Luk

Luk

¹ Atata Tiofilọs ogwu ògbegbe umin, ike owu oriọọn̄be, owuwa ene mîwuuk lek ige mfufuk òfolek otutuuk inu òmọmọnọ irek me etete kiji. ² Ebi ìgege mfufuk chi, ege inu eji enọbe me otu ebi ìsasa chieen̄ kiban̄ imun̄ inu cha okirọ bene me ibebene, mè ikitumu si inu chi isibi inyi ebi ene. ³ Eya orọ, mgbọ emi me lek n̄a mwuwuuk lek ifiat mgbọ iwọlọ iweek ubọk otutuuk inu chi osabe irọ bene me ibebene, mmun̄ si ibe ke îgbe ibe emi ǹge ubọk inu chi orọbe, me onineen̄ me onineen̄, ǹjet owu, ⁴ inyi owu òriọọn̄ atikọ òkup me emen otutuuk inu etumube ijeen̄ owu. ⁵ Me mgbọ ogwu ubọọn̄ Erọdu okikpulu agan̄ Judia, îkaan̄ ogwu ngwugwa ge òkukup, ekigwen Jekaraya. Ọmọ ìnan̄a me owot iman ebi ngwugwa eyi agan̄ kè Abija ogwu owot iman kè Erọn. Nwa ogwu ngwugwa yi ìre Elisabet, ogwu ònan̄a si me owot iman kè Erọn. ⁶ Jekaraya mè Elisabet mîluk ugwem òtatat me isi Awaji, mè ikirọ otutuuk nteme mè ikan geelek Awaji onyibe, kpunu geege ema erọbe ilọ. ⁷ Ire, ema kpekaan̄ gwun̄ geege, mije, Elisabet ìre ora. Ema ene iba cha si mîkan enenen. ⁸ Me mgbọ ge, irek isisi ikwaan̄ me Uwu Mbuban onenikana ire lek ebi owot iman ebi ngwugwa eyi agan̄ kè Abija. ⁹ Ike ọrọmijọn̄ ebi ngwugwa okupbe, eneniroon̄ nriroon̄ iweek ogwu òbosi iwọp nsensi me Ere Mbuban me Uwu Mbuban, mè inisa me ikeya igobo Jekaraya ibe isi. ¹⁰ Mgbọ îrebe mgbọ ekiwọp nsensi, otutuuk ebi ìtititiin̄ ibenitọbọ ebum inyi Awaji ekup me oyet ikiriaak uriaak, mè itele Jekaraya gaalek me agba lek ntook ere îkupbe ikiwọp nsensi me emen Uwu Mbuban. ¹¹ Ogwu osat Okumugwem ge okakana isibi me isi kan̄, mè ikeke me agan̄ ulom ntook nsensi ya. ¹² Mgbọ Jekaraya omun̄be ogwu osat ya, iririki, ukpook otetet. ¹³ Ire, ogwu osat ya otutumu inyi ọmọ ibe, “Jekaraya kafieek owot, mije Awaji înọ ida uriaak kwun̄. Elisabet nwa kwun̄ mônin̄ owot, mè iman gwun̄ enerieen̄ ge inyi owu. Owu mônyi gwun̄ ya erieen̄, Jọn. ¹⁴ Gwun̄ ya môre inu unwọọn̄ mè ubelejit inyi owu. Imaman kan̄ môrọ si inyi owuwa ene enwọọn̄ unwọọn̄, ¹⁵ mije, gwun̄ ya môre ikpele ene me isi Okumugwem. Ire, gwun̄ ya ìkpochak miin̄ gerep geege me otu, ìkponwọnwọ si unye miin̄ geege me ugwem kan̄. Ekwukwu Mbuban môjot gwun̄ ya me emen bene me emen owot ogwu uga. ¹⁶ Gwun̄ ya môrọ inyi owuwa ebi Ijeren egwu ekom egọọk Okumugwem Awaji kiban̄. ¹⁷ Îre ọmọ obodasi inu sabum Okaan̄-ene ònonu. Isinu, môsa òjelek Ekwukwu mè ikpele unye eyi kè Ilaija ogwu nriran inu inisi ikwaan̄. Môgwu ejit ute ikom ifo lek ebi bọn, mè igwu ejit ebi unye ibot ikom ifo lek iriọọn̄-inu eyi ata irọrọ, mè irọ inyi ebi enen̄ebe isun̄ inyi Okaan̄-ene ekup me mbem-lek ekekpọ inunu Okaan̄-ene.” ¹⁸ Jekaraya onenido ogwu osat ya ibe, “Ìre emi m̀bajeje iriọọn̄ ibe ke inu yi môrọ kubọk owu otumube? Mije, mgbọ keyi, emi ìre oka enerieen̄, nwa n̄a si îkan enenen.” ¹⁹ Ogwu osat ya ofọfọọk ọmọ ibe, “Emi ìre Geberen, ǹkikup me isi Awaji. Îre Awaji oria emi ibe emi ǹnenlook owu ata etip yi. ²⁰ Mgbọ keyi, ike owu okachieekge ikọ n̄a, eyi kpolọbe irọrọ iso me mgbọ mgbọ môkembe, owu mônin̄ mbuuk, òkpoyaka ikọt itumu ikọ bene me mgbọ keyi si re usen inu yi môrọbe iso.” ²¹ Otutuuk mgbọ ya, ebi ene mêkikup ikpọ Jekaraya, mè ikikeek inu òrọrọ inyi ọmọ ikup ifiin̄ me emen Ere Mbuban ikeya. ²² Mgbọ Jekaraya onan̄abe isibi inu, ìkakọt ìsan̄a amọn ìnyi ema. Ìyaka ikisa ubọk ubọk ikitọ ijeen̄ ema. Ema erọriọọn̄ ibe ke îra imun̄ ilaak ọkpọchieen̄ me emen Ere Mbuban. ²³ Mgbọ Jekaraya osibe ikwaan̄ kan̄ isan̄a me Uwu Mbuban, isisibi ifo. ²⁴ Ìkajọn̄ọ mgbọ, Elisabet ogwu nwa omọmọnọ onyan̄, mè ichit me uwu onyan̄ go, ²⁵ mè itumu ibe, “Okumugwem îrọ ikpele inu inyi emi. Cherekeyi, Okumugwem îjeen̄ emi imumechieen̄ kan̄, mè isan̄a emi esip me isi me etete ebilene.” ²⁶ Me òso onyan̄ gweregwen Elisabet okupbe me owot, Awaji okpọkpọk iria Geberen ogwu osat ya isi Najeret me Galili, ²⁷ me lek gwun̄ enenwaan̄ ge ikariọọn̄ge enerieen̄, ekigwen Meri, ogwu gwun̄ enerieen̄ ge ekigwen Josefu, otetbe itele ibodo me lek nwa. Josefu yi ìnan̄a me owot iman ogwu ubọọn̄ Debit. ²⁸ Ogwu osat ya osisi lek gwun̄ enenwaan̄ ya, mè itọp ọmọ amọn, ibe, “Nnyi owu amọn, owu ogwu Awaji omabe enenen! Okumugwem òwa melek kwun̄.” ²⁹ Ikọ ya otetet Meri ukpook enenen. Ibebene ikikeek inu amọn ya osibibe. ³⁰ Ogwu osat ya onenitumu inyi ọmọ ibe, “Meri, katet ukpook. Awaji îkeke inyi owu. ³¹ Owu mônin̄ owot, mè iman gwun̄ enerieen̄. Owu mônyi gwun̄ ya erieen̄, Jisọs. ³² Gwun̄ ya môre ikpele ene, mêgwen ọmọ Gwun̄ Awaji Òbebene Ichit. Okumugwem Awaji môrọ gwun̄ ya ubọọn̄ inyi inibọkọ irek ubọọn̄ kè Debit ogwu ute. ³³ Gwun̄ ya môkikpulu otutuuk ebi owot iman kè Jekọp ire mgbọ ikakaan̄ge itata. Mkpulu kan̄ ìkpokaan̄ okputut.” ³⁴ Meri onenido ogwu osat ya ibe, “Ìre inu yi ìbojeje irọ? Mije, emi ǹkariọọn̄ enerieen̄.” ³⁵ Ogwu osat ya obebe ọmọ, “Ekwukwu Mbuban mônu me lek kwun̄, unye Awaji Ogwu Òbebene Ichit môkana ichit owu. Mije keya, gwun̄ ya owu oboman môre gwun̄ òkup mbuban, mêkigwen ọmọ Gwun̄ Awaji. ³⁶ Ofifi si, Elisabet ogwu uwu kinyi înin̄ owot me ukan. Me mgbọ keyi, owot onyan̄ gweregwen okup me lek ogwu enenwaan̄ ya ogwu otutuuk ene ekigwen ogwu ora, ³⁷ mije, kpunu inu geege òyọyọt igak Awaji irọrọ.” ³⁸ Meri onenitumu inyi ogwu osat ya ibe, “Emi ìre gwun̄ usun̄ Okumugwem. Ike owu otumube, nchieek, ikup si ikeya melek n̄a.” Mgbọ Meri otumube ikọ yi isan̄a, ogwu osat ya otetele ọmọ. ³⁹ Meri ogwagwat lek ineen̄ lek, mè inan̄a ije isi gwun̄ ama ere Jekaraya mè Elisabet elukbe, me inyọn̄ ogoon̄ me agan̄ Judia. ⁴⁰ Mgbọ îrebe ama ya, ijeje isi inin̄ uwu kè Jekaraya, mè imun̄ Elisabet, mè itọp amọn. ⁴¹ Elisabet inọnọ amọn kè Meri, gwun̄ òkup me owot kan̄ okpọkpọ itọp lek ikana. Ekwukwu Mbuban oninin̄ ijot emen kè Elisabet. ⁴² Itataan̄ ukpo itumu inyi Meri ibe, “Owu ore enenwaan̄ ogwu Awaji ogbanabe ichit me etete otutuuk ebibaan̄. Gwun̄ yi owu oboman si ìre gwun̄ egbanabe. ⁴³ Jei, ìre umin òkup ikeyi ìjeje ire emi lek, ibe ke owu nga Okaan̄ n̄a oyaka ikinu inikpọ emi? ⁴⁴ Mgbọ yaage nnọbe ida amọn kwun̄, gwun̄ òkup emi me owot okpọkpọ inwọọn̄ unwọọn̄, mè itọp lek ikana. ⁴⁵ Awaji igbana owu, mije, owu ochieek ibe ke ida ikọ Okumugwem môrọ iso.” ⁴⁶ Meri onenitumu ibe, “Ibot ejit n̄a îtọn̄ Okumugwem. ⁴⁷ Emi nnwọọn̄ unwọọn̄, mije inu Awaji ogwu Unyan̄a n̄a orọbe inyi emi. ⁴⁸ Mije, Okumugwem ìkawuuk emi, usun̄ kan̄ enenwaan̄ ogwu irek kan̄ osikibe. Bene mè mgbọ keyi fo isi, otutuuk ebilene me ukot geelek mêkigwen emi ogwu egbanabe, ⁴⁹ mije, Awaji ilile îrọ ikpele inu inyi emi. Erieen̄ Awaji îkup mbuban. ⁵⁰ Me ukot me ukot, Awaji îkikaan̄ ejit nsan me lek ebi geelek ìkinyi ọmọ ulibi. ⁵¹ Awaji îsa unye kan̄ isi ikpele ikwaan̄. Îyiyala ebi ìkigumu lek, mè ijijaka nkeek kiban̄ geelek. ⁵² Îsan̄a ebi ibot mkpulu me inyọn̄ ogboon̄ mkpulu kiban̄, mè ibene ebi irek kiban̄ osikibe ifo inyọn̄. ⁵³ Îsa owuwa ata inu inyi ebi uraafiọọn̄ okitaka, mè ilap ebi ìbọbọọn̄ ubọọn̄ isan̄a ukpọk ubọk. ⁵⁴ Îtap ubọk inyi ebi kan̄, ebi Ijeren. ⁵⁵ Ìkawuuk ikakaan̄ ejit nsan me lek kè Ebereham mè bọn owot iman kan̄ ire mgbọ geelek, kubọk îchieekbe use inyi ebi nte nte kiji me ukot ikaan̄.” ⁵⁶ Meri îgọọk Elisabet ikup iso onyan̄ ita sabum înigwu ikom ifo Najeret. ⁵⁷ Onyan̄ isoso me lek kè Elisabet, îmaman gwun̄ enerieen̄. ⁵⁸ Ebi uwu kiban̄ mè ebi melek kiban̄ elukbe me ere ge enọnọ ikpele ata inu yi Okumugwem orọbe inyi Elisabet, mè inu inigọọk ọmọ inwọọn̄ unwọọn̄. ⁵⁹ Òso egwe jeeta, ema enunu si ibenigọọk ifieek gwun̄ ya afi, mè iben me ejit isasa gwun̄ ya isan̄a Jekaraya, ogwu ute. ⁶⁰ Ire, nga gwun̄ ya otutumu inyi ema ibe ke kpebesa gwun̄ ya isan̄a ogwu ute; ke ebegwen gwun̄ ya Jọn. ⁶¹ Ema edodo ọmọ ibe, “Ìre ekene okichieek erieen̄ keya me uwu kinyi?” ⁶² Ema enenisa ubọk ubọk itọ inyi ogwu ute ibe mè ìre ebegwegwen gwun̄ ya ye? ⁶³ Jekaraya osasa ubọk ubọk itọ ibe enyi ọmọ uwot ige-inu. Mgbọ esabe uwot ya ijet, igege ibe, “Erieen̄ kan̄ ìre Jọn.” Inu ya okeke otutuuk ene chieen̄. ⁶⁴ Mgbọ yaage alọm kan̄ otọtọn̄ọ, ibebene ikitumu ikọ, mè ikitọn̄ Awaji. ⁶⁵ Ukpook otetet ebi ife cha ìnunu enenen. Etip inu chi òrọrọ otataan̄ ikana otutuuk agan̄ Judia ya òkup me inyọn̄ ogoon̄. ⁶⁶ Ebi ìnọnọ ekekibe, “Ìre kpasi gwun̄ ire yi? Sa ìre gwun̄ yi ìbokana keke mọnọ?” Mije, otutuuk ene mîmun̄ ibe ke ubọk Okumugwem me lek gwun̄ ya okupbe. ⁶⁷ Ekwukwu Mbuban onenijot emen kè Jekaraya, ibebene ikiben nriran ibe, ⁶⁸ “Itọn̄ ikup inyi Okumugwem Awaji ebi Ijeren, mije, înu ininyan̄a ebi kan̄, mè ifaka ema isibi. ⁶⁹ Înyi eji ikpele Ogwu Unyan̄a inan̄a me ototun̄ ukan̄ kè Debit ogwu usun̄ kan̄, ⁷⁰ kubọk îtumube inan̄a me otu ebi nriran kan̄, karake ukot ikaan̄, ⁷¹ ibe ke ọmọ mônyan̄a eji isibi me ubọk ebi ochicha kiji mè ebi geelek ekamage eji; ⁷² ke ọmọ môkaan̄ ejit nsan me lek ebi nte nte kiji, mè ikeek inyan̄a-ibot kan̄ eyi òkup mbuban. ⁷³ Îchieek si use inyi Ebereham nte kiji ibe ⁷⁴ ke ọmọ môsan̄a eji isibi me ubọk ebi ochicha kiji, mè irọ inyi eji ekayaka ìtọbọ ebum ìnyi ọmọ me ukpook, ⁷⁵ mè isun̄ eji esese inyi lek kan̄, inyi eji etana me isi kan̄ usen geelek me ugwem kiji. ⁷⁶ Owu gwun̄ n̄a, mêgwen owu ogwu nriran Awaji Òbebene Ichit, mije, owu obodasi ije me isi Okaan̄-ene, mè isi inen̄e oniin̄ isun̄ iban ọmọ, ⁷⁷ mè isi ilook ebi eyi kan̄ ibe ke Awaji môtele ijo kiban̄ inyi ema, mè isa me ikeya inyan̄a ema isibi. ⁷⁸ Awaji kiji môsa me ejit nsan kan̄ inyi eji ogwu unyan̄a ogwu mônube me lek kiji kubọk ìre egwe owele itoon̄ eji me lek, ⁷⁹ mè isa utoon̄ ònan̄a me emen inyọn̄ initoon̄ me lek otutuuk ebi ìluk me emen ikpele udun, ebi ìkup me emen ubọk mkpa mgbọ geelek. Awaji môsa me ikeyi ijeen̄ eji oniin̄ eyi esuuk.” ⁸⁰ Gwun̄ ya okekimin me akpalek mè emen iriọọn̄-inu eyi Awaji, mè iluk me emen èwê mege ire mgbọ îsan̄abe lek kan̄ isibi ijeen̄ ebi Ijeren.

¹ Me ike mgbọ ya, Ọgọsitọs, ogwu Sisa òkikpulu ido Rom, oneninyi ikan ibe efuk otu ifuk ene me otutuuk ido geelek ebi Rom ekikpulu. ² (Eyi ore adasi mgbọ efukbe ene. Ifuk-ene yi ìmọnọ irek me mgbọ Kwiriniọs orebe ogwu ibot mkpulu me ido Siria.) ³ Otutuuk ene efofon ama kiban̄ igọọk isi itap erieen̄ me ikpa. ⁴ Ikeya si ke Josefu onan̄a me Najeret òkup me Galili ifo Betelehem, ama iman kè Debit òkup me ido Judia, mije, ọmọ ìre gwun̄ owot iman kè Debit. ⁵ Josefu osasa Meri ogwu ìbodo igbaalek ije. Mgbọ ya owot îmin me lek kè Meri. ⁶ Mgbọ ema ekupbe me Betelehem ya, mgbọ uman kan̄ okekem. ⁷ Imaman adasi gwun̄ kan̄, gwun̄ enerieen̄, mè isa ekwut ikaan̄-gwun̄ ikat gwun̄ ya, mè iben imaan̄ me uwu anam, me emen okwa ekisa itap inorie inyi anam, mije, ema kpekaan̄ irek igọọk ikup me uwu ebi ichen. ⁸ Îkaan̄ ebi ìkpukpo arọọn̄ ìkup me ere ema ekikpukpo anam, me agba lek ama ya, ikibem arọọn̄ kiban̄ me eririeen̄. ⁹ Ogwu osat Okumugwem okakana isibi me etete kiban̄, utoon̄ eyi umin Okumugwem ototoon̄ ikana ere ya, ukpook otetet ema. ¹⁰ Ire, ogwu osat ya obebe ema, “Ikatet ukpook, mije, îre ata etip eyi òborọ inyi otutuuk ene enwọọn̄ unwọọn̄ enenen ke nsa ijet enyi. ¹¹ Cherekeyi, me emen ama kè Debit, mîman Ogwu Unyan̄a inyi enyi. Ogwu Unyan̄a yi ìre Karais Okaan̄-ene. ¹² Inu enyi ebesa iriọọn̄ ìre ke enyi mêmun̄ gwun̄ esabe ekwut ikaan̄-gwun̄ ikat, mè iben imaan̄ me emen okwa ekisa inyi anam inorie.” ¹³ Mgbọ yaage, ogbogbo ebi osat enanan̄a me emen inyọn̄ isibi inu inigọọk adasi ogwu osat ya ikeke, mè ikikọt okwa itọn̄ Awaji ibe, ¹⁴ “Itọn̄ mè umin ikup inyi Awaji me emen inyọn̄ ere òbebene ichit. Esuuk ikup me linyọn̄ inyi ebilene ebi Awaji okaan̄be ata ejit me lek.” ¹⁵ Mgbọ ebi osat cha enan̄abe itele ema, mè ifo emen inyọn̄, ema etọtọt ibe mè ema enesi Betelehem esi ekpọ inu ya òrọrọ, eyi Okumugwem otumube inyi ema. ¹⁶ Ema enenilibi ekot ekot isi, mè isi imun̄ Meri mè Josefu, mè imun̄ si gwun̄ ya olaakbe me emen okwa. ¹⁷ Mgbọ ema emun̄be gwun̄ ya, ema ekpakpa otutuuk inu ogwu osat ya otumube inyi ema òfolek gwun̄ ya inyi ebi ene me ere ya. ¹⁸ Ukpatu ya okeke otutuuk ebi ìnọnọ chieen̄ enenen. ¹⁹ Ire, Meri otetet otutuuk inu cha ikaan̄ me ejit, mè ikikeek inu ikọ chi osibibe. ²⁰ Ebi ìkpukpo arọọn̄ cha egwugwu ikom ifo ere ema enan̄abe, mè ikitọn̄ Awaji, mè ikinyi ọmọ umin, mije otutuuk inu ema enọbe, mè isa chieen̄ kiban̄ isi imun̄, kubọk ogwu osat ya otumube inyi ema. ²¹ Òso egwe jeeta, mgbọ ebefieek gwun̄ ya afi, enenisan̄a ọmọ erieen̄, Jisọs, òrere erieen̄ eyi ogwu osat Awaji onyibe ọmọ sabum enin̄be owot kan̄. ²² Mgbọ Meri okupbe iso otu ifuk usen mfaka igwọk-lek, igọọk me lek Ikan kè Mosis, ema eneniben gwun̄ ya isa isi Jeruselem isi iyaka itap me ubọk Okumugwem, ²³ kubọk egebe me Ikan Okumugwem ibe esa gwun̄ uchili-owot geelek òrere enerieen̄ eyaka enyi Okumugwem kubọk ngwugwa. ²⁴ Ema enenisi Jeruselem ya isisi igwa ngwugwa igwọk-lek kubọk egebe me Ikan Okumugwem. Ngwugwa ya, ekisa ekerekwukwu iba, mè ìre bọn elesia iba igwa. ²⁵ Me ike mgbọ ya, îkaan̄ ogwu enerieen̄ ge òkup me Jeruselem, ekigwen Simiọn. Ogwu enerieen̄ yi ìre ogwu ata irọrọ òkekeke inye melek Awaji enenen, mè ikikpọ chieen̄ mgbọ Awaji mônyan̄abe ebi Ijeren isibi. Ekwukwu Mbuban òwa si melek kan̄. ²⁶ Ekwukwu Mbuban îwuuk lek itumu inyi ọmọ ibe ke ogwugwu ìkpokwu, îtata ìsasa chieen̄ kè ogwugwu imun̄ ogwu Awaji otoon̄be ubọk me ibot ya, ogwu Okumugwem oboria inu. ²⁷ Ekwukwu Mbuban onenisa ogwu enerieen̄ yi isi oyet egep Uwu Mbuban. Josefu mè Meri enenisa Jisọs inu me Uwu Mbuban inenirọ ọrọmijọn̄ eyi Ikan kiban̄. ²⁸ Simiọn obọbọkọ gwun̄ ya ikaan̄ me ubọk kan̄, mè inyi Awaji itọn̄ ibe, ²⁹ “Okumugwem, owu ora irọ use kwun̄ iso. Eya orọ, mgbọ yi, tele mè emi ogwu usun̄ kwun̄ m̀fo me esuuk. ³⁰ Mije, nra isa chieen̄ n̄a imun̄ unyan̄a kwun̄, ³¹ eyi owu oneen̄be isun̄ me isi ebi otutuuk ido geelek, ³² inyi inire utoon̄ eyi òbonichili oniin̄ unyan̄a kwun̄ inyi ebi ekarege ebi Ju, mè irọ inyi ebi kwun̄ Ijeren ekaan̄ umin.” ³³ Inu chi Simiọn otumube ibak Jisọs okeke nte kan̄ mè nga kan̄ chieen̄ enenen. ³⁴ Simiọn onenigbana ema, mè itumu inyi Meri ogwu uga ibe, “Kpọ, Awaji ìria gwun̄ yi inu ibe inirọ inyi owuwa ene me etete ebi Ijeren enan̄a erọn̄, mè irọ si inyi owuwa ene enan̄a ekeke, me Ijeren. Gwun̄ yi môre inu ijejeen̄ ònan̄a me ubọk Awaji, eyi ebi ene ebekitumu ikọ ikeme. ³⁵ Sa me ikeyi, owuwa nlelet nkeek òkup ebi ene me emen ejit môkpọk mbum. Owu me lek kwun̄ si, ikpele ufieejit ibot gwun̄ yi môchim owu ejit igwak kubọk oge akọn̄.” ³⁶ Me usen ya, ogwu nriran enenwaan̄ ge ekigwen Ana, òwa si me Uwu Mbuban ya. Ọmọ ìre gwun̄ kè Fanuen ogwu ònan̄a me owot iman kè Ase. Ogwu enenwaan̄ ya îkan enenen. Îbat olom, mè igọọk ogwu olom iluk acha jaaba gaalek, ogwu olom okwukwu. ³⁷ Ogwu enenwaan̄ ya oluluk kubọk nwakpa ire mgbọ yi îsobe akọp acha jeeta mè ini. Otutuuk mgbọ ya, ìkanan̄a ìsibi ìtele Uwu Mbuban. Ìkup me ere ya ikisi ikwaan̄, mè ikitọbọ ebum inyi Awaji, eririeen̄ mè ikarek, me uriaak mè ijin otu. ³⁸ Ogwu enenwaan̄ ya onenichichini Simiọn mè gwun̄ ya mè Meri mè Josefu mgbọ ya, mè itọn̄ Awaji mije gwun̄ ya, mè itumu si ikọ òfolek gwun̄ ya inyi otutuuk ebi ìkikpọ chieen̄ mgbọ Awaji obonyan̄a ebi Jeruselem isibi. ³⁹ Mgbọ Josefu mè Meri erọbe otutuuk inu iso igọọk me lek Ikan Okumugwem onyibe, ema egwugwu ikom inan̄a me Jeruselem ika Najeret ama kiban̄, me Galili. ⁴⁰ Gwun̄ ya okekimin, mè inye lek, mè ikaan̄ iriọọn̄-inu enenen. Awaji ogbagbana ọmọ si me agan̄ geelek. ⁴¹ Acha geelek, mgbọ ijọk Iraraka isikem, nte kè Jisọs mè nga kè Jisọs mîkigọọk isi Jeruselem. ⁴² Mgbọ Jisọs osobe akọp mè acha iba, ema egọgọọk isi irie ijọk Iraraka ya si, igọọk me lek ọrọmijọn̄ kiban̄. ⁴³ Mgbọ ijọk ya otabe, ogwu ute mè ogwu uga enenigwu ikom ikije ifo ama kiban̄. Jisọs obabia me Jeruselem. Ire, ema kperiọọn̄. ⁴⁴ Ubọk ema ekikeek ibe ke Jisọs melek kiban̄ ekije, ema mîje ije otutuuk egwe ge sabum enibene ikiweek ọmọ me etete ebi otoko kiban̄ mè ebi unene kiban̄. ⁴⁵ Mîweek ọmọ igak, kpemun̄. Ema egwugwu ikom isi Jeruselem isi iweek. ⁴⁶ Òso egwe ita, ema eneniweek ọmọ imun̄ me Uwu Mbuban ike îkweekbe irek me etete ebi ìkijeen̄ Ikan kè Mosis, mè ikigban̄ inu ife cha ekitumu, mè ikido si ema ikọ. ⁴⁷ Ufọọk-otu kè Jisọs, mè ubọk îsabe ikigobo inu itet îke otutuuk ebi ìnọnọ chieen̄ enenen. ⁴⁸ Mgbọ ogwu ute mè ogwu uga enube inimun̄ ọmọ me etete ife cha, îkwu ema lek. Ogwu uga onenibe ọmọ, “Gwun̄, ìre keke ire eyi owu orọbe eji ikeyi? Nte kwun̄ melek n̄a mîfieek owot, mè inyinya ikana ere iweek owu igak, eji kpemun̄ owu.” ⁴⁹ Jisọs onenido ema ibe, “Ìre keke orọ enyi ekiweek emi? Ìre enyi kperiọọn̄ ibe ke mâkup me uwu Nte n̄a?” ⁵⁰ Ire, nte kan̄ mè nga kan̄ kpekọt itet ibot me lek ikọ ya îtumube. ⁵¹ Jisọs idodo ema ikọ ya isan̄a, inanan̄a ikeke, mè igọọk ema ije ifo Najeret, mè ikisiki ibot inyi ema. Ire, ogwu uga otetet otutuuk inu cha ikaan̄ me ejit. ⁵² Jisọs okekimin isibi, mè iriọọn̄ inu, mè inwọn isi me isi Awaji melek ebilene.

¹ Me òso akọp mè acha go eyi ogwu Sisa ekigwen Taiberiọs orebe ogwu ibot mkpulu me Rom, mgbọ ya ke Pọntiọs Pailet okikpulu agan̄ Judia, Erọdu okekikpulu agan̄ Galili. Filip ngwan̄ kè Erọdu okikpulu agan̄ Ituria mè agan̄ Tarakonaitis. Laisanias okekikpulu agan̄ Abilin. ² Mgbọ ya si ke Anas mè Keyefas ere ebi ibot ngwugwa me Jeruselem. Me emen mgbọ ya, Awaji onenigwen Jọn gwun̄ kè Jekaraya me emen èwê iria ikwaan̄. ³ Jọn obebene ikijijen̄e ikana otutuuk ama òkup me agba okwaan̄ Jọdan ikilook ebi ene etip ibe, “Ìgwu ìkom me emen ijo kinyi, mè ìnigwook mun̄, inyi Awaji itele ijo kinyi inyi enyi.” ⁴ Inu yi îje itat me lek inu egebe me emen ikpa ogwu nriran Asaya ibe, “Ida ge òkitaan̄ ukpo me emen èwê ibe, ‘Ìnen̄e oniin̄ ìsun̄ ìban Okaan̄-ene, ìrọ oniin̄ òtatat ìnyi ọmọ. ⁵ Mêtọm otutuuk iteke geelek, inyi ibene ikeke, mè ibak otutuuk orioon̄ mè ogoon̄ geelek igwook, inyi ijọn̄ ilibi ìkike. Mêrọ inyi otutuuk oniin̄ òkukukọnọ ilibi itat, mè irọ si inyi oniin̄ geelek òkup kpunukpunukpunu irọt. ⁶ Otutuuk ebi ido geelek mêmun̄ Ogwu Unyan̄a Awaji oriabe inu.’ ” ⁷ Ogbogbo ene egbugbuku isibi inu, ibe Jọn inigwook ema mun̄. Mgbọ Jọn omun̄be ife chi, itutumu inyi ema ibe, “Enyi bọn ijo ulu kechi! Ìre ekene oteme enyi ibe enyi elibi enwọnọ unaan̄-ejit Awaji eyi òbonunu? ⁸ Ìkirọ ata irọrọ eyi òbokijeen̄ ibe ke enyi mîgwu ikom me atikọ. Ikakpọkpọ ìkup ìkitumu ìbe ke enyi ìre bọn kè Ebereham, mè ìkikeek ibe ke enyi mêsa me ikeya inwọnọ osusut Awaji. Ǹkitumu inyi enyi ibe ke Awaji môkọt irọ inyi ewuuk chi òkup me ere yi ikana bọn inyi Ebereham. ⁹ Mgbọ yi, mîto otuban itele me ebon uti geelek. Ire ikaan̄ uti ikatoge ata mfut, mêcho ito, mè iben itọp itap me ukan̄.” ¹⁰ Ebi ife cha enenikido ọmọ ibe, “Mgbọ keyi, ìre keke ke eji eberọ?” ¹¹ Jọn ofọfọọk ema ibe, “Ogwu òkaan̄ ọfọnti iba, iche ge inyi ogwu ikakaan̄ge geege. Ogwu òkaan̄ inorie, iche si inyi ogwu ikakaan̄ge.” ¹² Ebi ìkibọkọ otitip ido otutuuk mîgọọk inu ibe Jọn inigwook ema mun̄, mè inido Jọn ibe, “Ogwu ijejeen̄, eyi kiji, ìre keke ke eji eberọ?” ¹³ Jọn ofọfọọk ema ibe, “Ikabọkọ otitip ìwa ìraka ike ebe enyi ebọkọ.” ¹⁴ Usini ebi akọn̄ mîgọọk inu si me ere ya, mè inido ọmọ ibe, “Sa eji ye? Ìre keke ke eji eberọ?” Jọn ofọfọọk ema ibe, “Ikakisa me unye ubọk ìtet ebi ene ìbọkọ ikpoko. Ikakitoon̄ ene geege uraamọn ataak. Ìtele inyi mkpukpe geelek ekikpe inyi enyi ijot enyi chieen̄.” ¹⁵ Ebi Ju mîkaan̄ ikpọchieen̄ òmimin enenen me lek inunu ogwu Awaji otoon̄be ubọk me ibot ya. Eya orọ, mgbọ Jọn okijeen̄ inu me ere ya, ema ekekikeek me emen ejit kiban̄ ibe ke Jọn môkọt ire ogwu ene ya. ¹⁶ Jọn otutumu inyi ema otutuuk ene ibe, “Emi ǹkisa mun̄ ikike igwook enyi mun̄. Ire, ene ge òmimin igak emi mônu. Emi me lek n̄a ǹkagbe ogwu òbotọn̄ọ olik ikpukot ene ya. Ene ya isinu, ìbosa Ekwukwu Mbuban mè ukan̄ igwook enyi mun̄. ¹⁷ Ene ya îkaan̄ ugen̄ sanasana otu kan̄ me ubọk, eyi ìbosa igen̄ mfufe isan̄a me lek akpa, mè ikpulu akpa cha isi itap me emen uwu isun̄-inu kan̄, mè ikpulu mfufe cha isi itap me emen ukan̄ eyi ìkakiniin̄.” ¹⁸ Jọn îtumu si owuwa ikọ isa igbaalek iteme ife cha nteme mgbọ îkilook ema ata etip ya. ¹⁹ Jọn îtumu ikọ ikeme Erọdu ogwu ibot mkpulu mije îtetbe Erọdias, nwa ogwu ngwan̄ Filip, ibọkọ isa irọ nwa kan̄, igbaalek owuwa ijo inu òkup esese esese echi Erọdu orọbe me ugwem kan̄. ²⁰ Erọdu otetet Jọn itap me mkpọn, mè isa ijo inu keya itap isọkọ me lek otutuuk ijo inu îwuukbe lek irọrọ iraka. ²¹ Mgbọ Jọn okigwook otutuuk ene cha mun̄, îgwook si Jisọs mun̄. Mgbọ Jisọs okiriaak uriaak, emen inyọn̄ ochichili ibook. ²² Ekwukwu Mbuban onanan̄a me emen inyọn̄ iwulu isiki inu kubọk ekerekwukwu, mè inisọọk ọmọ me lek. Ida ge onanan̄a me emen inyọn̄ ikitumu ibe, “Owu ìre gwun̄ n̄a ogwu mmabe, ejit n̄a îbele me lek kwun̄ enenen.” ²³ Jisọs ìre akọp acha ita mgbọ îbenebe isi ikwaan̄ kan̄. Ebi ene ekigwen ọmọ gwun̄ kè Josefu. Josefu ìre gwun̄ kè Eli. ²⁴ Eli orere gwun̄ kè Matat, Matat orere gwun̄ kè Libai, Libai orere gwun̄ kè Meliki, Meliki orere gwun̄ kè Jana, Jana orere gwun̄ kè Josefu. ²⁵ Josefu orere gwun̄ kè Matatayas, Matatayas orere gwun̄ kè Emọs, Emọs orere gwun̄ kè Nahum, Nahum orere gwun̄ kè Esili, Esili orere gwun̄ kè Nagai. ²⁶ Nagai orere gwun̄ kè Maati, Maati orere gwun̄ kè Matatayas, Matatayas orere gwun̄ kè Semeyin, Semeyin orere gwun̄ kè Josek, Josek orere gwun̄ kè Joda. ²⁷ Joda orere gwun̄ kè Jowanan, Jowanan orere gwun̄ kè Resa, Resa orere gwun̄ kè Jerubaben, Jerubaben orere gwun̄ kè Siatien, Siatien orere gwun̄ kè Neri, Neri orere gwun̄ kè Meliki. ²⁸ Meliki orere gwun̄ kè Adi, Adi orere gwun̄ kè Kosam, Kosam orere gwun̄ kè Elimadam, Elimadam orere gwun̄ kè Eri, Eri orere gwun̄ kè Josuwa. ²⁹ Josuwa orere gwun̄ kè Elieja, Elieja orere gwun̄ kè Jorim, Jorim orere gwun̄ kè Matat, Matat orere gwun̄ kè Libai. ³⁰ Libai orere gwun̄ kè Simiọn, Simiọn orere gwun̄ kè Juda, Juda orere gwun̄ kè Josefu, Josefu orere gwun̄ kè Jonam, Jonam orere gwun̄ kè Eliakim. ³¹ Eliakim orere gwun̄ kè Meleya, Meleya orere gwun̄ kè Mena, Mena orere gwun̄ kè Matata, Matata orere gwun̄ kè Netan, Netan orere gwun̄ kè Debit. ³² Debit orere gwun̄ kè Jesi, Jesi orere gwun̄ kè Obedi, Obedi orere gwun̄ kè Bowaji, Bowaji orere gwun̄ kè Salimọn, Salimọn orere gwun̄ kè Nasiọn. ³³ Nasiọn orere gwun̄ kè Aminadap, Aminadap orere gwun̄ kè Adimin, Adimin orere gwun̄ kè Ani, Ani orere gwun̄ kè Ejirọn, Ejirọn orere gwun̄ kè Pereji, Pereji orere gwun̄ kè Juda. ³⁴ Juda orere gwun̄ kè Jekọp, Jekọp orere gwun̄ kè Ajiki, Ajiki orere gwun̄ kè Ebereham, Ebereham orere gwun̄ kè Tera, Tera orere gwun̄ kè Nahọ. ³⁵ Nahọ orere gwun̄ kè Serugu, Serugu orere gwun̄ kè Rewu, Rewu orere gwun̄ kè Pelegi, Pelegi orere gwun̄ kè Eberi, Eberi orere gwun̄ kè Siela. ³⁶ Siela orere gwun̄ kè Keyinan, Keyinan orere gwun̄ kè Afakisadi, Afakisadi orere gwun̄ kè Siem, Siem orere gwun̄ kè Nuwa, Nuwa orere gwun̄ kè Lemek. ³⁷ Lemek orere gwun̄ kè Metusela, Metusela orere gwun̄ kè Enọk, Enọk orere gwun̄ kè Jaredi, Jaredi orere gwun̄ kè Mahalalen, Mahalalen orere gwun̄ kè Keyinan. ³⁸ Keyinan orere gwun̄ kè Enọs, Enọs orere gwun̄ kè Set, Set orere gwun̄ kè Adam, Adam onenire gwun̄ Awaji.

¹ Jisọs onenije inan̄a me agba okwaan̄ Jọdan ya, mè Ekwukwu Mbuban me emen kan̄. Ekwukwu Mbuban onenisa ọmọ ifo emen èwê. ² Ere ya ke Yọk otọ ọmọ ikpọ akọp usen ini. Me otutuuk usen cha îkupbe me ere ya, ìkarie inorie geege. Uraafiọọn̄ otataka ọmọ enenen mgbọ usen cha otabe. ³ Yọk onunu me lek kan̄, mè itumu inyi ọmọ ibe, “Ire owu ore Gwun̄ Awaji, tumu-nu nyi ewuuk chi ibe ikana inorie.” ⁴ Jisọs ofọfọọk ọmọ ibe, “Ege me Ikpa Mbuban ibe, ‘Ìkare inorie gaalek ke ene obokisa iluk ugwem.’ ” ⁵ Yọk onenisa Jisọs ije isi inene ere ge òbebene, mè isa sọntiik mgbidim mgbọ ikeke me ere yaage ijeen̄ ọmọ otutuuk ama ubọọn̄ geelek eyi linyọn̄ keyi ere ebilene elukbe, ⁶ mè initumu inyi ọmọ ibe, “Kpọ, emi mâyaka otutuuk inu ubọọn̄ eyi ama ubọọn̄ chi, mè unye isasa ikikpulu ema otutuuk inyi owu, mije, mîyaka otutuuk kiban̄ itap emi me ubọk. Emi mâkọt iyaka ema inyi ene geelek òneneme emi. ⁷ Eya orọ, ire owu otọbọ ebum inyi emi, otutuuk ama ubọọn̄ chi môkana ire echi kwun̄.” ⁸ Jisọs ofọfọọk ọmọ ibe, “Ege me Ikpa Mbuban ibe, ‘Tọbọ ebum nyi Okumugwem Awaji kwun̄, mè kisi ikwaan̄ nyi ọmọ gaalek.’ ” ⁹ Yọk osasa Jisọs isi me ere òbebene ichit me inyọn̄ Uwu Mbuban me Jeruselem, mè itumu inyi ọmọ ibe, “Ire owu ore Gwun̄ Awaji, nan̄a me ere yi wulu keke me ijọn̄ nu. ¹⁰ Mije, ege me Ikpa Mbuban ibe, ‘Awaji mônyi ebi osat kan̄ ida ibe eriọọn̄ ubọk ekpọ owu chieen̄ me lek. ¹¹ Ebi osat cha mêben owu ikaan̄ me ubọk kiban̄, inyi owu okatọbọ ukot me lek ewuuk.’ ” ¹² Jisọs ofọfọọk ọmọ ibe, “Ege me Ikpa Mbuban ibe, ‘Katọ Okumugwem Awaji kwun̄ ìkpọ.’ ” ¹³ Yọk itọtọ Jisọs ikpọ me agan̄ geelek isan̄a, itetele ọmọ, mè ikikup ikpọ mgbọ ọmọ môyakabe ikaan̄ ofifi irek ikpọk initọ Jisọs ikpọ. ¹⁴ Jisọs onenigwu ikom ika inu Galili, melek unye Ekwukwu Mbuban me emen kan̄. Etip kan̄ otataan̄ ikana otutuuk agan̄ ya. ¹⁵ Inenikijeen̄ inu me uwu ntitiin̄ òkup me ama cha. Otutuuk ene ekekitọn̄ ọmọ. ¹⁶ Jisọs oneninan̄a me agan̄ ya ije isi Najeret ere ekpukpobe ọmọ isibi, mè ije isi uwu ntitiin̄ kiban̄ me Usen Mbuban, ike îkirọ me Usen Mbuban geelek. Ineninan̄a ikeke ibofuk Ikpa Mbuban. ¹⁷ Enenisa ikpa ogwu nriran Asaya ijet ọmọ ibe ifuk. Ibọbọkọ, mè ichili. Chieen̄ kan̄ ototoon̄ me ere ge, ifufuk. Ere chieen̄ kan̄ otoon̄be ya ìre ere egebe ibe, ¹⁸ “Ekwukwu Okumugwem òwa me lek n̄a, mije, Okumugwem îgobo emi ibe emi ǹsi ǹlook ebi ugbọọn̄ ata etip. Îria emi ibe ǹsi ǹlook ebi ìkup me mkpọn ibe ke mîsan̄a ebibi isibi me mkpọn, mè ǹsi ǹlook ebi ǹnàan̄ ibe ke ebibi mêkọt imọọn̄ inu, mè ǹsan̄a ebi ekirọ ikeme ǹsibi me irak ubọk ufialek, inyi ekaan̄ utelelek. ¹⁹ Îria emi si ibe emi ǹnu ǹnenlook ibe ke mgbọ Okumugwem obonyan̄a ebi kan̄ isibi îre.” ²⁰ Jisọs ifufuk isan̄a, ichichit ikpa ya, mè iyaka itap me ubọk ogwu ikwaan̄ me uwu ntitiin̄ ya, mè isiki ikweek irek. Otutuuk ebi ìkup me uwu ntitiin̄ ya ekpọkpọ igwuun̄ ọmọ chieen̄ me lek. ²¹ Inenitumu inyi ema ibe, “Cherekeyi, inu yi egebe me Ikpa Mbuban, eyi enyi esabe utọn̄ kinyi inọ, îrọ iso me chieen̄ kinyi.” ²² Ata ikọ òkinan̄a ọmọ me otu isibi okpọkpọ ikitop otutuuk ebi ìkup me uwu ntitiin̄ ya me lek, mè ike ema chieen̄ enenen. Ema ekekitumu ibe, “Ìre ìkafat ìre gwun̄ kè Josefu ore ogwu?” ²³ Jisọs onenitumu inyi ema ibe, “Emi nriọọn̄ ibe ke enyi mêto urọk inyi emi ibe, ‘Ogwu ofia, gwa lek kwun̄ nu! Inu cha geelek eji enọbe ibe ke owu orọ me Kapanọm, rọ-nu inu cha me ere keyi, òrere ama kwun̄, inyi eji egọọk emun̄.’ ” ²⁴ “Me atikọ, ǹkitumu inyi enyi ibe ke ogwu nriran ìkakikaan̄ umin me ama kan̄. ²⁵ Me atikọ, owuwa ebi nwakpa òwa me Ijeren me ukot kè Ilaija ogwu nriran, me mgbọ ibot ikayakage ìrep otutuuk acha ita mè onyan̄ gweregwen, eyi ikpele akan̄ onin̄be ikana otutuuk ido geelek. ²⁶ Ire, Awaji ìkaria Ilaija ìsi me lek nwakpa Ijeren geege. Kpan̄asi ikeya, Awaji ìria Ilaija isi me lek nwakpa ge me ama Jerefat me agan̄ Saidọn. ²⁷ Ikeya si, owuwa ebi orukan̄ inyakpa òwa me Ijeren me ukot kè Ilaisia ogwu nriran. Ire, kpunu ene geege me etete kiban̄ ogwu Ilaisia ogwabe. Kpan̄asi ikeya, îre Nieman ogwu ònan̄a me ido Siria gaalek ke Ilaisia ogwa.” ²⁸ Otutuuk ebi ìkup me uwu ntitiin̄ ya, mè inọ ikọ cha Jisọs otumube enanaan̄ ejit enenen, ²⁹ mè inan̄a ikeke jîp, mè inin̄ Jisọs gìrìrìm, mè ibieen̄ ọmọ isibi me emen ama ya, mè isa ọmọ ije ifo ere òkup ngigo ngigo me inyọn̄ ogoon̄ ere ama Najeret okekebe, ibesi ibieen̄ ọmọ itọp, mè inan̄a me ere ya irọn̄ me ijọn̄ me ebon ogoon̄ ya, mè ikwu. ³⁰ Ire, Jisọs okpọkpọ ije itibi me etete urum kiban̄, mè ije isibi isi ere ìbosi. ³¹ Jisọs onanan̄a me Najeret ije isi Kapanọm, ama òkup me Galili, mè ibene ikijeen̄ ebi ene inu me Usen Mbuban. ³² Inu ya îkijeen̄ okpọkpọ ike ebi ene chieen̄, mije ìkijeen̄ ikọ Awaji ya kubọk ogwukaan̄ ikọ ya me lek kan̄. ³³ Me emen uwu ntitiin̄ ya, ogwu enerieen̄ ge òwa, ogwu ijo erumun̄ okupbe me emen. Ogwu enerieen̄ yi otataan̄ ukpo itumu inyi ọmọ ibe, ³⁴ “Ìre keke ke okiweek eji me lek, owu Jisọs ogwu Najeret? Ìre ònu ibonijijaka eji? Nriọọn̄ owu ijaan̄ lek. Owu ìre Ogwu Òkup Mbuban, ogwu Awaji oriabe inu.” ³⁵ Jisọs orarama ọmọ mgbọ yaage ibe, “Chit otu! Nan̄a sibi me emen ogwu enerieen̄ ya.” Ijo erumun̄ ya obeben ogwu enerieen̄ ya itọbọ me ijọn̄ me isi otutuuk ife cha, mè inan̄a me emen kan̄ isibi. Ire, ìkasak unan geege me lek ogwu enerieen̄ ya. ³⁶ Inu ya òrọrọ okwukwu ebi ene lek enenen. Ema ekekitumu me lek kiban̄ ibe, “Iyak! Ijejeen̄ keyi ye? Sa unye keyi ye? Ikọ otu ikike ke ene yi otumu inyi ijo erumun̄, ijo erumun̄ ogbagban̄, mè inan̄a me emen ene isibi.” ³⁷ Etip kè Jisọs otataan̄ ikana otutuuk ama òkup me agan̄ ya. ³⁸ Jisọs oneninan̄a me uwu ntitiin̄ ya isibi, mè ije isi uwu kè Saimọn. Mgbọ ya, ukan̄ îbak nga nwa kè Saimọn me lek enenen. Ebi ene etutumu inyi Jisọs ibe initap ubọk irọ inyi lek ogwu enenwaan̄ ya inye. ³⁹ Jisọs okwukwuun̄ isi ikpọ ogwu enenwaan̄ ya me inyọn̄ mkpilaak, mè igana ere inyi orukan̄ ya, orukan̄ ya otetele ogwu enenwaan̄ ya, lek kan̄ onyenye. Inanan̄a ikeke mgbọ yaage, mè isi ikirọ inorie inyi ema. ⁴⁰ Me agan̄ ikakwun̄ usen ya, ebi ene ekpukpulu otutuuk ebi chieen̄ orukan̄ geelek okifiak isa ijet Jisọs ibe igwa. Jisọs ototoon̄ ubọk me lek kiban̄ me ge me ge, mè igwa otutuuk kiban̄ isan̄a. ⁴¹ Ògak ge, Jisọs îrieen̄ si ijo erumun̄ isibi me emen owuwa ene. Ijo erumun̄ cha ekekitaan̄ ukpo itumu inyi Jisọs ibe, “Owu ore Gwun̄ Awaji!” Ire, Jisọs okekigana inyi ema ibe echit otu. Ìkachieek ibe ema esan̄a amọn, mije, ema mîriọọn̄ ibe ke Jisọs ore Karais ya. ⁴² Me òfit iwele kan̄, me agan̄ egwe, Jisọs ojeje isibi me ama ya isi ere ònọnọọn̄. Ebi ene ekekijijen̄e ikana ikiweek ọmọ. Mgbọ ema eweekbe ọmọ imun̄, ema eweweek irọrọ inyi ọmọ igọọk ema iluk, mè ikatele ema. ⁴³ Ire, Jisọs ofọfọọk ema ibe, “Mâsi ilook si ata etip òfolek mkpulu eyi Awaji me ama kechilọ si. Îre mije keya ke Awaji oria emi inu.” ⁴⁴ Ikeya ke Jisọs ojijen̄e ikana otutuuk uwu ntitiin̄ òkup me agan̄ Judia ikitumu ikọ Awaji.

¹ Usen ge, mgbọ Jisọs okitumu ikọ Awaji me agba okwaan̄ oyô Geneseret, ebi ene ekekeke ikana ọmọ ikigban̄ ikọ Awaji. ² Jisọs onenimun̄ uji iba me atasuk ya ebi mbọm irin̄ esabe ikọp inu, mè isibi itele isi ikigwọk njin kiban̄ me ere ya. ³ Mije ebi ene ekinwan ọmọ, isasaba inin̄ emen uji ge me lek uji iba cha, eyi òrere eyi kè Saimọn, mè itumu inyi Saimọn ibe ibieen̄ uji ya ida ibọkọ ifo okwaan̄ sọnja inyi ọmọ, mè isiki ikweek irek me emen uji ya ikitumu ikọ Awaji inyi ebi ife cha ìkekeke me otu inyọn̄. ⁴ Mgbọ Jisọs otumube ikọ Awaji inyi ife cha isan̄a, itutumu inyi Saimọn mè ebi uji kan̄ ibe, “Ìkọp ìfo okwaan̄, mè ìto njin, inyi etet irin̄.” ⁵ Saimọn ofọfọọk ọmọ ibe, “Ogwu Nte, eji mîkwukwulu ibọm mbọm otutuuk eririeen̄ mege iniwele egwe cherekeyi, eji kpetet kubọk ufuk irin̄ ge. Ire, mije, owu oyakabe initumu ikeyi, mâsi igwook njin ma.” ⁶ Ema enenikọp ida ibọkọ, mè igwook njin. Irin̄ oninin̄ igak lek njin ya. Mgbọ ema ekitaba njin ya, ulobo irin̄ cha obebene ikigwak njin ya. ⁷ Ema ebebene ubọk igwen ebi ìkup me uji eyi òkup me agan̄ ijọn̄ ya ibe enetap ubọk enyi ema. Ife cha ekọkọp inu, mè initaba usini njin ya itap me uji kiban̄. Irin̄ cha ojojot uji iba cha, mè isiki uji kubọk ìborerek. ⁸ Mgbọ Saimọn Pita omun̄be inu ya òrọrọ, isisiki isọọk, mè itet Jisọs me akpatukot, mè itumu inyi ibe, “Okaan̄-ene, je nan̄a emi me lek, ke emi ìre ogwu ijo.” ⁹ Saimọn ìtumu ikọ ya, mije, ubọk irin̄ ge ya ema etetbe îke ọmọ mè ebi uji kan̄ chieen̄, ¹⁰ mè ike si Jemis mè Jọn bọn kè Jebidi ebi ìnitap ubọk inyi ema chieen̄. Jisọs otutumu inyi Saimọn ibe, “Katet ukpook, mije, bene me mgbọ keyi fo isi, owu môkitet ene.” ¹¹ Ema ekọkọp uji kiban̄ itoon̄ me ijọn̄, mè ijuuk irin̄ cha, mè njin, mè uji itele, mè igọọk Jisọs. ¹² Jisọs onenije isi ama ge me ere ya. Me ama ya, ogwu enerieen̄ ge òkifiak orukan̄ inyakpa òwa. Mgbọ ogwu enerieen̄ ya omun̄be Jisọs, itọtọbọ ekpe, mè iyaka isi ichit me ijọn̄ me isi kè Jisọs, mè ibeek ọmọ ibe, “Okaan̄-ene, ire ineme owu, owu môkọt igwa emi, inyi emi ǹtana.” ¹³ Jisọs onyanyana ubọk ichak ogwu inyakpa ya me lek, mè itumu ibe, “Îneme emi. Lek kwun̄ inye!” Mgbọ yaage, inyakpa ya otata isan̄a kpai. ¹⁴ Jisọs otataba ogwu enerieen̄ ya ubọk me utọn̄ ibe, “Kakpa inu yi òrọrọ ìnyi ene geege. Ire, je fo, mè sa lek kwun̄ si jeen̄ ogwu ibot ngwugwa, mè gwa ngwugwa eyi Mosis onyibe me Ikan ibe ene geelek egwabe inyakpa isan̄a me lek igwa, inyi ebi ene esa eriọọn̄ ibe ke owu otana.” ¹⁵ Ire, etip kè Jisọs otataan̄ ikana ere igak adasi mgbọ. Ogbogbo ene esisibi inu inigban̄ ikọ kan̄, mè isa si orukan̄ kiban̄ inu ibe igwa ema. ¹⁶ Ire, Jisọs okekisibi isi ere ònọnọọn̄ isi ikup ikiriaak uriaak. ¹⁷ Usen ge, mgbọ Jisọs okijeen̄ ebi ene inu, ebi Farisi, mè ebi ìjeen̄ Ikan ìnan̄a me ama geelek me agan̄ Galili, mè agan̄ Judia mè ama Jeruselem egọgọọk inu inisiki ikweek irek ikigban̄ ikọ kan̄. Okumugwem onyinyi si Jisọs unye isasa igwa orukan̄. ¹⁸ Usini ebirieen̄ eneniben ogwu enerieen̄ ge òkifiak orukan̄ ngọm me inyọn̄ mkpilaak isa inu, mè iweek isasa ọmọ iraka inin̄ uwu ya isi imaan̄ me isi kè Jisọs. ¹⁹ Ire, ema kpekọt iraka inin̄ uwu ya mije ebi ene enin̄be inwaan̄ uwu ya. Ema esasa ene ya inene ifo inyọn̄ uwu ya, mè ichili nruruk ge me otoon̄-uwu ya, mè itobo olik me lek mkpilaak ogwu ngọm ya, mè iben ọmọ me inyọn̄ mkpilaak itap itibi me otu nruruk ya iniyik me etete ebi ene, me isi kè Jisọs, me emen uwu ya. ²⁰ Mgbọ Jisọs omun̄be ichechieek kiban̄, itutumu inyi ene ya ibe, “Une, mîtele ijo kwun̄ inyi owu.” ²¹ Ebi Farisi mè ebi ìjeen̄ Ikan ìkup me ere ya ebebene ikinunuun̄ ibe, “Ìre ekene ire ogwu, òkimọnọ lek kan̄ kubọk Awaji ikeyi? Ìre ekene obokọt itele ijo inyi ene ilọ Awaji gaalek?” ²² Jisọs orọriọọn̄ ekiket kiban̄, mè inido ema ibe, “Ìre keke orọ enyi ekikeek òjelek ekiket òkup ikeyi me ejit kinyi? ²³ Ìre eyi owa ofet itutumu? Ìre ibebe: Mîtele ijo kwun̄ inyi owu? Sa ìre ibebe: Nan̄a keke, mè je ije? ²⁴ Mgbọ keyi, emi mârọ inyi enyi eriọọn̄ ibe ke emi Gwun̄ Ebilene nkaan̄ unye me linyọn̄ keyi itetele ijo inyi ene.” Itutumu inyi ogwu ngọm ya ibe, “M̀be owu, nan̄a keke, kat mkpilaak kwun̄, mè je fo.” ²⁵ Mgbọ yaage, ogwu ngọm ya onanan̄a ikeke me isi otutuuk kiban̄, mè ikat mkpilaak ya esabe iben ọmọ inu ikaan̄ me ubọk, mè ije isibi ifo, mè ikitọn̄ Awaji. ²⁶ Inu ya okeke otutuuk ebi ìkup me ere ya chieen̄ enenen. Ema ebebene ikitọn̄ Awaji, mè ikitumu ibe, “Îyak, chieen̄ kiji îmun̄ uyeke uyeke inu cherekeyi.” ²⁷ Mgbọ eya orakabe, Jisọs osisibi me uwu ya, mè ije ifo isi, mè imun̄ ogwu enerieen̄ ge ekigwen Libai, ogwu òkibọkọ otitip ido, osikibe ikweek irek me uwu ikwaan̄ kan̄. Jisọs ogwegwen ọmọ ibe, “Na nagọọk emi.” ²⁸ Mgbọ yaage Libai onanan̄a ikeke, mè ijuuk otutuuk inu òkup me uwu ya itele, mè igọọk Jisọs. ²⁹ Libai osasa Jisọs isi uwu kan̄, mè ito ikpele ijọk inyi Jisọs. Owuwa ebi ìkibọkọ otitip ido mè ebi ofifi ene egọgọọk ema ikweek irek ikirie inorie ya si. ³⁰ Ire, mgbọ ebi Farisi mè ebi ìjeen̄ Ikan ebi ìrere si ebi Farisi emun̄be ike ebi ife cha ekigọọk Jisọs igbaan̄ irie inorie, ema edodo ebi udun̄ kè Jisọs ibe, “Ìre keke orọ enyi ekigọọk ebi ìkibọkọ otitip ido mè ebi ijo igbaan̄ irie inorie?” ³¹ Jisọs ofọfọọk ema ibe, “Ebi lek onyebe kpekiweek ogwu ofia. Îre ebi lek ikanyege ekiweek ogwu ofia. ³² Eya orọ, emi ǹkanu inenigwen ebi ata irọrọ. Ire, ǹnu inenigwen ebi ijo irọrọ ibe egwu ekom me emen ijo kiban̄.” ³³ Usini ebi Farisi mè ebi ìjeen̄ Ikan cha enenitumu inyi Jisọs ibe, “Ebi udun̄ kè Jọn ògwook mun, mè ebi udun̄ ebi Farisi mîkijin otu, mè ikiriaak uriaak mgbọ geelek. Ire, ebi udun̄ kwun̄ ekpọkpọ ikisa lek kiban̄ inyi irerie mè inwọnwọ.” ³⁴ Jisọs onenitumu inyi ema ibe, “Me ere ijọk ido-nwa, ìre ebi unene ogwu òdo nwa mêkọt ijin otu me ere ogwu òdo nwa okupbe melek kiban̄? Iin̄-iin̄, eya ìkpokọt irọ! ³⁵ Ire, mgbọ òkinu, mgbọ mêsan̄abe ogwu òdo nwa isan̄a me etete kiban̄. Îre mgbọ keya ke ema ebejin otu.” ³⁶ Jisọs ototo urọk ge inyi ema ibe, “Kpekikọọk ọkpọkọ aya ọfọnti isa ichim ichit ere ògwagwak me lek oka ọfọnti. Mije, ire irọ ikeya, aya ọfọnti ya môje me ere ekọọkbe ya igwak. Ọkpọkọ aya ọfọnti ya si ìkpoje ge melek oka ọfọnti ya. ³⁷ Ikeya si, kpekitap aya miin̄ me emen oka ogbokot ikpa anam, mije, unye aya miin̄ ya môrama oka ogbokot ya ibum. Inenire, miin̄ me ichep, ogbokot me ichep. ³⁸ Eya orọ, ekitap aya miin̄ me emen ayaya ogbokot ikpa anam. ³⁹ Ofifi si, ene geelek ònwọnwọ oka miin̄ isan̄a, ìkayaka ìkiweek inwọnwọ aya miin̄, mije, ìbobe ke oka miin̄ ya înwọn igak aya miin̄.”

¹ Me Usen Mbuban ge, mgbọ Jisọs mè ebi udun̄ kan̄ ekije itibi uko akpa ge, ebi udun̄ kan̄ ekekifan̄a sọnja akpa me uko ya inwaan̄ itap me akajit ubọk, mè ikichọk mfufe isan̄a me lek, mè ikitaka. ² Usini ebi Farisi ekukup imun̄ ema, mè inido ema ibe, “Ìre keke orọ enyi ekirọ inu Ikan kè Mosis obe ekarọ me Usen Mbuban?” ³ Jisọs obebe ema, “Ìre enyi kperarak ifuk-nu inu Debit orọbe mgbọ uraafiọọn̄ otakabe ọmọ mè ebi melek kan̄? ⁴ Debit ìjeje inin̄ uwu Awaji, mè imọnọ fituru esabe igwa ngwugwa inyi Awaji itaka, mè iche si inyi ebi melek kan̄. Me ubọk Ikan kiji okupbe, îre ebi ngwugwa gaalek ekitaka fituru ya òkup me mbuban.” ⁵ Jisọs onenitumu inyi ema ibe, “Gwun̄ Ebilene ore Ogwukaan̄ Usen Mbuban.” ⁶ Me ofifi Usen Mbuban, Jisọs ojeje inin̄ uwu ntitiin̄, mè ikijeen̄ inu. Ogwu enerieen̄ ge ubọk agan̄ ulom okwube òwa si me emen uwu ya. ⁷ Usini ebi ìjeen̄ Ikan mè ebi Farisi ekekiweek ikan ema ebesa itet Jisọs. Eya orọ, ema ekekigwuun̄ chieen̄ ikpọ mè ìre Jisọs môgwa ene me Usen Mbuban ya. ⁸ Jisọs orọriọọn̄ inu ema ekikeek, mè itumu inyi ogwu enerieen̄ ubọk ge okwube ya ibe, “Nan̄a keke, mè sibi nakeke me isi otutuuk ene.” Ogwu enerieen̄ ya onanan̄a ikeke, mè ije inikeke me isi otutuuk ene. ⁹ Jisọs onenitumu inyi ebi ife cha ibe, “Ǹdo enyi nu, ìre keke ke Ikan kè Mosis onyi irek ibe erọ me Usen Mbuban? Ìre ìnyi irek ibe erọ ata inu, sa ìre ijo inu? Ìre ìnyi irek ibe enyan̄a ugwem ene? Sa ìre ìnyi irek ibe efiat ugwem ene?” ¹⁰ Mgbọ îdobe ikọ ya isan̄a, iraraan̄ chieen̄ ikana ikikpọ emen isi ife cha me ge me ge, mè itumu inyi ogwu enerieen̄ ya ibe, “Nyana ubọk kwun̄.” Ogwu enerieen̄ ya onyanyana ubọk, orukan̄ ya otata isan̄a kpai. ¹¹ Ejit onanaan̄ ebi ife cha enenen mije inu ya òrọrọ. Ema ebebene ikitọt me etete kiban̄ inu ema eberọ Jisọs. ¹² Usen ge me emen mgbọ ya, Jisọs onenije inene inyọn̄ ogoon̄ ge isi ikup ikiriaak Awaji, mè ikup me uriaak otutuuk eririeen̄ ya. ¹³ Egwe iwewele, igwegwen otutuuk ebi ìkigọọk ọmọ me udun̄ iriaak me lek kan̄, mè inigobo akọp me ene iba isibi me etete kiban̄, mè igwen ema ebi otuchieen̄ kan̄. ¹⁴ Erieen̄ ebi otuchieen̄ cha ìre Saimọn ogwu îgwenbe si Pita, mè Anduru ogwu ngwan̄, mè Jemis, mè Jọn, mè Filip, mè Batolomi, ¹⁵ mè Matiyu, mè Tọmọs, mè Jemis gwun̄ kè Alifiọs, mè Saimọn ogwu ulọk ama ominbe me ejit, ¹⁶ mè Judas gwun̄ kè Jemis, mè Judas Isikariọt ogwu onenileke Jisọs inyi ekpan̄. ¹⁷ Jisọs oneninan̄a me inyọn̄ ogoon̄ ya isibi, mè inikeke me ere ijọn̄ olaakbe, ọmọ mè akọp mè ebi otuchieen̄ iba kan̄ cha. Owuwa ebi ìkigọọk ọmọ me udun̄, mè ogbogbo ebi ìnan̄a me agan̄ Judia, mè ama Jeruselem, mè ebi ìnan̄a me ama Taya mè Saidọn me agba awaji, enunu inijot me ere ya, ¹⁸ ikiweek inọnọ ikọ kè Jisọs, mè ikiweek si ibe Jisọs igwa orukan̄ kiban̄. Ebi geelek ìkakaan̄ ijo erumun̄ me emen, Jisọs orerieen̄ ijo erumun̄ cha isibi me emen kiban̄. ¹⁹ Mije unye okinan̄a me lek kan̄ isibi, mè ikigwa ene, owuwa ebi ene ekekiweek ichachak ọmọ ubọk me lek, inyi lek kiban̄ inye. ²⁰ Jisọs onenibene chieen̄ ikpọ ebi udun̄ kan̄, mè itumu ibe, “Ugbana môkup inyi enyi ebi ugbọọn̄, mije, mkpulu eyi Awaji ìkup inyi enyi. ²¹ Ugbana môkup inyi enyi ebi ìkiran̄ ọfiọọn̄ mgbọ keyi, mije, owot kinyi môjot. Ugbana môkup inyi enyi ebi ìkito ito mgbọ keyi, mije, enyi mêchak imọm. ²² Ugbana môkup inyi enyi mgbọ ebi ene mêchabe enyi mije erieen̄ Gwun̄ Ebilene, mè isa si mije erieen̄ ya irieen̄ enyi isibi me etete kiban̄, mè irọ enyi inu unyechieen̄, mè ijit erieen̄ kinyi kubọk enyi ìre ebi ijo ife. ²³ “Ebi ene isikirọ enyi inu chi, ìkibele ejit, mè ìjop okwa unwọọn̄, mije, Awaji îsun̄ mkpukpe òmimin enenen inyi enyi me emen inyọn̄. Ikafieek owot, mije, ikeya si ke ebi nte nte kiban̄ esisaak ebi nriran me ukot ikaan̄. ²⁴ Ire, môfieek inyi enyi ebi ìbọbọọn̄ ubọọn̄ mgbọ keyi, mije, enyi mîra ibọkọ otutuuk mkpukpe kinyi isan̄a me ugwem keyi. ²⁵ Môfieek inyi enyi ebi owot ojotbe mgbọ keyi, mije, enyi mêran̄ ọfiọọn̄. Môfieek si inyi enyi ebi ìkichak imọm mgbọ keyi, mije, enyi mêfieek ejit, mè ito ito. ²⁶ Môfieek inyi enyi mgbọ ebi ene isikitumu ata ikọ ibak enyi mgbọ geelek, mije, ikeya ke ebi nte nte kiban̄ erọ me lek ebi nriran ataak me ukot kiban̄.” ²⁷ Jisọs onenitumu si ibe, “Enyi ebi ìkigban̄ ikọ n̄a mgbọ keyi, m̀be enyi, ìma ebi ochicha kinyi, mè ìkirọ ata inu ìnyi ebi geelek ìchacha enyi. ²⁸ Ìgbana ebi geelek ìgbogbo enyi, mè ìriaak uriaak me ibot ebi geelek ìrọrọ ikeme enyi. ²⁹ Ire ikaan̄ ogwu isulu owu ada me agba isi ge, kana agan̄ keyilọ nyi ene ya isulu si. Ire ene ibọkọ owu ọfọnti inyọn̄ kwun̄, kakput ene ya, tele mè ibọkọ ọfọnti irak kwun̄ si igbaalek. ³⁰ Ikaan̄ ogwu ibeek owu inu, nyi. Ikaan̄ ogwu imọnọ inu kwun̄, kasi ìdo ibe iyaka inyi owu. ³¹ Ikaan̄ inu oweekbe ibe ene irọ inyi owu, rọ si ikeya nyi ene. ³² “Ire enyi ima ebi ìmama enyi gaalek, ìre kpasi oruru ke enyi ekaan̄? Ebi ìkirọ ijo inu si ekima ebi ìmama ema. ³³ Ire enyi irọ ata inu inyi ebi ìkirọ ata inu inyi enyi gaalek, ìre kpasi oruru ke enyi ekaan̄? Ìre ìkare inu yaage si ke ebi ìkirọ ijo inu ekirọ? ³⁴ Ire enyi ikifọọk inu inyi ebi enyi eriọọn̄be ibe ke mêkọt iyaka inu ya ikpe enyi gaalek, ìre kpasi oruru ke enyi ebekaan̄ mije keya? Ebi ìkirọ ijo inu me lek kiban̄ ekifọọk si inu inyi ebi ijo inu ogbo kiban̄ ebi ema eriọọn̄be ibe ke mêkọt iyaka otutuuk inu cha ikpe ema. ³⁵ Ire, emi m̀be enyi, ìma ebi ochicha kinyi, mè ìkirọ ata inu ìnyi ema. Ìkifọọk inu ìnyi ene, mè ikakpọ chieen̄ iyayaka ibọkọ useen̄. Mgbọ enyi isikirọ ikeya, mkpukpe kinyi mômin enenen. Enyi mêre bọn Awaji Ogwu Òbebene Ichit. Mije, Awaji îkirọ ata inu inyi ebi ikpak, mè ebi ata inu geelek ene erọbe inyi ìkakinin̄ chieen̄. ³⁶ Eya orọ, ìkirọ ene nsan ike Nte kinyi okirọ ene nsan. ³⁷ “Ikakifieek ene ikọ, inyi Awaji ikafieek enyi ikọ si. Ikakitip ene oyerebet, inyi Awaji ikatip enyi oyerebet si. Ikaan̄ ebi irọ enyi ijo inu, ìtele ìnyi ife cha, ke Awaji si môtele ijo kinyi inyi enyi. ³⁸ Ìkiche inu ìnyi ene, ke Awaji môkiche inu inyi enyi si. Awaji isiboche inu inyi enyi, ìbotọtọ ijot, mè ikeme itap, mè isisik, inyi inin̄ inwaan̄, mè ikpọk itap si, inyi ijot ibene, mè ifiin̄, sabum ìboniben igwook itap enyi me ubọk. Mije, inu enyi esabe itọ inyi ene ke Awaji obosa itọ si inyi enyi.” ³⁹ Jisọs onenito urọk inyi ema ibe, “Ìre ogwu ǹnàan̄ môkọt isa ogwu ǹnàan̄ ijeen̄ oniin̄? Ìre ema ene iba kpebegbaan̄ irọn̄ inin̄ emen udọn̄? ⁴⁰ Ofifi si, ogwu òkikween̄ inu ìkakimin ìgak ogwu òkijeen̄ ọmọ inu. Ire, mgbọ ogwu ekijeen̄ inu ya isikween̄ isan̄a, ìbokup kubọk ogwu òjejeen̄ ọmọ inu. ⁴¹ “Ìre keke orọ owu okiruk chieen̄ ikpọ sọntiik nsiseen̄ uti òkup me chieen̄ ngwan̄ kwun̄, mè isan̄a chieen̄ me lek ikpele uwot òkup me chieen̄ kwun̄? ⁴² Ìre owu òbojeje itumu inyi ngwan̄ kwun̄ ibe inu inyi owu òsan̄a nsiseen̄ uti me chieen̄ kan̄, me ere owu me lek kwun̄ okakọtge ìmun̄ ikpele uwot eyi òkup me chieen̄ kwun̄? Owu ogwu isi iba keyi! Dasi jene ikpele uwot òkup me chieen̄ kwun̄ san̄a, inyi owu òkọt òmọọn̄ inu òsan̄a sọntiik nsiseen̄ uti eyi òkup ngwan̄ kwun̄ me chieen̄. ⁴³ “Ata uti ìkakito ijo mfut. Ikeya si, ijo uti ìkakito ata mfut. ⁴⁴ Ekisa mfut uti iriọọn̄ lek uti. Kpekigbeme mfut figi me lek ukpak. Kpekigbeme si mfut gerep me lek uti abọm egbe. ⁴⁵ Ikeya si, ata ene ìkirọ ata inu inan̄a me lek ata ekiket eyi òkup me emen ejit kan̄. Ogwu ijo ene ìkirọ ijo inu inan̄a me lek ijo ekiket eyi òkup me emen ejit kan̄. Eya orọ, ene ìkitumu ikọ igọọk me lek inu òjojot ọmọ me ejit.” ⁴⁶ Jisọs onenido ema ibe, “Ìre keke orọ enyi ekpọkpọ ikigwen emi Okaan̄-ene, Okaan̄-ene, ire, enyi kpekirọ inu nkitumu? ⁴⁷ Mâjeen̄ enyi inu ge nu. Ene geelek ònunu me lek n̄a, mè inọ ikọ n̄a, mè irọ inu nkitumu, ⁴⁸ ene ya ìkup kubọk ogwu òbonama uwu, mè irọkọ ijọn̄ idọk, mè igwook ewuuk irak ijọn̄ uwu ya itoon̄ me inyọn̄ ewuuk me emen ijọn̄. Mgbọ mun̄ ile obaakbe inu, mè isa unye agbugbuk inibieen̄ uwu ya, uwu ya ìkasisik, mije, mînama inye. ⁴⁹ Ire, ene geelek ònọnọ ikọ n̄a, mè ijit irọrọ inu nkitumu, ene ya ìkup kubọk ogwu ònanama uwu kan̄ me inyọn̄ achiaan̄, ìkatap ewuuk irak ijọn̄. Mgbọ yaage mun̄ ile obaakbe inu, mè isa unye agbugbuk inibieen̄ uwu ya, uwu ya ogbugbugbọ igwook, mè igwak isan̄a kpai.”

¹ Mgbọ Jisọs otumube ikọ chi inyi ebi ife cha isan̄a, inanan̄a me ere ya ije ifo ama Kapanọm. ² Me ama ya, îkaan̄ ogwu ibot akọn̄ ge òkakaan̄ gwun̄ uwu ge îmabe enenen, mè itoon̄ ejit me lek. Me ike mgbọ ya, gwun̄ uwu ogwu enerieen̄ yi îfiak enenen, mè igbet mkpa. ³ Mgbọ ogwu ibot akọn̄ yi onọbe inu òfolek kè Jisọs, iraria usini ebi ugane ebi Ju ibe esi etumu enyi ibe soso, mè ogwugwu inye lek inu inigwa gwun̄ uwu kan̄ inyi ọmọ. ⁴ Ife cha enunu me lek kè Jisọs, mè iniriaak ibe, “Soso, nasi gwa gwun̄ uwu ene yi, ke ene yi îgbe ogwu owu môtapbe ubọk inyi me oniin̄ òkup ikeyi. ⁵ Mije, ogwu enerieen̄ yi îma eji ebi Ju enenen, mè inama uwu ntitiin̄ inyi eji.” ⁶ Jisọs onanan̄a igọọk ema ije. Mgbọ ema ejebe igbet ere uwu ogwu ibot akọn̄ ya, ogwu ibot akọn̄ ya oraria ebi unene kan̄ ibe enetumu enyi Jisọs ibe ikayaka ìsisaak lek ìje ìnu uwu kan̄, mije ke ọmọ ìkagbe ogwu ogwugwu obonin̄ uwu kan̄; ⁷ ke ìre mije keyi ke ọmọ omọnọ ibe ke ọmọ ìkagbe ogwu òbokọt ije inu inigwen ogwugwu isi mè isi. Soso, mè ogwugwu itumu ikọ otu gaalek, ke lek gwun̄ uwu kan̄ mônye. ⁸ Mije ke ọmọ ìre ogwu òkup me irak ebi ibot akọn̄ ìbebene igak ọmọ. Ọmọ me lek kan̄ îyaka ikaan̄ si ebi akọn̄ me irak kan̄. Ọmọ isinyi ene ge ida ibe, je, ke ìbojeje. Ọmọ iyaka ibe ofifi ene, na, ke ìbonunu. Ọmọ ibe gwun̄ uwu kan̄, rọ ikeyi, ke ìborọrọ. ⁹ Ikọ ene ya otumube okeke Jisọs chieen̄. Igwugwu isi ikom, mè itumu inyi ebi ogbogbo ene cha ìkigọọk ọmọ me udun̄ ibe, “Ǹkitumu inyi enyi ibe ke ǹkararak ìchichini òjelek ikpele ichechieek òkup ikeyi, ìrere me otutuuk ido ebi Ijeren.” ¹⁰ Ebi ikwaan̄ cha egwugwu ikom ifo uwu ogwu ibot akọn̄ ya, mè isi imun̄ ibe ke lek gwun̄ uwu kan̄ ya înye isan̄a. ¹¹ Mgbọ eya orakabe, Jisọs oneninan̄a me Kapanọm ije isi ama ekigwen Nên. Ebi udun̄ kan̄ mè ogbogbo ene mîgọọk ọmọ isi ama ya si. ¹² Mgbọ ema ekije igbet otunchit ama ya, ema emumun̄ ebenbe nkwukwu ene me inyọn̄ uwot ibesa isibi isi ifuun̄. Gwun̄ enerieen̄ ya òkwukwu ìre gwun̄ ibot ge ogwu uga okaan̄be. Ogwu uga si ìre nwakpa. Owuwa ene enanan̄a me ama ya igbuku isibi ikigọọk nwakpa ya ije. ¹³ Mgbọ Okaan̄-ene omun̄be nwakpa ya, njijin ogwu enenwaan̄ ya otetet ọmọ enenen. Itutumu inyi ibe, “Kayaka ìto ito.” ¹⁴ Mgbọ îtumube ikeya isan̄a, ijeje isi lek ebi ìbeben nkwukwu ene ya, mè itet ubọk me lek uwot ya, ife cha eyayaka ikeke. Itutumu inyi nkwukwu ene ya ibe, “Gwun̄ enerieen̄, m̀be owu, nan̄a keke!” ¹⁵ Ogwu òkwukwu ya obebene lek ikweek irek, mè ibene ikitumu ikọ. Jisọs osasa ọmọ ikana itap me ubọk ogwu uga. ¹⁶ Ukpook otetet otutuuk ebi ìkup me ere ya. Ema ebebene ikitọn̄ Awaji, mè ikitumu ibe, “Ikpele ogwu nriran îra inu me etete kiji! Awaji îra inu ineninyan̄a ebi kan̄.” ¹⁷ Etip inu yi Jisọs orọbe otataan̄ ikana otutuuk agan̄ Judia, mè otutuuk asabọn ama geelek òkana Judia okokop. ¹⁸ Ebi udun̄ kè Jọn enenikpa otutuuk inu chi Jisọs orọbe inyi Jọn. Jọn onenigwen ene iba me lek kiban̄, ¹⁹ mè iria ibe, “Ìsi ìdo-nu Okaan̄-ene ibe, ìre ogwugwu ore ogwu òbonunu ya? Sa ìre eji ekup ekpọ ofifi ene?” ²⁰ Mgbọ ebi osat kè Jọn cha enube me lek kè Jisọs, ema enenitumu inyi ọmọ ibe, “Jọn ògwook mun̄ oria eji inu me lek kwun̄ ibe eji enedo eriọọn̄ me otu kwun̄, mè ìre owu ore ogwu òbonunu ya? Sa ìre eji ekup ekpọ ofifi ene?” ²¹ Me ike mgbọ yaage, Jisọs ògwagwa owuwa ebi orukan̄, mè ilap ijo erumun̄ isibi me emen owuwa ene, mè irọ inyi ebi ǹnàan̄ emọọn̄ inu. ²² Eya orọ, Jisọs ofọfọọk ebi osat kè Jọn cha ibe, “Ìfon, mè ìsi ìkpa otutuuk inu enyi esabe chieen̄ kinyi imun̄, mè isa utọn̄ kinyi inọ, ìnyi Jọn. Ìkpa ìnyi ibe ke ebi ǹnàan̄ mêkimọọn̄ inu, ebi akọọk mêkije ije, ebi ìnan mêkinọ ikọ, mîgwa ebi inyakpa, mè ijomo ebi ìkwukwu. Ìkpa si ìnyi ibe ke mîlook ebi ugbọọn̄ ata etip. ²³ Ugbana môkup inyi ene geelek ogwu ikanan̄age ìrọn̄ mije n̄a.” ²⁴ Mgbọ ebi ikwaan̄ kè Jọn cha egwube ikom ifo, Jisọs obebene ikitumu ikọ òfolek kè Jọn inyi urum ebi ene ìkup me ere ya, mè ikido ema ibe, “Mgbọ enyi esibibe isi lek kè Jọn me emen èwê, ìre keke ke enyi esi ikpọ? Ìre enyi esi ikpọ mbubet efet okiwumu iyaka imaan̄? ²⁵ Ire ìkare eya, ìre keke ke enyi esibi isi ikpọ-ni? Ìre enyi esi ikpọ enerieen̄ òsasa ujuja unye otu ewe ọfọnti ibala lek? Ire ebi ìkiluk ubene ugwem, mè ikitap ọfọnti unye otu ewe, òjelek kè ebiba ekiluk me uwu ebi ubọọn̄, kpekikup me emen èwê. ²⁶ Ire, ǹdo-nu enyi. Ìre keke ke enyi esibi isi ikpọ? Ìre ogwu nriran ke enyi esi ikpọ? Iin̄, ǹkitumu inyi enyi ibe ke Jọn îmin igak ogwu nriran. ²⁷ Mije, îre ọmọ ke ege inu òfolek me Ikpa Mbuban ibe ke Awaji ibe, ‘Emi mâria gwun̄ ikwaan̄ n̄a ibe idasi ije me isi kwun̄, mè isi inen̄e oniin̄ isun̄ iban owu.’ ²⁸ “Me atikọ, ǹkitumu inyi enyi ibe, me etete ebilene, kpunu ene geege emanbe, ogwu òmimin igak Jọn. Ire, ogwu òsisip ichit me emen mkpulu eyi Awaji îmin igak Jọn.” ²⁹ (Mgbọ otutuuk ebi ìkup me ere ya, ògak ge ebi ìkibọkọ otitip ido, enọbe ikọ cha Jisọs otumube ibak Jọn, ema echechieek ibe ke inu ya ìrọ igọọk me nkeek Awaji me atikọ. Mije, ema cha ìre ebi Jọn ogwookbe mun̄. ³⁰ Ire, ebi Farisi mè ebi ìjeen̄ Ikan mîjit nkeek Awaji okaan̄be me lek kiban̄, mije ema ekachieekge ibe Jọn igwook ema mun̄.) ³¹ Jisọs obebene ikitumu ibe, “Ìre m̀basa ebi mgbọ kechi itọ me lek keke mọnọ? Ìre ife chi ebet lek keke mọnọ? ³² Ebi ukot kechi ekup kubọk nsabọn ìsisiki ikweek me oyet ifit. Ebi agan̄ ge ekekitaan̄ ukpo itumu inyi ebi agan̄ keyilọ ibe, ‘Eji mîkwak okwa ijọk inyi enyi, enyi kpechieek ijojop. Eji mîyaka ikwak okwa ito inyi enyi, mun̄ ito ìkasibi enyi me chieen̄.’ ³³ Mije, mgbọ Jọn ògwook mun̄ onube, ìkakirie inorie, ìkakinwọ si miin̄. Enyi ebebe ke ijo erumun̄ me emen kan̄. ³⁴ Ire, mgbọ Gwun̄ Ebilene onube, mè ikirie inorie, mè ikinwọ miin̄, enyi ebebene ikitumu ibe ke ogwugwa ìre ogwu ebek ile, mè ogwu usa-miin̄, ogwu òkigọọk ebi ìkibọkọ otitip ido, mè ofifi ebi ijo ife ìkup esese esese ikitet unene. ³⁵ Ire, inan̄a me lek ebi ìbọbọkọ iriọọn̄-inu eyi Awaji itap, ebi ene mêmun̄ ibe ke iriọọn̄-inu eyi Awaji ore eyi òtatat.” ³⁶ Usen ge, ogwu Farisi ge onenigwen Jisọs isa isi iriak ichen me uwu kan̄. Jisọs osisi, mè igọọk isiki ikweek irek me lek ikasi me uwu ya ikirie inorie. ³⁷ Mgbọ ogwu enenwaan̄ òje oyet ge me ama ya onọbe ibe ke Jisọs òwa me uwu ogwu Farisi ya okupbe ikirie ichen, imọmọnọ iko ge esabe ewuuk ekigwen alabasita irom, eyi aran̄ utop olu ojotbe emen, ikaan̄ me ubọk isa ije inu uwu ya. ³⁸ Mgbọ îrebe uwu ya, iraraka inin̄, mè isi ikeke me ukot kè Jisọs, me agan̄ udun̄, mè ibene ikito ito. Mun̄ ito ònan̄a me chieen̄ kan̄ okekirọn̄ọ igwook me ukot kè Jisọs. Ogwu enenwaan̄ ya okekisa ijeek ibot kan̄ ituku mun̄ ito ya, mè ikisa otu ifip ukot iba kè Jisọs, mè inichili iko ya, mè ikana aran̄ ya òkup me emen igwook me ukot iba kè Jisọs. ³⁹ Mgbọ ogwu Farisi ya omun̄be inu ya òrọrọ, ibebene ikitumu inyi lek kan̄ ibe, “Mebe ene yi ìre ogwu nriran, kè oriọọn̄ òjelek ene ogwu enenwaan̄ yi òkitet ọmọ ubọk me lek orebe. Ogwu enenwaan̄ yi ìre ogwu ijo.” ⁴⁰ Jisọs onenibe ọmọ, “Saimọn, nkaan̄ ikọ ge mbatumu inyi owu.” Ogwu Farisi ya ofọfọọk ọmọ ibe, “Ogwu Ijejeen̄, tumu nyi emi ma!” ⁴¹ Jisọs onenito urọk ge ibe, “Îkaan̄ ebirieen̄ iba ìfọfọọk ikpoko me ubọk ogwu enerieen̄ ge òkinyam ikpoko. Ene ge ofọọk efit dinari go, sa ogwulọ ofọọk akọp dinari go. ⁴² Me lek kiban̄ ene iba cha, kpunu ogwu òkakaan̄ ikpoko isa isi ikpe urieek kan̄ inyi ogwukaan̄ ikpoko ya. Mije keya, ogwukaan̄ ikpoko ya ofufuk urieek ene iba cha ichep inyi lek kan̄, mè ibe ife cha ekayaka ìkpe ọmọ urieek cha, ke ọmọ îtele inyi ebibi.” Jisọs itoto urọk ya isan̄a, inenido ibe, “Me etete ebi urieek iba cha, ìre ogwu owa oboma ogwu òtetele urieek inyi ema ya ichit?” ⁴³ Saimọn ofọfọọk ibe, “Me nkeek n̄a, îre ogwu urieek kan̄ ominbe igak oboma ogwu òtetele urieek inyi ema ya ichit.” Jisọs obebe ọmọ, “Owu ofọọk itat.” ⁴⁴ Itutumu ikeya isan̄a, ineniyaka isi ikweek ogwu enenwaan̄ ya, mè itumu inyi Saimọn ibe, “Ke omun̄ ogwu enenwaan̄ yi? Emi nnu me uwu kwun̄, owu òkanyi emi mun̄ ǹsa ǹgwọk ukot kubọk ọrọmijọn̄ kiji oweekbe. Ire, mun̄ ito ònan̄a me chieen̄ ogwu enenwaan̄ yi ke ogwu enenwaan̄ yi osa igwọk emi ukot, mè isa ijeek ibot kan̄ ituku emi ukot ichat. ⁴⁵ Owu òkakat emi mgbọ nnin̄be uwu kwun̄ kubọk ọrọmijọn̄ oweekbe. Ire, bene me karake nnin̄be uwu kwun̄, ogwu enenwaan̄ yi ìkpọkpọ ikifip ukot n̄a. ⁴⁶ Mgbọ nnube me uwu kwun̄, owu òkaken emi aran̄ me ibot kubọk ọrọmijọn̄ okupbe. Ire, ogwu enenwaan̄ yi îsa aran̄ utop olu iniken emi me ukot agan̄ iba. ⁴⁷ Eya orọ, ǹkitumu inyi owu ibe ke ikpele imumechieen̄ ogwu enenwaan̄ yi okaan̄be ìkijeen̄ ibe ke mîtele ogbogbo ijo inu kan̄ inyi ọmọ. Ikeya si, ikaan̄ ogwu ikaan̄ sọntiik imumechieen̄ gaalek, ìsibi ibe ke ìre sọntiik ijo inu gaalek ke etele inyi ene ya.” ⁴⁸ Jisọs onenitumu inyi ogwu enenwaan̄ ya ibe, “Ogwu enenwaan̄, mîtele otutuuk ijo kwun̄ inyi owu.” ⁴⁹ Ebi melek kiban̄ ìkukup me lek ikasi ya ebebene ikinunuun̄ me etete kiban̄ ibe, “Ìre kpasi ene ire ogwu òyaka inikitele ijo inyi ene?” ⁵⁰ Jisọs otutumu inyi ogwu enenwaan̄ ya ibe, “Ichechieek kwun̄ înyan̄a owu! Fo me esuuk.”

¹ Sọnja mgbọ iraraka, Jisọs onenikijijen̄e ikana otutuuk ama ile mè asabọn ama ikilook ata etip eyi mkpulu eyi Awaji. Akọp mè ebi otuchieen̄ iba kan̄ ekekigọọk ọmọ ikijijen̄e ikana, ² ema mè usini ebibaan̄ ebi Jisọs olapbe ijo erumun̄ isibi me emen, mè igwa esese chieen̄ orukan̄ me lek. Erieen̄ ebibaan̄ cha ìre Meri ogwu Magidala ogwu Jisọs olapbe ijo erumun̄ jaaba isibi me emen, ³ mè Juwana nwa kè Chusa ogwu ibot ikwaan̄ me uwu kè Erọdu, mè Susana, mè owuwa ofifi ebibaan̄. Ebibaan̄ chi ekisa ikpoko ubọk kiban̄, mè inu ema ekaan̄be itap ubọk inyi Jisọs mè ebi otuchieen̄ kan̄. ⁴ Ebi ene enenikigbuku inan̄a me ama ile geelek isibi inu lek kè Jisọs. Jisọs onenito urọk inyi ema ibe, ⁵ “Ene ge oninan̄a isi iwop mfut me uko kan̄. Mgbọ îkigwọ mfut cha ifiaak, usini orọrọn̄ me eden̄ oniin̄. Ebi ene ejajak me ukot iraka, ebi kè ofut enenitọk otutuuk imeen̄ isan̄a. ⁶ Usini mfut cha orọrọn̄ me ijọn̄ ewuuk. Mgbọ îtibibe isibi, ikwakwaan̄ isan̄a mije kpunu mun̄ me irak ijọn̄ ya. ⁷ Usini mfut orọrọn̄ me ijọn̄ ere ukpak okupbe. Ukpak melek mfut cha egbagbaan̄ itibi isibi. Ukpak cha otitibi ikana ichit nsek otu mfut cha. Ìkachieek ibe itibi ijaan̄, mè ito ata mfut. ⁸ Ire, usini mfut cha orọrọn̄ me ata ijọn̄, mè itibi isibi, mè ito ogbogbo mfut òwawa, efit mgbọ, igak echi esabe iwop.” Mgbọ Jisọs otobe urọk ya isan̄a, itutumu inyi ema ibe, “Ogwu ikaan̄ utọn̄ ìbosa inọ ikọ, inọ.” ⁹ Ebi udun̄ kan̄ enenido ọmọ inu urọk ya osibibe. ¹⁰ Jisọs otutumu inyi ema ibe, “Mîchili otutuuk nlelet inu eyi mkpulu Awaji ijeen̄ enyi, inyi enyi eriọọn̄. Ire, ǹkitumu ikọ me urọk inyi ebi ofifi ene, inyi, ‘Ema mêmun̄, ire, kpebekọt imun̄ itat; ema mênọ, ire, kpebekọt igobo itet.’ ” ¹¹ Itutumu ikeyi isan̄a, inenibe ema, “Ibot urọk ya ìre ikeyi: Mfut ya ìre ikọ Awaji. ¹² Echi òrọrọn̄ me eden̄ oniin̄ ìre ebi ìnọnọ ikọ ya, ire, Yọk onunu initeen̄ ikọ ya isan̄a me ejit kiban̄, inyi ema ekakọt ìchieek, mè ìbọkọ unyan̄a. ¹³ Mfut echi òrọrọn̄ me ijọn̄ ewuuk ìre ebi ìbọbọkọ ikọ ya itap me unwọọn̄ mgbọ ema enọbe. Ire, ikọ ya ìkatibi ugwun̄-ijọn̄ me emen kiban̄. Ema echieek me lek ikọ ya sọntiik mgbọ. Ire, mgbọ ntọ-mkpọ onube, ema ewawaka irọn̄. ¹⁴ Mfut echi òrọrọn̄ me ijọn̄ ukpak ìkeke inyi ebi ìnọnọ ikọ ya, mè ibọkọ itap. Ire, ike mgbọ okije, uyọrọlek linyọn̄, mè ulọk inu ubọọn̄, mè ubelejit eyi linyọn̄ onenikana ichit ikọ ya, mè irọ inyi mfut kan̄ ikakikup ìkan, mè ìren̄e kubọk ge. ¹⁵ Ire, mfut echi òrọrọn̄ me ata ijọn̄ ìkeke inyi ebi ìnọnọ ikọ ya, mè ibọkọ itap me ata ejit, mè itet ikaan̄, mè igban̄ utọn̄ me lek, mè ikat ejit ikeke inye mege ire mgbọ îtobe mfut. ¹⁶ “Kpunu ogwu òkimin mkpukan̄ isan̄a, mè iben isi iyik me irak mkpilaak. Kpan̄asi ikeya, ìboben itoon̄ me inyọn̄ ngugọọn̄, inyi ene geelek òninin̄ uwu ya isa utoon̄ mkpukan̄ ya imọọn̄ inu. ¹⁷ Inu geelek eletbe, mêsan̄a isibi me chieen̄ otutuuk ene. Inu geelek echitbe, mêchili ibook me emen utoon̄ inyi ebi ene eriọọn̄. ¹⁸ Eya orọ, enyi ìriọọn̄ ubọk ìgban̄ utọn̄ me lek ikọ n̄a. Mije, ogwu ikaan̄ inu, mêkpọk inyi ene ya inu igbaalek eyi îwuukbe lek ikaan̄. Ire, ogwu ikakaan̄ge inu, ìrere sọntiik inu eyi îkeekbe ibe ọmọ îtet ikaan̄ inye, mêtet ibọkọ isan̄a me ubọk.” ¹⁹ Mgbọ Jisọs okitumu ikọ ya, nga kan̄ mè ebi ngwan̄ kan̄ enunu ibenimun̄ ọmọ. Ire, kpekọt ije igbet ere ọmọ okupbe, mije ebi ene ewabe enenen. ²⁰ Ene ge me etete ebi ife cha ojeje isi itumu inyi ọmọ ibe, “Kpọ nga kwun̄ mè ebi ngwan̄ kwun̄ me oyet ekekebe ikiweek imumun̄ owu.” ²¹ Jisọs otutumu inyi otutuuk ebi ìkup me ere ya ibe, “Nga n̄a mè ebi ngwan̄ n̄a ìre ebi geelek ìnọnọ ikọ Awaji, mè ikirọ.” ²² Usen ge, Jisọs onenitumu inyi ebi udun̄ kan̄ ibe, “Eji enesaba okwaan̄ oyô yi etoon̄ me usaba agan̄.” Ema eninin̄ uji ge, mè itap awala, mè ibene ikisaba okwaan̄ oyô ya. ²³ Jisọs osisiki ilaak me emen uji ya. Me ekakpọge chieen̄, unye efet okpọkpọ ibene ikiwut itoon̄ me inyọn̄ isi mun̄ me okwaan̄ oyô ya, mè ikitap mun̄ me uji me agba agan̄ iba. Ebi udun̄ kè Jisọs cha ebebene ikifieek owot ibe ke uji kiban̄ mônirek. ²⁴ Ema esisi itimi Jisọs, mè ibe ọmọ, “Ogwu Nte, ogwu Nte, eji mênichieen̄ me mun̄!” Jisọs onanan̄a ikeke, mè igana inyi egwijo ya mè ekoon̄ ya. Egwijo ya owọwọ, isi mun̄ olilibi inyana. ²⁵ Jisọs onenido ebi udun̄ kan̄ ibe, “Ìre keke orọ enyi kpekaan̄ ichechieek?” Inu ya Jisọs orọbe okeke ema chieen̄, mè itet ema ukpook enenen. Ema ebebene ikitumu me lek kiban̄ ibe, “Ìre kpasi ene ire ogwu, ogwu òkinyi ida, efet mè mun̄ okekigban̄ utọn̄ inyi ida kan̄?” ²⁶ Jisọs mè ebi udun̄ kan̄ enenisaba okwaan̄ ya, mè itoon̄ me agan̄ ijọn̄ ama ekigwen Gerasa eyi òkibene isi ikpọ agan̄ Galili me usaba agan̄ okwaan̄ oyô ya. ²⁷ Mgbọ Jisọs onan̄abe me uji ya isibi, mè ije inene ijọn̄, ogwu enerieen̄ ge ijo erumun̄ okupbe me emen onanan̄a me ama ya isibi inichichini ọmọ. Îfiin̄ mgbọ ogwu enerieen̄ ya obenebe ikije njak ikana ere, mè ikiluk me emen oron ekwukwu. Ìkayaka ìkiluk me uwu. ²⁸ Mgbọ ogwu enerieen̄ ya omun̄be Jisọs, itataan̄ ukpo, mè ilibi inu initọbọ ekpe me ukot kè Jisọs, mè ikitaan̄ ukpo itumu ibe, “Owu Jisọs Gwun̄ Awaji Òbebene Ichit, òkiweek emi keke me lek? Soso, nriaak owu, kasulu emi osusut.” ²⁹ Ijo erumun̄ ya ìtumu ikọ ya mije Jisọs îwuuk lek igana inyi ibe inan̄a me emen ogwu enerieen̄ ya isibi. Owuwa mgbọ, ijo erumun̄ ya isibene me lek ogwu enerieen̄ ya, kpekikọt ikeme isiki. Isitap mkpọn me ubọk mè ukot isasa itet ọmọ ikaan̄ me ere ge, îra isọp mkpọn cha igwook. Ijo erumun̄ ya îra isa ọmọ ilibi inin̄ oron. ³⁰ Jisọs ododo ọmọ ibe, “Ìre keke ire erieen̄ kwun̄?” Ibabak ibe ke erieen̄ kan̄ ìre “Urum,” mije, ijo erumun̄ òninin̄ me emen kan̄ îwa enenen. ³¹ Ijo erumun̄ cha ekekiriaak Jisọs ibe ikaria ema ìsi ìtap me emen udọn̄ ikakaan̄ge okputut. ³² Me ike mgbọ ya, owuwa okodi òjeje me urum òwa me agba agan̄ ge me inyọn̄ ogoon̄ ya okupbe ikirie urie. Ijo erumun̄ cha ebebeek Jisọs ibe itele inyi ema esi enin̄ emen okodi cha. Jisọs ochechieek. ³³ Ema enanan̄a me emen ogwu enerieen̄ ya isibi, mè isi inin̄ emen okodi cha. Otutuuk okodi cha olilibi inan̄a me inyọn̄ ogoon̄ ya ikwala isibi igwook me okwaan̄ mè inwọ mun̄, mè ikwaan̄ ita kpai. ³⁴ Mgbọ ebi ìkikpukpo okodi cha emun̄be inu ya òrọrọ, ema elilibi inin̄ emen ama òkup me otutuuk agba ijọn̄ ya, mè isi ikilook inu ema emun̄be ikana. ³⁵ Ebi ene egbugbuku isibi ibenisa chieen̄ kiban̄ imun̄ inu ya òrọrọ. Ema enenire lek kè Jisọs, mè imun̄ ogwu ijo erumun̄ onan̄abe me emen isibi ya okweekbe irek me ijọn̄ me ukot kè Jisọs, mè ọfọnti me lek, mè iriọọn̄ lek kan̄. Ukpook otetet otutuuk kiban̄. ³⁶ Ebi ìkukup me ere ya imun̄ mgbọ inu ya orọbe, ebeben otutuuk ike Jisọs osabe igwa ogwu iraak ya ikpa inyi ebi ìnunu cha. ³⁷ Otutuuk ebi Gerasa, mè ebi ìnan̄a me bọn ama òkup me agan̄ ya ebebene ikiriaak Jisọs ibe isibi me inyọn ijọn̄ kiban̄. Ema etumu ikọ ya, mije, inu ya Jisọs orọbe îtet ema ukpook enenen. Mije keya, Jisọs ogwugwu ikom isi inin̄ uji, mè ikọp isaba okwaan̄ oyô ya ifo agan̄ ema enan̄abe inu, ọmọ me ebi udun̄ kan̄. ³⁸ Sabum ema enisan̄a uji me ijọn̄, ogwu enerieen̄ ya Jisọs ogwabe iraak me lek orariaak Jisọs ibe itele inyi ọmọ igọọk ogwugwu ifo. Ire, Jisọs ojijit, mè itumu inyi ọmọ ibe, ³⁹ “Gwu kom fo, mè si kpa ata inu Awaji orọbe inyi owu nyi ebi ene.” Ogwu enerieen̄ ya ogwugwu ikom ifo, mè ikije ikana otutuuk ama ya ikikpa ikpele inu Jisọs orọbe inyi ọmọ inyi ebi ene. ⁴⁰ Mgbọ Jisọs osababe okwaan̄ itoon̄ me agan̄ mgbọ înan̄abe ya, ebi urum ene ìkukup me atasuk ya ebọbọkọ ọmọ itap, mije, ema ekukup me ere ya ikibem mgbọ ìboka. ⁴¹ Mgbọ ife cha ekibọkọ Jisọs itap, ogwu ibot uwu ntitiin̄ ge ekigwen Jairọs, onunu, mè inirọn̄ me ijọn̄ me ukot kè Jisọs, mè ikiriaak ibe, inigọọk ọmọ isi uwu kan̄, ⁴² mije ke ibot gwun̄ enenwaan̄ ge gaalek ọmọ okaan̄be, òsoso akọp mè acha iba, mônigak ọmọ ikwu. Mgbọ Jisọs okigọọk ọmọ ije, ogbogbo ene efafan̄a ichit Jisọs me oniin̄ ya. ⁴³ Ogwu enenwaan̄ ge eje okisibi me lek otutuuk akọp mè acha iba òwa me etete ife cha. Ogwu enenwaan̄ ya îfiat otutuuk ikpoko îkaan̄be inyi ebi ofia, ire, kpunu ogwu òkọkọt igwa ọmọ. ⁴⁴ Ike owuwa ebi ene ekanabe ichit Jisọs, ogwu enenwaan̄ ya onanan̄a me agan̄ udun̄ ikichichiki me etete ebi ene cha, mè ije inire lek kè Jisọs, mè itet ubọk me lek utọn̄ ọfọnti kè Jisọs. Mgbọ yaage, eje ya ofefieek. ⁴⁵ Jisọs oraraan̄ chieen̄, mè ikido ibe, “Ìre ekene ochak emi ubọk me lek?” Mgbọ otutuuk ene ebe ke ìkare ema, Pita onenitumu inyi Jisọs ibe, “Ogwu Nte, ebi ene ekpọkpọ ikana ichit owu, mè ikinwan owu.” ⁴⁶ Ire, Jisọs okpọkpọk itumu ibe, “Ene ge îchak emi ubọk me lek, mije, nriọọn̄ mgbọ unye onan̄abe emi me emen isibi.” ⁴⁷ Mgbọ ogwu enenwaan̄ ya omun̄be ibe ke ọmọ ìkakọt ìlet, isasan̄a lek kan̄ isibi, mè ikiran, mè inirọn̄ me ijọn̄ me ukot kè Jisọs. Me isi otutuuk ene me ere ya, ibeben inu òrọrọ ọmọ ochakbe ubọk me lek kè Jisọs ikpa, mè ikpa si ibe ke mgbọ yaage ọmọ ochakbe ubọk me lek kè Jisọs, lek kan̄ onyenye. ⁴⁸ Jisọs onenitumu inyi ọmọ ibe, “Gwun̄ enenwaan̄, ichechieek kwun̄ îrọ inyi lek kwun̄ inye. Fo me esuuk.” ⁴⁹ Jisọs òkitumu ikọ ya me otu, ene ge onanan̄a me uwu kè Jairọs ogwu ibot uwu ntitiin̄ ya inu, mè inibe Jairọs, “Kayaka ìmama lek ìsisaak ogwu ijejeen̄, ke gwun̄ kwun̄ enenwaan̄ ya îkwu.” ⁵⁰ Mgbọ Jisọs onọbe etip ya, itutumu inyi Jairọs ibe, “Kafieek owot! Kaan̄ ichechieek, ke lek gwun̄ ya mônye.” ⁵¹ Mgbọ Jisọs orebe uwu kè Jairọs, ìkachieek ibe ene geege igọọk ọmọ inin̄ emen agwut ere emaan̄be gwun̄ enenwaan̄ ya, ita me lek Pita, mè Jọn, mè Jemis, mè nte gwun̄ ya, mè nga gwun̄ ya gaalek. ⁵² Me ike mgbọ ya, otutuuk ebi ama ya ìninin̄ ijot uwu ya mêkito ito, mè ikifieek ejit inyi gwun̄ ya. Jisọs onyinyi ema ida ibe, “Ikayaka ìto ito! Gwun̄ enenwaan̄ ya ìkakwukwu, ìkilalaak.” ⁵³ Ife cha echachak ọmọ ichep, mije, ema mîriọọn̄ ibe ke gwun̄ enenwaan̄ ya îkwu. ⁵⁴ Ire, Jisọs otetet gwun̄ enenwaan̄ ya me ubọk, mè itumu inyi ibe, “Gwun̄ n̄a, nan̄a keke!” ⁵⁵ Ekwukwu gwun̄ ya oyayaka igwu ikom ininin̄ emen gwun̄ ya. Ijojomo, mè inan̄a ikeke mgbọ yaage. Jisọs obebe ogwu uga mè ogwu ute enyi gwun̄ ya inorie mè irie. ⁵⁶ Inu ya ogwogwook ogwu ute mè ogwu uga mbiribọ me lek. Ire, Jisọs otataba ema ubọk me utọn̄ ibe ekakpa inu ya ìnyi ene geege.

¹ Jisọs onenigwen akọp mè ebi otuchieen̄ iba kan̄ ititiin̄, mè inyi ema unye isasa ilap otutuuk ijo erumun̄ isibi me emen ene, mè igwa esese chieen̄ orukan̄, ² mè iniria ema isibi ibe esi elook ata etip eyi mkpulu eyi Awaji, mè egwa ebi lek ikanyege. ³ Îtumu si inyi ema ibe, “Ikamọnọ inu geege ìkaan̄ me ubọk ìsa ìje ije ya. Ikamọnọ mkpat, ikamọnọ akpa ubọk, ikamọnọ fituru, ikamọnọ ikpoko, ikamọnọ ọfọnti ìso iba. ⁴ Uwu geelek òbọbọkọ enyi itap, ìkup me uwu ya mege ire mgbọ enyi mênan̄abe me ama keya isibi. ⁵ Ire ikaan̄ ama ekabọkọge enyi ìtap, ìnan̄a me ama ya ìsibi. Enyi isibesibi, ìgen̄ achiaan̄ ukot kinyi ìgwook ìnyi ebi ama ya kubọk inu ijejeen̄ isasa itaba ema ubọk me utọn̄ ibe ke unaan̄-ejit Awaji môkeme ama ya.” ⁶ Mgbọ ebi otuchieen̄ kan̄ cha ebọkọbe nteme cha isan̄a, ema enanan̄a ije isi ilook ata etip ya ikana asabọn ama geelek, mè ikigwa owuwa ebi orukan̄ me ere geelek ema esibe. ⁷ Mgbọ Erọdu ogwu òkikpulu Galili, onọbe ukpatu òfolek otutuuk inu cha òkimọnọ irek, ifuk ibot kan̄ îwuwọlọ. Ìkariọọn̄ ogwu òkirọ inu cha, mije, usini ene ekitumu ibe ke ìre Jọn ògwook mun̄ onan̄a ikeke me mkpa inikirọ inu cha. ⁸ Usini ene ebe ke ìre Ilaija okana isibi inikirọ inu cha. Ebi ofifi ene si ekekibe ke ìre ene ge me lek ebi nriran ukot ikaan̄ ogwu ikom inu inikirọ inu cha. ⁹ Erọdu obebe ke ìre ọmọ me lek kan̄ onyi ida, efefieek Jọn ebek, ikwukwu. Ìre ekene ire ogwu ọmọ okinọ nke nke inu chi òfolek mọnọ? Inenikiweek imumun̄ Jisọs ogwu òkirọ otutuuk inu cha. ¹⁰ Mgbọ ebi otuchieen̄ kè Jisọs cha ekabe, mè inikpa otutuuk inu ema erọbe inyi Jisọs isan̄a, Jisọs osasa ema igbaalek ije ifo ama ekigwen Betisaida ema gaalek. ¹¹ Ire, owuwa ene enọnọ ibe ke Jisọs òkije isi Betisaida, mè igbuku inin̄ oniin̄ ya igọọk ọmọ. Jisọs obọbọkọ ema itap, mè ibene ikitumu ikọ òfolek mkpulu Awaji inyi ema, mè igwa si otutuuk ebi lek ikanyege. ¹² Me agan̄ ikakwun̄ usen ya, mgbọ egwe okideke, ebi otuchieen̄ kan̄ enenitumu inyi ọmọ ibe, “Ria ife cha sibi, mè eje esi asabọn ama òkukup igbet ere ya esi eweek inorie elep erie, mè eweek si ere ilaak, mije, ere yi eji ekupbe îjọn̄ọ ere me lek ama enenen.” ¹³ Jisọs ofọfọọk ema ibe, “Enyi me lek kinyi, ìweek inorie ìnyi ife chi erie ma.” Ema efọfọọk ọmọ ibe, “Owut fituru go mè ufuk irin̄ iba gaalek ke eji ekaan̄. Ìre òkiweek ibe eji esi elep inorie òboso otutuuk ife chi ni?” ¹⁴ (Ebi ìkup me ere ya mêso obop ebirieen̄ go.) Jisọs onenibe ebi otuchieen̄ kan̄, “Ìtumu ìnyi ife cha ibe esiki ekweek me irek me irek, akọp ene go me irek ge.” ¹⁵ Ema esisi itumu inyi. Otutuuk ife cha esisiki ikweek me ijọn̄. ¹⁶ Jisọs onenibọkọ owut fituru go mè ufuk irin̄ iba cha, mè ibene isi ikpọ inyọn̄, mè inyi Awaji itọn̄, mè ikpọkọ fituru cha mè irin̄ cha inyi ebi otuchieen̄ kan̄ ibe esa esi eche enyi ife cha. Ema ebọbọkọ isa isi iche inyi ife cha. ¹⁷ Otutuuk ife cha ererie inorie ya ijot, mè isik si. Ebi otuchieen̄ kè Jisọs eteteen̄ ọkpọkọ echi òsisik ijot akọp mè okwun iba. ¹⁸ Usen ge, Jisọs onenisi iriaak uriaak me ere ònọnọọn̄, ọmọ mè ebi udun̄ kan̄ gaalek. Jisọs onenido ema ibe, “Ìre ebi ene ekitumu ibe ke emi ìre ekene?” ¹⁹ Ema efọfọọk ibe, “Usini ene ebe ke owu ìre Jọn ògwook mun̄, usini ene ebe owu ìre Ilaija. Sa usini ene si ekitumu ibe ke ene ge me lek ebi nriran ukot ikaan̄ ogwu ikom inu.” ²⁰ Jisọs onenido ema ibe, “Sa enyi ye? Ìre enyi ekikeek ibe ke emi ìre ekene?” Pita ofọfọọk ọmọ ibe, “Îre owu ore ogwu Awaji otoon̄be ubọk me ibot ya!” ²¹ Jisọs orọriọọn̄ ubọk itaba ema ubọk me utọn̄ ibe ekakpa inu ya ìnyi ene geege. ²² Jisọs onenitumu inyi ebi udun̄ kan̄ ibe, “Gwun̄ Ebilene mômun̄ owuwa ufialek. Ebi ugane ama, mè ebi ibot ngwugwa, mè ebi ìjeen̄ Ikan mêjit ọmọ, mè ikpan̄ ọmọ. Ire, me òso usen ita, Awaji môjomo ọmọ me mkpa.” ²³ Jisọs onenitumu inyi ebi udun̄ kan̄ mè otutuuk ebi ìkup me ere ya ibe, “Ire ikaan̄ ogwu òbogọọk emi, ene ya ijit lek kan̄, mè iben uti nkwurieen̄ kan̄ egwe geelek isa ikigọọk emi. ²⁴ Mije, ene geelek òweweek ibọbọọk ugwem kan̄, ene ya môfiin̄ ugwem ya. Ire, ogwu geelek òfifiin̄ ugwem kan̄ mije n̄a, ene ya môkaan̄ ugwem kan̄. ²⁵ Ìre kpasi oruru ke ene obokaan̄, ire ene ikaan̄ otutuuk linyọn̄, mè ifiin̄ lek kan̄, mè ìyaka ire, mè ichep lek kan̄ ire mgbọ ikakaan̄ge itata? ²⁶ Ire ikaan̄ ogwu itet esip mije n̄a, mè ìre mije ikọ n̄a, emi Gwun̄ Ebilene mâtet esip si mije ene ya mgbọ mânube me umin mè uja eyi n̄a, mè umin mè uja eyi Nte n̄a, mè eyi ebi osat Awaji ìkup mbuban. ²⁷ Me atikọ, ǹkitumu inyi enyi ibe ke usini me lek ebi ìkekeke me ere yi mgbọ yi kpebekwu mege ire mgbọ ema mêsabe chieen̄ kiban̄ imun̄ mkpulu eyi Awaji.” ²⁸ Mgbọ inu òso egwe jeeta orakabe, Jisọs osasa Pita, mè Jọn, mè Jemis igbaalek inene ifo inyọn̄ ogoon̄ ge isi ikup ikiriaak uriaak. ²⁹ Mgbọ ìkiriaak uriaak, isi kan̄ onwenwene, ọfọnti îtapbe me lek okpọkpọ itana kubọk abalara, mè ikinin̄ ene chieen̄ kubọk ura. ³⁰ Mgbọ yaage, ene iba ekakana isibi inikigọọk Jisọs ikpa ukpatu. Ene iba cha ìre Mosis mè Ilaija. ³¹ Ema ekana isibi me umin mè uja eyi emen inyọn̄, mè ikigọọk Jisọs ikpa ukpatu òfolek mkpa Jisọs obokwu me Jeruselem. ³² Otutuuk mgbọ cha, Pita mè ebi melek kan̄ mêkilaak. Ire, mgbọ ema ebolobe chieen̄, ema emumun̄ umin mè uja kè Jisọs, mè imun̄ si Mosis mè Ilaija ekekebe melek Jisọs. ³³ Mgbọ ebirieen̄ iba cha ekitele Jisọs, Pita otutumu inyi Jisọs ibe, “Ogwu Nte, înwọn ubọk eji ekupbe me ere yi. Eji enenama atanga ita, ge eyi kwun̄, ge eyi kè Mosis, ge eyi kè Ilaija.” (Pita ìkpọkpọ itumu ikọ ya ikeya, mije, ìkariọọn̄ inu ìkitumu.) ³⁴ Pita òkitumu ikọ ya me otu, oduku inyọn̄ okakana ichit ema. Ukpook otetet ema mgbọ oduku inyọn̄ ya okikana ichit ema. ³⁵ Ida ge okekitumu ikọ me emen oduku inyọn̄ ya ibe, “Ogwugwu ìre Gwun̄ n̄a ogwu emi ngobobe inyi lek n̄a. Ìgban̄ utọn̄ ìnyi ọmọ!” ³⁶ Ida ya itutumu ikọ isan̄a, ebi udun̄ kè Jisọs enenibene chieen̄, mè imun̄ Jisọs gaalek okekebe. Ema etetet inu ema emun̄be ya ikaan̄ me ejit kiban̄. Kpekpa inyi ene geege me mgbọ ya. ³⁷ Me òfit iwele kan̄, Jisọs mè ebi udun̄ kan̄ ita cha eneninan̄a me inyọn̄ ogoon̄ ya isibi, mè inichichini melek ogbogbo ebi ene. ³⁸ Ene ge me etete ebi ife cha otataan̄ ukpo itumu inyi Jisọs ibe, “Ogwu Ijejeen̄, soso, nye lek nakpọ gwun̄ n̄a, ibot gwun̄ enerieen̄ ge gaalek nkaan̄be. ³⁹ Ijo erumun̄ okisisaak. Isibene me lek, gwun̄ ya îra ikitaan̄ ukpo. Îra ijibi gwun̄ ya itọbọ me ijọn̄ mè ikisik, awo îra ikibaan̄ me otu. Ìkakinyinyi gwun̄ ya irek inyi isiki efuuk. Sa me ikeyi, ijo erumun̄ ya òkisak gwun̄ ya unan me lek iwa enenen. ⁴⁰ Mgbọ keyi, nsa gwun̄ ya inu, mè iriaak ebi udun̄ kwun̄ ibe erieen̄ ijo erumun̄ ya esibi. Ire, ema mîsa igak, kpekọt irieen̄ isibi.” ⁴¹ Jisọs onenigana inyi ebi udun̄ kan̄ ibe, “Jei, ebi mgbọ kechi, enyi mîfieek, mè inan ichechieek enenen! Ìre kpa mgbọ ke mbagọọk enyi ikup ire sabum enyi ènekaan̄ ichechieek? Sa ìre m̀bame una ichechieek kinyi ire mgbọ owa?” Inenitumu inyi nte gwun̄ ya ibe, “Sa gwun̄ kwun̄ na me ere keyi.” ⁴² Mgbọ gwun̄ ya okije inu, ijo erumun̄ ya obebene gwun̄ ya me lek kubọk mkpikpi, mè ijibi itọbọ me ijọn̄. Jisọs ogagana inyi ijo erumun̄ ya, ijo erumun̄ ya osisibi me emen gwun̄ ya, lek gwun̄ ya onyenye. Jisọs osasa gwun̄ ya inyi ogwu ute. ⁴³ Mbiribọ ogwogwook otutuuk ebi ìkup me ere ya me lek, mije ikpele unye Awaji eyi òsisibi utoon̄ me isi kiban̄. Mgbọ ebi ene ekibubeek chieen̄ ikana me lek inu ya Jisọs orọbe, Jisọs onenitumu inyi ebi udun̄ kan̄ ibe, ⁴⁴ “Ìriọọn̄ ubọk ìgban̄ utọn̄ me lek ikọ yi mbatumu inyi enyi. Me atikọ, mêleke emi Gwun̄ Ebilene, ikana itap me ubọk ebilene.” ⁴⁵ Ire, ebi udun̄ kan̄ kpekọt iriọọn̄ inu ikọ ya osibibe. Kpekọt igobo ibot ikọ ya itet, mije, kpekpọk mbum inu ya inyi ema eriọọn̄. Ukpook si ìkachieek inyi ema ekọt edo Jisọs ibot ikọ ya. ⁴⁶ Ebi udun̄ kè Jisọs enenibene ikiwut ifan̄a ikiweek irọriọọn̄ ogwu òbore ogwu òmimin ichit me etete kiban̄. ⁴⁷ Jisọs orọriọọn̄ ekiket kiban̄, mè igwen sọntiik gwun̄ ge inito me agba lek kan̄, ⁴⁸ mè initumu inyi ema ibe, “Ene geelek òbọbọkọ sọntiik gwun̄ yi itap me erieen̄ n̄a ìbọkọ emi itap. Ene geelek òbọbọkọ emi itap ìbọkọ ogwu òraria emi inu itap. Eya orọ, ene geelek òsisip ichit me etete kinyi, ogwa ore ogwu òmimin ichit.” ⁴⁹ Jọn onenitumu inyi Jisọs ibe, “Ogwu Nte, eji mîmun̄ enerieen̄ ge okisa erieen̄ kwun̄ irieen̄ ijo erumun̄ isibi me emen ene, mè iweek igbagban ene ya, mije ikarege ogwu melek kiji.” ⁵⁰ Jisọs onenibe ema, “Ikagban ene ya, mije, ene geelek ikarọge ìkeme enyi, ìgọọk enyi ikeke.” ⁵¹ Ike îkigbet mgbọ Awaji obomọnọ Jisọs ifo emen inyọn̄, Jisọs otutumu ifieek me ejit kan̄ ibe ke ọmọ môsi Jeruselem, mè ibene ije ikije isi Jeruselem. ⁵² Isasan̄a ebi ene iria ibe edasi ekeje me isi kan̄ ekesi enen̄e ere esun̄ eban ọmọ. Ife cha esisi inin̄ gwun̄ ama ebi Sameria ge. ⁵³ Ire, ebi ama ya kpechieek ibọbọkọ ọmọ itap, mije, ema mîriọọn̄ ibe ke ìre Jeruselem ke îben me ejit iboniraka isi. ⁵⁴ Mgbọ Jemis mè Jọn ebi udun̄ kan̄ enọbe etip ya, ema edodo Jisọs ibe, “Okaan̄-ene, ìre oweek ibe eji enyi ida mè ukan̄ inan̄a me emen inyọn̄ initaka ebi ama yi iriọk?” ⁵⁵ Jisọs oyayaka chieen̄ ikpọ ema, mè igana ikọ inyi ema. ⁵⁶ Itutumu ikọ ya isan̄a, ema enanan̄a isi ofifi ama. ⁵⁷ Mgbọ Jisọs mè ebi udun̄ kan̄ ekije me oniin̄ ya, enerieen̄ ge onenitumu inyi Jisọs ibe, “Mâgọọk owu isi ere geelek obosi.” ⁵⁸ Jisọs ofọfọọk ọmọ ibe, “Ekpukuruk îkaan̄ udọn̄ ere îkiluk, unọn òwulu me inyọn̄ îkaan̄ si uwu ere ìkiluk. Ire, emi Gwun̄ Ebilene, ǹkakaan̄ ere nkinin̄ isiki ilaak itap efuuk.” ⁵⁹ Jisọs omumun̄ ofifi ene, mè igwen ibe, “Na nagọọk emi.” Ire, ogwu enerieen̄ ya ofọfọọk ọmọ ibe, “Okaan̄-ene, tele mè ǹdasi ǹsi m̀fuun̄ nte n̄a sabum ǹnengọọk owu.” ⁶⁰ Jisọs obebe ọmọ, “Tele mè ebi kpekaan̄ ugwem ikakaan̄ge itata efuun̄ ebi kiban̄ ìkwukwu. Ire, owu nan̄a si look ata etip eyi mkpulu eyi Awaji kana ere.” ⁶¹ Ofifi ene si onunu, mè initumu inyi Jisọs ibe, “Okaan̄-ene, ǹkiweek igọgọọk owu ije. Ire, tele mè ǹdasi ǹgwu ǹkom m̀fo ǹsi ǹtumu ǹnyi ebi uwu n̄a ibe eriọọn̄ ubọk ekup, sabum mânigọọk owu.” ⁶² Jisọs ofọfọọk ogwu enerieen̄ ya ibe, “Ene geelek òkisa erie mbuuk ibak ijọn̄ ere ìbowop mfut me emen uko, mè ikiraan̄ chieen̄ ikpọ udun̄, ene ya ìkagbe ogwu òbosi ikwaan̄ me emen mkpulu eyi Awaji.”

¹ Mgbọ eya orakabe, Okaan̄-ene onenigobo ofifi akọp ene jaaba mè iba me etete ebi ìkigọọk ọmọ me udun̄, mè iria ema isibi ene iba iba, ibe edasi eje esi ama geelek, mè ere geelek ọmọ obosi. ² Sabum ema enije, îtumu inyi ema ibe, “Inu eberọkọ me uko îwa enenen. Ire, ebi ìberọkọ mfut cha me uko ìre ene inen mè inen gaalek. Eya orọ, ìbeek Okumugwem, ogwukaan̄ ikwaan̄ uko, ibe iria ebi ikwaan̄ itap me uko, inyi enerọkọ mfut me uko. ³ Mgbọ yi, ìje. Ǹkiria enyi kubọk arọọn̄ isi itap me etete egbe. ⁴ Ikamọnọ akpa ikpoko. Ikamọnọ akpa ubọk. Ikamọnọ si ikpukot. Ikatọp ene geege amọn me oniin̄. ⁵ “Enyi isibenin̄ uwu geelek, ìdasi itọp ebi ìkup me uwu ya amọn ibe, ‘Esuuk ikup inyi enyi!’ ⁶ Ire ogwu esuuk ikup me uwu ya, esuuk kinyi môbia me lek ene ya. Ire kpunu ogwu esuuk me uwu ya, esuuk kinyi môyaka ika igọọk enyi. ⁷ Enyi isinin̄ uwu ya, ìbia me ere keya, mè ìkirie mè ìkinwọ inu geelek ebi uwu ya mêkinyi enyi. Mije, îgbe ibe ogwu òsi ikwaan̄ ibọkọ mkpukpe ubọk ikwaan̄ kan̄. Ikakiluk ìkana ere, mè ìkinan̄a me uwu ge ìsi ofifi uwu. Ìluk me uwu yaage gaalek. ⁸ “Ama geelek enyi enin̄be, ire ebi ama ya ibọkọ enyi itap, ìrie inu geelek ema esan̄abe isibi isa itet enyi ichen. ⁹ Ìgwa ebi orukan̄ ìkup me ama ya, mè ìtumu inyi ebi ama ya ibe ke mkpulu eyi Awaji îkup mgbet me lek kiban̄. ¹⁰ Ire, ama geelek enyi enin̄be, mè ire ebi ama ya kpebọkọ enyi itap, ìje ìkana otutuuk lek oniin̄ ama ya, mè ìkitumu inyi ema ibe ¹¹ ke enyi mîgen̄ achiaan̄ ijọn̄ ama kiban̄ eyi òkup enyi me akajit ukot igwook inyi ema isasa irọ inyi ema eriọọn̄ ibe ke unaan̄-ejit Awaji môkeme ema. Ìtumu si ìnyi ema ibe ke mkpulu eyi Awaji îkup mgbet. ¹² Me atikọ, ǹkitumu inyi enyi ibe, me Usen Oyerebet, môfieek enenen inyi ebi ama ya igak ebi ama Sọdọm.” ¹³ Jisọs onenitumu ibe, “Môfieek inyi enyi ebi ama Korajin, môfieek si inyi enyi ebi ama Betisaida. Mije, mebe ke ìre me Taya mè Saidọn ke merọ otutuuk inu ukechieen̄ echi erọbe me emen ama kinyi, kè ebi ama iba chi mîra itap ọfọnti ufieejit, mè ifufuku lek me ntọn̄ mije ubọnọlek, mè igwu ikom me ijo kiban̄ karake ukot ukot. ¹⁴ Eya orọ, me Usen Oyerebet, môfieek enenen inyi enyi igak ebi ama Taya mè Saidọn. ¹⁵ Enyi ebi ama Kapanọm, ìre enyi ekikeek ibe ke mêbene enyi ifo inyọn̄, inyi enyi ekana ebi ama òmimin ichit? Iin̄-iin̄, ebesisiki enyi itap me ama ekwukwu.” ¹⁶ Jisọs onenitumu inyi ebi udun̄ kan̄ cha ibe, “Ene geelek ògbagban̄ utọn̄ inyi enyi, ìgban̄ utọn̄ inyi emi. Ene geelek òjijit enyi, ìjit emi. Ikeya si, ene geelek òjijit emi, ìjit Nte n̄a ogwu òraria emi inu.” ¹⁷ Akọp ene jaaba mè iba cha, ìsisi ikwaan̄ Jisọs oriabe ema, egwugwu ikom ika me unwọọn̄, mè inikpa inyi Jisọs ibe, “Okaan̄-ene, ijo erumun̄ si îsiki ibot inyi eji me erieen̄ kwun̄.” ¹⁸ Jisọs otutumu inyi ema ibe, “Mmun̄ Setan okinan̄a me isinyọn̄ kubọk mèrèmèrèp isinyọn̄ irọn̄ me ijọn̄. ¹⁹ Ìkpọ, nnyi enyi unye ibe enyi ejak ukot me inyọn̄ ijijunu mè inyọn̄ eferen̄, mè etim ekpan̄ otutuuk unye geelek ogwu ochicha okaan̄be. Kpunu inu geege òbokọt isak enyi unan me lek. ²⁰ Ire, ikanwọọn̄ unwọọn̄ mije ijo erumun̄ osikibe ibot inyi enyi. Kpan̄asi ikeya, ìnwọọn̄ unwọọn̄, mije, mîge erieen̄ kinyi me emen inyọn̄.” ²¹ Me ike mgbọ ya, unwọọn̄ ojojot Jisọs ejit sa me unye Ekwukwu Mbuban. Itutumu ibe, “Nte n̄a, Ogwukaan̄ emen inyọn̄ mè linyọn̄, ntọn̄ owu, mije owu oletbe otutuuk inu chi me chieen̄ ebi ìriọọn̄ inu, mè ebi ìkakaan̄ ikpele ifuk-ibot, mè inichili ibook inyi ebi ìkup kubọk asa nsabọn ekariọọn̄ge inu geege. Iin̄, Nte n̄a, ntọn̄ owu, mije, îre ikeyi ke îneme owu irọrọ. ²² “Nte n̄a îkana otutuuk inu itap emi me ubọk. Kpunu ogwu òrọriọọn̄ ogwu emi, Gwun̄ Awaji, nrebe ilọ me lek Nte n̄a gaalek. Kpunu si ogwu òrọriọọn̄ ogwu Nte n̄a orebe, ilọ emi ogwu Gwun̄ melek ebi geelek înemebe emi ichichili Nte n̄a ijeen̄.” ²³ Jisọs onenikana isi ikpọ ebi udun̄ kan̄, mè inween̄ lek itumu inyi ema ibe, “Enyi ebi ìsasa chieen̄ kinyi imun̄ inu chi enyi ekimun̄, Awaji îgbana enyi enenen. ²⁴ Mije, ǹkitumu inyi enyi ibe ke owuwa ebi nriran ukot ikaan̄ mè ebi ubọọn̄ mîweek imumun̄ inu chi enyi ekimun̄, ire, kpemun̄. Mîweek si inọnọ inu chi enyi ekinọ, ire, kpenọ.” ²⁵ Usen ge, ogwu enerieen̄ ge òkijeen̄ Ikan oneniweek itọtọ Jisọs ikpọ, mè inido ọmọ ibe, “Ogwu Ijejeen̄, ìre keke ke mbarọ mè ikaan̄ ugwem ikakaan̄ge itata?” ²⁶ Jisọs ododo ọmọ ibe, “Ìre keke ke ege me Ikpa Mbuban? Ìre inu egebe me ere ya ìsibi keke?” ²⁷ Ogwu enerieen̄ ya ofọfọọk ibe ke ege me Ikpa Mbuban ibe, “Ma Okumugwem Awaji kwun̄ me otutuuk ejit kwun̄, mè otutuuk ibot ejit kwun̄, mè otutuuk unye kwun̄, mè otutuuk ekiket kwun̄, mè ma ogwu melek kwun̄ kubọk omabe akpalek kwun̄.” ²⁸ Jisọs onenitumu inyi ọmọ ibe, “Owu ofọọk itat. Rọ si ikeya, ke owu môkaan̄ ugwem ikakaan̄ge itata.” ²⁹ Mije ogwu enerieen̄ ya oweekbe ijejeen̄ ebi ene ibe ke inu ọmọ okirọ îtat, inenido Jisọs ibe, “Ìre ekene ore ogwu melek n̄a?” ³⁰ Jisọs onenito urọk ge ibe, “Ogwu enerieen̄ ge oninan̄a me Jeruselem ikije isi Jeriko, mè inije inin̄ emen ubọk ebi inọ afa. Ebi inọ cha etetet ene ya, mè isut ọmọ igbet mkpa, mè ibọkọ otutuuk inu îkaan̄be, mè ijuuk ọmọ itele ikeya me ijọn̄, mè ilibi inan̄a. ³¹ Ogwu ngwugwa ge onenikije me oniin̄ yaage iboniraka. Mgbọ îmun̄be ogwu enerieen̄ ya olaakbe me agba oniin̄ ya, isasaba ifo agba oniin̄ agan̄ keyilọ isi ije iraka isi uyọrọlek kan̄. ³² Ikeya si, ogwu otoko kè Libai ge, òkigọọk itap ubọk isi ikwaan̄ me Uwu Mbuban, onunu ibonije iraka. Mgbọ îbenebe chieen̄ imun̄ ene ya olaakbe me agba oniin̄, isasaba si ifo agba oniin̄ agan̄ keyilọ isi ije iraka isi uyọrọlek kan̄. ³³ Ire, ogwu Sameria ge onenije si iboniraka me oniin̄ ya, mè inire ere inu ya orọbe. Mgbọ îmun̄be ene ya olaakbe me agba oniin̄, ikakaan̄ ejit njijin me lek ene ya, ³⁴ mè ije inin̄ lek, mè isa aran̄ mè miin̄ itoon̄ me chieen̄ unan cha, mè isa ekwut ibọp ichit chieen̄ unan cha, mè ibene ene ya itoon̄ me inyọn̄ inyinya akpan kan̄, mè isa ije isi uwu isiki-efuuk ge me oniin̄ ya, mè ikpọ chieen̄ me lek iwele egwe. ³⁵ Mgbọ egwe owelebe, inenikana ene ya itap me ubọk ogwu ibot uwu isiki-efuuk ya, mè itap ubọk me akpa imọnọ dinari iba inyi, mè ibe ikpọ chieen̄ me lek ogwu enerieen̄ ya inyi ọmọ. Ire ikaan̄ ofifi ikpoko geelek îfiatbe me lek ogwu enerieen̄ ya, ọmọ isiboraka ika, ke ọmọ môyaka ikpe ogwugwu.” ³⁶ Mgbọ Jisọs otobe urọk ya isan̄a, inenido ogwu òjeen̄ Ikan ya ibe, “Me nkeek kwun̄, ìre ekene me etete ene ita cha, ore ogwu melek ogwu enerieen̄ ya ogwu ebi inọ afa cha esulube?” ³⁷ Ogwu òjeen̄ Ikan ya ofọfọọk ibe ke ìre ogwu òkakaan̄ ejit njijin me lek ene ya. Jisọs obebe ọmọ, “Fo, mè si rọ si ikeya.” ³⁸ Mgbọ Jisọs mè ebi udun̄ kan̄ eyakabe ibene ije kiban̄ ikije ibesi Jeruselem, ema enenire gwun̄ ama ge. Me ere ya, ogwu enenwaan̄ ge ekigwen Mata onenibọkọ ema itap. ³⁹ Mata îkaan̄ ngwan̄ enenwaan̄ ge ekigwen Meri. Meri osisiki ikweek me ukot Okaan̄-ene ikigban̄ inu îkijeen̄. ⁴⁰ Ire, Mata okekikwukwulu me lek inorie ebesa itet Jisọs mè ebi udun̄ kan̄ ichen. Mgbọ Mata omun̄be ibe ke Meri ìkanu ìnitap ubọk ìnyi ọmọ me lek ikwaan̄, ijeje isi lek kè Jisọs, mè ibe ọmọ, “Okaan̄-ene, ìre înwọn ike ngwan̄ n̄a ojuukbe emi gaalek itele me lek ikwaan̄? Tumu nyi ibe inu initap ubọk inyi emi ma!” ⁴¹ Jisọs obebe ọmọ, “Mata! Mata! Owu òkisisaak lek kwun̄, mè ikifieek owot me lek owuwa inu. ⁴² Ire, inu ge gaalek okup me uyọt ichit. Inu ya ke Meri ogobo inyi lek kan̄. Me atikọ, kpunu ogwu òbobọkọ inu ya isan̄a me ubọk kan̄.”

¹ Usen ge Jisọs onenije isi ere ge isi iriaak uriaak. Mgbọ îriaakbe uriaak ya isan̄a, ene ge me lek ebi udun̄ kan̄ obebe ọmọ, “Okaan̄-ene jeen̄ eji ubọk ekiriaak uriaak, ike Jọn ojeen̄be ebi udun̄ kan̄.” ² Jisọs onenitumu inyi ema ibe, “Enyi isiberiaak uriaak, ikeyi ke enyi mêkiriaak: Nte kiji, erieen̄ kwun̄ ikup mbuban. Mkpulu eyi kwun̄ inu. ³ Nyi eji inorie usen geelek, kubọk okinyi eji me usen me usen. ⁴ Tele ijo kiji nyi eji, kubọk eji ekitele inyi ebi ìrọrọ eji ilọ. Kachieek ibe eji enin̄ me ntọ-mkpọ.” ⁵ Jisọs onenito urọk ge inyi ema ibe, “Ire ene ge me etete kinyi isi uwu ogwu unene me ejit eririeen̄, mè isi itimi ogwu une kan̄ me ilaak, mè ibeek ibe, ‘Une kwun̄, nye lek fọọk emi owut fituru ita, mè ǹsa ǹsi ǹtet ichen, ⁶ ke ogwu unene n̄a ge òkup me oniin̄ ije înigba uwu n̄a. Ǹkakaan̄ inu geege mbasa itet ichen ya.’ ⁷ “Ire, ogwu une kan̄ ya ofọfọọk ọmọ ibe, ‘Kayaka ìsisaak emi ke nra iwuuk lek igọbọ afọn̄, mè inin̄ uwu ilaak, emi melek nsabọn n̄a. M̀kpayaka ikọt inan̄a ikeke ininyi owu inu geege.’ ⁸ Me atikọ, ǹkitumu inyi enyi ibe, ire ogwu unene ya ìkanan̄a ìkeke ìninyi ene ya inu geege mije îrebe unene kan̄, ìkpolọlọ inanan̄a ikeke ininyi ene ya otutuuk inu geelek îweekbe, mije îkpọkpọ itet lek inye ikibeek, ìkalibi esip. ⁹ “Ikeya si, ǹkibe enyi: Ìbeek, ke mênyi enyi. Ìweek, ke enyi mêweek imun̄. Ìtọbọ ubọk me isotu, ke mêgwuku inyi enyi. ¹⁰ Mije, ogwu ibeek, môbọkọ inu îbeekbe. Ogwu iweek, môweek imun̄. Ogwu itọbọ ubọk me isotu, mêgwuku inyi. ¹¹ “Enyi ebi ìrere ute, ìre ekene me lek kinyi ke ogwu gwun̄ môdo irin̄, mè ene ya isi imọnọ ijijunu isa inyi? ¹² Sa ìre ekene ke ogwu gwun̄ môdo nkwa unọn, mè ene ya isi itet eferen̄ inyi ogwu gwun̄? ¹³ Ire enyi ebi ijo irọrọ iriọọn̄ ubọk ekinyi bọn kinyi ata inu, ìre enyi kpefat ikeek ibe ke Nte kinyi ogwu òkup me emen inyọn̄ môria Ekwukwu Mbuban inyi ene geelek òbebeek ọmọ?” ¹⁴ Îkaan̄ mgbọ ge Jisọs orieen̄be ijo erumun̄ mbuuk isibi me emen gwun̄ enerieen̄ ge. Mgbọ ijo erumun̄ ya onan̄abe isibi, ogwu mbuuk ya obebene ikitumu ikọ. Inu ya okeke otutuuk ebi ìkup me ere ya chieen̄ enenen. ¹⁵ Ire, usini ebi ìkup me ere ya, mè imun̄ inu ya òrọrọ ekekitumu ibe ke Jisọs ìkisa unye kè Bejibun ogwu ibot ijo erumun̄ irieen̄ ijo erumun̄ isibi me emen ene. ¹⁶ Ire, usini ene eweweek itọtọ Jisọs ikpọ, mè ibe irọ-nu inu ijejeen̄ ge inyi ema esa eriọọn̄ ibe ke unye ke ogwugwu ìnan̄a me ubọk Awaji. ¹⁷ Ire, Jisọs orọriọọn̄ ekiket kiban̄, mè itumu inyi ema ibe, “Ido geelek ebi ìkup me emen ekitim akọn̄ ikeme lek kiban̄, ido ya ìbochechep. Ikeya si, uwu geelek ebi ìkup me emen echebe lek, mè ikirọ ikeme lek kiban̄, uwu ya ìkpokeke. ¹⁸ Enyi ekibe ke emi ǹkisa unye kè Bejibun irieen̄ ijo erumun̄ ìsibi me emen ene. Ǹdo-nu enyi, ire ebi ìkigọọk Setan ikitim akọn̄ ikeme lek kiban̄, ìre mkpulu kè Setan ìbojeje ikeke? ¹⁹ Ire emi nkisa unye kè Bejibun ilap ijo erumun̄ isibi me emen ene, ìre kpasi unye ke ebi kinyi ekisa ilap ijo erumun̄ isibi? Eya orọ, îre ebi udun̄ kinyi cha gaalek ebesibi oyerebet me ibot kinyi. ²⁰ Ire, ire emi nkisa unye Awaji irieen̄ ijo erumun̄ isibi me emen ene, eya ìsibi ibe ke mkpulu eyi Awaji îra ire etete kinyi. ²¹ “Ire ene ogwu ònyenye lek ikpulu nroon̄ akọn̄ kan̄ itap me lek, mè ikeke ikibem uwu kan̄, kpunu ogwu òbokọt ichak ubọk me lek inu geelek ene ya okaan̄be. ²² Ire, ire ogwu ònyenye lek igak ene ya initim akọn̄ melek ene ya, mè itim ikpan̄ ene ya, môkpulu otutuuk nroon̄ akọn̄ cha ene ya osabe itoon̄ ejit, mè ikpulu otutuuk inu geelek ene ya okaan̄be iche inyi lek kan̄ mè ebi melek kan̄. ²³ “Ogwu ikakekege ìnyi emi ìkijeje ikeme emi. Ikeya si, ogwu ikagọọkge emi ìkititiin̄, ene ya ìkiyiyiyala. ²⁴ “Ijo erumun̄ isinan̄a me emen ene isibi, ìkijijen̄e ikana inyọn̄ ijọn̄ òchachat ikiweek ere ìboluk. Ire ìkakọt ìweek ìmun̄, îra itumu me lek kan̄ ibe ke ọmọ môgwu ikom iyaka ifo uwu kan̄ ya ere ọmọ onan̄abe isibi. ²⁵ Isinire uwu kan̄ ya, mè imun̄ ibe ke mîkwọk uwu ya itana, mè inen̄e inu geelek isun̄ me irek, ²⁶ îra igwu ikom, mè isi isa ofifi ijo erumun̄ jaaba ìkirọ inu afa afa igak ọmọ igbaalek inu. Ema mîra ininin̄ emen uwu ya iluk. Sa me ikeyi, irek ene ya îra ifieek me mgburudun̄ mgbọ ya igak ubọk îkupbe me adasi.” ²⁷ Jisọs òkitumu ikọ ya me otu, enenwaan̄ ge me etete ife cha otataan̄ ukpo itumu inyi ọmọ ibe, “Ugbana ikup inyi ogwu enenwaan̄ òmaman owu, mè inyi owu ebe, mè ikpukpo owu isibi.” ²⁸ Jisọs ofọfọọk ogwu enenwaan̄ ya ibe, “Iin̄, ire, ugbana òmimin igak eya môkup inyi ebi geelek ìnọnọ ikọ Awaji, mè ikirọ.” ²⁹ Mgbọ ogbogbo ene egbukube inu inisọkọ me lek ife cha, Jisọs otutumu inyi ife cha ibe, “Enyi ijo ebi mgbọ kechi ekiweek inu ijejeen̄. Ire, kpebejeen̄ enyi inu ijejeen̄ geege ilọ me lek ikween̄ inu ònan̄a me lek kè Jona. ³⁰ Ike Jona ogwu nriran orebe inu ijejeen̄ inyi ebi ama Ninifu, ikeya si ke Gwun̄ Ebilene obore inu ijejeen̄ inyi enyi ebi mgbọ kechi. ³¹ Me Usen Oyerebet Awaji, ogwu Ubọọn̄ Enenwaan̄ ònan̄a me Agan̄ Òsiki mônan̄a ikeke isibi ata-ikọ ikeme enyi ebi mgbọ kechi, mè itumu itip enyi. Mije, ogwu ubọọn̄ enenwaan̄ yi ìnan̄a me ama kan̄ me ujọn̄ọ ere ije inigwook me ere keyi inenigban̄ ikọ iriọọn̄-inu eyi ogwu ubọọn̄ Sọlọmọn okitumu. Mgbọ yi, ogwu òmimin igak Sọlọmọn òwa me ere keyi. ³² Me Usen Oyerebet Awaji si, ebi Ninifu mênan̄a ikeke isibi ata-ikọ ikeme enyi ebi mgbọ kechi, mè itumu itip enyi. Mije, ema mîgwu ikom mgbọ Jona otumube ikọ Awaji inyi ema. Mgbọ yi, ogwu òmimin igak Jona òwa me ere keyi. ³³ “Kpunu ogwu òkimin mkpukan̄, mè iben isi iyik me ere òlelet, mè ìre isa okwa ikana ichit. Kpan̄asi ikeya, ìboben itoon̄ me otu ngugọọn̄, inyi ebi geelek ìninin̄ uwu ya ekesa utoon̄ kan̄ emọọn̄ inu. ³⁴ Chieen̄ kwun̄, ọmọ ore mkpukan̄ inyi akpalek kwun̄. Ire kpunu inu geege òkwekwek owu chieen̄, otutuuk lek kwun̄ ìbokup me utoon̄, kpunu inu geege owu òkpokọt imọọn̄. Ire, ire ikaan̄ inu òkwekwek owu chieen̄, otutuuk lek kwun̄ ìbokup me emen ikpele udun. ³⁵ Eya orọ, kachieek ibe utoon̄ eyi òkup me emen kwun̄ ikana ire udun. ³⁶ Ire otutuuk lek kwun̄ ikup me utoon̄, kpunu agan̄ geege òkukup me udun, otutuuk lek kwun̄ ìbore utoon̄ utoon̄ kubọk utoon̄ mkpukan̄ okitoon̄ ikana owu me lek.” ³⁷ Mgbọ Jisọs otumube ikọ cha isan̄a, ogwu Farisi ge onenigwen ọmọ ibe inu ichen me uwu kan̄. Jisọs ogọgọọk ije isi uwu ya, mè igọọk isiki ikweek me lek ikasi ikirie inorie. ³⁸ Mgbọ ogwu Farisi ya omun̄be ibe ke Jisọs ìkadasi ìgwọk ubọk sabum înirie inorie, kubọk ọrọmijọn̄ kiban̄ okupbe, ikeke ọmọ chieen̄. ³⁹ Jisọs orọriọọn̄ ejit kan̄, mè itumu inyi ọmọ ibe, “Enyi ebi Farisi ekigwọk udun̄ ekpen̄ mè udun̄ alala itana, ire, me emen ejit kinyi, chieen̄ ile mè inu ikpak ojot. ⁴⁰ Enyi ebi burubut kechi! Ìre ìkare Awaji ogwu òrorom udun̄ orom si agan̄ emen? ⁴¹ Ìsa inu òkup me emen ekpen̄ mè alala kinyi cha ìche ìnyi ebi ugbọọn̄, ke inu geelek enyi ekaan̄be môtana me isi Awaji. ⁴² “Môfieek inyi enyi ebi Farisi! Enyi ekichieek mkpa ikinyi Awaji irek ge me etete akọp irek me ibot asabọn inwan̄ uti ekisa irọ inyi inorie itop, kubọk mînt, mè rû, mè ofifi esese asabọn inwan̄ òkup me uko, ire, mè ikikpọ chieen̄ ilọ me lek isisibi unen oyerebet, mè imumun̄ Awaji me chieen̄. Kpan̄asi ikeya, isisibi unen oyerebet, mè imumun̄ Awaji me chieen̄ ke enyi mekikpọ chieen̄ me lek, mè ikikeek si inyinyi Awaji irek ge me akọp irek. ⁴³ “Môfieek inyi enyi ebi Farisi! Enyi ebi ìkima ikwekweek me inyọn̄ ikasi esun̄be inyi ebi ibot me uwu ntitiin̄, mè ikima si ibe ebi ene eketọp enyi ata amọn eyi umin me emen ewe ere ene ewabe. ⁴⁴ “Môfieek inyi enyi ebi Farisi, mije enyi ekup kubọk udọn̄ ufuun̄ òlelet. Ogwu ikariọọn̄ge, mè isi ije isaba me inyọn̄, îra ikana ogwu ikatanage me isi Awaji.” ⁴⁵ Ene ge me lek ebi ìjeen̄ Ikan cha otutumu inyi Jisọs ibe, “Ogwu Ijejeen̄, me emen ikọ chi okitumu, riọọn̄ si ibe ke owu gwa òkitumu ikọ inaan̄ eji me lek.” ⁴⁶ Jisọs ofọfọọk ibe, “Môfieek inyi enyi ebi ìjeen̄ Ikan, mije, uyọt uyọt ikan enyi ekigo inyi ene ìkup kubọk enyi ekiben ulobo akpan ikeme ene. Ire, enyi me lek kinyi kpechieek ichachak ubọk me lek akpan ya igọọk ibeme. Ìrere otubọk kinyi, enyi kpechieek ibe ichak me lek. ⁴⁷ “Môfieek inyi enyi, mije, enyi ekiwat ujuja ewuuk me inyọn̄ udọn̄ ufuun̄ ebi nriran ebi nte nte kinyi ekpan̄be. ⁴⁸ Ike ebi nte nte kinyi ekpan̄be ebi nriran cha isan̄a, enyi enenikibala udọn̄ kiban̄, eya ìkijeen̄ ibe ke inu ebi nte nte kinyi cha erọbe îtop enyi me lek. ⁴⁹ Îre mije inu yi ke Awaji osa me emen iriọọn̄-inu kan̄ itumu ibe ke ọmọ môria ebi nriran mè ebi otuchieen̄ kan̄ ijet enyi; ke enyi mêkpan̄ usini kiban̄, mè itutuku usini. ⁵⁰ Eya orọ, eje otutuuk ebi nriran ekpan̄be, bene me karake linyọn̄ obenebe na re cherekeyi, ìtoon̄ enyi ebi ukot keyi me ibot. ⁵¹ Me atikọ, ǹkitumu inyi enyi ibe ke Awaji ìkpolọlọ isusulu enyi ebi ukot keyi osusut, mije eje otutuuk ife cha, bene me lek eje kè Eben na re lek eje kè Jekaraya ogwu ekpan̄be me emen Uwu Mbuban, me agbagba ntook ngwugwa melek ere mbuban. ⁵² “Môfieek inyi enyi ebi ìjeen̄ Ikan, mije, enyi mîchit isotu eyi ifuk-ibot mkpulu eyi Awaji, mè imọnọ atafi isan̄a, inyi ebi ene ekakọt ìgobo Ikọ Awaji ìtet. Enyi me lek kinyi, ninin̄ mkpulu ya, enyi kpenin̄, ire, enyi enenikana ukput inyi ebi geelek ìweweek iraraka inin̄.” ⁵³ Mgbọ Jisọs otumube ikọ chi isan̄a, mè inan̄a me ere ya, ebi Farisi mè ebi ìjeen̄ Ikan ebebene me mgbọ ya ikitumu ikọ ikeme ọmọ ijo ijo, mè ikido ọmọ owuwa idodo, ⁵⁴ isasa ileke ọmọ ikọ me otu, inyi esa me ikeya etet ọmọ.

¹ Me ike mgbọ ya, ebi ene esisibi inu me obop obop, mè inin̄ inwaan̄ me ere Jisọs okupbe ya, kpeyaka imun̄ ere itap ukot. Ukot usini ene okekitoon̄ me inyọn̄ echi ebi ofifi ene. Jisọs onenibene me lek ebi udun̄ kan̄ ikiteme nteme ibe, “Ìgbala chieen̄ me lek olat ebi Farisi, eyi òrere isi iba. ² Kpunu inu geege echitbe eyi kpebechili ibook, kpunu si inu geege eletbe eyi kpokpọkbe mbum, inyi ebi ene eriọọn̄. ³ Ikeya si, ikọ geelek enyi etumube me emen udun, mênọ me emen utoon̄ egwe. Ikọ geelek enyi echitbe isotu, mè ikup me emen agwut inween̄ otu itumu, mêtaan̄ ukpo itumu isibi me oyet ama, mè otutuuk ene enọ.” ⁴ Jisọs onenitumu si ibe, “Ebi une n̄a, ǹkitumu inyi enyi ibe: Ikatet ukpook me lek ebi ìkikọt ikpan̄ anam akpalek gaalek, ire, kpekikọt iyaka irọ ofifi inu igak ikeya. ⁵ Ire, mâjeen̄ enyi ogwu ògbegbe ibe enyi etet ukpook me lek. Ìtet ukpook me lek ogwu keya òbokọt ikpan̄ anam akpalek isan̄a, mè ikaan̄ unye itọtọp owu itap me emen ukan̄ ama yọk. Iin̄, m̀be enyi: Ìtet ukpook me lek kè ogwa. ⁶ Ìkpọ-nu agagawaji! Ìre ìkare go ke ekinyam me ikpoko iba? Ire, ubọk geelek ema esiikbe ikeya, kpunu geege me lek kiban̄ òkilọ Awaji chieen̄. ⁷ Ìrere ijeek òkup enyi me ibot, Awaji îriọọn̄ otu ifuk kiban̄ otutuuk isan̄a me ukut me ukut. Eya orọ, ikatet ukpook, mije, ene geelek me etete kinyi îmin me isi Awaji igak ogbogbo agagawaji.” ⁸ Jisọs onenitumu inyi ema ibe, “Ikaan̄ ogwu itumu emi isibi me isi ebilene, emi Gwun̄ Ebilene, mâtumu si ene ya isibi me isi ebi osat Awaji. ⁹ Ire, ogwu ijit emi me isi ebilene, emi si mâjit ene ya me isi ebi osat Awaji. ¹⁰ Ogwu itumu emi Gwun̄ Ebilene ilọ, mêtele inyi ene ya. Ire, ogwu geelek òtutumu Ekwukwu Mbuban ilọ, kpebetele inyi ene ya. ¹¹ “Ire ebi ene itet enyi isa isi oyerebet me isi ebi uwu ntitiin̄, mè isi ebi ibot mkpulu, mè isi ebi ibot geelek, ikasisaak lek me lek ubọk enyi ebesa inyan̄a lek kinyi. Ikasisaak lek si me lek ikọ enyi ebetumu. ¹² Mije, mgbọ isikem, Ekwukwu Mbuban môjeen̄ enyi inu enyi ebetumu.” ¹³ Ene ge me etete ogbogbo ife cha obebe Jisọs, “Ogwu Ijejeen̄, tumu nyi ngwan̄ n̄a ibe iche uche inu nte kiji okwube itele, eyi òrere emi lek, inyi emi ma.” ¹⁴ Jisọs ofọfọọk ene ya ibe, “Gwun̄ enerieen̄, ìre ekene osa emi irọ ogwu ibot oyerebet me etete kwun̄ melek ngwan̄ kwun̄?” ¹⁵ Idodo ene ya ikeya isan̄a, inenitumu inyi otutuuk ebi ife cha ibe, “Ìgwuun̄ chieen̄! Ikakaan̄ chieen̄ ile me lek inu geege. Mije, ìkare ene ikakaan̄ ogbogbo inu ire ene iluluk ugwem.” ¹⁶ Jisọs onenito urọk ge inyi ema ibe, “Enerieen̄ ge oniwop mfut me ijọn̄ kan̄, ijọn̄ ya onenitibi inu ijaan̄ enenen. ¹⁷ Ogwu enerieen̄ ya onenibene ikikeek ekiket ibe mè ìre ọmọ ìborọrọ mfut kan̄ cha mọnọ, ìkare ata ere isun̄ mfut uko ke ọmọ okaan̄. ¹⁸ “Inenitumu ifieek me lek kan̄ ibe ke ọmọ môgbugbọ oka ere ọmọ okisun̄ mfut uko kan̄ igwook, mè ikpọk inama echi òmimiin̄ igak echa, mè ikpulu otutuuk mfut ònan̄a me uko kan̄, mè otutuuk inu ọmọ okaan̄be isi isun̄ me ere ya, inyi ikajijaka. ¹⁹ Ọmọ isirọ ikeya isan̄a, ọmọ mônitumu inyi lek kan̄, ibe, ‘Kayaka ìsisaak lek kwun̄! Siki kweek rie, mè nwọ, mè kinwọọn̄ unwọọn̄, ke inorie òwa ogbogbo etitiin̄be isun̄, eyi môbenbe owu owuwa acha.’ ²⁰ “Ire, Awaji onenigwen ogwu enerieen̄ yi, mè itumu inyi ọmọ ibe, ‘Owu ogwu burubut keyi! Eririeen̄ chereyi, ugwem kwun̄ môraka! Osikwu, ìre ekene obonikaan̄ otutuuk inu cha otitiin̄be isun̄ inyi lek kwun̄?’ ²¹ “Ikeyi ke ìbokup inyi ene geelek òkigbala inu isun̄ inyi lek kan̄ isa ibọọn̄ ubọọn̄ me akpalek, ire, me lek inu eyi Awaji, ìkakaan̄ inu geege.” ²² Jisọs onenitumu inyi ebi udun̄ kan̄ ibe, “Eya orọ, ǹkitumu inyi enyi ibe: Ikasisaak lek kinyi me lek inorie enyi eberie isa igat ugwem, mè ekwut mè ọfọnti enyi ebekisa ichit lek kinyi. ²³ Mije, ugwem îkup me uyọt igak inorie, anam akpalek si îkup me uyọt igak ekwut mè ọfọnti. ²⁴ Ìkpọ-nu unọn inyọn̄, ema kpekiwop inu, kpekirọrọkọ, kpekaan̄ uwu isun̄ inorie, kpekakaan̄ si ere ekisun̄ mfut erọkọbe me uko. Ire, Awaji gaalek me lek kan̄ okibọọk ema. Ìre enyi kperiọọn̄ ibe ke enyi mînye otu ewe igak unọn inyọn̄? ²⁵ Ìre ekene me etete kinyi obokọt isa me isisisaak lek itap mbubak mgbọ ge gaalek isọkọ me otu ifuk usen ugwem kan̄? ²⁶ Ire enyi kpebekọt irọ sọntiik inu òkup ikeya, ìre keke orọ enyi ekisisaak lek kinyi me lek ofifi inu? ²⁷ “Ìkpọ-nu uti ajakajak òkup me oron! Ìkpọ ubọk ema ekitibi! Kpekisi ikwaan̄ geege, kpekilọk ekwut inyi lek kiban̄. Ire, ǹkitumu inyi enyi ibe, ìrere ogwu ubọọn̄ Sọlọmọn me lek kan̄, me otutuuk ubọọn̄ geelek îbọọn̄be, ìkakọt ìbala lek ìjaan̄ ìsoon̄ ge me etete uti ajakajak chi. ²⁸ Ire Awaji ikibala mbubet otu oron ikeya, echi òkitibi isibi chereyi, iyakwut mîra isọp isa isọk ukan̄, ìre enyi kperiọọn̄ ibe ke Awaji môbala enyi ijaan̄ enenen igak ikeya? Enyi ebi sọntiik ichechieek kechi! ²⁹ Ikeya si, ikakpọkpọ ìkikeek mgbọ geelek ibe: Keke ke eji eberie? Keke ke eji ebenwọ? Ikasisaak lek kinyi mije inu chi. ³⁰ Mije, echichi ore inu ebi ekachieekge me lek Awaji ekilibi igọọk. Ire, eyi kinyi, Nte kinyi, Awaji, îriọọn̄ ibe ke inu chi îkup enyi me uyọt. ³¹ Kpan̄asi ikeya, ìweek mkpulu eyi Awaji, ke mênyi enyi otutuuk inu chi si igbaalek. ³² “Enyi sọntiik urum arọọn̄, ikatet ukpook. Mije, Nte kinyi îtumu ifieek ibe ke ọmọ mônyi enyi irek me mkpulu kan̄. ³³ Eya orọ, ìnyam otutuuk inu enyi ekaan̄be, mè ìsa ikpoko cha ìche ìnyi ebi ugbọọn̄. Sa me ikeya, enyi mêkaan̄ akpa ikpoko eyi kponin̄be oka, mè ikaan̄ si inu ubọọn̄ me emen inyọn̄ eyi kpotabe, mije, inọ ìkpokọt ichiin̄, nkarankat si ìkpokọt itaka. ³⁴ Mije, ere inu ubọọn̄ kinyi okupbe, ere keya si ke ejit kinyi obokup.” ³⁵ Jisọs onenitumu inyi ebi udun̄ kan̄ ibe, “Ìnwene lek kubọk ebi ìbesi ikwaan̄, ikachieek ibe mkpukan̄ kinyi iniin̄. ³⁶ Ìkup me mbem-lek kubọk bọn uwu ebi ìkikup ikpọ mgbọ nte uwu kiban̄ mônan̄abe me ijọk ido-nwa ika, inyi ema ekọt egwat lek egwuku isotu mgbọ geelek nte uwu kiban̄ môkabe, mè initọbọ ubọk me isotu. ³⁷ Mônwọn enenen inyi ebi ikwaan̄ cha geelek ebi nte uwu kiban̄ môkabe inimun̄ me mbem. Me atikọ, ǹkitumu inyi enyi ibe ke nte uwu kiban̄ ya mônwene lek kubọk gwun̄ uwu, mè iyaka inisi ikwaan̄ inyi bọn uwu kan̄ cha. Môbe bọn uwu kan̄ cha esi esiki ekweek me lek ikasi, mè isi irọ inorie iben ijet ema erie. ³⁸ Mônwọn enenen inyi ebi ikwaan̄ cha geelek ebi mêkupbe me mbem-lek mege ire mgbọ nte uwu kiban̄ môkabe, ìrere ejit eririeen̄, mè ìre me agan̄ egwe ke îka inu. ³⁹ “Ofifi si, ìriọọn̄ ibe, ire ogwukaan̄ uwu iriọọn̄ mgbọ ogwu inọ obonu uwu kan̄, ìkpotele uwu kan̄ inyi ogwu inọ ya inibum inin̄ ichiin̄ inu. ⁴⁰ Ikeya si, m̀be enyi, ìkup me mbem-lek, mije, Gwun̄ Ebilene ìbonu me ike mgbọ enyi ekakpọkpọge chieen̄.” ⁴¹ Pita onenido Jisọs ibe, “Okaan̄-ene, ìre òkito urọk yi inyi eji ebi udun̄ kwun̄? Sa ìre òkito inyi otutuuk ene?” ⁴² Okaan̄-ene ofọfọọk ọmọ ibe, “Ire owu onido ikeya, ìre ekene ore ogwu ibot ikwaan̄ ogwu òriọọn̄ inu, mè igbe utoon̄-ejit, ogwu ogwu ute-uwu obobene uwu kan̄ itap me ubọk, mè ibe iriọọn̄ ubọk ikpọ chieen̄ me lek ebi ikwaan̄ ìkup ọmọ me ubọk, mè ikinyi ema uche inorie kiban̄ me ata mgbọ? ⁴³ Mônwọn inyi ogwu ibot ikwaan̄ ya enenen, ire ogwu ute-uwu inan̄a me ije kan̄ ika, mè inimun̄ ibe ke òkirọ inu igọọk ubọk nte uwu kan̄ otemebe ọmọ. ⁴⁴ Me atikọ, ǹkitumu inyi enyi ibe ke ogwu ute-uwu ya ìkpolọlọ ibebene ogwu ibot ikwaan̄ ya ifo inyọn̄, mè isa ọmọ ito me ibot otutuuk inu geelek îkaan̄be. ⁴⁵ Ire, ire ogwu ibot ikwaan̄ ya motumu ibe, ‘Nte uwu n̄a mikup ifiin̄ ikaka,’ mè ibene ikisut bọn uwu ìkup ọmọ me ubọk, ebirieen̄ mè ebibaan̄, mè ikpulu otutuuk inorie irie, mè ikpulu miin̄ inwọ isa, ⁴⁶ ogwu ute-uwu oneninan̄a ika me usen ọmọ ikakpọkpọge chieen̄, mè ikana isibi ọmọ me nriki, ogwu ute-uwu ya ìbosusulu ogwu ibot ikwaan̄ ya osusut òfefieek ichit, mè ilap isibi ito me ere ekito ebi unye-ibot. ⁴⁷ “Eya orọ, gwun̄ uwu geelek òrọriọọn̄ inu nte uwu kan̄ okiweek, mè ijuuk itele, ìkarọ, ìkakukup si me mbem-lek, ogwu ute-uwu môsulu ọmọ ikpele osusut. ⁴⁸ Ire, gwun̄ uwu geelek ikariọọn̄ge inu nte uwu kan̄ okiweek, mè isi irọ inu òlọlọ eyi ògbegbe osusut, osusut ebesulu gwun̄ uwu keya ìbore sọntiik. Ene geelek Awaji onyibe owuwa inu, Awaji môweek si owuwa inu me ubọk ene ya. Ogwu geelek înyibe ogbogbo inu, ogbogbo inu si ke ìboweek ene ya me ubọk.” ⁴⁹ Jisọs onenitumu si ibe, “Emi ǹnu inenitap ukan̄ itaka linyọn̄. Mebe ke ukan̄ ya îbene ikilolomo sabum mgbọ keyi, kè òtop emi me lek. ⁵⁰ Ire, îkaan̄ igwook-mun̄ ge eyi ukwook eyi mâjebe itibi. M̀kpasiki efuuk mege ire mgbọ ukwook ya môrakabe.” ⁵¹ Jisọs onenido ema ibe, “Ìre enyi ekikeek ibe ke ǹnu me linyọn̄ inenitap esuuk? Iin̄-iin̄, ǹkitumu inyi enyi ibe ke ǹnu ineniche ebilene. ⁵² Bene me mgbọ keyi fo isi, ire ene go ikup me ototun̄ ukan̄ ge, ene ita mêche lek kiban̄ isan̄a, mè ikirọ ikeme ene iba kechilọ. Ebi ene iba cha si mêkirọ ikeme ebi ene ita cha. ⁵³ “Ikeya si, icheche lek môkup. Ute môrọ ikeme gwun̄ kan̄ enerieen̄, gwun̄ enerieen̄ môrọ ikeme ogwu ute. Uga môrọ ikeme gwun̄ kan̄ enenwaan̄, gwun̄ enenwaan̄ môrọ ikeme ogwu uga. Uga-olom môrọ ikeme nwa-gwun̄, nwa-gwun̄ môrọ si ikeme ogwu uga-olom.” ⁵⁴ Jisọs onenitumu inyi urum ene ya ibe, “Enyi isimun̄ oduku inyọn̄ ofitbe me agan̄ ichep-ura, enyi mîra ikitumu ibe ke ibot mônirep. Ikeya si, ibot îra irep. ⁵⁵ Efet isibene ikiwut inan̄a me òsiki, enyi mîra ikitumu ibe ke ere môniyok. Ikeya si, ere îra ibene iyok. ⁵⁶ Enyi ebi isi iba kechi! Enyi mîkisa ubọk ijọn̄ mè isinyọn̄ okupbe iriọọn̄ inu òbomọnọ irek. Ìre keke orọ enyi kperiọọn̄ inu otutuuk inu òkirọ me egwe cherekeyi osibibe? ⁵⁷ “Ìre keke orọ enyi kpekikọt iwọlọ inu ikpọ, mè iriọọn̄ eyi òtatat irọrọ? ⁵⁸ Ire ogwu ikọ kwun̄ isa owu ikije ibosi uwu oyerebet, riaak ene ya, ubọk geelek oriọọn̄be, mè gọọk ọmọ tumu fieek me oniin̄ ya. Ire òkarọ ikeya, ene ya môtaba owu isi isi ogwu ibot oyerebet. Ogwu ibot oyerebet ya môneniyaka owu itap me ubọk ogwu ikan, ogwu ikan môsasa owu isi itap me mkpọn. ⁵⁹ Me atikọ, owu môbia me mkpọn ya mege ire mgbọ owu môkpebe otutuuk ikpoko ikọ ya isan̄a kpai.”

¹ Me ike mgbọ ya, usini ebi ìkup me ere ya, enenikpa inyi Jisọs ibe ke Pailet îkpan̄ ebi Ju ìnan̄a me Galili mgbọ ife cha ekigwa ngwugwa me ubọk me emen Uwu Mbuban. ² Jisọs ododo ebi ìtutumu ikọ ya ibe, “Ìre enyi ekikeek ibe ke ebi Galili ebi ekpan̄be cha erọrọ ijo inu igak otutuuk ebi Galili, ke Awaji obak me lek isulu ema osusut ikeya? ³ Ire ikeya ke enyi ekikeek, îlọ. Mije, ìrere enyi me lek kinyi, ire enyi kpegwu ikom inan̄a me emen ijo kinyi, otutuuk kinyi mêkwaan̄ si ike ife cha ekwaan̄be. ⁴ Ìrere akọp mè ene jeeta cha ebi ìkwakwaan̄ mgbọ uwu oket ogbugbọbe ikeme ema me Sailowam, ìre enyi ekikeek ibe ke ife chi mîrọ ijo inu igak otutuuk ebi ìluk me Jeruselem? ⁵ Iin̄-iin̄, ìkare ikeya. Ìrere enyi me lek kinyi, îtata enyi egwugwu ikom inan̄a me emen ijo kinyi, enyi otutuuk ene mêkwaan̄ si isan̄a ike ife cha ekwaan̄be.” ⁶ Jisọs onenito urọk ge inyi ema ibe, “Îkaan̄ enerieen̄ ge òkakaan̄ uti figi me emen uko gerep kan̄, mè ikijijen̄e ikisi ikpọ mè ìre ọmọ mômun̄ mfut me inyọn̄ uti ya. Ire, ìkamun̄ mfut geege me inyọn̄. ⁷ Inenitumu inyi ogwu òkisi ikwaan̄ me uko ya ibe, ‘Acha ita ire eya nkijijen̄e ebon uti figi yi inikiweek mfut me inyọn̄. Ire, ǹkamumun̄ kubọk mfut geege. Ìre uti yi ìbokpọkpọ ikeke ikeyi ikike ichit ijọn̄ ni? Fieek fiin̄!’ ⁸ Ire, ogwu òkisi ikwaan̄ me uko ya ofọfọọk ọmọ ibe, ‘Ogwu nte tele mè ikup-nu acha ge yi isọkọ me lek, mè ǹchiin̄ ijọn̄ ǹkana, mè ǹgwook inorie uti me ebon, mè eyaka ekpọ-nu. ⁹ Ire ito mfut acha òbonu, mônwọn. Ire ìkato mfut mgbọ ya, efieek efiin̄.’ ” ¹⁰ Îkaan̄ Usen Mbuban ge, Jisọs okijeen̄ inu me uwu ntitiin̄ ge. ¹¹ Enenwaan̄ ge ijo erumun̄ otapbe akọọk otutuuk akọp mè acha jeeta òwa si me uwu ntitiin̄ ya okupbe. Ijo erumun̄ ya ìtetet ogwu enenwaan̄ ya inwun igọbọ. Ogwu enenwaan̄ ya ìkakikọt ìbene lek ìkeke ìtat. ¹² Mgbọ Jisọs omun̄be ogwu enenwaan̄ ya, igwegwen ọmọ ibe, “Ogwu enenwaan̄, mîrọ inyi owu ònwọnọ me ubọk orukan̄ òkisisaak owu!” ¹³ Itotoon̄ ubọk me lek ogwu enenwaan̄ ya. Mgbọ yaage, ogwu enenwaan̄ ya obebene lek ikeke itat, mè ikitọn̄ Awaji. ¹⁴ Ogwu ibot uwu ntitiin̄ ya onanaan̄ ejit mije Jisọs ogwabe ene me Usen Mbuban, mè igana inyi ebi ìkup me uwu ya ibe, “Usen gweregwen okup isasa isi ikwaan̄. Ogwu iweek ibe egwa ọmọ, inu me emen usen gweregwen cha, ikanu me Usen Mbuban.” ¹⁵ Jisọs ofọfọọk ọmọ ibe, “Enyi ebi isi iba kechi! Ìre enyi kpekitọn̄ọ erie mbuuk kinyi, mè ìre inyinya akpan kinyi me uwu anam isa ije isibi isi inyi mudim me Usen Mbuban? ¹⁶ Ire enyi ikirọ ikeya me lek anam ikike, sa ogwu enenwaan̄ yi, gwun̄ kè Ebereham, ogwu Yọk otapbe mkpọn otutuuk akọp mè acha jeeta ye? Ìre ìkagbe ibe etọn̄ọ ogwu enenwaan̄ yi esibi me emen mkpọn me Usen Mbuban ni?” ¹⁷ Ikọ ya Jisọs odobe ema okpọkpọ itet otutuuk ebi ochicha kan̄ cha esip. Ire, otutuuk ene ekekibele ejit me lek otutuuk inu ukechieen̄ Jisọs okirọ me etete kiban̄. ¹⁸ Jisọs onenikitumu ibe, “Ìre mkpulu eyi Awaji ìbet lek keke mọnọ? Sa ìre keke ke mbasa itọ me lek? ¹⁹ Mkpulu eyi Awaji ìkup kubọk ukwuuk uti Mọsitadi eyi gwun̄ enerieen̄ ge omọnọbe isi iwop me uko kan̄. Ukwuuk uti ya otitibi, mè ikana ikpele uti. Unọn òwulu me inyọn̄ okekinu inisọọk me inyọn̄ otu agọọk uti ya.” ²⁰ Jisọs okpọkpọk ikitumu ibe, “Ìre keke ke mbasa mkpulu eyi Awaji itọ me lek mọnọ? ²¹ Mkpulu eyi Awaji ìkup kubọk sọntiik olat eyi enenwaan̄ otọbe itap me lek owuwa akpa ekọkọk eyi ìbosa irọ fituru, mè ifuku ikana mege olat ya okakana iso lek otutuuk akpa ekọkọk ya, mè irọ inyi akpa ya iwuku.” ²² Mgbọ Jisọs okije ibosi Jeruselem, ikpọkpọ ikije igwaka inin̄ owuwa ama ile mè asabọn ama òkup me oniin̄ ya, me ikijeen̄ ebi ama cha inu. ²³ Ene ge ododo ọmọ ibe, “Okaan̄-ene, ìre ibot ene inen mè inen gaalek ke ebenyan̄a isibi?” Jisọs otutumu inyi ema ibe, ²⁴ “Ìsa ubọk geelek enyi ekọtbe, mè ìraka inin̄ me otunchit eyi ògbagba inwan. Mije, ǹkitumu inyi enyi ibe ke ogbogbo ene mêsa lek igak, ire, kpebekọt iraka inin̄ otunchit ya. ²⁵ Ogwukaan̄ uwu isinan̄a ikeke, mè inichit isotu ya, enyi mêkeke me oyet, mè itọbọ ubọk me otu isotu, mè iriaak igak ibe, ‘Soso Ogwu nte, gwuku isotu nyi eji.’ Ire, ogwukaan̄ uwu ya môfọọk enyi ibe, ‘Ǹkariọọn̄ enyi isi. Ǹkarọriọọn̄ si ere enyi enan̄abe.’ ²⁶ “Mgbọ ya, enyi mênibene ikitumu ibe, ‘Iyak, eji mîgọọk owu igbaan̄ ikweek irie mè inwọ, owu si ojejeen̄ eji inu me lek oniin̄ eji elukbe me ama kiji.’ ²⁷ “Ire, ogwukaan̄ uwu ya môkpọk ifọọk enyi ibe, ‘Ǹkariọọn̄ enyi isi. Ǹkarọriọọn̄ si ere enyi enan̄abe. Ìje ìnan̄a emi me isi, enyi ebi ijo kechi!’ ²⁸ “Mgbọ ya, enyi mêto ujat ito, mè itaka ejeek enenen. Mije, enyi mêbene chieen̄ imun̄ Ebereham mè Ajiki mè Jekọp mè otutuuk ebi nriran ukot ikaan̄ ekupbe me isi Awaji, ire, elalap enyi isibi igwook me oyet. ²⁹ Ebi ene mênan̄a me ido geelek me linyọn̄, me agan̄ mbum-ura mè agan̄ ichep-ura, me agan̄ inyọn̄ mè agan̄ òsiki inu inigọọk isiki ikweek irie ijọk me ama ubọọn̄ Awaji. ³⁰ Me atikọ, owuwa ebi ìrere ebi isi chereyi mêkana ebi òta me mgbọ ya. Owuwa ebi òta chereyi mêkana ebi isi me mgbọ ya.” ³¹ Mgbọ Jisọs okitumu ikọ ya, usini ebi Farisi enunu initumu inyi ọmọ ibe, “Nan̄a me ere keyi fo ofifi ere si kup, ke Erọdu òkiweek ikpakpan̄ owu.” ³² Jisọs ofọfọọk ema ibe, “Ìsi ìlook ekpukuruk ya ibe ke emi mâgwa ene, mè irieen̄ ijo erumun̄ isibi me emen ene cherekeyi mè iyakwut. Òso egwe ita, mârọ ikwaan̄ n̄a isan̄a. ³³ Ubọk geelek, emi mâje ije n̄a inyi isi chereyi mè iyakwut mè uban̄akwut, mije, ogwu nriran geege ìkpokwu me ofifi ere, ilọ me Jeruselem gaalek.” ³⁴ Jisọs onenitumu ibe, “Jei Jeruselem! Jeruselem! Owu ama òkikpan̄ ebi nriran, mè ikisa ewuuk itọbọ ebi ikwaan̄ geelek Awaji oriabe ijet owu. Owuwa mgbọ, emi me lek n̄a nkiweek ikpukpulu enyi ebi Jeruselem itap me lek n̄a kubọk uman unọn okikpulu ebi bọn ichit me irak uwop. Ire, enyi kpechieek. ³⁵ Ìkpọ, mîyaak Uwu Mbuban kinyi itele inyi enyi ikeya ukpọk ukpọk emen. Me atikọ, ǹkitumu inyi enyi ibe ke enyi kpebeyaka imun̄ emi igak ikeya mege ire mgbọ enyi mêkitumu ibe, ‘Ugbana ikup inyi ogwu ònunu me erieen̄ Okumugwem!’ ”

¹ Usen Mbuban ge, ogwu ibot ebi Farisi ge onenisa Jisọs ifo uwu kan̄ isi itet ichen. Mgbọ Jisọs okupbe me uwu ya ikirie inorie, ebi ìkup me uwu ya ekekiruk chieen̄ ikpọ inu ìborọ. ² Me emen uwu ya, enerieen̄ ge òkifiak orukan̄ mfuuk òwa okupbe me isi kè Jisọs. ³ Jisọs onenido ebi Farisi mè ebi ìjeen̄ Ikan ìkup me uwu ya ibe, “Ìre Ikan kè Mosis înyi irek ibe egwa ene me Usen Mbuban, sa ìre ìkanyi?” ⁴ Ire, ife cha ekpọkpọ iriaan̄ otu, kpesan̄a amọn. Jisọs ototoon̄ ene ya ubọk me lek, mè igwa ene ya, mè ibe ije ifo. ⁵ Mgbọ îriabe ene ya ifo isan̄a, inenido ife cha ibe, “Ire ene ge me etete kinyi ikaan̄ gwun̄ enerieen̄, mè ìre erie mbuuk ònanan̄a irọn̄ inin̄ emen udọn̄ mun̄ me Usen Mbuban, ìre ene ya ìkpotaba gwun̄ ya mè ìre anam ya isibi mgbọ yaage?” ⁶ Ire, ife cha kpeyaka imun̄ inu geege ebefọọk. ⁷ Jisọs onenimun̄ ubọk otutuuk ebi egwenbe me irek inorie ya ekisi igobo irek umin inyi lek kiban̄ me lek ikasi inorie ya, mè inito urọk ge inyi ema ibe, ⁸ “Ire ene ito ijọk ido-nwa, mè igwen owu, owu osisi ere ya, kasi ìsi ìkweek me irek umin. Mije, ogwu ibot ijọk ya môkọt igwen si ofifi ene ogwu òmimin igak owu. ⁹ Ire igwen ogwu òmimin igak owu, mè ene ya isinu, ogwu ògwegwen enyi ene iba cha mônu inibe owu, ‘Kana irek kwun̄ sa nyi ene yi!’ Mgbọ keya, owu môsa isi esip inan̄a ikeke isi ikweek me ere òsisiki ichit. ¹⁰ Kpan̄asi ikeya, ire ene igwen owu me irek ijọk, mè ire osi, mọnọ irek òsisiki ichit. Ogwu ibot ijọk ya isinu, mônibe owu, ‘Une, nan̄a keke je fo isi si mọnọ ata irek umin.’ Sa me ikeya, owu môkana ire ogwu enyibe umin me isi otutuuk ebi egwenbe melek kwun̄. ¹¹ Mije, ene geelek òbebene lek kan̄, mêgele ene ya isiki. Ene geelek òsisiki lek kan̄ me ijọn̄, mêbene ene ya ifo inyọn̄.” ¹² Jisọs itutumu ikeya inyi ife cha isan̄a, inenitumu inyi ogwu ògwegwen ema me ijọk ya ibe, “Mgbọ geelek obokigwen ene inorie, mè ìre òboto ijọk, kakigwen ebi unene kwun̄, mè ìre ebi ngwan̄ kwun̄, mè ìre ebi egep kwun̄, mè ìre ebi melek kwun̄ ebi ìbọbọọn̄ ubọọn̄. Mije, ire ogwen ema, ema mêkọt iyaka igwen owu inorie si. Sa me ikeya, owu môbọkọ useen̄ inorie ema eriebe me uwu kwun̄. ¹³ Kpan̄asi ikeya, ire oto ijọk, gwen ebi ugbọọn̄, mè ebi ngọm, mè ebi akọọk, mè ebi ǹnàan̄. ¹⁴ Osirọ ikeya, Awaji môgbana owu. Mije, ubọk geelek ife cha kpebekọt ikpe owu useen̄ inorie ema eriebe me uwu kwun̄, Awaji mônyi owu useen̄ mkpukpe kwun̄ me mgbọ ebi ata irọrọ mêjomobe me mkpa.” ¹⁵ Mgbọ enerieen̄ ge me lek ebi ìkigọọk irie inu me uwu ogwu Farisi ya onọbe ikọ ya Jisọs otumube, inenitumu inyi Jisọs ibe, “Jei, mônwọn inyi ene geelek òbogọọk irie inorie ijọk me mkpulu eyi Awaji enenen!” ¹⁶ Jisọs onenito urọk ge isa ifọọk ene ya otu ibe, “Enerieen̄ ge onibene ikineen̄ lek itoto ikpele ijọk, mè iniria ikwaan̄ igwen owuwa ebi ene ibe enu ijọk kan̄. ¹⁷ Mgbọ mgbọ orebe, ogwukaan̄ ijọk ya oneniria gwun̄ uwu kan̄ isibi ibe isi ilook ebi egwenbe cha ibe enu, ke mîra ineen̄ otutuuk inu geelek isun̄ isan̄a. ¹⁸ “Ire, otutuuk ebi egwenbe cha me ge, me ge, ejijit igwen ya. Ogwu ikup oweek ikọ ọmọ obotumu isa isan̄a lek kan̄. Ogwu adasi otutumu ibe ke mgbọ keyi mgbọ keyi ke ọmọ olep ijọn̄ uko; ke ọmọ ìkiweek isisi ikpọ ijọn̄ ya. Eya orọ, ke ọmọ ìkpokọt inu ijọk ya. Soso, mè ogwugwu ikanaan̄ ejit. ¹⁹ “Ogwu òso ene iba ololook ibe ke mgbọ keyi mgbọ keyi ke ọmọ olep akọp erie mbuuk ekisa isi ikwaan̄ me uko. Mgbọ yi, ke ọmọ ìbosi isi itọ ema ikpọ mè ìre ema mînye lek ikwaan̄. Eya orọ, ke ọmọ ìkpokọt inu ijọk ya. Soso, mè ogwugwu ikanaan̄ ejit. ²⁰ “Ikeya si, ofifi ene ofọfọọk ibe ke mgbọ keyi mgbọ keyi ke ọmọ odo aya nwa. Eya orọ, ke ọmọ ìkpokọt inu ijọk ya. ²¹ “Gwun̄ uwu ogwukaan̄ ijọk ya ogwugwu ikom ika, mè inikpa otutuuk inu ebi egwenbe cha etumube inyi nte uwu kan̄. Ogwu ute-uwu ya onanaan̄ ejit enenen, mè itumu inyi ogwu gwun̄ uwu ya ibe, ‘Gwat lek je sibi si otutuuk lek uga oniin̄ mè asabọn oniin̄ òkup me emen ama yi, mè kpulu otutuuk ebi ugbọọn̄, mè ebi ngọm, mè ebi ǹnàan̄, mè ebi akọọk geelek omun̄be sa na.’ ²² “Ìkafiin̄ mgbọ, gwun̄ uwu ya osisi, mè ika, mè initumu inyi ogwu ute-uwu ibe ke ọmọ îkpulu otutuuk ife cha ebi ọmọ omun̄be isa inu. Ire, ke uwu ìkajot. ²³ “Ogwukaan̄ uwu ya otutumu inyi gwun̄ uwu kan̄ ya ibe, ‘Je nin̄ otutuuk oniin̄ geelek ònanan̄a me ama yi isibi, mè nin̄ emen asabọn oniin̄ geelek òkup me udun̄ ama yi si kpulu ebi geelek omun̄be me ere cha sa na, inyi uwu n̄a inin̄ ijot. ²⁴ Mije, ǹkitumu inyi enyi ibe, me atikọ, kpunu ene geege me etete ebi egwenbe cha òborie inu geege me ijọk n̄a.’ ” ²⁵ Usen ge, ogbogbo ene egbugbuku ikigọọk Jisọs ije me ejit oniin̄. Jisọs okakana isi ikpọ ema, mè itumu inyi ema ibe, ²⁶ “Ire ikaan̄ ogwu inu me lek n̄a, ene ya ìkpokọt ire ogwu udun̄ n̄a îtata ìmama emi enenen igak ubọk îmabe nte kan̄ mè nga kan̄, mè nwa kan̄ mè bọn kan̄, mè ngwan̄ kan̄ enerieen̄ mè ngwan̄ kan̄ enenwaan̄. Eyi ògagak otutuuk, ire ene ya ìkama emi ìgak ugwem kan̄, ene ya ìkagbe irere ogwu udun̄ n̄a. ²⁷ Ofifi si, ikaan̄ ogwu ikabenge uti nkwurieen̄ kan̄ ìsa ìgọọk emi, ene ya ìkpokọt ire ogwu udun̄ n̄a. ²⁸ “Ire ene geelek me etete kinyi ibonama ubene ubene uwu inyọn̄, sabum ene ya obobene inama uwu ya, ìbodadasi isiki ikweek ifuk otu ifuk ikpoko uwu ya oboben, mè ikpọ-nu mè ìre ọmọ îkaan̄ ikpoko iso isasa inama uwu ya isan̄a, mè ìre ọmọ ìkakaan̄. ²⁹ Mije, ire ene ya ìkadasi ìfuk ifuk-ibot ikeya, mè ire ikpọkpọ isi itap uwu ya me ijọn̄, mè ibene ikinama, mè ìkakọt ìnama uwu ya ìsan̄a, ebi geelek ìmumun̄ mgbidim ebek uwu ya mêkichak ene ya itap ebot. ³⁰ Mêkitumu ibe, ‘Omun̄, ene yilọ îtap uwu me ijọn̄, ìkakọt ìnama ìsan̄a.’ ³¹ “Ofifi si, ire ogwu ubọọn̄ òkakaan̄ akọp obop ebi akọn̄ gaalek ibosi itim akọn̄ melek ofifi ogwu ubọọn̄ òkakaan̄ akọp obop ebi akọn̄ iba, ìbodadasi ifuk ifuk-ibot ikpọ mè ìre ọmọ môkọt isa akọp obop ebi akọn̄ kan̄ isi itim akọn̄ melek ogwu ubọọn̄ ogwu òkakaan̄ akọp obop ebi akọn̄ iba. ³² Ire ogwu ubọọn̄ ya ifuk ifuk-ibot, mè imun̄ ibe ke ọmọ ìkpokọt isa ebi akọn̄ kan̄ cha ebi ekawage isi itim akọn̄ melek ogwu ubọọn̄ keyilọ òkakaan̄ owuwa ebi akọn̄, mgbọ ogwu ubọọn̄ keyilọ ya ikajejege ìgbet ere nu, môsa ata mgbọ isan̄a ebi ene iria ibe esibi egọọk me oniin̄ esi eriaak, mè eweek esuuk. ³³ Ikeya si, ene geelek me etete kinyi ogwu ikatelege otutuuk inu geelek îkaan̄be, ene ya ìkpokọt ire ogwu udun̄ n̄a.” ³⁴ Jisọs onenitumu ibe, “Me atikọ, uchi înwọn. Ire, ire uchi ifiin̄ utop kan̄, kpunu ubọk ebeyaka ikọt irọ mè ikaan̄ utop kan̄. ³⁵ Eya orọ, uchi ya ìkayaka ìnwọn isasa irọ inu geege. Ire iben igwook me ijọn̄, ìkpokọt itap ubọk irọ mè ijọn̄ itibi inu ijaan̄. Inu òkukup irọrọ me lek uchi ya ìre ibeben ifiin̄. Ogwu ikaan̄ utọn̄ ìbosa inọ ikọ, inọ!”

¹ Usen ge, owuwa ebi ìkibọkọ otitip ido mè owuwa ebi kpekisun̄ Ikan ebi Ju enunu inigọọk igban̄ ijejeen̄ kè Jisọs. ² Ire, ebi Farisi mè ebi ìjeen̄ Ikan ìkup me ere ya ebebene ikinunuun̄ me etete kiban̄ ibe ke Jisọs ìkibọkọ ebi ijo itap, mè ikigọọk ema igbaan̄ irie inorie. ³ Jisọs onọnọ ikọ ya ema ekinunuun̄, mè inito urọk ge inyi ema ibe, ⁴ “Ire ene ge me etete kinyi ikaan̄ efit arọọn̄, mè ikpulu ema isa isibi isi mè esi etaka mbubet, arọọn̄ ge oneninan̄a me lek ichep, ene ya môtele akọp arọọn̄ onaan̄ge mè onaan̄ge kechilọ, mè ikijijen̄e ikana isi iweek arọọn̄ ge ya òchechep mege ire mgbọ môweekbe imun̄. ⁵ Ene ya isiweek arọọn̄ ya imun̄, môsa me ubelejit iben arọọn̄ ya itoon̄ me oguga, mè isa ije ifo. ⁶ Isika inire uwu, mônigwen ebi unene kan̄, mè ebi melek kan̄ elukbe me ere ge ibe enegọọk ọmọ enwọọn̄ unwọọn̄, mije ke ọmọ îweek arọọn̄ kan̄ òchechep imun̄. ⁷ Me atikọ, ǹkitumu inyi enyi ibe, ubọk yaage si, unwọọn̄ òmimin igak eya môkup me emen inyọn̄ me ibot ogwu ijo ge gaalek ògwugwu ikom isibi me ijo irọrọ, igak me ibot akọp ene onaan̄ge mè onaan̄ge ebi ìkigwen lek kiban̄ ebi ata irọrọ, ebi igwugwu ikom ikakupge me uyọt. ⁸ “Ofifi si, ire enenwaan̄ ge ikaan̄ akọp darakima, ge oneninan̄a me lek ichep, ogwu enenwaan̄ ya ìbomimin ukan̄ isa imọọn̄ inu ibene irak inu geelek me uwu kan̄ ichan, mè igwuun̄ chieen̄ iweek ikpoko ya mege ire mgbọ môweekbe imun̄. ⁹ Isiniweek ikpoko ya imun̄, môgwen ebi unene kan̄ mè ebi melek kan̄ elukbe me ere ge ibe enegọọk ọmọ enwọọn̄ unwọọn̄, mije, ke ọmọ îweek ikpoko kan̄ òchechep imun̄. ¹⁰ Ikeya si, ǹkitumu atikọ inyi enyi ibe ke ikpele unwọọn̄ ọmọ òwa me etete ebi osat Awaji me ibot ogwu ijo ge gaalek ògwugwu ikom isibi me emen ijo kan̄.” ¹¹ Jisọs okpọkpọk ito ofifi urọk inyi ema ibe, “Îkaan̄ ogwu enerieen̄ ge òkakaan̄ ibot bọn ebirieen̄ iba. ¹² Ogwu ijija me lek kiban̄ onenigwen ogwu ute, mè itumu inyi ibe, ‘Nte n̄a, che otutuuk inu okaan̄be nyi eji ngwan̄ iba, mè nyi emi uche eyi òrere emi lek mgbọ keyi.’ Ogwu ute okpukpulu otutuuk inu îkaan̄be iche irek iba inyi bọn kan̄ iba cha, mè isa uche eyi ogwu ijija ya inyi ogwukaan̄. Ibọbọkọ. ¹³ “Sọntiik mgbọ iraraka, gwun̄ enerieen̄ ogwu ijija ya okpukpulu otutuuk inu kan̄ cha inyam, mè ibọkọ ikpoko itap me akpa, mè ibene ije ije inan̄a me uwu ifo atalek ujọn̄ọ ere isi iluk, mè ifiat ikpoko cha otutuuk isan̄a isa iluk ubene ugwem melek ebi òje oyet. ¹⁴ Mgbọ îfiatbe otutuuk ikpoko cha isan̄a kpai, uga akan̄ oneninin̄ ikana otutuuk ido ere îlukbe ya. Uraafiọọn̄ otetet ọmọ ire lek, ìkayaka ìkaan̄ inu geege ìborie. ¹⁵ Inenisi iweek ikwaan̄ me ubọk gwun̄ enerieen̄ ge me ido ya. Ogwu enerieen̄ ya oneniria ọmọ ibe ikisi ikpukpo okodi inyi ọmọ. ¹⁶ Me ere ìkikpukpo okodi cha, kpunu ogwu òkinyi ọmọ inorie geege. Eya orọ, ikekikeek ibe ke ọmọ môkọt igọọk ikirie inorie okodi cha okirie. ¹⁷ “Mije otutuuk ufialek cha, gwun̄ ya oneninọ lek, mè ibe, ‘Jei! Ìre kpasi ukwook ke nkibọkọ ikeyi? Otutuuk ebi usun̄ ìkisi ikwaan̄ inyi nte n̄a mîkaan̄ inorie ikirie ijot otu, mè ikirie isik. Emi nnenikikwu me lek uraafiọọn̄ me ere keyi! ¹⁸ Mâgwu ikom ije ifo igọọk nte n̄a. Nsire uwu, mâriaak nte n̄a, mè itumu inyi ibe: Jei, nte n̄a, nrọ ijo inu me isi Awaji, mè irọ owu si ilọ. ¹⁹ Emi ǹkayaka ìgbe ogwu ebegwen gwun̄ kwun̄. Eya orọ, mọnọ emi kubọk ene ge me lek ebi usun̄ kwun̄.’ ²⁰ Itutumu ikeya ifieek me ejit kan̄ isan̄a, inanan̄a ikeke, mè ije ika igọọk ogwu ute. Ire, mgbọ gwun̄ ya ìkajeje ìgbet, ogwu ute okukup me ujọn̄ọ ere imun̄ ọmọ, mè ikaan̄ ejit njijin me lek kan̄, mè isa ekot ekot ilibi isi ikweek ogwu gwun̄, mè iwele ubọk iba ikana ọmọ ikat. ²¹ “Mgbọ yaage, gwun̄ enerieen̄ ya obebene ikitumu inyi ogwu ute ibe, ‘Jei Nte n̄a, nrọ ijo inu me isi Awaji, mè irọ owu si ilọ enenen. Emi ǹkayaka ìgbe ogwu ebegwen gwun̄ kwun̄.’ ²² “Ìkatutumu ikọ ya ìsan̄a me otu, ogwu ute otataan̄ ukpo itumu inyi ebi usun̄ kan̄ ibe, ‘Ìgwat lek ìsa ọfọnti eyi òjajaan̄ ichit ìna ìnitap gwun̄ n̄a, mè ìmọnọ mkpọtubọk ìsa ìnitap ọmọ me otubọk, mè ìteen̄ ikpukot ìsa ìjet, inyi itap ikwek ukot, ²³ mè ìsi ìtet erie mbuuk ya eyi egwookbe inyi imin ufuk mè ijaan̄ lek ìkpan̄, mè ìbala ìsa ìtem inorie, mè eji enerie ijọk. ²⁴ Mije, gwun̄ n̄a yi îkwu, mè iyaka ijomo me mkpa. Ọmọ îchep, ekpọkpọk iweek ọmọ imun̄.’ Sa me ikeyi, nte gwun̄ ya ototo ijọk, ebi ene ebebene ikirie, mè ikinwọ. ²⁵ “Otutuuk mgbọ cha, ngwan̄ gwun̄ ya ogwu ugane ọmọ òwa me ere îkikpukpo anam ogwu ute. Mgbọ îkika, mè inije igbet uwu, inọnọ ida nkwukwak mè okput òjijop okitaan̄ me uwu kiban̄. ²⁶ Eya orọ, igwegwen ogwu usun̄ kiban̄ ge ikido ibe mè ìre keke ke ekirọ me uwu kiban̄ ye? ²⁷ Ogwu usun̄ ya ofọfọọk ọmọ ibe, ‘Îre ngwan̄ kwun̄ ogwu ijija oka. Eya orọ nte kwun̄ otobe ijọk, mè ibe ekpan̄ erie mbuuk eyi egwookbe ya, mè esa etem inorie, mije ke ngwan̄ kwun̄ ya îka me utelelek mè unye-lek. Îre eya orọ uwu ya okikput.’ ²⁸ “Ogwu ngwan̄ ogwu ugane inọnọ ikọ ya, inanaan̄ ejit enenen, mè ijit ininin̄ uwu. Mgbọ ogwu ute onọbe ibe ke gwun̄ kan̄ ogwu ugane îka, mè inaan̄ ejit, mè ijit ininin̄ uwu, isisibi igọọk, mè isi iriaak. ²⁹ Ire, gwun̄ ya ofọfọọk ogwu ute ibe, ‘Owu kpọ-nu, karake acha acha mbenebe ikisi ikwaan̄ inyi owu kubọk usun̄, ǹkakpaka ida ikọ kwun̄ kubọk ge. Ire, owu òkakup-nu usen ge, mè ìmọnọ kubọk sọntiik gwun̄ ebot ge ìnyi emi ibe emi, “Bọkọ kpan̄ sa rie ijọk melek ebi unene kwun̄.” ³⁰ Ire, mgbọ keyi gwun̄ kwun̄ yilọ, ogwu òkpukpulu inu kwun̄ isa isi ifiat isan̄a melek ebi òje oyet, ogwube ikom ije ukpọk ubọk ika inu me uwu, owu oneninyi ida ibe ekpan̄ erie mbuuk ya efiatbe mgbọ igwook inyi imin ufuk etem enyi, mè itaka.’ ³¹ “Ogwu ute obebe gwun̄ ya, ‘Iin̄-iin̄ gwun̄ n̄a! Kpọ, owu melek n̄a ekikup mgbọ geelek. Otutuuk inu geelek nkaan̄be ìre eyi kwun̄. ³² Eya orọ, îgbe ibe eji erie ijọk, mije, ngwan̄ kwun̄ yi ìkup mgbọ yi kubọk ogwu òkwukwu itele eji, mè iyaka ikpọk ijomo me mkpa, mè ikup si kubọk ogwu òchechep, eweweek imun̄.’ ”

¹ Jisọs onenito urọk ge inyi ebi udun̄ kan̄ ibe, “Îkaan̄ ogwu ubọọn̄ ge òkakaan̄ inu enenen, mè ikaan̄ ogwu ibot ikwaan̄ òkikpọ chieen̄ me lek otutuuk inu îkaan̄be. Usen ge ogwu ubọọn̄ yi oneninọ ibe ke ogwu ibot ikwaan̄ kan̄ ya ìkpọkpọ ikijijaka inu ọmọ otapbe ogwugwu me ubọk. ² Eya orọ, ogwu ubọọn̄ yi ogwegwen ogwu ibot ikwaan̄ kan̄ ya, mè ido ibe, ‘Ìre keke ke nkinọ ikeyi òfolek kwun̄? Mgbọ keyi, narọ ifuk nyi emi ubọk osabe ikpọ chieen̄ me lek otutuuk inu geelek ntapbe owu me ubọk, mije, owu òkpoyaka ire ogwu ibot ikwaan̄ inyi emi igak ikeya.’ ³ “Ogwu ibot ikwaan̄ ya onenikup me lek kan̄, mè ibe, ‘Jei, ìre m̀barọrọ mgbọ keyi? Nte uwu n̄a mônibọkọ ikwaan̄ yi isan̄a emi me ubọk. Emi ǹkanye lek ìsoon̄ ogwu môkọtbe igọọk ikisi ikwaan̄ uko. Ofifi kan̄, esip ìkpochieek ibe emi ǹkọt ǹgọọk ǹkenje ǹkana ere m̀beek inu. ⁴ Nriọọn̄ inu mbarọ inyi ebi ene ebọkọ emi etap me uwu kiban̄ mgbọ nte uwu n̄a isilap emi inan̄a me lek ikwaan̄ me ere keyi.’ ⁵ “Ineniria ikwaan̄, me nlelet, igwen ebi geelek ìkakaan̄ nte uwu kan̄ urieek me ge me ge, mè ido ogwu adasi ibe, ‘Ìre kpasi urieek ke okaan̄ nte uwu n̄a?’ ⁶ “Ogwu urieek keya ofọfọọk ibe ke ọmọ ìkaan̄ urieek efit ogbokot aran̄ olifu jeeta. “Itutumu inyi ogwu urieek ya ibe, ‘Kayaka ìfiat mgbọ, bọkọ ikpa urieek kwun̄, siki kweek, mè ge ibe ke ìre efit ogbokot ini.’ ⁷ “Igwegwen ogwu òso iba, mè ido ibe, ‘Ìre kpasi urieek ke okaan̄ nte uwu n̄a?’ “Ogwu urieek keya ofọfọọk ibe ke ọmọ ìkaan̄ urieek obop akpa akpa ge. “Ibebe ogwugwa, ‘Bọkọ ikpa urieek kwun̄, mè ge tap ibe ke ìre efit akpa jeeta.’ ⁸ “Mgbọ ogwu ubọọn̄ ya onọbe inu ya ogwu ikwaan̄ kan̄ ya orọbe, itọtọn̄ ogwu ibot ikwaan̄ ya enenen mije ujọn̄ọ ifuk-ibot îkaan̄be inyi lek kan̄.” Jisọs onenitumu ibe, “Me atikọ, ebi ìkigọọk inu linyọn̄ keyi mîkisa ifuk-ibot igọọk ebi melek kiban̄ irọ inu igak ike ebi ìkup me emen utoon̄ eyi Awaji ekirọ. ⁹ Ikeya si, m̀be enyi: Ìsa inu ubọọn̄ kinyi me linyọn̄ keyi ìtet unene ìnyi lek kinyi. Kperiọọn̄, ikaan̄ mgbọ inu ubọọn̄ cha isiraka, enyi mêre ebi ebebọkọ itap me uwu eyi òbokup ire mgbọ ikakaan̄ge itata. ¹⁰ “Mije, ene geelek ekọtbe itoon̄ ejit me lek me lek sọntiik inu, mêkọt itoon̄ ejit me lek si me lek inu ilile. Ubọk yaage si, ene geelek ekakọtge ìtoon̄ ejit me lek me lek sọntiik inu, kpebekọt itoon̄ ene ya ejit me lek si me lek inu ilile. ¹¹ Eya orọ, ire kpekọt itoon̄ enyi ejit me lek me ubọk enyi ekisa ikpọ chieen̄ me lek inu ubọọn̄ eyi linyọn̄ keyi, ìre ekene obokana atata inu ubọọn̄ eyi emen inyọn̄ itap enyi me ubọk? ¹² Ofifi si, ire enyi kpekọt ikpọ chieen̄ me lek inu ofifi ene òkup enyi me ubọk, ìsibi ibe, ire inyi enyi eyi kinyi gaalek, ke enyi kpebekọt ikpọ si chieen̄ me lek. Eya orọ, kpebenyi enyi inu eyi kinyi. ¹³ “Kpunu gwun̄ uwu geege òbokọt ikisi ikwaan̄ inyi nte uwu iba me mgbọ yaage. Ire ìkama ene ge, mè ìcha ogwulọ, môsa otutuuk ejit kan̄ isi ikwaan̄ inyi ene ge, mè ikpọ ogwulọ chieen̄ isiki. Ikeya si, enyi kpebekọt igọọk Awaji, mè ikigọọk si ikpoko.” ¹⁴ Mgbọ ebi Farisi enọbe ikọ cha, ema ebebene ikichak Jisọs, mije, ema mîma ikpoko enenen. ¹⁵ Jisọs obebene ikitumu inyi ema ibe, “Enyi kechi! Me isi ebi ene, enyi ekirọ kubọk enyi ìre ebi ata ife. Ire, Awaji îriọọn̄ inu òkup me emen ejit kinyi isan̄a kpai. Ìriọọn̄ ibe ke inu òmimin enenen me isi ebilene, ìre mbuban inu me isi Awaji. ¹⁶ “Ikan kè Mosis melek inu ebi nriran ukot ikaan̄ egebe ìkup me uyọt bene me ukot ikaan̄ na re ukot kè Jọn ògwook mun̄ gaalek. Ire, bene me ukot kè Jọn fo isi, ijejeen̄ eyi ata etip eyi Awaji îyaka inibọkọ irek. Mgbọ keyi, owuwa ene mêkibọkọ ata etip yi itap, mè ikije itibi uga ufialek, mè ikiraka inin̄ emen mkpulu ya. ¹⁷ Ire, ike geelek, Ikan kè Mosis ìbokpọkpọ ikeke inye. Inyọn̄ mè ijọn̄ ichechep îfet igak inu òsisip ichit me emen Ikan cha ififiin̄ unye kan̄. ¹⁸ “Ene geelek òjijit ogwu nwa, mè isi ido ofifi enenwaan̄ îrọn̄ ikan ugan-nwa. Enerieen̄ geelek òdodo ogwu enenwaan̄ ogwu ogwu olom ojitbe îrọn̄ si ikan ugan-nwa.” ¹⁹ Jisọs onenito urọk ge inyi ema ibe, “Îkaan̄ ogwu enerieen̄ ge òbọbọọn̄ ubọọn̄ enenen, mè ikitap ujuja unye otu ewe ọfọnti ebi ubọọn̄, echi irio irio mè echi okuket, mè ikirie utop otu, mè ikiluk ubene ugwem usen geelek. ²⁰ Îkaan̄ si ogwu mbeek ge ekiben iniyik me otunchit uwu ogwu ubọọn̄ yi egwe geelek, inyi ikikweek ibeek inu. Erieen̄ ogwu mbeek yi ìre Lajọrọs. Otutuuk lek kan̄ ìre inya inya. ²¹ Lajọrọs yi ìkikweek me ere ya ikibeek ngigen̄e inorie òkinan̄a me inyọn̄ ikasi ogwu ubọọn̄ ya irọn̄ọ igwook me ijọn̄. Ògak ge, usini mgbọ, ibo îra ikifan̄a inu inilaka chieen̄ inya kan̄ cha. ²² “Ogwu mbeek ya îbeek inu me ere ya ikeya ire usen mkpa kan̄. Usen îkwube, ebi osat Awaji ebeben ọmọ isi iyik me agba lek kè Ebereham me irek ijọk me emen inyọn̄. Ogwu ubọọn̄ ya si okwukwu, ebeben ọmọ ifuun̄, ifofo ama ekwukwu. ²³ Me ama ekwukwu ya, îmun̄ ogbogbo ufialek me emen ukan̄. Inenikup me ere ya ibene chieen̄ imun̄ Ebereham me ujọn̄ọ ere, mè imun̄ si Lajọrọs okupbe me agba lek kan̄. ²⁴ Itataan̄ ukpo igwen Ebereham, mè iriaak ibe, ‘Ogwu nte Ebereham, soso kaan̄ ejit nsan me lek n̄a. Ria Lajọrọs ibe ijiin̄ ibot otubọk kan̄ ge me emen mun̄, mè isa inirọn̄ọ itoon̄ emi me otu alọm inyi ǹsa ǹsuuk ebek, mije, emi gwa ǹkimun̄ ujaralek enenen me emen ukan̄ yi nkupbe.’ ²⁵ “Ire, Ebereham ofọfọọk ọmọ ibe, ‘Gwun̄ n̄a, kawuuk ibe ke mgbọ owu okupbe me ògat ugwem, ke owu obọkọ otutuuk ata inu òkukup inyi owu, me mgbọ Lajọrọs okibọkọ ijo inu. Ire, me mgbọ keyi, Lajọrọs ìkup me emen unwọọn̄ me ere keyi, sa owu oyaka inikup me emen ujaralek. ²⁶ Ògak ge, ikpele udọn̄ ge ọmọ òwa okupbe me etete kiji ebi ìkup me agan̄ keyi, melek kinyi ebi ìkup me agan̄ keya. Mije keya, ogwu iweek inanan̄a me agan̄ keyi isaba inu agan̄ kinyi, ìkpokọt. Ogwu ikup me agan̄ keya si, mè iweek isasaba inu agan̄ keyi, ìkpokọt isaba.’ ²⁷ “Ogwu ubọọn̄ ya onenitumu inyi Ebereham ibe, ‘Ire ikeya, soso ogwu nte, ria Lajọrọs si uwu nte n̄a me linyọn̄, ²⁸ mije, nkaan̄ ibot ngwan̄ ebirieen̄ go. Soso be Lajọrọs isi itaba ebi ngwan̄ n̄a cha ubọk me utọn̄, inyi ema ekanu ìninin̄ si me emen ujaralek yi nkupbe.’ ²⁹ “Ebereham ofọfọọk ọmọ ibe, ‘Ebi ngwan̄ kwun̄ mîkaan̄ Ikan kè Mosis, mè ikaan̄ si ijejeen̄ ebi Nriran ukot ikaan̄ egebe. Tele mè ema egban̄ utọn̄ me lek ijejeen̄ iba chi.’ ³⁰ “Ogwu ubọọn̄ ya obebe, ‘Iin̄-iin̄, Ebereham nte n̄a, ire ogwu òkwukwu inan̄a me ekwukwu isi itumu ikọ inyi ema, ema mênọ, mè igwu ikom.’ ³¹ “Ebereham ofọfọọk ọmọ ibe, ‘Ire ebi ngwan̄ kwun̄ kpegban̄ utọn̄ inyi Ikan kè Mosis mè ijejeen̄ ebi Nriran ukot ikaan̄, ìrere ogwu òkwukwu ojomo me mkpa, mè isi itumu ikọ inyi ema, ema kpebechieek si ikọ ene ya.’ ”

¹ Jisọs onenitumu inyi ebi udun̄ kan̄ ibe, “Me atikọ, inu òkirọ inyi ene irọ ijo inu mônu owuwa owuwa. Ire, môfieek enenen inyi ene geelek inu cha oboje me ubọk inu. ² Me atikọ, ire itobo ikpele ewuuk ikọk-akpa me ebek ene ya, mè iben ọmọ itọp ito me okwaan̄, eya mônwọn me lek ene ya igak ene ya irọrọ inyi ene ge me lek ebi asasa chi ije ilọ. ³ Eya orọ, ìgbala chieen̄ ìkpọ lek kinyi! Ire ngwan̄ kwun̄ irọ ijo inu, tumu ikọ nyi. Ire igwu ikom, tele ijo kan̄ nyi. ⁴ Ire ngwan̄ kwun̄ irọ owu ilọ mgbọ jaaba me egwe ge, mè igwu ikom inu me lek kwun̄ mgbọ jaaba cha inibe owu kpukpa ke ọmọ ìkpoyaka irọ ofifi, tele ijo kan̄ nyi.” ⁵ Ebi otuchieen̄ kan̄ enenibe ọmọ, “Okaan̄-ene, ire ikeya, soso rọ mè ichechieek kiji imin igak ikeyi.” ⁶ Jisọs ofọfọọk ema ibe, “Ire enyi ikaan̄ ichechieek òsisip ikup kubọk ukwuuk uti mọsitadi, enyi mêkọt itumu inyi ikpele uti ile yi ibe, ‘Jibi nan̄a me ere yi, mè si keke me ejit okwaan̄,’ mè Uti ya ogban̄ utọn̄, mè orọ ike enyi etumube.” ⁷ Inenido ema ibe, “Ire ene ge me lek kinyi iria ogwu usun̄ kan̄ ibe isi isi ikwaan̄ me uko kan̄, mè ìyaka ire isi ikpukpo arọọn̄ kan̄, ogwu usun̄ ya osisi. Mgbọ ogwu usun̄ ya isinan̄a me ere ikwaan̄ ya ika, ìre nte uwu kan̄ môtumu inyi ọmọ mgbọ yaage ibe, ‘Oka! Kpọ inorie yi, nasiki kweek rie?’ ⁸ Iin̄-iin̄! Kpan̄asi ikeya, ìbotumu inyi ogwu usun̄ ya ibe, ‘Si rọ inorie nyi emi, mè nwene lek, mè nakeke kpọ emi chieen̄ me lek mgbọ mâkirie inorie, mè ikinwọ miin̄. Nsirie eyi n̄a isan̄a, mgbọ ya, owu môkọt isi irie eyi kwun̄, mè inwọ miin̄.’ ⁹ Ìtumu-nu, ìre ene ya môbe ogwu usun̄ kan̄ ya, ‘Owu onirọ,’ mije îrọbe inu ọmọ obe irọ? Iin̄-iin̄, ìkpotumu ikeya kubọk ge. ¹⁰ Ikeya si, enyi isirọ inu geelek ebe enyi erọ isan̄a, ikakiweek itọn̄. Kpan̄asi ikeya, ìkitumu ibe, ‘Eji ìre ebi ikwaan̄, eji kpegbe ebi ebetọtọn̄, mije, îre ikwaan̄ òkukup inyi eji ke eji erọ.’ ” ¹¹ Jisọs onenikije me oniin̄ òkup me etete Sameria mè Galili, ibosi Jeruselem. ¹² Mgbọ ìkije ibonin̄ gwun̄ ama ge òkup me ere ya, akọp ebirieen̄ ebi inyakpa okifiak ejeje inikweek ọmọ me oniin̄, ire, kpeje iriaak ọmọ me lek. ¹³ Ema ekekeke me ujọn̄ọ ere ikitaan̄ ukpo igwen ọmọ ibe, “Ogwu Nte Jisọs, soso to eji nsan!” ¹⁴ Jisọs obebene chieen̄ imun̄ ema, mè itumu inyi ema ibe, “Ìfon, mè ìsa lek kinyi ìsi ìjeen̄ ebi ngwugwa.” Mgbọ ema ekije ibesa lek kiban̄ isi ijeen̄ ebi ngwugwa cha, orukan̄ kiban̄ otata, ema etatana. ¹⁵ Mgbọ ene ge me lek ife cha omun̄be ibe ke lek kan̄ înye, igwugwu ikom inu, mè ikitaan̄ ukpo itọn̄ Awaji, ¹⁶ mè initọbọ ekpe me ukot kè Jisọs, mè ikitọn̄ ọmọ. Ogwu enerieen̄ ya ògwugwu ikom inu ìre ogwu Sameria. ¹⁷ Jisọs onenido ọmọ ibe, “Ìre ìkare otutuuk akọp ene cha ke emi ngwa? Ìre ene onaan̄ge kechilọ cha ekup me owa? ¹⁸ Ìre kpunu ene geege me etete ife cha òkọkọt igwu ikom initọn̄ Awaji ilọ me lek ogwu ichen yi gaalek?” ¹⁹ Inenitumu inyi ogwu enerieen̄ ya ibe, “Nan̄a keke, mè je fo, ke ichechieek kwun̄ îrọ mè lek kwun̄ inye.” ²⁰ Me mgbọ ge, ebi Farisi enenido Jisọs ibe mè ìre mkpulu eyi Awaji ìbonu mgbọ owa ye? Jisọs ofọfọọk ema ibe, “Inunu eyi mkpulu eyi Awaji ìkare inu ebilene mêkọtbe isa me lek inu ijejeen̄ ifuk iriọọn̄. ²¹ Eya orọ, kpunu ene geege òbokọt itumu ibe, ‘Kpọ mkpulu eyi Awaji ire eyi,’ mè ìyaka ire, ‘Kpọ mkpulu eyi Awaji ire eyilọ,’ mije, mkpulu eyi Awaji ìkup me emen ejit kinyi.” ²² Inenitumu inyi ebi udun̄ kan̄ ibe, “Mgbọ òkinu, mgbọ enyi mêweekbe ubọk emi Gwun̄ Ebilene mânikup me etete kinyi, ìrere egwe ge gaalek, ire, enyi kpebemun̄ emi. ²³ Mgbọ ya si, ebi ene mêbe enyi, ‘Ìkpọ, ke ọmọ ire ogwu,’ mè ìyaka ire ‘Ìkpọ, ke ọmọ ire ogwulọ.’ Ire, ikalibi ìgọọk òjelek ebi ìkup ikeya. ²⁴ Mije, ike mèrèmèrèp isinyọn̄ okikebe me isinyọn̄, mè itoon̄ inan̄a me agan̄ ge isaba isi ire ofifi agan̄, ikeya si ke Gwun̄ Ebilene obokup me usen môkpọkbe inu. ²⁵ Ire, sabum mgbọ keya, Gwun̄ Ebilene môdasi imun̄ owuwa ufialek, ebi ene me ukot keyi mêjit si ọmọ itele. ²⁶ “Ike îkupbe me ukot kè Nuwa, ikeya si ke ìbokup mgbọ Gwun̄ Ebilene môgwube ikom inu. ²⁷ Me ukot kè Nuwa, ebi ene kpekeek inu geege, ekpọkpọ ikiluk ugwem kiban̄ ifo isi, mè ikirie, mè ikinwọ, mè ikido nwa, mè ikisa bọn kiban̄ iche olom mege inire usen Nuwa onin̄be uji ọfọ ya. Mun̄ ile onunu, mè ikpan̄ otutuuk ife cha isan̄a kpai. ²⁸ “Ubọk yaage si ke îkup me ukot kè Lọt. Me mgbọ ya si, ebi ene me ama Sọdọm ekpọkpọ ikiluk ugwem kiban̄ ifo isi, mè ikirie, mè ikinwọ, mè ikilep inu, mè ikinyam ewe, mè ikiwop mfut me uko, mè ikinama uwu. ²⁹ Ire, usen yaage Lọt onan̄abe isibi itele ama ya, ukan̄ biridọni onanan̄a me isinyọn̄ irep igwook me ama ya, mè ikpan̄ otutuuk ebi ama ya isan̄a kpai. ³⁰ “Ikeyi si ke ìbokup me usen Gwun̄ Ebilene môyakabe ikpọk inu. ³¹ Me usen ya, ogwu ikup me inyọn̄ òtoon̄-uwu, ikasibi ijọn̄ ìsi ìnin̄ uwu ìkpulu inu îkaan̄be. Ikeya si, ogwu ikup me uko ikisi ikwaan̄, ikagwu ìkom ìfo uwu ìsi ìkpulu inu îkaan̄be. ³² Ìkeek inu òrọrọ nwa kè Lọt mije îyakabe chieen̄ ikpọ udun̄ mgbọ ya. ³³ Ene geelek òweweek inyanyan̄a ugwem kan̄ me linyọn̄ keyi môfiin̄ ugwem ya. Ene geelek òchechieek ififiin̄ ugwem kan̄ me linyọn̄ keyi, ene ya môkaan̄ ugwem kan̄. ³⁴ Me atikọ, ǹkitumu inyi enyi ibe, me eririeen̄ usen Gwun̄ Ebilene mônube, ene iba mêgbaan̄ ilaak me inyọn̄ mkpilaak ge, mêmọmọnọ ene ge, mè itele ogwu melek kan̄. ³⁵ Me usen ya, ebibaan̄ iba mêkigbaan̄ ikọk akpa, mêmọmọnọ ene ge, mè itele ogwu melek kan̄. [ ³⁶ Ebirieen̄ iba mêkigbaan̄ isi ikwaan̄ me uko, mêmọmọnọ ene ge, mè itele ogwu melek kan̄.]” ³⁷ Ebi udun̄ kan̄ enenido ọmọ ibe ìre ere owa ke inu yi oborọ? Jisọs ofọfọọk ema ibe, “Ere geelek nkwukwu inu okupbe, ere keya ke edene obotitiin̄.”

¹ Jisọs onenito urọk ge inyi ebi udun̄ kan̄, isasa ijeen̄ ema ibe ke îgbe ibe ema ekeriaak uriaak mgbọ geelek, mè ekawọ lek ibe ke Awaji ìkanyi ema ifọọk. ² Ìto urọk ya ibe, “Îkaan̄ ogwu ibot oyerebet ge òluk me ama ge. Ogwu ibot oyerebet ya ìkakilibi Awaji, ìkakinyi si ene geege isi. ³ Îkaan̄ si nwakpa ge òluk me ama ya, mè ikpọkpọ ikinu iniriaak ogwu ibot oyerebet ya ibe isibi oyerebet inyi ọmọ mè ogwu ochicha kan̄, inyi ọmọ ikaan̄ unen kan̄, mè inwọnọ me ubọk ene ya. ⁴ “Ogwu enenwaan̄ ya îsi me lek ogwu enerieen̄ yi owuwa mgbọ, mè isa igak, ogwu enerieen̄ yi ojijit. Ire, me mgburudun̄ mgbọ, ogwu ibot oyerebet yi onenibe, ‘Ubọk geelek ǹkakitet ukpook me lek Awaji, ǹkakinyi si ene geege isi, ⁵ ire, mije nwakpa yi okpọkpọ ikinu inikisisaak emi mgbọ geelek, mâsibi oyerebet ya inyi ogwu nwakpa yi, mè irọ inyi ikaan̄ unen kan̄, inyi ikayaka ìnu ìnisisaak emi ofifi.’ ” ⁶ Okaan̄-ene onenido ebi udun̄ kan̄ ibe, “Ìre enyi mînọ ikọ ijo ogwu ibot oyerebet ya otumube? ⁷ Ire ijo ogwu ibot oyerebet isibi unen oyerebet, mè inyi nwakpa ya unen kan̄, ìre enyi kpekeek ibe ke Awaji môsibi unen oyerebet inyi ebi îgobobe isibi inyi lek kan̄, ebi ìkitaan̄ ukpo ibeek ọmọ mbeek eririeen̄ mè ikarek? Ìre enyi ekikeek ibe ke Awaji môfiat mgbọ irọrọ mbeek ebi kan̄ ebeekbe ọmọ? ⁸ Me atikọ, Awaji ìkpofiat mgbọ kubọk ge. Môsibi unen oyerebet inyi ife cha, mè imun̄ ibe ke ema mîkaan̄ unen kiban̄ ugwat ugwat. Ire, ubọk geelek, mgbọ Gwun̄ Ebilene môkpọkbe inu, ìre mônimun̄ ebi ìkakaan̄ ichechieek me linyọn̄ yi?” ⁹ Me ere ya ema ekupbe, îkaan̄ usini ene ebi ìtotoon̄ ejit ibe ke Awaji îbọkọ ema itap mije ata irọrọ kiban̄, mè ikikpọ ebi ofifi ene chieen̄ isiki. ¹⁰ Jisọs onenito ofifi urọk inyi ife chi ibe, “Ebirieen̄ iba eninan̄a ije isi Uwu Mbuban ibesi iriaak uriaak. Ene ge ìre ogwu Farisi, ogwulọ ore ogwu òkibọkọ otitip ido. ¹¹ Ogwu Farisi ya odada lek ibọkọ ikeke esese, mè ikiriaak uriaak ibe, ‘Awaji owu onirọ, mije, emi ǹkakup kubọk otutuuk ebilene, ebi ìkibọkọ ene inu me unye, mè ikifeen̄ ene, mè ikigan nwa ene. Ògak ge, owu onirọ, mije, emi ǹkakup kubọk ogwu otitip ido yilọ. ¹² Eyi n̄a, ǹkijin otu mgbọ iba me nde geelek, mè ikikpe irek ge me etete akọp irek me otutuuk inu geelek nkibọm.’ ¹³ “Ire, ogwu òkibọkọ otitip ido ya okekeke me ujọn̄ọ ere. Ìkakọt ìbene chieen̄ ìkpọ inyọn̄. Kpan̄asi ikeya, ìsisiki lek kan̄ me ijọn̄, mè ikisulu ubọk me ejit, mè ikitumu ibe, ‘Jei Awaji, emi ìre ogwu ijo. Soso, kaan̄ ejit nsan me lek n̄a.’ ” ¹⁴ Jisọs onenitumu inyi ema ibe, “Me atikọ, ǹkitumu inyi enyi ibe, me etete ife cha ene iba, ogwu òkibọkọ otitip ido ya ore ogwu òrọrọ inu òtatat me isi Awaji. Ogwu Farisi ya ìkarọ inu òtatat me isi Awaji. Mije, ogwu òbebene lek kan̄, ene ya ke mêsiki. Ire, ogwu geelek òsisiki lek kan̄ me ijọn̄, ogwugwa ke mêbene ifo inyọn̄.” ¹⁵ Me ike mgbọ ya, ebi ene ekekisa asa nsabọn kiban̄ ijet Jisọs ibe ichak ubọk me lek, mè igbana. Mgbọ ebi udun̄ kan̄ emun̄be ebi ife cha, ema ebebene ikigana ikọ inyi. ¹⁶ Ire Jisọs ogwegwen asa nsabọn cha iriaak me lek kan̄, mè itumu inyi ebi udun̄ kan̄ cha ibe, “Ìtele inyi asa nsabọn enu me lek n̄a, ikakput ema, mije, îre ebi ìkup kubọk asa nsabọn chi ke mkpulu eyi Awaji okup inyi. ¹⁷ Me atikọ, ǹkitumu inyi enyi ibe, ene geelek ikabọkọge mkpulu eyi Awaji ìtap kubọk sọntiik gwun̄, ìkpokọt inin̄ mkpulu ya.” ¹⁸ Usen ge ogwu ibot ebi Ju ge onenido Jisọs ibe, “Ata Ogwu Ijejeen̄, ìre keke ke mârọ, mè ikaan̄ ugwem ikakaan̄ge itata?” ¹⁹ Jisọs obebe ọmọ, “Ìre keke orọ ogwenbe emi ata ene? Kpunu ene geege òrere ata ene, ilọ me lek Awaji gaalek. ²⁰ Owu oriọọn̄ ibe ke Ikan ìtumu ibe, ‘Kagan nwa ene, kakpan̄ ene, kachiin̄ inọ, kakeke ata-ikọ ataak ìkeme ene geege, nyi nte kwun̄ mè nga kwun̄ umin.’ ” ²¹ Ene ya ofọfọọk ibe, “Emi ǹkisusun̄ Ikan kecha karake nkupbe sọntiik.” ²² Jisọs inọnọ ikọ ya, itutumu inyi ene ya ibe, “Kpọ, inu ge gaalek osik owu môrọbe. Si nyam otutuuk inu okaan̄be, mè sa ikpoko cha che nyi ebi ugbọọn̄, ke owu môkaan̄ inu ubọọn̄ me emen inyọn̄. Osinyam inu cha, mè isa ikpoko cha inyi ebi ugbọọn̄ isan̄a, gwu kom nagọọk emi.” ²³ Mgbọ ene ya onọbe ikọ yi, ifefieek ejit enenen, mije ọmọ ìre ene ogwu òbọbọọn̄ ubọọn̄ enenen. ²⁴ Jisọs okpọkpọ ọmọ sìì, mè ibe, “Môyọt enenen ebi ìbọbọọn̄ ubọọn̄ ininin̄ mkpulu eyi Awaji. ²⁵ Môfet aligọ ijeje itibi chieen̄ alaga igak ogwu òbọbọọn̄ ubọọn̄ ininin̄ mkpulu eyi Awaji.” ²⁶ Ikọ ya otetet lek otutuuk ebi ìnọnọ. Ema ekekibe, “Îyak, ire ikup ikeya, ìre ekene ke mênyan̄a?” ²⁷ Jisọs ofọfọọk ema ibe, “Inu ebilene kpebekọt irọ, ìkire mfufet inu me lek Awaji.” ²⁸ Pita onenitumu inyi Jisọs ibe, “Eyi kiji, eji mîtele otutuuk inu eji ekaan̄be, mè igọọk owu!” ²⁹ Jisọs ofọfọọk ibe, “Iin̄, ǹkitumu atikọ inyi enyi ibe, ene geelek òtetele uwu mè ìre ogwu nwa, mè ìre ebi ngwan̄, mè ìre ute mè uga, mè ìre bọn, mije mkpulu eyi Awaji, ³⁰ ene ya ìkpolọlọ ibọbọkọ inu òwawa igak echa me ukot keyi, mè iyaka ikaan̄ si ugwem ikakaan̄ge itata me mgbọ òkup me isi.” ³¹ Jisọs onenigwen akọp mè ebi udun̄ iba kan̄ ida ibọkọ, mè itumu inyi ema ibe, “Ìkpọ, Jeruselem ke eji ebesi. Eji isire ama ya, inu geelek ebi nriran egebe òfolek Gwun̄ Ebilene, môrọ iso. ³² Mêyaka ọmọ ìtap me ubọk ebi ekarege ebi Ju. Ife chi mêrọ ọmọ inu ochak, mè inu esip, mè icho ataak igwook ọmọ me lek, mè isulu ọmọ, mè ikpan̄ ọmọ. ³³ Ire, òso egwe ita, ọmọ môjomo me mkpa.” ³⁴ Ire, ebi udun̄ kan̄ kpekọt igobo ikọ cha geege itet, mije, Awaji îrọ mè ema ekakọt ìgobo inu cha ìtet. Sa me ikeya, ema kpekọt iriọọn̄ inu Jisọs okitumu ikọ ibak. ³⁵ Mgbọ Jisọs mè ebi udun̄ kan̄ ekije igbet Jeriko, ogwu ǹnàan̄ ge ọmọ òwa me agba oniin̄ ya okupbe ikibeek inu. ³⁶ Mgbọ înọbe okput ene ekiraka, idodo ebi ene ibe mè ìre keke okirọ ye? ³⁷ Ebi îdobe cha efọfọọk ọmọ ibe ke ìre Jisọs ogwu Najeret okije iraka me lek oniin̄ ya. ³⁸ Ogwu ǹnàan̄ ya obebene ikitaan̄ ukpo ibe, “Jisọs Gwun̄ kè Debit, soso to emi nsan!” ³⁹ Ebi ìkije me ntut agan̄ isi egagana inyi ibe ichit otu. Ire, ogwu ǹnàan̄ ya okpọkpọ itet lek inye ikitaan̄ ukpo ibe, “Gwun̄ kè Debit, to emi nsan.” ⁴⁰ Jisọs onọnọ ida ene ya, mè iyaka ikeke, mè inyi ida ibe esa ene ya ejet ọmọ. Mgbọ esabe inu, Jisọs, ododo ọmọ ibe, ⁴¹ “Ìre keke ke oweek ibe emi ǹrọ ǹnyi owu?” Ene ya ofọfọọk ibe, “Okaan̄-ene, ǹkiweek isasa chieen̄ n̄a imọọn̄ inu!” ⁴² Jisọs onenitumu inyi ene ya ibe, “Mọọn̄ inu! Ichechieek kwun̄ îrọ mè lek kwun̄ inye!” ⁴³ Mgbọ yaage, ene ya obebene ikimọọn̄ inu, mè ikije igọọk Jisọs, mè ikitọn̄ Awaji. Otutuuk ebi ìkukup me ere ya imun̄ inu ya òrọrọ egọgọọk si ikitọn̄ Awaji.

¹ Jisọs, onenikije itibi emen ama Jeriko. ² Îkaan̄ enerieen̄ ge òkup me ama ya ekigwen Jakiọs. Jakiọs yi ìre ogwu ibot ebi ìkibọkọ otitip ido, mè ire si ogwu òbọbọọn̄ ubọọn̄ enenen. ³ Jakiọs oneniweek imumun̄ Jisọs isi mè isi. Ire, bak me lek ọmọ orebe ogwu mgbidim, ìkakọt ìmun̄ Jisọs, mije ogbogbo ene efan̄abe ichit Jisọs. ⁴ Eya orọ, ililibi iraka otutuuk ogbogbo ene cha ifo isi, mè isi inene inyọn̄ uti ile ge ekigwen Sikamọ me oniin̄ ere Jisọs obonije iraka, inyi ọmọ ikọt imun̄ Jisọs. ⁵ Mgbọ Jisọs ojebe ire ebon uti ya, ibebene chieen̄ ikpọ ebek uti ya, mè igwen ọmọ, “Jakiọs, gwat lek sibi ijọn̄ na, ke m̀bakup me uwu kwun̄ cherekeyi.” ⁶ Mgbọ yaage, Jakiọs onanan̄a isibi ijọn̄, mè inibọkọ Jisọs itap me uwu kan̄ me ubelejit. ⁷ Otutuuk ebi ìkup me ere ya imun̄ Jakiọs obọkọbe Jisọs itap ebebene ikinunuun̄ ibe, “Ìkpọ-nu ubọk ene yi osibe ichen me uwu ogwu ijo keyilọ.” ⁸ Me emen uwu ya, Jakiọs onanan̄a ikeke, mè itumu inyi Okaan̄-ene ibe, “Okaan̄-ene, kpọ, mâche otutuuk inu nkaan̄be ìkike iba, mè isa agan̄ ge iche inyi ebi ugbọọn̄. Ire ikaan̄ ogwu mfeen̄be me inu geelek, mâyaka inu ya ikpe inyi ene ya mgbọ ini.” ⁹ Jisọs onenitumu inyi ọmọ ibe, “Unyan̄a eyi Awaji înu me uwu keyi chereyi, mije, ene yi si ìre gwun̄ kè Ebereham. ¹⁰ Emi Gwun̄ Ebilene ǹnu ineniweek, mè inyan̄a ebi ìchechep.” ¹¹ Ere ya ema erebe îgbet ere me Jeruselem. Ebi ìkukup ikigban̄ ikọ ya ekekikeek ibe ke Jisọs isirere Jeruselem, ke mkpulu eyi Awaji môbene mgbọ yaage. Eya orọ, ike ema ekigban̄ ikọ ya, Jisọs okpọkpọk ito ofifi urọk inyi ema ibe, ¹² “Ogwu enerieen̄ ge òsibi me uwu ubọọn̄ oninan̄a ije ujọn̄ọ ije isi ofifi ido ibosi inyi erọ ọmọ ubọọn̄ me ere ya, mè ọmọ igwu ikom ika inu inikpulu ebi kan̄. ¹³ Sabum îninan̄a ije ya, igwegwen akọp ebi ikwaan̄ kan̄ ititiin̄, mè inyi ema ikpoko alata araran̄ ge ge me ene, mè ibe ema esa ikpoko cha enyam ewe mege ire mgbọ ọmọ môkabe. (Ikpoko yi ge môso isasa ikpe ogwu ikwaan̄ ge onyan̄a ita.) ¹⁴ “Ire, ebi kan̄ cha ebi ìboka inikpulu kpema ọmọ. Eya orọ, mgbọ ogwu enerieen̄ yi onan̄abe isan̄a, me udun̄ kan̄, ife chi esasan̄a ikwaan̄ iria isi lek ebi ìberọ ogwu enerieen̄ yi ubọọn̄ ibe ke ema kpeweek ibe ene yi inire ogwu ubọọn̄ kiban̄. ¹⁵ “Ire, mîrọ si ogwu enerieen̄ ya ubọọn̄, igwugwu ikom ika, ubọk geelek ebi kan̄ echabe ọmọ. Mgbọ îkabe, iraria ikwaan̄ igwen ebi ikwaan̄ kan̄ cha ebi înyibe ikpoko, ibe enerọ ifuk enyi ọmọ, inyi ọmọ iriọọn̄ oruru ekaan̄be me ibot ikpoko cha. ¹⁶ “Ogwu adasi onunu, mè inibe, ‘Ogwu nte, eyi n̄a, nrie ofifi akọp ikpoko alata araran̄ me oruru itoon̄ me inyọn̄ ibot ikpoko eyi owu onyibe emi.’ ¹⁷ “Ogwu nte uwu kan̄ ofọfọọk ọmọ ibe, ‘Owu orọ ijaan̄ enenen, ata ogwu ikwaan̄! Owu ogbe utoon̄ ejit me lek sọntiik inu. Eya orọ, bọkọ akọp ama ile kikpulu.’ ¹⁸ “Ogwu òso iba onunu, mè ibe, ‘Ogwu nte, eyi n̄a nrie ikpoko alata araran̄ go itoon̄ me inyọn̄ ibot ikpoko eyi owu onyibe emi.’ ¹⁹ “Ogwu nte uwu kan̄ otutumu inyi ọmọ ibe, ‘Owu bọkọ ama ile go kikpulu.’ ²⁰ “Ofifi ogwu ikwaan̄ onunu, mè ibe, ‘Ogwu nte, kpọ ikpoko kwun̄ yi. Ǹsasa ọkpọkọ ekwut ikat ikpoko ya, mè iben isi ilet, inyi ikachep. ²¹ Ukpook kwun̄ îtet emi, mije, owu ìre uyọt uyọt ene. Owu òkimọnọ inu me ere okasun̄ge, mè ikirọkọ inu me ere owu okawopge.’ ²² “Ogwu nte uwu kan̄ ofọfọọk ọmọ ibe, ‘Owu ijo ogwu ikwaan̄ keyi! Ikọ otu kwun̄ gaalek ke mbasa ifieek oyerebet inyi owu. Owu oriọọn̄ ibe ke emi ìre uyọt uyọt ene; ke ǹkimọnọ inu ikarege eyi n̄a, mè ikirọkọ inu eyi nkawopge! ²³ Ìre keke orọ owu òkasa ikpoko ya ìsi ìnyi ebi ìkinyam ikpoko, inyi iman oruru inyi emi, mè ǹnengbaan̄ isi ikpoko melek oruru m̀bọkọ mgbọ keyi nkabe?’ ²⁴ “Itutumu ikeya inyi ogwu ikwaan̄ yi isan̄a, inenitumu inyi ebi melek kiban̄ ekupbe me ere ya ibe, ‘Ìbọkọ ene yi ikpoko ya ìsan̄a me ubọk, mè ìsa ìnyi ogwu òrerie akọp ikpoko alata araran̄ me oruru.’ ²⁵ “Ife cha efọfọọk ogwu ubọọn̄ ya ibe, ‘Ogwu nte, ogwu owu obe eji ebọkọ ikpoko ya esa enyi îwuuk lek ikakaan̄ akọp ikpoko!’ ²⁶ “Ogwu ubọọn̄ ya ofọfọọk ibe, ‘Me atikọ, ogwu òkakaan̄ inu ke ebenyi isọkọ me lek inyi ikaan̄ inu iwa igak. Ire, ogwu ikakaan̄ge inu, ìrere sọntiik eyi îkaan̄be, mêtet ibọkọ isan̄a me ubọk, inyi ikayaka ìkakaan̄ geege.’ ²⁷ Ogwu ubọọn̄ ya oneninyi ida ibe esi etet otutuuk ebi òchicha kan̄ cha, ebi ekaweekge ibe ọmọ ikpulu ema, esa enu enekpan̄ me isi kan̄.” ²⁸ Jisọs itoto urọk ya isan̄a, inanan̄a ikeke, mè ibene ije kan̄ ikije isi Jeruselem. Ọmọ okije me isi, sa ebi udun̄ kan̄ ekije igọọk ọmọ me udun̄. ²⁹ Mgbọ îjebe igbet Betifegi mè Betani, ama iba òkup me inyọn̄ ogoon̄ Olifu ya, inenidasi iria ene iba ebi udun̄ kan̄ ibe, ³⁰ “Ìje ìsi ama yilọ òkup me isi kinyi. Mgbọ yaage enyi enin̄be, enyi mêmun̄ gwun̄ inyinya akpan ge, etobobe itele, eyi ene geege ikanenege inyọn̄. Ìtọn̄ọ ìsa ìjet emi. ³¹ Ire ikaan̄ ogwu ido enyi ibe mè ìre keke orọ enyi ekitọn̄ọ anam ya, ìfọọk ibe ke ìre Okaan̄-ene okiweek.” ³² Ebi îriabe ikwaan̄ ya ejeje, mè isi imun̄ otutuuk inu cha ubọk yaage Okaan̄-ene otumube inyi ema. ³³ Mgbọ ema ekitọn̄ọ gwun̄ inyinya akpan ya, ebikaan̄ enenido ema ibe, “Ìre keke orọ enyi ekitọn̄ọ anam ya?” ³⁴ Ema efọfọọk ibe ke ìre Okaan̄-ene okiweek. Ebikaan̄ anam ya etetele ibe ema esa anam ya eje. ³⁵ Ema enenisa anam ya ijet Jisọs, mè iwọọk ọfọnti inyọn̄ kiban̄ itoon̄ me inyọn̄ anam ya, mè itap ubọk ibene Jisọs, inyi ikọt inene ikweek me inyọn̄ anam ya. ³⁶ Mgbọ anam ya okisa Jisọs ije, ebi ene ekekiwọọk ọfọnti inyọn̄ kiban̄ iwele me ejit oniin̄. ³⁷ Mgbọ Jisọs orebe ere oniin̄ okwalabe isiki inan̄a me inyọn̄ ogoon̄ Olifu ya, ogbogbo ebi ìkigọọk ọmọ me udun̄ ebebene ikitaan̄ ukpo unwọọn̄, mè ikitọn̄ Awaji mije otutuuk inu ukechieen̄ geelek ema emun̄be Jisọs orọbe, ³⁸ mè ikitumu ibe, “Ugbana ikup inyi ogwu ubọọn̄ ogwu ònunu me erieen̄ Okumugwem. Esuuk ikup me emen inyọn̄, mè itọn̄ ikup inyi Awaji me emen inyọn̄ ere òbebene ichit!” ³⁹ Usini ebi Farisi ìkup me etete ogbogbo ene cha etutumu inyi Jisọs ibe, “Ogwu Ijejeen̄, tumu nyi ebi udun̄ kwun̄ ibe ekayaka ìkput ere!” ⁴⁰ Jisọs ofọfọọk ema ibe, “Me atikọ, ǹkitumu inyi enyi ibe, ire ebi ife chi iriaan̄ otu, ewuuk chi òkup me ere yi môsan̄a amọn itaan̄ ukpo itọn̄ yi si.” ⁴¹ Mgbọ Jisọs ojebe igbet, mè ibene chieen̄ itoon̄ me lek ama Jeruselem, mun̄ ito osisibi ọmọ me chieen̄. ⁴² Itoto ito me ibot ama ya, mè ibe, “Jei ebi Jeruselem, ire gaalek mofet ibe enyi eriọọn̄, mè chereyi, inu òbosa esuuk ijet enyi, kè ònwọn! Ire, îlet enyi me chieen̄ mgbọ keyi. ⁴³ Ìkpọ, mgbọ òkinu mgbọ ebi ochicha kinyi mêsabe akọn̄ inikana enyi me ijọn̄ okop okop, mè ifieek mgban ikwek enyi me agan̄ geelek, inyi ene geege ikakọt ìnan̄a me emen ama kinyi ìsibi, mè ikitim akọn̄ melek kinyi. ⁴⁴ Ebi ochicha kinyi mêgbugbọ otutuuk mgban ama kinyi igwook me ijọn̄, mè ikpan̄ otutuuk ebi ama kinyi isan̄a kpai! Ife cha kpebetele inyi ewuuk mgban ama kinyi ge ikeke me inyọn̄ ge, mije enyi kpeweek irọriọọn̄ mgbọ Awaji onube iboninyan̄a enyi.” ⁴⁵ Jisọs oneninin̄ ama Jeruselem, mè ije inin̄ emen Uwu Mbuban, mè ibene ikilap ebi ìkinyam ewe isibi me ere ya, ⁴⁶ mè ikitumu inyi ema ibe, “Awaji ìtumu me Ikpa Mbuban ibe, ‘Uwu n̄a môre uwu uriaak.’ Ire, enyi eyaka inikisa uwu ya irọ ere ebi inọ ekinu inilet lek.” ⁴⁷ Bene me usen ya, Jisọs okekijeen̄ inu me Uwu Mbuban ya usen geelek. Ebi ibot ngwugwa, mè ebi ìjeen̄ Ikan, mè ebi ibot ebi Ju ekekiweek ikpakpan̄ ọmọ. ⁴⁸ Ire, ema kpekọt ikaan̄ irek itet ọmọ, mije, ebi ene ekpọkpọ ikinin̄ ijot ere ya inikigban̄ ikọ kan̄.

¹ Usen ge mgbọ Jisọs okijeen̄ ebi ene inu, mè ikilook ata etip me emen oyet egep Uwu Mbuban, ebi ibot ngwugwa mè ebi ìjeen̄ Ikan, melek ebi ugane ama enunu me lek kan̄, ² mè inido ọmọ ibe, “Tumu nyi eji nu, ìre kpasi unye ke okisa ìrọ ikwaan̄ chi? Ìre ekene onyi owu unye yi?” ³ Jisọs onenibe ema, “Mgbọ keyi, emi mâdo enyi ikọ ge. ⁴ Ìre unye eyi Jọn okisa igwook ene mun̄ ìnan̄a me ubọk Awaji? Sa ìre ìnan̄a me ubọk ebilene?” ⁵ Ema eninin̄ oru me lek kiban̄, mè ibe, “Ire eji ifọọk ibe ke unye ya ìnan̄a me ubọk Awaji, môdo eji ibe mè ìre keke orọ eji kpechieek ikọ kè Jọn? ⁶ Ire eji ifọọk ibe ke ìnan̄a me ubọk ebilene, otutuuk ebi ene ìkup me ere yi mêteen̄ ewuuk itọbọ eji, mije, otutuuk ene mîchieek ibe ke Jọn ìre ogwu nriran.” ⁷ Eya orọ, ema efọfọọk Jisọs ibe, “Eji kperiọọn̄ ere unye kè Jọn ya onan̄abe.” ⁸ Jisọs otutumu inyi ema ibe, “Emi si, m̀kpatumu ere unye eyi nkisa irọ inu chi geelek onan̄abe inyi enyi.” ⁹ Jisọs onenito urọk ge inyi ema ibe, “Ogwu enerieen̄ ge oniwop uko gerep ge, mè isa uko ya itap me ubọk ebi ikwaan̄ uko ibe ekekpọ chieen̄ me lek, mè inan̄a isi ije me ofifi ido, mè ikup ifiin̄ me oniin̄ ije ya. ¹⁰ Mgbọ mgbọ irọrọkọ inu me uko okembe, ogwukaan̄ uko ya oraria ogwu ikwaan̄ kan̄ ge isi lek ebi ikwaan̄ uko cha ibe isi ibọkọ uche mfut eyi kan̄ isa ijet ọmọ. Ire, ebi ikwaan̄ uko cha etetet ogwu ikwaan̄ ya isut, mè iria ọmọ ifo ukpọk ubọk. ¹¹ Ogwukaan̄ uko ya oneniria ofifi ogwu ikwaan̄ isi lek ebi ikwaan̄ uko cha. Ire, ife cha etetet ogwu ikwaan̄ keya si isut, mè irọ ọmọ inu esip, mè iria ọmọ si ifo ukpọk ubọk. ¹² Ogwukaan̄ uko ya oraria òso ogwu ikwaan̄ ita isi lek ife cha. Ema etetet ogwu ikwaan̄ keya isulu itap unan me lek, mè ilap isibi ukpọk ubọk. ¹³ “Ogwukaan̄ uko ya onenibe, ‘Jei, ìre keke ke mbayaka irọ? Usini mgbọ, ire nria ibot gwun̄ ge n̄a, ogwu mmabe, isi lek ife cha, ife cha mênyi gwun̄ ya ulibi.’ ¹⁴ “Ire, mgbọ ebi ikwaan̄ uko cha emun̄be gwun̄ ya, ema etọtọt me etete kiban̄ ibe, ‘Ogwu òbonirie uko yi me irot ire ogwulọ òkinu. Eji enetet ekpan̄, inyi irot kan̄ yi ikana ire eyi kiji.’ ¹⁵ Ema etetet gwun̄ ya, mè itaba isibi me emen uko ya, mè ikpan̄.” Mgbọ Jisọs otobe urọk ya isan̄a, inenibe ebi ife cha, “Ìre keke ke enyi ekeek ibe ogwukaan̄ uko ya oborọ ebi ikwaan̄ cha? ¹⁶ Ìbokpakpan̄ otutuuk ife cha isan̄a, mè ibọkọ uko ya isa inyi ebi ofifi ene.” Mgbọ ebi ìkup me ere ya enọbe urọk ya Jisọs otobe, ema ebebe, “Awaji ikachieek!” ¹⁷ Jisọs okpọkpọ ema sìì, mè inibe ema, “Ire ikeya, ìbum-nu ibot ikọ egebe me Ikpa Mbuban ibe, ‘Ewuuk eyi ebi ìnama uwu ejitbe, ọmọ oyaka inikana ata ibot uwu.’ ¹⁸ Ene geelek ònanan̄a irọn̄ me inyọn̄ ewuuk ya môkpọk isan. Ene geelek ewuuk yi orọn̄be ikeme, ìbokpukpukpuku si.” ¹⁹ Ebi ìjeen̄ Ikan mè ebi ibot ngwugwa eweweek oniin̄ ema ebesa itet Jisọs mgbọ yaage, mije, ema mîriọọn̄ ibe ke ìre ema ke îto urọk ya ikeme. Ire, ema kpekọt itet Jisọs, mije ukpook ebi ene. ²⁰ Ebi ìjeen̄ Ikan mè ebi ibot ngwugwa cha ekekikpọ mgbọ Jisọs môrọbe inu ilọ, inyi ema etet. Ema eraria ebi ene ibe erọ lek kiban̄ kubọk ema ìre ata ebi ìriọọn̄ Ikan, mè ekegban̄ Jisọs ikọ me otu, inyi ema ekọt ekaan̄ inu ema mêsabe itet Jisọs ikana itap me ubọk ogwu ibot mkpulu ebi Rom ogwu òkup me agan̄ ya, inyi itip ọmọ oyerebet. ²¹ Ebi eriabe cha enenido Jisọs ibe, “Ogwu Ijejeen̄, eji mîriọọn̄ ibe ke ikọ kwun̄ mè ijejeen̄ kwun̄ ìkpọkpọ ikitat; ke owu òkakikpọ si ene geege chieen̄ me isi. Me atikọ, owu òkijeen̄ ebi ene oniin̄ eyi Awaji ubọk îgbebe. ²² Tumu-nu, ìre îtat ibe eji eketip otitip ido enyi ogwu Sisa, ogwu ibot mkpulu ebi Rom, sa ìre ìkatat?” ²³ Jisọs omọmọọn̄ isi iba kiban̄, mè ibe ema, ²⁴ “Ìjeen̄ emi dinari ge nu.” Ife cha emọmọnọ dinari ge isibi ijeen̄. Idodo ema ibe, “Ìre ogugo kè ekene, mè erieen̄ kè ekene okup me lek ikpoko yi?” ²⁵ Ema efọfọọk ibe ke ìre eyi ogwu Sisa. Jisọs otutumu inyi ema ibe, “Ire ikeya, ìsa inu ogwu Sisa ìnyi ogwu Sisa, mè ìsa eyi Awaji ìnyi Awaji.” ²⁶ Ufọọk-otu kè Jisọs yi ogwogwook ema mbiribọ me lek, otu ochichit ema. Ema kpekọt isa ikọ geege Jisọs otumube me isi ebi ene itet ọmọ me ikan. ²⁷ Ebi ekigwen ebi Sadusi, ebi ekachieekge ibe ke ebi ìkwukwu mêjomo me mkpa, enunu me lek kè Jisọs, mè inido ọmọ ibe, ²⁸ “Ogwu Ijejeen̄, Mosis îge me emen Ikan inyi eji ibe, ire ene ido nwa, mè ikwu itele, ìkabon gwun̄ geege me owot ogwu enenwaan̄ ya, mè ngwan̄ ogwu òkwukwu ya imọnọ nwakpa ya me lek nwa, mè ibon bọn inyi ogwu ngwan̄ ya òkwukwu. ²⁹ Me ere ngwan̄ ebirieen̄ jaaba ekupbe, ogwu ugane me lek kiban̄ onenido nwa, mè ikwu itele, ìkabon gwun̄ geege. ³⁰ Ogwu òso iba omọmọnọ ogwu enenwaan̄ ya ikaan̄ me lek nwa, mè ikwu itele si, ìkabon gwun̄ geege. ³¹ Ogwu òso ita si omọmọnọ ogwu enenwaan̄ ya ikaan̄, mè ikwu itele, ìkabon gwun̄ geege. Sa me ikeya, otutuuk ebirieen̄ jaaba cha ekakaan̄ ogwu enenwaan̄ ya me lek nwa iso, mè ikwaan̄ itele, kpebon gwun̄ geege. ³² Me òta kan̄ si, ogwu enenwaan̄ ya okwukwu. ³³ Me mgbọ ebi ìkwukwu mêjomobe me mkpa, ìre ogwu enenwaan̄ ya ìbore nwa inyi ekene me etete ngwan̄ ebirieen̄ jaaba cha, mije, otutuuk kiban̄ mîkaan̄ ọmọ me lek nwa iso?” ³⁴ Jisọs ofọfọọk ema ibe, “Ebi ukot keyi mîkido nwa, mè ikibat olom. ³⁵ Ire, ebi geelek Awaji omun̄be ibe ke mîgbe igọgọọk iluk ugwem me mgbọ ya mgbọ ebi ìkwukwu mêjomobe me mkpa, ife cha kpebedo nwa, kpebebat si olom. ³⁶ Ema si kpebeyaka ikwu ofifi, mije, ema ebekup kubọk ebi osat Awaji. Ema mêkana ire bọn Awaji, nan̄a me lek ema mêjomobe me mkpa. ³⁷ Ire me lek ikọ ijojomo me mkpa, Mosis me lek kan̄ îjeen̄ ibe ke ebi ìkwukwu mêjomo me mkpa. Mije, mgbọ Mosis ogebe inu òfolek uti ukan̄ okilomo me lek ya, erieen̄ îgwenbe Okumugwem ìre ‘Awaji kè Ebereham, mè Awaji kè Ajiki, mè Awaji kè Jekọp.’ Ife chi mîwuuk lek ikwaan̄ iraka isan̄a sabum mgbọ ya. ³⁸ Eya orọ, Awaji ìkare Awaji ebi ìkwukwu. Ire, Awaji ìre Awaji ebi ìkup me ugwem, mije, me lek Awaji, otutuuk ebilene ekup me ògat ugwem, ebi ìkwukwu mè ebi ekakwuge.” ³⁹ Usini ebi ìjeen̄ Ikan ìkup me ere ya ebebe ọmọ, “Ogwu Ijejeen̄, owu ofọọk itat!” ⁴⁰ Eya iraraka, kpunu ene geege òyayaka ichat lek ido ọmọ ofifi ikọ. ⁴¹ Jisọs onenido ema ibe, “Ìre keke orọ ebi ene ekitumu ibe ke ogwu Awaji otoon̄be ubọk me ibot ìnan̄a me owot iman kè Debit? ⁴² Mije, Debit me lek kan̄ ìge me emen ikpa Okwa ibe, ‘Okumugwem ìtumu inyi Okaan̄ n̄a ibe, “Siki kweek me agan̄ ubọk ulom n̄a, ⁴³ mege ire mgbọ mârọbe inyi ebi ochicha kwun̄ ekana inu ibene ukot enyi owu.” ’ ⁴⁴ Ìtumu-nu, ogwu Debit me lek kan̄ ogwenbe Okaan̄-ene, ìbojeje iyaka inire gwun̄ inyi Debit?” ⁴⁵ Me isi otutuuk ene ìkukup me ere ya ikigban̄ ikọ, Jisọs otutumu inyi ebi udun̄ kan̄ ibe, ⁴⁶ “Ìgbala chieen̄ me lek ebi ìjeen̄ Ikan! Ife chi ekima isasa ujọn̄ọ ọfọnti kiban̄ ikije ikana ere, mè ikima ibe ebi ene eketọp ema ata amọn eyi umin me emen ewe ere ebi ene ewabe, mè ikima si ikwekweek me inyọn̄ ikasi esun̄be inyi ebi ibot me emen uwu ntitiin̄, mè ikwekweek me irek umin me ere geelek ekirie ijọk. ⁴⁷ Ife chi ekifeen̄ ebi nwakpa, mè ikibọkọ uwu kiban̄ isak, mè ikinwọọn̄ irariaak ujọn̄ọ uriaak isasa ijeen̄ ebi ene ibe ke ema mîriọọn̄ Awaji igana. Osusut kiban̄ obomin ichit.”

¹ Jisọs onenibene chieen̄ imun̄ ubọk owuwa ebi ìbọbọọn̄ ubọọn̄ ekinu initap ikpoko kiban̄ me emen okop ekitap ikpoko me Uwu Mbuban ya. ² Mgbọ îkikpọ si, imumun̄ nwakpa ge, ogwu ugbọọn̄, onube, mè initap asabọn ikpoko ekwe iba me emen okop ya. ³ Jisọs onenitumu inyi ebi udun̄ kan̄ ibe, “Me atikọ, ǹkitumu inyi enyi ibe, me etete otutuuk ebi ìtatap ikpoko me emen okop ya, îre ugbọọn̄ nwakpa ya otap ikpoko iwa ichit. ⁴ Mije, ebibilọ cha otutuuk emọnọ sọntiik me lek ogbogbo inu ubọọn̄ ema ekaan̄be isa ininyi. Ire, ogwu nwakpa ya ìsa me irek ugbọọri kan̄ inyi otutuuk inu îkaan̄be ibosa iluk ugwem, ìkasun̄ geege ìnyi lek kan̄.” ⁵ Usini ebi udun̄ kè Jisọs ekukup me lek kiban̄, mè ikitọn̄ uja ewuuk esabe inama Uwu Mbuban, mè otutuuk inu geelek ebi ene echebe inyi Awaji, echi esabe igbaalek ibala uwu ya. Jisọs onọnọ, mè itumu inyi ema ibe, ⁶ “Me lek otutuuk inu chi enyi ekimun̄ me ere yi, mgbọ òkinu me isi, mgbọ enyi kpebeyaka imun̄ ewuuk geege otoon̄be me inyọn̄ ge. Mêgbugbọ otutuuk ewuuk chi igwook me ijọn̄.” ⁷ Ema enenido Jisọs ibe, “Ogwu ijejeen̄, ìre mgbọ owa ke inu chi obomọnọ irek? Ìre kpasi inu ijejeen̄ ke ebi ene ebesa iriọọn̄ mgbọ inu chi obomọnọ irek?” ⁸ Jisọs otutumu inyi ema ibe, “Ìgwọk chieen̄, ikachieek ibe ene geege ifiaan̄ enyi. Mije, owuwa ene mênu me erieen̄ n̄a. Ogwu inu, mônikitumu ibe, ‘Òta mgbọ îre isan̄a! Emi nre ogwu unyan̄a ya ogwu Awaji otoon̄be ubọk me ibot.’ Ife chi isinu, ikagọọk! ⁹ Enyi isikinọ ukpatu akọn̄ melek ùrioon̄ òkup esese esese, ikafieek owot, mije, me atikọ, inu chi môdasi imọnọ irek. Ire, òta mgbọ ìkponu mgbọ yaage.” ¹⁰ Inenitumu si inyi ema ibe, “Ido môtim akọn̄ ikeme ido, ama ubọọn̄ môtim akọn̄ ikeme ama ubọọn̄. ¹¹ Ijọn̄ môsisik unye unye me owuwa ere. Akan̄ mè owuwa chieen̄ orukan̄ òkup esese esese mônin̄ me owuwa ere me linyọn̄. Inu ukpook mè owuwa uyeke uyeke inu môkimọnọ irek me isinyọn̄. ¹² “Ire, sabum otutuuk inu chi ònorọ, ebi ene mêtet enyi, mè itutuku enyi, mè isa enyi isi emen uwu ntitiin̄ kiban̄ isi isibi oyerebet me ibot, mè itap enyi me uwu mkpọn. Mêtaba si enyi isi isi ebi ubọọn̄ mè ebi ibot mkpulu ibe esibi enyi oyerebet me ibot. Otutuuk inu chi eberọ enyi, ìbore mije enyi echieekbe me lek n̄a. ¹³ Mgbọ ema mêkitutuku enyi, enyi mêkisa irek keya ikilook ema ata etip. ¹⁴ Ire, ikasisaak ejit kinyi ìkikeek inu enyi ebetumu isa inyan̄a lek kinyi me isi ife cha. ¹⁵ Mije, mgbọ ya isikem, emi mâjeen̄ enyi ikọ enyi ebetumu, mè inyi enyi si ifuk-ibot ike enyi ebesa itumu ikọ, inyi ebi ochicha kinyi ekakọt ìgbini, mè ìgwak. ¹⁶ Ebi nte kinyi mè nga kinyi, mè ebi ngwan̄ kinyi, mè ebi uwu kinyi, mè ebi unene kinyi mêleke enyi itap me emen ufialek, mè irọ inyi ekpan̄ usini kinyi. ¹⁷ Otutuuk ebi ene mêcha enyi mije n̄a. ¹⁸ Ire, emi mâbem enyi. Kpunu ukut ijeek ibot kinyi geege òbonan̄a ichep. ¹⁹ Ire enyi ikeke inye, enyi mênwọnọ, mè ikaan̄ unyan̄a. ²⁰ “Ofifi si, enyi isimun̄ urum ebi akọn̄ ekanabe Jeruselem okop okop, ìriọọn̄ ibe ke mgbọ ebegbugbọ ama ya îkem. ²¹ Me mgbọ ya, ebi geelek ìkup me Judia elibi enene inyọn̄ ogoon̄ echi òkup me agan̄ ya. Ebi ìkup me emen ama Jeruselem enan̄a esibi etele ama ya. Ebi ìkup me asabọn ama òkukup iriaak Jeruselem ekayaka ìnin̄ Jeruselem. ²² Mije, îre mgbọ ya ke Awaji obosulu ebi Jeruselem osusut, isasa irọ otutuuk inu egebe me Ikpa Mbuban ibak Jeruselem iso. ²³ Ufialek môkup enenen inyi ebibaan̄ ìkup me owot, mè ebi ìkakaan̄ nsabọn ebi ekabange ebe me ubọk. Ufialek òmimin enenen môkup me inyọn̄ ijọn̄ yi. Unaan̄-ejit Awaji si môkeme ife chi me mgbọ ya. ²⁴ Mêkpan̄ usini kiban̄ me akọn̄, mè ikpulu usini kiban̄ me akọn̄ isa ifo owuwa ofifi ido. Ebi ekarege ebi Ju mênu initim akọn̄ ikpan̄ ebi Jeruselem, mè ijak Jeruselem me ukot, mè ikikpulu ebi Jeruselem mege ire mgbọ mgbọ Awaji osun̄be ibe ebi ekarege ebi Ju ekpulu ebi Ju môsobe. ²⁵ “Me ike mgbọ cha, uyeke uyeke inu ijejeen̄ môrọ me lek ura, mè onyan̄, mè ntoronyan̄. Otutuuk mgbọ ya, ido geelek me linyọn̄ keyi môkup me uga ukpook mije ikpele ekoon̄ mè ogbururu òbonin̄ okwaan̄. ²⁶ Mgbọ ebi ene mêkikpọ chieen̄ me lek inu òkinu me linyọn̄, ukpook môtet ema ire lek ema mêkigak iweek, mije, inu geelek òkinyi utoon̄ me isinyọn̄ môsisik, mè ijibi inan̄a me akpat. ²⁷ Mgbọ inu chi môkimọnọ irek, ebi ene mêmun̄ Gwun̄ Ebilene okinu me emen oduku inyọn̄, me unye mè ikpele umin mè uja. ²⁸ Eya orọ, mgbọ inu chi isibene ikirọ, enyi ìnan̄a ìkeke, mè ìbene ibot kinyi ìfo inyọn̄, mije, mgbọ ebefaka enyi isibi îgbet.” ²⁹ Jisọs onenito urọk ge inyi ebi udun̄ kan̄ ibe, “Ìkpọ-nu uti figi melek otutuuk uti geelek. ³⁰ Mgbọ geelek enyi isimun̄ uti chi ogen̄be inwan̄ isan̄a, ayaya inwan̄ oyayaka ibene ikisek me lek, enyi mîra imun̄, mè iriọọn̄ ibe ke mgbọ ura îra igbet. ³¹ Ikeya si, enyi isimun̄ inu chi geelek okirọ, ìriọọn̄ ibe ke mkpulu eyi Awaji îra igbet. ³² “Me atikọ, ǹkitumu inyi enyi ibe ke ebi ukot keyi kpebekwaan̄ otutuuk isan̄a mege ire mgbọ otutuuk inu chi geelek môrọbe iso. ³³ Inyọn̄ mè ijọn̄ môraka isan̄a, ire, ikọ n̄a ìbokekeke inye ire mgbọ geelek. ³⁴ “Eya orọ, ìgbala chieen̄. Ikawuuk lek, mè ìfiat otutuuk mgbọ kinyi me lek uga irerie mè inwọnwọ miin̄, mè ikekeek ekiket mbọm mè ubọk iluk ugwem. Mije, ire otutuuk ejit kinyi ikup me lek inu chi gaalek mgbọ geelek, usen inunu Gwun̄ Ebilene mônu enyi me uwuuk-lek, mè itet enyi kubọk ufe otet anam. ³⁵ Uyọrọlek yi isinu, môre lek otutuuk ebi ìkup me linyọn̄. ³⁶ Eya orọ, enyi ìkup me mbem mgbọ geelek, mè ìkiriaak uriaak, inyi enyi ekọt enwọnọ otutuuk inu chi òbomọnọ irek, mè ekọt ekeke me isi Gwun̄ Ebilene.” ³⁷ Me otutuuk ike mgbọ ya, Jisọs ìkisi ijeen̄ inu me Uwu Mbuban usen geelek, mè ikisi ikup me inyọn̄ ogoon̄ Olifu ikakwun̄ geelek. ³⁸ Ata ewelegwe ewelegwe usen geelek, ebi ene mîra ikigbuku inu me Uwu Mbuban inikigban̄ inu ìkijeen̄.

¹ Mgbọ ijọk Fituru Ekatapge Olat me lek, eyi ekigwen si ijọk Iraraka, okigbet, ² ebi ibot ngwugwa, mè ebi ìjeen̄ Ikan enenikitọt ike ema ebesa ikọt itet Jisọs ikpan̄, mè ebi ene ekatap okput, mije, ema ekifieek owot me lek ebi ene. ³ Yọk oneninin̄ emen kè Judas ogwu ekigwen Isikariọt, ene ge me lek akọp mè ebi otuchieen̄ iba kè Jisọs. ⁴ Judas onenije isi lek ebi ibot ngwugwa cha, mè ebi ibot ebi ìkibem Uwu Mbuban, mè isi itọt melek kiban̄ ibe ke ọmọ môkọt ileke Jisọs inyi ebibi. ⁵ Ife cha ebebele ejit, mè ichieek ibe, ire ikọt ileke Jisọs inyi ema, ke ema mêkpe ogwugwu ikpoko. ⁶ Judas ochechieek, mè ibene ikiweek mgbọ ere mônọọn̄be, inyi ọmọ ileke Jisọs inyi ife cha, mè ebi ene ekariọọn̄. ⁷ Inenire usen ekirie ijọk Fituru Ekatapge Olat me lek, òrere usen ekikpan̄ arọọn̄ ebesa irie ijọk Iraraka. ⁸ Jisọs oraria Pita mè Jọn ibe esi enen̄e ere esun̄, mè ema enerie ijọk Iraraka eyi kiban̄. ⁹ Ema enenido Jisọs ibe mè ìre ere owa ke îweek ibe ema esi erọ inorie ya? ¹⁰ Jisọs onenitumu inyi ema ibe, “Enyi isikije inin̄ emen ama, ogwu enerieen̄ ge òben ugọn̄ mudim môchichini enyi me oniin̄. Ìgọọk ogwu enerieen̄ ya ìsi uwu geelek ìbonin̄, ¹¹ mè ìtumu ìnyi ogwukaan̄ uwu ya ibe ke ogwu Ijejeen̄ ìbe mè ìre omọmọ uwu ebi ichen, ere ọmọ mè ebi udun̄ kan̄ ebenikup irie inorie ijọk Iraraka? ¹² Mgbọ yaage, ogwukaan̄ uwu ya môsa enyi inene ifo agan̄ inyọn̄ isi ijeen̄ agwut ge ebalabe ijaan̄ me lek uwu ya. Ìrọ inorie ya me ere ya.” ¹³ Ema enanan̄a ije, mè isi imun̄ otutuuk inu cha geelek kubọk Jisọs otumube inyi ema. Me ere ya ke ema erọ inorie ijọk Iraraka ya isun̄. ¹⁴ Jisọs mè ebi otuchieen̄ kan̄ enenire uwu ya, mè ikweek ikana me lek ikasi inorie ya mgbọ mgbọ ya okembe. ¹⁵ Jisọs otutumu inyi ebi udun̄ kan̄ ibe, “Îlọk emi enenen irerie inorie ijọk Iraraka keyi melek kinyi sabum mbanin̄ emen ufialek. ¹⁶ Mije, me atikọ, emi m̀kpayaka irie inorie yi mege ire mgbọ mêrọbe ijọk yi ijot me mkpulu eyi Awaji.” ¹⁷ Jisọs onenibene ekpen̄ miin̄ ijọk ya, mè inyi Awaji itọn̄, mè ibe ema, “Ìbọkọ miin̄ yi ìche ìnyi lek kinyi. ¹⁸ Me atikọ, emi m̀kpayaka inwọ miin̄ ònan̄a me lek gerep ofifi mege ire mgbọ mkpulu eyi Awaji mônube.” ¹⁹ Inenimọnọ si fituru, mè inyi Awaji itọn̄, mè igwaka, mè isa inyi ema, mè itumu inyi ema ibe, “Eyi ìre akpalek n̄a eyi esabe igwa ngwugwa mije kinyi. Ìkirọ ikeyi ìsa ìkikeek emi.” ²⁰ Mgbọ ema eriebe inorie ya isan̄a, Jisọs okpọkpọk iben ekpen̄ miin̄ ya inyi ema, mè ibe, “Miin̄ keyi ìre ayaya inyan̄a-ibot eyi esabe eje n̄a, eyi ebegwook me ijọn̄ mije kinyi, isa irọ. ²¹ Ire, ìkpọ, ogwu òboleke emi inyi ekpan̄ òwa me lek ikasi yi ogọọkbe emi igbaan̄ ikweek ikirie inorie. ²² Me atikọ, Gwun̄ Ebilene môkwu mkpa kubọk Awaji odọmọbe isun̄. Ire, môfieek inyi ogwu keya òboleke ọmọ inyi ekpan̄.” ²³ Ema ebebene ikidido lek kiban̄ ibe mè ìre ekene me etete kiban̄ obokat ejit ikitọt òjelek inu òkup ikeyi? ²⁴ Ebi udun̄ kè Jisọs ebebene ikiwut ifan̄a me lek kiban̄ iweek irọriọọn̄ ogwu ebi ene ekimọnọ kubọk ogwu òmimin ichit me etete kiban̄. ²⁵ Jisọs onenitumu inyi ema ibe, “Ebi ubọọn̄ ìkikpulu ido ebi ekarege ebi Ju ekisa unye ubọk ikpulu ebi ìkup me irak kiban̄. Ebi ema ekikpulu cha mîra ikisiki ibot inyi ema, mè ike ema erieen̄ ikigwen ema ‘Ebi ìrọ nnwọn.’ ²⁶ Ire, ìkpokup ikeyi me etete kinyi. Kpan̄asi ikeya, ogwu òmimin ichit me etete kinyi ìbokup kubọk ogwu òsisip ichit. Ogwu geelek òrere ogwu ibot si môkup kubọk gwun̄ uwu. ²⁷ Ǹdo enyi nu, ogwu òkwekweek me lek ikasi mè ekebeben inorie eneyik enyi irie, mè ogwu òkibeben inorie ijet ene ya me lek ikasi, ìre ekene omin igak ekene? Me atikọ, îre ogwu òkwekweek me lek ikasi mè ekebeben inorie eneyik enyi omin igak ogwu òkibeben inorie iniyik me inyọn̄ ikasi. Ire, emi ǹkup me etete kinyi kubọk ogwu òkibeben inorie iniyik me inyọn̄ ikasi. ²⁸ Mgbọ nkupbe me emen ufialek, enyi ere ebi ìkekeke melek n̄a. ²⁹ Mgbọ keyi, nkana ibot mkpulu itap enyi me ubọk kubọk Nte n̄a okanabe ibot mkpulu itap emi me ubọk si. ³⁰ Sa me ikeyi, enyi mêkọt igọọk emi isiki ikweek me lek ikasi ijọk ikirie mè ikinwọ me emen mkpulu n̄a, mè isiki ikweek irek si me inyọn̄ udu ubọọn̄ ikikpulu akọp mè otoko iba ebi Ijeren.” ³¹ Ikọ ya itata Jisọs me otu, itutumu inyi Saimọn Pita ibe, “Saimọn! Saimọn! Kpọ, Yọk îbọkọ unye inenigen̄ owu kubọk ekigen̄ mfufe isan̄a me lek akpa. ³² Ire, nriaak uriaak me ibot kwun̄ inyi ichechieek kwun̄ ikatele owu. Ikaan̄ mgbọ osiyaka igwu ikom ika igọọk emi, tap efuuk me owot bọn Nte kwun̄, inyi ema ekeke enye me ichechieek kiban̄.” ³³ Pita ofọfọọk Jisọs ibe, “Okaan̄-ene, ubọk geelek ìbore, emi mbem lek igọgọọk owu ije isi ire okputut. Ìsibi mkpọn, mâgọọk owu isi. Ìrere mkpa, mâgọọk owu ikwu.” ³⁴ Jisọs ofọfọọk ọmọ ibe, “Pita, ǹkitumu inyi owu ibe, sabum unọn obokpọk me eririeen̄ chereyi, owu môjit emi mgbọ ita, mè ibe ke owu òkariọọn̄ ogwu emi nrebe.” ³⁵ Jisọs onenido ebi udun̄ kan̄ ibe, “Mgbọ nriabe enyi isibi ibe enyi esi elook ata etip, mè ibe enyi ekamọnọ akpa ikpoko, ekamọnọ akpa ubọk, ekamọnọ si ikpukot geege ìkaan̄ me ubọk, ìre îkaan̄ inu ònanan enyi me oniin̄ ije ya?” Ema efọfọọk ibe iin̄-iin̄, ke kpunu inu geege ònanan ema mgbọ ya. ³⁶ Jisọs otutumu inyi ema ibe, “Mgbọ keyi, ogwu ikaan̄ akpa ikpoko, imọnọ ikaan̄ me ubọk, mè imọnọ si akpa ubọk. Ikaan̄ ogwu ikakaan̄ge oge etim, inyam ọfọnti inyọn̄ kan̄, mè isa ikpoko ya isi ilep oge etim. ³⁷ Mije, ege me Ikpa Mbuban ibe, ‘Mîfuk ọmọ itap me otu ifuk ebi ijo.’ Me atikọ, inu yi ìborọrọ iso me ugwem n̄a. Iin̄, otutuuk inu geelek egebe ibak emi me Ikpa Mbuban môrọ iso ubọk egebe.” ³⁸ Ebi udun̄ kan̄ enenitumu inyi ọmọ ibe, “Okaan̄-ene, kpọ, oge etim iba ire echi.” Jisọs ofọfọọk ibe, “Ikup ikeya!” ³⁹ Jisọs oneninan̄a isibi me Jeruselem, mè ije ifo inyọn̄ ogoon̄ Olifu ubọk îkiwuuk lek irọ, ọmọ mè ebi udun̄ kan̄. ⁴⁰ Mgbọ îrebe ere ya, itutumu inyi ebi udun̄ kan̄ ibe, “Ìriaak uriaak, inyi enyi ekarọn̄ ìnin̄ emen ntọ-mkpọ.” ⁴¹ Mgbọ îtumube ikọ ya isan̄a, ijeje ida ibọkọ me lek kiban̄, mè itọbọ ekpe me ijọn̄, mè ikiriaak uriaak ibe, ⁴² “Nte n̄a, ire ineme owu, ben ekpen̄ ufialek yi san̄a emi me lek. Ire, ìkare me nkeek eyi n̄a. Nkeek eyi kwun̄ irọ iso.” ⁴³ Ogwu osat Awaji ge onanan̄a me emen inyọn̄ inu initap ọmọ efuuk me owot me ere ya. ⁴⁴ Mije ikpele ufieek-owot eyi ufialek cha okemebe ọmọ, ikekiriaak uriaak unye unye. Uyok òkisibi ọmọ me lek okekirọn̄ọ igwook me ijọn̄ kubọk eje. ⁴⁵ Mgbọ Jisọs onan̄abe ikeke me uriaak ya, mè ije isi lek ebi udun̄ kan̄, isisi imun̄ ema ewọbe, mè ilaak inwọnọ mije ufieejit. ⁴⁶ Idodo ema ibe, “Ìre keke orọ enyi ekilaak ikeyi? Ìnan̄a ìkeke, mè ìriaak uriaak, inyi enyi ekarọn̄ ìnin̄ emen ntọ-mkpọ.” ⁴⁷ Jisọs òkitutumu ikọ ya me otu, urum ebi ene enunu me ere ya. Ene ge me lek ebi udun̄ kan̄ ekigwen Judas oje me isi ife cha, mè ikisa ema inu. Judas onenije inin̄ lek kè Jisọs ibosi ikat ọmọ. ⁴⁸ Jisọs ododo ọmọ ibe, “Judas, ìre òbonisa ikakat ene ileke Gwun̄ Ebilene inyi ekpan̄?” ⁴⁹ Mgbọ ebi udun̄ kè Jisọs emun̄be inu òborọ ogwu nte uwu kiban̄ me ere ya, ema edodo Jisọs ibe, “Okaan̄-ene, ìre eji ewọọk oge etim kiji esa ekep ife chi?” ⁵⁰ Mgbọ yaage, ene ge me lek kiban̄ otataba oge etim kan̄ isibi, mè isa ikep ogwu usun̄ ogwu ibot ebi ibot ngwugwa, mè ifieek utọn̄ kan̄ agan̄ ulom isan̄a. ⁵¹ Ire, Jisọs ogagana inyi ema ibe, “Ikup ikeya!” Itutumu ikeya, itotoon̄ ubọk me agba isi ene ya, utọn̄ kan̄ oyayaka ikup ubọk îkupbe me adasi mgbọ. ⁵² Jisọs onenido ebi ibot ngwugwa, mè ebi ibot ebi ìkibem Uwu Mbuban mè ebi ugane ama cha ebi ìnunu ibenitet ọmọ ibe, “Ìre emi ǹkitap wọlọwọlọ me ama, eyi enyi ekaan̄be oge etim mè ibet me ubọk isa inu ikeyi ibenitet emi? ⁵³ Ke emi melek kinyi ekititiin̄ me Uwu Mbuban usen geelek, enyi kpetet emi. Ire, mgbọ kinyi ire eyi, mgbọ Yọk ogwu ibot udun okikpulu.” ⁵⁴ Ife cha etetet Jisọs, mè isa ije isi uwu ogwu ibot ebi ibot ngwugwa. Pita okekije me ujọn̄ọ ere ikigọọk ema me udun̄. ⁵⁵ Mîsọk ukan̄ me eden̄ oyet egep ya. Mgbọ Pita orebe oyet egep ya, igọgọọk isi ikup me ere ya ikigwele ukan̄ ya. ⁵⁶ Ogwu usun̄ enenwaan̄ ge omumun̄ Pita okupbe me ere ya ikigọọk igwele ukan̄, mè igwuun̄ chieen̄ ikpọ Pita, mè iriọọn̄ ọmọ isi, mè itumu me ere ya ibe, “Ogwu enerieen̄ yi òwa me lek ebi ìkigọọk Jisọs ije.” ⁵⁷ Ire, Pita okakan̄, mè itumu inyi gwun̄ enenwaan̄ ya ibe, “Ogwu enenwaan̄, ǹkariọọn̄ ogwu enerieen̄ ya!” ⁵⁸ Sọnja mgbọ iraraka, ofifi ene omumun̄ Pita, mè itumu inyi ibe, “Owu si ìre ene ge me lek ebi ife cha!” Pita obebe ene ya, “Ogwu enerieen̄, ìkare emi!” ⁵⁹ Inu òbet lek mbubak mgbọ ge iraraka, ofifi ene omumun̄ Pita, mè itumu ibe, “Me atikọ, ene yi ìkpolọlọ irere ene ge me lek ebi ìkigọọk Jisọs, mije, ene yi ìre ogwu Galili.” ⁶⁰ Pita ofọfọọk ibe, “Ogwu enerieen̄, ǹkariọọn̄ inu owu okitumu ikọ ibak.” Ikọ ya ìkatata Pita me otu, unọn okpọkpọk. ⁶¹ Mgbọ yaage, Okaan̄-ene okakana chieen̄, mè ikpọ Pita sìì. Pita onenisi ikeek ikọ Okaan̄-ene otumube inyi ọmọ ibe, sabum unọn obosan̄a amọn me eririeen̄ cherekeyi, ke owu môjit ọmọ mgbọ ita. ⁶² Mgbọ yaage, Pita onanan̄a me oyet egep ya ije isibi, mè ibene ito ujat ito. ⁶³ Ebirieen̄ ebi ìkibem Jisọs ebebene ikirọ ọmọ inu ochak, mè ikisut ọmọ, ⁶⁴ mè ibọp ọmọ chieen̄ ichit, mè ikibe ọmọ, “Ben nriran, mè bak-nu mè ìre ekene osulu owu!” ⁶⁵ Ife cha mîtumu si owuwa ikọ unyechieen̄ inyi Jisọs. ⁶⁶ Me ewelegwe kan̄, Oru ebi Ju oninin̄. Otutuuk ebi ibot ngwugwa, mè ebi ìjeen̄ Ikan, mè ebi ugane ama enenititiin̄. Enenisa Jisọs inu me isi kiban̄. ⁶⁷ Ebi Oru cha enenitumu inyi Jisọs ibe, “Ire owu ore ogwu Awaji otoon̄be ubọk me ibot ya, tumu nyi eji!” Jisọs ofọfọọk ema ibe, “Ire ntumu inyi enyi, enyi kpebechieek. ⁶⁸ Ire nyaka idodo enyi ikọ, enyi kpebechieek ifọfọọk. ⁶⁹ Ire, bene me mgbọ keyi, Gwun̄ Ebilene môkweek irek me agan̄ ubọk ulom Awaji Ogwu Òkaan̄ Unye Geelek.” ⁷⁰ Otutuuk ebi ife cha edodo ọmọ ibe, “Ire ikeya, ìre owu ore Gwun̄ Awaji ya?” Jisọs ofọfọọk ema ibe, “Iin̄, enyi mîtumu itat ibe ke emi nre Gwun̄ Awaji ya.” ⁷¹ Ife cha ebebe, “Ire ikeya, ìre kpasi ofifi ata-ikọ ke eji eyaka ikiweek? Eji mîsa utọn̄ kiji inọ ikọ ònan̄a me otu kan̄ gaalek!”

¹ Otutuuk ebi Oru ebi Ju enanan̄a ikeke, mè isa Jisọs ije isi isi kè Pailet. ² Ema ebebene ikitumu ikọ ikeme Jisọs me ere ya ibe, “Eji mîweek iriọọn̄ ibe ke ene yi ìkifiat owuwa ebi ene ibot me ido kiji, mè ikijeen̄ ibe ekayaka ìtip otitip ido ìnyi ogwu Sisa. Ofifi si, ene yi ìkitumu ibe ke ọmọ ore ogwu Awaji otoon̄be ubọk me ibot ya, òrere ogwu ubọọn̄.” ³ Pailet onenido Jisọs ibe, “Tumu-nu, ìre owu ore ogwu ubọọn̄ ebi Ju ya?” Jisọs ofọfọọk ibe, “Owu otumu-ma!” ⁴ Pailet onenitumu inyi ebi ibot ngwugwa mè ebi urum ene ya ibe ke ọmọ ìkamun̄ ijo inu geege eyi ogwu enerieen̄ yi orọbe eyi ebesa ifieek oyerebet itip ene yi. ⁵ Ire, ema etetet lek inye, mè ikitumu ibe, “Inu ene yi okijeen̄ òkitap ijo wọlọwọlọ me otutuuk agan̄ Judia. Ìbene me agan̄ Galili, mè isa ikeya inu inigwook me ere keyi.” ⁶ Mgbọ Pailet onọbe ikeya, inenido ibe mè Jisọs ìre ogwu Galili ye? Ema echechieek ibe iin̄, ke ìre ogwu Galili. ⁷ Mgbọ Pailet oriọọn̄be ibe ke Jisọs ìnan̄a me Galili, òrere agan̄ Erọdu okikpulu, iraria Jisọs ijet Erọdu. Me ike mgbọ ya, Erọdu òwa me Jeruselem. ⁸ Mgbọ Erọdu omun̄be Jisọs, ejit îbele enenen, mije, îwuuk lek ikinọ inu òfolek kan̄ karake ujọn̄ọ mgbọ, mè ikiweek imumun̄ ọmọ isi mè isi. Mije inu chi îkinọ, ikekiweek isasa chieen̄ kan̄ imun̄ mgbọ Jisọs okirọ inu ukechieen̄. ⁹ Eya orọ, ikpukpulu ikọ idodo ichit Jisọs me lek. Ire, Jisọs ìkafọọk ọmọ otu kubọk ge. ¹⁰ Ebi ibot ngwugwa mè ebi ìjeen̄ Ikan ekekeke si me ere ya, mè ikitoon̄ Jisọs ikọ me unye me unye. ¹¹ Erọdu mè ebi akọn̄ kan̄ enenikisa Jisọs irọ inu ochak, mè itap ọmọ ọfọnti ilile ebi ubọọn̄ ekitap, mè iyaka iria ọmọ ijet Pailet. ¹² Usen ya ke Erọdu mè Pailet ekana unene. Sabum usen ya, ema ekup me ochicha. ¹³ Pailet onenigwen ebi ibot ngwugwa, mè ebi ibot ama, mè otutuuk ebi ama ititiin̄, ¹⁴ mè itumu inyi ema ibe, “Enyi esa ogwu enerieen̄ yi inu me isi n̄a kubọk ogwu òkifiat ebi ene ibot, inyi ekayaka ìsun̄ ikan me ido kinyi. Me isi kinyi me ere yi, emi nnin̄ emen ikọ enyi etumube itoon̄ ogwu enerieen̄ yi, mè iwọlọ ikpọ, ǹkamun̄ ikan geege òtetet ene yi. ¹⁵ Ikeya si, Erọdu ìkamun̄ ikan geege eyi ene yi orọn̄be. Îre eya orọ îyakabe iria ene yi ijet eji. Enyi me lek kinyi ìkpọ-ma! Ene yi ìkagbe mkpa, mije, ìkarọn̄ ikan geege eyi mêkọtbe isa itet ọmọ ikpan̄. ¹⁶ Eya orọ, mâsulu ọmọ osusut òkekem, mè itele inyi ifo.” [ ¹⁷ Me ijọk Iraraka geelek, Pailet îkisan̄a ene ge isibi me mkpọn inyi ebi Ju ibe ifo me ikike.] ¹⁸ Ebi ife cha etataan̄ ukpo me ida ge ibe, “Kpan̄ ogwu ene yi, mè san̄a Barabas sibi nyi eji!” ¹⁹ Etap Barabas mkpọn mije wọlọwọlọ îtapbe me Jeruselem, mè ikpan̄ ene. ²⁰ Pailet okpọkpọk igwen ebi ife cha itumu ikọ inyi ike îtumube me adasi mgbọ, mije, ìkiweek isasan̄a Jisọs isibi, inyi ifo. ²¹ Ire, ema ekpọkpọ ikitaan̄ ukpo unye unye ibe, “Gon kpan̄! Gon ọmọ kpan̄ me inyọn̄ uti nkwurieen̄!” ²² Pailet okpọkpọk itumu ikọ melek ife cha òso mgbọ ita, mè ido ema ibe, “Ìre mije keke? Ìre kpasi ikan ke ogwu enerieen̄ yi orọn̄? Emi ǹkamun̄ ikan mkpa geege òtetet ene yi. Eya orọ, mâsulu ene yi osusut, mè itele inyi ifo.” ²³ Ire, ema etetet lek inye ikitaan̄ ukpo ikitumu inyi Pailet ibe igon Jisọs ikpan̄. Sa me ikeya, Pailet ogbagban̄ utọn̄ inyi ema, ²⁴ mè irọ inu ema ekiweek inyi ema. ²⁵ Isasan̄a ogwu etapbe me mkpọn mije wọlọwọlọ mè mkpan̄-ene isibi inyi ema kubọk ema edobe, mè isa Jisọs inyi ema esa esi erọ ike înemebe ema. ²⁶ Ebi akọn̄ ebi Rom etetet Jisọs isa inan̄a me ere ya ije inin̄ oniin̄ ibesa isi igon ikpan̄. Me oniin̄ ya, ema echichichini ogwu enerieen̄ ge ekigwen Saimọn, ogwu ama Sairini, okinan̄a me sọntiik ama ge ika inu Jeruselem, mè itet ogwu enerieen̄ ya me unye ubọk, mè ibene uti nkwurieen̄ ebesa igon Jisọs itoon̄ ọmọ ibe iben isa igọọk Jisọs me udun̄. ²⁷ Owuwa ebibaan̄ òwa me etete ebi ìkigbuku igọọk Jisọs me udun̄. Ebibaan̄ cha ekekito ito, mè ikifieek ejit mije kè Jisọs. ²⁸ Jisọs okakana chieen̄ ikpọ ema, mè itumu inyi ema ibe, “Enyi ebibaan̄ Jeruselem, ikayaka ìto ito me ibot n̄a, ìto ito ìnyi lek kinyi mè nsabọn kinyi. ²⁹ Mije, mgbọ òkinu eyi enyi mêkitumu ibe, ‘Inwọn inyi ebibaan̄ ebi ora, mè ebi kpenin̄ owot iman bọn, mè ebi nsabọn geege kpenwọ ebe me ejit!’ ³⁰ Mgbọ ya si, ebi ene mêkitumu inyi ikpele ogoon̄ ibe, ‘Gbugbọ keme eji!’, mè ikitumu inyi orioon̄ ibe, ‘Let eji!’ ³¹ Mije, ire ebi ene irọ òjelek inu òkup ikeyi me lek njijoon̄ uti, kpelọlọ irọrọ eyi òfefieek igak ikeyi me lek uti òkwukwu ichiaak.” ³² Ebi akọn̄ cha mîsa si ebirieen̄ iba ìrọrọn̄ ikan igbaalek ije ibesa isi igon ikpan̄ melek kè Jisọs. ³³ Mgbọ ema erebe ere ekigwen “Ngigọ Ibot Ene,” ema egogon Jisọs me uti nkwurieen̄, mè igon si ebirieen̄ iba cha igbaalek kan̄, ene ge me agan̄ ubọk ulom kan̄, ene ge me agan̄ ubọk ujit. ³⁴ Jisọs onenikup me inyọn̄ uti nkwurieen̄ ya iriaak uriaak ibe, “Ute, tele nyi ema, mije, ema kperiọọn̄ inu ema ekirọ.” Ebi akọn̄ cha enenikup me ere ya iroon̄ nriroon̄ isa iche ọfọnti kè Jisọs inyi lek kiban̄. ³⁵ Urum ebi ene ìgọgọọk inu me ere ya ekekeke ikikpọ inu òkirọ. Ebi ibot ebi Ju ekekirọ Jisọs inu ochak, mè ikitumu ibe, “Înyan̄a ebi ofifi ene. Inyan̄a-nu lek kan̄ ire me atikọ ke ọmọ ore ogwu Awaji otoon̄be ubọk me ibot ya, òrere ogwu Awaji ogobobe isibi inyi lek kan̄.” ³⁶ Ebi akọn̄ cha ekekirọ si Jisọs inu ochak, mè inyi ọmọ miin̄ òkitop kubọk inu òjijin, ³⁷ mè ikitumu inyi ọmọ ibe, “Ire owu ore ogwu ubọọn̄ ebi Ju, nyan̄a lek kwun̄!” ³⁸ Îkaan̄ inu egebe igon me lek uti nkwurieen̄ ya me agan̄ ibot kè Jisọs. Inu ya egebe ìre, OGWU ÌRE OGWU UBỌỌN̄ EBI JU. ³⁹ Ene ge me lek ebi ene iba cha egonbe me agba lek kè Jisọs, otutumu inyi Jisọs ibe, “Ke owu ore ogwu Awaji otoon̄be ubọk me ibot ya? Nyan̄a lek kwun̄, mè nyan̄a eji gbaalek ma!” ⁴⁰ Ire, ogwu òso iba me lek ebi ene iba cha egonbe igbaalek kè Jisọs ogagana inyi ogwu melek kan̄ ya ibe, “Ya! Ìre ukpook Awaji ìkakitet owu? Ìre ìkare oyerebet yaage efieekbe inyi ene yi ke efieek si inyi eji? ⁴¹ Eyi kiji, osusut kiji îtat, mije, eji ekibọkọ osusut igọọk me lek ijo inu eji erọbe. Ire, ogwu enerieen̄ yi ìkarọ ijo inu geege.” ⁴² Ogwu enerieen̄ ya onenitumu inyi Jisọs ibe, “Jisọs, keek emi mgbọ owu mômọnọbe irek ubọọn̄ kwun̄.” ⁴³ Jisọs ofọfọọk ọmọ ibe, “Me atikọ, cherekeyi, owu melek n̄a mêkup me Paradais!” ⁴⁴ Me ike mgbọ yi, òfuk-mgbọ îsulu akọp mè iba eyi ejit ikarek. Utoon̄ ura ochechep, uga udun̄ okakana otutuuk ido ya ichit bùk, mè ikup ikeya mege ire mgbọ òfuk-mgbọ osulube ita eyi ikarek. ⁴⁵ Ekwut esabe ifieek ikwek ere mbuban me Uwu Mbuban otọtọbọ ibum iba, ibene me inyọn̄ inire ijọn̄. ⁴⁶ Jisọs otataan̄ ukpo itumu ibe, “Ute, nkana ekwukwu n̄a itap owu me ubọk.” Ikọ yi itata ọmọ me otu, ifufuuk òta efuuk, mè itọbọ. ⁴⁷ Mgbọ ogwu ibot akọn̄ òkup me ere ya omun̄be inu ya òrọrọ, itọtọn̄ Awaji, mè itumu ibe, “Me atikọ, ogwu enerieen̄ yi ìre ogwu ata irọrọ!” ⁴⁸ Mgbọ otutuuk ebi ìnunu ere ya ibenikpọ chieen̄ emun̄be otutuuk inu cha òrọrọ, ema efefieek owot, mè ikisulu ubọk me ejit kiban̄, mè ikpọk iyat. ⁴⁹ Ire, otutuuk ebi ìrọriọọn̄ Jisọs, mè ebibaan̄ ebi ìgọgọọk ọmọ ije inan̄a me Galili inire Jeruselem, ekekeke me ujọn̄ọ ere ikikpọ inu cha òkirọ. ⁵⁰ Îkaan̄ ogwu enerieen̄ ge ekigwen Josefu, òrere ene ge me etete ebi Oru ebi Ju, mè ire si ata ene ogwu ògbegbe utoon̄ ejit. ⁵¹ Josefu yi ìnan̄a me ama ekigwen Arimatia me ido Judia. Ọmọ ìkagọọk ìchieek me lek inu ebi ibot ebi Ju etọtbe, mè irọ me lek kè Jisọs, mije, ọmọ ìre ogwu òkikpọ chieen̄ me inunu eyi mkpulu Awaji. ⁵² Josefu yi ojeje isi lek kè Pailet isi ibeek ibe inyi ọmọ nkwukwu kè Jisọs. Pailet ochechieek. ⁵³ Inenisi ijene nkwukwu kè Jisọs isibi me inyọn̄ uti nkwurieen̄, mè isa ekwut-ufuun̄ ikat, mè iben isi imaan̄ me emen udọn̄ erọkọbe me lek ewuuk, eyi kperarak ifuun̄-nu ene geege me emen. ⁵⁴ Usen ya ìre usen ebi Ju ekinen̄e lek isun̄. Usen Mbuban ìbobene me otu ikakwun̄ usen ya, me ikajọn̄ọge mgbọ. ⁵⁵ Ebibaan̄ cha ebi melek Jisọs enan̄abe me Galili inu egọgọọk Josefu ije, mè isi imun̄ udọn̄ ufuun̄ ya, mè imun̄ si ubọk emaan̄be nkwukwu kè Jisọs me emen udọn̄ ya. ⁵⁶ Ema enenigwu ikom ifo, mè isi irọ ugwun̄ mè aran̄ utop olu ebesa iniken nkwukwu kè Jisọs, inyi ikajọ. Ire, ema esisiki efuuk me Usen Mbuban igọọk ubọk Ikan kè Mosis otumube.

¹ Usen Mbuban ya onunu, mè iraka. Me ata ewelegwe ewelegwe òfit iwele kan̄, eyi òrere usen Awaji, ebibaan̄ cha enenisa ugwun̄ mè aran̄ cha ema erọbe ikaan̄ me ubọk inan̄a ije isi udọn̄ ere efuun̄be Jisọs. ² Mgbọ ema erebe ere ya, ema emumun̄ ibe ke mîkpukpọt ikpele ewuuk esabe ichit otu udọn̄ ya isan̄a. ³ Ema eninin̄ emen udọn̄ ya, mè ikpọ, kpemun̄ nkwukwu kè Okaan̄-ene Jisọs. ⁴ Ukpook otetet ema. Ema ekpọkpọ ikeke me ere ya, kpeyaka iriọọn̄ inu eberọ. Mgbọ ema ekekebe me ere ya, ebi osat Awaji iba, ìtatap ọfọnti òtatana kubọk ura, ekpọkpọ ikana isibi, mè ikeke me agba lek kiban̄. ⁵ Ebibaan̄ cha egegele ibot isiki, mè ikana isi ichit me ijọn̄, mije, ukpook îtet ema enenen. Ire, ebi osat Awaji iba cha enenido ema ibe, “Ìre keke orọ enyi ekiweek ogwu òkup me ugwem me etete ebi ìkwukwu? ⁶ Jisọs ìkakup me ere keyi! Îjomo me mkpa! Ìkeek ikọ îtumube inyi enyi me Galili mgbọ îkupbe me ugwem melek kinyi ibe, ⁷ ke mêtet ọmọ Gwun̄ Ebilene ikana itap me ubọk ebi ekariọọn̄ge Awaji, inyi egon ekpan̄. Òso egwe ita, ke ọmọ môyaka ijomo me mkpa.” ⁸ Ema enenisi ikeek ikọ cha Jisọs otumube inyi ema. ⁹ Ema enanan̄a me udọn̄ ufuun̄ ya igwu ikom ika, mè inikpa otutuuk inu chi inyi akọp mè ene ge ebi otuchieen̄ kan̄, melek otutuuk ebi melek kiban̄. ¹⁰ Ebibaan̄ ebi ìsisi imun̄ inu yi, mè isa inikpa inyi ebi otuchieen̄ kè Jisọs cha ìre Meri ogwu Magidala, mè Juwana, mè Meri nga kè Jemis mè ofifi ebibaan̄ ebi melek kiban̄. ¹¹ Ire, ubọk ukpatu ya okupbe uyeke uyeke kubọk ukpatu ama urọk, ebi otuchieen̄ cha kpechieek ikọ ebibaan̄ cha ekpabe inyi ema. ¹² Ire, Pita onanan̄a ikeke jîp, mè isa ekot ekot ilibi isi otu udọn̄ ufuun̄ ya. Mgbọ îrebe, ikwukwuun̄ isi ikpọ emen udọn̄ ya, mè imun̄ ekwut-ufuun̄ cha gaalek olaakbe ikeya me ere ya. Inu ya òrọrọ okwukwu Pita lek enenen. Igwugwu ikom ifo, mè ikikeek ubọk inu ya osabe ikup ikeya. ¹³ Ebi udun̄ kè Jisọs ene iba eneninan̄a me Jeruselem ikije isi gwun̄ ama ge ekigwen Emayọs. Nan̄a me Jeruselem si re Emayọs îjọn̄ọ ere iso ewuuk ije jaaba. ¹⁴ Me oniin̄ ije kiban̄, ema ekekikpa ukpatu òfolek inu cha òrọrọ me Jeruselem. ¹⁵ Mgbọ ema ekije, mè ikikpa ukpatu ya, Jisọs me lek kan̄ onanan̄a me agan̄ udun̄ kiban̄ ije inu, mè inigọọk ema ikigbaan̄ ije. ¹⁶ Ema mîmun̄ ọmọ, ire, kpekọt iriọọn̄ ogwu ọmọ orebe. ¹⁷ Jisọs onenido ema ibe, “Ìre kpasi ukpatu ke enyi ekikpa ije me oniin̄ ikeyi?” Ema eyayaka ikeke. Ufieejit òkup ema me ejit îsibi me isi kiban̄. ¹⁸ Ene ge me etete kiban̄ ogwu ekigwen Kilopas onenido Jisọs ibe, “Ìre owu gaalek ore ogwu ichen òkup me Jeruselem eyi owu okariọọn̄ge inu òrọrọ me usen inen mè inen kechi?” ¹⁹ Jisọs ododo ema ibe mè ìre keke orọ ye? Ema efọfọọk ibe, “Îre ukpatu òfolek kè Jisọs ogwu Najeret ke eji ekikpa. Jisọs ya ìre ikpele ogwu nriran Awaji, ogwu ikọ kan̄ mè inu îkirọ okaan̄be unye me isi Awaji mè isi ebilene. ²⁰ Ebi ibot ngwugwa mè ebi ibot ebi Ju etetet ọmọ isa inyi Pailet ogwu ibot mkpulu ebi Rom, inyi itip ọmọ oyerebet mkpa. Etetet ọmọ igon ikpan̄ me inyọn̄ uti nkwurieen̄. ²¹ Ire, eji mîkpọ chieen̄ ibe ke ìre ọmọ obonisan̄a ebi Ijeren isibi me irak ubọk usun̄. Ògak ge, chereyi ore òso egwe ita karake egonbe ọmọ ikpan̄. ²² Usini ebibaan̄ kiji mîrọ eji inu ukpook. Mgbọ ebibaan̄ chi esibe udọn̄ ere efuun̄be ọmọ me ata otu ewelegwe chereyi, kpemun̄ nkwukwu kan̄. ²³ Kpan̄asi ikeya, eyaka igwu ikom ika initumu ibe ke ema mîmun̄ ebi osat ebi ìtutumu inyi ema ibe ke Jisọs òwa me ugwem. ²⁴ Isasa irọ ikọ ya inye, usini ebi melek kiji mîsi udọn̄ ere efuun̄be ọmọ, mè isi imun̄ inu geelek kubọk ebibaan̄ cha etumube. Ire, kpemun̄ nkwukwu kan̄ me ere ya.” ²⁵ Jisọs onenitumu inyi ife cha ibe, “Enyi mîbubut enenen! Enyi kpekigwat lek igobo inu itet! Ìkpọ-nu ubọk îyọtbe enyi me lek igwagwat lek ichieek otutuuk ikọ ebi nriran etumube. ²⁶ Ìre ìkafat ìre unen ibe ke Karais ya mômun̄ ufialek sabum ònonin̄ emen itọn̄ eyi mkpulu kan̄?” ²⁷ Jisọs onenibene me lek inu Mosis ogebe me Ikan, mè echi ebi Nriran egebe, ikijeen̄ ema otutuuk inu egebe me emen Ikpa Mbuban òfolek kan̄. ²⁸ Mgbọ ema ejebe igbet ugwaka oniin̄ Emayọs ere ema ebesi, Jisọs orọrọ kubọk ìbojeje iraka ama ya. ²⁹ Ema erariaak ọmọ ibe, “Soso nagọọk eji gba uwu laak wele egwe, ke egwe mônifit, egwe cherekeyi môniraka.” Jisọs ochechieek, mè igọọk ema ije igwaka ama ya. ³⁰ Mgbọ ema ekupbe me lek ikasi ikirie inorie, Jisọs omọmọnọ fituru, mè iriaak uriaak me lek, mè igwaka iche inyi ema. ³¹ Mgbọ yaage, chieen̄ kiban̄ obobolo kubọk ebi ìnanan̄a ikeke me ilaak. Ema eneniriọọn̄ ibe ke ogwu enerieen̄ ya ìre Jisọs me lek kan̄. Mgbọ yaage Jisọs onininiin̄ ichep me chieen̄ kiban̄. ³² Ema ekekibubeek, mè ikitumu ibe, “Chei, eji mîkpọ si ubọk ikọ îkitumu me oniin̄ ya okpọkpọ ikiyok eji ukan̄ me ejit otutuuk mgbọ îkikpa inu egebe me Ikpa Mbuban iwele inyi eji.” ³³ Mgbọ yaage, ema enanan̄a ikeke, mè igwu ikom ije ifo Jeruselem. Mgbọ ema erebe uwu ema ekititiin̄, ema esisi imun̄ akọp mè ebi otuchieen̄ ge kè Jisọs, mè ebi ofifi ife etitiin̄be. ³⁴ Ebi otuchieen̄ cha enenitumu inyi ema ene iba cha ibe, me atikọ, ke Okaan̄-ene îjomo me mkpa, mè isibi ichichini melek Saimọn. ³⁵ Ebirieen̄ iba cha enenikpa inu òrọrọ me oniin̄ ije kiban̄, mè ubọk ema esabe ikọt iniriọọn̄ Okaan̄-ene Jisọs mgbọ îgwakabe fituru itap ema me ubọk. ³⁶ Mgbọ ene iba cha ekikpa ukpatu ya me otu, Jisọs me lek kan̄ okakana isibi mgbọ yaage, mè ikeke me etete otutuuk kiban̄, mè ibe ema, “Esuuk ikup inyi enyi!” ³⁷ Ema eririki. Ukpook si otetet ema, mije, ema ekikeek ibe ke ìre ekwukwu. ³⁸ Jisọs onenido ema ibe, “Keke orọ ukpook itet enyi? Ìre keke orọ ejit kinyi ikup iba iba ikeyi? ³⁹ Ìkpọ ubọk iba n̄a, mè ìkpọ ukot iba n̄a, mè ìriọọn̄ ibe ke ìre emi me atikọ! Ìna ìnichak emi ubọk me lek, mè ìriọọn̄ ibe ke emi ǹkare ekwukwu, mije, emi nkaan̄ akpalek. Ire, ekwukwu ìkakikaan̄ akpalek mè ukwuuk kubọk enyi emun̄be emi nkaan̄be.” ⁴⁰ Mgbọ ìkitumu ikọ ya inyi ema, ikakana akajit ubọk iba kan̄ ijeen̄ ema, mè ijeen̄ si ema ukot iba kan̄. ⁴¹ Ire, ema kpekọt ichieek si ibe ke ìre ọmọ, mije, imumun̄ ọmọ ema emun̄be îke ema chieen̄ enenen, mè irọ si mè unwọọn̄ ijot ema ejit. Ubọk ema ekakọtge ìchieek, Jisọs, ododo ema ibe, “Ìre enyi mîkaan̄ inorie me ere yi?” ⁴² Ema efọfọọk ibe, “Iin̄,” mè isi isa ọkpọkọ irin̄ ewọwọp ijet ọmọ. ⁴³ Ibọbọkọ irin̄ ya, mè itaka me isi otutuuk kiban̄. ⁴⁴ Mgbọ îtakabe isan̄a, inenitumu inyi ema ibe, “Ìkpọ, inu cha ntumube inyi enyi mgbọ nkupbe melek kinyi ire echi òkinirọ iso. Me mgbọ ya, ntumu inyi enyi ibe ke otutuuk inu egebe òfolek n̄a me emen ikpa Ikan kè Mosis, mè emen ikpa ebi Nriran, mè emen ikpa Okwa ìkpolọlọ irọrọ iso.” ⁴⁵ Jisọs onenichili ema ejit, inyi ema ekọt etet ibot me lek inu egebe me emen Ikpa Mbuban. ⁴⁶ Inenitumu inyi ema ibe, “Ege me Ikpa Mbuban ibe ke Karais ya, (òrere ogwu Awaji otoon̄be ubọk me ibot ya) mômun̄ owuwa ufialek, mè ikwu, mè ijomo me mkpa me òso egwe ita. ⁴⁷ Mîge si me Ikpa Mbuban ibe ke mêkisa me erieen̄ kan̄ ilook ata etip ibene me Jeruselem isi ire otutuuk ido geelek me linyọn̄ ibe mè ebi ene egwu ekom, inyi Awaji itele ijo kiban̄ inyi ema. ⁴⁸ Mije enyi emun̄be otutuuk inu chi orọbe iso, enyi ìre ebi ata-ikọ. ⁴⁹ Mgbọ yi, emi me lek n̄a mâria uche eyi Nte n̄a ochieekbe me use ijet enyi. Eya orọ, ìkup me Jeruselem mege ire mgbọ Awaji môriabe unye ya inan̄a me emen inyọn̄ ijet enyi.” ⁵⁰ Jisọs onenisa ebi udun̄ kan̄ cha ije isibi me Jeruselem ifo agan̄ ama Betani, mè ibene ubọk iba kan̄ ifo inyọn̄, mè ikigbana ema. ⁵¹ Òkigbana ema me ubọk, inanan̄a itele ema, mè inene ifo emen inyọn̄. ⁵² Ema etọtọbọ ebum inyi ọmọ me ere ya, mè isa me ikpele unwọọn̄ igwu ikom ika inu Jeruselem. ⁵³ Bene me mgbọ ya fo isi, ema ekpọkpọ ikisi ikup me Uwu Mbuban ikitọn̄ Awaji.