KOLOSAS

KOLOSAS

¹ Kami dowai in agsolat, in osai Pablo, piyangwat Diyos katiwala Kiristo Isos, in osai kantam belag Timotiyo. ² Kami agsolat sa mga bodang Diyos sa bayan Kolosas, mga belag in yewed mga aglimbang kay Kiristo. Kamo pakayawteen in Diyos kantam Amang, osai pakanen apyaan pag remrem. ³ Baatte kamo kanyam piyagpandalangin, kami agkaanggay sa Diyos in Amang kantam Kapwan IsoKiristo, ⁴ angkataw kami abaritaan in kamo agpasandig ngani kay Kiristo Isos, osai in kamo agpakayawte sa boo mga iidang Diyos. ⁵ Kaya kamo agkataw ina, panawen sa kanyo piyagpanaya in siyandata sa langit batay sa kanyo. Kamo abaritaan ina tangona in piyatoldo sa kanyo in totoo pag barita, in Maal pag Barita. ⁶ Ina pag barita agarabang agbaba makaanggay sa boo mga mangyan kataw din in mibaloy sa kanyo sogod kanyo arengeyan, kanyo atawanan in kalakoyen in agpakayawte in Diyos. ⁷ Ina piyatoldo Ipapras sa kanyo. Siyo kanyam piyagpakayawte pag sarig, yewed aglimbang agpanawen, sogowan Kiristo, kanyam din sogowan sa kanyo. ⁸ Siyo in agbarita sa kanyam keyen kamo agpakayawte ngani sa mga amat. Ina pag agpakayawte tiyaboy in Abyan Diyos sa kanyo. ⁹ Ibat ina kanyam arengeyan, kami yewed agempet agpandalangin sa kanyo. Kanyam piyagayay sa Diyos kamo patoldowen gayed in kansiyo beet, osai kamo pakanen in Abyan in boo katawanan matang kanyo atawanan in kansiyo beet. ¹⁰ Sa kataw ina kamo kabaloy agogali maal sibay sa Kapwan osai makaanggay wano sa kansiyo, boo maal in kanyo panawen osai agistobo in kanyo atawanan sa Diyos. ¹¹ Kanyam din piyagpandalangin, kamo pakarigenen gayed in kansiyo lakoy kabaloyan, matang kamo agkaanggay daan agbanta sa boote. ¹² Osai kanyam pandalangin kamo agkaanggay sa Amang, angkataw kamo kansiyo piyasibay piyaagem sa mga iidang agbalay sa rawa sa sakopan Diyos. ¹³ Kitam kansiyo piyalpas sa kabaloyan lened, piyasakop wakay sa kansiyo Bodang piyagmaal. ¹⁴ In Bodang in agpalpas sa kantam, osai in aglibangaw sa kantam mga daet. ¹⁵ In Diyos yewed piyagngitan, kamay Kiristo in agpapangkit no kataw nakay siyo, osai Kiristo in kansiyo Bodang apo kabaloyan sa boo mga piyangwat. Siyo in tokawan sa boo, ¹⁶ angkataw siyo in piyakan in panawen agpangwat in boo sa langit kadayo sa kobat. Kansiyo piyangwat in mga piyagngitan. Kansiyo din piyangwat in yewed piyagngitan, kataw in mga poon lakoy, in agsakop, in mga kapitan, in mga apo kabaloyan mga yewed piyagngitan. In boo wanote, Kiristo in piyakan in panawen agpangwat osai in agalapet. ¹⁷ Siyo in tokawan sa boo, osai siyo in agalapet sa boo matang yewed masida. ¹⁸ In barkadaan in mga bodang Diyos in kansiyo bilog. Kiristo in agparakay, siyo in olo, siyo in tokawan boway wakay tagoli, matang siyo in lakonaw lakoy sa boo. ¹⁹ In boo kalakoyen Diyos kansiyo wa piyabalay kay Kiristo. ²⁰ Kiristo in iidang Diyos matang in boo piyaagem wakay sa Diyos. Kadayo in sa kobat, kadayo in sa langit, in boote mipakapya wa panawen matay kansiyo Bodang sa kodos. ²¹ Kadayo kamo in mga yewed Odyo. Tangona kamo adayonaw sa Diyos, kanyo remrem aglaban sa kansiyo, osai kamo agpamangwat daet. ²² Kamay ngona kamo piyangwat wa Diyos kansiyo mga bodang panawen Kiristo biyono, kansiyo daan bilog in matay. Kaya matay matang kitam maal wano, malinis, idapo daet in kitam kansiyo piyagpaadap sa Diyos. ²³ Kamay kailangan palagi kitam ayaw aglimbang, agpakarigen sa kantam paniwala, ayaw agpaglebey in agpasandig sa mga pangako in Maal pag Barita kantam arengeyan. Ako Pablo piyangwat sogowan Diyos agbaba ina pag Maal pag Barita in piyabarita sa boo mga mangyan. ²⁴ Ngona ako agkaanggay sa kangay mga kaidapan panawen sa kanyo, angkataw sa kangay kaidapan ako agtolong aglobos in mga kaidapan Kiristo panawen sa kansiyo bilog, in barkadaan mga bodang Diyos. ²⁵ Ako piyangwat Diyos sogowan in barkadaan kansiyo mga bodang, in ako kansiyo iidang agpatoldo sa kanyo in kansiyo agiplaong. Ako kansiyo iidang matang agpalowas wa gayed sa kanyo in piyagbetang. ²⁶ Ina piyagbetang sa boo mga mangyan sogod kay naw tangona kamay ngona piyagpalowas wa sa kantam sa kansiyo mga iidang. ²⁷ In beet Diyos palowasen sa kantam in kalakoyen in makasoyo pag kansiyo piyagbetang, matang kantam wakay palowasen sa boo mga mangyan. Ina in Kiristo agbalay sa kantam. Kalbas no kataw ina kitam katiyak batay sa rawa Diyos. ²⁸ Na Kiristo in kanyam piyagbarita. Sa boo katawanan tiyaboy Diyos sa kanyam, kami agpatoldo sa boo mga mangyan matang siro sibay kanyam piyagpaadap sa Diyos, panawen siro agiyagem kay Kiristo. ²⁹ Ina in dailan kaya ako agpilit wano agpanawen, angkataw in kansiyo lakoy kabaloyan agpanawen sa kangay galem.

¹ In kangay beet kanyo atawanan in kalakoyen in ako agpilit panawen sa kanyo, osai sa mga taga Laodisya, kadayo sa boo mga ikkay katawan sa kangay. ² In kangay beet maeyat kanyo remrem, matang kamo boo malageman agpaybelagan. No kataw ina kamo katawan wa gayed, kamo mayaman sa atawanan. Na kamo batay katawan in batang piyagbetang Diyos, ina ngani Kiristo. ³ Ina pag kayamanan, in boo katawanan osai in atawanan, agibalay sa kansiyo. ⁴ Ina kangay piyagsabi sa kanyo matang kamo idbatay piyabaribid in roma kamayba nakay pag mga baritaen kagwali maalen. ⁵ Kamayba ako idapo asin sa kanyo na ako agremrem daan sa kanyo. Ako agkaanggay sa kanyo maalen pag ogali, osai sa kanyo marigen pag agpasandig kay Kiristo. ⁶ Kataw kantam tiyanggap Kiristo Isos matang kantam Kapwan, na kitam wa agogali kataw siyo. ⁷ Kitam wa miskapet sa kansiyo, pasandig sa kansiyo in kantam boway. Pakarigenen in kantam paniwala sa piyatoldo sa kantam, osai palagi agkaanggay sa Diyos. ⁸ Kitam agingat wa, karam kitam abel in mga bosliyen pag agpatoldo idapo kabolowan, in yewed agpasandig kay Kiristo, no yewed sa siyabi tangona kay naw in mga kakoyayan, osai in mga yewed piyagngitan pag apo kabaloyan atai sa kobat. ⁹ Angkataw in kabetek Kiristo mibaloy mangyan, na in boo sa Diyos sa kansiyo daan. ¹⁰ Kalbas in kitam agiyagem sa kansiyo na kitam piyaboway wa gayed. Sakop sa kansiyo in boo apo kabaloyan, in boo mga poon yewed piyagngitan. ¹¹ Panawen kitam agiyagem kay Kiristo kitam kagwali kansiyo wa tiyoli yewed kataw in sa bilog. In beet siyabi in makadaet pag piyagkaamag kantam bilog biyenglay wa. ¹² In kitam biyaotismowan kitam kagwali liyebeng sarig siyo, kalbas boway wakay sarig din siyo, angkataw kitam agpasandig sa kabaloyan Diyos in agpaboway wakay sa kansiyo. ¹³ Kamo in mga yewed Odyo tangona kagwali matay wa panawen sa kanyo mga daet, osai panawen kamo idapo in batas keyen patoli, kamay ngona kamo piyaboway wakay Diyos sarig Kiristo. Kansiyo wa liibangaw in kantam mga daet. ¹⁴ Kansiyo wa piyaidapo kabolowan in listaan kantam daet in agpatotoo kitam agsonggar sa mga Batas. Ina kansiyo kiyowa, piyako wa sa kodos matang idapo wa. ¹⁵ In Kiristo matay sa kodos kansiyo diyaeg in mga mamaw, in mga apo kabaloyan sa kobat. Siro arikoyan wa angkataw ngiitan wa gayed siro sakop sa kansiyo. ¹⁶ Na ayaw kitam pasakop sa kamayba nakay pag agpamangwat mga batas panawen sa pamangnen, osai sa aginem, sa kainan, sa pangabos bolan, osai ibeng agpainga. ¹⁷ Ina pag mga kataw ina anong waget in mga agrateng. Ina pag aganong Kiristo wa. ¹⁸ Apo mga mangyan keyen kailangan agpakaskit sa bilog, osai agsamba sa mga angil. Siro agpakabwat remrem keyen agpanaynep, kamay siro agyabang waget. Na ayaw agpasakop sa kansiro matang yewed malibangaw in kantam batay bayad. ¹⁹ Siro idwa pasakop kay Kiristo. Bago siyo in olo, in boo bilog agpalpangiskapet apo mga eyat apo kalowan boo sakop sa kansiyo matang baldog. Ina in beet Diyos. ²⁰ Matay wa kitam sarig Kiristo, kitam idwa sakop sa mga mamaw agsakop sa kobat. Na nakay batang kamo agogali kagwali sakop kay asin. Nakay batang kamo agpasakop sa mga otos keyen, ²¹ Ayaw agatang anda, ayaw agpamangan ina, ayaw komapkap ati? ²² In mga ina otos waget piyagpatoldo mga mangyan, panawen waget sa mga agkasida. ²³ In mga kataw ina, in mga agsamba sa mga angil, osai in agpamakaskit sa bilog, ina kagwali waget apo kabolowan, kamay ina yewed kapandaeg sa kantam mga bilog agkaamag aglampas sa piyagkailangan.

¹ Kitam ngani tagoli wakay piya boway sarig Kiristo, na kantam beeten in mga sa langit in sa pagpamatawan Kiristo agtokkaw sa pamalang agbangen Diyos. ² Na pakalakoyen sa kantam remrem in mga sa langit, ayaw in mga sa kobat. ³ Angkataw kitam mga matay wa. In kantam boway piyagbetang palagem Kiristo sa Diyos. ⁴ Kiristo wa daan in kantam boway. No dogayan siyo lomwas wakay, na kitam din batay lomwas kansiyo sarig, kataw din siyo agrawa. ⁵ Na benglayen wa in mga ogali piyagkabeet kantam bilog, kataw in agpanggaraw, in marames pag ogali, in agkaamag aglampas sa piyagkailangan, in mga daet pag kantam piyagbeet, in agsolang, na ina agsamba sa mga yewed Diyos. ⁶ Panawen asin in Diyos agkabais, batay agparosa sa mga mangyan agsonggar sa kansiyo beet. ⁷ Tangona kamo din agkaboway sa mga kataw ina pag ogali. ⁸ Kamay ngona kanyo wa benglayen anda pag boo, in agkagalit, in agkabais, in daet remrem, in aglibak, osai in mga makarikoy pag panggisoden. ⁹ Ayaw agiplaong baribid angkataw kanyo wa biyenglay in datiyan pag ogali, kadayo in mga daeten pag piyagpangwat. ¹⁰ Kamo omilag wa sa bayo wakay pag ogali. Kitam piyangwat Diyos. Anggan ngona kitam kansiyo kay piyagpangwat piyagpatolad sa kansiyo, matang agistobo in kantam atawanan sa kansiyo. ¹¹ Na sa bayo pag boway in boo tikkalakoyan osai in Odyo osai in yewed, kamayba toli kamayba yewed, kamayba panyawan, kamayba batang aswangan, kamayba apo kapwan, kamayba agipalpas. Na kay Kiristo boo tikkalakoyan. In Kiristo sa boo. ¹² Na angkataw kitam mga iidang Diyos, mga maalen, kansiyo mga piyagpakayawte, na kantam ogaliyen in agpakayawte, in maalen pag remrem, kabwatte remrem, mabait, osai agbanta. ¹³ No apo agpangwat makasirot sa kantam, na agbanta wa kitam. Kataw in Kapwan aglibangaw wa sa kantam mga daet, na kataw din ina kailangan kantam libangawen in sa roma mga daet. ¹⁴ Labi kay sa boo, kitam maybelagan angkataw ina in bekkes matang kitam malageman wa gayed. ¹⁵ Papoonen sa kantam galem in apyaan pag remrem batang kay Kiristo angkataw panawen ina kitam biyerya, piyangwat osai ka bilog. Osai palagi kitam agpakaanggay sa kansiyo. ¹⁶ Pakaknowen sa kantam remrem in barita panawen kay Kiristo. Malsipatoldowan, maysibilinan sa boo kantam katawanan. Agbaren mga awit, mga baren pansamba agkaanggay sa Diyos. ¹⁷ Kamayba nakay in kantam piyagpangwat, kamayba agiplaong, kamayba panawen, na kantam pangwaten pasakop kay Isos in Kapwan. Osai panawen sa kansiyo kitam wa agkaanggay sa Diyos Amang. ¹⁸ Kamo mga babai, kamo pasakop sa kanyo mga lalaki, angkataw ina in beet in Kapwan. ¹⁹ Kamo mga lalaki, kamo agpakayawte sa kanyo mga babai, ayaw matapang sa kansiro. ²⁰ Kamo mga bodang, kamo palagi maniwala sa kanyo mga koyay, angkataw ina makaanggay sa Kapwan. ²¹ Kamo mga amang, kamo ayaw agpangwat in makabais sa kanyo mga bodang, karam siro batay manampo. ²² Kamo mga sogowan, kamo palagi maniwala sa kanyo mga kapwan atai sa kobat. Kamayba siro yewed agpangkit kamo ayaw aglimbang, ayaw waget makaanggay sa kansiro, dayem agkalimo sa Kapwan sa langit, makaanggay sa kansiyo. ²³ Kamayba nakay in kanyo piyagpangwat ayaw mabyat in remrem angkataw in Kapwan in agsogo sa kanyo, yewed mangyan waget. ²⁴ Angkataw kanyo atawanan kamo batay kansiyo piyakan in bayad, ina in kansiyo pangako. Kiristo in kanyo Kapwan. ²⁵ Angkataw in agpangwat daet batay ngani piyarosa Diyos no nangkalakoy in kansiyo piyangwat daet, angkataw in Diyos idbatay agpangidang sa mangyan.

¹ Kamo mga kapwan, pangwaten in betek sa kanyo mga sogowan, ayaw agdamot panawen, angkataw kamo din apo Kapwan sa langit. ² Ayaw agempet agpandalangin, ayaw agkaesek, palagi agkaanggay. ³ Kami din dalanginen matang kami pakanen Diyos kabetek agpabarita in kansiyo agiplaong, matang kanyam piyagpalowas in batang piyagbetang panawen kay Kiristo. Kaya ako piyagbilanggo panawen ina in kangay piyagbarita. ⁴ Dayem nges kangay ngani piyagpalowas gayed, angkataw ina in piyagkailangan sa kangay. ⁵ Pakamaalen in kantam piyagpapangkit sa mga yewed agpaniwala. Ayaw agsidaen in kabetek. ⁶ Kailangan kantam barogi masadap, makaparengey. Kailangan kitam katawan somagot sa baatte osai. ⁷ Tikiko in batay agbarita sa kanyo in boo panawen sa kangay. Siyo kanyam belag piyagmaal, siyo yewed aglimbang agtolong. Siyo kangay sarig sogowan in Kapwan. ⁸ Kaya siyo kangay piyagsogo sa kanyo matang kanyo atawanan no kataw nakay wa ako, osai matang piyakaeyat kanyo remrem. ⁹ Kansiyo sarig Onisimo kantam din belag piyagmaal, yewed aglimbang. Siyo kanyo din kabelagan. Siro in batay agpaalam sa kanyo in boo atai mibaloy. ¹⁰ - ¹¹ Osai Aristarko in kangay sarig sa bilanggowan, osai Markos kay Birnabi pingsan, siro keyen, Kamo kagwali wa nakay? Kadayo Oswi in piyagawit Osto. Sa mga Odyo kay Kiristo wa siro waget pag tolo in mga Odyo in agtolong sa kangay agpabarita in Diyos agpapoon. Siro agpakaeyat kangay remrem. Panawen kay Markos ako apo wa piyatokaw bilin sa kanyo. No siyo asin pataboy sa kanyo, na kanyo pabelagen. ¹² Kadayo din Ipapras agsabi keyen, Kamo nangkataw wa? Siyo kanyo din kabelagan, sogowan Kiristo Isos. Baatte siyo agpilit agpandalangin matang kamo marigen, gorangen wa sa paniwala, agpaniwala sa boo beet Diyos. ¹³ Kangay ngiitan siyo agpilit agtolong sa kanyo, kadayo sa mga taga bayan Laodisya osai taga bayan Irapolis. ¹⁴ Osai din Lokas in kantam piyagmaal pag agpanggamot, osai Dimas. Siro boo keyen, Nakay, idapo kamay nakay sa kanyo? ¹⁵ Kanyo sabiyen sa kantam mga belag sa Laodisya keyen siro kanyam piyagpandalangin. Kadayo Nimpa, osai in barkadaan mga bodang Diyos in agsamba sa kansiyo balay. ¹⁶ Paka kanyo wa mabasa anda pag solat, na kanyo pabasaen din sa barkadaan mga bodang Diyos sa Laodisya. Osai in kangay solat sa mga taga Laodisya kanyo din basaen. ¹⁷ Sabiyen kay Arkipo keyen, siyo ayaw agempet sa panawen in Kapwan in tiyaboy sa kansiyo. ¹⁸ Ako Pablo wa daan in agsolat anda pag keyen, Kamo nangkataw wa? Remremen in kangay eket karakara. Kamo pakayawteen in Diyos.