MATIYO

MATIYO

¹ Anda in liStaan in mga kakoyayan IsoKiristo. Siyo kay Dabid kasokponan, kasokponan din Abraam. ² In kay Abraam bodang Isaak, in kay Isaak bodang Akob, in kay Akob bodang Oda, osai in kansiyo mga belag. ³ Kalbas in kay Oda bodang Paris osai Sara, Tamar in inang. In kay Paris bodang Isrom, in kay Isrom bodang Aram. ⁴ In kay Aram bodang Aminadab, in kay Aminadab bodang Naason, in kay Naason bodang Salmon. ⁵ In kay Salmon bodang Boos, Raab in inang. In kay Boos bodang Obid, Root in inang. In kay Obid bodang Isi. ⁶ In kay Isi bodang Dabid in poon lakoy. In kay Dabid bodang Solomon, in inang in kay Oriyas batang babai. ⁷ In kay Solomon bodang Robowam, in kay Robowam bodang Abiyas, in kay Abiyas bodang Asa. ⁸ In kay Asa bodang Osapat, in kay Osapat bodang Oram, in kay Oram bodang Osyas. ⁹ In kay Osyas bodang Otam, in kay Otam bodang Akas, in kay Akas bodang Isikyas. ¹⁰ In kay Isikyas bodang Manasis, in kay Manasis bodang Amos, in kay Amos bodang Osyas. ¹¹ In kay Osyas bodang Ikonyas osai in kansiyo mga belag. Ina pag betek in mga kasokponan Israil biyaba sa Babilonya. ¹² Paka kalbas in siro biyaba sa Babilonya in kay Ikonyas bodang Salatil, in kay Salatil bodang Sorobabil. ¹³ In kay Sorobabil bodang Abiyod, in kay Abiyod bodang Iliyakim, in kay Iliyakim bodang Asor. ¹⁴ In kay Asor bodang Sadok, in kay Sadok bodang Akim, in kay Akim bodang Iliyod. ¹⁵ In kay Iliyod bodang Iliyasar, in kay Iliyasar bodang Matan, in kay Matan bodang Akob. ¹⁶ In kay Akob bodang Osi in kay Mariya lalaki. Mariya in inang Isos, in piyagawit Kiristo. ¹⁷ Na sogod kay Abraam anggan kay Dabid, na labing opat ka kasokponan. Sogod wakay kay Dabid anggan siro biyaba sa Babilonya na labing opat din ka kasokponan. Sogod wakay siro biyaba sa Babilonya anggan kay Kiristo na labing opat din ka kasokponan. ¹⁸ In IsoKiristo biyodang kataw tai. Mariya in batay kansiyo inang, osai Osi, siro batay wa taybalang. Kamay siro ikkay piyalalay, Mariya mana bonting wa. In kapwan bonting in Betek pag Abyan. ¹⁹ Osi in kansiyo batay lalaki, siyo osai ka mangyan betek in ogali. Matang kansiyo riyemrem siyo batay wa pasoway kay Mariya, kamay kansiyo piyagtago matang Mariya yewed arikoyan. ²⁰ In kansiyo kay piyagpanremrem ina, siyo manaynep, apo papangkit sa kansiyo osai ka angil batang sa Kapwan. Keyen, Laki Osi, kasokponan Dabid, ayaw agkalimo palalay kay Mariya, angkataw in kapwan in kansiyo piyagbonting in Betek pag Abyan. ²¹ Siyo batay mamodang kaliyakiyante. Isos in kaimo taboyen ngaran angkataw siyo in batay agpamaboway sa kansiyo mga mangyan, agkowa kansiro mga daet. ²² Ina boo mipangwat matang mibaloy in siyabi in Kapwan. Kansiyo poropita in agsabi keyen, ²³ Batay bonting osai ka daraga, kalbas siyo batay mamodang kaliyakiyante. Siyo batay piyagawit Imanowil, in beet siyabi keyen kantam sarig in Diyos. ²⁴ Paka Osi mipolaw, siyo maniwala sa siyabi in angil batang sa Kapwan. Mariya kansiyo wa piyaanggat, ²⁵ kamay siro yewed kay maylalay, anggan miboslot wa in bodangte kaliyakiyan. Kansiyo ngani tiyaboy ngaran Isos.

¹ Tangona in betek Irodis in poon lakoy, Isos biyoslot sa bayan Bitliim sa kobat Odiya. Kalbas apo rateng sa bayan lakoy Irosalim mga mangyan Apo Katawanan sa mga magirem. Siro batang ista agbangen sa paglowasan ibeng. ² Baatte siro agtanong keyen, Sa nakay in bodangte bayo biyoslot batay poon lakoy sa mga Odyo? Kanyam ngiitan sa paglowasan ibeng in magirem lakoy tanda siyo miboslot wa. Kaya kami atai pataboy, matang agmaal sa kansiyo. ³ Paka Irodis in poon lakoy karengey ina, toloy wa malingetnget in kansiyo remrem, kadayo in sa boo taga Irosalim. ⁴ Kansiyo tiipon in boo mga sasirdoti osai in mga agpatoldo in mga Batas Diyos. Siro kansiyo tiyanong keyen, Sa nakay batay biyoslot in Kiristo? ⁵ Siro keyen, Sa bayan Bitliim sa kobat Odiya, angkataw in solat in poropita keyen, ⁶ Laki mga taga Bitliim, sa mga bayan lakoy sa Odiya kanyo bayan kalakoy daan din in amat, angkataw asina batay lomwas in osai ka poon lakoy. Siyo batay agalapet sa kangay mga mangyan mga bodang Israil. ⁷ Kalbas piyaberya wakay Irodis ina pag mga Apo Katawanan, kamay piyagtago. Kansiyo tiyanong no nangkadogay wa lomwas in magirem lakoy. ⁸ Kalbas siro kansiyo piyabilinan keyen, Dali wa, kamo panaw wa. Kanyo pamangkiten gayedte in bodangte. Paka ngiitan wa, kanyo paalamen sa kangay, matang ako din ista kapataboy, agmaal din sa kansiyo. Siro kansiyo wa piyapanaw, piyataboy sa Bitliim. ⁹ - ¹⁰ Paka siro karengey wa in bilin in poon lakoy, in mga Apo Katawanan panaw wa. Kalbas in magirem lakoy kansiro ngiitan sa paglowasan ibeng, kansiro wakay ngiitan. Siro agkaanggay wano gayedte. Ina agpanokaw sa kansiro anggan rateng sa pagbalayan in bodangte. Asin wa betek omempet. Paka siro kangitan in magirem lakoy omempet wa, ¹¹ siro misoroy wa sa balay, kansiro ngiitan in bodangte sa bangen Mariya in kansiyo inang. Siro patalegeb, agmaal sa kansiyo. Kalbas kansiro wa biyoswang in mga palnowan, kansiro tiyaboy sa kansiyo ginto, osai pamada, osai gamot piyagawit mira. ¹² Paka kalbas siro manaynep, piyagayaw wa Diyos domalan kay Irodis, matang siro manlili wa, moli wa sa kansiro kobat. ¹³ Paka panaw wa in mga Apo Katawanan, Osi manaynep. Apo angil batang sa Kapwan papangkit sa kansiyo keyen, Miyorog wa, in talinay babaen wa sa Iipto. Kalbas kamo ayaw kay agipanaw ista anggan ako yewed keyen wakay. Angkataw in bodangte batay piyagpamangkit Irodis matang bonowen. ¹⁴ Kalbas miyorog wa Osi, biyaba wa in talinayte. Ina daan pag yabi siro panaw wa pataboy sa Iipto. ¹⁵ Siro ista wa agbalay anggan Irodis matay wa. Kaya kataw ina matang mibaloy wa in siyabi in poropita keyen, Kangay biyerya in kangay bodang batang sa Iipto. ¹⁶ Paka Irodis katawan wa keyen siyo miyesa waget in mga Apo Katawanan, siyo agkagalit wa gayed, kalbas in boo mga bodangte kaliyakiyan sa Bitliim kansiyo wa piyabono, anggan sa mga balabaan kay, in boo bodang anggan dowai wa ka dagon biyono. Kaya kataw ina panawen sa siyabi in mga Apo Katawanan keyen kadogay ina lomwas in magirem. ¹⁷ Matang ina pag betek mibaloy wa in siyabi Irimiyas in poropita keyen, ¹⁸ Apo arengeyan sa Rama agpalpanangis, agpalpanggoong lakoy. Piyagpanangisan Rakir in kansiyo mga bodang. Siyo idbatay maayat, angkataw siro matay wa boo. ¹⁹ Paka matay wa Irodis, Osi manaynep wakay sa Iipto, apo papangkit sa kansiyo osai ka angil batang sa Kapwan. ²⁰ Keyen in angil, Kao miyorog wa, in talinay paoliyen wakay sa kobat Israil, kataw matay wa in mga agkabono sa bodangte. ²¹ Kalbas siyo miyorog wa. Kansiyo wakay biyaba in talinay sa kobat Israil. ²² Kamay paka kansiyo wakay abaritaan keyen, In kay Irodis wakay bodang Arkilaw in agpoon lakoy sa Odiya, Osi agkalimo pataboy asin. In Diyos apo wakay siyabi sa kansiyo sa taynep, matang siro pataboy wa sa kobat Galiliya. ²³ Siro ista wa agpamataw sa bayante Nasarit. Matang mibaloy wa in siyabi in mga poropita panawen in bodang keyen, Siyo batay piyagawit Nasarino.

¹ Ina pag betek Owan in Agbaotismo rateng wa sa moyod sa kobat Odiya. Asina siyo agpatoldo ² keyen, Benglayen wa in kanyo mga daet, kataw in Diyos bangen wa agpapoon. ³ Ina pag Owan in piyagsabi Isaiyas in poropita in siyo keyen, Apo agpango sa moyod keyen, Kanyo sandataen in batay dalan in Kapwan, pakapyaen wa kamo in kansiyo mga batay dalan. ⁴ In kay Owan piyangwat damit boybol kamilyo, in sesel sa baris balat kambing. In kansiyo piyagkoman doron osai daiket. ⁵ Kalbas pataboy sa kansiyo in mga taga Irosalim, anggan sa boo Odiya, kadayo din in mga agbalay sa balabaan sapa Ordan. ⁶ Siro agsabi in kansiro mga daet, kalbas siro biyaotismowan wa Owan sa sapa Ordan. ⁷ Kamay kansiyo ngiitan aronaw mga Parisiyo kadayo mga Sadosiyo agrateng batay agpabaotismo. Kansiyo siyabi sa kansiro keyen, Kamo kagwali mga dopong. Nakay in agpatoldo sa kanyo domalagan sa parosa Diyos agrateng? ⁸ Pangwaten wa in mga maal pag ogali, matang atawanan in mga mangyan keyen biyenglay wa ngani in kanyo mga daet. ⁹ Kamo ayaw mangaas agsabi keyen, Kami idbatay piyarosa Diyos angkataw kami kay Abraam mga kasokponan. Kangay piyagsabi sa kanyo batang atai pag mga bato in Diyos kabaloy agpangwat mga kasokponan Abraam. ¹⁰ In wasay agisandata wa batay agpokan sa mga yangaw anggan sa mga dalig. Kamayba nakay pag yangaw yewed agpanggalem maal batay piyagpokan, piyagbenglay sa baya. ¹¹ Owan keyen kay, Panawen kamo agbenglay in kanyo mga daet kamo kangay piyagsogbo sa sapa. Dayem in agrateng sa kangay paori, siyo in batay agsogbo sa kanyo sa Betek pag Abyan osai sa baya. Siyo in apo kabaloyan labi kay kataw ako. Ako kalakoyte, yewed sibay kamayba sogowan aglowat waget kansiyo tapatos. ¹² Kansiyo wa piyagatang in kansiyo birao, kansiyo batay piyagpalsoway in mga paray, in beter batay piyagbetang, kamay in laya batay piyagtebed sa baya idapo kalobosan. ¹³ Isos batang sa Galiliya pataboy kay Owan sa sapa Ordan. Isos beet biyaotismowan. ¹⁴ Kamay Owan nges dayo. Siyo keyen, Nakay batang kao in agpasabangen sa kangay? Ako agbangen in kailangan kaimo biyaotismowan. ¹⁵ Kamay siyabi Isos keyen, Bayansiyo mibaloy ngona ina. Ina maal kanta pangwaten, kataw ina in beet Diyos. Kalbas Owan pomayag wa. ¹⁶ Paka Isos biyaotismowan wa siyo toloy patakdang sa sapa. Maboswang in langit, kalbas kansiyo ngiitan in Abyan Diyos aglompot kagwali bantog kalapati, omapon sa kansiyo. ¹⁷ Apo osai ka agiplaong batang sa langit keyen, Anda in kangay piyagmaal pag Bodang, in kangay wano piyagkaanggayan.

¹ Paka kalbas, Isos piyaanggat in Abyan Diyos sa moyod matang piyagtepeng in diyablo. ² Apatnapo ka ibeng Isos yewed mamangan kamayba din yabi, kalbas siyo agkayawes wa. ³ Rateng wa sa kansiyo in diyablo in agpanepeng keyen, No ngani kao in Bodang Diyos, na sogowen ina pag mga bato matang mipangwat pamangnen. ⁴ Kamay Isos keyen, In Agisolat keyen, Yewed sa pamangnen waget in mangyan agkaboway, dayem sa baatte agiplaong piyagsabi in Diyos. ⁵ Paka kalbas ina Isos piyaanggat in diyablo sa Irosalim, in Bayan lakoy iidang Diyos. Siyo piyataydek sa tangrawan in bobongan sa balay lakoy Diyos. ⁶ Siyabi in diyablo keyen, No ngani kao in Bodang Diyos, na kao palabo asin. Kataw in Agisolat keyen, In Diyos batay agsogo kansiyo mga angil, kao batay kansiro piyagalapet, Kao batay piyagatang kansiro mga bakwaw karam kao batay asolpo sa bato. ⁷ Keyen wakay Isos, Agisolat din keyen, Ayaw kaimo agtepengen in Diyos in kaimo Kapwan. ⁸ Kalbas Isos piyaanggat wakay in diyablo sa mabwat lakoy pag boksor. Isos piyarongaw piyapangkit sa kansiyo in boo mga sakopan sa boo kobat, kadayo in boo mga kasangkapan. ⁹ Keyen in diyablo, No kao patalegeb, agmaal sa kangay, na ina pag boo kangay batay piyagpasakop sa kaimo. ¹⁰ Siyabi wakay Isos keyen, Kao bali wa Katanas, angkataw in Agisolat keyen, Diyos waget in kaimo pagmaalen. Siyo in kaimo Kapwan. Siyo waget in kaimo paniwalaen. ¹¹ Isos biyaliwan wa in diyablo. Kalbas in mga angil wakay in rateng, agtolong sa kansiyo. ¹² Paka Isos abaritaan keyen biilanggo wa Owan, siyo moli wakay sa Galiliya. ¹³ Siyo idwa agbalay sa Nasarit, dayem sa Kapirnaom wa. Ina pag bayan sa balabaan dagatte Galiliya, sa kobat Sabolon osai Niptali. ¹⁴ Matang mibaloy wa in siyabi Isaiyas, in poropita keyen, ¹⁵ In kobat Sabolon, osai Niptali, sa dalan agtaboy sa dagat, sa ripay Ordan, Galiliya pagbalayan in mga yewed Odyo. ¹⁶ In mga mangyan datiyan agbalay sa lened kangitan wa tinglaw agrawa wano. Ina pag tinglaw in agrawa sa kansiro, sa mga agibolalang piyaglened katayan. ¹⁷ Ina pag betek Isos agparakay wa agpatoldo keyen, Benglayen wa in kanyo mga daet, kataw in Diyos bangen wa agpapoon. ¹⁸ In Isos agbalaba sa dagatte Galiliya, kansiyo ngiitan tayari agpangisda, in osai Simon piyagawit Pidro, in osai Anris. Siro agpanlambat. ¹⁹ Siyabi Isos sa kansiro keyen, Kamo miyanggat sa kangay, kamo kangay batay piyagpatoldo agpangkabel mangyan matang maniwala. ²⁰ Toloy siro miyanggat kay Isos, biyaliwan in kansiro mga lambat. ²¹ Siro panaw wa asin, ista kayte agbangen kansiyo wakay ngiitan tayari Santiyago osai Owan, mga bodang Sibidiyo. Siro talamayan sa bangka, agpakapya kansiro lambat. In dokalaki biyerya din Isos. ²² Siro toloy miyanggat kay Isos. Kansiro biyaliwan in amang, kadayo in kansiro bangka. ²³ Diyalan wa Isos in boo kobat Galiliya. Siyo agpatoldo sa mga baiay pagpaniponan, in Maal pag Barita kansiyo piyatoldo keyen, In Diyos bangen wa agpapoon. Kansiyo piyaoraw in baatte maskit osai momoy sa mga mangyan. ²⁴ Siyo biyaritaan sa boo kobat Siriya, kalbas biyaba sa kansiyo in boo apo maskit, in boo din mga piyagmomoy, osai in mga piyaglowasan mamaw, mga agpameypey, kadayo in mga pilay. Siro boo kansiyo piyaoraw. ²⁵ Miyanggat sa kansiyo in karowan wano pag mga mangyan batang sa Galiliya, batang sa Dikapolis, osai sa Irosalim, sa Odiya, kadayo sa ripay Ordan.

¹ Paka Isos kangitan in karowan wano pag mga mangyan, siyo monaker sa boksor, siyo asin agaron, osai in kansiyo mga agadar. ² Siro piyatoldo keyen, ³ Boway wa in mga idapo piyagpasandigan no yewed in Diyos waget, angkataw siro kansiyo wa ngani mga bodang. ⁴ Boway wa in mga agrongkot, angkataw siro batay piyagayat Diyos. ⁵ Boway wa in mga agpakabwatte remrem, angkataw kansiro batay abel in mga piyangako Diyos. ⁶ Boway wa in mga beet wano gayed agpangwat in beet Diyos, angkataw siro batay piyakan in kansiro piyagkabeet. ⁷ Boway wa in mga katawan agpakayawte, angkataw siro batay din piyagpakayawte in Diyos. ⁸ Boway wa in mga idapo piyagtago sa Diyos, angkataw siro batay katawan sa Diyos. ⁹ Boway wa in mga agpatoldo agpaybelagan, angkataw siro batay piyagawit Diyos kansiyo mga bodang. ¹⁰ Boway wa in mga piyagpaidapan panawen siro agpangwat in beet Diyos, angkataw siro kansiyo wa ngani mga bodang. ¹¹ Kamo ngani boway wa no kamo piyagpamalowasan panawen kamo agpaniwala sa kangay, osai piyagpaidapan piyagpabintangan boo mga daet. ¹² No apo ina pag mga kaidapan na kamo boway wa, angkataw lakonaw in batay piyagtaboy sa kanyo sa langit. Kataw daan din ina in piyangwat sa mga poropita in mga tokaw kay sa kanyo. ¹³ Isos keyen kay, Kamo kagwali asing sa mga mangyan. No in asing idapo wa matamis na idbatay wa matamis wakay tagoli. Ina idapo wa kabolowan, no yewed piyagbenglay wa piyagpanlaedan mga mangyan. ¹⁴ Kamo kagwali tinglaw sa mga mangyan. In osai ka bayan no sa latayan na piyagngitan gayed. ¹⁵ In agparaet tinglaw idbatay agpabolalang sa galem baldi. Dayem sa datiyan daan pag pamabolalangan, matang agrawa daan sa boo galem balay. ¹⁶ Na kataw din ina, kanyo parawaen in kanyo tinglaw sa boo mangyan, matang kansiro piyagngitan in kanyo mga maalen pag ogali, kalbas batay piyagpakalakonaw in kantam Amang sa langit. ¹⁷ Kamo ayaw keyen kaya ako atai pataboy matang biyenglay in mga Batas Diyos, osai in piyatoldo in mga poropita. Kaya ako atai pataboy yewed matang ina biyenglay, no yewed agpatoldo in beet gayed siyabi. ¹⁸ Kamo ayaw agkanawey, in langit batay maidapo, kadayo in kobat, kamay sa mga Batas Diyos idapo batay maidapo kamayba in kalakoyte waget pag toldok anggan yewed kay piyangwat ina pag boo. ¹⁹ Na no siyo agpaidapo kabolowan sa mga Batas Diyos, kamayba in kalakoyte waget, osai agpatoldo kataw ina sa mga amat, na siyo in batay kalakoyte wano sa mga bodang Diyos. Kamay in agpangwat in mga Batas Diyos, osai agpatoldo keyen ina pangwaten, na siyo in batay lakonaw sa mga bodang Diyos. ²⁰ Kangay piyagsabi no in kamo agpangwat in beet Diyos kalakoy waget in piyagpangwat in mga agpatoldo in mga Batas Diyos, osai in mga Parisiyo, na kamo idbatay mibaloy mga bodang Diyos. ²¹ Isos keyen kay, Kanyo atawanan in siyabi tangona keyen, Ayaw agbono mangyan. In agbono mangyan batay piyagparosa. ²² Kamay in kangay agbangen piyagsabi sa kanyo, no siyo agkagalit sa kansiyo belag, na batay din piyarosa. In agsabi sa kansiyo belag keyen, Kao idapo kabolowan, na siyo batay piyagparosaan in mga tanongan in mga Odyo. In agsabi sa kansiyo belag keyen, Kao idapo bait, na siyo batay piyagbenglay sa baya lakoy sa toyongan. ²³ Na no kao sa balay Diyos, apo batay piyagtaboy sa Diyos, kalbas kaimo aremreman kao apo piyangwat daet sa kaimo belag, ²⁴ na kaimo kay baliwanen ngonate sa balay Diyos in kaimo batay piyagtaboy, kalbas kao ista wakay, pabelag. Bayo kao moli wakay sa balay Diyos, kalbas in kaimo piyagtaboy taboyen wa sa Diyos. ²⁵ No kao apo kaaway batay agabla sa kaimo, na sa dalan kay kao manggisodan sa kansiyo yewed kay rateng sa osap. No yewed kao kansiyo batay piyagpaosap sa mga poon lakoy, kao batay piyagtaboy sa mga polis, batay piyagbilanggo. ²⁶ Kangay piyagsabi kao idbatay ngani piyagpalpas anggan apo kay tera in kaimo otang kamayba osai wagette ka sintimos. ²⁷ Isos keyen kay, Kanyo atawanan in siyabi keyen, Ayaw agpanggaraw. ²⁸ Kamay in kangay agbangen piyagsabi sa kanyo kamayba siyo agpangkit sa osai ka kagbaiyan, apo bait agkabeet, na in kansiyo remrem manggaraw wa asin pag kagbaiyan. ²⁹ No in kaimo mata agakay sa kaimo matang kao agpangwat daet, na maal kay kasloten wa, kalbas benglayen. Angkataw maal kay maidapo in osai ka sangkap sa kaimo bilog ayaw ngaro in boo kaimo bilog biyenglay sa toyongan. ³⁰ No in kaimo pamalang pag bakwaw agakay sa kaimo matang kao agpangwat daet, na dodowen wa, benglayen wa. Angkataw maal kay maidapo in osai ka sangkap kaimo bilog, ayaw ngaro in boo kaimo bilog biyenglay sa toyongan. ³¹ Isos keyen kay, Apo din siyabi keyen, No biyaliwan in osai ka kaliyakiyan in kansiyo babai, na in babai pangwatanen kasondowan malsoway wa. ³² Kamay in kangay agbangen piyagsabi sa kanyo, No kaliyakiyan agbaliwan sa kansiyo babai, kamayba in babai idbatang agpanggaraw, kalbas in batang babai mamangkit wakay lalaki, na in agbaliwan agbangen in apo daet angkataw siyo in dailan kaya manggaraw in kansiyo batang babai. Osai in kaliyakiyan wakay in miskapet sa kagbaiyan biyaliwan na siyo agpanggaraw din. ³³ Kanyo din atawanan apo tangona siyabi keyen, No kanyo riigen in kanyo pangako, na ayaw agsala, dayem pangwaten ngani in kanyo piyangako sa Kapwan. ³⁴ Kamay in kangay agbangen piyagsabi, ayaw agrigenen kanyo pangako. Ayaw agrigenen keyen kamaybawa sa langit, angkataw in langit pagtokkawan lakoy Diyos. ³⁵ Ayaw agrigenen keyen, kamaybawa sa kobat, angkataw in kobat paglaedan Diyos. Ayaw din agrigenen keyen kamaybawa sa Irosalim, angkataw ina bayan in lakonaw pag Poon Lakoy. ³⁶ Ayaw din agrigenen keyen kamaybawa ako matay, angkataw kamayba osai wagette ka abok sa kaimo olo yewed kaimo apaboksi, idbatay din kaimo mipangwat maitem. ³⁷ No in kaimo siyabi aon, na sibay wa in aon. No in kaimo siyabi yewed na sibay wa din in yewed. Angkataw kamayba nakay pag agiplaong marigen in asin piyadagdag, ina batang sa diyablo. ³⁸ Isos keyen kay, Kanyo atawanan in siyabi keyen, No osai ka mangyan agkaslot sa osai ka mangyan mata, na kasloten wakay din in kansiyo mata. No in osai ka mangyan agsowal sa ngipen sa osai, na sowalen wakay din in kansiyo ngipen. ³⁹ Kamay in kangay agbangen piyagsabi sa kanyo ayaw kanyo aglabananen in mga daeten pag mangyan. No apo somampek sa kaimo osai ka pisngi, na kaimo patobangen wakay sa kansiyo in osai. ⁴⁰ No kao yaabla in osai ka mangyan matang abel kaimo lambong, na kaimo taboyen kadayo in kaimo islen. ⁴¹ No kao piyagpilit agbaba palnowan osai ka kilomitro, na kaimo babaen anggan dowai ka kilomitro. ⁴² In agayay sa kaimo pakanen. In agpabeles sa kaimo pabelesen. ⁴³ Kanyo atawanan in siyabi keyen, Pakayawteen in kaimo belag, kamay kalobante agkabais sa kaimo kaaway. ⁴⁴ Kamay in kangay agbangen piyagsabi kanyo keyen, Pakayawteen din in kanyo mga kaaway. Kanyo pandalanginen in mga agpaidap sa kanyo, ⁴⁵ matang kamo bodang ngani in kantam Amang sa langit. Angkataw kansiyo piyagpalowas in kansiyo ibeng sa mga mangyan maalno, kadayo sa mga mangyan daeten. Osai kansiyo piyagpaodanan in mga mangyan agpamangwat maal, kadayo in mga agpamangwat daet. ⁴⁶ No kamo agpakayawte waget sa mga agpakayawte sa kanyo, na in Diyos idapo batay tiyaboy lakonaw sa kanyo. Ina dayem piyagpangwat din in mga daeten pag mga mangyan. ⁴⁷ No kamo agpabelag waget sa kanyo mga belag, na kamo idapo piyangwat labi kay sa mga roma. Ina dayem piyagpangwat din in mga yewed agpaniwala. ⁴⁸ Kailangan ngani kamo agpakayawte wano gayed, kataw din in kantam Amang sa langit.

¹ Isos keyen kay, Kamo agingat no kamo agpangwat maal, ayaw agpapangkit waget sa mga mangyan. No kataw ina in kanyo piyagpangwat, na in kantam Amang sa langit idapo batay tiyaboy lakonaw sa kanyo. ² Na no kamo agtaboy sa mga maidap ayaw agtolad sa mga agpakagwali waget agpaniwala. No siro agtaboy sa mga maidap, na kansiro piyagpapangkit sa boo mangyan sa mga balay pagpaniponan, sa mga dalan, matang waget siro piyagmaal mga mangyan. Kangay piyagsabi sa kanyo ina waget in kansiro batay abel. ³ Dayem no kamo agtaboy sa mga maidap, na ayaw kanyo agpaalamen kamayba sa kanyo wano gayed belag, ⁴ matang idapo katawan in kamo agtaboy. Na kamo batay piyakan lakonaw in kantam Amang, angkataw siyo in kangitan sa kantam piyagpangwat, in amat idapo katawan. ⁵ Isos keyen kay, No kamo agpandalangin ayaw agtolad sa mga agpakagwali waget agpaniwala. Siro agkaanggay agpandalangin agtaydek sa mga balay pagpaniponan osai sa mga palsangaan dalan, matang ngiitan in mga mangyan. Kangay piyagsabi sa kanyo ina waget in kansiro batay abel. ⁶ Dayem no kamo batay agpandalangin na kamo patago matang yewed ngiitan, kalbas kamo mandalangin wa sa kantam Amang yewed kanyo piyagngitan. Na kamo batay piyakan lakonaw in kantam Amang, angkataw siyo in kangitan sa kantam maalno pag piyagpangwat idapo katawan in amat. ⁷ No kamo agpandalangin ayaw agolitolit sa idapo kabolowan kataw in piyagpangwat in mga yewed agpaniwala. In kansiro remrem siro batay piyagparengey panawen sa dogay pag agpandalangin. ⁸ Kamo ayaw agtolad sa kansiro, angkataw bayo kitam mangayay, atawanan wa in kantam Amang in kantam mga kailangan. ⁹ Kamo mandalangin kataw tai, Kanyam Amang sa langit, kaimo waget ngaran in pagmaalen wa in boo. ¹⁰ Kao wa ngani in agpapoon sa boo. In kaimo beet pangwaten wa in boo mangyan. No nangkataw ina sa langit, na pangwaten din kataw ina atai sa kobat. ¹¹ Ngona pag ibeng kami pakanen in kanyam piyagkailangan pamangnen. ¹² Kaimo wa libangawen in kanyam mga daet, angkataw kami aglibangaw sa mga daet piyagpangwat sa kanyam. ¹³ Kami ayaw agpadalanen sa maloba pag tepeng. Kaimo boyawen in Daeten sa kanyam. Kataw ina in agpandalangin. ¹⁴ Angkataw no kamo aglibangaw sa mga daet piyangwat sa kanyo, na in kanyo mga daet batay din piyaglibangaw in kantam Amang sa langit. ¹⁵ Kamay no yewed kanyo piyaglibangaw in mga daet piyagpangwat sa kanyo, na in kanyo mga daet idbatay liibangaw in kantam Amang. ¹⁶ No betek kamo idwa agkoman matang dogay agpandalangin, na ayaw agtolad sa mga agpakagwali waget agpaniwala. Siro agrongkot anggan soraboten, matang atawanan in mga mangyan siro yewed agkoman. Kangay piyagsabi sa kanyo ina waget in kansiro batay abel. ¹⁷ No betek kamo idwa agkoman na kamo agogas daan mata, agsokray daan, ¹⁸ matang ayaw atawanan in roma kamo yewed agkoman. In kantam Amang yewed piyagngitan, siyo waget in batay katawan, na kamo batay piyakan lakonaw in kantam Amang, angkataw siyo kangitan in kantam piyagpangwat yewed atawanan in amat. ¹⁹ Isos keyen kay, Kamo ayaw agpakaro sangkap atai sa kobat. Atai ina piyagsida ipes, mga kalawang, osai piyagpanakaw. ²⁰ Dayem paya sa langit in kamo agpakaro sangkap. Ista idapo ipes agpansida, osai kalawang, idapo agpanakaw. ²¹ Angkataw no saano agbangen in kanyo mga sangkap, na batay din asin in kanyo remrem. ²² Isos keyen kay, In kantam mata in kagwali tinglaw sa kantam bilog. Na no matarem in kantam mata, na piyagrawaan din in boo kantam galem, ²³ kamay no malabo in kantam mata, na in kantam galem boo wa din agkalenedan. No kanyo rawa mibaloy wa mana lened, na maloba wano ina pag lened. ²⁴ Isos keyen kay, In mangyan idbatay kapanawen sa dowai ka kapwan. Angkataw no kataw ina siyo batay agkagalit sa osai agpakayawte wakay sa osai. Siyo batay agpanawen maal sa osai, in osai piyagidapo kabolowan. Kitam idbatay kapanawen sa Diyos kadayo din sa kowarta. ²⁵ Na kangay piyagsabi sa kanyo keyen, Ayaw agkariyaban keyen, idapo batay kiyoman, osai piyaginem, kantam kailangan matang agkaboway, kadayo sa kantam mga damit sa bilog. Angkataw osai pamangnen osai in boway, in boway agbangen in lakonaw. Osai damit, osai in bilog, in bilog agbangen in lakonaw. ²⁶ Kanyo remremen in mga bantog. Siro yewed agtogda, yewed din agani, siro yewed din agbetang pamangnen, kamay siro piyagpakoman daan kantam Amang sa ogbos. Kamo agbangen labi kay piyagmaal sa mga bantog. ²⁷ Sa agkariyaban idapo batay kabaloy agpakadogay sa kansiyo boway kamayba osai wagette ka dodo ibeng. Aon? ²⁸ Na nakay batang kamo agkariyaban keyen kamo idapo damit? Kanyo remremen in mga betakan agitalo sa kobat. Siro yewed agpanawen, yewed agsimat, ²⁹ kamay kangay piyagsabi sa kanyo keyen, in poon lakoy Solomon, kamayba siyo mayaman wano, siyo idbatang agsoroy damit kamaalno ina kamayba osai waget asin pag mga betakan. ³⁰ Na no in mga lalosen, ngona agkaboway goribaste piyagsonog wakay, no ina piyakan din damit Diyos, na kamo labi kay piyagpakan. Kamo mana maloba mainaen sa agpasandig sa Diyos. ³¹ Na kamo ayaw agkariyaban panawen sa kanyo pamangnen osai piyaginem, kadayo damit. ³² Ina in mga piyagkariyaban in mga yewed kay agpaniwala sa Diyos. Atawanan in kantam Amang sa langit ina boo kantam kailangan. ³³ Dayem kitam pasakop sa Diyos, osai kitam agogali in kansiyo beet. Ina in pakalakonawen sa kantam remrem, na in boo kantam kailangan kansiyo batay piyagtaboy. ³⁴ Na kamo ayaw agkariyaban sa batay mibaloy goribas, dayem ista wa rateng bayo kitam manremrem. In mga makariyaban sa osai ka ibeng sibay wa piyanremrem asin pag ibeng.

¹ Isos agiplaong kay keyen, Kamayba nakay pag mangyan ayaw kantam agremremen kalakoyte, matang kitam idbatay din piyagremrem Diyos kalakoyte. ² Angkataw no nangkalakoy in kantam remrem sa roma, na kalakoy din ina in batay remrem Diyos sa kantam, no nakay in kantam piyasibay sa roma, na kalakoy din ina in batay piyasibay Diyos sa kantam. ³ Nakay batang kaimo piyagngitan in sepet sa mata kaimo belag, bago in yangaw lakoy agiskapet sa kaimo agbangen mata idwa kaimo piyagngitan? ⁴ Nakay batang kao agpangaas agsabi sa kaimo belag keyen, Amba aywawa, kangay wa kowaen in kaimo sepet, bago in sa kaimo din mata apo lakoy yangaw agiskapet? ⁵ Kao agpakagwali waget agpaniwala. Tokaw kay kowaen in yangaw agiskapet sa kaimo mata, na batay wa kangitan gayed maal, in agkowa in sepet sa kaimo belag. ⁶ In mga piyagtalaga sa Diyos ayaw kanyo taboyen sa mga tito, kataw isag kamo siyonggaban, piyangayat. In kanyo mga bogway ayaw agbenglayen sa mga beyek, isag kansiro waget piyanlaedan. ⁷ Isos keyen kay, Kamo mangayay sa Diyos, kamo batay piyagpakan, mamangkit wa, kamo batay kangitan, merya wa, kamo batay piyaonaik. ⁸ Angkataw in mangayay batay piyakan, in mamangkit batay kangitan, in merya batay piyaonaik. ⁹ No agayay tinapay in kanyo bodang, na nakay, idbatay kanyo piyakan bato, Aon? ¹⁰ No agayay isda, na idbatay kanyo piyakan olay, Aon? ¹¹ Na no kamo kamayba daeten katawan agtaboy maalno sa kanyo mga bodang, na labi kay in kantam Amang sa langit, siyo batay agtaboy in mga maalno sa mga agayay sa kansiyo. ¹² In kanyo beet pangwaten sa kanyo in roma, na kanyo din pangwaten sa mga roma. Ina in beet siyabi in mga Batas Diyos osai in piyagpatoldo in mga poropita. ¹³ Isos keyen kay, Misoroy sa kalakoyte pag sakbawan alabat, angkataw in sakbawan agtaboy sa toyongan maslang, in dalan agtaboy sa toyongan bolaos. Karowan in asin agdalan. ¹⁴ Kamay in sakbawan agtaboy sa boway kalakoyte, in dalan agtaboy sa boway rikot. Korangte in kangitan ina pag dalan. ¹⁵ Isos keyen kay, Agingat sa mga agpakagwali waget poropita. In agrateng sa kanyo siro kagwali topa mabait, kamay in kansiro remrem kagwali bangaw matapang. ¹⁶ Siro kanyo batay atawanan panawen sa kansiro daeten pag mga ogali. In talonyong idbatay manggalem bayabas, tagotong idbatay manggalem kapi. ¹⁷ No maalno in poon yangaw, na maalno din in raweg, kamay in daeten pag poon yangaw, na daeten din in raweg. ¹⁸ In maalno pag yangaw, idbatay manraweg daeten, osai in daeten pag poon yangaw idbatay manggalem maalno. ¹⁹ Kamayba nakay pag poon yangaw, no yewed agpanggalem maalno na batay piyagpokan, piyagtebed sa baya. ²⁰ Na ngani in mga agpakagwali waget pag mga poropita kanyo batay atawanan panawen sa kansiro mga ogali. ²¹ Isos keyen kay, Karowan in mga agpangawit sa kangay keyen, Kapwan, Laki Kapwan, kamay siro yewed batay boo bodang Diyos, dayem in mga agogali in beet kangay Amang sa langit. ²² Dogayan sa kalobosan pag Ibeng aronaw in batay agsabi sa kangay keyen, Laki Kapwan, panawen sa kaimo kami tangona agbarita in kaimo piyagsabi, osai sa kaimo kabaloyan kami agboyaw din mga mamaw, osai in mga idbatay mipangwat kanyam piyangwat. ²³ Kalbas kangay wakay siyabi sa kansiro keyen, Bali wa kamo mga agpamangwat daet. Kamayba nangkadogay ako yewed katawan sa kanyo. ²⁴ Isos keyen kay, Na no nakay pag mangyan in agparengey atai sa kangay mga piyagsabi, kalbas kansiyo piyagpangwat, na siyo kataw in osai ka mangyan apo katawanan, agtadyok kansiyo balay sa marigen pag diya. ²⁵ Kalbas toloy bomagyo, bomongkalos wa, in balay yoogyog kowaya. Kamay yewed maregnas, angkataw ina tiyadyok sa marigen pag diya. ²⁶ Dayem in agparengey atai sa kangay mga bilin, kamay yewed piyagpangwat, na siyo kataw in osai ka mangyan idapo bait, agtadyok kansiyo balay sa lakbowen pag diya. ²⁷ Kalbas toloy bomagyo, bomongkalos wa, in balay yoogyog kowaya, toloy maregnas wa gayed, idapo wa tera. ²⁸ Paka Isos kalbas wa agsabi ina pag boo, in mga karowan agpanremrem agkaanggay sa kansiyo agpatoldo. ²⁹ Siro keyen, Kami kansiyo piyagpatoldo kataw in osai ka apo kabaloyan, yewed kataw in mga agpatoldo in mga Batas Diyos.

¹ Paka Isos mongali wa batang sa bolod, siyo yaanggatan karowan wano pag mangyan, ² Kalbas pasabangen osai ka mangyan kagwali piyagpanyakit, siyo agpaselang domaing kay Isos keyen, Laki no kao beet agpaoraw sa kangay maskit, na kao kabaloy. ³ Siyo yaatang Isos keyen, Ako beet ngani, maal wakay ngona kao. Toloy idapo wakay ngani in kagwali panyakit. ⁴ Isos keyen, Ina ayaw kaimo agsabiyen kamayba kay nakay pag mangyan. No yewed kao ista wa papangkit sa sasirdoti matang siyo keyen, Kao maal wakay. Kalbas kaimo wa taboyen sa Diyos in siyabi sa Batas Mowisis, na batay atawanan in mga mangyan keyen in kaimo maskit maoraw wa. ⁵ Paka Isos rateng sa Kapirnaom, osai ka kapitan sa mga sondalo taga Roma pasabangen sa kansiyo, agdaing ⁶ keyen, Laki, in kangay sogowan maloba wano in agkaidapan, yewed kapaglebey, siyo agibolalang daan sa balay. ⁷ Keyen Isos, Ako batay ista, siyo kangay piyagpaoraw. ⁸ Kamay siyabi in kapitan keyen, Laki, ako kalakoyte, yewed sibay matang kao monaik sa kangay balay. Kao miplaong waget, na batay maoraw in maskit kangay sogowan. ⁹ Angkataw ako sakop sa mga mabwat pag poon, osai ako apo din mga sondalo sakop sa kangay. No kangay siyabi sa osai keyen, Kao ista wa, na toloy wa siyo ista. No kangay wakay siyabi sa osai keyen, Aywawa, na toloy wa siyo agpasabangen. No ako keyen sa kangay sogowan, Ina pangwaten, na toloy wa kansiyo piyagpangwat. ¹⁰ Paka Isos karengey ina siyo agsoyo. Kansiyo siyabi sa mga agyanggat sa kansiyo keyen, Kangay piyagsabi sa kanyo, kamayba atai sa mga taga Israil, ako idbatang kangitan kaloba ina in agpasandig sa Diyos. ¹¹ Ayaw agkanawey, aronaw in taga paglowasan ibeng, osai taga paglabowan ibeng batay malpamangan osai Abraam, Isaak, kadayo Akob sa sakopan Diyos. ¹² Kamay aronaw sa mga kasokponan Israil maal nges piyasoroy sa sakopan, kamay siro batay biyenglay sa lened ista wa sa adayonaw. Ista siro batay agpanangis lakoy anggan agpaldeet wa in ngipen. ¹³ Kalbas siyabi Isos sa kapitan keyen, Kao moli wa. Kataw kao agpasandig sa Diyos, na batay mibaloy in kaimo piyagayay. Ina daan pag betek maal wakay in kansiyo sogowan. ¹⁴ Isos pataboy sa kay Pidro balay. Kansiyo ngiitan ista in kay Pidro babai inang agpalibay, apo maskit, maibeng in bilog. ¹⁵ Yaatang Isos in kansiyo bakwaw, kalbas toloy maoraw in maskit. In inang miyorog, toloy wakay agalapet kay Isos. ¹⁶ Ina daan pag bayapon aronaw mga piyaglowasan mamaw in biyaba kay Isos. Siyo miplaong waget, domalagan wa in mga mamaw. Piyaoraw wa din in boo apo maskit. ¹⁷ Kataw ina mibaloy in siyabi Isaiyas in poropita keyen, Kansiyo kiyowa in kantam mga maskit. Kansiyo biyaba in kantam mga momoy. ¹⁸ Paka ngiitan Isos in karowan pag mga mangyan sa bangen, siyo agsogo sa kansiyo mga agadar keyen, Kitam wa motol sa ripay dagatte. ¹⁹ Pasabangen osai ka agpatoldo in mga Batas, keyen, Laki Agpamatoldo, ako batay miyanggat sa kaimo kamaybawa kao sa nakay pataboy. ²⁰ Keyen Isos, In mga alamid apo pagoliyan sa leyang, in mga bantog apo din pogadan, kamay ako in Bodang Mangyan idapo pagpangesekan. ²¹ In osai sa kansiyo mga agadar agsabi keyen, Laki Kapwan, maal lames ako moli kay ngonate anggan kangay wa malebeng in kangay amang? ²² Kamay keyen Isos, Kao miyanggat wa sa kangay. Bayansiyo in mga matay in aglebeng in kansiro mga matay. ²³ Isos somakay sa bangka, osai in kansiyo mga agadar. ²⁴ Isos agesek. Toloy apo bagyo, in bangka agkabangen tiyabonan sapa. ²⁵ In mga agadar pataboy kay Isos, siyo piyolaw keyen, Laki Kapwan, kami tolongen. Kitam agkaleggeb wa. ²⁶ Keyen Isos, Nakay batang kamo agkalimo? Nakay ina, kamo yewed agpasandig sa Diyos? Kalbas siyo miyorog, in kowaya kansiyo siyabiyan osai in dagat, kalbas apyaan wakay in boo. ²⁷ Siro agsoyo wano keyen, Nakay lames pag mangyan ina? Kamaybawa kowaya, kamaybawa dagat agpaniwala sa kansiyo. ²⁸ Paka Isos rateng sa ripay dagatte, sa kobat Gadara, siyo tiyagbo dowai ka mangyan batang sa lebengan. Siro piyaglowasan mga mamaw, matapang wano, anggan idapo kapangaas domalan asin pag kobat. ²⁹ Siro toloy mango keyen, Bodang Diyos, nakay in kaimo panawen sa kanyam? Kao lames atai pataboy matang kami kaimo piyakaskitan sa yewed kay kabetek? ³⁰ Sa yewed adayonaw ista, karowan wano pag beyek agpaypanlongkod. ³¹ In mga mamaw agdaing kay Isos keyen, No kami kaimo piyagboyaw, na kami pasoroyen ista sa karowan pag beyek. ³² Keyen Isos, Dali wa, panaw wa kamo. Kalbas siro panaw wa, misoroy wa sa mga beyek. In mga beyek toloy wa domalagan sa lintoy, mangalabo sa dagatte, siro mangaleggeb wa. ³³ In mga agalapet beyek toloy wa domalagan pataboy sa bayan. Ista kansiro biyarita in boo mipangwat, kadayo in mibaloy sa mga piyaglowasan mamaw. ³⁴ Kadogay in boo mangyan asin pag bayan ista pataboy kay Isos. Paka kansiro ngiitan siro agdaing sa kansiyo keyen, Kao panaw wa, ayaw atai sa kanyam kobat.

¹ Isos somakay sa bangka, pataboy sa ripay, rateng wa sa kansiyo bayan. ² Osai ka mangyan yewed wano kapaglebey biyaba kay Isos, siyo piyagosong sa yaiyan. Paka kay Isos ngiitan in kalobaen in siro agpasandig sa kansiyo, kansiyo siyabi sa apo maskit keyen, Kale, pakaeyaten in kaimo remrem, liibangaw wa in kaimo mga daet. ³ Riyemrem in kalaati mga agpatoldo in mga Batas keyen, In agsabi kataw ina, ina pag lalaki aglibak sa Diyos. ⁴ Kamay atawanan Isos in kansiro remrem. Siyo keyen, Nakay batang kamo agremrem daet? ⁵ Nakay agbangen in yewed maidap sabiyen, in osai keyen, Liibangaw wa in kaimo mga daet, in osai keyen, Kao tomaydek wa, panaw? ⁶ Amba kamo mangkit. Ako in Bodang Mangyan apo din kabaloyan atai sa kobat aglibangaw sa mga daet. Kalbas siyo miplaong wakay sa apo maskit keyen, Amba laki, kao tomaydek wa, babaen wakay in yaiyan, kao moli wa. ⁷ In kaliyakiyan toloy wa ngani tomaydek, moli wa. ⁸ Alimowan in mga mangyan kangitan ina. Siro agmaal sa Diyos in agpakan ina pag kabaloyan lakoy sa mga mangyan. ⁹ Isos panaw wa asin pag kobat. In siyo agipanaw kansiyo ngiitan osai ka mangyan in ngaran Matiyo. Siyo agitokkaw sa opisina agpaningil bowis. Keyen Isos, Kao miyanggat wa sa kangay. Tomaydek wa ngani Matiyo, miyanggat sa kansiyo. ¹⁰ In Isos sa kay Matiyo balay agkoman osai in kansiyo mga agadar, rateng in aronaw mga agpaningil bowis osai in mga agpamangwat daet. Siro maybelagan, malpamangan. ¹¹ In ina ngiitan in mga Parisiyo kansiro tiyanong in mga agadar keyen, Nakay batang in agpatoldo sa kanyo agpabelag agkoman sa mga agpaningil bowis osai sa roma kay pag mga agpamangwat daet? ¹² Paka kay Isos arengeyan ina siyo keyen, In idapo maskit idapo kailangan agpanggamot, dayem in apo maskit. ¹³ Kamo panaw wa, remremen in siyabi sa Agisolat keyen, In makaanggay sa kangay yewed waget in agsamba, dayem kadayo in agpakayawte sa mga amat. Kaya ako atai pataboy matang beryaen in mga apo daet, yewed in mga keyen siro idapo daet. ¹⁴ Pasabangen kay Isos in mga agadar kay Owan in Agbaotismo. Siro keyen, Kami, osai din in mga Parisiyo apo ogali yewed agpamangan dayem agpandalangin waget. Nakay batang in kaimo mga agadar idapo kataw ina pag ogali? ¹⁵ Keyen Isos, In mga mangyan pataboy sa kasalan idbatay agrongkot anggan baywi kay kansiro sarig in kaliyakiyan batay taybalang. Kamay dogayan in kaliyakiyan piyagkowa wakay. Na ina pag betek siro idbatay wa agkoman. ¹⁶ Isos keyen kay, Idapo batay agsimat ikkay mikeres pag damit sa dogay wa pag lambong. Angkataw no isag mikeres in bayo pag damit, na mistobo wa gayed in rognit sa simatan. ¹⁷ Osai in bayo pag alak idbatay siyoroy sa dogay wa balat pagsoroyan. Angkataw no kataw ina, na isag mangkoltik wa in balat, mabobo wa in alak kadayo in pagsoroyan masida wa din. In bayo pag alak piyagsoroy sa bayo pag balat, na tanan idbatay masida. ¹⁸ Isos agiplaong kay, rateng in osai ka poon mga Odyo. Siyo agpaselang kay Isos agdaing keyen, In kangay bodang kagbaiyan matay karai wate. Kamay miyanggat kao sa kangay, siyo paaponanen kaimo bakwaw na siyo batay wakay boway. ¹⁹ Isos tomaydek, miyanggat sa kansiyo, miyanggat sa kansiyo in mga agadar. ²⁰ Osai ka kagbaiyan labing dowai wa ka dagon piyagpanalowan miyanggat kay Isos paoriyan. Kansiyo kiyapkap in tangrawan kay Isos lambong. ²¹ Angkataw kansiyo remrem keyen, No kangay wa makapkap kay Isos lambong, na toloy wa ako batay maoraw sa kangay maskit. ²² Isos mangkit sa kansiyo paoriyan, kansiyo ngiitan in kagbaiyan, keyen, Laki, Pakaeyaten in kaimo remrem, kaya piyaoraw in kaimo maskit panawen kao agpasandig sa Diyos. Ina daan pag betek maoraw wa, maal wakay in kagbaiyan. ²³ Paka Isos rateng sa balay in poon, kansiyo ngiitan in mga agbangsi, osai aronaw mangyan aglalae anggan. ²⁴ Isos keyen, Kamo bali wa. Yewed matay in bodang, agesek waget. Isos piyagpatawaan wa. ²⁵ Kamay paka kansiyo piyalompot wa in mga mangyan, siyo misoroy sa balay. Kansiyo yaatang sa bakwaw in bodang. Kadogayte miyorog wa toloy in bodang. ²⁶ Ina pag mibaloy biyarita asin pag boo kobat. ²⁷ In Isos agipanaw asin pag kobat apo dowai ka kaliyakiyan beleg miyanggat sa kansiyo. Siro agpango keyen, Laki Kasokponan Dabid, kami pakayawteen. ²⁸ In Isos monaik sa balay in mga beleg pasabangen sa kansiyo. Isos agtanong sa kansiro keyen, Sa kanyo remrem nakay, ina kangay abaloyan? Siro keyen, Aon, Laki Kapwan. ²⁹ Kalbas kansiyo kiyapkap kansiro mata, keyen, No nangkataw in kanyo paniwala na mibaloy wa. ³⁰ Kalbas siro kangitan wa ngani. Isos maloba wa agbilin sa kansiro keyen, Kamayba kay nakay, ina ayaw kanyo agsabiyen. ³¹ Kamay in siro panaw wa Isos kansiro piyagbarita asin pag boo kobat. ³² Paka panaw wa in dokalaki, apo wakay biyaba kay Isos osai ka piyaglowasan mamaw yewed din kaiplaong. ³³ Paka biyoyaw Isos in mamaw, in kaliyakiyan miplaong wa. In mga mangyan agsoyo keyen, Atai sa Israil idapo batang ngiitan kataw ina. ³⁴ Kamay siyabi in mga Parisiyo keyen, Batang daan sa poon mga mamaw in kansiyo kabaloyan agpamoyaw mamaw. ³⁵ Isos agipanawan sa boo mga bayan lakoy anggan sa mga bayante, siyo agpatoldo sa mga balay pagpaniponan. Kansiyo piyagpatoldo in Maal pag Barita in Diyos agpapoon wa, osai din kansiyo piyaoraw in mga maskit, kamayba wa nakay pag mga maskit. ³⁶ In kansiyo ngiitan in karowan wano pag mga mangyan siyo apakayawtean sa kansiro, angkataw siro agkagolo, mabyat in remrem, kagwali mga topa idapo agalapet. ³⁷ Matang kansiyo siyabi sa kansiyo mga agadar keyen, Lakonaw in aniyen, kamay korangte in batay agani. ³⁸ Na kanyo ayayen sa Kapwan aniyen, keyen kansiyo wa sogowen in mga batay agani.

¹ Kay Isos tiipon in Labing Dowai ka kansiyo agadar, kansiyo piyakan kabaloyan agboyaw sa daeten pag mga mamaw, osai agpaoraw sa kamaybawa nakay pag maskit. ² Anda in mga ngaran in kansiyo labing dowai ka katiwala. In osai Simon piyagawit din Pidro, in kadowai Anris kay Pidro belag, in katolo osai in kaopat siro tayari din Santiyago osai Owan in kay Sibidiyo mga bodang, ³ in kalima Pilipi, in kaenem Bartolomi, in kapito Tomas, in kawalo Matiyo in agpaningil bowis, in kasiyam Santiyago kay Alpiyo bodang, in kasampo Tadyo, ⁴ in kalabing osai Simon in ribildi, in kalabing dowai Odas Iskaryoti in agpadakep kay Isos. ⁵ Ina pag Labing Dowai siyogo Isos. Keyen in kansiyo bilin, Kamo ayaw agtaboy sa kobat in mga yewed Odyo, osai kamayba sa nakay pag bayan sa kobat Samariya. ⁶ Dayem in kanyo pagtaboyan in mga kasokponan Israil. Siro kagwali mga topa malibangaw. ⁷ In kamo agipanaw in kanyo patoldowen keyen, In Diyos bangen wa agpapoon. ⁸ Kanyo paorawen in mga maskit, pabowayen wa in mga matay, osai boyawen in mga mamaw. Kamo piyakan idapo bayad, na kamo agpakan wakay sa roma idapo din bayad. ⁹ Kamo ayaw agbaba mga kowarta sa kanyo sokloban, kamayba in papil, kamayba pilak kamayba tanso. ¹⁰ In kamo agipanaw ayaw agbaba begyas, osai balokas pamalit, kamayba tapatos, osai sikkor. Angkataw in agpanawen piyagpakan in boo kansiyo pamangnen. ¹¹ Kamayba bayan lakoy, kamayba bayante, paka kamo rateng kanyo pamangkiten no nakay pag mangyan asin in batay agpabelag sa kanyo, kalbas kamo mamataw sa kansiyo anggan kamo baywi kay ista pag bayan. ¹² In kamo agisoroy asin pag balay na kamo mandalangin keyen, Kamo pakaanggayen in Diyos. ¹³ Kalbas no ngani kamo piyabelag in mga mangyan sa balay, na agaway kay in kanyo pandalangin. Kamay no yewed na kanyo wakay kowaen in kanyo pandalangin. ¹⁴ Kamayba sa nakay pag balay, sa nakay pag bayan, no siro dayo agpabelag, dayo agparengey sa kanyo, na kamo panaw wa asin, ragragen in bogabo sa kanyo darapa, in beet siyabi siro batay piyagparosa. ¹⁵ Kangay piyagsabi sa kanyo keyen, Dogayan sa Ibeng Agparosa osai in mga taga asin pag bayan, osai in mga taga Sodoma, taga Gomora, in batay maloba pag parosa in sa mga taga asin agbangen. ¹⁶ Ngona kamo kagwali mga topa kangay piyagsogo sa aronaw bangaw. Kamo agtolad sa mga olay, baatte sandata, osai sa mga bantog kalapati mabait. ¹⁷ Kamo agingat sa mga mangyan, angkataw kamo batay piyagbaba sa mga osap, osai batay piyagpamogbog sa mga balay pagpaniponan. ¹⁸ Panawen kamo agpaniwala sa kangay kamo batay piyagpaadap sa mga gobirnador osai sa mga poon lakoy. Na kamo batay agbarita sa kansiro kadayo sa mga yewed Odyo. ¹⁹ No kamo batay wa piyagosap ayaw agkariyaban no nakay in batay kanyo siyabi, osai no nangkataw in agsabi. Angkataw no rateng in kabetek na kamo batay piyakan in kanyo batay siyabi. ²⁰ Angkataw in kanyo batay siyabi yewed batang sa kanyo waget remrem, dayem sa Abyan kantam Amang. ²¹ Apo mangyan batay agtaboy kansiyo belag sa mga agpamono. Kataw din ina in batay piyagpangwat in amang sa kansiyo bodang. Apo din mga bodang batay mandaeg sa kansiro mga koyay, kansiro piyagpabono. ²² Panawen kamo agpaniwala sa kangay kamo batay piyagkagalitan boo mangyan. Kamay in agaway kay sa kangay anggan sa kalobosan, na siyo in batay piyaboway. ²³ No kamo piyagpaidapan sa osai ka bayan, na kamo domalagan pataboy sa osai wakay. Kangay piyagsabi sa kanyo yewed kay batay kanyo diyalan in boo mga bayan sa Israil, ako in Bodang Mangyan rateng wa. ²⁴ In piyagpaadar idbatay lakonaw kay sa kansiyo agpatoldo. In sogowan idbatay lakonaw kay sa kansiyo kapwan. ²⁵ Agkaanggay in agadar no siyo kataw wa kansiyo agpatoldo, osai in sogowan no siyo kataw in kansiyo kapwan. No in koyay sa talnakiyan yaawit Bilsibol, na labi wa batay piyaglibak in kansiyo talnakiyan. ²⁶ Na kamo ayaw agkalimo sa mga mangyan. In ngona piyagbetang batay daan piyagngitan, in ngona piyagtago dogayan batay daan atawanan. ²⁷ In kangay piyagsabi sa kanyo ngona piyagtago sa roma, kanyo wakay sabiyen sa boo. In kangay ngona piyagkimkimot sa kanyo, kanyo wakay pangowen sa boo. ²⁸ Ayaw agkalimo sa mga agbono sa bilog, kamay siro yewed kabono sa abyan. Dayem in Diyos in apo kabaloyan agbono sa abyan kadayo sa bilog, agbenglay sa toyongan, ina wa in kanyo kalimowanen. ²⁹ Dowai ka maya piyagpabili osai waget ka sintimos. Kamay kamayba osai waget ka maya idbatay matay no kantam Amang yewed pomayag. ³⁰ Kamaybawa in kanyo mga abok, boo kansiyo biilang. ³¹ Na kamo ayaw agkalimo, angkataw kamo piyagmaal ngani labi kay sa karowan pag mga maya. ³² No siyo in agpabelag sa kangay sa pangkit mga mangyan, na siyo kangay din batay piyagpabelag sa pangkit kangay Amang sa langit. ³³ Dayem in agpamangyan sa kangay sa pangkit mga mangyan, na ako batay din agpamangyan sa kansiyo sa pangkit kangay Amang sa langit. ³⁴ Isos keyen kay, Ayaw kanyo agremremen keyen, Kaya ako atai pataboy matang apyaan in mga mangyan. Kaya ako atai pataboy yewed matang apyaan dayem magolo in mga mangyan. ³⁵ Kaya ako atai matang siro batay aglaban, In bodang kaliyakiyan agla ban sa kansiyo amang, In bodang kagbaiyan aglaban sa kansiyo inang, In manogang aglaban sa kansiyo biyanan. ³⁶ In batay kaaway osai ka mangyan in kansiyo daan mga kamalay. ³⁷ Osai in kansiyo koyay osai ako, no in mangyan agpakayawte sa koyay agbangen na siyo yewed maal sa kangay. Osai in kansiyo bodang osai ako, no in mangyan agpakayawte sa bodang agbangen na siyo yewed maal sa kangay. ³⁸ No siyo yewed sandata agyanggat sa kangay kamayba batay piyagbono, na siyo yewed maal sa kangay. ³⁹ In agaman kansiyo boway na siyo batay aidapowan. Kamay in aidapowan in kansiyo boway panawen siyo agpaniwala sa kangay, na siyo batay apo. ⁴⁰ In agpabelag sa kanyo na ina in agpabelag din sa kangay. Kalbas in agkabeet sa kangay na ina agkabeet din sa Diyos in agsogo sa kangay. ⁴¹ In agpabelag sa osai ka poropita panawen siyo poropita, na in agpabelag batay piyagpakan in bayad kalakoy wa daan in piyagtaboy sa poropita. In agpabelag sa maalno pag mangyan panawen siyo maalno, na in agpabelag batay piyagpakan kalakoy wa daan in piyagtaboy sa maalno. ⁴² No siyo in agpakan kamayba osaite ka baso sapa sa kalakoyte pag kangay agadar panawen siyo kangay agadar, na kangay piyagsabi sa kanyo in agpakan batay wa daan piyagpakan kaanggayanan.

¹ Paka kalbas wa kay Isos piyabilinan in kansiyo Labing Dowai ka agadar, siyo panaw wa asin pataboy sa mga bayan matang ista agpatoldo osai agpaadar. ² Ina pag betek Owan in Agpamaotismo sa bilanggowan wa. Siyo abaritaan in mga piyagpangwat Kiristo. Kalbas kansiyo siyogo in kansiyo mga agadar, ³ matang agsabi kay Isos keyen, Kao lames in piyangako Diyos batay atai? ⁴ Isos keyen, Kamo moli wakay kay Owan, kanyo sabiyen sa kansiyo in kanyo arengeyan anggan in kanyo ngiitan. ⁵ Kangitan wa in mga beleg, in mga pilay agipanawan wa, maal wakay in mga kagwali piyagpanyakit, in mga bingi karengey wa din, in mga matay boway wakay, osai in Maal pag Barita piyagpatoldo sa mga maidap. ⁶ Agkaanggay in mangyan no yewed piyagbaslag in agremrem panawen sa kangay. ⁷ Paka panaw wa in kay Owan mga sogowan, Isos miplaong sa mga mangyan panawen kay Owan, keyen, Nakay batang kamo pataboy kay Owan sa moyod? ⁸ Nakay lames in beet kanyo ngiitan? Yewed mangyan maal wano in damit. In mga agdamit maalno idbatay ngiitan sa moyod dayem sa mga balay lakoy mga poon lakoy. ⁹ Na nakay lames ngani in beet kanyo ngiitan? Osai lames ka poropita? Aon ngani, kangay piyagsabi sa kanyo, Owan labi kay kalakoy in mga poropita. ¹⁰ Angkataw Owan in piyagsabi sa Agisolat keyen, Baina, kangay wa piyagsogo in kangay sogowan tokaw sa kaimo. Siyo in agsandata in kaimo batay dalan. ¹¹ Kangay piyagsabi sa kanyo, sa boo mangyan idapo kalakoy Owan in Agpamaotismo. Kamay in kalakoyte sa boo mga bodang Diyos, siyo labi kay kalakoy Owan. ¹² Sogod agpamarita Owan in Agpamaotismo anggan ngona in mga sakop sa Diyos piyagpangwatan daet in mga aleleng, kansiro nges piyagagaw sa Diyos. ¹³ Kataw anggan sa kabetek Owan in boo mga poropita kadayo in mga Batas agsabi in mga batay mibaloy. ¹⁴ Kalbas no nges kanyo batay piyaniwala, na Owan wa in Iliyas kansiro siyabi batay rateng. ¹⁵ No kamo apo talinga na mamarengey wa. ¹⁶ Sa nakay kangay piyagpatolad in mga mangyan agkaboway ngona? Siro kataw mga bodang agtokkaw sa tongkodan dayo agmesa. In kansiro mga pagbelag agberya keyen, ¹⁷ Kamayba kami agbangsi, agkamesa nges kataw kainan kamo dayo malkaanggayan. Kamayba wakay kami manggoong, agkamesa nges kataw aglebeng, dayo din kamo manangis. ¹⁸ Kaya kamo kangay piyagpatolad asin angkataw Owan atai pataboy yewed agkoman masadap, yewed din aginem alak, kalbas in mga mangyan keyen, Siyo piyaglowasan mamaw. ¹⁹ Kadogay rateng wakay ako in Bodang Mangyan, agpamangan din aginem din. Kalbas in mga mangyan keyen wakay, Baina, ina pag mangyan matakaw, agpanlasing, agpabelag sa mga agpaningil bowis, osai sa mga agpamangwat daet. Kamay in katawanan Diyos piyagngitan betek panawen sa kansiyo mga piyagpangwat. ²⁰ Paka kalbas siyabiyan Isos in mga mangyan sa mga bayan kansiyo piyagpangwatan aronaw mga makasoyo pag panawen, kamay siro yewed agbenglay kansiro mga daet. ²¹ Keyen Isos, Lakonaw in batay parosa sa kanyo mga taga Korasin, kamo mga taga Bitsayda. Angkataw no nges piyangwat sa Tiro osai sa Sidon in mga makasoyo pag piyangwat atai sa kanyo, na nges siro dogay wa agdamit sako, agtokkaw sa borisen, matang agpapangkit siro agbenglay kansiro mga daet. ²² Kangay piyagsabi sa kanyo, dogayan sa Ibeng Agparosa, osai sa kanyo, osai sa Tiro osai Sidon, na sa kanyo agbangen in maloba pag parosa. ²³ Osai kamo mga taga Kapirnaom, kamo mana agpakabwat anggan sa langit. Kamo batay piyalabo sa toyongan. Angkataw no nges piyangwat sa Sodoma in mga makasoyo pag panawen piyangwat sa kanyo, na nges siro baywi kay anggan ngona. ²⁴ Kamay kangay piyagsabi sa kanyo, dogayan sa Ibeng Agparosa, osai in sa kansiro osai in sa kanyo, na in sa kanyo agbangen in maloba pag parosa. ²⁵ Ina pag betek siyabi Isos keyen, Laki Amang, kao Kapwan langit osai kobat. Ako agkaanggay sa kaimo, angkataw in kaimo biyetang sa mga batang agadar, sa mga apo katawanan, kaimo piyalowas sa mga kataw bodangte in remrem. ²⁶ Aon, Amang, ako agkaanggay sa kaimo panawen kataw ina in kaimo iidang. ²⁷ Isos keyen kay, In boote piyaalapet sa kangay in kangay Amang. Idapo katawan no nakay ako no yewed in Amang waget. Osai idapo din katawan no nakay in Amang no yewed ako in Bodang, osai in kangay iidang paalamanen. ²⁸ Keyen Isos, Pasabangen wa sa kangay, kamo mga mainaen, mga agkabyatan remrem. Na kamo kangay piyagpakan wakay eyat. ²⁹ Kamo omadar sa kangay, maniwala sa kangay. Kataw ako mabait, ako agpakabwatte in remrem. Na kanyo remrem batay wakay piyakaeyat. ³⁰ Yewed mabyat in kangay piyagpatoldo, in agpaniwala sa kangay yewed maidap.

¹ Osai ka Ibeng Pamainga, kora Isos mipadalan sa osai ka agay. Agkayawes wa in kansiyo mga agadar, siro manlotok takway, kansiro liyokka, kalbas kiyoman wa in begas. ² Paka ina ngiitan in mga Parisiyo kansiro siyabi kay Isos keyen, Kao mangkit, in piyagpangwat kaimo mga agadar. Ina piyagayaw sa Ibeng Pamainga. ³ Keyen Isos, Yewed mana kanyo biyasa in piyangwat Dabid in siyo agkayawes wa, osai in kansiyo mga sarig. ⁴ Siyo misoroy sa balay Diyos, kansiro kiyoman in tinapay piyaandog sa Diyos. Piyagayaw in mga Batas ina pag tinapay kansiro kiyoman, no yewed in mga sasirdoti waget in maal mamangan ina. ⁵ Yewed din mana kanyo biyasa sa Batas no betek Ibeng Pamainga na in mga sasirdoti sa balay lakoy Diyos agpanawen daan, kamay ina yewed daet. ⁶ Kangay piyagsabi sa kanyo, in atai labi kay kalakoy sa balay lakoy Diyos. ⁷ No nges kanyo atawanan in beet siyabi in Agisolat keyen, In makaanggay sa kangay yewed waget in agsamba, dayem kadayo in agpakayawte sa mga amat, na yewed kanyo piyadaet in mga mangyan yewed daet. ⁸ Ako in Bodang Mangyan Kapwan din in Ibeng Pamainga. ⁹ Isos panaw wa pataboy sa kansiro balay pagpaniponan. ¹⁰ Ista apo osai ka kaliyakiyan makenet wa in osai ka bakwaw. Ista din in mga mangyan agkabeet Isos sombongen, matang siro agtanong keyen, Maal lames sa Batas in agpaoraw sa Ibeng Pamainga? ¹¹ Keyen Isos, No kamo apo ayop malabo sa langa sa Ibeng Pamainga na nakay, idbatay wa mana kanyo kiyowa? ¹² Labi kay maal in mangyan osai in ayop. Na maal sa Batas in agpangwat maal kamayba sa Ibeng Pamainga. ¹³ Kalbas kansiyo siyabi sa kaliyakiyan keyen, Odoyen wa in kaimo bakwaw. Kalbas yoodoy ngani kansiyo bakwaw, toloy wakay maal, mibaloy wakay kataw in osai agbangen. ¹⁴ Kalbas panaw in mga Parisiyo, maypolongan no nangkataw lames batay mabono Isos. ¹⁵ Amatangan Isos in kansiro piyagremrem, matang siyo panaw wa asin. Aronaw in miyanggat sa kansiyo. Kalbas kansiyo piyaoraw in boo mga apo maskit. ¹⁶ Kamay siro maloba kansiyo piyagayaw agpamaton sa roma na siyo in agpaoraw. ¹⁷ Matang mibaloy wa in siyabi Isaiyas in poropita keyen, ¹⁸ Baanda, in sogowan kangay iidang, kangay piyagmaal gayed, in kangay ngani piyagkaanggayan. Kangay batay piyabalay sa kansiyo in kangay Abyan. In kansiyo batay piyalowas in kangay mga remrem sa boo mangyan. ¹⁹ Idbatay siyo daegan, idbatay agpango, idbatay maksen in kansiyo agiplaongan sa mga tongkodan, ²⁰ Idbatay kansiyo piyaidapo kabolowan in mainaen, idbatay kiyaplep in tinglaw agkaplek wa, anggan ina pag remrem Diyos mandaeg wa gayed. ²¹ In boo mga mangyan batay agpasandig sa kansiyo kabaloyan. ²² Biyaba kay Isos in osai ka kaliyakiyan piyaglowasan mamaw, beleg, osai yewed kaiplaong. Siyo piyaoraw Isos, kaiplaong wakay, kangitan wakay din. ²³ In boo mangyan agsoyo keyen, Isos wa lames in kay Dabid Kasokponan? ²⁴ Kamay paka ina arengeyan in mga Parisiyo kansiro siyabi keyen, Kaya ina pag mangyan kabaloy agboyaw mga mamaw angkataw in poon mga mamaw Bilsibol in agtaboy sa kansiyo in kabaloyan agboyaw. ²⁵ Atawanan Isos in kansiro piyagremrem, matang siyo keyen, In baatte sakopan no agpalawayan, na batay masida. Osai in baatte bayan osai talnakiyan no agpalawayan, na batay wa din masida. ²⁶ Na kataw din ina Katanas no siyo agboyaw kay Katanas, na siyo daan in aglaban sa kansiyo sadiri, na batay masida in kansiyo sakopan. ²⁷ No kanyo piyagsabi in Bilsibol in agpakan kabaloyan sa kangay agboyaw mamaw, na in galem ina pag siyabi kadayo in mga agpaniwala sa kanyo, batang din kay Bilsibol in kansiro kabaloyan agboyaw mamaw. Na siro wa din in batay agsabi keyen, Kamo baribid. ²⁸ Kamay no in Abyan Diyos in agpakan sa kangay in kabaloyan agboyaw mamaw na in beet siyabi in Diyos agparakay wa agpapoon sa kanyo. ²⁹ Nangkataw batay aisoroy in balay in osai ka mangyan maeyat, no yewed tokaw biyakos in kapwan? No mabakos wa na bayo batay aisoroy in balay, matakaw in kansiyo mga sangkap. ³⁰ In yewed agiyagem sa kangay, na aglaban sa kangay. In yewed agtolong sa kangay agtipon, na agpanripatak. ³¹ Na kangay piyagsabi sa kanyo, batay piyaglibangaw in boo daet osai aglibak. Dayem in aglibak sa Abyan Diyos, ina idbatay piyaglibangaw. ³² In miplaong aglaban sa Bodang Mangyan ina batay liibangaw sa kansiyo, kamay in agiplaong aglaban sa Betek pag Abyan na idbatay wa daan malibangaw in kansiyo daet kamayba ngona, kamayba dogayan. ³³ Siyabi din Isos sa mga Parisiyo keyen, Kantam remrem no maalen in raweg na maalen din in poon yangaw, kamay no daeten in raweg na daeten din in poon yangaw, angkataw sa raweg atawanan in poon. ³⁴ Kamo mga aleleng, mga kagwali dopong, na nangkataw kamo batay kasabi in maal? Angkataw no nakay in piyaglakonaw in mangyan sa kansiro remrem na ina in kansiyo piyagsabi. ³⁵ Maal in piyagsabi in maal pag mangyan batang sa kansiyo maal pag remrem. Daeten in piyagsabi in daeten pag mangyan angkataw kansiyo remrem makno daet. ³⁶ Kangay piyagsabi sa kanyo keyen, Sa Ibeng in Diyos agosap in baatte mangyan batay piyagbotog panawen sa baatte kansiyo ngona agiplaong idapo kabolowan. ³⁷ Angkataw no daeten in kanyo agiplaong na kamo batay piyarosa. No maalen in kanyo agiplaong na kamo idbatay piyarosa. ³⁸ In mga Parisiyo osai mga agpatoldo in mga Batas Diyos agsabi kay Isos keyen, Laki Agpamatoldo, papangkiten sa kanyam in makasoyo pag panawen matang atawanan kao apo in kabaloyan Diyos. ³⁹ Keyen Isos, Kamo pag mga mangyan daeten, yewed betek sa Diyos. Kamo agpamangkit in makasoyo pag panawen. Kamo idbatay piyapangkit makasoyo no yewed ina waget in makasoyo pag mibaloy kay Onas in poropita. ⁴⁰ No kataw Onas tolo ka ibeng, tolo ka yaabi mataw sa galem boyon isda lakoy, na kataw din ina ako in Bodang Mangyan batay mataw sa galem diya tolo ka ibeng. ⁴¹ Sa Ibeng Agparosa in mga taga Ninibi batay tomaydek agsabi keyen parosaen in ngona pag mga mangyan. Angkataw in Onas agpatoldo sa kansiro siro mamarengey wa, biyenglay wa in kansiro mga daet. Kamay ngona apo atai labi kay kalakoy in kay Onas piyagpatoldo. ⁴² Sa Ibeng Agparosa in kagbaiyan poon lakoy sa kobat Siba batay agsabi keyen parosaen in ngona pag mga mangyan. Angkataw siyo pataboy kay Solomon batang sa tangrawan kobat matang parengeyen in kansiyo betek pag agiplaong. Kamay ngona apo atai labi kay kalakoy in kay Solomon agiplaong. ⁴³ Isos keyen kay, Paka biyoyaw in mamaw sa osai ka mangyan, in mamaw agipanawan wa sa mamara pag kobat agpamangkit pagbalayan. No idapo ngiitan, ⁴⁴ na siyo batay keyen, Ako batay wakay moli sa kangay taite pagbalayan. Rateng wakay sa mangyan, kansiyo ngiitan piyakapya wa kamay idapo galem. ⁴⁵ Na siyo panaw wakay, batay kay agpaanggat pito ka mamaw labi kay kaloba siyo, misoroy wakay sa mangyan asina wakay in agbalay, matang in piyaglowasan maloba wa gayed labi kay sa datiyan. Na batay din kataw ina in mga mangyan agkaboway ngona. ⁴⁶ Isos agiplaong kay sa mga mangyan, rateng sa tongkodan kansiyo inang, kansiyo mga ariyan, agkabeet manggisodan sa kansiyo. ⁴⁷ Apo agiplaong sa kansiyo keyen, Asina sa tongkodan kaimo inang, kaimo mga belag agkapatagbo sa kaimo. ⁴⁸ Keyen Isos, Nakay? Kangay inang? Kangay mga belag? ⁴⁹ Kansiyo piyatoldo in kansiyo mga agadar, keyen, Anda dayem in kangay inang, in kangay mga belag. ⁵⁰ Angkataw no siyo in agpangwat in beet kangay Amang sa langit, na siyo wa in kangay inang, osai belag.

¹ Ina daan pag ibeng Isos lompot sa balay, tomokkaw sa balabaan dagatte. ² Kalbas siyo tiiponan in bonton wano pag mga mangyan, matang siyo somakay sa osai ka bangka, asin siyo tomokkaw. Sa balabaan wakay dagatte agpalpantaydek in mga mangyan. ³ Kalbas siro kansiyo piyatoldo aronaw sa mga alimbawa keyen, Apo osai ka mangyan panaw batay agsabog bini. ⁴ In siyo agsabog apo bini maragrag sa dalan. Rateng in mga bantog, ina pag bini kiyoman. ⁵ Apo wakay bini maragrag sa batowen, kamay asin yewed matekba in diya. Ina pag bini toloy mitalo angkataw yewed matekba in diya. ⁶ Kamay paka mabwat wa in ibeng ina aibengan, malayo, kataw korangte in dalig. ⁷ Apo wakay bini maragrag sa lalosenan. Mistobo in lalosen, kiyopot wa in togda. ⁸ Apo din bini maragrag sa maalno pag diya, ina manggalem. Apo sangdaan ka beter baatte osai ka poon, apo wakay animnapo, apo din tatlompo. ⁹ In apo talinga mamarengey wa. ¹⁰ In mga agadar agpasabangen kay Isos agtanong keyen, In kao agpatoldo sa kansiro nakay batang sa mga alimbawa? ¹¹ Siyo keyen, In mga tangona piyagbetang panawen sa Diyos agpapoon piyagpalowas wa sa kanyo, kamay yewed maal sa kansiro agbangen. ¹² Angkataw in apo na piyagpakan kay, anggan karowan wa gayed. Kamay in idapo na piyagkowa wakay in kansiyo remrem kansiyo. ¹³ Kaya sa mga alimbawa ako agiplaong sa kansiro panawen kamayba siro agpangkit yewed kangitan, kamayba siro agparengey yewed karengey, yewed katawan. ¹⁴ Mangibaloy wa sa kansiro in siyabi Isaiyas batang sa Diyos keyen, Kamo batay agparengey agpa rengey kamay idbatay din katawan. Kamo batay agpangkit agpangkit kamay idbatay din kangitan. ¹⁵ Angkataw anda pag mga mangyan idbatay katawan. In kansiro talinga bingi wa, in kansiro mga mata pesekan wa. No yewed kataw ina, na kansiro mata batay kangitan, kansiro talinga batay karengey, osai in kansiro remrem batay katawan. Na siro batay wakay moli sa kangay, matang kangay batay piyaoraw. ¹⁶ Kamay kamo agbangen agkaanggay angkataw in kanyo mga mata kangitan wa osai in kanyo mga talinga karengey wa. ¹⁷ Kangay piyagsabi sa kanyo keyen, Bonton in mga poropita osai mga maalno pag mangyan in agkabeet kangitan sa kanyo piyagngitan, kamay yewed kansiro ngiitan. Osai beet karengey in kanyo piyagparengey kamay yewed kansiro arengeyan. ¹⁸ Kanyo wa pamarengeyen in beet siyabi in alimbawa in agsabog bini. ¹⁹ In mangyan agparengey sa barita panawen sa sakopan Diyos kamay no yewed kansiyo atawanan in beet siyabi, na siyo kataw in bini mipasabog sa dalan. Rateng in dimonyo, yaagaw in mipabalay sa kansiyo remrem. ²⁰ In bini mipasabog sa batowen, ina in alimbawa sa agparengey sa agiplaong Diyos, kalbas toloy agkaanggay sa barita. ²¹ Kamay idwa kansiyo piyagremrem matang kadogayte waget siyo agpaniwala. Paka rateng wa in mga kaidapan, mga agpangolok, siyo toloy wa omempet. ²² In mipasabog sa lalosenan, ina alimbawa sa agparengey sa barita, kamay siyo agkariyaban sa mga nakayte atai sa kobat, osai agkasadapan sa mga kasangkapan, kalbas in barita aligetan wa sa kansiyo remrem idwa manggalem. ²³ In mipasabog sa maalno pag diya, ina in alimbawa sa agparengey sa barita, siyo katawan in beet siyabi, kalbas siyo agpanggalem. Apo manggalem sangdaan, apo din animnapo, apo din tatlompo. ²⁴ Isos apo wakay alimbawa siyabi sa kansiro keyen, In agpapoon in Diyos kataw anda. Apo osai ka mangyan agsabog sa kansiyo agay in maalno pag bini. ²⁵ Kamay paka yabi wa agesek wa in mga mangyan, rateng in kansiyo kaaway, in kansiyo panogdaan siyabogan wakay lalosen, in bolos kagwali in togda. Panaw wakay in kaaway. ²⁶ Moslod in bini. Paka labasan wa bayo ngiitan din in lalosen. ²⁷ Pasabangen wa sa kapwan agay in kansiyo mga sogowan. Siro keyen, Laki, yewed mana maal in kaimo bini siyabog? Na nakay batang apo lalosen? ²⁸ Siyo keyen, Osai ka kaaway in agpangwat ina. In mga sogowan keyen, Kaimo lames beet kanyam gaboten in mga lalosen? ²⁹ Siyo keyen, Ayaw. Karam kadayo in togda kanyo magabot. ³⁰ Bayansiyo wa malageman anggan tagani. Kangay piyagsabi sa mga agani keyen, Tokaw kowaen in mga lalosen, kanyo bekkesen matang sonogen. Kalbas in togda tiponen sa kangay banglin. ³¹ Giisod wakay Isos in osai ka alimbawa keyen, In agpapoon in Diyos kataw osai ka bisloy tiyogda osai ka mangyan sa kansiyo kobat. ³² Ina pag bini kalakoyte wa gayed sa boo bini, kamay paka mitogda kadogay mistobo ina in lakonaw lakoy sa boo togda, mibaloy poon lakoy yangaw, pagpangaponan mga bantog in kansiyo mga sanga. ³³ Kansiyo giisod in osai wakay ka alimbawa keyen, In agpapoon in Diyos kataw in pamaistobo tinapay piyaagem osai ka kagbaiyan sa osai ka galang arina, kadogay ina boo mistobo. ³⁴ Ina pag boo siyabi Isos sa mga alimbawa. Siyo idapo siyabi sa mga mangyan no yewed sa mga alimbawa. ³⁵ Na mibaloy wa in siyabi in poropita keyen, Sa mga alimbawa ako batay miplaong sa kansiro. In mga agibetang ibat piyangwat in kobat kangay batay piyagsabi sa kansiro. ³⁶ Kalbas kay Isos biyaliwan in mga mangyan, monaik sa balay. Pasabangen sa kansiyo in kansiyo mga agadar. Kansiro siyabi keyen, Patoldowen sa kanyam in beet siyabi in alimbawa in lalosen sa agay. ³⁷ Isos keyen, In agsabog in maalno pag bini na ina ako in Bodang Mangyan. ³⁸ In agay ina in boo kobat. In maal pag bini ina in mga mangyan piyagsakop Diyos, in lalosen ina in mga mangyan piyagsakopan dimonyo. ³⁹ In kaaway in agsabog in lalosen ina in dimonyo wa daan. In tagani in kalobosan kobat. Osai in mga agani in mga angil. ⁴⁰ No nangkataw in lalosen piyagtipon osai piyagtebed, na kataw din ina in batay mibaloy sa kalobosan kobat. ⁴¹ Batay piyagsogo ako in Bodang Mangyan in kangay mga angil matang kowaen sa kangay pagsakopan in boo dailan kaya in mga mangyan agpangwat daet, osai in boo agpamangwat daet. ⁴² Ina kansiro batay biyenglay sa timbonan lakoy baya. Ista siro batay agpanangis lakoy anggan agpaldeet in kansiro mga ngipen. ⁴³ No kataw ina in mga bodang Diyos batay agrawa kataw ibeng sa sakopan in kansiro Amang. No kamo in apo talinga, na mamarengey wa. ⁴⁴ In agpapoon in Diyos kataw in kowarta lakoy biyenben sa osai ka kobat. Ina ngiitan osai ka mangyan, kadogay kansiyo wakay biyenben. Siyo agkaanggay wano, moli wakay sa balay, piyabili in boo sa kansiyo, kalbas biili in kobat pagbetangan in kowarta. ⁴⁵ In agpapoon in Diyos kataw wakay sa osai ka agpanlako, siyo agpamangkit bogway. ⁴⁶ Paka siyo kangitan osai ka bogway makaamag wano, siyo panaw wa, piyabili in boo sa kansiyo, kalbas biili ina pag bogway. ⁴⁷ In agpapoon in Diyos kataw wakay in osai ka pangkabel isda, piyalabo sa dagatte, karowan in abel isda. ⁴⁸ Paka makno wa giyoyod wakay sa balabaan dagatte. In mga kapwan malpanokkaw matang idangen in mga isda. In mga maalen kansiro tiipon sa mga pagsoroyan, kamay biyenglay wa in mga yewed maalen. ⁴⁹ Kataw ina in batay mipangwat sa kalobosan kobat. Batay agrateng in mga angil, in mga agpamangwat daet piyagpasoway sa mga maal pag mangyan. ⁵⁰ Kalbas in mga agpamangwat daet piyagbenglay sa agigang lakoy pag timbon. Ista siro batay agpanangis lakoy anggan agpaldeet in mga ngipen. ⁵¹ Keyen Isos, Ina pag boo kanyo lames atawanan? Siro keyen, Aon. ⁵² Kalbas kansiyo siyabi sa kansiro keyen, Kaya ngani in baatte agpatoldo in mga Batas, no siyo mibaloy wa bodang Diyos, na siyo kataw in osai ka kapwan agpalowas mga bayo kay osai in mga datiyan wa batang sa kansiyo pagbetangan. ⁵³ Paka Isos kalbas wa agsabi ina pag mga alimbawa siyo panaw wa asin, ⁵⁴ moli sa kansiyo bayan Nasarit. Kalbas siyo agpatoldo sa kansiro balay pagpaniponan. Agsoyo in mga karengey sa kansiyo. Siro keyen, Saano batang in atawanan ina pag lalaki, osai in kansiyo kabaloyan mamangwat in mga makasoyo? ⁵⁵ Yewed mana siyo in bodang in agpamangwat balay? Yewed mana Mariya in kansiyo inang, osai kora Santiyago, Osi, Simon, osai Odas in kansiyo mga ariyan? ⁵⁶ Yewed mana atai agbalay in kansiyo mga ariyan kagbaiyan? Na saano kansiyo atawanan ina pag boo? ⁵⁷ Kalbas daeten wa in kansiro remrem sa kansiyo. Kalbas siyabi Isos sa kansiro keyen, In Poropita piyagmaal kamaybawa saano, ayaw ngaro sa kansiyo sadiri kobat, osai sa kansiyo sadiri kabelagan. ⁵⁸ In kay Isos mga piyangwat makasoyo asin yewed karowan panawen siro yewed agpasandig sa kansiyo.

¹ Ina daan pag betek in gobirnador Irodis karengey in barita panawen kay Isos. ² Kansiyo siyabi sa kansiyo mga sogowan keyen, Ina Owan in Agpamaotismo. Kaya siyo kabaloy agpangwat ina pag mga makasoyo angkataw siyo batang matay tagoli wakay boway. ³ - ⁴ Angkataw taite kay Irodis piyagpangelel Owan keyen, Daeten in kao komwa kay Irodiyas in babai kaimo belag Pilipi. Kalbas Irodis agpadakep kay Owan matang biyakos osai piyabilanggo. ⁵ Kansiyo beet Owan bonowen kamay siyo agkalimo sa mga Odyo angkataw kansiro atawanan Owan osai ka poropita. ⁶ Paka rateng wa in ibeng kaboslot Irodis in kay Irodiyas daraga somayaw sa adap in mga mangyan. Kalbas Irodis maloba wa anggayan. ⁷ Kalbas kansiyo piyangako maloba sa daraga keyen, Kangay wa batay tiyaboy sa kaimo in kamayba nakay kaimo piyagayay. ⁸ Kalbas panawen sa siyabi kansiyo inang in daraga keyen, Ngona wa daan kaimo taboyen sa kangay sa osai ka palanggana in olo Owan in Agpamaotismo. ⁹ Kalbas Irodis agrongkot. Kamay panawen arengeyan in mga mangyan in kansiyo pangako, kansiyo siyogo keyen, Taboyen wa sa daraga in kansiyo piyagayay. ¹⁰ Kalbas Owan kansiyo piyapogot sa bilanggowan. ¹¹ Kalbas yaangan wa sa palanggana in olo, bayo tiyaboy sa daraga, kalbas toloy wakay kansiyo biyaba sa kansiyo inang. ¹² Rateng in mga agadar kay Owan, kansiro kiyowa in kansiyo bilog, kalbas liyebeng, kalbas pataboy wakay kay Isos agbarita. ¹³ In Isos karengey ina siyo somakay sa osai ka bangka, siyo agboktong pataboy sa osai ka betek. Ina abaritaan in mga mangyan, siro panaw sa mga bayan, mangagak sa kansiyo kamay agipanaw sa balabaan dagatte. ¹⁴ In lompot Isos sa balabaan kansiyo ngiitan in karowen in mangyan, kalbas siyo agpakayawte sa kansiro. Kalbas piyaoraw in mga apo maskit kansiro piyagbaba. ¹⁵ Agkabayapon wa in kansiyo mga agadar pasabangen kay Isos. Siro keyen, Anda adayonaw pag kobat, agkalabo wa in ibeng. Na kaimo wa palpasen in mga mangyan matang pataboy sa mga balay matang siro kabili pamangnen. ¹⁶ Isos keyen, Kamaybawa idwa siro panaw. Kamo wa in agpakan pamangnen sa kansiro. ¹⁷ Siro keyen, In atai kantam lima waget ka tinapay dowai ka isda. ¹⁸ Keyen Isos, Amba, atai wa babaen. ¹⁹ In mga mangyan kansiyo piyatokkaw sa lalosenan. Kalbas kansiyo kiyowa in lima ka tinapay osai in dowai ka isda. Siyo manangra sa langit, agpasalamat sa Diyos. Kalbas kansiyo piyandodo in mga tinapay. Kansiyo wa siyogo in mga agadar keyen, Panaboyen wa sa mga mangyan. ²⁰ Siro boo malpamangan, anggan bosog. In mga agadar agtipon in mga mitera piyandodo. In kansiro matipon labing dowai ka galang makno kay. ²¹ Lima ka libo ka kaliyakiyan in mamangan. Apo din mga kagbaiyan, osai in mga bodang. ²² Toloy kay Isos piyasakay sa bangka in mga agadar, piyatokaw sa ripay dagatte, anggan kansiyo wa piyapanaw in mga mangyan. ²³ Paka panaw wa in mga mangyan siyo monaker wa sa boksor batay mandalangin. Abayaponan siyo agboktong sa boksor. ²⁴ In bangka sa kagwaraan wa dagatte, piyagsabongan alon angkataw piyagtagbo kowaya. ²⁵ Paka agkaboka wa Isos mangagak sa kansiro agipanaw aglaed sa sapa. ²⁶ Paka siyo ngiitan in mga agadar alimowan, mangirabot, mango keyen, Kablag. ²⁷ Isos toloy miplaong keyen, Kamo ayaw alimowan. Ako daan. Pakaeyaten in kanyo remrem. ²⁸ Miplaong Pidro keyen, Laki Kapwan, no kao in Kapwan, na ako pataboyen asin sa kaimo papanawen palaeden sa sapa. ²⁹ Keyen Isos, Aywawa. Pidro lomabo sa bangka agbikang wa sa sapa, pataboy kay Isos. ³⁰ Paka ngiitan siyo in lakonaw pag kowaya siyo alimowan wa, agparakay agkaleggeb. Siyo mango keyen, Kapwan, ako kowaen wa. ³¹ Isos toloy omatang kay Pidro, miplaong keyen, Kalakoyte in kaimo paniwala. Nakay batang kaimo remrem piyagbaslag? ³² In siro omakyat sa bangka omempet wa in kowaya. ³³ In mga sa bangka toloy wa agmaal sa kansiyo keyen, Kao ngani in Bodang Diyos. ³⁴ Paka kapotol wa sa dagat, tomakdang sa kobat Ginisarit, siro lompot. ³⁵ Isos atawanan in mga taga asin, Toloy wa piyagpabarita sa mga balabaan keyen, Isos asina wa. Kalbas biyaba sa kansiyo in boo apo maskit. ³⁶ Kansiro siyabi sa kansiyo keyen, Pakapkapen kamayba sa tangrawan waget kaimo lambong. In boo komapkap maoraw wakay, idapo wa in maskit.

¹ Apo mga Parisiyo osai mga agpatoldo in mga Batas Diyos batang sa Irosalim pasabangen kay Isos, ² agsabi keyen, Nakay batang biyaliwan in kaimo mga agadar in ogali kantam mga kakoyayan? Siro agpamangan in kansiro bakwaw yewed piyagogas kataw in kantam ogali. ³ Isos keyen, Nakay batang kanyo din piyagbaliwan in Batas Diyos panawen sa mga ogali kanyo mga kakoyayan? ⁴ Siyabi in Diyos keyen, Pagmaalen in kaimo mga koyay. Osai keyen, In agiplaong daet sa kansiyo koyay, na kailangan siyo bonowen. ⁵ Kamay kanyo piyagpatoldo keyen, No siyabi osai ka mangyan sa kansiyo mga koyay keyen, In kangay nges tolong sa kanyo tiyaboy wa sa Diyos, ⁶ na idwa kailangan agalapet sa koyay. Na panawen sa ogali kanyo mga kakoyayan kanyo wa piyagidapo kabolowan in agiplaong Diyos. ⁷ Kamo mga agpakagwali waget agpamwala. Betek in kay Isaiyas siyabi batang sa Diyos panawen sa kanyo keyen, ⁸ Anda pag mga mangyan, in kansiro piyagsabi agmaal sa kangay, kamay in kansiro remrem adayonaw sa kangay. ⁹ Idapo kabolowan in siro agsamba sa kangay. In kansiro piyagpatoldo sogo waget mangyan. ¹⁰ Biyerya Isos in mga mangyan, kalbas kansiyo siyabi keyen, Kanyo parengeyen, remremen anda in kangay batay piyagsabi. ¹¹ In agisoroy sa bibi idapo makarames sa mangyan sa pangkit Diyos. Dayem in aglowas sa bibi, ina in makarames. ¹² Pasabangen kay Isos in mga agadar keyen, Kaimo lames atawanan in mga Parisiyo agremrem wa in kaimo siyabi? ¹³ Siyo keyen, Batay giyabot in baatte togda no yewed kangay Amang sa langit in agtogda. ¹⁴ Bayansiyo siro. Siro agakay nges bago siro beleg. No beleg in agakay sa beleg, na siro tanan batay malabo sa balao. ¹⁵ Siyabi Pidro keyen, Sabiyen sa kanyam in beet siyabi in alimbawa. ¹⁶ Keyen Isos, Kamo din lames idapo atawanan? ¹⁷ Kamo lames yewed katawan in misoroy sa bibi rateng sa boyon, kadogay lampas wakay? ¹⁸ Dayem in batang sa bibi, ina batang sa remrem. Ina in makarames sa mangyan sa pangkit Diyos. ¹⁹ Nangkataw sa bait batang in daet pag remrem, in agbono mangyan, in agpanggaraw, in marames pag ogali, in agpanakaw, in agpatotoo yewed betek, in agbintang. ²⁰ In mga ina in agparames sa mangyan sa pangkit Diyos. Kamay in agkoman yewed agogas bakwaw, ina yewed agparames sa mangyan sa pangkit Diyos. ²¹ Isos panaw wa ista pataboy sa kobat bangen sa bayan Tiro osai bayan Sidon. ²² Pasabangen sa kansiyo osai ka kagbaiyan taga Kanaan ista agoli. Malakas in miplaong keyen, Laki Kasokponan Dabid, kao agpakayawte kangay. In kangay bodang kagbaiyan maloba wa piyagpaidapan mamaw. ²³ Isos idwa somagot. In mga agadar pasabangen sa kansiyo keyen, Taboyen wa in kansiyo piyagayay, matang idapo wa ina pag agpangopango sa kantam paori. ²⁴ Isos keyen, Ako siyogo sa mga waget kasokponan Israil. Siro kagwali mga topa malibangaw. ²⁵ Kalbas pasabangen wakay in kagbaiyan, agpaselang sa kansiyo keyen, Kapwan, ako tolongen. ²⁶ Keyen Isos, Yewed maal kiyowa in pamangnen sa mga bodang kalbas tiyaboy sa mga tito. ²⁷ Keyen in kagbaiyan, Aon ngani, Kapwan, kamay in mga tito agpamangan in mga lopisan malabo sa kansiro kapwan. ²⁸ Siyabi Isos sa kagbaiyan keyen, Kao ngani agpasandig sa Diyos. Agibaloy in kaimo piyagayay. Ina daan maoraw wa kansiyo bodang. ²⁹ Isos panaw asin pataboy wakay sa balabaan dagat Galiliya. Siyo monaker sa boksorte, tomokkaw. ³⁰ Malpanrateng in karowan wano mangyan apo piyagbaba mga pilay, mga bakwil, mga beleg, mga yewed katawan miplaong, aronaw kay roma. In boo mga apo maskit piyabolalang sa bangen Isos, siro piyaoraw. ³¹ In mga mangyan agsoyo paka ngiitan kaiplaong wakay in mga yewed katawan miplaong, maal wakay in mga bakwil, kapanaw wakay in mga pilay, kangitan wakay in mga beleg. Kalbas siro agmaal sa Diyos in piyagmaal Israil. ³² Biyerya Isos in kansiyo mga agadar keyen, Ako agpakayawte atai pag mga mangyan. Tolo wa ka ibeng siro agyanggat sa kangay, idapo wa pamangnen. Yewed maal siro kangay piyapanaw no yewed kay kakoman, karam siro malibed sa dalan. ³³ Keyen in mga agadar, Idapo atai balay. Na saano batay kitam mangayay pamangnen sibay sa karo ina mangyan? ³⁴ Keyen Isos, Angkalakoy in kanyo pamangnen? Siro keyen, Pito ka tinapay, apo dinte isda. ³⁵ In karowan mangyan piyatokkaw Isos sa diya. ³⁶ Kansiyo kiyowa in pito ka tinapay osai in mga isda. Kalbas agpasalamat sa Diyos. Piyanlotok wa in tinapay, tiyaboy sa mga agadar. Kansiro wakay biyagi sa mga mangyan. ³⁷ Malpamangan in boo, mangabosog. Tiipon in tera mga dodo tinapay, pito ka galang lakoy makno. ³⁸ Opat ka libo ka lalaki in mamangan. Apo din mga kagbaiyan, apo din mga bodang. ³⁹ In mga mangyan piyapanaw wa Isos. Siyo somakay wa sa bangka, pataboy sa kobat Magadan.

¹ Apo mga Parisiyo pasabangen kay Isos, osai mga Sadosiyo. Kansiro beet siyo abel sa agiplaong. Siro agayay keyen, Laki Isos, papangkiten sa kanyam osai ka tandaan batang sa langit. ² Keyen Isos, In agkalabo wate in ibeng kamo keyen, Goribas pag ibeng maal, baati danggaen in langit. ³ Sa omaga kamo keyen, Agodan, baina lened in langit. Kamo katawan agpangkit sa mga tanda sa langit kamay yewed kanyo piyagpangkit in mangibaloy wa tandaan ngona pag betek. ⁴ In ngona wa pag mga mangyan daeten, aleleng. Kamo agpamangkit in tandaan. Idapo batay piyapangkit sa kanyo no yewed ina waget in mibaloy kay Onas. Kalbas siro biyaliwan wa Isos, siyo panaw wa. ⁵ Siro motol sa dagatte. In mga agadar alibangawan agbaba pamangnen tinapay. ⁶ Keyen Isos, Agingat kamo sa pamaistobo tinapay sa mga Parisiyo, osai sa mga Sadosiyo. ⁷ In mga agadar agpaypolongan keyen, Kaya ina siyabi Isos panawen kitam idapo piyagbaba pamangnen. ⁸ Isos katawan daan in kansiro piyagpanggisodan. Siyo keyen, Kalakoyte in kanyo paniwala. Baina kanyo piyagpaypolongan in kamo idapo pamangnen. ⁹ Ikkay mana kanyo atawanan? Kamo mana agkalibangaw wa sa lima ka tinapay diyodo, kalbas piyakoman sa lima ka libo ka mangyan. Nangkaro ka galang in tera? ¹⁰ Osai in pito ka tinapay piyakoman sa opat ka libo ka mangyan. Nangkaro ka galang in tera? ¹¹ Na nakay batang ikkay kanyo atawanan in kangay beet siyabi karai yewed pamangnen? ¹² Kadogay kansiro wa atawanan in piyagsabi Isos yewed keyen agingat sa pamaistobo tinapay no yewed keyen agingat kamo sa piyagpatoldo in mga Parisiyo osai in mga Sadosiyo. ¹³ Paka rateng Isos sa bangen bayan Sisariya Pilipos kansiyo tiyanong in kansiyo mga agadar keyen, Nakay in piyagsabi in mga mangyan, nakay kono pag mangyan ako in Bodang Mangyan? ¹⁴ Siro keyen, In siyabi in kalaati keyen kao Owan in Agpamaotismo. Keyen wakay in kalaati kao Iliyas. Apo kay keyen kao Irimiyas, no yewed osai sa mga poropita. ¹⁵ Keyen Isos, Sa kanyo wakay nakay? Ako nakay pag mangyan? ¹⁶ Keyen Simon Pidro, Kao in Kiristo, in Bodang Diyos boway. ¹⁷ Siyabi Isos sa kansiyo keyen, Laki Simon bodang Onas, kao anggayan wa, angkataw yewed mangyan in agpatoldo ina sa kaimo no yewed in kangay Amang sa langit. ¹⁸ Kangay piyagsabi kaimo kao Pidro. Kalbas asin pag bato lakoy, kangay batay piyagtipon in barkadaan kangay mga bodang. Ina idbatay wano adaeg kamaybawa katayan. ¹⁹ Kangay batay piyagtaboy sa kaimo in mga sosi sa sakopan langit. Kamayba nakay in kaimo piyagayaw sa kobat na ina batay din piyagayaw sa langit. In kaimo piyayagan sa kobat, na ina batay din piyayagan sa langit. ²⁰ Kalbas maloba kansiyo piyagayaw keyen, Ayaw kanyo agsabiyen kamayba kay nakay keyen ako in Kiristo. ²¹ Ibat ina pag betek Isos agsabi sa kansiyo mga agadar keyen kailangan siyo pataboy sa Irosalim. Ista siyo batay piyaidapan maloba in mga koyay osai in mga poon sasirdoti osai in mga agpatoldo in mga Batas Diyos. Siyo kansiro batay biyono, kamay sa katolo ka ibeng siyo batay wakay piyaboway. ²² Isos piyasoway Pidro sa mga amat agadar, kalbas siyabiyan keyen, Laki Kapwan, ayaw kataw ina. Yewed mayadi ina mibaloy sa kaimo. ²³ Kamay Isos patobang kay Pidro keyen, Katanas, kao bali wa. Kao ageleg sa kangay dalan. In kaimo piyagremrem yewed in sa Diyos remrem, dayem in remrem mangyan. ²⁴ Kalbas siyabi Isos sa kansiyo mga agadar keyen, No in mangyan beet miyanggat sa kangay, na papaoriyen in kansiyo sadiri remrem, pasanen in kansiyo kodos, kalbas miyanggat sa kangay. ²⁵ Angkataw no in mangyan agaman sa kansiyo boway, na siyo batay aidapowan. Kamay in yewed agaman kansiyo boway panawen siyo agpaniwala sa kangay, na siyo batay kabel boway. ²⁶ Idapo kabolowan sa osai ka mangyan no kansiyo abel in boo kobat kamay in kapalit in kansiyo boway. In mangyan idapo batay piyagtaboy kapalit kansiyo boway. ²⁷ Angkataw ako in Bodang Mangyan batay rateng apo in kabaloyan lakoy kangay Amang, agyanggat in kangay mga angil. Ina pag betek batay piyabayadan in baatte mangyan panawen in kansiyo piyangwat. ²⁸ Kangay piyagsabi sa kanyo keyen, In kalaati atai sa kanyo idbatay matay anggan yewed kay kansiro ngiitan ako in Bodang Mangyan atai agtaboy agpansakop.

¹ Paka kadalan enem ka ibeng kay Isos piyaanggat kora Pidro osai Santiyago osai in kansiyo belag Owan. Siro monaker sa osai ka mabwat pag boksor. ² In siro ista kansiro ngiitan Isos miyalis, in kansiyo mata agrawa kagwali ibeng, in kansiyo damit maboksi wano agbalawas. ³ Kalbas kansiro ngiitan Mowisis osai Iliyas agpanggisodan kay Isos. ⁴ Kalbas kay Pidro siyabi kay Isos keyen, Laki Kapwan, maal in kami atai. No kao beet na ako batay agpangwat tolo ka barangas, in osai sa kaimo, in osai kay Mowisis, in osai kay Iliyas. ⁵ Pidro agiplaong kay siro riirongan wa osai ka libo agrawa. Apo miplaong batang asin keyen, Anda wa in kangay piyagpakayawte pag Bodang, maloba wano ako anggayan sa kansiyo. Kamo mamarengey sa kansiyo. ⁶ Paka arengeyan ina in mga agadar, siro maloba wano alimowan. Siro patalegeb wa. ⁷ Isos pasabangen sa kansiro, kalbas siro yaatang keyen, Kamo tomaydek wa, ayaw wa agkalimo. ⁸ Paka siro manriwa, idapo wa siro ngiitan no yewed Isos waget. ⁹ In siro agongali wa sa boksor keyen Isos, In kanyo ngiitan ayaw kanyo agsabiyen kamayba kay nakay, anggan ako in Bodang Mangyan yewed kay batang matay kalbas boway wakay. ¹⁰ Isos tiyanong in mga agadar keyen, Nakay batang piyagsabi in mga agpatoldo in mga Batas keyen kailangan tokaw rateng Iliyas? ¹¹ Siyo keyen, Iliyas ngani batay atai matang agpakapya in boote. ¹² Kamay kangay piyagsabi sa kanyo Iliyas atai wa. Kamay siyo yewed atawanan in mga mangyan. Kansiro piyangwat sa kansiyo in kansiro mga beet. Na kataw daan din ina kansiro batay piyagpaidapan ako in Bodang Mangyan. ¹³ Kalbas atawanan in mga agadar keyen in kansiyo piyagsabi Owan in Agpamaotismo. ¹⁴ Paka siro rateng wakay sa karowan mangyan osai ka kaliyakiyan pasabangen kay Isos, agpaselang sa kansiyo, ¹⁵ keyen, Laki Kapwan kao agpakayawte sa kangay bodang kaliyakiyan. Siyo peypeyen, maloba piyagpaidapan. Mapret siyo misiba sa baya, no yewed misogbo sa sapa. ¹⁶ Kangay wa biyaba sa kaimo mga agadar, kamay yewed kansiro apaoraw. ¹⁷ Keyen Isos, Kamo in mga mangyan ngona mga baribid, mga yewed agpaniwala. Anggan nangkadogay kay kailangan ako mataw kay sa kanyo? Anggan nangkadogay kailangan ako agbanta kay sa kanyo? Atai babaen in bodang. ¹⁸ In mamaw siyabiyan Isos, panaw wa sa bodang. Toloy wa maoraw in bodang. ¹⁹ Kalbas in mga agadar kay Isos siro waget agtanong keyen, Nakay batang yewed kanyam apamoyaw in mamaw? ²⁰ Keyen Isos, Panawen sa kalakoyte in kanyo paniwala. Ayaw alibangawan anda, no in kanyo agpasandig sa Diyos kamayba kalakoytete kataw in beter moktasa na kamo kabaloy agsabi atai pag bolod keyen kao panaw wa, ista wa pataboy. Na ina batay panaw. In boote kanyo batay abaloyan. ²² In agpaysarigan in mga agadar sa kobat Galiliya siyabi Isos sa kansiro keyen, Ako in Bodang Mangyan batay piyadakep sa mga mangyan, ²³ batay biyono. Kamay sa katolo ka ibeng ako batay wakay piyaboway. Kalbas in mga agadar maloba wa manremrem. ²⁴ Paka siro rateng sa bayan Kapirnaom pasabangen kay Pidro in mga agpaningil bowis sa balay lakoy Diyos. Siro keyen, In kanyo lames agpamatoldo agbayad bowis sa balay lakoy Diyos? ²⁵ Keyen Pidro, Aon. In siyo misoroy sa balay, siyo yewed kay miplaong, siyabi Isos keyen, Laki Simon, nakay in kaimo remrem? In mga poon lakoy atai sa kobat, sa nakay agbangen in kansiro piyagkowaan bowis, osai sa kansiro mga bodang, osai sa mga panyawan? ²⁶ Keyen Pidro, Sa mga panyawan. Keyen Isos, No kataw ina, na idwa piyagpabayadan in mga bodang. ²⁷ Kamay matang siro yewed agkagalit sa kanta, kao pataboy wa sa dagat, benglayen wa in biktang. Kowaen in tokaw pag isda kaimo abel, ngangaen wa in bibi, kao apo ngiitan kowarta pilak. Na kowaen, ista taboyen, bayad kanta bowis.

¹ Ina pag betek in mga agadar pasabangen kay Isos. Siro keyen, Sa mga bodang Diyos nakay in kansiyo piyagpakalakoy? ² Biyerya Isos osai ka bodang, piyataydek sa kansiro kagwaraan, ³ keyen, Kangay piyagsabi sa kanyo, No kamo yewed agiyalis, yewed kataw in mga bodang na kamo yewed ngani mibaloy mga bodang Diyos. ⁴ No siyo in agpakalakoyte kataw anda pag bodang, na siyo in lakonaw sa sakopan Diyos. ⁵ No siyo in agkaanggay sa osai ka bodang kataw tai, panawen sa kangay, na ako in piyagkaanggayan. ⁶ Keyen kay Isos, Kamayba nakay in agpamaakay sa daet sa bodangte agpasandig sa kangay, na in maal kay sa kansiyo in eketanen lakoy bato kansiyo leey, kalbas siyo leggeben sa dagat. ⁷ Maidap wano sa kobat panawen sa mga makadaet. Kamayba nangkadogay idbatay maidapo in mga makadaet, kamay makalimo in batay mibaloy sa agpamaakay sa daet. ⁸ No kaimo bakwaw in agakay sa kaimo matang kao agpangwat daet, kamayba bitis, na dodowen wa, benglayen wa. Maal kao pataboy sa boway idapo kalobosan osai waget in bakwaw no bitis, sa biyenglay sa baya idapo kalobosan dowai ka bakwaw no bitis. ⁹ No kaimo mata in agakay sa kaimo matang kao agpangwat daet na kasloten wa, benglayen wa. Maal kay in kao pataboy sa boway idapo kalobosan osai waget in mata sa dowai ka mata biyenglay sa baya idapo kalobosan. ¹⁰ Kamo agingat, ayaw agrengrengen kamayba nakay pag bodangte. Ayaw agkalibangaw in kansiro mga angil baatte agpangkit sa kangay Amang sa langit. ¹² Nakay in kanyo remrem? No in osai ka mangyan apo osai ka daan ka topa, no in osai malibangaw, na kansiyo batay biyaliwan in siyamnapot siyam sa boksor, matang siyo mamangkit wakay in malibangaw, aon? ¹³ Paka kansiyo ngiitan ina, kangay piyagsabi, ina pag osai kansiyo batay kiyaanggayan labi kay sa siyamnapot siyam in idbatang malibangaw. ¹⁴ Na kataw din ina in beet kantam Amang sa langit ayaw maidapo kamayba osai ka bodangte kataw tai. ¹⁵ Isos keyen, No kaimo belag agpangwat daet sa kaimo na kao pataboy sa kansiyo paalamen in kansiyo piyangwat daet. Ayaw agpaparengeyen sa amat. No siyo mamarengey sa kaimo na siyo kaimo wakay belag. ¹⁶ Kamay no siyo dayo mamarengey, na kaimo paanggaten in osai, no yewed dowai ka mangyan, matang in kanyo piyanggisodan kansiro din piyarengey, kalbas piyatonayan dowai no yewed tolo. ¹⁷ No siyo dayo kay mamarengey sa kansiro na kaimo sabiyen sa barkadaan mga bodang Diyos. Kalbas no dayo kay din mamarengey asin, na siyo kaimo wa paagemen sa mga yewed agpaniwala, kataw in mga agpaningil bowis. ¹⁸ Keyen Isos, Kangay piyagsabi sa kanyo kamayba nakay in kanyo piyagayaw sa kobat, na ina batay din piyagayaw sa langit. Osai kamayba nakay in kanyo piyayagan sa kobat, na ina batay din piyayagan sa langit. ¹⁹ Kangay kay din piyagsabi sa kanyo, no in dowai sa kanyo malsiyayon atai sa kobat no nakay in batay piyagayay sa pandalangin, na ina batay tiyaboy sa kanyo in kangay Amang sa langit. ²⁰ Kamayba saano agtipon in dowai, tolo sa kangay ngaran, na ako asin daan sa kansiro kagwaraan. ²¹ Pidro pasabangen kay Isos, keyen, Laki Kapwan, No isagte isagte agpangwat daet sa kangay in kangay belag, na makanangkaro kangay libangawen in kansiyo daet? Makapito lames? ²² Keyen Isos, Ayaw waget makapito, no yewed makapitompo ka pito. ²³ Angkataw in Diyos agpapoon kataw tai. In osai ka poon lakoy batay wa mandegdeg in mga otang in kansiyo mga sogowan. ²⁴ In tokaw kansiyo biyerya in apo otang laksa laksa ka piso. ²⁵ Panawen siyo idapo pambayad, siyogo in kansiyo kapwan keyen, Pabiliyen wa siyo, kadayo in kansiyo babai, anggan in kansiro mga bodang, osai din in boo kansiro kasangkapan, matang kabayad. ²⁶ In sogowan agpaselang wa gayed sa kansiyo kapwan, agdaing wano keyen, Ako agayay kayte rogar, laki, kangay piyagbayadan in boo kangay otang. ²⁷ Kalbas kansiyo kapwan apakayawtean. Piyaidapo wa in kansiyo otang, piyaoli wa in sogowan. ²⁸ Kamay paka panaw wa in sogowan, kansiyo ngiitan kansiyo kapwa sogowan apo otang sa kansiyo 100 ka piso. Ina kansiyo siyonggaban, siyakal, keyen, Agbayad wa kao in kaimo otang. ²⁹ Kalbas ina agpaselang wa gayed sa kansiyo agdaing wano keyen, Ayaw kay, laki, ako idapo kay bayad, kamay ako agbayad daan dogayan. ³⁰ Kamay siyo dayo maniwala. Kansiyo biilanggo in kansiyo sarig sogowan, anggan siyo yewed kay agbayad. ³¹ Paka ina ngiitan in kalaati mga sogowan, siro maloba agremrem. Siro pataboy sa kansiro kapwan, giisod in boo piyangwat. ³² Kalbas in tokawan pag sogowan biyerya wakay in kapwan, keyen, Kao in aleleng wano pag sogowan. Panawen kao agdaing sa kangay, liibangaw wa in boo kaimo otang. ³³ Ako agpakayawte sa kaimo na kailangan din kao agpakayawte sa kaimo kapwa. ³⁴ Kalbas abaisan in poon, siyo piyabilanggo wa anggan siyo yewed agbayad. ³⁵ Na no yewed boo remrem kanyo piyaglibangaw in daet kanyo belag, na kataw daan ina in batay piyangwat sa kanyo in kangay Amang sa langit.

¹ Paka siyabi Isos ina pag boo siyo panaw wa sa Galiliya, pataboy sa kobat Odiya sa ripay Ordan. ² Siyo yaagak in karowan ka mangyan. Ista siro kansiyo piyaoraw. ³ Apo mga Parisiyo pasabangen sa kansiyo, siyo kansiro nges piyagsandaw. Siro keyen, Maal lames sa mga Batas in lalaki agbenglay kansiyo babai kamayba nakay in dailan? ⁴ Keyen Isos, Kanyo ngani piyagbasa sa mga Agisolat in keyen sa parakayan siro piyangwat Diyos kaliyakiyan osai kagbaiyan? ⁵ Kalbas siyabi keyen, Ina in dailan kaya in kaliyakiyan batay pasoway wa sa mga koyay, maysarig wa in taybalang. Siro mibaloy osai waget. ⁶ Na siro idwa dowai, no yewed osai waget. Na in piyaysarig in Diyos ayaw agpalsowayen in mangyan. ⁷ Manggisodan kay sa kansiyo in mga Parisiyo keyen, Na nakay batang siyogo Mowisis keyen, In babai pakanen solat pagrigenan sa palsowayan, bayo biyenglay? ⁸ Keyen Isos, Panawen sa marigen in kanyo remrem kaya Mowisis keyen, Kalobante kamo agbenglay sa kanyo mga babai. Kamay sa parakayan yewed kataw ina. ⁹ Na kangay piyagsabi sa kanyo no siyo in agbenglay sa kansiyo babai kamay idbatang manggaraw in babai, kalbas mamangkit wakay sa osai ka kagbaiyan, na in kaliyakiyan wa daan in manggaraw. Kadayo in mamangkit sa kagbaiyan biyenglay, na ina agpanggaraw din. ¹⁰ Kalbas keyen in mga agadar, No kataw ina in taybalang, na in maal kay ayaw wa mamangkit. ¹¹ Keyen Isos, Yewed boo kabaloy maniwala asin pag piyagpatoldo, ina waget in mga piyakan Diyos ina pag kabaloyan. ¹² Angkataw aronaw dailan kaya in amat kaliyakiyan yewed kapamangkit babai. In kalaati bating wa daan in siro biyodang, apo din mga biyating mangyan, kalbas apo din yewed mamangkit babai matang agpanawen sa panawen Diyos. No siyo in kabaloy maniwala asin pag piyagpatoldo na dali wa. ¹³ Apo agbaba mga bodang kay Isos, matang kansiyo ramrosen osai pandalanginen. Kamay in mga agbaba siyabiyan in mga agadar. ¹⁴ Kamay Isos keyen, Bayansiyo pasabangen atai kangay in mga bodang. Siro ayaw agayawen, angkataw sa mga kataw siro in Diyos agpapoon. ¹⁵ Kansiyo piyanramros in mga bodang. Kalbas siyo panaw wa. ¹⁶ Apo wakay osai ka kaliyakiyan pasabangen kay Isos keyen, Laki Agpamatoldo, nakay lames in maal kangay pangwaten matang ako apo in boway idapo kalobosan? ¹⁷ Keyen Isos, Nakay batang ako kaimo piyagtanong no nakay in maal? Osai waget in maal. No kao beet apo in boway na kao maniwala sa mga Batas. ¹⁸ Siyo keyen, Mga nakay? Keyen Isos, Ayaw agbono mangyan, ayaw agpanggaraw, ayaw agpanakaw, ayaw agsabi baribid, ¹⁹ pagmaalen in kaimo mga koyay, osai pagmaalen in roma mangyan kataw daan kao. ²⁰ Keyen in begle, Ina pag boo kangay wa piyagpaniwala. Nakay kay in kangay pangwaten? ²¹ Keyen Isos, No kao beet sibay, na kao panaw wa, pabiliyen wa in kaimo mga sangkap. In abel kowarta taboyen wa sa mga agkaidapan. Na kao batay kabel mga sangkap sa langit. Kalbas kao atai wakay miyanggat wa sa kangay. ²² Paka karengey ina in begle, siyo panaw wa agrongkot angkataw siyo aronaw sangkap. ²³ Siyabi Isos sa kansiyo mga agadar keyen, Totoo in kangay piyagsabi, maidap mibaloy bodang Diyos in aronaw sangkap. ²⁴ Kangay wakay piyagolit sa kanyo, maidap komislot sa salay karayom in osai ka ayop lakoy piyagawit kamilyo, kamay labi kay maidap sa aronaw sangkap in pasakop sa Diyos. ²⁵ In ina arengeyan in mga agadar siro maloba wano agsoyo. Siro keyen, No kataw ina na nakay in batay apaboway? ²⁶ Siro tiyerekan Isos, keyen, Ina idbatay mipangwat mga mangyan, kamay sa Diyos in boote batay mipangwat. ²⁷ Siyabi Pidro, Baanda, kanyam wa biyaliwan in boote, miyanggat wa sa kaimo. Na nakay wakay lames in batay tiyaboy sa kanyam? ²⁸ Keyen Isos, Anda kanyo remremen. No dogayan sa bayo wakay pag kobat ako in Bodang Mangyan agtokkaw wa sa kangay lakoy pagpanokkawan agpapoon, na kamo in mga miyanggat sa kangay batay din agtokkaw sa mga tokkawan agpapoon sa labing dowai ka barkadaan mga kasokponan Israil. ²⁹ Osai no siyo agbaliwan in kansiyo balay, kansiyo mga belag, osai mga koyay, mga bodang, mga kobat panawen sa kangay, na siyo batay piyakan osai ka daan ka mga kataw in kansiyo biyaliwan. Osai batay piyakan in boway idapo kalobosan. ³⁰ Kamay aronaw mga tokaw batay apaoriyan, aronaw din mga paoriyan batay manokaw.

¹ Isos keyen, In Diyos agpapoon kataw in osai ka kapwan osai ka kobat. Siyo pasodip agpamangkit batay agpanawen sa kansiyo kobat. ² Siro maypolong in bayad sa boo ibeng agpanawen. Paka kasondo wa, siro siyogo wa agpanawen. ³ Paka pangitlogan wa in ibeng siyo panaw wakay. Kansiyo ngiitan sa bayan mga agtaydek waget idapo agpanawen. ⁴ Siyabi sa kansiro keyen, Kamo pataboy sa kangay, agpanawen sa kangay kobat. Kamo pakanen in sibay pag bayad. Siro toloy panaw. ⁵ Paka morto in ibeng siyo mangkit wakay, mangiriyan mangkit wakay. Apo wakay ngiitan agtaydek, siyogo wakay. ⁶ Paka agapon wa in ibeng mangkit wakay, apo wakay ngiitan agtaydek. Siyo keyen, Nakay batang kamo agtaydek waget boo ibeng? ⁷ Siro keyen, Idapo batay agtaboy panawen. Siyo keyen, No kataw ina, na kamo pataboy sa kangay, agpanawen sa kangay kobat. ⁸ Paka agkalened wa siyabi in kapwan sa kansiyo sogowan keyen, Beryaen wa in dokalakiyan, piyagbayadan wa. In paori rateng, ina in tokaw pakanen, in sa tokawan papaoriyen. ⁹ In mga paori rateng in baatte osai piyakan bayad sibay sa osai ka boo ibeng. ¹⁰ Paka biyerya wakay in mga tokaw in kansiro remrem siro piyagpakan labi kayte kalakoy. Kamay in baatte osai piyakan daan in bayad sa boo ibeng. ¹¹ Paka siro piyakan wa siro daeten wa in remrem sa kapwan kobat. ¹² Keyen, Osai wagette ka oras siro agpanawen, kami kamaybawa maibeng boo ibeng agpanawen. Na nakay batang piyaytikkalakoyan in bayad kami boo? ¹³ In kapwan miplaong sa osai ka lalaki keyen, Laki, kao yewed kangay piyadaya. Kao piyakan in sibay in kanta polong karai sa boo ibeng. ¹⁴ Kowaen in kaimo, kao panaw wa. Beet daan kangay biyayadan in mga paori kataw daan in kanyo. ¹⁵ Ako in kapwan in kowarta. Nakay, yewed mana maal ako agremrem in kangay kowarta agbayad sa kanyo? Kao lames agkairis panawen ako mabait? Ina wa in kalobosan in kay Isos alimbawa. ¹⁶ Kalbas siyo keyen, Na in mipaori agipatokaw, in tokaw agipaori. ¹⁷ In Isos agonaker batay sa Irosalim, kansiyo piyasoway sa karowan in Labing Dowai ka agadar. Kansiyo siyabi ¹⁸ keyen, Kitam agonaker wa agtaboy sa Irosalim. Ista ako in Bodang Mangyan batay piyadakep sa mga poon sasirdoti osai sa mga agpatoldo in mga Batas. Kansiro batay piyolong ako bonowen. ¹⁹ Kalbas ako batay piyagtaboy sa mga yewed Odyo, batay piyagmesa, piyagpamogbog, kalbas piyagpako sa kodos. Kamay sa katolo ka ibeng ako batay wakay piyaboway. ²⁰ Pasabangen kay Isos in kay Sibidiyo babai, agyanggat in kansiyo mga bodang. Siyo apo piyagayay matang siyo agpaereng wa sa bangen Isos. ²¹ Kalbas keyen Isos, Nakay in kaimo beet? Kalbas keyen in inang, Dayem nges anda in kangay dowai ka bodang, dogayan paka kao agpapoon wa lakoy, na kaimo patokkawen sa kaimo balabaan agtolong sa kaimo agpapoon, in osai sa pamalang agbangen, in osai sa tagwala agbangen. ²² Siyabi Isos sa kansiro keyen, Kamo yewed katawan in beet siyabi in kanyo piyagayay sa kangay. Kamo lames batay katiis sa kaidapan kangay batay diyalan? Siro keyen, Batay din. ²³ Keyen Isos, In kaidapan batay kangay diyalan na kanyo din batay piyagdalan. Kamay yewed sa kangay in agsabi no nakay in batay agtokkaw sa kangay pamalang osai sa kangay tagwala. Ina pag mga tongkolin wara kangay Amang no sa nakay agbangen in kansiyo piyagtaboy ina. ²⁴ Paka karengey ina in sampo ka agadar siro agkagalit wa kay dokalaki. ²⁵ Kalbas biyerya Isos in kansiyo labing dowai ka agadar. Siyo keyen, Kanyo atawanan, sa mga yewed Odyo in kansiro mga poon agpansakop sa kansiro, in kansiro mga lakonaw agpapoon sa kansiro. ²⁶ Kamay sa kanyo ayaw kataw ina. Dayem no nakay in beet sa kanyo lakonaw, na kailangan siyo sogowan. ²⁷ Osai no nakay in beet poon na siyo batay kanyo piyagalapet sogowan. ²⁸ Kataw ako in Bodang Mangyan, kaya atai pataboy yewed batay agsogo, no yewed batay sogowan, osai piyagtaboy kangay boway matang bayad sa karowan. ²⁹ In siro agipanaw sa bayan Iriko, Isos yaanggatan in aronaw mangyan. ³⁰ Apo dowai ka kaliyakiyan beleg agtokkaw sa balabaan dalan. In siro katawan Isos asin agdalan siro agpango lakoy keyen, Laki Kasokponan Dabid, kami ayawte. ³¹ Siro siyabiyan in mga mangyan, yaayaw aglalae. Kamay siro labi kayno aglalae keyen, Laki Kasokponan Dabid, kami ayawte. ³² Isos tomaydek wa, siro biyerya, kalbas tiyanong keyen, Nakay in kanyo beet kangay piyangwat sa kanyo? ³³ Siro keyen, Laki, in kanyam beet kami kangitan wakay. ³⁴ Isos agpakayawte sa kansiro, yaatang kansiro mga mata. Toloy wakay siro kangitan, miyanggat sa kansiyo.

¹ Kora Isos bangen wa sa Irosalim. In siro rateng sa bayante Bitpagi, sa boksor Olibowan, piyatokaw Isos in dowai ka agadar, ² keyen, Kamo pataboy ista pag bayante, kanyo toloy batay ngiitan piyageket osai ka asno agyanggat kansiyo bodang. Kanyo lowaten, atai babaen sa kangay. ³ No apo miplaong sa kanyo na keyen, Piyagkailangan in Kapwan. Na toloy piyagpababa. ⁴ Kaya kataw ina matang mibaloy in siyabi in poropita keyen, ⁵ Kanyo sabiyen sa mga mangyan sa bayan lakoy Siyon keyen, Baati, anda wa in kanyo Poon Lakoy agpakabwatte remrem, agsakay sa asno, sa bodang asno. ⁶ Panaw in dowai ka agadar. Kansiro piyangwat in siyabi Isos. ⁷ Biyaba siro in asno, kadayo in bodang. In kansiro islen piyadamig sa awak mga asno. Isos somakay wa. ⁸ Aronaw mangyan agpadamig kansiro islen sa kansiyo batay dalan. In amat agdodo wa sanga yangaw, piyabolalang sa dalan. ⁹ Agpalpangowan in mga mangyan sa tokawan, kadayo in sa paoriyan keyen, Pagmaalen in Kasokponan Dabid. Pakalakonawen in agrateng agbaba in kabaloyan in Kapwan. Pagmaalen in Diyos sa ogbos. ¹⁰ Paka Isos misoroy sa bayan lakoy Irosalim in boo mangyan agkagolo. Siro agpaypolongan keyen, Nakay lames pag mangyan ina? ¹¹ Keyen wakay in karowan, Ina Isos in poropita taga Nasarit, sa Galiliya. ¹² Isos misoroy sa balay lakoy Diyos. Kansiyo piyamoyaw in boo mga agpamabili asin, kadayo in mga agbili. Kansiyo din piyanligan in mga lamisa in mga agpamariya kowarta, kadayo in pagpanokkawan in mga agpamabili bantog kalapati. ¹³ Kansiyo siyabi keyen, In siyabi sa mga Agisolat keyen, Keyen in Diyos, Batay piyagawit balay pagpandalanginan in kangay balay. Ina in siyabi, kamay anda pag balay kanyo piyagpangwat pagpatagowan mga agpanakaw. ¹⁴ Pasabangen kay Isos sa balay lakoy Diyos in mga beleg osai pilay. Siro kansiyo piyaoraw. ¹⁵ In mga poon sasirdoti osai in mga agpatoldo in mga Batas, siro kangitan sa mga makasoyo pag piyagpangwat Isos. Osai karengey sa mga bodang pangowan sa galem balay lakoy Diyos keyen, Pagmaalen in Kasokponan Dabid. Kalbas ina pag mga poon agkagalit wa. ¹⁶ Kalbas siro keyen kay Isos, Kaimo lames arengeyan in piyagsabi ina pag mga bodang? Keyen Isos, Aon. Nakay ina, yewed kay mana kanyo biyasa in piyagsabi sa mga Agisolat keyen, In mga bodangte, osai in mga agpanoso kay kaimo piyatoldo agmaal gayed? ¹⁷ Isos panaw wa asin, lampas wa sa bayan lakoy, pataboy wa sa bayante Bitanya, mesek wa asin. ¹⁸ Paka omaga in Isos agoli wakay sa bayan lakoy siyo agkayawes. ¹⁹ Siyo kangitan sa balabaan dalan osai ka yangaw piyagawit igos. Paka siyo rateng asin siyo idapo kangitan galem, mga daon waget. Kalbas kansiyo siyabi sa poon igos keyen, Kamayba nangkadogay kao idbatay wa manggalem. Toloy wa matonga in poon igos. ²⁰ Ina ngiitan in mga agadar, siro agsoyo wano, keyen, Nangkataw toloy matonga ina pag igos? ²¹ Keyen Isos, Totoo in kangay piyagsabi, no kanyo remrem yewed piyagbaslag agpasandig sa Diyos, na in kangay piyangwat sa poon igos kanyo din batay apangwat. Yewed waget ina. No kanyo siyabi asin pag boksor keyen, Kao bali wa asin, palabo wa sa dagat, na batay mibaloy in kanyo siyabi. ²² Osai no kamo agpasandig sa Diyos na kamo batay piyakan kamayba nakay in kanyo piyagayay sa kanyo pandalangin. ²³ Isos misoroy wakay sa balay lakoy Diyos. In siyo agpatoldo in mga poon sasirdoti pasabangen sa kansiyo osai in mga koyay sa mga mangyan. Siro keyen, Nakay in kaimo kabaloyan agpangwat ina pag mga kataw ina? Nakay in agsogo sa kaimo? ²⁴ Keyen Isos, Ako apo din tanong sa kanyo. No isag anda kanyo siyagot na kangay din piyagsabi sa kanyo no nakay in kangay kabaloyan agpangwat ina. ²⁵ In Owan agbaotismo, nakay in agsogo sa kansiyo, no in Diyos, no in mga mangyan? Siro wakayte agpaypolongan keyen, No kitam keyen, In Diyos, na isag siyo keyen, Na nakay batang kamo yewed maniwala kay Owan? ²⁶ Kamay no kitam keyen, In mangyan, ai, makalimo in mga mangyan angkataw siro boo katawan keyen Owan osai ka poropita. ²⁷ Matang kansiro siyabi kay Isos keyen, Kami yewed katawan. Kansiyo wakay siyabi keyen, Na idbatay din kangay siyabi sa kanyo no nakay in agsogo sa kangay agpangwat. ²⁸ Keyen Isos, Nakay in kanyo remrem? Osai ka mangyan apo bodang dowai ka kaliyakiyan. In amang pasabangen sa panganay keyen, Laki, ngona pag ibeng kao agpanawen sa agay. ²⁹ Siyo keyen, Dayo. Kalbas yaalis wakay kansiyo remrem, siyo ista wa pataboy. ³⁰ Pasabangen wakay in amang sa osai, ina din in kansiyo siyabi. In bodang keyen, Aon, laki. Kamay yewed ista pataboy. ³¹ Na nakay in kanyo remrem asin pag dowai? Nakay agbangen in agpangwat in beet kansiyo amang? Siro keyen, In panganay agbangen. Kalbas keyen Isos, Kangay piyagsabi sa kanyo in mga agpaningil bowis, osai in aleleng pag mga kagbaiyan batay pasakop sa kabaloyan Diyos tokaw kay sa kanyo. ³² Angkataw atai rateng Owan agpatoldo sa kanyo in maal pag ogali, kamay kamo yewed maniwala sa kansiyo. In mga agpaningil bowis maniwala sa kansiyo, osai in aleleng pag mga kagbaiyan. Kamaybawa ina kanyo ngiitan yewed kay din kamo agbenglay in kanyo daet agpaniwala kay Owan. ³³ Keyen Isos, Anda in osai ka alimbawa. Apo osai ka mangyan manogda sa kansiyo alamanan mga balagen piyagawit obas. Kansiyo yaalabat, kansiyo piyangwat pesaan raweg, tiyadyok in paltawan pagdamayan. Kalbas kansiyo wa piyaalapet sa mga mangyan. Kalbas siyo pataboy wa sa adayonaw pag kobat. ³⁴ Paka kaobasen wa, kansiyo piyataboy ista in kansiyo mga sogowan keyen ayayen sa mga agalapet in kansiyo bagiyan. ³⁵ Kamay in mga sogowan yaatang in mga agalapet. In osai biyogbog wa, in kadowai biyono wa, in katolo biyenglayan wa bato. ³⁶ Siyogo kay in kapwan in aronaw kay sogowan, kamay kataw daan in piyangwat in mga agalapet. ³⁷ In paori wa piyataboy ista in kansiyo bodang kaliyakiyan. In remrem keyen, Siro idbatay mangaas aglaban sa kangay bodang. ³⁸ Kamay paka in bodang ngiitan wa in mga agalapet, siro maypolongan keyen, Anda wa dogayan in batay kapwan. Kantam wa bonowen. Kalbas in batay nges kansiyo kantam wa. ³⁹ Kalbas siyo yaatang wa, giyoyod sa awak alabat, biyono wa. ⁴⁰ Keyen Isos, Na paka rateng in kapwan, nakay lames in maal kansiyo batay piyangwat asin pag mga agalapet obasan? ⁴¹ Keyen in mga mangyan, Ina pag mga aleleng kansiyo batay piyagripor. In obasan batay wakay piyagpaalapet sa mga amat, sa batay agtaboy kansiyo bagiyan. ⁴² Keyen Isos, Kanyo ngani mabasa sa mga Agisolat keyen, In bato in piyangidangan in mga agtadyok balay, na siyo wa in mibaloy in lakonaw sa boo. In Kapwan in agpangwat ina. Ina makasoyo sa kantam. ⁴³ Na kangay ngani piyagsabi, idwa sa kanyo in sakopan Diyos. Batay wa piyagtaboy sa mga mangyan batay agtaboy in raweg. ⁴⁵ In mga poon sasirdoti osai in mga Parisiyo karengey in kay Isos mga kowinto. Kalbas kansiro atawanan siro in piyagtamaan. ⁴⁶ Siyo nges diyakep siro, kamay siro agkalimo sa mga mangyan angkataw atawanan in mga mangyan Isos poropita.

¹ Isos agpangwat wakay mga alimbawa. ² Siyo keyen, In Diyos agpapoon kataw in osai ka poon lakoy agsandata batay malpamangan sa kasal kansiyo bodang kaliyakiyan. ³ Siyogo in kansiyo mga sogowan agberya sa mga mangyan piyagpanaya, kamay siro agkabibel. ⁴ Kalbas siyo agsogo wakay sa amat wakay pag mga sogowan keyen, Sabiyen sandata wa in pamangnen, biyono wa in mga piyataba baka. In pamangnen madimla wa. Ayaw wa agpabeya. ⁵ Kamay siyo yewed daan piyagpaniwala in mga piyagpanaya. Siro panaw sa kansiro beet pagtaboyan, in osai sa kansiyo agay, in osai sa kansiyo anap boway. ⁶ In kalaati wakay, kansiro siyonggaban in mga sogowan, biyogbog, biyono wa. ⁷ In poon lakoy agkagalit wano. Siyogo wa in kansiyo mga sondalo, riipor wa ina pag mga agpamono, piyasonog in kansiro bayan lakoy. ⁸ Siyabi in poon lakoy sa kansiyo mga sogowan keyen, Sandata wa in pamangnen, kamay in mga piyagpanaya yewed sibay in kaalenen. ⁹ Na kamo ati wa sa mga dalan, no kamo kangitan mangyan na keyen, Kitam wa sa kasalan. ¹⁰ Panaw wa in mga sogowan, gomisod sa aronaw mangyan pag dalan, in atagbo mangyan piyaanggat wa kamayba daeten pag mangyan, kamayba maal, anggan maakno wa, boo wa mangyan in tongkodan balay. ¹¹ In poon lakoy asin pataboy piyanroris in mga mangyan, kansiyo ngiitan osai ka mangyan in lambong yewed pangkasal. ¹² Siyo keyen, Laki, nakay batang kao kaisoroy atai pataboy idapo lambong pangkasal? Idwa meles in mangyan. ¹³ Siyabi in poon lakoy sa kansiyo mga sogowan keyen, Bakosen kansiyo mga bakwaw, kansiyo bitis, benglayen wa istanaw sa lened, sa mga agpanangis, agtogait in ngipen. ¹⁴ Isos aglobos kansiyo alimbawa keyen, Aronaw in piyagberya, kalbas korangte in piyagidang. ¹⁵ Panaw wa asin in mga Parisiyo. Kansiro piyagpaypolongan matang Isos asalaod sa kansiyo mga agiplaong. ¹⁶ Matang piyataboy kay Isos in kansiro mga agadar, agyanggat in mga mangyan Irodis. Siro keyen, Laki Agpamatoldo, kanyam atawanan kao betek, totoo in kaimo mga piyagpatoldo ogali makaanggay sa Diyos. Osai kao yewed agkalimo sa mga mangyan angkataw kao yewed agpangidang mangyan. ¹⁷ Nakay in maal sa mga Batas, no agbayad bowis sa poon lakoy Sisar, no ayaw wa? Nakay in kaimo remrem? ¹⁸ Kamay atawanan Isos in kansiro mga daet pag remrem matang siyo keyen, Kamo mga agpakagwali waget. Nakay batang ako kanyo piyagsalaod? ¹⁹ Amba, ako papangkiten in kowarta pambowis. Kalbas siyo piyakan osai ka kowarta bakal. ²⁰ Isos keyen, In rarawan atai, nakay pag mangyante? Kay nakay ngaran in agisolat atai? ²¹ Siro keyen, Kay Sisar. Kalbas keyen Isos, No kataw ina na taboyen kay Sisar in sa kansiyo, osai sa Diyos in sa Diyos. ²² In siro karengey ina siro agsoyo. Siro panaw. Isos biyaliwan wa. ²³ Ina daan pag ibeng apo mga Sadosiyo pataboy kay Isos. Siro yewed agpaniwala keyen apo boway wakay. Kansiro siyabi sa kansiyo ²⁴ keyen, Laki Agpamatoldo, siyabi Mowisis keyen no in osai ka lalaki matay idapo bodang, na kailangan in kansiyo belag miskapet wakay sa babai matang siro mamodang. No apo bodang na in kapwan in matay daan. ²⁵ Atai sa kanyam tangona apo pito ka kaliyakiyan. in panganay taybalang wa, toloy matay idapo kay bodang. Matang kansiyo babai biyaliwan wa sa kansiyo ariyan. ²⁶ Kataw din ina in mibaloy sa waraan, kadayo sa katolo, anggan rateng sa bongsowan. ²⁷ Matay wa siro boo, bayo matay wakay din in kagbaiyan. ²⁸ Na, no in mga matay boway wakay, na nakay in batay piyagawit lalaki angkataw kansiyo liyalaki siro boo? ²⁹ Keyen Isos, Kamo bagya, yewed kanyo piyangkit in mga Agisolat, osai in kabaloyan Diyos. ³⁰ Angkataw sa dogayan pag boway idapo taybalang. Boo wa daan kataw in mga angil sa langit. ³¹ Panawen sa dogayan pag boway, yewed kay mana kanyo biyasa sa mga Agisolat in siyabi Diyos sa kanyo ³² keyen, Ako in Diyos in piyagmaal Abraam, piyagmaal Isaak, piyagmaal Akob. In Diyos piyagmaal yewed in mga matay no yewed in mga boway. ³³ In karowan mangyan karengey ina siro agsoyo kay Isos piyatoldo. ³⁴ Paka abaritaan in mga Parisiyo keyen in mga Sadosiyo diyaeg wa Isos, siro maypolongan wa. ³⁵ In osai agpatoldo in mga Batas. Siyo agtanong agtepeng kay Isos keyen, ³⁶ Laki Agpamatoldo, sa boo mga Batas nakay in lakonaw? ³⁷ Keyen Isos, Kantam pagmaalen in Diyos kantam Kapwan, in boo kantam galem, boo eyat, boo remrem. ³⁸ Ina in lakonaw sa boo mga Batas. ³⁹ In kadowai kataw daan ina keyen, Kantam pakayawteen in amat mangyan kataw daan in agpakayawte sa kantam sadiri. ⁴⁰ In boo mga Batas osai in piyagpatoldo in mga poropita ina boo agisagalem asin pag dowai ka Batas. ⁴¹ In agkatipon in mga Parisiyo Isos agtanong sa kansiro, ⁴² keyen, In Kiristo, nakay in kanyo remrem? Siyo lames kay nakay kasokponan? Siro keyen, Kay Dabid. ⁴³ Keyen Isos, Na nakay batang Dabid, in siyo piyagpatoldo in Abyan Diyos siyo agawit sa Kiristo keyen Kapwan? Angkataw in siyabi Dabid keyen, ⁴⁴ Siyabi in Kapwan sa kangay Kapwan keyen, Kao tomokkaw atai sa kangay pamalang agbangen, Kao kangay bisi anggan in mga aglaban sa kaimo boo wa kangay piyasakop sa kaimo. ⁴⁵ Na no in Kiristo piyagawit din Dabid keyen Kapwan, na nangkataw masabi keyen siyo kasokponan Dabid? ⁴⁶ In mga Parisiyo idapo wano kabeles kay Isos. Ibat asin idapo kapangaas agtanong sa kansiyo.

¹ Kadogay siyabi Isos sa mga mangyan, kadayo sa kansiyo mga agadar ² keyen, In mga agpatoldo in mga Batas osai in mga Parisiyo, kansiro tongkolin in agpaliwanag in mga Batas Mowisis. ³ Na kanyo pangwaten in kansiro mga piyagpatoldo, maniwala sa kansiro mga batas. Kamay ayaw kanyo agtoladen in kansiro mga ogali. Baina yewed kansiro piyagpangwat in kansiro mga piyagpatoldo. ⁴ Siro agimis in mabyat pag panlowan, piyagpababa sa mga mangyan, kamay siro dayo mamaglebey kamaybate in solo, dayo agtolong agpaleteng. ⁵ In boo kansiro mga piyagpangwat piyagpapangkit waget sa mga mangyan. Baina piyagpakaslang in mga pagsoroyan mga agiplaong Diyos piyagbekkes sa kansiro mga kiray. Osai piyagpakaaba in agisokbit sa kansiro mga lambong. ⁶ Sa mga piyasta kansiro piyagkaanggay in agtokkaw sa lakonaw pag panokkawan bangen in agpapoon. Osai siro agkaanggay agtokkaw sa maal pag panokkawan sa mga balay pagpaniponan. ⁷ Siro agkasadapan no siro piyagawit keyen, Agpatoldo. Kansiro piyagkasadapan in siro piyagpakalakonaw in mga mangyan sa mga bayan. ⁸ Kamay kamo ayaw agamag sa pagawitan keyen Agpatoldo, angkataw osai waget in kanyo Agpamatoldo, kamo boo tayariyan. ⁹ Osai ayaw kanyo agawiten Amang kamayba kay nakay atai sa kobat, angkataw osai waget in kanyo Amang, in Amang sa langit. ¹⁰ Ayaw din kamo agamag sa pagawitan Poon, angkataw osai waget in kanyo Poon, siyo in Kiristo. ¹¹ In piyagpakoyay sa kanyo kailangan siyo kanyo sogowan. ¹² In agpakabwat batay piyakabwatte. In agpakabwatte batay piyakabwat. ¹³ Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyageleg in dalan Diyos, matang in mga mangyan yewed kapasakop sa Diyos. Kamo dayo pasakop sa Diyos kalbas kanyo din piyageleg in dalan matang in mga batay nges pasakop agkaeleg. ¹⁵ Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyagliblibok in boo kobat piyagpotol din in dagat agpamangkit kamayba osai waget ka yewed Odyo kanyo piyagpaakay miyagem sa paniwala mga Odyo. Kalbas paka mipaagem wa, siyo kanyo piyagpangwat labi kay daet sa kanyo. ¹⁶ Maloba in batay parosa sa kanyo. Kamo agakay nges sa mga beleg, bago kamo din beleg. Kamo agpatoldo keyen, No in mangyan manompa keyen kamayba wakay sa balay lakoy Diyos, na kamayba idwa kansiyo piyangwat in kansiyo panompa. Kamay no siyo manompa keyen kamayba wakay sa ginto sa balay lakoy Diyos, na kailangan ngani pangwaten in kansiyo panompa. ¹⁷ Kamo mga beleg, mga idapo atawanan. Yewed piyaglakonaw in ginto, no yewed in balay lakoy DiyoS, angkataw panawen asin kaya in ginto piyagtalaga sa Diyos. ¹⁸ Osai kanyo piyagpatoldo keyen, No in mangyan manompa keyen, kamayba wakay sa pagpanonogan andog, na kamayba idwa piyangwat in kansiyo panompa. Kamay no siyo manompa keyen kamayba wakay sa andog piyagsonog, na kailangan ngani pangwaten kansiyo panompa. ¹⁹ Kamo beleg ngani. Yewed in andog in lakonaw, no yewed in pagpanonogan, angkataw panawen asin kaya piyagtanggap Diyos in andog. ²⁰ Na ngani, in siyo agpanompa keyen kamayba wakay sa pagpanonogan andog, na in beet siyabi yewed waget in pagpanonogan no yewed kadayo in boo asin piyagandog. ²¹ Osai in siyo agpanompa keyen kamayba wakay sa balay lakoy Diyos na ina yewed waget in balay no yewed kadayo in Diyos in agpamataw asin pag balay. ²² Osai in siyo agpanompa keyen kamayba wakay sa langit na in beet siyabi in pagpanokkawan Diyos sa langit, kadayo in Diyos wa daan in asin agtokkaw. ²³ - ²⁴ Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Baina kanyo piyagtaboy sa Diyos in kasampo ka bilog in mga baranoy, mga tanglad, mga golayen, kamay idwa kanyo piyagpangwat in lakonaw pag mga Batas, kataw in agpangwat in betek, in agpakayawte, osai in mabait. Kataw ina kanyo piyagkowa in neknekte sa kanyo batay piyaginem, kamay kanyo piyagtelen in kamilyo lakoy. In lakonaw pag mga Batas in kailangan ngani kanyo paniwalaen kamay ayaw din anaweyan in agtaboy in kasampo. Kamo ngani mga beleg pag agpaakay. ²⁵ Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyagogas in awak in lisap osai in palato, kamay in galem maakno kanyo mga piyagagaw, mga piyagtakaw. ²⁶ Kamo in mga Parisiyo beleg. Kanyo wa tokaw ogasen in galem agbangen in lisap osai in palato, na batay din malinis in awak. ²⁷ Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kamo kagwali mga lebengan piyagpaboksi, maalen sa pangkit in awak, kamay sa galem boo wano marames, mga bitol mangyan matay. ²⁸ Kataw ina ngani kamo. Sa pangkit mangyan maalen, kamay sa kanyo galem aleleng wano, kamo agpakagwali waget. ²⁹ Maloba in batay parosa sa kanyo, kamo in mga agpatoldo in mga Batas, kamo in mga Parisiyo. Kamo mga agpakagwali waget. Kanyo piyagpakapya in mga lebengan in mga poropita osai piyagpakaalen in mga lebengan in mga maalen pag mga mangyan. ³⁰ Osai kamo keyen, No nges kami agkaboway tangona in kabetek in kanyam mga kakoyayan, na kami idbatay agtolong agbono sa mga poropita. ³¹ Na sa kanyo piyagsabi kataw ina na kanyo piyagamin kamo bodang in mga agpamono sa mga poropita. ³² Dali, lobosen wa kamo in piyarakay in kanyo mga kakoyayan. ³³ Kamo mga olay, talnakiyan dopong. Idapo batay padalan kamo batay mipalpas sa parosa toyongan. ³⁴ Na ngani, ako batay agsogo sa kanyo mga poropita, mga katawanan, mga agpatoldo in mga Batas. Na in kalaati kanyo batay biyono, in kalaati batay piyako sa kodos. In kalaati kanyo batay biyogbog sa kanyo mga balay Diyos, kanyo batay piyagboyaw sa aronaw bayan. ³⁵ Matang batay sa kanyo in parosa sa agbono sa boo mga mangyan maalen sa boo kobat sigod Abil in idapo daet anggan kay Sakaryas bodang Barakyas. Siyo in kanyo biyono sa paywaraan in pagsonogan andog osai in balay lakoy Diyos. ³⁶ Kangay piyagsabi sa kanyo in mga mangyan agkaboway ngona in batay piyarosa panawen ina pag boo mga agbono. ³⁷ Isos keyen kay, Irosalim, laki mga taga Irosalim. Kanyo piyagbono in mga poropita. In mga siyogo Diyos kanyo biyenglayan bato anggan matay. Makakarowan wano nges kangay beet kamo yaalapet kataw in manok aglemlem sa kansiyo mga sipsipan, kamay kamo dayo. ³⁸ Na in kanyo balay lakoy Diyos batay piyagbaliwan wa gayed. ³⁹ Kangay piyagsabi sa kanyo, sigod ngona idbatay wa kanyo ngiitan ako anggan sa kanyo remrem keyen, Agkaanggay in agrateng agbaba in kabaloyan in Kapwan.

¹ Isos lompot wa sa balay lakoy Diyos, batay wa agipanaw. Pasabangen in kansiyo mga agadar keyen, Kao mangkit in kalakoyen in balay lakoy Diyos. ² Kamay keyen Isos, Kanyo mana piyagngitan ina pag balay lakoy Diyos? Kangay piyagsabi sa kanyo, dogayan ina boo batay piyagpanligan, idapo wa batay mitera bato agisapaw sa kansiyo pagaponan bato. ³ In kora Isos agtokkaw wa sa boksor Olibowan, idapo asin in roma mangyan, in mga agadar agtanong wakay keyen, Nangkadogay batay mibaloy in kaimo karai siyabi? Nakay in tandaan no kao bangen wa batay rateng, osai in batay wa kalobosan kobat? ⁴ Keyen Isos, Kamo agingat, karam kamo batay piyadaya mangyan. ⁵ Angkataw aronaw in batay agrateng agalapet kangay ngaran keyen siro wa in Kiristo. Aronaw in kansiro batay liibangaw. ⁶ Kamo batay karengey agaleng mga aggira, osai mga barita apo gira. Na kamo ayaw ngani alimowan, angkataw ina boo kailangan ngani mibaloy, kamay yewed kay ina in kalobosan. ⁷ Angkataw batay apo aggira in osai ka bansa aglaban sa osai ka bansa, in osai ka sakopan aglaban sa osai ka sakopan. Apo batay agkayawes, osai batay agloni sa kalaati pag mga kobat. ⁸ Ina pag mga kataw ina parakayan waget in mga kaidapan, kataw in mga kagbaiyan agparakay agboslot. ⁹ Ina pag mga betek kamo batay piyagkairisan boo mangyan panawen kamo sa kangay, osai kamo batay piyagdakep, piyagpaidapan, kalbas piyagbono wa. ¹⁰ No kataw wa ina na aronaw wa in batay omempet, idwa agpaniwala, kalbas batay agpalsikairisan, in osai batay agpatoldo wakay sa osai sa mga batay agbono. ¹¹ Aronaw in batay lomwas bosliyen pag mga poropita. Aronaw in kansiro batay liibangaw. ¹² Panawen sa agarabang wa in daet batay makorang wano in agpaybelagan. ¹³ Kamay no siyo agaway agpaniwala anggan sa kalobosan, na siyo ngani batay piyaboway. ¹⁴ In Maal pag Barita batay biyaba sa boo kobat, matang atawanan in boo mangyan keyen in Diyos agpapoon. Paka kataw ina wa agrateng wa in kalobosan. ¹⁵ Kanyo batay ngiitan agitaydek sa betek tiyalaga sa Diyos in makasoka sa Diyos, in agpansida, in siyabi wa Danil in poropita. In beet siyabi ina remremen in agbasa. ¹⁶ No kataw wa ina na in mga mangyan sa Odiya domalagan wa pataboy sa mga boksor. ¹⁷ No siyo sa paltawan na ayaw wa misoroy sa galem balay, matang komwa in mga kamayba nakay sa balay. ¹⁸ No siyo sa agay, na ayaw wa moli matang komwa kansiyo islen. ¹⁹ Asina pag mga ibeng ayawte wa in mga bonting, osai in mga agpasoso. ²⁰ Panawen sa agdalagan, kanyo dalanginen ayaw mipabetek sa pangodan, ayaw din sa Ibeng Pamainga. ²¹ Angkataw asin pag mga betek batay maloba wano in kaidapan. Ibat in piyangwat in kobat anggan ngona idapo kay batang kaidapan kaloba ina, kalbas kamayba nangkadogay idapo wa din batay kaloba ina. ²² No ina pag kabetek yewed piyakadogayte Diyos na idapo batay mangyan piyaboway. Kamay panawen sa mga iidang Diyos batay ngani piyakadogayte ina pag kabetek. ²³ Asina pag betek no apo agsabi sa kanyo keyen, Anda wa in Kiristo, no yewed keyen, Siyo asin wa, na kamo ayaw maniwala. ²⁴ Angkataw apo batay lomwas mga agpakagwali waget Kiristo, mga bosliyen pag mga poropita. Siro batay agpangwat mga makasoyo wano pag mga tanda, matang liibangaw no mayadi kamayba in mga iidang Diyos. ²⁵ Kanyo remremen, ina yewed kay mibaloy kangay wa siyabi sa kanyo. ²⁶ Na no apo agsabi sa kanyo keyen, Baati siyo sa moyod wa, na kamo ayaw ista pataboy. Kamayba siro keyen, Siyo sa galem wa balay, na kamo ayaw wano maniwala. ²⁷ Angkataw in agrateng in Bodang Mangyan bigla kataw kilat piyagngitan sa paglowasan ibeng anggan sa paglabowan ibeng. ²⁸ Kamayba saano in apo agibolalang matay, na batay asin matipon in mga owak. ²⁹ Paka kalbas ina pag mga kaidapan, in ibeng batay toloy komelep, kadayo in bolan idwa din agrawa, kadayo din in mga magirem sa langit agpangaragrag wa, osai piyagyogyog wa in mga apo kabaloyan sa mga ogbos. ³⁰ Kalbas toloy lomwas sa langit in tandaan in Bodang Mangyan. In boo mga mangyan sa boo kobat batay wa malpanangis, angkataw kansiro wa piyagngitan in Bodang Mangyan sa mga libo, agrateng wa ngani, apo lakoy kansiyo kabaloyan, piyagngitan wa in kansiyo kalakoyen. ³¹ Agana lakoy in bodyong. Kansiyo piyagsogo kansiyo mga angil sa boo kobat, matang piyagtipon kansiyo mga iidang batang sa boo wano kobat. ³² Kanyo remremen in alimbawa in yangaw igos. No agpandaon wakay in mga sanga, na kanyo atawanan agkaboka wakay in pangibeng. ³³ Na kataw din ina no kanyo piyagngitan agpangibaloy wa ina pag boo, na kanyo wa atawanan bangen wa in kabetek in Bodang Mangyan batay agrateng. ³⁴ Remremen kamo, bayo matay in boo mga mangyan agkaboway ngona, ina pag boo batay wa mibaloy. ³⁵ Batay maidapo in langit osai in kobat, kamay in kangay mga siyabi idbatay maidapo. ³⁶ Ina pag kabetek idapo batay katawan, kamayba in mga angil sa langit, kamayba ako in Bodang. Dayem in Amang, siyo waget in katawan. ³⁷ In kabetek agrateng in Bodang Mangyan kataw daan tangona in kabetek kora Nowi. ³⁸ Ina tangona in idapo kay in gonaw in mga mangyan apyaan agpalpamangan, agpalpanginem, agpalpamangkit babai mga lalaki, anggan rateng in ibeng Nowi somakay wa sa kansiyo bangka lakoy. ³⁹ In mga mangyan apyaan daan, bayo katawan bongkalos wa lakoy siro boo malimes wa. Na kataw din ina in batay mibaloy dogayan sa agrateng in Bodang Mangyan. ⁴⁰ Asina pag betek apo dokalaki sa agay, in osai piyagpaanggat, in osai biyaliwan. ⁴¹ Apo din dokabai agbayo, in osai piyagpaanggat, in osai biyaliwan. ⁴² Na kamo agdamay ngani, angkataw yewed kanyo atawanan no nakay pag betek in kanyo Kapwan batay atai. ⁴³ Remremen anda. No nges in kapwan balay katawan no nangkadogay betek sa yabi batay rateng in agpanakaw, na siyo agdamay wa ngani, idbatay kansiyo piyabayaan iisoroy in kansiyo balay. ⁴⁴ Na kailangan din kamo baatte sandata angkataw in Bodang Mangyan batay rateng sa betek yewed kanyo piyagremrem. ⁴⁵ In katawanan pag sogowan in yewed aglimbang, siyo in piyagpapoon kansiyo kapwan sa kansiyo mga sogowan, siyo wa in agtaboy in kansiro pamangnen sa baatte kabetek. ⁴⁶ No ina pag sogowan aratengan in kansiyo kapwan agpangwat kansiyo panawen na siyo batay agkaanggay. ⁴⁷ Kangay piyagsabi sa kanyo ina pag sogowan, in boo sa kapwan batay piyagpaalapet sa kansiyo. ⁴⁸ Kamay no daeten ina pag sogowan, no kansiyo remrem keyen dogay kay in agrateng kansiyo kapwan, ⁴⁹ no kansiyo wa piyagpaidapan in amat pag mga sogowan, osai agyanggat sa mga agpanlasing, agpalpamangan, agpalpamarik, ⁵⁰ na in kansiyo kapwan batay rateng sa kabetek yewed kansiyo piyagremrem. ⁵¹ Kalbas ina pag sogowan batay maloba wano piyagparosa, siyo piyagpaagem wa sa parosa in mga agpakagwali waget agpaniwala. Ista siyo batay agpanangis wa gayed anggan agtogait in mga ngipen.

¹ Keyen Isos, In kabetek ako in Bodang Mangyan agrateng batay agpoon lakoy, kataw anda in alimbawa. Apo sampo ka daraga lomabo sa balay, in baatte osai apo kansiyo tinglaw. Siro agtagbo sa kaliyakiyan batay kiyasal. ² In lima katawanan, in lima wakay idapo bait. ³ - ⁴ In mga katawanan, siro agsandata langis karam maplek isag kansiro tinglaw, in mga wakay idapo bait idapo wa sandata langis. ⁵ Dogay wano in agrateng in kaliyakiyan batay piyagkasal, anggan siro boo aesekan wa. ⁶ Kalbas paka kagwaraan wa yabi apo wa ngani mango keyen, Agrateng wa in kaliyakiyan. Mipolaw wa, tagbowen wa. ⁷ In sampo ka daraga toloy mipolaw, kalbas piyamalakonaw in igang kansiro mga tinglaw. ⁸ Kalbas in mga idapo bait miplaong sa mga katawanan keyen, Kami agayayte kanyo langis, agkaplek wano kanyam tinglaw. ⁹ Kamay keyen in mga katawanan, Na karam idbatay sibay sa kantam boo. In maal kay kamo panaw wa, kamo bomili kay sa tindaan. ¹⁰ Matang in lima ka daraga idapo bait toloy wa lomabo. Siro agbili kay rateng wa in kaliyakiyan batay piyagkasal, in lima ka daraga sandata daan, siro wa in kansiyo sarig monaik sa balay apo kainan. Kadogay toloy wa biyengbeng in sakbawan. ¹¹ Kalbas rateng wakay in lima ka daraga idapo bait. Siro agpango keyen, Laki, kami din paonaiken. ¹² Kamay keyen in kaliyakiyan, Nakay pag mga mangyan kamo? Ako yewed katawan sa kanyo. ¹³ Keyen Isos, Na ngam kamo agdamay, angkataw yewed kanyo atawanan in ibeng osai in kabetek. ¹⁴ Keyen Isos, In ako in Bodang Mangyan agpoon kataw din osai ka mangyan batay panaw batay sa adayonaw. Kansiyo biyerya in kansiyo mga sogowan, kalbas kansiyo piyaalapet sa kansiro in kansiyo mga kasangkapan. ¹⁵ In baatte osai piyakan kowarta sibay sa kansiyo batay abaloyan. In osai piyakan lima ka libo ka piso, in kadowai dowai ka libo ka piso, in katolo in tiyaboy osai ka libo ka piso. Kalbas panaw wa in kapwan. ¹⁶ In piyakan lima ka libo ka piso toloy wa agpanawen agtinda anggan siyo kaabel wakay lima kay ka libo ka piso pakinabang. ¹⁷ Kataw din ina in piyangwat in piyakan dowai ka libo ka piso. Siyo kaabel din pakinabang dowai kay ka libo ka piso. ¹⁸ Kamay in piyakan osai ka libo ka piso lompot wa, toloy agkali sa diya, kansiyo wa biyetang in kowarta tiyaboy in kapwan. ¹⁹ Paka dogay wa naw moli wakay in kapwan ina pag mga sogowan. Siro piyagbotog wa. ²⁰ Kalbas pasabangen in piyakan lima ka libo ka piso, agbaba din in pakinabang lima wakay ka libo. Siyo keyen, Laki, anda daan in lima ka libo ka piso kaimo piyaalapet sa kangay. Anda wakay in pakinabang kangay abel lima din ka libo. ²¹ Keyen in kapwan, Aa yadi. Kao maal pag sogowan yewed aglimbang. Angkataw kao maalno pag paalapetan in kalakoyte, na kao kangay batay piyagpaalapetan in lakonaw. Aywawa, kita wa agpalkaanggay. ²² Pasabangen din in piyakan dowai ka libo ka piso, keyen, Laki, anda wa in dowai ka libo ka piso kaimo piyaalapet sa kangay. Anda wakay in pakinabang kangay abel dowai din ka libo. ²³ Keyen in kapwan, Aa yadi. Kao maalen pag sogowan yewed aglimbang. Angkataw kao maalno pag paalapetan in kalakoyte, na kao kangay batay piyagpaalapetan in lakonaw. Aywawa, kita wa agpalkaanggay. ²⁴ Pasabangen wakay in piyakan osai ka libo ka piso. Siyo keyen, Laki, kangay atawanan kao matapang pag mangyan. Kao agani sa yewed kaimo tiyogda, kao agbetang sa yewed kaimo liyayap. ²⁵ Ako agkalimo, matang kangay wa biyenben sa diya in kaimo kowarta. Anda daan in kaimo osai ka libo. ²⁶ Keyen in kapwan, Kao pag sogowan, aleleng, bibelen. Kao nges mana katawan ako agani sa yewed kangay tiyogda, ako agbetang sa yewed kangay liyayap. ²⁷ Na nakay batang yewed kaimo liyabo sa bangko in kangay kowarta matang in ako rateng wakay apo wa pakinabang? ²⁸ Kalbas siyabi wakay sa kansiyo polis keyen, Dali wa, kowaen wa sa kansiyo in osai ka libo. Taboyen wa sa apo sampo ka libo. ²⁹ Angkataw no siyo in apo na piyagpakan kay, anggan karowan wa gayed. Kamay no siyo in idapo, na kadayo in baywi kay sa kansiyo piyagkowa wa din. ³⁰ Ina pag sogowan in idapo kabolowan benglayen wa sa lened. Ista wa siyo batay maloba agpanangis anggan agtogait in kansiyo ngipen. ³¹ Keyen Isos, Batay rateng in Bodang Mangyan piyagpalowas wa in kansiyo kalakoyen, piyagpaanggat in boo kansiyo mga angil. Kalbas siyo batay tomokkaw sa kansiyo pagpanokkawan lakoy agpoon. ³² Kalbas in boo mga mangyan batay piyagtipon sa kansiyo bangen, siro kansiyo batay piyagpalsowayan kataw in agalapet topa, kansiyo piyagpasoway sa topa in mga kambing. ³³ In mga topa batay sa pamalang agbangen, in mga kambing sa tagwala agbangen. ³⁴ Kalbas batay siyabi in Poon lakoy sa mga mangyan sa kansiyo pamalang agbangen keyen, Mga Laki, kamo in mga piyakaanggay kangay Amang, aywawa, kamo wa in agkapwan sa sakopan siyandata sa kanyo ibat tangona kay naw in piyangwat in kobat. ³⁵ Angkataw in ako agkayawes kanyo piyakan pamangnen, in ako agkainem kanyo piyakan sapa, in ako taga adayonaw kanyo piyakan esekan. ³⁶ In ako idapo wa damit kanyo piyakan, in ako apo maskit ako kanyo piyagalapet, in ako piyagbilanggo ako kanyo piyagtolong. ³⁷ Kalbas ina in maalno pag mga mangyan batay somagot keyen, Laki Kapwan, kao idbatang kanyam ngiitan agkayawes kalbas kanyam piyakan pamangnen, no yewed agkainem kalbas kanyam piyainem. ³⁸ Kao idbatang kanyam ngiitan taga adayonaw kalbas kanyam piyakan esekan, idapo din batang idapo damit kalbas kanyam piyakan. ³⁹ Kao idbatang kanyam ngiitan apo maskit no yewed piyagbilanggo kalbas kanyam tiyolong. ⁴⁰ Batay wakay keyen in Poon lakoy, Totoo ngani in kangay piyagsabi sa kanyo, in kanyo piyangwat ina sa kangay mga belag piyagpakalakoyte, na ina sa kangay wa daan kanyo piyangwat. ⁴¹ Kalbas in Poon lakoy batay wakay keyen sa mga mangyan sa kansiyo tagwala agbangen, Kamo in mga piyanompaan, bali wa kamo. Ista wa kamo sa baya idbatay matay, in siyandata sa diyablo osai sa kansiyo mga mamaw. ⁴² Angkataw in ako agkayawes ako yewed kanyo piyakan pamangnen, in ako agkainem ako yewed kanyo piyakan sapa. ⁴³ In ako taga adayonaw ako yewed kanyo piyakan esekan, in ako idapo damit ako yewed kanyo piyakan, in ako apo maskit, osai piyagbilanggo ako yewed kanyo tiyolong. ⁴⁴ Siro batay somagot keyen, Laki Kapwan, Kao idbatang kanyam ngiitan agkayawes, agkainem, taga adayonaw, idapo damit, apo maskit, piyagbilanggo, kalbas kao idwa kanyam tiyolong. ⁴⁵ Kalbas in Poon lakoy batay wakay keyen sa kansiro, Totoo ngani in kangay piyagsabi sa kanyo, in kamo dayo agtolong sa kangay mga belag piyagpakalakoyte, na sa kangay wa daan kamo dayo agtolong. ⁴⁶ Ina pag mga dayo agtolong batay piyataboy sa parosa idbatay lobos, kamay in maalno pag mga mangyan batay piyakan boway idbatay din lobos.

¹ Paka Isos kalbas agpatoldo ina pag boo kansiyo siyabi sa kansiyo mga agadar keyen, ² Kamo katawan sabali wa in piyasta piyagawit Paskowa. Kalbas in Bodang Mangyan batay wa piyadakep matang piyako sa kodos. ³ Ina daan pag betek, in mga poon sasirdoti osai in mga koyay sa mga Odyo siro agtipon sa balay lakoy in mabwat pag poon sa mga sasirdoti, in ngaran Kaypas. ⁴ In kansiro piyagpolong Isos kansiro piyagbantaan madakep idapo batay katawan, matang siyo mabono. ⁵ Matang siro keyen, Ayaw sa betek piyasta. Isag mangagolo in mga mangyan. ⁶ In Isos sa bayante Bitanya sa balay Simon in batang apo kagwali panyakit, ⁷ in siyo agpamangan, osai ka kagbaiyan pasabangen sa kansiyo apo piyagbaba osai ka pagsoroyan piyangwat batang bato lakonaw in bayad. In galem mala masadap lakonaw wano in bayad. Kalbas ina pag mala masadap boo wa kansiyo biyobo sa olo Isos. ⁸ Paka ina ngiitan in mga agadar siro agkagalit wa sa kagbaiyan, keyen, Nakay batang kiyataw waget ina in mala masadap? ⁹ No nges karai ina piyabili na lakonaw in abel bayad, kalbas taboyen sa mga maidap. ¹⁰ Kamay Isos katawan daan in kansiro remrem. Matang siyo keyen, Nakay batang kanyo piyagkataw ina in kagbaiyan? Maal wano in kansiyo piyangwat sa kangay. ¹¹ In mga maidap palagi daan sa kanyo, kamay ako idwa dogay idapo wa. ¹² Kaya kansiyo biyobo in mala masadap sa kangay bilog, matang ako piyagsandata batay liyebeng. ¹³ Totoo in kangay piyagsabi, kamayba saano piyatoldo in Maal pag Barita, ista batay din piyagawit in piyangwat ina pag kagbaiyan matang siyo idbatay alibangawan. ¹⁴ In osai sa Labing Dowai ka agadar, in ngaran Odas Iskaryoti, siyo pataboy sa mga poon sasirdoti. ¹⁵ Siyo keyen, No kamo tiyolong matang Isos madakep, na nakay in kanyo batay bayad? Matang siyo piyakan tatlompo lakoy ka kowarta pilak. ¹⁶ Kalbas ibat daan ina pag betek Odas agpamangkit wa padalan agpadakep kay Isos. ¹⁷ In tokaw pag ibeng in Piyasta in piyagkoman tinapay idapo pamaistobo, pasabangen kay Isos in kansiyo mga agadar, agtanong keyen, Saano kaimo beet kanyam sandataen in kaimo batay Yapon sa Paskowa? ¹⁸ Keyen Isos, Kamo pataboy sa bayan lakoy, pamangkiten ina pag mangyan. Kamo keyen, Anda in bilin in Agpamatoldo, agkabangen wa in kangay kabetek. Sa kaimo wa balay ako batay mamangan in Yapon sa Paskowa, osai in kangay mga agadar. ¹⁹ Piyangwat ngani in mga agadar in bilin Isos, kansiro siyandata in Yapon sa Paskowa. ²⁰ Paka yabi wa Isos tomokkaw wa batay agkoman, osai in labing dowai ka agadar. ²¹ Paka siro agkoman wa Isos miplaong keyen, In kangay piyagsabi in osai sa kanyo batay agpadakep sa kangay. ²² Kalbas maloba wano malingetnget in kansiro remrem. Siro baatte osai keyen, Laki Kapwan, yewed ako, aon? ²³ Keyen Isos, In osai ka agpalanglang sa kangay, siyo wa in batay agpadakep sa kangay, ²⁴ kataw in siyabi sa mga Agisolat in Bodang Mangyan batay maablaw. Kamay ayawte wa in batay agpadakep sa kansiyo. Maal kay nges sa kansiyo in siyo ayaw wa biyodang. ²⁵ Kadayo Odas in batay agpadakep kay Isos, siyo din keyen, Laki Agpamatoldo, yewed ako, aon? Keyen Isos, Kao in agsabi ina. ²⁶ In siro agpalpamangan Isos omatang sa tinapay, siyo agpasalamat, kalbas kansiyo piyandodo, tiyaboy sa mga agadar. Siyo keyen, Anda in kangay bilog. Kanyo kowaen, komanen. ²⁷ Kansiyo din yaatang in pagpangineman, kansiyo piyasalamatan, kalbas tiyaboy din sa kansiro keyen, Kamo boo minem asin. ²⁸ Angkataw ina in kangay daya in panrigen sa kasondowan Diyos osai kansiyo mga bodang, in kangay daya batay piyagbobo panawen sa karowan, matang liibangaw in kansiro mga daet. ²⁹ Kangay piyagsabi sa kanyo, ibat ngona ako idbatay wa minem in sapa batang sa raweg obas, anggan sa ibeng kitam wakay malpanginem in bayo pag sapa obas sa sakopan kangay Amang. ³⁰ Paka siro kabaren wa osai ka awit, siro pataboy wa sa boksor Olibowan. ³¹ Isos miplaong wakay sa kansiyo mga agadar keyen, Isag yabi ako batay biyaliwan kamo boo, kataw in piyagsabi sa mga Agisolat keyen, In agalapet topa kangay batay biyono, kalbas in mga topa batay omarabang. ³² Kamay paka ako boway wakay ako batay tokaw sa kanyo sa Galiliya. ³³ Keyen Pidro, Kamayba kao biyaliwan in boo, ako idbatay wano mamaliwan sa kaimo. ³⁴ Keyen Isos, Totoo ngani, ngona daan pag yabi yewed kay anggan panalaok manok kao makatolo wa agpamangyan sa kangay. ³⁵ Kamay Pidro keyen, Kamayba ako piyagbono wa sarig kao, ako idbatay wano agpamangyan sa kaimo. Kadayo in boo mga agadar, kataw din ina in siyabi. ³⁶ Isos rateng sa kobat piyagawit Gitsimani agyanggat in kansiyo mga agadar. Siyo keyen sa kansiro, Kamo atai wa tomokkaw. Ako ista kayte agbangen agpandalangin. ³⁷ Kamay Pidro osai in dowai ka bodang Sibidiyo kansiyo piyaanggat. Kalbas malingetnget wano in kansiyo remrem, agkabyatan wa gayed. ³⁸ Kansiyo siyabi sa kansiro keyen, In kalobaen in malingetnget sa kangay galem anggan tomag ako batay wa matay. Kamo atai daan, ako damayen. ³⁹ Siyo ista kayte agbangen patalegeb, agpandalangin keyen, Kangay Amang, no nges maal, na ayaw wa sa kangay anda pag kaidapan. Kamay ayaw in kangay beet in mibaloy, dayem in kaimo daan. ⁴⁰ Siyo moli wakay sa mga agadar, siro aratengan agesek. Siyo keyen kay Pidro, Kamo mana agesek? Kamo mana yewed kabaloy agdamay kangay kamayba kadogayte waget? ⁴¹ Kamo agdamay wa ngani, mandalangin matang paka kamo piyagtepeng wa kamo idbatay diyaeg. Sandata wa nges in kanyo remrem, kamay in bilog mainaen. ⁴² Kalbas siyo ista wakay mandalangin keyen, Kangay Amang, no yewed mayadi ako lomawey atai pag kaidapan, no kailangan ngani ako domalan asin, na dali wa, in kaimo beet in pangwaten. ⁴³ Kalbas siyo moli wakay, kora Pidro aratengan wakay agesek, angkataw siro agrongronga wano. ⁴⁴ Matang siro kansiyo wakay biyaliwan. Katolo wa in siyo ista wakay agpandalangin. Kataw daan in siyabi karai. ⁴⁵ Paka siyo moli wakay siyo keyen, Kamo mana agesek kay, aglimbang daan? Baati, ngona wa in kabetek, in Bodang Mangyan batay wa piyagpadakep sa mga agpamangwat daet. ⁴⁶ Tomaydek wa. Kitam wa. Anda wa in batay agpadakep sa kangay. ⁴⁷ Isos agiplaong kay rateng wa Odas in osai sa labing dowai. Siyo aronaw sarig mangyan agbaba mga pisaw lakoy osai mga garoti. Siro siyogo in mga poon sasirdoti osai in mga koyay mga Odyo. ⁴⁸ Sa dalan kay Odas agtaboy wa tanda keyen, In kangay isag biyelag kiyapet, na ina wa in kanyo piyagpamangkit. Toloy wa kanyo dakepen. ⁴⁹ Paka kalbas, Odas toloy wa pasabangen kay Isos keyen, Ko, laki Agpaadar, kao mana atai? Kalbas toloy kiyapet. ⁵⁰ Keyen Isos, Dali wa, laki, pangwaten wa in dailan kaya kao atai pataboy. Kalbas Isos siyonggaban in mga mangyan, siyo diyakep. ⁵¹ In osai sa mga sarig Isos liyakso wa in pisaw lakoy, toloy piyalang in sogowan in mabwat pag poon sa mga sasirdoti, maagis in talinga. ⁵² Kamay keyen Isos, Soroyen wakay sa kaloban in kaimo pisaw. Angkataw in mga agpamogot, siro boo batay piyogot. ⁵³ Kao mana yewed katawan no ako mangayay tolong sa kangay Amang, na ako toloy batay piyakan mga angil, labi kay pito ka laksa. ⁵⁴ Kamay no kataw ina na idbatay wa mibaloy in siyabi sa mga Agisolat keyen kailangan anda mibaloy. ⁵⁵ Ina pag betek Isos miplaong wakay sa karowan keyen, Ako nakay, tolisan? Baina kamo atai pataboy agpalpamaba mga pisaw lakoy osai mga garoti matang ako madakep. Bago ako ibeng ibeng sa balay lakoy Diyos agtokkaw agpatoldo, ako yewed kanyo diyakep. ⁵⁶ Kamay kaya anda boo mibaloy matang mibaloy in siyabi in mga poropita sa mga Agisolat. Kalbas toloy wa mandalagan in boo mga agadar. Isos biyaliwan wa. ⁵⁷ Isos biyaba in mga domakep sa kansiyo sa balay lakoy Kaypas in mabwat pag poon sa mga sasirdoti. Ista agkatipon in mga agpatoldo in mga Batas, osai in mga koyay sa mga Odyo. ⁵⁸ Pidro mangagak kamay yewed agpasabangen. Siyo anggan sa tongkodan balay in mabwat pag poon sa mga sasirdoti, misoroy sa alabat, tomokkaw sa tongkodan paagem sa mga agdamay, matang ngiitan no nakay in batay kalobosan. ⁵⁹ In mga poon sasirdoti osai in boo tanongan in mga Odyo, siro agpamangkit mangyan agpasaen kay Isos, matang siyo mapabono. ⁶⁰ Kamay siro idapo wano ngiitan kamayba aronaw in omadap asin agpansabi mga yewed totoo panawen kay Isos. Kadogay apo dowai ka mangyan tomaydek, ⁶¹ miplaong keyen, In siyabi ina pag mangyan siyo kabaloy agregnas in balay lakoy Diyos kalbas kansiyo wakay apangwat tolo waget ka ibeng. ⁶² romaydek in mabwat pag poon sa mga sasirdoti, miplaong kay Isos keyen, Kao mana idapo batay beles sa kansiro mga bintang sa kaimo? ⁶³ Kamay Isos yewed miplaong. Kalbas siyabi in mabwat pag poon sa mga sasirdoti sa kansiyo keyen, Ako sogowan in agkaboway pag Diyos agotos sa kaimo keyen, Kaimo wa sabiyen sa kanyam no kao ngani in Kiristo in Bodang Diyos. ⁶⁴ Isos meles wa keyen, Baina, kaimo wa siyabi. Kamay anda in kangay piyagsabi sa kanyo, ibat ngona kanyo batay piyagngitan in Bodang Mangyan agtokkaw sa pamalang agbangen in Apo lakoy Kabaloyan, kalbas batay din agrateng wakay sa mga libo sa langit. ⁶⁵ In mabwat pag poon sa mga sasirdoti, paka karengey ina siyo agalitan wa gayed, toloy riyognit in kansiyo lambong. Siyo keyen, Piyawa, agpanonggar sa Diyos ina. Kitam idwa kailangan agpamangkit kay in sombong. Kamo wa daan in karengey ina pag agpanonggar. ⁶⁶ Nakay in kanyo remrem? In amat keyen, In maal kay siyo bonowen wa. ⁶⁷ Kalbas Isos piyanopayan sa mata, piyanontok. In roma wakay agsampal sa kansiyo, ⁶⁸ agiplaongan keyen, Kao pag Kiristo. No kao ngani poropita, na nakay in somampal sa kaimo? ⁶⁹ Pidro agtokkaw sa tongkodan. Apo kagbaiyan sogowan pasabangen sa kansiyo keyen, Kao sarig din Isos in taga Galiliya, aon? ⁷⁰ Kamay Pidro tomanggi sa pangkit in boo keyen, Ako idapo katawan in kaimo piyagsabi. ⁷¹ Pidro pataboy sa sakbawan alabat. Siyo ngiitan wakay osai ka sogowan kagbaiyan. Keyen in sogowan, Ina pag kaliyakiyan sarig din Isos in taga Nasarit. ⁷² Pidro tomanggi wakay keyen, Kamaybawa kayno, ako yewed katawan ina pag mangyan. ⁷³ Yewed kayte dogay in mga agtaydek asin pasabangen kay Pidro keyen, Kao wa ngani in osai sa kansiro. Baina, kaimo agiplaong kataw ina. ⁷⁴ Pidro agpanompa wano keyen, Kamayba ako matay wa, ako yewed ngani katawan ina pag mangyan. Kalbas toloy wa tomalaok in manok. ⁷⁵ Kalbas Pidro karemrem in siyabi Isos keyen, Yewed kay panalaok manok kao makatolo agpamangyan sa kangay. Siyo toloy wa panaw, agpanangis wa gayed maloba.

¹ Paka omaga wa agpolong wakay in mga poon sasirdoti osai in mga koyay sa mga Odyo. In kansiro piyagpolong no nangkataw in batay agbono kay Isos. ² Kadogay kansiro biyakos, biyaba sa gobirnador, in ngaran Pilato. ³ Odas in agpadakep kay Isos, paka kansiyo atawanan Isos batay wa biyono, siyo toloy wakay manremrem. Kansiyo wakay piyaoli sa mga poon sasirdoti osai sa mga koyay in tatlompo ka kowarta. ⁴ Siyo keyen, Ako agpangwat wa lakoy daet. In mangyan idapo daet kangay piyadakep matang siyo biyono. Kamay siro keyen, Ina nakay wakay sa kanyam? Saken kao. ⁵ Toloy biyenglay Odas sa galem balay lakoy Diyos in mga kowarta, kalbas siyo panaw wa, pasesel wa. ⁶ Piyamorot wakay in mga poon sasirdoti in kowarta. Siro keyen, Anda pag kowarta bayad sa daya in beet siyabi apo osai ka mangyan biyono. Idwa mayadi piyaagem sa kowarta sa balay lakoy Diyos. ⁷ Matang siro maypolongan wa keyen, Anda pag kowarta pabayaden wa sa kobat in agpamangwat keden, kalbas pangwaten lebengan sa mga taga adayonaw. ⁸ Matang ibat asin anggan ngona ina pag kobat piyagawit wa kobat daya anggan ngona. ⁹ Kataw ina mibaloy wa in siyabi Irimiyas in poropita keyen, Kansiro kiyowa in tatlompo ka kowarta pilak in piyabayad sa kansiyo. Sa mga kasokponan Israil kalakoy ina in bayad mangyan. ¹⁰ Kalbas kansiro wa piyabayad sa kobat in agpamangwat keden, kataw ina in biilin in Kapwan sa kangay. ¹¹ Isos piyataydek sa adap gobirnador. Siyo biyotog in gobirnador keyen, Kao lames ngani in Poon lakoy in mga Odyo? Keyen Isos, Kao wa in agsabi. ¹² Kamay in siyo piyamabintangan in mga poon sasirdoti osai in mga koyay siyo idapo meles. ¹³ Matang siyabi Pilato sa kansiyo keyen, Kao nakay, karengey in karowen kansiro mga bintang sa kaimo? ¹⁴ Kamay Isos idapo din meles kamayba osai waget ka agiplaong. Matang in gobirnador agsoyo wano. ¹⁵ In ogali in gobirnador baatte piyasta piyagawit Paskowa siyo agpalpas osai ka mangyan piyagbilanggo, no nakay in piyagkabeet in mga mangyan. ¹⁶ Ina pag betek apo mangyan piyagbilanggo atawanan in boo mga mangyan, in ngaran Isos Barabas. ¹⁷ Matang paka in mga mangyan matipon wa, Pilato miplaong sa kansiro keyen, Nakay agbangen in kanyo beet kangay palpasen, in osai Barabas, in osai Isos piyagawit Kiristo? ¹⁸ Pilato katawan kaya Isos biyaba sa kansiyo, panawen agpanagiri in mga koyay mga Odyo. ¹⁹ In Pilato agtokkaw sa kansiyo lakoy pagpanokkawan agosap, in kansiyo babai agsogo mangyan agsabi sa kansiyo keyen, Ayaw agpanlado asin pag mangyan, idapo daet. Karai yabi ako manaynep panawen sa kansiyo, kalbas ako piyaidapan wano. ²⁰ Kamay in mga mangyan piyangolokan in mga poon sasirdoti osai in mga koyay keyen, In kanyo ayayen kay Pilato Barabas in palpasen. Isos agbangen bonowen wa. ²¹ In mga mangyan tiyanong wakay in gobirnador keyen, Nakay agbangen in kanyo piyagayay kangay palpasen? Siro keyen, Barabas wa. ²² Keyen wakay Pilato, No kataw ina na nakay in kangay batay piyangwat kay Isos in piyagawit Kiristo? Siro boo keyen, Pakowen wa sa kodos. ²³ Pilato keyen, Nakay batang? Nakay in kansiyo piyangwat daet? Kamay mango wakay gayedte in mga mangyan keyen, Pakowen sa kodos. ²⁴ Paka kataw ina wa, Pilato katawan siyo idapo wa batay mibaloy, labi kay batay magolo in mga mangyan. Matang siyo omayay sapa, agogas wa kansiyo bakwaw sa pangkit in mga mangyan. Siyo keyen, Ako idapo daet. Yewed ako in agpabono ina pag mangyan idapo daet. Wara kamo. ²⁵ Keyen in boo mga mangyan, Bayansiyo wa kanyam anggan sa kanyam mga bodang in parosa panawen asina pag matay. ²⁶ Kalbas Barabas wa in piyalpas Pilato. Kamay Isos agbangen kansiyo piyabogbog, tiyaboy sa kansiro matang piyako sa kodos. ²⁷ Isos biyaba wa in mga sondalo gobirnador sa kampo. Asin siyo piyagribok in karowan mga sondalo piyagmesa kataw anda. ²⁸ Kansiro kiyowa in kansiyo lambong, piyaislenan wakay mapola wano. ²⁹ Kalbas kansiro siyolapid balagen dogiyen, piyasarikaw sa kansiyo. Piyaatang sa kansiyo pamalang osai ka tanrak. Siro agpaselang kagwali agdaing sa kansiyo agmesa waget keyen, Pakalakoyen in Poon lakoy mga Odyo. ³⁰ Kalbas siyo piyanopayan wa, kiyowa wakay in tanrak, siyo piyanampek sa olo. ³¹ Paka kalbas wa miyesa, kiyowa wa in islen, siyoroy wakay in kansiyo lambong. Siyo kansiro wa piyapanaw matang piyako sa kodos. ³² Paka lampas wa sa sormokan kansiro atagbo osai ka kaliyakiyan taga Sirini piyagawit Simon. Siyo kansiro piilitan agbaba in kay Isos kodos. ³³ Siro rateng sa kobat piyagawit Golgota, in beet siyabi Kobat Bitol Olo. ³⁴ Asin Isos piyakan nges alak piyaageman panas, kamay paka kansiyo tiyepeng idwa kansiyo iinem. ³⁵ Kalbas siyo piyako wa sa kodos. Kansiro piyostaan in kansiyo lambong in kansiro piyagpalbagiyan. ³⁶ Siro malpanokkaw wa asin, agdamay sa kansiyo. ³⁷ Sa ogbos kansiyo olo apo solat piyaiskapet, in sombong sa kansiyo keyen, Anda Isos, in Poon lakoy in mga Odyo. ³⁸ Ina daan pag betek apo din dowai ka agpanakaw piyako sa mga kodos, in osai sa kay Isos pamalang agbangen in osai sa tagwala agbangen. ³⁹ Siyo piyamalowasan in mga asin domalan, agpelespeles in olo ⁴⁰ keyen, Yewed mana kao in batay agregnas in balay lakoy Diyos, kalbas kaimo wakay piyagtadyok tolo waget ka ibeng? Na amba dali, in kaimo bilog pabowayen. No kao ngani in Bodang Diyos, na lompot wa sa kodos. ⁴¹ Kadayo din in mga poon sasirdoti, in mga agpatoldo in mga Batas, osai in mga koyay, Isos kansiro din piyamalowasan ⁴² keyen, Kansiyo piyaboway in mga roma, kamay in kansiyo bilog yewed apaboway. Siyo kono in Poon lakoy sa mga kasokponan Israil. No ngona siyo lompot sa kodos, na kami batay wa din maniwala sa kansiyo. ⁴³ Siyo kono agpasandig sa Diyos, siyo keyen din siyo Bodang Diyos, na wara in Diyos in agpaboway sa kansiyo no siyo piyagkabeet Diyos. ⁴⁴ Kadayo in mga agpanakaw agipako sa mga kodos sa kansiyo bangen, siro kataw din ina agpangimok sa kansiyo. ⁴⁵ Ibat tangali anggan mangiriyan lakoy makelep wa in boo kobat. ⁴⁶ Paka mangiriyan wa lakoy mango Isos keyen, Ili, Ili, lama sabaktani? In beet siyabi, Kangay Diyos, kangay Diyos, nakay batang ako kaimo biyaliwan? ⁴⁷ In kalaati asin agitaydek karengey ina matang siro keyen, Kansiyo piyagberya Iliyas. ⁴⁸ In osai toloy domalagan komwa kagwali lomot, siyogbo sa toba, piyaistebek sa tanrak, piyasopsop kay Isos. ⁴⁹ Kamay in amat wakay keyen, Ayaw kay ngani, kantam panayaen no Iliyas ngani batay rateng agpaboway sa kansiyo. ⁵⁰ Isos mango wakay lakoy. Kalbas mabogloy wa in payeng. ⁵¹ Ina daan pag betek sa balay lakoy Diyos toloy marognit in damit pamengbeng ibat sa ogbos anggan sa ngato. Manloni wa lakoy, mangabaslag in bato asin pag kobat. ⁵² Mabolwat in mga lebengan, pangkabowayan in mga bodang Diyos mga matay wa. ⁵³ Siro panaw wa sa mga lebengan, kalbas paka Isos boway wakay siro pataboy sa Irosalim, in Maal wano pag Bayan, siro lomwas asin sa karowan mangyan. ⁵⁴ In kapitan osai in kansiyo mga sarig agdamay kay Isos, paka lomoni wa osai ngiitan in mga mibaloy, siro pangkalimowan wano agpangirabot. Siro keyen, Ina mana ngani Bodang Diyos. ⁵⁵ Aronaw din mga kagbaiyan sa adayonaw kayte agriwa. Ibat daan sa Galiliya siro agyanggat agtolong kay Isos sa kansiyo mga kailangan. ⁵⁶ Kadayo Mariya in taga Magdala, osai Mariya in kay kora Santiyago inang osai kay Osi, kadayo in inang Santiyago osai Owan. ⁵⁷ Paka malabo wa in ibeng apo rateng osai ka kaliyakiyan in ngaran Osi taga Arimatiya. Siyo mayaman, agadar din kay Isos. ⁵⁸ Siyo pataboy kay Pilato, kansiyo yaayay in bilog Isos. Pilato agsogo keyen, Taboyen wa. ⁵⁹ Matang kiyowa wa Osi in bilog Isos, kansiyo tiyeem bayo daan pag benang lino. ⁶⁰ Kansiyo piyabolalang sa kansiyo batay lebengan, in bayo kay kiyali piyangwat leyang sa bato lakoy. Kalbas kansiro liigan osai ka bato lakoy piyabengbeng sa bibi leyang. Kalbas siyo panaw wa. ⁶¹ Asina din Mariya in taga Magdala osai in osai ka Mariya, siro agtokkaw sa bangen lebengan. ⁶² Paka goribas wa, in beet siyabi paka kadalan wa in Biirnis, in mga poon sasirdoti osai in mga Parisiyo maysarigan pataboy kay Pilato. ⁶³ Siro keyen, Laki Gobirnador, kanyam piyagremrem in siyabi ina pag bosliyen. Taite kay in siyo agkaboway kay kansiyo siyabi keyen, Sa katolo ka ibeng ako batay wakay boway. ⁶⁴ Na in maal kao agsogo agdamay gayed sa lebengan anggan sa katolo ka ibeng. Karam no asin pataboy in kansiyo mga agadar tiyakaw in bilog, kalbas kansiro wakay piyagbarita sa mga mangyan keyen siyo boway wakay, no kataw ina na in siro batay agpadaya labi kay kataw in datiyan. ⁶⁵ Pilato keyen, Dali wa, kamo komwa wa mga sondalo, ista wa kamo, kanyo pakarigenen in lebengan. Wara kamo sa kanyo abaloyan. ⁶⁶ Kadogay siro ista ngani, kansiro tiyandaan in bibi lebengan matang atawanan no batang wa biyoswang. Kalbas piyadamayan wa.

¹ Paka kalbas in Ibeng Pamainga agpangaboka wa in ibeng Linggo in dokabai Mariya in taga Magdala pataboy sa lebengan osai in osai ka Mariya. ² Kalbas toloy lomoni lakoy. Apo angil siyogo in Kapwan lompot batang sa langit. Kansiyo liigan in bato lakoy bengbeng sa lebengan, ina kansiyo tiyokkawan. ³ In kansiyo mata makasolap wa labi kagwali kilat, in kansiyo damit maboksi wa labi agbalawas. ⁴ In mga agdamay pangkalimowan managelgey, mameypey kagwali wa matay. ⁵ Keyen in angil sa dokabai, Ayaw alimowan. Ako katawan in kanyo piyagpamangkit Isos in piyako taite sa kodos. ⁶ Kamay siyo idapo wa atai angkataw siyo boway wakay tagoli kataw in kansiyo siyabi. Maanda, kanyo pangkiten in kansiyo batang pagpabolalangan. ⁷ Kamo ista wa agbarita sa kansiyo mga agadar keyen siyo boway wakay tagoli, siyo batay tokaw sa kanyo pataboy sa Galiliya. Ista siyo kanyo batay ngiitan. Dali wa, ayaw agpabeya. Ina wa, masabi wa in boo. ⁸ Siro maykalaliyan wa panaw sa lebengan. Siro nges agkalimo kay kamay agkaanggay wano. Siro agdalagan wa gayed agtaboy sa mga agadar matang agbarita in mga mibaloy karai. ⁹ Sa dalan kay siro tiyagbo wa Isos, siyo miplaong sa kansiro keyen, Kamo kagwali wa nakay? Siro pasabangen, omatang sa kansiyo bitis agmaal wano sa kansiyo. ¹⁰ Isos keyen sa kansiro, Ayaw agkalimo. Dali wa, kamo ista wa sabiyen sa kangay mga pagbelag siro pataboy wa sa Galiliya. Ako kansiro batay ngiitan ista. ¹¹ Paka in dokabai panaw wa, in amat mga sondalo agdamay sa lebengan pataboy wa sa bayan lakoy. Kansiro biyarita sa mga poon sasirdoti in boo mibaloy. ¹² In mga poon sasirdoti osai in mga koyay maypolongan wa. Kalbas in mga sondalo kansiro piyakan lakoy kowarta. ¹³ Siro siyogo keyen, Keyen in kanyo pansabiyen, Karai yabi in kami agesek, asin pataboy in mga agadar kay Isos, kansiro tiyakaw in kansiyo bilog. ¹⁴ Keyen kay in siyabi, Kamayba ina rateng sa gobirnador kamo ayaw agkariyaban. Kami wa in baala asin. ¹⁵ Kalbas kiyowa wa in mga agdamay in kowarta, piyangwat in bilin karai. Matang anggan ngona pag mga ibeng ina daan in piyagsabi in mga Odyo. ¹⁶ In Labing Osai ka agadar pataboy wa sa Galiliya, sa boksor siyabi Isos sa kansiro. ¹⁷ Paka siro maltagbowan wa, Isos kansiro piyagmaal wano, kamay in amat sa kansiro piyagbaslag kay in remrem. ¹⁸ Kalbas Isos pasabangen sa kansiro keyen, Tiyaboy wa sa kangay in boo kabaloyan, kamayba sa langit kamayba sa kobat. ¹⁹ Na kamo panaw wa, kanyo patoldowen in boo mga mangyan matang siro miyanggat sa kangay, baotismowanen sa ngaran in Amang, osai in Bodang, osai in Betek pag Abyan. ²⁰ Siro kanyo patoldowen maniwala sa boo kangay piyatoldo sa kanyo. Kamo ayaw anaweyan, ako palagi kanyo sarig anggan sa idapo kalobosan.