen kwun̄ isibi inikikpukpo ebi n̄a, Ijeren.” ⁷ Erọdu oneninween̄ lek igwen ebi ichen cha ìnan̄a me agan̄ mbum-ura, mè iweek iriọọn̄ me otu kiban̄ ike mgbọ ntoronyan̄ ya obenebe isibi. ⁸ Mgbọ îbọkọbe ema ikọ me otu isan̄a, ineniria ema isi ama Betelehem ibe, “Ìsi ìgbala chieen̄ ìweek gwun̄ ya. Ire enyi iweek imun̄, ìna ìnilook emi, inyi emi si ǹgọọk ǹsi ǹtọbọ ebum ǹnyi gwun̄ ya.” ⁹ Mgbọ ogwu ubọọn̄ ya otumube ikọ melek kiban̄ isan̄a, ema enanan̄a isibi, mè ikpọk imun̄ ntoronyan̄ ya ema emun̄be me agan̄ mbum-ura okije me isi kiban̄, mè inikeke itat me inyọn̄ uwu ere gwun̄ ya okupbe. ¹⁰ Ejit îbele ema enenen mgbọ ema emun̄be ntoronyan̄ ya. ¹¹ Ema ejeje inin̄ uwu ya, mè isi imun̄ gwun̄ ya me ubọk kè Meri ogwu uga, mè igele igwook me ijọn̄, mè itọbọ ebum inyi ọmọ, mè inichili okop inu ubọọn̄ kiban̄, mè isan̄a alata araran̄, mè okpukpuk mgbe òkidun̄u olu utop utop ònan̄a me lek uti ekigwen Farankinsens, mè eyi ònan̄a me lek uti ekigwen Mâa isibi isa iche inyi gwun̄ ya. ¹² Mgbọ ema enyibe inu inyinyi kiban̄ isan̄a, ema ejeje me ofifi oniin̄ ifo ido kiban̄. Ema erọ ikeya, mije, Awaji îtaba ema ubọk me utọn̄ me emen ilaak ibe ema ekagwu ìkom ìsi lek ogwu ubọọn̄ Erọdu. ¹³ Mgbọ ebi ìriọọn̄ inu cha efonbe isan̄a, ogwu osat Okumugwem osisibi ichichini Josefu me emen ilaak, mè itumu inyi ibe, “Nan̄a keke, mè ben gwun̄ ya mè ogwu uga sa libi fo ido Ijipiti si kup. Luk me ere ya re mgbọ emi mâyakabe initeme owu inu owu môrọbe, mije Erọdu môbene ikiweek gwun̄ ya ikpakpan̄.” ¹⁴ Josefu onanan̄a ikeke me ilaak me eririeen̄ ya, mè iben gwun̄ ya mè ogwu uga, isa ilibi ifo ido Ijipiti, ¹⁵ mè isi iluk me ere ya mege ire mgbọ Erọdu okwube, sabum înigwu ikom ika. Ikeyi ke ikọ Okumugwem otumube inan̄a me otu ogwu nriran osa irọ iso. Okumugwem ìtumu ibe, “Ǹgwen gwun̄ n̄a enerieen̄ inan̄a me Ijipiti isibi.” ¹⁶ Ogwu ubọọn̄ Erọdu înaan̄ ejit enenen mgbọ îweekbe isibi ibe ke ebi ìriọọn̄ inu cha mîfiaan̄ ọmọ, kpeyaka igwu ikom inikpa inu ema emun̄be inyi ọmọ. Eya orọ, inyinyi ida ibe ekpan̄ otutuuk asa nsabọn ebirieen̄ me Betelehem, mè otutuuk asabọn ama òkukup iriaak, bene me lek ebi emanbe ayaya si re lek ebi ìmimiin̄ iso acha iba, igọọk me ike mgbọ ntoronyan̄ ya obenebe isibi, kubọk ebi ìriọọn̄ inu cha etumube inyi ọmọ. ¹⁷ Ikeyi ke ikọ Okumugwem otumube inan̄a me otu ogwu nriran Jerimaya osa irọ iso. ¹⁸ Jerimaya ìtumu ibe, “Mînọ ida ene ge okito ito me Rema, mè ikifieek ejit enenen. Rechen òkito ito mije bọn kan̄ ìkwakwaan̄ ita. Ìkachieek ibe ekat ọmọ ejit, mije, nsabọn cha kpeyaka ikup me ugwem.” ¹⁹ Mgbọ Erọdu okwube iraka, ogwu osat Okumugwem onenikpọk isibi ichichini Josefu me emen ilaak me Ijipiti, ²⁰ mè itumu inyi ibe, “Nan̄a keke, mè ben gwun̄ ya mè ogwu uga sa fo ìdo Ijeren, mije, ebi ìweweek ikpakpan̄ gwun̄ ya mîkwaan̄ isan̄a.” ²¹ Josefu onanan̄a ikeke, mè iben gwun̄ ya mè ogwu uga isa ifo Ijeren. ²² Ire, mgbọ Josefu onọbe ibe ke Akelọs ore ogwu ubọọn̄ me Judia me irek kè Erọdu ogwu ute, ukpook otetet ọmọ ifofo Judia. Eya orọ, kpan̄asi Judia, ikakana ifo agan̄ Galili ike ogwu osat Okumugwem otemebe ọmọ me emen ilaak. ²³ Mgbọ îrebe Galili, inenisi iluk me ama ekigwen Najeret. Ikeyi ke ikọ Okumugwem otumube inan̄a me otu ebi nriran osa irọ iso ibe ke mêkigwen gwun̄ ya ogwu Najeret.

¹ Me emen mgbọ ya, Jọn ògwook mun̄ onunu, mè ikijijen̄e ikana me emen èwê òkup me Judia ikilook ebi ene ata etip ibe, ² “Ìgwu ìkom me ijo kinyi, mije, mkpulu eyi Awaji îkup mgbet.” ³ Jọn ògwook mun̄ yi ke Asaya oben nriran òfolek mgbọ îtumube ibe, “Ida ene ge òkitaan̄ ukpo me emen èwê ibe, ‘Ìnen̄e oniin̄ ìsun̄ ìban Okumugwem, mè ìrọ oniin̄ òtatat ìnyi ọmọ.’ ” ⁴ Ọfọnti Jọn okitap, esa inwọọn̄ aligọ irom. Fanti îkitobo me ebon ìre fanti ikpa anam. Inorie kan̄ ìre akaka mè njijoon̄ aran̄ akwọọk. ⁵ Ebi ene ekekigbọọk inan̄a me Jeruselem, mè otutuuk ido Judia, mè otutuuk ama òkup me agba okwaan̄ Jọdan inu me lek kè Jọn, ⁶ mè ikifuk ijo kiban̄ isibi. Jọn okekigwook ema mun̄ me okwaan̄ Jọdan. ⁷ Ire, mgbọ Jọn omun̄be owuwa ebi Farisi mè ebi Sadusi ekinu me lek kan̄ ibenigọọk igwook mun̄, itutumu inyi ema ibe, “Enyi ijo ulu kechi! Ìre ekene oteme enyi ibe enyi elibi enwọnọ uyọt uyọt unaan̄-ejit Awaji eyi òbonunu? ⁸ Ìkirọ ata irọrọ eyi òbokijeen̄ ibe ke enyi mîgwu ikom me atikọ. ⁹ Ikakpọkpọ ìkup ìkitumu ìbe ke enyi ìre bọn kè Ebereham, mè ìkikeek ibe ke enyi mêsa me ikeyi inwọnọ osusut Awaji. Ǹkitumu inyi enyi ibe ke Awaji môkọt irọ inyi ewuuk chi òkup me ere yi ikana bọn inyi Ebereham. ¹⁰ Mgbọ yi, mîto otuban itele me ebon uti geelek. Ire ikaan̄ uti ikatoge ata mfut, mêcho ito, mè iben itọp itap me emen ukan̄. ¹¹ “Emi ǹkisa mun̄ ikike igwook enyi mun̄, isasa ijeen̄ ibe ke enyi mîgwu ikom. Ire, îkaan̄ ene ge òbonu me udun̄ n̄a. Ene ya îmin igak emi enenen ire lek emi ǹkagbe ogwu òbokiben ikpukot ene ya. Ene ya ìbosa Ekwukwu Mbuban mè ukan̄ igwook enyi mun̄. ¹² Ofifi si, ene ya îkaan̄ ugen̄ sanasana otu eyi ìbosa igen̄ mfufe isan̄a me lek akpa, mè ikpulu akpa cha isi itap me emen uwu isun̄-akpa kan̄, mè ikpulu mfufe cha isi iwọp me emen ukan̄ eyi ìkakiniin̄.” ¹³ Jisọs oneninan̄a me agan̄ Galili isi agba okwaan̄ Jọdan, inyi Jọn igwook ọmọ mun̄. ¹⁴ Ire, Jọn oweweek ikpukput ọmọ, mè itumu inyi ọmọ ibe, “Owu ore ogwu mogwook emi mun̄. Owu òyaka ìjeje ininu me lek n̄a ibe emi ǹnengwook owu mun̄?” ¹⁵ Jisọs ofọfọọk Jọn ibe, “Tele inyi ikup ikeya mgbọ keyi, mije, îgbe ibe owu ògwook emi mun̄, inyi eji esa me oniin̄ keyi erọ otutuuk inu eyi Awaji okiweek eso.” Jọn onenichieek, mè igwook ọmọ mun̄. ¹⁶ Mgbọ yaage Jọn ogwookbe Jisọs mun̄ isan̄a, Jisọs onan̄abe me emen mun̄ okwaan̄ Jọdan ya iwook inene ijọn̄, isinyọn̄ ochichili, imumun̄ Ekwukwu Awaji okinan̄a me isinyọn̄ iwulu kubọk ekerekwukwu isiki inu, mè inisọọk me lek kan̄. ¹⁷ Ida ge onanan̄a me emen inyọn̄ ikitumu ibe, “Ogwugwu ore gwun̄ n̄a enerieen̄, ogwu mmabe. Emi mbele ejit enenen me lek kan̄.”

¹ Ekwukwu Awaji onenisa Jisọs ije isi emen èwê, inyi Yọk itọ ọmọ ikpọ. ² Mgbọ Jisọs okupbe me ere ya ijin otu akọp usen ini, uraafiọọn̄ onenitaka ọmọ. ³ Yọk onunu initọ ọmọ ikpọ, mè ibe ọmọ, “Ire owu ore Gwun̄ Awaji me atikọ, tumu ikọ nyi ewuuk chi, mè ikana inorie inyi owu.” ⁴ Jisọs ofọfọọk ọmọ ibe, “Ege me Ikpa Mbuban ibe, ‘Ìkare inorie gaalek ke ene okisa iluk ugwem. Ire, ene ìkisa ikọ geelek ònan̄a me otu Awaji isibi iluk ugwem.’ ” ⁵ Yọk onenisa Jisọs isi itoon̄ me ere òbebene ichit me inyọn̄ Uwu Mbuban me Jeruselem, ⁶ mè itumu inyi ọmọ ibe, “Ire owu ore Gwun̄ Awaji me atikọ, nan̄a me ere yi wulu keke me ijọn̄, mije, ege me Ikpa Mbuban ibe, ‘Awaji mônyi ebi osat kan̄ ikan òfolek kwun̄. Ema mêben owu ikaan̄ me ubọk kiban̄, inyi owu okatọbọ ukot me lek ewuuk.’ ” ⁷ Jisọs ofọfọọk ọmọ ibe, “Ege si me Ikpa Mbuban ibe, ‘Katọ Okumugwem Awaji kwun̄ ìkpọ.’ ” ⁸ Yọk okpọkpọk isa Jisọs isi inyọn̄ ogoon̄ òbebene ichit, mè isa ọmọ ijeen̄ otutuuk ama ubọọn̄ geelek eyi linyọn̄ keyi, mè otutuuk uja mè umin ama ubọọn̄ cha, ⁹ mè itumu inyi ọmọ ibe, “Emi mânyi owu otutuuk inu chi geelek, ire owu ogwook akpatukot me ijọn̄, mè itọbọ ebum inyi emi.” ¹⁰ Jisọs ogagana inyi Yọk ibe, “Je nan̄a emi me isi, Setan, mije, ege me Ikpa Mbuban ibe, ‘Tọbọ ebum nyi Okumugwem Awaji kwun̄ gaalek, mè kisi ikwaan̄ si nyi ọmọ gaalek.’ ” ¹¹ Yọk otetele ọmọ. Ebi osat Awaji enunu inisi ikwaan̄ inyi ọmọ. ¹² Jisọs oneninọ ibe ke mîtet Jọn ògwook mun̄ itap me mkpọn, mè igwu ikom ika inu ama Najeret me Galili. ¹³ Sọnja mgbọ iraraka, inanan̄a me Najeret isi iluk me ama Kapanọm me agba okwaan̄ oyô Galili, me agan̄ ijọn̄ ebi otoko kè Jebulọn mè Nafitali elukbe. ¹⁴ Eyi onenirọ iso ikọ Awaji otumube inan̄a me otu ogwu nriran Asaya ibe, ¹⁵ “Ebi ìluk me inyọn̄ ijọn̄ otoko kè Jebulọn, mè otoko kè Nafitali, mè inyọn̄ ijọn̄ òkup ifo agan̄ okwaan̄ ile, mè ebi ìluk me usaba agan̄ okwaan̄ Jọdan, mè ido Galili agan̄ ebi ofifi ido elukbe; ¹⁶ ife chi, ìrere ebi ìluk me emen udun, mîmun̄ ikpele utoon̄. Utoon̄ îtoon̄ ire lek ebi ìluk me inyọn̄ ijọn̄ ere udun eyi mkpa okupbe.” ¹⁷ Bene me mgbọ ya, Jisọs obebene ikitumu ikọ Awaji inyi ebi ene ibe, “Ìgwu ìkom, mije, mkpulu eyi Awaji îkup mgbet.” ¹⁸ Usen ge, mgbọ Jisọs okije me agba okwaan̄ oyô Galili, inenimun̄ ngwan̄ ebirieen̄ iba, Saimọn ogwu ekigwen si Pita melek Anduru ogwu ngwan̄. Ema ekitọp njin me okwaan̄ oyô ya mgbọ Jisọs omun̄be ema, mije, ema ìre ebi mbọm irin̄. ¹⁹ Jisọs onenigwen ema ibe, “Ìna ìnigọọk emi, ke mârọ inyi enyi ekana ebi ìkibọm mbọm itet-ene.” ²⁰ Mgbọ yaage, ema etetele njin kiban̄, mè igọọk ọmọ ije. ²¹ Mgbọ înan̄abe me ere ya ije ifo isi sọnja, ikpọkpọk imun̄ ofifi ngwan̄ ebirieen̄ iba, Jemis mè Jọn bọn kè Jebidi, melek nte kiban̄ ekupbe me emen uji ikinama njin kiban̄. Igwegwen ema si. ²² Mgbọ yaage, ema etetele nte kiban̄ melek uji kiban̄, mè inan̄a igọọk ọmọ. ²³ Jisọs onenikijijen̄e ikana me Galili, mè ikijeen̄ inu me uwu ntitiin̄ ebi Ju, mè ikilook ata etip eyi mkpulu Awaji, mè ikigwa esese chieen̄ orukan̄ mè ufiak me lek ebi ene. ²⁴ Etip kan̄ okekitaan̄ ikana otutuuk ido Siria. Ebi ene ekekikpulu otutuuk ebi chieen̄ orukan̄ geelek okifiak, mè ebi lek okinaan̄, mè ebi ijo erumun̄ okisisaak, mè ebi mkpikpi, mè ebi ngọm, isa ijet Jisọs ibe igwa. Igwagwa otutuuk kiban̄. ²⁵ Mije keya, ogbogbo ebi ene ìnan̄a me Galili, mè ebi ìnan̄a me Akọp Ibot Ama, mè Jeruselem, mè agan̄ Judia, mè ebi ìnan̄a me usaba agan̄ okwaan̄ Jọdan ekekigbuku igọọk ọmọ.

¹ Mgbọ Jisọs omun̄be ogbogbo ebi ene cha, ijeje isi inene inyọn̄ ogoon̄ ge, mè isiki ikweek irek. Ebi udun̄ kan̄ enenene igọọk ọmọ. ² Ibebene ikijeen̄ ema mè ebi ife cha inu ibe, ³ “Ugbana môkup inyi ebi geelek ìrọriọọn̄ ibe, isan̄a me lek Awaji, ke ema kpekup me lek inu geege, mije, ebibi ke mkpulu eyi Awaji okup inyi. ⁴ Ugbana môkup inyi ebi ìkifieek ejit, mije, mêkat ema ejit. ⁵ Ugbana môkup inyi ebi ìsisiki lek, mije, îre ema ebekaan̄ linyọn̄. ⁶ Ugbana môkup inyi ebi geelek ìkakaan̄ ikpele ulọk irọrọ inu Awaji okiweek, mije, Awaji mônyi ema inu ya òkilọk ema ojot ojot. ⁷ Ugbana môkup inyi ebi ejit nsan, mije, Awaji môkaan̄ ejit nsan me lek kiban̄. ⁸ Ugbana môkup inyi ebi geelek kpunube ofiaan̄ me emen, mije, îre ema ebemun̄ Awaji. ⁹ Ugbana môkup inyi ebi ìkitap esuuk, mije, ema mêkigwen bọn eyi Awaji. ¹⁰ Ugbana môkup inyi ebi ekisisaak mije ema ekirọ inu Awaji okiweek, mije, ema ke mkpulu eyi Awaji okup inyi. ¹¹ “Ugbana môkup inyi enyi mgbọ ebi ene ekinyi enyi unyechieen̄, mè ikisisaak enyi, mè ikikan̄ ataak itumu ijo ikọ geelek itoon̄ enyi mije n̄a. ¹² Enyi ìkinwọọn̄ unwọọn̄, mè ìkibele ejit, mije, mkpukpe kinyi me emen inyọn̄ îmin enenen. Ikeyi si ke esisaak ebi nriran ìkukup sabum ukot kinyi. ¹³ “Enyi ìre uchi me linyọn̄. Ire, ire uchi ifiin̄ utop kan̄, kpunu ubọk geege eberọ inyi iyaka ikaan̄ utop kan̄. Eya orọ, ebebeben itọp ifiin̄ me oyet, mè ebi ene ekejak me ukot eraka, mije, ìkayaka ìkup me lek inu geege. ¹⁴ “Enyi ìre utoon̄ eyi linyọn̄. Ama geelek enamabe me inyọn̄ ogoon̄ ìkpokọt ilet. ¹⁵ Ikeya si, ebi ene kpekimin mkpukan̄, mè isa okwa ikana ichit. Ekiben mkpukan̄ itoon̄ me inyọn̄ ngugọọn̄, inyi ikinyi utoon̄, mè otutuuk ebi ìkup me emen uwu ya ekesa emọọn̄ inu. ¹⁶ Ikeya si, enyi ìrọ inyi utoon̄ kinyi ikitoon̄ me etete ebi ene, inyi ema ekemun̄ ata ubọk ikwaan̄ kinyi, mè eketọn̄ Nte kinyi ogwu òkup me emen inyọn̄.” ¹⁷ “Ikakeek ibe ke emi ǹnu inenifiat Ikan kè Mosis mè ijejeen̄ echi egebe me emen ikpa ebi Nriran. Ǹkanu inenigwak Ikan chi. Ire, ǹnu inenirọ Ikan chi iso. ¹⁸ Me atikọ, ǹkitumu inyi enyi ibe, mege inyọn̄ mè ijọn̄ môrakabe isan̄a, kpunu inu geege enyibe me emen Ikan òboraraka, îtata ìrọrọ iso ubọk enyibe, bene me eyi ilile re lek eyi òsisip ichit. ¹⁹ Ikaan̄ ene geelek ikasage Ikan chi geege ìgwen inu, ìrere eyi òsisip ichit, mè ikijeen̄ si ebi ofifi ene ibe ekegọọk ọmọ erọ si ikeya, ene ya môre ogwu òsisip ichit me emen mkpulu eyi Awaji. Ire, ene geelek òkisun̄ inu geelek enyibe me Ikan, mè ikijeen̄ ebi ene ibe ekerọ si ikeya, ene ya môre ogwu òmimin ichit me mkpulu eyi emen inyọn̄. ²⁰ Emi ǹkitumu si inyi enyi ibe, îtata enyi etetet ata irọrọ inye igak ubọk ebi Farisi mè ebi ìjeen̄ Ikan ekitet, enyi kpebekọt inin̄ emen mkpulu eyi Awaji. ²¹ “Enyi mînọ ibe ke etumu me ukot ikaan̄ ibe, ‘Ikakpan̄ ene, ikaan̄ ogwu ikpan̄ ene, ke mêfieek oyerebet itip ene ya.’ ²² Ire, emi ǹkitumu inyi enyi ibe, ikaan̄ ogwu inaan̄ ejit inyi ogwu ngwan̄, mêfieek oyerebet itip ene ya. Ofifi si, ikaan̄ ogwu ibe ogwu ngwan̄, ‘Owu ene ikike keyi,’ mêsa ene ya isi oyerebet me isi ebi Oru ebi Ju. Ikaan̄ si ogwu ibe ogwu ngwan̄, ‘Owu burubut keyi,’ ene ya îgbe ogwu òbonin̄ emen ukan̄ ama yọk. ²³ “Mije keyi, ire owu osa inu obosa igwa ngwugwa inyi Awaji inigwook me agba lek ntook, mè inikup me ere ya ikeek ibe ke ngwan̄ kwun̄ îkaan̄ takataka isi melek kwun̄, ²⁴ juuk inu obosa igwa ngwugwa ya tele me ere ya, mè dasi si rọ esuuk melek ngwan̄ kwun̄ sabum ònogwu okom ònu ònogwa ngwugwa kwun̄. ²⁵ “Gwat lek rọ esuuk melek ogwu òkiweek isasa owu isi uwu oyerebet, me mgbọ ikọ ya ikarege uwu oyerebet. Mije, ire ikọ ya isi ire isi ogwu ibot oyerebet, ogwu ibot oyerebet môkọt iyaka owu itap me ubọk ogwu ikan ido ibe isa owu isi itap me mkpọn. ²⁶ Me atikọ, ǹkitumu inyi owu ibe, osinin̄ uwu mkpọn ya, owu òkpokọt isibi, îtata òkpekpe otutuuk ikpoko mkpukpe ikan orọn̄be isan̄a kpai. ²⁷ “Enyi mînọ ibe ke ejeen̄ ibe, ‘Ikagan nwa ene.’ ²⁸ Ire, emi ǹkitumu inyi enyi ibe, enerieen̄ geelek òsasa chieen̄ ikpọ enenwaan̄, mè ikaan̄ ulọk ilaak me lek ogwu enenwaan̄ ya, enerieen̄ ya îra igagan ogwu enenwaan̄ ya isan̄a me emen ejit kan̄. ²⁹ Ire chieen̄ kwun̄ agan̄ ulom ikirọ inyi owu òrọ ijo inu, rọkọ chieen̄ ya san̄a, mè tọp fiin̄, mije, înwọn ibe nriro ge inan̄a me lek kwun̄ igak owu ikakaan̄ otutuuk nriro lek kwun̄ iso, ebeben owu itọp itap me emen ukan̄ ama yọk. ³⁰ Ire ubọk kwun̄ agan̄ ulom ikirọ inyi owu òrọ ijo inu, fieek ubọk ya san̄a, mè tọp fiin̄, mije, înwọn ibe nriro ge inan̄a me lek kwun̄ igak owu ikakaan̄ otutuuk nriro lek kwun̄ iso, ebeben owu itọp itap me emen ukan̄ ama yọk. ³¹ “Etumu ibe, ‘Ogwu iboyaak ogwu nwa, ige ikpa iyaak-nwa inyi ogwu enenwaan̄ ya.’ ³² Ire, emi ǹkitumu inyi enyi ibe, enerieen̄ geelek òyayaak ogwu nwa me ogwu nwa ikasige ugan, enerieen̄ ya îrọn̄ ikan, mije, îsa ogwu enenwaan̄ ya itap òje oyet. Ene geelek òdodo si ogwu enenwaan̄ ogwu ogwu olom oyaakbe me oniin̄ òkup ikeyi îrọn̄ si ikan ugan-nwa.” ³³ “Enyi mînọ si ibe ke ejeen̄ me ukot ikaan̄ ibe, ‘Ogwu inyan̄a ibot inyi Okumugwem, ene ya ikalọlọ irọrọ inyan̄a-ibot kan̄ iso.’ ³⁴ Ire, emi ǹkitaba enyi ubọk me utọn̄ ibe, ikayaka ìnyan̄a ibot kubọk ge. Ikasa emen inyọn̄ ìnyan̄a ibot, mije, emen inyọn̄ ìre udu ubọọn̄ Awaji. ³⁵ Ikasa si linyọn̄ ìnyan̄a ibot, mije, linyọn̄ ìre inu Awaji okisa ibene ukot. Ikasasa si erieen̄ ama ile Jeruselem ìnyan̄a ibot, mije, ama ya ìre ama Ogwu Ubọọn̄ ilile ya. ³⁶ Ikasa si ibot kinyi inyan̄a ibot, mije, enyi kpebekọt irọ inyi ukut ijeek geege òkup me ibot kinyi ikana okuket, mè ìre ofifit. ³⁷ Ikanyan̄a ibot geege mgbọ enyi ekichieek ene use. Ire, iin̄ kinyi ire iin̄ me atikọ, iin̄-iin̄ kinyi ire si iin̄-iin̄ me atikọ. Isisaba iraka iin̄ mè iin̄-iin̄, ikọ geelek oyakabe itap isọkọ me lek use kwun̄ ìnan̄a me ubọk Yọk.” ³⁸ “Enyi mînọ ibe ke ejeen̄ ibe, ‘Ogwu irọkọ owu chieen̄ ge, rọkọ si ene ya chieen̄ ge me useen̄. Ogwu ifan̄a owu ejeek ge, fan̄a si ene ya ejeek ge me useen̄.’ ³⁹ Ire, emi ǹkitumu inyi enyi ibe, ikaan̄ ogwu irọ enyi ijo inu, ikarọ ene ya useen̄. Ire ene isulu enyi ada me agba isi agan̄ ulom, ìkana agan̄ ujit ìnyi mè isulu si. ⁴⁰ Ire ene ibosi igwen owu oyerebet, inyi ọmọ ikọt ibọkọ owu ọfọnti irak kwun̄, wọọk ọfọnti inyọn̄ kwun̄ si gbaalek sa nyi ene ya. ⁴¹ Ire ogwu akọn̄ ge itet owu me unye ibe owu ònoben inu ògọọk ọmọ òje ewuuk ije ge, gọọk ene ya je so ewuuk ije iba. ⁴² Ogwu ibeek owu inu, che nyi. Ogwu inu ufọọk me lek kwun̄, kajit ifọfọọk ene ya inu îweekbe ifọfọọk. ⁴³ “Enyi mînọ ibe ke ejeen̄ ibe, ‘Ma ogwu melek kwun̄, mè cha ogwu ochicha kwun̄.’ ⁴⁴ Ire, emi ǹkitumu inyi enyi ibe, ìma ebi ochicha kinyi, mè ìkiriaak uriaak me ibot ebi ìkisisaak enyi, ⁴⁵ inyi enyi ere bọn Nte kinyi ogwu òkup me emen inyọn̄. Mije, Nte kinyi ogwu òkup me emen inyọn̄ ìkirọ inyi ura kan̄ ikira ìkike itoon̄ me lek ebi ata ene mè ebi ijo ene, mè ikirọ si inyi ibot kan̄ ikirep ìkike igwook me lek ebi ata irọrọ mè ebi ijo irọrọ. ⁴⁶ Ire enyi ikima ebi ìmama enyi gaalek, ìre kpasi mkpukpe ke enyi eyaka ikikpọ chieen̄ ibọbọkọ me ubọk Awaji? Ìre ìkare si inu yaage ke ebi ìkibọkọ otitip ido ekirọ? ⁴⁷ Ire enyi ikitọp ebi ngwan̄ kinyi gaalek amọn, ìre kpasi inu ke enyi esa isibi esese me lek ebi ofifi ene? Ìre ìkare si inu yaage ke ebi ekariọọn̄ge Awaji ekirọ? ⁴⁸ Eya orọ, ìnwọn ìsan̄a kubọk Nte kinyi ogwu òkup me emen inyọn̄ onwọnbe isan̄a.

¹ “Ìmun̄ ibe ke enyi kpekinyi inyinyi kinyi me chieen̄ ebilene, inyi ebilene ekemun̄. Mije, ire enyi ikinyi inyinyi kinyi me chieen̄ ebilene, enyi kpebekaan̄ mkpukpe geege inan̄a me ubọk Nte kinyi ogwu òkup me emen inyọn̄. ² “Eya orọ, mgbọ enyi isikiche inu inyi ebi ugbọọn̄, ikasa ìtaan̄ okput ìkana ere ike ebi isi iba ekirọ me emen uwu ntitiin̄ melek ejit oniin̄, inyi ebi ene ekemun̄ inu ema ekirọ, mè etọn̄ ema. Me atikọ, ǹkitumu inyi enyi ibe ke ife cha mîbọkọ mkpukpe kiban̄ ojot ojot isan̄a kpai. ³ Ire, mgbọ geelek owu okiche inu inyi ogwu ugbọọn̄, kakichieek ibe ubọk kwun̄ agan̄ ujit iriọọn̄ inu ubọk kwun̄ agan̄ ulom okirọ. ⁴ Sa me ikeyi, inyinyi kwun̄ môkup me nlelet. Ikeya si, Nte kwun̄ ogwu òkimun̄ inu ekirọ me nlet môkpe owu mkpukpe. ⁵ “Enyi isiberiaak uriaak, ikakiriaak kubọk ebi isi iba ekiriaak. Ebi isi iba ekima ikekeke me eden̄ uwu ntitiin̄, mè agba oniin̄ ikiriaak uriaak, inyi ebi ene ekemun̄ ema. Me atikọ, ife chi mîbọkọ mkpukpe kiban̄ ojot ojot isan̄a kpai. ⁶ Ire owu, mgbọ geelek oboriaak uriaak, je nin̄ emen agwut kwun̄, mè gwuk isotu, mè kup me ere ya riaak uriaak nyi Nte kwun̄ ogwu kpekimun̄ chieen̄, ke Nte kwun̄ ogwu òkimọọn̄ inu erọbe me nlelet môkpe owu mkpukpe kwun̄. ⁷ Me mgbọ okiriaak uriaak, kakpọkpọ ìkitumu ikọ ikakaan̄ge ibot kubọk ebi ekariọọn̄ge Awaji ekirọ, mije, ema ekimọnọ ibe ke Awaji ìbonọ ema ida inan̄a me lek owuwa ikọ kiban̄. ⁸ Ire, ikarọ ubọk ife chi ekirọ, mije, Nte kinyi îriọọn̄ inu geelek òkup enyi me uyọt sabum enyi ebenichichili otu ido. ⁹ “Enyi isiberiaak uriaak, ikeyi ke enyi ebekiriaak: Nte kiji ogwu òkup me emen inyọn̄, erieen̄ kwun̄ ikup me mbuban, ¹⁰ mkpulu eyi kwun̄ inu, mè nkeek kwun̄ irọ me linyọn̄, ike îkupbe me emen inyọn̄. ¹¹ Nyi eji inorie chereyi, kubọk okinyi eji me usen me usen. ¹² Tele ijo kiji nyi eji, ike eji ekitele inyi ebi ìrọrọ eji ijo inu. ¹³ Kachieek eji enin̄ me ntọ-mkpọ, ire, taba eji sibi me ubọk Yọk.” ¹⁴ “Ire enyi itele ijo inyi ebilene ebi ìrọrọ enyi ijo inu, Nte kinyi ogwu òkup me emen inyọn̄ môtele si ijo kinyi inyi enyi. ¹⁵ Ire, ire enyi kpetele ijo inyi ebi ìrọrọ enyi ijo inu, Nte kinyi si ìkpotele ijo kinyi inyi enyi.” ¹⁶ “Mgbọ geelek enyi ekijin otu, ikakisun̄ lek kinyi njijin njijin kubọk ebi isi iba ekirọ, mije, ema ekinwenwene isi kiban̄, inyi ebi ene esa eriọọn̄ ibe ke ema ekijin otu. Me atikọ, ǹkitumu inyi enyi ibe ke ife chi mîbọkọ otutuuk mkpukpe kiban̄ ojot ojot isan̄a kpai. ¹⁷ Ire, mgbọ geelek owu obojin otu, gwọk isi kwun̄, mè chiọọk aran̄ me lek ijeek ibot kwun̄, ¹⁸ inyi ene geege ikariọọn̄ ibe ke owu òkijin otu, ilọ me lek Nte kwun̄ ogwu kpekimun̄ chieen̄. Nte kwun̄ ogwu òkimọọn̄ inu geelek ekirọ me nlelet môkpe owu mkpukpe kwun̄. ¹⁹ “Ikatitiin̄ inu ubọọn̄ kinyi ìsun̄ me linyọn̄ keyi ere nkarankat mè achiaan̄ môtakabe isan̄a, melek ere ebi inọ mêkọtbe ibum inin̄ uwu inichiin̄. ²⁰ Ire, ìtitiin̄ inu ubọọn̄ kinyi ìsun̄ me emen inyọn̄, ere nkarankat mè achiaan̄ kpokọtbe isi ifiat, melek ere ebi inọ kpekọtbe ibum inin̄ isi ichiin̄. ²¹ Mije, ere geelek inu ubọọn̄ kwun̄ okupbe, ere ya si ke ejit kwun̄ okup. ²² “Chieen̄ ene ìkup kubọk mkpukan̄ isa inyi akpalek ene. Eya orọ, ire chieen̄ kinyi inwọn, utoon̄ ìbojojot enyi me emen. ²³ Ire, ire chieen̄ kinyi ifieek, udun ìbojojot enyi me emen. Ire utoon̄ òkup me emen kinyi iyaka inikana udun, udun keya mômin enenen. ²⁴ “Kpunu gwun̄ uwu geege òbokọt ikisi ikwaan̄ inyi nte uwu iba mgbọ ge. Ire ìkama nte uwu ge, mè ìcha ogwulọ, môyaka lek kan̄ inyi nte uwu ge, mè ikpọ ogwulọ chieen̄ ilọ me lek. Ikeya si, enyi kpebekọt ikisi ikwaan̄ inyi Awaji melek inu ubọọn̄ linyọn̄ me mgbọ yaage. ²⁵ “Eya orọ, ǹkitumu inyi enyi ibe, ikakisisaak lek mije inu enyi ebekirie, melek inu enyi ebekinwọ, mè ìre ekwut mè ọfọnti enyi ebekisa ikwek lek. Ǹdo enyi nu, ìre ugwem ìkafat ìkup me uyọt ìgak inorie? Sa ìre akpalek ìkafat ìkup me uyọt ìgak ekwut mè ọfọnti? ²⁶ Ìkpọ-nu unọn òwulu me inyọn̄, ìkakiwop inu geege, ìkakirọrọkọ si inu geege ìtap me uwu isun̄-inorie. Ire, Nte kinyi ogwu òkup me emen inyọn̄ okekikpukpo ema mgbọ geelek. Ìre enyi kpefat inye otu ewe enenen igak unọn chi? ²⁷ Ìre ekene me etete kinyi obokọt itap mbubak mgbọ ge isọkọ me otu ifuk usen ugwem kan̄ inan̄a me imama lek ikisisaak lek kan̄? ²⁸ “Ìre keke orọ enyi ekisisaak lek kinyi mije ekwut mè ọfọnti? Ìkpọ-nu ubọk ajakajak otu oron okitibi, mè ikijaan̄ lek. Ema kpekisi ikwaan̄, kpekilọk ekwut. ²⁹ Ire, ǹkitumu inyi enyi ibe ke ogwu ubọọn̄ Sọlọmọn me lek kan̄ ìkakọt ìbala lek ìsoon̄ ge me lek ajakajak otu oron chi, ubọk geelek îminbe mè ibọọn̄ ubọọn̄ enenen. ³⁰ Ire mbubet otu oron eyi òkitibi chereyi, mè ikwu iyakwut, esasa isọk ukan̄, ke Awaji okibala ijaan̄ ikeyi, ìre Awaji ìkpofat inyi enyi inu enyi ebetap ichit akpa lek igak ikeya? Enyi ebi sọntiik ichechieek kechi! ³¹ Eya orọ ikayaka ìkisisaak lek kinyi ìkibe, ‘Ìre keke ke eji eberie? Ìre keke ke eji ebenwọ? Sa ìre keke ke eji ebetap isa ikwek lek?’ ³² Mije, îre inu chi ke ebi ekariọọn̄ge Awaji ekinwe chieen̄ ilibi igọọk. Ire, eyi kinyi, Nte kinyi ogwu òkup me emen inyọn̄ îriọọn̄ ibe ke inu chi geelek îkup enyi me uyọt. ³³ Eya orọ, ìdasi ìweek mkpulu eyi Awaji, mè irọrọ inu Awaji okiweek, ke Awaji mônyi enyi otutuuk inu chi geelek si igbaalek. ³⁴ Ikakisisaak lek mije iyakwut òbowele. Ìtele inyi ufialek eyi iyakwut òbowele ikup inyi iyakwut. Usen geelek îkaan̄ ufialek eyi kan̄. Ikasa ufialek eyi iyakwut òbowele ìnitap ìsọkọ me lek ufialek eyi egwe cherekeyi.

¹ “Ikafieek ene ikọ, inyi ene ikafieek enyi si ikọ. ² Mije, ike enyi efieekbe ene ikọ, ikeya si ke ebi ene ebefieek enyi ikọ. Inu yaage enyi esabe ifieek ene ikọ ke ebi ene ebesa ifieek enyi ikọ si. ³ “Ìre keke orọ owu okisa chieen̄ ikpọ sọntiik nsiseen̄ uti òkup ngwan̄ kwun̄ me chieen̄, ire, òkamun̄ ikpele nkikek uti òkup me chieen̄ kwun̄? ⁴ Sa ìre owu òbojeje ibe ngwan̄ kwun̄, ‘Kana ǹsan̄a owu nsiseen̄ uti me chieen̄,’ me ere owu me lek kwun̄ okiben nga nkikek uti ile me chieen̄ ikana ere? ⁵ Owu ogwu isi iba keyi! Dasi san̄a ikpele nkikek uti òkup me chieen̄ kwun̄, inyi owu òkọt òmọọn̄ inu òsan̄a nsiseen̄ uti òkup ngwan̄ kwun̄ me chieen̄. ⁶ “Ikasa inu òkup mbuban ìnyi ibo. Ire enyi ìsa inyi, ibo cha môgwu ikana inu iniloon̄ enyi lek igwak. Ikeya si, ikakpulu akalari unye otu ewe ìtọọn̄ ìgwook ìnyi okodi. Ire enyi irọ, okodi cha môsa ukot ijak akalari cha me ijọn̄. ⁷ “Ìbeek, ke mênyi enyi. Ìweek, ke enyi mêweek imun̄. Ìtọbọ ubọk me isotu, ke mêgwuku inyi enyi. ⁸ Mije ogwu ibeek, môbọkọ; ogwu iweek, môweek imun̄; ogwu itọbọ ubọk me isotu, mêgwuku inyi. ⁹ “Ìre ekene me lek kinyi ke ogwu gwun̄ môbeek fituru, mè ene ya inyi ewuuk? ¹⁰ Sa ìre ekene ke ogwu gwun̄ môbeek irin̄, mè ene ya inyi ijijunu? ¹¹ Ire enyi ebi ijo iriọọn̄ ubọk ekinyi bọn kinyi ata inu, ìre enyi kperiọọn̄ ibe ke Nte kinyi ogwu òkup me emen inyọn̄ mônyi ene geelek òbebeek ọmọ inu isaba iraka ike enyi ekinyi bọn kinyi? ¹² Eya orọ, ire ikaan̄ inu omun̄be ibe ke înwọn ibe ene irọ inyi owu, owu rọ si inu ya nyi ofifi ene, mije, eyiyi ore inu eyi otutuuk Ikan kè Mosis, mè inu geelek egebe me emen ikpa ebi Nriran osibibe. ¹³ “Ìje ìtibi ìnin̄ me otunchit eyi òsisip. Mije, otunchit eyi òkisa ene isi itap me ichep mè mfiat ìwewele, oniin̄ kan̄ si ìkpọkpọ iwele. Ebi ene ebi ìkije inin̄ me otunchit yi ìre ogbogbo. ¹⁴ Ire, otunchit eyi òkisa ene isi itap me ugwem ìre sọntiik. Oniin̄ kan̄ si ìkpọkpọ isip, mè ikup uyọt uyọt. Ibot ene inen mè inen gaalek ekikọt iweek otunchit yi mè oniin̄ yi imun̄. ¹⁵ “Ìriọọn̄ lek kinyi me lek ebi nriran ataak ebi ìkije ikana kubọk arọọn̄ eyi ìkakifiat inu geege, ire, me emen kiban̄, ema ìre egbe òkigwak anam itaka. ¹⁶ Enyi mêsa ọrọmijọn̄ kiban̄ iriọọn̄ ema. Ìre ukpak môto mfut gerep? Sa ìre abọm egbe môto mfut figi? ¹⁷ Ubọk yaage si, ata uti geelek ìkito ata mfut, ijo uti geelek si ìkito ijo mfut. ¹⁸ Ikeya si, ata uti ìkakito ijo mfut. Ijo uti si ìkakito ata mfut. ¹⁹ Uti geelek ikatoge ata mfut, mêcho ito, mè iben itọp itap me ukan̄. ²⁰ Eya orọ, enyi mêsa mfut kiban̄ iriọọn̄ ema. ²¹ “Ìkare ene geelek òkigwen emi Okaan̄-ene, Okaan̄-ene, obonin̄ mkpulu eyi emen inyọn̄. Îre ogwu keya òkirọ nkeek eyi Nte n̄a ogwu òkup me emen inyọn̄ gaalek obonin̄. ²² Mgbọ Usen Oyerebet Awaji môrebe, owuwa ene mêbe emi, ‘Okaan̄-ene, ìre ìkare erieen̄ kwun̄ ke eji esa iben nriran, mè isa ilap ijo erumun̄ isibi me emen ene, mè isa irọ si owuwa inu ukechieen̄?’ ²³ Mgbọ ya, mâbook otu itumu inyi ema ibe, ‘Enyi ebi ijo irọrọ kechi! Ǹkariọọn̄ enyi isi kubọk ge. Ìje ìnan̄a emi me isi.’ ” ²⁴ “Eya orọ, ene geelek ònọnọ ikọ n̄a chi, mè ikirọ ike emi nkijeen̄, ene ya ìkup kubọk ogwu òriọọn̄ inu ogwu ònanama uwu kan̄ me inyọn̄ ewuuk. ²⁵ Ibot onenirep ibọn̄ uwu ya, mun̄ ile obabaak imeen̄, efet egwijo owuwut si ibieen̄. Ire, uwu ya ìkagbugbọ, mije, etọbọ ọdọ kan̄ me inyọn̄ ewuuk. ²⁶ Ire, ene geelek ònọnọ ikọ n̄a, mè ìkasa ikọ ya ìgwen inu, ene ya ìkup kubọk ogwu burubut òsi inama uwu kan̄ me inyọn̄ okpoon̄. ²⁷ Ibot onenirep ibọn̄ uwu ya, mun̄ ile obabaak imeen̄, efet egwijo owuwut si ibieen̄. Uwu ya ogbugbugbọ igwook, mè irọn̄ atalek irọn̄.” ²⁸ Mgbọ Jisọs ojeen̄be inu chi isan̄a, ijejeen̄ kan̄ otetet ebi ife cha ukpook, mè ike ema chieen̄ enenen. ²⁹ Mije, ìkajeen̄ inu ya kubọk ebi ìjeen̄ Ikan ekijeen̄. Ire, ìjeen̄ inu ya kubọk ogwu òkakaan̄ unye me lek inu ya.

¹ Mgbọ Jisọs onan̄abe me inyọn̄ ogoon̄ ya isibi, owuwa ebi ene egbugbuku ikigọọk ọmọ me udun̄. ² Ogwu orukan̄ inyakpa ge ojeje inu, mè initọbọ ekpe me isi kan̄, mè ibe ọmọ, “Okaan̄-ene, ire ineme owu, owu môkọt igwa emi, inyi emi ǹtana.” ³ Jisọs onyanyana ubọk kan̄ ichak ogwu orukan̄ ya me lek, mè itumu inyi ibe, “Îneme emi, lek kwun̄ inye!” Mgbọ yaage, orukan̄ inyakpa ya otata isan̄a kpai, ọmọ otatana. ⁴ Jisọs otutumu inyi ọmọ ibe, “Kakpa inu yi òrọrọ ìnyi ene geege. Ire, sa lek kwun̄ si jeen̄ ogwu ngwugwa, mè gwa ngwugwa ike Mosis onyibe me Ikan ibe ene geelek egwabe inyakpa isan̄a me lek igwa, inyi ebi ene esa eriọọn̄ ibe ke owu otana.” ⁵ Jisọs oneninan̄a ije isi ama Kapanọm. Mgbọ înin̄be emen ama ya, ogwu ibot akọn̄ ge onunu me lek kan̄ iniweek ntap-ubọk, ⁶ mè ibe ọmọ, “Soso Okaan̄-ene, îkaan̄ gwun̄ uwu n̄a ge òkifiak orukan̄ ngọm. Ọmọ me uwu olaakbe, ìkakọt ibene lek, mije, orukan̄ ya îfiak ọmọ enenen.” ⁷ Jisọs onenichieek ogwu ene ya use ibe ke ọmọ mônu inigwa ogwu gwun̄ uwu ya. ⁸ Ogwu ibot akọn̄ ya otutumu inyi Jisọs ibe, “Okaan̄-ene, emi ǹkagbe ogwu owu obonin̄ uwu kan̄. Keke me ere keyi tumu ikọ, ke lek gwun̄ uwu n̄a ya mônye. ⁹ Mije, emi ìre ogwu akọn̄ òkup me irak ofifi ebi akọn̄ ebi ìbebene igak emi. Îkaan̄ si ebi ìkukup emi me irak. Ire nnyi ida ibe ene ge me lek ebi ìkup me irak n̄a, ‘Je,’ ene ya ìkaan̄ ijeje. Nsiyaka inyi ida ibe ofifi ene, ‘Na,’ ogwa ìkaan̄ inunu. Nsibe gwun̄ uwu n̄a, ‘Rọ ikeyi,’ ìborọrọ.” ¹⁰ Ikọ ogwu ibot akọn̄ ya otumube okeke Jisọs chieen̄ enenen. Jisọs otutumu inyi ebi ìkigbuku igọọk ọmọ me udun̄ cha ibe, “Me atikọ, ǹkitumu inyi enyi ibe ke ǹkararak ìmun̄ ene geege òkakaan̄ òjelek ikpele ichechieek òkup ikeyi me Ijeren. ¹¹ Eya orọ, ǹkitumu inyi enyi ibe ke owuwa ebi ekarege ebi Ijeren mênan̄a me agan̄ mbum-ura, mè agan̄ ichep-ura inu inigọọk Ebereham mè Ajiki mè Jekọp isiki ikweek ikirie ijọk me mkpulu eyi emen inyọn̄. ¹² Ire, ebi ekikpọ chieen̄ ibe ke ema ebekup me mkpulu eyi emen inyọn̄, ebiba ke ebelap isibi igwook me emen udun. Me ere ya ke ema ebekup ikitaan̄ ukpo ito ito, mè ikitaka ejeek.” ¹³ Jisọs onenitumu inyi ogwu ibot akọn̄ ya ibe, “Je fo, ke mêrọ inyi owu ike owu ochieekbe.” Me ike mgbọ yaage si, lek gwun̄ uwu ogwu ibot akọn̄ ya onyenye. ¹⁴ Jisọs oneninan̄a me ere ya ije isi uwu kè Pita, mè imun̄ nga nwa kè Pita olaakbe me inyọn̄ mkpilaak. Ukan̄ îbak me lek. ¹⁵ Jisọs ochachak ọmọ ubọk me lek, ukan̄ ya otetele ọmọ. Inanan̄a ikeke, mè isi irọ inorie inyi ema. ¹⁶ Me otu ikakwun̄ usen ya, ebi ene ekpukpulu owuwa ebi ijo erumun̄ okupbe me emen ijet Jisọs, Jisọs otutumu otu ikọ ge, otutuuk ijo erumun̄ cha esisibi isan̄a me emen ebi ife cha. Igwagwa si otutuuk ebi orukan̄ geelek ìnunu me lek kan̄. ¹⁷ Inu chi Jisọs orọbe îrọ iso ikọ Awaji otumube inan̄a me otu kè Asaya ogwu nriran ibe, “Ọmọ gaalek obeme ufiak kiji, mè ibeme otutuuk orukan̄ kiji inyi eji.” ¹⁸ Mgbọ Jisọs omun̄be ogbogbo ebi ene cha ìkekeke ikana ọmọ, itutumu inyi ebi udun̄ kan̄ ibe, “Eji enesaba okwaan̄ yi esi agan̄ keyilọ.” ¹⁹ Ogwu òjeen̄ Ikan ge ojeje inu me lek kan̄, mè ibe ọmọ, “Ogwu Ijejeen̄, emi mâgọọk owu ijijen̄e isi ere geelek obosi.” ²⁰ Jisọs ofọfọọk ọmọ ibe, “Ekpukuruk îkaan̄ udọn̄ ere îkiluk, unọn òwulu me inyọn̄ îkaan̄ si uwu ere îkiluk. Ire, emi Gwun̄ Ebilene ǹkakaan̄ ere nkiyaka ibot imaan̄.” ²¹ Ene ge me lek ebi ìkigbọọk igọọk ọmọ me udun̄ onenibe ọmọ, “Okaan̄-ene, emi mâgọọk owu ije. Ire, tele mè ǹdasi ǹsi m̀fuun̄ nte n̄a sabum, ǹnengọọk owu.” ²² Jisọs obebe ọmọ, “Na nagọọk emi, mè tele mè ebi kpekaan̄ ugwem ikakaan̄ge itata efuun̄ ebi kiban̄ ìkwukwu.” ²³ Jisọs oneninin̄ emen uji, ọmọ mè ebi udun̄ kan̄, mè ibene ikikọp isaba okwaan̄ oyô ya. ²⁴ Ema mêkikọp me inyọn̄ isi mun̄ ya, egwijo okpọkpọ ibene me ema ekakpọge chieen̄. Egwijo ya îwut inye enenen me isi mun̄ ya, ekoon̄ obebene ikitap mun̄ me uji kiban̄ ya. Ire, ike mgbọ ya, Jisọs ìkilalaak. ²⁵ Ebi udun̄ kan̄ esisi itimi ọmọ, mè ibe ọmọ, “Okaan̄-ene, nyan̄a eji! Eji mênichieen̄ ita me okwaan̄.” ²⁶ Jisọs obebe ema, “Ìre keke orọ ukpook okitet enyi ikeyi? Enyi ebi sọntiik ichechieek kechi!” Ineninan̄a ikeke, mè igana ere inyi unye efet egwijo ya melek ekoon̄ cha, ema ewọwọ, isi mun̄ olọlọkọ. ²⁷ Inu ya okeke ebi udun̄ kan̄ chieen̄ enenen. Ema ebebene ikidido lek kiban̄ ibe, “Ìre kpasi ene ire ogwu, ogwu efet mè okwaan̄ okigban̄ uton̄ inyi?” ²⁸ Jisọs mè ebi udun̄ kan̄ enenisaba okwaan̄ ya itoon̄ me agan̄ ebi Gadara elukbe. Mgbọ ema erebe ere ya, ene iba ijo erumun̄ okisisaak enanan̄a me oron ekwukwu isibi inichichini ọmọ. Mije ebi ife chi ekirọ inu afa afa, ebi ene kpeyaka ikọt ikije iraka me ere ya. ²⁹ Ema imumun̄ Jisọs, ema ebebene ikitaan̄ ukpo ibe, “Owu Gwun̄ Awaji, ìre keke ke okiweek melek kiji? Ìre òbonu inisisaak eji mgbọ keyi me mgbọ mgbọ ikakemge-nu?” ³⁰ Îkaan̄ ikpele urum okodi òkukup igbet ere ya ikirie urie. ³¹ Ijo erumun̄ cha eneniriaak Jisọs ibe, “Ire obolap eji isibi me emen ife chi, lap eji tap me emen urum okodi chilọ.” ³² Jisọs ogagana inyi ema ibe, “Ìnan̄a ìsibi!” Ema enanan̄a me emen ife cha isibi, mè ikana isi inin̄ emen okodi cha. Otutuuk urum okodi ya olilibi ikwala isibi agan̄ ogoon̄ ya, mè igbuku igwook me okwaan̄, mè ikwaan̄ ita. ³³ Ebi ìkikpukpo okodi cha elilibi inin̄ emen ama, mè isi ilook ebi ene inu òrọrọ me lek okodi kiban̄, mè inu òrọrọ me lek ebirieen̄ iba cha ijo erumun̄ okupbe me emen. ³⁴ Ebi ama ya egbugbuku isibi inu inichichini Jisọs me ere ya. Mgbọ ema emun̄be ọmọ, ema ebebene ikiriaak Jisọs ibe inan̄a isibi me inyọn̄ ijọn̄ kiban̄.

¹ Jisọs onenisaba inin̄ emen uji. Ọmọ melek ebi udun̄ kan̄ esasaba okwaan̄ ya ifo ama ere îkiluk. ² Mgbọ ema erebe ama ya, ebi ene ebeben enerieen̄ ge òkifiak orukan̄ ngọm me inyọn̄ ufo isa ijet ọmọ ibe igwa. Mgbọ Jisọs omun̄be ichechieek ife cha ekaan̄be, itutumu inyi ogwu ngọm ya ibe, “Gwun̄ enerieen̄, kat ejit, ke mîtele ijo kwun̄ inyi owu.” ³ Mgbọ usini ebi ìjeen̄ Ikan ìkup me ere ya enọbe ikọ ya Jisọs otumube, ema ebebene ikinunuun̄ me etete kiban̄ ibe, “Ene yi ìkitumu ikọ unyechieen̄ ikeme Awaji.” ⁴ Jisọs orọriọọn̄ inu ema ekikeek, mè inido ema ibe, “Ìre keke orọ enyi ekikeek ijo ekikeek òkup ikeya me ejit kinyi? ⁵ Ìre eyi owa ofet itutumu? Ìre ibebe: Mîtele ijo kwun̄ inyi owu? Sa ìre ibebe: Nan̄a keke, mè kat ufo kwun̄, mè je fo? ⁶ Mgbọ keyi, emi mârọ inyi enyi eriọọn̄ ibe ke emi Gwun̄ Ebilene nkaan̄ unye me linyọn̄ yi itetele ijo inyi ene.” Itutumu inyi ogwu ngọm ya ibe, “Nan̄a keke, mè kat ufo kwun̄, mè je fo.” ⁷ Me isi otutuuk kiban̄, ogwu ngọm ya onanan̄a ikeke mgbọ yaage, mè ije ifo. ⁸ Mgbọ ebi ìkup me ere ya emun̄be inu ya òrọrọ, ukpook otetet ema enenen. Ema ebebene ikitọn̄ Awaji ogwu ònyinyi ebilene òjelek unye òkup ikeyi. ⁹ Mgbọ Jisọs onan̄abe me ere ya ije inyi isi, inenimun̄ ogwu enerieen̄ ge ekigwen Matiyu, ogwu òkitip otitip ido okupbe me uwu ikwaan̄ kan̄, mè igwen ọmọ ibe, “Na nagọọk emi.” Matiyu onanan̄a ikeke, mè igọọk Jisọs. ¹⁰ Jisọs mè ebi udun̄ kan̄ enenisi uwu kè Matiyu. Matiyu otetet ema ichen. Owuwa ebi ìkibọkọ otitip ido, mè owuwa ebi kpekisun̄ Ikan kè Mosis enunu inigọọk Jisọs mè ebi udun̄ kan̄ ikirie inorie me uwu ya. ¹¹ Ebi Farisi imumun̄ ikeya, ema edodo ebi udun̄ kè Jisọs ibe, “Ìre keke orọ mè ogwu ijejeen̄ kinyi ikigọọk ebi otitip ido mè ebi ijo igbaan̄ irie inorie?” ¹² Jisọs onọnọ ikọ ya ema edobe, mè itumu inyi ema ibe, “Ogwu lek onyebe ìkakiweek ogwu ofia. Îre ogwu lek ikanyege okiweek ogwu ofia. ¹³ Enyi mîfuk me emen Ikpa Mbuban ibe ke Awaji ìbe, ‘Ǹkiweek ejit nsan, ǹkaweek ngwugwa.’ Ìfon, mè ìsi ìweek inu ikọ ya osibibe. Emi ǹkanu inenigwen ebi ata irọrọ. Ǹnu inenigwen ebi ijo irọrọ ibe egwu ekom.” ¹⁴ Usen ge, ebi udun̄ kè Jọn ògwook mun̄ enunu me lek kè Jisọs, mè inido ọmọ ibe, “Ìre keke orọ eji mè ebi Farisi ekijin otu, ire, ebi udun̄ kwun̄ kpekijin otu?” ¹⁵ Jisọs oyayaka ido ema ibe, “Ìre ebi egwenbe me ijọk ido-nwa ebejeje ikup me ufieejit, me ere ogwu òdo nwa okupbe me etete kiban̄? Ire, usen ge òkinu, mgbọ mêmọnọbe ogwu òdo nwa ya isan̄a me etete kiban̄. Mgbọ keya ke ema ebejin otu. ¹⁶ “Kpekisa ọkpọkọ aya ekwut ichim ichit ere ògwagwak me lek oka ekwut, mije, ọkpọkọ aya ekwut ya môlibi iriaak, mè itaba chieen̄ ere ògwagwak ya ibook igak adasi mgbọ. ¹⁷ Ikeya si, kpunu ogwu òkitap aya miin̄ me emen oka ogbokot ikpa anam, mije, oka ogbokot ikpa anam ya môrama ibum, mè ijijaka, mè ifin si miin̄ ya ichep. Ekitap aya miin̄ me emen aya ogbokot ikpa anam, miin̄ melek ogbokot îra ikikup me utelelek.” ¹⁸ Ikọ ya ìkatata Jisọs me otu, enerieen̄ ge me lek ebi ibot uwu ntitiin̄ ebi Ju onunu, mè initọbọ ekpe me isi kan̄, mè itumu inyi ọmọ ibe, “Gwun̄ n̄a enenwaan̄ îkwu mgbọ keyi mgbọ keyi. Ire, soso, na si chak ubọk me lek, ke môgat ugwem.” ¹⁹ Jisọs onanan̄a ikeke, mè igọọk ogwu enerieen̄ ya ije. Ebi udun̄ kan̄ si egọgọọk ọmọ ije. ²⁰ Îkaan̄ ogwu enenwaan̄ ge eje okisibi me lek akọp mè acha iba. Mgbọ Jisọs mè ebi udun̄ kan̄ ekije ibesi uwu ogwu ibot uwu ntitiin̄ ya, ogwu enenwaan̄ yi onanan̄a me agan̄ udun̄ ije itibi etete ebi ene, mè inichak ubọk me otu utọn̄ ọfọnti kè Jisọs. ²¹ Ogwu enenwaan̄ ya îwuuk lek itumu ifieek me ejit kan̄ ibe, ìrere otu utọn̄ ọfọnti kè Jisọs gaalek ke ọmọ okọt ichak ubọk me lek, ke lek kan̄ mônye. ²² Mgbọ îchakbe ubọk me otu utọn̄ ọfọnti ya, Jisọs okakana chieen̄, mè imun̄ ọmọ, mè ibe ọmọ, “Gwun̄ enenwaan̄, kat ejit, ke ichechieek kwun̄ îgwa owu.” Mgbọ yaage, lek ogwu enenwaan̄ ya onyenye. ²³ Mgbọ Jisọs mè ebi udun̄ kan̄ cha ejebe ire uwu ogwu ibot uwu ntitiin̄ ya, ema emumun̄ ebi ìkiwut odu ifit mkpa-ene, mè imun̄ si ubọk ebi ito enin̄be inwaan̄ uwu ya, mè ikikput okput. ²⁴ Jisọs oneninyi ida ibe, “Enyi otutuuk ene ìsibi. Gwun̄ enenwaan̄ ya ìkakwukwu, ìkilalaak.” Ire, ebi ife cha ekekichak ọmọ. ²⁵ Mgbọ îlapbe ema otutuuk ene igwook me oyet isan̄a, ininin̄ emen agwut ere emaan̄be gwun̄ enenwaan̄ ya, mè itet ọmọ me ubọk ibene. Gwun̄ enenwaan̄ ya onanan̄a ikeke. ²⁶ Etip inu yi otataan̄ ikana otutuuk agan̄ ya. ²⁷ Jisọs inanan̄a me ere ya ikije, ebi ǹnàan̄ iba ekekije igọọk ọmọ, mè ikitaan̄ ukpo ibe, “Gwun̄ kè Debit, kaan̄ ejit nsan me lek kiji.” ²⁸ Mgbọ Jisọs ojebe isi inin̄ uwu ere ìkikup, ebi ǹnàan̄ iba cha enenije inu me lek kan̄. Ọmọ onenido ema ibe, “Ìre enyi mîchieek ibe ke emi mâkọt igwa enyi?” Ebi ǹnàan̄ cha efọfọọk ibe, “Iin̄, Okaan̄-ene, eji mîchieek.” ²⁹ Jisọs onenitoon̄ ubọk me chieen̄ kiban̄, mè itumu inyi ema ibe, “Ikup inyi enyi ike ichechieek kinyi okupbe.” ³⁰ Ema ebebene ikimọọn̄ inu. Ire, Jisọs otataba ema ubọk me utọn̄ ibe mè ema ekakpa inu ya òrọrọ ìnyi ene geege. ³¹ Ire, ema enanan̄a me uwu ya isibi, mè isi ikikpa etip òfolek kè Jisọs ikana otutuuk agan̄ ya. ³² Mgbọ ebi ǹnàan̄ cha ekinan̄a me uwu ya isibi, ebi ene esasa ogwu enerieen̄ ge ijo erumun̄ okupbe me emen inin̄ uwu ya ijet Jisọs ibe igwa. Ijo erumun̄ ya îrọ inyi ene ya ikayaka ìkọt ìtumu ikọ. ³³ Jisọs onenilap ijo erumun̄ ya isibi me emen ene ya. Mgbọ yaage ogwu mbuuk ya obebene ikitumu ikọ. Inu ya okwukwu otutuuk ebi ìkup me ere ya lek enenen. Ema ebebene ikitumu ibe ke ema kperarak imun̄ òjelek inu òkup ikeyi me ido Ijeren. ³⁴ Ire ebi Farisi ìkup me ere ya ekekitumu ibe ke Jisọs ìkisa unye ogwu ibot ebi ijo erumun̄ ilap ijo erumun̄ isibi me emen ebi ene. ³⁵ Jisọs okekije ikana otutuuk ama ile mè asabọn ama geelek, mè ikijeen̄ inu me emen uwu ntitiin̄ kiban̄, mè ikilook ata etip eyi mkpulu eyi Awaji, mè ikigwa orukan̄ mè ufiak geelek òkup esese esese. ³⁶ Mgbọ îmun̄be ogbogbo ebi ene cha ekigbuku igọọk ọmọ, itoto ema nsan, mije, ema mîkaan̄ owuwa ufialek. Melek si, kpunu ogwu òkitap ubọk inyi ema. Ema ekititeek kubọk arọọn̄ ikakaan̄ge ogwu okekikpukpo. ³⁷ Inenitumu inyi ebi udun̄ kan̄ ibe, “Ìkpọ, inu eberọkọ me uko îwa me atikọ, ire, ebi ikwaan̄ ìre ene inen mè inen gaalek. ³⁸ Eya orọ, ìbeek Okumugwem, ogwukaan̄ ikwaan̄ irọrọkọ inu me uko, ibe iria owuwa ebi ikwaan̄ itap me uko kan̄, mè enerọkọ inu me uko.”

¹ Jisọs onenigwen akọp mè ebi udun̄ iba kan̄ cha iriaak me lek kan̄, mè inyi ema unye, inyi ema ekelap ijo erumun̄ esibi me emen ene, mè ekegwa esese chieen̄ orukan̄ mè ufiak geelek. ² Erieen̄ akọp mè ebi udun̄ iba kan̄ cha ìre, adasi, Saimọn ogwu ekigwen si Pita, mè Anduru ogwu ngwan̄, mè Jemis gwun̄ kè Jebidi mè Jọn ogwu ngwan̄, ³ mè Filip mè Batolomi mè Tọmọs mè Matiyu ogwu òkibọkọ otitip ido, mè Jemis gwun̄ kè Alifiọs, mè Tadiọs, ⁴ mè Saimọn ogwu ulọk ama ominbe me emen, mè Judas Isikariọt ogwu òleke Jisọs inyi ekpan̄. ⁵ Akọp mè ene iba kechi ke Jisọs oria isibi. Sabum îniria ema isibi, înyi ema nteme ibe, “Ikaje ìsi lek ebi ekarege ebi Ju. Ikanin̄ ama ebi Sameria geege. ⁶ Ire, ìje isi yaage ìsi lek ebi Ijeren ebi ìkup kubọk arọọn̄ òchechep. ⁷ Ike enyi ekije, ìkilook ebi ene ibe ke mkpulu eyi emen inyọn̄ îkup mgbet. ⁸ Ìgwa ebi orukan̄, mè ìjomo ebi ìkwukwu, mè ìgwa ebi inyakpa, mè ìlap ijo erumun̄ ìsibi me emen ebi ene. Enyi ebọkọ unye yi me ọsọ. Ikeya si, ìsa unye yi ìsi ikwaan̄ ìnyi ebi ene me ọsọ. ⁹ Ikamọnọ ikpoko alata okuket, mè ìre eyi alata araran̄, mè ìre eyi ekwe geege ìtap me akpa. ¹⁰ Ikaben akpa ije, ikamọnọ ọfọnti ìso iba, ikamọnọ ikpukot ìso ukot iba, ikamọnọ mkpat geege ìkaan̄ me ubọk me oniin̄ ije kinyi. Mije, ogwu òsi ikwaan̄ môrie inu ubọk ikwaan̄ kan̄. ¹¹ “Ama geelek enyi enin̄be, mè ìre ama ile, mè ìre gwun̄ ama, ìweek ene ge òkakaan̄ ukpook Awaji me emen, mè ìkup me uwu ene ya mege ire mgbọ enyi mêtelebe ama ya. ¹² Enyi isinin̄ uwu geelek, ìtọp ebi ìkup me uwu ya amọn ibe, ‘Esuuk ikup melek kinyi.’ ¹³ Ire ebi ìkup me uwu ya ibọkọ enyi itap, esuuk kinyi môkup melek kiban̄. Ire, ire kpebọkọ enyi itap, esuuk kinyi môgwu ikom igọọk enyi. ¹⁴ Ire ikaan̄ uwu geelek, mè ìre ama geelek kpebọkọ enyi itap, mè igban̄ ikọ kinyi, enyi isibenan̄a me uwu ya, mè ìre ama ya isibi, ìgen̄ achiaan̄ ukot kinyi ìgwook me ere ya. ¹⁵ Me atikọ, ǹkitumu inyi enyi ibe, me Usen Oyerebet Awaji, ke môfieek inyi ama ya enenen igak ama Sọdọm mè Gọmọra. ¹⁶ “Mgbọ yi, ǹkiria enyi isibi kubọk arọọn̄ isi itap me etete egbe. Eya orọ, ìgbala chieen̄ kubọk ijijunu, ire, ìkirọ inu esuuk esuuk kubọk ekerekwukwu. ¹⁷ Ire, ìgbala chieen̄ me lek ebi ene, mije, ebilene mêtet enyi me unye, mè isa enyi isi isi ebi ibot ama, mè isa olik isulu enyi me uwu ntitiin̄ kiban̄ me ama geelek. ¹⁸ Mije n̄a, mêsa enyi isi oyerebet me isi ebi ibot mkpulu, mè ebi ubọọn̄, inyi enyi ekesa irek òkup ikeya elook ebi ibot chi melek ebi ekarege ebi Ju ata etip. ¹⁹ Ire, isisa enyi isi oyerebet, ikasisaak lek kinyi me lek inu enyi ebetumu, mè ìre ike enyi ebesa itumu, mije, mênyi enyi inu enyi ebetumu me ike mgbọ ya. ²⁰ Mije, ìkare enyi ebekitumu ikọ mgbọ ya, îre Ekwukwu eyi Nte kinyi obokup me emen kinyi ikitumu ikọ me mgbọ ya. ²¹ “Mgbọ ya, ngwan̄ môsa ngwan̄ inyi ekpan̄, ute môsa ogwu gwun̄ inyi ekpan̄, nsabọn mênye ibot inyi ebi ute mè ebi uga, mè irọ inyi ekpan̄ ema. ²² Otutuuk ene mêcha enyi mije n̄a. Ire, ene geelek me lek kinyi òkekeke inye isi ire okputut, ogwa ke mênyan̄a. ²³ Ire ebi ene isisaak enyi me ama ge, ìlibi ìfo ofifi ama. Me atikọ, enyi kpebejijen̄e ikana otutuuk ama òkup me ido Ijeren iso sabum Gwun̄ Ebilene mônube. ²⁴ “Ogwu òkikween̄ inu ìkakimin ìgak ogwu òkijeen̄ ọmọ inu. Ikeya si, gwun̄ uwu ìkakimin ìgak ogwu ute-uwu. ²⁵ Ogwu òkikween̄ inu môkọt imin ikup kubọk ogwu òkijeen̄ ọmọ inu, gwun̄ uwu si môkọt imin ikup kubọk ogwu ute-uwu. Ire, ire ebi ene igwen ogwu nte uwu, Bejibun, ìriọọn̄ ibe ke kpebelọlọ igwegwen ebi uwu ene ya erieen̄ òfefieek igak ikeya. ²⁶ “Eya orọ, enyi ikatet ukpook me lek kiban̄, mije kpunu inu geege echitbe eyi kpebechili ibook, kpunu si inu geege eletbe eyi kpokpọkbe mbum, inyi ebi ene eriọọn̄. ²⁷ Inu geelek ntumube inyi enyi me emen udun, ìtumu ìsibi me utoon̄ egwe. Ikọ geelek etumube ususuk itap enyi me utọn̄, ìkeke me inyọn̄ uwu ìtumu, inyi otutuuk ene enọ. ²⁸ Ikakitet ukpook me lek ebi ìbekọt ikpan̄ akpalek gaalek, ire, kpebekọt ikpan̄ ibot ejit. Ire, ìtet ukpook me lek Awaji ogwu òbokọt igbaan̄ ibot ejit mè akpalek ijijaka isan̄a me emen ukan̄ ama yọk. ²⁹ Ìre ìkare agagawaji iba ke ekinyam ikpoko ge? Ire, kpunu agagawaji geege òkinan̄a irọn̄ me ijọn̄ me ikarege nkeek eyi Nte kinyi. ³⁰ Ike yaage si, Awaji îriọọn̄ otu ifuk otutuuk ukut ijeek òkup enyi me ibot isan̄a. ³¹ Eya orọ, ikafieek owot, mije, enyi mînye otu ewe igak ogbogbo agagawaji. ³² “Ire ikaan̄ ogwu ichieek me lek n̄a, mè itumu emi isibi me isi ebilene, emi mâtumu ene ya si isibi me isi kè Nte n̄a ogwu òkup me emen inyọn̄. ³³ Ire, ire ikaan̄ ogwu ijit emi me isi ebilene, emi mâjit si ene ya me isi kè Nte n̄a ogwu òkup me emen inyọn̄. ³⁴ “Enyi ikakeek ibe ke emi m̀banitap esuuk me linyọn̄. Ǹkanu inenitap esuuk. Îre oge akọn̄ ke nsa inu. ³⁵ Mije, ǹnu inenitap ochicha me etete gwun̄ enerieen̄ mè ogwu ute, mè etete gwun̄ enenwaan̄ mè ogwu uga, mè etete nwa gwun̄ mè uga-olom. ³⁶ Ebi ototun̄ ukan̄ ene ebere ebi ochicha ene ya. ³⁷ “Ene geelek òmama ogwu ute mè ogwu uga igak emi ìkagbe irere ogwu eyi n̄a. Ene geelek si òmama gwun̄ kan̄ enerieen̄ mè gwun̄ kan̄ enenwaan̄ igak emi, ìkagbe si irere ogwu eyi n̄a. ³⁸ Ene geelek ogwu ìkakiben uti nkwurieen̄ kan̄ ìgọọk emi, ene ya ìkagbe si irere ogwu eyi n̄a. ³⁹ Ene geelek òbọbọọk ugwem kan̄ isun̄, môfiin̄ ugwem kan̄. Ire, ene geelek òfifiin̄ ugwem kan̄ mije n̄a môkaan̄ ugwem kan̄. ⁴⁰ “Ene geelek òbọbọkọ enyi itap, ìbọkọ emi itap. Ene geelek òbọbọkọ emi itap, ìbọkọ Awaji ogwu òraria emi inu itap. ⁴¹ Ene geelek òbọbọkọ ogwu nriran itap mije îrebe ogwu nriran, ene ya môbọkọ si mkpukpe ogwu nriran ya môbọkọbe. Ikeya si, ene geelek òbọbọkọ ogwu ata irọrọ itap mije îrebe ogwu ata irọrọ, ene ya môbọkọ si mkpukpe eyi ogwu ata irọrọ môbọkọbe. ⁴² Me atikọ, ǹkitumu inyi enyi ibe, ire ikaan̄ ene geelek òtọtọkọ ekpen̄ mudim ge inyi ogwu òsisip ichit me lek ebi udun̄ n̄a chi mije îrebe ogwu udun̄ n̄a, ene ya ìkpolọlọ ibọbọkọ si mkpukpe kan̄.”

¹ Mgbọ Jisọs otemebe akọp mè ebi udun̄ iba kan̄ nteme isan̄a, ineninan̄a me ere ya ikijijen̄e ikana owuwa ama me Galili, mè ikijeen̄ inu, mè ikilook ata etip ikana me ama cha. ² Jọn ògwook mun̄ okukup me uwu mkpọn inọ inu Jisọs okirọ, mè iria ebi udun̄ kan̄ ibe esi edo Jisọs ibe, ³ mè ìre ogwugwu ore ogwu òbonunu ya? Sa ìre ema ekup ekpọ ofifi ene? ⁴ Mgbọ ife cha esibe isi ido Jisọs ikọ ya, Jisọs ofọfọọk ema ibe, “Ìgwu ìkom ìfon, mè ìsi ìkpa inu enyi emun̄be, mè inu enyi enọbe ìnyi Jọn. ⁵ Ebi ǹnàan̄ mêkimọọn̄ inu, ebi akọọk mêkije ije, mêkigwa ebi orukan̄ inyakpa, ebi inan mêkinọ ikọ, mêkijomo ebi ìkwukwu, mêkilook si ebi ugbọọn̄ ata etip. ⁶ Ugbana môkup inyi ene geelek ogwu ikanan̄age ìrọn̄ mije n̄a.” ⁷ Mgbọ ebi udun̄ kè Jọn cha enan̄abe me ere ya ikije ifo, Jisọs obebene ikitumu ikọ òfolek kè Jọn inyi ogbogbo ene cha, mè ikido ema ibe, “Mgbọ enyi esibibe isi emen èwê ya, ìre keke ke enyi esi ikpọ? Ìre mbubet eyi efet okiwumu imaan̄ ke enyi esi ikpọ mọnọ? ⁸ Ire ìkare eya, ìre keke ke enyi esibi isi ikpọ? Ìre enerieen̄ òsa ujuja ekwut mè ọfọnti ibala lek ke enyi esi ikpọ? Iin̄-iin̄, ìkpokọt ire ikeya, mije, ebi ìkibala lek ikeya ekiluk me uwu ebi ubọọn̄. ⁹ Ìre keke-ni ke enyi esibi isi ikpọ? Ìre ogwu nriran ke enyi esibi isi ikpọ? Iin̄, me atikọ, ogwu enyi esi ikpọ ya îmin igak ogwu nriran. ¹⁰ Ọmọ ore gwun̄ ikwaan̄ ya ogwu egebe inu òfolek me emen Ikpa Mbuban ibe ke Awaji ibe, ‘Emi mâria gwun̄ ikwaan̄ n̄a ibe idasi ije me isi kwun̄, mè isi inen̄e oniin̄ isun̄ iban owu.’ ¹¹ Me atikọ, ǹkitumu inyi enyi ibe, me etete bọn ebirieen̄ ebi ebibaan̄ emaan̄be bene me karake ukot ukot, kpunu ene geege òmimin igak Jọn ògwook mun̄. Ire, ogwu òsisip ichit me mkpulu eyi emen inyọn̄ îmin igak Jọn. ¹² Bene me mgbọ Jọn ògwook mun̄ obenebe ikilook ata etip na re mgbọ keyi, mkpulu eyi Awaji ìkitibi imin me unye. Ebi ìnyenye ejit gaalek ekikọt itibi inin̄. ¹³ Mege Jọn oninu, Ikan kè Mosis îtumu inu òfolek mkpulu yi. Ebi nriran si mîben nriran òfolek. ¹⁴ Jọn yi ore Ilaija ya ogwu ebi nriran etumube ibe ke mônu. Ire ineme enyi, ìbọkọ ìchieek. ¹⁵ Ogwu ikaan̄ utọn̄, inọ. ¹⁶ “Ìre keke ke mbasa ebi ukot mgbọ keyi itọ me lek? Ife chi ekup kubọk nsabọn ìkup me oyet ama ikifit ifit. Ebi agan̄ ge ekekitaan̄ ukpo itumu inyi ebi agan̄ keyilọ ibe, ¹⁷ ‘Eji mîwut otita isa ikọt okwa unwọọn̄ inyi enyi, enyi kpechieek ijojop. Eji mîkọt okwa ito inyi enyi, enyi kpechieek itoto ito ufieejit.’ ¹⁸ Mgbọ Jọn onube, îkijin otu owuwa mgbọ, ìkakinwọ miin̄ geege. Ire, ebi ene ekekitumu ibe ke îkaan̄ ijo erumun̄ me emen. ¹⁹ Emi Gwun̄ Ebilene nneninu, mè ikirie, mè ikinwọ. Ebi ene ekekibe ke emi ìre ogwu ebek inorie mè ogwu usa-miin̄, ogwu òkigọọk ebi òtitip ido mè ebi kpekisun̄ Ikan kè Mosis igbaan̄ ije. Ire, îre ikwaan̄ Awaji okisa iriọọn̄-inu kan̄ isi me emen ene, ke ekisa iriọọn̄ ibe ke iriọọn̄-inu ya ìre eyi atata.” ²⁰ Jisọs obebene ikifieek otu inyi ama cha ere îrọbe owuwa inu ukechieen̄, mije, ebi ama cha kpegwu ikom. Ikekitumu inyi ema ibe, ²¹ “Môfieek inyi enyi ebi ama Korajin. Môfieek si inyi enyi ebi ama Betisaida. Ire ibe ìre Taya mè Saidọn ke merọ otutuuk inu ukechieen̄ echi erọbe me emen ama kinyi, kè ebi ama cha etap ọfọnti ufieejit, mè èkekpukpọt me ntọn̄, mè ègwu ekom karake ukot ukot. ²² Ire, ǹkitumu inyi enyi ibe ke môfieek enenen inyi enyi me Usen Oyerebet Awaji igak ebi Taya mè Saidọn. ²³ Enyi ebi ama Kapanọm, ìre enyi ekikeek ibe ke mêbene enyi ifo emen inyọn̄? Iin̄-iin̄, îre ama yọk ke ebesiki enyi isi itap. Ire ibe ìre Sọdọm ke merọ inu ukechieen̄ echi erọbe me emen ama kinyi, kè Sọdọm òkup mege òre cherekeyi. ²⁴ Eya orọ, emi ǹkitumu inyi enyi ibe ke môfieek inyi Kapanọm igak Sọdọm me Usen Oyerebet.” ²⁵ Mgbọ Jisọs otumube ikọ chi isan̄a, ineniriaak uriaak ibe, “Ute, Ogwukaan̄ inyọn̄ mè ijọn̄, ntọn̄ owu, mije, owu òlelet inu chi geelek me lek ebi ìriọọn̄ inu mè ebi ìkaan̄ ifuk-ibot, mè iniben ikpọk mbum ijeen̄ asa nsabọn ebi ekariọọn̄ge inu geege. ²⁶ Iin̄, Ute, îre ikeyi ke îneme owu irọrọ. ²⁷ “Nte n̄a îkana otutuuk inu itap emi me ubọk. Kpunu ogwu òrọriọọn̄ ogwu Gwun̄ orebe, ilọ me lek ogwu Ute. Kpunu si ogwu òrọriọọn̄ ogwu Ute orebe, ilọ me lek Gwun̄ ya, mè ebi geelek înemebe Gwun̄ ya isasa Nte kan̄ ijeen̄. ²⁸ “Enyi ebi efuuk otabe me owot mije ibebeme ulobo inu, ìna me lek n̄a, ke mânyi enyi isiki-efuuk. ²⁹ Ìben ibot uti ibeme-inu n̄a agan̄ ge ìtoon̄ me oguga kinyi, mè ìkween̄ inu me ubọk n̄a, mije, emi ìre ogwu esuuk, mè ire si ogwu òsisiki lek me ugwem. Ire enyi inu, enyi mêkaan̄ utelelek me ibot ejit kinyi. ³⁰ Mije, uti ibeme-inu n̄a ìkayọt ibebeme, akpan n̄a si îfet.”

¹ Îkaan̄ mgbọ ge Jisọs mè ebi udun̄ kan̄ ekije itibi emen uko akpa ge me Usen Mbuban. Mgbọ ema ekije, ebi udun̄ kan̄ ekekifaan̄ akpa me uko ya itaka mije uraafiọọn̄. ² Mgbọ ebi Farisi emun̄be ikeya, egwegwen Jisọs, mè ibe ọmọ, “Kpọ, ebi udun̄ kwun̄ mêkirọ inu ikatatge irọrọ me Usen Mbuban.” ³ Jisọs onenido ema ibe, “Ìre enyi kpefuk inu Debit orọbe mgbọ uraafiọọn̄ otakabe ọmọ mè ebi melek kan̄? ⁴ Debit ìjeje inin̄ Uwu Awaji, mè isi imọnọ fituru esabe igwa ngwugwa inyi Awaji itaka, mè iche si inyi ebi melek kan̄. Inu ya ema erọbe îlọ me Ikan, mije, fituru cha ìkup inyi ebi ngwugwa gaalek. ⁵ Sa ìre enyi kpefuk me emen Ikan kè Mosis ibe ke ebi ngwugwa ìkisi ikwaan̄ me Uwu Mbuban mîkichaka mbuban me Usen Mbuban, ire, ikan geege ìkatet ema? ⁶ Ire, emi ǹkitumu inyi enyi ibe ke ogwu òmimin igak Uwu Mbuban òwa me ere keyi, me etete kinyi. ⁷ Ege me Ikpa Mbuban ibe ke Awaji ìbe, ‘Ǹkaweek ngwugwa, ǹkiweek ejit nsan.’ Ire ibe enyi mîtet ibot me lek ikọ yi, enyi kpemekigwen ikan ikeme ebi ekarọge ijo inu. ⁸ Mije, Gwun̄ Ebilene ore Ogwukaan̄ Usen Mbuban.” ⁹ Jisọs onenije inan̄a me ere ya, mè isi inin̄ uwu ntitiin̄ ebi Ju òkup me ama ya. ¹⁰ Ogwu enerieen̄ ge ubọk agan̄ ge ogọmbe òwa me emen uwu ya okupbe. Usini ebi ìkup me emen uwu ya eneniweek itetet Jisọs me ikan, mè inido ọmọ ibe, “Ìre Ikan kè Mosis îgban igwagwa ene me Usen Mbuban?” ¹¹ Jisọs oneniyaka ido ema ibe, “Ire ene ge me lek kinyi ikaan̄ arọọn̄ ge òrọrọn̄ inin̄ emen udọn̄ me Usen Mbuban, ìre ene ya ìkpotaba arọọn̄ ya isibi me usen ya? ¹² Ìre enyi kperiọọn̄ ibe ke ene înye otu ewe enenen igak arọọn̄? Eya orọ, Ikan ìkagban ene irọrọ ata inu me Usen Mbuban.” ¹³ Inenitumu inyi ogwu enerieen̄ ya ibe, “Nyana ubọk kwun̄!” Ogwu enerieen̄ ya onyanyana ubọk. Ubọk kan̄ onyanyana, mè inye kubọk agan̄ keyilọ. ¹⁴ Mgbọ ebi Farisi emun̄be inu ya, ema enanan̄a isibi isi itọt ubọk ema ebesa itet Jisọs ikpan̄. ¹⁵ Jisọs orọriọọn̄ ijo otitọt kiban̄ ya, mè inan̄a me agan̄ ya isibi. Owuwa ene egọgọọk ọmọ ije, igwagwa otutuuk ebi lek ikanyege me etete kiban̄, ¹⁶ mè ibe ema ekatumu ogwu ọmọ orebe ìnyi ene geege. ¹⁷ Inu yi îrọ iso ikọ Awaji otumube inan̄a me otu ogwu nriran Asaya ibe, ¹⁸ “Ogwugwu ìre gwun̄ ikwaan̄ n̄a ogwu ngobobe inyi lek n̄a. Ọmọ ìre ogwu mmabe, ogwu inu kan̄ okineme emi. Mânyi ọmọ Ekwukwu n̄a, ọmọ môlook ebi ido geelek etip òfolek unen oyerebet n̄a. ¹⁹ Ọmọ ìkpobaak ibaak, ìkponyi okput, ìkpotaan̄ ukpo itumu ikọ me lek oniin̄. ²⁰ Ike ikanwọnge ibe efan̄a uti akpa òkakaan̄ unan me lek efiin̄, ikeya si, ọmọ ìkporọ inu unye unye me lek ebi ekakaan̄ge unye. Ike ikagbege ibe eniin̄ ibot ukan̄ òkekibubuuk, ikeya si, ọmọ ìkponye ejit me lek ebi ekakaan̄ge ikpọchieen̄ geege. Ọmọ môkeke inye me irọrọ ata inu, mege ire mgbọ unen oyerebet môsobe otutuuk ere geelek. ²¹ Otutuuk ebi ekarege ebi Ju mêkaan̄ ikpọchieen̄ inan̄a me lek erieen̄ kan̄.” ²² Ebi ene enenisa enerieen̄ ge ijo erumun̄ okupbe me emen ijet Jisọs. Ijo erumun̄ ya îtap ene ya ǹnàan̄, mè itap si mbuuk. Jisọs ogwagwa ogwu enerieen̄ ya, mè irọ inyi ikimọọn̄ inu, mè ikitumu ikọ. ²³ Inu ya okeke otutuuk ebi ìkup me ere ya chieen̄. Ema ekekitumu ibe, “Ìre òbe ìkpore Gwun̄ kè Debit ya ore ogwugwu mọnọ?” ²⁴ Ire, mgbọ ebi Farisi enọbe ikọ ebi ife cha ekitumu, ema ebebene ikitumu ibe ke Jisọs ìkisa unye kè Bejibun, ogwu ibot ijo erumun̄, ilap ijo erumun̄ isibi me emen ene. ²⁵ Jisọs orọriọọn̄ ekiket kiban̄, mè itumu inyi ema ibe, “Ido geelek ebi ìkup me emen ekitim akọn̄ ikeme lek kiban̄, ido ya ìbochechep. Ikeya si, ama geelek, mè ìre uwu geelek ebi ìkup me emen ekirọ ikeme lek kiban̄, ama ya mè ìre uwu ya ìkpokọt ikeke. ²⁶ Ikeya si, ire Setan ikilap Setan isibi, Setan îche lek kan̄. Ire ikeya, ìre mkpulu kè Setan ìbojeje ikọt ikeke inye? ²⁷ Ire emi nkisa unye kè Bejibun ilap ijo erumun̄ isibi me emen ene, ìre kpasi unye ke ebi kinyi ekisa ilap ijo erumun̄ isibi me emen ene? Ire ikeya, îre bọn kinyi gaalek ebesibi oyerebet ikeme enyi. ²⁸ Ire, ire unye Ekwukwu Awaji ke ǹkisa ilap ijo erumun̄ isibi, eya ìkijeen̄ ibe ke mkpulu eyi Awaji înu me etete kinyi. ²⁹ “Ofifi si, enyi ìtumu-nu, ìre ene ìbojeje ikọt ibum inin̄ uwu ogwu ònyenye lek isi ikpulu inu, ire ìkadasi ìtet ogwu unye ya ìbọp sabum? Isidasi itet ene ya ibọp ikam, mgbọ ya ke ìbonikọt inin̄ uwu ene ya ikpulu inu. ³⁰ “Eya orọ, ogwu ikakekege ìnyi emi, ìkijeje ikeme emi. Ikeya si, ogwu ikagọọkge emi ìkititiin̄, ene ya ìkiyiyiyala. ³¹ Me atikọ, ǹkitumu inyi enyi ibe ke mêtele ijo irọrọ mè ijo otu ikọ geelek inyi ene, ire, kpebetele inyi ogwu geelek òtutumu Ekwukwu Mbuban ilọ. ³² Ogwu itumu Gwun̄ Ebilene ilọ, mêkọt itele inyi. Ire, kpebetele inyi ene geelek òtutumu Ekwukwu Mbuban ilọ, mè ìre mgbọ keyi, mè ìyaka ire me mgbọ òkinu me isi.” ³³ “Uti ekpọbe chieen̄ me lek ijaan̄ ìboto ata mfut. Eyi ekakpọge ìjaan̄ ìboto ijo mfut. Mije ekisa mfut uti iriọọn̄ uti. ³⁴ Enyi bọn ijo ulu kechi! Ata ikọ ìbojeje inan̄a enyi me otu isibi me ere enyi erebe ebi ijo ife? Ìre enyi kperiọọn̄ ibe ke ikọ òkup ene me ejit ke ene okisan̄a itumu isibi? ³⁵ Ogwu ata ene ìkisan̄a ata inu isibi inan̄a me etete ata inu òkup me emen kan̄. Ikeya si, ogwu ijo ene ìkisan̄a ijo inu isibi inan̄a me etete ijo inu òkup me emen kan̄. ³⁶ Ire, me atikọ, emi ǹkitumu inyi enyi ibe, me Usen Oyerebet Awaji, ene geelek môfọọk ikọ ibot kan̄ mije ijo otu usem geelek îtumube. ³⁷ Mije, mêsa ikọ otu kinyi ifieek oyerebet inwọn enyi, mè esa si ikọ otu kinyi efieek oyerebet etip enyi.” ³⁸ Usini ebi ìjeen̄ Ikan, mè ebi Farisi enenibe Jisọs, “Ogwu Ijejeen̄, eji ekiweek ibe owu òrọ inu ukechieen̄ ge òjeen̄ eji nu.” ³⁹ Jisọs ofọfọọk ema ibe, “Ìre enyi ikpak ikpak lek ebi mgbọ kechi ekariọọn̄ge Awaji enikiweek inu ijejeen̄? Kpunu ofifi inu ijejeen̄ geege ebejeen̄ enyi, ilọ me lek inu ijejeen̄ ònan̄a me lek kè Jona ogwu nriran. ⁴⁰ Ike Jona okupbe egwe ita mè eririeen̄ ita me emen owot utemun̄, ikeya si ke emi Gwun̄ Ebilene mbakup egwe ita mè eririeen̄ ita me ejit ijọn̄. ⁴¹ Me Usen Oyerebet, ebi ama Ninifu mêkeke ata-ikọ ikeme enyi, mè irọ inyi oyerebet itip enyi ebi mgbọ kechi, mije, ema mîgwu ikom inan̄a me emen ijo kiban̄ mgbọ Jona otumube ikọ Awaji inyi ema. Ire, me mgbọ yi, ogwu òmimin igak Jona òwa me ere keyi, me etete kinyi. ⁴² Ofifi si, ogwu ubọọn̄ enenwaan̄ ogwu Sieba mônan̄a ikeke itumu ikọ ikeme enyi me Usen Oyerebet ya, mije, ogwu ubọọn̄ enenwaan̄ ya ìnan̄a me ido kan̄ òkup me okputut linyọn̄ itutobo inigban̄ ikọ iriọọn̄-inu me otu ogwu ubọọn̄ Sọlọmọn. Ire, me mgbọ yi, ogwu òmimin igak ogwu ubọọn̄ Sọlọmọn òwa me ere keyi, me etete kinyi. ⁴³ “Ijo erumun̄ isinan̄a me emen ene isibi, îra ikijijen̄e ikana me emen èwê ikiweek ere ìbokup isiki efuuk. Ire ìkakọt ìweek ìmun̄, ⁴⁴ îra itumu ifieek me ejit kan̄ ibe ke ọmọ môgwu ikom ifo uwu ere ọmọ osibibe itele. Isinire uwu ya, mè inimun̄ ibe ke kpunu ene geege òluluk me emen, ire, mîchan uwu ya, mè inen̄e isun̄ ijaan̄, ⁴⁵ îra igwu ikom, mè isi isa ofifi ijo erumun̄ jaaba, ìwawa ikpak me lek igak ọmọ, igbaalek ika inu uwu ya iniluk ibia. Mije keya, bene me mgbọ ya fo isi, ugwem ene ya môfieek enenen igak ubọk îkupbe me adasi mgbọ. Ikeyi ke ìbokup inyi ebi mgbọ kechi ìrere ebi ikpak.” ⁴⁶ Jisọs òkitumu ikọ ya me otu inyi ebi ife cha, ebi ngwan̄ kan̄ mè ogwu uga enenikeke me isi oyet ya, mè ikiweek itutumu ikọ melek kan̄. ⁴⁷ Ene ge me lek ebi ife cha onenitumu inyi Jisọs ibe, “Nga kwun̄, mè ebi ngwan̄ kwun̄ me isi oyet ekekebe ikiweek itutumu ikọ melek kwun̄.” ⁴⁸ Jisọs onenido ema ibe, “Ìre ekene ore nga n̄a, mè ebi ngwan̄ n̄a?” ⁴⁹ Ineninyana ubọk ifo lek ebi udun̄ kan̄, mè itumu inyi ebi ife cha ibe, “Ebibi ere nga n̄a mè ebi ngwan̄ n̄a. ⁵⁰ Ene geelek òkirọ inu Nte n̄a ogwu òkup me emen inyọn̄ okiweek, ene ya ore ngwan̄ n̄a enerieen̄, mè ngwan̄ n̄a enenwaan̄, mè nga n̄a.”

¹ Me usen yaage, Jisọs oneninan̄a me uwu ya isibi, mè isi isiki ikweek irek me agba okwaan̄ oyô. ² Mije urum ebi ene ìkekeke ikana ọmọ emalek iwa, isasaba inin̄ emen uji ge me atasuk ya isiki ikweek. Ife cha ekekeke me otu inyọn̄ ikigban̄ ọmọ. ³ Jisọs okekisa me urọk ijeen̄ ema owuwa inu, mè ikpa inyi ema ibe, “Ogwu uko ge onisibi isi iwop mfut me uko. ⁴ Mgbọ îkigwọ mfut cha ifiaak ikana, usini orọrọn̄ me eden̄ oniin̄. Ebi kè ofut enunu initọk imeen̄ isan̄a. ⁵ Usini orọrọn̄ me ijọn̄ ewuuk ere achiaan̄ ikadọkge. Sọnja mgbọ, ititibi isibi, mije, achiaan̄ òkup me ere ya ìkadọk. ⁶ Ire, mgbọ ura obumbe, unye ura otetet ema ichiaak, ikwakwaan̄ isan̄a, mije ugwun̄-ijọn̄ kiban̄ ikatibige ìnin̄ ijọn̄ ìdọk. ⁷ Usini mfut cha orọrọn̄ me etete ukpak, mè itibi isibi. Ire, ukpak cha otitibi ichit nsek uti cha, mè irọ inyi ikatibi ìjaan̄. ⁸ Usini mfut orọrọn̄ me ata ijọn̄, mè itibi isibi, mè ito mfut. Usini oto mfut iwa efit mgbọ, usini akọp mgbọ gweregwen, usini akọp mgbọ ita igak otu ifuk esabe iwop.” ⁹ Mgbọ îtobe urọk ya isan̄a, itutumu inyi ema ibe, “Ogwu ikaan̄ utọn̄, inọ!” ¹⁰ Mgbọ eya orakabe, ebi udun̄ kan̄ enunu, mè inibe ọmọ, “Ìre keke orọ okisa urọk itumu ikọ inyi ene?” ¹¹ Jisọs ofọfọọk ema ibe, “Mînyi enyi ifuk-ibot isasa iriọọn̄ nlelet inu òfolek mkpulu eyi Awaji. Ire, kpenyi ebi ofifi ife ifuk-ibot keya. ¹² Ogwu òkakaan̄ inu ke mênyi ofifi inu isọkọ me lek eyi îkaan̄be, inyi ikaan̄ iwa igak. Ire, ogwu ikakaan̄ge, mêtet sọntiik eyi îkaan̄be ibọkọ isan̄a me ubọk. ¹³ Ǹkisa me urọk itumu ikọ inyi ema inyi ema mêkpọ, mè ikpọ igak, kpebekọt imun̄. Ema mêgban̄, mè igban̄ igak, kpebekọt igobo itet. ¹⁴ Sa me ikeyi, ke ikọ Awaji otumube inan̄a me otu kè Asaya ogwu nriran orọ iso. Asaya ìtumu ibe, ‘Enyi mênọ, ire, enyi kpebekọt igobo itet. Enyi mêmun̄, ire, enyi kpebekọt imun̄ itet. ¹⁵ Mije, ejit ebi ife chi ìkayaka ìkọt ìkigobo inu ìtet. Ema mînwaan̄ utọn̄ kiban̄ ichit, mè ichọkọ chieen̄ kiban̄ igọm. Mebe ìkare ikeya, kè ema ekọt esa chieen̄ kiban̄ emọọn̄ inu, mè esa utọn̄ kiban̄ ènọ ikọ, mè esa ejit kiban̄ egobo inu ètet, mè ema ègwu ekom, mè Awaji ònyan̄a ema.’ ¹⁶ Ire, mîgbana enyi enenen, mije, enyi mîkisa chieen̄ kinyi imọọn̄ inu, mè ikisa utọn̄ kinyi inọ ikọ. ¹⁷ Me atikọ, emi ǹkitumu inyi enyi ibe ke owuwa ebi nriran mè ebi ata irọrọ me ukot ikaan̄ mîweek imumun̄ inu enyi ekimun̄, ire, kpekọt imun̄. Mîweek si inọnọ ikọ enyi ekinọ, ire, kpekọt inọ. ¹⁸ “Eya orọ, ìgban̄ utọn̄ me lek inu urọk ogwu òwop mfut ya osibibe. ¹⁹ Mfut echi òrọn̄ me eden̄ oniin̄ ìkeke inyi ebi ìnọnọ ikọ òfolek mkpulu eyi Awaji, ire, kpekọt igobo ikọ cha ema enọbe itet. Yọk îra inu inijọk ikọ cha isan̄a me ejit kiban̄. ²⁰ Mfut echi òrọn̄ me ijọn̄ ewuuk ìkeke inyi ebi ìnọnọ ikọ ya, mè isa me ubelejit ibọkọ itap mgbọ yaage. ²¹ Ire, mije ikọ ya ikakaan̄ge ata ugwun̄-ijọn̄ me emen kiban̄, ìkafuk ugwem. Eya orọ, mgbọ uyọrọlek mè osusut isinu inyi ema mije ikọ ya, ema mîra inan̄a irọn̄ mgbọ yaage. ²² Mfut echi òrọn̄ me etete ukpak ìkeke inyi ebi ìnọnọ ikọ ya, ire, saasaak eyi ugwem mè uleke eyi inu ubọọn̄ linyọn̄ îra ininwunwana ikọ ya, mè irọ inyi ikakọt ìto mfut geege. ²³ Ire, mfut echi òrọrọn̄ me ata ijọn̄ ìkeke inyi ebi ìnọnọ ikọ ya, mè igobo itet. Ebibi ere ebi ìtoto mfut. Usini me lek kiban̄ eto mfut iwa efit mgbọ, usini akọp mgbọ gweregwen, usini akọp mgbọ ita igak otu ifuk esabe iwop.” ²⁴ Jisọs onenito ofifi urọk ibe, “Mkpulu eyi Awaji ìkup kubọk ogwu enerieen̄ ge òwop ata mfut me emen uko kan̄. ²⁵ Ire, mgbọ otutuuk ene ekilaak, ogwu ochicha kan̄ osasa mbubet isi iwop me etete akpa ogwu enerieen̄ ya owopbe me emen uko ya, mè inan̄a ije ifo. ²⁶ Mgbọ akpa cha otibibe isibi, mè ibene ikito ajakajak, mbubet cha ogọgọọk itibi isibi si. ²⁷ “Mgbọ ebi ikwaan̄ ogwu enerieen̄ ya emun̄be mbubet cha me etete akpa me uko ya, ema enunu lek nte uwu kiban̄, mè inibe ọmọ, ‘Nte uwu, ìre ìkare ata mfut gaalek ke owop me uko kwun̄? Ìre mbubet òtitibi me emen uko ya ìnijeje?’ ²⁸ “Nte uwu kiban̄ ofọfọọk ibe ke ìkpolọlọ ogwu ochicha orọ inu ya. Ebi ikwaan̄ cha edodo nte uwu kiban̄ ibe, ‘Ìre eji esi ejim otutuuk mbubet cha esan̄a?’ ²⁹ “Nte uwu kiban̄ obebe, ‘Iin̄-iin̄, ikasi, mije, mgbọ enyi mêkijim mbubet cha, enyi mêlọ ubọk ijim akpa igbaalek. ³⁰ Eya orọ, ìtele inyi akpa cha mè mbubet cha egbaan̄ etibi. Isire mgbọ irọrọkọ inu me uko, mâtumu inyi ebi ìkirọkọ inu me uko ibe edasi ejim mbubet cha, mè egbaan̄ ebọp me efit me efit, inyi ekpulu esi ewọp me ukan̄, sabum ènefaan̄ akpa etitiin̄, mè ekpulu èsi etap me emen uwu isun̄-akpa n̄a.’ ” ³¹ Jisọs onenito si ofifi urọk ibe, “Mkpulu eyi Awaji ìkup kubọk ukwuuk uti ekigwen mọsitadi eyi ene omọnọbe isi iwop me uko kan̄. ³² Ukwuuk uti yi osip ichit me lek otutuuk ukwuuk uti geelek. Ire, isitibi isibi, ọmọ okimin igak uti geelek ekiwop me uko, mè okana ikpele uti ere ebi kè unọn inyọn̄ enikisọọk, mè ikinama uwu me inyọn̄.” ³³ Jisọs okpọkpọk ito ofifi urọk ibe, “Mkpulu eyi Awaji ìkup kubọk olat, eyi ogwu enenwaan̄ ochibibe sọntiik igwook me lek owuwa akpa ekọkọk ìbosa irọ fituru, mè itap mun̄ me lek, mè igbaan̄ ema ifuku mege sọntiik olat ya îra irọ inyi otutuuk akpa ekọkọk ya iwuku.” ³⁴ Jisọs ìtumu otutuuk ikọ chi inyi ife cha me urọk. Kpunu inu geege îtumube inyi ema eyi ikasage me urọk ìtumu. ³⁵ Ikeyi ke ikọ Awaji otumube inan̄a me otu ogwu nriran orọ iso ibe, “Emi mâkitumu ikọ me urọk, mâtumu owuwa ikọ òkup nlelet bene me karake erombe linyọn̄.” ³⁶ Mgbọ Jisọs otelebe urum ebi ene cha, mè ije inin̄ uwu, ebi udun̄ kan̄ enunu me lek kan̄, mè inibeek ibe ibum ibot urọk mbubet òtibi me emen uko ya inyi ema. ³⁷ Jisọs onenitumu inyi ema ibe, “Ogwu òwop mfut ya ìre Gwun̄ Ebilene. ³⁸ Uko ya ìre linyọn̄ keyi. Ata mfut cha ìre ebi ìkup me emen mkpulu eyi Awaji. Sa mbubet cha okeke inyi bọn eyi Yọk. ³⁹ Ogwu ochicha ogwu òwop mbubet cha ìre Yọk. Mgbọ irọrọkọ inu me uko ya ìre òta mgbọ eyi linyọn̄. Sa ebi ìrọkọ inu me uko cha ere ebi osat Awaji. ⁴⁰ “Ike ejimbe mbubet cha, mè itap ukan̄ iwọp itaka iriọk, ikeya si ke ìbokup me òta mgbọ eyi linyọn̄ keyi. ⁴¹ Mgbọ ya isikem, Gwun̄ Ebilene môria ebi osat kan̄ itap me etete ebi ọmọ okikpulu, ibe esi esan̄a inu geelek òkirọ inyi ene irọ ijo inu, mè esan̄a si otutuuk ebi geelek ìkirọ ijo inu esibi, ⁴² mè ekpulu ema etọọn̄ etap me emen unye ukan̄. Ebi ìkup me emen ukan̄ ya mêkito uga ito, mè ikitaka ejeek. ⁴³ Mgbọ keya, ebi ata irọrọ mêkitoon̄ kubọk ura me etete ebi Nte kiban̄ okikpulu. Ogwu ikaan̄ utọn̄, inọ.” ⁴⁴ Jisọs onenito urọk ibe, “Mkpulu eyi Awaji ìkup kubọk inu ubọọn̄ òlelet me emen ijọn̄ ere ge. Enerieen̄ ge onenikirọkọ ijọn̄ me ere ya, mè isi itoon̄ me lek inu ubọọn̄ cha, mè ida achiaan̄ ichit, mè ìsa me ubelejit ifo isi ikpulu otutuuk inu îkaan̄be inyam, mè isa ikpoko ya isi ibọkọ ijọn̄ ya ilep. ⁴⁵ “Ofifi si, mkpulu eyi Awaji ìkup kubọk ogwu ewe òkiweek ewuuk unye otu ewe ìbolep. ⁴⁶ Mgbọ îweekbe ge eyi atata imun̄, igwugwu ikom ifo, mè isi inyam otutuuk inu îkaan̄be, mè isa ikpoko ya inilep ewuuk unye otu ewe ya. ⁴⁷ “Ofifi si, mkpulu eyi Awaji ìkup kubọk àkarà eyi egwookbe ikana owuwa chieen̄ irin̄ me okwaan̄, ⁴⁸ mè itaba itoon̄ me inyọn̄, mè inikup igobo irin̄ echi atata itap ijot owuwa okwun, mè inikpulu echi kpukukpukukpuku òsisik itọọn̄ ifiin̄. ⁴⁹ Ikeyi ke ìbokup me òta mgbọ. Mije ebi osat mênu iniche ebi ijo irọrọ isan̄a me lek ebi ata irọrọ, ⁵⁰ mè ikpulu ebi ijo irọrọ itọọn̄ itap me emen ukan̄. Ebi ìkup me emen ukan̄ ya mêkito uga ito, mè ikitaka ejeek.” ⁵¹ Jisọs onenido ema ibe, “Ìre enyi mîtet otutuuk inu chi?” Ema echechieek ibe iin̄, ke ema mîtet. ⁵² Inenitumu inyi ema si ibe, “Ogwu òjeen̄ Ikan geelek ejeen̄be inu igọọk me oniin̄ mkpulu eyi Awaji ìkup kubọk ogwu òkaan̄ uwu, mè ikitibi inin̄ emen agwut ere îkisun̄ inu, mè ikisan̄a inu ubọọn̄ echi ukot ikaan̄ mè echi ayaya isibi.” ⁵³ Mgbọ Jisọs otumube ikọ me urọk isan̄a, ijeje inan̄a me ere ya ifo. ⁵⁴ Mgbọ îrebe ama ere ekpukpobe ọmọ isibi, ibebene ikijeen̄ inu me uwu ntitiin̄ kiban̄. Inu cha îkijeen̄ okpọkpọ ike ebi ene chieen̄. Ema ebebene ikidido ibe, “Iriọọn̄-inu keyi mè unye isasa irọ inu ukechieen̄ chi ìnan̄a ene yi me owa mọnọ? ⁵⁵ Ìre ìkare gwun̄ ogwu usọ ya ire ogwu? Sa ìre ìkare ogwu enenwaan̄ ekigwen Meri ore ogwu uga? Sa ìre ìkare Jemis, mè Josefu, mè Saimọn, mè Judas ere ebi ngwan̄ ebirieen̄? ⁵⁶ Ìre ìkare ebi ngwan̄ kan̄ ebibaan̄ melek kiji egbaan̄ iluk me ama yi? Ire ikeya, ìre otutuuk inu chi ene yi okirọ ìnan̄a ọmọ me owa mọnọ?” ⁵⁷ Ema ebebene ikaan̄ njijọ ejit me lek kan̄. Eya orọ, Jisọs otutumu inyi ema ibe, “Ogwu nriran îkikaan̄ umin me ere geelek, îtata me ama kiban̄, mè uwu kan̄ gaalek ke ìkakikaan̄ umin.” ⁵⁸ Jisọs ìkakọt irọ owuwa inu ukechieen̄ me ama kiban̄, mije una ichechieek kiban̄.

¹ Mgbọ etip kè Jisọs otaan̄be inire utọn̄ kè Erọdu ogwu ibot mkpulu me agan̄ Galili, ² Erọdu okekitumu inyi ebi ikwaan̄ kan̄ ibe ke ìkpolọlọ Jọn ògwook mun̄ ojomo me mkpa inikirọ inu chi; ke eya orọ îkaan̄be unye ikisa irọ inu ukechieen̄ cha. ³ Sabum mgbọ ya, Erọdu înyi ida ibe etet Jọn ebọp, mè esa esi etap me uwu mkpọn mije kè Erọdias nwa kè Filip. Filip yi ìre ngwan̄ kè Erọdu. ⁴ Unaan̄-ejit kè Erọdu me lek kè Jọn ògwook mun̄ ìre ke Jọn îtumu ibe ke ìkatat ibe ọmọ Erọdu ibọkọ Erọdias nwa kè Filip ogwu ngwan̄. ⁵ Erọdu îweek ikpakpan̄ Jọn ògwook mun̄, ire, ìkifieek owot ibe ke ebi ene mêto akọn̄. Mije, otutuuk ebi ene mîchieek ibe ke Jọn ìre ene ge me lek ebi nriran. ⁶ Usen ge, mgbọ Erọdu otobe ijọk usen uman kan̄, gwun̄ enenwaan̄ kè Erọdias onenijop okwa me isi kè Erọdu melek ebi ichen îgwenbe me lek ijọk ya. Okwa gwun̄ enenwaan̄ ya ojopbe onenibele Erọdu ejit enenen. ⁷ Erọdu onyanyan̄a ibot inyi gwun̄ ya ibe ido ọmọ inu geelek îweekbe, ke ọmọ mônyi ogwugwu. ⁸ Nga gwun̄ ya onenitọt inyi gwun̄ ya ibe ido ibot kè Jọn ògwook mun̄. Gwun̄ enenwaan̄ ya onenisi ido Erọdu ibe, “Nyi emi ibot kè Jọn ògwook mun̄ me emen okwa mgbọ keyi.” ⁹ Inu yi gwun̄ ya odobe onenifieek ogwu ubọọn̄ yi me lek enenen. Ire, mije îwuukbe lek inyan̄a ibot me isi ebi ichen kan̄ cha, inyinyi ida ibe enyi gwun̄ ya inu îweekbe. ¹⁰ Ikeya ke esi me uwu mkpọn isi ifieek ibot kè Jọn ògwook mun̄, ¹¹ mè iben itap me emen okwa isa ijet gwun̄ enenwaan̄ ya. Ibọbọkọ, mè isa ijet ogwu uga. ¹² Ebi udun̄ kè Jọn enunu iniben nkwukwu kan̄ isi ifuun̄, mè iben inu ya orọrọ isi ikpa inyi Jisọs. ¹³ Mgbọ Jisọs onọbe ukpatu òfolek kè Jọn, ọmọ mè ebi udun̄ kan̄ enwenween̄ lek inin̄ uji, mè ikọp isi ere ònọnọọn̄. Ebi ene inọnọ ikeya, egbugbuku inan̄a me ama geelek òkup me agan̄ ya ije ukot ukot igọọk ọmọ. ¹⁴ Mgbọ ema ekọpbe uji kiban̄ initoon̄ me ijọn̄, Jisọs obebene chieen̄ imun̄ ogbogbo ife cha ejotbe ere ya. Njijin kiban̄ otetet ọmọ, igwagwa otutuuk ebi orukan̄ ìkup me etete kiban̄. ¹⁵ Me otu ikakwun̄ usen ya, ebi udun̄ kan̄ enenitumu inyi ọmọ ibe, “Egwe îjọkọ enenen, melek si, ere yi îjọn̄ọ ere enenen me lek ama. Tele inyi ife chi eje esi asabọn ama òkukup igbet ere yi esi elep inorie.” ¹⁶ Jisọs ofọfọọk ema ibe, “Ìkanwọn ibe ife chi efon ukpọk owot. Enyi ìweek inorie ìnyi ema erie.” ¹⁷ Ebi udun̄ kan̄ ebebe ke ìre owut fituru go, mè ufuk irin̄ iba gaalek ke ema ekaan̄. ¹⁸ Jisọs obebe ema, “Ìsa fituru cha mè irin̄ cha ìjet emi.” ¹⁹ Ineninyi ida ibe mè ebi ife cha esiki ekweek me inyọn̄ mbubet, mè inibọkọ owut fituru go mè ufuk irin̄ iba cha, mè ibene chieen̄ ikpọ inyọn̄, mè inyi Awaji itọn̄. Inyinyi Awaji itọn̄ isan̄a, igwagwaka fituru cha ọkpọkọ ọkpọkọ, mè isa inyi ebi udun̄ kan̄. Ema ebọbọkọ, mè isa isi iche inyi ebi ife cha. ²⁰ Otutuuk kiban̄ ererie, mè irie ijot. Ebi udun̄ kan̄ eteteen̄ ọkpọkọ echi ife cha etakabe isik, ijojot akọp mè okwun iba. ²¹ Otu ifuk ebi ìrerie inorie ya ìre obop ebirieen̄ go, kpefuk ebibaan̄ mè nsabọn itap me lek. ²² Mgbọ yaage ife cha eriebe inorie isan̄a, Jisọs onenibe ebi udun̄ kan̄ esi enin̄ uji, mè edasi kan̄ ekọp esaba agan̄ keyilọ. Ọmọ me lek kan̄ obabia me udun̄ ikitap ife cha me oniin̄ inyi efon. ²³ Itatap ema me oniin̄ isan̄a, ijeje inene inyọn̄ ogoon̄, ọmọ gaalek, isi ikup iriaak uriaak ire agan̄ ikakwun̄. ²⁴ Ike mgbọ ya, uji ya îjọn̄ọ ere me okwaan̄, efet okekiwut ibieen̄ ema ikpebe, ekoon̄ si okekisisaak ema. ²⁵ Me òfit iwele kan̄, me agan̄ egwe, Jisọs onanan̄a ikije ukot ukot me inyọn̄ isi mun̄ me okwaan̄ oyô ya igọọk ema. ²⁶ Mgbọ ebi udun̄ kan̄ emun̄be ọmọ okije me inyọn̄ isi mun̄, ukpook otetet ema enenen. Ema ebebe ke ìre ekwukwu, mè isan̄a ukpo ibọn̄. ²⁷ Ire, mgbọ yaage Jisọs obọbọkọ ema otu, mè ibe ema, “Ìkat ejit, ikatet ukpook, ke emi ke ìre.” ²⁸ Pita obebe ọmọ, “Okaan̄-ene, ire owu me atikọ, gwen emi ibe emi ǹje me inyọn̄ isi mun̄ ǹnu me lek kwun̄.” ²⁹ Jisọs obebe ọmọ, “Na.” Pita onanan̄a me emen uji ya isaba isibi, mè ikije me inyọn̄ isi mun̄ ya igọọk Jisọs. ³⁰ Ire, mgbọ Pita oraan̄be chieen̄ ikpọ efet ya me isi mun̄, ifefieek owot, mè ibene ikigen. Mgbọ îbenebe ikigen, ibọbọn̄ ukpo ibe, “Okaan̄-ene nyan̄a emi soso!” ³¹ Mgbọ yaage, Jisọs onyanyana ubọk itet ọmọ, mè ibe ọmọ, “Owu ogwu una ichechieek keyi! Keke orọ òbene òkaan̄ ejit iba?” ³² Mgbọ ema ene iba esababe inin̄ uji, efet ya owọwọ. ³³ Ebi ìkup me emen uji ya etọtọbọ ebum inyi Jisọs, mè ibe ọmọ, “Owu ìre Gwun̄ Awaji me atikọ!” ³⁴ Ema enenikọp isaba itoon̄ me agan̄ ijọn̄ ekigwen Geneseret. ³⁵ Ebi ìluk me inyọn̄ ijọn̄ ya erọriọọn̄ Jisọs isi, mè ilook etip ikana ere geelek ibe ke Jisọs înu. Ebi ene ekpukpulu otutuuk ebi orukan̄ kiban̄ ijet ọmọ, ³⁶ mè iriaak ọmọ ibe itele inyi ebi orukan̄ cha echak ubọk me utọn̄ ọfọnti kan̄. Otutuuk ebi ìchachak ubọk me lek ọfọnti kan̄, lek kiban̄ onyenye isan̄a.

¹ Usini ebi Farisi, mè ebi ìjeen̄ Ikan eneninan̄a me Jeruselem inu me lek kè Jisọs, mè inido ọmọ ibe, ² “Ìre keke orọ ebi udun̄ kwun̄ ekijit irọrọ ọrọmijọn̄ ebi ugane esun̄be? Ebi udun̄ kwun̄ kpekigwọk ubọk sabum ènerie inorie.” ³ Jisọs onenido ema ibe, “Ìre keke orọ enyi ekifiat Ikan Awaji mije ọrọmijọn̄ kinyi? ⁴ Mije Awaji ìbe, ‘Min nte kwun̄ mè nga kwun̄. Ogwu itumu ijo otu ikọ inyi ogwu ute, mè ìre ogwu uga, ekpakpan̄.’ ⁵ Ire, enyi eyaka ikijeen̄ ibe, ire ogwu ikaan̄ inu ìbosa itap ubọk inyi ogwu ute mè ìre ogwu uga, mè itumu inyi ogwu ute mè ìre ogwu uga ibe ke inu ya ìkup inyi Awaji, ⁶ ke ene ya môkọt isa me ikeya itele inyinyi ogwu ute mè ìre ogwu uga umin. Sa me ikeyi, enyi mîra ikisa ọrọmijọn̄ kinyi irọ inyi Ikan Awaji ikana inu ikike. ⁷ Enyi ebi isi iba kechi! Nriran Asaya obenbe òfolek kinyi ìre atikọ. Asaya ìben nriran ibe ke Awaji ìbe, ⁸ ‘Ife chi ekimin emi me ukpọk-otu ikike, ire, ejit kiban̄ îjọn̄ọ ere me lek n̄a. ⁹ Ema ekitọbọ ebum inyi emi ikike, mè ikijeen̄ ikan ema gaalek etapbe kubọk ìre Ikan Awaji.’ ” ¹⁰ Jisọs onenigwen ebi ife cha iriaak me lek kan̄, mè itumu inyi ema ibe, “Ìgban̄ utọn̄, mè ìtet ibot me lek ikọ yi. ¹¹ Ìkare inu òkinin̄ ene otu okirọ inyi ene ikatana me isi Awaji. Îre inu òkinan̄a ene me otu isibi gaalek okirọ inyi ene ikatana me isi Awaji.” ¹² Ebi udun̄ kan̄ enenije iriaak ọmọ me lek, mè ibe ọmọ, “Ìre oriọọn̄ ibe ke ebi Farisi mînaan̄ ejit me lek ikọ ya owu otumube?” ¹³ Jisọs ofọfọọk ema ibe, “Uti geelek eyi Nte n̄a ogwu òkup me emen inyọn̄ ikasage ubọk kan̄ ìwop, mêgbaan̄ uti cha mè ugwun̄-ijọn̄ ijim isan̄a. ¹⁴ Ìjuuk ema ìtele, mije, ema ìre ebi ǹnàan̄ ìkisa ebi ǹnàan̄ ijeen̄ oniin̄. Ire ogwu ǹnàan̄ ikisa ogwu ǹnàan̄ ijeen̄ oniin̄, ema ene iba mêgbaan̄ irọn̄ inin̄ emen udọn̄.” ¹⁵ Pita onenibeek Jisọs ibe ibum ibot urọk ya inyi ema. ¹⁶ Jisọs onenido ema ibe, “Ìre enyi kpekikọt igobo inu itet si ire chereyi? ¹⁷ Ìre enyi kperiọọn̄ ibe ke inu geelek ònin̄ ene otu ìkiraka ifo owot, mîra ikine ifiin̄? ¹⁸ Ire, inu geelek ònan̄a ene me otu isibi ìkinan̄a me ejit ene. Îre echichi okirọ inyi ene ikatana me isi Awaji. ¹⁹ Mije, ijo ekiket geelek, mè ikpakpan̄ ene me unye, mè ugan-nwa mè ijeje oyet, mè ichichiin̄ inọ, mè ikekeke ata-ikọ ataak, mè ifafiat ene, ìkinan̄a me ejit ene isibi. ²⁰ Îre inu chi okirọ inyi ene ikatana me isi Awaji. Ekagwọkge ubọk sabum ènerie inorie ìkakirọ inyi ene ikatana me isi Awaji.” ²¹ Jisọs oneninan̄a me ere ya ije isi agan̄ Taya mè Saidọn. ²² Ogwu enenwaan̄ Kenan ge òluk me agan̄ ya onunu me lek kan̄, mè ibe ọmọ, “Okaan̄-ene, Gwun̄ kè Debit, soso to emi nsan. Ijo erumun̄ òkisisaak gwun̄ n̄a enenwaan̄ enenen.” ²³ Ire, Jisọs okpọkpọ iriaan̄ otu, ìkasan̄a amọn geege. Ebi udun̄ kan̄ etutumu inyi ibe, “Tumu nyi ogwu enenwaan̄ ya ibe ifo, inyi ikayaka ibọn̄ ukpo igọọk eji me udun̄.” ²⁴ Jisọs onenifọọk ogwu enenwaan̄ ya ibe, “Eria emi inu me lek arọọn̄ òchechep me otoko kè Ijeren gaalek.” ²⁵ Ogwu enenwaan̄ ya onunu initọbọ ekpe me isi kan̄, mè ibe ọmọ, “Okaan̄-ene, soso, nye lek tap ubọk nyi emi.” ²⁶ Jisọs ofọfọọk ọmọ ibe, “Ìkanwọn ibe eben inorie nsabọn eberie etọp eto me ijọn̄ enyi ibo.” ²⁷ Ogwu enenwaan̄ ya obebe ọmọ, “Iin̄ Okaan̄-ene, ikeya ke îre. Ire, ibo ìkekikup si me irak ikasi ogwu ute-uwu ikirie ngigen̄e inorie òkinan̄a me inyọn̄ ikasi ya igwook me ijọn̄.” ²⁸ Jisọs ofọfọọk ọmọ ibe, “Ogwu enenwaan̄, ichechieek kwun̄ îmin. Mîrọ inu oweekbe inyi owu.” Me ike mgbọ yaage, lek gwun̄ ogwu enenwaan̄ ya onyenye. ²⁹ Jisọs oneninan̄a me ere ya ije isi agba okwaan̄ oyô Galili, mè isi inene inyọn̄ ogoon̄ ge isiki ikweek. ³⁰ Ogbogbo ebi ene ekpukpulu ebi ngọm, mè ebi ǹnàan̄, mè ebi akọọk, mè ebi mbuuk, mè ofifi ebi ìkifiak esese chieen̄ orukan̄ isa inigwook me ukot kan̄. Igwagwa otutuuk kiban̄. ³¹ Mgbọ ebi ife cha emun̄be ibe ke ebi mbuuk mîbene ikitumu ikọ, lek ebi ngọm înye, ebi akọọk mîbene ikije ije, ebi ǹnàan̄ mîbene ikimọọn̄ inu, ikeke ema chieen̄ enenen. Ema ekekitọn̄ Awaji ebi Ijeren. ³² Jisọs onenigwen ebi udun̄ kan̄ iriaak me lek kan̄, mè itumu inyi ibe, “Njijin ife chi îtet emi enenen. Egwe ita ire echa ife chi ekupbe melek n̄a. Mgbọ keyi, inorie kiban̄ îta, kpunu inu geege ema eberie. Eya orọ, m̀kpatele inyi ema esa uraafiọọn̄ me owot eje efon, inyi ema ekagak ìweek me oniin̄.” ³³ Ebi udun̄ kan̄ efọfọọk ọmọ ibe, “Ìre eji ebejeje ikaan̄ inorie òboso urum ene òmin ikup ikeyi me emen èwê yi?” ³⁴ Jisọs onenido ema ibe, “Ìre owut fituru inen ke enyi ekaan̄?” Ema efọfọọk ibe ke ema ekaan̄ owut fituru jaaba gaalek mè ufuk asabọn irin̄ inen mè inen. ³⁵ Inenitumu inyi ogbogbo ene cha ibe esiki ekweek me ijọn̄, ³⁶ mè inibọkọ owut fituru jaaba, mè ufuk irin̄ inen mè inen cha, mè inyi Awaji itọn̄. Mgbọ înyibe Awaji itọn̄ isan̄a, ikpọkpọkọ fituru cha mè irin̄ cha itap ebi udun̄ kan̄ me ubọk ibe esa esi eche enyi ebi ife cha. ³⁷ Otutuuk kiban̄ ererie inorie ya ijot. Mgbọ ema eriebe isan̄a, ebi udun̄ kan̄ eneniteen̄ echi eriebe isik itap me okwun, ijojot okwun jaaba. ³⁸ Otu ifuk ebi ìrerie inorie ya ìre obop ebirieen̄ ini, kpefuk ebibaan̄ mè nsabọn itap me lek. ³⁹ Jisọs onenitap ife cha me oniin̄ ifofo kiban̄ isan̄a, mè inin̄ uji, ọmọ mè ebi udun̄ kan̄ ekọkọp isaba isi agan̄ Magidala.

¹ Usen ge, ebi Farisi, mè ebi Sadusi enunu ibeniweek Jisọs ikọ me otu, mè ikido ọmọ ibe ijeen̄ ema nu inu ijejeen̄ ge ònan̄a me emen inyọn̄. ² Jisọs onenifọọk ema ibe, “Isire agan̄ ikakwun̄, mè isinyọn̄ isikup eje eje, enyi mîra ibe ke ere môjaan̄ me ewelegwe òfit-iwele kan̄. ³ Isire ewelegwe, mè isinyọn̄ isikup eje eje, mè ikana ichit, enyi mîra ibe ke egwijo ìkpolọlọ ijijibi chereyi. Enyi mîkikọt isa ubọk isinyọn̄ okupbe itumu ike egwe usen obokup. Ire, enyi kpekọt iriọọn̄ inu eyi inu ijejeen̄ echi mgbọ kechi okekebe inyi. ⁴ Ebi mgbọ kechi ìrere ebi ikpak mè ebi ekariọọn̄ge Awaji ekiweek inu ijejeen̄. Ire, kpunu inu ijejeen̄ geege ebejeen̄ ema ilọ me lek inu ijejeen̄ ònan̄a me lek kè Jona.” Mgbọ Jisọs otumube ikọ chi isan̄a, ijeje inan̄a itele ife cha. ⁵ Ebi udun̄ kè Jisọs mîwuuk itatap fituru me uji sabum ema enikọp isaba okwaan̄ oyô ya. ⁶ Jisọs onenikiteme ema nteme ibe, “Ìgbala chieen̄ me lek olat ebi Farisi mè eyi ebi Sadusi.” ⁷ Mgbọ îkiteme ema nteme ya, ema ekekitumu me lek kiban̄ ibe ke ìkpolọlọ mije ema ekatapge fituru geege me uji orọ îkitumu ikọ ya. ⁸ Jisọs orọriọọn̄ inu ema ekitumu me lek kiban̄, mè ibe ema, “Enyi ebi sọntiik ichechieek kechi! Ìre keke orọ enyi ekibọnọ lek ibe ke enyi kpemọnọ fituru itap me uji? ⁹ Ìre enyi kpekikọt igobo si inu geege itet ire mgbọ keyi? Ìre enyi mîwuuk mgbọ nsabe owut fituru go gaalek inyi obop ene go erie ejot? Sa ìre enyi mîwuuk otu ifuk okwun enyi eteen̄be fituru echi etakabe isik ijot? ¹⁰ Ìre enyi mîwuuk mgbọ nsabe owut fituru jaaba inyi obop ene ini erie ejot? Sa ìre enyi mîwuuk si otu ifuk okwun eteen̄be fituru echi etakabe isik ijot? ¹¹ Ìre keke orọ enyi kpekọt igobo itet ibe ke ìkare fituru ke nkitumu ikọ òfolek inyi enyi? M̀be enyi, ìgbala chieen̄ me lek olat ebi Farisi mè eyi ebi Sadusi.” ¹² Mgbọ ya ke ebi udun̄ kan̄ enitet ibot ibe ke ìkare olat ekisa irọ fituru ke Jisọs otumu ibe ema egbala chieen̄ me lek. Ire, ke ìkitaba ema ubọk me utọn̄ òfolek ijo ijejeen̄ ebi Farisi mè ebi Sadusi ekijeen̄. ¹³ Jisọs mè ebi udun̄ kan̄ enenije inu ama ekigwen Sisaria Filipai. Me ama ya, Jisọs onenido ebi udun̄ kan̄ ibe, “Ìre ebi ene ekitumu ibe ke emi Gwun̄ Ebilene ìre ekene?” ¹⁴ Ema efọfọọk ibe, “Usini ene ekibe ke owu ìre Jọn ògwook mun̄, usini ene ebe ke owu ìre Ilaija. Sa usini ene ebe ke owu ìre Jerimaya, mè ìyaka ire ene ge me lek ebi nriran.” ¹⁵ Jisọs onenido ema ibe, “Ìre enyi me lek kinyi ebe ke emi ìre ekene?” ¹⁶ Saimọn Pita ofọfọọk ibe, “Owu ore ogwu Awaji otoon̄be ubọk me ibot ya, ogwu òrere Gwun̄ Awaji òkup me ugwem!” ¹⁷ Jisọs obebe ọmọ, “Saimọn, gwun̄ kè Jona, ugbana ikup inyi owu, mije, ìkare ogwu ebilene ochili inu yi inyi owu. Îre Nte n̄a ogwu òkup me emen inyọn̄ ochili inu yi ijeen̄ owu. ¹⁸ Ǹkitumu inyi owu ibe ke owu ìre Pita (eyi òsisibi ewuuk). Îre me inyọn̄ ewuuk keyi ke mbanama ntitiin̄ n̄a. Mkpa me lek kan̄ ìkpokọt itim ikpan̄ ntitiin̄ ya. ¹⁹ Emi mânyi owu otutuuk atafi mkpulu eyi Awaji. Inu geelek owu obọpbe me linyọn̄ keyi, mêbọp si ikeya me emen inyọn̄. Inu geelek otọn̄ọbe me linyọn̄ keyi, mêtọn̄ọ si me emen inyọn̄.” ²⁰ Inenitaba ebi udun̄ kan̄ ubọk me utọn̄ ibe ekatumu inyi ene geege ibe ke ọmọ ore ogwu Awaji otoon̄be ubọk me ibot ya. ²¹ Bene me mgbọ ya fo isi, Jisọs obebene ikikpa iwele inyi ebi udun̄ kan̄ ibe, “Emi mâsi Jeruselem. Me ere ya, mâmun̄ owuwa ufialek me ubọk ebi ugane ama, mè ebi ibot ngwugwa, mè ebi ìjeen̄ Ikan. Mêkpan̄ emi. Ire, egwe ita isiraka, mâjomo me mkpa.” ²² Pita inọnọ ikọ ya, igwegwen Jisọs ida ibọkọ, mè ikikan̄ inu inyi ibe, “Okaan̄-ene, Awaji ikachieek! Inu yi ìkporọ owu!” ²³ Jisọs okọkọọn̄ chieen̄ ikpọ Pita, mè itumu inyi ibe, “Je nan̄a emi me isi, owu Yọk keyi! Owu ìre òkeke me otu oniin̄ inyi emi. Ìkare inu òneme Awaji ke okikeek. Îre inu òneme ebilene ke owu okikeek.” ²⁴ Jisọs onenitumu inyi ebi udun̄ kan̄ ibe, “Ire ikaan̄ ogwu iweek igọgọọk emi, ene ya ijit lek kan̄, mè iben uti nkwurieen̄ kan̄ isa igọọk emi. ²⁵ Mije, ogwu iweek ibọbọọk ugwem kan̄, ene ya môfiin̄ ugwem kan̄. Ire, ene geelek òfifiin̄ ugwem kan̄ mije n̄a, ene ya môweek ugwem kan̄ imun̄. ²⁶ Ìre kpasi oruru ke ene obokaan̄, ire ene ya ikaan̄ otutuuk linyọn̄, mè ifiin̄ ugwem kan̄? Sa ìre keke ke ene obokọt isa inyi me useen̄ ibot ejit kan̄? ²⁷ Gwun̄ Ebilene mônu me umin mè uja eyi ogwu Ute, ọmọ melek ebi osat kan̄. Isinu, mgbọ keya ke ìbonikpe ene geelek mkpukpe igọọk me ubọk ikwaan̄ ene ya orọbe. ²⁸ Me atikọ, ǹkitumu inyi enyi ibe ke usini me lek ebi ìkekeke me ere yi mgbọ yi kpebekwu mege ire mgbọ ema mêmun̄be Gwun̄ Ebilene okinu melek mkpulu kan̄.”

¹ Mgbọ egwe gweregwen orakabe, Jisọs onenisa Pita mè Jemis mè Jọn ngwan̄ kè Jemis igbaalek kan̄ ije isi inene ubene ogoon̄ ge, ema gaalek. ² Me ere ya, me isi ebi udun̄ kan̄ cha, akpalek kè Jisọs onwenwene. Isi kan̄ okekitoon̄ kubọk ura, ọfọnti kan̄ okekitana kubọk utoon̄ egwe. ³ Mgbọ yaage, ema emumun̄ Mosis mè Ilaija ekanabe isibi, mè ikigọọk Jisọs ikpa ukpatu. ⁴ Mije Pita ikariọọn̄ge inu ìbotumu, ikpọkpọ itumu inyi Jisọs ibe, “Okaan̄-ene, înwọn ubọk eji ekupbe me ere yi. Ire ineme owu, emi mânama atanga ita, ge eyi kwun̄, ge eyi kè Mosis, ge eyi kè Ilaija.” ⁵ Pita òkitumu ikọ ya me otu, oduku inyọn̄ òtotoon̄ òkakana ema ichit bùk. Ida ge okekitumu ikọ me emen oduku inyọn̄ ya ibe, “Ogwugwu ìre Gwun̄ n̄a ogwu mmun̄be me chieen̄, inu kan̄ îneme emi enenen. Ìgban̄ ikọ kan̄!” ⁶ Mgbọ ebi udun̄ kè Jisọs enọbe ida ya, ukpook otetet ema, ema erọrọn̄ me ijọn̄, mè ikana isi ikwuun̄. ⁷ Jisọs onenichak ema ubọk me lek, mè ibe ema, “Ìnan̄a ìkeke, ikayaka ifieek owot.” ⁸ Mgbọ ema ebenebe isi me ijọn̄, kpeyaka imun̄ ofifi ene geege, ilọ Jisọs gaalek. ⁹ Mgbọ ema ekinan̄a me inyọn̄ ogoon̄ ya isibi, Jisọs otutumu inyi ema ibe ekakpa inu ema emun̄be ìnyi ene geege, mege ire mgbọ ọmọ Gwun̄ Ebilene môjomobe me mkpa. ¹⁰ Ebi udun̄ kan̄ enenido ọmọ ibe, “Tumu-nu, ìre ebi ìjeen̄ Ikan ejeje ikitumu ibe ke Ilaija môdasi inu sabum Karais ònu?” ¹¹ Jisọs ofọfọọk ema ibe, “Me atikọ, Ilaija obodasi inu ininen̄e otutuuk inu isun̄ me irek. ¹² Ire, ǹkitumu inyi enyi ibe ke Ilaija îra inunu iraka, ire, ebi ene kperiọọn̄ ibe ke ìre ọmọ ore ogwa. Ire, ema mîrọ ọmọ ijo inu geelek òneneme ema. Ikeya ke Gwun̄ Ebilene obomun̄ ufialek me ubọk kiban̄.” ¹³ Mgbọ ya ke ebi udun̄ kan̄ cha eniriọọn̄ ibe ke ìkitumu ikọ ya ibak Jọn ògwook mun̄. ¹⁴ Mgbọ ema ejebe inire lek ogbogbo ene cha, ogwu enerieen̄ ge onunu, mè initọbọ ekpe me isi kè Jisọs, ¹⁵ mè ikiriaak ọmọ ibe, “Okaan̄-ene, soso, kaan̄ ejit nsan me lek gwun̄ n̄a enerieen̄. Gwun̄ ya ìkifiak mkpikpi, orukan̄ ya òkitutuku gwun̄ ya enenen. Owuwa mgbọ, isibene me lek, ìkekirọ inyi irọn̄ inin̄ emen ukan̄, mè ìre emen mun̄. ¹⁶ Mije keya, ke nsa gwun̄ ya ijet ebi udun̄ kwun̄ ibe egwa, ire, ema kpekọt igwa.” ¹⁷ Jisọs onenibe, “Jei, ebi mgbọ kechi, enyi mîfieek, mè inan ichechieek enenen! Ìre kpa mgbọ ke mbagọọk enyi ikup ire sabum enyi ènekaan̄ ichechieek? Sa ìre kpa mgbọ ke mbame una ichechieek kinyi isi ire? Ìsa gwun̄ ya ìjet emi.” ¹⁸ Inenigana inyi ijo erumun̄ ya, ijo erumun̄ ya onanan̄a me emen gwun̄ enerieen̄ ya isibi. Mgbọ yaage, lek gwun̄ ya onyenye. ¹⁹ Mgbọ inu ya orọbe iraka, ebi udun̄ kan̄ enwenween̄ lek inu inido ọmọ ibe mè ire keke orọ ema kpekọt ilap ijo erumun̄ ya isibi me emen gwun̄ enerieen̄ ya? ²⁰ Jisọs ofọfọọk ema ibe, “Îre mije ichechieek kinyi misip. Me atikọ, ǹkitumu ibe, ire ibe enyi mîkaan̄ ìchechieek, ìrere eyi òsisip ikup kubọk ukwuuk uti mọsitadi, kpunu inu geege òboyọt igak enyi. Enyi mêkọt itumu inyi ikpele ogoon̄ yi ibe, ‘Jibi nan̄a me ere keyi si keke me ere keyilọ!’, mè ogoon̄ yi orọ si ubọk enyi etumube. [ ²¹ Ire, kpekikọt ilap òjelek ijo erumun̄ keyi isibi me emen ene, îtata me uriaak mè ijin-otu gaalek.”] ²² Usen ge, mgbọ ema ekigbaan̄ ije ikana me Galili, Jisọs onenitumu inyi ebi udun̄ kan̄ ibe, “Mêleke emi Gwun̄ Ebilene itap me ubọk ebi ene, ²³ inyi ekpan̄. Ire, òso egwe ita, mâjomo me mkpa.” Mgbọ ebi udun̄ kan̄ enọbe ikọ yi, ejit obebene ikifieek ema enenen. ²⁴ Mgbọ Jisọs mè ebi udun̄ kan̄ ejebe inire Kapanọm, ebi ìkibọkọ otitip uwu Mbuban enenigwen Pita ida ibọkọ, mè ido ibe, “Ìre ogwu ijejeen̄ kinyi îkigọọk itip otitip Uwu Mbuban?” Otitip yi ìkire ikpoko ekigwen darakima iba. ²⁵ Pita obebe iin̄, ke îkigọọk itip. Mgbọ Pita ogwube ikom inin̄ uwu, sabum ìbosan̄a amọn, Jisọs odadasi ibe ọmọ, “Saimọn, keke ore ekiket kwun̄? Ìre ebi owa ekikpe mkpukpe, mè ìre otitip inyi ebi ubọọn̄ ìkikpulu ema me linyọn̄ keyi? Ìre bọn owot, sa ìre ebi ichen ekikpe?” ²⁶ Pita ofọfọọk ibe ke ìre ebi ichen. Jisọs obebe ọmọ, “Ire ikeya, bọn owot kpekaan̄ ititip otitip keya! ²⁷ Ire, mọnọ ukọọk si tọp to me okwaan̄ oyô, adasi irin̄ owu môtababe, chili otu irin̄ ya, ke owu mômun̄ ikpoko alata ge eyi òrere darakima ini. Mọnọ sa nyi ife cha me lek otitip kwun̄ mè eyi n̄a, inyi ife cha ekanaan̄ ejit ìnyi eji.”

¹ Me mgbọ ya ebi udun̄ kè Jisọs enunu me lek kan̄, mè inido ọmọ ibe, “Ìre ekene omin ichit me mkpulu eyi emen inyọn̄?” ² Jisọs ogwegwen sọntiik gwun̄ ge, ibe inikeke me etete kiban̄, ³ mè initumu inyi ema ibe, “Me atikọ, ǹkitumu inyi enyi ibe, îtata enyi egwugwu ikom, mè ikana ikup kubọk asa nsabọn, enyi kpebenin̄ mkpulu eyi emen inyọn̄. ⁴ Eya orọ, ene geelek ògegele lek kan̄ isiki kubọk sọntiik gwun̄ yi, ene ya ore ogwu òmimin ichit me mkpulu eyi emen inyọn̄. ⁵ Ikeya si, ogwu geelek òbọbọkọ sọntiik gwun̄ òkup ikeyi itap me erieen̄ n̄a, îre emi ke ene ya obọkọ itap. ⁶ “Ire, kpan̄asi ene orọbe inyi ge me lek nsabọn chi ebi ìchechieek me lek n̄a irọ ijo inu, mônwọn me lek ene ya ire itobo ewuuk ekisa ikọk akpa me ebek kan̄, mè iben ọmọ isi itọp ito me ejit okwaan̄, inyi igen. ⁷ Môfieek inyi linyọn̄ keyi mije owuwa inu òkirọ inyi ebi ene ekerọ ijo inu. Me atikọ, òjelek inu kechi kpolọlọ inunu. Ire, môfieek enenen inyi ene geelek òsasa òjelek inu chi inu. ⁸ Ire ubọk kwun̄, mè ìre ukot kwun̄ ikirọ inyi owu òrọ ijo inu, fieek tọp fiin̄, mije, mônwọn owu isasa ukot ge mè ìre ubọk ge inin̄ emen ugwem, igak owu ikakaan̄ ukot iba mè ubọk iba, ire, ebeben owu itọp itap me emen ukan̄ òkpọkpọ ikilomo ire mgbọ geelek. ⁹ Ikeya si, ire chieen̄ kwun̄ ikirọ inyi owu òkorọ ijo inu, rọkọ chieen̄ ya tọp fiin̄, mije, mônwọn ibe owu òsa agan̄ chieen̄ ge ònin̄ emen ugwem, igak owu ikakaan̄ chieen̄ iba me lek ibot, ire, ebeben owu itọp itap me emen ukan̄ ama yọk. ¹⁰ “Ikakpọ ene geege me etete asa nsabọn chi chieen̄ ìsiki, mije, ǹkitumu inyi enyi ibe, me emen inyọn̄, ebi osat Awaji ìkikpọ chieen̄ me lek nsabọn chi ekikup me isi kè Nte n̄a ogwu òkup me emen inyọn̄ mgbọ geelek. [ ¹¹ “Emi Gwun̄ Ebilene ǹnu ineninyan̄a ebi ìchechep.] ¹² Ire ene ikaan̄ efit arọọn̄, ge oneninan̄a me lek ije ilọ oniin̄, ìre enyi kpekeek ibe ke ene ya môtele akọp arọọn̄ onaan̄ge mè onaan̄ge kechilọ me inyọn̄ ogoon̄, mè ikijijen̄e ikana iweek ge ya òjeje ilọ ọmọ chieen̄? ¹³ Me atikọ, ǹkitumu inyi enyi ibe, ire ene ya iweek arọọn̄ ge ya imun̄, môbele ejit me lek arọọn̄ ge ya igak me lek akọp arọọn̄ onaan̄ge mè onaan̄ge kechilọ echi ikajege ìlọ ogwukaan̄ chieen̄. ¹⁴ Ikeya si, Nte kinyi ogwu òkup me emen inyọn̄ ìkaweek ibe ge me lek asa nsabọn chi inan̄a ichep. ¹⁵ “Ire ngwan̄ kwun̄ irọ owu ilọ, je si lek kan̄, owu melek kan̄ gaalek, mè jeen̄ ọmọ inu eyi îrọbe owu ilọ. Ire igban̄ utọn̄, mè ichieek ibe ke ọmọ îrọ owu ilọ, owu okpọk ikaan̄ ọmọ me lek ngwan̄. ¹⁶ Ire, ire ìkachieek, gwen ene ge, mè ìre ene iba, sa gbaalek kwun̄ si lek kan̄, inyi utọn̄ ebi ata-ikọ iba, mè ìre ita, inọ, mè irọ ikọ geelek etumube inye. ¹⁷ Ire ijit igbagban̄ ida ebi ata-ikọ cha, si kpa inu ya nyi ebi ntitiin̄ Awaji. Ire ijit si igbagban̄ ida ebi ntitiin̄ Awaji, mọnọ ọmọ kubọk ogwu ikariọọn̄ge Awaji, mè ìyaka ire ogwu otitip ido. ¹⁸ “Me atikọ, ǹkitumu inyi enyi ibe, inu geelek enyi ebọpbe me linyọn̄, mêbọp si me emen inyọn̄. Inu geelek enyi etọn̄ọbe me linyọn̄, mêtọn̄ọ si me emen inyọn̄. ¹⁹ “Ofifi kan̄, ǹkitumu si inyi enyi ibe, ire ene iba me etete kinyi ikup me linyọn̄ keyi igbaan̄ ichieek me lek inu geelek enyi ekiriaak uriaak òfolek, Nte n̄a ogwu òkup me emen inyọn̄ môrọ ikeya si inyi enyi. ²⁰ Mije, ere ene iba mè ìre ene ita egbaan̄be ititiin̄ me erieen̄ n̄a, emi òwa me ere ya melek kiban̄.” ²¹ Pita oneninu me lek kè Jisọs, mè inido ọmọ ibe, “Okaan̄-ene, ìre ngwan̄ n̄a ìborọ emi ilọ mgbọ inen, mè emi ǹtele ǹnyi? Ìre môso mgbọ jaaba?” ²² Jisọs ofọfọọk ọmọ ibe, “Ìkare mgbọ jaaba gaalek, îre akọp mgbọ jaaba irek jaaba. ²³ “Eya orọ, mkpulu eyi Awaji ìkup kubọk ogwu ubọọn̄ ge òweweek irọrọ ifuk melek ebi ikwaan̄ kan̄. ²⁴ Mgbọ îbenebe ifuk ya, esasa ene ge ogwu òkakaan̄ ọmọ urieek owuwa obop akpa ikpoko ijet ọmọ. ²⁵ Mije ogwu enerieen̄ ya ikakọtge ìkpe urieek ya, ogwu nte uwu kiban̄ onyinyi ida ibe ekpulu ogwu enerieen̄ ya, mè ogwu nwa, mè nsabọn kan̄, mè otutuuk inu îkaan̄be esi enyam, mè esa ikpoko ya enekpe ọmọ urieek kan̄ ya. ²⁶ “Ogwu ikwaan̄ ya ogwogwook ekpe me ijọn̄, mè iriaak ogwu ute-uwu ya ibe, ‘Soso, kaan̄ ukarajit sọnja mgbọ me lek n̄a, ke mâkpe owu otutuuk urieek nkaan̄be owu.’ ²⁷ Ogwu ute-uwu ya okakaan̄ ejit nsan me lek kan̄, mè ifuk otutuuk urieek cha ichep inyi, mè itele ibe ifo. ²⁸ “Mgbọ yaage ogwu ikwaan̄ ya onan̄abe isibi, ichichichini ofifi ogwu ikwaan̄ ogbo kan̄ ge ogwu òkakaan̄ ọmọ urieek sọntiik ikpoko mêkọtbe isa ikpe ogwu ikwaan̄ ge onyan̄ ita gaalek, mè ikana ene ya itet me ebek, mè ikinwan, mè itumu inyi ibe, ‘Kpe emi otutuuk urieek okaan̄be emi.’ ²⁹ “Ene ya ogwogwook ekpe me ijọn̄, mè ikiriaak ibe, ‘Soso, kaan̄ ukarajit me lek n̄a sọnja mgbọ, ke mâkpe owu otutuuk urieek nkaan̄be owu.’ ³⁰ “Ire, ogwu enerieen̄ yi ìkachieek. Kpan̄asi ikeya, itetet ogwu ikwaan̄ ogbo kan̄ ya ijet ibe etap me mkpọn, inyi ikup me ere ya mege ire mgbọ geelek môkọtbe ikpe ọmọ otutuuk urieek kan̄ isan̄a. ³¹ Mgbọ ebi ikwaan̄ ogbo kiban̄ emun̄be inu ya òrọrọ, ejit îfieek ema enenen. Ema ebeben inu ya isi ikpa inyi nte uwu kiban̄. ³² “Nte uwu kiban̄ oraria ikwaan̄ igwen ogwu enerieen̄ ya, mè itumu inyi ibe, ‘Îyak, owu òjeje ifieek ikeyi? Emi mfuk ikpele urieek owu okaan̄be emi ichep mije owu oriaakbe emi. ³³ Ìre keke orọ owu òkakọt ìkaan̄ ejit nsan me lek ogwu ikwaan̄ ogbo kwun̄ ike emi nkaan̄be me lek kwun̄?’ ³⁴ Ogwu ute-uwu ya osasa me unaan̄-ejit ikana ọmọ inyi ibe etap me mkpọn, mè ikup me ere ya mege ire mgbọ môkọtbe ikpe ọmọ otutuuk urieek îkaan̄be ọmọ isan̄a kpai.” ³⁵ Jisọs onenitumu inyi ema ibe, “Ikeyi si ke Nte n̄a ogwu òkup me emen inyọn̄ oborọ enyi, îtata enyi esasa me otutuuk ejit kinyi itele ijo geelek ebi ngwan̄ kinyi erọbe enyi.”

¹ Mgbọ Jisọs otumube ikọ cha isan̄a, inenije inan̄a me Galili isi agan̄ ijọn̄ Judia eyi òkup me usaba okwaan̄ Jọdan. ² Ogbogbo ebi ene efafan̄a igọọk ọmọ me agan̄ ya, igwagwa owuwa ebi lek ikanyege me ere ya. ³ Usini ebi Farisi enunu ibenileke ọmọ ikọ me otu, mè inido ọmọ ibe, “Ìre îtat me Ikan ibe ene iyaak ogwu nwa mije inu geelek?” ⁴ Jisọs ofọfọọk ema ibe, “Ìre enyi kpefuk inu egebe me Ikpa Mbuban ibe, me ibebene, ke Awaji ìrom ema enerieen̄ mè enenwaan̄, ⁵ mè itumu si ibe, mije keyi, ogwu enerieen̄ môtele ogwu ute mè ogwu uga, mè isa lek kan̄ ichim iriaak me lek ogwu nwa, ema ene iba mênenikana ire akpalek ge? ⁶ Sa me ikeya, ema kpeyaka ire ene iba ofifi, ema eyaka inire ene ge kpọi. Eya orọ, inu Awaji ogbaan̄be ibuk, ene geege ikayiyala.” ⁷ Ema enenido ọmọ ibe, “Ìre keke orọ Mosis onyibe Ikan ibe ire ogwu iweek iyayaak ogwu nwa, ige ikpa iyaak-olom inyi, mè ilap isibi?” ⁸ Jisọs ofọfọọk ema ibe, “Îre mije unye-ejit kinyi ke Mosis otele ibe enyi ekejit nwa kinyi. Ire, ìkakup ikeya bene me ibebene. ⁹ Emi ǹkitumu inyi enyi ibe, ene geelek òyayaak ogwu nwa, mè isi ido ofifi enenwaan̄, ene ya îrọn̄ ikan ugan-nwa ikeme ogwu nwa, îtata mè ogwu nwa ya ìnanan̄a me lek kan̄ isi isi ene.” ¹⁰ Ebi udun̄ kan̄ etutumu inyi ọmọ ibe, “Ire ikeya ke îkup me etete olom mè nwa, înwọn ibe ekado nwa, mè ekabat olom.” ¹¹ Jisọs ofọfọọk ema ibe, “Ìkare otutuuk ene ebekọt ibọkọ ijejeen̄ keyi itap, îre ebi Awaji osun̄be inyi gaalek ebekọt ibọkọ itap. ¹² Mije, inu òkirọ inyi ene ikakaan̄ nwa, mè ìyaka ire ikakaan̄ olom, miwa. Usini ene ke eman ikeya, usini ene ke ebilene esan̄a osok, sa usini ene ebak me lek mkpulu eyi emen inyọn̄ ijit ikakaan̄ nwa, mè ìre ikakaan̄ olom. Ene geelek òbokọt ibọkọ ijejeen̄ keyi itap, ibọkọ itap.” ¹³ Ebi ene enenisa asa nsabọn kiban̄ ijet Jisọs ibe itoon̄ ubọk me lek, mè iriaak uriaak inyi. Ire, ebi udun̄ kan̄ ekekigana ikọ inyi ebi ìkisa nsabọn cha inu. ¹⁴ Jisọs otutumu inyi ema ibe, “Ìtele inyi asa nsabọn cha enu me lek n̄a, ikakput ema. Mije, îre ebi ìkup kubọk nsabọn ke mkpulu eyi Awaji okup inyi.” ¹⁵ Itotoon̄ nsabọn cha ubọk me lek isan̄a, mè ije inan̄a me ere ya. ¹⁶ Mgbọ Jisọs onan̄abe me ere ya ikije inyi isi, ogwu enerieen̄ ge onenije inu me lek kan̄, mè ibe ọmọ, “Ogwu Ijejeen̄, ìre kpasi ata inu ke mbarọ, mè ikaan̄ ugwem ikakaan̄ge itata?” ¹⁷ Jisọs ododo ọmọ ibe, “Keke orọ okido emi idodo òfolek ata inu? Îre Awaji gaalek ore ogwu ònwọnwọn. Ire oweek ininin̄ emen ugwem ya, sun̄ Ikan Awaji onyibe.” ¹⁸ Ogwu enerieen̄ ya ododo ọmọ ibe mè ìre Ikan echi owa? Jisọs onenikigo Ikan cha inyi ọmọ ibe, “Kakpan̄ ene, kagan nwa ene, kachiin̄ inọ, kakeke ata-ikọ eyi ataak, ¹⁹ libi nte kwun̄ mè nga kwun̄, mè ma ogwu melek kwun̄ kubọk omabe akpalek kwun̄.” ²⁰ Ogwu enerieen̄ ya otutumu inyi Jisọs ibe ke ọmọ îkisun̄ otutuuk ikan kecha iso, mè ìre îkaan̄ ofifi òsisik ọmọ ikasun̄ge? ²¹ Jisọs onenifọọk ọmọ ibe, “Ire oweek inwọnwọn isan̄a, fo mè si kpulu otutuuk inu okaan̄be nyam, mè sa ikpoko cha che nyi ebi ugbọọn̄, ke owu môkaan̄ inu ubọọn̄ isun̄ iban lek kwun̄ me emen inyọn̄. Osirọ isan̄a gwu kom na nagọọk emi.” ²² Ire, mgbọ gwun̄ enerieen̄ ya onọbe ikọ ya, ejit ofefieek ọmọ enenen, inanan̄a ije ifo, mije, îbọọn̄ ubọọn̄ enenen. ²³ Jisọs onenitumu inyi ebi udun̄ kan̄ ibe, “Me atikọ, ǹkitumu inyi enyi ibe ke îyọt enenen ogwu òbọbọọn̄ ubọọn̄ ininin̄ mkpulu eyi emen inyọn̄. ²⁴ Ǹkitumu si inyi enyi ibe ke aligọ ijeje itibi chieen̄ alaga îfet igak ogwu òbọbọọn̄ ubọọn̄ ininin̄ mkpulu eyi Awaji.” ²⁵ Mgbọ ebi udun̄ kan̄ enọbe ikọ ya, ukpook otetet ema enenen, ema enenido ibe, “Ire ikeya, ìre ekene ke mênyan̄a?” ²⁶ Jisọs okpọkpọ ema sìì, mè inibe ema, “Ire me lek ebilene, inu keyi ìkafet. Ire, me lek Awaji, inu geelek îkup mfufet.” ²⁷ Pita onenido ọmọ ibe, “Mgbọ keyi, eji mîtele otutuuk inu geelek, mè igọọk owu, ìre keke ke eji ebekaan̄ me useen̄?” ²⁸ Jisọs ofọfọọk ema ibe, “Ǹkitumu atikọ inyi enyi ibe, mgbọ inu geelek môkanabe ayaya, mgbọ Gwun̄ Ebilene môkweekbe irek me inyọn̄ udu ubọọn̄ kan̄ me umin mè uja eyi emen inyọn̄, enyi akọp mè ene iba ebi ìkigọọk emi me udun̄, mêkweek si irek me inyọn̄ akọp mè udu ubọọn̄ iba ikisibi oyerebet me ibot akọp mè otoko iba ebi Ijeren. ²⁹ Mgbọ ya, ene geelek ogwu òtetele ogwu ute, mè ìre ogwu uga, mè ìre ebi ngwan̄ kan̄ ebirieen̄, mè ìre ebi ngwan̄ kan̄ ebibaan̄, mè ìre uwu, mè ìre bọn, mè ìre ijọn̄ uko, mije n̄a, ene ya môbọkọ inu cha geelek iwa efit mgbọ igak echi îtelebe, mè ikaan̄ si ugwem ikakaan̄ge itata igbaalek. ³⁰ Ire, owuwa ebi ìrere ebi isi me mgbọ keyi mêkana ire ebi òta, ebi ìrere ebi òta me mgbọ keyi mêkana ire ebi isi.”

¹ Jisọs onenitumu ibe, “Mkpulu eyi Awaji ìkup kubọk ogwu enerieen̄ ge òkiwop uko, mè inan̄a isibi me agan̄ egwe isi igwen ebi ikwaan̄ ibe enesi ikwaan̄ me uko gerep kan̄. ² Mgbọ îgwenbe ife cha, igọgọọk ema itumu ifieek ibe ema esi esi ikwaan̄ me uko gerep kan̄, ke ọmọ môkpe ebibi geelek dinari ge ge, òrere ikpoko ekikpe ogwu ikwaan̄ ge me egwe usen ge. ³ “Mgbọ òfuk-mgbọ osulube onaan̄ge eyi ewelegwe, ogwu enerieen̄ ya ojeje isi oyet ewe, mè isi imun̄ ebi ikwaan̄ ekekebe ikana ere ya ukpọk ubọk. ⁴ Igwegwen ema ibe enesi egọọk esi ikwaan̄ me uko gerep kan̄ si, ke ọmọ môkpe ebibi mkpukpe ògbegbe. ⁵ Ife cha echechieek, mè isi igọọk isi ikwaan̄ me uko ya. Ogwukaan̄ uko ya okpọkpọk inan̄a isibi si mgbọ òfuk-mgbọ osulube akọp mè iba eyi ejit ikarek, mè isibi si mgbọ îsulube ita eyi ikarek, mè igween̄ si ebi ikwaan̄ itap me uko kan̄, mè ichieek si ikpekpe ema mkpukpe ògbegbe. ⁶ Mgbọ òfuk-mgbọ osulube go eyi ikakwun̄, ogwukaan̄ uko ya okpọkpọk inan̄a isibi, mè isi imun̄ si ofifi ebi ikwaan̄ ekekebe ikana ere ya, mè inido ema ibe, ‘Ìre keke orọ enyi ekikeke ikana ukpọk ubọk karake ewelegwe?’ ⁷ “Ife cha efọfọọk ọmọ ibe, ‘Kpunu ene geege ògwegwen eji me ikwaan̄ ma!’ “Inenibe ema si enegọọk esi esi ikwaan̄ me uko gerep kan̄. ⁸ “Me agan̄ ikakwun̄, ogwukaan̄ uko gerep ya otutumu inyi ogwu ibot ikwaan̄ kan̄ ibe, ‘Gwen ebi ikwaan̄ cha titiin̄, mè kpe ema mkpukpe kiban̄, bene me lek ebi ìnunu mgburudun̄ si re lek ebi egwenbe me adasi.’ ⁹ “Ebi ikwaan̄ egwenbe me mgbọ òfuk-mgbọ osulube go eyi ikakwun̄ enunu, ogwu ibot ikwaan̄ ya okpekpe ema dinari ge me ene. ¹⁰ Eya orọ, mgbọ ebi egwenbe me adasi cha enube, ema ekekikeek ibe ke mkpukpe kiban̄ mômin igak eyi ebibilọ ebọkọbe. Ire, ogwu ibot ikwaan̄ ya okpekpe si ema ene ge dinari ge, ubọk îkpebe ebibilọ. ¹¹ Mgbọ ema ebọkọbe ikpoko cha ire ubọk, ema ebebene ikikaan̄ uduk me lek ogwukaan̄ uko ya, ¹² mè itumu inyi ọmọ ibe, ‘Ife chi ebi egwenbe mgburudun̄ esi ikwaan̄ mbubak mgbọ ge gaalek. Ìre keke orọ owu ogbaan̄be ema melek kiji ikpe ikpoko ikike, me ere eji esibe ikwaan̄ bene me karake ewelegwe, ura otataka eji otutuuk mgbọ cha, eji emumun̄ otutuuk ufialek ikwaan̄ ya ibene me ewelegwe ire agan̄ ikakwun̄?’ ¹³ “Ire, ogwukaan̄ uko ya ofọfọọk ene ge me lek kiban̄ ibe, ‘Une, ǹkafeen̄ owu kubọk ge. Mgbọ ngwenbe owu me ikwaan̄, ìre ìkare dinari ge ke owu ochieek ibe emi m̀kpe owu me ikwaan̄ usen ge? ¹⁴ Bọkọ ikpoko ikwaan̄ kwun̄, mè je fo, ke m̀bakpe ogwu ngwenbe me ikwaan̄ mgburudun̄ mkpukpe ìkike melek kwun̄. ¹⁵ Ìre ǹkakaan̄ unye isasa ikpoko n̄a irọ inu geelek òneneme emi? Sa ìre owu òkikaan̄ ejit mba me lek n̄a mije nchilibe ubọk irọ inu?’ ” ¹⁶ Mgbọ Jisọs otobe urọk ya isan̄a, inenitumu inyi ebi udun̄ kan̄ ibe, “Ikeyi ke ìbokup si, ebi mgburudun̄ mêkana ire ebi adasi, ebi adasi mêkana ire ebi mgburudun̄.” ¹⁷ Me oniin̄, mgbọ ema ekije isi Jeruselem, Jisọs ogwegwen ebi udun̄ kan̄ ida ibọkọ, mè itumu inyi ema ibe, ¹⁸ “Ìgban̄ utọn̄, eji ebesi Jeruselem. Me ama ya, mêleke emi Gwun̄ Ebilene ikana itap me ubọk ebi ibot ngwugwa mè ebi ìjeen̄ Ikan. Ife chi mêtip emi oyerebet mkpa, ¹⁹ mè iyaka emi itap me ubọk ebi ekarege ebi Ju, ebi mêsabe emi irọ inu ochak, mè isulu emi me njijan̄, mè igon emi ikpan̄ me inyọn̄ uti nkwurieen̄. Ire, òso egwe ita, mâjomo me mkpa.” ²⁰ Nwa kè Jebidi onenisa bọn kan̄ iba, Jemis mè Jọn, inu me lek kè Jisọs, mè initọbọ ekpe me ijọn̄, mè ikibeek mbeek me ubọk kè Jisọs. ²¹ Jisọs ododo ọmọ ibe, “Ìre keke ke oweek ibe emi ǹrọ ǹnyi owu?” Ogwu enenwaan̄ ya ofọfọọk ọmọ ibe, “Soso, chieek ibe bọn ebirieen̄ iba n̄a chi egọọk owu ekweek irek me mkpulu eyi kwun̄, ene ge me agan̄ ulom kwun̄, ene ge me agan̄ ujit kwun̄.” ²² Jisọs onenibe ema, “Enyi kperiọọn̄ inu enyi ekibeek. Ìre enyi mêkọt inwọ inu ònan̄a me emen ekpen̄ ufieejit eyi emi mbanwọ?” Ema efọfọọk ibe ke ema mêkọt inwọ. ²³ Jisọs onenitumu inyi ema ibe, “Me atikọ, enyi mênwọ inu ònan̄a me emen ekpen̄ ufieejit eyi mbanwọ. Ire, emi ǹkakaan̄ unye igogobo ebi ìbekweek irek me agan̄ ubọk ulom n̄a, mè agan̄ ubọk ujit n̄a, mije, irek cha ìkup inyi ebi Nte n̄a onen̄ebe isun̄ iban.” ²⁴ Mgbọ akọp ebi udun̄ kan̄ kechilọ enọbe inu ya òrọrọ, ema enanaan̄ ejit enenen inyi ngwan̄ iba cha. ²⁵ Jisọs ogwegwen ema ititiin̄, mè ibe ema, “Enyi mîriọọn̄ ibe ke ebi ìkikpulu ido ebi ekarege ebi Ju ekisa me unye ubọk ikikpulu ebi ìkup me irak kiban̄. Ebi ilile me ido cha si ekitọ eyi òneme ema inyi ebi ema ekikpulu. ²⁶ Ire, ìkabore ikeya me etete kinyi. Ire ikaan̄ ogwu iweek irere ogwu ibot me etete kinyi, ene ya môkana ire ogwu òkisi ikwaan̄ inyi enyi. ²⁷ Ogwu geelek òweweek irere adasi me etete kinyi, ene ya môkana ogwu usun̄ inyi enyi, ²⁸ kubọk Gwun̄ Ebilene onube, ìkanu ibe ebi ene enesi ikwaan̄ enyi ọmọ. Ire, ìnu inenisi ikwaan̄ inyi ebi ene, mè isa ugwem kan̄ igwa ngwugwa me ibot owuwa ene.” ²⁹ Mgbọ Jisọs mè ebi udun̄ kan̄ ekinan̄a me Jeriko ije isibi, ogbogbo ebi ene egbugbuku ikigọọk ọmọ me udun̄. ³⁰ Îkaan̄ ebi ǹnàan̄ iba ìkukup me agba oniin̄ ya. Mgbọ ife chi enọbe ibe ke Jisọs mônije iraka me oniin̄ ya, ema ebebene ikitaan̄ ukpo igwen ọmọ ibe, “Okaan̄-ene, Gwun̄ kè Debit, soso rọ eji nsan.” ³¹ Ogbogbo ebi ene cha ekekirama ema ibe, “Ìchit otu kinyi me ere ya.” Ire, ema erọriọọn̄ ikibọn̄ ukpo ibene ida ikibe ọmọ, “Okaan̄-ene, Gwun̄ kè Debit, soso rọ eji nsan ma.” ³² Jisọs oyayaka ikeke, mè igwen ema ibe enu, mè inido ema ibe, “Ìre keke ke enyi ekiweek ibe emi ǹrọ ǹnyi enyi?” ³³ Ema ebebe ọmọ, “Okaan̄-ene, eji ekiweek ibe owu òrọ inyi eji emọọn̄ inu.” ³⁴ Jisọs ototo ema nsan, mè itoon̄ ubọk me chieen̄ kiban̄. Mgbọ yaage, ema emọmọọn̄ inu, mè ibene ikije igọọk Jisọs.

¹ Mgbọ ema enan̄abe me Jeriko ikije isi Jeruselem, ema enenije ire gwun̄ ama ge ekigwen Betifegi, òkup me inyọn̄ ogoon̄ Olifu, Jisọs oraria ene iba me lek ebi udun̄ kan̄ ibe, ² “Ìje ìsi gwun̄ ama yilọ òkup me isi kinyi, ke enyi mêmun̄ inyinya akpan ge etobobe me lek uti, mè ogwu gwun̄ me agba lek. Ìtọn̄ọ ema ìsa ìjet emi. ³ Ire ikaan̄ ogwu isan̄a amọn me lek anam cha, ìtumu ìnyi ibe ke Okaan̄-ene oweek, ke ene ya môtele inyi enyi esa eje mgbọ yaage.” ⁴ Inu yi îrọ iso ikọ Awaji otumube inan̄a me otu ogwu nriran ge ibe, ⁵ “Tumu nyi ama Sayọn ibe, ‘Ìkpọ, ogwu ubọọn̄ kinyi òkinu me lek kinyi. Îsiki lek kan̄, mè ikilibi me inyọn̄ inyinya akpan inu, me inyọn̄ gwun̄ inyinya akpan ke îkilibi inu!’ ” ⁶ Ebi udun̄ kan̄ cha esisi, mè irọ ubọk îtemebe ema, ⁷ mè isa inyinya akpan ya melek ogwu gwun̄ inu, mè isan̄a ọfọnti kiban̄ iwele me inyọn̄ anam cha, Jisọs onenene inyọn̄ kiban̄ ikweek. ⁸ Owuwa ene esasan̄a si ọfọnti kiban̄ iwele me ijọn̄ me oniin̄, usini ene ekekep nlak mè inwan̄ me lek ito me oniin̄. ⁹ Urum ene ebi ìkije me isi mè ebi ìkije me udun̄ ekekibọn̄ okooko ibe, “Osana! Itọn̄ ikup inyi Gwun̄ kè Debit! Ugbana ikup inyi ogwu ònunu me erieen̄ Okumugwem! Itọn̄ ikup inyi Awaji me emen inyọn̄, ere òbebene ichit!” ¹⁰ Jisọs ininin̄ Jeruselem, ama ofafan̄a kep. Ebi ene ebebene ikidido ibe, “Ìre ekene ore ogwa òkinu?” ¹¹ Ebi urum ene cha ekekifọọk ibe ke ìre Jisọs, ogwu nriran ònan̄a me Najeret me agan̄ Galili. ¹² Jisọs ojeje inin̄ emen Uwu Mbuban, mè ilap otutuuk ebi ìkinyam ewe mè ebi ìkilep inu me emen uwu ya isibi, mè ida ikasi ebi ìkinwene ikpoko mè ogboon̄ ebi ìkinyam ekerekwukwu me emen uwu ya ikana ichit, ¹³ mè ikitumu inyi ema ibe, “Ege me Ikpa Mbuban ibe ke Awaji ibe, ‘Mêkigwen uwu n̄a uwu uriaak.’ Ire, enyi eyaka ikisa uwu ya irọ ere ebi inọ ekinu inilet lek.” ¹⁴ Ebi ǹnàan̄ mè ebi akọọk enunu si me lek kan̄ me Uwu Mbuban ya, igwagwa ema. ¹⁵ Ire, mgbọ ebi ibot ngwugwa mè ebi ìjeen̄ Ikan emun̄be inu ukechieen̄ cha Jisọs orọbe, mè inọ si ike nsabọn ekibọn̄ okooko me Uwu Mbuban ya isa ikitọn̄ ọmọ ibe, “Itọn̄ ikup inyi Gwun̄ kè Debit!”, ema enanaan̄ ejit enenen, ¹⁶ mè inu inido ọmọ ibe, “Ìre onọ inu nsabọn chi ekitumu?” Jisọs ofọfọọk ema ibe, “Iin̄, nnọ. Ìre enyi kperarak ifuk inu egebe ibak Awaji me Ikpa Mbuban, ibe, ‘Ojot ojot itọn̄ înan̄a me otu nsabọn, mè otu asa nsabọn ebi ìkinwọ ebe igọọk owu’?” ¹⁷ Jisọs onanan̄a isibi itele ema, mè ije isi Betani, ere îlaakbe iwele egwe. ¹⁸ Me ewelegwe, mgbọ Jisọs mè ebi udun̄ kan̄ enan̄abe me Betani igwu ikom ikije isi Jeruselem, uraafiọọn̄ onenitaka ọmọ. ¹⁹ Ibebene chieen̄ imun̄ uti figi ge inwan̄ ojotbe lek me agba oniin̄ ya, mè ije isi lek. Ire, ìkamun̄ mfut geege me inyọn̄. Ifefieek otu inyi uti figi ya ibe, “Bene mè chereyi, kayaka ìkpọk ìto mfut ofifi.” Mgbọ yaage, uti figi ya ochachiaak isan̄a. ²⁰ Inu ya okeke ebi udun̄ kan̄ chieen̄ enenen. Ema ekekido ibe, “Ìre uti figi ya ìjeje igwat lek ichiaak isan̄a ikeya?” ²¹ Jisọs ofọfọọk ema ibe, “Ǹkitumu atikọ inyi enyi ibe, ire enyi ikaan̄ ichechieek, mè kpekaan̄ ejit iba, ìkare inu enyi emun̄be òrọrọ me lek uti figi yi gaalek ke enyi ebekọt irọ. Enyi mêkọt itumu si inyi ogoon̄ yi ibe, ‘Jibi nan̄a me ere yi, mè si rọn̄ me okwaan̄,’ mè òkup si ikeya. ²² Ire enyi ikaan̄ ichechieek, enyi mêbọkọ inu geelek enyi ebeekbe me uriaak.” ²³ Mgbọ Jisọs ojebe isi inin̄ Uwu Mbuban, mè ikijeen̄ inu, ebi ibot ngwugwa, mè ebi ugane ama enunu me lek kan̄, mè inido ọmọ ibe, “Tumu-nu, ìre kpasi unye ke okisa irọ otutuuk inu chi? Ìre ekene onyi owu unye yi?” ²⁴ Jisọs ofọfọọk ema ibe, “Emi nkaan̄ si idodo ge mbado enyi. Ire enyi ifọọk idodo n̄a, mâtumu unye nkisa irọ otutuuk inu chi ijeen̄ enyi. ²⁵ Ìre unye eyi Jọn okisa igwook ene mun̄ ìnan̄a me owa? Ìre ìnan̄a me ubọk Awaji? Sa ìre ìnan̄a me ubọk ebilene?” Ema eninin̄ oru me lek kiban̄, mè ibe, “Ire eji ifọọk ibe ke ìnan̄a me ubọk Awaji, môdo eji ibe ìre keke orọ eji kpechieek ikọ kè Jọn. ²⁶ Ire eji ifọọk ibe ke ìnan̄a me ubọk ebilene, eya ìkpotat, bak me lek ufieek-owot eji ekaan̄be me lek ebilene. Mije, otutuuk ene mîchieek ibe ke Jọn ìre ogwu nriran.” ²⁷ Eya orọ, ema efọfọọk Jisọs ibe ke ema kperiọọn̄. Jisọs ofọfọọk ema ibe, “Emi si m̀kpatumu ere unye nkisa irọ otutuuk inu chi onan̄abe inyi enyi.” ²⁸ Jisọs onenido ema ibe, “Ìre keke ke enyi ekeek òfolek inu keyi?”, mè inito urọk ge inyi ema ibe, “Ogwu enerieen̄ ge okaan̄ ibot bọn ebirieen̄ iba, mè initumu inyi ogwu adasi ibe, ‘Si rọ ikwaan̄ me uko gerep chereyi nyi emi!’ ²⁹ “Gwun̄ ya ofọfọọk ogwu ute ibe ke ọmọ ìkposi. Ire, me mgburudun̄ mgbọ, inwenwene ejit, mè isi irọ ikwaan̄ ya. ³⁰ “Ogwu ute ya onenisi lek gwun̄ kan̄ ogwu òso iba, mè itumu si ikọ yaage inyi. “Gwun̄ ya ochechieek ibe iin̄ ke ọmọ môsi. Ire, ìkasi.” ³¹ Jisọs onenido ebi ife cha ibe, “Me etete bọn ebirieen̄ iba cha, ìre ogwu owa orọ inu nte kiban̄ oweekbe?” Ema efọfọọk ibe ke ìre ogwu adasi. Jisọs onenibe ema, “Me atikọ, ǹkitumu inyi enyi ibe ke ebi ìkibọkọ otitip ido mè ebi òje oyet mêkidasi inin̄ mkpulu eyi Awaji me isi kinyi. ³² Mije, Jọn ògwook mun̄ înu ibonijeen̄ enyi oniin̄ ike enyi ebesa ikana ebi ata irọrọ me isi Awaji, enyi kpechieek ikọ kan̄. Ire, ebi ìkibọkọ otitip ido mè ebi òje oyet mîchieek ikọ kan̄. Enyi esasa chieen̄ kinyi ikimun̄ ubọk ebi ijo chi ekigwu ikom, mè ikpọkpọ itet si ejit kinyi inye, mè ijit inwenwene ejit, mè ichieek ikọ kè Jọn.” ³³ Jisọs onenibe ema “Ìgban̄ ofifi urọk. Îkaan̄ ogwu enerieen̄ ge òkakaan̄ ijọn̄ uko, mè iwop gerep, mè inama ọgọ ikana uko ya, mè irọkọ udọn̄ ere ebekichimi mun̄ isibi me lek mfut gerep cha, mè inama uwu-oket ere ebekikup ibem uko ya, mè inisa uko ya inyi ebi ikwaan̄ uko ibe ekekpọ chieen̄ me lek, mè inan̄a isi ije me ofifi ido. ³⁴ Me mgbọ irọrọkọ inu me uko okembe, ogwukaan̄ uko ya oneniria ebi usun̄ kan̄ isi lek ebi ikwaan̄ uko cha ibe esi ebọkọ uche mfut eyi kan̄ ejet ọmọ. ³⁵ “Ebi ikwaan̄ uko cha etetet ebi usun̄ cha, mè isut ene ge me lek kiban̄, mè ikpan̄ ogwu òso iba, mè isa ewuuk itọbọ ogwu òso ita. ³⁶ Ogwukaan̄ uko ya okpọkpọk iria ebi usun̄ ìwawa igak ebi îriabe me adasi mgbọ ibe esi ebọkọ uche mfut eyi kan̄ ejet ọmọ. Ife cha erọrọ si ebi usun̄ kechi ike erọbe ebi adasi. ³⁷ Me mgburudun̄ kan̄, ogwukaan̄ uko ya oraria gwun̄ kan̄ ibe isi lek ife cha, mè ikeek ibe ke ife cha mêlibi gwun̄ kan̄. ³⁸ “Ire, mgbọ ebi ikwaan̄ uko cha emun̄be gwun̄ ogwukaan̄ uko ya okinu, ema etọtọt ibe, ‘Kpọ gwun̄ ogwukaan̄ uko ire eyi, eji enetet ekpan̄, inyi irot ìbokaan̄ ikana ire eyi kiji.’ ³⁹ Mgbọ gwun̄ ya onube, ema etetet, mè itaba isibi me emen uko gerep ya, mè ikpan̄.” ⁴⁰ Jisọs onenido ebi ìkigban̄ urọk ya ibe, “Mgbọ ogwukaan̄ uko gerep ya isinu, ìre keke ke ìborọ ebi ikwaan̄ uko cha?” ⁴¹ Ife cha efọfọọk ibe ke ìbokpakpan̄ otutuuk ijo ebi ikwaan̄ uko cha isan̄a, mè isa uko kan̄ inyi ofifi ebi ikwaan̄ uko, ebi ìbekinyi ọmọ uche mfut eyi kan̄ mgbọ geelek erọkọbe mfut me uko. ⁴² Jisọs onenido ema ibe, “Ìre enyi kpefuk inu egebe me Ikpa Mbuban ibe, ‘Ewuuk ebi ìnama uwu ejitbe, ọmọ oyaka inikana ata ibot uwu. Eyi ìre inu Okumugwem orọbe, inu yi îjaan̄ enenen me chieen̄ kiji.’ ⁴³ “Eya orọ, ǹkitumu inyi enyi ibe ke mêbọkọ mkpulu eyi Awaji isan̄a me ubọk kinyi, mè isa inyi ebi ìbesa mfut ògbegbe inu. [ ⁴⁴ Ene geelek ònanan̄a irọn̄ me inyọn̄ ewuuk yi môkpọk isan. Ene geelek ewuuk yi orọn̄be ikeme ìbokpukpukpuku si.”] ⁴⁵ Mgbọ ebi ibot ngwugwa mè ebi Farisi cha enọbe urọk cha Jisọs otobe, ema erọriọọn̄ ibe ke ìre ema ke îkitumu ikọ ya ibak. ⁴⁶ Eya orọ, ema enenikiweek ubọk ebesa itet ọmọ. Ire, ukpook ebi ene ìkachieek, mije, otutuuk ene emọnọ Jisọs kubọk ogwu nriran.

¹ Jisọs onenitumu si ikọ inyi ebi ene me urọk, ² mè ibe, “Mkpulu eyi Awaji ìkup kubọk ogwu ubọọn̄ òtoto ijọk ido-nwa inyi gwun̄ kan̄ enerieen̄. ³ Mgbọ ijọk ya obobene, ogwu ubọọn̄ ya oneniria ebi usun̄ kan̄ ibe esi elook otutuuk ebi egwenbe cha ibe enu, ke ijọk mônibene. Ire, ife cha ejijit inunu. ⁴ “Ogwu ubọọn̄ ya okpọkpọk iria owuwa ebi usun̄ kan̄ ibe esi elook otutuuk ebi egwenbe cha ibe mè enu ke ọmọ îtem inorie ijọk isan̄a; ke ọmọ îkpan̄ owuwa uman erie mbuuk egwookbe inyi imiin̄ ufuk, mè ikpan̄ si owuwa orie erie mbuuk igbaalek; ke mîneen̄ inu geelek isun̄ isan̄a iban ebibi, mè ebibi enu enegọọk ọmọ erie ijọk ido-nwa gwun̄ kan̄. ⁵ “Ire, ife cha kpesa igwen ogwu ubọọn̄ ya isun̄ inu geege. Ogwu ikup, oje òsi uyọrọlek kan̄. Ene ge osi uko kan̄, ofifi ene ojeje isi inu òbek ọmọ. ⁶ Ebibilọ esasa me ejit ikpak itet ebi usun̄ ogwu ubọọn̄ ya isut ikpan̄. ⁷ Mgbọ ogwu ubọọn̄ ya onọbe inu ife cha erọbe, inanaan̄ ejit enenen, mè iria ebi akọn̄ kan̄ ibe esi ekpan̄ otutuuk ebi ìkpakpan̄ ebi usun̄ kan̄ cha, mè etap ukan̄ ewọp ama kiban̄. ⁸ “Ogwu ubọọn̄ ya onenikpọk igwen ebi usun̄ kan̄ itumu inyi ibe, ‘Mînen̄e otutuuk inorie ijọk ido-nwa ya isun̄ isan̄a, ire ke ebi egwenbe cha kpegbe ibọbọkọ umin enyibe ema. ⁹ Eya orọ, ìje ìsibi otutuuk lek oniin̄ geelek, mè ìgwen ebi geelek enyi emun̄be ibe enerie inorie ijọk ido-nwa ya.’ ¹⁰ Ikeya si, ebi usun̄ cha enanan̄a isibi, mè ije inin̄ otutuuk lek oniin̄, mè igween̄ ene geelek ema emun̄be, ebi ata mè ebi ijo. Uwu ijọk ya ojojot dum dum. ¹¹ “Ire, mgbọ ogwu ubọọn̄ ya onin̄be uwu ya ibonikpọ ebi ichen cha, imumun̄ ogwu enerieen̄ ge ikatapge ọfọnti ido-nwa ogọọkbe ikweek irek me emen uwu ya, ¹² mè ibe ọmọ, ‘Une, òjeje inin̄ uwu yi me okatapge ọfọnti ido-nwa?’ Ogwu enerieen̄ ya ìkakọt ìsan̄a amọn. ¹³ “Ogwu ubọọn̄ ya onyinyi ida ibe ebi usun̄ kan̄ etet ogwu enerieen̄ ya ebọp ukot mè ubọk, mè etọp eto me oyet me emen udun, mè ikup me ere ya ikito ito, mè ikitaka ejeek. ¹⁴ “Mije ebi egwenbe mîwa, ire, ene inen mè inen gaalek ke egobo.” ¹⁵ Ebi Farisi enenititiin̄, mè itọt ubọk ebesa ileke Jisọs ikọ me otu, mè esa me ikeya etet ọmọ. ¹⁶ Ema eneniria ebi udun̄ kiban̄ melek ebi ìkigọọk Erọdu isi lek kan̄. Ebi melek kiban̄ chi esisi, mè ido Jisọs ibe, “Ogwu Ijejeen̄, eji mîriọọn̄ ibe ke owu ìre ogwu òkitumu atikọ, mè ikijeen̄ si oniin̄ eyi Awaji ike îgbebe. Òkakilibi ene chieen̄, mije, òkakikpọ ene geege chieen̄ me isi. ¹⁷ Tumu-nu nkeek kwun̄ òfolek ikọ keyi nyi eji. Ìre îgbe ibe eketip otitip ido enyi ogwu Sisa (òrere ogwu ibot mkpulu ebi Rom), sa ìre ìkagbe?” ¹⁸ Jisọs orọriọọn̄ ijo otitọt kiban̄, mè ibe ema, “Enyi ebi isi iba kechi! Ìre keke orọ enyi ekiweek ileleke emi ikọ me otu ikeyi? ¹⁹ Ìjeen̄ emi nu ikpoko enyi ekisa itip otitip ido ya.” Ema esasa dinari ge ijet ọmọ. ²⁰ Idodo ema ibe, “Ìre ogugo kè ekene mè erieen̄ kè ekene ire echi me lek ikpoko yi?” ²¹ Ema efọfọọk ibe ke ìre eyi ogwu Sisa. Jisọs ofọfọọk ema ibe, “Ìsa inu ogwu Sisa ìnyi ogwu Sisa, mè ìsa eyi Awaji ìnyi Awaji.” ²² Ifọọk ya okeke ema chieen̄. Ema etetele ọmọ, mè ije inan̄a. ²³ Me usen yaage, ebi Sadusi ebi ìkijeen̄ ibe ke kpunu ijojomo me mkpa, enenisa idodo ge inu me lek kè Jisọs, ²⁴ mè inibe ọmọ, “Ogwu Ijejeen̄, Mosis ìtumu inyi eji ibe ire ene ikwu itele ogwu nwa, ìkabon gwun̄, mè ogwu ngwan̄ imọnọ nwakpa ngwan̄ kan̄ okwube itele ya ido, mè ibon bọn me owot inyi ngwan̄ kan̄ ogwu òkwukwu. ²⁵ Me ere ngwan̄ ebirieen̄ jaaba ekupbe, ogwu adasi me etete kiban̄ ododo nwa, ìkabon gwun̄. Ikwukwu itele nwa kan̄ ya inyi ogwu ngwan̄. ²⁶ Ogwu òso iba omọmọnọ ogwu enenwaan̄ ya ido, mè ikwu itele si, ìkabon gwun̄. Ikeya ke ema otutuuk ene ere nlom ogwu enenwaan̄ ya iso ire lek ogwu òso jaaba, mè ikwaan̄ itele, kpebon bọn. ²⁷ Me mgburudun̄ kan̄, ogwu enenwaan̄ ya okwukwu. ²⁸ Tumu-nu, me mgbọ ebi ìkwukwu mêjomobe me mkpa, ìre ogwu enenwaan̄ ya ìbore nwa inyi ekene me etete ebi ngwan̄ jaaba cha, mije, ema otutuuk ene mîkaan̄ ọmọ me lek nwa iso?” ²⁹ Jisọs ofọfọọk ema ibe, “Enyi mîje ilọ, mije, enyi kperiọọn̄ inu egebe me Ikpa Mbuban, enyi kperiọọn̄ si unye Awaji. ³⁰ Me mgbọ ijojomo me mkpa, ebi ene kpebedo nwa, kpebesa ene iche olom si, ebekup kubọk ebi osat ìkup me emen inyọn̄. ³¹ Ire me lek ikọ ijojomo me mkpa, ìre enyi kpefufuk inu Awaji otumube me emen Ikpa Mbuban inyi enyi ibe, ³² ‘Emi ìre Awaji kè Ebereham, mè Awaji kè Ajiki, mè Awaji kè Jekọp’? Awaji ìkare Awaji ebi ìkwukwu. Îre Awaji ebi ìkup me ugwem.” ³³ Mgbọ ebi urum ene cha enọbe ikọ ya, ijejeen̄ kè Jisọs okeke ema chieen̄ enenen. ³⁴ Mgbọ ebi Farisi enọbe ibe ke Jisọs îtumu ikọ ichit ebi Sadusi otu, ema enenititiin̄. ³⁵ Ogwu òjeen̄ Ikan ge me etete kiban̄ onenido Jisọs ikọ ge isasa itọ ọmọ ikpọ, ³⁶ mè ibe ọmọ, “Ogwu Ijejeen̄, ìre ikan eyi owa omin ichit me etete otutuuk Ikan kè Mosis?” ³⁷ Jisọs ofọfọọk ọmọ ibe, “Îre Ikan eyi òbe, ‘Ma Okumugwem Awaji kwun̄ me otutuuk ejit kwun̄ mè otutuuk ibot ejit kwun̄, mè otutuuk ekiket kwun̄.’ ³⁸ Eyiyi ore adasi Ikan, mè ire si eyi òmimin ichit. ³⁹ Ikan eyi òmimin igọọk eya, mè ikup si kubọk keya ìre eyi òbe, ‘Ma ogwu melek kwun̄ kubọk omabe akpalek kwun̄.’ ⁴⁰ Îre me lek Ikan iba kechi ke otutuuk Ikan kè Mosis, mè otutuuk ijejeen̄ ebi nriran ejeen̄be obieen̄.” ⁴¹ Ike ebi Farisi etitiin̄be me ere ya, Jisọs osasa me irek keya ido ema ibe, ⁴² “Ìre enyi ekikeek keke òfolek ogwu Awaji otoon̄be ubọk me ibot? Ìre gwun̄ kè ekene ke ìre?” Ema efọfọọk ibe ke ìre gwun̄ kè Debit. ⁴³ Ikpọkpọk ido ema ibe, “Ire ikeya, ìre Debit ìjeje igwen ene ya Okaan̄-ene mgbọ îbenbe nriran inan̄a me unye Ekwukwu Mbuban ibe, ⁴⁴ ‘Okumugwem ìtumu inyi Okaan̄ n̄a ibe, “Siki kweek irek me agan̄ ubọk ulom n̄a mege ire mgbọ mârọbe mè ebi ochicha kwun̄ ekana inu ibene ukot enyi owu.” ’ ⁴⁵ Ire Debit igwen ene ya Okaan̄-ene, ìre ene ya ìbojeje iyaka inire gwun̄ ikike inyi Debit?” ⁴⁶ Kpunu ene geege me lek kiban̄ òkọkọt ifọọk ọmọ otu. Bene me usen ya nyi isi, kpunu ene geege òyayaka ikọt isan̄a mgbugba me lek ido ọmọ ikọ ofifi.

¹ Jisọs onenitumu inyi ebi urum ene cha mè ebi udun̄ kan̄ ibe, ² “Ebi Farisi mè ebi ìjeen̄ Ikan ere ebi ìkakaan̄ unye ikpakpa Ikan kè Mosis iwele ijeen̄ ebi ene. ³ Eya orọ, enyi ìkigban̄ utọn̄ inyi ema, mè ìkirọ otutuuk inu geelek ema ekitumu inyi enyi. Ire, ikalululuk ìrọ inu ema ekirọ, mije, ema kpekirọ inu ema ekijeen̄. ⁴ Ema ekitap ulobo akpan iben ikeme ene me ibot. Ire, ema me lek kiban̄ kpekiweweek ichachak ubọk me lek akpan ya igọọk ibeme. ⁵ “Inu geelek ema ekirọ, ekirọ inyi ebilene emun̄ ema. Ọkpọk egebe ikọ Awaji itap me emen, mè ikisa fanti itobo ikam me inyọn̄ isi melek ubọk me mgbọ ekiriaak uriaak, eyi otutuuk ene ìkire sọntiik. Ire, eyi kiban̄, ikpele ile. Mgbidim olik òkididen̄ me utọn̄ ekwut ekisa ichit lek iriaak uriaak, eyi kiban̄ ujọn̄ọ ile. ⁶ Ema ekima ikwekweek me irek umin me ere geelek ekirie ijọk, mè ikwekweek me inyọn̄ ikasi esun̄be inyi ebi ibot me uwu ntitiin̄. ⁷ Ema ekinwọọn̄ si ibe ebi ene eketọp ema ata amọn me emen ewe ere ebi ene ewabe, mè ikima ibe ekegwen ema ‘Ebi Ijejeen̄.’ ⁸ “Ire, ikachieek ibe ekegwen enyi ‘Ebi Ijejeen̄,’ mije, Ogwu Ijejeen̄ ge gaalek ke enyi ekaan̄, melek si, enyi otutuuk ene ìre ngwan̄ ngwan̄. ⁹ Ikagwen ene geege me linyọn̄ keyi ‘Ute,’ mije, Ute ge gaalek ke enyi ekaan̄ òrere ogwu òkup me emen inyọn̄. ¹⁰ Ikachieek si ibe egwen enyi ‘Ogwu Ibot,’ mije, Ogwu Ibot ge gaalek ke enyi ekaan̄, òrere ogwu Awaji otoon̄be ubọk me ibot. ¹¹ Ogwu òmimin ichit me etete kinyi môre ogwu òkisi ikwaan̄ inyi enyi. ¹² Mije, ogwu ikibene lek, mêsiki. Ogwu isiki lek kan̄ me ijọn̄, mêbene ifo inyọn̄.” ¹³ Jisọs onenibene ikigana ere inyi ema ibe, “Môfieek inyi enyi ebi ìjeen̄ Ikan, mè ebi Farisi, enyi ebi isi iba kechi! Enyi ekigwuk isotu mkpulu eyi Awaji ikwek ebi ìbeninin̄. Enyi me lek kinyi, ninin̄, enyi kpeweek ininin̄. Yaka tetele inyi ebi ìweweek ininin̄ enin̄, enyi kpechieek. [ ¹⁴ Môfieek inyi enyi, ebi ìjeen̄ Ikan mè ebi Farisi, enyi ebi isi iba kechi! Enyi ekifeen̄ ebi nwakpa ibọkọ uwu kiban̄, mè ikinwọọn̄ irariaak ujọn̄ọ uriaak isa ikibene lek kinyi me isi ebilene. Eya orọ, osusut kinyi mônye enenen.] ¹⁵ “Môfieek inyi enyi ebi ìjeen̄ Ikan, mè ebi Farisi, enyi ebi isi iba kechi! Enyi ekije inan̄a me ama ge isi ire ofifi ama, mè ikisaba owuwa okwaan̄, mè ikikwukwulu ikiweek ibot ejit ge òbogwu ikom igọọk enyi. Enyi isikọt ikaan̄ ene ge, enyi mîra irọ inyi ene ya iyaka ifieek igak enyi mgbọ iba, mè ikana ire ogwu ama yọk igak ike enyi erebe. ¹⁶ “Môfieek inyi enyi ebi ǹnàan̄ ìkisa ene ijeen̄ oniin̄. Enyi ekitumu ibe, ire ene isa Uwu Mbuban inyan̄a ibot, ke inyan̄a-ibot keya ìkakup melek inu geege. Ire, ire ene isa alata araran̄ òkup me Uwu Mbuban inyan̄a ibot, ke inyan̄a-ibot keya ore eyi ònyenye. ¹⁷ Enyi burubut ebi ǹnàan̄ kechi! Alata araran̄ melek Uwu Mbuban eyi òrọrọ inyi alata araran̄ ya ikup mbuban, ìre eyi owa omin igak? ¹⁸ Enyi ekijeen̄ si ibe ire ene isa ntook ngwugwa Awaji inyan̄a ibot, ke inyan̄a-ibot keya ìkakup me lek inu geege. Ire, ire ene isa inu òkup me inyọn̄ ntook ya eyi ebesa igwa ngwugwa inyan̄a ibot, ke inyan̄a-ibot keya onye. ¹⁹ Enyi ebi ǹnàan̄ kechi! Ǹdo-nu enyi, inu ebesa igwa ngwugwa melek ntook eyi òrọrọ inyi inu ngwugwa ya ikup mbuban, ìre eyi owa omin igak? ²⁰ Ene geelek òsasa ntook ngwugwa inyan̄a ibot, ìsa ntook ya melek otutuuk inu ngwugwa òkup me inyọn̄ ntook ya inyan̄a ibot. ²¹ Ikeya si, ene geelek òsasa Uwu Mbuban inyan̄a ibot ìsa Uwu Mbuban ya melek Awaji ogwu òluk me emen Uwu Mbuban ya inyan̄a ibot. ²² Ene geelek òsasa emen inyọn̄ inyan̄a ibot ìsa udu ubọọn̄ Awaji melek Awaji ogwu òkweek me inyọn̄ udu ubọọn̄ ya inyan̄a ibot. ²³ “Môfieek inyi enyi ebi ìjeen̄ Ikan mè ebi Farisi, enyi ebi isi iba kechi! Enyi ekichieek mkpa ikinyi irek ge me etete akọp irek me ibot asabọn inwan̄ uti ekisa irọ inyi inorie itop, kubọk echi ekigwen mînt mè dîn mè kumìn, ire, mè ikikpọ chieen̄ ilọ me lek ikpele inu òkukup me uyọt me emen Ikan kinyi, kubọk irọrọ atikọ, mè ikakaan̄ ejit nsan, mè igbegbe utoon̄-ejit. Kpan̄asi ikeya, echi ilile cha òkukup me uyọt ke enyi mekikpọ chieen̄ me lek, mè ikikeek si echilọ cha echi ikamage lek ìkup me uyọt. ²⁴ Enyi ebi ǹnàan̄ ìkisa ene ijeen̄ oniin̄! Enyi ekiruk atat isan̄a me emen miin̄, mè ikimeen̄ erie mbuuk me emen miin̄ ya. ²⁵ “Môfieek inyi enyi ebi ìjeen̄ Ikan mè ebi Farisi, enyi ebi isi iba! Enyi ekigwọk udun̄ ekpen̄ kinyi mè alala kinyi. Ire, emen cha, ejit ile mè inu enyi ebọkọbe ene me unye ojot. ²⁶ Owu ogwu Farisi, ogwu ǹnàan̄, dasi gwọk emen ekpen̄ kwun̄ mè alala kwun̄, ke udun̄ cha môtana si. ²⁷ “Môfieek inyi enyi ebi ìjeen̄ Ikan mè ebi Farisi, ebi isi iba! Enyi ekup kubọk udọn̄ ufuun̄ ekenbe agba okuket me ntut oyet, inyi ijaan̄. Ire, ukwuuk nkwukwu ene mè njijọ inu ojot emen. ²⁸ Ikeya si, me akpalek kinyi, enyi ekup me chieen̄ ene kubọk ebi ata irọrọ. Ire, me emen kinyi, ugwem isi iba mè inu ikpak geelek ìjojot. ²⁹ “Môfieek inyi enyi ebi ìjeen̄ Ikan mè ebi Farisi, ebi isi iba kechi! Enyi ekiwat ujuja ewuuk me inyọn̄ udọn̄ ufuun̄ ebi nriran, mè ikibala udọn̄ ufuun̄ ebi ata irọrọ, ³⁰ mè ikitumu ibe ke more enyi ekup me ukot ebi nte nte kinyi cha, ke enyi kpemegọọk ema ifiin̄ eje ebi nriran. ³¹ Sa me ikeya, enyi mîkeke ata-ikọ ikeme lek kinyi ibe ke enyi ìre bọn bọn ebi ìkpan̄ ebi nriran me afa. ³² Ire ikeya, ebi nriran ebi nte nte kinyi ekpan̄be isik cha, enyi me lek kinyi ìkpan̄ ìsan̄a-ma! ³³ “Enyi ulu kechi! Enyi bọn ijo ulu kechi! Ìre enyi ebejeje inwọnọ itip-oyerebet eyi môsabe enyi itap me ama yọk? ³⁴ Eya orọ, emi mâria ebi nriran, mè ebi ìriọọn̄ inu, mè ebi ijejeen̄ ijet enyi. Ire, enyi mêkpan̄ usini kiban̄, mè igon usini me inyọn̄ uti nkwurieen̄, mè itet usini isut me emen uwu ntitiin̄ kinyi, mè ikilibi ikana me ama me ama ikiweek itetet ema. ³⁵ Sa me ikeya, eje otutuuk ebi ata irọrọ ekpan̄be me linyọn̄ môtoon̄ enyi me ibot, bene me lek eje kè Eben ogwu ikarọge ijo inu geege si re lek eje kè Jekaraya gwun̄ kè Berekaya ogwu enyi etetbe ikpan̄ me etete ere mbuban melek ntook ngwugwa me emen Uwu Mbuban. ³⁶ Me atikọ, ǹkitumu inyi enyi ibe ke osusut otutuuk ijo irọrọ chi ìbotoon̄ enyi ebi mgbọ kechi me ibot.” ³⁷ Jisọs onenibọn̄ ukpo ibe, “Jei, ebi Jeruselem, Jeruselem, enyi ebi ìkikpan̄ ebi nriran, mè ikisa ewuuk itọọn̄ ebi osat geelek Awaji oriabe ijet enyi! Owuwa mgbọ, emi nkisa iweek ichachiaan̄ ebi kinyi igba lek n̄a, inyi ǹchit enyi kubọk uman unọn okichit ebi bọn me irak uwop kan̄, ire, enyi kpechieek. ³⁸ Enyi ebi Jeruselem, ìkpọ, mêtele Uwu Mbuban kinyi inyi enyi ukpọk emen. ³⁹ Ǹkitumu inyi enyi ibe ke enyi kpebeyaka imun̄ emi ofifi mege ire mgbọ enyi mêtumube ibe, ‘Ugbana ikup inyi ogwu ònunu me erieen̄ Okumugwem.’ ”

¹ Mgbọ Jisọs okije inan̄a me Uwu Mbuban ya isibi, ebi udun̄ kan̄ enunu me lek kan̄, mè ikitọn̄ ubọk uwu cha ojaan̄be. ² Jisọs onenibe ema, “Enyi mîmun̄ uwu chi? Me atikọ, ǹkitumu inyi enyi ibe ke mêgbugbọ otutuuk ewuuk chi geelek igwook me ijọn̄, kpunu ewuuk geege òboyaka itoon̄ me inyọn̄ ge.” ³ Mgbọ Jisọs orebe inyọn̄ ogoon̄ Olifu, mè isiki ikweek, ebi udun̄ kan̄ enwenween̄ lek ije inu lek kan̄, mè inido ọmọ ibe, “Ìre mgbọ owa ke otutuuk inu chi oborọ iso? Sa ìre kpasi inu ijejeen̄ ke ebesa iriọọn̄ mgbọ owu oboyaka inu, mè mgbọ linyọn̄ keyi oboraka?” ⁴ Jisọs ofọfọọk ema ibe, “Ìgbala chieen̄. Ikachieek ibe ene geege ifiaan̄ enyi. ⁵ Mije, owuwa ene mênu me erieen̄ n̄a, mè ikigwen lek kiban̄ Karais, mè ifiaan̄ owuwa ene ifiin̄. ⁶ Enyi mênọ okput akọn̄ me agba lek kinyi, mè inọ si etip akọn̄ òkitim me ujọn̄ọ ere. Ikachieek ibe ejit kinyi isisik, mije, inu chi geelek môrọ, ire, ota mgbọ ìkpore-nu. ⁷ Ido môtim akọn̄ ikeme ido, ama ubọọn̄ môtim akọn̄ ikeme ama ubọọn̄. Owuwa akan̄ môkup, sikisik ijọn̄ môkup me owuwa ere. ⁸ Otutuuk inu chi geelek ìbore gaalek ibebene ujaralek cha, ìbokup kubọk uman obene ikifiak nwa-owot. ⁹ “Mgbọ ya, ebi ene mêtet enyi isa inyi etutuku, mè ekpan̄. Ebi ido geelek mêcha enyi mije enyi echieekbe me lek n̄a. ¹⁰ Mgbọ ya si, owuwa ene mêyaak itele ichechieek kiban̄. Ema mêcha lek kiban̄, mè ikileke ebi melek kiban̄ itap me ufialek. ¹¹ “Mgbọ ya, owuwa ebi nriran ataak mêkana isibi, mè ifiaan̄ owuwa ene. ¹² Mgbọ ya si, mije inu ikpak obokimumana, imumechieen̄ òkup me etete owuwa ebi ene môtọọk. ¹³ Ire, ene geelek òchechieek me lek n̄a, mè ikeke inye isi ire òta mgbọ, ogwugwa obokaan̄ unyan̄a. ¹⁴ Ire, mêdasi ilook ata etip eyi mkpulu Awaji yi ikana otutuuk linyọn̄, inyi otutuuk ido geelek enọ sabum òta mgbọ ònore. ¹⁵ “Enyi isimun̄ òchichaka inu eyi ichep, eyi ogwu nriran Danien otumube ikọ ibak, okekebe me ere mbuban (ogwu òkifuk, itet ibot), ¹⁶ mgbọ ya, ebi ìkup me Judia, elibi efon inyọn̄ ogoon̄. ¹⁷ Ikaan̄ ogwu ikup me inyọn̄ otoon̄-uwu kan̄, ikanan̄a ìsibi ijọn̄ ìsi ìnin̄ uwu kan̄ ìmọnọ inu geege ìsibi. ¹⁸ Ikaan̄ ogwu ikup me emen uko, ikaweek ifofo uwu isi imọnọ ọfọnti kan̄. ¹⁹ Môfieek enenen me lek ebibaan̄ ebi ìkup me owot mè ebi ìkaan̄ nsek bọn ìkinwọ ebe me ubọk mgbọ usen cha môrebe. ²⁰ Ire, ìriaak Awaji ibe ekot ya ikare me mgbọ utọọk, mè ikare si me Usen Mbuban. ²¹ Mije, ikpele ujaralek òbokup mgbọ cha, òjelek kan̄ ìkararak ìkup karake inyọn̄ yi obenebe mege inire chereyi. Mbet kan̄ si ìkpoyaka ikup. ²² Awaji îra iwuuk lek ifieek usen cha igbidim. Ire ìkare ikeya kpunu ogwu mosik me ugwem. Awaji môrọ inyi usen cha igbidim mije ebi îgobobe inyi lek kan̄. ²³ Me mgbọ ya, ire ikaan̄ ogwu itumu inyi enyi ibe, ‘Ìkpọ, ke Karais ire ogwu,’ mè ìre, ‘Ke Karais ire ogwulọ,’ ikachieek. ²⁴ Mije, owuwa ebi Karais ataak mè owuwa ebi nriran ataak mêkana isibi, mè inijeen̄ owuwa ikpele inu ijejeen̄, mè ikirọ owuwa inu ukechieen̄ isa ikifiaan̄ ebi ene. Ire ikup mfufet, ema mêfiaan̄ si ire lek ebi Awaji ogobobe inyi lek kan̄. ²⁵ Ìkpọ! Nra idasi ilook enyi sabum inu chi oborọ. ²⁶ “Eya orọ, ire ene initumu inyi enyi ibe ìkpọ, ke Karais òwa me emen èwê, ikasibi ìsi ìweek. Ire iyaka itutumu inyi enyi ibe ke Karais òwa me emen agwut, ikachieek si. ²⁷ Mije, inunu Gwun̄ Ebilene ìbokup kubọk isinyọn̄ òkikekebe, eyi ebi ene ekimun̄ bene me agan̄ mbum-ura re agan̄ ichep-ura. ²⁸ Ere geelek nkwukwu inu okupbe, ere keya ke edene okititiin̄.” ²⁹ Jisọs onenitumu ibe, “Mgbọ yaage otutuuk ujaralek usen cha môrakabe isan̄a, ‘Ura môdun, onyan̄ ìkpoyaka itoon̄, ebi kè ntoronyan̄ mênan̄a me isinyọn̄ irurọn̄ọ. Ikpele inu geelek òkinyi utoon̄ me isinyọn̄ môsisik, mè ijibi inan̄a me akpat.’ ³⁰ “Mgbọ ya, iman̄ Gwun̄ Ebilene môsibi ikeke me isinyọn̄. Otutuuk ebi ido geelek me linyọn̄ mêkup me ufieejit. Ema mêmun̄ Gwun̄ Ebilene okinu me emen oduku inyọn̄ me isinyọn̄, me unye mè ikpele umin mè uja. ³¹ Ida ikpele odu môtaan̄, ọmọ oraria ebi osat kan̄ itap me otutuuk linyọn̄, me agan̄ inyọn̄, mè agan̄ osiki, mè agan̄ mbum-ura, mè agan̄ ichep-ura, ibe esi ekpulu ebi ọmọ ogobobe inyi lek kan̄ etitiin̄. ³² “Ìsa uti figi ìkween̄ inu. Uti figi isigen̄ oka inwan̄ isan̄a, mè inibene igwook ayaya inwan̄ me lek, enyi mîra iriọọn̄ ibe ke mgbọ ura îgbet. ³³ Ikeya si, enyi isimun̄ otutuuk inu chi okirọ, ìriọọn̄ ibe ke inunu Gwun̄ Ebilene îgbet; ke îra irere me otu isotu kinyi. ³⁴ Me atikọ, ǹkitumu inyi enyi ibe ke ebi ukot keyi kpebekwaan̄ isan̄a mege otutuuk inu chi môrọbe iso. ³⁵ Inyọn̄ mè ijọn̄ môraka, ire, ikọ n̄a ìkakaan̄ mgbọ iraraka kubọk ge. ³⁶ “Ire, kpunu ene geege òrọriọọn̄ usen ya, mè mbubak mgbọ ya. Ebi osat Awaji ìkup me emen inyọn̄ me lek kiban̄ kperiọọn̄, emi Gwun̄ Ebilene ǹkariọọn̄, îtata Nte n̄a gaalek oriọọn̄. ³⁷ Ike îkupbe me ukot kè Nuwa, ikeya si ke ìbokup mgbọ Gwun̄ Ebilene mônube. ³⁸ Sabum mun̄ ile ya oninu, ebi ene ekirerie mè ikinwọ, mè ikido nwa, mè ikisa bọn kiban̄ iche olom mege ire usen Nuwa onin̄be emen uji. ³⁹ Ema kperiọọn̄ si ibe ke ufialek òkinu, mege ire mgbọ mun̄ ile ya onube, mè inimeen̄ ema otutuuk isan̄a. Ikeya si ke ìbokup mgbọ Gwun̄ Ebilene mônube. ⁴⁰ Ene iba mêkisi ikwaan̄ me uko, mêmọnọ ene ge isan̄a, mè ijuuk ene ge itele. ⁴¹ Ebibaan̄ iba mêkikọk akpa me inyọn̄ ewuuk, mêmọnọ ene ge isan̄a, mè ijuuk ene ge itele. ⁴² “Eya orọ, ìkup me mbem, mije, enyi kperiọọn̄ usen Okaan̄ kinyi môgwube ikom inu. ⁴³ Ire, ìtet ibot me lek ikọ keyi. Ire ogwukaan̄ uwu moriọọn̄ ikeke mbubak mgbọ eyi ogwu inọ obosa inu uwu kan̄ me eririeen̄, kè òkup me mbem lek, kpomotele uwu kan̄ inyi ogwu inọ inibum inin̄ isi ichiin̄ inu. ⁴⁴ Eya orọ, enyi si, ìkup me mbem, mije, Gwun̄ Ebilene ìbonu me mgbọ enyi kpebekpọ chieen̄.” ⁴⁵ Jisọs onenibe ema, “Ìre ekene ore ogwu usun̄ ya ogwu òrọriọọn̄ inu, mè igbe utoon̄-ejit, ogwu ogwu ute-uwu osabe ito me ibot otutuuk ebi uwu kan̄, mè ibe ikinyi ema inorie me mgbọ me mgbọ? ⁴⁶ Mônwọn inyi ogwu usun̄ ya, ire ogwu ute-uwu ika inimun̄ ubọk îkisi ikwaan̄ enyibe ọmọ ijaan̄ ifo isi. ⁴⁷ Me atikọ, ǹkitumu inyi enyi ibe ke ogwukaan̄ uwu ya môsa ogwu usun̄ ya irọ ogwu ibot me lek otutuuk inu geelek îkaan̄be. ⁴⁸ Ire, ìkeek-nu, ire ogwu usun̄ ya ire ogwu ikpak, mè itumu ifieek me ejit kan̄ ibe ke nte uwu kan̄ ìkpogwat lek ika, ⁴⁹ mè ibene ikisut ebi usun̄ ogbo kan̄, mè ikigọọk ebi usa-miin̄ ikirie mè ikinwọ isa, ⁵⁰ mè ire nte uwu kan̄ inika me usen mè mbubak mgbọ eyi ọmọ ikakpọge chieen̄ ibe ke môka, ⁵¹ nte uwu ya môsulu ọmọ me njijan̄, mè irọ ọmọ inu ekirọ ebi isi iba, mè ilap ọmọ ito me ere ìboto uga ito, mè ikitaka ejeek.”

¹ Jisọs onenito urọk inyi ema ibe, “Me mgbọ ya, mkpulu eyi Awaji ìbokup kubọk akọp obaak nsabọn ibaan̄ ebi ìbeben mkpukan̄ kiban̄ ikaan̄ me ubọk inan̄a isibi isi ere ijọk ido-nwa ibesi ichichini ogwu enerieen̄ òbodo nwa. ² Me etete akọp nsabọn ibaan̄ cha, ene go ìre ebi welewele, sa ene go kechilọ ere ebi ìriọọn̄ inu. ³ Ene go ebi welewele cha ekpọkpọ iben mkpukan̄ kiban̄ ikeya, kpeben ofifi aran̄ ukan̄, ita me lek eyi òkup me emen mkpukan̄ cha gaalek. ⁴ Ire, ene go kechilọ ebi ìriọọn̄ inu cha mîben ofifi aran̄ ukan̄ me emen iko igbaalek eyi òkup me emen mkpukan̄ kiban̄. ⁵ Ogwu enerieen̄ òbodo nwa ya ìkagwat lek inu, ilaak onyenyeen̄ nsabọn ibaan̄ cha. Ema elalaak inwọnọ. ⁶ “Me ejit eririeen̄, ukpo otataan̄ ibe, ‘Ogwu enerieen̄ òbodo nwa înu! Ìnan̄a ìsibi ìnichichini ọmọ!’ ⁷ “Otutuuk akọp nsabọn ibaan̄ cha eririki, mè ibolo chieen̄ me ilaak, mè iyaka mkpukan̄ kiban̄ ibene. ⁸ Ebi welewele cha enenikibeek ebi ìriọọn̄ inu cha ibe, ‘Ìche sọntiik me lek aran̄ ukan̄ kinyi ìnyi eji, ke mkpukan̄ kiji òkiniin̄.’ ⁹ “Nsabọn ibaan̄ ìriọọn̄ inu cha efọfọọk ema ibe, ‘Iin̄-iin̄, eji kpebenyi enyi, mije, aran̄ ukan̄ kiji ìkposo eji melek kinyi. Ìsi lek ebi ìkinyam aran̄ ukan̄ ìsi ìlep eyi kinyi.’ ¹⁰ “Mgbọ ema ejebe ibesi ilep aran̄ ukan̄ ya, me udun̄ kiban̄, ogwu enerieen̄ òbodo nwa ya onunu. Nsabọn ibaan̄ ebi ìbebem lek cha egọgọọk ogwu enerieen̄ ya iraka inin̄ uwu ijọk ido-nwa ya. Egogon isotu. ¹¹ “Sọntiik mgbọ iraraka, nsabọn ibaan̄ ebi ìsi ilep aran̄ ukan̄ cha ekaka inu, mè inikisulu ubọk me isotu ibe, ‘Ogwu nte, ogwu nte, soso, gwuku isotu nyi eji ma!’ ¹² “Ire, ogwu enerieen̄ ya ofọfọọk ema ibe, ‘Me atikọ, ǹkariọọn̄ enyi isi.’ ” ¹³ Jisọs onenitumu inyi ema ibe, “Enyi ìkup me mbem lek, mije, enyi kperiọọn̄ usen ya, mè ìre mbubak mgbọ eyi Gwun̄ Ebilene mônube.” ¹⁴ Jisọs onenito si ofifi urọk inyi ema ibe, “Mkpulu eyi Awaji ìkup kubọk ogwu enerieen̄ ge òbosi ujọn̄ọ ije, mè inigwen ebi usun̄ kan̄ ititiin̄, mè ibene otutuuk inu îkaan̄be itap ema me ubọk. ¹⁵ Ene ge ke înyi akpa ikpoko go, ofifi ene ke înyi akpa iba, ofifi ene ke înyi akpa ge. Ìnyi ema ikpoko cha ikpọ me lek efuuk kiban̄, me ge me ge. Inyinyi isan̄a, inanan̄a ije kan̄. ¹⁶ Ogwu òbọbọkọ akpa ikpoko go ya osasa eyi kan̄ isi inyam ewe mgbọ yaage, mè irie oruru akpa ikpoko go itoon̄ me inyọn̄. ¹⁷ Ikeya si, ogwu òbọbọkọ akpa ikpoko iba orerie oruru akpa ikpoko iba itoon̄ me inyọn̄ eyi kan̄. ¹⁸ Ire, ogwu òbọbọkọ akpa ikpoko ge ya okpọkpọ iben ikpoko ogwu ute-uwu ya isi irọkọ ijọn̄ itap, mè ida achiaan̄ ichit. ¹⁹ Nte uwu kiban̄ îkup ifiin̄ enenen sabum înika, mè inigwen ebi usun̄ kan̄ cha ibe enerọ ifuk. ²⁰ Ogwu òbọbọkọ akpa ikpoko go ya osasa ikpoko kan̄ inifuk ifuk inyi nte uwu kan̄, mè itumu inyi ibe, ‘Nte uwu, akpa ikpoko go ke owu onyi emi. Ire, nyaka irie oruru akpa ikpoko go si itoon̄ me inyọn̄ ikpoko mbọkọbe.’ ²¹ “Nte uwu kan̄ obebe ọmọ, ‘Owu orọ ijaan̄ enenen, ata ogwu usun̄ ògbegbe utoon̄-ejit! Owu ogbe utoon̄-ejit me lek sọntiik inu inen mè inen. Eya orọ, mâsa owu irọ ogwu ibot me lek owuwa inu ilile. Nin̄ nagọọk nte uwu kwun̄ bele ejit.’ ²² “Ogwu usun̄ òbọbọkọ akpa ikpoko iba osasa si ikpoko kan̄ inu inirọ ifuk inyi ogwu ute-uwu, mè ibe ọmọ, ‘Nte uwu, akpa ikpoko iba ke owu onyi emi. Ire, nyaka irie oruru akpa ikpoko iba itoon̄ me inyọn̄ ikpoko mbọkọbe.’ ²³ “Nte uwu kan̄ ofọfọọk ọmọ ibe, ‘Owu orọ ijaan̄ enenen, ata ogwu usun̄ ògbegbe utoon̄-ejit! Owu ogbe utoon̄-ejit me lek sọntiik inu inen mè inen. Eya orọ, mâsa owu irọ ogwu ibot me lek owuwa inu ilile. Nin̄ nagọọk nte uwu kwun̄ bele ejit.’ ²⁴ “Me òta kan̄, ogwu usun̄ òbọbọkọ akpa ikpoko ge ya osasa ikpoko kan̄ inu, mè initumu inyi nte uwu kan̄ ibe, ‘Nte uwu, emi nriọọn̄ ibe ke owu miyọt ugwem. Owu òkirọkọ mfut me ere okawopge, mè ikititen̄e inu me ere okatọọn̄ge inu geege ìgwook. ²⁵ Eya orọ mfieekbe owot, mè iben ikpoko ya onyibe emi isi irọkọ ijọn̄ itap, mè ichit. Mgbọ yi, kpọ ikpoko kwun̄ ire eyi, bọkọ.’ ²⁶ “Nte uwu kan̄ ofọfọọk ọmọ ibe, ‘Owu ijo una-ifi ogwu usun̄ keyi! Ire owu oriọọn̄ ibe ke emi ǹkirọkọ inu me ere nkawopge, mè ikititen̄e inu me ere nkatọọn̄ge inu geege igwook, ²⁷ ìre keke orọ owu òkaben ikpoko n̄a ìsi ìtap me uwu isun̄-ikpoko, inyi emi ǹnembọkọ ibot ikpoko n̄a melek oruru mgbọ nkabe?’ ²⁸ “Ogwu ute-uwu ya, onyinyi ebi usun̄ kan̄ ida ibe, ‘Ìbọkọ akpa ikpoko ge ya ìsan̄a ene yi me ubọk, mè ìsa ìnyi ogwu òkakaan̄ akọp akpa ikpoko. ²⁹ Mije, ogwu òkakaan̄ inu ke ebenyi inu isọkọ me lek, inyi ikaan̄ iwa igak. Ire, ogwu ikakaan̄ge inu, ìrere sọntiik eyi îkaan̄be, mêtet ibọkọ isan̄a me ubọk, inyi ikayaka ìkakaan̄ geege. ³⁰ Enyi isibọkọ ikpoko ya isan̄a, ìben ijo ogwu usun̄ ya ikakupge me lek inu geege ìtọp ìto me oyet me emen udun, inyi ikup me ere ya ikito ito, mè ikitaka ejeek.’ ” ³¹ Jisọs onenitumu inyi ema si ibe, “Mgbọ Gwun̄ Ebilene mônube me umin kan̄ mè uja kan̄, ọmọ melek otutuuk ebi osat kan̄, môsiki ikweek me inyọn̄ udu ubọọn̄ kan̄ eyi umin mè uja eyi emen inyọn̄. ³² Mgbọ ya, mêtitiin̄ otutuuk ebi ido geelek eyi linyọn̄ keyi me isi kan̄. Ọmọ mônikiche ema isun̄ irek iba, kubọk ogwu òkpukpo anam okiche arọọn̄ isan̄a me lek ebot, ³³ mè isun̄ arọọn̄ me agan̄ ulom kan̄, mè isun̄ ebot me agan̄ ujit kan̄. ³⁴ “Mgbọ ya, Ogwu Ubọọn̄ ya mônitumu inyi ebi ìkup me agan̄ ulom kan̄ ibe, ‘Ìna, enyi ebi Nte n̄a ogbanabe, ìniraka inin̄ ama ubọọn̄ eyi Awaji onen̄ebe isun̄ iban enyi karake îrombe linyọn̄. ³⁵ Mije, mgbọ nkupbe me uraafiọọn̄, enyi mînyi emi inorie. Mgbọ ebek orakbe emi, enyi mînyi emi mudim. Mgbọ nrebe ogwu ichen, enyi mîgwen emi itap me uwu kinyi. ³⁶ Mgbọ nkupbe njak, enyi mînyi emi ekwut ǹkwun. Mgbọ lek n̄a ikanyege, enyi mîkpọ emi chieen̄ me lek. Mgbọ nkupbe me mkpọn, enyi mîkije inikpọ emi.’ ³⁷ “Ebi ata irọrọ cha mênikido ọmọ ibe, ‘Okaan̄-ene, ìre mgbọ owa ke eji emun̄ owu okupbe me uraafiọọn̄, mè inyi owu inorie? Sa ìre mgbọ owa ke eji emun̄ ebek orakbe owu, mè inyi owu mudim ònwọ? ³⁸ Ìre mgbọ owa ke eji emun̄ owu kubọk ogwu ichen, mè igwen owu itap me uwu kiji? Sa ìre mgbọ owa ke eji emun̄ owu okupbe njak, mè inyi owu ekwut òkwun? ³⁹ Ìre mgbọ owa ke eji emun̄ owu okifiak, mè ikpọ owu chieen̄ me lek? Sa ìre mgbọ owa ke eji emun̄ owu okupbe me mkpọn, mè ije inikpọ owu?’ ⁴⁰ “Ogwu Ubọọn̄ ya mônifọọk ema ibe, ‘Me atikọ, ǹkitumu inyi enyi ibe, inu geelek enyi erọbe inyi ene ge me lek ebi ngwan̄ n̄a chi, ìrere ogwu irek kan̄ osikibe ichit, îre emi ke enyi erọ inyi.’ ⁴¹ “Ogwu Ubọọn̄ ya mônenitumu inyi ebi ìkup me agan̄ ujit kan̄ cha ibe, ‘Ìje ìnan̄a emi me isi, enyi ebi Awaji ochobe ataak inyi! Ìje ìsi ìnin̄ emen ukan̄ eyi òkisak ire mgbọ geelek, eyi esọkbe iban Yọk mè ebi osat kan̄. ⁴² Mije, uraafiọọn̄ îtaka emi, enyi kpenyi emi inorie ǹrie. Ebek îrak emi, enyi kpenyi emi mudim ǹnwọ ǹsiki ebek. ⁴³ Emi nnu ichen, enyi kpegwen emi itap me uwu kinyi. Emi nkup njak, enyi kpenyi emi ekwut ǹkwun. Emi mfiak orukan̄, enyi kpekpọ emi chieen̄ me lek. Emi nkup me mkpọn, enyi kpeje inikpọ emi.’ ⁴⁴ “Ebibi mênido ọmọ ibe, ‘Okaan̄-ene ìre mgbọ owa ke eji emun̄ uraafiọọn̄ okitaka owu, mè imun̄ ebek orakbe owu, mè imun̄ owu kubọk ogwu ichen, mè imun̄ owu okupbe njak, mè imun̄ ibe lek kwun̄ ìkanye, mè imun̄ owu me mkpọn, mè ijit itatap ubọk inyi owu?’ ⁴⁵ “Ogwu Ubọọn̄ ya mônenifọọk ema ibe, ‘Me atikọ, eyi enyi ejitbe irọrọ inu chi inyi ene ge me lek ebi ngwan̄ n̄a chi, ìrere ogwu irek kan̄ osikibe ichit, îre emi ke enyi ejit irọrọ inyi.’ ⁴⁶ “Ebi ife cha mênenije inan̄a isi inin̄ me osusut eyi mgbọ ikakaan̄ge itata. Ire, ebi ata irọrọ cha mênenisi inin̄ me ugwem ikakaan̄ge itata.”

¹ Mgbọ Jisọs ojeen̄be otutuuk inu cha isan̄a, inenitumu inyi ebi udun̄ kan̄ ibe, ² “Enyi mîriọọn̄ ibe ke egwe iba gaalek osik ijọk Iraraka môrebe. Mgbọ ya, mêleke emi Gwun̄ Ebilene inyi egon ekpan̄ me inyọn̄ uti nkwurieen̄.” ³ Ebi ibot ngwugwa mè ebi ugane ama enenititiin̄ me uwu ogwu ibot ngwugwa ekigwen Keyefas, ⁴ mè ikitọt ike ema ebesa inween̄ lek ileke Jisọs itet ikpan̄. ⁵ Ire, ema etutumu ifieek ibe ke ìkpore me emen ijọk ya, inyi ebi ene ekato akọn̄. ⁶ Mgbọ Jisọs okupbe me Betani, me uwu kè Saimọn ogwu òfafiak orukan̄ inyakpa, ⁷ ogwu enenwaan̄ ge osasa iko alabasita aran̄ unye otu ewe ojotbe emen inu me lek kè Jisọs me lek ikasi ere îkweekbe irek, mè ikana aran̄ ya igwook Jisọs me ibot. ⁸ Mgbọ ebi udun̄ kan̄ emun̄be inu ogwu enenwaan̄ ya orọbe, ema enanaan̄ ejit, mè ikinunuun̄ me lek kiban̄ ibe, “Îyak! Sa ichep keyi ye? ⁹ Mêkọt inyam aran̄ yi me unye otu ewe, mè esa ikpoko ònan̄a me lek eche enyi ebi ugbọọn̄.” ¹⁰ Jisọs orọriọọn̄ inu ema ekitumu, mè inido ema ibe, “Ìre keke orọ enyi ekisisaak ogwu enenwaan̄ yi? Ogwu enenwaan̄ yi îrọ inu ògbegbe, mè ijaan̄, inyi emi. ¹¹ Mije, ebi ugbọọn̄ melek kinyi ekikup mgbọ geelek. Ire, emi m̀kpagọọk enyi ikup mgbọ geelek. ¹² Aran̄ yi ogwu enenwaan̄ yi ogwookbe emi me lek, ìsa ibala akpalek n̄a isun̄ iban ifufuun̄ n̄a. ¹³ Me atikọ, ǹkitumu inyi enyi ibe, ere geelek mêlookbe ata etip yi me otutuuk linyọn̄, mêtumu inu ogwu enenwaan̄ yi orọbe igbaalek, inyi ekesa ekeek ogwu enenwaan̄ yi.” ¹⁴ Mgbọ ya Judas Isikariọt, ene ge me lek akọp mè ene iba ebi udun̄ kè Jisọs onenisi lek ebi ibot ngwugwa, ¹⁵ mè isi ido ema ibe, “Ìre keke ke enyi ebechieek inyinyi emi, ire nleke Jisọs itap enyi me ubọk?” Ife cha efufuk akọp ikpoko alata okuket ita isibi isa inyi ọmọ. ¹⁶ Bene me mgbọ ya, Judas obebene ikiweek mgbọ irek môsibibe inyi ọmọ ileke Jisọs inyi ebi ife cha. ¹⁷ Me adasi usen eyi ijọk Fituru Ekatapge Olat me lek, ebi udun̄ kè Jisọs enenido Jisọs ibe, “Ìre ere owa ke oweek ibe eji erọ inorie ijọk Iraraka enyi owu?” ¹⁸ Jisọs obebe ema, “Ìje ìnin̄ emen ama Jeruselem, ke enyi mêmun̄ ogwu enerieen̄ ge. Ìtumu inyi ibe ke Ogwu Ijejeen̄ ìbe ke mgbọ kan̄ îkem; ke ọmọ ìkiweek irerie ijọk Iraraka melek ebi udun̄ kan̄ me uwu kwun̄.” ¹⁹ Ebi udun̄ kan̄ cha erọrọ ike Jisọs otemebe ema, mè irọ inorie ijọk Iraraka ya si. ²⁰ Me otu ikakwun̄ usen ya, Jisọs mè akọp mè ebi otuchieen̄ iba kan̄ cha ekwekweek irek me lek ikasi ikirie inorie ya. ²¹ Mgbọ ema ekirie inorie ya, Jisọs onenitumu inyi ema ibe, “Me atikọ, ǹkitumu inyi enyi ibe ke ene ge me lek kinyi môleke emi inyi ekpan̄.” ²² Ejit îfieek ema enenen mgbọ ema enọbe ikọ ya. Ema ebebene, me ge me ge, ikido Jisọs ibe, “Okaan̄-ene, ke ìkare emi ke okitumu wa?” ²³ Jisọs ofọfọọk ibe, “Ogwu ògọgọọk emi igbaan̄ ijiin̄ fituru me emen alala usun̄ ge, ene ya oboleke emi inyi ekpan̄. ²⁴ Gwun̄ Ebilene môkwu mkpa kubọk egebe ibak ọmọ me emen Ikpa Mbuban. Ire, môfieek inyi ene ya ogwu môlekebe Gwun̄ Ebilene inyi ekpan̄. Kè ònwọn ire kpememaman ene ya.” ²⁵ Judas ogwu òboleke ọmọ ya onenido ọmọ ibe, “Ogwu Ijejeen̄, ke ìkare emi wa?” Jisọs ofọfọọk ọmọ ibe, “Iin̄, owu gaalek osa otu kwun̄ itumu-ma!” ²⁶ Me irek inorie ya si, Jisọs onenimọnọ fituru, mè igbana, mè ikpọkọ, mè isa inyi ebi udun̄ kan̄, mè itumu inyi ema ibe, “Ìbọkọ, mè ìtaka, eyi ìre akpalek n̄a.” ²⁷ Ikeya si, ineniben ekpen̄ miin̄, mè igbana, mè ibene itap ema me ubọk, mè itumu inyi ema ibe, “Ìbọkọ ìnwọ, enyi otutuuk ene. ²⁸ Eyi ìre eje n̄a eyi esabe irọ inyan̄a-ibot Awaji onyan̄abe inyi ebilene inye. Îre eje n̄a eyi egwookbe mije ibot owuwa ene, inyi Awaji isa me ikeya itele ijo ebilene. ²⁹ Me atikọ, emi m̀kpayaka inwọ miin̄ ònan̄a me lek mfut gerep yi ofifi, mege ire mgbọ emi melek kinyi mêkpọkbe inwọ eyi ayaya me emen mkpulu eyi Nte n̄a.” ³⁰ Mgbọ ema eriebe inorie ya isan̄a, ema ekọkọt okwa itọn̄ Awaji, mè inan̄a isibi ije ifo inyọn̄ ogoon̄ Olifu. ³¹ Me ere ya, Jisọs onenitumu inyi ema ibe, “Me eririeen̄ keyi, enyi otutuuk ene mêyat itele emi, kubọk egebe me Ikpa Mbuban ibe ke Awaji ìbe, ‘Mâkpan̄ ogwu òkpukpo arọọn̄, urum arọọn̄ môyiyala.’ ³² Ire, nsijomo me mkpa, mâsi ikup me Galili iban enyi.” ³³ Pita obebe, “Ìrere otutuuk ene etele owu, emi m̀kpatele owu.” ³⁴ Jisọs ofọfọọk ọmọ ibe, “Me atikọ, me eririeen̄ keyi, sabum unọn obosan̄a amọn, owu môjit emi mgbọ ita.” ³⁵ Ire Pita okpọkpọk itumu inye si ibe, “Emi m̀kpajit owu kubọk ge, ìrere ebegbagbaan̄ emi melek kwun̄ ikpan̄.” Inu yaage si ke otutuuk ebi udun̄ kan̄ kechilọ etumu. ³⁶ Me inyọn̄ ogoon̄ Olifu ya, Jisọs onenisa ebi udun̄ kan̄ isi ere ekigwen Gesemeni, mè ibe ema, “Ìkup me ere keyi, inyi ǹje ǹsi ere keyilọ ǹsi ǹriaak uriaak.” ³⁷ Isasa Pita mè bọn ebirieen̄ iba kè Jebidi igbaalek kan̄ ije ifo isi sọnja. Lek kan̄ osisisik enenen, ibebene ikikup me uga ufieejit. ³⁸ Itutumu inyi ema ibe, “Ufieejit òkup emi me ejit îmin enenen ire lek môkọtbe ikpan̄ emi. Ìkup me ere keyi, mè ìgọọk emi ìkibem.” ³⁹ Jisọs otetele ema, mè ije ifo isi sọnja, mè irọn̄ inyana me ijọn̄, mè ikana isi ichit, mè ikiriaak uriaak ibe, “Jei, Nte n̄a! Ire ikup mfufet, soso ben ekpen̄ ufialek yi san̄a emi me lek. Ire, nkeek kwun̄ irọ, ikare me nkeek eyi n̄a.” ⁴⁰ Inenigwu ikom inu me lek ebi udun̄ kan̄ ita cha, mè inimun̄ ema ekilaak, mè ido Pita ibe, “Ìre keke orọ enyi kpekọt igọọk emi itop chieen̄ ukpọk ukpọk lek mbubak mgbọ ge gaalek? ⁴¹ “Ìkup me mbem, mè ìkiriaak uriaak, inyi enyi ekarọn̄ ìnin̄ me emen ntọ-mkpọ. Mmun̄ ibe ke ekwukwu kinyi îbem lek me atikọ, ire, akpalek kinyi îwọ.” ⁴² Jisọs itutumu ikeya isan̄a, itetele ema, mè ije isi iriaak uriaak òso mgbọ iba, ibe, “Nte n̄a, ire ìkakup mfufet ibe owu òben ekpen̄ ufialek yi òsan̄a emi me lek îtata ǹnwọnwọ, nkeek kwun̄ irọ!” ⁴³ Igwugwu ikom si inu me lek kiban̄, mè inimun̄ ema ekilaak, mije, ilaak îtet ema enenen. ⁴⁴ Itetele ema, mè ikpọk ije isi iriaak uriaak òso mgbọ ita, mè iriaak si otu uriaak yaage. ⁴⁵ Mgbọ îgwube ikom inu me lek ebi udun̄ kan̄ ita cha, inenimun̄ ike ema ekilaak, mè ibe ema, “Ìre enyi ekilalaak, mè ikisiki efuuk ire mgbọ keyi? Ìkpọ, mgbọ ebeleke Gwun̄ Ebilene ikana itap me ubọk ebi ijo îkem. ⁴⁶ Ìnan̄a ìkeke, inyi eji eneje, ke ogwu òboleke emi inyi ekpan̄ ore ogwulọ òkinu.” ⁴⁷ Jisọs òkitutumu ikọ ya me otu, Judas ene ge me lek ebi akọp mè ebi udun̄ kan̄ iba cha, okakana isibi, ọmọ melek ogbogbo ebi ene ìkaan̄ ibet mè oge etim me ubọk. Ebi ibot ngwugwa mè ebi ugane ama eria ife cha ibe enetet Jisọs. ⁴⁸ Sabum ema enire ere ya, Judas îwuuk lek itumu inyi ema ibe, ene geelek ọmọ môkanabe ikat, ke ene ya ore ogwa, mè ebibi etet. ⁴⁹ Ema irere ere ya, Judas okpọkpọ iraka isi ge igọọk Jisọs, mè itọp ọmọ amọn ibe, “Ogwu Ijejeen̄,” mè ikana ọmọ ikat. ⁵⁰ Jisọs obebe ọmọ, “Une, inu obenbe me ejit inu, rọ-ma!” Ebi ife cha egbugbuku inin̄ lek kè Jisọs, mè ikana ọmọ itet, mè itet inye. ⁵¹ Mije keya, ene ge me lek ebi ìkigọọk Jisọs me udun̄ otatap ubọk iwọọk oge etim kan̄ isibi, mè ikep ogwu usun̄ ogwu ibot ebi ibot ngwugwa, mè ifieek utọn̄ agan̄ ge isan̄a me agba ibot ogwu usun̄ ya. ⁵² Jisọs otutumu inyi ogwu udun̄ kan̄ ya ibe, “Yaka oge etim kwun̄ tap me emen ogan, mije, ogwu òkep oge ìbokwu me otu oge. ⁵³ Ìre owu òkariọọn̄ ibe ke mâkọt igwen Nte n̄a mgbọ keyi, mè Nte n̄a onyi emi ebi osat ìwawa iraka akọp mè urum iba, inyi enetim akọn̄ me ibot n̄a? ⁵⁴ Ire, ire nnirọ ikeya, ìre inu egebe me Ikpa Mbuban ìbojeje inirọ iso ike egebe ibe ke môrọ?” ⁵⁵ Jisọs onenido ogbogbo ebi ife cha ibe, “Ìre emi ìre ogwu òkichiin̄ inọ me afa, eyi enyi esabe oge etim mè ibet isibi inu ibenitet emi? Usen geelek, ke ǹkigọgọọk enyi ikup me Uwu Mbuban ikijeen̄ inu, enyi kpetet emi. ⁵⁶ Ire, otutuuk inu chi ìkimọnọ irek isasa irọ inu ebi nriran egebe me Ikpa Mbuban iso.” Mgbọ ya, otutuuk ebi udun̄ kan̄ eyayat itele ọmọ, mè ilibi inan̄a. ⁵⁷ Ebi ìtetet Jisọs esasa ọmọ ije isi uwu kè Keyefas ogwu ibot ebi ibot ngwugwa, ere ebi ìjeen̄ Ikan mè ebi ugane ama etitiin̄be. ⁵⁸ Pita okekije me ujọn̄ọ ere igọọk Jisọs me udun̄, mè igọọk ije iraka inin̄ emen oyet egep ogwu ibot ebi ibot ngwugwa, mè isi igọọk ebi ìkibem ere isiki ikweek, inyi ọmọ imun̄ inu cha geelek ire òta kan̄. ⁵⁹ Ebi ibot ngwugwa mè otutuuk ebi Oru ebi Ju ekekiweek ataak ataak inu ata-ikọ ebesa itoon̄ Jisọs uraamọn, inyi ekọt ekpan̄ ọmọ. ⁶⁰ Ire, kpekọt ikaan̄ geege, ubọk geelek owuwa ebi ata-ikọ ataak enan̄abe isibi. Me òta kan̄, ene iba enenisibi inu, ⁶¹ mè initumu ibe ke ema mînọ Jisọs otumube ibe ke ọmọ môkọt igbugbọ Uwu Mbuban igwook, mè isa egwe ita gaalek ikpọk inama isan̄a. ⁶² Mgbọ yaage, ogwu ibot ebi ibot ngwugwa onanan̄a ikeke, mè ibe Jisọs, “Ìre owu òkakaan̄ inu geege obofọọk? Ìre keke ke ife chi ekitumube ikeme owu ikeyi?” ⁶³ Ire, Jisọs okpọkpọ iriaan̄ otu. Ogwu ibot ebi ibot ngwugwa obebe Jisọs, “Me erieen̄ Awaji òkup me ugwem, ire owu ore Karais ya, òrere Gwun̄ Awaji, tumu nyi eji mgbọ keyi.” ⁶⁴ Jisọs ofọfọọk ọmọ ibe, “Iin̄, îre ikeya ubọk owu otumube. Ire, sọntiik mgbọ me isi, enyi mêmun̄ Gwun̄ Ebilene osikibe ikweek irek me agan̄ ubọk ulom Awaji Ogwu Òkaan̄ Unye Geelek, mè inan̄a me isinyọn̄ ikinu me emen oduku inyọn̄.” ⁶⁵ Mgbọ ogwu ibot ebi ibot ngwugwa onọbe ikọ ya Jisọs otumube, isasa me unaan̄-ejit itaba ọfọnti kan̄ igwak, mè ibe, “Ene yi îtumu Awaji ifiat! Ìre kpasi ata-ikọ ke enyi eyaka ikiweek? Ìre enyi otutuuk ene kpesa utọn̄ kinyi inọ ijo ikọ ya îtumube? ⁶⁶ Nkeek kinyi ye?” Otutuuk ene echechieek igwook ibe ke îgbe ibe ekpan̄. ⁶⁷ Ema ebebene ikicho ataak igwook ọmọ me isi, mè ikisa akpọ igon ọmọ. Usini ene ekekitap ọmọ ada me isi, ⁶⁸ mè ikitumu inyi ọmọ ibe, “Karais, ben nriran nyi eji nu. Ìre ekene osulu owu?” ⁶⁹ Mgbọ Pita okupbe me emen oyet egep ya, gwun̄ enenwaan̄ ge me lek ebi usun̄ ogwu ibot ebi ibot ngwugwa onenije inu me lek kan̄, mè ibe ọmọ, “Ke owu melek Jisọs ogwu Galili ya ekije.” ⁷⁰ Ire, Pita okakan̄, mè itumu me isi otutuuk kiban̄ inyi gwun̄ enenwaan̄ ya ibe, “Emi ǹkariọọn̄ inu owu okitumu ikọ ibak,” ⁷¹ mè inan̄a me ere ya ije isi ikeke me otunchit. Me ere ya, ofifi gwun̄ enenwaan̄ ge omumun̄ ọmọ si, mè itumu inyi ebi ìkup me ere ya ibe, “Ene yi ìre ene ge me lek ebi ìkigọọk Jisọs ogwu Najeret me udun̄.” ⁷² Pita okpọkpọk ikan̄, mè inyan̄a ibot ibe, “Ǹkariọọn̄ ogwu enerieen̄ ya enyi ekitumu ikọ ibak.” ⁷³ Sọnja mgbọ iraraka, ebi ìkekeke me ere ya ejeje isi lek kè Pita, mè itumu inyi ọmọ ibe, “Me atikọ, owu ìre ene ge me lek ebi ife cha, mije, ida usem kwun̄ ikpọk owu mbum.” ⁷⁴ Pita obebene ikitap awọ inyi lek kan̄, mè ikinyan̄a ibot inyi ife cha ibe, “Ǹkariọọn̄ ogwu enerieen̄ ya.” Mgbọ yaage, unọn osasan̄a amọn. ⁷⁵ Pita onenisi ikeek ikọ ya Jisọs otumube inyi ọmọ ibe, “Sabum unọn ònosan̄a amọn, owu môjit emi mgbọ ita.” Inanan̄a ije isibi oyet, me isi ikup ikito ujat ito.

¹ Me òfit-iwele kan̄, me agan̄ egwe, ebi ibot ngwugwa, mè ebi ugane ama enenititiin̄, mè itumu ifieek ibe ke mêkpan̄ Jisọs. ² Ema enenitap ọmọ mkpọn me ubọk mè ukot, mè isa ọmọ isi isi kè Pailet, ogwu ibot mkpulu. ³ Mgbọ Judas ogwu òleleke Jisọs omun̄be ibe ke mîtip Jisọs oyerebet mkpa, ibọbọnọ lek enenen, mè iyaka akọp ikpoko alata okuket ita îbọkọbe ya ijet ebi ibot ngwugwa mè ebi ugane ama, ebi ìnyinyi ọmọ ikpoko ya, ⁴ mè itumu ibe ke ọmọ îrọ ijo inu, mije ke ọmọ îleke ogwu ikarọge ijo inu geege inyi ekpan̄. Ema ebebe ọmọ, “Eya ìre mbubek kwun̄, ìkagbaan̄ eji me lek.” ⁵ Judas okpukpulu ikpoko cha itọọn̄ igwook me emen Uwu Mbuban, mè ije inan̄a isi itap olik me ebek, mè itaba lek kan̄ ikpan̄. ⁶ Ire, ebi ibot ngwugwa eteteen̄ ikpoko cha, mè ibe ke ìkatat me Ikan ibeben ikpoko ya itap me ere ekisun̄ ikpoko me Uwu Mbuban, mije ke ìre ikpoko eje ene. ⁷ Eya orọ, ema esasa ikpoko ya isi ilep ijọn̄ me ubọk ene ge òkibot ugọn̄, inyi ekesa efuun̄ ebi ichen. ⁸ Mije keya ke ekigwen ere ya Ijọn̄ Eje inire chereyi. ⁹ Ikeyi ke esa irọ inu ogwu nriran Jerimaya otumube iso ibe, “Ema mîbọkọ akọp ikpoko alata okuket ita, òrere otu ewe ebi Ijeren echieekbe ikpekpe me ibot kan̄, ¹⁰ mè isa ilep ijọn̄ me ubọk ene ge òkibot ugọn̄, ike Okumugwem otọbe inyi emi.” ¹¹ Me mgbọ ya, Jisọs òwa okekebe me isi kè Pailet ogwu ibot mkpulu ebi Rom etobe ibe ikikpulu agan̄ Judia. Pailet ododo ọmọ ibe, “Ìre owu ore ogwu ubọọn̄ ebi Ju ya?” Jisọs ofọfọọk ọmọ ibe, “Owu otumu ma!” ¹² Mgbọ ebi ibot ngwugwa mè ebi ugane ama etoon̄be Jisọs uraamọn ikọ, Jisọs ìkpọkpọ iriaan̄ otu, ìkafọọk ema ikọ geege. ¹³ Pailet onenido Jisọs ibe, “Ìre òkanọ otutuuk ikọ chi ekitumu ikeme owu?” ¹⁴ Ire Jisọs ìkafọọk ema otu me lek ikọ cha geege. Inu ya okeke ogwu ibot mkpulu ya chieen̄ enenen. ¹⁵ Me ijọk Iraraka geelek, îre ọrọmijọn̄ ogwu ibot mkpulu yi isasan̄a ogwu mkpọn ge, ogwu ebi ama edobe, isibi me mkpọn inyi ifo. ¹⁶ Ike mgbọ ya, ogwu enerieen̄ ge ekigwen Barabas ogwu otutuuk ene eriọọn̄be ibe ke ìre ogwu afa, ọmọ òwa me uwu mkpọn okupbe. ¹⁷ Eya orọ, mgbọ ebi ene etitiin̄be me ere uwu kè Pailet me usen ya, Pailet onenido ema ibe, “Ìre ogwu owa ke enyi eweek ibe emi ǹsan̄a ǹsibi ǹnyi enyi? Ìre Barabas, sa ìre Jisọs ogwu ekigwen Karais?” ¹⁸ Pailet ìdo ikọ yi, mije, îriọọn̄ ibe ke esa me ejit mba itet Jisọs inu me isi kan̄ ibe ọmọ ikpan̄. ¹⁹ Mgbọ Pailet okweekbe irek me inyọn̄ ogboon̄ ubọọn̄ oyerebet kan̄, ogwu nwa oraria etip ijet ibe isan̄a lek kan̄ isan̄a me lek inu geelek ògbaan̄ me lek ogwu enerieen̄ ata irọrọ ya, mije ke ọmọ îmun̄ ijo ilaak òfolek ogwu enerieen̄ ya me eririeen̄; ke ilaak ya îsisaak ọmọ enenen karake ewelegwe. ²⁰ Ebi ibot ngwugwa mè ebi ugane ama etọtọ ejit ebi ene ifiat ibe mè edo ibe isan̄a Barabas inyi ema, mè ikpan̄ Jisọs. ²¹ Pailet, ogwu ibot mkpulu, okpọkpọk ido ife cha ibe, “Ìre ekene ke enyi eweek ibe emi ǹtele inyi ifo?” Ema otutuuk ene edidimi igwook ibe ke ema eweek Barabas. ²² Pailet onenido ema ibe, “Ìre keke ke enyi eweek ibe emi ǹrọ Jisọs ogwu ekigwen Karais yi?” Ema egwagwat lek ifọọk ibe, “Gon kpan̄!” ²³ Pailet ododo ema ibe, “Mije keke? Ìre kpasi ijo inu ke îrọ?” Ire, ema erọriọọn̄ ikitaan̄ ukpo unye unye ibe, “Gon ọmọ kpan̄ me inyọn̄ uti nkwurieen̄!” ²⁴ Pailet omumun̄ ibe ke kpunu ike ọmọ obokọt inyan̄a Jisọs, kpan̄asi ikeya, ire ọmọ ije inyi isi, ke etim mè uyọrọlek môsibi. Eya orọ, me isi ogbogbo ebi ife cha, ibọbọkọ mun̄ isa igwọk ubọk kan̄, mè itumu inyi ema ibe, “Ubọk n̄a geege kpunu me lek eje ogwu enerieen̄ yi. Eje ogwu enerieen̄ yi ìtoon̄ enyi me ibot.” ²⁵ Otutuuk kiban̄ echechieek igwook ibe, “Iin̄, eje kan̄ itoon̄ eji me ibot, mè itoon̄ si me ibot bọn kiji!” ²⁶ Pailet onenisan̄a Barabas isibi me mkpọn inyi ema, ike ema edobe, mè isa Jisọs inyi ebi akọn̄ esulu me njijan̄, mè esa esi egon ekpan̄ me inyọn̄ uti nkwurieen̄. ²⁷ Ebi akọn̄ ìkibem ogwu ibot mkpulu enenisa Jisọs isibi isi emen oyet egep uwu ogwu ibot mkpulu. Otutuuk urum ebi akọn̄ ìkup me ere ya ekekeke ikana ọmọ okop okop, ²⁸ mè iwọọk ọfọnti kan̄ isan̄a ọmọ me lek, mè iyaka initap ọmọ uga ọfọnti irio irio eyi ebi ubọọn̄ ekitap, ²⁹ mè isa ukpak ilọk okpibot ubọọn̄ ikwuun̄ ọmọ me ibot, mè imọnọ okuba itap ọmọ me ubọk agan̄ ulom, mè ikitọbọ ekpe me isi kan̄, isasa irọ ọmọ inu ochak, mè ikibe ọmọ, “Ogwu ubọọn̄ ebi Ju, eji mîtọp owu amọn!” ³⁰ Ema ekekicho ataak igwook ọmọ me lek, mè ibọkọ okuba òkup me ubọk kan̄ ya isa isulu ọmọ me ibot owuwa mgbọ. ³¹ Mgbọ ema erọbe ọmọ inu ochak chi isan̄a, ema ewọwọọk ọfọnti irio irio ya isan̄a ọmọ me lek, mè ikpọk ikpulu ọfọnti kan̄ cha itap ọmọ me lek, mè isa ọmọ ije inan̄a ibesi igon ikpan̄ me inyọn̄ uti nkwurieen̄. ³² Mgbọ ema ekije inan̄a me ama ya isibi, ema enenichichini ogwu enerieen̄ ge ekigwen Saimọn ònan̄a me ama Sairini, mè itet me ubọk unye ibe iben uti nkwurieen̄ kè Jisọs. ³³ Ema enenije isi ire ere ekigwen Gọligọta (eyi òsisibi Ere Ngigọ Ibot Ene). ³⁴ Me ere ya ke ene ge otọkọ miin̄ ewọlọbe ugwun̄ òkirọ mè ene ikanọ unan me lek inyi Jisọs. Ire, mgbọ îchakbe me otu ikpọ, ijijit inwọnwọ. ³⁵ Ema egogon ọmọ me inyọn̄ uti nkwurieen̄. Mgbọ egonbe ọmọ isan̄a, ema eneniroon̄ nriroon̄ isasa iriọọn̄ ubọk ema ebesa iche ọfọnti kan̄ cha inyi lek kiban̄, mè isa me ikeya iche ọfọnti kan̄ isan̄a, ³⁶ mè inisiki ikweek me ere ya ikibem ọmọ. ³⁷ Mîge ikan esabe itip ọmọ oyerebet igon me agan̄ ibot uti nkwurieen̄ ya ibe OGWUGWU ÌRE JISỌS, OGWU UBỌỌN̄ EBI JU. ³⁸ Mîgon si ene iba ebi ìkichiin̄ inọ me afa me uti nkwurieen̄ me agba lek kan̄ me ere ya, ene ge me agan̄ ulom kan̄, ene ge me agan̄ ujit kan̄. ³⁹ Ebi ìkije iraka me ere ya ekekitọp ibot, mè ikichak ọmọ, ⁴⁰ mè ikitumu ibe, “Owu ogwu òbe ke ọmọ môgbugbọ Uwu Mbuban ito, mè isa egwe ita gaalek ikpọk inama isan̄a! Nyan̄a lek kwun̄ ma! Nan̄a me inyọn̄ uti nkwurieen̄ ya sibi ijọn̄ nu, ire me atikọ ke owu ìre Gwun̄ Awaji.” ⁴¹ Ikeya si ke otutuuk ebi ibot ngwugwa, mè ebi ìjeen̄ Ikan, mè ebi ugane ama erọ ọmọ inu esip, ⁴² mè ikitumu ibe, “Înyan̄a ebi ofifi ife, ire ìkakọt inyan̄a lek kan̄. Ọmọ ogwu òrere ogwu ubọọn̄ ebi Ijeren, inan̄a me inyọn̄ uti nkwurieen̄ isibi ijọn̄ nu, inyi eji echieek me lek kan̄. ⁴³ Ọmọ ìtoon̄ ejit me lek Awaji. Awaji ya îtoon̄be ejit me lek ininyan̄a ọmọ ma, ire Awaji iweek ọmọ. Ke ọmọ ìkigugo lek ibe, ‘Emi ìre Gwun̄ Awaji.’ ” ⁴⁴ Ikeya si ke ebi inọ iba cha egonbe me agba lek kan̄ ekinye chieen̄ inyi ọmọ. ⁴⁵ Udun okakana ichit otutuuk ere ke bùk, bene me akọp mè mbubak mgbọ iba eyi ejit ikarek si re mbubak mgbọ ita eyi ikarek. ⁴⁶ Mgbọ òfuk-mgbọ osulube ita, Jisọs otataan̄ ukpo ibe “Elọi, Elọi, lama sabatani,” eyi òsisibi “Awaji n̄a, Awaji n̄a, ìre keke orọ mè owu òjit emi òtele?” ⁴⁷ Mgbọ ebi ìkeke me ere ya enọbe ida kan̄, usini kiban̄ ekekitumu ibe ke ìkibọn̄ọ Ilaija. ⁴⁸ Ene ge me lek kiban̄ ogwagwat lek ilibi isi imọnọ ise ijiin̄ me emen miin̄ òkitop njijin njijin, mè iben inwaan̄ me otu uti, mè ibene ifo otu kè Jisọs ibe inwọ. ⁴⁹ Ire usini kiban̄ ebebe ene ya, “Nan̄a me lek, inyi eji ekpọ-nu mè ìre Ilaija mônu ininyan̄a ọmọ.” ⁵⁰ Jisọs okpọkpọk itaan̄ ukpo si, mè itọbọ. ⁵¹ Me ike mgbọ yaage, ekwut esaba ifieek ikwek ere mbuban me emen Uwu Mbuban otọtọbọ ibum iba, bene me inyọn̄ inire ijọn̄. Ijọn̄ osisisik. Ewuuk oraraan̄ ibak. ⁵² Owuwa udọn̄ ufuun̄ obubum, mè ichili otu, owuwa ebi ìchechieek me lek Awaji, mè ikwu iraka ejojomo me mkpa. ⁵³ Me mgbọ Jisọs ojomobe me mkpa eyi kan̄ isan̄a, ema enanan̄a me udọn̄ ufuun̄ cha isibi, mè ije inin̄ emen ama Jeruselem. Owuwa ene emumun̄ ema. ⁵⁴ Mgbọ ogwu ibot akọn̄ mè ebi melek kan̄ ìgọgọọk ikup ikibem Jisọs emun̄be sikisik ijọn̄ ya mè otutuuk inu cha òrọrọ, ukpook otetet ema enenen. Ema etutumu ibe, “Me atikọ, ene yi ìre Gwun̄ Awaji.” ⁵⁵ Owuwa ebibaan̄ ebi ìkitap ubọk inyi Jisọs, mè igọọk ọmọ ije bene me karake Galili mîgọọk inu, mè ikeke me ujọn̄ọ ere ikikpọ. ⁵⁶ Meri ogwu Magidala, mè Meri nga kè Jemis melek Josefu, mè nwa kè Jebidi nga kè Jemis mè Jọn òwa me lek ebibaan̄ cha. ⁵⁷ Me agan̄ ikakwun̄ usen ya, ogwu enerieen̄ ge òbọbọọn̄ ubọọn̄ enenen, mè ire si ogwu udun̄ kè Jisọs, ekigwen Josefu, ogwu ama Arimatia, ⁵⁸ oneninan̄a ije isi lek kè Pailet, mè isi ibeek ibe inyi ọmọ nkwukwu kè Jisọs, inyi ọmọ iben isi ifuun̄. Pailet onyinyi ida ibe etele inyi Josefu iben nkwukwu kè Jisọs isi ifuun̄. ⁵⁹ Josefu onenisi isan̄a nkwukwu kè Jisọs me inyọn̄ uti nkwurieen̄ ya, mè isa aya ekwut ikat, ⁶⁰ mè iben isi ifuun̄ me emen aya udọn̄ ufuun̄ îrọkọbe me lek ewuuk inyi lek kan̄, mè ikpukpọt ikpele ewuuk ge ichit otu udọn̄ ya, mè ije ifo. ⁶¹ Meri ogwu Magidala, mè Meri nga kè Jemis mè Josefu me ere ya esikibe ikweek ikibene isi ikpọ udọn̄ ufuun̄ ya. ⁶² Me òfit-iwele kan̄, mgbọ usen ebi Ju ekinen̄e lek kiban̄ isun̄ iban Usen Mbuban orakabe, ebi ibot ngwugwa mè ebi Farisi enenije isi lek kè Pailet, ⁶³ mè ibe ọmọ, “Ogwu nte, eji mîkeek mgbọ ogwu ofiaan̄ ya okupbe me ugwem, mè ikijeen̄ inu. Îtumu ibe ire ọmọ ikwu, mè egwe ita isiraka, ke ọmọ môjomo me mkpa. ⁶⁴ Eya orọ nyi ida ibe ebi akọn̄ eriọọn̄ ubọk ekebem udọn̄ ya usen geelek ubọk ògbegbe mege eso usen ita. Ire kperọ ikeya, ebi udun̄ kan̄ mêkọt isi iben nkwukwu kan̄ isan̄a, mè inifiaan̄ itumu inyi ebi ene ibe ke îjomo me mkpa. Ire òjelek inu òkup ikeya irọ, ofiaan̄ eyi mgburudun̄ mômin igak eyi adasi.” ⁶⁵ Pailet ofọfọọk ema ibe, “Ire ikeya, ìkpulu ebi akọn̄ ìsa ìsi, mè esi ebem ere ya ubọk enyi eweekbe.” ⁶⁶ Ikeya ke ema esi ichọkọ otu udọn̄ ufuun̄ ya ichit, mè itap iman̄ me inyọn̄ ewuuk ya, inyi ene geelek ekakọt ìchili, mè ito ebi akọn̄ cha, inyi ekebem otu udọn̄ ya.

¹ Mgbọ Usen Mbuban orakabe isan̄a, me usen Awaji, me agan̄ egwe, Meri ogwu Magidala, melek Meri nga kè Jemis mè Josefu, enenije ibesi ikpọ udọn̄ ufuun̄ kè Jisọs. ² Me ekakpọge chieen̄, ijọn̄ obebene ikisisik enenen, mije ogwu osat Okumugwem înan̄a me emen inyọn̄ inu me udọn̄ ufuun̄ ya, mè inikpukpọt ewuuk ya isan̄a, mè isiki ikweek me inyọn̄. ³ Isi ogwu osat ya ìkimumen kubọk mèrèmèrèp isinyọn̄. Ikeya si ke ọfọnti òkup me lek kan̄ okitana kubọk abalara. ⁴ Ukpook ogwu osat ya otetet ebi akọn̄ ìkibem ere ya enenen. Ema ekekiran, mè ichiaak inye kubọk ebi ìkwukwu. ⁵ Ogwu osat ya otutumu inyi ebibaan̄ cha ibe, “Ikafieek owot, mije, nriọọn̄ ibe kè enyi ekiweek Jisọs ogwu egonbe ikpan̄ me inyọn̄ uti nkwurieen̄. ⁶ Ìkakup me ere keyi. Îjomo me mkpa ike îtumube. Ìna ìnikpọ ere emaan̄be nkwukwu kan̄, ⁷ mè ìgwat lek ìje ìsi ìlook ebi udun̄ kan̄ ibe ke îjomo me mkpa; ke òkije me isi kiban̄ ifo Galili; ke ere ya ke ema ebesi imun̄ ọmọ. Mgbọ yi, emi nra itumu inyi enyi, inyi enyi eriọọn̄.” ⁸ Ukpook otetet ebibaan̄ cha. Ire, unwọọn̄ ojojot ema ejit. Ema esasa ekot ekot inan̄a me udọn̄ ufuun̄ ya ilibi ibesa etip ya isi ilook ebi udun̄ kè Jisọs. ⁹ Mgbọ yaage, Jisọs okakana isibi me isi kiban̄, mè itọp ema amọn ibe, “Esuuk ikup inyi enyi!” Ema ejeje inin̄ ọmọ lek, mè igele igwook me ijọn̄, mè itet ọmọ ebek ukot, mè itọbọ ebum inyi ọmọ. ¹⁰ Jisọs otutumu inyi ema ibe, “Ikatet ukpook! Ìsi ìlook ebi ngwan̄ n̄a ibe eje esi Galili, ke ebibi mêmun̄ emi me ere ya.” ¹¹ Mgbọ ebibaan̄ cha ekilibi me oniin̄, ebi akọn̄ ìbebem udọn̄ ya eninin̄ emen ama Jeruselem, mè isi ikpa otutuuk inu cha òrọrọ me ere ya inyi ebi ibot ngwugwa. ¹² Ebi ibot ngwugwa cha melek ebi ugane ama etititiin̄, mè itọt inu ema eberọ, mè inyi ebi akọn̄ cha owuwa ikpoko, ¹³ mè itumu inyi ebi akọn̄ cha ibe, “Ìtumu ìnyi ebi ene ibe ke ebi udun̄ kan̄ enu me eririeen̄ mgbọ ilaak onwọnọbe enyi inichiin̄ nkwukwu kè Jisọs isan̄a me emen udọn̄ ya. ¹⁴ Ire ukpatu yi ire utọn̄ ogwu ibot mkpulu, eji mêchit enyi, mè itumu ikọ òbosiki ọmọ ejit, inyi ufialek geege ikakeme enyi.” ¹⁵ Ebi akọn̄ cha ebọbọkọ ikpoko ya, mè irọ ike ife cha etemebe ema. Mfufuk keyi ònan̄a me otu kiban̄ cha ore eyi òkije ikana me etete ebi Ju mege inire cherekeyi. ¹⁶ Akọp mè ebi udun̄ ge kè Jisọs cha enenije isi inyọn̄ ogoon̄ ge òkup me Galili, ere Jisọs otumube ibe ema esi. ¹⁷ Mgbọ ema emun̄be Jisọs, ema etọtọbọ ebum inyi ọmọ me ere ya. Ire, usini kiban̄ kpechieek ibe ke ìre ọmọ. ¹⁸ Jisọs onenije inu me lek kiban̄, mè itumu inyi ema ibe, “Awaji înyi emi unye me lek otutuuk inu geelek òkup me emen inyọn̄, mè echi òkup me linyọn̄ keyi. ¹⁹ Eya orọ, ìje ìsi ìrọ inyi otutuuk ebi ido geelek me linyọn̄ ekana ebi ìkigọọk emi me udun̄, mè ìgwook ema mun̄ me erieen̄ eyi Ute, mè erieen̄ eyi Gwun̄, mè erieen̄ eyi Ekwukwu Mbuban, ²⁰ mè ìjeen̄ ema inu, inyi ema ekerọ otutuuk inu geelek ntumube ibe enyi ekerọ. Me atikọ, emi mâkup melek kinyi mgbọ geelek, ire mgbọ linyọn̄ keyi môtabe.”