Ebi Kọlọsi

¹ Emi Pọọlu ogwu òrere ogwu otuchieen̄ kè Jisọs Karais inan̄a me nkeek Awaji, emi melek Timọti gwun̄ Nte kiji ege ikpa etip keyi ² ijet enyi bọn Awaji me ama Kọlọsi, enyi bọn Nte ebi ìgbegbe utoon̄-ejit me emen Karais. Awaji ogwu òrere Nte kiji inyi enyi atata nnwọn kan̄ mè esuuk kan̄. ³ Mgbọ geelek eji ekiriaak uriaak me ibot kinyi, eji kpekilọlọ itọtọn̄ Awaji ogwu òrere Nte Okaan̄ kiji Jisọs Karais. ⁴ Eji ekitọn̄ ọmọ, mije, eji mînọ ibe ke ichechieek kinyi îkeke inye, mè inọ si ibe ke enyi mîmun̄ otutuuk bọn Awaji me chieen̄. ⁵ Enyi ekaan̄ ichechieek yi mè imumechieen̄ yi mije enyi ekikpọ chieen̄ ikakaan̄ ugbana eyi Awaji osun̄be iban enyi me emen inyọn̄. Enyi mîwuuk lek inọ inu òfolek ugbana yi me emen ata etip eyi atikọ eyi elookbe enyi. ⁶ Ata etip yi òkitaan̄ si ikana otutuuk linyọn̄, mè ikisi ata ikwaan̄ me ugwem ebi ene. Owuwa ene mêkichieek me lek. Ubọk yaage si ke ata etip yi osi ata ikwaan̄ me emen ugwem kinyi karake enyi enọbe, mè isa me ikeya iriọọn̄ ubọk atata nnwọn eyi Awaji okupbe me atikọ. ⁷ Epafaras odasi isa ata etip yi inilook enyi. Ọmọ ìre ata ogwu eji emun̄be me chieen̄ enenen, ogwu melek kiji ekisi ikwaan̄ inyi Jisọs Karais. Ọmọ ore ogwu òsasa ejit ge isi ikwaan̄ kè Karais me irek kiji me etete kinyi. ⁸ Ọmọ si onikpa inyi eji ubọk enyi ekimun̄ ene me chieen̄ inan̄a me unye eyi Ekwukwu Awaji. ⁹ Mije keyi, karake adasi usen eji enọbe inu òfolek kinyi, eji ekpọkpọ ikiriaak uriaak me ibot kinyi, mè ikibeek Awaji ibe irọ mè enyi eriọọn̄ nkeek kan̄ ejaan̄ lek, mè ekaan̄ ojot ojot iriọọn̄-inu eyi Ekwukwu kan̄ okinyi, inyi enyi ekekọt egobo inu geelek etet. ¹⁰ Iriọọn̄-inu yi oborọ inyi enyi ekeluk ugwem ògbegbe ebi ìkigọọk Okaan̄-ene, mè ekerọ inu òkibele ọmọ ejit mgbọ geelek. Sa me ikeyi, enyi mêkirọ ata inu me oniin̄ geelek, mè ikpọkpọ ikiriọọn̄ inu eyi Awaji ifo isi. ¹¹ Eji ekiriaak si uriaak ibe mè Awaji isa ikpele unye kan̄, eyi òmimin ichit, irọ mè enyi ekeke enye, mè ekaan̄ ujọn̄ọ ukarajit, mè ekawọ lek, mè ekebele ejit me emen inu geelek. ¹² Eji ekiriaak si ibe mè enyi eketọn̄ Nte kiji ogwu òrọrọ inyi enyi egbe ebi ìbegọọk ikaan̄ uche me lek ugbana eyi ọmọ osun̄be iban ebi kan̄ me emen mkpulu eyi utoon̄ kan̄, ¹³ mije, Awaji îtaba eji isibi me irak ubọk mkpulu eyi udun̄, mè isa eji isi itap me emen mkpulu eyi ogwu Gwun̄ ogwu îmun̄be me chieen̄. ¹⁴ Îre ogwu Gwun̄ ya ofaka eji isibi me usun̄ eyi ijo inu, mè itele otutuuk ijo kiji inyi eji. ¹⁵ Karais, ogwu eji esabe chieen̄ imun̄, ìre inu geelek eyi Awaji ogwu eji ekasage chieen̄ ìmun̄ orebe. Ọmọ ore adasi Gwun̄ enerieen̄ eyi Awaji. Ọmọ îmin enenen, kpebekọt isa inu geelek Awaji orombe itọ me lek kan̄. ¹⁶ Mije, Awaji ìsa me ubọk kan̄ irom otutuuk inu geelek, echi òkup me emen inyọn̄, mè echi òkup me linyọn̄, echi ekisa chieen̄ imun̄, mè echi kpekisa chieen̄ imun̄, mè irom si otutuuk ebi osat geelek, mè otutuuk ijo erumun̄ geelek, mè ebi ibot ìkikpulu ema, mè ebi unye kiban̄, mè otutuuk kiban̄ me irek me irek. Awaji ìsa me ubọk Gwun̄ kan̄ yi irom otutuuk inu geelek eyi îrombe. Otutuuk inu chi ìnan̄a me ubọk kè Karais. Karais si ke otutuuk inu chi okup inyi. ¹⁷ Ọmọ ìwuwuuk lek ikup sabum enirom otutuuk inu. Me emen kan̄ si ke otutuuk inu okigbaan̄ isọk. ¹⁸ Ọmọ ore ibot isa inyi akpalek kan̄ eyi òrere ntitiin̄ Awaji, eyi ọmọ me lek kan̄ obenebe. Me etete otutuuk ebi geelek ìkwukwu, ọmọ odasi ijomo me mkpa. Eyi ìkijeen̄ ibe ke ọmọ ore ogwu òmimin ichit me emen inu geelek. ¹⁹ Mije, îbele Awaji ejit ibe otutuuk inu geelek ọmọ orebe ikup iso ifuk ojot ojot me emen kè Karais. ²⁰ Îneme si Awaji isasa me lek kè Karais ikpulu otutuuk inu geelek îrombe iyaka isa ika inu me lek kan̄. Awaji ìsa me eje eyi Gwun̄ kan̄ ofiin̄be mgbọ îkwube me inyọn̄ uti nkwurieen̄ irọ esuuk melek otutuuk inu geelek, echi òkup me linyọn̄, mè echi òkup me emen inyọn̄, inyi ema otutuuk eyaka egwu ekom eka egọọk ọmọ. ²¹ Me mgbọ òraraka, enyi me lek kinyi si mîjọn̄ọ ere me lek Awaji, mije enyi erebe ebi òchicha Awaji, inan̄a me lek ijo ekiket enyi ekikeek me emen ejit kinyi melek ijo ugwem enyi ekiluk. ²² Ire, me mgbọ keyi, Awaji îrọ inyi enyi melek kan̄ eyaka enere unene, sa me mkpa eyi Gwun̄ kan̄ okwube me akpalek ebilene me inyọn̄ uti nkwurieen̄ mije kinyi. Sa me ikeyi ke îgwọk enyi itana me emen ejit kinyi, mè isun̄ enyi me mbuban inyi lek kan̄, inyi ene geege ikamun̄ inu ìbosa ifieek enyi ikọ me isi kan̄. ²³ Ìkeke ìnye me emen ichechieek ìfo isi, ikasisik. Ìkaan̄ ikpọchieen̄ me lek inu geelek etumube inyi enyi me emen ata etip. Ata etip yi eyi ekilook otutuuk ene me otutuuk linyọn̄, ke Awaji ogwen emi Pọọlu kubọk ogwu usun̄ kan̄ ibe emi ǹkenlook ǹkana ere. ²⁴ Mgbọ keyi, ejit îbele emi enenen me lek ufialek mbọkọbe mije kinyi. Mije, ubọk Karais obọkọbe ufialek, ikeya si ke emi nkisa akpalek n̄a ibọkọ ufialek me ibot ntitiin̄ Awaji, eyi òrere akpalek kè Karais. Ǹkibọkọ ufialek yi isasa irọ inyi ikwaan̄ eyi Karais osibe iso ifuk. ²⁵ Awaji ìgogobo emi ibe emi ǹnensi ikwaan̄ ǹnyi ntitiin̄ kan̄. Ìgobo emi ibe emi ǹnenlook otutuuk ene otutuuk ata etip kan̄. ²⁶ Ata etip yi ìre nlelet inu eyi Awaji ochitbe isun̄, ìkachili ìnyi ene geege karake ukot ukot, ire, mè inichili ibook me mgbọ keyi inyi ebi kan̄. ²⁷ Awaji îwuuk lek itumu ifieek ibe ke ọmọ môrọ inyi ebi kan̄ eriọọn̄ ubọk nlelet inu yi osabe imin iyaka, mè ubọk îsabe ikaan̄ ikpele oruru inyi ebilene me otutuuk ido geelek. Nlelet etip yi eyi Awaji ochilibe ibook ìre, ke Karais ọmọ òwa me emen ejit kinyi. Eya orọ, ke enyi mîkaan̄ ikpọchieen̄ ibe ke enyi mêgọọk ọmọ ikup me emen umin mè uja kan̄. ²⁸ Îre mije keya ke eji ekilook otutuuk ene ata etip òfolek kè Karais, mè ikitaba ene geelek ubọk me utọn̄, mè ikisa me otutuuk iriọọn̄-inu ijeen̄ ebilene inu, inyi ogwu geelek òchechieek me lek kè Karais imin iso ifuk ubọk ògbegbe, me mgbọ môkekebe me isi Awaji. ²⁹ Eya orọ, ǹkisa otutuuk ikpele unye Karais onyibe emi irọ ikwaan̄ yi, ubọk efuuk n̄a obenbe, inyi ǹkọt ǹrọ ǹre okputut me atata.

¹ Ǹkiweek ibe enyi eriọọn̄ ibe ke nkwukwulu enenen me emen ikwaan̄ me ibot kinyi, ebi Kọlọsi mè ebi Lawodisia, mè otutuuk ebi geelek ekararakge ìmun̄ emi isi mè isi. ² Ǹkirọ ikwaan̄ yi, inyi ǹkat ife cha ejit, mè ǹtap ema efuuk me emen, inyi ema ekana ere ge sa me imumun̄ lek kiban̄ me chieen̄. Ǹkiweek ibe ema egobo inu chi etet ejaan̄ lek, inyi ema ekaan̄ ojot ojot utoon̄-ejit, mè esa me ikeya eriọọn̄ nlelet inu ya eyi Awaji ochilibe ibook. Nlelet inu yi ìre Karais me lek kan̄. ³ Me emen kè Karais ke Awaji otap otutuuk udọk udọk unye otu ewe ifuk-ibot mè iriọọn̄-inu kan̄. ⁴ Ǹkitumu ikọ yi inyi enyi, inyi ene geege ikasa unin̄i otu ikọ ìnifiaan̄ enyi ìfiin̄. ⁵ Mije, ubọk geelek nkakupge me etete kinyi me akpalek, ekiket òfolek kinyi îmin emi me ejit mgbọ geelek. Ejit îbele emi si, mije enyi ekiriọọn̄ ubọk itet lek kinyi ikaan̄, mè ikeke inye me ichechieek kinyi me emen kè Karais. ⁶ Mgbọ keyi enyi ebọkọbe Jisọs Karais itap kubọk Okaan̄ kinyi, ìkiluk si ugwem kubọk ebi ìchechieek me lek kan̄. ⁷ Ìtap ugwun̄-ijọn̄ kinyi ìdọk me emen kan̄, inyi enyi ekaan̄ ugwem, mè eketibi emiin̄ me emen kan̄. Ìkeke ìnye me emen ichechieek kinyi kubọk ejeen̄be enyi, mè ìkinyi ọmọ ogbogbo itọn̄ mgbọ geelek. ⁸ Ìgbala chieen̄, inyi ene geege ikasa ujọn̄ọ ifuk-ibot ebilene ìnifiaan̄ enyi ìsan̄a me lek ata ichechieek kinyi. Mije, òjelek iriọọn̄-inu keyi ìkanan̄a me ubọk kè Karais, ìnan̄a me lek ọrọmijọn̄ eyi ebilene, mè ubọk Yọk ogwu òkikpulu linyọn̄ keyi. ⁹ Mije, otutuuk inu geelek eyi Awaji orebe îso ifuk me emen kè Karais mgbọ îlukbe me akpalek ebilene. ¹⁰ Eyi enyi ekupbe me emen kè Karais, enyi si mîkaan̄ ojot ojot ugwem ya, mije, ọmọ ore ogwu ibot òmimin igak otutuuk ebi ibot geelek, mè ebi ibot erumun̄ geelek. ¹¹ Me emen kè Karais si, mîfieek enyi afi. Ifieek-afi keyi ìkare òjelek eyi ebilene ekirọ. Eyi ìre ifieek-afi eyi kè Karais, eyi òrere isasan̄a eyi Karais osan̄abe enyi isibi me emen ijo ugwem eyi akpalek. ¹² Me mgbọ egwookbe enyi mun̄, ìkup kubọk egbagbaan̄ enyi melek Karais ifuun̄, mè igbaan̄ enyi melek kan̄ si ijomo me mkpa, mije enyi echieekbe me lek unye eyi Awaji ogwu òjojomo Karais me mkpa. ¹³ Me adasi mgbọ, enyi ekwukwu isan̄a, kpekaan̄ ata ugwem, mije ijo inu enyi erọbe, melek mije enyi ekarege ebi eyi Awaji, ebi efieekbe afi. Mgbọ enyi enichieek me lek kè Karais, Awaji onenirọ inyi enyi egat ugwem melek Karais. Awaji îtele otutuuk ijo kiji inyi eji. ¹⁴ Awaji îgwak otutuuk ikpa urieek ijo inu kiji mè ikan geelek òtetet eji ifiin̄ isan̄a, inan̄a me lek mkpa kè Karais. Ìkup kubọk Awaji ìbeben ikpa urieek ijo inu cha igon ikam me inyọn̄ uti nkwurieen̄ kè Karais. ¹⁵ Me inyọn̄ uti nkwurieen̄ ya si ke Karais obọkọ otutuuk unye ebi ibot ijo erumun̄ geelek itọp ifiin̄, mè itim ikpan̄ ebi ibot ijo erumun̄ cha, mè isa ema ikiwulu òkô ika me isi otutuuk ene, kubọk ebi ekpulube me akọn̄. ¹⁶ Eya orọ, ikachieek ibe ene geege ifieek enyi ikọ òfolek inu enyi ekirie, mè inu enyi ekinwọ. Ikachieek si ibe ene geege ifieek enyi ikọ òfolek ubọk ekisa irie ijọk mfaka, mè ìre ijọk aya onyan̄, mè ìre inu òfolek Usen Mbuban. ¹⁷ Mije, inu chi geelek ìre ogugo inu òbonunu. Ire, achubọk inu ya eyi inu chi orebe ogugo inyi, ìre Karais me lek kan̄. ¹⁸ Eya orọ, ikachieek ibe ebi ofiaan̄ geege, ìkimọnọ lek kiban̄ kubọk ebi ìmimiin̄, enefieek enyi ikọ. Ife chi ekibe mè ebi ene ekesiki lek kiban̄ me ijọn̄, mè eketọbọ ebum enyi ebi osat Awaji, mè ikitumu si ibe ke Awaji ochili inu chi ijeen̄ ema me ilaak ọkpọchieen̄. Ema kpekup me lek inu geege, ire, ema ekpọkpọ ikibene lek. Ifuk-ibot kiban̄ ìnan̄a me linyọn̄ keyi gaalek. ¹⁹ Òjelek ene òkup ikeya ìkayaka ìkup melek Karais ogwu òkup kubọk ibot isa inyi akpalek. Ike nlik me ibot usọk okigbaan̄ otutuuk nriro òkup me akpalek ene isọk me lek ibot ene, ikeya si ke Karais okigbaan̄ otutuuk ebi kan̄ ititiin̄ me emen kan̄, mè ikinyi ema unye, mè ikirọ inyi ema eketibi esibi ike Awaji okiweek ibe ema etibi esibi. ²⁰ Enyi mîgọọk Karais ikwu mkpa, mè inwọnọ me ubọk ebi ijo erumun̄ ìkikpulu linyọn̄ keyi. Ìre keke orọ enyi eyaka ikiluk ugwem kubọk ebi linyọn̄ ekiluk? Enyi ejeje iyaka ikisiki ibot inyi ikan ọrọmijọn̄ echi ebilene etapbe ibe, ²¹ “Katet ubọk me lek keyi! Katap eyi me otu! Kachak ubọk me lek keyi!”? ²² Otutuuk ikan chi ìbofafiat isan̄a kpai me ubọk ebilene, me ikafiin̄ge mgbọ, mije, îre me ekiket ebilene mè ijejeen̄ ebilene ke înan̄a. ²³ Me atikọ, ire ikpọ ikan chi inyọn̄ inyọn̄, ìkup kubọk ata iriọọn̄-inu òwa me emen. Ebi ìchechieek me lek ikan chi ekitet lek kiban̄ me unye ikitọbọ ebum inyi ebi osat Awaji, mè ikifiaan̄ isiki lek kiban̄ me ijọn̄, mè ikisulu lek kiban̄ osusut ikagbege. Ire, ikan chi ìkakaan̄ unye geege isasa ikput ijo nkeek mè ijo ulọk akpalek geelek eyi ebilene ekikaan̄.

¹ Awaji îgbaan̄ enyi melek Karais ijomo me mkpa. Eya orọ, ìkiweek inu echi òkup me emen inyọn̄ ere Karais osikibe ikweek me agan̄ ubọk ulom unye eyi Awaji. ² Ìkikaan̄ ulọk, mè ìkikeek ekiket òfolek inu echi òkup me emen inyọn̄, ikakaan̄ ulọk me lek inu echi òkup me linyọn̄ keyi. ³ Mije, enyi mîkwaan̄ itele oka ijo ugwem kinyi, mè iyaka inikaan̄ ayaya ugwem. Awaji onenimọnọ ayaya ugwem ya ilet me emen kè Karais ogwu òkup melek Awaji. ⁴ Eya orọ, Karais ore ugwem kinyi. Me mgbọ Karais ogwu òrere ugwem kinyi ya môgwube ikom inu, enyi mêgọọk ọmọ si ikana isibi me umin mè uja kan̄. ⁵ Mije Karais orebe ugwem kinyi, ìtele otutuuk oka ijo ugwem kinyi cha eyi linyọn̄ keyi. Ìmọnọ oka ugwem cha kubọk inu òkwukwu, eyi ikayakage ìkaan̄ unye me emen kinyi. Ìtele ijeje oyet mè ten̄ten̄ ugwem, mè ugwem barabat, mè ijo ulọk, mè chieen̄ ile, mije, ire enyi ikaan̄ chieen̄ ile me lek inu geelek, ìsibi ibe ke enyi mîmin inu ya igak Awaji. ⁶ Îre mije inu chi geelek ke unaan̄-ejit Awaji obonikeme ebi kpekisiki ibot inyi Awaji. ⁷ Me adasi mgbọ, enyi me lek kinyi mîgọọk ikirọ ijo inu chi me emen oka ugwem enyi ekiluk. ⁸ Ire, mgbọ keyi enyi ekaan̄be ayaya ugwem, ìtele otutuuk ijo ugwem cha. Ìtele unaan̄-ejit, mè uyok ejit, mè ikekeek ene ijo, mè itutumu ene ifiat, mè ijo otu ikọ geelek. ⁹ Ikakan̄ ataak ìnyi ebi melek kinyi, mije, enyi mîra iwọọk oka ugwem kinyi eyi òkirọ inyi enyi ekerọ ijo inu cha isan̄a, ¹⁰ mè iyaka initap ayaya ugwem eyi Awaji orombe. Awaji ogwu òrorom ugwem ya ìkpọkpọ ikinwene ugwem ya, inyi ikikana ayaya, mè inikup kubọk ugwem kan̄, mè enyi esa me ikeya eriọọn̄ ọmọ ejaan̄ lek. ¹¹ Me emen ayaya ugwem yi, otutuuk ene ìre ìkike, ogwu Ju mè ogwu ikarege ogwu Ju, ogwu efieekbe afi mè ogwu ekafieekge afi, ebi usun̄ mè ebi ekarege usun̄, mè otutuuk ebi ekabologe chieen̄, ìrere ebi ìluk me agan̄ ekigwen Sitia. Otutuuk chi ìre ikike, kpunu esese inu geege òkukup me etete kiban̄, mije, Karais ore inu geelek inyi ema, ọmọ si okup me emen otutuuk kiban̄. ¹² Eya orọ, enyi kubọk ebi eyi Awaji, ebi Awaji ogobobe isun̄ esese inyi lek kan̄, ìmun̄ lek kinyi me chieen̄ enenen, ìkikaan̄ ejit njijin mè ata ejit me lek ene. Ìkisiki lek kinyi, mè ìkirọ inu esuuk esuuk, mè ìkikaan̄ ukarajit. ¹³ Ikakigwat lek ìnaan̄ ejit ìnyi ebi melek kinyi ebi ìrọrọ enyi ilọ. Ire ebi melek kinyi irọ enyi ijo inu, ìtele inyi ema. Ike Awaji otelebe ijo kinyi inyi enyi, enyi si, ìtele ìnyi ebi geelek ìrọrọ enyi ijo inu. ¹⁴ Eyi ògagak otutuuk, ìkaan̄ imumechieen̄ me lek ebi melek kinyi, mije, imumechieen̄ okigbaan̄ otutuuk ata ugwem chi ibọp me emen ene, mè ikirọ inyi ene ya iso ifuk ubọk Awaji oweekbe. ¹⁵ Ìtele mè esuuk eyi Karais okinyi ene ikup me emen ejit kinyi, mè ikijeen̄ enyi oniin̄ me emen inu geelek enyi ekirọ, mije, Awaji ìgbaan̄ otutuuk kinyi igwen, inyi enyi enere akpalek ge gaalek, mè eluk me esuuk. Ìkinyi Awaji itọn̄ mgbọ geelek. ¹⁶ Ìtele mè ikọ kè Karais ikup me emen kinyi ojot ojot. Ìkisa me ojot ojot iriọọn̄-inu ìkijeen̄ ebi melek kinyi inu. Ìkikọt okwa mbuban mè okwa itọn̄ ìnyi Awaji, mè okwa echi òkibene Ekwukwu Mbuban. Ike enyi ekikọt okwa inyi Awaji, ìkitọn̄ ọmọ mgbọ geelek me emen ejit kinyi. ¹⁷ Me inu geelek enyi ekirọ, mè ìre me ikọ otu mè ìre me ikwaan̄ irọrọ me ubọk, ìkirọ otutuuk me erieen̄ Okaan̄-ene Jisọs, mè ìkisa me lek erieen̄ kan̄ ìnyi Awaji itọn̄. ¹⁸ Enyi ebi nwa, ìsiki ibot ìnyi ebi nlom kinyi, mije, ikeya ogbe ibe ogwu òkup me emen Okaan̄-ene irọ. ¹⁹ Enyi ebi olom, ìmun̄ ebi nwa kinyi me chieen̄. Ikaluk ugwem ijo ijo melek kiban̄. ²⁰ Enyi nsabọn, ìsiki ibot ìnyi nte kinyi mè nga kinyi me emen inu geelek, mije, irọrọ ikeyi okibele Awaji ejit. ²¹ Enyi ebi ute, ikatap nsabọn kinyi ijo ejit, inyi ema ekanan̄a me ikeya ìwọ lek me irọrọ inu òtatat. ²² Enyi ebi usun̄, ìkisiki ibot ìnyi ebi nte uwu kinyi me emen inu geelek. Ikakisiki ibot me mgbọ ema ekupbe gaalek, inyi ema ekema enyi. Ire, ìkisa otutuuk ejit kinyi ìsi ikwaan̄ ìnyi ema me oniin̄ òbokinyi Okaan̄-ene umin. ²³ Inu geelek enyi ekirọ, ìkisa otutuuk ejit kinyi ìrọ, mije, enyi ekirọ inyi Okaan̄-ene, ìkare ebilene. ²⁴ Ikawuuk ibe ke Okaan̄-ene môkpe enyi mkpukpe ubọk ikwaan̄ kinyi. Enyi mêbọkọ otutuuk irot geelek îsun̄be inyi enyi, mije, Okaan̄-ene Karais me lek kan̄ ore nte uwu ya ogwu enyi ekisi ikwaan̄ inyi. ²⁵ Ene geelek òkirọ ijo inu ìkpolọlọ ibọbọkọ mkpukpe ijo inu kan̄, mije, Awaji ìkakilibi ene geege chieen̄, ìkakigobo si ene geege isi.

¹ Enyi ebi nte uwu, ìkirọ inu òtatat, mè igbe ìnyi ebi usun̄ kinyi. Mije, enyi mîriọọn̄ ibe ke enyi si mîkaan̄ Nte Uwu me emen inyọn̄. ² Ìkiriaak uriaak mgbọ geelek. Ìkup me mbem lek, mè ìkitọn̄ Awaji otutuuk mgbọ. ³ Ìkiriaak si uriaak me ibot kiji ibe Awaji ichili oniin̄ ibook, inyi eji ekelook ata etip, mè eji ekọt ekpa nlelet inu ya eyi Awaji ochilibe ibook òfolek kè Karais enyi ebi ene. Enyi mîriọọn̄ ibe ke ìre mije ilolook ata etip yi ke etet emi itap me mkpọn. ⁴ Ìkiriaak uriaak me ibot n̄a, inyi ǹkọt ǹlook ata etip yi mkpọk mbum ike îgbebe, mè ebi ene egobo etet ejaan̄ lek. ⁵ Ìsa me iriọọn̄-inu ìkirọ inu melek ebi ekachieekge me lek Okaan̄-ene, mè isa irek geelek enyi ekaan̄be melek kiban̄ ìrọ ata ikwaan̄ òkakaan̄ oruru. ⁶ Ìkisa ida ònwọnwọn, mè ata otu eyi òkibele ebi ene ejit, ìtumu ikọ mgbọ geelek, inyi enyi ekeriọọn̄ ubọk enyi ebekisa ifọọk ene geelek ikọ. ⁷ Taikikọs môtumu inu geelek òfolek n̄a inyi enyi. Ọmọ ìre atalek gwun̄ Nte ogwu eji emabe enenen, ogwu òkisa otutuuk efuuk kan̄ isi ikwaan̄. Ọmọ melek n̄a ekigbaan̄ isi ikwaan̄ inyi Okaan̄-ene. ⁸ Inu òrọrọ nriabe ọmọ inu me lek kinyi ìre, inyi inikpa otutuuk inu òfolek kiji inyi enyi, mè itap si enyi efuuk me emen. ⁹ Ọmọ melek Onesimọs atata gwun̄ Nte ogwu eji emabe enenen, ogwu ògbegbe utoon̄-ejit ebenu me lek kinyi. Ọmọ ìre ene ge me lek ebi ntitiin̄ kinyi. Ema ene iba mêkpa otutuuk inu òkirọ me ere keyi inyi enyi. ¹⁰ Arisitakọs ogwu melek n̄a ekupbe me mkpọn me ere yi ìbe mè emi ǹtọp enyi amọn ǹnyi ọmọ. Ikeya si, Mak, gwun̄ ngwan̄ kè Banabas îtọp enyi amọn. Nra iwuuk lek ige ikpa nteme òfolek kè Mak ijet enyi. Eya orọ, mgbọ ọmọ isinu, ìsa ata ejit ìbọkọ ọmọ ìtap. ¹¹ Josuwa ogwu ofifi erieen̄ kan̄ orebe Jọsitọs, îtọp si enyi amọn. Me otutuuk ebi melek n̄a ekisi ikwaan̄ eyi mkpulu eyi Awaji, ebibi gaalek ere ebi Ju. Me atikọ, ema mîtap emi efuuk me emen enenen. ¹² Epafaras, òrere ene ge me lek ebi ntitiin̄ kinyi, mè ire si ata ogwu òkisi ikwaan̄ inyi Jisọs Karais, îtọp enyi amọn. Ọmọ ìkiriaak uriaak mgbọ geelek ibe mè Awaji irọ inyi enyi ekeke enye, mè emiin̄ eso ifuk me emen inu eyi Awaji, mè eriọọn̄ nkeek Awaji ejaan̄ lek. ¹³ Emi me lek n̄a nkeke ata-ikọ inyi ọmọ, ibe ke ọmọ gwa òkikwukwulu enenen ikisi ikwaan̄ me ibot kinyi, mè ebi Lawodisia, mè ebi Hirapolis. ¹⁴ Luk ogwu ofia eji emabe enenen, mè Dimas mîtọp enyi amọn si. ¹⁵ Ìtọp bọn Nte kiji ìkup me Lawodisia amọn, mè ìtọp si gwun̄ Nte n̄a enenwaan̄, Nimfa, mè ebi ntitiin̄ Awaji ìkititiin̄ me uwu kan̄ ata amọn ìnyi eji. ¹⁶ Enyi isifuk ikpa etip keyi isan̄a me ntitiin̄ kinyi, ìrọ inyi ire ubọk ebi Lawodisia, mè efuk esibi si me ntitiin̄ kiban̄. Nge ofifi ikpa etip ijet ema, mè ibe ema erọ mè ire enyi ubọk. Ema isiria ikpa ya ijet enyi, ìfuk si ìsibi me ntitiin̄ kinyi. ¹⁷ Ìlook Akipọs ibe ikalọlọ irọrọ ikwaan̄ Okaan̄-ene eyi etapbe ogwugwu me ubọk ibe irọ ya. ¹⁸ Emi Pọọlu nsa ubọk n̄a gaalek igwat òta ikọ chi ijet enyi. Ntọp enyi amọn! Ikawuuk ibe ke emi ǹkup si me mkpọn. Atata nnwọn eyi Awaji ikup melek kinyi.