3 OWAN

¹ Ako in Koyay in agsolat. Ako agsolat kay Gayo, in kangay piyagpakayawte pag belag. ² Laki belag, kangay piyagpandalangin ayaw nges apo kamay nakay sa kaimo, osai maal in kaimo bilog, kataw ako katawan maal in kaimo abyan. ³ Ako agkaanggay wano gayed in apo rateng mga belag agbarita kao agpaniwala sa betek, osai betek in ogali. ⁴ Sa kangay idapo barita labi kay makaanggay, sa barita keyen agogali betek in kangay mga bodang. ⁵ Laki belag, maal ngani in kaimo panawen agtolong sa mga belag agpaniwala, kamayba siro yewed datiyan atawanan. ⁶ Siro agbarita atai sa barkadaan kao agpakayawte. Maal no siro kaimo kay tiyolong sa agipanaw, kataw ina maal sa pangkit Diyos, ⁷ angkataw siro panaw panawen kay Kiristo. Siro idapo kiyowa kamayba nakay pag tolong sa mga yewed agpaniwala sa Diyos. ⁸ Maal kantam tolongen in mga kataw ina, matang kitam apo bagiyan sa agpabarita in betek. ⁹ Ako somolat asin sa kanyo barkadaan mga bodang Diyos. Kamay Diyotripis dayo agparengey sa kangay. Angkataw in kansiyo beet siyo in koyay sa kanyo. ¹⁰ No ako asin pataboy, na kangay wakay piyagsabi in boo kansiyo mga panawen, osai in kansiyo mga siyabi bosliyen aglaban sa kanyam. Yewed waget ina. Siyo dayo pabelag sa mga belag agrateng. Osai in mga agkapabelag sa mga agrateng kansiyo wa piyagayaw, osai piyagpasoway wa sa barkadaan. ¹¹ Laki belag, ayaw agtolad sa daet, dayem sa maal. In agpamangwat maal, na siyo sa Diyos agbangen. Kamay in agpamangwat daet na idbatang kay kangitan sa Diyos. ¹² In barita in boo keyen, Dimitriyo maal. In kansiyo betek pag ogali agpatonay din siyo maal. Ina daan in kanyam barita. Kaimo atawanan totoo in kanyam piyagsabi. ¹³ Karowan kay nges in kangay batay siyabi sa kaimo, kamay idwa piyagsolat. ¹⁴ Kangay nges beet, idwa dogay kita maltagbo, matang kapanggisodan. ¹⁵ Kao nges apyaan. In kantam mga belag atai keyen, Kao kagwali wa nakay? Kaimo sabiyen sa kantam belag asin keyen, baatte osai kangay piyagpanremrem.