Иоаннга болгон ачылта
Сӧс бажы
11 Иисус Христостоҥ болгон ачылта. Бу ачылтаны Ого удабастаҥ не болотонын Бойыныҥ кулдарына кӧргӱзейин деп, Кудай берген. Ол мыны Бойыныҥ ангели ажыра Бойыныҥ Иоанн кулына ийип кӧргӱскен. 2 Иоанн нени кӧргӧнин ончозын айдып туру: Кудайдыҥ сӧзи керегинде, ого Иисус Христос ачкан чындык керегинде.
3 Бу судур сӧстӧрди кычырып турганы ла угуп тургандары, анда бичилгенин чеберлеп тургандары кежиктӱ, нениҥ учун дезе ӧй јууктап келди.
4 Иоаннаҥ – Асиядагы јети серкпеге. Слерге бар, болгон ло келип јаткан Кудайдаҥ, Оныҥ ширеези алдында јӱрген јети тыннаҥ, 5 база чындык керечи, ӧлгӧндӧр ортодо баштапкы тирилген, јердеги каандардыҥ Башчызы Иисус Христостоҥ јакшылык ла амыр јетсин. Ол биске карузып јат, бисти Бойыныҥ каныла кинчектеристеҥ јунган. 6 Ол Кудайга, Бойыныҥ Адазына, бисти каандар ла абыстар эткен. Ого ӱргӱлји чакка мак ла кӱч! Аминь.
7 Бат, Ол булутла келер, Оны кандый ла кӧс, Оны јыдала сайгандары да, кӧрӱп ийер, јердиҥ ончо ук-калыктары Оныҥ алдында сыктажар. Чын, аминь.
8 «Мен – Альфа ла Омега, бажы ла учы» – деп, Кудай Кайракан айдат, бар, болгон ло келип јаткан кӱчтӱдеҥ кӱчтӱ Кудай.
9 Мен, Иоанн, Иисус Христостыҥ Бойындагы карындажыгар, кыйын-шырада, каандыкта ла чыдуда слерле кожо туружаачы бойым, Кудайдыҥ сӧзи учун, Иисус Христостыҥ керези учун Патмос дейтен ортолыкта болуп калгам. 10 Мен Кайраканныҥ кӱнинде Тынга алдыртып, кийнимде амыргыныҥ ӱни ошкош тыҥ ӱнди угуп ийгем, ол айткан:
– Мен – Альфа ла Омега, Баштапкы ла Калганчы. 11 Кӧрӱп турганыҥды тӱрбекке бичип, јети серкпеге ий: Ефеске, Смирнага, Пергамга, Фиатирге, Сардиске, Филадельфияга, Лаодикияга.
12 Меге айткан ӱн кемдийи деп кӧрӧргӧ, кайра баштангам. Кайра баштанала, јети алтын јарыткышты, 13 јети јарыткыштыҥ ортозында Кижи Уулына тӱҥейди кӧрӱп ийгем. Ол узун эдектӱ кеп кийген, кӧгӱстей алтын кур курчанган. 14 Бажындагы чачы ак тӱктий, кардый апагаш, кӧстӧри – оттыҥ јалбыжындый. 15 Буттары јестий, печкеде кызыгандый, ӱни – кӧп суулардыҥ табыжындый. 16 Оҥ колында јети јылдыс тудунып алган, оозынаҥ эки мистӱ кылыш чыгып турган. Чырайы – јаркынду чалыган кӱндий.
17 Оны кӧрӧлӧ, будына ӧлгӧндий барып тӱшкем. Ол меге оҥ колын салып, айткан:
– Коркыба, Мен – Баштапкы ла Калганчы, 18 база Јӱргени. Ӧлгӧм, је бат, ӱргӱлји чакка тирӱ, аминь. Менде таамыныҥ ла ӧлӱмниҥ тӱлкӱӱри бар. 19 Анайдарда, кӧргӧниҥди бичи: не барын, мыныҥ соҥында не болорын. 20 Сен кӧргӧн оҥ колымдагы јети јылдыстыҥ ла јети алтын јарыткыштыҥ јажыды бу: јети јылдыс – јети серкпениҥ ангелдери, сен кӧргӧн јети јарыткыш – јети серкпе.
Ефестеги серкпеге
21 – Ефестеги серкпениҥ ангелине бичи: оҥ колында јети јылдыс тудунып алганы, јети алтын јарыткыштыҥ ортозыла базып јӱргени мынайда айдат: 2 «Эдип јӱрген керектериҥди, уур ижиҥди де, чыдууҥды да билерим. Анайда ок јаман улусты кӧрӱп албазыҥды, бойлорын апостолдор деп аданган улусты ченеп, олор тӧгӱнчи болгонын јартына чыкканыҥды билерим. 3 Сенде чыду бар, Меге болуп сеге кӧпти ӧдӧргӧ келишкен, је сен јобобогоҥ.
4 Је сеге удура айдатаным бар: сен баштапкы сӱӱжиҥди јылыйтып койгоҥ. 5 Анайдарда, кайдаҥ јыгылганыҥды эзеп, кинчегиҥди алынып, башкыдагы керектерди эт. Андый эмес болзо, кинчегиҥди алынбазаҥ, удабас сеге келип, јарыткыжыҥды јеринеҥ јылдырып койорым. 6 Је сенде јакшызы бар, ол – николаиттердиҥ эдип јӱрген керектерин Мен чилеп јаман кӧрӱп турганыҥ.
7 Тын серкпелерге нени айдып турганын кулакту кижи уксын: јеҥип турганга Кудайдыҥ райында ӧзӱп турган јӱрӱм агажынаҥ јиирге берерим».
Смирнадагы серкпеге
8 – База Смирнадагы серкпениҥ ангелине бичи: ӧлгӧн Бойы тынданган Баштапкы ла Калганчы мынайда айдат: 9 «Сениҥ керектериҥди, кыйыныҥды да, тӱреҥиҥди де (чындап, сен бай) билерим, је сен бай эмейиҥ. „Иудейлер бис“ дешкендердиҥ јамандаганын да билерим. Олор иудейлер де эмес, сатананыҥ јууны. 10 Сеге ӧдӧтӧн кыйын-шырадаҥ коркыба. Бат, кӧрмӧс слерди ченейин деп, ортогордоҥ кезигерди тӱрмеге сугар. Слер он кӱн кыйналарыгар. Ӧлӧргӧ јетире чындык бол, кайрал эдип сеге јӱрӱм берерим.
11 Тын серкпелерге нени айдып турганын кулакту кижи уксын: јеҥип турганы экинчи ӧлӱмнеҥ каршу албас».
Пергамдагы серкпеге
12 – База Пергамдагы серкпениҥ ангелине бичи: эки мистӱ кылыштузы мынайда айдат: 13 «Сениҥ керектериҥди, сатананыҥ ширеези турган јерде јуртаганыҥды билерим. Анайда ок Меге чындык болгоныҥды, керек дезе слерде, сатана јуртаган јерде, чындык Антипа керечим ӧлтӱртип койордо, Меге бӱткениҥнеҥ јана тӱшпегениҥди де билерим.
14 Је сеге эмеш удура айдатаным бар: сенде Валаамныҥ ӱредӱзинеҥ тудунган улус бар. Ол Израильдиҥ улузы чалуга тайганды јип, балыр јӱрӱм јӱрзин деп, олорды астырарга Валакты ӱредип койгон. 15 Анайда ок сенде де Мениҥ кӧрӧр кӱӱним јок николаиттер ӱредӱзинеҥ тудунган улус бар. 16 Анайдарда, кинчегиҥ алын. Алынбазаҥ, удабастаҥ сеге келип, оозымныҥ кылыжыла ол улусла јуулажарым.
17 Кулакту кижи уксын, Тын серкпелерге нени айдып турганын: јеҥип турганга јажытту манна јиирге берерим, база ак-таш, ташка бичилген јаҥы атла адаарым. Алып јатканнаҥ башка, ол атты кем де билбес».
Фиатирдеги серкпеге
18 – База Фиатирдеги серкпениҥ ангелине бичи: кӧзи болзо от јалбыжындый, буды болзо јестий Кудайдыҥ Уулы мынайда айдат: 19 «Эдип јӱрген керектериҥди, сӱӱжиҥди де, бӱдӱмјиҥди де, Кудайга јалчы болуп јӱргениҥди де, чыдууҥды да билерим, калганчы керектериҥ баштапкызынаҥ јаан болгонын да билерим.
20 Бойын јарлыкчы деп аданып турган Иезавель деп ӱй кижиниҥ табына салдырып турганыҥ учун сеге удура айдатаным бар. Ол Мениҥ кулдарымды ӱредип, балыр кылынзын, чалуга тайганды јизин деп, астырып јат. 21 Мен ого балыр кылыныжында кинчегин алынар ӧй бергем, је ол кинчегин алынбаган. 22 Бат, ол эдип јӱрген керектериниҥ кинчектерин алынбаза, Мен оны оору-јоболдыҥ тӧжӧгине, оныла кожо балыр кылынып јӱргендерди улу ачу-коронго таштап јадым. 23 Балдарын да ӧлтӱрерим, Мен – кижиниҥ санаазын ла јӱрегин ченеечи деп, ончо серкпелер билип алар. Кажыгарга ла эткен керектеригер аайынча јандыра берерим. 24 Слерге дезе, база бу ӱредӱдеҥ тудунбай турган, сатананыҥ тереҥ јажыттары дегенди билбес Фиатирдеги арткан улуска, айдып турум: слерге ӧскӧ јӱк артпазым. 25 Је келгенчем, бойыгарда барын бек тудыгар.
26 Јеҥип, Мениҥ керектеримди учына јетире бӱдӱрип турган кижиге калыктардыҥ бажын билер јаҥ берерим. 27 Ол калыктарды темир тайакла кабырар, той балкаштаҥ эткен јыракыларды чылап оодор. Мен де Адамнаҥ јаҥ алганым чылап, 28 ого таҥ чолмонды берерим.
29 Тын серкпелерге нени айдып турганын кулакту кижи уксын».
Сардистеги серкпеге
31 – База Сардистеги серкпениҥ ангелине бичи: Бойында Кудайдыҥ јети тыны ла јети јылдыс бары мынайда айдат: «Эдип јӱрген керектериҥди билерим. Сен тирӱ болгоҥдый ат аданып јӱредиҥ, је сен ӧлӱп калгаҥ. 2 Ойгу бол, сенде арткан-калганды, ӧлӱп те јаткан болзо, тыҥыт. Эдип јӱрген керектериҥ Кудайым алдында чындаптаҥ јакшы болгонын кӧрбӧй турум. 3 Оныҥ учун нени алганыҥды ла нени укканыҥды эске ал, чеберлеп, кинчегиҥ алын. Ойгу болбозоҥ, уурчы чылап келерим, сеге кандый ӧйдӧ келеримди билбезиҥ.
4 Је сенде Сардисте кийимин быјарсытпаган бир канча кижи бар. Мениле кожо ак кийимдӱ базып јӱргӱлеер, нениҥ учун дезе олор бого јарамык. 5 Јеҥип турганы ак кийим кийер. Оныҥ ады-јолын јӱрӱм тӱрбегинеҥ кырбазым, Адам алдында ла Оныҥ ангелдери алдында оныҥ адын јарлаарым.
6 Тын серкпелерге нени айдып турганын кулакту кижи уксын».
Филадельфиядагы серкпеге
7 – База Филадельфиядагы серкпениҥ ангелине бичи: Агару, Чындык дегени, ачса, кем де јаап болбос, јапса, кем де ачып болбос Давидтиҥ тӱлкӱӱри бары мынайда айдат: 8 «Эдип јӱрген керектериҥди билерим. Бат, сениҥ алдыҥда эжикти ачтым, оны кем де јаап болбойт. Сениҥ кӱчиҥ ас, је Мениҥ сӧзимди чеберлеп, Мениҥ адымла аданарынаҥ јана тӱшпегеҥ. 9 Бат, сеге сатананыҥ јуунынаҥ бир кезик улусты ийип јадым. Олор бойлорын иудейлер дейдилер, је олор иудейлер эмес, тӧгӱндеп јат. Бат, Мен келип, олорды сениҥ будыҥныҥ алдына бажыртарым. Ол тушта Мен сеге карузып турганымды билип алгылаар. 10 Мениҥ айтканымла чыдамкай болгоҥ. Оныҥ учун ченелте ӧйинеҥ Мен де сени чеберлеп аларым. Ол ӧй јерде јуртагандарды ченеерге, бастыра телекейге келер.
11 Удабастаҥ келерим. Кайралыҥды кижи албазын деп, не барыҥды бек тут. 12 Јеҥип турганды Кудайымныҥ байзыҥында бакана эдерим, ол оноҥ база чыкпас. Ого Кудайымныҥ адын, Кудайымныҥ калазыныҥ – Кудайымнаҥ теҥеридеҥ тӱжӱп јаткан Иерусалимниҥ адын ла Мениҥ јаҥы адымды бичиирим.
13 Тын серкпелерге нени айдып турганын кулакту кижи уксын».
Лаодикиядагы серкпеге
14 – База Лаодикиядагы серкпениҥ ангелине бичи: Аминь дегени – чындык ла чын керечи, Кудай јайаганныҥ баштамызы мынайда айдат: 15 «Эдип јӱрген керектериҥди билерим. Сен соок то, изӱ де эмезиҥ. Э-э, сен соок эмезе изӱ болгон болзоҥ! 16 Је сен јылузымак, изӱ де, соок то эмес болорыҥда, сени оозымнаҥ кустырып ийерим. 17 Сен айдадыҥ: „Мен бай, байыгам, немедеҥ тутабай јадым“. Је сен бойыҥды кежик јок, ич ачыыр, тӱреҥи, сокор ло јылаҥаш деп билбейдиҥ. 18 Сеге јӧп берип турум: байыырга, Менеҥ отло аруталган алтын садып ал, кийип аларга ла уйатту јылаҥажыҥ кӧрӱнбезин деп, ак кийим садып ал, кӧрӧргӧ, кӧзиҥди сӱркӱшле сӱртӱп ал.
19 Карузып турган улузымныҥ кинчектерин ачып, кезедедим. Анайдарда, кичееҥкей бол, кинчегиҥ алын.
20 Бат, эжик јанында туруп, токылдадып јадым. Ӱнимди угуп, эжигин ачкан кижиге кирип, оныла кожо ажанарым, ол до Мениле кожо ажанар. 21 Јеҥип турганды Мениле кожо ширееме отургузарым. Мен де јеҥип, Адамла кожо Оныҥ ширеезине отурып алгам. 22 Тын серкпелерге нени айдып турганын кулакту кижи уксын».
Кудайдыҥ ширеези алдында
41 Мыныҥ кийнинде теҥериде ачык эжикти кӧрӱп ийгем. Мен уккан, меге баштанган амыргыныҥ ӱни ошкош байагы ӱн айткан:
– Бери чык, мыныҥ кийнинде не болорын кӧргӱзейин.
2 Мен ол тарый Тынга алдыртып, теҥериде ширее турганын, ширееде Отурганды кӧрӱп ийгем. 3 Бу Отурганы бӱдӱмиле яспис ле сардис деп таштарга тӱҥей болгон, ширеени эбире солоҥы смарагд таш чылап мызылдаган. 4 Ширеени эбире јирме тӧрт ширее, ширеелерде отурган јирме тӧрт башчы. Олор ак кийимдӱ, баштарында – алтын ӧрӱмелдер. 5 Ширеедеҥ јалкын јалтылдап, ӱндер угулып, кӱкӱрт кӱркӱреп турган. Ширеениҥ алдында отту јети јарыткыш – Кудайдыҥ јети тыны. 6 Ширеениҥ алдында мӧлтӱр ташка тӱҥей ару шил талай. Ширее ортодо ло ширеени эбире алын ла кийин јанында кӧп кӧстӧрлӱ тӧрт тынду. 7 Баштапкы тынду арсланга тӱҥей, экинчи тынду бозуга тӱҥей болгон, ӱчинчи тынду кижидий чырайлу болгон, тӧртинчи тынду учуп бараткан мӱркӱтке тӱҥей. 8 Тӧрт тындуныҥ кажызы ла алтыдаҥ канатту болгон, канаттарды эбире ле ич јаны кӧп кӧстӧрлӱ. Тындулар тӱн-тӱш токтобой айдып тургандар:
– Кайракан, кӱчтӱдеҥ кӱчтӱ Кудай агару, агару, агару! Ол болгон, бар ла келип јат.
9 Тындулар ширееде Отурганга, ӱргӱлји чакка Јӱреечиге мак, кӱндӱ эдип, алкыш-быйанын јетиргенде, 10 јирме тӧрт башчы ширееде Отурганныҥ алдына јыгылып, ӱргӱлји чакка Јӱреечиге бажырып, алтын ӧрӱмелдерин ширеениҥ алдына салып, айдып тургандар:
11 – Сен, Кайракан, макты, кӱндӱни ле кӱчти аларга јарамык, нениҥ учун дезе Сен ончоны јайагаҥ, Сениҥ табыҥла ончозы јӱрет, ончозы бӱткен.
Тӱрбек ле Кураан
51 Оноҥ ширееде Отурганныҥ оҥ колында тӱрбекти кӧрӱп ийгем. Бу тӱрбекте јети таҥма базылган, ичинде ле тыштында бичилген. 2 Мен кӱчтӱ ангелди кӧрӱп ийгем, ол тыҥ ӱнденип јарлап турган:
– Тӱрбекти ачып, оныҥ таҥмазын алып ийерге кем јарамык?
3 Је теҥериде де, јерде де, јердиҥ алдында да кем де тӱрбекти ачып, ого карап кӧрӱп болбогон. 4 Тӱрбекти ачып, ого карап кӧрӧргӧ јарамык кижи табылбаган учун, мен кӧп ыйлагам. 5 Башчылардыҥ бирӱзи меге айткан:
– Ыйлаба. Бат, Иуда угынаҥ Давидтиҥ тазылы, Арслан, јеҥди. Ол бу тӱрбекти ачып, оныҥ јети таҥмазын алып ийер аргалу.
6 Мен ширее ле тӧрт тындуныҥ ортозында, башчылардыҥ ортозында Кураан турганын кӧрӱп ийгем. Ол сойылгандый болгон, јети мӱӱстӱ ле јети кӧстӱ – Кудайдыҥ ончо јерге ийилген јети тыны. 7 Ол келип, ширееде Отурганныҥ оҥ колынаҥ тӱрбекти алган. 8 Тӱрбекти аларда, тӧрт тынду ла јирме тӧрт башчы Кураанныҥ алдына кӧҥкӧрӧ тӱшкен. Кажызы ла јадаганду, фимиамла толтырылган алтын айакту болгон, бу – агарулардыҥ мӱргӱлери. 9 Олор јаҥы сарын сарнап, айдып јадылар: «Сен тӱрбекти колго аларга ла оныҥ таҥмазын алып ийерге јарамык, нениҥ учун дезе, Сен сойылып, Бойыҥныҥ каныҥла кандый ла ӱйедеҥ, тилдеҥ, калыктаҥ ла уктаҥ улусты Кудайга садып алгаҥ. 10 Сен бисти Кудайыска каандар ла абыстар эткеҥ. Бис јерде башкарарыс».
11 Мен ширеени, тындуларды ла башчыларды эбире кӧп ангелдерди кӧрӱп, ӱндерин угуп ийгем. Тоозы тӱмендердиҥ тӱмени, муҥдардыҥ муҥы болгон. 12 Олор тыҥ ӱнденип, айдыжып тургандар: «Сойылган Кураан јаҥды, байлыкты, ойгорды, кӱчти, кӱндӱӱни, макты ла алкышты аларга јарамык!»
13 Теҥериде ле јерде, јердиҥ алдында ла талайда јӱрген кандый ла јайалган, олордо бар не ле неме мынайда айдыжып турганын угуп ийгем: «Ширееде Отурганга ла Кураанга ӱргӱлји чакка алкыш, кӱндӱӱ, мак ла кӱч!» 14 Тӧрт тынду: «Аминь!» – дегендер, јирме тӧрт башчы кӧҥкӧрӧ тӱжӱп, элен-чакка Јӱреечиге бажыргандар.
Алты таҥманы алып ийгени
61 Кураан јети таҥманыҥ бирӱзин алып ийгенин кӧргӧм, тӧрт тындуныҥ бирӱзи кӱкӱрттиҥ ӱни ошкош ӱнле: «Келип, кӧр!» – дегенин уккам. 2 Мен ак атты кӧрӱп ийгем. Атка мингени саадакту болгон, ого кайрал берилген. Ол јеҥӱчил чилеп, јеҥерге чыккан.
3 Кураан экинчи таҥманы алып ийерде, экинчи тынду: «Кел, кӧр!» – дегенин уккам. 4 От-кызыл ӧҥдӱ ӧскӧ ат чыгып келген. Атка мингенге јердеҥ амырды алзын, улус бой-бойын ӧлтӱришсин деп, јӧп берилген. Ого јаан кылыш берилген.
5 Кураан ӱчинчи таҥманы алып ийерде, ӱчинчи тынду: «Кел, кӧр!» – дегенин уккам. Мен кара атты кӧрӱп ийгем. Атка мингенниҥ колында – беске. 6 Мен тӧрт тындуныҥ ортозынаҥ чыккан ӱндий немени угуп ийгем: «Хиникс буудайды динарийге, ӱч хиникс арбаны динарийге. Је оливаныҥ майын ла виноградтыҥ аракызын ӱребе».
7 Кураан тӧртинчи таҥманы алып ийерде, тӧртинчи тынду: «Келип, кӧр!» – дегенин уккам. 8 Је бат, мен куба атты кӧрӱп ийгем. Атка мингенниҥ ады-јолы Ӧлӱм болгон. Оныҥ кийнинеҥ Таамы барып јаткан. Ого јердиҥ тӧртинчи ӱлӱзин башкарар, улусты кылышла, тороло, оору-јоболло, јерлик аҥдарла ӧлтӱрер јаҥ берилген.
9 Кураан бежинчи таҥманы алып ийерде, тагылдыҥ алды тужында јӱрген јулаларды кӧргӧм. Бу јулалар Кудайдыҥ сӧзи учун, бойлорындагы кере учун ӧлтӱрилген улустыйы болгон. 10 Олор тыҥ ӱнденип кыйгырыжып тургандар:
– Э-э, агару ла чын Каан, јерде јӱрген улусты тӧгӱлген каныбыс учун јаргылап, ӧч аларга јетире канча кире ӧй арткан?
11 Олордыҥ кажызына ла ак кийим берилген. Олор ок чылап ӧлтӱртетен кожо иштегендери ле карындаштары тооны толтырганча, база ас ӧйгӧ сакызын деп, олорго айдылган.
12 Кураан алтынчы таҥманы алып ийгенин кӧргӧм. Је бат, улу-јаан јерсилкиниш болгон, кату тӱктеҥ эткен кийим чилеп кӱн карара берген, ай кандый боло берген; 13 смоква агаш тыҥ салкынга силкидип, бышкалак кат-јиилектерин ычкынганы чылап, теҥериниҥ јылдыстары јерге тӱшкен; 14 теҥери тӱрбек чилеп тӱрӱлип, јажына берген; кандый ла кыр, ортолык бойлорыныҥ јеринеҥ јылган; 15 јердеги каандар, улулар, черӱ башчылары, байлар, кӱчтӱлер, кандый ла кул, кандый ла јайым кижи кырлардыҥ куй-таштарына ла капчалдарына јажынып, 16 кырларга ла кайаларга айдып тургандар:
– Ӱстибиске аҥтарылып, бисти ширееде Отурганнаҥ ла Кураанныҥ чугулынаҥ јажырыгар, 17 нениҥ учун дезе Оныҥ чугулыныҥ улу кӱни келди, бого кем чыдажар аргалу?
Кудайдыҥ ширеези алдында турган калыктар
71 Мыныҥ кийнинде јердиҥ тӧрт булуҥында турган тӧрт ангелди кӧрӱп ийгем. Салкын јерге де, талайга да, кандый да агашка сокпозын деп, олор јердиҥ тӧрт салкынын тудунып алгандар. 2 Оноҥ кӱнчыгыштаҥ кӧдӱрилип јаткан ӧскӧ ангелди кӧрӱп ийгем. Ол тирӱ Кудайдыҥ таҥмазын тудунып алган. Јерге ле талайга каршу јетирер јаҥ берилген тӧрт ангелге тыҥ ӱнденип кыйгырып, айткан:
3 – Кудайыстыҥ кулдарыныҥ маҥдайларына таҥма баспаганчабыс, јерге де, талайга да, агаштарга да каршу јетирбегер.
4 Таҥмалалган улустыҥ тоозын угуп ийгем: Израиль уулдарыныҥ ончо ӱйелеринеҥ 144 муҥ кижи таҥмалалган.
5 Иуда ӱйезинеҥ
12 муҥ кижи таҥмалалган.
Рувим ӱйезинеҥ
12 муҥ кижи таҥмалалган.
Гад ӱйезинеҥ
12 муҥ кижи таҥмалалган.
6 Асир ӱйезинеҥ
12 муҥ кижи таҥмалалган.
Неффалим ӱйезинеҥ
12 муҥ кижи таҥмалалган.
Манассия ӱйезинеҥ
12 муҥ кижи таҥмалалган.
7 Симеон ӱйезинеҥ
12 муҥ кижи таҥмалалган.
Левий ӱйезинеҥ
12 муҥ кижи таҥмалалган.
Иссахар ӱйезинеҥ
12 муҥ кижи таҥмалалган.
8 Завулон ӱйезинеҥ
12 муҥ кижи таҥмалалган.
Иосиф ӱйезинеҥ
12 муҥ кижи таҥмалалган.
Вениамин ӱйезинеҥ
12 муҥ кижи таҥмалалган.
9 Мыныҥ кийнинде кем де тоолоп болбогон кара-бајырт улусты кӧрӱп ийгем. Анда ончо уктардаҥ, ӱйелердеҥ, калыктардаҥ ла тилдердеҥ улус болгон. Олор ширеениҥ алдында ла Кураанныҥ алдында тургандар. Ак кийимдӱ болгондор, колдорында пальма агаштыҥ сабактарын тудунып алгандар.
10 – Улусты ширееде отурган Кудайыс ла Кураан аргадайт! – деп, олор тыҥ ӱнденип кыйгырыжып тургандар.
11 Ончо ангелдер ширеени, башчыларды ла тӧрт тындуны эбире тургандар. Олор ширеениҥ алдына кӧҥкӧрӧ јыгылып, Кудайга бажырып, 12 айткандар:
– Аминь! Кудайыска ӱргӱлји чакка алкыш, мак, ойгор, быйан, кӱндӱӱ, јаҥ ла кӱч! Аминь.
13 Сӧс айдып баштайла, башчылардыҥ бирӱзи менеҥ сураган:
– Ак кийим кийген бу не улус, олор кайдаҥ келген?
14 – Сен билериҥ, бийим – дегем.
Ол меге айткан:
– Улу ачу-коронноҥ келген улус бу. Олор кийимин јунуп, Кураанныҥ каныла ак эткендер. 15 Оныҥ учун Кудайдыҥ ширеези алдында туруп, Оныҥ байзыҥында Ого тӱни-тӱжи бажырып јадылар. Ширееде Отурганы олордыҥ чадыры боло берер. 16 Олор база торолобос, суузабас, олорды кӱн, кандый да изӱ ӧртӧбӧс, 17 нениҥ учун дезе олорды ширеениҥ орто тужындагы Кураан кабырар, тирӱ сууныҥ агындарына апарар, Кудай олордыҥ кӧзинеҥ кандый ла јашты арчыыр.
Јетинчи таҥманы алып ийгени
81 Кураан јетинчи таҥманы алып ийерде, теҥериде јарым саат кире ыҥ-шыҥ боло берген. 2 Кудайдыҥ алдында турган јети ангелди кӧрӱп ийгем. Олорго јети амыргы берилген.
3 Ӧскӧ ангел келип, фимиам ӧртӧйтӧн алтын айагын тудунганча, тагылдыҥ алдына тура берген. Ого кӧп фимиам берилген. Ол оны ончо агарулардыҥ мӱргӱлериле кожо ширее алдындагы алтын тагылга салган. 4 Фимиам ыжы агарулардыҥ мӱргӱзиле кожо ангелдиҥ колынаҥ Кудайдыҥ алдына кӧдӱрилген. 5 Ангел алтын айакты алып, тагылдаҥ отло толтырып, јерге чачкан: ӱндер угулып, кӱкӱрт кӱркӱреп, јалкын јалтылдап, јер силкинген.
6 Јети амыргылу јети ангел амыргылаарга белетенип алган.
7 Баштапкы ангел амыргылаган. Оныҥ кийнинде мӧндӱр ле от канла колыныжала, јерге тӱшкен. Јердиҥ ӱчинчи ӱлӱзи, агаштардыҥ ӱчинчи ӱлӱзи, кандый ла кӧк ӧлӧҥ кӱйе берген.
8 Экинчи ангел амыргылаган. Отло јалбырап кӱйген улу-јаан кырдый неме талайга ташталган. Талайдыҥ ӱчинчи ӱлӱзи кан боло берген, 9 талайда јӱрген тынар-тындуныҥ ӱчинчи ӱлӱзи ӧлгӧн, керептердиҥ ӱчинчи ӱлӱзи сайалып-оодылган.
10 Ӱчинчи ангел амыргылаган. Теҥеридеҥ јарыткыш чылап кӱйген улу-јаан јылдыс тӱшкен. Ол суулардыҥ ӱчинчи ӱлӱзине ле суулардыҥ агындарына тӱшкен. 11 Јылдыстыҥ ады Јыпшан болгон. Суулардыҥ ӱчинчи ӱлӱзи јыпшан боло берген. Бу суудаҥ улустыҥ кӧбизи ӧлгӧн, нениҥ учун дезе суулар ачу боло берген.
12 Тӧртинчи ангел амыргылаган. Кӱнниҥ ӱчинчи ӱлӱзи, айдыҥ ӱчинчи ӱлӱзи, јылдыстардыҥ ӱчинчи ӱлӱзи ӱрелген. Оныҥ учун олордыҥ ӱчинчи ӱлӱзи караҥуй боло берген. Тӱштиҥ ӱчинчи ӱлӱзи туркунына јарык јок болгон, анайда ок тӱнниҥ ӱчинчи ӱлӱзи база.
13 Теҥериде бийик учуп бараткан, тыҥ ӱнденип, мынайда айдып турган бир ангелди кӧрӱп, угуп ийгем:
– Јерде јуртаган улуска ачу-корон, ачу-корон, ачу-корон, нениҥ учун дезе арткан ӱч ангел амыргы тартарга белен.
91 Бежинчи ангел амыргылаган: теҥеридеҥ јерге тӱшкен јылдысты кӧрӱп ийгем. Ого алыс јердиҥ оозыныҥ тӱлкӱӱри берилген. 2 Ол алыс јердиҥ оозын ачып ийерде, улу-јаан печкедеҥ чилеп, алыс јердеҥ ыш чыккан. Алыс јердиҥ бу ыжынаҥ кӱн ле кей карачкыланган. 3 Ыштаҥ јерге аспан чыгып келген, ого јердиҥ скорпиондорында ошкош јаҥ берилген. 4 Јердиҥ ӧлӧҥине, кандый да кӧккӧ, кандый да агашка каршу јетирбезин деп, аспанга айдылган. Ого јаҥыс Кудайдыҥ таҥмазы маҥдайларына базылбаган улусты чагары јарадылган. 5 Олорго бу улусты ӧлтӱрбезин, јаҥыс беш ай кыйназын деп айдылган. Бу кыйын скорпион кижини чагып кыйнагандый. 6 Ол кӱндерде улус ӧлӱмди бедиреер, је оны таап болбос. Ӧлӧргӧ кӱӱнзеер, је ӧлӱм олордоҥ кача берер.
7 Аспан бӱдӱмиле јуу-согушка кадырылган аттарга тӱҥей болгон. Баштарында алтын ӧрӱмелдер ошкош немелер, чырайлары – кижиниҥ чырайындый. 8 Чачы ӱй кижиниҥ чачындый, тиштери арсландыйы ошкош. 9 Аспан темир куйактый куйакту болгон, канаттарыныҥ шуулты јуу јерине маҥтап бараткан кӧп аттарга јеккен јуучыл абралардыҥ табыжындый. 10 Ондо скорпиондордо ошкош куйруктар бар, куйруктарында чактырмалар. Куйруктарында улуска беш ай каршу јетирер јаҥ болгон. 11 Олордыҥ кааны алыс јердиҥ ангели болгон. Оныҥ ады еврейлеп Аваддон, гректеп Аполлион .
12 Баштапкы ачу-корон ӧдӧ берген. Бат, оныҥ кийнинеҥ база эки ачу-корон келип јат.
13 Алтынчы ангел амыргылаган: Кудайдыҥ алдында турган алтын тагылдыҥ тӧрт мӱӱзинеҥ чыккан ӱнди угуп ийгем. 14 Ӱн амыргылу алтынчы ангелге айткан:
– Улу Евфрат сууныҥ јанында кӱлилген тӧрт ангелдиҥ кӱлӱзин чеч.
15 Улустыҥ ӱчинчи ӱлӱзин ӧлтӱрерге бу кӱнге, ӧйгӧ, айга, јылга белетелген тӧрт ангелдиҥ кӱлӱзи чечилген. 16 Атту черӱниҥ тоозы тӱменниҥ эки тӱмени болгон. Оныҥ тоозын угуп ийгем.
17 Анайып, меге кӧрӱлте болуп, аттарды ла олорго минген улусты кӧрӱп ийгем. Олордыҥ куйагыныҥ ӧҥи кызыл-от, кара-кӧк лӧ кӱкӱрдий. Аттардыҥ баштары – арсландардыҥ баштарындый, оосторынаҥ от, ыш ла кӱкӱр чыгып турган. 18 Бу ӱчӱдеҥ, – оосторынаҥ чыгып турган оттоҥ, ыштаҥ ла кӱкӱрдеҥ – улустыҥ ӱчинчи ӱлӱзи кырылган. 19 Аттардыҥ кӱчи оосторында ла куйруктарында болгон. Куйруктары – јыландарга тӱҥей, олор баштарлу болгон, оныла каршу эдип тургандар.
20 Бу кату-јоболло ӧлтӱртпеген арткан улус санаазын кубултпай, колдорыла эткенинеҥ јана тӱшпеген. Олор шилемирлерге бажырарын, кӧрӱп те, угуп та, базып та болбос алтын, мӧҥӱн, јес, таш, агаш чалуларга бажырарын токтотпогон. 21 Олор ӧлтӱрип, тармалап, балыр кылынып, уурданып эткен кинчектерин алынбаган.
Тӱрбектӱ ангел
101 Теҥеридеҥ тӱжӱп јаткан, булутла оролгон ӧскӧ кӱчтӱ ангелди кӧрӱп ийгем. Бажыныҥ ӱстинде солоҥы болгон, чырайы кӱндий, буттары от баканадый. 2 Колында ачык тӱрбек тудунып алган. Оҥ будыла талайга, сол будыла јерге базып, 3 арслан ыркыранганы чылап, тыҥ ӱнденип кыйгырган. Ол кыйгырарда, јети кӱкӱрт бойлорыныҥ ӱндериле ӱнденип ийген. 4 Јети кӱкӱрт ӱнденерде, бичиирге санангам, је теҥеридеҥ меге айткан ӱнди угуп ийгем:
– Јети кӱкӱрттиҥ айтканын таҥмалап кой, оны бичибе.
5 Талайда ла јерде турганын мен кӧргӧн ангел колын теҥери ӧрӧ кӧдӱрген. 6 Ӧй база болбос деп, ол теҥерини ле ондо барын, јерди ле ондо барын, талайды ла ондо барын јайаган ӱргӱлји чакка Јӱреечиле чертенген. 7 Је јетинчи ангел амыргылаар кӱндерде, Ол Бойыныҥ кулдарына – јарлыкчыларына, јарлаганыла, Кудайдыҥ јажыды бӱдер.
8 Теҥеридеҥ мен угуп ийген ӱн меге ойто айда берген:
– Барып, талайда ла јерде турган ангелдиҥ колындагы ачык тӱрбекти ал.
9 Ангелге барып, тӱрбекти бер – дегем. Ангел меге айткан:
– Оны алып, ји. Кардыҥда ол ачу болор, је оозыҥда балдый тату болор.
10 Ангелдиҥ колынаҥ тӱрбекти алып, јип ийгем. Оозымда ол балдый тату болгон, јип ийеримде, кардымда ачу боло берген. 11 Ол меге айткан:
– Сен кӧп калыктарга, уктарга, тилдерге ле каандарга ойто судурлаар учурлу.
Эки керечи
111 Меге кемјийтен будакка тӱҥей тайак берилип, айдылган:
– Тур, Кудайдыҥ байзыҥын ла тагылды, ондо бажырып турган улусты кемји. 2 Байзыҥныҥ тыш кӱрентигин дезе тоодоҥ чыгарып, кемјибе, нениҥ учун дезе ол кара јаҥдуларга берилген: олор агару каланы тӧртӧн эки ай тепсеер. 3 Эки керечиме јаҥ берерим, олор кату тӱктеҥ эткен кийим кийип, Кудайдыҥ табын 1260 кӱн јарлаар.
4 Бу керечилер – јердиҥ Кайраканы алдында турган эки май-агаш ла эки јарыткыш. 5 Олорго кижи каршу јетирейин дезе, олордыҥ оосторынаҥ от чыгып, ӧштӱлерин јуда салар. Олорго кижи каршу јетирейин дезе, ол анайып ӧлтӱртер. 6 Кудайдыҥ табын јарлаган кӱндерде јерге јаҥмыр јаабазын деп, олордо теҥерини бӧктӧӧр јаҥ бар. Анайда ок, кӱӱни тутса, сууларды кан эдип кубултар, кандый ла тӱбекле јерге согулта эдер јаҥы бар.
7 Олор керелеп тӱгессе, алыс јердеҥ чыгып јаткан аҥ олорго удура јуулажып, олорды јеҥип, ӧлтӱрип койор. 8 Сӧӧктӧри Содом ло Египет деп тыннаҥ адалган улу каланыҥ оромында, Кайраканыс кере тартылган јерде јадар. 9 Калыктардаҥ, ӱйелердеҥ, тилдердеҥ ле уктардаҥ улус олордыҥ сӧӧктӧрин ӱч јарым кӱн кӧрӧр, сӧӧктӧрин сӧӧк салар јерге јуудырбас. 10 Јерде јуртаган улус бого сӱӱнип, јыргаар, бой-бойына сыйлар ийер, нениҥ учун дезе бу эки јарлыкчы јерде јуртаган улусты кыйнаган.
11 Је ӱч јарым кӱнниҥ бажында јарлыкчыларга Кудайдаҥ јӱрӱмниҥ тыны кирип, экилези бутка турган. Олорды кӧргӧн улуска улу коркыш болгон. 12 Эки јарлыкчы «Бери чыгыгар!» – деп, теҥеридеҥ айткан тыҥ ӱнди угуп ийгендер. Олор булутла теҥериге чыккандар, ӧштӱлери олорды кӧрӱп тургандар. 13 Ол ло тарый улу-јаан јерсилкиниш болгон, каланыҥ онынчы ӱлӱзи келип тӱшкен. Јерсилкиништеҥ јети муҥ кижи ӧлгӧн, арткан улус сӱрекей коркып, Теҥери Кудайына алкыжын јетирген.
14 Экинчи ачу-корон ӧдӧ берген. Бат, ӱчинчи ачу-корон јылгыр келип јат.
Јетинчи амыргы
15 Јетинчи ангел амыргылаган. Теҥериде мынайда айткан тыҥ ӱндер болгон:
– Телекейдиҥ Каандыгы Кайраканыстыҥ ла Оныҥ Христозыныҥ Каандыгы боло берди. Ол ӱргӱлји чакка башкарар!
16 Ширеелеринде Кудайдыҥ алдында отурган јирме тӧрт башчы кӧҥкӧрӧ јыгылып, Кудайга бажырып, 17 айткандар:
– Бойыҥныҥ улу кӱчиҥди алып, каан боло бергениҥ учун, Сеге, бар, болгон ло келип јаткан Кайраканга, кӱчтӱдеҥ кӱчтӱ Кудайга, баш болзын! 18 Калыктар чугулданган, Сениҥ де чугулыҥ келди. Ӧлгӧндӧрди јаргылаар, кулдарыҥды, јарлыкчыларыҥды, агаруларды, Сенеҥ айагандарды, кичӱлерди ле улуларды кайралдаар, јерди кырып тургандарды кырар ӧй келди.
19 Кудайдыҥ теҥеридеги байзыҥы ачылып, байзыҥныҥ ичинде Оныҥ кереезиниҥ ковчеги кӧрӱнип келген. Јалкындар јалтылдап, ӱндер угулып, кӱкӱрттер кӱркӱреп, јер силкинип, улу-јаан мӧндӱр тӱшкен.
Ӱй кижи ле јелбеген
121 Теҥериде улу билди кӧрӱнип келген – кӱн кийген ӱй кижи. Оныҥ бут алдында ай, бажында он эки јылдысту ӧрӱмел. 2 Ол барлу болгон, бала таап, оорудаҥ ла кыйыннаҥ кыйгырып турган.
3 Теҥериде ӧскӧ билди кӧрӱнип келген: бат, јети башту ла он мӱӱстӱ јаан от-кызыл јелбеген. Баштарында јети кӱрее. 4 Куйругы теҥеридеҥ јылдыстардыҥ ӱчинчи ӱлӱзин јалмай согуп, јерге таштаган. Бу јелбеген бала табар ӱй кижиниҥ алдына туруп алган, балазын тапса, јуда саларга. 5 Ӱй кижи ончо калыктарды темир тайакла кабырар эр киндиктӱ бала тапкан. Балазын оноҥ ала койып, Кудайга ла Оныҥ ширеезине апарып салгандар. 6 Ӱй кижи дезе ого Кудай белетеп койгон ээн јерге кача берген. Анда оны 1260 кӱнниҥ туркунына кичеейтен болгон.
7 Теҥериде јуу башталган: Михаил ле оныҥ ангелдери јелбегенге удура јуулашкан. Јелбеген ле оныҥ ангелдери олорго удура јуулашкан. 8 Је јелбеген баштагандар јеҥдирткен, олорго теҥериде јер табылбаган. 9 Кӧрмӧс лӧ сатана деп адалаачы, бастыра телекейди мекелеечи јаан јелбеген, јебрен јылан, тӧмӧн ташталган. Ол јерге ташталган, ангелдери кожо ташталгандар.
10 Теҥериде айткан тыҥ ӱнди угуп ийгем:
– Эмди Кудайыстыҥ аргадажы, кӱчи ле каандыгы, Оныҥ Христозыныҥ јаҥы једип келди, нениҥ учун дезе карындаштарысты коптоочы, олорды Кудайыс алдында тӱни-тӱжи коптоочы ташталган. 11 Карындаштарыс оны Кураанныҥ каныла, бойыныҥ керезиниҥ сӧзиле јеҥгендер, бойлорыныҥ јӱрӱмин ӧлӧргӧ дӧ јетире сӱӱбегендер. 12 Оныҥ учун јыргагар, теҥерилер ле олордо јуртагандар! Јерге ле талайга ачу-корон! Слерге кӧрмӧс тӱшкен. Ол ӧйи ас болгонын билип, тыҥ атыйланып калган.
13 Јелбеген јерге таштатканын кӧрӧлӧ, эр киндиктӱ бала тапкан ӱй кижини истеп баштаган. 14 Ӱй кижиге ээн јерге бойыныҥ јерине учсын деп, јаан мӱркӱттиҥ эки канады берилген. Анда оны јыланныҥ ыраагында ӧйдиҥ, ӧйлӧрдиҥ ле јарым ӧйдиҥ туркунына кичеейтен болгон.
15 Суу агыза берзин деп, јылан бойыныҥ оозынаҥ ӱй кижиниҥ кийнинеҥ агын суу божодып ийген. 16 Је јер ӱй кижиге болужып, оозын ачып, јелбегенниҥ оозынаҥ чыккан сууны јудуп ийген. 17 Јелбеген ӱй кижиге чугулданып, оныҥ арткан ач-ӱрениле – Кудайдыҥ јакылталарын бӱдӱрип тургандарла, бойлорында Иисус Христостыҥ керези бар болгондорло јуулажарга барган.
Эки аҥ
131 Мен талайдыҥ кумагында тура бергем. Талайдаҥ чыгып јаткан он мӱӱстӱ ле јети башту аҥды кӧрӱп ийгем. Мӱӱстеринде – он кӱрее, баштарында – Кудайды јамандаган ат-јолдор бичилген. 2 Мен кӧрӱп ийген аҥ ирбиске тӱҥей болгон. Буттары – айуныйы, оозы – арсландыйы ошкош. Ого јелбеген бойыныҥ кӱчин, ширеезин ле улу јаҥ берген. 3 Аҥныҥ баштарыныҥ бирӱзи јаан шыркалудый болгонын кӧрӱп ийгем. Је бу јаан шырка јазылып калган. Јерде јуртаган ончо улус алаҥ кайкап, аҥныҥ кийнинеҥ барган. Аҥга јаҥ берген учун јелбегенге бажыргандар. 4 Аҥга да бажырып, айткандар:
– Кем аҥга теҥ, кем оныла тартыжар аргалу?
5 Улуркап, Кудайды јамандазын деп, аҥга оос берилген. Мыны тӧртӧн эки ай эдер јаҥ берилген. 6 Ол Кудайды јамандап айдарга, Оныҥ адын, Оныҥ јуртын, теҥериде јуртагандарды јамандаарга оозын ачкан. 7 Ого агаруларга удура јуулажып јеҥери берилген. Кандый ла ӱйени, калыкты, тилди ле укты башкарар јаҥ берилген. 8 Телекей јайалганнаҥ ала сойылган Кураандагы јӱрӱмниҥ тӱрбегинде аттары бичилбеген, јерде јуртаган ончо улус бу аҥга бажырар.
9 Кулакту кижи уксын! 10 Олјого апарып јатканы, бойы олјого барар. Кылышла ӧлтӱрип јатканы, бойы кылыштаҥ ӧлӧр. Мында агарулардыҥ чыдузы ла бӱдӱмјизи керек.
11 Јердеҥ чыгып келген ӧскӧ аҥды кӧрӱп ийгем. Ол кураанныҥ мӱӱзи ошкош эки мӱӱстӱ болгон, јелбеген чилеп эрмектенген. 12 Ол баштапкы аҥныҥ јаҥын оныҥ алдында бӱдӱрип, ончо јерди ле ондо јуртаган улусты јаан шырказы јазылган баштапкы аҥга бажыртат. 13 Улу билдилер эдип, улус кӧзинче теҥеридеҥ јерге от то тӱжӱртип јат. 14 Аҥныҥ алдында эдерге берилген кайкалдарла ол јерде јуртаган улусты тӧгӱндеп јат. Анайып, кылыштаҥ шыркалу, је тирӱ аҥныҥ сӱрин этсин деп, јерде јуртаган улуска айдып јат. 15 Аҥныҥ сӱри айдар аргалу болзын деп, аҥныҥ сӱрине бажырбаган ончо улус ӧлтӱртсин деп, ого аҥныҥ сӱрине тын кийдирер јаҥ берилген. 16 Ол ончозыныҥ, – кичӱлердиҥ ле улулардыҥ, байлардыҥ ла тӱреҥилердиҥ, јайымда јӱргендердиҥ ле кулдардыҥ – оҥ колдорына эмезе маҥдайларына таҥма тургустырып јат. 17 Анайып, таҥма, эмезе аҥныҥ ады, эмезе оныҥ адыныҥ тоозы бар кижидеҥ башка кем де садып та албас, садып та болбос.
18 Мында ойгорлык керектӱ. Санаа бары аҥныҥ тоозын алзын, бу – кижиниҥ тоозы. Оныҥ тоозы 666.
Јаҥы сарын
141 Кӧрзӧм, Сион кырда Кураан туру, Оныла кожо 144 муҥ кижи. Маҥдайларында Оныҥ Адазыныҥ ады-јолы бичилген. 2 Теҥеридеҥ кӧп суулардыҥ, јаан кӱкӱрттиҥ табыжындый ӱн угуп ийгем. База улус бойлорыныҥ јадагандарыла ойногондо чыгатан ӱндий ӱн угуп ийгем. 3 Олор ширеениҥ алдында, тӧрт тындуныҥ ла башчылардыҥ алдында јаҥы сарын сарнап јат. Јердеҥ садылып алган байагы 144 муҥ кижидеҥ башка, бу сарынды кем де ӱренип албаган. 4 Бойлорын ӱй улусла быјарсытпаган улус бу, нениҥ учун дезе олор ару бойлоры артып калгандар. Кураан кайдаар ла барганда, Оныҥ кийнинеҥ барып турган улус бу. Олор баштапкы кат-јиилектер чилеп, Кудайга ла Кураанга улустаҥ садылып алган. 5 Олордыҥ сӧстӧринеҥ тӧгӱн табылбаган. Кудайдыҥ ширеези алдында олордо јек јок.
Ӱч ангел
6 Теҥериде учуп бараткан ӧскӧ ангелди кӧрӱп ийгем. Јерде јуртаган улуска, кандый ла укка, ӱйеге, тилге ле калыкка јарлаарга, ол мӧҥкӱлик Јакшылыкту Јарлу болгон. 7 Ол тыҥ ӱнденип айткан:
– Кудайдаҥ айап, Ого мак јетиригер, нениҥ учун дезе Оныҥ јаргызыныҥ ӧйи једип келди. Теҥерини ле јерди, талайды ла суулардыҥ агындарын јайаган Јайаачыга бажырыгар.
8 Оныҥ кийнинеҥ экинчи ангел учуп, айткан:
– Келип тӱшти, келип тӱшти улу Вавилон! Ол кычаныҥ ла балырдыҥ аракызыла ончо калыктарды сугарган.
9 Олордыҥ кийнинеҥ ӱчинчи ангел учуп, тыҥ ӱнденип айткан:
– Аҥга ла оныҥ сӱрине бажырып, маҥдайына эмезе колына таҥма алынып турган кижи 10 Кудайдыҥ атыйланыжыныҥ чейилбеген аракызынаҥ, Оныҥ чугулыныҥ айагында белетелген аракыдаҥ ичер. Ол агару ангелдер алдында ла Кураан алдында отло, кӱкӱрле кыйнадылар. 11 Кыйыныныҥ ыжы ӱргӱлји чакка кӧдӱрилер. Аҥга ла оныҥ сӱрине бажырып, оныҥ адыныҥ таҥмазын алынып турган улус тӱште де, тӱнде де амыр билбес. 12 Мында Кудайдыҥ јакылталарын чеберлеген ле Иисуска чындык агарулардыҥ чыдузы керек.
13 Теҥеридеҥ айткан ӱнди угуп ийгем:
– Мыны бичи: «Ӧлгӧндӧр, – Кайраканга бӱдӱп ӧлӱп јаткандар, – эмдидеҥ ары кежиктӱ. Эйе, – деп, Тын айдат, олор бойыныҥ ижинеҥ токынаар, олордыҥ керектери кийнинеҥ барып јат».
Јердиҥ ажын кескени
14 Кӧрзӧм, ак булут, булутта Кижи Уулына тӱҥейи отуры. Бажында алтын ӧрӱмел, колында курч серп. 15 Байзыҥнаҥ ӧскӧ ангел чыгып, булутта Отурганга тыҥ ӱнденип кыйгырган:
– Серпиҥди ийип, ашты кес, нениҥ учун дезе аш кезер ӧй једип келген, јерде аш быжып калган.
16 Булутта Отурганы серпин јерге чачкан, јердиҥ ажы кезилген.
17 Ӧскӧ ангел теҥеридеги байзыҥнаҥ чыгып келген, база курч серптӱ. 18 Отты башкарар ӧскӧ ангел тагылдаҥ чыгып келеле, курч серптӱге тыҥ ӱнденип кыйгырган:
– Курч серпиҥди ийип, јердеги виноградтыҥ сабактарын кес, нениҥ учун дезе кат-јиилектери быжып калган.
19 Ангел серпин јерге чачып, јердеги виноградты јууп, Кудайдыҥ чугулыныҥ улу-јаан сыскырузына таштаган. 20 Кат-јиилектер каланыҥ тыштындагы сыксыруда тепселген. Сыксырудаҥ кан чыгып, аттыҥ ӱйгенине де јетире кӧдӱрилип, 1600 стадияга јайылган.
151 Теҥериде улу ла кайкамчылу ӧскӧ билдини кӧрӱп ийгем – ол калганчы јети кату-јоболду јети ангел болгон. Бу кату-јоболдорло Кудайдыҥ чугулы туузылып јаткан.
2 Отло колынган шил талайдый немени кӧрӱп ийгем. Аҥды, оныҥ сӱрин ле ады-јолыныҥ тоозын јеҥген улус Кудайдыҥ јадагандарын тудунганча, шил талайда турулар. 3 Олор Кудайдыҥ Моисей кулыныҥ сарынын ла Кураанныҥ сарынын сарнап, айдыжып јадылар:
– Э-э, Кайракан, кӱчтӱдеҥ кӱчтӱ Кудай, эдип јӱрген керектериҥ улу ла кайкамчылу! Э-э, агару улустыҥ Кааны, јолдорыҥ чындык ла чын! 4 Кем Сенеҥ айабас, Кайракан, адыҥды кем алкабас? Јаҥыс Сен агару. Ончо калыктар келип, алдыҥа бажырар, нениҥ учун дезе чындык керектериҥ ачылган.
5 Мыныҥ кийнинде кӧрзӧм, теҥериде байзыҥныҥ ич јаны – керениҥ чадыры ачылган. 6 Байзыҥнаҥ јети кату-јоболду јети ангел чыгып келген. Олор ару ла јаркындалган кеден кийимдӱ болгон, кӧгӱстей алтын курлар курчалган. 7 Тӧрт тындуныҥ бирӱзи јети ангелге јети алтын айак берген. Бу айактар ӱргӱлји чакка јӱреечи Кудайдыҥ чугулыла толо болгон. 8 Байзыҥ Кудайдыҥ магынаҥ ла кӱчинеҥ ышла толгон. Јети ангелдиҥ јети кату-јоболы божобогончо, байзыҥга кем де кирип болбогон.
Кудайдыҥ чугулы
161 Мыныҥ кийнинде байзыҥнаҥ јети ангелге айткан тыҥ ӱнди угуп ийгем:
– Барып, Кудайдыҥ чугулыныҥ јети айагын јерге урыгар.
2 Баштапкы ангел барып, айагын јерге урган. Аҥныҥ таҥмазы бар, оныҥ сӱрине бажырып јӱрген улустыҥ эди-канында јаман ла ириҥдӱ ӧҥзӱре шыркалар боло берген.
3 Экинчи ангел айагын талайга урган. Суу ӧлгӧн кижиниҥ каны ошкош кан боло берген, талайдагы ончо тындулар ӧлӱп калган.
4 Ӱчинчи ангел айагын сууларга ла агындарга урган. Олор кан боло берген. 5 Сууларды башкарар ангелдиҥ мынайда айтканын угуп ийгем:
– Сен, Кайракан, акту, Сен – Бары ла Болгоны, Сен Агару, нениҥ учун дезе мыны јаргылагаҥ. 6 Олор агарулардыҥ ла јарлыкчылардыҥ канын тӧккӧн учун, Сен олорго кан ичерге бергеҥ. Олор бого туруп јат.
7 Тагылдаҥ айткан ӧскӧ ӱнди угуп ийгем:
– Эйе, Кайракан, кӱчтӱдеҥ кӱчтӱ Кудай, јаргыларыҥ чын ла чындык!
8 Тӧртинчи ангел айагын кӱнге урган: кӱнге улусты отло ӧртӧдӧри берилген. 9 Улус коркышту изӱге ӧртӧткӧн. Олор бу кату-јоболдыҥ бажын билер Кудайдыҥ адын јамандап, Ого мак јетирбегендер ле баштанбагандар.
10 Бежинчи ангел айагын аҥныҥ ширеезине урган: аҥныҥ каандыгы караҥуй боло берген. Олор оору-сыстаҥ тилдерин тиштенип тургандар. 11 Оору-сызынаҥ ла шырказынаҥ улам Теҥери Кудайын јамандап, је эткен керектериниҥ кинчегин алынбагандар.
12 Алтынчы ангел айагын улу Евфрат сууга урган: кӱнчыгыштаҥ каандарга јол белен болзын деп, оныҥ суузы сооло берген. 13 Бакадый ӱч кара јелбисти кӧрӱп ийгем. Олор јелбегенниҥ оозынаҥ, аҥныҥ оозынаҥ ла тӧгӱн јарлыкчыныҥ оозынаҥ чыгып јаткандар. 14 Бу – билдилер эдеечи шилемирдиҥ јелбистери. Олор бастыра телекейдиҥ каандарына, олорды кӱчтӱдеҥ кӱчтӱ Кудайдыҥ улу кӱнинде јуу-согушка јуурга, барып јадылар.
15 – Бат, уурчы чылап сакыбас јанынаҥ келерим. Јылаҥаш баспайын, уйадымды кижи кӧрбӧзин деп, ойгу болуп, кийимин чеберлеген кижи кежиктӱ.
16 Олор каандарды еврейлеп Армагеддон деп јерге јууп алгандар.
17 Јетинчи ангел айагын кейге урган. Теҥериниҥ байзыҥындагы ширеедеҥ: «Бӱтти!» – деген тыҥ ӱн угулган. 18 Јалкындар јалтылдап, кӱкӱрттер кӱркӱреп, ӱндер угулып, улу-јаан јерсилкиниш болгон. Андый тыҥ, андый улу-јаан јерсилкиниш кижи јерде табылганынаҥ бери болбогон. 19 Улу кала ӱч башка јарылган, калыктардыҥ калалары келип тӱшкен. Кудай улу Вавилонды эске алып, ого Бойыныҥ чугулыныҥ атыйланыжыныҥ аракылу айагынаҥ ичерге берген. 20 Кандый ла ортолык кача берген, кырлар јоголып калган. 21 Талант кемдӱ јаан мӧндӱр теҥеридеҥ улуска тӱшкен. Мӧндӱрдеҥ болгон кату-јобол учун улус Кудайды јамандаган, нениҥ учун дезе бу коркышту кату-јобол болгон.
Аҥга минген ӱй кижи
171 Јети айакту јети ангелдиҥ бирӱзи келип, меге айткан:
– Бери кел, кӧп сууларда отурган улу балыр ӱй кижини јаргылаганын кӧргӱзейин. 2 Оныла кожо јердеги каандар балыр кылынган, оныҥ балырыныҥ аракызынаҥ јерде јуртаган улус эзирген.
3 Ангел мени ээн јерге Тында апарган. Кызыл аҥга минген ӱй кижини кӧрӱп ийгем. Бу аҥ бастыра бойы Кудайды јамандаган ат-јолдорло бичилген. Ол јети башту ла он мӱӱстӱ болгон. 4 Ӱй кижи кызыл ла кубакай-кызыл кийимдӱ болгон, алтынла, баалу-чуулу таштарла, эрјинеле кееркедилген. Колында алтын айак тудунып алган. Айак јескинчиле, балырыныҥ быјарыла толо болгон. 5 Ӱй кижиниҥ маҥдайында јажытту ат бичилген: «Улу Вавилон, балыр ӱй улустыҥ ла јердеги быјардыҥ энези». 6 Ӱй кижи агарулардыҥ канынаҥ ла Иисустыҥ керечилериниҥ канынаҥ эзирик болгонын кӧрӱп ийгем. Оны кӧрӧлӧ, сӱрекей кайкагам. 7 Ангел меге айткан:
– Не кайкап туруҥ? Сеге бу ӱй кижиниҥ ле оны алып јӱрген јети башту, он мӱӱстӱ аҥныҥ јажыдын айдып берейин. 8 Сен кӧргӧн аҥ – болгон, эмди – јок. Ол алыс јердеҥ чыгып, бойыныҥ ӧлӱмине барар. Телекейдиҥ бӱткенинеҥ ала јӱрӱмниҥ тӱрбегинде ады-јолдоры бичилбеген, јерде јуртаган улус аҥды кӧрӱп, кайкажар, нениҥ учун дезе ол болгон, эмди јок, је ойто келер. 9 Мында ойгор санаа керек. Јети баш – ол ӱй кижи отурган јети тӧҥ, 10 база јети каан. Бежӱзи ӧлгӧн, бирӱзи эзен, бирӱзи – келгелек. Келзе, мында узак артпас. 11 Болгон ло эмди јок аҥ – ол сегизинчи, јетӱниҥ тоозынаҥ. Ол бойыныҥ ӧлӱмине барат.
12 Сен кӧргӧн он мӱӱс – ол каандыкты алгалак он каан, је олор каандар чылап, аҥла кожо јаҥды бир саатка алар. 13 Олордыҥ санаазы јаҥыс, бойлорыныҥ кӱчин ле јаҥын аҥга берер. 14 Олор Кураанга удура јуулажар, је Кураан олорды јеҥер, нениҥ учун дезе Ол – кайракандардыҥ Кайраканы, каандардыҥ Кааны. Оныла кожо јӱргендер айттырылган, талдалган ла чындык улус болуп јадылар.
15 База ангел меге айткан:
– Сен сууларды кӧрдиҥ, олордо балыр ӱй кижи отуры, ол суулар – калык ла јондор, элдер ле тилдер. 16 Сен кӧргӧн он мӱӱс ле аҥ бойы балыр ӱй кижини јаман кӧрӧр, тӱредер, јылаҥаштаар, эди-канын јиир, отко ӧртӧп койор. 17 Олордыҥ јӱрегине Кудай Бойыныҥ табын бӱдӱрер кӱӱн салган. Олор Кудайдыҥ сӧзи бӱтпегенче, ончо јаҥды аҥга берер учурлу болгон. 18 Сен кӧргӧн ӱй кижи дезе јердеги каандарды бийлеген улу кала.
Вавилонныҥ келип тӱшкени
181 Мыныҥ кийнинде теҥеридеҥ тӱжӱп јаткан ӧскӧ ангелди кӧрӱп ийгем. Ондо улу јаҥ бар болгон. Оныҥ магынаҥ јер јарый берген. 2 Ол тыҥ ӱнденип кыйгырып, айткан:
– Келип тӱшти, келип тӱшти улу Вавилон, ол – улу балыр ӱй кижи! Ол шилемирлердиҥ јурты, кандый ла кара јелбистиҥ шибееленер јери, кандый ла быјар, јескинчилӱ куштыҥ шибееленер јери боло берген. 3 Ончо калыктар оныҥ кычазыныҥ ла балырыныҥ аракызынаҥ ичкен, јердеги каандар оныла кожо балыр кылынып јӱрген, јердеги којойымдар оныҥ улуркагынаҥ байыган.
4 Теҥеридеҥ айткан ӧскӧ ӱнди угуп ийгем:
– Бу каладаҥ чык, калыгым, оныла кожо кинчек этпеске, оныҥ кату-јоболын албаска, 5 нениҥ учун дезе оныҥ кинчектери теҥериге јетти, јаман керектерин Кудай эске алды. 6 Слерге ол канайда берген, ого анайда ла јандыра беригер, эткен керектери аайынча эки катап кӧп јандырыгар. Слерге берген айагына ого ичерге эки катап кӧп урыгар. 7 Бойын канча кире макка чыгарган ла сайраган, ого анча ла кире кыйын-шыра ла ачу-корон јандыра беригер, нениҥ учун дезе ол бойыныҥ јӱрегинде айдат: «Абакай-каан чылап отурып јадым. Мен тул эмезим, ачу-корон кӧрбӧзим». 8 Мыныҥ учун бир кӱн ого кату-јобол, ӧлӱм, сыгыт ла торо келер, ол отло ӧртӧлӧр, нениҥ учун дезе оны јаргылаачы Кудай Кайракан – кӱчтӱ.
9 Оныҥ кӱйӱп, ышталып јатканын кӧрӧлӧ, оныла кожо балыр кылынган, байлыгыла јӱрген јердеги каандар оны эске алып, ыйлажып-сыктажар. 10 Кыйын-шыразынаҥ коркып, ыраагында туруп, айдыжар: «Ачу-корон, ачу-корон сеге, улу кала, бек кала Вавилон! Сениҥ јаргыҥ бир ӧйдӧ келди!»
11 Јердеги којойымдар оны эске алып, ыйлажып-сыктажар, нениҥ учун дезе олордоҥ кем де неме садып албас: 12 алтын ла мӧҥӱн эдимдерди, баалу-чуулу таштарды, эрјинени, кӱделини, кызыл бӧсти, торконы, кӧс кылбыгар бӧстӧрди, јараш јытту јӱзӱн-јӱӱр агаштарды, јоонныҥ сӧӧгинеҥ ле эҥ баалу агаштаҥ эткен јӱзӱн-базын эдимдерди, кӱлерди, темирди, ак-ташты, 13 јараш јытту ӧзӱмди, фимиамды, мирраны, ладанды, аракыны, майды, кулурды, буудайды, малды, койлорды, јылкыларды, јуучыл абраларды, улустыҥ эди-канын ла јулазын.
14 Бойыҥ кӱӱнзеген кат-јиилектер сенде јоголып калган. Ончо байлыктарыҥ ла јаркыныҥ сени таштап барган, – оны таап болбозыҥ.
15 Мыныҥ ончозыла садыжып байыган којойымдар оныҥ кыйын-шыразынаҥ коркып, ыраагында тургулаар, ыйлап, сыктап, 16 айдыжар: «Ачу-корон, ачу-корон сеге, улу кала, кӱдели, кызыл ла кубакай-кызыл кийим кийген, алтынла, баалу-чуулу таштарла, эрјинеле кееркедилген кала, 17 нениҥ учун дезе ондый байлык бир ле ӧйдӧ јоголып калган!»
Ончо керепчилер, ончо керепле јӱзеечилер, ончо талайчылар, талайда иштеген ончо улус ыраагында туруп, 18 оныҥ кӱйӱп, ышталып јатканын кӧрӱп, кыйгырыжа бергендер:
– Кандый кала бу улу калага тӱҥей!
19 Олор баштарына кубал сееп, онтоп-калактап, ыйлап-сыктап, айдыжып тургандар:
– Ачу-корон, ачу-корон сеге, улу кала! Талайда керептерлӱ ончо улус оныҥ эрјинелериле байыган, је ол бир ле ӧйдӧ ээнзиреп калган. 20 Бого сӱӱнигер, теҥери, агарулар, апостолдор ло јарлыкчылар, нениҥ учун дезе Кудай оны слердиҥ јаргыгарла јаргылаган.
21 Бир кӱчтӱ ангел теерменниҥ јаан тажындый ташты алып, талайга таштап, айткан:
– Мынайып ла улу Вавилон кала ташталар, оны кем де таап болбос. 22 Јадагандаган, сарнаган, шоорлогон, сыбыскылаган улустыҥ ӱни сенде база угулбас; кандый бир немеле узанган ус сенде база болбос, теерменниҥ тажыныҥ табыжы сенде база угулбас; 23 јарыткыштыҥ јарыгы сенде база јарытпас; колтуныҥ ла сыргалјыныҥ ӱни сенде база угулбас, нениҥ учун дезе којойымдарыҥ улус ортодо јерде улулар болгон, илби-тармаҥла ончо калыктар астырылган. 24 Ондо јарлыкчылардыҥ, агарулардыҥ ла јерде ӧлтӱрткен ончо улустыҥ каны табылган.
Теҥеридеги сӱӱнчи
191 Мыныҥ кийнинде теҥериде кӧп тӱмен улустыҥ ӱни ошкош тыҥ ӱнди угуп ийгем:
– Аллилуия! Аргадаш, мак ла кӱч – Кудайыстыйы, 2 нениҥ учун дезе Оныҥ јаргылары чын ла чындык. Ол јерди бойыныҥ балырыла быјарсыткан улу балыр ӱй кижини јаргылаган, Бойыныҥ кулдарыныҥ каны учун ӧч алган.
3 Олор такып айткандар:
– Аллилуия! Оныҥ ыжы ӱргӱлји чакка кӧдӱрилет.
4 Јирме тӧрт башчы ла тӧрт тынду кӧҥкӧрӧ тӱжӱп, ширееде отурган Кудайга бажырып,
– Аминь! Аллилуия! – дегендер.
5 Ширеедеҥ мынайда айткан ӱн чыккан:
– Кудайысты мактагар, Оныҥ ончо кулдары, Оноҥ айап јӱргендер, кичӱлер ле улулар!
6 Кӧп улустыҥ ӱниндий, кӧп суулардыҥ ла јаан кӱкӱрттиҥ табыжындый неме угуп ийгем, олор айдыжып тургандар:
– Аллилуия! Кайракан, кӱчтӱдеҥ кӱчтӱ Кудайыс, каанныҥ ширеезине отурды! 7 Сӱӱнип јыргайлы, Ого мак јетирели, нениҥ учун дезе Кураанныҥ тойы једип келген, Оныҥ сыргалјызы бойын белетеп алган. 8 Ого кеен, ару ла јарык кӱдели кийим кийерге берилген. Кеен кӱдели кийим агарулардыҥ чындык керектери болуп јат.
9 Ангел меге айткан:
– Бичи: «Кураанныҥ ажын јиирине айттырылганы кежиктӱ».
Меге база айткан:
– Бу сӧстӧр – Кудайдыҥ чын сӧстӧри.
10 Мен ангелге бажырарга, оныҥ будыныҥ јанына кӧҥкӧрӧ тӱшкем. Је ол меге айткан:
– Јок, онойтпо. Мен сеге ле Иисустыҥ керези бар карындаштарыҥа андый ла кул. Кудайга бажыр! Иисустыҥ керези – судурлаштыҥ тыны.
Ак аттузы
11 Ачык теҥерини ле ак атка Мингенди кӧрӱп ийгем. Оны Чындык ла Чын деп адап јадылар, Ол чындык јаргылап ла јуулажып јат. 12 Оныҥ кӧстӧри – от јалбыжындый, бажында кӧп кӱреелер. Анда бичилген ат бар, Оныҥ Бойынаҥ башка, оны кем де билбес. 13 Ол канла шиҥилген кийим кийген. Оныҥ ады-јолы – Кудайдыҥ Сӧзи. 14 Оныҥ кийнинеҥ ак аттарлу, кеен, ак ла ару кӱдели кийимдӱ теҥериниҥ черӱлери барып јат. 15 Калыктарды јеҥерге, оозынаҥ курч кылыш чыгып јат. Ол калыктарды темир тайакла кабырат, кӱчтӱдеҥ кӱчтӱ Кудайдыҥ атыйланыжыныҥ ла чугулыныҥ сыксырузын Бойы тепсейт. 16 Кийиминде ле јалмажында ат бичилген: каандардыҥ Кааны, кайракандардыҥ Кайраканы.
17 Кӱнде турган бир ангелди кӧрӱп ийгем. Ол теҥериде учуп бараткан ончо куштарга тыҥ ӱнденип кыйгырган:
– Бери учыгар, Кудайдыҥ улу курсагын јиирге јуулыгар! 18 Слер каандардыҥ эдин, муҥ черӱ башчыларыныҥ эдин, кӱчтӱлердиҥ эдин, аттардыҥ ла олорго минген улустыҥ эдин, ончозыныҥ, – јайымда јӱргендердиҥ де, кулдардыҥ да, кичӱлердиҥ де, улулардыҥ да эдин јииригер.
19 Аҥды, јердеги каандарды ла олордыҥ черӱлерин кӧрӱп ийгем. Олор атка Мингенге, Оныҥ черӱлерине удура јуулажарга јуулгандар. 20 Аҥ олјого алылган, оныла кожо оныҥ алдына билдилер јайаган тӧгӱн јарлыкчы. Ол билдилер јайап, аҥныҥ таҥмазын алынган ла оныҥ сӱрине бажырган улусты аскырган. Олор экилези кӱкӱрле кӱйген отту кӧлгӧ тирӱге ташталган. 21 Арткандары атка Мингенниҥ оозынаҥ чыгаачы кылыштаҥ ӧлгӧн. Ончо куштар олордыҥ эдин јип тойгон.
Муҥ јыл
201 Теҥеридеҥ тӱжӱп јаткан ангелди кӧрӱп ийгем. Оныҥ колында алыс јердиҥ тӱлкӱӱри ле јаан кынјы болгон. 2 Ол кӧрмӧс лӧ сатана болгон јелбегенди – јебрен јыланды тудуп, муҥ јылга кынјылаган. 3 Алыс јерге таштап, бӧктӧйлӧ, чыгар јерин таҥмалаган. Оныҥ учун ол муҥ јыл туузылбайынча, калыктарды астырып болбос. Мыныҥ кийнинде ас ӧйгӧ јайымдалар.
4 Ширеелерди, олордо отурган, јаргылаарга тап берилген улусты кӧрӱп ийгем. База Иисусты керелегени учун, Кудайдыҥ сӧзи учун бажын кезе чаптырган улустыҥ јулаларын. Олор аҥга, оныҥ сӱрине де бажырбаган, маҥдайына ла колына таҥма албаган. Олор тынданып, Христосло кожо муҥ јыл башкарган. 5 Муҥ јыл туузылбаганча, ӧлгӧн улустыҥ артканы тынданбаган. Бу – баштапкы тирилиш. 6 Баштапкы тирилиште ӱлӱзи бары кежиктӱ ле агару. Олорды экинчи ӧлӱм бийлеп болбос, је олор Кудайдыҥ ла Христостыҥ абыстары болор, Оныла кожо муҥ јыл башкарар.
7 Муҥ јыл туузылза, сатана каруулдаҥ јайымдалар. Ол јердиҥ тӧрт булуҥында јуртаган калыктарды – Гог ло Магогты астырайын, олорды јуулажарга јууйын деп чыгар. Олордыҥ тоозы талайдыҥ кумагындый болор. 8 Олор јердиҥ телкемине чыгып, агарулардыҥ оду-турлузын ла Кудайдыҥ сӱӱген калазын курчап ийгендер. 9 Је теҥеридеги Кудайдаҥ от тӱжӱп, олорды јудуп койгон. 10 Олорды астырган кӧрмӧс дезе отту ла кӱкӱрлӱ кӧлгӧ ташталган. Аҥ ла тӧгӱн јарлыкчы анда ок болгондор. Олор ончозы тӱни-тӱжи ӱргӱлји чакка кыйналар.
Ӧлгӧн улусты јаргылаганы
11 Улу ак ширеени ле ондо Отурганды кӧрӱп ийгем. Оныҥ кӧрӱжинеҥ теҥери ле јер качкандар, олорго јер табылбаган. 12 Кудайдыҥ алдында турган ӧлгӧн улусты, кичӱлерди ле улуларды кӧрӱп ийгем. Тӱрбектер ачык болгон, ӧскӧ тӱрбек база ачык болгон – јӱрӱмниҥ тӱрбеги. Ӧлгӧн улус тӱрбектерде бичилгениле эткен керектериле јаргылаткан. 13 Талай бойындагы ӧлгӧн улусты берген, Ӧлӱм ле Таамы ӧлгӧн улузын бергендер. Кажызы ла эткен керектериле јаргылаткан. 14 Ӧлӱм ле Таамы отту кӧлгӧ ташталган. Бу – экинчи ӧлӱм. 15 Јӱрӱмниҥ тӱрбегинде бичилбегени, отту кӧлгӧ ташталган.
Јаҥы Иерусалим
211 Јаҥы теҥерини ле јаҥы јерди кӧрӱп ийгем. Башкы теҥери ле башкы јер кеде јӱре бергендер, талай да јок болгон. 2 Мен, Иоанн, теҥеридеги Кудайдаҥ тӱжӱп јаткан агару каланы, јаҥы Иерусалимди, кӧрӱп ийгем. Ол эш-нӧкӧрине болуп кееркединген сыргалјыдый белетелген. 3 Теҥеридеҥ айткан тыҥ ӱнди угуп ийгем:
– Бат, Кудайдыҥ чадыры улусла кожо, Ол олорло кожо јӱрер. Олор Оныҥ калыгы болор, Ол Бойы олордыҥ Кудайы болор. 4 Олордыҥ кӧзинеҥ ончо јашты арчыыр. Ӧлӱм де, ачу-корон до, сыгыт та, јобол до база болбос, нениҥ учун дезе башкызы јӱре берген.
5 Ширееде Отурганы айткан:
– Бат, ончозын јаҥы эдип јайап јадым!
Оноҥ айткан:
– Бичи, бу сӧстӧр чындык ла чын.
6 Оноҥ меге:
– Бӱтти! – деген. – Мен – Альфа ла Омега, Бажы ла Учы. Суузап турганга јӱрӱмниҥ суузынаҥ тегинге берерим. 7 Јеҥип турганы ончозын энчиленер. Мен ого Кудайы болорым, ол Меге уулым болор. 8 Коркынчактардыҥ, чындык эместердиҥ, быјарсыгандардыҥ, ӧлтӱреечилердиҥ, балыр кылынып јӱргендердиҥ, тармачылардыҥ, чалуга бажыраачылардыҥ ла ончо тӧгӱнчилердиҥ јери – отло, кӱкӱрле кӱйген кӧлдӧ. Бу – экинчи ӧлӱм.
9 Калганчы јети кату-јоболло толо јети айакту јети ангелдиҥ бирӱзи келип, меге айткан:
– Кел, сыргалјыны, Кураанныҥ эжин, кӧргӱзейин.
10 Ол мени Тынга алдыртып, јаан ла бийик кырга чыгарала, теҥеридеги Кудайдаҥ тӱжӱп јаткан улу каланы, агару Иерусалимди кӧргӱскен. 11 Ол Кудайдыҥ магыла јаркындалган. Оныҥ јаркыны сӱрекей баалу таштыҥ, кристаллдый ару яспис таштыҥ јаркынындый. 12 Ол јаан ла бийик стенелӱ, он эки каалгалу. Каалгаларда он эки ангел турат. Анда Израильдиҥ калыгыныҥ он эки угыныҥ ады-јолдоры бичилген. 13 Ӱч каалга кӱнчыгыштаҥ болгон, ӱчӱзи – тӱндӱктеҥ, ӱчӱзи – тӱштӱктеҥ, ӱчӱзи – кӱнбадыштаҥ. 14 Каланыҥ стенези он эки тӧстӱ. Олордо Кураанныҥ он эки апостолыныҥ ады-јолдоры бичилген.
15 Меге айтканы каланы, оныҥ каалгаларын ла стенезин кемјийтен алтын тайакту болгон. 16 Кала тӧрт булуҥду, оныҥ узуны тууразындый ок. Ол каланы тайакла кемјиирде, он эки муҥ стадия болгон. Узуны, тууразы ла бийиги тӱҥей. 17 Стенезин кемјиген. Кижиниҥ кемјӱзиле колдыҥ јӱс тӧртӧн тӧрт карызы болгон. Бу ангелдиҥ кемјӱзи. 18 Стене яспистеҥ тудулган, кала бойы – ару шилдий ару алтын. 19 Каланыҥ стенезиниҥ тӧстӧри јӱзӱн-јӱӱр баалу-чуулу таштарла кееледилген: баштапкы тӧс – яспис, экинчизи – сапфир, ӱчинчизи – халкидон, тӧртинчизи – смарагд, 20 бежинчизи – сардоникс, алтынчызы – сардолик, јетинчизи – хризолит, сегизинчизи – берилл, тогузынчызы – топаз, онынчызы – хризопраз, он биринчизи – гиацинт, он экинчизи – аметист. 21 Он эки каалга – он эки эрјине: кажы ла каалга бир эрјинедеҥ эдилген. Каланыҥ оромы – јалтыраган шилдий ару алтын.
22 Калада байзыҥ кӧрбӧгӧм, нениҥ учун дезе оныҥ байзыҥы – кӱчтӱдеҥ кӱчтӱ Кудай Кайракан ла Кураан. 23 Калага јарыдар кӱн де, ай да керек јок, оны Кудайдыҥ магы јарыткан, оныҥ јарыткыжы – Кураан. 24 Аргадалган калыктар оныҥ јарыгында базып јӱрер, јердеги каандар ого бойыныҥ магын ла кӱндӱӱзин экелер. 25 Каланыҥ каалгалары тӱште јабылбас, тӱн де ондо болбос. 26 Ого калыктардыҥ магын ла кӱндӱзин экелгилеер. 27 Ого бир де быјар неме, јескинчилӱ кылынып, тӧгӱнденип јӱрген бир де кижи кирбес, јӱк ле Кураандагы јӱрӱмниҥ тӱрбегинде бичилгени кирер.
Бат, удабастаҥ келерим!
221 Ангел меге јӱрӱмниҥ ару суузыныҥ агынын кӧргӱскен. Ол кристаллдый ару болгон, Кудайдыҥ ла Кураанныҥ ширеезинеҥ агып чыккан. 2 Каланыҥ оромыныҥ орто тужында, сууныҥ ол јанында ла бу јанында јӱрӱмниҥ агажы ӧскӧн. Ол ай сайын, јылына он эки катап тӱжӱм берип турган. Оныҥ јалбрактары калыктарды эмдеерге берилген.
3 Калада каргышка калганы база болбос. Анда Кудайдыҥ ла Кураанныҥ ширеези болор, Оныҥ кулдары Ого бажырып јӱрер. 4 Олор Оныҥ Бойын кӧрӧр, олордыҥ маҥдайында Оныҥ ады бичилер. 5 Анда тӱн база болбос, олорго јарыткыш та, кӱнниҥ јарыгы да керек јок болор, нениҥ учун дезе олорго Кудай Кайракан јарыдар. Олор ӱргӱлји чакка башкарар.
6 Ангел меге айткан:
– Бу сӧстӧр чындык ла чын. Удабастаҥ не болотонын Бойыныҥ кулдарына кӧргӱзерге, агару јарлыкчылардыҥ тыныныҥ Кудай Кайраканы Бойыныҥ ангелин ийген.
7 Бат, удабастаҥ келерим! Бу тӱрбектиҥ судур сӧстӧрин чеберлеп јӱрген кижи кежиктӱ.
8 Мен, Иоанн, мыны уктым, кӧрдим. Мен угала, кӧрӧлӧ, меге мыны кӧргӱзип турган ангелге бажырарга, оныҥ бут алдына кӧҥкӧрӧ тӱшкем. 9 Је ол меге айткан:
– Јок, онойтпо. Мен сендий ле јарлыкчы карындаштарыҥдый, бу тӱрбектиҥ сӧстӧрин чеберлеп јӱрген улустый ок кул. Кудайга бажыр.
10 Меге база айткан:
– Бу тӱрбектиҥ судур сӧстӧрине таҥма баспа, нениҥ учун дезе ӧй јууктап келген. 11 Чын эмести эткени база да чын эмести эткей, быјары база да быјартынгай, актузы база да актуны эткей, агарузы база да агарулангай.
12 Бат, удабастаҥ келерим! Кайралымды кожо экелип, кажы ла кижиге эткен кереги аайынча берерим. 13 Мен – Альфа ла Омега, Баштапкызы ла Калганчызы, Бажы ла Учы.
14 Оныҥ јакылталарын бӱдӱрип јӱргендери – кежиктӱ. Олор јӱрӱмниҥ агажынаҥ алып јиир, калага каалгала кирер. 15 Тыштында артары – ийттер ле тармачылар, балыр јӱрӱмдӱлер ле ӧлтӱреечилер, чалуга бажыраачылар, тӧгӱнди сӱӱчи ле тӧгӱндеп турган кандый ла улус.
16 Мен, Иисус, Бойымныҥ ангелимди ийгем. Ол мыны слерге серкпелерде керелеер. Мен – Давидтиҥ тазылы ла калдыгы, јаркынду таҥ чолмон.
17 Тын ла Сыргалјы: «Кел!» – дейдилер. Угуп турганы: «Кел!» – дегей. Суузаганы келгей, кӱӱни бары јӱрӱмниҥ суузын тегинге алгай.
18 Бу тӱрбектиҥ судур сӧстӧрин угуп турган кажы ла кижиге керелеп турум: ол сӧстӧргӧ неме кошкон кижиге Кудай бу тӱрбекте бичилген кату-јоболды кожор. 19 Бу судур тӱрбектиҥ сӧстӧринеҥ нени алып барза, Кудай јӱрӱмниҥ бичигинеҥ, агару каладаҥ ла бу тӱрбекте бичилгенинеҥ оныҥ ӱлӱзин алып барар.
20 Мыны керелеечи айдат:
– Эйе, удабастаҥ келерим!
Аминь. Кел, Иисус Кайракан!
21 Иисус Христос Кайраканыстыҥ јакшылыгы ончогорло болгой. Аминь.