ROMA

ROMA

¹ Ako Pablo in agsolat sa mga taga Roma. Ako sogowan Kiristo Isos, iidang Diyos matang sogowan lakoy, kansiyo tiyalaga agpatoldo in kansiyo Maal pag Barita. ² Ina pag Barita in piyangako Diyos tangona naw, piyababa sa kansiyo mga poropita, in kansiro siyolat sa mga Agisolat. ³ Ina pag Maal pag Barita panawen sa kansiyo Bodang IsoKiristo kantam Kapwan. In kansiyo bilog mangyan kasokponan Dabid, ⁴ kamay sa kaalenen kansiyo abyan, ngiitan siyo Bodang ngani Diyos, panawen sa kabaloyan lakoy in siyo batang matay tagoli wakay boway. ⁵ Panawen sa kansiyo kami piyakan Diyos in maalen pag tiyaboy, in kami piyagsogo agbarita sa kabaloyan Kiristo agakay sa mga mangyan sa boo kobat matang siro pasakop agpaniwala sa kansiyo. ⁶ Kamo din agiyagem asin, angkataw kamo mga iidang IsoKiristo. ⁷ Kamo in boo mga piyagpakayawte Diyos sa bayan Roma in kangay piyagsolatan. Kamo kansiyo iidang matang kansiyo mga bodang. Kamo pakayawteen Diyos osai pakanen in apyaan pag remrem, in Diyos kantam Amang osai IsoKiristo kantam Kapwan. ⁸ In tokaw kangay piyagsabi keyen, Panawen kay IsoKiristo kamo boo kangay piyagkaanggay sa Diyos angkataw in kanyo paniwala piyagbarita sa boo kobat. ⁹ Kangay boo remrem Diyos in kangay piyagtiwalaan, matang kangay piyagpatoldo in Maal pag Barita panawen sa Bodang Diyos. Atawanan in Diyos kamo baatte kangay piyagpandalangin. ¹⁰ Baatte kangay piyagayay sa kansiyo in ako pataboyen asin sa kanyo no nges ina in kansiyo beet. ¹¹ Dogay wa ako beet wano katagbo sa kanyo matang agbagi in piyagtaboy Diyos sa kantam abyan matang kamo piyakaeyat. ¹² In kangay beet siyabi kitam boo agpaysitolongan agpalsipaeyatan sa kantam paniwala. ¹³ Laki mga belag, kangay beet kanyo atawanan makakarowan wa ako batay wa nges pataboy asin sa kanyo, kamay baatte ako agkaeleg. Ako beet din asin agakay mga mangyan kay Kiristo kataw daan in kangay piyangwat sa roma mga yewed Odyo. ¹⁴ Kailangan ngani ako agbarita sa mga taga bayan kadayo sa mga taga agbaw, sa mga katawan kadayo sa mga yewed katawan. ¹⁵ Ina in dailan kaya ako beet din agpatoldo in Maal pag Barita asin sa bayan Roma. ¹⁶ Yewed kangay piyagkarikoyan in agpatoldo in Maal pag Barita, angkataw ina in kabaloyan Diyos in agpaboway sa baatte agpasandig sa kansiyo, tokaw sa mga Odyo, kalbas kadayo din sa mga yewed Odyo. ¹⁷ Angkataw in Maal pag Barita in agsabi in padalan Diyos agpangwat idapo daet sa mga mangyan. Ina panawen siro agpasandig sa kansiyo ibat sa parakayan, na anggan din sa kalobosan ina panawen daan din siro agpasandig sa kansiyo. Kataw in mga Agisolat keyen, In agibetek sa pangkit Diyos, siyo batay agkaboway panawen siyo agpasandig sa kansiyo. ¹⁸ Piyagpapangkit Diyos batang sa langit in kansiyo galit sa boo daet piyagpamangwat mga mangyan aglaban sa kansiyo. Angkataw sa kansiro mga daet pag ogali in betek piyagtakleb wa. ¹⁹ Angkataw in maal atawanan panawen sa Diyos mapawa nges sa kansiro angkataw kansiyo wa piyapangkit. ²⁰ Ibat kay naw in piyangwat in kobat in kansiyo idapo kalobosan pag kabaloyan osai in kansiyo kadiyosen, kamayba ina yewed piyagngitan, na ina mapawa gayed piyagngitan sa kansiyo mga piyangwat, maal nges atawanan. Matang in mangyan idapo wa batay dailan. ²¹ Kamaybawa kansiro wa atawanan apo Diyos, siyo yewed kansiro piyagpakabwat kataw in kailangan sa Diyos. Idapo, kamayba piyagkaanggayan. Dayem in kansiro mga piyagremrem in mga idapo kabolowan, siro biyeleg wa in kansiro idapo bait pag remrem. ²² Kansiro remrem siro apo katawanan, kamay siro idapo bait. ²³ Angkataw kansiro piyagpaidapo kabolowan in kalakoyen in Diyos in idbatay matay. Kansiro wakay piyagmaal in mga rarawan piyangwat waget kataw mangyan agkatay, kataw mga bantog, mga ayop, mga aginanap. ²⁴ Ina in dailan kaya siro piyabayaan Diyos sa kansiro mga marames pag piyagkabeet anggan siro agpalpamangwatan makarikoy sa kansiro mga bilog. ²⁵ Kansiro piyagpaidapo kabolowan in totoo panawen sa Diyos, miskapet wakay sa baribid. Kansiro piyagmaal piyaglakonaw in mga piyangwat waget, yewed in Agpangwat, bago nges siyo in kailangan pagmaalen anggan idapo kalobosan. Aon ngani. ²⁶ Ina in dailan kaya siro piyabayaan Diyos sa kansiro mga makarikoy pag piyagkabeet. Kamayba in mga kagbaiyan dayo wa palalay sa mga kaliyakiyan. In kansiro piyangwat lalaki kagbaiyan daan. ²⁷ Kataw din ina in mga kaliyakiyan, dayo wa din palalay sa mga kagbaiyan, dayem kansiro piyangwat babai kaliyakiyan daan. Siro agpalpamangwat in makarikoy sa osai osai. Matang panawen sa kansiro daet, piyagpaidapan in kansiro bilog, piyarosa agibetek sa kansiro daet. ²⁸ Kansiro piyagpaawakan in Diyos, matang siro kansiyo wa piyabayaan. In kansiro mga remrem mibaloy wa idapo bait, siro agloblob wa sa daet. ²⁹ Kansiro wa gayed piyagogali in boo wano daet, mga baribid wa gayed, mga solangan, mga agremrem daet. Siro mga agpanagiri, mga agbono mangyan, mga agpamalaway, mga agpamadaya, mga aleleng. Siro mga agkasadapan agbarita daet, ³⁰ mga agpamasaen, mga agkairis sa Diyos, mga agpanlibak, mga agyabang, mga agpakabwat. Siro mga sanay wa agpamangwat baatte osai wakay ka daet, mga agpandaeg sa mga koyay. ³¹ Siro mga idapo bait, mga bosliyen. Siro yewed katawan agpakayawte, mga yewed katawan agpangkit sa idap in roma mangyan. ³² Siro nges katawan in Batas Diyos keyen, Piyagbono in agpangwat mga kataw ina. Kamayba siro katawan ina siro agaway kay agpamangwat, agkaanggay kay gayed sa amat mga agpamangwat kataw ina.

¹ Na laki, kamayba nakay pag mangyan kao, no kao agsabi keyen in roma apo daet, na kao yewed batay kadailan. Angkataw in kao agpadaet sa roma na kaimo din piyagpadaet in kaimo sadiri. Angkataw kao agpamangwat din in kataw ina, in kaimo piyagsabi keyen daet. ² Kantam atawanan agibetek ngani in parosa Diyos sa mga mangyan agpamangwat kataw ina. ³ Na nakay, kaimo lames remrem kao idbatay piyagparosa Diyos no kao agpadaet sa mga agpamangwat kataw ina kamay kao agpamangwat din? ⁴ Kaimo lames piyagidapo kabolowan in Diyos angkataw siyo mabait, katawan agbanta, yewed toloy agkagalit? Kao yewed lames katawan kaya siyo mabait matang kao piyagpakan kabetek agbenglay kaimo daet? ⁵ Kamay kataw kao marigen in remrem, osai idbatay agbenglay in kaimo daet, na labi kay kaimo piyagpaistobo in batay dogayan parosa sa kaimo sa ibeng piyagpalowas Diyos in kansiyo galit, piyagparosa in mga agpamangwat daet. ⁶ Angkataw in Diyos in batay agbayad sa baatte mangyan no nakay in kansiro mga piyangwat. ⁷ In bayad sa mga yewed aglimbang agpangwat maal angkataw kansiro beet siro piyagmaal Diyos, piyalakonaw, idbatay wa matay, na in bayad piyagtaboy Diyos sa kansiro, ina boway idapo kalobosan. ⁸ Dayem sa mga madamot, mga agpaniwala sa baribid yewed sa betek, na sa kansiro agbangen in piyagtaboy Diyos galit lakoy agparosa. ⁹ Kaidapan, maloba wa gayed idbatay apyaan in batay tiyaboy Diyos sa baatte mangyan agpamangwat daet, tokawan sa mga Odyo, kalbas kadayo din sa mga yewed Odyo. ¹⁰ Dayem in piyagtaboy Diyos sa baatte mangyan agpamangwat maal, siro piyalakonaw, piyagmaal, osai apyaan. Ina din tokawan sa mga Odyo, kalbas kadayo din sa mga yewed Odyo. ¹¹ Angkataw in Diyos yewed agpangidang. ¹² In mga yewed Odyo idapo in mga Batas Diyos piyasolat kay Mowisis, siro batay piyagparosa Diyos kamayba siro yewed katawan sa mga Batas. In mga Odyo wakay agbangen siro katawan sa mga Batas, siro batay piyagparosa Diyos no nangkataw in siyabi sa mga Batas. ¹³ Angkataw yewed in mga agparengey waget sa mga Batas, dayem in mga agpangwat ina, na siro in batay piyangwat Diyos idapo daet. ¹⁴ In mga yewed Odyo no siro wakayte agpangwat in piyagsabi sa mga Batas, na ina kagwali wa batas sa kansiro kamayba siro idapo in mga Batas. ¹⁵ Piyagngitan in mga Batas agibalay sa kansiro mga remrem, panawen sa kansiro piyagpangwat. In kansiro mga bait agsabi din ina agibalay sa kansiro mga remrem, angkataw apo betek in kansiro remrem keyen, Ina pag kangay piyangwat daet, apo wakay betek keyen, Anda agbangen maal. ¹⁶ Ina boo batay mibaloy sa Ibeng dogayan in Diyos batay agosap sa mga mangyan panawen sa kansiro mga remrem piyagbetang. Kiristo Isos in sogowan agosap. Ina in piyagsabi in Maal pag Barita kangay piyagpatoldo. ¹⁷ Kao keyen kao Odyo, agpasandig sa mga Batas Diyos, osai agpakalakonaw keyen, Kitam in mga Odyo in mga iidang Diyos. ¹⁸ Kaimo atawanan in beet Diyos. Panawen kao agadar sa mga Batas kao katawan keyen anda maal, ina daet. ¹⁹ In kaimo remrem kao agakay sa mga beleg, agparawa sa mga piyagkalenedan in remrem. ²⁰ Kao agpabait sa mga idapo bait, agpatoldo sa mga bodang, angkataw kaimo abel sa mga Batas in boo atawanan osai in boo betek. ²¹ Kao agpatoldo sa mga roma, na nakay batang yewed piyatoldo in kaimo sadiri? Kao agpatoldo keyen, Ayaw agpanakaw. Baina, kao agpanakaw din. ²² Kao keyen, Ayaw agpanggaraw, bago kao agpanggaraw din. Kao agkaramesan sa mga yewed Diyos. Baina, kao agpanakaw sa mga balay in mga yewed Diyos. ²³ Kao agpakalakonaw keyen kao sakop sa mga Batas, bago in kao yewed agpaniwala sa mga Batas, na in Diyos kaimo piyagpaidapo kabolowan sa pangkit mga roma. ²⁴ Kataw in mga Agisolat keyen, Panawen sa kanyo sa mga Odyo in ngaran Diyos piyagidapo kabolowan in mga yewed Odyo. ²⁵ No kaimo piyagpangwat in mga Batas Diyos na apo kabolowan in kao tiyoli. Kamay no kao yewed agpangwat in mga Batas, na idapo wa kabolowan in kao tiyoli. ²⁶ Kamayba in yewed Odyo, in yewed tiyoli no agpangwat in piyagsabi sa mga Batas na siyo kagwali wa daan tiyoli sa pangkit Diyos. ²⁷ Na in mga yewed tiyoli, panawen siro agpangwat in piyagsabi in mga Batas, siro batay agsabi sa kanyo keyen, Kamo in mga tiyoli apo daet, angkataw kamo apo wa daan in mga Batas sa mga Agisolat, kamay kamo yewed agpangwat ina. ²⁸ In totoo toli yewed waget in piyagpangwat sa bilog. Kaya in mangyan Odyo, yewed panawen waget sa piyagngitan sa kansiyo bilog, ²⁹ no yewed panawen sa bayo wakay kansiyo remrem, kansiyo bait. Ina in Abyan Diyos in agpangwat, yewed in mga Batas sa mga Agisolat. In kataw ina pag mangyan, in agmaal sa kansiyo yewed in mga mangyan no yewed in Diyos.

¹ Na nakay batang in mga Odyo aglabis kay sa mga yewed Odyo? Nakay in pakinabang sa toli? ² Karowan ngani. In tokaw sa boo, sa mga Odyo piyaalapet in mga agiplaong Diyos. ³ No in kalaati Odyo bosliyen, na sa kanyo remrem nakay, in Diyos lames agpamosliyen din? ⁴ Yewed ngani mayadi. In Diyos yewed ngani bosliyen kamayba in boo mangyan bosliyen. Kataw in mga Agisolat keyen, Diyos, atawanan in kaimo mga agiplaong yewed bosliyen. Osai no kao piyagosap na kao batay daan mandaeg. ⁵ Kataw anda in matiwid mga mangyan. No labi kay piyagngitan in kaalenen in Diyos panawen sa daeten in kantam mga piyagpangwat, na nakay, kantam lames asabi keyen in Diyos daeten in siyo agparosa sa kantam? ⁶ Yewed ngani mayadi. No in Diyos daeten, na nangkataw siyo batay kaosap sa boo mga mangyan? ⁷ Aronaw kay in agmatiwid keyen, No labi kay lomwas in kalakoyen in Diyos panawen ako bosliyen, angkataw labi kay piyagngitan in siyo agpangwat in kansiyo mga siyabi, na no kataw ina nakay batang ako kansiyo piyagparosa kataw in osai ka agpamangwat daet? ⁸ Nakay batang yewed maal kitam mamangwat daet no batay maal in kalobosan? In mga agpamasaen sa kangay keyen kataw ina kono in kangay piyagpatoldo. Na maal ngani siro parosaen Diyos. ⁹ Na nakay, kitam in mga Odyo mabwat kay lames sa mga yewed Odyo? Kapya. Kataw karai in kangay siyabi, kamayba nakay pag mga mangyan, kamayba in mga Odyo, kamayba in mga yewed, kitam boo yewed kabaloy yewed agpangwat daet. ¹⁰ Kataw in siyabi sa mga Agisolat keyen, Idapo mangyan agpangwat maal. Idapo, kamayba osai waget. ¹¹ Idapo katawan. Idapo agpamangkit sa Diyos. ¹² In boo mangyan pabaribid wa. Siro boo wa mga aleleng. Idapo mabait. Idapo, kamayba osai waget. ¹³ In kansiro mga bibi marames wa gayed, kagwali lebengan idwa tiyabon, angkataw in kansiro mga agiplaong agpamadaya, in kansiro mga agiplaong makakatay kataw in kayat dopong. ¹⁴ Siro maloba wa agpamanes agpansabi mga makakaskit pag agiplaong. ¹⁵ Siro agkalaliyan agbono mangyan. ¹⁶ Kamayba saano siro domalan, apo liyangat mga maskit, mga kaidapan. ¹⁷ Siro yewed katawan in apyaan pag dalan. ¹⁸ Siro idapo katawan agkalimo sa Diyos. ¹⁹ Kantam atawanan in boo piyagsabi sa mga Batas Diyos ina piyagsabi sa kantam boo angkataw in boo mangyan sakop sa mga Batas. Na in boo mangyan yewed kadailan angkataw in boo batay piyagosap Diyos. ²⁰ In mangyan idbatay piyagpangwat Diyos idapo daet panawen sa agpangwat in piyagsabi sa mga Batas, angkataw idapo mangyan kabaloy agpangwat in mga Batas. Kamay panawen sa mga Batas kaya in mangyan katawan siyo apo daet. ²¹ Kamay ngona piyagpapangkit wa gayed in padalan Diyos agpangwat idapo daet sa mga mangyan. Ina yewed panawen sa mga Batas kamayba piyatonayan in mga Batas osai in mga poropita. ²² In mga agpasandig kay IsoKiristo piyagpangwat Diyos idapo daet. Ina sa boo agpasandig kay Isos, kamayba kataw nakay pag mangyan. ²³ Angkataw in boo pabaribid wa, yewed sibay sa kalakoyen siyandata nges Diyos sa kantam. ²⁴ Kamay kamayba kataw ina kitam piyagpangwat Diyos idapo daet panawen sa kansiyo lakonaw pag agpakayawte, osai panawen kay Kiristo Isos in agpalpas sa kantam. ²⁵ Kiristo in iidang Diyos matang in siyo biyono siyo wa in padalan aglibangaw sa daet in mga agpasandig sa kansiyo. Ina piyangwat Diyos matang piyagngitan siyo betek ngani. Tangona kansiyo piyagbanta in daet piyagpangwat mga mangyan, siro idwa kansiyo piyarosa. ²⁶ Kalbas ngona pag betek panawen sa kansiyo piyangwat, piyagngitan din in siyo idapo daet, osai in kansiyo din piyagpangwat idapo daet in mga agpasandig kay Isos. ²⁷ Na ngona kitam idapo wa dailan agpakabwat, angkataw in kitam idapo daet yewed sa kitam agpangwat in mga Batas, dayem sa kitam agpasandig kay Kiristo. ²⁸ Angkataw atawanan wa in mangyan piyagpangwat Diyos idapo daet yewed panawen sa agpaniwala sa mga Batas no yewed panawen sa agpasandig sa kansiyo. ²⁹ In Diyos yewed waget sa mga Odyo. Siyo Diyos din sa mga yewed Odyo. Siyo Diyos sa boo ³⁰ angkataw siyo osai waget. Kamayba in mga Odyo, siro kansiyo piyagpangwat idapo daet panawen siro agpasandig kay Kiristo. Kadayo din in mga yewed Odyo, siro kansiyo din piyagpangwat idapo daet panawen siro agpasandig kay Kiristo. ³¹ Na nakay, panawen sa agpasandig kay Kiristo kanyam wa lames piyagidapo kabolowan in mga Batas? Kapya. Kanyam kay ngani piyagpalakonaw in mga Batas.

¹ Kantam remremen in kantam tangona kakoyayan Abraam, no nakay in mibaloy sa kansiyo. ² No kaya siyo piyangwat idapo daet panawen sa kansiyo piyagpangwat, na maal wa siyo agpakabwat. Kamay siyo yewed maal agpakabwat sa pangkit Diyos, ³ angkataw piyagsabi in mga Agisolat keyen, In dailan kaya Abraam piyangwat Diyos idapo daet, panawen siyo agpasandig sa Diyos. ⁴ No in mangyan agpanawen, na in piyagtaboy sa kansiyo yewed piyagawit taboy waget, no yewed bayad sa panawen. ⁵ Kamay in agkabeet idapo daet, yewed panawen sa siyo agpangwat maal, dayem panawen sa siyo agpasandig sa Diyos in agpangwat idapo daet sa mga mangyan daeten, na ina pag mangyan in piyagpangwat idapo daet panawen siyo agpasandig sa Diyos. ⁶ Ina din in beet siyabi Dabid in siyo keyen, Agkaanggay in mangyan piyangwat Diyos idapo daet yewed dailan sa kansiyo mga panawen. ⁷ Keyen Dabid, Boway wa in mangyan aleleng no liibangaw wa Diyos in daet, idapo wa ngani daet. ⁸ Boway wa in mangyan in daet idbatay wa piyagremrem in Kapwan. ⁹ Ina pag kaanggayan in siyabi Dabid, ina yewed waget sa mga Odyo. Yewed. Ina sa mga yewed din Odyo. Kantam piyagsabi batang sa mga Agisolat keyen, Kaya Abraam piyangwat Diyos idapo daet panawen siyo agpasandig sa kansiyo. ¹⁰ Nangkadogay lames mibaloy ina, no siyo ikkay tiyoli, no siyo tiyoli wa? Ina mibaloy wa in yewed kay siyo tiyoli. ¹¹ In siyo ikkay tiyoli siyo piyangwat Diyos idapo daet panawen siyo agpasandig sa kansiyo. Kalbas siyo tiyoli wa matang tanda siyo piyangwat wa idapo daet. Kataw ina siyo mibaloy wa amang in boo agpasandig sa Diyos, in boo piyangwat idapo daet kamayba yewed tiyoli. ¹² Kataw din ina siyo amang in mga tiyoli, yewed waget panawen sa siro tiyoli no yewed panawen sa siro agtolad sa kantam tangona kakoyayan agpasandig sa Diyos, kataw in piyangwat Abraam in siyo ikkay tiyoli. ¹³ In Diyos mangako kay Abraam, kadayo sa kansiyo mga kasokponan keyen in boo kobat batay kansiro, yewed panawen Abraam agpaniwala sa mga Batas no yewed panawen siyo agpasandig sa Diyos, kataw ina siyo piyangwat idapo daet. ¹⁴ Kamay apo mga agremrem keyen idapo batay piyakan in pangako no yewed in mga agpaniwala sa mga Batas. Kamay no kataw ina na idapo batay piyakan, angkataw idapo kabaloy agpaniwala sa mga Batas. Osai sa mga agremrem kataw ina kansiro din remrem idapo kabolowan in agpasandig sa Diyos. ¹⁵ In piyagkabel sa mga Batas in galit Diyos, angkataw no idapo Batas na idapo din daet. ¹⁶ Na in pangako agiyagem waget sa agpasandig matang yewed piyagbayadan, dayem piyagtaboy waget Diyos panawen sa kansiyo lakonaw pag agpakayawte sa mga kasokponan Abraam, yewed waget sa mga agpaniwala sa mga Batas no yewed kadayo din sa boo mga kataw siyo agpasandig sa Diyos. Siyo in amang sa kantam boo. ¹⁷ Keyen in mga Agisolat, Kao kangay piyangwat amang sa karowan mga mangyan. Ina pag pangako piyagpangwat Diyos in kay Abraam piyagpasandigan, in Diyos in agpaboway sa mga matay, osai in agberya sa mga idapo kay, matang siro mibaloy wa. ¹⁸ Kamayba tiyak idbatay wa mamodang Abraam, siyo agpanaya kay din, agpasandig kay sa Diyos, matang siyo mibaloy wa ngani amang sa karowan mga mangyan. Kataw in siyabi Diyos kay Abraam keyen, In kaimo mga kasokponan batay karo in mga magirem. ¹⁹ Marigen daan in kansiyo agpasandig sa Diyos kamayba siyo mga osai wa ka daan ka dagon, koyayte wa gayed, osai Sara baog din, osai koyayte wa din. ²⁰ Yewed piyagbaslag in kansiyo remrem sa pangako Diyos, dayem labi kay siyo agpakaeyat in agpasandig, agmaal sa Diyos. ²¹ Siyo agpaniwala ngani in Diyos kabaloy agpangwat in kansiyo pangako. ²² Matang siyo piyangwat Diyos idapo daet panawen siyo agpasandig sa kansiyo. ²³ Kamay in siyabi keyen in piyangwat Diyos idapo daet, ina siyolat yewed waget kay Abraam, ²⁴ dayem kadayo din sa kantam. Kitam din piyangwat idapo daet panawen kitam agpasandig sa Diyos in agpaboway wakay tagoli kay Isos in kantam Kapwan. ²⁵ Siyo piyabono panawen sa kantam mga daet, kalbas piyaboway wakay matang kitam apangwat idapo daet.

¹ Na kataw kitam piyangwat wa Diyos idapo daet panawen sa agpasandig kay IsoKiristo kantam Kapwan, na panawen din sa kansiyo kitam apyaan, idwa agkalimo sa Diyos. ² Panawen sa agpasandig kay Kiristo kitam kansiyo wa yaakay piyasagalem sa lakonaw pag agpakayawte Diyos in kantam piyagpasandigan ngona. Matang kantam piyagkaanggayan in kitam katiyak batay apo bagiyan sa kansiyo kalakoyen. ³ Yewed waget ina, no yewed kitam agkaanggay din sa kantam mga kaidapan angkataw kantam atawanan no kitam piyagpaidapan na kitam labi wa agbanta. ⁴ Kadogay in kitam yewed aglimbang kitam piyagpakarigen. Kadogay in kitam marigen kitam katiyak ngani. ⁵ Kadogay in kantam piyagtiyak batay ngani mibaloy, angkataw in agpakayawte Diyos piyabalay wa sa kantam galem. In Betek pag Abyan in tiyaboy wa sa kantam, siyo in agpabalay. ⁶ In kitam idapo kay kabaloyan Kiristo biyono panawen sa mga agpamangwat daet, sa kabetek tarato Diyos. ⁷ Maidap sa mangyan agtaboy kansiyo boway panawen sa osai ka mangyan idapo daet, kamay karam apo mangyan mangaas agpangwat ina panawen sa osai ka mangyan maal. ⁸ Kamay tangona in kitam agaway kay agpamangwat daet Kiristo biyono panawen sa kantam. Kataw ina piyapangkit Diyos in kansiyo agpakayawte sa kantam. ⁹ Na in kitam piyangwat idapo daet panawen Kiristo biyono, na labi wa kitam batay kansiyo piyalpas sa galit Diyos. ¹⁰ Tangona kitam mga kalaban Diyos. Kamay ngona panawen in kansiyo Bodang biyono, kitam kansiyo wa piyangwat bodang. Na kataw bodang wa, labi kay kitam batay piyaboway piyaagem sa kay Kiristo boway. ¹¹ Yewed waget ina. Kitam agkaanggay wa sa Diyos panawen sa kantam Kapwan IsoKiristo, angkataw kitam piyangwat wa Diyos kansiyo bodang panawen sa kansiyo. ¹² Panawen sa osai ka mangyan, rateng sa kobat in daet. Kalbas panawen sa kansiyo daet, rateng wa din in katayan. Kalbas romarab sa boo mangyan, matang in boo agkatay panawen in boo apo daet. ¹³ In ikkay tiyaboy Diyos in mga Batas, apo wa daet sa kobat. Kamay in idapo kay in mga Batas yewed kay masabi keyen in daet aglaban sa batas. ¹⁴ Kamaybawa kataw ina, sogod in kabetek Adan anggan sa kabetek Mowisis in mga mangyan agkatay wa daan, kamayba in kansiro mga daet yewed kataw in kay Adan, aglaban sa batas Diyos. Adan rarawan sa osai ka batay rateng. ¹⁵ Kamay ina pag dowai yewed tikkataw, angkataw in piyangwat Diyos panawen sa kansiyo lakonaw pag agpakayawte labi kay kalakoy in kay Adan aglaban sa batas. Panawen sa daet osai ka mangyan, Adan, aronaw mangyan in matay. Kamay panawen din sa osai ka mangyan, IsoKiristo, rateng sa karowan in maalen pag piyagtaboy Diyos panawen sa kansiyo lakonaw pag agpakayawte. ¹⁶ In piyagtaboy Diyos yewed kataw in mibaloy panawen sa kay Adan piyangwat daet. Angkataw panawen kay Adan osai waget ka piyangwat daet in siyabi Diyos keyen, Parosaen wa. Kamay panawen sa lakonaw pag piyagtaboy Diyos, kamayba karowan in daet, in siyabi Diyos keyen, Kangay wa piyaglibangaw in daet. ¹⁷ Panawen sa osai ka mangyan, Adan, in mga mangyan sakop wa sa katayan, panawen sa kansiyo daet. Kamay panawen din sa osai ka mangyan, IsoKiristo, labi kay lakonaw in tiyaboy sa mga piyakayawte wano gayed Diyos, sa kansiyo piyangwat idapo wa daet. Siro batay boway, batay dogayan agpapoon. ¹⁸ Na no panawen sa osai waget ka daet pag panawen in boo mangyan piyarosa, na kataw daan din ina panawen sa osai waget ka maal pag panawen in boo mangyan piyalpas, piyakan boway. ¹⁹ No panawen sa daet osai waget ka mangyan aronaw mangyan agpangwat daet, na kataw daan din ina panawen sa paniwala osai waget ka mangyan, na aronaw mangyan in batay piyangwat Diyos idapo daet. ²⁰ Paka apo wa in mga Batas Diyos karowan wa in yewed agpaniwala. Kamay paka karowan wa in yewed agpaniwala labi wa mistobo in lakonaw pag agpakayawte in Diyos. ²¹ Na ngani no kataw in daet agpandaeg panawen sa katayan, na kataw daan din in lakonaw pag agpakayawte in Diyos agpandaeg panawen siyo agpangwat idapo daet sa mga mangyan, matang tiyaboy in boway idapo kalobosan panawen kay IsoKiristo kantam Kapwan.

¹ Na nangkataw wa? Kitam lames agaway kay agpamangwat daet matang mistobo kay in lakonaw pag agpakayawte Diyos? ² Ayaw wa. Kitam dayem matay wa sa mga daet, na kitam idwa kailangan agogali daet. ³ Yewed lames kanyo atawanan kitam boo biyaotismowan agiyagem kay Kiristo Isos na kitam agiyagem din sa kansiyo katayan? ⁴ In kitam biyaotismowan, kitam matay sarig siyo kalbas liyebeng, na no kataw Kiristo boway wakay panawen sa kabaloyan lakoy in Amang, na kitam din kabaloy wa agogali in bayo wakay pag boway. ⁵ Angkataw no kitam agiyagem kay Kiristo in siyo matay, na tiyak kitam batay din agiyagem sa kansiyo in siyo boway wakay. ⁶ Kantam atawanan in kantam datiyan boway agiyagem sa kansiyo in siyo piyako sa kodos, matang biyono wa in daeten pag piyagkabeet kantam bilog. Na no kataw ina kitam idwa sakop sa daet. ⁷ Angkataw in mga matay wa siro piyalpas wa, idwa sakop sa mga daet. ⁸ Kamay kantam piyagpaniwala no kitam matay agiyagem kay Kiristo, na kitam batay din boway agiyagem sa kansiyo. ⁹ Kantam atawanan Kiristo tagoli boway, na idbatay wa tagoli wakay matay, na siyo idwa sakop sa katayan. ¹⁰ Siyo makaosai waget matay panawen sa daet. Ngona in kansiyo boway sakop wa sa Diyos. ¹¹ Na kataw din ina kantam remremen kitam matay wa sa daet, kamay agkaboway sakop wa sa Diyos, panawen kitam agpalageman kay Kiristo Isos. ¹² Na in kantam agkatay pag bilog ayaw agpasakopen sa daet matang ayaw kitam sakop sa daeten pag mga piyagkabeet kantam bilog. ¹³ Kamaybawa nakay sa kantam bilog ayaw agpasakopen sa daet matang sogowan sa daet. Dayem kitam pasakop wa sa Diyos, angkataw kitam piyaboway wa sa katayan. In boo sa kantam pasakopen sa kansiyo matang sogowan wa sa maal. ¹⁴ Angkataw idwa kailangan kitam sakop sa daet, angkataw kitam idwa sakop sa mga Batas, no yewed sakop wa sa lakonaw pag agpakayawte Diyos. ¹⁵ Na nakay, kitam lames agpangwat daet panawen kitam idwa sakop sa mga Batas, no yewed sakop sa lakonaw pag agpakayawte Diyos? Ayaw ngani. ¹⁶ Kantam atawanan no kitam pasakop wa sa mangyan matang kansiyo sogowan, na kitam sogowan wa ngani siyo. No in mangyan pasakop sa daet, na siyo batay matay. Dayem no siyo pasakop sa Diyos na siyo batay piyangwat idapo daet. ¹⁷ Kamay kitam agkaanggay sa Diyos angkataw kitam in tangona sakop sa daet, ngona maniwala wa gayed sa piyatoldo sa kantam. ¹⁸ Kitam piyalpas wa sa daet, ngona sakop wakay sa maal. ¹⁹ Kangay piyagalapet in mga agiplaong baatte piyagalapet mga mangyan matang toloy kanyo atawanan. No nangkataw tangona kitam pasakop sa agpanggaraw, sa kaalelengan agistobo, na ngona wakay kitam pasakop wa sa maal pag mga ogali matang kitam mibaloy maal wano gayed. ²⁰ In kitam tangona sakop kay sa daet kitam yewed agkalawagen sa maal. ²¹ Na nakay ngani in kantam abel asin pag mga panawen in kantam ngona piyagkarikoyan? In batay kalobosan ina pag mga kataw ina katayan. ²² Kamay ngona kitam piyalpas wa sa daet, kalbas sakop wa sa Diyos. Na in kantam abel asin kitam agogali labi kay maalno, kalbas in batay kalobosan ina boway idapo kalobosan. ²³ Angkataw in bayad daet katayan, kamay in piyagtaboy in Diyos in boway Kiristo Isos kantam Kapwan. Ina pag boway idapo kalobosan idapo ngani bayad.

¹ Laki mga belag, kanyo wa atawanan in batas, na kamo katawan in osai ka mangyan sakop sa batas anggan waget siyo agkaboway kay. ² Alimbawa, in batas in osai ka kagbaiyan agiyagem sa kansiyo lalaki anggan waget siyo agkaboway, kamay no in lalaki matay, na siyo mipalpas wa sa mga batas panawen sa taybalang. ³ Na no boway kay in kansiyo lalaki no siyo mamangkit wakay sa roma, na ina agpanggaraw. Kamay no matay wa in kansiyo lalaki na siyo idwa sakop asin pag batas. No siyo mamangkit wakay lalaki, na ina yewed agpanggaraw. ⁴ Na mga belag, kataw din ina sa kantam. In kitam miyagem wa sa bilog Kiristo, kitam matay wa sa mga Batas, matang kitam maal wa apo wakay kapwan, ina Kiristo in boway wakay, matang in Diyos apo abel sa kantam in mga maalen pag panawen. ⁵ Tangona in kitam agogali kay in kantam tangona piyagkabeet, na in mga daeten pag piyagkabeet kantam mga bilog piyolaw in mga Batas agpilit sa kantam agpamangwat in mga daet matang kitam matay. ⁶ Kamay ngona in kitam matay wa sa mga daet agpansakop sa kantam, na kitam idwa sakop sa mga Batas. Ngona kitam sakop sogowan wa sa Diyos, idwa sa datiyan pag mga Batas in mga agisolat, dayem sa bayo wakay pag boway batang sa Abyan Diyos. ⁷ Na nakay, in mga Batas lames daet? Yewed ngani. Kamay no idapo in mga Batas na ako nges idbatay katawan keyen ina daet. No in mga Batas idapo siyabi keyen, Ayaw agpansolang, na ako nges yewed katawan daet in agpansolang. ⁸ Kamay panawen asin daan pag otos kangay galem piyolaw daet yaakay sa agpansolang sa boote. Angkataw no idapo in otos na matay in daet. ⁹ Tangona in ako yewed kay katawan keyen apo otos, ako boway daan. Kamay paka kangay wa atawanan ina, abowayan wakay in daet, ako wakay matay. ¹⁰ Ina daan nges pag otos in kailangan agpaboway sa kangay, bago mana ina daan in piyangwat padalan matang ako biyono. ¹¹ Angkataw in otos piyangwat in daet padalan matang ako piyadaya. Kataw ina ako biyono ngani in daet. ¹² In mga Batas Diyos maal wano, in baatte ngani otos idapo daet, boo betek, maal wano. ¹³ Na nakay, in maalen pag otos lames in agbono sa kangay? Yewed ngani. In maal, in otos, piyangwat padalan in daet, kamay in daet wa daan in agbono sa kangay. Panawen ina ngiitan wa gayed in kadaetan lakoy in daet. ¹⁴ Kantam atawanan in mga Batas tolong sa abyan. Kamay ako bilog, sogowan daet. ¹⁵ Yewed kangay atawanan no nakay batang ako kataw tai. Baanda, in kangay beet piyangwat idwa kangay piyagpangwat. No nakay in kangay dayo piyangwat na ina in kangay piyagpangwat. ¹⁶ No ako dayo in kangay piyagpangwat daet, na in beet siyabi ako keyen maalno in mga Batas. ¹⁷ Na idwa ako gayed in agpangwat ina, no yewed in daet in agbalay sa kangay. ¹⁸ Kangay atawanan idapo maalno agbalay sa kangay, na in beet siyabi sa kangay bilog in agkapangwat daet. Angkataw kamayba ako beet agpangwat maal, kamay ako yewed kabaloy. ¹⁹ Angkataw yewed kangay piyagpangwat in maalno kangay beet. Dayem in kangay mana piyagpangwat in daet in dayo kangay piyangwat. ²⁰ No ako agpangwat in kangay dayo piyangwat, na idwa ako gayed in agpangwat, no yewed in daet wa daan in agbalay sa kangay. ²¹ Na anda in kangay atawanan sa kangay. Kamayba ako beet agpangwat in maalno, in daet idbatay panaw sa kangay. ²² Sa galem gayed kangay remrem ako agkaanggay sa mga Batas Diyos. ²³ Kamay apo kay osai ka batas agbalay sa kangay bilog. Ina aglaban sa batas sa kangay remrem. Panawen ina ako sakop sa daet agbalay sa kangay bilog. ²⁴ Na ako ayawte ngani. Nakay ngani in batay agpaboway sa kangay sa kangay bilog in agbaba sa katayan? ²⁵ Kitam wa agkaanggay sa Diyos angkataw in agpaboway IsoKiristo wa in kantam Kapwan. Na kataw ina ako no ako waget, in kangay remrem sogowan in mga Batas Diyos, kamay in kangay bilog sogowan daet.

¹ Na ngani in mga agiyagem kay Kiristo Isos, idbatay wa piyarosa. ² Ako idwa sakop sa batas daet osai katayan, angkataw ako piyalpas wa in agpamaboway pag batas in Abyan Diyos panawen kay Kiristo Isos. ³ Piyangwat in Diyos in yewed apangwat in mga Batas panawen sa idapo kabaloyan in mangyan. Kansiyo siyogo in kansiyo Bodang apo bilog kataw kantam, kamay in kantam agbangen agpamangwat daet. Isos siyogo matang tiyaboy in kansiyo boway panawen sa daet. Kalbas in betek siyo apo ina pag bilog in daet kansiyo wa gayed piyakadaet. ⁴ Ina pag piyangwat Diyos matang in boo mga otos sa mga Batas kantam wa abaloyan, in kitam idwa agogali in piyagkabeet kantam bilog no yewed in piyagkabeet in Abyan Diyos. ⁵ Angkataw in mga agogali in mga piyagkabeet kansiro bilog, kansiro remrem baatte sakop sa mga piyagkabeet kansiro bilog. Kamay in mga agogali in mga piyagpatoldo in Abyan, kansiro remrem baatte sakop sa piyagkabeet in Abyan. ⁶ In mga apo remrem sakop sa mga piyagkabeet kansiro bilog, ina agitaboy sa katayan. Kamay in mga apo remrem sakop sa piyagkabeet in Abyan, na agkaboway, apyaan. ⁷ Angkataw in baatte agremrem sa mga piyagkabeet in bilog, ina aglaban sa Diyos, yewed agpaniwala sa mga Batas Diyos, yewed din kabaloy maniwala. ⁸ In mga agogali in mga piyagkabeet kansiro bilog idbatay kabaloy agpakaanggay sa Diyos. ⁹ Kamay no agbalay ngani sa kantam in Abyan Diyos, na kitam idwa agogali in mga piyagkabeet kantam mga bilog, no yewed in piyagkabeet in Abyan Diyos. No in osai ka mangyan idapo in Abyan Kiristo, na siyo yewed kay Kiristo. ¹⁰ Angkataw no Kiristo agbalay sa kantam na kamayba wa kantam bilog matay wa panawen sa kantam daet, na agkaboway in kantam abyan panawen kitam piyaidapo wa daet. ¹¹ No agbalay sa kantam in Abyan Diyos in agpaboway wakay kay IsoKiristo, na ina din pag Diyos in batay agtaboy boway sa kantam mga agkatay pag bilog, angkataw in kansiyo Abyan agbalay sa kantam. ¹² Na, laki mga belag, idwa kitam sakop sa mga piyagkabeet kantam bilog. Na kitam idwa kailangan agogali sa mga piyagkabeet kantam bilog. ¹³ No kitam agogali in mga piyagkabeet kantam bilog, na kitam batay ngani matay. Dayem no sa kabaloyan in Abyan kantam piyagbono in mga daeten pag ogali kantam bilog, na kitam batay boway. ¹⁴ In boo mga piyagpatoldo in Abyan Diyos siro mga bodang Diyos. ¹⁵ Angkataw in Abyan tiyaboy Diyos sa kantam yewed agpansakop agpamalimlimo sa kantam, no yewed kitam kansiyo piyagpangwat bodang Diyos matang sa kabaloyan in Abyan maal wa kitam agawit sa Diyos keyen, Amang, kangay Amang. ¹⁶ In Abyan Diyos sarig ngani kantam abyan in keyen kitam ngani mga bodang Diyos. ¹⁷ Kalbas panawen kitam kansiyo mga bodang kitam batay piyagpakan in mga piyangako Diyos. Sarig Kiristo kitam batay piyagpakan in mga siyandata Diyos batay kay Kiristo. No ngona kitam kansiyo sarig piyagpaidapan, na dogayan kitam batay din piyagpakalakonaw sarig siyo. ¹⁸ Kamayba nangkalakoy in mga kaidapan ngona betek no sa kangay ina tomag idapo daan no batay piyagpaytikkalakoy osai in kalakoyen lakoy piyagpalowas batay sa kantam. ¹⁹ In boo mga piyangwat Diyos agkabeet wano in piyagpalowas Diyos in kansiyo mga bodang. ²⁰ In boo mga piyangwat masida wa, idbatay wa mibaloy in kaalenen kaya siro piyangwat. Kaya kataw ina yewed panawen sa kansiro beet dayem panawen ina in remrem Diyos. Kamay kamayba kataw ina na batay wakay maal, ²¹ angkataw in boo mga piyangwat kamayba ngona agkabolok, dogayan batay piyalpas, idwa agkabolok, matang sarig in mga bodang Diyos in siro piyalpas wa gayed. ²² Kitam katawan anggan ngona in boo mga piyangwat agdaing sa piyagkaidapan kataw in kagbaiyan agboslotan. ²³ Yewed waget siro in kataw ina, kadayo din kitam in piyakan in Abyan, in tokawan tiyaboy Diyos sa kantam, kitam din agdaing agkabyatan sa kantam galem anggan kitam agpanaya kay sa kabetek in Diyos batay agpalowas in kitam kansiyo ngani mga bodang, in kitam piyalpas wa gayed kadayo in kantam mga bilog. ²⁴ Kitam piyaboway wa, kalbas kantam piyagpanaya ina pag batay mibaloy. Kamay no abel wa in piyagpanaya na idwa piyagpanaya. Nakay in agpanaya sa abel wa daan? ²⁵ Kamay no kitam agpanaya sa yewed kay kantam abel, na kitam yewed aglimbang agpanaya. ²⁶ Osai kay ka dailan kaya kitam piyagtolong in Abyan Diyos angkataw kitam idapo kabaloyan. Kitam yewed gayed katawan mandalangin maal, matang in Abyan in agpangayay sa Diyos panawen sa kantam. In kansiyo piyagalapet in mga agiplaong idbatay masabi mangyan. ²⁷ In Diyos in kabaloy agpangkit sa remrem mangyan, siyo katawan daan in beet siyabi in Abyan, angkataw in piyagpandalangin in Abyan sa mga bodang Diyos, ina wa daan in beet Diyos. ²⁸ Kantam wa atawanan sa boote mga mibaloy sa mga agkaanggay sa Diyos siyo agtolong sa kansiro matang in boote mibaloy maal sa kansiro, siro in kansiyo mga iidang matang piyagpangwat in kansiyo beet. ²⁹ Angkataw tangona daan naw in Diyos katawan wa daan no nakay agbangen in kansiyo, kalbas siro kansiyo wa siyandata matang kataw wa daan kansiyo Bodang, matang siyo wa ngani in panganay sa tayariyan aro. ³⁰ In kansiyo mga siyandata kansiyo iidang, kalbas in kansiyo mga iidang kansiyo wa piyangwat idapo daet, kalbas in kansiyo piyangwat idapo daet kansiyo piyakalakonaw. ³¹ Batang asin pag boo nakay in kantam atawanan? No in Diyos sa kantam agbangen, na nakay in batay kapandaeg sa kantam? Idapo. ³² Yewed kansiyo piyagayaw in kansiyo Bodang, dayem tiyaboy ngani sa kantam boo. Na no tiyaboy sa kantam in kansiyo Bodang, na batay din tiyaboy sa kantam in boote sarig kansiyo Bodang. ³³ Nakay in batay agabla sa kantam, sa mga iidang Diyos? In Diyos idbatay, angkataw siyo wa daan in agpangwat sa kantam idapo daet. ³⁴ Nakay in batay agparosa sa kantam? Kiristo Isos idbatay, angkataw siyo in biyono, kalbas piyaboway wakay, kalbas ngona sa pamalang agbangen Diyos agpandalangin sa kantam. ³⁵ Kamayba kitam maloba piyagpaidapan, piyagpangwatan daet, agkayawes, maidap, piyagpamalimlimowan, kamayba piyagbono, na idapo batay kapasoway sa kantam sa pakayawte Kiristo. Idapo. ³⁶ Kataw in siyabi sa mga Agisolat keyen, Panawen sa kaimo kami boo ibeng batay piyagbono, kami kataw in mga topa batay piyagbono. ³⁷ Idapo ngani. Asin pag boo kitam mandaeg daan panawen sa kabaloyan Kiristo in agpakayawte sa kantam. ³⁸ Kangay ngani atawanan idapo batay kapasoway sa kantam sa pakayawte Diyos. Kamayba matay, kamayba boway, kamayba angil, kamayba mamaw, kamayba nakay ngona betek, kamayba sa agrateng kay, kamayba in mga poon mamaw, ³⁹ kamayba in mga sa ogbos, kamayba in mga sa galem diya, kamayba nakay pag mga piyangwat, na idapo wano kabaloy agpasoway sa kantam sa pakayawte Diyos piyagpalowas Kiristo Isos kantam Kapwan.

¹ Ako agrongkot wano panawen sa kangay mga kabelagan in mga bodang Israil. In kangay piyagsabi atawanan Kiristo totoo ngani. In kangay piyagsabi yewed baribid. In Betek pag Abyan katawan din idapo magolo sa kangay galem sa kangay piyagsabi sa kanyo. ² In kangay piyagsabi ako maloba wano agrongkot, idbatay maoraw in maskit sa kangay remrem panawen sa mga bodang Israil. ³ Siro kangay mga kamangyanan, kangay mga kabelagan. In maal kay nges ako agbangen in misoway kay Kiristo, in parosaanen in Diyos, matang siro piyasabangen. ⁴ Siro mga bodang Israil, yaawit Diyos kansiyo mga bodang piyapangkit sa kansiro in kansiyo kalakoyen. In kasondowan tiyaboy din sa kansiro, osai in mga Batas, in betek pag agsamba, osai in mga pangako. ⁵ Siro in kasokponan in mga kakoyayan lakoy. Ina din pag kasokponan in rakayan in bilog Kiristo in Diyos mabwat wano sa boo. Siyo palagi paglakonawen anggan idapo kalobosan. Ina wa ngani. ⁶ Yewed kangay piyagsabi keyen yewed mibaloy in pangako Diyos. Angkataw yewed in boo batang kay Israil in iidang Diyos kansiyo mga mangyan. ⁷ Osai in kay Abraam mga kasokponan siro yewed boo bodang Diyos. In Diyos keyen kay Abraam, In batang waget kay Isaak in batay piyagawit kaimo mga kasokponan. ⁸ Na in beet siyabi ina yewed in boo kay Abraam bodang piyagawit bodang Diyos, no yewed in mga waget biyodang panawen sa pangako Diyos, siro waget in piyagawit kasokponan Abraam. ⁹ Baina keyen in pangako, Sa kataw ngona betek ako atai wakay, kalbas ina pag betek Sara batay wa mamodang, kaliyakiyante. ¹⁰ Yewed waget ina. In kay Ribika bodang malsiing, bodang sa kantam kakoyayan Isaak, ¹¹ - ¹² in siro ikkay biyodang idapo kay kapangwat kamayba maal kamayba daet, siyabi wa Diyos kay Ribika keyen, In kakaan agbangen in batay sogowan in ariyan. Na asin piyagngitan in Diyos agidang panawen sa kansiyo wa daan beet, yewed panawen sa mga piyagpangwat mangyan. ¹³ Kataw in mga Agisolat keyen, Akob in kangay iidang, Isaw kangay piyangidangan. ¹⁴ Na nakay, kantam lames asabi keyen in Diyos baribid? Yewed ngani mayadi. ¹⁵ Angkataw keyen in siyabi Diyos kay Mowisis, Ako batay agpakayawte sa kangay beet pakayawteen. Wara ako in agidang no nakay in kangay batay piyagpakayawte. ¹⁶ Na in piyagpangwat Diyos yewed sa beet mangyan, yewed sa eyat mangyan, dayem batang waget sa kansiyo pakayawte. ¹⁷ Angkataw sa mga Agisolat kansiyo siyabi kay Paraon keyen, Kaya kao kangay piyangwat poon lakoy, matang waget panawen sa kaimo kangay batay piyapangkit in kangay kabaloyan, matang in kangay ngaran atawanan sa boo mga kobat. ¹⁸ Na ngani in Diyos agpakayawte no nakay in kansiyo beet piyakayawte. Osai kansiyo piyakarigen in remrem no nakay in kansiyo beet piyakarigen. ¹⁹ Karam apo batay agsabi sa kangay keyen, No idapo batay kabaloy aglaban sa kansiyo beet, na nakay batang in Diyos agparosa kay sa kantam? ²⁰ Kamay kitam mangyan waget. Idapo batay kalaban kataw ina sa Diyos. In piyangwat lames batay kasabi sa agpangwat keyen, Nakay batang ako piyangwat kataw tai? ²¹ Yewed mana maal in agpamangwat keden, batang sa osai waget ka tikmel diya, agpangwat osai ka keden maalno, osai wakay ka keden daeten? ²² Kamayba beet piyalowas in Diyos in kansiyo galit, osai beet piyapangkit in kansiyo kabaloyan, siyo maloba agbanta sa mga mangyan kailangan parosaen, bonowen. ²³ Ina kansiyo piyangwat matang piyalowas in kansiyo idapo kaloba ina pag kalakoyen in tiyaboy sa kantam kitam in kansiyo mga piyagpakayawte, in tangona kansiyo siyandata batay piyagpakan in kansiyo kalakoyen. ²⁴ Kitam ina pag mga mangyan in kansiyo iidang yewed waget batang sa mga Odyo, no yewed batang din sa mga yewed Odyo. ²⁵ Kataw ina in kansiyo siyabi sa aklat Osiyas keyen, In datiyan yewed kangay mga mangyan, na kangay batay piyagawit kangay mga mangyan. Osai in datiyan yewed kangay piyagpakayawte kangay batay piyagpakayawte. ²⁶ Osai sa kobat in mga mangyan piyagsabiyan keyen, Kamo yewed kangay mga mangyan, siro batay piyagawit mga bodang Diyos agkaboway. ²⁷ Anda wakay in biyarita Isaiyas panawen sa mga bodang Israil keyen, Kamayba in mga bodang Israil in karowen karo in bowangin sa dagat korang waget in batay piyaboway. ²⁸ Angkataw maloba osai malakas batay piyagpangwat in Kapwan in kansiyo parosa sa boo kobat. ²⁹ Isaiyas din in agsabi keyen, No in Kapwan in Apo Kabaloyan idapo piyatera agkaboway sa kantam mga kasokponan, na kitam nges mibaloy kataw in Sodoma, osai kataw in Gomora. ³⁰ Na in kantam atawanan batang asin piyagkaanggayan Diyos in mga yewed Odyo in mga yewed agpilit makaanggay sa kansiyo pangkit. Panawen siro agpasandig sa kansiyo siro kansiyo piyangwat idapo daet. ³¹ Dayem in mga bodang Israil, in mga agpilit agpaniwala sa mga Batas matang nges makaanggay sa pangkit Diyos, kamay siro galot. ³² Kaya siro galot angkataw siro wakayte agpamangkit padalan agpakaanggay sa Diyos, yewed panawen sa agpasandig sa kansiyo, no yewed panawen sa kansiro waget piyangwat. Siro asolpo sa bato makasolpo, ³³ in siyabi sa mga Agisolat keyen, Baanda, kangay piyabolalang sa Siyon osai ka bato makasolpo, lakonaw pag bato makairos. Kamay kamayba nakay in agpasandig sa kansiyo idbatay wa mangalwasi.

¹ Mga belag, maloba kangay piyagkabeet, kangay piyagpandalangin sa Diyos keyen, Pabowayen in mga bodang Israil. ² In kangay ngiitan sa kansiro siro agpilit wano makaanggay sa pangkit Diyos kamay baribid in kansiro atawanan. ³ Angkataw yewed kansiro atawanan in padalan Diyos agpangwat sa mangyan idapo daet. Kalbas siro agpilit nges agpangwat in kansiro sadiri padalan, idwa aggisod sa padalan Diyos. ⁴ Kay Kiristo wa mibaloy in dailan kaya apo in mga Batas, matang kamayba nakay in agpasandig sa kansiyo kansiyo piyagpangwat idapo daet. ⁵ In siyolat Mowisis panawen sa mga Batas agpangwat sa mangyan idapo daet, keyen, No in mangyan kabaloy agpangwat in boo mga Batas, na siyo batay piyaboway. ⁶ Kamay anda wakay in piyagsabi panawen sa piyagpangwat idapo daet panawen sa agpasandig keyen, Ayaw agremremen keyen, Nakay in batay monaik sa langit? In beet siyabi matang Kiristo piyalompot. ⁷ Ayaw din agremremen keyen, Nakay in batay lompot sa toyongan? In beet siyabi matang Kiristo kiyowa batang sa mga matay. ⁸ Kamay in piyagsabi keyen, In agiplaong Diyos bangen sa kaimo, in kaimo wa daan piyagsabi, in kaimo piyagremrem. Na ina in agiplaong kanyam piyagbarita, in keyen agpasandig sa Diyos, ⁹ in keyen, No kaimo piyagsabi keyen Isos in Kapwan, osai no in kaimo remrem agpasandig keyen siyo piyaboway wakay Diyos, na kao batay piyaboway. ¹⁰ Angkataw no kantam remrem agpasandig sa Diyos na kitam kansiyo piyagpangwat idapo daet. Osai no kitam agpalowas ina sa kantam piyagsabi na kitam piyagpaboway. ¹¹ Keyen in mga Agisolat, Kamayba nakay in agpasandig sa kansiyo idbatay mangalwasi. ¹² Pikkataw daan in Odyo osai in yewed Odyo. Osai waget in Kapwan sa boo mangyan. In boo mga agayay sa kansiyo piyagpakan in kansiyo mga piyagtaboy. ¹³ Baina in mga Agisolat keyen, In boo mga mangayay sa Kapwan batay piyaboway. ¹⁴ Kamay in mga mangyan idbatay omayay sa yewed kansiro piyagpasandigan. Osai siro idbatay agpasandig sa kansiyo no siro yewed karengey in barita panawen sa kansiyo. Osai siro idbatay karengey in barita no idapo agpatoldo in barita. ¹⁵ Osai idapo batay agbarita no yewed siyogo. Kataw in mga Agisolat keyen, In agrateng in agbaba maalno pag barita makaanggay wano sa kangitan. ¹⁶ Kamay in maniwala sa maalno pag barita yewed boo. In siyabi Isaiyas keyen, Laki Kapwan, nakay in maniwala sa kanyam barita? ¹⁷ Na in paniwala batang sa agparengey. In piyagparengey in barita panawen kay Kiristo. ¹⁸ Kamay karam apo agtanong keyen, Siro lames ikkay karengey in barita? Karengey wa ngani, angkataw in mga Agisolat keyen, In mga agpatoldo in barita pataboy wa sa boo kobat. In kansiro agiplaong rateng wa sa boo kobat. ¹⁹ Apo kay keyen, In mga bodang Israil lames yewed katawan? Mowisis in tokaw agsagot keyen, Batay piyagidang Diyos in mga mangyan yewed gayed bansa matang kamo batay agpanagiri. Batay piyagidang Diyos mga mangyan idapo katawanan matang kamo batay agkagalit. ²⁰ Isaiyas labi kay maeyat agsabi in siyabi Diyos keyen, Ako atagbo in mga yewed agpamangkit sa kangay. Ako papangkit sa mga mangyan yewed agtanong panawen sa kangay. ²¹ Kamay panawen sa mga bodang Israil kansiyo siyabi keyen, Boo ibeng ako agberya agpakayawte sa mga mangyan songgaran, dayo maniwala.

¹ Na nakay, biyenglay wa lames Diyos in kansiyo mga mangyan? Yewed. Baina ako osai daan ka bodang Israil, kasokponan Abraam, sa tiribo Binamin. ² Yewed biyenglay in Diyos in kansiyo mga mangyan in tangona kansiyo iidang. Kanyo atawanan in siyabi sa mga Agisolat panawen kay Iliyas in siyo agdaing sa Diyos panawen sa piyangwat in mga bodang Israil. ³ Siyo keyen, Kapwan, kansiro biyono in kaimo mga poropita, kansiro riyegnas in mga paltawan pansonogan andog sa kaimo. Ako waget in agitera, kadogay ako beet kay biyono. ⁴ Kamay in siyabi Diyos sa kansiyo keyen, Ako apo kay piyatera pito ka libo ka kaliyakiyan yewed agsamba sa yewed Diyos piyagawit Baal. ⁵ Na ngona din kataw ina, apo kay agitera mga iidang Diyos panawen sa kansiyo lakonaw pag agpakayawte. ⁶ Siro kansiyo ngani iidang panawen sa kansiyo lakonaw pag agpakayawte, yewed panawen sa kansiro mga panawen. Angkataw no ina panawen sa kansiro mga piyagpangwat, na yewed wa masabi ina panawen sa lakonaw pag agpakayawte. ⁷ Na in atawanan asin in kansiro piyagkaamag yewed abel in boo mga bodang Israil angkataw in amat marigen in remrem. In mga waget iidang Diyos in kaabel ina. ⁸ Kataw in siyabi sa mga Agisolat keyen, Anggan ngona pag betek, piyaidapo katawanan in Diyos in kansiro mga remrem. Kansiro mga mata biyeleg wa, kansiro talinga biingi wa din. ⁹ Siyabi din Dabid keyen, Dayem nges kansiro mga katiponan mibaloy wa kagwali salaod, kagwali balatik. Siro nges maligan, piyarosa. ¹⁰ Dayem nges malened kansiro mga mata matang siro idwa kangitan. Siro nges mabokkong agkaidapan anggan agkaboway. ¹¹ Na nakay, in beet siyabi in asolpo in mga bodang Israil, siro lames maligan wa gayed? Yewed ngani. Kamay panawen siro mairos agpangwat daet, rateng wa sa mga yewed Odyo in boway idapo kalobosan. Matang in mga Odyo aamagan sa abel in mga yewed Odyo. ¹² Na ngona, no panawen sa daet in mga Odyo batay makamaal sa boo mangyan, osai no panawen siro galot in mga yewed Odyo apo pakinabang, na no siro boo maniwala labi kay lakonaw in batay pakinabang. ¹³ Laki mga yewed Odyo, anda wakay in kangay piyagsabi sa kanyo. Panawen ako katiwala siyogo Kiristo sa mga yewed Odyo, na kangay piyaglakonaw in agbarita sa kanyo, ¹⁴ matang in kangay mga kabelagan in mga Odyo aamagan, matang no kataw ina, batay din piyaboway in amat sa kansiro. ¹⁵ No panawen in mga Odyo biyenglay Diyos, in mga mangyan sa boo kobat maybelagan wa osai in Diyos, na no in Diyos tagoli wakay agtanggap sa mga Odyo, na ina kagwali in matay wa piyaboway wakay. ¹⁶ In arina piyagpangwat tinapay, no in tokaw pag tinapay tiyaboy sa Diyos, na ina pag boo, Diyos wa daan in kapwan. No sa yangaw piyagtalaga sa Diyos in mga dalig, na kadayo in mga sanga Diyos wa daan in kapwan. ¹⁷ Alimbawa osai ka togda yangaw piyagawit olibo, diyodo in kalaati sanga, kalbas apo wakay mga sanga batang sa olibo kobat piyasokpon sa dodowan matang kansiro makowa in reta batang sa mga dalig. Na kamo in mga yewed Odyo kataw ina pag olibo kobat piyasokpon wa matang ngona kamo piyagpakan bagiyan in sa mga Odyo. ¹⁸ Na yewed mayadi kamo agidapo kabolowan sa mga sanga in togda. Ayaw agyabang. Kanyo remremen yewed kamo in agpaboway sa mga dalig. Siro agbangen in agpaboway sa kanyo. ¹⁹ Na karam kanyo batay siyabi keyen, Diyodo in mga sanga matang kami misokpon. ²⁰ Betek ina, kamay kaya siro diyodo panawen siro yewed agpasandig sa Diyos. Kalbas kaya kamo siyokpon panawen kamo agpasandig sa kansiyo. Na ayaw agyabang, dayem alimowan wa agbangen. ²¹ Angkataw no in mga sanga in togda in mga Odyo yewed piyagalwasi in Diyos, na kamo din idbatay kansiyo piyagalwasi. ²² Asin kantam piyagngitan in Diyos mabait osai matapang. Siyo matapang sa mga yewed agpasandig sa kansiyo, kamay mabait sa kanyo no kamo agaway kay agpasandig sa kansiyo kabaiten. No yewed, na kamo piyagdodo din. ²³ In mga Odyo, no siro agpasandig wakay sa Diyos, na siro piyagsokpon wakay. Angkataw in Diyos apo kabaloyan agsokpon wakay tagoli sa kansiro. ²⁴ No kamo in sanga in olibo kobat piyasokpon sa togda olibo, kamayba yewed kataw ina in ogali olibo, na labi kay in mga Odyo batay wakay misokpon sa olibo kansiro daan dodowan. ²⁵ Mga Belag, apo osai ka piyagbetang kangay nges beet kanyo atawanan, matang yewed batay agpakabwat in kanyo remrem. In mga bodang Israil in siro ngona yewed agpasandig ina kadogayte waget, yewed anggan dogayan, anggan waget kapasabangen wa sa Diyos in boo karowen in mga yewed Odyo. ²⁶ No kataw ina batay wa piyaboway in boo mga bodang Israil, kataw in mga Agisolat keyen, Batay rateng in Agpamaboway batang sa Siyon. Kansiyo batay kiyowa sa mga kasokponan Akob in boo kansiro daet. ²⁷ Paka kangay wa kiyowa in kansiro mga daet, na ina wa in kangay batay kasondowan sa kansiro. ²⁸ Panawen siro dayo in Maal pag Barita siro mibaloy wa kalaban Diyos, matang kamo in mga yewed Odyo apo wa pakinabang. Kamay panawen siro kansiyo iidang, siro kansiyo daan piyagmaal panawen sa kansiro mga kakoyayan. ²⁹ Angkataw in Diyos yewed agiyalis in remrem panawen sa kansiyo mga iidang osai sa kansiyo mga tiyaboy. ³⁰ Tangona kamo mga aglaban sa Diyos. Kamay ngona kamo kansiyo piyagpakayawte panawen in mga Odyo aglaban wa sa kansiyo. ³¹ Kataw din ina ngona, in kamo piyagpakayawte in Diyos in mga Odyo aglaban sa kansiyo, na in mga Odyo batay din kansiyo piyagpakayawte kataw kamo piyagpakayawte. ³² Angkataw in Diyos pomayag in boo mangyan pasakop sa kansiro mga daet, matang kansiyo batay apalowas sa kansiro in kansiyo pakayawte. ³³ Idbatay wano lobos in yaman Diyos, osai in kansiyo katawanan, kadayo in kansiyo atawanan. Idapo batay katawan in kansiyo mga remrem. Idapo batay katawan in kansiyo mga padalan. ³⁴ Kataw in siyabi sa mga Agisolat keyen, Nakay in katawan in remrem in Kapwan? Idapo. Nakay in kabaloy agpatoldo sa kansiyo? Idapo din. ³⁵ Nakay in kataboy sa Diyos matang in Diyos agbayad wakay sa kansiyo? Idapo ngani. ³⁶ Angkataw siyo in agpangwat in boote, siyo in agalapet sa boote, osai kansiyo wa daan in boote. Na siyo pakalakonawen anggan idapo kalobosan. Ina wa ngani.

¹ Na ngani, mga belag, ako agpilit sa kanyo panawen in Diyos maloba wa agpakayawte sa kantam, kanyo wa ngani taboyen sa Diyos in kanyo bilog agkaboway, makaanggay sa kansiyo. Kanyo wa ngani talagaen sa kansiyo. Kataw ina in betek pag agsamba sa Diyos. ² Ayaw kanyo agtoladen in mga ogali in mga yewed agpaniwala, no yewed paalisen Diyos in kanyo datiyan remrem matang miyalis wa in boo kanyo ogali. Kataw ina kamo batay katawan no nakay in beet Diyos, no nakay in maal, in makaanggay, in betek wa gayed pag kansiyo beet. ³ Panawen sa kabaloyan tiyaboy Diyos sa kangay, kangay piyagsabi sa baatte osai sa kanyo keyen, in kanyo kalakoyen ayaw agpakabwaten lampas sa agibetek. No yewed remremen gayed maal in kanyo kalakoyen, no nangkalakoy in paniwala tiyaboy Diyos sa kanyo. ⁴ In osai ka bilog mangyan karowan in sangkap. Baatte sangkap osai wakay in panawen. ⁵ Na kataw din ina kitam, kamaybawa karowan kitam piyalageman sa osai waget ka bilog Kiristo. In baatte osai agiskapet sa mga roma. ⁶ Baatte osai wakay in kantam mga kabaloyan no nangkalakoy in tiyaboy Diyos sa kantam. No kitam in piyakan in agpalowas in batang sa Diyos, na ina wa in kantam pangwaten no nangkalakoy in kantam paniwala. ⁷ No in tiyaboy sa kantam in agtolong, na agtolong wa ngani. No in agpatoldo in tiyaboy, na kitam wa agpatoldo. ⁸ No in tiyaboy sa kantam in agpaeyat remrem, na kitam wa agpaeyat remrem. No kitam piyakan in agtaboy sa mga maidap, na ayaw mabyat in remrem agtaboy. No in agpoon, na ayaw aglimbang agpapoon. No in agpakayawte sa amat, na in agkaanggay pag agpakayawte. ⁹ In agpakayawte ayaw agpakagwali waget. Kadaetanen in daet pag ogali, dayem in maal pag ogali, ina in alapeten. ¹⁰ Kitam maybelagan, kataw kitam tayariyan wa gayed. Pakalakoyen in agmaal sa kantam belag labi kay sa kantam sadiri. ¹¹ Ayaw aglimbang, in boo remrem pasakopen sa Kapwan agpanawen. ¹² Kitam wa agkaanggay sa piyagpanaya. No kitam piyagpaidapan na agbanta wate. Osai palagi agpandalangin. ¹³ Kantam tolongen in mga belag agpaniwala sa kansiro mga kailangan. Pabelagen in mga mangyan agrateng. ¹⁴ In mga agpamangwat daet sa kantam dalanginen keyen pakayawteen. Ayaw kantam agpamanesen. Dalanginen ngani. ¹⁵ No apo agkaanggay na kitam wa din agkaanggay. Kitam din manangis sa mga agpanangis. ¹⁶ Malsiyayonan in remrem. Kitam ayaw agpakabwat, dayem pabelagen in mga maidap. Kitam ayaw keyen lakonaw in kantam atawanan. ¹⁷ Ayaw kitam mangganti sa daet. Kitam agpilit agpapangkit in maal pag ogali sa boo mangyan. ¹⁸ No nges ngani maal na kitam agpangwat in boo kantam abaloyan, matang agkaboway maal kadayo in boo mangyan. ¹⁹ Laki mga belag, ayaw kitam agpalgantiyan. Bayansiyo in Diyos in agparosa. Angkataw in siyabi sa mga Agisolat keyen, Keyen in Kapwan, Ako in agpamarosa, bayansiyo ako in agparosa. ²⁰ Ayaw kitam agganti, dayem no agkayawes in kantam kaaway, na kantam pakanen pamangnen, no siyo agkainem, na pakanen sapa. Na no kataw ina siyo batay arikoyan wa gayed. ²¹ Kitam ayaw agpadaeg sa daeten pag remrem. No yewed pangwaten in maal matang diyaeg in daet.

¹ In baatte mangyan pasakop sa mga poon lakoy. Angkataw idapo kabaloyan yewed batang sa Diyos. Ina pag mga kabaloyan piyangwat Diyos. ² Matang no siyo aglaban sa mga apo kabaloyan na siyo aglaban sa piyangwat Diyos. In agkataw ina agayay parosa. ³ In mga agpamangwat maal yewed kailangan agkalimo sa mga poon. Dayem in mga agpangwat daet, na siro agkalimo ngani. No kitam beet yewed agkalimo sa mga poon, na kitam agpangwat wa maal, na kitam kansiro batay piyagmaal. ⁴ Angkataw siro mga sogowan Diyos agalapet sa kantam. Kamay no kitam agpangwat daet na kitam agkalimo wa, angkataw siro apo ngani kabaloyan agparosa. Siro sogowan Diyos, matang parosaen in mga agpamangwat daet. ⁵ Na kailangan ngani kitam pasakop, yewed waget matang idbatay piyarosa Diyos, no yewed panawen ina wa daan in betek. ⁶ Ina din in dailan kaya kitam agbayad bowis. In mga poon apo kabaloyan siro mga sogowan Diyos. Ina in kansiro tongkolin. ⁷ Kantam taboyen sa baatte osai in kailangan taboyen. Bayaden in bowis sa kailangan piyagbayadan, maniwala sa kailangan paniwalaen, pagmaalen in kailangan pagmaalen. ⁸ Ayaw agpangotang, dayem kitam maybelagan, angkataw in agpakayawte sa roma, na ina agpaniwala wa sa mga Batas. ⁹ Angkataw in mga Batas kataw in ayaw agpanggaraw, ayaw agbono mangyan, ayaw agpanakaw, ayaw agpansolang, kadayo in roma kay pag mga batas, na ina pag boo agisagalem atai pag siyabi keyen, Pagmaalen in roma mangyan, kataw daan in kaimo bilog. ¹⁰ In agpakayawte yewed agpangwat daet kamayba kay nakay. Na in agpakayawte, ina in agpaniwala sa boo mga Batas. ¹¹ Kaya kailangan kantam pangwaten ina angkataw kantam atawanan in kabetek ngona, idwa kabetek age sek. Kitam mipolaw wa, angkataw bangen wa in kitam piyagpaboway, bangen wa labi kay sa tangona in kitam bayo kay agpasandig sa kansiyo. ¹² In yabi agkaidapo wa, bangen wa in mapawa. Kantam wa benglayen in boo mga daet piyagpangwat sa yabi. Boo remrem piliten wa agpangwat in maal sa mapawa. ¹³ Kailangan in kantam mga ogali maalen, yewed makarikoy. Ayaw agsidaen in kabetek kataw in aglasing, osai in daeten pag agkaanggay. Ayaw agpanggaraw, mga makarikoy pag panawen. Ayaw agpalaway, agpalpanagiri. ¹⁴ Dayem kantam soroyen in Kapwan IsoKiristo. Ayaw wa kantam agremremen in boo daeten pag makaanggay sa kantam bilog.

¹ No apo mangyan kalakoyte in paniwala na kantam alapeten. Ayaw kay aggisoden in kansiyo piyagremrem. ² Apo agpaniwala keyen maal mamangan kamayba nakay. Apo wakay kalakoyte in paniwala, golay waget in kansiyo piyagkoman. ³ In agkoman kamayba nakay ayaw aglibak sa agkoman waget golay. Osai in agkoman kamayba nakay ayaw agsabiyanen in agkoman waget golay, angkataw siyo piyagalapet Diyos. ⁴ Ayaw kitam agsabiyanen in osai ka sogowan in roma mangyan. In kansiyo waget Kapwan in batay agsabi no siyo maalno no yewed. Kalbas siyo batay ngani maal, angkataw in Kapwan kabaloy agpangwat siyo maal. ⁵ Apo mangyan agremrem keyen in osai ka ibeng lakonaw labi kay sa roma ibeng. Apo wakay agremrem keyen in boo ibeng tikkalakoyan. Kailangan in baatte mangyan ayaw piyagbaslag in remrem panawen sa mga ibeng. ⁶ Kaya in osai ka mangyan agogali sa osai ka ibeng, panawen sa Kapwan. In agkoman kamayba nakay, na kaya siyo agkoman panawen sa Kapwan, angkataw siyo agkaanggay sa Diyos. In yewed agkoman kataw ina, na kaya yewed agkoman panawen din sa Kapwan, angkataw siyo din agkaanggay sa Diyos. ⁷ Kamayba nakay sa kantam idapo agkaboway panawen waget sa kantam sadiri. Idapo din agkatay panawen waget sa kantam sadiri. ⁸ No kitam agkaboway na ina panawen sa Kapwan. No kitam agkatay na ina din panawen sa Kapwan. Na ngani kamaybawa boway, kamaybawa matay, kitam sa Kapwan wa gayed. ⁹ Angkataw kaya Kiristo matay kadogay tagoli wakay boway matang siyo in Kapwan kadayo sa mga matay, kadayo sa mga agkaboway. ¹⁰ Na ayaw kantam agsabiyanen in kantam mga belag sa agpaniwala. Ayaw kantam aglibaken in kantam belag. Angkataw kitam boo batay piyagsokat Diyos no kitam maalno no yewed. ¹¹ Angkataw siyabi sa mga Agisolat keyen, Keyen in Kapwan, Kataw ako agkaboway, baatte mangyan batay agpaselang sa kangay, osai baatte mangyan batay agsabi in Diyos in lakonaw. ¹² Na ngani in baatte osai sa kantam batay piyagbotog Diyos. ¹³ Na ayaw wa kitam agidapo kabolowan sa baatte osai. Dayem piliten ayaw agpangwat eleg sa paniwala kantam belag, ayaw agpaakay sa kansiyo sa daet. ¹⁴ Panawen ako agiyagem sa Kapwan Isos kangay ngani atawanan idapo pamangnen piyagayaw. Kamay no piyagremrem in mangyan ina piyagayaw kiyoman, na piyagayaw ngani sa kansiyo ina. ¹⁵ No panawen sa pamangnen kantam piyagkoman magolo in remrem kantam belag, na asin kitam idwa agpakayawte sa kantam belag. Panawen sa kansiyo Kiristo matay. Na siyo ayaw kantam agpasakopen sa parosa Diyos panawen waget sa kantam pamangnen. ¹⁶ No nakay in sa kantam atawanan maal, na ayaw agpabayaan sabiyanen in roma. ¹⁷ Angkataw in mangyan piyagsakop Diyos yewed panawen sa piyagkoman, osai sa piyaginem, dayem panawen siyo agibetek, apyaan in remrem, agkaanggay. Ina boo batang sa Betek pag Abyan. ¹⁸ In kataw ina pag agpaniwala kay Kiristo, siyo piyagkaanggayan Diyos, osai piyagmaal in mga mangyan. ¹⁹ Na kitam agpilit agogali in mga makamaal sa agpalageman, osai in makapaeyat remrem sa baatte osai. ²⁰ Ayaw agsidaen in piyangwat Diyos panawen waget sa kantam pamangnen. In boo pamangnen maal, kamay ayaw agkomanen in batay makadaet sa roma. ²¹ In maal kay ayaw wa mamangan in ablasen, ayaw minem alak, ayaw agpangwat kamayba nakay in makadaet sa kantam belag sa agpaniwala. ²² In kantam remrem asin pag mga kataw ina kitam waget osai in Diyos in kailangan katawan, yewed kailangan piyagsabi sa roma. Agkaanggay in mangyan yewed magolo in remrem sa kansiyo piyagpangwat kansiyo atawanan maal. ²³ Kamay in mangyan no piyagbaslag in remrem sa kansiyo piyagkoman, na siyo batay piyarosa Diyos, angkataw in siyo agkoman yewed panawen sa kansiyo paniwala. In kamayba nakay in yewed batang sa paniwala na ina daet.

¹ Kitam in mga maeyat in agpaniwala kailangan kantam tolongen in mga mainaen sa agpaniwala. Ayaw in kantam waget sadiri piyagkaanggayan in remremen. ² Kantam tolongen in roma mangyan matang siyo agkaanggay kadogay maeyat wakay in kansiyo paniwala. ³ Angkataw kamayba Kiristo yewed agkabeet sa kansiyo sadiri piyagkaanggayan, no yewed siyo kataw in sa mga Agisolat keyen, In siro agpanlibak sa kaimo, ako in liibak. ⁴ In boo mga siyabi tangona sa mga Agisolat, kaya ina siyolat matang kitam katawan, angkataw no kitam agbasa sa mga Agisolat na piyagpakaeyat in kantam remrem matang agkaanggay agpanaya. ⁵ In Diyos in agpakarigen osai in agpaeyat sa kantam remrem. Na kangay piyagpandalangin sa kansiyo keyen, Kamo boo palagemanen kanyo remrem sa agpangwat in beet Kiristo Isos, ⁶ matang kamo agpaysarigan agmaal sa Diyos sa Amang kantam Kapwan IsoKiristo. ⁷ No nangkataw kitam piyagalapet Kiristo, na kataw din ina in kantam pangwaten sa kantam mga belag, matang in Diyos piyagpakalakoy. ⁸ Kangay piyagsabi sa kanyo kaya Kiristo mibaloy sogowan mga Odyo matang piyapangkit in Diyos yewed bosliyen, kansiyo ngani piyagpangwat in kansiyo mga pangako sa mga kakoyayan. ⁹ Osai matang din in mga yewed Odyo agmaal din sa Diyos panawen siyo agpakayawte. Kataw in siyabi sa mga Agisolat keyen, Na kao kangay batay piyagmaal sa adap in mga yewed Odyo. Ako batay agbaren agmaal sa kaimo ngaran. ¹⁰ Siyabi wakay keyen, Mga yewed Odyo, agkaanggay wa kamo sarig in mga mangyan iidang Diyos. ¹¹ Apo kay din siyabi keyen, Kamo in mga yewed Odyo, kanyo pagmaalen in Kapwan. In boo mga mangyan agmaal sa kansiyo. ¹² Siyabi wakay Isaiyas keyen, Batay rateng in kasokponan Isi. Siyo batay lomwas matang agpapoon sa mga yewed Odyo. Siro batay agpasandig sa kansiyo. ¹³ In Diyos in agtaboy in piyagpanaya, na kansiyo wa taboyen sa kanyo in makaanggay osai in apyaan pag remrem, matang kamo agkaanggay agpanaya panawen sa kabaloyan in Betek pag Abyan. ¹⁴ Mga belag, kangay ngani atawanan kamo agpangwat maal wano, kamo aronaw in atawanan, osai kamo kabaloy agpalsipatoldowan. ¹⁵ Kamay anda kangay siyolat sa kanyo apo betek kagwali matapang matang kamo kangay wakay piyagpatoldo. Kaya ako agpangaas agsolat kataw ina panawen in tiyaboy Diyos sa kangay, ¹⁶ in ako sogowan Kiristo Isos sa mga yewed Odyo. Matang ako sasirdoti agpatoldo sa kansiro in Maal pag Barita Diyos, matang siro piyagtaboy sa Diyos, makaanggay sa kansiyo, piyangwat maal wano in Betek pag Abyan. ¹⁷ Na panawen ako sogowan Kiristo Isos kangay piyagpalakoy in kangay panawen sa Diyos. ¹⁸ Ako idapo batay siyabi, no yewed in piyangwat Kiristo in ako kansiyo siyogo matang in mga yewed Odyo yaakay Kiristo sa agpaniwala sa Diyos. Ina panawen sa kangay mga agiplaong osai piyangwat, ¹⁹ panawen din sa mga tanda mga makasoyo pag panawen, sa kabaloyan in Betek pag Abyan. Matang sa boo kobat, sogod sa Irosalim anggan sa Iliriko kangay wa piyamatoldo gayed in Maal pag Barita panawen kay Kiristo. ²⁰ Palagi in kangay beet agpatoldo in Maal pag Barita sa boo kobat yewed kay aratengan in ngaran Kiristo, matang ako yewed kagwali agdagdag towar sa mga arigi tiyadyok in mga roma. ²¹ No yewed kataw in siyabi sa mga Agisolat keyen, In mga ikkay abaritaan panawen sa kansiyo batay kangitan sa kansiyo. In mga ikkay karengey panawen sa kansiyo batay katawan. ²² Ina in dailan kaya ako yewed kay katokor pataboy sa kanyo. ²³ Kamay ngona lobos wa in kangay panawen atai pag kobat, osai panawen dogay wa ako beet wano pataboy asin sa kanyo, ²⁴ kangay remrem ako batay domalan sa kanyo in ako agpataboy sa Ispanya matang kitam nges maltagbowan. Ako beet mataw kayte agpainga asin. Kangay din remrem kamo batay tomolong sa kangay in ako panaw batay sa Ispanya. ²⁵ Kamay ngona ako batay kay pataboy sa Irosalim, agbaba tolong sa mga belag ista. ²⁶ Angkataw in remrem in mga barkadaan mga bodang Diyos sa Masidonya osai sa Akaya keyen maal siro agpababa tolong sa mga maidap sa mga bodang Diyos sa Irosalim. ²⁷ Siro agkaanggay agtolong. Kamay ina kailangan kansiro piyagpangwat angkataw siro in mga yewed Odyo piyakan mga Odyo in mga piyagkailangan in abyan, na maal ngani siro wakay agtolong sa mga Odyo sa mga piyagkailangan in bilog. ²⁸ Na paka tiyaboy wa in tolong sa mga belag sa Irosalim ako batay domalan asin lampas sa Ispanya. ²⁹ Kangay atawanan in ako asin agpataboy sa kanyo ako apo piyagbaba bonton wano in tolong batang kay Kiristo. ³⁰ Laki mga belag, panawen sa Kapwan IsoKiristo osai panawen in agpalsipakayawtean tiyaboy in Abyan Diyos sa kantam, ako agayay tolong sa kanyo sa pandalangin. Ako dalanginen gayed, ³¹ matang ako agipalpas sa mga yewed agpasandig sa Diyos sa Odiya, osai matang in mga belag ista agkaanggay sa kangay piyagbaba tolong. ³² No kataw ina, na ako batay agkaanggay agrateng sa kanyo agpainga sa kanyo, no ina in beet Diyos. ³³ Kamo boo alapeten in Diyos in agtaboy in apyaan pag remrem. Ina wa ngani.

¹ Kangay piyagpapangkit sa kanyo Pibi in kantam belag pag kagbaiyan. Siyo agpanawen sa barkadaan mga bodang Diyos sa bayan Sinkiriyo. ² Panawen sa Kapwan siyo kanyo pabelagen kalakoy in betek sa mga iidang Diyos. Siyo tolongen sa boo kansiyo kailangan angkataw lakonaw in kansiyo tolong sa karowan, kadayo sa kangay. ³ Kagwali wa nakay taybalang Pirisila osai Akwila, in kangay sarig agpanawen kay Kiristo Isos? ⁴ Siro bangen nges matay matang ako yewed matay. Yewed waget ako in agkaanggay, kadayo in boo mga barkadaan mga bodang Diyos sa mga yewed Odyo. ⁵ Nangkagwali wakay in barkadaan mga bodang Diyos in agsamba sa kansiro balay? Osai in kangay pagbelag Ipinito, kataw wa nakay siyo? Siyo in tokaw pag agpasandig kay Kiristo ista sa kobat lakoy Asya. ⁶ Osai Mariya, in agpanawen gayed sa kanyo. ⁷ Osai kora Adroniko osai Onya, siro Odyo din kataw ako. Siro taite kangay sarig sa bilanggowan. Atawanan siro mga sogowan Kiristo, tokaw kay sa kangay agpasandig sa kansiyo. ⁸ Kagwali wa nakay Ampilyato, kangay piyagmaal sa kay Kiristo? ⁹ Osai Orbano kantam katolong agpanawen kay Kiristo. Osai kangay pagbelag Istakis. ¹⁰ Kadayo Apilis, atawanan siyo yewed aglimbang agpasandig kay Kiristo. Osai in balayan Aristobolo. ¹¹ Kadayo Orodiyon, Odyo din kataw ako. Osai in mga belag agpasandig kay Kiristo sa balay Narsiso. ¹² Osai nangkagwali wakay Tiripina osai Tiriposa, mga maeyat agpanawen sa Kapwan? Kadayo din Pirsida in kangay piyagbelag, lakonaw in kansiyo piyanawen sa Kapwan. ¹³ Osai Ropo in lakonaw pag sogowan in Kapwan, osai in kansiyo inang, kangay din inang. ¹⁴ Osai kora Asindirito, osai Piligonti, osai Irmis, osai Patrobas, osai Irmas, osai in boo mga belag kansiro sarig. ¹⁵ Osai kora Pilogogo, osai Olya, osai Niryo osai kansiyo belag kagbaiyan, osai Olimpas, osai in boo mga belag kansiro sarig. ¹⁶ No kamo maltagbowan na malkaanggayan kamo. In boo mga barkadaan mga agpasandig kay Kiristo siro keyen, Kamo kagwali wa nakay? ¹⁷ Mga belag, tandaen in mga agbaslagbaslag sa kanyo barkadaan, in mga agpaakay agbenglay in mga piyatoldo kanyo wa piyaniwalaan. Siro kanyo panliliyanen. ¹⁸ In mga kataw ina mangyan yewed sogowan Kiristo kantam Kapwan, no yewed sa kansiro waget sadiri mga beet. Panawen waget sa kansiro mga maalno kamay bosliyen pag panggisoden kansiro piyaglibangaw in mga ikkay maeyat in paniwala. ¹⁹ In kamo agpaniwala kay Kiristo biyarita wa sa boo mangyan. Ako agkaanggay wano asin. Kamay in kangay beet kamo apo atawanan panawen sa mga maalno, kamay idapo atawanan sa mga daet. ²⁰ In Diyos in agtaboy in apyaan pag remrem. Idwa dogay batay wa kansiyo piyadaeg Katanas, batay kanyo piyanlaedan. Sa kanyo in lakonaw pag agpakayawte kantam Kapwan IsoKiristo. ²¹ Timotiyo, in kangay katolong agpanawen, siyo keyen, Kagwali wa nakay kamo? Kadayo Losyo, Ason osai Sosipatro, siro kangay kabelagan. ²² Ako Tirsiyo in agsolat anda in kay Pablo solat, ako din keyen, Panawen kitam agpaybelagan sa Kapwan kagwali wa nakay kamo? ²³ Keyen din Gayo, kansiyo balay kangay pagitokodan. Atai agsamba in boo barkadaan mga bodang Diyos. Osai Irasto in agalapet kowarta atai pag bayan, osai kantam belag Kowarto. ²⁵ Ngona kantam pagmaalen in Diyos, in kabaloy agparigen sa kantam panawen in Maalno pag Barita kangay piyagpatoldo panawen kay IsoKiristo. Ina pag Maalno pag Barita tangona dogay wano piyagbetang kamay ngona piyalowas wa. ²⁶ Panawen sa sogo in Diyos idapo kalobosan ina pag barita piyatoldo wa sa boo mga mangyan, matang siro agpasandig kay Kiristo, maniwala sa kansiyo. Ina pag boo siyabi in mga poropita sa mga Agisolat. ²⁷ In osai waget ka Diyos in katawan sa boo, siyo pakalakonawen anggan idapo kalobosan, panawen kay IsoKiristo. Ina wa ngani.