Ефестегилерге

Павел апостолдыҥ Ефестеги серкпеге самаразы

¹ Кудайдыҥ табыла Христос Иисустыҥ апостолы Павелдеҥ – Ефесте јуртаган агаруларга, Христос Иисустыҥ Бойында чындык улуска.

² Слерге Кудай Адабыстаҥ ла Иисус Христос Кайраканнаҥ јакшылык ла амыр јетсин.

Павелдиҥ мӱргӱзи

³ Кудай, Иисус Христос Кайраканыстыҥ Адазы, алкалзын! Ол бисти теҥеридеги ончо тын алкыжыла Христостыҥ Бойында алкаган. ⁴ Сӱӱште јӱрзин деп, Оныҥ алдында агару ла јек јок болзын деп, Ол бисти телекей јайалардаҥ озо Христостыҥ Бойында талдап алган. ⁵ Адазыныҥ кӱӱнин бӱдӱрген ле Ого јараарыла эткен Христос ажыра Кудай бисти Бойына балазынарын озолондыра темдектеп алган. ⁶ Оныҥ улу јакшылыгы учун алказын деп, Ол мыны эткен. Бу јакшылыкты биске карузыган Уулыныҥ Бойында сыйлаган. ⁷ Оныҥ Бойында ла Оныҥ каны ажыра биске јайым берилген, кинчектерис ташталган. Кудай мыны Бойыныҥ јакшылыгыныҥ байлыгыла эткен. ⁸ Бу јакшылыкты Ол биске артыктай ийип, ончо ойгорлык ла оҥдош берген. ⁹ Христос канайып акту бойыныҥ кӱӱниле эткенин кӧргӱзип, бу ажыра Бойыныҥ кӱӱниниҥ јажыдын ачкан. ¹⁰ Ӧй једип келерде, Ол мыны эткен. Оныҥ амадузы – ончозыныҥ бажында Христосты тудуп, Оныҥ Бойында теҥеридезин ле јердезин ончозын бириктирери. ¹¹ Элдеҥ озо Христоско иженип јӱрген бойлорыс Кудайдыҥ магын алказын деп, Оныҥ Бойынаҥ энчи алзын деп, Ол биске озолондыра темдектеген, нениҥ учун дезе, Кудай ончозын Бойыныҥ умзанганыла, кӱӱниле эдет. ¹³ Оныҥ Бойында слер де чындыктыҥ сӧзин – слердиҥ аргадажыгар керегинде Сӱӱнчилӱ Јарды угала, Ого бӱдереерде, Кудай слерге таҥма тургускан. Мынызы – слерге берер болгон Агару Тын. ¹⁴ Ол энчибисти аларыс деп, биске бӱдӱмји эдип, Кудайдыйы болгон улус јайымдалзын ла Оныҥ магы алкалзын деп берилген.

¹⁵ Бат оныҥ учун мен де, Иисус Кайраканга бӱткенигер ле ончо агаруларга сӱӱжигер керегинде угала, ¹⁶ слер учун Кудайга јаантайын алкыш јетирип, слерди эске алынып, мӱргийдим: ¹⁷ Иисус Христос Кайраканыстыҥ Кудайы, мактыҥ Адазы, Бойын билип алзын деп, слерге ойгорлыктыҥ ла ачылтаныҥ Тынын берзин, ¹⁸ јӱректеригердиҥ кӧстӧрин јарытсын, Ол слерди не ижемјиге кычырып алганын, агарулар алып турган Оныҥ мактулу энчизиниҥ байлыгы кандый болгонын билип алзын деп; ¹⁹ Ого бӱдӱп јӱрген бистердиҥ бойыбыста иштеп турган Оныҥ кӱчи кандый улу-јаан болгонын билип алыгар деп, мӱргип јадым. ²⁰ Бу ок кӱчле Кудай Христостыҥ Бойында иштеп, Оны тиргизип, теҥериде Оны Бойыныҥ оҥ јанына отургыскан. ²¹ Кудай Оны ончо башталгалардаҥ ла ӧрӧги јаҥдардаҥ, кӱчтӱлердеҥ ле каандыктардаҥ бийик эткен; Оныҥ ады-јолын јаҥыс та бу чактагы эмес, је келер ӧйлӧрдӧги адалатан аттардаҥ бийик эткен. ²² Кудай ончозын Оныҥ буды алдына бактырып, Оны ончозынаҥ бийик, Серкпениҥ Бажы эткен. ²³ Серкпе дезе Христостыҥ Эди-Каны, Ол оны толо эдип, ончозын ончозында толтырат.

Ӧлӱмнеҥ – јӱрӱмге

¹ Слер керегинде айтса, јазыктарыгардаҥ ла кинчектеригердеҥ улам ӧлӱп калган болгоныгар. ² Ол тушта олорго алдыртып, бу телекейдиҥ чӱм-јаҥдарыла јӱргенигер, кейде бийлеген башкараачыга бакканыгар. Ол – тын, ол эмди Кудайга удурлажып турган улустыҥ бойында иштейт. ³ Олордыҥ ортозында ончобыс ол тушта эт-канныҥ кычазыла јӱргенис, эт-канныҥ ла санааныҥ кӱӱнин бӱдӱргенис, арткан улус чылап, бӱткен бӱдӱмисле «чугулдыҥ балдары» болгоныс. ⁴ Је быйаныла бай Кудай бисти Бойыныҥ улу сӱӱжиле сӱӱген. ⁵ Ол ончобысты, јазыктардаҥ улам ӧлӱп калган бойлорысты, Христосло кожо тындандырган, – слер база јакшылыкла аргадалдыгар, – ⁶ Ол бисти Христос Иисусла кожо тиргизип, теҥериде Оныла кожо отургыскан. ⁷ Мынызыла Христос Иисустыҥ Бойында биске јакшылыгыныҥ ла быйанзагыныҥ учы-куйузы јок байлыгын келер чактарда ачар кӱӱндӱ болгон. ⁸ Слер Кудайга бӱдӱп, Оныҥ јакшылыгыла аргадалганыгар. Бу кайрал эмес, оны Кудай тегин берген. ⁹ Кем де мактанбазын деп, эткен керектеригер де учун аргадалбадыгар. ¹⁰ Бис Кудайдыҥ јайааны ине, быйанду керектер этсин деп, Ол бисти Христос Иисус ажыра јайаган. Мыны Кудай биске озолондыра темдектеп койгон.

Христостыҥ Бойында бирлик

¹¹ Оныҥ учун слер качан да эт-канныҥ керектериле јӱрген кара јаҥдулар болгоныгарды ундыбагар. Слерди «томдолбогон улус» дежетен. Анайда бойлоры кижиниҥ колыла томдолгон улус айдыжатан. ¹² Ол ӧйдӧ Христос јок јӱргенигер, Израильдиҥ калыгына ӧскӧ јердиҥ улузы болгоныгар. Кудайдыҥ кереези ле Оныҥ берген сӧзи слерге ӧскӧ болгон. Слер бу телекейде ижемји ле Кудай јок јӱргенигер. ¹³ Эмди дезе слер, качан да Кудайдаҥ ыраак болгон бойыгар, Христос Иисустыҥ Бойында Оныҥ каны ажыра јуук боло бердигер. ¹⁴ Ол бистиҥ амырыс ине. Ол экӱдеҥ бирӱ эткен, бисти бӧлиичи ӧштӧжӱниҥ бӧлинтизин Бойыныҥ Эди-Каныла бускан, ¹⁵ Јасактыҥ ээжилерин ле некелтелерин токтоткон. Оныҥ амадузы – эки кижидеҥ Бойында Бойы бир јаҥы кижини јайап, амырды јеткилдеери; ¹⁶ Бойыла ӧштӧжӱни јоголтып, керӱ агаш ажыра бир эт-канда экӱни Кудайла јараштырары. ¹⁷ Ол келип, слерге, ыраак та, јуук та болгондорго, амырды јарлыктаган. ¹⁸ Оныҥ учун олор до, бис те Христос ажыра Адага бир Тында кирер аргабыс бар.

¹⁹ Анайдарда, слер ӧскӧ јердиҥ улузы да, кӧчӱп келген улус та эмезигер, је агаруларла кожо јаҥыс јердиҥ улузы, Кудайдыҥ улузы боло бердигер. ²⁰ Слер анайда ок апостолдор ло јарлыкчылар салган тӧскӧ турагарды тудуп јадыгар. Бу тӧстиҥ баш тажы – Христос Иисус. ²¹ Ол тудулып јатканды тудуштырат, онызы кӧдӱрилип, Кайраканныҥ агару байзыҥы боло берет. ²² Оныла кожо кажыгар ла Кудайдыҥ Тыны јӱрген тура боло бередигер.

Павелдиҥ ӧскӧ калыктарга јалчы болуп иштегени

¹ Бого болуп мен, Павел, кара јаҥдулар болгон слер учун Христос Иисустыҥ кижендӱзи боло бергем. ² Слерге болуп меге берилген Кудайдыҥ јакшылыгы канайда иштеп, тудуп турганын слер уккан эмейигер. ³ Кудай меге ачылта ажыра Оныҥ јажыдын билерин берген. Ол керегинде ӧрӧ кыскарта бичиген эдим. ⁴ Мыны кычырып, Христостыҥ јажыдын канайып оҥдоп турганымды билип аларыгар. ⁵ Бу јажытты кижиликтиҥ башкыдагы ӱйелерине билери берилбеген, ол эмди Тын ажыра Кудайдыҥ агару апостолдорына ла јарлыкчыларга ачылган. ⁶ Ончо калыктар да бир эт-канныҥ ӱйези боло берип, ол ок энчини алзын деп, Сӱӱнчилӱ Јарда Иисус Христос ажыра Кудай берген сӧс олордыйы да боло берзин деп, бу јажытты ачканы ол. ⁷ Меге сыйлалган јакшылыкла бу Сӱӱнчилӱ Јардыҥ јалчызы болуп калгам. Бу Оныҥ кӱчиниҥ ижи ажыра болгон. ⁸ Меге, агару улус ортодо неге де турбас кижиге, Христостыҥ сагышла билип албас байлыгын ӧскӧ калыктарга јарлазын деп, бу јакшылык берилген. ⁹ Анайда ок Кудай нени эдерге умзанганыныҥ јажыды неде болгонын ончозына ачары берилген. Бу јажыт дезе ончоны јайаган Кудайдыҥ, ончоны тӧзӧгӧн Иисус Христостыҥ Бойында чактардыҥ башталганынаҥ ала јажырылган. ¹⁰ Эмди теҥеридеги јаандарга ла јаҥдарга Кудайдыҥ ойгорлыгы ончо јӱзӱндериле Серкпе ажыра ачылзын деп, бу јакшылык берилген. ¹¹ Мыны Кудай Бойыныҥ јажын-чакка умзаныжы аайынча эдип, Христос Иисус Кайраканыстыҥ Бойында бӱдӱрген. ¹² Оныла бирлик болуп, Ого бӱдӱп, Кудайга јӱректерис ачык ла бӱдӱмјилӱ кирер аргабыс бар. ¹³ Оныҥ учун слерди сурап турум: слерге болуп кыйналып јӱргемде, сӱригер тӱшпезин, нениҥ учун дезе, бу слердиҥ магыгар.

Христостыҥ сӱӱжи

¹⁴ Бого болуп Иисус Христос Кайраканыстыҥ Адазы алдында тизеленип јадым. ¹⁵ Оныҥ ады-јолынаҥ теҥеридеги ле јердеги кандый ла ук-тӧс бойыныҥ ады-јолын алган. ¹⁶ Ол слерге Бойыныҥ магыныҥ байлыгынаҥ кӱч берип, Бойыныҥ Тыны ажыра слердиҥ кӧксигерди бек этсин деп, ¹⁷ Кудайга бӱткенигер ажыра Христос јӱректеригерде јӱрзин деп, ¹⁸ тазылыгар ла тӧзигер сӱӱш болзын деп, мӱргип турум. Ол тушта ончо агаруларла кожо Христостыҥ сӱӱжиниҥ элбегин ле узунын, бийигин ле тереҥин оҥдоор, ¹⁹ ол кижиниҥ билгиринеҥ бийик те болзо, билер аргалу болорыгар. Ол тушта Кудайдыҥ толо кемине једеригер.

²⁰ Кудай дезе бистиҥ бойыбыста иштеп турган кӱчиле нени сураганыстаҥ эмезе сананганыстаҥ чик-јок кӧпти эдер аргалу. ²¹ Ого Иисус Христостыҥ Бойындагы Серкпеде ӱйедеҥ ӱйеге ӱргӱлји чакка мак! Аминь.

Эт-канныҥ бирлиги

¹ Анайдарда, мен, Кайраканга болуп кижендӱ бойым, слерди јайнап турум: слерди Кудай кычырып алган кычыруга турар эдип јӱригер. ² Јаантайын јобош ло јымжак болыгар, бой-бойыгарга буурзап јӱрерге кичеенигер. ³ Бойыгар ортодо амырды чеберлеп, Тынныҥ бирлигин корулап аларга ончо кӱчигерди салыгар. ⁴ Эт-кан јаҥыс, Тын јаҥыс, нениҥ учун дезе слерди Кудай кычырып алган ижемји јаҥыс. ⁵ Кайракан јаҥыс, Кудайга бӱдетени јаҥыс, креске тӱжетени јаҥыс. ⁶ Ончозыныҥ Кудайы ла Адазы јаҥыс. Ол ончозыныҥ бажында, ончозы ажыра ла ончозында.

⁷ Је бистиҥ кажыбыска ла Христостыҥ берип турган кемиле јакшылык берилген. ⁸ Оныҥ учун айдылган: «Ол улусты олјологондорды олјолоп, бийикке кӧдӱрилип, улуска сый берген». ⁹ Је «кӧдӱрилген» дегени ол не болотон? Ол башкыда јердиҥ эҥ тереҥине тӱшкен дегени эмес беди? ¹⁰ Ол тӱшкени эди, ончозын бӱдӱрип койорго, Ол ок ончо теҥерилердеҥ бийик кӧдӱрилгени эди. ¹¹ Ол кезигин апостолдор, кезигин – јарлыкчылар, кезигин – кӱдӱчилер ле ӱредӱчилер эдип тургускан. ¹² Агарулар Кудайдыҥ керегине јӱрерге ле Христостыҥ Эди-Канын – Серкпени тыҥыдарга белен болзын деп, Ол мынайда эткен. ¹³ Кудайга бӱдеринде ле Оныҥ Уулын билип аларында ончобыс бирликке јетсин деп, Христостыҥ толо кемине једип, эр кемине табышкан улус болзын деп, мынайда эдилген. ¹⁴ Ол тушта база кичӱ балдар болбозыс, салкындый кубулчаҥ не ле ӱредӱ бисти тӱймедип, баштап апарбас. Бу ӱредӱ астырышка экелип турган кижиниҥ тӧгӱнинеҥ ле сӱмезинеҥ улам табылат. ¹⁵ Карын, чынды сӱӱште айдып, Ого ончозында тӱҥейлежип, ӧзӧрибис. Ол – Христос, Бажы эди. ¹⁶ Оныҥ шылтузында ончо эт-кан – Серкпе бириктирилген, оныҥ ончо ӱйелери бой-бойыла бек колбулу, олордыҥ кажызы ла бойыныҥ ижин эдер аргалу кемиле эдет, ончо эт-кан ӧзӱп, сӱӱште тудулат.

Башкыдагы јӱрӱм ле јаҥы јӱрӱм

¹⁷ Анайдарда, Кайраканныҥ алдында айдып ла керелеп турум: бойлорыныҥ сандыртту санаазыла јӱрген кара јаҥдулар чылап база јӱрбегер. ¹⁸ Олордыҥ санаазы карачкыда, олор Кудайдыҥ јӱрӱминеҥ бӧлилген, нениҥ учун дезе Оны билип алар кӱӱндери јок, јӱректери катуланган. ¹⁹ Олор нени де сеспей барып, бойлорын балыр јӱрӱмге берип, кандый ла быјар керектерди тойор-канарын билбей эдип јадылар. ²⁰ Слер дезе Христосты билип алдыгар, мынызы слерди ӧскӧгӧ ӱредет. ²¹ Оны уктыгар, Оныҥ Бойынаҥ ӱрендигер, нениҥ учун дезе чындык Иисустыҥ Бойында. ²² Башкыдагы јӱрӱмигерди артырарга, тӧгӱн кычаларга алдырып, чирип јаткан бойыгардагы јебрен кижидеҥ мойноорго ӱрендигер. ²³ Анайда ок санаагарды тынла јаҥыртып, ²⁴ Кудайга тӱҥейлеп, чындаптаҥ акту ла агару эдип јайалган јаҥы кижини бойыгарга алынарга ӱрендигер.

²⁵ Оныҥ учун меке-тӧгӱннеҥ мойногор, кажыгар ла бойыгардыҥ јуук кижигерге чынды айдыгар, нениҥ учун дезе, бис бой-бойыбыска – бир эт-канныҥ ӱйелери. ²⁶ Чугулданып, кинчек этпегер. Кӱн ашкалакта, чугулыгар ӧчӱп калгай. ²⁷ Кӧрмӧскӧ јер бербегер. ²⁸ Ууры эткен кижи мынаҥ ары ууры этпезин. Карын, не-немедеҥ тутакту јӱрген кижиле ӱлежерге, тузалу неме эдип, акту бойыныҥ колыла иштезин. ²⁹ Оозыгардаҥ бир де јаман сӧс чыкпазын, јаҥыс ла бӱдерине ӱредер ле угуп турган улуска јакшылык береечи сӧстӧр чыксын. ³⁰ Кудайдыҥ Агару Тынын кунуктырбагар. Јайымдалар кӱнге деп, слерге Оныҥ таҥмазы тургузылган. ³¹ Не ле ачыныш, чугулданыш, атыйланыш, кыйгырыш, јамандаш ӧскӧ дӧ јаманла кожо слердеҥ ыразын. ³² Је бой-бойыгарга быйанзак, буурзак болыгар. Кудай Христостыҥ Бойында јаманыгарды таштаганы чылап, слер де бой-бойыгардыҥ јаманыгарды таштагар.

Јарыктыҥ балдары чылап јӱригер

¹ Анайдарда, сӱӱген балдар чылап, Кудайга тӱҥейлежип, ² сӱӱште јӱригер. Анайып Христос то бисти сӱӱп, јараш јытту берӱ чилеп, Кудайга јараар тайылга чылап, бис учун Бойын берген. ³ Балыр јӱрӱм, быјар, ачыркаш деген немелер ортогордо адалбас та учурлу. Андый немелер агаруларга јарабас. ⁴ Анайда ок слерге багай, кей сӧстӧр айдарга, улус шоодорго јарабас. Оныҥ ордына Кудайга алкыш јетиригер. ⁵ Билип јӱригер дейдим, балыр јӱрӱмдӱ, быјар улус, акча-јӧӧжӧгӧ чалуга чылап бажырып турган улус Христостыҥ ла Кудайдыҥ Каандыгында энчи албай јат. ⁶ Андый улус Кудайга удурлажат, олорго Оныҥ чугулы келип јат. Слерди кей сӧстӧрлӧ кижи мекелебезин.

⁷ Олордыҥ эдип јӱрген керектеринде кожо турушпагар. ⁸ Слер качан да караҥуй болгон эдигер, эмди слер – Кайраканныҥ Бойындагы јарык. Андый болгондо, јарыктыҥ балдары чылап јӱригер. ⁹ Тын быйанзак болорын, чындыкты ла чынды тууйт ине. ¹⁰ Кудайга не јарап турганын билип алыгар. ¹¹ Карачкыныҥ нени де туубас керектеринде турушпагар. Карын, олорды иле эдигер. ¹² Олордыҥ јажытту эдип турганын айдарга да уйатту ине. ¹³ Иле эдилип турган ончо неме јарыкта ачылат. Јарыкка ачык ончо неме – јарык бойы. ¹⁴ Оныҥ учун айдылган:

«Ойгон, уйуктап јатканы! Тирил!

Сени Христос јарыдар».

¹⁵ Анайдарда, эдип јӱргенигерди ајарыгар! Санаа-укаазы јок улус чылап эмес, керсӱ улус чылап эдип јӱригер. ¹⁶ Ӧйди баалагар, нениҥ учун дезе кӱндер јаманды экелип јат. ¹⁷ Оныҥ учун санаа-укаа јок болбогор, је Кайраканныҥ кӱӱни незинде болгонын оҥдоп алыгар. ¹⁸ Ичинбегер, мынызы слерди јайрадып јат. Оныҥ ордына Тыннаҥ толтырыныгар. ¹⁹ Кожо сарындар, мак јаҥарлар, тыннаҥ берилген јаҥарлар айдыгар. Јаҥарлап, Кайраканды бастыра јӱрегердеҥ мактагар. ²⁰ Иисус Христос Кайраканыстыҥ адында ончозы учун Ада Кудайга јаантайын алкыш јетиригер. ²¹ Кудайдаҥ айап, бой-бойыгарга багып јӱригер.

Ӱйлери ле ӧбӧӧндӧри

²² Ӱй улус, ӧбӧӧндӧрӧӧргӧ Кайраканга чылап багыгар. ²³ Христос – Серкпениҥ бажы база эт-канныҥ аргадаачызы чылап, ӧбӧӧни де ӱйиниҥ бажы болуп јат. ²⁴ Серкпе Христоско багып турганы чылап, ӱйлери де ӧбӧӧндӧрине ончозында багар учурлу.

²⁵ Эрлер, Христос Серкпени сӱӱгени чилеп, слер де ӱйлеригерди сӱӱгер. Оны Кудайдыҥ сӧзиле јунуп, арутап, Ого учурлайын деп, Ол Серкпе учун Бойын берген. ²⁷ Бойыныҥ алдында мактулу Серкпе боло берзин, ондо эмеш те кир, једикпес, бого тӱҥей ӧскӧ дӧ немелер јок болзын, је ол агару ла јек јок болзын деп, Ол кӱӱнзеген. ²⁸ Анайып, акту бойлорыныҥ эди-канын чылап, ӧбӧгӧндӧри де ӱйлерин сӱӱр учурлу. Ӱйин сӱӱгени, бойын бойы сӱӱгени ол. ²⁹ Кем де качан да бойыныҥ эди-канын јаман кӧрбӧгӧн. Карын, оны азырайт, кичеейт, Кайракан Серкпени чилеп, ³⁰ нениҥ учун дезе, бис – Оныҥ эди-каныныҥ ӱйелери, Оныҥ эди-канынаҥ ла Оныҥ ӱйе-сӧӧктӧринеҥ болорыс. ³¹ Бат оныҥ учун кижи адазын ла энезин артырып, ӱйине јапшынар. Экӱ бир эт-кан боло берер. ³² Бу улу јажыт. Мен Христос ло Серкпе керегинде айдадым. ³³ Анайып кажыгар ла бойын бойы чылап, ӱйин сӱӱзин. Ӱйи дезе ӧбӧгӧнин тооп јӱрзин.

Балдар ла ада-энелер

¹ Балдар, Кайраканга болуп ада-энегерге уккур болыгар, онызы чын болор. ² «Адаҥды ла энеҥди тооп јӱр» , бу – Кудайдыҥ берген сӧзи бар баштапкы јакылта: ³ «Ол тушта сеге јакшы болор, јерде узак јаш јажаарыҥ».

⁴ Слер де, адалар, балдарыгарды ачындырбагар! Је Кайракан канайып ӱреткен ле јакыган эди, олорды анайып чыдадыгар.

Кулдар ла бийлер

⁵ Кулдар, айап ла ширтилдеп, јӱректеригер ачык болуп, јердеги бийлеригерге Христоско чылап багыгар. ⁶ Јалканчыктар чылап, улус кӧрзин деп эмес, је бастыра јӱрегинеҥ Кудайдыҥ кӱӱнин бӱдӱрип јӱрген Христостыҥ кулдары чылап багыгар. ⁷ Улуска эмес, Кайраканга чылап кичеенип јалчы болуп јӱригер. ⁸ Билип јӱригер, кандый ла быйанду керек учун, оны кул да, јайым да кижи эткен болзо, Кайракан кайралдаар.

⁹ Слер де, бийлер, кулдарла база анайда тудуныгар, олорго кату болбогор. Олордо до, слерде де теҥериде Кайракан барын ундыбагар. Ол улусты ылгабай јат.

Кудайдыҥ мылтык-јепселин алыгар

¹⁰ Адакыда айдайын дегеним бу, карындаштар: Кайраканныҥ Бойында, Оныҥ ийдезиле, кӱчиле тыҥыдыныгар. ¹¹ Кӧрмӧстиҥ куурмакту керектерине удура турарга, Кудайдыҥ мылтык-јепселин јӱктенип алыгар. ¹² Бис кижиниҥ бойына удура тартыжып турган эмезибис, је бис башталгаларга удура, ӧрӧги јаҥдарга удура, карачкыныҥ башчыларыныҥ бу телекейине удура, теҥеридеги јаманныҥ тындарына удура тартыжып јадыбыс. ¹³ Оныҥ учун јаман кӱн једе конзо, олорго удура турар аргалу болорго, ончозын ӧдӧлӧ, туруп чыдаарга, Кудайдыҥ мылтык-јепселин алыгар. ¹⁴ Анайдарда, бек турыгар! Чындыкла курчаныгар. Слердиҥ актугар слердиҥ кӧӧ-куйагаар болгой. ¹⁵ Амыр керегинде Сӱӱнчилӱ Јар јарлаарга белен болгоныгар бутка кийген ӧдӱгер болзын. ¹⁶ Мынаҥ башка, бӱдериниҥ куйагын алыгар, оныла јаманныҥ кызыган ончо согоондорын ӧчӱрип ийеригер. ¹⁷ База аргадаштыҥ јуучыл бӧрӱгин алыгар, оноҥ тынныҥ кылыжын – Кудайдыҥ сӧзин.

¹⁸ Мӱргип, јаантайын Кудайдаҥ сурагар. Слерге Тынныҥ берип турганыла, нени керексип турганыгарды ончозын сурап, мӱргигер. Бого болуп сергек, турумкай болыгар, ончо агарулар учун сурагар. ¹⁹ Айдып баштазам, Кудай меге керектӱ сӧстӧр берзин деп, Сӱӱнчилӱ Јардыҥ јажыдын ачыгынча јарлазын деп, мен де учун сурагар. ²⁰ Мен анайда ла јарлаар учурлу. Мен оныҥ кижендӱ элчизи.

²¹ Мениҥ айалгаларымды слерди де билзин деп, слерге ончозын Тихик јетирер. Ол мениҥ карузыган карындажым ла Кайраканныҥ чындык јалчызы. ²² Бистиҥ керектерис керегинде айдып, јӱректеригерди сергитсин деп, оны слерге ийип јадырым.

²³ Слерге, карындаштар, Ада Кудайдаҥ ла Иисус Христос Кайраканнаҥ амыр, сӱӱш ле бӱдери болзын. ²⁴ Иисус Христос Кайраканысты ӧлбӧс сӱӱшле сӱӱп јӱрген ончо улуска јакшылык болзын. Аминь.