Ebi Teselonaika eyi òso iba

¹ Emi Pọọlu mè Sailas mè Timọti ege ikpa etip yi ijet enyi ebi ntitiin̄ Awaji me ama Teselonaika, ebi ìrere ebi Awaji ogwu Nte kiji mè Okaan̄-ene Jisọs Karais ekaan̄be. ² Atata nnwọn mè esuuk eyi Awaji Ute mè Okaan̄-ene Jisọs Karais ikup inyi enyi. ³ Bọn Nte n̄a, îgbe ibe eji eketọn̄ Awaji mgbọ geelek mije kinyi. Irọrọ ikeyi ìkpọkpọ itat, mije, ichechieek kinyi ìkpọkpọ ikimin, imumechieen̄ enyi ekaan̄be me etete kinyi si ìkpọkpọ ikimin. ⁴ Eya orọ eji ekisa enyi igugo lek inyi ntitiin̄ Awaji geelek, mije enyi ekatbe ejit, mè ikeke inye me ichechieek kinyi me emen otutuuk ntọ-mkpọ geelek òkinu inyi enyi, mè emen irọrọ ikeme geelek eyi ebi ene ekirọ ikeme enyi. ⁵ Ike enyi ekekebe inye me emen ufialek chi geelek, ìkijeen̄ ibe ke oyerebet Awaji ìre unen. Mije enyi ekekebe inye, Awaji îfuk enyi kubọk ebi ìgbegbe igọgọọk ikaan̄ uche me lek ugbana eyi mkpulu kan̄, eyi enyi ekibak me lek ibọkọ ufialek chi. ⁶ Awaji ìre ogwu òkirọ inu òtatat mgbọ geelek. Eya orọ, ogwu itap enyi ufialek me lek, Awaji môtap si ene ya ufialek me lek. ⁷ Enyi ebi ìkukup me emen ufialek mgbọ keyi, Awaji mônyi enyi melek kiji isiki efuuk me mgbọ Okaan̄-ene Jisọs môjebe melek ukan̄ òkisasak inan̄a me emen inyọn̄ isibi inu, ọmọ mè unye unye ebi osat kan̄. ⁸ Mgbọ ya, ebi ekariọọn̄ge Awaji, mè ebi geelek ekachieekge igbagban̄ utọn̄ me lek ata etip eyi Okaan̄-ene Jisọs, Okaan̄-ene môsulu ema osusut. ⁹ Okaan̄-ene môjijaka ema isi ire mgbọ ikakaan̄ge itata, mè ilap ema isan̄a me isi kan̄, inyi ema ekakaan̄ uche me lek umin mè uja mè unye kan̄. ¹⁰ Inu chi ìbomọnọ irek me usen Okaan̄-ene mônube inibọkọ itọn̄ me etete ebi eyi kan̄, mè ibọkọ umin me etete ebi geelek ìchechieek me lek kan̄. Enyi si me otu ifuk ebi ìbenyi ọmọ umin mè inwọọn̄ ọmọ, mije, enyi mîchieek me lek ata etip kan̄ eyi eji elookbe enyi. ¹¹ Eya orọ, eji ekiriaak uriaak mgbọ geelek me ibot kinyi ibe mè Awaji kiji irọ inyi enyi eluk ugwem ògbegbe igwen eyi îgwenbe enyi. Eji ekiriaak si uriaak ibe Awaji isa unye kan̄ irọ inyi ata ulọk geelek enyi ekaan̄be irọ iso, mè irọ si inyi inu geelek enyi ekirọ bak me lek ichechieek enyi ekaan̄be ije ijaan̄. ¹² Mije, sa me ikeyi, erieen̄ Okaan̄ kiji Jisọs môbọkọ itọn̄ inan̄a me ugwem kinyi. Enyi si mêbọkọ itọn̄ me emen Okaan̄-ene inan̄a me lek atata nnwọn eyi Awaji kiji mè Okaan̄ kiji Jisọs Karais.

¹ Bọn Nte n̄a, òfo me lek inunu eyi Okaan̄ kiji Jisọs Karais obokpọk inu, mè chinichini eyi eji melek kan̄ ebegbaan̄ ichichini, eji ekibeek enyi ibe, ² soso, ikagwat lek ìsisik ejit, mè ìfieek owot mije ukpatu eyi ekikpa ikana ibe ke usen Okaan̄-ene obonu îra inunu iraka. Ubọk geelek ekitumu ibe ke ìre eji eben etip yi me nriran, mè ikijeen̄ si me ikọ otu, mè ige itap me ikpa iria ijet enyi, ikachieek! ³ Ikachieek ibe ene geege ifiaan̄ enyi, mije, usen ya ìkabonu, îtata mgbọ ikpele unye-ibot, mgbọ ebi ene mêkije ikeme Awaji ìdadasi ire. Emen mgbọ unye-ibot ya ke ogwu òfiat Ikan Awaji obosan̄a lek kan̄ isibi. Awaji îwuuk lek isun̄ ibe ke ọmọ môjijaka ene yi me ama yọk. ⁴ Ene yi môbene lek kan̄ ifo inyọn̄, mè ikije ikeme inu geelek ebi ene ekitọbọ ebum inyi mè ikimọnọ kubọk Awaji kiban̄. Sa me ibene-lek yi, ene yi môraka inin̄ emen Uwu Mbuban isi isiki ikweek, mè ikitumu ibe ke ọmọ me lek kan̄ ore Awaji. ⁵ Ìre enyi kpeyaka ikeek ibe ke nkitumu ikọ yi inyi enyi mgbọ ngọọkbe enyi ikup? ⁶ Enyi me lek kinyi mîriọọn̄ inu òtetet ene yi ikaan̄, inyi ikakọt ìsan̄a lek kan̄ ìsibi mgbọ keyi mege ire mgbọ mgbọ kan̄ môrebe. ⁷ Mgbọ keyi, unye ya eyi òkirọ inyi ebi ene ekefiat Ikan Awaji ọmọ òwa onween̄be lek ilet ikup ikisi ikwaan̄ me linyọn̄ keyi. Ire, îkaan̄ ogwu òkikpukput. Unye ya ìkpokọt isan̄a lek kan̄ isibi mege ire mgbọ Awaji môsan̄abe ogwu òkikput ọmọ ya isan̄a. ⁸ Mgbọ ya ke ogwu òfiat Ikan Awaji ya me lek kan̄ obosan̄a lek kan̄ isibi. Ire, Okaan̄-ene Jisọs isinu, môsa efet otu kan̄ ikpan̄ ene ya, mè isa ikpele utoon̄ kan̄ ifiat unye ene ya mè ubọk ikwaan̄ ene ya isan̄a kpai. ⁹ Ogwu òfiat Ikan Awaji ya ìbonu me unye eyi Yọk, mè ikirọ owuwa inu ukechieen̄, mè ofiaan̄ ofiaan̄ inu ijejeen̄, mè ataak ataak inu ukpook òkup esese esese. ¹⁰ Môsa ikpak ikpak lek ataak geelek ifiaan̄ ebi Awaji osun̄be ibe echechep. Ife chi ebechep, mije ema ekachieekge imama atikọ eyi Awaji eyi mesabe inyan̄a ema isibi. ¹¹ Mije ema ejitbe atikọ yi, Awaji îtap ema ikpele welewele, inyi ema ekechieek ikọ ataak geelek ene geelek otumube inyi ema. ¹² Sa me ikeyi, otutuuk ebi ìkinwọọn̄ irọrọ ijo inu, mè ijit ichechieek me lek atikọ Awaji, Awaji môtip ema oyerebet. ¹³ Ire, bọn Nte n̄a ebi Okaan̄-ene omabe, îgbe ibe eji ekenyi Awaji itọn̄ mgbọ geelek mije kinyi. Awaji ìgobo enyi bene me ibebene, inyi enyi enechieek me lek atikọ kan̄, mè Ekwukwu Mbuban isan̄a enyi isun̄ esese inyi ọmọ, mè ọmọ ìsa me lek inu chi inyan̄a enyi isibi. ¹⁴ Îre ata etip eji elookbe enyi ke Awaji osa igwen enyi itap me emen unyan̄a yi, inyi enyi enegọọk ekaan̄ irek me emen umin mè uja eyi Okaan̄ kiji Jisọs Karais. ¹⁵ Eya orọ, bọn Nte n̄a, ìkeke ìnye, mè ìtet otutuuk atikọ cha, echi eji ejeen̄be enyi me ikọ otu mè echi eji egebe me ikpa ijet enyi ìnye. ¹⁶ Okaan̄ kiji Jisọs Karais me lek kan̄, mè Awaji ogwu Nte kiji, ogwu òmun̄ eji me chieen̄, mè isa atata nnwọn kan̄ inyi eji ukarajit eyi ikakaan̄ge itata, mè irọ inyi eji ekaan̄ atata ikpọchieen̄ me lek kan̄, ¹⁷ ikat enyi ejit, mè itap enyi efuuk me owot me emen ata inu geelek enyi ekirọ, mè ata ikọ geelek enyi ekitumu!

¹ Bọn Nte n̄a, me ikakana ikọ n̄a igwook, ǹkibeek enyi ibe, ìriaak uriaak me ibot kiji, inyi ikọ Okaan̄-ene igwat lek ikana ere geelek, mè ebi ene enyi si ikọ yi umin kubọk enyi enyibe. ² Ìriaak uriaak si ibe Awaji inyan̄a eji me ubọk ebi ikpak mè ebi ijo ife, mije, ìkare otutuuk ene echieek me lek kè Jisọs Karais. ³ Ire, Okaan̄-ene ìre ogwu atikọ. Ọmọ môtap enyi efuuk me emen, mè ibem enyi, inyi enyi ekanin̄ me ubọk ogwu òchicha, òrere Yọk. ⁴ Eji mîtoon̄ ejit ibe ke Okaan̄-ene môrọ inyi enyi ekerọ inu geelek eji ebe enyi erọ, mè ekerọ si ikeya efo isi. ⁵ Okaan̄-ene isa ejit kinyi ifo lek imumechieen̄ eyi Awaji okaan̄be me lek kinyi, mè ukarajit eyi Karais okinyi. ⁶ Bọn Nte n̄a, eji mîsa me erieen̄ Okaan̄-ene Jisọs Karais inyi enyi ida ibe, ìkpebe lek kinyi me lek bọn Nte geelek ìrere ugbek, ebi kpekirọ ọrọmijọn̄ eyi enyi ekween̄be me ubọk kiji, òrere ikekisi ikwaan̄. ⁷ Enyi me lek kinyi mîriọọn̄ ibe ke îgbe ibe enyi ekekpọ inu me ubọk kiji erọ. Eji kpere ebi una-ifi mgbọ eji egọọkbe enyi ikup. ⁸ Eji kpebọkọ ene geege inorie irie me eji ekakpege ewe. Kpan̄asi ikeya, eji ekisi ikwaan̄ eririeen̄ mè ìkarek, mè ikikwukwulu ikeya isa ikikpukpo lek kiji, inyi eji ekaben ufialek kiji ìnikeme ene geege me etete kinyi. ⁹ Ìkare ibe ke eji kpegbe ebi enyi mekpọbe owot ke eji ebaalek ikpọ lek kiji. Ire, eji erọ ikeya, inyi enyi ekpọ inu me ubọk kiji erọ. ¹⁰ Eya orọ, mgbọ eji egọọkbe enyi ikup, eji mînyi enyi ikan ibe, “Ene geelek ikasige ikwaan̄, ikarie inorie!” ¹¹ Eji etumu ikọ yi, mije, eji mînọ ibe ke usini kinyi ìre ugbek, kpekirọ inu geege igak ijeje ikana ikikpa ene. ¹² Eji mîsa me erieen̄ Okaan̄-ene Jisọs Karais inyi òjelek ife ìkup ikeya ida, mè itaba ema ubọk me utọn̄ ibe egele lek egwook, mè esi ikwaan̄ ekesa ekpọ lek kiban̄. ¹³ Bọn Nte n̄a, ikachieek ibe efuuk ita enyi me owot irọrọ ata inu. ¹⁴ Ikaan̄ ene geelek òjijit irọrọ inu eji egebe inyi enyi me emen ikpa yi, igwuun̄ chieen̄ me lek ene ya. Ikachieek ibe ene ya igọọk enyi igbaan̄ irọ inu geege, inyi esip itet ene ya. ¹⁵ Ire, ikamọnọ ene ya kubọk ogwu òchicha. Kpan̄asi ikeya, ìtaba ọmọ ubọk me utọn̄ kubọk gwun̄ Nte kinyi. ¹⁶ Mgbọ yi, Okaan̄-ene me lek kan̄, ogwu òkinyi ene esuuk, inyi enyi esuuk me oniin̄ kinyi geelek me mgbọ geelek! Okaan̄-ene ikup inyi enyi otutuuk ene! ¹⁷ Emi, Pọọlu nsa ubọk n̄a gaalek ige amọn keyi. Eyi ore iman̄ n̄a me emen ikpa n̄a geelek. Ikeyi ke nkige ikpa n̄a geelek. ¹⁸ Atata nnwọn eyi Okaan̄ kiji Jisọs Karais ikup inyi enyi otutuuk ene!