LOKAS

LOKAS

¹ Laki Koyay Tiyopilo, aronaw wa in agpilit somolat in mga mibaloy atai sa kanyam. ² In kansiro siyolat batang sa mga siyabi in mga kangitan osai agpatoldo ina sigod sa parakayan. ³ Ina pag boo kangay din piyamangkit gayed maal sogod sa parakayan, matang kangay remrem maal din ako agsolat wa sa kaimo, toloytoloy in kowinto. ⁴ Matang kaimo atawanan betek ngani ina pag mga piyatoldo sa kaimo. ⁵ In betek Irodis in poon lakoy sa Odiya, apo osai ka sasirdoti in ngaran Sakaryas sa kay Abiyas barkadaan mga sasirdoti. In kansiyo babai in ngaran Ilisabit. Siro tanan kasokponan Aaron, ⁶ tanan din makaanggay sa pangkit Diyos, agogali in boo mga Batas osai bilin in Kapwan. ⁷ Siro idapo bodang, kataw Ilisabit baog, siro tanan wate koyayte. ⁸ Ina pag betek in barkadaan kora Sakaryas in apo panawen sa balay lakoy Diyos. ⁹ In ogali in mga sasirdoti siro agposta no nakay in batay agsonog in mala masadap. Sakaryas in mandaeg matang siyo misoroy wa sa kabetek tiyalaga sa Diyos. ¹⁰ Sa betek piyagsonog in mala masadap, in boo mangyan sa tongkodan agbangen agpandalangin. ¹¹ Bayo katawan papangkit kay Sakaryas osai ka angil batang sa Kapwan, agtaydek sa bangen in pagsonogan mala masadap, sa kay Sakaryas pamalang agbangen. ¹² Alimowan Sakaryas in siyo kangitan in angil, siyo agkalimo gayed. ¹³ Kamay keyen in angil, Ayaw agkalimo, Sakaryas. In Diyos agparengey sa kaimo pandalangin. Kamo osai Ilisabit batay apo bodang kaliyakiyante. Owan in kaimo taboyen ngaran. ¹⁴ Kao batay agkaanggay wano. Paka siyo biyoslot wa na aronaw din in batay anggayan, ¹⁵ angkataw siyo batay lakonaw sa pangkit Diyos. Siyo piyagayaw aginem alak, kamayba nakay pag piyaginem makalasing. Sogod siyo biyoslot siyo piyagbalayan wa in Betek pag Abyan. ¹⁶ Bonton sa mga kasokponan Israil kansiyo batay piyagpaoli sa Kapwan sa kansiro Diyos. ¹⁷ Siyo batay tokaw sa Kapwan, apo in bait osai in kabaloyan Iliyas in poropita, matang maybelagen wakay osai in mga koyay osai in mga bodang. Osai in mga aleleng batay wakay piyagpaoli sa betek pag mga ogali. Kataw ina in sa Kapwan pag mga mangyan kansiyo batay siyandata sa kansiyo. ¹⁸ Siyabi Sakaryas sa angil, Nangkataw kangay batay matiyak ina batay ngani mibaloy? Angkataw ako koyayte wa, kadayo kangay babai. ¹⁹ Kalbas keyen wakay in angil, Ako Gabril, in agpanawen sa pangkit Diyos. Siyo in agsogo sa kangay matang tomonton sa kaimo anda pag maalno pag barita kangay siyabi sa kaimo. ²⁰ Ina ngani batay mibaloy anggan sa rateng in kabetek. Kamay kataw kao yewed maniwala sa kangay siyabi, na kao batay yewed kaiplaong, anggan sa ibeng ina mibaloy. ²¹ Anggan in mga mangyan agpanaya kay Sakaryas, siro agsoyo no nakay batang siyo kadogay ina sa galem in kabetek tiyalaga sa Diyos. ²² Paka siyo lomwas wakay siyo idwa kaiplaong sa kansiro. Siyo agribway waget kansiyo bakwaw, agpatonay siyo idwa kaiplaong. Matang siro katawan siyo apo ngani ngiitan sa kabetek tiyalaga sa Diyos. ²³ Paka kalbas wa in kabetek siyo agpanawen, siyo moli wakay. ²⁴ Yewed kayte dogay Ilisabit bonting wa. Siyo idwa agipanawan anggan lima ka bolan. ²⁵ Kalbas siyo keyen, Ngona ako piyagpakayawte in Kapwan. Anda kansiyo piyangwat matang ako idwa agkarikoy sa adap mga mangyan. ²⁶ Paka kaenem wa ka bolan in kay Ilisabit bonting, in angil Gabril siyogo in Diyos sa bayante Nasarit sa kobat Galiliya. ²⁷ Siyo siyogo agbaba barita sa osai ka daraga in ngaran Mariya. Siyo batay wa kiyasal kay Osi, osai ka kaliyakiyan kasokponan in poon lakoy Dabid. ²⁸ Pasabangen in angil kay Mariya, siyabi keyen, Kataw nakay wa kao? In Kapwan agkaanggay sa kaimo, siyo agyanggat sa kaimo. ²⁹ Kamay Mariya ariyaban asin pag siyabi. Siyo agpanremrem wano no nakay in beet siyabi ina. ³⁰ Kamay siyabi in angil, Kao ayaw alimowan, Mariya. Angkataw in Diyos agkaanggay sa kaimo. ³¹ Baina, kao batay bonting, batay apo bodang kaliyakiyante. Kaimo taboyen ngaran Isos. ³² Siyo batay lakonaw, batay piyagawit Bodang Diyos in Mabwat sa boo. Batay piyasakop sa kansiyo Diyos Kapwan in boo sakopan kansiyo kakoyayan Dabid. ³³ Siyo batay agpapoon lakoy sa mga kasokponan Akob anggan idapo kalobosan. In kansiyo agpoon idapo kalobosan. ³⁴ Keyen Mariya, Nangkataw batay mibaloy ina? Ako dayem daraga. ³⁵ Keyen in angil, Batay rateng sa kaimo in Betek pag Abyan. Kao batay riirongan in kabaloyan Diyos in Mabwat lakoy sa boo, matang in kaimo batay bodang betek ngani sa Diyos. Siyo batay piyagawit Bodang Diyos. ³⁶ Kaimo atawanan in kaimo kabelagan Ilisabit, siyo datiyan piyagawit baog, kamay ngona siyo bonting, ngona kaenem wa ka bolan, kamayba koyay wa. ³⁷ Angkataw sa Diyos in boo agibaloy. ³⁸ Keyen Mariya, Ako in sogowan in Kapwan. Kalobante mibaloy sa kangay in kaimo siyabi. Kadogay siyo biyaliwan wa in angil. ³⁹ Ikkayte dogay Mariya agkabiglaan agtaboy sa kobat Odiya, sa osai ka bayante sa agbaw. ⁴⁰ Paka siyo misoroy sa balay Sakaryas, siyo miplaong kay Ilisabit. ⁴¹ Paka Ilisabit karengey kay Mariya miplaong toloy agpaglebeyan in bodangte sa kansiyo boyon. Toloy misoroy kay Ilisabit in Betek pag Abiyan. ⁴² Siyo miplaong maksen keyen, Sa boo mga kagbaiyan kao in piyagmaal, osai piyagmaal din in bodang sa kaimo boyon. ⁴³ Ako nakay matang piyangkit in inang kangay Kapwan? ⁴⁴ Baina in ako karengey kaimo agiplaong in bodang sa kangay boyon toloy agkaanggay agpaglebeyan. ⁴⁵ Kao agkaanggay kataw kao maniwala keyen batay mibaloy in siyabi sa kaimo in Kapwan. ⁴⁶ Keyen Mariya, In kangay galem agmaal sa Kapwan. ⁴⁷ Kangay abyan agkaanggay sa Diyos in agpamaboway sa kangay. ⁴⁸ Panawen ako kansiyo piyagmaal, kamayba ako in kalakoyte pag kansiyo sogowan. Na sigod ngona in boo mga kasokponan batay agsabi keyen ako in agkaanggay, ⁴⁹ panawen sa lakonaw pag mga piyangwat sa kangay in Apo Kabaloyan. Pagmaalen in kansiyo ngaran. ⁵⁰ Kansiyo piyagpakayawte in mga agmaal sa kansiyo, sa boo mga kasokponan. ⁵¹ Kansiyo piyapangkit in kaeyaten kansiyo bakwaw. Kansiyo kiyalat in mga agpakabwat remrem. ⁵² In mga poon lakoy kansiyo piyakalakoyte. In mga wakay kalakoyte kansiyo piyakalakoy. ⁵³ Kansiyo piyabosog in mga maalno in mga agkayawes. In mga mayaman agbangen kansiyo piyapanaw idapo piyagbaba. ⁵⁴ Kansiyo tiyolong in mga kasokponan Israil in kansiyo sogowan, matang mibaloy in kansiyo pangako sa kantam mga kakoyayan, ⁵⁵ kay Abraam, osai sa kansiyo mga kasokponan anggan idapo kalobosan. ⁵⁶ Mariya agpamataw kay kora Ilisabit anggan mga tolo ka bolan, kalbas siyo moli wakay sa kansiyo kobat. ⁵⁷ Rateng wa in kabetek Ilisabit agboslot wa. In lomwas kaliyakiyante. ⁵⁸ Abaritaan in mga agbalay sa kansiro bangen, osai in mga kabelagan keyen, Ilisabit piyagpakayawte wano in Kapwan. Siro boo agkaanggay sa kansiyo. ⁵⁹ Sa kawalo ka ibeng siro asin pataboy angkataw piyagtoli in bodang. Siyo kansiro nges batay piyagawit Sakaryas kataw kansiyo amang. ⁶⁰ Kamay siyabi in inang keyen, Ayaw ina. Owan in batay kansiyo ngaran. ⁶¹ Siro keyen, Kamay sa kanyo kabelagan idapono piyagawit kataw ina. ⁶² Kalbas siro agkimkimot sa amang, agtanong no nakay in kansiyo beet piyangwat ngaran in bodang. ⁶³ Sakaryas mangayay pagsolatan, kalbas siyo somolat keyen, Kansiyo ngaran Owan. Siro boo agsoyo. ⁶⁴ Kalbas toloy wakay kaiplaong Sakaryas. Siyo toloy agmaal sa Diyos. ⁶⁵ Agsoyo in boo agbalay sa kansiro bangen, ina boo piyaggisod wa sa boo kobat Odiya sa agbaw. ⁶⁶ Ina piyanremrem gayed in boo mga karengey, atawanan wa gayed sa kansiyo ngani in Kapwan. Matang siro keyen, Batay lames nakay ina pag bodang? ⁶⁷ In kansiyo amang Sakaryas maeyat in remrem batang sa Betek pag Abyan, piyaiplaong keyen, ⁶⁸ Pagmaalen in Kapwan in kay Israil Diyos, angkataw kansiyo tiyolong, kansiyo piyalpas in kansiyo mga mangyan. ⁶⁹ Kansiyo tiyaboy sa kantam osai ka Agpamaboway apo kabaloyan, batang sa kasokponan Dabid kansiyo sogowan. ⁷⁰ Kataw in piyangako tangona in Diyos siyabi in kansiyo maal wano pag mga poropita ⁷¹ keyen, Kamo batay kangay Piyagpaboway sa kanyo mga kaaway, sa boo agkagalit sa kanyo. ⁷² Kansiyo din piyangako batay din piyagpakayawte in kantam mga kakoyayan. Kansiyo wakay batay piyanremrem in kansiyo mga maal wano pag kasondowan. ⁷³ Kansiyo piyarigen wano in kansiyo pangako kay Abraam, kantam kakoyayan. ⁷⁴ keyen kitam batay kansiyo piyaboway sa kantam mga kaaway, matang kitam idapo piyagkalimo, kitam kasamba sa kansiyo. ⁷⁵ matang din kitam maal wano, betek gayed sa kansiyo pangkit, anggan kitam agkaboway kay. ⁷⁶ Laki bodangte, kao batay piyagawit poropita batang sa Mabwat lakoy sa boo. Angkataw kao in batay tokawan sa Kapwan, matang sandataen in kansiyo batay dalan. ⁷⁷ Osai agpatoldo sa kansiyo mga mangyan siro batay piyaboway, angkataw kansiro mga daet liibangaw. ⁷⁸ Angkataw maloba wano agpakayawte in kantam Diyos. Kitam batay piyaboway. Ina batay kagwali aglowas wa in ibeng, ⁷⁹ agrawa sa mga agkalenedan, osai sa mga bangen wa matay, matang kitam piyagsarig sa apyaan pag dalan. ⁸⁰ Mistobo in bodang, osai maeyat kansiyo abyan. Siyo agbalay wa sa moyod anggan sa kabetek siyo papangkit wakay sa mga kasokponan Israil.

¹ Ina pag betek in mabwat pag poon lakoy Agosto agbatas keyen kailangan agpalista in boo mga mangyan. ² Ina in tokaw pag palista in kabetek Kirinyo in gobirnador sa Siriya. ³ Kalbas moli wa in baatte mangyan sa kansiyo daan rakayan matang agpalista. ⁴ Osi panaw wa sa bayan Nasarit sa Galiliya, pataboy wa sa bayan Bitliim sa Odiya. Ina pag bayan in biyoslot in poon lakoy tangona Dabid. Kaya asin pataboy siyo kasokponan Dabid. ⁵ Siyo asin batay agpalista. Miyanggat Mariya, in kansiyo batay babai, siyo bonting. ⁶ Sa betek siro ista, rateng wa in kabetek Mariya batay agboslot. ⁷ Miboslot wa in kansiyo panganay, kaliyakiyante. Tiyeem wa komot in bodangte, kalbas piyapalibay wate sa labangan, angkataw maliget wa in balay, idapo wa batay esekan piyagtaboy sa kansiro. ⁸ Asina din pag kobat sa bolod apo mga agalapet topa. Siro yewed agpalpagesek, agdamay kansiro mga topa. ⁹ Toloy lomwas sa kansiro osai ka angil batang sa Kapwan. Romawa sa kansiro balabaan in makasolap pag rawa Kapwan, siro pangkalimowan wa gayed. ¹⁰ Kamay siyabi in angil keyen, Kamo ayaw agkalimo. Baanda, ako apo piyagbaba sa kanyo maalno pag barita, batay agpakaanggay sa boo mangyan. ¹¹ Angkataw biyoslot ngona sa bayan Dabid in kanyo Agpamaboway. Siyo in Kiristo in Kapwan. ¹² Anda in tandaan, batay kanyo ngiitan in bodangte piyagteem komot, agipalibay sa labangan. ¹³ Toloy lomwas in karowan wano pag taga langit miyanggat sa angil agmaal sa Diyos keyen, ¹⁴ Pagmaalen in Diyos sa langit. Sa kobat apyaan in mga mangyan kansiyo piyagkaanggay. ¹⁵ Paka panaw wa in mga angil, moli wa sa langit, in mga agalapet topa agpaypolongan wa keyen, Kitam wa sa Bitliim. Amba, kantam pangkiten in siyabi karai in Kapwan. ¹⁶ Kadogay siro agkabiglaan ista pataboy. Kansiro ngani ngiitan Mariya, osai Osi, kadayo in bodangte agipalibay sa labangan. ¹⁷ Paka kansiro ngiitan in bodang, kansiro siyabi in siyabi karai in angil panawen asin pag bodang. ¹⁸ Agsoyo in boo mga karengey sa siyabi in mga agalapet topa. ¹⁹ Ina boo piyagalapet Mariya sa kansiyo galem, isagteisagte kansiyo piyagpanremrem. ²⁰ Panaw wa in mga agalapet topa. Siro agmaal sa Diyos, osai agsabi in kansiyo kabaloyan, panawen sa boo kansiro arengeyan osai ngiitan kataw daan in biyarita in angil sa kansiro. ²¹ Sa kawalo ka ibeng in bodangte tiyoli wa. In tiyaboy ngaran Isos. Ina in tiyaboy in angil, bayo siyo biyonting. ²² Mowisis apo Batas keyen, In kagbaiyan batang agboslot kailangan linisen. Na paka rateng in kabetek pag ibeng aglinis, kora Mariya pataboy sa Irosalim. Piyagbaba in bodangte matang piyaadap sa Kapwan, ²³ angkataw apo siyolat sa mga Batas in Kapwan keyen, In baatte bodang panganay kaliyakiyan kailangan piyagsandata sa Kapwan. ²⁴ Siyabi kay din sa mga Batas in Kapwan keyen, Kailangan agandog taybalang koykorowan no yewed dowai ka sipsipan kalapati. Kaya siro ista pataboy matang agandog kataw ina. ²⁵ Apo osai ka kaliyakiyan sa Irosalim, in ngaran Simyon. Siyo maal pag mangyan, yewed aglimbang agpaniwala sa Diyos. Siyo agpanaya sa piyagpamaboway in mga kasokponan Israil. In Betek pag Abyan agsarig sa kansiyo. ²⁶ In Betek pag Abyan agsabi sa kansiyo keyen, Kao idbatay matay anggan ikkay kaimo ngiitan in Kiristo piyangako in Kapwan. ²⁷ Siyo piyaonaik in Abyan sa balay lakoy Diyos. Paka Isos ista biyaba in kansiyo mga koyay sa balay lakoy Diyos matang piyangwat in agisolat sa mga Batas, ²⁸ siyo siyalili Simyon, kalbas agmaal sa Diyos keyen, ²⁹ Laki Kapwan, ngona mibaloy wa in kaimo pangako. Ako in kaimo sogowan maal wa ngani matay, ³⁰ angkataw kangay wa ngani ngiitan in kaimo siyogo Agpamaboway, ³¹ kaimo siyandata, batay ngiitan in boo mangyan. ³² Siyo batay kagwali tinglaw batay agrawa sa mga yewed Odyo. Osai agpakalakoy sa mga kasokponan Israil, sa kaimo mga mangyan. ³³ In mga koyay agsoyo sa mga siyabi Simyon panawen sa bodangte. ³⁴ Siro piyandalangin Simyon, osai siyabi sa kansiyo inang Mariya keyen, Anda pag bodang iidang Diyos matang in karowan sa mga kasokponan Israil batay piyarosa. Aronaw din in batay piyaboway. Siyo tanda batang sa Diyos. Kamay siyo batay piyagbenglay in karowan. ³⁵ Kataw ina atawanan wa in kansiro piyagbetang sa remrem. Panawen asin kaimo remrem batay wa kagwali siyaldak pisaw. ³⁶ - ³⁷ Ista din sa balay lakoy Diyos in osai ka kagbaiyan poropita, in ngaran Ana, bodang Panwil, kasokponan Asir. Siyo koyay wa gayed, pito wagette ka dagon siro taybalang, matay wa kansiyo lalaki. Siyo walompot opat wa ka dagon. Palagi siyo sa balay lakoy Diyos, kadayo ibeng kadayo yabi siyo agmaal sa Diyos, idwa agkoman, agpandalangin waget. ³⁸ Ina daan pag betek siyo asin pasabangen kay kora Isos. Siyo agkaanggay sa Diyos. Agbarita din siyo panawen kay Isos sa boo agpanaya sa piyagpaboway Diyos in mga taga Irosalim. ³⁹ In kansiro wa mipangwat in boo piyagsabi sa mga Batas in Kapwan siro moli wakay sa Nasarit, sa kobat Galiliya, sa kansiro daan bayan. ⁴⁰ In bodang agistobo, maeyat, lakonaw din in atawanan. Siyo makaanggay sa pangkit Diyos. ⁴¹ Baatte dagon sa kabetek in piyasta piyagawit Paskowa, in mga koyay Isos ista pataboy sa Irosalim. ⁴² Paka Isos labing dowai wa ka dagon siro talnakiyan ista wakay pataboy kataw in datiyan piyagpangwat in mga koyay. ⁴³ Paka kalbas wa in piyasta, siro agoli wa. Isos pabaliwan sa Irosalim, kamay yewed atawanan in mga koyay. ⁴⁴ Sa kansiro remrem Isos sarig daan in karowan agipanaw. Siro agipanaw wa anggan osai ka boo ibeng. Paka siro katawan idapo Isos kansiro piyamangkit sa kansiro mga kabelagan osai sa amat sarig. ⁴⁵ Idapo ngiitan. Kalbas siro moli wakay sa Irosalim agpamangkit sa kansiyo. ⁴⁶ Paka goribas wakay Isos bayo ngiitan sa galem balay lakoy Diyos. Siyo agitokkaw, sarig in mga agpatoldo. Siyo agparengey sa kansiro osai agtanong. ⁴⁷ In boo karengey kay Isos agsoyo sa kansiyo atawanan osai sa kansiyo mga sagot. ⁴⁸ Agsoyo din in kansiyo mga koyay paka siyo ngiitan. Siyabi in kansiyo inang keyen, Laki, nakay batang agkataw ina in kaimo piyangwat? Baanda, agkariyaban wano kami in kaimo amang agpamangkit sa kaimo. ⁴⁹ Siyabi Isos sa kansiro keyen, Nakay batang ako kanyo piyagpamangkit? Yewed mana kanyo atawanan ako kailangan atai sa balay kangay Amang? ⁵⁰ Yewed kansiro atawanan in kansiyo beet siyabi. ⁵¹ Siyo miyanggat sa kansiro, moli wakay sa Nasarit. Siyo agpaniwala sa kansiyo mga koyay. Ina pag boo palagi piyagremrem in kansiyo inang. ⁵² Agistobo Isos kadayo in kansiyo atawanan. In Diyos agkaanggay sa kansiyo kadayo in mga mangyan.

¹ Sa kalabing lima ka dagon Tibiryo Sisar mabwat pag poon lakoy, Ponsiyo Pilato poon sa kobat Odiya, Irodis in poon sa kobat Galiliya, in kansiyo belag Pilipi in poon sa kobat Itoriya osai Tarakoniti, osai Lisanyas in agpoon sa Abilinya. ² Anas osai Kaypas in mabwat sa mga poon sasirdoti. Ina pag mga betek Owan in bodang Sakaryo sa moyod. Kalbas siyo wa in siyogo Diyos agpatoldo in kansiyo agiplaong. ³ Matang siyo agipanawan sa boo kobat sa balabaan sapa Ordan agpatoldo keyen, Benglayen wa in kanyo mga daet, pabaotismo wa, na batay wa liibangaw Diyos in kanyo mga daet. ⁴ Kataw ina in siyolat in poropita Isaiyas sa kansiyo aklat keyen, Anda in piyagsabi in osai ka agpango sa moyod keyen, Kanyo sandataen in pagdalanan in Kapwan. Pakapyaen wa kamo in kansiyo batay dalan. ⁵ In baatte malkep kanyo wa bongsodanen. In baatte boksor baatte bolod kanyo wa papatagen. In agibaliko pag dalan kanyo wa toronen. In daeten pag dalan kanyo wa linisen. ⁶ Matang atawanan in boo mangyan in Diyos agpamaboway. ⁷ Aronaw in mangyan pataboy kay Owan matang siro biyaotismo. Kalbas kansiyo siyabi sa kansiro keyen, Kamo kagwali mga dopong, nakay in agpatoldo sa kanyo domalagan sa parosa Diyos agrateng? ⁸ Pangwaten wa in mga maal pag ogali matang atawanan in mga mangyan keyen biyenglay wa ngani in kanyo mga daet. Ayaw kanyo agremremen keyen kamo kay Abraam mga kasokponan. Kangay piyagsabi sa kanyo, batang atai pag mga bato in Diyos kabaloy agpangwat mga kasokponan kay Abraam. ⁹ Ngona daan in wasay agisandata wa batay agpokan sa mga yangaw anggan sa mga dalig. Kamayba nakay pag yangaw in yewed agpanggalem maal batay piyagpokan piyagbenglay sa baya. ¹⁰ In mga mangyan agtanong kay Owan keyen, Na nakay in batay kanyam piyangwat? ¹¹ Owan keyen, No kamo dowai ka lambong na in osai taboyen sa idapo. Osai no apo pamangnen na agtaboy din. ¹² Apo din mga agpaningil bowis rateng sa kansiyo matang agpabaotismo. Siro keyen, Ai kami, laki Agpatoldo, in kanyam batay piyangwat nangkataw? ¹³ Siyo keyen, Ayaw agsingilen in labi kay sa kailangan singilen. ¹⁴ Apo wakay mga sondalo agtanong sa kansiyo keyen, Al kami, nakay in kanyam? Siyo keyen, No kamo agpangayay na ayaw agpamilit, ayaw agbintang. Osai ayaw agsolang sa kanyo bayad. ¹⁵ In mga mangyan agpanaya sa agrateng in Kiristo. In karowan agremrem kay Owan keyen, Karam ina wa. ¹⁶ Matang Owan miplaong sa kansiro keyen, Kamo kangay piyagsogbo sa sapa, kamay in agrateng sa kangay paoriyan, siyo in batay agsogbo sa kanyo sa Betek pag Abyan, osai sa baya. In kansiyo kabaloyan labi kay sa kangay. Ako kalakoyte yewed sibay kamayba sogowan waget aglowat kansiyo tapatos. ¹⁷ Kansiyo wa piyagatang in kansiyo birao matang benglayen in talinga. In paray kansiyo batay piyagbetang sa banglin. Kamay in talinga batay piyagtebed sa baya idapo kalobosan. ¹⁸ Owan aronaw kay bilin sa mga mangyan in siyo agpatoldo in Maal pag Barita. ¹⁹ Kamay kansiyo siyabiyan Irodis in poon panawen kansiyo kiyowa Irodyas in babai kansiyo belag, osai panawen sa aronaw kay pag mga daet kansiyo piyangwat. ²⁰ Matang Owan piyabilanggo Irodis. Ina osai kay ka daet piyadagdag Irodis sa kansiyo mga daet. ²¹ Paka in boo mangyan biyaotismowan wa, Isos din biyaotismowan. In siyo agpandalangin maboswang in langit, ²² in Betek pag Abyan aglompot, omapon sa kansiyo, apo bilog kagwali bantog kalapati. Apo agiplaong batang sa langit keyen, Kao in kangay piyagmaal pag Bodang. Kao kangay wano piyagkaanggayan. ²³ In Isos mga tatlompo wa ka dagon siyo agparakay wa agpatoldo. In remrem in mga mangyan in kansiyo amang Osi, in kay Osi amang Ili, ²⁴ - ³⁸ in kay Ili amang Matat, in kay Matat amang Libi, in kay Libi amang Milki, in kay Milki amang Diyana, in kay Diyana amang Osi, in kay Osi amang Matatyas, in kay Matatyas amang Amos, in kay Amos amang Naom, in kay Naom amang Isli, in kay Isli amang Nagi, in kay Nagi amang Maat, in kay Maat amang Matatyas, in kay Matatyas amang Simi, in kay Simi amang Osi, in kay Osi amang Oda, in kay Oda amang Diyowana, in kay Diyowana amang Risa, in kay Risa amang Sorobabil, in kay Sorobabil amang Salatil, in kay Salatil amang Niri, in kay Niri amang Milki, in kay Milki amang Adi, in kay Adi amang Kosam, in kay Kosam amang Ilmodan, in kay Ilmodan amang Iir, in kay Iir amang Oswi, in kay Oswi amang Ilisir, in kay Ilisir amang Orim, in kay Orim amang Matat, in kay Matat amang Libi, in kay Libi amang Simyong, in kay Simyong amang Oda, in kay Oda amang Osi, in kay Osi amang Diyonan, in kay Diyonan amang Iliyakim, in kay Iliyakim amang Milya, in kay Milya amang Mainan, in kay Mainan amang Matata, in kay Matata amang Natan, in kay Natan amang Dabid, in kay Dabid amang Isi, in kay Isi amang Obid, in kay Obid amang Boos, in kay Boos amang Salmon, in kay Salmon amang Naason, in kay Naason amang Aminadab, in kay Aminadab amang Admin, in kay Admin amang Arni, in kay Arni amang Isrom, in kay Isrom amang Paris, in kay Paris amang Oda, in kay Oda amang Akob, in kay Akob amang Isaak, in kay Isaak amang Abraam, in kay Abraam amang Tari, in kay Tari amang Nakor, in kay Nakor amang Sirog, in kay Sirog amang Riyo, in kay Riyo amang Pilig, in kay Pilig amang Ibir, in kay Ibir amang Sila, in kay Sila amang Kainan, in kay Kainan amang Arpaksad, in kay Arpaksad amang Siim, in kay Siim amang Nowi, in kay Nowi amang Lamik, in kay Lamik amang Matosalim, in kay Matosalim amang Inok, in kay Inok amang Arid, in kay Arid amang Malalil, in kay Malalil amang Kainan, in kay Kainan amang Inos, in kay Inos amang Siit, in kay Siit amang Adan, Adan in sa Diyos bodang.

¹ Isos agoli wakay batang sa sapa Ordan, siyo piyagbalayan gayed in Betek pag Abyan. Siyo piyaanggat in Abyan sa moyod. ² Apatnapo ka ibeng siyo piyagtepeng in diyablo. Ina pag kadogayen siyo yewed mamangan. Paka kalbas siyo agkayawes wa gayed. ³ In diyablo keyen sa kansiyo, No kao ngani in Bodang Diyos, na sogowen anda pag bato matang mipangwat pamangnen. ⁴ Kamay keyen Isos, In Agisolat keyen, Yewed sa pamangnen waget agkaboway in mangyan. ⁵ Isos piyaanggat in diyablo sa osai ka mabwat pag kobat. Isos piyarongaw, piyapangkit sa kansiyo kadogayte agpenpenek in boo mga sakopan sa boo kobat. ⁶ Keyen in diyablo, Ina pag boo kangay batay piyagpasakop sa kaimo, osai in boo kalakoyen kangay batay piyagtaboy sa kaimo. Angkataw ina tiyaboy wa sa kangay, matang kangay wakay taboyen kamayba sa nakay kangay beet. ⁷ Matang no kao somamba sa kangay na ina boo kaimo wa. ⁸ Kamay keyen Isos, In Agisolat keyen, In Diyos waget in kaimo sambaen, siyo in kaimo Kapwan. Siyo waget in kaimo paniwalaen. ⁹ Kalbas Isos piyaanggat in diyablo sa tangrawan in bobongan sa balay lakoy Diyos sa Irosalim. Keyen in diyablo, No kao ngani in Bodang Diyos na kao palabo asin. ¹⁰ Angkataw keyen in Agisolat, In Diyos batay agsogo kansiyo mga angil agalapet sa kaimo. ¹¹ Osai keyen, Kao kansiro batay piyagatang, karam kaimo bitis batay asolpo sa bato. ¹² Kamay keyen Isos, Apo din Agisolat keyen, Ayaw kaimo agtepengen in Diyos in kaimo Kapwan. ¹³ Paka in diyablo alobosan wa mga padalan agtepeng kay Isos, siyo panaw wa, agpanaya wakay sa osai kay ka kabetek agtepeng sa kansiyo. ¹⁴ Isos moli wakay sa kobat Galiliya, apo in kabaloyan in Betek pag Abyan. In barita panawen sa kansiyo biyaba asin pag boo kobat. ¹⁵ Siyo agpatoldo sa kansiro mga balay pagpaniponan, kalbas siyo piyaglakonaw in boo mangyan. ¹⁶ Isos pataboy sa bayan Nasarit, asin tangona siyo mistobo. Sa Ibeng Pamainga siyo misoroy sa balay pagpaniponan, kataw ina in kansiyo ogali. Siyo tomaydek batay agbasa sa mga Agisolat. ¹⁷ In tiyaboy sa kansiyo in aklat siyolat in poropita Isayas. Kansiyo biyoswang in aklat, kansiyo piyamangkit, kalbas biyasa in kabetek in agisolat, keyen, ¹⁸ In Abyan in Kapwan sa kangay, angkataw ako kansiyo iidang agpatoldo sa mga maidap in Maal pag Barita. Ako kansiyo siyogo agsabi sa mga piyagbilanggo keyen kamo batay wa piyagpalpas, osai sa mga beleg keyen kamo batay wakay kangitan. Ako siyogo agpaboway sa mga piyagpaidapan, ¹⁹ osai agbarita keyen ngona daan pag dagon in Kapwan batay agpamaboway. ²⁰ Kalbas kansiyo wakay kiyopot in aklat piyaoli wa sa agalapet. Kalbas siyo tomokkaw. In boo sa balay pagpaniponan agpangkit gayed sa kansiyo. ²¹ Kansiyo siyabi sa kansiro keyen, Ngona wa daan in kamo agparengey, mibaloy wa in siyabi ina pag Agisolat. ²² Siro boo agmaal sa kansiyo. Siro agsoyo sa kaalenen in kansiyo mga agiplaong. Siro keyen, Yewed mana ina in bodang Osi? ²³ Keyen Isos, Tiyak kanyo batay siyabi sa kangay in piyagsabi keyen, Laki Agpanggamot, kaimo paorawen in kaimo sadiri maskit. Osai kanyo batay din siyabi keyen, Kaimo din pangwaten atai sa kaimo daan kobat in kami abaritaan kaimo piyangwat sa Kapirnaom. ²⁴ Isos keyen kay, Totoo ngani idapo poropita piyagkaanggayan sa kansiyo daan kobat. ²⁵ In kangay piyagsabi, tangona sa kabetek idapo odan sa kobat Israil tolo ka dagon kalaati anggan maloba wa in yawes, ina in kabetek Iliyas, aronaw nges asin sa mga kasokponan Israil mga kagbaiyan balo, ²⁶ kamay Iliyas yewed siyogo kamayba kay nakay sa kansiro, dayem sa osai ka kagbaiyan balo yewed Odyo sa bayan Saripta sa kobat Sidon. ²⁷ Osai sa kabetek Ilisiyo, aronaw nges in mga apo kagwali panyakit sa kobat Israil, kamay idapo piyaoraw sa kansiro no yewed Naaman in taga Siriya agbangen. ²⁸ Paka in mga asin sa balay pagpaniponan karengey ina pag siyabi Isos, siro boo maloba wano agkagalit sa kansiyo, ²⁹ anggan rateng agpaltaydekan. Isos biyaba sa awak bayan, sa pimpingan in boksor in pagtadyokan kansiro bayan. Siyo batay liyabo sa lintoy lakoy. ³⁰ Kamay Isos domalan daan sa kansiro kagwaraan, siyo panaw wa. ³¹ Kalbas Isos mongali wa pataboy sa bayan Kapirnaom sa kobat din Galiliya. Sa Ibeng Pamainga siyo agpatoldo sa mga mangyan. ³² Siro agsoyo sa kansiyo agpatoldo, kataw apo kabaloyan in kansiyo mga agiplaong. ³³ Ista sa balay pagpaniponan apo osai ka kaliyakiyan piyaglowasan mamaw, maloba wano daet. Siyo mango maksen ³⁴ keyen, Isos taga Nasarit, nakay in kaimo panawen sa kanyam? Kaya lames kao atai matang kami bonowen? Ako katawan no nakay kao. Kao in Betek, in siyogo Diyos. ³⁵ Siyo piyangelel Isos keyen, Kao ayaw aglalae. Kao bali wa asin pag mangyan. In boo mangyan agpangkit, in mangyan liigan in mamaw, kalbas biyaliwan wa, idapo kiyaskitan. ³⁶ Siro boo agsoyo, agsabi sa baatte osai keyen, Nakay lames pag yangaw ina? Baina, Isos apo kabaloyan agboyaw sa mga mamaw, kalbas in mamaw domalagan ngani. ³⁷ Matang in barita Isos piyarateng asin pag boo kobat. ³⁸ Isos panaw sa balay pagpaniponan pataboy sa kay Simon balay. Kay Simon babai inang apo maskit maibeng wano in bilog, matang siro omayay kay Isos keyen, Paorawen nges ina. ³⁹ Isos tomaydek sa bangen in kagbaiyan, biyoyaw in lagnat, toloy maidapo. In inang toloy miyorog, agalapet sa kansiro. ⁴⁰ Paka agapon wa in ibeng in boo apo maskit, kamayba nakay pag maskit, biyaba kansiro mga pagbelag kay Isos. Kansiyo yaatang in baatte osai ka apo maskit, piyaoraw. ⁴¹ Osai in mga mamaw domalagan sa aronaw kansiro mga piyaglowasan. In mga mamaw agpango keyen, Kao in Bodang Diyos. Kamay siro piyangelel Isos, yaayaw miplaong, angkataw kansiro atawanan siyo in Kiristo. ⁴² Goribaste pasodip panaw wa Isos pataboy sa osai ka moyod, kamay siyo piyagpamangkit in mga mangyan. Paka siyo ngiitan siro agpilit nges keyen, Kami ayaw agbaliwanen. ⁴³ Kamay siyo keyen, Ako kailangan din sa roma pag mga bayan, agpatoldo in Maal pag Barita panawen sa Diyos agpapoon angkataw ina in dailan kaya ako siyogo. ⁴⁴ Kadogay siyo agpatoldo wa sa mga balay pagpaniponan in mga Odyo.

¹ Osai ka ibeng Isos agitaydek sa balabaan in dagatte Ginisarit. Siyo piyagliget wano in aronaw pag mga mangyan agkaparengey sa agiplaong Diyos. ² Siyo kangitan dowai ka bangka sa balabaan dagatte. In mga agpangisda lompot wa, agogas wa in kansiro mga lambat. ³ Isos monaik sa osai ka bangka, omayay kay Simon in kapwan bangka keyen, In bangka pakaadayonawen kayte sa bowanginan. Kalbas Isos agtokkaw sa bangka agpatoldo sa mga mangyan. ⁴ Paka Isos kalbas wa agiplaongan siyo keyen kay Simon, Amba, ista kayte pataboyen in kaimo bangka sa malayem, kanyo labowen wakay in kanyo mga lambat matang kabel isda. ⁵ Simon keyen, Laki Agpamatoldo, kami karai boo yabi agpanawen, kamay kami idapono abel. Kamay panawen sa kaimo siyabi kangay wakay tagoli piyaglabo. ⁶ Kalbas kansiro ngani liyabo in lambat. Kadogay in karowen in kansiro abel anggan batay wa agpangasida in lambat. ⁷ Matang kansiro biyerya in kansiro mga katowang sa osai ka bangka keyen, Tolongen. Kalbas asin ngani pataboy. Makno isda in dowai ka bangka anggan agkalegmek wa. ⁸ Paka ngiitan ina Simon Pidro, siyo patalegeb wa sa kay Isos bangen keyen, Laki Kapwan, kao ayaw sa kangay, angkataw ako daeten pag mangyan. ⁹ Angkataw siyo agsoyo sa karowen in kansiro abel isda, kadayo in kansiyo mga sarig, ¹⁰ kadayo din in kansiyo mga katowang Santiyago osai Owan in kay Sibidiyo mga bodang. Keyen Isos kay Simon, Ayaw agkalimo, laki, sogod ngona, idwa isda in kaimo piyagpamangkit no yewed mga mangyan wa. ¹¹ Paka in mga bangka piyabolalang wa sa balabaan dagatte siro miyanggat wa kay Isos. Kansiro wa biyaliwan in boote. ¹² In Isos sa osai ka bayan, apo osai ka kaliyakiyan kagwali piyagpanyakit. Paka Isos kansiyo ngiitan siyo maloba agpaselang, agayay kay Isos keyen, Laki, no kao beet agpaoraw sa kangay maskit, na kao kabaloy matang ako maal wakay miyanggat sa kangay mga kabelagan. ¹³ Siyo kay Isos yaatang, keyen, Ako beet ngani, na dali, maoraw wa ngani. Kalbas toloy idapo wa ngani in kagwali panyakit. ¹⁴ Keyen Isos, Ina ayaw kaimo pagsabiyen kamayba kay nakay pag mangyan, no yewed kao pataboy sa sasirdoti, papangkit, kalbas kaimo taboyen sa Diyos in siyabi sa Batas Mowisis, na batay atawanan in mga mangyan in kaimo maskit maoraw wa. ¹⁵ Kamay in barita panawen kay Isos labi kay mistobo anggan aronaw wano pag mangyan agtipon sa bangen kay Isos matang agparengey sa kansiyo, osai matang paorawen in kansiro mga maskit. ¹⁶ Kamay Isos mapret panaw, pataboy sa moyod agpandalangin. ¹⁷ Osai ka ibeng in Isos agpatoldo sa osai ka balay, asin din agitokkaw mga Parisiyo osai mga agpatoldo in mga Batas. Siro batang sa mga bayan sa Galiliya, Odiya, osai sa Irosalim. Isos apo in kabaloyan in Kapwan matang agpaoraw sa mga rnaskit. ¹⁸ Kalbas apo lomwas mga mangyan agosong sa yaiyan osai ka kaliyakiyan yewed wano kapaglebey. Siro agpilit nges misoroy sa balay matang in apo maskit piyasabangen kay Isos. ¹⁹ Kamay idapo dalan panawen sa aronaw mangyan, matang siro monaik sa awakan balay, kansiro yoorak kiyalbot in atep, kalbas piyalooy in apo maskit sa yaiyan daan, anggan sa kagwaraan sa kabetek Isos. ²⁰ Paka ngiitan Isos in kalakoyen in siro agpasandig sa kansiyo, kansiyo siyabi sa apo maskit keyen, Laki, liibangaw wa in kaimo mga daet. ²¹ In mga agpatoldo in mga Batas, osai in mga Parisiyo agremrem keyen, Nakay pag mangyan ina in aglibak kataw ina sa Diyos? Idapo batay kabaloy aglibangaw sa mga daet no yewed in Diyos waget. ²² Kamay atawanan Isos in kansiro piyagremrem matang siyo keyen, Nakay batang kamo agremrem kataw ina? ²³ Nakay agbangen in yewed maidap sabiyen, in osai keyen, Liibangaw wa in kaimo mga daet, in osai keyen, Kao tomaydek wa, panaw? ²⁴ Amba kamo mangkit. Ako in Bodang Mangyan apo din kabaloyan atai sa kobat aglibangaw sa mga daet. Kalbas siyo miplaong wakay sa apo maskit keyen, Amba laki, kao tomaydek wa, babaen wakay in yaiyan, kao moli wa. ²⁵ Toloy tomaydek siyo, siro boo agpangkit. Biyaba wakay siyo in yaiyan, moli wa agmaal sa Diyos. ²⁶ Agsoyo siro boo, aglakonaw sa Diyos. Siro keyen, Ngona pag ibeng mga makasoyo wano in kantam ngiitan. ²⁷ Paka kalbas, Isos panaw, kansiyo ngiitan osai ka agpaningil bowis, in ngaran Libi, agtokkaw sa opisina paningilan bowis. Keyen Isos, Kao miyanggat sa kangay. ²⁸ Libi tomaydek, miyanggat kay Isos. Kansiyo biyaliwan in boote. ²⁹ Kalbas Isos piyangwatan Libi kainan lakoy sa kansiyo balay. Aronaw in asin mga agpaningil bowis osai in amat kay pag mga mangyan, agpaylanglangan. ³⁰ In mga Parisiyo osai in kansiro mga sarig in mga agpatoldo in mga Batas, siro agremrem daet, keyen sa kay Isos mga agadar, Nakay batang kamo agpaypalanglangan osai agpalineman sa mga agpaningil bowis, osai sa roma kay pag mga agpamangwat daet? ³¹ Keyen Isos, In idapo maskit idapo kailangan agpanggamot, no yewed in apo maskit. ³² Kaya ako atai pataboy yewed matang beryaen in mga keyen siro idapo daet, no yewed in mga apo daet, matang kansiro benglayen in kansiro mga daet. ³³ Apo mga agsabi kay Isos keyen, In mga agadar kay Owan mapret yewed agpamangan matang agpandalangin dogay, kadayo in mga agadar sa mga Parisiyo. Kamay in kaimo mga agadar agpamangan daan, aginem din. ³⁴ Keyen Isos, No apo kasalan na in mga kabelagan in batay lalaki idbatay kanyo apilit yewed mamangan anggan agyanggat kay in kaliyakiyan batay taybalang. ³⁵ Kamay dogayan batay piyagkowa in kaliyakiyan. Na paka siyo idapo wa, in kansiyo mga kabelagan idbatay wa agkoman. ³⁶ Kansiyo din siyabi sa kansiro in osai ka alimbawa keyen, Idapo batay agkowa sa bayo pag lambong matang piyabalay sa dogay wa pag lambong. No kataw ina na batay masida in bayo pag balokas, osai in bayo daeten sa pangkit sa dogay wa. ³⁷ Osai idapo din batay agsoroy sa dogay wa pagsoroyan balat in bayo pag alak, angkataw paka mistobo wa in bayo pag alak na batay mangkoltik in dogay wa pag soroyan balat. Na batay mabobo in alak, kadayo in pagsoroyan balat masida wa din. ³⁸ No yewed in bayo pag alak soroyen daan sa bayo pag balat. ³⁹ Osai in kainem wa sa dogay wa pag alak idapo wa agkabeet sa bayo pag alak angkataw in kansiyo remrem keyen, In dogay wa in masadap.

¹ Osai ka Ibeng Pamainga kora Isos mipadalan sa osai ka agay. In kansiyo mga agadar manlotok takway, kansiro liyokka, kalbas kiyoman wa in begas. ² Apo mga Parisiyo agsabi keyen, Nakay batang kanyo piyagpangwat in piyagayaw sa Ibeng Pamainga? ³ Keyen Isos, Yewed mana kanyo biyasa in piyangwat Dabid in siyo agkayawes osai in kansiyo mga sarig? ⁴ Siyo misoroy sa balay Diyos, kansiyo kiyoman in tinapay piyaandog wa sa Diyos. Piyakan kay din in kansiyo mga sarig, kamaybawa ina piyagayaw in mga Batas, no yewed in mga sasirdoti waget in maal mamangan ina. ⁵ Siyabi kay din Isos keyen, Ako in Bodang Mangyan Kapwan din in Ibeng Pamainga. ⁶ Sa osai wakay ka Ibeng Pamainga Isos misoroy sa balay pagpaniponan agpatoldo. Apo ista osai ka kaliyakiyan, makenet wa in pamalang pag bakwaw. ⁷ In mga agpatoldo in mga Batas, osai in mga Parisiyo agpamangkit dailan matang Isos masombong, kalbas siro agpanaya no siyo batay agpaoraw sa Ibeng Pamainga. ⁸ Kamay Isos katawan in kansiro piyagremrem, siyabi sa kaliyakiyan makenet wa in bakwaw keyen, Kao tomaydek atai sa kagwaraan. Kalbas siyo panaw tomaydek sa kagwaraan. ⁹ rsos keyen sa mga mangyan, Amba mana, sa Ibeng Pamainga nakay in betek sa mga Batas, osai in agpangwat maal, osai in agpangwat daet? Nakay ngani in maal, osai in agpaboway osai in agbono? ¹⁰ Isos tomerek sa kansiro boo, kalbas siyabi sa kaliyakiyan keyen, Paodoyen in kaimo bakwaw. Kansiyo ngani piyaodoy, toloy wa maoraw. ¹¹ Kalbas agkagalit wa gayedte in mga agpatoldo in mga Batas osai in mga Parisiyo. Siro agpaypolongan wa no nakay in maal piyangwat kay Isos. ¹² Osai ka ibeng ina pag kabetek Isos monaker sa bolod batay agpandalangin. Boo yabi ngani siyo agpandalangin sa Diyos. ¹³ Paka omaga wa kansiyo biyerya in kansiyo mga aga dar, kalbas labing dowai kansiyo iidang, kansiyo piyangwat katiwala. ¹⁴ In osai Simon kansiyo piyagawit Pidro, in kadowai Anris kay Simon belag, in katolo Santiyago, in kaopat Owan, in kalima Pilipi, in kaenem Bartolomi, ¹⁵ in kapito Matiyo, in kawalo Tomas, in kasiyam Santiyago bodang Alpiyo, in kasampo Simon in piyagawit Ribildi, ¹⁶ in kalabing osai Odas bodang Santiyago, in kalabing dowai Odas Iskaryoti in agpadakep kay Isos. ¹⁷ Isos mongali wakay, osai in kansiyo mga katiwala anggan sa patag. Ista in aronaw sa kansiyo mga piyagpatoldo osai aronaw wano mangyan batang sa boo kobat Odiya osai sa bayan Irosalim, osai sa mga bayan Tiro osai Sidon sa balabaan dagat. Siro asin pataboy matang agparengey kay Isos, osai matang mapaoraw in kansiro mga maskit. ¹⁸ Kansiyo din piyaoraw in mga maloba piyagpaidapan mga mamaw. ¹⁹ In boo mangyan agpilit komapkap sa kansiyo, angkataw lakonaw in kansiyo kabaloyan agpaoraw sa kansiro boo. ²⁰ Isos agpangkit sa kansiyo mga agadar, keyen, Boway wa kamo in mga maidap, angkataw in Diyos in kanyo poon lakoy. ²¹ Boway wa kamo in mga agkayawes ngona, angkataw kamo batay piyabosog. Boway wa kamo in mga agrongkot ngona, angkataw kamo batay piyagpakaanggay. ²² Boway wa kamo no kamo piyagkabaisan mga mangyan panawen sa kangay sa Bodang Mangyan, no kamo piyagboyaw, no kamo piyagpamalowasan, osai kanyo ngaran piyagidapo kabolowan. ²³ No kataw ina na kamo agkaanggay wa anggan agloksowanan, angkataw kamo batay piyakan lakonaw sa langit. Kataw din ina in piyangwat kansiro mga kakoyayan sa mga poropita. ²⁴ Kamay maidap in batay rateng sa kanyo, kamo in mga aronaw sangkap, angkataw kamo kadalan wa sa apyaan. ²⁵ Maidap in batay rateng sa kanyo in mga bosog ngona, angkataw kamo batay agkayawes. Maidap in batay rateng sa kanyo in mga agkaanggay ngona, angkataw kamo batay agrongkot osai agpalpanggoong. ²⁶ Maidap in batay rateng sa kanyo no kamo piyagkaanggayan in boo mangyan, angkataw kataw daan din ina in piyangwat kansiro mga kakoyayan sa mga bosliyen pag poropita. ²⁷ Kamay mga laki, anda in kangay piyagsabi sa kanyo. Kantam pakayawteen in mga aglaban sa kantam, kantam pangwatanen maal in mga agkabais sa kantam. ²⁸ Kantam dalanginen keyen pakayawteen in mga agpamanes sa kantam, in mga agpamangwat daet sa kantam. ²⁹ No apo somontok sa kantam pisngi, na kadayo in osai agbangen ka pisngi. No apo agagaw sa kantam islen, na taboyen wa din in lambong. ³⁰ Kantam pakanen in baatte agayay sa kantam. No apo komwa kantam mga sangkap na ayaw wa tagoli agayayen. ³¹ No nakay in kantam beet piyangwat sa kantam, na ina in kantam pangwaten sa mga amat. ³² No kantam piyagpakayawte in mga waget agpakayawte sa kantam na idapo wa bayad batay piyagtaboy Diyos sa kantam. Kamaybawa in mga agpamangwat daet, siro agpakayawte din sa mga agpakayawte sa kansiro. ³³ Osai in mga agpangwat maal sa kantam, no ina waget in kantam piyagpangwatan maal, na idapo wa bayad batay piyagtaboy Diyos sa kantam. Kamaybawa in mga agpamangwat daet, siro din agpangwat kataw ina. ³⁴ Osai in mga mangyan batay kabayad sa kantam, no ina waget in kantam piyagpabeles, na idapo wa bayad batay piyagtaboy Diyos sa kantam. Kamaybawa in mga apo daet agpabeles din sa mga apo daet, matang kaabel wakay bayad. ³⁵ Ayaw kitam kataw ina. Dayem pakayawteen in mga aglaban sa kantam. Siro kantam pangwatanen maal. Kitam agpakan sa mga idbatay kabayad. No kataw ina na lakonaw in batay bayad tiyaboy Diyos sa kantam, osai kitam batay ngani bodang Diyos in Mabwat sa boo, angkataw siyo mabait sa mga daet pag mangyan, osai sa mga madamot. ³⁶ Kitam agpakayawte kataw in kantam Amang agpakayawte. ³⁷ Isos keyen, Kamayba nakay pag mangyan ayaw kantam agremremen kalakoyte, matang kitam idbatay din piyagremrem Diyos kalakoyte. Ayaw kitam agsogo agparosa sa amat na kitam idbatay din piyarosaan Diyos. Kantam libangawen in daet sa roma mga mangyan, na batay din liibangaw Diyos in kantam mga daet. ³⁸ Kitam agpakan, na kitam batay piyagpakan Diyos, lakonaw anggan makno in batay piyagtaboy sa kantam. Angkataw no nangkalakoy in kantam piyagremrem sa mga roma, na kalakoy din ina in batay piyagremrem Diyos sa kantam. ³⁹ Siyabi Isos osai ka alimbawa keyen, In beleg lames batay kabaloy agakay sa osai ka beleg? Yewed. Siro tanan batay maligan sa balao. ⁴⁰ In agadar idbatay lakonaw sa kansiyo agpaadar. Kamay paka siyo katawan wa gayed, na siyo kataw daan kansiyo agpaadar. ⁴¹ Nakay batang kaimo piyagngitan in sepet sa kaimo belag, bago kao din apo lakoy yangaw agiskapet sa kaimo mata? ⁴² Nangkataw kao batay kasabi sa kaimo belag keyen, Amba laki, kangay wa kowaen in kaimo sepet, bago kao apo din lakoy yangaw agiskapet sa kaimo mata? Ina agpakagwali waget agpaniwala. Tokaw kowaen in yangaw agiskapet sa kaimo mata, na kao batay kangitan maal in agkowa in sepet sa kaimo belag. ⁴³ Keyen Isos, In maalen pag poon yangaw idbatay manggalem daeten. In daeten pag poon yangaw idbatay manggalem maalno. ⁴⁴ In poon yangaw atawanan panawen sa kansiyo raweg, angkataw idbatay manggalem kapi in tagotong, idbatay manggalem bayabas in talonyong. ⁴⁵ In maalno pag mangyan agpamangwat maalno angkataw maalno in kansiyo remrem. In daeten pag mangyan agpamangwat daeten angkataw daeten in kansiyo remrem. In piyagsabi in mangyan in piyaglakonaw sa kansiyo remrem. ⁴⁶ Isos keyen, Nakay batang ako kanyo piyagawit Kapwan, laki Kapwan, kamay yewed kanyo piyagpangwat in kangay piyagsabi? ⁴⁷ In mangyan agpasabangen sa kangay, agparengey sa kangay piyagsabi, kalbas kansiyo piyagpangwat na siyo kataw tai. ⁴⁸ Siyo kataw osai ka mangyan agtadyok balay, agkali sa malayem, sa maalno pag diya, piyakarigen in mga arigi. Paka bomongkalos, diyalan wa sapa in balay, kamay yewed maligan angkataw marigen in agtadyok. ⁴⁹ Kamay in agparengey sa kangay agiplaong kamay yewed kansiyo piyagpangwat, na siyo kataw osai ka mangyan agtadyok balay sa masasa pag diya, yewed marigen. Bomongkalos, diyalan sapa in balay, toloy wa maligan, maorak wa gayed ina pag balay.

¹ Paka kalbas wa Isos agsabi ina pag boo sa mga mangyan, siyo pataboy wa sa bayan Kapirnaom. ² Ista apo osai ka kapitan mga sondalo taga Roma. Siyo apo sogowan kansiyo wano piyagmaal, kamay apo maskit in sogowan, agkatay wa. ³ Paka in kapitan abaritaan panawen kay Isos, siyo agsogo mga koyay mga Odyo komaon kay Isos matang paorawen kansiyo sogowan. ⁴ Paka rateng kay Isos in mga koyay, siro maloba wa agayay sa kansiyo keyen, In kapitan maal pag mangyan, maal kaimo tolongen, ⁵ angkataw kitam in mga Odyo kansiyo piyagmaal. Siyo in agpatadyok in atai balay pagpaniponan. ⁶ Kalbas Isos miyanggat. Paka Isos bangen wa sa balay, siyogo in kapitan in kansiyo mga pagbelag patagbo kay Isos keyen, Laki, kao ayaw wa agpakaabara, angkataw ako kalakoyte, yewed sibay matang kao misoroy sa kangay balay. ⁷ Ina din in dailan kaya yewed ako in pataboy sa kaimo, angkataw ako yewed sibay. Kao miplaong waget, na batay maoraw in kangay sogowan. ⁸ Angkataw ako sakop sa mga mabwat pag poon, osai ako apo din mga sondalo sakop sa kangay. No kangay siyabi sa osai keyen, Kao ista wa, na toloy wa siyo ista, no sa osai wakay keyen, Aywawa, na toloy wa siyo agpasabangen. No ako keyen sa kangay sogowan, Ina pangwaten, na toloy wa kansiyo piyagpangwat. ⁹ Paka Isos karengey ina siyo agsoyo. Siyo patobang sa karowan pag mangyan agyanggat sa kansiyo keyen, Kangay piyagsabi sa kanyo ako idbatang kangitan in agpasandig sa Diyos karigen ina kamayba sa mga kasokponan Israil. ¹⁰ Paka rateng wakay sa balay in mga siyogo, kansiro ngiitan maoraw wa gayed in maskit in sogowan. ¹¹ Paka kalbas, Isos pataboy sa osai ka bayan piyagawit Nain. Miyanggat kansiyo mga agadar osai karowan wano pag mangyan. ¹² Paka bangen wa agbosngaw sa bayan, atagbo siyo in batay aglebeng. In matay in boktong bodang kaliyakiyan osai ka kagbaiyan balo. Aronaw in miyanggat sa aglebeng. ¹³ Paka in Kapwan kangitan sa inang in matay siyo apakayawtean, siyabi sa kansiyo keyen, Ayaw agpanangis. ¹⁴ Isos pasabangen sa pagosongan in matay, omatang. Tomaydek wa in mga agosong. Keyen Isos, Pag begle, amba kao miyorog wa. ¹⁵ In begle tomokkaw, miplaong. Kalbas siyo tiyaboy Isos sa kansiyo inang. ¹⁶ Siro boo agkalimo wano, kalbas agmaal sa Diyos keyen lomwas wa sa kantam osai ka poropita lakoy, piyangkit in Diyos in kansiyo mga mangyan. ¹⁷ Ina pag barita panawen kay Isos maripatak sa boo kobat Odiya, sa mga balabaan ina pag kobat. ¹⁸ In mga agadar kay Owan in Agpamaotismo agbarita sa kansiyo ina pag boo piyangwat Isos. ¹⁹ Kalbas biyerya Owan in dowai ka kansiyo agadar, siyogo, piyataboy sa Kapwan, matang tiyanong no siyo in piyagpanaya, no agpanaya kay roma? ²⁰ Paka rateng kay Isos siro keyen, Kami siyogo Owan in Agpamaotismo matang agtanong no kao in piyagpanaya no agpanaya kay roma. ²¹ Ina pag betek Isos agpaoraw sa aronaw maskit, mga piyagoliyan wa maskit, mga piyaglowasan mamaw. Aronaw din beleg kansiyo piyaoraw. ²² Kalbas siyabi Isos sa mga sogowan Owan keyen, Moli wakay kamo kay Owan, sabiyen sa kansiyo in kanyo mga ngiitan, in kanyo din arengeyan. Kamo keyen, In mga beleg kangitan wa, in mga pilay agipanawan wa, piyaoraw wa in mga apo kagwali panyakit, in mga bingi karengey wa, in mga matay piyaboway wakay, osai in Maal pag Barita piyagpatoldo sa mga maidap pag mangyan. ²³ Agkaanggay in mangyan no yewed piyagbaslag in remrem panawen sa kangay. ²⁴ Paka panaw wa in kay Owan mga sogowan, Isos miplaong sa karowan pag mangyan panawen kay Owan, keyen, Nakay batang kamo pataboy kay Owan sa moyod? Nakay lames in beet kanyo ngiitan? Yewed ngani garasen piyagkowaya. ²⁵ Nakay ngani in beet kanyo ngiitan? Yewed mangyan maal wano in damit. In mga agdamit maal wano, in mga aronaw sangkap, siro agbalay sa mga balay lakoy mga poon lakoy. ²⁶ Kamay nakay lames in beet kanyo ngiitan? Osai lames ka poropita? Aon ngani. Kangay piyagsabi Owan labi kay kalakoy sa amat mga poropita. ²⁷ Angkataw siyo in piyagsabi in mga Agisolat in siyabi Diyos keyen, Kangay piyagsogo in kangay sogowan tokaw sa kaimo. Kansiyo batay piyagpakapya in kaimo batay dalan. ²⁸ Isos keyen kay, Kangay piyagsabi sa kanyo, sa boo mangyan Owan in mabwat. Kamay sogod ngona in kabwattete sa boo mga bodang Diyos, ina labi kay kabwat siyo. ²⁹ In boo mga mangyan kadayo in mga agpaningil bowis, paka siro karengey in mga siyabi Isos, siro agmaal sa Diyos, angkataw siro batang pabaotismo kay Owan. ³⁰ Dayem in mga Parisiyo osai in mga agpatoldo in mga Batas, siro yewed pabaotismo kay Owan angkataw kansiro piyagidapo kabolowan in remrem Diyos sa kansiro. ³¹ Isos keyen kay, Sa nakay kangay piyagpatolad in mga mangyan agkaboway ngona? Siro kataw nakay? ³² Siro kataw mga bodang agtokkaw sa tongkodan dayo agmesa. In kansiro mga pagbelag agberya, keyen, Kami agbangsi agkamesa kasalan, kamay kamo dayo agpalkaanggayan. Manggoong wakay agkamesa lebeng, dayo din kamo manangis. ³³ Kaya kamo kangay piyagpatolad asin angkataw atai pataboy Owan in Agpamaotismo yewed agpamangan masadap, yewed agbarik, kalbas kamo keyen, Siyo piyaglowasan mamaw. ³⁴ Ako wakay in Bodang Mangyan atai agkasadapan agpamangan, agpanginem, kalbas kamo keyen, Baina, ina pag mangyan matakaw, agpanlasing, agpabelag sa mga agpaningil bowis, sa mga agpamangwat daet. ³⁵ Kamay in katawanan Diyos piyagngitan betek sa piyagpangwat in mga agkaanggay asin. ³⁶ Isos piyaanggat osai ka Parisiyo in ngaran Simon, mamangan sa kansiyo balay. Isos misoroy wa sa balay, tomokkaw wa batay mamangan. ³⁷ Asin pag bayan apo kagbaiyan daeten in ogali. In abaritaan siyo Isos agkoman sa balay in Parisiyo, siyo asin pataboy apo piyagbaba pagsoroyan piyangwat batang bato lakonaw in bayad, ina makno pamada. ³⁸ Siyo pasabangen sa awak Isos sa bangen bitis. Siyo agpanangis, kay Isos darapa matemek wa in lowa. Kalbas ina piyonas wa kansiyo abok, yaatang, yoodyodan pamada. ³⁹ Paka ina ngiitan in Parisiyo in agpaanggat kay Isos, kansiyo riyemrem keyen, No poropita ngani Isos, na siyo katawan ina pag kagbaiyan in omatang sa kansiyo, katawan siyo daeten. ⁴⁰ Panawen sa piyagremrem in Parisiyo Isos keyen, Laki Simon, ako apo piyagsabi sa kaimo. Keyen Simon, Nakay in piyagsabi, laki Agpamatoldo? ⁴¹ Isos keyen, Dowai ka kaliyakiyan apo otang sa osai ka mangyan. In osai alaga lima ka daan ka ibeng agpanawen, in osai alaga limampo waget ka ibeng. ⁴² Kamay siro yewed kabaloy agbayad, matang kansiyo wa piyaidapo in otang, tanan. Na asin pag dowai nakay agbangen in maloba agkaanggay sa agpaotang? ⁴³ Keyen Simon, Sa kangay remrem ina in lakonaw agbangen in otang. Keyen Isos, Betek in kaimo remrem. ⁴⁴ Isos patobang sa kagbaiyan kamay miplaong kay Simon keyen, Kao kangitan ina pag kagbaiyan? Ako misoroy sa kaimo balay ako yewed kaimo piyakan sapa pangogas kangay darapa, kamay kansiyo tiyemek lowa kangay darapa, piyonas kansiyo abok. ⁴⁵ Ako yewed kaimo yaatang piyagpabelag, kamay siyo, sigod misoroy, agatang daan sa kangay darapa. ⁴⁶ Kangay olo yewed kaimo yoodyodan kamayba langis, kamay kangay darapa kansiyo piyagyodyodan pamada. ⁴⁷ Na kangay piyagsabi sa kaimo, piyagngitan anda pag kagbaiyan agkaanggay wano gayed sa kangay, na asin atawanan kamayba aronaw in kansiyo daet boo wa liibangaw. Kamay in mangyan no kalakoyte in kansiyo daet liibangaw, na kalakoyte din in kansiyo kaanggayan. ⁴⁸ Kalbas siyabi Isos sa kagbaiyan keyen, In kaimo mga daet liibangaw wa. ⁴⁹ Kalbas in amat mangyan asin agkoman manremrem keyen, Nakay lames pag mangyan ina in kabaloy kamayba aglibangaw sa mga daet? ⁵⁰ Kamay keyen Isos sa kagbaiyan, Kao piyaboway wa panawen kao agpasandig sa Diyos. Maal wa kao panaw, apyaan in remrem.

¹ Kadogayte Isos agipanawan sa mga bayan osai sa mga bayante. Siyo agbarita osai agpatoldo in Maal pag Barita panawen sa Diyos agpapoon. Agyanggat sa kansiyo in labing dowai ka agadar. ² Apo din mga kagbaiyan batang apo maskit no yewed piyaglowasan mamaw kalbas piyaoraw Isos. In osai Mariya piyagawit taga Magdala. Pito ka mamaw in biyoyaw Isos sa kansiyo. ³ In kadowai Owana in babai Kosa in kay Irodis katiwala, in katolo Sosana, osai aronaw kay roma. Siro in agbayad in kay Isos mga piyagkailangan, osai in sa kansiyo mga agadar. ⁴ Agpalpanrateng kay Isos in mga mangyan batang sa aronaw mga bayan. Paka lakonaw wa in aronan kansiyo siyabi anda pag alimbawa. ⁵ Apo osai ka mangyan panaw batay agsabog bini. In siyo agsabog wa apo bini maragrag sa dalan, kalbas ina piyanlaedan osai kiyoman bantog. ⁶ Apo din maragrag sa batowen. Paka moslod wa, ina toloy wakay makenet panawen mamara in diya. ⁷ Apo din maragrag sa lalosenan. Kalbas mistobo in lalosen kiyopot in togda. ⁸ In amat maragrag sa maalno pag diya. Ina mistobo, in baatte togda manggalem isang daan ka beter. Kalbas Isos mango keyen, In apo talinga mamarengey. ⁹ In mga agadar agtanong kay Isos no nakay in beet siyabi ina pag alimbawa. ¹⁰ Isos keyen, In mga batang piyagbetang panawen sa Diyos agpapoon piyagpalowas wa sa kanyo, kamay sa mga amat ina piyagalimbawa matang, Kamayba siro agpangkit siro idbatay katawan, Kamayba siro mamarengey siro idbatay katawan. ¹¹ Isos agsabi kay keyen, Anda in beet siyabi in alimbawa. In beet siyabi in bini in agiplaong Diyos. ¹² In mga bini maragrag sa dalan, na in beet siyabi in mga mamarengey, kamay paka rateng in diyablo in agiplaong kiyowa sa kansiro remrem, matang siro yewed agpasandig sa Diyos, yewed piyaboway. ¹³ In maragrag sa batowen in beet siyabi in mga mamarengey sa agiplaong Diyos kalbas agkaanggay sa barita, kamay yewed mibaloy gayed sa kansiro remrem. Kadogayte waget siro agpaniwala, kamay paka maidap wa siro pasoway wakay. ¹⁴ In mga wakay sa lalosenan, in beet siyabi in mga mamarengey kamay yewed kay dogay siyo diyaeg in mga piyagkariyaban, osai in mga sangkap, osai in mga piyagkaanggay atai sa kobat, matang idwa malayes in kansiro raweg. ¹⁵ In mga wakay maragrag sa maalno pag diya, in beet siyabi in mga maal pag mangyan agpaniwala. Siro mamarengey sa agiplaong Diyos, kansiro yaalapet sa kansiro remrem, yewed aglimbang anggan manggalem. ¹⁶ No in mangyan agparaet tinglaw na idbatay piyagtakleb kaldido idbatay piyabalay sa ngato esekan, dayem sa pagpamabolalangan tinglaw matang in rawa piyagngitan in mga agonaik sa balay. ¹⁷ Angkataw in boo mga piyagbetang ngona na dogayan batay piyalowas. In boo mga piyagtabon ngona na dogayan ngiitan, atawanan. ¹⁸ Na remremen in kanyo piyagparengey. Angkataw in apo na piyagpakan kay. Kamay in idapo na piyagkowa wakay kamayba nakay in kansiyo piyagremrem kansiyo. ¹⁹ Rateng in mga ariyan Isos osai in inang, kamay siro yewed kapasabangen angkataw karowan mangyan. ²⁰ Apo agsabi sa kansiyo keyen, Asina wa sa tongkodan in kaimo inang osai din kaimo mga belag, beet patagbo sa kaimo. ²¹ Kamay Isos keyen, In mga agparengey in agiplaong Diyos, kalbas agpangwat, na siro wa in kangay inang osai mga belag. ²² Osai ka ibeng Isos somakay sa bangka osai in kansiyo mga agadar. Kalbas keyen Isos, Kitam wa sa ripay dagatte. Matang siro panaw wa. ²³ Agipanaw wa in bangka, Isos agesek wa, toloy wa bowawi lakoy. In bangka agkakno wa sapa, siro agkaleggeb wa. ²⁴ In mga agadar pataboy kay Isos, piyolaw, keyen, Laki Agpamatoldo, agkaleggeb wa kitam. Isos miyorog wa, siyabiyan in kowaya osai in bongkalos. Toloy maoraw, apyaan wa. ²⁵ Siyabi Isos sa kansiro keyen, Sa nakay wa in kanyo paniwala? Kamay siro agkalimo, agsoyo, agpaypolongan keyen, Nakay pag mangyan ina? Kamayba kowaya, kamayba sapa kansiyo piyagiplaong, siyo piyagpaniwalaan. ²⁶ Siro rateng sa kobat Girgisa sa ripay in dagatte sa kabetek Galiliya. ²⁷ Paka Isos lompot sa bangka siyo tiyagbo osai ka kaliyakiyan taga asin piyaglowasan mga mamaw. Siyo dogay wa yewed batang agsoroy damit, yewed din agpamataw sa balay dayem sa leyang lebengan. ²⁸ Paka kangitan kay Isos siyo mango, paselang sa kansiyo, maksen kansiyo siyabi keyen, Isos, bodang Diyos in Mabwat sa boo, nakay in kaimo panawen sa kangay? Ako maloba agayay sa kaimo ako ayaw agpakaskitanen. ²⁹ Kaya siyabi ina angkataw in mamaw piyagsogo Isos piyagboyaw sa mangyan. Siyo makakarowan aoliyan. Kamayba siyo piyagdamay, piyagpangaw, piyagbakos mga karakara, ina boo kansiyo piyagpansida, siyo piyagdarosog in mamaw sa moyod. ³⁰ Siyabi Isos sa kansiyo keyen, Nakay in kaimo ngaran? Siyo keyen, Bonton. angkataw karowan in mamaw misoroy sa kansiyo. ³¹ In mga mamaw agdaing kay Isos keyen, Kami ayaw agpataboyen sa toyongan. ³² Ista pag kobat apo karowan mga beyek agpaypanlongkod sa bolod. In mga mamaw omayay kay Isos keyen, Kami pasoroyen sa mga beyek. Keyen Isos, Dali wa. ³³ In mga mamaw panaw wa sa mangyan, kalbas misoroy wa sa mga beyek. Kalbas in mga beyek toloy wa domalagan sa lintoy, mangalabo sa dagatte, siro mangaleggeb wa. ³⁴ Paka ngiitan in mga agalapet beyek ina pag mibaloy siro domalagan, kansiro wa biyarita sa bayan, kadayo sa kobat. ³⁵ Kalbas in mga mangyan ista pataboy matang piyangkit ina pag mibaloy. Paka siro rateng kay Isos kansiro ngiitan in mangyan karai in piyaglowasan mamaw agtokkaw agpatobang kay Isos, agdamit wa, maal wakay in remrem. Kalbas siro maloba wa alimowan. ³⁶ In mga kangitan in mibaloy siro agbarita sa kansiro no nangkataw piyaoraw in piyaglowasan mamaw. ³⁷ In mga taga Girgisa agpaselang kay Isos keyen, Kao ayaw atai kanyam, laki. Angkataw siro agkalimo wano. Matang Isos somakay wa sa bangka batay wa panaw. ³⁸ In batang piyaglowasan mamaw keyen siyo paanggaten. Kamay siyo kay Isos wakay piyaoli ³⁹ keyen, Kao moli wakay sa kanyo, kalbas kaimo sabiyen sa mga mangyan in kalakoyen in piyangwat Diyos sa kaimo. Kalbas in kaliyakiyan moli wa sa bayan, agbarita ngani sa boo mga mangyan in piyangwat Isos sa kansiyo. ⁴⁰ Paka Isos moli wakay batang sa ripay dagatte, siyo piyabelag in karowan angkataw siyo kansiro piyagpanaya. ⁴¹ Pataboy sa kansiyo osai ka agpapoon sa balay pagpaniponan, in ngaran Alro. Siyo agpakabwatte paselang kay Isos keyen, Laki, kao miyanggat sa kangay balay, ⁴² angkataw agkatay wa in kangay osai waget ka bodang kagbaiyan labing dowai wa ka dagon. In Isos agipanaw siyo piyagliget mga mangyan. ⁴³ Apo osai ka kagbaiyan labing dowai wa ka dagon piyagpanalowan. In boo kansiyo sangkap liyobos wa piyabayad sa mga agpagamot kamay idapo kapaoraw kamayba nakay. ⁴⁴ Siyo pasabangen kay Isos awak komapkap sa tangrawan kansiyo lambong. Toloy idapo wakay in kansiyo maskit. ⁴⁵ Keyen Isos, Nakay in komapkap sa kangay? Kamay idapo kasabi. Kalbas keyen Pidro, Laki Agpamatoldo, aronaw wano pag mangyan in agliget sa kaimo. ⁴⁶ Kamay keyen Isos, Apo ngani komapkap sa kangay, angkataw kangay atawanan apo kabaloyan makowa sa kangay. ⁴⁷ In atawanan wa ina pag kagbaiyan yewed atago in kansiyo piyangwat siyo pasabangen kay Isos agkalimo, agpaselang. In boo mangyan agparengey, kansiyo siyabi kay Isos in dailan kaya siyo kansiyo kiyapkap, osai in toloy maoraw in kansiyo maskit. ⁴⁸ Siyabi Isos sa kansiyo keyen, Laki bodang, kaya piyaoraw in kaimo maskit panawen kao agpasandig sa Diyos. Maal wa kao panaw, apyaan in remrem. ⁴⁹ Ikkay lobos in kay Isos piyagsabi apo rateng batang sa balay Airo agsabi sa kansiyo keyen, Matay wa in kaimo bodang. Ayaw wa agabaraen in Agpamatoldo. ⁵⁰ In karengey ina Isos siyo keyen kay Alro, Ayaw agkalimo. Kao agpasandig waget sa Diyos, na batay maal wakay. ⁵¹ Paka rateng sa kay Airo balay Isos idapo piyaanggat sa galem balay no yewed Pidro waget osai Owan osai Santiyago kadayo in amang kadayo in inang in daragate. ⁵² In boo asin mga mangyan agpalpanangis, agpalpanggoong agalwasi sa matay. Kamay Isos keyen, Ayaw agpalpanangis. Siyo yewed matay, agesek waget. ⁵³ Isos piyagpatawaan waget in mga mangyan. Kansiro atawanan keyen matay wa. ⁵⁴ Kamay yaatang Isos in kansiyo bakwaw keyen, Miyorog wa, Lale. ⁵⁵ Toloy mamayeng wakay, siyo miyorog wa. Isos agsogo keyen, In bodang pakanen pamangnen. ⁵⁶ Toloy agsoyo in mga koyay. Kamay siyabi Isos keyen, Ayaw agpamarita in mibaloy kamayba kay nakay.

¹ Biyerya Isos in kansiyo Labing Dowai ka agadar, piyakan kabaloyan agpamoyaw sa boo mga mamaw, osai agpaoraw sa mga maskit. ² Siro siyogo agpatoldo keyen, In Diyos agpapoon, siyogo din agpaoraw sa mga maskit. ³ Isos keyen, Ayaw agbaba kamayba nakay sa agipanaw, kamayba sikkor, kamayba begyas, kamayba pamangnen, kamayba kowarta, kamayba lambong. ⁴ Kamayba sa nakay pag balay kamo misoroy, na mamataw asin anggan kamo agipanaw wakay asin pag bayan. ⁵ Kamayba nakay pag bayan no siro yewed agpabelag sa kanyo, na ragragen in bogabo sa kanyo darapa, in beet siyabi siro batay piyagparosa. ⁶ Kalbas panaw wa ngani in mga agadar, pataboy sa mga bayanan, agpatoldo in Maal pag Barita osai agpangoraw sa mga maskit sa boo kobat. ⁷ In gobirnador Irodis abaritaan in boo mga mibaloy. Malingetnget in kansiyo remrem angkataw apo mga agsabi keyen, Owan in Agpamaotismo boway wakay tagoli. ⁸ Apo wakay mga agsabi keyen, Lomwas wakay Iliyas. Apo wakay din agsabi keyen, Boway wakay in osai ka poropita tangona. ⁹ Kamay in siyabi Irodis keyen, Kangay taite piyapogot Owan. Nakay lames in agpangwat in mga piyagbarita sa kangay? Kalbas siyo beet wano katagbo kay Isos. ¹⁰ Paka moli wakay in mga katiwala, kansiro giisod kay Isos in boo kansiro mga mibaloy. Kalbas siro kansiyo piyaanggat sa osai ka bayan piyagawit Bitsayda, siro waget idapo roma. ¹¹ Kamay paka ina atawanan in mga mangyan siro mangagak. Siro kansiyo piyabelag, piyatoldo panawen sa Diyos agpapoon, osai piyaoraw in mga kailangan gamoten. ¹² Agkalabo wa in ibeng, in Labing Dowai pasabangen kay Isos keyen, Palpasen wa in mga mangyan matang siro pataboy sa mga bayanan, sa mga balay sa bangen, matang mangayay pamangnen osai esekan, angkataw atai kobat waget idapo balay. ¹³ Kamay keyen Isos, Kamo wa in agpakan pamangnen sa kansiro. Siro keyen, Kitam idapo pamangnen no yewed lima wagette ka tinapay, osai dowaite ka isda. Kaimo beet nakay, kami bomili pamangnen batay piyagtaboy atai pag boo mangyan? ¹⁴ Siro mga lima ka libo ka kaliyakiyan. Kamay siyabi Isos sa kansiyo mga agadar keyen, Siro patokkawen baatte aronan mga limampo. ¹⁵ Kataw ngani ina in kansiro piyangwat, siro boo piyatokkaw. ¹⁶ Kiyowa Isos in lima ka tinapay osai in dowai ka isda. Siyo manangra sa langit, agpasalamat sa Diyos. Kalbas kansiyo piyandodo in tinapay osai in isda, tiyaboy sa kansiyo mga agadar matang bagiyen sa mga mangyan. ¹⁷ Siro mamangan, boo bosog. Tiipon in mga agadar in mitera, labing dowai ka galang makno kay. ¹⁸ Osai ka ibeng Isos agpandalangin, siyo waget, kamay in mga agadar sa bangen daan. Siro tiyanong Isos keyen, Nakay in piyagsabi in karowan mangyan, nakay kono pag mangyan ako? ¹⁹ Siro keyen, In kalaati keyen kao Owan in Agpamaotismo. In kalaati kay din keyen kao Iliyas. Apo wakay din keyen kao osai sa mga poropita tangona boway wakay tagoli. ²⁰ Keyen Isos, Sa kanyo wakay nakay? Ako nakay pag mangyan? Keyen Pidro, Kao in Kiristo, in siyogo Diyos. ²¹ Kalbas maloba wano piyagayaw Isos sa kansiro keyen, Ayawno agsabiyen kamayba kay nakay keyen ako in Kiristo. ²² Siyabi din Isos sa kansiyo mga agadar keyen, Ako in Bodang Mangyan kailangan domalan sa aronaw kaidapan. Ako batay piyangidangan in mga koyay mga Odyo, osai in mga poon sasirdoti, osai in mga agpatoldo in mga Batas. Ako batay biyono, kamay sa katolo ka ibeng batay wakay piyaboway. ²³ Kalbas siyabi Isos sa boo asin keyen, No in mangyan beet miyanggat sa kangay na papaoriyen in kansiyo sadiri remrem, ibengibeng kansiyo pasanen in kansiyo kodos, miyanggat sa kangay. ²⁴ No in mangyan agaman sa kansiyo boway na siyo batay aidapowan. Kamay in yewed agaman kansiyo boway panawen sa kangay na siyo batay kabel boway. ²⁵ Idapo kabolowan sa osai ka mangyan no kansiyo abel in boo kobat kamay in kapalit in kansiyo boway, siyo pataboy sa toyongan. ²⁶ No in mangyan dayo agpabelag sa kangay, agkarikoy agbarita in kangay agiplaong, na ako in Bodang Mangyan batay din dayo agpabelag sa kansiyo, in ako atai wakay piyagngitan in kangay kalakoyen, in kalakoyen in Amang osai in mga angil, siro maalno. ²⁷ In kalaati atai sa kanyo idbatay matay anggan yewed kay ngiitan in Diyos agpapoon. Betek in kangay piyagsabi. ²⁸ Mga walo ka ibeng diyalan sogod ina pag mga siyabi Isos, kansiyo piyaanggat Pidro, Owan osai Santiyago, monaker sa boksor matang mandalangin. ²⁹ Sa betek siyo agpandalangin miyalis in kansiyo mata, in kansiyo lambong mibaloy maboksi makasolap. ³⁰ Toloy apo lomwas dowai ka kaliyakiyan agpanggisodan sa kansiyo, Mowisis osai Iliyas. ³¹ Siro din agrawa. In kansiro piyagbarogi in kay Isos bangen wa abaloyan sa Irosalim, in beet Diyos in siyo batay matay. ³² Kora Pidro batang aesekan wa anggan, kamay paka siro apolawan, kansiro ngiitan Isos agrawa, osai in dokalaki agtaydek sa kansiyo bangen. ³³ In dokalaki batay wa panaw kay Isos, Pidro keyen, Laki Agpamatoldo, maal in kami atai. Kami batay agpangwat tolo ka barangas, in osai kaimo, in osai kay Mowisis, in osai kay Iliyas. Kamay siyo yewed manremrem, toloy waget miplaong kataw ina. ³⁴ In Pidro agiplaong kay siro riirongan osai ka libo. In siro tiyabon in libo siro agkalimo. ³⁵ Apo agiplaong batang sa libo keyen, Anda in kangay Bodang in kangay iidang. Siyo kanyo parengeyen. ³⁶ Paka idapo wa in agiplaong Isos mana osai waget. Ina pag mibaloy piyagbetang kay ina pag tolo ka agadar. Yewed kay kansiro siyabi kamayba kay nakay. ³⁷ Paka omaga wa, in siro agongali Isos tiyagbo karowan pag mga mangyan. ³⁸ Apo osai ka kaliyakiyan sa karowan mango keyen, Laki Agpamatoldo, ako apo piyagayay sa kaimo. Kaimo pangkiten in kangay bodang kaliyakiyan, boktong bodang. ³⁹ Siyo piyaglowasan mamaw. No betek lomwas siyo toloy mango lakoy, piyagyogyog anggan agbora in bibi, kalbas idbatay biyaliwan anggan siyo idapo wano eyat. ⁴⁰ Ako omayay sa kaimo mga agadar keyen, Boyawen, kamay siro yewed kabaloy. ⁴¹ Keyen Isos, Kamo in mga mangyan ngona mga baribid, mga yewed agpaniwala. Anggan nangkadogay kay kailangan ako mataw kay sa kanyo, agbanta kay sa kanyo? Atai babaen in kaimo bodang. ⁴² Agrateng kay in bodang siyo liigan in mamaw sa diya, yoogyog. Kalbas in mamaw siyabiyan Isos. In bodang piyaoraw Isos, tiyaboy wakay sa kansiyo amang. ⁴³ Kalbas in mga mangyan boo agsoyo sa kalakoyen in Diyos. In mga mangyan agsoyo kay sa boo piyagpangwat Isos, kansiyo siyabi sa kansiyo mga agadar ⁴⁴ keyen, Remremen kamo anda in kangay batay piyagsabi. Ako in Bodang Mangyan batay piyagtaboy sa kabaloyan mga mangyan. ⁴⁵ Kamay yewed kansiro atawanan in kalabowan. Ina piyagtago sa kansiro matang siro yewed katawan. Osai siro agkalimo agtanong sa kansiyo no nakay in beet siyabi. ⁴⁶ In mga agadar agpalagawan no nakay agbangen sa kansiro in lakonaw. ⁴⁷ Amatangan Isos in kansiro remrem matang kansiyo biyerya in osai ka bodangte, piyataydek sa kansiyo bangen. ⁴⁸ Siyabi Isos sa kansiro keyen, Kamayba nakay in agkaanggay atai pag bodang panawen sa kangay, na ako in piyagkaanggayan. Osai kamayba nakay in agkaanggay sa kangay na in agsogo sa kangay in piyagkaanggayan. In kalakoyte sa kanyo siyo in lakonaw. ⁴⁹ Miplaong Owan keyen, Laki Agpamatoldo, kami apo ngiitan mangyan agawit kaimo ngaran sa agpamoyaw mga mamaw. Kanyam piyagayaw siyo angkataw siyo yewed kantam kabelagan. ⁵⁰ Kamay keyen Isos, Ayaw kantam agayawen, nangkataw in yewed aglaban sa kantam na sa kantam daan. ⁵¹ Agkabangen wa in kabetek Isos batay piyaonaik sa langit, siyo panaw wa sa Galiliya agpilit pataboy sa Irosalim. ⁵² Siyo agsogo in kalaati matang piyatokaw. Siro panaw wa, pataboy sa osai ka bayanan sa Samariya matang agpamangkit kay Isos pagesekan. ⁵³ Kamay siyo yewed piyabelag asin angkataw siyo agtaboy sa Irosalim. ⁵⁴ In atawanan ina Santiyago osai Owan kansiro siyabi keyen, Amba, laki Kapwan, maal lames kami agberya baya batang sa langit, siro tebeden? ⁵⁵ Kamay Isos patobang sa dokalaki, siro siyabiyan. ⁵⁶ Kalbas kora Isos pataboy wa sa osai wakay ka bayanan. ⁵⁷ In siro agipanaw apo mangyan miplaong kay Isos keyen, Ako batay miyanggat kaimo kamaybawa kao sa nakay pataboy. ⁵⁸ Isos keyen, In mga alamid apo pagoliyan sa mga leyang, in mga bantog apo din pogad, kamay ako in Bodang Mangyan idapo pagpangesekan. ⁵⁹ Sa osai wakay ka mangyan siyabi Isos keyen, Kao miyanggat wa sa kangay. Kamay keyen in mangyan, Laki maal lames ako moli kay ngonate anggan kangay wa malebeng in kangay amang? ⁶⁰ Kamay keyen Isos, Bayansiyo in mga matay in aglebeng in kansiro mga matay, kamay kao agbangen, kao panaw wa agpatoldo keyen in Diyos agpapoon wa. ⁶¹ Apo wakay osai keyen, Laki, ako batay miyanggat sa kaimo, kamay maal lames ako paoliyen kay matang agsabi sa kangay mga kabelagan? ⁶² Isos keyen, In mangyan agarado, no baatte agpanagoli, na siyo yewed sibay agpanawen sa sakopan Diyos.

¹ Paka ina kalbas, in Kapwan omidang kay pitompo dowai ka agadar. Siro siyogo baatte dowai tokaw sa kansiyo sa baatte bayan baatte kobat sa batay kansiyo pagtaboyan. ² Kansiyo siyabi sa kansiro keyen, Bonton in batay piyagani, kamay korangte in agpanawen. Kitam mandalangin sa Kapwan keyen sogowen in mga agani sa kansiyo agay. ³ Kamo kangay piyagsogo agipanawan. Kamo kagwali mga bodangte topa kangay piyagsogo sa kagwaraan mga bangaw. ⁴ Kamo ayaw agbaba kamayba sokloban, kamayba begyas, kamayba tapatos. Kamo ayaw aglimbang sa dalan agpanggisodan sa mga mangyan. ⁵ Paka kamo misoroy kamayba kay nakay balay na kamo toloy mandalangin keyen, Kamo pakaanggayen in Diyos. ⁶ No apo asin agbalay mabait pag mangyan na siro batay ngani piyakaanggay. Kamay no idapo, na kamo wa daan in batay piyakaanggay Diyos. ⁷ Kamo asin daan pag balay mamataw, kamo mamangan osai minem kamayba nakay in piyagtaboy sa kanyo, angkataw in agpanawen maal piyagpakan in kansiyo pamangnen. Kamo ayaw agpalkoyogpalkoyog. ⁸ Paka kamo rateng sa osai ka bayan, no kamo piyabelag in mga taga ista na kamo mamangan kamayba nakay in piyagtaboy sa kanyo, ⁹ kanyo paorawen in mga apo maskit ista, osai kanyo sabiyen sa mga mangyan keyen, Agkabangen wa agpapoon sa kanyo in Diyos. ¹⁰ Kamay no apo bayan in mga mangyan yewed agpabelag sa kanyo, na kamo agipanaw sa kansiro mga dalan. Kanyo sabiyen ¹¹ keyen, Kadayo in mga bogabo atai sa kanyo bayan in miskapet sa kanyam darapa kanyam wa piyagragrag, in beet siyabi kami dayo sa kanyo. Kamay ayaw alibangawan bangen wa sa kanyo in Diyos agsakop. ¹² Kangay piyagsabi sa kanyo keyen, Dogayan sa Ibeng Agparosa osai in mga taga ista pag bayan, osai in mga taga Sodoma, in batay maloba pag parosa in sa mga taga ista agbangen. ¹³ Isos keyen kay, Lakonaw in batay parosa sa kanyo, mga taga Korasin. Lakonaw in batay parosa sa kanyo, mga taga Bitsayda. Angkataw no nges piyangwat sa Tiro osai sa Sidon in mga makasoyo piyangwat atai sa kanyo, na siro dogay wa agdamit sako, agtokkaw sa borisen, matang agpapangkit siro agbenglay kansiro daet. ¹⁴ Dogayan sa Ibeng Agparosa, osai sa kanyo, osai sa Tiro osai Sidon, na sa kanyo agbangen in maloba pag parosa. ¹⁵ Osai kamo mga taga Kapirnaom, kamo mana agpakabwat anggan sa langit. Kamo batay piyalabo sa toyongan. ¹⁶ Siyabi Isos sa kansiyo mga agadar keyen, In agparengey sa kanyo na siyo agparengey sa kangay. In agpamangyan sa kanyo na siyo agpamangyan sa kangay. Osai in dayo sa kangay, na siyo dayo sa agsogo sa kangay. ¹⁷ Moli wakay kay Isos in pitompo dowai ka agadar. Siro agkaanggay wano, keyen, Laki Kapwan, kamaybawa in mga mamaw agpaniwala sa kanyam paka kanyam biyoyaw sa kabaloyan kaimo ngaran. ¹⁸ Siyabi Isos keyen, Kangay ngiitan Katanas malabo batang sa langit kagwali mangkilat. ¹⁹ Baina, kamo kangay piyakan kabaloyan lomaed sa mga olay, sa mga alipan, kabaloyan agsakop kay Katanas. Idapo batay kabaloy agpaidap sa kanyo. ²⁰ Kamay kamo agkaanggay yewed panawen sa sakop sa kanyo in mga mamaw, no yewed panawen sa kanyo mga ngaran siyolat wa sa langit. ²¹ Ina din pag betek Isos agkaanggay wano batang sa Betek pag Abyan. Kansiyo siyabi keyen, Laki Amang, kao kapwan langit osai kobat, ako agkaanggay sa kaimo angkataw ina pag kabaloyan kaimo piyagbetang sa mga apo katawanan, sa mga dogay wa agpasok, ina kaimo wa piyapangkit sa mga mangyan kabwatte in remrem kagwali in mga bodangte kay. Aon, Amang, ako agkaanggay angkataw ina in kaimo iidang. ²² Kalbas kansiyo siyabi sa mga mangyan keyen, In boote piyaalapet sa kangay in kangay Amang. Idapo katawan no nakay ako, no yewed in Amang waget. Osai idapo din katawan no nakay in Amang no yewed ako in Bodang, osai in kangay iidang paalamanen. ²³ Isos patobang sa kansiyo mga agadar, komimkimot keyen, Kamo boway wa angkataw kamo kangitan in kanyo mga piyagngitan. ²⁴ Kangay piyagsabi aronaw mga poropita osai mga poon lakoy in agkabeet kangitan in kanyo mga piyagngitan, agkabeet karengey in kanyo mga piyagparengey, kamay yewed kansiro ngiitan, yewed kansiro piyarengey. ²⁵ Apo osai ka agpatoldo in mga Batas pasabangen kay Isos agkabel nges sa kansiyo keyen, Laki Agpamatoldo, nakay in maal kangay pangwaten matang ako piyakan in boway idapo kalobosan? ²⁶ Keyen Isos, Nakay in agisolat sa mga Batas? Nakay in kaimo piyagbasa asina? ²⁷ Siyo keyen, In mga Batas keyen, Kailangan kantam pagmaalen in Diyos kantam Kapwan, in boo kantam galem, abyan, eyat osai remrem. Osai pakayawteen in roma mangyan, kataw daan in agpakayawte sa kantam sadiri. ²⁸ Keyen Isos, Betek in kaimo siyabi. Na no kaimo piyagpangwat ina na kao batay agkaboway. ²⁹ Kamay in mangyan agkalimo siyo batay arikoyan, matang siyo agtanong wakay kay Isos keyen, Kamay nakay ngani pag mga mangyan? ³⁰ Siyabi Isos keyen, Alimbawa, apo mangyan mongali batang sa Irosalim, pataboy sa Iriko. Siyo kiyabel mga tolisan, kiyowa in lambong, piyamogbog, biyaliwan kagwali wa matay. ³¹ Kadogay apo mipadalan osai ka sasirdoti. Paka ngiitan in mangyan siyo manlili, siyo toloy wa daan agipanaw. ³² Domalan wakay sa kabetek in mangyan osai ka katolong sasirdoti. Paka ngiitan in mangyan siyo din manlili, siyo toloy wa daan agipanaw. ³³ Asin wakay domalan osai ka taga Samariya. Paka ngiitan in mangyan siyo apakayawtean. ³⁴ Pasabangen siyo, in mga sogat giyamot langis osai alak, kalbas piyamekkes. In mangyan piyasakay sa kansiyo daan asno, biyaba sa balay pagpangesekan, yaalapet. ³⁵ Paka omaga kansiyo kiyowa kowarta alaga dowai ka ibeng agpanawen, tiyaboy sa kapwan balay keyen, Siyo kaimo alapeten. No korang kay ina, na kangay kay piyagbayadan no ako agoli wa. ³⁶ Kalbas keyen Isos sa agpatoldo in Batas, Na asin pag tolo, kaimo nakay, nakay agbangen in agpabelag sa kiyabel tolisan? ³⁷ Keyen in agpatoldo in Batas, In agpakayawte sa kansiyo. Kalbas siyabi Isos sa kansiyo, Kao panaw wa, kataw daan ina in kaimo pangwaten. ³⁸ In kora Isos agipanaw wakay siro rateng sa osai ka bayanan. Asin siro piyabelag osai ka kagbaiyan in ngaran Marta, piyaisoroy sa balay. ³⁹ Ina pag kagbaiyan apo kay din belag in ngaran Mariya. Siyo agtokkaw agpatobang kay Isos agparengey sa kansiyo agiplaong. ⁴⁰ Kamay Marta yewed katokor sa kansiyo mga panawen. Siyo pasabangen kay Isos keyen, Laki Kapwan, kao yewed agkalawagen ako piyabayaan kangay belag agpanawen ako waget? Kaimo sabiyen sa kansiyo ako tolongen wa. ⁴¹ Kamay keyen in Kapwan, Laki Marta, Marta, kao maloba agpanremrem sa karowen panawen. ⁴² Kamay osai waget in kailangan gayed. Iidang Mariya in maalen, na ina idbatay piyagkowa sa kansiyo.

¹ Osai ka betek Isos agpandalangin. Paka kalbas siyabi in osai ka kansiyo agadar keyen, Laki Kapwan, kami patoldowen mandalangin, kataw Owan agpatoldo sa kansiyo mga agadar. ² Siyabi Isos keyen, No kamo agpandalangin na keyen, Amang, kaimo waget ngaran in pagmaalen wa in boo. Kao wa ngani in agsakop sa boo. ³ Kami pakanen in kanyam pamangnen sa ibengibeng. ⁴ Osai kaimo wa libangawen in kanyam mga daet, angkataw kami aglibangaw sa mga daet piyagpangwat sa kanyam. Kami ayaw agpadalanen sa maloba pag tepeng. Kataw ina in agpandalangin. ⁵ Isos agsabi kay sa kansiro keyen, Alimbawa, in osai sa kanyo pataboy sa osai ka belag kagwaraan yabi, keyen, Laki, ako pakanen pamangnen. ⁶ Rateng osai ka belag batang sa adayonaw, kalbas ako idapo batay tiyaboy. ⁷ Keyen wakay in sa galem balay, Ako ayaw agabaraen. Ako idbatay wa kaorog, angkataw agibengbeng wa in sakbawan, kami talnakiyan agpalibay wa. Ako idbatay kataboy pamangnen. ⁸ Keyen Isos, Kangay piyagsabi sa kanyo kamayba siyo idbatay miyorog agtaboy panawen kamo agpaybelag, na sa kaimo pagpilit siyo batay ngani miyorog, agtaboy in boo kaimo piyagayay. ⁹ Kangay piyagsabi sa kanyo kamo mangayay sa Diyos, kamo batay piyagpakan. Kamo mamangkit, kamo batay kangitan. Kamo merya, kamo batay piyaonaik. ¹⁰ Angkataw in mangayay batay piyakan, in mamangkit batay kangitan, in merya batay piyaonaik. ¹¹ Kamo in mga amang, no kanyo bodang agayay isda, na nakay, idbatay kanyo piyakan olay, aon? ¹² No siyo omayay itlog, na idbatay kanyo piyakan alipan, aon? ¹³ Na no kamo, kamayba daeten, katawan agtaboy maalno sa kanyo mga bodang, na labi kay in kantam Amang sa langit, siyo batay agtaboy in Betek pag Abyan sa mga agayay sa kansiyo. ¹⁴ Osai ka betek Isos agboyaw osai ka mamaw sa kaliyakiyan yewed kaiplaong. Paka panaw wa in mamaw in kaliyakiyan kaiplaong wakay. In mga mangyan agsoyo. ¹⁵ Kamay in kalaati keyen, Kaya Isos kabaloy agboyaw mga mamaw panawen siyo piyakan kabaloyan Bilsibol in poon mga mamaw. ¹⁶ In amat wakay beet agtepeng sa kansiyo matang siro agsabi keyen, Kao agpangwat makasoyo matang kanyam atawanan kao siyogo Diyos. ¹⁷ Kamay Isos katawan in kansiro piyagremrem, matang siyo keyen, In baatte sakopan no agpalawayan na batay masida, kalbas no in mga talnakiyan agpalawayan na batay din masida. ¹⁸ Na kataw din ina Katanas, no aglaban sa kansiyo sadiri na batay masida in kansiyo sakopan. Kaya ako keyen, angkataw kamo agsabi keyen ako piyakan Bilsibol kabaloyan agboyaw mga mamaw. ¹⁹ No kanyo piyagsabi in Bilsibol in agpakan kabaloyan sa kangay agboyaw mamaw, na in galem ina pag siyabi kadayo in mga agpaniwala sa kanyo, batang din kay Bilsibol in kansiro kabaloyan agboyaw mamaw. Na siro wa din in batay agsabi keyen, Kamo baribid. ²⁰ Kamay no in Abyan Diyos in agpakan sa kangay in kabaloyan agboyaw mga mamaw, na in beet siyabi in Diyos agparakay wa agpapoon sa kanyo. ²¹ No osai ka mangyan maeyat apo torag in agdamay sa kansiyo balay, na in kansiyo mga sangkap idbatay matakaw. ²² Kamay no siyo alowasan osai ka mangyan labi kay maeyat sa kansiyo, kalbas siyo diyaeg, kiyowa wa in kansiyo torag kansiyo pagpasandigan, na kansiyo mga sangkap batay yaagaw kalbas piyamagi wa. ²³ In yewed agiyagem sa kangay na aglaban sa kangay, osai in yewed agtolong sa kangay agtipon in paray, na siyo agpanripatak. ²⁴ No osai ka mamaw biyoyaw wa sa osai ka mangyan, siyo agipanawan sa mga batowen pag kobat, agpamangkit pagbalayan. No siyo idapo ngiitan, na siyo batay keyen, Ako batay moli sa kangay batang pagbalayan. ²⁵ Paka siyo rateng wakay sa mangyan, kansiyo ngiitan in balay piyakapya wa, maalen. ²⁶ Na siyo panaw wakay batay kay agpaanggat pito ka mamaw labi kay kaloba siyo. Siro batay misoroy, ista wa agbalay, matang in piyaglowasan maloba wa gayed labi kay sa datiyan. ²⁷ Isos agiplaong kay, apo kagbaiyan sa karowanan mango keyen, Agkaanggay in kagbaiyan agbaba sa kaimo sa kansiyo boyon osai agpasoso sa kaimo. ²⁸ Kamay keyen Isos, Labi kay agkaanggay in mga agparengey osai agpaniwala sa agiplaong Diyos. ²⁹ Aronaw kay in mga mangyan agpaypanrateng, Isos keyen, Daeten wano in ngona pag mga mangyan. Siro agayay in makasoyo pag panawen kamay idapo batay piyapangkit sa kansiro no yewed in makasoyo pag mibaloy kay Onas. ³⁰ No nangkataw Onas mibaloy tanda sa agrateng parosa sa mga taga Ninibi, na kataw daan din ina ako in Bodang Mangyan batay tanda sa mga mangyan agkaboway ngona. ³¹ Sa Ibeng Agparosa batay tomaydek in kagbaiyan poon lakoy sa kobat Siba agsabi keyen in ngona pag mga mangyan parosaen. Angkataw siyo batang sa balabaan kobat matang parengeyen in kay Solomon katawanan. Kamay ngona apo atai labi kay kalakoy in kay Solomon katawanan. ³² Sa Ibeng Agparosa in mga taga Ninibi batay agtaydek agsabi keyen in ngona pag mga mangyan parosaen. Nangkataw in Onas agpatoldo sa kansiro, na kansiro biyenglay in kansiro mga daet. Kamay ngona apo atai labi kay kalakoy in kay Onas piyagpatoldo. ³³ In agparaet tinglaw idbatay agbetang, idbatay agpabolalang sa galem baldi, dayem sa datiyan daan pagpamabolalangan, matang no apo misoroy mangyan piyagngitan in agrawa. ³⁴ In kantam mata in kagwali tinglaw sa kantam bilog. Na no matarem in kantam mata na piyagrawaan in boo kantam galem. Kamay no malabo in kantam mata na in kantam galem boo wa din agkalenedan. ³⁵ Na kamo agingat, karam in kanyo rawa mibaloy wa lened. ³⁶ No kantam boo galem sa piyagrawaan, yewed agkalenedan, na ina agkarawaan gayed, kagwali piyagrawaan tinglaw makasolap. ³⁷ Paka Isos kalbas wa agiplaong, siyo piyanaya sa balay osai ka Parisiyo batay agkoman. Misoroy siyo sa balay, tomokkaw batay agkoman. ³⁸ In Parisiyo agsoyo, angkataw kansiyo ngiitan Isos agkoman idwa yoogas in bakwaw kataw in ogali piyatoldo kansiro mga kakoyayan. ³⁹ Siyabi sa kansiyo in Kapwan keyen, Kamo mga Parisiyo, kanyo piyagogas in awak in kanyo mga pagyanganan, kamay in kanyo galem agkatakaw, daeten wano. ⁴⁰ Kamo idapo bait. In agpangwat in awak pagyanganan, siyo din in agpangwat in galem. ⁴¹ Kamay kanyo taboyen sa mga maidap in mga galem pagyanganan, matang batay maalno in boote sa kanyo. ⁴² Lakonaw in batay parosa sa kanyo, kamo in mga Parisiyo. Kamo agtaboy sa Diyos in kasampo ka bilog mga baranoy, mga tanglad, osai in boo mga golayen, kamay idwa kanyo piyagpangwat in betek sa mga roma mangyan, osai idwa agkabeet sa Diyos. Ina pag mga lakonaw in kailangan ngani kanyo pangwaten, kamay ayaw din kanyo kalibangawanen in agtaboy in kasampo. ⁴³ Lakonaw in batay parosa sa kanyo, kamo in mga Parisiyo. Angkataw kanyo piyagkaanggay in agtokkaw sa maal pagpanokkawan sa mga balay pagpaniponan. Kamo agkaanggay no kamo in piyagpakalakonaw in mga mangyan sa mga bayan. ⁴⁴ Lakonaw in batay parosa sa kanyo, angkataw kamo kagwali mga lebengan idapo tanda, piyagpanlaedan in mga mangyan idapo katawan. ⁴⁵ Kalbas siyabi sa kansiyo in osai ka agpatoldo in mga Batas keyen, Laki Agpamatoldo, sa kaimo siyabi kataw ina na kadayo din kami in kaimo piyagpasaenan. ⁴⁶ Kalbas siyabi Isos keyen, Lakonaw din in batay parosa sa kanyo, kamo in mga agpatoldo in mga Batas. Angkataw kanyo piyagpababa sa mga mangyan in mabyat pag mga palnowan, kamay kamo dayo mamaglebey, kadayote in solo dayo agtolong. ⁴⁷ Lakonaw in batay parosa sa kanyo angkataw kanyo piyagpakapya in mga lebengan in mga poropita biyono tangona kanyo mga kakoyayan. ⁴⁸ Sa kataw ina kamo agpapangkit kamo agiyagem sa piyangwat kanyo mga kakoyayan tangona. Angkataw siro in agbono sa mga poropita, kamo wakay agpakapya in mga lebengan. ⁴⁹ Apo agisolat sa osai ka aklat piyagawit In Katawanan Diyos keyen, Ako batay agsogo sa kansiro mga poropita, osai mga katiwala. In kalaati kansiro batay biyono, in kalaati wakay batay piyagpangwatan daet. ⁵⁰ Na in mga mangyan agkaboway ngona in batay piyarosaan panawen sa agbono sa boo mga poropita sogod piyangwat in kobat, ⁵¹ sogod biyono Abil anggan din biyono Sakaryas sa paywaraan in pagsonogan andog osai in balay lakoy Diyos. Kangay ngani piyagsabi batay wa daan piyarosaan in mga mangyan agkaboway ngona panawen asin pag boo mga biyono. ⁵² Lakonaw in batay parosa sa kanyo, kamo in mga agpatoldo in mga Batas, angkataw kanyo yeeleg in dalan matang in mga mangyan yewed karengey in katawanan Diyos. Kamo dayo maniwala asin, kalbas kanyo kay piyagayaw in mga mangyan beet maniwala. ⁵³ Isos panaw asin pag balay. Kalbas sogod asin in mga agpatoldo in mga Batas, osai in mga Parisiyo maloba wa aglaban kay Isos, baatte siyo piyagtanong makakarowan, ⁵⁴ matang nges siyo abel sa kansiyo mga agiplaong.

¹ Karowan wano pag mangyan in rateng, anggan agpaldeksean. Isos tokaw miplaong sa kansiyo mga agadar keyen, Ayaw agtolad sa mga Parisiyo agpakagwali waget. Ina kagwali pamaistobo tinapay. ² In boo piyagbetang batay daan piyagngitan, in boo piyagtabon batay daan atawanan. ³ In kanyo siyabi sa lened batay daan arengeyan sa ibeng. In kanyo piyagkimkimot sa galem balay batay daan piyagpango sa karowan. ⁴ Mga laki, kangay piyagsabi sa kanyo, kamo ayaw agkalimo sa mga agpamono mangyan. Paka in mangyan mabono wa siro idapo wa batay mibaloy. ⁵ Kangay piyagsabi sa kanyo no sa nakay kailangan kamo agkalimo. Kailangan kamo agkalimo sa Diyos, angkataw siyo apo kabaloyan agbono sa mga mangyan, kalbas paka mabono wa in mangyan siyo apo kay din kabaloyan agbenglay sa toyongan. In Diyos agbangen in kanyo kalimowanen. ⁶ Lima ka maya piyagpabili dowai waget ka sintimos. Kamay kamayba osai waget ka rnaya idbatay malibangaw sa remrem Diyos. ⁷ Kamaybawa in kanyo mga abok boo kansiyo biilang. Na kamo ayaw agkalimo, angkataw kamo piyagmaal labi kay sa karowan pag mga maya. ⁸ Kangay piyagsabi sa kanyo, in agpabelag sa kangay sa pangkit mga mangyan, na siyo batay din piyabelag ako in Bodang Mangyan sa pangkit in mga angil Diyos. ⁹ Dayem in agpamangyan sa kangay sa pangkit mga mangyan, na siyo batay din kangay piyamangyan sa pangkit in mga angil Diyos. ¹⁰ In miplaong aglaban sa kangay sa Bodang Mangyan, na ina pag daet in Diyos kabaloy aglibangaw, kamay in aglibak sa Betek pag Abyan, na ina pag daet in Diyos idbatay wa daan aglibangaw asin. ¹¹ No kamo batay wa piyagosap sa mga balay pagpaniponan, sa adapan mga poon, osai sa mga apo kabaloyan, na ayaw agpanremrem no nakay in batay kanyo siyabi, osai no nangkataw in agsabi, ¹² angkataw asin daan pag betek, in Betek pag Abyan in batay agpatoldo sa kanyo no nakay in maal kanyo siyabi. ¹³ Osai ka kaliyakiyan sa tiponan miplaong kay Isos keyen, Laki Agpamatoldo, kaimo sogowen in kangay kakaan keyen taboyen wa sa kangay in kangay bagiyan in ogon kanyam amang. ¹⁴ Isos keyen, Laki, idapo agpangwat sa kangay tanongan matang agbagi. ¹⁵ Kalbas kansiyo siyabi sa kansiro boo keyen, Kamo agingat, ayaw kamo agkabeet sa aronaw sangkap, angkataw in kantam boway yewed sa karowen mga sangkap. ¹⁶ Kalbas giisod Isos osai ka alimbawa keyen, In osai ka mangyan mayaman karowan wano ngani in ani sa kansiyo tobigan. ¹⁷ Kalbas siyo manremrem keyen, Nangkataw wa anda ako? Idapo wa pagbetangan in kangay ani. ¹⁸ Manremrem wakay keyen, A, maal kay mana in oraken in kangay mga banglin, agpangwat wakay mga balay lakoy, mga banwa, matang asin kangay biyetang in kangay ani osai in boote sa kangay. ¹⁹ Na batay wa apyaan kangay remrem keyen, Yadi, aronaw wa in kangay sangkap, maal wa ako agpakabosog, maal wa agbarik, aglasing, angkataw in kangay pamangnen agibetang idbatay malobos anggan dogay wano. ²⁰ Kamay siyabi in Diyos sa kansiyo keyen, Kao idapo bait. Isag daan pag yabi batay wa piyagkowa in kaimo boway. Na kay nakay wa ina aro pag mga boote? ²¹ Kataw ina ngani in batay mibaloy sa mga agpasandig sa sangkap, kamay sa pangkit Diyos siro maidap wano. ²² Siyabi Isos sa kansiyo mga agadar keyen, Ina in dailan kaya ako keyen ayaw agkariyaban keyen, idapo batay kiyoman matang kitam agkaboway, idapo batay damit sa bilog. ²³ Angkataw osai pamangnen osai in boway, in boway agbangen in lakonaw. Osai damit osai in bilog, in bilog agbangen in lakonaw. ²⁴ Kanyo remremen in mga owak. Siro yewed agtogda, yewed din agkali. Siro idapo kalongkong pagbetangan pamangnen kamay siro piyagpakoman daan in Diyos. Na kamo piyagmaal in Diyos labi kay sa mga bantog. ²⁵ Sa agkariyaban idapo batay kabaloy agpakadogay sa kansiyo boway kamayba osai wagette ka dodo ibeng, aon? ²⁶ Na no kamo yewed kapangwat kalakoyte ina, na nakay batang kamo agkariyaban kay sa mga pamangnen, sa mga damit. ²⁷ Kanyo remremen in mga agitalo betakan sa kobat. Siro yewed agpanawen, yewed agsimat, kamay in kangay piyagsabi sa kanyo, in poon lakoy Solomon, kamayba siyo mayaman wano, siyo idbatang agsoroy damit kamaalno ina kamayba osai waget asin pag mga betakan. ²⁸ Na no in mga lalosen, ngona agkaboway, isagte piyagsonog, no ina piyakan damit in Diyos, na kamo labi kay piyagpakan. Kamo mana maloba wano mainaen sa agpasandig sa Diyos. ²⁹ Na kamo ayaw maloba agpanremrem sa agpamangkit pamangnen osai sapa. ³⁰ Ina in mga piyagkariyaban in mga yewed kay agpasandig sa Diyos. In kantam Amang sa langit katawan ina boo kantam piyagkailangan. ³¹ Labi kay sa boo kitam pasakop sa Diyos, na ina pag boo kansiyo batay piyagtaboy sa kantam. ³² Kamo pag barkadaante, ayaw agkalimo, angkataw in beet Diyos in kantam Amang in kamo batay din kansiyo sarig agpapoon. ³³ Pabiliyen wa in kanyo mga sangkap, kalbas taboyen sa mga maidap, palitanen osai wakay ka pagsoroyan, pagtiponan mga sangkap sa langit. Ista siro idbatay lobos, idapo batay kapasabangen agpanakaw, idapo din mga ipes agpansida. ³⁴ Angkataw no saano agbangen in kanyo mga sangkap, na batay din asin in kanyo remrem. ³⁵ Kailangan kamo sandata kamayba nakay in rateng, alapeten in igang kanyo mga tinglaw. ³⁶ Kamo nges kataw daan in mga sogowan agpanaya sa kansiro kapwan batang sa kasalan, matang paka rateng osai agberya na toloy agkowa in bengbeng sakbawan. ³⁷ Agkaanggay in mga sogowan aratengan in kansiro kapwan agpanaya. Kangay piyagsabi sa kanyo, in kapwan batay agkowa in kansiyo maalno pag lambong, in mga sogowan kansiyo batay piyatokkaw, kalbas siyo batay agbagi pamangnen sa kansiro. ³⁸ No siyo rateng kagwaraan yabi, kamayba ikkay agkaboka, na siro agkaanggay no siro aratengan sandata. ³⁹ Kanyo remremen, no nges atawanan in kapwan balay no nakay pag betek in agrateng in agpanakaw na idbatay kansiyo piyabayaan iisoroy in kansiyo balay. ⁴⁰ Kailangan din kamo agsandata angkataw batay agrateng ako in Bodang Mangyan sa betek yewed kanyo piyagpanaya. ⁴¹ Miplaong Pidro keyen, Laki Kapwan, kay nakay lames kaimo piyagsabi ina pag alimbawa, no sa kanyam, no sa boo mangyan? ⁴² Keyen in Kapwan, Kailangan kamo kataw in apo katawanan pag sogowan yewed aglimbang. Siyo in piyangwat kansiyo kapwan katiwala sa amat mga sogowan matang agtaboy kansiro pamangnen sa kabetek. ⁴³ Agkaanggay ina pag sogowan no moli kansiyo kapwan siyo aratengan agpanawen daan. ⁴⁴ Kangay ngani piyagsabi sa kanyo, siyo batay piyagpaalapetan in kansiyo kapwan sa boote kansiyo mga sangkap. ⁴⁵ Kamay no ina pag sogowan agremrem keyen dogay kay bayo batay rateng in kansiyo kapwan, kalbas siyo agparakay agbogbog sa kansiyo belag mga sogowan kaliyakiyan kadayo kagbaiyan, kadogay siyo agpakabosog, ag barik, aglasing, ⁴⁶ na kansiyo kapwan batay rateng sa ibeng yewed kansiyo piyagremrem, sa kabetek yewed kansiyo atawanan. Siyo batay maloba piyagparosa kansiyo kapwan, piyaagem sa parosa in mga yewed agpaniwala. ⁴⁷ In sogowan in katawan in remrem kansiyo kapwan, kamay no siyo yewed agsandata, yewed agpangwat in kansiyo beet, na siyo batay piyarosa maloba wano. ⁴⁸ Kamay in sogowan yewed katawan in remrem kansiyo kapwan, kamay siyo agpangwat in sibay piyagparosa, na kalakoyte in kansiyo parosa. In piyakan lakonaw, na piyagasaan in Kapwan batay lakonaw. In piyakan labi kay lakonaw, na piyagasaan in Kapwan batay labi kay lakonaw. ⁴⁹ Kaya ako atai pataboy matang agbaba baya sa kobat. Dayem nges maraet wa ina. ⁵⁰ Kataw in piyagbaotismo piyagsogbo sa sapa na kailangan kay ako siyogbo sa kaidapan. Maloba maidap in kangay remrem anggan ina yewed kay mibaloy. ⁵¹ Kanyo lames remrem kaya ako atai pataboy matang apyaan in mga mangyan? Yewed. Dayem malsowayan in mga remrem. ⁵² Ibat ngona in lima ka mangyan agpaykamalayan batay malawayan. In tolo batay aglaban sa dowai, in dowai batay aglaban sa tolo. ⁵³ Siro batay malawayan. Batay malaway in amang osai in kansiyo bodang kaliyakiyan. Batay malaway in inang osai in kansiyo bodang kagbaiyan. Batay malaway in biyaran osai in kansiyo manogang. ⁵⁴ Siyabi Isos sa karowan mangyan keyen, Paka kanyo ngiitan aglened sa kalabowan ibeng na kamo keyen batay omodan, kalbas ngani omodan. ⁵⁵ Osai no in bariyos batang sa paglowasan ibeng na kamo keyen, A, batay agibeng. Kalbas ngani agibeng. ⁵⁶ Kamo mga agpakagwali waget. Kamo katawan agpangkit sa mga tanda sa kobat, mga sa langit. Nakay batang yewed kanyo piyagpangkit in mangibaloy wa tandaan ngona pag betek? ⁵⁷ Nakay batang kamo yewed kaksiyote agremrem no nakay in maal? ⁵⁸ No kao yaabla batay piyagosapan, na sa dalan kay, ayaw kay rateng sa osap maypolong wa. No yewed maypolong na karam kao batay giyoyod sa tiponan in mga poon, kadogayte tiyaboy sa polis, batay biilanggo. ⁵⁹ Kangay piyagsabi kao idbatay ngani piyagpalpas anggan apo kay tera in kaimo otang kamayba osai wagette ka sintimos.

¹ Ina daan betek apo rateng mga mangyan agbarita kay Isos keyen, Apo mga mangyan taga Galiliya biyono Pilato sa betek siro agandog sa Diyos. ² Keyen Isos, Na kay, panawen ina pag mga mangyan taga Galiliya biyono, kanyo lames remrem siro apo daet labi kay sa roma mga mangyan taga Galiliya? Yewed. ³ Kamay kangay piyagsabi sa kanyo, no yewed kanyo biyenglay in mga daet, na kamo boo kataw daan din ina batay maripor. ⁴ Osai in labing walo ka mangyan matay in siro aregnasan in mabwat pag balay bato sa Silowi, kanyo lames remrem siro apo daet labi kay sa boo mga mangyan agbalay sa Irosalim? Yewed. ⁵ Kamay kangay piyagsabi sa kanyo no yewed kanyo biyenglay in mga daet, na kamo boo kataw daan din ina batay maripor. ⁶ Siyabi Isos anda pag alimbawa. Apo osai ka mangyan apo poon igos sa kansiyo kobat. Kalbas piyanibaw no apo raweg, kamay idapo siyo ngiitan kamayba osai. ⁷ Matang kansiyo siyabi sa agalapet kansiyo kobat keyen, Tolo wa ka dagon ako baatte atai agpanibaw atai pag poon, kamay siyo idapo aggalem. Pokanen wa ina, agpaliget waget sa kobat. ⁸ Kamay keyen in agalapet, Laki, ngona pag dagon ayaw kay kanta agpokanen. Kangay kay piyagkali in balabaan, kangay piyagpabolalangan in pampagalem. ⁹ No manraweg isag pag dagon na maal wa. Kamay no yewed na kanta wa pokanen. ¹⁰ Osai ka Ibeng Pamainga Isos agpatoldo sa osai ka balay pagpanipon. ¹¹ Apo osai ka kagbaiyan asin labing walo wa ka dagon piyagmamaw. Siyo agkabokkongan wa, yewed wano kapaodoy. ¹² Paka ngiitan Isos in kagbaiyan, kansiyo biyerya, kalbas keyen, Laki, piyaoraw wa in kaimo kaidapan. ¹³ Yaatang Isos in kagbaiyan. Siyo toloy wa miyodoy, agkaanggay wa sa Diyos. ¹⁴ Kamay agalitan in agpapoon sa pagpamponan, angkataw agpaoraw Isos sa lbeng Pamainga. Matang kansiyo siyabi sa mga mangyan keyen, Apo enem ka ibeng maal agpanawen. Na asin pag mga ibeng kamo atai pataboy matang agpagamot. Ayaw sa Ibeng Pamainga. ¹⁵ Siyabi in Kapwan keyen, Kamo mga agpakagwali waget. Yewed mana sa Ibeng Pamainga kanyo piyagpanlowat in kanyo baka osai kabayo sa mga pageketan, kanyo piyagali sa pagpangineman? ¹⁶ Na nakay, anda pag kagbaiyan sa kasokponan Abraam labing walo wa ka dagon biyakos Katanas, yewed mana maal siyo piyaglowat sa Ibeng Pamainga? ¹⁷ Sa siyabi Isos arikoyan in boo mga aglaban sa kansiyo. Kamay aanggayan in karowan mga mangyan sa boo kansiyo mga piyangwat makasoyo. ¹⁸ Keyen Isos, Nangkataw lames in Diyos agpapoon? In kangay alimbawa keyen, ¹⁹ Ina kataw osai ka bisloy tiyogda osai ka mangyan sa kansiyo kobat. Mitalo, mistobo wa, mibaloy wa poon yangaw, pagpamogadan mga bantog in mga sanga. ²⁰ Isos apo kay siyabi keyen, Nakay kay lames in maal pag alimbawa in Diyos agpapoon? ²¹ Ina kataw pamaistobo tinapay, kalakoyte in piyaagem osai ka kagbaiyan sa osai ka galang arina, kadogay in boo mistobo. ²² Isos agipanaw kay. Siyo agpatoldo sa mga bayan, kamayba bayanan kansiyo piyagdalan in siyo agpataboy kay sa Irosalim. ²³ Apo osai ka mangyan miplaong sa kansiyo keyen, Laki, korangte lames in batay piyaboway? Siyabi Isos keyen, ²⁴ Kanyo piliten misoroy sa maliget pag sakbawan. Kangay piyagsabi sa kanyo aronaw mangyan in agkabeet misoroy kamay idbatay kaisoroy. ²⁵ Paka biyengbeng wa in kapwan balay in sakbawan, na kamo batay agtaydek sa tongkodan agberya agberya keyen, Laki Kapwan, kami pasoroyen. Siyo batay somagot keyen, Ako yewed katawan no taga nakay kamo. ²⁶ Kalbas kamo batay keyen, Kitam batang malpamangan, batang malpanginem. Kao batang agpatoldo sa kanyam mga bayan. ²⁷ Kamay siyo batay agsabi sa kanyo keyen, Kamo yewed kangay atawanan, no kamo taga nakay. Kamo bali wa, ayaw atai sa kangay, kamo in boo agpamangwat daet. ²⁸ Paka kanyo ngiitan sa sakopan Diyos Abraam, osai Isaak, osai Akob osai in boo mga poropita, kamay kamo piyagayaw misoroy, na kamo batay agpalpanangis, agpalpanogait in kanyo mga ngipen. ²⁹ Batay rateng mga mangyan batang sa boo wano kobat, batay agtokkaw agpalpamangan sa sakopan Diyos. ³⁰ Apo mga paori batay manokaw. Apo mga tokaw batay apaoriyan. ³¹ Ina pag betek apo rateng mga Parisiyo, siyabi kay Isos keyen, Kao panaw wa, ayaw wa atai, angkataw kao beet biyono Irodis. ³² Siyabi Isos keyen, Kanyo sabiyen asin pag Irodis keyen, Ako batay kay ngona agboyaw mga mamaw, osai agpaoraw din sa mga maskit, kamay idwa dogay mibaloy wa in kangay panawen. ³³ Kamay ngona ako agaway kay agipanaw agtaboy sa Irosalim anggan mibaloy wa in boo, angkataw in osai ka poropita yewed maal biyono no yewed sa Irosalim. ³⁴ Keyen Isos, Irosalim, laki mga taga Irosalim, kanyo piyagbono in mga poropita. In mga siyogo Diyos kanyo biyenglayan bato anggan matay. Makakarowan wano nges kangay beet kamo yaalapet kataw in manok aglemlem sa kansiyo mga sipsipan, kamay kamo dayo. ³⁵ Na in kanyo balay lakoy Diyos batay piyagbaliwan wa gayed. Kangay piyagsabi sa kanyo, ako idbatay wa kanyo ngiitan anggan sa rateng wa in kabetek kamo keyen, Agkaanggay in agrateng in agbaba in kabaloyan in Kapwan.

¹ Osai ka Ibeng Pamainga Isos pataboy sa balay osai ka poon sa mga Parisiyo, matang mamangan. Siyo piyagpangkit wa gayed in mga mangyan. ² Pasabangen kay Isos in osai ka kaliyakiyan mabaktek in boo bilog. ³ Kalbas miplaong Isos sa mga Parisiyo osai sa mga agpatoldo in mga Batas keyen, Maal lames sa mga Batas in agpaoraw sa Ibeng Pamainga? O, yewed wa? ⁴ Siro idapo somagot. Kalbas yaatang Isos in apo maskit, piyaoraw, kalbas piyapanaw wa. ⁵ Kalbas siyabi wakay Isos sa kansiro keyen, No kamo apo bodang kamayba baka malabo sa balao, nakay, idbatay wa lames kanyo kiyowa kamayba Ibeng Pamainga? ⁶ Siro yewed wa kasagot. ⁷ Asin sa balay Parisiyo ngiitan Isos piyagidang in mga mangyan in mga maalno pag panokkawan. Kalbas kansiyo siyabi anda pag alimbawa ⁸ keyen, No apo agpanaya sa kanyo sa kasalan, na ayaw agidangen in maalno pag panokkawan. Karam apo kay piyagpanaya mangyan mabwat kay sa kanyo. ⁹ Kalbas in agberya sa kanyo tanan batay pasabangen sa kaimo keyen, Ina pag panokkawan taboyen atai pag mangyan. No kataw ina na kao batay arikoyan, batay tomokkaw sa piyagpakabwatte pag panokkawan. ¹⁰ In maal kay no kao piyagpanaya na kao tomokkaw sa piyagpakabwatte pag panokkawan, angkataw no isag kao ngiitan in agberya na kansiyo batay siyabi sa kaimo keyen, Laki belag, kao atai wa sa maalno pag panokkawan. Kataw ina kao piyagmaal sa pangkit in mga mangyan asin agpalpamangan. ¹¹ Angkataw in agpakabwat batay piyagpakabwatte. Osai in agpakabwatte batay piyagpakabwat. ¹² Kalbas siyabi wakay Isos sa agberya sa kansiyo keyen, No kao agsandata wakay batay kainan, na ayaw agberyaen in kaimo barkadaan, in kaimo mga belag, in kaimo mga kawaras, in mga aronaw sangkap sa bangen kaimo balay. Angkataw in mga ina batay wakay daan din agberya sa kaimo. No kataw ina, na biyayadan wakay. ¹³ Dayem no kao agsandata lakoy batay kainan na in kaimo beryaen in mga maidap, mga pilaw, mga pilay, osai in mga beleg. ¹⁴ Siro idbatay kabayad sa kaimo. Na kao batay agkaanggay, angkataw paka piyaboway wakay in mga maalno pag mangyan na kao batay piyakan Diyos bayad. ¹⁵ In osai ka asin agpamangan karengey in siyabi Isos, kalbas siyabi kay Isos keyen, Agkaanggay in mangyan batay agkoman sa sakopan Diyos. ¹⁶ Keyen Isos, Apo osai ka kaliyakiyan agsandata lakoy batay kainan. Aronaw in piyaalam. ¹⁷ Paka rateng wa in kabetek kansiyo wa siyogo agsabi sa mga piyaalam keyen, Aywawa. Sandata wa in boo. ¹⁸ Kamay siro boo agkabibel. Siyabi in osai keyen, Ako kabili wa kobat. Kailangan ako ista pataboy manibaw. Kao keyen ayaw manremrem daet, laki. ¹⁹ Siyabi wakay in osai keyen, Ako komwa sampo ka baka pangarado. Kailangan ako ista kangay piyatepeng. Kao keyen, Ayaw manremrem daet, laki. ²⁰ Siyabi in ka tolo keyen, Ako yewed kapataboy angkataw ako bayo taybalang. ²¹ Moli wakay in sogowan, ina boo piyaalam sa kansiyo kapwan. Agalitan in kapwan balay, siyabi sa kansiyo sogowan keyen, Kao ista pataboy pakalakas sa mga tongkodan, sa mga dalan, atai paanggaten in mga maidap, in mga pilaw, in mga beleg, in mga pilay. ²² Kadogayte moli wakay in sogowan, keyen, Laki, mipangwat wa in kaimo piyagsogo kamay maliway kay. ²³ Siyabi in kapwan sa kansiyo keyen, Kao ista wakay sa mga dalan, sa mga kobat, kaimo piliten in mga mangyan, atai paanggaten matang makno kangay balay. ²⁴ Kangay piyagsabi sa kanyo in mga tokaw piyaalam idapono batay kakoman sa kangay siyandata pamangnen. ²⁵ Karowan wano ka mangyan in agyanggat kay Isos, kalbas siyo patobang sa kansiro keyen, ²⁶ No siyo pag mangyan in beet agadar sa kangay, no kansiyo amang osai inang, babai, mga bodang, mga belag, kamayba in kansiyo wa daan boway, no in mga ina kansiyo piyagpakalakonaw labi kay sa kangay na yewed maal siyo kangay pagsarig. ²⁷ No siyo yewed sandata agyanggat sa kangay kamayba batay piyagbono, na yewed maal siyo agadar sa kangay. ²⁸ Alimbawa in osai sa kanyo agremrem batay agpangwat balay lakoy bato. Tokaw kay siyo batay tomokkaw agbilang no nangkalakoy in batay bayad, no sibay in kansiyo kowarta. ²⁹ Kansiyo piyagkalimo karam no agpangwat wa siyo alobosan kowarta na in balay idbatay mibaloy, kalbas siyo batay piyagpatawaan in mga kangitan, ³⁰ keyen, Ina pag mangyan agpangaas agpangwat kalakoy ina, bago idbatay daan mibaloy. ³¹ Alimbawa wakay, osai ka poon lakoy batay piyaglabanan osai wakay ka poon lakoy. Na siyo agsandata batay wa din tomagbo aggira, kamay tokaw kay siyo manremrem no in kansiyo sampo ka libo ka sondalo sibay mandaeg sa kansiyo kalaban apo dalwampo ka libo ka sondalo. ³² No kansiyo remrem siyo batay diyaeg, na adayonaw kay in kalaban siyo batay agsogo kansiyo mga konsiyal papolong sa kalaban. ³³ Na kataw daan din ina, no in mangyan agalwasi sa boo kansiyo mga sangkap na yewed mayadi siyo agadar sa kangay. ³⁴ Maal in asing. Kamay no in asing idapo wa matamis, na idapo wa masadap. ³⁵ Ina idapo wa kabolowan kamayba sa kobat, kamayba sa bongsodan lalosen pampataba diya. Ina piyagbenglay wa. No apo talinga na mamarengey wa.

¹ Apo pasabangen kay Isos aronaw mga agpaningil bowis, osai roma kay pag mga agpamangwat daet. Siro agkaparengey in kay Isos piyagsabi. ² Kalbas in mga Parisiyo osai in mga agpatoldo in mga Batas, siro agpaypanremrem keyen, Ina pag kaliyakiyan agyanggatyanggat sa mga agpamangwat daet, anggan siyo agpabelag agkoman. ³ Matang siyabi Isos sa kansiro anda pag alimbawa keyen, ⁴ Alimbawa, no osai sa kanyo apo osai ka daan ka topa, no in osai malibangaw, siyo batay agnakay? Kansiyo batay biyaliwan sa moyod in siyamnapo siyam ka topa, kansiyo piyagpamangkit in malibangaw anggan kansiyo wakay ngiitan. ⁵ Paka ngiitan wakay siyo agkaanggay wa gayed. Kansiyo wakay piyasan. ⁶ No rateng wa sa balay, piyagberya in boo sa bangen, in mga kabelagan, keyen, Kitam wa malkaanggayan kataw kangay wakay ngiitan in malibangaw topa. ⁷ Keyen Isos, Kangay piyagsabi sa kanyo, Na kataw daan din ina no osai ka mangyan agbenglay sa kansiyo daet, na in kaanggayanan sa langit labi kay lakonaw sa apo siyamnapo siyam ka mangyan betek, idapo batay biyenglay daer ⁸ Isos apo siyabi keyen, Alimbawa kay, no osai ka kagbaiyan apo sampo ka kowarta bakal, no malibangaw in osai, na siyo agnakay? Kansiyo batay piyaraet in tinglaw, agwalis sa balay agpamangkitagpamangkit anggan ngiitan. ⁹ Kalbas ngiitan, piyagberya wa in boo sa bangen, in mga kabelagan keyen, Kitam wa malkaanggayan kataw ngiitan wakay in kangay malibangaw kowarta bakal. ¹⁰ Keyen Isos, Na kataw daan din ina in kaanggayanan in mga angil Diyos panawen osai ka agpamangwat daet agbenglay wa in kansiyo daet. ¹¹ Isos apo kay siyabi keyen, Alimbawa kay, osai ka mangyan apo dowai ka bodang kaliyakiyan. ¹² Miplaong in ariyan keyen, Amang, taboyen wa sa kangay in kangay bagiyan kaimo mga sangkap. Kalbas biyagi wa in amang in kansiyo mga sangkap, tiyaboy wa sa mga bodang. ¹³ Yewed dogay piyaalis wa in ariyan in kansiyo bagiyan. Kadogayte kansiyo wa biyaba in kowarta sa adayonaw pag kobat. Paka rateng ista siyo agaleleng, kansiyo waget siida in kansiyo kowarta. ¹⁴ Paka lobos wa boo, ista pag kobat maloba wa in yawes. Agparakay wa in kansiyo kaidapan. ¹⁵ Kalbas siyo pataboy sa osai ka taga ista. Siyo piyagpataboy sa kansiyo kobat agalapet in mga beyek. ¹⁶ Siyo agkakoman nges kamayba in mga waget dadak piyagpakoman sa mga beyek. Kamay idapo batay mangyan agtaboy. ¹⁷ Kadogay siyo apo wakay bait manremrem, keyen, Sa kangay amang aronaw in mga sogowan piyagbayadan in pamangnen bonton daan. Kamay ako atai agkatay sa agkayawes. ¹⁸ Na ako agoli wakay sa kangay amang. Ako batay keyen, Amang, ako apo piyangwat daet sa Diyos osai sa kaimo. ¹⁹ Ako idwa maal yaawit kaimo bodang. Ako pangwaten wa sogowan. ²⁰ Siyo panaw wa, pataboy sa kansiyo amang. Adayonaw kay siyo ngiitan wa kansiyo amang. Kadogayte in amang maloba wa anggayan domalagan, tiyagbo in bodang, yaatang, kiyapet. ²¹ Siyabi in bodang, Amang, ako apo piyangwat daet sa Diyos osai sa kaimo. Ako idwa maal yaawit kaimo bodang. ²² Kamay siyabi in amang sa kansiyo mga sogowan, Ayaw agpabeya. Atai babaen in maal pag lambong, siyo soroyanen. Soroyanen kay singsing, soroyanen kay tapatos. ²³ Kowaen wa in piyataba pag baka, bonowen wa. Kitam wa malpamangan, malkaanggayan, ²⁴ angkataw anda in kangay bodang batang wa kagwali matay kalbas boway wakay, maidapo, kalbas ngiitan wakay. Kalbas siro malkaanggayanan wa. ²⁵ Ina pag betek in kakaan agbangen sa agay. In siyo agoli wa, paka bangen wa sa balay kansiyo arengeyan in agtogtog, in agpalkaanggayanan. ²⁶ Kansiyo biyerya in osai ka sogowan keyen, Nakay batang apo kataw ina? ²⁷ Keyen wakay in sogowan, Rateng wakay in kaimo ariyan, matang piyabono kaimo amang in piyataba pag baka, kataw siyo moli wakay agkaboway daan, idapo din maskit. ²⁸ Kamay agalitan in kakaan, dayo wa misoroy sa balay. Kalbas lompot in kansiyo amang, siyo yaayat. ²⁹ Kamay kansiyo siyabi sa amang keyen, Kaimo remremen, anda pag kadogayen ako agtolong sa kaimo, kamayba nangkadogay ako yewed mandaeg sa kaimo, kamay kamayba makaosai waget ako idbatang kaimo piyakan kamayba osaite ka bodang kambing matang agpalkaanggayan kami osai in kangay mga pagbelag. ³⁰ Kamay paka rateng ina pag kaimo bodang in lomobos kaimo mga sangkap sa aleleng pag mga kagbaiyan, na kaimo kayno piyabono in piyataba pag baka. ³¹ Keyen wakay in amang, Lale, kita palagi daan agpaysarig. In boo kangay sangkap, boo daan kaimo. ³² Kamay kailangan kitam agkaanggay malpamangan, angkataw in kaimo ariyan batang wa kagwali matay kalbas boway wakay, maidapo, kalbas ngiitan wakay.

¹ Siyabi kay din Isos sa kansiyo mga agadar keyen, Alimbawa, apo osai ka mangyan aronaw in sangkap, apo piyaalapetan. Apo agsabi sa kansiyo keyen, In kaimo mga sangkap piyagsida in kaimo piyaalapetan. ² Kalbas kansiyo biyerya in piyaalapetan keyen, Nakay ina pag kangay arengeyan panawen sa kaimo? Kaimo wa kowintaen in boo kangay kowarta kaimo giyastos, kataw kao idwa maal agalapet kay. ³ Kalbas manremrem in agalapet keyen, Nakay wa lames in kangay pangwaten? Siyabi in kangay amo piyagkowa wa sa kangay in kangay panawen. Ako yewed kabaloy agarado, makarikoy wakay in agpangayay waget. ⁴ A mana, ako katawan wa in kangay batay piyangwat, matang kamayba kiyowa sa kangay in kangay panawen ako apo daan batay agpabelag sa kangay. ⁵ Kalbas kansiyo biyerya in boo apo otang sa kansiyo amo. In osai kansiyo tiyanong keyen, Nangkalakoy in kaimo otang sa kangay amo? ⁶ Siyo keyen, Osai ka daan kontinir langis. Keyen in agalapet, Anda in listaan in kaimo otang. Dali wa, kaimo wa listaen limampo waget. ⁷ Kalbas tiyanong wakay in kadowai keyen, Kao wakay, angkalakoy in kaimo otang sa kangay amo? Keyen, Osai ka daan sako paray. Keyen in agalapet, Anda wa in listaan in kaimo otang. Kaimo wa solaten walompo waget. ⁸ Siyabi in mayaman, Maalno in piyangwat in agpamadaya pag agalapet. Siyo katawan agpangwat padalan. Isos keyen kay, In mga agkasadapan sa kobat siro padalanan sa mga kataw siro, labi kay sa mga agkaanggay sa Diyos. ⁹ Isos agiplaong kay keyen, Kangay piyagsabi sa kanyo, in kanyo mga kasangkapan atai sa kobat alapeten maal sa agpaybelagan. Na no lobos wa kamo batay piyabelag sa langit sa mga balay idapo kalobosan. ¹⁰ No siyo in maal pag agalapet in kalakoyte na siyo maal din piyaalapetan in lakonaw. In mangyan wakay in agpadaya sa kalakoyte na ina agpadaya din sa lakonaw. ¹¹ No kamo yewed maal piyaalapetan in mga sangkap atai sa kobat, na nakay kay in batay agpaalapet sa kanyo in tonay gayed pag kasangkapan? ¹² Osai no kamo yewed maal agalapet in mga sangkap in roma, na nakay kay in batay agtaboy sa kanyo in batay nges sa kanyo? ¹³ In sogowan yewed kapanawen sa dowai ka kapwan. No kataw ina siyo batay agkagalit sa osai, agpakayawte wakay sa osai. No yewed siyo batay agpanawen maal sa osai, agidapo kabolowan sa osai. Na kamo yewed din kabaloy agpanawen sa dowai, osai sa Diyos osai sa kowarta. ¹⁴ In mga Parisiyo karengey in kay Isos siyabi, kalbas siro agpatawa sa kansiyo angkataw siro solangan sa mga sangkap. ¹⁵ Kansiyo siyabi sa kansiro keyen, Kamo agpakagwali waget maalen sa pangkit mga mangyan, kamay atawanan in Diyos in kanyo galem. Angkataw in piyagpakalakonaw mga mangyan ina piyagidapo kabolowan in Diyos. ¹⁶ Keyen Isos, In mga Batas Mowisis osai in mga siyolat in mga poropita, ina apo kabaloyan anggan sa kabetek Owan in Agpamaotismo. Sogod asin piyagpatoldo wa in Maal pag Barita panawen sa sakopan Diyos, kalbas in baatte osai agpilit misoroy asin. ¹⁷ In langit osai in kobat batay maidapo kamay sa mga Batas idapono batay maidapo kamayba osaite ka pantig. ¹⁸ Keyen Isos, No in kaliyakiyan agbaliwan sa kansiyo babai, mamangkit wakay sa roma, na siyo agpanggaraw wa. Osai no in mangyan miskapet sa biyaliwan wa, na siyo din agpanggaraw. ¹⁹ Keyen Isos, Alimbawa, apo osai ka mangyan aronaw sangkap, mga maal wano in kolay kansiyo mga lambong, ibengibeng bonton in pamangnen. ²⁰ Sa poon kansiyo agdan apo piyabolalang osai ka mangyan maidap, in ngaran Lasaro, boo sogat in kansiyo bilog. ²¹ Siyo beet mamangan sa mga lopisan piyagbenglay in aronaw sangkap. Yewed waget ina, no yewed siyo piyagpasabangenan in mga tito, piyagila in kansiyo mga sogat. ²² Kalbas matay wa in maidap pag mangyan, biyaba wa mga angil sa saliliyan Abraam sa langit. In aronaw sangkap matay wa din, liyebeng. ²³ In siyo piyagparosa sa toyongan siyo manangra. Kansiyo ngiitan sa adayonaw Lasaro piyagsalili Abraam. ²⁴ Kalbas siyo mango keyen, Mambey Abraam, ako ayawte wa. Kaimo sogowen Lasaro, sogbowen sa sapa in kansiyo solo, temeken in kangay bibi, kataw ako piyagpakaskitan wano atai pag baya. ²⁵ Kamay keyen Abraam, Laki bodang, kaimo remremen kao tangona sa kobat maalno in kaimo boway, kamay Lasaro maloba wano agkaidapan. Na ngona siyo piyagpakan apyaan atai, kao wakay piyagpaidapan. ²⁶ Osai din apo lakoy lintoy sa kantam paywaraan, matang in mangyan atai yewed karateng asin, in asin yewed karateng atai. ²⁷ Keyen wakay in aronaw sangkap, Na no kataw ina, laki Amang, in kangay nges beet Lasaro pataboyen sa balay kangay amang, ²⁸ angkataw ako apo kay lima ka belag kaliyakiyan. Siyo kaimo ngani sogowen ista matang siro patoldowen, na dogayan siro idwa atai rateng pag maskit wano. ²⁹ Kamay keyen Abraam, Apo sa kansiro in mga siyolat Mowisis osai in mga poropita, maniwala wa siro asina. ³⁰ Kamay siyo keyen, A, laki Amang Abraam, yewed sibay ina, dayem nges pataboy sa kansiro osai ka batang wa matay kalbas boway wakay, na batay wa kansiro piyagbenglay in kansiro mga daet. ³¹ Keyen wakay Abraam, No siro dayo maniwala sa mga siyolat Mowisis osai in mga poropita, na siro idbatay daan din maniwala kamayba sa osai ka batang matay boway wakay.

¹ Siyabi Isos sa kansiyo mga agadar keyen, Idbatay maidapo in mga dailan kaya in mga mangyan agpangwat daet, kamay makalimo in batay mibaloy sa mangyan agpamaakay sa daet. ² Osai in siyo agpaakay sa daet sa osai ka bodangte, osai in siyo yeeketan bato lakoy sa leey liyeggeb sa dagat, na in maal kay agbangen sa kansiyo in siyo leggeben. ³ Na kamo agingat. No in kaimo belag agpangwat daet sa kaimo na sabiyanen. Kalbas no siyo agdaing, na kaimo libangawen in daet. ⁴ No sa osai ka ibeng makapito siyo agpangwat daet sa kaimo, makapito din siyo moli sa kaimo agdaing, na libangawen kao in kansiyo daet. ⁵ Siyabi kay Isos in kansiyo mga katiwala keyen, Kaimo kay paistobowen in kanyam paniwala. ⁶ Siyabi wakay in Kapwan keyen, No in kanyo paniwala kalakoy waget in osaite ka beter moktasa, na kamo batay kabaloy agsogo asin pag poon lakoy yangaw keyen, Kao pagabot wa, patogda wakay sa dagat, na batay wa daan maniwala. ⁷ Keyen Isos sa mga mangyan, Alimbawa, apo osai sa kanyo apo sogowan agarado, no yewed agalapet kanyo topa. No siyo rateng batang sa pagpanawenan, na idbatay kanyo siyabi keyen, Aywawa, mamangan wa. ⁸ No yewed kamo keyen, Tongtongen wa in kangay pamangnen. Kao agsandata wa, ako pakomanen wa. No ako kalbas wakay mamangan, na kao wakay in agkoman. ⁹ In sogowan idbatay kiyaanggayan maloba angkataw kansiyo waget piyangwat in piyagsogo sa kansiyo. ¹⁰ Na kataw daan din ina kamo. No kanyo wa piyangwat in boo piyagsogo sa kanyo na in maal kanyo sabiyen keyen, Kami mga sogowan waget, kanyam waget piyangwat in kanyam panawen. ¹¹ In Isos agipanaw agtaboy sa Irosalim, siyo domalan sa paltabaan Samariya osai Galiliya. ¹² Paka siyo agrateng sa osai ka bayanan siyo tiyagbo sampo ka mangyan piyagsogatan kagwali panyakit. Siro tomaydek sa adayonaw kayte, ¹³ mango keyen, Isos, Agpamatoldo, kami ayawte. ¹⁴ Paka siro ngiitan Isos, siyo keyen, Kamo panaw, papangkit sa mga sasirdoti. In siro sa dalan maoraw wa in kansiro panyakit. ¹⁵ Paka atawanan in osai maoraw wa in kansiyo panyakit, siyo moli wakay, agpango agmaal sa Diyos. ¹⁶ Siyo maloba wano agkaanggay kay Isos. Ina pag mangyan taga Samariya. ¹⁷ Keyen Isos, Yewed mana sampo in piyaoraw? Saano wa in siyam? ¹⁸ Idapo mana moli agmaal sa Diyos no yewed anda waget pag yewed Odyo? ¹⁹ Kalbas siyabi Isos sa batang panyakiten keyen, Maal kao panaw wa. Kaya kao piyaoraw panawen kao agpasandig sa kangay. ²⁰ In mga Parisiyo miplaong kay Isos keyen, Nangkadogay batay agparakay in Diyos agsakop? Kalbas keyen Isos, Idbatay ngiitan in agparakay in Diyos agsakop. ²¹ Idapo din batay katawan keyen, Maanda wa in agparakay, no yewed keyen, Baati wa, angkataw in Diyos agparakay wa agpapoon sa galem in kalaati sa kanyo. ²² Kalbas kansiyo siyabi sa mga agadar keyen, Dogayan kamo batay beet wano kangitan sa kangay sa Bodang Mangyan kamayba sa osai waget ka ibeng, kamay idbatay kanyo ngiitan. ²³ Apo batay agsabi sa kanyo keyen, Baati siyo, no yewed keyen, Baanda wa siyo. Na ayaw kamo maniwala sa kansiro, ayaw ista pataboy. ²⁴ Angkataw paka rateng in kabetek, in agrateng in Bodang Mangyan batay piyagngitan in boo mangyan kagwali kilat piyagngitan sa boo kobat. ²⁵ Kamay kailangan tokaw siyo piyagpaidapan maloba osai piyagbenglay in mga mangyan ngona. ²⁶ In kabetek batay wa agrateng ako in Bodang Mangyan kataw daan tangona in kabetek Nowi. ²⁷ Ina pag betek in mga mangyan agpalpamangan, agpalpamarik, agpamangkit babai, mga lalaki, anggan rateng in ibeng Nowi somakay wa sa kansiyo bangka lakoy. Kalbas rateng in bongkalos, mangatay wa siro boo. ²⁸ Kataw daan ina in kabetek Lot, in mga mangyan agpalpamangan, agpalpamarik, agpamaalis, agpangkowa, agtogda, agtadyok balay. ²⁹ Kamay in ibeng panaw wa Lot sa bayan Sodoma piyalabo Diyos in baya osai mga bato bolalakaw. ³⁰ Na kataw daan ina in ibeng in batay papangkit in Bodang Mangyan. ³¹ Asin pag ibeng no in mangyan sa awakan kansiyo balay, na ayaw misoroy sa galem balay matang komwa in kansiyo mga kamayba nakayte, osai in sa agay ayaw agoli. ³² Remremen in mipangwat sa kay Lot babai. ³³ No in mangyan agpilit agaman kansiyo boway na siyo batay aidapowan. Kamay no in mangyan aidapowan kansiyo boway na batay apo. ³⁴ Kangay piyagsabi sa kanyo, asin pag yabi batay apo dokalaki agesek sa osai ka damig. In osai batay piyagpaanggat, in osai biyaliwan. ³⁵ Batay apo dokabai agbayo, in osai batay piyagpaanggat in osai biyaliwan. ³⁷ Keyen in mga agadar, Laki Kapwan, sa nakay lames ina? Siyo keyen, No sa nakay in bilog matay, na asina wakay batay agkatipon in mga owak.

¹ Giisod Isos sa kansiro in osai ka alimbawa matang piyatoldo kailangan kitam baatte agpandalangin, ayaw abyatan remrem. ² Kansiyo siyabi keyen, Sa osai ka bayan apo tanongan. Siyo yewed agkalimo sa Diyos, yewed din agkalawagen sa mga mangyan. ³ Asin din pag bayan apo osai ka kagbaiyan balo isagteisagte agpasabangen sa tanongan agateet keyen, Osapen wa in agpangwat daet sa kangay. ⁴ In tanongan dogay kayte dayo agosap. Kamay paka dogay wa siyo manremrem keyen, Kamayba ako yewed agkalimo sa Diyos, yewed din agkalawagen sa mga mangyan, ⁵ kangay wa batay piyagosap in sa balo kalaban panawen siyo agateet sa kangay, karam isag ako aidapan panawen siyo isagteisagte agateet. ⁶ Kay Isos kay siyabi keyen, Kanyo arengeyan in siyabi in daeten pag tanongan. ⁷ Na in Diyos labi kay agtolong sa kansiyo mga iidang, in agdaing sa kansiyo kamayba ibeng kadayo yabi. Siyo idbatay agpabeya agtolong sa kansiro. ⁸ Kangay piyagsabi sa kanyo siyo toloy ngani batay agtolong sa kansiro. Kamay paka rateng wa ako in Bodang Mangyan atai pag kobat, ako lames batay apo ngiitan mga mangyan agpasandig sa kangay? ⁹ Giisod din Isos osai ka alimbawa sa mga keyen siro idapo daet, piyagpaidapo kabolowan in roma. ¹⁰ Keyen, Apo dowai ka kaliyakiyan monaik sa balay lakoy Diyos batay mandalangin. In osai Parisiyo, in osai agpaningil bowis. ¹¹ In Parisiyo tomaydek agpandalangin keyen, Diyos, ako agkaanggay sa kaimo angkataw ako yewed kataw in roma mangyan, mga agpanakaw, mga mayabang, mga agpanggaraw, yewed din kataw ina pag agpaningil bowis. ¹² Baatte looban ako makadowai yewed agkoman matang agpandalangin, osai sa boo kangay piyagkabel in kasampo piyagandog wa sa kaimo. ¹³ Kamay in agpaningil bowis agtaydek sa adayonaw kayte, siyo agkarikoy agtangra sa langit, no yewed agpaereng wano keyen, Diyos, kao agpakayawte sa kangay, ako apo wano daet. ¹⁴ Isos keyen kay, Na kangay piyagsabi sa kanyo in agpaningil bowis agbangen in siyo moli sa balay siyo piyagkaanggayan Diyos. In Parisiyo yewed. Angkataw in agpakabwat na siyo batay piyagpakabwatte, kamay in agpakabwatte na batay piyagpakabwat. ¹⁵ In mga koyay agbaba kay Isos in kansiro mga bodangte matang kansiyo yaatang. In kangitan in mga agadar kansiro siyabiyan in mga koyay in mga bodang. ¹⁶ Kamay biyerya Isos in mga koyay, piyasabangen sa kansiyo. Kalbas siyabi sa mga agadar keyen, In mga bodang pasabangenen sa kangay. Ayaw kanyo agayawen, angkataw sa mga kataw siro in Diyos agsakop. ¹⁷ In kangay piyagsabi sa kanyo betek, kamayba nakay in yewed agpasakop sa Diyos kataw osai ka bodangte na siyo idbatay ngani sa sakopan Diyos. ¹⁸ Osai ka poon miplaong kay Isos keyen, Laki Maal pag Agpamatoldo, nakay in maal kangay pangwaten matang ako apo boway idapo kalobosan? ¹⁹ Keyen wakay Isos, Nakay batang ako kaimo piyagawit maal? Idapo maal no yewed in Diyos waget. ²⁰ Kao katawan in mga Batas keyen, Ayaw agpanggaraw, ayaw agpamono mangyan, ayaw agpanakaw, ayaw agsabi baribid, pagmaalen in kanyo mga koyay. ²¹ Siyabi wakay in poon keyen, Ina pag boo kangay piyagpaniwalaan sigod ako kalakoyte kay. ²² Paka karengey ina Isos siyo keyen, Osai kay in korang sa kaimo. Pabiliyen wa in boo kaimo mga sangkap, in abel kowarta taboyen wa sa mga maidap, na kao batay kabel mga sangkap sa langit. Kalbas kao atai wakay miyanggat sa kangay. ²³ Kamay in siyo karengey ina siyo agrongkot wa, angkataw siyo aronaw sangkap. ²⁴ Ngiitan Isos siyo agrongkot, kalbas siyabi keyen, Maidap sa aronaw mga sangkap in mibaloy bodang Diyos. ²⁵ Maidap komislot sa salay karayom in osai ka ayop lakoy piyagawit kamilyo, kamay labi kay maidap sa aronaw sangkap in pasakop sa Diyos. ²⁶ In mga mangyan karengey ina keyen, Na no kataw ina nakay in batay piyaboway? ²⁷ Keyen Isos, In idbatay mipangwat mangyan, ina agipangwat sa Diyos. ²⁸ Pidro miplaong keyen, Baanda, kanyam wa biyaliwan in kanyam pagoliyan matang miyanggat sa kaimo. ²⁹ Keyen wakay Isos, Totoo in kangay piyagsabi, no in mangyan in agbaliwan kansiyo pagoliyan, kansiyo babai, mga belag, mga koyay, mga bodang panawen sa sakopan Diyos, ³⁰ na siyo batay piyakan labi kay lakonaw ngona pag boway, osai dogayan in tiyaboy in boway idapo kalobosan. ³¹ In Labing Dowai ka agadar piyasoway Isos sa karowan, siyabi sa kansiro keyen, Baanda kitam agtaboy wa sa Irosalim. Ista in boo siyolat in mga poropita panawen sa Bodang Mangyan batay mipangwat sa kangay. ³² Ako batay tiyaboy sa mga yewed Odyo, batay kansiro piyagmesa, batay piyagsabiyan daet, batay piyagpanopayan. ³³ Ako batay kansiro biyogbog, batay biyono. Kamay sa katolo ka ibeng ako batay wakay piyaboway. ³⁴ Kamay in mga agadar idapo atawanan sa kansiro arengeyan, yewed kansiro abel in kansiyo beet siyabi, yewed kansiro atawanan no nakay in piyagsabi Isos. ³⁵ Paka Isos agkabangen wa sa bayan Iriko, ista apo osai ka kaliyakiyan beleg agtokkaw sa balabaan dalan, agpangayay. ³⁶ In kansiyo atawanan aronaw mangyan agdalan siyo keyen, Nakay batang ina? ³⁷ Keyen in mga mangyan, Aglawey Isos taga Nasarit. ³⁸ Kalbas siyo toloy mango keyen, Isos, Kasokponan Dabid, ako ayawte. ³⁹ Siyo siyabiyan in mga sa tokawan agbangen keyen, Ayaw aglalae. Kamay labi kay gayed piyakaksen in agpango keyen, Kasokponan Dabid, ako ayawte. ⁴⁰ Isos toloy tomaydek, siyabi keyen, Atai paanggaten in beleg. Paka siyo sa bangen wa, Isos keyen, ⁴¹ Nakay in kaimo beet kangay pangwaten sa kaimo? Keyen, Laki, kangay nges beet ako kangitan wakay. ⁴² Isos keyen wakay, Na kao kangitan wakay. Kaya kao maoraw panawen kao agpasandig sa Diyos. ⁴³ Ina daan siyo toloy wakay kangitan, agmaal sa Diyos, miyanggat wa kay Isos. Paka ina ngiitan in mga mangyan siro boo agmaal wa din sa Diyos.

¹ Isos rateng wa sa Iriko, agipanaw sa galem bayan. ² Asin apo osai ka aronaw sangkap in ngaran Sakiyo. Siyo osai ka poon sa mga agpaningil bowis. ³ Siyo agpilit kangitan kay Isos no kagwali nakay Isos, kamay idbatay kansiyo ngiitan panawen siyo pendek, kataw karowan in mangyan. ⁴ Kalbas siyo domalagan wa manokaw, monaik sa osai ka yangaw matang isag Isos asin agdalan siyo ngiitan. ⁵ Paka Isos asina wa betek siyo manangra, siyabi keyen, Laki Sakiyo, dali wa, lompot wa, kataw ngona kailangan ako mesek sa kaimo balay. ⁶ Siyo maykalaliyan wa lompot, agkaanggay wano agpabelag kay Isos. Kalbas siro maysarigan wa sa balay. ⁷ In boo kangitan ina agpaypanremrem keyen, Nakay batang Isos misoroy batay agesek sa balay in osai ka daeten pag mangyan? ⁸ Sakiyo tomaydek, miplaong keyen, Laki Kapwan, in kalaati kangay mga sangkap kangay wa piyagtaboy sa mga maidap. Osai no ako apo piyadaya na makaopat kangay batay piyagpaoli sa kansiyo. ⁹ Panawen asin pag siyabi keyen Isos kay Sakiyo, Ngona pag ibeng piyaboway wa in kaimo talnakiyan angkataw kamo kasokponan din Abraam. ¹⁰ Angkataw ako in Bodang Mangyan atai pataboy matang pamangkiten osai pabowayen in mga malibangaw. ¹¹ Kataw agparengey kay in mga mangyan giisod Isos osai ka alimbawa, angkataw siyo agkabangen wa rateng sa Irosalim, kalbas in remrem in mga mangyan keyen toloy wa batay agpapoon in Diyos. ¹² Siyo keyen, Apo osai ka mangyan apo tongkolin batay pataboy sa adayonaw pag kobat matang piyangwat poon lakoy. Kalbas paka siyo poon wa siyo batay wakay moli. ¹³ Bayo siyo panaw kansiyo biyerya in sampo sa kansiyo mga sogowan. Sa baatte osai kansiyo piyaalapet in osai ka kowarta in kalakoyen tolo ka bolan agpanawen. Siyo keyen, Ina kanyo paistobowen anggan ako rateng. ¹⁴ Kamay in kansiyo mga kabelagan agkabais sa kansiyo. Paka siyo panaw siro agsogo mga mangyan agsabi sa batay agpangwat poon sa kansiyo keyen, Kami dayo ina pag mangyan agsakop sa kanyam. ¹⁵ Kamay siyo piyangwat din poon lakoy. Siyo moli wa, kalbas kansiyo biyerya in kansiyo mga sogowan piyaalapetan kowarta, matang kansiyo atawanan no nangkalakoy in mistobo sa baatte osai. ¹⁶ Pasabangen in osai, kalbas siyo keyen, Laki, in kaimo piyaalapet kowarta sa kangay mistobo anggan sampo. ¹⁷ Keyen in poon, Aa yadi, kao maal pag sogowan. Kataw kao yewed aglimbang sa kalakoyte na kao kangay piyagpangwat poon sa sampo ka bayan. ¹⁸ Pasabangen wakay in kadowai. Siyo keyen, Laki, in kaimo piyaalapet kowarta sa kangay mistobo anggan lima. ¹⁹ In poon keyen, Na kao kangay piyagpangwat poon sa lima ka bayan. ²⁰ Pasabangen wakay in katolo ka sogowan. Siyo keyen, Laki, in kaimo kowarta anda daan. Kangay tiyeem sa osai ka panyo, kalbas kangay biyetang. ²¹ Ako agkalimo sa kaimo nangkataw kao matapang pag mangyan. Kaimo piyagkowa in yewed kaimo, kaimo piyagani in yewed kaimo yaasik. ²² Siyo siyabiyan in poon keyen, Kao daeten pag sogowan. Sa kaimo siyabi, asin daan kao kangay piyagparosa. Kaimo atawanan ako matapang. Kaimo piyagsabi kangay piyagkowa in yewed kangay, kangay piyagani in yewed kangay yaasik. ²³ Na nakay batang in kangay kowarta yewed kaimo siyoroy sa bangko, matang no ako rateng wakay kangay batay makowa In kangay kowarta anggan in pakinabang? ²⁴ Kadogay kansiyo siyabi sa mga asina keyen, Kanyo kowaen sa kansiyo in kowarta, kalbas taboyen sa apo sampo. ²⁵ Siro keyen, Laki, siyo apo wa sampo ka kowarta. ²⁶ Keyen wakay in poon, Kangay piyagsabi sa kanyo, in baatte apo na piyagpakan kay, kamay in idapo na kadayo in agitera sa kansiyo piyagkowa wa din. ²⁷ Kamay in mga aglaban sa kangay, in mga dayo pasakop sa kangay, siro atai babaen, kalbas bonowen sa kangay pangkit. ²⁸ Paka ina masabi wa Isos, na siyo tokaw wa pataboy sa Irosalim. ²⁹ In siyo bangen wa sa mga bayante Bitpagi osai Bitanya sa boksor Olibowan, kansiyo siyogo in dowai ka agadar. ³⁰ Kansiyo siyabi keyen, Kamo pataboy ista pag bayante. Sa soromokan wa kanyo batay ngiitan piyageket osai ka asno. Siyo bodang kay, yewed kay batang siyakayan mangyan. Kanyo lowaten, babaen atai. ³¹ No apo agtanong kanyo keyen, Nakay batang kanyo piyaglowat, na sabiyen, Piyagkailangan in Kapwan. ³² Panaw wa in dowai ka sogowan, kansiro ngani ngiitan in asno kataw in siyabi Isos. ³³ In kansiro piyaglowat in asno, in mga kapwan keyen, Nakay batang kanyo piyaglowat ina? ³⁴ Siro keyen, Piyagkailangan in Kapwan. ³⁵ In asno biyaba wa kay Isos, in kansiro mga islen piyadamig sa awak in asno, kalbas Isos piyasakay. ³⁶ Agipanaw wa Isos, piyadamig wakay in mga mangyan in kansiro mga islen sa kansiyo batay dalan. ³⁷ Paka bangen wa sa bayan lakoy, agongali wa sa boksor Olibowan, agpalkaanggayan in karowan mga agadar, maksen agmaal sa Diyos panawen sa kansiro mga ngiitan in boo mga makasoyo. ³⁸ Siro keyen, Pagmaalen in poon lakoy in agrateng apo piyagbaba in kabaloyan in Kapwan. Apyaan sa langit. Pakalakonawen in Diyos sa langit. ³⁹ Apo mga Parisiyo sa karowan miplaong kay Isos keyen, Laki Agpamatoldo, kaimo sabiyanen in kaimo mga agadar. ⁴⁰ Keyen wakay Isos, Kangay piyagsabi sa kanyo, no siro idwa agiplaong, na in mga bato wa in batay mango. ⁴¹ Paka Isos bangen wa sa Irosalim, kansiyo wa piyagngitan, siyo manangis wa ⁴² keyen, Dayem nges kanyo atawanan ngona pag ibeng no nakay in padalan matang kamo apyaan. Kamay yewed. Ina ngona piyagbengbeng wa sa kanyo remrem. ⁴³ Agrateng in mga ibeng kamo batay piyagbengbeng in mga aglaban sa kanyo, siro batay agribok sa kanyo anggan idapo wa batay dalan kamayba saano agbangen. ⁴⁴ Kamo in mga agbalay asin pag bayan, kamo boo batay biyono, kanyo bayan riipor anggan. Idapo wa batay mitera bato agisapaw sa osai wakay ka bato. Angkataw yewed kanyo atawanan in agrateng in Agpamaboway. ⁴⁵ Isos misoroy sa balay lakoy Diyos. Kalbas piyamoyaw in mga asin agpamabili. ⁴⁶ Kansiyo siyabi sa kansiro keyen, In siyabi in mga Agisolat keyen, Keyen in Diyos, In kangay balay, balay pagpandalanginan. Ina in siyabi kamay anda pag balay kanyo piyangwat pagpatagowan mga agpanakaw. ⁴⁷ Isos ibengibeng agpatoldo sa balay lakoy Diyos. In mga poon sasirdoti osai in mga agpatoldo in mga Batas, osai in mga koyay sa mga mangyan, siro agpamangkit padalan matang siyo mabono. ⁴⁸ Kamay siro idapo ngiitan padalan no nangkataw ina batay mibaloy, angkataw in mga mangyan boo agkasadapan agparengey sa kansiyo.

¹ Osai ka ibeng in Isos agbarita sa mga mangyan sa balay lakoy Diyos, agpatoldo in Maal pag Barita, pasabangen sa kansiyo in mga poon sasirdoti, osai in mga agpatoldo in mga Batas, osai din in mga koyay sa mga mangyan. ² Siro keyen, Sabiyen kao sa kanyam no nakay in kaimo kabaloyan agpangwat ina pag mga kataw ina, no nakay in agsogo sa kaimo? ³ Keyen Isos, Ako din apo tanong sa kanyo. ⁴ In Owan agbaotismo nakay in agsogo sa kansiyo, no in Diyos, no in mga mangyan? ⁵ Siro wakayte agpaypolongan keyen, No kantam siyabi keyen in Diyos, na kansiyo wakay piyagsabi keyen, Na nakay batang kamo yewed maniwala kay Owan? ⁶ Kamay no kantam wakay siyabi keyen in mga mangyan, na kitam batay biyono in mga mangyan, angkataw sa kansiro atawanan Owan osai ka poropita. ⁷ Matang siro keyen, Kami yewed katawan no nakay in agsogo kay Owan. ⁸ Siyabi Isos sa kansiro keyen, Na ako din idbatay agsabi sa kanyo no nakay in agsogo sa kangay agpangwat ina pag mga kataw ina. ⁹ Kay Isos giisod sa mga mangyan anda pag alimbawa keyen, Apo osai ka mangyan manogda balagen piyagawit obas sa kansiyo alamanan. Kalbas kansiyo piyaalapet sa mga mangyan. Kalbas siyo pataboy sa adayonaw. Dogay siyo ista. ¹⁰ Paka kaobasen wa kansiyo siyogo osai ka sogowan sa mga agalapet matang kiyowa in kansiyo bagiyan. Kamay in sogowan biyogbog in mga agalapet, piyaoli idapo piyagbaba. ¹¹ Kalbas siyo agsogo wakay osai ka sogowan. Ina din kansiro biyogbog, piyamalowasan, piyaoli din idapo piyagbaba. ¹² Kalbas kansiyo kay piyataboy ista in katolo, ina kansiro kay din siyogatan, biyoyaw. ¹³ Kalbas in kapwan obasan agremrem keyen, Nakay lames in kangay maal piyangwat? In kangay wa bodang in pataboyen wa, in kangay piyagpakayawte. Siro idbatay mangaas aglaban sa kansiyo. ¹⁴ Kamay paka in bodang ngiitan in mga agalapet siro maypolongan keyen, Anda wa in batay kapwan dogayan, kantam wa bonowen, matang kantam wa dogayan in kansiyo nges batay mga sangkap. ¹⁵ Kalbas siyo kansiro giyoyod sa balabaan in obasan, kalbas biyono. Na nangkataw wa lames in batay piyanawen in kapwan obasan sa mga agalapet? ¹⁶ Siyo batay ista, batay kansiyo piyagbono in mga daeten pag mga agalapet, kalbas in obasan piyaalapet sa mga roma. Paka ina arengeyan in mga mangyan, siro keyen, Adey, ayaw nges kataw ina. ¹⁷ Kalbas siro piyagterekan Isos, siyabi keyen, Na nakay in beet siyabi anda pag talata sa mga Agisolat keyen, In bato piyangidangan in mga agtadyok balay, na siyo wa in mibaloy in lakonaw sa boo. ¹⁸ In malabo asin pag bato batay madodog, kamay in alabowan ina batay malesa. ¹⁹ In mga agpatoldo in mga Batas osai in mga poon sasirdoti beet nges kabelen Isos ina daan pag betek, angkataw kansiro wa atawanan siro wa daan in piyagsabiyan ina pag alimbawa. Kamay siro yewed mangaas angkataw siro agkalimo sa mga mangyan. ²⁰ Kalbas siyo kansiro piyagriwa, agpamangkit kabetek. Siro agsogo mga mangyan agpakagwali waget agkaanggay kay Isos. In kansiro beet Isos masalaod sa kansiyo mga agiplaong, anggan apo dailan matang Isos biyaba wa sa gobirnador. ²¹ Siyabi kay Isos ina pag mga sogowan keyen, Laki Agpamatoldo, kanyam atawanan betek in kaimo mga piyagsabi, in kao agpatoldo. Kao yewed agpangidang mangyan, no yewed totoo in kaimo piyagpatoldo in mga ogali piyagpamangkit Diyos sa mga mangyan. ²² Na nakay in maal sa mga Batas, no agbayad bowis sa poon lakoy Sisar, no ayaw wa? ²³ Kamay atawanan Isos in kansiro daeten pag remrem, matang kansiyo siyabi, ²⁴ keyen, ako paatangen osai ka kowarta bakal. In rarawan atai nakay pag mangyante, osai kay nakay ngaran in agisolat atai? Siro keyen, Kay Sisar. ²⁵ Siyabi Isos keyen, Na taboyen kay Sisar in sa kansiyo, osai sa Diyos in sa Diyos. ²⁶ Siro diyaeg wa. Isos idbatay kansiro masalaod sa kansiyo mga agiplaong asin sa pangkit in mga mangyan. Siro agsoyo sa kansiyo siyabi, kalbas siro idwa aglalae. ²⁷ Apo mga Sadosiyo pasabangen kay Isos. In mga Sadosiyo in mga agsabi in mga matay wa idbatay boway wakay. Kansiro siyabi kay Isos keyen, ²⁸ Laki Agpamatoldo, Mowisis apo siyolat sa kantam keyen, No apo taybalang idapo kay bodang matay wa in lalaki, na in babai kowaen wakay in kansiyo belag. No mamodang na paapowen ista pag matay. ²⁹ Apo tayariyan pito ka kaliyakiyan. In panganay mamabaiyen wa, toloy matay idapo kay bodang. ³⁰ Miskapet wakay sa balo in waraan, matay din. ³¹ In katolo kataw daan ina, anggan sa pito. Boo miskapet asin pag kagbaiyan ina pag pito, boo daan matay idapo bodang. ³² Sa kalobosan matay wakay in kagbaiyan. ³³ Na no apo boway wakay, na asin pag pito nakay in kansiyo wa gayed lalaki? Angkataw kansiyo boo liyalaki ina pag pito. ³⁴ Siyabi wakay Isos keyen, In ngona pag boway in mga mangyan agbabai, aglalaki, ³⁵ kamay in mga mangyan piyamaal wa piyaboway wakay, in mga agkaboway dogayan, na idapo wa agbabai aglalaki. ³⁶ Siro idwa agkatay angkataw siro kataw wa mga angil. Siro mga bodang Diyos angkataw siro piyaboway wakay. ³⁷ Sa kay Mowisis daan siyolat, kantam atawanan in mga matay piyagpaboway wakay. Baina, sa kabetek apo in yangawte agigang, in Kapwan kansiyo piyagawit keyen in Diyos piyagmaal Abraam, piyagmaal Isaak, piyagmaal Akob. ³⁸ Na no kora Abraam agmaal sa Diyos na in beet siyabi kamayba siro matay siro boway wakay. ³⁹ Siyabi in kalaati in mga agpatoldo in mga Batas keyen, Laki Agpamatoldo, maal in kaimo sagot. ⁴⁰ Idapo wa agpangaas agtanong kay sa kansiyo kamayba nakay. ⁴¹ Siyabi Isos sa kansiro keyen, Nakay batang piyagsabi keyen in Kiristo kay Dabid kasokponan? ⁴² Dabid wa daan in agsolat sa aklat mga Awit keyen, Siyabi in Kapwan sa kangay Kapwan keyen, Kao tomokkaw atai sa kangay pamalang agbangen, kao kangay bisi ⁴³ anggan in mga aglaban sa kaimo, boo wa kangay piyasakop sa kaimo. ⁴⁴ Na no in Kiristo piyagawit din Dabid keyen Kapwan, na nakay batang piyagsabi keyen in Kiristo kay Dabid kasokponan? ⁴⁵ Agparengey daan in mga mangyan, siyabi Isos sa kansiyo mga agadar keyen, ⁴⁶ Kamo agingat sa mga agpatoldo in mga Batas. Siro agkasadapan aglambong maaba in siro agipanawan. Kansiro din beet siro piyagpakabwat in mga mangyan sa mga bayan, beet din in mga maal pag panokkawan sa mga balay pagpaniponan, osai in pagpanokkawan in mga poon sa mga piyasta. ⁴⁷ Kamay siro agpanggolpi sa mga kagbaiyan balo, siro agpapangkit waget sa mga mangyan siro agpandalangin dogay. Maloba in batay parosa sa kansiro.

¹ Isos mangkit, kansiyo ngiitan in mga aronaw sangkap agso roy kowarta sa pagpanyanganan andog sa balay lakoy Diyos. ² Kansiyo din ngiitan osai ka maidap, kagbaiyan balo agsoroy dowaite ka sintimos. ³ Isos keyen, Kangay piyagsabi sa kanyo, ina pag balo kamayba maidap, in kansiyo siyoroy labi kay kalakoy karai in sa aronaw sangkap. ⁴ Angkataw kansiro tiyaboy in idwa kansiro kailangan. Kamay ina pag balo, kamayba maidap wano, kansiyo tiyaboy in boo kansiyo pamili pamangnen. ⁵ Piyagbarogi in kalaati sa kansiyo mga agadar keyen, In kaalenen in balay lakoy Diyos, in kalakoyen in mga bato piyabengbeng, osai in boo makaanggay asin tiyaboy mga mangyan sa Diyos. Kamay siyabi Isos ⁶ keyen, Ina pag kanyo piyagngitan bato, agrateng in kabetek idapo batay mitera bato agisapaw sa osai wakay ka bato. ⁷ Kansiro siyabi kay Isos keyen, Laki Agpamatoldo, nangkadogay kay batay mibaloy ina? Nakay in tandaan kami keyen batay wa masida in balay lakoy Diyos? ⁸ Keyen wakay Isos, Kamo agingat, karam kamo batay piyadaya mangyan. Angkataw aronaw in batay agrateng agalapet kangay ngaran keyen siro in Kiristo, osai keyen rateng wa in kabetek. Kamo ayaw miyanggat sa kansiro. ⁹ No kamo karengey barita mga gira, mga kagolowan, na kamo ayaw agkalimo. Kailangan tokaw apo mga kataw ina, kamay yewed kay toloy rateng in kalobosan. ¹⁰ Kansiyo kay siyabi keyen, Osai ka bansa batay aggira sa osai ka bansa, osai ka sakopan aglaban sa osai ka sakopan. ¹¹ Batay apo loni lakoy lakonaw, apo batay agkayawes, apo batay pandalan mangaskit sa baatte kobat. Apo din batay lomwas mga makalimo osai mga makasoyo pag mga tanda batang sa langit. ¹² Kamay bayo mibaloy ina pag boo kamo batay piyagdakep, batay piyagpangwatan daet. Kamo batay piyagbaba sa mga balay pagpaniponan matang osapen, kalbas piyagbilanggo. Panawen din sa kangay kamo batay piyagpaadap sa mga poon lakoy osai sa mga gobirnador. ¹³ Na ina pag betek kamo batay kapatoldo in Maal pag Barita. ¹⁴ Pakaeyaten in kanyo remrem, kamo ayaw toloy agkalimo agremrem no nakay in kanyo batay matiwid, ¹⁵ angkataw kamo kangay batay piyagpakan kabaloyan osai mga matiwid idbatay alabanan idbatay adaeg in kanyo mga kalaban. ¹⁶ In kanyo mga koyay in batay agpadakep sa kanyo, osai in kanyo mga belag, in kanyo mga kamalay, mga pagbelag. Kalbas in kalaati sa kanyo batay piyagbono. ¹⁷ In boo batay agkabais sa kanyo panawen sa kangay. ¹⁸ Kamay idbatay maidapo kamayba osai wagette ka kanyo abok. ¹⁹ Kamo agpakarigen wa gayed, na kamo batay apo in boway idapo kalobosan. ²⁰ No kanyo ngiitan in Irosalim piyagribok wa mga sondalo, na kanyo wa atawanan bangen wa ina masida. ²¹ Na pataboy wa sa agbaw in mga sa kobat Odiya. In mga sa bayan panaw wa, ayaw din pataboy asin in mga sa kobat. ²² Angkataw ina wa in kabetek in Diyos batay agparosa sa mga kasokponan Israil, matang mibaloy in boo mga Agisolat. ²³ Asin pag kabetek ayawte wa in mga bonting, osai in mga agpasoso, angkataw batay rateng atai pag kobat in maloba pag kaidapan, in mga mangyan atai batay piyagparosa Diyos. ²⁴ Siro batay biyono sa gira, no yewed batay piyagbaba sa roma pag mga kobat matang piyangwat sogowan. In bayan Irosalim batay piyagsida wa gayed in mga yewed Odyo anggan kalbas wa in kabetek in mga yewed Odyo piyagpakan Diyos kabaloyan. ²⁵ Batay apo mga tanda sa ibeng, osai sa bolan, kadayo sa mga magirem. Sa kobat in dagat batay agaleng agistobo anggan in mga mangyan batay magolo in remrem, maloba alimowan. ²⁶ In mga mangyan batay maidapo in remrem agkalimo panawen agkariyaban sa mga batay mibaloy sa kobat, angkataw batay piyagpagolo in mga apo kabaloyan sa kiwang. ²⁷ Asin pag betek ako in Bodang Mangyan batay ngiitan mga mangyan sa osai ka libo agrateng wa ngani apo lakoy kangay kabaloyan, piyagngitan wa in kangay kalakoyen. ²⁸ No agparakay wa mibaloy ina pag boo, na kamo ayaw wa agrongkot, agkaanggay wa, angkataw agkabangen wa kamo piyaboway. ²⁹ Siyabi Isos sa kansiro osai ka alimbawa keyen, Kanyo pangkiten in yangaw igos osai in roma kay pag mga yangaw. ³⁰ No ina agpandaon wakay na kanyo atawanan agkaboka wakay in pangibeng. ³¹ Na kataw daan ina no kanyo ngiitan agpangibaloy wa ina in kangay mga siyabi, na kanyo wa atawanan bangen wa in Diyos agsakop. ³² Remremen kamo, bayo matay in boo mga mangyan agkaboway ngona ina pag boo batay wa mibaloy. ³³ Batay maidapo in langit osai in kobat, kamay in kangay mga siyabi idbatay maidapo. ³⁴ Alapeten in kanyo remrem, ayaw malibangaw, ayaw agpamiyasta, agpanlasing, agpanremrem waget sa mga makariyaban atai sa kobat, karam kamo yewed kay sandata toloy wa abel ina pag Ibeng. ³⁵ Angkataw in boo mga mangyan sa boo kobat batay aratengan ina pag Ibeng. ³⁶ Na kailangan kamo palagi agdamay ayaw aglimbang agpandalangin, matang kamo apo kabaloyan agdalan asin pag boo mga batay mibaloy idapo kamay nakay, kalbas kamo kapasabangen sa kangay sa Bodang Mangyan. ³⁷ Agpamatoldo Isos ibengibeng sa balay lakoy Diyos. Bayaponbayapon siyo agonaker sa boksor Olibowan, ista siyo agpamataw yabi. ³⁸ Agpasodip in mga mangyan pataboy sa balay lakoy Diyos matang agparengey sa kansiyo.

¹ Agkabangen wa in piyasta piyagawit Paskowa, in siro agkoman tinapay idapo pamaistobo. ² In mga poon sasirdoti, osai in mga agpatoldo in mga Batas agpamangkit padalan matang Isos mabono, in idbatay atawanan in mga mangyan, angkataw siro agkalimo sa mga mangyan. ³ Ina pag betek misoroy Katanas sa galem Odas in piyagawit Iskariyoti, siyo in osai sa Labing Dowai ka agadar. ⁴ Kalbas siyo panaw pataboy sa mga poon sasirdoti osai sa mga poon mga agdamay sa balay lakoy Diyos. Odas keyen, Kangay wa piyagpadakep Isos. Kalbas siro maypolongan in padalan matang diyakep. ⁵ In mga poon anggayan, batay piyakan kowarta Odas. ⁶ Kalbas Odas mangako wa. Sogod asin siyo agpamangkit wa padalan matang Isos madakep in yewed atawanan in karowan mangyan. ⁷ Sa mga ibeng in Piyasta in agkoman tinapay idapo pamaistobo, rateng wa in ibeng agbono in bodang topa sa yapon piyagawit Paskowa. ⁸ Siyogo Isos Pidro osai Owan keyen, Kamo ista wa, sandataen in kantam Yapon sa Paskowa. ⁹ Siro keyen, Saano kaimo beet kami agsandata? ¹⁰ Keyen wakay Isos, Kamo pataboy sa bayan. Sa bosngawan apo batay tomagbo sa kanyo osai ka kaliyakiyan agbaba galon sapa. Kanyo agaken siyo anggan sa balay kansiyo isoroyan. ¹¹ Kanyo sabiyen sa kapwan balay keyen, In Agpamatoldo agsabi no saano lames in maal siyo mamangan in Yapon sa Paskowa kadayo in kansiyo mga agadar. ¹² Na batay kansiyo piyatoldo sa kanyo in osai ka lakonaw pag basag sa ogbos, apo din mga sangkap. Ista kamo agsandata. ¹³ Panaw wa in dokalaki, kansiro ngani ngiitan in boote siyabi Isos. Kalbas kansiro wa siyandata in Yapon in Paskowa. ¹⁴ Paka rateng wa in kabetek, Isos tomokkaw wa batay agkoman osai in kansiyo mga katiwala. ¹⁵ Kansiyo siyabi keyen, Dogay wa ako agpanaya matang kitam ngona agpaylanglangan agkoman anda pag Yapon sa Paskowa bayo ako pataboy sa kaidapan. ¹⁶ Kangay piyagsabi sa kanyo ako idbatay wa tagoli mamangan Paskowa anggan sa mibaloy wa sa sakopan Diyos in piyagalimbawa atai. ¹⁷ Kalbas yaatang Isos in pagpangineman, agpasalamat sa Diyos, kalbas keyen, Anda kanyo kowaen, kamo malbagiyan. ¹⁸ Angkataw kangay piyagsabi sa kanyo, sogod ngona ako idbatay wa minem sapa batang sa obas anggan yewed kay rateng in Diyos agsakop. ¹⁹ Kalbas kansiyo kiyowa in tinapay, agpasalamat sa Diyos, kansiyo piyandodo, kalbas tiyaboy sa kansiro. Kansiyo siyabi keyen, Anda in kangay bilog piyagtaboy panawen sa kanyo. Kanyo wa komanen agremrem sa kangay. ²⁰ Kataw din ina paka kalbas wa agyapon kansiyo wakay yaatang in pagpangineman, keyen, In galem anda pag pangineman in bayo wakay pag kasondowan Diyos, in kangay daya in panrigen, in piyagpabobo panawen sa kanyo. ²¹ Kamay in osai sa kanyo in kangay mga sarig agkoman in batay agpadakep sa kangay. ²² Ako in Bodang Mangyan batay maablaw kataw in remrem Diyos, kamay makapangirabot in batay parosa sa mangyan agpadakep sa kangay. ²³ Kalbas siro agpaypolongan keyen, Nakay sa kantam in batay agpangwat ina? ²⁴ In mga agadar agpalagawan no nakay sa kansiro in piyagpakalakoy. ²⁵ Siyabi Isos sa kansiro keyen, In mga poon lakoy sa mga yewed Odyo agsakop sa mga sakop sa kansiro, in mga mabwat kansiro piyagawit Koyay. ²⁶ Kamay ayaw kataw ina sa kanyo. Sa kanyo kailangan in mabwat kataw bongsowan. Kailangan in agpakoyay kataw sogowan. ²⁷ Osai in koyay in agsogo, osai in bodang in piyagsogo, na piyagpakalakonaw in agsogo agbangen, aon? Kamay ako agyanggat sa kanyo, matang kanyo sogowan. ²⁸ Kamo agaway agiyanggat sa kangay sa kangay mga kaidapan. ²⁹ No nangkataw ako piyakan kangay Amang kabaloyan agpapoon lakoy, na kataw din ina kamo kangay piyagpakan kabaloyan agpapoon, ³⁰ matang kitam agpaylanglangan osai agpalpangineman sa kangay sakopan. Osai kamo batay mga agpapoon sa labing dowai ka tiribo mga kasokponan Israil. ³¹ Isos keyen, Simon, Laki Simon, mamarengey kao. Tiyaboy kay Katanas in kansiyo yaayay, in kamo boo tepengen kataw in paray piyaglayap. ³² Kamay kao kangay piyandalangin matang marigen in kao agpasandig sa Diyos. Kalbas paka kao moli wakay sa kangay na kaimo din pakarigenen in kaimo mga pagbelag. ³³ Keyen wakay Pidro, Laki Kapwan, ako sandata wa piyagbilanggo, kamayba biyono sarig kaimo. ³⁴ Keyen wakay Isos, Laki Pidro, kangay piyagsabi sa kaimo, bayo tomalaok in manok ngona daan pag yabi, ako makatolo kaimo batay piyamangyan. ³⁵ Siyabi Isos sa kansiro keyen, In kamo tangona kangay siyogo idapo piyagbaba sokloban, galang, sinilas, nakay, apo lames korang sa kanyo? Siro keyen, Idapono. ³⁶ Siyo keyen, Kamay ngona no kamo apo sokloban na babaen, osai galang. No idapo pisaw, na paalisen in kanyo islen, bomili wa pisaw. ³⁷ Angkataw kangay piyagsabi sa kanyo in siyabi sa mga Agisolat keyen, Siyo piyaagem sa mga aleleng. Na kailangan ina mibaloy sa kangay, angkataw ngona agibaloy wa in agisolat panawen sa kangay. ³⁸ Siyabi in mga agadar keyen, Laki Kapwan, apo dowai ka pisaw. Keyen Isos, Sibay wa ina. ³⁹ Isos panaw wa sa bayan, kalbas kataw in kansiyo datiyan piyagpangwat siyo pataboy sa boksor Olibowan. Miyanggat in kansiyo mga agadar. ⁴⁰ Paka ista rateng kansiyo si yabi sa kansiro keyen, Kamo din mandalangin matang kamo idbatay piyagtepeng. ⁴¹ Isos panaw sa kansiro anggan kadayo benglayan bato. Asin siyo agpaereng agpandalangin, ⁴² keyen, Amang, no nges maal sa kaimo, na ayaw wa sa kangay anda pag kaidapan. Kamay ayaw in kangay beet in mibaloy, dayem in kaimo daan. ⁴⁵ Paka kalbas agpandalangin Isos tomaydek, pataboy wakay sa mga agadar. Kansiyo aratengan siro agpalpagesek apagodan angkataw maloba agpanremrem. ⁴⁶ Isos keyen, Nakay batang kamo agesek? Miyorog wa, mandalangin wa matang kamo idbatay piyagtepeng. ⁴⁷ Agiplaongan kay Isos agpaypanrateng wa in aronaw mangyan, in agpanokaw in piyagawit Odas, kaagem sa Labing Osai. Pasabangen siyo kay Isos, batay kiyapet. ⁴⁸ Keyen Isos sa kansiyo, Laki Odas, in agkapet sa kangay in kaimo mana padalan agpadakep sa Bodang Mangyan? ⁴⁹ Paka ngiitan in mga agadar sarig Isos in batay mibaloy siro keyen, Laki Kapwan, nakay, kami agpalang wa? ⁵⁰ In sogowan in mabwat pag poon sa mga sasirdoti piyalang wa in osai ka agadar, maagis in kansiyo talinga, in sa pamalang agbangen. ⁵¹ Kamay keyen Isos, Siyana, ayaw wa ina. Kansiyo kiyapkap in talinga in sogowan, mibalay wakay. ⁵² Miplaong Isos sa mga poon sasirdoti, osai sa mga poon mga agdamay sa balay lakoy Diyos, osai sa mga koyay in ista pataboy matang siyo dakepen. Isos keyen, Ako nakay, tolisan? Baina kamo malitaboy atai agbaba mga pisaw, mga garoti? ⁵³ Bago ibengibeng ako agpatoldo sa balay lakoy Diyos, kamo ista din, kamay ako yewed kanyo diyakep. Kamay ngona wa in kanyo kabetek. Agsakop wa in diyablo. ⁵⁴ Isos kansiro wa diyakep, biyaba sa balay in mabwat pag poon sa mga sasirdoti. Pidro mangagak sa kansiyo kamay adayonaw in paywaraan. ⁵⁵ In mga mangyan sa tongkodan agpoypoy baya, agpalpanokkaw, agpalpanayang. Pidro agiyagem sa kansiro. ⁵⁶ Siyo ngiitan osai ka sogowan kagbaiyan. Kalbas agriwa wa gayed sa kansiyo keyen, Ina pag mangyan sarig din Isos. ⁵⁷ Kamay Pidro aglaban keyen, Aa, yewed kangay atawanan ina. ⁵⁸ Paka dogay wakayte siyo ngiitan wakay in osai ka kaliyakiyan keyen, Kao din osai ka kansiyo sarig, aon? Kamay keyen Pidro, Aa yewed, laki. ⁵⁹ Kadalan wakay labi kayte kadogay agtongtong, in osai kay ka kaliyakiyan agpakarigen wa gayedte in piyagsabi keyen, Amatangan wa daan ngani siyo wa in sarig. Baina, siyo din taga Galiliya. ⁶⁰ Kamay keyen wakay Pidro, Laki, yewed kangay atawanan in kaimo piyagsabi. Siyo agiplaongan kay toloy wa tomalaok in manok. ⁶¹ Patobang wa Isos agterek wa gayed kay Pidro. Toloy wakay riyemrem Pidro in siyabi in Kapwan sa kansiyo keyen, Bayo tomalaok in manok ngona daan pag yabi ako makatolo kaimo batay piyamangyan. ⁶² Pidro pabokod wa, manangis wa gayed maloba. ⁶³ Isos piyagmesa osai piyamogbog in mga agdamay sa kansiyo. ⁶⁴ Tiyabon in kansiyo mata, siyabi keyen, Amba kaimo sabiyen no nakay in bomogbog sa kaimo. ⁶⁵ Labi kayno gayed siyo kansiro piyagsabiyan daet. ⁶⁶ Paka ibeng wa agkatipon in boo mga koyay, in mga poon sasirdoti, osai in mga agpatoldo in mga Batas. Siro in boo tanongan in mga Odyo. Kalbas Isos piyaadap, kansiro piyagosap. ⁶⁷ Siro keyen, Kaimo wa sabiyen sa kanyam, kao lames in Kiristo? Isos keyen, Kamayba siyabi sa kanyo, kamo idbatay daan maniwala. ⁶⁸ No kangay wakay tiyanong kamo, kamo idbatay daan somagot. ⁶⁹ Kamay ibat ngona in Bodang Mangyan batay tomokkaw sa pamalang agbangen Diyos in apo lakoy kabaloyan. ⁷⁰ Siro boo keyen, In kaimo mana beet siyabi kao in Bodang Diyos? Keyen wakay Isos, Kamo wa in agsabi, yewed ako. ⁷¹ Keyen siro, Idwa kailangan kitam agpamangkit kay agpatonay. Kitam wa daan karengey in kansiyo wa daan agiplaong.

¹ Tomaydek in boo mga koyay, Isos kansiro biyaba kay Pilato. ² Piyarakay kansiro siyombong keyen, Kanyam abel anda pag kaliyakiyan agrengke sa mga mangyan agsonggar sa batas. Siyo agayaw agbayad bowis kay Sisar, kansiyo din piyagsabi siyo in Kiristo, osai ka poon lakoy. ³ Siyabi Pilato kay Isos keyen, Kao lames in poon lakoy in mga Odyo? Siyabi Isos keyen, Kao wa in agsabi. ⁴ Siyabi Pilato sa mga poon sasirdoti kadayo din sa mga mangyan keyen, Ako idapo ngiitan daet asin pag mangyan. ⁵ Kamay siro agpilit kay keyen, Panawen sa kansiyo mga piyatoldo kansiyo piyagrengke in boo mga mangyan atai sa kobat Odiya agsonggar sa batas. Agparakay sa Galiliya, kalbas ngona atai wa sa Irosalim. ⁶ Paka Pilato karengey ina siyo keyen, Isos mana taga Galiliya? ⁷ Paka kansiyo atawanan Isos batang sa sakopan Irodis in poon lakoy sa Galiliya Isos kansiyo piyababa kay Irodis. Angkataw ina pag betek Irodis sa Irosalim. ⁸ Paka Isos ngiitan, Irodis agkaanggay wano, angkataw makarowan wa siyo mga abaritaan panawen kay Isos, kalbas dogay wa kansiyo beet ngiitan. Kansiyo piyagpanaya Isos agpangwat makasoyo, beet kansiyo ngiitan. ⁹ Matang Isos kansiyo piyagbotog anggan, kamay yewed meles kamayba kalakoyte. ¹⁰ Agaway kay din in mga poon sasirdoti osai in mga agpatoldo in mga Batas, siro yewed agempet Isos piyagsombong. ¹¹ Isos piyagmesa piyaglibak Irodis kadayo in kansiyo mga sondalo, siyoroy sa kansiyo maalen wano pag lambong. Kalbas Isos piyaoli wakay kay Pilato. ¹² Datiyan agpalaway osai Irodis osai Pilato, kamay ina pag ibeng siro agpaybelag wa. ¹³ Piyaberya Pilato in mga poon sasirdoti, kadayo in mga koyay, anggan in mga mangyan. ¹⁴ Kalbas siyabi keyen, Anda pag kaliyakiyan kanyo piyaadap sa kangay, kanyo piyagsabi keyen siyo agrengke sa mga mangyan agsonggar sa batas. Kamay ngona siyo kangay biyotog sa kanyo adap, kalbas kangay ngiitan in kanyo piyagkabintang sa kansiyo yewed betek. ¹⁵ Kadayo Irodis idapo ngiitan daet sa kansiyo, matang siyo piyaoli wakay sa kangay. Siyo idapo daet, siyo yewed maal biyono. ¹⁶ Na siyo kangay piyagpabogbog kalbas piyagpalpas. ¹⁸ Kamay siro mayraesan mango keyen, Ina pag mangyan bonowen. Barabas in palpasen. ¹⁹ Kaya Barabas mabilanggo panawen siyo agsonggar sa batas osai agpanggolo sa Irosalim, panawen din siyo agbono mangyan. ²⁰ Pilato miplaong wakay sa kansiro panawen kansiyo beet Isos palpasen. ²¹ Kamay in mga mangyan mango kay keyen, Pakowen sa kodos, siyo pakowen sa kodos. ²² Sa katolo kay Pilato siyabi keyen, Nakay batang? Nakay in kansiyo piyangwat daet? Ako idapo ngiitan daet matang siyo piyabono, na siyo kangay piyagpabogbog kalbas piyagpalpas. ²³ Kamay siro labi kay malpangowan keyen, Isos pakowen ngani sa kodos. Kalbas in kansiro pango mandaeg. ²⁴ Matang Pilato agsogo wa keyen, Siyo bonowen wa. ²⁵ Kansiyo piyalpas in mangyan mabilanggo panawen Sa agpanggolo osai agsonggar sa batas, osai agbono din mangyan, angkataw ina in kansiro piyagayay. Kamay Isos kansiyo tiyaboy sa kansiro matang pangwaten in kansiro beet. ²⁶ In kansiro piyaanggat Isos matang piyako sa kodos kansiro atagbowan osai ka kaliyakiyan batang sa kobat. Ina pag mangyan Simon taga Sirini. Siyo piilitan agbaba in kodos miyanggat kay Isos. ²⁷ In karowan mangyan mangagak kay Isos kadayo in mga kagbaiyan maloba agpanangis agkalowayan sa kansiyo. ²⁸ Isos managoli sa kansiro keyen, Laki mga kagbaiyan taga Irosalim, ako ayaw agpanangisanen. In kanyo sadiri in pagpanangisanen osai in kanyo mga bodang. ²⁹ Angkataw agrateng wa in kabetek in mga mangyan batay agsabi keyen, Agkaanggay in mga baog, in mga kagbaiyan yewed agpamodang, in mga idbatang piyanosowan bodang. ³⁰ Ina pag betek in mga mangyan batay manremrem keyen, Dayem nges kitam yopanganen wa mga boksor. Dayem nges kitam tabonanen wa mga bolod matang toloy wa matay. ³¹ Isos keyen kay, Nangkataw no kataw anda in piyagpangwat sa idapo daet, na labi kay kaloba anda in batay piyangwat sa mga apo daet. ³² Apo din piyaanggat dowai ka mangyan lakonaw wano in kansiro daet, matang bonowen kataw din Isos. ³³ Paka rateng wa siro sa kobat piyagawit Bitol Olo, Isos kansiro wa piyako sa kodos. In dowai ka apo lakoy daet piyako wa din sa mga kodos, in osai sa kay Isos pamalang agbangen in osai sa kansiyo tagwala. ³⁴ In siyabi Isos keyen, Amang, kaimo libangawen in kansiro daet angkataw yewed kansiro atawanan in kansiro piyagpangwat. Kalbas in mga sondalo malpostaan in agbagi in kansiyo mga damit. ³⁵ In mga mangyan agtaydek sa bangen agpangkit. Agpatawa sa kansiyo in mga koyay keyen, Kansiyo kono piyaboway in mga roma. Na no siyo ngani in Kiristo, in iidang Diyos, na pabowayen din in kansiyo bilog. ³⁶ Kadayo din in mga sondalo agpatawa sa kansiyo, agpasabangen agpatawtaw kagwali toba. ³⁷ Siro keyen, No kao in poon lakoy in mga Odyo, na kaimo pabowayen in kaimo bilog. ³⁸ Apo agisolat sa kansiyo ogbos. In piyagsabi keyen, Anda in Poon Lakoy in mga Odyo. ³⁹ Isos piyamalowasan in osai ka apo lakoy daet agipako sa kodos keyen, Yewed mana kao in Kiristo? Na pabowayen in kaimo bilog, kadayo in kanyam. ⁴⁰ Kamay siyo siyabiyan in osai ka agipako sa kodos keyen, Kao lames yewed agkalimo Sa Diyos? Kao piyagparosa kataw din siyo. ⁴¹ Kita maal piyarosa kataw anda. Ina betek ngani sa kanta mga piyangwat. Kamay ina pag mangyan idapo piyangwat daet. ⁴² Kalbas keyen siyo, Laki Isos, paka kao agpapoon wa na ako kaimo remremen. ⁴³ Siyabi wakay Isos keyen, Kangay piyagsabi sa kaimo, ngona daan pag ibeng kao kangay piyagpaanggat sa langit. ⁴⁴ Paka tangali wa malened wa in boo kobat anggan mangiriyan lakoy. ⁴⁵ Makelep wa in ibeng. Marognit sa kagwaraan malsowayan in damit pamengbeng sa galem balay lakoy Diyos. ⁴⁶ Isos mango lakoy keyen, Amang, in kangay abyan kangay wa piyagpaalapet sa kaimo. Paka masabi wa ina siyo matay wa. ⁴⁷ In ngiitan in kapitan mga sondalo in mibaloy, siyo agmaal wa sa Diyos. Kansiyo siyabi keyen, Totoo ngani ina maal pag mangyan. ⁴⁸ In boo mga mangyan asin agkatipon agpangkit, paka kansiro ngiitan in mibaloy siro moli wa maskit in barosen maloba agpanremrem. ⁴⁹ In boo mga pagbelag Isos kadayo in mga kagbaiyan miyanggat sa kansiyo sogod sa Galiliya, siro agitaydek sa adayonaw kayte agriwa asin pag boo mibaloy. ⁵⁰ - ⁵¹ Apo kaliyakiyan taga Arimatiya, osai ka bayan mga Odyo. Kansiyo ngaran Osi. Siyo mabait pag mangyan, maalno, agpanaya din sa kabetek in Diyos agpapoon. Kamayba siyo osai sa mga tanongan in mga Odyo siyo dayo sa kansiro piyangwat kay Isos. ⁵² Ina pag mangyan pataboy kay Pilato, kansiyo yaayay in bilog Isos. ⁵³ Kansiyo wa piyalompot, tiyeem wa benang lino, kalbas piyabolalang sa leyang kiyali sa bato lintoy, idbatang kay liyebengan. ⁵⁴ Ina Biirnis, in ibeng agsandata sa Ibeng Pamainga. Batay wa agparakay in Ibeng Pamainga. ⁵⁵ Miyanggat kay Osi in mga kagbaiyan in kay Isos batang pagsarig sogod Galiliya. Kansiro ngiitan in lebengan, kadayo in pagibolalangan in bilog Isos. ⁵⁶ Kalbas siro moli wa, agsandata mga pamada osai gamot piyagawit mira batay piyagyodyod sa bilog Isos. Kamay sa Sabado in Ibeng Pamainga siro idwa agpanawen kataw in siyabi sa mga Batas.

¹ Paka agkaboka wa Linggo in mga kagbaiyan agtaboy sa lebengan piyagbaba in mga pamada kansiro siyandata. ² Rateng wa siro, kansiro ngiitan kiyowa wa in bato pangkopot, boswang wa in sakbawan lebengan. ³ Siro misoroy kamay idapo ngiitan in bilog in Kapwan Isos. ⁴ In siro agkaidapowan remrem panawen asin, toloy ngiitan dowai ka kaliyakiyan agitaydek sa kansiro balabaan, agrawa in damit. ⁵ Siro patalegeb kataw maloba agkalimo. Siyabi in dokalaki keyen, Nakay batang kanyo piyagpamangkit in agkaboway sa pagpabolalangan mga matay? ⁶ Idapo wa atai siyo. Siyo boway wakay. Kanyo remremen in kansiyo siyabi sa kanyo in siyo sa Galiliya kay tangona, ⁷ in siyo keyen kailangan siyo in Bodang Mangyan batay piyagtaboy sa kabaloyan mga agpamangwat daet, piyako sa kodos, kalbas sa katolo ka ibeng siyo boway wakay. ⁸ Kalbas riyemrem wakay in mga kagbaiyan in siyabi Isos. ⁹ Siro moli wakay batang sa lebengan. Ina pag boo kansiro giisod sa labing osai, kadayo sa roma pag mga sarig. ¹⁰ Ina pag mga kagbaiyan kora Mariya taga Magdala, Owana, osai Mariya inang Santiyago, osai kansiro kay din pagsarig mga kagbaiyan. Siro in aggisod ina pag boo sa mga katiwala Isos. ¹¹ Kamay ina pag agiplaong kansiro riyemrem idapo kabolowan, matang idwa piyagpaniwalaan in dokabaiyan. ¹² Kamay Pidro tomaydek, domalagan pataboy sa lebengan. Siyo pabokkong paserek sa leyang, siyo idapo ngiitan no yewed in benang waget. Kalbas siyo moli agsoyo sa mibaloy. ¹³ Ina daan din pag ibeng in dowai ka mga agadar agipanaw agtaboy sa bayanan piyagawit Imaos. In kadayowen ina sa Irosalim mga labing osai ka kilomitro. ¹⁴ Kansiro piyaggisod in boo mga mibaloy. ¹⁵ In siro agbarogi agpanggisodan Isos lomwas miyanggat sa kansiro. ¹⁶ Kamay yewed kansiro atawanan keyen ina Isos. ¹⁷ Keyen Isos, In kamo agipanaw nakay ina in kanyo piyagpanggisod? Siro tomaydek wa, agpaypamaereng. ¹⁸ In osai in ngaran Kilyopas keyen, Sa boo mga mangyan agpamataw sa Irosalim ngona kao waget mana in yewed katawan in mibaloy taite wagette? ¹⁹ Isos keyen wakay, Nakay in mibaloy? Siro keyen, In mibaloy kay Isos taga Nasarit. Siyo osai ka poropita in kansiyo kabaloyan agiplaong osai agpanawen lakonaw sa pangkit Diyos osai sa boo mga mangyan. ²⁰ Siyo tiyaboy in kantam mga koyay osai in kantam mga poon sasirdoti kay Pilato matang bonowen, kalbas siyo piyako sa kodos. ²¹ Bago siyo nges in kanyam piyagpanaya batay agpalpas sa mga kasokponan Israil. Osai din sogod mibaloy ina ngona mataw wa ibeng. ²² Kamay kami agsoyo wano sa biyarita in kalaati mga kagbaiyan sa kanyam barkadaan. Siro karai pasodip pataboy sa lebengan, ²³ kamay yewed kansiro ngiitan in kansiyo bilog. Siro moli wakay agsabi siro apo ngiitan mga angil agsabi keyen Isos agkaboway. ²⁴ Matang in kalaati kanyam barkadaan pataboy din sa lebengan. Kansiro ngiitan kataw ngani in siyabi in mga kagbaiyan, kamay yewed kansiro ngiitan Isos. ²⁵ Siyabi Isos sa kansiro keyen, Nakay batang kamo kagwali idapo bait? Nakay batang kamo yewed maniwala sa boo mga siyabi in mga poropita? ²⁶ Kailangan ngani in Kiristo domalan asin pag boo kaidapan bayo kansiyo kiyowa in kansiyo kalakoyen. ²⁷ Kalbas piyatoldo Isos sa kansiro in boo piyagsabi panawen sa kansiyo sa mga Agisolat. Piyarakay sa mga siyolat Mowisis anggan din sa siyolat in boo mga poropita. ²⁸ Paka bangen wa sa bayanan pagratengan in dokalaki, Isos batay kay nges lomampas. ²⁹ Kamay siyo yaayaw wa in dokalaki keyen, Kao atai wa mesek kanyam, bayapon wa, lened wa. Matang siyo misoroy wa sa balay. ³⁰ Paka tomokkaw wa batay agkoman, kiyowa Isos in pamangnen, kadogay mandalangin wa, kalbas piyandodo in pamangnen, tiyaboy sa kansiro. ³¹ Kalbas toloy wakay siro karemrem, katawan wa keyen ina wa mana Isos. Kalbas siyo toloy wa mapasaw. ³² Kalbas siro malsiterek keyen, Kaya mana agkaanggay wano in kanta remrem in kitam agpanggisodan karai sa dalan, osai in siyo agpaliwanag sa kanta in mga Agisolat. ³³ Kalbas siro toloy tomaydek moli wakay sa Irosalim. Paka rateng kansiro ngiitan agkatipon in labing osai ka agadar kadayo in roma kay din kansiro mga pagsarig. ³⁴ Siro boo agpanggisodan keyen, Totoo ngani in Kapwan boway wakay. Siyo papangkit kay Simon. ³⁵ Giisod wakay in dokalaki in mibaloy karai sa dalan, osai in kansiro bayo atawanan keyen Isos in siyo agbagi pamangnen. ³⁶ Ina piyagpanggisodan kay in mga agadar toloy asin Isos agtaydek sa kansiro kagwaraan. Kansiyo siyabi keyen, Kamo kataw wa nakay? ³⁷ Siro ariyaban, alimowan wa keyen kablag. ³⁸ Kamay siyabi Isos sa kansiro keyen, Nakay batang magolo in kanyo remrem? Nakay batang piyagbaslag kay in kanyo remrem kataw ina? ³⁹ Pangkiten in kangay mga dalokap, in kangay mga darapa. Ako wa ngani. Ako atangen, pangkiten. In kablag idapo galem, idapo bitol. Kamay maanda, ako bilog wa daan gayed, yewed kablag. ⁴⁰ Paka siyabi wa ina piyapangkit in kansiyo mga dalokap, mga darapa. ⁴¹ Kamay siro yewed kay din katiyak panawen sa agkaanggay wano osai panawen din agsoyo. Matang kansiyo siyabi keyen, Atai lames apo pamangnen? ⁴² Siyo piyakan dodo siba isda. ⁴³ Kansiyo kiyowa, kalbas kiyoman. Siro kangitan. ⁴⁴ Kalbas kansiyo siyabi keyen, Anda wa in kangay tangona piyagsabi sa kanyo in kitam agpaysarigan kay. Kailangan ngani mibaloy in boo mga agisolat panawen sa kangay sa mga Batas Mowisis, osai in siyolat in mga poropita, kadayo in sa mga Awit. ⁴⁵ Kalbas kansiro remrem piyakapya Isos matang atawanan wa in beet siyabi in mga Agisolat. ⁴⁶ Kansiyo siyabi keyen, In siyabi sa mga Agisolat keyen kailangan in Kiristo domalan asin pag kaidapan, kalbas sa katolo ka ibeng piyaboway wakay. ⁴⁷ Osai kailangan agparakay sa Irosalim anggan sa boo mga kobat, sa kabaloyan in Kiristo ina pabaritaen sa boo mga mangyan keyen, Benglayen wa in daet matang ina liibangaw wa Diyos. ⁴⁸ Kamo in mga kangitan wa ina pag boo. ⁴⁹ Remremen, in piyangako kangay Amang batay piyagtaboy sa kanyo, ina kangay batay piyagsogo sa kanyo. Na kamo mataw daan sa Irosalim anggan kamo yewed kay piyakan in kabaloyan batang sa Diyos. ⁵⁰ Kalbas siro piyaanggat Isos, panaw wa pataboy sa bangen in bayanan Bitanya. Kalbas yoorog kansiyo bakwaw matang siro piyagpandalangin. ⁵¹ In siyo agpandalangin kay sa kansiro siyo piyagpaonaik wa sa langit, siro piyagbaliwan. ⁵² Siyo kansiro piyagmaal, kalbas siro moli wakay sa Irosalim agkaanggay wano. ⁵³ Baatte siro sa balay lakoy Diyos agmaal sa kansiyo.