Jemis

Jemis

¹ Emi Jemis, ogwu usun̄ eyi Awaji mè eyi Okaan̄-ene Jisọs Karais, nge ikpa etip yi ijet enyi, ebi eyi Awaji, ebi ìyiyiyala ikana otutuuk linyọn̄. Ntọp otutuuk kinyi amọn. ² Bọn Nte n̄a, mgbọ geelek owuwa esese ntọ-mkpọ okinu inyi enyi, ìkinwọọn̄ unwọọn̄, ³ mije, enyi mîriọọn̄ ibe, ire ichechieek kinyi ikeke inye itibi ntọ-mkpọ cha, ke enyi mêsa me ikeya ikaan̄ ukarajit. ⁴ Ìkat ejit ìre òta. Ikanan̄a ìrọn̄ me emen ntọ-mkpọ geege, inyi enyi esa me ikeya emiin̄ esibi, mè eso ifuk me irọrọ kinyi geelek, mè ata irọrọ geege ikanan me emen ugwem kinyi. ⁵ Ire ikaan̄ ogwu ikakaan̄ge iriọọn̄-inu me etete kinyi, ene ya ibeek me ubọk Awaji ogwu òkichili ubọk inyi ene inu me ikakaan̄ge uduk, ke Awaji mônyi ene ya iriọọn̄-inu. ⁶ Ire, ene ya isibobeek Awaji iriọọn̄-inu ya, ikaan̄ ichechieek, ikakaan̄ ejit iba. Mije, ene geelek òkakaan̄ ejit iba ìkup kubọk ekoon̄ eyi efet okiben iwut ikana me inyọn̄ isi mun̄. ⁷ Ogwu òkikaan̄ ejit iba ikeya, ikakpọ chieen̄ ìbe ke ọmọ môkọt ikaan̄ inu geege inan̄a me ubọk Awaji. ⁸ Ene geelek òkakaan̄ ejit iba, ene ya ìkakikeke ìnye me lek inu geelek îkirọ. ⁹ Ene geelek òchechieek me lek kè Jisọs, mè ire ugbọọn̄, ene ya ibele ejit mgbọ Awaji isibene ọmọ ifo inyọn̄. ¹⁰ Ogwu geelek òchechieek me lek kè Jisọs, mè ire ogwu òbọbọọn̄ ubọọn̄, ene ya ibele ejit mgbọ Awaji isigele ọmọ isiki. Mije, ike ajakajak òkup me oron okikwu iraka me ikafiatge mgbọ, ikeya si ke ebi ìbọbọọn̄ ubọọn̄ ebekwaan̄ si iraka. ¹¹ Ìkire, ura isira, mè initet uti òkaan̄ ajakajak me lek, inwan̄ uti ya îra iriọkọ, otutuuk ajakajak òkup me lek uti ya îra igen̄ igwook me ijọn̄, uja kan̄ îra ifiat. Ikeya si ke ebi ìbọbọọn̄ ubọọn̄ ebekwaan̄ me emen jen̄ejen̄e kiban̄ itele otutuuk inu ubọọn̄ kiban̄ cha. ¹² Ugbana môkup inyi ene geelek òkakat ejit, mè ikeke inye me emen ntọ-mkpọ, mije, ire ene ya ikeke inye itibi ntọ-mkpọ cha, môbọkọ mkpukpe eyi òrere ugwem ikakaan̄ge itata, eyi Awaji ochieekbe use inyinyi ebi geelek ìmumun̄ ọmọ me chieen̄. ¹³ Ire ikaan̄ ogwu ntọ-mkpọ onube inyi, ene ya ikatumu ibe ke ìre Awaji okitọ ọmọ ikpọ. Mije, kpunu ijo inu geege òbokọt ileke Awaji, inyi irọ ijo inu. Awaji me lek kan̄ si ìkakitọ ene geege ìkpọ. ¹⁴ Ire, ijo ulọk ene okaan̄be me emen kan̄ isinitaba ene ya isibi, mè ileke ọmọ itap me emen ijo inu, eya ore ntọ-mkpọ òkinu inyi ene. ¹⁵ Ijo ulọk ya isininin̄ owot, îra iman ijo inu. Ijo inu yi si isinimin isibi, îra iniman mkpa. ¹⁶ Eya orọ, bọn Nte n̄a ebi mmabe, ikachieek ibe ene ifiaan̄ enyi. ¹⁷ Atata inu geelek, mè uche geelek ònwọnwọn isan̄a ìkinan̄a me emen inyọn̄, me ubọk Awaji ogwu òrorom otutuuk inu geelek òkinyi utoon̄ me isinyọn̄. Ọmọ me lek kan̄ ìkakinwene, ìkakigba ìyak si, mè ìtap udun kubọk ura okirọ. ¹⁸ Ìneneme Awaji, ke îsa ikọ kan̄, eyi òrere atikọ, inyi eji ayaya ugwem, inyi eji enekup kubọk adasi mfut me etete otutuuk inu geelek îrombe. ¹⁹ Bọn Nte n̄a ebi mmabe, ìtet ibot me lek nteme keyi mbanyi enyi. Îgbe ibe ene geelek ikigwat lek inọ ikọ, ire, ikakigwat lek ìtumu ikọ, ikakigwat lek si ìnaan̄ ejit. ²⁰ Mije, unaan̄-ejit ìkakichieek ibe ene ikọt irọ ata irọrọ eyi Awaji okiweek. ²¹ Eya orọ, ìfiin̄ otutuuk ijo ugwem geelek, mè ìjit otutuuk ijo inu geelek, mè ìsiki lek kinyi me isi Awaji, mè ìbọkọ ikọ kan̄ eyi îtapbe enyi me emen ejit. Mije, ikọ ya obokọt inyan̄a enyi isibi. ²² Ikakikpọkpọ ìgban̄ ikọ Awaji gaalek, ìkirọ inu ikọ ya okitumu. Mije, ogwu òkpọkpọ ikigban̄, mè ìkarọ, ene ya ìkifiaan̄ lek kan̄. ²³ Ene geelek òkpọkpọ ikigban̄ ikọ Awaji ikike, ire, ìkakirọ inu ikọ ya okitumu, ene ya ìkup kubọk ogwu òkeke me isi umọọn̄ ikikpọ isi kan̄. ²⁴ Isikpọ lek kan̄ me emen umọọn̄ isan̄a, mè ije inan̄a, mgbọ yaage, îra iwuuk ubọk isi kan̄ okupbe. ²⁵ Ire, ene geelek òkigwuun̄ chieen̄ ikween̄ ikan Awaji, mè ikeke inye me lek, ìkakinọ mè ìwuuk, Awaji môgbana ene ya me emen inu geelek ene ya okirọ. Ikan Awaji înwọn isan̄a, mè ikaan̄ si unye isasa inyan̄a ene isibi. ²⁶ Ogwu imọnọ ibe ke ọmọ îriọọn̄ Awaji, ire, ìkakọt ìtet alọm kan̄ ìkaan̄, ene ya ìkifiaan̄ lek kan̄. Irọriọọn̄ Awaji kan̄ si ìkasibi inu geege. ²⁷ Me isi Awaji ogwu òre Nte kiji, atata irọriọọn̄ Awaji, eyi ikakaan̄ge wọlọwọlọ inu geege me emen, ìre ene ikpọkpọ chieen̄ me lek ebi nwakpa mè bọn ìnan ute mè uga me emen ufialek kiban̄, mè ene ya itetet lek kan̄, inyi ijo inu eyi linyọn̄ ikakọt ìfiat ọmọ.

¹ Bọn Nte n̄a, mgbọ keyi enyi echieekbe me lek Ogwukaan̄ kiji Jisọs Karais, ogwu umin mè uja kan̄ ominbe ichit, enyi ikakinyi ene geege umin ìgak ofifi ene. ² Ire enyi ikup me emen uwu ntitiin̄ kinyi, ene iba eneninin̄ inu, ene ge ore ubọọn̄, mè itap ujuja ọfọnti unye otu ewe, mè itap mkpọtubọk alata araran̄, ogwulọ orere ugbọọn̄, mè itap oka ọfọnti ògwagwak. ³ Mgbọ enyi ekibọkọ ema itap, enyi eneninyi ogwu òsasa ọfọnti unye otu ewe ibala lek ya umin, mè ibe ọmọ, “Kpọ ata irek ire eyi, nasiki kweek,” mè initumu inyi ogwu ugbọọn̄ ya ibe, “Si keke me ere keyilọ. Ire ere keya ìkanwọn owu me lek, nasiki kweek me ukpọk ijọn̄ me ere keyi, me agba ukot n̄a.” ⁴ Ire enyi irọ ikeya, enyi mîgobo ene isi me etete kinyi, mè ikisa ijo nkeek kinyi irọ ikeme ebi melek kinyi. ⁵ Bọn Nte n̄a, ìgban̄ utọn̄! Îre ebi ìgbọgbọọn̄ me linyọn̄ keyi ke Awaji ogobo, inyi enechieek me lek kè Jisọs, mè esa me ikeya ekaan̄ mkpulu eyi Awaji me irot. Awaji îwuuk lek ichieek use ibe ke ebi geelek ìmumun̄ ọmọ me chieen̄ mêkaan̄ uche me lek mkpulu kan̄. ⁶ Ire, ìkpọ-nu ubọk enyi ekikpọ ebi ugbọọn̄ chieen̄ isiki. Ǹdo enyi nu! Ìre ebi owa ekitutuku enyi, mè ikisa enyi isi uwu oyerebet? Ìre ìkafat ìre ebi ìbọbọọn̄ ubọọn̄? ⁷ Ìre ìkare ife chi si ekitumu ikeme ata erieen̄ kè Jisọs eyi Awaji osabe me lek igwen enyi bọn kan̄? ⁸ Me atikọ, ire enyi ikirọ Ikan ya eyi Awaji òrere Ogwu Ubọọn̄ onyibe me emen Ikpa Mbuban ibe, “Mun̄ ogwu melek kwun̄ me chieen̄ kubọk omun̄be akpalek kwun̄ me chieen̄,” enyi mêkirọ ijaan̄ enenen. ⁹ Ire, ire enyi ikigobo isi ene, enyi mîrọn̄ Ikan Awaji, mè ije ilọ. ¹⁰ Ogwu òkisun̄ otutuuk Ikan Awaji, mè inifiat ge gaalek me etete otutuuk Ikan cha, ene ya îfiat otutuuk Ikan Awaji cha iso. ¹¹ Mije, Awaji ogwu òtutumu ibe, “Kagan nwa ene, kasi ugan,” ọmọ si otumu ibe, “Kakpan̄ ene.” Eya orọ, ire owu òkagan nwa ene, òkasi ugan, ire, owu onenikpan̄ ene, owu orọn̄ Ikan Awaji. ¹² Eya orọ, me ikọ geelek enyi ebetumu, mè inu geelek enyi eberọ, ikawuuk ibe ke, usen ge, Awaji môsibi eji oyerebet me ibot. Inu ìbosa ifieek oyerebet inyi eji me usen ya ìre Ikan kan̄ eyi òkirọ inyi ene inwọnọ. ¹³ Me Usen Oyerebet ya, Awaji ìkpokaan̄ ejit nsan me lek ene geege ogwu ìkakikaan̄ ejit nsan me lek ene. Ire, ogwu geelek òkikaan̄ ejit nsan me lek ene mômun̄ ibe ke ejit nsan Awaji okaan̄be me lek ene îmin igak itip-oyerebet eyi Awaji okitip ene. ¹⁴ Bọn Nte n̄a, ire ene ibe ke ọmọ îkaan̄ ichechieek, ire, ìkakirọ ata ikwaan̄ geege, ìre kpasi oruru ke ene ya okaan̄? Ìre òjelek ichechieek òkup ikeya ìbojeje ikọt inyan̄a ene ya? ¹⁵ Ire kubọk gwun̄ Nte enerieen̄, mè ìre enenwaan̄ ikup, ìkakaan̄ ọfọnti geege ìbotap, ìkakaan̄ si inorie geege ìborie, ¹⁶ ene ge me lek kinyi onenitumu inyi ene ya, me ukpọk otu ikike, ibe, “Riọọn̄ ubọk je! Ọfọnti lek mè inorie otu ikanan owu!”, ire, ìkatap ubọk geege ìnyi ogwu ene ya, ìre kpasi oruru okup me lek keya? ¹⁷ Ikeya si ke îkup me lek ogwu òbebe ke ọmọ îchieek me lek Awaji, ire, ìkakirọ inu Awaji okiweek. Ichechieek kan̄ ìkwukwu. ¹⁸ Ire ene ikitumu ibe, “Owu ochieek me lek Awaji, sa emi nkirọ ata irọrọ,” emi mâfọọk ene ya ibe, ire ene ìkakirọ ata irọrọ geege, ìre ebejeje ikọt iriọọn̄ ibe ke ene ya îchieek me lek Awaji? Mije, îre sa me lek ata irọrọ n̄a ke ebi ene ebesa iriọọn̄ ibe ke emi nchieek me lek Awaji. ¹⁹ Ire owu ochieek ibe ke ìre Awaji ge gaalek okup, owu orọ inwọn. Ire, riọọn̄ ibe ke ebi ijo erumun̄ me lek kiban̄ mîchieek si ikeya. Mije keyi ke ukpook okitet ema, ema ekekiran. ²⁰ Owu ogwu burubut keyi! Ìre mârọrọ inyi owu òriọọn̄ ibe ke ire ene ichieek me lek Awaji, mè ìkakirọ ata inu, ke ichechieek ene ya ìkasibi inu geege? ²¹ Ìre mije keke ke Awaji ofuk Ebereham nte kiji kubọk ogwu ata irọrọ? Ìre ìkafat ìre mije ata ubọk ikwaan̄ kan̄, eyi mgbọ ìbogwu Ajiki ogwu gwun̄ me inyọn̄ ntook ìsa igwa ngwugwa inyi Awaji? ²² Ìre òkafat ìmun̄, me ugwem kè Ebereham, ibe ke ichechieek kan̄ mè ata irọrọ kan̄ îgbaan̄ irọ ikwaan̄? Ata inu eyi Ebereham orọbe îrọ ichechieek kan̄ ijot. ²³ Eya onenirọ iso ikọ egebe me emen Ikpa Mbuban ibe, “Ebereham îchieek me lek Awaji. Awaji osasa me ikeya ifuk ọmọ kubọk ogwu ata irọrọ. Ebi ene esasa si mije keya ikigwen Ebereham ogwu unene Awaji.” ²⁴ Eyiyi îjeen̄ ibe ke ìkare sa me ichechieek gaalek ke Awaji okisa imọnọ ene kubọk ogwu ata irọrọ; ke Awaji îkisa si ata ubọk ikwaan̄ ene okirọ igbaalek imọnọ ene kubọk ogwu ata irọrọ. ²⁵ Ata ubọk ikwaan̄ ikeyi si ke Awaji osa ifuk ogwu enenwaan̄ òje oyet ekigwen Rehabu kubọk ogwu ata irọrọ. Mgbọ ebi enun̄unun̄ ebi Ijeren esibe ibesi ikpọ ama ebi kè Rehabu, Rehabu obọbọkọ ema itap, mè ijeen̄ ema ofifi oniin̄ eyi ema esabe ije isibi ifo me esuuk, mè inwọnọ me ubọk ebi ama ya. ²⁶ Me lek ebilene, ekwukwu ene isinan̄a isibi itele anam akpalek ene, ene ya îra ikwu. Ikeya si, ichechieek ikakaan̄ge ubọk ikwaan̄ ìre nkwukwu.

¹ Bọn Nte n̄a, owuwa ene me etete kinyi ekaweek irere ebi ijejeen̄, mije, ike enyi eriọọn̄be, oyerebet Awaji mônye me lek kiji ebi ijejeen̄ igak otutuuk ene. ² Otutuuk kiji mîkirọ ilọ me owuwa oniin̄. Ire, ikaan̄ ogwu ikarọge ìlọ me otu itumu ikọ, ene ya înwọn isan̄a. Ogwu òkup ikeya si obokọt ikpulu otutuuk lek kan̄. ³ Eji isiberọ inyi inyinya ikirọ inu eji ekiweek, eji ekimọnọ mgbidim okwukwut itap isaba otu kan̄, mè itobo ikaan̄. Sa me ikeya, eji mîra ikikọt iwumu anam ya ikana, inyi isa eji isi ere geelek eji eweekbe isisi. ⁴ Ikeya si ke îkup me lek uji ile etapbe awala me lek. Unye efet isinin̄ emen awala cha, îra ikiben uji ya ikọp ije. Ubọk geelek uji ya ominbe iyaka, îre sọntiik uran̄ òkikup me edim uji ya gaalek ke ogwu òkikọkọp okisa igọbọ uji ya ikana isi agan̄ geelek îweekbe isisi. ⁵ Ubọk yaage si ke alọm ukan̄ okup. Sọntiik gwun̄ alọm ukan̄ môkọt isak, mè itaka nga oron ile isan̄a kpai. Ikeyi ke alọm ene okup. Mimin, ìkamin. Ire, îkaan̄ unye enenen me emen ugwem ene, mè ikitumu ikpele ikọ. ⁶ Alọm ene ìkup kubọk ukan̄. Me etete otutuuk nriro geelek òkup me lek ene, alọm obokọt irọ ijo inu ichit. Otutuuk ijo inu geelek òkup me linyọn̄ îso ifuk me otu alọm ene. Ijo inu înan̄a me lek alọm iso otutuuk akpalek ene. Alọm môkọt itap ukan̄ itaka otutuuk ugwem ene ifiat isan̄a kpai, bene me usen uman re usen mkpa ene ya. Ama yọk me lek kan̄ ke ukan̄ yi òkup ene me otu alọm onan̄a. ⁷ Ebilene mîkikeme owuwa esese inu geelek Awaji orombe isiki, mè ijeen̄ inu, bene me lek anam oron, mè unọn òwulu me inyọn̄, mè inu geelek òkinyinyọnọ me ijọn̄, re lek irin̄ òkup me mun̄. ⁸ Ire, kpunu ene geege òkikọt ikeme alọm òkup me otu ene isiki, mè ijeen̄ inu. Alọm ìkup kubọk ogbuuruk ere ijo inu okpọkpọ ikinan̄a igbuk isibi. Kpekikọt ikeme itet ikaan̄. Inu geelek môkọtbe ikpan̄ ene òwa me otu alọm ene ojotbe. ⁹ Alọm yaage eji ekisa itọn̄ Ogwukaan̄ kiji òrere Nte kiji Awaji, ọmọ si ke eji ekisa igbo ebilene ogbo kiji, ebi Awaji orombe me mbet kan̄. ¹⁰ Itọn̄ mè ogbo ìkinan̄a me otu yaage isibi. Bọn Nte n̄a, ìkagbe ibe ikup ikeya! ¹¹ Ìre ala mè ata mudim môkọt ikinan̄a me emen ogbuuruk yaage ikigbuk isibi? ¹² Bọn Nte n̄a, uti figi ìkakito mfut olifu, olik gerep si ìkakito mfut figi. Ikeya si, kpebekọt ichibi ata mudim me emen ogbuuruk ere ala okinan̄a isibi. ¹³ Ìre ekene me etete kinyi oriọọn̄ inu, mè ikigobo inu itet? Ene ya isiki lek kan̄ me ijọn̄, mè ikirọ ata inu. Ikeya ke ebi ene ebesa iriọọn̄ ibe ke ene ya ìre ogwu òriọọn̄ inu. ¹⁴ Enyi me lek kinyi, ire enyi ikaan̄ chieen̄ ile mè njijọ ejit me emen ejit kinyi, mè ikikeek lek kinyi gaalek, kpekikeek ebi ofifi ene, ikagugo lek ibe ke enyi mîriọọn̄ inu, mè ìsa me ikeya ìkan̄ ataak ìkeme atikọ. ¹⁵ Mije, òjelek ugwem keya, eyi usini ene ekibe ke ìre iriọọn̄-inu, ìkanan̄a me ubọk Awaji, ìkanan̄a si me ubọk Ekwukwu Awaji. Ìnan̄a me linyọn̄ keyi, me ubọk Yọk. ¹⁶ Mije, ere chieen̄ ile mè njijọ ejit okupbe, ere ya si, wọlọwọlọ mè otutuuk ijo inu geelek môkup. ¹⁷ Ire, ata iriọọn̄-inu eyi Awaji okinyi ene, ìkup esese. Ogwu geelek òkakaan̄ iriọọn̄-inu keyi môtana me ejit kan̄, mè ikima iluluk me esuuk melek ebi ene, mè ikikaan̄ ata ejit, mè ikisiki lek, mè ikikaan̄ ejit nsan me lek ebi ene, mè ikirọ ata inu mgbọ geelek. Ìkpokigobo isi ene. Ofiaan̄ geege ìkpokup si me emen kan̄. ¹⁸ Ebi geelek ìdedeke ugwem, mè ikitap esuuk me etete ebi ene, ife cha mêrie oruru ikpele unwọọn̄ eyi ònan̄a me lek ata ubọk ikwaan̄ kiban̄.

¹ Ìre keke okitap ibaak mè etim me etete kinyi? Îre owuwa ijo ulọk echi òkitim me emen kinyi okisa ibaak mè etim inu. ² Enyi isiweek inu, mè enyi kpekọt ikaan̄ inu enyi ekiweek, enyi mîra iweek ikpakpan̄ ene inyi enyi ekọt ekaan̄ inu ya. Enyi ekimin ejit me lek inu ebi ofifi ife ekaan̄be. Ire enyi kpekọt inu ya ikaan̄, enyi mîra ibaak ibaak, mè itim etim. Enyi kpekikaan̄ inu enyi ekiweek, mije, enyi kpekibeek me ubọk Awaji. ³ Enyi isikibeek inu me ubọk Awaji, enyi kpekibọkọ, mije, enyi ekibeek inan̄a me ijo ulọk. Enyi ekiweek isasa inu cha ibele lek kinyi gaalek ejit. ⁴ Enyi kechi ìkup kubọk enenwaan̄ òtetele ogwu olom, mè ikisi ije oyet ikana! Ìre enyi kperiọọn̄ ibe ke imama linyọn̄ ìre ichacha Awaji? Eya orọ, ene geelek ògọgọọk linyọn̄ itet unene îkana ogwu ochicha me lek Awaji. ⁵ Ìre enyi ekimọnọ ibe ke ikọ egebe me Ikpa Mbuban ibe ke Ekwukwu eyi Awaji otapbe me emen kiji îkaan̄ ikpele ulọk me lek kiji ìre ataak? ⁶ Ire, nsan eyi Awaji otapbe eji me ejit îmin enenen igak ijo ulọk òkup eji me ejit. Ikeya si ke ege me Ikpa Mbuban ibe, “Ebi geelek ìkigumu lek, Awaji ìkakichieek ìnyi. Ire, ebi geelek ìkisiki lek, ebiba ke Awaji okitap ubọk inyi, mè ikitap si unye me lek.” ⁷ Eya orọ, ìsiki lek kinyi me isi Awaji, mè ijit Yọk, ke Yọk môlibi itele enyi. ⁸ Ìtaba lek ìriaak me lek Awaji, ke Awaji si môtaba lek iriaak me lek kinyi. Enyi ebi ìkirọ ijo inu, ìsan̄a ubọk kinyi me emen ijo inu. Enyi ebi ejit iba, ìtele ejit iba kinyi, mè ìrọ inyi ejit kinyi itana me isi Awaji. ⁹ Ìkeek lek kinyi! Ìbọnọ lek, mè ìfieek ejit, mè ìto ito mije otutuuk ijo inu enyi erọbe. Ikayaka ìchak imọm, ìfieek ejit! Ikayaka ìnwọọn̄ unwọọn̄, ìkup me ufieek-owot! ¹⁰ Ìsiki lek kinyi me isi Awaji, ke Awaji môbene enyi ifo inyọn̄. ¹¹ Bọn Nte n̄a, ikatumu lek kinyi ìfiat. Mije, ene geelek òtutumu gwun̄ Nte kan̄ ifiat, mè ifieek gwun̄ Nte kan̄ ikọ, îtumu Ikan Awaji ifiat, mè ifieek Ikan ya si ikọ. Ire owu ofieek Ikan Awaji ikọ, owu òkayaka ìre ogwu òkisun̄ Ikan ya. Owu okana ire ogwu òmọmọnọ ibe ke ọmọ îmin igak Ikan ya. ¹² Awaji gaalek okaan̄ inyinyi ene Ikan. Ọmọ gaalek si ore ogwu òbofieek oyerebet inyi ene. Ọmọ gaalek obokọt inyan̄a ene, mè ifiat si ugwem ene. Ìre owu ìre ekene, eyi obonikifieek gwun̄ Nte kwun̄ ikọ? ¹³ Ìgban̄ utọn̄! Enyi ebi ìkitumu ibe, “Cherekeyi, mè ìre iyakwut, eji mênan̄a me ama keyi ifo ama keyilọ isi iluk acha ge, mè ikinyam ewe, mè ikibọm ikpoko.” ¹⁴ Inu òborọ me iyakwut, enyi me lek kinyi kperiọọn̄! Ìre enyi ekikeek ibe ke ugwem kinyi ìre keke mọnọ? Ugwem kinyi ìkup kubọk mbat òkisibi me otu ewelegwe. Ìkafiat mgbọ îra inimi ita. ¹⁵ Kpan̄asi igugugo lek ikeya, ikọ enyi mekitumu ìre, “Ire ineme Okaan̄-ene, eji mêluk ugwem, mè irọ inu keyi, mè ìre inu keyilọ.” ¹⁶ Ire, me mgbọ keyi, enyi ekigugo lek, mè ikitumu ikpele otu ikọ. Òjelek gogolek keya ìre ijo inu. ¹⁷ Eya orọ, ire ene iriọọn̄ ata inu ògbegbe irọrọ, mè ijuuk itele, ìkarọ, ene ya îrọ ijo inu.

¹ Mgbọ yi, enyi ebi ìbọbọọn̄ ubọọn̄, ìgban̄ utọn̄! Ìbene ìkito ito, mè ìkisut lek mije uyọrọlek òbonu inyi enyi. ² Inu ubọọn̄ kinyi îfiat isan̄a kpai. Nkarankat îtaka otutuuk ujuja ekwut mè ọfọnti kinyi igwak isan̄a kpai. ³ Achiaan̄ îtaka si otutuuk ikpoko alata araran̄ mè alata okuket kinyi ifiat isan̄a kpai. Achiaan̄ ya òtataka ikpoko cha môre inu ijejeen̄ inyi enyi ibe ke ikeya si ke akpalek kinyi obokpukpuku isan̄a kubọk inu ukan̄ otakabe iriọk. Mije, enyi ekititiin̄ ikpoko isun̄ inyi lek kinyi me mgbọ keyi òrere òta mgbọ. ⁴ Ìkpọ, enyi mîgwen ebi ikwaan̄ ibe enegbọ oron uko enyi enyi, mè ijit ikpekpe ife cha ikpoko. Ife cha mêkito ito mije mfeen̄ enyi efeen̄be ema. Enyi mîgwen si ebi ikwaan̄ ibe enerọkọ inu me uko enyi enyi, mè ijit si ikpekpe ema mkpukpe kiban̄. Ida ito kiban̄ si îre utọn̄ Okaan̄-ene Ogwu Òkaan̄ Unye Geelek. ⁵ Me linyọn̄ keyi, enyi mîrie ugwem ubọk înemebe enyi, mè ikaan̄ inu geelek enyi eweekbe. Enyi mîrie utop otu geelek isa imiin̄ ufuk kubọk erie mbuuk ekigwook isun̄ iban usen ebekpan̄. ⁶ Enyi mîtip ebi ekarọge ijo inu geege oyerebet, mè ikpan̄ ema si, me ere ema kpekekeke ìkwek oniin̄ kinyi. ⁷ Bọn Nte n̄a, ìkat ejit mege ìre mgbọ Okaan̄-ene Jisọs môkpọkbe inu. Ìsa ebi ìkiwop uko ìkween̄ inu. Ema isiwop mfut kiban̄ isan̄a me uko, ekekikat ejit ikup mege, mgbọ ibot îra inu, mè iraka. Mgbọ ya, mfut kiban̄ îra itibi ijaan̄, mè òto ata mfut. ⁸ Ikeya si, enyi ìkat ejit, mè ìkeke ìnye, mije, inunu Okaan̄-ene îgbet. ⁹ Bọn Nte n̄a, ene geege ikaben gwun̄ Nte kan̄ me ejit, inyi oyerebet ikatip enyi me isi Awaji. Mije, Okaan̄-ene Jisọs Karais, ogwu òbosibi oyerebet òwa me otu isotu okekebe. ¹⁰ Bọn Nte n̄a, ìsa ebi nriran ukot ikaan̄ ebi ìtutumu ikọ me erieen̄ Awaji ìkween̄ inu òfolek ikakat ejit me emen ufialek. ¹¹ Me mgbọ keyi, eji ekimọnọ ema kubọk ebi Awaji ogbanabe, mije, ema mîkat ejit, mè ikeke inye ire òta. Enyi mînọ ubọk Jobu osabe ikat ejit mgbọ ntọ-mkpọ onube inyi. Enyi mîriọọn̄ si ubọk Okumugwem ogbanabe ọmọ me mgburudun̄ mgbọ. Me atikọ, ejit njijin, mè ejit nsan eyi Okumugwem okaan̄be me lek ebi kan̄ îmin enenen. ¹² Ògak ge, bọn Nte n̄a, ikakinyan̄a ibot mgbọ enyi ekichieek ene use. Ikasa emen inyọn̄, mè ìre linyọn̄, mè ìre ofifi inu geelek ìnyan̄a ibot. Ire enyi ichieek, ìbe, iin̄. Ire enyi kpechieek, ìbe, iin̄-iin̄. Mije, ire enyi kperọ ikeya, oyerebet môtip enyi. ¹³ Me etete kinyi, ire ikaan̄ ogwu òkup me emen ufialek, ene ya iriaak uriaak. Ire ikaan̄ ogwu ejit okibele, ene ya ikọt okwa itọn̄ Awaji. ¹⁴ Ire ikaan̄ ogwu lek ikanyege, ene ya igwen ebi ibot uwu ntitiin̄ Awaji, mè eneriaak uriaak me lek kan̄, mè esa aran̄ etoon̄ ọmọ me lek me erieen̄ Okaan̄-ene. ¹⁵ Uriaak ya ife cha esabe me ichechieek iriaak môrọ inyi lek ogwu orukan̄ ya inye. Okaan̄-ene môgwa ogwu orukan̄ ya. Ire ikaan̄ ijo inu geelek ene ya orọbe, Okaan̄-ene môtele si inyi ene ya. ¹⁶ Eya orọ, me etete kinyi, ogwu ikup, ifuk ijo kan̄ isibi inyi ogwu melek kan̄, mè ge iriaak uriaak me ibot ge si, inyi Awaji ikigwa enyi. Uriaak ogwu ata irọrọ oriaakbe îkikaan̄ unye enenen, mè ikisi si ikpele ikwaan̄. ¹⁷ Ìkeek-nu Ilaija ogwu nriran. Ọmọ ìre si ebilene kubọk eji erebe. Ire, mgbọ Ilaija otetbe lek inye, mè iriaak uriaak ibe ibot ikarep, ibot ìkarep si me linyọn̄ otutuuk acha ita mè onyan̄ gweregwen. ¹⁸ Mgbọ mgbọ ya orakabe, ikpọkpọk iriaak uriaak ibe mè ibot irep. Awaji orọrọ inyi isinyọn̄ ida ibot igwook me linyọn̄. Mfut obebene ikitibi isibi me ijọn̄. ¹⁹ Bọn Nte n̄a, ire ene ge me etete kinyi ije ilọ oniin̄ inan̄a me lek atikọ eyi Awaji, mè ofifi ene itap ubọk irọ inyi ene ya igwu ikom igọọk Awaji, ²⁰ enyi ìriọọn̄ ibe, ene geelek òrọrọ inyi ogwu ijo igwu ikom, mè itele ijo oniin̄ kan̄, ke ene ya înyan̄a ibot ejit ogwu ijo ya isibi me mkpa, mè irọ inyi Awaji itele owuwa ijo inu.