ODAS

ODAS

¹ Ako Odas in agsolat, sogowan IsoKiristo, osai belag Santiyago. Ako agsolat sa mga iidang Diyos, mga piyagpakayawte in Diyos Amang, osai piyagalapet IsoKiristo. ² Kangay pandalangin kamo alapeten, pakapyaen, osai pakayawteen gayed wano. ³ Laki mga belag, kangay wano nges beet ako agsolat sa kanyo panawen sa bayo pag boway tiyaboy sa kantam boo. Kamay labi kay kailangan ako agpatoldo sa kanyo agmatiwid gayed agalapet sa paniwala piyatoldo sa mga iidang Diyos. Ina pag paniwala osai waget anggan idapo kalobosan. ⁴ Angkataw apo mga mangyan idapo Diyos miyagem sa kanyo yewed kanyo atawanan. In kabaiten Diyos kansiro piyaglepes keyen siyo mabait, maal kamayba nakay. Kalbas siro agpamangwat daet, osai dayo kansiro atawanan IsoKiristo. Siyo waget in kantam poon, osai Kapwan. Tangona daan siyabi sa mga Agisolat in batay parosa piyagsandata sa kansiro. ⁵ Kamayba wa kanyo wa atawanan, kangay nges beet kanyo wakay panremremen in bayan Israil piyalpas in Kapwan sa kobat Iipto. Paka kalbas, kansiyo biyono in mga yewed agpasandig sa kansiyo. ⁶ Kanyo din panremremen in mga angil in agsolang sa kansiro kabaloyan, kalbas biyaliwan in kansiro pagbalayan, siro biyakos Diyos karakara idbatay mabogloy, osai biilanggo sa maloba lened anggan sa Kalobosan pag Ibeng Lakoy. Kalbas in parosa labi kay kalakoy. ⁷ Kanyo din panremremen in mga bayan Sodoma osai Gomora, osai in mga bayan asin sa bangen. Siro din maloba agpanggaraw osai bakla. Kalbas siro piyarosaan baya idapo kalobosan panremrem sa mga mangyan ayaw agpangwat kataw ina. ⁸ Kataw daan ina ina pag mga mangyan. Panawen sa kansiro mga taynep, piyagpangwatan daet in kansiro bilog, osai piyagidapo kabolowan in kabaloyan Diyos, osai piyagsabiyan daet in mga angil. ⁹ Kamayba Migil, siyo in koyay sa boo mga angil, in betek siro agpalaway osai in diyablo panawen sa bilog Mowisis, in siyo agpangelel sa diyablo Migil yewed mangaas agsabi daet. Dayem keyen in kansiyo siyabi, Kao pangelelen in Kapwan. ¹⁰ Kamay ina pag mga mangyan agpanlibak sa yewed kansiro atawanan. Kalbas in kansiro datiyan atawanan, kataw in atawanan mga ayop, na siro masamok anggan makakatay sa abyan. ¹¹ Maloba wano maidap in batay rateng kansiro, angkataw siro tomolad kay Kain. Kataw din Balaam, siro bomaribid, matang kabel waget kowarta. Kataw daan Kori siro lomaban sa Diyos, na siro batay din biyono. ¹² Siro maloba wano makasida sa kanyo agpaysarigan no betek kamo maltipon agpalpamangan. Siro idapo rikoy pag agkoman, in kansiro waget bilog in piyagpakayawte. Siro kagwali mga libo piyagbaba waget kowaya, idapo omodan, kagwali din poon yangaw yewed agpanraweg kamayba kabetek, kataw giyabot anggan dalig, matay wa gayed. ¹³ Siro kagwali mga maeyat pag alon sa dagat. In kansiro mga makarikoy pag panawen in kagwali bora. Kagwali magirem agipanawan. Siro siyandataan maloba pag lened anggan idapo kalobosan. ¹⁴ Inok in kapito ka kasokponan batang kay Adan. Siyo tangona daan agsabi panawen ina pag mga mangyan keyen, Kanyo pangkiten, agrateng in Kapwan, agyanggat in libolibo kansiyo mga angil, ¹⁵ matang agidang sa boo, kalbas agparosa sa boo yewed katawan sa Diyos, panawen sa boo kansiro mga daeten pag panawen, osai siro agsonggar sa Diyos. ¹⁶ Ina pag mga mangyan solangan osai torayen, maloba agkabeet sa mga daet, mga mayabang, agpanlepes kamayba nakay in kansiro beet. ¹⁷ Laki mga belag, palagi kanyo pagremremen in piyatoldo sa kanyo in tokaw pag mga agadar kay IsoKiristo kantam Kapwan. ¹⁸ Tangona kay siyabi wa siro sa kanyo keyen, Sa batay kalobosan, batay apo mga agpaniwala sa kansiro mga daet pag beet, mga agpatawa sa kanyo. ¹⁹ Ina pag mga mangyan in agpangwat matang malsowayan in agpaysarigan, mga mangyan agpasandig sa mga daet pag panawen, yewed piyagbalayan in Abyan Diyos. ²⁰ Kamay, laki mga belag, kamo agpakarigen in kanyo agpaniwala sa maal wano pag adar. Kamo patolong mandalangin sa Betek pag Abyan. ²¹ Kamo mamataw sa Diyos agpakayawte, anggan agpanaya kay sa kantam Kapwan IsoKiristo. Siyo in batay agtaboy boway idapo kalobosan, angkataw siyo agpakayawte sa kantam. ²² Kanyo pakayawteen, tolongen in mga piyagbaslag in remrem. ²³ Siro kanyo pabowayen, kowaen sa baya. In kalaati wakay pakayawteen. Kamay agingat, kanyo karamesen kamayba in kansiro mga lambong liyebagan kansiro mga makarikoy pag daet. ²⁴ Kamo ayaw agkanawey, in Diyos kabaloy agalapet sa kanyo matang kamo yewed agpangwat daet. Osai kabaloy agparateng sa kanyo sa adap kansiyo kalakoyen, agkaanggay wano, idapo daet. ²⁵ Siyo in osai waget ka Diyos, in agpamaboway sa kantam, panawen kay IsoKiristo kantam Kapwan. Kailangan in boo agsabi keyen, Siyo in maal wano, siyo in koyay, siyo in lakonaw, siyo in apo kabaloyan, ibat tangona kay, anggan ngona, anggan dogayan. Ina wa ngani.