MARKOS

MARKOS

¹ Anda in Maal pag Barita panawen kay IsoKiristo in Bodang Diyos. ² Ina agparakay in agibaloy in siyolat tangona in poropita Isaiyas keyen, In Diyos keyen, Baanda, kangay piyagsogo in kangay sogowan tokaw sa kaimo. Kansiyo batay piyakapya in kaimo dalan. ³ Apo agpango sa moyod keyen, Kanyo pakapyaen in dalan in Kapwan, Kanyo linisen in kansiyo batay dalan. ⁴ Na kataw ngani ina lomwas Owan sa moyod. Siyo agbaotismo osai agpatoldo keyen, Benglayen wa in kanyo mga daet, pabaotismo wa, na batay wa liibangaw Diyos in kanyo mga daet. ⁵ Kalbas in boo mga mangyan taga kobat Odiya pataboy sa kansiyo, osai in boo mga taga bayan Irosalim. Siro agsabi wa kay Owan in kansiro mga daet, kalbas kansiyo biyaotismowan sa sapa Ordan. ⁶ In kay Owan lambong batang boybol kamilyo, in kansiyo sintoron batang balat ayop. In kansiyo piyagkoman doron osai daiket. ⁷ Siyo agpatoldo keyen, In agrateng sa kangay paoriyan siyo in apo kabaloyan, labi kay kataw ako. Ako kalakoyte, yewed sibay kamayba sogowan waget aglowat kansiyo tapatos. ⁸ Kamo kangay piyagsogbo sa sapa. Kamay siyo in batay agsogbo sa kanyo sa Betek pag Abyan. ⁹ Ina daan pag mga betek Isos rateng batang sa bayante Nasarit sa Galiliya. Kalbas siyo biyaotismowan Owan sa sapa Ordan. ¹⁰ Paka siyo patakdang sa sapa, toloy kansiyo ngiitan biyoswang in langit, in Abyan Diyos aglabo sa kansiyo kagwali bantog kalapati. ¹¹ Osai apo miplaong batang sa langit keyen, Kao in kangay piyagmaal pag Bodang, kao kangay wano piyagkaanggayan. ¹² Kalbas Isos toloy piilit in Abyan Diyos pataboy sa moyod. ¹³ Siyo agpamataw ista apatnapo ka ibeng piyagtepeng Katanas no siyo batay agpangwat daet. Siyo asin sa apo mga ayop matapang, kalbas siyo piyagtolong mga angil. ¹⁴ Paka Owan biilanggo wa, Isos pataboy wa sa Galiliya, agpatoldo in Maal pag Barita batang sa Diyos keyen, ¹⁵ Ngona wa in kabetek, in Diyos batay wa agpapoon sa mga mangyan. Benglayen wa in kanyo daet, osai maniwala wa sa Maal pag Barita. ¹⁶ In Isos agdalan sa balabaan dagatte Galiliya, kansiyo ngiitan tayari Simon, in osai Anris, agpanlambat sa dagatte, angkataw isda in kansiro anap boway. ¹⁷ Kalbas keyen Isos, Kamo miyanggat sa kangay, kamo kangay piyagpatoldo agpamangkit mangyan. ¹⁸ Kalbas toloy kansiro biyaliwan in mga lambat, miyanggat sa kansiyo. ¹⁹ Paka adayonaw wate, ngiitan wakay tayari Santiyago, in osai Owan, kay Sibidiyo mga bodang. Siro sa bangka agpakapya din mga lambat. ²⁰ Kalbas siro din toloy piyaanggat Isos. Kalbas kansiro biyaliwan sa bangka in kansiro amang Sibidiyo, osai in mga katolong piyagbayadan. Siro miyanggat kay Isos. ²¹ Siro rateng sa bayan Kapirnaom. Kalbas sa Ibeng Pamainga Isos misoroy sa balay pagpaniponan, agpatoldo. ²² Kalbas in mga mangyan agsoyo sa kansiyo, angkataw in siyo agpatoldo siyo apo kabaloyan, yewed kataw in mga datiyan agpatoldo in mga Batas Diyos. ²³ Kalbas toloy misoroy sa kansiro balay pagpaniponan osai ka mangyan piyaglowasan maloba pag mamaw. Siyo mango keyen, ²⁴ Laki Isos taga Nasarit, kami ayaw agladowen. Kaya lames kao atai pataboy matang kami kaimo bonowen? Ako katawan no nakay kao, kao in Betek in siyogo Diyos. ²⁵ Kalbas siyo piyangelel Isos keyen, Ayaw aglalae. Kao bali wa asin pag lalaki. ²⁶ Kalbas in mamaw mango lakoy, yoogyog in piyaglowasan. Kalbas domalagan wa in mamaw. ²⁷ Kalbas in boo asin agsoyo wano anggan siro maltanongan keyen, Nakay lames tai? Bayo wakay pag adar anda. Isos apo mana kabaloyan agsogo kamayba sa mga mamaw. In mga mamaw agpaniwala sa kansiyo. ²⁸ Kalbas Isos toloy mibarita sa boo mga mangyan sa kobat Galiliya. ²⁹ Kora Isos anggan Santiyago osai Owan lomabo sa balay pagpaniponan, toloy pataboy sa balay Simon osai Anris. ³⁰ In kay Simon babai inang agibolalang apo maskit maibeng in bilog. Ina toloy siyabi kay Isos. ³¹ Kalbas Isos pataboy sa kansiyo, yaatang sa bakwaw, yoorog. Kalbas idapo wa maibeng in bilog, maal wakay. Siyo agalapet wa kay kora Isos. ³² Bayapon wa, malabo wa in ibeng, biyaba kay Isos in boo apo maskit, osai in mga piyaglowasan mamaw. ³³ In boo mangyan asin pag bayan agtipon sa bangen sakbawan. ³⁴ Kalbas Isos agpaoraw sa aronaw apo maskit, kamayba nakay pag maskit, osai agpamoyaw sa aronaw mamaw. Piyagayaw Isos miplaong in mga mamaw, angkataw kansiro atawanan Isos no nakay siyo. ³⁵ Isos mipolaw agkaboka wa, lened kay, lomabo wa pataboy sa osai ka moyod. Siyo ista agpandalangin. ³⁶ Kalbas kora Simon agpamangkit sa kansiyo. ³⁷ Paka Isos ngiitan siro keyen, Laki Isos, kao piyagpamangkit in boo mangyan. ³⁸ Kamay Isos keyen, Kitam ista wakay pataboy pag mga bayan, matang ako kapatoldo kay din ista, angkataw ina in dailan kaya ako atai pataboy. ³⁹ Kalbas kansiyo diyalan in boo kobat Galiliya, agpatoldo sa kansiro mga balay pagpaniponan, osai agpamoyaw sa mga mamaw sa mga piyaglowasan. ⁴⁰ Apo osai ka mangyan piyagpanyakit agpaselang agdaing kay Isos keyen, No kao beet agpaoraw sa kangay maskit, na kao kabaloy. ⁴¹ Kalbas Isos agpakayawte sa kansiyo, kansiyo yaatang in mangyan, keyen, Ako beet ngani, na dali, maoraw wa ngani. ⁴² Ina daan toloy wa maoraw in kagwali panyakit, maal wakay in mangyan. ⁴³ - ⁴⁴ Kalbas Isos maloba wano agbilin sa kansiyo keyen, Kao ista wa sa sasirdoti, papangkit. Kalbas kataw in siyabi sa Batas Mowisis, kao agtaboy andog, na in mga mangyan batay katawan keyen maoraw wa in kaimo maskit. Kamaybawa kay nakay kao ayaw agsabi keyen, Isos in agpaoraw sa kangay. Kalbas siyo toloy piyapanaw Isos. ⁴⁵ Kamay siyo panaw, agpamarita wa sa boo mga mangyan keyen, Ako piyaoraw wa Isos. Anggan Isos idwa kapapangkit sa mga bayan, no yewed siyo ista sa adayonaw sa mga moyod. Kalbas in mga mangyan agpalitaboy daan sa kansiyo batang sa boo asin pag mga kobat.

¹ Paka dogay kayte Isos rateng wakay sa Kapirnaom. Kalbas biyarita wa keyen, Isos sa balay wakay. ² Matang aronaw wa mangyan in agkatipon, anggan idapo wa pagtaydekan, kamayba sa tongkodan waget. Isos agpatoldo sa kansiro in Maal pag Barita. ³ Kalbas apo maypanrateng opat ka mangyan apo piyagosong osai ka kaliyakiyan yewed kapaglebey. ⁴ Kalbas in siro yewed karateng kay Isos panawen maliget, kansiro yoorak in atep sa kansiyo betek. Paka apo wa salay kansiro piyalooy in apo maskit agipalibay daan sa kansiyo yaiyan. ⁵ Paka ngiitan Isos in kalakoyen in siro agpasandig sa kansiyo, kansiyo siyabi sa apo maskit keyen, Kale, liibangaw wa in kaimo mga daet. ⁶ Kamay asin apo agtokkaw mga agpatoldo in mga Batas Diyos, siro agpanremrem keyen, ⁷ Nakay batang ina pag mangyan agsabi kataw ina? Siyo agpakagwali wa Diyos. Idapo batay kabaloy aglibangaw sa mga daet, no yewed in Diyos waget. ⁸ Kamay Isos toloy katawan in kansiro piyagremrem, matang siyo keyen, Nakay batang kamo agremrem kataw ina? ⁹ Nakay agbangen in yewed maidap sabiyen sa yewed kapaglebey, in osai keyen, Liibangaw wa in kaimo mga daet, in osai keyen, Kao tomaydek wa, panaw? ¹⁰ Amba kamo boo mangkit. Ako in Bodang Mangyan apo din kabaloyan atai sa kobat aglibangaw sa mga daet. Kalbas siyo miplaong wakay sa apo maskit keyen, ¹¹ Kangay piyagsabi sa kaimo, Amba kao tomaydek, babaen wa in kaimo yaiyan, moli wa sa kaimo balay. ¹² In siro boo agpangkit in apo maskit tomaydek wa, toloy biyaba in yaiyan, panaw wa. Siro boo agsoyo, agmaal sa Diyos, agsabi keyen, Ibat tangona kitam idapo kay batang kangitan kataw ina. ¹³ Isos pataboy wakay sa balabaan dagatte Galiliya. Kalbas pataboy sa kansiyo in karowan mangyan, siro kansiyo piyatoldo. ¹⁴ Kalbas in siyo agipanaw wakay kansiyo ngiitan Libi, bodang Alpiyo, agtokkaw sa opisina paningilan bowis. Keyen Isos, Kao miyanggat wa sa kangay. Libi tomaydek wa, miyanggat kay Isos. ¹⁵ Kalbas Isos osai in kansiyo mga agadar agpalpamangan sa kay Libi balay. Apo din mga agpaningil bowis, osai mga agpamangwat daet, angkataw aronaw in agyanggat kay Isos. ¹⁶ Apo din mga Parisiyo pag mga agpatoldo in mga Batas Diyos. In siro kangitan Isos agpalanglang sa mga agpamangwat daet, osai sa mga agpaningil bowis, kansiro siyabi sa kansiyo mga agadar keyen, Nakay batang Isos agpalanglang sa mga agpaningil bowis osai sa amat kay pag mga agpamangwat daet? ¹⁷ Isos karengey ina pag siyabi, matang siyo keyen sa mga agpatoldo in mga Batas Diyos, In mga idapo maskit idapo kailangan agpanggamot, dayem in mga apo maskit. Kaya ako atai pataboy yewed matang agberya sa mga keyen siro idapo daet, dayem sa mga apo daet. ¹⁸ Osai ka betek kay Owan mga agadar yewed wa agpamangan matang siro dogay agpandalangin, kadayo in mga Parisiyo. Kalbas apo mga pasabangen kay Isos keyen, Nakay batang yewed wa agkoman in kay Owan mga agadar, kadayo in sa mga Parisiyo, kamay in kaimo mga agadar agpamangan daan? ¹⁹ Keyen Isos, In mga piyagberya sa kasalan idbatay kabaloy idwa agkoman anggan baywi kay in batay lalaki. No baywi kay in batay lalaki na siro agkoman daan. ²⁰ Dayem dogayan batay kiyowa wa in kaliyakiyan na asin pag mga ibeng siro idbatay wa mamangan. ²¹ Idapo batay agsimat ikkay mikeres pag damit sa dogay wa pag lambong, angkataw no isag mikeres in bayo pag damit, na mistobo in rognit sa simatan. ²² Osai idapo batay agsoroy bayo pag alak sa mga datiyan wa pag balat pagsoroyan, angkataw in alak batay mistobo, na batay mangkoltik in balat, na mabobo wa in alak, kadayo in balat pagsoroyan masida wa din. No bayo pag alak, na kailangan bayo pag balat. ²³ Kalbas Ibeng wakay Pamainga, kora Isos mipadalan sa mga panogdaan kagwali paray. Kalbas in siro betek agpalipanaw, in kansiyo mga agadar agpamoti in mga galem. ²⁴ Kalbas keyen kay Isos in mga Parisiyo, Kao mangkit, in piyagpangwat in kaimo mga agadar. Ina piyagayaw sa Ibeng Pamainga. ²⁵ - ²⁶ Kalbas siyabi Isos keyen, Yewed mana kanyo biyasa in piyangwat Dabid tangona in betek Abiyatar in mabwat pag poon sa mga sasirdoti. Kora Dabid idapo pamangnen, siro agkayawes. Dabid misoroy sa balay Diyos, siyo mamangan in tinapay piyaandog sa Diyos. Ina piyagayaw piyagkoman no yewed in mga waget sasirdoti. Dabid mamangan, kansiyo din piyakan in kansiyo mga sarig. ²⁷ Isos keyen kay, In mga mangyan piyangwat yewed matang agalapet sa Ibeng Pamainga. Dayem in Ibeng Pamainga agbangen piyangwat panawen ina piyagkailangan mga mangyan. ²⁸ Na ako in Bodang Mangyan kapwan din in Ibeng Pamainga.

¹ Isos tagoli misoroy sa balay pagpaniponan. Asin apo kaliyakiyan makenet wa in osai ka bakwaw. ² Apo din asin mga mangyan agpamangkit dailan matang Isos masombong, matang siro agriwa sa kansiyo no siyo batay agpaoraw asin pag lalaki sa Ibeng Pamainga. ³ Kalbas biyerya Isos in makenet in bakwaw keyen, Amba, kao atai sa kagwaraan. ⁴ Siyabi Isos sa mga mangyan keyen, Nakay agbangen in betek sa kantam mga batas, osai in agpangwat maal sa Ibeng Pamainga, osai in agpangwat daet? Nakay ngani in maal, osai in agpaboway, osai in agbono? Kamay siro idapo somagot. ⁵ Kalbas Isos tomerek sa mga mangyan sa kansiyo balabaan, siyo agkabais, agrongkot panawen marigen in kansiro remrem. Kalbas kansiyo siyabi sa kenet in bakwaw keyen, Kaimo paodoyen in kaimo bakwaw. Toloy kansiyo piyaodoy, in kansiyo bakwaw maal wakay. ⁶ Kalbas maypanlabo in mga Parisiyo, toloy maypolongan osai in mga agiyagem kay Irodis, no nangkataw Isos kansiro batay mabono. ⁷ Isos panaw, pataboy sa dagatte Galiliya, miyanggat in kansiyo mga agadar. Kalbas mangagak sa kansiyo maloba karowan pag mga mangyan. Siro mga taga kobat Galiliya. Apo din mga taga kobat Odiya, ⁸ taga bayan Irosalim, taga kobat Idomiya, taga ripay sapa Ordan, osai taga balabaan mga bayan Tiro, osai Sidon. Maloba karowan pag mangyan in malitaboy kay Isos, panawen siro abaritaan in boo kansiyo mga piyagpangwat. ⁹ Kalbas keyen Isos sa kansiyo mga agadar, Ako sandataanen osai ka bangkate matang ako yewed liiget in karowan. ¹⁰ Angkataw aronaw wa in kansiyo piyaoraw, anggan ngona siyo piyagliget in boo mga apo maskit, beet kakapkap sa kansiyo. ¹¹ In mga piyaglowasan, paka kangitan sa kansiyo in mga mamaw, siro patalegeb sa kansiyo bangen, agpango keyen, Kao in Bodang Diyos. ¹² Kamay siro maloba yaayaw Isos keyen, Ako ayaw kanyo agpatoldowen no nakay ako. ¹³ Kalbas Isos monaker sa bolod. Kansiyo piyaanggat in kansiyo mga iidang. Siro ista omaron. ¹⁴ Kalbas siyo omidang Labing Dowai ka kaliyakiyan, siro kansiyo piyangwat mga katiwala, matang siro kansiyo sarig, osai matang siro kansiyo batay piyagsogo agpatoldo, ¹⁵ osai siro piyagpakan kabaloyan agpamoyaw sa mga mamaw. ¹⁶ Anda wa in Labing Dowai kansiyo iidang. In osai Simon kansiyo piyagawit Pidro. ¹⁷ In kadowai osai in katolo Santiyago osai Owan mga bodang Sibidiyo. Siro tayari kansiyo piyagawit Bowanirdis, in beet siyabi ina kagwali dalegdeg. ¹⁸ In kaopat Anris, in kalima Pilipi, in kaenem Bartolomi, in kapito Matiyo, in kawalo Tomas, in kasiyam Santiyago bodang Alpiyo, in kasampo Tadyo, in kalabing osai Simon in piyagawit Ribildi, ¹⁹ in kalabing dowai Odas Iskaryoti, siyo in batay agpadakep kay Isos. ²⁰ Paka Isos moli wakay, omarigbo wakay sa kansiyo in karowan mangyan, anggan kora rsos idwa katokor agkoman. ²¹ In abaritaan ina in kansiyo mga kabelagan, siro asin pataboy matang nges siyo piyaanggat, angkataw in amat mga mangyan keyen, Siyo idapo wa bait. ²² Kalbas in mga agpatoldo in mga Batas Diyos, in mga batang sa Irosalim siro keyen, Isos piyaglowasan Bilsibol, in poon mga mamaw, ina in agpakan sa kansiyo kabaloyan agpamoyaw sa mga mamaw. ²³ Kalbas in mga mangyan piyasabangen Isos, siyabi sa kansiro sa mga alimbawa keyen, Nangkataw batay mibaloy Katanas in agboyaw sa kansiyo sadiri? ²⁴ No in mga mangyan sa osai ka sakopan agpalawayan, na batay masida ina pag sakopan. ²⁵ Osai no agpalawayan in agpaykamalayan, na batay din masida ina pag agpaykamalayan. ²⁶ Na kataw din ina Katanas. No siyo aglaban sa kansiyo sadiri, no agpalawayan in kansiyo mga sakop, na ina idbatay dogay, agkaidapo wa in kansiyo sakopan. ²⁷ Kamay in mangyan idbatay kaisoroy sa balay maeyat pag mangyan, matang panakawen in kansiyo mga sangkap, no yewed tokaw kansiyo biyakos in kapwan. No mabakos wa, na batay mapanakaw in sa kansiyo balay. ²⁸ Totoo in kangay piyagsabi sa kanyo keyen, In boo mga daet maal liibangaw Diyos, kamaybawa in aglibak sa kansiyo. ²⁹ Kamay no in mangyan aglibak sa Betek pag Abyan, na in Diyos idbatay ngani aglibangaw asin pag daet. Ina pag mangyan apo ngani daet idapo kalobosan. ³⁰ Kaya siyabi Isos kataw ina, angkataw in kalaati keyen, Siyo piyaglowasan mamaw. ³¹ Kalbas rateng wa in kay Isos mga belag, osai in inang. Siro agtaydek sa tongkodan agsogo agberya kay Isos. ³² Aronaw in agpalpanokkaw sa bangen Isos. Siro keyen, Baati, sa tongkodan in kaimo inang, osai kaimo mga belag. Kao piyagpamangkit. ³³ Kalbas siyo keyen, Nakay in kangay inang? Nakay in kangay mga belag? ³⁴ Kalbas siyo manriwa sa mga agpalpanokkaw sa kansiyo bangen, siyabi sa agberya sa kansiyo keyen, Anda dayem in kangay inang, osai in kangay mga belag, ³⁵ angkataw no siyo in agpangwat in beet Diyos, na siyo wa in kangay belag osai inang.

¹ Tagoli Isos sa balabaan dagatte agpatoldo. Kalbas maloba karowan in mangyan agkatipon sa kansiyo, matang siyo somakay sa osai ka bangka sa dagatte, siyo asin agtokkaw. In boo karowan agaron sa diya sa balabaan dagatte. ² Kalbas siro kansiyo piyatoldo aronaw sa mga alimbawa. Kataw tai in kansiyo siyabi, ³ Mamarengey. Apo mangyan panaw batay agsabog bini. ⁴ In siyo agsabog apo bini maragrag sa bolaos. Kalbas rateng in mga bantog, ina kiyoman. ⁵ Apo din maragrag sa batowen, yewed matekba in diya. Ina toloy moslod angkataw yewed malayem in diya. ⁶ Kamay paka tangali wa in ibeng, ina aibengan, matay, angkataw korangte in dalig. ⁷ Apo din maragrag sa lalosenan. Kalbas mistobo in lalosen, kiyopot in togda, idwa manggalem. ⁸ Kalbas in amat wakay maragrag sa maal pag diya, ina mistobo, agtarobos, manggalem. Apo poon manggalem tatlompo ka beter, apo animnapo, apo sangdaan. ⁹ Kalbas Isos keyen, In apo talinga na mamarengey wa. ¹⁰ Kalbas paka idapo wa in karowan, in Labing Dowai, kadayo din in mga sa bangen, siro agtanong kay Isos no nakay in beet siyabi in alimbawa. ¹¹ Keyen Isos, Kamo piyakan wa kabaloyan matang kanyo atawanan wa in tangona piyagbetang panawen sa Diyos agpapoon. Kamay sa roma mga mangyan in boo piyagalimbawa, ¹² matang Kamayba siro agpangkit agpangkit, siro idbatay daan katawan, osai kamayba siro agparengey agparengey, siro idbatay daan katawan. No yewed kataw ina na nges siro patobang wa sa Diyos, kalbas liibangaw in kansiro mga daet. ¹³ Kalbas siyabi Isos keyen, Ikkay mana kanyo atawanan ina pag alimbawa? Na nangkataw batay kanyo atawanan in boo mga alimbawa? ¹⁴ In beet siyabi in bini piyagsabog in mangyan ina in Agiplaong Diyos. ¹⁵ In beet siyabi in mga sa bolaos, ina in mga mangyan agparengey sa Agiplaong Diyos, kalbas toloy asina wa Katanas, piyagkowa in Agiplaong mipasabog sa kansiro. ¹⁶ Kataw din ina in mga sa batowen. Ina in mga mangyan paka siro karengey in Agiplaong ina toloy nges kansiro tiyanggap, agkaanggay, ¹⁷ kamay idwa kansiro piyagremrem gayed, no yewed kadogayte waget siro agpaniwala. Paka apo magolo, no yewed siro piyagpaidapan panawen sa Agiplaong, na siro toloy wa atorayan. ¹⁸ Kalbas in amat wakay kataw in mga sa lalosenan, ina in mga karengey in Agiplaong, ¹⁹ kalbas siro agkariyaban wa atai sa kobat, osai agkabeet sa mga kowarta, sa mga sangkap, kalbas piyagliget in Agiplaong, ina idwa manggalem. ²⁰ Kamay in mga sa maal pag diya, siro in agparengey in Agiplaong, agalapet ina, kalbas manggalem apo tatlompo, apo animnapo, apo sangdaan. ²¹ Siyabi Isos keyen, No in mangyan agparaet tinglaw na idbatay piyagtakleb kaldido, idbatay din piyagbetang sa ngato talabang, no yewed batay piyagsokbit sa pagsokbitan tinglaw. ²² Angkataw in boo mga piyagbetang batay piyagpangkit. In boo mga piyagtago, batay atawanan. ²³ In apo talinga, na mamarengey wa. ²⁴ Isos keyen kay, Remremen in kanyo piyagparengey. No nangkalakoy in kanyo piyagtaboy, na kalakoy din ina in piyagtaboy wakay Diyos sa kanyo, labi kay. ²⁵ Angkataw in apo, na batay kay piyagpakan. Kamay in idapo, na batay wakay piyagkowa kamayba nakay in kansiyo piyagremrem kansiyo. ²⁶ Keyen Isos, In Diyos agpapoon kataw osai ka mangyan agasik bini sa agay. ²⁷ Kalbas baat yabi agesek, baat ibeng agipanawan. In bini agboslod, agistobo, yewed atawanan in kapwan no nangkataw ina. ²⁸ In diya in agpaistobo, in tokaw lomwas in daon, kalbas in bonting, kalbas in galem lakoy. ²⁹ Kamay paka layes wa in galem, in kapwan toloy agani, angkataw rateng wa in tagani. ³⁰ Keyen Isos, Kataw nakay lames in Diyos agpapoon? Aa. In kangay alimbawa asin keyen, ³¹ Ina kagwali osai ka bisloy. Ina kalakoyte wano sa boo mga bini sa kobat, ³² kamay paka tiyogda siyo mistobo wa lakoy labi kay sa boo mga togda piyagpanggolay, kalbas mansanga lakoy anggan in kansiyo mga sanga sibay wa piyagpogadan mga bantog. ³³ Kataw ina Isos agpatoldo sa kansiro sa mga alimbawa, no nangkalakoy in kansiro abaloyan atawanan. ³⁴ Siyo yewed agpatoldo sa kansiro no yewed sa mga alimbawa. Kamay paka idapo wakay in mga mangyan kansiyo siyabi sa kansiyo mga agadar in boo beet siyabi in mga alimbawa. ³⁵ Ina daan pag ibeng, bayapon wa, siyabi Isos sa kansiyo mga agadar keyen, Kitam wa motol sa dagatte. ³⁶ Matang biyaliwan wa siro in karowan, siro agsakay sa kansiyo datiyan bangka pagtokkawan. Apo din sarig roma pag mga bangka. ³⁷ Kalbas apo rateng bagyo, in bangka piyagsipwakan lakoy bongkalos anggan agkaleggeb wa. ³⁸ Isos apo teken agesek sa solit agbangen. Kalbas siyo kansiro piyolaw keyen, Laki Agpamatoldo, kao lames yewed agkalawagen? Kitam batay wa matay. ³⁹ Kalbas siyo mipolaw, piyangelel in kowaya keyen, Siyana wa. Siyabi sa dagat keyen, Sibay wa. Kalbas maoraw wa in kowaya, apyaan wa gayed in dagat. ⁴⁰ Kalbas siyabi Isos sa mga agadar keyen, Nakay batang kamo agkalimo? Kamo mana yewed kay agpasandig sa kangay? ⁴¹ In mga agadar maloba wa agsoyo, maypolongan keyen, Nakay lames pag mangyan ina? Agpaniwala sa kansiyo kamayba in kowaya, kamayba in dagat.

¹ Kora Isos rateng wa sa ripay in dagatte sa kobat Girasa. ² Paka siyo lompot sa bangka, siyo tiyagbo osai ka kaliyakiyan batang sa mga leyang lebengan. Ina pag kaliyakiyan piyaglowasan maloba wano pag mamaw. ³ Siyo agbalay sa mga leyang lebengan. Siyo yewed abakos kamayba mga karakara. ⁴ Angkataw mapret wa siyo piyangaw osai biyakos karakara, kalbas kansiyo piyamogloy in mga karakara, piyanlotok in mga pangaw. Idapono mangyan kabaloy kapandaeg sa kansiyo. ⁵ Kamayba yabi kamayba ibeng siyo baatte agpango sa mga lebengan osai sa mga boksor. Osai siyo agpamaseben sa mga bato. ⁶ Paka siyo kangitan kay Isos sa adayonaw, siyo domalagan tomagbo, agmaal sa kansiyo. ⁷ Siyo mango maksen keyen, Isos, kao Bodang Diyos mabwat sa boo. Ako ayaw agladowen. Ako apo piyagayay sa kaimo sa pangkit Diyos, ako ayaw kaimo agpakaskitanen. ⁸ Kaya kansiyo siyabi kataw ina, angkataw siyabi wa Isos sa mamaw keyen, Kao pag maloba wano pag mamaw, kao bali wa asin pag mangyan. ⁹ Kalbas Isos keyen, Nakay in kaimo ngaran? Keyen in mamaw, Ako piyagawit Bonton, angkataw kami karowan. ¹⁰ Kalbas siyo agdaing wano kay Isos keyen, Kami ayaw agboyawen atai pag kobat. ¹¹ Asin pag boksor apo karowan wano mga beyek agpaypanlongkod. ¹² Kalbas in mga mamaw agdaing kay Isos keyen, Kami ista wa pamataboyen sa mga beyek, kami kaimo paisoroyen ista. ¹³ Isos pomayag. Kalbas in mga mamaw panaw wa sa mangyan, mangisoroy wa sa mga beyek. Siro mga dowai ka libo. Kalbas in mga beyek maypandalagan gayed sa rakyas anggan misogbo sa dagatte, mangaleggeb wa. ¹⁴ Kalbas domalagan in mga agalapet in mga beyek, in mibaloy kansiro biyarita sa bayan osai sa mga kobat. Kalbas malitaboy ista in mga abaritaan matang piyangkit ina pag mibaloy. ¹⁵ Paka rateng kay Isos, kansiro ngiitan in batang piyaglowasan agitokkaw, aglambong wa, apo wakay bait, siyo in batang piyaglowasan bonton. Kalbas siro agkalimo. ¹⁶ Kalbas in mga karai kangitan agbarita sa kansiro in mibaloy sa batang piyaglowasan mamaw, osai sa mga beyek. ¹⁷ Kalbas siro omayay kay Isos keyen, Kao ayaw wa atai sa kanyam kobat, laki. ¹⁸ In Isos agsakay wa sa bangka, siyo piyagtanoran in batang piyaglowasan mga mamaw keyen, Ako miyanggat sa kaimo. ¹⁹ Kamay siyo yewed piyaanggat, dayem keyen Isos, Kao moli wakay sa kaimo mga kabelagan, kaimo sabiyen in kalakoyen in piyangwat in Kapwan sa kaimo, no nangkataw siyo agpakayawte sa kaimo. ²⁰ Kalbas panaw wa in mangyan, agbarita ngani sa mga bayan Dikapolis in kalakoyen in boo piyangwat Isos sa kansiyo. Kalbas in boo mga mangyan agsoyo. ²¹ In Isos motol wakay sa ripay dagatte, agkatipon in maloba karowan pag mga mangyan sa kansiyo sa balabaan dagatte. ²² Kalbas apo rateng osai ka mangyan in ngaran Airo, siyo agpapoon sa balay pagpaniponan. Paka kangitan kay Isos siyo maloba wano agpaselang sa kansiyo, ²³ maloba agayay keyen, In kangay bodangte kagbaiyan batay wa matay. Kao miyanggat wa sa kangay, siyo kaimo atangen matang siyo maal wakay, boway. ²⁴ Kalbas Isos miyanggat wa kay Airo. Karowan wano in miyanggat kay Isos anggan siyo piyagliget. ²⁵ Asin apo osai ka kagbaiyan labing dowai wa ka dagon piyagpanalowan. ²⁶ Siyo maloba piyagpaidapan, kansiyo wa liyobos in boo kansiyo mga sangkap sa aronaw aggamot sa kansiyo, kamay idbatay maoraw, no yewed agkarereg wa. ²⁷ - ²⁸ Siyo abaritaan wa in mga piyagpangwat Isos. Kalbas siyo keyen, Kamayba nges kansiyo waget lambong in kangay makapkap na kangay maskit maoraw wakay. Matang siyo paagem sa karowan kay Isos awak, komapkap sa kansiyo lambong. ²⁹ Kalbas toloy wa ngani maoraw in kansiyo agdaya, kansiyo atawanan sa kansiyo bilog keyen maal wakay siyo. ³⁰ Isos toloy katawan apo makowa kabaloyan sa kansiyo, kalbas siyo papeles, siyabi sa karowan keyen, Nakay in komapkap sa kangay lambong? ³¹ Kalbas siyabi in kansiyo mga agadar keyen, Kaimo piyagngitan kao piyagliget in karowan, kalbas kaimo kay piyagsabi keyen nakay in komapkap sa kaimo? ³² Kalbas siyo manriwa sa balabaan, agpamangkit no nakay in komapkap sa kansiyo. ³³ In kagbaiyan katawan in mibaloy sa kansiyo, matang siyo pasabangen agkalimo anggan agtagelgey, maloba wano paselang kay Isos, agsabi sa kansiyo in boo mibaloy. ³⁴ Kalbas Isos keyen, Laki, kaya kao maal wa, angkataw kao agpasandig sa kangay. Maal wa kao panaw apyaan, kao maal wa ngani sa kaimo maskit. ³⁵ In Isos agiplaongan kay apo mga rateng batang sa balay Airo, agsabi keyen, Matay wa in kaimo bodang. Ayaw wa agabaraen in Agpamatoldo. ³⁶ Kamay Isos yewed maniwala sa kansiro siyabi, no yewed siyo miplaong sa poon keyen, Ayaw agkalimo, agpasandig ngaro sa kangay. ³⁷ Kalbas Isos panaw wakay. Siyo yewed pomayag miyanggat in mga mangyan no yewed Pidro waget, osai tayari Santiyago. ³⁸ Paka siro rateng sa balay Airo, Isos karengey in agkagolo in mga mangyan, agpalpanangis lakoy anggan. ³⁹ Paka Isos misoroy, kansiyo siyabi sa kansiro keyen, Nakay batang kamo agkagolo wa labi agpalpanangis kataw ina? In bodang yewed matay, agesek waget. ⁴⁰ Kamay siyo kansiro piyagpatawaan. Kamay siro boo piyamalabo Isos. In kansiyo waget piyaanggat in mga koyay in bodang, osai in kansiyo tolo ka agadar, misoroy sa pagibolalangan in bodang. ⁴¹ Kalbas kansiyo yaatang in bakwaw in bodang, siyabi keyen, Talita komi, in beet siyabi keyen, Lale, kao mamarengey sa kangay. Miyorog wa kao. ⁴² Kalbas toloy wa miyorog in kagbaiyante, agipanawan wakay. Siyo labing dowai wa ka dagon. Kalbas siro boo maloba agsoyo. ⁴³ Kalbas Isos maloba agbilin sa kansiro keyen, Ayaw agbaritaen in kangay piyangwat kamayba kay nakay. Kalbas kansiyo siyogo keyen, In bodang pakanen pamangnen.

¹ Kalbas Isos panaw asin, pataboy sa bayan kansiyo iistobowan. Agyanggat in kansiyo mga agadar. ² Sa Ibeng Pamainga, siyo agparakay agpatoldo sa balay pagpaniponan. Agsoyo in aronaw agparengey sa kansiyo. Siro keyen, Nakay batang lames Isos katawan ina pag boo? Keyen kay, Nakay ina pag atawanan in tiyaboy sa kansiyo? Osai keyen, In kalakoyen in kansiyo mga piyagpangwat. ³ Yewed mana ina in panday, in bodang Mariya, in belag Santiyago, osai Osi, osai Odas, osai Simon? Atai din agbalay in kansiyo mga belag kagbaiyan, aon? Kalbas Isos kansiro piyangidangan. ⁴ Kalbas Isos keyen, In poropita piyagmaal in mga mangyan. In mga waget taga kansiyo kobat, in kansiyo mga kamalay, osai in kansiyo mga kabelagan, siro waget in yewed agmaal sa kansiyo. ⁵ Kalbas siyo yewed kapangwat asin kamayba nakay pag makasoyo pag panawen, no yewed kansiyo waget yaatang in korangte apo maskit, siro piyaoraw. ⁶ Isos agsoyo panawen siro yewed agpaniwala. Kalbas Isos agipanawan agpatoldo sa mga bayante. ⁷ Kalbas kansiyo biyerya in Labing Dowai, kansiyo siyogo baatte dowai. Siro kansiyo piyakan kabaloyan agpamoyaw sa mga mamaw. ⁸ - ⁹ Kansiyo piyabilin keyen, Kamo ayaw agbaba kamayba nakay sa agipanaw, kamayba pamangnen, kamayba begyas, kamayba kowarta sa sokloban, kamayba lambong, no yewed sikkor waget. Soroyen in tapatos. ¹⁰ Kalbas kansiyo kay siyabi sa kansiro keyen, Kamayba sa nakay pag balay kamo piyaesek, na asina wa agpamataw anggan kamo panaw wakay asin pag bayan. ¹¹ Kamayba nakay pag bayan, no siro dayo agpabelag sa kanyo, no siro dayo agparengey sa kanyo, na kamo panaw wa asin pag bayan, ragragen in bogabo sa kanyo darapa, in beet siyabi siro batay piyagparosa. ¹² Kalbas panaw wa in Labing Dowai, agpatoldo sa mga mangyan keyen, Benglayen wa in daet. ¹³ Osai kansiro piyamoyaw in mga mamaw sa mga piyaglowasan, kansiro yoodyodan langis in aronaw apo maskit, piyaoraw. ¹⁴ In gobirnador Irodis abaritaan panawen sa mga piyagpangwat Isos, angkataw mibarita wa in kansiyo ngaran. Apo mga agsabi keyen, Siyo wakay Owan in agpamaotismo, siyo batang matay, piyaboway wakay. Ina in dailan kaya siyo apo ina pag kabaloyan. ¹⁵ Kamay in mga amat keyen, Siyo Iliyas. In amat wakay keyen, Siyo osai ka poropita kataw in tangona pag mga poropita. ¹⁶ Kamay in Irodis abaritaan panawen kay Isos kansiyo siyabi keyen, Ina Owan, in kangay tangona piyapogot ngona piyaboway wakay. ¹⁷ Angkataw Irodis ngani in agpadakep, in agpabakos, in agpakolong kay Owan, matang makaanggay kay Irodiyas. Ina nges in babai Pilipi belag Irodis, kamay kay Irodis tiyaban. ¹⁸ Owan batang agpangelel kay Irodis keyen, Daet sa Diyos in kaimo kiyowa in babai kaimo belag. ¹⁹ Kalbas Irodiyas agkabais kay Owan, beet biyono. Kamay siyo yewed kabaloy, ²⁰ angkataw Irodis agmaal kay Owan, angkataw kansiyo atawanan siyo betek, maalno pag mangyan. Matang Owan kansiyo piyagayaw piyagbono. Siyo agkaanggay agparengey kay Owan, kamayba malingetnget in kansiyo remrem sa piyagsabi. ²¹ Kamay paka kabetek wa in ibeng kay Irodis kaboslot Irodiyas kangitan wa padalan. Biyerya Irodis in kansiyo mga konsiyal, osai in mga kapitan, kadayo in mga mayaman sa Galiliya, matang malpamangan sa kansiyo siyandata pamangnen. ²² Misoroy in kay Irodiyas daraga, somayaw. Irodis anggayan sa kansiyo agsayaw, osai in mga agpalpamangan. Kalbas siyabi Irodis sa daraga keyen, Ayayen sa kangay kamayba nakay in kaimo beet, kangay batay piyagtaboy sa kaimo. ²³ Kansiyo piyangako wa gayed keyen, Kamayba nakay in kaimo piyagayay, kangay batay piyagtaboy sa kaimo, kamayba in kalaati kangay sakopan. ²⁴ Kalbas in daraga lomabo, siyabi sa kansiyo inang keyen, Nakay in kangay ayayen? Keyen in inang, Ayayen in kay Owan olo, in agpamaotismo. ²⁵ Toloy moli wakay in daraga sa poon, keyen, In kangay beet ngona wa daan kaimo wa taboyen sa kangay in olo Owan in agpamaotismo sa osai ka palanggana. ²⁶ Kalbas Irodis agalwasi wa gayed kay Owan, kamay siyo agkarikoy agayaw in yaayay in daraga panawen in kansiyo pangako piyarengey in mga agpalpamangan. ²⁷ Matang in poon toloy agsogo sa osai ka sondalo keyen, Atai wa babaen in olo Owan. Kalbas panaw in sondalo, pataboy sa kolongan, piyogot in olo Owan, ²⁸ piyabolalang sa osai ka palanggana, biyaba, tiyaboy sa daraga. Ina tiyaboy wakay in daraga sa kansiyo inang. ²⁹ Paka ina abaritaan in kay Owan mga agadar, siro ista pataboy, kiyowa in bilog Owan, siyangat. ³⁰ In kay Isos mga katiwala moli wakay sa kansiyo, giisod sa kansiyo in boo kansiro piyangwat, osai in boo piyatoldo. ³¹ Kamay aronaw mangyan in agpaypanrateng osai agpalipanaw, anggan kora Isos idwa katokor agkoman. Matang kay Isos siyabi keyen, Kitam wa pataboy sa osai ka moyod, matang adayonaw sa karowan, kamo kapainga wakayte. ³² Kalbas siro panaw, somakay sa bangka, pataboy sa osai ka moyod. ³³ Kamay aronaw in kangitan sa kansiro agipanaw, mga katawan sa kansiro. In mga mangyan batang sa boo mga bayan maykabiglaan pataboy kay Isos pagtaboyan, tokaw wakay rateng sa kansiyo. ³⁴ Kalbas in Isos aglabo sa bangka kansiyo ngiitan maloba karowan, siyo agpakayawte sa kansiro, angkataw siro kagwali mga topa idapo agalapet. Kalbas siyo agpatoldo sa kansiro in boote. ³⁵ Agkalabo wa in ibeng, pasabangen kay Isos in mga agadar keyen, Ngona agkalabo wa in ibeng, anda pag kobat moyod, ³⁶ na kaimo wa palpasen in mga mangyan matang siro pataboy sa mga balay sa bangen osai sa mga bayan matang kabili pamangnen. ³⁷ Kamay keyen Isos sa kansiro, Kamo wa in agtaboy pamangnen sa kansiro. Siro keyen, Nakay? Kami wa in panaw mamili pamangnen alaga dowai ka daan ka ibeng agpanawen, kalbas kanyam piyagpakoman sa kansiro? ³⁸ Keyen Isos, Asin sa kanyo nangkaro ka tinapay? Dali wa, kanyo pangkiten. Paka kansiro piyangkit siro keyen, Apo lima ka tinapay, apo din dowai ka isda. ³⁹ Kalbas in mga agadar siyogo Isos keyen, Kanyo patokkawen in mga mangyan, mayaronan siro sa mga lalosenan. ⁴⁰ Kalbas siro boo malpanokkaw, in mga aronan apo mga sangdaan, apo mga limampo. ⁴¹ Kalbas kiyowa Isos in lima ka tinapay, osai in dowai ka isda. Siyo manangra sa langit, agpasalamat sa Diyos. Kalbas kansiyo piyandodo in mga tinapay, tiyaboy sa mga agadar matang bagiyen sa mga mangyan. Kalbas kansiyo din biyagi in dowai ka isda. ⁴² Siro boo malpamangan, mga bosog. ⁴³ Tiipon wakay in mga agadar in mitera pamangnen, labing dowai ka galang makno. ⁴⁴ In mga malpamangan, in mga kaliyakiyan agbangen, siro lima ka libo. ⁴⁵ Toloy siyogo Isos in kansiyo mga agadar somakay sa bangka, siro piyatokaw wa sa Bitsayda sa ripay dagatte, anggan kansiyo piyagpalpas in mga mangyan. ⁴⁶ Siyo keyen sa mga mangyan, Ako din agipanaw wa. Kalbas siyo pataboy sa boksor matang mandalangin. ⁴⁷ Paka yabi wa in mga agadar sa bangka sa kagwaraan wa dagatte, Isos agboktong waget sa kobat. ⁴⁸ Siyo kangitan sa mga agadar aidapan wa ageyat agsagwan, angkataw siro piyagtagbo in kowaya. Paka agkaboka wa Isos mangagak sa kansiro agipanaw aglaed sa sapa, batay nges aglampas sa kansiro. ⁴⁹ Kamay paka ngiitan in mga agadar siyo agipanaw aglaed sa sapa, siro mango angkataw kansiro remrem siyo kablag. ⁵⁰ Siro boo alimowan. Kamay siyo toloy miplaong sa kansiro keyen, Ayaw agkalimo. Ako dayem Isos. Pakaeyaten in kanyo remrem. ⁵¹ Siyo monaik wa din sa bangka, kalbas maoraw in kowaya. Siro maloba agsoyo, ⁵² angkataw yewed kansiro atawanan in beet siyabi in piyangwat Isos sa tinapay kansiyo biyagi. Ina yewed kay abel kansiro remrem. ⁵³ Siro motol sa dagatte, rateng wa sa kobat Ginisarit in bangka yeeket wa. ⁵⁴ Siro lomabo, Isos toloy atawanan in mga taga asin, ⁵⁵ matang in mga mangyan toloy agberya sa boo sa mga bangen, matang in boo apo maskit yoosong piyagbaba kay Isos kamaybawa saano kansiro abaritaan ista siyo. ⁵⁶ Kamayba saano siyo rateng, kamayba sa mga bayante, kamayba sa mga bayan lakoy, kamayba sa kobat, in mga apo maskit piyagbaba sa mga pagpangaronan. Siro agdaing kay Isos keyen, Siro pakapkapen kamayba sa tangrawan waget kaimo lambong. Kalbas in boo kaatang maal wakay.

¹ Apo mga omaron sa bangen Isos, siro mga Parisiyo. Apo din mga agpatoldo in mga Batas Diyos, siro batang sa Irosalim. ² Kansiro ngiitan in kalaati kay Isos mga agadar agpamangan in bakwaw yewed yoogas kataw in ogali piyagpatoldo in mga Parisiyo. ³ In mga Odyo na labi kay in mga Parisiyo idbatay mamangan anggan in bakwaw yewed kay yoogas kataw in ogali piyatoldo in kansiro mga kakoyayan. ⁴ Yewed din agpamangan kamayba nakay in biili sa bayan no yewed kay yoogas. Aronaw kay din mga piyatoldo kansiro piyagpaniwalaan, kataw in mga padalan agogas sa mga pagineman, sa mga palato, sa mga kaldido, kadayo sa mga damig. ⁵ Isos tiyanong in mga Parisiyo osai in mga agpatoldo in mga Batas Diyos keyen, Nakay batang in kaimo mga agadar yewed agpaniwala sa mga piyatoldo in kantam mga kakoyayan? Baina, siro agpamangan yewed yoogas in bakwaw kataw in ogali sa agogas. ⁶ Isos keyen, Betek in kay Isaiyas siyabi batang sa Diyos panawen sa kanyo. Kamo mga agpakagwali waget agpaniwala. Kataw in siyolat Isaiyas keyen, Keyen in Diyos, Agmaal sa kangay in kansiro mga agiplaong, kamay in kansiro mga remrem adayonaw sa kangay. ⁷ Idapo kabolowan in siro agsamba sa kangay. Angkataw siro keyen siro agpatoldo in Agiplaong Diyos, kamay ina piyagsabi waget mangyan. ⁸ Isos keyen kay, Kanyo piyagidapo kabolowan in Batas Diyos, in mga piyagpatoldo waget mga mangyan in kanyo piyagalapet. ⁹ Kalbas Isos miplaong kay keyen, Kamo katawan wano agbenglay in Batas Diyos matang kanyo piyagpangwat in kanyo waget piyagpatoldo. ¹⁰ Baina in yootos Mowisis keyen, Pagmaalen in kanyo mga koyay. In aglibak sa kansiyo mga koyay na siyo bonowen. ¹¹ Kamay kanyo wakay piyatoldo keyen, Kalobante siyabi osai ka mangyan sa kansiyo koyay keyen, Anda in batay nges kangay tiyaboy sa kaimo idwa maal angkataw kangay wa tiyaboy sa Diyos. ¹² Na in kamo agpatoldo kataw ina siyo kanyo wa piyagayaw agtolong sa kansiyo koyay. ¹³ Na kataw ina in Agiplaong Diyos kanyo piyagidapo kabolowan sa kanyo mga piyagpatoldo sa mga amat. Osai aronaw kay din mga kataw ina in kanyo piyagpangwat. ¹⁴ Tagoli wakay biyerya Isos in mga mangyan, siyabi sa kansiro keyen, Kamo boo mamarengey, remremen in kangay batay piyagsabi. ¹⁵ In piyagsoroy sa bibi yewed makarames sa mangyan sa pangkit Diyos, dayem in mga batang sa remrem mangyan na ina in makarames sa kansiyo. ¹⁷ Kay Isos biyaliwan in mga mangyan. Paka misoroy sa balay siyo tiyanong in kansiyo mga agadar panawen sa kansiyo siyabi karai. ¹⁸ Keyen Isos, Kamo mana idapo kay katawanan? Yewed kay mana kanyo atawanan? Yewed makarames sa mangyan in kansiyo piyagkoman, ¹⁹ kataw ina yewed agisoroy sa kansiyo remrem, no yewed sa boyon, kalbas paka kadalan lampas wakay. In beet siyabi ina in boote pamangnen maal kiyoman. ²⁰ Siyo agaway agiplaong keyen, In aglowas batang sa remrem mangyan in agpakarames sa kansiyo sa pangkit Diyos. ²¹ Angkataw sa galem, sa remrem mangyan, agrakay in mga daet remrem kaya siyo agpanggaraw, agpanakaw, agbono mangyan, ²² agpanaban, agkabeet sa yewed kansiyo, agpamangwat in boo mga daet, mga agpamadaya, marames pag ogali, agpanagiri, agpamasaen, agyabang, yewed agremrem sa Diyos. ²³ Ina pag boo batang sa remrem mangyan. Ina in agparames sa kansiyo sa pangkit Diyos. ²⁴ Isos panaw ista pataboy wa sa kobat sa bangen bayan Tiro, mamataw sa osai ka balay ista. Siyo beet ayaw nges atawanan in mga mangyan siyo asina, kamay atawanan daan. ²⁵ Osai ka inang apo bodangte kagbaiyan piyaglowasan mamaw karengey barita keyen rateng wa Isos. Siyo toloy pataboy kay Isos, agpaselang wano sa kansiyo. ²⁶ Ina pag kagbaiyan yewed Odyo, siyo taga Siropinisya. Siyo agdaing kay IsoS keyen, Pamoyawen in mamaw Sa kangay bodang. ²⁷ Kamay siyabi Isos sa kansiyo keyen, Kailangan tokaw pabosogen in mga bodang. Yewed maal kiyowa in pamangnen sa mga bodang, matang biyenglay sa mga titote. ²⁸ Keyen in kagbaiyan, Kamay, laki Kapwan, in mga titote sa ngato agpamangan in mga poypor agpangaragrag sa mga bodang. ²⁹ Matang kay Isos siyabi keyen, Panawen sa kaimo siyabi dali wa, maal wa moli kao, panaw wa in mamaw sa kaimo bodang. ³⁰ Kalbas moli wa in kagbaiyan, kansiyo aratengan in bodang agipalibay sa esekan. Idapo wa ngani in mamaw. ³¹ In Isos agoli wakay batang sa bangen bayan Tiro, siyo domalan sa bayan Sidon, kalbas sa kagwaraan kobat Dikapolis, anggan rateng sa dagatte Galiliya. ³² Biyaba sa kansiyo osai ka kaliyakiyan bingi, yewed gayed kaiplaong. Siro agdaing kay Isos keyen, Kaimo atangen anda pag mangyan. ³³ Kalbas siyo piyaanggat ISos adayonaw sa karowan mangyan. Siyoroy Isos in kansiyo mga solo sa mga talinga in bingi. Paka kiyowa wakay siyo manopay sa solo, piyayodyod sa dila in mangyan. ³⁴ Manangra sa langit Isos, mamayeng lakoy, siyabi sa mangyan keyen, Ipata, in beet siyabi Maboswang wa. ³⁵ Kalbas siyo karengey wa, idwa mabyat in dila, kaiplaong wa maal. ³⁶ Siyabi Isos sa mga mangyan keyen, Ayaw wano agpamarita in mibaloy kamaybawa saano. Kamay in siyo agayaw agayaw siro labi kay agbarita agbarita. ³⁷ Siro maloba agsoyo keyen, Maal wano in boote kansiyo piyangwat. Baina, karengey wa in mga bingi, kaiplaong wa in mga yewed kaiplaong.

¹ Paka kadalan ina pag mga ibeng tagoli wakay agkatipon kay Isos in karowan mangyan. Siro idapo wa pamangnen, matang biyerya Isos in kansiyo mga agadar, siyabi sa kansiro keyen, ² Ako agpakayawte sa mga mangyan angkataw tolo wa ka ibeng siro agyanggat kangay, kalbas ngona siro alobosan wa pamangnen. ³ No siro kangay piyaoli agkayawes sa kansiro mga balay, na siro batay piyaidapan sa dalan. Batang kay sa adayonaw siro in amat. ⁴ Keyen in mga agadar, Sa nakay kitam batay kangitan pamangnen atai sa moyod sibay sa karo tai in mangyan? ⁵ Keyen Isos, Angkalakoy in kanyo pamangnen? Siro keyen, Pito ka bilog tinapay. ⁶ Kalbas in mga mangyan piyatokkaw Isos sa diya. Kalbas kansiyo kiyowa in pito ka tinapay, siyo agpasalamat sa Diyos, kansiyo piyandodo in tinapay, tiyaboy sa mga agadar matang biyagi sa mga mangyan. Kataw ngani ina in piyangwat in mga agadar. ⁷ Siro apo dinte mga isda. Ina din kansiyo piyasalamat sa Diyos, kalbas kansiyo siyogo keyen, Anda din taboyen sa mga mangyan. ⁸ Kalbas siro boo malpamangan, anggan bosog. Tiipon in tera in mga pandodowan tinapay, pito ka galang lakoy makno. ⁹ In mamangan opat ka libo ka mangyan. Kalbas piyaoli Isos in mga mangyan. ¹⁰ Kalbas siyo somakay sa bangka, sarig in kansiyo mga agadar, pataboy sa kobat Dalmanota. ¹¹ Apo rateng mga Parisiyo, agmatiwid kay Isos. Kansiro beet siyo arikoyan, matang kansiro yaayay keyen, Kao agpapangkit lakonaw pag panawen matang atawanan kao sogowan Diyos. ¹² Kalbas Isos mamayeng lakoy, kansiyo siyabi keyen, Nakay batang kamo in mga agkaboway kay ngona agpamangkit tandaan? Kangay piyagsabi sa kanyo, kamo idbatay ngani piyakan tandaan. ¹³ Isos panaw wa sa kansiro, somakay sa bangka, pataboy sa ripay dagatte. ¹⁴ In mga agadar alibangawan agbaba pamangnen. In kansiro pamangnen sa bangka osai waget ka tinapay. ¹⁵ Isos miplaong sa kansiro keyen, Kamo agingat, ayaw agalapet in sa mga Parisiyo pag pamaistobo tinapay osai in kay Irodis. ¹⁶ Kalbas in mga agadar agpolong keyen, Kaya ina siyabi Isos, angkataw kitam idapo piyagbaba pamangnen. ¹⁷ Ina atawanan Isos, matang siyo keyen, Nakay batang kanyo piyagpaypolongan keyen, Kitam idapo piyagbaba pamangnen? Ikkay mana kanyo atawanan, ikkay atawanan? Marigen kay lames kanyo remrem? ¹⁸ Kamo nges apo mata, kamay yewed mana kangitan? Kamo nges apo talinga, kamay yewed mana karengey? Kamo mana agkalibangaw wa? ¹⁹ In kangay piyandodo in lima ka tinapay sa lima ka libo ka mangyan angkaro ka galang in makno in tera in pandodowan tinapay? Siro keyen, Labing dowai. ²⁰ Keyen wakay Isos, In kangay piyandodo in pito ka bilog tinapay sa opat ka libo ka mangyan angkaro ka galang in makno in tera? Siro keyen, Pito. ²¹ Keyen siyo, Kalbas ina mana yewed kay daan kanyo atawanan? ²² Kora Isos rateng sa bayante Bitsayda. Osai ka kaliyakiyan beleg biyaba kay Isos, keyen, Siyo atangen. ²³ Kay Isos yaatang sa bakwaw in beleg, yaakay sa awak bayan. Kalbas in mata kansiyo tiyopayan, yaatang. Kalbas keyen, Kao kangitan kamayba nakay? ²⁴ In kaliyakiyan mangkit, kalbas keyen, Ako kangitan mga mangyan, kamay siro kagwali poon yangaw agipanawan. ²⁵ Tagoli wakay yaatang Isos kansiyo mata. Kalbas in beleg mangkit gayed, kangitan wa gayed. ²⁶ Siyo piyaoli wa Isos sa kansiyo balay keyen, Ayaw wa domalan sa bayan. ²⁷ Isos, osai in kansiyo mga agadar, ista pataboy sa mga bayante sa bangen Sisariya Pilipo. In siro agipanaw sa dalan kansiyo tiyanong in mga agadar keyen, Nakay in piyagsabi in mga mangyan, nakay kono pag mangyan ako? ²⁸ Siro keyen, In siyabi in amat kao kono Owan in agpamaotismo, in amat wakay keyen kao Iliyas, apo din keyen kao osai sa mga poropita. ²⁹ Kamay keyen Isos, Kamo wakay nakay? Ako nakay pag mangyan? Pidro keyen, Kao in Kiristo. ³⁰ Kalbas Isos agbilin sa kansiro keyen, Ayaw wano agsabi kamayba kay nakay keyen ako in Kiristo. ³¹ Piyarakay ina betek Isos agpatoldo sa kansiyo mga agadar keyen, Ako in Bodang Mangyan kailangan piyagpaidapan aronaw. Ako batay piyagidangan in mga koyay osai in mga poon sasirdoti, kadayo in mga agpatoldo in mga Batas Diyos. Kalbas ako batay biyono, kamay sa katolo ka ibeng ako boway wakay. ³² Ina kansiyo siyabi mapawa sa kansiro. Kalbas Isos piyasoway Pidro sa amat, siyabi keyen, Ayaw wa agkataw ina. ³³ Kamay Isos agpangkit sa kansiyo mga agadar, agpangelel kay Pidro keyen, Katanas, kao bali wa. In kaimo remrem yewed batang sa Diyos no yewed batang sa mga mangyan. ³⁴ Biyerya Isos in mga mangyan, kadayo in kansiyo mga agadar, kansiyo siyabi keyen, No siyo in beet miyanggat sa kangay, na papaoriyen in kansiyo sadiri remrem, pasanen in kansiyo kodos, miyanggat sa kangay. ³⁵ Angkataw no in mangyan agaman sa kansiyo boway, na siyo batay aidapowan. Kamay in yewed agaman kansiyo boway panawen sa kangay osai panawen sa Maal pag Barita na siyo batay kabel boway. ³⁶ Idapo kabolowan sa osai ka mangyan no kansiyo abel in boo kobat kamay in kapalit in kansiyo boway. ³⁷ In mangyan idapo batay mataboy kapalit matang piyaoli in kansiyo boway. ³⁸ Ngona pag betek aronaw in mga agpamangwat daet, na no in mangyan ngona dayo agpabelag sa kangay, agkarikoy agbarita in kangay agiplaong asin sa mga agpamangwat daet, na dogayan ako in Bodang Mangyan idbatay din agpabelag sa kansiyo, dogayan in ako rateng wakay apo piyagngitan in kabaloyan lakoy kangay Amang, sarig in mga angil.

¹ Kay Isos kay siyabi sa kansiro keyen, Tiyak ngani in kalaati atai sa kanyo siro batay kangitan in DiyoS agpapoon apo lakoy kabaloyan. Siro idbatay kay matay. ² Paka kadalan enem ka ibeng Isos monaker sa osai ka mabwat pag boksor. Siyo idapo piyaanggat no yewed Pidro waget, osai Santiyago, osai Owan. Ista kansiro ngiitan Isos miyalis wa, ³ agrawa, in kansiyo lambong maboksi wano makasolap. Kamayba nakay pag mangyan agogas lambong, idapo kapaboksi kataw ina. ⁴ Ngiitan in tolo ka agadar Mowisis, osai Iliyas agpanggisodan osai Isos. ⁵ Kalbas siyabi Pidro kay Isos keyen, Laki Agpamatoldo, maal in kami atai. Kami batay agpangwat tolo ka barangas, in osai sa kaimo, in osai kay Mowisis, in osai kay Iliyas. ⁶ Pidro yewed manremrem, toloy waget miplaong kataw ina, panawen siro maloba agkalimo. ⁷ Kalbas siro kiyanlongan osai ka libo. Apo miplaong batang sa libo keyen, Anda in kangay piyagmaal pag Bodang. Siyo kanyo parengeyen. ⁸ In mga agadar toloy manriwa sa balabaan, idapo wa ngiitan no yewed Isos waget. ⁹ In siro agongali, siro piyabilin Isos keyen, Ayaw kanyo agsabiyen kamayba wa kay nakay in kanyo ngiitan, anggan ako in Bodang Mangyan yewed kay batang matay boway wakay. ¹⁰ Kalbas kansiro piyagalapet in bilin, kamay siro agpaypolongan no nakay in beet siyabi ina pag kansiyo siyabi keyen, boway wakay. ¹¹ Isos kansiro tiyanong keyen, Nakay batang piyagsabi in mga agpatoldo in mga Batas keyen, kailangan Iliyas in tokaw atai pataboy? ¹² Isos keyen, Iliyas ngani in tokaw atai agrateng, matang kansiyo pakapyaen in boote. Na nakay batang piyagsabi in mga Agisolat keyen ako in Bodang Mangyan batay aronaw kaidapan osai piyagpamalowasan? ¹³ Kamay kangay piyagsabi sa kanyo keyen, Iliyas rateng wa, kalbas siyo piyangwatan mga mangyan kamayba nakay in kansiro beet, kataw daan in siyabi in mga Agisolat panawen sa kansiyo. ¹⁴ Kora Isos moli wakay sa mga agadar mataw, kansiro ngiitan maloba karowan pag mangyan agkatipon sa kansiro. In mga agpatoldo in mga Batas Diyos agpalsisagotan osai in mga agadar. ¹⁵ Paka in mga mangyan kangitan kay Isos, siro boo agsoyo. Siro domalagan pataboy sa kansiyo, miplaong sa kansiyo. ¹⁶ Isos miplaong sa kansiyo mga agadar keyen, Nakay in kanyo piyagpalsisagotan osai ina pag mga mangyan? ¹⁷ In osai batang sa karowan keyen, Laki Agpamatoldo, kangay biyaba atai sa kaimo in kangay bodang kaliyakiyan, kataw siyo piyaglowasan mamaw, yewed kaiplaong. ¹⁸ Baatte siyo piyaglowasan siyo piyagligan in mamaw, agbora in kansiyo bibi, agtogait in kansiyo ngipen, agkakenet in kansiyo bilog. Kangay yaayay sa kaimo mga agadar keyen boyawen in mamaw, kamay siro yewed kabaloy. ¹⁹ Kalbas siyabi Isos sa kansiro keyen, Piyawa, kamo pag mga agkaboway ngona, mga yewed agpaniwala. Anggan nangkadogay kay kailangan ako mataw kay sa kanyo? Anggan nangkadogay kay ako agbanta kay sa kanyo? In bodang atai babaen. ²⁰ Kansiro ngani biyaba kay Isos. In Isos ngiitan in mamaw, toloy kansiyo yoogyog in bodang. Siyo mibolalang sa diya, agliganligan, agbora wa in bibi. ²¹ Kalbas keyen Isos sa amang, Angkadogay wa siyo piyaglowasan in mamaw? Keyen in amang, Sogod bodangte kay. ²² Siyo mapret siyogbo in mamaw sa baya, no yewed sa sapa matang nges biyono. Kamay no kao apo batay padalan, na kao agpakayawte sa kanyam, kami kaimo tolongen. ²³ Isos keyen, Nakay batang kao keyen no apo padalan? In boote apangwat in agpasandig sa Diyos. ²⁴ Toloy miplaong maksen in amang keyen, Ako ngani agpasandig. No korang kay in kangay paniwala na kaimo dagdaganen. ²⁵ Kay Isos ngiitan agpaypanrateng kay in mga mangyan, matang kansiyo piyangelel in mamaw keyen, Kao pag mamaw agpayewed kaiplaong, agpakabingi, kao kangay piyagboyaw, bali wa asin sa bodang. Ayaw wakay misoroy sa kansiyo. ²⁶ In mamaw mango, yoogyog anggan in bodang, kalbas panaw wa. In bodang mibaloy wa kagwali matay, matang siyabi in karowan keyen, Matay wa. ²⁷ Kadogay in bodang yaatang Isos sa bakwaw, yoorog. Tomaydek wa in bodang. ²⁸ Kora Isos misoroy wa sa balay. In mga agadar, siro wakayte keyen, Nakay batang kami yewed kabaloy agpamoyaw sa mamaw? ²⁹ Keyen wakay Isos, In kataw ina pag mamaw idbatay apamoyaw no yewed sa agpandalangin. ³⁰ Kora Isos panaw wa ista, domalan sa Galiliya. In beet Isos in mga mangyan ayaw katawan siyo asin, ³¹ angkataw kansiyo piyagpatoldo in kansiyo mga agadar. Keyen, Ako in Bodang Mangyan batay tiyaboy sa kabaloyan mga mangyan, batay biyono, kamay batay wakay boway sa katolo ka ibeng. ³² Yewed kansiro atawanan in kansiyo beet siyabi, kamay siro agkalimo agtanong sa kansiyo. ³³ Kora Isos rateng sa Kapirnaom. In siro sa balay wa, keyen Isos sa kansiyo mga agadar, Nakay in kanyo piyagpolong karai sa dalan? ³⁴ Siro yewed miplaong, angkataw siro agpalagawan karai no nakay sa kansiro in lakonaw. ³⁵ Isos tomokkaw, kansiyo tiipon in Labing Dowai, siyabi sa kansiro keyen, No siyo beet lakonaw, na kailangan siyo kalakoyte sa boo, sogowan in boo. ³⁶ Kansiyo biyerya in osai ka bodangte, piyataydek sa kansiro kagwaraan. Kansiyo kiyapet in bodang, siyabi sa mga agadar keyen, ³⁷ No in mangyan panawen sa kangay agkaanggay sa bodangte kataw anda, na ako in kansiyo piyagkaanggayan. Osai no siyo agkaanggay sa kangay, na yewed waget ako in kansiyo piyagkaanggayan, no yewed in agsogo sa kangay. ³⁸ Siyabi Owan sa kansiyo keyen, Laki Agpamatoldo, kami apo ngiitan mangyan agawit kaimo ngaran sa agpamoyaw mamaw. Kanyam piyagayaw siyo, angkataw siyo yewed kantam sarig. ³⁹ Kamay keyen Isos, Siyo ayaw kantam agayawen, angkataw no siyo kabaloy agalapet kangay ngaran matang agpangwat lakonaw pag panawen, na siyo idbatay toloy agsabi daet sa kangay. ⁴⁰ Angkataw in yewed aglaban sa kantam na sa kantam daan. ⁴¹ Kangay piyagsabi sa kanyo keyen, Kamayba nakay in agtaboy sa kanyo osai ka lisap sapa panawen kamo sa kangay, na siyo batay ngani piyakan bayad. ⁴² Kamayba nakay in agpamaakay sa daet sa bodangte kataw tai agpasandig sa kangay, na in maal kay sa kansiyo in eketanen lakoy bato kansiyo leey, kalbas siyo leggeben sa dagat. ⁴³ No kaimo bakwaw in agakay sa kaimo matang kao agpangwat daet, na kaimo dodowen. Maal kay sa kaimo in pataboy sa langit osai waget in bakwaw, sa apo dowai ka bakwaw kao pataboy sa toyongan, misogbo sa baya idbatay maplek. ⁴⁵ Osai no kaimo bitis in agakay sa kaimo matang kao agpangwat daet, na kaimo dodowen. Maal kay sa kaimo in pataboy sa langit pilay, sa apo dowai ka bitis kao biyenglay sa toyongan. ⁴⁷ Osai no kaimo mata agakay sa kaimo matang kao agpangwat daet, na kaimo kasloten. Maal kay sa kaimo in pataboy sa sakopan Diyos osai waget in mata, sa apo dowai ka mata kao biyenglay sa toyongan. ⁴⁸ Ista yewed batay matay in mga eled agkoman sa kansiro, idbatay maplek in baya. ⁴⁹ Kataw in agay piyaglinis baya, osai kataw in pamangnen piyagpatamis asing, na kataw daan din ina in baatte mangyan batay piyagpakamaal. ⁵⁰ Maal in asing, kamay no idwa matamis in asing, na idbatay wa matamis wakay tagoli. Toladen kamo in asing, osai maybelagan.

¹ Isos panaw wa ista, pataboy sa kobat Odiya, kalbas motol sa sapa Ordan. Tagoli wakay siyo piyagtiponan aronaw mangyan. Siyo agpatoldo sa kansiro kataw in kansiyo datiyan ogali. ² Apo mga Parisiyo pasabangen kay Isos, kansiro beet siyo abel, matang kansiro siyabi keyen, Maal lames sa mga Batas Diyos no in lalaki agbenglay sa kansiyo babai? ³ Isos keyen, Nakay in Batas tiyaboy Mowisis sa kanyo? ⁴ Siro keyen, Mowisis pomayag keyen, In lalaki maal agbenglay sa kansiyo babai no in babai piyakan wa solat sa agpalsoway. ⁵ Kamay siyabi Isos sa kansiro keyen, Kaya kansiyo siyolat ina pag Batas, angkataw marigen in kanyo remrem. ⁶ Kamay in siyabi sa mga agisolat keyen, Sa parakayan kay in piyangwat in Diyos in kobat, in mga mangyan kansiyo piyangwat kaliyakiyan osai kagbaiyan. ⁷ Ina in dailan kaya piyagbaliwan in kaliyakiyan in kansiyo mga koyay, maysarig wa siro osai in babai. ⁸ Siro mibaloy wa osai waget, matang siro idwa dowai, no yewed osai waget. ⁹ Na in piyaysarig in Diyos ayaw agpasowayen mangyan. ¹⁰ Paka siro rateng sa balay in mga agadar agtanong wakay kay Isos panawen ina pag kansiyo siyabi. ¹¹ Siyo keyen, No osai ka kaliyakiyan agbenglay sa kansiyo babai, miskapet wakay sa osai, na siyo agpangwat daet sa kansiyo babai, siyo agpanggaraw. ¹² Osai no in osai ka kagbaiyan agbenglay sa kansiyo lalaki, miskapet wakay sa osai na siyo din agpanggaraw. ¹³ Apo mga agbaba mga bodang kay Isos, matang kansiyo atangen. Kamay in mga agbaba piyangelel in mga agadar. ¹⁴ Paka Isos karengey ina, siyo agalitan, siyabi sa mga agadar keyen, In mga bodang pasabangenen sa kangay. Ayaw agayawen, angkataw sa mga kataw ina in Diyos agpapoon. ¹⁵ Totoo in kangay piyagsabi, in yewed agtolad sa bodangte agpasakop sa Diyos, na siyo idbatay ngani sa sakopan Diyos. ¹⁶ Kay Isos kiyapet in mga bodang, yaatang, piyandalangin. ¹⁷ In Isos batay wa panaw, apo osai ka kaliyakiyan domalagan pasabangen sa kansiyo, agpaselang keyen, Maal pag Agpamatoldo, nakay lames in kangay pangwaten matang apo boway idapo kalobosan? ¹⁸ Isos keyen, Nakay batang ako kaimo piyagawit maal? Idapo maal no yewed in Diyos waget. ¹⁹ Kaimo atawanan in mga Batas keyen ayaw agbono mangyan, ayaw manggaraw, ayaw manakaw, ayaw agsabi baribid, ayaw agpamadaya, pagmaalen in kaimo mga koyay. ²⁰ Keyen in kaliyakiyan, Laki Agpamatoldo, ina pag boo kangay piyagpaniwalaan sogod ako kalakoyte kay. ²¹ Kalbas siyo piyangkit Isos, piyagpakayawte. Siyabi keyen, Osai kay in korang sa kaimo. Kao panaw wa, kaimo pabiliyen in kaimo boo piyagalapet, in abel kowarta taboyen sa mga maidap, na kao batay apo sangkap sa langit, kalbas kao atai wakay miyanggat sa kangay. ²² Agpanremrem in kaliyakiyan asin pag siyabi, siyo panaw wa agrongkot, angkataw aronaw in kansiyo sangkap. ²³ Piyangkit Isos in kansiyo mga agadar, siyabi sa kansiro keyen, Maidap wano sa mangyan aronaw in sangkap in agpasakop sa Diyos. ²⁴ Kalbas in mga agadar agsoyo sa kansiyo siyabi. Tagoli wakay siyabi Isos keyen, Mga bodang, maidap wano in agpasakop sa Diyos. ²⁵ Maidap komislot sa salay karayom in osai ka ayop lakoy piyagawit kamilyo, kamay labi kay maidap sa mangyan aronaw in sangkap in agpasakop sa Diyos. ²⁶ In mga agadar agsoyo labi wa, siyabi sa kansiyo keyen, Na nakay ngani in batay apaboway? ²⁷ Isos agpangkit sa kansiro keyen, Ina yewed apangwat mangyan, kamay yewed maidap sa Diyos angkataw in boote apangwat Diyos. ²⁸ Pidro miplaong kay Isos keyen, Baanda, kanyam wa biyaliwan in boote sa kanyam matang miyanggat sa kaimo. ²⁹ Keyen Isos, Totoo in kangay piyagsabi, no in mangyan agbaliwan kansiyo pagoliyan, kansiyo mga belag, mga koyay, mga bodang, mga agay, panawen sa kangay, osai panawen sa Maal pag Barita, ³⁰ na ngona wa daan pag boway siyo batay piyakan sangdaan ka mga belag, mga inang, mga bodang, mga kobat, kamay batay din piyagpaidapan. Kalbas dogayan siyo batay agkaboway idapo kalobosan. ³¹ Kamay aronaw mga tokaw ngona dogayan apaoriyan, aronaw mga paori ngona dogayan batay manokaw. ³² Kora Isos agonaker sa dalan agtaboy sa Irosalim. Isos tokawan sa kansiro. In mga agadar agsoyo. Agkalimo in mga mangyan agyanggat sa kansiyo. In Labing Dowai piyasoway Isos sa karowan, siyabi sa kansiro in batay mibaloy sa kansiyo keyen, ³³ Baanda, kitam agonaker agtaboy sa Irosalim. Kalbas ako in Bodang Mangyan batay tiyaboy sa mga poon sasirdoti, osai sa mga agpatoldo in mga Batas Diyos. Siro batay maypolongan keyen bonowen, kalbas ako batay tiyaboy sa mga yewed Odyo. ³⁴ Ako kansiro batay piyagmesa, piyagtopayan, piyagbogbog, kalbas biyono. Kamay sa katolo ka ibeng ako batay wakay boway. ³⁵ Pasabangen kay Isos tayari Santiyago, in osai Owan, mga bodang Sibidiyo. Siro keyen, Laki Agpamatoldo, kami nges apo piyagayay sa kaimo. ³⁶ Keyen Isos, Nakay ina? ³⁷ Siro keyen, Dogayan paka kao agpapoon lakoy kami nges patokkawen sa kaimo bangen agtolong sa kaimo agpapoon, in osai sa kaimo pamalang agbangen, in osai sa tagwala agbangen. ³⁸ Kamay keyen Isos, Yewed kanyo atawanan in beet siyabi kanyo piyagayay. Kamo lames batay kabaloy agtiis sa kaidapan kangay batay piyagtiisan? Kamo lames batay kabaloy pasogbo sa kaidapan kataw ako anggan matay? ³⁹ Siro keyen, Kabaloy. Keyen Isos, Kamo batay ngani agtiis sa kaidapan kangay batay piyagtiisan, kamo batay ngani pasogbo sa kaidapan kataw ako, ⁴⁰ kamay yewed sa kangay in agidang no nakay in tomokkaw sa kangay pamalang osai sa kangay tagwala. In Diyos in batay agtaboy ina pag mga tongkolin sa mga piyagsandataan. ⁴¹ In karengey ina in sampo ka agadar siro agalitan sa tayari. ⁴² Matang siro piyasabangen Isos keyen, Kamo katawan in mga piyagawit poon sa mga yewed Odyo, na siro agpansakop. In mga lakonaw, na siro in apo kabaloyan. ⁴³ Kamay kamo ayaw agkataw ina. Kamayba nakay sa kanyo in beet lakonaw, na kailangan siyo kalakoyte. ⁴⁴ No siyo beet agpapoon na kailangan siyo sogowan in boo. ⁴⁵ Angkataw kamayba ako in Bodang Mangyan, kaya atai pataboy yewed matang ako piyagtolong, no yewed matang ako agtolong, osai matang agtaboy kangay boway agpaboway sa karowan. ⁴⁶ Kora Isos rateng sa Iriko. In siyo aglampas wa ista sarig in kansiyo mga agadar, osai aronaw kay amat mangyan, kansiro diyalan apo agtokkaw beleg sa balabaan dalan, agpangayay. In ngaran Bartimiyo, bodang Timiyo. ⁴⁷ In siyo katawan ina pag agdalan Isos taga Nasarit, siyo mango keyen, Isos kasokponan Dabid, ako ayawte. ⁴⁸ Siyo piyangelel in mga mangyan keyen, Ayaw agkasamang, kamay siyo agpango labi kay keyen, Kasokponan Dabid, ako ayawte. ⁴⁹ Isos tomaydek keyen, Siyo beryaen. Kalbas kansiro ngani biyerya in beleg. Siro keyen, Pakaeyaten in kaimo remrem, tomaydek wa, kao piyagberya Isos. ⁵⁰ Kansiyo biyenglay in kansiyo islen, bigla tomaydek, pasabangen kay Isos. ⁵¹ Keyen Isos, Nakay in kaimo beet kangay pangwaten sa kaimo? Keyen in beleg, Laki Agpamatoldo, kangay nges beet ako kangitan wakay. ⁵² Keyen Isos, Kao maal wa panaw. Maal wa kao panawen kao agpasandig sa kangay. Toloy wakay siyo kangitan, miyanggat kay Isos sa dalan.

¹ Kora Isos bangen wa sa Irosalim, sa latayan boksor Olibowan. Piyagrongaw wa in mga bayante Bitpagi osai Bitanya. Piyatokaw Isos in dowai ka agadar, ² keyen, Kamo pataboy ista sa bayan Bitanya. Paka kamo rateng wa toloy kanyo batay ngiitan osai ka asno piyagawit asno piyageket. Siyo bodang kay, idbatang kay siyakayan mangyan. Kanyo lowaten, atai babaen. ³ No apo agsabi sa kanyo keyen nakay batang kanyo piyaglowat, na kanyo sabiyen keyen, Piyagkailangan in Kapwan, toloy wakay din piyagpaoli. ⁴ Kalbas panaw wa in dokalaki, ngiitan ngani in bodang asno sa balabaan dalan piyageket sa sakbawan osai ka balay. In kansiro wa piyaglowat in asno, ⁵ in mga mangyan ista agtaydek keyen, Nakay batang kanyo piyaglowat ina? ⁶ Kansiro siyabi in bilin Isos kalbas siro piyapanaw. ⁷ Biyaba kay Isos in bodang asno, piyadamig sa awak in kansiro mga islen, kalbas Isos somakay. ⁸ Aronaw mangyan agpadamig kansiro mga islen sa kansiyo batay dalan agmaal kay Isos. In kalaati wakay mandodo palongpong sa kobat, piyadamig sa dalan agmaal kay Isos. ⁹ In mga mangyan tokaw kay Isos, osai in sa paoriyan siro agpango keyen, Pagmaalen in Diyos. Kansiyo pabowayen in agrateng apo in kabaloyan in Kapwan. ¹⁰ Pabowayen Diyos in sakopan Dabid, kantam tangona kakoyayan, in sakopan tagoli wakay piyagpangwat. Pagmaalen ngani in Diyos sa ogbos. ¹¹ Isos rateng sa Irosalim, misoroy sa balay lakoy Diyos. Kansiyo wa piyangkit in boote ista, kalbas siyo lomabo, moli wakay sa Bitanya, sarig in Labing Dowai, angkataw ina yabi wa. ¹² Goribas wakay in siro agoli wakay batang sa Bitanya, agkayawes wa Isos. ¹³ Kansiyo ngiitan sa adayonaw osai ka poon igos daonan. Siyo pasabangen, ina piyangkit no nges apo raweg. Kamay idapo ngiitan, no yewed mga daon waget, kataw ina yewed kay betek panggalem igos. ¹⁴ Kalbas kansiyo siyabi sa poon igos keyen, Sogod ngona idapo wa batay mamangan raweg sa kaimo. In kansiyo mga agadar karengey ina pag siyabi. ¹⁵ Siro rateng wakay sa Irosalim, Isos misoroy sa balay lakoy Diyos. Kansiyo piyamoyaw in mga asin agpamabili, osai in mga agpamili sa galem balay lakoy Diyos, piyanligan in mga lamisa in mga agpamariya kowarta, osai in mga pagpanokkawan in mga agpamabili bantog kalapati. ¹⁶ In mga agbaba waget palnowan, kansiyo piyagayaw agpandalan sa galem balay lakoy Diyos. ¹⁷ Kansiyo piyatoldo in mga mangyan keyen, Apo siyolat sa mga Agisolat keyen, Keyen in Diyos, In kangay balay batay piyagawit balay pagpandalanginan sa boo mga mangyan. Ina in siyabi kamay anda pag balay kanyo piyangwat pagpatagowan mga agpanakaw. ¹⁸ Paka karengey ina in mga poon sasirdoti osai in mga agpatoldo in mga Batas Diyos, siro agpamangkit padalan matang Isos mabono, angkataw siro agkalimo sa kansiyo, panawen in boo mga mangyan agsoyo sa kansiyo piyagpatoldo. ¹⁹ Kalbas yabi wa Isos panaw wakay sa bayan, kadayo in kansiyo mga agadar. ²⁰ Goribas wakay siro domalan wakay sa poon igos, kansiro ngiitan matay wa gayed. ²¹ Kay Pidro riyemrem in siyabi kaponi Isos, matang siyo keyen, Laki Agpamatoldo, kaimo pangkiten, matonga wa in poon igos, in kaimo siyompa. ²² Keyen Isos, Kamo agpasandig wa sa Diyos. ²³ Totoo in kangay piyagsabi sa kanyo, no in mangyan agsabi atai pag boksor keyen panaw wa kao asin, kao somogbo wa sa dagat, na no siyo maniwala keyen batay ngani mibaloy in kansiyo siyabi, no yewed piyagbaslag in kansiyo remrem, na in kansiyo yaayay batay tiyaboy Diyos sa kansiyo, batay ngani mibaloy. ²⁴ Matang kangay piyagsabi sa kanyo keyen, No kamo agpandalangin apo piyagayay na maniwala kamo keyen, Ina tiyaboy wa, na batay ngani tiyaboy sa kanyo. ²⁵ No kamo agpandalangin na libangawen wa in mga daet piyangwat sa kanyo, matang in kanyo mga daet liibangaw din in kantam Amang sa langit. ²⁷ Kora Isos pataboy wakay sa Irosalim. In siyo agipanawan sa balay lakoy Diyos, siyo piyasabangenan in mga poon sasirdoti, osai in mga agpatoldo in mga Batas Diyos, osai in mga koyay. ²⁸ Siro keyen, Nakay in kaimo kabaloyan agpangwat ina pag mga kataw ina? Nakay in agsogo sa kaimo agpangwat? ²⁹ Keyen Isos, Ako din apo tanong sa kanyo. No kamo kasagot in kangay, na kangay batay din piyagsabi sa kanyo no nakay in agsogo sa kangay agpangwat ina pag mga kataw ina. ³⁰ In Owan agpamaotismo, nakay in agsogo sa kansiyo, no in Diyos, no in mga mangyan? Amba, nakay in kanyo sagot? ³¹ Kalbas siro wakayte agpaypolongan keyen, No kitam keyen in Diyos, na isag siyo keyen, Na nakay batang kamo yewed maniwala kay Owan? ³² Kamay no kitam keyen in mangyan, ai ... Siro agkalimo sa mga mangyan, angkataw sa remrem in boo mangyan Owan osai ka poropita. ³³ Matang kansiro siyabi kay Isos keyen, Kami yewed katawan. Siyabi wakay Isos sa kansiro keyen, Na ako din idbatay agsabi sa kanyo no nakay in agsogo sa kangay agpangwat ina pag mga kataw ina.

¹ Isos agaway agiplaong sa mga mangyan, kamay ngona in kansiyo siyabi sa mga alimbawa. Siyo keyen, Apo osai ka mangyan agtogda sa kansiyo alamanan mga balagen piyagawit obas. Kansiyo yaalabat. Kalbas siyo agkali sa bato pesaan raweg, agtadyok paltawan batay pagdamayan. Kalbas kansiyo piyaalapet in obasan sa mga mangyan, siyo pataboy sa adayonaw pag kobat. ² Paka kaobasen wa, in kapwan agsogo osai ka mangyan, komwa nges sa mga agalapet in kansiyo bagiyan. ³ Kamay in sogowan diyakep in mga agalapet, biyogbog, piyaoli idapo piyagbaba. ⁴ In kapwan agsogo wakay osai, kamay siyo kansiro siyampek sa olo, piyangwatan wano daet. ⁵ Kansiyo wakay siyogo osai kay, kadogay kansiro biyono. Aronaw kay in kansiyo siyogo, kamay kataw daan din ina in kansiro piyangwat, in kalaati biyogbog in kalaati biyono. ⁶ Osai waget in maal kay kansiyo piyagsogo sa kansiro, in kansiyo piyagpakayawte pag bodang. Siyo in paori piyataboy. In kansiyo remrem keyen, Kansiro batay piyagmaal in kangay bodang. Keyen in kansiyo bait. ⁷ Kamay in mga agalapet obasan maypolongan keyen, Anda wa in batay kapwan dogayan. Na dali, bonowen wa, matang kantam wa dogayan in batay nges kansiyo kobat. ⁸ Kalbas siyo kansiro ngani diyakep, biyono, biyenglay sa awak alabat. ⁹ Na nakay in batay piyangwat in kapwan obasan? Siyo batay ista pataboy, batay kansiyo piyamono ina pag mga agalapet, kalbas in obasan batay piyaalapet sa roma wakay pag mga mangyan. ¹⁰ Yewed kay mana kanyo biyasa in sa mga Agisolat keyen, In bato in piyangidangan in mga agtadyok balay, na ina wa mibaloy in lakonaw sa boo. ¹¹ Ina in Kapwan in agpangwat. Ina makasoyo sa kantam. ¹² In mga poon Odyo katawan wa siro in piyagtamaan kansiyo alimbawa matang Isos kansiro nges piyagdakep. Kamay siro agkalimo sa mga mangyan, matang siro idapo piyangwat sa kansiyo. Siro panaw wa. ¹³ Apo mga Parisiyo, osai mga agiyagem kay Irodis siro siyogo in mga poon kay Isos matang nges siyo abel sa kansiyo agiplaong. ¹⁴ Siro pasabangen sa kansiyo, siyabi keyen, Laki Agpamatoldo, kanyam atawanan kao betek, kao idapo piyagdowai in piyagsabi, kataw in boo mga mangyan tikkatawan sa kaimo pangkit. Totoo in kaimo piyagpatoldo in mga ogali piyagpamangkit Diyos sa mga mangyan. Na nakay in maal sa mga Batas, no agbayad bowis sa poon lakoy Sisar no ayaw wa? ¹⁵ Maal lames in agbayad bowis? Nakay, ayaw? Kamay Isos katawan siro agpakagwali waget, matang siyo keyen, Nakay batang ako kanyo nges piyagkabel? Ako paatangen osai ka kowarta bakal, ako papangkiten. ¹⁶ Kalbas siyo piyaatang. Isos keyen, In rarawan atai, nakay pag mangyante? Kay nakay ngaran in atai agisolat? Siro keyen, Kay Sisar. ¹⁷ Isos keyen, Na kantam taboyen kay Sisar in sa kansiyo, osai in sa Diyos sa kansiyo. Kalbas siro agsoyo kay Isos. ¹⁸ Apo mga Sadosiyo pasabangen kay Isos. In mga Sadosiyo keyen in mga matay idbatay boway wakay. ¹⁹ Siro keyen kay Isos, Laki Agpamatoldo, siyolat Mowisis sa kantam keyen, No apo taybalang matay in lalaki idapo kay bodang, na kailangan in babai kowaen wakay in kansiyo belag. No apo bodang na paapowen sa ngaran in matay. ²⁰ Na, apo osai ka tayariyan pito ka kaliyakiyan. Taybalang in panganay, kalbas matay, idapo bodang. ²¹ Miskapet wakay sa balo in waraan, matay wakay idapo din bodang. Kataw daan ina in mibaloy sa katolo, osai sa mga paori kay. ²² Ina boo miskapet asin pag kagbaiyan. Ina pag pito ka tayariyan, siro boo matay idapo bodang. Kalbas matay wa din in kagbaiyan. ²³ Na sa dogayan pag boway asin pag pito nakay in batay kansiyo lalaki? Angkataw kansiyo wa liyalaki siro boo. ²⁴ Keyen Isos, Kamo somala lakoy, angkataw yewed kanyo atawanan in mga Agisolat, osai in kabaloyan Diyos. ²⁵ Angkataw sa dogayan pag boway in mga mangyan idbatay wa taybalang. Siro kataw wa mga angil sa langit. ²⁶ No ngani kanyo piyagpanremrem no batay wakay piyaboway in mga matay, na basaen in siyolat Mowisis sa betek apo in poon yangawte agigang. Asin apo siyabi in Diyos kay Mowisis keyen, Ako in Diyos in piyagmaal Abraam, Isaak, osai Akob. ²⁷ Na no kora Abraam agmaal sa Diyos na in beet siyabi kamayba siro matay siro boway wakay. Kamo somala lakoy. ²⁸ Osai ka agpatoldo in mga Batas Diyos karengey in siro agpalsisagotan. Kansiyo remrem maal in sagot Isos sa mga Sadosiyo, matang siyo pasabangen kay Isos keyen, Nakay pag Batas in lakonaw? ²⁹ Isos keyen, Anda in lakonaw pag Batas, in keyen, Laki kasokponan Israil mamarengey, in Kapwan kantam Diyos, siyo waget in Kapwan. ³⁰ Pagmaalen in Kapwan kantam Diyos in boo kantam galem, in boo abyan, osai in boo remrem, osai in boo eyat. ³¹ Anda wakay in kadowai, kitam agpakayawte sa roma mangyan kataw daan in agpakayawte sa kantam sadiri. Idapo wa roma Batas labi kay kalakoy asin pag dowai. ³² In agpatoldo in mga Batas Diyos keyen, Betek ngani, laki Agpamatoldo. Totoo ngani in kao keyen osai waget in Diyos. Idapo wa roma no yewed siyo waget. ³³ No kitam boo galem, boo remrem, boo eyat agmaal sa Diyos, osai agpakayawte sa kapwa kataw in sa kantam sadiri, na ina labi kay lakonaw sa agtaboy mga ayop piyagsonog, osai in mga ayop piyagbono piyagtaboy sa Diyos. ³⁴ Ngiitan Isos maalen in kansiyo sagot, matang siyo keyen, Kao bangen wa mipaagem sa mga piyagsakop Diyos. Sogod asin idapo wa kapangaas agtanong kay Isos. ³⁵ In Isos agpatoldo sa balay lakoy Diyos, siyo keyen, Nakay batang piyagsabi in mga agpatoldo in mga Batas Diyos keyen, In Kiristo kasokponan Dabid? ³⁶ Bago Dabid wa daan in agsabi batang sa Betek pag Abyan keyen, Siyabi in Kapwan sa kangay Kapwan keyen, Tomokkaw wa kao sa kangay pamalang agbangen, Kao kangay bisi anggan in mga aglaban sa kaimo boo wa kangay piyasakop sa kaimo. ³⁷ Dabid wa daan in agawit kay Kiristo keyen Kapwan. Na nangkataw ngani batay masabi siyo kasokponan Dabid? In karowan mangyan agkasadapan agparengey kay Isos. ³⁸ In Isos agpatoldo siyo keyen, Kamo agingat sa mga agpatoldo in mga Batas Diyos. Siro agkasadapan aglambong maaba in siro agipanawan, osai beet siro piyagpakalakonaw in mga mangyan sa mga bayan. ³⁹ In kansiro din beet in mga maal pag panokkawan sa mga balay pagpaniponan. Beet siro tokaw piyakan sa mga piyasta. ⁴⁰ Siro agpapangkit sa mga mangyan siro agpandalangin dogay kamay siro agpanggolpi sa mga kagbaiyan balo. Maloba in batay parosa sa kansiro. ⁴¹ Isos tomokkaw sa balay lakoy Diyos sa bangen pagpanyanganan andog. Kansiyo piyagriwa in mga mangyan agtaboy kowarta. Aronaw in mga mayaman agtaboy lakonaw. ⁴² Pasabangen wakay in osai ka kagbaiyan balo maidap, siyo agtaboy dowaite ka kowarta, in kalakoyen osai ka sintimos. ⁴³ Kay Isos piyasabangen in kansiyo mga agadar keyen, Kangay piyagsabi sa kanyo ina pag balo maidap, kansiyo tiyaboy lakonaw kay sa boo mga tiyaboy. ⁴⁴ Angkataw siro boo, kansiro tiyaboy in idwa kansiro kailangan, kamay ina pag balo, ka mayba maidap wano, kansiyo tiyaboy in boo kansiyo pangkowa pamangnen.

¹ In Isos aglabo wa sa balay lakoy Diyos siyabi sa kansiyo in osai ka agadar keyen, Laki Agpamatoldo, kao mangkit, in kalakoyen anda pag balay, in pangkalakoyen in mga bato piyabengbeng atai sa balay lakoy Diyos. ² Keyen Isos, Kaimo piyagngitan in kalakoyen ina pag mga balay. Ina dogayan idapo batay mitera bato asina agisapaw sa kansiyo pagaponan bato, in boo mga bato batay piyagpanligan. ³ In kora Isos agtokkaw sa boksor Olibowan, kansiro piyagngitan in balay lakoy Diyos. Kalbas kora Pidro, osai Santiyago, osai Owan osai Anris, miplaong sa kansiyo idapo roma karengey. Siro keyen, ⁴ Nangkadogay kay batay mibaloy ina pag kaimo siyabi? Nakay in tandaan no bangen wa mibaloy ina pag boo? ⁵ Siyabi Isos sa kansiro keyen, Kamo agingat, karam kamo batay piyadaya mangyan. ⁶ Angkataw aronaw batay atai agalapet kangay ngaran keyen siro in Kiristo. Kalbas kansiro batay piyaglibangaw in karowan. ⁷ Kamo ayaw agkalimo kamayba kamo karengey agaleng mga aggira, osai mga barita mga gira. Kailangan ngani mibaloy ina pag mga kataw ina, kamay yewed kay toloy rateng in kalobosan. ⁸ Angkataw osai ka tiribo batay aglaban sa osai ka tiribo, osai ka sakopan batay aggira sa osai ka sakopan. Osai batay apo mga loni sa aronaw kobat, apo batay agkayawes. Kamay in mga kaidapan kataw ina parakayan kay waget agpalowas in maal pag kabetek. ⁹ Pakaeyaten kamo in agpasandig sa Diyos, angkataw kamo batay piyadakep, piyagosap mga poon, kamo batay piyagbogbog sa mga balay pagpaniponan. Panawen kamo sa kangay kamo batay piyagpaadap sa mga gobirnador, sa mga poon lakoy. Na kamo kasabi sa kansiro in Maal pag Barita. ¹⁰ Bayo rateng in kalobosan kailangan piyatoldo in Maal pag Barita sa boo kobat. ¹¹ Paka kamo diyakep batay piyagosap, na kamo ayaw agpanremrem no nakay in kanyo batay matiwid. Asin betek kanyo sabiyen in piyatoldo sa kanyo in Betek pag Abyan angkataw siyo wa in agiplaong, idwa kamo. ¹² In belag daan in batay agpadakep kansiyo belag matang biyono, in amang daan in batay agpadakep kansiyo bodang, matang biyono. In mga bodang batay labanan agpabono sa mga koyay. ¹³ Kamo batay piyagkabaisan in boo, panawen kamo sa kangay. Kamay in agyanggat sa kangay anggan sa kalobosan, na siyo in batay piyaboway. ¹⁴ Isos agiplaong kay keyen, Kanyo batay piyagngitan agitadyok sa piyagayaw pagtadyokan in makasoka sa Diyos. (In beet siyabi ina kailangan atawanan in agbasa.) Na no ina mibaloy wa, na in mga sa Odiya domalagan wa pataboy sa mga boksor. ¹⁵ In sa ogbos balay toloy lomabo, ayaw wa komwa kamayba nakay sa kansiyo balay. ¹⁶ In sa agay ayaw wa moli matang komwa kanyo islen. ¹⁷ Asin pag mga ibeng ayawte in mga bonting osai in mga agpasoso. ¹⁸ Kanyo pandalanginen ina pag mga kataw ina ayaw mibaloy sa betek pangodan. ¹⁹ Angkataw asin pag betek batay apo lakonaw wano pag kaidapan, sogod piyangwat in Diyos in kobat anggan ngona idapo kay batang kaidapan kalakoy ina. Idapo wakay din batay kalakoy ina kamayba wa nangkadogay. ²⁰ No ina pag betek yewed piyakadogayte in Diyos na idapo mangyan batay mapaboway. Kamay panawen sa kansiyo mga iidang kansiyo ngani piyakadogayte. ²¹ Kalbas no apo agsabi sa kanyo keyen, Atai wa in Kiristo, no keyen, Asina wa siyo, na kamo ayaw maniwala. ²² Angkataw batay apo lomwas mga agpakagwali Kiristo, mga agsabi keyen siro poropita. Siro batay agpapangkit mga tandaan, mga makasoyo, matang nges liibangaw kadayo in mga iidang in Diyos. ²³ Na kamo agingat wa. Baina, kangay wa piyatokaw siyabi sa kanyo in boote. ²⁴ Paka kadalan ina pag kaidapan batay lomened in ibeng idbatay agrawa in bolan. ²⁵ Batay agpangaragrag in mga magirem batang sa langit. Batay piyagpagolo in mga apo kabaloyan sa kiwang. ²⁶ Ako in Bodang Mangyan batay piyagngitan sa mga libo, agrateng apo kabaloyan lakoy, agrawa lakoy. ²⁷ Kangay batay piyagsogo in mga angil sa boo kobat matang piyagtipon in mga iidang Diyos batang sa boo mga kobat. ²⁸ Isos keyen kay, Kanyo remremen in alimbawa in poon igos. No ina mandaon wakay na kanyo atawanan bangen wa in pangibeng. ²⁹ Na kataw daan ina, no kanyo ngiitan agpangibaloy wa ina in kangay mga siyabi, na kanyo batay atawanan bangen wa in kabetek in ako atai agtaboy, agrateng wa. ³⁰ Kanyo remremen. Ina pag boote batay wa mibaloy bayo matay in boo mga mangyan agkaboway ngona. ³¹ Agkaidapo in langit osai in kobat kamay in kangay mga agiplaong idbatay ngani maidapo. ³² Isos keyen kay, Ina pag ibeng, ina pag kabetek in agrateng ina, idapo katawan kamayba in mga angil sa langit, kamayba ako in Bodang. Dayem in Amang, siyo waget in katawan ina. ³³ Kamo agingat, agdamay, angkataw yewed kanyo atawanan no nangkadogay ina batay rateng. ³⁴ Ina kataw osai ka mangyan batay panaw pataboy sa adayonaw pag kobat, piyaalapet in kansiyo pagoliyan sa mga sogowan. In baatte osai kansiyo piyakan panawen, in agdamay sa sakbawan kailangan baatte sandata sa kansiyo wakay agrateng. ³⁵ Na kamo kataw daan ina, kailangan baatte sandata, angkataw yewed kanyo atawanan no nangkadogay batay rateng in kapwan balay, no bayapon, no kagwaraan yabi, no panalaok wa manok, no omaga. ³⁶ Karam siyo toloy rateng, kalbas kamo aratengan agesek. ³⁷ In kangay piyagsabi sa kanyo, kangay piyagsabi sa boo mangyan keyen, Agsandata wa kamo.

¹ Sabali wa in pista piyagawit Paskowa, in piyagkoman tinapay idapo pamaistobo, na osai in mga poon sasirdoti osai in mga agpatoldo in mga Batas Diyos, siro agpolong agpamangkit padalan agdakep kay Isos in idbatay atawanan in mga mangyan, kalbas siyo batay piyagbono. ² Siro keyen, Ayaw wa sa betek piyasta, karam magolo in mga mangyan. ³ In betek Isos sa bayante Bitanya sa balay Simon in batang apo kagwali panyakit, in betek siyo agkoman, apo rateng osai ka kagbaiyan agbaba pagsoroyan piyangwat batang bato lakonaw in bayad, ina makno pamada piyagawit nardo, lakonaw wano in bayad. Kansiyo biyaslag in botilya, in langis biyobo sa kay Isos olo. ⁴ Kamay apo asin mga abaisan, agpalpansabi keyen, Nakay batang siyayang waget in langis? ⁵ Bago nges no piyabili na in bayad labi kay tolo ka daan ka ibeng agpanawen, maal nges tiyaboy sa mga maidap. Kalbas kansiro piyangelel in kagbaiyan. ⁶ Kamay keyen Isos, Nakay batang siyo kanyo piyagpangelel? Siyo ayaw agladowen. Maalen in kansiyo piyangwat sa kangay. ⁷ Palagi daan agyanggat sa kanyo in mga maidap. Kamayba nangkadogay no kanyo beet na kamo katolong kansiro. Kamay ako yewed agyanggat sa kanyo anggan dogayan. ⁸ Piyangwat in kagbaiyan in kansiyo abaloyan. Kaya ako kansiyo biyobowan langis matang in kangay bilog piyagsandata batay liyebeng. ⁹ Totoo in kangay piyagsabi, kamayba saano piyatoldo in Maal pag Barita na batay din piyagawit ina in kansiyo piyangwat matang siyo idbatay alibangawan. ¹⁰ In osai sa Labing Dowai ka agadar Odas Iskaryoti. Siyo pataboy sa mga poon sasirdoti keyen, Isos kangay batay piyadakep sa kanyo. ¹¹ Siro agkaanggay asin pag siyabi, matang siro mangako siyo pakanen kowarta. Sogod asin Odas agpamangkit padalan agpadakep kay Isos. ¹² In tokaw pag ibeng piyasta in piyagawit tinapay idapo pamaistobo, in ibeng piyagbono in mga bodang topa sa Paskowa, in kansiyo mga agadar keyen kay Isos, Saano lames in kaimo beet kami agsandata kaimo Yapon sa Paskowa? ¹³ Kansiyo siyogo in dowai ka agadar keyen, Kamo ista pataboy sa bayan, apo batay tomagbo sa kanyo osai ka kaliyakiyan agbaba galon sapa. Kamo asina wa miyanggat. ¹⁴ Kalbas no sa nakay pag balay siyo monaik, kanyo sabiyen sa kapwan balay keyen, In Agpamatoldo agsabi no saano lames in maal siyo mamangan in Yapon sa Paskowa, kadayo in kansiyo mga agadar. ¹⁵ Na kansiyo batay piyatoldo sa kanyo in osai ka lakonaw pag basag sa ogbos, apo din mga sangkap. Ista wa kamo agsandata in boote kantam piyagkailangan. ¹⁶ Panaw wa in dokalaki, pataboy sa bayan. Kansiro ngani ngiitan in boo siyabi Isos. Kalbas kansiro wa siyandata in Yapon sa Paskowa. ¹⁷ Bayapon rateng wa Isos agyanggat in Labing Dowai. ¹⁸ In siro agpamangan wa Isos keyen, Totoo in kangay piyagsabi, in osai sa kanyo in kangay mga sarig agkoman in batay agpadakep sa kangay. ¹⁹ Maypanremrem in mga agadar, baatte osai siro agsabi sa kansiyo keyen, Yewed ako, aon? ²⁰ Isos keyen, Osai sa kanyo in kangay sarig agkoman. ²¹ Ako in Bodang Mangyan batay matay kataw in siyolat panawen sa kangay. Kamay makapangirabot in batay parosa sa mangyan agpadakep sa kangay. Maal kay nges asin pag mangyan no siyo idwa biyodang. ²² In siro agkoman kay, Isos omatang sa tinapay, agpasalamat sa Diyos. Kalbas kansiyo piyandodo, tiyaboy sa mga agadar. Siyo keyen, Anda kanyo kowaen. Anda in kangay bilog. ²³ Kalbas kansiyo yaatang in pagpangineman, agpasalamat din, kalbas tiyaboy sa kansiro. Siro boo malpanginem. ²⁴ Isos keyen, Ina in kangay daya, panrigen sa kasondowan Diyos osai kansiyo mga bodang, kangay daya in batay piyagbobo panawen sa karowan. ²⁵ Totoo in kangay piyagsabi, sogod ngona ako idbatay wa minem in sabaw obas anggan dogayan kangay piyaginem in bayo pag sabaw sa sakopan Diyos. ²⁶ Siro agbaren osai ka awit, kalbas pataboy wa sa boksor Olibowan. ²⁷ Siyabi Isos sa kansiro keyen, Ako batay biyaliwan kamo boo. Kataw in Agisolat keyen, In agalapet topa kangay batay piyagbono, kalbas batay omarabang in mga topa. ²⁸ Kamay paka ako piyaboway wakay, ako batay tokaw sa kanyo sa Galiliya. ²⁹ Pidro keyen, Kamaybawa siro boo agbaliwan sa kaimo, na ako idbatay ngani agbaliwan sa kaimo. ³⁰ Isos keyen sa kansiyo, Totoo ngani, ngona daan pag yabi bayo tomalaok in manok makadowai, ako kaimo batay piyamangyan makatolo wa. ³¹ Kamay Pidro agrigen wano agsabi keyen, Kamaybawa ako biyono kaimo sarig, kao idbatay kangay piyamangyan. In boo agadar kataw din ina. ³² Kora Isos pataboy sa alamanan piyagawit Gitsimani. Siyabi Isos sa kansiyo mga agadar keyen, Kamo atai daan agtokkaw. Ako ista kayte agbangen agpandalangin kay. ³³ Kamay kansiyo piyaanggat Pidro, osai Santiyago, osai Owan. Kalbas agkagolo in kansiyo remrem, malingetnget wano. ³⁴ Siyo keyen, Maloba agrongkot in kangay galem, anggan tomag ako batay wa matay. Kamo atai daan, agdamay. ³⁵ Isos ista kayte, patalegeb sa diya, agpandalangin keyen, No nges maal, na ayaw wa rateng sa kangay in kaidapan. ³⁶ Amang, kangay Amang, kao kabaloy sa boo. Na kaimo alisen anda pag kaidapan sa kangay. Kamay in pangwaten in kaimo daan beet, ayaw in kangay beet. ³⁷ Isos moli wakay sa tolo ka agadar siro mana agesek. Kansiyo siyabi kay Pidro keyen, Aa, laki Simon, kao mana agesek? Kao mana yewed kabaloy agdamay osai waget ka oras? ³⁸ Kamo agdamay wa ngani, mandalangin keyen, Kami ayaw agpatepengen. Sandata wa nges in kanyo remrem, kamay in bilog mainaen. ³⁹ Siyo panaw wakay, mandalangin wakay, kataw daan in siyabi karai. ⁴⁰ Kalbas siyo moli wakay sa kansiyo mga agadar. Agesek daan din, angkataw siro maloba wano agkaesek. Siro idapo wa masabi kay Isos. ⁴¹ In sa katolo wa siyo moli siyo keyen, Kamo mana aglimbang kay, agesek daan? Sibay wa. Ngona wa in kabetek, in ako in Bodang Mangyan batay tiyaboy sa kabaloyan in mga daet pag mangyan. ⁴² Tomaydek wa, kitam wa. Anda wa in batay agpadakep sa kangay. ⁴³ Isos agiplaongan kay, toloy wa rateng Odas, in osai sa Labing Dowai, agyanggat in karowan agpalpamaba mga pisaw lakoy osai mga garoti. Siro siyogo in mga poon sasirdoti, osai in mga agpatoldo in mga Batas Diyos, osai in mga koyay. ⁴⁴ In agpadakep kay Isos batang agsabi sa mga batay agdakep keyen, In kangay isag kiyapet, ina wa in kanyo piyagpamangkit. Kanyo dakepen, babaen. Ayaw galot in agdamay. ⁴⁵ Paka rateng Odas siyo toloy pasabangen kay Isos, miplaong keyen, Laki Agpamatoldo. Kalbas Isos kiyapet. ⁴⁶ Kalbas Isos siyonggaban in karowan, diyakep. ⁴⁷ In osai ka agadar aglakso kansiyo pisaw lakoy, piyalang in sogowan in mabwat pag poon sa mga sasirdoti, yaagis in talinga. ⁴⁸ Kalbas siyabi Isos sa mga mangyan keyen, Kamo nakay, keyen ako agpanakaw? Baina, kamo malitaboy atai agbaba mga pisaw lakoy mga garoti matang ako diyakep. ⁴⁹ Bago ibengibeng daan ako sa balay lakoy Diyos agpatoldo. Kamo ista din, kamay ako yewed kanyo diyakep. Kamay kailangan mibaloy in Agisolat. ⁵⁰ Kalbas in boo mga agadar domalagan wa, Isos biyaliwan. ⁵¹ Miyanggat kay Isos osai ka begle, idapo lambong, agislen waget benang. Siyo diyakep nges in mga mangyan, ⁵² kamay biyenglay wa in islen, domalagan idapo damit. ⁵³ Isos kansiro biyaba sa balay in mabwat pag poon sa mga sasirdoti. Agkatipon ista in boo mga poon sasirdoti, osai in mga koyay, osai in mga agpatoldo in mga Batas Diyos. ⁵⁴ Pidro mangagak sa kansiyo, kamay adayonaw in paywaraan, anggan sa tongkodan balay, agpaagem sa mga agdamay, agtokkaw, agpanayang sa baya. ⁵⁵ In mga poon sasirdoti, osai in mga tanongan in mga Odyo agpamangkit dailan matang Isos batay mabono, kamay siro idapo ngiitan. ⁵⁶ Aronaw nges in agpabintang sa kansiyo, kamay yewed tikkatawan in siyabi. ⁵⁷ Kalbas apo mga tomaydek agpabintang keyen, ⁵⁸ Kami karengey kansiyo siyabi keyen, Kangay batay piyagregnas anda pag balay lakoy Diyos in piyangwat mangyan. Kalbas tolo waget ka ibeng ako agtadyok wakay osai, yewed mangyan in agpangwat. ⁵⁹ Kamaybawa kataw ina yewed daan tikkatawan in kansiro mga siyabi. ⁶⁰ Tomaydek sa kagwaraan tiponan in mabwat pag poon sa mga sasirdoti, miplaong kay Isos keyen, Nakay batang kao idbatay meles? Nangkataw sa kaimo ina pag mga sombong kataw ina? ⁶¹ Kamay Isos yewed miplaong, idapo siyabi kamayba nakay. Tagoli wakay siyo tiyanong in mabwat pag poon sa mga sasirdoti keyen, Kao lames in Kiristo, in Bodang Diyos in Piyagmaal? ⁶² Isos keyen, Ako ngani. Kanyo batay ngiitan in Bodang Mangyan agitokkaw sa pamalang agbangen in Apo Kabaloyan sa boo, kanyo batay piyagngitan agrateng sa mga libo sa langit. ⁶³ Kalbas toloy wa agalitan in mabwat pag poon sa mga sasirdoti anggan kansiyo wa riyognit in kansiyo daan lambong. Siyabi keyen, Idwa kantam kailangan in mga pasaen. ⁶⁴ Kamo karengey wa din in siyo agpakagwali Diyos. Nakay in kantam polong? Siro boo malsiyayonan keyen, Kailangan siyo bonowen. ⁶⁵ Isos piyanopayan in kalaati. Tiyabon in mata, kalbas piyanontok, toloy tiyanong keyen, Kaimo sabiyen, Nakay in somontok sa kaimo? Siyo piyanampal din in mga agdamay. ⁶⁶ Kamay Pidro baywi kay sa tongkodan. Apo osai ka kagbaiyan lomwas, siyo sogowan in mabwat pag poon sa mga sasirdoti. ⁶⁷ Ina pag kagbaiyan kangitan kay Pidro agpanayang sa baya. Kansiyo riyoris gayed, keyen, Kao din sarig ina pag Isos in taga Nasarit. ⁶⁸ Kamay Pidro tomanggi keyen, Yewed kangay atawanan, ako yewed katawan in kaimo beet siyabi. Siyo pataboy wa sa sakbawan alabat. Tomalaok wa in manok. ⁶⁹ Asina Pidro ngiitan wakay in sogowan kagbaiyan. Siyabi in kagbaiyan sa mga asin keyen, Ina pag mangyan sarig ngani kora Isos. ⁷⁰ Kamay Pidro tomanggi wakay. Dogay wakayte siyabi wakay kay Pidro in mga asin agtaydek keyen, Soo, kao din ngani osai ka sarig kora Isos. Baina kao din taga Galiliya. ⁷¹ Kamay Pidro keyen, Kamayba wakayno sa langit, ako yewed ngani katawan ina pag mangyan. ⁷² Kalbas tomalaok wakay in manok. Pidro toloy wakay karemrem in siyabi Isos sa kansiyo keyen, Bayo makadowai tomalaok in manok, ako makatolo kaimo batay piyamangyan. Kalbas siyo toloy manangis wa lakoy.

¹ Paka omaga wa toloy maypolongan in mga poon sasirdoti, osai in mga koyay, kadayo in mga agpatoldo in mga Batas Diyos, osai in amat kay pag mga tanongan. Kalbas Isos kansiro piyabakos, biyaba kay Pilato. ² Siyabi Pilato sa kansiyo keyen, Kao lames in Poon lakoy mga Odyo? Isos keyen, Kao wa in agsabi. ³ Karowan pag sombong kay Isos in siyabi in mga poon sasirdoti. ⁴ Pilato keyen kay, Nakay batang kao idbatay meles? Kao karengey in kalobaen in kansiro mga sombong sa kaimo. ⁵ Kamay Isos yewed din meles, matang Pilato agsoyo. ⁶ In ogali Pilato baatte piyasta Paskowa siyo agpalpas osai ka bilanggo, no nakay in iidang in mga mangyan. ⁷ Ina pag betek apo mangyan piyagbilanggo in ngaran Barabas. Barabas osai in kansiyo mga sarig, siro mga ribildi, mga batang agbono mangyan sa agpalawayan lakoy. ⁸ Kalbas in mga mangyan pasabangen miplaong kay Pilato keyen, Pangwaten wa in kaimo ogali agpalpas bilanggo. ⁹ Siyo keyen, Nakay, kanyo beet kangay wa palpasen Isos in Poon lakoy mga Odyo? ¹⁰ Pilato katawan kaya Isos piyaadap sa kansiyo in mga poon sasirdoti angkataw siro agpanagiri kay Isos. ¹¹ Kamay in mga mangyan piyangolokan in mga poon sasirdoti keyen, Barabas wa in ayayen. ¹² Siyabi Pilato keyen, Na no kataw ina nakay wa in kangay pangwaten atai pag mangyan in kanyo piyagawit Poon lakoy mga Odyo? ¹³ Kalbas mango in mga mangyan keyen, Pakowen wa sa kodos. ¹⁴ Keyen Pilato, Nakay batang? Nakay in kansiyo piyangwat daet? Kamay labi kay malpangowan in mga mangyan keyen, Pakowen wa sa kodos. ¹⁵ In beet Pilato in mga mangyan anggayan, matang kansiyo piyalpas Barabas. Isos kansiyo piyabogbog, kalbas tiyaboy wa sa mga sondalo matang piyako sa kodos. ¹⁶ Isos biyaba in mga sondalo sa galem in tongkodan in balay lakoy gobirnador. Kansiro tiipon in boo barkadaan mga sondalo. ¹⁷ Isos kansiro siyoroyan osai ka lambong mapola wano. Siro agsolapid balagen dogiyen, piyasarikaw sa kansiyo. ¹⁸ Siro agpakagwali agmaal sa kansiyo. Siro keyen, Boway wa in Poon lakoy mga Odyo. ¹⁹ Kalbas Isos piyamogbog oway sa olo, piyanopayan. Siro agpaselang kagwali agdaing sa kansiyo. ²⁰ Paka siro kalbas wa agmesa sa kansiyo, kansiro wakay kiyowa in mapola wano, siyoroy wakay in kansiyo lambong, piyapanaw wa, batay piyako sa kodos. ²¹ Sa dalan wa kansiro atagbo osai ka kaliyakiyan, in ngaran Simon taga Sirini, amang Aliyanro osai Ropo. Siyo piilitan in mga sondalo keyen, Babaen kao in kay Isos kodos. ²² Isos kansiro biyaba sa kobat piyagawit Golgota, in beet siyabi bitol olo. ²³ Isos piyakan nges alak piyaageman gamot piyagawit mira, kamay siyo dayo minem. ²⁴ Isos kansiro piyako sa kodos. Kalbas in agbagi kansiyo mga damit, in mga sondalo agpostaan matang atawanan no nakay in batay kabel ina. ²⁵ Omaga kay in ibeng in Isos piyako sa kodos. ²⁶ Apo siyolat sa kansiyo ogbos in sombong sa kansiyo keyen, In Poon lakoy mga Odyo. ²⁷ Dowai ka ribildi piyako sa mga kodos bangen kay Isos, in osai sa pamalang agbangen, in osai sa tagwala agbangen. ²⁹ Isos piyamalowasan in mga agpaypanlawey, aglinglingay, agsabi keyen, Aas, kao pag batay kono agregnas in balay lakoy Diyos, kalbas tolo waget ka ibeng tagoli wakay mipangwat. ³⁰ Amba, kao lompot wa sa kodos, pabowayen in kaimo bilog. ³¹ Kadayo din in mga poon sasirdoti agpatawa sa kansiyo, osai in mga agpatoldo in mga Batas Diyos, agpalpansabiyan keyen, Siyo kono agpaboway sa mga amat, kamay in kansiyo bilog yewed kansiyo apaboway. ³² No kantam ngani ngiitan siyo lompot sa kodos na kantam atawanan siyo in Kiristo in Poon lakoy mga kasokponan Israil, na kitam maniwala wa sa kansiyo. Kadayo din in kansiyo mga sarig agipako sa mga kodos, siro agpamalowas din sa kansiyo. ³³ Tangali wa in ibeng malened wa in boo kobat anggan mangiriyan lakoy. ³⁴ Mangiriyan wa Isos mango lakoy keyen, Iloy, iloy, lama sabaktani? Na in beet siyabi keyen, Kangay Diyos, kangay Diyos, nakay batang ako kaimo biyaliwan? ³⁵ In kalaati asin agtaydek karengey in kansiyo siyabi. Siro keyen, Baina, kansiyo piyagberya Iliyas. ³⁶ In osai toloy domalagan, komwa kagwali lomot, piyaistebek sa tanrak, biyobowan kagwali toba, matang somopsop Isos. Kalbas keyen, Ayaw kay. Kantam pangkiten no rateng Iliyas batay agpalompot sa kansiyo. ³⁷ Isos mango lakoy, kalbas matay wa. ³⁸ In damit pamengbeng sa galem balay lakoy Diyos toloy marognit sa kagwaraan malsoway. ³⁹ In kapitan sondalo agtaydek sa bangen kodos kangitan in Isos matay kataw ina. Matang siyo keyen, Totoo mana ngani ina pag mangyan Bodang Diyos. ⁴⁰ Apo din mga kagbaiyan sa adayonaw agriwa. Kadayo Mariya taga Magdala, kadayo Salomi, kadayo Mariya inang tayari Santiyagote osai Osi. ⁴¹ Tangona daan sa Galiliya siro agyanggat wa kay Isos agtolong. Asina din in amat kay pag mga kagbaiyan in mga batang sarig Isos in siyo agonaker agtaboy sa Irosalim. ⁴² - ⁴³ Ina ibeng agsandata, goribas wa in Ibeng Pamainga. Panawen agkabayapon wa kaya Osi pataboy kay Pilato, maeyat in remrem agayay in bilog Isos. Ina Osi taga Arimatiya. Siyo osai ka tanongan in mga Odyo piyaglakonaw in mga mangyan. Siyo agpanaya din sa kabetek in Diyos agpapoon. ⁴⁴ Pilato agsoyo keyen, Nakay, matay wa mana? Matang kansiyo piyaberya in kapitan sondalo, keyen, Nakay, matay wa ngani Isos? ⁴⁵ Keyen in kapitan, Matay wa ngani. Matang keyen wakay Pilato kay Osi, Na dali wa, kaimo wa kowaen in bilog. ⁴⁶ Kalbas Osi bomili benang lino. In bilog Isos kansiyo piyalompot, tiyeem sa benang, piyabolalang sa leyang kiyali sa bato lintoy lakoy. Kalbas in sakbawan biyengbeng wakay bato lakoy. ⁴⁷ Mariya taga Magdala agriwa osai Mariya inang Osi. Kansiro ngiitan no saano in aglebeng kay Isos.

¹ Sabado in Ibeng Pamainga, paka malabo wa in ibeng, Mariya taga Magdala, osai Salomi, kadayo Mariya inang Santiyago, siro bomili pamada, batay piyagyodyod sa bilog Isos. ² Kalbas Linggo omaga, lomwas wa in ibeng, siro pataboy sa lebengan. ³ Sa dalan kay siro agpanggisodan keyen, Nakay lames isag in kantam batay agkowa in bato agibengbeng sa lebengan? ⁴ Kaya siro keyen angkataw ina lakonaw lakoy. Kadogay kansiro piyangkit, kiyowa wa mana in bato, agiboswang wa in sakbawan. ⁵ Siro misoroy sa lebengan kalbas kansiro ngiitan osai ka begle agtokkaw sa kansiro agbangen pamalang. In lambong maaba, maboksi wano. Siro alimowan. ⁶ Keyen in kaliyakiyan, Ayaw agkalimo. Kanyo piyagpamangkit Isos taga Nasarit, in piyako sa kodos. Siyo idapo wa atai, siyo boway wakay. Baanda in kansiyo batang pagibolalangan. ⁷ Ngona kamo panaw wa. Kanyo sabiyen sa mga agadar, labi wa kay Pidro, keyen, Isos tokaw sa kanyo sa Galiliya. Ista siyo kanyo batay ngiitan, kataw in kansiyo siyabi sa kanyo. ⁸ Kalbas siro panaw wa sa lebengan, domalagan, panawen siro maloba wano agkalimo. Ina idwa siyabi kamayba kay nakay panawen siro agkalimo. ⁹ Isos boway wakay pasodip sa ibeng Linggo. Siyo tokaw papangkit kay Mariya taga Magdala. Pito ka mamaw tangona in biyoyaw Isos asin pag kagbaiyan. ¹⁰ In mga agadar agalwasi kay Isos, agpanangis. Mariya pataboy sa kansiro agbarita in kansiyo ngiitan. ¹¹ Kamay siro yewed maniwala kay Mariya in siyo keyen Isos boway wakay, kansiyo ngiitan. ¹² Isos papangkit din sa dowai ka agadar agipanaw agtaboy sa agay, kamay miyalis wa in kansiyo bilog. ¹³ Kalbas siro moli wakay sa Irosalim, in mibaloy biyarita sa amat mga agadar, kamay siro yewed din maniwala. ¹⁴ Kalbas Isos papangkit wakay sa Labing Osai, sa betek siro agpalpamangan. Siro kansiyo siyabiyan panawen siro yewed agpasandig sa kansiyo, osai panawen marigen in kansiro remrem yewed maniwala sa mga kangitan sa kansiyo in siyo boway wakay. ¹⁵ Kalbas siyo agbilin wa keyen, Kamo agipanawan sa boo kobat, kanyo patoldowen in Maal pag Barita sa boo mga mangyan. ¹⁶ In maniwala osai biyaotismowan batay piyaboway, kamay in yewed maniwala batay piyagparosa. ¹⁷ In mga agpasandig sa kangay batay piyakan kangay kabaloyan, matang kapangwat mga lakonaw pag panawen. Sa kangay kabaloyan siro batay kapamoyaw sa mga mamaw, osai batay kaiplaong in amat wakay agiplaong. ¹⁸ Kamayba siro mipaatang sa olay siro idbatay manakay, kamayba mipainem sa makapolongan. Osai no kansiro kiyapkap in mga apo maskit na batay maoraw.