Ebi Teselonaika eyi adasi

¹ Emi Pọọlu mè Sailas mè Timọti ege ikpa etip yi ìjet enyi ebi ntitiin̄ Awaji me ama Teselonaika, ìrere ebi Awaji Ute mè Okaan̄-ene Jisọs Karais ekaan̄be. Atata nnwọn mè esuuk eyi Awaji ikup inyi enyi. ² Eji mîkitọn̄ Awaji mgbọ geelek mije kinyi, mè ikitap enyi si me uriaak mgbọ geelek. ³ Me emen uriaak kiji me isi Awaji ogwu Nte kiji, eji kpekilọlọ itutumu inu òfolek imumechieen̄ enyi ekaan̄be, mè ata inu enyi ekirọ inan̄a me lek enyi echieekbe me lek kè Jisọs Karais. Eji kpekilọlọ si itutumu inu òfolek ike enyi ekatelege mgbọ geege ikakaan̄ ikpọchieen̄ me lek Okaan̄ kiji Jisọs Karais. ⁴ Bọn Nte n̄a ebi Awaji omabe, eji mîriọọn̄ ibe ke Awaji îgobo enyi isibi inyi lek kan̄. ⁵ Eyi ìre inu eji eriọọn̄be, mije, ata etip eji esabe ijet enyi ìkare me ikọ otu gaalek, ìje melek unye mè Ekwukwu Mbuban. Enyi melek kiji esasa otutuuk ejit ibọkọ itap, mè ichieek me lek. Enyi mîmun̄ ubọk eji elukbe ugwem mgbọ eji egọọkbe enyi ikup me ama kinyi. Îre mije kinyi ke eji eluk ikeya, inyi enyi ekween̄ inu enan̄a me ugwem kiji. ⁶ Enyi mîkpọ inu me ubọk kiji irọ, mè ikpọ si inu me ubọk Okaan̄-ene irọ. Sa me ikeya ke enyi ebọkọ ata etip ya itap me unwọọn̄ eyi Ekwukwu Mbuban okinyi, ubọk geelek enyi emun̄be owuwa ufialek. ⁷ Mije inu yi enyi erọbe, enyi mîkana ebi otutuuk ebi ìchechieek me lek kè Jisọs Karais me ido Mesidonia mè Akaya ebekikpọ inu me ubọk irọ. ⁸ Enyi ke ekibene chieen̄ ikpọ, mije, ata etip Okaan̄-ene ìnan̄a me otu kinyi isibi isi ire lek ebi Mesidonia mè ebi Akaya. Ògak ge, etip ichechieek kinyi me lek Awaji îtaan̄ si ikana otutuuk ere. Eya orọ, kpunu inu geege eji eyaka ikitumu òfolek kinyi, ⁹ mije, ere geelek eji esibe, ebi ere cha gaalek ekisa otu kiban̄ itumu ubọk enyi esabe ibọkọ eji itap me mgbọ eji enube ama kinyi, mè ikitumu si ubọk enyi esabe itele itọtọbọ ebum inyi mkpọmfaka, mè ikana igọọk Awaji, mè ikisi ikwaan̄ inyi atata Awaji òkup me ugwem. ¹⁰ Ebi ere chi geelek mîkitumu si ibe ke enyi ekikpọ chieen̄ mgbọ Gwun̄ eyi Awaji, òrere Jisọs ogwu Awaji ojomobe me mkpa, mônan̄abe me emen inyọn̄ inu. Jisọs yi ore ogwu òninyan̄a eji isibi me emen unaan̄-ejit Awaji eyi òbonunu.

¹ Bọn Nte n̄a, enyi me lek kinyi mîriọọn̄ ibe ke inunu eji enube me lek kinyi ìkachep me ikike. ² Eji mîmun̄ owuwa ufialek, mè ibọkọ ikpele esip me ama Filipai, kubọk enyi eriọọn̄be. Ire, mgbọ eji enube ama kinyi, Awaji înyi eji unye eji esabe ikọt ikeke ida otutuuk ikpele ufialek ebi ene eweekbe isasa ikput ikwaan̄ kiji me ama kinyi. Eji mîsa si unye ya ichieek mkpa ilook enyi ata etip eyi Awaji. ³ Ikọ eji etumube inyi enyi ìkakaan̄ inu òlọlọ me emen. Eji kpekaan̄ ofifi ekiket geege me ejit isa itumu. Eji kpetutumu si ikọ ya isasa ifiaan̄ enyi. ⁴ Ire, Awaji îtoon̄ eji ejit me lek, mè iyaka ata etip kan̄ itap eji me ubọk ibe eji ekelook. Eya orọ, eji kpetumu ikọ kiji ibe ineme ebilene. Ire, eji etumu ibe ineme Awaji ogwu òrọriọọn̄ ijọn̄ ijọn̄ ejit kiji. ⁵ Kubọk enyi eriọọn̄be, eji kpetumu unin̄i otu ikọ inyi enyi. Eji kpesa si ulọk ebek ikpoko inu, mè ifiaan̄ ikitumu utop utop ikọ isa ichit. Awaji ore ogwu ata-ikọ inyi eji. ⁶ Eji kpeweek ibe ene geege, mè ìre enyi mè ìre ebi ofifi ife, etọn̄ eji. ⁷ Me atikọ, eji kubọk ebi otuchieen̄ kè Karais, eji mîkaan̄ unen idodo ibe enyi ekekpọ eji chieen̄ me lek. Ire, kpan̄asi ikeya, eji eyaka inigọgọọk enyi iluk esuuk esuuk kubọk ata uga òkigbala chieen̄ ikpọ asa nsabọn kan̄. ⁸ Bak me lek ulọk eji ekaan̄be me lek kinyi, eji kpeche ata etip eyi Awaji gaalek inyi enyi, eji mîsa me ubelejit iche si lek kiji igbaalek inyi enyi, mije, eji mîmun̄ enyi me chieen̄ enenen. ⁹ Bọn Nte n̄a, eji mîriọọn̄ ibe ke enyi kpewuuk kwulukwulu kiji mè unye ikwaan̄ eji ekisi mgbọ eji egọọkbe enyi iluk, mè ikilook enyi ata etip eyi Awaji. Mgbọ ya, eji ekisi ikwaan̄ eririeen̄ mè ikarek ikisa ikpọ lek kiji, inyi eji ekasa ufialek eyi akpalek kiji geege ìkeme enyi. ¹⁰ Enyi ìre ebi ata-ikọ inyi eji, ikeya si ke Awaji ore ogwu ata-ikọ inyi eji ibe ke otutuuk mgbọ eji elukbe me etete kinyi ebi ìchechieek me lek kè Jisọs Karais, ke eji mîsun̄ lek kiji me mbuban, mè ikirọ ata irọrọ, mè ikiluk ugwem eyi ikakaan̄ge nrọ-nlọ geege me emen. ¹¹ Enyi mîriọọn̄ si ibe ke eji ekaan̄ ugwem me lek kinyi me ene me ene kubọk ute okikaan̄ me lek ebi bọn. ¹² Eji mîkinyi enyi nteme, mè ikitap enyi efuuk me emen, mè ikirọ enyi inye ibe enyi ekeluk ugwem eyi òbokineme Awaji ogwu ògwegwen enyi, inyi enyi enekaan̄ uche me ugbana eyi mkpulu kan̄, mè umin kan̄ mè uja kan̄. ¹³ Eji mîkitọn̄ Awaji mgbọ geelek, mije, mgbọ eji etumube ikọ Awaji inyi enyi, eyi enyi ebọkọbe itap, enyi kpebọkọ itap kubọk ikọ ebilene. Ire, enyi ebọkọ itap kubọk ikọ Awaji, mije, ikọ Awaji ke ìre me atikọ. Ikọ yi si òkisi ikwaan̄ me emen kinyi ebi ìchechieek me lek kè Jisọs Karais. ¹⁴ Bọn Nte n̄a, inu yaage òrọrọ enyi orọ ebi ntitiin̄ Awaji, òrere ebi eyi Jisọs Karais, me ido Judia. Ike enyi ebọkọbe ufialek me ubọk ebi ido kinyi, ikeya si ke ebi ntitiin̄ Awaji cha ebọkọ ufialek me ubọk ebi Ju, òrere ebi kiban̄. ¹⁵ Îre ebi Ju chi ekpan̄ Okaan̄-ene Jisọs, mè ikpan̄ ebi nriran kiban̄, mè ilap eji si isibi. Ife chi mîrọ inu ònanaan̄ Awaji ejit, mè irọ ikeme otutuuk ebilene, ¹⁶ mije ema ekputbe eji ibe eji ekasi ìtumu ikọ Awaji ìnyi ebi ekarege ebi Ju mè ebiba egọọk ekaan̄ unyan̄a. Òjelek ijo inu kechi ema ekirọ mgbọ geelek orọ inyi ijo kiban̄ ikpọkpọ iwa ijot ere. Mgbọ keyi unaan̄-ejit Awaji îrọn̄ ikeme ema! ¹⁷ Bọn Nte n̄a, sọntiik mgbọ yi eji enan̄abe itele enyi, îlọk eji enenen iyayaka imun̄ enyi, ubọk geelek ibe ke eji etele enyi me akpalek gaalek, ìkare me ekiket. Mije keyi, eji mîsa lek me owuwa oniin̄ ikọkọt inimun̄ enyi isi mè isi. ¹⁸ Eji mîweek ikpọkpọk inu me lek kinyi. Emi me lek n̄a Pọọlu nsa lek owuwa mgbọ inunu, ire, Yọk ìkachieek eji enu. ¹⁹ Îre mije kinyi ke eji mêkaan̄ ikpọchieen̄, mè unwọọn̄, mè ikaan̄ si inu isasa ibaak alọm eyi ntim-mkpan̄ me isi Okaan̄ kiji Jisọs mgbọ mônube. ²⁰ Enyi, me atikọ, ere itọn̄ mè unwọọn̄ eyi eji ekaan̄be.

¹ Eya orọ, mgbọ eji ekakọtge ìyaka ìme inunu inimun̄ enyi, eji etutumu ifieek ibe, kpan̄asi eji kpebemumun̄ enyi isi mè isi, ke eji gaalek mêkup me ama Atens, ² mè isan̄a Timọti gwun̄ Nte kiji, òrere ogwu usun̄ Awaji mije ilolook ata etip kè Karais, iria ibe inu me lek kinyi. Eji eria ọmọ inu ibe initap ubọk inyi enyi, inyi enyi ekọt ekeke enye me emen ichechieek kinyi, mè inyi si enyi nteme, ³ inyi ene geege me lek kinyi ikanan̄a ìrọn̄ mije ufialek chi ebi ene ekisa irọ ikeme enyi. Enyi me lek kinyi mîriọọn̄ ibe ke irọrọ ikeme eyi ebi ene ekirọ ikeme eji ìre inu Awaji odọmọbe isun̄ inyi eji. ⁴ Mgbọ eji ekupbe melek kinyi, sabum ufialek cha onibebene, eji mîdasi ikitumu inyi enyi ibe ke sọnja mgbọ, ebi ene mêsulu eji osusut. Ike enyi eriọọn̄be, ikọ kiji ya îrọ si iso, eji mîbọkọ si osusut kubọk eji ewuukbe lek itumu. ⁵ Mije keyi, emi ǹkayaka ìkọt ìkup me nkariọọn̄ge ubọk enyi ekupbe. Ufieek-owot n̄a me lek kinyi ìre, usini mgbọ ke ogwu ntọ-mkpọ ya îra inunu initọ enyi ikpọ, mè irọ inyi otutuuk ikwaan̄ eji esibe me etete kinyi ichep me ikike. Mije keya ke nria Timọti inu me lek kinyi. ⁶ Mgbọ yi, Timọti înan̄a me lek kinyi ika inu, mè inikpa inyi eji ibe ke enyi ekpọkpọ ikeke inye me emen ichechieek kinyi mè imumechieen̄ kinyi. Îtumu si ibe ke enyi kpewuuk eji mgbọ geege; ke òkilọk enyi si imumun̄ eji kubọk îkilọk eji imumun̄ enyi. Echi ìre atalek ata ukpatu inyi eji. ⁷ Eya orọ, bọn Nte n̄a, me emen ufialek kiji mè irọrọ ikeme eyi ebi ene ekirọ ikeme eji, eji kpeyaka ikaan̄ ufieek-owot geege me lek kinyi. Ichechieek kinyi îkat eji ejit. ⁸ Mgbọ keyi, eji mîbene igat ata ugwem, mije eji eriọọn̄be ibe ke enyi mîkeke inye me emen Okaan̄-ene. ⁹ Eji kpebekọt itọn̄ Awaji isan̄a mije unwọọn̄ eji ekaan̄be me ibot kinyi me isi Awaji. ¹⁰ Eji ekisa otutuuk ejit kiji iriaak uriaak eririeen̄ mè ikarek ibe Awaji irọ inyi eji ekọt emun̄ enyi isi me isi, mè esa irek keya enyi enyi nteme eyi enyi ekakaan̄ge-nu òfolek ichechieek enyi echieekbe. ¹¹ Mgbọ yi, Awaji ogwu Nte kiji me lek kan̄, mè Okaan̄ kiji Jisọs isan̄a oniin̄ isibi ubọk eji mêsabe inimun̄ enyi. ¹² Okaan̄-ene irọ inyi imumechieen̄ enyi ekaan̄be me lek otutuuk ene ikpọkpọ ikimin, mè ikeke inye kubọk imumechieen̄ eji ekaan̄be me lek kinyi ominbe, mè ikeke inye. ¹³ Okaan̄-ene isa me ikeyi irọ inyi enyi ekeke enye me ejit kinyi, mè ekup me mbuban, mè ekakaan̄ nrọ-nlọ geege me emen ugwem kinyi me isi Awaji ogwu Nte kiji me mgbọ Okaan̄-ene Jisọs mônube, ọmọ mè ebi eyi kan̄.

¹ Me òta kan̄, bọn Nte n̄a, eji mîjeen̄ enyi ubọk enyi ebesa ikiluk ugwem òkineme Awaji, enyi ekekiluk si ikeya. Mgbọ keyi, eji ekisa me erieen̄ Okaan̄-ene Jisọs iriaak enyi, mè ikirọ enyi inye ibe enyi ekeluk si ugwem ya efo isi egak ikeya. ² Mije, enyi mîriọọn̄ nteme eji enyibe enyi inan̄a me unye Okaan̄-ene Jisọs. ³ Îre nkeek Awaji ibe enyi esun̄ lek kinyi esese, mè esan̄a lek esan̄a me ugwem barabat. ⁴ Îre si nkeek Awaji ibe ene geelek ikween̄ itetet lek kan̄ ikaan̄ me oniin̄ òkakaan̄ ulibi, mè oniin̄ òkukup me mbuban. ⁵ Awaji ìkaweek ibe ene geege iyaka lek kan̄ inyi ijo ulọk eyi barabat kubọk ebi ekariọọn̄ge Awaji ekirọ. ⁶ Ìkaweek si ibe ene geege isa me ugwem barabat irọ ikeme ogwu ngwan̄ me emen kè Jisọs Karais. Kubọk eji ewuukbe lek itumu inyi enyi, mè itaba enyi ubọk me utọn̄, Okaan̄-ene môsulu ene geelek òrọrọ òjelek ijo inu keyi osusut. ⁷ Awaji ìkagwen eji ibe eji eneluk ugwem barabat. Ire, ìgwen eji ibe eji eneluk ugwem òkup me mbuban. ⁸ Eya orọ, ene geelek òjijit nteme keyi ìkajit ebilene, ìjit Awaji ogwu ònyinyi enyi Ekwukwu Mbuban kan̄. ⁹ Mgbọ yi, ìkayaka ìkup me uyọt ibe ene geege ige ikpa inyi enyi nteme òfolek ikakaan̄ imumechieen̄ ngwan̄ mè ngwan̄ me etete kinyi, mije, Awaji me lek kan̄ îwuuk lek ijeen̄ enyi ibe enyi ekemun̄ lek kinyi me chieen̄. ¹⁰ Me atikọ si, enyi mîmun̄ otutuuk ebi ìchechieek me lek kè Jisọs Karais me chieen̄ me otutuuk agan̄ Mesidonia. Ire, eji ekirọ enyi inye ibe enyi ekemun̄ ema me chieen̄ si efo isi egak eya. ¹¹ Me otutuuk ugwem kinyi, ìkiweek iluluk ugwem esuuk esuuk, ikatap chieen̄ me lek inu ikarege enyi lek. Ikare si ebi ugbek, ìkisa ubọk kinyi ìsi ikwaan̄, inyi enyi ekekaan̄ inorie erie, kubọk eji ewuukbe lek itumu inyi enyi. ¹² Sa me ikeyi, enyi mêkirọ otutuuk uyọrọlek kinyi me ekasage ìkpọ ene geege chieen̄, mè isa me ikeya ikaan̄ ulibi me isi ebi ekachieekge me lek kè Jisọs Karais. ¹³ Bọn Nte n̄a, eji ekiweek ibe enyi eriọọn̄ otutuuk atikọ òfolek ebi ìkwukwu, inyi enyi ekakifieek ejit kubọk ebi ofifi ife ebi ekakaan̄ge ikpọchieen̄ ekirọ. ¹⁴ Eji mîchieek ibe ke Jisọs îkwu, mè ikpọk ijomo me mkpa. Ikeya si, eji mîchieek ibe ke Awaji môria ebi geelek ìchechieek me lek kè Jisọs mè ikwu, inyi egọọk Jisọs egbaan̄ enu mgbọ Jisọs môgwube ikom inu. ¹⁵ Igọọk me lek ikọ Okaan̄-ene me lek kan̄ otumube, eji ekitumu inyi enyi mgbọ keyi ibe ke ìkare eji ebi mêkupbe me ugwem ire Usen Okaan̄-ene môgwube ikom inu ebedasi ichichini ọmọ. Îre ebi ìkwukwu ebedasi ichichini ọmọ sabum ebi ìkup me ugwem. ¹⁶ Usen ya isire, Okaan̄-ene me lek kan̄ mônan̄a me emen inyọn̄ isibi. Mgbọ îkinan̄a isibi, ida ge môtaan̄ ukpo inyi ulook, ogwu ibot ebi osat mônyinyi ida, odu Awaji môkekitaan̄. Ebi ìchechieek me lek kè Jisọs Karais mè ikwu mênenidasi ijomo me mkpa. ¹⁷ Ema isijomo isan̄a, mênenikpulu eji ebi mêkupbe me ugwem ire Usen ya isan̄a mgbọ yaage isa isi ichichini melek kiban̄ me emen oduku inyọn̄, inyi eji egọọk esi echichini melek Okaan̄-ene me emen efet. Ikeya ke eji melek kan̄ mêluk ire mgbọ ikakaan̄ge itata. ¹⁸ Eya orọ, ìkisa ikọ chi ìkat lek kinyi ejit.

¹ Bọn Nte n̄a, ìkakup me uyọt igege ikpa inyi enyi òfolek mgbọ, mè ìyaka ire ibot mgbọ inu chi mômọnọbe irek, ² mije, enyi me lek kinyi mîriọọn̄ ibe ke Usen Okaan̄-ene obokpọk inu ìbonu me uwuuk-lek kubọk ogwu inọ okinu me uwuuk-lek. ³ Mgbọ ebi ene mêkitumu ibe, “Eji mîkaan̄ esuuk! Eji mîkaan̄ utelelek!”, mgbọ ya ke mfiat mè mkpa obonu inyi ema me uwuuk-lek kubọk uman otet nwa owot. Kpunu ene geege me lek kiban̄ òbonwọnwọnọ. ⁴ Ire, enyi bọn Nte n̄a, Usen ya ìkponu enyi me uwuuk-lek kubọk ogwu inọ okinu, mije, enyi kpekup me emen udun. ⁵ Otutuuk kinyi ebi ìchechieek me lek kè Jisọs Karais ekup me emen utoon̄, mè ikije me utoon̄ ikarek. Eji kpekup me emen udun̄ eririeen̄. ⁶ Eya orọ, eji ekalalaak kubọk ebi ekariọọn̄ge Okaan̄-ene ekilaak. Kpan̄asi ikeya, eji ekup me ọkpọchieen̄, mè ekup si me mbem-lek mgbọ geelek. ⁷ Mije, ebi geelek ìkilalaak ekilaak me eririeen̄, ebi geelek ìkinwọ miin̄ isa si ekinwọ isa me eririeen̄. ⁸ Ire, eji ebi ìkije me ikarek, eji ekup me mbem-lek, mè emọnọ ichechieek melek imumechieen̄ kubọk nroon̄ akọn̄ eyi ekisa ikwek ejit, mè emọnọ ikpọchieen̄ eyi eji ekaan̄be me lek ojot ojot unyan̄a kiji eyi òkup me isi, kubọk okpibot akọn̄. ⁹ Awaji ìkagobo eji ibe eji enebọkọ osusut unaan̄-ejit kan̄. Ire, ìgobo eji inyi eji enekaan̄ unyan̄a enan̄a me lek Okaan̄ kiji Jisọs Karais, ¹⁰ ogwu òkwukwu mkpa me ibot kiji, inyi eji enegọọk ọmọ eluk ere mgbọ geelek, mè ìre eji ekukup me ugwem mè ìre eji ekwukwu, mgbọ ọmọ mônube. ¹¹ Eya orọ, ìkikat ebi melek kinyi ejit, mè ìkitap si ubọk ìbene ebi melek kinyi ìgwuun̄ me emen ichechieek, kubọk enyi ekirọ mgbọ keyi. ¹² Bọn Nte n̄a, eji ekibeek enyi ibe enyi esa ulibi ògbegbe enyi ebi ìkisi ikwaan̄ ikọ Awaji me etete kinyi, òrere ebi Awaji ogobobe ibe eketeme enyi nteme. ¹³ Ìkinyi ema ulibi òmimin ichit, mè ìkimun̄ ema me chieen̄ mije ikwaan̄ ema ekisi. Ìluk me esuuk melek ebi melek kinyi. ¹⁴ Bọn Nte n̄a, eji ekibeek enyi ibe, soso, ìtaba ebi geelek ìrere ugbek ubọk me utọn̄, mè ìkat ebi ukpook owot ejit. Ìtap ubọk ìnyi ebi ichechieek kiban̄ owọbe, mè ìkaan̄ ukarajit me lek ene geelek. ¹⁵ Ìmun̄ ibe ke ene geege ìkarọ ogwu ngwan̄ useen̄ ijo inu. Ire, me mgbọ geelek, ìkiben me ejit ikakaan̄ ata ejit me lek ebi melek kinyi mè ebi ofifi ife si. ¹⁶ Ìkinwọọn̄ unwọọn̄ mgbọ geelek, ¹⁷ mè ìkiriaak uriaak mgbọ geelek. ¹⁸ Ìkinyi Awaji itọn̄ me emen inu geelek òsisibi inyi enyi, mije, eyi ore inu Awaji okiweek me ubọk kinyi, enyi ebi ìrere ebi eyi Jisọs Karais. ¹⁹ Ikakput Ekwukwu Mbuban ibe ikasi ikwaan̄ kan̄. ²⁰ Ikamọnọ nriran ebi eyi Awaji ekiben inyi enyi kubọk inu ikike. ²¹ Ire, ìwọlọ inu geelek ìkpọ, mè ìtet echi òrere atata me lek ìnye, ²² mè ìsan̄a lek kinyi me lek ijo inu geelek. ²³ Awaji me lek kan̄, ogwu òkinyi ene esuuk, isun̄ otutuuk lek kinyi me mbuban, me irọ inyi ekwukwu kinyi, mè ibot-ejit kinyi, mè anam akpalek kinyi ikakaan̄ nrọ-nlọ geege me emen mgbọ Okaan̄-ene Jisọs Karais môgwube ikom inu. ²⁴ Awaji ogwu ògwegwen enyi môrọ otutuuk inu chi ijot, mije, ọmọ îgbe utoon̄-ejit, ọmọ ìkare ogwu ofiaan̄. ²⁵ Bọn Nte n̄a, ìriaak Awaji me ibot kiji. ²⁶ Ìtọp otutuuk bọn Nte kiji amọn ìnyi emi. Ìkat ema, mè itọp ema amọn me imumechieen̄. ²⁷ Nsa erieen̄ Okaan̄-ene ibeek enyi, ikalọlọ ifufuk ikpa yi inyi otutuuk bọn Nte kiji enọ. ²⁸ Atata nnwọn eyi Okaan̄ kiji Jisọs Karais ikup inyi enyi!