PILIMON
11 Ako Pablo in agsolat. Kaya ako piyagbilanggo ako agpangwat in panawen Kiristo Isos. Kangay sarig in agsolat kantam belag Timotiyo. Ako agsolat kay Pilimon, kanyam piyagmaal pag sarig agpanawen. 2 Osai sa barkadaan mga bodang Diyos agtipon sa kaimo balay. Osai kay Apiya, kantam belag kagbaiyan, kadayo kay Arkipo, sondalo Isos kataw kitam. 3 In kangay pandalangin keyen, In Diyos kantam Amang, osai IsoKiristo kantam Kapwan agpakaanggay osai agpakapya sa kanyo remrem. 4 Laki Pilimon, baatte ako agpandalangin sa kaimo ako agkaanggay sa Diyos. 5 Angkataw ako karengey barita keyen kao agpakayawte sa boo mga iidang Diyos, osai kao agpasandig kay Isos in Kapwan. 6 In kangay pandalangin keyen in kitam agpaybelagan agpaniwala kay Kiristo ina batay agpaistobo sa katawanan panawen sa boo maal tiyaboy Diyos sa kantam, angkataw kitam agiyagem kay Kiristo. 7 Laki belag, in kao agpakayawte, na ina agpakaanggay sa kangay osai agpakaeyat remrem. Panawen sa kaimo, labi kay agkaanggay in remrem in mga iidang Diyos. 8 - 9 Ako apo piyagayay sa kaimo. Kalobante ako agpilit sa kaimo, angkataw ako kaimo din belag agpaniwala kay Kiristo, kamay panawen ako agpakayawte sa kaimo na ako idbatay agpilit, ako agayay waget, kamayba ako Pablo in sogowan Kiristo Isos, ngona piyagbilanggo panawen sa kansiyo. 10 In kangay beet sa kaimo, panawen kay Onisimo. In ako atai sa bilanggowan siyo mibaloy wa kangay bodang sa agpaniwala. 11 Tangona kao idapo abel maal sa kansiyo, kamay ngona siyo lakonaw pag tolong sa kanta. 12 Siyo kangay wakay piyagpaoli sa kaimo. Kamayba ako batay agkalowayan wano sa kansiyo. 13 Kangay nges beet siyo atai daan sa kangay, matang angkataw idapo kao, na siyo nges in agtolong sa kangay atai, anggan ako baywi kay sa bilanggowan panawen sa Maal pag Barita. 14 Kamay ako dayo kataw ina no kao yewed pomayag, matang yewed waget piilit, dayem kao wakayte in tomolong sa kangay. 15 Kaya yangon Onisimo kadogayte maidapo sa kaimo, matang paka moli, siyo kaimo wakay anggan dogayan, 16 idwa pagsogowan waget, dayem siyo belag piyagmaal. Siyo kangay piyagmaal, kamay labi kay kaimo piyagmaal. Yewed waget kaimo pagsogowan, dayem osai ka belag agpaniwala sa Kapwan. 17 Na no kao keyen ako kaimo belag, na Onisimo kaimo pabelagen, kataw din kao agpabelag sa kangay. 18 No siyo apo piyangwat daet sa kaimo, karam apo otang, na sa kangay wa singilen. 19 Ako Pablo in agpirma keyen, Ako batay agbayad sa kaimo. Ako dayo agsabi kamay kao boway wa panawen sa kangay. 20 Laki belag, in kangay wano nges beet sa kaimo, panawen sa kantam Kapwan kaimo pangwaten in kangay piyagayay. Pakaanggayen gayed in kangay galem angkataw kita tanan agiyagem kay Kiristo. 21 Ako katawan batay wa daan kaimo piyangwat in piyagsabi atai pag solat. Osai labi kay kalakoy sa kangay piyagayay in kaimo batay piyangwat. 22 Ako apo kay piyagayay. Ako sandataanen esekan. No nges in beet Diyos na ako batay wakay asin moli, kataw in kanyo piyagpandalangin. 23 Ipapras in kangay sarig piyagbilanggo panawen kay Kiristo Isos, siyo keyen, Kamo kagwali wa nakay? 24 Kataw din ina Markos, Aristarko, Dimas, osai Lokas, in kangay mga sarig agpanawen. 25 Ako agpandalangin keyen, IsoKiristo kantam Kapwan agpakayawte sa kanyo boo.