PILIPOS

PILIPOS

¹ Kami Pablo in agsolat, osai Timotiyo. Kami kay Kiristo Isos alapet sogowan. Kami agsolat sa boo mga bodang Diyos sa bayan Pilipos, mga paagem kay Kiristo Isos, kadayo sa mga koyay, osai sa mga katolong. ² Kanyam pandalangin keyen, Kamo pakayawteen osai pakapyaen kantam Amang Diyos osai IsoKiristo kantam Kapwan. ³ Baatte ako manremrem sa kanyo ako agkaanggay sa Diyos kangay piyagmaal. ⁴ Baatte ako agpandalangin sa kanyo boo ako agkaanggay wano, ⁵ angkataw kitam agpaysarigan agpabarita in Maal pag Barita, ibat kamo bayo kay maniwala anggan ngona. ⁶ Kangay wa gayed atawanan in Diyos in agparakay in maal pag panawen sa kanyo. Na siyo wa daan in batay aglobos anggan sa Ibeng rateng Kiristo Isos. ⁷ Kamo ayaw agsoyo in ako agpakayawte sa kanyo boo, kataw kamo kangay wano piyagmaal. Angkataw kamo kangay mga belag sa makaanggay pag panawen tiyaboy Diyos sa kangay. Tangona in ako agipalpas kay agpatonay osai agmatiwid agalapet sa Maal pag Barita kamo kangay wa belag, anggan din ngona in ako piyagbilanggo wa kamo belag kay din. ⁸ In Diyos katawan kaya ako agkalowayan wano gayed sa kanyo boo, angkataw Kiristo Isos in agbalay sa kangay galem agpakayawte sa kanyo boo. ⁹ Kangay pandalangin in kanyo agpakayawte agistobo anggan anggan, apo agiyagem katawanan sa boo maal osai kabaloyan agidang keyen, anda maal, anda daet, ¹⁰ matang kamo kaidang in maalno gayed. No kataw ina na dogayan sa Ibeng rateng Kiristo Isos kamo ngiitan malinis, idapo daet. ¹¹ Osai in boo kanyo ogali maalno batang kay IsoKiristo. Matang in Diyos piyagmaal osai piyagpakalakonaw. ¹² Laki mga belag, kamo katawan ina in mga mibaloy sa kangay. Na beet kangay siyabi sa kanyo, ina boo makatolong sa agipanaw in Maal pag Barita. ¹³ Panawen asin in boo mga agdamay sa balay lakoy in poon lakoy, osai in mga amat kay atai, kansiro wa atawanan, kaya ako piyagbilanggo panawen ako kay Kiristo sogowan. ¹⁴ Panawen din in ako piyagbilanggo in karowan sa mga belag atai labi kay agpakaeyat sa agpasandig sa Kapwan. Siro yewed agrega, siro agpakaeyat kay agbaba in barita Diyos. ¹⁵ Ako katawan in kalaati, kaya siro agbarita Kiristo angkataw siro agpamalaway osai agpanagiri. Kamay in amat wakay agbangen, kaya siro agbarita panawen sa kansiro maalno pag remrem. ¹⁶ Siro agbarita panawen siro apo in agpakayawte pag remrem, angkataw kansiro atawanan kaya ako piyagbilanggo panawen ako agmatiwid agalapet sa Maal pag barita. ¹⁷ In amat in ako keyen agpamalaway, in siro agbarita Kiristo siro agpanagiri, in kansiro beet ako labi kay piyagpaidapan atai sa bilanggowan. ¹⁸ Kamay ina pag boo yewed makasida sa kangay. Kamayba nangkataw agbangen ako agkaanggay daan angkataw Kiristo piyagbarita, kamayba maal in kansiro remrem, kamayba daet. In osai kay kangay piyagkaanggay, ¹⁹ in kangay atawanan ako batay piyalpas panawen sa kabaloyan in Abyan IsoKiristo osai sa kanyo pandalangin. ²⁰ In kangay kayno piyagkabeet in ako nges idapo liimbangan sa kangay mga panawen. Dayem kamayba ngona palagi maeyat kangay remrem, matang boo kangay bilog aglakonaw kay Kiristo kamayba wa ako agkaboway, kamayba wa matay. ²¹ No sa kangay in agkaboway idapo kabolowan no idapo Kiristo. Na in matay labi kay apo kabolowan. ²² Ako yewed kaidang asin pag dowai. Kamay no ako agkaboway kay, na aronaw kay in mibaloy sa kangay mga panawen. ²³ Kaya piyagbaslag kangay remrem, ako beet panaw wa atai pag boway, pataboy kay Kiristo, angkataw ina in labi wa makaanggay sa kangay. ²⁴ Kamay labi kay piyagkailangan in ako agkaboway kay, matang labi kayno makatolong sa kanyo. ²⁵ Na panawen ina, kangay wa gayed atawanan ako agaway kay agkaboway sarig kamo boo, matang katolong sa kanyo agpakarigen osai agpakaanggay agpasandig sa Kapwan. ²⁶ Na no ako asina wakay sa kanyo, kamo labi kay agkaanggay aglakonaw kay Kiristo Isos panawen sa kangay. ²⁷ Na, laki mga Belag, in kanyo mga ogali pasibayen sa Maal pag Barita panawen kay Kiristo. No kataw ina kamayba wa ako karateng sa kanyo, kamayba aratengan waget barita, na ako katawan kamo yewed aglimbang agpaniwala. Osai waget in remrem kamo agpaytolongan ageyat agpanawen sa Maalno pag Barita. ²⁸ Ayaw agkalimo sa mga agkabais sa kanyo. Angkataw no kamo yewed agkalimo na ina in tanda siro batay diyaeg. Batang sa Diyos in kanyo pandaeg. ²⁹ Angkataw in lakonaw pag tiyaboy Diyos sa kanyo panawen kay Kiristo yewed waget in agpaniwala sa kansiyo, dayem kadayo din in agbanta sa kaidapan panawen sa kansiyo. ³⁰ Kanyo ngiitan ako datiyan piyaglabanan, osai kanyo atawanan anggan ngona ako agaway kay piyaglabanan, kamay ngona kitam boo agpaysarigan piyaglabanan.

¹ In kamo agiyagem kay Kiristo, no ina agpakaeyat kanyo remrem, no kamo agkasadapan sa kansiyo agpakayawte, no kamo osai in Abyan Kiristo agpaybelag wa gayed, no kamo agpalsipakayawtean, agkapaytolongan, ² na no kataw ina, ako pakaanggayen wa gayed, sa agpalageman pag remrem, paltikkatawanen in agpakayawte, osai malsiyayonan wano. ³ rn kanyo mga panawen ayaw sa agpanagiri, ayaw sa agpakabwat remrem Dayem agpakabwatte in remrem, pabalayen sa kanyo remrem keyen in mga amat maal kay sa kanyo. ⁴ Tolongen in mga amat sa kansiro mga kailangan. Ayaw waget agremremen in kanyo mga sadiri kailangan. ⁵ Pakabwatteen in kanyo remrem kataw daan Kiristo Isos. Siyo agpakabwatte remrem kataw anda. ⁶ Siyo kataw wa daan gayed Diyos. Siyo kabwat daan Diyos, kamay ina pag kabwaten yewed kansiyo yaalwasi. ⁷ Dayem siyo wakayte agbenglay in boo. Siyo mibaloy kataw wa daan sogowan. Siyo mibaloy kataw wa daan mangyan. ⁸ In siyo mangyan wa siyo agpakabwatte daan, siyo agpaniwala kamayba siyo biyono, anggan kamaybawa in sa kodos pag katayan. ⁹ Panawen ina siyo liyakonaw Diyos, piyakabwat in kansiyo tongkolin, piyalakonaw sa boo. ¹⁰ Anggan in baatte osai sa langit, sa kobat, anggan sa galem diya batay agpaselang, agpasakop sa kansiyo ngaran. ¹¹ In boo batay keyen IsoKiristo in Kapwan, matang in Diyos Amang piyaglakonaw. ¹² Na, laki mga belag, tangona in ako asina kay sa kanyo kamo baatte maniwala sa kangay. Na ngona in ako idapo, labi kay kamo maniwala. Kamo pasakop gayed agkalimo sa Diyos, ayaw aglimbang agpanawen, anggan mibaloy wa gayed in boway piyagtaboy sa kanyo. ¹³ Angkataw Diyos in agpanawen sa kanyo, matang kamo beet maniwala, osai kabaloy agpaniwala sa kansiyo. ¹⁴ Sa boo kanyo panawen ayaw mabyat in remrem, ayaw agpalawayan. ¹⁵ - ¹⁶ Matang kamo maal wano gayed pag mga bodang Diyos, idapo batay ngiitan daet sa kanyo, idapo lebag, kamayba kamo agbalay sa kagwaraan mga mangyan agpamangwat daet, mga aleleng. Na in kamo agpatawtaw in barita agpamaboway kamo mga kagwali tinglaw sa kansiro agrawa sa lened. Na no kataw ina, sa Ibeng Kiristo agrateng lakonaw in kangay kaanggayan panawen sa kanyo, angkataw ngiitan wa gayed in galem kangay panawen, mibaloy wa makabolowan in ako ageyat. ¹⁷ - ¹⁸ Karam ako batay biyono kataw andog piyalagem sa kanyo piyagandog sa Diyos panawen kamo agpaniwala. No kataw ina na ako agkaanggay. Na kamo din agkaanggay. Kitam boo malsikaanggayan. ¹⁹ No nges in Kapwan Isos beet, na idwa dogay batay kangay piyagsogo Timotiyo sa kanyo, matang no atai wakay rateng na apyaan wa in kangay remrem sa barita no kataw nakay wa kamo. ²⁰ Angkataw idapo kataw siyo agpakayawte sa kanyo, kataw daan in ako agpakayawte sa kanyo. Siyo agpanremrem ngani sa kanyo. ²¹ Angkataw in boo roma in beet in kansiro waget sadiri pakinabang. Siro dayo agtolong sa kay IsoKiristo panawen. ²² Kamo din kangitan wa in kansiyo kaalenen in siyo kagwali kangay bodang agtolong sa kangay in agpabarita in Maal pag Barita. ²³ No kangay wa atawanan in batay mibaloy sa kangay na siyo toloy wa kangay piyagpataboy asin sa kanyo. ²⁴ Osai nges in kangay piyagayay sa Kapwan, ako idwa din dogay batay kapataboy asin sa kanyo. ²⁵ Kamay in kangay remrem Ipaprodito paoliyen wa din asin sa kanyo. Siyo kanyo siyogo agtolong sa kangay. Kalbas siyo kangay wa gayed belag, kasondalo wa din katolong sa panawen Diyos. ²⁶ Siyo agkalowayan wano gayed osai agkariyaban din sa kanyo panawen rateng wa sa kanyo in barita keyen siyo apo maskit. ²⁷ Batang ngani apo maskit siyo, anggan bangen wa matay, kamay in Diyos agpakayawte sa kansiyo matang siyo maal wakay. Yewed waget sa kansiyo, dayem sa kangay din, matang in siyo piyaoraw na idwa mistobo in kangay agrongkot. ²⁸ Kaya ngani kangay beet siyo moli wa sa kanyo, matang no siyo kanyo wakay ngiitan na kamo agkaanggay wakay, na ako din idwa agrongkot. ²⁹ Na panawen sa Kapwan siyo kanyo gayed belagen, kaanggayanen. Kanyo pagmaalen in mga mangyan kataw siyo. ³⁰ Angkataw yewed kansiyo yaalwasi kansiyo boway sa ageyat agpanawen kay Kiristo. Siyo agkabangen wa matay, panawen siyo in kanyo sogowan agtolong sa kangay.

¹ Anggan waget atai, mga belag. Kamo agkaanggay sa Kapwan. Ako yewed agkatorayan agolitolit in kangay wa batang siyabi sa kanyo, angkataw ina batay tolong sa kanyo. ² Kamo agingat sa mga mangyan agkasadapan agpamangwat daet, agogali ayop, in mga agtoli. ³ Kanyo remremen yewed siro agbangen in mga tiyoli, dayem kitam agbangen, angkataw kitam yewed agpasandig sa mga waget ogali. Dayem kitam piyagtolong in Abyan Diyos matang kitam agmaal sa Diyos, osai kay Kiristo Isos in kantam kaanggayan. ⁴ No nges in mga waget ogali in sibay pagpasandigan, na ako kapasandig asin. No nges kitam piyangwat Diyos betek panawen waget sa kantam mga ogali, na maal ako agpasandig asin labi kay sa mga roma, ⁵ panawen ako tiyoli sa kawalo ka ibeng in ako bodangte kay. Ako kasokponan Israil, sa tiribo Binamin, ako ngani Ibriyo, ako batang Parisiyo agpaniwala ngani sa mga Batas Mowisis, ⁶ in kalobaen ako agpaniwala sa mga Batas kangay piyagpaidapan in mga agpaniwala kay Isos. No nges kitam piyangwat Diyos betek panawen sa agpaniwala sa mga Batas, na idapo batay ngiitan daet sa kangay. ⁷ Tangona kangay remrem ina pag mga ogali pakinabangan. Kamay ngona panawen kay Kristo ina kangay wakay riyemrem makalogi. ⁸ Yewed waget ina, dayem in boote kangay piyagremrem makalogi kapalit in labi kay maal, in katawan kay Kiristo Isos kantam Kapwan. Panawen kay Kiristo in boote malibangaw wa sa kangay, kangay wa iidapo kabolowan, matang Kiristo sa kangay wa gayed, ⁹ osai ako paagem wa gayed sa kansiyo. Ngona in kangay atawanan in kangay kaalenen yewed batang sa kangay wakayte, yewed batang sa agpaniwala sa mga Batas, dayem batang sa Diyos panawen sa agpasandig kay Kiristo. ¹⁰ Ngona in kangay wano beet kangay wa gayed atawanan Kiristo, osai in kansiyo kabaloyan in siyo boway wakay tagoli, osai sarig sa kansiyo mga kaidapan, kamayba matay din kataw daan siyo, ¹¹ matang nges ako piyaboway wakay din tagoli. ¹² Yewed kangay piyagsabi keyen ako kabel wa ina pag boo. Yewed din kangay piyagsabi ngona ako kabaloy wa. Kamay ako agpilit agkabel ina pag kabaloyan, angkataw ina in dailan kaya ako abel Kiristo Isos. ¹³ Laki mga belag, yewed kangay piyagremrem in kangay wa abaloyan ina pag boo. In kangay osai waget ka piyagpangwat ngona, piyaglibangaw wa in mga kadalan, agpilit wakay agkabel in mga agrateng. ¹⁴ Ako batay ngani agpilit anggan sa pagratengan matang abel in bayad. Na in bayad in ako piyagberya Diyos panawen kay Kiristo Isos matang ako agkaboway sa langit. ¹⁵ Kataw ina in maal remremen in mga marigen wa sa paniwala. Kamay no sa kanyo apo mangyan yewed kataw ina in remrem, na ina batay piyagpatoldo Diyos sa kanyo. ¹⁶ In piyagkailangan kantam ogaliyen kay in kantam wa atawanan. ¹⁷ Laki mga belag, kamo boo tomolad sa kangay. Kanyo pangkiten in boo mga agtolad sa kanyam mga ogali, kataw ina maal pag toladan. ¹⁸ Kataw in kangay palagi piyagsabi, ngona ako agpanangis wa agolit sa kanyo keyen, Aronaw in apo ogali aglaban sa beet siyabi in katayan Kiristo sa kodos. ¹⁹ Toyongan in batay kansiro riyateng, angkataw in kansiro piyagdiyos in kansiro boyon, kansiro piyagpayabangan in maal nges piyagkarikoyan, kansiro waget piyagpanremrem in mga atai sa kobat. ²⁰ Kamay kitam agbangen taga langit, kitam agkabiglaan agpanaya in agrateng batang sa langit, in kantam Agpamaboway, IsoKiristo in Kapwan. ²¹ Paka rateng ina pag Ibeng, in kantam mga bilog agkasida kansiyo wa batay piyagpalitan, piyagpangwat maal wano kataw daan in kansiyo bilog maal wano, panawen sa kansiyo kabaloyan in agpansakop sa boote.

¹ Na ngani, mga belag, pakarigenen in kanyo boway sa Kapwan. Kamo kangay piyagkalowayan, piyagmaal, kamo makaanggay sa kangay, kamo kangay piyaglakonaw. ² Laki dokabai Yodiya osai Sintiki, kangay wano nges piyagsabi sa kanyo keyen, Kamo maybelag wa, kataw kamo tayari sa Kapwan. ³ Osai kao, laki kangay katolong sa panawen, kangay din piyagsabi sa kaimo keyen kaimo tolongen ina pag dokabai, angkataw siro batang wa tomolong din sa kangay ageyat agpabarita in Maal pag Barita, sarig din Kiliminti osai in roma kay din kangay mga katolong agpamarita. In kansiro mga ngaran agisolat sa aklat listaan in mga agkaboway. ⁴ Kitam baatte agkaanggay sa Kapwan. Kangay wakay piyagolit keyen, Kitam agkaanggay. ⁵ Kitam agpakabait kamayba sa nakay. In Kapwan sa bangen. ⁶ Ayaw kitam agkariyaban kamayba sa nakay. Dayem mandalangin sa Diyos, agkaanggay, ayayen in boo kanyo mga piyagkailangan. ⁷ Kalbas in Diyos batay agpakapya sa kanyo galem, sa kanyo remrem panawen kay Kiristo Isos. In kalakoyen ina pag kapyaanan lampas sa atawanan mangyan. ⁸ Anggan kay atai, laki mga belag. Kantam remremen gayed in boo maal, osai in maal piyaglakonaw, in mga yewed bosliyen, mga mabait, in mga betek, mga malinis, mga maal pag remrem, mga maal pag ogali, mga maalen sa pangkit. ⁹ Kanyo ogaliyen in kangay tiyaboy, piyatoldo sa kanyo, kadayo in kangay siyabi kadayo in mga ogali kangay piyapangkit. No kataw ina na in Diyos agpamataw sa kanyo matang kamo apyaan. ¹⁰ Ako maloba wa agkaanggay sa Kapwan angkataw dogay wa, ngona tagoli wakay ako kangitan kamo agpakayawte sa kangay. Ako katawan ako nges yewed kanyo agkalibangawan. Kaya waget kamo idapo batay agbaba tolong. ¹¹ Kangay piyagsabi sa kanyo yewed sa ako agayay tolong. Ako beken sanay daan agkaanggay kamayba nangkataw. ¹² Ako batang wa domalan sa korang, batang wa din domalan sa aronaw. Ako sanay wa agkaanggay kamayba nangkataw, kamayba saano, kamayba bosog, kamayba agkayawes, kamayba aronaw, kamayba idapo. ¹³ Ako kabaloy kamayba nangkataw panawen sa kabaloyan tiyaboy Kiristo sa kangay. ¹⁴ Kamayba kataw ina, ako agkaanggay sa kanyo piyangwat, in ako piyagpaidapan kamo tomolong sa kangay. ¹⁵ In ako panaw sa Masidonya, bayo agparakay agpabarita in Maalno pag Barita, kanyo atawanan idapo roma barkadaan mga bodang Diyos tomolong agtaboy sa kangay, no yewed kamo waget in mga taga Pilipos. ¹⁶ In ako apo kailangan sa Tisalonika, kamo agpababa kay din tolong sa kangay, yewed waget makaosai. ¹⁷ Kamay yewed in kowarta in kangay piyagkaanggay, dayem in kamo apo midagdag sa listaan kanyo mga maal pag panawen. ¹⁸ Ngona ako boway wa panawen sa kanyo mga piyababa. Labi kay sa kangay piyagkailangan in kanyo tolong piyababa kay Ipaprodito. Ina kagwali andog mala masadap sa Diyos, makaanggay wano sa kansiyo. ¹⁹ In Diyos kangay piyagmaal, siyo in batay agtaboy sa kanyo panawen kay Kiristo Isos in boo kanyo piyagkailangan batang sa kansiyo kayamanan yewed agkalobos. ²⁰ In kantam Amang Diyos paglakonawen anggan idapo kalobosan. Ina wa ngani. ²¹ Kanyo sabiyen sa boo mga iidang Diyos, osai agpasandig kay Kiristo Isos keyen siro kangay piyagpandalangin. Kadayo in kantam mga belag kangay sarig agpandalangin. ²² In boo mga iidang Diyos atai, labi kay in sa balay lakoy in poon lakoy, siro keyen, Kamo kataw wa nakay? ²³ Kamo boo pakaanggayen IsoKiristo kantam Kapwan.