Ebi Galesia
11 Emi Pọọlu, ogwu otuchieen̄ kè Jisọs Karais nge ikpa etip yi. Ìkare ebilene eria emi ikwaan̄ otuchieen̄ yi, ìkarere si ebilene egwen emi itap me lek ikwaan̄ yi. Îre Jisọs Karais me lek kan̄ melek Awaji Ute ogwu òjojomo Jisọs me mkpa egwen emi iria ikwaan̄ yi. 2 Emi melek otutuuk bọn Nte ebi melek n̄a ekupbe ege ikpa etip yi ijet enyi ebi ntitiin̄ Awaji ìkup me agan̄ Galesia. 3 Atata nnwọn mè esuuk eyi Awaji Ute, mè Okaan̄-ene Jisọs Karais ikup melek kinyi! 4 Jisọs Karais ore ogwu òsasa ugwem kan̄ inyi ibe esa egwa ngwugwa mije ijo inu kiji, inyi ọmọ isa me ikeya itaba eji isibi me emen ugwem eyi ijo linyọn̄ keyi, ubọk Awaji ogwu òrere Nte kiji oweekbe. 5 Itọn̄ ikup inyi Awaji ire mgbọ ikakaan̄ge itata! Ikup ikeya! 6 Îke emi chieen̄ enenen ike enyi esabe igwat lek iyaak itele Awaji ogwu òsasa me atata nnwọn kè Karais igwen enyi itap me lek kan̄, mè ikana ikigọọk ofifi etip eyi enyi ekikeek ibe ìre ata etip. 7 Me atikọ, etip ya ìkare ata etip kubọk ge. Ǹkitumu ikọ yi, mije, îkaan̄ ebi ìkiwuwọlọ enyi ibot, mè ikiweek si iwuwuwọlọ ata etip kè Karais. 8 Ire, eji ekitumu inyi enyi ibe, ìrere eji me lek kiji, mè ìyaka ire ogwu osat onan̄a me emen inyọn̄ inu, inilook enyi ofifi ata etip inwene me lek eyi eji elookbe enyi me adasi ya, unaan̄-ejit Awaji ikeme ene ya ire mgbọ ikakaan̄ge itata. 9 Eya orọ, ubọk eji ewuukbe lek itumu, ikeya si ke nkitumu mgbọ keyi. Ire ikaan̄ ogwu inu inilook enyi ofifi ata etip inwene me lek eyi enyi ewuwuuk lek ibọkọ itap, unaan̄-ejit Awaji ikeme ene ya ire mgbọ ikakaan̄ge itata. 10 Me emen ikọ yi ntumube, ìre enyi ekikeek ibe ke ìre ebi owa ke nkiweek irọrọ inyi ejit ibele? Ìre ebilene, sa ìre Awaji? Mebe ìre ebilene ke nkiweek irọrọ inyi ejit ibele, emi kpamakana ogwu ikwaan̄ inyi Karais. 11 Bọn Nte n̄a, ǹkiweek ibe enyi eriọọn̄ ibe ke ìkare ubọk ebilene ke ata etip eyi nlookbe enyi onan̄a. 12 Ǹkabọkọ me ubọk ene geege, ǹkakwekween̄ si ìnan̄a me ubọk ene geege. Îre Jisọs Karais me lek kan̄ ochili ata etip yi inyi emi. 13 Nkeek ibe ke enyi mînọ ukpatu òfolek ubọk nlukbe ugwem n̄a me mgbọ òraraka igọọk me ubọk ebi Ju ekiriaak Awaji, mè ubọk nsabe isisaak ebi ntitiin̄ Awaji uyọt uyọt, mè ikiweek ijijijaka ntitiin̄ Awaji, inyi ichep. 14 Me etete otutuuk ebi Ju ebi ìrere ogbo n̄a, emi me otu ifuk ebi ìjeje ijọn̄ọ ere ichit me igọgọọk ọrọmijọn̄ ebi Ju. Emi ǹsasa otutuuk ugwem n̄a inyi ọrọmijọn̄ ebi nte nte kiji. 15 Ire, Awaji îwuuk lek igobo emi sabum enimaman emi, mè isa me atata nnwọn kan̄ igwen emi inyi lek kan̄, 16 mè isa me ubelejit kan̄ ichili Gwun̄ kan̄ ijeen̄ emi, inyi ǹsa ata etip òfolek kan̄ ǹsi ǹlook ebi ekarege ebi Ju. Mgbọ Awaji oriabe emi ikwaan̄ yi, ǹkasa ikọ yi ìsi ìkpa melek ebilene geege. 17 Ǹkaje si isi Jeruselem ìsi ìmun̄ ebi ìdadasi ire ebi otuchieen̄ kè Karais me isi n̄a. Kpan̄asi ikeya, ǹnanan̄a mgbọ yaage ije isi agan̄ Arebia. Sọnja mgbọ iraraka, ngwugwu ikom ika inu ama Damasikọs. 18 Mgbọ acha ita orakabe, nnenisi Jeruselem inyi ǹsi ǹriọọn̄ Pita, mè igọọk ọmọ ikup akọp mè usen go. 19 Ìkakaan̄ ofifi ogwu otuchieen̄ geege mmun̄be, îtata Jemis ngwan̄ Okaan̄-ene gaalek. 20 Ǹkitumu inyi enyi me isi Awaji ibe ke otutuuk inu chi ngebe ijet enyi ìre atikọ, kpunu ataak geege me emen. 21 Sọnja mgbọ iraraka, nneninan̄a isi agan̄ Siria mè agan̄ Silisia. 22 Mege inire ike mgbọ ya, otutuuk ntitiin̄ kè Karais òkup me agan̄ Judia kperiọọn̄ ogwu nrebe. 23 Etip gaalek ke ema ekinọ ibe ke ogwu mgbọ òkisisaak ema ya ìyaka inikilook ata etip òfolek ichechieek ya eyi mgbọ îweekbe ibe ichep. 24 Ema enenibene ikitọn̄ Awaji mije inu îrọbe me ugwem n̄a.
21 Akọp mè acha ini iraraka, nnenikpọk isi Jeruselem, emi melek Banabas. Nsa Taitọs si igbaalek isi. 2 Ǹsi Jeruselem ya, mije, Awaji ojeen̄ emi ibe emi ǹsi. Mgbọ nrebe, nnenichichini melek ebi ibot ntitiin̄ Awaji gaalek me ere ònọnọọn̄, mè inikpa ata etip nlookbe ebi ekarege ebi Ju ijeen̄ ema, inyi ema enọ, mè eriọọn̄ inu njeen̄be. Ǹrọ ikeyi, mije, ǹkaweek ibe otutuuk ikwaan̄ nsibe, mè echi nkisi me mgbọ keyi ikana inu ikike. 3 Ubọk geelek Taitọs ogwu melek n̄a ejebe ikarege ogwu Ju, ema kpetet ọmọ ibe inifieek afi. 4 Ire, ubọk geelek si, mîgwen ikọ yi isibi me emen ntitiin̄ ya, mije, îkaan̄ usini ene ebi ìnwenween̄ lek ikup me emen ntitiin̄ Awaji ya, ire, kpere bọn Nte. Ife chi enin̄ ntitiin̄ yi me nlelet, mè ifiaan̄ ikirọ kubọk ema ìre bọn Nte, inyi ema enekpọ utelelek eyi eji ekaan̄be me emen kè Karais. Ema ekiweek ibe eji ekpọkpọ ebia me irak Ikan kè Mosis melek ọrọmijọn̄ ebi Ju kubọk ebi usun̄. 5 Ire, eji kpechieek inyi ema kubọk mgbọ ge, inyi eji ekọt esun̄ ojot ojot atikọ òkup me emen ata etip enyi enyi ebi ekarege ebi Ju, me wọlọwọlọ geege ikanin̄ge me emen. 6 Ire me lek ebi ìkup kubọk ebi isi cha, ǹkamun̄ esese inu geege òkup me etete kiban̄ mè ebi ofifi ife, mije, Awaji ìkakikpọ inu ene orebe me akpalek. Mgbọ mkpabe otutuuk ata etip ya eyi nkilook ijeen̄ ema, kpunu ayaya inu geege ema etapbe isọkọ me lek. 7 Kpan̄asi ikeya, ema enenimun̄ ibe ke Awaji îgwen emi me atikọ iria ibe ǹsa ata etip ǹsi ǹlook ebi ekarege ebi Ju kubọk îgwenbe Pita iria ibe ilook ebi Ju ata etip. 8 Mije, ema mîmun̄ ibe ke ìre Awaji ya ogwu ònyinyi Pita unye ibe ire ogwu otuchieen̄ kè Karais me etete ebi Ju, onyi si emi unye ibe emi ǹre ogwu otuchieen̄ kè Karais me etete ebi ekarege ebi Ju. 9 Jemis, mè Pita, mè Jọn, ebi bọn Nte ekimọnọ kubọk ebi ibot me etete kiban̄ enenimun̄ ibe ke Awaji îsa me atata nnwọn kan̄ inyi emi ikwaan̄ yi me atikọ. Mije keyi, ema enyinyi emi melek Banabas ubọk isasa ijeen̄ ibe ke eji melek kiban̄ ekigbaan̄ ubọk isi ikwaan̄ yaage. Ema enenichieek ibe mè eji esi elook ata etip me etete ebi ekarege ebi Ju, mè ema si esi elook ata etip yaage me etete ebi Ju. 10 Inu ge gaalek ema ebe eji erọ ìre mè eji ekawuuk itatap ubọk inyi ebi ugbọọn̄ me emen ntitiin̄ kiban̄ me Jeruselem. Inu yi si ìre inu nkiweweek irọrọ. 11 Me ike mgbọ ge Pita onube Antiọk, ngana ikọ inyi ọmọ me isi otutuuk ebi ìchechieek, mije îrọbe inu ikatatge. 12 Me mgbọ Pita onube Antiọk ayaya, ìkigọọk bọn Nte ebi ekarege ebi Ju igbaan̄ irie inorie. Ire, mgbọ yaage ebi ikwaan̄ Jemis oriabe inu erebe Antiọk, Pita otataba lek isan̄a me etete ife cha, mè ijit iyayaka igọọk ebi ife cha igbaan̄ irie inorie, mije ukpook îkaan̄be me lek ebi ìkibe ke ebi ekarege ebi Ju geelek ìchechieek me lek kè Karais mêfieek afi. 13 Ikeya si ke bọn Nte ebi Ju ìkup me ere ya egọọk si Pita irọ inu isi iba ya. Ìrere Banabas me lek kan̄, ife chi mîrọ inyi igọọk ema ikaan̄ ijo ugwem ebi isi iba ya. 14 Me mgbọ mmun̄be ema ekiluk ugwem ya eyi ikatatge me lek atikọ eyi ata etip okijeen̄, ntutumu inyi Pita me isi otutuuk kiban̄ ibe, “Kpọ, me atikọ, owu ìre ogwu Ju. Ire, owu òkirọ inu kubọk ogwu ikarege ogwu Ju. Ire owu ogwu Ju òkarọ inu kubọk ogwu Ju, owu òjeje inikisa me unye ubọk itet ebi ekarege ebi Ju ibe ekerọ ọrọmijọn̄ ebi Ju?” 15 Me atikọ, eji ìre ebi Ju inan̄a me iman kiji. Eji kpere ebi ofifi ido ìkirọ ijo inu. 16 Me mgbọ keyi, eji ebi Ju mîra iniriọọn̄ ibe ke ene ìkakikana ata ene me isi Awaji sa me lek isusun̄ Ikan kè Mosis. Eji mîra iniriọọn̄ ibe ke ìre nan̄a me ichechieek me lek kè Jisọs Karais gaalek ke ene obosa ikana ata ene me isi Awaji. Mije keya, eji ebi Ju si mîgọọk ichieek me lek kè Jisọs Karais, inyi eji esa me lek ichechieek eji echieekbe me lek kè Karais ekana ata ife me isi Awaji. Ìkare mije isusun̄ Ikan kè Mosis. Mije, kpunu ene geege òkikana ata ene me isi Awaji inan̄a me isusun̄ Ikan kè Mosis. 17 Kubọk mgbọ keyi, eji mêkiweek ikakana ebi ata ife me isi Awaji inan̄a me lek ichechieek me lek kè Karais. Ire inisibi utoon̄ ibe, mije eji kpeyaka ikisun̄ Ikan kè Mosis, ke eji ekpọkpọ ibia me emen ijo inu kiji me isi Awaji, ìre eya ìsibi ibe ke Karais ìbe mè eji ekerọ ijo inu? Ìkasibi ikeya kubọk ge, mije, Karais ìkpokọt irọ inyi ene irọ ijo inu. 18 Ire, ire emi njit Ikan kè Mosis, mije ìkakirọ ene ikana ata ene me isi Awaji, mè iyaka inigwu ikom ifo lek Ikan ya isi ikpọk ibene ikisun̄, me atikọ, emi ìre ogwu òfiat Ikan. 19 Îre nan̄a me lek Ikan cha ke nsa iriọọn̄ ibe ke emi ǹkwukwu isan̄a mije nkakọtge ìsun̄ otutuuk Ikan cha. Mije keya ke njit iyayaka itoon̄ ejit me lek Ikan cha, inyi ǹkọt ǹluk ugwem ǹnyi Awaji. 20 Mîgbaan̄ emi melek Karais igon ikpan̄ me inyọn̄ uti nkwurieen̄. Eya orọ, emi ǹkayaka ìkup me ugwem. Îre Karais okiluk ugwem me emen n̄a. Ugwem eyi nkiluk me linyọn̄ me mgbọ keyi, ǹkiluk nan̄a me lek nchieekbe me lek Gwun̄ Awaji, ogwu òmumun̄ emi me chieen̄, mè isa ugwem kan̄ igwa ngwugwa me ibot n̄a. 21 Emi m̀kpajit atata nnwọn eyi Awaji kubọk ge, mije, ire isusun̄ Ikan kè Mosis môkọt irọ inyi ene ikana ogwu ata irọrọ me isi Awaji, ìsibi ibe ke mkpa Karais okwube ìre inu ikike.
31 Îyak, enyi burubut ebi Galesia kechi! Ìre ekene orom enyi ikeyi? Ìre ìkare enyi kechi ke ekpa otutuuk inu ijeen̄ ike esabe igon Jisọs Karais ikpan̄ me inyọn̄ uti nkwurieen̄? 2 Inu ge gaalek ke emi mweek me otu kinyi! Mgbọ enyi ebọkọbe Ekwukwu eyi Awaji, ìre enyi ebọkọ Ekwukwu ya sa me isusun̄ Ikan kè Mosis, sa ìre sa me ichechieek me lek ikọ Awaji eyi etumube inyi enyi? 3 Ìre enyi ejeje ibubut ikeyi? Mgbọ enyi ebenebe, enyi esa Ekwukwu eyi Awaji itoon̄ ejit. Ìre keke orọ mè enyi etele Ekwukwu Awaji ya, mè eyaka enetoon̄ ejit me lek unye kinyi gaalek me mgburudun̄ mgbọ? 4 Ìre enyi ekimọnọ ibe ke otutuuk ikpele inu cha enyi ejebe itibi ìre me ikike? Me atikọ, ìkare me ikike! 5 Ekwukwu Awaji ogwu Awaji okinyi enyi mè ikpele uyeke inu eyi Awaji okirọ me emen kinyi, ìre ìnan̄a mije Ikan kè Mosis echi enyi ekisun̄, sa ìre mije ata etip eyi enyi enọbe, mè ichieek me lek? 6 Ìkpọ-nu Ebereham! Ege me Ikpa Mbuban ibe ke Ebereham îchieek ikọ Okumugwem otumube inyi ọmọ. Okumugwem osasa mije ichechieek ya ifuk Ebereham kubọk ogwu ata irọrọ me isi kan̄. 7 Eya orọ, ìriọọn̄ ibe ke ebi ìkakaan̄ ichechieek keyi ere bọn kè Ebereham me atikọ. 8 Sa me unye eyi Awaji, ebi ìgege Ikpa Mbuban me ukot ikaan̄ mîmọọn̄ itibi ibe ke Awaji môsa me ichechieek irọ inyi ebi ekarege ebi Ju ekana ebi ata irọrọ me isi kan̄. Mije keya ke Awaji otumu inyi Ebereham ibe, “Îre nan̄a me lek kwun̄ ke mâgbana otutuuk ido geelek.” 9 Eya orọ, ike Awaji ogbanabe Ebereham mije îchieekbe me lek ikọ kan̄, ikeya si Awaji môgbana ene geelek òchechieek me lek ikọ kan̄. 10 Ire, Awaji îfieek otu inyi ebi geelek ìkitoon̄ ejit ibe ke isusun̄ Ikan kè Mosis môrọ inyi ema ekana ebi ata irọrọ me isi Awaji. Mije, ege me Ikpa Mbuban ibe, “Awaji îfieek otu inyi ene geelek ogwu ìkakisun̄ otutuuk Ikan geelek egebe me emen ikpa Ikan kè Mosis ìso mgbọ geelek.” 11 Ikeya si, îbook otutuuk ene chieen̄ ibe ke kpunu ene geege òbokana ogwu ata ene me isi Awaji sa me isusun̄ Ikan kè Mosis, mije, ege me emen Ikpa Mbuban ibe, “Ogwu òsasa me ichechieek ikana ogwu ata irọrọ, ene ya môluk ugwem.” 12 Ire, isusun̄ Ikan ìkabieen̄ me lek ikakaan̄ ichechieek. Kpan̄asi ikeya, ege me emen Ikpa Mbuban ibe, “Ogwu òkirọ inu Ikan otumube môluk si ugwem igọọk me lek Ikan.” 13 Ikan îbọp eji, mije, eji kpekọt irọ otutuuk Ikan iso. Ire, Karais îsa lek kan̄ ibọkọ ufieek-otu ya me ibot kiji. Sa me ikeya, Karais îfaka eji isibi me emen ufieek-otu eyi Ikan. Mije, ege me Ikpa Mbuban ibe, “Awaji îfieek otu inyi ene geelek ejeen̄be me otu ọfọkọ.” 14 Jisọs Karais ìfaka eji isibi, inyi, sa me lek kan̄, ugbana eyi Awaji ogbanabe Ebereham ire lek ebi ekarege ebi Ju, mè eji esa me ichechieek ebọkọ Ekwukwu Mbuban eyi Awaji ochieekbe use inyinyi ebi kan̄. 15 Bọn Nte n̄a, mâsa inu òkirọ me ugwem keyi usen geelek ijeen̄ enyi inu. Inu geelek ebilene egbaan̄be ichieek me lek, mè igbaan̄ inyan̄a ibot me lek, kpunu ene geege òbokọt igwak, kpunu si ene geege òbokọkọt itap inu isọkọ me lek. 16 Ubọk yaage si ke îkup me lek use keyi. Awaji îchieek use, mè inyan̄a ibot inyi Ebereham mè mfut owot iman kan̄. Ikpa Mbuban ìkatumu ikọ ìbak owuwa mfut, òrere owuwa bọn owot iman. Ìtumu ikọ ibak mfut ge, eyi òrere gwun̄ owot iman ge gaalek. Gwun̄ owot iman ge kè Ebereham ya ìre Jisọs Karais. 17 Ibot ikọ n̄a ìre ikeyi: Awaji ìdasi inyan̄a ibot inyi Ebereham me ukot ikaan̄. Efit acha ini mè akọp ita îraka me lek, sabum Awaji oninyi ebi Ju Ikan kan̄. Ikan chi ònunu me mgburudun̄ ìkpokọt inigwak inyan̄a-ibot eyi Awaji onyan̄abe inyi Ebereham. Ìkpokọt si ifiat use ya eyi Awaji ochieekbe Ebereham. 18 Ire Awaji ikinyi ene irot ya sa me isusun̄ Ikan kè Mosis, ìsibi ibe ke ìkayaka ìre me use ke ekisa ikaan̄ irot ya. Ire, Awaji ìche irot ya inyi Ebereham me ikike inan̄a me lek use îchieekbe Ebereham. 19 Ire ikeya me atikọ, ìre Awaji ìbak me lek keke inyi Ikan cha? Awaji ìnyi Ikan cha inigbaalek inyan̄a-ibot kan̄, inyi ebi ene esa eriọọn̄ inu nrọ-nlọ orebe. Ikan cha ìkpulu eji me sọntiik mgbidim mgbọ gaalek inire mgbọ Gwun̄ Owot Iman kè Ebereham ya, ogwu Awaji ochieekbe me use onube. Îre ebi osat Awaji esa Ikan ya inu. Ene ge onenikup kubọk ogwu nteek me etete Awaji melek ebilene, mè ibọkọ Ikan cha me ubọk ebi osat cha isa inyi ebilene. 20 Ogwu nteek ìkikup me ere agan̄ iba ekirọ inu. Ere ene ge gaalek okirọ inu, eya ìkado ogwu nteek geege. Îre Awaji gaalek me lek kan̄ ochieek Ebereham use ya, ìkaweek ogwu nteek geege. 21 Ire ikeya, ìre Ikan kè Mosis îje ikeme use eyi Awaji ochieekbe? Ìkaje ìkeme kubọk ge! Mije, mebe ke îkaan̄ Ikan eyi môkọtbe inyi ene ugwem ikakaan̄ge itata, eya monijeen̄ ibe ke Ikan kè Mosis môkọt irọ inyi ene ikana ogwu ata irọrọ. Ire, kpunu òjelek Ikan òkup ikeya. 22 Kpan̄asi ikeya, ege me Ikpa Mbuban ibe ke ìre unye eyi ijo inu okikpulu otutuuk ebilene me linyọn̄. Îre ebi ìkakaan̄ ichechieek gaalek ebebọkọ use eyi Awaji ochieekbe inyinyi ebi ìchechieek me lek kè Jisọs Karais. 23 Me adasi mgbọ, sabum mgbọ ebi ene enibene ikichieek me lek kè Jisọs Karais, Ikan ìtetet otutuuk kiji itap me mkpọn, mè igon isotu ikwek eji. Eji ekukup me mkpọn ya mege inire mgbọ Jisọs Karais onube, eji enenibene ikichieek me lek kan̄. 24 Sa me ikeya, Ikan ìyaka inikup kubọk ogwu òkijeen̄ eji inu mege inire mgbọ Karais onube. Mgbọ keyi Karais onube, ene geelek òchechieek me lek kan̄ môkana ata ene me isi Awaji. 25 Mgbọ keyi irek osibibe inyi eji ekọt echieek me lek kè Karais, Ikan ìkpoyaka ire ogwu òkijeen̄ eji inu ofifi. 26 Enyi otutuuk ebi ìchechieek me lek kè Jisọs Karais, enyi ìre bọn Awaji inan̄a me lek ichechieek kinyi. 27 Otutuuk kinyi ebi ìgwogwook mun̄, mè isa me ikeya igọọk Karais igbaan̄ ire ge, enyi mîra itap ọrọmijọn̄ kè Karais kubọk ọfọnti. 28 Eya orọ, me etete kinyi, kpunu esese inu òkukup me etete ebi Ju mè ebi ekarege ebi Ju, mè ebi usun̄ mè ebi ekarege ebi usun̄, mè ebirieen̄ mè ebibaan̄. Otutuuk kinyi mîgbaan̄ ire ge me emen kè Jisọs Karais. 29 Eya orọ, ire enyi ire ebi eyi Karais, enyi ìre bọn owot iman kè Ebereham me atikọ. Enyi si mêrie irot ya eyi Awaji ochieekbe use inyinyi Ebereham.
41 Ibot ikọ n̄a ìre ikeyi: Mgbọ gwun̄ òbobọkọ inu ubọọn̄ ogwu ute me irot orebe sọntiik, ubọk geelek îrebe ọmọ okaan̄ otutuuk inu geelek ogwu ute okaan̄be, ọmọ melek ogwu usun̄ ìre ìkike. 2 Ebi ofifi ife ebekikpọ ọmọ chieen̄ me lek, mè ikikpọ si chieen̄ me lek inu ubọọn̄ kan̄ cha mege ire mgbọ ogwu ute osun̄be inyi ọmọ. 3 Ikeya si ke îkup me lek kiji. Me adasi mgbọ, mgbọ eji ekupbe kubọk nsabọn ekagoboge inu geege ìtet, eji ekup kubọk usun̄ inyi asabọn inu òkup kubọk ikan mè ọrọmijọn̄ cha, òfolek ubọk iriaak Awaji, echi ònan̄a me linyọn̄ keyi. 4 Ire, me mgbọ mgbọ okembe, Awaji oneniria Gwun̄ kan̄ inu me linyọn̄. Enenwaan̄ oman ọmọ, ineniluk si ugwem me irak Ikan kè Mosis, mije ọmọ orebe ogwu Ju. 5 Awaji ìria Gwun̄ kan̄ yi inu ibe inifaka ebi ìkup me irak ubọk Ikan isibi, inyi otutuuk kiji enekana bọn Awaji. 6 Mije enyi erebe bọn Awaji ke Awaji oria Ekwukwu eyi Gwun̄ kan̄ initap eji me ejit. Ekwukwu ya okikup me emen kiji ikitaan̄ ukpo igwen Awaji, “Papa! Nte n̄a!” 7 Eya orọ, owu òkayaka ìre usun̄ ofifi. Ire, owu ìre gwun̄ owot. Mije owu orebe gwun̄ Awaji, Awaji îmọnọ owu isa irọ gwun̄ kan̄ ogwu môgọọkbe ikaan̄ uche me lek irot eyi îsun̄be inyi bọn kan̄. 8 Me mgbọ òraraka, mgbọ enyi ekariọọn̄ge Awaji, enyi ekup me usun̄ inyi inu ikarege Awaji cha echi enyi ekitọbọ ebum inyi. 9 Ire, me mgbọ keyi enyi eriọọn̄be Awaji, eyi Awaji oriọọn̄be enyi kubọk bọn kan̄, ìre keke orọ mè enyi eyaka ekegwu ekom efo lek ten̄eten̄e ijo erumun̄ cha òkup njijin njijin, kpekaan̄ unye mè efuuk geege me emen? Ìre enyi ekiweek ikpọkpọk isi inin̄ usun̄ inyi inu cha? 10 Enyi ejeje ikimin usini usen, mè aya onyan̄, mè acha, mè ibot mgbọ, kubọk inu òsibi esese? 11 Ukpook îtet emi me lek kinyi! Ìkikup emi me lek kubọk otutuuk ikwaan̄ nsibe me etete kinyi mônikana inu ikike. 12 Bọn Nte n̄a, soso, nriaak enyi, ìkup kubọk emi nkupbe, mije, emi ǹkup si kubọk enyi ekupbe. Enyi kperọ emi ijo inu geege. 13 Kubọk enyi eriọọn̄be, adasi mgbọ nnube inilook enyi ata etip, îre mije lek n̄a ikanyege ke ngọọk enyi ikup, mè ikilook enyi ata etip ya. 14 Ubọk geelek orukan̄ n̄a ya oyaka inikana itọtọ-ikpọ inyi enyi me mgbọ ya, enyi kpejit emi, kpekpọ si emi chieen̄ isiki. Kpan̄asi ikeya, enyi ebọkọ emi itap kubọk ogwu osat Awaji, mè ibọkọ si emi itap kubọk emi ìre Jisọs Karais me lek kan̄. 15 Me mgbọ ya, enyi mînwọọn̄ emi enenen. Ìre unwọọn̄ kinyi ya ìnikup me owa mgbọ keyi? Me mgbọ ya si, mebe ke îkup mfufet ibe enyi erọkọ chieen̄ kinyi enyi emi, kè enyi èrọkọ enyi emi. 16 Ìre enyi eyaka inimọnọ emi kubọk ogwu ochicha kinyi mgbọ keyi, mije ntumube atikọ inyi enyi? 17 Ife cha mêkisa enenen iweek irọrọ inyi enyi ekana egọọk ema. Ire, ìkare me ata ejit ke ema ekirọ. Otutuuk inu ema ekiweek ìre ileleke enyi isan̄a me lek kiji, inyi enyi enekaan̄ ulọk me lek kiban̄ kubọk ema ekaan̄be me lek kinyi. 18 Înwọn ibe ene ikaan̄ ulọk me lek ene, ire inu ekibak me lek ikaan̄ ulọk ya ire ata inu. Mônwọn si ibe enyi ekekaan̄ òjelek ulọk keya otutuuk mgbọ, ìkare mgbọ nkupbe me etete kinyi gaalek. 19 Atata bọn n̄a ebi mmun̄be me chieen̄, kubọk uman okifiak nwa owot, ikeya si ke emi mkpọk ikup me emen ufiak mije kinyi. Ufiak yi ìbokpọkpọ ikifiak emi ikeyi mege ire mgbọ Karais môrebe ogwu ibot mkpulu me agan̄ geelek me emen ugwem kinyi otutuuk ene. 20 Me atikọ, ìkup emi me lek kubọk ke kè ǹkup me etete kinyi mgbọ keyi, inyi ǹriọọn̄ ubọk mâsabe itumu ikọ melek kinyi. Mije, owot îfieek emi enenen mije kinyi. 21 Enyi ebi ìkiweek ikukup me irak Ikan kè Mosis, ìna-nu ǹdo enyi! Ìre enyi kperiọọn̄ inu egebe me Ikan me Ikpa Mbuban? 22 Ege ibe ke Ebereham ìbon bọn ebirieen̄ iba. Ene ge ke enenwaan̄ usun̄, ekigwen Ega, oman. Sa ogwulọ ke enenwaan̄ ogwu ikarege usun̄, ekigwen Sera, oman. 23 Gwun̄ Ebereham obonbe me owot ogwu enenwaan̄ usun̄ ya, eman kubọk ekiman otutuuk ene. Ire, gwun̄ ogwu îbonbe me owot ogwu enenwaan̄ ogwu ikarege usun̄ ya, eman inan̄a me lek use eyi Awaji ochieekbe Ebereham. 24 Ǹsasa mfufuk yi ito kubọk urọk. Ebibaan̄ iba chi ekeke inyi inyan̄a-ibot iba echi Awaji onyan̄abe. Ega, okeke inyi inyan̄a-ibot eyi Awaji onyan̄abe inyi Mosis me inyọn̄ ogoon̄ Saina. Otutuuk bọn îmaan̄be ìre ebi usun̄. 25 Ubọk Ega okekebe inyi inyan̄a-ibot eyi Awaji onyan̄abe me inyọn̄ ogoon̄ Saina me agan̄ Arebia, ikeya si ke îkeke inyi ama ile Jeruselem me chereyi. Mije, Jeruselem melek otutuuk ebi ìluk me emen kan̄, ekup me usun̄ me irak Ikan eyi Awaji onyibe ebi Ju. 26 Ire, Jeruselem eyi òkup me emen inyọn̄ ìkakup me usun̄. Ọmọ si okup kubọk uga inyi eji otutuuk ene. 27 Mije, ege me Ikpa Mbuban ibe, “Nwọọn̄ unwọọn̄, owu enenwaan̄ ora! Bọn̄ okooko, owu ogwu enenwaan̄ uman ikarakge ìtet! Mije, ogwu enenwaan̄ ejitbe itele môkaan̄ bọn iwa igak ogwu enenwaan̄ òkaan̄ olom.” 28 Eya orọ, enyi bọn Nte n̄a, enyi ìre bọn eyi Awaji ochieekbe me use, kubọk Ajiki orebe. 29 Me ike mgbọ ya, gwun̄ ogwu emanbe kubọk ekiman otutuuk ene îsisaak gwun̄ ogwu emanbe me unye eyi Ekwukwu Mbuban. Ikeya si ke îkup me mgbọ keyi. 30 Ire, ìre keke ke Ikpa Mbuban otumu? Ikpa Mbuban ìbe, “Lap ogwu enenwaan̄ usun̄ ya, melek ogwu gwun̄ sibi. Mije, gwun̄ ogwu enenwaan̄ usun̄ ya ìkpogọọk gwun̄ ogwu enenwaan̄ ogwu ikarege usun̄ igbaan̄ ikaan̄ uche me lek irot eyi nte kiban̄.” 31 Eya orọ, bọn Nte, eji kpere bọn ogwu enenwaan̄ usun̄. Eji ìre bọn ogwu enenwaan̄ ogwu ikarege usun̄.
51 Karais îra irọ inyi eji enwọnọ me irak Ikan kè Mosis, inyi eji ekayaka ìre usun̄ ofifi. Eya orọ, ìkeke ìnye! Ikayaka ìchieek ibe ene geege ikpọk iben akpan usun̄ inikeme enyi ofifi. 2 Ìtap iman me lek ikọ n̄a! Emi Pọọlu nkitumu inyi enyi ibe, ire enyi ichieek ibe efieek enyi afi, ìsibi ibe ke ikwaan̄ Karais osibe me ibot kinyi ìre inu ikike. 3 Ǹkikpọk itaba otutuuk kinyi ubọk me utọn̄ ibe, ene geelek òchechieek ibe efieek ọmọ afi, ene ya ìkaan̄ irọrọ otutuuk inu geelek egebe me Ikan iso. 4 Enyi ebi ìkiweek ikakana ebi ata ene me isi Awaji inan̄a me isusun̄ Ikan kè Mosis, ìriọọn̄ ibe ke mîche enyi isan̄a me lek kè Karais. Enyi kpeyaka ikup me irak atata nnwọn eyi Awaji. 5 Eyi kiji, eji ekikpọ chieen̄ ibe, inan̄a me unye eyi Ekwukwu Awaji, ke Awaji mômọnọ eji kubọk ebi ata irọrọ, mije eji echieekbe me lek kè Karais. 6 Mije, me emen kè Karais Jisọs eji ekupbe, ifefieek afi mè ekafieekge afi ìkakup me uyọt. Otutuuk inu òkup me uyọt ìre ichechieek me lek kè Jisọs Karais, eyi òkijeen̄ lek kan̄ isibi sa me imumun̄ ene me chieen̄. 7 Me ibebene, enyi mîkirọ ijaan̄ enenen. Ìre keke orọ mè enyi ekayaka ìsiki ibot ìnyi ata etip ya eyi òrere eyi atata? 8 Inwenwene ejit enyi enwenebe ìkanan̄a me ubọk Awaji ogwu ògwegwen enyi. 9 Ebi ene ekito urọk ibe, “Sọntiik olat okirọ inyi otutuuk ikpele fituru iwuku.” 10 Ire, mije eji ekupbe me emen kè Karais, ejit n̄a înye ibe ke ekiket kinyi ìkponwene me lek eyi n̄a. Nriọọn̄ si ibe ke ebi geelek ìkiwuwọlọ enyi ibot mêbọkọ osusut me ubọk Awaji. Ebi geelek ema erebe, kpelọlọ ibọbọkọ osusut. 11 Bọn Nte n̄a, ire emi nkijeen̄ inyi isi ibe ke îgbe ibe ebi ene ekefieek afi, ìre keke orọ ekpọkpọ ikisisaak emi? Ekisisaak emi mije ǹkakijeen̄ ene ikeya. Mebe ke ǹkijeen̄ ibe ekefieek afi, ata etip nkilook òfo me lek uti nkwurieen̄ kè Karais kpomoyaka ikinaan̄ ebi ene ejit. 12 Me lek ife cha ebi ìkisisaak enyi, ire ulọk ifefieek afi imalek imin ema ikeya me ejit, ema esan̄a lek kiban̄ osok isi ge ma! 13 Bọn Nte n̄a, Awaji ìgwen enyi ibe enyi enekaan̄ utelelek, mè esibi me usun̄ eyi Ikan kè Mosis. Ire, ikasa me irak utelelek yi ìtele ibe oka ijo ubọk iluk ugwem kinyi ikitọ ikọ inyi enyi. Kpan̄asi ikeya, ìmun̄ lek kinyi me chieen̄, mè ìkisi ikwaan̄ ìnyi ebi melek kinyi. 14 Otutuuk Ikan kè Mosis ìkitumu ikọ yaage ibe, “Mun̄ ebilene ogbo kwun̄ me chieen̄ kubọk akpalek kwun̄.” 15 Eya orọ, ire enyi ikpọkpọ ikiloon̄ lek kinyi igwak itaka kubọk anam oron, ìgbala chieen̄. Ire enyi kpegbala chieen̄, enyi mêkpan̄ lek kinyi isan̄a. 16 Eya orọ, ǹkitumu inyi enyi ibe, ìtele mè Ekwukwu Awaji ikijeen̄ enyi oniin̄ me emen inu geelek, inyi enyi ekakirọ ijo inu eyi akpalek ijo inu kinyi okitọ inyi enyi. 17 Mije, inu eyi òkilọk akpalek ijo inu ìkare inu eyi Ekwukwu Awaji okiweek. Inu eyi Ekwukwu Awaji okiweek si ìkare inu eyi òkilọk akpalek ijo inu. Ema chi agan̄ iba, ge ìkakichieek ìnyi ge. Eya orọ, inu owu okirọ, ìkare eyi owu oweekbe irọrọ. 18 Ire, ire Ekwukwu Awaji ikijeen̄ owu oniin̄ me ugwem kwun̄, Ikan kè Mosis ìkayaka ìkaan̄ unye me emen ugwem kwun̄. 19 Irọrọ echi akpalek ijo inu ìkakilet. Irọrọ chi ìre ugwem barabat, mè ifafiat lek, mè ijo bukubuku ugwem, 20 mè itọtọbọ ebum inyi mkpọmfaka, mè iwot mè ido-inu, mè ichacha ene, mè ibaak mè etim, mè chieen̄ ile, mè unaan̄-ejit, mè iweweek nnwọn inyi lek ene gaalek, mè icheche lek, mè ikekikaan̄ agan̄, 21 mè itoto mba, mè inwọnwọ miin̄ isa, mè ijo ifit miin̄ mè òje oyet, mè owuwa ofifi ijo inu òkup kubọk kechi. Ǹkitaba enyi ubọk me utọn̄ mgbọ keyi si kubọk mwuukbe lek itaba iraka, ibe ke ebi geelek ìkirọ inu òkup ikechi kpebekaan̄ mkpulu eyi Awaji me irot. 22 Ire, inu Ekwukwu Mbuban okisa inu me emen ugwem kiji ìre imumechieen̄, mè unwọọn̄, mè esuuk, mè ukarajit, mè ikakaan̄ ata ejit, mè inwọnwọn nnwọn, mè igbegbe utoon̄-ejit, 23 mè irọrọ inu esuuk esuuk, mè itetet lek. Kpunu ikan geege ògbagban ibe ene ikakirọ ata inu kechi. 24 Ebi geelek ìrere ebi eyi Jisọs Karais mîjit oka akpalek ijo inu kiban̄ mè otutuuk ulọk geelek eyi oka akpalek ijo inu ya okima. Ìkup kubọk ema egogon akpalek ya mè ijo ulọk cha me inyọn̄ uti nkwurieen̄ kè Karais. 25 Mije îrebe Ekwukwu Mbuban okinyi eji ugwem, eji esa otutuuk ugwem kiji enyi ọmọ si ikikpulu. 26 Eji ekakigumu lek. Eji ekakirọ inyi ene inaan̄ ejit. Eji ekakikaan̄ si chieen̄ ile me lek ebi melek kiji.
61 Bọn Nte n̄a, ire ene ge me etete kinyi irọn̄ inin̄ me emen ijo inu, enyi ebi ìkakaan̄ Ekwukwu Awaji me emen, ìsa me ugwem eyi esuuk ìsi ìsa ene ya ìgwu ìkom inu me ata oniin̄. Ire, ìgwuun̄ chieen̄ inyi ene geege me etete kinyi ikarọn̄ ìnin̄ si me ntọ-mkpọ. 2 Ìkitap ubọk ìnyi ebi melek kinyi me emen ufialek kiban̄. Mije, sa me irọrọ ikeya, enyi mêkirọ ikan kè Karais iso. 3 Ire ikaan̄ ogwu ikikeek ibe ke îkaan̄ inu ọmọ orebe, me mgbọ ikarege inu geege, ene ya ìkifiaan̄ lek kan̄. 4 Ogwu ikup, itaak chieen̄ ikpọ irọrọ kan̄. Ire irọrọ kan̄ inwọn, mgbọ ya ke ìbobele ejit me lek inu îrọbe. Ikasa lek kan̄ ìtọ me lek ofifi ene. 5 Mije, ene geelek ìbobeme akpan eyi kan̄. 6 Îgbe ibe ene geelek òkikween̄ ikọ Awaji ikiche ata inu geelek îkaan̄be inyi ogwu òkijeen̄ ọmọ ikọ Awaji ya. 7 Ikachieek ibe efiaan̄ enyi. Kpunu ogwu òbokọt ifeen̄ Awaji. Inu geelek ene owopbe, eya ke ìborọkọ. 8 Ene geelek òkirọ inu akpalek ijo inu kan̄ okiweek, ene ya ìborọkọ mkpa kubọk mfut uko eyi ònan̄a me akpalek kan̄ ijo inu. Ire, ene geelek òkirọ inu Ekwukwu Mbuban okiweek, ene ya môkaan̄ ugwem ikakaan̄ge itata eyi ònan̄a me ubọk Ekwukwu Mbuban. 9 Eji ekawọ lek me irọrọ ata inu, mije, ire eji kpewọ lek, mgbọ isikem, eji mêbọkọ ata mkpukpe mije ata ikwaan̄ kiji. 10 Eya orọ, eji ekerọ ata inu enyi otutuuk ene mgbọ geelek irek osibibe inyi eji. Ògak otutuuk, eji ekerọ ata inu enyi ebi ngwan̄ kiji ebi ìchechieek me lek kè Jisọs Karais. 11 Emi gaalek nsa ubọk n̄a igwat ere keyi me lek ikpa yi ijet enyi. Ìkpọ ike ubọk ikpa n̄a osabe imiin̄ iyaka! 12 Ebi ife chi, ebi ìkiweek ichechieek ata erieen̄ me isi ebilene, ekiweek itetet otutuuk kinyi me unye ubọk ifieek afi. Ema ekirọ ikeya, inyi ebi ene ekasisaak ema mije ata etip òfo me lek mkpa eyi Jisọs Karais okwube me inyọn̄ uti nkwurieen̄. 13 Ema me lek kiban̄ ebi ìchieek me lek ifieek-afi kpekọt isun̄ otutuuk Ikan kè Mosis iso. Ire, ema ekekiweek ibe enyi enefieek afi, inyi ema ekesa egugo lek ibe ke enyi mîsiki ibot inyi Ikan kiban̄, mè isa lek kinyi inyi ibe efieek enyi afi. 14 Ire eyi n̄a, Awaji ikachieek ibe emi ǹsa ofifi inu geege ǹgugo lek, ilọ me lek uti nkwurieen̄ eyi Okaan̄ kiji Jisọs Karais. Mije mkpa kè Karais, inu linyọn̄ keyi îkana nkwukwu inu me lek n̄a. Emi si nkakana nkwukwu ene me lek inu linyọn̄. Ìkup kubọk ebeben inu linyọn̄ cha igon ikpan̄ me inyọn̄ uti nkwurieen̄ kè Karais. 15 Ifefieek afi mè ekafieekge afi ìkasibi inu geege. Inu òkup me uyọt ìre ke Awaji îra ikpọk eji irom ayaya me emen kè Karais. 16 Esuuk mè ejit nsan eyi Awaji ikup inyi ebi geelek ìkiluk ugwem igọọk ubọk ayaya ugwem yi oweekbe. Esuuk mè ejit nsan eyi Awaji ikup si inyi otutuuk ebi Awaji ogobobe inyi lek kan̄, ebi ìkup kubọk atata ebi Ijeren inyi Awaji. 17 Òta ikọ n̄a ìre ikeyi: Ene geege ikayaka ìkpọk ìsisaak emi. Mije, akpat unan òkup me akpalek n̄a ìre iman̄ òkijeen̄ ibe ke emi ìre usun̄ kè Jisọs. 18 Bọn Nte n̄a, atata nnwọn eyi Okaan̄ kiji Jisọs Karais ikup melek kinyi. Ikup ikeya!