Ebi Kọrint eyi òso iba

¹ Emi Pọọlu ogwu òrere ogwu otuchieen̄ kè Jisọs Karais inan̄a me nkeek Awaji, emi melek Timọti gwun̄ Nte kiji ege ikpa etip yi ijet enyi, ebi ntitiin̄ Awaji eyi òkup me ama Kọrint, mè otutuuk bọn Awaji ìkup me otutuuk agan̄ Akaya. ² Atata nnwọn mè esuuk eyi ònan̄a me ubọk Awaji ogwu òrere Nte kiji, mè ubọk Okaan̄-ene Jisọs Karais ikup inyi enyi. ³ Itọn̄ ikup inyi Awaji ogwu òrere Nte Okaan̄-ene Jisọs Karais. Ọmọ ore Ute ogwu òkito ene nsan, mè ire si Awaji ogwu òkikat ene ejit me irek geelek. ⁴ Awaji ìkikat eji ejit mgbọ geelek eji ekupbe me ufialek, inyi eji ekọt esa ukarajit eyi eji ebọkọbe me ubọk kan̄ ekekat si ebi ofifi ife ejit mgbọ geelek ema ekupbe me ufialek. ⁵ Mije, kubọk eji ekibọkọ ufialek Karais obọkọbe owuwa owuwa, ikeya si ke eji ekikaan̄ uche owuwa owuwa me lek ukarajit eyi Awaji inan̄a me lek kè Karais. ⁶ Ire eji ikibọkọ uga osusut, eji ekibọkọ inyi enyi ekekat ejit, mè ekaan̄ unyan̄a. Ire Awaji ikitap eji efuuk me emen, ìkitap inyi enyi esa me ikeya ekekaan̄ si efuuk mè ujọn̄ọ ukarajit me mgbọ òjelek ufialek eji ekibọkọ isikikeme enyi. ⁷ Eya orọ, ikpọchieen̄ eji ekaan̄be òfo me lek kinyi ìkpọkpọ inye, mije, eji mîriọọn̄ ibe, ubọk enyi ekigọọk eji imun̄ ukwook, ke ikeya si ke enyi ebegọọk eji ikaan̄ ukarajit eyi eji ekikaan̄. ⁸ Bọn Nte kiji, eji ekiweek ibe enyi eriọọn̄ inu òfolek ufialek eji ebọkọbe me agan̄ Esia. Ufialek ya îmin isaba iraka inu eji ekikọt ibeme. Ugwem me lek kan̄ îrook eji iluluk. ⁹ Me atikọ, eji me lek kiji mîkeek ibe ke otutuuk inu òkukup inyi eji ìre mkpa gaalek. Ire, inu yi ìrọ ikeya inyi eji ekayaka ìtoon̄ ejit me lek kiji, kpan̄asi ikeya, eji etoon̄ ejit me lek Awaji ogwu òkijomo ebi ìkwukwu. ¹⁰ Awaji ore ogwu ònyanyan̄a eji isibi me òjelek mkpa òkup ikeya. Iin̄, môkpọk inyan̄a eji isibi si ofifi mgbọ. Eji mîtoon̄ ejit ibe ke ìbokpọkpọ ikinyan̄a eji isibi mgbọ geelek, ¹¹ mije enyi ekiriaak uriaak me ibot kiji, mè ikisa me ikeya itap ubọk inyi eji. Sa me ikeya, owuwa ene mênyi Awaji itọn̄ me ibot kiji mije nnwọn înwọnbe me lek kiji, inan̄a me lek uriaak owuwa ene ekiriaak me ibot kiji. ¹² Inu ge òkibele eji ejit enenen ìre ke ejit kiji îrọ inye ibe ke eji esa me unye eyi Awaji ikiluk ugwem me linyọn̄ keyi. Ògak ge, eji ekisa me unye Awaji iluk ugwem melek kinyi, me oniin̄ òkup me mbuban, me kpunube ofiaan̄ geege me emen ejit kiji. Ìkare me iriọọn̄-inu eyi ebi linyọn̄ keyi ke eji esa ikọt iluk ugwem ya, îre me atata nnwọn eyi Awaji gaalek. ¹³ Eji kpege inu geege ijet enyi eyi enyi kpebekọt ifuk, mè igobo itet. ¹⁴ Emi ǹkikpọ chieen̄ ibe, kubọk enyi eriọọn̄be eji ọkpọkọ ọkpọkọ me mgbọ keyi, ke enyi mêriọọn̄ ojot ojot, me usen Okaan̄-ene Jisọs Karais môkpọkbe inu, ibe ke enyi mêkọt isa eji igugo lek kubọk eji ekisa enyi igugo lek. ¹⁵ Nriọọn̄ ijaan̄ lek ibe ke inu yi ìkpolọlọ ikukup ikeya. Eya orọ mweekbe idadasi inimun̄ enyi, inyi enyi ekaan̄ ugbana mgbọ iba. ¹⁶ Mije, ǹkitọt igbagba ere kinyi mgbọ mbaraka isi agan̄ Mesidonia, mè iyaka inigba si ikpọ enyi me oniin̄ ikaka n̄a, mgbọ mâgwube ikom inan̄a me Mesidonia ikika inu agan̄ Judia, inyi enyi etap ubọk enyi emi me oniin̄ ije n̄a. ¹⁷ Ìre enyi ekikeek ibe ke ejit n̄a ìkup iba iba mgbọ nkitọt ije yi? Sa ìre ǹtọt ije yi kubọk ebi linyọn̄ ekitọt, mè ikikup me irek yaage ibe, “Iin̄, iin̄,” melek “Iin̄-iin̄, iin̄-iin̄”? ¹⁸ Me atikọ, kubọk Awaji orebe ogwu ògbegbe utoon̄-ejit, ikeya si, ikọ eji etumube inyi enyi ìkare òjelek ikọ “Iin̄” mè “Iin̄-iin̄” òkup ikeya. ¹⁹ Mije ikọ kè Jisọs Karais, Gwun̄ Awaji, eyi emi, mè Timọti, mè Sailas etumube inyi enyi ìkare ikọ ekikweek me irek yaage ibe, “Iin̄” mè “Iin̄-iin̄.” Mije, îre me emen ikọ yi ke Awaji obe, “Iin̄.” ²⁰ Me emen kè Karais, otutuuk use geelek Awaji ochieekbe ebilene ìre, “Iin̄.” Eya orọ, îre nan̄a me lek kan̄ ke eji otutuuk ene ekibe, “Ikup ikeya!” Sa me ikeya, Awaji îra ikibọkọ itọn̄. ²¹ Îre Awaji me lek kan̄ okirọ inyi eji melek kinyi ekeke enye me emen kè Karais. Ọmọ si otoon̄ eji ubọk me ibot, mè îsan̄a eji isun̄ esese, ²² mè itap eji iman̄ oriọọn̄ kan̄ me lek, mè itap Ekwukwu Mbuban kan̄ me ejit kiji, kubọk inu esabe inyi me nsọọn̄, isasa ijeen̄ ibe ke ọmọ môrọ otutuuk use ọmọ ochieekbe eji iso. ²³ Awaji ore ogwu ata-ikọ inyi emi ibe ke inu òrọrọ nkanuge Kọrint ìre ke ǹkaweek inenitap enyi ufialek me lek. ²⁴ Eji kpetọtọ kubọk ikọ inyi enyi ibe enyi enechieek me lek inu enyi kpeweek ichechieek me lek. Ire, eji ekigọgọọk enyi igbaan̄ ikwaan̄ isi, inyi enyi ekaan̄ unwọọn̄. Mije, îre sa me ichechieek ke enyi ekeke inye.

¹ Îre bak me lek keya ke ntumu ifieek ibe ke emi m̀kpayaka ikpọk inu me lek kinyi, inyi enyi ekayaka ìbọkọ ofifi ufialek. ² Mije, ire nrọ inyi ejit ifieek enyi, ìre ekene oborọ inyi ejit ibele emi, ilọ me lek kinyi ebi nrọbe inyi efieek ejit? ³ Ikpa ngebe ijet enyi, ǹge ikeya, inyi, nsinu me lek kinyi, enyi ebi ìberọ inyi ejit ibele emi ekayaka ìnirọ inyi ejit ifieek emi. Me atikọ, nriọọn̄ ijaan̄ lek ibe, ire ejit ibele emi, ke enyi otutuuk ene mêbele ejit si. ⁴ Ǹsa owuwa mun̄ itọ me chieen̄, mè ikpele ufiak mè ufieejit me ejit ige ikpa ya ijet enyi mgbọ ya. Ǹkage ikpa ya isasa irọ inyi ejit ifieek enyi, ǹge isasa irọ mè enyi eriọọn̄ ibe ke imumechieen̄ nkaan̄be me lek kinyi îmin enenen. ⁵ Ire ikaan̄ ogwu irọ inyi ebi ene efieek ejit, ìkare emi ke îrọ. Îre enyi otutuuk ene, mè ìyaka ire usini kinyi, ke îrọ inyi. Ǹkatumu ikọ yi isasa irọ inyi ijo inu ene ya orọbe imalek imin enyi me chieen̄ igak ubọk îkupbe. ⁶ Ire, osusut ya eyi owuwa ebi ntitiin̄ esulube ọmọ îso. ⁷ Eya orọ, kpan̄asi ikpọkpọ ikisulu ọmọ osusut ifo isi, ìnwene ejit, mè ìtele ìnyi ọmọ, mè ìkat ọmọ ejit, inyi ulobo ufieejit ya ikamalek ìkeme ọmọ ìfiat. ⁸ Soso, nriaak enyi, ìnye lek ìrọ inyi ene ya iriọọn̄ ibe ke enyi mîmun̄ ọmọ me chieen̄. ⁹ Ikpa ya ngebe ijet enyi, ǹge isasa iweek iriọọn̄ mè ìre enyi mêkọt ikeke inye me emen ntọ-mkpọ ya, mè ikisiki ibot me inu geelek. ¹⁰ Ene geelek enyi etelebe ijo inyi, emi si ntele inyi ene ya. Ijo geelek ntelebe inyi ene, mè ire ikaan̄ eyi ntelebe inyi ene, me isi kè Karais, ǹtele ijo ya inyi ene ya mije kinyi, ¹¹ inyi Setan ikasa me irek òkup ikeya ìfeen̄ eji. Mije, eji mîriọọn̄ otutuuk ijo otitọt Setan okitọt ibak eji. ¹² Mgbọ nnube Torowas ibanilook ata etip kè Jisọs Karais, mweek imun̄ ibe ke Okaan̄-ene îchili oniin̄ ibook, inyi emi ǹnenlook ata etip me ere ya. ¹³ Ire, ǹkakaan̄ esuuk me ejit, mije, ǹkamun̄ Taitọs gwun̄ Nte n̄a me ere ya. Mije keya, mbebe bọn Nte ìkup me ama ya eriọọn̄ ubọk ekup, mè inan̄a itele ema ije ifo agan̄ Mesidonia. ¹⁴ Ire, itọn̄ ikup inyi Awaji, ogwu òkisa eji ije me emen kè Karais, kubọk ogwu òje isi akọn̄ okisa ebi akọn̄ kan̄ mè ebi ekpulube me akọn̄ ikije me onineen̄ me onineen̄ ika me unwọọn̄ mgbọ ema etimbe ikpan̄ ebi ochicha kiban̄ me akọn̄. Îre eji ke Awaji okisa irọ inyi ebi ene me ere geelek eriọọn̄ Karais. Irọriọọn̄ Karais ìkup kubọk inu òkidun̄u atalek utop olu. ¹⁵ Mije, eji ekup kubọk aran̄ utop olu eyi Karais osabe igwa ngwugwa inyi Awaji, eyi olu kan̄ okidun̄u ikana me etete ebi Awaji okinyan̄a isibi, mè ebi ìbechechep. ¹⁶ Eji ekidun̄u njijọ olu eyi mkpa me inwọm ebi ìbechechep, mè ikidun̄u utop utop olu eyi ugwem me inwọm ebi Awaji okinyan̄a isibi. Ìre ekene obokọt irọ òjelek inu òkup ikeya? ¹⁷ Eji kpekup kubọk owuwa ebi ene ebi ìkisa ikọ Awaji inyam ewe iweek oruru. Kpan̄asi ikeya, me unye kè Karais, eji ekisa me otutuuk ejit kiji itumu ikọ me isi Awaji, kubọk ebi Awaji oriabe ikwaan̄.

¹ Ìre ikọ ntumube îtaan̄ enyi me utọn̄ kubọk eji mîra ikpọk ibene ikitọn̄ lek kiji? Ìre îkup me uyọt ibe mè eji ekejeen̄ enyi ikpa unye mgbọ eji isibenu lek kinyi? Sa ìre îkup me uyọt ibe eji ekebọkọ enyi ikpa unye me ubọk sabum eji ènenu me lek kinyi? ² Îre enyi me lek kinyi ere ikpa unye kiji, eyi egebe me ejit kiji, eyi otutuuk ene eriọọn̄be, mè ikifuk. ³ Enyi mîrọ si inyi otutuuk ene eriọọn̄ ibe ke enyi ìre ikpa ulook eyi Karais ogebe, eyi eji esabe isi ichon ikana. Ikpa ya ìkare ikpa eyi esabe mun̄ ikpa ikike ige me inyọn̄ ewuuk ikike. Karais ìsa Ekwukwu eyi Awaji òkup me ugwem ige ulook ya me emen ejit ebilene. ⁴ Îre nan̄a me lek kè Karais ke eji ekaan̄ òjelek utoon̄-ejit òkup ikeyi me lek Awaji. ⁵ Eji kpebekọt itumu ibe ke ìre eji gaalek esa unye kiji irọ otutuuk inu eji erọbe. Otutuuk efuuk kiji ìnan̄a me ubọk Awaji. ⁶ Îre ọmọ orọ inyi eji ekọt ekana ebi ìkisi ikwaan̄ eyi ayaya inyan̄a-ibot. Ìkare inyan̄a-ibot eyi Ikan kè Mosis eyi egege isibi, îre inyan̄a-ibot eyi Ekwukwu Mbuban. Mije, Ikan eyi egege isibi ìkikpakpan̄ ene, ire, Ekwukwu Mbuban ìkinyinyi ene ugwem. ⁷ Ikan kè Mosis, etibi me lek ewuuk ikike. Mkpulu eyi Ikan ya si ìsa mkpa inu. Ire, mgbọ Ikan ya onube, ìje melek umin mè uja inu. Mije umin mè uja ya okitoon̄ me emen isi kè Mosis, ebi Ijeren kpekọt igwuun̄ chieen̄ ikpọ Mosis emen isi, ubọk geelek utoon̄ ya obenebe ikigwọk ita. ⁸ Ire mkpulu eyi mkpa ya inu melek umin mè uja, ìre mkpulu eyi Ekwukwu Mbuban ìkpofat ije melek umin mè uja òmimin igak ikeya? ⁹ Ire mkpulu eyi òkitip ene oyerebet ikaan̄ umin mè uja, ìre mkpulu eyi òkirọ inyi ebi ene ekana ebi ata irọrọ ìkpofat ikaan̄ umin mè uja igak ikeya? ¹⁰ Inu ya òkakaan̄ umin mè uja me ukot ikaan̄ ìkayaka ìkaan̄ umin mè uja geege, ire isa itọ me lek ayaya inu eyi òkakaan̄ umin mè uja igak ikeya. ¹¹ Ire inu òkigwọgwọk ita ije melek umin mè uja, ìre inu eyi òbofufuk ìkpofat ikaan̄ umin mè uja igak ikeya? ¹² Eya orọ, ire eji ikaan̄ òjelek ikpọchieen̄ òkup ikeya, ìsibi ibe ke kpunu ulibi-chieen̄ geege me lek kiji. ¹³ Eji kpekup kubọk Mosis ogwu òsasa ekwut ikana ichit isi kan̄, inyi ebi Ijeren ekakọt ìmọọn̄ ọmọ isi mgbọ utoon̄ ya okigwọk ita. ¹⁴ Mîchit ejit kiban̄ igon, mije, mege inire cherekeyi, mgbọ geelek ema ekifuk ikpa oka inyan̄a-ibot ya, ekwut yaage okichit ema ejit. Kpesan̄a ekwut ya isan̄a, mije, îre mgbọ ene isichieek me lek kè Karais gaalek ke ekichili ekwut ya isan̄a ene me ejit. ¹⁵ Iin̄, mege inire chereyi, mgbọ geelek ema ekifuk ikpa Ikan kè Mosis, ìkikup kubọk ekwut ya si ìkpọkpọ ichit ema ejit. ¹⁶ Ire, mgbọ geelek ene geelek ogwube ikom igọọk Okaan̄-ene, mîra isan̄a ekwut ya isan̄a ene ya me ejit. ¹⁷ Me mgbọ keyi, me emen etip yi, Okaan̄-ene ore Ekwukwu ya. Ere geelek Ekwukwu Okaan̄-ene okupbe, utelelek òwa me ere ya. ¹⁸ Eyi kiji, mije ekwut geege ikachitge eji isi, ìkup kubọk eji ekeke me isi umọọn̄ ikikpọ umin mè uja eyi Okaan̄-ene me emen umọọn̄. Umin mè uja ya okekinan̄a me isi umọọn̄ ya itoon̄ igwook eji me lek, mè ikpọkpọ ikinwene eji ifo isi inan̄a me umin mè uja itap me umin mè uja, inyi eji ekup kubọk Okaan̄-ene okupbe. Îre Okaan̄-ene, ogwu òrere si Ekwukwu ya, okinwene eji, mè ikirọ inyi eji eketibi emiin̄ me emen umin kan̄ mè uja kan̄.

¹ Awaji ìnyi eji ikwaan̄ keyi sa me ejit nsan kan̄. Eya orọ, efuuk ìkpota eji me emen. ² Eji mîjit nlelet njijọ ugwem geelek òkisa esip inu, mè ijit si ugwem ofiaan̄. Eji kpekiwuwọlọ ikọ Awaji. Kpan̄asi ikeya, eji ekitutumu otutuuk atikọ iwele me isi ebi ene ubọk îgbebe, inyi ema eriọọn̄ eji, mè eriọọn̄ me ejit kiban̄ ibe ke inu eji ekitumu ìre atikọ me isi Awaji. ³ Ire ata etip eji ekilook ilet kubọk inu esabe ekwut ichit, ìlet me chieen̄ ebi ìbechechep. ⁴ Me lek kiban̄, ebi ekachieekge me lek kè Jisọs, Setan, òrere awaji ebi linyọn̄ keyi ìgogon ejit kiban̄ ichit, inyi ema ekakọt ìmọọn̄ utoon̄ òkinan̄a me lek ata etip eyi umin mè uja kè Karais, ogwu òrere inu geelek Awaji orebe. ⁵ Eji kpetumu ikọ òfolek kiji inyi ene geege. Ire, eji ekitumu Jisọs Karais isibi kubọk Okaan̄-ene, mè ikisa lek kiji ijeen̄ enyi kubọk ebi usun̄ mije kè Jisọs. ⁶ Awaji ogwu òtutumu ibe, “Utoon̄ itoon̄ isibi me emen udun,” ọmọ orọ inyi utoon̄ kan̄ itoon̄ me emen ejit kiji. Sa me ikeyi ke eji ekaan̄ utoon̄ ònan̄a me irọriọọn̄ umin mè uja eyi Awaji eyi òkitoon̄ me inyọn̄ isi kè Karais. ⁷ Ata etip eyi Awaji ìkup kubọk inu ubọọn̄ ònyenye otu ewe. Ire, eji ebi Awaji otapbe ata etip yi me ubọk ibe esa elook ebilene, eji ìre otin̄ ibat ikike. Eyi ìkijeen̄ ibe ke ìre ubọk Awaji ke unye ògak otutuuk unye, eyi eji esabe ikisi ikwaan̄ yi onan̄a; ke ìkanan̄a me ubọk kiji. ⁸ Ufialek înan̄a me agan̄ geelek inikeme eji, ire, ìkakeme eji ìkpan̄. Usini mgbọ, ejit kiji îkikup iba iba, ire, kpunu mgbọ geege eji kpekaan̄ ikpọchieen̄. ⁹ Ebi ene mîsisaak eji, ire, Awaji ìkatele eji. Ebi ochicha mîsulu eji itọbọ me ijọn̄, ire, eji kpekwu. ¹⁰ Me mgbọ geelek, eji ekibeme osusut mkpa me akpalek kiji isa ikije ikana kubọk Jisọs obemebe mege ire usen îkwube. Eji ekibeme òjelek mkpa kè Jisọs yi me akpalek kiji, inyi ugwem kè Jisọs si isibi utoon̄ me akpalek kiji. ¹¹ Eji ebi ìkup me ògat ugwem mgbọ keyi, eji ekup me ubọk mkpa mgbọ geelek mije kè Jisọs, inyi ebi ene emun̄ ugwem kè Jisọs me akpalek kiji yi, òrere inu òbokwukwu. ¹² Eya orọ, mije eji ekikup me ubọk mkpa mgbọ geelek, enyi mîkaan̄ ugwem ikakaan̄ge itata. ¹³ Ege me Ikpa Mbuban ibe, “Nchieek, eya orọ ntumube.” Ikeya si, sa me òjelek ichechieek yaage, eji si mîchieek, eya orọ eji ekitumu inu eji echieekbe isibi. ¹⁴ Mije, eji mîriọọn̄ ibe ke Awaji ogwu òjojomo Okaan̄-ene Jisọs me mkpa môjomo eji si me mkpa, kubọk îjomobe Jisọs me mkpa, mè isa eji melek kinyi inigbaan̄ ichichini me isi kan̄. ¹⁵ Otutuuk inu chi òrọrọ ìsa ata inu ijet enyi, inyi atata nnwọn eyi Awaji imumana iso owuwa owuwa ene, mè owuwa ene esa me ikeya enyi Awaji ojot ojot itọn̄, inyi Awaji ikaan̄ umin mè uja. ¹⁶ Eya orọ, efuuk ìkata eji me emen. Ubọk geelek akpalek kiji okikwu ije sọntiik sọntiik, Awaji ìkpọkpọ ikirọ inyi ekwukwu kiji ikikana ayaya egwe geelek. ¹⁷ Mije, sọntiik ufialek chi eji ekibọkọ mgbọ keyi, eyi òbokup sọntiik mgbọ gaalek, òkinen̄e ikpele umin mè uja eyi môkupbe ire mgbọ ikakaan̄ge itata isun̄ iban eji. Umin mè uja yi îmin enenen igak otutuuk ufialek cha. ¹⁸ Eya orọ, eji kpekpọ chieen̄ me lek inu ekisa chieen̄ imun̄. Eji ekikpọ chieen̄ me lek inu echi kpekisa chieen̄ imun̄. Mije, inu ekisa chieen̄ imun̄ ìkikup sọntiik mgbidim mgbọ gaalek. Ire, inu kpekisa chieen̄ imun̄ okikup ire mgbọ ikakaan̄ge itata.

¹ Eji mîriọọn̄ ibe, ire uwu ikpa anam eyi linyọn̄ keyi eyi eji elukbe me emen, òrere akpalek kiji, isigbugbọ, ke eji mîkaan̄ uwu eyi kpogbugbọbe mege ire mgbọ ikakaan̄ge itata, eyi Awaji me lek kan̄ onamabe inyi eji me emen inyọn̄. Ìkare uwu esabe ubọk ebilene inama. ² Ire, me mgbọ keyi, eji ekito mfi mgbọ geelek, mije, òkilọk eji ibeben akpalek kiji eyi emen inyọn̄ ikwaan̄ me lek. ³ Mije, ire eji ikwaan̄ akpalek ya me lek kiji, eji kpebeyaka ikup njak. ⁴ Mgbọ keyi eji elukbe me emen uwu ikpa anam yi, eji ekitoto mfi me irak ulobo ufialek. Mije, eji kpeweek ikwukwu mkpa, inyi akpalek keyi inan̄a eji me lek. Ire, eji ekiweek itatap akpalek kiji eyi emen inyọn̄ itoon̄ me inyọn̄ akpalek keyi, inyi akpalek kiji keyi, eyi òbokwukwu, ichep ita me emen ugwem ikakaan̄ge itata. ⁵ Awaji me lek kan̄ ore ogwu òdọdọmọ isan̄a ibe ke mênwene eji. Înyi eji Ekwukwu kan̄ kubọk nsọọn̄ isasa irọ inye ibe ke inu yi ìkpolọlọ imọmọnọ irek ubọk ọmọ odọmọbe. ⁶ Eya orọ, ejit kiji înye mgbọ geelek. Eji mîriọọn̄ si ibe, eyi eji ekiluk me uwu ikpa anam yi, òrere akpalek kiji, me linyọn̄ keyi, ke eji kpekup melek Okaan̄-ene isi mè isi. ⁷ Mije, eji ekiluk ugwem me ichechieek eji echieekbe me lek Okaan̄-ene, ìkare me imumun̄ eyi eji esabe chieen̄ imun̄ ọmọ. ⁸ Ejit kiji înye. Môneme eji itetele akpalek keyi, mè ifo igọọk Okaan̄-ene isi ikup. ⁹ Eya orọ, inu eji ekiben me ejit mgbọ geelek ìre irọrọ inu òkibele ọmọ ejit mgbọ geelek, mè ìre eji ekukup me ugwem me akpalek keyi, mè ìre eji ekwukwu isibi itele akpalek yi. ¹⁰ Mije, eji otutuuk ene mêkeke me isi ogboon̄ ubọọn̄ kè Jisọs Karais, inyi isibi eji oyerebet me ibot, mè ene geelek ibọkọ mkpukpe ògbegbe ọmọ igọọk me lek ata inu, mè ìre ijo inu eyi ọmọ orọbe mgbọ ọmọ okupbe me ògat ugwem me akpalek. ¹¹ Ubọk eji eriọọn̄be inu itetet ukpook Okaan̄-ene okupbe me lek, eya orọ eji ekisa iweek irọrọ inyi ebi ene eriọọn̄, mè egọọk echieek si me lek kan̄. Inu eji erebe îsibi utoon̄ me isi Awaji. Nkaan̄ ikpọchieen̄ ibe ke îsibi si utoon̄ me ejit kinyi. ¹² Ìkare kubọk eji ekiweek ikpọkpọk isa lek kiji ijeen̄ enyi. Ire, eji ekinyi enyi irek, inyi enyi esa eji egugo lek, mè ekaan̄ inu enyi ebekisa itumu inyi ebi ìkisa inu ekisa chieen̄ imun̄ ikigugo lek, mè itele isasa inu òkup ene me emen ejit igugo lek. ¹³ Ire ibot kiji iwuwọlọ, îre mije Awaji ke îwuwọlọ. Ire ibot kiji iso ifuk, îre mije kinyi ke îso ifuk. ¹⁴ Mije, eji ekiluk ugwem igọọk me lek imumechieen̄ Karais okaan̄be me lek kiji. Eji mîriọọn̄ ijaan̄ lek ibe, mije ene ge okwube me ibot otutuuk ene, ke otutuuk ene mîkwu. ¹⁵ Ene ya ìkwu me ibot otutuuk ene, inyi ebi ìkup me ugwem ekayaka ìluk ugwem ìnyi lek kiban̄, ire, ekeluk enyi ọmọ ogwu òkwukwu mije kiban̄, mè ijomo si me mkpa mije kiban̄. ¹⁶ Eya orọ, bene me mgbọ keyi fo isi, eji kpebeyaka ikisa chieen̄ eyi linyọn̄ ikikpọ ene geege. Me adasi mgbọ, eji mîkisa chieen̄ eyi linyọn̄ ikikpọ Karais, ire, eji kpeyaka irọ ikeya me mgbọ keyi. ¹⁷ Eya orọ, ire ene ikup me emen Jisọs Karais, ene ya ìre ogwu ekpọkbe irom ayaya. Oka inu îraka, otutuuk inu îkana ayaya! ¹⁸ Otutuuk inu chi ìnan̄a me ubọk Awaji, ogwu òsasa me lek kè Karais irọ mè eji ekana ebi òma melek kan̄, mè ikana si ikwaan̄ irọrọ inyi ebi ene melek kan̄ ekana òma itap eji me ubọk. ¹⁹ Ibot etip kiji ire ke inan̄a me lek kè Karais, ke Awaji îrọ inyi otutuuk ebi linyọn̄ ekup me esuuk melek kan̄. Ìkayaka ìfuk ijo kiban̄ geege ìkeme ema. Îre etip eyi irọrọ esuuk yi ke îkana itap eji me ubọk. ²⁰ Eya orọ, eji ekitumu ikọ me otuchieen̄ kè Karais, mije, Awaji me lek kan̄ ìkisa me otu kiji ikigwen enyi, mè ikiriaak enyi. Eya orọ, eji ekiriaak enyi me erieen̄ kè Karais ibe, soso ìrọ esuuk melek Awaji. ²¹ Awaji îben otutuuk ijo kiji isa ikeme Karais ogwu ikarọge ijo inu geege, inyi ọmọ ikana ogwu ijo, mè eji enan̄a me lek kan̄ ekana ebi ata irọrọ me isi Awaji.

¹ Eji kubọk ebi melek Awaji ekigbaan̄ isi ikwaan̄, eji ekibeek enyi ibe, ikamọnọ atata nnwọn Awaji eyi enyi ebọkọbe kubọk inu ikike. ² Mije, Awaji ìtumu ibe, “Me mgbọ înemebe emi ikakaan̄ ejit nsan me lek kinyi, nnọ ida ito kinyi. Ntap si ubọk inyi enyi me usen nnyan̄abe enyi isibi.” Me atikọ, mgbọ keyi ore mgbọ înemebe Awaji ikakaan̄ ejit nsan me lek ene. Mgbọ keyi ore usen unyan̄a. ³ Eji kpekeke ikwek oniin̄ ene geege. Eya orọ, eji kpeweek si ibe ene geege itumu ijo ikọ òfolek ikwaan̄ eji ekirọ. ⁴ Kpan̄asi ikeya, me inu geelek eji ekirọ, eji ekijeen̄ ibe ke eji ìre ebi ikwaan̄ Awaji me atikọ. Eji mîkaan̄ ikpele ukarajit mgbọ eji ekije itibi owuwa ufialek, mè esese uyọrọlek, mè ùrioon̄. ⁵ Mîsulu eji me njijan̄, mè itap eji mkpọn, mè idimi ama me ibot kiji. Eji mîsi unye ikwaan̄, mè itop chieen̄ iwele egwe owuwa usen, kpelaak ilaak, mè iran̄ ọfiọọn̄ owuwa mgbọ. ⁶ Eji ekijeen̄ si ibe ke eji ìre ebi ikwaan̄ Awaji sa me unye eyi Ekwukwu Mbuban, mè iluluk ugwem òtatana, mè ikakaan̄ ifuk-ibot, mè imeme owuwa inu, mè ikakaan̄ ata ejit, mè ikakaan̄ atalek imumechieen̄ me lek ene, ⁷ mè ilolook ata etip eyi atikọ sa me unye eyi Awaji. Eji ekaan̄ nroon̄ akọn̄ eyi ata irọrọ me ubọk agan̄ ulom mè ubọk agan̄ ujit ikisa itim akọn̄, mè ikisa ikput lek kiji. ⁸ Usini ene mîmin eji, usini ene ekpọkpọ eji chieen̄ isiki. Usini ene mîtọn̄ eji, usini ene efefieek eji ikọ. Eji ìre ebi atikọ, ire, ebi ene ekimọnọ eji kubọk ebi ofiaan̄. ⁹ Ebi ene mîriọọn̄ eji, ire, ekirọ kubọk eji kpere ebi eriọọn̄be. Eji ekup kubọk ebi ìkwukwu, ire, eji òwa me ògat ugwem. Mîsulu eji kubọk ebekpakpan̄, ire, eji kpekwu. ¹⁰ Eji mîkup me ufieejit, ire, eji ekibebele ejit mgbọ geelek. Eji ìre ebi ugbọọn̄, ire, eji mîtap owuwa ene ubọọn̄. Me chieen̄ ebilene, eji kpekaan̄ inu geege, ire, eji mîkaan̄ otutuuk inu geelek iso. ¹¹ Bọn Nte kiji ebi Kọrint, eji echichili ejit kiji ibook itumu otutuuk atikọ inyi enyi, eji kpelet enyi inu geege. ¹² Eji mîjeen̄ imumechieen̄ me lek kinyi, ire, enyi kpejeen̄ imumechieen̄ me lek kiji. ¹³ Mgbọ keyi, ǹkiteme enyi nteme kubọk enyi ìre nsabọn n̄a. Ìchili ejit ìjeen̄ imumechieen̄ me lek kiji kubọk eji ekijeen̄ me lek kinyi, inyi mfeen̄ ikakup. ¹⁴ Ikasa lek kinyi ìchim ìriaak me lek ebi ekachieekge me lek kè Karais. Ìre keke ke ata irọrọ mè ijo inu egbaan̄ ikaan̄? Sa ìre utoon̄ melek udun ebejeje igbaan̄ ije? ¹⁵ Ìre Karais melek Yọk ebejeje igbaan̄ ichieek? Ìre ogwu òchechieek me lek kè Karais ìkaan̄ keke melek ogwu ikachieekge me lek kè Karais? ¹⁶ Ìre keke ke uwu mbuban Awaji ogbaan̄ ikaan̄ melek mkpọmfaka? Mije, eji ìre uwu mbuban Awaji ogwu òkup me ugwem. Awaji me lek kan̄ ìtumube ibe, “Emi mâluk melek kiban̄, mè ikijijen̄e me etete kiban̄; emi mâre Awaji kiban̄, ema mêre si ebi n̄a.” ¹⁷ Okumugwem si onenitumu ibe, “Eya orọ, ìnan̄a ìsibi me etete kiban̄, mè ìkup esese. Ikatet ubọk me lek inu geege ikatanage me isi Awaji, inyi emi m̀bọkọ enyi ǹtap.” ¹⁸ Okumugwem Ogwu Òkaan̄ Unye Geelek ìtumu si ibe, “Emi mâre Ute inyi enyi, enyi mêre bọn n̄a ebirieen̄ mè bọn n̄a ebibaan̄.”

¹ Atata bọn Nte n̄a, îre eji ke Awaji ochieek otutuuk use chi. Eya orọ, eji egwọk akpalek kiji etana, mè esibi etele inu geelek òkirọ inyi akpalek kiji mè ekwukwu kiji ikatana me isi Awaji. Eji esa me ukpook Awaji esun̄ lek kiji me mbuban ojot ojot. ² Ìsa me otutuuk ejit kinyi ìmun̄ eji me chieen̄. Eji kperọ ene geege ilọ. Eji kpefiat ene geege. Eji kpefeen̄ si ene geege me etete kinyi. ³ Ǹkatumu ikọ yi isasa itip enyi oyerebet, mije, mwuuk lek itumu inyi enyi ibe ke enyi mîmin eji me ejit enenen. Ire mkpa, eji mêkwaan̄ melek kinyi. Iyaka ire ugwem, eji mêgat melek kinyi. ⁴ Ntoon̄ enyi ejit me lek enenen, mè ikisa enyi si irọ otu enenen. Me emen ufialek geelek eji ekibọkọ, Awaji îkitap emi efuuk me emen enenen. Unwọọn̄ òkup emi me ejit ìkakaan̄ okputut. ⁵ Mgbọ eji erebe agan̄ Mesidonia, akpalek kiji ìkasiki efuuk. Ufialek ìkinan̄a me agan̄ geelek inu. Ebi ene ekup ifan̄a ifan̄a melek kiji. Me emen ejit kiji, eji ekup me ufieek-owot. ⁶ Ire, Awaji ogwu òkikat ejit ebi ejit orọn̄be utọọk, onenikat eji ejit sa me inunu kè Taitọs. ⁷ Ìkare sa me ìnunu kan̄ gaalek, ukarajit eyi enyi enyibe ọmọ îgọọk itap ubọk ikat eji ejit si. Îkpa inyi eji ibe ke enyi mîkaan̄ ulọk imumun̄ emi, mè ifieek ejit enenen, mè ikaan̄ ejit itatap ubọk inyi emi mije ebi ochicha n̄a. Etip yi îrọ mè ubelejit n̄a imin enenen. ⁸ Ìrere ke ikpa n̄a ya îrọ mè enyi efieek ejit, ǹkabọnọ lek kubọk ge. Ire, mbọnọ lek sọnja, mije mmun̄be ibe ke ikpa ya îrọ mè enyi enaan̄ ejit sọntiik mgbọ. ⁹ Ire, ǹkibebele ejit mgbọ keyi. Ìkare mije ikpa ya orọbe mè inu enyi erọbe ifieek enyi me lek. Îre mije ufieejit kinyi ya orọbe inyi enyi egwu ekom. Awaji ìsa ufieejit ya irọ enyi ata ikwaan̄ me emen. Eya orọ, ìkare ijo inu geege ke eji erọ enyi. ¹⁰ Mije, ufieejit ònan̄a me ubọk Awaji ìkirọ inyi ene igwu ikom, mè ikisa unyan̄a inu, ìkakisa ubọnọlek ìnu. Ire, ufieejit eyi linyọn̄ ìkisa mkpa inu. ¹¹ Ìkpọ ikpele ikwaan̄ eyi ufieejit yi ònan̄a me ubọk Awaji osibe me emen ugwem kinyi! Enyi mîtet lek inye mgbọ keyi, kpeyaka ikaan̄ ejit iba iba. Mgbọ keyi, enyi mîra ibem lek itutumu ikọ isa isan̄a lek kinyi me emen ijo inu, inyi ebi ene eriọọn̄ ibe ke ìkare enyi erọ. Enyi mîra ikinaan̄ ejit me mgbọ ene orọbe ijo inu. Ukpook ijo inu îra ikitet enyi. Òkilọk enyi imumun̄ emi. Irọrọ inu òtatat me isi Awaji îra ikilọk enyi. Enyi mîra ibem lek isusulu ogwu òrọrọ ijo inu osusut. Me agan̄ geelek, me emen ikọ keyi, enyi mîra ijeen̄ ibe ke ubọk kinyi îtana. ¹² Eya orọ, ubọk geelek ibe ke nge ikpa ya, ǹkage mije ogwu òrọrọ ijo inu ya, ǹkage si mije ogwu erọbe ilọ. Ire, ǹge ikpa ya isasa irọ inyi ikpele ulọk enyi ekaan̄be me lek kiji isibi utoon̄ me chieen̄ kinyi, me isi Awaji. ¹³ Otutuuk inu chi geelek îkat eji ejit enenen. Ògak ge, ejit îbele eji enenen mije unwọọn̄ Taitọs okaan̄be mgbọ îkabe, mè inikpa inyi eji ibe ke enyi otutuuk ene mîrọ inyi ukpook ita ọmọ me emen. ¹⁴ Mwuuk lek ikisa enyi irọ otu inyi ọmọ sabum înije. Eya orọ, ejit îbele emi ibe ke enyi kpechieek ibe esip itet emi. Ike inu geelek eji ekitumu òfolek kinyi okire atikọ, ikeya si, gogolek eyi eji esabe enyi igugo inyi Taitọs ìre si atikọ. ¹⁵ Taitọs isikikeek ubọk otutuuk kinyi esikibe ibot, mè isa me ukpook mè uran-lek ibọkọ ọmọ itap, imumechieen̄ îkaan̄be me lek kinyi îra ikimin enenen. ¹⁶ Mbele ejit enenen mgbọ keyi, mije, mâkọt itoon̄ enyi ejit me lek ojot ojot me inu geelek.

¹ Bọn Nte n̄a, eji ekiweek irọrọ inyi enyi eriọọn̄ inu òfolek atata nnwọn eyi Awaji onyibe ntitiin̄ kan̄ òkup me agan̄ Mesidonia. ² Ema ekije itibi nga ujat ujat ntọ-mkpọ ile. Ire, unwọọn̄ îmin ema me ejit enenen ire lek ema echilibe ubọk ire òta iche uche inyi bọn Awaji, ubọk geelek ugbọọri okemebe ema enenen. ³ Ǹkitumu atikọ inyi enyi ibe ke ema mînyi ubọk efuuk kiban̄ okọtbe, mè inyinyi si iraka ubọk ema ekaan̄be. Ema esa me ejit kiban̄ gaalek ⁴ ikibeek ibe, soso, mè eji echieek inyi ema egọọk eche inu ejet bọn Awaji ìkup me Judia, ke ema ekiweek igọgọọk ikaan̄ uche me lek ikwaan̄ yi, mè isa me ikeya igọọk bọn Nte igbaan̄ irọ inu. ⁵ Ema mîrọ igak ubọk eji ekeekbe! Ema edadasi isa lek kiban̄ inyi Okaan̄-ene, mè inisa si lek kiban̄ inyi eji, igọọk me nkeek Awaji. ⁶ Ikeya si, eji mîbeek Taitọs ogwu òwuwuuk lek inu inibọkọ uche yi, ibe ikpọk inu si me lek kinyi inisi ikwaan̄ imumechieen̄ yi ire òta me etete kinyi. ⁷ Îre enyi ekirọ inwọn ichit me owuwa inu, me ichechieek, mè itutumu ikọ Awaji, mè irọriọọn̄ atikọ, mè itetet lek inye ikisi ikwaan̄ ikọ Awaji, mè imumun̄ eji me chieen̄. Ikeya si, ìmun̄ ibe ke ìre enyi erọ inwọn ichit me inyinyi uche eyi imumechieen̄ yi. ⁸ Ǹkanyinyi enyi kubọk ikan. Ire, ǹkijeen̄ enyi ubọk ebi ofifi ife ebembe lek itatap ubọk, inyi ǹsa me ikeya ǹjeen̄ ibe ke imumechieen̄ kinyi ìre eyi atata me atikọ. ⁹ Enyi mîriọọn̄ ikpele atata nnwọn eyi Okaan̄ kiji Jisọs Karais ojeen̄be! Ubọk geelek ọmọ obọọn̄be ubọọn̄, ire, ọmọ îkana ugbọọn̄ mije kinyi, inyi enyi enan̄a me lek ugbọọri kan̄ ebọọn̄ ubọọn̄. ¹⁰ Nteme ònwọnwọn ichit inyinyi enyi me lek ibot ikọ yi ìre ikeyi: Me acha òraraka, enyi ere ebi ìdadasi ibene ikinyi uche yi. Ìkare inyinyi gaalek, enyi si ere ebi ìdadasi ikaan̄ ulọk inyinyi. ¹¹ Eya orọ, me mgbọ keyi, ìrọ isan̄a, inyi ebi ene esa me ikeya emun̄ ibe ke enyi mîkaan̄ ulọk ya me atikọ. Ìnyi ike ubọk kinyi osoon̄be. ¹² Mije, ire ene ikaan̄ ejit inyinyi, inu geelek òsibi ọmọ me ubọk ke ebebọkọ, ìkare inu ọmọ ikakaan̄ge. ¹³ Ìkare ǹkiweek ibe mè enyi ekemun̄ ukwook, mè ebi ofifi ife ekarọ inu geege. Ire, ǹkiweek ibe inyinyi kinyi, enyi agan̄ iba, ije ìkike. ¹⁴ Me mgbọ keyi enyi ekaan̄be inu owuwa, ema ekukup me una, uche ònan̄a me lek owuwa inu eyi enyi ekaan̄be môsi irọ inyi ema ekaan̄ inu geelek ònanan ema. Mgbọ inu isininwọn me lek kiban̄, mè ifieek me lek kinyi, uche ònan̄a me lek owuwa inu eyi ema mêkaan̄be mônirọ inyi enyi ekaan̄ inu geelek eyi mônanbe enyi. Mgbọ ya, inyinyi kinyi agan̄ iba mônenilibi ìkike. ¹⁵ Ege me Ikpa Mbuban ibe, “Ogwu òteteen̄ iwa ìkakaan̄ ìwa ìraka ikeke îweekbe; ogwu òteteen̄ sọntiik ìkakaan̄ ìsip ìraka ikeke îweekbe.” ¹⁶ Ntọn̄ Awaji enenen, mije, ulọk yaage nkaan̄be itatap ubọk inyi enyi ke îtap si me ejit kè Taitọs. ¹⁷ Mije, Taitọs îbọkọ otitọt kiji itap mgbọ yaage, mè isa me ubelejit itumu ifieek me lek kan̄ gaalek ibe ke ọmọ mônu me lek kinyi. ¹⁸ Eji ekiria ọmọ melek gwun̄ Nte kiji ge, ogwu otutuuk ntitiin̄ Awaji ekinyi ulibi mije ubọk îkisa isi ikwaan̄ itutumu ikọ Awaji ijaan̄ enenen. ¹⁹ Ògak ge, îre otutuuk ntitiin̄ Awaji egobo gwun̄ Nte kiji yi ibe ikigọọk eji ikijijen̄e ikana ere geelek eji ekisi ikwaan̄ inyinyi eyi imumechieen̄ yi. Eji ekisi ikwaan̄ yi, inyi Okaan̄-ene me lek kan̄ ibọkọ umin, mè eji esa me ikeya ejeen̄ ibe ke eji mîkaan̄ ulọk itatap ubọk inyi bọn Awaji. ²⁰ Eji ekigbagbala chieen̄ irọ ikwaan̄ inyinyi eyi imumechieen̄ yi, inyi ene geege ikakaan̄ inu geege ìbosa ifieek eji ikọ me lek ubọk eji ekisa isi ikwaan̄ yi. ²¹ Eji ekibọbọkọ ufialek ikirọ ikwaan̄ yi, inyi inu geelek eji erọbe itat me isi Okaan̄-ene, mè itat si me isi ebilene. ²² Ofifi ene si eji ekiria igbaalek kiban̄ ìre gwun̄ Nte kiji ge ogwu eji eweekbe imun̄ ibe ke îkaan̄ ulọk itatap ubọk mgbọ geelek. Ògak ge, mgbọ keyi îtoon̄be enyi ejit me lek enenen, îweek inunu ere kinyi. ²³ Ire Taitọs, ọmọ ìre ogwu melek n̄a ekigbaan̄ isi ikwaan̄ me etete kinyi. Bọn Nte kiji iba kechilọ ìre ebi otutuuk ntitiin̄ òkup me agan̄ keyi egobobe ito me otuchieen̄ kiban̄, inyi esa umin enyi Karais. ²⁴ Eya orọ, ìjeen̄ ebirieen̄ chi ata imumechieen̄ kinyi, inyi otutuuk ntitiin̄ Awaji emun̄, mè eriọọn̄ ibe ke eji kpesa enyi irọ otu me ikike.

¹ Ìkakup me uyọt ibe emi ǹge ikpa ǹjet enyi òfolek ikwaan̄ ntap ubọk eyi ekiria ijet ebi eyi Awaji ìkup me Judia. ² Nriọọn̄ ibe ke enyi mîkaan̄ ulọk itatap ubọk. Mije keya si ke nkisa enyi igugo lek me isi ebi agan̄ Mesidonia, mè ikitumu inyi ema ibe ke enyi ebi ìkup me agan̄ Akaya mîbem lek isan̄a itatap ubọk karake acha keyilọ. Ulọk enyi ekaan̄be îsisik owuwa kiban̄, mè irọ inyi ema ebene etap lek me lek ikwaan̄ ntap-ubọk yi. ³ Eya orọ, ǹkiria bọn Nte kiji chi inu me lek kinyi, inyi enyi esa ata mgbọ ebem lek itatap ubọk, mè gogolek geelek eji esabe enyi igugo ìkare me ukpọk-otu ikike. ⁴ Ire ebi Mesidonia igọọk emi inu, mè inimun̄ ibe ke enyi kpebem lek me atikọ, esip môtet eji enenen, mè itet enyi si, mije, eji mîtoon̄ enyi ejit me lek enenen. ⁵ Eya orọ îkupbe me uyọt ibe emi ǹria bọn Nte kiji chi ibe edasi enu enedọmọ esan̄a melek kinyi ubọk enyi mêsabe ichili ubọk inyi inyinyi ata ejit yi kubọk enyi ewuukbe lek ichieek use ibe ke enyi mêrọ. Ìneen̄ otutuuk inu ìsun̄ sabum usen mânube, inyi ire inyinyi ata ejit me atikọ, mè ikare kubọk inu esabe ejit uduk inyi mije etetbe ene me unye. ⁶ Ikawuuk ibe ke ogwu òwop sọntiik mfut inen mè inen gaalek me uko ìborọkọ si sọntiik. Ire, ogwu òchichili ejit iwop owuwa ìborọkọ si owuwa. ⁷ Ene geelek inyi inu îtumube ifieek me ejit kan̄ ibe ke ọmọ mônyi, ikare me ejit uduk, ikare si kubọk etetet ọmọ me unye ubọk. Mije, Awaji ìkima ogwu òkisa me ubelejit inyi inyinyi. ⁸ Awaji môkọt inyi enyi otutuuk ugbana geelek ogbogbo, inyi enyi ekekaan̄ otutuuk inu geelek enyi eweekbe mgbọ geelek, mè ekechili ubọk ekeda inyinyi egwook, inyi ekesa esi ata ikwaan̄ geelek òkup me uyọt isisi. ⁹ Ege me Ikpa Mbuban ibe, “Ọmọ îchili ubọk iche uche inyi ebi ugbọọn̄; ata irọrọ kan̄ môkup ire mgbọ ikakaan̄ge itata.” ¹⁰ Awaji ogwu òkiche mfut inyi ogwu òwop mfut, mè ikirọ inyi mfut cha itibi ikana inorie ebererie, mônyi enyi inu ogbogbo, mè irọ inyi ikwaan̄ ata irọrọ kinyi ikimumana. ¹¹ Awaji môrọ inyi enyi ebọọn̄ ubọọn̄ me oniin̄ geelek, inyi enyi ekekọt echili ubọk enyi inyinyi me irek geelek. Sa me ikeyi, owuwa ene mênyi Awaji itọn̄ mije uche kinyi, eyi eji mêsabe isi iche inyi ema. ¹² Ikwaan̄ keyi enyi ekisi òkirọ inyi ebi eyi Awaji ekaan̄ inu geelek ònanan ema. Ìkare eya gaalek, ikwaan̄ kinyi yi òkirọ inyi ogbogbo ene ekesa me ejit unwọọn̄ enyi Awaji itọn̄ ikpele ikpele. ¹³ Ikwaan̄ keyi enyi ekirọ îjeen̄ ene ebi enyi erebe me atikọ. Eya orọ, owuwa ene mênyi Awaji umin mije enyi esikibe ibot inyi ata etip kè Karais eyi enyi echieekbe me lek, mè ikitumu isibi. Ema mênyi si Awaji umin mije uche enyi echilibe ubọk iche inyi ema, mè ofifi bọn Nte si. ¹⁴ Ema isiberiaak uriaak inyi enyi, ema mêsa otutuuk ejit kiban̄ iriaak, mije ikpele uyeke uyeke atata nnwọn eyi Awaji onyibe enyi. ¹⁵ Itọn̄ ikup inyi Awaji mije uche îchebe inyi eji, eyi otu ebilene kpokọtbe ikpa.

¹ Emi Pọọlu ogwu enyi ebe ke ìkifieek owot me isi kinyi, mè ikinye otu me udun̄ kinyi, emi ǹkisa me isiki-lek mè ejit nsan kè Karais iriaak enyi. ² Soso, nsinu me lek kinyi, ikarọ inu geege eyi môrọbe mè ǹnye otu ǹnyi enyi. Mije, nriọọn̄ ibe ke mâkọt inye otu ijaan̄ lek inyi usini ebi melek kinyi ebi ìkikeek ibe ke eji ekirọ inu ubọk ebi linyọn̄ ekirọ. ³ Mije, ubọk geelek eji elukbe me linyọn̄ keyi, eji kpekitim akọn̄ kubọk ebi linyọn̄ ekitim. ⁴ Nroon̄ akọn̄ eji ekisa itim akọn̄ kiji ìkare echi linyọn̄ keyi, îre echi ònan̄a me ubọk Awaji. Nroon̄ akọn̄ chi îkaan̄ unye enenen. Môkọt igbugbọ uwu mgban-akọn̄ geelek ònyenye igwook me ijọn̄. ⁵ Ọmọ ke eji ekisa igbugbọ otutuuk ifan̄a geelek, mè ofiaan̄ ugumulek geelek eyi òkikput ibe ene ekariọọn̄ Awaji, mè ikisa si itet ijo ekiket ebilene geelek me unye, inyi isiki ibot me ijọn̄ inyi Karais. ⁶ Otutuuk kinyi isijeen̄ ibe ke enyi mîsiki ibot iso, eji mêbem lek isusulu ebi unye-ibot geelek osusut. ⁷ Enyi ekikpọ inu inyọn̄ inyọn̄ gaalek. Ire ikaan̄ ogwu me etete kinyi òkimọnọ lek kan̄ ibe ke ọmọ ìre ogwu kè Karais, ene ya ikpọk ikeek ibe ke eji si ìre ebi kè Karais, kubọk ọmọ orebe. ⁸ Okaan̄-ene înyi eji unye ibe eji enama enyi ebene, mè ekagbugbọ enyi ìgwook. Ire nsa unye yi ibaan̄ alọm imin sọnja, esip geege ìkpotet emi. ⁹ Ǹkaweek ibe ikup kubọk ǹkisa ikpa n̄a chi itap enyi ukpook me emen. ¹⁰ Usini ebi kinyi ekitumu ibe, “Ikpa kè Pọọlu ìkisisisik ene ukot me ijọn̄, mè ikikup ene me lek unye unye. Ire, me isi mè isi, Pọọlu ìkakaan̄ ulobo geege me lek, ikọ îkitumu si ìkakisibi inu geege.” ¹¹ Îgbe ibe ebi ìkup ikeya eriọọn̄ ibe, inu eji erebe me emen ikpa kiji mgbọ eji kpekup isi mè isi, ke inu yaage si ke eji ebere me emen irọrọ kiji mgbọ eji isinu isi mè isi. ¹² Eji kpeweek isusun̄ lek kiji ìkike melek ebi ìkimọnọ lek kiban̄ ubene ubene. Eji kpeweweek si isasa lek kiji itọ me lek kiban̄. Ife chi kpekaan̄ ifuk-ibot geege. Mije, ema ekisa lek kiban̄ itọ me lek ebi melek kiban̄, mè ikisa si ebi melek kiban̄ iroon̄ lek kiban̄, inyi ema eriọọn̄ ere ema erebe. ¹³ Ire eyi kiji, eji kpebegugo lek iraka ubọk îgbebe. Ire, eji ebegugo lek iyaka me lek ikwaan̄ Awaji otapbe eji me ubọk. Ikwaan̄ ya si ke eji enirọ me etete kinyi. ¹⁴ Eyi eji ekisa enyi igugo lek, gogolek kiji ìkasaba ìraka iman̄, mije, îre eji esa ata etip kè Karais itutobo mege inigwook me karake ama kinyi. ¹⁵ Eji kpesaba si iraka iman̄, mije, eji kpesa ikwaan̄ ebi ofifi ife erọbe igugo lek kubọk ke ìre eji erọ. Eji mîkaan̄ ikpọchieen̄ ibe, ike ichechieek kinyi okimumana, ke ikeya si ke ere ikwaan̄ kiji me etete kinyi môkida iwele enenen enenen. ¹⁶ Mgbọ keya, eji mêkọt isa ata etip isaba iraka enyi isi ilook me ofifi ido. Mije, eji kpeweek isasa ikwaan̄ ebi ofifi ife ewuukbe lek irọ me ofifi agan̄ igugo lek. ¹⁷ Ikpa Mbuban ìtumu ibe, “Ene geelek òbogugo lek, igugo lek mije inu Okaan̄-ene orọbe.” ¹⁸ Ene isasa otu kan̄ gaalek itumu ata ikọ ibak lek kan̄, eya ìkakup me lek inu geege. Ire, Okaan̄-ene me lek kan̄ isitumu ata ikọ ibak ene, eya onwọn ichit.

¹ Nkaan̄ ikpọchieen̄ ibe ke enyi mênye lek ime sọntiik burubut ikọ n̄a. Nriọọn̄ ibe ke enyi mîwuuk lek ikime iraka. ² Nkaan̄ ikpele ejit me lek kinyi, kubọk Awaji si okaan̄be. Ǹtet enyi kubọk obaak nsabọn ibaan̄ isun̄ inyi olom ge gaalek, òrere Karais. Ǹkiweek isasa enyi inyi Karais kubọk atata obaak nsabọn ibaan̄ ekariọọn̄ge ebirieen̄. ³ Ire, nkaan̄ ufieek-owot ibe, kubọk ijijunu osabe me uleke ifiaan̄ Îfu, inyi inan̄a irọn̄, ikeya si, ke ebi ene mêkọt ifiat enyi ibot, mè irọ inyi enyi ekayaka ìgọọk Karais me otutuuk ejit kinyi. ⁴ Mije, mmun̄ ibe ke enyi ekpọkpọ ikibọkọ inu geelek itap, kpekifiat mgbọ ikiwọlọ ikpọ mè ìre atata, mè ìre ijijo. Ìkire, ogwu isa ofifi Jisọs inijeen̄ enyi, mè ikarege Jisọs ogwu eji ejeen̄be enyi, enyi mîra ikpọkpọ ibọkọ itap. Ogwu isa ofifi ekwukwu geelek mè ofifi ata etip geelek inijeen̄ enyi, me ikarege Ekwukwu mè ata etip eyi enyi ebọkọbe me ubọk kiji, enyi mîra ikpọkpọ ikibọkọ itap. ⁵ Ire, ǹkakeek ibe ke nsiki enenen ìgak ebi enyi ekimọnọ ibe ìre ebi otuchieen̄ ìbebene ichit cha. ⁶ Ubọk geelek nkakaan̄ge uja otu ìtumu ikọ, nkaan̄ ifuk-ibot. Eyiyi ìre inu eji esabe me oniin̄ geelek irọ inyi enyi eriọọn̄ ejaan̄ lek me emen inu geelek eji ekirọ melek kinyi. ⁷ Ubọk nsikibe lek n̄a, inyi ǹkọt ǹlook enyi ata etip eyi Awaji me ikike, mè ǹsa me ikeya m̀bene enyi m̀fo inyọn̄, ìre ijo inu ire eya nrọbe? ⁸ Mgbọ nkupbe melek kinyi ikilook enyi ata etip, ìyaka inikup kubọk ǹkichichiin̄ inu me ubọk ebi ofifi ntitiin̄ Awaji, mije, îre ebiba ekikpọ emi owot me mgbọ ya. ⁹ Mgbọ nkupbe melek kinyi ikisi ikwaan̄, inu isinan emi, ǹkakisisaak ene geege me etete kinyi ibe initap ubọk inyi emi. Mije, îre bọn Nte kiji ìnan̄a me agan̄ Mesidonia ekinyi emi inu geelek òkup emi me uyọt. Ǹkasa ufialek n̄a geege ìnikeme enyi ene geege. Ikeyi ke mbakirọ si ifo isi. ¹⁰ Sa me atikọ kè Jisọs Karais òkup emi me emen, kpunu ene geege me otutuuk agan̄ Akaya òbokọt ikput emi ibe nkayaka ìgugo lek. ¹¹ Ìre keke orọ mè ǹtumu ikọ keyi? Ìre mije ke ǹkama enyi? Awaji îriọọn̄ ibe ke mma enyi enenen! ¹² Mâkpọkpọ ikirọ inu nkirọ mgbọ keyi ifo isi, inyi ebi ìkigugo lek ibe ke ema melek kiji ekisi ikwaan̄ me oniin̄ yaage ekakaan̄ inu ema ebesa ikigugo lek. ¹³ Mije, ife ìkup ikecha ìre ebi otuchieen̄ eyi ataak, mè ebi ikwaan̄ ofiaan̄, ebi ìkinwene lek kiban̄ ikup kubọk ebi otuchieen̄ kè Karais. ¹⁴ Eyi ìkake ene geege chieen̄. Mije, Setan me lek kan̄ îkinwene lek kan̄ ikup kubọk ogwu osat eyi utoon̄. ¹⁵ Eya orọ, ìkake eji chieen̄ ìgana si ibe ke ebi ikwaan̄ kan̄ mînwene lek kiban̄ ikup kubọk ebi ikwaan̄ eyi ata irọrọ. Me mgburudun̄, ema mêbọkọ mkpukpe ògbegbe ikwaan̄ cha geelek ema erọbe. ¹⁶ Mâkpọk itumu si, ene geege ikamọnọ emi kubọk ogwu burubut! Ire, ire enyi imọnọ emi kubọk ogwu burubut, ìbọkọ emi kubọk ogwu burubut, inyi ǹkaan̄ irek ǹgugo lek si sọnja. ¹⁷ Me emen unye-ejit eyi nkaan̄be ikisa igugo lek, ǹkasa me unye eyi Okaan̄-ene ìkitumu inu nkitumu. Ire, ǹkitumu ikọ kubọk ogwu burubut. ¹⁸ Ire, ubọk owuwa ebi ene ekisa inu linyọn̄ igugo lek, ikeya si emi si mâgugo lek. ¹⁹ Ire, enyi mîriọọn̄ inu ikeyi, mè ikibele ejit ikigban̄ ikọ ebi burubut! ²⁰ Ebi ene mêkisa enyi irọ usun̄, mè ikisa enyi ibọm mbọm inyi lek kiban̄, mè ikifeen̄ enyi, mè ikikpọ enyi chieen̄ isiki, mè ikitap enyi ada me isi, enyi ekpọkpọ ikibọkọ itap! ²¹ Eji kpebekọt inye ejit irọ ene òjelek nnaan̄ òkup ikeya. Ire ibesa eya ifuk ibe ke eji kpenye chieen̄, efuk! Esip ibotet eji, itet! Inu geelek ene môkọtbe isa igugo lek, emi si mâkọt isa igugo lek. Ǹkitumu ikọ kubọk ogwu burubut. ²² Ire ema ire ebi Iburu, emi si, emi ìre ogwu Iburu. Ire ema ire ebi Ijeren, emi si, emi ìre ogwu Ijeren. Ire ema ire bọn owot iman ke Ebereham, emi si, emi ìre gwun̄ owot iman kè Ebereham. ²³ Ire ema ìre ebi ikwaan̄ kè Jisọs Karais, emi ìre ata ogwu ikwaan̄ ke Jisọs Karais igak ema otutuuk ene! Iin̄, ikọ keya môkọt itaan̄ ene me utọn̄ kubọk emi ìre ogwu iraak! Nsi ikwaan̄ inye enenen igak ema. Mîtap emi mkpọn owuwa mgbọ igak ema, mè isulu emi iwa mgbọ igak ema. Nkup me ubọk mkpa si owuwa mgbọ igak ema. ²⁴ Mgbọ go ire eya ebi Ju esulube emi ìnan ge me akọp otu njijan̄ ini. ²⁵ Mgbọ ita ke ebi Rom esa mgbidim okwukwut isulu emi. Mgbọ ge ke esa ewuuk itọbọ emi ibekpan̄. Mgbọ ita ke uji orek emi me okwaan̄, nkukup me inyọn̄ isi mun̄ eririeen̄ ge mè ikarek ge, me ejit okwaan̄. ²⁶ Ǹkikup me oniin̄ ije mgbọ geelek, mè ikikup me ubọk mkpa me sọntiik okwaan̄, mè ikup si me ubọk mkpa me ubọk ebi inọ afa. Nkup si me ubọk mkpa me ubọk ebi Ju ama n̄a mè ubọk ebi kpere ebi Ju. Nkup me ubọk mkpa me emen uga ama ere ogbogbo ene elukbe mè emen èwê ere ebi ene ekalukge. Nkup me ubọk mkpa me okwaan̄ ile mè ubọk ataak ataak bọn Nte. ²⁷ Nkwukwulu me lek ikwaan̄, mè imun̄ ukwook, mè ikitop chieen̄ owuwa eririeen̄, ǹkalaak ilaak. Owuwa mgbọ, uraafiọọn̄ îtaka emi, ebek si orarak emi, ire, ǹkamun̄ inorie geege ìrie. Nkup me lek utọọk owuwa mgbọ, mè ije njak owuwa mgbọ. ²⁸ Isan̄a me lek otutuuk inu kechi, saasaak mè owuwa ekiket òfolek otutuuk ntitiin̄ Awaji ìkikekeme emi egwe geelek. ²⁹ Ìre îkaan̄ ogwu lek owọbe eyi emi nkagọọkge ene ya ìkup me uwọ-lek? Ìre ekene orọn̄ inin̄ me ijo inu eyi emi nkafieekge ejit ìkwu mije ene ya? ³⁰ Ire mbagugo lek me atikọ, mâsa inu òkijeen̄ uwọ-lek n̄a igugo lek. ³¹ Awaji ogwu òrere Nte Okaan̄-ene Jisọs îriọọn̄ ibe ke ìkare ataak ke nkikan̄. Itọn̄ ikup inyi ọmọ ire mgbọ ikakaan̄ge itata. ³² Mgbọ nkupbe me ama Damasikọs, ogwu ibot mkpulu ama ya, ogwu òkup me irak ogwu ubọọn̄ ekigwen Aretas, ito ebi ìkibem ere ikana ama ya ibe etet emi. ³³ Ire, bọn Nte ebeben emi me emen okwun, itap itibi otu nruruk ge òkup me lek mgban ama ya, mè igele emi isiki iyik me udun̄ ama. Nsasa me ikeya ilibi inwọnọ me ubọk kan̄.

¹ Mâkpọkpọ ikigugo lek inyi isi ubọk geelek kpunube oruru me lek. Mâtumu si ikọ ire lek ilaak ọkpọchieen̄ mè inu Okaan̄-ene ochilibe ijeen̄ emi. ² Nriọọn̄ ogwu enerieen̄ ge òchechieek me lek kè Karais, ogwu ebenbe isa isi emen inyọn̄ ere òbebene ichit, akọp mè acha ini òraraka. Mè ìre inu yi ìrọ ọmọ me ọkpọchieen̄ me akpalek keyi, mè ìre me ilaak ọkpọchieen̄, ǹkariọọn̄, Awaji gaalek oriọọn̄. ³ Mâkpọk itumu si. Nriọọn̄ ibe ke Awaji îben ene ya isa ifo Paradais. Ire, ǹkariọọn̄ mè ìre me ọkpọchieen̄, mè ìkare ọkpọchieen̄, Awaji gaalek oriọọn̄. ⁴ Me ere ya, ene ya înọ inu otu ebilene kpokọtbe itumu isibi, echi kpenyi ebilene unye ibe ekpa. ⁵ Mâsa enerieen̄ òkup ikeya igugo lek. Ire, m̀kpasa lek n̄a igugo lek, îtata mè m̀basa inu echi òkijeen̄ uwọ-lek n̄a igugo lek. ⁶ Ìrere mweweek igugugo lek, m̀kpare ogwu burubut, mije, mâkitumu atikọ me emen gogolek n̄a. Ire, m̀kpagugo lek, mije ǹkaweek ibe ene geege ikeek inu òfolek n̄a ibene igak inu nrọbe, mè echi ntumube. ⁷ Awaji ìkaweek ibe emi m̀bene lek ǹraka iman̄ mije owuwa ikpele uyeke uyeke nlelet inu chi îchilibe ijeen̄ emi. Eya orọ, isasa ukpak ge, òrere ogwu osat kè Setan, inichim inwaan̄ emi me emen ufuk, inyi ikisisaak emi. ⁸ Mgbọ ita ke nriaak uriaak ibeek Okaan̄-ene ibe ijibi ukpak ya isan̄a emi me lek. ⁹ Ire, Okaan̄-ene okekifọọk emi ibe, “Atata nnwọn n̄a îso owu, mije, unye n̄a ìkiso ifuk me emen kwun̄ me mgbọ lek kwun̄ owọbe isan̄a.” Eya orọ, mâkibele ejit mè ikigugo lek mgbọ geelek mije lek n̄a owọbe, inyi m̀mun̄ unye kè Jisọs Karais eyi òkikana emi ichit. ¹⁰ Îre mije keyi ke nkima uwọ-lek, mè unyechieen̄ eyi ebi ene ekinyi emi, mè ukwook, mè saasaak, mè ufialek òkup esese esese mije kè Karais. Mije, mgbọ unye n̄a otabe isan̄a, mgbọ keya ke lek n̄a onye iso ifuk. ¹¹ Nrọ inu kubọk ogwu burubut. Ire, îre enyi erọ mè ǹkup ikeya. Îre enyi ere ebi mekitumu ata ikọ òfolek n̄a inyi ebi ene, ìkare emi makitumu. Mije, ubọk geelek nkakupge me lek inu geege, emi ǹkasiki enenen ìgak ife cha ebi enyi ekimọnọ kubọk ebi otuchieen̄ ìbebene ichit. ¹² Mgbọ nkupbe me etete kinyi, nsa me irak ikpele ukarajit irọ otutuuk inu geelek ekisa iriọọn̄ ene kubọk ata ogwu otuchieen̄ kè Karais, kubọk inu òbet lek uyeke uyeke inu ijejeen̄, mè ikwaan̄ ukpook, mè inu ukechieen̄ òkup esese esese. ¹³ Ìre me oniin̄ òkwekweek ke enyi esa isiki igak ofifi ntitiin̄ Awaji, ilọ me lek nkasage ufialek n̄a ìkeme enyi mgbọ geege? Ire eya ke nsa irọ enyi ilọ, soso ìtele ìnyi emi! ¹⁴ Mgbọ keyi, ǹkibem lek inunu inikpọ enyi òso mgbọ ita. M̀kpasa ufialek n̄a geege inikeme enyi, mije, ìkare inu enyi ekaan̄be ke nkiweek. Îre enyi ke nkiweek. Ìkare nsabọn ekibọm inu isun̄ iban ebi ute mè ebi uga. Îre ute mè uga ekibọm inu isun̄ iban nsabọn kiban̄. ¹⁵ Eya orọ, môbele emi ejit ifafiat otutuuk inu geelek nkaan̄be inyi enyi, mè ifiin̄ si lek n̄a igbaalek inyi enyi, inyi enyi ekeke enye. Ire nkaan̄ ikpele imumechieen̄ me lek kinyi, ìre sọntiik imumechieen̄ gaalek ke enyi ebekaan̄ me lek n̄a? ¹⁶ Ubọk geelek inu osabe ikup, enyi mîriọọn̄ ibe ke ǹkaben ufialek n̄a ìkeme enyi. Ire, usini kinyi ekekitumu ibe ke emi ǹsa ofiaan̄ inileke enyi ibọkọ inu me ubọk. ¹⁷ Ìtumu nu, me etete ebi nriabe inu me lek kinyi cha, ìre îkaan̄ ebi nsabe ifeen̄ enyi? ¹⁸ Nria Taitọs ibe inu me lek kinyi, mè iria gwun̄ Nte kiji ge ibe igọọk ije. Ìre Taitọs îfeen̄ enyi? Ìre ìkare ejit yaage mè oniin̄ yaage ke eji melek kinyi ekisa irọ ikwaan̄ yi? ¹⁹ Me otutuuk ikọ chi eji ekitumu, usini mgbọ enyi ekikeek ibe ke eji ekiweek ichichit mbum kiji me isi kinyi. Iin̄-iin̄, ìkare ikeya! Eji kubọk ebi eyi Karais, eji ekitumu ikọ me isi Awaji. Ofifi si, bọn Nte n̄a, inu geelek eji ekirọ melek kinyi, eji ekirọ isasa inama enyi ibene me ichechieek. ²⁰ Nkaan̄ ufieek-owot ibe, nsinu, ke m̀kpanimun̄ enyi ubọk mweekbe ibe enyi ekup, enyi si kpebemun̄ emi ubọk enyi eweekbe ibe emi ǹkup. Nkaan̄ si ufieek-owot ibe ke ìre ibaak, mè ejit ile, mè ijo unaan̄-ejit, mè icheche lek, mè itutumu ene ifiat, mè ikpakpa ene, mè ugumulek, mè wọlọwọlọ ke mbanimun̄. ²¹ Nkaan̄ ufieek-owot ibe, ire nnu, ke Awaji n̄a môsiki emi me isi kinyi. Mije, ikpele ufieejit môkeme emi, ire nnu, mè inimun̄ ibe ke ebi ìrọrọn̄ inin̄ emen ijo inu karake mgbọ, kpegwu ikom itele ugwem ikatanage me isi Awaji, mè ugwem oje oyet, mè ijo ulọk barabat eyi ema ekifufuku me emen.

¹ Eyi môre òso mgbọ ita mbanu inikpọ enyi. Ìkeek inu Ikpa Mbuban otumube ibe, “Ogwu itumu ikọ itoon̄ ene, môkaan̄ ebi ata-ikọ iba mè ìre ita isa irọ ikọ kan̄ inye.” ² Me òso mgbọ iba nnube inikpọ enyi, ntaba ubọk me utọn̄ ebi ìrọrọ ijo inu mè ebi ofifi ene si. Mgbọ keyi nkakupge melek kinyi isi mè isi, mâkpọk itaba enyi ubọk me utọn̄ si ibe, nsinu, ke m̀kpalọlọ isusulu ene geelek òrọrọ ijo inu osusut. ³ Mije, enyi ekiweek ibe emi ǹjeen̄ enyi inu ijejeen̄ eyi enyi mêsabe iriọọn̄ ibe ke ìre Karais okitumu ikọ inan̄a me otu n̄a. Karais ìkawọ lek me inu geelek îkirọ melek kinyi, ire, ìkijeen̄ unye kan̄ me etete kinyi. ⁴ Me atikọ, egon ọmọ ikpan̄ me inyọn̄ uti nkwurieen̄ kubọk ogwu uwọ-lek, ire, ìkiluk ugwem mgbọ keyi sa me unye eyi Awaji. Ikeya si, eji ebi eyi kan̄, eji mîwọ. Ire, eji ekigọọk Karais iluk ugwem si sa me unye eyi Awaji, inyi eji ekọt esi ikwaan̄ enyi enyi. ⁵ Ìwọlọ ugwem kinyi, mè ìtọ lek kinyi ìkpọ mè ìre enyi òwa me emen ichechieek. Enyi mêweek imun̄ ibe ke Jisọs Karais ọmọ òwa me emen kinyi, îtata mè enyi ekikakan̄ ataak ibe ke enyi ìre ebi ìchechieek me lek kan̄. ⁶ Ntoon̄ ejit ibe ke enyi mêweek imun̄ ibe ke eji kpenan̄a irọn̄ me emen ntọ-mkpọ ya; ke eji ìre ata ebi otuchieen̄. ⁷ Mgbọ keyi, eji ekiriaak Awaji ibe mè enyi ekarọ inu geege ìlọ. Ìkare isasa ijeen̄ ibe ke eji mêkirọ ijaan̄. Ire, eji ekiweek ibe mè enyi ekerọ inu òtatat, ubọk geelek môkupbe me chieen̄ ebilene kubọk eji kpere ata ebi otuchieen̄. ⁸ Mije, eji kpebekọt irọ inu geege ikeme atikọ ya, kpan̄asi ikeya, eji ebekekeke inyi atikọ ya. ⁹ Eji mîkibele ejit mgbọ geelek lek kiji owọbe, eyi kinyi onyenye. Uriaak kiji ìre, mè Awaji irọ inyi enyi eso ifuk me emen ichechieek. ¹⁰ Îre mije keyi ke nge inu chi me ikpa ijet enyi mgbọ keyi nkakupge melek kinyi isi mè isi. Mije, nsinu, ǹkaweek isasa unye Okaan̄-ene onyibe emi kubọk ogwu otuchieen̄ irọ enyi inu me lek ikpak ikpak. Okaan̄-ene ìnyi emi unye yi ibe emi ǹsa ǹnama enyi m̀bene, ìkanyi ibe emi ǹsa m̀gbugbọ enyi ǹgwook. ¹¹ Eya orọ, bọn Nte n̄a ìriọọn̄ ubọk ìluk. Ìweek ubọk enyi mêkọtbe iluk ugwem òsoso ifuk, ìgban̄ utọn̄ me lek nteme n̄a. Ìluk me ejit ge, mè ìluk me esuuk. Awaji ogwu imumechieen̄ mè esuuk môkup melek kinyi. ¹² Ìkat lek kinyi me oniin̄ òkup mbuban, mè ìtọp lek kinyi amọn. ¹³ Otutuuk bọn Awaji mîtọp enyi amọn. ¹⁴ Atata nnwọn eyi Okaan̄-ene Jisọs Karais, mè imumechieen̄ eyi Awaji, mè igbagbaan̄ ititiin̄ eyi Ekwukwu Mbuban ikup melek kinyi otutuuk ene.