Ikwaan̄ ebi otuchieen̄

Ikwaan̄ ebi otuchieen̄

¹ Ogwu nte Tiofilọs, me emen adasi ikpa ngebe ijet owu, mkpa inyi owu otutuuk inu Jisọs orọbe, mè echi îjeen̄be bene me ibebene ikwaan̄ kan̄, ² mege inire usen Awaji omọnọbe ọmọ ifo emen inyọn̄. Sabum Jisọs oninan̄a ifo emen inyọn̄, îteme ebi otuchieen̄ ebi îgobobe inyi lek kan̄ owuwa nteme sa me unye eyi Ekwukwu Mbuban. ³ Mgbọ îbọkọbe ufialek eyi mkpa isan̄a, mè ijomo me mkpa, îsa lek kan̄ ijeen̄ ebi otuchieen̄ kan̄ me owuwa oniin̄ eyi ebi ene kpebekọt igbini, ibe ke ọmọ îjomo me mkpa me atikọ, mè ikup me ògat ugwem. Bene me mgbọ îjomobe me mkpa, îsa lek kan̄ ikijeen̄ ebi otuchieen̄ kan̄ iraka akọp usen ini, mè ikijeen̄ ema inu òfolek mkpulu eyi Awaji. ⁴ Me mgbọ ge îsibibe ichichini ema, igọgọọk ema ikirie inorie, mè itumu inyi ema ibe, “Ikanan̄a me Jeruselem ìsibi. Ìkup ìkpọ mgbọ Nte n̄a môriabe uche ya eyi îchieekbe enyi me use ijet enyi kubọk ntumube ikọ òfolek inyi enyi. ⁵ Jọn ìsa mun̄ ikike igwook ene mun̄. Ire, me usen inen me inen òkinu me isi, emi mâsa Ekwukwu Mbuban igwook enyi mun̄.” ⁶ Me ofifi mgbọ ema etitiin̄be melek kè Jisọs, ema enenido ọmọ ibe, “Okaan̄-ene, ìre mgbọ keyi ke owu oborọ inyi ebi Ijeren ekpọk ekekpulu lek kiban̄?” ⁷ Jisọs otutumu inyi ema ibe “Mgbọ mè ibot mgbọ echi Nte n̄a osun̄be me unye kan̄ inyi inu geelek ìkakup ìnyi enyi irọriọọn̄. ⁸ Ire, enyi mêbọkọ unye mgbọ Ekwukwu Mbuban mônube me emen kinyi. Bene me mgbọ ya, enyi mêkeke ata-ikọ inyi emi me Jeruselem, mè otutuuk agan̄ Judia, mè agan̄ Sameria, mè ikeke ata-ikọ mege isi ire ntutun̄ ere geelek me linyọn̄ keyi.” ⁹ Ikọ ya itata Jisọs me otu, Awaji obebene ọmọ isan̄a me ijọn̄ me isi kiban̄ ifo emen inyọn̄. Oduku inyọn̄ okakana ichit ọmọ. Ema kpeyaka imun̄ ọmọ ofifi. ¹⁰ Ike ema ekpọkpọ ibene chieen̄ igwuun̄ me isinyọn̄ ikikpọ ubọk oduku inyọn̄ okisa ọmọ ifo, ebirieen̄ iba ìtatap ọfọnti okuket ekakana isibi, mè ikeke me agba lek kiban̄, mè ibe ema, ¹¹ “Enyi ebirieen̄ ebi Galili, ìre keke orọ enyi ekekebe me ere keyi ikibene chieen̄ ikpọ inyọn̄ ikeyi? Jisọs keyiyi ogwu enyi emun̄be Awaji omọnọbe isan̄a me etete kinyi ifo emen inyọn̄, môyaka igwu ikom inu ike yaage enyi emun̄be ọmọ okinene ifo emen inyọn̄.” ¹² Mgbọ Jisọs onenebe ifo emen inyọn̄ isan̄a, ebi otuchieen̄ kan̄ enenigwu ikom inan̄a me inyọn̄ ogoon̄ ya ekigwen ogoon̄ Olifu ika inu me Jeruselem. Nan̄a me ere inu ya orọbe na re Jeruselem môjọn̄ọ ere iso ewuuk ije ge, òrere ikeke ujọn̄ọ ije ene môkọtbe ije me Usen Mbuban. ¹³ Mgbọ ema erebe Jeruselem, ema ejeje isi inin̄ emen agwut ere ema ekikup me uwu inyọn̄ ge me emen ama ya. Ema ebi ìsisi ere ya ìre: Pita, mè Jọn, mè Jemis, mè Anduru, mè Filip, mè Tọmọs, mè Batolomi, mè Matiyu, mè Jemis gwun̄ kè Alifiọs, mè Saimọn ogwu otu-ogbo ebi ulọk ama ominbe me ejit, mè Judas gwun̄ kè Jemis. ¹⁴ Ema mè owuwa ebibaan̄, mè Meri nga kè Jisọs, mè ebi ngwan̄ kè Jisọs, ekekikup me ere ya ikiriaak uriaak mgbọ geelek. ¹⁵ Ebi ìchieek me lek kè Jisọs ìkititiin̄ me ere ya ikiriaak uriaak mîso efit ene me akọp iba. Usen ge, Pita onanan̄a ikeke me etete kiban̄, mè itumu inyi ema ibe, ¹⁶ “Bọn Nte n̄a, inu Ekwukwu Mbuban otumube me ukot ikaan̄ inan̄a me otu kè Debit òfolek kè Judas ogwu òsasa ebi ene ijeen̄ oniin̄ inyi enetet Jisọs kpomolọlọ irọrọ iso ike egebe me Ikpa Mbuban. ¹⁷ Judas ìre ene ge me etete kiji, mè ire si ogwu egogobo isibi ibe inigọọk eji isi ikwaan̄.” ¹⁸ Judas îsa ikpoko ekpebe ọmọ me lek ijo ikwaan̄ kan̄ ya isi ilep ijọn̄ ge. Ere ya ke înan̄a irọn̄, owot kan̄ orarama ibum, otutuuk nkat òkup ọmọ me owot ogbọgbọọk isibi, ikwukwu. ¹⁹ Otutuuk ebi ìkup me Jeruselem enọnọ inu ya òrọrọ, mè inyi ijọn̄ ya erieen̄ me usem Iburu, Akelidama (eyi òsisibi Ijọn̄ Eje). ²⁰ Pita îtumu si ibe, “Inu ya ìrọ ikeya, mije, Debit ìge me Ikpa Okwa ibe: ‘Eyat etele uwu kan̄, ene geege ikaluk me emen uwu kan̄,’ mè ige si ibe, ‘Ofifi ene ibọkọ irek ikwaan̄ kan̄ isi.’ ²¹ Eya orọ, eji enegobo enerieen̄ ge me etete kiji, inyi inimọnọ irek kè Judas. Ene ya môre ogwu ògọgọọk eji ikup otutuuk mgbọ Okaan̄-ene Jisọs okupbe ikijijen̄e ikana melek kiji, ²² bene me mgbọ Jọn ogwookbe ọmọ mun̄ na re mgbọ Awaji omọnọbe ọmọ isan̄a me etete kiji ifo emen inyọn̄. Mije, ene yi mônigọọk eji ikeke ata-ikọ ibe ke Okaan̄-ene îjomo me mkpa me atikọ.” ²³ Ema enenitọ ubọk me lek ebirieen̄ iba. Ene ge ore Josefu ogwu ekigwen Basabas, (mè ègwen si Jọsitọs). Ofifi ene ore Matayas. ²⁴ Mgbọ ema etọbe ubọk me lek ebirieen̄ iba chi, ema eneniriaak uriaak ibe, “Okaan̄-ene, owu oriọọn̄ ejit ene geelek. Me etete ene iba chi, jeen̄ eji ogwu owu ogobobe, ²⁵ inyi inigọọk eji irọ ikwaan̄ ebi otuchieen̄ yi me irek eyi Judas otelebe, mè inan̄a ifo ere ògbegbe ọmọ.” ²⁶ Mgbọ ema eriaakbe uriaak ya isan̄a, ema eneniroon̄ nriroon̄. Nriroon̄ ya onenirọn̄ inyi Matayas. Enenisa ọmọ itap isọkọ me lek akọp mè ebi otuchieen̄ ge cha, inyi otu ifuk kiban̄ iso akọp mè iba.

¹ Mgbọ usen mfaka Pentikọs orebe, otutuuk ebi otuchieen̄ kè Jisọs etititiin̄ me ere ge. ² Me ekakpọge chieen̄, ema enọnọ ida inu ge okitaan̄ kubọk ida unye efet ikinan̄a me isinyọn̄ inu, mè inijot emen uwu ere ema ekupbe ya. ³ Ema emumun̄ inu òkup kubọk owuwa alọm ukan̄ me emen uwu ya. Alọm ukan̄ cha onenikpọk iche, mè inisọọk ema otutuuk me ibot, me ene me ene. ⁴ Ekwukwu Mbuban oninin̄ ijot emen otutuuk kiban̄, ema ebebene ikitumu usem òkup esese esese ubọk Ekwukwu Mbuban orọbe inyi ema ekọt etumu. ⁵ Me ike mgbọ ya, owuwa ebi Ju, ebi ìkakaan̄ ukpook Awaji me emen mînan̄a me ido geelek òkup me linyọn̄ inu me Jeruselem ibenigọọk irie ijọk ya. ⁶ Mgbọ ema enọbe ida okput ya, ogbogbo ebi ene enanan̄a isibi inu inititiin̄ me ere ya ikigban̄ ikọ ife cha ekitumu. Ogwu ikup ònọ ubọk ekitumu ikọ me usem ama kan̄. Inu ema emun̄be me ere ya okeke ema chieen̄ enenen. ⁷ Ubọk inu ya okebe ema chieen̄ enenen, ema ekekibe, “Iyak! Ìre otutuuk ife chi ìkitumu ikọ kpefat ire ebi Galili? ⁸ Ire ikeya, ìre ife chi ejeje ikitumu ikọ eyi eji geelek ekinọ me otu usem ama kiji me ge me ge? ⁹ Mije, otutuuk kiji ebi ìkup me ere yi kpenan̄a me ama ge inu. Usini kiji enan̄a me ido Patia, mè Midia, mè Elam. Usini enan̄a me ido Mesopotemia, mè agan̄ Judia, mè Kapadosia. Usini enan̄a me ido Pọntọs, mè Esia, ¹⁰ mè Firijia mè Pamfilia, mè Ijipiti. Usini ene enan̄a me ido Libia me agan̄ òkup igbet ama Sairini, sa usini enan̄a me ama Rom. ¹¹ Usini me lek ebi ìnan̄a me Rom ya ìre ebi Ju, sa usini ere ebi ofifi ido ìnenichieek me lek ubọk iriaak Awaji ebi Ju. Usini me lek kiji ìre ebi Keret, sa usini ere ebi Arebia. Eji geelek mînọ ema ekisa usem ama kiji me ge me ge ikitumu ikpele inu ukechieen̄ geelek Awaji orọbe.” ¹² Inu yi îkwu ema lek, mè iwuwọlọ ema ibot ire lek ema ekitumu ibe, “Iyak, ìre eyi keyi ìsibi keke mọnọ?” ¹³ Ire, usini kiban̄ ekekisa ebi ife cha irọ inu ochak, ibe, “Ìkpọ, ife chi mînwọ aya miin̄, mè inwọ isa!” ¹⁴ Pita onenisibi ikeke, ọmọ melek akọp mè ebi otuchieen̄ ge kechilọ, mè itaan̄ ukpo ikitumu ikọ inyi ebi urum ene cha ibe, “Enyi ebi Ju, mè otutuuk kinyi ebi ìluk me Jeruselem, ìgban̄ utọn̄, inyi m̀kpa inu chi òkirọ me ere yi ǹnyi enyi. Ìgbala utọn̄ me lek ikọ geelek mbatumu. ¹⁵ Kpunu miin̄ geege òsasa ebirieen̄ chi kubọk enyi ekikeek, mije, mgbọ keyi mgbọ keyi ke òfuk-mgbọ osulu onaan̄ge eyi ewelegwe. ¹⁶ Ire, inu yi ìkirọ ikọ Juwen ogwu nriran otumube iso. ¹⁷ “Juwen ìbe ke Awaji ibe, ‘Me òta mgbọ, emi mâria Ekwukwu n̄a igwook me emen otutuuk ebilene. Bọn ebirieen̄ kinyi mè bọn ebibaan̄ kinyi mêben nriran. Nsabọn irieen̄ kinyi mêmun̄ ilaak ọkpọchieen̄. Ebi ugane ebirieen̄ kinyi mêmumun̄ ilaak. ¹⁸ Me mgbọ ya, emi mâria Ekwukwu n̄a itap me emen bọn ikwaan̄ n̄a ebirieen̄ mè ebibaan̄, inyi ema ekeben si nriran. ¹⁹ Emi mârọ owuwa inu ukechieen̄ me isinyọn̄, mè irọ owuwa uyeke inu ijejeen̄ me linyọn̄. Eje môgwook me linyọn̄, ukan̄ môkilomo, oduku okekibumu isibi. ²⁰ Me isinyọn̄, ura môgwu ikom idun, Onyan̄ mônin̄ ikup eje eje. Otutuuk inu chi mômọnọ irek sabum ìbore ikpele usen ya eyi Okaan̄-ene mônube me umin mè uja kan̄. ²¹ Me usen ya, Awaji mônyan̄a otutuuk ebi geelek ìkigwen erieen̄ Okaan̄-ene.’ ²² “Ebi Ijeren ìgban̄ utọn̄! Jisọs ogwu Najeret ìre ogwu Awaji oraria inu, mè ibene ọmọ ijeen̄ enyi sa me owuwa ikpele ikwaan̄ ukpook, mè inu ukechieen̄, mè owuwa uyeke uyeke inu ijejeen̄. Me isi kinyi otutuuk ke Awaji orọ otutuuk inu chi inan̄a me ubọk kè Jisọs, kubọk enyi me lek kinyi eriọọn̄be. ²³ Me nkeek Awaji, ebi ene enenitet Jisọs yi ikana itap enyi me ubọk kubọk Awaji owuukbe lek iriọọn̄ isan̄a ibe ke môrọ. Enyi etetet ikana itap me ubọk ebi ekariọọn̄ge Awaji, inyi egon ọmọ ekpan̄ me inyọn̄ uti nkwurieen̄. ²⁴ Ire, Awaji ojojomo ọmọ me mkpa, mè isan̄a ọmọ isibi me emen ufialek eyi mkpa, mije, mkpa ìkpokọt itet ọmọ ikaan̄. ²⁵ Îre ọmọ ke Debit otumu ikọ òfolek ibe: ‘Mmun̄ Okumugwem me isi n̄a mgbọ geelek. Mije ọmọ okupbe me agan̄ ubọk ulom n̄a, kpunu inu geege òbokọt isisik emi. ²⁶ Eya orọ ejit n̄a îbele. Ikọ unwọọn̄ mè okwa unwọọn̄ okinan̄a emi me otu isibi. Ubọk geelek akpalek n̄a môkwube, nkaan̄ ikpọchieen̄ ibe ke mâluk ugwem, ²⁷ mije, owu òkpotele ibe ibot ejit n̄a ibia me udọn̄ ufuun̄. Owu òkpotele si ibe ogwu kwun̄ Ogwu Òkup me Mbuban ijọ ilaak me emen udọn̄. ²⁸ Owu ojeen̄ emi oniin̄ eyi ugwem, Unwọọn̄ môjot emi ejit mgbọ mâmun̄be owu isi me isi.’ ²⁹ “Ebi kiji, emi mâsa irek keyi itumu ikọ òfolek kè Debit ogwu nte nte kiji inyi enyi. Debit îkwu, ebeben ifuun̄. Udọn̄ ufuun̄ kan̄ ọmọ òwa melek kiji mege inire chereyi. ³⁰ Ire, Debit ìre ogwu nriran. Îriọọn̄ ibe ke Awaji îchieek use, mè inyan̄a ibot igbaalek ibe ke ọmọ môsa gwun̄ owot iman kan̄ ge irọ ubọọn̄ me inyọn̄ ogboon̄ ubọọn̄ kan̄. ³¹ Debit îmun̄ inu òborọ me mgbọ òkup me isi. Eya orọ, ibeben nriran òfolek ijojomo me mkpa eyi Karais obojomo, mè itumu ibe ke Awaji ìkatele inyi nkwukwu kè Karais ibia me emen udọn̄ ufuun̄, ìkatele si inyi ijọ. ³² Me atikọ, Awaji îjomo Jisọs yi me mkpa inin̄ me ugwem, eji otutuuk ene ìre ebi ata-ikọ ibe ke inu chi îmọnọ irek me atikọ. ³³ Awaji onenibene ọmọ ifo inyọn̄, inyi inikweek irek me agan̄ ubọk ulom kan̄. Me ere ya ke îbọkọ Ekwukwu Mbuban me ubọk ogwu Ute, kubọk ogwu Ute ochieekbe use, mè iria itap me emen kiji kubọk enyi ekimun̄, mè ikinọ mgbọ yi. ³⁴ Ofifi si, Debit ìkanene ìfo emen inyọn̄. Ire, ọmọ me lek kan̄ otumu ibe: ‘Okumugwem îtumu inyi Okaan̄ n̄a ibe, “Siki kweek me ubọk agan̄ ulom n̄a, ³⁵ mege ire mgbọ mâsabe ebi ochicha kwun̄ irọ inu ibene ukot inyi owu.” ’ ³⁶ “Eya orọ, otutuuk kinyi ebi Ijeren, ìriọọn̄ ibe ke Awaji îsa Jisọs yi, ogwu enyi egonbe ikpan̄, irọ Okaan̄-ene mè Karais.” ³⁷ Ikọ ya Pita otumube osisisik ebi ife cha ejit enenen. Ema edodo Pita mè ebi melek kan̄ ibe, “Ebi ngwan̄ kiji, ìre keke ke eji eberọ mgbọ keyi?” ³⁸ Pita ofọfọọk ema ibe, “Enyi otutuuk ene, ìgwu ìkom, mè egwook enyi mun̄ me erieen̄ kè Jisọs Karais, inyi Awaji itele otutuuk ijo kinyi inyi enyi, ke enyi mêbọkọ Ekwukwu Mbuban, eyi òrere uche Awaji. ³⁹ Use yi Jisọs ochieekbe icheche Ekwukwu Mbuban inyi ene, ìkup inyi enyi mè bọn kinyi, mè ikup inyi otutuuk ebi geelek ìkup me ujọn̄ọ ere. Use yi ìkup inyi otutuuk ebi geelek Okaan̄-ene Awaji kiji môgwenbe.” ⁴⁰ Pita îtumu si owuwa ikọ ikisa iriaak ebi ife cha, mè ikibe ema, “Ìgwu ìkom, mè Awaji inyan̄a enyi isibi me emen osusut òkukup inyi ijo ebi ukot keyi, ebi ìjijit atikọ.” ⁴¹ Owuwa ene ebọbọkọ ata etip ya Pita olookbe itap, ebi udun̄ kè Jisọs cha egwogwook ema mun̄. Ebi ìgwugwu ikom me usen ya, mè inigọọk inin̄ isọkọ me otu ifuk ebi udun̄ kè Jisọs mîso obop ene ita. ⁴² Otutuuk ebi ìchechieek me lek kè Jisọs Karais etetet lek inye ikikween̄ inu me ubọk ebi otuchieen̄ kè Jisọs, mè ikigbaan̄ iluk ugwem me ejit ge, mè ikigbaan̄ irie inorie ikike melek inorie mbuban, mè ikitet lek inye me irariaak uriaak mgbọ geelek. ⁴³ Ebi otuchieen̄ kè Jisọs cha ekekirọ owuwa inu ukechieen̄ mè owuwa uyeke ikwaan̄ òkup esese esese. Ukpook otetet ebi ene enenen mije otutuuk inu chi ema ekirọ. ⁴⁴ Otutuuk ebi ìchechieek cha ekekigbaan̄ ititiin̄ me ere ge mgbọ geelek, mè ikigbaan̄ iche inu kiban̄. Inu geelek ene geelek okaan̄be ìre eyi otutuuk ene. ⁴⁵ Ema ekekikpulu inu geelek ema ekaan̄be inyam, mè isa ikpoko cha idọmọ inyi ebi melek kiban̄ igọọk me lek inu geelek ònanan ene geelek. ⁴⁶ Usen geelek, ema ekekinititiin̄ me oyet egep Uwu Mbuban. Ema ekekigbaan̄ irie inorie me uwu kiban̄, me uwu me uwu, me ubelejit mè ejit òtatana, ⁴⁷ mè ikitọn̄ Awaji. Otutuuk ebi ene ekekikaan̄ ata ejit me lek kiban̄. Okaan̄-ene okekinyan̄a ebi ene, mè ikisa inisọkọ me otu ifuk kiban̄ usen geelek.

¹ Usen ge, mgbọ òfuk-mgbọ osulube ita eyi ejit ikarek, òrere mgbọ uriaak, Pita mè Jọn eneninan̄a ije ibesi iriaak uriaak me Uwu Mbuban. ² Mgbọ ema erebe otunchit eyi ekigwen Uja Otunchit, ema emumun̄ ogwu akọọk ge, emanbe ikeya, okweekbe me ere ya ikibeek inu. Usen geelek, ebi uwu kiban̄ ekibeben ọmọ iniyik me agba otunchit ya, inyi ikup me ere ya ikibeek inu me ubọk ebi geelek ìbenije iraka inin̄ oyet egep Uwu Mbuban ya. ³ Mgbọ ogwu akọọk ya omun̄be Pita mè Jọn ebenije iraka inin̄ otunchit ya, ibebeek ibe eche inu enyi ọmọ. ⁴ Pita mè Jọn egwugwuun̄ chieen̄ ikikpọ ọmọ. Pita otutumu inyi ọmọ ibe, “Bene chieen̄ kpọ eji!” ⁵ Ogwu akọọk ya obebene chieen̄ ikpọ ema, mè ikikeek ibe ke mêche inu inyi ọmọ. ⁶ Ire, Pita obebe ọmọ, “Ǹkakaan̄ ikpoko alata araran̄ mè alata okuket. Ire, inu nkaan̄be ke mbanyi owu. Me erieen̄ kè Jisọs Karais ogwu Najeret, nan̄a keke je ije!” ⁷ Pita itutumu ikọ ya isan̄a, inyanyana ubọk itet ogwu akọọk ya me ubọk agan̄ ulom, mè itap ubọk inyi ọmọ, inyi inan̄a ikeke. Mgbọ yaage, ijọn̄ ukot kan̄ iba mè ukwuuk ebek ukot kan̄ onyenye. ⁸ Iwuwulu inan̄a ikeke me ukot kan̄, mè ibene ikije ije, mè igọọk Pita mè Jọn ije inin̄ emen oyet egep Uwu Mbuban. Òkije, òkiwulu, mè ikitọn̄ Awaji, mije ubelejit. ⁹ Mgbọ otutuuk ebi ene emun̄be ogwu akọọk ya okije ije, mè ikitọn̄ Awaji, ¹⁰ ema etetet ọmọ chieen̄ me lek, mè iriọọn̄ ibe ke ìre ogwu akọọk ya, ogwu òkikweek me agba Uja Otunchit Uwu Mbuban ya ikibeek inu. Inu ya okeke ema chieen̄, mè ikwu ema lek enenen. ¹¹ Îke otutuuk ebi ene chieen̄ enenen imumun̄ ogwu akọọk ya ogọbọbe Pita mè Jọn ikaan̄, mè ikigọọk ema ije me emen Uwu Mbuban me agan̄ ekigwen, ọfọ kè Sọlọmọn. Eya orọ, otutuuk ene efafan̄a, mè isa ekot ekot ilibi igọọk ema me ere ya. ¹² Mgbọ Pita omun̄be urum ebi ene cha efan̄abe inijot ere ya, ibebe ema, “Enyi ebi Ijeren, ìre inu yi ìjeje ike enyi chieen̄ ikeyi? Ìre keke orọ enyi ekikpọ eji ikeyi kpoo kubọk ke ìre me unye kiji melek ubọk eji esabe ikup me mbuban ke eji esa irọ inyi ene yi ije ije? ¹³ Awaji kè Ebereham, mè Awaji kè Ajiki, mè Awaji kè Jekọp, mè Awaji ebi nte nte kiji înyi Jisọs ogwu ikwaan̄ kan̄ umin. Jisọs yi ke enyi etet inyi ibe ekpan̄, mè ijit ọmọ me isi kè Pailet, mgbọ Pailet oweekbe itetele ọmọ inyi ifo. ¹⁴ Enyi mîjit Ogwu Òkup me Mbuban mè ogwu Ata Irọrọ, mè ibeek ibe esan̄a ogwu òkpan̄ ene esibi enyi enyi. ¹⁵ Enyi mîtet ogwu òkinyi ene ugwem ikpan̄. Ire, Awaji ojojomo ọmọ me mkpa, kubọk eji esabe chieen̄ kiji imun̄, mè ikeke ata-ikọ inyi. ¹⁶ Îre nan̄a me ichechieek me lek erieen̄ kè Jisọs ke eji esa irọ inyi lek inye ogwu enerieen̄ yi ogwu enyi ekimun̄, mè iriọọn̄ isi. Unye eyi òkup me emen erieen̄ kè Jisọs, mè ichechieek eji ekaan̄be me lek kan̄ orọ inyi lek ene yi inye isan̄a kpai, kubọk otutuuk kinyi emun̄be si. ¹⁷ “Mgbọ yi, ebi ngwan̄ n̄a, nriọọn̄ ibe ke enyi mè ebi ibot kinyi erọ Jisọs inu ya me ekariọọn̄ge. ¹⁸ Ire, Awaji îwuuk lek itumu me otu ebi nriran me ukot ikaan̄ ibe ke ogwu ọmọ otoon̄be ubọk me ibot mômun̄ owuwa ufialek. Inu yi enyi erọbe Jisọs ke Awaji osa irọ ikọ kan̄ ya iso. ¹⁹ Eya orọ, ìgwu ìkom, mè ìgọọk Awaji, inyi itele otutuuk ijo kinyi inyi enyi, ²⁰ mè Okumugwem irọ inyi mgbọ isiki-efuuk ya inu, mè ikpọk iria Jisọs inu. Jisọs yi ore ogwu Mesaya ya, ogwu Okumugwem ogobobe isibi inyi enyi. ²¹ Jisọs yi môbia me emen inyọn̄ mege ire mgbọ Awaji mônen̄ebe otutuuk inu geelek isun̄, kubọk îchieekbe use inan̄a me otu ebi nriran kan̄ ìkup me mbuban karake ukot ikaan̄. ²² Mije, Mosis îtumu ibe ke Okumugwem Awaji kinyi môsan̄a ogwu nriran ge òkup kubọk kan̄ isibi me etete bọn kinyi inyi enyi, mè enyi ekalọlọ igbagban̄ utọn̄ me lek inu geelek ogwu nriran ya môtumube inyi enyi. ²³ Ene geelek ikagban̄ge utọn̄ ìnyi ogwu nriran ya, ke ebekpakpan̄, inyi esa me ikeya esan̄a ene ya esan̄a me etete ebi eyi Awaji. ²⁴ Me atikọ, otutuuk ebi nriran geelek, bene me lek kè Samien re lek otutuuk ebi ìnunu me udun̄ kan̄, mîtumu ikọ òfolek inu chi òkirọ mgbọ kechi. ²⁵ Otutuuk use geelek Awaji ochieekbe inan̄a me otu ebi nriran ukot ikaan̄, mè inyan̄a-ibot Awaji onyan̄abe melek ebi nte nte kinyi, ìre echi kinyi me irot. Awaji ìtumu inyi Ebereham ibe ke nan̄a me lek bọn owot-iman kè ogwugwu ke ọmọ obogbana otutuuk ido geelek me linyọn̄. ²⁶ Mije keya, mgbọ Awaji ogobobe ogwu ikwaan̄ kan̄ isibi, ìdasi iria ọmọ ijet enyi ebi Ijeren, inyi inirọ mè enyi geelek egwu ekom etele ijo kinyi, mè isa me ikeya igbana enyi.”

¹ Mgbọ Pita mè Jọn ekitumu ikọ inyi ife cha me Uwu Mbuban, ebi ngwugwa, mè ogwu ibot ebi ìkibem Uwu Mbuban, mè usini ebi Sadusi enenije inu me lek kiban̄. ² Mgbọ ema enube, mè ininọ Pita mè Jọn ekitumu inyi ife cha ibe ke Jisọs îjomo me mkpa, ejit onanaan̄ ema enenen, mije, eya ìkijeen̄ ibe ke ebi ìkwukwu mêjomo me mkpa. ³ Eya orọ, ema etetet Pita mè Jọn isa ije. Ire, mije egwe obonifit, ema esasa ife chi isi itap me mkpọn, mè ekup me ere ya ewele egwe. ⁴ Ire, owuwa ebi ìnọnọ ata etip Pita olookbe ya, echechieek me lek kè Jisọs. Sa me ikeya, otu ifuk ebirieen̄ ebi ìchechieek owawa ilap me lek obop ene go. ⁵ Me òfit iwele kan̄, ebi ibot ama, mè ebi ugane ama, mè ebi ìjeen̄ Ikan enenititiin̄ me Jeruselem. ⁶ Anas ogwu ibot ebi ibot ngwugwa, mè Keyefas, mè Jọn, mè Alikisenda, mè owuwa ebi ìnan̄a me uwu ogwu ibot ebi ibot ngwugwa, mîgọọk ititiin̄ si me ere ya. ⁷ Ema eraria ibe esa Pita mè Jọn enu me isi kiban̄, mè ibene ikido ema ikọ ibe, “Ìre kpasi unye, mè ìre kpasi erieen̄ ke enyi esa irọ inu yi enyi erọbe?” ⁸ Pita onenisa me unye eyi Ekwukwu Mbuban òjojot ọmọ me emen itumu inyi ema ibe, “Me umin kinyi, ebi ibot mkpulu, mè ebi ugane ama Ijeren! ⁹ Ire mije ata inu eyi eji erọbe inyi ogwu akọọk ge ke enyi etet eji ikido ikọ, mè ikido ubọk eji esabe igwa ene yi, ¹⁰ eji mêsa irek keyi itumu inyi enyi, inyi enyi otutuuk ene eriọọn̄, mè otutuuk ebi Ijeren si eriọọn̄: Îre nan̄a me erieen̄ kè Jisọs Karais ogwu Najeret, ogwu enyi etetbe igon ikpan̄ me inyọn̄ uti nkwurieen̄, ogwu Awaji ojomobe me mkpa, ke lek ene yi ogwu òkeke me isi kinyi mgbọ yi onye isan̄a kpai. ¹¹ Jisọs yi si ke Ikpa Mbuban otumu ikọ ibak ibe, ‘Ewuuk ya eyi ebi ìnama uwu ejitbe, ọmọ oyaka inikana ire ata ibot uwu.’ ¹² Ilọ me lek kè Jisọs, kpunu ofifi ene geege òbokọt inyan̄a ene, mije, kpunu ofifi erieen̄ geege eyi Awaji onyibe me etete ebilene me otutuuk linyọn̄ keyi, eyi eji mêkọtbe ikaan̄ unyan̄a inan̄a me lek, ilọ erieen̄ kè Jisọs gaalek.” ¹³ Mgbọ ebi Oru cha emun̄be ubọk Pita mè Jọn esabe itumu ikọ me isi kiban̄, kpetet ukpook, mè iriọọn̄ si ibe ke ife cha ìre ebi ikike, ebi kpebọkọ ikween̄-inu geege, mbiribọ ogwogwook ema me lek. Mgbọ ya ke ema enimun̄ ibe ke igọgọọk Jisọs ije eyi Pita mè Jọn egọọkbe ije îsi ikwaan̄ me emen kiban̄. ¹⁴ Ire, mije ebi Oru cha emun̄be ogwu akọọk egwabe ya ogọọkbe Pita mè Jọn ikeke me isi kiban̄, ema kpeyaka iriọọn̄ inu geege ebetumu. ¹⁵ Eya orọ, ema enyinyi ida ibe esan̄a ebi ife cha esibi me emen uwu Oru ya. Mgbọ ife cha esibibe, ebi Oru cha ekekidido lek kiban̄ ibe, ¹⁶ “Ìre keke ke eji eberọ ife chi mọnọ? Mije, otutuuk ebi ìluk me Jeruselem mîriọọn̄ ibe ke ìre atalek inu ukechieen̄ ke ife chi erọ. Eji me lek kiji si, kpunu ubọk eji ebekọt ijit. ¹⁷ Ire, isasa ikput inyi etip inu yi ikayaka ìtaan̄ ìkana ere ìgak ikeya, eji etaba ife chi ubọk me utọn̄ ibe ekayaka ìkpọk ìtumu ikọ geege ìnyi ene geege me erieen̄ ene ya ofifi.” ¹⁸ Mgbọ ema etọtbe otitọt ya isan̄a, ema egwegwen Pita mè Jọn itap me uwu, mè inyi ema ikan ibe mè ema ekalululuk ìkpọk ìtumu ikọ geege ìnyi ene geege me erieen̄ kè Jisọs, mè ekayaka ìjejeen̄ ene geege inu geege me erieen̄ ya ofifi. ¹⁹ Ire, Pita mè Jọn efọfọọk ema ibe, “Enyi gaalek ìfieek oyerebet keyi. Ìre îtat me isi Awaji ibe eji erọ inu enyi etọbe, mè etele eyi Awaji otumube? ²⁰ Mije, eji kpebekọt itele itutumu inu eji esabe chieen̄ kiji imun̄, mè isa si utọn̄ kiji inọ.” ²¹ Ebi Oru cha etataba ema ubọk me utọn̄ isa itap ema ukpook me lek, mè ijuuk ema itele inyi efon. Kpekọt iriọọn̄ ubọk ebesulu ema osusut mije ukpook ebi ene, bak me lek, me ike mgbọ ya, otutuuk ene mêkibele ejit mè ikitọn̄ Awaji mije inu ukechieen̄ ya òrọrọ. ²² Ogwu enerieen̄ ya egwabe îraka akọp acha ini me usen uman. ²³ Mgbọ Pita mè Jọn enan̄abe me isi ebi Oru cha isibi, ema efofon igọọk ebi melek kiban̄, mè iben otutuuk inu cha ebi ibot ngwugwa, mè ebi ugane ama etumube inyi ema ikpa inyi. ²⁴ Mgbọ ebi melek kiban̄ cha enọbe inu ya òrọrọ, ema enenisa me ida ge itaan̄ ukpo igwen Awaji ibe, “Okaan̄-ene Ogwu Òkaan̄ Unye Geelek, owu orom inyọn̄ mè ijọn̄ mè okwaan̄, mè otutuuk inu geelek òkup me emen kiban̄. ²⁵ Owu otumu ikọ inan̄a me otu ogwu usun̄ kwun̄ Debit nte kiji sa me unye eyi Ekwukwu Mbuban ibe, ‘Ìre keke orọ ido ebi ekarege ebi Ju ekigumu lek ikeyi? Sa ìre keke orọ ebi ene ekitọt otitọt ikakaan̄ge ibot? ²⁶ Ebi ubọọn̄ linyọn̄ mîneen̄ lek kiban̄ isun̄ isan̄a, ebi ibot mkpulu geelek mîgbaan̄ ititiin̄, mè ibem lek irọrọ ikeme Okumugwem, mè irọ si ikeme Gwun̄ kan̄ ogwu îtoon̄be ubọk me ibot.’ ²⁷ “Me atikọ, Erọdu mè Pọntiọs Pailet, mè ebi ekarege ebi Ju mîgbaan̄ ititiin̄ melek ebi Ijeren me ama Jeruselem yi, mè ilet itọt otitọt irọrọ ikeme Jisọs, ogwu ikwaan̄ kwun̄ òkup mbuban, ogwu owu otoon̄be ubọk me ibot. ²⁸ Ema etitiin̄ inenirọ otutuuk inu geelek owu owuukbe lek isa me unye kwun̄ mè nkeek kwun̄ idọmọ isan̄a karake ukot ukot ibe ke mômọnọ irek. ²⁹ Me mgbọ keyi, Okumugwem, owu omun̄ ubọk ife chi ekiweek itatap eji ukpook me lek. Rọ inyi eji ebi ikwaan̄ kwun̄ enye otu etumu ikọ kwun̄ me ekatetge ukpook geege. ³⁰ San̄a unye kwun̄ sibi sa gwa ebi ene, mè rọ owuwa inu ukechieen̄, mè uyeke uyeke ikwaan̄ òkup esese esese me erieen̄ kè Jisọs, ogwu ikwaan̄ kwun̄ òkup mbuban.” ³¹ Mgbọ ema eriaakbe uriaak ya isan̄a, ere ya ema ekupbe osisisik. Ekwukwu Mbuban oninin̄ ijot ema emen. Ema etutumu ikọ Awaji me unye. Ukpook geege ìkatet ema. ³² Me mgbọ ya, otutuuk ebi ìchechieek me lek kè Jisọs ekiluk me ekiket ge, mè ejit ge. Kpunu ogwu òbe ke inu ọmọ okaan̄be ìre eyi kan̄ gaalek. Ire, ema ekigbagbaan̄ iche inu ene geelek okaan̄be. ³³ Ebi otuchieen̄ kè Jisọs cha ekekisa me ikpele unye ikijeen̄ ibe ke Okaan̄-ene Jisọs îjomo me mkpa. Atata nnwọn eyi Awaji okukup inyi ema ojot ojot, me oniin̄ geelek. ³⁴ Kpunu ene geege ònanan inu geege me etete kiban̄. Mije me mgbọ me mgbọ, ebi ìkakaan̄ ijọn̄ uko mè ìre uwu mîkinyam ijọn̄ kiban̄ mè uwu kiban̄, mè ikisa ikpoko cha inu, ³⁵ mè inikana itap me ubọk ebi otuchieen̄ kè Jisọs cha. Ema mîra iniche ikpoko cha me ene me ene ikpọ me lek inu geelek ònanan ene geelek. ³⁶ Îkaan̄ ogwu enerieen̄ ge ekigwen Josefu, ogwu otoko kè Libai, ònan̄a me Saipọrọs, ogwu ebi otuchieen̄ kè Jisọs ekigwen Banabas (eyi òsisibi ogwu òkikat ene ejit). ³⁷ Ogwu enerieen̄ yi oneninyam ijọn̄ uko kan̄, mè isa ikpoko ya inikana itap me ubọk ebi otuchieen̄ kè Jisọs.

¹ Ire, ogwu enerieen̄ ge ekigwen Ananayas mè Safaira ogwu nwa eneninyam ijọn̄ uko kiban̄. ² Mgbọ ema enyambe ijọn̄ ya, ọmọ melek ogwu nwa eninin̄ otitọt, mè ifele usini me lek ikpoko ya isun̄ inyi lek kiban̄, mè isa eyi òsisik inu ininyi ebi otuchieen̄ kè Jisọs. ³ Mgbọ îsabe ikpoko ya inu, Pita obebe ọmọ, “Ananayas, ìre keke orọ ochieekbe ibe Setan inin̄ ijot owu ejit ikeyi, mè irọ inyi owu òfele usini me lek ikpoko obọkọbe me lek ijọn̄ kwun̄ onyambe òsun̄ ònyi lek kwun̄, mè ònu ònokan̄ ataak ònyi Ekwukwu Mbuban? ⁴ Ijọn̄ ya ìre eyi kwun̄ sabum oninyanyam. Mgbọ onyambe, mè ibọkọ ikpoko, ikpoko ya si ìre eyi kwun̄, owu okaan̄ unye me lek. Ìre keke orọ mè owu òkeek irọrọ òjelek inu òkup ikeyi? Ataak keyi owu okan̄be, òkakan̄ ìnyi ebilene, îre Awaji ke okan̄ inyi.” ⁵ Mgbọ yaage Ananayas onọbe ikọ ya Pita otumube, irọrọn̄ me ijọn̄, mè ikwu. Ikpele ukpook otetet otutuuk ebi geelek ìnọnọ inu ya òrọrọ. ⁶ Nsabọn irieen̄ enanan̄a isibi inu, mè inisa ekwut-ufuun̄ ikat nkwukwu kan̄, mè iben isibi isi ifuun̄. ⁷ Mbubak mgbọ ita iraraka, Safaira ogwu nwa okakana inin̄ uwu ya, ìkariọọn̄ inu òrọrọ ogwu olom. ⁸ Pita ododo Safaira ibe, “Tumu-nu atikọ nyi emi. Ìre otutuuk ikpoko owu mè Ananayas nlom kwun̄ ekaan̄be me lek ijọn̄ ya enyi enyambe ire eyi?” Ifọfọọk ibe, “Iin̄, otutuuk ire eya.” ⁹ Pita otutumu inyi ọmọ ibe, “Ìre keke orọ mè enyi olom mè nwa egbaan̄ echieek inenitọ Ekwukwu Okaan̄-ene ikpọ? Kpọ! Ebi ìbeben nlom kwun̄ isi ifuun̄ ere echilọ me otu isotu. Ema mêben si nkwukwu kwun̄ isibi isi ifuun̄.” ¹⁰ Mgbọ yaage Pita otumube ikọ ya isan̄a, Safaira orọrọn̄ me ijọn̄, me ukot kè Pita, mè ikwu. Nsabọn irieen̄ cha eninin̄ uwu, mè inimun̄ ibe ke ọmọ si îkwu, mè iben si nkwukwu kan̄ isibi isi ifuun̄ me agba lek ogwu olom. ¹¹ Ikpele ukpook otetet otutuuk ebi ntitiin̄ Awaji mè otutuuk ebi geelek ìnọnọ inu ya òrọrọ. ¹² Ebi otuchieen̄ kè Jisọs ekekirọ owuwa ikwaan̄ ukechieen̄ mè uyeke uyeke inu me etete ebi ene. Otutuuk kiban̄ ekekititiin̄ me emen ọfọ kè Sọlọmọn me Uwu Mbuban. ¹³ Ubọk geelek ebi ene ekitumu atikọ ibak ema, kpunu ofifi ene geege ikarege ogwu melek kiban̄ òkọkọt isan̄a ukpook me lek ikigọọk ema ije. ¹⁴ Ire, owuwa ene, ebirieen̄ mè ebibaan̄, ekekichieek me lek Okaan̄-ene, mè inikigọọk ema inin̄ isọkọ me otu ifuk kiban̄. ¹⁵ Mije ikwaan̄ ukechieen̄ chi ebi otuchieen̄ cha ekirọ, ebi ene ekekiben ebi kiban̄ ebi lek ikanyege me inyọn̄ okpọkpọ mè inyọn̄ ufo isa iniyik itele me agba oniin̄, inyi Pita isinije iraka, ogugo kan̄ ire lek usini ife cha, mè lek kiban̄ inye. ¹⁶ Ogbogbo ebi ene si ekpukpulu ebi kiban̄ ebi orukan̄ òkup esese esese okifiak, mè ebi ijo erumun̄ okisisaak, isa inan̄a me asabọn ama òkup ikana Jeruselem inu me lek kiban̄. Ema egwagwa otutuuk kiban̄ isan̄a. ¹⁷ Ire, ogwu ibot ebi ibot ngwugwa, mè otutuuk ebi melek kan̄ geelek ebi ìrere ebi Sadusi, enenikaan̄ njijọ ejit enenen me lek ebi otuchieen̄ kè Jisọs. ¹⁸ Ema etetet ebi otuchieen̄ cha isi igon me uwu mkpọn ere ekitap ene geelek. ¹⁹ Ire, me ejit eririeen̄, ogwu osat Okumugwem onunu inichili otutuuk isotu òkup me uwu mkpọn ya, mè isan̄a ebi otuchieen̄ cha isibi, mè itumu inyi ema ibe, ²⁰ “Ìje ìsi ìkeke me oyet egep Uwu Mbuban ìlook otutuuk ebi Ju otutuuk ojot ojot ata etip eyi ayaya ugwem yi.” ²¹ Me otu ewelegwe, ebi otuchieen̄ cha ejeje inin̄ emen oyet egep Uwu Mbuban, mè ibene ikilook ebi ene ata etip ya kubọk ogwu osat Okumugwem ya obe ema erọ. Ogwu ibot ebi ibot ngwugwa mè ebi melek kan̄ enunu, mè igwen ntitiin̄ ebi Oru ebi Ju, òrere ntitiin̄ ile ebi ugane ama Ijeren, mè inisan̄a ikwaan̄ iria ibe esi esan̄a ebi otuchieen̄ cha esibi me uwu mkpọn esa enu me isi kiban̄. ²² Ire, mgbọ ebi eriabe ikwaan̄ ya erebe uwu mkpọn ya, kpemun̄ ebi otuchieen̄ cha. Ema egwugwu ikom inilook ebi Oru ibe, ²³ “Eji mîre ere ya, mè imun̄ ebi ìkibem ere ekekebe ikana me isotu cha, mè imun̄ si ibe ke egogon otutuuk isotu uwu mkpọn ya ikam. Ire, mgbọ eji egwukube isotu cha, mè iraka inin̄ uwu mkpọn ya, eji kpemun̄ ene geege me emen.” ²⁴ Mgbọ ogwu ibot ebi ìkibem Uwu Mbuban, mè ebi ibot ngwugwa cha enọbe ikọ yi, lek okwukwu ema enenen. Ema ebebene ikikeek ibe mè ìre eyi ìbosa keke inu mọnọ. ²⁵ Mgbọ ema ekikeek ikeya, ene ge okakana isibi, mè inilook ebi Oru ibe, “Ìna ìnisi ìkpọ, ke ife cha enyi etetbe itap me uwu mkpọn ere echilọ ìkijeen̄ ebi ene inu me oyet egep Uwu Mbuban.” ²⁶ Mgbọ yaage ogwu ibot ebi ìkibem Uwu Mbuban onọbe ikọ ya, ikpukpulu ebi ibot akọn̄ kan̄ isa ije isi ere ya, mè isi igwen ema ibe enu. Ema kpesa unye ubọk itet ebi otuchieen̄ cha, mije ufieek-owot ibe ke ebi Ju mêteen̄ ewuuk itọọn̄ ema. ²⁷ Ema enenisa ebi otuchieen̄ cha inu me isi ebi Oru, inyi ogwu ibot ebi ibot ngwugwa ido ema ikọ. ²⁸ Ogwu ibot ebi ibot ngwugwa onenitumu inyi ebi otuchieen̄ cha ibe, “Eji mînyi enyi ikan ibe enyi ekayaka ìjeen̄ ene geege inu me erieen̄ yi. Ire, enyi ekpọkpọ ichit utọn̄, mè ikijeen̄ otutuuk ebi Jeruselem inu me erieen̄ yi, mè iben si me ejit irọrọ inyi eje ene yi initoon̄ eji me ibot.” ²⁹ Pita melek otutuuk ebi otuchieen̄ cha efọfọọk ibe, “Eji ebesiki ibot inyi Awaji, ìkare ebilene! ³⁰ Awaji ogwu ebi nte nte kiji etọbọbe ebum inyi îrọ inyi Jisọs, ogwu enyi egonbe ikpan̄ me inyọn̄ uti, ijomo me mkpa, ³¹ mè ibene ọmọ ifo inyọn̄, mè isun̄ ọmọ me agan̄ ubọk ulom eyi unye kan̄, mè irọ ọmọ Ogwu Ibot Mkpulu mè Ogwu Unyan̄a ogwu òborọ inyi ebi Ijeren egwu ekom, inyi Awaji itele otutuuk ijo kiban̄ inyi ema. ³² Eji me lek kiji, melek Ekwukwu Mbuban ogwu Awaji onyibe ebi geelek ìsisiki ibot inyi ọmọ, ìre ebi ata-ikọ inyi otutuuk inu chi.” ³³ Mgbọ ebi Oru cha enọbe ikọ chi, ema enanaan̄ ejit enenen, mè iweek ikpakpan̄ ebi otuchieen̄ kè Jisọs cha. ³⁴ Ire, ogwu Farisi ge, ogwu òjeen̄ Ikan, ekigwen Gamalien, oneninan̄a ikeke me etete ebi Oru. Gamalien yi ìre ogwu otutuuk ene ekinyi ulibi. Ineninyi ida ibe esan̄a ebi otuchieen̄ cha esibi-nu me etete kiban̄ sọnja mgbọ. ³⁵ Mgbọ esan̄abe ebi otuchieen̄ cha isibi isan̄a, inenitumu inyi ebi Oru ogbo kan̄ ibe, “Ebi Ijeren, ìriọọn̄ ubọk ifuk ifuk-ibot enenen òfolek inu yi enyi etọtbe irọrọ ife chi. ³⁶ Me ike mgbọ ge òraraka, gwun̄ enerieen̄ ge ekigwen Tiyudas înan̄a isibi, mè ijeen̄ lek kan̄ kubọk ene ilile. Inu òsoso efit ebirieen̄ ini ekekigọọk ọmọ me udun̄. Ìkafiin̄ mgbọ, ekpakpan̄ ene ya. Ebi udun̄ kan̄ cha eyiyiyala isan̄a kpai. Ebi ene kpeyaka inọ inu geege òfolek kan̄. ³⁷ Mgbọ ogwa orakabe, ogwu Galili ge ekigwen Judas onanan̄a si isibi me mgbọ efukbe ifuk ene, mè itaba owuwa ene inyi lek kan̄. Mîkpan̄ ọmọ si. Ebi udun̄ kan̄ eyayat si ita. ³⁸ Eya orọ, me lek keyi òbebene mgbọ keyi, m̀be enyi, ìtele ife chi mè efon. Ikarọ ema inu geege. Mije, ire inu ife chi ekirọ ìnan̄a me ubọk ebilene, môchep me ikafiin̄ge mgbọ. ³⁹ Ire, ire inan̄a me ubọk Awaji, kpunu ubọk enyi ebesa ikọt ida ife chi ito. Kpan̄asi ikeya, enyi mêmun̄ ibe ke ìkayaka ìre ebilene ke enyi ekigọọk itim etim, ke ìre Awaji me lek kan̄.” Ebi Oru ya ebọbọkọ nteme kè Gamalien ya itap, ⁴⁰ mè igwen ebi otuchieen̄ cha itap me uwu, mè inyi ida ibe esa njijan̄ esulu ema. Mgbọ esulube ema isan̄a, etatap ikan ibe ema ekayaka ìtumu ikọ geege ìnyi ene geege me erieen̄ kè Jisọs, mè itele ibe ema efon. ⁴¹ Ebi otuchieen̄ cha enanan̄a me isi ebi Oru ya isibi, mè ikibele ejit ibe ke Awaji îfuk ema kubọk ebi ìgbegbe ibọbọkọ esip mije erieen̄ kè Jisọs. ⁴² Ire, me usen me usen, ema kpekitele itititiin̄ me oyet egep Uwu Mbuban, mè uwu ebi ene, ikijeen̄ inu, mè ikilook ata etip ibe ke Jisọs ore ogwu Awaji otoon̄be ubọk me ibot ya.

¹ Ike mgbọ okije, otu ifuk ebi ìchechieek me lek kè Jisọs okekiwa. Me etete kiban̄, ebi Ju ìnan̄a me okwaan̄ okwaan̄, mè ikitumu usem Giris enenigugọlọ melek ebi Ju ìluk me ido Ijeren, mè ikitumu usem Aremia. Ebi Ju okwaan̄ okwaan̄ ekibe ke ekicheche inorie ilọ ebi nwakpa kiban̄ usen geelek. ² Mije keya, akọp mè ebi otuchieen̄ iba cha enenigwen otutuuk ebi ìchechieek cha ititiin̄, mè itumu inyi ema ibe, “Ìkatat ibe eji ebi otuchieen̄ etele ikwaan̄ itutumu ikọ Awaji, mè eyaka enekekpọ chieen̄ me lek inorie. ³ Eya orọ, bọn Nte kiji, ìgobo ebirieen̄ jaaba me etete kinyi, ebi enyi eriọọn̄be ibe ke mîkaan̄ Ekwukwu Mbuban mè iriọọn̄-inu ojot ojot me emen, inyi eji ekana ikwaan̄ icheche ikpoko inorie yi etap me ubọk, ⁴ mè eji ekọt esa otutuuk mgbọ kiji etap me irariaak uriaak mè itutumu ikọ Awaji.” ⁵ Ifuk-ibot yi onenibele otutuuk ebi ìchechieek cha ejit. Ema egogobo Sitibin, enerieen̄ ogwu ichechieek mè Ekwukwu Mbuban ojotbe emen, mè Filip, mè Porokọrọs, mè Nikanọ, mè Timọn, mè Pamenas, mè Nikolas ogwu Antiọk, ogwu òtetele ubọk iriaak Awaji ebi Ju, mè inichieek me lek kè Jisọs. ⁶ Enenisa ife chi inu me isi ebi otuchieen̄. Ebi otuchieen̄ etotoon̄ ema ubọk me ibot, mè iriaak uriaak me ibot kiban̄. ⁷ Sa me ikeyi, ikọ Awaji okpọkpọk ikana ere. Otu ifuk ebi ìchechieek okekimumana enenen me Jeruselem. Owuwa ebi ngwugwa si egọgọọk ichieek me lek kè Jisọs. ⁸ Sitibin, ogwu enerieen̄ ya ogwu Ekwukwu Mbuban mè iriọọn̄-inu ojotbe emen onenikirọ owuwa inu ukechieen̄ mè uyeke uyeke ikwaan̄ me etete ebi ene. ⁹ Ikafiin̄ mgbọ, usini ebi Ju ebi ekigwen ebi “Ntitiin̄ ebi Ìkaan̄ Lek” enenibene ufialek melek kè Sitibin. Ebi ntitiin̄ chi enan̄a me ama Sairini mè Alikisendira mè ido Silisia, mè Esia. Ife chi ebebene ikigọọk Sitibin iwut ifan̄a. ¹⁰ Ire, ema kpekọt ikeke ida Sitibin, mije uga iriọọn̄-inu, mè unye eyi Ekwukwu Mbuban eyi îsabe ikitumu ikọ. ¹¹ Ife chi enwenween̄ lek isi ilep ebi ene ibe enu enetoon̄ Sitibin uraamọn ibe ke ema mînọ Sitibin okitumu ijo ikọ ikeme Mosis, mè itumu si ikeme Awaji. ¹² Sa me ikeyi, ife chi etatap wọlọwọlọ me ejit ebi Ju, mè ebi ugane ama, mè ebi ìjeen̄ Ikan. Ema etetet Sitibin isa isi me isi Oru ebi Ju. ¹³ Ema egwegwen si ebi ata-ikọ ataak. Ife chi esisibi inu me isi ebi Oru, mè initumu ibe ke Sitibin ìkakitele itutumu ikọ ikeme Uwu Mbuban mè Ikan kè Mosis. ¹⁴ Mije, ke ema mînọ Sitibin okitumu ibe ke Jisọs ogwu Najeret ya môgbugbọ Uwu Mbuban yi, mè inwene si otutuuk ọrọmijọn̄ geelek Mosis onyibe eji. ¹⁵ Otutuuk ebi ìkup me uwu Oru ya egwugwuun̄ chieen̄ ikikpọ Sitibin, mè imun̄ ibe ke isi kan̄ ìkitoon̄ kubọk isi ogwu osat Awaji.

¹ Ogwu ibot ebi ibot ngwugwa onenido Sitibin ibe, “Ìre ikọ chi etumube itoon̄ owu ìre atikọ?” ² Sitibin ofọfọọk ibe, “Ebi ngwan̄ n̄a ebirieen̄, mè ebi nte n̄a, ìgban̄ utọn̄. Awaji ogwu òkaan̄ umin mè uja îsibi me isi kè Ebereham nte nte kiji mgbọ îkupbe me ido Mesopotemia, sabum îninan̄a isi iluk me ama Heran, ³ mè itumu inyi Ebereham ibe, ‘Nan̄a sibi tele ido kwun̄ mè ebi uwu kinyi, mè je si inyọn̄ ijọn̄ ere emi mâsabe owu ijeen̄.’ ⁴ “Sa me ikeya, Ebereham onanan̄a itele ido Kalidiya, mè isi iluk me Heran. Mgbọ ogwu ute okwube iraka, Awaji oneniria ọmọ inu me inyọn̄ ijọn̄ yi ere enyi ebi Ijeren elukbe mgbọ keyi. ⁵ Mgbọ înube iniluk me inyọn̄ ijọn̄ yi, Awaji ìkacheche ijọn̄ yi ìnyi ọmọ, ìkatọtọ kubọk ukot ge, ibe ikana ire eyi kan̄. Ire, Awaji onenichieek use ibe ke ìre Ebereham mè bọn owut iman kan̄ ebekaan̄ ijọn̄ yi, ubọk geelek Ebereham ikakaan̄ge gwun̄ geege nu me mgbọ ya. ⁶ Awaji ìtumu inyi ọmọ ibe, ‘Bọn owot iman kwun̄ mêsi iluk kubọk ebi ichen me ama ikarege eyi kiban̄. Ebi ama ya mêsa ema irọ usun̄, mè itutuku ema efit acha ini. ⁷ Ire, emi mâsut ido ya ema enin̄be usun̄ inyi osusut. Osusut ya isiraka, ema mênan̄a me ido ya isibi, mè initọbọ ebum inyi emi me ere keyi.’ ⁸ Awaji oneninyi Ebereham ọrọmijọn̄ eyi ifieek-afi isasa ijeen̄ inu ijejeen̄ òfolek inyan̄a-ibot ọmọ onyan̄abe melek Ebereham. Ebereham onenibon Ajiki. Mgbọ emanbe Ajiki isan̄a, òso usen jeeta, Ebereham ofefieek ọmọ afi. Ajiki onenibon Jekọp, Jekọp onenibon ebi nte nte kiji, akọp mè ene iba. ⁹ “Ebi nte nte kiji cha enenikaan̄ njijọ ejit me lek kè Josefu ngwan̄ kiban̄, mè itet ọmọ inyam kubọk usun̄ inyi ebi Ijipiti. Ire, Awaji okekeke melek kè Josefu, ¹⁰ mè inyan̄a ọmọ isibi me otutuuk uyọrọlek kan̄. Awaji oneninyi ọmọ iriọọn̄-inu, mè irọ inyi ogwu Fero, òrere ogwu ubọọn̄ ido Ijipiti, ima ọmọ. Ogwu Fero onenisa ọmọ irọ ogwu ibot mkpulu me otutuuk ido Ijipiti, mè isa ọmọ si irọ ogwu ibot mkpulu me emen uwu kan̄ òrere uwu ogwu ubọọn̄. ¹¹ Akan̄ oneninin̄ ikana otutuuk ido Ijipiti mè ido Kenan, ebi ene etataka lek me otu mije una inorie. Ebi nte nte kiji kpeyaka ikaan̄ inorie eberie. ¹² Mgbọ Jekọp onọbe ibe ke inorie òwa me Ijipiti, iraria bọn ebirieen̄ kan̄ òrere ebi nte nte kiji cha, ibe esi elep inorie. Adasi mgbọ ema esibe ama ya ire eya. ¹³ Òso mgbọ iba ema esibe Ijipiti, Josefu osasa lek kan̄ ijeen̄ ebi ngwan̄ inyi ema eriọọn̄ ogwu ọmọ orebe. Ogwu Fero si osasa me ikeya iniriọọn̄ inu òfolek ebi uwu ebi kè Josefu. ¹⁴ Josefu oneniria etip ibe Jekọp ogwu ute mè otutuuk ototun̄ ukan̄ kan̄, eka egọọk ọmọ me Ijipiti. Otu ifuk ebi ototun̄ ukan̄ kè Jekọp ebi ìnan̄a me Kenan isi Ijipiti ìre akọp ene jaaba mè go. ¹⁵ Ikeya ke Jekọp osa ije isi iluk me Ijipiti. Ọmọ mè ebi nte nte kiji cha ekukup me ere ya ikwaan̄ isan̄a. ¹⁶ Esasa nkwukwu kiban̄ ika inu me Sekem inifuun̄ me udọn̄ ufuun̄ Ebereham ofukbe ikpoko kan̄ isa ilep me ubọk kè Amọ me Sekem. ¹⁷ “Mgbọ îgbetbe mgbọ Awaji oborọ use îchieekbe Ebereham iso, ebi Ijeren ìkup me Ijipiti emumumana enenen, mè iwa me otu ifuk. ¹⁸ Ofifi ogwu ubọọn̄ ikariọọn̄ge Josefu onenibene ikikpulu ido Ijipiti. ¹⁹ Aya ogwu Fero ya onenikaan̄ ijo ejit me lek ebi kiji, mè ikirọ ema inu me lek ofiaan̄ ofiaan̄, mè itet ema me unye ibe eben asa nsabọn kiban̄ emanbe ayaya etọp efiin̄, inyi ekwaan̄. ²⁰ “Me emen mgbọ yi ke eman Mosis. Mosis ìre gwun̄ òsisibi esese mgbọ emanbe. Onyan̄ ita gaalek ke ekpukpo Mosis me uwu ogwu ute. ²¹ Mgbọ kpeyaka ikọt ilet ọmọ, esasan̄a ọmọ isibi me uwu. Gwun̄ enenwaan̄ ogwu Fero osisi imun̄ ọmọ, mè iben ọmọ isa isi ikpukpo, mè imọnọ ọmọ isa irọ gwun̄ kan̄. ²² Mosis obọbọkọ ikween̄-inu òfolek otutuuk iriọọn̄-inu ebi Ijipiti, mè inye lek, mè inye si otu itumu ikọ. ²³ “Mgbọ Mosis osobe akọp acha ini, ineniben me ejit ibe ke ọmọ môsi ikpọ ebi kiban̄, ebi Ijeren. ²⁴ Mgbọ îkije, imumun̄ ogwu Ijipiti ge okirọ nnaan̄ me lek ogwu Ijeren ge, mè isi ibọkọ etim ya itim inyi ogwu Ijeren kiban̄, mè isulu ogwu Ijipiti ya ikpan̄. ²⁵ Mosis ìkeek ibe ke ebi kiban̄ mêriọọn̄ ibe ke Awaji ìbonisa ọmọ inyan̄a ema isibi. Ire, ebi kiban̄ kperiọọn̄. ²⁶ Òfit iwele kan̄, Mosis onenimun̄ ebirieen̄ iba ebi Ijeren ekitim etim. Isisi iteek etim ya, mè itumu inyi ema ibe, ‘Ebi une n̄a, ikayaka irọ-ma, ke enyi ìre ngwan̄ ngwan̄. Ìre keke orọ enyi ebesak lek kinyi unan?’ ²⁷ “Ire, ogwu ubọk kan̄ onyebe igak, obebieen̄ Mosis ida ibọkọ, mè ido ọmọ ibe, ‘Ire ekene orọ owu ogwu mkpulu mè ogwu ibot oyerebet me etete kiji? ²⁸ Ìre òbonikpan̄ emi ike okpan̄be ogwu Ijipiti me iyakwut?’ ²⁹ Mgbọ yaage Mosis onọbe ikọ ya, ililibi iyaak Ijipiti, mè isi iluk me ido Midia kubọk ogwu ichen, mè ikup me ere ya ibon ibot bọn ebirieen̄ iba. ³⁰ “Mgbọ Mosis olukbe me ere ya iso akọp acha ini, mè iraka, inenimun̄ ogwu osat ge me emen alọm ukan̄ òkilomo me lek gwun̄ uti ge òkup me emen èwê me agba lek ogoon̄ Saina. ³¹ Inu ya îmun̄be okeke ọmọ chieen̄ enenen, ijeje iriaak, inyi ọmọ iriọọn̄ ubọk ikpọ inu ya iso chieen̄ iba. Mgbọ îjebe igbet, inọnọ ida Okumugwem okitumu inyi ọmọ ibe, ³² ‘Emi ìre Awaji ebi nte nte kwun̄. Emi ìre Awaji kè Ebereham, mè Awaji kè Ajiki, mè Awaji kè Jekọp.’ Mosis oririki, ukpook otetet, ìkayaka ìkọt ìkpọ gwun̄ uti ya. ³³ “Okumugwem otutumu inyi Mosis ibe, ‘Wọọk ikpukot san̄a me ukot kwun̄, mije, ere yi okekebe ìre ijọn̄ mbuban. ³⁴ Me atikọ, emi mmun̄ tukutuku eyi ekitutuku ebi n̄a me Ijipiti, mè inọ si mfi ito kiban̄. Mgbọ keyi nnan̄a isibi inu ineninyan̄a ema isibi. Eya orọ, na me ǹria owu ǹgwu ǹkom ǹsi Ijipiti.’ ³⁵ “Mosis yi ke ebi Ijeren ejit, mè ido otu ibe ‘Ire ekene orọ owu ogwu mkpulu mè ogwu ibot oyerebet me etete kiji?’ Ọmọ ke Awaji me lek kan̄ oria ibe iyaka inire ogwu mkpulu kiban̄, mè inyan̄a ema isibi sa me unye eyi ogwu osat Awaji ogwu òtutumu ikọ inyi ọmọ me emen alọm ukan̄ ya. ³⁶ Mosis osasa me unye ubọk isan̄a ema isibi, mè irọ owuwa uyeke uyeke inu mè ikwaan̄ ukechieen̄ me Ijipiti, mè irọ si me Okwaan̄ Araran̄, mè irọ si ikeya me emen èwê otutuuk akọp acha ini. ³⁷ Mosis yi si otumu inyi ebi Ijeren ibe ke Awaji môsan̄a ogwu nriran ge òkup kubọk kan̄ isibi me etete kinyi inyi enyi. ³⁸ Mosis yi si melek ebi nte nte kiji ekup me emen èwê. Ọmọ si ore ogwu òbọbọkọ ikọ òkinyi ene ugwem me otu ogwu osat Awaji me inyọn̄ ogoon̄ Saina isa initumu inyi ebi nte nte kiji, ebi nte nte kiji ekakana iyaka initap eji me ubọk. ³⁹ “Ire, ebi nte nte kiji ejijit igbagban̄ utọn̄ inyi ọmọ, mè ifiin̄ ọmọ itele, mè iyaka ikiweek igwugwu ikom ifo Ijipiti me emen ejit kiban̄, ⁴⁰ mè itumu inyi Erọn ibe ibot awaji ebobot inyi ema, inyi inisa ema ije me oniin̄, mije ke ema kpeyaka iriọọn̄ inu òrọrọ Mosis ogwu òsasa ema isibi me Ijipiti. ⁴¹ Mgbọ ya ke ema enibot inu ge kubọk gwun̄ erie mbuuk, mè ito ijọk inyi, mè ikisa ngwugwa inigwa inyi inu yi ema esabe ubọk kiban̄ gaalek irọ. ⁴² Ire, Awaji odada lek ibọkọ me lek kiban̄, mè ijit ema itele, inyi ema eketọbọ ebum enyi ebi kè ntoronyan̄ òkup me isinyọn̄. Eyi onenirọ inu Awaji otumube me emen ikpa ebi Nriran iso ibe, ‘Enyi ebi Ijeren, ìre îkaan̄ ngwugwa geege enyi egwabe inyi emi, mè ìre eyi anam, mè ìre eyi ofifi inu, me otutuuk akọp acha ini enyi ekupbe me emen èwê? ⁴³ Iin̄-iin̄, kpan̄asi ikeya, ke enyi eyaka ikiben isi yọk ekigwen Mọlọk ikaan̄, mè ikiben si ntoronyan̄ enyi ebotbe inyi yọk kinyi ekigwen Refan ikaan̄. Inu chi otutuuk ìre mkpọmfaka enyi erombe me ubọk kinyi gaalek, mè ikitọbọ ebum inyi. Eya orọ, me atikọ, mâkpulu enyi itọọn̄ isibi me ido kinyi ifo ere òjọjọn̄ọ ere iraka ido Babilọn.’ ⁴⁴ “Mgbọ ebi nte nte kiji ekije me emen èwê, ema mîkaan̄ uwu mbuban eyi ikpa anam, eyi òkijeen̄ ibe ke Awaji òwa melek kiban̄. Enama uwu ya igọọk ubọk Awaji odọmọbe isan̄a, mè isa ijeen̄ Mosis. ⁴⁵ Owuwa acha iraraka, Josuwa osasa ebi Ijeren initim akọn̄ melek ebi ofifi ido ebi ìdadasi iluk me inyọn̄ ijọn̄ yi, mè ilap ebi ife cha isibi. Ebi nte nte kiji esasa uwu mbuban eyi ikpa anam ya igbaalek iniluk me ere yi. Emen uwu mbuban eyi ikpa anam ya ke ebi nte nte kiji ekitọbọ ebum inyi Awaji mege inire me ukot kè Debit ogwu ubọọn̄. ⁴⁶ Awaji onenima Debit enenen. Debit onenibeek Awaji kè Jekọp ibe itele inyi ọmọ inama uwu inyi ogwugwu. ⁴⁷ Ire, Sọlọmọn gwun̄ kè Debit oyaka ininama uwu ya inyi Awaji. ⁴⁸ “Ire, Awaji ogwu Òbebene Ichit ìkakiluk me uwu ebilene enamabe, kubọk Okumugwem otumube me otu ogwu nriran ibe, ⁴⁹ ‘Emen inyọn̄ ìre ogboon̄ ubọọn̄ n̄a, sa linyọn̄ ore inu ibene-ukot n̄a. Ìre kpasi uwu ke enyi ebekọt inama inyi emi? Sa ìre ere owa obota emi mè ǹkup ǹkensiki efuuk? ⁵⁰ Ìre ìkare emi nsa ubọk n̄a irom otutuuk inu chi?’ ⁵¹ “Enyi ebi unye ibot kechi! Ejit kinyi ìkariọọn̄ Awaji! Utọn̄ kinyi si ìkakinọ ikọ Awaji! Enyi ekup kubọk ebi nte nte kinyi. Enyi ekpọkpọ ikirọ ikeme Ekwukwu Mbuban mgbọ geelek kubọk ebi nte nte kinyi erọbe. ⁵² Ìre îkaan̄ ogwu nriran Awaji geege ebi nte nte kinyi ekatapge ufialek me lek uyọt uyọt? Ìrere ebi ìtutumu inu òfolek inunu Ogwu Ata Irọrọ, ebi nte nte kinyi mîtet si ikpan̄. Mgbọ keyi Ogwu Ata Irọrọ ya onube, enyi me lek kinyi eleleke ọmọ si, mè itet ikpan̄. ⁵³ Enyi kechi ìbọbọkọ Ikan inan̄a me ubọk ebi osat Awaji, mè ijit irọrọ inu Ikan ya otumube.” ⁵⁴ Mgbọ ebi Oru cha enọbe ikọ ya Sitibin otumube, ema enanaan̄ ejit enenen, mè iban̄a otu inyi ọmọ. ⁵⁵ Ire, me mgbọ ya, Ekwukwu Mbuban oninin̄ ijot emen kè Sitibin. Sitibin obebene chieen̄ ikpọ emen inyọn̄, mè imun̄ umin mè uja eyi Awaji, mè imun̄ si Jisọs okekebe me agan̄ ubọk ulom Awaji. ⁵⁶ Sitibin okekitumu ibe, “Ìkpọ! Mmun̄ emen inyọn̄ ochilibe ibook, mè imun̄ si Gwun̄ Ebilene okekebe me agan̄ ubọk ulom Awaji.” ⁵⁷ Mgbọ ema enọbe ikọ ya Sitibin otumube, ema otutuuk ene esasa ubọk ichit utọn̄, mè ikitaan̄ ukpo ibene ida enenen, mè igbaan̄ ilibi mgbọ ge inin̄ lek kè Sitibin, ⁵⁸ mè itaba ọmọ isibi ifo udun̄ ama, mè iteen̄ ewuuk ikisa itọbọ ọmọ. Otutuuk ebi ìnitoon̄ Sitibin uraamọn cha ewọọk ọfọnti kiban̄ igwook inyi gwun̄ enerieen̄ ge ekigwen Sọọlu ibe ikpọ chieen̄ me lek. ⁵⁹ Mgbọ ema ekisa ewuuk itọbọ Sitibin, Sitibin orariaak uriaak ibe, “Okaan̄-ene Jisọs bọkọ ibot ejit n̄a.” ⁶⁰ Itutumu ikọ ya isan̄a, igwogwook ekpe kan̄ me ijọn̄, mè itaan̄ ukpo itumu ibe, “Okaan̄-ene, kafuk ijo keyi itoon̄ ema me ibot.” Ikọ keyi itata ọmọ me otu, itọtọbọ.

¹ Usen yaage, atalek ikpele ufialek oninin̄ ikeme ebi ntitiin̄ Awaji cha ìkup me Jeruselem. Otutuuk ebi ntitiin̄ cha eyiyiyala, mè ikpọk ichon ikana iso otutuuk agan̄ Judia mè Sameria. Ebi otuchieen̄ cha gaalek eyaka inisik me Jeruselem. ² Usini ebi Ju ebi ìkaan̄ ukpook Awaji me emen esisi iben nkwukwu kè Sitibin isi ifuun̄, mè ifieek ejit inyi ọmọ enenen. ³ Sọọlu obebene ikijijaka ntitiin̄ Awaji. Ìkije ikana me uwu me uwu ikitaba ebirieen̄ mè ebibaan̄ ebi ìchechieek me lek kè Jisọs isibi isa isi itap me uwu mkpọn. ⁴ Ebi ìchechieek cha ìyayaak Jeruselem, ekekitumu ikọ Awaji me ere geelek ema esibe. ⁵ Filip osisi ama ge òkup me Sameria, mè ikilook ebi ama ya ata etip òfolek ogwu Awaji otoon̄be ubọk me ibot. ⁶ Ebi ene efafan̄a ijot inikigban̄. Mgbọ ebi urum ene cha enọbe ikọ Filip okitumu, mè imun̄ inu ukechieen̄ îkirọ, ema egwugwuun̄ utọn̄ ikigban̄ ikọ kan̄. ⁷ Owuwa ijo erumun̄ òkup me emen ebi ene okekitaan̄ ukpo unye unye, mè ikinan̄a me emen owuwa ene isibi. Filip okekigwa si owuwa ebi ngọm, mè ebi akọọk. ⁸ Mije keya, ebi ama ya enwọnwọọn̄ unwọọn̄ enenen. ⁹ Me emen ama ya, îkaan̄ ogwu enerieen̄ ge ekigwen Saimọn. Ọmọ ìre ogwu òdo inu. Ido-inu kan̄ îke ebi ene chieen̄ enenen me Sameria. Ọmọ okekigugo lek ibe ke ọmọ ìre òsibi isi ene. ¹⁰ Mije keya, otutuuk ebi Sameria, ebi ugane mè nsabọn, ubọọn̄ mè ugbọọn̄, ekekigban̄ utọn̄ inyi ọmọ, mè ikitumu si ibe ke ọmọ me atikọ ore unye Awaji ya eyi ebi ene ekigwen “Ikpele Unye.” ¹¹ Otutuuk ene ekekisiki ibot inyi ọmọ mije îkisa unye eyi ido-inu kan̄ ya irọ ema inu ukechieen̄ ijọn̄ọ acha. ¹² Ire, mgbọ Filip onube inilook ata etip òfolek mkpulu eyi Awaji mè erieen̄ kè Jisọs Karais, ebi ama ya echechieek me lek kè Jisọs. Filip ogwogwook ema mun̄, ebirieen̄ mè ebibaan̄. ¹³ Saimọn ya me lek kan̄ si ochechieek me lek ata etip ya. Egwogwook ọmọ mun̄. Ibebene ikigọọk Filip ikijijen̄e ikana. Ikpele ikwaan̄ ukechieen̄, mè uyeke inu cha Filip okirọ okekike ọmọ chieen̄ enenen. ¹⁴ Ebi otuchieen̄ ìkup me Jeruselem eneninọ ibe ke ebi Sameria mîbọkọ ikọ Awaji itap, mè iria Pita mè Jọn isi lek kiban̄. ¹⁵ Mgbọ Pita mè Jọn erebe ama ya, eneniriaak uriaak me lek ebi ìchechieek cha, inyi ema ebọkọ Ekwukwu Mbuban. ¹⁶ Mije, karake ema echieekbe me lek kè Jisọs, Ekwukwu Mbuban ìkanin̄-nu emen ene geege me etete kiban̄. Egwook ema mun̄ gaalek me erieen̄ Okaan̄-ene Jisọs. ¹⁷ Pita mè Jọn enenitoon̄ ema ubọk me ibot, ema ebọbọkọ Ekwukwu Mbuban. ¹⁸ Saimọn imumun̄ ibe ke ebi ene mîbọkọ Ekwukwu Mbuban mgbọ ebi otuchieen̄ cha etoon̄be ema ubọk me ibot, ichechieek Pita mè Jọn ikpoko, ¹⁹ mè itumu inyi ema ibe, “Soso, ìnyi emi òjelek unye yi si, inyi ene geelek mâtoon̄be ubọk me ibot ibọkọ Ekwukwu Mbuban ya.” ²⁰ Ire, Pita ofọfọọk ọmọ ibe, “Ikpoko kwun̄ ichep melek kwun̄, mije, òkikeek ibe ke owu môkọt isa ikpoko ilep uche eyi Awaji. ²¹ Owu òkakaan̄ irek me emen ikwaan̄ keyi, òkakaan̄ si uche me lek, mije, ejit kwun̄ ìkatat me isi Awaji. ²² Eya orọ, gwu kom me emen ijo inu yi, mè riaak uriaak nyi Okaan̄-ene ibe itele inyi owu. Usini mgbọ, Okaan̄-ene môtele inyi owu me lek òjelek ijo ekiket keyi okaan̄be me ejit kwun̄. ²³ Mije, mmun̄ ibe ke owu okaan̄ ijo ejit enenen, mè isa me ikeya inin̄ usun̄ inyi ijo inu.” ²⁴ Saimọn otutumu inyi Pita ibe, “Soso riaak Okaan̄-ene nyi emi, inyi inu geege me lek inu cha otumube ikarọ emi me lek.” ²⁵ Mgbọ Pita mè Jọn enyibe ata-ikọ kiban̄ isan̄a, mè ilook ata etip eyi Okaan̄-ene isan̄a, ema egwugwu ikom ifo Jeruselem. Me oniin̄ ifofo kiban̄, ema ekekilook si ata etip ya me owuwa asabọn ama ebi Sameria. ²⁶ Ogwu osat Okumugwem ge onenitumu inyi Filip ibe, “Nan̄a keke, mè je fo agan̄ òsiki, me oniin̄ ònan̄a me Jeruselem itibi me emen èwê, isi Gaja.” (Oniin̄ ya mikinọọn̄.) ²⁷ Filip onanan̄a ikeke mgbọ yaage ije, mè isi ichichini ogwu enerieen̄ ge esan̄abe osok, òkisi ikwaan̄ inyi ogwu Kandesi, òrere ogwu ubọọn̄ enenwaan̄ òkikpulu Etiopia. Ogwu enerieen̄ ya ìre ikpele ogwu ibot ikwaan̄ òkikpọ chieen̄ me lek otutuuk uwu isun̄ ikpoko me Etiopia. Ogwu enerieen̄ yi ìsi Jeruselem isi igọọk itọbọ ebum inyi Awaji. ²⁸ Me oniin̄ ikaka kan̄, ikwekweek me emen uji ijọn̄ kan̄, eyi anam okitaba ije, ikifuk ikpa Asaya ogwu nriran ogebe. ²⁹ Ekwukwu Mbuban otutumu inyi Filip ibe, “Gele gbet lek uji ijọn̄ ya, mè kachieek ibe ilibi iraka owu.” ³⁰ Filip olilibi iriaak me lek uji ya, mè inọ ogwu enerieen̄ ya okifuk ikpa Asaya ogwu nriran ogebe, mè inido ọmọ ibe, “Ìre otet inu ya okifuk?” ³¹ Ogwu enerieen̄ ya ofọfọọk Filip ibe, “Ìre m̀bajeje ikọt itet, ire kpunu ogwu òjejeen̄ emi?” Inenigwen Filip ibe isaba inin̄ emen uji ya inigọọk ọmọ ikweek irek. ³² Ibot Ikpa Mbuban ere îkifuk ìre ere egebe ibe: “Etet ọmọ isa ije kubọk arọọn̄ ebesa isi ikpan̄. Ìkasan̄a amọn, ìkpọkpọ iriaan̄ otu kubọk arọọn̄ okirọ mgbọ ekisọp inwọọn̄ isan̄a me lek. ³³ Mîrọ ọmọ inu esip, mè ijit ifefieek unen oyerebet inyi ọmọ. Kpunu ogwu òbokọt ikpa inu òfolek bọn owot iman kan̄, mije, mîfieek ugwem kan̄ isan̄a me linyọn̄.” ³⁴ Ogwu ibot ikwaan̄ ya onenido Filip ibe, “Tumu nyi emi, ìre ekene ke Asaya ogwu nriran okitumu ikọ yi ibak? Ìre ìkitumu ibak lek kan̄, sa ìre ofifi ene?” ³⁵ Filip onenibene me ibot ikpa ere îkifuk ya, mè ikpa ata etip òfolek kè Jisọs inyi ogwu enerieen̄ ya. ³⁶ Me oniin̄ ije kiban̄, ema enenire ere ge mun̄ okupbe. Ogwu ibot ikwaan̄ ya obebe Filip, “Kpọ, ke mun̄ ire eyi! Ìre keke obogban ibe owu okagwook emi mun̄ mgbọ keyi?” [ ³⁷ Filip ofọfọọk ọmọ ibe, “Ire owu osa otutuuk ejit kwun̄ ichieek me lek ata etip yi, mâkọt igwook owu mun̄.” Ogwu enerieen̄ ya ofọfọọk ibe, “Nchieek ibe ke Jisọs Karais ore Gwun̄ eyi Awaji.”] ³⁸ Ogwu ibot ikwaan̄ ya oneninyi ida ibe mè uji ya ikeke. Uji ya okekeke. Filip melek kan̄ esisibi ijọn̄, mè ije isi emen mun̄ ya. Filip ogwogwook ọmọ mun̄ me ere ya. ³⁹ Mgbọ yaage ema enan̄abe me emen mun̄ ya iwook inene, Ekwukwu Okaan̄-ene omọmọnọ Filip isan̄a. Ogwu ibot ikwaan̄ ya ìkayaka ìmun̄ ọmọ ìgak ikeya. Ire, ikekinwọọn̄ unwọọn̄, mè ikpọk ibene ije kan̄ ikije ifo ido kiban̄. ⁴⁰ Filip onenisi isibi me ama ekigwen Ajọtọs, mè ikijijen̄e ikana ama ile geelek ikilook ata etip mege isi ire ama Sisaria.

¹ Otutuuk mgbọ ya, Sọọlu okpọkpọ itet lek inye ikitap ukpook, mè mkpa me lek ebi udun̄ Okaan̄-ene. Mije keya, inanan̄a ije isi lek ogwu ibot ebi ibot ngwugwa, ² mè isi ibeek ibe inyi ọmọ ikpa unye, inyi ọmọ isa isi ije ikana otutuuk uwu ntitiin̄ ebi Ju òkup me Damasikọs isi iweek ebi ìchechieek me lek Oniin̄ yi, mè ìre ebirieen̄ mè ìre ebibaan̄, mè itet ema isa initap me mkpọn me Jeruselem. ³ Ibọbọkọ ikpa ya, mè inan̄a ije. Mgbọ îjebe igbet Damasikọs, me ekakpọge chieen̄, utoon̄ onanan̄a me isinyọn̄ ikebe ikana ọmọ mèrèrèp. ⁴ Ọmọ onanan̄a irọn̄ me ijọn̄, mè inọ ida ge okitumu inyi ọmọ ibe, “Sọọlu, Sọọlu, ìre keke orọ owu okisisaak emi?” ⁵ Sọọlu ododo ibe, “Owu ìre ekene, Okaan̄-ene?” Ida ya ofọfọọk ibe, “Emi ìre Jisọs, ogwu owu okisisaak. ⁶ Nan̄a keke mgbọ keyi, mè je nin̄ emen ama Damasikọs. Me emen ama ya, mêteme owu inu owu oborọ.” ⁷ Ebi melek kan̄ cha ekpọkpọ ikeke me ere ya, kpekọt isan̄a amọn. Ema mînọ ida ya, ire, kpemun̄ ene geege. ⁸ Sọọlu onanan̄a ikeke, mè ichili chieen̄. Ire, ìkayaka ìkọt ìmọọn̄ inu. Ebi melek kan̄ cha enenitet ọmọ me ubọk isa ije inin̄ emen ama Damasikọs. ⁹ Sọọlu okukup ikeya egwe ita, ìkamọọn̄ inu, ìkarie inorie, ìkanwọ inu geege. ¹⁰ Me Damasikọs ya, îkaan̄ ogwu enerieen̄ ge ekigwen Ananayas, ogwu òchechieek me lek kè Jisọs Karais. Me ilaak ọkpọchieen̄, Okaan̄-ene ogwegwen ogwu enerieen̄ ya, “Ananayas!” Ichechieek ibe, “Iin̄, Okaan̄-ene.” ¹¹ Okaan̄-ene otutumu inyi ibe, “Je si uwu ogwu enerieen̄ ge ekigwen Judas, me oniin̄ ekigwen Oniin̄ Òtatat. Osire uwu ya, do ibe ejeen̄ owu ogwu enerieen̄ ge ekigwen Sọọlu ogwu Tasọs. Sọọlu ya ọmọ òwa me uwu ya mgbọ keyi okiriaak uriaak.” ¹² Me ilaak ọkpọchieen̄ si, Sọọlu omumun̄ ubọk ogwu enerieen̄ ge ekigwen Ananayas onube initoon̄ ọmọ ubọk me lek, mè irọ inyi ọmọ ibene ikimọọn̄ inu. ¹³ Ananayas onenifọọk ibe, “Okaan̄-ene, nnọ owuwa ukpatu òfolek ene yi, mè otutuuk inu ikpak îrọbe me lek bọn kwun̄ me Jeruselem. ¹⁴ Mgbọ keyi înube me Damasikọs, îbọkọ ikpa unye me ubọk ogwu ibot ebi ibot ngwugwa, inyi ọmọ ikọt itet otutuuk ebi ìkigwen erieen̄ kwun̄ isi itap me mkpọn.” ¹⁵ Ire, Okaan̄-ene otutumu inyi Ananayas ibe, “Je si, mije, nra igobo ogwu enerieen̄ ya ibe inikana inu ikwaan̄ inyi emi, mè isi itumu erieen̄ n̄a isibi inyi ebi ekarege ebi Ju mè ebi ubọọn̄, mè ebi Ijeren. ¹⁶ Emi mâjeen̄ ọmọ otutuuk ufialek ìbobọkọ mije n̄a.” ¹⁷ Ananayas onanan̄a ije isi uwu ya, mè iraka inin̄, mè itoon̄ ubọk iba kan̄ me lek kè Sọọlu, mè itumu ibe, “Sọọlu, gwun̄ Nte n̄a, Okaan̄-ene Jisọs ogwu òchichichini owu me oniin̄ mgbọ okinu ama keyi, oria emi inu me lek kwun̄, inyi owu òbene òkomọọn̄ inu, mè Ekwukwu Mbuban inin̄ ijot me emen kwun̄.” ¹⁸ Mgbọ yaage, inu òkup kubọk ikpọk irin̄ owawaan̄ inan̄a Sọọlu me chieen̄ igwook me ijọn̄. Sọọlu obebene ikimọọn̄ inu, mè inan̄a ikeke. Egwogwook ọmọ mun̄. ¹⁹ Ibọbọkọ inorie irie. Mgbọ îriebe inorie isan̄a, unye obebene inin̄ ọmọ emen. Sọọlu îgọọk ebi ìchechieek me lek kè Jisọs Karais ikup owuwa usen me Damasikọs. ²⁰ Me ikafiatge mgbọ, ibebene ikitumu ikọ Awaji me uwu ntitiin̄ ebi Ju cha òkup me ama ya ibe ke Jisọs ore Gwun̄ Awaji. ²¹ Ikọ Awaji Sọọlu okitumu ya okeke otutuuk ebi ìnọnọ chieen̄ enenen. Ema ekekido ibe, “Ìre ìkare ene yi okirọ inu ikpak me lek otutuuk ebi ìchechieek me lek erieen̄ keyi me Jeruselem? Eyi înube ama keyi, ìre ìkare ìnu ibonitet ebi ìchechieek me lek erieen̄ yi si isa ijet ebi ibot ngwugwa etap me mkpọn?” ²² Ire, Sọọlu okpọkpọ itet lek inye ikitumu ikọ Awaji me unye me unye. Oniin̄ îsabe ikijeen̄ ebi ene ibe ke Jisọs ore ogwu Awaji otoon̄be ubọk me ibot ya îkwu lek ebi Ju ìkup me Damasikọs enenen. Kpunu ene geege me etete kiban̄ òkọkọt ikeke ifọọk ọmọ otu. ²³ Mgbọ owuwa usen orakabe, ebi Ju enenitọt ikpakpan̄ Sọọlu. ²⁴ Ire, Sọọlu onọnọ otitọt kiban̄. Ebi Ju ekekikeke me otunchit ama ya eririeen̄ mè ikarek ikibem mgbọ Sọọlu oboniraka, inyi ema etet ekpan̄. ²⁵ Ire, me eririeen̄ usen ge, ebi ìchechieek me lek ikọ Awaji Sọọlu okitumu, ebeben Sọọlu me emen okwun ge etobobe olik me lek itap itibi otu nruruk ge me lek mgban enamabe ikana ama ya, mè igele ọmọ me emen okwun ya isiki iyik me ijọn̄ me agan̄ oyet. ²⁶ Sọọlu onanan̄a me ere ya ije ifo Jeruselem, mè iweek itetet lek iriaak me lek ebi ìchechieek me lek kè Jisọs Karais me Jeruselem. Ire, mije ukpook, ife cha kpenyi ọmọ irek, mije ema kpechieek ibe ke Sọọlu îkana ogwu udun̄ kè Jisọs Karais me atikọ. ²⁷ Ire, Banabas onenitet Sọọlu igba lek, mè isa ọmọ inu me isi ebi otuchieen̄ kè Jisọs, mè inikpa inyi ema ubọk Sọọlu omun̄be Okaan̄-ene me oniin̄ mgbọ ìbosi Damasikọs, mè ubọk Okaan̄-ene otumube ikọ inyi Sọọlu. Îkpa si inyi ema ubọk Sọọlu osabe ilook si ata etip me erieen̄ kè Jisọs ikana Damasikọs, ukpook ìkatet. ²⁸ Sa me ikeya, Sọọlu onenigọọk ebi otuchieen̄ cha ikup, mè ikilook ata etip me erieen̄ Okaan̄-ene ikana ere geelek me Jeruselem, ukpook ìkatet. ²⁹ Îtumu si ikọ Awaji inyi ebi Ju ebi ìkitumu usem Giris, mè iwut ifan̄a ikọ Awaji melek kiban̄ enenen. Mije keya, ema ebebene ikiweek ikpakpan̄ ọmọ. ³⁰ Mgbọ ebi ìchechieek me lek kè Jisọs enọbe otitọt yi, ema esasa Sọọlu ije iban me Sisaria, mè iria ọmọ ifo Tasọs ama kiban̄. ³¹ Bene me mgbọ ya, otutuuk ntitiin̄ Awaji òkup me otutuuk agan̄ Judia, mè Galili, mè Sameria onenikaan̄ utelelek, mè ikeke inye, mè ikimumana inan̄a me unye eyi Ekwukwu Mbuban ogwu òtatap ema efuuk me emen. Ebi ntitiin̄ Awaji ekekiluk ugwem me ukpook Okaan̄-ene. ³² Mgbọ Pita okijijen̄e ikana owuwa ama òkup me agan̄ ya, îje si isi ikpọ bọn Awaji ìkup me ama ekigwen Lida. ³³ Me ama ya, inenimun̄ ogwu ngọm ge ekigwen Enias. Ogwu enerieen̄ ya îkup me ijọn̄ orukan̄ ya acha jeeta. ³⁴ Mgbọ Pita omun̄be ogwu enerieen̄ ya, itutumu inyi ibe, “Enias, Jisọs Karais îgwa owu! Nan̄a keke, mè kat mkpilaak kwun̄!” Enias onanan̄a ikeke mgbọ yaage jîp. ³⁵ Mgbọ otutuuk ebi Lida mè Sarọn emun̄be inu ya òrọrọ, ema egwugwu ikom igọọk Okaan̄-ene. ³⁶ Me ama Jọpa, îkaan̄ enenwaan̄ ge òchechieek me lek kè Jisọs, ekigwen Tabita, mè ègwen si Dọkas me usem Giris. (Erieen̄ iba cha ìsibi “uman anam.”) Ọmọ îchieek si me lek kè Jisọs. Ogwu enenwaan̄ ya ìre ogwu òkirọ ata inu, mè ikitap ubọk inyi ebi ugbọọn̄ mgbọ geelek. ³⁷ Me emen mgbọ Pita okupbe me Lida, ogwu enenwaan̄ ya onenifiak orukan̄, mè ikwu. Eneniken nkwukwu kan̄ mun̄ isan̄a, mè iben imaan̄ me agwut ge òkup me agan̄ inyọn̄ me lek uwu ya. ³⁸ Lida îgbet ere me Jọpa. Eya orọ, mgbọ ebi ìchechieek me lek kè Jisọs me Jọpa enọbe ibe ke Pita òwa me Lida, ema eraria ebirieen̄ iba ibe esi egwen Pita ibe, soso, mè ogwugwu inu mgbọ keyi mgbọ keyi. ³⁹ Mgbọ yaage Pita obọkọbe etip ya, igọgọọk ebirieen̄ iba cha ije inu Jọpa. Mgbọ îrebe uwu ya, esasa ọmọ ije inene uwu inyọn̄ ya isi me agwut ere emaan̄be nkwukwu ogwu enenwaan̄ ya. Mgbọ Pita onin̄be agwut ya, ebi nwakpa ìkup me agwut ya ikito ito ekakana ichit Pita, mè ikijeen̄ ọmọ ọfọnti, mè ekwut echi Dọkas ochimbe inyi ema mgbọ îkupbe me ugwem. ⁴⁰ Ire, Pita osasan̄a ema otutuuk ene isibi me emen agwut ya, mè itọbọ ekpe me ijọn̄, mè iriaak uriaak. Mgbọ îriaakbe uriaak isan̄a, ikakana isi ikpọ nkwukwu ene ya, mè itumu ibe, “Tabita, nan̄a keke!” Ogwu enenwaan̄ ya òkwukwu obobolo chieen̄. Mgbọ îmun̄be Pita, ibebene lek isiki ikweek irek. ⁴¹ Pita onenitet ọmọ me ubọk, mè itap ubọk inyi ọmọ inan̄a ikeke. Ikekeke. Pita onenigwen ebi ìchechieek me lek kè Jisọs mè ebi nwakpa cha ibe enu, mè inikana ogwu enenwaan̄ ya me ògat ugwem itap ema me ubọk. ⁴² Etip inu ya otataan̄ ikana otutuuk Jọpa. Mije keya, owuwa ebi ene egwugwu ikom inichieek me lek Okaan̄-ene. ⁴³ Pita oluluk me Jọpa ifiin̄ mgbọ sọnja me uwu ogwu enerieen̄ ge ekigwen Saimọn, ogwu òkisa ikpa anam irom inu.

¹ Me ama Sisaria, îkaan̄ ogwu ibot akọn̄ ge ekigwen Kọniliọs, ogwu òkikpulu efit ebi akọn̄ ge me lek urum akọn̄ ebi Rom eyi ekigwen “Urum akọn̄ ido Itali.” ² Ọmọ mè otutuuk ebi ototun̄ ukan̄ kan̄ mîkaan̄ ukpook Awaji me emen, mè ikitọbọ ebum inyi Awaji. Ogwu enerieen̄ yi îkichili ubọk enenen iche inu inyi ebi ugbọọn̄ me etete ebi Ju, mè ikiriaak uriaak inyi Awaji me mgbọ me mgbọ. ³ Usen ge, mgbọ òfuk-mgbọ osulube ita eyi ejit ikarek, Kọniliọs onenimun̄ ilaak ọkpọchieen̄, mè imun̄ ijaan̄ lek ubọk ogwu osat Awaji ge ojebe inu me lek kan̄, mè inigwen ọmọ, “Kọniliọs!” ⁴ Kọniliọs oririki, mè ikikpọ ogwu osat ya kpoo, mije ukpook, mè ido ọmọ ibe, “Ìre keke, Okaan̄-ene?” Ogwu osat ya ofọfọọk Kọniliọs ibe, “Awaji înọ otutuuk uriaak kwun̄, mè imun̄ si otutuuk ikwaan̄ ata ejit eyi owu okirọ inyi ebi ugbọọn̄, mè ikeek owu. ⁵ Eya orọ, mgbọ keyi, ria ene si Jọpa, mè esi egwen ogwu enerieen̄ ge ekigwen Saimọn Pita ejet owu. ⁶ Saimọn Pita yi ìluk me uwu ogwu enerieen̄ ge ekigwen Saimọn, ogwu òkisa ikpa anam irom inu. Uwu kè Saimọn ya ìkup me agba okwaan̄ ile.” ⁷ Mgbọ ogwu osat Awaji ya òtutumu ikọ melek kan̄ onan̄abe, Kọniliọs ogwegwen ebi ikwaan̄ kan̄ ene iba igbaalek ene ge me etete ebi akọn̄ ìkibem ọmọ, ogwu òkakaan̄ ukpook Awaji me emen, ⁸ mè iben otutuuk inu ya òrọrọ ikpa ijeen̄ ema, mè iria ema ibe esi Jọpa esi egwen Saimọn Pita ejet ọmọ, kubọk ogwu osat ya otemebe. ⁹ Òfit iwele kan̄, me ejit ikarek mgbọ ebi Kọniliọs oriabe ikwaan̄ cha ejebe igbet Jọpa, Pita onenene ifo inyọn̄ otoon̄-uwu ya isi ikup ikiriaak uriaak. ¹⁰ Me ere ya, uraafiọọn̄ onenitaka ọmọ, iweweek irerie inorie. Mgbọ ekitem inorie ìborie, imumun̄ ilaak ọkpọchieen̄. ¹¹ Me emen ilaak ọkpọchieen̄ ya, Pita omumun̄ ubọk isinyọn̄ ogwukube ibook, mè imun̄ inu ge òkup kubọk nga odidọ akpọk isi ile ge etobobe olik me utọn̄ agan̄ ini, mè itet me lek olik cha igele ikisiki inan̄a me isinyọn̄ isibi inu me ijọn̄. ¹² Pita omumun̄ owuwa anam ukot ini òkup esese esese, mè anam echi òkinyinyọnọ me ijọn̄, mè imun̄ si unọn òwulu me inyọn̄ me inyọn̄ odidọ ya. ¹³ Ida ge okekitumu inyi Pita ibe, “Pita, nan̄a keke! Kpan̄, mè taka!” ¹⁴ Pita ofọfọọk ibe, “Iin̄-iin̄, Okaan̄-ene, m̀kpakọt, mije, ǹkararak ìkitaka inu geege òrere inu mbuban, mè echi ikatanage me isi Awaji.” ¹⁵ Ida ya otutumu ikọ òso mgbọ iba inyi Pita ibe, “Inu geelek Awaji orombe itana, owu katumu ibe ke ìkatana.” ¹⁶ Inu ya îrọ ikeya iso mgbọ ita. Mgbọ yaage eyi òso mgbọ ita ya orakabe, ebeben odidọ ya mè anam mè unọn cha me inyọn̄ isan̄a ifo isinyọn̄. ¹⁷ Mgbọ Pita okikeek inu ilaak ọkpọchieen̄ ya osibibe, ebirieen̄ cha ebi Kọniliọs oriabe inu eneniweek uwu Pita olukbe imun̄, mè inikeke me otunchit uwu ya, ¹⁸ mè igwen ebi uwu ya ido ibe mè ìre uwu keyi ke ogwu enerieen̄ ge ekigwen Saimọn Pita ogọọk ikup ye? ¹⁹ Mgbọ Pita okikeek inu òfolek ilaak ọkpọchieen̄ ya, Ekwukwu Mbuban onenigwen ọmọ itumu inyi ibe, “Saimọn, ebirieen̄ ita mêkiweek owu. ²⁰ Eya orọ, nan̄a keke je sibi ijọn̄, mè gọọk ife cha je, mije, îre emi nria ema inu. Kpọkpọ gọọk je, kakiket ukot.” ²¹ Pita ojeje isibi ijọn̄ igọọk ebirieen̄ cha, mè itumu inyi ema ibe, “Emi nre ogwu enerieen̄ ya enyi ekiweek. Ìre keke orọ enyi eniweek emi?” ²² Ema efọfọọk ibe, “Îre Kọniliọs ogwu ibot akọn̄ oria eji inu. Kọniliọs ìre ata ene ogwu òkiriaak Awaji me atikọ, mè ire si ogwu otutuuk ebi Ju ekinyi umin. Ogwu osat Awaji ge òkup mbuban otumu inyi Kọniliọs ibe iria ikwaan̄ igwen owu, mè igban̄ utọn̄ me lek inu geelek owu môtumube.” ²³ Mgbọ Pita onọbe ikọ kiban̄ isan̄a, ibọbọkọ ema itap me uwu ya, mè initet ema ichen. Ema ekukup me uwu ya iwele egwe. Me òfit iwele kan̄, Pita melek ebi ife cha enanan̄a ije isi Sisaria. Usini bọn Nte ìkup me Jọpa egọgọọk ọmọ isi. ²⁴ Ema mîkup me oniin̄ ije ya ifit egwe. Me òfit iwele kan̄, ema erere uwu kè Kọniliọs me ama Sisaria. Me mgbọ ema kperere-nu, Kọniliọs oraria ikwaan̄ igwen ebi uwu kiban̄ mè ata ebi unene kan̄ ititiin̄ me uwu kan̄ iban Pita. ²⁵ Mgbọ Pita obosaba inin̄ uwu ya, Kọniliọs ojeje ikweek ọmọ, mè igele igwook me ijọn̄ me ukot kan̄, mè inyi ọmọ umin. ²⁶ Ire, Pita otetet Kọniliọs ibene, mè itumu inyi ibe, “Nan̄a keke, ke emi me lek n̄a ìre ebilene ikike.” ²⁷ Pita onenikitumu ikọ melek Kọniliọs, mè ikije iraka inin̄ uwu ya. Mgbọ Pita onin̄be emen uwu ya, imumun̄ owuwa ene etitiin̄be ikup ikikpọ ọmọ. ²⁸ Inenitumu inyi ema ibe, “Enyi mîriọọn̄ ijaan̄ lek ibe ke Ikan kiji ebi Ju, ìkanyi irek ibe ogwu Ju geege igọọk ogwu ikarege ogwu Ju igbaan̄ inu irọ. Ìkanyi si irek ibe ogwu Ju isi uwu ogwu ikarege ogwu Ju. Ire, Awaji îjeen̄ emi ibe emi nkamọnọ ene geege kubọk ogwu òchaka mbuban, mè iyaka ire ogwu ikatanage me isi Awaji. ²⁹ Eya orọ, mgbọ nnọbe igwen yi, ǹkajit. M̀kpọkpọ inan̄a ikeke mgbọ yaage, mè inu. Mgbọ keyi, ìre keke orọ mè enyi eria ikwaan̄ egwen emi?” ³⁰ Kọniliọs onenifọọk Pita ibe, “Îre òjelek ike mgbọ keyi, òfuk-mgbọ osulube ita eyi ikarek, me egwe ini òraraka, ke emi nkiriaak uriaak me uwu n̄a. Mgbọ nkiriaak uriaak ya, enerieen̄ ge òtap ọfọnti okuket okpọkpọ ikana isibi, mè ikeke me isi n̄a, ³¹ mè itumu inyi emi ibe, ‘Kọniliọs! Awaji înọ ida uriaak kwun̄, mè ikeek si owuwa ata inu owu okirọ inyi ebi ugbọọn̄. ³² Eya orọ, ria ebi ene si Jọpa, mè esi egwen ogwu enerieen̄ ge ekigwen Saimọn Pita, ogwu ichen òkup me uwu kè Saimọn ogwu òkirọ ikwaan̄ ikpa anam me agba okwaan̄.’ ³³ Eya orọ, me ekafiatge mgbọ, nraria ikwaan̄ igwen owu mgbọ yaage. Înwọn enenen ubọk owu onube. Mgbọ keyi, eji otutuuk ene mîtitiin̄ me ere keyi me isi Awaji inenigban̄ otutuuk inu geelek Okaan̄-ene otemebe owu ibe owu ònojeen̄ eji.” ³⁴ Pita onenibene itumu ikọ inyi ife cha ibe, “Me mgbọ keyi, emi mmun̄ ibe ke ìre atikọ ibe ke Awaji ìkakigobo ene geege isi. ³⁵ Ire, ke îkibọkọ ene geelek me ido geelek itap, ire ene ya ikaan̄ ukpook kan̄ me emen, mè ikirọ inu òtatat. ³⁶ Etip yi ke Awaji oria ijet ebi Ijeren inan̄a me lek ata etip eyi esuuk eyi Jisọs Karais onube inilook. Jisọs Karais yi ore Okaan̄-ene inyi otutuuk ebilene. ³⁷ Enyi mîriọọn̄ inu geelek òmọmọnọ irek me otutuuk agan̄ Judia. Inu chi ìbene me Galili mgbọ Jọn ogwookbe ene mun̄, mè itumu ikọ Awaji eyi kan̄ isan̄a. ³⁸ Enyi mîriọọn̄ ibe ke Awaji îgobo Jisọs ogwu Najeret, mè inyi ọmọ Ekwukwu Mbuban, mè unye. Enyi mîriọọn̄ si ibe ke Jisọs yi îjijen̄e ikana ikirọ ata inu, mè ikisan̄a otutuuk ebi geelek Yọk otapbe mkpọn isibi, mije Awaji okekebe melek kan̄. ³⁹ “Eji ìre ebi ata-ikọ me lek otutuuk inu Jisọs orọbe me Jeruselem mè ido ebi Ju. Ebi ene etetet ọmọ igon ikpan̄ me inyọn̄ uti nkwurieen̄. ⁴⁰ Ire, Awaji ojojomo ọmọ me mkpa me òso egwe ita, mè irọ inyi ebi ene emun̄ ọmọ. ⁴¹ Mgbọ îjomobe me mkpa, ìkare otutuuk ene emun̄ ọmọ. Îre eji ebi ata-ikọ ebi Awaji ogobobe gaalek emun̄ ọmọ. Eji mîgọọk ọmọ ikweek irie inorie, mè inwọ miin̄ me mgbọ îjomobe me mkpa iraka. ⁴² Ineninyi eji ida ibe eji ekelook ebi ene ata etip, mè ekeke ata-ikọ enyi ọmọ ibe ke ìre ọmọ ke Awaji ogobo ibe inire ogwu òbosibi oyerebet me ibot ebi ìkup me ugwem, mè ebi ìkwukwu. ⁴³ Ọmọ ke otutuuk ebi nriran ukot ikaan̄ etumu ikọ òfolek ibe, ‘Inan̄a me erieen̄ kan̄, ke mêtele ijo inyi ene geelek òchechieek me lek kan̄.’ ” ⁴⁴ Pita òkitumu ikọ ya me otu, Ekwukwu Mbuban oneninin̄ emen otutuuk ebi ìkup me uwu ya ikigban̄ ikọ ya. ⁴⁵ Mije bọn Nte cha ìgọgọọk Pita inan̄a me Jọpa inu erebe ebi Ju, îke ema chieen̄ enenen imumun̄ ibe ke Awaji îtap Ekwukwu Mbuban me emen ebi ekarege ebi Ju si. ⁴⁶ Mije, ema mînọ ubọk ife cha ekitumu ikọ me nke nke usem, mè ikitọn̄ Awaji. Pita onenitumu ibe, ⁴⁷ “Eyi Awaji onyibe ife chi Ekwukwu Mbuban kubọk înyibe eji ebi Ju, ìre ekene oboyaka ikput ibe ekagwook ife chi mun̄?” ⁴⁸ Eya orọ, Pita onyinyi ida ibe egwook ife cha mun̄ me erieen̄ kè Jisọs Karais. Mgbọ egwookbe ema mun̄ isan̄a, ema erariaak Pita ibe igọọk ema ikup sọntiik usen inen mè inen.

¹ Ebi otuchieen̄ mè bọn Nte ìkup me otutuuk ido Judia eneninọ ibe ke ebi ekarege ebi Ju mîbọkọ ikọ Awaji itap. ² Eya orọ, mgbọ Pita onube inire Jeruselem, bọn Nte ebi Ju, ebi ìkirọ inye ibe ebi ekarege ebi Ju geelek ìchechieek me lek kè Jisọs efieek afi, ebebene ikitumu ijo otu ikọ inyi ọmọ, ibe, ³ “Ìre ìkare owu keyi oje isi inin̄ uwu ebi ekafieekge afi, mè igọọk isiki ikweek irie inorie?” ⁴ Pita obebene ikpa otutuuk inu cha òrọrọ, mè ubọk îrọbe inyi ema. ⁵ Ìtumu inyi ema ibe, “Emi ǹkup me Jọpa ikiriaak uriaak, mè imun̄ ilaak ọkpọchieen̄. Me emen ilaak ya, mmun̄ inu òkup kubọk odidọ akpọk isi ile etobobe olik me utọn̄ ini, onan̄abe me isinyọn̄ ikigele isiki inu, mè iniyik me isi n̄a. ⁶ Mkpọkpọ, mè imun̄ owuwa anam ukot ini, mè owuwa anam oron, mè imun̄ si anam echi òkinyinyọnọ me ijọn̄, mè ebi kè unọn inyọn̄ me inyọn̄ odidọ ya. ⁷ Mgbọ nkikpọ anam cha, ida ge onenitumu inyi emi ibe, ‘Pita, nan̄a keke! Kpan̄, mè taka!’ ⁸ “Mfọfọọk ibe, ‘Okaan̄-ene, emi m̀kpakọt itaka anam cha kubọk ge, mije, ǹkararak ìkirie inu geege òrere inu mbuban, mè ìyaka ìre inu ikatanage me isi Awaji.’ ⁹ “Ida ya okpọkpọk inan̄a me inyọn̄ òso mgbọ iba itumu ibe, ‘Inu geelek Awaji orombe, mè itumu ibe ke îtana, owu katumu ibe ke ìkatana.’ ¹⁰ Inu ya îrọ mgbọ ita sabum enitaba inu akpọk isi ile ya òbet lek odidọ ibene isan̄a ifo isinyọn̄. ¹¹ “Mgbọ yaage, ebirieen̄ ita eriabe inan̄a me Sisaria inu Jọpa ibe enegwen emi enenire uwu ya ere nlukbe. ¹² Ekwukwu Mbuban otutumu inyi emi ibe mè emi nkakiket ukot, mè ǹgọọk ife cha ǹje mgbọ yaage. Ebirieen̄ gweregwen chi, bọn Nte ebi enyi emun̄be me ere yi, mîgọọk emi ije inan̄a me Jọpa isi ire uwu kè Kọniliọs ya me Sisaria. Eji otutuuk ene mîsaba inin̄ uwu kè Kọniliọs ya. ¹³ Mgbọ eji enin̄be emen uwu ya, Kọniliọs onenikpa inyi eji ibe ke ọmọ îmun̄ ogwu osat Awaji ge me uwu kan̄ mgbọ ọmọ okiriaak uriaak. Ogwu osat Awaji ya otutumu inyi ọmọ ibe mè ọmọ iria etip isi lek enerieen̄ ge ekigwen Saimọn ogwu ekigwen si Pita òkup me Jọpa; ¹⁴ ke Pita ya mônitumu ikọ Awaji inyi ọmọ, inyi Awaji isa me ikeya inyan̄a ọmọ mè otutuuk ebi ototun̄ ukan̄ kan̄. ¹⁵ “Emi ibebene ikitumu ikọ Awaji inyi ema me uwu ya, Ekwukwu Mbuban oninin̄ emen ife cha, kubọk înin̄be eji ebi Ju emen me adasi mgbọ. ¹⁶ Me ike mgbọ ya, nsisi ikeek ikọ Okaan̄-ene otumube ibe, ‘Jọn ìsa mun̄ ikike igwook ebi ene mun̄. Ire, mêsa Ekwukwu Mbuban igwook enyi mun̄.’ ¹⁷ Eya orọ, ire Awaji inyi ebi ife cha Ekwukwu Mbuban yaage ubọk înyibe eji ebi Ju mgbọ eji echieekbe me lek Okaan̄-ene Jisọs Karais, ìre emi ìre ekene, eyi emi mbanikikput Awaji?” ¹⁸ Mgbọ bọn Nte cha ìkup me Jeruselem enọbe otutuuk ubọk inu cha osabe irọ, ema kpeyaka isisaak Pita. Kpan̄asi ikeya, ema ebebene ikitọn̄ Awaji, mè ikitumu ibe, “Ire ikeya, Awaji înyi si ebi ekarege ebi Ju irek ibe egwu ekom, mè ekaan̄ ugwem ikakaan̄ge itata.” ¹⁹ Saasaak ya eyi òbene me mgbọ ekpan̄be Sitibin îrọ mè bọn Nte eyiyala esi egwook me ere òkup kubọk Fonisia, mè Saipọrọs, mè Antiọk. Ere geelek ema erebe, ema ekitumu ikọ Awaji inyi ebi Ju gaalek. ²⁰ Ire, usini ebirieen̄ me lek bọn Nte cha, ebi ìnan̄a me Saipọrọs mè Sairini inu Antiọk ebebene ikilook ebi ìkitumu usem Giris ata etip eyi Okaan̄-ene Jisọs. ²¹ Okaan̄-ene otatap ubọk inyi bọn Nte chi, ogbogbo ene echechieek, mè igwu ikom igọọk Okaan̄-ene. ²² Etip inu ya òrọrọ otataan̄ isi ire utọn̄ ebi ntitiin̄ Awaji òkup me Jeruselem, ema eraria Banabas ibe isi Antiọk isi ikpọ. ²³ Mgbọ Banabas orebe Antiọk, mè imun̄ ibe ke Awaji îsa me atata nnwọn kan̄ igbana ebi ama ya, ibebele ejit, mè itap ema efuuk me emen ibe mè ema esa otutuuk ejit kiban̄ ekeke enye me lek Okaan̄-ene me atikọ. ²⁴ Banabas ìre ata ene òkakaan̄ ichechieek, ogwu Ekwukwu Mbuban ojotbe me emen. Me ere ya, owuwa ebi ene egwugwu ikom igọọk Okaan̄-ene. ²⁵ Banabas oneninan̄a me Antiọk isi Tasọs isi iweek Sọọlu. ²⁶ Mgbọ îweekbe Sọọlu imun̄, isasa ọmọ ika inu Antiọk. Ema ene iba egọgọọk ebi ntitiin̄ Awaji òkup me Antiọk ikup iso acha ge, mè ikijeen̄ ogbogbo ene inu. Îre me Antiọk ke edasi ikigwen ebi udun̄ kè Jisọs ebi “Kirisiten.” ²⁷ Me ike mgbọ ya si, usini ebi nriran enanan̄a me Jeruselem inu me Antiọk. ²⁸ Ene ge me lek kiban̄, ogwu ekigwen Agabọs, onanan̄a ikeke, mè iben nriran me unye Ekwukwu Mbuban ibe ke uga akan̄ môkup me otutuuk ido echi ebi Rom ekikpulu. (Inu ya îrọ si iso me mgbọ ogwu Sisa ekigwen Kọlọdiọs okikpulu ido ebi Rom.) ²⁹ Mije keya, ebi udun̄ kè Jisọs chi enenitumu ifieek me lek kiban̄ ibe ke ema mêria inu geelek ema ekọtbe ikaan̄, me ene me ene, ijet bọn Nte ìkup me Judia isasa itap ubọk inyi ema. ³⁰ Ikeya ke otutuuk kiban̄ erọ si, mè ikisa inu cha inyi Banabas mè Sọọlu. Ebiba mîra ikiria inu cha ijet ebi ugane ntitiin̄ me Jeruselem.

¹ Me mgbọ inu chi geelek okije inyi isi, ogwu ubọọn̄ Erọdu obebene ikisisaak owuwa ebi ntitiin̄ Awaji enenen. ² Înyi ida, esasa oge etim ifieek Jemis ngwan̄ kè Jọn ebek. ³ Mgbọ Erọdu omun̄be ibe ke inu ya ọmọ orọbe îbele ejit ebi ibot ebi Ju, ijeje inyi isi, mè initet Pita si. Inu ya ìrọ me mgbọ ijọk Fituru Ekatapge Olat me lek. ⁴ Mgbọ Erọdu otetbe Pita, isasa isi itap me uwu mkpọn, mè ikana ọmọ itap me ubọk ugbọ ebi akọn̄ ini, ene ini me ugbọ ge, ibe ekebem. Erọdu ìben me ejit isasan̄a Pita isibi mgbọ ijọk mfaka ya môrakabe, mè esibi ọmọ oyerebet me ibot me isi otutuuk ene. ⁵ Mije keya ke etet Pita ikaan̄ me mkpọn. Ire, ebi ntitiin̄ Awaji etetet lek inye me uriaak, ikibeek Awaji mbeek me ibot kan̄. ⁶ Me eririeen̄ òbowele usen Erọdu obosan̄a Pita isibi inyi esibi oyerebet me ibot, Pita ìlaak me etete ebi akọn̄ iba. Mîsa mkpọn iba igon ọmọ ikam me lek ebi akọn̄ iba cha, ofifi ebi akọn̄ ìkibem ere ekekeke me otunchit uwu mkpọn ya ikibem. ⁷ Me ekakpọge chieen̄, ogwu osat Okumugwem ge okakana isibi me isi kè Pita. Utoon̄ ototoon̄ me otutuuk emen agwut uwu mkpọn ere Pita okupbe ya. Ogwu osat ya ochachak ubọk me agba nkan̄ kè Pita, mè isisik ọmọ, mè itumu inyi ọmọ ibe, “Gwat lek bolo chieen̄!” Mgbọ yaage mkpọn etapbe Pita me ebek ubọk agan̄ iba osọsọp igwook me ijọn̄. ⁸ Ogwu osat ya otutumu inyi Pita ibe, “Mọnọ fanti tobo ọfọnti kwun̄ nye, mè tap ikpukot kwun̄!” Pita ototobo fanti, mè itap ikpukot. Ikpọkpọk itumu inyi ibe, “Mọnọ ọfọnti inyọn̄ kwun̄ tap, mè gọọk emi!” ⁹ Pita ogọgọọk ogwu osat ya ije isibi me uwu mkpọn ya. Ire, ìkariọọn̄ ibe ke inu ya ogwu osat ya okirọ melek kan̄ ìre inu òkirọrọ. Ìkup me lek kan̄ kubọk ọmọ ìkimumun̄ ilaak. ¹⁰ Ema enenije iraka adasi otunchit mè ebi akọn̄ ìkibem ere keya, mè iraka si otunchit òso iba mè ebi akọn̄ ìkibem eyi keya. Òta kan̄, ema ejeje inire lek otunchit esabe okwukwut irọ, eyi ekije itibi isibi iraka inin̄ emen ama. Otunchit ya ochichili me lek kan̄ gaalek inyi ema. Ema ejeje itibi iraka inin̄ emen ama. Mgbọ ema ejebe ujọn̄ọ oniin̄ ge isan̄a, ogwu osat ya otetele Pita, mè ininiin̄ ichep. ¹¹ Mgbọ ya ke Pita oninọ lek, mè ibe, “Jei, mgbọ keyi, îbolo emi chieen̄ me atikọ ibe ke Okaan̄-ene îria ogwu osat kan̄ inu, inyi ininyan̄a emi isibi me emen ubọk kè Erọdu, mè emen otutuuk ijo inu geelek ebi ibot ebi Ju etọtbe irọrọ emi. Ìkare ilaak ke nkimumun̄.” ¹² Mgbọ Pita otetbe ibot me lek inu ya òrọrọ, inanan̄a ije isi uwu kè Meri nga kè Jọn ogwu ekigwen si Mak, ere owuwa ebi ene etitiin̄be ikiriaak uriaak. ¹³ Mgbọ Pita orebe uwu ya, mè ikitọbọ ubọk me isotu, gwun̄ enenwaan̄ ge ekigwen Roda, òkisi ikwaan̄ me uwu ya onunu ibonigwuku isotu. ¹⁴ Mgbọ înọbe ida ogwu òkitọbọ ubọk me isotu ya, mè iriọọn̄ ibe ke ìre ida kè Pita, unwọọn̄ ìkachieek ibe ichili isotu inyi Pita. Kpan̄asi ikeya, igwugwu ikom ilibi inin̄ uwu isi ikpa ibe, “Îre Pita okeke me otu isotu!” ¹⁵ Ebi ìkup me uwu ya ebebe ọmọ, “Ibot kwun̄ îwuwọlọ!” Ire, Roda okpọkpọ itet otu inye ikitumu ibe ke ìre Pita ke îre. Ebi ife cha ebebe, ire ikeya, ke môre ogwu osat òkibem Pita okitọbọ ubọk me isotu ya. ¹⁶ Ire, Pita okpọkpọ itet lek inye ikitọbọ ubọk me isotu. Mgbọ ema enisi igwuku isotu ikpọ, mè imun̄ ibe ke ìre Pita, mbiribọ ogwogwook ema me lek enenen. ¹⁷ Ire, Pita owuwuwum ubọk inyi ema ibe eriaan̄ otu, mè inikpa inyi ema ubọk Awaji osabe isan̄a ọmọ isibi me uwu mkpọn. Mgbọ îkpabe isan̄a, inenibe ema esa ukpatu ya esi ekpa enyi Jemis mè otutuuk bọn Nte, mè inan̄a me ere ya ije ifo ofifi ere. ¹⁸ Mgbọ egwe owelebe, ikpele wọlọwọlọ oninin̄ me etete ebi akọn̄ ìkibem ere ya. Ema ekekidido lek kiban̄ ibe mè ìre kpasi inu onirọ Pita ye? ¹⁹ Erọdu onyinyi ida ibe eweek Pita ugwat ugwat esa ejet ọmọ. Ebi akọn̄ eweweek Pita igak, ire, kpekọt iweek imun̄. Erọdu ogwegwen ebi akọn̄ cha ìbebem Pita ido ikọ, mè inyi ida ibe ekpan̄ ema. Mgbọ inu yi orọbe iraka, Erọdu oneninan̄a me agan̄ Judia ifo ama Sisaria isi ikup sọnja mgbọ. ²⁰ Me ujọn̄ọ mgbọ òraraka, Erọdu îbene ikinaan̄ ejit enenen me lek ebi ama Taya mè ebi ama Saidọn. Eya orọ, mgbọ îkupbe me Sisaria ya, ebi ama iba chi enenigbaan̄ isan̄a ene iria ibe esi etumu ikọ eta melek kan̄, inyi esuuk ikup me etete kiban̄ melek kan̄. Ebi esan̄abe cha edadasi isi igọọk ogwu enerieen̄ ge ekigwen Balasitọs, ogwu òkup me otuchieen̄ ikwaan̄ me uwu ogwu ubọọn̄ Erọdu ya itet unene. Sa me lek ene ya, ema ekọkọt itumu ikọ melek kè Erọdu, mè iriaak ibe mè esuuk ikup, mije, otutuuk inorie ebi ama iba cha ekirie ìkinan̄a me ido ogwu ubọọn̄ Erọdu okikpulu. ²¹ Mgbọ usen etumube ifieek okembe, ogwu ubọọn̄ Erọdu otatap ọfọnti ubọọn̄ kan̄, mè isi isiki ikweek irek me inyọn̄ ikasi ubọọn̄, mè ikitumu ikọ inyi ogbogbo ebi ene ìtititiin̄ me oyet ile. ²² Ebi ife cha ekekitaan̄ ukpo ibe, “Ida keyi ìre ida awaji, ìkare ida ebilene!” ²³ Mije Erọdu ikanyige Awaji itọn̄, ogwu osat Okumugwem osusulu ọmọ ito me ijọn̄ mgbọ yaage. Mkput oninin̄ ijot ọmọ emen, mè irie ọmọ ikpan̄. Ikwukwu. ²⁴ Ikọ Awaji okpọkpọ ikije inyi isi, mè ikikpọk iche ikana ere geelek. ²⁵ Mgbọ Banabas mè Sọọlu esibe ikwaan̄ kiban̄ isan̄a, ema egwugwu ikom ika inu Jeruselem, mè isa Jọn ogwu ekigwen si Mak igbaalek ika.

¹ Me mgbọ ya, ntitiin̄ Awaji òkup me Antiọk îkaan̄ owuwa ebi nriran mè ebi ijejeen̄ me emen. Erieen̄ kiban̄ ìre Banabas mè Simiọn ogwu ekigwen Naiga, mè Lusiọs ogwu Sairini mè Manayen, (Ogwu ekpukpobe ọmọ mè Erọdu ogwu ibot mkpulu me ere ge), mè Sọọlu. ² Usen ge mgbọ ema ekitọbọ ebum inyi Okaan̄-ene me ijin-otu mè uriaak, Ekwukwu Mbuban otutumu inyi ema ibe, “Ìsan̄a Banabas mè Sọọlu ìsun̄ esese ìnyi emi, inyi enerọ ikwaan̄ ngwenbe ema ibe enerọ!” ³ Eya orọ, mgbọ ema eriaakbe uriaak, mè ijin otu isan̄a, ema etotoon̄ ubọk me ibot ebirieen̄ iba cha, mè iriaak uriaak inyi ema, mè iria ema isibi. ⁴ Ebirieen̄ iba chi, Banabas mè Sọọlu, ebi Ekwukwu Mbuban oriabe isibi, enenije isi ire ama Selusia òkup me otu mun̄, mè inin̄ uji inan̄a me ere ya isi ire achọ Saipọrọs. ⁵ Mgbọ ema erebe ama ekigwen Salamis me achọ ya, ema ebebene ikitumu ikọ Awaji me otutuuk uwu ntitiin̄ ebi Ju òkup me ama ya. Ema mîsa Jọn Mak igbaalek ije, inyi ikitap ubọk inyi ema me lek ikwaan̄. ⁶ Ema mîjijen̄e ikana otutuuk inyọn̄ achọ ya, mè inire ama ge ekigwen Pafọs. Me ama ya, ema enenichichini ogwu enerieen̄ ge ogwu Ju, ogwu nriran ataak, òkisa yọk ofia iroon̄ nriroon̄. Erieen̄ kan̄ ìre Baa-Jisọs. ⁷ Ogwu nriran ataak yi ìre unene kè Segiọs Pọlọs, ogwu ebi ibot mkpulu ebi Rom etobe ibe ikikpulu ebi ìluk me inyọn̄ achọ ya. Segiọs Pọlọs yi îkaan̄ ifuk ibot enenen. Ineniria ikwaan̄ igwen Banabas mè Sọọlu ibe enu enetumu ikọ Awaji enyi ọmọ igban̄. ⁸ Ire, mgbọ ema erebe uwu ogwu ibot mkpulu ya, Baa-Jisọs ya, ogwu ekigwen si Elimas (eyi òsisibi “ogwu ofia” me usem ebi Giris), onenitap ufialek ikwek Banabas mè Sọọlu, mè iweek irọrọ inyi ogwu ibot mkpulu ya ikabọkọ ichechieek eyi Banabas mè Sọọlu ekijeen̄ ìtap. ⁹ Ire, Ekwukwu Mbuban oninin̄ ijot emen kè Sọọlu ogwu ekigwen si Pọọlu. Ibebene chieen̄ igwuun̄ Elimas me lek, mè itumu inyi ọmọ ibe, ¹⁰ “Owu gwun̄ yọk keyi! Owu ìre ogwu ochicha inyi inu geelek òrere ata inu. Ataak geelek mè ijo ofiaan̄ geelek ìjojot owu emen. Ìre ìkakem si mgbọ owu obotele iwuwuwọlọ atikọ eyi Okaan̄-ene? ¹¹ Mgbọ keyi, unaan̄-ejit Okaan̄-ene îkeme owu. Owu mônin̄ ǹnàan̄. Bene me mgbọ keyi, owu òkpoyaka imọọn̄ utoon̄ egwe sọnja mgbọ.” Mgbọ yaage oduku ekirika mè udun okakana ichit ọmọ ke bùk. Ibebene ikinyinya ikana ikiweek ogwu òbotet ọmọ me ubọk isa ikijeen̄ oniin̄. ¹² Mgbọ ogwu ibot mkpulu ya omun̄be inu ya òrọrọ, ichechieek me lek kè Karais, mije, ijejeen̄ înọbe òfolek Okaan̄-ene îke ọmọ chieen̄ enenen. ¹³ Pọọlu mè ebi melek kan̄ eneninan̄a me Pafọs ikọp isi Pega eyi òkup me agan̄ Pamfilia. Me ama keyi ke Jọn otele ema, mè igwu ikom ifo Jeruselem. ¹⁴ Pọọlu mè Banabas enanan̄a me Pega ije isi ama Antiọk òkup me agan̄ Pisidia. Me Usen Mbuban, ema eninin̄ uwu ntitiin̄ ebi Ju òkup me ama ya, mè isiki ikweek. ¹⁵ Mgbọ efukbe inu inan̄a me emen ikpa Ikan kè Mosis, mè ifuk si inan̄a me emen ikpa ebi Nriran isan̄a, ubọk ekirọ, ebi ibot uwu ntitiin̄ ya eraria etip ijet Pọọlu mè Banabas ibe, “Bọn Nte, ire ikaan̄ ikọ enyi ebetumu isasa itap eji efuuk me emen, ìnitumu, ke irek îsibi inyi enyi.” ¹⁶ Mgbọ ya, Pọọlu onanan̄a ikeke, mè iwuwum ubọk inyi ema ibe egban̄ utọn̄, mè inibene ikitumu inyi ema ibe, “Enyi ebi Ijeren, mè otutuuk kinyi ebi ofifi ido ebi ìkaan̄ ukpook Awaji me emen, soso ìgban̄ utọn̄ me lek inu mbatumu! ¹⁷ Awaji ogwu ebi Ijeren ekitọbọ ebum inyi ogobo ebi nte nte kiji, mè irọ inyi ema emumana ekana ikpele ido me mgbọ ema egọọkbe iluk me ido Ijipiti, mè isa me ikpele unye isan̄a ema isibi me ido ya. ¹⁸ Akọp acha ini ke Awaji ome irọrọ kiban̄ me emen èwê. ¹⁹ Ido jaaba ke Awaji otim akọn̄ ikpan̄ me inyọn̄ ijọn̄ Kenan, mè iyaka ijọn̄ ife cha inyi ebi kan̄ ibe ebọkọ ekaan̄ me irot. ²⁰ Otutuuk inu chi òrọrọ ìben efit acha ini mè akọp go. Mgbọ eya orakabe, inenikinyi ema ebi ibot oyerebet ibe ekekpulu ema. Òta ogwu ibot oyerebet òkpukpulu ema ìre Samien ogwu nriran. ²¹ Ebi Ijeren enenido Awaji ibe inyi ema ogwu ubọọn̄, inyi ikpulu ema. Awaji onyinyi ema Sọọlu gwun̄ kè Kis ogwu ònan̄a me egep kè Benjamin. Sọọlu okpukpulu ebi Ijeren akọp acha ini. ²² Ire, Awaji osasan̄a Sọọlu isan̄a, mè isa Debit gwun̄ kè Jesi irọ ubọọn̄ inyi ema. Mije ata irọrọ kè Debit ke Awaji me lek kan̄ otumu ata ikọ òfolek kan̄ ibe, ‘Emi nra imun̄ ibe ke Debit gwun̄ kè Jesi ìre ogwu òkirọ inu òkineme emi me ejit. Debit môrọ otutuuk inu geelek mweekbe ibe irọ.’ ²³ Inan̄a me owot iman kè Debit ke Awaji osan̄a Jisọs, ogwu unyan̄a ya îchieekbe use, isibi inyi ebi Ijeren. ²⁴ Sabum Jisọs oninu, Jọn ògwook mun̄ îdasi inu inilook otutuuk ebi Ijeren ibe egwu ekom me emen ijo kiban̄, mè enu enegwook mun̄. ²⁵ Mgbọ Jọn osibe ikwaan̄ kan̄ igbet itata, inenido ebi ene usen ge ibe, ‘Ìre enyi ekikeek ibe ke emi ìre ekene? Emi ǹkare ene ya ogwu enyi ekikpọ chieen̄ me inunu kan̄. Ìkpọ, ene ya òkinu me udun̄ n̄a, emi ǹkagbe ogwu òbotọn̄ọ olik ikpukot ene ya.’ ²⁶ “Bọn Nte n̄a, enyi bọn owot iman kè Ebereham, mè enyi ebi ofifi ido ìkakaan̄ ukpook Awaji me emen, îre eji ke Awaji oria ata etip eyi unyan̄a keyi ijet. ²⁷ Ebi Jeruselem mè ebi ibot kiban̄ kperiọọn̄ ogwu Jisọs orebe. Ire, itip-oyerebet eyi ema etipbe ọmọ îrọ inyi inu ebi nriran egebe ibak ọmọ, eyi ekifuk me uwu ntitiin̄ me Usen Mbuban geelek, irọ iso. ²⁸ Ubọk geelek kpunube ijo inu geege îrọbe eyi ebesa itip ọmọ oyerebet mkpa, ema egegen ibak itumu inyi Pailet ibe inyi ida ibe ekpan̄ ọmọ. ²⁹ Mgbọ ema erọbe otutuuk inu egebe me Ikpa Mbuban ibak ọmọ iso, ebi udun̄ kan̄ enenijene nkwukwu kan̄ me inyọn̄ uti nkwurieen̄ isa isi ifuun̄ me udọn̄ ufuun̄. ³⁰ Ire, Awaji ojojomo ọmọ me mkpa. ³¹ Ebi udun̄ kan̄ ebi ìgọgọọk ọmọ ijijen̄e ikana inan̄a me agan̄ Galili inire Jeruselem esasa chieen̄ imun̄ ọmọ owuwa mgbọ me owuwa usen. Me mgbọ keyi, ebi ife chi enire ebi ata-ikọ inyi ọmọ me isi ebi ene. ³² “Ata etip yi ke eji esa inu inilook enyi mgbọ keyi: ³³ Use ya eyi Awaji ochieekbe ebi nte nte kiji ke Awaji onirọ iso me ukot kiji ebi ìrere bọn bọn, sa me lek îjomobe Jisọs me mkpa. Ikeya ke ege si me ikpa Okwa, òso ibot iba, ibe, ‘Owu ìre Gwun̄ n̄a, chereyi ke Emi nkana ire Nte kwun̄.’ ³⁴ Ijojomo me mkpa eyi Awaji ojomobe ọmọ inyi nkwukwu kan̄ ikajọ ke ege inu òfolek me Ikpa Mbuban ibe, ‘Emi mânyi enyi ugbana òkup mbuban, eyi kpolọbe, eyi nchieekbe use inyinyi Debit.’ ³⁵ Ikeya ke ege si ikọ ya me ofifi ere me Ikpa Mbuban ibe, ‘Owu Awaji òkpotele mè ogwu kwun̄ Ogwu Òkup Mbuban ikup me emen udọn̄ ufuun̄ ijọ.’ ³⁶ “Mgbọ Debit ogwu òtutumu ikọ ya osibe ikwaan̄ inyi Awaji isan̄a me ukot eyi kan̄, îkwu igọọk ebi nte nte kan̄, ebeben ifuun̄, nkwukwu kan̄ ojọjọ. ³⁷ Ire, Jisọs ogwu Awaji ojomobe me mkpa ìkajọ kubọk ge. ³⁸ Eya orọ, bọn Nte n̄a ebirieen̄, ǹkiweek ibe enyi eriọọn̄ me atikọ ibe ke etip itetele ijo inyi ene ìje me ubọk kè Jisọs inire enyi lek. ³⁹ Ǹkiweek si ibe enyi eriọọn̄ ibe ke ogwu geelek òchechieek me lek kè Jisọs môsa me lek kè Jisọs ilibi inwọnọ otutuuk ijo inu cha echi Ikan kè Mosis ikakọtge ìrọ inyi enyi elibi enwọnọ. ⁴⁰ “Eya orọ, ìgbala chieen̄, inyi inu ebi nriran etumube ikarọ ìso me lek kinyi. Ebi nriran etumu ibe, ⁴¹ ‘Enyi ebi kpekisa Awaji ìgwen inu, ìkana chieen̄ ìkpọ inu mbarọ, mè ike enyi chieen̄, mè enyi ekwaan̄ esan̄a. Mije, emi mârọ inu ge me ukot kinyi eyi môrebe, ire ene itumu inyi enyi, enyi kpebechieek.’ ” ⁴² Mgbọ Pọọlu mè Banabas ekinan̄a me uwu ntitiin̄ ya isibi, ebi ene ebebe ema eyaka enu enejeen̄ ema inu cha me ofifi Usen Mbuban. ⁴³ Mgbọ ebi ntitiin̄ ya eyatbe, owuwa ebi Ju mè owuwa ebi ofifi ido ebi ìchechieek inye me lek ubọk iriaak Awaji ebi Ju egọgọọk Pọọlu mè Banabas. Pọọlu mè Banabas etutumu ikọ melek kiban̄, mè irọ ema inye ibe ekeke enye efo isi me emen atata nnwọn eyi Awaji. ⁴⁴ Me Usen Mbuban ògọgọọk, isik sọnja more otutuuk ebi ama ya esibi inu inigban ikọ Okaan̄-ene. ⁴⁵ Ire, mgbọ ebi ibot ebi Ju emun̄be urum ebi ene ìnunu me ere ya, ema ekakaan̄ ejit mba me lek kè Pọọlu mè Banabas, mè ibene ikitiik ema, mè ikitumu ikọ ikeme inu ema ekijeen̄. ⁴⁶ Ire, me ekalibige ema chieen̄, Pọọlu mè Banabas etutumu inyi ema ibe, “Îkup me uyọt ibe eji edasi etumu ikọ Awaji enyi enyi. Ire, enyi mîjit ikọ ya, mè imọnọ ibe ke ugwem ikakaan̄ge itata ìkagbe enyi. Mgbọ keyi, eji mênisa ikọ ya ikana ijet ebi ekarege ebi Ju. ⁴⁷ Mije keyi ke Okaan̄-ene onyi eji ikan ibe, ‘Nra irọ ibe owu òre utoon̄ ònyi ebi ekarege ebi Ju, inyi owu òsa unyan̄a òsi òre lek ebi geelek me otutuuk linyọn̄.’ ” ⁴⁸ Mgbọ ebi ekarege ebi Ju enọbe ikọ ya, ema ebebele ejit enenen, mè imin ikọ Okaan̄-ene eyi Pọọlu mè Banabas ekitumu. Otutuuk ebi Awaji ogobobe isun̄ ibe ekaan̄ ugwem ikakaan̄ge itata echechieek me lek kè Jisọs. ⁴⁹ Sa me ikeya, ikọ Okaan̄-ene okakana iso ere geelek me agan̄ ya. ⁵⁰ Ire, ebi Ju etutumu ikọ ifiat ejit ebibaan̄ ebi ukpook Awaji okupbe me emen, ebi eriọọn̄be erieen̄ me ama ya, mè ebirieen̄ ebi ìrere ebi isi me ama ya. Sa me ikeya, ebi ama ya ebebene ufialek me lek kè Pọọlu mè Banabas, mè ilap ema isibi me inyọn̄ ijọn̄ kiban̄. ⁵¹ Mgbọ Pọọlu mè Banabas ebenan̄a me ama ya isibi, ema egegen̄ achiaan̄ ukot kiban̄ igwook me ama ya kubọk inu ata-ikọ ikeme ebi ama ya, mè inan̄a ije isi ama ekigwen Aikoniọm. ⁵² Ebi udun̄ kè Jisọs ìkup me Antiọk ejojot me unwọọn̄, mè ijot si me Ekwukwu Mbuban.

¹ Mgbọ Pọọlu mè Banabas erebe Aikoniọm ema ejeje isi inin̄ uwu ntitiin̄ ebi Ju, kubọk ema ekirọ me ere geelek ema ekisi. Ema mîtumu ikọ Awaji me unye me uwu ntitiin̄ ya. Owuwa ebi ene echechieek me lek kè Jisọs, ebi Ju mè ebi ekarege ebi Ju. ² Ire, ebi Ju ebi ìjijit ikọ ya etatap wọlọwọlọ me etete ebi ekarege ebi Ju, mè irọ inyi ema ekaan̄ njijọ ejit me lek kè Pọọlu mè Banabas. ³ Ire, Pọọlu mè Banabas ekukup si me ama ya ijọn̄ọ mgbọ, mè ikitumu ikọ Okaan̄-ene me unye. Okaan̄-ene onyinyi ema unye, inyi ema ekerọ owuwa uyeke inu isasa ikirọ ikọ eyi atata nnwọn kan̄ eyi Pọọlu mè Banabas ekitumu inye. ⁴ Ebi ama ya echeche lek kiban̄ irek iba, usini ene ekeke inyi ebi Ju, usini ene ekeke inyi ebi otuchieen̄ kè Jisọs. ⁵ Ebi ekarege ebi Ju, mè ebi Ju, mè ebi ibot kiban̄ enenigbaan̄ itọt ibe ke ema mêtet Pọọlu mè Banabas itap unan me lek, mè isa ewuuk itọbọ ikpan̄. ⁶ Ire, ijo otitọt kiban̄ yi orere utọn̄ kè Pọọlu mè Banabas. Ema enanan̄a me ama ya isibi, mè ilibi ifo agan̄ Laikonia, mè inin̄ ama ekigwen Lisitira, mè Dabi, mè otutuuk ama òkup igbet agan̄ ya, ⁷ mè ikup si me ama cha ikilook ata etip ya. ⁸ Me Lisitira, îkaan̄ ogwu enerieen̄ ge òkukup. Ogwu enerieen̄ yi ìre akọọk karake iman kan̄, ìkararak ìje ije me ugwem kan̄. ⁹ Ogwu enerieen̄ ya okwekweek me ijọn̄ ikigban̄ ata etip Pọọlu okilook. Pọọlu ogwugwuun̄ chieen̄ ikpọ ọmọ, mè imun̄ ibe ke îchieek me lek kè Jisọs, mè imun̄ si ibe ke mêkọt igwa ọmọ, ¹⁰ mè inibene ida itumu inyi ọmọ ibe, “Nan̄a keke, mè keke me ukot kwun̄.” Mgbọ yaage, ene ya owuwulu inan̄a ikeke, mè ibene ikije ije. ¹¹ Mgbọ ebi ama ya emun̄be inu ya Pọọlu orọbe, ema ebebene ikitaan̄ ukpo itumu me usem Laikonia ibe, “Ebi kè awaji eji ekiriaak mînan̄a me inyọn̄ isibi inu me lek kiji me akpalek ebilene!” ¹² Mije keya, ema enyinyi Pọọlu mè Banabas erieen̄ usini awaji cha. Banabas ke ema egwen Jewus, mè igwen Pọọlu Hemes, mije ọmọ ore ogwu òkimalek itumu ikọ me etete kiban̄ ene iba. ¹³ Awaji kiban̄ ogwu ekigwen Jewus ya, enama isi kan̄ me udun̄ ama ya. Mgbọ yaage, ogwu òban Jewus ya osisi itaba orie erie mbuuk ge, mè ikpulu si owuwa efit ajakajak isa ikije inu me otunchit ama ya, ọmọ mè ogbogbo ebi ama ya, ibosa inigwa ngwugwa inyi Pọọlu mè Banabas. ¹⁴ Ire, mgbọ Pọọlu mè Banabas, ebi otuchieen̄ kè Jisọs cha enọbe inu ebi ama ya ekiweek irọrọ, ema enanaan̄ ejit, mè itaba ọfọnti kiban̄ igwak, mè ilibi inin̄ etete ife cha, mè ikitaan̄ ukpo itumu inyi ema ibe, ¹⁵ “Ebirieen̄ ebi Lisitira, ìre kpasi inu ke enyi ekirọ ikeyi? Eji me lek kiji ìre ebilene ikike si kubọk enyi erebe. Eji enu inenilook enyi ata etip, inyi enyi esibi etele inu chi ikakaan̄ge oruru, mè ekana egọọk Awaji ogwu òkup me ugwem, ogwu òrorom inyọn̄ mè ijọn̄ mè okwaan̄ mè otutuuk inu geelek òkup me emen kiban̄. ¹⁶ Me adasi mgbọ, Awaji yi îtele ibe otutuuk ebi ido geelek ekeje me oniin̄ geelek òneneme ema. ¹⁷ Ire, Awaji ìkakilọ ikakaan̄ inu òkirọ inyi ebilene eriọọn̄ ibe ke ọmọ ore Awaji. Îjeen̄ enyi ata ejit kan̄ me inyinyi enyi ibot òkinan̄a me inyọn̄ irep igwook me ijọn̄, mè ikirọ inyi mfut enyi ewopbe me uko ikitibi, mè ikito mfut me mgbọ kiban̄, mè isa me ikeya ikinyi enyi inorie ogbogbo. Mije keya, enyi mîra ikibele ejit, mè ikinwọọn̄ unwọọn̄.” ¹⁸ Ubọk geelek ikọ yi Pọọlu otumube otetbe ebi ama ya lek, îyọt enenen sabum ebi otuchieen̄ cha enikọt ikput ife cha ibe ekagwa ngwugwa ìnyi ema. ¹⁹ Me mgbọ ya, usini ebi Ju enanan̄a me Antiọk òkup me Pisidia, mè Aikoniọm inu me Lisitira, mè inisa ikọ otu ifiat ibot ebi ama ya. Mije keya, ebi ama ya eteteen̄ ewuuk isa itọbọ Pọọlu, igagak iweek. Ema etataba ọmọ isibi isi ito me udun̄ ama, mè ikeek ibe ke îkwu. ²⁰ Ire, mgbọ ebi ìchechieek me lek kè Jisọs enube inikeke ikana ọmọ, inanan̄a ikeke, mè igọọk ema igwu ikom ije inin̄ emen ama ya. Me òfit iwele kan̄, Pọọlu mè Banabas enanan̄a me ama ya ije ifo Dabi. ²¹ Pọọlu mè Banabas enenire Dabi, mè ibene ikilook ata etip. Owuwa ene echechieek me lek kè Jisọs. Ema eyayaka inigwu ikom isi Lisitira, mè Aikoniọm, mè Antiọk eyi òkup me Pisidia. ²² Ama geelek ema erebe, ema mîra ikikat bọn Nte ìkup me ama ya ejit, mè ikitap ema efuuk me emen, inyi ekọt ekeke enye me emen ichechieek kiban̄. Ema ekitumu inyi bọn Nte chi ibe, “Eji mêje itibi owuwa ufialek sabum eji mênikọt iraka inin̄ mkpulu eyi Awaji.” ²³ Ntitiin̄ Awaji geelek ebi otuchieen̄ iba chi esibe, ema mîra ikigobo ebi ugane ntitiin̄ ito me ibot ibe ekekpulu ntitiin̄ ya, mè isa me uriaak mè ijin-otu ibene ife cha itap me ubọk Okaan̄-ene ogwu ema etoon̄be ejit me lek. ²⁴ Mgbọ Pọọlu mè Banabas ejebe ikana agan̄ Pisidia isan̄a, ema enanan̄a ije isi agan̄ Pamfilia. ²⁵ Me agan̄ Pamfilia, ema mîlook ata etip me ama Pega, mè iraka isi ire ama Atalia. ²⁶ Me Atalia ke ema enin̄ uji awala ikọp ika inu Antiọk ere esabe uriaak ibene ema itap me ubọk atata nnwọn eyi Awaji sabum ema enibene ikwaan̄ yi eyi ema esibe isan̄a me mgbọ keyi. ²⁷ Mgbọ ema erebe Antiọk ya, ema enenigwen ebi ntitiin̄ Awaji òkup me ama ya ititiin̄, mè ikpa otutuuk ikwaan̄ Awaji osabe ema isi, mè ikpa si ubọk Awaji osabe ichili oniin̄ inyi ebi ekarege ebi Ju enechieek si me lek kè Jisọs. ²⁸ Ema enenigọọk ebi ìchechieek ikup me Antiọk ijọn̄ọ mgbọ.

¹ Mgbọ Pọọlu mè Banabas ekupbe me Antiọk ya, usini ebirieen̄ enanan̄a me agan̄ Judia inu me Antiọk, mè ikijeen̄ bọn Nte ìkup me ama ya ibe, “Îtata mè efefieek enyi afi igọọk me Ikan kè Mosis, Awaji ìkponyan̄a enyi.” ² Pọọlu mè Banabas egọgọọk ife cha iwut ifan̄a, mè igugọlọ enenen mije ijejeen̄ yi. Bọn Nte ìkup me Antiọk enenisan̄a Pọọlu mè Banabas mè ebi ofifi ife si igbaalek iria ibe esi Jeruselem esi emun̄ ebi otuchieen̄ mè ebi ugane ntitiin̄ Awaji chieen̄ mije ijejeen̄ yi. ³ Ebi ntitiin̄ Awaji me Antiọk eneniria ebi egobobe cha isibi. Mgbọ ema ejebe inire ido Fonisia mè agan̄ Sameria, ema ekekikpa inyi ebi ama cha ubọk ebi ekarege ebi Ju esabe igwu ikom inu me lek Awaji. Bọn Nte ìkup me ere cha ebebele ejit enenen mije etip ya. ⁴ Mgbọ ema enube inire Jeruselem, ebi otuchieen̄ mè ebi ugane ntitiin̄ mè otutuuk ebi ntitiin̄ Awaji ebọbọkọ ema itap me ata ubọk. Pọọlu mè Banabas enenikpa otutuuk ikwaan̄ Awaji osabe ema isi inyi ebi ntitiin̄ Awaji cha. ⁵ Ire, mgbọ ema egban̄be ikọ ya isan̄a, usini ebi ìchechieek, ebi irarak ire ebi Farisi, enanan̄a ikeke, mè itumu ibe, “Me atikọ, îgbe ibe otutuuk ebi ekarege ebi Ju, ebi ìbọbọkọ ata etip itap efieek afi, mè esun̄ otutuuk Ikan kè Mosis.” ⁶ Ebi otuchieen̄ mè ebi ugane ntitiin̄ enenisi inin̄ oru òfolek ikọ ya. ⁷ Mgbọ ema ewutbe ifan̄a ijọn̄ọ mgbọ me emen oru ya, Pita oneninan̄a ikeke me etete kiban̄, mè itumu inyi ema ibe, “Bọn Nte n̄a, enyi mîriọọn̄ ibe, me sọnja mgbọ òraraka, ke Awaji îgobo emi me etete kinyi iria ibe emi ǹsa ata etip ǹsi ǹlook ebi ekarege ebi Ju, inyi ema enọ, mè echieek. ⁸ Awaji ogwu òrọriọọn̄ ejit ebilene oneninyi ebi ife cha Ekwukwu Mbuban ubọk înyibe eji si, isasa ijeen̄ ibe ke ọmọ îbọkọ ife cha itap. ⁹ Awaji ìkamọnọ ebi ife cha kubọk esese ife me lek kiji, mije, ìsa me ichechieek ife cha ekaan̄be igwọk ejit ife cha itana, kubọk îrọbe inyi eji. ¹⁰ Me mgbọ keyi, ìre keke orọ enyi ekiweek ibeben ulobo akpan eyi eji mè ebi nte nte kiji ekakọtge ìbeme itoon̄ ife chi me oguga? Ìre enyi kperiọọn̄ ibe ke eyi ìre itọtọ Awaji ikpọ? ¹¹ Iin̄-iin̄, ìkatat ikeya. Eji mîchieek ibe ke Awaji ìnyan̄a ife chi sa me atata nnwọn eyi Okaan̄ kiji Jisọs Karais, kubọk Awaji onyan̄abe eji si.” ¹² Otutuuk ebi ntitiin̄ ekpọkpọ iriaan̄ otu ikigban̄ mgbọ Banabas mè Pọọlu ekikpa ubọk Awaji osabe ema isi ikwaan̄ ukechieen̄, mè irọ si uyeke inu me etete ebi ekarege ebi Ju. ¹³ Mgbọ ema ekpabe isan̄a, Jemis onenitumu ibe, “Bọn Nte n̄a, ìgban̄ utọn̄! ¹⁴ Saimọn îra ikpa ubọk Awaji okaan̄be ulọk me lek ebi ekarege ebi Ju me adasi mgbọ, mè igobo ebi ene me etete kiban̄ isa irọ ebi kan̄. ¹⁵ Ikọ ebi nriran egebe ìkpọkpọ ilibi itat me lek ikọ eji ekinọ mgbọ keyi. Ebi nriran ege ibe ke Awaji ìbe, ¹⁶ ‘Mgbọ keyi isiraka, emi mâgwu ikom inu ininama uwu kè Debit eyi ògbugbugbọ irọn̄. Mâkpọk inama uwu ya ònanan̄a irọn̄, mè irọ inyi iyaka inwọn. ¹⁷ Sa me ikeya, otutuuk ebilene ebi ìsisik, mè otutuuk ebi ido geelek ebi ngwenbe inyi lek n̄a mêniweek Okumugwem ogwu òrọrọ inu chi geelek, ¹⁸ eyi ebi ene eriọọn̄be karake ukot ikaan̄.’ ¹⁹ “Eya orọ, me nkeek n̄a ìkagbe ibe eji etap uyọrọlek me lek ebi ìgwugwu ikom igọọk Awaji me etete ebi ekarege ebi Ju. ²⁰ Kpan̄asi ikeya, eji ege ikpa ejet ife cha ibe ekarie inorie geege ikatanage me isi Awaji mije esabe igwa ngwugwa inyi mkpọmfaka, mè etele ugwem barabat, mè ekataka anam geelek ekpan̄be eyi eje ikasibige me lek, mè eje si ikanin̄ ema otu. ²¹ Mije, bene me karake ukot ikaan̄ ke ekifuk Ikan kè Mosis me ama geelek. Mege inire mgbọ keyi, mêkifuk si me otutuuk uwu ntitiin̄ ebi Ju me Usen Mbuban geelek.” ²² Ebi otuchieen̄ mè ebi ugane ntitiin̄ mè otutuuk ebi ntitiin̄ Awaji ìkup me Jeruselem enenitumu ifieek ibe ke mêgobo ene igbaalek kè Pọọlu mè Banabas iria isi Antiọk. Ema enenigobo Judas ogwu ekigwen Basabas, mè Sailas. Ebirieen̄ iba chi ìre ebi ibot me etete bọn Nte me Jeruselem. ²³ Enenige ikpa etip keyi isa inyi ema ibe esa egbaalek esi: “Eji bọn Nte kinyi ebi otuchieen̄, mè ebi ugane ntitiin̄ Awaji ege ikpa etip keyi ijet enyi, bọn Nte ebi ekarege ebi Ju me Antiọk, mè Siria, mè Silisia. ²⁴ “Eji mînọ ibe ke îkaan̄ ebi ìnan̄a me etete kiji inu me lek kinyi me eji ekanyige unye, mè inisisaak enyi, mè itumu ikọ òwuwuwọlọ enyi ejit. ²⁵ Mije keya, ke eji otutuuk ene etumu ifieek ibe egobo ene me etete kiji, inyi egọọk enu me lek kinyi, ema mè atata ebi unene kiji, Banabas mè Pọọlu, ²⁶ ebi ìsasa me mkpa mè ugwem isi ikwaan̄ mije erieen̄ Okaan̄ kiji Jisọs Karais. ²⁷ Eya orọ, eji eria Judas mè Sailas ibe egọọk enu enesa otu kiban̄ ekpa otutuuk inu yaage eji egebe me emen ikpa etip yi enyi enyi isi mè isi. ²⁸ Înwọn me lek Ekwukwu Mbuban, mè inwọn si me lek kiji ibe ke ìkagbe ibe eji eyaka ebene ofifi ulobo akpan eyi Ikan kè Mosis geege etoon̄ enyi me oguga ilọ me lek nteme kechi: ²⁹ Ikarie inorie geege esabe igwa ngwugwa inyi mkpọmfaka. Ikalaka eje. Ikataka anam geege ekpan̄be eyi eje ikasibige me lek. Ìtele ugwem barabat. Ire enyi isan̄a lek kinyi me lek otutuuk inu chi, mônwọn enenen. ³⁰ Ebi ntitiin̄ Awaji me Jeruselem eneniria ebi ikwaan̄ cha isibi. Mgbọ ema erebe Antiọk, ema etititiin̄ otutuuk ebi ntitiin̄ Awaji ìkup me ama ya, mè inisa ikpa ya inyi ema. ³¹ Ife cha ebọbọkọ ikpa ya, mè ifuk. Mgbọ efukbe, mè inọ ikọ ukarajit òkup me emen, ejit obebele ema enenen. ³² Judas mè Sailas me lek kiban̄ ìre ebi nriran. Ema enenitumu owuwa ikọ ukarajit isa itap bọn Nte cha efuuk me emen, inyi ekọt ekeke enye efo isi me emen ichechieek kiban̄. ³³ Mgbọ ema egọọkbe ikup me Antiọk ijọn̄ọ mgbọ sọnja, bọn Nte cha enenitutuun̄ ema itap me oniin̄. Ema efofo Jeruselem me esuuk, igọọk ebi ìraria ema inu. ³⁴ Ire, Sailas obebe ke ọmọ môbia me Antiọk. ³⁵ Pọọlu mè Banabas ekukup me Antiọk. Ema mè owuwa ofifi bọn Nte ekukup me ere ya ikijeen̄ inu, mè ikilook ata etip eyi Okaan̄-ene. ³⁶ Mgbọ mgbọ orakabe itoon̄ me lek, Pọọlu onenitọt inyi Banabas ibe mè ema enegwu ekom esi ama geelek ere ema elookbe ata etip eyi Okaan̄-ene, esi ekpọ-nu ubọk ebi ìchechieek me ere cha ekirọ. ³⁷ Banabas oneniweek ibe Jọn ogwu ekigwen si Mak igọọk ema isi ije ya. ³⁸ Ire, Pọọlu obebe ke ìkagbe ibe Jọn igọọk ema isi, mije ke îtele ema me Pamfilia me adasi ije kiban̄, mè igwu ikom, ìkagọọk ema ìsi ikwaan̄ ya ìre òta. ³⁹ Ifan̄a ya otatap ikpele ibaak me etete kiban̄, ema echeche lek. Banabas omọmọnọ Jọn Mak isa igbaalek inin̄ uji awala ikọp isi achọ Saipọrọs. ⁴⁰ Pọọlu omọmọnọ Sailas. Ebi ntitiin̄ Awaji erariaak uriaak inyi ema, mè iyaka ema itap me ubọk atata nnwọn eyi Okaan̄-ene. Ema enanan̄a. ⁴¹ Pọọlu osasa Sailas igbaalek ije ikana agan̄ Siria mè Silisia ikitap efuuk me emen ebi ntitiin̄ Awaji ìkup me agan̄ cha.

¹ Pọọlu onenije isi ire Dabi, mè iraka isi ire Lisitira. Me Lisitira ke Pọọlu onichichini gwun̄ Nte ge ekigwen Timọti. Ogwu uga ìre ogwu Ju, mè ire si gwun̄ Nte. Sa ogwu ute ore ogwu Giris. ² Otutuuk bọn Nte ìkup me Lisitira mè Aikoniọm mîtumu ata ikọ òfolek kè Timọti. ³ Mije keya Pọọlu oweweek imọmọnọ Timọti itap me lek kan̄. Eya orọ, Pọọlu obebe mè efieek Timọti afi, inyi ebi Ju ebọkọ ọmọ etap, mije otutuuk ebi Ju ìkup me agan̄ ya mîriọọn̄ ibe ke Timọti ìre ogwu Giris; ke ìkare ogwu Ju. ⁴ Mgbọ eya orakabe, Pọọlu onenibene ikijijen̄e ikana me ama me ama, mè ikikpa inu ebi otuchieen̄ mè ebi ugane ntitiin̄ me Jeruselem edọmọbe inyi bọn Nte ebi ekarege ebi Ju, mè ikibe ema esun̄ ikan cha. ⁵ Sa me ikeya, ebi ntitiin̄ cha ekekeke inye me emen ichechieek, mè ikimumana me otu ifuk me usen me usen. ⁶ Pọọlu mè ebi melek kan̄ enenije itibi agan̄ Firijia, mè Galesia, mije Ekwukwu Mbuban ìkachieekge ibe ema elook ata etip me agan̄ Esia. ⁷ Mgbọ ema ejebe inire oke ijọn̄ Misia, ema mîweek ijeje inin̄ agan̄ Bitinia. Ire, Ekwukwu kè Jisọs ìkachieek ibe ema enin̄. ⁸ Mije keya, ema ejeje iraka agan̄ Misia, mè isi ama Torowas. ⁹ Mgbọ ema erebe ama ya, me eririeen̄, Pọọlu omumun̄ ilaak ọkpọchieen̄ ubọk ogwu enerieen̄ Mesidonia ge okekebe me isi kan̄, mè ikibeek ọmọ ibe, “Soso, saba na me Mesidonia natap ubọk nyi eji!” ¹⁰ Mgbọ Pọọlu omun̄be ilaak ọkpọchieen̄ ya isan̄a, eji ebebene mgbọ yaage ikibem lek isisi Mesidonia, mije, eji mîchieek ibe ke ìre Awaji ogwen eji ibe esi elook ebi agan̄ ya ata etip. ¹¹ Eji eninin̄ uji awala me Torowas, mè ikọp ejit yaage iraka ifo achọ ekigwen Samoteres. Òfit iwele kan̄, eji ekọkọp isaba itoon̄ me atasuk ama Niapolis. ¹² Eji eneninan̄a me Niapolis ije ukot ukot isi ama Filipai. Filipai ìre ama ebi Rom ekikpulu, mè ire si isi ama me agan̄ Mesidonia. Eji eluluk ijọn̄ọ usen me ama ya. ¹³ Me Usen Mbuban, eji enanan̄a me ama ya ije isibi isi agba okwaan̄ ge ere eji ekeekbe ibe ke mêmun̄ ere ebi Ju ekiriaak uriaak. Eji esisiki ikweek irek, mè ibene ikitumu ikọ Awaji melek ebibaan̄ ìtititiin̄ me ere ya. ¹⁴ Ene ge me lek ebi ìgbagban̄ ikọ Awaji ya ìre ogwu enenwaan̄ ge ekigwen Lidia, ònan̄a me ama Tiyatira. Ogwu enenwaan̄ ya ìkinyam ekwut unye otu ewe òkikup irio irio. Ọmọ ìre si ogwu òkitọbọ ebum inyi Awaji. Okaan̄-ene ochichili ejit ogwu enenwaan̄ ya, ibọbọkọ ikọ Awaji Pọọlu otumube ya itap. ¹⁵ Mgbọ îbọkọbe ikọ ya itap, egwogwook ọmọ mè otutuuk ebi uwu kan̄ mun̄. Mgbọ egwookbe ọmọ mun̄ isan̄a, igwegwen eji ibe enu me uwu kan̄, mè itumu inyi eji ibe, “Ire enyi imọnọ emi kubọk ogwu òchechieek me lek Okaan̄-ene, ìna ìnigọọk emi iluk.” Îriaak eji mege eji echechieek, mè igọọk ọmọ ifo uwu kan̄. ¹⁶ Usen ge eji ekije isi ere uriaak ya, ogwu enenwaan̄ usun̄ ge erumun̄ ido-inu okupbe me emen onenichichini eji me oniin̄. Ogwu enenwaan̄ yi îkisa ido-inu yi ibọm ikpoko enenen inyi ebikaan̄ kan̄. ¹⁷ Ogwu enenwaan̄ ya onenikigọọk Pọọlu mè otutuuk kiji ikije ikana ere, mè ikitaan̄ ukpo ìtumu ibe, “Ebirieen̄ chi ìre ebi ikwaan̄ eyi Awaji Òbebene Ichit. Ema enu ibeniteme enyi oniin̄ enyi ebesa ikaan̄ unyan̄a.” ¹⁸ Ogwu enenwaan̄ ya îrọ inu yi owuwa usen. Usen ge, Pọọlu onanaan̄ ejit, mè ikana isi ida ọmọ, mè igana inyi ijo erumun̄ ya ibe, “Me erieen̄ kè Jisọs, ǹkitọ inyi owu ibe owu, nan̄a me emen gwun̄ enenwaan̄ yi sibi!” Mgbọ yaage, erumun̄ ya onanan̄a isibi me emen kan̄. ¹⁹ Mgbọ ebikaan̄ usun̄ enenwaan̄ ya eriọọn̄be ibe ke otu oniin̄ ema ekisa ikaan̄ ikpoko îchit, ema etetet Pọọlu mè Sailas mgbọ yaage, mè idut ema isi me isi ebi ibot ama, me oyet ewe. ²⁰ Me isi ebi oyerebet ebi Rom cha, ema etutumu ibe, “Ife chi ìre ebi Ju. Ema enu inikitap ufialek me ama kiji, ²¹ mè ikisa ọrọmijọn̄ ikatatge me lek ikan kiji ebi Rom inikifiat ebi kiji ibot.” ²² Ogbogbo ebi ama ya egọgọọk itap lek irọ Pọọlu mè Sailas inu. Ebi oyerebet ebi Rom cha enyinyi ida ibe esan̄a Pọọlu mè Sailas ọfọnti me lek, mè esa njijan̄ esulu ema. ²³ Mgbọ ife cha esulube Pọọlu mè Sailas imem, edudut ema isi igon ikam me uwu mkpọn, mè inyi ogwu ibot uwu mkpọn ya ida ibe igwuun̄ chieen̄ ikpọ ema. ²⁴ Mije ogwu ibot uwu mkpọn ya obọkọbe òjelek etip òkup ikeya, isasa ema isi itap me agwut mkpọn eyi òkup me emen emen, mè igon ukot kiban̄ ikam me agbagba chieen̄ uwot ekisa igon uyọt uyọt ebi mkpọn. ²⁵ Me ejit eririeen̄, Pọọlu mè Sailas ekekiriaak uriaak, mè ikikọt okwa itọn̄ Awaji. Ebi mkpọn kechilọ ekekigban̄. ²⁶ Me ekakpọge chieen̄, ijọn̄ obebene ikisisik me ere ya atalek unye unye, mè isisik ire lek ewuuk irak ijọn̄ uwu mkpọn ya. Mgbọ yaage, otutuuk isotu uwu mkpọn ya ogwugwuku ibook. Otutuuk mkpọn esabe igon ebi mkpọn cha geelek ogegen̄ igwook. ²⁷ Ogwu ibot uwu mkpọn ya obobolo chieen̄, mè imun̄ ubọk otutuuk isotu uwu mkpọn ya ogwukube ibook. Mgbọ îmun̄be ikeya, iwọwọọk oge etim kan̄ ibosa ikpan̄ lek, mije, ìkeek ibe ke otutuuk ebi mkpọn cha mîlim ifon isan̄a kpai. ²⁸ Ire, Pọọlu okukup imun̄ inu ene ya oborọ, mè itaan̄ ukpo itumu inyi ibe, “Kasak unan geege me lek kwun̄. Eji otutuuk ene òwa me ere keyi!” ²⁹ Ogwu ibot uwu mkpọn ya obebe esa mkpukan̄ ejet ọmọ. Mgbọ îbọkọbe mkpukan̄ ya, iwuwulu inin̄ emen uwu ya, mè irọn̄ me isi kè Pọọlu mè Sailas, mè ikiran. ³⁰ Inenisan̄a ema isibi, mè ido ema ibe, “Ebi nte n̄a, ìre keke ke mbarọ mè ikaan̄ unyan̄a?” ³¹ Ema efọfọọk ọmọ ibe, “Chieek me lek Okaan̄-ene Jisọs, ke mênyan̄a owu, mè otutuuk ebi uwu kwun̄.” ³² Pọọlu mè Sailas enenitumu ikọ eyi Okaan̄-ene inyi ọmọ mè otutuuk ebi uwu kan̄. ³³ Me ejit eririeen̄ ya si, ogwu òkibem uwu mkpọn ya osasa ema isi igwọk chieen̄ unan cha etapbe ema me lek mgbọ esulube ema. Pọọlu mè Sailas egwogwook ọmọ mè otutuuk ebi uwu kan̄ mun̄. ³⁴ Inenisa ema inu me uwu kan̄, mè irọ inorie iyik inyi ema erie. Ọmọ mè otutuuk ebi uwu kan̄ ebebele ejit enenen, mije ichechieek ema enichieek me lek Awaji. ³⁵ Mgbọ egwe owelebe, ebi oyerebet cha eraria ebi ikan ido ibe esi elook ogwu ibot uwu mkpọn ya ibe itele mè ebirieen̄ iba cha efon. ³⁶ Ogwu ibot uwu mkpọn ya ololook Pọọlu mè Sailas ibe, “Ebi oyerebet cha mîria etip inu ibe emi ǹtele mè enyi efon. Eya orọ, ìnan̄a isibi, mè ìfo me esuuk.” ³⁷ Ire, Pọọlu otutumu inyi ebi ikan ido cha ibe, “Ìkpọ, eji ìre bọn owot Rom. Ebi oyerebet cha kpesibi oyerebet geege me ibot kiji isasa iriọọn̄ mè eji mîrọn̄ ikan, mè ìre eji kperọn̄, kubọk ikan ebi Rom odobe. Ekpọkpọ itet eji isut me isi otutuuk ene, mè igon eji ikam me uwu mkpọn, mè ibeninween̄ lek isan̄a eji isibi mgbọ keyi me nlelet, me ebi ene ekariọọn̄ge. Iin̄-iin̄, eya ìkporọ! Ema me lek kiban̄ enu enesa eji eje esibi me uwu mkpọn!” ³⁸ Ebi ikan ido cha egwugwu ikom, mè isa ikọ ya isi ikpa inyi ebi oyerebet cha. Mgbọ ebi oyerebet cha enọbe ibe ke Pọọlu mè Sailas ìre bọn owot Rom, ukpook otetet ema. ³⁹ Ema enunu iniriaak Pọọlu mè Sailas, mè isa ema ije inan̄a me uwu mkpọn ya isibi, mè iriaak ema ibe esibi me ama ya. ⁴⁰ Mgbọ Pọọlu mè Sailas enan̄abe me uwu mkpọn ya isibi, ema ejeje isi uwu kè Lidia. Me uwu ya, ema echichichini owuwa bọn Nte, mè itumu ikọ ukarajit me emen ichechieek inyi ema, mè isibi itele ama ya.

¹ Pọọlu mè Sailas enenije itibi emen ama Amfipolis mè Apolonia, mè inire ama Teselonaika. Uwu ntitiin̄ ebi Ju ge òwa me ama ya. ² Pọọlu ojeje isi uwu ntitiin̄ ebi Ju ya, ubọk îkiwuuk lek irọ me ere geelek îsibe. Usen Mbuban ita ke îkup me ere ya ikitumu ikọ inyi ife cha inan̄a me inu egebe me Ikpa Mbuban, ³ mè ikikpa iwele inyi ema ibe ke mîwuuk lek ige ibe ke ogwu Awaji otoon̄be ubọk me ibot môbọkọ ufialek, mè ijomo me mkpa. Sa me ikeya ke îtumu inyi ema ibe, “Jisọs yi ogwu nkitumu ikọ òfolek inyi enyi, ọmọ ore ogwu Awaji otoon̄be ubọk me ibot ya.” ⁴ Usini me lek ebi Ju cha echechieek ikọ ya, mè ikana igọọk Pọọlu mè Sailas. Ubọk yaage si, owuwa ebi Giris, ebi ukpook Awaji okupbe me emen egọgọọk ichieek. Owuwa ebibaan̄ ebi eriọọn̄be isi me ama ya si mîgọọk ichieek. ⁵ Ire, ebi ibot ebi Ju ekakaan̄ njijọ ejit me lek kè Pọọlu mè Sailas mije owuwa ebi ene echieekbe ikọ kiban̄, mè inin̄ emen ewe isi ititen̄e ebi ijo ife, mè ebi una ubọk ikwaan̄ igbaalek kiban̄, mè ibene ikpele ufialek me emen ama ya. Ema egbugbuku inin̄ uwu kè Jesin isi iweek Pọọlu mè Sailas ibesan̄a isibi inyi ebi ama. ⁶ Mgbọ ekamun̄ge Pọọlu mè Sailas me uwu ya, ema etataba Jesin mè usini bọn Nte isa isi me isi ebi ibot ama, mè ikitaan̄ ukpo itumu ibe, “Ebi ife chi ebi ìkifiat otutuuk linyọn̄ igwook mînu me ama kiji, ⁷ Jesin obọbọkọ ema itap me uwu kan̄. Ife chi ere ebi ìkifiat ikan geelek ogwu Sisa okitap, mè ikibe ke ofifi ogwu ubọọn̄ ge ọmọ òwa, ogwu ekigwen Jisọs.” ⁸ Mgbọ ebi ibot ama, mè ebi ogbogbo ene cha enọbe ikọ ya, okput obebene, ama odidimi. ⁹ Ebi ibot ama mè ebi ogbogbo ene cha efefieek mkpukpe inyi Jesin mè ebi melek kan̄ kubọk ata-ikọ ibe ke ema kpebeyaka itap ufialek ofifi. Ema ekpekpe mkpukpe cha. Ife cha etetele inyi ema efon. ¹⁰ Egwe ififit, bọn Nte cha esasan̄a Pọọlu mè Sailas isibi me ama ya ibe esi Beria. Mgbọ yaage ema erebe Beria, ema eraraka isi uwu ntitiin̄ ebi Ju òkup me ama ya. ¹¹ Ire, ebi Beria kpekaan̄ ijo ejit kubọk ebi Teselonaika ekaan̄be. Ema mîchili ejit ibọkọ ata etip ya, mè ikaan̄ ikpele ulọk me lek, mè ikiwọlọ Ikpa Mbuban usen geelek ikikpọ mè ìre ikọ Pọọlu okitumu cha ìre atikọ. ¹² Sa me ikeya, owuwa ebi Ju echechieek me lek ata etip ya. Owuwa ebibaan̄ ebi Giris ebi eriọọn̄be erieen̄ me ama, mè ebirieen̄ kiban̄ si mîgọọk ichieek. ¹³ Mgbọ ebi Ju ìkup me Teselonaika enọbe ibe ke Pọọlu òkitumu si ikọ Awaji me Beria, ema enanan̄a inu Beria, mè initumu ikọ ifiat ebi ene ibot, mè ibene itap ufialek. ¹⁴ Mgbọ yaage, bọn Nte ìkup me Beria esasan̄a Pọọlu isibi me ama ya iria ifo agba okwaan̄ ile. Ire, Sailas mè Timọti ekukup me Beria. ¹⁵ Ebi ìsasa Pọọlu ije iban egọgọọk ọmọ ije inire ama Atens, mè igwu ikom ifo Beria. Mgbọ ema ebefo, Pọọlu ololook ema ibe etumu enyi Sailas mè Timọti ibe egwat lek enu me lek kan̄ me Atens. ¹⁶ Mgbọ Pọọlu okupbe me Atens ikikpọ ibe Sailas me Timọti enu, ejit kan̄ îsisik enenen mije owuwa isi yọk îmun̄be me ama ya. ¹⁷ Mije keya, ikekinin̄ uwu ntitiin̄ ebi Ju òkup me ama ya ikisi itumu ikọ Awaji melek ebi Ju mè ebi ofifi ido ìkakaan̄ ukpook Awaji me emen, mè ikisi itumu si me oyet ewe usen geelek melek ebi geelek îchichinibe. ¹⁸ Mgbọ Pọọlu okitumu ikọ Awaji ikana ama ya, usini ebi uga ifuk-ibot ìnan̄a me otu-ogbo kè Epikurọs mè otu-ogbo ebi ekigwen ebi Sitọik ebebene ikigọọk ọmọ iwut ifan̄a. Usini kiban̄ ekekido ibe, “Ìre keke ke ogwu una ifuk-ibot yilọ okiweek itutumu?” Usini kiban̄ ebebe ke ìkup kubọk ìkitumu ikọ òfolek awaji ebi ofifi ido. Ema etumu ikọ ya mije Pọọlu okilook ema ata etip òfolek kè Jisọs, mè ikijeen̄ si inu òfolek ijojomo me mkpa. ¹⁹ Ema enenisa Pọọlu isi me emen ntitiin̄ ebi Oru eyi ekigwen Ariopagọs. Ebi ife cha enenibe Pọọlu, “Tumu aya ijejeen̄ okijeen̄ yi nyi eji nu, inyi eji enọ. ²⁰ Mije, aya ijejeen̄ kwun̄ yi ìkup eji me utọn̄ uyeke uyeke. Eji ekiweek irọriọọn̄ inu ijejeen̄ chi osibibe.” ²¹ (Otutuuk inu ebi Atens mè ebi ichen geelek ìluluk ama kiban̄ ekima irọrọ ìre ifafiat mgbọ ikup ikitumu ikọ òfolek aya ifuk-ibot, mè ikigban̄ si òjelek ikọ kecha.) ²² Pọọlu onanan̄a ikeke me isi ebi ntitiin̄ Ariopagọs ya, mè itumu inyi ema ibe, “Enyi ebi Atens, emi mmun̄ ibe, me oniin̄ geelek, ke enyi ìre ebi ìmama ikekitọbọ ebum. ²³ Mije, mgbọ nkijijen̄e ikana me ama kinyi, mè ikikpọ ere enyi ekitọbọ ebum, mmun̄ ntook ge egebe me lek ibe, EYI ÌKUP INYI AWAJI EYI EKARIỌỌN̄GE. Me mgbọ keyi, inu ya eyi enyi ekitọbọ ebum inyi kubọk inu enyi ekariọọn̄ge ke mbatumu inu òfolek inyi enyi. ²⁴ “Awaji ogwu òrorom linyọn̄, mè otutuuk inu geelek òkup me emen kan̄, ọmọ ore Okaan̄-ene ogwu òkaan̄ emen inyọn̄ mè linyọn̄ keyi. Awaji ya ìkakiluk me uwu mbuban echi ubọk ebilene onamabe. ²⁵ Kpunu si inu geege ònanan ọmọ, eyi ebilene mêkọtbe isi ikwaan̄ inyi ọmọ, inyi ọmọ inan̄a me ikeya ikaan̄ inu ya. Mije, îre ọmọ me lek kan̄ okinyi ebilene ugwem, mè efuuk, mè otutuuk inu geelek òkup esese esese. ²⁶ Inan̄a me lek adasi ene ge îrombe ke îsan̄a otutuuk ido ebilene isibi ibe eneluk ejot otutuuk linyọn̄, mè isun̄ mgbọ inyi ebi ido geelek, mè idọmọ si ere inyi ido geelek eluk. ²⁷ Awaji ìrọ inu yi inyi ebilene esa me ikeyi eweek ọmọ, mè elibi egọọk ọmọ. Usini mgbọ, sa me ikeya, mêweek ọmọ imun̄, ubọk geelek ọmọ ikajọn̄ọge ere me lek kiji me ge me ge. ²⁸ ‘Mije, me emen kan̄ ke eji ekiluk ugwem, mè ikijijen̄e ikana, mè ire si ebilene eyi eji erebe.’ Ikeya si ke usini ebi ìge usem kinyi etumu ibe, ‘Eji ìre bọn kan̄.’ ²⁹ “Eya orọ, kubọk eji erebe bọn Awaji, ìkagbe ibe eji ekeek ibe ke Awaji ìbet lek inu alata araran̄ mè ìre alata okuket, mè ìre ewuuk, echi ebilene esabe ubọk kiban̄ irom igọọk me ifuk-ibot kiban̄ mè ubọk ikwaan̄ kiban̄. ³⁰ Awaji îkpọ chieen̄ ilọ me lek inu chi geelek ebilene erọbe mgbọ òraraka me ekariọọn̄ge. Ire, mgbọ keyi, Awaji ìkinyi otutuuk ene me ere geelek ikan ibe egwu ekom, mè etele ijo inu kiban̄ geelek. ³¹ Mije Awaji îsan̄a egwe ge isun̄, mgbọ ìbosa me ata irọrọ isibi oyerebet me ibot otutuuk ebi linyọn̄. Ogwu òbosibi oyerebet yi ìre ogwu enerieen̄ ge Awaji ogobobe isibi. Ijojomo me mkpa eyi ene ya ojomobe ore inu ata-ikọ ibe ke ene ya ore ogwu Awaji ogobobe isibi me atikọ.” ³² Mgbọ ema enọbe ikọ ijojomo me mkpa ya, usini kiban̄ echachak ikọ ya ifiin̄ me lek imọm. Ire, usini kiban̄ ebebe mè Pọọlu iyaka inu inikpa ikọ ya inyi ema ofifi usen. ³³ Pọọlu oneninan̄a me ere ntitiin̄ ya isibi. ³⁴ Usini ebirieen̄ echechieek, mè ibene ikigọọk Pọọlu. Ene ge me lek ebirieen̄ cha ìre Dayọnisiọs ogwu oru Ariopagọs. Ogwu enenwaan̄ ge ekigwen Damaris, mè owuwa ebi ofifi ene si mîgọọk ichieek, mè igọọk Pọọlu.

¹ Mgbọ eya orakabe, Pọọlu onanan̄a me Atens ije isi Kọrint. ² Me ama ya ke ichichini ogwu Ju ge ekigwen Akwila, ogwu ama Pọntọs. Ìkafiin̄ mgbọ Akwila mè Pirisila ogwu nwa enan̄abe me Rom me ido Itali inu me Kọrint, mije Kọlọdiọs ogwu Sisa otapbe ikan ibe otutuuk ebi Ju esibi me Rom. Pọọlu onenisi ikpọ ife chi. ³ Akwila mè ogwu nwa ìre ebi ìkichim uwu ikpa anam kubọk Pọọlu orebe si. Eya orọ, mgbọ Pọọlu onube inikpọ ema, mè imun̄ ukot mbọm kiban̄, igọgọọk ema iluk ikirọ ikwaan̄ ya. ⁴ Usen Mbuban geelek, Pọọlu îra ikisi uwu ntitiin̄ ebi Ju òkup me ama ya isi itumu ikọ Awaji melek ebi Ju mè ebi Giris, ikisa iweek irọrọ inyi ema echieek me lek kè Jisọs. ⁵ Mgbọ Sailas mè Timọti enan̄abe me Mesidonia inu me Kọrint, Pọọlu osasa otutuuk mgbọ kan̄ inyi ilolook ata etip ya, mè ikisa inu ata-ikọ me emen Ikpa Mbuban ikijeen̄ ebi Ju ibe ke Jisọs ore ogwu Awaji otoon̄be ubọk me ibot ya. ⁶ Ire, mgbọ ebi Ju ekitumu ikeme Pọọlu, mè ikitiik ọmọ, Pọọlu onanaan̄ ejit, mè igen̄ mfuun̄ isan̄a me lek ọfọnti kan̄ isasa irọ inu ata-ikọ ikeme ema, mè itumu inyi ema ibe, “Eje kinyi ibia me ibot kinyi! Ikwaan̄ ògbegbe ibe emi ǹsi ǹnyi enyi, nsi isan̄a. Awọ keya înan̄a emi me ibot. Bene me mgbọ keyi fo isi, mâkana isi lek ebi ekarege ebi Ju.” ⁷ Pọọlu onanan̄a me uwu ntitiin̄ ya isibi, mè ikana isi inin̄ uwu ogwu enerieen̄ ge ekigwen Titiọs Jọsitọs me agba lek uwu ntitiin̄ ebi Ju ya. Titiọs ya ìre ogwu ofifi ido òkitọbọ ebum inyi Awaji. ⁸ Kirisipọs ogwu ibot uwu ntitiin̄ ebi Ju ya mè otutuuk ebi uwu kan̄ echechieek me lek Okaan̄-ene. Owuwa ebi Kọrint ìnọnọ ikọ cha Pọọlu otumube echechieek si. Pọọlu ogwogwook ema mun̄. ⁹ Me eririeen̄ usen ge, Okaan̄-ene onenitumu inyi Pọọlu me ilaak ọkpọchieen̄ ibe, “Katet ukpook! Kpọkpọ kitumu ikọ Awaji fo isi! Kachit otu! ¹⁰ Mije emi òwa melek kwun̄. Kpunu ene geege òbotim owu etim, kpunu si ene geege òbosak owu unan me lek. Mije nkaan̄ owuwa ene me emen ama yi.” ¹¹ Mije keya, Pọọlu okukup me ama ya acha ge mè ọkpọkọ ikijeen̄ ebi ene ikọ Awaji. ¹² Me mgbọ Galio orebe ogwu ibot mkpulu me agan̄ Akaya, ebi Ju egbagbaan̄ itọt, mè itet Pọọlu isa isi uwu oyerebet ibe Galio ifieek oyerebet inyi, ¹³ mè itumu ibe, “Ene yi ìkiweek irọrọ inyi ebi ene eketọbọ ebum enyi Awaji me oniin̄ eyi ikatatge me lek Ikan kè Mosis.” ¹⁴ Mgbọ Pọọlu obonifọọk ikọ ya, Galio otutumu inyi ebi Ju cha ibe, “Ìkpọ, mebe enyi ebi Ju enitumu ikọ òfolek ten̄eten̄e ijo ugwem, mè ìyaka ire ene irọrọn̄ ikpele ikan ido, kè òtat ibe emi m̀gban̄ utọn̄ me lek ikọ kinyi. ¹⁵ Ire, mije îrebe inu òfolek ikọ otu, mè ikọ erieen̄, mè inu ògbaan̄ me lek Ikan kinyi, enyi me lek kinyi ìsi ìsibi oyerebet keya me etete kinyi. Emi m̀kpasibi oyerebet me ibot òjelek inu òkup ikeya.” ¹⁶ Galio itutumu ikeya isan̄a, ilalap ebi Ju cha isibi me uwu oyerebet ya. ¹⁷ Otutuuk kiban̄ esasa unaan̄-ejit igwook inin̄ lek kè Sọsitenis ogwu ibot uwu ntitiin̄ kiban̄, mè itet isut me isi uwu oyerebet ya. Ire, Galio omumun̄, mè idaan̄ chieen̄ isan̄a me lek, kubọk ìkamun̄. ¹⁸ Pọọlu onenigọọk bọn Nte ikup me Kọrint owuwa usen, mè initele ema, mè isa Akwila mè Pirisila igbaalek ije me uji mun̄ ifo ido Siria. Sabum îninan̄a, îgba ama Kenkiriye ikup ikwọkọ ijeek isan̄a mè ibot kan̄, mije inyan̄a-ibot ge înyan̄abe. ¹⁹ Mgbọ ema erebe Efesọs, Pọọlu otetele Akwila mè Pirisila, mè ije eyi kan̄ isi uwu ntitiin̄ ebi Ju òkup me ama ya isi ikitumu ikọ Awaji melek ebi Ju. ²⁰ Mgbọ ebi Ju cha ebeekbe Pọọlu ibe igọọk ema ikup sọnja mgbọ igbaalek, Pọọlu ojijit. ²¹ Ire, sabum înan̄abe itele ema, îchieek ema use ibe, ire ineme Awaji, ke ọmọ môyaka igwu ikom inu. Ineninin̄ uji ikọp inan̄a me Efesọs. ²² Mgbọ ema ekọpbe itoon̄ me Sisaria, Pọọlu ojeje isi Jeruselem isi itọp ebi ntitiin̄ Awaji amọn, mè inije ifo Antiọk. ²³ Pọọlu okukup sọnja mgbọ me Antiọk, mè ibene ikijijen̄e me ama me ama ikana otutuuk agan̄ Galesia mè Firijia ikitap efuuk me emen ebi ìchechieek me lek kè Jisọs me ama cha. ²⁴ Me ike mgbọ ya, ogwu Ju ge ekigwen Apọlọs ogwu ama Alikisendira, onanan̄a inu me Efesọs. Ogwu enerieen̄ yi îriọọn̄ ikpa, mè ire ogwu usọ me otu itumu-ikọ, mè iriọọn̄ si inu egebe me Ikpa Mbuban enenen. ²⁵ Mîwuuk lek ijeen̄ ọmọ inu òfolek Oniin̄ eyi Okaan̄-ene, ọmọ okekinye otu itumu ikọ, mè iriọọn̄ ikijeen̄ inu òfolek kè Jisọs itat. Ire, otutuuk igwook-mun̄ eyi ọmọ oriọọn̄be ìre igwook-mun̄ kè Jọn. ²⁶ Apọlọs obebene ikitumu ikọ me uwu ntitiin̄ ebi Ju, ìkatet ukpook geege. Mgbọ Akwila mè Pirisila enọbe inu îkijeen̄, ema egwegwen ọmọ isa ifo uwu kiban̄, mè inisiki lek ijeen̄ ọmọ Oniin̄ eyi Awaji ijaan̄ igak ike ọmọ oriọọn̄be. ²⁷ Mgbọ Apọlọs oboninan̄a isi Akaya, bọn Nte erọrọ ọmọ inye, mè ige ikpa inyi bọn Nte ìkup me Akaya ibe ebọkọ ọmọ etap. Mgbọ îrebe agan̄ ya, inenire nga ntap-ubọk ile inyi ebi ìchechieek me lek kè Jisọs me agan̄ ya inan̄a me atata nnwọn eyi Awaji. ²⁸ Mije, îsa me unye otu ifan̄a kan̄ itumu ikọ ichit otu ebi Ju me eden̄ ama, mè isa inu egebe me emen Ikpa Mbuban ijeen̄ ikpọk mbum ibe ke Jisọs ore Karais ya.

¹ Mgbọ Apọlọs okupbe me Kọrint, Pọọlu onenije me inyọn̄ inyọn̄ ikana isi Efesọs, mè ichichini usini ebi ìchechieek me ama ya, ² mè ido ema ibe, “Ìre enyi mîbọkọ Ekwukwu Mbuban me mgbọ enyi echieekbe?” Ema efọfọọk ibe, iin̄-iin̄, ke ema kperarak inọnọ ibe ke Ekwukwu Mbuban ọmọ òwa. ³ Pọọlu ododo ema ibe, “Ire ikeya, ìre kpasi igwook-mun̄ ke enyi ebọkọ?” Ema efọfọọk ibe ke ìre igwook-mun̄ kè Jọn. ⁴ Pọọlu otutumu inyi ema ibe, “Igwook-mun̄ kè Jọn ìre igwook-mun̄ eyi òkijeen̄ ibe ke ene îgwu ikom itele ijo kan̄. Jọn ìtumu inyi ebi ene ibe echieek me lek ogwu òbonu me udun̄ kan̄, òrere Jisọs.” ⁵ Mgbọ ema enọbe ikọ yi, egwogwook ema mun̄ me erieen̄ Okaan̄-ene Jisọs. ⁶ Pọọlu onenitoon̄ ema ubọk me lek. Ekwukwu Mbuban oninin̄ ema me emen, ema ebebene ikitumu ikọ me nke nke usem, mè ikiben nriran. ⁷ Ema otutuuk ìre akọp mè ebirieen̄ iba. ⁸ Pọọlu onanan̄a isi inin̄ uwu ntitiin̄ ebi Ju, mè inye otu ikigọọk ema igbini ikọ ikiweek inwenwene ema ejit me lek ijejeen̄ eyi mkpulu eyi Awaji. Îkup me ama ya onyan̄ ita ikigọọk ema igbini ikọ. ⁹ Ire, usini kiban̄ etetet ejit inye, mè ijit ichechieek me lek kè Jisọs. Kpan̄asi ikeya ema ekekitumu Oniin̄ eyi Okaan̄-ene ifiat me isi ebi ntitiin̄ ebi Ju. Eya orọ Pọọlu onanan̄a isibi itele ema, mè isa ebi ìchechieek me lek kè Jisọs igbaalek kan̄ ikisi ijeen̄ inu usen geelek me uwu ikpa kè Tiranọs. ¹⁰ Pọọlu îjeen̄ inu me ere ya ikeya acha iba. Sa me ikeyi, otutuuk ebi Ju mè ebi Giris ìluk me agan̄ Esia ya enọnọ ikọ Okaan̄-ene iso. ¹¹ Awaji orọrọ owuwa uyeke uyeke inu inan̄a me ubọk kè Pọọlu, ¹² ire lek ekisa akisi ubọk mè ekwut ekitobo ijeen̄ me isi ejit isa isi ikwaan̄ inichak me lek kè Pọọlu, mè isa isi ikitoon̄ me lek ebi orukan̄, mè ebi ijo erumun̄ okupbe me emen, lek ebi orukan̄ îra inye, ijo erumun̄ cha îra isibi itele ebi îkupbe me emen. ¹³ Usini ebi Ju ebi ìkijijen̄e ikana ikilap ijo erumun̄ isibi me emen ene eneniweek isasa erieen̄ Okaan̄-ene Jisọs ilap ijo erumun̄ isan̄a ene me emen. Ema ekekitumu inyi ijo erumun̄ cha ibe, “Nsa erieen̄ kè Jisọs ogwu Pọọlu okitumu isibi igana inyi owu ibe owu, sibi!” ¹⁴ Îkaan̄ nsabọn irieen̄ jaaba ìkirọ inu yi. Ema ìre bọn kè Sikiba ogwu ibot ngwugwa ebi Ju. ¹⁵ Usen ge, ijo erumun̄ ya ofọfọọk ema ibe, “Nriọọn̄ Jisọs, mè iriọọn̄ si Pọọlu. Ire, enyi ìre ebi owa?” ¹⁶ Ogwu enerieen̄ ya ijo erumun̄ okupbe me emen owuwulu inin̄ etete kiban̄, mè inye lek igak otutuuk kiban̄, mè isut ema ijaan̄ lek. Eje okekisibi ema me lek. Ema ebeben unan me lek ilibi njak njak isibi me uwu ya. ¹⁷ Mgbọ otutuuk ebi Ju mè ebi Giris ìluk me Efesọs enọbe ukpatu inu ya òrọrọ, ukpook otetet ema enenen. Ema enyinyi erieen̄ Okaan̄-ene Jisọs ikpele ulibi òmimin igak adasi mgbọ. ¹⁸ Otutuuk ebi ìchechieek me lek kè Jisọs enunu initumu ijo inu kiban̄ isibi me isi otutuuk ene. ¹⁹ Owuwa ebi ìkido inu ekpukpulu ikpa kiban̄ cha ema ekisa ido inu inigwook me ere ge, mè itap ukan̄ iwọp me isi otutuuk ene. Mgbọ efukbe ikpoko ikpa cha obenbe, isisibi akọp obop darakima go. ²⁰ Sa me ikeyi, ikọ Okaan̄-ene okpọkpọk ikana ere, unye kan̄ si okekimin. ²¹ Mgbọ otutuuk inu chi orọbe iraka, Pọọlu obeben me ejit ibe ke ọmọ môje itibi Mesidonia mè Akaya isi Jeruselem, mè itumu ifieek ibe, ọmọ isinan̄a me Jeruselem, ke ọmọ môsi Rom si. ²² Ineniria Timọti mè Erasitọs, ene iba me lek ebi ìkitap ubọk inyi ọmọ, isi Mesidonia, mè ibia me agan̄ Esia ya sọnja mgbọ. ²³ Me ike mgbọ ya si, ikpele ufialek oninin̄ me ama Efesọs mije Oniin̄ eyi Okaan̄-ene. ²⁴ Îkaan̄ ogwu enerieen̄ ge me ama ya ekigwen Demetọrọs ogwu òkisa alata okuket itọkọ mkpọmfaka eyi yọk ekigwen Atemis. Ọmọ mè ebi usọ ebi melek kan̄ ekirọ ikwaan̄ ya mîkikaan̄ oruru enenen inan̄a me ubọk ikwaan̄ ya. ²⁵ Usen ge, Demetọrọs onenigwen otutuuk ebi usọ ebi ìkigọọk ọmọ isi ikwaan̄ ya mè ofifi ebi usọ ìkisi òjelek ikwaan̄ ya si ititiin̄, mè itumu inyi ema ibe, “Ebi melek n̄a, enyi mîriọọn̄ ibe ke ubọk ikwaan̄ kiji yi îkinyi eji atalek oruru. ²⁶ Mgbọ keyi enyi mîsa chieen̄ kinyi imun̄, mè isa utọn̄ kinyi inọ ubọk ogwu enerieen̄ yi ekigwen Pọọlu okitumu ikana ere ibe ke awaji echi ebilene esabe ubọk irom ìkare awaji kubọk ge, mè isa me ikeya ifiat owuwa ene ibot, mè inwene ogbogbo ene ejit me ama Efesọs yi, mè otutuuk agan̄ Esia. ²⁷ Inu yi môrọ inyi ukot mbọm kiji ikaan̄ ijo erieen̄. Ire, eyi ofefieek ichit ìre ke uwu ikpele yọk kiji, Atemis, môkana inu ochak. Atemis me lek kan̄ si, ogwu otutuuk ebi agan̄ Esia, mè otutuuk linyọn̄ ekitọbọ ebum inyi môkana inu ikike. Umin eyi ekinyi ọmọ kubọk yọk môchep isi ge dìp.” ²⁸ Mgbọ yaage ebi ife cha enọbe ikọ ya, ejit onanaan̄ ema enenen, ema ebebene ikitaan̄ ukpo ibe, “Atemis ebi Efesọs ore yọk òmimin!” ²⁹ Mgbọ yaage, otutuuk ama ya odidimi. Ebi afa cha esasa me ejit ge igbuku inin̄ ama, mè itet Gayọs mè Arisitakọs ebi ìgọgọọk Pọọlu me udun̄ inan̄a me Mesidonia inu, mè itaba ema isa isi oyet ile. ³⁰ Pọọlu îweek isisibi isi oyet ile ya, ire, ebi ìchechieek me lek kè Jisọs kpechieek. ³¹ Usini ebi ibot ikwaan̄ ebi Rom ìkup me agan̄ Esia si ebi ìrere unene kè Pọọlu eraria etip ijet Pọọlu ibe, soso, mè ogwugwu ikalululuk ìsibi ìsi oyet ile ya. ³² Wọlọwọlọ oninin̄ me etete urum ene cha, ema otutuuk ene ekekitaan̄ ukpo itumu ikọ. Mgbọ usini ene ekitumu ikọ ge, ebi ofifi ene ekitumu ofifi ikọ. Owuwa me lek ebi ife cha kperọriọọn̄ si ibot inu òrọrọ ema etitiin̄be me oyet ile ya. ³³ Usini ebi Ju esasan̄a Alikisenda ito me isi, mè itumu ikọ itap me otu. Alikisenda owuwuwum ubọk inyi ema ibe eriaan̄ otu, inyi ọmọ itumu ubọk inu ya osabe irọ inyi ema. ³⁴ Ire, mgbọ ebi ife cha emun̄be ibe ke Alikisenda ya ìre ogwu Ju, otutuuk kiban̄ esasa me ida ge itaan̄ ukpo ejit yaage iso mbubak mgbọ iba, ikibe, “Atemis ebi Efesọs ore yọk òmimin!” ³⁵ Ogwu uti ikpa ama ya onenirọ inyi okput ya iwọ, mè itumu inyi ema ibe, “Enyi ebirieen̄ ama Efesọs, ǹdo enyi nu, ìre îkaan̄ ene geege me otutuuk linyọn̄ ogwu ikariọọn̄ge ibe ke ìre ebi Efesọs ekiban uwu Atemis mè ewuuk kan̄ ya eyi ònan̄a me inyọn̄ irọn̄ me ijọn̄? ³⁶ Eya orọ, ubọk otutuuk ene eriọọn̄be atikọ kechi, înwọn ibe enyi egele lek, mè ekarọ inu geege kubọk ebi ekanọge lek. ³⁷ Ebirieen̄ chi enyi esabe inu me ere keyi kpechiin̄ inu me isi yọk geege me ama kiji, kpetumu si ikọ geege ilọ inyi Atemis kiji kubọk ge. ³⁸ Ire Demetọrọs mè ebi ikwaan̄ kan̄ ikaan̄ ikọ melek ene, isotu uwu oyerebet ìbobook, ebi ibot oyerebet si òwa. Demetọrọs mè ebi melek kan̄ esa ikọ kiban̄ esi ere ògbegbe, mè etumu eta. ³⁹ Ire iyaka ikaan̄ ofifi esese inu enyi eweekbe igwegwen isibi, ìsan̄a ìsibi me etete ebi ìkisibi oyerebet, inyi etumu efieek. ⁴⁰ Me lek inu eji erọbe cherekeyi, kpegbala chieen̄ ikpọ, ebi ibot mkpulu mêkọt itoon̄ eji ikọ, ibe ke eji mîtim etim ijọn̄. Ire irọ ikeya, eji kpebekọt itumu inwọnọ, mije, kpunu inu geege eyi morọ inyi eji erọ òjelek inu eji erọbe cherekeyi.” ⁴¹ Ikọ ya itata ọmọ me otu, ibebe ema otutuuk ene eyat. Ema enanan̄a me ere ya ifon.

¹ Mgbọ ufialek ya owọbe me ama ya, Pọọlu ogwegwen ebi ìchechieek me lek kè Jisọs ititiin̄, mè itumu ikọ ikat ema ejit, mè ibe ema eriọọn̄ ubọk eluk, mè inan̄a isi agan̄ Mesidonia. ² Îjijen̄e ikana me agan̄ ya, mè ikitumu owuwa ikọ ukarajit inyi ebi ene mege, mè inire ido Giris, ³ mè ikup me Giris onyan̄ ita. Mgbọ ìbonan̄a me Giris ikọp isi Siria, inọnọ ibe ke ebi Ju mîtọt isasan̄a ugwem kan̄. Mije keya, inwenwene ejit, mè itọt ijeje inyọn̄ inyọn̄ itibi Mesidonia. ⁴ Ebi ìgọgọọk ọmọ ije ìre Sopata gwun̄ kè Pirọs ogwu ama Beria, mè Arisitakọs mè Sekọndọs, ebi ama Teselonaika, mè Gayọs ogwu ama Dabi, mè Timọti mè Taikikọs mè Tọrọfimọs, ebi ìnan̄a me agan̄ Esia. ⁵ Ife chi edasi ije isi ikup me Torowas iban eji. ⁶ Mgbọ ijọk Fituru Ekatapge Olat me lek orakabe, eji enenikọp inan̄a me Filipai, mè ikup me okwaan̄ egwe go sabum eji enichichini ema me Torowas, mè ikup me ama ya usen jaaba. ⁷ Me usen Awaji, eji enenititiin̄ iberie inorie mbuban. Pọọlu otutumu ikọ Awaji inyi ebi ìchechieek me lek kè Jisọs me Torowas. Mije îweekbe itetele ama ya me òfit iwele kan̄, ikukup me lek ikọ ya irọn̄ ejit eririeen̄. ⁸ Mîmin owuwa mkpukan̄ me emen agwut uwu inyọn̄ ita ya ere eji etitiin̄be. ⁹ Îkaan̄ ogwu nsabọn irieen̄ ge ekigwen Yutikọs òsisiki ikweek me otu nruruk ge me agwut ya ikigọọk igban̄ ikọ ya. Mgbọ îkigban̄ ikọ ya, uga ilaak obeben ọmọ, inanan̄a me uwu òso inyọn̄ ita ya irọn̄ me ijọn̄. Mgbọ esibe isi ibene ọmọ, îkwu inye. ¹⁰ Pọọlu me lek kan̄ onanan̄a isibi ijọn̄, mè inilaak inyana me inyọn̄ ogwu enerieen̄ ya, mè ikat ọmọ ikaan̄, mè itumu inyi ebi melek kan̄ ibe, “Ikasisaak ejit kinyi! Ìkakwu! Ọmọ me ugwem!” ¹¹ Pọọlu onenigwu ikom inene ifo uwu inyọn̄ ya, mè ikpọkọ fituru ya, eji ererie inorie mbuban me ere ya. Pọọlu otutumu ikọ Awaji inyi ema mege ibum ura, mè inan̄a itele ema. ¹² Bọn Nte cha enenisa gwun̄ enerieen̄ ya me ògat ugwem iban me uwu kan̄, mè ikaan̄ ukarajit enenen. ¹³ Eji edadasi ikọp okwaan̄ okwaan̄ isi Asọs, mè isi itap Pọọlu me ama ya. Pọọlu otọt ikeya inyi eji, mije îweekbe ijeje ukot ukot isi Asọs. ¹⁴ Pọọlu onenichichini eji me Asọs, eji etatap ọmọ me uji, mè ikọp isi ama Mitilin. ¹⁵ Me òfit iwele kan̄, eji esasan̄a uji, mè ikọp isi agba lek achọ Kiyọs. Me òfit iwele ofifi usen, eji esasaba itoon̄ me achọ Samọs. Me òfit iwele ògọgọọk, eji enenire ama Militọs. ¹⁶ Pọọlu otutumu ifieek me ejit kan̄ ibe ke ọmọ môkọp iraka Efesọs, inyi ọmọ ikafiat mgbọ me agan̄ Esia, mije, ìkup ọmọ ugwat ugwat, inyi ọmọ isi ire Jeruselem me usen Pentikọs, ire ọmọ ikọt. ¹⁷ Eya orọ, mgbọ ema etoon̄be me ijọn̄ me Militọs, Pọọlu oraria ikwaan̄ igwen ebi ugane ntitiin̄ Awaji òkup me Efesọs ibe enemun̄ ọmọ me Militọs. ¹⁸ Mgbọ ife cha enube, Pọọlu otutumu inyi ema ibe, “Enyi Mîriọọn̄ ubọk nlukbe melek kinyi otutuuk mgbọ ngọọkbe enyi iluk, bene me adasi usen njakbe ukot me ijọn̄ Esia. ¹⁹ Enyi mîmun̄ ibe ke ǹsa ejit òsisiki mè isa si mun̄ ito me chieen̄ isi ikwaan̄ inyi Okaan̄-ene me emen otutuuk ikpele ntọ-mkpọ ònunu inyi emi inan̄a me lek ijo otitọt ebi Ju etọtbe isasan̄a ugwem n̄a. ²⁰ Enyi mîriọọn̄ ibe ke ǹkatele ilolook enyi etip geelek eyi môtapbe ubọk inyi enyi. Ire, ǹkijeen̄ enyi ikọ Awaji me eden̄ ama, mè ikijeen̄ si ikana me uwu me uwu. ²¹ Ntaba ebi Ju mè ebi Giris ubọk me utọn̄ ibe ke îkup me uyọt ibe ema egwu ekom etele ijo inu kiban̄, mè ekana egọọk Awaji, mè ekaan̄ ichechieek me lek Okaan̄ kiji, Jisọs. ²² “Mgbọ keyi me emen isiki ibot eyi nsikibe inyi Ekwukwu Mbuban, Jeruselem ke mbasi, ubọk geelek nkariọọn̄ge inu òbosibi inyi emi me ere ya. ²³ Inu nriọọn̄be ìre gaalek ke me ama geelek nrebe, Ekwukwu Mbuban ìkitaba emi ubọk me utọn̄ ibe ke ùrioon̄ mè mkpọn okup iban emi. ²⁴ Ire, emi ǹkasa ugwem n̄a ìgwen inu geege. Otutuuk inu mweekbe ìre ikọkọt irọ ikwaan̄ Okaan̄-ene Jisọs onyibe emi isan̄a, eyi òrere ikwaan̄ ilolook ebi ene ata etip òfolek atata nnwọn eyi Awaji. ²⁵ “Mgbọ keyi, emi nriọọn̄ ibe, me etete kinyi otutuuk ebi njijen̄ebe ikana ikilook ata etip eyi mkpulu eyi Awaji, ke kpunu ene geege òboyaka ikpọk imun̄ emi isi mè isi ofifi. ²⁶ Eya orọ, me chereyi, ǹkitumu inyi enyi ibe, ire ikaan̄ ogwu me lek kinyi òjeje ichep, eje kan̄ ìkakup emi me ubọk. ²⁷ Mije, ǹkatele irọrọ inyi enyi eriọọn̄ otutuuk nkeek Awaji. ²⁸ Eya orọ, ìkpọ chieen̄ me lek kinyi, mè ìgbala si chieen̄ ìkpọ otutuuk ebi Ekwukwu Mbuban osabe itap enyi me ubọk ibe enyi ekpọ chieen̄ me lek. Soso, ìkpukpo ebi ntitiin̄ Okaan̄-ene chi ebi Okaan̄-ene osabe eje kan̄ ilep, kubọk ogwu òkpukpo arọọn̄ okikpukpo arọọn̄ kan̄. ²⁹ Nriọọn̄ ibe, nsinan̄a itele enyi, ke ijo ebi nlilọ ijejeen̄ mênu iniyiyala enyi, kubọk ijo anam okiwulu inin̄ me etete arọọn̄, mè ikpan̄ ema otutuuk isan̄a, ìkatele geege. ³⁰ Ìrere me etete kinyi, usini ene mênan̄a isibi, mè ininwene atikọ eyi Awaji, inyi ema esa me ikeya ekaan̄ ebi ìbekigọọk ema me udun̄. ³¹ Eya orọ, ìgwọk chieen̄, mè ikibem! Ikawuuk ibe, me otutuuk acha ita ngọọkbe enyi iluk, ke ǹkatele itataba enyi ubọk me utọn̄, me ge me ge, eririeen̄ mè ikarek, melek mun̄ ito me chieen̄ n̄a. ³² “Mgbọ keyi, ǹkibene enyi itap me ubọk Awaji, mè ubọk ikọ eyi atata nnwọn kan̄, eyi òbokọt inama enyi ibene, mè irọ inyi enyi ekaan̄ uche me lek ugbana eyi òkup inyi otutuuk ebi Awaji osun̄be esese inyi lek kan̄. ³³ Ǹkakaan̄ chieen̄ me lek ikpoko alata okuket, mè alata araran̄, mè ìyaka ire ọfọnti ene geege okaan̄be. ³⁴ Enyi me lek kinyi mîriọọn̄ ibe ke ǹsasa ubọk n̄a chi ibọm mbọm eyi nsabe irọ inu geelek òkup emi mè ebi melek n̄a me uyọt. ³⁵ Me inu geelek nrọbe, njeen̄ enyi ibe, sa me òjelek unye ikwaan̄ òkup ikeyi, ke eji mêkọt itap ubọk inyi ebi una, kubọk Okaan̄-ene Jisọs Karais me lek kan̄ otumube ibe, ‘Inyinyi îkaan̄ ugbana me lek igak ibọbọkọ.’ ” ³⁶ Mgbọ Pọọlu otumube ikọ chi isan̄a, itọtọbọ ekpe me ijọn̄, ọmọ melek kiban̄ otutuuk ene, mè iriaak uriaak. ³⁷ Otutuuk kiban̄ ebebene ikito ito, mè ikikana Pọọlu ikat, mè ibe ọmọ iriọọn̄ ubọk ije. ³⁸ Inu òfefieek ema ejit ichit ìre ikọ ya Pọọlu otumube ibe ke ema kpebeyaka imun̄ ọmọ ofifi. Ema esasa ọmọ isi itap me uji.

¹ Mgbọ eji etelebe ebi ugane ntitiin̄ Efesọs cha, eji esasan̄a uji me ijọn̄, mè ikọp isi achọ Kọs. Me òfit iwele kan̄, eji ekọkọp isi itoon̄ me achọ Rodis, mè inan̄a me ere ya isi ama Patara. ² Me Patara ke eji enitut uji ile òbosaba isi ido Fonisia, mè igọọk inin̄, mè ikọp isaba okwaan̄ ya. ³ Mgbọ eji ebenebe chieen̄ imọọn̄ achọ Saipọrọs, eji ekọkọp iraka me agan̄ osiki, mè itet uji itat ikọp ifo ido Siria, mè isi itoon̄ me ijọn̄ me ama Taya. Me ere ya ke ebesan̄a otutuuk akpan inu òkup me uji ya igwook. ⁴ Eji enenimun̄ usini ebi udun̄ kè Jisọs me ama ya, mè igọọk ema ikup egwe jaaba. Ema eneniben nriran sa me unye Ekwukwu Mbuban, mè iriaak Pọọlu ibe ikasi Jeruselem. ⁵ Ire, mgbọ usen eji ebenan̄a me ama ya orebe, otutuuk bọn Nte cha mè ebi nwa, mè ebi bọn, esasa eji ije iban mege isibi me ama ya. Eji irere atasuk, eji etọtọbọ ekpe me ijọn̄ me agba okpoon̄, mè iriaak Awaji. ⁶ Mgbọ eji eriaakbe uriaak ya isan̄a, eji melek kiban̄ etọtọp lek kiji amọn mgburudun̄. Eji esasaba inin̄ uji, ema egwugwu ikom ifo. ⁷ Eji eneninan̄a me Taya ikọp isi ire Tọlemayas. Mgbọ eji etapbe uji me ama ya, eji enenisi itọp bọn Nte ìkup me ama ya amọn, mè igọọk ikup egwe ge. ⁸ Me òfit iwele kan̄, eji esasan̄a uji me Tolemayas, mè ikọp isi ama Sisaria. Mgbọ eji erebe Sisaria, eji egọgọọk Filip ogwu òkilook ata etip ikup me uwu kan̄. Filip yi ìre ene ge me lek ebirieen̄ jaaba ebi ebi otuchieen̄ egobobe me Jeruselem ibe ekegọọk ema ekpọ chieen̄ me lek ikwaan̄. ⁹ Filip yi îkaan̄ nsabọn ibaan̄ ini ebi ìkiben nriran, ema kpekaan̄ olom. ¹⁰ Mgbọ eji elukbe me ere ya iwa usen, ogwu nriran ge ekigwen Agabọs onanan̄a me agan̄ Judia inu me ama ya, ¹¹ mè ije inu me ere eji ekupbe, mè imọnọ fanti kè Pọọlu isa ibọp ubọk iba kan̄, mè ukot iba kan̄, mè itumu ibe, “Ekwukwu Mbuban ìtumu ibe, ‘Ikeyi ke ebi Ju ìkup me Jeruselem ebebọp ogwukaan̄ fanti yi, mè ikana ọmọ itap me ubọk ebi ekarege ebi Ju.’ ” ¹² Mgbọ eji enọbe ikọ yi, eji melek otutuuk bọn Nte ìkup me ere ya erariaak Pọọlu ibe ikasi Jeruselem. ¹³ Pọọlu obebe eji, “Ìre keke orọ enyi ekito ito ifiat emi ejit ikeyi? Emi mbem lek inyi inu geelek, ìkare ibọbọp emi ubọk mè ukot gaalek. Mbem lek si ikwukwu me Jeruselem mije erieen̄ Okaan̄-ene Jisọs.” ¹⁴ Ubọk Pọọlu ikachieekge inwenwene ejit, eji esasan̄a lek me lek, mè ibe, “Nkeek Okaan̄-ene irọ!” ¹⁵ Mgbọ eya orakabe, eji enenibem lek, mè inan̄a ije isi Jeruselem. ¹⁶ Usini bọn Nte esasa eji iban inan̄a me Sisaria inire uwu ke Nesin, ogwu Saipọrọs ge òluk me Jeruselem. Nesin yi ìre ene ge me lek ebi ìdadasi ichieek me lek kè Jisọs. Uwu kan̄ ke eji egọọk ikup me Jeruselem. ¹⁷ Mgbọ eji erebe Jeruselem, bọn Nte ìkup me ama ya ebọbọkọ eji itap me unwọọn̄. ¹⁸ Me òfit iwele kan̄, Pọọlu melek kiji enenije isi imun̄ Jemis. Mgbọ eji erebe, eji mîmun̄ otutuuk ebi ugane ntitiin̄ Awaji melek kan̄. ¹⁹ Pọọlu otọtọp ema amọn, mè iniben otutuuk ikwaan̄ Awaji osabe ọmọ isi me irek me irek me etete ebi ekarege ebi Ju ikpa inyi ema. ²⁰ Mgbọ ema egban̄be ukpatu ya isan̄a, ema etọtọn̄ Awaji, mè initumu inyi Pọọlu ibe, “Kpọ, gwun̄ Nte Pọọlu, me mgbọ keyi, ogbogbo ebi Ju, me obop obop, mîchieek me lek kè Jisọs. Ire, ife chi si ekpọkpọ itet Ikan kè Mosis ikaan̄ inye. ²¹ Ema ekinọ ibe ke owu òkijeen̄ otutuuk ebi Ju ebi ìluk me etete ebi ekarege ebi Ju ibe mè etele Ikan kè Mosis, mè ekayaka ìfieek bọn kiban̄ afi, mè etele si otutuuk ọrọmijọn̄ ebi Ju. ²² Mgbọ keyi, eji kpeyaka iriọọn̄ inu eji eberọ, mije, ife cha kpelọlọ inọnọ ibe ke owu onu! ²³ Eya orọ, ire ikaan̄ inu geelek eji etumube inyi owu, rọ ikeya. Îkaan̄ ebirieen̄ ini me etete kiji ebi ìnyanyan̄a ibot isa ichieek Awaji use, mè isun̄ lek kiban̄ me mbuban mgbọ keyi, inyi ema etana me isi Awaji. ²⁴ Si kpulu ife chi tap me lek kwun̄, mè gọọk ema faka mfaka igwọk-lek ya. Kpe ikpoko mfaka ya nyi ema, inyi ema ekọt ekwọkọ ijeek me ibot, mè egwa ngwugwa ekisa ichit mfaka ya. Osigọọk irọ ọrọmijọn̄ ebi Ju yi, otutuuk ebi Ju mêmun̄ ibe ke owu me lek kwun̄ òkiluk ugwem igọọk me lek Ikan kè Mosis, mè isa me ikeya iriọọn̄ ibe ke otutuuk ukpatu cha ema enọbe òfo me lek kwun̄ ìre ataak. ²⁵ Ire inu òfolek ebi ekarege ebi Ju ebi ìchechieek me lek kè Jisọs, eji mîra iwuuk lek ige ikpa itumu nkeek kiji inyi ema ibe ema etele inorie geelek esabe igwa ngwugwa inyi mkpọmfaka, mè ekalaka eje, mè ekataka anam geelek ekpan̄be, eyi eje ikasibige me lek, mè etele ugwem barabat.” ²⁶ Òfit iwele kan̄, Pọọlu okpukpulu ife cha itap me lek kan̄, mè igọọk ema igwọk lek, ubọk ọrọmijọn̄ okupbe, mè inije isi Uwu Mbuban isi ilook usen igwok-lek kiban̄ obota, òrere usen ebegwa ngwugwa ekisa ichit igwọk-lek, me ibot kan̄, mè ibot ebi ene ini melek kan̄ cha. ²⁷ Sabum usen jaaba eyi igwọk-lek kiban̄ cha onita, ebi Ju ìnanan̄a me agan̄ Esia inu me Jeruselem emumun̄ Pọọlu me Uwu Mbuban, mè itap wọlọwọlọ me etete otutuuk ebi ìkup me ere ya, mè itet Pọọlu, ²⁸ mè ikitaan̄ ukpo ibe, “Ebi Ijeren, ìna ìnitap ubọk inyi eji! Kpọ ogwu enerieen̄ ya ire ogwu, ogwu òkijeen̄ otutuuk ene me ere geelek inu ikeme ebi kiji, mè Ikan kiji, me Uwu Mbuban yi. Ògak ge, ìkpọ, ke îsa ebi Giris initap me emen Uwu Mbuban, mè isa me ikeya ichaka mbuban me lek ere yi òkup me mbuban, inyi ikayaka ìtana.” ²⁹ (Ubọk ema ewuukbe lek imun̄ Pọọlu melek Tọrọfimọs ogwu Efesọs me ama ya sọntiik mgbọ òraraka, ema ekikeek ibe ke Pọọlu îsa ene ya initap me Uwu Mbuban.) ³⁰ Ama ofafan̄a kep, ebi ene egbugbuku inan̄a me agan̄ geelek inu, mè initet Pọọlu itaba isibi me Uwu Mbuban ya. Mgbọ yaage, echichit otutuuk otunchit Uwu Mbuban. ³¹ Mgbọ ema ekiweek ikpakpan̄ Pọọlu, etip orere lek ogwu ibot akọn̄ ebi Rom òkup me Jeruselem ibe ke ufialek înin̄ me otutuuk emen ama. ³² Me ekafiatge mgbọ geege, ogwu ibot akọn̄ ya oteteen̄ ebi ibot akọn̄ inen mè inen, mè ikpulu si urum ebi akọn̄ inen mè inen igbaalek isa ilibi ekot ekot isibi igọọk ebi ife cha. Mgbọ yaage ebi ìkitap ufialek cha emun̄be ogwu ibot akọn̄ mè otutuuk ebi akọn̄ cha, ema etetele isusulu Pọọlu. ³³ Ogwu ibot akọn̄ ya olilibi inin̄ etete kiban̄, mè itet Pọọlu, mè inyi ida ibe esa mkpọn iba ebọp ọmọ, mè inikido ogwu Pọọlu orebe, mè inu îrọbe. ³⁴ Mgbọ usini ene me ere ya ekitaan̄ ukpo itumu ikọ ge, ebi ofifi ife ekekitaan̄ ukpo itumu ofifi ikọ. Ubọk okput ya onyebe enenen, ogwu ibot akọn̄ ya ìkakọt ìriọọn̄ inu òrere ibot ikọ. Mije keya, inyinyi ida ibe esa Pọọlu efo oyet egep ebi akọn̄. ³⁵ Mgbọ Pọọlu ogọọkbe ebi akọn̄ cha ije inire otu okpurukpu òkup me otunchit oyet egep ebi akọn̄ ya, ebi afa cha ebebene ikirọ inu iraak iraak me lek kan̄. Mije keya, ebi akọn̄ cha ebeben ọmọ ikaan̄ me ubọk kiban̄ isa ije inin̄ emen oyet egep ya. ³⁶ Ebi urum ene ìkigọọk ema me udun̄ ekekitaan̄ ukpo ibe, “Ìkpan̄ ọmọ! Ìkpan̄ ọmọ!” ³⁷ Mgbọ ebi akọn̄ cha ebesa Pọọlu iraka inin̄ emen oyet egep kiban̄, Pọọlu otutumu inyi ogwu ibot akọn̄ ya ibe, “Soso tele mè ǹtumu ikọ ge ǹnyi owu.” Ogwu ibot akọn̄ ya ododo Pọọlu ibe, “Ìre okitumu usem ebi Giris? ³⁸ Ìre ìkare owu ore ogwu Ijipiti ya òsasa obop ebi ijo ibot ini cha inin̄ emen èwê, me ujọn̄ọ mgbọ òraraka, isi ikup ikitim akọn̄ iweek ifefele ama?” ³⁹ Pọọlu ofọfọọk ọmọ ibe, “Emi ìre ogwu Ju, ǹnan̄a me ama Tasọs me agan̄ Silisia. Emi ìre gwun̄ owot ama eriọọn̄be erieen̄. Ǹkasibi me fọkọfọkọ ama. Soso tele mè ǹtumu ikọ ǹnyi ife chi.” ⁴⁰ Ogwu ibot akọn̄ ya onyinyi Pọọlu unye ibe itumu ikọ. Pọọlu okekeke me otu okpurukpu ya, mè iwuwum ubọk inyi ebi ife cha ibe egban̄ utọn̄. Otutuuk kiban̄ erariaan̄ otu. Pọọlu obebene ikitumu ikọ inyi ema me usem Iburu.

¹ Pọọlu otutumu inyi ema ibe, “Ebi ngwan̄ n̄a mè ebi nte n̄a, ìgban̄ utọn̄, mè ǹtumu ikọ ibot n̄a.” ² Mgbọ ema enọbe ibe ke Pọọlu ìkitumu ikọ ya inyi ema me usem Iburu, ere okukup yìràk. Otutuuk ene erariaan̄ ere ikigban̄. Pọọlu obebene ikitumu inyi ema ibe, ³ “Emi ìre ogwu Ju, emanbe me Tasọs òkup me agan̄ Silisia. Ire, ekpukpo emi isibi me Jeruselem yi. Nkween̄ ikpa ijaan̄ lek enenen me irak kè Gamalien, ogwu òkijeen̄ Ikan ebi nte nte kiji, mè ichieek mkpa mè ugwem me lek inu eyi Awaji, kubọk enyi otutuuk ekupbe cherekeyi. ⁴ Mije keya, emi me lek n̄a nsisaak ebi geelek ìchechieek me lek Oniin̄ Awaji keyi, mè ikpan̄ owuwa me lek kiban̄. Nsa me Ikan itet ebirieen̄ kiban̄ mè ebibaan̄ kiban̄ itọọn̄ itap me mkpọn. ⁵ Ogwu ibot ebi ibot ngwugwa, mè otutuuk ebi Oru ebi Ju mêkọt itumu si ibe ke ikọ nkitumu ìre atikọ. Emi mbọkọ ikpa unye me ubọk kiban̄ ibasa ijet ebi ibot ebi Ju ìkup me Damasikọs, mè enyi emi irek mè ǹtet otutuuk ife cha kubọk ebi mkpọn, mè ǹtaba ema ǹsa ǹnu Jeruselem inyi enebọkọ osusut. ⁶ “Me ejit ikarek, mgbọ nkije igbet Damasikọs, me ekakpọge chieen̄, ikpele utoon̄ ge onanan̄a me isinyọn̄ itoon̄ mèrèrèp ikana emi me ijọn̄ mgbọ yaage. ⁷ Nnanan̄a irọn̄ me ijọn̄, mè inọ ida ge okibe emi, ‘Sọọlu, Sọọlu! Ìre keke orọ okisisaak emi ikeyi?’ ⁸ “Ndodo ibe, ‘Okaan̄-ene owu ìre ekene?’ “Ida ya ofọfọọk ibe, ‘Emi ìre Jisọs ogwu Najeret ogwu owu okisisaak.’ ⁹ Ebi melek n̄a ekije ije ya mîmun̄ utoon̄ ya, ire, kpekọt itet ibot me lek ida ya òkitumu ikọ melek n̄a. ¹⁰ “Nnenido ibe, ‘Okaan̄-ene, ìre keke ke mbarọ?’ Okaan̄-ene ofọfọọk emi ibe, ‘Nan̄a keke, mè je nin̄ emen ama Damasikọs. Osire emen ama ya, mêtumu otutuuk ikwaan̄ ngobobe isibi ibe owu ònorọ inyi owu.’ ¹¹ Ebi melek n̄a etetet emi me ubọk isa ije inin̄ emen ama Damasikọs, mije, unye utoon̄ ya îrọ inyi chieen̄ n̄a ikayaka ìmọọn̄ inu. ¹² “Ogwu enerieen̄ ge ekigwen Ananayas onunu inikpọ emi. Enerieen̄ ya ìre atalek ogwu òkisun̄ Ikan kè Mosis, ogwu otutuuk ebi Ju ìluk me Damasikọs ekinyi umin. ¹³ Ananayas ojeje inikeke me agba lek n̄a, mè ibe emi, ‘Gwun̄ Nte n̄a Pọọlu, mọọn̄ inu!’ Mgbọ yaage, mbebene ikimọọn̄ inu, mè imọọn̄ ogwu enerieen̄ ya. ¹⁴ “Inenitumu inyi emi ibe, ‘Awaji ebi nte nte kiji îgobo owu ibe owu ònoriọọn̄ nkeek kan̄, mè ònomun̄ si Ogwu Ata Irọrọ ya, mè ònọ si ikọ ònan̄a me otu kan̄. ¹⁵ Me lek otutuuk inu geelek owu osabe chieen̄ imun̄ mè isa utọn̄ inọ, owu môre ogwu ata-ikọ inyi ọmọ me isi otutuuk ebilene. ¹⁶ Mgbọ keyi, kayaka ìkup ìfiat mgbọ. Nan̄a keke, mè egwook owu mun̄, mè kigwen erieen̄ Okaan̄-ene, inyi egwọk otutuuk ijo kwun̄ esan̄a.’ ¹⁷ “Mgbọ ngwube ikom ika inu Jeruselem, nneninin̄ Uwu Mbuban usen ge isi iriaak uriaak. Mgbọ nkiriaak uriaak ya, nnenimun̄ ilaak ọkpọchieen̄. ¹⁸ Me emen ilaak ọkpọchieen̄ ya, mmumun̄ ubọk Okaan̄-ene okitumu ikọ inyi emi ibe, ‘Gwat lek nan̄a sibi me Jeruselem, mije, ebi Jeruselem kpebechieek inu geelek obotumu ibak emi.’ ¹⁹ “Ntutumu inyi ọmọ ibe, ‘Okaan̄-ene kpọ, ife chi mîriọọn̄ ibe ke emi ǹkekijijen̄e ikana me uwu ntitiin̄ me uwu ntitiin̄ isi ikikpulu ebi geelek ìchechieek me lek kwun̄ itap me mkpọn, mè isut usini kiban̄. ²⁰ Mgbọ ekpan̄be Sitibin ogwu ata-ikọ kwun̄, emi òwa me ere ya nkekebe ikigọọk irọ inye ibe ekpan̄. Emi me lek n̄a si ntet otutuuk ọfọnti ebi ìkpakpan̄ Sitibin cha ikaan̄ mgbọ ekitọbọ ọmọ ikpan̄.’ ²¹ “Okaan̄-ene otutumu inyi emi ibe ‘Je! Mâria owu isi ujọn̄ọ ere, me etete ebi ekarege ebi Ju.’ ” ²² Ogbogbo ebi ene cha mîkat ejit ime efuuk ikigban̄ ikọ kè Pọọlu mege inire mgbọ îtumube ikọ keyi. Ema inọnọ ikọ yi, otutuuk kiban̄ etataan̄ ukpo, ibe “Ìcho ene yi ìfiin̄ ìsan̄a me linyọn̄! Ene yi ìkagbe ogwu òboluk ugwem!” ²³ Ema ekekibọn̄ ukpo, mè ikiwọọk ọfọnti kiban̄ itọp igwook, mè ikigwọ achiaan̄ ifiaak ifo inyọn̄. ²⁴ Mije keya, ogwu ibot akọn̄ ya onyinyi ida ibe esa Pọọlu esi etap me oyet egep ebi akọn̄. Ineninyi ida ibe esulu Pọọlu, mè edo ọmọ ikọ, inyi eriọọn̄ inu òrọrọ ebi ene ekitaan̄ ukpo me ibot kan̄ ikeya. ²⁵ Mgbọ ebi akọn̄ cha ebọpbe Pọọlu isan̄a, mè iben imaan̄ me ijọn̄ ibesulu, Pọọlu ododo ogwu ibot akọn̄ ge òkeke me ere ya ibe, “Ìre îtat me ikan ibe enyi esulu gwun̄ owot Rom me mgbọ kpunube oyerebet geege otitip ene ya?” ²⁶ Mgbọ ogwu ibot akọn̄ ya onọbe ikọ ya, ijeje isi lek ogwu ibot otutuuk ebi akọn̄ cha, mè ido ibe, “Ìre keke ke owu oborọ ikeyi? Kpọ, ogwu enerieen̄ yi ìre gwun̄ owot Rom.” ²⁷ Ogwu ibot otutuuk ebi akọn̄ ya ojeje isi lek kè Pọọlu, mè ido ibe, “Tumu-nu atikọ nyi emi, ìre owu ìre gwun̄ owot Rom?” Pọọlu ofọfọọk ọmọ ibe, “Iin̄, emi ìre gwun̄ owot Rom.” ²⁸ Ogwu ibot akọn̄ ya otutumu inyi Pọọlu ibe, “Kpọ, emi me lek n̄a m̀kpekpe ogbogbo ikpoko sabum nnikọt ikana ire gwun̄ owot Rom.” Pọọlu ofọfọọk ọmọ ibe, “Eyi n̄a, emi ìre gwun̄ owot Rom nan̄a me iman n̄a.” ²⁹ Mgbọ yaage ebi akọn̄ cha, ebi ìbenisulu ọmọ mè ido ọmọ ikọ, eyayat itele ọmọ. Ogwu ibot otutuuk ebi akọn̄ ya si me lek kan̄, ukpook îtet enenen mgbọ îriọọn̄be ibe ke ọmọ îtap mkpọn me ubọk mè ukot kè Pọọlu gwun̄ owot Rom. ³⁰ Ogwu ibot otutuuk ebi akọn̄ ya îweek irọriọọn̄ ibot inu òrọrọ ebi Ju ekiweek ikpakpan̄ Pọọlu me atikọ. Eya orọ, me òfit iwele kan̄, isasan̄a Pọọlu isibi, mè inyi ida ibe ebi ibot ngwugwa mè otutuuk Oru ebi Ju etitiin̄, mè inisa Pọọlu isi ntitiin̄ ebi Oru ya, mè isan̄a ọmọ ito me isi ebi Oru ya ibe itumu ikọ ibot kan̄.

¹ Pọọlu ogwugwuun̄ chieen̄ ikpọ ebi Oru ya sìì, mè inibe ema, “Ebi ngwan̄ n̄a, ejit n̄a ìkafieek emi ikọ geege, mije, nluk ugwem n̄a me isi Awaji ubọk îgbebe mege inire cherekeyi.” ² Mije usem ya, Ananayas ogwu ibot ebi ibot ngwugwa onyinyi ida ibe ebi ìkekeke iriaak me lek kè Pọọlu esulu Pọọlu ada me lek otu. ³ Pọọlu otutumu inyi ọmọ ibe, “Awaji môsulu owu ada si, owu agba lek uwu esabe ndun̄ iken keyi! Ìre owu òsiki ìkweek me ere keya ibosibi emi oyerebet me ibot igọọk me lek Ikan kè Mosis, mè idasi inyi ida ibe esulu emi ada me lek otu? Ìre ìkare Ikan ire eya owu orọn̄be?” ⁴ Ife cha ìkekeke iriaak ọmọ egagana inyi ọmọ ibe, “Ìre ikeya ke okinye chieen̄ inyi ogwu ibot ebi ibot ngwugwa Awaji?” ⁵ Pọọlu ofọfọọk ibe, “Chei, ebi ngwan̄ n̄a, ìkpukpa, ke ǹkariọọn̄ ibe ke ene yi ìre ogwu ibot ebi ibot ngwugwa, mije ege me Ikpa Mbuban ibe, ‘Katumu ijo ikọ ìbak ogwu òkikpulu ebi kinyi.’ ” ⁶ Mije Pọọlu oriọọn̄be ibe ke usini me lek ebi Oru ya ìre ebi Farisi, sa usini ere ebi Sadusi, itataan̄ ukpo itumu inyi ema ibe, “Ebi ngwan̄ n̄a, emi ìre ogwu Farisi. Nte n̄a me lek kan̄ si ìre ogwu Farisi. Mgbọ keyi, ekisibi emi oyerebet me ibot mije nkaan̄be ikpọchieen̄ ibe ke ebi ìkwukwu mêjomo me mkpa.” ⁷ Ikọ ya itata Pọọlu me otu, ebi Farisi mè ebi Sadusi ebebene ikibaak ibaak. Uwu Oru ya ocheche irek iba. ⁸ (Mije ebi Sadusi kpechieek ibe ke ebi ìkwukwu mêjomo me mkpa, kpechieek si ibe ke ebi osat mè ebi erumun̄ òwa. Ire, ebi Farisi mîchieek ibe ke otutuuk cha òwa.) ⁹ Okput ibaak ya onyenye enenen. Usini me lek ebi ìjeen̄ Ikan ìrere ebi Farisi enanan̄a ikeke, mè ikigbini ikọ ya atalek unye unye, mè ikibe, “Eji kpemun̄ ijo inu geege ogwu enerieen̄ yi orọbe. Ekene oriọọn̄, môkọt ire erumun̄, mè ìre ogwu osat ge onitumu ikọ inyi!” ¹⁰ Ubọk ifan̄a ya onyebe enenen, mè ikup afa afa, ogwu ibot akọn̄ ya ofefieek owot ibe ke agan̄ iba cha mêkọt itaba Pọọlu igwak. Inyinyi ebi akọn̄ ida ibe enin̄ etete ife cha, mè esan̄a Pọọlu esibi me etete kiban̄ me unye, mè esa esi etap me oyet egep ebi akọn̄. ¹¹ Me eririeen̄ usen ya, Okaan̄-ene onenikeke me agba lek kè Pọọlu, mè itumu inyi ibe, “Kafieek owot! Ike otumube emi isibi me Jeruselem, ikeya si, owu môtumu emi isibi me Rom.” ¹² Me òfit iwele kan̄, me ewelegwe, usini ebi Ju enwenween̄ lek ititiin̄ ikup itọt otitọt, mè igbaan̄ inyan̄a ibot ibe ke ema kpeberie inorie geege, kpebenwọ si miin̄ geege mege ire mgbọ ema mêkpan̄be Pọọlu. ¹³ Ebi ìninin̄ oru yi mîwa iraka akọp ene ini. ¹⁴ Ema esisi itumu inyi ebi ibot ngwugwa mè ebi ugane ama ibe, “Eji mînyan̄a ibot ibe ke eji kpeberie inu geege mege ire mgbọ eji mêkpan̄be Pọọlu. ¹⁵ Me mgbọ keyi, enyi melek ebi Oru, ìge ikpa ge ìjet ogwu ibot akọn̄ ya, mè ìfiaan̄ ìtumu ìnyi ibe iria Pọọlu inu me isi kinyi, ke enyi ekiweek inọnọ otutuuk atikọ òfolek ikọ kan̄. Sabum Pọọlu mônije ire ere keyi, eji mêcho ọmọ ifiin̄ me oniin̄.” ¹⁶ Ire, gwun̄ enerieen̄ ge òrere gwun̄ ngwan̄ kè Pọọlu enenwaan̄ onọnọ otitọt ya, mè ije inin̄ emen oyet egep ebi akọn̄ ya isi ikpa inyi Pọọlu. ¹⁷ Pọọlu ogwegwen ene ge me lek ebi ibot akọn̄ me ere ya, mè itumu inyi ibe, “Sa gwun̄ enerieen̄ yi si me isi ogwu ibot otutuuk ebi akọn̄, mije, îkaan̄ inu ìbokpa inyi.” ¹⁸ Ogwu ibot akọn̄ ya osasa gwun̄ enerieen̄ ya isi me isi ogwu ibot otutuuk ebi akọn̄, mè itumu inyi ibe, “Pọọlu ogwu mkpọn ya obeek ibe emi ǹsa gwun̄ enerieen̄ yi ǹnu me isi kwun̄, mije ke îkaan̄ inu ìbotumu inyi owu.” ¹⁹ Ogwu ibot otutuuk ebi akọn̄ ya onenitet gwun̄ enerieen̄ ya me ubọk, mè isa ije ida ibọkọ, mè ido ibe, “Ìre kpasi ikọ ke oweek itutumu inyi emi?” ²⁰ Gwun̄ enerieen̄ ya otutumu inyi ibe, “Ebi Ju mîgbaan̄ itọt isan̄a ibe ke ema mêfiaan̄ ibeek ibe owu òria Pọọlu ònu me isi ebi Oru me iyakwut, mije ke ema ekiweek inọnọ otutuuk atikọ òfolek ikọ kan̄. ²¹ Soso, kachieek, mije, ebi Ju ìraraka akọp ene ini mîlet me agba oniin̄ ikikpọ mgbọ Pọọlu oboniraka, inyi ema ekpan̄ ọmọ sabum ìbore isi ebi Oru. Ife chi mînyan̄a ibot ibe ke ema kpebechak inu geege me otu, mè ìre inorie, mè ìre miin̄, mege ire mgbọ ema mêsan̄abe ugwem kè Pọọlu. Ema mîbem lek isan̄a mgbọ keyi, ekikup ikpọ mgbọ owu môsan̄abe Pọọlu isibi inyi ema.” ²² Ogwu ibot ya obebe gwun̄ enerieen̄ ya, “Fo, mè katumu ìnyi ene geege ibe ke onikpa ikọ yi inyi emi.” ²³ Ogwu ibot otutuuk ebi akọn̄ ya onenigwen ene iba me lek ebi ibot akọn̄ ìkup me irak kan̄, mè inyi ema ida ibe, “Ìgwat lek ìtitiin̄ efit ebi akọn̄ iba, mè ofifi akọp ebi akọn̄ jaaba ebi ìkilibi me inyọn̄ inyinya, mè ebi akọn̄ ìkitọbọ otunwa, efit iba, mè ìbem lek. Òfuk-mgbọ isisulu onaan̄ge me ikakwun̄ cherekeyi, enyi mêsa Pọọlu isi Sisaria. ²⁴ Ìgobo si inyinya echi Pọọlu obokọp, mè ìmun̄ ibe ke enyi mîsa Pọọlu isi ire isi kè Filikis ogwu ibot mkpulu me utelelek.” ²⁵ Ogwu ibot otutuuk ebi akọn̄ ya onenige ikpa igbaalek inyi ema. Ìge ikpa ya ikeyi: ²⁶ “Emi Kọlọdiọs Lisiọs nge ikpa etip keyi ijet owu Filikis, ogwu ibot mkpulu, ogwu otutuuk ebi ene ekinyi umin. ²⁷ “Ebi Ju etet ene yi ibekpan̄ me unye. Ire, mgbọ nnọbe ibe ke ọmọ ìre gwun̄ owot Rom, nsasa ebi akọn̄ n̄a isi ere ya isi inyan̄a ọmọ isibi me ubọk kiban̄. ²⁸ Mgbọ mweekbe irọriọọn̄ ikan òtetet ọmọ, nnenisa ọmọ isi me isi Oru kiban̄. ²⁹ Me ere ya, emi nniweek imun̄ ibe ke uraamọn ekitoon̄ ọmọ ìgbaan̄ me lek Ikan kiban̄. Ire, ǹkamun̄ ikan geege îrọn̄be eyi ebesa me lek ikpan̄ ọmọ, mè ìyaka ire, eyi ebesa itap ọmọ mkpọn. ³⁰ Mgbọ yi, mbọkọ si etip ibe ke mîtọt isan̄a ikpakpan̄ ogwu enerieen̄ yi. Eya orọ mbe ke m̀kpayaka ifiat mgbọ, mè iria ọmọ ijet owu. Ntumu si inyi ebi ìkitoon̄ ọmọ uraamọn cha ibe egọọk enu me isi kwun̄, enetumu unaan̄-ejit kiban̄ ejeen̄ owu.” ³¹ Ebi akọn̄ cha erọrọ ubọk enyibe ema ida, mè isa eririeen̄ yaage isan̄a Pọọlu isibi me ama, mè isa ọmọ isi ire ama ekigwen Antipatiris. ³² Me òfit iwele kan̄, ebi ibot akọn̄ cha mè otutuuk kè ebilọ enenibe mè ebi ìkikọp inyinya cha esa Pọọlu esi ere Sisaria, mè igwu ikom eyi kiban̄ ika inu oyet egep ebi akọn̄ me Jeruselem. ³³ Ebi ìkikọp inyinya cha esasa Pọọlu ikọp inire Sisaria, mè isa ikpa etip ya inyi Filikis ogwu ibot mkpulu, mè ikana Pọọlu itap ọmọ me ubọk. ³⁴ Filikis ofufuk ikpa ya isan̄a, mè inido Pọọlu agan̄ înan̄abe. Mgbọ înọbe ibe ke Pọọlu ìre ogwu Silisia, ³⁵ itutumu inyi Pọọlu ibe, “Mâgwen ikọ kwun̄ isibi mgbọ ebi ìtotoon̄ owu uraamọn isinu.” Inyinyi ida ibe esa Pọọlu esi etap me uwu ubọọn̄ eyi Erọdu ogwu ubọọn̄ onamabe, mè eto ebi akọn̄ inyi ekebem.

¹ Egwe go iraraka, Ananayas ogwu ibot ebi ibot ngwugwa oneninan̄a me Jeruselem inu me Sisaria, ọmọ melek usini ebi ugane ama, mè ogwu usọ ikan ge ekigwen Tetulọs, ibenikpa otutuuk ikọ ema ekaan̄be ikeme Pọọlu me isi kè Filikis ogwu ibot mkpulu. ² Mgbọ ema onube me isi ogwu ibot mkpulu ya, ogwu ibot mkpulu ya oraria ibe esa Pọọlu enu. Mgbọ Pọọlu onube, Tetulọs onenibene ikọ kan̄ itumu me isi ogwu ibot mkpulu ya, mè ibe, “Filikis ogwu otutuuk ene ekinyi umin! Eji otutuuk ene mîluk me esuuk ijọn̄ọ mgbọ me irak ubọk mkpulu kwun̄. Owu osasa ata ifuk-ibot kwun̄ inen̄e si owuwa inu òlọlọ isun̄ itat me ido yi. ³ Me oniin̄ geelek, eji otutuuk ene me ere geelek mîbele ejit mije inu chi owu orọbe, mè ibe owu, usọ! Owu onirọ! ⁴ Me nkafiatge mgbọ kwun̄, ǹkibeek owu ibe, soso, nye lek kat ejit gban̄ mgbidim ikọ keyi eji ebetumu. ⁵ “Adasi irek, eji emun̄ ogwu enerieen̄ yi kubọk ogwu òkitap uyọrọlek. Ene yi ìkitap uyọrọlek, mè òto etim ijọn̄ me etete ebi Ju me ere geelek îsibe me linyọn̄. Ọmọ gwu ore ogwu ibot me otu-ogbo ge me ama Najeret. ⁶ Ene yi îkat ejit iraka inin̄ emen Uwu Mbuban ibosi ichaka mbuban me lek uwu ya. Eji etetet ọmọ, [mè ibesibi ọmọ oyerebet me ibot igọọk me lek Ikan kiji. ⁷ Ire, Lisiọs ogwu ibot otutuuk ebi akọn̄ osasa ebi akọn̄ inu, mè inisa me unye ubọk ibọkọ ọmọ isan̄a me ubọk kiji, ⁸ mè inyi ida ibe ebi geelek ìkakaan̄ inu ebetumu ikeme ọmọ enu me isi kwun̄.] Ire owu me lek kwun̄ odo ọmọ ikọ, owu môweek imun̄ me otu kan̄ gaalek ibe ke otutuuk ikọ eji ekitumu ikeme ọmọ ìre atikọ.” ⁹ Otutuuk ebi Ju ìkup me ere ya egọgọọk itap otu, mè itumu ibe ke ikọ chi etumube ìre atikọ. ¹⁰ Ogwu ibot mkpulu ya oneniwuwum ubọk inyi Pọọlu ibe itumu ikọ. Pọọlu otutumu inyi ogwu ibot mkpulu ya ibe, “Emi nriọọn̄ ibe ke owu osibi oyerebet inyi owuwa ene me ido yi owuwa acha. Eya orọ, ejit îbele emi itutumu ikọ ibot n̄a me isi kwun̄. ¹¹ Do, ke mêtumu inyi owu ibe, me ikarakage akọp mè usen iba chereyi, emi nje isi Jeruselem ibasi itọbọ ebum inyi Awaji. ¹² Ebi ìkitoon̄ emi ikọ mgbọ keyi kpemun̄ emi nkigọọk ene geege iwut ifan̄a me Uwu Mbuban, kpemumun̄ si ubọk nkitap wọlọwọlọ me etete ebi ene me emen uwu ntitiin̄, mè ìyaka ire me ofifi ere geege me emen ama yi. ¹³ Me atikọ, me lek otutuuk ikọ chi ife chi ekitumu itoon̄ emi, kpunu inu geege eyi ene geege me lek ife chi obokọt ichak ubọk me lek ibe ke ìre ikan eyi emi nrọn̄be ore eyi. ¹⁴ Ubọk geelek, emi nchieek me isi kwun̄ ibe ke ǹkitọbọ ebum inyi Awaji ebi nte nte kiji igọọk me ijejeen̄ eyi Oniin̄ ya eyi ema chi ekibe ke ìre ijo otu-ogbo. Emi nchieek si me lek otutuuk inu geelek òjeje itat me lek Ikan kè Mosis, mè inu egebe me emen ikpa ebi Nriran. ¹⁵ Emi ǹkaan̄ si ikpọchieen̄ yaage eyi ife chi ekaan̄be me lek Awaji ibe ke otutuuk ebi ìkwukwu mêjomo me mkpa, ebi ata irọrọ me ebi ijo irọrọ. ¹⁶ Mije keyi ke nkisa iluluk ugwem n̄a mgbọ geelek me isi Awaji mè isi ebilene me oniin̄ eyi ejit n̄a ìkpofieekbe emi ikọ. ¹⁷ “Emi nnan̄a me ido kiji ijọn̄ọ acha, mè inika inu Jeruselem ibaniche owuwa uche inyi ebi kiji, mè igwa si ngwugwa igọọk me lek ọrọmijọn̄ kiji. ¹⁸ Ǹdadasi ifaka mfaka igwọk-lek, me itana si igọọk me lek Ikan kiji sabum njebe isi inin̄ emen Uwu Mbuban isi igwa ngwugwa ya, eyi ema enube inimun̄ emi me lek. Ebi ene kpefan̄a igọọk emi, kpunu si okput geege òninin̄ me ere ya. ¹⁹ Ire, usini ebi Ju ìnan̄a me agan̄ Esia inu Jeruselem òwa si me ere ya. Kè ònwọn ire ema mekup me isi kwun̄ mgbọ keyi, ikitumu ikọ itoon̄ emi, ire ikaan̄ inu geege ema ebetumu ikeme emi. ²⁰ Ìrere mgbọ esabe emi isi me isi ebi Oru, ire ikaan̄ ikan geege eyi eweekbe imun̄ òtetet emi, ife chi ebi ìkup me ere yi etumu esibi-nu. ²¹ Otutuuk inu ife chi mêsabe itumu ikeme emi ìre inu ge yi gaalek ntaan̄be ukpo itumu me isi ebi Oru ibe ke ìre mije nchieekbe ibe ke ebi ìkwukwu mêjomo me mkpa ke etet emi inisibi oyerebet me ibot.” ²² Pọọlu itutumu ikọ kan̄ isan̄a, Filikis obebieen̄ oyerebet ya ifo isi, mè itumu inyi ema ibe ikaan̄ mgbọ Lisiọs ogwu ibot akọn̄ ya isinu, ke ọmọ môfieek oyerebet kiban̄. Filikis me lek kan̄ îriọọn̄ inu òfolek Oniin̄ Okaan̄-ene ya ijaan̄ lek. ²³ Filikis oneninyi ida ibe mè ogwu ibot akọn̄ ge isa Pọọlu igwu ikom, mè ito ebi akọn̄, inyi ekebem, mè inyi irek, inyi ebi unene kè Pọọlu ekenu enesi ikwaan̄ enyi mè ekeche inu enyi. ²⁴ Usen inen mè inen iraraka, Filikis osasa ogwu nwa òrere ogwu Ju ekigwen Durusila, inu, mè iniria ibe esa Pọọlu enu. Pọọlu onunu, mè inikpa inu òfolek ichechieek me lek kè Jisọs Karais inyi ema, ema egbagban̄. ²⁵ Ubọk Pọọlu okitumu ikọ òfolek ata irọrọ, mè itetet lek, mè oyerebet Awaji eyi òbonunu, ukpook otetet Filikis. Itutumu inyi Pọọlu ibe, “Ikup ikeya mgbọ keyi nu! Gwu kom fo! Mgbọ geelek irek osibibe, mâyaka igwen owu.” ²⁶ Me mgbọ ya, Filikis ìkikpọ chieen̄ ibe ke Pọọlu mônyi ọmọ ikpoko udun̄. Eya orọ ikpọkpọ ikiria ikwaan̄ igwen Pọọlu igọọk ikpa ukpatu me mgbọ me mgbọ. ²⁷ Mgbọ acha iba orakabe me lek, enwenwene Filikis, mè iria ofifi ogwu ibot mkpulu ekigwen Pọsiọs Fesitọs inu inyi inibọkọ irek kè Filikis. Ubọk Filikis oweekbe irọrọ inyi ebi Ju ebele ejit melek kan̄, itetele inyi Pọọlu ibia me mkpọn.

¹ Mgbọ Fesitọs obenebe ikwaan̄ kan̄ kubọk ogwu ibot mkpulu, egwe ita iraraka, inanan̄a me Sisaria isi ikpọ ama Jeruselem. ² Mgbọ Fesitọs orebe Jeruselem, ebi ibot ngwugwa, mè ebi ibot ebi Ju enenisa irek keya igwen ikọ kè Pọọlu isibi me isi kan̄. ³ Ema ebebeek ọmọ, kubọk ntap-ubọk, ibe inye lek iria Pọọlu inu me Jeruselem. Ema ebeek mbeek ya, mije, ema ekibem lek ilelet ebi ene me agba oniin̄ inyi ekpebe Pọọlu me oniin̄ ya ekpan̄. ⁴ Ire, Fesitọs ofọfọọk ema ibe, “Iin̄-iin̄, ebi akọn̄ ekibebem Pọọlu me Sisaria. Emi me lek n̄a si, m̀bagwugwu ikom ifo Sisaria me nkafiatge mgbọ. ⁵ Ire Pọọlu irọ enyi ilọ, ìria usini ebi ibot kinyi inyi egọọk emi eje ukot ge esi egwen ikan îrọn̄be ekeme ọmọ me ere keya.” ⁶ Fesitọs îkup me Jeruselem iso usen jeeta, mè ire akọp usen, mè inigwu ikom ika inu Sisaria. Òfit iwele kan̄, igwegwen ebi uwu oyerebet, mè inyi ida ibe esa Pọọlu enu me isi kan̄. ⁷ Mgbọ esabe Pọọlu inu, ebi Ju cha ìgọgọọk inan̄a me Jeruselem inu ebebene ikigwen owuwa ataak ataak ulobo ikan ikeme ọmọ. Kpunu ikan cha geege eyi ema ekọtbe ijeen̄ ibe ke ìre atikọ. ⁸ Pọọlu onenitumu ikọ ibot kan̄, mè ibe, “Emi ǹkafiat Ikan ebi Ju geege, ǹkachaka mbuban geege me Uwu Mbuban. Ǹkarọ si inu geege ìkeme ogwu Sisa.” ⁹ Fesitọs oneniweek irọrọ inyi ebi Ju ebele ejit me lek kan̄, mè inido Pọọlu ibe, “Ìre môneme owu isisi Jeruselem, mè ǹsi ǹsibi oyerebet kwun̄ me ere keya mije otutuuk inu chi ekitumu ikeme owu?” ¹⁰ Pọọlu ofọfọọk ibe, “Isi ikasi oyerebet ogwu Sisa ire eyi nkekebe. Îre ere keyi gaalek si ogbe ere mêsibibe emi oyerebet me ibot. Ìkakaan̄ ijo inu geege nrọbe ebi Ju, kubọk owu me lek kwun̄ oriọọn̄be ijaan̄ lek. ¹¹ Ubọk geelek, ire nrọn̄ ikan, mè irọ inu eyi ògbegbe ibe ekpan̄ emi, ǹkajit mkpa. Ire, ire kpunu atikọ geege me emen otutuuk ikọ ebi Ju chi etumube ikeme emi, kpunu ene geege òkakaan̄ unye ikakana emi itap ema me ubọk. Eya orọ, mgbọ keyi, emi ǹkibeek ibe ikọ n̄a ifo isi ogwu Sisa me lek kan̄.” ¹² Fesitọs ogbagbaan̄ ibot ichọk melek ebi oru kan̄, mè initumu inyi Pọọlu ibe, “Owu òkiweek ibe ikọ kwun̄ ifo isi ogwu Sisa. Isi ogwu Sisa si ke owu obosi!” ¹³ Sọnja mgbọ iraraka, ogwu ubọọn̄ Agiripa melek Benais ogwu ngwan̄ enenwaan̄, enenije inu Sisaria ibenitọp Fesitọs, aya ogwu ibot mkpulu amọn, mè ibọkọ ọmọ itap. ¹⁴ Mije ema ekupbe me Sisaria ya iwa usen, Fesitọs oneniben ikọ kè Pọọlu ikpa ijeen̄ ogwu ubọọn̄ Agiripa, ibe “Ogwu enerieen̄ ge òwa me ere yi, ogwu Filikis otelebe me mkpọn, mè inan̄a. ¹⁵ Mgbọ nsibe Jeruselem, ebi ibot ngwugwa, mè ebi ugane ama ebi Ju mîgwen owuwa ikan ikeme ogwu enerieen̄ yi, mè ibeek ibe emi m̀fieek oyerebet mkpa ǹnyi. ¹⁶ “Nnenitumu inyi ema ibe ke ebi Rom kpekisa ene inyi ekpan̄ ikeya me ekanyige ene ya irek, mè idasi ikeke itumu ikọ ibot kan̄ me isi ebi ìgwegwen ikan ikeme ọmọ. ¹⁷ Mgbọ ebi Ju cha egọọkbe emi inu me ere keyi, ǹkafiat mgbọ geege. Òfit iwele kan̄, ngwegwen ebi oyerebet ititiin̄, mè inyi ida ibe esa ogwu enerieen̄ ya enu. Esasa inu. ¹⁸ Ire, mgbọ ebi ìtotoon̄ ọmọ ikọ cha enan̄abe ikeke ibetumu ikọ, kpegwen ikan geege mkpọbe chieen̄ ibe ke mêgwen ikeme ogwu enerieen̄ ya. ¹⁹ Kpan̄asi ikeya, ìyaka inire sọntiik gọlọgọlọ gaalek ke ema ekaan̄ melek ogwu enerieen̄ ya òfolek ubọk iriaak Awaji kiban̄, mè inu òfolek ene ge òkwukwu iraka ekigwen Jisọs, ogwu Pọọlu okitumu inye otu ibe ke ọmọ òwa me lek ugwem. ²⁰ Ikọ ya okpọkpọ iniwuwọlọ emi. Ǹkayaka ìriọọn̄ ubọk mbasa iweek emen òjelek ikọ keyi, inyi ǹriọọn̄ atikọ. Mije keya, ndodo ogwu enerieen̄ ya ibe mè ìre môneme ogwugwu isisi Jeruselem inyi ǹsi ǹkup me ere keya ǹsibi oyerebet me lek otutuuk ikọ cha ekitumu ikeme ogwugwu. ²¹ Ire, ogwu enerieen̄ ya ìkachieek. Kpan̄asi ikeya, itutumu ibe esa oyerebet kan̄ esi isi ogwu Sisa. Eya orọ, nnyinyi unye ibe etet ọmọ ekaan̄ me mkpọn mege ire mgbọ mâkọtbe iria ọmọ ijet ogwu Sisa.” ²² Ogwu ubọọn̄ Agiripa onenitumu inyi Fesitọs ibe ke ọmọ me lek kan̄ môweek si inọnọ ikọ me otu ogwu enerieen̄ ya. Fesitọs ofọfọọk ọmọ ibe, “Owu mônọ ikọ otu kan̄ me iyakwut.” ²³ Me òfit iwele kan̄, ogwu ubọọn̄ Agiripa mè Benais ogwu ngwan̄ enenwaan̄ enenije ikeya òrirọ òrirọ, me umin kiban̄ inu, mè inin̄ uwu oyerebet ya, ema melek ebi ibot akọn̄, mè ebi ibot ama. Fesitọs onyinyi ida, esasa Pọọlu inu. ²⁴ Fesitọs onenitumu ibe, “Ogwu ubọọn̄ Agiripa, mè otutuuk kinyi ebi melek kiji ekupbe me ere yi, enyi mîmun̄ ogwu enerieen̄ yi. Otutuuk ebi Ju mîge ikpa inyi emi ikeme ene yi me Jeruselem mè ere keyi si me Sisaria, mè ikitaan̄ ukpo ibe ke ogwu enerieen̄ yi ìkayaka ìgbe iluluk ugwem ofifi. ²⁵ Ire, emi mweek imun̄ ibe ke kpunu ikan geege îrọn̄be eyi ògbegbe ibe ekpan̄ ọmọ. Mgbọ keyi, ubọk ọmọ gaalek otumube ibe esa ikọ kan̄ ejet ogwu Sisa, emi si ntumu ifieek iraria ọmọ isi Rom. ²⁶ Ire, kpunu ikan geege ogwu enerieen̄ yi orọn̄be, eyi emi mbakọt itet ubọk me lek isa ige ikpa ijet ogwu ibot mkpulu ido Rom. Eya orọ nsan̄abe ogwu enerieen̄ yi isibi inu me isi kinyi otutuuk ene, ògak ge, me isi kwun̄, owu ogwu ubọọn̄ Agiripa. Soso ìgọọk emi ìwọlọ emen ikọ yi, inyi ǹkọt ǹkaan̄ inu mâkọtbe ige itap me ikpa iria ijet ogwu Sisa. ²⁷ Mije, ikpọkpọ imọnọ ogwu mkpọn iria ikeya ijet ogwu Sisa, me ikakaan̄ge ata ikan geege esabe ibọp ene ya ìre inu burubut.”

¹ Agiripa onenitumu inyi Pọọlu ibe, “Mînyi owu irek mgbọ keyi ibe owu otumu ikọ ibot kwun̄.” Pọọlu onanan̄a ikeke, mè iwuwum ubọk ibe egban̄ utọn̄, mè inibene itumu ikọ ibe, ² “Ogwu ubọọn̄ Agiripa, emi mmọnọ lek n̄a kubọk ogwu atisi, mije irek osibibe inyi emi, mè ǹkeke me isi kwun̄ me chereyi ǹtumu ikọ ibot n̄a me emen otutuuk ikọ geelek ebi Ju etumube ikeme emi. ³ Ògak ge, mmọnọ lek n̄a kubọk ogwu atisi enenen, mije, owu oriọọn̄ otutuuk ọrọmijọn̄ ebi Ju mè ubọk igbini-ikọ kiban̄ ijaan̄ lek. Eya orọ, ǹkibeek owu ibe, soso, kat ejit gban̄ ikọ n̄a. ⁴ “Otutuuk ebi Ju mîriọọn̄ ubọk nsabe ikiluk ugwem n̄a bene me karake nkupbe ijija, bene me mgbọ nlukbe me ido iman n̄a na re mgbọ nlukbe me Jeruselem. ⁵ Ife chi mîriọọn̄ emi karake ujọn̄ọ mgbọ. Ire môneme ema itutumu atikọ, ema mêkọt isa otu kiban̄ itumu ibe ke emi ǹluk ugwem igọọk ọrọmijọn̄ ebi Farisi. Ebi otu-ogbo yi ere ebi ìkitet Ikan kè Mosis mè ọrọmijọn̄ ebi Ju inye igak otutuuk ene me ubọk eji ebi Ju ekiriaak Awaji. ⁶ Ire, me mgbọ keyi, ibot ibot inu òrọrọ mè ekesibi emi oyerebet me ibot chereyi ìre mije ǹkikpọ chieen̄ ibe ke Awaji môrọ otutuuk use îchieekbe ebi nte nte kiji iso. ⁷ Use yi ke otutuuk akọp mè otoko iba kiji ekikpọ chieen̄ ibe ke Awaji môrọ iso inyi ema. Eyi ore utoon̄-ejit kiban̄ eyi ema ekisi ikwaan̄ inyi Awaji me eririeen̄ mè ikarek. Ogwu ubọọn̄ Agiripa ogwu otutuuk ene ekinyi umin, îre mije ikpọchieen̄ yi gaalek ke ebi Ju ekitoon̄ emi otutuuk ikọ chi. ⁸ Ǹdo enyi nu, enyi ebi Ju, ìre keke orọ mè iyọt enyi me lek ichechieek ibe ke Awaji îkijomo ene me mkpa? ⁹ “Me adasi mgbọ, emi me lek n̄a si nchieek inye ibe ke îgbe ibe ǹrọ inu geelek nkọtbe isasa ifiat erieen̄ kè Jisọs ogwu Najeret. ¹⁰ Ikeya si ke nrọ me Jeruselem. Mbọkọ unye me ubọk ebi ibot ngwugwa, mè ikpulu owuwa bọn Awaji itap me mkpọn. Mgbọ geelek etipbe ema oyerebet mkpa, emi nra igọọk ichieek ibe ke îgbe ibe ekpan̄ ema. ¹¹ Owuwa mgbọ, ǹkijijen̄e ikana me uwu ntitiin̄ ebi Ju geelek ikisi isulu ema osusut, mè ikiweek irọrọ inyi ema etumu Awaji elọ. Ìkayaka me ikeya, emi nsa si me ujat ejit yi igọọk ife cha me ama ile geelek me ofifi ido, mè isisaak ema enenen. ¹² “Me òjelek ije yi, usen ge, nsisi ibọkọ unye me ubọk ebi ibot ngwugwa, ife cha si eraria emi isibi isi ama Damasikọs. ¹³ Me umin kwun̄, Ogwu ubọọn̄, kigban̄. Me oniin̄ ije ya nkije isi Damasikọs, me ejit ikarek, mmumun̄ ikpele utoon̄ òtotoon̄ igak ura onan̄abe me isinyọn̄, mè initoon̄ ikana emi mè ebi melek n̄a me ijọn̄ okokop. ¹⁴ Eji otutuuk ene erọrọn̄ me ijọn̄. Emi nnọnọ ida ge okitumu ikọ inyi emi me usem ebi Iburu ibe, ‘Sọọlu Sọọlu! Ìre keke orọ okisisaak emi ikeyi? Îyọt enenen owu isasak lek kwun̄ unan ikeyi, kubọk erie mbuuk okisa ukot isook uti ukpak eyi ogwukaan̄ kan̄ okisa ilap ọmọ.’ ¹⁵ “Emi nnenido ibe, ‘Okaan̄-ene, ìre owu ìre ekene?’ “Okaan̄-ene ofọfọọk ibe, ‘Emi ìre Jisọs, ogwu owu okisisaak. ¹⁶ Ire, me mgbọ keyi, nan̄a keke me ukot kwun̄. Emi ǹsa lek n̄a ijeen̄ owu isasa igobo owu, inyi owu ònore ogwu ikwaan̄ n̄a, mè òre si ogwu ata-ikọ n̄a, inyi owu òkọt òtumu ikọ òfolek inu echi owu osabe chieen̄ kwun̄ imun̄ òfo me lek n̄a, mè echi mâjeen̄be owu me mgbọ òkup me isi. ¹⁷ Mânyan̄a owu isibi me ubọk ebi kwun̄, mè inyan̄a owu isibi si me ubọk ebi ekarege ebi Ju, ebi mâriabe owu isi lek. ¹⁸ Owu môrọ inyi ema emọọn̄ inu, mè egwu ekom enan̄a me udun enin̄ me utoon̄, mè enan̄a si me unye eyi Setan enu me lek unye eyi Awaji, inyi Awaji itele ijo kiban̄ inyi ema, mè ema esa me ikeya ekaan̄ uche me lek ugbana eyi òkukup inyi ebi Awaji osan̄abe isun̄ esese inyi lek kan̄ sa me ichechieek echieekbe me lek n̄a.’ ¹⁹ “Eya orọ, ogwu ubọọn̄ Agiripa, emi ǹkakpaka ibot ìnyi ilaak ọkpọchieen̄ ya eyi ònan̄a me emen inyọn̄ inu inyi emi. ²⁰ Adasi kan̄, m̀bene ilolook etip ya me Damasikọs, mè inilook si me Jeruselem, mè isi ilook si ikana otutuuk agan̄ Judia, mè inikana igọọk ebi ekarege ebi Ju isi ilook etip yaage ibe mè ema egwu ekom, mè eyaka enu me lek Awaji, mè ekerọ si irọrọ echi òkijeen̄ ibe ke ema mîgwu ikom. ²¹ Îre mije ilolook ata etip yi ke ebi Ju etet emi me Uwu Mbuban, mè ibekpan̄ emi. ²² Ire, Awaji îtap ubọk inyi emi mege inire chereyi, mè irọ inyi ǹkeke me isi owuwa ebi ene, ebi asasa mè ebi ilile, ǹtumu ikọ Awaji. Inu nkitumu ìre inu yaage eyi ebi nriran mè Mosis etumube ibe ke môrọ. ²³ Ema otutuuk ene etumu ibe ke Karais ya môbọkọ ufialek, mè inire adasi ogwu òbojomo me mkpa, mè isa me ikeya inilook otutuuk ebi Ju, mè ebi ekarege ebi Ju ibe ke utoon̄ eyi Awaji, eyi oboninyan̄a ema îra inu.” ²⁴ Mgbọ Pọọlu okitumu ikọ yi isa inyan̄a lek kan̄, Fesitọs ofefieek Pọọlu ikọ ya me otu, mè itaan̄ ukpo itumu ibe, “Îyak Pọọlu, ibot kwun̄ îwuwọlọ isan̄a. Uga ikween̄-inu îrama owu iraak.” ²⁵ Pọọlu ofọfọọk ọmọ ibe, “Me umin kwun̄ Fesitọs, emi ǹkare iraak. Ikọ nkitumu ìre atikọ, mè ire si ikọ ògbegbe itutumu. ²⁶ Ogwu ubọọn̄ Agiripa îriọọn̄ inu chi ijaan̄. Eya orọ, emi mâkọt ifet lek itumu ikọ melek kan̄, mije, nriọọn̄ ibe ke ìkakaan̄ inu chi geege eyi ọmọ ikariọọn̄ge inu geege òfolek, bak me lek ìkakaan̄ geege me lek inu chi echi erọbe me nlelet. ²⁷ Ogwu ubọọn̄ Agiripa, ìre owu ochieek me lek inu ebi nriran egebe me Ikpa Mbuban? Emi nriọọn̄ ibe ke owu ochieek.” ²⁸ Agiripa onenido Pọọlu ibe, “Ìre òkikeek ibe ke owu môkọt inwene emi ejit mè ǹkana ogwu eyi kè Karais me sọntiik mgbidim mgbọ keyi gaalek?” ²⁹ Pọọlu ofọfọọk ibe, “Mè ìre mgbidim mgbọ, mè ìre ujọn̄ọ mgbọ, uriaak n̄a me isi Awaji ìre, mè owu, mè ìre otutuuk ebi ìkup me ere yi ekana ere inu emi nrebe. Ire, ekakaan̄ mkpọn me ubọk kubọk emi nkaan̄be.” ³⁰ Ogwu ubọọn̄ Agiripa, mè Benais ogwu ngwan̄ enenwaan̄, mè Fesitọs ogwu ibot mkpulu, mè otutuuk ebi melek kan̄ cha enanan̄a ikeke, mè isibi. ³¹ Mgbọ ema ekije isibi, ema ekekitumu me etete kiban̄ ibe, “Ogwu enerieen̄ yi ìkarọ inu geege eyi mêkọtbe isa itet ọmọ ikpan̄, mè ìyaka ire itetet itap me mkpọn.” ³² Agiripa onenitumu inyi Fesitọs ibe, “Mebe ene yi ìkatumu ibe esa oyerebet kan̄ esi me isi ogwu Sisa, kè owu okọt òtele inyi ifo me utelelek.”

¹ Mgbọ etumube ifieek isan̄a ibe ke eji mênikọp isi Itali, enenibene Pọọlu mè ofifi ebi mkpọn itap me ubọk ogwu ibot ebi akọn̄ ge ekigwen Juliọs, òrere ene ge me lek ogbo ebi akọn̄ ebi ekigwen “Urum akọn̄ ogwu Sisa” ebi ìkisi ikwaan̄ inyi ogwu ibot mkpulu ebi Rom. ² Eji esisi inin̄ uji ile ge me atasuk ama Adaramitiọm, mè ikọp isibi. Uji ile ya ìbonan̄a me ere ya isi otutuuk ama mgba-uji òkup me agba okwaan̄ ile me ido Esia. Ogwu enerieen̄ ge ekigwen Arisitakọs, ogwu ònan̄a me ama Teselonaika me agan̄ Mesidonia òwa melek kiji. ³ Me òfit iwele kan̄, eji ekọkọp itoon̄ me atasuk Saidọn. Juliọs onenikaan̄ ata ejit me lek kè Pọọlu, mè itele ibe isibi ijọn̄ isi ikpọ ebi unene, inyi etap ubọk enyi me lek inu geelek òkup ọmọ me uyọt. ⁴ Eji enenisan̄a uji me ama ya. Mije efet okiwut ibieen̄ eji, eji ekọkọp isi ikana me agan̄ udun̄ achọ Saipọrọs inyi eji enan̄a me isi efet. ⁵ Eji enenikọp isaba okwaan̄, mè iraka me isi okwaan̄ agan̄ Silisia mè Pamfilia, mè isi itoon̄ me ijọn̄ me ama ekigwen Maira me agan̄ Laisia. ⁶ Me ere ya ke Juliọs ogwu ibot ebi akọn̄ ya onimun̄ uji ge ònan̄a me Alikisendira ibosi ido Itali, mè inisan̄a eji itap me emen. ⁷ Eji enenisan̄a uji, mè ikikọp ususuk ususuk, mè ifiat owuwa usen me okwaan̄ mije efet okiwut ikweek eji. Eji mîmun̄ ufialek sabum eji enikọt ikọp itoon̄ me atasuk ge òkup me agba lek ama Kinidọs. Mije efet ya ikachieekge ibe eji ekọp ubọk ekiwuuk lek ikọp, ebi ìkikọp uji ya ebeben uji ya ikọp isi ikana me udun̄ achọ Keret inan̄a me isi efet, mè ikọp iraka me otu ọsọt ekigwen Salimọni, ⁸ mè itet iriaak me agba ijọn̄ ikikọp. Eji mîmun̄ ufialek enenen sabum eji enikọt inwan̄a efet ya mege isi ire emen ọfọ ekigwen, “Ata Atasuk” òkup me agba lek ama ekigwen Lasia. ⁹ Sabum mgbọ yi, mgbọ îwuuk lek ije enenen me lek kiji, mè inin̄ emen mgbọ unye efet okiwut, òrere mgbọ mfaka Usen Itetele Ijo orakabe igwook. Eya orọ, ikọkọp me okwaan̄ ya mgbọ ya onenire mkpa mè ugwem. Mije keya, Pọọlu onenitaba otutuuk ebi ìkup me uji ya ubọk me utọn̄ ibe, ¹⁰ “Ebi une n̄a, emi nra imun̄ ibe ke ùrioon̄ mônu inyi eji me emen ije kiji yi, mè itap ikpele ichep me lek uji yi, mè otutuuk akpan inu òjot me emen, melek ugwem kiji si.” ¹¹ Ire, kpan̄asi ogwu ibot ebi akọn̄ ya môgban̄be ida kè Pọọlu, ìyaka isi igban̄ ida ogwu òkikọp uji, mè ogwukaan̄ uji. ¹² Mije atasuk ya ikanwọnge ere ikukup me mgbọ utọọk, owuwa ene me uji ya ebebe mè esan̄a uji ekọp efo ama Finikis me achọ Keret ya si esi ekup mè mgbọ utọọk iraka. Atasuk Finikis ya ìyaka isi ikikpọ agan̄ ichep-ura, bene me ntut inyọn̄ re ntut òsiki. ¹³ Sọntiik mgbọ, efet awaji obebene ikiwut ususuk. Ebi ìkikọp uji ya ekekikeek ibe ke ema mêkọt ikọp uji ya isi ire ere ema ebenbe me ejit, mè initaba iloma, mè isan̄a uji, mè itap awala, mè ikikọp agba ijọn̄ agba ijọn̄ me isi okwaan̄ achọ Keret ya. ¹⁴ Ìkajọn̄ọ mgbọ, unye egwijo ge ekigwen “Efet inyọn̄ agan̄ mbum-ura” obebene ikiwut inan̄a me inyọn̄ achọ Keret ya, mè itap ogbururu ijot okwaan̄. ¹⁵ Egwijo ya osisik eji ito me eden̄ okwaan̄ mgbọ yaage. Eji kpeyaka ikọt ikọp inwan̄a efet ifo agba ijọn̄. Eji ekakana uji ito itat, inyi iben eji ije. ¹⁶ Unye efet ya obeben eji ikọp ejit yaage isi ikana inin̄ udun̄ achọ ge ekigwen Kawuda, inan̄a me isi efet sọnja. Me ere ya ke ebi ìkikọp uji ya enisa mege, mè inikọt itaba gwun̄ uji etobobe me edim uji ile ya itap me emen uji ile ya. ¹⁷ Mgbọ etababe gwun̄ uji ya itap isan̄a, ema esasa olik itap ikana me lek uji ile ya, mè itobo ikam, inyi inu geege ikawaka ìrọn̄. Mije ema ekifieek owot ibe ke egwijo ya môben uji ya isi itọbọ irak me inyọn̄ okpurukpu yereyerek okpoon̄ òkup me isi okwaan̄ ido Libia, ema ekpọkpọk awala isan̄a me lek uji ya, mè itele uji ya ikeya inyi efet ikibieen̄ ije. ¹⁸ Ubọk egwijo ya omabe lek isulu uji ya enenen, me òfit iwele kan̄, ebi ìkikọp uji ya ebebene ikikpulu inu etapbe me uji ya itoon̄ ifiin̄ me okwaan̄. ¹⁹ Me òso egwe ita, ebikaan̄ uji ya esasa ubọk kiban̄ gaalek ikpulu otutuuk inu ekisa ikọp uji ile ya itọọn̄ ifiin̄ me okwaan̄ isan̄a. ²⁰ Mije egwijo ya owutbe unye unye ikeya owuwa usen, eji kpemun̄ ura me ikarek, kpemun̄ ntoronyan̄ me eririeen̄, eji otutuuk ene ekpọkpọ iyaka imọnọ me ejit kiji ibe ke kpunu ubọk ebesa ikọt inyan̄a eji isibi. ²¹ Eji otutuuk ene mîkup ikeya owuwa usen, kperie inorie geege. Usen ge, Pọọlu onanan̄a ikeke me isi ebikaan̄ uji ya, mè itumu inyi ema ibe, “Ebi une n̄a, mebe enyi mîgban̄ utọn̄ me lek ikọ n̄a ya, mè itele isasan̄a uji me agba achọ Keret, enyi kpemekaan̄ òjelek ichep kechi, kpunu si inu geege eyi mofiat. ²² Ire, me mgbọ keyi, ǹkiriaak enyi ibe, soso, ìkat ejit! Mije, kpunu ene geege me lek kinyi òbokwukwu. Uji gaalek obofiat. ²³ Me eririeen̄ òraraka, ogwu osat Awaji Ogwukaan̄ n̄a, ogwu nkisi ikwaan̄ inyi, înu inikeke me agba lek n̄a, ²⁴ mè itumu inyi emi ibe, ‘Pọọlu katet ukpook! Owu òkpolọlọ ikekeke me isi ogwu Sisa, inyi isibi oyerebet me ibot kwun̄. Mije kwun̄, Awaji îsa me atata nnwọn kan̄ inyan̄a ebek ugwem otutuuk ebi melek kwun̄ ekupbe me emen uji yi.’ ²⁵ Eya orọ, ebi une n̄a, ìtet lek ìnye. Mije, emi nkaan̄ ichechieek me lek Awaji, mè itoon̄ ejit ibe ke ìkpolọlọ irọrọ ike îtumube inyi emi. ²⁶ Ire, ubọk geelek, efet yi môben eji itọbọ irak me ijọn̄ me agba lek achọ ge.” ²⁷ Eji mîkup me inyọn̄ isi mun̄ me okwaan̄ ya ekigwen okwaan̄ Ediria iso akọp mè eririeen̄ ini. Me ejit eririeen̄, me òso akọp mè eririeen̄ ini ya, ebi ìkikọp uji ya eweweek iriọọn̄ ibe ke eji mêkigbet ijọn̄. ²⁸ Ema enenitọ ijọn̄, mè imun̄ ibe ke îdọk iso akọp ejit iba. Sọnja mgbọ iraraka, ema ekpọkpọk itọ, mè imun̄ ibe ke oke ere keya îdọk iso akọp mè ejit go. ²⁹ Ubọk efet egwijo ya okpọkpọ ikiwut ibieen̄ uji kiji itap me ijọn̄, ema efefieek owot ibe ke uji ya mônisi itọbọ me lek ewuuk, mè inito iloma ini me agan̄ edim uji isa itet uji ikaan̄, mè ikup ikiriaak Awaji ibe egwe iwele. ³⁰ Ebi ìkikọp uji ya etọtọt inwenween̄ lek inan̄a isibi itele uji ya, mè inisan̄a gwun̄ uji ya ito me mun̄, mè ifiaan̄ ikirọ kubọk ema ebesi itọn̄ọ iloma òkup me otu uji ito me mun̄. ³¹ Mgbọ Pọọlu omun̄be inu ya, itutumu inyi ogwu ibot akọn̄ ya mè ebi akọn̄ melek kiban̄ ibe, “Ire ebi ife chi inan̄a me uji yi isibi, kpunu ene geege me etete kinyi òbonwọnọ mkpa.” ³² Mgbọ yaage, ebi akọn̄ cha esọsọp olik esabe itobo gwun̄ uji ya, gwun̄ uji ya onanan̄a irọn̄ me okwaan̄, mè ichep. ³³ Me agan̄ egwe, mgbọ egwe okitoon̄ inu, Pọọlu orariaak otutuuk ebi uji ya erie inorie, mè itumu inyi ema ibe, “Chereyi mè ọmọ oso akọp mè usen ini, enyi ekpọkpọ ikup me ufieejit mgbọ geelek, kperie inu geege. ³⁴ Mgbọ yi, soso, ìnye lek ìrie inorie, inyi enyi ekaan̄ efuuk me owot. Me atikọ, kpunu ukut ijeek geege òbonan̄a me ibot ene geege me etete kinyi ichep.” ³⁵ Mgbọ Pọọlu otumube ikọ ya inyi ema isan̄a, ibọbọkọ fituru, mè inyi Awaji itọn̄ me isi otutuuk kiban̄, mè ikpọkọ me lek ikitaka. ³⁶ Inu ya Pọọlu orọbe onenitap ema efuuk me emen. Ema ererie si inorie. ³⁷ Otutuuk otu ifuk kiji ebi ìkup me emen uji ya ìre efit ene iba, mè akọp jaaba, mè gweregwen. ³⁸ Mgbọ ema eriebe inorie ijot, ema etọtọọn̄ otutuuk inorie òsisik me uji ya ifiin̄ me okwaan̄, inyi uji ya ifet. ³⁹ Mgbọ egwe owelebe ita, ebi ìkikọp uji ya ebebene chieen̄ imun̄ emen ọfọ ge, mè imun̄ si inyọn̄ okpoon̄, mè itumu ifieek ibe ke ema mêkọp uji ya itoon̄ me ere ya. Ire, ema kpekọt iriọọn̄ ere ijọn̄ ya orebe. ⁴⁰ Ema enenisọp otutuuk olik iloma cha, mè itele iloma cha me okwaan̄, mè itọn̄ọ si olik esabe itobo uran̄ edim uji ikaan̄, mè itaba awala eyi isi iwele inyi efet, mè iyaka otu uji ikpọ ijọn̄. ⁴¹ Ire, uji ya olilibi itoon̄ me inyọn̄ okpurukpu ge òkup me ògbet ijọn̄ ya, mè isa otu ichim inwaan̄ me emen okpoon̄ ya. Kpeyaka ikọt ibieen̄ isan̄a. Ikpele ekoon̄ cha onenitọọn̄ agan̄ edim uji ya ibak isan̄a. ⁴² Ebi akọn̄ cha enenitọt ibe ke ema mêkpan̄ otutuuk ebi mkpọn ìkup me uji ya, inyi ene geege me lek kiban̄ ikakọt igwọk ìsi ìre ijọn̄, mè ìlibi ìfo ìtoon̄ ema me ibot. ⁴³ Ire, ogwu ibot ebi akọn̄ ya ogbagban ema, mije ìkaweek ibe ekpan̄ Pọọlu. Kpan̄asi ikeya, inyinyi ida ibe ebi geelek ìbekọt igwọk ugwọk edasi ewulu erọn̄ me okwaan̄, mè egwọk efo ijọn̄, ⁴⁴ mè ebi ekariọọn̄ge ugwọk etet uwot mè ọkpọkọ uji òkup me isi mun̄ esa ete esi ere ijọn̄. Sa me ikeya, ema otutuuk ene esisi ire ijọn̄ me esuuk.

¹ Mgbọ otutuuk kiji egwọkbe isi ire ijọn̄, mè inwọnọ mkpa, eji eneniriọọn̄ ibe ke ere ya eji ekupbe ìre achọ Mọlita. ² Ebi ìluk me inyọn̄ achọ ya ekakaan̄ ata ejit òmimin enenen me lek kiji, mè ibọkọ eji itap ubọk ògbegbe. Ike ibot ya okpọkpọ ikirep, mè itap eji utọọk me emen, ife cha esọsọk ukan̄ inyi eji egwele. ³ Pọọlu onenikpulu bọn nkirika me ere ya ibotap me ukan̄. Mgbọ îsabe nkirika cha igbet lek ukan̄, mije uyok ukan̄ ya, ijo ulu ge onanan̄a me emen nkirika cha isibi, mè ilom Pọọlu me ubọk, mè ijeen̄ ibia ikeya. ⁴ Mgbọ ebi ama ya emun̄be ubọk ijo ulu ya ojeen̄be Pọọlu me ubọk, ema ebebene ikitumu me etete kiban̄ ibe, “Me atikọ, ene yi ìkpolọlọ irere ogwu òkpan̄ ene. Mije, înwọnọ mkpa me okwaan̄, ire ijo inu kan̄ oyayaka iniweek si ọmọ imun̄ me inyọn̄ ijọn̄. Awọ îtet, ìkpoluk ugwem.” ⁵ Ire, Pọọlu osisisik ubọk kan̄, ijo ulu ya owawaka irọn̄ inin̄ emen ukan̄, ìkasak Pọọlu unan geege me lek. ⁶ Ife cha ekekikpọ chieen̄ ibe ke Pọọlu ìkpolọlọ ifufuuk. Ire ìkafuuk, ke ìbokpọkpọ inan̄a irọn̄, mè ikwu. Ire, ema mîkpọ igak, mgbọ îjọn̄ọ me lek, kpemun̄ ubọk inu geege orọbe Pọọlu me lek. Ema enwenwene ejit, mè ibe me atikọ, ke ene yi ìre yọk ge. ⁷ Ogwu ibot mkpulu ekigwen Pubọlọs, ogwu ebi Rom etobe ibe ikikpulu otutuuk achọ ya, îkaan̄ owuwa ijọn̄ uko me agba lek ere ya. Pubọlọs yi obọbọkọ eji itap me uwu kan̄, mè iriak eji ichen enenen. Eji eluluk me uwu kan̄ usen ita. ⁸ Me mgbọ ya, ogwu ute me inyọn̄ mkpilaak, lek ìkanye. Ukan̄ îbak ichit lek, ikekigwook si asuk eje eje. Pọọlu onenije isi ikpọ ọmọ, mè itoon̄ ọmọ ubọk me lek, mè iriaak uriaak inyi, lek kan̄ onyenye. ⁹ Mgbọ inu yi orọbe, otutuuk ebi lek ikanyege me inyọn̄ achọ ya enunu me lek kè Pọọlu, Pọọlu ogwagwa ema otutuuk ene. ¹⁰ Ife cha mînyi eji umin me owuwa oniin̄ òkup esese esese me mgbọ eji egọọkbe ema ikup. Mgbọ eji ebenan̄a me achọ ya, ema etatap inorie mè owuwa inu geelek eji mêweekbe me okwaan̄ ijot uji inyi eji. ¹¹ Mgbọ eji ekupbe me ere ya iso onyan̄ ita, eji enenigọọk inin̄ uji ebi Alikisendira ge ekigwen “Awaji Mgban Iba” ikọp inan̄a isi Rom. Uji ya ìkup me achọ ya otutuuk mgbọ utọọk ya. Esa uji ya igwen yọk iba ekigwen Kasitọ mè Polọkis echi ekọbe isi kiban̄ me otu uji ya. ¹² Eji enenikọp isi itoon̄ me ama Sirakọs, mè ikup me ere ya egwe ita, ¹³ mè ininan̄a me ere ya ikọp isi itoon̄ me ama Regiọm. Òfit iwele kan̄, eji esasan̄a uji me ere ya, efet awaji obeben eji ikọp mege egwe ofifit, mè iwele, sabum eji enire ama Putioli. ¹⁴ Eji enenimun̄ owuwa bọn Nte me ama ya. Ema enenibeek ibe eji egọọk ema ekup nde ge. Eji egọgọọk ema ikup, mè inije ifo Rom. Ikeya ke ije osa iben eji itutobo inire Rom. ¹⁵ Bọn Nte ìkup me Rom mînọ ibe ke eji mêkinu. Eya orọ, ema enanan̄a ije inigwook me ama ekigwen “Ewe Apiọs” mè eyi ekigwen “Uwu Iwọ-ifi Ita” inikup ikpọ eji. Mgbọ Pọọlu omun̄be ebirieen̄ chi, itọtọn̄ Awaji, mè ikaan̄ ukarajit. ¹⁶ Mgbọ eji erebe Rom, etetele inyi Pọọlu iluk me lek kan̄, mè ito ogwu akọn̄ ge ibe ikibem ọmọ. ¹⁷ Egwe ita iraraka, Pọọlu ogwegwen otutuuk ebi ibot ebi Ju ititiin̄. Mgbọ ema etitiin̄be, Pọọlu onenitumu inyi ema ibe, “Ebi ngwan̄ n̄a, me atikọ, kpunu ijo inu geege nrọbe ebi kiji, kpunu si ọrọmijọn̄ ebi nte nte kiji geege eyi mfiatbe. Ire, ebi kiji etetet emi me Jeruselem kubọk ogwu mkpọn, mè ikana emi itap me ubọk ebi Rom. ¹⁸ Ebi ibot mkpulu ebi Rom eneniwọlọ emen ikọ ya ikpọ, mè imun̄ ibe ke kpunu ikan geege nrọn̄be eyi ògbegbe mkpa, mè iweek itetele emi inyi ǹje m̀fo. ¹⁹ Ire, ebi Ju ejijit otu oyerebet ya. Mije keya ke mbe esa oyerebet n̄a enu me isi ogwu Sisa. Ìkakaan̄ ikan geege ngwenbe ikeme ebi kiji. ²⁰ Îre mije keyi ke mweek imumun̄ enyi, mè itumu ikọ yi melek kinyi. Ìkare mije ofifi inu ke etap emi mkpọn yi. Îre mije ikpọchieen̄ eyi otutuuk ebi Ijeren ekaan̄be ke etap emi mkpọn.” ²¹ Ife cha efọfọọk Pọọlu ibe, “Eji kpebọkọ-nu ikpa ulook geege òfolek kwun̄ inan̄a me Judia. Kpunu si ebi ngwan̄ kiji geege ìsasa etip inan̄a me ere ya inilook eji òfolek kwun̄, kpetutumu si ijo ikọ geege ibak owu. ²² Mgbọ keyi eji ekiweek inọnọ inu owu okeekbe òfolek ebi otu-ogbo yi eyi ekigwen Oniin̄ Okaan̄-ene, mije, ebi ene me ere geelek mêkitumu ikọ ikeme ebi otu-ogbo yi.” ²³ Ema melek kè Pọọlu enenitumu ifieek me lek ofifi usen ema ebeyaka inititiin̄. Mgbọ usen ya orebe, ema enunu me uwu ere Pọọlu olukbe. Otu ifuk ebi ìnunu me usen ya îwa igak ebi inunu me adasi usen. Pọọlu onenibene me ewelegwe ya ilook ema etip òfolek mkpulu eyi Awaji mege ifit egwe usen ya, mè ikisa inu egebe me emen Ikan kè Mosis mè emen ikpa ebi Nriran ikiweek inwenwene ebi ife cha ejit òfolek ogwu Jisọs orebe. ²⁴ Usini ebi ife cha enwenwene ejit bak me lek ikọ Pọọlu otumube. Ire, usini kiban̄ kpechieek. ²⁵ Wọlọwọlọ oninin̄ me etete kiban̄, ema echeche lek, mè ibene ikije ifon mgbọ Pọọlu otumube òta ikọ kan̄ inyi ema. Òta ikọ ya ìre eyi Pọọlu otumube inyi ema ibe, “Ikọ Ekwukwu Mbuban otumube me otu kè Asaya ogwu nriran inyi ebi nte nte kinyi ìkpọkpọ itat. Ekwukwu Mbuban ìtumu inyi Asaya ibe, ²⁶ ‘Je si lek ife chi, mè tumu nyi ema ibe, Enyi mênọ, ire enyi kpebekọt igobo itet. Enyi mêmun̄, ire enyi kpebekọt imọọn̄ itet. ²⁷ Mije, ejit ife chi înye enenen. Utọn̄ kiban̄ ìkayaka ìkigwat lek ìnọ ikọ. Ema mîtet chieen̄ kiban̄ ichit Mebe ìkare ikeya, kè ema esa chieen̄ kiban̄ emọọn̄ inu, mè esa utọn̄ kiban̄ ènọ ikọ, mè esa ejit kiban̄ egobo inu ètet, mè ègwu ekom ènu me lek n̄a, inyi emi ǹgwa ema.’ ²⁸ “Eya orọ, emi ǹkiweek ibe mè enyi eriọọn̄ ibe ke Awaji îra iria unyan̄a kan̄ yi ijet ebi ekarege ebi Ju. Ebi ife chi mêgban̄ utọn̄, mè ibọkọ si unyan̄a yi itap.” [ ²⁹ Ikọ keyi itata Pọọlu me otu, ebi Ju cha ebebene ikiwut ifan̄a me etete kiban̄, mè inan̄a me ere ya isibi.] ³⁰ Pọọlu îluk me Rom otutuuk acha iba me uwu eyi ubọk kan̄, eyi îbọkọbe, mè ikikpe ikpoko me lek. Ebi ene ekekinu inikpọ ọmọ, ọmọ okekibọkọ ema itap ijaan̄ lek. ³¹ Pọọlu okukup me Rom ya, mè ikilook ata etip eyi mkpulu eyi Awaji, mè itet lek inye ikijeen̄ ene geelek inu òfolek Okaan̄-ene Jisọs Karais, ìkatet ukpook. Kpunu ene geege òyayaka ikput ọmọ.