Pita eyi òso iba
11 Emi Saimọn Pita, ogwu ikwaan̄ kè Jisọs Karais, mè ogwu otuchieen̄ kè Jisọs Karais, nkige ikpa etip keyi ijet enyi ebi ìsasa me ata irọrọ eyi Awaji kiji mè Ogwu Unyan̄a kiji Jisọs Karais ibọkọ òjelek unye otu ewe ichechieek eji ekaan̄be. 2 Atata nnwọn mè esuuk imumana inyi enyi ike enyi ekiriọọn̄ Awaji, mè ikiriọọn̄ si Okaan̄ kiji Jisọs ifo isi. 3 Awaji îsa me unye kan̄ inyi eji otutuuk inu geelek òkukup me uyọt ibe eji ekaan̄ sabum eji mênikọt iluk ugwem me oniin̄ òbokinyi ọmọ umin. Awaji ìnyi eji inu chi inan̄a me lek eji eriọọn̄be ọmọ ogwu òsasa me umin kan̄ mè nnwọn kan̄ igwen eji. 4 Sa me umin mè nnwọn yi ke Awaji onyi eji ikpele unye otu ewe inu cha echi îchieekbe use inyinyi eji. Sa me ikeyi si ke enyi ebekọt inwọnọ filafila ugwem eyi ijo ulọk okisa inu me linyọn̄ keyi, mè igọọk igbaan̄ ikaan̄ ubọk iluk-ugwem eyi Awaji. 5 Mije keyi gaalek, ìkaan̄ ata ugwem ìgbaalek ichechieek enyi ekaan̄be, mè ìkaan̄ ifuk-ibot ebi eyi Awaji ìgbaalek ata ugwem enyi ekaan̄be. 6 Ìkitet lek kinyi ìkaan̄ ìgbaalek ifuk-ibot enyi ekaan̄be, mè ìkikaan̄ ujọn̄ọ ukarajit ìgbaalek itetet lek eyi enyi ekitet. Ìkaan̄ ukpook Awaji me emen kinyi ìgbaalek ujọn̄ọ ukarajit enyi ekikaan̄. 7 Ìkikaan̄ ata ejit eyi ngwan̄ mè ngwan̄ ìgbaalek ukpook Awaji eyi enyi ekaan̄be, mè ìkimun̄ ene me chieen̄ ìgbaalek ata ejit eyi ngwan̄ mè ngwan̄ enyi ekikaan̄. 8 Mije, ire enyi ikaan̄ ata ugwem chi me emen kinyi, mè ikije inyi isi me emen kiban̄, ema mêrọ inyi efuuk ikakita enyi me emen, mè irọ si inyi enyi ekesi ata ikwaan̄ efo isi inan̄a me lek enyi eriọọn̄be Okaan̄ kiji Jisọs Karais. 9 Gwun̄ Nte geelek ikakaan̄ge inu chi me emen ugwem kan̄, gwun̄ Nte ya înin̄ ǹnàan̄, ìkakimọọn̄ inu ìjọn̄ọ ere. Îwuuk ibe ke Awaji îra igwọk oka ijo inu kan̄ isan̄a ọmọ me lek. 10 Eya orọ, bọn Nte n̄a, ìsa ikpele ulọk ìsi ikwaan̄ ìgak adasi mgbọ, inyi enyi esa me ikeya erọ igwen Awaji ogwenbe enyi mè igogobo eyi Awaji ogobobe enyi enye. Mije, ire enyi ikirọ inu chi, enyi kpebenan̄a irọn̄ me emen ichechieek kinyi kubọk ge. 11 Sa me ikeyi, Awaji mônyi enyi otutuuk unen, inyi enyi eraka enin̄ emen mkpulu eyi Okaan̄ kiji mè Ogwu Unyan̄a kiji Jisọs Karais, eyi môkupbe ire mgbọ ikakaan̄ge itata. 12 Mije keyi, mâkikeek enyi inu chi mgbọ geelek, ubọk geelek enyi ewuukbe lek iriọọn̄ ema iraka, mè ikeke inye me emen atikọ enyi ekaan̄be. 13 Mmun̄ ibe ke îtat ibe emi ǹkenkeek enyi inu chi me mgbọ keyi nkupbe me ugwem me akpalek keyi. 14 Mije, nriọọn̄ ibe ke mâkwu me ikajọn̄ọge mgbọ, kubọk Okaan̄ kiji Jisọs Karais otumube ikpọk mbum inyi emi. 15 Ubọk geelek nkọtbe, mârọ mè enyi ekawuuk inu chi, inyi enyi ekekeek ema efo isi mgbọ emi mâkwube iraka. 16 Mgbọ eji elookbe enyi etip òfolek unye eyi Okaan̄ kiji Jisọs Karais, mè inunu ọmọ obokpọk inu, ìkare utop otu ukpatu ebilene ikike ke eji ekpa inyi enyi. Îre etip òfolek umin kan̄ eyi eji me lek kiji esabe chieen̄ kiji imun̄ ke eji elook enyi. 17 Mije, ọmọ îbọkọ umin mè itọn̄ me ubọk Awaji Ute mgbọ ida orọn̄be inyi ọmọ, me ikpele umin mè uja eyi òmimin ichit, ibe, “Ogwugwu ìre Gwun̄ n̄a ogwu mmun̄be me chieen̄! Ejit n̄a îbele enenen me lek kan̄!” 18 Eji melek kan̄ ekup me inyọn̄ ogoon̄ mbuban ya mgbọ ida ya orọn̄be. Eji me lek kiji mînọ ida ya. 19 Me lek kiji, inu yi òrọrọ îrọ ikọ ebi nriran etumube me ukot ikaan̄ inye. Eya orọ, îgbe ibe enyi egban̄ utọn̄ me lek ikọ ebi nriran cha, mije, ikọ cha ìkup kubọk mkpukan̄ òkitoon̄ me ere òdudun. Môtoon̄ ikeya mege ire mgbọ egwe môwelebe, ntoronyan̄ otu ewelegwe onenisibi ikeke me emen ejit kinyi. 20 Ògak ge, îgbe ibe enyi eriọọn̄ ibe ke kpunu ene geege òbokọt isa me ekiket kan̄ gaalek ikpa ibot nriran geege egebe me Ikpa Mbuban. 21 Mije, ikọ eyi nriran geelek egebe me Ikpa Mbuban ìkanan̄a me ekiket eyi ebilene mgbọ geege. Îre Ekwukwu Mbuban onyi ebilene unye ibe etumu ikọ ònan̄a me ida Awaji.
21 Ire, me ukot ikaan̄, owuwa ebi nriran ataak mînu me etete ebi kiji. Ikeya si, owuwa ebi ijejeen̄ ataak mêkup me etete kinyi. Ife chi mênween̄ lek ikijeen̄ nlilọ ijejeen̄ òkisa mkpa inu, mè ijit si Okaan̄-ene me lek kan̄ ogwu òfafaka ema isibi me emen mkpa eyi ijo inu kiban̄ osabe ijet ema. Sa me ikeyi, ema mêsa mkpa ekakpọge chieen̄ ijet lek kiban̄. 2 Owuwa ene mêgọọk ife chi isi ikiluk ugwem ikatatge, mè irọ inyi ebi ene etumu oniin̄ eyi atikọ efiat. 3 Mije ulọk ebek ikpoko òkup ife chi me emen, ema mêsa mfufuk ema gaalek esan̄abe isibi inifiaan̄ enyi ifiin̄, mè isa enyi irọ ijọn̄ mbọm kiban̄. Awaji îra ititip ema oyerebet mkpa isan̄a karake mgbọ. Ogwu òbojijaka ema si ìgwọgwọk chieen̄ ikup. 4 Mgbọ ebi osat me lek kiban̄ erọbe Awaji ilọ, Awaji ìkatele ema. Ìkpukpulu ema itọp itap me ama yọk, mè itap ema mkpọn me emen udọn̄ uga udun okupbe. Ere keya ke ema ebekup ire Usen Oyerebet Awaji. 5 Mgbọ ebi ukot ikaan̄ erọbe Awaji ilọ, Awaji ìkato ema nsan kubọk ge. Kpan̄asi ikeya, ìsasa mun̄ ile ikpan̄ otutuuk ebi linyọn̄ mgbọ keya isan̄a kpai, mije ema ekariọọn̄ge Awaji, mè inyan̄a Nuwa ogwu òkilook etip eyi ata irọrọ isibi, ọmọ mè ene jaaba gaalek. 6 Mgbọ ebi ama Sọdọm mè ebi ama Gọmọra erọbe Awaji ilọ, Awaji ìtitip ema oyerebet mkpa, mè itap ukan̄ iwọp ema mè ama kiban̄ cha ikana ntọn̄, mè isa ema irọ kubọk inu ijejeen̄, inyi ebilene esa eriọọn̄ inu òkukup inyi otutuuk ebi ekariọọn̄ge Awaji. 7 Ire, Awaji înyan̄a Lọt ogwu ata irọrọ isibi me emen ukan̄ ya. Ugwem barabat ife cha ebi esip ikakupge me isi ekikaan̄, îsisaak Lọt me ejit enenen. 8 Mije, eyi Lọt ogwu ata irọrọ okiluk me etete ijo ife cha me usen me usen, mè ikisa chieen̄ imun̄ ijo ugwem ema ekiluk, mè ikinọ si me utọn̄, îkisisaak ọmọ me ejit enenen. 9 Otutuuk mfufuk chi ìkijeen̄ ibe ke Okaan̄-ene îriọọn̄ oniin̄ îkisa inyan̄a ebi geelek ìkimin ọmọ isibi me emen ntọ-mkpọ, mè iriọọn̄ si ubọk îkisa itet ebi ijo irọrọ isun̄, mè ikisulu ema osusut iban Usen Oyerebet kan̄. 10 Osusut yi ìbonye ichit me lek ebi ìkiluk ugwem igọọk me lek wọlọwọlọ ulọk eyi òkilọk akpalek ijo inu, mè ikikpọ unye eyi Awaji chieen̄ isiki. Ife chi mîkaan̄ chieen̄, mè ikiweek ibe inu geelek ikije ubọk ema ekiweek. Ukpook ìkakitet ema inyenye chieen̄ inyi ebi osat ìkup me irek umin me emen inyọn̄. 11 Ebi osat Awaji me lek kiban̄, ebi ìnyenye lek igak ife chi, mè ikaan̄ si efuuk igak ema, kpekitumu ikpak ikpak ikọ ikeme ema me isi Okaan̄-ene. 12 Ire, ife chi ekitumu mbuban ikọ ikeme inu ema ekariọọn̄ge. Ema ekup kubọk anam oron ikike, emaan̄be igwook inyi itetet ikpan̄, kpekaan̄ ifuk-ibot. Ema mêkwu mkpa si kubọk anam oron. 13 Ema mêbọkọ ijo inu kubọk mkpukpe me lek ijo inu eyi ema erọbe. Me lek kiban̄, irerie ugwem ìre ibeben ijọk irerie mè inwọnwọ eyi ekito me eririeen̄ inito me chieen̄ ikarek. Ife cha isikigọọk enyi ikup ikirie inorie ubelejit, ema ekikup kubọk okpa me etete kinyi, mè ikitap enyi esip me isi. Mije, otu ema ekisa irie ofiaan̄ ofiaan̄ ugwem kiban̄ ya ke ekisa igọọk enyi irie inorie ya si. 14 Chieen̄ kiban̄ ìkikup me lek ugan-nwa mgbọ geelek. Efuuk ìkakita ema me owot me irọrọ ijo inu. Ema ekileke ebi kpekeke inye me ichechieek itap me emen ijo inu. Ema ìre ebi chieen̄ ile ojotbe emen, ife Awaji ofieekbe otu inyi. 15 Ema mîtele oniin̄ eyi òtatat, mè inyinya ichep, mè ikisi irọ òjelek inu ogwu nriran Belam gwun̄ kè Biyọ orọbe, Belam ogwu òmama irọrọ ijo inu inyi ọmọ ibọkọ mkpukpe. 16 Ire, inyinya akpan gaalek, òrere anam ikike eyi ìkakitumu ikọ, ogana ikọ inyi Belam me lek ijo inu ìborọ. Inyinya akpan ya ìsa ida ebilene itumu ikọ ikwek ogwu nriran yi, inyi ikakọt ìsi ikwaan̄ ebi iraak ya eyi ìbosi. 17 Ife chi ekup kubọk ogbuuruk mun̄ ochatbe isan̄a me emen, mè ikup si kubọk oduku inyọn̄ eyi efet okiben iwut ikana. Ere òdudun ichit ke Awaji oneen̄ isun̄ iban ema. 18 Ema ekitumu ikpele otu ikọ ikike me oniin̄ eyi burubut, mè ikisa ijo ulọk akpalek eyi barabat ileke ene itap me emen ijo ijejeen̄ kiban̄. Ebi ema ekileke ìre ebi ìkinanan̄a me etete ebi ekariọọn̄ge Awaji isibi. 19 Ema ekichieek use ibe ke ema mêrọ inyi ebi ene ekaan̄ utelelek, me ere ema me lek kiban̄ erebe usun̄ inyi ugwem wọlọwọlọ. Mije, inu geelek òrere nte uwu inyi ene, eya ke ene okire usun̄ inyi. 20 Ire ema inwọnọ ugwem wọlọwọlọ eyi linyọn̄ keyi mije ema eriọọn̄be Okaan̄ kiji mè Ogwu Unyan̄a kiji Jisọs Karais, mè ikpọk isa lek kiban̄ isi itap me emen ugwem yaage si, mè itele inyi ikana nte uwu inyi ema, mgburudun̄ mgbọ me ugwem kiban̄ môfieek igak adasi mgbọ. 21 Ire ema kpemeriọọn̄ oniin̄ eyi ata irọrọ, eya kè ònwọn me lek kiban̄ ogak ema irọriọọn̄ isan̄a, mè itele ikan ya òkup me mbuban eyi ekanabe itap ema me ubọk. 22 Inu keyi òrọrọ ema ìkpọkpọ ije itat me lek urọk ebi ene ekito ibe, “Ibo îgwu ikom isi ilaka igbọ eyi îgbọbe,” melek eyi ekito si ibe, “Okodi ekenbe mun̄ isan̄a, îgwu ikom isi ikifufuku lek me emen ibat.”
31 Atata bọn Nte n̄a, òso ikpa iba ire eyi nkige ijet enyi. Ikpa iba chi ngebe, ǹge isasa ikeek enyi inu chi enyi ewuukbe lek inọ, inyi enyi ekekeek ata ekiket òfolek. 2 Ìkeek ikọ ebi nriran ìkup me mbuban etumube me ukot ikaan̄, mè ikan eyi Okaan̄ kiji òrere Ogwu Unyan̄a kiji Jisọs Karais onyibe enyi sa me ubọk ebi otuchieen̄ kan̄. 3 Adasi kan̄, ìriọọn̄ ibe, me òta mgbọ, ke ebi ìkiluk ugwem igọọk me lek ijo ulọk eyi akpalek kiban̄ mênu. Ema mêchak enyi ochak enenen, 4 mè ikitumu ibe, “Mgbọ Jisọs obe ke ọmọ môkpọk inu ya ye! Ìre keke orọ ikanuge mege inire mgbọ keyi? Ebi nte nte kiji mînu, mè ikwaan̄ isan̄a, otutuuk inu ìkpọkpọ ikije inyi isi ubọk îkupbe karake Awaji orombe linyọn̄!” 5 Ire, ife chi mîjit irọriọọn̄ ibe, bene me ibebene, ke Awaji ìsa ikọ otu kan̄ gaalek irom inyọn̄ mè ijọn̄. Linyọn̄ keyi ìnan̄a me emen mun̄ itibi isibi. Mun̄ ke Awaji osa irom linyọn̄ yi. 6 Mun̄ si ke Awaji osa ichep linyọn̄ me ukot ikaan̄. 7 Ikọ yaage si ke Awaji osa itet isinyọn̄ mè linyọn̄ mgbọ keyi ikaan̄ iban mgbọ ukan̄ obotaka ema iriọk me Usen Oyerebet Awaji. Awaji ìkisun̄ ema iban Usen Oyerebet kan̄ ya, mgbọ ìbokpan̄ ebi ekariọọn̄ge ọmọ. 8 Ire, atata bọn Nte n̄a, ikawuuk ibot ikọ ge keyi: Me lek Awaji, usen ge ìkup kubọk obop acha ge, obop acha ge ìkup si kubọk usen ge. 9 Ìkare kubọk Okaan̄-ene ìkifafiat mgbọ me irọrọ use eyi îchieekbe ibe ke ọmọ môgwu ikom inu iso, kubọk usini ene ekimọnọ ibe ke îfiat mgbọ. Ire, ìsa mije ukarajit îkaan̄be me lek kinyi itaba mgbọ ya ijọn̄ọ, mije, ìkiweek ibe otutuuk ene egwu ekom. Ìkaweek ibe ene geege ichep. 10 Ire, Usen Okaan̄-ene obonu ìbokana isibi me uwuuk-lek kubọk ogwu inọ. Me usen ya, akpabin inyọn̄ môsa me ida uga okput ininiin̄ ita, ìkpoyaka ikup. Ukan̄ môkala inu geelek òkup me isinyọn̄, mè itaka ema otutuuk iriọk. Linyọn̄ keyi mè otutuuk ikwaan̄ geelek esibe me emen kan̄ môkpọk mbum, mè ikup njak. 11 Eyi Awaji obofiat otutuuk inu geelek isan̄a ikeyi, ìre kpasi ugwem ogbe ibe enyi eluk? Îgbe ibe enyi eluk ugwem eyi òkukup me mbuban, mè ikinyi Awaji umin. 12 Ìkiluk òjelek ugwem òkup ikeya ìsa ìkikup ìkpọ inunu eyi Usen Okaan̄-ene obokpọk inu, mè ìsa ìkirọ si inyi Usen ya igwat lek inu. Usen ya ke akpabin inyọn̄ obotaka iriọk me ukan̄, otutuuk inu òkup me isinyọn̄ môkakala, mè itaka iriọk me ukan ya si. 13 Ire, eji ekikup ikpọ inu Awaji ochieekbe me use, òrere ayaya isinyọn̄, mè ayaya linyọn̄ ere ebi ata irọrọ ebeluk isun̄ ama kiban̄. 14 Eya orọ, atata bọn Nte n̄a, mije enyi ekikpọ chieen̄ mgbọ inu chi oborọ iso, ubọk geelek enyi ekọtbe, ìluk ugwem eyi ikakaan̄ge okpa geege mè nrọ-nlọ geege me emen, mè ìluk me esuuk melek Awaji. 15 Ìtet ibot! Ikawuuk ibe ke Okaan̄ kiji ìkikaan̄ ukarajit me lek kinyi, inyi enyi egwu ekom, mè ekaan̄ unyan̄a. Inu yi si ke atata gwun̄ Nte kiji, Pọọlu, osa me iriọọn̄-inu Awaji onyibe ọmọ ige me emen ikpa ijet enyi. 16 Ubọk yaage ke Pọọlu okige me emen otutuuk ikpa kan̄ mgbọ geelek îkige ikpa òfolek inu chi. Usini inu îkige me emen ikpa kan̄ ìre inu òkiyọyọt ikọkọt igobo itet. Echichi ore inu ebi ekakaan̄ge iriọọn̄-inu mè ebi ekakekege ìnye me ata ijejeen̄ ekiwuwọlọ kubọk ema ekiwuwọlọ owuwa inu egebe me Ikpa Mbuban. Sa me ikeyi ke ema ekisa mkpa ijet lek kiban̄. 17 Eya orọ, atata bọn Nte n̄a, kubọk enyi ewuukbe lek iriọọn̄ otutuuk inu chi, ìgbala chieen̄, inyi enyi ekarọn̄ ìnin̄ emen ijo ijejeen̄ ife chi ebi ekariọọn̄ge esip ekijeen̄, mè ìsa me ikeya ìnan̄a me irek enyi ewuukbe lek ikeke inye ìrọn̄. 18 Ire, ìkitibi ìmiin̄ me emen atata nnwọn mè emen irọriọọn̄ eyi enyi eriọọn̄be Okaan̄ kiji mè Ogwu Unyan̄a kiji Jisọs Karais. Itọn̄ ikup inyi Okaan̄ kiji mgbọ keyi mè mgbọ ikakaan̄ge itata. Ikup ikeya!