Ebi Kọrint eyi adasi
11 Emi Pọọlu, ogwu Awaji osabe me nkeek kan̄ igwen ibe inire ogwu otuchieen̄ kè Jisọs Karais, emi mè Sọsitenis gwun̄ Nte kiji 2 ege ikpa etip keyi ijet enyi ebi ntitiin̄ Awaji òkup me ama Kọrint, ebi Awaji osan̄abe isun̄ esese inyi lek kan̄ sa me lek kè Jisọs Karais, mè igwen ibe eneluk ugwem òkup me mbuban. Eji ege ikpa yi inyi enyi melek otutuuk ebi geelek ìkigwen erieen̄ Okaan̄ kiji Jisọs Karais, ogwu òrere Okaan̄ kiban̄, mè ire si Okaan̄ kiji. 3 Atata nnwọn mè esuuk eyi ònan̄a me ubọk Awaji ogwu òrere Nte kiji, mè Okaan̄-ene Jisọs Karais ikup melek kinyi. 4 Nkitọn̄ Awaji mgbọ geelek me ibot kinyi, mije atata nnwọn eyi înyibe enyi sa me lek kè Karais Jisọs. 5 Mije, inan̄a me lek kè Karais, enyi mîbọọn̄ ubọọn̄ enenen me oniin̄ geelek, ìrere me otu itumu-ikọ kinyi geelek, mè ifuk-ibot kinyi geelek. 6 Îsibi utoon̄ ibe ke etip òfolek Karais eyi enyi ebọkọbe itap îtibi ugwun̄-ijọn̄ me emen kinyi. 7 Eya orọ, kpunu uche eyi Ekwukwu Mbuban geege ònanan enyi me mgbọ keyi enyi ekikup ikpọ mgbọ Awaji môchilibe Okaan̄ kiji Jisọs Karais ijeen̄ eji. 8 Ọmọ môtet enyi ikaan̄ inye mege ire òta mgbọ, inyi ekamun̄ okpa geege me emen kinyi me usen ọmọ Okaan̄ kiji Jisọs Karais môkpọkbe inu. 9 Awaji ogwu ògwegwen enyi ibe enyi enegọọk Gwun̄ kan̄ Jisọs Karais egbaan̄ inu erọ îgbe ogwu etoon̄be ejit me lek. 10 Bọn Nte n̄a, nsa erieen̄ Okaan̄-ene Jisọs Karais iriaak enyi ibe enyi otutuuk ene ere otu ge, inyi icheche lek ikakup me etete kinyi, inyi enyi egbaan̄ ere ge ejaan̄ lek, mè ekaan̄ ejit ge, mè ekiket ge. 11 Bọn Nte n̄a, usini ebi ìnan̄a me ototun̄ ukan̄ kè Kolowi mîkpa inyi emi ibe ke owuwa ibaak òwa me etete kinyi. 12 Ikọ nkitumu ìre ke usini kinyi ekibe, “Emi ǹkigọọk Pọọlu.” Usini ekitumu ibe, “Emi ǹkigọọk Apọlọs.” Usini ekitumu ibe, “Emi ǹkigọọk Pita.” Sa usini ene ekitumu si ibe, “Emi ǹkigọọk Karais.” 13 Ìre mîche Karais? Ìre Pọọlu ke egon ikpan̄ me uti nkwurieen̄ mije kinyi? Sa ìre me erieen̄ kè Pọọlu ke egwook enyi mun̄? 14 Ntọn̄ Awaji ibe ke ǹkagwook ene geege mun̄ me etete kinyi, ilọ me lek Kirisipọs mè Gayọs gaalek. 15 Eya orọ, kpunu ogwu òbotumu ibe ke emi ǹsa me erieen̄ n̄a igwook enyi mun̄. 16 Iin̄, nkeek si ibe ke ìre emi ngwook ebi ototun̄ ukan̄ kè Sitifanas mun̄. Isan̄a me lek kè ebibi, ǹkayaka ìkeek ibe ke ngwook ebi ofifi ife mun̄. 17 Karais ìkaria emi ìnu ibe emi ǹnengwook ene mun̄. Ìria emi inu ibe emi ǹnenlook ata etip, mè nkasa ikọ iriọọn̄-inu ebilene ìlook ata etip ya, inyi mkpa eyi Karais okwube me inyọn̄ uti nkwurieen̄ ikakana inu kpunube unye me emen. 18 Ata etip òfolek mkpa eyi Karais okwube me inyọn̄ uti nkwurieen̄ ìre inu burubut isa inyi ebi ìbechechep. Ire, me lek kiji ebi ekinyanyan̄a isibi, ata etip ya ìre unye eyi Awaji. 19 Ege me Ikpa Mbuban ibe, “Mâjijaka iriọọn̄-inu ebi ìriọọn̄ inu; Mârọ inyi ifuk-ibot ebi ìkween̄ uga ikpa ikayaka ìkup me lek inu geege.” 20 Omọmọ ebi ìriọọn̄ inu cha? Omọmọ ebi ìkween̄ uga ikpa cha? Sa ebi uga ifan̄a ibot ikpa eyi linyọn̄ mgbọ keyi cha ekup me owa? Me atikọ, Awaji îjeen̄ ibe ke iriọọn̄-inu eyi linyọn̄ keyi ìre burubut. 21 Me iriọọn̄-inu eyi Awaji, Awaji ìkasun̄ ibe ebi linyọn̄ esa me iriọọn̄-inu eyi kiban̄ eriọọn̄ ọmọ. Eya orọ, îbele Awaji ejit isasa me lek burubut ikọ eyi eji ekitumu inyan̄a ebi geelek ìchechieek. 22 Ebi Ju ekiweek imumun̄ uyeke uyeke inu ijejeen̄ sabum ema ènechieek ibe ke ata etip yi ìre atikọ. Ikeya si, ebi Giris ekiweek isasa ifuk-ibot ebilene igobo ata etip yi itet. 23 Ire, ata etip eji ekilook ebi ene ìre ata etip òfolek kè Karais ogwu egonbe ikpan̄ me inyọn̄ uti nkwurieen̄. Eya orọ, ata etip yi ìre njijọ inu me lek ebi Ju, mè ire inu burubut me lek ebi ekarege ebi Ju. 24 Ire, me lek ebi Awaji ogwenbe, ebi Ju mè ebi kpere ebi Ju, Karais ore unye eyi Awaji, mè ire si iriọọn̄-inu eyi Awaji. 25 Ire ebi ene ikimọnọ ibe ke inu yi Awaji orọbe ìre inu burubut, burubut eyi Awaji îgak iriọọn̄-inu ebilene. Ofifi si, ire ebi ene ikimọnọ ibe ke Awaji îdek, idedek eyi Awaji odekbe înye igak unye geelek ebilene ekaan̄be. 26 Bọn Nte n̄a, ìkeek-nu òjelek ife enyi erebe sabum Awaji onigwen enyi! Me chieen̄ ebilene, owuwa kinyi kpere ebi ìriọọn̄ inu, owuwa kinyi kpere ebi isi ile, ebi ìkakaan̄ unye isasa ikitọ ikọ, owuwa kinyi si kpemiin̄ me irek. 27 Ire, Awaji ìgobo ebi ebi linyọn̄ emọnọbe kubọk ebi burubut, inyi esip itet ebi ìriọọn̄ inu, mè igobo si ebi ìdedek me linyọn̄, inyi esip itet ebi unye. 28 Awaji ìgobo inu òsisiki ichit me linyọn̄ keyi, mè inu echi ebi linyọn̄ ekpọbe ilọ chieen̄, mè inu echi ikarege inu geege, isa irọ inyi inu ebi linyọn̄ esabe igwen inu ikayaka ìkup me lek inu geege. 29 Awaji ìrọ ikeyi inyi ene geege ikagugo lek me isi kan̄. 30 Îre Awaji orọ mè eji egọọk Jisọs Karais egbaan̄ ere ge. Ọmọ si orọ inyi eji ekaan̄ iriọọn̄-inu, mè ekana ebi ata irọrọ, sa me lek kè Jisọs Karais. Sa me lek kè Karais si ke eji ekana ebi ìkup me mbuban. Karais si ofaka eji isibi me irak ubọk ijo inu. 31 Îre mije keyi ke Ikpa Mbuban otumu ibe, “Ogwu geelek òbogugo lek, igugo lek mije inu echi Okaan̄-ene orọbe.”
21 Bọn Nte n̄a, mgbọ nnube me ere kinyi inilook enyi etip òfolek udọk udọk atikọ eyi Awaji, ǹkasa utop otu ikọ mè uga iriọọn̄-inu ìnitumu ikọ isasa inwene enyi ejit. 2 Mije, mgbọ nkupbe melek kinyi, ǹtutumu ifieek me ejit n̄a ibe ke ǹkabakeek ekiket òfolek inu geege, ilọ me lek kè Jisọs Karais, ògak ge, mkpa eyi ọmọ okwube me inyọn̄ uti nkwurieen̄. 3 Ǹnu me lek kinyi kubọk ogwu òwọwọ idek, mè ikitet ukpook, mè ikiran enenen mije ukpook. 4 Mgbọ nnube inijeen̄ enyi inu, mè ilook enyi ata etip, ǹkasa me iriọọn̄-inu mè ikọ ekisa inwene ene ejit ìnu me lek kinyi. Ire, ǹnu melek ikpele unye eyi Ekwukwu Mbuban eyi enyi emun̄be. 5 Eya orọ, ichechieek kinyi ìkanan̄a me lek iriọọn̄-inu ebilene, ìnan̄a me lek unye eyi Awaji. 6 Eji ekitumu ikọ òkinyi ene iriọọn̄-inu inyi ebi ìmimiin̄ iso me emen inu eyi Awaji. Ire, ìkare iriọọn̄-inu eyi linyọn̄ mgbọ keyi, ìkare si iriọọn̄-inu eyi ebi ibot mkpulu eyi linyọn̄ mgbọ keyi ebi unye kiban̄ obokana inu ikike. 7 Ire, eji ekitumu ikọ òfolek nlelet iriọọn̄-inu eyi Awaji, eyi Awaji oletbe me chieen̄ ebilene mè itumu ifieek, karake sabum enirom linyọn̄, ibe ke ọmọ môchili ijeen̄ eji me ukot keyi, inyi eji esa me ikeya ekaan̄ umin kan̄ mè uja kan̄. 8 Me etete ebi ìkikpulu linyọn̄ me ukot keyi, kpunu ogwu òkọkọt igobo iriọọn̄-inu ya itet. Ire ema mekọt igobo itet, ema kpemetet Okaan̄-ene ogwu òkaan̄ otutuuk umin mè uja igon ikpan̄ me inyọn̄ uti nkwurieen̄. 9 Ubọk geelek, mîge si me Ikpa Mbuban ibe, “Inu echi Awaji onen̄ebe isun̄ iban ebi ìmumun̄ ọmọ me chieen̄, kpunu chieen̄ ene geege òrarak imun̄, kpunu utọn̄ ene geege òrarak inọ, kpunu ejit ene geege òbokọkọt ikeek ubọk inu cha osabe ikup.” 10 Ire, îre eji ke Awaji ochili inu chi ijeen̄, sa me unye eyi Ekwukwu Mbuban kan̄. Mije, îre Ekwukwu Mbuban okimọọn̄ inu geelek itibi, ìrere nlelet udọk udọk inu òkup Awaji me ejit. 11 Mije, kpunu ene geege òkikọt iriọọn̄ inu òkup ene me ejit, îtata ekwukwu ene ya gaalek obokọt iriọọn̄. Ikeya si, kpunu ogwu òrọriọọn̄ ekiket Awaji, ilọ me lek Ekwukwu eyi Awaji gaalek obokọt iriọọn̄. 12 Ekwukwu eyi Awaji onyibe eji ìkanan̄a me linyọn̄ keyi, îre Ekwukwu eyi Awaji me lek kan̄. Ekwukwu ya okirọ inyi eji eriọọn̄ otutuuk uche geelek Awaji ochebe inyi eji me ikike. 13 Eya orọ, iko eji ekitumu ìkare ikọ ònan̄a me ifuk-ibot ebilene, eji ekitumu ikọ eyi Ekwukwu Mbuban ojeen̄be eji. Eji ekikpa atikọ eyi Ekwukwu Mbuban inyi ebi ìkakaan̄ Ekwukwu Mbuban me emen kiban̄. 14 Ire, ogwu ikakaan̄ge Ekwukwu Mbuban me emen kan̄ ìkpokọt ibọkọ inu Ekwukwu Mbuban Awaji okinyi ene, mije, inu cha ìre inu burubut me lek kan̄. Ìkpokọt igobo inu cha si itet, mije, ekisa me unye Ekwukwu Mbuban gaalek igobo inu cha itet. 15 Ogwu òkakaan̄ Ekwukwu Mbuban me emen gaalek okikọt iweek inu geelek iriọọn̄, ire, ọmọ me lek kan̄, kpunu ene geege òkikọt iweek ọmọ iriọọn̄. 16 Ege me Ikpa Mbuban ibe, “Ìre ekene oriọọn̄ inu òkup me ejit Okumugwem? Ìre ekene obokọt iteme ọmọ nteme?” Ire, eji ebi ìkakaan̄ Ekwukwu Awaji me emen kiji, eji mîkaan̄ ekiket kè Karais me ejit kiji.
31 Bọn Nte n̄a, me mgbọ nkupbe melek kinyi, ǹkakọt ìtumu ikọ melek kinyi kubọk ebi ìkakaan̄ Ekwukwu Mbuban me emen. Kpan̄asi ikeya, ǹkitumu ikọ melek kinyi kubọk ǹkitumu inyi ebi linyọn̄ ikike, ebi ekariọọn̄ge Awaji, mije, mgbọ ya, enyi ìre asa nsabọn emanbe ayaya me oniin̄ eyi Karais. 2 Me mgbọ ya, mfufet ikọ Awaji òbet lek mun̄ ebe ikike ekisa inyi nsabọn ke nsa ikinyi enyi. Ǹkanyi enyi echi udọk udọk cha òbet lek unye unye inorie ebi ugane ekirie. Mije, enyi kpemiin̄-nu iso ebi ìberie òjelek inorie òkup ikeya. Mege inire mgbọ keyi si, enyi kpemiin̄ iso-nu. 3 Mije, enyi ekiluk si ugwem kubọk ebi linyọn̄. Eyi enyi ekikaan̄ chieen̄ ile me lek ebi melek kinyi, mè ikibaak ibaak, ìre eya ìkajeen̄ ibe ke enyi ìre ebi linyọn̄, ebi ìkiluk ugwem igọọk me lek ọrọmijọn̄ ebilene ikike? 4 Ire ene ge me etete kinyi ikibe, “Emi ìre ogwu kè Pọọlu,” ofifi ene otutumu ibe, “Emi ìre ogwu kè Apọlọs,” ìre eyi ìkajeen̄ ibe ke enyi ìre ebilene ikike? 5 Ìre ekene ore Apọlọs? Sa ìre ekene ore Pọọlu? Ema ìre ebi usun̄ gaalek, ebi enyi esabe me lek kiban̄ inichieek me lek kè Karais. Ema ekirọ ikwaan̄ igọọk ubọk Awaji ochebe ikwaan̄ inyi ema, me ene me ene. 6 Eji ekup kubọk ebi ikwaan̄ uko. Emi Pọọlu mwop mfut, Apọlọs onenigwook mun̄ me ebon mfut cha. Ire, Awaji gaalek ire ogwu òrọrọ inyi mfut cha itibi. 7 Eya orọ, ogwu òwowop mfut mè ogwu ògwogwook mun̄ me ebon mfut kpekup me lek inu geege. Ire, Awaji ogwu òrọrọ inyi mfut cha itibi, ọmọ gaalek okup me uyọt. 8 Ogwu òwop mfut mè ogwu ògwook mun̄ me ebon mfut ìre ìkike. Ire, ogwu ikup, môbọkọ mkpukpe ubọk ikwaan̄ kan̄ igọọk me ikeke ikwaan̄ îsibe. 9 Mije, eji ìre ebi melek Awaji ekigbaan̄ isi ikwaan̄. Enyi ìre uko eyi Awaji, mè ire si uwu eyi Awaji okinama. 10 Sa me atata nnwọn eyi Awaji onyibe emi, ntọbọ ọdọ uwu ya kubọk ogwu usọ ikwaan̄ uwu ogwu òrọriọọn̄ ikwaan̄ kan̄ ijaan̄. Ebi ofifi ife enenikinama uwu ya me inyọn̄ ọdọ ntọbọbe ya. Ire, ogwu geelek òkinama uwu me inyọn̄ ọdọ ya, igbala chieen̄ iriọọn̄ ubọk îkisa inama. 11 Mije, kpunu ofifi ọdọ ebeyaka itọbọ, ilọ me lek ọdọ ge ya gaalek eyi Awaji me lek kan̄ otọbọbe, eyi òrere Jisọs Karais. 12 Inu geelek ene geelek osabe inama uwu me inyọn̄ ọdọ ya, mè ìre alata araran̄, mè ìre alata okuket, mè ìre ewuuk unye otu ewe geelek, mè ìyaka ire uti, mè ìre mbubet, mè ìre nchat uti akpa, 13 ubọk ikwaan̄ ene ya môkpọk mbum me Usen Okaan̄-ene môkpọkbe inu. Mije, Awaji me lek kan̄ môsa ukan̄ itọ ikwaan̄ ene geelek ikpọ. Sa me lek inu ukan̄ ya môrọbe me lek ubọk ikwaan̄ cha, ene geelek mômọọn̄ ijaan̄ lek ike ikwaan̄ ọmọ osibe okupbe. 14 Ire ukan̄ ìkataka inu ene onamabe itoon̄ me inyọn̄ ọdọ ya, ene ya môbọkọ mkpukpe kan̄. 15 Ire, ire ukan̄ itaka inu ene onamabe itoon̄ me inyọn̄ ọdọ ya iriọk, ene ya môkaan̄ ichep. Mênyan̄a ene ya me lek kan̄ isibi. Ire, ọmọ ìbokup kubọk ogwu òwuwulu isibi me emen uwu ukan̄ okitaka, mè inwọnọ me otu alọm ukan̄. 16 Ìre enyi kperiọọn̄ ibe ke enyi ìre uwu mbuban eyi Awaji; ke Ekwukwu Awaji ìkiluk me emen kinyi? 17 Ikaan̄ ogwu ijijaka uwu mbuban Awaji, Awaji môjijaka ene ya. Mije, uwu mbuban eyi Awaji ìkup me mbuban. Enyi me lek kinyi ere uwu mbuban ya. 18 Ene geege ikafiaan̄ lek kan̄! Ire ikaan̄ ene me etete kinyi ogwu òkikeek ibe ke ọmọ îriọọn̄ inu me linyọn̄ mgbọ keyi, ene ya ikana ogwu burubut, inyi isa me ikeya ikana ogwu òriọọn̄ inu me atikọ. 19 Mije, iriọọn̄-inu eyi linyọn̄ keyi ìre burubut me isi Awaji. Mije keya ke ege me Ikpa Mbuban ibe, “Awaji îtet ebi ìriọọn̄ inu me emen ngan kiban̄,” 20 mè ige si ibe, “Okumugwem îriọọn̄ ibe ke ekiket ebi ìriọọn̄ inu ìkasibi inu geege.” 21 Eya orọ, ikayaka ìsa ubọk ikwaan̄ ebilene ìgugo lek. Mije, otutuuk inu geelek ìre eyi kinyi. 22 Îre enyi ekaan̄ Pọọlu, mè Apọlọs, mè Pita, mè ikaan̄ si otutuuk linyọn̄, mè ugwem, mè mkpa, mè inu geelek òkukup mgbọ kechi, mè echi òkup me isi. Otutuuk inu chi geelek ìkup inyi enyi. 23 Sa enyi otutuuk ekup inyi Karais. Karais me lek kan̄ okukup inyi Awaji.
41 Îgbe ibe ebi ene ekemọnọ eji ebi ìkijeen̄ enyi inu kubọk ebi ìkisi ikwaan̄ inyi Karais, ebi Awaji okanabe nlelet udọk udọk atikọ kan̄ itap me ubọk ibe esa ejeen̄ ebi ene. 2 Ute-uwu geelek ìkikpọ chieen̄ ibe ke gwun̄ uwu kan̄ ogwu ọmọ okanabe inu kan̄ itap me ubọk môre ogwu ọmọ môkọtbe itoon̄ ejit me lek. 3 Inu geelek enyi, mè ìyaka ire ebi ofifi ife, ekikeek òfolek n̄a ìkasisaak emi kubọk ge. Mè ìre ekitọtọn̄ emi, mè ìyaka ire ekifefieek emi ikọ, eya ìre sọntiik inu me lek n̄a. Emi me lek n̄a si, ǹkakikeek inu geege òfolek n̄a, mè ìyaka ire ikwaan̄ n̄a. 4 Ejit n̄a ìkafieek emi ikọ. Ire, eya ìkasibi ibe ke emi ǹkariọọn̄ ijo inu. Okaan̄-ene me lek kan̄ ore ogwu òbosibi oyerebet me ibot n̄a. 5 Eya orọ, ikasibi oyerebet ìnyi ene geege me mgbọ usen ikakemge-nu. Ìtele inyi Okaan̄-ene ikpọk inu. Me usen ya, Okaan̄-ene isinu, mônikpọk mbum otutuuk nlelet inu geelek ebi ene ekirọ me emen udun, mè ikpọk mbum otutuuk nlelet otitọt geelek òkup me ejit ebilene. Me mgbọ ya, ogwu geelek ògbegbe itọn̄, môbọkọ itọn̄ inan̄a me ubọk Awaji. 6 Atata bọn Nte n̄a, ǹkitumu inu chi ibak Apọlọs melek n̄a, mije kinyi, inyi enyi esa me lek kiji ekween̄ inu òfolek inu egebe me Ikpa Mbuban ibe, “Kasaba ìraka inu egebe me Ikpa Mbuban.” Sa me ikeya, enyi kpebeyaka ikisa ene ge igugo lek, mè ikpọ ogwulọ chieen̄ ìsiki. 7 Ìre keke ke owu osa inwene me lek ofifi ene? Ìre îkaan̄ inu owu okaan̄be eyi ikarege Awaji onyi owu? Ire, ire ke enyinyi owu otutuuk inu owu okaan̄be, ìre keke orọ okigugo lek kubọk ke ìre mije ata ikwaan̄ osibe ke okaan̄ inu chi; ke ìkare echeche inyi owu? 8 Eyi kinyi, mgbọ keyi mgbọ keyi mege, enyi mîbene ikimọnọ ibe ke inu geege ìkayaka ìnan enyi; ke enyi mîbọọn̄ ubọọn̄, mè ikana ebi ubọọn̄ itele eji. Kè obele emi ejit enenen, mebe ke enyi mîkana ebi ubọọn̄ me atikọ, inyi eji si egọọk enyi ekana ebi ubọọn̄. 9 Mije, ìkup me lek n̄a kubọk Awaji ìgogobo eji ebi otuchieen̄ ito me irek òsisiki ichit. Eji ekup kubọk ebi etipbe oyerebet mkpa, mè ikpulu igwook me eden̄ oyet me isi otutuuk inu geelek Awaji orombe, me isi ebi osat Awaji, mè isi ebilene, ibe ekenu enekpọ eji kubọk ekikpọ ifit. 10 Eji mîkana ebi burubut mije kè Karais! Ire, me emen kè Karais, enyi ekimọnọ lek kinyi kubọk ebi ìriọọn̄ inu! Iin̄, eji mîwọ, mè idek! Ire, enyi mînye lek! Enyi ke ebi ene ekinyi umin! Sa eji ke ekikpọ chieen̄ isiki! 11 Mege inire mgbọ keyi, eji ekikup me uraafiọọn̄, mè urak-ebek, mè ikisa oka ekwut mè oka ọfọnti ichit lek, mè ikibọkọ osusut me ubọk ebilene. Eji kpekaan̄ ere iluluk. 12 Eji ekisa ubọk iba kiji ikwukwulu, inyi eji ekọt ekpọ owot kiji. Ebi ene isigbo eji, eji ekigbagbana ema. Ema isikisisaak eji, eji mîra ikime. 13 Ebi ene isikitumu eji ifiat, eji mîra ikisa ata otu ikifọọk ema. Mege inire cherekeyi, eji ekup kubọk nsak inu eyi ebi linyọn̄ echanbe isa isi ifiin̄ me inyọn̄ otiton. Me chieen̄ ebi linyọn̄, eji ìre njijọ inu ikagbege ibe etele me ere ebilene elukbe. 14 Ǹkage inu chi isasa itap enyi esip me isi. Ire, ǹkiweek iteteme enyi nteme, mije, enyi ìre bọn n̄a ebi mmabe. 15 Enyi mêkọt ikaan̄ obop obop ebi ijejeen̄ ebi ìkikpukpo enyi me oniin̄ eyi Karais. Ire, ute ge gaalek ke enyi ekaan̄, ìkare owuwa. Emi nre nte kinyi me emen kè Jisọs Karais. Mije, emi nre adasi ene ogwu òsasa ata etip kè Jisọs Karais inilook enyi, eyi enyi ebọkọbe itap. 16 Eya orọ, soso nriaak enyi, ìkikpọ inu me ubọk n̄a ìrọ. 17 Îre mije keyi ke nria Timọti, òrere gwun̄ n̄a me emen Okaan̄-ene, inu me lek kinyi. Emi mmun̄ ọmọ me chieen̄ enenen. Ọmọ ìre ogwu òkigban̄ utọn̄, mè ikisa otutuuk ejit kan̄ irọ ikwaan̄ inyi Okaan̄-ene. Ọmọ môyaka inirọ mè enyi ekeek ubọk nsabe ikiluk ugwem me oniin̄ kè Jisọs Karais. Ubọk iluk-ugwem yi si ke emi nkijeen̄ ebi ene me ntitiin̄ Awaji me ere geelek nsibe. 18 Usini kinyi mîbene ikigumu lek, mè ikikeek ibe ke emi m̀kpayaka igwu ikom inu me lek kinyi. 19 Ire, ire ineme Awaji, mâgwat lek inu inikpọ enyi. Mgbọ ya, mâniweek iriọọn̄ òjelek ikọ ebi ìkigumu lek cha ekitumu, mè iriọọn̄ si unye ema ekaan̄be. 20 Mije, mkpulu eyi Awaji ìkije melek unye, ìkare me ikọ otu gaalek. 21 Ìre eyi owa ke enyi eweek? Ìre enyi eweek ibe emi ǹsa njijan̄ ǹkaan̄ me ubọk ǹnu? Sa ìre enyi mênwene ugwem, mè ǹnu me imumechieen̄, mè ekwukwu eyi irọrọ inu esuuk esuuk?
51 Ukpatu òkitaan̄ ikana ere me mgbọ keyi ibe ke îkaan̄ ebi ìkiluk ugwem barabat me etete kinyi ebi ntitiin̄ Awaji. Ebe ke ugwem barabat ya îfieek ire lek, kperarak imun̄ òjelek kan̄, ìrere me etete ebi ekariọọn̄ge Awaji. Ebe ke enerieen̄ ge me etete kinyi òkigọọk nwa ogwu ute ilaak. 2 Ìre enyi ejeje ikigumu lek, kpan̄asi enyi mekikup me ufieejit? Ogwu òkup ikeya ìre ogwu enyi melalap isibi me emen ntitiin̄ kinyi! 3 Ubọk geelek nkakupge me etete kinyi isi mè isi, ire, me emen ejit n̄a, emi melek kinyi ekup me ere ya. Sa me erieen̄ Okaan̄-ene Jisọs, emi mwuuk lek ifieek oyerebet isan̄a inyi ogwu òrọrọ inu ya. M̀fieek oyerebet ya kubọk ǹkukup me ere ya melek kinyi. 4 Enyi ebi ntitiin̄ Awaji ìgbaan̄ ìtitiin̄ me ere ge. Me emen ejit n̄a, mâgọọk enyi ikup. Unye Okaan̄ kiji Jisọs môkup si melek kinyi. Ìsa me unye Okaan̄-ene, 5 ìkana ene ya ìtap me ubọk Setan, inyi ijijaka akpalek ijo inu ene ya, mè Awaji inyan̄a ibot ejit kan̄, me usen Okaan̄-ene Jisọs môkpọkbe inu. 6 Gogolek kinyi ìkatat. Ìre enyi kperiọọn̄ urọk ge ekito ibe, “Sọntiik olat etapbe me emen akpa ekọkọk okirọ inyi otutuuk owut fituru iwuku?” 7 Ìsan̄a ijo inu ya ìsan̄a me etete kinyi, inyi enyi etana kubọk ayaya akpa ekọkọk, eyi ekatapge olat geege me lek. Me atikọ, enyi mîtana isan̄a, mije, Karais îkwu mkpa mije kinyi. Karais ìkup kubọk arọọn̄ ekisa igwa ngwugwa inyi Awaji me mgbọ ijọk Iraraka. 8 Eya orọ, eji esan̄a lek kiji me lek otutuuk ijo inu geelek, kubọk njijọ ejit mè inu ikpak, inyi eji ekakup kubọk fituru òkakaan̄ oka olat me lek. Kpan̄asi ikeya, eji ekeluk ugwem eyi atikọ, eyi ofiaan̄ geege ikakupge me emen, inyi eji ekup kubọk fituru eyi ekatapge olat geege me lek, eyi ebi Ju ekisa irie ijọk Iraraka. Sa me ikeya, eji mêre ebi ìkirie ijọk ya ubọk ògbegbe. 9 Me emen ikpa ngebe ijet enyi, ntumu ibe mè enyi ekagọọk ebi barabat ìgbaan̄ ìrọ inu geege. 10 Ǹkatumu ikọ yi ìbak ebi linyọn̄ ebi kpechieek me lek kè Karais, ebi ìrere ebi barabat, mè ebi ejit ile, mè ebi ofiaan̄, mè ebi ìkiriaak mkpọmfaka. Mije, ire ebiba, kpunu ubọk geege enyi ebesa iluk me linyọn̄ keyi, mè ilọ ichichichini ema, îtata me enyi enanan̄a isibi isi ge, kpeyaka iluk me linyọn̄ keyi. 11 Ire, ǹkitumu ibe enyi ekagbaan̄ inu geege ìrọ melek ene geelek òbebe ke ọmọ ìre gwun̄ Nte, mè ire ogwu barabat, mè ogwu ejit ile, mè ogwu òkiriaak mkpọmfaka, mè ogwu òkitumu ene ifiat, mè ogwu usa-miin̄, mè ogwu mfeen̄. Ikagọọk òjelek kè ebiba ìgbaan̄ ìrọ inu geege. Ìrere inorie ikike, ikagọọk ema ìgbaan̄ ìrie. 12 Ìkare ikwaan̄ n̄a itatap chieen̄ me emen ugwem ebi kpere ebi ntitiin̄ Awaji ikikpọ mè ìre ema mêkirọ inwọn, mè ìre kperọ inwọn. Ire, îre ikwaan̄ kinyi iwọwọlọ ugwem ebi ìkup me emen ntitiin̄ Awaji ikpọ, mè ìre ema mêkirọ inwọn, mè ìre kpekirọ inwọn. 13 Awaji gaalek ore ogwu òbotumu oyerebet inyi ebi kpekup me emen ntitiin̄ Awaji. Ire enyi, kubọk egebe me Ikpa Mbuban, “Ìsan̄a ogwu ijo ene ya ìsibi me etete kinyi.”
61 Ire gwun̄ Nte ge me etete kinyi ikaan̄ ikọ melek ofifi gwun̄ Nte, ìre ìjeje itat ibe ene ya isi igwen gwun̄ Nte kan̄ oyerebet me isi ebi ekariọọn̄ge Awaji, kpan̄asi ìbosa ikọ ya isi me isi bọn Nte? 2 Ìre enyi kperiọọn̄ ibe ke ìre ebi eyi Awaji ebesibi oyerebet inyi ebi linyọn̄? Ire, ire ke ìre enyi ebesibi oyerebet inyi ebi linyọn̄, ìre keke orọ enyi kpebekọt isibi oyerebet me lek asabọn ikọ òsisibi me etete kinyi gaalek? 3 Ìre enyi kperiọọn̄ ibe ke ìre eji ebesibi oyerebet inyi ebi osat Awaji? Ire ikeya, ìre keke orọ enyi kpekọt isibi oyerebet me lek inu eyi linyọn̄ keyi? 4 Eya orọ, ire òjelek gọlọgọlọ òkup ikeya ikpọk ikup me etete kinyi, ìgwen bọn Nte, ìrere ebi ìsisiki ichit me emen ntitiin̄ Awaji, inyi enesibi oyerebet ya. 5 Ǹkitumu ikọ yi inyi esip itet enyi! Ìre ìkakakaan̄ kubọk ene ge me etete kinyi ogwu òkakaan̄ ifuk-ibot ire lek môkọtbe isibi oyerebet me lek gọlọgọlọ òkup me etete ebi ìchechieek me lek kè Karais? 6 Ìkatatat kubọk ge ibe gwun̄ Nte ge isi igwen ogwu ngwan̄ oyerebet me uwu oyerebet, inyi ebi ekachieekge me lek Okaan̄-ene enekup ekesibi ema oyerebet me ibot! 7 Me atikọ, eyi enyi ekigwen bọn Nte kinyi oyerebet me uwu oyerebet, eya ìkijeen̄ ibe ke enyi mîrọn̄ inin̄ emen ijo inu isan̄a. Kpan̄asi uwu oyerebet, kè ònwọn ibe enyi eme ijo inu bọn Nte kinyi erọbe enyi. Kè ònwọn si ibe enyi etele inyi bọn Nte kinyi efeen̄ enyi. 8 Ire, kpan̄asi ebi ofifi ife mekifeen̄ enyi, ìyaka inire enyi me lek kinyi ekifeen̄ ene, mè ikirọ ene ijo inu, mè ikirọ si ire lek bọn Nte kinyi gaalek! 9 Ìre enyi kperiọọn̄ ibe ke ebi ìkirọ ijo inu kpebekaan̄ uche geege me mkpulu eyi Awaji? Ikachieek ibe efiaan̄ enyi! Ebi barabat, mè ebi ìkiriaak mkpọmfaka, mè ebi ugan-nwa, mè ebirieen̄ ebi ìkilaak ebirieen̄ ogbo kiban̄, mè ebibaan̄ ebi ìkilaak ebibaan̄ ogbo kiban̄, 10 mè ebi inọ, mè ebi ejit ile, mè ebi usa-miin̄, mè ebi ìkitumu ene ifiat, mè ebi mfeen̄ geelek kpebekaan̄ uche me mkpulu eyi Awaji kubọk ge. 11 Ubọk usini kinyi ekupbe ire eya me adasi mgbọ. Ire, mîgwọk enyi isan̄a me emen ijo kinyi, mè irọ inyi enyi ekup me mbuban, mè irọ si inyi enyi ekana ebi ata irọrọ sa me erieen̄ Okaan̄-ene Jisọs Karais, mè unye eyi Ekwukwu eyi Awaji kiji. 12 Usini kinyi ekitumu ibe, “Emi mâkọt irọ inu geelek, ikan ìkatet emi.” Iin̄, îre ikeya. Ire, ìkare otutuuk inu geelek okaan̄ oruru. Emi me lek n̄a si, mâkọt irọ inu geelek, ikan ìkatet emi. Ire, m̀kpatele ibe inu geege isa emi irọ usun̄, mè ikitọ ikọ inyi emi. 13 Usini kinyi ekitumu ibe, “Inorie ìkup inyi owot, owot ìkup inyi inorie!” Iin̄, îre ikeya. Ire, owot mè inorie ìre inu Awaji obojijijaka isan̄a kpai. Akpalek ene ìkakup ìnyi ugwem barabat, ìkup inyi Okaan̄-ene Jisọs Karais. Okaan̄-ene si ore ogwu òkinyi akpalek ene inu îweekbe. 14 Awaji ìsa me unye kan̄ ijomo Okaan̄-ene me mkpa. Ikeya si ke ìbojomo eji me mkpa. 15 Ìre enyi kperiọọn̄ ibe ke akpalek kinyi ìre nriro lek kè Karais me lek kan̄? Ìre îgbe ibe emi ǹsa nriro lek kè Karais ǹchim ǹriaak me lek ogwu òje oyet? 16 Ìre enyi kperiọọn̄ ibe ke ene geelek òsasa lek kan̄ isi ichim iriaak me lek ogwu òje oyet îkana akpalek ge melek ogwu òje oyet ya? Mije, ege me Ikpa Mbuban ibe, “Ema ene iba mêkana ire akpalek ge.” 17 Ire, ene geelek òsasa lek kan̄ ichim iriaak me lek Okaan̄-ene îkana ge melek Okaan̄-ene me emen ekwukwu. 18 Ìlibi ìnan̄a me lek ugwem barabat! Otutuuk ofifi ijo inu geelek eyi ene okirọ ìkakigbaan̄ me lek akpalek ogwu òkirọrọ. Ire, ene geelek òkekibubat ìkirọ ijo inu ya ikeme akpalek kan̄. 19 Ìre enyi kperiọọn̄ ibe ke akpalek kinyi ìre uwu mbuban, ere Ekwukwu Mbuban òkup enyi me emen okiluk? Îre Awaji onyi enyi Ekwukwu Mbuban ya. Ìkare enyi ekaan̄ lek kinyi. Îre Awaji okaan̄ enyi! 20 Awaji ìlelep enyi, mè ikpe ewe! Eya orọ, ìsa akpalek kinyi ìmin Awaji.
71 Nteme mbanyi enyi òfolek ikọ ya enyi etumube me emen ikpa enyi egebe ijet emi ìre ikeyi: Ire ogwu enerieen̄ ibe ke ọmọ ìkpokaan̄ nwa, ìkpochak si ubọk me lek enenwaan̄ geege, înwọn. 2 Ire, mije ugwem barabat omalek iwa, îgbe ibe enerieen̄ geelek ikaan̄ nwa eyi kan̄, mè enenwaan̄ geelek ikaan̄ si olom eyi kan̄, inyi enyi ekanan̄a ìrọn̄ ìnin̄ me ijo inu. 3 Olom inyi ogwu nwa inu geelek òrere unen ogwu nwa kubọk nwa òbat olom. Nwa si inyi ogwu olom inu geelek òrere unen ogwu olom kubọk olom òyet nwa. 4 Mije, akpalek nwa ìkakup ìnyi nwa, ìkup inyi ogwu olom. Ikeya si, akpalek olom ìkakup ìnyi olom, ìkup inyi ogwu nwa. 5 Owu olom, kajit inyinyi nwa kwun̄ akpalek kwun̄, îtata mè ìre enyi egbagbaan̄ ichieek ibe ke enyi ebetap lek kinyi me uriaak. Ikeya si, owu nwa, kajit si inyinyi nlom kwun̄ akpalek kwun̄, îtata si mè ìre mije uriaak yaage. Uriaak ya ikakup ìfiin̄ ìraka sọntiik mgbidim mgbọ gaalek. Sọntiik mgbọ ya isiraka, ìyaka ìgbaan̄ ìtitiin̄. Mije, ire enyi ikup ikeya ifiin̄, mè kpeyaka ikọt itet lek kinyi ikaan̄, Setan mônitọ enyi ikpọ, enyi mênanan̄a irọn̄. 6 Ikọ yi nkitumu, ǹkatatap kubọk ikan. Ǹkitumu ibe, ogwu iweek ibabat olom, ibat. Ogwu iweek idodo nwa, ido, ke ibabat olom, mè idodo nwa ìkare ijo inu. 7 Mebe ke otutuuk ene ekup kubọk emi nkupbe, kpekaan̄ nwa, kpekaan̄ olom, kè oneme emi enenen. Ire, Awaji ìnyi ene uche esese esese, kpa ogwu mè eyi kan̄. Ene ge ikaan̄ uche keyi, ofifi ene òyaka òkaan̄ uche keyilọ. 8 Ire, me lek ebi kpedo nwa, mè ebi kpebat olom, mè ebi nwakpa, ǹkitumu inyi ema ibe ke înwọn ibe ema ekup ikeya, ekado nwa, ekabat olom, kubọk emi nkupbe. 9 Ire, ire ema kpekọt itet lek ikaan̄, ema edo nwa, mè ebat olom. Mije, înwọn ibe ogwu enerieen̄ ido nwa, mè ogwu enenwaan̄ ikaan̄ olom, igak ema itetele inyi ijo ulọk ilaak ebibaan̄ mè ebirieen̄ ikitaka ema kubọk ukan̄. 10 Ebi ìkaan̄ olom mè ebi ìkaan̄ nwa ke nkinyi ikan ibe: Nwa ikayaak ogwu olom. Ìkare emi nnyi ikan keyi, îre Okaan̄-ene onyi. 11 Ire, ire ogwu enenwaan̄ iyaak ogwu olom, ikayaka ìbat ofifi olom. Ikup me lek kan̄ gaalek. Ire ìkaweek ikeya, igwu ikom isi irọ esuuk melek ogwu olom. Olom geege ikayaak si ogwu nwa! 12 Ebirieen̄ mè ebibaan̄ ìkibat ebi ekachieekge me lek kè Karais ke nkinyi nteme keyi. Nteme keyi, ìkare Okaan̄-ene onyi, îre emi nnyi ibe: Ire ogwu enerieen̄ òchechieek me lek kè Karais ikaan̄ nwa ogwu ikachieekge me lek kè Karais, mè ire ogwu nwa ya ichieek ibabia melek ogwu olom, ogwu olom ya ikayaak ogwu nwa. 13 Ubọk yaage si, ire ogwu enenwaan̄ òchechieek me lek kè Karais ikaan̄ olom ogwu ikachieekge me lek kè Karais, mè ire ogwu olom ya ichieek ibabia melek ogwu nwa, ogwu nwa ya ikayaak ogwu olom. 14 Mije, Awaji îbọkọ olom ya ogwu ikachieekge me lek kè Karais itap mije ogwu nwa ogwu òchechieek me lek kè Karais. Ikeya si, Awaji îbọkọ nwa ya ogwu ikachieekge me lek kè Karais itap mije ogwu olom ogwu òchechieek me lek kè Karais. Ire Awaji ìkarọ ikeya, bọn kiban̄ ebekup kubọk bọn ebi kperiọọn̄ Awaji. Ire, mije Awaji orọbe ikeya, Awaji îbọkọ bọn kiban̄ itap kubọk ebi ìchechieek me lek Karais. 15 Ire, me etete olom mè nwa chi, ire ogwu ikachieekge me lek kè Karais ya iweek iyayaak, ogwu òchechieek itele inyi iyaak. Ire iyaak, ikan geege ìkatet ogwu òchechieek me lek kè Karais ya, mè ìre enerieen̄, mè ìre enenwaan̄. Mije, Awaji ìgwen eji ibe eji eneluk me esuuk. 16 Owu nwa, ogwu òchechieek me lek kè Karais, ìre oriọọn̄ mè ìre me lek kwun̄ ke Awaji obosa inyan̄a nlom kwun̄? Owu olom, ogwu òchechieek me lek kè Karais, ìre oriọọn̄ mè ìre me lek kwun̄ ke Awaji obosa inyan̄a nwa kwun̄? 17 Òfo me lek ikọ ido-nwa mè ibat-olom, îgbe ibe ene geelek irọ inu igọọk me lek uche Okaan̄-ene ochebe inyi ọmọ, mè ifo isi ikiluk ugwem kan̄ ubọk îkiluk me mgbọ Awaji ogwenbe ọmọ. Eyiyi ore ikan nkinyi me otutuuk ntitiin̄ Awaji geelek. 18 Ire ikaan̄ ogwu òwuwuuk lek ifieek afi sabum Awaji onigwen ọmọ, ene ya ikayaka ìweek ikakana ogwu ekafieekge afi. Ire iyaka ikaan̄ ogwu ikawuukge lek ìfieek afi sabum Awaji onigwen ọmọ, ene ya ikaweek ifefieek afi. 19 Ifefieek afi mè ekafieekge afi ìkakup me lek inu geege. Inu òkup me uyọt ìre irọrọ inu Awaji obe erọ. 20 Eya orọ, ene geelek ifo isi ikup ubọk ọmọ okupbe me mgbọ Awaji ogwenbe ọmọ. 21 Ire owu ore usun̄ me mgbọ Awaji ogwenbe owu, kachieek ibe eya isisaak owu. Ire owu môkọt ikaan̄ lek kwun̄, kaan̄ lek kwun̄! 22 Mije, ogwu geelek òrere usun̄ me mgbọ Okaan̄-ene ogwenbe ọmọ, ene ya îkana ogwu òkaan̄ lek kan̄ me emen Okaan̄-ene. Ikeya si, ogwu òkakaan̄ lek kan̄ me mgbọ Okaan̄-ene ogwenbe ọmọ, ene ya îkana ogwu usun̄ inyi Karais. 23 Awaji ìlep enyi me unye otu ewe. Eya orọ, ikayaka ìnin̄ usun̄ ìnyi ebilene. 24 Bọn Nte n̄a, òfo me lek inu chi, irek geelek ene okupbe me mgbọ Awaji ogwenbe ọmọ, ene ya ikup si me irek ya ifo isi, mè ikeke inye melek Awaji. 25 Ire me lek ebi ekabatge olom nu, mè ebi ekadoge nwa nu, Okaan̄-ene ìkanyi emi ikan geege òfo me lek kiban̄. Ire, emi mâtumu ejit n̄a inyi enyi, kubọk ogwu ògbegbe utoon̄-ejit sa me ejit nsan Okaan̄-ene. 26 Me ekiket n̄a, m̀be ke înwọn ibe enyi ekup ubọk enyi ekupbe, mije ikpele ufialek òkukup mgbọ kechi. 27 Ogwu òdo nwa ikayaak ogwu nwa. Ogwu ikadoge nwa, ikaweek idodo nwa. 28 Ire, ire owu odo nwa, owu òkarọ ijo inu geege. Ire gwun̄ enenwaan̄ ibat olom, ìkarọ si ijo inu geege. Ire, ebi ìkaan̄ olom mè ebi ìkaan̄ nwa mêbọkọ owuwa ufialek me linyọn̄ keyi. Eya orọ nkitumu inyi enyi ibe ke mônwọn ibe enyi ekado nwa, mè ekabat olom, inyi ufialek kecha iraka enyi me ibot. 29 Bọn Nte n̄a, ibot ikọ n̄a ìre ke mgbọ eji ekaan̄be migbidim. Eya orọ, bene me mgbọ keyi nyi isi, ebi ìkaan̄ nwa, ekeluk ugwem kubọk ema kpekaan̄ nwa. 30 Ebi ìkifieek ejit, ekup kubọk ema kpefieek ejit. Ebi ìkibele ejit, ekup kubọk ebi kpebele ejit. Ebi ìlelep inu, erọ kubọk inu cha ema elepbe ìkare echi kiban̄. 31 Ebi ìkisa inu linyọn̄ isi ikwaan̄, erọ kubọk ema kpesa otutuuk inu cha igwen inu geege. Mije, linyọn̄ keyi, kubọk eji eriọọn̄be, ìboraraka isan̄a kpai. 32 Ǹkiweek ibe inu geege ikayaka ìsisaak enyi kubọk ge. Ejit ogwu enerieen̄ ikadoge nwa ìkikup me lek inu eyi Okaan̄-ene. Mgbọ geelek, ìkiweek irọrọ inyi Okaan̄-ene ibele ejit. 33 Ire, ejit ogwu òkaan̄ nwa ìkikup me lek inu linyọn̄ keyi, mè inu ọmọ môrọbe inyi ogwu nwa ibele ejit. 34 Mije keya, ulọk kan̄ îbum iba. Ikeya si, ejit ogwu enenwaan̄ ogwu ikakaan̄ge olom, mè ìyaka ire enenwaan̄ ikariọọn̄ge enerieen̄ ìkikup me lek inu eyi Okaan̄-ene. Inu òkup ọmọ me uyọt ìre isasa otutuuk ejit kan̄, mè akpalek kan̄ inyi Okaan̄-ene. Ire, enenwaan̄ òbat olom ìkikeek inu òfolek linyọn̄ keyi, mè inu ọmọ môrọbe inyi nlom kan̄ ibele ejit. 35 Ǹkitumu ikọ chi isasa itap ubọk inyi enyi. Ǹkaweek ikwekwek enyi. Ǹkiweek ibe enyi eluk ugwem me oniin̄ òtatat, mè igbe, mè esa otutuuk ejit kinyi enyi Okaan̄-ene. 36 Ire gwun̄ enerieen̄ itet gwun̄ nsabọn ibaan̄ itele ibodo, mè imun̄ ibe ke ọmọ gwa òkirọ inu ikatatge me lek gwun̄ enenwaan̄ ya, mè ire ke ogwu enenwaan̄ ya îlọk ọmọ igana, ọmọ okekeek ibe ke îgbe ibe ema ebat, gwun̄ enerieen̄ ya ido gwun̄ enenwaan̄ ya, ubọk îweekbe irọrọ. Eya ìkare ijo inu. 37 Ire, ire gwun̄ enerieen̄ ya ikọt itet lek kan̄ ikaan̄, mè itumu ifieek me ejit kan̄ ibe ke ọmọ ìkpodo ogwu nsabọn ibaan̄ ya îtetbe itele, me ikarege etetet ọmọ me unye, gwun̄ enerieen̄ ya îrọ si inu òtatat. 38 Eya orọ, ogwu òdodo gwun̄ nsabọn ibaan̄ îtetbe itele îrọ inwọn. Ire, ogwu ikadoge gwun̄ nsabọn ibaan̄ îtetbe itele orọ inwọn igak. 39 Ogwu enenwaan̄ òbat olom ìkaan̄ ibabia melek ogwu olom otutuuk mgbọ ogwu olom okupbe me ugwem. Ire, ire ogwu olom ikwu, ogwu enenwaan̄ ya îkaan̄ unen isisi ibat ofifi olom. Ire, olom ìbobat ya ikalọlọ irere ogwu òchechieek me lek kè Karais. 40 Ire, me nkeek n̄a, mmun̄ ibe, ire ogwu enenwaan̄ ya ìkayaka ìsi ìbat ofifi olom, ke môbele ejit igak ire ibat ofifi olom. Nchieek ibe ke nkeek n̄a yi ìnan̄a me ubọk Ekwukwu Awaji ogwu òkup emi me emen.
81 Mâtumu ikọ si òfo me lek inorie esabe icho me isi mkpọmfaka. Eji mîriọọn̄ ibe ke eji otutuuk ene mîkaan̄ ifuk-ibot, kubọk enyi ekitumu. Ire, òjelek ifuk-ibot keyi ìkirọrọ mè ene igumu lek. Îre imumechieen̄ okinama ene ibene. 2 Eya orọ, ire ogwu ikeek ibe ke îkaan̄ inu ọmọ oriọọn̄be, ene ya ìkariọọn̄-nu inu ubọk îgbebe ibe iriọọn̄. 3 Ire, ogwu òmumun̄ Awaji me chieen̄ ke Awaji oriọọn̄ kubọk gwun̄ kan̄. 4 Eya orọ, ire me lek ikọ òfolek irerie inorie esabe igwa ngwugwa inyi mkpọmfaka, eji mîriọọn̄ ibe ke ìkakaan̄ inu geege eyi mkpọmfaka orebe me linyọn̄ keyi. Ire, eji mîriọọn̄ si ibe ke ìkakaan̄ ofifi Awaji geege òkukup, ilọ me lek Awaji ge gaalek. 5 Ubọk geelek, owuwa inu ọmọ òwa me inyọn̄ mè ijọn̄ echi ebi ene ekimọnọ kubọk Awaji melek Okaan̄-ene. Me atikọ, owuwa awaji mè owuwa okaan̄-ene òwa si. 6 Ire, me lek kiji, Awaji ge gaalek okup. Ọmọ ore Ute, ogwu òrorom otutuuk inu geelek. Ọmọ si ke ugwem eji ekiluk okup inyi. Okaan̄-ene ge gaalek si okup. Ọmọ ìre Jisọs Karais, ogwu Awaji osabe me lek kan̄ irom otutuuk inu geelek. Sa me lek kan̄ si ke eji ekiluk ugwem. 7 Ire, ìkare otutuuk bọn Nte eriọọn̄ inu yi ikeyi. Usini kiban̄ mîwuuk lek ikiriaak mkpọmfaka iraka lek sabum enigwu ikom igọọk Okaan̄-ene. Mege inire mgbọ keyi, ejit kiban̄ ìkanye. Ema isikitaka anam esabe igwa ngwugwa inyi mkpọmfaka, ema mîra ikikeek ibe ke ìre mkpọmfaka ya okaan̄ anam ya. Eya orọ, ema ekimọnọ ibe ke itataka anam ya môrọ inyi ema ekatana me isi Awaji. 8 Irerie inorie mè ekariege ìkakirọ mè eji enwọn me isi Awaji. Ire eji kperie, eya ìkporọ ibe eji ekana ebi ijo. Ire eji irie, eya ìkporọ ibe eji enwọn egak. 9 Ubọk geelek, ìgbala chieen̄, inyi unen eyi enyi ekaan̄be ikọkọt irie inorie geelek ikakana ukput ìnyi ebi kpekeke inye me emen ichechieek. 10 Mije, ire ogwu ejit ikanyege me lek òjelek inorie òkup ikeya inimun̄ owu ogwu òrọriọọn̄ inu òfolek inorie ya okupbe me emen uwu yọk ikigọọk irie inorie esabe igwa ngwugwa inyi mkpọmfaka, usini mgbọ, eya môrọ inyi ukpook ita ene ya me lek irerie inorie esabe igwa ngwugwa inyi mkpọmfaka si. 11 Sa me ikeya, gwun̄ Nte kwun̄ yi ogwu ikakekege ìnye me ichechieek, ogwu Karais okwube mkpa mije kan̄, môchep mije iriọọn̄-inu kwun̄. 12 Enyi isikirọ ijo inu ikeme bon Nte kinyi me òjelek oniin̄ òkup ikeyi, mè ikirọ inyi ema eje elọ, me mgbọ ejit kiban̄ ikakekege ìnye me emen ichechieek, îre Karais me lek kan̄ ke enyi ekirọ ijo inu ya ikeme. 13 Eya orọ, ire mmun̄ ibe ke inorie nkirie môrọ inyi gwun̄ Nte n̄a irọ ijo inu, mâtele inorie ya, m̀kpayaka irie, inyi nkarọ mè gwun̄ Nte n̄a inan̄a irọn̄.
91 Ìre emi ǹkafat ìkaan̄ lek n̄a? Sa ìre ǹkafat ìre ogwu otuchieen̄ kè Karais? Ìre ǹkafat ìsa chieen̄ ìmun̄ Okaan̄ kiji Jisọs? Sa ìkafat ìre enyi chi ere mfut ubọk ikwaan̄ emi nsibe inyi Okaan̄-ene? 2 Ire emi ǹkarere ogwu otuchieen̄ kè Karais me isi ebi ofifi ife, me lek kinyi, emi ìre ogwu otuchieen̄ kè Karais. Mije, ugwem kinyi, ebi ìchechieek me lek Okaan̄-ene, ore iman̄ oriọọn̄ òkijeen̄ ibe ke emi ìre ogwu otuchieen̄ Okaan̄-ene me atikọ. 3 Îre ikọ keyi ke nkisa ifọọk otu ebi geelek ìkifieek emi ikọ. 4 Ìre ìkafat ìgbe ibe ebi ene ekenyi eji inorie mè inu enwọnwọ mije ikwaan̄ kiji? 5 Ìre keke obokput eji ibe eji ekakaan̄ nwa òchechieek me lek kè Karais ìsa ìkaan̄ me ubọk ìkijijen̄e, kubọk Pita mè ebi otuchieen̄ kechilọ mè ebi ngwan̄ Okaan̄-ene ekirọ? 6 Sa ìre emi mè Banabas gaalek ere ebi ìbekisa ubọk kiji ikikwukwulu isa ikikpọ owot kiji? 7 Ìre ebi akọn̄ ebi owa ekitim akọn̄, mè ikisa ikpoko ubọk kiban̄ ikpọ lek? Ìre ebi owa ekiwop uko, kpekirie inorie ònan̄a me uko kiban̄? Sa ìre ekene okikpukpo erie mbuuk, ìkakinwọ mun̄ ebe ònan̄a me lek erie mbuuk ya? 8 Ìkare ifuk-ibot ebilene ke nkisa ìtumu ikọ yi, mije, Ikan kè Mosis ìkitumu si ikọ yaage. 9 Mije, ege me Ikan kè Mosis ibe, “Katobo otu erie mbuuk ìchit me mgbọ ekisa erie mbuuk ya iwaan̄ akpa isan̄a me lek mgbigbin.” Ìre enyi ekikeek ibe ke Awaji ìkitumu ikọ yi ikpọ me lek erie mbuuk? 10 Iin̄-iin̄, îre eji ke ìkitumu ikọ ya ibak, ìkare erie mbuuk ikike! Îre mije kiji ke ege inu yi. Mije, ebi ikwaan̄ ìkiwop inu me uko mè ebi ìkirọkọ inu me uko ekikpọ chieen̄ ibe ke ema mêgọọk ikaan̄ uche me lek inu ònan̄a me uko ya. 11 Ikeya si, kubọk eji ewopbe mfut eyi òrere ikọ Awaji me etete kinyi, ìre ìkafat ìtat ibe eji egọọk ekaan̄ uche me lek ugbana eyi inu linyọn̄ keyi eyi Awaji onyibe enyi? 12 Ire ebi ofifi ife ikaan̄ unen ikakaan̄ ntap-ubọk me ubọk kinyi isa ikikpọ lek kiban̄, eji mîkaan̄ unen yi igak ebi ofifi ife cha. Ire, eji kpegbini unen kiji yi. Kpan̄asi ikeya, eji ekpọkpọ ikime inu geelek, inyi eji ekakana ukput ìnyi ata etip kè Karais. 13 Ìre enyi kperiọọn̄ ibe ke ebi ìkisi ikwaan̄ me Uwu Mbuban ekirie inorie inan̄a me Uwu Mbuban? Sa ìre enyi kperiọọn̄ ibe ke ebi ìkigwa ngwugwa me inyọn̄ ntook inyi Awaji ekirie inorie ònan̄a me lek inu ebi ene esabe inigwa ngwugwa me inyọn̄ ntook ya. 14 Ikeya si, Okaan̄-ene înyi ida ibe ke ebi ìkilook ata etip mêkikaan̄ inu ema ebesa ikikpọ lek kiban̄ inan̄a me ubọk ebi ìbọbọkọ ata etip ya itap. 15 Ire, emi ǹkasa unen chi Okaan̄-ene onyibe eji ìrọ inu geege. Ìrere ikpa yi nkige ijet enyi, ǹkage ìsa ìweek ibe enyi erọ inu chi enyi emi. Mije, ǹkaweek ibe ene geege inirọ inyi nkayaka ìkaan̄ inu yi nkisa igugo lek. Kpan̄asi ikeya, ire nkwu, înwọn igak! 16 Ire, ilolook ata etip ìkare ikwaan̄ mâkọtbe isa igugo lek. Mije, Awaji ìnyinyi emi ikwaan̄ yi kubọk ikan. Ire nkalook ata etip, môfieek inyi emi enenen! 17 Ire nsa me ejit n̄a gaalek ikilook ata etip, mâkọt ikpọ chieen̄ ibe ke mâbọkọ mkpukpe. Ire, ìkare me ejit n̄a gaalek ke nkisa ilook, îre ikwaan̄ Awaji otapbe emi me ubọk gaalek ke nkirọ. 18 Ire ikeya, ìre keke ore mkpukpe n̄a? Mkpukpe n̄a ìre ilolook ebi ene ata etip yi me ikike, me nkagbinige unen eyi makaan̄be inan̄a me lek ikwaan̄ ilolook ata etip. 19 Me atikọ, nkaan̄ lek n̄a, ǹkare usun̄ ìnyi ene geege. Ire, emi ǹsasa lek n̄a irọ usun̄ inyi otutuuk ene, inyi ǹkọt ǹkaan̄ owuwa ene ǹsa ǹnyi Okaan̄-ene. 20 Me etete ebi Ju, ǹkirọ inu kubọk ebi Ju, inyi ǹkọt ǹkaan̄ ebi Ju ǹnyi Okaan̄-ene. Ubọk geelek nkakupge me irak Ikan kè Mosis, ire, me etete ebi ìkisun̄ Ikan kè Mosis, ǹkirọ inu kubọk ebi ìkisun̄ Ikan kè Mosis, inyi ǹkọt ǹkaan̄ ebi ìkisun̄ Ikan kè Mosis ǹnyi Okaan̄-ene. 21 Me etete ebi kpere ebi Ju, òrere ebi kpekisun̄ Ikan kè Mosis, emi ǹkirọ inu kubọk ebi kpere ebi Ju, inyi ǹkọt ǹkaan̄ ebi kpere ebi Ju ǹnyi Okaan̄-ene. Eyi ìkasibi ibe ke emi ǹkakisun̄ ikan Awaji, mije, ǹkisusun̄ ikan eyi Karais mgbọ geelek. 22 Me etete ebi kpekeke inye me ichechieek, ǹkirọ inu kubọk ebi kpekeke inye me ichechieek, inyi ǹkọt ǹkaan̄ ebi kpekeke inye me ichechieek ǹnyi Okaan̄-ene. Irek geelek ene geelek okupbe, nchieek ikukup kubọk ene ya okupbe, inyi ǹkọt ǹsa me oniin̄ geelek nriọọn̄be ǹrọ mè Awaji inyan̄a usini me lek kiban̄. 23 Ǹkirọ otutuuk inu chi mije ata etip ya, inyi emi si ǹgọọk ǹkaan̄ uche me lek ugbana ebi ene ekikaan̄ inan̄a me lek ata etip ya. 24 Enyi mîriọọn̄ ibe, me ere ekiwut ifan̄a ekot, ke ìre owuwa ene ekilibi, ire, ke ene ge gaalek okilibi igak otutuuk ene, mè iben mkpukpe. Eya orọ, ìlibi ekot ìjaan̄, inyi enyi eben mkpukpe. 25 Ene geelek òbogọọk iwut ifan̄a ekot ìkisasa ata mgbọ ikikween̄ ekot, mè ikitọ lek kan̄ ikpọ me oniin̄ òkup uyọt uyọt, sabum usen ekot ya. Ema ekibọkọ otutuuk ufialek cha inyi ema eben mkpukpe eyi òrere inwan̄ ikike eyi kpofukbe, eyi ekisa ikwuun̄ ene me ibot kubọk okpibot ubọọn̄. Ire, eji ekibọkọ ufialek eyi kiji, inyi eji ebọkọ atata okpibot ubọọn̄ eyi òbofufuk ire mgbọ ikakaan̄ge itata. 26 Eya orọ, emi ǹkakpọkpọ ìkilibi ekọt ubọk geelek, kubọk ogwu welewele. Ǹkilibi igọọk me ikan ekot, mè iben chieen̄ n̄a igwuun̄ me ere ekot ya obota. Ikeya si, ǹkakpọkpọ ìkisulu akpọ welewelewele kubọk ogwu òkiwum akpọ me lek efet ichep ikike, ìkakisulu ìtat. 27 Ǹkibọbọkọ otutuuk ufialek geelek isa isulu akpalek n̄a itap me irek, inyi ikirọ inu geelek ntọbe inyi, kubọk ogwu usun̄ okirọ. Ǹkirọ ikeyi, inyi, nsilook ebi ofifi ife ata etip, mè ema isibọkọ itap, mè ikaan̄ unyan̄a, mè emi nkayaka ìnikana ogwu ebejijit ibe ikabọkọ mkpukpe.
101 Bọn Nte n̄a, ìkeek inu ebi nte nte kiji ejebe itibi mgbọ Mosis okisa ema ije me emen èwê isibi me Ijipiti. Îre oduku inyọn̄ osa otutuuk kiban̄ ijeen̄ oniin̄. Ema otutuuk ejeje ukot ukot isaba okwaan̄ ekigwen Okwaan̄ Irio. 2 Ìkup kubọk esasa oduku inyọn̄ ya mè okwaan̄ ya igwook otutuuk kiban̄ mun̄, inyi ema ekana ebi udun̄ kè Mosis. 3 Ema otutuuk ene mîgbaan̄ irie inorie ònan̄a me ubọk Awaji, 4 mè igbaan̄ inwọ mudim ònan̄a me ubọk Awaji. Mudim ya ìnan̄a me lek ewuuk Awaji onyibe ema, eyi òkukup melek kiban̄ otutuuk mgbọ ema ekije me oniin̄ ije kiban̄. Ewuuk ya ìre Karais me lek kan̄. 5 Ire, ubọk geelek Awaji orọbe otutuuk inu chi inyi ema, owuwa kiban̄ mîrọ inu ònanaan̄ Awaji me ejit, mè ikwaan̄ irurọn̄ọ me emen èwê. 6 Inu chi ìre inu ikween̄-inu eyi òkitaba eji ubọk me utọn̄, inyi eji ekakaan̄ ulọk irọrọ ijo inu kubọk ebi nte nte kiji cha erọbe. 7 Enyi si, ikatọbọ ebum ìnyi mkpọmfaka, kubọk ema erọbe. Inu òfolek kiban̄ ke ege me Ikpa Mbuban ibe, “Ebi ife cha esisiki ikweek ikirie, mè ikinwọ, mè inan̄a ikeke ikijop okwa mfaka ebi yọk.” 8 Ofifi si, eji ekaluk ugwem barabat kubọk usini ebi nte nte kiji cha erọbe, eyi akọp obop ene iba mè obop ita egbaan̄be ikwaan̄ me usen ge gaalek. 9 Eji ekatọ Okaan̄-ene ìkpọ kubọk usini kiban̄ erọbe, eyi ulu otọkbe ema ikpan̄ isan̄a. 10 Eji ekakinunuun̄ kubọk usini kiban̄ enunuun̄be, eyi ogwu osat òkikpan̄ ene okpan̄be ema isan̄a. 11 Otutuuk inu cha òrọrọ ema ìre inu ebi ene ebesa ikween̄ inu inyi lek kiban̄. Ege inu cha me Ikpa Mbuban kubọk inu isasa itaba eji ubọk me utọn̄, mije eji ekupbe me ugwem me mgbọ keyi, mgbọ òta mgbọ orebe isan̄a. 12 Eya orọ, ogwu òkikeek ibe ke ọmọ îkeke inye, ene ya igbala chieen̄, inyi ọmọ ikanan̄a ìrọn̄ mgbọ ntọ-mkpọ isinu. 13 Kpunu ntọ-mkpọ geege òkinu inyi enyi, eyi ikarege eyi òkinu ìnyi otutuuk ene. Ire, Awaji ìkakitele irọrọ otu ikọ kan̄ iso. Ìkpotele ibe enyi erọn̄ enin̄ emen ntọ-mkpọ eyi òbololobo igak enyi ibebeme. Ire, mgbọ ntọ-mkpọ ya isinu, Awaji mônyi enyi unye isasa ikeke inye, mè isan̄a oniin̄ isibi mgbọ enyi mêkupbe me emen ntọ-mkpọ ya, inyi enyi etim ekpan̄. 14 Eya orọ, atata bọn Nte n̄a, ìsan̄a lek kinyi me itọtọbọ ebum inyi mkpọmfaka. 15 Ǹkitumu ikọ inyi enyi kubọk ebi ìriọọn̄ lek. Eya orọ, ìkpọ me lek kinyi, mè ìre ikọ nkitumu ìre atikọ, mè ìre ìkare. 16 Mgbọ eji ekigbaan̄ irie inorie mbuban, eji ekinyinyi Awaji itọn̄ me lek ekpen̄ miin̄ ugbana ya eji ekinwọ. Eji isikinwọ miin̄ ya, eji ekigọọk Karais igbaan̄ ire ge sa me lek eje kan̄. Eji isikikpọkọ fituru ya itaka, eji ekigọọk Karais igbaan̄ ire ge me akpalek kan̄. 17 Mije fituru ya orebe owut ge gaalek, ìsibi ibe ke eji owuwa ene ebi ìkitaka fituru ya mîgbaan̄ ire akpalek ge gaalek. Mije, eji otutuuk ene ekigbaan̄ itaka owut fituru ge gaalek. 18 Ìkeek-nu inu òfolek ọrọmijọn̄ ebi Ju. Ebi geelek ìtataka anam ònan̄a me inyọn̄ ntook ngwugwa, mîgọọk Awaji, ogwu egwabe ngwugwa ya inyi, igbaan̄ ire ge. 19 Ìre keke ore ibot ikọ nkitumu? Ìre ìsibi ibe ke îkaan̄ inu ngwugwa egwabe inyi mkpọmfaka okupbe me lek? Sa ìre ìsibi ibe ke îkaan̄ inu mkpọmfaka cha okupbe me lek? 20 Iin̄-iin̄, ìkare ikeya! Ibot ikọ n̄a ìre ke ngwugwa geelek ebi ekariọọn̄ge Awaji ekigwa, ekigwa inyi ijo erumun̄. Ìkare Awaji ke ekigwa inyi. Emi ǹkaweek ibe enyi egọọk ijo erumun̄ egbaan̄ ere ge. 21 Enyi kpebekọt inwọ miin̄ inan̄a me ekpen̄ Okaan̄-ene, mè iyaka isi inwọ si miin̄ inan̄a me ekpen̄ ijo erumun̄. Enyi kpebekọt irie inorie me inyọn̄ ikasi Okaan̄-ene, mè iyaka isi irie si me inyọn̄ ikasi ijo erumun̄. 22 Ìre eji ekiweek irọrọ mè Okaan̄-ene inaan̄ ejit ikeme eji? Sa ìre eji mînye lek igak Okaan̄-ene ni? 23 Usini kinyi ekitumu ibe, “Emi mâkọt irọ inu geelek, ikan geege ìkatet emi.” Ikeya ke ire! Ire, ìkare inu geelek eji ekirọ okikaan̄ oruru. Iin̄, enyi ekitumu ibe, “Emi mâkọt irọ inu geelek, ikan ìkatet emi.” Ire, ìkare inu geelek okinama ene ibene me inu eyi Okaan̄-ene. 24 Ene geege ikakirọ inu òbotap ubọk inyi lek kan̄ gaalek. Ire, ene geelek ikirọ inu òbokitap ubọk inyi ebi ofifi ife si. 25 Ìkpọkpọ ìtaka anam geelek ekinyam me ewe. Ikado ikọ geege òfolek anam ya eyi môsisaakbe enyi me ejit. 26 Mije, ege me Ikpa Mbuban ibe, “Linyọn̄ keyi mè otutuuk inu geelek òkup me emen kan̄, îre Okumugwem okaan̄.” 27 Ire ogwu ikachieekge me lek kè Jisọs Karais igwen enyi ibe enyi enegọọk ọmọ erie inorie, ìkpọkpọ ìrie inorie geelek eyikbe inyi enyi. Ikado ikọ geege òfolek inorie ya eyi môsisaakbe enyi me ejit. 28 Ire, ire ene ge initumu inyi enyi ibe ke inorie ya ìre inorie esabe igwa ngwugwa inyi mkpọmfaka, ìtele inorie ya. Mije ene ya ogwu òkpakpa inu ya ijeen̄ enyi, ikarie inorie ya, inyi ogwu ejit ikanyege ikanan̄a ìrọn̄. 29 Îre ejit ogwu òkpakpa inu ya inyi enyi ke nkitumu, mije, ene ya îmọnọ ibe ke îlọ irerie òjelek inorie òkup ikeya. Ìkare ejit kinyi ke nkitumu, mije, ejit kinyi înye ibe ke enyi mêkọt irie inorie geelek. Usini ebi ene mêkọt ido ibe, “Ìre îtat ibe emi nkarie inu òneme emi irerie mije inu ofifi ene okikeek? 30 Ire nnyi Awaji itọn̄ isan̄a me lek inorie, mè irie inorie ya, ebejeje ifieek emi ikọ mije inorie nnyibe Awaji itọn̄ me lek?” 31 Eya orọ, me inu geelek enyi ekirọ, mè ìre inorie ke enyi ekirie, mè ìre miin̄ ke enyi ekinwọ, ìkirọ me oniin̄ òbosa itọn̄ inyi Awaji. 32 Ìgbala chieen̄! Ikarọ inu òborọ mè ene geege ije ilọ oniin̄, mè ìre ebi Ju, mè ìre ebi ekarege ebi Ju, mè ìyaka irere ebi ntitiin̄ Awaji. 33 Ikeya si ke emi nkisa iweek irọrọ. Ǹkiweek irọrọ inyi ejit ibele otutuuk ene me inu geelek nkirọ. Ǹkakikeek inu òbokaan̄ oruru inyi emi gaalek. Ǹkikeek inu òbokaan̄ oruru inyi owuwa ebi ofifi ife, inyi Awaji isa me ikeya inyan̄a ema isibi.
111 Ìkigọọk akpat ukot n̄a, kubọk emi si nkigọọk akpat ukot kè Karais. 2 Ntọn̄ enyi, mije enyi ekikeek otutuuk inu geelek njeen̄be enyi, mè ikirọ si igọọk me ubọk njeen̄be enyi. 3 Ire, ǹkiweek ibe enyi eriọọn̄ ibe ke Karais ore ogwu ibot inyi ogwu enerieen̄ geelek. Olom ore ogwu ibot inyi ogwu nwa. Awaji onenire ogwu ibot inyi Karais. 4 Eya orọ, ogwu enerieen̄ geelek òchichit ibot me mgbọ ìkiriaak uriaak, mè ìre mgbọ ìkitumu ikọ Awaji, ìsibi ibe ke ìkanyi Karais, ogwu òrere ogwu ibot kan̄, umin. 5 Ogwu enenwaan̄ geelek ikachitge ibot kan̄ mgbọ ìkiriaak uriaak, mè ìre mgbọ ìkitumu ikọ Awaji, ìsibi ibe ke ìkanyi ogwu olom, ogwu òrere ogwu ibot kan̄, umin. Eyi ogwu enenwaan̄ ya ikachitge ibot, ìkup kubọk ekwọkwọkọ otutuuk ijeek òkup me ibot kan̄ isan̄a. 6 Ire ogwu enenwaan̄ ibe ke ọmọ ìkpochit ibot, ikwọkọ ijeek isan̄a me ibot kan̄ ma! Isọsọp ijeek, mè ikwọkwọkọ ijeek isan̄a me ibot ìre inu esip me lek ebibaan̄. Eya orọ, îgbe ibe ogwu enenwaan̄ ikichit ibot. 7 Ìkagbe ibe enerieen̄ ikichit ibot mgbọ ìkiriaak uriaak. Mije, Awaji ìrom enerieen̄ me mbet kan̄, ọmọ si okijeen̄ umin mè uja eyi Awaji. Ire, ogwu enenwaan̄ ìkijeen̄ umin mè uja eyi ogwu olom. 8 Mije, Awaji ìkarom enerieen̄ inan̄a me lek enenwaan̄, ìrom enenwaan̄ inan̄a me lek enerieen̄. 9 Ikeya si, Awaji ìkarom enerieen̄ ìnyi enenwaan̄, ìrom enenwaan̄ inyi enerieen̄. 10 Eya orọ, îgbe ibe enenwaan̄ geelek ikichit ibot, isasa ijeen̄ ibe ke ọmọ ìkup me irak enerieen̄, inyi ebi osat Awaji ekanaan̄ ejit. 11 Me lek kiji ebi ìchechieek me lek Okaan̄-ene, eji mîriọọn̄ ibe, ire enerieen̄ ìkakup, enenwaan̄ ìkpokup. Ikeya si, ire enenwaan̄ ìkakup, enerieen̄ ìkpokup. 12 Mije, ike erombe enenwaan̄ inan̄a me lek enerieen̄, ikeya si ke enenwaan̄ okiman enerieen̄. Ire, otutuuk inu chi geelek ìnan̄a me ubọk Awaji. 13 Enyi gaalek ìfieek-nu oyerebet keyi! Ìre îgbe ibe ogwu enenwaan̄ ikachit ibot me mgbọ ìkiriaak Awaji? 14 Ubọk Awaji osun̄be, ire ijeek itibi ijọn̄ọ me ibot enerieen̄, îre inu esip. 15 Ire, ujọn̄ọ ijeek ìre inu uja mè umin inyi enenwaan̄. Mije, Awaji ìnyi enenwaan̄ ujọn̄ọ ijeek, inyi ikisa ichit ibot. 16 Ire ikaan̄ ogwu iwut ifan̄a me lek ikọ yi, ene ya iriọọn̄ ibe ke îre ikeyi ke eji otutuuk, mè otutuuk ntitiin̄ Awaji geelek ekirọ. Eji kpeyaka ikaan̄ ofifi ọrọmijọn̄ òfolek ikọ keyi igak ikeya. 17 Me ofifi ibot ikọ mbanyi enyi nteme òfolek, m̀kpakọt itọn̄ enyi. Mije, mgbọ enyi ekigbaan̄ ititiin̄ ikitọbọ ebum inyi Awaji, ugwem enyi ekikaan̄ me ere ya ìkisa ijo inu inu, ìkakisa ata inu ìnu. 18 Me adasi irek, nnọ ibe ke enyi isikigbaan̄ ititiin̄ kubọk ntitiin̄ Awaji, ke icheche lek îkikup me etete kinyi. Mâkọt ichieek ibe ke ikọ ya ìre atikọ. 19 Me atikọ, icheche lek môkup me etete kinyi, inyi ebi ene esa me ikeya eriọọn̄ ebi ìkirọ inu òkibele Awaji ejit me etete kinyi. 20 Mgbọ geelek enyi ekigbaan̄ ititiin̄ iberie inorie Okaan̄-ene, ìkare inorie Okaan̄-ene ke enyi ekirie. 21 Ǹkitumu ikọ yi mije, me mgbọ enyi isiberie inorie ya, ìkire ogwu ikup òkwuun̄ isi òrie inorie kan̄. Kpunu ogwu òyaka ikiraan̄ chieen̄ ikpọ mè ìre ogwu melek kan̄ okirie, mè ìkarie. Îre eya orọ usini ene ekiran̄ ọfiọọn̄ ikwu, me ere ebi ofifi ife ekirie inorie, mè ikinwọ miin̄ igak lek. 22 Îyak! Ìre enyi kpekaan̄ uwu, ere enyi mekọtbe ikikup irie inorie, mè inwọ miin̄ kinyi ubọk òneme enyi? Ìre keke orọ enyi ekikpọ ebi ntitiin̄ Awaji chieen̄ isiki, mè ikirọ ebi ìkup me una inu esip? Ìre enyi ekikeek ibe ke m̀batumu keke inyi enyi? Ìre enyi ekiweek ibe emi ǹtọn̄ enyi mije ijo irọrọ òkup ikeya ni? Iin̄-iin̄, m̀kpatọn̄ enyi kubọk ge! 23 Mije, ijejeen̄ echi Okaan̄-ene ochilibe ijeen̄ emi ke nsa iyaka ijeen̄ enyi. Me eririeen̄ yaage elekebe Okaan̄-ene Jisọs Karais inyi ibe ekpan̄, Okaan̄-ene ìmọmọnọ fituru, 24 mè inyi Awaji itọn̄ me lek, mè ikpọkọ, mè itumu ibe, “Eyi ìre akpalek n̄a eyi esabe inyi mije kinyi. Ìkirọ ikeyi ìfo isi ìsa ìkikeek emi.” 25 Ubọk yaage si, mgbọ ema eriebe inorie ikakwun̄ ya isan̄a, ibeben miin̄ me emen ekpen̄, mè itumu ibe, “Ekpen̄ miin̄ keyi ìre aya inyan̄a-ibot eyi Awaji osabe eje n̄a inyan̄a melek ebilene. Mgbọ geelek enyi mênwọbe miin̄ yi, ìkirọ ikeyi, inyi enyi esa ekekeek emi.” 26 Mije, mege ire mgbọ Okaan̄-ene môkpọkbe inu, enyi isikitaka fituru yi, mè ikinwọ miin̄ ònan̄a me emen ekpen̄ yi, enyi ekilook ebi ene ibe ke Okaan̄-ene îkwu mkpa mije kiji. 27 Eya orọ, ene geelek òtataka fituru yi, mè inwọ miin̄ ònan̄a me emen ekpen̄ yi me oniin̄ ikagbege, ene ya îrọn̄ ikan ikeme akpalek Okaan̄-ene mè eje Okaan̄-ene. 28 Mije keyi, îgbe ibe ogwu geelek òbotaka fituru ya, mè inwọ miin̄ ònan̄a me emen ekpen̄ ya, ene ya idasi itaak chieen̄ ikpọ emen ugwem kan̄, mè ọmọ îgbe, mè ọmọ ìkagbe, sabum ònorie, mè ònwọ. 29 Mije, ene geelek òtataka fituru ya, mè inwọ miin̄ ònan̄a me emen ekpen̄ ya, me ikariọọn̄ge inu akpalek Okaan̄-ene mè eje Okaan̄-ene osibibe, îre itip-oyerebet Awaji ke ene ya otaka, mè inwọ itoon̄ me ibot kan̄. 30 Îre eya orọ owuwa ene me etete kinyi ekiwọ idek, mè ikifiak orukan̄. Mije inu yi si, usini kinyi mîkwaan̄. 31 Ire, ire eji idasi itaak chieen̄ ikpọ emen ugwem kiji sabum ènerie inorie Okaan̄-ene, Awaji ìkpotip eji oyerebet. 32 Okaan̄-ene isikisulu eji osusut, ìkisasa ijeen̄ eji ibe ke eji mîje ilọ, inyi ọmọ ikagbaan̄ eji melek ebi linyọn̄ ìtip oyerebet me mgburudun̄ usen. 33 Eya orọ, bọn Nte n̄a, mgbọ geelek enyi ekigbaan̄ ititiin̄ iberie inorie Okaan̄-ene, ikakirie kubọk ekifufum, ìkikup ìban ebi melek kinyi. 34 Ire ikaan̄ ogwu uraafiọọn̄ okitaka, ene ya idasi irie inorie me uwu kan̄ sabum, inyi enyi ekasa itip-oyerebet ìnyi lek kinyi me mgbọ enyi isigbaan̄ ititiin̄ ikirie inorie Okaan̄-ene. Nsinu, mâteme enyi nteme òfolek inu kechilọ geelek òsisik.
121 Bọn Nte n̄a, mgbọ keyi, ǹkiweek ibe enyi eriọọn̄ ubọk eriọọn̄ inu òfolek uche echi Ekwukwu Mbuban okinyi ene. 2 Ìkeek ibe, sabum enyi enichieek me lek kè Karais, ke ebi ene mîsa enyi ije ilọ oniin̄, enyi ekekitọbọ ebum inyi mkpọmfaka, echi kpunube ugwem geege me emen. 3 Eya orọ, ǹkitumu inyi enyi ibe ke ene geelek òkitumu ikọ sa me unye eyi Ekwukwu Awaji ìkpokọt itumu ibe, “Ifieek inyi Jisọs!” Kpunu si ene geege òbokọt itumu ibe “Jisọs ìre Okaan̄-ene,” îtata mè ìre Ekwukwu Mbuban onyi unye ibe itumu. 4 Uche echi Ekwukwu Mbuban okinyi ene ìkup esese esese, ire, îre Ekwukwu Mbuban yaage gaalek okinyi ema otutuuk. 5 Ikwaan̄ ebi ene ekisi inyi Okaan̄-ene ìkup esese esese, ire, îre Okaan̄-ene yaage gaalek ke ekisi otutuuk ikwaan̄ cha inyi. 6 Owuwa oniin̄ ọmọ òwa eyi Awaji okisi ikwaan̄ me emen ebi ene, inyi ekekọt erọ owuwa ikwaan̄ òkup esese esese enyi Awaji. Ire, Awaji yaage gaalek okirọ otutuuk ikwaan̄ chi geelek me emen otutuuk ene. 7 Inu geelek Ekwukwu Mbuban ochilibe inyi ene geelek, ìchili inu ya inyi ene ya inyi otutuuk ebi eyi Awaji ekaan̄ oruru me lek. 8 Ekwukwu Mbuban înyi usini ene unye isasa itumu ikọ òkijeen̄ iriọọn̄-inu eyi Awaji, mè inyi si ebi ofifi ife ifuk-ibot isasa ikpọk mbum nlelet inu eyi Awaji ijeen̄ ebi ene. Îre Ekwukwu Mbuban yaage gaalek okinyi ema otutuuk unye isasa irọ inu chi geelek. 9 Ekwukwu Mbuban yaage okinyi usini ene ikpele ichechieek isasa ikọt itoon̄ ejit ibe ke Okaan̄-ene ìkpolọlọ irọrọ inu òkup me uyọt me mgbọ inu oyọtbe. Ekwukwu Mbuban yaage si okinyi usini ene unye isasa igwa ebi orukan̄, 10 mè inyi usini ene unye isasa irọ inu ukechieen̄, mè inyi usini ene unye isasa iben nriran, mè inyi usini ene unye isasa ikọt iriọọn̄ inu echi ònan̄a me ubọk Ekwukwu Mbuban, mè echi ikanan̄age me ubọk Ekwukwu Mbuban. Ekwukwu Mbuban yaage si okinyi usini ene unye isasa itumu ikọ me nke nke usem, mè inyi si usini ene unye isasa ikana nke nke usem cha, inyi ebi ene eriọọn̄ inu îsibibe. 11 Îre Ekwukwu Mbuban yaage gaalek okinyi ebi ene otutuuk uche chi. Ìkinyi ene geelek esese uche igọọk me ubọk înemebe ọmọ. 12 Karais ìkup kubọk akpalek ene, eyi òrere ge gaalek, mè ikaan̄ owuwa nriro. Ubọk geelek nriro cha owabe, ema otutuuk egbaan̄ ire akpalek ge gaalek. 13 Ikeya si, me mgbọ egwookbe eji mun̄, eji otutuuk ene, ebi Ju mè ebi kpere ebi Ju, ebi usun̄ mè ebi kpere usun̄, Ekwukwu Mbuban îrọ inyi eji otutuuk ene ekana akpalek ge gaalek. Ekwukwu Mbuban yaage gaalek si ke Awaji otap eji otutuuk me emen ejit, me ene me ene. 14 Nriro òkup me akpalek ene îwa, ìkare nriro ge gaalek. 15 Ire ukot inibe, “Mije nkarege ubọk, ǹkakup me akpalek,” eya ìkasibi ibe ke ukot ìkayaka ìre ge me lek nriro òkup me akpalek ene. 16 Ikeya si, ire utọn̄ initumu ibe, “Mije nkarege chieen̄, ǹkakup me akpalek,” eya ìkasibi ibe ke utọn̄ ìkayaka ìre ge me lek nriro òkup me akpalek ene. 17 Ìkpọ-nu, ire otutuuk akpalek ene ire chieen̄ gaalek, ìre ene ìbojeje ikinọ ikọ? Ire otutuuk akpalek ene ire utọn̄ gaalek, ìre ene ìbojeje ikinọ olu inu? 18 Ire, me atikọ, Awaji ìnenen̄e otutuuk nriro òkup me akpalek ene isun̄ me irek me irek, mè isun̄ ema otutuuk me irek kiban̄ ubọk înemebe ọmọ. 19 Mebe ke ìre nriro ge gaalek okup, akpalek kpomokup! 20 Me atikọ, nriro òkup me akpalek ene îwa, ire, ema otutuuk egbaan̄ ire akpalek ge gaalek. 21 Eya orọ, chieen̄ ìkpokọt itumu inyi ubọk ibe, “Ǹkaweek owu!” Ibot si ìkpokọt itumu inyi ukot ibe, “Ǹkaweek enyi.” 22 Kpan̄asi ikeya, nriro lek ene echi ekimọnọ ibe ke ìre ema ewọ ichit, ema ere echi òkukup me uyọt ichit. 23 Ikeya si, nriro echi eji ekimọnọ ibe ke kpekup me lek inu geege, ema ke ekinyi umin ichit. Nriro echi ikagbege ibe chieen̄ imun̄, ema ke eji ekikpọ chieen̄ me lek ijaan̄ ichit. 24 Nriro echi òjajaan̄ mè igbe ibe chieen̄ ene imun̄, echicha ìkado òjelek ata ubọk ikpọkpọ keya. Ire, Awaji ìsun̄ nriro lek ene ikeya, inyi eji ekesa ikpele umin enyi nriro echi ikakaan̄ge umin geege. 25 Awaji ìkaweek ibe icheche lek ikup me etete nriro cha. Ìkiweek ibe ema otutuuk ekekpọ chieen̄ me lek kiban̄ ìkike. Ge ikakpọ chieen̄ me lek ge ìgak ofifi. 26 Ire nriro ge ikup me ufialek, otutuuk nriro kechilọ ekup si me ufialek melek kan̄. Ire ebi ene itọn̄ nriro ge, otutuuk nriro kechilọ mêgọọk nriro keya inwọọn̄ unwọọn̄ si. 27 Mgbọ keyi, enyi otutuuk ene ìre akpalek kè Karais. Ene geelek me etete kinyi ìre nriro ge me akpalek kè Karais ya. 28 Me emen ntitiin̄ Awaji, Awaji îgobo ebi ene ito ibe ekerọ ikwaan̄ òkup esese esese. Eyi adasi ìre ebi otuchieen̄, òso iba ìre ebi nriran, òso ita ìre ebi ijejeen̄. Îgobo si ebi ene ito ibe ekerọ inu ukechieen̄, mè igobo si ebi ìbekigwa ebi orukan̄, mè ebi ìbekitap ubọk inyi ebi ene, mè ebi mkpulu, mè igobo si ebi ìbekitumu ikọ me nke nke usem. 29 Ìkare otutuuk ene ere ebi otuchieen̄! Ìkare otutuuk ene ere ebi nriran! Ìkare otutuuk ene ere ebi ijejeen̄! Ìkare si otutuuk ene ekaan̄ unye isasa ikirọ inu ukechieen̄. 30 Ìkare otutuuk ene ekigwa ebi orukan̄! Ìkare si otutuuk ene ekitumu ikọ me nke nke usem! Ìkare otutuuk ene ke enyi unye isasa ikọt ikikana nke nke usem cha, inyi ebi ene ekeriọọn̄ inu îsibibe. 31 Ire, ìsa otutuuk ejit kinyi ìweek uche cha echi òkukup me uyọt ichit. Mgbọ keyi, mânijeen̄ enyi inu ònwọnwọn ichit.
131 Ìrere ǹkọkọt ikitumu ikọ me otutuuk usem ebilene mè usem ebi osat Awaji, mè ire ǹkakaan̄ imumechieen̄ me lek ene, emi ìre nkom ikike mè enwirinwan òkitaan̄ ida ichit ene utọn̄. 2 Ìrere ǹkakaan̄ uche eyi ibeben nriran, mè ikaan̄ unye isasa iriọọn̄ otutuuk udọk udọk nlelet inu eyi Awaji, mè ikaan̄ otutuuk ifuk-ibot geelek, ìkerere ǹkakaan̄ òjelek ichechieek eyi mâsabe ikọt ijibi ogoon̄ isan̄a me akpat isi iyik me ofifi ere, mè ire ǹkakaan̄ imumechieen̄ me lek ene, emi ìre inu ikike. 3 Ìrere mkpukpulu otutuuk inu nkaan̄be iche inyi ebi ugbọọn̄, mè isa lek n̄a inyi ibe esa ukan̄ ewọp emi ekpan̄, mè ire ǹkakaan̄ imumechieen̄ me lek ebi ene, kpunu oruru geege mbakaan̄. 4 Ogwu òmun̄ ene me chieen̄ îkime inu ijọn̄ọ mgbọ, mè ikikaan̄ ata ejit me lek ene. Ìkakikaan̄ chieen̄ ile, ìkakitumu otu ile, ìkakigumu si lek. 5 Ogwu òmun̄ ene me chieen̄ ìkakinye chieen̄ ìnyi ene, ìkakiweek nnwọn eyi lek kan̄ gaalek, ìkakigwat lek ìnaan̄ ejit, ìkakifuk ijo inu ene orọbe ọmọ ìtet ìkaan̄. 6 Ogwu òmun̄ ene me chieen̄ ìkakinwọọn̄ unwọọn̄ mije ijo inu ene orọbe. Kpan̄asi ikeya, ìkinwọọn̄ unwọọn̄ me mgbọ ene orọbe inu òtatat. 7 Ogwu òmun̄ ene me chieen̄ ìkakitumu ijo inu ene orọbe ìsibi, kpan̄asi ikeya, ìkichichit. Ìkitotoon̄ ene ejit me lek mgbọ geelek, mè ikikaan̄ ikpọchieen̄ mgbọ geelek me irek geelek ibe ke inu mônwọn, mè ikikaan̄ si ukarajit mgbọ geelek. 8 Imumun̄ ene me chieen̄ ìkakaan̄ okputut. Uche eyi ibeben nriran ọmọ òwa, ire, mgbọ òkinu eyi ibeben nriran ìkpoyaka ikup. Uche eyi itutumu ikọ me nke nke usem ọmọ òwa, ire, mgbọ òkinu mgbọ ìkpoyaka ikup. Uche eyi ifuk-ibot ọmọ òwa, ire, uche keyi si môraka. 9 Mije, me mgbọ keyi, eji kperiọọn̄ otutuuk inu isan̄a, Awaji ìkachili si otutuuk inu ìjeen̄ eji, inyi eji etumu esibi. 10 Ire, mgbọ Awaji isirọ inyi otutuuk inu geelek iso ifuk, inu geelek ikasoge ifuk ìkpoyaka ikup. 11 Mgbọ emi nrebe sọntiik gwun̄, ǹkitumu ikọ kubọk sọntiik gwun̄, ǹkikeek ekiket kubọk sọntiik gwun̄, ǹkifuk ifuk-ibot si kubọk sọntiik gwun̄. Ire, mgbọ mminbe inin̄ ene, ǹkayaka ìrọ inu kubọk sọntiik gwun̄. 12 Mgbọ keyi, eji ekimọọn̄ inu ogugo ogugo, kubọk inu ekimọọn̄ me isi umọọn̄ òfafiat. Ire, me mgbọ ya, eji mêmọọn̄ otutuuk inu geelek isi mè isi. Mgbọ keyi, ǹkariọọn̄ otutuuk inu ìsan̄a. Ire, me mgbọ ya, mâriọọn̄ inu geelek ojot ojot kubọk Awaji oriọọn̄be emi ojot ojot. 13 Inu ita okup, echi òkikup ire mgbọ geelek. Ema ìre ichechieek, mè ikpọchieen̄, mè imumechieen̄. Eyi òmimin ichit me etete inu ita chi ìre imumechieen̄.
141 Ìsa otutuuk efuuk kinyi ìweek ikekimun̄ ene me chieen̄. Ìsa si ejit ge ìweek uche echi Ekwukwu Mbuban okinyi ene, ògak ge, uche eyi ibeben nriran. 2 Ene geelek òkitumu ikọ me nke nke usem ìkitumu ikọ melek Awaji, ìkare melek ebilene. Mije kpunu ogwu òbokọt igobo ikọ kan̄ itet. Ìkitumu udọk udọk inu eyi Awaji sa me unye eyi Ekwukwu Mbuban. 3 Ire, ogwu òkiben nriran ìkitumu ikọ inyi ebilene ogbo kan̄, isasa irọ ema inye, mè itap ema efuuk me emen, mè ikat ema ejit. 4 Ogwu òkitumu ikọ me nke nke usem ìkinama ichechieek kan̄ inye. Ire, ogwu òkiben nriran ìkinama ebi ntitiin̄ Awaji inye me ichechieek. 5 Môneme emi ibe ene geelek me etete kinyi ikitumu ikọ me nke nke usem. Ire, môneme emi igak ikeya ire ene geelek ikiben nriran. Ogwu òkiben nriran îmin igak ogwu òkitumu ikọ me nke nke usem, îtata mè îkaan̄ ofifi ene ogwu òbokọt ikana etip ya itap me usem ebi ene ekinọ, inyi inama ichechieek otutuuk ebi ntitiin̄ Awaji inye. 6 Bọn Nte n̄a, ire nnu me etete kinyi, mè ibene ikitumu ikọ me usem eyi enyi ekariọọn̄ge, ìre kpasi oruru ke ìbonin̄ inyi enyi? Ìkponin̄ oruru geege. Kpan̄asi ikeya, ire ntumu nlelet inu ge eyi Awaji ochilibe ijeen̄ emi inyi enyi, mè ìre ifuk-ibot ònan̄a me ubọk Awaji ke nchili ijeen̄ enyi, mè ìre m̀beben nriran inyi enyi, mè ìyaka ire ǹjejeen̄ enyi ikọ Awaji, echichi obonin̄ oruru inyi enyi. 7 Ìkpọ-nu, kubọk otita mè uneen̄, òrere inu ikakaan̄ge ugwem me lek, ire ida nkwukwak chi ikitaan̄ wọlọwọlọwọlọ, ìre ebi ene ebejeje iriọọn̄ okwa ebi ìkikwak nkwukwak cha ekifit? Kpebekọt iriọọn̄, îtata mè ida nkwukwak cha ìtataan̄ ijaan̄ me utọn̄ ene. 8 Ofifi si, ire ida akama ikitaan̄ wọlọwọlọwọlọ, ìre ebi akọn̄ ebejeje iriọọn̄ ibe ke mênisi akọn̄, mè ibem lek? 9 Ikeya si ke îkup melek kinyi. Ire enyi itumu ikọ me usem ebi ene ekakọtge ìgobo ìtet, ìre ekene obokọt itet ibot me lek ikọ enyi ekitumu? Eya ìre ikpọkpọ ikitumu ikọ igwook me emen efet ikike. 10 Me atikọ, owuwa esese usem òwa me linyọn̄. Ire, ìkakaan̄ eyi ekitumu mè ebi ene ekariọọn̄ inu ekitumu. 11 Ire ene ikitumu usem, mè ǹkanọ inu ene ya okitumu, emi m̀bakup kubọk ogwu ichen me lek ene ya. Ene ya si ìbokup kubọk ogwu ichen me lek n̄a. 12 Ikeya si ke îkup me lek kinyi. Ike enyi ekaan̄be ulọk ikakaan̄ uche echi Ekwukwu Mbuban okinyi ene, me etete uche cha geelek, ìweek ikakaan̄ uche echi òkinama ntitiin̄ Awaji ibene ìgak otutuuk. 13 Mije keyi, ogwu òkitumu ikọ me nke nke usem, iriaak uriaak ibe Awaji inyi ọmọ unye isasa ikikana ikọ ya inyi ebi ene ekeriọọn̄ inu ọmọ okitumu. 14 Mije, mgbọ nkiriaak uriaak me nke nke usem, îre ekwukwu n̄a gaalek okiriaak uriaak ya. Ǹkasa ekiket n̄a ìgbaalek ìriaak uriaak ya. 15 Eya orọ, ìre keke ke mbayaka inirọ? Mâriaak uriaak me ekwukwu n̄a, ire, mâsa ekiket n̄a si igbaalek iriaak. Mâkọt okwa me ekwukwu n̄a, ire, mâsa ekiket n̄a si igbaalek ikọt. 16 Ire owu okitọn̄ Awaji me ekwukwu kwun̄ me emen ntitiin̄, ire, ogwu ikike ògọgọọk ikup me emen ntitiin̄ ya ìkanọ inu otumube, ìre ene ya ìbojeje ikọt igọọk ichieek igwook ibe, “Ikup ikeya,” me lek uriaak ya owu oriaakbe isa itọn̄ Awaji? Ìkpokọt, mije, ìkariọọn̄ inu owu otumube. 17 Môkọt ire ibe ke owu òkinyi Awaji itọn̄, me atikọ, ire, itọn̄ ya ìkanama ichechieek ene ya ìbene. 18 Ntọn̄ Awaji n̄a ibe ke emi ntumu ikọ me nke nke usem igak otutuuk kinyi. 19 Ire, me emen ntitiin̄, ire ntumu ikọ go gaalek me usem otutuuk ene enọbe, isa ìteme ebi ene nteme, eya înwọn igak itutumu akọp obop ikọ me nke nke usem, eyi ene geege ikariọọn̄ge inu îsibibe. 20 Bọn Nte n̄a, ikayaka ìkikeek ekiket kubọk nsabọn! Ìkup kubọk asa nsabọn me lek irọrọ ijo inu gaalek. Ire, ìkikeek ekiket kubọk ebi ugane. 21 Ege me Ikan kè Mosis ibe ke Okumugwem ìtumu ibe, “Mâtumu ikọ inyi ife chi inan̄a me otu ebi ìkitumu usem ema ekariọọn̄ge, mè otu ebi ichen. Ire, nriọọn̄ ibe, ìrere ikeya si, ke ema kpebegban̄ ikọ n̄a.” 22 Eya orọ, itutumu ikọ me nke nke usem ìre inu ijejeen̄ inyi ebi kpechieek me lek kè Karais, ìkare inu ijejeen̄ ìnyi ebi ìchechieek. Ire, ibeben nriran ìre inu ijejeen̄ inyi ebi ìchechieek, ìkare inu ijejeen̄ inyi ebi kpechieek. 23 Ire otutuuk ebi ntitiin̄ Awaji inigbaan̄ ititiin̄ ibetọbọ ebum, mè ikitumu ikọ me nke nke usem, mè ire ebi ekariọọn̄ge inu ife cha ekitumu, mè ìyaka ire ebi ekachieekge me lek kè Karais inin̄ inu, ìre kpebetumu ibe ke otutuuk ife cha ìre ebi iraak? 24 Ire, ire ogwu ikachieekge me lek kè Karais, mè ìyaka ire ogwu oyet, inin̄ emen uwu ntitiin̄ Awaji mgbọ otutuuk ene ekiben nriran, ikọ otutuuk ene cha ekitumu môfieek ọmọ ikọ, mè irọ inyi iriọọn̄ ibe ke ọmọ ìre ogwu ijo. 25 Ikọ cha si môkpọk mbum otutuuk nlelet inu geelek òkup ene ya me ejit. Sa me ikeya, ene ya môgwook ekpe me ijọn̄, mè itọbọ ebum inyi Awaji, mè isa otu kan̄ itumu ibe, “Jei, Awaji òwa me etete kinyi, me atikọ!” 26 Bọn Nte n̄a, ìtet ibot me lek nteme keyi nkinyi enyi. Enyi isigbaan̄ ititiin̄ ibetọbọ ebum inyi Awaji, ene ge inyi okwa, ene ge itumu ikọ Awaji, ene ge iben nriran itumu inu Awaji ochilibe ijeen̄ ọmọ, ene ge itumu ikọ me nke nke usem, ene ge ikana ikọ ya, inyi otutuuk ene enọ. Inu geelek mêrọbe môre inu òbonama ntitiin̄ Awaji ibene. 27 Ire ebetumu ikọ me nke nke usem, ene ge, mè ìre ene iba gaalek etumu. Imalek iwa ifiat, ire ene ita. Ebekitumu si, ene ge, mgbọ ge, otutuuk ene ekagbaan̄ ìtumu mgbọ ge. Ene ge isitumu isan̄a, ogwu Awaji onyibe unye isasa ikana ikọ ya, ikana, inyi otutuuk ene eriọọn̄ inu etumube. 28 Ire kpunu ogwu òbokọt ikana nke nke usem cha inyi ebi ene me ere ya, ebi ìkitumu usem cha echit otu me emen ntitiin̄, mè etumu ikọ me nke nke usem cha me emen ejit kiban̄ enyi lek kiban̄ melek Awaji. 29 Ire me lek ebi nriran, ene iba, mè ire ene ita gaalek eben nriran, mè ebi nriran kebilọ ekegban̄, mè eketọ ekpọ-nu, mè ìre ìnan̄a me ubọk Awaji, mè ìkare. 30 Ire Awaji ichili ayaya etip ijeen̄ ofifi ene òsisiki ikweek me mgbọ ene ge okiben nriran, ogwu adasi ya isiki ikweek, mè inyi ogwu òso iba ya irek, inyi itumu ikọ. 31 Mije, enyi otutuuk mêkọt iben nriran, ene ge, mgbọ ge, inyi ene geelek ibọkọ ikween̄-inu, mè inu enyi ekitumu itap si otutuuk ene efuuk me emen. 32 Ogwu Awaji onyibe unye isasa ikiben nriran, ọmọ okaan̄ itọtọ ikọ inyi unye ya. 33 Mije, Awaji ìkakima wọlọwọlọ. Kpan̄asi ikeya, ìkima ibe eji ekegbaan̄ erọ inu me esuuk. Inu ògbegbe ibe ekerọ me emen otutuuk ntitiin̄ ebi eyi Awaji geelek ìre ikeyi: 34 Ebibaan̄ ekeriaan̄ ere me emen ntitiin̄ Awaji. Kpenyi ebibaan̄ unye itutumu ikọ me emen uwu ntitiin̄ Awaji, me mgbọ ntitiin̄ okije inyi isi. Ikeya si ke ege me Ikan kè Mosis ibe mè ebibaan̄ ekesiki lek kiban̄, mè ekare ebi ibot. 35 Ire ikaan̄ inu enenwaan̄ geelek oweekbe idodo ikọ òfolek, ido ogwu olom me uwu. Mije, ebibaan̄ itutumu ikọ me emen ntitiin̄ Awaji ìre inu esip. 36 Îyak! Ìre ikọ Awaji ìbene me lek kinyi? Sa ìre enyi gaalek enọ ikọ Awaji? 37 Me etete kinyi, ire ikaan̄ ogwu imọnọ ibe ke ọmọ ìre ogwu nriran, mè ìyaka ire ke ọmọ îkaan̄ uche eyi Ekwukwu Mbuban okinyi ene, ene ya iriọọn̄ ibe ke inu chi nkige ijet enyi ìre ikan Okaan̄-ene. 38 Ire ikaan̄ ogwu ìkasa ikan chi ìgwen inu geege, ikamọnọ ene ya kubọk inu geege. 39 Eya orọ, bọn Nte n̄a, ìsa otutuuk ejit kinyi ìweek ibeben nriran. Ire, ikakput ibe ene ikatumu ikọ me nke nke usem. 40 Ire, ìkirọ inu geelek me onineen̄, me oniin̄ ògbegbe.
151 Mgbọ keyi, bọn Nte n̄a, ǹkiweek itataba ekiket kinyi ifo lek ata etip ya eyi nlookbe enyi, eyi enyi ebọkọbe itap, mè isa me ikeya ikeke inye me emen ichechieek kinyi. 2 Îre nan̄a me lek ata etip yi ke Awaji okinyan̄a enyi, mè ire enyi itet ata etip ya nlookbe enyi inye. Ire enyi kpetet inye, otutuuk ichechieek enyi echieekbe me lek kè Karais ìre inu ikike. 3 Mije, ata etip mbọkọbe me ubọk kè Jisọs Karais ke nkana itap enyi me ubọk, kubọk adasi inu òkup me uyọt ichit. Ata etip ya ìre ikeyi: Karais îkwu mkpa mije ijo inu kiji, kubọk egebe me Ikpa Mbuban ibe ke môrọ. 4 Mîfuun̄ ọmọ, Awaji ojojomo ọmọ me mkpa me òso egwe ita, kubọk egebe me Ikpa Mbuban ibe ke môrọ. 5 Ọmọ okakana isibi me isi kè Pita, mè isibi si me isi akọp mè ebi otuchieen̄ kan̄ iba. 6 Mgbọ eya orakabe, isisibi si me isi ogbogbo bọn Nte ìwawa iraka efit ene go, me mgbọ yaage. Owuwa me lek bọn Nte cha me ugwem mgbọ keyi. Ire, usini kiban̄ mîkwaan̄. 7 Ofifi mgbọ, isisibi me isi kè Jemis, mè isibi si me isi ebi otuchieen̄ kechilọ. 8 Me òta kan̄, isisibi si me isi n̄a me oniin̄ òsibi esese, kubọk gwun̄ emanbe me ulọ-mgbọ. 9 Emi nsip ichit me etete ebi otuchieen̄. Me atikọ, emi ǹkagbe ogwu ebegwen ogwu otuchieen̄, mije, nsisaak ntitiin̄ Awaji enenen. 10 Ire, îre sa me atata nnwọn eyi Awaji ke nre inu nrebe mgbọ keyi. Atata nnwọn ya ìkachep me ikike. Mije, me atikọ, emi nsi ikwaan̄ igak otutuuk ebi otuchieen̄. Ire, ìkare me unye n̄a ke nsa irọ ikwaan̄ cha. Îre atata nnwọn Awaji eyi òkup melek n̄a osa emi irọ otutuuk ikwaan̄ cha. 11 Eya orọ, mè ìre me otu n̄a, mè ìre me otu ebi otuchieen̄ kechilọ, îre ata etip ge yi gaalek ke eji otutuuk ekilook. Ọmọ si ke enyi echieek me lek. 12 Ire ata etip eji ekilook ikitumu ibe ke Awaji îjomo Karais me mkpa, usini ebi kinyi ejeje ikitumu ibe ke ebi ìkwukwu kpebejomo me mkpa? 13 Ire ebi ìkwukwu kpebejomo me mkpa, kubọk enyi ekitumu, ìsibi ibe ke Awaji ìkajomo Karais me mkpa. 14 Ire Awaji ìkajomo Karais me mkpa, ata etip eji ekilook îkana inu ikike, ichechieek kinyi si ìkasibi inu geege. 15 Ògak ge, ire Awaji ìkajomo Karais me mkpa, ìsibi ibe ke eji otutuuk ene ekikan̄ ataak ikeme Awaji, me lek eji ekitumu ibe ke Awaji îjomo Karais me mkpa. Mije, ire ebi ìkwukwu kpebejomo me mkpa, ìsibi ibe ke Awaji ìkajomo Karais me mkpa. 16 Ire Awaji ìkpojomo ebi ìkwukwu me mkpa, ìsibi ibe ke ìkajomo si Karais me mkpa. 17 Ire Awaji ìkajomo Karais me mkpa, ìsibi ibe ke ichechieek kinyi ìchechep ikike; ke Awaji ìkatele ijo kinyi geege ìnyi enyi. 18 Ìsibi si ibe ke otutuuk bọn Nte cha ìchechieek me lek kè Karais, mè ikwu, echechep. 19 Ire ikpọchieen̄ eji ekaan̄be me lek kè Karais ìyaka me lek inu linyọn̄ keyi gaalek, nsan lek kiji gaalek omin ichit me etete otutuuk ebilene me linyọn̄ keyi. 20 Ire, Awaji îjomo Karais me mkpa me atikọ. Awaji ìdasi ijomo Karais me mkpa isasa ijeen̄ ibe ke ọmọ môjomo si otutuuk ebi ìkwukwu me mkpa. 21 Mije, ike mkpa onin̄be linyọn̄ sa me ubọk ene ge, òrere Adam, ikeya si, ijojomo me mkpa mônu si inan̄a me ubọk ene ge. 22 Ike otutuuk ebilene ekikwaan̄ mije ema enan̄abe me owot iman kè Adam, ikeya si ke Awaji môjomo otutuuk ebilene me mkpa inin̄ me ugwem, mije ema echieekbe me lek kè Karais. 23 Ogwu ikup, ìbojomo me mgbọ eyi kan̄. Karais ore ogwu adasi. Ọmọ isikpọk inu, otutuuk ebi eyi kan̄ mênenijomo me mkpa eyi kiban̄. 24 Eya isiraka, òta inu geelek me linyọn̄ keyi môneninu. Mgbọ ya, Karais môtim ikpan̄ otutuuk ibot mkpulu geelek òkup me linyọn̄ keyi, mè echi òkikpulu me isinyọn̄, mè otutuuk unye geelek, mè inikana mkpulu kan̄ itap me ubọk Awaji Ute. 25 Mije, Karais môkikpulu mege ire mgbọ Awaji môtimbe ikpan̄ otutuuk ebi ochicha kè Karais, mè isa ema irọ inu ibene ukot inyi Karais. 26 Òta ogwu ochicha Karais môkpan̄be ìre mkpa. 27 Mije, ege me Ikpa Mbuban ibe, “Awaji îkeme otutuuk inu isiki itap me irak ukot kan̄.” Ubọk geelek egebe ikeya, îsibi utoon̄ ibe ke Awaji me lek kan̄, ogwu òtatap otutuuk inu me irak kè Karais, ìkakup me otu ifuk otutuuk inu cha îtapbe me irak kè Karais. 28 Awaji isitap otutuuk inu me irak mkpulu ogwu Gwun̄ isan̄a, ogwu Gwun̄ ya me lek kan̄ mônenikup me irak ogwu Ute ogwu òtatap otutuuk inu me irak kan̄. Mgbọ ya, Awaji mônenikana Ogwukaan̄ otutuuk inu geelek, me ire Ogwu Ibot Mkpulu me inu geelek. 29 Ire ebi ìkwukwu kpebejomo me mkpa, ebi ene ejeje ikigwook ebi ìkup me ugwem mun̄ me useen̄ ebi ìkwukwu? Ìre keke orọ mè ekegwook òjelek mun̄ òkup ikeya ire ife cha ebi ekigwook mun̄ ya inyi kpebejomo me mkpa? 30 Ire ebi ìkwukwu kpebejomo me mkpa, ìre keke orọ eji me lek kiji ekijeen̄ òjelek ijejeen̄ òkup ikeya, mè ikitap lek kiji, mgbọ geelek, me emen inu môkọtbe isa mkpa ijet eji? 31 Bọn Nte n̄a, me atikọ, ǹkikup me irak ubọk mkpa egwe geelek, ǹkafiaan̄ enyi. Ikeya si ke nkinwọọn̄ unwọọn̄ mgbọ geelek me ibot kinyi, mije enyi otutuuk ene erebe ebi eyi Okaan̄ kiji Jisọs Karais. 32 Ufialek mbọkọbe me Efesọs ìkup kubọk ǹtim etim melek ijo anam oron. Ire ke ìre mije ulọk eyi akpalek ebilene ikike ke mbọkọ ufialek ya, ìre kpasi oruru ke mbakaan̄? Ire ebi ìkwukwu kpebejomo me mkpa, “Eji erie, mè enwọ! Mije, iyakwut, eji mêkwaan̄ ita,” kubọk egebe me Ikpa Mbuban. 33 Ikachieek ibe ene geege ifiaan̄ enyi, “Ijo otu-ogbo, ìkekifiat ata ugwem.” 34 Ikayaka ìbubut! Ìluk ugwem kubọk ebi ìkakaan̄ ifuk-ibot, ikayaka ìrọ ijo inu ìfo isi. Mije, îkaan̄ usini ene me etete kinyi ebi ekariọọn̄ge Awaji kubọk ge. Ǹkitumu ikọ keyi inyi esip itet enyi. 35 Usini mgbọ, ebi ene mêkọt ido ibe, “Òmọmọ ubọk ebi ìkwukwu ebesa ijomo me mkpa? Ìre kpasi akpalek ke ife cha ebekaan̄?” 36 Eya ìre ikọ ebi burubut! Ìre enyi kperiọọn̄ ibe ke mfut ewopbe ìkakitibi ìsibi ire ìkadasi ikwu? 37 Mgbọ ekiwop mfut me uko, ìkare uti òbotitibi isibi ya me lek kan̄ ke ekitap me ijọn̄. Inu ekitap me ijọn̄ ìre ukwuuk mfut uti ya, môkọt ire ukwuuk akpa, mè ìre ukwuuk ofifi mfut uti. 38 Îre Awaji obonyi mfut ya akpalek ubọk òneneme ọmọ. Awaji ìkinyi ukwuuk mfut geelek akpalek igọọk me lek uti eyi òkito mfut ya. 39 Otutuuk inu òkup me linyọn̄ keyi kpegbaan̄ ikaan̄ chieen̄ akpalek ìkike. Ebilene mîkaan̄ akpalek eyi kiban̄ esese, anam si îkaan̄ eyi kiban̄, unọn îkaan̄ si eyi kiban̄. Ikeya si ke irin̄ okaan̄ eyi kiban̄ esese. 40 Otutuuk inu òkup me isinyọn̄ îkaan̄ akpalek eyi kiban̄. Ikeya si, otutuuk inu òkup me linyọn̄ îkaan̄ si akpalek eyi kiban̄. Uja eyi akpalek eyi inu echi òkup me isinyọn̄ ìkup esese. Uja eyi akpalek eyi inu echi òkup me linyọn̄ ìkup si esese. 41 Ura îkaan̄ uja eyi kan̄ esese, onyan̄ si îkaan̄ eyi kan̄. Ikeya si ke ebi kè ntoronyan̄ ekaan̄ uja eyi kiban̄ esese. Uja ntoronyan̄ ge okaan̄be înwene me lek uja ofifi ntoronyan̄ okaan̄be. 42 Ikeya si ke ìbokup me mgbọ Awaji môjomobe ebi ìkwukwu. Akpalek eyi ebenbe ifuun̄ ìre akpalek òbojọjọ, ire, Awaji isijomo akpalek ya me mkpa, môkana akpalek eyi kpojọbe. 43 Mgbọ efuun̄be akpalek ya, ìkakaan̄ umin geege, ire, Awaji isijomo akpalek ya me mkpa, akpalek ya môkaan̄ umin mè uja. Mgbọ efuun̄be akpalek ya, ìkpọkpọ idek, ìkakaan̄ unye geege. Ire, Awaji isinijomo akpalek ya me mkpa, akpalek ya môkaan̄ unye. 44 Mgbọ efuun̄be akpalek ya, îre akpalek ikike ke efuun̄. Ire, Awaji isinijomo akpalek ya me mkpa, ìbore akpalek eyi erumun̄. Ire ke akpalek eyi linyọn̄ keyi òwa, ìsibi ibe ke akpalek eyi erumun̄ òwa si. 45 Mije, ege me Ikpa Mbuban ibe, “Adam, adasi ene Awaji orombe, okakana ogwu ògat ugwem.” Ire, òta Adam, òrere Karais, onenikana Ekwukwu òkinyi ebilene ugwem. 46 Ìkare akpalek eyi erumun̄ odasi inu. Îre akpalek eyi linyọn̄ keyi odasi inu, sabum akpalek eyi erumun̄ oninu. 47 Adasi Adam ìnan̄a me ntitaak ijọn̄ eyi linyọn̄ keyi. Ire, Adam ogwu òso iba ìnan̄a me emen inyọn̄. 48 Ubọk ogwu Awaji osabe ntitaak ijọn̄ linyọn̄ keyi irom okupbe, ikeya si ke ebi ìrere ebi linyọn̄ keyi ekup. Ubọk ogwu ònan̄a me emen inyọn̄ okupbe, ikeya si ke ebi ìkup ìnyi ogwu ònan̄a me emen inyọn̄ ekup. 49 Ike eji ekupbe mgbọ keyi me mbet ogwu esabe ntitaak linyọn̄ keyi irom, ikeya si ke eji ebekup me mbet ogwu ònan̄a me emen inyọn̄. 50 Bọn Nte n̄a, ǹkirọ inyi enyi eriọọn̄ ibe ke akpalek mè eje ikike ìkpokọt inin̄ emen mkpulu eyi Awaji. Ikeya si, inu eyi môjọbe ìkpokọt ikaan̄ inu eyi kpojọbe. 51 Eya orọ, ìgban̄ utọn̄! Mânitumu nlelet inu ge inyi enyi! Eji otutuuk kpebekwaan̄ isan̄a. Ire, ebenwenwene eji otutuuk ene mgbọ yaage. 52 Òta mgbọ isire, ida odu môtaan̄. Òta ida odu isitaan̄, mgbọ yaage, chit chieen̄ mè bolo, bọn Nte ebi ìkwukwu mêjomo me mkpa me akpalek eyi kpoyakabe ijọ. Mêneninwene eji ebi mêkupbe me ògat ugwem mgbọ ya, inyi eji enekaan̄ ayaya akpalek. Inu chi geelek ìborọ mgbọ yaage kubọk utoon̄ okebe mgbọ ge mèrèp. 53 Mije, akpalek eyi òkikwukwu môkana akpalek eyi kpoyakabe ikwu. Akpalek yaage eyi òkijọjọ môkana akpalek eyi kpoyakabe ijọ. 54 Mgbọ akpalek keyi eyi òkijọjọ isinikana akpalek eyi kpoyakabe ijọ, mè akpalek keyi eyi òkikwukwu isinikana akpalek eyi kpoyakabe ikwu, mgbọ ya ke inu egebe me Ikpa Mbuban mônirọ iso, ibe, “Awaji îtim ikpan̄ mkpa isan̄a kpai!” 55 “Jei mkpa, òmọmọ unye kwun̄ ya okisa itim ikpan̄ ebilene? Jei mkpa, iwot kwun̄ ya ìkup owa?” 56 Iwot eyi mkpa okisa ikpan̄ ene ìre ijo inu. Unye eyi ijo inu okaan̄be ìre Ikan kè Mosis. 57 Ire, itọn̄ ikup inyi Awaji ogwu òkirọ inyi eji etim ekpan̄, inan̄a me unye Okaan̄ kiji Jisọs Karais. 58 Eya orọ, bọn Nte n̄a, ìkeke ìnye! Ikachieek ibe inu geege isisik enyi. Ìkisa lek kinyi ìtap me ikwaan̄ Okaan̄-ene mgbọ geelek. Mije, enyi mîriọọn̄ ibe ke kwulukwulu geelek enyi ekwukwulube inyi Okaan̄-ene ìkpochep me ikike.
161 Eyi ìre nteme òfolek ititip otitip ebekisa itap ubọk inyi bọn Nte ìkup me agan̄ Judia. Ubọk ntemebe otutuuk ntitiin̄ òkup me agan̄ Galesia ibe ekerọ, enyi si ìkirọ ikeya. 2 Me usen Awaji geelek, ene geelek me etete kinyi ikisan̄a ikpoko isun̄ esese ikpọ me lek mkpukpe îkaan̄be me ubọk ikwaan̄ kan̄ me nde ya. Ire enyi ikirọ ikeya, kpebeyaka ikije ikana ikitip ikpoko ya mgbọ nsinu. 3 Ìgobo ebirieen̄ ebi enyi etoon̄be ejit me lek ìsibi. Mgbọ nsinu, mâninyi ema ikpa unye ebesa iriọọn̄ ema, mè iria ema isibi, inyi ema esa inu cha enyi enyibe ejet bọn Nte me Jeruselem. 4 Ire nnu, mè imun̄ ibe ke îgbe ibe emi ǹsi Jeruselem ya si, ema mêgọọk emi ije. 5 Nsijijen̄e ije n̄a ikana agan̄ Mesidonia isan̄a, mânu me lek kinyi. Mwuuk lek itọt isan̄a isisi ije me agan̄ Mesidonia. 6 Nsinu, mâgọọk enyi ikup ifiin̄. Usini mgbọ mâgọọk enyi ikup ita mgbọ utọọk, inyi enyi etap ubọk enyi emi, mè ǹkọt ǹsi ofifi ere geelek mbasi. 7 Ire nnu me lek kinyi, ǹkaweek ikpọkpọ igba, mè iraka mgbọ yaage, ǹkiweek igọgọọk enyi ikup ifiin̄ sọnja, ire ineme Okaan̄-ene. 8 Ire, mâkup me Efesọs mege ire mgbọ ijọk Pentikọs. 9 Mije, irek îsibi iwa enenen inyi emi itutumu ikọ Awaji me Efesọs yi nkupbe, ubọk geelek owuwa ebi ene ekirọ ikeme emi. 10 Ire Timọti inu me lek kinyi, ìbọkọ ọmọ ìtap, mè ìrọ inyi ejit ibele ọmọ, mije, ọmọ ìkisi ikwaan̄ Okaan̄-ene si, kubọk emi nkisi. 11 Ene geege ikakpọ ọmọ chieen̄ ìsiki. Kpan̄asi ikeya, ìtutuun̄ ọmọ itap me oniin̄ me esuuk, inyi igwu ikom ika igọọk emi. Mije, emi gwa ǹkikpọ chieen̄ ikaka kan̄, ọmọ mè bọn Nte ebi melek kan̄. 12 Òfo me lek gwun̄ Nte kiji Apọlọs, nriaak ọmọ enenen ibe igọọk bọn Nte kebilọ inu inikpọ enyi, ire, usini mgbọ ìkatat me lek kan̄ inunu mgbọ keyi. Mgbọ geelek îkaan̄be irek, mônu. 13 Ìgbala chieen̄, mè ìkeke ìnye me ichechieek! Ikatet ukpook me lek inu geege! Ìnye lek! 14 Ìkirọ inu geelek me imumechieen̄. 15 Enyi mîriọọn̄ ibe ke ìre Sitifanas mè ototun̄ ukan̄ kan̄ ere adasi ebi ìgwugwu ikom ichieek me lek Okaan̄-ene me otutuuk agan̄ Akaya. Ema mîsa otutuuk efuuk kiban̄ ikisi ikwaan̄ inyi ebi eyi Awaji. 16 Eya orọ, bọn Nte n̄a, ǹkibeek enyi ibe, soso ìkisiki ibot ìnyi ebi ìkup ikeyi, mè ebi geelek ìgọgọọk ema ikisi ikwaan̄ yi, mè ikeke inye ikikwukwulu. 17 Ejit îbele emi enenen mgbọ Sitifanas, mè Fọtinetọs, mè Akaikọs enube inire ere keyi. Eyi enyi ekakupge me agba lek n̄a, inunu kiban̄ îkat emi ejit enenen. Ìyaka inikup kubọk ema enu me irek kinyi. 18 Ema mîtap emi unye me emen, kubọk ema erọbe inyi enyi. Îgbe ibe enyi eriọọn̄ ebi ìkup ikechi me etete kinyi, mè ekemin ema si. 19 Otutuuk ebi ntitiin̄ Awaji ìkup me agan̄ Esia mîtọp enyi amọn. Akwila mè Pirisila ogwu nwa mîtọp enyi amọn enenen, enyi ebi melek kiban̄ egbaan̄be ire ge sa me lek Okaan̄-ene. Ebi ntitiin̄ Awaji eyi òkititiin̄ me uwu kiban̄ si mîtọp enyi amọn. 20 Otutuuk bọn Nte ìkup me ere keyi mîtọp enyi amọn. Ìtọp lek kinyi amọn, mè ìkat lek kinyi me erieen̄ Awaji. 21 Îre emi Pọọlu nsa ubọk n̄a gaalek ige amọn keyi. 22 Ikaan̄ ogwu ikamun̄ge Okaan̄-ene me chieen̄, ifieek inyi ene ya. Jei, Okaan̄-ene, na! 23 Atata nnwọn Okaan̄-ene Jisọs Karais ikup inyi enyi. 24 Imumechieen̄ n̄a ikup melek kinyi otutuuk ene, enyi ebi ìrere ebi eyi kè Jisọs Karais.