Павел апостолдыҥ Римдеги серкпеге самаразы
Ончо калыктарга Сӱӱнчилӱ Јар
11 Христос Иисустыҥ кулынаҥ, кычырылган Павел апостолдоҥ.
Мен Кудайдыҥ Сӱӱнчилӱ Јарын јарлаарга тудулгам. 2 Башкыда Ол Бойыныҥ јарлыкчылары ажыра бу Јар керегинде Агару Бичикте сӧзин берген. 3 Бу Јар Оныҥ Уулы – Иисус Христос Кайраканыс керегинде. Ол Давидтиҥ угынаҥ кижи чилеп туулган ла агарулыктыҥ тыныныҥ кӱчиле тирилгени ажыра Кудайдыҥ Уулы деп ачылган. 5 Ол ажыра јакшылык алып, ончо калыктар Оныҥ адына болуп Кудайга бӱдӱп, Ого уккур болзын деп, апостолдор боло бергенис. 6 Бу калыктардыҥ ортозында слер де, Иисус Христостыйы болорго кычырылган улус, јӱрӱп јадыгар.
7 Слерге, Кудай сӱӱп турган, Оныҥ агару калыгы болорго кычырылган, Римде јӱрген ончо улуска, Кудай Адабыстаҥ ла Иисус Христос Кайраканнаҥ јакшылык ла амыр јетсин.
8 Элдеҥ озо Иисус Христос ажыра ончогор учун Кудайымга алкыш-быйаным айдып турум, нениҥ учун дезе бӱдӱп турганыгар керегинде бастыра телекейде јарлалат. 9 Кудай мениҥ керечим: Оныҥ Уулы керегинде Сӱӱнчилӱ Јар јарлап, Ого тынымла бажырып јӱрӱм. Слерди туркаары эске алынып, 10 мӱргип, Кудайдыҥ табыла качан бирде слерге келер аргалу болойын деп, јаантайын сурайдым. 11 Агару Тыннаҥ алган јайалтаны берейин, слерди тыҥыдайын деп, слерди кӧрӱксеп јадым. 12 Ӧскӧртӧ айтса, ортогордо болзом, бӱдӱп турганыс ажыра бой-бойыстаҥ кӧкӱдӱ аларыс, слер менеҥ, мен слердеҥ аларым.
13 Слерди билзин деп турум, карындаштар: слерге кӧп катап келерге јазангам, је эмдиге јетире буудактарга учурагам. Слерге келип, ӧскӧ калыктардыҥ ортозында чылап, слердиҥ де ортогордо ижимниҥ турултазы болзын дегем. 14 Мен еллиндерге ле ӧскӧ улуска, ойгорлорго ло неме билбестерге јарлыктаар учурлу. 15 Анайдарда, мен керегинде айтса, слерге де, Римде јӱрген улуска, Сӱӱнчилӱ Јар јарлаарга белен.
16 Мен Христостыҥ Сӱӱнчилӱ Јарынаҥ уйалбай јадым, нениҥ учун дезе ол – Кудайдыҥ кӱчи, ол бӱдӱп турган ончо улусты аргадайт: озо баштап иудейлерди, анайда ок еллиндерди. 17 Бу Јар улусты Кудайга бӱткени ажыра оноҥ кӧп бӱдерине экелип, Кудай канайда актап турганын кӧргӱзет, бичилгениле: «Акту кижи бӱдӱп, тирӱ јӱрер».
Улустыҥ кинчеги
18 Кудайды тообой, јаман эдип, јаманыла чындыкты јаба базып турган улуска теҥеридеҥ Кудайдыҥ чугулы келип јат. 19 Олор Кудай керегинде билетенин билип јадылар, нениҥ учун дезе мыны олорго Кудай ачкан. 20 Кӧскӧ кӧрӱнбес немелер – Оныҥ ӱзӱлбес-тӱгенбес кӱчи ле кудайлыгы телекейдиҥ јайалганынаҥ ала иле кӧрӱнет. Олор Оныҥ јайаганы ажыра аайлалат. Оныҥ учун бу улус бойлорын актап, нени де айдып болбос. 21 Олор Кудайды билип алып, Оны Кудайды чылап мактабадылар, Ого алкыш-быйанын айтпадылар. Карын, бойлорын куру санаа-шӱӱлтелерге берип койдылар. Мынаҥ улам неме аайлабас јӱректери караҥуйга алдырган. 22 Бойлорын ойгор деп адап, тенек болуп калдылар. 23 Ӧлбӧс Кудайга бажырардыҥ ордына ӧлӱмдӱ кижидий, куштардый, тӧрт санду тындулардый ла јылып, јорголоп јӱрер тындулардый сӱр-кеберлерге бажырадылар.
24 Оныҥ учун Кудай олорды јӱректери кӱӱнзеген быјарга берип койгон. Олор эди-кандарын бойлоры быјарсыдып, 25 Кудайдыҥ чындыгын меке-тӧгӱнге солыгандар, јайалган немелерди байлап, олорго бажыргандар. Јайаачыбыс дезе ӱргӱлји чакка алкышту, аминь. 26 Бу учун Кудай олорды уйатту кычаларына берип койгон: олордыҥ ӱй улузы эр улусла ары јанынаҥ берилген колбуны јектеп, ого удура кылынып јадылар. 27 Анайда ок эр де улус ӱй улусла ары јанынаҥ берилген колбуны јектеп, бой-бойлорын сӱрекей кӱӱнзейдилер: эр улус эр улусла уйатту немелер эдип, бойлорыныҥ азып тургандары учун бойлорында бойлоры кезедӱ алып јадылар.
28 Кудайды билип аларын керектебеген учун Кудай олорды саҥ-тескери санаага берип койгон. Оныҥ учун олор этпести эдедилер. 29 Олор чын эмес керектерле, балыр кылыкла толо: ачыркайдылар, чайдам кылык кылынадылар, кӱйӱнедилер, ӧлтӱредилер, ӧӧркӧжӧдилер, мекелейдилер, јабарлап јадылар, коптойдылар; 30 куурмактажып јадылар, Кудайды јаман кӧрӧдилер, бойлорын тудунбайдылар, улуркайдылар, јакшыркайдылар, јаманды эдейин деп јӱредилер, ада-энелериниҥ сӧзин укпайдылар; 31 тенексийдилер, сӧзине турбайдылар, улуска килебейдилер, јарашпайдылар, быйан этпейдилер. 32 Анайда кылынып турган улус Кудайдыҥ чындык јасагыла ӧлӱмге турар деп билип, јаҥыс та анайда кылынып турган эмес, је анайда кылынып турган улусты јарадып јадылар.
Ончозына Кудайдыҥ јаргызы
21 Анайдарда, кижи, сен ӧскӧ улусты јаргылап јадыҥ ба? Сен кем де болзоҥ, акталбазыҥ. Ӧскӧ улусты јаргылап турганыҥла бойыҥды бойыҥ јаргылайдыҥ ине, нениҥ учун дезе, ӧскӧ улусты јаргылап, бойыҥ олор чылап ок кылынадыҥ. 2 Анайда кылынып турган улуска Кудайдыҥ чындык јаргызы барын бис билерис. 3 Кижи, анайда кылынып турган улусты јаргылап, бойыҥ олор ло чылап кылынып, Кудайдыҥ јаргызынаҥ кыйыжарым деп сананып туруҥ эмеш пе? 4 Ол эмезе, Оныҥ улу быйанзагын, јымжак ла чыдамкай болгонын јектеп јадыҥ ба? Оныҥ быйанзагы сени кинчегиҥди алынарына экелип турганын аайлабай јадыҥ ба? 5 Је сен кедер, јӱрегиҥ Кудайга баштанбаган. Кудайдыҥ чугулы келерине ле Оныҥ чындык јаргызы ачылар кӱнге бойыҥа бойыҥ чугул јууп јадыҥ. 6 Ол кажы ла кижиге эткен керектерине кӧрӧ берер. 7 Јаантайын јакшы керектер эдип, макка, кӱндӱге ле ӧлбӧскӧ јӱткӱп турган улуска ӱргӱлји јӱрӱм берер. 8 Бойын сӱӱп, чындыкка бакпай, јаманга беринип турган улуска – чугул ла атыйланыш ийер. 9 Јаманды эдеечи кандый ла кижиге ачу-корон ло кыйын-шыра ийер: озо баштап иудейге, анайда ок еллинге. 10 Јакшыны эдеечи кажы ла кижиге мак, кӱндӱ ле амыр ийер: озо баштап иудейге, анайда ок еллинге. 11 Кудай улусты ылгабай јат ине.
12 Јасагы јок улус кинчек этсе, Јасак јокко ло ӧлӱп калар. Јасакту улус кинчек этсе, Јасакла јаргыладар. 13 Кудайдыҥ алдында Јасакты угуп турган улус акту эмес, је Јасакты бӱдӱрип турган улус акталар. 14 Јасагы јок ӧскӧ калыктар бӱткен бӱдӱмиле Јасакка келижерин эдип јӱрзе, олордо Јасак јок то болзо, бойлорына бойлоры јасак болуп јадылар. 15 Мынызыла олор Јасактыҥ некелтелери јӱректеринде бичилгенин кӧргӱзедилер. Мыны олордыҥ санаазы керелейт: олор бойлорында шӱӱп, бойлорын бирде бурулайдылар, бирде актайдылар. 16 Мениҥ јарлыктаганымла, Иисус Христос ажыра Кудай улустыҥ јажытту керектерин јаргылаар кӱнде андый болор.
Иудейлер ле Јасак
17 Бат сен иудей деп аданадыҥ, Јасакка иженедиҥ, Кудайла мактанадыҥ. 18 Оныҥ табын билериҥ, Јасактаҥ ӱренип, эҥ артык дегенин ылгаштырып билериҥ; 19 сен сокорлордыҥ једекчизи, караҥуйда јӱргендерге јарык, 20 керсӱ эместердиҥ таскадаачызы, неме билбестердиҥ ӱредӱчизи болгоныҥа бӱдӱп јадыҥ, нениҥ учун дезе Јасак сеге толо билим ле чындык берет. 21 Анайдарда, ӧскӧ улусты ӱредип, бойыҥды бойыҥ ӱретпейдиҥ бе? «Ууры этпе» деп јарлап, бойыҥ уурданып јадыҥ ба? 22 «Чайдам кылынба» деп јарлыктап, бойыҥ чайдам кылынадыҥ ба? Чалулардаҥ јескинген бойыҥ, агаруныҥ байын бузадыҥ ба? 23 Јасакла мактанадыҥ, је Јасакты бузуп, Кудайды уйатка тӱжӱредиҥ. 24 Айдарда, бичилгениле, слердеҥ улам ӧскӧ калыктар ортодо Кудайдыҥ ады јамандалат.
25 Јасакты бӱдӱрип турган болзоҥ, томдош тузалу, је Јасакты бузуп турган болзоҥ, томдолгоныҥ болбогон немедий. 26 Анайдарда, томдолбогон кижи Јасактыҥ некелтелерин бӱдӱрип турган болзо, Кудай оны томдолгон деп бодобос беди? 27 Бӱткен бӱдӱмиле томдолбогон, је Јасакты бӱдӱрип турган кижи сени јаргылабас беди? Сенде бичилген Јасак бар, сен томдолгоҥ, је Јасакты бузуп јадыҥ. 28 Чырайыла иудей болгоны, иудей эмес, эт-канда эдилген томдош – ол томдош эмес. 29 Је чын иудей – ол ич јаны андый болгоны, чын томдош јӱректе эдилгени. Ол бичилген Јасакла эмес, је Тынла эдилген. Андый кижини улус эмес, Кудай мактаар.
Кудай чындык, кижи – тӧгӱнчи
31 Анайдарда, иудей болорыныҥ артыгы незинде, ол эмезе томдоштоҥ кандый туза бар? 2 Ончо јанынаҥ артык. Элдеҥ озо неде дезе, олорго Кудайдыҥ сӧзи бӱдӱмјилелген. 3 Олордыҥ кезиги чындык эмес болзо, не? Мынызы Кудайдыҥ чындыгын јоголтып болор бо? 4 Јок туру! Кудай чындык, кандый ла кижи – тӧгӱнчи, бичилгениле: «Ончо сӧстӧриҥде Сен акту болорыҥ, јаргылазаҥ, јеҥип аларыҥ». 5 Је чын эмес эдип турганыс Кудайдыҥ чынын иле эдип турган болзо, не деерибис? Ол биске чугулын ийип, чын эмес эдип турган болор бо? (Мыны улустыҥ шӱӱгени чилеп айдадым.) 6 Јок туру! Ол чындык эмес болзо, бу телекейдиҥ улузын канайып јаргылайтан? 7 Је мениҥ меке-тӧгӱним Кудайдыҥ чындыгын там иле эдип, Ого мак экелип турган болзо, мени кинчектӱни чилеп не учун јаргылайтан? 8 Айса, јакшы боло берзин деп, јаманды эдерис пе? Анайда бисти кезик улус јамандап, бого ӱредип јадыгар деп бурулайдылар. Андый улус јаргыга турары јолду.
9 Анайдарда, не деерибис? Бис ӧскӧлӧринеҥ артык айалгада ба? Эмеш те эмес. Иудейлерди де, еллиндерди де, ончозын кинчек бийлеп јат деп кӧргӱскенибис, 10 бичилгениле:
«Бир де акту кижи јок, бир де.
11 Аайлап турган кижи јок, кем де Кудайды бедиребейт.
12 Ончозы јолдоҥ аскан, ончозы эш-немеге јарабас.
Кем де јакшыны этпейт, кем де, бир де кижи.
13 Олордыҥ сӧстӧри ӧлӱм ле чириш экелет.
Тилдериле тӧгӱндеп јадылар,
эриндеринде – јыланныҥ короны.
14 Оосторы ачу сӧстӧрлӧ, каргышла толо.
15 Буттары кан тӧгӧргӧ јылгыр.
16 Јолдорында бускалаҥ ла кату-јобол артырып јадылар.
17 Амырдыҥ јолдорын билгилебес.
18 Кудайдаҥ айабай јадылар».
19 Јасак ого багып турган улуска айдып турганын бис билерис. Анайып айдар неме табылбай, бастыра телекейдиҥ улузы Кудайдыҥ алдында бурулу боло берет. 20 Јасактыҥ некеп турганын эткениле Кудайдыҥ алдында кем де актанып болбос. Јасак ажыра кинчек ачылат ине.
Јасакла эмес, Кудайга бӱткенисле аргадаларыс
21 Је эмди Јасактаҥ камаан јокко акту болор јолды Кудай улуска кӧргӱзип берген. Ол керегинде Јасак ла јарлыкчылар керелейт. 22 Кудай дезе Иисус Христоско бӱткени ажыра бӱдӱп турган ончо улусты Бойыныҥ алдында акту эдет. Мында башказы јок, 23 нениҥ учун дезе, ончо улус кинчек эдип, Кудайдыҥ магын керексинип јадылар. 24 Ончозы Кудайдыҥ јакшылыгыла тегинге акталадылар, нениҥ учун дезе олорды Иисус Христос јайымга садып алган. 25 Улус Ого бӱткени ажыра Оныҥ каныныҥ шылтузында кинчектери ташталып, быйан алзын деп, Кудай Оны тайылгага учурлаган. Бойыныҥ чындыгын кӧргӱзерге, Оныҥ анайда эткени ол. Башкыда эдилген кинчектерге ајару этпей, 26 эмдиги де ӧйдӧ Бойыныҥ чындыгын кӧргӱзерге, чындык болорго ло Иисуска бӱдӱп турган улусты акту эдерге, Ол чыдашкан.
27 Анайдарда, мактанар немебис кайда? Јоголтылып калган. Јасакты бӱдӱргени ажыра ба? Эткен керектер ажыра ба? Јок, Кудайга бӱткени ажыра. 28 Кижи Јасакты бӱдӱретенинеҥ камаан јокко, Кудайга бӱткениле акталат деп бодоп јадыбыс ине. 29 Кудай јаҥыс иудейлердийи бе? Ол ӧскӧ дӧ калыктардыйы эмес пе? Эйе, Ол ӧскӧ дӧ калыктардыйы. 30 Кудай јаҥыс эмей. Ол бӱдӱп турган учун томдолгон до кижини, бӱдӱп турган болзо, томдолбогон до кижини актаар. 31 Анайдарда, бӱдӱп турган болзобыс, Јасакты јоголтып турганыс ол бо? Јок туру! Карын, Јасакты јӧптӧп јадыбыс.
Авраамныҥ Кудайга бӱткени
41 Айдарда, улу адабыс Авраам керегинде нени айдарыс? Бойы неге јединген? 2 Ол эткен керектериле акталган болзо, мактанар аргазы бар. Је Кудайдыҥ алдында эмес. 3 Агару Бичик не дийт? – «Авраам Кудайга бӱткен, оныҥ учун Кудай оны акту кижи деп адаган». 4 Је иштеп турган кижиге јал – ол быйан эмес, карын, ол оны алар учурлу. 5 Эдип турган керектери учун эмес, кинчектӱ улусты актаган Кудайга бӱдӱп турган кижи, бӱткени учун акту деп ададып јат. 6 Анайда Давид те Кудай акту деп адаган кижини эткен керектеринеҥ камаан јокко кежиктӱ дийт: 7 «Јарамас керектери ташталган, кинчектери јабылган улус кежиктӱ. 8 Кудай кинчектерин тоого албай турган кижи кежиктӱ».
9 Анайдарда, бу кежик томдолгон улустыйы ба, эмезе томдолбогон до улустыйы ба? Бис дезе Авраам Кудайга бӱткени учун оны Кудай акту кижи деп адаган дейдис. 10 Качан адаган? Томдолордоҥ озо бо, эмезе соҥында ба? Соҥында эмес, томдолордоҥ озо. 11 Ол соҥында томдолгон. Бу темдек ол томдолордоҥ озо Кудайга бӱткени учун акталганын кӧргӱскен. Анайып Авраам бӱдӱп турган ончо улустыҥ адазы боло берген. Олор томдолбогон до болзо, бӱдӱп турган учун, Кудай олорды да акту улус деп адап јат. 12 Ол анайда ок томдолгон до улустыҥ адазы боло берген. Олор јаҥыс та томдолгон эмес, је улу адабыстыҥ – Авраамныҥ јолыла барып, ол томдолордоҥ озо Кудайга бӱдӱп баштаганы учун бӱткендер.
13 Кудай Авраамга ла оныҥ калдыктарына јер-телекейди энчи эдип берерим деген. Ол бу энчини Јасакты бӱдӱргени учун эмес, је бӱдӱп, акталганы ажыра берер болгон. 14 Јасакла јӱрген улус энчи алып турган болзо, бӱдетени темей, берген сӧстӧ учур јок болор эди, 15 нениҥ учун дезе Јасак бойыла кожо Кудайдыҥ чугулын экелет. Кайда Јасак јок, ол анда бузулбайт. 16 Оныҥ учун Кудайдыҥ берген сӧзин Ого бӱдӱп, алып јадылар. Бу сӧс Авраамныҥ ончо калдыктарына Кудайдыҥ быйаны ла ижемјилӱ эп-арга болуп јат. Јаҥыс та Јасакты бӱдӱрип турган улуска эмес, је Авраам Кудайга бӱткени чилеп бӱдӱп турган улуска. Авраам – ончобыска адабыс. 17 Бичилгениле: «Сени кӧп калыктардыҥ адазы эдип койдым». Ол ӧлгӧн улуска јӱрӱм береечи, јок немени бар деп айдаачы Кудайга бӱдӱп, Оныҥ алдында адабыс болуп јат.
18 Иженери јок то болзо, ол иженип ле бӱдӱп, «Сениҥ калдыктарыҥ андый кӧп болор» – деп айдылганыла, кӧп калыктардыҥ адазы боло берген. 19 Јӱс јашка јууктап калган кижиниҥ эди-каны ӧлӱмтик деп, Сарра карган, бала таппас деп аайлап та турза, ол Кудайга бӱткенче болгон. 20 Ол Кудайдыҥ берген сӧзине алаҥзыбай, бӱтпей турганын кӧргӱспеген. Карын, оноҥ тыҥ бӱдӱп, Кудайды мактап, 21 Ол кӱчтӱ, берген сӧзин бӱдӱрер деп, бек бӱткен. 22 Оныҥ учун Кудай оны акту кижи деп адаган. 23 «Акту кижи деп адаган» деген сӧстӧр јаҥыс та ого эмес, 24 је биске де бичилген. Бис те, Иисус Кайраканысты тиргискен Кудайга бӱдӱп турган бойлорыс, акту деп ададарыс. 25 Иисус бисти акталзын деп, јазыктарыс учун ӧлӱмге берилип, тирилген.
Кудайла амыр
51 Анайдарда, бӱдӱп турганысла акту бололо, Иисус Христос Кайраканыс ажыра Кудайла амыр јӱрӱп јадыбыс. 2 Христос биске бӱдӱп турганыс ажыра јакшылыкка кирер арга берген. Бу јакшылыкта јӱрӱп, Кудайдыҥ магында туружарыска иженип турганысла мактанып јадыбыс. 3 Јаҥыс та мыныла эмес, је кыйын-шырала да мактанып јадыбыс, нениҥ учун дезе кыйын-шыра бисти чыдамкай эдип турганын билерис. 4 Чыдажып турганыста, Кудай бисти ченейт, ченелгени – ижемји берет. 5 Ижемји уйатка салбас, нениҥ учун дезе биске берилген Агару Тын ажыра сӱӱш јӱректериске урулат.
6 Христос, темдектелген ӧйдӧ, чине јок тужыбыста, Кудайга бӱтпес бис учун ӧлгӧн ине. 7 Акту кижи учун кем де ӧлӧт эмеш пе? Айса болзо, јакшы кижи учун кем де ӧлӧргӧ тидинер болор бо? 8 Је Кудай биске карузып турганын кинчектӱ тужыбыста Христос бис учун ӧлгӧни ажыра кӧргӱзет. 9 Оныҥ учун, анчада ла эмди, Оныҥ каныла акталган бойлорыс, Ол ажыра Кудайдыҥ чугулынаҥ аргадаларыс. 10 Ӧштӱлер болгон бойлорыс, Кудайла Оныҥ Уулыныҥ ӧлӱми ажыра јарашкан болзобыс, анчада ла эмди, Оныла јарашкан соҥында, Оныҥ Уулыныҥ јӱрӱми ажыра аргадаларыс. 11 Јаҥыс та бу эмес, је Иисус Христос Кайраканыс ажыра Кудайдыйы болгонысла мактанып јадыбыс. Ол бисти Кудайла јараштырган.
Адам ла Христос
12 Кинчек телекейге бир кижи ажыра келген, кинчек ажыра ӧлӱм келген. Анайып ончо улус ӧлӱмдӱ боло берген, нениҥ учун дезе ончозы кинчек эткен. 13 Кинчек телекейде Јасактаҥ озо до болгон. Је Јасак јок тушта кинчек тоого алылбайт. 14 Ӧлӱм дезе баштапкы кижи Адамнаҥ ала Моисейге јетире бийлеген. Ол Кудайдыҥ јакылтазын бускан Адам чылап кинчек этпеген улусты да бийлеген. Адам – эмди болотонныҥ теми.
15 Је кижиниҥ јазык эткенин Кудайдыҥ сыйына тӱҥейлеерге јарабас. Бир кижиниҥ јазыгынаҥ улам кӧп улус ӧлгӧн болзо, анчада ла Кудайдыҥ јакшылыгы ла сыйы бир Кижиниҥ – Иисус Христостыҥ јакшылыгы ажыра кӧп улуска артыктай берилет. 16 Кудайдаҥ сый нени эдип турганын, бир јазык нени эдип турганын тӱҥейлеерге јарабас. Бир кижиниҥ јазыгы учун бурулаарга јаргы болгон, Кудайдаҥ сый кӧп јазыктардаҥ улусты акту эдерге берилген. 17 Бир кижи эткен јазыктаҥ улам ӧлӱм бир кижи ажыра бийлеген. Анчада ла бир Кижи – Иисус Христос ажыра Кудайдыҥ јакшылыгыныҥ байлыгын ла акталарга сый алып, тегинге акталып турган улус јӱрӱмде бийлеер. 18 Оныҥ учун бир кижиниҥ јазыгы ончо улуска јаргы экелгени чилеп, бир Кижиниҥ акту кереги ончо улусты актап, олорго јӱрӱм берет.
19 Бир кижиниҥ уккур эмези кӧп улусты кинчектӱ эткени чилеп, бир Кижиниҥ уккур болгоны кӧп улусты акту эдер. 20 Јасак келерде, јазык кӧптӧй берген. Кинчек бойыла кожо ӧлӱм экелип, бийлей бергени чилеп, Кудайдыҥ да јакшылыгы Иисус Христос Кайраканыс ажыра бисти акту эдет. Кинчек кӧптӧй берерде, ӱргӱлји јӱрӱм берерге бийлезин деп, јакшылык там кӧптӧгӧн.
Кинчекке ӧлгӧнис, Христоско тирӱ
61 Айдарда, не деп айдарыс? Јакшылык арбындазын деп, кинчек эдип јӱрерис пе? Јок туру! 2 Бис кинчекке ӧлӱп калганыс. Айдарда, канайып кинчек эдип јӱрерис? 3 Ончобыс Христос Иисусла бирлик болорго креске тӱжеристе, Оныла кожо ӧлӧргӧ креске тӱшкенисти билбей туругар эмеш пе? 4 Креске тӱжӱп, Оныҥ ӧлӱминде кожо туружаачылар боло берип, Оныла кожо бойыбысты кӧмдис. Ол Аданыҥ мактулу кӱчиле тирилгени чилеп, бис те јаҥы јӱрӱмле јӱрели деп, анайда эткенис ол. 5 Ол чылап ӧлӱп, Оныла кожо бириккен болзобыс, Ол чылап тирилерис.
6 Бисти кинчектиҥ кулы болбозын деп, кинчегис бисти бийлебезин деп, бистиҥ јебрен кижибис Оныла кожо кере тартылганын бис билерис. 7 Ӧлӱп калган кижи кинчектеҥ јайымдалганы ол ине. 8 Христосло кожо ӧлгӧн болзобыс, Оныла кожо јӱрерис деп, бӱдӱп јадыбыс. 9 Бис билерис, тирилген Христос база ӧлбӧс: ӧлӱм Оны бийлебей јат. 10 Ол ӧлӧрдӧ, кинчекке болуп бир катап ӧлгӧн, је јӱрӱп турганы Кудайга јӱрӱп јат. 11 Анайып слер де, бойыгарды кинчекке ӧлӱп калганыгар, је Христос Иисус Кайраканыс ажыра Кудайга тирӱ деп бодогор.
12 Анайдарда, ӧлӱмдӱ эди-каныгарда кинчек бийлебезин деп, оныҥ кычаларына бакпагар. 13 Эди-каныгардыҥ ӱйелерин јаманныҥ јепсели эдип, кинчекке бербегер. Оныҥ ордына јӱрӱмге тирилген бойыгарды Кудайга беригер. Эди-каныгардыҥ ӱйелерин слерди актайтан јепсел эдип Ого беригер. 14 Кинчек слерди бийлебес, нениҥ учун дезе слерди Јасак эмес, јакшылык башкарат.
Кинчектиҥ кулдары эмезис
15 Анайдарда, не? Јасакка эмес, јакшылыкка башкартып јӱрӱп јадыбыс дейле, кинчек эдетенис пе? Јок туру! 16 Кемге бойыгарды бактыртып, кулга берип турган болзогор, ого кул боло берип турганыгарды билбей туругар эмеш пе? Ол эмезе ӧлӱмге барарга багадыгар, ол эмезе акталайын деп багадыгар. 17 Башкыда кинчектиҥ кулдары болгоныгар, је Кудайга баш, бойыгарды учурлаган ӱредӱге бастыра јӱрегеердеҥ бактыгар. 18 Кинчектеҥ јайымдалып, чын эдип јӱрерге, Кудайдыҥ кулдары боло бердигер.
19 Бойыгар аайлап болбос учун мыны улустыҥ шӱӱгени чилеп айдып турум. Азыйда јарамас керектер эдерге, эди-каныгардыҥ ӱйелерин быјарга ла јарамаска кул эдип берген эдигер. Анайда эмди де, чындык керектер эдерге, бойыгарды Кудайга учурлайын деп, ӱйелеригерди бактырыгар.
20 Кинчектиҥ кулдары болороордо, чынга бакпаганыгар. 21 Ол тушта эткен керектереердиҥ турултазы кандый болгон? Эмди ол керектер учун слерге уйатту, нениҥ учун дезе олордыҥ турултазы – ӧлӱм. 22 Је эмди кинчектеҥ јайымдалып, Кудайдыҥ кулдары боло берип, агарулалып јадыгар. Мыныҥ турултазы – ӱргӱлји јӱрӱм. 23 Кинчектиҥ јалы – ӧлӱм ине, Кудайдаҥ сыйы – Христос Иисус Кайраканыс ажыра ӱргӱлји јӱрӱм.
Јасактаҥ јайымдалдыс
71 Слерге, карындаштар, Јасакты билер улуска, айдып турум: кижи тирӱ јӱргенде, оны Јасак башкарып турганын билбейдигер эмеш пе? 2 Айылду ӱй кижи тирӱ јӱрген ӧбӧӧниле Јасакла колболгон. Је ӧбӧӧни јада калза, ол ӧбӧӧниле колбогон Јасактаҥ јайымдалат. 3 Оныҥ учун, ӧбӧӧни тирӱ јӱрерде ӧскӧ кижиге барза, балыр јӱрӱмдӱ ӱй кижи болор. Је ӧбӧӧни јада калза, ол Јасактаҥ јайым, ӧскӧ кижиге барып, балыр јӱрӱмдӱ ӱй кижи болбос.
4 Анайып слер де, карындаштарым: Христостыҥ эди-каны ажыра Јасакка ӧлдигер. Слер тирилген Христостыйы болорго ӧлдигер. Анайып, Кудайга јарамыкту керектер эдер аргагар бар. 5 Бӱткен бӱдӱмисле јӱреристе, Јасак ажыра ачылган кинчектӱ кычалар биске ӧлӱмди экелерге, ӱйелеристе бойыныҥ ижин эткен. 6 Је эмди бис Јасактаҥ, бисти киженде туткан ончо немедеҥ јайымдалдыс. Оныҥ учун бичилген Јасакка эмес, Тынга башкартып, Кудайга јаҥыдаҥ јалчы болуп јадыбыс.
Јасак ла кинчек
7 Айдарда, не деерибис? Јасак – ол кинчек пе? Јок туру! Је Јасак эмес болзо, кинчек ол не дегенин билбес эдим. Јасак: «Кӱӱнзебе...» – дебеген болзо, андый кӱӱнзешти билбес эдим. 8 Кинчек дезе јакылтага тайанып, бойымда јӱзӱн-базын кӱӱнзештерди ойгоскон. Јасак јокко кинчек јӱрбей јат ине.
9 Мен качан да Јасак јокко јӱргем. Је јакылта табыларда, кинчек тынданып келген, 10 мен дезе ӧлӱп калгам. Јӱрӱм берер јакылта меге чындаптаҥ ӧлӱм экелгени јарталган. 11 Кинчек дезе јакылтага тайанып, мени тӧгӱндеп, оныҥ болужыла ӧлтӱрип койгон. 12 Оныҥ учун Јасак агару, јакылта агару, чын ла јакшы.
13 Анайдарда, јакшы меге ӧлӱм экелди эмеш пе? Јок туру! Карын, мыны кинчек эткен, ол кинчек болуп ачыларга, јакшыны тузаланып, меге ӧлӱм экелген. Кинчек канча кире јаман болгонын јакылта ажыра кӧргӱзерге, анайда болгоны ол. 14 Јасак тынга айдат деп, бис билерибис. Мен дезе эт-канду кижи, кинчекке садылгам. 15 Нени эдип турганымды аайлабайдым. Эдейин дегенди, этпейдим, нени кӧрӧр кӱӱним јок, оны эдедим. 16 Этпейин дегенди эдип турган болзом, Јасак јакшы деп, јӧпсинип јадым.
17 Оныҥ учун мыны мен эдип турган эмезим, је менде јӱрген кинчек эдет. 18 Мен билерим, менде, мениҥ бойымда јакшы јӱрбей јат. Менде јакшыны эдер кӱӱн бар, је оны эдерге менде јакшы јок. 19 Эдейин деген јакшыны, этпейдим, этпейин деген јаманды, эдедим. 20 Этпейин дегенди эдип турган болзом, мыны мен эдип турган эмезим, је менде јӱрген кинчек эдип јат.
21 Анайдарда, јасакты кӧрӱп турум: јакшыны эдейин деген бойымда јаҥыс јаман бар. 22 Ичимдеги кижи Кудайдыҥ Јасагына сӱӱнип јат, 23 је эди-каным ӧскӧ јасакла јӱрӱп јат. Ол санаам јарадып турган јасакка удура тартыжып, эди-канымдагы кинчектӱ јасакка мени олјолоп јат. 24 Бараксанды мени! Ӧлӱмге экелеечи бу эт-каннаҥ мени кем јайымдаар? 25 Кудайымга алкыш-быйаным, Ол мыны Иисус Христос Кайраканыс ажыра эткен.
Анайдарда, мен бойым бойымныҥ санаамла Кудайдыҥ Јасагына кул, је эди-канымла кинчектиҥ јасагына кул.
Тынла агарулалган јӱрӱм
81 Анайдарда, Христос Иисусла кожо эт-канга эмес, Тынга башкартып јӱрген улусты јаргы бурулап болбос. 2 Христос Иисус ажыра јӱрӱм берип турган Тынныҥ јасагы мени кинчектиҥ ле ӧлӱмниҥ јасагынаҥ јайымдаган. 3 Эт-каннаҥ улам кӱчин јылыйткан Јасактыҥ эдип болбогонын Кудай эткен. Ол кинчектӱ эт-каныбыстый эт-канду болгон Уулын кинчек учун тайылга эдип ийип, эт-кан эдип турган кинчекти бурулаган. 4 Эт-канга эмес, Тынга башкартып јӱрген бойыбыста Јасактыҥ чындык некелтелери бӱтсин деп, Кудайдыҥ мынайда эткени бу.
5 Эт-канга башкартып јӱрген улус эт-канныҥ кӱӱнин бӱдӱрейин деп, Тынга башкартып јӱрген улус Тынныҥ кӱӱнин бӱдӱрейин деп, сананып јадылар. 6 Санаагарда эт-кан башкарып турган болзо, – ол ӧлӱм, санаагарда Тын башкарып турган болзо, – ол јӱрӱм ле амыр, 7 нениҥ учун дезе эт-канныҥ кӱӱнин бӱдӱрейин деп умзанып јӱрген кижи Кудайла ӧштӧжӧт. Ол Кудайдыҥ Јасагына бакпайт, ого багып та болбойт. 8 Эт-канга башкартып јӱрген улус Кудайга јарабас.
9 Кудайдыҥ Тыны бойыгарда јӱрген болзо, слер эт-канга эмес, Тынга башкартып јӱрӱп јадыгар. Кемде Христостыҥ Тыны јок, ол Оныйы эмес. 10 Је Христос бойыгарда јӱрген болзо, эди-каныгар кинчектеҥ улам ӧлӱмтик, тын дезе акталганыгардаҥ улам јӱрӱп јат. 11 Христосты тиргискен Кудайдыҥ Тыны бойыгарда јӱрген болзо, Оны тиргискен Кудай бойыгарда јӱрген Тыныла слердиҥ де ӧлӱмдӱ эди-каныгарды тындандырар.
12 Анайдарда, карындаштар, бисте эт-кан алдында молју јок, бис ого башкартып јӱрбес учурлу. 13 Эт-канга башкартып јӱрзегер, ӧлӱп каларыгар, эт-канныҥ кинчектӱ керектерин Тынла ӧлтӱрзегер, тирӱ јӱреригер. 14 Кудайдыҥ Тынына башкартып јӱрген ончо улус Кудайдыҥ балдары болуп јадылар. 15 Слер ойто коркып јӱрбес учурлу, слер кулданыштыҥ тынын албадыгар, је слерди Кудайга балазынып турган Тынды алдыгар. Бу Тынла «Авва, Ада!» деп, кыйгырып јадыбыс. 16 Ол ок Тын бистиҥ тынла кожо бисти Кудайдыҥ балдары деп керелейт. 17 Балдары болзобыс, Кудайдыҥ берер болгонын аларыс. Мыны Христосло кожо аларыс. Оныла кожо шыралап турган болзобыс, Оныла кожо макталарыс.
Келер ӧйдӧги мак
18 Эмдиги шырабыс, бис алар макка кӧрӧ, неге де турбас деп бодоп турум. 19 Кудай Бойыныҥ балдарын макка кӧдӱрерин ончо јайалган неме энчикпей сакып јат ине. 20 Кандый ла јайалган баштаҥы айалгазын бойыныҥ кӱӱниле эмес, Кудайдыҥ табыла јылыйткан. 21 Бойы да ӧлӱмниҥ кулданыжынаҥ јайымдалар деп, Кудайдыҥ балдарыныҥ јайымын ла магын ӱлежер деп, јайалган иженет.
22 Бис билерис, ончо јайалган эмдиге јетире кожо онтоп, кыйналып јат. 23 Јаҥыс та јайалган эмес, је бис те, Тыннаҥ баштапкы ӱрендер алган бойлорыс, Кудай бисти качан балазынарын, эди-каныбысты јайым эдерин сакып, ичибисте онтоп јадыбыс. 24 Бис иженип турганыста, аргадалганыс ол. Кӧрӱп турганыҥа иженип турган болзоҥ, ол ижемји эмес. Кӧрӱп турган немеге кем иженер? 25 Је кӧрбӧй турган немеге иженгенисте, ол тушта чыдажып сакып јадыбыс.
26 Анайда ок Тын да бисти, чине јок бойыбысты, тыҥыдат. Не деп, канайып мӱргийтенин бис билбезис. Је Тын Бойы сӧслӧ чыгара айдып болбос эттире улу тынып, бис учун јайнап јат. 27 Кудай јӱректеристи шиҥдеп, Тынныҥ санаазын билер, нениҥ учун дезе Тын агарулар учун Кудайдыҥ табыла сурап јат. 28 Бис билерис, Кудайды сӱӱп турган, Оныҥ табыла кычырылган улуска ончозы јакшыга иштеп јат. 29 Оныҥ Уулы кӧп карындаштар ортодо тун туулганы болзын деп, Кудай озолодо билип алган улузын Бойыныҥ Уулыныҥ сӱр-кеберине тӱҥей болзын деп темдектеп койгон. 30 Озолодо темдектеп койгон улусты кычырып алган; кычырып алган улусты актап койгон; актап койгон улусты макка кӧдӱрген.
Христостыҥ сӱӱжин кем де айрып болбос
31 База нени айдар? Кудай бис учун болзо, кем биске удура? 32 Ол Бойыныҥ Уулын килебей, ончобыс учун ӧлӱмге берип, Оныла кожо биске ончозын сыйлап бербес беди? 33 Кудайдыҥ талдап алган улузын кем бурулап болор? Олорды Кудай актап јат. 34 Кем јаргылап болор? Ӧлгӧн, оноҥ тирилген Христос Кудайдыҥ оҥ јанында јӱрӱп, бис учун сурап јат.
35 Бисти Кудайдыҥ сӱӱжинеҥ кем айрып койор? Ачу-корон бо, эмезе кысталаҥ ба? Истежӱ бе, эмезе торо бо? Тӱреҥи бе, јеткер бе, эмезе кылыш па? 36 Бичилген јок беди:
«Сен учун бисти кажы ла кӱн ӧлтӱредилер.
Бисти сойотон койлорго бодойдылар».
37 Је мыны ончозын биске карузып турган Кудайдыҥ болужыла јеҥип јадыбыс. 38 Ӧлӱм де, јӱрӱм де, ангелдер де, ӧрӧги јаҥдар да, эмди болуп турганы да, келер ӧйлӧрдӧ дӧ болотоны, кандый да ийде-кӱч, 39 теҥеридези де, алыс јердези де, јайалганныҥ бирӱзи де бисти Христос Иисус Кайраканыстыҥ Бойындагы Кудайдыҥ сӱӱжинеҥ айрып болбос деп, мен бӱдӱп јадым.
Кудай ла Оныҥ калыгы
91 Христос алдында чынды айдадым, тӧгӱндебей јадым. Онызын Агару Тынга башкарткан санаам керелейт: 2 меге сӱрекей эрикчил, јӱрегимде токтобос сыс. 3 Каны јаҥыс карындаштарым учун мен бойым каргышка калып, Христостоҥ айрыткан болзом кайдадым. 4 Олор Израильдиҥ улузы: олорды Кудай балазынып алган, олорго Бойыныҥ магын ачкан, кереестер ле Јасак берген, Ого бажырып јӱрерин ле Бойыныҥ сӧзин берген. 5 Олор улу адалардыҥ калдыктары, олордыҥ ортозынаҥ кижи чилеп Христос туулган. Ол ончозынаҥ ӧрӧ турган ӱргӱлји чакка алкышту Кудай. Аминь.
6 Је бу Кудайдыҥ берген сӧзи кӱчин јылыйтып салган дегени эмес. Израильдеҥ туулган ончо улус Израильдийи эмес ине. 7 Анайда ок Авраамныҥ ончо калдыктары оныҥ балдары эмес. Је мынайда айдылган: «Исаактаҥ туулганы калдыгыҥ деп адалар». 8 Ӧскӧртӧ айтса, јӱк эт-каннаҥ туулган балдар Кудайдыҥ балдары эмес, је Оныҥ берген сӧзиле туулган балдар чын калдыктар деп бодолор. 9 Бат, берген сӧс бу: «Бу ок ӧйдӧ келерим, Сарра уулду болор».
10 Је бу ончозы эмес. Ревеккала база андый болгон. Ол бир кижидеҥ – улу Исаак адабыстаҥ эки уулду болгон. 11 Олор туулгалакта, бир јакшыны эмезе бир јаманды эткелекте, Ревеккага айдылган: «Јаан уул кичӱзине јалчы болор». Анайып, Кудайдыҥ табы талдаш ажыра бӱдет, бу талдаш эткен керектердеҥ эмес, Оныҥ кычырузынаҥ камаанду. 13 Бичилгениле: «Иаковко карузый бергем, Исавты кӧрбӧй баргам».
14 Айдарда, не деерибис? Кудай чын эмес эдет эмеш пе? Јок туру! 15 Ол Моисейге айткан ине: «Быйан эдетениме, быйан эдерим, буурзайтаныма, буурзарым». 16 Оныҥ учун ончозы кижиниҥ кӱӱнинеҥ эмес, оныҥ кичеенип турганынаҥ эмес, быйан эдип турган Кудайдаҥ камаанду. 17 Ол Агару Бичикте фараонго айдат: «Сен ажыра кӱчимди кӧргӱзерим, адым јер-ӱстинде јарлалар. Оныҥ учун сени кӧдӱргем». 18 Анайдарда, Ол быйан эдейин дегенге, быйан эдет, катуландырайын дегенди, катуландырат.
Кудайдыҥ чугулы ла быйаны
19 Сен меге айтпай кайдарыҥ: «Ол база не учун бурулап турган? Оныҥ табына кем удурлажар?» 20 Је сен кем андый, кижи, Кудайла сӧс блаажарга? «Мени не керек андый эттиҥ?» – деп, эдилген неме оны эткен кижиге айдар беди? 21 Той балкаштыҥ узы бир чейинтиле чӱмдӱ јыракы ла тегин јыракы эдер јаҥы јок по?
22 Кудай дезе Бойыныҥ чугулын ла кӱчин кӧргӱзерге кӱӱнзеп, Оныҥ чугулын алып турган ла ӧлӱмге јаргылаткан улуска килеп, узак чыдашкан. 23 Ол анайда ок макка белетелген, Оныҥ быйанын алып турган улуска Бойыныҥ магыныҥ байлыгын кӧргӱзерге кӱӱнзеген. 24 Ол улус бис эдибис. Ол бисти јаҥыс та иудейлердеҥ эмес, је ӧскӧ дӧ калыктардаҥ кычырып алган. 25 Бу керегинде Ол анайда ок Осия јарлыкчы ажыра айдат:
«Мениҥ эмес калыкты, Мениҥ калыгым деп адаарым,
сӱӱбегенди, сӱӱгеним деп адаарым.
26 Мениҥ калыгым эмезигер деп айдылган јерде
олорды тирӱ Кудайдыҥ уулдары деп адагылаар».
27 Исаия дезе Израиль керегинде јарлап јат: «Израильдиҥ уулдарыныҥ тоозы талайдыҥ кумагындый да болзо, јӱк арткан-калганы аргадалар. 28 Кайракан јерде Бойыныҥ керегин тӱгезип јат, оны чынынча, јылгыр ла јана баспай бӱдӱрип койор». 29 Исаияныҥ озолодо айтканыла: «Саваоф Кайракан калдыктарыска килебеген болзо, Содомдый болор, Гоморрага тӱҥейлежер эдибис».
Христос – бӱдӱрилтер таш
30 Айдарда, не деерибис? Акту болорго јӱткӱбеген ӧскӧ калыктар акталган, Кудайга бӱткени ажыра акталган. 31 Израильдиҥ улузы дезе, Јасак ажыра акту болорго јӱткӱп, акталбаган. 32 Нениҥ учун? Бӱткениле эмес, јасакты бӱдӱргениле акту болорго јӱткигени учун. Олор бӱдӱрилетен ташка бӱдӱрилгендер. 33 Бичилгениле:
«Бат, Сиондо таш салып јадым – ого бӱдӱрилгилеер,
кайа-таш салып јадым – оноҥ улам јыгылгылаар.
Је Ого бӱдӱп турган кандый ла кижиге уйатту болбос».
101 Карындаштар! Израильдиҥ улузы аргадалзын деп, бастыра јӱрегимнеҥ кӱӱнзеп, олор учун Кудайга мӱргип турум. 2 Олор Кудайга чындык болорго сӱрекей кӱӱнзейдилер деп, керелеп турум, је мыны Ого не јараарын билбей эдип јадылар. 3 Оныҥ учун Кудай улусты канайда актап турганын билбей, акту болорго бойлоры јединерге ченежип, Ол актазын деп, Ого бакпагандар. 4 Христос – ол Јасактыҥ бӱдӱп калганы. Ол бӱдӱп турган кажы ла кижини актайт.
5 Моисей Јасак ажыра акту болоры керегинде бичийт: «Јасактыҥ јакылталарын бӱдӱрген кижи јӱрӱм јӱрер». 6 Бӱткени ажыра акту болоры керегинде Агару Бичик мынайда айдат: «Христосты јерге экелерге, теҥериге кем чыгар деп, бойыҥды сураба». 7 Ол эмезе: «Христосты ӧлгӧн улус ортодоҥ ӧрӧ алып чыгарга, алыс јерге кем тӱжер?» – деп. 8 Агару Бичик не дийт? –
«Кудайдыҥ сӧзи сеге јуук,
ол тилиҥде ле кӧксиҥде».
Улус бӱтсин деп, бис јарлыктап турган сӧс бу. 9 Иисус – ол Кайракан деп, тилиҥле јарлап, Оны Кудай тиргискен деп, јӱрегиҥле бӱдер болзоҥ, аргадаларыҥ. 10 Акталайын деп, јӱрегиле бӱдедилер, аргадалайын деп, тилиле јарлайдылар. 11 Агару Бичик айдат ине:
«Ого бӱдӱп турган кандый ла кижи уйатка тӱшпес».
12 Иудей ле еллин ортодо башказы јок, нениҥ учун дезе ончозыныҥ Кайраканы јаҥыс, Ого баштанып турган кажы ла кижиге Ол Бойыныҥ байлыгынаҥ берип јат. 13 Кайраканга баштанган кандый ла кижи аргадалар.
Израиль Сӱӱнчилӱ Јарды алынбаган
14 Је Кемге бӱтпей турган, Ого канайып баштанат? Кем керегинде укпаган, Ого канайып бӱдет? Јарлыктап турган кижи јокко канайып угат? 15 Ийилбезе, канайып јарлыктайт? Агару Бичик айдат: «Амырды, Сӱӱнчилӱ Јарды јарлап базып јӱрген улустыҥ буттары кандый кеен!» 16 Је Сӱӱнчилӱ Јарды ончо улус бойына алынбаган. Исаия айдат ине: «Кайракан! Бис айткан сӧстӧрди угала, кем бӱткен?»
17 Анайдарда, кижи Јарды угуп турганда, бӱдӱп баштайт, Христос јарлалып турганда, угат. 18 Је мен сурайдым: «Олор укпады эмеш пе?» Уккан эмей! Бичилгениле:
«Олордыҥ ӱни јер-ӱстине јайылган,
олордыҥ сӧстӧри орчылаҥныҥ кыйузына јеткен».
19 База сурайдым: «Израиль билбеди эмеш пе?» Моисей баштапкы болуп айткан:
«Калык деп адалбас калык ажыра слерди кӱнӱркедерим.
Санаа-укаазы јок калык ажыра слерди ачындырарым».
20 Исаия да чике айдат:
«Мени бедиребеген улус Мени таап алды,
Мени сурулабаган улуска ачылдым».
21 Израиль керегинде айдат: «Бакпас, кедер калыкты кычырып, кере тӱжине колдорымды јайдым».
Кудай Бойыныҥ калыгын јектебеген
111 Анайдарда, сурап турум: Кудай Бойыныҥ калыгын јектеп койды эмеш пе? Јок туру! Мен бойым да Израильдиҥ кижизи, Авраам калдыгы, Вениамин угынаҥ болорым. 2 Озолодо билер болгон калыгын Кудай јектебеген. Ол эмезе Илия Кудайга баштанып, Израильге комыдап турарда, Агару Бичик не деп айдып турганын билбезигер бе? – 3 «Кайракан! Јарлыкчыларыҥды ӧлтӱрдилер, тагылдарыҥды јемирдилер; мен јаҥыскан арттым, мениҥ де тынымды бедиреп јадылар». 4 Кудай ого нени ачкан? – «Ваалдыҥ алдына тизеленбеген јети муҥ эрди Бойыма чеберлеп алдым». 5 Анайып эмди де, Кудай Бойыныҥ јакшылыгыла талдап алган арткан-калганы чеберлелген. 6 Олор јакшылыкла талдалган болзо, эткен керектериле талдалбаган. Оноҥ башка, јакшылык чын эмес болор эди. Эткен керектериле талдалган болзо, ол јакшылык эмес; оноҥ башка, эткен керек ол керек эмес.
7 Айдарда, не? Израиль нени бедиреген, ого јединбеген. Јӱк талдалган улус ого јединген, арткан улус – катуланган. 8 Бичилгениле:
«Кудай санааларын ӧчӧмиктеп, јӱректерин мокорткон.
Бу да кӱнге јетире кӧстӧри кӧрбӧй јат,
кулактары укпай јат».
9 Давид те айдат:
«Тойлоп-јыргаганы олорго тузак, чакпыдагы јем болзын,
бу учун олор јыгылзын, кезедӱ алзын;
10 кӧрбӧскӧ, кӧстӧри карачкыланзын,
арка-белдери ӱргӱлјиге бӱгӱлип калзын».
11 Анайдарда, сурап турум: олор чек јыгыларга, бӱдӱрилди эмеш пе? Јок туру! Ол ажыра Израильдиҥ ичи кӱйзин деп, олордыҥ јыгылганы ӧскӧ калыктарга аргадаш экелген. 12 Олордыҥ јыгылганы телекейге байлык экелип, олордыҥ тӱрегени калыктарга байлык экелип турган болзо, анчада ла орныкканы оноҥ кӧп байлык экелер.
13 Слерге, ӧскӧ калыктарга, айдадым: Кудай мени ӧскӧ калыктарга ийгени учун, Ол макталзын деп, бастыра кӱчимди саларым. 14 Айса болзо, каны јаҥыс карындаштарымды кӱнӱркедип, кезигин аргадап болорым. 15 Олордыҥ јектелгени бу телекейдиҥ улузын Кудайла јараштырган болзо, Кудай јаратса, не болор? Ӧлгӧндӧргӧ јӱрӱм болор. 16 Калаштыҥ баштапкы бӧлӱги агару болзо, ончо калаш агару; тазыл агару болзо, будактары да агару.
17 Май-агаштыҥ кезик будактары сынып калган. Сен, јерлик май-агаштыҥ корбозы, олордыҥ ордына кондырылгаҥ. Сен тазылла бирлик боло берип, май-агаштыҥ јулугыла азыранып јадыҥ. 18 Айдарда, бу будактар алдында мактанба. Сенде мактанар шылтак јок, нениҥ учун дезе тазылдаҥ сен тудунып јадыҥ, тазыл сенеҥ тудунып турган эмес.
19 Сен айдарыҥ: «Мени кондырылзын деп, будактар сындырылган». 20 Јакшы. Олор бӱтпеген учун сындырылган, сен бӱдӱп турганыҥ учун јӱрӱп јадыҥ. Анайдарда, оморкобо, је коркып јӱр. 21 Кудай агашта ӧскӧн будактарга килебеген болзо, сеге килеер деп сананып туруҥ ба?
22 Анайдарда, Кудай јакшы ла кату болгонын кӧрӱп јадыҥ. Ол сынып калганга кату, је сеге јакшы. Оныҥ јакшызында јӱрӱп турган болзоҥ, Ол сеге јакшы. Оноҥ башка, сен де кезе чабыларыҥ. 23 Је байагы да улус бӱде берзе, кондырылар, олорды ойто кондырар кӱч Кудайда бар. 24 Сен ар-бӱткенинче јерлик май-агаштаҥ кезе чабылып, јакшы май-агашка ар-бӱткенге удура кондырылган болзоҥ, анчада ла тӧрӧл будактарга бойыныҥ агажына кондырыларга јеҥил болор.
25 Бойыгар керегинде бийик сананбагар деп, бу јажытты билип алыгар деп турум, карындаштар: ӧскӧ калыктардыҥ Кудай темдектеп койгон тоозы Ого келбегенче, Израильдиҥ улузы кезек ӧйгӧ катуланган. 26 Анайдарда, бастыра Израиль аргадалар, бичилгениле:
«Сионноҥ Јайымдаачы келип,
Иаковтоҥ кинчекти ырадар.
27 Кинчектерин чечсем,
олорго бу Мениҥ кереезим болор».
28 Олор Сӱӱнчилӱ Јарды алынбай, слерге болуп Кудайдыҥ ӧштӱлери болуп јадылар, је олор Кудайдыҥ талдап алган калыгы болуп артып јадылар, нениҥ учун дезе олорды Кудай улу адаларга болуп сӱӱп јат. 29 Ол Бойына кычырып алган улус керегинде шӱӱлтезин кубултпай јат, олорго берген сыйларын кайра албай јат.
30 Слер де качан да Кудайга уккур эмес болгоныгар, је эмди, олордыҥ уккур эмезинеҥ улам, Ол слерге быйан эткен. 31 Кудай слерге быйан эткени чилеп, бойлорына да быйан этсин деп, эмди олор до уккур эмес. 32 Ончо улуска быйан эдерге, ончозын Кудай уккур эместиҥ олјозына алган.
33 Э-э, Кудайдыҥ байлыгы кандый улу, ойгоры ла билими кандый тереҥ! Оныҥ шӱӱлтелерин шиҥдеер, Оныҥ јолдорын аайлаар арга јок. 34 Кайраканныҥ санаазын кем билип алган? Ого кем јӧп айдып берген? 35 Кайра јандырзын деп, Ого кем нени-нени берген бе? 36 Ончозын Ол јайаган ине, ончозы Оныҥ шылтузында ла Ого болуп јӱрет. Ого ӱргӱлји чакка мак. Аминь.
Кудайга учурлалган јӱрӱм
121 Анайдарда, карындаштар, Кудайдыҥ буурзаганына болуп јайнап турум: Кудайга јараар агару ла тирӱ тайылганы чылап, эди-каныгарды Ого беригер. Ого анайып бажырганыгар чын болор. 2 Бу телекейге эптешпегер, је санаагарды јаҥыртып, бойыгарды солыгар. Анайып, Кудай слердеҥ нени кӱӱнзеп турганын, не Ого јакшы, не јарап турганын, Оныҥ толо кеми не болгонын билип аларыгар.
3 Меге берилген јакшылыкла кажыгарга ла айдып турум: бойыгар кандый болгоныгардаҥ бийик сананбагар. Карын, кажыгарга ла Кудайдаҥ бӱдери канча кире берилгениле кеминде сананыгар. 4 Бистиҥ бир эт-каныбыста кӧп ӱйелер бар, је олор ончозы бир тӱҥей керек этпей јат. 5 Анайып бис те: бис кӧп тӧ болзобыс, Христостыҥ Бойында – бир эт-кан, је бойы бойыбыска ӱйелер болуп јадыбыс. 6 Кудай Бойыныҥ јакшылыгыла биске башка-башка јайалталар берген. Кемге Кудайдыҥ сӧзин айдары берилген, бӱдери канча кире берилгениле айтсын. 7 Кемге карындаштарга болужары берилген, болушсын. Кемге ӱредери берилген, ӱретсин. 8 Кемге кӧкӱдери берилген, кӧкӱтсин. Кемге ӱлежер јайалта берилген, ачык-јарык ӱлешсин. Кемге јаҥ берилген, кичеенип башкарзын. Кемге быйан эдери берилген, мыны јакшы кӱӱн-санаалу этсин.
9 Сӱӱжигер ару болзын. Јаманды кӧрӧр кӱӱнигер јок болзын, јакшыдаҥ тудуныгар. 10 Бой-бойыгарга карындаштар чылап эрке карузыгар, бой-бойыгарга кӱндӱ эдеринде баштапкы болыгар. 11 Мында јаантайын кичееҥкей болыгар, тынла јалбыштаныгар, Кайраканга јалчы болуп јӱригер. 12 Ижемји слерге сӱӱнчи экелзин. Ачу-корондо чыдамкай болыгар, јаантайын мӱргигер. 13 Кудайдыҥ улузы не-немедеҥ тутакту јӱрзе, ӱлежигер, кӱндӱзек болыгар. 14 Слерди истеечилерди алкагар. Алкагар, каргабагар. 15 Сӱӱнип јӱргендерле кожо сӱӱнигер, ыйлап јӱргендерле кожо ыйлагар. 16 Бой-бойыгарга санаагар јаҥыс болзын, улуркабагар, је јобожыган улуска тартылыгар, бойыгарды бийиксинбегер. 17 Кемге де јаман учун јаман этпегер. Ончо улус алдында јакшыны эдерге кичеенигер.
18 Аргалу болзогор, ончо улусла амыр јӱригер. 19 Бойыгар учун ӧчӱркебегер, кару улузым, Кудайдыҥ чугулына јер беригер. Бичилген јок беди: «Мен ӧч аларым, Мен јандыра берерим» – деп, Кайракан айдат. 20 Карын, ӧштӱӱҥ аштап турган болзо, азыра, суузап турган болзо, суу ичир. Мынайда эдип, оныҥ бажына кос јуурыҥ. 21 Јаманга јеҥдирбе, је јаманды јакшыла јеҥ.
Јаҥга багары
131 Кажы ла кижи јаҥдуга баксын, нениҥ учун дезе Кудай тургуспаган јаҥ јок. Бар јаҥдарды ончозын Кудай тургускан. 2 Оныҥ учун јаҥга удурлашкан кижи Кудайдыҥ тургусканына удурлажып јат. Удурлажып турганы, бойлорын јаргыга тӱжӱрет. 3 Јакшыны эдип јӱрген улус эмес, јаманды эдип јӱрген улус јаҥдулардаҥ коркыыр учурлу. Јаҥнаҥ коркыбайын деп турган болзоҥ, јакшыны эт, ол сени мактаар. 4 Јаҥда отурган кижи Кудайдыҥ јалчызы ине, ол сеге јакшыны эдерге иштеп јат. Јаманды эдип јӱрген болзоҥ, коркы: ол кылышты тегин алып јӱрбей јат. Ол Кудайдыҥ јалчызы, јаманды эдип јӱрген улусты јаргылайт. 5 Оныҥ учун јаҥ берилгенге багар керек, јаҥыс та кезедӱ аларым деп коркыыр эмес, је јӱрек айдып турганыла багар керек. 6 Мыныҥ учун калан да тӧлӧйдигер. Олор Кудайга јалчы болуп, јаантайын молјулу керегин бӱдӱрет.
7 Кажызына ла нени беретен, оны беригер: кемге калан, – ого калан, кемге албан, – ого албан, кемнеҥ коркыйтан, коркыгар, кемге кӱндӱ эдетен, эдигер.
Сӱӱш – ол Јасакты бӱдӱрери
8 Кемге де, нени де тӧлӱлӱ болбогор. Сок јаҥыс тӧлӱгер – ол бой-бойыгарды сӱӱйтен тӧлӱ болзын, нениҥ учун дезе ӧскӧ кижини сӱӱп турганы – Јасакты бӱдӱрген. 9 Јакылталар: чайдам кылынба, ӧлтӱрбе, ууры этпе, тӧгӱндеп керелебе, ӧскӧ кижинийин кӱӱнзебе – булар ла ӧскӧлӧри де бу сӧстӧрдӧ салынган ине: «Бойыҥды бойыҥ сӱӱгеҥдий, јуугыҥды сӱӱп јӱр». 10 Сӱӱп турган кижи јуук кижизине јаманды этпес. Оныҥ учун сӱӱри – ол Јасакты бӱдӱрери.
11 Анайда эдигер, нениҥ учун дезе слер эмдиги ӧйди билеригер: биске уйкудаҥ ойгонор ӧй келген. Бис Кудайга бӱткен тужыска кӧрӧ эмди аргадалатан кӱнибис јуук. 12 Тӱн ӧдӱп калды, тӱш јууктап келди. Анайдарда, караҥуйдыҥ керектерин таштап, јарыктыҥ мылтык-јепселин кийели. 13 Бойыбысты тӱштиҥ јарыгында чылап тудуналы: јыргабайлы, аракыдабайлы, балыр, кал кылык кылынбайлы, ӧӧркӧшпӧйли, кӱйӱнбейли. 14 Куйагаар Иисус Христос Кайракан болзын. Эт-канды кичееп, оныҥ кычазын бӱдӱрбегер.
Бой-бойыгарды јаргылабагар
141 Кудайга бӱдеринде чинези јетпей турган кижини бойыгарга јуудып алыгар, кӧрӱм-шӱӱлтези керегинде оныла сӧс блаашпагар. 2 Кезик кижи ончозын јиирге јараар деп бӱдет, чине јогы, јаҥыс маала-ажын јийт. 3 Јип турганы, јибей турганды јаман кӧрбӧзин. Јибей турганы, јип турганды јаргылабазын, нениҥ учун дезе оны Кудай јуудып алган. 4 Ӧскӧ кижиниҥ кулын јаргылайтан сен кем андый? Ол бойыныҥ Кайраканы алдында турат, эмезе јыгылат. Јыгылза, тургузылар, нениҥ учун дезе Кудайда оны ойто тургузар кӱч бар.
5 Кезик кижи бир кӱнди арткан кӱндердеҥ аҥылу деп бодойт. Ӧскӧ кижиге ончо кӱндер тӱҥей. Кажы ла кижи ого бойыныҥ санаазы билип турганыла этсин. 6 Кӱндерди аҥылап турган кижи Кайраканга болуп аҥылайт, кӱндерди аҥылабай турганы Кайраканга болуп аҥылабайт. Курсак јип турган кижи Кайраканга болуп јийт, нениҥ учун дезе Кудайга алкыш-быйанын айдат. Курсак јибей турган кижи Кайраканга болуп јибей, Кудайга алкыш-быйанын айдат. 7 Кемибис те бойына болуп јӱрбейт, кемибис те бойына болуп ӧлбӧйт ине. 8 Јӱрген болзобыс, Кайраканга болуп јӱрӱп јадыбыс. Ӧлӱп јаткан болзобыс, Кайраканга болуп ӧлӱп јадыбыс. Анайдарда, јӱргенис пе, ӧлӱп јатканыс па, – бис Кайракандыйы. 9 Оныҥ учун ӧлгӧн дӧ, тирӱ де улусты бийлеерге, Христостыҥ ӧлгӧни де, тирилгени де, тынданганы да ол.
10 Сен дезе карындажыҥды не јаргылайдыҥ? Эмезе сен? Карындажыҥды не јаман кӧрӱп јадыҥ? Ончобыс Христостыҥ јаргызы алдына турарыбыс. 11 Бичилген јок беди: «Мен бар, – деп, Кайракан айдат, – Мениҥ алдыма кажызы ла тизеленер, кажы ла тил Мени Кудай деп, ачыгынча айдар». 12 Анайдарда, кажыбыс ла бойы учун Кудайдыҥ алдына каруу берер. 13 Оныҥ учун бойы бойыбысты јаргылабайлы. Карын, карындажыска бӱдӱрилер эмезе јыгылар шылтак болбойлы деп сананыгар.
14 Мен билерим, меге Иисус Кайракан бӱдӱмји берип јат: ончо неме бойы алдынаҥ ару эмес болбой јат. Је кандый бир немени ару эмес деп бодогон кижиге ол ару эмес. 15 Кандый бир курсакты јип, мынызыла карындажыҥды ӧӧркӧдип турган болзоҥ, сен сӱӱштиҥ айтканыла этпей јадыҥ. Анайып курсагыҥла карындажыҥа јаман эдип јадыҥ, Христос бу карындажыҥ учун база ӧлгӧн ине. 16 Јакшы деп бодогоноорды кижи јамандабазын. 17 Кудайдыҥ Каандыгы ол ичип-јийтени эмес ине. Је ол – Агару Тын ажыра берилип турган чындык, амыр ла сӱӱнчи. 18 Христоско мынайда јалчы болуп турган кижи Кудайга јарап јат, оны улус јарадып јат.
19 Анайдарда, биске амырды экелип, бой-бойыбысты тыҥыдып турганга јӱткӱйли. 20 Кудайдыҥ эдип турганын курсакка болуп буспа. Ончо курсак ару. Је ӧскӧ кижини бӱдӱрилтип јип турган кижиге – јаман. 21 Карындажыҥды бӱдӱрилтип, эмезе јилбиркедип, эмезе кинчекке кийдирип турган болзо, эт јибезеҥ, аракы ичпезеҥ, ӧскӧзин де этпезеҥ – торт.
22 Бӱдӱп турган болзоҥ, бойыҥда бойыҥ Кудайдыҥ алдында бӱт. Чынга бодогонын эдип, бу учун бойын јаргылабай турган кижи кежиктӱ болгоны ол. 23 Эреҥистелип, је курсакты јип турган кижи јаргылайт, нениҥ учун дезе ол мыны бӱтпей эдет. Бӱтпей эдип турган ончо неме – ол кинчек. 24 Кудайды алкайлы! Сӱӱнчилӱ Јарым ажыра, Иисус Христостыҥ Јары ажыра чактарда јажырылган јажытты ачып, Ол слерди тыҥыдар аргалу. 25 Је эмди ончо калыктар Кудайга багып, бӱтсин деп, бу јажыт јарлыкчылардыҥ бичиктери ажыра ӱргӱлји Кудайдыҥ јакарганыла ачылган. 26 Ого, сок јаҥыс ойгор Кудайга, Иисус Христос ажыра ӱргӱлји чакка мак! Аминь.
Бойыгарга јараарыла этпегер
151 Бис, Кудайга бӱдеринде кӱчтӱ улус, бӱдеринде чине јок улустыҥ јӱгин апарыжар учурлу, бойыска јараарыла этпес учурлу. 2 Кажыбыс ла јуук кижибиске јараарыла эдип, ол Кудайга бӱдеринде ӧссин деп, ого јакшыны эдер учурлу. 3 Христос то Бойына јараарыла этпеген, карын, бичилгениле: «Сени јамандаган улустыҥ јамандажы Меге тӱшкен».
4 Башкыда ончо бичилгени бисти ӱредерге бичилген. Бис олордоҥ чыду ла кӧкӱдӱ алып, ижемјибисти јылыйтпазыбыс. 5 Чыду ла кӧкӱдӱ берип турган Кудай дезе, Христос Иисуска јараарыла, санаагарды јаҥыс этсин, 6 санаагар јаҥыс болуп, бир ӱнле Кудайды, Иисус Христос Кайраканыстыҥ Адазын, мактазын деп.
7 Оныҥ учун Кудай макталзын деп, слерди Христос јуудып алганы чылап, бой-бойыгарды јуудып турыгар. 8 Кудайдыҥ чындыгына болуп Иисус Христос иудей калыкка јалчы боло бергенин слерге айдып турум. Анайып, Ол улу адаларга берген сӧсти бӱдӱрген. 9 Ӧскӧ калыктарга дезе, олор Кудайды мактазын деп, быйан эдип јалчы боло берген, бичилгениле:
«Оныҥ учун Сени кара јаҥдулар ортодо мактаарым,
Сеге сарындар сарнаарым».
10 База айдылган:
«Оныҥ калыгыла кожо јыргагар, ӧскӧ калыктар!»
11 База:
«Кайраканды мактагар, ончо ӧскӧ калыктар!
Оны макка чыгарыгар, ончо калыктар!»
12 База Исаия айдат:
«Ол Иессейдиҥ тазылынаҥ чыгып,
калыктарды башкарарга келер.
Ого калыктар иженер».
13 Агару Тынныҥ кӱчиле ижемјигер там кӧптӧзин деп, ижемји берип турган Кудай Ого бӱткенигер ажыра слерди кандый ла сӱӱнчиле, амырла толтырзын.
Павелдиҥ ижи
14 Бойым да слерге бӱдӱмјилӱ, карындаштарым: слер јакшыла толо, ончозын билип, бой-бойыгарды ӱредер аргагар бар. 15 Је мен слерге, карындаштар, бир кезик немелерди эске алындырарга тидим бичидим, нениҥ учун дезе Кудайдаҥ меге берилген јакшылыкла 16 Иисус Христостыҥ абызы болуп, ӧскӧ калыктар ортодо абыстап, Сӱӱнчилӱ Јар јарлап јадым. Олор Агару Тынла агарулалып, Кудайга јараар тайылга боло берзин деп, мыны эдип јадым.
17 Анайдарда, Кудайга эткен керектеримле Иисус Христос ажыра мактанар аргам бар. 18 Ӧскӧ калыктарды Кудайга уккур болорына экелерге, Христос мен ажыра нени эткен, јӱк оны тидим айдып јадым. Ол мыны сӧслӧ, керекле, 19 билдилердиҥ ле кайкалдардыҥ кӱчиле, Кудайдыҥ Тыныныҥ кӱчиле эткен. Анайып, Иерусалимнеҥ ала Иллирикке јетире Христостыҥ Сӱӱнчилӱ Јарын јарлыктаар аргалу болгом. 20 Айла, Христостыҥ адын улус уккалак јерлерде јарлыктаарга кичеенгем, ӧскӧ кижи салган тӧскӧ неме тутпайын деп, 21 бичилгениле:
«Христос керегинде кемдерге јарлалбаган, олор кӧрӧр,
кемдер укпаган, олор аайлаар».
22 Слерге кӧп катап келерге санангам, је јӱзӱн-башка шылтактардаҥ улам келишпеген. 23 Эмди бу ороондордо мен јарлыктабаган јер артпаган. Слерге кӧп јылдардыҥ туркунына келерге кӱӱнзегеним учун 24 Испания јаар атанып, слерге келерим. Слерле јолой кӧрӱжерим деп, иженип турум. Бир кезек ӧйгӧ дӧ болзо слерле кожо болуп, сӱӱнип алзам, оноҥ ары барарга мени јолго шыйдыырыгар.
25 Эмди агаруларга болужайын деп, Иерусалим јаар барып јадым. 26 Керек неде дезе, Македонияныҥ ла Ахаияныҥ серкпелери Иерусалимдеги јокту агаруларга болуш јетирерге кӱӱнзегендер. 27 Мыны бойлоры эдерге кӱӱнзегендер. Је олор мыны эдер учурлу болгон. Иудейлер Тыннаҥ берилген байлыкла ӧскӧ калыктарла ӱлешкен болзо, ӧскӧ калыктар олорго јердеги байлыкла болужар учурлу.
28 Бу јакылтаны бӱдӱрип, јууганымды олорго јетирзем, Испания јаар атанып, јолой слерле туштажарым. 29 Слерге келзем, Христостыҥ Сӱӱнчилӱ Јарыныҥ алкыжын толтыра экелерим деп, билип јадым.
30 Иисус Христос Кайраканыска болуп, Агару Тын берип турган сӱӱшке болуп слерди сурап турум, карындаштар: мен учун Кудайга мӱргип, мениҥ тартыжуумда мениле кожо болыгар. 31 Ол мени Иудейдеги бӱтпестердеҥ айрызын деп, Иерусалимге эткенимди ондогы агарулар јаратсын деп, 32 Кудайдыҥ табы болзо, мени слерге сӱӱнчилӱ келип, слерле кожо амырап алзын деп мӱргигер. 33 Амырдыҥ Кудайы ончогорло кожо болгой. Аминь.
Эзен айттырыштар
161 Слерди Фивала таныштырып турум. Ол бистиҥ эјебис, Кенхреадагы серкпениҥ болушчызы. 2 Оны агарулар чылап, Кайраканныҥ улузы чылап уткып, не-немедеҥ тутакту болзо, болужыгар. Ол бойы кӧп улуска, меге де болушкан.
3 Прискиллага ла Акилага эзен айдыгар. Олор мениле кожо Иисус Христоско иштеп јӱрген улус. 4 Олордыҥ јӱрӱми мен учун јеткердиҥ алдында болгон. Олорго јаҥыс та мен эмезим, је ӧскӧ калыктардыҥ ончо серкпелери быйанду. 5 Анайда ок олордыҥ айлындагы серкпеге эзен айдыгар.
Сӱӱген Епенет карындажыма эзен айдыгар. Ол Ахаяда Христоско бӱткен баштапкы кижи болор.
6 Мариамга эзен айдыгар. Ол биске кӧп иштеген.
7 Угы јаҥыс Андроникке ле Юнияга эзен айдыгар. Бу улус мениле кожо кижендӱ болгондор. Олор апостолдор ортодо јарлу улус, менеҥ озо Христостыйы боло бергендер.
8 Кайраканныҥ Бойында сӱӱген Амплий карындажыма эзен айдыгар.
9 Бисле кожо Христоско иштеп јӱрген Урбанга, база сӱӱген Стахий карындажыма эзен айдыгар.
10 Христоско чындык болгоны ченелген Апеллеске эзен айдыгар. Аристовулдыҥ айылдагы улузына эзен айдыгар.
11 Угы јаҥыс Иродионго эзен айдыгар. Наркисстиҥ айлындагы улузынаҥ Кайракандыйы болгондорго эзен айдыгар.
12 Трифенага ла Трифосага эзен айдыгар. Бу ӱй улус Кайраканга кӧп иштеген. Сӱӱген Персида эјебиске эзен айдыгар. Ол база Кайраканга кӧп иштеген.
13 Кайракан талдап алган Руфка, база мениҥ де энейим боло берген оныҥ энейине эзен айдыгар.
14 Асинкритке, Флегонтко, Ермга, Патровко, Ермийге ле олорло кожо јӱрген ӧскӧ дӧ карындаштарга эзен айдыгар.
15 Филологко, Юлияга, Нирейге ле оныҥ эјезине, Олимпанга ла олорло кожо јӱрген ончо агаруларга эзен айдыгар.
16 Бой-бойыгарла агару окшошло эзендежигер.
Слерге Христостыҥ ончо серкпелери эзен айдып турулар.
17 Слерди сурап турум, карындаштар: слер алган ӱредӱге удурлажып, слерди бӧлип, бӱдеринде буудак эдип турган улустаҥ чеберленигер, олордоҥ кыйыжыгар. 18 Андый улус Иисус Христос Кайраканыска эмес, боро кардына болуп иштеп јадылар. Олор тату, јараш сӧстӧр айдып, сӱмеленип билбес улусты астырадылар. 19 Кайраканга уккур болгоныгарды ончо улус билер. Оныҥ учун слер учун сӱӱнип турум. Је јакшы керектерге ойгор болыгар, јаман керектерге ару болыгар деп кӱӱнзейдим. 20 Амырдыҥ Кудайы саадабай будыгардыҥ алдына сатананы јыга бассын. Иисус Христос Кайраканыстыҥ јакшылыгы слерле кожо болзын! Аминь.
21 Слерге мениле кожо иштеп јӱрген Тимофей, угы јаҥыс Луций, Иасон ло Сосипатр эзен айдып турулар.
22 Бу самараны бичип алган мен де, Тертий, слерле Кайракан ажыра бирлик бойым, слерге эзен айдып турум.
23 Слерге Гаий эзен айдып туру. Ол мени ле ончо серкпени бойыныҥ айлында уткыган кижи болор.
Слерге каланыҥ керектерин башкарып турган Ераст ла Кварт карындаш эзен айдып турулар. 24 Иисус Христос Кайраканыстыҥ јакшылыгы слерле кожо болгой. Аминь.