Timọti eyi adasi
11 Emi Pọọlu, ogwu òrere ogwu otuchieen̄ kè Jisọs Karais inan̄a me ida eyi Awaji Ogwu Unyan̄a kiji, mè Jisọs Karais ogwu eji ekaan̄be ikpọchieen̄ me lek, 2 emi nge ikpa etip keyi ijet owu Timọti, atata gwun̄ n̄a me oniin̄ ikọ Awaji. Atata nnwọn mè nsan mè esuuk eyi Awaji Ute mè eyi Jisọs Karais Okaan̄ kiji ikup inyi owu. 3 Îkaan̄ ebi ife ge ìkup me Efesọs ikijeen̄ nlilọ ijejeen̄. Eya orọ, ike ntumube inyi owu mgbọ ya mbasi Mesidonia, kup me Efesọs, inyi ògban ife cha, inyi ekayaka ìjeen̄ nlilọ inu cha. 4 Tumu nyi ife cha ibe etele urọk cha ikakaan̄ge ibot, mè ujọn̄ọ mfufuk owot iman cha ema ekifiat mgbọ kiban̄ ikijeen̄, mije, îre ifan̄a ifan̄a gaalek ke inu chi okitap me etete ebi ene, ìkakijeen̄ ene nkeek Awaji. Ekisa me ichechieek gaalek iriọọn̄ nkeek Awaji. 5 Inu òrọrọ mbe owu ògban ife cha ìre, inyi ebi ene ekọt esa me ejit ikakaan̄ge ofiaan̄ geege me emen, mè atata ichechieek eyi kpunube wọlọwọlọ geege me emen, emun̄ ebi melek kiban̄ me chieen̄, me ekiket kiban̄ ikafieekge ema ikọ geege. 6 Usini ene mîkpọ chieen̄ ilọ me lek inu chi, mè inan̄a igọọk ikisi itumu burubut ikọ ikakupge me lek inu geege. 7 Ema ekiweek irere ebi ìkijeen̄ Ikan Awaji, ire, ema kperiọọn̄ inu ema ekitumu. Ikan cha si ema ekirọ kubọk ema erọriọọn̄ ifiat, ema kpekọkọt igobo itet. 8 Eji mîriọọn̄ ibe ke Ikan kè Mosis ìre inu ònwọnwọn, mè ire ebi ene isun̄ Ikan cha kubọk Awaji oweekbe ibe esun̄. 9 Eji mîriọọn̄ si ibe ke kpebak me lek ebi ata irọrọ inyi Ikan cha; ke enyi Ikan cha ibak me lek ebi ìkifiat Ikan mè ebi unye-ibot, mè ebi kpekitet ukpook Awaji, mè ebi ijo ubọk irọrọ, mè ebi ekatanage me isi Awaji, mè ebi kpekisa inu eyi Awaji igwen inu geege, mè ebi ìkikpan̄ ebi ute mè ebi uga, mè ebi geelek ìkikpan̄ ene, 10 mè ebi barabat, mè ebirieen̄ ìkilaak ebirieen̄ ogbo kiban̄, mè ebi geelek ìkichiin̄ ene isa irọ usun̄, mè ebi ataak, mè ebi ìkinyan̄a ibot isan̄a mè ikan̄ ataak, mè ebi ìkije ikeme ata ijejeen̄ geelek eyi Awaji. 11 Ata ijejeen̄ chi ìre echi òkup me emen ata etip eyi umin mè uja, eyi Awaji ogwu òkaan̄ itọn̄ osabe itap emi me ubọk ibe emi ǹtumu ǹsibi. 12 Nsa itọn̄ inyi Jisọs Karais Okaan̄ kiji ogwu òmumun̄ ibe ke emi mgbe, mè igobo emi, mè inyi emi unye ibe emi ǹnensi ikwaan̄ ǹnyi ọmọ. 13 Me mgbọ òraraka, nkitumu ijo ikọ ibak Okaan̄-ene Jisọs, mè ikirọ ikeme ọmọ, mè ikirọ ọmọ inu esip. Ire, Awaji îkaan̄ emi ejit nsan me lek, bak me lek, inu chi nrọbe, ǹrọ me ekariọọn̄ge, mije, me mgbọ ya, ǹkachieek ibe ke Jisọs ore Karais ya. 14 Okaan̄ kiji oneninyi emi atata nnwọn kan̄ ojot ojot, mè inyi emi ichechieek mè imumechieen̄ eyi òkup me emen kè Jisọs Karais. 15 Eyi ekitumu ibe ke Jisọs Karais ìnu me linyọn̄ ineninyan̄a ebi ijo, ikọ ya ìre atalek atikọ, mè ire si ikọ ògbegbe ibe otutuuk ene echieek, mè ebọkọ etap. Emi mfieek ichit me etete otutuuk ebi ijo. 16 Mije keyi ke Awaji oto emi nsan, inyi Jisọs Karais isa emi ya ogwu òfefieek ichit me etete ebi ijo, ijeen̄ ebilene inu òfolek ujọn̄ọ ukarajit kan̄. Sa me ikeyi, ebi geelek mêchieekbe me lek kan̄ mè ikaan̄ ugwem ikakaan̄ge itata, mêkween̄ inu inan̄a me lek n̄a. 17 Umin mè itọn̄ ikup inyi Awaji ogwu òrere Ubọọn̄ eyi mgbọ geelek, ogwu kpokwube, ogwu chieen̄ ebilene ìkakimun̄, ogwu ọmọ gaalek orebe Awaji, ire mgbọ geelek, mgbọ geelek! Ikup ikeya! 18 Timọti, gwun̄ n̄a, ǹkinyi owu nteme keyi igọọk me lek nriran ebi eyi Awaji ebenbe ibak owu, mije, ire orọ inu etumube me nriran ya, owu môtim ata etim inyi Awaji, 19 mè ikeke inye me emen ichechieek. Ejit kwun̄ si ìkpofieek owu ikọ. Usini ene òwa ebi ekagban̄ge utọn̄ me lek inu ejit kiban̄ okitọ inyi ema. Sa me ikeya, ichechieek kiban̄ me lek Awaji îjijaka. 20 Usini me lek ife cha ìre Ameniọs mè Alikisenda. Nkana ife chi ene iba itap me ubọk Yọk, inyi isulu ema osusut, inyi ema ekayaka ìtọ Awaji ubọk me isi.
21 Me adasi irek, ìkiriaak uriaak, mè ìkibeek mbeek me ibot otutuuk ene. Ìkiriaak Awaji ibe irọ ene nsan, mè ìkinyi ọmọ itọn̄ me ibot otutuuk ene. 2 Ìkiriaak uriaak si me ibot ebi ubọọn̄ mè ebi geelek ìkup me ibot mkpulu, inyi eji eluk me esuuk mè utelelek me ojot ojot ukpook Awaji, mè ekeluk ugwem òkakaan̄ ulibi me oniin̄ geelek. 3 Eyi ìre inu ònwọnwọn, mè ineme Awaji Ogwu Unyan̄a kiji, 4 ogwu òweweek ibe otutuuk ene ekaan̄ unyan̄a, mè eriọọn̄ atikọ kan̄. 5 Awaji ge gaalek okup, ogwu nteek ge gaalek si okup ikiteek nteek me etete Awaji melek ebilene. Ene ya ìre Jisọs Karais, 6 ogwu òsasa lek kan̄ irọ inu inwene ibot inyi otutuuk ebilene. Eyi onenire inu ata-ikọ eyi ònunu me ata mgbọ, inirọ inyi ebi ene eriọọn̄ ibe ke Awaji ìkiweek inyanyan̄a otutuuk ebilene isibi me emen ijo inu. 7 Etip yi ke Awaji ogwen emi isa irọ ogwu otuchieen̄ kè Karais, ibe emi ǹsi ǹlook ǹkana me ere geelek, mè ǹsi ǹjeen̄ ebi ekarege ebi Ju ata etip eyi ichechieek mè atikọ. Ǹkakan̄ ataak ìnyi enyi, ǹkitumu atikọ. 8 Me ere geelek enyi etitiin̄be ikitọbọ ebum inyi Awaji, ǹkiweek ibe ebirieen̄ ekeriaak uriaak. Ebirieen̄ chi mêre ebi ìtatana me isi Awaji, kpebekaan̄ unaan̄-ejit mè ibaak geege me ejit. Ema mêkibene ubọk kiban̄ òkup mbuban ifo inyọn̄ mgbọ ekiriaak uriaak. 9 Ǹkiweek si ibe ebibaan̄ ekesa inu echi ekem ekem otu ewe ebala lek kiban̄ me ubọk ògbegbe mè inwọn mè ijaan̄. Ekakikpa òjelek ijeek ebi òje oyet ekikpa mè èkenwunwaan̄ inu unye otu ewe egak emen. Ekakisa si alata araran̄, mè ewuuk unye otu ewe, mè unye otu ewe ekwut mè ọfọnti ìbala lek. 10 Ire, mbala lek kiban̄ ìbore isisi ata ikwaan̄ echi ògbegbe ibe ebibaan̄ ebi ìchechieek me lek Awaji ekesi. 11 Enenwaan̄ geelek isiki ibot, mè ikiriaan̄ ere ikween̄ inu me emen uwu ntitiin̄ Awaji. 12 Ǹkanyi enenwaan̄ geege irek ibe ijeen̄ ikọ Awaji, mè ìyaka ire ibe ikitọ ikọ inyi ebirieen̄. Inu òkukup inyi enenwaan̄ ìre irariaan̄ ere ikigban̄ ikọ gaalek, 13 mije, Awaji ìdasi irom Adam sabum Îfu. 14 Ofifi kan̄, ìkare Adam ke Yọk ofiaan̄, îre Îfu ogwu enenwaan̄ ke îfiaan̄, inanan̄a irọn̄ inin̄ me ijo inu. 15 Ire, Awaji mônyan̄a ogwu enenwaan̄ inan̄a me lek Gwun̄ ya emanbe, mè ire ogwu enenwaan̄ ya ichieek me lek kè Jisọs Karais, mè ikeke inye me ichechieek ya mè imumechieen̄, mè itana me isi Awaji mgbọ geelek, mè ikisun̄ lek kan̄ ubọk ògbegbe.
31 Ene geelek òbeben me ejit ìrere ogwu òkpọ chieen̄ me ntitiin̄ Awaji, ene ya îweek ata ikwaan̄ òkakaan̄ umin. Eyi ìre atalek ikọ ògbegbe ibe etoon̄ ejit me lek. 2 Ogwu òkpọ chieen̄ me ntitiin̄ Awaji ìbore ogwu ikakaan̄ge nrọ-nlọ geege eyi ebi ene mêkisa itumu ijo usem ibak ọmọ. Ìbore si ogwu òkaan̄ nwa ge gaalek, mè ire ogwu òkirọ inu esuuk esuuk, mè ogwu òkikọt itet lek kan̄ ikaan̄, mè ogwu ebi ene ekinyi ulibi, mè ogwu òkima ibọbọkọ ebi ichen itap, mè ire si ogwu òrọriọọn̄ ijeen̄ ikọ Awaji. 3 Ìkabore ogwu òkimalek inwọ miin̄, ìkabore si ogwu afa. Ire, ìbore ogwu òkisiki lek, mè ikirọ inu esuuk esuuk. Ìkpore ogwu òkibaak ibaak, ìkpore si ogwu òkima ikpoko. 4 Ogwu òkpọ chieen̄ me ntitiin̄ Awaji môre ogwu òkiriọọn̄ ubọk ikpulu uwu kan̄ ijaan̄, mè ikikọt itet nsabọn kan̄, inyi ekesiki ibot enyi ọmọ, mè ekelibi ene me oniin̄ geelek. 5 Mije, ire ene ìkakọt ìkpulu uwu kan̄ ìjaan̄, ìre ìbojeje ikọt ikpọ chieen̄ me lek ntitiin̄ Awaji? 6 Ogwu òkpọ chieen̄ me ntitiin̄ Awaji ìkpore ogwu òchechieek me lek kè Jisọs Karais ayaya, inyi ikagumu lek, mè ìsa me ikeya ìnan̄a ìrọn̄ ìnin̄ me emen itip-oyerebet yaage Awaji otipbe Yọk. 7 Ọmọ môre ogwu ebi ekarege ebi ntitiin̄ Awaji ekinyi ulibi, inyi ikabọkọ itiik-otu melek esip me ubọk ebi ene, mè ìsa me ikeya ìrọn̄ ìnin̄ emen ufe eyi Yọk. 8 Ebi ntap-ubọk me ntitiin̄ Awaji si mêre ebi ebi ene ebekinyi ulibi, mè ire si ebi ofiaan̄ geege ikakupge me emen. Kpebere ebi ìkimalek inwọ miin̄, kpebere si ebi ìkaan̄ chieen̄ ile me lek ikpoko. 9 Ema mêre ebi ìtetet udọk udọk atikọ eyi ichechieek ema echieekbe me lek kè Jisọs Karais inye, me ejit kiban̄ ikafieekge ema ikọ geege. 10 Sabum ebemọnọ ema me lek ikwaan̄, mêdadasi itọ ema ikpọ. Ire kpunu nrọ-nlọ geege me ugwem kiban̄, emọnọ ema. 11 Ikeya si, ebi nwa kiban̄ mêre ebi ìgbegbe ulibi. Kpebere ebi ìkikpa ene, kpebere si ebi ìkinaan̄ ejit. Ebere ebi ìkirọ inu esuuk esuuk, mè ire si ebi ekitoon̄ ejit me lek, me inu geelek ema ekirọ. 12 Ogwu ntap-ubọk me ntitiin̄ Awaji môre ogwu òkaan̄ nwa ge gaalek, mè ikikpulu nsabọn kan̄ mè uwu kan̄ ijaan̄. 13 Ebi ntap-ubọk geelek ìsisi ikwaan̄ kiban̄ ijaan̄ mêkaan̄ irek umin me emen ntitiin̄ Awaji. Mije keyi, otu kiban̄ môninye itutumu ikọ òfolek ichechieek kiban̄ me emen kè Jisọs Karais. 14 Ǹkikpọ chieen̄ ibe, me ikafiin̄ge mgbọ, ke mânu inikpọ owu. Ire, ǹkige ikpa keyi ijet owu inyi, 15 ire ǹkagwat lek ìnu, owu môriọọn̄ ubọk ògbegbe ibe ebi ene ekesun̄ lek kiban̄ me ototun̄ ukan̄ eyi Awaji. Ototun̄ ukan̄ eyi Awaji ìre ogbo ntitiin̄ eyi Awaji ogwu òkup me ugwem, mè ire si ewuuk irak uwu mè ata òkibeme atikọ eyi Awaji. 16 Me atikọ, nlelet inu eyi echilibe ijeen̄ eji òfolek irọriọọn̄ Awaji îdọk enenen. Nlelet inu yi ìre ikeyi: Karais înu me linyọn̄ me akpalek ebilene, Ekwukwu Awaji îjeen̄ ibe ke kpunu nrọ-nlọ geege me emen kan̄, ebi Osat Awaji mîmun̄ ọmọ, ebi kan̄ mîtumu ọmọ isibi me ido geelek, ebi linyọn̄ mîchieek me lek kan̄, Awaji îben ọmọ ifo emen inyọn̄ isi itap me emen umin mè uja.
41 Ekwukwu Mbuban îtumu isibi ibe, me òta mgbọ, ke usini ebi ìchechieek me lek kè Jisọs Karais mêyaka ichechieek kiban̄ ito, mè ikana igọọk ekwukwu echi ofiaan̄, mè ijejeen̄ echi ijo erumun̄ okijeen̄. 2 Ijejeen̄ chi ìboje me otu ebi ofiaan̄ ebi ìkirọ kubọk ema ìre ebi atikọ. Ejit ife chi ìkpọkpọ inye kubọk inu esabe nkọm-ochichim ukan̄ otetbe iren̄e iwọp ikpan̄, mije, ema kpeyaka ikikọt iriọọn̄ inu òtatat mè eyi òlọlọ. Eya orọ, ema ikefafiaan̄ ene ubọk geelek, ejit kiban̄ ìkakifieek ema ikọ kubọk ge. 3 Ema ekijeen̄ ebi ene ibe ekayaka ìdo nwa, ekayaka ìbat olom, mè ekayaka ìrie usini inorie ebi ene ekirie, inorie Awaji orombe ibe ebi geelek ìchechieek me lek kan̄, mè iriọọn̄ atikọ kan̄ ekerie, mè enyi ọmọ itọn̄. 4 Inu geelek Awaji orombe ìre inu ònwọnwọn, kpunu geege ebefifiin̄. Otutuuk ìre inu ebebọbọkọ, mè inyi Awaji itọn̄, 5 mije, ikọ Awaji mè itọn̄ eji enyibe Awaji îrọ inyi inorie ya ikup me mbuban, mè igbe inu eberie. 6 Ire onyi bọn Nte kiji ìkup me ere ya otutuuk nteme chi, owu môre ata gwun̄ ikwaan̄ kè Jisọs Karais, mè ire si ogwu ekpukpobe isibi igọọk me atikọ eyi oniin̄ ikọ Awaji melek ata ijejeen̄ eyi owu me lek kwun̄ okigọọk. 7 San̄a lek kwun̄ me lek mfufuk echi ìkakinyi Awaji umin. Kikween̄ iluluk ugwem òkinyi Awaji umin. 8 Irọrọ inu eyi òkirọ mè anam akpalek ene inye înwọn. Ire, irọrọ inu ike Awaji oweekbe onwọn ichit me oniin̄ geelek, mije, môtap ubọk inyi ene me ugwem keyi, mè itap si ubọk inyi ene me ugwem òkinu me isi. 9 Ikọ keyi mbatumu ìre atalek ikọ eyi ògbegbe ibe ebọkọ otutuuk etap. 10 Eji ekikwukwulu mè ikibọkọ ufialek mije eji ekikpọ chieen̄ me lek Awaji ogwu òkup me ugwem, ogwu òrere ogwu Unyan̄a inyi otutuuk ebilene, ògak ge ebi geelek ìchechieek me lek kan̄. 11 Kiteme ebi ene nteme, mè kijeen̄ ema ibe ekerọ inu chi. 12 Kachieek ibe ene geege ikpọ owu chieen̄ isiki mije orebe sọntiik gwun̄. Ire, luk ugwem eyi ebi ìchechieek me lek kè Jisọs Karais mêsabe ikikween̄ inu òfolek otu itumu ikọ, mè ubọk irọ inu, mè imumechieen̄, mè ichechieek, mè iluluk ugwem eyi nrọ-nlọ ikakupge me emen. 13 Sa mgbọ kwun̄ mè efuuk kwun̄ kifuk Ikpa Mbuban nyi ebi ene, mè kitumu ikọ Awaji, mè kijeen̄ si ikọ Awaji mege ire mgbọ mânube. 14 Gbala chieen̄ kpọ uche eyi Ekwukwu Mbuban onyibe owu inan̄a me otu ebi nriran, mgbọ ebi ugane ntitiin̄ Awaji etoon̄be owu ubọk me ibot. 15 Gwuun̄ chieen̄ kirọ inu chi, mè sa otutuuk lek kwun̄ nyi, inyi ene geelek imun̄ ubọk owu okije ifo isi. 16 Gbala chieen̄ kpọ lek kwun̄ mè inu okijeen̄, mè nye lek kirọ ikeya fo isi, mije, ire okirọ ifo isi, Awaji môsa me ikeya inyan̄a owu, mè inyan̄a si ebi geelek ìkigban̄ ikọ kwun̄.
51 Kakigana ikọ ìnyi ebi ugane ebirieen̄, kitumu ikọ ususuk nyi ema geelek kubọk ìre nte kwun̄. Mọnọ ebi nsabọn irieen̄ kubọk ebi ngwan̄ kwun̄ ebirieen̄. 2 Mọnọ ebi ugane ebibaan̄ kubọk ebi nga kwun̄, mè mọnọ si ebi nsabọn ibaan̄ kubọk ebi ngwan̄ kwun̄ ebibaan̄, kakaan̄ ijo ulọk geege òfolek kiban̄ me ejit kwun̄. 3 Sa ulibi ògbegbe nyi ebi nwakpa geelek ekakaan̄ge ebi ìkikpọ ema chieen̄ me lek. 4 Ire nwakpa ikaan̄ bọn mè ìre bọn bọn, nsabọn cha ekpukpo ebi ìsasa ema inu inyọn̄ kubọk ebi ìsasa ema inu inyọn̄ ekpukpobe ema, mè esa me ikeya edasi ebene me uwu kiban̄ ekerọ inu ichechieek kiban̄ okido ibe ema erọ enyi ebi uwu kiban̄. Eyi ìre inu Awaji okiweek. 5 Nwakpa geelek ikakaan̄ge ogwu òkikpọ ọmọ chieen̄ me lek ìkitoon̄ ejit me lek Awaji, mè ikiriaak uriaak ibeek ntap-ubọk me ubọk Awaji eririeen̄ mè ikarek. 6 Ire, nwakpa geelek òsasa lek kan̄ inyi utop linyọn̄ mè ubene ugwem, nwakpa ya ìkwukwu isan̄a, ubọk geelek îkupbe me ugwem. 7 Nyi otutuuk ene nteme keyi, inyi ema ekerọ inu òtatat, mè otu ene ikakire ema lek. 8 Ene geelek ikakpọge chieen̄ me lek ebi uwu kiban̄, ògak ge ebi ototun̄ ukan̄ kan̄ gaalek, ene ya îjit ichechieek îchieekbe me lek kè Jisọs Karais. Ene ya si îfieek igak ogwu ikachieekge me lek Awaji. 9 Kamọnọ nwakpa geege ìtap me otu ifuk ebi nwakpa, îtata ìkakan iraka akọp acha gweregwen, mè ire ogwu ikatelege ogwu olom, mè ìsi ugan. 10 Isan̄a me ikeya, nwakpa ogwu ebetap erieen̄ môre si ogwu eriọọn̄be mije ata ubọk ikwaan̄ kan̄, kubọk ikwaan̄ ikpọkpọ ebi bọn isibi me ubọk ògbegbe, mè isasa ata ubọk ibọkọ ebi ichen itap me uwu kan̄, mè igwọgwọk ukot ebi ntitiin̄ Awaji, mè itatap ubọk inyi ebi ìkup me emen ufialek, mè irọrọ inu geelek òrere ata inu me otutuuk ugwem kan̄. 11 Ire, ebi nwakpa geelek ekarege ebi ugane, kafuk ìtap me otu ifuk ebi nwakpa, mije, ulọk olom isimin me emen kiban̄, ema mêsi ibat olom, mè itele Karais ogwu ema echieekbe use isisi ikwaan̄ inyi me otutuuk ugwem kiban̄. 12 Sa me ikeya, Awaji môtip ema oyerebet, mije ema efiatbe use ya ema echieekbe me ibebene mgbọ etapbe ema me otu ifuk ebi nwakpa. 13 Ìkarere eya gaalek, ema mêkọt ikana ugbek, mè ikijijen̄e isotu uwu ene. Isan̄a me lek irere ugbek, ike ekijijen̄e ikana cha, mêkikpa ene, mè ikitap chieen̄ me lek inu ebi ofifi ene, mè ikitumu ikọ ikagbege ibe etumu. 14 Eya orọ, nteme n̄a ìre, ogwu nwakpa geelek ikarege ugane, isi ikaan̄ olom, mè imaan̄ bọn, mè ikpọ chieen̄ me lek uwu kan̄, inyi ogwu òchicha ya ikasa me lek kan̄ ìkaan̄ inu ìbosa itumu eji ifiat. 15 Îkaan̄ usini òjelek ebi nwakpa chi ebi ìwuwuuk lek inan̄a irọn̄, mè ikana igọọk Yọk. 16 Ire enenwaan̄ geelek òchechieek me lek kè Jisọs Karais ikaan̄ ebi nwakpa me ototun̄ ukan̄ kiban̄, ogwu enenwaan̄ ya ikikpọ chieen̄ me lek ebi nwakpa kecha, mè ufialek keya ikakeme ebi ntitiin̄, inyi ebi ntitiin̄ ekọt ekpọ chieen̄ me lek ebi nwakpa ebi kpekaan̄ ebi ìbekikpọ ema chieen̄ me lek. 17 Ebi ugane ntitiin̄ geelek ìsisi ikwaan̄ kiban̄ ijaan̄, îgbe ibe ekpe ema mkpukpe kiban̄ irek iba, mè enyi ema ulibi si irek iba, ògak ge ebi ikwaan̄ kiban̄ orebe itutumu ikọ Awaji mè ijejeen̄ ikọ Awaji, 18 mije, ege me Ikpa Mbuban ibe, “Kabọp otu erie mbuuk ìchit me mgbọ ekisa erie mbuuk ya iwaan̄ akpa isan̄a me lek mgbigbin,” mè ige si ibe ke ogwu òsi ikwaan̄ îgbe ibọbọkọ mkpukpe ubọk ikwaan̄ kan̄. 19 Kagban̄ ikọ geege etumube ikeme ogwu ugane ntitiin̄ geege, îtata ebi ata-ikọ iba mè ìre ita enenirọ ikọ ya ijot. 20 Ire ogwu ugane ntitiin̄ irọ ijo inu, kup me isi otutuuk ebi ntitiin̄ Awaji gana ikọ nyi, inyi ebi ugane ntitiin̄ kechilọ emun̄, mè etet ukpook. 21 Me isi Awaji, mè isi kè Jisọs Karais, mè isi ebi osat Awaji ìkup me mbuban ke nkitumu inyi owu ibe, sun̄ nteme kechi nnyibe owu, mè kagọọk ene geege ìkeke, kagobo si ene geege isi. 22 Kakigwat lek ìtoon̄ ene ubọk me ibot ìsa ìrọ ogwu ugane ntitiin̄, inyi okamọnọ ogwu ikatatge, mè ìsa me ikeya ìkaan̄ uche me lek ijo ìnu geelek îrọbe. Sun̄ lek kwun̄ tana me isi Awaji. 23 Kayaka ìkinwọ mudim gaalek, kinwọ si sọntiik miin̄ gbaalek, mije owot kwun̄ melek orukan̄ òkisisaak owu mgbọ geelek. 24 Osikirọ inu melek ebi ene, riọọn̄ ibe ke ìkare ijo inu otutuuk ene ekirọ okikpọk mbum ìkike me chieen̄ ene. Echi usini ene môkọt ilet ikam mege ire mgbọ ebesibi ife cha oyerebet me ibot. Sa echi usini ene okikpọk mbum me ujọn̄ọ mgbọ sabum ebenisisibi ema oyerebet me ibot. 25 Ikeya si, ata inu ìkakilọlọ isisibi utoon̄. Echi ikasisibige utoon̄ si, kpekikọkọt ilet.
61 Ebi geelek ìrere ebi usun̄, ekenyi ebi nte uwu kiban̄ ojot ojot ulibi ògbegbe, inyi ene geege ikagọọk me lek kiban̄ mè ìtumu ijo usem ìbak erieen̄ Awaji melek ikọ Awaji eyi eji ekijeen̄. 2 Ebi usun̄ geelek ebi nte uwu kiban̄ erebe ebi ìchechieek me lek kè Jisọs Karais, ekamọnọ ibe ke ema mè ebi nte uwu kiban̄ mîkana ngwan̄ ngwan̄ me emen kè Karais, mè ìsa me ikeya ìtele inyinyi ema umin ògbegbe. Kpan̄asi ikeya, ema esi ikwaan̄ enyi ebi nte uwu kiban̄ cha egak ike ema ewuukbe lek ikisi, mije, ebi ikwaan̄ kiban̄ okinin̄ oruru inyi ìre ebi ìchechieek me lek kè Jisọs Karais, mè ire si ebi ema emabe. Nteme kechi ke owu môkijeen̄ ebi ntitiin̄ Awaji ebi ìrere usun̄, mè ikitumu inyi ema ibe ekerọ. 3 Ene geelek ònunu inijeen̄ esese inu, mè ijit ata ijejeen̄ eyi Okaan̄ kiji Jisọs Karais, mè ijit si ikọ Awaji eyi eji ekijeen̄, 4 ene ya ìre ogwu ugumulek, ìkariọọn̄ inu geege. Ene ya ìre ogwu òkima ifan̄a mè ikekigbini ikọ. Igbini-ikọ chi ìkitap ijo ejit, mè ibaak, mè itutumu ene ifiat, mè ijo una utoon̄-ejit me lek ene, 5 mè ikitap si okput mgbọ geelek me etete ebi ene ebi ejit kiban̄ ofiatbe isan̄a, ebi atikọ geege ikakupge me emen kiban̄, ebi ìkikeek ibe ke oniin̄ ikọ Awaji ìre oniin̄ mêsabe ibọọn̄ ubọọn̄. 6 Oniin̄ ikọ Awaji ìkekitap ene ikpele ubọọn̄, mè ire inu ene okaan̄be ijot ene chieen̄. 7 Mije eji kpesa inu geege inu me linyọn̄. Ikeya si, eji kpebesa inu geege inan̄a me linyọn̄ isibi. 8 Eya orọ, ire eji ikaan̄ inorie mè inu eji mêkisa ichit akpa lek, eya îso eji. 9 Ebi ìkiweek ibọbọọn̄ ubọọn̄ ekirọn̄ inin̄ me uleke, mè erọn̄ ènin̄ emen ufe eyi burubut ulọk, eyi môkọtbe itap ema unan me lek, mè otaba ema otap me emen ichep mè mfiat. 10 Ulọk ebek ikpoko ore ugwun̄-ijọn̄ ge eyi ijo inu geelek okinan̄a me lek itibi isibi. Usini ebi ìchechieek me lek kè Jisọs Karais mîgọọk ulọk ebek ikpoko mè itele ichechieek kiban̄, mè isa me ikeya itap ufieejit igak lek kiban̄. 11 Ire, owu ogwu eyi Awaji, san̄a lek kwun̄ me lek otutuuk inu chi. Libi gọọk ata irọrọ. Kaan̄ ukpook Awaji, mè ichechieek, mè imumechieen̄, mè ukarajit, mè kirọ inu esuuk esuuk. 12 Tim ubọk geelek okọtbe, inyi ichechieek kwun̄ ikeke inye, mije, ikeya otat. Sa me ikeya bọkọ ugwem ikakaan̄ge itata ya eyi Awaji ogwenbe owu itap me emen mgbọ otumube ichechieek kwun̄ isibi ubọk ògbegbe me isi ogbogbo ebi ata-ikọ. 13 Mgbọ yi, me isi Awaji ogwu òkinyi inu geelek ugwem, mè isi kè Jisọs Karais ogwu òkekeke inye itumu atikọ isibi ubọk ògbegbe me isi kè Pọntiọs Pailet, ke nkinyi owu ida ibe owu, 14 sun̄ ikan chi, me oniin̄ eyi ikakaan̄ge nrọ-nlọ geege eyi ebi ene mêsabe itiik owu otu, mege ire usen Okaan̄ kiji Jisọs Karais môkanabe isibi. 15 Ikakana isibi kan̄ yi ìbore inu Awaji oborọ me mgbọ òneneme ọmọ, ọmọ Awaji ogwukaan̄ itọn̄, ogwu ọmọ gaalek orebe Ogwu Ibot Mkpulu, mè Ubọọn̄ ebi ubọọn̄, mè Okaan̄ ebikaan̄-ene. 16 Ọmọ gaalek ore ogwu kpokwube mkpa, ogwu òluluk me emen utoon̄ eyi kpekikọt ire lek, ogwu ene geege ikararakge ìmun̄, ogwu ene geege ìkpokọkọt si imun̄. Umin mè unye ikup inyi ọmọ ire mgbọ geelek! Ikup ikeya! 17 Tumu nyi ebi geelek ìbọbọọn̄ ubọọn̄ me linyọn̄ keyi ibe ekasa inu ubọọn̄ kiban̄ ìgugo lek, mè ekasasa si ìtoon̄ ejit, mije, inu ubọọn̄ chi ìkinu chereyi, mè ofo iyakwut. Kpan̄asi ikeya, ema etoon̄ ejit me lek Awaji ogwu òkinyi eji ogbogbo inu geelek ibe eji ekesa ebele lek kiji ejit. 18 Tumu nyi ema ibe ekenwọn nnwọn melek ebi ene, mè ekerọ ata inu mgbọ geelek, mè ekechili ubọk, mè ekekaan̄ ejit icheche inu kiban̄ inyi ene. 19 Ire ema ikirọ ikeyi, ema mêkititiin̄ inu ubọọn̄ isun̄ inyi lek kiban̄, eyi môkupbe kubọk ewuuk irak uwu ònyenye inyi ema me mgbọ òkup me isi. Ikeyi ke ema ebesa ikọt ikaan̄ ugwem eyi òrere ugwem me atikọ. 20 Timọti, gbala chieen̄ kpọ inu Awaji osabe itap owu me ubọk ibe owu òkpọ. San̄a lek kwun̄ me lek iseseme usem echi ìkakinyi Awaji umin. San̄a lek kwun̄ si me lek burubut ikọ eyi ebi ene ekitumu ikeme atikọ, mè ikifiaan̄ igwen ibe ìre “ifuk-ibot.” 21 Usini ene ekigugo lek ibe ke ema mîkaan̄ “ifuk-ibot” yi, mè isa me lek keya ijit ichechieek me lek kè Jisọs Karais. Atata nnwọn eyi Awaji ikup inyi enyi!