PANAWEN

PANAWEN

¹ Laki Tiyopilo, sa tokaw pag aklat kangay siyolat in boo piyangwat Isos, osai piyatoldo, sogod siyo agparakay agpanawen, ² anggan sa ibeng siyo piyaonaik sa ogbos. Bayo siyo piyaonaik, sa kabaloyan in Betek pag Abyan, kansiyo piyabilinan in mga katiwala kansiyo iidang. ³ In Isos batang wa matay siyo makakarowan wakay papangkit sa kansiro, siro kangitan ngani siyo boway wakay gayed. Apatnapo ka ibeng apo ibeng kansiro piyagngitan. In kansiyo piyagbarogi in Diyos agpapoon. ⁴ In betek siyo agaway kay sa kansiro siyo agbilin keyen, Ayaw agipanaw sa Irosalim, panayaen in kangay siyabi sa kanyo, in piyangako kangay Amang Diyos. ⁵ Angkataw Owan ngani agpansogbo sa sapa. Kamay idwa dogay kamo batay siyogbo sa Betek pag Abyan. ⁶ In agkatipon Isos osai in kansiyo mga katiwala siro agtanong sa kansiyo keyen, Laki Kapwan, ngona daan lames in sakopan kaimo wakay piyagpaoli sa mga kasokponan Israil? ⁷ Siyo keyen, Yewed maal kamo in katawan in mga kabetek, in mga tarato. Ina sa Diyos Amang, siyo waget in apo kabaloyan agpangwat tarato. ⁸ Kamay paka rateng wa sa kanyo in Betek pag Abyan, kamo kansiyo batay piyakan kabaloyan, kalbas kamo batay agbarita panawen sa kangay sa Irosalim, sa boo Odiya, sa Samariya, anggan sa boo kobat. ⁹ Paka masabi wa ina, siyo piyaonaik wa sa ogbos, piyaganggatan daan in mga katiwala, anggan siyo biyengbeng wa libo, idwa piyagngitan. ¹⁰ In siyo agonaik siro agtangra kay sa langit, toloy apo dowai ka kaliyakiyan maboksi in lambong agtaydek asin sa kansiro bangen. ¹¹ In dokalaki miplaong keyen, Laki mga taga Galiliya, nakay batang kamo agtaydek, agtangra sa langit? Isos in kiyowa sa kanyo, piyaonaik sa langit, siyo daan in batay wakay atai pataboy, kataw daan in kanyo ngiitan siyo ista agonaik sa langit. ¹² Kalbas in mga katiwala panaw wa sa boksor Olibowan. Ina bangen sa Irosalim, kadogay agnganga in agipanaw. Siro moli wakay sa Irosalim. ¹³ Siro in osai Pidro, in kadowai Owan, in katolo Santiyago, in kaopat Anris, in kalima Pilipi, in kaenem Tomas, in kapito Bartolomi, in kawalo Matiyo, in kasiyam Santiyago bodang Alpiyo, in kasampo Simon in ribildi, in kalabing osai Odas bodang Santiyago. Paka siro rateng wa sa Irosalim, siro monaik sa ogbos pag basag sa balay kansiro pagpamatawan. ¹⁴ Siro boo agpalpandalangin waget, kadayo in mga kagbaiyan, anggan Mariya in inang Isos, osai in kay Isos mga belag kaliyakiyan. ¹⁵ Idwa dogay in mga agpaniwala agkatipon, mga 120 ka mangyan. Kalbas Pidro tomaydek, miplaong keyen, ¹⁶ Laki mga belag, kailangan mibaloy in mga Agisolat, in dodo in siyabi tangona Dabid, in siyo piyaiplaong in Betek pag Abyan. Na ina pag kansiyo siyabi panawen kay Odas in agpatoldo dalan sa mga agdakep kay Isos. ¹⁷ Odas tangona sarig daan kitam, piyakan din bagiyan atai pag panawen. ¹⁸ lTna pag Odas komwa osai ka poro kobat, in bayad in kowarta batang bayad kansiyo tiyampalas. Kalbas siyo malabo agisongkok, malto in boyon, maripatak in pena. ¹⁹ Ina atawanan in boo mga agbalay sa Irosalim, anggan ina pag kobat piyagawit Akildama sa kansiro agiplaong. In beet siyabi Gimai.) ²⁰ Pidro keyen kay, Na sa aklat Mga Awit Dabid apo siyolat keyen, In pagoliyan ina ayaw wa agalapeten. Ayaw apo asin agpamataw kamayba nakay. Apo din Agisolat keyen, In kansiyo panawen osai wakay in komwa. ²¹ Pidro keyen kay, Na in kanyam mga sarig taite in boo betek in Kapwan Isos agipanawan osai kitam, ²² sogod sa Owan agbaotismo anggan sa ibeng Isos kiyowa sa kantam, na kailangan in osai miyanggat wa sa kanyam, agbarita keyen siyo kangitan ngani Isos boway wakay. ²³ Kadogayte kansiro iidang dowai ka kaliyakiyan, in osai Matiyas, in osai Osi piyagawit Barsabas no yewed Osto. ²⁴ Kalbas siro maypandalangin keyen, Laki Kapwan, kao katawan in remrem in boo mga mangyan, na kaimo sabiyen no nakay agbangen in kaimo iidang atai pag dowai ka mangyan, ²⁵ matang siyo kaimo wa katiwala, sa kansiyo wa in panawen biyenglay Odas, in Odas ista pataboy sa pagidapan sibay sa kansiyo. ²⁶ Kalbas in dokalaki kansiro piyostaan. Matiyas in mandaeg, kalbas siyo piyangwat wa katiwala, siyo wakay in kalabing dowai.

¹ In rateng wa ngani in ibeng piyagawit Pintikostis, in boo mga agpaniwala agkatipon sa osai ka balay. ² Kalbas toloy apo agaleng batang sa langit, kagwali kowaya lakoy lakonaw. Kamayba saano sa balay pagtiponan maloba in agaleng. ³ Kalbas apo lomwas sa kansiro kagwali baya agdildila, omarabang, baatte mangyan yaaponan. ⁴ Kalbas siro boo toloy wa piyakan in Betek pag Abyan, siro toloy agiplaong in roma wakay pag mga agiplaong, angkataw siro piyaiplaong in Abyan. ⁵ Apo mga agbalay sa Irosalim mga Odyo datiyan agsamba, batang sa boo daan kobat. ⁶ Kalbas in siro karengey ina pag aglalae, omarigbo asin in karowan, agkagolo in remrem angkataw baatte mangyan karengey kansiyo daan agiplaong. ⁷ Kalbas siro boo agsoyo wano, agpaypolongan keyen, Nakay ina, yewed lames boo taga Galiliya ina pag mga agiplaongan? ⁸ Na nakay batang lames kitam boo wanote karengey siro agiplaong wa sa kantam mga agiplaong? ⁹ Kitam mga taga Partiya, mga taga Midya, mga taga Ilam, mga agbalay sa Misapotamya, sa Odiya, sa Kapadosya, sa Ponto, sa Asya, ¹⁰ sa Pirigya osai sa Pampilya, sa Iipto, osai sa mga sakop Libya sa bangen bayan Sirini, osai mga batang sa Roma, mga Odyo, osai mga mibaloy wa Odyo, ¹¹ mga taga Kiriti osai mga taga Arabya. Na nakay batang kitam karengey sa kantam mga agiplaong siro agsabi in mga lakonaw pag piyangwat Diyos? ¹² Kalbas siro boo agsoyo, osai magolo in remrem, agpanggisodan anggan keyen, Nakay lames in beet siyabi ina? ¹³ Kamay in amat wakay agpatawa keyen, Siro mga lasing waget. ¹⁴ Kalbas tomaydek kora Pidro, siro in labing dowai ka katiwala. Pidro miplaong maksen sa karowan mangyan keyen, Laki mga kabelagan, osai kamo boo mga agbalay sa Irosalim, ngona ako agpaliwanag in beet siyabi. Mamarengey sa kangay piyagsabi, ¹⁵ angkataw anda pag mga mangyan yewed mga lasing kataw in kanyo piyagpanremrem, angkataw pangitlogan waget in ibeng. ¹⁶ Anda dayem in siyabi tangona in poropita Owil keyen, ¹⁷ In Diyos keyen, Anda in kangay batay piyagpangwat. Sa kalobosan pag mga ibeng in boo mga mangyan batay piyakan in kangay Abyan. Na in kanyo mga bodang batay agpalowas in kangay agiplaong, in kanyo mga begle batay agkaanapen, in kanyo mga aplaki batay din manaynep. ¹⁸ Asin pag mga ibeng in kangay mga sogowan kaliyakiyan osai kagbaiyan batay piyakan kangay Abyan, na siro batay agpalowas in kangay agiplaong. ¹⁹ Kalbas ako batay agpapangkit in mga makalimo sa langit, mga makasoyo sa kobat, daya, osai baya, osai elep aglibo. ²⁰ In ibeng batay kiyelep, in bolan batay mapola idwa mayadi kagwali daya. Paka kataw ina, na batay wa rateng in Ibeng in Kapwan, in ibeng lakoy makasoyo. ²¹ Na batay piyaboway in baatte agberya sa Kapwan. ²² Keyen kay Pidro, Laki mga kabelagan, mamarengey sa kangay piyagsabi. Isos taga Nasarit siyogo Diyos. Kaya kitam katawan, angkataw siyo apo lakoy kabaloyan agpangwat tanda, mga makasoyo. In Diyos in agpangwat, Isos in sogowan. Ina kantam atawanan angkataw ina kantam daan ngiitan. ²³ Kamay in Diyos apo tangona remrem, kansiyo atawanan in batay mibaloy. Kalbas ina mibaloy ngani in Isos tiyaboy sa kanyo, kalbas kanyo tiyaboy sa mga daeten pag mangyan, kanyo piyabono, piyapako sa kodos. ²⁴ Kalbas siyo piyaboway wakay Diyos, piyalpas wa sa kabaloyan katayan, angkataw idwa mayadi siyo piyagbakos in katayan. ²⁵ Angkataw siyo in biyarita Dabid keyen, Kangay ngiitan baatte sa bangen kangay in Kapwan. Siyo kangay sarig matang ako idbatay apaglebey. ²⁶ Panawen ina din agkaanggay in kangay bait, agkaanggay in kangay agiplaong. Anggan in kangay bilog agkaanggay agpanaya. ²⁷ Angkataw in kangay abiyan idbatay kaimo biyenglay sa pagbalayan in mga matay. Kaimo batay piyagayaw mabolok in bilog kaimo Betek pag Sogowan. ²⁸ Kaimo piyatoldo sa kangay in mga padalan ako batay agkaboway. Kaya ako batay agkaanggay wano, angkataw kao in kangay sarig. ²⁹ Pidro keyen kay, Laki mga belag, tiyak in kangay piyagsabi sa kanyo panawen sa kantam tangona kakoyayan Dabid. Siyo matay, siyangat, in kansiyo sangatan baywi kay atai sa kantam anggan ngona. ³⁰ Kamay Dabid osai ka poropita. Siyo katawan in Diyos mangako sa kansiyo keyen, In osai sa kaimo mga kasokponan dogayan batay agpoon sa kaimo sakopan. ³¹ Ngiitan Dabid in batay piyangwat Diyos in Kiristo batay wakay piyaboway. Ina in dailan kaya kansiyo siyabi ina pag kasokponan idbatay biyenglay sa pagbalayan mga matay, in kansiyo bilog yewed piyayagan mabolok. ³² Ina wa daan Isos in piyaboway wakay Diyos, kami boo kangitan wakay. ³³ Ngona siyo piyaonaik sa pamalang agbangen Diyos kansiyo Amang. Tangona Siyo piyakan in Betek pag Abyan in piyangako in Amang. Kalbas ngona ina kansiyo wakay tiyaboy sa kanyam. Siyo in agpangwat in kanyo ngona piyagngitan, kanyo piyagparengey. ³⁴ Dabid yewed monaik sa langit kataw Isos, kamay siyo daan in agsabi keyen, Siyabi in Diyos sa kangay Kapwan keyen, Kao tomokkaw sa kangay pamalang, ³⁵ anggan kangay wa piyasakop sa kaimo in mga agkabais sa kaimo. ³⁶ Na kailangan ngani atawanan in boo mga kasokponan Israil keyen ina daan pag Isos in kanyo piyako sa kodos, siyo wa daan piyangwat ngani Diyos in Kapwan osai Kiristo. ³⁷ Kalbas paka in mga mangyan karengey ina, siro maloba wa abiyatan in remrem, agsabi kay Pidro osai sa mga amat katiwala keyen, Na laki mga belag, kami nangkataw wa? ³⁸ Kalbas keyen Pidro, Kailangan baatte osai sa kanyo benglayen wa in kanyo mga daet. Kalbas pabaotismo wa sa ngaran IsoKiristo, matang liibangaw wa in kanyo mga daet. Na kamo batay wa din piyakan in Betek pag Abyan. ³⁹ Angkataw ina piyangako Diyos sa kantam boo, osai sa kantam mga kasokponan, anggan sa boo mga mangyan, kamayba sa nakay in piyagberya in Kapwan, in kantam Diyos. ⁴⁰ Kalbas Pidro aronaw kay siyabi sa kansiro, agpilit keyen, Kamo pasoway wa matang yewed piyarosa sarig in ngona pag mga Odyo mga daeten. ⁴¹ Ina pag ibeng mga tolo ka libo ka mangyan maniwala sa kansiyo siyabi, biyaotismowan wa, mipaagem sa barkadaan mga agpaniwala. ⁴² In mga agpaniwala baatte agparengey sa mga katiwala agpatoldo, agpaybelagan, agpalbagiyan pamangnen, osai agpaysipandalanginan. ⁴³ In mga katiwala agpangwat lakoy aronaw mga makasoyo. Kalbas in boo mga mangyan agsoyo. ⁴⁴ In boo mga maniwala agpaysarigan, piyalageman in kansiro boo sangkap. ⁴⁵ Kalbas in kansiro ogali siro agpabili kansiro mga sangkap, in abel kowarta biyagi sa boo mga agpaniwala no nangkalakoy in piyagkailangan in baatte osai. ⁴⁶ Ibengibeng siro agkatipon sa balay lakoy Diyos, agpalbagiyan pamangnen sa mga balay. Siro agpalpamangan, agkaanggay ngani agpalbagiyan. ⁴⁷ Siro agmaal sa Diyos, osai siro piyagmaal in boo mga mangyan. Ibengibeng in barkadaan piyagdagdagan in Kapwan in kansiyo mga piyagpaboway.

¹ Osai ka ibeng mangiriyan wa, kabetek wa agsamba, Pidro osai Owan agonaik sa balay lakoy Diyos. ² Sa sakbawan piyagawit Maalen, apo kaliyakiyan piyagbaba, siyo pilaw sogod siyo biyoslot. Ibengibeng siyo piyagpatokkaw asin sa sakbawan matang agpangayay sa mga agrateng. ³ Siyo kangitan Pidro osai Owan batay wa monaik sa balay lakoy Diyos, kalbas siyo mangayay sa kansiro. ⁴ Kalbas dokalaki Pidro osai Owan agroris sa kansiyo. Kalbas keyen Pidro, Amba, kao mangkit kanyam. ⁵ Kalbas mangkit ngani, agpanaya nges no batay piyakan. ⁶ Kamay keyen Pidro, Ako idapono kowarta, kamay in atai sa kangay kangay piyagtaboy sa kaimo. Sa kabaloyan IsoKiristo taga Nasarit, amba, kao panaw wa. ⁷ Siyo yaatang Pidro sa pamalang, yoorog. Kalbas kansiyo bitis, kansiyo darapa toloy piyakan eyat, ⁸ siyo lomokso, tomaydek. Agparakay wa siyo agipanawan, kalbas miyanggat sa kansiro, misoroy sa balay lakoy Diyos. Siyo agipanawan, agloksowanan, agmaal sa Diyos. ⁹ In boo asin mga mangyan kangitan siyo agipanawan agmaal sa Diyos, ¹⁰ siro katawan ina in datiyan agitokkaw agpangayay sa Maalen pag sakbawan sa balay lakoy Diyos. Kalbas siro agsoyo wano idwa mayadi sa mipangwat sa kansiyo. ¹¹ Kalbas in siyo agatang kay Pidro osai kay Owan, in boo mga mangyan agsoyo, agdalagan, agtaboy sa dokalakiyan, sa piyagawit kay Solomon Solambi. ¹² Paka Pidro kangitan ina, siyo miplaong sa kansiro, keyen, Laki mga kasokponan Israil, nakay batang kamo agsoyo asin pag mibaloy? Nakay batang kami kanyo piyagpanroris? Kanyo lames remrem keyen kaya kami kabaloy agpaoraw sa kansiyo panawen kami in apo kabaloyan, panawen kami agsamba sa Diyos? ¹³ Yewed kataw ina, dayem in Diyos in piyagmaal Abraam, osai Isaak, osai Akob, in Diyos piyagmaal in kantam mga kakoyayan, siyo in agpaoraw, matang Isos in kansiyo Sogowan piyagpakalakonaw. Isos in kanyo tiyaboy sa mga poon, siyo kanyo piyamangyan sa pangkit Pilato, siyo in batay nges piyalpas Pilato kanyo siyombong. ¹⁴ Kanyo siyombong in Betek, in Maal wano pag Mangyan. Kalbas in kanyo yaayay palpasen in agpamono agbangen pag mangyan. ¹⁵ Kataw ina kanyo biyono in Agpamaboway, kamay siyo piyaboway wakay Diyos, kanyam wakay ngiitan. ¹⁶ In kabaloyan Isos in agpaoraw asin pag mangyan pilaw. Ina mibaloy panawen sa agpasandig kay Isos. In agpasandig kay Isos in agpaoraw gayed sa kansiyo, kataw ina kanyo boo piyagngitan. ¹⁷ Pidro keyen kay, Kalbas ngona, laki mga belag, kangay atawanan, kaya kamo agbono kay Isos, angkataw kamo yewed katawan in beet siyabi in kanyo piyagpangwat, kadayo in kanyo mga poon. ¹⁸ Kamay tangona piyagsabi in Diyos sa boo kansiyo mga poropita keyen in kansiyo Kiristo dogayan apo ina pag kaidapan. Na sa kanyo piyangwat kataw ina piyangwat wa Diyos in boo kansiyo tangona siyabi. ¹⁹ Na ngona benglayen wa in kanyo mga daet, pasabangen wa sa Diyos, matang kansiyo liibangaw in kanyo mga daet. ²⁰ Na kamo batay piyakan in Kapwan mga kabetek piyagpakaeyat in kanyo mga remrem. Osai kansiyo batay siyogo sa kanyo in kansiyo tangona iidang batay Kiristo, in kansiyo piyangako batay tiyaboy sa kanyo. Na ina Isos. ²¹ Kailangan siyo mataw sa langit anggan sa kabetek in boote piyagpangwat wakay bayo, kataw in piyasabi Diyos tangona sa kansiyo maalno pag mga poropita. ²² Alimbawa in siyabi Mowisis keyen, In Diyos kanyo Kapwan batay agsogo wakay sa kanyo osai ka poropita batang sa kanyo mga kabelagan, kataw daan in ako siyogo. Na kamo maniwala sa boo kansiyo batay siyabi. ²³ Kamayba nakay in yewed maniwala asin pag poropita, na siyo batay ngani piyasoway sa mga mangyan, batay biyono Diyos. Ina in siyabi Mowisis. ²⁴ Kadayo in boo mga poropita, sogod kay Samwil anggan in boo mga paori sa kansiyo, siro din agbarita panawen sa mga agibaloy ngona pag mga ibeng. ²⁵ Sa kantam in mga piyangako Diyos in piyasabi sa mga poropita. Kamo din apo bagiyan sa kasondowan piyangwat Diyos sa kantam mga kakoyayan, in kansiyo siyabi kay Abraam keyen, In kaimo mga kasokponan dogayan in kangay batay padalan agpakamaal sa boo mga mangyan sa boo kobat. ²⁶ Na iidang in Diyos Isos in kansiyo Sogowan, kalbas siyogo, kitam in tokaw riyatengan, matang kitam piyagpakamaal in kitam piyagpakan kabaloyan agbenglay in kantam mga daet.

¹ In dokalaki Pidro osai Owan agiplaong kay sa mga mangyan, toloy rateng in mga sasirdoti, osai in kapitan sa mga agdamay sa balay lakoy Diyos, anggan in mga Sadosiyo. ² Siro agkabais angkataw in dokalaki agpatoldo sa mga mangyan, osai agbarita keyen, Isos piyaboway wakay, matang atawanan keyen batay wakay boway in mga matay. ³ Kalbas in dokalaki kansiro diyakep, biilanggo anggan omaga, angkataw bayapon wa. ⁴ Kamay in mga agparengey karai sa agbarita, aronaw in maniwala. Kalbas in boo mga kaliyakiyan agpaniwala biilang wa, lima ka libo. ⁵ Paka omaga wa, agkatipon sa Irosalim in mga poon, osai in mga koyay, anggan in mga agpatoldo in mga Batas. ⁶ Asina din Anas in mabwat pag poon sa mga sasirdoti, osai Kaypas, osai Owan, osai Aliyanro, kadayo in boo mga kabelagan in mabwat pag poon sa mga sasirdoti. ⁷ Kansiro piyataydek sa kagwaraan in dokalaki, biyotog keyen, Sa nakay pag kabaloyan kamo kapaoraw ina pag pilaw? Nakay in ngaran in agsogo sa kanyo agpangwat kataw ina? ⁸ Kalbas Pidro maeyat in remrem batang sa Betek pag Abyan, siyo keyen, Laki mga poon sa mga mangyan, laki mga koyay, ⁹ no ngona kami piyagosap panawen agtolong sa pilaw, no nangkataw siyo piyaoraw, ¹⁰ na kailangan kanyo atawanan, anggan in boo mga kasokponan Israil, keyen anda pag mangyan in agtaydek sa kanyo kagwaraan, siyo maal wa panawen sa kabaloyan in ngaran Kiristo Isos taga Nasarit, in kanyo piyako sa kodos, kamay siyo piyaboway wakay Diyos. ¹¹ Isos in piyagawit in mga Agisolat, in dodo keyen, In towar biyenglay in mga agpangwat balay, siyo in mipangwat wa kalyongan. ¹² Idapo roma kapaboway no yewed Isos waget. Sa boo kobat idapono roma ngaran tiyaboy sa mga mangyan matang kitam piyaboway. ¹³ Kalbas in mga poon agsoyo angkataw Pidro yewed agkalimo, osai Owan. Labi kay siro agsoyo in siro katawan in dokalaki mga mangyan waget, idbatang agpasok sa iskolan. Kalbas in mga poon katawan wa keyen in dokalaki batang pagbelag Isos. ¹⁴ Kamay apo in batang pilaw agtaydek asin sa bangen, matang siro idapo masombong sa dokalaki. ¹⁵ Matang in dokalaki piyasoway sa tiponan, kalbas siro maypolongan keyen, ¹⁶ Nangkataw wa lames ina pag dokalaki? Angkataw in boo Irosalim katawan wa siro kapangwat makasoyo lakoy. Ina idbatay kantam atanggiyan. ¹⁷ Na kantam wa ayawen siro agpatoldo agalapet in ngaran Isos kamayba kay nakay, matang ina pag barita idbatay kay piyabarita sa mga mangyan. ¹⁸ Kalbas biyerya wakay in dokalaki, keyen, Ayaw agpatoldo agalapet in ngaran Isos. Ayaw agpamatoldo ina pag ngaran. ¹⁹ Kamay keyen Pidro osai Owan, Remremen kamo no nakay in maal sa Diyos, osai in maniwala sa kanyo, osai in sa Diyos. ²⁰ Kami idbatay kaempet agbarita in kanyam ngani ngiitan, osai piyarengey. ²¹ Kalbas in mga poon labi kay agayaw. Kalbas piyalpas wa in dokalaki. Idapo ngiitan dailan agparosa sa kansiro panawen sa mga mangyan, angkataw in boo mangyan agmaal sa Diyos panawen sa mibaloy. ²² In pilaw, in piyangwatan ina pag tanda, siyo lampas wa apatnapo ka dagon. ²³ Paka piyalpas wa in dokalaki, siro ista pataboy sa barkadaan mga agpaniwala, agbarita in siyabi in mga poon sasirdoti, osai in mga koyay. ²⁴ Paka karengey ina, siro boo agpalpandalangin sa Diyos keyen, Laki Kapwan sa boo, kao in agpangwat in langit, osai in kobat, osai in dagat, in boote. ²⁵ Kao in agsabi, in kaimo Betek pag Abyan in agpasabi sa kaimo sogowan kanyam tangona kakoyayan Dabid keyen, Nakay batang tangona agkabais in mga yewed Odyo? Osai in mga mangyan agpaypolongan in idbatay mibaloy? ²⁶ In mga poon sa mga kobat agsandata. In mga poon agkatipon, aglaban sa Kapwan, osai sa kansiyo iidang piyangwat Kiristo. ²⁷ Kalbas atai sa Irosalim siro agkatipon ngani, aglaban kay Isos sa kaimo Betek pag Sogowan, in kaimo iidang. Siro kora Irodis, osai Ponsiyo Pilato, anggan in mga yewed Odyo, kadayo in mga kasokponan Israil. ²⁸ Siro agkatipon matang mipangwat wa ngani in boo kaimo tangona piyagremrem batay piyangwat sa kaimo kabaloyan. ²⁹ Laki Kapwan, ngona kao mamarengey sa kansiro pamalimlimo. Kami in kaimo mga sogowan kaimo pakaeyaten in remrem matang yewed agkalimo agpatoldo in kaimo barita. ³⁰ Palowasen in kaimo kabaloyan matang agpaoraw, agpangwat mga tanda mga makasoyo, sa kabaloyan Isos in kaimo betek pag Sogowan. ³¹ Paka siro kalbas wa agpandalangin, in balay pagtiponan liyoni. Kalbas siro boo maeyat in remrem batang sa Betek pag Abyan, matang siro yewed agkalimo agbarita in agiplaong Diyos. ³² In barkadaan mga agpaniwala osai waget in remrem, in bait. Idapo agpangayaw kansiyo mga sangkap, boo piyalageman. ³³ In mga katiwala apo lakoy kabaloyan agbarita in kansiro ngani ngiitan in Kapwan Isos boway wakay. Piyagngitan siro boo piyagpakayawte gayed in Diyos. ³⁴ Sa kansiro idapo agkaidapan, angkataw in kansiro ogali in mga apo kobat, apo balay, no siro agpabili, na in abel kowarta biyaba, ³⁵ tiyaboy sa mga katiwala, matang biyagi sa boo mga agpaniwala no nangkalakoy in piyagkailangan in baatte osai. ³⁶ Alimbawa, apo mangyan in ngaran Osi, in ngaran yaalis wa in mga katiwala, piyagawit wa Birnabi, in beet siyabi ina Agpakaeyat remrem. Siyo kasokponan Libi taga kobat Sipri katolong sasirdoti. ³⁷ Siyo apo kobat, kansiyo piyabili. In abel kowarta biyaba, tiyaboy sa mga katiwala.

¹ Kamay apo taybalang, in lalaki Ananiyas, in babai Sapira, siro apo piyabili osai ka kobat. ² Siro taybalang maypolong, in kalaati kowarta biyetang wa, kadogayte in amat biyaba, tiyaboy sa mga katiwala. ³ Kalbas Pidro miplaong keyen, Laki Ananiyas, nakay batang in kanyo remrem kanyo piyadaeg kay Katanas matang kamo agpadaya nges sa Betek pag Abyan? Kanyo biyetang in kalaati kowarta kanyo abel bayad sa kobat. ⁴ In yewed kay piyabili, na kanyo daan, aon? Paka piyabili wa, in kanyo kowarta kanyo daan. Na nakay batang in kanyo remrem agpangwat kataw ina? In Diyos in kanyo nges piyagpadaya, yewed mangyan. ⁵ Paka karengey ina pag agiplaong, Ananiyas toloy maligan, matay wa. In boo mga mangyan in karengey ina pag mibaloy agkalimo wa gayed. ⁶ In mga begle pataboy kay Ananiyas, kansiro tiyeem, biyaba sa kobat, liyebeng. ⁷ Paka kadalan mga tolo ka oras rateng in babai, siyo yewed katawan in mipangwat. ⁸ Keyen Pidro, Kalakoy waget lames ina in bayad kanyo kobat? Amba, sabiyen sa kangay. Keyen in babai, Aon ngani, kalakoy waget ina. ⁹ Siyabi Pidro, Nakay batang kamo maypolong agtepeng no in Abyan in Kapwan batay apadaya? Baati, sa sakbawan wa in aglalae in batang aglebeng kaimo lalaki. Kao din batay biyaba. ¹⁰ Kalbas toloy maligan wa din in babai sa adapan Pidro, matay wa. Paka misoroy in mga begle, kansiro piyangkit, matay wakay in osai. Biyaba wakay din, piyaagem sa bangen lalaki, liyebeng. ¹¹ Kadogayte in boo barkadaan mga bodang Diyos maloba wano agkalimo, osai in boo karengey ina. ¹² In mga katiwala agpangwat sa pangkit in mga mangyan aronaw mga tandaan sa kabaloyan Diyos, mga makasoyo. In ogali in mga agpaniwala siro boo agtipontipon sa balay lakoy Diyos sa piyagawit kay Solomon Solambi. ¹³ Kamayba in mga mangyan agmaal sa mga agpaniwala siro agkalimo miyagem sa kansiro. ¹⁴ Kamay aronaw wakay in maniwala sa Kapwan, midagdag sa barkadaan, mga kaliyakiyan aro, mga kagbaiyan din aro. ¹⁵ Panawen sa mga makasoyo piyagpangwat in mga katiwala in mga apo maskit piyagbaba sa balabaan karsada, piyagpapalibay sa mga damig, matang no asin domalan Pidro, na in amat kansiyo batay piyaganongan. ¹⁶ Aronaw in mga mangyan sa mga bayan bangen sa Irosalim agrateng din agbaba in mga apo maskit, osai in mga piyaglowasan mamaw agpanrames, siro boo piyaoraw wakay. ¹⁷ In mabwat pag poon sa mga sasirdoti maloba wano agpanagiri sa mga katiwala Isos, osai in boo kansiyo mga sarig, in mga Sadosiyo. ¹⁸ Matang kansiyo diyakep in mga katiwala, biilanggo. ¹⁹ Kamay ina daan pag yabi in sakbawan bilanggowan biyoswang osai ka angil siyogo in Kapwan, in dokalakiyan kansiyo piyapanaw. Miplaong in angil keyen, ²⁰ Kamo ista wakay sa balay lakoy Diyos, agpatoldo sa mga mangyan asin ina pag bayo wakay pag mga ogali. ²¹ In mga katiwala maniwala sa angil, siro pasodip wa pataboy sa balay lakoy Diyos, agpatoldo ngani. In mabwat pag poon sa mga sasirdoti, anggan in kansiyo mga sarig, agberya sa boo mga koyay mga Odyo matang agtipon in boo mga tanongan, agsogo mga polis sa bilanggowan keyen, Atai wa babaen in dokalakiyan. ²² Rateng sa bilanggowan in mga polis, piyangkit sa galem, idapo mana mangyan. Moli wakay, agbarita keyen, ²³ Kanyam piyangkit, piyagkopot daan gayed in sakbawan sa bilanggowan, in mga agdamay asin daan, kamay paka kanyam wa biyoswang, piyangkit, idapo wa galem. ²⁴ Paka karengey ina in kapitan sa mga agdamay sa balay lakoy Diyos, anggan in mga poon sasirdoti siro agpanremrem wano keyen, Nakay lames isag in kalobosan ina? ²⁵ Kalbas rateng in barita keyen, Ista wa mana sa balay lakoy Diyos in kanyo biilanggo, siro agtaydek agpatoldo sa mga mangyan. ²⁶ Kalbas ista wakay in kapitan, sarig in mga polis, piyaanggat in mga katiwala, kamay idwa giyaroti angkataw in mga polis agkalimo piyamenglayan bato in mga mangyan. ²⁷ Paka piyarateng wa in dokalakiyan sa tiponan, siro piyataydek sa kagwaraan. Miplaong in mabwat pag poon sa mga sasirdoti ²⁸ keyen, Maloba taite kanyam piyagayaw in kamo agpatoldo agalapet in ngaran Isos, bago ngona in boo Irosalim kanyo wa piyaratengan ina pag barita. Osai kami kanyo siyombong keyen kami in agbono kay Isos. ²⁹ Kalbas Pidro meles, anggan in mga katiwala keyen, Osai in mangyan waget, osai in Diyos, in Diyos agbangen in kailangan kanyam piyagpaniwalaan. ³⁰ Isos kanyo piyako sa kodos, biyono. Kalbas siyo piyaboway wakay in Diyos, in Diyos in piyagmaal in kantam mga kakoyayan. ³¹ Kalbas ngona Isos piyaonaik wa Diyos sa kansiyo agbangen pamalang. Siyo in agpapoon osai in agpamaboway, matang in mga kasokponan Israil kabaloy wa agbenglay in kansiro mga daet, matang liibangaw wa Diyos. ³² Ina wa in kanyam piyagbarita, angkataw kanyam ngani atawanan ina totoo. Ina wa din in barita in Betek pag Abyan, in tiyaboy Diyos sa mga agpaniwala sa kansiyo. ³³ Paka karengey ina in mga poon agkagalit wano gayed, siro boo agkabono sa dokalakiyan. ³⁴ Kamay apo osai ka Parisiyo sa tiponan, in ngaran Gamalil. Siyo osai ka agpatoldo in mga Batas Diyos, siyo piyagmaal gayed in boo mga mangyan. Siyo tomaydek, agsogo keyen, In dokalakiyan palompoten ngonate. ³⁵ Kadogayte keyen, Laki mga kasokponan Israil, kantam remremen gayed maal no nakay in maal pangwaten sa dokalakiyan. ³⁶ Angkataw tangona apo mangyan piyagawit Tiyodas, siyo agyabang agpoon. Kalbas apo miyanggat sa kansiyo mga opat ka daan ka mangyan. Kalbas siyo biyono, kadogayte mandalagan wa in kansiyo mga mangyan, maidapo wa ina pag barkadaan. ³⁷ Kalbas sa betek piyagbilang in mga mangyan, apo kay mangyan piyagawit Odas, taga Galiliya, siyo din agpaakay sa mga mangyan. Kalbas siyo din biyono, mandalagan wakay din in kansiyo mga mangyan. ³⁸ Na ngona anda pag dokalakiyan ayaw wa agladowen. Bayansiyo, nangkataw no in kansiro remrem osai in kansiro mga piyagpangwat batang waget sa mga mangyan, na in kansiro panawen idbatay mibaloy. ³⁹ Kamay no batang sa Diyos, na kitam idbatay kapandaeg. No kataw ina na batay atawanan kitam aglaban sa Diyos. ⁴⁰ Kalbas in mga poon maniwala kay Gamalil. Biyerya wakay in dokalakiyan, biyogbog, yaayaw wakay agpatoldo sa kabaloyan Isos. Kalbas piyalpas wa in dokalakiyan. ⁴¹ Siro lomabo wa sa tiponan, agkaanggay wa keyen, In Diyos agmaal sa kantam. Baina, kitam piyarikoy panawen kay Isos. ⁴² Kalbas ibengibeng osai sa balay lakoy Diyos, osai sa mga balay, siro agaway agpatoldo, agbarita in Maal pag Barita keyen, Isos in Kiristo.

¹ Asin pag mga betek agkakarowan in mga agpaniwala. Kalbas malawayan wa osai in mga Odyo agiplaong Girigo, osai in mga Odyo agiplaong Odyo. In sa mga agiplaong Girigo agbangen keyen in kansiro mga balo piyagapi sa piyagbagi ibengibeng. ² Kadogayte in labing dowai ka katiwala agpatipon sa boo mga agpaniwala, keyen, Yewed maal in kami agempet agpatoldo in agiplaong Diyos, matang agbagi. ³ Na laki mga belag, in maal kamo mangidang sa kanyo pito ka lalaki, mga piyagmaal, mga lakonaw in remrem batang sa Betek pag Abyan, mga apo katawanan. Na siro kanyam piyagsogo asin pag panawen, ⁴ matang idwa piyagsalag in kanyam panawen agpandalangin osai agpatoldo in agiplaong Diyos. ⁵ Kalbas in boo mga barkadaan agkaanggay sa siyabi in mga katiwala, in kansiro iidang in osai Istiban, siyo marigen in paniwala, lakonaw in remrem batang sa Betek pag Abyan. In kadowai Pilipi, in katolo Porokoro, in kaopat Nikanor, in kalima Timon, in kaenem Parminas, in kapito Nikolas siyo taga Antiyokya kamay mibaloy wa Odyo. ⁶ Ina pag pito piyaadap sa mga katiwala, kalbas yaatang, piyandalangin. ⁷ Kalbas labi kay karowan mangyan in karengey in agiplaong Diyos. In mga agpaniwala agkakarowan wano sa Irosalim, kadayo in mga sasirdoti, aronaw din in maniwala. ⁸ Piyagngitan wano Istiban piyagpakayawte Diyos, angkataw siyo aronaw piyagpamangwat sa pangkit mga mangyan makasoyo mga tandaan sa kabaloyan lakoy tiyaboy Diyos sa kansiyo. ⁹ Apo barkadaan mga Odyo piyagawit Piyalpas wa. Siro apo kansiro balay pagpaniponan, siro mga taga Sirini, osai in mga taga Aliyanriya. Apo din barkadaan mga Odyo taga Silisya, osai mga taga Asya. In kalaati sa kansiro lomaban kay Istiban agmatiwid, ¹⁰ kamay siro idbatay kapandaeg sa kansiyo maal pag remrem, sa Abyan in agpaiplaong sa kansiyo. ¹¹ Kadogayte siro agtago agsogo sa mga mangyan agsabi keyen, Kami ngani karengey Istiban aglibak kay Mowisis, osai sa Diyos. ¹² Kataw ina kansiro riyengke in galit in mga mangyan, osai in mga koyay, osai in mga agpatoldo in mga Batas. Kalbas Istiban kansiro siyonggaban, diyakep, biyaba sa mga tanongan in mga Odyo. ¹³ Kadogayte kansiro piyaadap in mga agbintang keyen, Ina pag mangyan agpansabi waget daet sa kantam balay lakoy Diyos, osai sa mga Batas Mowisis. ¹⁴ Angkataw kami karengey siyo keyen ina pag Isos taga Nasarit batay agpokan sa kantam balay lakoy Diyos, batay agalis sa kantam mga ogali, in tiyaboy Mowisis. ¹⁵ Kalbas in boo tiponan agroris sa kay Istiban mata, siro kangitan kagwali mata angil.

¹ Kalbas in mabwat pag poon sa mga sasirdoti miplaong kay Istiban keyen, Nakay laki, betek ngani ina pag mga sombong? ² Miplaong Istiban keyen, Laki mga belag, laki mga koyay, kamo mamarengey sa kangay piyagsabi. In Diyos in lakonaw sa boo, siyo lomwas sa kantam tangona kakoyayan Abraam, in siyo agbalay kay sa Misapotamya, ikkay agbalay sa Aran. ³ Siyabi sa kansiyo in Diyos keyen, Kao panaw wa sa kaimo kobat, sa kaimo mga kabelagan, pataboy sa kobat kangay batay piyagpatoldo sa kaimo. ⁴ Kalbas siyo panaw wa ngani asin pag kobat, agbalay wa sa Aran anggan in kansiyo amang matay wa. Kalbas siyo piyapanaw wakay Diyos, anggan atai pag kobat, sa kantam pagbalayan ngona. ⁵ Kamay siyo idapo piyakan kobat atai, kamayba kaslangte darapa. Kamay in pangako Diyos keyen anda pag kobat batay ngani dogayan kansiyo, osai sa kansiyo mga kasokponan, kamayba asin pag betek siyo idapo kay bodang. ⁶ In siyabi Diyos keyen, In kaimo dogayan mga kasokponan batay agbalay sa kobat yewed siro in kapwan. Siro batay mga sogowan batay piyagpaidapan 400 ka dagon. ⁷ Keyen in Diyos, Kamay ako batay agparosa sa mga agpansakop sa kansiro. Na no kalbas wa, siro batay wakay panaw asin, atai wakay pag kobat agpandalangin sa kangay. ⁸ Kalbas in Diyos agsogo kay Abraam keyen, In mga kaliyakiyan toliyen, tanda sa kanta kasondowan. Kalbas Abraam apo wa bodang, Isaak. Paka ngani sa kawalo ka ibeng kansiyo tiyoli. Kalbas Isaak apo wa bodang, Akob. In bodang Akob labing dowai, in kantam tangona mga kakoyayan. ⁹ Keyen kay Istiban, In kantam mga kakoyayan agpanagiri kay Osi. Kalbas Osi piyabili, matang sogowan waget sa Iipto. Kamay in Diyos agaway kay agalapet sa kansiyo. ¹⁰ Siyo piyaboway Diyos sa boo mga kaidapan, piyakan in maal pag remrem, anggan siyo piyagmaal in poon lakoy sa Iipto. Osi piyangwat Paraon poon sa Iipto. Kadayo kay Paraon balay Osi katiwala wa din asin. ¹¹ Istiban keyen kay, Kalbas apo domalan agkayawes sa boo Iipto, kadayo sa Kanaan, agkaidapan wano, in kantam mga kakoyayan idapo piyagngitan pamangnen. ¹² Kalbas abaritaan Akob keyen apo pamangnen sa Iipto, kalbas kansiyo siyogo kansiyo mga bodang in kantam mga kakoyayan. Ina in tokaw pag siro pataboy ista. ¹³ Kalbas in tagoli wakay keyen Osi sa kansiyo mga belag, Mga laki, ako Osi. Kalbas in kabelagan Osi piyatoldo wa kay Paraon. ¹⁴ Kalbas Osi agsogo keyen, Atai wa pataboyen kantam amang Akob, anggan in kantam kabelagan. Siro pitompo lima ka mangyan. ¹⁵ Kalbas Akob malkoyog wa sa Iipto, siyo ista wa matay, kadayo kantam mga kakoyayan ista wa din matay. ¹⁶ Kansiro mga bilog biyaba wakay sa Sikim, asina wa liyebeng. Ina pag lebengan biili tangona Abraam sa mga kasokponan Amor sa Sikim, in bayad kowarta daan. ¹⁷ Keyen kay Istiban, Paka batay wa mibaloy in pangako Diyos in kansiyo siyabi kay Abraam, na agkakarowan wa gayed in mga kasokponan Israil sa Iipto. ¹⁸ Kalbas apo wakay bayo pag poon sa Iipto, siyo idapo katawan panawen kay Osi. ¹⁹ Siyo agpadaya, piyagpaidapan in kantam mga kakoyayan, piyanggais biyenglay in kansiro mga bodang, matang mangatay. ²⁰ Asin pag betek Mowisis biyoslot. Siyo maalen wano pag bodang sa pangkit Diyos. Tolo ka bolan siyo piyaistobo sa balay daan kansiyo mga koyay. ²¹ Kalbas paka biyenglay wa, siyo kiyowa wakay kay Paraon bodang, yaalapet wa ina pag kagbaiyan, mibaloy wa kansiyo bodang. ²² Kalbas Mowisis piyaadar wa sa boo atawanan in mga taga Iipto, maeyat in kansiyo agiplaong, maeyat din in kansiyo panawen. ²³ Istiban agiplaong kay keyen, Paka Mowisis apatnapo wa ka dagon, siyo manremrem keyen, Ako paya batay mangkit sa kangay mga belag kasokponan Israil. ²⁴ Kalbas kansiyo ngiitan in osai sa kansiro piyagpangwatan daet osai ka taga Iipto. Kalbas kansiyo tiyolong in kasokponan Israil, in taga Iipto kansiyo diyaeg, biyono. ²⁵ In kansiyo remrem in kansiyo mga kabelagan batay wa agremrem keyen siyo piyagsogo Diyos agpalpas sa kansiro. Kamay siro idapo agremrem kataw ina. ²⁶ Goribas wakay Mowisis apo wakay ngiitan dowai ka kasokponan Israil agpalaway. Kalbas siyo agosay nges keyen, Mga laki, kamo taybelag daan, na nakay batang kamo agpalaway? ²⁷ Kamay siyo diyekse in agpamangwat daet agbangen keyen, Nakay in agsogo sa kaimo agpoon, matang tanongan sa kanyam? ²⁸ Kao lames batay agbono sa kangay, kataw kaponi sa taga Iipto? ²⁹ Paka Mowisis karengey ina, siyo toloy wa domalagan asin sa Iipto, ista wa naw agbalay sa kobat Midyan. Ista wa siyo mamangkit babai, kalbas mamodang, dowai ka kaliyakiyan. ³⁰ Istiban keyen kay, Paka kadalan apatnapo ka dagon, Mowisis agipanawan sa moyod sa boksor Sinai, apo lomwas angil sa kansiyo sa osai ka yangawte agigang baya. ³¹ Mowisis agsoyo sa kansiyo ngiitan, siyo pasabangen kay, kansiyo piyagroris. Kalbas siyo karengey in agiplaong in Kapwan keyen, ³² Laki Mowisis, ako in Diyos piyagmaal kaimo mga kakoyayan, Abraam, Isaak, osai Akob. Kadogayte Mowisis mangirabot, siyo yewed kapangaas agpangkit. ³³ Keyen in Kapwan, Kowaen wa in kaimo tapatos, angkataw ina pag kobat kaimo paglaedan piyagtalaga sa kangay. ³⁴ Kangay ngani ngiitan in kangay mga mangyan maloba wano piyagpaidapan sa Iipto. Ako karengey siro mga agpalpangadedek wa. Kaya ako lompot, ako batay agpalpas sa kansiro. Amba, kao kangay piyagpaoli wakay sa Iipto. ³⁵ Istiban keyen kay, Kamay in kantam mga kakoyayan dayo kay Mowisis. Kansiro siyabi keyen, Nakay in agsogo sa kaimo agpoon, matang tanongan sa kanyam? Kamay Mowisis daan in siyogo Diyos agpoon, osai agpalpas sa kansiro sa tolong in angil in kansiyo ngiitan sa yangawte. ³⁶ Mowisis daan in agpalpas sa kantam mga kakoyayan sa Iipto. Asin siyo agpangwat lakoy mga tandaan mga makasoyo, kadayo sa dagat Mapola, kadayo din sa moyod apatnapo ka dagon. ³⁷ Ina daan pag Mowisis in agsabi sa mga kasokponan Israil keyen, In Diyos batay wakay agsogo poropita batang sa kanyo mga kabelagan, kataw daan in ako siyogo. ³⁸ Mowisis sarig in mga kasokponan Israil agkatipon sa moyod. Siyo in sarig in kantam mga kakoyayan osai sarig in angil in miplaong sa kansiyo sa boksor Sinai. Siyo in piyakan Diyos mga agiplaong agkaboway, matang kansiyo wakay tiyaboy sa kantam. ³⁹ Keyen kay Istiban, Kamay in kantam mga kakoyayan dayo maniwala kay Mowisis. Siyo biyenglay. Kansiro remrem keyen, Dayem nges kitam kaoli wakay sa Iipto. ⁴⁰ Kansiro siyabi kay Aaron keyen, Ina pag Mowisis in agpalpas kantam sa Iipto, saken wa no manakay siyo. Na kami pangwatanen wakay mga rarawan batay kanyam mga diyos agpatoldo dalan sa kantam. ⁴¹ Kalbas kansiro piyangwat kagwali bodang baka. Siro agbono mga ayop, yaandog asin sa kansiro piyagawit diyos, agpiyasta agmaal sa kansiro waget piyangwat. ⁴² Kalbas in Diyos paawak wa, siro piyabayaan wa sa agsamba sa mga magirem sa langit. Kataw in siyolat sa aklat in mga poropita keyen, Laki mga kasokponan Israil, in kamo sa moyod apatnapo ka dagon, in kanyo mga biyono ayop, mga pansola, tiyaboy lames kay nakay? Yewed sa kangay. ⁴³ Kanyo biyaba in torda in yewed Diyos piyagawit Molok, kanyo biyaba in rarawan magirem in yewed Diyos piyagawit Ripan, in mga rarawan kanyo piyangwat matang pagsambaan. Na kamo kangay batay piyagbenglay sa ripay Babilon. ⁴⁴ Keyen kay Istiban, Sa moyod in kantam mga kakoyayan apo in torda tanda in Diyos kansiro sarig. Mowisis siyogo Diyos agpangwat, kalbas kansiyo ngani piyangwat kataw in pagtoladan piyapangkit sa kansiyo. ⁴⁵ Paka Oswi wakay in poon, in torda piyagbaba din in kantam mga kakoyayan in siro mandaeg sa mga tiribo piyamoyaw Diyos atai pag kobat. In torda kansiro biyaba atai, ina atai kay anggan sa kabetek Dabid. ⁴⁶ Dabid piyagmaal in Diyos, kalbas siyo mandalangin keyen, Ako batay agpangwat balay lakoy sa kaimo, kao in Diyos piyagmaal in mga kasokponan Israil. ⁴⁷ Kamay Solomon wakay in agpangwat in balay lakoy Diyos. ⁴⁸ Kamay in Mabwat sa Boo yewed agbalay sa mga piyangwat mangyan. Kataw in siyabi in Diyos siyolat in poropita keyen, ⁴⁹ In langit in kangay pagtokkawan, in kobat in kangay paglaedan. Na kataw nakay pag balay in kanyo batay piyangwat sa kangay? Saano in kangay batay pagpamatawan? ⁵⁰ Ako daan in agpangwat ina pag boo. ⁵¹ Keyen kay Istiban sa mga tanongan, Kamo mga dayo padaeg, dayo pasakop sa Diyos, dayo agparengey sa Diyos. Kamo din baatte aglaban sa Betek pag Abyan. In kanyo ngona piyagpangwat kataw in piyangwat tangona kanyo mga kakoyayan. ⁵² In kanyo mga kakoyayan agpaidap sa boo mga poropita, kansiro tangona biyono in mga poropita in mga keyen batay rateng in betek gayed pag Sogowan Diyos. Kalbas ngona siyo kanyo piyadakep, kanyo biyono. ⁵³ Kamo in piyakan Diyos kansiyo mga Batas biyaba mga angil, bago yewed kanyo piyaniwalaan. ⁵⁴ Paka karengey ina in mga tanongan, siro agkaibengan wa labi sa galit kay Istiban. ⁵⁵ Kamay siyo lakonaw in remrem batang sa Betek pag Abyan. Siyo agtangra sa langit, kansiyo ngiitan in rawa Diyos, osai Isos agtaydek sa pamalang agbangen Diyos. ⁵⁶ Miplaong Istiban keyen, Baati, ako kangitan mabolwat in sakbawan sa langit, Isos in Bodang Mangyan agitaydek sa pamalang agbangen Diyos. ⁵⁷ Kalbas in mga poon mango lakoy maksen, piyangkopot in talinga. Istiban diyarosog, ⁵⁸ giyoyod piyalampas sa bayan, piyamenglayan bato. In mga agsombong karai in kansiro mga lambong piyapataw sa osai ka begle, in ngaran Saolo. ⁵⁹ In Istiban piyagpamenglayan bato siyo mandalangin maksen keyen, Laki Isos, Kapwan, kowaen wa in kangay abyan. ⁶⁰ Kadogayte kansiyo piyataydek kansiyo dolang, miplaong lakoy maksen keyen, Laki Kapwan, kaimo libangawen anda pag daet, in mga mangyan ayaw agparosaanen. Paka kalbas wa miplaong siyo matay wa.

¹ Saolo agantabay sa agbono. Piyarakay asin pag ibeng, in mga agpaniwala sa Irosalim, siro piyagpaidapan wa gayed. Siro boo maypandalagan wa, omarabang sa mga kobat sa Odiya, osai sa Samariya. In mga katiwala waget in mataw. ² Istiban siyangat in mga mangyan agmaal sa Diyos. Siro agrongkot wano anggan maloba agpalpanangis. ³ Kamay Saolo agkasida gayed sa barkadaan mga bodang Diyos, siyo agpangisoroy sa mga balay, agpanggoyod sa mga agpaniwala, mga kaliyakiyan, mga kagbaiyan din, piyagbenglay sa bilanggowan. ⁴ In mga omarabang agipanawan, agpatoldo daan in Maal pag Barita. ⁵ Pilipi pataboy sa bayan Samariya, agpatoldo panawen sa Kiristo. ⁶ Paka siro karengey kay Pilipi, osai kangitan in mga makasoyo kansiyo piyagpangwat, in karowan malpaniwala sa kansiyo piyagsabi. ⁷ Angkataw maypandalagan in mga mamaw sa aronaw mangyan piyaglowasan, agpango maksen. Aronaw din mga mangyan yewed wa kapaglebey, osai mga mangyan pilay, piyaoraw din Pilipi. ⁸ Siro agkaanggay wano asin pag bayan. ⁹ Asin pag bayan apo mangyan piyagawit Simon. Siyo dogay wa salimangkaan, in mga taga Samariya agsoyo sa kansiyo mga piyagpangwat lakoy. Siyo agpakabwat keyen siyo lakonaw lakoy. ¹⁰ Siyo piyagpaniwalaan in boo, anggan in mga lakonaw, anggan in mga mangyan waget. Ina pag mangyan kansiro piyagawit in Kabaloyan Lakoy batang sa Diyos. ¹¹ Siro agparengey sa kansiyo, angkataw dogay wa siro agsoyo sa kansiyo salimangka. ¹² Kalbas siro maniwala wakay sa kay Pilipi Maal pag Barita keyen in Diyos agpapoon wa, maniwala wa kamo kay IsoKiristo. Paka siro maniwala wa, siro biyaotismowan, mga kaliyakiyan, mga kagbaiyan din. ¹³ Kadayo Simon maniwala din. Paka biyaotismowan wa, siyo miyanggat wa kay Pilipi, siyo agsoyo sa mga lakonaw pag panawen piyagpangwat Pilipi, mga makasoyo. ¹⁴ Kalbas in mga katiwala sa Irosalim abaritaan keyen, In mga taga Samariya agpaniwala wa din sa agiplaong Diyos. Kalbas kansiro siyogo ista dokalaki Pidro osai Owan. ¹⁵ Paka in dokalaki rateng wa sa Samariya, siro agpandalangin sa mga agpaniwala keyen siro pakanen in Betek pag Abyan. ¹⁶ Angkataw kamayba nakay sa kansiro ikkay riyatengan in Betek pag Abyan. In siro biyaotismowan na sa ngaran waget Isos in Kapwan. ¹⁷ Kalbas siro yaatang in dokalaki. Siro piyakan wa in Betek pag Abyan. ¹⁸ Paka Simon kangitan in Betek pag Abyan tiyaboy sa mga yaatang wa in mga katiwala, siyo miplaong kay dokalaki Pidro osai Owan keyen, Kamo pakanen kowarta, ¹⁹ ako din pakanen ina pag kabaloyan, matang kamayba nakay in kangay yaatang, na siyo piyakan din in Betek pag Abyan. ²⁰ Kamay Pidro keyen, Kadayo kaimo kowarta, kadayo kao ista wa sa toyongan, angkataw kaimo remrem keyen batay mabayad kowarta in kabaloyan piyagtaboy Diyos. ²¹ Kao piyagayaw agyanggat atai pag panawen, angkataw in kaimo remrem daet sa Diyos. ²² Na benglayen wa in kaimo daet, mandalangin sa Kapwan, karam nges mayadi liibangaw in kaimo daet pag remrem in kao agkataw ina. ²³ Ako kangitan kao agpanagiri wano, kao piyagbakos daet. ²⁴ Kalbas Simon keyen, Ako kanyo dalanginen sa Kapwan, matang yewed rateng kangay in kanyo mga baritaen. ²⁵ In dokalaki, paka kalbas wa agbarita agpatoldo in agiplaong Diyos, siro moli wakay sa Irosalim. Siro agpatoldo in Maal pag Barita sa mga bayante sa Samariya kansiro diyalan. ²⁶ Pilipi siyogo osai ka angil in Kapwan keyen, Kao panaw wa ngani, pataboy sa dalan agongali, batang sa Irosalim agtaboy sa Gasa, ina pag dalan apo moyod. ²⁷ Kalbas siyo panaw wa, ista wa pataboy. Siyo kangitan kaliyakiyan taga Itiyopya, mabwat in tongkolin. Siyo katiwala Kandasi, in poon lakoy kagbaiyan sa mga taga Itiyopya. Siyo in agalapet in kay Kandasi boo mga sangkap. Ina pag lalaki batang pataboy sa Irosalim, agsamba, ²⁸ kalbas ngona agoli wakay. Siyo agitokkaw agsakay sa kalisa, agbasa sa aklat in apo siyabi Isaiyas in poropita. ²⁹ Pilipi siyogo in Abyan Diyos keyen, Amba kao pataboy ista pag kalisa, miyanggat. ³⁰ Domalagan Pilipi, pataboy sa kansiyo. Siyo karengey agbasa in apo tongkolin sa siyabi Isaiyas in poropita. Keyen Pilipi, Kao lames katawan in beet siyabi ina in kaimo piyagbasa? ³¹ Keyen in apo tongkolin, Nangkataw ako batay katawan, no idapo agpaliwanag sa kangay? Laki, somakay wa kao, atai wa tomokkaw sa kangay bangen. ³² Sa mga Agisolat in dodo kansiyo piyagbasa keyen, Siyo kataw topa piyagali batay piyagbono. Siyo yewed miplaong kataw in bodang topa yewed agana no piyagogoy. ³³ Siyo piyaidapo kabolowan, idapo tanongan batay mamarengey sa kansiyo. Siyo idapo batay bodang piyagpanggisodan dogayan, angkataw siyo biyono wa, idapo wa. ³⁴ In apo tongkolin miplaong kay Pilipi keyen, Laki, nakay in piyagpanggisodan in poropita? No siyo daan, no osai wakay ka mangyan? ³⁵ Kalbas Pilipi miplaong, piyarakay daan asin pag solat siyo agpatoldo sa kansiyo in Maal pag Barita Isos. ³⁶ Siro agipanaw kay sa dalan, rateng sa linaw. Keyen in apo tongkolin, Baati, apo sapa, maal lames ako biyaotismowan? ³⁸ Kalbas kansiyo piyaempet in kalisa, siro tanan lompot sa sapa, osai Pilipi, osai in apo tongkolin, kalbas biyaotismowan wa. ³⁹ Paka siro patakdang wakay, Pilipi toloy wa biyaba in Abyan in Kapwan, siyo idwa piyagngitan ina pag lalaki. In apo tongkolin agipanaw wakay sa kansiyo dalan, agkaanggay wano. ⁴⁰ Kamay Pilipi bayo katawan siyo mana sa Asoto wa. Kalbas siyo agipanawan kay, agpatoldo in Maal pag Barita sa boo mga bayante, anggan rateng sa Sisariya.

¹ Kamay Saolo agaway kay agpamosong, agkabono sa mga agpaniwala sa Kapwan. Kalbas siyo pataboy sa mabwat pag poon sa mga sasirdoti, ² mangayay mga solat batay biyaba sa mga balay pagpaniponan mga Odyo sa bayan Damasko, matang siro katawan siyo siyogo in mabwat pag sasirdoti. Kalbas no siyo apo ngiitan agpaniwala sa mga ogali Isos, na kansiyo batay diyakep, kamayba kaliyakiyan, kamayba kagbaiyan, biyaba sa Irosalim. ³ Kalbas siyo agipanaw wa. Paka bangen wa sa bayan Damasko, toloy mangkilat lakoy batang sa langit, agrawa wa lakoy in boo kansiyo balabaan. ⁴ Saolo malabo sa diya. Siyo karengey agiplaong keyen, Saolo, laki Saolo, nakay batang ako kaimo piyagpaidapan? ⁵ Keyen Saolo, Laki, kao nakay? Keyen, Ako Isos, in kaimo piyagpaidapan. ⁶ Miyorog wa kao, kao ista wa sa bayan. Ista kao batay piyatoldo in kaimo batay panawen. ⁷ In kay Saolo mga sarig abolaleg wa, idwa kaiplaong. Siro karengey in agiplaongan, kamay idapo ngiitan. ⁸ Kalbas miyorog Saolo. Paka mangimata siyo yewed kangitan, matang siyo yaakay, piyarateng sa Damasko. ⁹ Saolo tolo ka ibeng beleg, yewed mamangan, yewed din minem. ¹⁰ Sa Damasko apo mangyan agpaniwala kay Isos in ngaran Ananiyas. Siyo agkaanapen, lomwas sa kansiyo in Kapwan, keyen, Laki Ananiyas. Siyo keyen, Laki Kapwan, ako anda daan. ¹¹ Keyen in Kapwan, Kao panaw wa, ista pataboy sa dalan piyagawit Matoron, pataboy sa balay Odas. Asin pamangkiten mangyan taga Tartos, in ngaran Saolo. Siyo asin agpandalangin. ¹² Siyo batang manainep osai ka mangyan piyagawit Ananiyas misoroy sa balay, omatang sa kansiyo, matang siyo kangitan wakay. ¹³ Kamay keyen Ananiyas, Laki Kapwan, in aronaw barita keyen ina pag mangyan agpamangwat lakoy daet sa kaimo mga bodang sa Irosalim. ¹⁴ Kadayo atai siyo apo kabaloyan batang sa mga poon sasirdoti, matang in boo atai agmaal sa kaimo batay kansiyo diyakep. ¹⁵ Kamay keyen in Kapwan, Dali wa, angkataw siyo kangay iidang batay siyogo agbarita panawen sa kangay sa mga yewed Odyo, anggan sa mga poon lakoy, anggan din sa mga kasokponan Israil. ¹⁶ Ako batay agpatoldo sa kansiyo keyen siyo dogayan aronaw kaidapan matang ako batay piyaglakonaw. ¹⁷ Kalbas ista wa ngani pataboy Ananiyas, omakyat sa balay, omatang kay Saolo, keyen, Laki belag Saolo, ako siyogo Isos in Kapwan, in lomwas taite sa kaimo sa dalan, in kao atai agtaboy. Kaya ako kansiyo siyogo sa kaimo, matang kao kangitan wakay, osai matang kao piyakan in Betek pag Abyan. ¹⁸ Kalbas toloy apo maragrag batang sa kay Saolo mata kagwali sariksik. Kalbas siyo kangitan wakay, siyo tomaydek wa, kalbas biyaotismowan. ¹⁹ Kalbas siyo mamangan wakay, apo wakay eyat. Saolo dogay kayte agpamataw sa Damasko, agyanggat sa mga agpaniwala. ²⁰ Siyo toloy agbarita panawen kay Isos sa mga balay pagpaniponan mga Odyo keyen, Isos in Bodang Diyos. ²¹ In boo agparengey, agsoyo keyen, Tomag ina wa in agpamono sa Irosalim sa mga ista agmaal kay Isos. Kadayo atai ina din in kansiyo panawen, in mga agpaniwala batay kansiyo diyakep, batay biyaba sa mga poon sasirdoti. ²² Kalbas kay Saolo kabaloyan agistobo, siyo agmatiwid agpatoldo keyen Isos ngani in Kiristo. In mga Odyo agbalay sa Damasko idbatay kapandaeg sa kansiyo mga matiwid. ²³ Paka dogay kayte agpaypolongan in mga Odyo keyen Saolo bonowen wa. ²⁴ Kansiro piyagdamay in mga sakbawan sa alabat bayan, ibeng din, yabi din, matang siyo mabono. Kamay Saolo abaritaan keyen, Kao kono batay wa biyono. ²⁵ Kalbas osai ka yabi in kansiyo mga agadar komwa lakoy galang, Saolo siyoroy, piyalooy sa awak alabat. ²⁶ Saolo pataboy sa Irosalim, siyo beet wa nges miyanggat sa mga agpaniwala, kamay siro boo agkalimo sa kansiyo keyen karam yewed agpaniwala. ²⁷ Kalbas Birnabi agpaanggat kansiyo sa mga katiwala, agpanggisod sa kansiro keyen, Taite sa dalan Saolo batang kangitan sa Kapwan, in Kapwan miplaong sa kansiyo. Siyo idwa din agkalimo agpatoldo panawen kay Isos sa Damasko. ²⁸ Kalbas Saolo agpamataw wa sa kansiro, agipanawan wa sa Irosalim, yewed agkalimo agpatoldo panawen sa Kapwan. ²⁹ Kalbas siyo agiplaongan din sa mga Odyo agiplaong Girigo, siro agpalsisagotan, kamay siro batay nges agbono sa kansiyo. ³⁰ Paka ina atawanan wa in mga agpaniwala, Saolo kansiro tiyonton sa Sisariya, piyapanaw wa, piyataboy sa Tartos. ³¹ Paka kataw wa ina in mga barkadaan mga bodang Diyos sa Odiya apyaan wa, kadayo sa Galiliya, anggan sa Samariya. Siro agkakarowan, in kansiro remrem piyagpakaeyat in Betek pag Abyan, in siro agogali maal, agkamaal sa Kapwan. ³² In Pidro agipanawan sa mga amat bayan, siyo rateng wa din sa mga bodang Diyos sa bayante Lida. ³³ Asin siyo kangitan mangyan in ngaran Iniyas. Siyo apo maskit, walo wa ka dagon yewed kapaglebey. ³⁴ Keyen Pidro, Laki Iniyas, kao piyagpaoraw wa IsoKiristo. Miyorog wa, pakapyaen wa in kaimo esekan. Toloy ngani siyo miyorog. ³⁵ In boo taga Lida, in boo taga Patag Saron, siro kangitan ina, kalbas maniwala wa sa Kapwan. ³⁶ Sa bayan wakay Oppi apo kagbaiyan agpaniwala, in ngaran Tabita, no sa agiplaong Girigo na Dorkas, na in beet siyabi songayan. Maalno in kansiyo mga panawen, siyo baatte agtolong sa mga maidap. ³⁷ Asin pag betek siyo apo maskit, kalbas matay wa. In bilog yoogas, kadogayte piyabolalang sa ogbos pag basag. ³⁸ In bayan Lida bangen sa Oppi matang paka in mga agpaniwala abaritaan keyen Pidro sa Lida, kansiro siyogo dowai ka lalaki, komwa sa kansiyo keyen, Amba, kitam wa sa Oppi, ayaw agpabeya. ³⁹ Kalbas Pidro panaw wa, miyanggat. Paka rateng wa siyo piyaanggat sa ogbos pag basag. In boo mga balo agpasabangen agpalpanangis. Piyapangkit kay Pidro in mga damit, mga lambong piyangwat taite Dorkas, in siyo agkaboway kay. ⁴⁰ Kamay siro boo piyalompot Pidro. Kalbas Pidro piyatadyok in dolang, mandalangin, kalbas patobang sa matay, keyen, Laki Tabita, miyorog wa kao. Kalbas siyo mangimata. Paka kangitan kay Pidro, siyo tomokkaw. ⁴¹ Kalbas kay Pidro yaatang, piyataydek. Kalbas biyerya in mga balo osai in amat mga bodang Diyos, Dorkas piyapangkit, boway wakay. ⁴² Kalbas ina biyarita wa sa boo Oppi, anggan aronaw in maniwala sa Kapwan. ⁴³ Pidro dogay kay agpamataw sa Oppi sa kay Simon balay, in agpamakapya balat ayop batay piyagpangwat damit.

¹ Sa bayan Sisariya apo mangyan yewed Odyo, in ngaran Kornilyo. Siyo kapitan osai ka daan ka sondalo, sakop sa barkadaan mga sondalo piyagawit Barkadaan taga Italya. ² Siyo agpansamba sa Diyos, agmaal sa Diyos, osai in boo kansiyo mga kamalay. Siyo baatte agtolong sa maidap pag mga Odyo, osai mapret agpandalangin sa Diyos. ³ Mangiriyan wa in ibeng siyo agkaanapen, kansiyo wa gayed ngiitan misoroy sa kansiyo balay osai ka angil batang sa Diyos. Keyen in angil, Laki Kornilyo. ⁴ Kornilyo alimowan, agterek sa angil keyen, Nakay, Laki? Keyen in angil, In kaimo mga pandalangin makaanggay sa Diyos, osai in kao agtolong sa mga maidap. ⁵ Ngona kao agsogo mga mangyan sa Oppi, atai paanggaten Simon in piyagawit din Pidro. ⁶ Siyo agpamataw sa balay Simon, in agpakapya balat ayop, in balay sa balabaan dagat. ⁷ Paka in angil kalbas agiplaong siyo panaw wa. Kalbas Kornilyo agberya sa dowai ka sogowan, in katolo sondalo. In sondalo kay Kornilyo katolong, agsamba din sa Diyos. ⁸ Kalbas Kornilyo agbarita sa kansiro in barita angil, kalbas siro siyogo wa sa Oppi. ⁹ Goribas wa tangali siro agipanaw kay agkabangen wa rateng sa bayan Oppi, Pidro monaik wa sa ogbos balay sa atep agipatag, batay agpandalangin. ¹⁰ Kalbas siyo agkayawes wa, beet wa mamangan. Piyagtongtong kay in pamangnen siyo agkaanapen, ¹¹ kangitan maboswang in langit, apo piyagpalooy teem lakoy piyageket sa opat ka sokol, piyagparateng sa diya. ¹² In galem karowan, kamayba nakay in mga agipanawan, in mga aginanapan, in mga agilayogan. ¹³ Kalbas apo miplaong keyen, Laki Pidro, miyorog wa, agbono wa, mamangan wa. ¹⁴ Kamay Pidro keyen, Ablayan, laki Kapwan. Ako idbatang mamangan in sa mga Odyo piyagawit keyen piyagayaw. ¹⁵ Kalbas tagoli wakay miplaong keyen, In liinis wa Diyos, ayaw kaimo agawiten keyen piyagayaw. ¹⁶ Anggan makatolo mipangwat kataw ina, kalbas giyoyod wakay sa langit in teem. ¹⁷ Kadogayte in Pidro agremrem kay keyen, Nakay lames in beet siyabi ina in kangay ngiitan, rateng wa in mga siyogo Kornilyo. Siro piyatoldo wa kay Simon balay, agtaydek wa sa sakbawan, ¹⁸ agberya keyen, Atai lames apo mangyan agpamataw in ngaran Simon, piyagawit din Pidro? ¹⁹ Pidro agpanremrem kay in beet siyabi kansiyo ngiitan, kalbas miplaong in Abyan Diyos sa kansiyo keyen, Baina wa, tolo ka mangyan, kao piyagpamangkit. ²⁰ Dali wa, lomabo wa, kao miyanggat wa. Ayaw manremrem, ako dayem in agsogo sa kansiro. ²¹ Lomabo ngani Pidro, pataboy sa dokalakiyan keyen, Ako in kanyo piyagpamangkit. Nakay in kanyo panawen sa kangay? ²² Siro keyen, Kami piyagsogo Kornilyo. Siyo kapitan mga sondalo, maalno pag mangyan, agmaal sa Diyos, siyo piyagmaal din in boo mga Odyo. Siyo siyogo osai ka angil batang sa Diyos keyen, Pidro pataboyen atai, mamarengey sa kansiyo barita. ²³ Kalbas siro piyaonaik wa Pidro sa balay, piyaesek wa asin. Paka ibeng wakay panaw wa, siro maysarigan wa. Apo din miyanggat mga belag agpaniwala taga Oppi. ²⁴ Goribas wakay kora Pidro rateng wa sa Sisariya. Kornilyo agpanaya sa kansiyo kadayo in kansiyo mga kabelagan osai in kansiyo mga pagbelag gayed, angkataw siro kansiyo biyerya keyen, Matipon wa, agrateng wa dokalakiyan Pidro. ²⁵ Paka Pidro agrateng wa, Kornilyo toloy patagbo, patalegeb sa bangen kay Pidro bitis, agmaal sa kansiyo. ²⁶ Kamay siyo kay Pidro toloy yoorog keyen, Tomaydek kao, ako beken mangyan waget din. ²⁷ Siro agpanggisodan kay misoroy wa sa balay, aronaw ngani mangyan agkatipon wa. ²⁸ Kalbas Pidro miplaong sa kansiro keyen, Kamo katawan in mga Odyo piyagayaw agyanggat, piyagayaw misoroy sa balay yewed Odyo. Kamay siyabi in Diyos sa kangay keyen kamayba nakay pag mangyan ayaw agawiten keyen piyagayaw. ²⁹ Matang ngani in ako piyagpaanggat, ako yewed manremrem, ako toloy miyanggat. Na nakay wa in kanyo kailangan sa kangay? ³⁰ Kalbas keyen Kornilyo, Ngona in kaopat ka ibeng, kataw ngona mangiriyan in ibeng, ako atai sa balay, agpandalangin. Kalbas toloy lomwas mangyan sa kangay bangen, makasolap in lambong, maboksi. ³¹ Miplaong keyen, Laki Kornilyo, in kaimo pandalangin makaanggay sa Diyos, osai in kao agtolong sa mga maidap. ³² Na kao agsogo sa Oppi, atai pataboyen Simon in piyagawit din Pidro. Siyo agpamataw sa balay Simon in agpakapya balat ayop, in balay sa balabaan dagat. ³³ Kalbas toloy ngani ako agsogo komwa sa kaimo. Kalbas salamat ngani sa kaimo, laki, kao rateng atai. Kaya ngona kami boo atai sa pangkit Diyos, matang agparengey sa kaimo in boo agiplaong Diyos. ³⁴ Kalbas Pidro miplaong keyen, Ngona wa ngani ako katawan in Diyos yewed agpangidang sa mga mangyan. ³⁵ Kamayba nakay pag mga mangyan, no siyo agmaal sa Diyos osai agpangwat in betek, na siyo piyagpabodang Diyos. ³⁶ Kanyo atawanan in agiplaong Diyos piyababa sa mga kasokponan Israil, in Maal pag Barita keyen, IsoKiristo in agpakapya, siyo in Kapwan sa boo. ³⁷ Kanyo din atawanan in lakonaw pag mibaloy atai sa boo kobat in mga kasokponan Israil, agparakay sa Galiliya in Owan agpatoldo osai agbaotismo sa mga mangyan. ³⁸ In kangay beet siyabi Isos taga Nasarit piyakan Diyos in Betek pag Abyan, osai kabaloyan. Siyo agipanawan, agpangwat maal, agpaoraw sa boo piyagpaidapan in diyablo, angkataw in Diyos agyanggat sa kansiyo. ³⁹ Kami kangitan in boo kansiyo piyangwat sa kobat mga Odyo, anggan sa Irosalim. Kalbas siyo biyono, piyako sa kodos, ⁴⁰ kamay sa katolo ka ibeng siyo yoorog wakay Diyos, piyapangkit wakay, ⁴¹ yewed sa boo mangyan, dayem sa kanyam, kami waget in iidang Diyos matang kangitan. Paka siyo miyorog wakay batang wa matay, siyo mamangan pamangnen, kanyam kalanglang. ⁴² Kami kansiyo siyogo agbarita sa mga mangyan, osai agpatoldo keyen siyo piyangwat Diyos tanongan, kadayo sa mga agkaboway kay, kadayo sa mga matay wa. ⁴³ Siyo in piyagpanggisodan in boo mga poropita keyen, Kamayba nakay in agpasandig sa kansiyo, na in kansiyo mga daet piyaglibangaw sa kabaloyan Isos. ⁴⁴ Pidro agiplaongan kay, in boo agparengey sa piyagpatoldo toloy wa riyatengan in Betek pag Abyan. ⁴⁵ In mga agpaniwala in miyanggat kay Pidro, siro mga Odyo. Kalbas siro agsoyo keyen kadayo mana yewed mga Odyo piyakan din Diyos in Betek pag Abyan. ⁴⁶ Baina, siro agiplaongan sa yewed kansiro agiplaong agmaal sa Diyos. Kalbas miplaong Pidro ⁴⁷ keyen, Nakay mga laki? Apo lames agayaw agbaotismo atai pag mga mangyan? Baina, siro piyakan in Betek pag Abyan, kataw daan kitam tangona. ⁴⁸ Kalbas kansiyo siyogo keyen, Siro baotismowen wa sa ngaran IsoKiristo. Kalbas siro keyen, Laki Pidro, kao dogay kayte mamataw atai.

¹ Kalbas in mga katiwala Isos osai in mga belag agpaniwala sa boo kobat Odiya kabarita keyen anggan din in mga yewed Odyo, siro maniwala wa din sa agiplaong Diyos. ² Kalbas paka Pidro monaker sa Irosalim, siyo piyangelel in mga beet agtoli sa mga yewed Odyo. ³ keyen, Nakay batang kao monaik sa balay mga yewed Odyo, mga yewed tiyoli, kao agpalanglang kay din asin? ⁴ Kalbas giisod wa gayed Pidro in boo mibaloy. ⁵ Pidro keyen, In ako sa bayan Oppi agpandalangin, ako agkaanapen, ako kangitan kagwali lakoy teem piyageket sa opat ka sokol, piyagpalooy batang sa langit, piyarateng sa kangay. ⁶ Kalbas kangay riyoris, in galem aronaw, kamayba nakay in mga agipanawan, in mga aginanapan, in mga agilayogan. ⁷ Kalbas apo miplaong sa kangay keyen, Laki Pidro, miyorog wa, agbono wa, mamangan wa. ⁸ Kamay ako keyen, Ablayan, laki Kapwan, ako idbatang mamangan marames, idbatang mamangan in sa mga Odyo piyagawit keyen piyagayaw. ⁹ Kamay tagoli kay miplaong batang sa langit keyen, In liinis wa Diyos, ayaw kaimo agawiten piyagayaw. ¹⁰ Makatolo mipangwat kataw ina, kalbas giyoyod wakay lakoy boo sa langit. ¹¹ Ina daan betek sa balay kanyam pagpamatawan apo rateng tolo ka lalaki siyogo sa kangay batang sa Sisariya. ¹² Keyen in Abyan Diyos sa kangay, Kao miyanggat, ayaw wa manremrem. Anda pag enem ka belag agpaniwala, siro miyanggat din sa kangay. Kami misoroy kay Kornilyo balay. ¹³ Kalbas Kornilyo agbarita in kansiyo ngiitan angil agtaydek sa kansiyo balay, miplaong keyen, Kao agsogo mangyan sa Oppi, atai pataboyen Simon, in piyagawit din Pidro. ¹⁴ Siyo batay agsabi barita agpaboway sa kaimo, osai sa kaimo boo kamalay. Ina in siyabi in angil. ¹⁵ Kalbas ako bayo kay agiplaong kay kora Kornilyo, siro toloy riyatengan in Betek pag Abyan, kataw daan in kitam tangona. ¹⁶ Kalbas ako manremrem tangona in Kapwan apo siyabi keyen, Owan agsogbo sa sapa, kamay kamo batay siyogbo sa Betek pag Abyan. ¹⁷ Na no siro piyakan Diyos kataw din in tiyaboy sa kantam tangona in kitam agpasandig kay IsoKiristo in Kapwan, na nangkataw ako? Ako dayo aglaban sa Diyos. ¹⁸ Paka karengey ina in mga Odyo, siro idapo wa masabi. Siro agmaal wa sa Diyos keyen, Na mana kamayba in mga yewed Odyo, no siro agbenglay in kansiro mga daet, na siro piyagpaboway wa din Diyos. ¹⁹ In mga maypandalagan sa kaidapan in betek Istiban biyono, in amat pataboy anggan sa Pinisya, sa Sipri, sa Antiyokya. Siro agbarita panawen kay Isos, kamay sa mga waget Odyo. ²⁰ Apo wakay mga taga Sipri, mga din taga Sirini pataboy sa Antiyokya. Siro agbarita din sa mga yewed Odyo, agpatoldo in Maal pag Barita Isos in Kapwan. ²¹ Siro apo in kabaloyan in Kapwan, aronaw wano in maniwala, pasandig wa sa Kapwan. ²² In barita batang sa Antiyokya rateng sa barkadaan mga bodang Diyos sa Irosalim, matang kansiro siyogo Birnabi sa Antiyokya. ²³ Paka rateng wa, kansiyo ngiitan in agpakayawte in Diyos sa kansiro, siyo agkaanggay. Kalbas siro boo kansiyo piyatoldo keyen, Ayaw agempet agpaniwala sa Kapwan, ayaw aglimbang. ²⁴ Birnabi maal pag mangyan, maeyat in remrem batang sa Betek pag Abyan, marigen in paniwala. Kalbas aronaw mangyan kansiyo maakay sa Kapwan. ²⁵ Kalbas Birnabi pataboy sa Tartos, agpamangkit kay Saolo. ²⁶ Paka ngiitan, Saolo kansiyo piyaanggat sa Antiyokya. Osai ka boo dagon siro malageman asin pag barkadaan mga bodang Diyos, agpatoldo sa karowan mangyan. Sa Antiyokya in parakayan piyagawit Kiristiyano in mga agpaniwala kay Isos. ²⁷ Asin pag betek apo rateng sa Antiyokya mga poropita batang sa Irosalim. ²⁸ In osai, in ngaran Agabo. Siyo piyatoldo in Abyan in batay agrateng, kalbas siyo tomaydek keyen, Batay apo domalan lakoy agkayawes sa boo kobat. (Ina mibaloy ngani sa betek Kalaodyo in poon lakoy.) ²⁹ Kalbas in mga agpaniwala maypolongan keyen, Kitam agpababa tolong sa mga belag agbalay sa Odiya, no nangkalakoy in abaloyan kitam in baatte osai. ³⁰ Kalbas ina ngani in piyangwat. In tolong piyababa sa mga koyay sa barkadaan ista mga bodang Diyos. In agbaba dokalaki Birnabi, osai Saolo.

¹ Asin pag betek in poon lakoy Irodis agparakay agpaidap sa kalaati sa barkadaan mga bodang Diyos. ² Kansiyo piyapogot Santiyago, in kay Owan belag. ³ Kalbas kansiyo ngiitan ina makaanggay sa mga Odyo, matang sa betek piyasta in agkoman tinapay idapo pamaistobo, Pidro din kansiyo diyakep, ⁴ piyabilanggo, in agdamay labing enem ka sondalo, siro agpaypalitan baatte opat. In remrem Irodis no kalbas wa in Paskowa, na Pidro batay piyagosap sa pangkit in mga mangyan, ⁵ matang Pidro sa bilanggowan kay piyagdamay. Kamay siyo piyagpandalangin gayedte sa Diyos in mga agpaniwala. ⁶ Paka in remrem Irodis goribas wa in Pidro piyagpalowas sa mga mangyan. Kamay ina pag yabi Pidro agesek, piyageket karakara sa dowai ka sondalo, sa awak sakbawan apo din mga agdamay sa bilanggowan. ⁷ Kalbas toloy lomwas osai ka angil batang sa Kapwan, agrawa in galem bilanggowan. Pidro diyekse sa tagyang, piyolaw keyen, Miyorog wa, ayaw agpabeya. Kalbas toloy malabo in mga karakara sa kansiyo bakwaw. ⁸ Keyen in angil, Aglambong wa, soroyen wa in tapatos. Kalbas siyoroy. Keyen, Agislen wa, kao miyanggat wa sa kangay. ⁹ Lomabo ngani Pidro, miyanggat. Siyo keyen siyo agkaanapen waget, karam yewed totoo in piyagpangwat in angil. ¹⁰ Siro lomawey sa osai ka agdamay, kalbas sa kadowai anggan rateng sa sakbawan piyagbengbeng bakal, no lampas asin na bayan wa. Mabolwat lakoy in sakbawan siyo wakayte. Siro komislot wa, gomisod sa osai ka dalan, kalbas Pidro toloy wa biyaliwan in angil. ¹¹ Kalbas Pidro bayo katawan keyen totoo wa ngani, in angil siyogo in Kapwan, matang siyo piyalpas wa sa kabaloyan Irodis, osai sa boo piyagpanaya in mga Odyo. ¹² Paka Pidro katawan wa ina, siyo pataboy sa balay Mariya inang Owan Markos. Asin aronaw agkatipon, agpandalangin. ¹³ Kalbas siyo agtoktok sa sakbawan lakoy. Apo sogowan daraga in ngaran Roda, asin pataboy batay agbolwat. ¹⁴ In kansiyo piyarengey kay Pidro agiplaong, siyo agkaanggay, anggayan wa gayed, anggan toloy domalagan sa galem balay, ikkay biyolwat in sakbawan. Siyo keyen, Asina wa Pidro sa sakbawan lakoy. ¹⁵ Keyen in mga mangyan, Kao agkapayagan. Kamay Roda agpilit keyen, Apo ngani. Siro keyen, In angil waget, in agalapet sa kansi yo. ¹⁶ Kamay Pidro agaway agtoktok. Kalbas kansiro biyolwat in sakbawan, piyangkit, Pidro mana ngani. Siro agsoyo. ¹⁷ Kamay kay Pidro solo piyabetek sa bibi in beet siyabi keyen, Ayaw aglalae. Kalbas kansiyo giisod in padalan no nangkataw siyo piyalpas in Kapwan sa bilanggowan. Kalbas keyen, Kanyo wa sabiyen kay Santiyago, osai sa amat kay mga belag. Kalbas siyo panaw wa, ista pataboy sa osai wakay ka kobat. ¹⁸ Paka ibeng wa, magolo wano in mga sondalo agdamay keyen, Saano wa Pidro? ¹⁹ Irodis agpapamangkit kay Pidro, idapo ngiitan. Kalbas kansiyo yoosap in mga agdamay, piyabono. Kalbas Irodis panaw wa sa Odiya, pataboy sa Sisariya, mataw wa asin. ²⁰ Irodis agkagalit wano sa mga taga Tiro, osai sa mga taga Sidon. Kalbas siro maypolongan pataboy kay Irodis, matang piyasarigan Balasto, in kay Irodis katiwala. Siro batay agdaing kay Irodis angkataw sa kansiro kobat idapo pamangnen no yewed in batang daan sa kobat Irodis. ²¹ Paka sa tarato pag ibeng Irodis agsoroy kansiyo damit, maal wano pag damit, tomokkaw sa pagpanokkawan poon lakoy, kalbas agiplaong sa kansiro. ²² Kalbas in mga mangyan agiplaong maksen keyen, Ina yewed mangyan, ina in agiplaongan osai ka diyos. ²³ Irodis toloy wa piyakaskitan osai ka angil batang sa Kapwan, angkataw yewed piyagpakalakonaw in Diyos, siyo yeeyang, bayo matay wa. ²⁴ Kamay labi kay karowan mangyan in karengey in agiplaong Diyos, aronaw wa in maniwala. ²⁵ Kalbas dokalaki Birnabi osai Saolo, paka mibaloy wa in kansiro panawen sa Irosalim, siro moli wakay sa Antiyokya. Kansiro piyaanggat Owan Markos.

¹ Sa barkadaan mga bodang Diyos sa Antiyokya apo mga poropita, apo din mga agpatoldo. Siro in osai Birnabi, in kadowai Simyon in piyagawit Maitem, in katolo Losyo taga Sirini, in kaopat Manaen in pagbelag Irodis in gobirnador, in kalima Saolo. ² Sa betek siro yewed agpamangan matang siro agpakadogay agmaal sa Kapwan, siyabi in Betek pag Abyan keyen, In dokalaki Birnabi osai Saolo pabokoden wa. Siro kangay biyerya, kangay piyagsogo sa osai ka panawen. ³ Paka kalbas wa siro yewed agpamangan, osai agpandalangin, in dokalaki kansiro yaatang, kalbas piyapanaw wa. ⁴ In dokalaki siyogo in Betek pag Abyan, matang siro mongali pataboy sa Silyosya. Asin siro somakay sa parkado, panaw, rateng sa kobat Sipri. ⁵ Paka rateng sa bayan Salamina, siro agpatoldo in agiplaong Diyos sa mga balay pagpaniponan mga Odyo. Apo din Owan Markos agtolong sa kansiro. ⁶ Diyalan wa in boo kobat Sipri anggan sa bayan Papos. Ista siro kangitan mangyan salimangkaan, in ngaran Barisos. Siyo Odyo agpakagwali poropita. ⁷ Siyo pagbelag Gobirnador Sirgiyo Paolo. Apo katawanan in gobirnador. Kalbas in dokalaki Birnabi osai Saolo piyaberya in gobirnador, angkataw siyo agkaparengey sa agiplaong Diyos. ⁸ Kamay lomaban in salimangkaan. In kansiyo ngaran no piyaaling sa agiplaong Girigo na Ilimas. In kansiyo beet ayaw maniwala kay Isos in gobirnador. ⁹ Kalbas Saolo, piyagawit din Pablo, lakonaw in remrem batang sa Betek pag Abyan, siyo agterek sa salimangkaan, ¹⁰ keyen, Kao bodang Katanas. Kao aglaban sa boo betek, kao agpamadaya wano, agpanampalas wano. Baatte kaimo piyagpabaribid in totoo pag barita panawen sa Kapwan. ¹¹ Baina, kao ngona piyagparosa in Kapwan, kao batay beleg, kao dogay idbatay kangitan ibeng. Kalbas toloy libowen in kansiyo mata, kadogayte lened wa, agpangapkap nges siyo, agpamangkit agakay. ¹² In gobirnador, paka kangitan in mibaloy, siyo maniwala wa kay Isos, angkataw siyo agsoyo sa baritaen panawen sa Kapwan. ¹³ Kalbas in dokalakiyan Pablo somakay wa sa parkado, panaw wa sa Papos, rateng sa bayan Pirga sa kobat Pampilya. Kalbas siro biyaliwan wa Owan Markos, siyo moli wakay sa Irosalim. ¹⁴ Kalbas siro panaw wakay sa Pirga, rateng sa bayan Antiyokya sa kobat Pisidya. Sa Ibeng Pamainga siro misoroy sa balay pagpaniponan mga Odyo, tomokkaw. ¹⁵ Apo in agbasa sa mga siyolat Mowisis, osai in mga poropita. Paka kalbas wa ina, in mga poon sa balay pagpaniponan agpasogo sa dokalaki keyen, Laki mga kabelagan mga kasokponan Israil, no kamo apo piyagpatoldo barita pampaeyat sa remrem mga mangyan, na manggisodan wa. ¹⁶ Kalbas Pablo tomaydek, keyen, Ayaw aglalae, Laki mga kasokponan Israil, osai kamo in mga yewed Odyo pag mga agmaal sa Diyos, mamarengey wa. ¹⁷ In Diyos in piyagsamba in mga kasokponan Israil, siyo in omidang sa kantam mga kakoyayan. Siro kansiyo piyakarowan in siro panyawan waget sa kobat Iipto, kalbas sa kansiyo lakoy kabaloyan siro kansiyo piyalpas asin pag kobat. ¹⁸ Mga apatnapo ka dagon sa moyod kansiyo piyagtiis in kansiro mga riklamo. ¹⁹ Kalbas paka siida wa Diyos pito ka sakopan sa kobat Kanaan, ina pag kobat kansiyo wakay tiyaboy sa mga kasokponan Israil, matang kansiro pagbalayan mga 450 ka dagon. ²⁰ Paka kalbas wa ina, siro piyakan Diyos mga tanongan anggan sa kabetek Samwil in poropita. ²¹ Kalbas in siro omayay poon lakoy, Saolo piyatoldo Diyos sa kansiro. Siyo in bodang Kiis sa kasokponan Binamin. Siyo agpoon lakoy apatnapo ka dagon. ²² Paka siyo kiyowa wakay Diyos, Dabid wakay in kansiyo piyatoldo, matang agpoon sa kansiro. Siyabi in Diyos keyen, Kangay ngiitan Dabid, in bodang Isi makaanggay sa kangay. Siyo batay maniwala kamayba nakay in kangay beet. ²³ Batang sa kasokponan Dabid Isos, in piyangwat Diyos Agpamaboway sa mga kasokponan Israil, kataw daan din in kansiyo piyangako. ²⁴ Paka Isos batay wa agparakay agpanawen Owan agpatoldo wa sa boo mga kasokponan Israil keyen, Benglayen wa in daet, pabaotismo wa. ²⁵ Paka batay wa lobos in kay Owan panawen siyo miplaong keyen, Kanyo lames remrem nakay ako? Yewed ako in kanyo piyagpanaya Agpamaboway, kamay siyo agrateng sa kangay paoriyan, ako yewed sibay kamayba agorak waget kansiyo tapatos. ²⁶ Agiplaong kay Pablo keyen, Laki mga belag, mga kasokponan Abraam, kadayo din mga yewed Odyo agmaal sa Diyos, kitam in piyagparatengan anda pag barita in agpamaboway. ²⁷ Angkataw in mga taga Irosalim, kadayo in kansiro mga poon, siro yewed katawan Isos in Agpamaboway, yewed din katawan in beet siyabi in mga poropita, in piyagbasa baatte Ibeng Pamainga. Kamay ina pag siyabi in mga poropita kansiro ngani piyangwat, in siro agkasondo keyen, Isos bonowen. ²⁸ Kamayba siro idapo ngiitan daet sa kansiyo siro omayay kay Pilato keyen, Pabonowen. ²⁹ Paka mipangwat wa sa kansiyo in boo siyolat, siyo kiyowa wakay sa kodos, siyangat wa. ³⁰ Siyo matay, kamay siyo piyaboway wakay Diyos. ³¹ Kalbas karowan wakay ibeng apo ibeng siyo ngiitan in mga tangona agsarig sa kansiyo batang sa Galiliya anggan rateng sa Irosalim. Siro wa in agpabarita sa mga kasokponan Israil. ³² Keyen Pablo, Kanyam piyagbaba sa kanyo in Maal pag Barita keyen, In piyangako Diyos tangona sa mga kakoyayan in mga Odyo, ³³ na in Isos piyaboway wakay ina pag pangako mibaloy wa sa kantam, sa kansiro mga kasokponan. Ina kataw daan in siyolat sa kadowai ka awit, keyen, Kao kangay Bodang. Ibat ngona ako kaimo Amang. ³⁴ Isos batang matay, piyaboway wakay Diyos, idbatay wa tagoli matay. Ina din in siyabi Diyos tangona keyen, Totoo ngani kamo kangay batay piyakan in mga maal wano in kangay mga piyangako kay Dabid. ³⁵ Kataw daan in siyabi sa osai wakay ka betek keyen, In kaimo Betek pag Sogowan idbatay kaimo piyabayaan matay anggan mabolok. ³⁶ In Dabid agkaboway kay siyo agpaniwala sa beet Diyos. Kalbas siyo matay, miyanggat wa sa mga kakoyayan. Siyo mabolok. ³⁷ Kamay yewed mabolok in piyaboway wakay Diyos. ³⁸ Na, laki mga belag, kailangan kamo katawan wa in kanyam piyagbarita sa kanyo keyen in mga daet piyaglibangaw panawen kay Isos. ³⁹ No siyo agpasandig kay Isos, na siyo piyalpas wa sa parosa kansiyo daet, liibangaw wa in boo kansiyo daet, in idbatay alibangaw panawen sa mga Batas Mowisis. ⁴⁰ Agingat wa ngani kamo, karam isag mibaloy sa kanyo in siyabi in mga poropita keyen, ⁴¹ Laki mga aglibak sa siyabi Diyos, ngona in kangay piyagpangwat lakonaw, idbatay kanyo piyaniwala, kamayba apo agpatoldo sa kanyo in beet siyabi. mangkit wa kamo, agsoyo wa, kalbas matay wa. ⁴² Kalbas in Pablo osai Birnabi aglompot wa sa balay pagpaniponan, in mga mangyan omayay keyen, Isag pag Ibeng Pamainga kami patoldowen wakay ina pag barita. ⁴³ In mga mangyan agipanaw wa, aronaw in miyanggat kay dokalaki, mga Odyo, aronaw din in mga mibaloy wa Odyo. In dokalaki agpanitolan kay, agpatoldo agpakaeyat sa kansiro remrem keyen, Ayaw kamo aglimbang, pasandigen in kanyo remrem sa Diyos in agpakayawte. ⁴⁴ Isag pag Ibeng Pamainga agkabangen nges boo bayan agtipon agkaparengey sa agiplaong in Kapwan. ⁴⁵ Kamay paka in mga Odyo kangitan karo ina mangyan siro agpanagiri wano, aglaban sa piyagsabi Pablo, aglibak sa kansiyo. ⁴⁶ Kamay Pablo osai Birnabi yewed agkalimo miplaong keyen, Kailangan kamo in tokaw riyatengan in agiplaong Diyos, kamay kataw kamo dayo, kataw kanyo remrem keyen kamo yewed sibay piyakan in boway idapo kalobosan, na kami ista wa agbangen sa mga yewed Odyo. ⁴⁷ Angkataw kami siyogo in Kapwan, keyen, Kao kangay piyangwat kagwali tinglaw sa mga yewed Odyo, matang kaimo piyatoldo in boway idapo kalobosan sa boo mga mangyan sa boo mga kobat. ⁴⁸ Paka karengey ina in mga yewed Odyo, siro agkaanggay agmaal sa agiplaong in Kapwan. In mga iidang Diyos batay piyakan boway idapo kalobosan maniwala wa. ⁴⁹ Kalbas in agiplaong Diyos omarabang asin pag boo kobat. ⁵⁰ Kamay in mga kaliyakiyan agpapoon asin pag bayan, osai in mga kagbaiyan agsamba piyagmaal mga mangyan, siro piyamaakay in mga Odyo anggan dokalaki Pablo piyagpaidapan wa, kalbas biyoyaw wa asin pag kobat. ⁵¹ Kamay in dokalaki agragrag in bogabo sa kansiro darapa, in beet siyabi in mga asin batay piyarosa Diyos. Kalbas siro ista wa pataboy sa bayan Ikonyo. ⁵² In mga agpaniwala sa Antiyokya agkaanggay wano, maeyat in remrem batang sa Betek pag Abyan.

¹ Kataw daan din ina in mibaloy sa Ikonyo. In dokalaki Pablo osai Birnabi misoroy sa balay pagpaniponan mga Odyo. Siro agiplaong maal anggan aronaw in maniwala, mga Odyo, mga yewed Odyo. ² Kamay in dayo maniwala pag mga Odyo agpamaakay sa mga yewed Odyo, matang siro agremrem daet sa mga agpaniwala. ³ Dogay kayte agpamataw asin in dokalaki. Siro yewed agkalimo agbarita keyen in Kapwan agpakayawte. Siro piyakan in Kapwan kabaloyan agpangwat din mga makasoyo, mga tanda matang atawanan totoo in kansiro barita. ⁴ Kamay in mga mangyan asin pag bayan piyagsaliit, in amat sa mga Odyo agbangen, in amat wakay sa mga katiwala. ⁵ Kalbas apo mga Odyo, kadayo mga yewed Odyo, anggan mga poon maypolongan wa, batay agpangwat daet, agbenglay bato sa dokalaki. ⁶ Paka ina atawanan in dokalaki siro domalagan wa, pataboy sa Lisra anggan sa Dirbi, mga bayan sa Likaonya, anggan din sa mga kobat sa balabaan. ⁷ Asin pag mga kobat siro agpatoldo in Maal pag Barita. ⁸ Sa Lisra apo osai ka mangyan sogod biyoslot pilaw, yewed kapaodoy in mga bitis, idbatang panaw. ⁹ Siyo agtokkaw agparengey kay Pablo agiplaong. Kalbas Pablo agterek sa kansiyo, kangitan in kansiyo paniwala siyo batay piyaboway. ¹⁰ Miplaong Pablo maksen keyen, Kao tomaydek wa maal. Kalbas siyo lomokso, agipanawan wa. ¹¹ In piyangwat Pablo ngiitan in karowan, kalbas siro miplaong maksen, kamay sa agiplaong Likaonya, keyen, Atai wa maypanlowas sa kantam in mga diyos, kagwali mangyan. ¹² Matang Birnabi kansiro wa piyagawit diyos Siyos, Pablo piyagawit diyos Irmis, angkataw siyo agbangen in agiplaongan. ¹³ In pagsambaan kay Siyos sa bosngawan bayan. In agpapoon agsamba kay Siyos, kadayo in mga mangyan, siro agbaba mga baka agbogwayan betakan sa bangen sakbawan, batay nges piyagbono matang agsamba kay dokalaki. ¹⁴ Kamay paka ina atawanan Birnabi osai Pablo, in mga katiwala, siro agrognit kansiro lambong, in beet siyabi siro maloba wano aglaban sa batay piyagpangwat. Siro bigla domalagan, somaray sa karowan, agpango lakoy keyen, ¹⁵ Mga laki, nakay batang kamo agkataw ina? Kami dayem mangyan daan, kataw daan kamo. Kami yewed mga diyos. Kami dayem agbaba in Maal pag Barita panawen kay Isos keyen benglayen wa ina pag mga idapo kabolowan, agmaal wa sa agkaboway pag Diyos, in agpangwat in langit osai in diya, osai in dagat, anggan in boo sa galem asin. ¹⁶ Tangona in Diyos pomayag sa boo mga mangyan agogali in kansiro daan mga ogali, ¹⁷ kamay kansiyo datiyan piyagpapangkit sa kantam no kataw nakay siyo, in siyo agpangwat maal, agtaboy sa kantam odan batang sa langit, osai mga ani sa tagani, anggan kitam siyawaan pamangnen, piyakaanggay wano. ¹⁸ Kamayba in dokalaki agayaw kataw ina in karowan mangyan idbatay wa nges maempet agsamba sa kansiro, kamay maempet din. ¹⁹ Kamay apo asin rateng mga Odyo batang sa Antiyokya sa Pisidya, osai batang sa Ikonyo. Kansiro piyaakayan in mga mangyan, kalbas Pablo biyenglayan wa bato, giyoyod lampas sa bayan. Siro keyen, Matay wa ina. ²⁰ Kamay paka in mga agpaniwala agtipon sa kansiyo bangen, tomaydek wa siyo, moli wakay sa bayan. Paka omaga siro dokalaki Birnabi pataboy wa sa Dirbi. ²¹ In Pablo osai Birnabi agpatoldo in Maal pag Barita sa Dirbi, aronaw wa in kansiro aakay agpaniwala wa. Kadogayte siro moli wakay sa Lisra, anggan sa Ikonyo, anggan sa Antiyokya sa Pisidya. ²² Siro agpatoldo sa mga agpaniwala, agpakaeyat sa remrem keyen, Ayaw aglimbang in agpaniwala. Kailangan kitam aronaw maidap, bayo misoroy sa sakopan Diyos. ²³ Sa baatte barkadaan mga agpaniwala in dokalaki in agidang kansiro mga koyay. Kalbas paka agpandalangin wa idwa mamangan, siro piyaalapet in dokalaki sa Kapwan, in kansiro piyagpasandigan. ²⁴ Paka in dokalaki kadalan wa sa Pisidya, siro rateng sa Pampilya. ²⁵ Siro agpatoldo in barita sa bayan Pirga, kalbas mongali agtaboy sa bayan Atalya. ²⁶ Paka asin siro somakay sa parkado, pataboy sa Antiyokya, sa kansiro riyakayan tangona in siro piyaalapet sa agpakayawte pag Diyos matang siro agpanawen. Ngona mibaloy wa ina pag panawen. ²⁷ Paka rateng wa, kansiro tiipon in barkadaan mga bodang Diyos, piyanggisodan in boo piyangwat Diyos, sa kansiro mga panawen keyen, In mga yewed Odyo piyagpakan din Diyos padalan agpasandig sa kansiyo. ²⁸ Kalbas siro dogay wakay agpamataw asin sa mga agpaniwala.

¹ Kamay apo rateng sa Antiyokya mga kaliyakiyan batang sa Odiya. Siro agpatoldo sa mga belag agpaniwala keyen, No yewed tiyoli kataw in Batas Mowisis, na kamo idbatay apaboway. ² Pablo osai Birnabi maloba agmatiwid aglaban sa kansiro. Kalbas in polong keyen, Dokalakiyan Pablo osai Birnabi osai in amat kay pataboy sa Irosalim, ista maypolongan osai in mga katiwala osai din in mga koyay, no ngani toliyen. ³ Kalbas siro siyogo wa in barkadaan mga bodang Diyos. In siro agdalan sa Pinisya, kalbas sa Samariya, siro agbarita keyen, In mga yewed Odyo agpasabangen wa din sa Diyos. Ina makaanggay wano sa boo asin agpaniwala. ⁴ Paka rateng sa Irosalim, siro piyabelag in barkadaan mga bodang Diyos, osai in mga katiwala, osai in mga koyay. Kalbas kansiro piyanggisodan in boo piyangwat Diyos, sa kansiro mga panawen. ⁵ Apo mga Parisiyo agpaniwala, siro tomaydek, miplaong keyen, Kailangan toliyen in mga yewed Odyo pag mga agpasandig kay Isos, kailangan siro maniwala sa mga Batas Mowisis. ⁶ In mga katiwala anggan in mga koyay agkatipon matang agpolong no ngani toliyen in mga yewed Odyo. ⁷ Dogay wa agpolong, kadogayte tomaydek wa Pidro, miplaong keyen, Laki mga belag, kanyo atawanan in Diyos tangona omidang sa kantam. Kalbas ako in kansiyo siyogo sa mga yewed Odyo, matang agpatoldo sa kansiro in Maal pag Barita, matang siro maniwala. ⁸ Kalbas siro piyabodang in Diyos in katawan in mga remrem mangyan, baina siro kansiyo piyakan in Betek pag Abyan, kataw daan din kitam. ⁹ In Diyos yewed agpangidang osai sa kansiro sa mga yewed Odyo, osai sa kantam sa mga Odyo. Baina in kansiro din mga daet liibangaw wa panawen siro agpasandig kay Kiristo. ¹⁰ Na nakay batang ngona kamo agtepeng no in Diyos batay agkagalit? Kanyo piyagpakabyat in panawen sa mga agpaniwala. Ina pag mga Batas idbatay abaloyan kamayba kantam mga kakoyayan, kamayba kitam. ¹¹ Ayaw wa. In kantam piyagtiwala, kaya kitam piyagpaboway panawen kitam piyagpakayawte Isos in Kapwan. Na kadayo din siro kataw daan ina. ¹² Kalbas in boo tiponan idwa agiplaong, in siro agparengey kay Birnabi osai kay Pablo, in kansiro piyagpanggisodan in mga tanda, in mga makasoyo piyangwat Diyos sa mga yewed Odyo, sa kansiro mga panawen. ¹³ Paka siro kalbas wa, Santiyago wakay in miplaong keyen, Laki mga belag, mamarengey sa kangay. ¹⁴ Giisod wa Simon no nangkataw tangona piyalowas Diyos in siyo agpakayawte sa mga yewed Odyo. Baina, iidang sa kansiro in mga batay kansiyo. ¹⁵ Kataw din ina in siyabi in mga poropita, sa mga Agisolat keyen, ¹⁶ In siyabi in Kapwan keyen, Paka kalbas wa, ako batay wakay moli, batay wakay kangay piyakapya in kasokponan Dabid, in masida wa. Kamayba masida wa gayed batay wakay kangay piyangwat, batay wakay kangay tiyadyok, ¹⁷ matang in mga amat mangyan agpamangkit sa kangay, osai in boo kangay piyagapo sa mga yewed Odyo. ¹⁸ Ina in piyagsabi in Kapwan, ibat tangonanaw kataw ina in kansiyo datiyan piyagsabi. Ina in siyabi sa mga Agisolat. ¹⁹ Santiyago keyen kay, Na in kangay remrem ayaw kantam pagpaidapanen in mga yewed Odyo, in mga agpasabangen sa Diyos. ²⁰ Kitam agsolat waget sa kansiro keyen ayaw agkoman in pansola, osai ayaw agpanggaraw, osai ayaw agpamangan daya osai in mga ablasen siyesel. ²¹ Angkataw ibat tangona apo agpatoldo in kay Mowisis mga Batas sa boo mga bayan. Ina piyagbasa sa mga balay pagpaniponan mga Odyo baatte Ibeng Pamainga. ²² Kalbas in mga katiwala, anggan in mga koyay, kadayo in boo barkadaan mga bodang Diyos, in kansiro polong keyen, Kitam agidang mga mangyan, sogowen sa Antiyokya, in sarig Pablo osai Birnabi. Kalbas in siyogo Odas piyagawit Barsabas, osai Silas, angkataw siro piyagmaal in mga belag agpaniwala. ²³ Siro agbaba solat batang sa barkadaan keyen, Kami kanyo mga belag, mga katiwala, mga koyay in agsolat sa kanyo. Laki mga belag yewed Odyo sa Antiyokya, osai sa Siriya, osai din sa Silisya, ²⁴ sa kanyam apo rateng barita keyen apo mga mangyan batang kono sa kanyam agpatoldo sa kanyo maidap, anggan malingetnget kono in kanyo remrem. Kamay siro yewed kanyam siyogo. ²⁵ Matang in polong kami boo keyen, Kami agsogo sa kanyo in kanyam iidang mangyan. In sarig Pablo osai Birnabi, in kanyam mga piyagmaal. ²⁶ Ina pag dokalaki yewed agaman kansiro boway in siro agpanawen kay IsoKiristo kantam Kapwan. ²⁷ Kaya ngani kanyam siyogo Odas osai Silas, matang anda pag barita kansiro din batay piyagsabi gayed sa kanyo. ²⁸ In beet in Betek pag Abyan, osai in kanyam polong, kamo ayaw wa agpaidapanen. No yewed anda waget in kailangan, ²⁹ in ayaw agpamangan in pansola, ayaw agpamangan daya osai in mga ablasen siyesel, osai ayaw agpanggaraw. No in mga ina idwa kanyo piyagpangwat na kamo boway wa. Ina waget, mga laki. ³⁰ Kalbas in dokalakiyan siyogo wa, mongali, pataboy sa Antiyokya. Paka rateng, kansiro tiipon in barkadaan mga bodang Diyos, tiyaboy in solat. ³¹ Paka mabasa wa, in mga agpaniwala agkaanggay sa siyabi. ³² Kalbas in dokalaki Odas, in osai Silas, siro din mga poropita, siro agpatoldo aronaw sa mga belag, agpakaeyat sa kansiro mga remrem. ³³ Siro dogay kayte asin, kalbas siro piyalpas wa in mga belag, piyaoli sa mga agsogo sa kansiro. ³⁵ In dokalaki Pablo, in osai Birnabi, agaway sa Antiyokya, agpatoldo, agpaliwanag in agiplaong in Kapwan. Aronaw din in amat agpatoldo. ³⁶ Paka dogay kayte, Pablo miplaong kay Birnabi keyen, Amba, kita wa, ista wakay mangkit sa mga belag sa boo mga bayan kanta piyatoldowan in agiplaong in Kapwan, no nangkataw wa lames siro. ³⁷ In beet Birnabi paanggaten Owan Markos. ³⁸ Kamay in remrem Pablo ayaw wa agpaanggaten in moli tangona batang sa Pampilya, in idwa miyanggat anggan mibaloy wa in kansiro panawen. ³⁹ Kalbas siro agpalaway, anggan siro malsoway wa. Birnabi agpaanggat kay Markos, somakay sa parkado, pataboy sa Sipri. ⁴⁰ Kamay kay Pablo iidang Silas wa in kansiyo sarig. Paka siro piyandalangin in mga belag, piyaalapet sa Kapwan in agpakayawte, siro panaw wa, ⁴¹ domalan sa Siriya osai sa Silisya, agsabi in mga agpakaeyat sa remrem sa mga barkadaan mga bodang Diyos.

¹ Kora Pablo rateng sa Dirbi, kalbas sa Lisra. Apo asin osai ka agpaniwala, in ngaran Timotiyo, in inang Odyo agpaniwala din, in amang Girigo. ² Timotiyo piyagmaal in boo mga belag sa Lisra, kadayo sa Ikonyo. ³ In kay Pablo beet Timotiyo paanggaten. Kalbas siyo piyatoli wa Pablo, panawen sa mga Odyo asin pag mga kobat, angkataw siro boo katawan in kansiyo amang Girigo. ⁴ In siro agdalan sa mga bayan kansiro biyarita sa mga agpaniwala in mga bilin taite in mga katiwala, osai in mga koyay sa Irosalim keyen kanyo alapeten. ⁵ In mga barkadaan agistobo in paniwala, osai ibengibeng agkakarowan. ⁶ Kalbas in dokalakiyan Pablo domalan sa mga kobat Pirigya, osai Galasya, angkataw in Betek pag Abyan agayaw siro agpatoldo in barita sa kobat Asya. ⁷ Siro rateng sa betek Misya, kalbas batay nges pataboy sa kobat Bitinya, kamay siro yaayaw din asin in Abyan Isos, ⁸ matang siro domalan waget sa Misya, mongali, pataboy wa sa Torowas. ⁹ Ina pag yabi Pablo manaynep, apo agtaydek mangyan taga Masidonya, agdaing sa kansiyo keyen, Kao atai pataboy sa kobat Masidonya, kami tolongen. ¹⁰ Panawen siyo manaynep kataw ina, kanyam atawanan keyen kami piyagsogo Diyos agpatoldo in Maal pag Barita sa kansiro. Matang kami toloy agpamangkit dalan pataboy sa Masidonya. ¹¹ Kalbas kami somakay sa parkado, panaw wa sa Torowas, toloy sa kobat Samotrasya. Paka goribas wakay sa bayan Niyapolis, ¹² kalbas monaker sa Pilipos. Ina in lakonaw pag bayan asin pag betek sa kobat Masidonya, piyangwat mga taga Roma. Kami mamataw kayte asin pag bayan. ¹³ Paka Ibeng Pamainga, kami lampas sa alabat bayan, pataboy sa sapa. In kanyam remrem karam asin apo poro pandalanginan mga Odyo. Kalbas apo ngani asin mga kagbaiyan agkatipon. Kami malpanokkaw, agpanggisodan sa kansiro. ¹⁴ In osai sa mga kagbaiyan agparengey, in ngaran Lidya, taga bayan Tiyatira. In kansiyo panawen agpamabili kondiman. Siyo datiyan din agsamba sa Diyos. Kalbas in Kapwan agboswang kansiyo remrem, siyo maniwala sa piyagsabi Pablo. ¹⁵ Siyo biyaotismowan, kadayo in kansiyo mga kamalay, kalbas siyo agsabi sa kanyam keyen, Kataw sa kanyo remrem ako agpaniwala ngani sa Kapwan, na kamo mamataw sa kangay balay. Kami kansiyo piilit. ¹⁶ Osai ka ibeng in kami agtaboy sa pandalanginan kami atagbowan osai ka daraga, sogowan piyagalapet. Siyo piyaglowasan iskanto, agsabi in mga batay rateng. In kansiyo mga kapwan mayaman wa panawen sa kansiyo kabaloyan agkataw ina. ¹⁷ Kami kora Pablo kansiyo yaagakagak, agiplaong maksen keyen, Ina pag mga mangyan mga sogowan Diyos in Mabwat sa boo, siro agpatoldo sa kanyo in padalan kamo apaboway. ¹⁸ Ibengibeng siyo agkataw ina, anggan Pablo idwa katiis. Siyo managoli, miplaong sa iskanto keyen, Kao kangay piyagsogo sa kabaloyan IsoKiristo, kao bali wa, ayaw wa asin pag daraga. Kalbas in iskanto toloy wa ngani panaw sa kansiyo. ¹⁹ Paka in mga kapwan katawan idapo wa batay pakinabang asin pag kagbaiyan, Pablo osai Silas diyakep, giyoyod, piyataboy sa palingki, sa mga poon. ²⁰ Siro piyaadap sa mga poon taga Roma keyen, Anda pag dokalaki Odyo, agpagolo sa kantam bayan. ²¹ Siro agpatoldo mga ogali piyagayaw sa kantam batas. Kitam mga taga Roma yewed maal agalapet ina, agpamangwat ina. ²² In boo karowan somonggab kay dokalaki, in kansiro mga lambong giyoyod in mga poon, agsogo keyen, Bogbogen wa oway. ²³ Paka piyamogbog wa gayed, siro diyekse sa bilanggowan. In bilin sa agdamay keyen, Ayaw galot in agdamay. ²⁴ Angkataw ina in bilin, siro siyoroy sa potok bilanggowan, piyangaw. ²⁵ Kagwaraan wa yabi Pablo agpandalangin, osai Silas, agbaren mga awit sa Diyos, in mga amat piyagbilanggo agparengey. ²⁶ Toloy lomoni lakoy, anggan mamaglebey wa in pagtadyokan bilanggowan, in boo mga sakbawan toloy mangaboswang, in boo piyagbilanggo mangalowat in karakara. ²⁷ Apolawan in agdamay, kangitan agiboswang in mga sakbawan, in remrem mipalpas wa in mga piyagbilanggo. Toloy liyakso kansiyo pisaw, batay wa nges pabono. ²⁸ Kamay Pablo mango keyen, Ayaw agpabono. Kami anda daan, boo. ²⁹ Kalbas merya in agdamay, omayay tinglaw, toloy misoroy, patalegeb sa bangen Pablo osai Silas, agtagelgey, agkalimo. ³⁰ Kalbas siro kansiyo piyalabas sa bilanggowan keyen, Laki dokalaki, nakay lames in kailangan kangay pangwaten, matang ako piyaboway? ³¹ Siro keyen, Maniwala kao kay Isos, sa Kapwan, na kao batay piyaboway, kadayo in kaimo mga kamalay. ³² In barita panawen sa Kapwan piyatoldo sa kansiyo kadayo sa boo galem kansiyo balay. ³³ Yabi daan in dokalaki piyaanggat in agdamay, yoogas in kansiro mga sogat. Kalbas siyo toloy biyaotismowan, kadayo in kansiyo mga kamalay, boo. ³⁴ Kalbas in dokalaki piyaonaik sa kansiyo balay, piyakan pamangnen. In agdamay agkaanggay, osai in boo kansiyo kamalay, angkataw agpaniwala wa sa Diyos. ³⁵ Paka ibeng wa, in mga poon agsogo polis keyen, In dokalaki kaponi palpasen wa. ³⁶ Kalbas in agdamay agbarita kay kora Pablo keyen, In mga poon apo wa siyogo agpalpas sa kanyo, na kamo panaw wa, ayaw nges apo kamay nakay. ³⁷ Kamay siyabi Pablo sa mga polis keyen, Ayaw kataw ina. Kamayba idapo ngiitan daet sa kanyam, kami kansiro piyabogbog sa pangkit mga mangyan, kami biilanggo, bago kami sa listaan mga taga Roma. Kalbas nakay, kami batay piyagpalpas piyagtago? Ayaw. Siro daan in atai pataboy in agpalpas sa kanyam. ³⁸ Kalbas in mga polis agsabi ina pag barita sa mga poon. Paka katawan in mga poon in dokalaki sa listaan mga taga Roma, siro agkalimo. ³⁹ Matang siro ista pataboy sa bilanggowan, agdaing kay dokalaki agpalpas sa kansiro. In mga poon agsabi keyen, Amba, kamo nges panaw wa atai pag bayan. ⁴⁰ Kalbas in dokalaki panaw wa sa bilanggowan, pataboy wa kay Lidya balay, asin ngiitan in mga belag. In dokalaki agiplaong in mga agpakaeyat sa remrem, kalbas panaw wa asin pag bayan.

¹ Pablo osai Silas domalan sa mga bayan Ampipolis osai Apolonya, rateng sa bayan Tisalonika. In mga Odyo asin apo balay pagpaniponan, ² kalbas Pablo misoroy, angkataw ina kansiyo ogali. Tolo ka Ibeng Pamainga siyo osai in mga mangyan, kansiro piyagpolong in mga Agisolat. ³ Pablo agpaliwanag in mga beet siyabi keyen, Atai pag mga Agisolat kantam piyagngitan kailangan ngani in Kiristo piyaidap, matay, kalbas miyorog wakay. Isos in kangay ngona piyagbarita sa kanyo, siyo in Kiristo. ⁴ Kalbas in amat piyamaakay, miyanggat kay Pablo, osai kay Silas, kadayo din in mga yewed Odyo datiyan agsamba aronaw, kadayo mga mabwat pag kagbaiyan, aronaw din. ⁵ Kamay in mga Odyo agpanagiri. Siro agpaanggat mga daet pag mangyan batang sa palingki, agpatipon karowan, agpanggolo sa bayan. Kalbas kiyaig in kay Ason balay, agpamangkit kay dokalaki Pablo, batay nges biyaba sa karowan, ⁶ kamay in dokalaki idapo asin. Kalbas Ason wa in diyakep, osai in mga amat kay agpaniwala, giyoyod sa mga poon bayan, agiplaong maksen keyen, Ina pag dokalaki Pablo agpagolo sa boo kobat, rateng wa din atai sa kantam bayan, ⁷ osai Ason agpabelag sa kansiro. Siro boo dayo maniwala sa kay Sisar mga batas. Siro keyen apo osai wakay ka poon, in ngaran Isos. ⁸ Paka karengey ina, in mga mangyan agkariyaban, kadayo in mga poon. ⁹ Paka kora Ason agbayad wa in kowarta pampalpas, na siro piyalpas wa. ¹⁰ Yabi wa in dokalaki Pablo toloy piyapanaw in mga belag siyogo sa bayan Biriya. Paka rateng wa, siro misoroy sa balay pagpaniponan mga Odyo. ¹¹ In mga Odyo, osai sa Tisalonika, osai sa Biriya, in sa Biriya agbangen in maal in remrem, angkataw siro agkaanggay agparengey sa barita. Ibengibeng siro agpamangkit sa mga Agisolat no ngani betek in piyagsabi Pablo, ¹² matang aronaw in maniwala, aronaw din mga yewed Odyo maniwala, mga kaliyakiyan, mga mabwat pag kagbaiyan. ¹³ Kamay in mga Odyo sa Tisalonika abaritaan keyen, Sa Biriya din Pablo agpatoldo in siyo keyen agiplaong Diyos. Kalbas siro ista pataboy, agpamaakay agpanggolo sa karowan. ¹⁴ Kalbas Pablo toloy wa piyapanaw in mga belag, pataboy sa balabaan dagat. Kamay Silas mataw kay asin, osai Timotiyo. ¹⁵ Pablo tiyonton kansiyo mga sarig anggan sa bayan Atinas. Kalbas in mga sarig moli wakay, agbaba barita kay Silas osai kay Timotiyo keyen, Mga laki, kamo piyagpanaya Pablo sa Atinas. Ayaw wa agpabeya. ¹⁶ In Pablo sa Atinas agpanaya kay dokalaki Silas osai Timotiyo, kansiyo remrem malingetnget, angkataw kansiyo ngiitan in mga yewed Diyos asin pag bayan aronaw wano. ¹⁷ Sa balay pagpaniponan mga Odyo siyo agpanggisodan osai in mga Odyo, osai in yewed Odyo pag mga agsamba. Ibengibeng siyo sa palingki agpanggisodan, kamayba nakay in kansiyo atagbo asin. ¹⁸ Siyo agpalmatiwidan osai in mga agpatoldo in adar Ipikoros, osai in mga piyagawit Istowiko pag agpatoldo. In amat keyen, Nakay in piyagsabi ina pag agyabang agpanggisodan waget? In amat wakay keyen, Tomag siyo agpatoldo osai wakay ka mga diyos, in osai kansiyo piyagawit Isos, in osai kansiyo piyagawit Boway wakay. ¹⁹ Matang siyo piyaanggat sa tiponan piyagawit Ariyopago, keyen, Amba, kami patoldowen in bayo pag adar kaimo piyagpanggisodan. ²⁰ Angkataw in kaimo piyagsabi bayo wakay sa kanyam, matang ngani kami beet nges katawan in beet siyabi ina. ²¹ Siro in boo mga taga Atinas, osai in mga taga amat kobat agbalay asin, siro baatte agpatoldo osai agparengey kamayba nakay pag barita in bayo. ²² Kalbas Pablo tomaydek sa kagwaraan in tiponan keyen, Laki mga taga Atinas, in kangay atawanan kamo maloba agsamba sa boote. ²³ Angkataw in ako agipanawan, kangay ngiitan kanyo mga piyagsambaan. Apo din ngiitan osai ka piyagsambaan apo solat keyen, Sa Diyos yewed atawanan. Na ina pag Diyos in kanyo piyagsamba kamayba yewed kanyo atawanan, ina in kangay piyagpatoldo sa kanyo. ²⁴ In Diyos in agpangwat in kobat, anggan in boo asin, siyo din in Kapwan langit, Kapwan din kobat, siyo yewed agbalay sa mga balay piyangwat waget mangyan, ²⁵ siyo yewed piyagtolong mangyan, siyo idapo kailangan sa kantam, angkataw siyo daan in agpakan payeng sa boo mangyan, agtaboy boway, in boote siyo in agtaboy. ²⁶ In boo mga mangyan kansiyo piyangwat batang osai waget ka bilog mangyan, matang kitam agbalay sa boo kobat. Siyo in agsabi no nangkadogay kitam agkaboway, osai no saano in kantam mga pagbalayan. ²⁷ Kaya in mga mangyan piyangwat matang kitam mamangkit sa Diyos, matang kitam karemrem sa kansiyo, katawan sa kansiyo. Kamay siyo yewed adayonaw kamayba kay nakay pag mangyan. ²⁸ Angkataw apo keyen, Kaya kitam atai sa kobat, angkataw Diyos in agpangwat sa kantam, agpaboway sa kantam osai agpakan eyat sa kantam. Ina din in siyabi in amat kanyo mga koyay lakoy keyen, Kitam ngani mga bodang Diyos. ²⁹ Na no kitam mga bodang Diyos, ayaw kitam agremrem keyen in Diyos kagwali ginto, kagwali pilak, kagwali bato. Ayaw keyen siyo kagwali rarawan piyangwat mangyan batang sa kansiyo remrem. ³⁰ Piyabayaan wa Diyos in mga kabetek tangona in mga mangyan yewed katawan sa kansiyo. Kamay ngona siyo agsogo sa boo mga mangyan sa boo kobat keyen benglayen wa in kansiro mga daet. ³¹ Angkataw siyo apo wa tarato batay agpaosap sa boo mga mangyan. In batay tanongan osai ka mangyan kansiyo iidang. Betek ngani in kansiyo batay pasiya. Siyo batang wa matay piyaboway wakay Diyos, matang kantam atawanan ina ngani in kantam tanongan. ³² Paka siro karengey keyen in mga matay piyagpaboway wakay, siro in amat agpatawa wa. Kamay in amat wakay keyen, Kami batay wakay agparengey sa kaimo asin pag barita. ³³ Kalbas Pablo panaw wa sa kansiro. ³⁴ Kamay apo maniwala sa kansiyo, in osai Diyonisyo, osai ka koyay sa tiponan. Apo din osai ka kagbaiyan, in ngaran Damaris. Apo kay din mga amat.

¹ Paka kalbas wa ina Pablo panaw wa sa Atinas, pataboy sa bayan Korinto. ² Siyo katagbo asin Odyo, in ngaran Akwila, tangona taga Ponto, osai kansiyo babai, in ngaran Pirisila. Ngona siro bayo kay rateng batang sa kobat lakoy Italya, angkataw in boo mga Odyo sa bayan Roma piyamoyaw Kalaodyo in poon lakoy asin. Kalbas Pablo agpasabangen sa kansiro. ³ Osai Pablo osai kora Akwila, osai waget in anap boway, in agpangwat torda, matang siyo agpamataw sa kansiro, siro agpalpamanawen. ⁴ Baatte Ibeng Pamainga Pablo sa balay pagpaniponan mga Odyo agmatiwid agpilit sa mga Odyo, osai sa mga yewed Odyo. ⁵ Paka rateng wa Silas osai Timotiyo batang sa Masidonya, Pablo idwa katokor aganap boway, angkataw ibengibeng siyo agpatoldo waget sa mga Odyo keyen, Totoo ngani Isos in Kiristo. ⁶ Kamay Pablo piyaglabanan in mga Odyo, piyaglibak. Kalbas siyo agpigpig kansiyo damit keyen, Piyawa, no kamo yewed piyaboway na sa kanyo agbangen in daet, yewed sa kangay. Sogod ngona ako batay wa sa mga yewed Odyo. ⁷ Kalbas siyo panaw wa sa kansiro, pataboy sa balay Tisiyo Osto, osai ka datiyan agsamba sa Diyos. Ina pag balay sa bangen gayed in balay pagpaniponan mga Odyo. ⁸ In ngaran in poon sa balay pagpaniponan Kirispo. Siyo maniwala wa sa Kapwan, kadayo in boo kansiyo mga kamalay. In mga taga Korinto, aronaw in agparengey kay Pablo, aronaw in maniwala, kalbas biyaotismowan. ⁹ Osai ka yabi Pablo manainep, in Kapwan miplaong sa kansiyo keyen, Ayaw agkalimo miplaong, ayaw agempet, ¹⁰ angkataw ako in kaimo sarig. Idapo batay agpangwat daet sa kaimo. Angkataw in kangay mga mangyan atai pag bayan aronaw. ¹¹ Matang Pablo asin agpamataw osai ka dagon kalaati, agpatoldo sa kansiro in agiplaong Diyos. ¹² Kamay in betek Galyon piyangwat in gobirnador sa kobat Akaya, in mga Odyo malpanonggab kay Pablo. Siyo biyaba sa mga poon, ¹³ keyen, Anda pag lalaki agpamaakay sa mga mangyan agsamba sa Diyos, bago piyagayaw sa mga batas in kataw ina pag agsamba. ¹⁴ Pablo batay nges miplaong, kamay tokaw miplaong Galyon keyen, Kamo mga Odyo, ai. No karai agpangwat ngani daet, no manampalas, na in maal nges ako agaway kay agparengey sa kanyo. ¹⁵ Kamay no in sombong panawen waget sa mga agiplaong, mga waget ngaran sa kanyo mga Batas, na kamo wa in baala. Ako ayaw wa agtanongen asin pag mga kataw ina. ¹⁶ Kalbas siro kansiyo piyamoyaw sa tiponan. ¹⁷ Kalbas kansiro wakay siyonggaban Sosinis, siyo in poon sa balay pagpaniponan mga Odyo, kansiro biyogbog sa pangkit in mga poon, kamay Galyon idwa agkalawagen asin. ¹⁸ Kalbas Pablo dogay kayte asin agpamataw sa Korinto, kalbas agpamaalam sa mga belag, somakay sa parkado, pataboy sa Siriya. Miyanggat kora Pirisila osai Akwila. Paka rateng sa bayan Singkiriya, Pablo pagopit kansiyo abok, angkataw mibaloy wa in kansiyo osai ka pangako sa Diyos. ¹⁹ Rateng wakay sa Ipiso. (No isag Pablo agipanaw wakay asin na in taybalang mataw wa.) Siyo misoroy sa balay pagpaniponan agpalpamatiwidan osai in mga Odyo. ²⁰ In kansiro beet siyo dogay kayte agpamataw asin, kamay siyo dayo. ²¹ In siyo agsakay batay wa panaw sa Ipiso, siyo miplaong keyen, Ako agipanaw wa. No beet in Diyos ako atai wakay moli, na ako atai wakay. Kalbas panaw wa. ²² Paka rateng sa Sisariya, Pablo monaker wa, pataboy wa sa Irosalim, manggisodan ista sa barkadaan mga bodang Diyos. Kalbas mongali wakay, pataboy sa Antiyokya. ²³ Siyo dogay kayte asin agpamataw. Kalbas panaw wakay, domalan sa mga bayan sa kobat Galasya, kadayo sa kobat Pirigya, agsabi in mga agpakaeyat sa remrem sa mga agpaniwala. ²⁴ Osai ka Odyo rateng sa Ipiso, in ngaran Apolos. Siyo taga Aliyanriya, maalen in kansiyo agiplaong osai lakonaw in kansiyo atawanan sa mga Agisolat. ²⁵ Siyo batang piyaadar sa adar keyen Isos in Kapwan, kalbas agkasadapan agbarita sa mga amat. In kansiyo piyagpatoldo in barita Isos boo betek, kamay in kansiyo atawanan agbaotismo kataw waget in piyatoldo Owan. ²⁶ Siyo yewed agkalimo agpatoldo sa balay pagpaniponan in mga Odyo. Taybalang Pirisila osai Akwila karengey kansiyo agiplaong. Kalbas Apolos piyagpaanggat, in kansiyo atawanan mga ogali Diyos diyagdagan in taybalang. ²⁷ Siyo beet pataboy sa kobat Akaya. In mga belag keyen, Dali. Kalbas siro agsolat sa mga barkadaan mga bodang Diyos ista, keyen, Apolos pabelagen wa. Paka rateng sa Akaya, siyo agtolong lakoy sa mga piyagpakayawte Diyos, sa mga agpaniwala ista, ²⁸ angkataw siro kangitan in kansiyo lakoy matiwid agpandaeg ngani sa mga Odyo. Kansiyo piyagpaliwanag in beet siyabi in mga Agisolat keyen, Isos ngani in Kiristo.

¹ In betek Apolos sa Korinto, Pablo agipanawan sa agbaw, anggan rateng sa Ipiso. Asin siyo katagbo mga amat wakay pag mga agpaniwala. ² Siyabi Pablo sa kansiro keyen, Nakay ina? In kamo maniwala, kamo lames piyakan in Betek pag Abyan? Siro keyen, Yewed. Kami idbatang abaritaan keyen apo Betek pag Abyan. ³ Kalbas Pablo keyen, Na nakay in beet siyabi in kamo biyaotismowan? Keyen, Kataw in piyatoldo Owan. ⁴ Keyen Pablo, Owan agbaotismo sa mga agbenglay kansiro mga daet. Kamay siyo agpatoldo sa mga kasokponan Israil keyen kailangan maniwala sa batay rateng sa kansiyo paoriyan, na ina wa Isos. ⁵ Paka karengey ina, siro biyaotismowan wa sa ngaran Isos in Kapwan. ⁶ In Pablo omatang sa kansiro siro piyakan in Betek pag Abyan, kalbas siro toloy agiplaongan sa yewed kansiro agiplaong, osai agbarita in mga batang sa Diyos. ⁷ Siro mga labing dowai ka mangyan. ⁸ Tolo ka bolan Pablo agtaboytaboy sa balay pagpaniponan mga Odyo, yewed agkalimo agpanggisodan sa kansiro, agpilit agakay sa kansiro keyen, Pakapyaen wa in kanyo remrem panawen sa agpapoon Diyos. ⁹ Kamay apo mga agsonggar, dayo maniwala. In adar keyen Isos in Kapwan kansiro piyagpansabiyan daet sa boo mga barkadaan. Matang Pablo panaw wa sa kansiro, in mga agpaniwala miyanggat din, kalbas ibengibeng siyo agbarogi sa kay Tirano balay pagpaniponan. ¹⁰ Dowai ka dagon kataw ina, anggan in boo mga taga kobat Asya karengey wa sa barita panawen sa Kapwan, kadayo in mga Odyo, kadayo in mga yewed Odyo. ¹¹ Pablo piyakan Diyos kabaloyan agpangwat mga makasoyo wano, ¹² anggan in mga apo maskit, no kiyowaan mga panyo, mga lambong batang kay Pablo, na maoraw wa in maskit, panaw wa sa kansiro in mga mamaw. ¹³ Apo mga Odyo, balaonan agipanawan. Siro mangaas nges agboyaw mga mamaw agsabi in ngaran Isos in Kapwan. Siro miplaong sa mga mamaw keyen, Sa ngaran Isos in piyagpatoldo Pablo, kamo kangay piyagboyaw. Kamo panaw wa asin pag mangyan. ¹⁴ Osai ka tayariyan pito ka kaliyakiyan, in amang Iskiba. Siyo Odyo, osai ka mabwat pag poon sa mga sasirdoti. Siro agsabi kataw ina, ¹⁵ kalbas in mamaw meles keyen, Isos osai Pablo kangay atawanan, kamay kamo nakay? ¹⁶ Kalbas siro siyonggaban lakoy in piyaglowasan mamaw, siro boo diyaeg, asogatan aro, domalagan wa asin pag balay, idapo wa gayed in mga lambong. ¹⁷ Kalbas ina abaritaan wa in boo mga taga Ipiso, kadayo in mga Odyo, kadayo in mga yewed Odyo, kalbas siro boo agkalimo wa. Kalbas in ngaran in Kapwan Isos labi wa piyagmaal. ¹⁸ Osai din in mga maniwala, aronaw in pasabangen sa amat mga agpaniwala, omamin in kansiro mga piyagpamangwat daet pag ogali. ¹⁹ Aronaw din mga balaonan, biyaba in kansiro mga aklat pamalaon, kansiro tiyebed sa pangkit in boo mangyan. In kalakoyen in bayad ina pag mga papil tangona alaga limampo ka libo ka ibeng agpanawen. ²⁰ Kataw ina sa kabaloyan in Kapwan in barita panawen sa kansiyo omarabang, agpandaeg lakoy. ²¹ Paka kalbas wa ina pag mga mibaloy, Pablo piyagsogo in Abyan manremrem keyen, Ako paya batay sa Irosalim, kamay batay kay domalan sa kobat Masidonya, osai sa kobat Akaya. Siyo keyen, Paka kalbas wa sa Irosalim, kailangan din ako pataboy sa bayan lakoy Roma. ²² Kalbas dowai ka kansiyo katolong kansiyo siyogo wa tokaw sa Masidonya, in osai Timotiyo, in osai Irasto. Kamay siyo dogay kayte asin sa Asya. ²³ Asin pag betek apo lakoy golo panawen sa adar in keyen Isos in Kapwan, ²⁴ angkataw apo mangyan in ngaran Dimitriyo. Siyo pandayan pilak, agpangwat mga balayte rarawan sa pagsambaan Diyana, in kansiro piyagdiyos. Dimitriyo osai in kansiyo mga agpanawen aronaw in agrateng kowarta. ²⁵ Siro tiipon Dimitriyo, osai in amat kay pag mga pandayan agpangwat kataw ina, kalbas miplaong keyen, Mga laki, kanyo atawanan in kantam kowarta batang atai pag panawen lakonaw. ²⁶ Kamo kangitan, kamo abaritaan, in piyagpangwat ina pag Pablo. Kansiyo piyagsabi keyen, In mga rarawan piyagpangwat mangyan yewed Diyos. Kalbas aronaw wa kansiyo piyamaakay, yewed waget atai sa Ipiso, no yewed sa boo Asya. ²⁷ Na karam isag anda in kantam panawen batay piyaglibak. Dimitriyo keyen kay, Yewed waget ina. Kadayo Diyana diyos lakoy kagbaiyan, karam isag kansiyo balay piyagidapo wa kabolowan. Karam isag siyo idbatay wa piyaglakonaw. Bago siyo nges in piyagmaal in boo mga taga Asya, taga boo kobat. ²⁸ Paka in mga taga Ipiso karengey ina, siro agkagalit wano. Siro mango keyen, Kantam Diyana lakonaw. ²⁹ In boo bayan agkagolo, kansiro diyarosog dowai ka sarig Pablo, in osai Gayo, in osai Aristarko mga taga Masidonya. Kalbas kansiro giyoyod, siro boo pataboy sa pagpangaronan lakoy. ³⁰ Pablo beet nges pataboy sa karowan, kamay siyo piyagayaw in mga agpaniwala. ³¹ Sa mga poon sa Asya, in amat kay Pablo pagbelag. Siro agayaw wano kay Pablo keyen, Kao ayaw mangaas misoroy asin sa alabat pagpangaronan. ³² In tiponan agkagolo wano. Baatte mangyan in miplaong maksen, in piyagsabi osai wakay. Aronaw in yewed katawan no nakay batang ina pag matipon. ³³ In kalaati keyen ina panawen kay Aliyanro angkataw siyo piyataydek in mga Odyo. Kalbas Aliyanro agribway in kansiyo bakwaw, in beet nges miplaong sa mga mangyan. ³⁴ Kamay paka kansiro atawanan siyo Odyo, siro boo agpayraesan agiplaong maksen. Dowai ka boo oras siro keyen, Kantam Diyana lakonaw. ³⁵ Karowan in agpalpangowan, kamay paka dogay wa in osai ka poon sa bayan kabaloy wa agayaw asin pag aglalae. Siyo keyen, Laki mga taga Ipiso, in bayan Ipiso in agalapet kay Diyana lakoy balay, osai sa bato lakoy in malabo batang sa langit. Boo mga mangyan katawan ina, ³⁶ ina idbatay masida. Na ayaw wa aglalae, ayaw kay bigla. ³⁷ In dokalaki kanyo piyaanggat atai, siro idbatang manakaw sa balay lakoy Diyana, idbatang aglibak sa kansiyo. ³⁸ No ngani Dimitriyo osai kansiyo mga sarig panday apo piyagsombong, na apo mga ibeng pagpangosapan, apo mga tanongan, asina wa in agsombong. ³⁹ Kamay no kamo apo kay piyagtanong, na batay piyagpolong sa betek agpaltiponan in mga mangyan kataw in sa mga batas. ⁴⁰ Ayaw agbigla angkataw karam isag kitam piyagsombong panawen sa golo ngona pag ibeng, kitam idapo batay masabi maal pag dailan no nakay batang anda pag golo. ⁴¹ Paka masabi ina, kansiyo wa liyobos in tipon.

¹ Paka kalbas wakay in agkagolo, in mga agpaniwala biyerya Pablo, kansiyo piyakaeyat kansiro remrem. Kalbas siyo keyen, Ako agipanaw wa. Kalbas siyo panaw wa, pataboy sa Masidonya. ² Siyo domalan asin pag mga kobat, agpansabi in mga makaeyat sa kansiro remrem. Kalbas rateng sa kobat Akaya. ³ Tolo ka bolan siyo asin agpamataw. Kadogayte batay nges somakay sa parkado, pataboy sa Siriya. Kamay siyo abaritaan keyen in mga Odyo batay agbono sa kansiyo, matang siyo manremrem wakay keyen, Na ako paya domalan wakay sa Masidonya. ⁴ In agyanggat, in osai Sopatir bodang Piro taga Biriya. Apo din taga Tisalonika, in osai Aristarko, in osai Sigondo. Apo din Gayo taga Dirbi, osai Timotiyo. In taga Asya Tikiko osai Toropimo. ⁵ Siro tokaw wa, kami Pablo kansiro piyagpanaya sa Torowas. ⁶ Paka kalbas wa in mga ibeng in piyasta agpamangan tinapay idapo pamaistobo, kami somakay wa sa parkado, panaw wa sa Pilipos. Sa kalima ka ibeng kami rateng sa kansiro sa Torowas, kami boo asin agpamataw pito ka ibeng. ⁷ In Sabado bayapon kami agkatipon, batay malpamangan. Pablo agpatoldo sa kansiro, agiplaongan dogay, anggan kagwaraan yabi, angkataw siyo batay wa panaw goribas. ⁸ In kanyam pagpaniponan basag sa ogbos, aronaw in tinglaw. ⁹ Apo begle, in ngaran Yotiko, agibangtol sa bintana. Siyo agrongronga wano. Pablo agiplaongan kay, Yotiko aesekan wa gayed, malabo batang sa katolo ka basag anggan sa diya. Kalbas kansiro yaatang, matay wa mana. ¹⁰ Pablo lomabo, pasapaw sa kansiyo, kiyapet. Keyen, Ayaw pangkariyaban, siyo boway kay. ¹¹ Kalbas Pablo monaik wakay. Kami maldodowan wa pamangnen, malpamangan. Siyo agpatoldo kay dogay, anggan maboka, kalbas panaw wa. ¹² In begle piyaanggat wakay in mga belag, agpalkaanggayan wano. ¹³ Kami tokaw wa somakay sa parkado, angkataw in beet Pablo kansiyo dalan sa kobat agbangen. Kami panaw wa, pataboy sa Ason. Asin kono batay somakay Pablo. ¹⁴ Kami maltagbowan sa Ason, somakay wa din Pablo, kadogayte kami boo rateng sa Mitilini. ¹⁵ Panaw wakay asin, paka goribas rateng sa betek Kiyos, goribas wakay sa Samo, goribas wakay sa Milito. ¹⁶ Pablo keyen, Ayaw wa paya domalan sa Ipiso, matang yewed aglimbang sa Asya. Angkataw siyo agkalaliyan, agpilit agrateng sa Irosalim ikkay ibeng Pintikostis. ¹⁷ Sa Milito Pablo agsogo merya sa mga koyay sa barkadaan mga bodang Diyos sa Ipiso. ¹⁸ Paka siro rateng, siyo miplaong keyen, Kamo katawan in boo kangay mga ogali no kataw nakay, ibat sa ibeng tangona ako rateng atai sa Asya. ¹⁹ Kamayba lakonaw in kangay mga kaidapan batang sa mga remrem daet in mga Odyo, ako agpakabwatte remrem in ako agpanawen anggan agpanangis sa panawen in Kapwan. ²⁰ Kanyo atawanan in ako agpatoldo sa kanyo ako yewed agkarikoy agsabi kamayba nakay in makamaal sa kanyo. Ako agpatoldo sa kanyo sa mga tiponan, kadayo sa kanyo mga balay. ²¹ Kadayo sa mga Odyo, kadayo din sa mga yewed Odyo ako agpilit keyen, Benglayen wa in kanyo mga daet, pasabangen wa sa Diyos, pasandig sa kantam Kapwan IsoKiristo. ²² Kalbas baanda ako piyagsogo in Abyan pataboy sa Irosalim. Saken no ako batay niyakay ista, ²³ kamay sa baatte bayan kangay diyalan in Betek pag Abyan agsabi sa kangay keyen ako batay piyagbilanggo sa Irosalim, batay piyagpaidapan. ²⁴ Kamay ako yewed agaman kangay boway, in kangay piyaglakonaw in panawen in tiyaboy in Kapwan Isos sa kangay. In kangay waget beet mibaloy wa ina in agpatoldo in Maal pag Barita keyen in Diyos agpakayawte. ²⁵ Ako batang agipanawan agpatoldo sa boo mangyan in Diyos agpapoon, kamay ngona ako katawan kangay bilog idbatay wakay ngiitan, kamayba nakay sa kanyo. ²⁶ Na ngona in kangay piyagsabi, kamayba nakay sa kanyo no siyo yewed piyaboway na yewed sa kangay in daet, ²⁷ angkataw ako idbatang agkarikoy agpatoldo sa kanyo in boo remrem Diyos kansiyo batay piyangwat. ²⁸ Kanyo alapeten in kanyo bayo pag boway, osai in sa boo mga agpaniwala, in piyaalapet in Betek pag Abyan sa kanyo. Kanyo ngani alapeten in barkadaan mga bodang Diyos, in kansiyo biili in bayad in katayan kansiyo daan Bodang. ²⁹ In kangay atawanan, isag paka ako idapo wa atai, apo batay rateng sa kanyo mga matapang pag mangyan kagwali mga balagis, batay agsida sa barkadaan mga bodang Diyos. ³⁰ Dogayan apo din batang sa kanyo mga batay agpatoldo mga yewed totoo. Siro batay agpamaakay sa mga agpaniwala. ³¹ Na kamo agingat. Ayaw agkanawey ako tolo ka dagon kadayo ibeng kadayo yabi ako yewed aglimbang agpatoldo sa kanyo boo, anggan agpanangis. ³² Ngona kamo kangay piyagpaalapet sa Diyos, osai sa barita keyen siyo agpakayawte wano. Siyo kabaloy agpakaeyat sa kanyo, osai kataboy sa kanyo in boo maal in kansiyo siyandata sa boo kansiyo mga mangyan. ³³ Ako idbatang agamag kowarta, mga sangkap, mga damit, kamayba kay nakay. ³⁴ Kamo katawan ako wakayte in agpamangkit kowarta, sibay sa kangay mga kailangan, anggan din sa kangay mga sarig. ³⁵ Sa baatte kabetek kangay piyapangkit sa kanyo kailangan kitam kataw ina ageyat agpanawen matang agtolong sa mga idapo eyat. Remremen in agiplaong Isos in Kapwan, in siyo keyen, Osai in agtaboy, osai in piyagpakan, in agtaboy agbangen in agkaanggay. ³⁶ Paka Pablo kalbas wa agiplaongan, siro boo omaron pasongo. Siro piyandalangin Pablo. ³⁷ Siro boo agpanangis. Pablo kansiro piyagkapet, piyagpakayawte. ³⁸ Kaya siro maloba agrongkot, panawen sa kansiyo siyabi keyen, Kamo idbatay wakay kangitan kangay bilog. Kalbas siyo kansiro siyarig sa mapor.

¹ Paka kami panaw wa sa mga taga Ipiso kami somakay wa sa parkado, toloytoloy pataboy sa Koos. Paka goribas wakay kami rateng sa Rodas. Panaw wakay asin rateng sa Patara. ² Asin kanyam wakay ngiitan osai ka parkado batay sa Pinisya. Asina wakay somakay, panaw wakay. ³ Kami lomawey sa kobat Sipri, ina kanyam ngiitan sa tagwala agbangen, agipanaw kay anggan rateng sa bayan Tiro sa kobat Siriya. Asin kami lompot wa angkataw asin piyagpalompot in mga palnowan sa parkado. ⁴ Kanyam piyamangkit asin in mga agpaniwala kay Isos, ngiitan. Kami agpamataw sa kansiro anggan pito ka ibeng. Siro piyatoldo in Abyan Diyos agsabi kay Pablo keyen, Kao ayaw wa ista pataboy sa Irosalim. ⁵ Kalbas paka lampas wa in pito ka ibeng kami panaw wa batay wakay somakay sa parkado. Siro baatte talnakiyan boo miyanggat sa kanyam anggan lampas wa sa bayan. Paka sa balabaan wa dagat kami boo asin omaron pasongo, mandalangin. ⁶ Kalbas kami agpaalam wa, kami agbangen somakay wa sa parkado, siro agbangen moli wakay. ⁷ Panaw wakay sa Tiro agipanaw in parkado anggan sa bayan Tolimayda. Asin kami patagbo sa mga belag, kami asin mesek yabi. ⁸ Kagoribasan kami panaw wakay, rateng sa bayan Sisariya. Kami asin agpamataw sa balay Pilipi in misyoniro. Siyo in osai sa Pito ka iidang tangona agbagi pamangnen sa Irosalim. ⁹ Siyo apo opat ka bodang daraga boo poropita. ¹⁰ Sa mga ibeng kami asin agpamataw apo rateng batang sa Odiya osai wakay ka poropita in ngaran Agabo. ¹¹ Siyo pataboy sa kanyam, kiyowa in kay Pablo bayakes, kalbas piyabakos sa kansiyo daan mga bitis, osai sa bakwaw. Kansiyo siyabi keyen, Anda in piyagsabi in Betek pag Abyan keyen, Kataw tai batay piyagbakos mga Odyo sa Irosalim in kapwan anda pag bayakes, kalbas batay piyagtaboy sa mga yewed Odyo. ¹² Paka kami karengey ina kami kadayo in mga taga asin agpilit nges kay Pablo keyen, Ayaw wa pataboy sa Irosalim. ¹³ Kamay siyabi wakay Pablo keyen, Nakay batang kamo agpanangis, agpagolo sa kangay remrem? Ako beken sandata wa pabakos sa Irosalim, kamayba biyono, panawen sa Kapwan Isos. ¹⁴ In siyo idwa kanyam aayaw, kami omempet wa keyen, Na mibaloy wa in beet in Kapwan. ¹⁵ Paka kalbas ina pag mga ibeng kami mangimis wa, pataboy sa Irosalim. ¹⁶ Apo agpaniwala miyanggat sa kanyam mga taga Sisariya. Kami kansiro tiyonton sa balay Manason in kanyam batay pagpamatawan. Siyo taga Sipri, dogay wa agpaniwala. ¹⁷ Paka kami rateng sa Irosalim kami piyagkaanggayan in mga belag ista. ¹⁸ Kagoribasan kami kora Pablo pataboy kay Santiyago. Asina din in boo mga koyay sa barkadaan. ¹⁹ Pablo anggayan sa kansiro. Kalbas kansiyo giisod in boo wanote mga piyangwat Diyos sa mga yewed Odyo sa kansiyo piyanawen. ²⁰ In siro karengey ina siro agmaal sa Diyos. Kalbas kansiro siyabi kay Pablo keyen, Laki belag, kaimo atawanan aronaw wano in mga Odyo agpasandig wa kay Isos, anggan mga libo wa in karowen. Siro boo agpilit wano agpaniwala sa mga Batas Mowisis. ²¹ Kalbas siro abaritaan keyen in kao agpatoldo sa mga Odyo agbalay sa mga kobat mga yewed Odyo, na in kaimo kono piyagpatoldo keyen siro ayaw wa maniwala sa mga Batas Mowisis. In kaimo kono piyagsabi ayaw wa kansiro toliyen in kansiro mga bodang, osai ayaw wa agalapeten in ogali mga Odyo. ²² Kalbas kansiro batay wa ngani atawanan keyen kao atai wa, na nangkataw wa in maal pangwaten matang atawanan keyen kaimo din piyagalapet in mga Batas Mowisis? ²³ Sa kanyam remrem anda wa in maal kaimo pangwaten. Apo atai opat ka kaliyakiyan apo pangako sa Diyos. ²⁴ Na siro kaimo paanggaten, kamo boo agpangwat in ogali aglobos pangako in siyabi sa mga Batas. Kao wa in baala sa boo bayad matang maal wa siro agpabolog kansiro olo. No kataw ina na batay atawanan in boo mangyan keyen yewed mana betek in barita panawen sa kaimo, angkataw kaimo din piyagalapet in mga Batas Mowisis. ²⁵ Kamay in mga wakay yewed Odyo pag mga agpasandig kay Isos, kami batang wa agsolat sa kansiro agpatoldo keyen ayaw siro agkoman in pansola, kamayba daya, kamayba ablasen siyesel, osai ayaw manggaraw. ²⁶ Matang paka goribas wa piyaanggat Pablo in dokalakiyan. Kansiro wa piyangwat in ogali aglobos pangako, kalbas Pablo misoroy wa sa balay lakoy Diyos matang agsabi no nangkadogay siro batay sandata agtaboy in andog panawen sa baatte osai sa kansiro. ²⁷ Agkabangen wa rateng in kapito ka ibeng, Pablo ngiitan mga Odyo taga Asya sa balay lakoy Diyos. Kansiro piyagpangolokan in karowan mangyan, kalbas Pablo kansiro wa diyakep. ²⁸ Siro agpango keyen, Laki mga belag, kami tolongen. Sa boo kobat anda wa pag mangyan in agpatoldo daeten sa mga kasokponan Israil, aglaban sa mga Batas Mowisis, agsabi din daet sa balay lakoy Diyos. Yewed waget ina, siyo agpaanggat kay din mga yewed Odyo atai sa galem balay lakoy Diyos, matang marames wa in tiyalaga nges sa Diyos. ²⁹ Kaya kataw ina kansiro siyabi, panawen kansiro ngiitan Toropimo taga Ipiso agyanggat kay Pablo sa bayan. Kansiro remrem siyo piyaanggat din Pablo sa galem balay lakoy Diyos. ³⁰ Magolo wa anggan in boo bayan. In mga mangyan agpaypandalagan asin pataboy. Kansiro siyonggaban Pablo, giyoyod, piyalompot sa balay lakoy Diyos. Kalbas toloy wa kiyopot in mga sakbawan. ³¹ Siro agpilit agbono kay Pablo, kamay rateng sa mabwat pag kapitan mga sondalo taga Roma in barita keyen agkagolo wano in boo mangyan sa Irosalim. ³² Siyo toloy agpaanggat mga sondalo, kadayo mga kapitan, domalagan ista pataboy sa mga mangyan. Paka in mga mangyan kangitan sa kapitan lakoy osai sa mga sondalo, kansiro wa yeempet in agbogbog kay Pablo. ³³ Pasabangen in kapitan, Pablo diyakep, piyabakos dowai ka karakara. Keyen siyo, Nakay pag mangyan anda? Nakay in kansiyo piyangwat? ³⁴ In mga mangyan agpalpangowan, yewed tikkataw in piyagsabi. Agkagolo wano matang in kapitan idwa katawan no nakay in betek, matang Pablo kansiyo piyababa sa balay mga sondalo. ³⁵ Paka siro sa poon wa agdan in mga mangyan agpalkatapangan, anggan kailangan wa Pablo yoosong in mga sondalo. ³⁶ Angkataw agagak sa kansiro in mga mangyan agpango wano keyen, Siyo bonowen. ³⁷ Paka Pablo batay wa piyasoroy sa balay mga sondalo kansiyo siyabi sa kapitan keyen, Laki, maal lames ako manggisodan sa kaimo? Keyen in kapitan, Kao mana katawan agiplaong Girigo? ³⁸ Na no kataw ina yewed mana kao in taga Iipto taite in agpangolok sa mga mangyan agpanonggar, kalbas agpaanggat sa moyod 4,000 ka mangyan mga agpamono mangyan. ³⁹ Kalbas Pablo meles keyen, Laki, ako osai ka Odyo taga bayan Tarso sa kobat Silisya. Ina lakonaw pag bayan. In kangay nges beet ako manggisodan sa mga mangyan. ⁴⁰ Keyen in kapitan, Kalobante. Matang Pablo tomaydek sa batingal agdan, siyalbon kansiyo bakwaw in beet siyabi ayaw aglalae. Paka siro idwa aglalae siyo agiplaong wa sa agiplaong Ibriyo.

¹ Pablo miplaong keyen, Laki mga koyay, laki mga belag, amba kanyo parengeyen in kangay piyaggisod no nakay batang yewed maal ako biyono. ² Paka siro karengey siyo agiplaong sa agiplaong Ibriyo na siro agparengey wa gayed. Pablo agaway kay agiplaong keyen, ³ Ako osai ka Odyo, taga bayan Tarso sa kobat Silisya, kamay mistobo atai sa Irosalim, angkataw ako agadar kay Gamalil. Ako piyatoldo wa gayed in mga Batas in kantam mga kakoyayan. Ako ageyat wano agpaniwala sa mga Batas Diyos kataw din ngona kamo boo. ⁴ Kangay piyagpaidapan osai piyagpabono in mga agpaniwala sa Adar Isos. Siro kangay piyagbakos, piyagbilanggo, kamaybawa kaliyakiyan, kamaybawa kagbaiyan. ⁵ Amba kanyo tanongen in mabwat pag poon sa mga sasirdoti, kadayo in boo mga koyay. Baina, ako kansiro piyakan mga solat sa mga Odyo sa bayan Damasko, kalbas ako ista pataboy matang dakepen in ista mga agpaniwala asin pag adar, bakosen, babaen sa Irosalim matang parosaanen. ⁶ Tangali wa in ibeng ako bangen wa sa bayan Damasko, toloy romawa wa lakoy in boo kobat, balawas lakoy batang sa langit. ⁷ Ako toloy wa malabo sa diya. Kalbas ako karengey apo miplaong, siyabi sa kangay keyen, Laki Saolo, Saolo, nakay batang ako kaimo piyagpaidapan? ⁸ Kalbas ako keyen, Laki Kapwan, nakay kao? Siyo keyen, Ako Isos taga Nasarit, in kaimo piyagpaidapan. ⁹ In rawa lakoy ngiitan in kangay mga sarig, kamay yewed kansiro arengeyan in agiplaong sa kangay. ¹⁰ Kalbas ako keyen wakay, Laki Kapwan, nakay in kangay pangwaten? Kalbas siyabi wakay sa kangay in Kapwan keyen, Kao tomaydek, pataboy wa sa Damasko. Ista batay siyabi sa kaimo in boo kailangan kaimo pangwaten. ¹¹ Ina daan ako mabeleg wa, piyagsolap in rawa lakoy, matang ako piyagakay wa kangay mga sarig anggan rateng sa Damasko. ¹² Ista apo osai ka kaliyakiyan, in ngaran Ananiyas. Siyo agmaal ngani sa Diyos, agpaniwala sa mga Batas, osai piyagpakalakonaw in boo mga Odyo ista agbalay. ¹³ Siyo pasabangen sa kangay, tomaydek sa kangay bangen keyen, Laki belag Saolo, kao kangitan wakay. Kalbas ina daan pag betek ako toloy wakay kangitan, siyo kangay ngiitan. ¹⁴ Kalbas kay Ananiyas kay siyabi keyen, Kao iidang in Diyos in piyagmaal kantam mga kakoyayan matang kaimo atawanan in kansiyo beet, matang din kaimo ngiitan in kansiyo Betek pag Sogowan, anggan din kaimo arengeyan in kansiyo agiplaongan, ¹⁵ angkataw kao batay agbarita panawen sa kansiyo, kaimo batay siyabi sa boo mga mangyan in kaimo ngiitan, osai arengeyan. ¹⁶ Kalbas ngona ayaw wa agpabeya. Kao tomaydek wa, pabaotismo wa. Kao mandalangin wa sa kansiyo ngaran, matang kao malinis wa, idapo wa in kaimo mga daet. ¹⁷ Pablo agiplaong kay keyen, Ako moli wakay atai sa Irosalim. Sa betek ako sa balay lakoy Diyos agpandalangin ako agkaanapen apo ngiitan. ¹⁸ Kangay ngiitan in Kapwan, siyabi sa kangay keyen, Kao ayaw agpabeya, panaw wa sa Irosalim angkataw in mga mangyan atai idbatay maniwala sa kaimo barita panawen sa kangay. ¹⁹ Kalbas ako keyen, Laki Kapwan, kansiro ngani atawanan keyen in mga agpasandig sa kaimo kangay piyamangkit sa baatte balay pagpaniponan matang kangay piyabilanggo, osai piyabogbog. ²⁰ Osai in Istiban agbarita panawen sa kaimo, in siyo piyagbono ako asina din agiyagem sa mga agbono. Ako in agdamay sa mga lambong in mga agbono sa kansiyo. ²¹ Kamay siyabi sa kangay in Kapwan keyen, Panaw wa ngani, angkataw kao kangay piyagsogo sa adayonaw, sa mga yewed Odyo. ²² Anggan asin pag agiplaong in mga mangyan agparengey kay Pablo, kamay paka siyo keyen mga yewed Odyo siro toloy wa malpangowan keyen, Bonowen in kataw ina pag mangyan. Yewed mayadi siyo boway. ²³ Siro agaway kay agpalpangowan, agribway din kansiro mga islen, osai agsalbon in mga bogabo. ²⁴ Matang siyogo in mabwat pag kapitan keyen, Pablo paanggaten wa sa galem balay mga sondalo, kalbas bogbogen, botogen no nakay batang kaloba ina in agkagalit sa kansiyo in mga Odyo. ²⁵ Kamay paka siyo biyakos wa batay piyagbogbog, siyabi Pablo sa kapitan asin agtaydek keyen, Maal lames sa mga batas in agbogbog kataw ina sa mangyan sa listaan mga taga Roma, kamayba idapo kay kasondowan in tanongan? ²⁶ Paka karengey ina in kapitan siyo pataboy sa mabwat pag kapitan keyen, Ina mana pag mangyan sa listaan mga taga Roma. Nakay in kaimo batay piyangwat asin? ²⁷ Matang pasabangen kay Pablo in mabwat pag kapitan keyen, Totoo lames ngani kao sa listaan mga taga Roma? Keyen Pablo, Totoo. ²⁸ Keyen in kapitan, Lakonaw in kangay biyayad matang ako liista sa mga taga Roma. Keyen wakay Pablo, Kamay ako sogod ako biyodang. ²⁹ Toloy panaw sa kansiyo in mga batay nges agbotog sa kansiyo. Kadayo in mabwat pag kapitan alimowan wa angkataw Pablo kansiyo piyabakos karakara, bago mana siyo liista sa mga taga Roma. ³⁰ Beet atawanan in mabwat pag kapitan mga sondalo no nakay batang lames in mga Odyo agsombong kay Pablo, matang paka goribas kansiyo wa piyalowat in kay Pablo bakos, kansiyo piyatipon in mga poon sasirdoti, in boo mga tanongan in mga Odyo, Pablo piyaanggat, piyaadap sa tiponan.

¹ Kay Pablo piyanriwa gayed in tiponan, siyabi keyen, Laki mga belag, anggan ngona pag ibeng sa kangay boo boway in kangay remrem panawen sa kangay mga ogali apyaan sa pangkit Diyos. ² Paka Ananiyas in mabwat pag poon sa mga sasirdoti karengey ina, kansiyo siyogo in mga sa bangen Pablo keyen, Sampalen sa bibi. Kalbas siyampal wa ngani. ³ Siyabi wakay Pablo keyen, Kao batay piyarosa Diyos, kao pag agpakagwali waget. Kao asin agtokkaw matang ako kaimo piyagtanong no ako sa mga Batas, bago ako kaimo piyagpasampal baribid sa mga Batas. ⁴ Siyabi in asin mga agtaydek keyen, Kao mana mangaas agsonggar sa mabwat pag poon sa mga sasirdoti iidang Diyos? ⁵ Keyen wakay Pablo, A mana, mga belag, no nges karai ako katawan ina in mabwat pag poon sa mga sasirdoti, na ako idbatay. Angkataw in siyabi ngani sa mga Agisolat keyen, Ayaw agsonggar sa kanyo poon. ⁶ Atawanan Pablo in kalaati asin mga Sadosiyo, in kalaati wakay mga Parisiyo, matang kansiyo siyabi maksen keyen, Mga belag, ako Parisiyo, kadayo kangay amang Parisiyo. Kaya ako piyagpadaet ngona panawen sa kangay atawanan keyen in mga matay batay wakay piyaboway. ⁷ Paka siyabi wa Pablo ina, agpalawayan wa osai in mga Parisiyo osai in mga Sadosiyo, mabaslag wa in tiponan. ⁸ Angkataw in piyagsabi in mga Sadosiyo keyen in mga matay idbatay wa daan boway, osai keyen idapo mga angil, idapo mga mamaw. Kamay in mga wakay Parisiyo, siro agpaniwala asin pag boo. ⁹ Siro boo malpangowan. Kadogay tomaydek in kalaati mga agpatoldo in mga Batas, siro Parisiyo agbangen. Siro agmatiwid maksen keyen, Kami idapo ngiitan daet atai pag mangyan. Kitam yewed katawan, karam apo ngani mamaw miplaong sa kansiyo, karam angil. ¹⁰ Paka maloba wa in siro agpalawayan, in remrem in kapitan keyen karam isag Pablo piyandodo wa. Matang kansiyo siyogo in mga sondalo keyen, Amba kamo ista wa, Pablo agawen, betangen wa sa balay mga sondalo. ¹¹ Ina daan pag yabi in Kapwan tomaydek sa kay Pablo bangen keyen, Pakaeyaten in kaimo remrem. No nangkataw kao batang agbarita panawen sa kangay atai sa Irosalim, na kataw daan din ina kao batay agbarita sa bayan lakoy Roma. ¹² Paka omaga wa apo mga Odyo maypolongan, mansawet keyen, No Pablo yewed kay kantam mabono, na kitam ayaw kay mamangan pamangnen kamayba minem. ¹³ In mga malpangako kataw ina siro labi kay apatnapo ka mangyan. ¹⁴ Kalbas siro pataboy sa mga poon sasirdoti osai sa mga koyay, in piyagsabi keyen, Kanyam wa gayed sawetan kami idbatay mamangan pamangnen kamayba osai wagette ka somol anggan yewed kay kanyam mabono Pablo. ¹⁵ Na ngona ayayen kamo osai in boo mga tanongan sa mabwat pag kapitan keyen, Amba papangkiten wakay atai Pablo. Kamo agpangwat dailan keyen siyo piyagosap kay. Kalbas yewed kay rateng sa kanyo kanyam wa piyagbono. ¹⁶ Kay Pablo belag kagbaiyan apo bodang begle wa. Ina pag begle kabarita ina pag polong keyen Pablo piyagbono. Matang siyo pataboy wa sa balay mga sondalo, matang agbarita kay Pablo. ¹⁷ Kalbas kay Pablo biyerya osai ka kapitan, siyabi keyen, Anda pag begle kaimo sarigen sa mabwat pag kapitan, angkataw siyo apo batay siyabi sa kapitan. ¹⁸ Kalbas in begle piyaanggat sa mabwat pag kapitan, siyabi keyen, Ako biyerya Pablo in piyagbilanggo, siyogo somarig atai pag begle sa kaimo. Apo kono batay piyagsabi sa kaimo. ¹⁹ Kalbas in begle yaakay in mabwat pag kapitan, piyabokod sa mga karowan keyen, Nakay in kaimo batay siyabi sa kangay? ²⁰ Keyen wakay in begle, In polong in mga Odyo keyen, No nges goribas kaimo piyalowas wakay Pablo sa boo mga tanongan. Kamay kansiro waget dailan in siyo kono piyagosap kay. ²¹ Kamay kao ayaw maniwala sa kansiro angkataw in batay agdamay sa dalan siro labi kay apatnapo ka mangyan. Siro mansawet wa siro idbatay kay mamangan kamayba minem, anggan Pablo yewed kay kansiro mabono. Ngona siro sandata wa gayed, kansiro waget piyagpanaya in kao mangako. ²² In siyabi in mabwat pag kapitan keyen, Ayaw kaimo agsabiyen kamayba kay nakay keyen ina kaimo wa biyarita sa kangay. Kalbas in begle piyapanaw wa. ²³ Kalbas biyerya in mabwat pag kapitan dowai ka kapitan, siyogo keyen, Anggan isag bayapon kalbas wa manyapon, kanyo sandataen 200 ka sondalo, agyanggat pitompo ka agsakay sa kabayo, apo din 200 ka agbaba torag, matang pataboy sa Sisariya. ²⁴ Kanyo din sandataen in mga kabayo batay sakayan Pablo, kalbas siyo tontonen kay Gobirnador Pilis. Kanyo alapeten gayed maal. ²⁵ Kalbas siyo somolat kay Pilis keyen, ²⁶ Laki Gobirnador lakoy Pilis, ako Kalaodyo Lisiyas in agsolat sa kaimo. Kagwali wa nakay kao? ²⁷ Anda pag kaliyakiyan in ngaran Pablo diyakep in mga Odyo, kansiro nges batay biyono. Kamay kangay atawanan siyo sa listaan mga taga Roma matang kangay piyaanggat in mga sondalo, matang siyo yewed biyono. ²⁸ Kangay beet atawanan no nakay in kansiro sombong matang siyo kangay piyapangkit sa kansiro mga tanongan. ²⁹ Kangay ngiitan in kansiro sombong panawen sa mga Batas mga Odyo, kamay idapo sombong sibay makabono sa kansiyo, kamayba biilanggo. ³⁰ In ako kabarita keyen apo polong siyo batay piyagbono siyo toloy kangay piyatonton sa kaimo. Kangay wakay siyabi sa mga agsombong keyen sa kaimo wa kansiro sabiyen in sombong. ³¹ Kalbas in mga sondalo maniwala sa siyabi. Ina daan pag yabi Pablo kiyowa, tiyonton wa sa bayan Antipatris. ³² Paka goribas wakay in mga sondalo moli wakay sa balay. In mga waget agsakay sa kabayo in tomonton kay Pablo sa gobirnador. ³³ Paka rateng sa Sisariya Pablo tiyaboy wa sa gobirnador, tiyaboy din in solat. ³⁴ Paka mabasa wa in solat Pablo tiyanong in gobirnador keyen, Kao taga saano pag kobat? In kansiyo atawanan Pablo taga Silisya ³⁵ kansiyo siyabi keyen, Kao kangay batay piyagparengey no rateng wa in mga agsombong. Kalbas siyo agsogo keyen, Pablo damayen sa balay lakoy Irodis.

¹ Paka kadalan lima ka ibeng pataboy sa Sisariya Ananiyas in mabwat pag poon sa mga sasirdoti, sarig in kalaati pag mga koyay, sarig din osai ka katawan gayed agmatiwid in ngaran Tirtolo. Pablo kansiro siyombong kay Gobirnador Pilis. ² Paka Pablo piyalowas wa, piyarakay wa Tirtolo in agsombong. Keyen in kansiyo siyabi, Laki Gobirnador Pilis, kao lakonaw, kaya kami apyaan atai pag kobat panawen kao katawan wano agpapoon. Dogay wa kaimo piyagpakapya in boway sa kanyam kobat, matang ngona badya wa maal. ³ Ina kanyam atawanan matang kamayba saano kao baatte kanyam piyagkaanggayan. ⁴ Kamay karam kao apo panawen. Kamay kataw kao mabait wano, na kao mamarengey kadogayte waget sa kanyam piyagsabi sa kaimo. ⁵ Kanyam ngiitan ina pag Pablo aleleng, agpanggolo sa mga Odyo sa boo mga kobat. Siyo agpapoon sa panig in mga Nasarino. ⁶ Osai din kansiyo nges piilit agpanrames sa balay lakoy Diyos, matang siyo kanyam diyakep. ⁸ Na siyo kaimo wa tanongen. Kaimo batay atawanan totoo in boo kanyam mga siyabi panawen sa kansiyo. ⁹ Ina in siyabi Tirtolo. Kalbas in mga Odyo agiyayon sa kansiyo sombong. Siro keyen, Boo betek in kansiyo siyabi. ¹⁰ Paka Pablo piyaiplaong in gobirnador siyo keyen, Laki Gobirnador, kangay atawanan kao dogay wa tanongan sa mga mangyan atai pag kobat, matang ako agkaanggay agaman kangay boway sa kaimo adap. ¹¹ Sogod ako rateng sa Irosalim matang agsamba anggan ngona na labing dowai waget ka ibeng. Ina toloy batay kaimo atawanan no kao agtanong. ¹² Ako yewed kansiro ngiitan agpalsisagotan kamayba kay nakay sa galem balay lakoy Diyos. Ako idapo din agrengke manggolo sa mga balay pagpaniponan mga Odyo, kamayba sa nakay pag betek sa bayan. ¹³ Siro idapo din asabi patonay nges sa kansiro mga pasaen sa kangay. ¹⁴ Kamay anda in kangay piyagamin, in ako agsamba sa Diyos in piyagmaal tangona kanyam mga kakoyayan, na in kangay piyagpaniwalaan in Adar Isos. Kamay in mga agpasaen sa kangay keyen ina baribid pag adar. Bago kangay din piyagpaniwalaan in boo mga Batas Mowisis osai in mga siyolat in mga poropita. ¹⁵ In kangay piyagpanaya sa Diyos kataw din in kansiro, in batay wakay piyaboway Diyos in boo mga mangyan, kadayo in mga maal kadayo in mga daeten. ¹⁶ Matang ako baatte agpilit agpangwat maal sa pangkit Diyos kadayo din sa mga mangyan matang apyaan in kangay remrem. ¹⁷ Apo mga dagon ako idapo sa Irosalim. Kalbas ako moli wakay ista agbaba tolong sa mga agkaidapan sa kangay mga kabelagan mga kasokponan Israil, osai agandog mga ayop sa Diyos. ¹⁸ Kangay wa piyangwat in ogali aglobos pangako, kalbas ako kansiro ngiitan sa galem balay lakoy Diyos. Yewed karowan in asin mangyan, idapo din agkagolo. ¹⁹ Kamay apo asin mga Odyo taga Asya. No siro apo ngiitan daet sa kangay, na siro wa nges in atai pataboy agsombong sa kaimo. ²⁰ No yewed in mga mangyan atai in agsabi no nakay in kansiro ngiitan sa kangay daet in ako taite piyagosap kansiro mga tanongan. ²¹ Karam kansiro remrem keyen daeten in kangay mango sa adap in mga tanongan keyen, Kaya ako kanyo piyagpadaet ngona panawen sa kangay atawanan in mga matay batay wakay piyaboway. ²² Lakonaw in kay Pilis atawanan panawen sa Adar Isos, matang kansiyo wa piyaempet in osap keyen, No rateng wa atai in Kapitan Lisiyas na kangay batay piyagremrem in kanyo osap. ²³ Kalbas in kapitan siyogo Pilis keyen, Pablo damayen, kamay ayaw maloba, osai ayaw agayawen in kansiyo mga pagbelag agtolong sa kansiyo. ²⁴ Paka apo wakay mga ibeng diyalan, rateng wakay Pilis osai in kansiyo babai in ngaran Dorosila, siyo Odyo. Kalbas biyerya wakay Pablo. Kansiro piyarengey in piyagsabi Pablo panawen sa agpaniwala kay Kiristo Isos. ²⁵ Kamay paka kay Pablo piyagpaliwanag in agpangwat in betek, osai in agsakop sa kantam remrem, kadayo in parosa agrateng, na Pilis alimowan wa, toloy keyen, Kao panaw wa. No ako katokor wakay na kao piyagberya wakay. ²⁶ In remrem Pilis siyo batay piyakan Pablo kowarta matang makakarowan Pablo piyagberya agbarogi wakay. ²⁷ Kadalan wa dowai ka dagon piyalitan wa Pilis. Porsiyo Pisto wakay in gobirnador. In beet Pilis in mga Odyo agkaanggay daan sa kansiyo matang Pablo biyaliwan sa bilanggowan.

¹ Paka kadalan tolo ka ibeng sogod in Pisto rateng sa kobat kansiyo batay pagsakopan, siyo panaw wa sa Sisariya pataboy sa Irosalim. ² Ista Pablo siyombong kay Pisto in mga poon sasirdoti, osai in mga koyay sa mga Odyo. ³ Kansiro piilit sa gobirnador keyen, No kao mabait sa kanyam na Pablo atai babaen sa Irosalim. Kamay siro apo polong Pablo elegen sa dalan, bonowen. ⁴ Keyen wakay Pisto, Pablo piyagbilanggo sa Sisariya. Kalbas ako batay wa din agoli ista. ⁵ Na miyanggat wa sa kangay in kanyo mga koyay. Kalbas ista wa osapen ina pag mangyan no siyo apo piyangwat daet. ⁶ Pisto mataw sa Irosalim walo kay ka ibeng no yewed sampo bayo moli sa Sisariya. Paka goribas siyo tomokkaw sa pagpangosapan, agsogo keyen, Pablo atai babaen. ⁷ Paka rateng Pablo siyo riibok in mga Odyo batang sa Irosalim. Aronaw in kansiro mga piyalowas mga maloba pag sombong sa kansiyo, kamay siro idapo piyalowas patonay sa kansiro mga siyabi. ⁸ Kalbas miplaong Pablo keyen, Ako idapo piyangwat daet sa mga Batas in mga Odyo, kamayba sa balay lakoy Diyos, kamayba din kay Poon Lakoy Sisar. ⁹ Pisto beet kiyaanggayan in mga Odyo matang kansiyo siyabi kay Pablo keyen, Kao lames beet pataboy sa Irosalim matang kao ista kangay osapen panawen asin pag mga sombong? ¹⁰ Keyen wakay Pablo, Ako atai piyagosap sa kabaloyan Poon Lakoy Sisar. Kailangan atai wa ako osapen. Ako idapo piyangwat daet sa mga Odyo. Ina kaimo daan ngani atawanan. ¹¹ No ako apo somala sa batas, agpangwat kamayba nakay pag daet sibay bonowen na ako idbatay agayaw. Kamay no yewed mga totoo in kansiro mga pasaen sa kangay, na ako yewed mayadi tiyaboy sa kansiro. Ako paadapen kay Poon Lakoy Sisar angkataw ako liista taga Roma. ¹² Pisto papolong sa kansiyo mga konsiyal. Paka kalbas keyen, Kataw kaimo siyabi kao paadapen kay Poon Lakoy Sisar, na kao ista batay biyaba sa kansiyo. ¹³ Paka dogay wakay, in poon lakoy asin pag kobat in ngaran Agripa, siro rateng sa Sisariya osai kansiyo babai in ngaran Birnisi. Siro agpabelag kay Pisto. ¹⁴ In siro dogay kayte ista agpamataw giisod Pisto kay Agripa in osap taite kay Pablo. Kansiyo siyabi keyen, Apo atai osai ka kaliyakiyan biyaliwan Pilis sa bilanggowan. ¹⁵ In ako taite sa Irosalim siyo siyombong sa kangay in mga poon sasirdoti osai in mga koyay mga Odyo. Kansiro yaayay siyo parosaen. ¹⁶ Kamay kangay siyabi sa kansiro keyen yewed ogali in mga taga Roma in agparosa sa mangyan siyombong no yewed kay maltagbo osai in siyombong osai in agsombong, matang in siyombong kaiplaong no nangkataw in siyabi panawen sa pasaen. ¹⁷ Matang paka siro atai wa rateng ako yewed aglimbang. Kagoribasan wa daan ako tomokkaw sa pagpanokkawan tanongan, Pablo kangay wa piyaadap sa osap. ¹⁸ In kangay remrem karam in kansiro batay sombong lakonaw pag daet, kamay paka miplaong in mga agsombong na yewed mana lakonaw. ¹⁹ In kansiro waget piyagpalsisagotan in panawen waget sa kansiro piyagpaniwalaan, osai panawen sa osai ka mangyan in ngaran Isos. Ina pag mangyan matay wa, kamay piyagrigen Pablo keyen siyo agkaboway. ²⁰ Kalbas yewed kangay atawanan no nangkataw in pangwaten sa mga kataw ina, matang kangay tiyanong kay Pablo no siyo beet pataboy sa Irosalim matang ista wa osapen. ²¹ Kamay kay Pablo yaayay keyen siyo damayen kay atai, paadapen kay Poon Lakoy Sisar. Matang kangay siyogo keyen damayen kay anggan kangay wa piyagpababa kay Sisar. ²² Siyabi wakay Agripa kay Pisto keyen, Ako din nges agkaparengey in kay Pablo agiplaongan. Keyen wakay Pisto, Na goribas wa kao agparengey. ²³ Paka goribas lomwas wakay Agripa, osai Birnisi, misoroy wa sa balay pagpangosapan, agyanggat in mga mabwat pag mga kapitan sondalo, osai in lakonaw pag mga mangyan asin pag bayan. Siro boo agmaal kay Agripa. Pisto agsogo, kalbas Pablo piyaadap. ²⁴ Kalbas keyen Pisto, Poon Lakoy Agripa, osai kamo in boo mga atai, anda wa Pablo in kaliyakiyan siyombong sa kangay in boo mga Odyo. Kamayba atai kamayba sa Irosalim siro agpango keyen idwa maal siyo boway. ²⁵ Kamay ako idapo atawanan dailan matang siyo bonowen. Kamay kataw kansiyo yaayay siyo paadapen kay Poon Lakoy Sisar, na kangay remrem siyo kangay piyagpababa ista. ²⁶ Kamay ako yewed katawan no nakay in batay kangay siyabi sa solat kay Sisar lakoy panawen asin pag mangyan. Na ina in dailan kaya siyo kangay piyaadap sa kanyo, labi kayno gayed sa kaimo, laki poon lakoy Agripa, matang paka kalbas siyo kaimo biyotog, na ako apo wa batay asabi sa solat. ²⁷ Kataw kangay remrem yewed mayadi piyababa ista in osai ka piyagbilanggo no yewed siyabi sa solat in mga sombong panawen sa kansiyo.

¹ Siyabi Agripa kay Pablo keyen, Maal wa kao miplaong. Kalbas Pablo agodoy kansiyo bakwaw matang agmaal kay Agripa. Kalbas siyo agparakay wa miplaong. ² Pablo keyen, Laki Poon Lakoy Agripa, ngona ako agkaanggay in kao agparengey sa kangay mga piyagsabi panawen sa mga pasaen in mga Odyo sa kangay. ³ Angkataw kaimo wa gayed atawanan in boo mga ogali in mga Odyo kadayo in kansiro mga piyagpalsisagotan, na in kangay piyagayay kao agbanta agparengey sa kangay. ⁴ In kangay mga ogali atawanan in boo mga Odyo, angkataw sogod ako bodang kay ako agbalay sa kangay bayan osai sa Irosalim. ⁵ Dogay wa ako kansiro atawanan, matang no nges kansiro beet, siro wa daan in kasabi ako agogali in mga ogali Parisiyo, in maloba pag adar sa kanyam mga piyagpaniwalaan. ⁶ Bago ngona ako piyagosap panawen ako agpanaya sa piyangako in Diyos sa kanyam tangona mga kakoyayan. ⁷ Kaya kami in labing dowai ka tiribo mga Odyo maloba agsamba sa Diyos kamayba ibeng kamayba yabi panawen din ina pag piyangako in kansiro piyagpanaya. Laki Poon Lakoy Agripa, kaya ako siyombong in amat mga Odyo panawen asina pag piyagpanaya. ⁸ Nakay batang kamo yewed batay maniwala in Diyos agpaboway wakay sa mga matay wa? ⁹ In kangay remrem tangona kailangan kangay pangwaten in boo kangay abaloyan aglaban sa mga agpaniwala kay Isos in taga Nasarit. ¹⁰ Kataw ngani ina in kangay piyangwat sa Irosalim. Ako piyakan kabaloyan in mga poon sasirdoti, kalbas karowan pag mga bodang Diyos in kangay piyabilanggo. Osai in siro piyagbono ako agiyayon wa din. ¹¹ Mapret wano siro kangay piyagparosa sa mga balay pagpaniponan matang siro kangay piyagpilit nges agsabi daet kay Isos. Sa kalobaen in ako agkagalit sa kansiro siro kangay piyagpaidapan kamayba sa adayonaw pag mga bayan lakoy. ¹² Ina in dailan kaya ako pataboy sa Damasko, ako siyogo apo in kabaloyan in mga poon sasirdoti. ¹³ Tangali wa in ibeng, laki Poon Lakoy, in kami agipanaw kangay ngiitan in rawa lakoy batang sa ogbos, makasolap labi kay sa ibeng. Agrawa in boo kobat sa kabetek kami agpaysarigan. ¹⁴ Kami boo malabo sa diya. Ako karengey agiplaongan sa agiplaong Ibriyo, agsabi sa kangay keyen, Laki Saolo, Saolo, nakay batang ako kaimo piyagpaidapan? In kao aglaban sa kangay kataw ina na kao daan in piyagkaskitan. ¹⁵ Kalbas ako keyen, Laki Kapwan, kao nakay? Siyabi in Kapwan keyen, Ako Isos, in kaimo piyagpaidapan. ¹⁶ Tomaydek kao. Kaya ako papangkit sa kaimo matang kao sogowen. Kaimo sabiyen sa mga mangyan in ako kaimo ngiitan ngona kadayo in kangay mga batay kay piyagpapangkit sa kaimo. ¹⁷ Kao kangay batay piyagpaboway sa mga Odyo kadayo sa mga yewed Odyo. Kao kangay piyagsogo sa mga yewed Odyo, ¹⁸ matang siro piyakan katawanan matang siro dayo wa sa lened dayem pataboy wa sa rawa, siro kiyowa wa sa kabaloyan Katanas, kalbas tiyaboy wa sa Diyos. Kataw ina, in siro agpasandig sa kangay, batay liibangaw in kansiro mga daet, osai siro batay piyaagem sa mga bodang Diyos. ¹⁹ Na ngani, laki Poon Lakoy Agripa, ako maniwala wa ngani sa agpapangkit sa kangay batang sa langit. ²⁰ Ako agpamarita tokaw sa mga taga Damasko, kalbas sa mga taga Irosalim, sa boo kobat Odiya, kadayo din sa mga yewed Odyo. In kangay piyatoldo keyen, Benglayen wa in daet, pasabangen wa sa Diyos, alisen wa in kanyo mga ogali matang atawanan biyenglay wa ngani in daet. ²¹ Ina in dailan kaya ako diyakep in mga Odyo in ako sa balay lakoy Diyos, batay nges biyono. ²² Kamay ako baatte tiyolong Diyos matang ngona ako agtaydek atai, in kangay ngiitan kangay piyagbarita sa mga mabwat, kadayo sa mga kabwatte. In kangay piyagsabi in siyabi daan in mga poropita osai Mowisis in keyen batay mibaloy, ²³ in siro keyen kailangan piyagpaidapan in Kiristo, biyono. Kalbas siyo in tokaw batay piyaboway wakay matang agbarita sa mga Odyo, kadayo sa mga yewed Odyo keyen maal wa siro piyaboway. ²⁴ Pablo agiplaong kay, yewed kay lobos in kansiyo piyagsabi, Pisto miplaong maksen keyen, Pablo kao agkalibed wa. Masida wa in kaimo bait, sa kaimo lakonaw pag atawanan. ²⁵ Kamay Pablo somagot keyen, Laki Pisto lakoy, ako yewed agkalibed. In kangay mga piyagsabi boo totoo, in kangay bait maal daan. ²⁶ In kangay boo piyagsabi atawanan in Poon Lakoy Agripa matang yewed maidap sa kangay in agiplaong sa kansiyo. Ako katawan idapo piyagbetang sa kansiyo angkataw ina ngiitan in boo. ²⁷ Laki Poon Lakoy Agripa, kaimo lames piyagpaniwalaan in siyolat in mga poropita? Ako katawan kao agpaniwala asin. ²⁸ Siyabi Agripa kay Pablo keyen, Kaimo lames piyagremrem kadogayte waget ako batay kaimo maakay agpaniwala kay Kiristo? ²⁹ Keyen wakay Pablo, Kamayba kadogayte, kamayba dogay, in kangay piyagpandalangin sa Diyos yewed waget kao no yewed in boo din karengey ngona sa kangay, mibaloy wa kataw ako kay Kiristo. Kamay ayaw kataw tai piyageket karakara. ³⁰ Kadogay tomaydek wa in poon lakoy, osai in gobirnador, kadayo din Birnisi, anggan in boo mga sarig. ³¹ Paka siro lompot wa siro agpolongpolong keyen, Ina pag mangyan idapo piyangwat daet matang maal bonowen, kamayba biilanggo waget. ³² Siyabi Agripa kay Pisto keyen, No nges ina pag mangyan yewed omayay keyen paadapen kay Poon Lakoy Sisar, na maal wa nges palpasen.

¹ Paka siro maypolong wa kami batay wa piyataboy sa kobat Italya, Pablo piyaalapet kay Kapitan Olyo, osai in amat pag mga biilanggo. Olyo taga Roma, osai ka kapitan sa barkadaan mga sondalo piyagawit kay Poon Lakoy Sisar Barkadaan. ² Kami piyasakay sa mapor batang sa Adramitiyo batay wa panaw agtaboy sa mga bayan sa balabaan dagat sa kobat Asya. Kami panaw wa. Kanyam sarig Aristarko osai ka taga Tisalonika sa kobat Masidonya. ³ Kagoribasan kami rateng sa bayan Sidon. Kapitan Olyo agpakayawte kay Pablo, siyo pomayag Pablo patagbo sa kansiyo mga pagbelag asin matang siyo piyakan in kansiyo mga piyagkailangan. ⁴ Kami somakay wakay, panaw wakay asin kami pasaog badyate agbalaba sa kobat Sipri, angkataw kami piyagtagbo kowaya. ⁵ Paka madalan wa in dagat sa betek Silisya osai Pampilya kami rateng sa Mira, osai ka bayan sa kobat Lisiya. Kami lompot wa. ⁶ Ista ngiitan Kapitan Olyo in osai ka mapor batang sa Aliyanriya, batay agtaboy sa Italya. Kalbas kami asin wakay piyasakay. ⁷ Mainaen in agipanaw, karowan kayte ka ibeng kami agkaidapan bayo rateng sa betek bayan Kinido. Kataw kami piyagtagbo kay in kowaya, kami pabaribid pasaog agbalaba sa kobat Kirita sa betek Salmon. ⁸ Kami aidapan agbalaba anggan kami rateng sa bayanan piyagawit Maal pag Saogan, bangen sa bayan Lasiya. ⁹ Kami mipadogay anggan makalimo wa in agipanaw sa dagat angkataw bangen wa in pamagyo, kadalan wa in Ibeng Agdaing sa Diyos in Yewed Agpamangan pag ibeng. Matang siyabi Pablo sa kansiro keyen, ¹⁰ Mga laki, kangay atawanan no kitam agipanaw kay na ablayan, aronaw in batay masida, apo din batay maidapo mga palnowan kadayo in mapor, osai apo din batay mga matay sa kantam. ¹¹ Kamay in Kapitan Olyo yewed maniwala sa siyabi Pablo, dayem sa siyabi in kapwan mapor osai in agpapanaw. ¹² Osai din ina pag bayanan yewed maal pag pagpamatawan anggan kalbas wa in mga bolan pamagyo, matang siyabi in karowan keyen, Dali kay, karam kitam karateng sa bayan Pinisi. Ina osai ka saogan mapor sa kobat Kirita yewed piyagdalanan kowaya bagyo matang maal pag pagpamatawan. ¹³ Paka agaroros batang sa dagat kansiro remrem keyen maal wa kitam panaw, matang kansiro wa giyoyod in tidik apo kawit, kalbas agipanaw agbalaba sa kobat Kirita. ¹⁴ Kamay yewed kayte dogay lomwas lakoy in bagyo piyagawit Yorakolon batang sa agbaw. ¹⁵ In mapor piyagbogbog kowaya, idwa kabaloy lomaban, matang kami padaeg wa, pababa wa sa kowaya. ¹⁶ Kami biyaba kowaya mipasaog sa osai ka porote piyagawit Kalaoda. Kalbas kanyam piyaonaik piyasakay sa mapor in bangkate kamayba maidap. ¹⁷ Paka mapaonaik wa ina, in mapor piyagbekkes wa robid lakoy. Siro agkalimo batay midonggol sa yewed malayem sa bangen kobat Libya matang kansiro piyalompot in torda lakoy agitaydek, kalbas palimes waget. ¹⁸ Maloba kay in bagyo matang kagoribasan siro agparakay agbenglay sa dagat in mga palnowan. ¹⁹ Kalbas kagoribasan kay kadayo in kalaati gamit sa mapor biyenglay wa din. ²⁰ Aronaw wa pag mga ibeng aglened waget, kadayo magirem idapo piyagngitan, osai agaway kay in bagyo maloba wano, matang in kanyam remrem kami idbatay wa boway. ²¹ Paka dogay wa yewed agpalpamangan in mga mangyan sa mapor, Pablo tomaydek kalbas miplaong keyen, Mga laki, no nges kamo maniwala taite sa kangay siyabi, no nges kitam yewed panaw sa Kirita, na kitam idbatay aratengan kaidapan kataw tai. ²² Kamay ngona pakaeyaten ngani in kanyo remrem angkataw idapo batay matay sa kantam, kamaybawa osai waget. Kamay in mapor batay masida wa gayed. ²³ Angkataw karai yabi papangkit sa kangay osai ka angil batang sa Diyos kangay Kapwan, in kangay piyagpaniwalaan. ²⁴ Kansiyo siyabi keyen, Ayaw agkalimo, laki Pablo. Kao batay ngani paadap sa Poon Lakoy Sisar. Osai angkataw kao piyagpakayawte in Diyos, in boo kaimo mga sarig sa mapor batay kansiyo piyagpaboway. ²⁵ Na laki mga laki, pakaeyaten in kanyo remrem, angkataw ako agpasandig sa Diyos keyen batay ngani mibaloy in boo kansiyo siyabi sa kangay. ²⁶ Kamay in mapor batay mibenglay sa osai ka poro. ²⁷ Sa kalabing opat wa ka yabi kami piyagbagyo sa dagat Adriyatiko, paka kagwaraan wa yabi in remrem in mga agpapanaw sa mapor keyen tomag bangen wa in kobat. ²⁸ Kansiro siyokat in kalayemen in sapa, dalwampo ka depa. Ista kayte siyokat wakay, labing lima waget ka depa. ²⁹ Siro agkalimo in mapor batay mibalbay sa mga bato lakoy matang kansiro liyabo opat ka tidik apo kawit sa paori. Kalbas mandalangin keyen agkaboka wa nges. ³⁰ In mga agpapanaw sa mapor batay nges maypandalagan sa mapor, matang kansiro piyalooy in bangkate. Siro agpakagwali batay aglabo tidik apo kawit sa tokawan. ³¹ Kamay siyabi Pablo kay Kapitan Olyo osai sa mga sondalo keyen, No ina pag mga mangyan panaw sa mapor na kamo idbatay boway. ³² Matang tiyaras wa in mga sondalo in mga eket in bangkate, bayansiyo malabo sa dagat. ³³ Paka agkaboka wa siro boo piyagpilit Pablo malpamangan, keyen, Labing opat wa ka ibeng kamo agkariyaban, idapo kiyoman kamayba nakay. ³⁴ Kitam wa ngani mamangan, mga laki, matang kitam maeyat matang boway. Idapo batay maidapo sa kantam kamayba osai wagette ka abok. ³⁵ Paka siyabi wa ina Pablo, siyo komwa pamangnen kalbas mandalangin agkaanggay sa Diyos, siro boo karengey. Kansiyo piyandoros in pamangnen, mamangan wa. ³⁶ Siro boo piyakaeyat wa in remrem, kalbas siro din agkoman wa. ³⁷ Kami boo sa mapor 276 ka mangyan. ³⁸ Paka kami bosog wa kansiro wa biyenglay sa dagat in tera tirigo, matang langkay in mapor. ³⁹ Paka maboka wate siro apo ngiitan kobat kamay yewed kansiro atawanan no nakay pag kobat. Kamay kansiro ngiitan osai ka sokol apo bowanginan. In kansiro polong no kabaloy na ista wa patakdangen in mapor. ⁴⁰ Matang kansiro biyogloy in mga eket sa paori, biyaliwan wa sa galem dagat in mga tidik apo kawit. Kansiro din liyowat in eket sa mga tablate pampapeles, osai piyataydek in torda sa tokawan agbangen, matang in mapor biyaba nges kowaya sa bowanginan. ⁴¹ Kamay in mapor midonggol sa kalayemte. In tokawan agbangen somaray wa sa bowangin, idwa apaglebey, in paoriyan agbangen piyagbalbayan sapa lakoy anggan agpangadodog. ⁴² In remrem in mga sondalo bonowen wa in boo mga biilanggo, karam romangoy domalagan. ⁴³ Kamay siro yaayaw in Kapitan Olyo angkataw kansiyo beet Pablo ayaw agbonowen. Kansiyo siyogo in mga katawan romangoy lomokso wa sa sapa romangoy wa anggan sa balabaan. ⁴⁴ In amat wakay kansiyo siyogo miskapet sa mga tabla, no yewed sa mga towar batang sa mapor, palotang wa. Kataw ina kami boo rateng sa bowanginan boway daan.

¹ Paka kami sa bowanginan wa abowayan ngani, kami piyatoldo in ngaran in poro kobat keyen Malta. ² In mga taga ista agpakayawte wano sa kanyam, kami kansiro piyabelag, piyoypoy in baya anggan timbonan, angkataw agodan wa, madimla. ³ Pablo manyangaw wa. Paka kansiyo wa piyagtongo in yangaw, toloy apo lomwas olay aibengan, toloy komayat mibibeleng sa kansiyo bakwaw. ⁴ Paka ngiitan in mga taga ista in olay agisokbit sa kay Pablo bakwaw siro agpanggisodan keyen, Totoo ngani ina pag mangyan agpamono mangyan. Kamayba siyo yewed matay sa dagat, in Diyos idwa pomayag siyo agkaboway kay. ⁵ Kamay in olay kansiyo riikrik sa baya, siyo idapono kamay nakay. ⁶ Siro agpanaya kansiyo bilog mabaktek no yewed maligan toloy matay. Dogay wa siro agpanaya kamay idapono mibaloy sa kansiyo, kalbas bayo wakay kansiro remrem keyen, Siyo mana osai ka diyos. ⁷ In poon ista pag poro kobat in ngaran Pobliyo. Bangen asin in kansiyo kobat. Kami kansiyo piyabelag, piyaesek sa kansiyo balay tolo ka yabi. ⁸ In amang Pobliyo agibolalang, maibeng in bilog, agpanganggey. Pablo pasabangen sa kansiyo, siyo yaatang, piyandalangin, maoraw wa. ⁹ Paka ina atawanan in roma kay pag mga apo maskit asin pag kobat siro pasabangen din kay Pablo, piyaoraw din. ¹⁰ Aronaw in kansiro tiyaboy sa kanyam. Paka dogay wakay in kami batay wakay panaw asin kami piyakan in boo kanyam mga piyagkailangan. ¹¹ Kami tolo ka bolan mamataw asin kalbas somakay sa osai ka mapor asina kay din agpakalbas in pamagyo pag mga bolan. In ngaran in mapor Malsiing, batang sa Aliyanriya. Kami panaw wa. ¹² Rateng sa bayan Sirakosa, kami mataw tolo ka ibeng ista. ¹³ Kami panaw wakay, kalbas rateng sa bayan Rigiyo. Kagoribasan lomwas in kowaya batang sa paoriyan, matang dowai waget ka ibeng kami rateng sa bayanan Potiyoli, lompot wa. ¹⁴ Asin kami apo atagbowan mga belag kay Kiristo. Kami kansiro kay piyagayaw panaw, pito ka ibeng kami mataw. Sogod ina kami panaw wakay, agpataboy sa Roma. ¹⁵ In mga belag sa Roma abaritaan keyen kami agrateng wa, matang siro tomagbo wa sa kanyam sa bayante piyagawit Palingki Apiyo. Apo din sa bayante piyagawit Tolo ka Pagpamanganan. Paka ngiitan Pablo in mga belag, siyo agkaanggay wano sa Diyos, maeyat wakay in kansiyo remrem. ¹⁶ Paka kami rateng sa Roma, Pablo piyayagan mamangkit pagbalayan. Asin siyo agpamataw kamay apo daan sondalo agdamay sa kansiyo. ¹⁷ Paka kadalan tolo ka ibeng piyaberya Pablo in mga poon mga Odyo sa Roma. Paka matipon wa siyabi Pablo keyen, Laki mga kabelagan, kamayba ako idapo piyangwat daet sa amat mga Odyo, idapo din daet sa mga ogali kantam mga kakoyayan, ako diyakep sa Irosalim kalbas tiyaboy sa mga tanongan taga Roma. ¹⁸ In ako yoosap in mga taga Roma siro idapo ngiitan daet sa kangay, yewed maal bonowen, matang kansiro beet ako palpasen wa. ¹⁹ Kamay in ista mga Odyo agayaw, matang ako idapo ngiitan padalan no yewed paadapen atai kay Poon Lakoy Sisar, kamay ako idapo pasaen sa kantam mga mangyan. ²⁰ Kaya ako piyageket anda pag karakara panawen kay Kiristo, in piyagpanaya kitam in mga kasokponan Israil. Ina wa in dailan kaya kamo kangay biyerya, beet manggisodan sa kanyo. ²¹ Siyabi wakay in mga Odyo keyen, Idapo rateng sa kanyam solat batang sa Odiya panawen sa kaimo, kadayo sa kantam mga mangyan batang ista atai agtaboy, siro idapo din agkabaritaan piyagsabi daet panawen sa kaimo. ²² Kamay kanyam beet arengeyan no nakay in kaimo mga remrem. Angkataw kanyam atawanan sa boo kobat in adar Isos piyagsabiyan daet. ²³ Siro agpangwat tarato keyen kadogay ina pag ibeng. Kalbas sa kabetek tarato aronaw mga Odyo in pataboy sa kay Pablo pagbalayan. Boo ibeng siyo agpatoldo sa kansiro in Maal pag Barita panawen sa Diyos agpapoon. Kansiyo piyagpaliwanag in mga siyolat Mowisis osai in mga poropita, agpilit agakay sa kansiro agpasandig kay Isos. ²⁴ In kalaati maniwala sa kansiyo siyabi, kamay in kalaati wakay dayo. ²⁵ In siro batay wa panaw siro agpalsisagotan. Kamay bayo siro panaw Pablo apo kay osai ka siyabi keyen, Maalno in siyabi in Betek pag Abyan sa kanyo mga kakoyayan, in siyolat in poropita Isaiyas keyen, ²⁶ Kao pataboy asin pag mga mangyan, kaimo sabiyen sa kansiro keyen, Kamayba kamo agparengey, agparengey kamo idbatay katawan. Kamayba kamo agriwa, agriwa kamo idbatay kangitan. ²⁷ Angkataw marigen wa in remrem ina pag mga mangyan. Kansiro kiyopot in kansiro mga talinga. Pesekan wa in kansiro mga mata. No nges yewed kataw ina na kansiro mata batay kangitan, kansiro talinga batay karengey, osai in kansiro remrem batay katawan. Na siro batay wakay moli sa kangay, matang kangay batay piyakapya. Ina in siyabi in Kapwan. ²⁸ Pablo keyen kay, Na kailangan kanyo atawanan, piyalowas wa sa mga yewed Odyo anda pag barita keyen in Diyos agpamaboway. Siro agbangen in batay ngani agparengey. ³⁰ Dowai ka dagon Pablo agpamataw sa bayan Roma sa balay kansiyo piyagbayadan. Kansiyo piyabelag in boo mga pataboy sa kansiyo. ³¹ Siyo yewed agkalimo agbarita panawen sa Diyos agpapoon osai agpatoldo panawen kay IsoKiristo in Kapwan. Idapo agayaw sa kansiyo.