GALASYA

GALASYA

¹ Ako Pablo in agsolat anda. Ako sogowan agbarita, kamay ako yewed siyogo mangyan. Yewed mangyan in omidang sa kangay, no yewed IsoKiristo, osai in Diyos Amang in agpaboway wakay tagoli sa kansiyo. ² Kadayo in boo mga belag atai kangay sarig, kami agsolat sa mga barkadaan mga bodang Diyos sa boo kobat Galasya. ³ Kamo kanyam piyagpandalangin matang in Diyos kantam Amang agpakayawte osai agpakapya wa gayed sa kanyo remrem, osai IsoKiristo in Kapwan. ⁴ Panawen sa kantam mga daet, tiyaboy Kiristo in kansiyo boway matang kitam piyalpas wa sa daeten pag kabetek ngona. Angkataw siyo maniwala sa beet kantam Diyos, kantam Amang. ⁵ Siyo pagmaalen anggan idapo kalobosan. Ina wa ngani. ⁶ Ako agsoyo sa kanyo, in kamo toloy wa pabaribid in agpasandig sa Diyos. Sa pakayawte Kiristo kamo kansiyo biyerya, kalbas kamo toloy pabaribid wakay sa roma pag barita kamo keyen maal. ⁷ Kamay ina pag barita korang. Apo mga agpagolo sa kanyo remrem. Siro beet agsida sa Maal pag Barita Kiristo. ⁸ Angkataw kamayba wa kami, kamayba wa angil batang sa langit, no agpatoldo wakay sa kanyo yewed in Maal pag Barita kanyam wa piyatoldo, na siyo parosaen wa Diyos. ⁹ Kanyam wa siyabi, piyagolit wakay ngona, no apo agpatoldo sa kanyo yewed wakay in Maal pag Barita kanyo wa tiyanggap, na siyo parosaen wa gayed Diyos. ¹⁰ Na nakay, tomag lames kangay piyagkabeet in piyagmaal mangyan? Yewed. Dayem in kangay piyagkabeet in piyagmaal Diyos. Tomag lames ngani in kangay beet mangyan in agmaal sa kangay? Yewed ngani. No kataw daan ina in kangay beet na ako nges ayaw wa sogowan Kiristo. ¹¹ Laki mga belag, ako beet kamo katawan anda. In Maal pag Barita kangay piyagpatoldo yewed batang sa mangyan. ¹² Ina yewed kangay abel sa mangyan. Yewed din mangyan in agpatoldo sa kangay. Dayem IsoKiristo wa daan in agpapangkit ina sa kangay. ¹³ Kanyo wa abaritaan no kataw nakay in kangay boway tangona in ako agpaniwala kay sa mga piyagogali Odyo. Ako maloba wano agpamakaskit sa barkadaan mga bodang Diyos, agpilit wano agsida asin. ¹⁴ Sa agadar sa mga piyagogali mga Odyo ako mabwat kay sa boo Odyo kakoyay ako, nangkataw ako agpakaeyat wano agpangwat in boo ogali kanyam mga kakoyayan. ¹⁵ Kamay panawen in Diyos mabait ako ikkay biyodang ako kansiyo wa iidang, kalbas biyerya matang mibaloy kansiyo sogowan. ¹⁶ Paka kansiyo wa piyamaal, na in kansiyo Bodang piyapangkit wa sa kangay matang in Maal pag Barita sa kansiyo Bodang kangay biyaba piyatoldo sa mga yewed Odyo. Paka piyapangkit wa ako yewed agtanong sa mangyan kamayba wa kay nakay. ¹⁷ Kamayba wa sa mga katiwala Kiristo tokaw sa kangay, ako yewed pataboy sa kansiro sa Irosalim. Dayem ako tokaw pataboy sa kobat lakoy Arabya. Kadogay moli wakay sa bayan Damasko. ¹⁸ Anggan kalbas in tolo ka dagon bayo ako pataboy sa Irosalim matang katagbo kay Pidro. Ako agpamataw sa kansiyo labing lima ka ibeng. ¹⁹ Kamay in roma pag mga katiwala Kiristo ako idapo ngitan, no yewed Santiyago waget in ariyan in Kapwan. ²⁰ Totoo ngani anda in boo kangay piyagsabi. In Diyos katawan ako idapo piyagsabi baribid. ²¹ Paka kalbas ina, ako pataboy sa mga bayan sa Siriya osai sa Silisya. ²² Ina pag betek ako yewed kay atawanan in mga barkadaan mga bodang Diyos sa kobat lakoy Odiya. ²³ Siro karengey waget barita keyen in tangona agpamakaskit sa kansiro, ngona agpatoldo wa in paniwala kansiyo tangona piyagpilit piyagsida. ²⁴ Kalbas siro agmaal wa sa Diyos panawen sa kangay.

¹ Paka kalbas in labing opat ka dagon, ako monaker wakay sa Irosalim sarig Birnabi. Titos kangay din piyaanggat. ² Kaya ako ista pataboy angkataw siyabi in Diyos sa kangay kataw ina. Ako manggisodan sa mga koyay lakoy sa barkadaan mga bodang Diyos, kamay piyagtago. Kangay piyanggisod sa kansiro in Maal pag Barita in kangay piyagpatoldo sa mga yewed Odyo. Kaya ako agkataw ina, angkataw in kangay piyagkalimo karam kansiro batay piyagidapo kabolowan in kangay boo panawen tangona anggan ina pag betek. ³ Kamay Titos in kangay sarig, kamayba wa siyo Girigo, siyo yewed kansiro piilit piyatoli. ⁴ Kamay in beet in kalaati asin siyo patoliyen. Ina in mga agpakagwali waget belag paagem waget agitago sa barkadaan, matang kangitan no kitam in mga kay Kiristo Isos agipalpas wa ngani sa mga ogali in mga kakoyayan. Angkataw kansiro piyagkabeet kami piyagsakop wakay asin. ⁵ Kamay kami yewed padaeg sa kansiro, kamayba wa kadogayte agpenpenek, matang in Maal pag Barita sa kanyo idapo agiyagem baribid. ⁶ Kamay in mga tomag piyagpakoyay asin, kamay ako yewed mangkit sa kansiro kakoyayen angkataw sa Diyos idapo piyagidang, ina pag mga koyay idapo masabi dagdag sa Maal pag Barita kangay piyagpatoldo. ⁷ Dayem in kansiro ngiitan no nangkataw Pidro iidang Diyos agpatoldo in Maal pag Barita sa mga Odyo, na kataw daan din ina ako iidang matang agpatoldo sa mga yewed Odyo. ⁸ In Diyos in omidang kay Pidro matang kansiyo katiwala sa mga Odyo, siyo daan din in omidang sa kangay matang kansiyo katiwala sa mga yewed Odyo. ⁹ Paka kansiro ngiitan in Diyos in agtaboy anda pag tongkolin sa kangay kami Birnabi piyabelag in tolo ka koyay lakoy sa barkadaan mga bodang Diyos. Siro kora Santiyago, Pidro osai Owan. Kalbas kami maypolongan keyen kami sa mga yewed Odyo, siro wakay sa mga Odyo. ¹⁰ In kansiro waget piyagayay ayaw anaweyan in agtolong sa maidap pag mga agpaniwala sa Irosalim. Kataw wa daan ina in kangay datiyan beet pangwaten. ¹¹ Kamay in Pidro sa bayan Antiyokya siyo kangay siyabiyan sa adap in barkadaan, angkataw yewed maal in kansiyo piyangwat. ¹² In bayote siyo agpalanglang sa yewed Odyo pag mga agpaniwala. Kamay paka apo rateng mga sogowan Santiyago, siyo idwa palanglang sa mga yewed Odyo, angkataw siyo agkalimo sa mga agkapatoli sa mga yewed Odyo. ¹³ Kalbas kadayo in roma mga Odyo ista atoladan wa din, dayo wakay palanglang sa mga yewed Odyo. Anggan Birnabi aakayan wa din. ¹⁴ Kamay paka kangay ngiitan ina pag kansiro panawen kataw ina yewed betek sa Maal pag Barita, sa adapan siro boo kangay wa siyabiyan Pidro keyen, Kao osai ka Odyo, kao taite agogali kataw in mga yewed Odyo, yewed kataw in mga Odyo. Na nakay batang ngona kaimo piyagpilit in mga yewed Odyo agogali kataw in mga Odyo? ¹⁵ Kami kasokponan Odyo, kami yewed kataw in mga yewed Odyo piyagawit mga agpamangwat daet angkataw siro dayo agalapet in mga ogali kanyam mga kakoyayan. ¹⁶ Kamay in kanyam atawanan kaya in mangyan piyangwat Diyos idapo daet panawen sa agpasandig kay IsoKiristo, yewed panawen sa agpaniwala sa mga Batas Diyos. Kamayba kami, kami din agpasandig kay Kiristo Isos matang piyangwat idapo daet, panawen sa agpasandig kay Kiristo, yewed panawen sa agpaniwala sa mga Batas. Angkataw idapo batay piyangwat idapo daet panawen sa agpaniwala sa mga Batas. ¹⁷ Kanyam piyagpamangkit kay Kiristo in kami pangwaten Diyos idapo daet. Kamay no panawen ina kami mibaloy wa apo daet, na nakay, Kiristo agtolong sa daet? Baga. Yewed ngani mayadi. ¹⁸ Dayem no ako agoli wakay sa agpaniwala sa mga Batas, in datiyan wa kangay biyenglay, na ina pag mga Batas in agpatonay keyen ako agpangwat wa ngani daet. ¹⁹ Angkataw panawen sa mga Batas, ako kagwali wa matay, idwa sakop sa mga Batas. Matang ngona ako agkaboway sakop sa Diyos. Kiristo piyako sa kodos, siyo matay. Kalbas ako din kagwali wa matay kansiyo sarig. ²⁰ Na kamayba ngona ako agkaboway, na ina idwa ako, dayem Kiristo wa in agkaboway sa kangay galem. Matang in kangay piyagogali ngona, kangay apangwat sa agpasandig sa Bodang Diyos. Siyo in agpakayawte sa kangay, agtaboy kansiyo boway panawen sa kangay. ²¹ No nges panawen sa agpaniwala sa mga Batas in mangyan piyangwat Diyos idapo daet, na idapo nges kabolowan in Kiristo biyono. Kamay idbatay kangay piyagidapo kabolowan ina pag tiyaboy Diyos panawen siyo agpakayawte sa kantam.

¹ Kamo in mga taga Galasya, nakay wa in agpaidapo kanyo bait? Tomag kamo alomay wa. Mapawa wa gayed siyabi sa kanyo in IsoKiristo piyako sa kodos, anggan kagwali kanyo wa daan gayed ngiitan. ² Na ako apo tanong sa kanyo. Kaya lames kamo piyakan in Abyan Diyos panawen sa nakay agbangen? In osai panawen sa agpaniwala sa mga Batas Mowisis, in osai panawen sa agpasandig sa Maal pag Barita kanyo arengeyan? ³ Kamo idapo wano ngani bait. In kanyo bayo boway kanyo piyarakay sa kabaloyan in Abyan Diyos. Kalbas ngona kanyo remrem ina kanyo aparigen sa kanyo waget sadiri kabaloyan. ⁴ In boo mga mibaloy sa kanyo, kanyo lames piyagidapo kabolowan? Ayaw. Apo ngani. ⁵ Kamo piyakan Diyos in kansiyo Abyan. Siyo in agpangwat in mga makasoyo wano lakoy sa kanyo. Na ina yewed panawen sa kamo agpaniwala sa mga Batas. Dayem panawen sa kamo agpasandig sa Maal pag Barita kanyo arengeyan. ⁶ Remremen Abraam. Keyen in mga Agisolat, Panawen siyo agpasandig sa Diyos siyo piyangwat Diyos idapo daet. ⁷ Na asin kitam katawan in mga agpasandig sa Diyos, siro agbangen in mga kasokponan Abraam. ⁸ Sa mga Agisolat apo siyabi kay Abraam keyen, Panawen sa kaimo in boo mga mangyan batay piyagpakaanggay Diyos. Ina siyabi wa kay Abraam tangona kay naw. Na in galem ina in Maal pag Barita. Ina pag betek kamayba yewed kay mibaloy, atawanan wa batay piyangwat Diyos idapo daet in mga yewed Odyo panawen siro agpasandig sa kansiyo. ⁹ Abraam agpasandig sa Diyos kalbas siyo piyakaanggay. Na kataw daan din in boo agpasandig sa Diyos piyagpakaanggay wa din. ¹⁰ In boo agpilit agpaniwala sa mga Batas, na siro sa galem wa parosa Diyos. Angkataw in mga Agisolat keyen, Kamayba wa nakay in yewed maniwala sa kamayba osaite ka batas agisolat atai pag listaan mga Batas, na siyo sa galem wa parosa Diyos. ¹¹ Kaya mapawa ngani no panawen sa agpaniwala sa mga Batas na idapo batay piyangwat Diyos idapo daet. Angkataw in mga Agisolat keyen, In piyangwat Diyos idapo daet panawen sa agpasandig sa kansiyo, na ina in batay piyaboway. ¹² In piyagayay in mga Batas yewed in agpasandig sa Diyos, no yewed in agpangwat. Angkataw keyen in mga Batas, In agpangwat anda pag boo, ina in agkaboway. ¹³ Kitam piyalpas wa Kiristo sa kantam nges batay parosa panawen kitam yewed agpaniwala sa mga Batas. Kaya siyo matay panawen sa kansiyo wa in kantam nges batay parosa. Sa kansiyo katayan kitam biyayadan. Angkataw siyabi in mga Agisolat keyen, In baatte agipasak sa yangaw, in beet siyabi siyo piyagparosa Diyos. ¹⁴ Kaya Kiristo Isos agpakaidap kaloba ina, matang panawen sa kansiyo in kaanggayan tiyaboy Diyos kay Abraam piyarateng wa din anggan sa mga yewed Odyo. Osai matang in Abyan in piyangako Diyos maal wa tiyaboy sa kantam panawen kitam agpasandig kay Kiristo. ¹⁵ Laki mga belag, apo alimbawa sa ogali mga mangyan. Dowai ka mangyan malpangako. Paka kasondowan wa gayed, na idwa mayadi siida kamayba nakay. Idwa din mayadi diyagdagan. ¹⁶ In Diyos mangako kay Abraam osai sa kansiyo kasokponan. In mga Agisolat yewed keyen, Sa kaimo mga kasokponan. No keyen mga, na in beet siyabi karowan. Dayem keyen, Sa kaimo kasokponan. Idapo mga, na in beet siyabi osai waget. Na ina Kiristo. ¹⁷ Anda in kangay beet siyabi. In Diyos mangako kay Abraam. Kansiyo piyakarigen in kasondowan keyen, Batay ngani mibaloy. Na ina pag kasondowan idbatay asida in mga Batas in yewed kay rateng anggan kadalan wa 430 ka dagon. ¹⁸ No nges panawen sa agpaniwala sa mga Batas kitam piyakan in piyagtaboy Diyos, na ina idwa panawen sa pangako Diyos. Kamay kaya Abraam piyakan, angkataw piyagpangwat Diyos in kansiyo pangako. ¹⁹ Na no kataw ina, nakay batang tiyaboy in mga Batas? Kaya ina tiyaboy matang atawanan no nakay in beet siyabi daet. Kamay ina anggan waget rateng in kasokponan Abraam, in piyakan din in pangako. In mga Batas biyaba mga angil kay Mowisis. Kalbas siyo wakay in agsabi sa mga mangyan. ²⁰ In paywaraan piyagkailangan no dowai ka mangyan in agpalpangako. Kamay in Diyos osai waget. ²¹ Na nakay, in mga Batas lames aglaban sa mga pangako Diyos? Yewed ngani. No nges apo batas tiyaboy kabaloy agpamaboway sa mga mangyan, na in mangyan maal nges piyangwat Diyos idapo daet panawen sa agpaniwala asin pag batas. ²² Kamay keyen in mga Agisolat in boo mga mangyan sakop sa daet. Na idapo batay piyakan in piyangako no yewed in mga agpasandig kay IsoKiristo. In mga waget agpasandig sa kansiyo na ina wa in maal piyakan. ²³ Bayo rateng in kabetek agpasandig kay Kiristo kami in mga Odyo kagwali piyagbilanggo piyagdamay in mga Batas. ²⁴ Na in mga Batas in agdamay sa kanyam anggan Kiristo rateng wa matang kami piyangwat Diyos idapo daet panawen sa agpasandig kay Kiristo. ²⁵ Kamay angkataw ngona kami agpasandig wa sa kansiyo, na kami idwa piyagdamay in mga Batas. ²⁶ Kamo din in mga yewed Odyo mga bodang Diyos panawen sa agpasandig kay Kiristo Isos. ²⁷ Angkataw in boo biyaotismowan kay Kiristo, ina piyagbalayan wa Kiristo. ²⁸ Na tikkatawan wa kadayo in Odyo kadayo in yewed Odyo, kadayo in sogowan piyagalapet kadayo in yewed, anggan wa mga kaliyakiyan mga kagbaiyan. Na kitam boo osai waget panawen kitam boo agiyagem wa kay Kiristo Isos. ²⁹ No kamo kay Kiristo, na kamo miyagem wa din sa mga kasokponan Abraam. Sa kanyo wa din in piyagtaboy Diyos panawen sa kansiyo pangako.

¹ Anda kay din in osai ka alimbawa, In bodang in batay kapwan in mga sangkap in kansiyo amang, no siyo kalakoyte kay siyo sogowan waget, ikkay siyo in agalapet, kamayba dogayan siyo in batay kapwan in boo. ² Siyo sakop kay sa mga agalapet, sa mga katiwala anggan sa kabetek in tarato in kansiyo amang. ³ Kataw din ina kitam. In kitam yewed kay kay Kiristo kitam piyagpansakop kay mga mamaw in apo kabaloyan atai sa boo kobat. ⁴ Kamay paka rateng wa in tarato, siyogo Diyos in kansiyo Bodang. Siyo biyoslot kagbaiyan. Siyo Odyo sakop sa mga Batas. ⁵ Kaya siyo siyogo matang kansiyo piyalpas in mga sakop sa mga Batas. Na ngona kitam mibaloy wa gayed mga bodang Diyos. ⁶ Kaya atawanan kitam mga bodang Diyos, angkataw kitam piyakan in Abyan kansiyo Bodang sa kantam galem, matang kitam agsabi sa kansiyo keyen, Mambey, Amang. ⁷ Na kitam idwa sogowan, no yewed bodang wa. Na kataw bodang wa, kitam piyangwat wa din Diyos batay kapwan. ⁸ Tangona in yewed kay kanyo atawanan in Diyos, kamo sakop sa mga yewed Diyos. ⁹ Kamay ngona kanyo wa atawanan in Diyos. In maal kay nges kangay siyabi keyen kamo atawanan wa in Diyos. Na nakay batang kamo moli wakay sa mga mamaw tangona agpansakop sa kanyo? Siro idapo eyat, idapo kabolowan. Nakay batang kanyo wakay beet pasakop asin? ¹⁰ Kanyo piyagpaniwalaan in mga ibeng, in mga bolan, in mga kabetek, osai in mga dagon. ¹¹ Ako agkariyaban, karam idapo wa kabolowan in kangay eyat agpanawen sa kanyo. ¹² Mga Belag, ako agateet sa kanyo. Ako kanyo toladen in ako idwa agpanremrem sa mga Batas, kataw ako agtolad sa kanyo in kamo yewed sakop sa mga Batas. Tangona kitam agpaybelagan. ¹³ Kanyo atawanan kaya ako tangona kapatoldo sa kanyo in Maal pag Barita panawen ako apo maskit. ¹⁴ Kamayba kataw ina ako yewed kanyo piyaglado, yewed piyagkaramesan panawen sa kangay maskit, kamayba wa ina maidap sa kanyo. Dayem ako kanyo piyabelag gayed maal kataw in angil batang sa Diyos, kataw wa daan Kiristo Isos. ¹⁵ Tangona kamo agkaanggay wano. Na nakay batang ngona idwa? Ako wa daan in agsabi, no nges maal kiyaslot in kanyo mga mata matang taboyen sa kangay, na ina wa nges in kanyo piyangwat. ¹⁶ Ngona ako agpansabi kay in betek. Na nakay, panawen ina ako kanyo piyagkadaetan? ¹⁷ Ina pag mga bosliyen pag agpatoldo tomag agpakayawte sa kanyo, kamay yewed maal in kansiro remrem. In kansiro waget beet kamo agawen sa kangay matang kamo agpakayawte sa kansiro. ¹⁸ Maal in apo agpakayawte sa kanyo no maal in kansiro remrem. Dayem nges palagi kataw ina kitam, ayaw waget sa kabetek ako asin sa kanyo. ¹⁹ Laki kangay mga bodang, panawen sa kanyo ngona wakay ako agkaskitan wa labi kataw inang agkaboslotan, anggan Kiristo piyagngitan wa gayed sa kanyo boway. ²⁰ Kangay nges beet ako katagbo wa sa kanyo matang kitam manggisodan gayed na kangay wa asabi sa kanyo in boo kangay remrem. Kataw agkagolo wa labi kangay remrem panawen sa kanyo. ²¹ Amba, kamo in mga agkabeet wakay pasakop sa mga Batas, yewed lames kanyo piyagparengey in piyagsabi sa mga Batas? ²² In piyagsabi asin keyen, Abraanɩ apo dowai ka bodang. In osai Ismail in bodang sa sogowan waget, in osai wakay Isaak in bodang sa babai wa daan gayed. ²³ In bodang sa sogowan biyodang kataw waget kitam mga mangyan. Kamay in bodang sa babai gayed biyodang panawen in pangako Diyos. ²⁴ Asin pag dokabai apo alimbawa. In dokabai, na kantam remremen ina dowai ka kasondowan. Agar agbangen in alimbawa sa kasondowan apo in mga Batas piyangwat sa Boksor Sinai. In kansiyo mga bodang boo sogowan waget. ²⁵ Agar alimbawa sa Boksor Sinai sa kobat Arabya. Kamay ngona siyo alimbawa din sa bayan Irosalim, angkataw in mga mangyan asin pag bayan sakop asin pag mga Batas. ²⁶ Kamay Sara in babai gayed, ina alimbawa sa Irosalim sa langit. Ina in yewed sakop. Siyo in kantam inang. ²⁷ Angkataw in mga Agisolat keyen, Laki kagbaiyan yewed agpamodang, kao agkaanggay wa. Kao agkaanggay wano, kao in idbatang domalan sa kaidapan agboslot. Angkataw in biyaliwan pag kagbaiyan karowan wa in batay kasokponan, labi kay karo in apo lalaki. ²⁸ Mga belag, kataw Isaak biyodang sa babai gayed panawen sa pangako Diyos, na kataw din ina kitam bodang wa Diyos panawen sa pangako. ²⁹ No kataw tangona in biyodang sa kabaloyan in Abyan Diyos piyaidapan in biyodang kataw waget kitam mga mangyan, na kataw din ina ngona. ³⁰ Kamay in siyabi in mga Agisolat keyen, Boyawen in kagbaiyan sogowan, kadayo in kansiyo bodang. Angkataw in bodang in sogowan yewed mayadi piyakan bagiyan in mga sangkap. In boo sangkap piyagtaboy sa bodang in babai gayed. ³¹ Na, mga belag, kitam yewed mga bodang sa sogowan, no yewed bodang sa babai gayed.

¹ Kaya kitam piyalpas wa Kiristo sa mga Batas, matang kitam agipalpas ngani. Na kitam agpakarigen, matang ayaw wakay sakop asin pag mga Batas. ² Ako Pablo in agsabi, ayaw malibangaw in kangay piyagsabi. No kamo agpatoli kay, na Kiristo kanyo piyagpaidapo kabolowan. ³ Kangay wakay piyagolit, kamayba nakay pag agpatoli, kailangan siyo maniwala sa boo wano mga Batas. ⁴ No kamo agpilit agpaniwala sa mga Batas matang nges piyangwat Diyos idapo daet, na kamo pasoway wa kay Kiristo, pasoway wa sa Diyos in agpakayawte nges sa kanyo. ⁵ Kamay no sa kanyam, sa kabaloyan in Abyan Diyos, osai panawen sa agpasandig kay Kiristo kami agpanaya in kami batay piyangwat Diyos idapo daet. ⁶ Angkataw no in mangyan agiyagem kay Kiristo Isos, na idapo wa kabolowan kamayba tiyoli kamayba yewed tiyoli. Dayem in apo kabolowan in agpasandig sa kansiyo. Ina piyagngitan sa agpakayawte sa amat. ⁷ Maalen wa nges tangona in kanyo panawen. Nakay in ageleg sa kanyo sa agpaniwala sa totoo? ⁸ Nangkataw siyo agpilit sa kanyo? In kataw ina pag agpilit yewed batang sa Diyos. In Diyos in agberya sa kanyo. ⁹ Apo alimbawa keyen kamayba kalakoyte waget in piyaagem pamaistobo tinapay na mistobo lakoy in boo tikmel. ¹⁰ Panawen kitam boo agiyagem sa Kapwan ako apo tiwala sa kanyo in kanyo batay remrem kataw wa daan in kangay. Osai in agpagolo sa kanyo batay ngani piyarosaan Diyos, kamayba nakay pag mangyan. ¹¹ Mga belag, no ako agbarita keyen kailangan agpatoli, na nakay batang ako piyagpaidapan kay? No ina totoo, na nges yewed batay makagalit in kangay patoldo panawen sa katayan Kiristo. ¹² Kalbas asina sa mga agpanggolo sa kanyo kangay nges beet siro ayaw waget agpatoli dayem padodowen wa gayed. ¹³ Mga belag, kamo biyerya Diyos matang kamo agipalpas. Kamay kataw ngona kamo agipalpas, na ina ayaw agpangwaten dailan agpamangwat kamaybawate nakay pag daet in beet kanyo remrem. Dayem maytolongan kamo panawen sa agpaybelagan. ¹⁴ Angkataw osai waget ka agiplaong in galem in boo mga Batas. Ina keyen, Pakayawteen in roma mangyan, kataw wa daan in kanyo bilog. ¹⁵ Kamay no kamo agkataw ayop, agpalkayatan, agpangamol, na agingat, karam isag kamo idapo wa tera. ¹⁶ Anda wakay in kangay piyagsabi keyen, In kantam mga ogali pasakopen sa Abyan Diyos. Na kitam idbatay agpangwat ln piyagkabeet waget kantam bilog. ¹⁷ Angkataw in piyagkabeet kantam bilog aglaban sa beet in Abyan Diyos. Osai in Abyan aglaban sa piyagkabeet kantam bilog. Agpaylaban ina pag dowai, matang yewed kantam apangwat in beet nges piyangwat. ¹⁸ Kamay no kantam ogali piyagpasakop sa Abyan, na kitam idwa sakop sa mga Batas. ¹⁹ Atawanan in mga piyagpangwat in piyagkabeet kansiyo waget bilog, ina in mga agpanggaraw, mga marames, mga makarikoy pag panawen, ²⁰ in agsamba sa yewed Diyos, in agbalaon, in agkabais, in agpalaway, in agpanagiri, in daet remrem, in ayawan, in dayo mangako, in agpaylabanan, ²¹ in agpangayaw, in agpanlasing, in daeten pag mesaan, anggan in roma kay pag mga kataw ina. Kamo kangay piyagpatoldo kataw tangona keyen, In mga agpamangwat kataw ina idbatay piyakan bagiyan sa sakopan Diyos. ²² Anda wakay in mga batang sa Abyan, in agpakayawte, in agkaanggay, in apyaan in remrem, in yewed galiten, in mabait, in maalen, in yewed aglimbang, ²³ in kabwatte remrem, osai in kabaloy agsakop sa kansiyo remrem. Idapo batas laban sa mga kataw ina. ²⁴ In mga kay Kiristo Isos, in kansiro datiyan remrem, anggan in datiyan mga piyagkabeet kansiro wa biyono. ²⁵ In Abyan in agtaboy boway sa kantam, na kailangan kitam pasakop wa sa kansiyo. ²⁶ Ayaw kitam agyabang, ayaw matapang, ayaw agpanagiri.

¹ Mga belag, no sa kanyo apo ngiitan agpangwat daet, na kailangan kamo in mga sakop sa Abyan Diyos, kamo in agpatoldo sa kansiyo matang siyo agbait wakay. Kamay mabait pag agpatoldo. Osai agingat, karam kamo din batay tiyokso. ² Kamo maytolongan no apo agkaidapan. Kataw ina in agpangwat in bilin Kiristo. ³ No apo mangyan agpakalakonaw, kamay siyo kalakoyte, na piyagpadaya waget in kansiyo remrem. ⁴ Remremen in baatte mangyan sa kansiyo mga piyagpangwat no maalen no yewed. No atawanan maalen, na agkaanggay wa kansiyo remrem, Idwa kailangan agpangkit sa roma piyagpangwat. ⁵ Angkataw in baatte mangyan kailangan agpangwat in kansiyo wa daan panawen. ⁶ In agpatoldo in Maal pag Barita, kailangan in kansiyo mga agadar agpakan sa kansiyo in boo kansiro abaloyan. ⁷ Ayaw agpabaribiden in kanyo remrem. In Diyos yewed apadaya kamayba nakay. No nakay in yaasik in mangyan, na ina daan dogayan in kansiyo batay yaani. ⁸ No in mangyan agasik in mga daet piyagkabeet kansiyo bilog, na kansiyo batay yaani katayan. Dayem in agasik in mga piyagkabeet in Abyan, na kansiyo batay yaani in boway idapo kalobosan. ⁹ In kitam agpangwat maal ayaw mabyat in remrem. Angkataw paka rateng wa in kabetek kitam batay ngani agani no kitam yewed aglimbang. ¹⁰ Ayaw agsidaen in kabetek kitam agpangwat maal sa boo mangyan, labi kay no kantam belag sa agpasandig kay Isos. ¹¹ Amba, kanyo pangkiten anda pag mga solat mga lakonaw. Anda kangay wa daan bakwaw in agsolat sa kanyo. ¹² In mga agpakalakonaw sa piyangwat sa kansiro bilog, siro in mga agpilTt kamo din patoli. Kaya kansiro piyagpangwat ina matang siro idbatay wa piyagpaidapan panawen sa agbarita in katayan Kiristo sa kodos. ¹³ Kamayba in mga agpatoli siro yewed din agpaniwala sa mga Batas. Beet waget siro agpakalakonaw in kamo kansiro apilit agpatoli. ¹⁴ Kamay no sa kangay, ako idapono batay piyagpakalakonaw no yewed in IsoKiristo kantam Kapwan matay sa kodos. In mga ogali piyagpakalakonaw in roma mangyan, na panawen sa kodos ina pag ogali sa kangay matay wa. Ako idwa sakop asin pag mga ogali. ¹⁵ Kamayba tiyoli, kamayba yewed tiyoli idapo kabolowan, dayem in apo kabolowan in kitam bayo wakay piyangwat Diyos. ¹⁶ Sa boo mga agpaniwala kataw ina sa boo mga bodang Diyos, in kangay pandalangin siro kansiyo pakanen apyaan pag remrem osai pakayawteen. ¹⁷ Ibat ngona ako ayaw agpaidapanen kamayba wa nakay pag mangyan. Angkataw in mga golatowan sa kangay bilog, ina in mga tanda ako sogowan Isos. ¹⁸ Kamo pakayawteen IsoKiristo kantam Kapwan, mga belag. Ina wa ngani.