Ebi Efesọs
11 Emi Pọọlu, ogwu òrere ogwu otuchieen̄ kè Jisọs Karais inan̄a me nkeek Awaji, nge ikpa etip yi ijet enyi bọn Awaji ìkup me Efesọs, enyi ebi ìtotoon̄ ejit me lek kè Karais Jisọs. 2 Atata nnwọn mè esuuk eyi Awaji òrere Nte kiji mè eyi Okaan̄-ene Jisọs Karais ikup inyi enyi. 3 Itọn̄ ikup inyi Awaji ogwu òrere Nte Okaan̄ kiji Jisọs Karais. Ọmọ onyi eji otutuuk ugbana kan̄ geelek ònan̄a me emen inyọn̄, inan̄a me lek eji ekupbe me irak ubọk kè Karais. 4 Sabum înirom linyọn̄, îdasi igobo eji, inyi eji enere ebi kan̄ inan̄a me lek kè Karais, mè eji ekup me mbuban, mè ekakaan̄ nrọ-nlọ geege me lek me isi kan̄. 5 Bene me ibebene, Awaji îwuuk lek isa me imumechieen̄ kan̄ igobo eji isibi kubọk ebi ọmọ obomọnọ isa irọ nsabọn kan̄, inan̄a me lek kè Jisọs Karais. Ikeyi ke îneme Awaji me nkeek kan̄ irọrọ. 6 Eya orọ, eji etọn̄ Awaji mije atata nnwọn kan̄ eyi òkakaan̄ umin mè uja, eyi îchebe inyi eji me ikike, me emen Gwun̄ kan̄ ogwu îmun̄be me chieen̄. 7 Awaji ìsa eje Gwun̄ kan̄ ifaka eji isibi me usun̄ eyi ijo inu. Eyiyi ìsibi ibe, bak me lek Gwun̄ Awaji, ke Awaji îtele otutuuk ijo kiji inyi eji inan̄a me lek atata nnwọn kan̄ eyi òmimin enenen. 8 Awaji înyi eji atata nnwọn kan̄ imin enenen. Îsa me iriọọn̄-inu mè uga ifuk-ibot kan̄ 9 irọ inyi eji eriọọn̄ nlelet nkeek kan̄ eyi îbenbe me ejit irọrọ iso me lek kè Karais, 10 me mgbọ mgbọ isikem. Nlelet nkeek Awaji okaan̄be me ejit ìre ke ọmọ môgbaan̄ otutuuk inu geelek òkup me emen inyọn̄ mè echi òkup me linyọn̄ ititiin̄, mè isa ikana itap me ubọk ogwu ibot ge gaalek. Ogwu ibot ya ìre Karais. 11 Me emen kè Karais ke Awaji ogobo si eji isa irọ ebi kan̄. Îwuuk lek isan̄a eji isun̄ esese bene me ibebene igọọk me otitọt îtọtbe. Awaji ìkirọ inu geelek igọọk me nkeek kan̄, mè ike înemebe ọmọ. 12 Awaji ìrọ ikeyi, inyi eji ebi ìdadasi itoon̄ ejit me lek kè Karais ekeluk ugwem eyi òbokirọ inyi ebi ene eketọn̄ ọmọ me umin kan̄ mè uja kan̄. 13 Enyi si mîgọọk ikaan̄ uche me emen kè Karais. Mije, enyi mîchieek me lek kè Karais, mgbọ enyi enọbe ata etip eyi atikọ ya, eyi òrere ata etip eyi òsasa unyan̄a ijet enyi. Awaji onyinyi enyi Ekwukwu Mbuban, eyi îchieekbe me use, kubọk iman̄ òriọọn̄ kan̄ me lek kinyi isasa ijeen̄ ibe ke ìre ọmọ okaan̄ enyi. 14 Ekwukwu Mbuban ore inu ukarajit inyi eji ibe ke eji kpelọlọ ibọbọkọ irot eyi Awaji ochieekbe use inyinyi ebi kan̄, mè ire si inu ukarajit inyi eji ibe ke Awaji mônyi ebi kan̄ ojot ojot utelelek. Eji etọn̄ Awaji me umin mè uja kan̄! 15 Mije keyi, karake nnọbe inu òfolek ichechieek enyi ekaan̄be me lek Okaan̄-ene Jisọs, mè imumechieen̄ enyi ekaan̄be me lek otutuuk ebi ìchechieek, 16 emi ǹkakilọ itọtọn̄ Awaji me ibot kinyi, ǹkakilọ si ikekeek enyi me uriaak n̄a mgbọ geelek. 17 Ǹkibeek Awaji Okaan̄ kiji Jisọs Karais, òrere Ute òkaan̄ otutuuk umin mè uja, ibe inyi enyi Ekwukwu Mbuban ogwu òkinyi ene iriọọn̄-inu, mè ikichili inu geelek ijeen̄ ene, inyi enyi esa me ikeya eriọọn̄ ọmọ egak ubọk enyi eriọọn̄be. 18 Ǹkiriaak si uriaak ibe mè Awaji ichili ifuk-ibot kinyi, inyi enyi eriọọn̄ utoon̄-ejit ya eyi ọmọ obak me lek igwen enyi, mè eriọọn̄ si inu ubọọn̄ eyi umin mè uja eyi Awaji ochieekbe use inyinyi ebi eyi kan̄, 19 mè eriọọn̄ si ikpele unye kan̄, eyi îkisa isi ikwaan̄ me emen kiji ebi ìchechieek, eyi kpunube ofifi unye geege ebesa itọ me lek. Unye yi, eyi Awaji okisa isi ikwaan̄ me emen kiji, 20 ọmọ ore ikpele unye ya eyi îsabe isi ikwaan̄ me emen kè Karais mgbọ îjomobe Karais me mkpa, mè isa isi, inyi isi isiki ikweek me agan̄ ubọk ulom kan̄, òrere irek òmimin ichit, me emen inyọn̄ ere òbebene ichit. 21 Ere ya Karais okupbe îbene enenen igak otutuuk mkpulu geelek, mè ebi ibot geelek, mè ebi unye geelek, mè ebi ibot mkpulu ìkup esese esese. Erieen̄ kan̄ si obene ichit me etete otutuuk erieen̄ ebi ibot mkpulu geelek, bene me linyọn̄ keyi re linyọn̄ eyi òkinu me isi. 22 Awaji onenikana otutuuk inu itap me irak ukot kè Karais, mè isa ọmọ irọ ogwu ibot me otutuuk inu geelek inyi ntitiin̄ kan̄. 23 Ntitiin̄ ya ìre akpalek kè Karais eyi Karais orọbe ijot. Karais me lek kan̄ ore ogwu òkirọ inu geelek ijot me ere geelek.
21 Me mgbọ òraraka, enyi ekwakwaan̄ ita me emen erumun̄ mije unye-ibot kinyi mè nrọ-nlọ kinyi. 2 Emen ijo inu chi ke enyi ekiluk me mgbọ ya, mgbọ enyi ekigọọk ọrọmijọn̄ eyi linyọn̄ keyi okido, mè ikisi ikwaan̄ inyi Yọk òrere ogwu ibot mkpulu eyi otutuuk ijo erumun̄ òkiluk me isinyọn̄. Yọk yi ore erumun̄ òkitọ ikọ mgbọ keyi me emen ebi ìkikpaka ibot inyi Awaji. 3 Me ugwem kiji otutuuk ene, îkaan̄ mgbọ eji elukbe si igọọk me ida eyi akpalek ijo inu kiji, kubọk ebi ife chi ekiluk. Mgbọ ya, eji mîkinyi akpalek kiji inu geelek îweekbe, mè ikirọ otutuuk ulọk kan̄ geelek mè ekiket kan̄ geelek iso. Me mgbọ ya, mije ijo ugwem ya, otutuuk kiji melek ebi unye ibot cha egbaan̄ ikup me irak unaan̄-ejit Awaji. 4 Ire, Awaji îmun̄ eji me chieen̄ enenen. Ejit nsan kan̄ si îmin me lek kiji enenen. 5 Eya orọ, ubọk geelek eji ekwaan̄be ita me emen erumun̄ me mgbọ ya mije nrọ-nlọ kiji, Awaji onenitap eji ayaya ugwem me emen, inyi eji eneluk ugwem melek Karais. Awaji ìnyan̄a enyi sa me atata nnwọn kan̄. 6 Me emen kè Karais eji ekupbe, Awaji îgbaan̄ eji melek Karais ijomo me mkpa, mè ibene eji si, inyi eji egọọk Karais esiki ekweek me irek umin kan̄ me emen inyọn̄, mè egọọk ọmọ ekekpulu. 7 Awaji ìrọ inu yi inyi eji, mije ata ejit eyi îkaan̄be me lek kiji me emen kè Karais Jisọs, inyi ọmọ isa me ikeya isa atata nnwọn kan̄, eyi kpunube inu ebesa itọ me lek, ijeen̄ ebi ene me owuwa ukot òkinu me isi. 8 Mije, Awaji ìsa me atata nnwọn kan̄ inyan̄a enyi bak me lek enyi echieekbe me lek kè Karais Jisọs. Awaji ìkanyan̄a enyi mije ebi enyi erebe. Unyan̄a yi ìre uche eyi Awaji ocheche inyi enyi me ikike. 9 Ìkanan̄a mije ikwaan̄ geege enyi esibe, inyi ene geege ikakọt ìsa ìgugo lek. 10 Mije, îre Awaji orom eji. Awaji ìrom eji me emen kè Karais Jisọs, inyi eji enerọ ata ikwaan̄ eyi îwuukbe lek idọmọ isun̄ ibe eji enerọ. 11 Eya orọ, ìkeek ebi enyi erebe me adasi mgbọ! Inan̄a me imaman kinyi, enyi kpere ebi Ju. Ebi Ju ekigwen enyi ebi ekafieekge afi, mè ikigwen lek kiban̄ ebi efieekbe afi. Ire, ifefieek afi keya ìre inu ubọk ebilene orọbe me akpalek ebilene. 12 Ìkeek si ibe, me mgbọ ya òraraka, ke enyi kpekaan̄ Karais. Kpefuk si enyi kubọk bọn owot ido ebi Ijeren, ebi Awaji ogobobe isibi inyi lek kan̄. Enyi kpekaan̄ uche geege me emen otutuuk inyan̄a-ibot eyi Awaji onyan̄abe isa ichieek ebi kan̄ use. Enyi ekiluk me linyọn̄ keyi, kpekaan̄ ikpọchieen̄ geege, kpekaan̄ Awaji, enyi echechep. 13 Ire, me mgbọ keyi, me emen kè Jisọs Karais, enyi cha ebi mgbọ ìjọjọn̄ọ ere me lek Awaji, Awaji îtaba enyi igbet ere me lek kan̄ inan̄a me eje kè Karais. 14 Mije, Karais me lek kan̄ ore ogwu òtatap esuuk me etete kiji, mè irọ inyi eji agan̄ iba, ebi Ju mè ebi ekarege ebi Ju, ekana enere ge. Me mkpa îkwube, îsa akpalek kan̄ igbugbọ mgban eyi òcheche eji, mè ikitap ochicha me etete kiji agan̄ iba. 15 Karais îsa akpalek kan̄ igbugbọ mgban ya eyi òrere Ikan kè Mosis mè ogbogbo asabọn ikan mè ọrọmijọn̄ òje me lek. Sa me ikeyi ke îrọ inyi eji ido iba cha enekana ere ayaya ido ge gaalek me emen kan̄. Inan̄a me ikeya, esuuk okukup me etete kiji agan̄ iba cha. 16 Inan̄a me lek mkpa Karais okwube me inyọn̄ uti nkwurieen̄, Karais îsan̄a ochicha isan̄a me etete ebi Ju mè ebi ekarege ebi Ju, mè irọ inyi ema ekana ere ge me emen kan̄, mè iniyaka ema inyi Awaji. 17 Karais îsa ata etip eyi esuuk yi inilook enyi ebi ofifi ido ebi mgbọ ìjọjọn̄ọ ere me lek Awaji, mè isa si inilook eji ebi Ju ebi mgbọ ìgbegbet ere me lek Awaji. 18 Îre mije kè Karais ke eji egbaan̄ ikaan̄ irek inunu me isi Awaji Ute, sa me lek Ekwukwu Mbuban ge ya, ogwu Karais onyibe otutuuk kiji, ebi Ju mè ebi ekarege ebi Ju. 19 Eya orọ, me mgbọ keyi, enyi ebi ekarege ebi Ju, enyi kpeyaka ire ebi ofifi ido mè ebi ichen. Enyi mîgọọk bọn Awaji geelek igbaan̄ ikana bọn owot, mè ikana si ebi ototun̄ ukan̄ eyi Awaji, 20 mè ikup kubọk uwu eyi enamabe itoon̄ me inyọn̄ ewuuk irak ijọn̄ eyi ebi otuchieen̄ kè Karais mè ebi nriran enamabe, eyi Karais me lek kan̄ orebe ata ibot uwu. 21 Îre ata ibot uwu ya okigbaan̄ otutuuk uwu ya isọk. Inyọn̄ kan̄ si ke ekinama uwu ya ibene mege îra inikana uwu mbuban eyi òkup me mbuban me emen Okaan̄-ene. 22 Me emen kan̄ si ke Awaji okigbaan̄ enyi si melek otutuuk bọn Awaji geelek inama isọk, inyi enekana uwu eyi Awaji okiluk sa me Ekwukwu kan̄.
31 Îre mije etip atata nnwọn yi ke emi Pọọlu nkana ogwu mkpọn me ibot kinyi ebi ekarege ebi Ju, nan̄a me lek ikwaan̄ kè Karais eyi nsibe me etete kinyi. 2 Nkeek ibe ke enyi mîra inọ etip atata nnwọn Awaji, eyi Awaji osabe inyi enyi inan̄a me ubọk n̄a. 3 Etip atata nnwọn yi ore nlelet otitọt Awaji ya, eyi Awaji ochilibe ijeen̄ emi, kubọk mwuukbe lek ige sọntiik inu òfolek inyi enyi. 4 Enyi isifuk ikpa keyi, enyi mênikọt iriọọn̄ inu emi nriọọn̄be me lek nlelet inu òfolek kè Karais. 5 Awaji ìkachili inu yi ìjeen̄ ebilene me mgbọ òraraka. Ire, me mgbọ keyi, Awaji îsa me Ekwukwu kan̄ ichili nlelet inu yi ijeen̄ ebi otuchieen̄ mè ebi nriran kan̄ ìkukup me mbuban. 6 Nlelet otitọt ya ìre ikeyi: Me emen kè Karais, inan̄a me lek ata etip kan̄, ebi ekarege ebi Ju mîgọọk ebi Ju igbaan̄ ikaan̄ otutuuk ugbana Awaji geelek me irot. Ema melek ebi Ju mîgbaan̄ ire bọn owot ge. Ema si mîgọọk ebi Ju igbaan̄ ikaan̄ uche me lek use eyi Awaji ochieekbe ebi Ju. 7 Îre nan̄a me lek atata nnwọn Awaji, eyi Awaji osa me ikpele unye kan̄ iche inyi emi, ke emi nsa ikana ogwu òkilook ata etip yi. 8 Ubọk geelek nsipbe igak ogwu òsisip ichit me etete otutuuk bọn Awaji, îre emi ke Awaji onyi atata nnwọn yi, inyi ǹsi ǹlook ebi ekarege ebi Ju ata etip òfolek uga oruru ikakaan̄ge okputut, eyi òkup me emen kè Karais. 9 Awaji ìbe emi ǹrọ si, inyi otutuuk ene eriọọn̄ ubọk nlelet otitọt kan̄ obosa irọ iso. Awaji ogwu òrorom inu geelek ìlelet otitọt yi me ejit kan̄ karake ukot ukot. 10 Awaji ìchili inu yi ibook me mgbọ keyi, inyi ebi ibot ebi osat Awaji ìkup me emen inyọn̄, mè ebi ibot erumun̄ geelek ìkup me isinyọn̄ esa me lek ntitiin̄ kan̄ ekween̄ inu òfolek iriọọn̄-inu kan̄ me irek me irek. 11 Awaji ìrọ inu yi igọọk me lek nkeek kan̄ eyi òkukup ire mgbọ ikakaan̄ge itata, eyi îrọbe iso me emen Okaan̄ kiji Jisọs Karais. 12 Îre me emen kè Karais, inan̄a me lek ichechieek eyi eji echieekbe me lek kan̄, ke eji ekikọt ifet lek ije inu me isi Awaji me ojot ojot utoon̄-ejit. 13 Eya orọ, soso, ikachieek ibe osusut nkibọkọ me ibot kinyi irọ inyi lek kinyi iwọ. Mije, enyi ke ufialek chi obonin̄ oruru inyi. 14 Mije inu chi ke ntọbọ ekpe me isi Awaji Ute, 15 ogwu otutuuk ebi ototun̄ ukan̄ geelek me emen inyọn̄ mè linyọn̄ keyi esabe me lek kan̄ ikaan̄ erieen̄ kiban̄. 16 Ǹkiriaak uriaak ibe mè Awaji ogwu òbọbọọn̄ ubọọn̄ enenen me umin kan̄ mè uja kan̄, isa me Ekwukwu kan̄ inyi enyi unye-lek me emen ekwukwu kinyi, 17 inyi Karais iluk me emen ejit kinyi nan̄a me ichechieek kinyi. Ǹkiriaak si uriaak ibe mè enyi ekeke enye, mè etibi emiin̄ me emen imumechieen̄, 18 inyi enyi melek otutuuk bọn Awaji geelek ekọt egobo etet ubọk imumechieen̄ Karais okaan̄be me lek kiji osabe iwele, mè ijọn̄ọ, mè ibene, mè idọk iyaka. 19 Ǹkiriaak si Awaji ibe irọ inyi enyi ekọt eriọọn̄ imumechieen̄ yi eyi kpunube ifuk-ibot geege òbokọt igobo itet, inyi enyi esa me ikeya ejot echak me inu eyi Ekwukwu me agan̄ geelek me ugwem kinyi, kubọk Awaji me lek kan̄ ojotbe ichak isan̄a kpai. 20 Me mgbọ keyi, itọn̄ ikup inyi Awaji ogwu òkisa me lek unye kan̄, eyi òkisi ikwaan̄ me emen kiji, ikọt ikirọ inu geelek ijọn̄ọ ere isaba iraka ubọk eji ebeekbe, mè ìyaka ire ubọk eji ekeekbe. 21 Itọn̄ mè umin ikup inyi ọmọ me emen ntitiin̄ kan̄, mè emen kè Jisọs Karais, me ukot geelek mege ire mgbọ ikakaan̄ge itata. Ikup ikeya!
41 Eya orọ, emi ogwu òkup me mkpọn mije Okaan̄-ene, ǹkiriaak enyi ibe enyi ekeluk ugwem ògbegbe igwen eyi Awaji ogwenbe enyi. 2 Ìkisiki lek kinyi me ijọn̄ enenen, mè ìkirọ inu esuuk esuuk. Ìkikaan̄ ukarajit me lek ene, mè ìkisa me imumechieen̄ ìkime inu ebi melek kinyi ekirọ. 3 Ubọk geelek enyi ekọtbe, ìsa me oniin̄ eyi esuuk eyi ògbagbaan̄ enyi ibọp, ìgbaan̄ ìre ge me emen Ekwukwu Mbuban. 4 Akpalek ge gaalek okup, Ekwukwu Mbuban ge gaalek okup si. Ikeya si, ikpọchieen̄ ge gaalek okup, ọmọ ke Awaji ogwen enyi itap me emen me mgbọ îgwenbe enyi. 5 Okaan̄-ene ge gaalek okup, ichechieek ge gaalek okup, igwook-mun̄ ge gaalek si okup. 6 Awaji ge gaalek okup, ọmọ ore Ute inyi otutuuk ene. Ọmọ okikpukpo otutuuk ene, mè ikisi ikwaan̄ me emen otutuuk ene, mè iluk si me emen otutuuk ene. 7 Ire, Awaji ìnyi eji geelek atata nnwọn kan̄ igọọk me ike uche eyi Karais onyibe eji ominbe iyaka. 8 Îre mije keyi ke ege me Ikpa Mbuban ibe: “Mgbọ înenebe ifo emen inyọn̄, îsa ogbogbo ebi îkpulube me akọn̄ ikaan̄ me ubọk ifo, mè iche uche òkup esese esese inyi ebilene.” 9 (Ire, ìre ikọ ya eyi egebe ibe, “Înene ifo emen inyọn̄” ìsibi keke? Ìsibi ibe ke ogwu ònenene ifo emen inyọn̄ ya îdasi inan̄a me emen inyọn̄ igele isibi inu me linyọn̄, mè ikwala iraka inin̄ ejit ijọn̄. 10 Ogwu ògegele isibi ya ore ene ya ogwu ònenene ifo inyọn̄ ibene iraka otutuuk isinyọn̄, inyi ọmọ iwele isi ichak me otutuuk isinyọn̄ mè linyọn̄ geelek Awaji orombe.) 11 Îre ọmọ oche uche inyi ebilene, mè inyi usini ene ibe ere ebi otuchieen̄, mè inyi usini ene ibe ere ebi nriran, mè inyi usini ene ibe ere ebi ìkilook ata etip, mè inyi usini ene ibe ere ebi ìkikpulu ntitiin̄ Awaji mè ebi ijejeen̄. 12 Awaji ìnyi otutuuk uche chi isasa itutuun̄ ebi kan̄, inyi ekekọt esi ikwaan̄ òkup esese esese esa enama akpalek kè Karais, eyi òrere ntitiin̄ Awaji, ebene efo inyọn̄, 13 mege ire mgbọ eji otutuuk ene mêkanabe ire ge me emen ichechieek mè emen irọriọọn̄ Gwun̄ eyi Awaji, mè imiin̄ isibi, mè ijot ichak me inu geelek, kubọk Karais ojotbe ichak isan̄a kpai. 14 Mgbọ ya, eji kpebeyaka ire asa nsabọn ebi nlilọ ijejeen̄ geelek obokọt ikiben itọp ikana kubọk ekoon̄, mè ikiben iwut ikana kubọk efet. Eji kpebeyaka ire si ebi ebilene ebekọt isa ifiọk mè ujọn̄ọ ifuk-ibot ofiaan̄ ema ekisa ifeen̄ ene iniben ikiwumu ikana. 15 Kpan̄asi ikeya, eji esa me imumechieen̄ eketumu atikọ mgbọ geelek, inyi eji eketibi emiin̄ me oniin̄ geelek me emen kè Karais ogwu òrere Ibot. 16 Inan̄a me lek kan̄, ogwu òrere Ibot, ke otutuuk akpalek, eyi nlik mè ufuk otetbe igbaan̄ isọk, okitibi isibi, mè ikinama lek kan̄ ibene me imumechieen̄. Sabum akpalek ya obokọt ikitibi, otutuuk nriro òkup me emen akpalek ya ebekisisi ikwaan̄ kiban̄ iso. 17 Eya orọ, ǹkisa me erieen̄ Okaan̄-ene itumu inyi enyi ibe: Ikayaka ìluk ugwem kubọk ebi ekarege ebi Ju ekiluk me emen wọlọwọlọ ifuk-ibot kiban̄ cha ikakupge me lek inu geege. 18 Ifuk-ibot kiban̄ ìkpọkpọ idun. Ema mîjọn̄ọ ere enenen me lek ugwem Awaji okinyi ene, mije, bak me lek unye-ejit kiban̄, ema kpekọt iriọọn̄ inu geege. 19 Esip geege ìkakup ema me isi. Eya orọ, kpunu inu nsebe nsebe geege eyi ema kpekirọ. Ema si mîsa lek kiban̄ itap me emen ugwem ten̄ten̄ geelek ikagbege, mè ikpọkpọ ikikaan̄ si ulọk irọrọ ijo inu chi ifo isi igak ikeya. 20 Ire, inu enyi ekween̄be òfolek kè Karais ìkakup ikeya. 21 Nkeek ibe ke enyi mînọ inu òfolek kè Karais, mè ikeek si ibe, mije enyi echieekbe me lek kan̄, ke mîra ijeen̄ enyi atikọ eyi òkup me emen kan̄. 22 Eya orọ, òfo me lek oka ugwem eyi enyi ekiluk, ìwọọk oka akpalek kinyi ya eyi ijo ulọk eyi ofiaan̄ ofiatbe isan̄a ya isan̄a, 23 inyi Awaji inirọ mè ejit kinyi mè ifuk-ibot kinyi ikana ayaya. 24 Ìtap ayaya akpalek eyi Awaji orombe me mbet kan̄, inyi iniluk ata ugwem me emen ata irọrọ, mè ikup si me mbuban. 25 Eya orọ, ene geege ikayaka ìkan̄ ataak! Ene geelek ikitumu atikọ inyi ogwu melek kan̄, mije eji otutuuk egbaan̄ ikup me emen kè Karais yaage, kubọk otutuuk nriro òkup me lek ene ogbaan̄be ikup me akpalek yaage. 26 Ire onaan̄ ejit, kachieek ibe unaan̄-ejit ya isa owu isi itap me irọrọ ijo inu. Katet unaan̄-ejit ya ìkaan̄ me ejit kwun̄ mege ìfit egwe. 27 Kanyi Yọk irek geege me emen ugwem kwun̄. 28 Ogwu òkiwuuk lek ichiin̄ inọ, ikayaka ìchiin̄. Kpan̄asi ikeya, isa ubọk kan̄ ikirọ ikwaan̄ ògbegbe, inyi ikaan̄ inu ìbokisa ikpukpo lek kan̄, mè ikisa itap si ubọk inyi ebi ìkup me una. 29 Ikachieek ibe ijo ikọ geege ikinan̄a me otu kinyi isibi. Ire, ìkitumu ata ikọ gaalek eyi òbokitap ubọk inyi ene, mè ikibene ugwem ene igwuun̄ me agan̄ geelek ene ya okupbe me una, mè ikọ kinyi ikikaan̄ oruru inyi ebi ìkigban̄ enyi. 30 Ikakirọ inyi Ekwukwu Mbuban Awaji òkup me emen kinyi ikinaan̄ ejit, mije, ọmọ ore iman̄ oriọọn̄ eyi Awaji otapbe enyi me lek isasa ijeen̄ ibe ke enyi ìre ebi kan̄ mege ire mgburudun̄ usen mgbọ ọmọ môfakabe enyi isibi me usun̄ eyi ijo inu. 31 Ìsan̄a ujat ejit geelek, mè unaan̄-ejit geelek, mè uyok ejit, mè ibaak geelek, mè ikekeek ene ijo, mè irọrọ ikeme ene, me etete kinyi. 32 Ìkikaan̄ ata ejit mè ejit nsan me lek ebi melek kinyi, mè ìkitele ijo ebi melek kinyi erọbe enyi ìnyi ema, kubọk Awaji me lek kan̄ otelebe ijo kinyi inyi enyi mije kè Karais.
51 Kubọk enyi erebe bọn Awaji ebi Awaji omun̄be me chieen̄, ìkikpọ inu me ubọk Awaji ìrọ. 2 Ìkimun̄ ene me chieen̄ kubọk Karais omun̄be eji me chieen̄, mè isa ugwem kan̄ inyi Awaji kubọk inyinyi òkidun̄u utop olu, mè isa igwa si ngwugwa me ibot kiji. 3 Mije enyi erebe bọn Awaji ebi ìkup me mbuban, ikachieek ibe ijeje oyet, mè otutuuk ugwem ten̄ten̄ geelek, mè ikakaan̄ chieen̄ ile me lek inu ofifi ene ikup me ugwem kinyi. Ene geege me etete kinyi ikatutumu ikọ ìbak òjelek inu cha. Mije, ìkagbe ibe òjelek inu òkup ikechi ikup me etete bọn Awaji. 4 Ikeya si, ikakitumu ijo ikọ ebi barabat, mè ikọ ebi burubut. Ikakibele ijo mbele òkitap ikọ, mije, òjelek ikọ kechi ìkagbe inanan̄a me otu bọn Awaji isibi. Kpan̄asi ikeya, ìkitọn̄ Awaji mgbọ geelek. 5 Ìriọọn̄ ibe ke ogwu barabat mè ìre ogwu òkiluk ugwem ten̄ten̄, mè ìre ogwu chieen̄ ile, ìkpokaan̄ uche me emen mkpulu eyi Karais melek Awaji. Ikakaan̄ chieen̄ ile ìre si irariaak yọk. 6 Ikachieek ibe ene geege isa ikọ otu ikike inifiaan̄ enyi kubọk ge, mije, îre nan̄a me lek òjelek inu òkup ikeyi ke uga unaan̄-ejit Awaji oborọn̄ ikeme ebi ìkikpaka ibot inyi Awaji. 7 Eya orọ, ìtele ebi ìkup ikeya. Ikagọọk ema ìgbaan̄ ìrọ inu geege. 8 Mije, me adasi mgbọ, enyi ekup me emen udun. Ire, mgbọ keyi enyi ekupbe me emen kè Karais, enyi ekup me emen utoon̄. Eya orọ, ìluk ugwem kubọk ebi ìkup me emen utoon̄. 9 Mije, îre utoon̄ okisa otutuuk nnwọn geelek, mè otutuuk ata irọrọ geelek, mè otutuuk atikọ geelek inu. 10 Ìkikween̄ irọrọ inu echi òkineme Okaan̄-ene. 11 Ìsan̄a lek kinyi ìsan̄a me lek inu ikakaan̄ge oruru echi ebi ene ekirọ me emen udun. Kpan̄asi ikeya, ìtumu inu cha ìsibi ìkpọk mbum. 12 Mije, îre ikpele inu esip itutumu ikọ ibak inu cha ema ekirọ me nlelet. 13 Inu geelek esan̄abe isibi me emen utoon̄ îra ikana inu ebilene esabe chieen̄ imun̄, mè iriọọn̄ ubọk îkupbe, 14 mije, utoon̄ okirọ inyi ekekọt emọọn̄ inu geelek. Îre mije keya ke ege me Ikpa Mbuban ibe: “Ogwu òlaak ilaak, bolo chieen̄, nan̄a keke me mkpa, inyi Karais isa utoon̄ kan̄ itoon̄ owu me lek.” 15 Eya orọ, ìgwuun̄ chieen̄ me ubọk enyi ekiluk ugwem kinyi. Ikaluk ugwem kubọk ebi kpenọ lek. Ire, ìluk kubọk ebi ìriọọn̄ inu. 16 Ikatele ibe irek geege iraka enyi, ìkisa irek geelek enyi ekaan̄be isi ata ikwaan̄, mije, mgbọ kechi ìre ijo mgbọ. 17 Eya orọ, ikare ebi burubut. Ire, ìweek ìriọọn̄ inu Okaan̄-ene okiweek ibe enyi erọ. 18 Ikakinwọ miin̄ ìsa, mije, usa-miin̄ ìkifiat ene. Kpan̄asi ikeya ìtele inyi Ekwukwu Mbuban ijot me emen kinyi, mè ikitọ ikọ inyi enyi. 19 Ìkisa me okwa mbuban ìtumu ikọ melek ebi melek kinyi, mè ìkikọt okwa itọn̄, mè okwa eyi òkibene Ekwukwu Mbuban ìnyi ebi melek kinyi. Ìkikọt si okwa eyi unwọọn̄ me emen ejit kinyi mgbọ geelek ìnyi Okaan̄-ene. 20 Ìkitọn̄ Awaji Ute mgbọ geelek mije inu geelek, sa me erieen̄ Okaan̄ kiji Jisọs Karais. 21 Ìsiki ibot ìnyi ebi melek kinyi, mije umin eyi enyi ekinyi Karais. 22 Enyi ebi ìrere nwa, ìkisiki ibot ìnyi nlom kinyi kubọk enyi ekisiki ibot inyi Okaan̄-ene. 23 Mije, olom ore ibot inyi ogwu nwa, kubọk Karais orebe ibot inyi ntitiin̄ Awaji eyi òrere akpalek kan̄, eyi ọmọ orebe Ogwu Unyan̄a inyi. 24 Eya orọ, kubọk ntitiin̄ Awaji okisiki ibot inyi Karais, ikeya si ke îgbe ibe enyi ebi nwa ekesiki ibot enyi nlom kinyi me emen inu geelek. 25 Enyi ebi ìrere olom, ìmun̄ ebi nwa kinyi me chieen̄ kubọk Karais omun̄be ntitiin̄ Awaji me chieen̄, mè isa ugwem kan̄ igwa ngwugwa me ibot ntitiin̄ ya, 26 isasa isan̄a ọmọ isun̄ esese inyi Awaji, mè isa mun̄ igwọk ọmọ itana me emen ikọ Awaji. 27 Karais ìkiweek isasan̄a ntitiin̄ ya isun̄ inyi lek kan̄ kubọk ntitiin̄ òjajaan̄ isan̄a, eyi kpunube okpa, mè nwununwunu, mè iman̄ geege me lek. Ire, ìkiweek ibe ntitiin̄ ya ikup me mbuban, mè nrọ-nlọ geege ikakup me emen. 28 Ikeya si, îgbe ibe ebi olom ekemun̄ ebi nwa kiban̄ me chieen̄ kubọk ema emun̄be akpalek kiban̄ me chieen̄. Enerieen̄ geelek òmumun̄ ogwu nwa me chieen̄, ìmun̄ lek kan̄ me chieen̄. 29 Mije, kpunu ogwu òkicha akpalek kan̄. Kpan̄asi ikeya, ene geelek ìkibọbọọk akpalek kan̄ me inorie, mè ikiriọọn̄ ubọk ikpọ akpalek kan̄, kubọk Karais okiriọọn̄ ubọk ikpọ ntitiin̄ kan̄. 30 Eji otutuuk ene ìre nriro òkup me akpalek kè Karais. 31 Ege me Ikpa Mbuban ibe, “Mije keyi, ogwu enerieen̄ môtele ogwu ute mè ogwu uga, mè inisa lek kan̄ ichim iriaak melek ogwu nwa, ema ene iba mênenikana akpalek ge.” 32 Eyi ìre ikpele udọk udọk inu nlelet eyi echilibe. Emi m̀mọnọ ikọ yi kubọk inu ikween̄ inu òfolek mgbaan̄-nrọ eyi Karais okaan̄be melek ntitiin̄ kan̄. 33 Ubọk geelek, enyi ebi olom geelek ikalọlọ imumun̄ ebi nwa kinyi me chieen̄ kubọk enyi emun̄be lek kinyi me chieen̄. Enyi ebi nwa geelek, ikalọlọ inyinyi ebi nlom kinyi ulibi.
61 Nsabọn, enyi kubọk ebi eyi Okaan̄-ene ìkisiki ibot ìnyi ebi nte kinyi mè nga kinyi, mije, ikeyi otat. 2 Adasi Ikan kè Mosis eyi òkaan̄ use me emen ìre eyi òbe, “Ìmin nte kinyi mè nga kinyi, 3 inyi otutuuk inu ije ijaan̄ me lek kinyi, inyi enyi eluk ujọn̄ọ ugwem me linyọn̄ keyi.” 4 Enyi ebi ute, ikakitap nsabọn kinyi unaan̄-ejit. Kpan̄asi ikeya ìkijeen̄ ema inu, mè ìkiteme ema nteme eyi Okaan̄-ene. 5 Enyi ebi usun̄, ìkisa me ukpook mè ulibi ìkisiki ibot, mè ìkisi ikwaan̄ ìnyi ebi nte uwu kinyi me otutuuk ejit kinyi, kubọk enyi ekisiki ibot mè ikisi ikwaan̄ inyi Karais. 6 Ikakisiki ibot ìsi ikwaan̄ ìnyi ema me isi kiban̄ gaalek, inyi ema emun̄, mè ema enyi. Ire, ìkisi ikwaan̄ ìnyi ema kubọk ebi usun̄ kè Karais ebi ìkisa otutuuk ejit kiban̄ irọ inu Awaji okiweek. 7 Ìkisa otutuuk ejit kinyi ìsi ikwaan̄ ìnyi ema kubọk ke ìre Okaan̄-ene ke enyi ekisi inyi. Ikakisi kubọk ke enyi ekisi inyi ebilene ikike. 8 Mije, enyi mîriọọn̄ ibe ke Okaan̄-ene môkpe ene geelek mkpukpe ògbegbe me ibot ata inu geelek îrọbe, mè ìre usun̄, mè ìre ìkare usun̄, kpunu esese me lek. 9 Enyi ebi nte uwu, ìkisa si ubọk yaage ìkpulu ebi usun̄ kinyi. Ikakirọ ema inu me lek unye unye, mije, enyi mîriọọn̄ ibe ke ogwu òrere Ute inyi ema melek kinyi ọmọ òwa me emen inyọn̄, mè iriọọn̄ si ibe ke Ute yi ìkakigobo ene geege isi. 10 Me òta ikọ n̄a, ǹkitumu inyi enyi ibe: Ìkeke ìnye me emen Okaan̄-ene sa me lek ikpele unye kan̄. 11 Ìtap otutuuk nroon̄ akọn̄ eyi Awaji onyibe enyi, inyi enyi ekọt ekeke eda otutuuk ijo otitọt eyi yọk okitọt ibak enyi. 12 Mije, ìkare akpalek mè eje ikike ke eji ekitim akọn̄ yi ikeme. Ire, eji ekitim akọn̄ ikeme ebi ibot ijo erumun̄, mè ebi unye geelek, mè ogbogbo urum ijo erumun̄ ìkirọ inu ikpak, ebi ìkikpulu me linyọn̄ eyi kpekisa chieen̄ ìmun̄, mè unye geelek òkikpulu linyọn̄ eyi udun̄ keyi. 13 Eya orọ, ìtap otutuuk nroon̄ akọn̄ eyi Awaji, inyi, mgbọ ijo usen ya isinu, mè ogwu ochicha isijibi akọn̄ kan̄ igọọk enyi, enyi mêkọt ikeke ida, mè itim ọmọ ikpan̄, mè ikeke inye si me irek kinyi isi ire okputut. 14 Eya orọ, ìkeke ìnye, mè ìsa atikọ ìtobo me ebon kinyi kubọk fanti. Ìsa ata irọrọ ìkwek isi ejit kinyi kubọk ukwek-ejit. 15 Ìtap ata etip kè Karais, eyi òkinyi ene esuuk ìtap ìkwek ukot kinyi kubọk ikpukot, mije, îre ọmọ obokọt itet ukot kinyi inye me ijọn̄. 16 Ofifi si, ìmọnọ ichechieek ìkaan̄ me ubọk kubọk agbọ, inyi enyi ekesa ekọt eniin̄ ukan̄ me otu oran̄ echi ogwu ijo ya, òrere Setan, okisa isook enyi. 17 Ìmọnọ unyan̄a ìkwuun̄ ìkwek ibot kinyi kubọk okpibot akọn̄, mè ìmọnọ si oge akọn̄ eyi Ekwukwu Mbuban, eyi òrere ikọ Awaji, ìkaan̄ me ubọk. 18 Ìkiriaak uriaak me emen inu geelek ike geelek Ekwukwu Mbuban obe enyi eriaak, mè ìkibeek Awaji mbeek. Mije keyi, ìkup me mbem lek, mè ìkat ejit ìkiriaak uriaak mgbọ geelek me ibot otutuuk bọn Awaji, ikatetele mgbọ geege. 19 Ìriaak uriaak me ibot n̄a si ibe mè Awaji inyi emi inu mbatumu mgbọ geelek nchilibe otu n̄a itumu ikọ kan̄, inyi ukpook ita emi me lek, mè ǹkọt ǹrọ inyi ebi ene eriọọn̄ nlelet inu eyi Awaji ochilibe ibook me emen ata etip yi. 20 Mgbọ keyi, emi ìre ogwu òkeke me otuchieen̄ ata etip yi, ubọk geelek nkupbe me mkpọn. Ìriaak uriaak ibe mè Awaji irọ mè ǹkọt ǹkenlook ata etip yi ubọk îgbebe ibe ǹkenlook, mè ukpook geege ikatet emi. 21 Taikikọs, atata gwun̄ Nte ogwu ògbegbe utoon̄-ejit me emen ikwaan̄ Okaan̄-ene môkpa otutuuk inu inyi enyi, inyi enyi eriọọn̄ ubọk emi nkupbe, mè eriọọn̄ si inu nkirọ. 22 Îre mije keyi ke nria ọmọ inu me lek kinyi, inyi enyi eriọọn̄ ubọk eji ekupbe, mè ọmọ si iyaka itap enyi efuuk me emen. 23 Bọn Nte n̄a, Awaji Ute mè Okaan̄-ene Jisọs Karais inyi enyi esuuk, mè imumechieen̄, melek ichechieek. 24 Atata nnwọn eyi Awaji ikup inyi enyi otutuuk ebi ekawọge lek me imama Okaan̄ kiji Jisọs Karais.