PIYAPANGKIT

PIYAPANGKIT

¹ In galem anda pag aklat agsabi in mga batay rateng. Ina pag mga batay rateng tokaw piyapangkit Diyos kay Kiristo Isos matang kansiyo wakay piyapangkit sa kansiyo mga iidang. Isos agsogo angil matang agpapangkit sa osai ka iidang Diyos in ngaran Owan. ² Anda wa in solat Owan in kansiyo mga ngiitan, in piyapangkit Diyos, piyatoldo wakay Kiristo Isos. ³ Agkaanggay in agbasa anda pag aklat, osai agkaanggay in mga agparengey asin sa mga batay rateng, kalbas maniwala. Angkataw ina boo bangen wa batay mibaloy. ⁴ - ⁵ Ako Owan in agsolat sa pito ka barkadaan mga bodang Diyos sa Asya. Kangay pandalangin kamo pakaanggayen osai pakapyaen Diyos osai IsoKiristo, osai in pito ka angil sa adap pagpanokkawan lakoy Diyos. Siyo in Diyos tangona, Diyos din ngona, Diyos daan din anggan idapo kalobosan. IsoKiristo in betek pag agsabi, in tokaw abowayan sa mga matay, siyo in Poon Lakoy sa boo mga poon atai sa kobat. Kiristo Isos in agpakayawte sa kantam, siyo matay matang kitam piyalpas sa kantam mga daet. ⁶ Kitam kansiyo piyangwat osai ka barkadaan mga sasirdoti matang mga sogowan Diyos kansiyo Amang. Kiristo Isos pagpalakonawen osai pagpakoyayen anggan idapo kalobosan. Siyo wa ngani. ⁷ Baati, siyo agrateng wa, sa mga libo wa. Siyo batay piyagngitan in boo, kadayo in mga somaldak sa kansiyo. Batay malpanangis in boo tiribo atai sa kobat panawen sa kansiyo. Batay wa daan kataw ina, ina wa ngani. ⁸ Keyen in Diyos in Kapwan, Ako in parakayan, ako in kalobosan. Keyen in apo kabaloyan sa boo, siyo in Diyos tangona, Diyos din ngona, Diyos daan din anggan idapo kalobosan. ⁹ Ako Owan, in kanyo belag, kataw daan kamo agtiis sa kaidapan, angkataw kitam sakop kay Isos. Ako biilanggo sa kagwaraan dagat sa porote piyagawit Patmos, angkataw ako agpatoldo in agiplaong Diyos, osai in boo siyabi Isos, ina boo totoo. ¹⁰ Ina pag betek ibeng Linggo, ibeng Kapwan, ako piyaanggat in Abyan Diyos. Kalbas toloy ako karengey agpango sa kangay paoriyan kagwali lakoy bodyong agaleng, ¹¹ keyen, Solaten sa aklat in kaimo mga piyagngitan, kalbas pababaen sa pito ka barkadaan mga bodang Diyos, sa Ipiso, sa Ismirna, sa Pirgamo, sa Tiyatira, sa Sardis, sa Piladilpiya, osai sa Laodisya. ¹² Kalbas ako papeles sa paori matang kangay ngiitan in agiplaong. Kangay ngani ngiitan in pito ka tinglaw ginto. ¹³ Sa kagwaraan mga tinglaw apo agtaydek kagwali lakoy mangyan. Siyo aglambong lakoy anggan sa darapa, agsalabiyan ginto. ¹⁴ In abok maboksi wano kataw boybol pilak, kataw posilag. In kansiyo mga mata kagwali baya agigang. ¹⁵ In kansiyo bitis agkilat, kataw tanso siyogbo sa baya, yaasa anggan agkilat. In kansiyo agiplaong kaksen tagbongan sapa aglabo. ¹⁶ In kansiyo pamalang apo piyagatang pito ka magirem. Sa kansiyo bibi apo aglowas pisaw idapo sikil, tanan apo tarem. In kansiyo panrosayan makasolap kataw ibeng betek wano tangali. ¹⁷ In ako kangitan sa kansiyo ako mameypey kagwali matay sa kansiyo adap. Kamay ako yaatang kansiyo pamalang. Miplaong keyen, Ayaw agkalimo. Ako in parakayan, ako in kalobosan, ¹⁸ ako in agkaboway, ako batang wa matay, kamay maanda, ngona ako agkaboway wa palagi anggan idapo kalobosan. Ako apo kabaloyan sa katayan, kadayo sa balayan mga matay wa. ¹⁹ Amba, solaten wa in kaimo piyagngitan, in agpangipangwat ngona, osai in batay kay agrateng. ²⁰ Kangay wa piyagpaliwanag in kaimo ngiitan pito ka magirem kangay piyagatang sa pamalang, osai in pito ka tinglaw ginto. In pito ka magirem, na ina in mga angil sa pito ka barkadaan mga bodang Diyos. Kalbas in pito ka tinglaw, na ina in pito ka barkadaan mga bodang Diyos.

¹ Sa angil barkadaan mga bodang Diyos sa Ipiso kaimo solaten keyen, Anda in piyagsabi in agipanawan sa kagwaraan in pito ka tinglaw ginto, in apo piyagatang sa kansiyo pamalang pito ka magirem. ² Ako katawan kao agpilit agpanawen maal, in kao yewed aglimbang. Ako katawan din kao agkadaetan sa mga agpamangwat daet. Kaimo tiyepeng in mga agpakagwali mga katiwala Isos, kalbas kaimo ngiitan siro mga bosliyen. ³ Ako katawan din in kao yewed aglimbang, kamayba aronaw kaidapan kao agaway kay agtiis panawen sa kangay, kao yewed manromir. ⁴ Kamay ako apo ngiitan daet sa kaimo, ako idwa gayed kaimo piyagkabeet kataw tangona. ⁵ Kao manremrem wakay sa kaimo maalno pag ogali tangona. Benglayen wa in kaimo mga daet. Ngona kao agogali wakay kataw tangona in kaimo maal pag ogali. No kao idbatay agbait na ako batay wa asin, kangay wa piyagkowa in kaimo tinglaw sa kansiyo pagibolalangan. ⁶ Kamay ako apo din piyagkaanggay sa kaimo, in kao kataw daan ako agkagalit sa piyagpangwat in mga Nikolayta. ⁷ In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. In mga agpandaeg sa daet kangay batay piyagpakoman in raweg yanaw agpamaboway sa alamanan Diyos. ⁸ Sa angil barkadaan mga bodang Diyos sa Ismirna kaimo solaten keyen, Anda in piyagsabi in parakayan osai kalobosan, in batang matay kalbas boway wakay. ⁹ Ako katawan kao diyalan mga kaidapan, kangay atawanan kao maidap. Kamay yewed kataw ina, kao in mayaman. Kangay din atawanan in agpanlibak sa kaimo. Siro agpakagwali mga Odyo, kamay yewed, siro barkadaan mga sakop Katanas. ¹⁰ Ayaw agkalimo sa mga agrateng kaidapan sa kaimo. Amba, ayaw agkanawey anda, in amat sa kanyo batay siyoroy Katanas sa bilanggowan matang kamo tiyepeng Katanas. Kamo batay piyagpaidapan sampo ka ibeng. No kao agaway kay agpaniwala sa kangay kamayba wa matay, na sa kaimo kangay piyagtaboy in sarikaw tandaan siyo apo kangay boway. ¹¹ In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. In mga agpandaeg idbatay wa domalan sa kadowai ka katayan. ¹² Sa angil barkadaan mga bodang Diyos sa Pirgamo kaimo solaten keyen, Anda in piyagsabi in apo pisaw idapo sikil, tanan apo tarem. ¹³ Ako katawan kao piyagrongrongan in pagtokkawan Katanas. Kamaybawa kataw ina kao agaway kay agpaniwala sa kangay. Antipas, in kangay yewed aglimbang pag sogowan, siyo biyono asin sa kobat pagbalayan Katanas. Kamay kamayba ina pag mga ibeng yewed kaimo biyenglay in agpaniwala sa kangay. ¹⁴ Kamay ako apo ngiitan mga daet sa kaimo, in kalaati sa kanyo agpaniwala sa piyatoldo Balaam. Siyo in agpatoldo kay Balak agakay sa mga bodang Israil agpangwat daet. Panawen ina siro agpamangan wa in pamangnen piyasola, osai siro manggaraw. ¹⁵ In kalaati sa kanyo agpaniwala wa din sa mga piyagpatoldo in mga Nikolayta. ¹⁶ Amba ngani, benglayen wa in kanyo mga daet. No kamo idbatay, na idwa dogay ako batay asin, kalbas kamo kangay batay piyagarabas in kangay pisaw sa kangay bibi. ¹⁷ In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. In mga agpandaeg kangay batay piyagpakoman pamangnen in mana agibetang. Baatte osai kangay din batay piyagpakan bato motya, apo agisolat ngaran, bayo wakay pag ngaran, idapo batay roma kabasa in siyolat no yewed in piyakan. ¹⁸ Sa angil barkadaan mga bodang Diyos sa Tiyatira kaimo solaten keyen, Anda in piyagsabi in Bodang Diyos, in apo mata agigang kagwali baya, in apo bitis agkilat kagwali tanso yaasa. ¹⁹ Ako katawan in kaimo mga panawen, in kao agpanolong, osai agtiis. Ako katawan in kaimo mga panawen ngona labi kay kalakoy in tangona. ²⁰ Kamay ako apo ngiitan daet sa kaimo. Yewed kaimo biyoyaw Isabil, in kagbaiyan agpakagwali sogo Diyos. Siyo agpadaya, osai agpatoldo daet sa kangay mga sogowan matang siro agpanggaraw. Osai siyo agakay din agkoman pamangnen piyasola. ²¹ Siyo piyakan kabetek agbenglay in kansiyo marames pag ogali, kamay siyo yewed agbenglay. ²² Kaimo pangkiten, no siro yewed agbenglay ina pag kansiyo panawen kataw ina, na kadayo siyo, kadayo in mga agpanggaraw sa kansiyo, siro boo batay kangay piyagpakaskitan maloba, batay piyalageman sa kaidapan. ²³ Kadayo kansiyo mga bodang kangay batay piyagpamono matang in mga barkadaan mga bodang Diyos katawan ako in agroris sa galem remrem mangyan. In baatte osai sa kanyo kangay batay biyayadan no nangkataw in kansiyo panawen. ²⁴ Kamay kamo in amat mga taga Tiyatira, in yewed maniwala sa piyagpatoldo Isabil, osai yewed agadar sa piyagawit in lakonaw pag adar Katanas, na ako idapo wa maidap piyagtaboy sa kanyo. ²⁵ Kamay in kanyo piyagpaniwalaan ngona kanyo alapeten anggan ako rateng wakay. ²⁶ In mga agpandaeg, in mga agaway kay agpangwat in kangay beet anggan sa kalobosan, na siro kangay batay piyagpangwat poon sa mga tiribo. ²⁷ Siyo batay agsakop sa kansiro, batay agpoon lakoy, in pamogbog bakal, kataw bakal agpamaslag sa keden. Siyo kangay piyagpangwat poon kataw daan ako piyangwat poon kangay Amang. ²⁸ Kangay din piyagtaboy sa kansiyo in tagorabas. ²⁹ In apo talinga, na mamarengey sa piyagsabi in Abyan Diyos sa mga barkadaan kansiyo mga bodang.

¹ Sa angil barkadaan mga bodang Diyos sa Sardis kaimo solaten keyen, Anda in piyagsabi in apo pito ka angil Diyos, apo din pito ka magirem. Ako katawan in kaimo mga panawen. Kamayba kao keyen kao agkaboway, kamay yewed, kao ngani matay. ² Amba, mipolaw wa, paeyaten wakay in mga baywi kayte sa kaimo matang yewed toloy wa gayed matay. Angkataw kangay ngiitan in kaimo mga panawen yewed kay gayed maal sa pangkit kangay Diyos. ³ Na benglayen wa in kaimo mga daet. Kaimo wakay remremen in mga tiyaboy sa kaimo tangona, in mga piyatoldo sa kaimo, ina kaimo pangwaten wakay. No kao yewed mipolaw na ako batay asin kataw agpanakaw, idbatay kaimo atawanan in kabetek ako agrateng. ⁴ Kamay in amat asin sa Sardis apo kay agingat ikkay lebagen in kansiro mga lambong. Na siro maal wa kangay batay sarig agpaypanlambong maboksi. ⁵ In mga agpandaeg batay din piyakan lambong maboksi. Osai in kansiyo ngaran idbatay biyeleg sa aklat listaan in mga agkaboway. Osai siyo batay din kangay piyagpabelag sa pangkit kangay Amang osai sa kansiyo mga angil. ⁶ In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. ⁷ Sa angil barkadaan mga bodang Diyos sa Piladilpiya kaimo solaten keyen, Anda in piyagsabi in Betek, in maalno pasandigan, siyo in agatang in kay Dabid sosi. In kansiyo wa biyolwat, idapo wa batay kakopot, in kansiyo wa kiyopot, idapo wa batay kabolwat. ⁸ Ako katawan in kaimo mga panawen, ako katawan in kaimo kabaloyan kalakoyte, kamay kao agpaniwala sa kangay piyatoldo. Kao yewed atorayan sa kangay. Matang kangay wa biyolwat osai ka sakbawan sa kaimo, idapono batay kakopot. ⁹ Amba mamarengey kao. In barkadaan mga sakop Katanas, in mga agpakagwali Odyo, mga agpansabi baribid, siro kangay batay piyagpasabangen sa kaimo, piyagpatalegeb sa kaimo adap, matang siro katawan kao kangay piyagpakayawte. ¹⁰ Kao maniwala sa kangay otos keyen ayaw aglimbang, na kao kangay batay piyagalapet sa kabetek piyagtepeng wa in boo mangyan sa boo kobat. ¹¹ Idwa dogay ako batay asin rateng. Alapeten gayed in sa kaimo, matang kao batay mandaeg. Na kao batay kabel in sarikaw, idbatay tiyaboy sa roma. ¹² In agpandaeg kangay batay piyagpangwat arigi sa balay kangay Diyos. Siyo idbatay wa panaw asin kamayba nangkadogay. Kangay batay siyolatan siyo in ngaran kangay Diyos, osai in ngaran in bayan Diyos. Ina in bayo wakay pag Irosalim in batay aglompot batang sa langit, batang sa Diyos. Kangay din batay piyagsolat sa kansiyo in kangay bayo wakay pag ngaran. ¹³ In apo talinga, na mamarengey sa piyagsabi in Abyan Diyos sa mga barkadaan kansiyo mga bodang. ¹⁴ Sa angil barkadaan mga bodang Diyos sa Laodisya kaimo solaten keyen, Anda in piyagsabi in piyagawit Ina wa ngani. Siyo in yewed aglimbang, agsabi boo betek. Siyo in riyakayan in boo piyangwat Diyos. ¹⁵ Ako katawan in kaimo mga panawen. Ako katawan kao yewed maibeng, idwakay din madimla. Dayem nges kao maibeng, no yewed madimla. ¹⁶ Na angkataw kao matabang, yewed maibeng, idwakay din madimla, na kao kangay wa batay piyagongo. ¹⁷ Kaimo remrem kao mayaman, idbatay akorangan in boote. Kamay yewed kaimo ngiitan kao maidap wano, makapakayawte, korang wano, idapo damit, osai beleg kayno. ¹⁸ Amba ngani, in kangay piyagsabi sa kaimo, matang kao yomaman ngani, na kao agbili sa kangay ginto, ginto liinis wa. Osai matang idwa piyagngitan in kaimo makarikoy pag bilog, na kao bomili din lambong maboksi, kao agdamit. Osai bomili gamot mata matang kao kangitan. ¹⁹ In kangay mga piyagpakayawte kangay piyagpangelel, piyagparosa. Amba ngani, kao agpilit wa, benglayen wa in kaimo daet. ²⁰ Maanda, ako agitaydek sa awak sakbawan, agberya. No siyo mamarengey sa kangay agiplaong, agbolwat in sakbawan, na ako batay misoroy sa kansiyo. Kalbas ako batay kansiyo kalanglang sa agkoman. ²¹ In mga agpandaeg kitam batay malpanokkaw sa kangay lakoy pagpanokkawan. Kataw ako mandaeg, kalbas ngona kami malsitokkaw osai kangay Amang sa kansiyo lakoy pagpanokkawan. ²² In apo talinga, na mamarengey sa piyagsabi in Abyan Diyos sa mga barkadaan kansiyo mga bodang.

¹ Paka kalbas, ako manriwaan. Kangay ngiitan sa langit osai ka sakbawan agiboswang. Kalbas ako karengey wakay in agiplaong kagwali bodyong keyen, Amba, kao monaik atai, kangay batay piyagpapangkit sa kaimo in mga batay kay mangibaloy. ² Ako toloy piyaanggat in Abyan Diyos, kangay ngiitan sa langit osai ka pagpanokkawan lakoy, osai in agitokkaw asin. ³ In asin agitokkaw agkilat wano kagwali bato piyagawit aspi osai kornalina maalen wano. Apo balangaw birdi agbalawas agisarikaw sa ribok kansiyo pagpanokkawan. ⁴ Apo din agiribok asin dalwampot opat ka pagtokkawan. In agitokkaw asin dalwampot opat din ka mga koyay. Siro agpaypanlambong maboksi, agisarikawan ginto. ⁵ Asin sa pagpanokkawan lakoy maloba wano in dalegdeg, agpangkilat wano gayed, osai maloba wa in agaleng. Sa adap pagpanokkawan apo pito ka pangkad agigang, ina in pito ka angil Diyos. ⁶ Sa adap pagpanokkawan apo din kagwali dagat, bobog malinaw wano kataw salmin. In pagpanokkawan piyagribok opat ka agkaboway. Siro makno wa gayed mata, kamayba sa boyon, kamayba sa awak. ⁷ In osai ka agkaboway kagwali liyon, in kadowai kagwali baka, in katolo apo panrosayan kataw mangyan, in kaopat kagwali lawin agilayog. ⁸ In opat ka agkaboway baatte osai enem in lagay. Kadayo in lagay makno mata sa galem kadayo sa awak. Kamayba yabi kamayba ibeng siro yewed agempet agawit keyen, Betek, betek, betek in Diyos Kapwan, in apo kabaloyan sa boo. Siyo in Diyos tangona, Diyos din ngona, Diyos daan din anggan idapo kalobosan. ⁹ In opat ka agkaboway agmaal, aglakonaw, osai agpasalamat sa agitokkaw sa pagpanokkawan lakoy, sa palagi agkaboway kamayba nangkadogay. Baatte siro agawit, ¹⁰ agpatalegeb in dalwampot opat ka koyay sa adap in pagpanokkawan lakoy. Siro agsamba sa agitokkaw asin, sa palagi agkaboway kamayba nangkadogay. In kansiro mga sarikaw piyagpabolalang piyagtaboy sa adap in pagpanokkawan lakoy. Siro keyen, ¹¹ Kanyam Diyos, kanyam Kapwan, kao lakonaw. Na maal kao in pakalakonawen in boo, in pagmaalen in boo, osai in pagpakoyayen in boo, angkataw kao in agpangwat in boote. Kaya siro mibaloy, angkataw kaimo piyangwat kataw in kaimo beet.

¹ Kangay ngiitan in agitokkaw sa pagpanokkawan lakoy, in kansiyo pamalang apo piyagatang aklat agibaroron, maykabila apo solat. Ina piyagkandado pito ka kandado. ² Kalbas kangay ngiitan osai ka angil maeyat wano, maksen wano in agiplaong agsabi keyen, Nakay in mayadi agsida in mga kandado, agbolwat in aklat? ³ Kamayba sa langit, kamayba sa diya, kamayba sa galem diya, idapo ngiitan kabaloy agbolwat sa aklat, osai idapo karoris sa agisolat ista. ⁴ Asina ako manangis wano maloba angkataw idapo ngiitan mayadi agbolwat sa aklat, agroris sa agisolat asin. ⁵ Kamay keyen in osai ka koyay, Ayaw agpanangis. Baati, in liyon sa tiribo Oda, in kasokponan Dabid, siyo mandaeg wa, siyo wa in mayadi agsida in mga kandado, agbolwat in aklat. ⁶ Kalbas sa kagwaraan in pagpanokkawan lakoy, in piyagribok in opat ka agkaboway, osai in mga koyay, sa kagwaraan ina ako kangitan osai ka Bodang Topa agitaydek. Kagwali siyo batang wa biyono. Siyo apo pito ka songay, osai apo pito ka mata. Ina in pito ka angil Diyos in siyogo sa boo kobat. ⁷ Kalbas pasabangen in Bodang Topa, kiyowa in aklat sa pamalang in agitokkaw sa pagpanokkawan lakoy. ⁸ Paka ina kansiyo kiyowa, in opat ka agkaboway agpatalegeb sa adap in Bodang Topa, kadayo in dalwampot opat ka mga koyay. Baatte osai apo piyagatang kagwali gitara. Apo din tasa ginto makno mala masadap. Ina in mga pandalangin in mga iidang Diyos. ⁹ Siro agawit bayo wakay pag awit keyen, Kao in maal sa boo, maal komwa in aklat, Maal kao in agsida in mga kandado, angkataw kao batang biyono. In Diyos kaimo biiliyan mga mangyan, kaimo daya in pambili. In mga mangyan biili batang sa baatte tiribo, baatte agiplaong, baatte bayan, baatte kobat. ¹⁰ Siro kaimo piyangwat osai ka barkadaan mga sasirdoti matang mga sogowan kantam Diyos, siro batay agpoon sa kobat. ¹¹ Kalbas ako manriwaan wakay, ako karengey in agiplaong libolibo, karowan mga angil idwa abilang. Siro agribok sa pagpanokkawan lakoy, sa opat ka agkaboway, osai sa mga koyay. ¹² Siro agawit wa lakoy maksen keyen, In Bodang Topa lakonaw, in batang biyono. In maal in boo agsabi keyen siyo in kabaloy sa boo, siyo in mayaman sa boo, siyo katawan sa boo, siyo in maeyat sa boo. In maal siyo pagmaalen, pagpakalakoyen, pagpakabwaten. ¹³ Kalbas ako karengey in boo mga piyangwat sa langit, osai sa kobat, kadayo sa galem diya, anggan din in sa dagat. Ina pag boo agpalpangawitan keyen, In agitokkaw sa pagpanokkawan lakoy osai in Bodang Topa, siro pagpakabwaten, pagmaalen, pagpakalakoyen, pagpakoyayen, anggan idapo kalobosan. ¹⁴ In opat ka agkaboway keyen, Ina wa ngani. In mga koyay agpatalegeb, agsamba.

¹ Ako kangitan in pito ka kandado, in tokaw siida wa in Bodang Topa. Ako karengey miplaong in osai sa opat ka agkaboway, in kaksenen kaksen dalegdeg keyen, Aywawa. ² Paka ako mangkit kangay ngiitan osai ka kabayo pilak, in agsakay apo piyagatang pana. Siyo piyakan sarikaw, kalbas siyo panaw agpandaeg, batay wakay mandaeg. ³ Paka siida in Bodang Topa in kadowai ka kandado, ako karengey in kadowai ka agkaboway keyen, Aywawa. ⁴ Osai wakay ka kabayo mapola in lomwas, in agsakay asin piyakan kabaloyan agpagira sa kobat, matang in mga mangyan agpalbonowan. Osai lakoy ka pisaw in tiyaboy sa kansiyo. ⁵ Kalbas in Bodang Topa agsida sa katolo ka kandado. Ako toloy karengey in katolo ka agkaboway keyen, Aywawa. Osai wakay ka kabayo maitem in kangay ngiitan, in agsakay apo piyagatang timbangan. ⁶ Kalbas ako karengey apo tomag agiplaong batang sa opat ka agkaboway keyen, Osai waget ka gatang paray in abel bayad boo ibeng agpanawen. No mais na tolo ka gatang boo ibeng agpanawen. Kamay ayaw agsida in langis osai alak. ⁷ Paka siida in Bodang Topa in kaopat ka kandado, ako karengey in kaopat ka agkaboway keyen, Aywawa. ⁸ In kangay wakay ngiitan osai wakay ka kabayo agkaborayen, in agsakay asin agpalsadodo, in osai in ngaran Katayan, in osai in Balayan mga matay. Siro piyakan kabaloyan sa doros kobat matang agpamono sa gira, sa panyawes, sa pandalan, osai mga matapang pag mga ayop. ⁹ Paka siida in Bodang Topa in kalima ka kandado, kangay ngiitan sa galem in pagpangandogan in abyan in mga biyono panawen sa agpatoldo in Agiplaong Diyos, osai panawen sa kansiro piyagpangwat totoo. ¹⁰ Siro mango anggan keyen, Kapwan Kabaloyan, kao maal wano, osai betek. Nangkadogay kay kami agpanaya? Nangkadogay batay mibaloy in kaimo remrem agparosa sa mga mangyan agbono sa kanyam? ¹¹ In baatte osai sa galem pagpangandogan piyakan maboksi pag lambong. Siyabi sa kansiro keyen, Kamo agpainga kay ngonate anggan mibaloy wa in bilang kanyo mga belag osai mga sogowan Kiristo, in mga batay kay din piyagbono kataw daan kamo. ¹² Kalbas siida in Bodang Topa in kaenem ka kandado. Lomoni wa anggan. Toloy wa maitem in ibeng kataw damit maitem. In bolan wakay kataw daya, mapola. ¹³ In mga magirem sa langit mangaragrag wa, kataw in raweg igos moda kay, biyagyo, mangaragrag in galem. ¹⁴ Maidapo in langit kataw aklat bigla mibaroron. In mga boksor panaw wa sa kansiro betek, osai in mga poro. ¹⁵ In mga poon sa kobat, osai in mga koyay, osai in mga kapitan, in mga mayaman, in mga apo kabaloyan, in boo mangyan kamayba sogowan, kamayba agipalpas, siro boo malpamatago sa mga leyang, sa mga paywaraan bato, sa mga boksor. ¹⁶ kalbas siro agberya sa mga boksor, sa mga bato keyen, Kami tabonen matang kami ayaw ngiitan in agitokkaw sa pagpanokkawan lakoy, osai matang yewed rateng sa kanyam in agparosa in Bodang Topa. ¹⁷ Angkataw rateng wa in makalimo wano pag ibeng, in kami batay piyarosa in bodang Topa osai in agitokkaw sa pagpanokkawan lakoy. Nakay kay pag mangyan in batay yewed biyono?

¹ Paka kalbas ina, ako apo ngiitan opat ka angil agitaydek sa opat ka sokol kobat. Kansiro piyageleg in opat ka kowaya matang ayaw kay mangkowaya sa kobat, osai sa mga yangaw, kamayba din sa dagat. ² Kadogay ako kangitan osai kay ka angil agonaik ista agbangen sa paglowasan ibeng. Ina pag angil apo piyagatang batay pananda batang sa agkaboway pag Diyos. Siyo mango sa opat ka angil in piyakan kabaloyan agsida sa kobat osai sa dagat ³ keyen, Ayaw kay kanyo agsidaen in kobat, osai in mga yangaw, kamayba in dagat, anggan yewed kay matandaan sa kiray in mga sogowan kantam Diyos. ⁴ Kalbas siyabi sa kangay in bilang in mga tiyandaan. Siro osai ka daan apatnapot apat ka libo (144,000), batang sa boo mga tiribo Israil. ⁵ labing dowai ka libo (12,000) sa tiribo Oda, labing dowai ka libo (12,000) sa tiribo Robin, labing dowai ka libo (12,000) sa tiribo Gad, ⁶ labing dowai ka libo (12,000) sa tiribo Asir, labing dowai ka libo (12,000) sa tiribo Niptali, labing dowai ka libo (12,000) sa tiribo Manasis, ⁷ labing dowai ka libo (12,000) sa tiribo Simyon, labing dowai ka libo (12,000) sa tiribo Libi, labing dowai ka libo (12,000) sa tiribo Isakar, ⁸ labing dowai ka libo (12,000) sa tiribo Sabolon, labing dowai ka libo (12,000) sa tiribo Osi, labing dowai ka libo (12,000) sa tiribo Binamin. ⁹ Paka kalbas ina, ako kangitan aronaw mga mangyan, yewed abilang kamayba nakay, siro batang sa baatte kobat, baatte tiribo, baatte bayan, baatte agiplaong. Siro agtaydek sa adap in pagpanokkawan lakoy osai sa adap in Bodang Topa. Siro agpaypanlambong maboksi, apo piyagatang mga daon. ¹⁰ Siro miplaong maksen keyen, In Bodang Topa in agpamaboway, osai in kantam Diyos in agitokkaw sa pagpanokkawan lakoy. ¹¹ Tomaydek in boo mga angil sa bangen in pagpanokkawan lakoy osai in mga koyay, osai in opat ka agkaboway. Siro agpatalegeb sa adap in pagpanokkawan lakoy, agsamba sa Diyos. ¹² Siro keyen, Ina wa ngani. Kantam Diyos lakonaw. Kailangan in boo agsabi siyo in maal, siyo in mabwat, siyo in katawanan, siyo in piyagkaanggayan, siyo in koyay, siyo in apo kabaloyan, osai in maeyat, anggan idapo kalobosan. Ina wa ngani. ¹³ Ako tiyanong in osai ka koyay keyen, Nakay pag mga mangyan in agpaypanlambong maboksi? Sa nakay batang siro? ¹⁴ Ako keyen, Laki koyay, ako yewed katawan, kao in katawan. Kalbas in koyay keyen, Siro in mga batang domalan sa kaidapan lakoy, liinis in kansiro mga lambong, piyaboksi sa daya in Bodang Topa. ¹⁵ Ina in dailan kaya siro asin sa adap in pagpanokkawan lakoy Diyos. Kadayo ibeng kadayo yabi siro pagsogowan daan in Diyos sa kansiyo balay. In agitokkaw sa pagpanokkawan lakoy in batay agalapet sa kansiro. ¹⁶ Siro idbatay wa agkayawes, idbatay wa agkainem, siro idbatay wa din aibengan, idbatay wa din apasi kamayba nakay pag maibeng wano. ¹⁷ Angkataw in Bodang Topa sa kagwaraan pagpanokkawan lakoy in batay agalapet sa kansiro. Siro kansiyo piyagpaanggat sa mga bokal sapa agpamaboway. Batay piyonas in Diyos in lowa sa kansiro mga mata.

¹ Paka siida in Bodang Topa in kapito ka kandado idapo wano agiplaong sa langit kadogay agtongtong begas. ² Paka kalbas ina, ako kangitan pito ka angil agitaydek sa adap Diyos. In baatte osai piyakan bodyong. ³ Rateng in osai kay ka angil, apo piyagbaba pagsonogan mala masadap. Ina ginto. Kalbas siyo tomaydek sa bangen in pagpangandogan. Siyo piyakan aronaw wano pag mala masadap matang piyaagem sa mga pandalangin in mga iidang Diyos. Kalbas ina kansiyo piyaandog sa pagpangandogan ginto sa adap in pagpanokkawan lakoy. ⁴ Batang sa piyagatang in angil in elep mala masadap, osai in mga pandalangin in mga iidang Diyos mitaydek agonaik sa adap Diyos. ⁵ Kalbas in angil komwa baya sa pagpangandogan, piyabolalang sa pagsonogan mala masadap, kalbas biyenglay sa kobat. Toloy agdalegdeg lakoy, agaleng, agpangkilat, osai lomoni. ⁶ Kalbas in pito ka angil agsandata matang agpagana in bodyong. ⁷ Paka piyagana in tokaw pag angil in kansiyo bodyong, toloy omodan batang sa langit in odan kagwali bato, osai baya, apo din agiyagem daya. Masonog wa in diya in katolo ka baslag, kadayo in baatte katolo ka yangaw, osai in boo mga mabolaw kay pag lalosen. ⁸ Paka piyagana in kadowai ka angil in kansiyo bodyong, toloy biyenglay sa dagat in osai ka kagwali boksor lakoy agkatebed. Daya wa toloy in katolo ka dodo dagat. ⁹ Matay wa din in katolo ka agkaboway sa dagat. Osai masida wa din in baatte katolo ka sakayan sa dagat. ¹⁰ Paka piyagana in katolo ka angil in kansiyo bodyong, toloy malabo batang sa langit in osai ka magirem lakonaw wano agigang kagwali tinglaw, mitomrag sa baatte katolo ka sapa, osai sa baatte katolo ka bokal. ¹¹ Ina pag magirem piyagawit Mapait. Mibaloy wa mapait in baatte katolo ka sapa, kalbas aronaw pag mga mangyan in matay in siro minem ina. ¹² Paka piyagana in kaopat ka angil in kansiyo bodyong, toloy masida in ibeng in katolo ka dodo, kadayo in bolan, osai in mga magirem. Matang maidapo in kansiro rawa in katolo. No piyagdodo in ibeng, in katolo ka dodo lened. Kadayo yabi, idapo agrawa sa katolo ka dodo. ¹³ Paka kalbas osai ka kagwali lakoy lawin kangay ngiitan agilayogan sa ogbos. Ako karengey agpango keyen, Maidap, maidap, maidap in mga batay rateng kaidapan sa mga agbalay sa kobat, no piyagana in tolo kay ka angil in kansiro mga bodyong.

¹ Paka piyagana in kalima ka angil in kansiyo bodyong, ako kangitan malabo sa kobat osai ka magirem, piyakan sosi sa langa idapo potok. ² Kansiyo biyoswang in langa idapo potok, lomwas in elep kaloba in elep lakonaw lakoy pag timbon, anggan lomened wa in ibeng, osai in kiwang. ³ Maypanlowas mga doron batang asina pag elep, komalat sa boo kobat. Siro piyakan kabaloyan agpangwat kataw banayaw lakoy. ⁴ Siyabi sa kansiro ayaw agsidaen in mga lalosen, in mga yangaw, kamayba nakay pag togda. In mga mangyan waget idapo tanda in Diyos sa kiray in kayaten. ⁵ Siro yewed piyakan kabaloyan agbono sa kansiro, dayem pakaskitanen waget anggan lima ka bolan, in maskit kaskit in kayat banayaw lakoy. ⁶ Ina pag lima ka bolan in mga kiyayat agpamangkit sa katayan, kamay idbatay kansiro ngiitan. Beet nges siro matay wa, kamay idbatay daan matay. ⁷ In mga doron kagwali mga kabayo sandata batay aggira. Siro apo mga kagwali sarikaw ginto, in kansiro panrosayan kagwali panrosayan mangyan. ⁸ Kansiro abok kagwali abok kagbaiyan, in ngipen kagwali ngipen liyon. ⁹ In kansiro barosen piyagtabon kagwali bakal, in agaleng kansiro lagay kagwali in agaleng mga sakayan piyaggoyod kabayo agsonggab sa gira. ¹⁰ Kansiro ikoy apo sisir kataw in sa banayaw. Sa ikoy agbangen in kansiro kabaloyan agpakaskit sa mga mangyan lima ka bolan. ¹¹ In kansiro poon in angil in agdamay sa langa idapo potok. Abadon in kansiyo ngaran sa agiplaong Ibriyo. No sa agiplaong wakay Girigo, na Apolyon, in beet siyabi Agpansida. ¹² Kadalan wa in tokaw pag kaidapan. Dowai kay in agrateng. ¹³ Paka piyagana in kaenem ka angil in kansiyo bodyong, ako karengey osai ka agiplaong batang sa mga sokol in ginto pagpangandogan sa adap Diyos. ¹⁴ Miplaong sa kaenem ka angil apo bodyong keyen, Kaimo lowaten in opat ka angil piyagbakos sa balabaan in sapa lakoy Yopratis. ¹⁵ Siro datiyan piyagsandata asin pag kabetek, asin pag ibeng, asin pag bolan, asin pag dagon. Kalbas piyalpas in opat ka angil, matang agbono sa baatte katolo ka mangyan. ¹⁶ Siyabi sa kangay in bilang mga mangyan agsakay sa kabayo. Siro dowai ka daan ka milyon (200,000,000). ¹⁷ In kangay taynep ako kangitan in mga kabayo, in mga agsakay asin apo bakal sa barosen, in kolay kataw baya, osai kataw langit, osai madilaw kataw kasopri. In olo kabayo kagwali in mga olo liyon, aglowas sa kansiro bibi in baya, osai elep, osai kasopri. ¹⁸ Kalbas baatte katolo ka mangyan matay asin pag tolo ka pandalan, sa baya, osai elep, osai kasopri batang sa mga kabayo bibi. ¹⁹ In kabaloyan in mga kabayo sa kansiro bibi, osai sa ikoy. In ikoy kagwali olay apo olo, ina in agkayat. ²⁰ In mitera mga mangyan, ina in mga yewed matay asin pag mga pandalan, siro yewed mga agbenglay, yewed agpaawak, yewed din agempet sa agsamba sa mga mamaw, osai sa kansiro waget mga piyangwat rarawan ginto, pilak, osai tanso, bato, osai yangaw. Ina yewed batay kangitan, yewed din karengey, yewed kapanaw. ²¹ Siro yewed din agrega in kansiro ogali mga agpamono mangyan, in agsalimangka, agpanggaraw, agpanakaw din.

¹ Kalbas kangay ngiitan in osai kay ka angil maeyat aglompot batang sa langit. Siyo agislen libo, osai apo balangaw sa kansiyo olo. In kansiyo panrosayan agrawa kataw in ibeng. In kansiyo bitis kataw igang agitaydek. ² Osaite ka aklat in kansiyo piyagatang agibolwat. In pamalang pag bitis kansiyo piyalaed sa dagat, in tagwala agbangen sa diya. ³ Siyo mango. In kansiyo agiplaong kagwali agana lakoy liyon. Apo somagot pito ka dalegdeg. ⁴ Paka kalbas in pito ka dalegdeg, ako nges batay agsolat, kamay ako karengey in osai ka agiplaong batang sa langit keyen, Kaimo betangen in siyabi in pito ka dalegdeg, ayaw agsolaten. ⁵ Kalbas in angil in kangay ngiitan aglaed sa dagat osai sa diya, kansiyo pamalang agtoldo sa ogbos. ⁶ Siyo agsabi keyen, In Diyos in agkaboway anggan idapo kalobosan, siyo in agpangwat in langit osai in kobat, anggan in dagat, kadayo in boo agkaboway asin. Kamayba wakay sa Diyos, totoo in kangay piyagsabi, idwa dogay. ⁷ No piyagana in kapito ka angil in kansiyo bodyong, na piyangwat wa in Diyos in kansiyo remrem piyagbetang, kataw in siyabi siyo sa kansiyo mga poropita. ⁸ Paka kalbas, tagoli wakay manggisodan sa kangay in batang miplaong sa kangay batang sa langit keyen, Kao pasabangen sa angil agtaydek sa dagat osai sa diya. Kaimo kowaen in kansiyo piyagatang aklat agibolwat. ⁹ Kalbas ako pasabangen sa angil, kangay yaayay in aklatte. In siyabi siyo sa kangay keyen, Anda kaimo kowaen, kaimo komanen. Batay mapait sa kaimo boyon, kamay sa kaimo bibi masadap, kasadap daiket. ¹⁰ Kangay kiyowa in aklatte sa kansiyo bakwaw, kangay kiyoman. Masadap ngani sa kangay bibi, kamay paka matelen wa mapait sa kangay boyon. ¹¹ Kalbas apo siyabi sa kangay keyen, Kailangan kaimo wakay sabiyen in mga batay rateng sa mga manyan, sa mga bayan, mga agiplaong, osai sa mga poon lakoy.

¹ Kalbas tiyaboy sa kangay in osai ka pansokat kagwali sikkor. Siyabi keyen, Kao tomaydek, kaimo sokaten in balay lakoy Diyos, osai in pagpangandogan. Osai kaimo bilangen in mga asin agsamba. ² Kamay ayaw kaimo agsokaten in tongkodan, angkataw ina tiyaboy wa sa mga mangyan yewed agpaniwala sa Diyos. Batay kansiro piyanlaedan in Maal wano pag bayan apatnapo dowai ka bolan. ³ Kamay kangay batay siyogo in kangay dowai ka agsabi in betek, aglambongan sako. Osai ka libo dowai ka daan animnapo (1,260) ka ibeng siro batay agpabarita in agiplaong Diyos. ⁴ Ina pag dokalaki, siro in dowai ka poon olibo, osai in dowai ka tinglaw sa adap in Kapwan kobat. ⁵ No apo batay agpakaskit sa kansiro na batay lomwas sa kansiro bibi in baya agtebed sa kansiro mga kaaway. Kataw ina batay biyono no nakay in batay agpakaskit sa kansiro. ⁶ Ina din kabaloy agbengbeng in langit, matang ayaw omodan sa betek siro agpabarita in agiplaong Diyos. Siro apo din kabaloyan in sapa piyangwat daya. Osai baatte kansiro beet agpababa in kamayba nakay pag pandalan sa mga mangyan. ⁷ Paka kalbas wa in dokalaki agpabarita in Agiplaong Diyos, in ayop lakoy batay monaik batang sa langa idapo potok, batay aglaban sa kansiro. Siro batay diyaeg in ayop lakoy, batay biyono. ⁸ In kansiro bilog batay agibolalang sa karsada in bayan lakoy. No piyagpatolad ina pag bayan na maal piyagawit Sodoma, no yewed Iipto. Asin din piyako sa kodos in kansiro Kapwan. ⁹ Tolo ka ibeng kalaati in kansiro bilog batay piyagpangkit mga mangyan, kamayba batang sa nakay pag kobat, tiribo, agiplaong, bayan. Siro batay agayaw piyaglebeng in kansiro mga bilog. ¹⁰ In boo mangyan sa kobat batay agkaanggay panawen matay wa ina pag dokalaki, siro agpalkaanggay, batay agpaltaboyan kamayba nakay. Angkataw ina pag dokalaki agpabarita in batang sa Diyos, batang agpaidap wano sa mga mangyan. ¹¹ Paka kadalan in tolo ka ibeng kalaati, in Diyos agpoypoy sa dokalaki, agpaboway wakay, kalbas siro tomaydek. Alimowan wa gayed in mga mangyan kangitan. ¹² Kalbas siro karengey agiplaong lakoy batang sa langit keyen, Kamo monaik wa atai. Siro monaik sa osai ka libo anggan sa langit. Agpangkit daan in kansiro mga kaaway. ¹³ Ina pag betek lomoni wa anggan, maregnas in baatte kasampo ka balay. Pito ka libo ka mangyan in matay sa loni. In mga mangyan agkaboway kay maloba agkalimo. Siro keyen, Lakonaw ngani in Diyos sa langit. ¹⁴ Kadalan wa in dowai ka maidap. Idwa din dogay batay rateng in katolo. ¹⁵ Paka piyagana in kapito ka angil in kansiyo bodyong, apo miplaong maksen batang sa langit keyen, In kantam Kapwan osai in kansiyo Kiristo in apo kabaloyan agpoon lakoy sa boo kobat. Anggan idapo kalobosan siyo in agpoon lakoy. ¹⁶ Kalbas in dalwampot opat ka koyay in agitokkaw sa kansiro mga pagpanokkawan sa adap Diyos, siro patalegeb, agsamba sa kansiyo. ¹⁷ Siro keyen, Diyos, kanyam Kapwan, apo kabaloyan sa boo, Diyos tangona, Diyos ngona wa daan. Kami agkaanggay angkataw sa kaimo lakonaw pag kabaloyan kao agpoon lakoy. ¹⁸ In mga yewed agpaniwala sa Diyos agkagalit wano. Kamay rateng wa in kabetek kao agparosa sa mga daet pag mga matay, osai agtaboy bayad sa kaimo mga poropita, anggan sa kaimo mga iidang, sa boo agkalimo sa kaimo, kamayba lakonaw, kamayba kalakoyte. Kabetek wa kaimo bonowen in mga agbono sa mga mangyan sa kobat. ¹⁹ Biyoswang in balay lakoy Diyos ista sa langit. In baol in pagbetangan in kansiyo pangako ngiitan sa galem in kansiyo balay. Kalbas toloy mangkilat, omaleng, domalegdeg, lomoni, omodan mga kagwali bato.

¹ Kalbas lomwas wa sa langit osai ka makasoyo lakoy. Osai ka kagbaiyan aglambong ibeng, aglaed sa bolan. In kansiyo olo apo sarikaw labing dowai ka magirem. ² Siyo bonting, agkabangen wa agboslot, kalbas siyo agpango agkaskitan. ³ Osai kay ka makasoyo in lomwas sa langit, osai ka daragon mapola, kagwali bayawak, lakonaw lakoy. Apo pito ka olo, sampo in songay. In baatte olo apo sarikaw. ⁴ Yoopyas in kansiyo ikoy in katolo ka bilang mga magirem sa langit biyenglay sa kobat. Kalbas pataboy sa adap in kagbaiyan agkaboslotan, matang no lomwas wa na in bodang batay piyagtelen. ⁵ Kalbas lomwas wa in bodang, kaliyakiyante. Kamay apo komwa sa bodang, biyaba wa sa Diyos sa kansiyo pagpanokkawan lakoy. Ina pag bodang piyagsandata batay agpoon lakoy sa boo mga mangyan. Siyo maeyat wano, in pamogbog bakal. ⁶ In kagbaiyan wakay dayem domalagan wa pataboy sa moyod, sa osai ka kobat siyandata in Diyos sa kansiyo, matang ista siyo yaalapet osai ka libo, dowai ka daan, animnapo (1,260) ka ibeng. ⁷ Kadogay apo gira sa langit. In poon sa mga angil piyagawit Migil, osai in kansiyo mga kabelagan angil aglaban sa daragon osai in kansiyo mga kabelagan. ⁸ Diyaeg wa in daragon osai in kansiyo mga kabelagan. Siro biyoyaw wa sa langit. ⁹ Biyenglay wa in lakonaw wano pag daragon, in olay tangona, piyagawit diyablo, no yewed Katanas, in agpadaya sa boo mangyan. Siyo biyenglay wa sa kobat, kadayo in kansiyo mga kabelagan. ¹⁰ Kalbas ako karengey osai ka agiplaong maksen wano batang sa langit keyen, Ngona wa in Diyos agpamaboway. Piyapangkit wa in kansiyo kabaloyan, matang agpoon lakoy. Piyapangkit wa din in kabaloyan kansiyo Kiristo, angkataw biyoyaw wa sa langit in agpanombong sa kantam mga belag, in agpanombong sa kansiro kadayo ibeng kadayo yabi sa adap Diyos. ¹¹ Siro mandaeg sa diyablo panawen in daya in Bodang Topa, osai panawen in agsabi betek. Osai siro yewed mangalwasi kansiro boway. ¹² Na, laki mga taga langit, kamo malkaanggayan wa, in boo asin agbalay. Kamay maidap in batay piyagdalan kamo sa kobat osai sa dagat. Angkataw in diyablo lomabo wa sa kanyo, agkagalit wano, angkataw in kansiyo atawanan kadogayte wa in kansiyo betek. ¹³ Paka atawanan in daragon siyo biyenglay wa sa kobat, kansiyo piyangagak in agboslot in bodang kaliyakiyan. ¹⁴ Kamay in kagbaiyan piyakan dowai ka lagay kataw lawin lakoy, matang kailayog pataboy sa kansiyo kobat sa moyod. Ista siyo batay piyagalapet tolo ka dagon kalaati, matang idbatay abel in daragon. ¹⁵ Panawen ina in olay agparangtoy sapa sa kansiyo bibi, sapa lakoy agiros, matang in kagbaiyan malimes. ¹⁶ Kamay in kobat minganga, tiyelen in sapa piyarangtoy in daragon, matang boway daan in kagbaiyan. ¹⁷ In daragon agkagalit sa kagbaiyan. Siyo panaw wa matang aggira sa kansiyo mga kasokponan agkaboway kay. Ina in mga mangyan agpaniwala sa mga otos Diyos, in mga yewed aglimbang agpaniwala sa mga piyatoldo Isos. ¹⁸ Kalbas in daragon tomaydek sa balabaan dagat.

¹ Kalbas ako kangitan agonaik batang sa dagat in osai ka ayop lakoy. Apo pito ka olo, osai sampo ka songay. In baatte songay apo sarikaw. Sa baatte dayem olo apo solat osai ka ngaran agkairis sa Diyos. ² In ayop lakoy kangay ngiitan kagwali laog lakonaw wano, in kansiyo bitis kagwali bitis oso. In kansiyo ngoso kagwali ngoso liyon. Tiyaboy in daragon sa ayop lakoy in kansiyo eyat, osai kabaloyan, osai in maslang pag sakopan. ³ In osai sa kansiyo mga olo tomag apo sogat makakatay, kamay maoraw wakay. In boo mga mangyan somoyo, siro miyanggat sa ayop. ⁴ In daragon siyamba in boo mangyan angkataw kansiyo wa tiyaboy in kansiyo kabaloyan sa ayop lakoy. In ayop din kansiro siyamba keyen, Idapo katolad sa ayop lakoy. Idapo batay kalaban sa kansiyo. ⁵ In ayop lakoy yewed piyagayaw agsabi daet, agkairis sa Diyos, osai agpoon lakoy apatnapot dowai ka bolan. ⁶ Kansiyo ngani siyabiyan daet in Diyos, anggan in ngaran Diyos, kadayo in kansiyo balay, osai in boo ista agbalay. ⁷ Siyo yewed din piyagayaw aggira sa mga iidang Diyos, anggan siro diyaeg. Siyo piyakan kabaloyan sa baatte tiribo, bayan, agiplaong, osai kobat. ⁸ Batay agsamba sa kansiyo in boo mangyan atai sa kobat. In mga waget agisolat in kansiro ngaran sa aklat, na siro in idwa somamba. In yewed kay piyangwat in kobat, kansiro mga ngaran siyolat wa in Bodang Topa in batang biyono sa kansiyo aklat listaan in mga agkaboway. ⁹ No siyo apo talinga na mamarengey wa. ¹⁰ No siyo in batay piyagbiyag, na batay ngani piyagbiyag. No siyo in batay piyagbono, na batay ngani piyagbono. Matang kailangan in mga iidang Diyos agpakarigen in paniwala. ¹¹ Kalbas kangay ngiitan osai kay ka ayop lakoy lomwas batang sa diya. Apo dowai ka songay kataw songay osai ka bodang topa, kamay in kansiyo agiplaong kataw in agiplaong daragon. ¹² Ina in sogowan in tokawan pag ayop lakoy, apo in boo kansiyo kabaloyan. In boo mga mangyan sa kobat kansiyo piilit agsamba sa tokawan pag ayop lakoy apo sogat lakoy kamay maoraw wa. ¹³ Makasoyo in mga piyangwat in kadowai ka ayop lakoy. Siyo agpalompot baya batang sa langit sa pangkit mga mangyan. ¹⁴ In mga mangyan sa kobat kansiyo piyadaya panawen sa kansiyo mga piyangwat makasoyo sa adap in tokawan pag ayop lakoy. Kansiyo siyogo in mga mangyan agpangwat rarawan in tokawan pag ayop lakoy, in batang piyalang kamay agkaboway. ¹⁵ In kadowai ka ayop piyayagan din agtaboy payeng sa rarawan in tokawan pag ayop lakoy. Ngona kaiplaong in rarawan osai piyagbono in boo dayo somamba sa kansiyo. ¹⁶ In boo mangyan piilit in ayop agpatanda sa pamalang no yewed sa kiray. In boo mga mangyan lakonaw, kamayba kalakoyte, mayaman, maidap, kamayba alapet sogowan, kamayba yewed. ¹⁷ Idapo batay kabili, kamayba agpabili, dayem apo tanda in ngaran in ayop lakoy, no yewed in bilang kansiyo ngaran. ¹⁸ Kailangan asin in maronong. No siyo in maronong, na kansiyo batay atawanan in bilang ngaran in ayop, angkataw ina ngaran osai ka kaliyakiyan. In bilang 666.

¹ Ako mangkit, ista in Bodang Topa agtaydek sa boksor Siyon, sarig in osai ka daan apatnapot apat ka libo (144,000) ka mangyan. Siro apo solat sa kansiro kiray ngaran in Bodang Topa, osai ngaran in kansiyo Amang. ² Kalbas ako karengey osai ka miplaong batang sa langit kagwali agaleng tagbongan lakoy, osai agaleng dalegdeg. In agiplaong kangay arengeyan kagwali din togtog gitara. ³ Siro agawit bayo wakay pag awit sa adap in pagpanokkawan lakoy, osai sa opat ka agkaboway, anggan din sa dalwampot opat ka mga koyay. Idapo batay katawan ina pag awit no yewed in osai ka daan, apatnapot apat ka libo (144,000), in biili sa kobat. ⁴ Ina pag mga kaliyakiyan idbatang apo babai, siro begle daan, siro agyanggat sa Bodang Topa kamayba sa nakay pataboy. Siro biili ibat sa boo mga mangyan matang siro in tokawan tiyaboy sa Diyos osai sa Bodang Topa. ⁵ Siro yewed agsabi baribid kamayba nangkadogay. Siro idapo wano daet. ⁶ Kangay wakay ngiitan in osai ka angil agilayogan sa ogbos, agbaba in Maalno pag Barita idapo kalobosan, matang piyagpaalam sa boo mga mangyan sa boo kobat, baatte tiribo, agiplaong, osai bayan. ⁷ Siyo maksen agsabi keyen, Kamo agkalimo sa Diyos, pagmaalen in kansiyo kalakoyen. Angkataw rateng wa in kabetek siyo agparosa. Kanyo sambaen in Diyos in agpangwat langit, osai in kobat, dagat, osai mga bokal sapa. ⁸ Kadogay in kadowai ka angil agsabi keyen, Maregnas wa, maregnas wa in bayan lakoy Babilonya. Kansiyo piyakan alak in boo mangyan, in agpanggaraw kataw alak matapang. Siro kansiyo piilit piyainem. ⁹ Kadogay somonod sa dowai in katolo ka angil. Siyo agsabi maksen keyen, No siyo somamba sa ayop lakoy osai sa kansiyo rarawan, osai no siyo apo in tanda sa kansiyo bakwaw, no yewed sa kiray, ¹⁰ na siyo batay aginem in galit Diyos kataw alak idapo palagem, biyobo in Diyos sa lisap kansiyo galit. Siro batay maloba piyagpakaskitan baya osai kasopri sa adap in Bodang Topa, osai maal wano pag mga angil. ¹¹ In baya in agpakaskit sa kansiro, in elep batay agitaydek anggan idapo kalobosan. Kamayba ibeng, kamayba yabi idapo agpainga in mga somamba sa ayop lakoy, osai sa kansiyo rarawan, kamayba nakay in apo in tanda kansiyo ngaran. ¹² Na kailangan agpakarigen in mga iidang Diyos, in agpaniwala sa kansiyo mga otos, osai agaway agpasandig kay Isos. ¹³ Kalbas ako karengey agiplaong batang sa langit keyen, Kaimo solaten keyen, Sogod ngona agkaanggay in mga agpaniwala sa Kapwan anggan matay. Siyabi in Abyan keyen, Totoo ngani. Siro batay wa agpainga sa kansiro mga mabyat pag panawen, angkataw batay piyagngitan in raweg kansiro mga panawen. ¹⁴ Ako mangkit, kalbas kangay ngiitan maboksi pag libo. Asin agtokkaw osai ka agkaboway kagwali mangyan, apo sarikaw ginto, osai apo piyagatang karit matarem. ¹⁵ Osai kay ka angil in lomwas batang sa balay lakoy Diyos, agsabi maksen sa agitokkaw sa libo keyen, Dali wa, kao aggapas wa, angkataw kabetek wa, layes wa in aniyen sa kobat. ¹⁶ Aggapas wa ngani in agitokkaw sa libo, maani wa in aniyen sa kobat. ¹⁷ Osai kay ka angil in kangay ngiitan lomwas batang sa balay lakoy Diyos sa langit. Apo din piyagatang karit matarem. ¹⁸ Lomwas batang sa pagpangandogan in osai kay ka angil, in agalapet baya. Maksen kansiyo siyabi sa angil apo karit matarem keyen, Manggapas wa, aniyen wa in mga obas sa boo obasan sa kobat, angkataw layes wa. ¹⁹ Agkarit wa in angil, yaani in mga obas, kadogay siyoroy sa pesaan. Ina in maloba pag galit Diyos. ²⁰ In mga obas piyesa sa idwa bayan. Kadogay lomwas batang sa pesaan in daya kagwali bongkalos, tolo ka daan ka kilomitro in kadayowen, in kalayemen kalayem mangyan.

¹ Kangay ngiitan in osai kay ka makasoyo lakoy sa langit, pito ka angil apo pito ka kaidapan. Ina in kalobosan pag mga kaidapan. No kalbas wa ina, na lobos wa in galit Diyos. ² Ako apo ngiitan kagwali dagat bobog agigang. Kangay din ngiitan in mga mandaeg sa ayop lakoy, osai sa kansiyo rarawan, anggan sa apo in ngaran kataw in osai ka bilang. Siro agitaydek sa dagat bobog, agatang mga kagwali gitara tiyaboy in Diyos. ³ Kansiro piyagawit in awit Mowisis in sogowan Diyos, osai in awit Bodang Topa keyen, Diyos Kapwan, in apo Kabaloyan sa boo, lakonaw, makasoyo in kaimo mga panawen. Poon lakoy sa boo mga mangyan, in kaimo mga dalan betek, idapo baribid. ⁴ Kapwan, in boo batay agkalimo sa kaimo. In boo batay agsabi kao lakonaw, kao waget in maal wano. In boo mga mangyan batay pasabangen agsamba sa kaimo, angkataw in boo kangitan betek in kaimo mga panawen. ⁵ Paka kalbas ina, kangay ngiitan maboswang in balay lakoy Diyos sa langit. Sa galem apo in torda in pagbalayan gayed Diyos. ⁶ Lomwas batang sa balay lakoy Diyos in pito ka angil apo piyagbaba pito ka kaidapan. Siro aglambongan lino maboksi agrawa, apo piyagsalabi ginto. ⁷ Pito ka tasa ginto tiyaboy sa kansiro in osai sa opat ka agkaboway. Ina makno wano galit Diyos in agkaboway idapo kalobosan. ⁸ Makno elep in balay lakoy Diyos, agrakay sa kansiyo kalakoyen, osai sa kansiyo kabaloyan. Idapo batay kaisoroy sa balay lakoy Diyos anggan ikkay lobos in pito ka kaidapan piyagbaba in pito ka angil.

¹ Ako karengey osai ka agiplaong maksen sa balay lakoy Diyos agsogo sa pito ka angil keyen, Panaw wa kamo. Kanyo wa bobowen sa kobat in galem in pito ka tasa in galit Diyos. ² Panaw wa in tokawan pag angil, biyobo sa kobat in galem kansiyo tasa. In mga mangyan apo tanda in ayop lakoy, in mga agmaal sa kansiyo rarawan, toloy apo wa mga sogat maloba wano maskit. ³ Biyobo sa dagat in kadowai ka angil in galem kansiyo tasa. In sapa mibaloy wa kagwali daya mangyan matay wa. In baatte agkaboway sa dagat mangatay wa. ⁴ Biyobo in katolo ka angil in galem kansiyo tasa sa mga sapa, sa mga bokal. Toloy wa din daya. ⁵ Ako karengey agsabi in angil in agalapet mga sapa keyen, Kao maal wano, in agkaboway tangona, anggan ngona. Kao ngani betek, in kao agparosa kataw ina. ⁶ Angkataw kansiro biyono, biyobo in daya kaimo mga iidang, osai in mga poropita, Na siro piyainem daya. Ina in maal sa kansiro. ⁷ Kadogay ako karengey agiplaong batang sa pagpangandogan keyen, Diyos Kapwan, apo Kabaloyan sa boo, totoo betek in kaimo parosa sa kansiro. ⁸ Biyobo sa ibeng in kaopat ka angil in galem kansiyo tasa. In ibeng piyakan kabaloyan agtebed sa mga mangyan in maloba wano pag maibeng. ⁹ Matebed ngani siro, kamay siro agsabi daan baribid agkairis sa Diyos in kabaloy agpababa kaloba ina pag mga kaidapan. Kamay yewed din siro agbenglay in kansiro mga daet, agmaal sa Diyos. ¹⁰ Biyobo in kalima ka angil in galem kansiyo tasa sa pagtokkawan in ayop lakoy. Lomened in kansiyo sakopan. In mga mangyan agkayat ngoso panawen sa maskit. ¹¹ Siro agkairis sa Diyos panawen sa mga maidap, maskit in mga sogat, kamay yewed din siro agbenglay kansiro mga daet pag panawen. ¹² Biyobo in kaenem ka angil in galem kansiyo tasa sa sapa lakoy Yopratis. Toloy maikat in sapa, toloy wa apo dalan in mga poon lakoy batang sa paglowasan ibeng. ¹³ Ako kangitan lomwas batang sa bibi daragon, osai sa ayop lakoy, kadayo din sa agpadaya pag poropita, tolo ka marames pag mamaw, kagwali palaka. ¹⁴ Ina pag mga mamaw agpamangwat makasoyo. Kansiro piyagdalan in boo poon lakoy sa boo kobat matang piyagtipon batay aggira sa lakonaw pag Ibeng Diyos in apo Kabaloyan sa boo. ¹⁵ Apo miplaong keyen, Agparengey kamo. Ako agrateng kataw in agpanakaw. Agkaanggay in palagi agipolaw, osai yewed agkowa in kansiyo lambong, matang siyo idbatay panaw idapo lambong, yewed arikoyan sa amat. ¹⁶ In mga poon lakoy tiipon in mga mamaw sa osai ka kobat sa agiplaong Ibriyo piyagawit Armagidon. ¹⁷ Biyobo sa kiwang in kapito ka angil in kansiyo galem tasa. Apo miplaong maksen batang sa pagpanokkawan lakoy sa balay lakoy Diyos keyen, Mibaloy wa. ¹⁸ Mangkilat, omaleng, domalegdeg, lomoni lakoy anggan. Ina in maeyat pag loni, sogod tangona idapo batang kaeyat ina, ina maloba wano maeyat. ¹⁹ Mangagetek wa in bayan lakoy, mibaloy wa tolo. Mangayopang in boo bayan sa boo kobat. Kadayo in bayan lakoy Babilonya piyarosa din in Diyos, piyainem din in kansiyo maloba wano pag galit kataw alak. ²⁰ In boo poro kobat sa dagat maidapo. Maidapo wa din in mga boksor. ²¹ Omodan mga kagwali bato, in baatte osai in kabyaten agkabangen limampo ka kilo. Tiyamaan in mga mangyan. In mga mangyan agkairis sa Diyos, panawen asin pag kaidapan makapangirabot.

¹ Kalbas in osai sa pito ka angil apo pito ka tasa pasabangen sa kangay keyen, Aywawa, kangay piyagpapangkit sa kaimo no nangkataw kangay piyagparosa in inang sa mga agpanggaraw, in agitokkaw sa aronaw sapa. ² In mga poon lakoy sa kobat kansiyo giyaraw. In boo mangyan sa kobat aglasing sa kansiyo panawen agpanggaraw. ³ Ako piyaanggat in Abyan Diyos. Kalbas ako biyaba in angil sa moyod. Kangay ista ngiitan in osai ka kagbaiyan agsakay sa osai ka ayop lakoy mapola. In ayop lakoy apo pito ka olo, sampo in songay. In boo bilog makno wa solat boo agkairis sa Diyos. ⁴ In sa kagbaiyan lambong badyate agkapolaen, osai mapola wa daan. Ginto osai mga bato makaamag, osai pirlas in kansiyo mga yaman sa bilog. Kansiyo piyagatang in osai ka tasa ginto makno in marames pag panawen agpanggaraw. ⁵ Sa kansiyo kiray apo solat osai ka ngaran yewed atawanan in beet siyabi, keyen, In bayan lakoy Babilonya, inang sa mga agpanggaraw, sa boo marames pag panawen sa boo kobat. ⁶ Kangay ngiitan ina pag kagbaiyan lasing sa daya in mga iidang Diyos, sa daya in mga biyono panawen siro agpaniwala kay Isos. Paka siyo kangay ngiitan ako somoyo wano gayed maloba. ⁷ Keyen in angil, Nakay batang kao somoyo? Kangay piyagsabi sa kaimo in beet siyabi ina pag kagbaiyan, osai in kansiyo pagsakayan ayop lakoy apo pito ka olo, sampo in songay. ⁸ In ayop lakoy kaimo ngiitan agkaboway tangona, kamay ngona matay wa. Na batay wakay lomwas batang sa langa idapo potok, matang batay piyagbono. In mga mangyan agkaboway sa kobat, in yewed agisolat in ngaran sogod ikkay piyangwat in kobat sa aklat listaan in mga agkaboway, paka siro kangitan in ayop lakoy, siro batay somoyo, angkataw siyo tangona agkaboway, kalbas biyono, kamay batay wakay lomwas. ⁹ Kailangan asin in maronong osai katawan. In pito ka olo, na ina in pito ka latayan pagtokkawan in kagbaiyan. ¹⁰ Asin din pag pito ka olo piyagpatolad din in pito ka poon lakoy. In lima mangaligan wa, in kaenem agaway kay agpoon lakoy, in kapito yewed kay agrateng. No siyo rateng kadogayte waget siyo batay mamataw. ¹¹ In ayop lakoy agkaboway tangona, ngona idapo wa, na siyo in kawalo ka poon lakoy, na ina kabelag din sa pito. Siyo batay din piyagbono. ¹² In sampo ka songay kaimo ngiitan, na ina sampo ka poon lakoy yewed kay agpoon. Kamay siro batay din piyakan kabaloyan kadogay agtongtong agpoon lakoy sarig in ayop lakoy. ¹³ Ina pag sampo osai waget in remrem. Batay kansiro piyagpasakop sa ayop lakoy in kansiro kabaloyan agpoon. ¹⁴ Kansiro batay piyaglabanan in Bodang Topa, kamay siro batay daan diyaeg. In Bodang Topa osai in kansiyo mga biyerya, mga iidang, yewed aglimbang pag mga sarig, batay mandaeg. Angkataw in Bodang Topa Kapwan kay sa mga kapwan, siyo din in Poon sa mga poon. ¹⁵ Siyabi din sa kangay in angil keyen, In kaimo ngiitan mga sapa pagtokkawan in kagbaiyan agpanggaraw, na ina in mga mangyan in mga karowen, mga kobat, mga agiplaong. ¹⁶ In sampo ka songay kaimo ngiitan, osai in ayop lakoy, batay agkagalit sa kagbaiyan agpanggaraw. In boo kansiyo, batay kansiro piyagagaw. Siyo batay biyaliwan idapo wa damit. Kansiro batay piyagkoman in kansiyo bilog. In agitera batay piyagtebed. ¹⁷ Batang sa Diyos in kansiro osai waget ka remrem batay piyagpasakop sa ayop lakoy in kansiro kabaloyan agpoon, anggan mibaloy in mga siyabi in Diyos. ¹⁸ In kaimo ngiitan kagbaiyan, na ina in bayan lakoy, in apo kabaloyan sa mga poon lakoy sa kobat.

¹ Paka kalbas ina, kangay ngiitan in osai ka angil apo lakoy kabaloyan. Siyo aglompot batang sa langit. In boo kobat romawa panawen sa kansiyo kalakoyen. ² Siyo mango maksen keyen, Masida wa, masida wa in Babilonya lakoy. Ina ngona pagpamatawan waget in mga makageet, kolongan in mga marames pag mamaw, balay din marames pag mga bantog makasoka. ³ Angkataw kansiyo piyainem alak in boo mga mangyan, kansiyo daet agpanggaraw. In mga poon lakoy sa kobat agpanggaraw sa kansiyo. In mga aglako yomaman sa kansiyo marames pag panawen. ⁴ Ako karengey kay miplaong batang sa langit keyen, Kangay mga mangyan, kamo panaw wa sa kansiyo, ayaw kamo agkaakayan sa kansiyo daet, matang kamo yewed piyarosa sarig siyo. ⁵ Angkataw in langit siyawaan wa in kansiyo mga daet, in Diyos idbatay agkalibangaw sa mga daet Babilonya. ⁶ Kanyo pangwaten sa kansiyo kataw in kansiyo mga piyangwat. Kanyo pakaknowen in kansiyo lisap labi kay mapait kaysa kansiyo piyainem sa amat. ⁷ No nangkalakoy in kansiyo agpakabwat remrem osai agpanggaraw, na kalakoy daan ina siyo paidapanen osai parongkoten. Angkataw palagi kansiyo piyagpanremrem keyen siyo sa pagpanokkawan lakoy agpoon. Keyen siyo yewed balo, siyo idbatay agrongkot kamayba nangkadogay. ⁸ Kamay batay rateng sa kansiyo sa osai waget ka ibeng, in boo kaidapan, maskit, agrongkot, agkayawes. Siyo batay tiyebed sa baya, angkataw apo kabaloyan in Diyos Kapwan in agparosa sa kansiyo. ⁹ In mga poon lakoy sa kobat, siro in mga agpanggaraw sa kansiyo, osai kansiyo sarig agkabibel agpanawen, sa betek siro agpangkit sa elep batang sa bayan piyagsonog siro batay malpanangis, malpanggoong. ¹⁰ Siro batay tomaydek waget sa adayonaw, angkataw siro agkalimo sa kansiyo kaidapan. Siro keyen, Yaay, in kalobaen. Osai waget ka oras mibaloy wa in parosa sa lakonaw pag bayan Babilonya. ¹¹ In mga agpanlako sa kobat manangis panawen sa kansiyo, maypanremrem, angkataw idapo wa batay bomili in kansiro piyagtinda. ¹² Idapo wa batay bomili kansiro ginto, pilak, mga bato makaamag, osai pirlas, damit lino, damit silko, agkapolaen osai mapola daan, yangaw mala masadap, mga pangil ilipanti piyangwat sangkap, mga yangaw makaamag, tanso, bakal, bato pongol, ¹³ mga pampasadap pamangnen, osai mga mala masadap kataw kamanyan, mira, osai insinso, alak osai langis, arina osai tirigo, mga baka osai topa, kabayo osai kalisa, in mga din piyagtinda in mga bilog mangyan, mga sogowan. ¹⁴ In mga agpanlako agsabi sa kansiyo keyen, Maidapo wa in boo mga maalen kaimo piyagkaamag, idbatay wa tagoli kaimo ngiitan in boo kaimo mga kasangkapan, kadayo in kaimo kamaalnowen. ¹⁵ Idbatay agpasabangen in mga agpanlako, in mga yomaman asin pag bayan, angkataw siro agkalimo sa parosa sa kansiyo. Batay agpanangis siro, osai agpanremrem keyen, ¹⁶ Yaay, in kalobaen in mibaloy asin pag bayan lakoy. Tangona siro aglambongan lino, agkapolaen osai mapola wa daan. Osai tangona aronaw yaman sa bilog ginto, mga makaamag pag bato, osai pirlas. ¹⁷ Osai waget ka oras toloy maidapo ina pag boo. Osai in boo mga kapitan mapor, osai in mga agsakay, osai in mga agpamangka, in boo mga agpanlako sa dagat, sa adayonaw ¹⁸ agriwa sa elep batang sa bayan piyagsonog. Siro malpanangis keyen, Idapo bayan kataw ina pag bayan lakoy. ¹⁹ In siro agpalpanggoong kansiro olo piyagborisan. siro agpanangis keyen, Yaay, in kalobaen in mibaloy sa bayan lakoy. Asina yomaman in boo kapwan mapor, kamay osai waget ka oras toloy maidapo in boo kansiyo kayamanan. ²⁰ Maal wa agkaanggay in mga taga langit sa mibaloy sa kansiyo. Kamo in mga iidang Diyos, in mga katiwala Isos, osai in mga poropita, kamo agkaanggay wa. Angkataw siyo piyarosa wa in Diyos panawen sa kansiyo mga piyangwat sa kanyo. ²¹ Kalbas osai ka angil maeyat in komwa osai lakoy ka bato kagwali gilingan, biyenglay sa dagat, keyen, Kataw ina batay piyagsida in bayan lakoy Babilonya. Idbatay wa tagoli ngiitan, ²² idbatay arengeyan asin in mga agana gitara agtogtog, in agana bangsi, osai bodyong, idapo wa batay ngiitan asin in agpamangwat kamayba nakay pag sangkap, idbatay wa arengeyan in mga agaleng gilingan. ²³ Idbatay wa tagoli apo tinglaw asin kamayba osai waget, idbatay wa din arengeyan in kaanggayan sa kasalan. In mga agpanlako asin apo kabaloyan sa boo kobat, in mga asin salimangkaan agpadaya sa boo mangyan. ²⁴ Kaya in Babilonya piyarosa, angkataw siyo in agbono sa mga poropita, osai sa mga iidang Diyos, kadayo sa boo mga biyono sa kobat.

¹ Paka kalbas ina, ako karengey kagwali miplaong lakoy mayraesan aronaw wano mangyan sa langit, agawit keyen, Pagmaalen in Diyos, in kantam Diyos agpamaboway. Siyo in lakonaw, in apo kabaloyan. ² Totoo betek in kansiyo mga parosa. Kansiyo piyarosa in inang mga agpanggaraw, in agdaet sa kobat. Siyo piyarosaan in Diyos panawen sa agbono sa mga sogowan in Kapwan. ³ Tagoli wakay siro omawit keyen, Pagmaalen in Diyos, angkataw in sonog sa bayan lakoy Babilonya, in elep agtaydek lakoy anggan idapo kalobosan. ⁴ In dalwampo opat ka koyay osai in opat ka agkaboway agpatalegeb agmaal sa Diyos in agtokkaw sa pagpanokkawan lakoy keyen, Ina wa ngani. Pagmaalen in Diyos. ⁵ Apo miplaong sa pagpanokkawan lakoy keyen, Kanyo pagmaalen in kantam Diyos, kamo in boo kansiyo mga sogowan, kamayba lakonaw, kamayba din kalakoyte, kamo in mga agkalimo sa kansiyo. ⁶ Kalbas ako karengey kagwali miplaong lakoy aronaw wano mangyan mayraesan, kagwali agaleng lakoy tagbongan, osai agdalegdeg lakoy, keyen, Pagmaalen in Diyos, angkataw agpoon lakoy in kantam Diyos in Kapwan, in apo kabaloyan sa boo. ⁷ Kitam wa agkaanggay. Kantam pagmaalen in kansiyo kalakoyen, angkataw agkabangen wa in kasalan in Bodang Topa. Sandata wa in batay babai. ⁸ Siyo piyakan lambong maboksi wano pag lino agrawa. In beet siyabi in lino in mga maal pag panawen in mga iidang Diyos. ⁹ Siyabi sa kangay in angil keyen, Kaimo solaten keyen, Agkaanggay in mga biyerya sa kasalan in Bodang Topa. Siyo keyen kay, Ina totoo mga agiplaong Diyos. ¹⁰ Ako agpatalegeb sa kansiyo adap matang agmaal sa kansiyo. Kamay siyo keyen, Ayaw agmaal sa kangay, ako din dayem sogowan waget kataw kao, osai kataw in kaimo mga belag agbaba in betek pag barita in piyatoldo Isos. In Diyos in kaimo pagmaalen. In betek pag barita in piyatoldo Isos in piyagbaba in boo mga poropita. ¹¹ Kalbas maboswang in langit. Kangay ngiitan osai ka kabayo maboksi, in agsakay piyagawit Betek, Maal pag Pasandigan, angkataw betek in siyo agparosa, osai aglaban. ¹² In kansiyo mata kagwali igang baya. Siyo aronaw sarikaw. Kansiyo ngaran agisolat sa kansiyo bilog, siyo waget in katawan in beet siyabi ina. ¹³ In kansiyo lambong batang siyogbo sa daya. Siyo piyagawit Agiplaong Diyos. ¹⁴ Agyanggat sa kansiyo in mga sondalo sa langit, aglambong maboksi pag lino agrawa. Siro din agsakay sa mga kabayo maboksi. ¹⁵ Apo aglowas sa kansiyo bibi pisaw matarem, kansiyo batay pandaeg sa mga mangyan. Siyo batay agpoon lakoy, in pamogbog bakal. Kansiyo batay piyaglaed in pesaan obas piyagpaagos in maloba pag galit Diyos in apo kabaloyan sa boo. ¹⁶ Sa kansiyo lambong, osai sa kansiyo panobo apo solat ngaran keyen Poon lakoy mga poon, osai Kapwan in mga kapwan. ¹⁷ Kangay wakay ngiitan in osai ka angil agtaydek sa ibeng. Piyangowan siyo in boo mga bantog sa kiwang keyen, Aywawa kamo, matipon wa, malpamangan sa siyandata Diyos. ¹⁸ Aywawa, mamangan in galem mga poon lakoy, mga kapitan, mga sondalo, mga kabayo, osai in mga agsakay. Komanen wa in mga galem boo mangyan, kamayba sogowan kamayba yewed, kalakoyte osai lakonaw. ¹⁹ Kangay ngiitan in ayop lakoy, in mga poon lakoy sa kobat, osai in kansiro mga sondalo agkatipon matang aggira sa agsakay sa kabayo, osai sa kansiyo mga sondalo. ²⁰ Abel in ayop lakoy, kadayo in agpadaya pag poropita, in agpangwat mga makasoyo sa adap in ayop lakoy. Ina wa in agpadaya sa mga mangyan apo tanda in ayop lakoy, osai agmaal sa kansiyo rarawan. Siyo abel din. Ina pag dowai agkaboway daan biyenglay wa sa baya kasopri kaslang dagat. ²¹ In kansiro mga sondalo biyono in pisaw aglowas sa bibi in agsakay sa kabayo. Siyawaan wa in boo mga bantog agkoman sa kansiro galem.

¹ Kalbas kangay ngiitan in osai ka angil aglompot batang sa langit, apo piyagatang kadina lakoy, osai in sosi in langa idapo potok. ² Kansiyo diyakep in daragon, in olay tangona, ina in diyablo, Katanas. Biyakos osai ka libo ka dagon. ³ Ina biyenglay sa langa idapo potok. Biyengbeng in sakbawan, kiyandado, matang idwa kapadaya sa mga mangyan, anggan ikkay kalbas in osai ka libo ka dagon. No kalbas wa ina, na kailangan siyo piyagpalpas kadogayte waget. ⁴ Ako kangitan mga pagpanokkawan. In mga asin agitokkaw piyangwat wa tanongan. Kangay din ngiitan in abyan in mga piyogot panawen siro agbarita panawen kay Isos osai agpatoldo in agiplaong Diyos. Siro yewed agmaal sa ayop lakoy osai sa rarawan ina. Kansiro din piyagayaw tiyandaan in ayop lakoy kansiro ki ray osai bakwaw. Siro piyaboway wakay, kalbas agpoon lakoy sarig Kiristo osai ka libo ka dagon. ⁵ Ina in tokaw pag agpaboway wakay. In amat kay din pag mga matay, batay wakay din piyagpaboway, no kalbas in osai ka libo ka dagon. ⁶ Agkaanggay, apyaan gayed in mga piyaboway sa tokaw pag agpaboway wakay. In kadowai ka katayan idapo kabaloyan sa kansiro. Siro batay mga sasirdoti in Diyos osai in Kiristo. Siro kansiyo batay sarig agpoon lakoy osai ka libo ka dagon. ⁷ Paka kalbas in osai ka libo ka dagon, Katanas batay wakay piyagpalpas. ⁸ Siyo batay panaw matang agpadaya sa mga mangyan sa boo kobat, Gog osai Magog. Siro batay piyagtipon Katanas, batay piyagpaanggat sa gira, in karowen karo in bowangin sa balabaan dagat. ⁹ Siro panaw omarabang sa boo kobat. Kansiro riibok in kampo in mga iidang Diyos, osai in bayan kansiyo piyagmaal. Kamay apo baya lomabo batang sa langit, siro tiyebed. ¹⁰ In diyablo in agpadaya sa kansiro biyenglay din sa baya kasopri kaslang dagat, pagbenglayan din in ayop lakoy osai in agpadaya pag poropita. Siro batay piyagpakaskitan ibeng kadayo yabi anggan idapo kalobosan. ¹¹ Kalbas kangay ngiitan in osai ka pagpanokkawan lakoy maboksi, osai in asin agitokkaw. Mapasaw in kobat osai in langit sa kansiyo adap, idwa ngiitan tagoli. ¹² In mga matay kamayba lakonaw, kamayba kalakoyte, kangay ngiitan sa adap in pagpanokkawan lakoy. Biyoswang in mga aklat. Osai kay ka aklat biyolwat din, in aklat listaan in mga agkaboway. In mga matay piyagidang, no nakay in kansiro mga piyangwat, no nakay in agisolat sa mga aklat. ¹³ In mga matay sa dagat piyalowas. Piyalowas wakay din Katayan osai Pagbalayan in mga matay in mga sakop sa kansiro. In boo piyagidang no nakay in kansiro mga piyangwat. ¹⁴ Kalbas biyenglay sa baya kaslang dagat in Katayan osai in Pagbalayan mga matay. Ina pag baya in kadowai ka katayan. ¹⁵ Kamayba nakay in mga yewed liista kansiro ngaran sa aklat in mga agkaboway, na siyo biyenglay sa baya kaslang dagat.

¹ Kalbas kangay ngiitan in bayo wakay pag langit, bayo wakay din pag kobat. Mapasaw wa in datiyan langit, osai kobat, mapasaw wa din in dagat. ² Kangay ngiitan in Maal wano pag Bayan, bayo wakay pag Irosalim, aglompot batang sa langit, batang kay sa Diyos. Siyo kataw in kagbaiyan sandata batay pakasal, agpadaraga wa labi sa kansiyo batay lalaki. ³ Ako karengey maksen pag agiplaong batang sa pagpanokkawan lakoy keyen, Maanda in pagpamatawan Diyos sarig wa mga mangyan. Siyo kansiro wa kamalay. Siro kansiyo wa mga mangyan. In Diyos palagi din sa kansiro. Siyo kansiro Diyos. ⁴ Kansiyo wa batay piyonas in kansiro mga lowa. Idapo wa katayan, idapo wa agrongkot, idapo wa agpanangis, kamayba in mga maskit, angkataw in mga datiyan idapo wa. ⁵ Kadogay in agitokkaw sa pagpanokkawan lakoy keyen, Maanda, kangay piyagalis in boote. Keyen kay, Kaimo solaten keyen, Anda pag mga agiplaong boo betek, maal piyaniwalaan. ⁶ Siyabi kay sa kangay keyen, Mibaloy wa. Ako in Alpa osai in Omiga, in parakayan osai in kalobosan. No siyo agkainem na batay kangay piyakan sapa idapo bayad batang sa bokal agpamaboway. ⁷ No siyo in mandaeg, na anda in batay piyangwat sa kansiyo. Ako batay kansiyo Diyos, siyo wakay batay kangay bodang. ⁸ Kamay in mga agkalimo, in mga yewed agpaniwala, in mga bakla, in mga agpamono mangyan, mga agpanggaraw, mga balaonan, mga agmaal sa mga yewed Diyos, mga agpansabi baribid, na siro boo piyagbenglay sa baya kasopri kaslang dagat. Ina in kadowai ka katayan. ⁹ Pasabangen wakay sa kangay in osai sa pito ka angil apo pito ka tasa makno in pito ka kalobosan pag mga kaidapan keyen, Aywawa, kangay piyagpapangkit sa kaimo in kagbaiyan batay babai in Bodang Topa. ¹⁰ Ako piyaanggat in Betek pag Abyan, ako biyaba in angil sa osai ka latayan mabwat wano. Piyapangkit sa kangay in Irosalim, in Maal wano pag Bayan aglompot batang sa langit, sogod kayno sa Diyos. ¹¹ Ina agrawa panawen sa kabaloyan in Diyos, agbalawas kataw in makaamag pag bato aspi, agpaylangit kataw salmin. ¹² Apo lakoy alabat bato matekba osai mabwat, apo labing dowai ka sakbawan, in baatte osai apo agdamay osai ka angil. Sa mga ogbos sakbawan apo solat in mga ngaran in labing dowai ka tiribo Israil. ¹³ Sa paglowasan ibeng agbangen tolo ka sakbawan, sa paglabowan ibeng tolo din, sa katolo ka agbangen tolo, sa kaopat tolo din ka sakbawan. ¹⁴ In alabat in bayan lakoy tiyadyok sa labing dowai ka bato lakoy. Agisolat sa mga bato in ngaran in labing dowai ka katiwala in Bodang Topa. ¹⁵ In angil in agpanggisodan sa kangay apo piyagatang pansokat ginto, matang piyagsokat in bayan, in mga sakbawan osai in mga alabat. ¹⁶ In bayan tikkabaan osai in kaabaen, osai in kaslangen. Siyokat in angil in bayan, in kaabaen, osai in kaslangen, anggan din in kabwaten dalwampot opat ka libo (24,000) ka kilomitro. ¹⁷ Kansiyo din siyokat in alabat, in katekbaen apatnapo ka depa sa sokat in angil. ¹⁸ In alabat bato piyagawit aspi. In bayan ginto liinis wano gayed, agpaylangit kataw salmin. ¹⁹ In mga bato pagtadyokan in alabat piyaiskapetan mga makaamag pag bato. In tokaw aspi, in kadowai sapiro, in katolo kalsidonya, in kaopat ismiralda, ²⁰ in kalima onisi, in kaenem kornalina, in kapito kirisolito, in kawalo birilo, in kasiyam topasyo, in kasampo kirisopraso, in kalabing osai asinto, in kalabing dowai amatista. ²¹ Pirlas in labing dowai ka kopot sakbawan, baatte osai piyangwat osai waget ka pirlas. In bayan lakoy, in karsada ginto liinis wano gayed, agpaylangit kataw salmin. ²² Ako yewed kangitan balay lakoy Diyos asin pag bayan, angkataw in Diyos Kapwan in apo kabaloyan sa boo, osai in Bodang Topa, ina pag bayan boo kansiro balay. ²³ In bayan idwa kailangan in rawa ibeng, osai bolan, angkataw in kalakoyen Diyos in agrawa asin. In Bodang Topa in tinglaw. ²⁴ Asina pag rawa batay agipanawan in boo mangyan. Batay piyagbaba ista in mga poon lakoy sa kobat in kansiro mga kayamanan. ²⁵ Palagi agiboswang in mga sakbawan, angkataw asin idapo batay yabi. ²⁶ In kalakoyen yaman in boo mangyan batay piyagbaba asin pag bayan. ²⁷ Kamay idapo kaisoroy asin kamayba nakay pag marames sa pangkit Diyos, kamayba nakay pag bakla, osai mga agpansabi baribid. In mga waget agisolat in ngaran sa aklat in Bodang Topa, kansiyo listaan in mga agkaboway, na ina in kaisoroy asin pag bayan.

¹ In sapa agpamaboway piyapangkit din in angil sa kangay. In sapa kalinaw salmin aglowas sa pagpanokkawan lakoy in Diyos, osai in Bodang Topa. ² In sapa agdalan sa karsada sa kagwaraan in bayan. In tanan balabaan sapa apo poon yangaw agpamaboway, baatte bolan osai wakay ka raweg in galem. in mga daon pangoraw maskit sa mga mangyan. ³ Idapo batay asin makabais sa Diyos. Asin pag bayan in pagpanokkawan lakoy Diyos osai in Bodang Topa. Siyo batay piyagmaal in kansiyo mga sogowan. ⁴ Kansiro batay piyagngitan in kansiyo panrosayan. In kansiyo ngaran piyagsolat sa kansiro kiray. ⁵ Ista idapo yabi. Siro idwa kailangan in rawa mga tinglaw, kamayba rawa ibeng, angkataw in Diyos daan in Kapwan in batay kansiro tinglaw. Siro batay agpoon lakoy anggan idapo kalobosan. ⁶ Siyabi sa kangay in angil keyen, Anda pag mga agiplaong boo betek, maal piyaniwalaan. In Diyos Kapwan in agtaboy kansiyo Abyan sa kansiyo mga poropita, siyo in agsogo kansiyo angil matang piyapangkit sa kansiyo mga sogowan in mga idwa dogay batay wa mibaloy. ⁷ Keyen Isos, Mamarengey kamo. Ako agrateng wa. Agkaanggay in mga agpaniwala sa siyolat atai pag aklat. ⁸ Ako Owan in karengey, osai kangitan ina boo. Paka boo wa kangay arengeyan, kangay din ngiitan, ako patalegeb sa adap in angil in agpapangkit sa kangay, matang agmaal sa kansiyo. ⁹ Kamay siyo keyen, Ayaw agmaal sa kangay, ako din dayem sogowan waget kataw kao, osai kataw in kaimo mga belag poropita, kadayo in boo mga agpaniwala sa mga siyabi atai pag aklat. In Diyos in kaimo pagmaalen. ¹⁰ Kansiyo din siyabi keyen, Ayaw kaimo agbetangen in mga siyabi atai pag aklat mga batay rateng, angkataw bangen wa mibaloy ina. ¹¹ In daet, na agaway kay agpakadaet. In marames, na agaway kay agpakarames, kamay in maal, na agaway kay agpakamaal, in makaanggay sa Diyos, na agaway kay agpakaanggay sa Diyos. ¹² Keyen Isos, Kamo agparengey. Ako agrateng wa, kangay piyagbaba in mga batay piyagtaboy sa baatte osai, panawen sa kansiyo piyangwat. ¹³ Ako in Alpa osai in Omiga, in tokaw osai in paori, in parakayan osai in kalobosan. ¹⁴ Agkaanggay in aglaba kansiro mga damit, matang maal wa siro kaisoroy sa bayan, mamangan in raweg yangaw agpamaboway. ¹⁵ Kamay in mga bakla piyagayaw misoroy sa bayan, kadayo in mga balaonan, kadayo mga agpanggaraw, kadayo mga agpamono mangyan, kadayo mga agmaal sa yewed Diyos, osai in mga agpansabi osai agpamangwat bari bid. ¹⁶ Ako Isos in agsogo kangay angil matang ina piyapangkit sa kanyo sa mga barkadaan kangay mga bodang, ako kay Dabid kasokponan, ako in tagorabas. ¹⁷ Siyabi in Abyan, osai in batay babai keyen, Aywawa. In boo karengey anda keyen din, Aywawa. No siyo agkainem na pasabangen wa. No agkabeet, na komwa in sapa agpamaboway. Ina idapo bayad. ¹⁸ Ako Owan totoo wano agsabi sa baatte karengey, in piyagsabi atai pag aklat batay ngani rateng. No siyo agdagdag kay sa siyabi atai pag aklat na in mga kaidapan agkasolat atai batay piyagdagdag in Diyos sa kansiyo parosa. ¹⁹ Osai no siyo agkowa kamayba nakay sa mga siyabi atai, na batay din piyagkowa Diyos sa kansiyo in kansiyo nges bagiyan raweg yangaw agpamaboway, osai sa Maal wano pag Bayan, in piyagsabi atai pag aklat. ²⁰ In agpapangkit anda pag boo agsabi keyen, Tiyak wa ngani, ako agrateng wa. Dali wa ngani, Isos, Kapwan, aywawa. ²¹ Kangay pandalangin kamo boo alapeten Isos in Kapwan. Ina wa ngani.