IBRIYO

IBRIYO

¹ Tangona in Diyos mapret agiplaong sa kantam mga kakoyayan. Aronaw in kansiyo mga padalan agiplaong. In mga poropita, ina in kansiyo sogowan agiplaong tangona. ² In Bodang in sogowan agpangwat in boo wano gayed, siyo din in iidang agapo sa boote. Na ngona wa in sa kalobosan pag mga ibeng siyo wa in siyogo Diyos agiplaong sa kantam. ³ In Bodang in agbalawas sa rawa Diyos. No nangkataw in Diyos na kataw daan ina in Bodang. Kaya baywi in boo wanote panawen sa kabaloyan in sa Bodang agiplaong. Paka kansiyo wa yoogas in kantam mga daet siyo tomokkaw wa sa pamalang agbangen Diyos in apo kabaloyan sa boo. ⁴ Kataw in ngaran tiyaboy Diyos sa Bodang lakonaw kay sa ngaran mga angil, na kataw daan ina siyo labi kay kabwat sa mga angil. ⁵ Angkataw in Diyos idbatang miplaong sa angil keyen, Kao kangay Bodang, ako kaimo Amang. Idapo din siyabi panawen sa angil keyen, Ako batay kansiyo Amang, siyo batay kangay Bodang. ⁶ Dayem paka batay wa siyogo Diyos in kansiyo Bodang lakoy sa kobat, siyo keyen, Kailangan siyo pagmaalen in boo kangay mga angil. ⁷ Panawen wakay sa mga angil in Diyos keyen, In kangay mga angil kangay piyagpangwat kataw kowaya. In kangay mga sogowan piyagpangwat kataw igang baya. ⁸ Kamay in siyabi Diyos sa Bodang agbangen keyen, Diyos, kao batay agpapoon anggan idapo kalobosan. In kao agpapoon in boo kaimo remrem maalno. ⁹ In boo betek pag ogali kaimo piyagkabeet, in boo daet pag ogali kaimo piyagkairisan. Ina in dailan kaya kao in iidang Diyos, in kaimo Diyos. Osai kao kansiyo piyakan in makaanggay pag tongkolin agpapoon, labi kay sa tiyaboy sa kaimo mga kabelagan. ¹⁰ Keyen kay in siyabi, Kapwan, sa parakayan kay kao in agpangwat in boo kobat, kadayo in langit kao in agpangwat. ¹¹ In mga ina batay maidapo, kamay kao baywi daan. In mga ina agkasida kataw lambong loma wa. ¹² Ina kaimo batay piyagbaroron kataw islen, kalbas kataw lambong piyagpalitan. Kamay kao idbatay miyalis, kao kataw daan, idbatay matay kamayba nangkadogay. ¹³ In Diyos idbatang agsabi kamayba kay nakay pag angil kataw in kansiyo siyabi sa Bodang keyen, Kao lakonaw, matang kao kangay piyagpatokkaw sa kangay pamalang agbangen anggan in kaimo mga kaaway boo wa gayed kangay piyasakop sa kaimo. ¹⁴ Na asin atawanan in mga angil mga waget sogowan Diyos, kansiyo siyogo agtolong sa mga batay piyaboway.

¹ Na kailangan ngani remremen gayed maal in mga piyatoldo sa kantam, matang kitam idbatay mipabaribid. ² Kantam atawanan betek in Batas biyarita mga angil. Kamayba nakay in aglaban, in yewed maniwala asin, na siyo piyarosa kalakoy daan in kansiyo piyangwat daet. ³ Na labi kay kitam batay piyagparosa no kantam piyagidapo kabolowan in boway lakoy piyagtaboy sa kantam. Angkataw in Kapwan daan in tokaw agpatoldo ina. Kadogay in mga agparengey sa kansiyo, ina wakay in agpatonay agbarita sa kantam. ⁴ Ina piyatonay din Diyos sa kansiyo mga tanda, mga makasoyo lakoy pag panawen, kansiyo kabaloyan, kadayo din sa mga piyagtaboy in Betek pag Abyan, tiyaboy kataw wa daan in kansiyo beet. ⁵ In bayo wakay dogayan pag kobat in kanyam piyagsabi, ina yewed piyasakop Diyos sa mga angil. ⁶ Kamay sa osai ka betek sa mga Agisolat apo siyabi sa Diyos keyen, Nakay in kabolowan kami in mga mangyan? Nakay batang in mangyan kaimo piyagpanremrem? Nakay batang in mangyan kaimo piyagalapet? ⁷ Kadogayte waget kami in mga mangyan kaimo piyakabwatte sa mga angil. Kamay kami kaimo piyakalakonaw, kaimo piyakabwat. ⁸ In boo wanote kaimo piyasakop sa kabaloyan mangyan. Na in keyen in boo piyasakop sa mangyan, na in beet siyabi idapo yewed piyasakop. Kamay anggan ngona kantam piyagngitan yewed kay boo mipasakop sa kantam. ⁹ Kamay in mangyan Isos kantam atawanan. Kadogayte waget siyo piyakabwatte sa mga angil. Kaya siyo piyakabwatte matang siyo matay panawen sa boo mangyan angkataw in Diyos agpakayawte sa kantam. Kalbas ngona siyo piyakalakonaw piyakabwat, panawen siyo domalan sa katayan. ¹⁰ Panawen sa mga kaidapan diyalan Isos siyo piyasibay Diyos agpaanggat in karowan sa agrawa pag langit. Ina piyangwat Diyos in agpangwat in boote, osai agalapet in boote. Maal in kansiyo piyangwat kataw ina, angkataw batang ngani kay Isos in boway piyagtaboy sa kansiyo mga piyagpaanggat. ¹¹ Kadayo in mga liinis, kadayo Isos in aglinis sa kansiro mga daet, na siro boo osai waget in Amang. Matang Isos idwa agkarikoy agpabelag sa kantam. ¹² Siyo keyen, Diyos, kaimo ngaran kangay batay piyagbarogi sa kangay mga kabelagan. Ako batay agbaren agmaal sa kaimo sa tiponan kaimo mga bodang. ¹³ Keyen kay, Ako batay agpasandig sa Diyos. Siyabi kay keyen, Baanda wa ako osai in mga bodang tiyaboy Diyos sa kangay. ¹⁴ Kataw in piyagbarogi mga mangyan apo bilog apo daya, na Isos mibaloy din mangyan kataw siro apo bilog, apo daya. Kaya Isos agpangwat kataw ina matang panawen sa kansiyo katayan diyaeg wa gayed in dimonyo in datiyan apo kabaloyan sa katayan. ¹⁵ Matang piyamalpas wa Isos in mga mangyan boo boway batang sogowan dimonyo panawen siro agkalimo sa katayan. ¹⁶ Yewed ngani mga angil in kansiyo piyagtolong, dayem in mga kasokponan Abraam. ¹⁷ Ina in dailan kaya kailangan siyo mibaloy kataw wa daan gayed in kansiyo mga kabelagan. Matang siyo mibaloy Mabwat pag Sasirdoti agpakayawte osai yewed aglimbang pag sogowan Diyos, aglinis in mga daet sa mga mangyan. ¹⁸ Panawen siyo batang tiyokso domalan sa mga kaidapan siyo ngona kabaloy agtolong sa mga piyagtokso.

¹ Na, laki mga belag sa agpaniwala, mga iidang Diyos agtaboy sa langit, remremen Isos. Siyo sogowan lakoy Diyos, piyangwat Mabwat pag Sasirdoti agpapoon sa kantam paniwala. ² Sa talnakiyan Diyos Mowisis yewed aglimbang agpanawen kansiyo tongkolin. Na kataw daan din ina Isos. Siyo yewed aglimbang, siyo agpaniwala sa agsogo sa kansiyo. ³ Kataw in agpangwat in balay osai in balay piyangwat, in agpangwat agbangen in piyagpalakonaw, na kataw daan din ina Isos in piyagpalakonaw labi kay kay Mowisis. ⁴ In balay idbatay mibaloy no idapo agpangwat. Kamay Diyos in agpangwat in boo wanote. ⁵ - ⁶ Kiristo osai Mowisis siro tikkataw, tanan yewed aglimbang sa panawen tiyaboy Diyos. Kamay siro yewed tikkataw. Mowisis sogowan waget agsabi in batay kay piyagpalowas Diyos. Kamay Kiristo agbangen Bodang, siyo agpapoon sa talnakiyan. Kitam in kansiyo talnakiyan no kitam agpakaeyat in paniwala, osai agkaanggay sa kantam piyagpanaya. ⁷ Na kataw in siyabi in Maal wano pag Abyan keyen, Ngona, no kamo karengey in agiplaong Diyos, ⁸ na ayaw marigen in kanyo remrem, kataw tangona in sa moyod in manonggar kanyo mga kakoyayan in siro agtepeng sa Diyos. ⁹ Keyen in Diyos, Ista ako liyabanan, tiyepeng kanyo mga kakoyayan. Bago apatnapo ka dagon kansiro piyagngitan in kangay mga panawen. ¹⁰ Panawen ina, ina pag mga betek, ako abaisan asin pag mga mangyan. Ako keyen, Baatte siro agibaribid in remrem. Siro dayo katawan in kangay mga ogali. ¹¹ Matang sa kalobaen ako abaisan kangay wa siyabi keyen, Kamayba wakayno siro idbatay wa daan piyakan in kangay agpainga apyaan. ¹² Na, laki mga belag, kitam agingat. Ayaw apo sa kantam kamayba osai waget ka aleleng, yewed agpaniwala, anggan pakalwat wa sa agkaboway pag Diyos. ¹³ Dayem in maal, ngona pag apo kay kabetek kitam agpaeyat remrem sa osaiosai matang idapo batay mibaloy songgaran sa Diyos panawen siyo piyaakay daet. ¹⁴ Angkataw kitam boo kabelagan Kiristo, no kitam palagi daan marigen in agiskapet sa kansiyo, no nangkataw sa parakayan na kataw daan ina anggan sa kalobosan. ¹⁵ Keyen in mga Agisolat, Ngona, no kamo karengey in agiplaong Diyos, na ayaw marigen in kanyo remrem kataw tangona in kanyo mga kakoyayan manonggar sa kansiyo. ¹⁶ In mga tangona agparengey in agiplaong Diyos, kalbas somonggar sa kansiyo, siro in boo mga piyalpas Mowisis sa Iipto. ¹⁷ In tangona kiyabaisan Diyos apatnapo ka dagon, siro in mga agpamangwat daet kalbas mangatay wa sa moyod. ¹⁸ In piyagsabiyan Diyos in siyo keyen, Kamayba wakayno kamo idbatay wa daan piyakan in kangay agpainga apyaan, siro in mga dayo maniwala. ¹⁹ Na kantam atawanan kaya siro idwa piyakan in piyagsabi Diyos agpainga panawen siro yewed agpaniwala sa kansiyo.

¹ Ina pag pangako Diyos baywi kay anggan ngona, in pangako kitam batay karateng sa kansiyo agpainga. Na kitam agingat, ayaw yewed piyarateng. ² Kitam piyatoldo in Maal pag Barita kataw daan tangona ina pag mga mangyan. Kamay siro agbangen idapo abel pakinabang angkataw kamayba siro karengey wa in barita, ina yewed kansiro piyagpaniwalaan. ³ Dayem kitam in mga agpaniwala, kitam in karateng asin pag agpainga. Keyen in mga Agisolat, Sa kalobaen ako abaisan kangay wa siyabi keyen, Kamayba wakayno siro idbatay wa daan karateng sa kangay agpainga. Ina in kansiyo siyabi kamayba paka mipangwat wa in kobat mibaloy wa in kansiyo panawen. ⁴ Panawen sa kapito ka ibeng apo siyabi sa osai ka betek sa mga Agisolat keyen, Paka sa kapito wa ka ibeng in Diyos agpainga wa sa kansiyo mga panawen. ⁵ Tagoli wakay siyabi in mga Agisolat keyen, Kamayba wakayno siro idbatay wa daan karateng sa kangay agpainga. ⁶ Ina tangona pag mga tokaw karengey in Maal pag Barita, siro in mga yewed kabel in agpainga Diyos apyaan panawen siro yewed agpaniwala. Kamay in pangako baywi kay, apo kay batay piyakan in kansiyo agpainga apyaan. ⁷ Angkataw paka aronaw wakay dagon in diyalan, in Diyos agsogo kay Dabid agpangwat wakay tarato keyen, Ngona no kamo karengey in agiplaong Diyos, na ayaw marigen in kanyo remrem. ⁸ No nges tangona siro piyapainga Oswi na in Diyos idbatay wakay agtarato in agpakan kay in kansiyo agpainga apyaan. ⁹ Na no kataw ina in Diyos apo kay piyagtaboy agpainga sa mga agpasandig sa kansiyo, kataw in kansiyo agpainga sa kapito ka ibeng. ¹⁰ No in mangyan piyakan Diyos in kansiyo agpainga, na siyo agpainga din sa kansiyo mga panawen, kataw in Diyos agpainga in siyo kalbas wa sa kansiyo mga panawen. ¹¹ Na kitam wa agpilit agkabel sa piyagtaboy Diyos agpainga, ayaw galot panawen sa yewed maniwala kataw siro. ¹² Angkataw in agiplaong Diyos agkaboway, apo kabaloyan, osai labi kay katarem pisaw idapo sikil, tanan apo tarem. Ina agistebek anggan sa piyalsoway in bait osai in abyan, in kalowan osai in etek bitol. Ina katawan agtimbang in mga remrem osai bait mga mangyan. ¹³ Sa boo wanote idapo batay agibetang sa Diyos. In boote agitimrang sa kansiyo pangkit. Kitam boo batay omadap sa kansiyo. ¹⁴ Kataw kitam apo wa Isos in Bodang Diyos, siyo wa in kantam Mabwat pag Sasirdoti, in monaik sa langit anggan sa adap Diyos. Na kataw apo siyo, na kitam miskapet wa gayed sa kantam pagpasandigan. ¹⁵ Angkataw siyo in kantam Mabwat pag Sasirdoti, siyo agpakayawte sa kantam mga idapo eyat, angkataw sa boote siyo tiyepeng din kataw din kitam. Kamay siyo yewed agpangwat daet. ¹⁶ Na kitam ayaw agkalimo omadap sa Diyos in agpakayawte. Matang sa betek kitam agpangailangan kitam piyagtolong, piyagpakayawte.

¹ In baatte mabwat pag sasirdoti mangyan iidang Diyos piyakan tongkolin pagsogowan mga mangyan omadap sa kansiyo, matang siyo in agtaboy sa Diyos in kansiro mga andog osai in mga ayop piyagbono panawen sa mga daet. ² Kataw siyo mangyan daan idapo kabaloyan, na siyo mabait, katiis sa mga amat mangyan idapo atawanan osai sa mga agkalibangaw. ³ Kataw siyo idapo din kabaloyan, na kailangan din siyo agbono ayop panawen sa kansiyo sadiri daet, idwaget panawen sa daet mga roma mangyan. ⁴ In kataw ina pag mabwat pag tongkolin in mangyan yewed mayadi agidang sa kansiyo sadiri. Diyos waget in kaidang ina, kataw in siyo omidang kay Aaron. ⁵ Kiristo kataw din. Yewed siyo wakayte in agpalakonaw sa kansiyo sadiri matang mibaloy Mabwat pag Sasirdoti. Dayem siyo iidang Diyos in agsabi sa kansiyo keyen, Kao in kangay Bodang. Ako in kaimo Amang. ⁶ Sa osai wakay ka betek sa mga Agisolat in Diyos keyen, Kao in sasirdoti anggan idapo kalobosan kataw daan in kay Milkisidik pag agsasirdoti. ⁷ Tangona in Isos atai kay sa kobat siyo agpandalangin anggan agpanangis agdaing sa Diyos in kapaboway sa kansiyo sa katayan. Kalbas panawen siyo agpakabwatte wa gayed, siyo piyarengey Diyos. ⁸ Kamayba siyo Bodang Diyos siyo masanay agpaniwala, panawen sa mga kaidapan kansiyo diyalan. ⁹ Kalbas paka siyo piyasibay wa siyo mibaloy wa agpamaboway idapo kalobosan sa boo maniwala sa kansiyo. ¹⁰ Kalbas siyo piyangwat Diyos Mabwat pag Sasirdoti, kataw in kay Milkisidik pag agsasirdoti. ¹¹ Panawen ina pag agsasirdoti kami aronaw kay nges in batay piyagsabi, kamay maidap in agpaliwanag sa kanyo angkataw kamo dayo wa agparengey. ¹² Dayem nges karai kamo kabaloy wa din agpatoldo. Kamay anggan ngona in kanyo piyagkailangan in yewed kay maidap pag piyagadar sa agiplaong Diyos. Soso kay daan in kanyo piyagkailangan anggan ngona, bago in maal wa nges sa kanyo baaw wa daan. ¹³ Kantam atawanan no siyo piyagpanoso kay na bodangte daan, idapo kay atawanan keyen ina maal anda daet. ¹⁴ Kamay in marigen pag pamangnen, ina sa mga lakonaw wa, sa mga masanay wa, katawan wa keyen ina maal anda daet.

¹ Na kitam ngona ayaw agaway sa mga yewed kay maidap pag piyagadar panawen kay Kiristo. Dayem sa mga wakay agpaistobo sa kantam atawanan. Ayaw waget in adar panawen sa agbenglay in mga ogali idapo pakinabang, panawen din sa agpasandig sa Diyos, ² osai panawen sa mga agbaotismo, sa mga din komapkap, kadayo in boway wakay tagoli osai in parosa idapo kalobosan. Ina pag boo kanyo wa atawanan. ³ Ngona kitam domarede kay sa kantam piyagadar. No in Diyos pomayag, na ina ngani in kanyam batay piyangwat. ⁴ In mga mangyan riyawaan wa Diyos, in mga katepeng wa sa mga piyagtaboy Diyos, piyakan wa din in Betek pag Abyan, ⁵ atawanan wa din sa kansiro boway in kaalenen in agiplaong Diyos, osai in mga kabaloyan Diyos in batay kay piyalowas dogayan. ⁶ In mga kataw ina mangyan no siro moli wakay sa datiyan, na siro idbatay wa apaoli matang agbenglay in kansiro daet. Angkataw kansiro wakay piyako sa kodos in Bodang Diyos, kansiro wakay piyaidapo kabolowan. ⁷ No in kobat agkasadapan sa odan agpaistobo togda agpanggalem, piyagpakinabangan in agpanawen, na sa kataw ina pag kobat in Diyos mabait. ⁸ Kamay no in kobat piyagistobowan waget lalosen, mga dogiyen, na in kataw ina pag kobat idapo kabolowan, piyagkagalitan Diyos, batay piyagtebed dogayan. ⁹ Mga belag, kamayba kataw ina in kanyam siyabi, yewed piyagbaslag in kanyam remrem sa kanyo. Kami katawan kamo apo in boo maal sa boway idapo kalobosan. ¹⁰ In Diyos mabait. Siyo idbatay agkanawey in kanyo panawen palagi agpakayawte agtolong sa mga belag agpaniwala, angkataw kamo agmaal sa kansiyo. ¹¹ In kanyam beet in baatte osai sa kanyo agaway kay agpilit kataw ina anggan sa kalobosan, matang kanyo ngani abel in kanyo piyagpanaya. ¹² Na kamo ayaw bibelen. In kanyam beet kanyo toladen in mga agpasandig sa Diyos mga agbanta sa boote. Ngona siro piyagpakan in mga pangako Diyos. ¹³ In Diyos mangako kay Abraam siyo manompa agawit in kansiyo daan ngaran, angkataw idapo wa ngaran mabwat kay sa kansiyo matang kansiyo pagsompaan. ¹⁴ Siyo keyen, Kangay ngani pangako sa kaimo kao batay kangay piyagalapet maal, kao batay din piyagpakan aronaw kasokponan. ¹⁵ Abraam yewed aglimbang agpanaya. Kalbas tiyaboy ngani sa kansiyo in piyangako. ¹⁶ In mga mangyan no manompa na sa adap in mga mabwat kay. Kalbas panawen sa sompa idapo wa batay kabolwat ina. ¹⁷ Kataw din ina piyakangen Diyos sa kansiyo sompa in kansiyo pangako matang atawanan in kansiyo mga piyangakowan idbatay miyalis in kansiyo remrem. ¹⁸ Na in yaalapet Diyos dowai ka idbatay miyalis. In osai in kansiyo pangako, in osai in kansiyo sompa. Siyo idbatay kabaribid asin. Na kitam in mga somaog sa kansiyo apo maeyat pag remrem agpanaya sa kansiyo mga pangako. ¹⁹ Ina pag kantam piyagpanaya tiyak idbatay maidapo. Ina kagwali marigen pag eket sa kantam abyan, agrateng anggan sa galem wa gayed in balay lakoy Diyos, aglampas sa damit pamengbeng. ²⁰ Isos in tokaw misoroy asin matang kantam paywaraan, angkataw siyo mibaloy wa Mabwat pag Sasirdoti kataw in kay Milkisidik pag agsasirdoti.

¹ Ina pag Milkisidik siyo poon lakoy sa bayan Salim, osai siyo sasirdoti agbaba andog sa Diyos in Mabwat lakoy sa boo. In Abraam agoli batang mandaeg sa mga poon lakoy siyo tiyagbo Milkisidik, piyandalangin. ² Kalbas kay Abraam tiyaboy sa kansiyo in boo kasampo sa kansiyo abel sa gira. In beet siyabi ina pag ngaran Milkisidik keyen, Betek pag Agpoon lakoy. Osai siyo poon din lakoy sa Salim, na in beet siyabi poon lakoy sa kapyaan. ³ Idapo siyabi panawen sa kansiyo mga koyay. Idapo atawanan kansiyo kakoyayan. Idapo din siyabi siyo miboslot, siyo matay. Siyo kataw daan in Bodang Diyos agaway daan agsasirdoti anggan idapo kalobosan. ⁴ Kantam remremen in kay Milkisidik kabwaten. Baina siyo piyakan Abraam in boo kasampo sa kansiyo abel sa gira, kamayba Abraam in kantam kakoyayan lakoy. ⁵ Sa mga kasokponan Libi in mga piyangwat sasirdoti, siro in agpangkowa in kasampo sa boote sa mga bodang Israil angkataw ina in siyabi sa mga Batas. Ina piyagkowa sa kansiro kabelagan sa mga kasokponan din Abraam. ⁶ - ⁷ Ina pag Milkisidik yewed kasokponan Libi kamay kansiyo tiyanggap in boo kasampo batang kay Abraam. Tiyak ngani in agpandalangin agbangen lakonaw kay sa piyagpandalangin. Na kamayba Abraam piyakan Diyos in mga pangako siyo piyandalangin daan Milkisidik. ⁸ In mga kasokponan Libi in agpangkowa in kasampo, siro mga mangyan waget agkatay daan. Kamay atawanan sa mga Agisolat Milkisidik agbangen agkaboway ngani. ⁹ Maal din agsabi keyen kamayba Libi in agpangkowa in kasampo, siyo agtaboy wa din in kasampo sa betek in kansiyo nono Abraam agtaboy. ¹⁰ Angkataw kamayba Libi yewed kay biyodang siyo sa galem kay Abraam in ina tiyagbo Milkisidik. ¹¹ In mga Batas tiyaboy Diyos sa mga bodang Israil, matang siro mibaloy betek sa kansiyo pangkit. Na no nges ina pag kabeteken abel sa mga sasirdoti kasokponan Libi, na idwa nges kailangan osai kay ka sasirdoti in kataw in kay Milkisidik pag agsasirdoti, idwakay kataw in kay Aaron pag agsasirdoti. ¹² Na no piyalitan in kay Aaron pag agsasirdoti na kailangan din palitanen in mga Batas. ¹³ Kalbas in kantam Kapwan in piyagawit asin, siyo yewed kasokponan Libi. Siyo kasokponan Oda. Kamay idapo sasirdoti batang asin pag kasokponan. ¹⁴ Atawanan ngani in kantam Kapwan batang sa kasokponan Oda. Kamay Mowisis idapo siyabi keyen, Apo din sasirdoti batang asin pag kasokponan. ¹⁵ Ina labi kay maliwanag no apo wakay lomwas sasirdoti kataw Milkisidik. ¹⁶ Kaya siyo sasirdoti, yewed panawen sa kansiyo mga kakoyayan kataw in sa mga Batas, dayem sa kansiyo kabaloyan in siyo agkaboway idapo kalobosan. ¹⁷ Angkataw keyen in mga Agisolat, Kao sasirdoti anggan idapo kalobosan, kataw in kay Milkisidik pag agsasirdoti. ¹⁸ Kaya in tokawan Batas piyalitan wa, angkataw idapo kabaloyan, idapo pakinabang. ¹⁹ Angkataw asin pag mga Batas idapo mibaloy betek sa pangkit Diyos. Kamay in pagpasandigan tiyaboy sa kantam lakonaw in pakinabang, in kitam kapasabangen sa Diyos. ²⁰ In Diyos somompa in Isos kansiyo piyangwat sasirdoti. Kamay in mga kasokponan Libi agbangen in siro piyangwat sasirdoti siro yewed siyompaan Diyos. ²¹ In Isos piyagpangwat sasirdoti siyo siyompaan Diyos, angkataw in siyabi sa mga Agisolat keyen, In Kapwan manompa keyen, Kao sasirdoti anggan idapo kalobosan. Siyo idbatay agalis in kansiyo remrem. ²² Panawen Isos siyompaan Diyos na tiyak ngani labi kay maalen in bayo pag kasondowan Diyos in biyaba Isos sa kantam. ²³ Tangona in mga sasirdoti aronaw agaliliyan angkataw siro agkatay, yewed kadogay sa tongkolin. ²⁴ Kamay Isos palagi agkaboway kamayba nangkadogay, matang in siyo agsasirdoti idwa piyagaliliyan. ²⁵ Matang kansiyo apaboway anggan idapo kalobosan in mga domalan sa kansiyo agpasabangen sa Diyos, angkataw siyo palagi agkaboway matang agpandalangin sa kansiro. ²⁶ Panawen Isos kataw ina, na siyo in Mabwat pag Sasirdoti sibay sa kantam mga kailangan. Siyo maal wano, idapo daet, idapo baribid, yewed agiyagem sa mga agpamangwat daet. Osai siyo piyakabwat wa anggan lampas sa mga langit. ²⁷ Siyo yewed kataw in amat mabwat pag sasirdoti, in kailangan siro agbono ayop ibengibeng panawen sa kansiro sadiri daet, kalbas sa daet wakay mga roma mangyan. Kamay Isos makaosai waget agandog, in kansiyo piyaandog in kansiyo gayed bilog. Kalbas ina sibay anggan idapo kalobosan. ²⁸ In mga mabwat pag sasirdoti iidang panawen sa mga Batas, kamay siro mangyan waget yewed sibay. Kamay in piyangwat Diyos Mabwat pag Sasirdoti panawen sa kansiyo pangako, siyo in Bodang, in palagi sibay kamayba nangkadogay. Ina piyanompa Diyos paori wa sa Batas.

¹ Anda wa in galem in kanyam piyagsabi. Kitam apo ngani Mabwat pag Sasirdoti kataw ina. Siyo in katokkaw sa langit sa pamalang agbangen in pagtokkawan in Mabwat lakoy sa boo. ² Ista siyo agpanawen sa galem gayed in balay torda tiyadyok in Kapwan yewed mangyan. ³ In panawen in baatte mabwat pag sasirdoti in agandog osai agbono ayop piyagtaboy sa Diyos. Na kailangan din apo piyagandog in kantam Mabwat pag Sasirdoti. ⁴ No karai siyo atai sa kobat na siyo yewed mayadi agsasirdoti angkataw apo wa daan mga sasirdoti agbaba mga andog kataw in siyabi sa mga Batas. ⁵ Kaya atawanan in kansiro panawen rarawan waget in sa langit, angkataw rarawan waget in kay Mowisis tiyadyok balay torda. Baina, in siyo batay agtadyok in Diyos keyen, Kailangan ngani in kaimo pangwaten kataw daan in pagtoladan kangay piyapangkit sa kaimo ista sa boksor. ⁶ Kamay in panawen tiyaboy kay Isos mabwat kay sa panawen in roma pag mga mabwat pag sasirdoti, in siro agpaywaraan sa datiyan kasondowan. Baina in kasondowan in piyagpaywaraan Isos labi kay lakonaw. Ina riigen in labi kay lakonaw pag mga pangako. ⁷ No nges sibay in datiyan kasondowan, na idwa nges kailangan agpangwat osai ka bayo wakay pag kasondowan. ⁸ Kamay ngiitan in Diyos in kansiyo mga mangyan yewed kabaloy. Matang siyo keyen, Agrateng in kabetek ako batay agpangwat osai ka bayo wakay pag kasondowan sa mga bodang Israil, sa kasokponan Oda. ⁹ Ina yewed kataw in kangay tangona kasondowan sa kansiro mga kakoyayan in siro kangay yaakay piyapanaw sa Iipto. Angkataw siro somala asin pag kangay kasondowan matang siro kangay wa biyaliwan. ¹⁰ Kataw wakay anda in kangay batay piyangwat kasondowan sa mga bodang Israil. Paka rateng wa in kabetek, in kangay mga batas kangay batay piyagpabolalang sa kansiro mga remrem, batay piyagpabalay sa kansiro mga bait. Ako batay kansiro Diyos, siro batay kangay mga bodang. ¹¹ In boo batay katawan sa kangay, kamayba in mga lakonaw, anggan in mga kalakoyte. Matang idapo wa batay agpalsipatoldowan in mga kabelagan keyen, Kao pasandig wa sa Kapwan. ¹² Angkataw ako batay agpakayawte sa kansiro, kangay wa batay piyaglibangaw in kansiro mga daet. Ina wa in siyabi in Kapwan. ¹³ Na in siyabi Diyos keyen bayo wakay, na in beet siyabi in datiyan kasondowan kansiyo wa piyaidapo kabolowan. Kalbas kamayba nakay in piyagpaidapo wa kabolowan, in loma wa, na ina bangen wa ngani maidapo.

¹ In datiyan kasondowan apo mga Batas no nangkataw in padalan agsamba, osai apo din sambaan atai sa kobat. ² Ina tiyadyok piyangwat balay torda diyodo sa kagwaraan. In tokaw pag dodo piyagawit in tiyalaga sa Diyos. Asina in tinglaw, osai in lamisa pagpamabolalangan tinapay tiyalaga sa Diyos. ³ Kadogay apo bengbeng damit sa kagwaraan. Sa galem agbangen asin piyagawit in tiyalaga pagtagbowan gayed sa Diyos. ⁴ Asin agibolalang in lamisa ginto in pagpanebedan mala masadap, osai in baol tiyeem ginto in pagbalayan in kasondowan. Sa galem ina pag baol in ginto pag pagsoroyan in galem mana, osai in kay Aaron sikkor in mandaon, osai din in dowai ka dalapi bato in siyolatan in mga Batas. ⁵ Sa ogbos in baol apo in kirobin. In kansiro mga lagay agkabilad agiyatep sa ogbos in kabetek in paglibangawan Diyos sa daet mga mangyan. Ina pag mga kirobin agrawa, in beet siyabi in Diyos asina. Kamay ngona kami idbatay kay agpaliwanag ina pag boo. ⁶ Paka kataw ina piyakapya in boo sa galem balay torda na baatte ibeng in mga sasirdoti agisoroy sa tokaw pag dodo sa tiyalaga sa Diyos, agpangwat in kansiro tongkolin. ⁷ Kamay piyagayaw misoroy sa galem pag dodo, sa pagtagbowan gayed sa Diyos, no yewed in mabwat waget pag sasirdoti. Kamay ina makaosai waget sa baatte dagon. In siyo misoroy siyo agbaba daya piyagpaandog sa Diyos panawen sa kansiyo mga daet osai sa daet mga mangyan, in daet kansiro piyangwat yewed atawanan. ⁸ Ina in padalan in Betek pag Abyan agpatoldo keyen anggan baywi kay in datiyan pag torda, na yewed kay mabolwat in sa galem pag dodo, in pagtagbowan gayed sa Diyos. ⁹ Ina pag boo rarawan waget sa mibaloy wa ngona. Tangona in mga piyagtaboy sa Diyos osai in mga piyagbono piyagandog, ina yewed kapabetek sa agandog sa pangkit Diyos. ¹⁰ Angkataw in mga ina panawen waget sa mga pamangnen, mga piyaginem, mga padalan agogas. Ina mga Batas sa piyagngitan waget, piyagpangwat anggan waget yewed kay rateng in bayo wakay pag padalan. ¹¹ Kamay ngona rateng wa in Kiristo, in Mabwat pag Sasirdoti agpanawen sa mibaloy wa pag mga maal. Siyo misoroy ista agpanawen sa sambaan lakoy labi wa maalen, idapo korang, in yewed piyangwat mangyan, yewed agiyagem sa kobat piyangwat. ¹² In siyo misoroy ista sa pagtagbowan gayed sa Diyos, yewed wa daya kambing daya baka in kansiyo piyagbaba, dayem in kansiyo wa daan daya. Ina makaosai waget biyaba sibay wa matang liibangaw in kantam mga daet anggan idapo kalobosan. ¹³ In mga daya kambing osai daya toro, osai in domaraga pag baka maboris wa, ina piyagborasik sa mga mangyan lebagen sa pangkit Diyos. No ina kalimes sa kansiro lebag ¹⁴ na labi wa panlimes in daya Kiristo. In idapo kalobosan pag Abyan agtolong sa kansiyo agtaboy sa Diyos in kansiyo bilog in idapo wano daet, matang linisen in kantam remrem sa agpasandig sa mga ogali idapo pakinabang. Matang paka malinis wa, kitam kapanawen sa mga panawen in agkaboway pag Diyos. ¹⁵ Panawen ina Kiristo in paywaraan sa bayo pag kasondowan. Angkataw siyo matay matang in mga mangyan palpasen sa mga daet kansiro piyangwat tangona in siro baywi kay sa datiyan pag kasondowan. Panawen ina in mga biyerya Diyos batay kaabel in kansiyo piyangako, in mga maalen yewed agkalobos. ¹⁶ - ¹⁷ Alimbawa, apo agpamabilin in batay ogon. Kamay in ogon idapo batay kabolowan no yewed kay matay in agbilin. Dayem matay wa, na apo wa kabolowan. Na ayaw agkowaen no yewed kay tiyak matay wa in agbilin. ¹⁸ Ina in dailan kaya in tokaw pag kasondowan idapo kabolowan no idapo matay. ¹⁹ Piyanggisod Mowisis sa mga mangyan in boo bilin sa mga Batas. Kalbas kansiyo kiyowa in daya mga bodang baka osai in daya kambing piyaagem sa sapa. Kiyowa din in mapola pag boybol topa osai sanga lalosen piyagawit isopo. Ina siyogbo sa daya, kalbas kansiyo biyorasikan in aklat mga Batas, kadayo in mga mangyan. ²⁰ Siyo agiplaongan din keyen, Anda in daya in agrigen sa kasondowan in yootos Diyos kantam pangwaten. ²¹ Kataw din ina kansiyo biyorasikan daya in torda kadayo in boo mga sangkap sa agsamba. ²² Sa mga Batas tomag in boote kailangan daya in aglinis. No idapo matay na in daet idbatay liibangaw. ²³ Ina pag boo mga rarawan in mga sa langit, na kailangan ngani siro piyaglinis sa mga piyagbono kataw ina. Kamay labi kay maalen pag andog in piyagkailangan in mga sa langit wa daan. ²⁴ Angkataw Kiristo misoroy wa yewed sa piyangwat waget mangyan pag tiyalaga sa Diyos, sa rarawan waget, dayem sa langit wa daan. Ngona siyo ista wa sa adap Diyos agpandalangin sa kantam. ²⁵ Sa datiyan kasondowan in mabwat pag sasirdoti baatte dagon misoroy sa tiyalaga pagtagbowan gayed sa Diyos agbaba daya ayop. Kamay Kiristo agbangen makaosai waget misoroy agandog in kansiyo sadiri. ²⁶ No ina yewed sibay na kailangan nges siyo baatte matay wakay ibat tangona daan in piyangwat in kobat. Kamay ngona sa kalobosan agbangen pag mga kabetek Kiristo makaosai waget piyalowas agandog in kansiyo bilog. Ina sibay wa ngani matang aglibangaw sa daet. ²⁷ Baatte mangyan apo okol katayan. Ina makaosai waget, kalbas piyagosap wa Diyos. ²⁸ Na kataw din ina Kiristo makaosai waget din matay matang andog panlibangaw sa mga daet sa karowan mangyan. Siyo batay wakay atai lomwas idwa andog panawen sa mga daet, dayem agpamaboway wa sa mga agpanaya sa kansiyo.

¹ In totoo maalen, yewed in mga Batas. Ina rarawan waget sa mga maalno in batay kay rateng. In mga Batas yewed kapabetek sa mga mangyan baatte dagon agandog matang nges agpasabangen sa Diyos. ² No in mga agpasabangen sa Diyos liinis wa panawen asin pag mga piyagandog, na idwa nges magolo in kansiro remrem panawen sa kansiro mga daet, osai idwa nges kailangan wakay agandog. ³ Kamay ina daan pag mga andog in baatte dagon agpagolo wakay sa kansiro remrem panawen sa kansiro mga daet. ⁴ Angkataw in daya mga toro, mga daya kambing idbatay ngani kabaloy aglibangaw sa mga daet. ⁵ Ina in dailan kaya Kiristo, in siyo atai pataboy sa kobat, kansiyo siyabi sa Diyos keyen, Yewed mga andog, yewed mga ayop piyagbono in kaimo piyagkabeet. Dayem bilog in kaimo siyandata sa kangay, matang kangay piyagandog. ⁶ In mga andog piyagsonog osai mga andog panawen sa mga daet, yewed ina in kaimo piyagkaanggayan. ⁷ Matang ako keyen, Diyos, anda daan ako sandata wa agpangwat in kaimo beet, kataw in siyabi sa mga Agisolat panawen sa kangay. ⁸ In tokaw kansiyo siyabi keyen, Yewed kaimo piyagkabeet, yewed kaimo piyagkaanggayan in mga piyagtaboy, in mga andog, in mga ayop piyagsonog, osai in mga andog panawen sa mga daet, kamayba in mga ina in piyagayay in mga Batas. ⁹ Kalbas kansiyo wakay siyabi keyen, Diyos, anda daan ako sandata wa agpangwat in kaimo beet. Na kataw ina kansiyo kiyowa wa in datiyan, piyabalay wakay in bayo. ¹⁰ Kansiyo piyangwat in beet Diyos, yaandog in kansiyo bilog. Ina makaosai waget, sibay wa. Panawen ina kitam liinis wa sa kantam mga daet. ¹¹ In baatte sasirdoti Odyo ibengibeng agtaydek agpanawen agandog. Baatte ibeng ina daan in kansiyo panawen in agandog wakay ayop. Kamay ina idbatay kalinis sa mga daet. ¹² Kamay Kiristo agbangen makaosai waget omandog panawen sa mga daet. Ina sibay wa kamayba wa nangkadogay. Kalbas siyo tomokkaw wa sa pamalang agbangen Diyos. ¹³ Sigod ina siyo agpanaya anggan in kansiyo mga kaaway piyasakop wa gayed Diyos sa kansiyo. ¹⁴ Angkataw panawen sa kansiyo andog kamayba osai waget, na in kansiyo mga liinis, in kansiyo mga piyakapya sa pangkit Diyos, kansiyo piyangwat sibay anggan idapo kalobosan. ¹⁵ Kadayo din in Betek pag Abyan agpatonay sa kantam. In tokaw kansiyo siyabi keyen, ¹⁶ Keyen in Kapwan, No rateng wa ina pag kabetek, na anda wa in kasondowan kangay batay piyangwat sa kansiro. In kangay mga batas kangay batay piyagpabalay sa kansiro mga galem, piyagsoroy sa kansiro mga remrem. ¹⁷ Kalbas kansiyo kay din siyabi keyen, Kangay wa piyaglibangaw in kansiro mga daet, kadayo in siro agaleleng. ¹⁸ Paka liibangaw wa in mga daet, na idwa piyagkailangan agandog panawen sa mga daet. ¹⁹ Na, laki mga belag, panawen Isos matay kitam idwa piyagayaw misoroy sa pagtagbowan gayed sa Diyos. ²⁰ Angkataw in kansiyo bilog matay, ina in agrognit sa damit pamengbeng, matang kitam piyakan in bayo osai agkaboway pag padalan agpasabangen sa Diyos, ina in kay Isos boway. ²¹ Kitam apo sasirdoti lakoy agpapoon sa talnakiyan Diyos. ²² Na kitam pasabangen gayed sa Diyos agpasandig gayed asin pag sasirdoti, ayaw piyagbaslag in remrem, in kantam galem liinis wa in daet, in kantam bilog yoogas wa in malinis pag sapa. ²³ Kitam agpakarigen, ayaw aglimbang agsabi in kantam piyagpanaya, angkataw Diyos in mangako siyo idbatay ngani somala. ²⁴ Kitam wa agpilit agpalsipatoldowan sa agpakayawte, osai sa agpangwat maal. ²⁵ Ayaw dayo lomwas sa kantam mga agtipon kataw in ogali in amat, dayem pakaeyaten in remrem in baatte osai, labi kay ngona in kantam wa piyagngitan agkabangen wa in Ibeng agrateng in Kapwan. ²⁶ No kitam piyatoldo wa, katawan wa in betek, kalbas no kitam agaway kay agpamangwat daet, na idapo wa batay andog kabaloy agkowa in kantam daet. ²⁷ Dayem piyagpanaya wa in makapangirabot wano pag galit Diyos batay piyalowas, in baya lakoy batay aggalpong sa mga aglaban sa kansiyo. ²⁸ Kamayba nakay pag Odyo no agidapo kabolowan sa mga Batas Mowisis, no apo agpatonay dowai no yewed tolo, na siyo piyagbono wa, idapo batay agpakayawte sa kansiyo. ²⁹ Na no in mangyan agidapo kabolowan sa katayan in Bodang Diyos in agpakarigen sa kasondowan osai in aglinis nges sa kansiyo daet, no kataw ina siyo aglibak sa Bodang Diyos, aglibak din sa Abyan in agpakayawte, na in kataw ina pag mangyan labi wa mabyat in parosa, aon? ³⁰ Angkataw kitam katawan Diyos in agsabi keyen, Ako in agpamarosa, ako wa daan in agparosa. Osai din keyen, In Kapwan in batay agosap sa kansiyo mga mangyan. ³¹ Makapangirabot wano in parosa in agkaboway pag Diyos. ³² Amba, remremen wakay in tangona pag mga ibeng in kamo katanggap wa in rawa in Maal pag Barita. Kamayba aronaw in aglaban sa kanyo paniwala kamo marigen daan yewed ngani padaeg. ³³ Apo betek kamo piyaglibak piyagpamangwatan daet sa pangkit in karowan. Apo betek kamo sandata wa din paagem sa mga mangyan piyagpangwatan kataw ina. ³⁴ Kanyo din biyelag in mga piyagbilanggo. Osai kamayba piyangkowa in kanyo mga nakayte kamo agkaanggay daan, angkataw kanyo atawanan in yaman kanyo abel labi kay maal idbatay maidapo. ³⁵ Na ayaw kantam agbenglayen in agpasandig sa Diyos, angkataw ina apo lakoy bayad. ³⁶ Kailangan kitam agtiis matang kitam kapangwat in beet Diyos, na kitam batay piyakan in kansiyo piyangako. ³⁷ Angkataw keyen in mga Agisolat, Idwa dogay agrateng wa in atai agtaboy. Siyo yewed agpabeya. ³⁸ In kangay mga mangyan piyangwat idapo daet siro batay agkaboway panawen sa agpasandig sa kangay. Kamay no siyo mipaoli wakay na siyo idwa kangay piyagkaanggayan. ³⁹ Kamay kitam agbangen yewed mipaoli sa agtaboy sa toyongan. Dayem kitam mga agpasandig sa Diyos kalbas piyagpaboway.

¹ In agpasandig sa Diyos, siyo katawan batay ngani mibaloy in kansiyo piyagpanaya kamayba wa ikkay piyagngitan. ² Angkataw kaya in Diyos agkaanggay sa mga mangyan tangona, panawen siro agpasandig sa kansiyo. ³ Panawen kitam agpasandig sa Diyos, kitam katawan in kobat piyangwat Diyos sa kansiyo agiplaong, in ngona piyagngitan piyangwat batang sa yewed piyagngitan. ⁴ Panawen Abil agpasandig sa Diyos tiyanggap in kansiyo andog. In kay Kain wakay yewed tiyanggap. Kaya kantam atawanan Abil betek, angkataw in Diyos agkaanggay sa kansiyo andog. Kamayba siyo matay wa, siyo agaway kay agiplaongan anggan ngona panawen siyo agpasandig sa Diyos. ⁵ Panawen Inok agpasandig sa Diyos siyo yewed matay, siyo piyaaling sa ripay pag boway. Keyen in mga Agisolat, Siyo idwa piyagngitan angkataw siyo kiyowa wa Diyos. Siyabi din sa mga Agisolat keyen, In siyo ikkay kiyowa, in Diyos agkaanggay sa kansiyo. ⁶ In mangyan idbatay makaanggay sa Diyos no yewed agpasandig sa kansiyo, angkataw in agpasabangen sa Diyos kailangan siyo maniwala apo ngani Diyos, maniwala in Diyos mabait sa mga agpamangkit sa kansiyo. ⁷ Panawen Nowi agpasandig sa Diyos siyo piyatoldo Diyos in mga agrateng daet in ikkay batang ngiitan. Kalbas siyo maniwala sa Diyos agpangwat bangka matang piyaboway siro talnakiyan. Kaya atawanan in roma mangyan apo daet panawen Nowi agpaniwala sa Diyos. Na Nowi piyangwat Diyos idapo daet panawen siyo agpasandig sa kansiyo. ⁸ Panawen Abraam agpasandig sa Diyos in siyo biyerya Diyos siyo maniwala, biyaliwan in kansiyo pagoliyan, pataboy sa kobat piyangako Diyos sa kansiyo, siyo panaw kamayba yewed atawanan in kansiyo pagtaboyan. ⁹ Kamayba siyo panyawan sa kobat piyangako Diyos sa kansiyo, kaya siyo asin agbalay, panawen siyo agpasandig sa kansiyo. Siro isagteisagte malkoyogan, kadayo Isaak, osai Akob, siro din piyakan Diyos ina pag pangako. ¹⁰ Kaya Abraam agkataw ina angkataw siyo agpanaya sa bayan lakoy marigen in tiyadyok Diyos, piyangwat batang sa kansiyo remrem. ¹¹ Kamayba Sara baog, osai koyayte wa, panawen siyo agpasandig sa Diyos siyo piyakan Diyos kabaloyan mamodang din angkataw siyo maniwala keyen in Diyos idbatay somala sa kansiyo pangako. ¹² Na kamayba Abraam agkabangen wa matay, siyo mamodang din mibaloy wa karowan in kasokponan, idwa abilang kataw in mga magirem sa langit, kataw in mga bowangin sa dagat. ¹³ Siro boo agpasandig sa Diyos anggan sa katayan. Ikkay abel in piyangako sa kansiro, kamay kansiro ngiitan sa adayonaw, kansiro piyagkaanggayan. Kansiro yaamin siro mga panyawan waget agbalay atai sa kobat. ¹⁴ Na panawen siro agsabi kataw ina in mga amat mangyan katawan siro agpamangkit in kansiro batay sadiri kobat. ¹⁵ No kansiro piyagalwasi in kansiro batang pagoliyan na kalobante siro moli wakay. ¹⁶ Kamay in kansiro piyagkabeet labi kay kamaal ina, in sa langit wa daan pagbalayan. Matang in Diyos yewed agkarikoy piyagawit kansiro Diyos, siro kansiyo piyagsandataan bayan. ¹⁷ - ¹⁸ In betek Abraam piyagtepeng Diyos, panawen siyo agpasandig sa Diyos siyo agtaboy in kansiyo bodang Isaak, batay nges piyagbono piyagtaboy sa Diyos in kansiyo osai waget ka bodang, kamayba in piyangako Diyos Isaak in batay amang sa karowan wano. ¹⁹ Siyo katawan in Diyos kabaloy tagoli wakay agpaboway kay Isaak. Kataw ngani ina in mibaloy, Isaak kagwali wa batang matay, piyaoli wakay sa kansiyo. ²⁰ In Isaak agpandalangin kay Akob osai kay Isaw, panawen siyo agpasandig sa Diyos kansiyo asabi in mga maal pag agrateng dogayan. ²¹ In Akob koyayte wa batay wa matay, in siyo agatang sa kansiyo sowan agsamba, panawen siyo agpasandig sa Diyos kansiyo piyandalangin in kansiyo dowai ka popo bodang Osi. ²² In Osi bangen wa matay, panawen siyo agpasandig sa Diyos siyo keyen, In mga kasokponan Israil batay panaw sa Iipto, matang siyo agbilin keyen, Babaen in kangay mga bitol. ²³ Panawen kay Mowisis mga koyay agpasandig sa Diyos siro yewed agkalimo sa otos Paraon in poon lakoy sa Iipto. Tolo ka bolan kansiro biyetang in bodangte panawen kansiro ngiitan maalen wano pag bodang. ²⁴ Mowisis yaalapet kay Paraon bodang, kamay paka siyo lakonaw wa, panawen siyo agpasandig sa Diyos, siyo dayo wa piyagawit popo Paraon. ²⁵ Kansiyo remrem in siyo piyagpaidapan sarig in mga mangyan iidang Diyos, ina maal kay sa kadogayte waget pag kaanggayan in agyanggat sa mga agpamangwat daet. ²⁶ Kansiyo remrem in agtiis siyo piyagpakarikoy panawen siyo agpanaya kay Kiristo in batay rateng, ina lakonaw kay sa aronaw sangkap sa Iipto, angkataw siyo agpanaya sa batay bayad in piyagtaboy Diyos. ²⁷ Panawen Mowisis agpasandig sa Diyos siyo panaw sa Iipto, siyo yewed agkalimo sa galit in poon lakoy, maeyat kansiyo remrem angkataw siyo kagwali kangitan sa Diyos in yewed piyagngitan. ²⁸ Panawen ngani siyo agpasandig, kansiyo piyangwat in pista piyagawit Paskowa, kansiyo piyayodyodan daya in mga arigi sakbawan, matang in Sogowan Diyos Agpamono sa mga panganay idbatay agbono sa kansiro agbangen mga panganay, sa mga kasokponan Israil. ²⁹ Panawen agpasandig sa Diyos in mga kasokponan Israil siro kapotol sa Dagat Madayaan. In siro domalan kagwali mamara wa in diya, kamay paka mangagak in mga taga Iipto siro agbangen boo mangaleggeb. ³⁰ Panawen siro agpasandig sa Diyos in mga kasokponan Israil aglibedek pito ka ibeng sa bayan Iriko, kalbas mangaregnas in alabat bato. ³¹ In agpanggaraw pag kagbaiyan Raab idwa biyono sarig in mga yewed agpaniwala asin pag bayan, angkataw siyo agpasandig sa Diyos, kansiyo tiyanggap in mga talawtaw piyaonaik sa kansiyo balay. ³² Nakay, sibay wa yangon in kangay siyabi? Angkataw idwa katokor agkowinto kay Gidyon, kay Barak, kay Samson, kay Ipti, kay Dabid, kay Samwil, osai din sa mga poropita. ³³ Na panawen siro agpasandig sa Diyos, siro mandaeg sa mga sakopan, siro betek in agpapoon, kansiro abel in mga piyangako Diyos, kansiro kiyopot in bibi mga liyon. ³⁴ Siro kakaplek in timbon lakoy baya, siro mipalpas sa mga agpamogot. Kamayba siro mainaen siro piyakaeyat, matang siro mandaeg sa gira anggan piyatagoli in mga arigbowan sondalo panyawan. ³⁵ Apo mga kagbaiyan panawen siro agpasandig sa Diyos siro piyaoliyan kansiro mga matay, ina piyaboway wakay tagoli. In amat wakay biyono. Siro piyagpalpas nges, kamay siro yewed maniwala sa agolok, matang siro kabel in maalen sa ripay pag boway. ³⁶ In amat wakay piyaglibak, piyamogbog, apo din biyakos karakara, mga piyangaw. ³⁷ In amat piyamenglayan bato anggan matay, apo din in bilog diyodo lagadi, apo piyogot. In roma idapo damit, no yewed balat waget topa, osai kambing. Siro idapo kamayba nakay. Siro piyagrengreng, piyagpamangwatan daet. ³⁸ In kansiro kaalenen lampas sa atanggap in mga daeten pag mga mangyan. Siro aglibangawan waget sa mga moyod, sa mga boksor, agpatago sa mga leyang, sa mga langa. ³⁹ Ina pag boo, siro piyagmaal Diyos panawen siro agpasandig sa kansiyo. Kamay siro ikkay kabel in kansiyo mga piyangako, ⁴⁰ angkataw kitam din piyagremrem Diyos. In kansiyo remrem kitam boo kadayo siro piyalkaktekan piyangwat maal wano.

¹ Na nangkataw wa kitam? Angkataw karowan wano in agribok sa kantam, ina pag mga agpatonay sa agpasandig sa Diyos, na kantam wa benglayen in daet, in agpakabyat sa kantam osai in kamayba nakay pag makasalag, kitam agpilit agpakalakas in agdalagan sa dalan piyatoldo Diyos sa kantam. ² Baatte Isos in kantam pagpangkiten, angkataw siyo in pagpasandigan kantam paniwala ibat sa parakayan anggan sa kalobosan. Kaya yewed kansiyo kiyarikoyan in siyo agkatay sa kodos, panawen apo kaanggayan batay piyagtaboy sa kansiyo. Kalbas ngona siyo katokkaw wa sa pamalang agbangen in pagtokkawan lakoy Diyos. ³ Siyo kantam remremen in siyo agtiis sa daet pag mga mangyan agkabais sa kansiyo, na kitam idbatay abyatan remrem aregaan. ⁴ Angkataw anggan ngona in kamo aglaban sa daet kamo yewed kay piyagkabono. ⁵ Karam kamo agkalibangaw wa sa agiplaong Diyos in agpakaeyat sa kantam remrem in kitam piyagawit kansiyo mga bodang keyen, Kangay bodang, no kao piyagparosa in Kapwan, na ayaw aglaban. Osai ayaw abyatan remrem no kao kansiyo piyagpangelel. ⁶ Angkataw piyagparosa in Kapwan in kansiyo mga piyagpakayawte, osai piyagbogbog in kansiyo mga piyagapo bodang. ⁷ Na kantam tiisen in mga kaidapan, matang kitam pabeteken, angkataw in beet siyabi ina kitam piyagapo Diyos kansiyo wa daan bodang, kataw in baatte bodang piyagpakapya kansiyo amang. ⁸ No kitam yewed piyagparosa kataw in boo kansiyo mga bodang, na kitam alapet waget yewed bodang gayed. ⁹ Osai din, no kitam piyagparosa in kantam mga amang sa bilog, na siro kantam piyagmaal. Na labi kay maal in kitam pasakop sa Diyos sa kantam Amang sa abyan, matang kitam piyaboway. ¹⁰ In kitam bodang kay kitam piyagparosa kantam mga koyay no nangkataw in maal sa kansiro remrem. Kamay in Diyos agbangen, kaya kitam kansiyo piyagparosa matang kitam mipamaal, matang kitam apo din in kansiyo kaalenen. ¹¹ Sa kabetek kitam piyagparosa kitam yewed agkaanggay, angkataw maskit, kamay paka kalbas wa ina no kitam piyakapya wa, na kitam apyaan wa, agibetek wa in mga ogali. ¹² Na in idapo eyat agpakaeyat wa pakarigenen in agtaydek. ¹³ Pakapyaen in mga ogali matang in kagwali pilay idbatay malabo dayem maoraw. ¹⁴ Kitam agpilit agpaybelagan sa boo mangyan, agpangwat maal pag ogali, angkataw no siyo yewed maalen in ogali, na siyo idbatay kangitan sa Kapwan. ¹⁵ Kitam agpilit kamayba osai sa kantam ayaw agpaidapowen kabolowan in agpakayawte Diyos sa kantam. Ayaw din apo daet remrem agpakagolo agpansida sa karowan. ¹⁶ Agpilit din ayaw kamayba osai waget agpanggaraw, ayaw agkasadapan in mga atai waget sa kobat, kataw Isaw. Panawen sa osai ka yanganan pamangnen kansiyo piyaalis in batay nges piyagpaalapet ogon kansiyo amang panawen siyo in panganay. ¹⁷ Kanyo atawanan, sa kalobosan kansiyo wano beet in pandalangin kansiyo amang kamay kamayba agpanangis siyo idwa piyakan, angkataw idapo wa padalan agalis in kansiyo piyangwat. ¹⁸ Kitam yewed kataw in mga kasokponan Israil, in siro agpasabangen sa boksor Sinai in tangona piyagngitan, agrarab lakoy in baya, apo lened, maeyat wano in kowaya, makalimo, ¹⁹ agana lakoy bodyong apo agiplaongan makalimo, anggan malpandaing wa in mga karengey ina keyen, Omempet wa in agiplaong sa kanyam. ²⁰ Angkataw yewed kansiro abanta in batas keyen, Kamayba nakay kamayba ayop waget no manlaed asin sa boksor na benglayanen bato anggan matay. ²¹ Makapangirabot wano in kansiro piyagngitan, matang kadayo Mowisis keyen wa din, Ako agtagelgey wa agkalimo. ²² Kamay kitam agbangen kapasabangen sa boksor Siyon, sa bayan pagpamatawan Diyos agkaboway, sa langit pag Irosalim, sa aronan mga angil yewed abilang. ²³ Kitam karateng wa sa makaanggay pag barkadaan in mga piyagawit panganay Diyos, in mga agisolat sa langit in ngaran. Kitam sa adap wa Diyos in agosap sa boo mangyan, sa adap din in mga abyan in maalen pag mga mangyan in piyangwat maal wano. ²⁴ Kitam karateng wa din kay Isos, in paywaraan in bayo pag kasondowan. In kansiyo katayan apo kabolowan labi kay kalakoy in katayan Abil. ²⁵ Na kitam agpilit agparengey kay Isos, in agiplaong sa kantam. In mga tangona dayo agparengey sa agiplaong Diyos in piyaalam Mowisis sa kobat, siro yewed mipalpas sa parosa Diyos. Na labi kay kitam idbatay mipalpas no kitam dayo agparengey sa agiplaong batang sa langit. ²⁶ Tangona manloni in kobat panawen sa kansiyo agiplaong. Kamay ngona siyo mangako keyen, Makaosai kay waget kangay batay piyanloni yewed waget in kobat no yewed kadayo in langit. ²⁷ In keyen makaosai kay waget, na in beet siyabi piyagkowa in boo mga piyangwat, in boo apaglebey, matang palagi baywi in mga idbatay apaglebey. ²⁸ Na kitam wa agkaanggay sa Diyos angkataw in sakopan piyagtaboy sa kantam idbatay apaglebey. Na kantam pagmaalen in Diyos, no nangkataw in makaanggay sa kansiyo, in agpasakop osai agkalimo pag agmaal. ²⁹ Angkataw in kantam Diyos kagwali baya agpanggalpong.

¹ Ayaw agempet agpaybelagan. ² Paeseken in mga mangyan sa kantam mga balay. Angkataw apo mga mangyan agpaesek mangyan, in bayote yewed katawan bago mana angil in kansiro piyaonaik sa balay. ³ Kantam dalanginen in mga piyagbilanggo anggan tomag kitam piyagbilanggo din. Kantam dalanginen in mga piyagpaidapan anggan tomag kitam piyagpaidapan din. ⁴ Ayaw agpalsowayen in mga taybalang. Kailangan in taybalang agmaal sa osai osai angkataw piyagparosa Diyos in mga agbaliwan agpanggaraw. ⁵ Ayaw kitam sakop sa kowarta. Kitam agkaanggay wa kamayba nakay in sa kantam, angkataw in siyabi Diyos keyen, Kao idbatay kangay piyabayaan, idbatay din biyaliwan. ⁶ Na kitam yewed piyagbaslag in remrem kasabi keyen, In Kapwan in agtolong sa kangay. Ako idbatay agkalimo kamayba nakay in piyagpangwat mangyan sa kangay. ⁷ Ayaw agkalibangaw sa mga agpapoon sa kantam, agpatoldo in agiplaong Diyos. Kantam remremen in mga maalen in mibaloy batang sa kansiro boway. Kalbas kantam toladen in siro agpasandig sa Diyos. ⁸ IsoKiristo siyo kataw daan in tangona, kamayba ngona, anggan idapo kalobosan. ⁹ Kitam ayaw abel sa mga olok in kamayba nakay pag agpatoldo. In agpakaeyat sa kantam abyan in Diyos agpakayawte, yewed in mga batas panawen sa pamangnen. Baina, in mga agpaniwala asin idapo batang abel pakinabang. ¹⁰ Kitam apo osai ka kagwali paltawan pagsonogan andog. Yewed maal agkoman in yaandog asin in mga sasirdoti agpanawen sa datiyan torda pag sambaan. ¹¹ In daya mga ayop piyagbaba in mabwat pag sasirdoti sa pagtagbowan gayed sa Diyos, ina pag daya piyagandog panawen sa mga daet, kamay in mga galem agbangen biyaba wa sa awak bayan, ista wa piyagtebed. ¹² Kataw din ina Isos matay sa awak bayan matang panawen sa kansiyo daya in mga mangyan liinis sa kansiro mga daet. ¹³ Na kitam pataboy sa kansiyo sa awak bayan palagem sa kansiyo karikoyan. ¹⁴ Angkataw atai sa kobat kitam idapo bayan palagi batay pagoliyan. Dayem in kantam piyagpanaya in dogayan pag bayan. ¹⁵ Na kitam wa baatte agmaal sa Diyos, agawit in ngaran Isos. Ina kantam andog piyagparateng Isos sa Diyos. ¹⁶ Kitam ayaw agkalibangaw agpangwat maal, osai agtaboy sa mga roma, angkataw in kataw ina pag mga andog makaanggay din sa Diyos. ¹⁷ Kitam pasakop sa mga agpapoon sa kantam, pangwaten in kansiro piyagsabi. Panawen siro in agalapet sa kantam na siro batay piyagtanong Diyos. No kitam agpaniwala sa kansiro na siro agkaanggay agpanawen sa kansiro tongkolin. Kamay no yewed, na siro agkabyatan, na ina idbatay makamaal sa kantam. ¹⁸ Kami dalanginen. Sa kanyam atawanan kami idapo daet agpagolo sa galem, osai kami baatte agpilit agogali in betek kamayba nangkadogay. ¹⁹ In kangay ngani piyagayay sa kanyo ako dalanginen matang idwa dogay ako kaoli wakay sa kanyo. ²⁰ Kamo kangay piyagpandalangin sa Diyos in pagrakayan apyaan. Siyo in agpaboway wakay tagoli kay Isos kantam Kapwan. Isos kansiyo piyangwat Poon lakoy Agalapet sa kansiyo mga topa, angkataw in kansiyo katayan in agparigen sa idbatay lobos pag kasondowan. ²¹ Na in Diyos in agpakan sa kanyo in boo kanyo piyagkailangan matang kamo kapangwat in kansiyo beet. Osai Iso Kiristo in paywaraan agpangwat sa kantam galem in makaanggay sa Diyos. Siyo pakalakonawen anggan idapo kalobosan. Ina wa ngani. ²² Mga belag, kangay piyagayay kamo agbanta sa kangay piyatoldo, angkataw kaabate waget anda pag solat. ²³ Kangay beet biyarita sa kanyo kantam belag Timotiyo piyalpas wa. No nges siyo toloy wa atai rateng, na siyo kangay batay piyagpaanggat no ako batay wa asin sa kanyo. ²⁴ Kamo keyen sa mga agpakoyay sa kanyo siro kanyam piyagpandalangin kadayo in boo mga belag. In mga belag sa Italya keyen, Kamo lames idapo kamay nakay? ²⁵ Kamo boo pakayawteen in Diyos.