Ebi Iburu

¹ Me ukot ikaan̄, Awaji îtumu ikọ inyi ebi nte nte kiji owuwa mgbọ, me oniin̄ òkup esese esese, sa me otu ebi nriran. ² Ire, me mgburudun̄ usen chi, Awaji ìyaka initumu ikọ inyi eji inan̄a me otu Gwun̄ kan̄, ogwu îgobobe ibe ikana ogwukaan̄ otutuuk inu geelek me irot. Sa me ubọk Gwun̄ kan̄ yi si ke îrom otutuuk linyọn̄ keyi. ³ Umin mè uja eyi òkitoon̄ me lek Gwun̄ yi ìre umin mè uja eyi Awaji. Inu geelek Awaji orebe ke ọmọ ore, kpesan̄a, kpetap. Ọmọ ìkisa ikọ kan̄ eyi òkaan̄ unye ibeme otutuuk linyọn̄, inyi ikup ike îkupbe. Mgbọ îgwọkbe ijo otutuuk ebilene isan̄a, ifofo emen inyọn̄, mè isiki ikweek me irek umin mè unye, me agan̄ ubọk ulom eyi Awaji ogwu òkakaan̄ unye òchichit otutuuk unye geelek. ⁴ Gwun̄ Awaji îmin enenen igak ebi osat Awaji, mije, erieen̄ eyi Awaji onyibe ọmọ, eyi òrere “Gwun̄,” îmin enenen igak eyi ebi osat. ⁵ Mije, ìre kpasi ogwu osat ke Awaji otumu inyi ibe, “Owu ìre Gwun̄ n̄a, cherekeyi ke emi nkana Nte kwun̄”? Sa ìre kpasi ogwu osat ke Awaji otumu ikọ òfolek ibe, “Emi mâre ogwu Ute, ọmọ môre Gwun̄ n̄a”? ⁶ Ofifi si, mgbọ Awaji oboria adasi Gwun̄ enerieen̄ kan̄ inu me linyọn̄, îtumu ibe, “Ebi osat Awaji etọbọ ebum enyi ọmọ.” ⁷ Inu Awaji otumube òfolek ebi osat ìre ikeyi, “Awaji îrọ inyi ebi osat kan̄ ekegwat kubọk efet, mè isa ema si irọ ebi ikwaan̄ ìkakaan̄ unye kubọk alọm ukan̄.” ⁸ Ire, Gwun̄ kan̄ ke îtumu inu òfolek ibe, “Owu Awaji, ogboon̄ ubọọn̄ kwun̄ môkup ire mgbọ ikakaan̄ge itata! Unen oyerebet ore okuba ubọọn̄ owu obokisa ikpulu ebi kwun̄. ⁹ Owu oma ata irọrọ, mè icha inu ikpak. Mije keyi ke Awaji, ogwu òrere Awaji kwun̄ otoon̄ owu ubọk me ibot, mè inyi owu ikpele unwọọn̄, mè inyi owu irek umin òbebene igak eyi otutuuk ebi melek kwun̄.” ¹⁰ Awaji îtumu si ibe, “Bene me ibebene, owu Okaan̄-ene me lek kwun̄ otọbọ ọdọ otutuuk linyọn̄, mè isa ubọk kwun̄ irom otutuuk isinyọn̄. ¹¹ Otutuuk inu chi mêjijaka ita kpai, ire, owu òbokpọkpọ ikup ubọk owu okupbe. Otutuuk kiban̄ mêkana oka, mè igwak kubọk ekwut. ¹² Owu môkat ema kubọk ekwut, mè inwene ema kubọk ekinwene ọfọnti. Ire, owu òkup ubọk owu okupbe, òkakinwenwene, òkakikan, òkakikwu.” ¹³ Ìre kpasi ogwu osat ke Awaji otumu inyi ibe, “Nasiki kweek me agan̄ ubọk ulom n̄a, mege ire mgbọ mâtimbe ikpan̄ ebi ochicha kwun̄, mè isa ema irọ inu ibene ukot inyi owu?” ¹⁴ Ire ikeya, ìre keke ke ebi osat Awaji ere? Ema ìre ekwukwu ìkisi ikwaan̄ inyi Awaji, ebi Awaji oriabe inu ibe enesi ikwaan̄ enyi ebi mêbọkọbe unyan̄a eyi Awaji.

¹ Eya orọ, îgbe ibe eji egbala chieen̄ etet ikọ chi eji enọbe enye, inyi inu geege ikaben eji ìnan̄a me lek atikọ chi. ² Mije, Awaji îjeen̄ ibe ke etip ebi osat elookbe ebi nte nte kiji ukot ikaan̄ ìre atikọ, mè isulu ebi ìrọrọ ilọ, mè ebi ìjijit etip ya osusut ògbegbe ema. ³ Ire ikeya, ìre eji ebejeje inwọnọ osusut, ire eji ikpọ ikpele unyan̄a keyi ilọ chieen̄? Okaan̄-ene Jisọs Karais me lek kan̄ odasi isa etip unyan̄a keyi inilook ebi ene, sabum ebi ìnọnọ me otu kan̄ enirọ inye inyi eji ibe ke unyan̄a ya ìre atata. ⁴ Awaji me lek kan̄ si îrọ inye ibe ke unyan̄a ya ìre atikọ, sa me inu ukechieen̄, mè uyeke uyeke inu, mè unye ikwaan̄ òkup esese esese echi îrọbe, mè uche echi Ekwukwu Mbuban ochebe inyi ebi ene, me ene me ene, ubọk òneme ọmọ. ⁵ Ìkare ebi osat ke Awaji osun̄ ibe enekpulu linyọn̄ eyi òkinu me isi, eyi eji ekitumu ikọ òfolek. ⁶ Ire, ege me ere ge me Ikpa Mbuban ibe, “Ìre keke ke ogwu ebilene ore, eyi owu okikeek inu òfolek kan̄? Sa ìre gwun̄ ebilene ikike ke owu okikpọ chieen̄ me lek ikeyi? ⁷ Owu orom ọmọ isiki me irek sọnja igak ebi osat, mè ikwuun̄ ọmọ okpibot ubọọn̄ eyi umin mè uja mè itọn̄, ⁸ mè irọ ọmọ ogwu òkikpulu otutuuk inu geelek.” Mije Awaji orọbe ọmọ ogwu òkikpulu otutuuk inu, ìsibi ibe ke kpunu inu geege eyi Awaji ikatapge me irak kan̄. Ire, me mgbọ keyi, eji mîmun̄ ibe ke ìkare otutuuk inu ke ebilene ekikpulu. ⁹ Awaji îrọ mè Jisọs Karais isiki igak ebi osat sọnja mgbọ, inyi inikwu mkpa mije otutuuk ebilene sa me atata nnwọn eyi Awaji. Eji mîmun̄ ibe ke Awaji îkwuun̄ ọmọ okpibot ubọọn̄ eyi umin mè uja mè itọn̄, mije mkpa ya eyi ọmọ okwube. ¹⁰ Otutuuk inu geelek ìnan̄a me ubọk Awaji ogwu òrorom ema inyi lek kan̄. Eya orọ, îgbe, mè itat ibe Awaji isa owuwa ufialek irọ inyi Jisọs Karais iso ifuk, inyi owuwa ebi ene enekana bọn Awaji, mè egọọk ekaan̄ uche me lek umin mè uja eyi Awaji sa me lek kan̄. Mije, Jisọs Karais ore ogwu òkinyan̄a ene. ¹¹ Jisọs Karais ogwu òkirọ inyi ene ikup me mbuban, melek ebi ọmọ okirọ inyi ekup me mbuban, ìre bọn Ute ge. Eya orọ, esip ìkakitet ọmọ igwegwen ema ebi ngwan̄ kan̄. ¹² Ikeya ke îtumu inyi Awaji ibe, “Emi mâtumu owu isibi inyi ebi ngwan̄ n̄a, mâkọt okwa itọn̄ owu me isi otutuuk ebi ntitiin̄.” ¹³ Îtumu si ibe, “Emi mâtoon̄ ejit me lek Awaji,” mè itumu si ibe, “Kpọ, emi ire ogwu, melek nsabọn Awaji onyibe emi.” ¹⁴ Ubọk ebi Jisọs ogwenbe nsabọn cha erebe ebi ìkakaan̄ akpalek mè eje ikike, Jisọs îgọọk si ema ikaan̄ akpalek ebilene, inyi ọmọ ikwu mkpa, mè isa me mkpa kan̄ ijijaka Yọk, ogwu òkakaan̄ unye eyi mkpa, ¹⁵ mè isa me ikeya irọ inyi otutuuk ebi ìkitet ukpook mkpa me otutuuk ugwem kiban̄ esibi me usun̄, mè ekaan̄ lek kiban̄. ¹⁶ Me atikọ, ìkare ebi osat ke Jisọs okirọ inu chi isa itap ubọk inyi. Îre bọn owot iman kè Ebereham ke îkitap ubọk inyi. ¹⁷ Mije keyi, îgbe ibe ọmọ ikana ikup ubọk ebi ngwan̄ kan̄ ekupbe me oniin̄ geelek, inyi ọmọ ikana ogwu ibot ebi ibot ngwugwa, ogwu ògbegbe utoon̄ ejit me isisi ikwaan̄ inyi Awaji, mè ikikaan̄ ejit nsan me lek ebilene. Sa me ikeyi ke ọmọ môrọ inyi ejit isiki Awaji, inyi itele ijo inyi ebilene. ¹⁸ Mgbọ keyi, ọmọ môkọt itap ubọk enenen inyi ebi geelek ìkup me emen ntọ-mkpọ, mije, ọmọ me lek kan̄ îbọkọ ufialek mgbọ Yọk otọbe ọmọ ikpọ.

¹ Eya orọ, bọn Nte n̄a ebi ìkup me mbuban, ebi ìgọgọọk ikaan̄ uche me lek igwen eyi emen inyọn̄, ìkeek inu òfolek kè Jisọs, ogwu òrere ogwu otuchieen̄, mè ogwu ibot ebi ibot ngwugwa ogwu eji echieekbe me lek, mè ikitumu ikọ òfolek. ² Jisọs îrọ otutuuk inu geelek Awaji ogwu ògogobo ọmọ iria inu obe ọmọ irọ, kubọk Mosis si orọbe otutuuk ikwaan̄ Awaji obe ọmọ irọ me otutuuk emen ototun̄ ukan̄ eyi Awaji. ³ Ogwu ònama uwu okikaan̄ umin igak uwu înamabe. Ikeya si ke Jisọs ogbe ikakaan̄ umin enenen igak Mosis. ⁴ Mije, uwu geelek, îre ebilene ekinama. Ire, ogwu òkinama otutuuk inu geelek ìre Awaji. ⁵ Mosis îrọ otutuuk ikwaan̄ geelek Awaji obe ọmọ irọ kubọk ogwu ikwaan̄ me otutuuk ototun̄ ukan̄ Awaji, mè itumu inu òfolek inu Awaji obotumu me mgbọ òkup me isi. ⁶ Ire, Karais, Gwun̄ ògbegbe utoon̄-ejit, ore ogwu òkikpulu ototun̄ ukan̄ Awaji. Eji ere ebi ototun̄ ukan̄ Awaji ya, mè ire eji itet ikpọchieen̄ ya eyi eji ekisa igugo lek ikaan̄ inye, kpetet ukpook. ⁷ Eya orọ, kubọk Ekwukwu Mbuban otumube, “Cherekeyi, ire enyi inọ ida kan̄, ⁸ ikatet ejit kinyi ìnye kubọk enyi erọbe mgbọ enyi enyebe ibot inyi Awaji, mè itọ ọmọ ikpọ me emen èwê. ⁹ Ere ya ke ebi nte nte kinyi etọ emi ubọk me isi, mè itọ emi ikpọ, mè imun̄ si ikwaan̄ nsibe otutuuk akọp acha ini. ¹⁰ Îre mije keya ke nnaan̄ ejit inyi ebi ukot keya, mè itumu ibe ke ife cha ekpọkpọ ikije ilọ mgbọ geelek, mè ijit igọgọọk oniin̄ n̄a. ¹¹ Eya orọ, nnyanyan̄a ibot me unaan̄-ejit, mè itumu ibe ke ema kpebenin̄ emen isiki-efuuk nsun̄be iban ebi n̄a.” ¹² Eya orọ, bọn nte n̄a, ìgbala chieen̄, inyi ene geege me etete kinyi ikakaan̄ ejit ijo inu, mè una ichechieek, mè ìsa me ikeya ìgwu ìkom ìnan̄a ìtele Awaji ogwu òkup me ugwem. ¹³ Ire, ogwu ikup, ikitap ogwu melek kan̄ efuuk me emen usen geelek eyi mêkọtbe igwen “Chereyi,” inyi ulọk irọrọ ijo inu ikafiaan̄ enyi ìto, mè enyi ekana ebi unye-ibot, ebi ejit onyebe ikup gboi. ¹⁴ Mije, ire eji itet utoon̄-ejit ya eji ekaan̄be bene me karake ibebene inye isi ire òta, eji ìre ebi ìkigọọk Karais igbaan̄ inu irọ. ¹⁵ Ikeya ke Ikpa Mbuban otumu ibe, “Chereyi, ire enyi inọ ida kan̄, ikatet ejit kinyi ìnye, kubọk enyi erọbe mgbọ enyi enyebe ibot inyi Awaji.” ¹⁶ Ìre ebi owa enọ ida Awaji, mè inye ibot? Îre otutuuk ife cha ebi Mosis okpulube isa inan̄a me ido Ijipiti isibi. ¹⁷ Ìre ebi owa ke Awaji onaan̄ ejit inyi otutuuk akọp acha ini? Îre ebi ìrọrọ ilọ, mè ikwaan̄ irurọn̄ọ ikana me emen èwê. ¹⁸ Ìre ebi owa ke Awaji onyan̄a ibot inyi ibe ke kpebenin̄ isiki-efuuk kan̄? Îre ife cha ebi ìnyenye ibot inyi Awaji. ¹⁹ Eya orọ, eji mîmun̄ ibe ke ife cha kpekọt inin̄ emen isiki-efuuk eyi Awaji osun̄be inyi ebi kan̄, mije una ichechieek kiban̄.

¹ Awaji îchieek eji use ibe ke eji mênin̄ me isiki-efuuk kan̄. Use ya ìkekeke si mege inire chereyi. Eya orọ, eji egwuun̄ chieen̄ eluk ugwem me ukpook, inyi otutuuk kinyi egọọk enin̄ emen isiki-efuuk ya, mè ene geege ikalọ ininin̄. ² Mîlook ebi nte nte kiji cha ata etip kubọk elookbe eji si. Ire, etip ya ema enọbe ìkatap ubọk inyi ema, mije, ema ebi ìnọnọ etip ya kpesa me ichechieek ibọkọ etip ya itap. ³ Mgbọ yi, îre eji ebi ìkakaan̄ ichechieek ekinin̄ isiki-efuuk eyi Awaji ya. Awaji ìtumu ibe, “Nnaan̄ ejit, mè inyan̄a ibot ibe ke ife cha kpebenin̄ emen isiki-efuuk n̄a.” Ikọ yi ìkasibi ibe ke Awaji ìkanen̄e isiki-efuuk kan̄ ìsun̄, mije, îwuuk lek inen̄e isun̄ karake mgbọ îrombe linyọn̄ isan̄a. ⁴ Mîge inu òfolek òso egwe jaaba me ere ge me Ikpa Mbuban ibe, “Òso egwe jaaba, Awaji osisiki efuuk me lek ikwaan̄ kan̄.” ⁵ Me ere yaage si ke ege inu Awaji otumube ibe, “Ema kpebenin̄ isiki-efuuk n̄a kubọk ge.” ⁶ Ebi ìdadasi inọ ata etip ya kpenin̄, mije una ichechieek kiban̄. Ire, ebi ene mênin̄ si emen isiki-efuuk ya. ⁷ Ire, mgbọ mgbọ orakabe, mè inire ukot kè Debit, Awaji okpọkpọk isun̄ ofifi usen eyi îgwenbe “chereyi,” mè itumu inan̄a me otu kè Debit, kubọk mwuukbe lek itumu, ibe, “Chereyi, ire enyi inọ ida kan̄, ikatet ejit kinyi ìnye.” ⁸ Mije, mebe ke isiki-efuuk ya ore eyi Josuwa osabe ema isi itap me emen, mgbọ eya orakabe, Awaji kpomoyaka itumu ikọ ibak ofifi “chereyi.” ⁹ Eya orọ, ikọ yi ìsibi ibe ke isiki-efuuk òwa si inyi ebi eyi Awaji. Isiki-efuuk ya ìre òjelek eyi Awaji okaan̄be me òso egwe jaaba, mgbọ îrombe otutuuk inu isan̄a. ¹⁰ Ene geelek òninin̄ emen isiki-efuuk eyi Awaji môsiki efuuk me lek ikwaan̄ kan̄, kubọk Awaji osikibe efuuk me lek ikwaan̄ kan̄. ¹¹ Eya orọ, eji otutuuk ene enye lek ekwukwulu, inyi eji enin̄ isiki-efuuk ya. Ene geege me etete kiji ikanye ibot, mè ìnan̄a ìrọn̄ kubọk ebi nte nte kiji erọbe, mè ilọ ininin̄ isiki-efuuk ya. ¹² Mije, ikọ Awaji ìre ikọ òkup me ugwem, mè ikaan̄ unye. Ikọ Awaji îreke enenen igak oge akọn̄ isi iba geelek, mè ikichim itibi iraka inin̄ emen ene isi ifieek ekwukwu ene isan̄a me ibot ejit ene, mè ikifieek ufuk emen ukwuuk isan̄a me lek usọk ukwuuk, mè ikiriọọn̄ ekiket mè ulọk geelek òkup ene me ejit. ¹³ Ìkakaan̄ inu geege erombe eyi òlelet me isi Awaji. Inu geelek ìchichili ibook, mè ikup njak me chieen̄ Awaji ogwu eji ebekeke me isi, usen ge, ifuk ifuk lek kiji inyi. ¹⁴ Eya orọ, eji etet ata ichechieek kiji eyi eji ekitumu isibi enye, mije, eji mîkaan̄ ikpele ogwu ibot ebi ibot ngwugwa, ogwu òraraka inin̄ emen inyọn̄. Ọmọ ìre Jisọs Karais Gwun̄ Awaji. ¹⁵ Ogwu ibot ebi ibot ngwugwa ilile ogwu eji ekaan̄be ìkare ogwu kpokọtbe iriọọn̄ uwọ-lek kiji, mè ito eji njijin. Kpan̄asi ikeya, ogwu ibot ebi ibot ngwugwa eji ekaan̄be ìre ogwu òrọriọọn̄ otutuuk uwọ-lek kiji, mije, mîtọ ọmọ si ikpọ me oniin̄ geelek kubọk ekitọ eji ikpọ, ire, ọmọ ìkarọ ijo inu geege. ¹⁶ Eya orọ, eji esan̄a ukpook me lek, mè eje enu me lek ogboon̄ ubọọn̄ Awaji ogwu òkinyi ene atata nnwọn kan̄, inyi Awaji ikaan̄ ejit nsan me lek kiji, mè inyi eji atata nnwọn kan̄ eyi môtapbe ubọk inyi eji mgbọ geelek eji ekupbe me una.

¹ Ekigobo ogwu ibot ebi ibot ngwugwa geelek inan̄a me etete ebilene, inyi inikisi ikwaan̄ inyi Awaji me ibot otutuuk ebilene, mè ikinyi Awaji inyinyi, mè ikigwa ngwugwa mije ijo inu ebilene erọbe. ² Ọmọ môkọt isiki lek irọ inu melek ebilene ebi ìkije ilọ sa me ekariọọn̄ge inu geege, mije, ọmọ me lek kan̄ ìnan̄a me etete ebilene ikike, ebi kpekirọ inu itat otutuuk mgbọ. ³ Mije keyi, ọmọ isibogwa ngwugwa me ibot ebi ene, môgwa si me ibot kan̄ igbaalek. ⁴ Ìkare ene okisa ubọk kan̄ ito lek kan̄ me irek umin yi. Îre Awaji okigwen ene ito me irek umin ya, kubọk îgwenbe Erọn ito me mgbọ ukot ikaan̄. ⁵ Ikeya si, ìkare Karais osa ubọk kan̄ ikana ogwu ibot ebi ibot ngwugwa, inyi ọmọ ikaan̄ umin. Îre Awaji otumu inyi ọmọ ibe, “Owu ìre Gwun̄ n̄a, cherekeyi ke nkana Nte kwun̄.” ⁶ Awaji îtumu si me ofifi ere ibe, “Owu môre ogwu ngwugwa isi ire mgbọ ikakaan̄ge itata, igọọk me ọgbọn̄ kè Melikisedek.” ⁷ Mgbọ Jisọs olukbe me linyọn̄, îtaan̄ ukpo iriaak uriaak, mè isa mun̄ ito me chieen̄ ikibeek mbeek me ubọk Awaji ogwu môkọtbe inyan̄a ọmọ isibi me ubọk mkpa. Awaji onọnọ ọmọ ida, mije ọmọ osikibe lek, mè isiki ibot inyi Awaji. ⁸ Ubọk geelek ọmọ orebe Gwun̄ Awaji, ọmọ îkween̄ isisiki ibot sa me owuwa ufialek ọmọ omun̄be. ⁹ Mgbọ Awaji orọbe inyi ọmọ ijot iso ifuk isan̄a, ọmọ okakana ogbuuruk ere unyan̄a eyi mgbọ ikakaan̄ge itata okinan̄a isibi, inyi otutuuk ebi geelek ìkigban̄ utọn̄ inyi ọmọ. ¹⁰ Awaji onenirọ ọmọ ogwu ibot ebi ibot ngwugwa, igọọk me ọgbọn̄ kè Melikisedek. ¹¹ Eji mîkaan̄ owuwa ikọ itutumu òfolek irere ogwu ngwugwa eyi Karais orebe igọọk me ọgbọn̄ kè Melikisedek, ire, îyọt itutumu inyi enyi, mije, enyi kpekigwat lek igobo inu itet. ¹² Me atikọ, me mgbọ keyi, îre enyi ere ebi mekijeen̄ ebi ofifi ife inu. Ire, enyi eyaka ikiweweek ebi ìbenikpọk ibene ikijeen̄ enyi adasi inu ògbegbe ibe enyi eriọọn̄ òfolek ikọ Awaji. Mun̄ ebe ikike ogbe isasa ikpukpo enyi, ìkare inorie ònyenye. ¹³ Ene geelek ekisa mun̄ ebe ikpukpo ìre sọntiik gwun̄, ìkariọọn̄ inu geege òfolek ikọ eyi ata irọrọ. ¹⁴ Ire, inorie ònyenye ìkup inyi ebi ìmimiin̄ inin̄ ene, mije, ema mîsa ifuk-ibot kiban̄ ikeek ekiket owuwa mgbọ, mè ikween̄ iriọọn̄ esese inu òkup me etete ata inu mè ijo inu.

¹ Eya orọ, eji etele adasi inu ijejeen̄ òfolek kè Karais, mè eje enyi isi ekekween̄ inu òkukup inyi ebi ìmimiin̄ inin̄ ene. Eji ekayaka ìkpebe ìfo udun̄ ìkpọk ìsi lek adasi ijejeen̄ cha echi ekisa itọbọ ọdọ ikọ Awaji, kubọk igwugwu ikom itele ijo irọrọ echi òkisa mkpa inu, mè ichechieek me lek Awaji, ² mè nteme òfolek igwook-mun̄, mè itotoon̄ ene ubọk me lek, mè ebi ìkwukwu ijojomo me mkpa, mè oyerebet mgbọ ikakaan̄ge itata. ³ Eji etele adasi ijejeen̄ chi, mè eje enyi isi, ire ineme Awaji. ⁴ Ikpọkpọk igwu ikom igọọk Awaji ìkayaka ìkup ìnyi ebi geelek ìwuwuuk lek ikup me emen utoon̄ eyi Awaji, mè inọ utop ugbana eyi emen inyọn̄, mè igọọk ibọkọ Ekwukwu Mbuban, ⁵ mè inọ utop nnwọn eyi ikọ Awaji, mè inọ si utop unye eyi òbokisi ikwaan̄ ukpook me ukot òkup me isi, ⁶ ire ema ininan̄a irọn̄ itele ichechieek. Ema kpebekọt iyaka igwu ikom ofifi, mije, ìsibi ibe ke ema ebeyayaka ikpọk igon Gwun̄ Awaji me uti nkwurieen̄ ofifi mgbọ inyi lek kiban̄, inyi ọmọ irie esip me isi ebi ene. ⁷ Ijọn̄ geelek òkimeen̄ mun̄ ibot òkirep igwook me inyọn̄ kan̄ mgbọ geelek, eyi inu ewopbe me inyọn̄ kan̄ okitibi ijaan̄, mè isibi oruru inyi ebi ìwowop, Awaji îkigbana ijọn̄ ya. ⁸ Ire, ijọn̄ òkitibi ukpak mè abọm egbe, ijọn̄ ya ìkakaan̄ oruru geege. Awaji môfieek otu inyi ijọn̄ ya. Me òta kan̄ si, ijọn̄ ya ìre ijọn̄ ebetatap ukan̄ iwọp. ⁹ Ire, bọn nte n̄a, ubọk geelek eji ekitumu ikeyi, ejit kiji înye me lek kinyi. Eji mîriọọn̄, ibe ke enyi mêbọkọ owuwa atata ugbana òje melek unyan̄a. ¹⁰ Awaji ìkare ogwu òkifeen̄ ene, ìkpowuuk ikwaan̄ enyi erọbe, mè imumechieen̄ enyi ekaan̄be me lek kan̄ sa me ntap-ubọk enyi etapbe inyi ebi kan̄ me mgbọ òraraka, mè eyi enyi ekitap si inyi ema me mgbọ keyi. ¹¹ Eji ekiweek ibe ene geelek me etete kinyi ikikaan̄ si ulọk irọrọ òjelek inu òkup ikeyi ire òta, inyi enyi ekaan̄ inu ya enyi ekikpọ chieen̄ ikakaan̄. ¹² Eji kpeweek ibe enyi ekana ebi ugbek. Ire, eji ekiweek ibe enyi ekup kubọk ebi ìsasa me ichechieek mè ukarajit ibọkọ inu Awaji ochieekbe use inyinyi ema. ¹³ Mgbọ Awaji ochieekbe Ebereham use, ìsa lek kan̄ inyan̄a ibot, mije, ìkakaan̄ ofifi inu òmimin igak ọmọ eyi ọmọ môsabe inyan̄a ibot. ¹⁴ Awaji ìnyan̄a ibot inyi Ebereham ibe, “Me atikọ, mâgbana owu enenen, mè irọ inyi owot iman kwun̄ imumana iwa me otu ifuk.” ¹⁵ Ebereham okakat ejit ikup, mè ibọkọ inu ya Awaji ochieekbe ọmọ me use. ¹⁶ Ebilene ekisa ogwu òmimin igak ema inyan̄a ibot, inyan̄a-ibot ya îra ikirọ inye ibe ke inu ema etumube ìre atikọ, mè isa me ikeya ifieek otutuuk ifan̄a geelek. ¹⁷ Awaji ìweek irọrọ inyi otutuuk ebi ọmọ ochieekbe use eriọọn̄ ejaan̄ lek ibe ke nkeek kan̄ ìkakinwene. Eya orọ înyan̄abe ibot isa irọ use kan̄ inye. ¹⁸ Use yi, mè inyan̄a-ibot yi, òrere inu iba echi ìkakinwene, ìkijeen̄ ibe ke Awaji ìkakikan̄ ataak. Inu iba chi ke Awaji osa itap eji efuuk me emen enenen, eji ebi ìlilibi isi itap ibot me irak ubọk kan̄, inyi eji etet ikpọchieen̄ eyi ọmọ onyibe eji ekaan̄ enye. ¹⁹ Ikpọchieen̄ yi eji ekaan̄be, ọmọ okigọbọ ibot ejit kiji ikaan̄ kubọk iloma, inyi ikeke inye, mè ikaje ilọ. Ikpọchieen̄ yi okije itibi ekwut egbakabe me emen Uwu Mbuban me emen inyọn̄, mè iraka inin̄ Ere Òkup Mbuban Ichit me udun̄ ekwut ya. ²⁰ Jisọs îdasi ije me isi kiji isi inin̄ emen agwut mbuban ya me ibot kiji. Ọmọ îkana ogwu ibot ebi ibot ngwugwa ire mgbọ ikakaan̄ge itata, igọọk me ọgbọn̄ irek ngwugwa kè Melikisedek.

¹ Melikisedek yi ore ogwu ubọọn̄ ama Salem, mè ire si ogwu ngwugwa inyi Awaji Òbebene Ichit. Mgbọ Ebereham otimbe akọn̄ ikpan̄ ebi ubọọn̄ isan̄a, mè ikigwu ikom ika, Melikisedek onenichichini ọmọ, mè igbana ọmọ. ² Ebereham onyinyi ọmọ irek ge me etete akọp irek me lek otutuuk inu îkpulube me akọn̄ isa ika. Adasi erieen̄ kan̄, òrere Melikisedek ìsibi “ogwu ubọọn̄ ata irọrọ.” Erieen̄ kan̄ eyi òso iba, òrere “ogwu ubọọn̄ Salem” ìsibi “ogwu ubọọn̄ esuuk.” ³ Kpunu mfufuk geege egebe òfolek ogwu ute, mè ìre ogwu uga, mè ìre imaman kan̄ mè mkpa kan̄. Ọmọ ìbet lek Gwun̄ Awaji, mije ọmọ orebe si ogwu ngwugwa ire mgbọ ikakaan̄ge itata, kubọk Gwun̄ Awaji orebe. ⁴ Ìfat ìkpọ-nu òjelek ogwu ilile ene ya orebe! Ebereham nte kiji ukot ikaan̄ me lek kan̄ înyi ọmọ irek ge me etete akọp irek me lek otutuuk inu îkpulube me akọn̄ isa ika! ⁵ Ikan kè Mosis înyi bọn owot iman kè Libai, ebi ìrere ebi ngwugwa, unye ibe ekebọkọ irek ge me akọp irek me ubọk ebi Ijeren, ebi ìrere ebi ngwan̄ kiban̄ gaalek, ubọk geelek ebiba si erebe bọn owot iman kè Ebereham. ⁶ Melikisedek ìkanan̄a me owot iman kè Libai, ire, îbọkọ irek ge me etete akọp irek me ubọk kè Ebereham, mè igbana Ebereham ogwu Awaji ochieekbe use. ⁷ Îre ogwu òbebene me irek okigbana ogwu òsisiki me irek, eya kpunu ifan̄a me lek. ⁸ Me lek ebi otoko kè Libai, îre ebilene ikike ebi kpekifuk ugwem ekibọkọ irek ge me etete akọp irek yi. Ire, me lek kè Melikisedek, îre ọmọ, ogwu Ikpa Mbuban okitumu ibe ke ọmọ òwa me ògat ugwem, obọkọ irek ge me etete akọp irek ya. ⁹ Mêkọt itumu ibe ke Libai ogwu òkibọkọ irek ge me etete akọp irek, îkpe irek ge me etete akọp irek sa me ubọk kè Ebereham. ¹⁰ Mije, mgbọ Melikisedek ochichinibe Ebereham, eji mêkọt itumu ibe ke Libai òwa me emen lek kè Ebereham nte ogwu ute ukot ikaan̄, mije, kpemaman ọmọ nu. ¹¹ Awaji ìnyi ebi Ijeren Ikan ikpọ me lek ebi ngwugwa ìnan̄a me otoko kè Libai. Ire ke ikwaan̄ ebi ngwugwa ebi otoko kè Libai mokirọ inyi ene inwọn isan̄a, ìre ìjeje iyaka inikup me uyọt ibe ofifi ogwu ngwugwa òje me ọgbọn̄ kè Melikisedek inu, kpan̄asi ogwu ọgbọn̄ kè Erọn ogwu otoko kè Libai? ¹² Mije, mgbọ geelek enwenebe ọgbọn̄ ebi ngwugwa, mênwene si ikan. ¹³ Okaan̄ kiji, ogwu ekitumu ikọ yi ibak, ìre ogwu ofifi otoko. Kpunu ene geege me otoko kiban̄ òrarak ikifaka mfaka me inyọn̄ ntook kubọk ogwu ngwugwa. ¹⁴ Otutuuk ene mîriọọn̄ ibe ke Okaan̄ kiji ìnan̄a me otoko kè Juda. Mgbọ Mosis okitumu ikọ òfolek ebi ngwugwa, ìkabak otoko kè Juda. ¹⁵ Ibot ikọ kiji îsibi utoon̄ mgbọ keyi igak otutuuk mgbọ, mije inunu ofifi ogwu ngwugwa òje me ọgbọn̄ kè Melikisedek onube. ¹⁶ Ìkare me irot eyi owot iman ke ọmọ osa ikana ogwu ngwugwa, kubọk îkupbe me ikan mè ọrọmijọn̄. Ire, ọmọ ìkana ogwu ngwugwa sa me unye eyi ugwem kan̄ eyi mkpa ikakọtge ìkpan̄. ¹⁷ Mije, Ikpa Mbuban ìtumu ibe, “Owu ìre ogwu ngwugwa ire mgbọ ikakaan̄ge itata igọọk me ọgbọn̄ kè Melikisedek.” ¹⁸ Me mgbọ keyi, Awaji îkana oka ikan mè ọrọmijọn̄ cha ito, mije, ìkakaan̄ unye, melek si, ìkakaan̄ oruru ìnyi ebilene. ¹⁹ Ikan kè Mosis ìkakọt ìrọ inyi inu geege inwọn isan̄a. Eya orọ, Awaji îsa ayaya ikpọchieen̄ inu, eyi môsabe eji ijuuk igbet ọmọ lek. ²⁰ Ofifi esese inu òkup me lek keyi ìre ikeyi: Awaji înyan̄a ibot! Kpenyan̄a ibot geege mgbọ erọbe ebi owot iman kè Libai ebi ngwugwa. ²¹ Ire, mgbọ Awaji orọbe Karais ogwu ngwugwa, înyan̄a ibot, mè itumu ibe, “Okumugwem înyan̄a ibot, ìkponwene ejit. Owu ìre ogwu ngwugwa ire mgbọ ikakaan̄ge itata!” ²² Sa me ikeyi, Jisọs îkana ogwu nsọọn̄ isasa irọ ayaya inyan̄a-ibot yi inye. Ayaya inyan̄a-ibot yi înwọn igak eyi oka. ²³ Îkaan̄ si ofifi esese inu òkukup. Ebi ngwugwa kechilọ mîwa enenen, mije, mkpa ìkakitele inyi ema ekup ejọn̄ọ mgbọ me irek ikwaan̄ kiban̄. ²⁴ Ire, mije Jisọs òwa me ugwem ire mgbọ ikakaan̄ge itata, ọmọ môre ogwu ngwugwa ire mgbọ geelek, kpebeyaka ito ofifi ene me irek kan̄. ²⁵ Eya orọ, ebi geelek ìnunu me lek Awaji sa me lek kè Jisọs, Jisọs môkọt inyan̄a ema otutuuk ene ojot ojot, mije, ọmọ ìkukup me ugwem mgbọ geelek ikibeek Awaji mbeek me ibot kiban̄. ²⁶ Me atikọ, îre òjelek ogwu ibot ebi ibot ngwugwa òkup ikeyi ke eji ekiweek, ogwu môkọtbe irọ otutuuk inu òkup eji me uyọt. Ọmọ ìre ogwu òkup me mbuban, kpunu nrọ-nlọ geege me emen kan̄. Ọmọ îtana isan̄a. Awaji îmọnọ ọmọ isan̄a me etete ebilene ebi ìkirọ ijo inu, mè isun̄ ọmọ esese, mè ibene ọmọ isaba iraka emen inyọn̄ ifo ere òbebene ichit. ²⁷ Ebi ngwugwa kechilọ ekigwa ngwugwa egwe geelek. Ema ekidasi igwa ngwugwa mije ijo inu eyi kiban̄, sabum ènegwa si mije ijo inu ebi ofifi ife. Ire, ìkakup ikeya me lek kè Jisọs, mije, ọmọ ìgwa mgbọ ngwugwa ge gaalek mije ijo inu otutuuk ebilene. Mgbọ ngwugwa ge ya îsabe lek kan̄ igwa inyi Awaji îso otutuuk ene ire otutuuk mgbọ. ²⁸ Ubọk Ikan kè Mosis osun̄be, îre ebilene ikike ebi kpekaan̄ unye geege ke ekigobo isa irọ ogwu ibot ebi ibot ngwugwa. Ire, inyan̄a-ibot Awaji onyan̄abe, eyi ònunu me udun̄ Ikan kè Mosis, onenigobo Gwun̄ Awaji ogwu ònwọnwọn isan̄a ire mgbọ ikakaan̄ge itata, mè isa ọmọ irọ ogwu ibot ebi ibot ngwugwa.

¹ Otutuuk ibot ikọ eji ekitumu ire ikeyi: Eji mîkaan̄ òjelek ogwu ibot ebi ibot ngwugwa òkup kubọk ntumube iraka, ogwu òsisiki ikweek me agan̄ ubọk ulom ogboon̄ ubọọn̄ eyi Awaji Ogwu Òmimin Ichit, me emen inyọn̄. ² Ogwu ibot ebi ibot ngwugwa yi ìkisi ikwaan̄ me Ere Òkup Mbuban Ichit, eyi òrere uwu mbuban eyi atata, eyi Okumugwem me lek kan̄ onamabe, ìkare ebilene enama. ³ Ekigobo ogwu ibot ebi ibot ngwugwa geelek ito ibe ikinyi Awaji inyinyi, mè ikigwa ngwugwa inyi Awaji. Ikeya si, îkup me uyọt ibe ogwu ibot ebi ibot ngwugwa keyi ikaan̄ si inu ìbosa inyi Awaji. ⁴ Mebe ke ọmọ ìkup me linyọn̄, ọmọ kpomore ogwu ngwugwa kubọk ge, mije, ebi ngwugwa mîwa me linyọn̄, ebi ìkinyi Awaji inyinyi igọọk me lek Ikan ebi Ju. ⁵ Ere Mbuban eyi ebi ngwugwa cha ekikup isi ikwaan̄ ìre gaalek mbet mè ogugo Ere Mbuban eyi òkup me emen inyọn̄. Ikeya orọ, mgbọ Awaji obe Mosis inama uwu mbuban eyi ikpa anam, ìtataba Mosis ubọk me utọn̄ ibe, “Mun̄ ibe ke orọ otutuuk inu igọọk me ubọk eyi atata ya esabe ijeen̄ owu me inyọn̄ ogoon̄ okupbe.” ⁶ Ire, irek ikwaan̄ ogwu ngwugwa eyi Jisọs obọkọbe îbene igak eyi kiban̄. Ikeya si ke ayaya inyan̄a-ibot eyi òje me ubọk kè Jisọs inu obene igak oka inyan̄a-ibot. Ayaya inyan̄a-ibot yi îkaan̄ owuwa use ònwọnwọn igak eyi oka me emen. ⁷ Mije, mebe ke kpunu inu òlọlọ me lek adasi inyan̄a-ibot ya, kpomokup me uyọt ibe eweek ofifi inyan̄a-ibot. ⁸ Ire, Awaji îmun̄ nlilọ inu me emen ebilene, mè itumu ibe, “Okumugwem îtumu ibe, ‘Mgbọ òkinu, mgbọ mânyibe ebi ido Ijeren, mè ebi otoko kè Juda ayaya inyan̄a-ibot. ⁹ Ìkpokup kubọk inyan̄a-ibot nnyan̄abe melek ebi nte nte kiban̄ mgbọ ntetbe ema ubọk, mè isa ema inan̄a isibi me ido Ijipiti, mije, ife cha kpesun̄ ikan inyan̄a-ibot n̄a. Eya orọ, nsasan̄a ema chieen̄ me lek.’ ¹⁰ Okumugwem îtumu si ibe, ‘Inyan̄a-ibot mbanyan̄a melek ebi Ijeren ìre ikeyi: Ukot keya isiraka, mâtap ikan n̄a me emen ekiket kiban̄, mè ige ikan cha me ejit kiban̄. Emi mâre Awaji kiban̄, ema erere ebi n̄a. ¹¹ Ìkpoyaka ikup me uyọt ibe ene ijeen̄ ogwu melek kan̄, mè ìre ogwu ngwan̄ ibe, “Riọọn̄ Okumugwem,” mije, ema otutuuk ene mêriọọn̄ emi, bene me lek ogwu òsisip ichit re lek ogwu òmimin ichit. ¹² Mâtele nrọ-nlọ kiban̄ inyi ema, m̀kpayaka ikeek otutuuk ijo inu kiban̄ kubọk ge.’ ” ¹³ Mije Awaji ogwenbe inyan̄a-ibot yi “ayaya,” ìsibi ibe ke eyi adasi ya îkana oka. Eya orọ, inu geelek òkakan, mè ikana oka ìbochechep ugwat ugwat.

¹ Adasi inyan̄a-ibot îkaan̄ owuwa ikan òfolek ubọk ebi ene ebekitọbọ ebum inyi Awaji, mè ikaan̄ si Uwu Mbuban eyi ebilene enamabe, ere ebi ene ekititiin̄ ikikup itọbọ ebum inyi Awaji. ² Ebi ene mînama uwu mbuban eyi ikpa anam. Emen agwut eyi òkup me agan̄ isi isi ke eyik ngugọọn̄ mkpukan̄, mè iyik si ikasi itoon̄-inu, melek fituru esabe igwa ngwugwa inyi Awaji me inyọn̄. Agwut keyi ke ekigwen Ere Mbuban. ³ Me udun̄ agwut keya, ofifi agwut òwa esabe ekwut igbaka ichit isotu kan̄. Eya ore òso ekwut iba egbakabe me emen Uwu Mbuban ya. Agwut keyi ke ekigwen Ere Òkup Mbuban Ichit. ⁴ Me emen agwut keyi ke ntook alata araran̄, ere ekiwọp nsensi inyi Awaji okup, melek okop inyan̄a-ibot ya esabe alata araran̄ itọkọ ichit otutuuk lek. Inu òkup me emen okop ya ìre, gwun̄ otin̄ ge esabe alata araran̄ irom, eyi inorie ekigwen mana okupbe me emen, mè mkpat kè Erọn òtitibi inwan̄ me lek, mè akpakpa ewuuk iba egebe Ikan kè Mosis me lek. ⁵ Ebi osat iba, ekigwen cherubim, esabe alata araran̄ irom òwa me inyọn̄ okop ya, eyi òkijeen̄ ibe ke umin mè uja eyi Awaji òwa me ere ya. Ema ewewele uwop kiban̄ isa ikana ichit ogboon̄ eyi nsan ere Awaji okitele ijo inyi ebilene. Eji kpebekọt ikpa otutuuk inu chi me ntuun̄ me ntuun̄ isan̄a mgbọ keyi. ⁶ Ikeyi ke eneen̄ otutuuk inu isun̄. Emen agwut eyi òkup me agan̄ isi isi ya ke ebi ngwugwa ekinin̄ egwe geelek isi ikup ikirọ ikwaan̄ kiban̄. ⁷ Ogwu ibot ebi ibot ngwugwa gaalek okinin̄ agwut eyi emen emen ya. Ìkinin̄ agwut ya mgbọ ge gaalek me acha. Isibonin̄, ìkibeben eje isa ikaan̄ me ubọk inin̄. Ìkisa eje ya igwa ngwugwa mije ijo kan̄, mè ijo inu echi ebi ene erọbe me ekariọọn̄ge. ⁸ Ekwukwu Mbuban ìkisa eyiyi irọ inyi ebi ene eriọọn̄ ibe, eyi adasi uwu mbuban eyi ikpa anam ya mè otutuuk ọrọmijọn̄ kan̄ okukup, ke kpechili-nu oniin̄ inyi ebi ene eraka enin̄ Ere Òkup Mbuban Ichit. ⁹ Eyi ìkijeen̄ eji ubọk inu okupbe me mgbọ keyi. Ìkijeen̄ ibe ke mfaka cha, mè ngwugwa ekigwa ìkakọt ìrọ inyi ejit ebi ìkitọbọ ebum inyi Awaji itana isan̄a. ¹⁰ Otutuuk ọrọmijọn̄ chi ìgbaan̄ me lek ikan òfolek inorie mè miin̄, mè owuwa mfaka igwọk-lek. Otutuuk kechi ìre ten̄eten̄e ọrọmijọn̄ ekirọ iban mgbọ Awaji mônwenebe otutuuk inu ikana ayaya. ¹¹ Ire, Karais înu kubọk ogwu ibot ebi ibot ngwugwa eyi ata inu echi òwuwuuk lek ikup. Uwu mbuban eyi ikpa anam eyi ọmọ ojebe itibi ìre eyi òmimin ichit, mè inwọn isan̄a. Ìkare eyi ubọk ebilene onamabe, ìkare si eyi linyọn̄ keyi, òrere inu erorom. ¹² Karais ìje itibi uwu mbuban eyi ikpa anam ya, mè itibi iraka inin̄ emen Ere Òkup Mbuban Ichit ya mgbọ ge kpọi. Eje îkaan̄be me ubọk isa iraka inin̄ emen ere ya ìkare eje ebot mè eje erie mbuuk. Îre eje kan̄ gaalek ke îsa iraka inin̄ emen ere ya, mè ifaka eji isibi me emen ijo inu ire mgbọ ikakaan̄ge itata. ¹³ Eje ebot mè orie erie mbuuk, mè ntọn̄ ònan̄a me lek obaak uman erie mbuuk ewọpbe, ke ekinyiaan̄ igwook me lek ebi ìchachaka mbuban, îra ikisan̄a ife cha mbuban me lek, mè orọ inyi ema etana me akpalek. ¹⁴ Ire eje anam esabe igbama ene lek ikirọ inyi ene itana ikeya, ìre eje kè Karais ìkpofat irọ eyi ògagak ikeya? Sa me unye eyi Ekwukwu òkukup ire mgbọ ikakaan̄ge itata, ọmọ, ogwu kpunube nrọ-nlọ geege me emen, îsa lek kan̄ igwa ngwugwa inyi Awaji. Eje kan̄ môgwọk ejit kiji, inyi irọrọ geelek òkisa mkpa inu ita eji me ejit, mè eji ekọt ekesi ikwaan̄ enyi Awaji ogwu òkup me ugwem. ¹⁵ Mije keyi ke Karais osa ikana ogwu ayaya inyan̄a-ibot yi ojebe me ubọk inu, inyi ebi geelek Awaji ogwenbe ebọkọ ugbana ya eyi môkupbe ire mgbọ geelek, eyi Awaji ochieekbe use inyinyi ema. Ife chi mêbọkọ ugbana yi, mije, Karais îkwu mkpa kubọk ene unwene ibot mije kiban̄, inyi ema enan̄a esibi me ijo inu echi ema erọbe mgbọ ema ekupbe me irak adasi inyan̄a-ibot. ¹⁶ Ire ene ikup me ògat ugwem idọmọ isan̄a ubọk mêsabe iche inu kan̄ mgbọ ọmọ isikwu, îgbe ibe eweek eriọọn̄ ibe ke ene ya îkwu me atikọ sabum èneche inu ene ya okaan̄be. ¹⁷ Ikan idọmọ-inu keya ìkikaan̄ unye mgbọ ogwu òdọdọmọ inu ya isikwu, ìkare mgbọ îkupbe me ògat ugwem kan̄. ¹⁸ Mije keyi orọ, ìrere adasi inyan̄a-ibot ya, mebe ke kpegwook eje, kpomobene isi ikwaan̄. ¹⁹ Mgbọ Mosis ofukbe otutuuk Ikan egebe me ibot me ibot isibi inyi otutuuk ebi Ijeren isan̄a, inenisa otu uti haisop mè inwan̄ me lek, mè inwọọn̄ anam òkup irio irio ijiin̄ me emen eje erie mbuuk mè mudim, mè isa inyan igwook me lek ikpa Ikan ya, mè inyan si igwook me lek otutuuk ene, ²⁰ mè ikitumu ibe, “Eyi ìre eje inyan̄a-ibot ya, eyi Awaji onyibe ida ibe enyi esun̄.” ²¹ Ikeya si ke înyan eje ya igwook me lek uwu mbuban eyi ikpa anam ya, melek otutuuk inu ekisa ifaka mfaka òkup me emen uwu ya. ²² Me atikọ, kubọk Ikan kè Mosis odobe, ekisa eje igwọk lek otutuuk inu, inyi itana me isi Awaji. Eya orọ, ire kpefiin̄ eje, kpebetele ijo inyi ene. ²³ Inu chi ekirọ me linyọn̄ ìre gaalek ogugo achubọk atata mfaka eyi òkup me emen inyọn̄. Îkup me uyọt ibe esa owuwa ngwugwa òkup ikechi egwọk lek ogugo inu chi, inyi ema etana me isi Awaji. Ire, ngwugwa ònwọnwọn igak echichi ke ekisa igwọk lek achubọk inu cha me lek kiban̄, echi òkup me emen inyọn̄. ²⁴ Mije, ìkare Ere Mbuban eyi ebilene enamabe, eyi òrere ogugo achubọk atata Ere Mbuban òkup me emen inyọn̄ ke Karais oraka inin̄. Ire, ìraka inin̄ emen inyọn̄ me lek kan̄, mè ikeke me isi Awaji mgbọ keyi mije kiji. ²⁵ Ogwu ibot ebi ibot ngwugwa ebi Ju ìkisa eje ikarege eyi kan̄ ikiraka inin̄ Ere Òkup Mbuban Ichit kpa acha kpa acha. Ire, Karais ìraka inin̄ emen inyọn̄ isi isa lek kan̄ igwa ngwugwa mgbọ ge gaalek, ìkare kpa mgbọ kpa mgbọ, kubọk ogwu ibot ebi ibot ngwugwa ebi Ju okirọ. ²⁶ Mebe ìkare ikeya, kè Karais obọkọ ufialek owuwa mgbọ karake erombe linyọn̄. Ire, Karais ìkana isibi me linyọn̄ me mgburudun̄ mgbọ yi, inyi ọmọ inisa lek kan̄ igwa ngwugwa, mè iben otutuuk ijo ebilene isan̄a mgbọ ge gaalek iso ire mgbọ ikakaan̄ge itata. ²⁷ Awaji ìsun̄ ibe ke ene ìbokwu mkpa mgbọ ge gaalek. Eya isiraka, otutuuk ofifi inu òkukup inyi ene ya ìre oyerebet. ²⁸ Ikeya si, Karais ìsa lek kan̄ igwa ngwugwa mgbọ ge kpọi isasa iben ijo owuwa ebilene isan̄a. Ọmọ môkpọk ikana isibi òso mgbọ iba. Mgbọ ya, ìkare ìboniben ijo ebilene isan̄a. Ìbonu ininyan̄a ebi ìbebem lek ikikweek ikpọ ọmọ.

¹ Ikan kè Mosis ìre gaalek ogugo atata inu echi òbonunu, ìkare atata inu cha me lek kiban̄. Me irak Ikan ya, ebi ngwugwa ekpọkpọ ikigwa chieen̄ ngwugwa yaage acha geelek. Mije Ikan ya orebe ogugo gaalek, ìkpokọt irọ inyi ebi ìkitọbọ ebum inyi Awaji enwọn esan̄a. ² Mebe ke Ikan ya îrọ inyi ebi ìkitọbọ ebum inyi Awaji cha etana esan̄a mgbọ yaage, mè ijo kiban̄ ikayaka ìkup ema me lek, ejit kiban̄ kpomoyaka ikifieek ema ikọ òfolek ijo inu ofifi. More ikeya, kè otutuuk ngwugwa cha îra ifieek. ³ Ngwugwa cha ìkirọ inyi ebi ene ekekeek ijo kiban̄ me acha me acha, ⁴ mije, eje erie mbuuk mè ebot ìkpokọt iben ijo inu ebilene isan̄a. ⁵ Eya orọ, mgbọ Karais onube linyọn̄, ìtumu inyi Awaji ibe, “Ngwugwa eyi ekikpan̄ anam mè eyi kpekikpan̄ anam ìkakup owu me uyọt, ire, akpalek n̄a ke oneen̄ isun̄ ibe emi ǹsa ǹgwa ngwugwa. ⁶ Owu òkakibele ejit me lek owuwa ngwugwa ewọwọp, mè echi ekisa iben ijo inu isan̄a. ⁷ Nnenitumu ibe ‘Jei Awaji, kpọ emi gwu! Ǹnu inenirọ ekiket kwun̄, kubọk egebe òfolek n̄a me ikpa Ikan kè Mosis.’ ” ⁸ Me adasi irek, ubọk geelek Ikan kè Mosis okido ibe egwa ngwugwa, Karais ìtumu ibe, “Owu òkaweek ngwugwa echi ekikpan̄ anam mè echi kpekikpan̄ anam, mè echi ewọwọp mè echi ekisa iben ijo inu isan̄a. Ngwugwa chi ìkakibele owu ejit si.” ⁹ Îtumu si ibe, “Kpọ emi gwu! Ǹnu inenirọ ekiket kwun̄.” Sa me ikeyi ke Awaji oda adasi ngwugwa cha isan̄a, mè inisa eyi òso iba, òrere ngwugwa Karais ogwabe, inwene. ¹⁰ Mije Jisọs Karais osabe akpalek kan̄ ìgwa ngwugwa mgbọ ge gaalek iso otutuuk mgbọ, kubọk Awaji oweekbe, mîrọ inyi eji otutuuk ene ekup me mbuban. ¹¹ Ogwu ngwugwa ebi Ju geelek ìkikekeke ikeke ikeke ikifaka mfaka kan̄ egwe geelek òwele me inyọn̄, mè ikpọkpọ ikigwa chieen̄ ngwugwa yaage kpa mgbọ kpa mgbọ. Ire, ngwugwa chi ìkpokọt iben ijo inu ebilene erọbe isan̄a kubọk ge. ¹² Ire, Karais ìgwa ngwugwa mgbọ ge gaalek iso otutuuk mgbọ, isasa iben ijo inu ebilene isan̄a. Mgbọ îgwabe ngwugwa ya isan̄a, isisiki ikweek irek me agan̄ ubọk ulom Awaji. ¹³ Karake mgbọ ya ke îkweek me ere ya ikikpọ mgbọ Awaji môrọbe inyi ebi ochicha kan̄ ekana inu ibene ukot enyi ọmọ. ¹⁴ Sa me mgbọ ngwugwa ge ya, Karais îrọ inyi otutuuk ebi ọmọ okirọ inyi ekup me mbuban etana esan̄a ire mgbọ ikakaan̄ge itata. ¹⁵ Ekwukwu Mbuban si îrọ ikọ ya inye. Ìdasi itumu ibe, ¹⁶ “Okumugwem ìtumu ibe, ‘Inyan̄a-ibot mbanyan̄a melek kiban̄ ìre ikeyi: Ukot keya isiraka, mâtap ikan n̄a me emen ejit kiban̄, mè ige si ikan cha me emen ekiket kiban̄.’ ¹⁷ Îtumu igbaalek si ibe, ‘M̀kpayaka ikeek ijo inu kiban̄ mè nrọ-nlọ kiban̄ kubọk ge.’ ” ¹⁸ Awaji isitele otutuuk ijo inu chi inyi ebilene, ngwugwa ekigwa isa iben ijo inu isan̄a ìkpoyaka ikup me uyọt ofifi. ¹⁹ Eya orọ, bọn Nte n̄a, eji mîkaan̄ ojot ojot unen iraraka inin̄ Ere Òkup Mbuban Ichit, sa me eje kè Jisọs. ²⁰ Ọmọ îchili ayaya oniin̄ eyi òkup me ugwem inyi eji ekọt eje etibi ekwut uwu mbuban ya, eyi òrere akpalek kan̄. ²¹ Eji mîkaan̄ ikpele ogwu ngwugwa ogwu òrere ogwu ibot me uwu Awaji. ²² Mije eji ekaan̄be otutuuk inu chi, eji esa me ejit òtatana, mè ojot ojot ikpọchieen̄ eyi ichechieek eje enu me lek Awaji. Eji esa ejit eyi esabe eje inyan igwook inyi itana, mè ikayaka ìfieek eji ikọ, mè esa si akpalek eyi esabe mun̄ eyi kpunube okpa geege me emen igwọk itana, eje enu me lek Awaji. ²³ Eji etet ikpọchieen̄ ya, eyi eji echieekbe me lek mè ikitumu isibi, enye, mije, ogwu òchechieek eji use ya ìkakilọ irọrọ inu geelek îtumube ibe ọmọ môrọ. ²⁴ Eji ekekeek ubọk eji ebekisa itap ebi melek kiji efuuk me emen, inyi ema ekemun̄ ene me chieen̄, mè ekerọ ata inu. ²⁵ Eji ekawuuk ikekigbaan̄ ititiin̄, kubọk usini ebi ene ekirọ. Eji eketap ebi melek kiji efuuk me emen, ògak ge, mije eji eriọọn̄be ibe ke usen Okaan̄-ene òbonu òkigbet enenen. ²⁶ Mgbọ keyi erọbe inyi eji eriọọn̄ otutuuk atikọ, ire eji ikigen ibak ikpọkpọ ikirọ ijo inu, kpunu ofifi ngwugwa ebeyaka igwa isa iben ijo kiji isan̄a. ²⁷ Ire, otutuuk inu òboyaka inikup inyi eji me mgbọ keya ìre ikukup me ukpook ikikpọ oyerebet Awaji, mè unye ukan òkisak gwugwugwugwu, eyi òbotaka ebi ochicha Awaji iriọk. ²⁸ Me ukot ikaan̄, ogwu geelek òrọrọn̄ Ikan kè Mosis, ekikpakpan̄ ene ya me kpunube nsan, ire ebi ata-ikọ iba, mè ìre ita isinikeke ata-ikọ ikeme ene ya. ²⁹ Ire, ire ikeya me atikọ, ìre enyi kpekeek ibe ke osusut òmimin enenen igak ikeya môkup inyi ene geelek òjajak Gwun̄ Awaji me ukot, mè imọnọ eje inyan̄a-ibot ya, eyi esabe irọ inyi ọmọ ikup me mbuban, kubọk inu ikakupge me mbuban, mè inye chieen̄ inyi Ekwukwu Mbuban ogwu òkinyi ene atata nnwọn eyi Awaji? ³⁰ Mije, eji mîriọọn̄ ogwu otutumu ibe, “Îre emi nkirọ ene useen̄ inu, mâyaka ikpe,” mè itumu si ibe, “Okaan̄-ene môfieek oyerebet inyi ebi kan̄.” ³¹ Ene irọrọn̄ inin̄ ubọk Awaji òkup me ugwem ìre inu òkakaan̄ ukpook. ³² Ire, ìkeek adasi mgbọ ya enyi ebọkọbe utoon̄ Awaji itap. Enyi mîbọkọ owuwa ufialek mgbọ ya, mè ichieek si mkpa ikeke inye. ³³ Usini mgbọ, ebi ene mîrọ enyi inu esip, mè itap enyi unan me lek me eden̄ ama. Usini mgbọ, enyi mîra ikisa chieen̄ imun̄ ubọk ekirọ si ebi melek kinyi inu cha me agba lek kinyi, njijin ebi melek kinyi cha îra ikitet enyi. ³⁴ Enyi mîbọkọ ufialek melek ebi ìkup me mkpọn. Mgbọ ebọkọbe enyi inu enyi ekaan̄be, enyi mîme me unwọọn̄, mije, enyi mîriọọn̄ ibe ke enyi me lek kinyi mîkaan̄ inu echi ònwọnwọn igak echi ebọkọbe enyi, mè ikifuk si ire mgbọ ikakaan̄ge itata. ³⁵ Eya orọ, ikafiin̄ unye-ejit ya enyi ekaan̄be, mije, ebi mênyebe ejit ire itata mêbọkọ mkpukpe òmimin enenen. ³⁶ Îkup me uyọt ibe enyi ekaan̄ ukarajit, inyi enyi ekọt erọ nkeek Awaji, mè ebọkọ inu ya Awaji ochieekbe use inyinyi enyi. ³⁷ Mije, Ikpa Mbuban ìtumu ibe, “Me mgbidim mgbọ, ogwu òbonunu ya mônu, ìkpofiat mgbọ. ³⁸ Ire, ogwu eyi n̄a, ogwu ata irọrọ môluk ugwem sa me ichechieek. Ire, ire ikpebe lek inyi udun̄, emi m̀kpabele ejit me lek kan̄.” ³⁹ Ire, eji kpere ebi ìkikpebe lek inyi udun̄, mè ikwu ichep. Eji ìre ebi ìchechieek, mè ikaan̄ unyan̄a me ubọk Awaji.

¹ Ichechieek ìre itotoon̄ ejit me lek inu eji ekikpọ chieen̄ ibe ke mômọnọ irek, mè ibebieen̄ ejit ojot ojot me lek inu eji ekasage chieen̄ ìmun̄. ² Îre mije ichechieek ke Awaji osa itọn̄ ebi ukot ikaan̄. ³ Sa me ichechieek ke eji egobo itet ibe ke Awaji ìsa ikọ otu kan̄ irom otutuuk linyọn̄, mè igobo si itet ibe ke esa inu chieen̄ ene ikamun̄ge irom inu chieen̄ ene okimun̄. ⁴ Sa me ichechieek ke Eben ogwa ngwugwa ònwọnwọn igak eyi kè Ken inyi Awaji. Îre mije ichechieek kan̄ ke Awaji osa imọnọ ọmọ kubọk ogwu ata irọrọ, mije, Awaji îbọkọ ngwugwa kan̄ itap. Ubọk geelek Eben okwube iraka, etip ichechieek kan̄ òkitaan̄ si ire chereyi. ⁵ Sa me ichechieek kè Enọk ke emọnọ Enọk isan̄a me linyọn̄ keyi me ògat ugwem, inyi ikamun̄ mkpa. Kpeyaka imun̄ ọmọ, mije Awaji îmọnọ ọmọ isan̄a. Ire, sabum enimọnọ ọmọ isan̄a, Ikpa Mbuban ìtumu ibe ke irọrọ kan̄ îbele Awaji ejit. ⁶ Ire kpunu ichechieek, ene ìkpokọt irọ inyi ejit ibele Awaji. Mije, ene geelek òbonu me lek Awaji ìbodadasi ichieek ibe ke Awaji òwa, mè ichieek si ibe ke Awaji môkpe mkpukpe inyi ebi geelek ìkisa otutuuk ejit iweek ọmọ. ⁷ Sa me ichechieek, mgbọ Awaji otababe Nuwa ubọk me utọn̄ òfolek inu òkup me isi, eyi ekamun̄ge-nu me chieen̄, Nuwa ogbagban̄ utọn̄, mè inama uji ọfọ isa inyan̄a lek kan̄ melek ebi ototun̄ ukan̄ kan̄. Sa me ikeya, Nuwa îsa me ichechieek kan̄, itip ebi linyọn̄ oyerebet, mè ibọkọ ata irọrọ, eyi ekisa me ichechieek ikaan̄, me irot. ⁸ Sa me ichechieek, mgbọ Awaji ogwenbe Ebereham ibe inisi inyọn̄ ijọn̄ ere ìbosa inyi Ebereham me irot, Ebereham ogbagban̄ utọn̄, mè isi, ubọk geelek ikariọọn̄ge ere ya ìbosi. ⁹ Sa me ichechieek, Ebereham oluluk me inyọn̄ ijọn̄ ya, eyi Awaji ochieekbe use isasa inyi ọmọ, kubọk ogwu ichen me ama ene. Ìkiluk me uwu ikpa anam me ere ya. Ikeya si ke Ajiki mè Jekọp ebi ìgọgọọk ikaan̄ use ya me irot ekiluk si me uwu ikpa anam me inyọn̄ ijọn̄ ya. ¹⁰ Ebereham ìkikpọ chieen̄ ikakaan̄ ama ya eyi òkakaan̄ unye ewuuk irak ijọn̄ eyi òbokup ire mgbọ ikakaan̄ge itata, òrere ama ya eyi Awaji me lek kan̄ otọbe, mè inama me ubọk kan̄. ¹¹ Sa me ichechieek, Awaji îrọ mè Ebereham ikana ute, ubọk geelek Ebereham okanbe iraka ogwu òbokọt ibon gwun̄, Sera ogwu nwa si orere ora. Awaji ìrọ inu yi mije Ebereham otoon̄be ejit ibe ke Awaji ogwu òchechieek ọmọ use ìkpolọlọ irọrọ use kan̄ iso. ¹² Sa me ikeyi, ene ge yi gaalek ogwu òkakan ikup kubọk ogwu òkwukwu, onenikaan̄ bọn owot iman ìwawa ikup kubọk ntoronyan̄ òkup me isinyọn̄, mè iwa si kubọk nkwukwuuk okpoon̄ òkup me agba awaji. ¹³ Otutuuk ife chi ekup me emen ichechieek kiban̄ ikwu. Kpebọkọ inu cha echieekbe ema me use ire ubọk, ekup me ujọn̄ọ ere imun̄, mè ibọkọ itap, mè ichieek ibe ke ema ìre ebi ije, mè ebi ichen me linyọn̄ keyi. ¹⁴ Ebi ìkitumu usem òkup ikeyi ekijeen̄ ibe ke ema ekiweek ido eyi òrere eyi kiban̄. ¹⁵ Mebe ke ema ekikeek ekiket òfolek ido eyi ema esibibe itele, kè ema ekọt ègwu ekom efo ido ya. ¹⁶ Kpan̄asi ikeya, ema ekikpọ chieen̄ ifofo ido ònwọnwọn igak eyi kiban̄, òrere ido eyi òkup me emen inyọn̄. Eya orọ, esip ìkakitet Awaji mgbọ ema ekigwen ọmọ Awaji kiban̄, mije, Awaji îneen̄ ama ge isun̄ iban ema. ¹⁷ Sa me ichechieek, mgbọ Awaji otọbe Ebereham ikpọ, Ebereham ochechieek isasa Ajiki ogwu gwun̄ igwa ngwugwa inyi Awaji. Sa me ikeyi Ebereham, ogwu Awaji ochieekbe use, îbem lek isasa ibot gwun̄ ge gaalek îkaan̄be igwa ngwugwa inyi Awaji. ¹⁸ Me emen use ya, Awaji ìtumu inyi ọmọ ibe, “Îre bọn owot iman kè Ajiki ke ebefuk kubọk echi kwun̄.” ¹⁹ Ebereham ìben me ejit ibe ke Awaji môkọt ijomo Ajiki me mkpa. Me atikọ, ìkup si ikeya. Ebereham îkpọk ikaan̄ si Ajiki kubọk ke Ajiki ìjojomo me mkpa. ²⁰ Sa me ichechieek ke Ajiki ogbana Jekọp mè Isọ, mè itumu inyi ema ubọk ugwem kiban̄ obokup me mgbọ òkup me isi. ²¹ Sa me ichechieek, mgbọ Jekọp obokwu, igbagbana bọn kè Josefu me ge me ge, mè isa mkpat kan̄ ibieen̄ lek ikeke itọbọ ebum inyi Awaji. ²² Sa me ichechieek, mgbọ Josefu omun̄be ibe ke ọmọ mônikwu, itutumu inyi ebi Ijeren ibe ke ebibi mênan̄a isibi me Ijipiti ifo, mè iteme ema nteme òfolek ubọk ema eberọ ukwuuk kan̄. ²³ Sa me ichechieek, mgbọ emanbe Mosis, ogwu uga mè ogwu ute ebeben ọmọ ilet onyan̄ ita, kpetet ukpook ikan ogwu Fero otapbe, mije, ema mîmun̄ ibe ke Mosis ìre gwun̄ òsibi esese. ²⁴ Sa me ichechieek, mgbọ Mosis ominbe inin̄ ene, ijijit ibe ekagwen ọmọ gwun̄ gwun̄ enenwaan̄ ogwu Fero, ²⁵ mè ichieek igọgọọk ebi eyi Awaji ibọkọ ufialek, kpan̄asi irerie utop eyi ijo inu me sọntiik mgbidim mgbọ. ²⁶ Ọmọ îmọnọ ibe ke irerie esip mije ogwu Awaji otoon̄be ubọk me ibot îmin igak otutuuk inu ubọọn̄ òkup me Ijipiti, mije, ọmọ ìkikpọchieen̄ ibọbọkọ mkpukpe me mgbọ òkup me isi. ²⁷ Sa me ichechieek, ọmọ otetele Ijipiti, mè itet ejit inye kubọk ìmumun̄ Awaji ogwu ebi ene kpekisa chieen̄ imun̄. Ìkatet ukpook ibe ke ogwu Fero mônaan̄ ejit inyi ọmọ. ²⁸ Sa me ichechieek ke Mosis obene ijọk Iraraka, mè inyi ida ibe ebi Ijeren enyan eje egwook me lek isotu kiban̄, inyi ogwu osat òkikpan̄ ene ikakpan̄ adasi nsabọn ebirieen̄ ebi Ijeren. ²⁹ Sa me ichechieek ke ebi Ijeren eje isaba Okwaan̄ Irio kubọk ìyaka ire nchat ijọn̄ ikike. Ire, mgbọ ebi Ijipiti ebenigọọk ije isaba, mun̄ orerie ema otutuuk isan̄a. ³⁰ Sa me ichechieek ke mgban enamabe ikana ama Jeriko ogbugbo igwook me ijọn̄ mgbọ ebi Ijeren ejebe ikana ama ya egwe jaaba. ³¹ Sa me ichechieek ke ogwu enenwaan̄ òje oyet ekigwen Rehabu onwọnọ mkpa me mgbọ ebi Ijeren ekpan̄be ebi unye-ibot me Jeriko, mije ọmọ obọkọbe ebi enun̄unun̄ ebi Ijeren itap. ³² Ìre keke ke mbayaka itumu? Mgbọ ìkayaka ìsik ìnyi emi m̀kpa inu òfolek kè Gidiọn, mè Berak, mè Samsin, mè Jefita, mè Debit, mè Samien, mè owuwa ebi nriran. ³³ Sa me ichechieek ke ife chi etim akọn melek owuwa ido, mè itim ikpan̄ ema, mè irọ inu òtatat me isi Awaji, mè ibọkọ use Awaji ochieekbe ema. Ema mîchit otu egbe inwọọn̄, ³⁴ mè iniin̄ ikpele ukan̄ òkisasak, mè inwọnọ mkpa me otu oge akọn̄. Ema kpenye lek, ire, ema mîkana ebi unye, mè inye lek enenen me akọn̄, mè itim ikpan̄ owuwa urum ebi akọn̄ ofifi ido. ³⁵ Owuwa ebibaan̄ mîmun̄ ubọk ejomobe bọn kiban̄ me mkpa inyi ema mije ema ekaan̄be ichechieek. Usini ebi ene mîbọkọ ufialek mè ikwu, kpechieek itetele Awaji, inyi esan̄a ema esibi me emen ufialek, mije, ema ekiweek ijojomo me mkpa inin̄ me ugwem eyi ònwọnwọn ichit. ³⁶ Mîrọ usini ebi ene inu ochak, mè isulu ema ijat akpa. Usini kiban̄ ke esa mkpọn ibọp, mè itap me uwu mkpọn. ³⁷ Usini ene ke esa ewuuk itọbọ ikpan̄, mè isa ojijọọk ijọọk usini ene ibum ọkpọkọ iba. Sa usini ene ke esa oge etim ikep ikpan̄. Usini ene mînin̄ ugbọọri, mè ikitap ọfọnti ikpa arọọn̄, mè ikpa ebot gaalek. Mîsisaak ema, mè itap ema unan me lek. ³⁸ Linyọn̄ keyi ìkanwọn isoon̄ ere ema ebeluk. Ema mînyinya ikana kubọk ebi ìlibi ekot akọn̄ inin̄ emen èwê, mè inene inyọn̄ ogoon̄, mè ikinin̄ emen udọn̄ òkup me lek ogoon̄ mè emen udọn̄ òkup me ijọn̄ ikiweek ere ebenin̄ ilet lek. ³⁹ Otutuuk ife chi mîkaan̄ ata erieen̄ mije ichechieek kiban̄! Ire, kpunu ene geege me lek kiban̄ òbọbọkọ use ya echieekbe. ⁴⁰ Awaji îwuuk lek itọt inu ònwọnwọn ichit isun̄ iban eji. Nkeek Awaji ìre ke ọmọ ìkporọ ife cha ijot ire eji kpekup; ke îtata eji ekukup sabum ọmọ mônigbaan̄ eji melek kiban̄ irọ ijot mgbọ ge.

¹ Eya orọ, eyi ogbogbo ebi ata-ikọ ewabe ikana eji ikeyi, eji esan̄a otutuuk inu geelek òkigbugbana eji, mè ijo inu ya eyi òkigwat lek igugọbọ eji ikam me ikafiatge mgbọ, etọp efiin̄, mè ekat ejit elibi ekot yi òkup eji me isi ililibi. ² Eji eben chieen̄ kiji egwuun̄ me lek kè Jisọs, ogwu ichechieek kiji onan̄abe me ubọk, mè ogwu òkirọ ichechieek kiji ijot. Ọmọ îkat ejit ibọkọ ujaralek me inyọn̄ uti nkwurieen̄, ìkasa esip mkpa inyọn̄ uti nkwurieen̄ ìgwen inu geege, mije, îriọọn̄ ibe ke ọmọ môkaan̄ unwọọn̄ me mgburudun̄ mgbọ. Mgbọ îbọkọbe ujaralek ya isan̄a, ikukup irek me agan̄ ubọk ulom ogboon̄ ubọọn̄ eyi Awaji, ere îkupbe ire mgbọ keyi. ³ Ikachieek ibe lek kinyi iwọ, ikachieek si ibe efuuk ita enyi me emen. Ìkikeek ujaralek eyi Jisọs obọkọbe me ubọk ebi ijo ife, mè irọrọ ikeme eyi erọbe ikeme ọmọ. ⁴ Akọn̄ eyi enyi ekitim ikeme ijo inu, enyi kpetitim-nu ire lek eyi ekpan̄be enyi. ⁵ Ikawuuk ikọ ukarajit Awaji otumube inyi enyi kubọk bọn kan̄, ibe, “Gwun̄ n̄a, kamọnọ osusut eyi Okaan̄-ene okisulu owu kubọk inu ifit ifit, kachieek si ibe efuuk ita owu me emen mgbọ isikigana ere inyi owu. ⁶ Mije, ebi Okaan̄-ene omabe, ebiba ke îkinyi osusut, ebi geelek îbọkọbe itap kubọk bọn kan̄, ebiba ke îkisulu me njijan̄.” ⁷ Eya orọ, ìkikat ejit ìbọkọ ufialek chi geelek kubọk ìre osusut eyi ute okisulu ogwu gwun̄. Mije, ufialek chi enyi ekibọkọ ìkijeen̄ ibe ke Awaji ìkirọ enyi me lek kubọk ute okirọ melek ebi bọn. Ìkeek-nu, ìre kpasi gwun̄ okup, ogwu ogwu ute ìkakisulu me njijan̄? ⁸ Me atikọ, ire Awaji ìkasulu enyi njijan̄ kubọk îkisulu otutuuk ebi bọn, ìsibi ibe ke enyi kpere atata bọn; ke enyi ìre bọn ugan. ⁹ Ògak ge, ebi nte kiji me linyọn̄ keyi mîkisulu eji, eji ekekinyi ema ulibi si. Ire ikeya, ìre ìkafat ìgbe ibe eji esiki ibot egak ikeya enyi Awaji, òrere Nte kiji, ogwu òkaan̄ ekwukwu kiji, inyi eji egat ata ugwem? ¹⁰ Ebi nte kiji ebilene esulu eji sọntiik mgbidim mgbọ gaalek ubọk ema ekeekbe ibe ke îtat. Ire, Awaji ìkisulu eji, inyi inwọn inyi eji, inyi eji ekup me mbuban kubọk ọmọ okupbe me mbuban. ¹¹ Kpunu osusut geege òkitotop mgbọ ekisulu ene. Kpan̄asi ikeya, ìkinanaan̄ ene. Ire, me mgburudun̄ mgbọ, ebi geelek ìkwekween̄ inu inan̄a me lek osusut cha mîkikaan̄ mkpukpe eyi ugwem ata irọrọ, mè esuuk. ¹² Eya orọ, inyana ubọk kinyi cha òwọwọ ìsa ìtet inu, mè ìnyana akpatukot kinyi cha òmemem ìsa ìjak ukot me ijọn̄. ¹³ Ìkije me oniin̄ òtatat, inyi ukot òwọwọ inye, mè ikakana akọọk. ¹⁴ Ubọk geelek enyi eriọọn̄be, ìmun̄ ibe ke enyi mîluk me esuuk melek otutuuk ene, mè ikup me mbuban. Mije, ire ene ìkakup me mbuban, ìkpomun̄ Okaan̄-ene. ¹⁵ Ìmun̄ ibe ke otutuuk ene mîbọkọ atata nnwọn Awaji iso. Ìmun̄ si ibe ke ene geege me etete kinyi ìkakana ujat mfut eyi òbotibi isibi, mè inisa ujat kan̄ itap ufialek, mè irọ inyi owuwa ene ekatana me isi Awaji. ¹⁶ Ìmun̄ ibe ke kpunu ene geege òrere barabat; ke kpunu si ene geege ikariọọn̄ge Awaji, kubọk Isọ ogwu òsasa irek adasi gwun̄ enerieen̄ eyi ọmọ orebe inwene alala inorie ge gaalek. ¹⁷ Kubọk enyi eriọọn̄be, me mgburudun̄, mgbọ ọmọ obonibọkọ ugbana me ubọk ogwu ute, ogwu ute îjit igbagbana ọmọ. Ọmọ ototo ito iweek ugbana ya, ire, ìkakọt inwene ejit ogwu ute. ¹⁸ Ìkare inu eyi mêkọtbe ichak ubọk me lek ke enyi eje igba me lek, kubọk ebi Ijeren ejebe isi ikeke me agba ogoon̄ Saina eyi ukan̄ okisook isibi me inyọn̄, udun okakana ichit bùk, urimi oninin̄, egwijo okekijibi, ¹⁹ ida odu okekitaan̄, ida ge okekitumu ikọ. Mgbọ ebi Ijeren cha enọbe ida ya, ema erariaak ibe, soso, mè ida ya ikayaka ìtumu ikọ inyi ema, ²⁰ mije, ke ema kpebekọt ibeme ikan eyi ida ya okinyi ibe, “Ìrere anam ikike ochak lek me lek ogoon̄ ya, esa ewuuk etọbọ ekpan̄!” ²¹ Inu ema emun̄be me ere ya îtet ema ukpook enenen ire lek Mosis me lek kan̄ otumube ibe, “Ǹkiraran mije ukpook.” ²² Ìkare òjelek ogoon̄ Saina ya ke enyi enu me lek. Kpan̄asi ikeya, enyi enu me lek ogoon̄ Sayọn, òrere Jeruselem eyi òkup me emen inyọn̄, ama Awaji òkup me ugwem, ere obop obop ebi osat ekariọọn̄ge otu ifuk egbaan̄be ititiin̄ ikirie ijọk. ²³ Enyi enu me emen ebi adasi bọn eyi Awaji, ebi egebe erieen̄ kiban̄ itap me ikpa me emen inyọn̄. Enyi enu me lek Awaji ogwu òkifieek oyerebet inyi otutuuk ebi ene, mè inu si me lek ekwukwu ebi ata irọrọ, ebi Awaji orọbe ijot. ²⁴ Enyi enu me lek kè Jisọs ogwu ayaya inyan̄a-ibot ojebe me ubọk inu. Enyi enu si me lek eje ya eyi enyanbe, eyi òkitumu ikọ òfolek inu ònwọnwọn igak inu eje kè Eben otumube ikọ òfolek, eyi òrere irọrọ useen̄ inu erọbe ọmọ. ²⁵ Eya orọ, ìmun̄ ibe ke enyi kpejit ogwu òkitumu ikọ ya inyi enyi. Ire ebi Ijeren kpenwọnọ mgbọ ema ejitbe igbagban̄ utọn̄ inyi ogwu òtataba ema ubọk me utọn̄ me linyọn̄ keyi, ìre enyi ekikeek ibe ke eji mêkọt inwọnọ, ire eji ijit igbagban̄ utọn̄ inyi ogwu ònan̄a me emen inyọn̄ initaba eji ubọk me utọn̄? ²⁶ Me mgbọ ya, ida kan̄ îsisik ijọn̄. Ire, me mgbọ keyi, ọmọ îra ichieek use ibe, “Ofifi mgbọ, ìkare linyọn̄ gaalek ke mâsisik, mâsisik emen inyọn̄ si igbaalek.” ²⁷ Usem ya îtumube ibe, “Ofifi mgbọ,” ìsibi ibe ke mêsan̄a inu mêkọtbe isisik isan̄a, òrere inu echi erorom, inyi echi kpekọtbe isisik ibia. ²⁸ Eya orọ, mije eji ekibọkọ mkpulu eyi kpekọtbe isisik, eji etọn̄ Awaji, mè etọbọ ebum enyi ọmọ me oniin̄ òkibele ọmọ ejit, mè enyi ọmọ umin, mè etet ukpook me lek kan̄. ²⁹ Mije, Awaji kiji ìre ukan̄ òkitaka inu geelek iriọk.

¹ Ìkimun̄ lek kinyi me chieen̄ kubọk ngwan̄ mè ngwan̄, mije, enyi ìre bọn Ute ge. ² Ikawuuk ikekibọkọ ebi ichen itap, mije, usini ene mîsa me ikeya iriak ebi osat Awaji ichen me ekariọọn̄ge. ³ Ìkikeek ebi ìkup me mkpọn kubọk ìre enyi melek kiban̄ ekup me mkpọn. Ìkikeek si ebi ekitutuku kubọk ìre enyi melek kiban̄ ekigbaan̄ imun̄ ufialek. ⁴ Otutuuk ene ekenyi irek obat-olom umin. Ene geege ikafifala inyọn̄ mkpilaak olom mè nwa, mije, Awaji môsibi oyerebet me ibot ebi ugan-nwa, mè ebi barabat geelek. ⁵ Ìsan̄a lek kinyi me lek ulọk ebek ikpoko, mè ìtele inyi inu enyi ekaan̄be ijot enyi chieen̄. Mije Awaji îtumu ibe, “Emi m̀kpatele enyi kubọk ge, m̀kpasan̄a si enyi ubọk me lek.” ⁶ Eya orọ eji ekinye ejit itumu ibe, “Okaan̄-ene ore ogwu òkitap ubọk inyi emi, ukpook ìkpotet emi! Ìre keke ke ene obokọt irọ emi?” ⁷ Ìkikeek ebi ibot kinyi cha, ebi ìtutumu ikọ Awaji inyi enyi. Ìkeek ata inu ònanan̄a me ugwem kiban̄ isibi, mè ìkaan̄ òjelek ichechieek ema ekaan̄be. ⁸ Jisọs Karais ìkakinwene, ubọk îkupbe me iyakwut ke îkup me cherekeyi, môkup si ikeya ire mgbọ ikakaan̄ge itata. ⁹ Ikagọọk uyeke uyeke ijejeen̄ geelek, mè ìje ìlọ oniin̄. Mije, îre atata nnwọn Awaji okirọ inyi ejit kiji ikeke inye, ìkare mfaka eyi ikan inorie, eyi ikakaan̄ge oruru geege ìnyi ebi ìkisusun̄. ¹⁰ Ntook ngwugwa eyi eji ekaan̄be, ebi ngwugwa ebi Ju ìkisi ikwaan̄ me emen uwu mbuban eyi ikpa anam kpekaan̄ unye imọmọnọ inu me inyọn̄ irie. ¹¹ Ogwu ibot ebi ibot ngwugwa ebi Ju ìkiben eje anam me ubọk isa itibi iraka inin̄ Ere Òkup Mbuban Ichit isi igwa ngwugwa mije ijo inu otutuuk ebi ene, ire, mîra ikisa akpalek anam cha isibi udun̄ ama isi iwọp. ¹² Ikeya si ke Jisọs Karais omun̄ ufialek, mè ikwu mkpa me udun̄ otunchit ama Jeruselem, inyi ọmọ isa eje kan̄ igwọk ijo ebilene isan̄a, inyi ema ekup me mbuban. ¹³ Eya orọ, eji enesibi egọọk ọmọ me udun̄ ama, mè ebọkọ si òjelek esip eyi ọmọ obọkọbe. ¹⁴ Mije, eji kpekaan̄ ama geege me linyọn̄ keyi ere eji ebekọt iluk ire mgbọ ikakaan̄ge itata. Eji ekiweek ama ya eyi òbonunu me isi. ¹⁵ Eya orọ, sa me lek kè Jisọs, eji ekesa otu kiji etọn̄ Awaji mgbọ geelek kubọk ìre ngwugwa ke eji ekigwa inyi ọmọ. Eyi môre mfut ònan̄a me otu ebi ìkitumu erieen̄ kan̄ isibi. ¹⁶ Ikawuuk ikekirọ ata inu, mè ikekiche inu inyi ebi ekakaan̄ge. Mije, îre ngwugwa òkup ikeyi okibele Awaji ejit. ¹⁷ Ìkisiki ibot ìnyi ebi ibot kinyi, mè ìkirọ inu ema ekitumu inyi enyi. Îre ema ekikpọ chieen̄ me lek kinyi, mije, ema mêrọ ifuk òfolek kinyi inyi Awaji. Ìkigban̄ utọn̄ ìnyi ema, inyi ema ekesa ubelejit esi ikwaan̄ kiban̄, mè ikwaan̄ ya ikakana ufialek ìnyi ema. Mije, eya ìkposibi oruru geege inyi enyi. ¹⁸ Ìkiriaak uriaak ìnyi eji mgbọ geelek. Inu eji eriọọn̄be ìre ke ejit kiji ìkafieek eji ikọ, mije, eji ekiweek irọrọ inu òtatat me mgbọ geelek. ¹⁹ Ògak ge, ǹkibeek ibe enyi otutuuk ene eriaak Awaji me ibot n̄a, inyi ǹgwat lek ǹkaan̄ irek ǹgwu ǹkom ǹnu me lek kinyi. ²⁰ Awaji ogwu ibot esuuk îjomo Okaan̄-ene Jisọs, òrere ikpele Ogwu Òkpukpo Arọọn̄ ya, me mkpa, sa me lek eje eyi inyan̄a-ibot òkukup ire mgbọ ikakaan̄ge itata. ²¹ Awaji ogwu ibot esuuk yi inyi enyi otutuuk ata inu geelek enyi mêweekbe isasa ikọt irọ inu ọmọ okiweek. Awaji irọ inu òneme ọmọ me emen kiji, sa me lek kè Jisọs Karais, ogwu itọn̄ okupbe inyi ire mgbọ ikakaan̄ge itata. Ikup ikeya! ²² Bọn Nte n̄a, nriaak enyi, soso, ìkat ejit ìbọkọ nteme n̄a, mije, ikpa keyi ngebe ijet enyi ìkajọn̄ọ. ²³ Ǹkiweek irọrọ inyi enyi eriọọn̄ ibe ke mîsan̄a gwun̄ Nte kiji Timọti isibi me mkpọn. Ire igwat lek inu, mâsa ọmọ igbaalek inu inimun̄ enyi. ²⁴ Ìtọp otutuuk ebi ibot kinyi, mè otutuuk ebi eyi Awaji amọn ìnyi emi. Bọn Nte kiji ebi ìnan̄a me Itali si mîtọp enyi amọn. ²⁵ Atata nnwọn eyi Awaji ikup melek kinyi otutuuk ene! Ikup ikeya!