Pita eyi adasi
11 Emi Pita, ogwu otuchieen̄ kè Jisọs Karais, nge ikpa etip keyi ijet enyi ebi Awaji ogobobe inyi lek kan̄, ebi ichen me linyọn̄, ebi ìyiyiyala ikana otutuuk ido Pọntọs, mè Galesia, mè Kapadosia, mè Esia, mè Bitinia. 2 Awaji Ute ìdadasi iriọọn̄ enyi isan̄a, mè inigobo enyi igọọk me lek irọriọọn̄ îriọọn̄be enyi. Awaji ìsa me unye eyi Ekwukwu Mbuban irọ inyi enyi ekup me mbuban, mè ekesiki ibot enyi Jisọs Karais, inyi eje kan̄ igwọk enyi itana me isi Awaji. Atata nnwọn mè esuuk imumana inyi enyi ojot ojot. 3 Itọn̄ ikup inyi Awaji, òrere Nte Okaan̄ kiji Jisọs Karais! Îsa me ikpele nsan kan̄ ikpọk eji iman, mè inyi eji ikpọchieen̄ eyi ugwem inan̄a me lek ijojomo me mkpa eyi Jisọs Karais ojomobe. 4 Awaji înyi si eji irot eyi ìkpochep, ìkpofiat, ìkpogwọk ita si. Awaji ìsun̄ irot yi me emen inyọn̄ iban enyi. 5 Mije ichechieek kinyi, Awaji òkisa unye kan̄ ichit enyi iban òta mgbọ, mgbọ îbembe lek isasan̄a unyan̄a kan̄ isibi me chieen̄ ene. 6 Ìnwọọn̄ unwọọn̄ mije keyi. Ubọk geelek, enyi mêkọt ikifieek ejit sọnja mgbọ, mije owuwa ntọ-mkpọ òkup esese esese echi enyi ekije itibi mgbọ keyi. 7 Kubọk ukan̄ okikala alata araran̄, òrere inu òkifafiat, inyi okpa ita me lek, mè ikitoon̄, ikeya si ke ntọ-mkpọ cha okirọ me lek ichechieek kinyi, eyi ònyenye otu ewe igak alata araran̄. Ititim ikpan̄ ntọ-mkpọ cha ìkirọ inyi ichechieek kinyi ikana eyi atata, mè itọn̄ mè umin mè ulibi ikup inyi Jisọs Karais mgbọ môkpọkbe inu. 8 Ubọk geelek enyi kperarak isa chieen̄ kinyi imun̄ Jisọs Karais, enyi mîkaan̄ imumechieen̄ me lek kan̄. Ubọk geelek enyi kpemun̄ ọmọ mgbọ keyi, enyi mîchieek me lek kan̄. Îre mije keyi ke enyi ekinwọọn̄ unwọọn̄ enenen. Unwọọn̄ yi ìre unwọọn̄ eyi kpebekọt itumu isibi, mè ire si unwọọn̄ eyi umin mè uja eyi Awaji okupbe me emen. 9 Inu ya enyi ebak me lek ikaan̄ ichechieek îre enyi ubọk. Inu ya ìre unyan̄a eyi Awaji onyan̄abe ibot ejit kinyi isibi. 10 Ebi nriran ukot ikaan̄ ebi ìbeben nriran òfolek atata nnwọn Awaji eyi enyi ebekaan̄ mîfiat mgbọ, mè igwuun̄ chieen̄ iweek irọriọọn̄ inu òfolek unyan̄a yi. 11 Ema eweek irọriọọn̄ mgbọ unyan̄a yi obonu, mè ike ìbosa inu, kubọk Ekwukwu kè Karais òkup me emen kiban̄ otumube inyi ema me mgbọ îtumube ikọ òfolek ufialek eyi Karais obobọkọ, mè umin mè uja eyi ìbokaan̄ mgbọ ufialek cha isiraka. 12 Awaji îchili ijeen̄ ebi nriran cha ibe ke ìkare lek kiban̄ ke ema ekisi ikwaan̄ inyi; ke ìre enyi ke ema ekisi ikwaan̄ inyi. Awaji ìtumu ikọ ya mgbọ ema cha ekitumu ikọ òfolek inu ebi ìlolook enyi ata etip etumube inyi enyi. Ife cha esa me unye eyi Ekwukwu Mbuban ogwu eriabe inan̄a me emen inyọn̄ ijet ema ilook enyi ata etip ya. Ebi osat Awaji me lek kiban̄ si mîweek irọriọọn̄ inu chi. 13 Eya orọ, ìsan̄a wọlọwọlọ ekiket geelek me ejit kinyi, mè ìkaan̄ ifuk-ibot òsoso ifuk. Ìkaan̄ ojot ojot ikpọchieen̄ ònyenye me lek atata nnwọn Awaji eyi mênyibe enyi me mgbọ mêchilibe Jisọs Karais ijeen̄ enyi. 14 Enyi kubọk bọn Awaji ebi ìkigban̄ utọn̄ inyi Awaji, ikayaka ìgwu ìkom ìfo lek ijo ulọk cha enyi ekikaan̄ me adasi mgbọ ya enyi ekariọọn̄ge inu geege. 15 Kpan̄asi ikeya, ìkup me mbuban me emen inu geelek enyi ekirọ, kubọk Awaji ogwu ògwegwen enyi okupbe me mbuban. 16 Mije, ege me Ikpa Mbuban ibe, “Ìkup me mbuban, mije emi ǹkup me mbuban.” 17 Awaji ìkifieek oyerebet inyi ene geelek igọọk me lek ikwaan̄ ene ya osibe, ìkakilibi ene chieen̄. Eya orọ, ire enyi ikigwen ọmọ Ute, ìluk ugwem kinyi me ukpook mè ulibi me linyọn̄ keyi eyi enyi egọọkbe igbaan̄ iluk kubọk ebi ichen. 18 Enyi mîriọọn̄ ibe ke ìkare inu òkifafiat, kubọk alata araran̄ mè alata okuket, ke esa ifaka enyi isibi me ugwem ikakaan̄ge oruru, eyi enyi ebọkọbe me ubọk ebi nte nte kinyi. 19 Îre unye otu ewe eje kè Karais ogwu òkup kubọk arọọn̄ kpunube okpa geege mè ìroon̄ geege me lek, ke esa ifaka enyi isibi. 20 Awaji ìgogobo Karais isan̄a sabum enirom linyọn̄, mè inisan̄a ọmọ isibi me mgburudun̄ mgbọ yi mije kinyi. 21 Nan̄a me lek kan̄ ke enyi echieek me lek Awaji ogwu òjojomo ọmọ me mkpa, mè inyi ọmọ umin mè uja. Mije keyi, ichechieek kinyi mè ikpọchieen̄ kinyi ìkup me lek Awaji gaalek. 22 Mgbọ keyi enyi esabe me igbagban̄ utọn̄ me lek atikọ Awaji igwọk lek kinyi itana me isi Awaji, mè ikaan̄ si atata imumechieen̄, eyi kpunube wọlọwọlọ me emen, me lek bọn Nte kinyi, ìsa otutuuk ejit kinyi ìmun̄ lek kinyi me chieen̄ enenen. 23 Ìkare mfut ugwem ebilene eyi môkwube ke esa ikpọk enyi iman. Ekpọk enyi iman sa me ikọ Awaji eyi òkup me ugwem, mè ifuk ire mgbọ ikakaan̄ge itata. 24 Mije, ege me Ikpa Mbuban ibe, “Otutuuk ebilene ekup kubọk mbubet, otutuuk umin mè uja kiban̄ ìkup kubọk ajakajak oron. Mbubet môkwaan̄ ita, ajakajak ogegen̄ isan̄a. 25 Ire, ikọ eyi Okumugwem ìbokekeke ire mgbọ ikakaan̄ge itata.” Ikọ keyi ore ata etip eyi elookbe enyi.
21 Eya orọ, ìtele njijọ ejit, mè ofiaan̄, mè isi iba, mè chieen̄ ile, mè itutumu ene ifiat. 2 Kubọk nsabọn emanbe ayaya ekito ito iweek mun̄ ebe, ikeya si, enyi ìkiweek ata ikọ Awaji eyi kpunube ataak geege me emen, inyi enyi enan̄a me lek ikọ ya ekemiin̄ me emen unyan̄a eyi enyan̄abe enyi, 3 me mgbọ enyi etọbe ikpọ, mè imun̄ ibe ke Okaan̄-ene înwọn. 4 Ìna me lek kè Karais ogwu òrere ewuuk òkup me ugwem. Ebilene ejijit ọmọ, ire, îre ọmọ ke Awaji ogobo inyi lek kan̄. Ọmọ înye otu ewe me isi Awaji. 5 Mgbọ keyi enyi mîkana ewuuk inama-uwu òkup me ugwem. Ìsa lek kinyi ìnyi mè Awaji inama enyi kubọk uwu eyi Ekwukwu Mbuban, mè enyi ekana ebi ngwugwa ìkup mbuban, mè ekegwa ngwugwa eyi Ekwukwu Mbuban eyi Awaji okibọkọ itap inan̄a me lek kè Jisọs Karais. 6 Mije, ege me Ikpa Mbuban ibe, “Kpọ, nra igobo ewuuk unye otu ewe ge itap me ijọn̄ me Sayọn, isa irọ ata ibot uwu. Ene geelek òtotoon̄ ejit me lek kan̄ ìkporie esip kubọk ge.” 7 Eya orọ, me lek kinyi ebi ìchechieek, ewuuk yi înye otu ewe enenen. Ire, me lek ebi ekachieekge, Ikpa Mbuban ìtumu ibe, “Ewuuk eyi ebi ìnama uwu ejitbe, ọmọ onikana ata ibot uwu.” 8 Ikpa Mbuban îtumu si ibe, “Îre ewuuk keyi ke ebi ene ekitọbọ ukot me lek. Ọmọ si ore ewuuk òkirọ inyi ema enan̄a erọn̄.” Ewuuk yi ìkirọ mè ebi ene enan̄a erọn̄ mije ema kpegban̄ utọn̄ me lek ikọ ya eyi etumube inyi ema. Îre ikeya ke Awaji osun̄ inyi ema. 9 Ire, enyi ìre ebi Awaji ogobobe isibi inyi lek kan̄. Enyi ìre ebi ngwugwa ogwu ubọọn̄, mè ire si ido òkup me mbuban. Enyi ìre ebi Awaji okaan̄be. Awaji ìgobo enyi, inyi enyi ekelook ebi ene etip òfolek ikwaan̄ ukechieen̄ kan̄, ọmọ ogwu ògwegwen enyi isibi me emen udun initap me emen ikpele uyeke uyeke utoon̄ kan̄. 10 Me mgbọ òraraka, enyi kpere ebi eyi Awaji. Ire, me mgbọ keyi, enyi ìre ebi eyi Awaji. Me mgbọ ya, enyi kpekaan̄ uche me lek nsan Awaji. Ire, me mgbọ keyi, Awaji îkaan̄ ejit nsan me lek kinyi. 11 Atata bọn Nte n̄a, enyi ìre ebi ije mè ebi ichen me linyọn̄ keyi. Eya orọ, soso, nriaak enyi, ìsan̄a lek me lek ijo ulọk echi òkitim akọn̄ ikeme ibot ejit kinyi. 12 Ìluk ugwem òtatat me etete ebi ekachieekge, inyi, ubọk geelek ema mêkitumu ikọ itoon̄ enyi ibe ke enyi ìre ebi ìkirọ ijo inu, ema ekemun̄ ata inu enyi ekirọ, mè etọn̄ Awaji me usen Awaji mônube inikpe ebilene mkpukpe ubọk ikwaan̄. 13 Mije Okaan̄-ene, soso ìkisiki ibot ìnyi ebi ibot mkpulu geelek ebilene esan̄abe ito. Ìkisiki ibot ìnyi ogwu ibot mkpulu ogwu òbebene ichit me lek otutuuk ebi ibot mkpulu. 14 Ìkisiki si ibot ìnyi otutuuk ebi ibot mkpulu me ido geelek, ebi ogwu ibot mkpulu òbebene ichit onyibe unye ibe ekesulu ebi geelek ìrọrọ ilọ osusut, mè eketọn̄ ebi geelek ìkirọ inu òtatat. 15 Awaji ìkiweek ibe enyi ekerọ ata inu esa erọ inyi ebi burubut ìkitumu ikọ una ifuk-ibot echit otu. 16 Ìluk ugwem kubọk ebi ìkakaan̄ lek kiban̄. Ire, ikasa irek ikaan̄-lek ya ìchit lek ìkirọ inu ikatatge. Kpan̄asi ikeya, ìkiluk ugwem kubọk ebi usun̄ eyi Awaji. 17 Ìkinyi otutuuk ene ulibi ògbegbe. Ìkimun̄ otutuuk bọn Nte me chieen̄. Ìkitet ukpook Awaji, mè ìkinyi ogwu ibot mkpulu òbebene ichit umin. 18 Enyi ebi usun̄, ìsa me ulibi ìsiki ibot ìnyi ebi nte uwu kinyi. Ìkare ebi ìkakaan̄ ata ejit mè ikimọnọ ene gaalek, ìkisiki ibot si ìnyi ebi ìkirọ enyi nnaan̄, mè ikigana ikọ inyi enyi. 19 Mije, Awaji îkibele ejit me lek ebi geelek ìkibak me lek kan̄ ikat ejit ikibọkọ osusut eyi ikagbege. 20 Ìre kpasi oruru ke enyi ebekaan̄, ire enyi ikat ejit ibọkọ osusut mije ijo inu enyi erọbe? Ire, ire enyi ime osusut ebi ene esutbe enyi mije ata inu enyi erọbe, Awaji môbele ejit me lek kinyi. 21 Îre òjelek osusut òkup ikeyi ke Awaji ogwen enyi ibe enyi enebọkọ. Mije, Karais me lek kan̄ îbọkọ osusut mije kinyi, inyi enyi esa me lek kan̄ ekween̄ inu, mè ekegọọk me akpat ukot kan̄. 22 “Karais ìkarọ ijo inu geege. Ikọ ataak geege ìkanan̄a si me otu kan̄ ìsibi.” 23 Mgbọ ebi ene etumube ikọ unyechieen̄ inyi ọmọ, ọmọ ìkatumu si ikọ unyechieen̄ ìnyi ema me useen̄. Mgbọ îkibọkọ ufialek mkpa, ìkagana ikọ ìnyi ene geege. Kpan̄asi ikeya ìkakana otutuuk ufialek kan̄ itap me ubọk Awaji ogwu òkisibi unen oyerebet. 24 Karais me lek kan̄ osa akpalek kan̄ ibeme otutuuk ijo inu kiji me inyọn̄ uti nkwurieen̄, inyi eji ekwaan̄ etele ijo inu, mè eyaka eluk ugwem eyi ata irọrọ. Unan cha etapbe ọmọ me lek ke esa igwa eji. 25 Mije, me mgbọ òraraka, enyi ekup kubọk arọọn̄ òlọlọ oniin̄. Ire, me mgbọ keyi, enyi mîyaka igwu ikom ika inu me lek ogwu Òkpukpo Arọọn̄ ya, Ogwu Òkikpọ Chieen̄ me lek ibot ejit kinyi.
31 Ike yaage si, enyi ebi ìrere nwa, ìkisiki ibot ìnyi ebi nlom kinyi, inyi usini kiban̄ ebi ekachieekge me lek ikọ Awaji egwu ekom enechieek nan̄a me lek ugwem enyi ebi nwa kiban̄ ekiluk, me enyi ekatumuge ikọ geege ìnyi ema. 2 Mije, ema mêmun̄ ubọk enyi esikibe ibot, mè ikiluk ugwem òtatana. 3 Ikachieek ibe uja kinyi ire eyi ònan̄a me lek inu ekisa ibala akpalek, kubọk ikpakpa ijeek, mè isasa alata araran̄ mè ujuja ekwut mè ọfọnti ibala lek. 4 Kpan̄asi ikeya, uja kinyi ire eyi emen ibot ejit, eyi ìkakigwọk ìta, uja eyi ònan̄a me esuuk esuuk ugwem eyi ìkakitap okput. Òjelek uja keyi înye otu ewe enenen me isi Awaji. 5 Mije, ikeyi ke ebibaan̄ ukot ikaan̄, ebi ìtotoon̄ otutuuk ejit kiban̄ me lek Awaji, mè isun̄ lek kiban̄ me mbuban esa ikibala lek kiban̄, mè ikisiki ibot inyi ebi olom. 6 Sera ìre ene ge me lek ife cha. Îsiki ibot inyi Ebereham ogwu olom enenen, me ike ọmọ erieen̄, ikigwen ọmọ, “Ogwu nte.” Mgbọ keyi, enyi ìre bọn kan̄ ebibaan̄, ire enyi ikirọ inu òtatat me ekatetge ukpook geege. 7 Ubọk yaage si, enyi ebi ìrere olom, ìluk ìjaan̄ melek ebi nwa kinyi kubọk ebi ìkaan̄ ifuk-ibot, mè ìriọọn̄ ibe ke ema kpenye lek kire enyi. Ìkinyi ema ulibi ògbegbe ema, mije, îre ema melek kinyi egbaan̄ ikaan̄ ugwem ikakaan̄ge itata eyi Awaji ochebe inyi enyi me ikike. Ìluk me esuuk melek kiban̄, inyi inu geege ikakikput uriaak kinyi. 8 Me ikakana ikọ n̄a igwook, m̀be enyi, ìluk me ejit ge, mè ìkaan̄ ejit nsan me lek ebi melek kinyi. Ìmun̄ lek kinyi me chieen̄ kubọk ngwan̄ mè ngwan̄. Ìkaan̄ ejit njijin me lek ebi melek kinyi, mè ìkisiki lek. 9 Ikasa ijo inu ìkpe ijo inu ebi ene erọbe enyi. Ikaan̄ ogwu itiik enyi, ikatiik useen̄. Ire, ìkigbana ebi ìkirọ enyi ijo inu, mije, ikeyi ke Awaji ogwen enyi ibe enyi enerọ, inyi enyi ebọkọ ugbana me irot. 10 Mije, ege me Ikpa Mbuban ibe: “Ogwu geelek òmama iluluk ugwem, mè iweek si imumun̄ ata inu me ugwem kan̄, ene ya itele itutumu ijo ikọ, mè itele si ikakan̄ ataak. 11 Ene ya itele ijo inu, mè ikirọ ata inu. Ene ya ikiweek esuuk, mè ikaan̄ ulọk me itatap esuuk. 12 Mije, chieen̄ Okaan̄-ene ìkup me lek ebi ata irọrọ. Utọn̄ kan̄ ìkup òbook ikigban̄ uriaak kiban̄. Ire, Okumugwem ìkakinyi ebi ìkirọ ijo inu isi.” 13 Ire enyi ikaan̄ ulọk irọrọ ata inu mgbọ geelek, ìre ekene obotap enyi unan me lek? 14 Ire, ìrere enyi ebọbọkọ ufialek mije ata inu enyi ekirọ, Awaji môgbana enyi. Ikachieek ibe ukpook ebilene itet enyi, ikachieek si ibe ejit isisaak enyi. 15 Ire, ìkinyi Karais umin me emen ejit kinyi, mè imọnọ ọmọ kubọk Okaan̄-ene ogwu òkup mbuban. Ìkup me mbem lek mgbọ geelek, inyi, ire ene geelek inido enyi inu òrọrọ mè enyi ekaan̄ ikpọchieen̄ enyi ekaan̄be, enyi mêkọt inyi ene ya ifọọk. 16 Ire, ìsisiki lek ìkpa ìnyi ene ya me irak umin. Ikakaan̄ okpa geege me ejit, inyi esip itet ebi geelek ìkitumu ata ubọk irọrọ kinyi ifiat, mije ijo ikọ ema ekitumu ikeme enyi. 17 Ene ibọbọkọ ufialek mije ata inu îrọbe, ire ke ìre nkeek Awaji ibe ikup ikeya, ọmọ onwọn igak ibọbọkọ ufialek mije ijo inu ene orọbe. 18 Mije, Karais ìkwu mkpa mgbọ yaage gaalek mije ijo inu otutuuk ebilene erọbe. Ọmọ ogwu ata irọrọ okwu mkpa me ibot ebi ijo irọrọ, inyi ọmọ inan̄a me ikeya isa enyi ijet Awaji. Ebilene ekpan̄ ọmọ me akpalek, ire, Awaji onenirọ inyi ọmọ iluk ugwem me emen Ekwukwu. 19 Îje si me ekwukwu isi ama ekwukwu, isi itumu ikọ Awaji inyi ebi ekwukwu ebi ìkup me mkpọn. 20 Ebi ekwukwu chi ìre ebi ìjijit isisiki ibot inyi Awaji me ukot ikaan̄, me mgbọ Awaji omebe ejit ikup, ibene me mgbọ Nuwa obenebe inama uji ọfọ kan̄ ire mgbọ înamabe isan̄a. Ene inen mè inen gaalek enin̄ emen uji ya. Îre ene jeeta gaalek ebi ìninin̄ emen uji ya ke esa mun̄ ya inyan̄a isibi. 21 Mun̄ ya ìkeke inyi igwook-mun̄ eyi ekisa inyan̄a enyi isibi mgbọ keyi. Igwook-mun̄ yi ìkare igwọgwọk okpa isan̄a me akpalek ikike. Îre use eyi enyi esabe otutuuk ejit kinyi ichieek inyi Awaji, me okpa geege ikakupge enyi me ejit. Ekisa igwook-mun̄ yi inyan̄a ene isibi bak me lek ijojomo me mkpa eyi Jisọs ojomobe. 22 Mgbọ keyi, Karais ìkup me emen inyọn̄, mè isiki ikweek irek me agan̄ ubọk ulom Awaji. Me ere ya îkupbe, otutuuk ebi osat Awaji, mè otutuuk ebi ibot mkpulu geelek, mè ebi unye geelek ìkikpulu me linyọn̄ eyi eji ekasage chieen̄ imọọn̄, ekisiki ibot inyi ọmọ, ọmọ okekikpulu ema.
41 Eya orọ, mije Karais owuukbe lek isa akpalek kan̄ ibọkọ ufialek, enyi si ìkaan̄ òjelek ekiket keyi me emen kinyi, mè ìkisa ìnye ejit. Mije, ire ene isa akpalek kan̄ ibọkọ ufialek, ene ya ìkayaka ìkaan̄ mgbaan̄-nrọ geege melek ijo inu. 2 Sa me ikeya, ene ya ìkpoyaka ikiluk ugwem igọọk me ijo ulọk eyi akpalek ebilene me mgbọ òsisik me ugwem kan̄ me linyọn̄ keyi. Kpan̄asi ikeya, ìbokiluk ugwem igọọk me nkeek Awaji. 3 Mije, mgbọ enyi efiatbe iraka ikirọ inu cha ebi ekariọọn̄ge Awaji ekirọ, îkem. Me mgbọ ya, enyi ekiluk ugwem barabat, mè ikikaan̄ ijo ulọk, mè ikinwọ miin̄ isa, mè ikifit ijo ifit miin̄ mè òje oyet, mè ikisa lek kinyi inyi uga ijọk miin̄, mè ikitọbọ ebum inyi mkpọmfaka, eyi òrere inu mbuban. 4 Mgbọ keyi, îkike ebi ekariọọn̄ge Awaji chi chieen̄ imumun̄ ibe ke enyi kpeyaka ikigọọk ema iluk burubut ugwem mfiat ya. Mije keya, ema mîra ikitiik enyi. 5 Ire, ema kpebelọlọ ifọfọọk ikọ ibot kiban̄ me isi Awaji ogwu òbebem lek isisibi oyerebet me ibot ebi ìkup me ugwem, mè ebi ìkwukwu. 6 Îre mije keyi ke elook ebi ìkwukwu ata etip me mgbọ ema ekupbe me ugwem, inyi esibi ema oyerebet me ibot me akpalek, kubọk ebilene, mè ema eluk ugwem me emen Ekwukwu, kubọk Awaji okiluk. 7 Mgburudun̄ inu geelek îgbet. Eya orọ, ìtet lek ìkaan̄, ikachieek ibe inu geege iwuwọlọ enyi ibot. Ìgwọk chieen̄, inyi enyi ekọt ekeriaak uriaak. 8 Ògak ge, ìmun̄ lek kinyi me chieen̄ enenen, mije, imumechieen̄ ìkekichit ogbogbo ijo inu. 9 Ìkibọkọ ebi melek kinyi ìtap me uwu kinyi ubọk ògbegbe, mè ikakinunuun̄. 10 Ene geelek isa uche geelek Ekwukwu Mbuban ochebe inyi ọmọ ikisi ikwaan̄ inyi ebi melek kan̄, kubọk ata ebi ikwaan̄ ìkikpọ chieen̄ me lek esese uche echi Awaji okiche inyi ene inan̄a me atata nnwọn kan̄. 11 Ene geelek Awaji onyibe uche itutumu ikọ Awaji, ene ya ikitumu atalek ikọ Awaji. Ogwu enyibe uche isisi ikwaan̄ inyi ene, ene ya isa unye Awaji onyibe ọmọ ikisi ikwaan̄ inyi ene, inyi ebi ene eketọn̄ Awaji me emen inu geelek, inan̄a me lek kè Jisọs Karais ogwu itọn̄ mè ibot mkpulu okupbe inyi mege ire mgbọ geelek ikakaan̄ge itata. Ikup ikeya! 12 Atata ebi une n̄a, ikachieek ibe ntọ-mkpọ chi, òkup unan unan òkinitap enyi ufialek me lek, ike enyi chieen̄, kubọk ke îre uyeke uyeke inu ge ire eya òsisibi inyi enyi. 13 Kpan̄asi ikeya, ìbele ejit enenen ibe ke enyi mîgọọk ibọkọ ufialek kè Karais, inyi unwọọn̄ kinyi iso ifuk me mgbọ umin mè uja kè Karais môsibibe utoon̄. 14 Ire ebi ene inye chieen̄ inyi enyi mije erieen̄ kè Karais, Awaji môgbana enyi, mije Ekwukwu eyi umin mè uja, òrere Ekwukwu eyi Awaji îluk ibia me emen kinyi. 15 Ire enyi ibọkọ ufialek, ikachieek ibe inan̄a mije enyi erebe ebi ìkpan̄ ene, mè ìre ebi inọ, mè ìre ebi ìrọn̄ ikan, mè ìyaka ire ebi ìkitap lek kiban̄ me emen ikọ ebi ofifi ife. 16 Ire, ire enyi ibọkọ ufialek mije enyi erebe ebi eyi kè Karais, ikachieek ibe esip itet enyi. Kpan̄asi ikeya, ìtọn̄ Awaji ibe ke enyi ekichieek erieen̄ kè Karais. 17 Mije, îkem mgbọ oyerebet Awaji obobene. Oyerebet yi ìbodasi ibene me lek ebi ototun̄ ukan̄ eyi Awaji. Ire oyerebet idasi ibene me lek kiji, me atikọ, ìre mgburudun̄ usen ya ìbonikukup me lek ebi ìjijit ichechieek ata etip eyi Awaji? 18 Ikpa Mbuban îtumu si ibe: “Ire iyọt inyanyan̄a ebi ata irọrọ, ìre ìbonikukup me lek ebi ekariọọn̄ge Awaji, mè ebi ijo irọrọ?” 19 Eya orọ, ebi geelek ìkibọkọ ufialek igọọk me nkeek Awaji, ife cha esa lek kiban̄ etap me ubọk Awaji ogwu òrorom ema, ogwu ìkakilọ irọrọ use kan̄ iso, mè ekpọkpọ ekerọ ata inu efo isi.
51 Nteme keyi ìkup inyi ebi ugane ntitiin̄ Awaji, ebi ìkup me etete kinyi. Emi si ìre ogwu ugane ntitiin̄, mè ire ogwu ata-ikọ ogwu môkọtbe itumu ikọ òfolek ufialek geelek Karais obọkọbe, mè ire si ogwu môgọọkbe Karais ikaan̄ uche me lek umin mè uja kan̄ mgbọ eji mêmun̄be ọmọ. 2 Ìkikpukpo arọọn̄ Awaji otapbe enyi me ubọk. Enyi kubọk ebi ìkikpọ ema chieen̄ me lek, ìkpukpo ema kubọk Awaji oweekbe. Ìrọ kubọk inu enyi etutumu ifieek me ejit kinyi gaalek, ikarọ kubọk inu etetbe enyi me ubọk unye ibe erọ. Ikasa me ejit ile ìrọ ìsa ìweek ten̄ten̄ oruru. Ìsa me ulọk isisi ikwaan̄ inyi Awaji ìrọ. 3 Ikakpọkpọ ìkitọ ikọ ubọk geelek ìnyi ebi ekanabe itap enyi me ubọk. Ire, ìkirọ inu ògbegbe ìjeen̄ bọn arọọn̄ Awaji cha, inyi ema ekekpọ inu me ubọk kinyi erọ. 4 Ogwu Ibot Ebi Ìkpukpo Arọọn̄ isinu, enyi mêbọkọ okpibot ubọọn̄ eyi umin mè uja eyi kpogwọkbe ita. 5 Ikeya si, enyi ebi nsabọn irieen̄, ìkisiki ibot ìnyi ebi ugane. Ìkikaan̄ ugwem isisiki lek me lek ebi melek kinyi, mije, Ikpa Mbuban ìtumu ibe: “Awaji ìkakichieek ìnyi ebi ìkigumu lek, ire, ìkikaan̄ ata ejit me lek ebi ìkisiki lek.” 6 Eya orọ, ìsiki lek kinyi me irak ikpele ubọk Awaji, inyi ọmọ gaalek ibene enyi ifo inyọn̄ mgbọ mgbọ kan̄ isikem. 7 Ìkpulu otutuuk uyọrọlek kinyi ìtọp ìgwook ọmọ me lek, mije, ọmọ okikpọ enyi chieen̄ me lek. 8 Ìgwọk chieen̄, mè ìkup me mbem! Ogwu ochicha kinyi, òrere Yọk, òkinya ikana, mè ikigbin kubọk egbe inwọọn̄ ikiweek ogwu ìbochim itaka. 9 Ìjit Yọk, mè ìkeke ìnye me emen ichechieek. Mije, enyi mîriọọn̄ ibe ke bọn Nte kinyi me ere geelek me linyọn̄ mêkibọkọ si òjelek ufialek kechi enyi ekibọkọ. 10 Enyi isibọkọ ufialek sọntiik mgbọ, Awaji me lek kan̄, ogwukaan̄ otutuuk atata nnwọn geelek, ogwu òsasa me lek kè Karais igwen enyi itap me emen umin mè uja kan̄ eyi mgbọ ikakaan̄ge itata, môkpọk enyi inama, mè ibene enyi igwuun̄, mè inyi enyi unye-lek, mè irọ inyi enyi ekeke enye. 11 Ọmọ ke ibot mkpulu okup inyi mege ire mgbọ ikakaan̄ge itata. Ikup ikeya! 12 Sailas ogwu mmọnọbe kubọk gwun̄ Nte ògbegbe utoon̄-ejit, ọmọ otap ubọk inyi emi me igege sọntiik ikpa yi. Ǹge ikpa yi ikisa itap enyi efuuk me emen, mè ikikeke ata-ikọ inyi enyi ibe ke eyiyi ore atalek atata nnwọn eyi Awaji. Eya orọ, ìkeke ìnye me emen atata nnwọn yi. 13 Ebi ntitiin̄ Awaji òkup me Babilọn, ìrere bọn Nte kinyi, ebi egbaan̄be ema melek kinyi igobo, mîtọp enyi amon. Mak, gwun̄ n̄a si îtọp enyi amọn. 14 Ìkat ebi melek kinyi, mè ìtọp ema amọn me imumechieen̄. Esuuk ikup inyi otutuuk kinyi ebi ìkup me emen kè Karais.