2 TIMOTIYO

¹ Ako Pablo in agsolat. Sa beet Diyos ako katiwala Kiristo Isos, siyogo agbarita panawen sa boway piyangako sa mga agiyagem kay Kiristo Isos. ² Ako agsolat kay Timotiyo, in kangay piyagpakayawte pag bodang. Laki Timotiyo, in kangay pandalangin kao pabelagen, pakayawteen, osai pakaanggayen in Diyos kantam Amang, osai Kiristo Isos kantam Kapwan. ³ Ibeng osai yabi ako baatte agremrem sa kaimo osai agpandalangin agkaanggay sa Diyos in kangay piyagpaniwalaan gayed kataw in piyangwat in kangay mga kakoyayan. ⁴ No kangay aremreman in kao agpanangis, na ako maloba wano beet katagbo wakay sa kaimo, matang ako batay agkaanggay gayed. ⁵ Palagi kangay piyagpanremrem in kao yewed aglimbang agpaniwala, kataw in agpaniwala kaimo akbai Lowida, osai in kaimo inang Yonisi. Kangay atawanan kao agaway kay daan agpaniwala. ⁶ Ina in dailan kaya kao kangay piyagpabilinan kaimo pakaeyaten in agpangwat in tongkolin tiyaboy Diyos sa kaimo tangona in kao kangay yaatang piyandalangin. ⁷ Angkataw in tiyaboy Diyos sa kantam yewed in agkalimo, dayem in kansiyo Abyan in agtaboy sa kantam in kabaloyan, in agpakayawte, osai in katawan agsakop sa kantam remrem. ⁸ Na ayaw agkalimo agbarita panawen sa kantam Kapwan. Ayaw din agkalimo panawen ako piyagbilanggo panawen kay Kiristo. Dayem kao sandata din domalan sa kaidapan panawen sa Maal pag Barita, na kao batay piyakan Diyos kabaloyan agbanta. ⁹ Kitam piyaboway in Diyos osai iidang matang kansiyo bodang. Ina kansiyo piyangwat yewed panawen sa kantam mga piyangwat, dayem panawen sa kansiyo remrem, panawen siyo agpakayawte sa kantam. Ikkay piyangwat in kobat siyo agpakayawte wa sa kantam panawen kay Kiristo Isos. ¹⁰ Kamay ina bayo piyalowas in rateng Kiristo Isos, in kantam Agpamaboway. Panawen sa Maal pag Barita kantam atawanan kansiyo wa diyaeg in katayan, osai piyalowas in boway idapo kalobosan. ¹¹ Ako piyangwat Diyos katiwala agpatoldo matang agbarita ina pag Maal pag Barita. ¹² Ina in dailan kaya ako piyagkaidapan kataw tai. Kamay ako yewed agkalimo, angkataw kangay atawanan in kangay piyagpasandigan, atawanan ngani siyo apo kabaloyan kansiyo batay piyagalapet anggan sa kalobosan pag ibeng in Maal pag Barita kansiyo piyaalapet sa kangay. ¹³ Kaimo alapeten, kaimo toladen in mga maalno pag kangay piyatoldo sa kaimo. Ayaw agempet agpaniwala osai agpakayawte panawen kitam agiyagem kay Kiristo Isos. ¹⁴ Kaimo alapeten in boo mga maal in piyaalapet Diyos sa kaimo, sa tolong in Betek pag Abyan agbalay sa kantam. ¹⁵ Kaimo atawanan ako biyaliwan wa in boo mga taga Asya, kadayo Pigilo osai Irmoginis. ¹⁶ In boo mga kamalay Onisiporo pakayawteen in Kapwan. Makakarowan wa ako kansiyo tiyolong. Siyo yewed agkalimo kamayba ako piyagbilanggo. ¹⁷ Kamay in siyo rateng sa bayan Roma ako kansiyo piilit piyamangkit anggan ngiitan. ¹⁸ Kaimo ngani atawanan in karowen in kansiyo tolong sa kangay in ako sa Ipiso. Kangay pandalangin siyo pakayawteen in Kapwan sa Ibeng in Kapwan.

¹ Na kao din, laki Timotiyo, kangay bodang, kaimo pakaeyaten in remrem panawen sa kao piyagtolong Kiristo Isos. ² Kao karengey in kangay mga piyatoldo sa karowan pag mangyan. Na ina kaimo wakay patoldowen sa mga mangyan maal paalapetan, kabaloy batay agpatoldo sa mga roma. ³ Kao agsandata domalan sa kaidapan kataw osai ka maal pag sondalo sogowan Kiristo Isos. ⁴ In sondalo piyagsogo kansiyo kapitan yewed maal siyo aakayan sa yewed panawen sondalo, dayem kailangan siyo agpakaanggay sa kansiyo kapitan. ⁵ Kataw din in osai ka agmesaan no siyo yewed maniwala sa siyabi in agpamesa na siyo idbatay mandaeg. ⁶ In ageyat agbangen agtogda, na kansiyo bagiyan in galem lakonaw. ⁷ Kaimo pagremremen in kangay piyagsolat sa kaimo. Kao piyagtolong in Kapwan matang kaimo atawanan in boo. ⁸ Baatte kaimo remremen IsoKiristo, in batang sa kasokponan Dabid, siyo batang matay piyaboway wakay. Ina in Maal pag Barita kangay piyagpatoldo. ⁹ Panawen ina ako piyagpaidapan, piyageket karakara kataw in osai ka agpamono mangyan. Kamay in agiplaong Diyos yewed aeket. ¹⁰ Na in boote kangay piyagbanta, matang agtolong sa mga iidang Diyos, matang kansiro din abel in boway batang kay Kiristo Isos, osai in kalakoyen idapo kalobosan. ¹¹ Betek anda pag piyagsabi, No kitam matay sarig Kiristo, na kitam batay din boway kansiyo sarig. ¹² No kitam agbanta sa kaidapan, na kitam batay kansiyo sarig agpapoon. No kitam agpamangyan sa kansiyo, na siyo din batay agpamangyan sa kantam. ¹³ Kamayba kitam yewed betek, na siyo betek daan, Angkataw no kataw nakay siyo, na idbatay miyalis. ¹⁴ Anda baatte kaimo oliten sa kaimo mga mangyan. Siro kaimo pabilinanen sa pangkit Diyos, siro ayaw agpalsisagotan sa mga agiplaong sa mga adar. Ina idapo kabolowan, agsida kay sa paniwala in mga agparengey. ¹⁵ Pagpiliten matang kao makaanggay sa Diyos, sogowan idapo piyagkarikoy, idapo baribid in agpatoldo in Maal pag Barita. ¹⁶ Ayaw agpaagem sa mga agbarogi idapo kabolowan, angkataw ina labi kay agpaadayonaw sa dalan Diyos. ¹⁷ In kansiro piyagpatoldo kagwali sogat bangkokang agpamodang. Kataw din ina Iminyo osai Pilito. ¹⁸ Siro pabaribid wa sa betek pag adar, kansiro kay din piyagsida in paniwala in amat. Siro keyen, Kitam idapo wa dogayan pag boway wakay, ina mibaloy wa, idapo dogayan pag boway wakay. ¹⁹ Kamay marigen daan in pagpasandigan in kantam paniwala. Ina Diyos in agtadyok, apo sa Agisolat keyen, Atawanan in Kapwan in mga sa kansiyo, Osai keyen, In baatte agsamba sa Kapwan ayaw wa agpangwat daet. ²⁰ Sa mga balay mayaman, in mga sangkap in kalaati piyangwat ginto, mga pilak, ina mga piyagmaal, in kalaati wakay yangaw, mga keden, ina yewed maloba piyagmaal. ²¹ Na kataw wa ina no siyo yewed miyagem asin pag mga baribid pag piyatoldo, na siyo batay sangkap piyagmaal, piyagtalaga sandata wa piyagalapet kansiyo kapwan. ²² Kao ayaw agkaakayan sa mga piyagkabeet panawen in mga badyate bodang kay. Kao agpilit agogali in maalno, in agyanggat kay Kiristo, in agpakayawte sa amat, osai in yewed agpagolo, sarig in mga mangyan yewed agpakagwali waget agsamba sa Kapwan. ²³ Ayaw agkaakayan sa mga idapo kabolowan pag agpalsisagotan, angkataw kaimo atawanan ina agibaloy wa agpalawayan. ²⁴ In sogowan Kiristo yewed mayadi agpalaway, dayem siyo palagi mabait sa boo, katawan agpatoldo, yewed galiten. ²⁵ Kailangan siyo mabait pag agpabetek sa mga aglaban sa kansiyo piyagpatoldo, matang nges siro pakanen Diyos kabaloyan agbenglay kansiro daet, matang atawanan in betek. ²⁶ No kataw ina miyalis wakay kansiro remrem, siro batay mipalpas sa salaod diyablo in agsakop sa kansiro.

¹ Remremen anda. Sa kalobosan pag mga ibeng batay apo mga kabetek maidap wano. ² Batay apo mga mangyan madamot, agkabeet aronaw sangkap, agpalalo, mayabang, agpansabi daet sa roma, agsonggar sa mga koyay, yewed agremrem maal, aglibak sa Diyos, ³ yewed agpakayawte, yewed agpabelag, agpanlibak, yewed agsakop sa kansiro remrem, matapang, dayo sa maal, ⁴ yewed paniwalaan, bosliyen, agpakabwat, beet agpakaanggay sa sadiri, dayo agpakaanggay sa Diyos. ⁵ Siro agpakagwali agpaniwala kamay in kansiro mga ogali agpapangkit idapo kabolowan in siro keyen siro agpaniwala. Kao ayaw agyanggat sa mga kataw ina pag mangyan. ⁶ In kalaati sa kansiro agpangisoroy sa mga balay, matang kansiro piyagsakop in mga kagbaiyan kabwatte in remrem, mga abyatan kansiro mga daet, mga piyagakay kamayba nakay in beet, ⁷ mga kagbaiyan baatte agadar kamay yewed daan katawan in betek. ⁸ Ina pag mga kaliyakiyan aglaban sa betek, kataw Anis osai Amris lomaban kay Mowisis. Siro idapo agremrem maalno, yewed sibay in kansiro paniwala. ⁹ Kamay idwa dogay siro diyaeg wa, angkataw in kansiro idapo katawanan batay piyagngitan in boo, kataw in mibaloy kay Anis osai Amris. ¹⁰ Kamay kao agbangen, kaimo atawanan wa gayed in kangay piyagpatoldo, in kangay mga ogali, osai in kangay piyagpilit piyagkabel. Kaimo ngiitan in ako agpaniwala, in ako agbanta sa mga kaidapan, in ako agpakayawte sa amat, in ako idbatay siyawaan agpaniwala, ¹¹ in ako piyagpangwatan daet, osai in mga kaidapan kangay piyagbanta. Kaimo atawanan in mibaloy sa kangay sa Antiyokya, sa Ikonyo, osai sa Lisra. In kalobaen in mga kaidapan kangay diyalan. Kamay asin pag boo ako tiyolong in Kapwan. ¹² In boo mga beet agogali maalno panawen agyanggat kay Kiristo Isos batay piyagpaidapan. ¹³ Kamay in mga agpamangwat daet labi kay batay agistobo in daet. In mga agpatoldo baribid, labi kay batay agistobo in baribid. Siro agpadaya sa amat kadayo din siro piyagpadaya. ¹⁴ Kamay kao agbangen, ayaw agbaliwanen in mga piyatoldo kaimo atawanan, kaimo piyagpasandigan marigen, nangkataw kaimo atawanan maal piyaniwalaan in mga agpatoldo sa kaimo. ¹⁵ Sogod bodangte kay kaimo atawanan in Maalno pag mga Agisolat, in kabaloy agpatoldo sa kaimo matang kao batay piyagpaboway gayed panawen sa agpasandig kay Kiristo Isos. ¹⁶ In boo mga Agisolat in Abyan Diyos in agpasolat. Ina apo kabolowan sa agpatoldo in betek, sa agayaw sa daeten pag piyagpatoldo, sa agpaoraw sa baribid pag panawen, osai sa agakay sa betek pag ogali. ¹⁷ Matang in sogowan Diyos sandata, apo kabaloyan agpangwat in boo maalno pag panawen.

¹ Kao kangay piyagpabilinan sa pangkit Diyos osai Kiristo Isos in batay agidang no nakay in parosaanen sa mga agkaboway osai sa mga matay wa. Panawen sa siyo batay wakay agrateng batay agpapoon, kao kangay piyagpabilinan ² agpaliwanag in Agiplaong Diyos, agpilit agpaliwanag kamayba kabetek, kamayba yewed, sabiyanen in mga agpatoldo daet, pabeteken in mga baribid pag panawen, paeyaten in remrem in mainaen pag mga mangyan. Kao agpakabait in agpatoldo. ³ Angkataw agrateng wa in kabetek in mga mangyan idbatay wa agparengey sa betek pag piyagpatoldo, dayem in kansiro waget beet. Siro batay agpamangkit aronaw mga mangyan in kansiro waget beet in piyagpatoldo. ⁴ Siro batay agidapo kabolowan sa betek, toloy wa maniwala sa mga panggisoden. ⁵ Kamay kao agbangen, kamayba nakay in mibaloy kao agpakaeyat in remrem, agbanta sa boo mga kaidapan, agpilit agpabarita in Maal pag Barita, pangwaten gayed in tongkolin tiyaboy Diyos sa kaimo. ⁶ Kamay ako agbangen batay wa kagwali andog, rateng wa in kabetek ako batay wa matay. ⁷ Kangay wa piyangwat in boo kangay abaloyan sa labanan lakoy. Ako yewed agpaglebey agpaniwala. Lobos wa kangay diyalagan in boo dalan tiyaboy sa kangay. ⁸ Ngona in Diyos apo siyandata sarikaw sa kangay tanda sa betek in piyagtaboy sa mandaeg. Sa Ibeng Agosap in Kapwan in betek pag agidang, siyo in batay agtaboy sa kangay ina pag sarikaw. Kamay yewed waget sa kangay, dayem sa boo mga agkaanggay agpanaya in siyo rateng atai. ⁹ Piliten karateng atai sa kangay, ayaw dogay. ¹⁰ Ako biyaliwan wa Dimas panawen siyo agkabeet wa sa mga sangkap, pataboy wa sa Tisalonika. Kirisinti pataboy sa Galasya, Titos wakay sa Dalmasya. ¹¹ Lokas waget in kangay sarig atai. Markos kaimo tangawen, atai paanggaten, angkataw siyo kangay batay katolong sa panawen. ¹² Tikiko kangay wa piyataboy sa Ipiso. ¹³ Paka kao atai agtaboy na babaen kangay islen ista kangay biyaliwan kay Karpo sa Torowas, kadayo in kangay mga aklat, labi kay in mga lakonaw in bayad. ¹⁴ Daeten wano in piyangwat sa kangay Aliyanro in agpamangwat tanso. In Kapwan wa in batay agparosa sa kansiyo panawen sa kansiyo piyangwat. ¹⁵ Kao agingat sa kansiyo, angkataw siyo aglaban wano sa kantam piyagpabarita. ¹⁶ In tokaw ako piyagosapan idapo agtolong sa kangay. Ako biyaliwan wa in boo. Kangay piyagpandalangin ayaw siro parosaanen in Diyos. ¹⁷ Kamay in Kapwan agtolong daan sa kangay. Ako piyakan eyat matang kapabarita in boo Maal pag Barita sa boo mga yewed Odyo. Kalbas ako kansiyo wa piyaboway, idwa biyono. ¹⁸ Ako batay piyaboway in Kapwan sa boo mga daet, siyo din batay agpaanggat sa kangay sa kansiyo sakopan sa langit. Siyo pagmaalen anggan idapo kalobosan. Ina wa ngani. ¹⁹ Kao keyen kay Pirisila osai Akwila, kataw nakay wa siro, osai sa talnakiyan Onisiporo. ²⁰ Irasto mataw sa Korinto. Toropimo wakay kangay biyaliwan sa Milito angkataw siyo apo maskit. ²¹ Bayo rateng in balongaing piliten kao atai karateng. Kora Yobolo, Podinti, Lino, Kalaodya, osai in boo mga belag, siro keyen, Kao nangkataw wa? ²² In kangay pandalangin kao pakayawteen in Kapwan. Kamo boo pakayawteen in Diyos.