IPISO

IPISO

¹ Ako Pablo in agsolat, katiwala Kiristo Isos, angkataw ina in beet Diyos. Ako agsolat sa mga bodang Diyos sa Ipiso, sa mga yewed aglimbang agpaniwala kay Kiristo Isos. ² Kamo pakayawteen osai pakapyaen in Diyos kantam Amang osai IsoKiristo kantam Kapwan, osai pakanen in apyaan pag remrem. ³ Kitam malkaanggayan sa Diyos sa Amang IsoKiristo kantam Kapwan. Kitam kansiyo wa piyakan in baatte maal pag batang sa langit, in piyagkailangan kantam abyan, angkataw kitam piyaagem kay Kiristo. ⁴ Ikkay piyangwat in kobat, kitam iidang wa Diyos matang piyangwat maal gayed, idapo wa daet sa kansiyo pangkit panawen kitam agiyagem wa kay Kiristo. Panawen kitam kansiyo piyagpakayawte, ⁵ kitam kansiyo piyabokod matang kitam kansiyo mga bodang. IsoKiristo in padalan agpabokod. Tangona daan kataw ina in maal pag remrem Diyos in kansiyo piyagkabeet. ⁶ Ina matang batay piyagmaal in kalakoyen in kansiyo idapo piyagayay pag agpakayawte sa kantam, angkataw kitam piyaagem sa kansiyo piyagpakayawte pag Bodang. ⁷ Kiristo biyono panawen sa kantam. Na kitam piyalpas, in beet siyabi liibangaw wa in kantam mga daet. In kalakoyen in lakonaw pag agpakayawte in Diyos sa kantam ⁸ lakonaw wano lakoy anggan idwa asabi. Panawen sa kansiyo katawanan, sa kansiyo maal pag remrem ⁹ - ¹⁰ kansiyo wa piyangwat in kansiyo datiyan piyagremrem batay piyagpangwat. Kansiyo wa piyalowas sa kantam in kansiyo batang piyagbetang pag remrem, in kansiyo datiyan batay piyagpangwat paka rateng in kabetek. Kiristo in kansiyo padalan agpangwat. Ina pag kansiyo remrem in boote sa langit osai sa kobat kansiyo piyagpaagem kay Kiristo. Siyo in olo. ¹¹ Panawen kay Kiristo kami in mga Odyo iidang Diyos, matang kansiyo mga mangyan. Ina in siyandata Diyos in agpangwat in boote no nangkataw in beet kansiyo remrem. ¹² Kami in mga tokaw agpasandig kay Kiristo, siyandata Diyos agmaal sa kansiyo kalakoyen. ¹³ Kalbas kataw din ina kamo in mga yewed Odyo. Paka kamo karengey in betek, in Maalno pag Barita in agpamaboway, na kamo din agpasandig kay Kiristo, mibaloy wa kansiyo mga mangyan. Kalbas kamo piyakan in piyangako Diyos in Betek pag Abyan, matang tanda kamo kansiyo agbangen. ¹⁴ Ina pag Abyan in piyagtaboy sa kantam matang kantam matiyak atawanan batay ngani tiyaboy sa kantam in boo kansiyo piyangako sa kansiyo mga iidang, anggan dogayan mibaloy wa gayed piyaboway. Na kantam wa pagmaalen in kansiyo kalakoyen. ¹⁵ Kaya ngani, ibat ako abaritaan kamo agpasandig wa kay Isos sa Kapwan, osai kamo agpakayawte sa boo mga bodang Diyos, ¹⁶ ako palagi agkaanggay sa Diyos panawen sa kanyo. Sa kangay pandalangin kamo palagi piyagpaagem. ¹⁷ In kangay piyagayay sa Amang lakoy, sa Diyos kantam Kapwan IsoKiristo keyen, Kamo pakanen in katawanan pag remrem osai siyo papangkit sa kanyo matang siyo kanyo wa gayed atawanan. ¹⁸ Osai kansiyo paliwanagen sa kanyo remrem in kantam piyagpanaya, in galem in siyo agberya sa kantam, in kalakoyen in kayamanan kansiyo piyagsandata sa boo kansiyo mga bodang, ¹⁹ osai in kansiyo idapo kalobosan pag kabaloyan sa kantam sa mga agpasandig sa kansiyo. Ina daan din pag kabaloyan lakoy ²⁰ in agpaboway wakay tagoli osai agpaakyat kay Kiristo sa langit, siyo piyangwat Diyos kapitan. ²¹ Matang sakop wa daan sa kansiyo in boo mga poon, in mga koyay lakoy, in mga apo kabaloyan, in boo mga kapwan. Siyo labi kay mabwat sa boo mga tongkolin, yewed ngona waget pag mga betek, dayem anggan kamayba nangkadogay. ²² In boo wanote piyasakop Diyos sa kabaloyan Kiristo. Osai siyo piyangwat poon, olo sa barkadaan mga bodang Diyos. ²³ In barkadaan in kansiyo bilog. Siyo in agpaibaloy sa boote sa boo betek. Paka miyagem wa sa olo in bilog, na siyo mibaloy wa gayed.

¹ Tangona kay kamo in mga yewed Odyo matay wa panawen sa kanyo mga daet, panawen kamo dayo maniwala. ² In kanyo mga ogali daet, kataw daan in mga ogali atai sa kobat. Kamo sakop sa poon mga mamaw, in datiyan agpansakop sa mga dayo maniwala sa Diyos. ³ Tangona kami in mga Odyo kataw din ina. Kanyam piyagogali in mga ogali waget mangyan, kamayba nakay in beet kanyam bilog, in kanyam remrem. Na kami din kataw daan in boo mangyan piyagkagalitan Diyos panawen sa mga daet pag ogali. ⁴ Kamay in Diyos maloba wa apakayawtean sa kantam. In kalakoyen in kansiyo agpakayawte sa kantam ⁵ anggan kamayba wa kitam matay sa kantam mga daet, kitam piyaboway wakay piyaagem kay Kiristo. Kitam piyaboway wa ngani panawen sa kansiyo lakonaw pag agpakayawte sa kantam. ⁶ Panawen kitam agiyagem kay Kiristo Isos kitam piyaboway wakay Diyos piyaakyat sa langit, sarig Kiristo agpansakop. ⁷ Ina pag boo kansiyo piyangwat matang sa mga agrateng kay pag mga ibeng kansiyo batay apapangkit in idbatay asabi pag kalakoyen in kansiyo agpakayawte sa kantam. Kiristo Isos in padalan matang mipapangkit. ⁸ Kitam piyaboway angkataw kitam agpasandig sa kansiyo. Kamay ina panawen sa kansiyo lakonaw pag agpakayawte sa kantam, yewed panawen sa kantam agbangen piyangwat. Ina tiyaboy waget Diyos sa kantam. ⁹ Yewed panawen sa kantam mga piyangwat, matang kitam yewed mayadi agpakabwat remrem. ¹⁰ Kitam piyangwat Diyos. Kaya kitam piyangwat matang kitam agiyagem kay Kiristo Isos agpangwat maal sa boo kantam ogali. Tangona daan ina pag maal pag ogali siyandata wa Diyos matang kantam piyangwat. ¹¹ Kamo in mga yewed Odyo ayaw anaweyan sa kanyo tangona boway. In mga Odyo, panawen sa kansiro piyangwat sa kansiro bilog, siro piyagawit toli. Kalbas kamo kansiro piyagawit yewed toli. ¹² Kanyo pagremremen, tangona kamo agisoway kay Kiristo, yewed agiyagem sa mga mangyan Diyos. Kamo mga panyawan waget, idapo bagiyan sa polong Diyos, sa kansiyo mga piyangako sa kansiyo mga mangyan. Kamo agkaboway waget atai sa kobat idapo Diyos, idapo piyagpanaya. ¹³ Kamo tangona adayonaw sa Diyos. Kamay ngona, Kiristo biyono panawen sa kantam. Na kamo piyaagem sa kansiyo piyasabangen wa Diyos. ¹⁴ Kitam yaayos wakay Kiristo, piyabelag. Kami in mga Odyo, osai kamo in mga yewed Odyo, kansiyo piyangwat osai waget. Kansiyo tiyaboy kansiyo bilog, matang kansiyo riyegnas in kagwali bengbeng in agpalsoway sa kantam, in kitam agpalaway. ¹⁵ Osai in mga Batas mga Odyo, ina boo bilin, boo otos, ina kay Isos wa piyaidapo kabaloyan, matang piyaagem wa sa kansiyo in mga Odyo osai in mga yewed Odyo. Siro piyangwat wa osai waget matang apyaan wa gayed. ¹⁶ In siyo matay sa kodos, kansiyo wa liyobos in agpalaway in mga Odyo osai in mga yewed Odyo. Tanan wakay piyaoli sa Diyos, mibaloy wa osai waget. ¹⁷ Kiristo atai pataboy, agpatoldo in Maal pag Barita keyen, piyagpamakapya kadayo din kamo in mga yewed Odyo adayonaw sa Diyos, kadayo din kami in mga Odyo bangente sa kansiyo. ¹⁸ Panawen kay Kiristo tanan wa maal agpasabangen sa Amang sa padalan in Betek pag Abyan. ¹⁹ Na kamo mga yewed Odyo idwa taga adayonaw, idwa panyawan. Dayem kamo mga belag wa sa mga iidang Diyos, osai miyagem wa sa kansiyo talnakiyan. ²⁰ Kamo din piyaiskapet sa balay piyagtadyok in mga katiwala Kiristo, osai in mga poropita. IsoKiristo wa daan in arigi lakoy. ²¹ In baatte towar piyagpasibay sa amat towar. Kiristo in pamekkes, matang in piyagpangwat balay lakoy maalen, piyabokod tiyalaga sa Kapwan. ²² Panawen kamo din agiyagem kay Kiristo kitam boo piyalkapetan matang pagbalayan Diyos, piyagbalayan kansiyo Abyan.

¹ Panawen ina kamo kangay piyagpandalangin. Ako Pablo osai ka piyagbilanggo panawen kangay piyabarita IsoKiristo sa kanyo sa mga yewed Odyo. ² Sigodo kamo abaritaan wa din keyen panawen sa kansiyo lakonaw pag agpakayawte, ako piyakan Diyos anda pag tongkolin lakoy matang kamo apo pakinabang. ³ Kansiyo piyatoldo sa kangay in kansiyo batang piyagbetang pag remrem, kataw in kangay wate masolat. ⁴ No kanyo piyagbasa ina na kanyo batay atawanan ako katawan gayed in batang piyagbetang pag remrem Diyos panawen kay Kiristo. ⁵ Ina pag remrem idapo piyatoldo sa mga mangyan tangona, kamay ngona siyogo wa Diyos in kansiyo Abyan agpalowas ina sa kansiyo maalen pag mga katiwala Kiristo osai sa mga poropita. ⁶ In batang piyagbetang pag remrem keyen, Panawen sa Maal pag Barita kamo in mga yewed Odyo kataw daan in mga Odyo, apo din bagiyan sa boo makaanggay in piyagtaboy Diyos, kamo piyaagem wa din sa osai waget ka bilog, osai piyakan wa din in piyangako Diyos in kansiyo wa biyaloy kay Kiristo Isos. ⁷ Panawen in Diyos agpakayawte sa kangay, osai din panawen sa kansiyo lakoy kabaloyan ako kansiyo piyangwat sogowan agbaba in Maal pag Barita. ⁸ Ako kalakoyte wano sa boo mga iidang Diyos. Kamayba wa kataw ina, ako kansiyo piyasibay piyakan anda pag maalno pag panawen in agpatoldo sa mga yewed Odyo in Maal pag Barita panawen sa mga idbatay malobos pag mga piyagtaboy Kiristo, ⁹ osai in agpaliwanag sa boo mangyan no nangkataw piyagibaloy Diyos in kansiyo batang piyagbetang pag remrem. Ibat tangona daan naw idapo kay parakayan, ina piyagbetang Diyos in agpangwat in boote. ¹⁰ Matang ngona kansiyo piyagpapangkit sa mga poon osai sa mga apo kabaloyan sa langit in kansiyo idbatay malobos pag katawanan sa kamayba nakay pag panawen. In kansiyo padalan agpapangkit in barkadaan kansiyo mga bodang. ¹¹ Ina pag boo piyangwat Diyos matang mibaloy in kansiyo idapo kalobosan pag remrem. In padalan Kiristo Isos kantam Kapwan. ¹² Panawen sa kitam piyaagem wa osai agpasandig kay Kiristo kitam kapasabangen wa sa Diyos yewed agkalimo. ¹³ Na kangay piyagsabi sa kanyo, kamo ayaw abiyatan remrem sa kangay mga kaidapan panawen sa kanyo. Angkataw asina kamo apo pakinabang. ¹⁴ Ina in dailan kaya ako karai keyen ako agpandalangin sa Diyos Amang. ¹⁵ Siyo in kiyowaan in pagawitan amang sa boo talamang sa langit, kamayba wa sa kobat. ¹⁶ In kangay piyagayay sa kansiyo kamo pakanen kansiyo Abyan kabaloyan osai maeyat pag remrem batang sa kansiyo kayamanan, batang sa kansiyo kalakoyen. ¹⁷ Osai kataw kamo agpasandig kay Kiristo siyo mamataw sa kanyo remrem matang kamo tiyadyok, agistobo in kanyo dalig sa agpakayawte. ¹⁸ Matang kamo, sarig in boo mga bodang Diyos, katawan no nangkalakoy in kaslangen, in kaabaen, in kabwaten, osai in kalayemen in agpakayawte Kiristo. ¹⁹ Kamayba ina pag agpakayawte idbatay gayed atawanan, in kangay piyagayay sa Diyos ina kanyo ngani atawanan, matang sa boo kanyo boway kamo kiyaknowan wa gayed Diyos. ²⁰ In Diyos in kabaloy agpangwat labi kay naw kalakoy sa boo kantam piyagayay osai piyagremrem, panawen sa kansiyo kabaloyan agpanawen sa kantam. ²¹ Siyo pagpakalakoyen sa barkadaan mga bodang Diyos angkataw kitam agiyagem kay Kiristo Isos. In Diyos pagpakalakoyen sa baatte kasokponan anggan idapo kalobosan. Ina wa ngani.

¹ Na ako agpilit sa kanyo, ako in osai ka piyagbilanggo panawen ako sogowan in Kapwan, kanyo ogaliyen in betek pag ogali sa mga iidang Diyos. ² Kailangan kitam agpakabwatte remrem, agpakabait, ayaw aglimbang. Kitam agpalsipakayawtean, pagbantaen in baatte osai. ³ Kitam piyalageman in Abyan. Na kitam agpilit ayaw agpalawayan, matang yewed masida ina pag agpalageman. ⁴ Osai waget in bilog. Osai waget din in Abyan. Kataw din ina kitam biyerya Diyos matang kitam boo osai waget in piyagpanaya. ⁵ Osai waget in Kapwan, osai waget in paniwala, osai waget in baotismo. ⁶ Osai waget in Diyos in Amang kitam boo. Siyo Kapwan sa boo. Siyo in agpanawen sa boo. Siyo daan din in agbalay sa boo. ⁷ Kamay in baatte osai sa kantam piyakan no nakay pag kabaloyan in beet tiyaboy Kiristo. ⁸ Kataw in siyabi in Agisolat keyen, In siyo monaik sa langit, siyo apo piyagbaba, siyo aronaw abel mangyan. Osai siyo apo biyagi sa mga mangyan. ⁹ Na in siyo monaik sa langit, in beet siyabi lompot siyo atai sa kobat kadogay monaik wakay. ¹⁰ In lompot na siyo daan din in monaik sa ogbos langit, matang in boote kamayba saano piyangwat sibay angkataw apo siyo asina daan. ¹¹ Kalbas in keyen karai siyo apo biyagi sa mga mangyan, na in beet siyabi in kalaati kansiyo piyangwat mga katiwala, in kalaati wakay mga poropita, in kalaati mga misyoniro, in kalaati mga agalapet, mga agpatoldo. ¹² Kaya ina tiyaboy matang in barkadaan mga bodang Diyos siyandata agpanawen osai agpakaeyat sa bilog Kiristo. ¹³ Kataw ina kitam boo agpaniwala osai katawan sa Bodang Diyos, agpalageman anggan kitam koyay wa sa agpaniwala, kakoyay wa daan Kiristo. ¹⁴ Na kitam idbatay wa kataw in mga bodangte agkaakayan sa kamayba nakay pag piyagpatoldo, kataw laing piyaglimeslimes sa sapa, mga piyagparakparak kowaya. Kitam idbatay wa liibangaw in aleleng pag mga mangyan agpaakay daet sa kantam. ¹⁵ Dayem kitam agpakayawte agsabi in betek, batay agistobo in agpaagem kay Kiristo. Siyo in olo. ¹⁶ In Diyos in agtaboy in mga eyat matang in boo bilog agpalkapetan, sakop kay Kiristo. No in baatte osai agpangwat kansiyo panawen, na in boo bilog agistobo osai maeyat kataw agpaybelagan. ¹⁷ Ako siyogo in Kapwan agpilit agayaw sa kanyo keyen, Kamo ayaw wa agogali kataw in mga yewed Odyo. Idapo kabolowan in kansiro mga piyagremrem. ¹⁸ Beleg wa in kansiro mga remrem. Siro idapo in boway piyagtaboy Diyos, panawen siro dayo katawan, marigen in olo. ¹⁹ Siro idapo wa gayed rikoy. Siro agpamangwat in boote mga makarikoy, agkasadapan agpamangwat in boote marames. ²⁰ Kamay yewed kataw ina in kanyo atawanan kay Kiristo. ²¹ Kanyo ngani arengeyan in kansiyo agiplaong, osai kanyo atawanan in betek in piyatoldo Kiristo sa kanyo. ²² Baliwanen wa in kanyo datiyan mga ogali, in datiyan pag boway. Ina agbono sa kanyo panawen sa kanyo mga daet pag piyagkabeet. ²³ Kamo omilag wakay sa bayo pag remrem bayo pag boway. ²⁴ In kailangan ngiitan sa kanyo in bayo wakay pag boway in piyangwat kataw daan in Diyos, kataw daan din siyo betek, maal wano. ²⁵ Na benglayen wa in mga baribid. Kailangan in baatte osai agsabi in totoo sa kansiyo belag, angkataw kitam agiyagem sa bilog Kiristo. ²⁶ No kitam betek agkagalit na ayaw agpangwat daet. Ayaw kay malabo in ibeng benglayen wa in galit. ²⁷ Ayaw agpakanen dalan in dimonyo. ²⁸ In datiyan agpanakaw ayaw wa agtakaw. Dayem agpanawen wa. In kansiyo bakwaw agpanawen maal, matang siyo apo batay mataboy sa maidap. ²⁹ Ayaw agiplaongan makarikoy. Dayem kitam agpilit agiplaong maal makatolong sa roma, agibetek sa kabetek, osai agpakaeyat remrem. Matang in roma kabel pakinabang. ³⁰ Ayaw agpamarongkot sa Betek pag Abyan Diyos, angkataw siyo wa in tanda Diyos kitam kansiyo agbangen dogayan sa Ibeng kitam kansiyo wa piyagpalpas sa boote. ³¹ Kantam wa benglayen in boo daeten pag remrem, mga agkabais, mga agkagalit. Ayaw wa agpamalimlimo, ayaw aglibak. Ayaw agpanremrem daet sa roma. ³² Dayem kitam agpaybelagan, agpalsipakayawtean. Kataw in Diyos aglibangaw sa kantam mga daet panawen kay Kiristo, na kataw daan din ina kitam aglibangaw in daet sa roma mga mangyan.

¹ Kitam mga bodang Diyos. Siyo agpakayawte sa kantam. Na kitam agtolad sa kansiyo. ² Ogaliyen in agpakayawte, kataw in Kiristo. Panawen siyo agpakayawte sa kantam, tiyaboy in kansiyo boway andog mala masadap sa Diyos. ³ Kitam in mga bodang Diyos ayaw wa agsabi sa kantam barogi in mga agpanggaraw, mga marames pag mesa, mga agpanagiri. ⁴ Yewed din maal in mga marames osai idapo kabolowan pag panggisoden, in mga agkasolokan. Dayem kitam agkaanggay sa Diyos. ⁵ Totoo ngani in mangyan agpanggaraw, agpamangwat makarikoy, agpanagiri (ina agsamba sa yewed Diyos), in agkasadapan sa mga kataw ina daet, ina idbatay piyakan bagiyan sa sakopan Kiristo osai Diyos. ⁶ Ayaw kitam padaya sa mga mangyan agsabi in idapo kabolowan. Angkataw panawen asina pag mga piyangwat, in Diyos agkagalit sa mga yewed agpaniwala. ⁷ Na kitam ayaw agpabelag sa mga kataw ina. ⁸ Tangona kamo in mga yewed Odyo sa lened. Kamay ngona sa mapawa wa angkataw kamo sa Kapwan wa. Na kitam agogali maal kataw in betek sa mga agbalay sa mapawa. ⁹ Angkataw in galem mapawa boo wano maal, betek, osai totoo. ¹⁰ Kitam agadar matang atawanan no nakay in makaanggay sa Kapwan. ¹¹ Kitam ayaw agpabelag sa mga mangyan agpamangwat in idapo mga kabolowan, in mga sa lened. Kantam papangkiten in kadaeten in kansiro mga piyagpangwat. ¹² Angkataw makarikoy kamayba yaawit waget in kansiro mga piyagtago piyagpangwat. ¹³ In boo piyapangkit piyagngitan wa gayed no kataw nakay, ¹⁴ osai in riyawaan na agrawa. Matang in piyagsabi keyen, Laki agesek, mipolaw wa, miyorog wa batang sa mga matay, na kao batay piyagrawaan Kiristo. ¹⁵ Na kitam agingat ngani sa kantam mga ogali, no kataw nakay. Ayaw in idapo atawanan pag mga ogali, dayem in mga katawanan. ¹⁶ Ayaw agsidaen in baatte kabetek agpangwat in maal. Angkataw ngona pag betek aronaw in mga daet. ¹⁷ Ayaw kitam idapo bait. Kantam remremen no nakay in beet in Kapwan. ¹⁸ Kitam ayaw agpanlasing. Ina makagolo sa kantam boway. Dayem pasakopen in boote sa Abyan Diyos. ¹⁹ Kitam malsisagotan awit, mga baren pansamba. In boo kantam remrem agbaren agmaal sa Kapwan. ²⁰ Osai baatte agkaanggay sa Diyos Amang sa boote, panawen IsoKiristo kantam Kapwan. ²¹ Kitam malsipasakopan. Ina tanda kitam sakop kay Kiristo. ²² Kamo in mga babai, kamo pasakop sa kanyo mga lalaki, kataw daan kamo agpasakop sa Kapwan. ²³ Angkataw in lalaki in mabwat sa kansiyo babai, kataw din Kiristo in mabwat sa barkadaan mga bodang Diyos. In barkadaan in kansiyo bilog. Siyo in olo. Siyo din in agpaboway. ²⁴ No nangkataw in barkadaan sakop kay Kiristo, na kataw daan din ina kamo in mga babai pasakop gayed maal sa kanyo mga lalaki. ²⁵ Kamo in mga lalaki, kanyo pagpakayawteen in kanyo mga babai, kataw daan in Kiristo agpakayawte sa barkadaan mga bodang Diyos. Panawen asin kansiyo tiyaboy in kansiyo boway. ²⁶ Matang in barkadaan, paka kansiyo liinis, piyaogas sa sapa osai sa Agiplaong Diyos, na kansiyo piyatalaga sa Diyos. ²⁷ Ina kansiyo piyangwat matang in barkadaan piyasabangen sa kansiyo, maalno, idapo wano lebag, idapo kepes, idapo wano kamay nakayte, no yewed maalen wano gayed, idapo kalakoy ina. ²⁸ Kailangan in mga lalaki agpakayawte sa kansiro mga babai kataw daan in agpakayawte sa kansiro bilog. No in lalaki agpakayawte sa kansiyo babai na in beet siyabi siyo agpakayawte sa kansiyo daan bilog. ²⁹ Idapo mangyan agkagalit sa kansiyo bilog. Dayem piyagpakoman daan, piyagalapet, kataw daan din in Kiristo agalapet sa barkadaan mga bodang Diyos. ³⁰ Angkataw kitam mga galem kansiyo bilog. ³¹ Siyabi in Agisolat keyen, Panawen ina piyagbaliwan in kaliyakiyan in kansiyo mga koyay, agpaysarig in taybalang. Siro dowai mibaloy wa osai waget. ³² Ina lakonaw pag beet siyabi. Kangay remrem ina Kiristo osai in kansiyo barkadaan mga bodang Diyos. ³³ Kamay kamo in mga lalaki, kamo din in beet siyabi ina. Kanyo pakayawteen in kanyo mga babai, kataw daan in kanyo bilog. Osai kamo in mga babai, kamo pasakop sa kanyo mga lalaki.

¹ Kamo in mga bodang, kamo maniwala sa kanyo mga koyay, angkataw ina in piyatoldo in Kapwan, ina in betek pag ogali. ² Pagmaalen in kanyo amang osai inang, angkataw ina in tokaw pag bilin apo pangako, keyen, ³ No kao agmaal sa kaimo mga koyay, na kao batay apiyaan, batay dogay in kaimo boway atai sa kobat. ⁴ Kamo in mga koyay, ayaw agpakadaet remrem sa kanyo mga bodang. Dayem siro kanyo paistobowen patoldowen in mga adar in Kapwan. ⁵ Kamo in mga sogowan piyagalapet, kamo maniwala sa kanyo mga kapwan atai sa kobat. Pasakop wa gayed, agkalimo sa kansiro, ayaw aglimbang. Kataw daan in kamo agpasakop kay Kiristo. ⁶ Ayaw waget agpapangkit makaanggay sa kanyo kapwan. Kamayba idapo agpangkit, na kamo agpanawen daan gayed, kataw sogowan Kiristo. Kamo wakayte agpangwat in beet Diyos. ⁷ In agpanawen pakamaalnowen in bait kataw kamo sogowan Kiristo yewed mangyan waget. ⁸ Angkataw kantam atawanan IsoKiristo batay agbayad sa baatte mangyan agpangwat maal, kamayba sogowan piyagalapet kamayba yewed. ⁹ Kamo in mga kapwan, agpakamaal sa kanyo mga piyagalapet sogowan. Ayaw wa agpamalimlimo sa kansiro, angkataw kanyo atawanan kamo tanan sogowan piyagalapet osai waget ka Kapwan sa langit. Siyo idapo piyagidang. ¹⁰ Anda wa in kalobosan kangay piyagsabi. Kitam agpakaeyat. In padalan agpakaeyat in kitam agiyagem sa Kapwan, osai in kitam agpasandig sa kansiyo lakoy kabaloyan. ¹¹ Kantam soroyen in boo panlaban piyagtaboy Diyos, matang kitam kalaban sa daet pag mga padalan dimonyo. ¹² Angkataw yewed mga mangyan in kantam kalaban, no yewed in mga poon, in mga agpakoyay, in mga apo kabaloyan sa lened atai sa kobat, in karowan mamaw sa kiwang. ¹³ Na kantam soroyen in panlaban piyagtaboy Diyos. Kataw ina kitam batay kabaloy dogay in aglaban, no rateng in daet pag kabetek. Kalbas paka idapo wa abaloyan, kitam marigen daan in agtaydek. ¹⁴ Na kitam pakarigen in agtaydek. In totoo kantam pabalayen sa baris. In boo betek kantam pabengbengen sa barosen. ¹⁵ Soroyen sa darapa in sandata agpatoldo in Maalno pag Barita Diyos agpamakapya remrem. ¹⁶ Kantam palagi pagatangen in pamengbeng agkaplek sa boo mga agigang pag pana dimonyo. Ina pag pamengbeng in agpasandig kay Kiristo. ¹⁷ Kantam soroyen in sambalilo bakal in kitam piyaboway Diyos. Kantam atangen in pisaw in piyagtaboy in Abyan Diyos. Ina in kansiyo Agiplaong. ¹⁸ Kitam baatte agpandalangin, agayay tolong sa Diyos. Baatte kabetek mandalangin no nangkataw in piyatoldo in Abyan. Kamayba nakay pag betek ayaw aglimbang agpandalangin sa boo mga bodang Diyos. ¹⁹ Ako din dalanginen matang ako piyagpakan in betek pag mga agiplaong, osai yewed agkalimo agpatoldo in Maalno pag Barita in batang piyagbetang. ²⁰ Panawen asin pag Maalno pag Barita ako siyogo, kalbas ngona piyageket karakara. Na ako dalanginen matang in ako agbarita ako yewed agkalimo, kataw kailangan ako miplaong kataw ina. ²¹ Tikiko in batay agbarita sa kanyo in boote panawen sa kangay, no kataw nakay ako. Siyo kantam belag piyagmaal, osai yewed aglimbang sa panawen in Kapwan. ²² Kaya siyo kangay piyagsogo sa kanyo matang kanyo batay atawanan no nangkataw ako matang agpakaeyat sa kanyo remrem. ²³ In mga belag pakanen Diyos in apyaan pag remrem osai in paniwala osai pakayawteen in Diyos Amang osai IsoKiristo in Kapwan. ²⁴ Kamo pakayawteen lakoy in Diyos, kamo in boo mga yewed aglimbang agkaanggay kay IsoKiristo kantam Kapwan.