Timọti eyi òso iba

Timọti eyi òso iba

¹ Emi Pọọlu, ogwu òrere ogwu otuchieen̄ kè Jisọs Karais inan̄a me nkeek Awaji, nge ikpa etip yi. Emi ìre ogwu otuchieen̄ kè Jisọs Karais bak me lek inenilook ebi ene etip òfolek ugwem eyi òkup me emen kè Jisọs Karais, eyi Awaji ochieekbe use inyinyi ebi ene. ² Emi nge ikpa yi inyi owu Timọti, gwun̄ n̄a ogwu mmabe. Atata nnwọn mè nsan mè esuuk eyi Awaji Ute mè Okaan̄ kiji Jisọs Karais ikup inyi owu! ³ Ntọn̄ Awaji ogwu nkisa otutuuk ejit n̄a isi ikwaan̄ inyi, kubọk ebi nte nte n̄a esibe inyi me ukot ikaan̄. Nkitọn̄ ọmọ mgbọ nkitap owu me uriaak, eririeen̄ mè ikarek. ⁴ Ǹkiweek imumun̄ owu, inyi ǹkaan̄ unwọọn̄, mije, ǹkawuuk ito ya otobe me mgbọ mbanan̄a. ⁵ Ǹkawuuk ata ichechieek okaan̄be me lek kè Jisọs Karais. Lọis nga nga kwun̄ odasi ikaan̄ òjelek ichechieek yi, Yunais nga kwun̄ oyayaka inikaan̄. Mgbọ yi, nriọọn̄ ibe, me atikọ, ke òjelek ichechieek yi si òwa me emen kwun̄ okupbe. ⁶ Mije keyi, ǹkitap owu me ejit ibe owu òkosa uche eyi Awaji onyibe owu mgbọ ntoon̄be owu ubọk me ibot ya òsi ikwaan̄. Kachieek ibe ikpọkpọ ikup ikeya, ⁷ mije, Awaji ìkanyi eji Ekwukwu eyi môrọbe inyi eji ere ebi ukpook-owot. Awaji ìnyi eji Ekwukwu eyi mônyibe eji unye mè imumechieen̄, mè irọ inyi eji ekekọt etet lek kiji ekaan̄. ⁸ Eya orọ, kalibi esip me itutumu ikọ òfolek Okaan̄ kiji, kalibi si esip mije n̄a ogwu òkup me mkpọn mije kan̄. Sa me unye Awaji gọọk emi mun̄ ufialek mije ata etip eyi Awaji, ⁹ ogwu ònyanyan̄a eji, mè igwen eji ibe eji eneluk ugwem òkup me mbuban. Igwen yi Awaji ogwenbe eji, ìkare mije inu geege eji erọbe. Ire, Awaji ìgwen eji mije nkeek eyi îkaan̄be me lek kiji, melek atata nnwọn kan̄ eyi înyibe eji inan̄a me lek kè Jisọs Karais, sabum enirom linyọn̄. ¹⁰ Mgbọ yi, atata nnwọn yi îsibi utoon̄ inan̄a me lek inunu ogwu Unyan̄a kiji Jisọs Karais, ogwu ònunu inikpan̄ mkpa, mè isa me ata etip kan̄ ichili ugwem ikakaan̄ge itata ibook inyi ebilene eluk, mè ekayaka ìkwu mkpa. ¹¹ Mgbọ yi, Awaji îgobo emi kubọk ogwu ulook, mè ogwu otuchieen̄, mè ogwu ijejeen̄ ibe emi ǹkensa ata etip yi ǹkana ere. ¹² Îre mije ilolook ata etip yi ikana ke nkibọkọ otutuuk ufialek chi geelek. Ire, esip geege ìkatet emi, mije, nriọọn̄ ogwu Awaji ogwu nchieekbe me lek orebe. Ejit n̄a si înye ibe ke Awaji môgbala chieen̄ ikpọ inu nsabe itap ọmọ me ubọk mege ire mgbọ òta usen ya môrebe. ¹³ Tet atikọ cha njeen̄be owu nye, mè kikpọ me lek sa kijeen̄ ebi ofifi ene, mè keke nye me ichechieek mè imumechieen̄ eyi eji ekaan̄be me emen kè Jisọs Karais. ¹⁴ Sa unye eyi Ekwukwu Mbuban ogwu òluk me emen kiji tet atalek inu ya eyi Awaji otapbe owu me ubọk kaan̄ nye. ¹⁵ Owu oriọọn̄ ibe ke otutuuk ebi ntitiin̄ Awaji ìkup me agan̄ Esia mîyat itele emi isan̄a kpai. Faigelọs mè Amọganis si mîgọọk ilibi iyaak emi. ¹⁶ Awaji irọ ebi uwu kè Onesiferọs nsan, mije, ọmọ înu owuwa mgbọ inikpọ emi, mè inyi emi ukarajit! Ìkalibi esip ibe ke emi ǹkup me mkpọn. ¹⁷ Ire, mgbọ yaage îrebe Rom, ibebene ikijijen̄e ikana ikiweek emi, mè iniweek emi imun̄. ¹⁸ Okaan̄-ene ikaan̄ nsan me lek kan̄ me òta usen ya! Owu oriọọn̄ ijaan̄ lek ubọk îsabe isi owuwa ikwaan̄, mè itap ubọk inyi emi me Efesọs.

¹ Me mgbọ yi, owu gwun̄ n̄a, keke nye sa me atata nnwọn ya eyi eji ekaan̄be inan̄a me ubọk kè Jisọs Karais. ² Ikọ onọbe nkitumu me isi ogbogbo ene, sa ikọ cha jeen̄ ebi geelek otoon̄be ejit me lek ibe ke mêkọt ijeen̄, inyi esa esi ejeen̄ ebi ofifi ife. ³ Gọọk eji kat ejit bọkọ ufialek kubọk ata ogwu akọn̄ kè Jisọs Karais. ⁴ Ogwu akọn̄ geelek òkup me akọn̄ ìkakitap lek kan̄ me lek inu ebi ekarege ebi akọn̄ ekirọ. Ulọk kan̄ mgbọ geelek ìre ikekirọ inu òbokibele ogwu ibot kan̄ ejit. ⁵ Ikeya si, ogwu òkigọọk iwut ifan̄a ekot ìkaboben inu geege, îtata ìlilibi ekot ya igọọk me ikan ifan̄a ekot. ⁶ Ubọk yaage si, ogwu uko ònyenye ubọk isi ikwaan̄ me uko ogbe ogwu òbodasi ibọkọ uche inu erọkọbe me uko. ⁷ Keek ekiket òfolek inu chi nkitumu, mije, Awaji môrọ inyi owu ògobo otutuuk inu chi òtet. ⁸ Keek inu òfolek kè Jisọs Karais gwun̄ owot iman kè Debit. Îre ọmọ ke Awaji ojomo me mkpa, kubọk nkitumu me emen ata etip eyi nkilook. ⁹ Mije keyi ke nkibọkọ otutuuk ufialek chi ire lek eyi etetbe emi igon me mkpọn ikeyi kubọk ogwu ìkakisun̄ ikan. Ire, ejit îbele emi ibe ke ìkare ikọ Awaji ke egon me mkpọn. ¹⁰ Eya orọ, ǹkikat ejit ibeme ufialek chi geelek mije ebi Awaji ogobobe inyi lek kan̄, inyi ema si esa me ikeyi ekaan̄ unyan̄a melek umin mè uja eyi ikakaan̄ge okputut, eyi Jisọs Karais okirọ inyi ene ekaan̄. ¹¹ Ikọ mbatumu mgbọ keyi ìre ikọ ògbegbe ibe etoon̄ ejit me lek: Ire eji igọọk Jisọs, mè ikwu mkpa, eji mêluk melek kan̄. ¹² Ire eji ikeke inye melek kan̄, eji mêgọọk ọmọ igbaan̄ ikpulu me mkpulu kan̄. Ire eji ijit ọmọ, ọmọ si môjit eji. ¹³ Ire eji kpegbe ebi ebetoon̄ ejit me lek, ọmọ îgbe ogwu ebetoon̄ ejit me lek, mije, ọmọ ìkpokọt itele irọrọ ikọ kan̄ iso. ¹⁴ Kikeek ebi ntitiin̄ Awaji inu chi. Sa me erieen̄ Awaji taba ema ubọk me utọn̄, inyi ema ekakigbini ikọ, mije, igbini-ikọ ìkakaan̄ oruru geege. Otutuuk inu îkirọ ìre ifafiat ejit ebi geelek ìkukup ikigban̄. ¹⁵ Nye lek kirọ inu geelek efuuk kwun̄ okọtbe, inyi Awaji ibọkọ owu itap kubọk ogwu òrọriọọn̄ ikijeen̄ atikọ kan̄ me oniin̄ òtatat, inyi owu okare ogwu ikwaan̄ ogwu ubọk ikwaan̄ kan̄ okisa esip ijet. ¹⁶ San̄a lek kwun̄ me lek burubut mbele echi ìkakinyi Awaji umin, mije, ebi geelek ìkibele mbele kechi mêrọriọọn̄ ikifo isi ikiluk ugwem echi ìkakinyi Awaji umin. ¹⁷ Inu geelek ema ekijeen̄ me emen mbele kiban̄ cha ìkup kubọk njijọ inya òkpọkpọ ikitaka iwele chieen̄, mè ikitaka ene ufuk ijibi. Ene iba me lek ebi ìkijeen̄ ijo ijejeen̄ chi ìre Amenas mè Filetọs. ¹⁸ Ene iba chi mîtele atikọ, mè ikikan̄ ataak ibe ke ebi ìchechieek me lek kè Jisọs Karais mîra iwuuk lek ijojomo me mkpa iraka. Ikeya ke ema esa ifiat ichechieek ogbogbo ebi ene. ¹⁹ Ire, ikọ Awaji ìkup kubọk ewuuk irak uwu, ìkpọkpọ ikeke inye! Kpunu inu geege òbokọt isisik. Ikọ egebe ikam me lek ewuuk ya ìre, “Okaan̄-ene îriọọn̄ ebi eyi kan̄,” melek si, “Ene geelek òrere ogwu eyi Okaan̄-ene, isan̄a lek kan̄ me lek ijo inu.” ²⁰ Me emen uwu geelek òmimin, ìkare inu itap-inu echi alata araran̄ mè alata okuket gaalek okikup, echi uti mè echi ibat si ìkekikup. Usini ke ekisa itap inu inyi ebi ichen inyi isibi ogwukaan̄ uwu isi, usini ke ekisa itap inu geelek ikadoge umin. ²¹ Ikeya si, ene geelek ògwọgwọk ubọk kan̄ isan̄a me lek ijo inu chi, ene ya îkaan̄ oruru inyi Nte uwu kan̄, òrere Okaan̄-ene. Eya orọ, Okaan̄-ene môsan̄a ene ya isun̄ esese, mè ikisa ọmọ isi ikwaan̄ òkakaan̄ umin, mije, ọmọ îkup me mbem-lek ibe esa ọmọ esi ata ikwaan̄ geelek òkukup isisi. ²² Libi nan̄a me lek ijo ulọk òkilọk nsabọn irieen̄. Gọọk ebi ìkigwen Okaan̄-ene me ejit òtatana. Chieek mkpa kirọ ata irọrọ, mè kaan̄ ichechieek, mè imumechieen̄, mè esuuk. ²³ Je nan̄a me lek burubut igbini-ikọ ikakaan̄ge ifuk-ibot geege me emen, mije, owu oriọọn̄ ibe ke ìkisa ibaak mè etim inu. ²⁴ Ogwu ikwaan̄ Okaan̄-ene ìkpore ogwu òkibaak ibaak, ire, ìbore ogwu òkirọ inu esuuk esuuk melek ebi ene, mè ata ogwu ijejeen̄, mè ogwu òkikọt ime inu. ²⁵ Ọmọ môre si ogwu òkisa me esuuk esuuk iteme ebi ìkije ikeme ikọ kan̄ nteme me ere ife cha ejebe ilọ. Usini mgbọ, sa me ikeyi, Awaji môrọ inyi ife cha egwu ekom, mè eneriọọn̄ atikọ. ²⁶ Me oniin̄ òkup ikeyi, ife cha mêkọt ilibi inwọnọ ufe Yọk otipbe isa itet ema ikaan̄, inyi ema ekerọ ekiket kan̄.

¹ Gban̄ utọn̄ me lek ikọ keyi mbatumu. Me mgburudun̄ mgbọ, ufialek òmimin enenen môkup. ² Ebilene mêkima lek kiban̄ gaalek, kpebekikeek ebi ofifi ene. Ulọk ebek ikpoko mômin enenen, ema mêkigugo lek, mè ikigumu lek, mè ikigigama ene, mè ikinye ibot inyi nte kiban̄ mè nga kiban̄. Ema kpebekitọn̄ ebi ìrọ ema ata inu. Kpebekisun̄ lek kiban̄ esese inyi Awaji. ³ Mgbọ cha si, ebilene kpebekikaan̄ ejit nsan, kpebekitele ijo inyi ene. Ema mêre ebi ìkitumu ene ifiat, mè ebi afa, mè ebi ikpak, kpebekima ata inu geege. ⁴ Ema mêre ebi ìkisa ofiaan̄ ileke ene itap me uyọrọlek, mè ebi mêkọtbe irọ chieen̄ ijo inu geelek, mè ebi ugumulek môkirọ inyi ekakibọkọ nteme, mè ebi ìkima utop linyọn̄ igak Awaji. ⁵ Ema mêkirọ kubọk ema mîriọọn̄ Awaji. Ire, me oniin̄ ikọ Awaji, ọrọmijọn̄ gaalek ke ema ebekitet ikaan̄ inye, mè ikijit unye òkukup me emen irọriọọn̄ Awaji. Eya orọ, libi nan̄a me lek òjelek ebi ìkup ikecha! ⁶ Usini me lek ife chi ekinween̄ lek iraka inin̄ uwu ene isi isa nlilọ ijejeen̄ kiban̄ ileke wewe ebibaan̄ ebi ijo ulọk okupbe me emen, ebi ìkichiaan̄ ubọk iweek inu geelek, mije ukpook ijo inu ema erọbe okikeme ema. ⁷ Ebi wewe ebibaan̄ chi ekpọkpọ inu ikikween̄, ire, kpekọt iriọọn̄ atikọ eyi Awaji. ⁸ Ike Janes mè Jembiris ejebe ikeme Mosis me ukot ikaan̄, ikeya si ke ebi ife nlilọ ifuk-ibot chi Awaji ojitbe mije nlilọ ichechieek kiban̄, ekije ikeme atikọ eyi Awaji. ⁹ Ire, ema kpebeje ire ere geege, mije, mbubut kiban̄ môkpọk mbum me isi ebilene ike eyi kè Jenas mè Jembiris okpọkbe mbum. ¹⁰ Mgbọ yi, owu ora iriọọn̄ otutuuk ijejeen̄ n̄a mè ubọk nsun̄be lek n̄a, mè inu nkiweek irọrọ me ugwem n̄a. Owu omun̄ ichechieek n̄a mè ujọn̄ọ ukarajit n̄a, mè imumechieen̄ n̄a, mè ubọk nsabe ikime inu. ¹¹ Owu omun̄ si ubọk ebi ene ekirọ ikeme emi, mè ufialek mbọkọbe, mè inu geelek òsisibi inyi emi me Antiọk mè Aikoniọm mè Lisitira, mè otutuuk irọrọ ikeme echi erọbe ikeme emi, mè imun̄ si ubọk Okaan̄-ene otababe emi isibi me emen otutuuk ufialek cha. ¹² Me atikọ, ebi ene mêrọ ikeme ebi geelek ìchechieek me lek kè Jisọs Karais, mè ikiluk ugwem òkinyi Awaji umin. ¹³ Ire, ebi ikpak mè ebi ofiaan̄ cha mêrọriọọn̄ ikifiat igak ubọk ema ekupbe. Ike ema ekifiaan̄ ebi ene, ebi ofifi ife mêkifiaan̄ ema si! ¹⁴ Ire, owu, keke nye me lek atikọ Awaji eyi okween̄be, mè ibọkọ ichieek inye, mije, owu oriọọn̄ ebi ìjejeen̄ owu atikọ ya. ¹⁵ Owu oriọọn̄ si ibe ke bene me karake owu orebe sọntiik gwun̄ ke owu oriọọn̄ ikọ Awaji eyi òkup me mbuban. Ikọ Awaji yi môkọt irọ inyi owu òkaan̄ iriọọn̄-inu eyi òkisa unyan̄a inu sa me ichechieek me lek kè Jisọs Karais. ¹⁶ Otutuuk inu geelek òkup me Ikpa Mbuban, ege inan̄a me unye eyi Awaji igọọk me ubọk Awaji onyibe ida, mè ijeen̄ ibe ege. Inu chi ìre inu mêsabe ikijeen̄ atikọ eyi Awaji, mè isa ikikan̄ inu inyi ebi ìjeje ilọ, mè isa ikinen̄e inu òlọlọ me ugwem ene isun̄ itat, mè isa ikiteme ene ubọk mêsabe ikiluk ugwem me ata irọrọ. ¹⁷ Sa me ikeyi, ogwu eyi Awaji môre ogwu ekpukpobe ijaan̄ me oniin̄ geelek, inyi môkọtbe irọ ata inu geelek.

¹ Ǹkinyi owu nteme keyi me isi Awaji mè isi kè Jisọs Karais ogwu òbosibi oyerebet me ibot ebi ìkup me ugwem mè ebi ìkwukwu, me mgbọ môsabe mkpulu kan̄ inu kubọk ogwu ubọọn̄. ² Tumu ikọ Awaji kana! Chieek mkpa kitumu mgbọ geelek, mgbọ òtatat mè mgbọ ikatatge. Kitumu sa teme ebi ene nteme inyi eje etat, mè kisa kan̄ inu nyi ene, mè kisa tap ene efuuk me owot. Ire, mgbọ geelek okijeen̄ inu, kigwuun̄ chieen̄, mè kaan̄ ujọn̄ọ ukarajit. ³ Mije, mgbọ mônu, mgbọ ebilene kpebeyaka ikigban̄ utọn̄ me lek ata ijejeen̄ eyi Awaji. Kpan̄asi ikeya, ema mêkikpulu ogbogbo ebi ijejeen̄ iwak ikana lek kiban̄, inyi ekejeen̄ ema inu utọn̄ kiban̄ okison iweek inọnọ. ⁴ Ema mêda utọn̄ kiban̄ isan̄a me lek atikọ, mè ikisi igban̄ urọk ikike ikakaan̄ge ibot. ⁵ Ire, owu, tet lek kwun̄ kaan̄ me inu geelek, mè kat ejit me emen ufialek. Kisi ikwaan̄ kubọk ogwu òkitumu ikọ Awaji, mè kirọ inu geelek eyi irek ikwaan̄ kwun̄ odobe. ⁶ Ire emi, mîwuuk lek isa emi igwa ngwugwa kubọk miin̄ egwookbe me ijọn̄. Mgbọ mbatele ugwem keyi îra ikem. ⁷ Nra itim akọn̄ ya ubọk îgbebe, mè ilibi ekot n̄a isi ire òta. Ntet ichechieek n̄a me lek Awaji inye. ⁸ Eya orọ, mgbọ yi, mkpukpe eyi ntim-mkpan̄ ọmọ òwa okikup iban emi. Mkpukpe yi ìre okpibot ubọọn̄ esun̄be iban ebi ata irọrọ, eyi Okaan̄-ene ogwu òkifieek unen oyerebet mônyibe emi me Usen Oyerebet Awaji ya. Ìkare emi gaalek ke ìbonyi, mônyi si iso otutuuk ebi ìkup me mbem-lek ikikpọ chieen̄ me inunu kan̄. ⁹ Ikaan̄ ubọk geelek oriọọn̄be, gwat lek na namun̄ emi chieen̄, kafiat mgbọ, ¹⁰ mije, Dimas îma inu linyọn̄ keyi, mè ibak me lek keya ilibi itele emi ifo Teselonaika. Kirisens îsi Galesia, sa Taitọs osi Dalimesia. ¹¹ Îtata Luk gaalek ogọọk emi ikup. Mgbọ obonu, sa Mak gbaalek na, mije, ọmọ îkaan̄ ntap-ubọk inyi emi me lek ikwaan̄. ¹² Nria Taikikọs ibe isi Efesọs. ¹³ Osibonu, sa ọfọnti utọọk n̄a ya ntelebe me ubọk kè Kapọs me ama Torowas sa gbaalek na, mè sa ikpa n̄a cha si gbaalek na, ògak ge ikpa echi esabe ikpa anam irọ cha. ¹⁴ Alikisenda, ogwu òkisa okwukwut irom inu, îrọ emi inu inaan̄ me lek ikpele ikpele. Okaan̄-ene môkpe ọmọ mkpukpe ikpọ me lek inu îrọbe emi. ¹⁵ Owu si, riọọn̄ lek kwun̄ me lek kan̄, mije, ọmọ îkije ikeme ikọ Awaji eji ekitumu enenen. ¹⁶ Me adasi oyerebet esibibe me ibot n̄a, otutuuk ene elilibi itele emi. Emi gaalek nkeke ifọọk ikọ ibot n̄a. Ǹkibeek Awaji ibe itele inyi ema. ¹⁷ Ire, Okaan̄-ene îgọọk emi ikeke, mè inyi emi unye, inyi ǹkọt ǹtumu ikọ Awaji mè otutuuk ebi ekarege ebi Ju ìkup me ere ya egọọk enọ. Okaan̄-ene înyan̄a emi isibi me otu egbe inwọọn̄. ¹⁸ Mônyan̄a emi isibi si me ijo inu geelek eberọ emi, mè isa emi me utelelek isi itap me mkpulu kan̄ me emen inyọn̄. Itọn̄ ikup inyi ọmọ mgbọ geelek, mgbọ geelek. Ikup ikeya! ¹⁹ Tọp Pirisila mè Akwila amọn nyi emi, mè tọp si otutuuk ebi uwu kè Onesiferọs. ²⁰ Irasitọs òwa me Kọrint okupbe, Tọrọfimọs ke ntele me Militọs, mije lek kan̄ ikanyege. ²¹ Week ike owu mônube lek n̄a sabum mgbọ utọọk ònore. Yubulọs mè Pudinsi mè Lainus mè Kọlọdia mè otutuuk bọn Nte mîtọp owu amọn. ²² Okaan̄-ene ikup melek ekwukwu kwun̄! Atata nnwọn eyi Awaji ikup inyi otutuuk kinyi!