TITOS

TITOS

¹ Ako Pablo in agsolat, sogowan Diyos, katiwala IsoKiristo. Ako siyogo agpaeyat sa mga bodang Diyos sa kansiro paniwala, osai agpaistobo sa kansiro atawanan sa betek in agakay kantam sa Diyos, ² panawen sa agpanaya sa boway idapo kalobosan. Tangona kay naw, idapo kay in kobat, ina pag boway piyangako wa Diyos in yewed katawan agsabi baribid. ³ Kalbas sa kabetek ina kansiyo wa piyalowas kansiyo agiplaong. In Diyos in kantam Agpamaboway agsogo sa kangay agpaliwanag ina pag barita in kansiyo piyaalapet sa kangay. ⁴ Ako agsolat sa kaimo laki Titos, kao kangay wa gayed bodang sa paniwala. Kita tanan agpaniwala. Kangay pandalangin kao pakayawteen lakoy osai pakanen apyaan pag remrem in Diyos Amang osai Kiristo Isos kantam Agpamaboway. ⁵ Kao wa in kangay biyaliwan sa Kirita matang kaimo pakapyaen in mga yewed kay sibay, osai kao omidang mga koyay sa mga barkadaan mga bodang Diyos sa baatte bayan, kataw in kangay piyabilin sa kaimo. ⁶ In kaimo pamangkiten mangyan in idapo batay ngiitan daet, osai waget in babai, kadayo in mga bodang agpaniwala, yewed agpalawayan, yewed din daegan. ⁷ Angkataw in agpapoon sa barkadaan mga bodang Diyos kailangan idapo batay ngiitan daet sa kansiyo angkataw siyo paalapetan Diyos. Siyo yewed mayadi agpalalo, yewed galiten, yewed aglasing, yewed mayadi matapang, yewed amagen. ⁸ Kailangan siyo agpabelag, agkamaalan sa maal pag ogali, apo ngani bait, boo betek, maal wano, osai kabaloy agsakop sa kansiyo remrem. ⁹ Kailangan siyo agatang marigen sa barita piyatoldo, in maal piyaniwalaan. Kataw ina siyo batay kapatoldo in betek pag barita sa mga roma, osai batay kabaloy agpabetek sa mga aglaban asin. ¹⁰ Aronaw in mga mangyan daegan aglaban asin pag adar, in karowen sa kansiro in mga agsogo keyen patoli wa. In kansiro mga agiplaong idapo kabolowan agpamadaya sa mga amat. ¹¹ Kailangan siro sawayen, dodowen in kansiro piyagpangwat, angkataw apo wa talnakiyan kansiro wa gayed piyaggolo. Siro agpatoldo in yewed maal patoldowen matang waget kabel kowarta. ¹² Osai ka poropita taga daan Kirita in agsabi keyen, In mga taga Kirita datiyan mga agpansabi baribid, mga idapo bait, mga bibelen, mga solangan. ¹³ Na betek ngani in piyagsabi ina pag taga Kirita. Panawen ina siro pangelelen wa gayed, matang siro piyakapya wakay sa kansiro paniwala, ¹⁴ osai matang siro ayaw wa maniwala sa mga panggisoden in mga Odyo, kamayba sa piyagpatoldo in mga mangyan dayo sa betek. ¹⁵ Sa mangyan maalno in remrem, in boo maalno. Kamay sa mga mangyan daeten in remrem osai yewed agpaniwala, na sa kansiro in boo daeten, angkataw daeten wa in kansiro bait, in kansiro remrem. ¹⁶ Kansiro piyagsabi siro katawan sa Diyos, kamay ina yewed piyagngitan sa kansiro mga ogali. Siro mga marames wa labi, mga daegan, idbatay wa kapangwat kamayba nakay pag maal pag ogali.

¹ Kamay kao, in kaimo patoldowen in betek pag adar. ² Kaimo sabiyen sa mga aplaki kailangan siro kabaloy agsakop sa kansiro remrem, ayaw talamesa, apo bait, osai marigen in agpasandig, osai agpakayawte, yewed agpaglebey. ³ Sa mga wakay agbangen akbai kaimo sabiyen kailangan maalno in kansiro ogali, ayaw agpanlibak, ayaw agpamarik, matang siro kapatoldo in maal, ⁴ matang in kasalokoyan kay pag mga kagbaiyan kansiro apatoldo agpakayawte sa kansiro lalaki kadayo sa kansiro mga bodang, ⁵ apo bait, maalno in remrem, yewed bibelen, mabait, agpaniwala sa kansiro mga lalaki, matang idbatay piyaidapo kabolowan in agiplaong Diyos. ⁶ Kadayo in mga kasalokoyan kay pag mga kaliyakiyan kaimo piliten agsakop sa kansiro remrem. ⁷ Sa boo kaimo ogali kailangan kao maalno pag toladan. In kao agpatoldo ayaw aglimbang, remremen gayed maal. ⁸ Kaimo alapeten in betek pag mga agiplaong, in mga idapo batay ngiitan daet, matang in mga aglaban sa kantam batay arikoyan, idapo batay masabi daet panawen sa kantam. ⁹ In mga alapet sogowan kaimo patoldowen maniwala sa kansiro mga kapwan, in boote panawen pangwaten makaanggay sa kansiro, ayaw labanan. ¹⁰ Ayaw agpanakaw sa kansiro kapwan, dayem sa boote panawen siro maal piyaalapetan, matang batay piyagmaal in adar Diyos in kantam Agpamaboway. ¹¹ Angkataw piyalowas wa Diyos in kansiyo maalno pag remrem in agpamaboway sa boo mangyan. ¹² Ina in agpatoldo sa kantam agbenglay sa baribid pag mga ogali in mga piyagkabeet waget kantam bilog. Matang ngona kitam katawan agsakop sa kantam remrem, betek wa in ogali, makaanggay sa Diyos, ¹³ ngona in kitam agpanaya kay sa kantam maalno pag piyagpanaya, in piyagpalowas in kalakoyen lakoy Diyos kantam Agpamaboway IsoKiristo. ¹⁴ Kansiyo tiyaboy in kansiyo boway matang kitam makowa sa boo daet, kansiyo wa gayed piyakapya matang kansiyo wa mga mangyan, beet wano agpangwat maal. ¹⁵ Ina wa boo in kaimo patoldowen. In boo kaimo kabaloyan kaimo alapeten sa agpamakaeyat remrem osai sa agpangelel. Ayaw kaimo agpabayaanen kamayba nakay pag mangyan in agidapo kabolowan sa kaimo.

¹ In mga belag kaimo patoldowen agpasakop sa mga poon sa mga apo kabaloyan, maniwala sa kansiro, palagi sandata agpangwat in boote maal. ² In mga belag kaimo patoldowen ayaw aglibak kamayba kay nakay, ayaw agpalaway. Dayem agpabelag osai agpakayawte sa boo mangyan. ³ Tangona kitam din idapo bait, mga daegan, pabaribid, kitam sakop wa gayed sa boo daeten pag piyagkabeet kantam bilog, keyen makaanggay. Tangona kitam agogali agremrem daet osai agpanagiri. Kitam piyagkabaisan in roma mangyan, siro din kantam piyagkabaisan. ⁴ Kamay paka piyagngitan wa in kamaalnowen in Diyos kantam agpamaboway, in siyo agpakayawte sa kantam, ⁵ kitam kansiyo piyaboway. Ina kantam abel yewed panawen sa kantam maalen pag mga piyangwat dayem panawen sa kansiyo agpakayawte. In kitam liinis in Betek pag Abyan kitam biyodang wakay piyangwat bayo wakay. ⁶ Panawen kay IsoKiristo in kantam Agpamaboway in Betek pag Abyan tiyaboy lakoy Diyos sa kantam. ⁷ Matang in siyo agpakayawte lakoy sa kantam, kitam piyangwat idapo daet, osai piyakan in boway idapo kalobosan in kantam piyagpanaya. ⁸ Betek ngani ina pag siyabi. Na kangay beet kao ayaw aglimbang agpatoldo ina sa mga agpasandig sa Diyos matang siro sandata agpilit agpanawen maal. Ina in maalno, apo kabolowan sa mga mangyan. ⁹ Kao ayaw agpaagem sa mga agpalsagotan idapo kabolowan, ayaw agpanggisoden in mga kasokponan, osai ayaw agpalawayan panawen sa mga Batas, angkataw in mga kataw ina idapo kabolowan, idapo batay pakinabang. ¹⁰ No apo mangyan agpapoon agpaylabanan na kaimo pangelelen anggan makadowai, kalbas no agaway kay na ayaw wa agawiten belag, ¹¹ angkataw kaimo wa atawanan siyo daeten pag mangyan. Kaya atawanan siyo baribid panawen daan sa kansiyo mga daet pag panawen. ¹² Asin kangay batay piyagpataboy Artimas, no yewed Tikiko. Paka rateng wa asin, na ayaw yewed kao toloy ista pataboy sa kangay sa Nikopolis. Ista wa ako batay agpakalbas in mga bolan pamagyo. ¹³ Sinas in abogado osai Apolo kaimo piliten tolongen sa kansiro agipanaw. Kaimo tiyaken siro ayaw akorangan sa boote. ¹⁴ Kantam mga belag kaimo patoldowen ayaw aglimbang ageyat agpanawen, matang in kansiro mga kailangan siro apo daan kowaan osai kabaloy din agtolong sa mga idapo. ¹⁵ In boo kangay mga sarig atai keyen, Kataw nakay wa kao? Kaimo sabiyen sa kanta mga belag agpaniwala siro nangkataw wa. In kangay pandalangin sa kanyo boo keyen, Kamo pakayawteen lakoy Diyos.